احمد علی ملاح نے دہائیاں پہلے اپنے والدین سے سنا تھا کہ 1942 میں آنے والے سیلاب کی وجہ سے منچھر جھیل پوری کی پوری پانی سے بھر گئی تھی۔ بعد میں انہوں نے خود بھی دیکھا کہ 1977 اور 2010 میں آنے والے سیلاب نے اس جھیل کی گہرائی اور پھیلاؤ دونوں میں بہت اضافہ کر دیا تھا۔ تاہم وہ کہتے ہیں کہ اپنی 75 سالہ زندگی میں انہوں نے اس میں اتنا پانی آتے نہیں دیکھا جتنا اِس سال 15 جولائی اور 15 ستمبر کے درمیان ہونے والی بارشوں کے نتیجے میں اس میں آیا ہے۔

وہ ایک منفرد نوعیت کے گاؤں کے سربراہ ہیں جس کے تقریباً پانچ سو باسی منچھر جھیل کے اندر ہی کشتیوں پر بنے گھروں میں رہتے ہیں۔ یہ لوگ تقریباً ڈیڑھ سو خاندانوں میں منقسم ہیں اور گزر بسر کرنے کے لیے مچھلیاں اور آبی پرندے پکڑ کر فروخت کرتے ہیں۔

احمد علی ملاح کہتے ہیں کہ جھیل میں تازہ پانی کی بھاری مقدار میں آمد سے یہ سب ماہی گیر خاندان بہت خوش ہیں کیونکہ ان کا خیال ہے کہ اس سے مچھلیوں کی بہتر افزائش ممکن ہو سکے گی اور نتیجتاً ان کے روزگار میں بہتری آئے گی۔

منچھر کے کنارے واقع بوبک نامی بستی سے تعلق رکھنے والے علی انور ملاح بھی ان سے متفق ہیں۔ وہ کہتے ہیں کہ سیلابی پانی میں مچھلی کا پونگ بھی بڑی مقدار میں شامل تھا جس کی افزائش سے آنے والے مہینوں اور سالوں میں مقامی ماہی گیروں کا روزگار بہت بہتر ہو جائے گا۔ ان کا یہ بھی کہنا ہے کہ جھیل میں تازہ پانی کی آمد سے اس کا &quot;قدرتی ماحول صاف ہو گیا ہے جس کے باعث اس میں موجود مچھلیاں پہلے کی نسبت زیادہ تیزی&nbsp; سے بڑی ہوں گی&quot;۔

صوبہ سندھ کے محکمہ آب پاشی کی طرف سے جاری کیے گئے اعدادوشمار سے ظاہر ہوتا ہے کہ حالیہ مون سون کے دوران منچھر جھیل میں پانی کی گہرائی 10 فٹ سے بڑھ کر 25 فٹ تک پہنچ گئی ہے جبکہ اس کا پھیلاؤ تین سو 60 مربع کلومیٹر سے بڑھ کر پانچ سو مربع کلومیٹر ہو گیا ہے۔ تاہم اس سے جہاں مچھلیوں اور دوسری آبی حیات کی بہتر افزائش کی توقعات نے جنم لیا وہیں یہ خدشہ بھی پیدا ہو گیا کہ یہ اضافی پانی کہیں ارد گرد کی بستیوں میں داخل نہ ہو جائے۔ چنانچہ محکمہ آب پاشی نے ستمبر 2022 کے پہلے ہفتے میں جھیل کے گرد تعمیر کیے گئے حفاظتی بند میں دو جگہ شگاف کر دیے تاکہ اس میں آنے والا پانی ایک ایسی سمت میں خارج کیا جا سکے جس میں بڑی انسانی آبادیاں موجود نہیں۔

اگرچہ لگ بھگ ایک ماہ بعد یہ شگاف پر کر دیے گئے لیکن احمد علی ملاح کہتے ہیں کہ اس دوران انہیں اور جھیل پر رہنے والے دیگر ماہی گیروں کو ہروقت یہ فکر لگی رہتی تھی کہ ان سے نکلنے والا پانی کہیں مچھلیوں کے پونگ کو بھی اپنے ساتھ بہا کر نہ لے جائے اور یوں ان کی بہتر روزگار کی امیدیں دھری کی دھری نہ رہ جائیں۔ اس لیے وہ محکمہ آب پاشی کو مسلسل کہتے رہے کہ یہ شگاف فوراً بند کیے جائیں۔

<h2>پائیدار حل کی تلاش</h2>

منچھر جھیل سندھ کے مغربی اضلاع دادو اور جام شورو کے سنگم پر واقع ہے۔ اس میں آنے والے پانی کے تین ماخذ ہیں جن میں اس کے شمال مغرب میں کیرتھر کی پہاڑیوں پر ہونے والی بارش، اس کے شمال میں بہنے والا مین نارا ویلی ڈرین جو اسے حمل نامی جھیل سے جوڑتا ہے اور اس کے مشرق میں موجود دریائے سندھ شامل ہیں۔ آخری ماخذ سے جھیل کو پانی کی فراہمی 2009 میں شروع ہوئی جب حکومت نے طے کیا کہ اسے پورا سال 20 مکعب میٹر فی سیکنڈ کے حساب سے دریائی پانی فراہم کیا جائے گا تاکہ اسے خشک ہونے سے بچایا جا سکے۔

تاہم پچھلے 10 سالوں میں ان تینوں ذرائع سے جھیل میں پانی کی مجموعی آمد بہت کم رہی ہے جس کی وجہ سے اس کا زیرِآب رقبہ مسلسل سکڑتا رہا ہے۔ اسی دوران مختلف وجوہات کی بنا پر اس میں آلودگی کی سطح بھی بڑھتی رہی ہے۔ احمد علی ملاح کی بھانجی حسنہ ملاح اس تبدیلی کی نشان دہی کرتے ہوئے کہتی ہیں کہ &quot;پہلے ہم پینے کے لیے بھی اسی جھیل کا پانی استعمال کرتے تھے لیکن اب یہ اتنا گندا ہو گیا ہے کہ اسے پینے کا تصور بھی نہیں کیا جا سکتا&quot;۔

مہران یونیورسٹی آف انجینئرنگ اور ٹیکنالوجی جامشورو میں قائم آبی تحقیق کے مرکز میں کام کرنے والی تحقیق کار ڈاکٹر عظمیٰ عمران اس بات کی توثیق کرتی ہیں۔ انہوں نے منچھر جھیل پر نہ صرف پی ایچ ڈی کر رکھی ہے بلکہ اس پر تین تحقیقی مقالے بھی لکھ چکی ہیں۔ اس تحقیقی تجربے کی بنیاد پر ان کا کہنا ہے کہ مون سون کے موسم (جولائی-اگست) کے سِوا سال کے دیگر مہینوں میں اس جھیل کے پانی میں حل شدہ کیلشیم، میگنیشیم، پوٹاشیم، سوڈیم، کلورائیڈ اور سلفیٹ جیسے ٹھوس عناصر کی مقدار تین ہزار سے پانچ ہزار پانچ سو ملی گرام فی لٹر ہوتی ہے حالانکہ بین الاقوامی ادارہِ صحت کے قائم کردہ معیار کے مطابق یہ مقدار ایک ہزار ملی گرام فی لٹر سے زیادہ نہیں ہونی چاہیے۔

ان کے مطابق ان ٹھوس عناصر کی اتنی زیادہ مقدار جھیل کے پانی کو انسانی استعمال اور آبی حیات کے لیے شدید نقصان دہ بنا دیتی ہے۔ یہی وجہ ہے کہ &quot;1998 سے لے کر اب تک اس میں پائی جانے والی مچھلیوں کی قسمیں 32 سے کم ہو کر 23 رہ گئی ہیں جبکہ اس میں موجود مچھلیوں کی جسامت بھی پہلے سے چھوٹی ہو گئی ہے&quot;۔ &nbsp;

ان مسائل کے نتیجے میں پچھلی ایک دہائی میں متعدد ماہی گیر گھرانے احمد علی ملاح کا گاؤں اور ماہی گیری چھوڑ کر دوسرے علاقوں اور دوسرے شعبوں میں منتقل ہو چکے ہیں۔ اگر اس سال جھیل میں مناسب مقدار میں پانی نہ آتا تو اس کے کچھ مزید باشندے بھی نقل مکانی کے بارے میں سوچ رہے ہوتے۔

تاہم ڈاکٹر عظمیٰ عمران کا کہنا ہے کہ پانی کی آمد کے باوجود جھیل کی آلودگی &quot;خطرناک حدوں کو چھو رہی ہے جس کی وجہ سے اس کا قدرتی ماحول اب بھی آبی حیات، خاص طور پر مچھلیوں، کی بہتر افزائش کے لیے مناسب نہیں&quot;۔

تقریباً تین دہائیوں سے محکمہ آب پاشی کی طرف سے منچھر جھیل میں پانی کی پیمائش پر مامور 51 سالہ شیر محمد ملاح بھی ان سے اتفاق کرتے ہیں۔ ان کا کہنا ہے کہ جھیل کی آلودگی اتنی شدت اختیار کر چکی ہے کہ محض اضافی پانی کی آمد سے اس کا پائیدار حل ممکن نہیں رہا بلکہ، ان کے مطابق، اس کا واحد حل اس کی آلودگی کے ماخذ پر قابو پانا ہے۔

یہ ماخذ جھیل کے شمال میں واقع لاڑکانہ اور قمبر شہداد کوٹ جیسی بڑی بڑی انسانی آبادیوں کا فضلہ اور ان کی زرعی زمینوں سے نکلنے والے سیم زدہ پانی ہے جو پچھلی دو دہائیوں سے رائٹ بنک آؤٹ فال ڈرین (آر بی او ڈی) نامی نالے کے ذریعے جھیل میں شامل ہو رہا ہے۔ اس لیے ان کی نظر میں اس کی آلودگی کو ختم کرنے کے لیے &quot;آر بی او ڈی کا رخ موڑنا ضروری ہے تاکہ اس کا پانی منچھر جھیل میں گرنے کے بجائے سیدھا سمندر میں چلا جائے&quot;۔

ان کے بقول سندھ حکومت بھی اس حل سے آگاہ ہے اور اس نے اس حوالے سے ایک منصوبہ بھی بنا رکھا ہے۔ تاہم اس منصوبے پر ابھی تک عملی کام شروع نہیں ہو سکا جس کا ذکر کرتے ہوئے وہ خبردار کرتے ہیں کہ &quot;آر بی او ڈی کا رخ موڑنے میں جتنی دیر لگے گی منچھر جھیل میں آبی حیات کی افزائش کو درپیش خطرات میں اتنا ہی اضافہ ہو گا&quot;۔

رگ رگ میں میری پھیل گیا ہے یہ کیسا زہر: انسانی آبادیوں کے آلودہ پانی کی آمد سے حمل جھیل کی آبی حیات تباہی کا شکار۔

دور تک پھیلا ہوا پانی ہی پانی ہر طرف: کیا سیلاب سے بھر جانے کے بعد منچھر جھیل کی آلودگی خود بخود ختم ہو جائے گی؟

text

سرفراز نہر کے اردگرد واقع کئی بستیاں پچھلے دوماہ سے پانی میں ڈوبے ہوئے ہیں۔&nbsp;

یہ نہر سندھ کے ضلع میرپور خاص کی تحصیل ڈِگری کے بعض علاقوں سے گزرتی ہے جہاں کے رہنے والے لوگوں کا کہنا ہے کہ اِس سال جولائی میں شروع ہونے والی بارشوں کی وجہ سے اس میں سیلاب آگیا تھا جس کا پانی ابھی تک ان کے گھروں اور کھیتوں میں کھڑا ہوا ہے۔&nbsp;

اس سیلاب کی وجہ سے ہزاروں مقامی باشندے اب خانہ بدوشوں کی طرح زندگی گزار رہے ہیں۔ انہوں نے ڈِگری سے مختلف قصبوں اور شہروں کو جانے والی سڑکوں پر لکڑیوں، پرانے کپڑوں، رِلیوں اور گھاس پھوس سے چھوٹی چھوٹی جھونپڑیاں بنا رکھی ہیں جن میں وہ اپنے اہل خانہ کے ہمراہ رہائش پذیر ہیں۔&nbsp;

ان جھونپڑیوں کے زیادہ تر باسیوں کا تعلق بھیل، میگھواڑ، کولہی، باگڑی اور اوڈ جیسی ہندو شیڈولڈ کاسٹ برادریوں سے ہے جو معاشی اور معاشرتی اعتبار سے محروم ترین طبقوں میں شمار ہوتی ہیں۔ یہ بے سروسامان سیلاب متاثرین کھانے پینے کے لیے مکمل طور پر حکومت اور مخیر افراد کی طرف سے ملنے والی امداد کے محتاج ہیں۔

اگرچہ انہیں شکایت ہے کہ خوراک میں انہیں ہر بار صرف چاول ہی مل رہے ہیں جنہیں مسلسل کھاتے رہنا ممکن نہیں لیکن وہ مانتے ہیں کہ اس امداد کی عدم موجودگی میں وہ اپنی بھوک بھی نہیں مٹا پائیں گے۔

تاہم ڈِگری سے ٹنڈو جان محمد نامی قصبے کو جانے والی سڑک پر بنی ہوئی ایک جھونپڑی میں رہنے والے 35 سالہ پپو کولہی چاہتے ہیں کہ امداد فراہم کرنے والے افراد اور ادارے ان پناہ گزینوں کی باقی ضروریات کو بھی پورا کرنے کی کوشش کریں۔ خود ان کے لیے کھانے اور رہنے کے علاوہ سب سے بڑا مسئلہ ان دو بھینسوں کے لیے چارے کا بندوبست کرنا ہے جو وہ حصہ داری کی بنیاد پر پال رہے ہیں۔ وہ کہتے ہیں کہ ان کے علاقے میں اتنا پانی کھڑا ہے کہ چارے کی ہر مقامی فصل برباد ہو گئی ہے۔ اس لیے وہ ہروقت اسی فکر میں ڈوبے رہتے ہیں کہ ان بھینسوں کی خوراک کا انتظام کیسے کریں۔&nbsp;

ان کی نواحی جھونپڑی کے باسی 18 سالہ کشور میگھواڑ کو ایک اور فکر لاحق ہے۔

ان کا تعلق ٹنڈو جان محمد کے قریبی گاؤں اکبر آباد سے ہے۔ سیلاب آنے سے پہلے وہ ایک کالج میں انٹرمیڈیٹ کے طالب علم تھے اور اپنے خاندان کے دوسرے افراد کے ہمراہ ایک مقامی زمیندار کے ہاں کھیت مزدور کے طور پر بھی کام کرتے تھے۔ ان کے والدین نے اس زمیندار سے 60 ہزار روپے قرض بھی لے رکھا تھا تاکہ وہ کشور کے بڑے بھائی مکیش کو نرسنگ کورس میں داخلہ دلا سکیں۔ اب انہیں ہمہ وقت یہی خوف لگا رہتا ہے کہ اگر وہ اپنا قرض نہ چکا پائے تو زمیندار نہ جانے ان سے کیا سلوک کرے۔

وہ کہتے ہیں کہ سیلاب کی وجہ سے کپاس، مرچ، ٹماٹر اور گنے کی تمام مقامی فصلیں اور پپیتے اور کیلے کے تمام مقامی باغات تباہ ہو گئے ہیں جس کے باعث نہ تو انہیں جلدی مزدوری ملنے کی توقع ہے اور نہ ہی قرض واپس کر سکنے کی کوئی امید نظر آ رہی ہے۔

کشور میگھواڑ کے ساتھ رہنے والے پناہ گزینوں میں 50 سالہ ریشم بائی بھی شامل ہیں۔ ان کے شوہر پانچ سال پہلے مر چکے ہیں اور وہ اپنے دو بیٹوں اور ایک بیٹی کی شادیاں کر چکی ہیں۔ لیکن ان کی دو بیٹیاں جن کی عمریں نو سال اور 11 سال ہیں اب بھی ان کے ساتھ رہتی ہیں۔&nbsp;

ریشم بائی کئی دن سے بخار میں مبتلا ہیں جس کی وجہ سے انہیں جسم کے مختلف حصوں میں درد بھی رہتا ہے۔ انہیں خدشہ ہے کہ ان کی بیٹیاں بھی کہیں بیمار نہ ہو جائیں اس لیے وہ انہیں مچھروں سے محفوظ رکھنے کی ہر ممکن کوشش کرتی ہیں۔ اس مقصد کے لیے وہ اپنی جھونپڑی کے ارد گرد ہر روز خشک جھاڑیاں اور اُپلے جلاتی ہیں تاکہ ان کی حرارت اور دھواں مچھروں کو بھگا سکیں۔

لیکن، ان کے مطابق، یہ طریقہ زیادہ کارگر ثابت نہیں ہوتا۔ چنانچہ وہ چاہتی ہیں کہ کوئی حکومتی ادارہ یا غیرسرکاری تنظیم انہیں مچھردانیاں فراہم کر دے۔

<h2>بد انتظامی کا روگ</h2>

میرپور خاص میں واقع قومی اسمبلی کے حلقے این اے-219 سے منتخب ہونے والے پاکستان پیپلزپارٹی کے رکن میر منور علی تالپور سیلاب زدگان کی مدد کے لئے ضلعی انتظامیہ اور سندھ حکومت کی طرف سے کیے جانے والے اقدامات سے مطمئن نہیں۔ ان کا کہنا ہے ان کے ضلعے کی تقریباً نصف آبادی سیلاب سے متاثر ہوئی ہے لیکن ابھی تک یہاں صرف ساڑھے تین ہزار خیمے لگائے گئے ہیں۔ انہیں اس بات پر بھی اعتراض ہے کہ صوبائی حکومت نے سیلاب متاثرین کو کھانا فراہم کرنے کا کام تپے داروں (پٹواریوں) کے ذمے لگایا ہوا ہے &quot;حالانکہ انہیں اس کام کا کوئی تجربہ نہیں&quot;۔ ان کے مطابق اس کے نتیجے میں بہت سے &quot;ضرورت مند لوگ کھانے سے محروم ہیں&quot;۔&nbsp;

سیلاب زدگان کو مچھروں سے بچانے کے سرکاری انتظامات بھی ناقص نظر آتے ہیں۔ اس ضمن میں ایک اہم واقعہ تقریباً چھ ہفتے پہلے اس وقت سامنے آیا جب میرپور خاص کی ضلعی انتظامیہ نے ایک مقامی فیکٹری کے گودام کا تالہ توڑ کر وہاں سے ساڑھے چھ لاکھ مچھردانیاں برآمد کیں جو وفاقی حکومت کے ادارے ڈائریکٹوریٹ آف ملیریا کنٹرول اور نیشنل رورل سپورٹ پروگرام نامی غیرسرکاری تنظیم&nbsp; نے گزشہ سال جون میں خرید کر ذخیرہ کر رکھی تھیں۔ اس تنظیم کے اہل کاروں کا کہنا ہے کہ ان مچھردانیوں کی تقسیم کی ذمہ داری ڈائریکٹوریٹ آف ملیریا کنٹرول کے پاس تھی جس نے انہیں سیلاب زدگان تک پہنچانے کے بجائے گودام میں رکھنے کو ترجیح دی۔

تاہم ڈِگری کے بے گھر افراد کو شکایت ہے کہ اس برآمدگی کے بعد بھی انہیں مچھردانیاں نہیں مل سکیں۔ بلکہ ان کا کہنا ہے کہ یہ سب کی سب جیکب آباد، گھوٹکی، شکارپور اور شہید بے نظیر آباد (نواب شاہ) کے اضلاع میں پہنچا دی گئیں۔&nbsp;

نتیجتاً مقامی سیلاب زدگان میں کئی بیماریاں پھیل رہی ہیں۔

ڈِگری کے تحصیل ہسپتال کے سینئر میڈیکل آفیسر ڈاکٹر محمد الیاس جٹ کا کہنا ہے کہ چند ہفتے پہلے وہ پانچ گشتی طبی کیمپوں میں کام کرتے رہے ہیں جہاں وہ روزانہ چار سو سے زیادہ مریضوں کا معائنہ کرتے تھے۔ ان کے مطابق ان میں سے بیشتر کو ہیضہ، بخار اور جِلدی امراض لاحق تھے۔

کیا ہوا کیوں یہ سہانی بستیاں بیمار ہیں: 'ڈِگری کے سیلاب زدگان ہیضہ، بخار اور جلدی امراض کا شکار ہو رہے ہیں'۔

جس طرح انتظار حسین کے ناول &#39;بستی&#39; کا روپ نگر گاؤں &quot;اپنے تین بندروں کی بھینٹ دے کر بجلی کے زمانے میں داخل&quot; ہوا اسی طرح پاکستان ہزاروں پرندوں کی قربانی دے کر ہوا سے پیدا ہونے والی بجلی کے زمانے میں داخل ہو رہا ہے۔&nbsp;

قدرتی ماحول کی بہتری اور بقا کے لئے کام کرنے والے بین الاقوامی غیرسرکاری ادارے ورلڈ وائلڈلائف فنڈ فار نیچر (ڈبلیو ڈبلیو ایف) میں پراجیکٹ منیجر کے طور پر کام کرنے والے سعید الاسلام کا کہنا ہے کہ ہر ماہ تین سو سے چار سو پرندے اُن پون چکیوں کے پروں سے ٹکرا کر اپنی جان سے ہاتھ دھو بیٹھتے ہیں جو سندھ کے جنوبی ضلع ٹھٹہ میں ہوا سے بجلی پیدا کرنے کے لیے لگائی گئی ہیں۔ انہوں نے خود تو ان پرندوں کو مرتے نہیں دیکھا لیکن وہ کہتے ہیں کہ ان کی موت کی تصدیق بجلی پیدا کرنے والی کمپنیوں کے اُن اہل کاروں نے کی ہے جن کا کام پون چکیوں کے اردگرد کے قدرتی ماحول پر نظر رکھنا ہے۔

ان میں سے ایک کمپنی میں کام کرنے والے ایک الیکٹریکل انجینئر کہتے ہیں کہ یہ &quot;پون چکیاں ہر سال ایسے بہت سے پرندوں کی ہلاکت کا سبب بنتی ہیں جو سائبیریا اور وسطی ایشیا سے ستمبر میں ہجرت کر کے سندھ میں موجود پانی کے مختلف ذخائر کے اردگرد اترتے ہیں اور جنوری میں واپس جاتے ہیں&quot;۔ (تاہم یہ انجینئر اپنی شناخت ظاہر نہیں کرنا چاہتے کیونکہ ایسا کرنے سے ان کی نوکری کو خطرہ ہو سکتا ہے۔) &nbsp;

غلام سرور جمالی بھی پرندوں کی ہلاکت کے عینی شاہد ہونے کا دعویٰ کرتے ہیں۔ وہ سندھ کے محکمہ برائے تحفظ جنگلی حیات میں 33 سال کام کرنے کے بعد 2019 میں ڈپٹی کنزرویٹر کے عہدے سے ریٹائر ہوئے ہیں اور کہتے ہیں کہ انہوں نے بہت سے پرندوں کو پون چکیوں سے ٹکرا کر ہلاک ہوتے دیکھا ہے۔&nbsp;

ٹھٹہ ہی میں واقع ہالیجی جھیل پر آبی پرندوں کی حفاظت پر مامور حکومتِ سندھ کے اہل کار رشید احمد خان بھی ان دعووں کو درست قرار دیتے ہیں۔ وہ کہتے ہیں کہ انہوں نے خود 2016 میں ایسے بہت سے پرندے دیکھے جو پون چکیوں سے ٹکرا کر زخمی یا ہلاک ہوئے تھے۔ ان کے مطابق اُس وقت وہ ایک غیرسرکاری ادارے کے لیے اسی موضوع پر ایک رپورٹ تیار کر رہے تھے۔

ان کا یہ بھی کہنا ہے کہ متاثرہ پرندوں میں بلبلیں، چڑیائیں، باز، فاختائیں، تلور اور بگلے شامل تھے۔ تاہم وہ ہلاک شدہ پرندوں کی تعداد اور اس ادارے کا نام نہیں بتانا چاہتے جس کے لیے وہ کام کر رہے تھے۔

<h2>مشینی دور کا آغاز&nbsp;</h2>

توانائی کے متبادل ذرائع کو فروغ دینے والے وفاقی ادارے (آلٹرنیٹو انرجی ڈویلپمنٹ بورڈ) اور نیشنل پاور ریگولیٹری اتھارٹی (نیپرا) کی ویب سائٹوں پر دستیاب معلومات کے مطابق صوبہ سندھ میں پچھلے 10 سالوں میں ہوا سے بجلی بنانے کے 36 منصوبے شروع کیے گئے ہیں۔ ان میں سے چار ضلع ٹھٹہ کے قصبے گھارو میں لگائے گئے ہیں جو کراچی سے تقریباً 67 کلومیٹر مشرق میں واقع ہے جبکہ باقی 32 منصوبے جھمپیر نامی جگہ پر نصب ہیں جو کراچی سے ایک سو 29 کلومیٹر شمال مشرق میں واقع ہے۔

ان تمام منصوبوں کے تحت مجموعی طور پر ایک ہزار دو سو پون چکیاں لگائی گئی ہیں جن میں ہر ایک کا کھمبا لگ بھگ 80 میٹر اونچا ہوتا ہے جبکہ اس کے پر تقریباً 40 میٹر لمبے ہوتے ہیں۔ گویا ایک پون چکی کی زیادہ سے زیادہ بلندی ایک سو 20 میٹر ہو سکتی ہے (جو مینار پاکستان کی اونچائی سے دگنی ہے)۔&nbsp;

دوسری طرف، سرور جمالی کے مطابق، کونج، گِدھ، بگلے اور ماہی خور (پیلیکان) جیسے کئی پرندے زیادہ سے زیادہ 50 میٹر اونچا اڑ سکتے ہیں اس لیے دورانِ پرواز ان کا پون چکیوں کے پنکھوں سے ٹکرانا ایک یقینی امر ہوتا ہے۔ مذکورہ بالا الیکٹریکل انجینئر کا بھی کہنا ہے پون چکیوں کے اردگرد پائے جانے والے بیشتر پرندوں کی اڑان ایک سو 20 میٹر سے نیچے ہی رہتی ہے۔&nbsp;

تاہم کراچی یونیورسٹی کے شعبہ زوآلوجی میں پرندوں پر پی ایچ ڈی کرنے والے الطاف حسین ناریجو اس بات کو تسلیم نہیں کرتے کہ پون چکیاں پرندوں کی ہلاکت کا سبب بن رہی ہیں۔ ان کا کہنا ہے کہ زیادہ تر پرندے عام طور پر ان چکیوں کے کھمبوں سے تین گنا زیادہ اونچائی پر اڑتے ہیں &quot;اس لیے یہ ممکن ہی نہیں کہ وہ ان کے پروں سے ٹکرا کر ہلاک ہو جائیں&quot;۔&nbsp;

مقامی لوگوں کا کہنا ہے کہ اگر پرندوں کی ہلاکت کے واضح ثبوتوں کے باوجود یہ مان بھی لیا جائے کہ پون چکیاں انہیں ہلاک نہیں کر رہیں تو پھر بھی ان چکیوں کے دوسرے منفی ماحولیاتی اثرات کو نظرانداز نہیں کیا جا سکتا۔ جھمپیر کے نواحی گاؤں رمضان گوپانگ سے تعلق رکھنے والے وکیل اعظم گوپانگ ان اثرات کی نشان دہی کرتے ہوئے کہتے ہیں کہ رات کے وقت ان &quot;پون چکیوں کے کھمبوں پر لال بتیاں جلا دی جاتی ہیں جس کے باعث سائبیریا اور وسطی ایشیا سے آنے جانے والے پرندوں کی پرواز میں خلل پڑتا ہے کیونکہ وہ اکثر رات کو سفر کرتے ہیں&quot;۔ ان کا یہ بھی کہنا ہے کہ چکیوں کے چلنے کا شور بھی پرندوں کی پرواز اور مساکن کو منفی طور پر متاثر کرتا ہے جس کے باعث &quot;تلور اور پیلیکان جیسے پرندے اب جھمپیر اور اس کے گردونواح میں شاذونادر ہی دکھائی دیتے ہیں حالانکہ کچھ عرصہ پہلے وہ یہاں بڑی تعداد میں پائے جاتے تھے&quot;۔

سعید الاسلام بھی کم و بیش یہی کہتے ہیں۔ ان کے مطابق ہر سال تقریباً 10 لاکھ مسافر پرندے پاکستان کی حدود میں آتے ہیں جن میں سے بہت سے موسم سرما میں جھمپیر کے پہلو میں واقع کینجھر جھیل اور گھارو کے ساتھ موجود ہالیجی جھیل کو اپنا مسکن بناتے ہیں۔ لیکن وہ کہتے ہیں کہ حالیہ سالوں میں ان جھیلوں پر اترنے والے مسافر پرندوں کی تعداد بہت کم ہو گئی ہے کیونکہ پون چکیاں &quot;ان کا راستہ روک دیتی ہیں&quot;۔ &nbsp;

سندھ زوآلوجیکل سروے کے سابق اہل کار سید علی غالب کی تحقیق بالواسطہ طور پر ان کے نکتہ نظر کی توثیق کرتی ہے۔ اس کے مطابق 2012 اور 2014 کے درمیان، جب ابھی پون چکیوں سے بجلی کی پیداوار شروع نہیں ہوئی تھی، جھمپیر کے آس پاس پرندوں کی 79 سے زیادہ اقسام پائی جاتی تھیں۔ ان میں کئی طرح کے بگلے، تِلور، پیلیکان، پپیہے، جل مرغی، راج ہنس، سرخاب، اُلّو، کبوتر، چڑیا، بٹیر، تِلیر، نیل کنٹھ، گِدھ، باز اور بطخیں شامل تھیں۔ لیکن مقامی لوگوں کا کہنا ہے کہ ان میں سے کئی اقسام کے پرندے اب دکھائی بھی نہیں دیتے۔ &nbsp;

سید علی غالب کی تحقیق یہ بھی ظاہر کرتی ہے کہ اس علاقے میں دودھ دینے والے جنگلی جانوروں کی 15 اقسام اور رینگنے والے جانوروں کی 13 اقسام ملتی تھیں جو، اعظم گوپانگ کے مطابق، اب ناپید ہوتی جا رہی ہیں۔ وہ کہتے ہیں کہ گیدڑ، سؤر اور لومڑی جیسے جانور اب اس علاقے سے چلے گئے ہیں &quot;کیونکہ انسانی سرگرمیوں کے نتیجے میں ان کے مساکن اجڑ گئے ہیں&quot;۔&nbsp;

غلام سرور جمالی بھی کہتے ہیں کہ پون چکیاں لگنے کے بعد جھمپیر اور گھارو دونوں علاقوں میں لومڑی، گیدڑ، جنگلی بِلّے، سانڈ اور سؤر جیسے جنگلی جانوروں کے مساکن شدید متاثر ہوئے ہیں جو یہاں &quot;صدیوں سے رہتے چلے آ رہے تھے&quot;۔&nbsp;

<h2>کمپنیوں کی حکومت&nbsp;</h2>

ہوا سے بجلی پیدا کرنے والی کمپنیاں اس بات کی پابند ہوتی ہیں کہ وہ حکومت کو اس جگہ کا ایک تفصیلی ماحولیاتی جائزہ پیش کریں جہاں انہوں نے پون چکیاں لگانا ہوتی ہیں تاکہ حکومت یہ طے کر سکے کہ ان کی تنصیب سے قدرتی ماحول کو کتنا نقصان پہنچے گا۔ اس جائزے کی روشنی میں ہی کمپنیوں کو کام شروع کرنے کی اجازت دی جاتی ہے۔&nbsp;

جھمپیر میں لگائی گئی پون چکیوں کے ماحولیاتی اثرات کا جائزہ لاہور میں قائم ٹرائکن بوسٹن کنسٹلنگ کارپوریشن نامی کمپنی نے لیا۔ اگرچہ اس میں تسلیم کیا گیا کہ پون چکیوں کے شور سے پرندوں کی آمدوروفت اور رہن سہن میں خلل پڑ سکتا ہے لیکن اُن کی بقا کو درپیش زیادہ تر خطرات کو یہ کہہ کر مسترد کر دیا گیا کہ بیشتر مسافر پرندے دیگر وجوہات کی بنا پر پہلے ہی کینجھر جھیل پر نہیں آ رہے۔

رشید احمد خان اس بات سے اتفاق نہیں کرتے۔ ان کا کہنا ہے کہ کینجھر اور ہالیجی پر اب بھی ہر سال ہزاروں پرندے آتے ہیں۔ وہ اپنے محکمے کے جمع کردہ اعدوشمار کا حوالہ دیتے ہوئے کہتے ہیں کہ صرف 2021 میں ہالیجی پر 66 ہزار سے زیادہ پرندے اترے۔&nbsp;

تاہم پون چکیاں چلانے والی کمپنیاں بالواسطہ طور پر ان پرندوں کو لاحق خطروں کو تسلیم کرتی ہیں کیونکہ انہوں نے ایسے مقامی لوگ بھرتی کر رکھے ہیں جن کا واحد کام جنگلی حیات خصوصاً پرندوں کی نگرانی کرنا اور ان میں سے زخمی یا ہلاک ہونے والے جانداروں کے اعدادوشمار اکٹھے کرنا ہے۔ سرکاری قواعد کے مطابق ان کمپنیوں کے لیے ضروری ہے کہ وہ ان اعدادوشمار کے بارے میں سندھ کے ادارہ برائے تحفظ ماحول (سیپا) کو باقاعدگی سے آگاہ کریں۔

اس لیے ایک کمپنی سے منسلک ایک ماحولیاتی انجینئر اپنا نام ظاہر نہ کرنے کی شرط پر کہتے ہیں کہ تقریباً &quot;تمام کمپنیوں کو معلوم ہے کہ پون چکیوں کی وجہ سے کتنے پرندے زخمی اور ہلاک ہو رہے ہیں لیکن یہ معلومات کبھی نیوز میڈیا اور عام لوگوں تک نہیں پہنچتیں&quot;۔&nbsp;

ان کی یہ بات کسی حد تک ٹھیک معلوم ہوتی ہے کیونکہ بار بار رابطہ کرنے کے باوجود ان کمپنیوں کے اہل کاروں اور سیپا کے افسران نے اس معاملے پر مکمل چپ سادھ رکھی ہے اور اپنا موقف تک بیان کرنے کی کوشش نہیں کی۔

کسی کے جسم و جاں چھلنی کسی کے بال و پر ٹوٹے: 'مسافر پرندے ٹھٹہ میں لگی پون چکیوں سے ٹکرا کر اپنی جان سے ہاتھ دھو رہے ہیں'۔

flooding in jhimpir coal mine

فضلِ ربی 5 جولائی 2022 کو سندھ کے جنوبی ضلع ٹھٹہ میں واقع کوئلے کی 360 فٹ گہری کان میں کام کر رہے تھے جب انہوں نے دیکھا کہ ان کے اردگرد پانی جمع ہو رہا ہے۔ انہوں نے فوری طور پر باہر موجود لوگوں کو بتایا کہ انہیں کان سے نکلنے کے لیے مدد کی ضرورت ہے ورنہ وہ اور ان کے ساتھ کام کرنے والے 13 کان کن پانی میں ڈوب کر ہلاک ہو جائیں گے۔&nbsp;

اس طرح کے ہنگامی حالات میں عام طور پر لوہے سے بنا ایک لِفٹ نما جھولا کان میں اتارا جاتا ہے تاکہ کان کن اس میں بیٹھ کر باہر نکل سکیں۔ تاہم اُس دن اُس جھولے کو چلانے والی مشین کا انجن کام نہیں کر رہا تھا۔ چنانچہ ایک آہنی رسی کے ساتھ کُنڈا باندھ کر اسے کان میں پھینکا گیا تاکہ اس کے ذریعے ایک ایک کر کے کان کنوں کو باہر کھینچا جا سکے۔ لیکن اس عمل میں اتنی دیر لگ گئی کہ اُن میں سے محض پانچ کو ہی بچایا جا سکا جبکہ باقی نو بے بسی سے چیختے چلاتے اور مدد مانگتے موت کے منہ میں چلے گئے۔

خیبرپختونخوا کے ضلع سوات کی تحصیل مٹہ سے تعلق رکھنے والے 42 سالہ فضلِ ربی بچ جانے والے کان کنوں میں شامل تھے۔ ان کا کہنا ہے کہ مرنے والوں میں 12 سالہ عمر علی بھی شامل تھا &quot;جس کا کام کان میں ہوا کی ترسیل کے لیے بنائی گئی کھڑکیاں کھلی رکھنا تھا&quot;۔ اس کے والد علی محمد بھی اس کے ساتھ کان میں موجود تھے۔ تاہم &quot;مددگاروں نے کڑی محنت کر کے ان کی جان بچا لی&quot;۔

یہ دونوں باپ بیٹا سندھ کے ضلع جامشورو کے قصبے کوٹڑی سے کام کرنے آئے تھے۔ کان کنوں کے سپروائزار خان زمان کے مطابق اس حادثے میں جاں بحق ہونے والے آٹھ دیگر افراد میں سے 20 سالہ محمد ابوبکر، 40 سالہ محمد عظیم، 37 سالہ گل حسن، 22 سالہ عطااللہ اور 22 سالہ سجاد کا تعلق خیبر پختونخوا کے ضلع سوات سے تھا جبکہ 48 سالہ پرویز، 36 سالہ جان ولی اور 34 سالہ میاں شیر اُسی صوبے کے ضلع شانگلہ کے رہنے والے تھے۔&nbsp;

میاں شیر کے بھائی بخت شیر جامشورو کے علاقے لاکھڑا میں کان کنی کا کام&nbsp;کرتے تھے لیکن حادثے کے روز وہ چھٹی پر اپنے گھر گئے ہوئے تھے۔ ان کا کہنا ہے کہ مرنے سے ایک روز پہلے میاں شیر نے اپنے بیٹے اور تین بیٹیوں سے فون پر وعدہ کیا تھا کہ وہ انہیں بڑی عید کے کپڑوں کی خریداری کے لیے پیسے بھیجیں گے &quot;لیکن چند روز کے بعد ان کی میت گھر آ گئی&quot;۔&nbsp;

ان کے تیسرے بھائی جان شیر بھی اس حادثے میں شدید زخمی ہو گئے تھے کیونکہ، فضلِ ربی کے مطابق، &quot;جب وہ کان سے باہر آ رہے تھے تو کچھ فاصلہ طے کرنے کے بعد رسی ان کے ہاتھ سے چھوٹ گئی اور وہ دوبارہ پانی میں جا گرے۔ تاہم خوش قسمتی سے رسی پر لگا ہوا کنڈا ان کے کپڑوں میں پھنس گیا جس کی مدد سے انہیں بالآخر باہر کھینچ لیا گیا&quot;۔&nbsp;

اس سارے عمل کے دوران جان شیر اتنے بے سدھ ہو گئے کہ انہیں باہر نکالنے والے مددگاروں نے سمجھا کہ وہ مر چکے ہیں۔ تاہم کچھ دیر کے بعد ان کے جسم میں حرکت ہوئی تو انہیں ایک قریبی قصبے جھرک کے دیہی مرکز صحت میں لے جایا گیا جہاں ان کی جان بچا لی گئی۔ اب وہ خیبر پختونخوا میں واقع ایک سرکاری طبی مرکز، سوات میڈیکل کمپلیکس، میں زیرعلاج ہیں۔ &nbsp;

<h2>حادثہ ایک دم نہیں ہوتا&nbsp;</h2>

حادثے سے متاثر ہونے والی کان جھمپیر نامی گاؤں کے قریب واقع ہے۔ سرکاری دستاویزات کے مطابق اس علاقے میں ایک ہزار چھ سو 84 مربع کلومیٹر اراضی پر کوئلہ پایا جاتا ہے۔ اسے زمین سے نکالنے کے لیے بڑے بڑے گڑھے یا &nbsp;کنویں بنائے گئے ہیں جن میں سے ہر ایک کے اندر متعدد گہری سرنگیں کھودی گئی ہیں۔ کان کن ان سرنگوں میں سے کوئلہ نکال کر ان گڑھوں یا کنوؤں میں لاتے ہیں جہاں سے اسے بوریوں میں بھر کر اوپر پہنچایا جاتا ہے۔

جھمپیر میں ایسی کانوں کی مجموعی تعداد تین سو کے قریب ہے جن میں سے ہر ایک میں کم و بیش 30 مزدور کام کرتے ہیں۔&nbsp;

پاکستان بھر سے تعلق رکھنے والی کئی مزدور تنظیموں کے اتحاد متحدہ لیبر فیڈریشن کے سندھ کے صدر اور لاکھڑا کول مائنز لیبر یونین کے جنرل سیکرٹری آصف خٹک کہتے ہیں کہ یہ کانیں ایک ایسے علاقے میں واقع ہیں جہاں زیرِ زمین پانی کی سطح کافی بلند ہے کیونکہ پانی کے دو بڑے ذخیرے، کینجھر جھیل اور دراوت ڈیم، اس کے بالکل پاس واقع ہیں۔&nbsp;

وہ سمجھتے ہیں کہ 5 جولائی کو ہونے والے حادثے کا سبب اس پانی کی سطح میں مون سون کی بارشوں کی وجہ سے ہونے والا اضافہ تھا۔ اس لیے وہ حکومت سے مطالبہ کرتے ہیں کہ &quot;اس موسم میں یہاں کان کنی پر مکمل پابندی ہونی چاہیے&quot;۔

صوبہ سندھ کے محکمہ توانائی کے ذیلی ادارے انسپیکٹوریٹ آف کول مائنز ڈویلپمنٹ کے چیف انسپکٹر رسول بخش چنّہ اس بات سے متفق نہیں۔ ان کا کہنا ہے کہ زیرِ زمین پانی کی سطح بلند ہونے سے &quot;کانوں میں بنی سرنگیں ڈھے جانی چاہئیں لیکن اس حادثے میں ایسا نہیں ہوا&quot;۔&nbsp;

درحقیقت جھمپیر پولیس سٹیشن میں ان کی طرف سے درج کرائی گئی ایک ابتدائی معلوماتی رپورٹ میں کان کے مالک امان اللہ، اس کے منیجر عمر محمد اور کان کنوں کے ٹھیکیدار عالم زیب سمیت چار افراد کو مجرمانہ غفلت کا مرتکب قرار دیا گیا ہے۔ اس رپورٹ کے اندراج کے بعد پولیس نے عمر محمد اور عالم زیب کو گرفتار بھی کیا تھا لیکن 22 روز جیل میں گزارنے کے بعد انہوں نے عدالت سے ضمانت پر رہائی حاصل کر لی جبکہ امان اللہ نے شروع سے ہی ضمانت قبل از گرفتاری کروا رکھی ہے۔

اس دوران صوبائی حکومت نے جھمپیر میں کان کنی پر عارضی پابندی بھی لگا دی ہے اگرچہ اس پر عمل درآمد ہوتا کہیں دکھائی نہیں دیتا کیونکہ حادثے کا شکار ہونے والی کان کے علاوہ دیگر تمام مقامی کانوں میں زور شور سے کام جاری ہے۔ &nbsp;&nbsp;

<h2>&#39;خاک میں لتھڑے ہوئے خون میں نہلائے ہوئے&#39;</h2>

عزیز اللہ ببر نامی ایک مقامی باسی پچھلے 10 سال سے جھمپیر کی&nbsp;کانوں سے نکلنے والا کوئلہ ٹرکوں میں لادنے کا کام کر رہے ہیں۔ ان کے مطابق &quot;کان کنوں کو آئے روز حادثات پیش آتے رہتے ہیں لیکن نہ تو کانوں کے مالکان کو ان کی فکر ہوتی ہے اور نہ ہی حکومت ان کے بارے میں کچھ سوچتی ہے&quot;۔ ان کا یہ بھی کہنا ہے کہ &quot;ان کانوں میں کام کرنے والے لوگوں کے لئے نہ تو قریب میں کوئی اچھا ہسپتال موجود ہے اور نہ ہی انہیں کوئی ایمبولینس دستیاب ہے جو ہنگامی حالت میں انہیں جلد از جلد کسی ڈاکٹر یا طبی مرکز تک لے جا سکے&quot;۔

اسی طرح جھمپیر میں کان کنی کرنے والے مزدوروں کے جسم پر نہ تو کان کنی کا مخصوص حفاظتی لباس دکھائی دیتا ہے اور نہ ہی ان میں سے کسی کو کام کے دوران پہننے کے لیے لمبے بوٹ، ہیلمٹ اور دستانے دیے جاتے ہیں۔ یہی وجہ ہے کہ ان میں سے بیشتر کے ہاتھ پاؤں زخمی نظر آتے ہیں۔

آصف خٹک اس صورتِ حال کی ذمہ داری حکومتی غفلت پر ڈالتے ہیں۔ ان کے مطابق &quot;حکومتی اہل کار کان کنوں کے لیے درکار حفاظتی انتظامات کا باقاعدگی سے معائنہ نہیں کرتے جس کے باعث کان مالکان ان انتظامات کو یقینی نہیں بناتے اور نتیجتاً کان کنوں کو اکثروبیشتر حادثوں کا سامنا کرنا پڑتا ہے&quot;۔&nbsp;

تاہم انسپیکٹوریٹ آف کول مائنز ڈویلپمینٹ کے ڈپٹی ڈائریکٹر ٹیکنیکل شہزاد مظفر قادر کے لکھے ہوئے ایک سرکاری خط کے مطابق انہوں نے آخری مرتبہ اپریل 2022 میں جھمپیر کی کانوں کا معائنہ کیا تھا۔ اس خط میں ان کا یہ بھی کہنا تھا 31 اگست 2020 کو انہوں نے متاثرہ کان کے مالکان کو حفاظتی طریقہ ہائے کار کے متعلق تمام تفصیلات فراہم کر دی تھیں۔&nbsp;

لیکن انہوں نے اس خط میں کہیں واضح نہیں کیا کہ آیا معائنے کے وقت تمام کانوں میں ضروری انتظامات موجود تھے یا نہیں اور آیا متاثرہ کان کے مالکان نے ان کے بتائے گئے حفاظتی طریقہ ہائے کار پر عمل درآمد کیا ہوا تھا یا نہیں۔

جھمپیر میں کوئلے کی کان میں مہلک حادثہ: 'نہ تو کانوں کے مالکان کو کان کنوں کی فکر ہوتی ہے اور نہ ہی حکومت ان کے بارے میں کچھ سوچتی ہے'۔

scheduled caste hindu dalit facing discrimination in sindh electoral politics

scheduled caste hindu dalit facing discrimination in sindh politics

دو ماہ پہلے سندھ میں بلدیاتی انتخابات کے شیڈول کا اعلان ہوا تو شروع میں تلسی بائی نے بھی کونسلر کی عام نشست کے لیے اپنے کاغذات نامزدگی جمع کرا دیے۔ لیکن جلد ہی انہوں نے اپنے آپ کو اس میدان سے باہر کر لیا۔&nbsp; وہ کہتی ہیں کہ ان کا ماضی کا تجربہ اتنا برا رہا ہے کہ اب وہ کبھی بھی انتخابات میں حصہ نہیں لیں گی۔

سندھ کے جنوبی ضلع تھرپارکر کے ضلعی صدر مقام مٹھی کے کھوکھر محلہ میں رہنے والی 41 سالہ تلسی بائی پانچ بچوں کی ماں ہیں اور ہندو شیڈولڈ کاسٹ برادری میگھواڑ سے تعلق رکھتی ہیں۔ انہوں نے انٹرمیڈیٹ تک تعلیم حاصل کر رکھی ہے اور اوائل جوانی سے ہی اپنے شیڈولڈ کاسٹ ہم مذہبوں کے حقوق کا تحفظ کرنے کے لیے سرگرم ہیں۔

انہوں نے2018&nbsp; میں تھرپارکر کے ایک حلقے سے قومی اسمبلی کا انتخاب بھی لڑا تھا جس میں انہیں ایک ہزار دو سو 30 ووٹ ملے تھے۔ ان کے مقابلے میں کامیاب ہونے والے امیدوار پاکستان پیپلز پارٹی سے تعلق رکھنے والے ڈاکٹر مہیش کمار ملانی تھے جنہوں نے ایک لاکھ سے زیادہ ووٹ حاصل کیے تھے اور جو ایک اونچی ذات کے ہندو ہیں۔

اس انتخاب میں تلسی بائی کے مدمقابل 13 امیدوارتھے جن میں سے نو مسلمان اور چار ہندو تھے۔ ان ہندو امیدواروں میں سے دو کا تعلق شیڈولڈ کاسٹ برادریوں سے تھا اور دو کا تعلق اونچی ذاتوں سے۔ وہ اس حلقے کی واحد خاتون امیدوار تھیں۔

انتخابی مہم کے دوران ہونے والے تجربات کا ذکر کرتے ہوئے وہ کہتی ہیں کہ ان کے مخالفین نے ان کی ذات اور سماجی حیثیت کا تواتر سے مذاق اڑایا۔ اس عمل میں، ان کے مطابق، نہ صرف مسلمان بلکہ اونچی ذات کے ہندو امیدوار بھی شامل تھے کیونکہ &quot;وہ شیڈولڈ کاسٹ ذاتوں سے تعلق رکھنے والے ہندوؤں سے ہاتھ ملانا بھی پسند نہیں کرتے&quot;۔

تاہم ذات پات کی بنیاد پر سیاسی امتیاز کا سامنا صرف تلسی بائی کو ہی نہیں کرنا پڑا بلکہ کئی دوسرے مقامی شیڈولڈ کاسٹ ہندو بھی اس کا شکار ہو چکے ہیں۔

سندھ اسمبلی کے سابق رکن 50 سالہ پونجو بھیل (جن کا تعلق شیڈولڈ کاسٹ بھیل برادری سے ہے) اس کی ایک حالیہ مثال دیتے ہوئے کہتے ہیں کہ جب جون 2022 میں ہونے والے بلدیاتی انتخابات کے لیے پاکستان پیپلزپارٹی نے تھرپارکر کی تحصیل اسلام کوٹ میں چند یونین کونسلوں میں بھیل اور میگھواڑ امیدواروں کو چیئرمین کے عہدوں کے لیے نامزد کرنا چاہا تو اونچی ذات کی ٹھاکر راجپوت برادری کے ایک مقامی سیاست دان نے صاف کہہ دیا کہ وہ کسی شیڈولڈ کاسٹ چیئرمین کے ماتحت نائب چیئرمین نہیں بنیں گے۔

پونجو بھیل کا تعلق تھرپارکر کے نواحی ضلع عمر کوٹ سے ہے۔ وہ ایک بار 2002 سے لے کر 2007 تک اور دوسری بار 2013 سے لے کر 2016 تک متحدہ قومی موومنٹ کی جانب سے اقلیتوں کے لیے مخصوص کردہ نشست پر سندھ اسمبلی کے رکن رہ چکے ہیں۔ اب وہ پاکستان پیپلزپارٹی سے وابستہ ہیں اور وزیر اعلی سندھ کے معاون خصوصی کے طور پر کام کر رہے ہیں۔

ان کا کہنا ہے کہ اگرچہ ذات پات کی بنیاد پر پائی جانے والی تقسیم سندھ کے ہندو سماج میں ہر سطح اور ہر شعبے میں موجود ہے لیکن سیاست میں یہ نسبتاً زیادہ نمایاں ہے۔ ان کے مطابق حالیہ بلدیاتی انتخابات میں اس کی ایک نمایاں مثال تھرپارکر کی یونین کونسل سینگارو میں دیکھنے میں آئی جہاں شیڈولڈ کاسٹ میگھواڑ آبادی کی اکثریت ہے۔ لیکن، ان کے مطابق &quot;اس کے باوجود اس برادری سے تعلق رکھنے والے افراد کو مبینہ طور پر محض ذات پات کی بنیاد پر اس کے چیئرمین کا امیدوار نامزد نہیں کیا گیا&quot;۔

<h2>ذات بقابلہ جماعت</h2>

ارباب لطف اللہ سندھ اسمبلی کے رکن اور کھیلوں اور نوجوانوں کے امور کے بارے میں وزیر اعلیٰ سندھ کے معاون خصوصی ہیں۔ ان کا تعلق تھرپارکر کے ارباب خاندان سے ہے جو کئی دہائیوں سے انتخابی سیاست میں سرگرم ہے۔ ان کے والد ارباب امیر حسن قومی اسمبلی کے رکن رہ چکے ہیں جبکہ ان کے چچا ارباب غلام رحیم 2004 سے لے کر 2007 تک سندھ کے وزیرِاعلیٰ کے طور پر کام کرچکے ہیں۔

ارباب لطف اللہ 2017 میں 28 سال کی عمر میں پاکستان پیپلز پارٹی میں شامل ہوئے لیکن ان کی جماعت کے کئی ارکان کا کہنا ہے کہ پچھلے پانچ سالوں میں انہوں نے اس کے ضلعی صدر گیان چند کی صدارت میں ہونے والے کسی ایک اجلاس میں بھی شرکت نہیں کی۔ اس جماعت سے وابستہ ایک سرگرم سیاسی کارکن اپنا نام ظاہر نہ کرنے کی شرط پر اس کی یہ وجہ بیان کرتے ہیں کہ گیان چند کے میگھواڑ ہونے کی وجہ سے ارباب لطف اللہ ان کی قیادت کو دل سے تسلیم نہیں کرتے۔

گیان چند کی عمر 56 سال ہے اور انہوں نے زرعی انجینئرنگ کی ڈگری حاصل کر رکھی ہے۔ وہ مارچ 2015 سے مارچ 2021 تک پاکستان پیپلز پارٹی کی طرف سے سینیٹ کے رکن رہے ہیں۔ اس سے پہلے انہوں نے ضلع تھرپارکر کے صوبائی اسمبلی کے ایک حلقے سے ارباب غلام رحیم کے مقابلے میں 2013 کے عام انتخابات میں حصہ لیا تھا اور دوسرے نمبر پر آئے تھے۔

وہ تسلیم کرتے ہیں کہ ارباب لطف اللہ ان کی صدارت میں ہونے والے اجلاسوں میں شریک نہیں ہوتے۔ لیکن اس بات کو براہِ راست ذات پات سے منسلک کرنے کے بجائے وہ کہتے ہیں کہ &quot;ایسے اجلاسوں میں بیٹھنا شاید انہیں اپنے مرتبے سے کم&nbsp; تر کام لگتا ہے&quot;۔

تاہم کسی شخص کا نام لیے بغیر ان کا یہ بھی کہنا ہے کہ &quot;ہم نے بہت محنت کر کے اپنی جماعت کے اندر ذات پات کا نظام توڑا ہے )لیکن) کچھ لوگ اب اس نظام کو دوبارہ مستحکم کر رہے ہیں&quot;۔ اس لیے وہ پاکستان پیپلز پارٹی کی قیادت سے مطالبہ کرتے ہیں کہ &quot;وہ ایسے لوگوں کے رویے کا نوٹس لے اور ان کے خلاف کارروائی کرے جو خود کو اس کے ضابطہ اخلاق سے ماورا سمجھتے ہیں&quot;۔

دوسری طرف ارباب لطف اللہ کہتے ہیں کہ پاکستان پیپلز پارٹی کے ضلعی معاملات میں ان کی عدم شمولیت کی وجہ گیان چند کی صدرات نہیں بلکہ ان کے اپنے خاندان کے اندر سیاسی ذمہ داریوں کی تقسیم ہے۔ ان کے مطابق &quot;جماعتی معاملات کی ذمہ داری میرے بڑے بھائی ارباب امان اللہ کے پاس ہے جو باقاعدگی سے اس کے مقامی اجلاسوں میں شریک ہوتے ہیں&quot;۔ تاہم وہ دعویٰ کرتے ہیں کہ وہ خود بھی 26 جون 2022 کو ہونے والے ایک اجلاس میں شرک ہو چکے ہیں جس کی صدارت گیان چند نے ہی کی تھی اور جس میں تھرپارکر سے بلدیاتی انتخابات میں حصہ لینے والے امیدواروں کا فیصلہ کیا گیا تھا۔

گیان چند اُن کے اس دعوے کو درست قرار نہیں دیتے بلکہ کہتے ہیں کہ اس اجلاس میں بھی ان کے بجائے ان کے بھائی نے ہی شرکت کی تھی۔

<h2>ان گنت صدیوں کے تاریک بہیمانہ طلسم</h2>

تازہ ترین مردم شماری کے مطابق تھرپارکر کی 43 فیصد آبادی ہندومذہب کی ماننے والی ہے۔ اس میں سے دو تہائی کا تعلق ان شیڈولڈ کاسٹ برادریوں سے ہے جنہیں مقامی سماج میں نچلی ذاتیں کہا جاتا ہے۔ مٹھی سے 15 کلومیٹر دور ایک&nbsp; گاؤں میں رہنے والے فن کار سنگتراش صحرائی کہتے ہیں کہ ان برادریوں کے افراد اپنی روزمرہ زندگی کے ہر شعبے میں ہر روز امتیازی سلوک سے دوچار ہوتے ہیں۔

اس کی مثال دیتے ہوئے وہ کہتے ہیں کہ &quot;اگر کوئی شیڈولڈ کاسٹ خاتون کسی بس میں کھڑی ہو کر سفر کر رہی ہو تو مرد حضرات اسے اپنی نشست پیش نہیں کرتے&quot;۔ اسی طرح، ان کے مطابق، &quot;شیڈولڈ کاسٹ ہندوؤں کو اونچی ذات سے تعلق رکھنے والے ہندوؤں کے ساتھ ایک برتن میں کھانا کھانے اور ایک ہی مندر میں عبادت کرنے کی اجازت بھی نہیں&quot;۔ حتیٰ کہ مذہبی تہواروں پر بھی &quot;اونچی ذات کے ہندو نچلی ذاتوں سے تعلق رکھنے والے لوگوں کے ساتھ بات چیت تک نہیں کرتے&quot;۔

پونجو بھیل اس حوالے سے پیش آنے والے ایک انتہائی ناخوشگوار واقعے کا ذکر کرتے ہوئے کہتے ہیں کہ اکتوبر 2013 میں تھرپارکر کے نواحی ضلع بدین کے قصبے پنگریو میں بھورو بھیل کی لاش اس وجہ سے اس کی قبر سے نکال دی گئی کہ مقامی مسلمان نہیں چاہتے تھے کہ ایک شیڈولڈ کاسٹ ہندو کو ان کے مردوں کے ساتھ دفن کیا جائے۔

وہ اس صورتِ حال کی ذمہ داری ان لوگوں پر ڈالتے ہیں &quot;جو اقتدار کے ایوانوں میں نچلی ذاتوں کے لوگوں کی نمائندگی کرتے ہیں&quot;۔ ان کا کہنا ہے کہ میگھواڑ، بھیل اور کولہی ذاتوں سے تعلق رکھنے والے جو لوگ کسی نہ کسی حیثیت میں صاحب اختیار ہیں یا رہے ہیں انہوں نے ذات پات کے امتیاز کو ختم کرنے کے لیے کوئی عملی اقدامات نہیں کیے۔ بلکہ، ان کے بقول، &quot;یہ لوگ شیڈولڈ کاسٹ برادریوں کے حقوق کا شور صرف اسی وقت مچاتے ہیں جب ان کا ذاتی مفاد خطرے میں ہوتا ہے&quot;۔

وہ تو یہاں تک کہتے ہیں کہ شیڈولڈ کاسٹ برادریوں سے تعلق رکھنے والے مقتدر لوگ ذات پات کے نظام کو برقرار رکھنے میں برابر کے شریک ہیں کیونکہ وہ اپنے سے کم تر ذاتوں کے لوگوں سے وہی سلوک کرتے ہیں جو اونچی ذات والے اُن سے کرتے ہیں۔ یہی وجہ ہے کہ ان لوگوں نے کبھی &quot;باگڑی، جوگی اور شکاری جیسی پسماندہ ترین شیڈولڈ کاسٹ برادریوں کی بہتری کے لیے کوئی کام نہیں کیا&quot;۔

تاہم تھرپارکر کی تحصیل ننگرپارکر سے تعلق رکھنے والی 43 سالہ سینیٹر کشوبائی، جنہیں عام طور پر کرشنا کولہی یا کرشنا کماری کہا جاتا ہے، پونجو بھیل سے پوری طرح متفق نہیں۔ ان کا اپنا تعلق بھی شیڈولڈ کاسٹ کولہی برادری سے ہے اور ان کی زندگی ذات پات کی بنیاد پر روا رکھے جانے والے واقعات سے بھری پڑی ہے۔ لیکن وہ سیاسی سطح پر ہونے والی کچھ مثبت تبدیلیوں کی بھی نشان دہی کرتی ہیں۔

وہ کہتی ہیں کہ سکول میں انہیں اور ان کے بھائی ویرجی کولہی کو اپنے ساتھی طلبا کے ساتھ بیٹھنے تک نہیں دیا جاتا تھا یہاں تک کہ &quot;دوسرے بچے جس گلاس میں پانی پیا کرتے تھے ہم اس میں پانی بھی نہیں پی سکتے تھے&quot;۔ ان کے مطابق سفر کرنے سے لے کر کھیتوں میں کام کرنے تک انہیں ہر جگہ ایسے ہی رویوں کا سامنا کرنا پڑا۔ ان کے اپنے الفاظ میں &quot;ہم تو ضلع عمرکوٹ کی تحصیل کنری میں وڈیروں کی نجی جیل میں قید بھی رہے ہیں اور ہم نے اس قدر جبری مشقت کی ہے کہ ہمیں اپنے مذہبی تہوار منانے کے لیے بھی چھٹی نہیں دی جاتی تھی&quot;۔

لیکن وہ کہتی ہیں کہ پاکستان پیپلز پارٹی شیڈولڈ کاسٹ برادریوں سے تعلق رکھنے والے بہت سے لوگوں کو سیاسی میدان میں آگے لے کر آئی ہے جن میں وہ خود اور ان کے بھائی ویرجی کولہی بھی شامل ہیں جنہیں وزیرِاعلیٰ سندھ کا معاون خصوصی بنایا گیا ہے۔ ان کے بقول &quot;پاکستان پیپلز پارٹی نے ہمیں بہت پیار اور عزت دی ہے&quot;۔

ان کا یہ بھی کہنا ہے کہ ان کی جماعت کی قیادت ان سے کبھی ذات پات کی بنیاد پر امتیازی سلوک نہیں کرتی۔ اس کے برعکس وہ کہتی ہیں کہ اس کے سربراہ &quot;بلاول بھٹو زرداری کو تو میں نے راکھی باندھ کر اپنا بھائی بنا رکھا ہے (جبکہ ان کی بہن) بختاور بھٹو زرداری کے ساتھ میری گال سے گال ملاتے ہوئے تصاویر بھی بنی ہوئی ہیں&quot;۔

سندھ ہندو میرج ایکٹ: 'شیڈولڈ کاسٹ ہندو عورتوں کو معلوم ہی نہیں کہ وہ قانونی طریقے سے طلاق لے سکتی ہیں'۔

بچ نہ سکا میں ذات سے اپنی: جنوبی سندھ کے شیڈولڈ کاسٹ ہندو سیاسی کارکنوں کو انتخابی اور جماعتی سیاست میں منفی امتیازی سلوک کا سامنا۔

رائے سنگھ سوڈھو نامی وکیل پر الزام ہے کہ وہ کسی شیڈولڈ کاسٹ جج کے سامنے پیش ہونا پسند نہیں کرتے۔ &nbsp;

یہ الزام ایک خط میں لگایا گیا ہے جو صوبہ سندھ کے ضلع تھرپارکر کی تحصیل ننگرپارکر میں متعین سول جج کرم علی شاہ نے 16 مئی 2022 کو صوبے میں وکالت کے پیشے کی نگرانی کرنے والے ادارے، سندھ بار کونسل، کو لکھا ہے۔ اس میں انہوں نے شکایت کی ہے کہ رائے سنگھ سوڈھو شیڈولڈ کاسٹ جج کے سامنے پیش ہونے کے بجائے اپنے مقدمے دوسری عدالتوں میں منتقل کرا لیتے ہیں۔&nbsp;

عدالتی ریکارڈ ان کی شکایت کی توثیق کرتا ہے۔ اس کے مطابق 43 سالہ رائے سنگھ سوڈھو چھ ایسے مقدمات میں پیش ہونے سے انکار کر چکے ہیں جن کی شنوائی تحصیل چھاچھرو میں متعین شیڈولڈ کاسٹ برادری سے تعلق رکھنے والے سول جج آکاش میگھواڑ کر رہے تھے۔ اس انکار کی مبینہ وجہ یہ ہے کہ وہ خود کو اونچی ذات کا فرد خیال کرتے ہیں اور شیڈولڈ کاسٹ والوں کو نیچی ذات کے لوگ سمجھتے ہیں۔&nbsp;مقامی وکلا کی رائے میں &quot;ٹھاکر راجپوت ہونے کے ناطے&quot; رائے سنگھ سوڈھو کے لیے ایک &quot;میگھواڑ جج کو عدالت میں مائی لارڈ کہنا بہت مشکل ہے&quot;۔

تاہم رائے سنگھ سوڈھو اس بات تردید کرتے ہیں کہ انہوں نے ذات پات کی بنیاد پر کسی جج کے سامنے پیش ہونے سے انکار کیا ہے۔ اس کے برعکس ان کا دعویٰ ہے کہ وہ کئی مقدمات میں آکاش میگھواڑ کی عدالت میں پیش ہو چکے ہیں اور ابھی بھی ان کے پندرہ کے قریب مقدمے ریجھو مل نامی سول جج کی عدالت میں زیرسماعت ہیں جن کا تعلق بھی میگھواڑ برادری سے ہے۔&nbsp;

وہ ڈسٹرکٹ بار ایسوسی ایشن تھرپارکر کے صدر رہ چکے ہیں اور کہتے ہیں کہ ان کے ساتھ کام کرنے والے متعدد وکلا میگھواڑ، بھیل اور کولہی نامی شیڈولڈ کاسٹ برادریوں سے تعلق رکھتے ہیں۔ ان میں ڈسٹرکٹ بار ایسوسی ایشن کے موجودہ صدر موہن لال ایڈووکیٹ بھی شامل ہیں جن کا تعلق میگھواڑ برادری سے ہے۔ رائے سنگھ سوڈھو کا دعویٰ ہے کہ موہن لال ایڈووکیٹ کو ووٹ دینے والوں میں وہ خود بھی شامل تھے۔

ان کا یہ بھی کہنا ہے کہ ان کے خلاف سندھ بار کونسل کو بھیجے گئے خط کی اصل وجہ یہ ہے کہ انہوں نے ڈسٹرکٹ بار ایسوسی ایشن کی حمایت سے 14 مئی 2022 کو جج کرم علی شاہ کے &quot;نامناسب رویے&quot; کے خلاف ایک قرارداد پیش کی تھی جس میں سندھ ہائی کورٹ کے چیف جسٹس سے ان کے خلاف تحقیقات کا مطالبہ کیا گیا تھا۔ ان کے مطابق &quot;جج صاحب نے اس قرارداد کے جواب میں کارروائی کرتے ہوئے میرے خلاف بے بنیاد الزامات عائد کیے ہیں&quot;۔&nbsp;

<h2>ذات پات کی تقسیم</h2>

سندھ بار کونسل نے ابھی تک جج کرم علی شاہ کے خط پر کوئی کارروائی نہیں کی۔ اس کے وائس چیئرمین ذوالفقار علی جلبانی کہتے ہیں کہ وکلا کے خلاف دائر کی گئی شکایات کونسل کی ایگزیکٹو کمیٹی کو بھیج دی جاتی ہیں جو فیصلہ کرتی ہے کہ ان پر کیا پیش قدمی کی جانی چاہیے۔ لیکن ان کا کہنا ہے کہ &quot;اگر اس کمیٹی نے رائے سنگھ سوڈھو کے خلاف کوئی کارروائی تجویز کی تو اس پر ضرور عمل کیا جائے گا&quot;۔&nbsp;

اس دوران جج کرم علی شاہ کا خط سوشل میڈیا پر وائرل ہو چکا ہے جس کے نتیجے میں شیڈولڈ کاسٹ برادریوں سے تعلق رکھنے والے وکلا نے رائے سنگھ سوڈھو کے مبینہ طرزِعمل پر احتجاج بھی کیا ہے۔ ان وکلا میں ڈسٹرکٹ بار ایسوسی ایشن&nbsp;تھرپارکر کے 27 سالہ رکن شنکر میگھواڑ بھی شامل تھے۔ ان کا کہنا ہے کہ رائے سنگھ سوڈھو کا شیڈولڈ کاسٹ جج کے سامنے پیش ہونے سے انکار کوئی انوکھا واقعہ نہیں۔ بلکہ، ان کے بقول، وہ آئے روز دیکھتے ہیں کہ &quot;کس طرح عدالتوں اور وکلا کی تنظیموں میں ذات پات کی بنیاد پر امتیاز برتا جاتا ہے&quot;۔ اس روزمرہ کے تجربے کی بنیاد پر وہ کہتے ہیں کہ &quot;اونچی ذات سے تعلق رکھنے والے وکلا خود کو شیڈولڈ کاسٹ وکلا اور ججوں سے برتر تصور کرتے ہیں&quot;۔&nbsp;

وسند تھری، جو ڈسٹرکٹ بار ایسوسی ایشن تھرپارکر کے سابق صدر&nbsp;اور سندھ کے سماجی مسائل پر ایک روشن خیال نکتہ نظر رکھنے والی سیاسی جماعت&nbsp;عوامی تحریک کے رہنما ہیں، کہتے ہیں کہ ذات پات کی تقسیم کے ذمہ دار وہ قدیم مذہبی تصورات ہیں جنہیں وکلا سمیت ہندو مذہب سے تعلق رکھنے والے بہت سے لوگ آج بھی درست سمجھتے ہیں۔ لیکن، ان کے مطابق، آئینِ پاکستان کی شق نمبر 25 کی رُو سے تمام شہری قانون کی نظر میں برابر ہیں۔ چنانچہ وہ حکومت سے مطالبہ کرتے ہیں کہ وہ اس بات کو یقینی بنائے کہ ذات پات کی بنیاد پر کس شہری کے ساتھ کوئی منفی امتیازی سلوک نہ ہو۔&nbsp;

<h2>وہ صبح کبھی تو آئے گی</h2>

پاکستان میں شیڈولڈ کاسٹ ہندوؤں کی کل تعداد 2017 کی مردم شماری کے مطابق آٹھ لاکھ 49 ہزار چھ سو 14 ہے (جبکہ ملک کی مجموعی ہندو آبادی 45 لاکھ کے لگ بھگ ہے)۔ ان کی بڑی تعداد تھرپارکر اور عمر کوٹ کے اضلاع میں رہتی ہے اور سماجی، معاشی اور تعلیمی اعتبار سے بہت پس ماندہ ہے۔

تاہم مہران یونیورسٹی آف انجینئرنگ اینڈ ٹیکنالوجی جامشورو میں انجینئرنگ فیکلٹی کے ڈین کے طور پر کام کرنے والے ڈاکٹر خانجی ہریجن سمجھتے ہیں کہ شیڈولڈ کاسٹ ہندوؤں کے حالات میں بہتری آ رہی ہے جس کی بنا پر انہیں یقین ہے کہ ہندو آبادی میں پائی جانے والی ذات پات کی تقسیم ہمیشہ برقرار نہیں رہے گی۔ ان کا اپنا تعلق بھی شیڈولڈ کاسٹ برادری سے ہے اور وہ کہتے ہیں کہ &quot;تعلیم نے شیڈولڈ کاسٹ ہندوؤں کو سماجی طور پر مضبوط بنا دیا ہے&quot;۔ ان کے مطابق &quot;اب ان برادریوں سے تعلق رکھنے والے بہت سے نوجوان لڑکے اور لڑکیاں ہر شعبے میں اعلیٰ کارکردگی کا مظاہرہ کر رہے ہیں جس سے نہ صرف سماجی سطح پر ان کے خلاف نفرت میں قدرے کمی آئی ہے بلکہ خود انہوں نے بھی امتیازی رویوں کا مقابلہ کرنا سیکھ لیا ہے&quot;۔&nbsp;

لیکن تھرپارکر کی تحصیل اسلام کوٹ سے تعلق رکھنے والے 68 سالہ سونو کھنگرانی کا تجربہ اس سے قطعاً مختلف ہے۔

وہ تھردیپ مائیکرو فنانس فاؤنڈیشن نامی غیرسرکاری ادارے کے سربراہ ہیں۔ غربت، ذات پات، قحط سالی اور ماحولیاتی تبدیلی کے خلاف ان کی جدوجہد کو خراجِ تحسین پیش کرتے ہوئے وفاقی حکومت نے 2010 میں انہیں صدارتی ایوارڈ بھی دیا تھا جو کسی شیڈولڈ کاسٹ ہندو کو ملنے والا اس طرح کا پہلا سرکاری اعزاز ہے۔&nbsp;

ان کے مطابق تھرپارکر اور اس کے نواحی اضلاع میں غریب اور ان پڑھ شیڈولڈ کاسٹ ہندوؤں کے خلاف منفی امتیازی سلوک روز کا معمول ہے۔ لیکن ان کا کہنا ہے کہ ان برادریوں سے تعلق رکھنے والے پڑھے لکھے، خوش حال اور اچھے عہدوں پر فائز لوگوں کو بھی ہر وقت اسی قسم کے سماجی رویوں کا سامنا کرنا پڑتا ہے۔ وہ اپنی زندگی کا ایک واقعہ بیان کرتے ہوئے کہتے ہیں کہ 1982 میں وہ سندھ زرعی یونیورسٹی ٹنڈو جام میں بطور لیکچرار کام کر رہے تھے جب ایک دن یونیورسٹی کے ڈائریکٹر فنانس نے کسی بات پر انہیں موچار (موچی کا بیٹا) کہتے ہوئے اپنے دفتر سے نکل جانے کو کہا۔ وہ کہتے ہیں کہ &quot;میں اس بات پر اتنا دلبرداشتہ ہوا کہ میں نے سرکاری نوکری کو ہی خیرباد کہہ دیا&quot;۔&nbsp;

اسی طرح جب 2008 اور 2012 کے درمیان انہیں ایک سرکاری ادارے، سندھ رورل سپورٹ آرگنائزیشن، کا چیف ایگزیکٹو بنایا گیا تو اس وقت بھی ان کے کئی ماتحت ان کی ذات کی وجہ سے ان کی بات ماننے سے انکار کر دیتے تھے۔ ان کے بقول جب وہ کسی نائب قاصد کی بازپرس کرتے تو وہ انہیں کہہ دیتا کہ &quot;تم تو موچی کے بیٹے ہو تم ہمارا کیا بگاڑ لو گے&quot;۔&nbsp;

اس تفریق کے اثرات کے بارے میں بات کرتے ہوئے ان کا کہنا ہے کہ شیڈولڈ کاسٹ برادریوں سے تعلق رکھنے والے لوگوں کا اپنی قابلیت منوانے کے لیے دوسروں سے کہیں زیادہ محنت کرنا پڑتی ہے کیونکہ &quot;انہیں اعلیٰ ذات سے تعلق رکھنے والے ہندوؤں جیسے تعلیمی اور معاشی مواقع نہیں ملتے&quot;۔ حتیٰ کہ جب ان میں سے کوئی کسی فیصلہ ساز عہدے پر بھی پہنچ جاتا ہے &quot;تو اعلیٰ ذات کے ہندو اسے دل سے قبول نہیں کرتے&quot;۔

اشفاق لغاری

اشفاق لغاری کا تعلق حیدرآباد سندھ سے ہے، وہ انسانی حقوق، پسماندہ طبقوں، ثقافت اور ماحولیات سے متعلق رپورٹنگ کرتے ہیں۔

دور تک پھیلا ہوا پانی ہی پانی ہر طرف: کیا سیلاب سے بھر جانے کے بعد منچھر جھیل کی آلودگی خود بخود ختم ہو جائے گی؟

کیا ہوا کیوں یہ سہانی بستیاں بیمار ہیں: 'ڈِگری کے سیلاب زدگان ہیضہ، بخار اور جلدی امراض کا شکار ہو رہے ہیں'۔

کسی کے جسم و جاں چھلنی کسی کے بال و پر ٹوٹے: 'مسافر پرندے ٹھٹہ میں لگی پون چکیوں سے ٹکرا کر اپنی جان سے ہاتھ دھو رہے ہیں'۔

جھمپیر میں کوئلے کی کان میں مہلک حادثہ: 'نہ تو کانوں کے مالکان کو کان کنوں کی فکر ہوتی ہے اور نہ ہی حکومت ان کے بارے میں کچھ سوچتی ہے'۔

بچ نہ سکا میں ذات سے اپنی: جنوبی سندھ کے شیڈولڈ کاسٹ ہندو سیاسی کارکنوں کو انتخابی اور جماعتی سیاست میں منفی امتیازی سلوک کا سامنا۔

یہ ہمیں تھے جن کے لباس پر سر رہ سیاہی لکھی گئی: 'اونچی ذات کے وکیل کے لیے میگھواڑ جج کو عدالت میں مائی لارڈ کہنا بہت مشکل ہے'۔

Lok Sujag