قبائلی ضلع خیبر کے امجد علی نے تین سال پہلے باڑہ میں لوہے کا کارخانہ لگایا تو انہیں بہت اچھے نتائج کی امید تھی۔ لیکن پچیس کروڑ روپے سے شروع کیا جانے والا یہ کاروبار انہیں تین سال میں ہی بند کرنا پڑ گیا اور اب وہ حکومت کے تقریباً چار کروڑ روپے کے مقروض ہیں۔

ان کے کارخانے میں پرانے لوہے (سکریپ) کو پگھلا کر اسے خام لوہے میں تبدیل کیا جاتا تھا۔ وہ اس لوہے کو سریا بنانے والے کارخانوں کو بیچتے تھے۔ اب کارخانے کو تالا لگ گیا ہے اور وہاں کام کرنے والے تقریباً ڈیڑھ سو افراد بے روزگار ہو گئے ہیں یا کہیں اور نوکریاں کر رہے ہیں۔

انہی لوگوں میں پشاور سے تعلق رکھنے والے تیس سالہ جلال خان بھی شامل ہیں جو اس کارخانے میں سکریپ کو پگھلانے کی بھٹی پر ڈیوٹی دیتے تھے۔ اس کام کی انہیں ماہانہ چالیس ہزار روپے تک اجرت ملتی تھی۔ کارخانہ بند ہوا تو انہوں نے کچھ تگ و دو کے بعد ایک جنرل سٹور پر ملازمت کر لی جہاں انہیں پانچ سو روپے دیہاڑی ملتی ہے۔

جلال خان کارخانے کی ملازمت کو یاد کرتے ہوئے کہتے ہیں کہ تب انہیں جو اجرت ملتی تھی اس سے ان کا گھر اچھا چلتا تھا۔ یہ کارخانہ ان کے گھر کے قریب بھی تھا جہاں وہ روزانہ پیدل چلے جاتے تھے۔&nbsp; ان کا کہنا ہے کہ دیہاڑی کی یہ نوکری مہنگائی کے اس دور میں ان کے روزمرہ بنیادی اخراجات بھی پورے نہیں کرتی۔

خیبرپختونخوا میں ضم ہونے والے ضلع خیبر اور دیگر قبائلی اضلاع (سابقہ فاٹا) میں پچھلے دو تین سال میں سٹیل کے 60 میں سے 35 کارخانے بند ہو گئے ہیں۔ سٹیل ملز ایسوسی ایشن ضلع خیبر کے سابق صدر حاجی اسلم آفریدی بتاتے ہیں کہ ان کارخانوں میں ہزاروں افراد ملازمت کرتے تھے جبکہ بہت سے لوگوں کا روزگار بالواسطہ ان کارخانوں سے منسلک تھا۔

سٹیل کے علاوہ دیگر صنعتوں کی بھی یہی صورتحال ہے۔ 2009 تک ضلع خیبر کے علاقے باڑہ میں ہی کپڑا تیار کرنے کے 135 چھوٹے بڑے کارخانے تھے جو اب بند پڑے ہیں۔ باڑہ پاور لومز ایسوسی ایشن کے صدر حاجی رضا خان کے مطابق ان کارخانوں میں تقریباً چار ہزار افراد کام کرتے تھے جو اب بےروزگار ہیں یا چھوٹی موٹی مزدوری کرنے پر مجبور ہیں۔

قبائلی اضلاع میں کارخانے بند ہونے کا سلسلہ پچھلے دو تین سال میں شروع ہوا جس کی بنیادی وجہ وہاں بجلی کے بلوں پر لاگو ہونے والی فیڈرل ایکسائز ڈیوٹی اور سیلز ٹیکس، انکم ٹیکس اور ودہولڈنگ ٹیکس ہیں۔

ضلع خیبر سے تعلق رکھنے والے وکیل مفرق شاہ کا کہنا ہے کہ 2018 میں 25ویں آئینی ترمیم کے بعد جب قبائلی علاقوں (فاٹا) کو خیبرپختونخوا میں ضم کیا گیا تو وہاں فوری طور پر انہی قوانین کا اطلاق ہونے لگا جو باقی ملک میں نافذ ہیں۔ حالانکہ فیصلہ یہ ہوا تھا کہ ملکی قوانین کو قبائلی اضلاع میں مرحلہ وار لاگو کیا جائے گا۔

یہ سلسلہ 2019 میں شروع ہوا جب فیڈرل بیورو آف ریونیو نے ضم شدہ اضلاع میں قائم صنعتوں پر ٹیکس لاگو کرنے کے لئے ایک نئی پالیسی کا اعلان کیا جس کے تحت مئی 2018 کے بعد قائم کئے جانے والے گھی، خوردنی تیل اور سٹیل کے کارخانوں سے بجلی کے بل میں سیلز ٹیکس اور فیڈرل ایکسائز ڈیوٹی وصول کی جانے لگی۔

ان کارخانوں کے مالک اس فیصلے کے خلاف پشاور ہائی کورٹ چلے گئے جس نے فیڈرل ایکسائز ڈیوٹی تو ختم کر دی جبکہ سیلز ٹیکس پر حتمی فیصلہ دینے تک حکم امتناع جاری کر دیا۔

فیڈرل بورڈ آف ریونیو نے ایکسائز ڈیوٹی کے حوالے سے پشاور ہائی کورٹ کے فیصلے کو سپریم کورٹ میں چیلنج کر دیا جو تاحال زیر التوا ہے۔ دوسری طرف بجلی کے بِلوں میں سیلز ٹیکس اور فیڈرل ایکسائز ڈیوٹی کی مد میں بقایا جات تواتر جمع ہوتے رہے۔ اب صورتِ حال یہ ہے باڑہ میں کپڑا بنانے کی ایک فیکٹری کے مالک ساجد علی کے ذمے دو سال کے چار کروڑ روپے واجب الادا ہیں جبکہ بعض کارخانہ دار ایسے بھی ہیں جن کے ذمے یہ رقم 30 کروڑ روپے تک پہنچ گئی ہے۔

صنعت کاروں نے احتجاج شروع کیا تو حکومت نے ان علاقوں کو 30 جون 2023 تک انکم ٹیکس، وِد ہولڈنگ ٹیکس اور سیلز ٹیکس سے استثنا دے دیا گیا۔ مفرق شاہ بتاتے ہیں کہ اس فیصلے کے تحت قبائلی اضلاع میں قائم انڈسٹری کو خام مال کی درآمد اور تیار مال پر بھی ٹیکسوں کی چھوٹ دے دی گئی۔

امجد علی کا خیال تھا کہ ٹیکسوں میں چھوٹ سے ان کا کاروبار دن دُگنی رات چُگنی ترقی کرے گا۔ لیکن بجلی کے بِلوں میں فیول پرائس ایڈجسمنٹ اور کاؤنٹر ٹیرف کی مد میں ہونے والے اضافے کی صورت میں ان پر ایک نئی افتاد آن پڑی۔ اب انہیں بجلی کا ایک یونٹ 35 روپے کے بجائے 55 روپے میں پڑنے لگا۔

کاؤنٹر ٹیرف لائن لاسسز یا بجلی چوری کی مد میں عائد جاتا ہے۔ مثال کے طور پر اگر ایک گرِڈ سٹیشن سے ایک لاکھ یونٹ بجلی استعمال ہوئی ہے اور بجلی کے بِلوں میں نوے ہزار یونٹ ظاہر ہو رہے ہیں تو بقیہ 10 ہزار یونٹ متعلقہ گرڈ سٹیشن کے تمام صارفین میں برابر تقسیم کر دیے جاتے ہیں۔ امجد پر اب بجلی کے بلوں میں فیڈرل ایکسائز ڈیوٹی اور سیلز ٹیکس کی مد میں ساڑھے چار کروڑ روپے کے واجبات ہیں۔

اسلم آفریدی کہتے ہیں کہ قبائلی اضلاع میں لائے جانے والے خام مال پر تو ٹیکس میں چھوٹ دی گئی ہے لیکن اسی خام مال سے تیار کردہ چیزیں جب ان اضلاع سے باہر بھیجی جاتی ہیں تو ان پر 16 فیصد سیلز ٹیکس اور دو فیصد انکم ٹیکس لگا دیا جاتا ہے۔

ضلع خیبر میں لوہے کے کارخانے بند ہونے کی ایک اور اہم وجہ خام مال کی عدم دستیابی ہے۔ اسلم آفریدی کے مطابق اپریل میں وفاقی حکومت نے صنعتوں کے لئے درکار خام مال کے درآمدی کوٹے میں 25 فیصد کمی کر دی جو بعد میں 50 فیصد تک بڑھا دی گئی۔ اس فیصلے سے خیبر اور مہمند میں سٹیل کے کارخانوں کی پیداواری صلاحیت متاثر ہوئی کیونکہ ان کے لیے 60 فیصد خام مال درآمد ہو کر آتا ہے۔

ملک میں زرِ مبادلہ کے ذخائر میں کمی کی وجہ سے حکومت ڈالر کی بیرون ملک منتقلی روکنے کے لئے لیٹر آف کریڈٹ (ایل سیز) نہیں کھول رہی۔ اس کے نتیجے میں کراچی بندرگاہ پر پڑے&nbsp; کنٹینروں پر لگنے والے ڈیمرج کی رقم مال کی اصل قیمت سے بڑھ چکی ہے۔ بندرگاہ پر کھڑے کنٹینر کو ایک ہفتہ میں وہاں سے نہ نکالے جانے کی صورت میں روزانہ کے حساب سےعائد ہونے والے جرمانے کو ڈیمرج چارجز کہا جاتا ہے۔

حاجی رضا خان کہتے ہیں کارخانے بند ہونے سے ناصرف لوگوں کا روزگار متاثر ہوا بلکہ اس سے ان علاقوں میں عسکریت پسندی کی روک تھام کے عمل پر بھی منفی اثر پڑے گا۔

وہ بتاتے ہیں کہ &#39;&#39;پچھلے چند سال میں سکیورٹی اداروں کے ہاتھوں گرفتار ہونے والے تقریباً 400 طالبان کو انہی کارخانوں میں ہنر سکھایا گیا جن کی 95 فیصد تعداد اب اپنی سابقہ سرگرمیاں ترک کر کے ماہانہ چالیس ہزار روپے تک کما رہی ہے۔ روزگار کے ذرائع بند ہونے سے ایسے لوگوں کو پرامن زندگی کی جانب واپس لانے کا عمل متاثر ہو سکتا ہے۔&nbsp;

سنگِ مرمر کی صنعت کا احتجاج: 'بجلی کے بلوں میں اضافے سے فیکٹریاں چلانا منافع بخش نہیں رہا'۔

قبائلی اضلاع میں بند ہوتے کارخانے: ہزاروں محنت کشوں کا روزگار خطرے میں پڑ گیا

text

سنہ 2010 میں نو سال کی عمر میں احمد خان کے جسم میں سوجن اور منہ اور ناک سے خون آنا شروع ہوا تو ان کے گھر والے گھبرا گئے۔

وہ انہیں پشاور میں ایک نِجی کلینک لے گئے جہاں لیبارٹری ٹیسٹوں کے بعد یہ بات سامنے آئی کہ اُن کو گردوں کا عارضہ لاحق ہے۔ اگلے دس سال احمد کے گھر والے ان کا علاج کرواتے رہے لیکن دو سال قبل ان کے گردے مکمل طور پر ناکارہ ہو گئے۔ اب انہیں ہفتہ میں دو مرتبہ ڈائیلسس (گُردوں کی صفائی) کے تکلیف دہ عمل سے گزرنا پڑتا ہے۔

اسی سلسلہ میں امسال نومبر کے وسط میں احمد پشاور میں گردوں کے علاج کے ایک سرکاری ہسپتال میں ڈائلیسس کروا رہے ہیں۔ ان کے بیڈ کے قریب ہی رکھی مضبوط پلاسٹک کی کرسی پر اُن کے 50 سالہ پریشان حال والد اس عمل کے مکمل ہونے کا انتظار کر رہے ہیں۔ ان کی 55 سالہ والدہ انہیں اپنا ایک گردہ عطیہ کرنا چاہتی ہیں لیکن خیبر پختونخوا میں گردوں کے امراض کے علاج کا واحد سرکاری ہسپتال انسٹی ٹیوٹ آف کِڈنی ڈیزیز میں پچھلے دو سال میں نہ ہونے کے برابر آپریشن ہوئے ہیں۔

انسٹی ٹیوٹ آف کِڈنی ڈیزیز میں ٹرانسپلانٹ کوارڈینیٹر ڈاکٹر فضل منان کہتے ہیں کہ 2007ء میں قائم ہونے والے اس ادارہ میں اگلے ہی سال گردے کے پیوند کاری کے آپریشن ہونا شروع ہو گئے اور &rsquo;&rsquo;فروری 2020ء تک تین سو سے زائد پیوند کاری کے آپریشن ہوئے جن میں کامیابی کے شرح 92 فیصد ہے۔&lsquo;&lsquo;

ان کا دعویٰ ہے کہ انسٹی ٹیوٹ آف کِڈنی ڈیزیز میں گردے کے پیوند کاری بند نہیں کی گئی &rsquo;&rsquo;بلکہ دو سال کے عرصہ میں اس پورے نظام کو عالمی معیار کے مطابق لانے کی کوشش کی گئی۔&lsquo;&lsquo; اس سلسلہ میں، ان کے مطابق، پانچ کروڑ روپے عمارت پر لگائے گئے جبکہ چار کروڑ روپے کی لاگت سے لیبارٹری کے لئے جدید سامان خریدا گیا۔

لیکن دوسری طرف ایک عام تاثر ہے کہ دو سال قبل گُردوں کی پیوند کاری کے ماہر اور انسٹی ٹیوٹ آف کِڈنی ڈیزیز کے سربراہ ڈاکٹر آصف ملک کی ریٹائرمنٹ کے بعد ان کا متبادل نہ ہونے کی وجہ سے ہسپتال انتظامیہ کو کِڈنی ٹرانسپلانٹ کے آپریشن بند کرنا پڑے۔

ڈاکٹر منان اس بات سے اتفاق نہیں کرتے۔

ڈاکٹر آصف ملک، ان کے مطابق، اکتوبر 2020 میں ریٹائر ہوئے تھے جبکہ اس سے آٹھ ماہ پہلے فروری 2020ء میں کورونا وبا کی وجہ سے پیوند کاری کے عمل کو عارضی طور پر روک دیا گیا تھا۔ وہ یہ دعویٰ بھی کرتے ہیں کہ انسٹی ٹیوٹ آف کِڈنی ڈیزیز میں پیوند کاری کے ماہر عملے کی ایک مکمل ٹیم موجود ہے۔

اُنہوں نے کہا کہ انسٹی ٹیوٹ آف کِڈنی ڈیزیز میں گردوں کے پیوند کاری کے چار سرجن، تین نفرالوجسٹ، تین یورالوجسٹ، ایک آئی سی یو کے ماہر، ایک نشہ دینے کے ماہر سمیت آٹھ بندوں کے ٹیم موجود ہے &rsquo;&rsquo;جبکہ نجی ہسپتالوں میں چار بندوں کے ٹیم ہوتی ہے۔&lsquo;&lsquo;

لیکن وہ یہ بات بھی تسلیم کرتے ہیں کہ آپریشن کے عمل اور ٹیم کے نگرانی کے لئے ایک ماہر سرجن کی ضرورت ہے جو انہیں دستیاب نہیں ہے۔ یہی وجہ ہے کہ انسٹی ٹیوٹ آف کِڈنی ڈیزیز کو اس سال مارچ میں گُردوں کی پیوند کاری کے حوالہ سے عالمی شہرت یافتہ ڈاکٹر سعید اختر کے ساتھ ایک معاہدہ کرنا پڑا۔ ڈاکٹر سعید اختر نے اپنی نگرانی میں گُردوں کی پیوند کاری کے 25 آپریشن کروانے کی حامی بھری۔ اس طرح اس سال جون سے دوبارہ آپریشن شروع کر دیئے گئے۔

ڈاکٹر منان کو امید ہے کہ &rsquo;&rsquo;ڈاکٹر سعید کے تجربہ اور رہنمائی سے استفادہ کرتے ہوئے انسٹی ٹیوٹ آف کِڈنی ڈیزیز کا عملہ جلد ہی خود آپریشن کرنے کے قابل ہو جائے گا۔&lsquo;&lsquo;

ڈاکٹر سعید اختر کے نگرانی میں پہلا آپریشن جون میں جبکہ دوسرا آپریشن اگست میں ہوا جبکہ مزید چار مریضوں کے آپریشن کی تیاری مکمل ہے۔ تاہم میڈیکل ٹرانسپلانٹ ریگولیٹری اتھارٹی کی ٹیم نے ستمبر میں انسٹی ٹیوٹ آف کِڈنی ڈیزیز کے دورے کے دوران اسے گُردے کی پیوند کاری کے آپریشن کے لئے غیر موزوں قراد دیا۔ میڈیکل ٹرانسپلانٹ ریگولیٹری اتھارٹی کا کہنا ہے کہ اس ہسپتال میں گُردوں کی پیوند کاری کے لئے درکار سٹاف تو موجود ہے &rsquo;&rsquo;لیکن آپریشن کے دوران اس ٹیم کی رہنمائی اور مکمل تربیت کے لئے ماہر ڈاکٹر نہیں ہے۔&lsquo;&lsquo;

ڈاکٹر منان کہتے ہیں کہ انسٹی ٹیوٹ آف کِڈنی ڈیزیز ایک نجی ہسپتال میں گردوں کے پیوند کاری کے عمل کے نگران ڈاکٹر شاہد علی کے ساتھ بھی ایک معاہدہ کرنے جا رہا ہے جس کے تحت وہ یہاں پر ہونے والے آپریشن کی نگرانی کریں گے۔ اس وقت ڈاکٹر شاہد خیبر پختونخوا کے اُن دو سرجنز میں سے ایک ہیں جو گُردوں کی پیوند کاری کے سپیشلائزڈ (ماہر) سرجن ہیں۔

<h2>متبادل مہنگا علاج</h2>

تیس سالہ ساجد خان قبائلی ضلع خیبر کی تحصیل باڑہ کے علاقے عالم گُودر کے رہنے والے ہیں۔ وہ پشاور میں حیات آباد انڈسٹر یل سٹیٹ میں اسلحہ سازی کے ایک کارخانہ میں کام کرتے ہیں۔ گذشتہ سال کے وسط میں ان کے دونوں گُردوں نے کام چھوڑ دیا تو انہیں پشاور میں ایک نجی ہسپتال، رحمان میڈیکل انسٹی ٹیوٹ، لایا گیا۔

اُن کی 22 سالہ بہن انہیں اپنا ایک گُردہ عطیہ کرنے کے لئے تیار ہوئیں تو ایک اور مسئلہ آڑے آ گیا۔ صوبہ خیبر پختونخوا میں حکومت کی جانب سے جاری کردہ صحت انصاف کارڈ کے تحت گردے کی مفت پیوند کاری کی جا سکتی ہے۔ لیکن مئی 2018ء میں صوبے میں ضم کیے گئے وفاق کے زیرِ انتظام قبائلی علاقہ جات (جنہیں بعد میں قبائلی اضلاع کا نام دیا گیا) کے باشندوں کو تاحال یہ سہولت میسر نہیں ہے۔ یہی وجہ ہے کہ ساجد نے اس سال 25 جنوری کو ایک نجی ہسپتال کو 18 لاکھ روپے ادا کر کے گردے کی پیوند کاری کروائی۔

لیکن اتنا مہنگا علاج ہر مریض کے بس میں نہیں۔

انسٹی ٹیوٹ آف کِڈنی ڈیزیز گردوں میں نہ صرف صوبے بھر بلکہ ہمسایہ ملک افغانستان سے روازنہ 12 سو مریض علاج کے لئے آتے ہیں۔ گُردوں کے صفائی کے لئے 25 مشینیں کام کر رہی ہیں جو 24 گھنٹے میں 125 مریضوں کا ڈائیلسس کر سکتی ہیں۔

ڈاکٹر منان نے سُجاگ کو بتایا کہ صرف انسٹی ٹیوٹ آف کِڈنی ڈیزیز میں ہفتے میں تقریباً چار سو مریضوں کے ڈائلیسس ہوتے ہیں جن کا مستقل علاج پیوند کاری کے ذریعہ ہی ممکن ہے۔ اسی طرح پشاور سمیت صوبہ کے مختلف اضلاع میں قائم بڑے ہسپتالوں میں ڈائلیسس ہوتے ہیں &rsquo;&rsquo;جس سے صوبہ بھر میں ایسے مریضوں کی تعداد کا اندازہ لگایا جا سکتا ہے۔&lsquo;&lsquo;

ہوئی صورت نہ کچھ اپنی شفا کی: خیبرپختونخوا کے قبائلی اضلاع کے رہائشی افراد صحت سہولت پروگرام کی متعدد سہولتوں سے محروم۔

گُردوں کی پیوند کاری کے ماہر سرجن کی عدم دستیابی: خیبر پختونخوا کے واحد سرکاری ہسپتال میں آپریشن بند

اگست میں آنے والے سیلاب کے بعد خیبر پختونخوا کے ضلع چارسدہ میں شمس الرحمان کی زرعی اراضی کو پانی کی فراہمی بند ہے۔ ان کی دو ایکڑ زمین پر گنے کا فصل تیار ہے لیکن بارشوں کی کمی اور پھر سیلاب سے نہری نظام کو ہونے والے نقصان کے باعث وہ اپنی زمین کو مطلوبہ مقدار میں پانی نہیں دے پائے۔ ان کا کہنا ہے کہ اس مرتبہ ان کے گنے میں رس کم ہو گا جس سے ان کی آمدنی بھی کم ہو جائے گی۔&nbsp;

تیس سالہ شمس الرحمان کا تعلق چارسدہ کی تحصیل شبقدر کے گاؤں مٹہ مغل خیل سے ہے۔ یہ گاؤں ضلع چارسدہ، مردان اور نوشہرہ کو پانی مہیا کرنے والے منڈہ ہیڈ ورکس سے تقریباً چھ کلومیٹر کے فاصلے پر واقع ہے۔ شبقدر میں کاشت ہونے والے گنے سے بنایا جانے والا گُڑ صوبہ بھر میں اپنے اعلی معیار کے لئے شہرت رکھتا ہے۔ تاہم اس سال پانی کی کمی کے باعث گنے کی ناقص پیداوار کا اثر گڑ کی صنعت پر بھی پڑے گا۔ شمس کا کہنا ہے کہ عام طور پر انہیں گنے کی فروخت سے سالانہ چھ لاکھ روپے تک آمدنی ہوتی ہے لیکن اس سال انہیں اس کا نصف حاصل ہونے کی بھی امید نہیں۔

اس سال 26 اگست کو آنے والے سیلاب میں دریائے سوات پر بنائے گئے منڈہ ہیڈ ورکس کو بھی نقصان پہنچا ہے جس سے چارسدہ، مردان اور نوشہرہ میں زرعی زمینوں کو پانی کی فراہمی بند ہو گئی ہے۔ محکمہ آبپاشی کے ایگزیکٹو انجینئر حافظ یاسر کے مطابق اس ہیڈ ورکس میں دو لاکھ 25 ہزار کیوسک پانی کا دباؤ برادشت کرنے کی صلاحیت تھی تاہم رواں سال سیلاب میں تین لاکھ کیوسک پانی آیا ہے۔ اس دوران منڈہ سے چند کلومیٹر مغرب کے جانب زیر تعمیر مہمند ڈیم سے بڑی مقدار میں تعمیراتی مواد بھی سیلاب میں بہہ کر ہیڈ ورکس میں آ گیا جس سے پانی کے بہاؤ میں رکاوٹ پیدا ہوئی اور نہروں میں پانی کی سپلائی معطل ہو گئی۔

منڈہ ڈیم سے لوئر سوات کینال اور دوآبہ کینال نامی دو بڑی نہریں نکلتی ہیں۔ 1900کیوسک پانی فراہم کرنے والی لوئر سوات کینال ضلع مردان کی بیشتر زرعی زمینوں کو سیراب کرتی ہے جبکہ چارسدہ اور نوشہرہ کے کچھ حصوں کو بھی یہیں سے پانی فراہم کیا جاتا ہے۔ دوآبہ کینال سے ضلع چارسدہ کی تحصیل شبقدر کی زرعی زمینوں کو 350 کیوسک پانی فراہم کیا جاتا ہے۔ منڈہ ہیڈ ورکس سے تینوں اضلاع میں مجموعی طور پر ایک لاکھ ستر ہزار ایکٹر زمین سیراب ہوتی ہے۔

منڈہ ہیڈ ورکس پر بڑا سیلابی ریلا 26 اگست کو آیا تھا جس نے اس کے آٹھ میں سے تین پینل (دروازے) تباہ کر دیے جس سے پانی کی ترسیل معطل ہو گئی۔ سیلاب کے بعد ہیڈ ورکس سے نکلنے والی دو آبہ کینال میں 11 فٹ بلند ریت اور مٹی کی تہہ جمع ہو گئی جس نے پانی کا بہاؤ روک دیا۔ حافظ یاسر کے مطابق نہر کو صاف کرنے اور اس کے بند مضبوط بنانے پر دس کروڑ روپے لاگت آئے گی۔&nbsp;

شمس کا کہنا ہے کہ ہیڈ ورکس کے قریب بڑی مشینری سے نہر کی بحالی کا کام تو جاری ہے تاہم اُن کے بقول یہاں سے آگے نظر گڑھی، کتوزئی، برہ گڑھی، اسلام آباد اور مٹہ میں نہر کو بھی نقصان پہنچا ہے جسے بحال کرنے کی ضرورت ہے۔

<h2>&#39;کھیت سوکھ رہے ہیں&#39;</h2>

شبقدر کے گاؤں سردار گڑھی کے رہائشی 70 سالہ میاں رحمت الدین اپنے گاؤں میں کریانے کی دکان چلاتے ہیں۔ تاہم اُن کی آمدنی کا بڑا ذریعہ ان کی تین ایکڑ زرعی زمین ہے جس پر وہ گنا اگاتے ہیں۔ سیلاب کے دوران دوآبہ نہر میں ملبہ آنے سے رحمت کی فصلوں کو بھی پانی کی فراہمی معطل ہے۔

ان کا کہنا ہے کہ سیلابی پانی ان کے کھیتوں میں دو سے تین فٹ اونچی ریت کی تہہ بچھا گیا ہے۔ وہ موجودہ فصل کی کٹائی کے بعد کھیتوں سے ریت صاف کرنے کا ارادہ رکھتے ہیں جس پر فی ایکڑ دو لاکھ روپے سے زیادہ رقم خرچ ہو گی ۔ اگر وہ ایسا نہیں کرتے تو اس زمین پر کئی سال تک کوئی فصل کاشت نہیں کی جا سکے گی۔

شبقدر سے ہی تعلق رکھنے والی 70 سالہ زینت بی بی نے اپنے کھیت میں سبزیاں اگا رکھی ہیں جو پانی نہ ملنے کے باعث سوکھ گئی ہیں۔ وہ یاد کرتی ہیں کہ 2010 میں آنے والے سیلاب کے بعد ان کی زمین چھ سال تک بنجر رہی تھی جس کے بعد انہوں نے اپنے دو بیٹوں کو ملازمت کے لیے دبئی بھجوایا اور ان کی دو سال کی کمائی سے 2016 میں اپنی زمین کو دوبارہ قابل کاشت بنایا۔ ان کا کہنا ہے کہ اس سیلاب نے انہیں ایک مرتبہ پھر اسی مشکل میں ڈال دیا ہے جس کا وہ کئی سال تک سامنا کرتی رہی ہیں۔

چارسدہ کے محکمہ زراعت (توسیع) کے ضلعی افسر علی خان بتاتے ہیں کہ حالیہ سیلاب سے چارسدہ میں نو ہزار 545 ایکڑ زمین پر فصلیں اور باغات تباہ ہوئے جس سے تقریباً 84 کروڑ روپے کا نقصان ہوا۔ ان کا کہنا ہے کہ گنے کی فصل تیار ہے تاہم اس مرتبہ پانی کی کمی کے باعث پیداوار کم ہو سکتی ہے۔&nbsp;

چارسدہ کے علاقے وینو گڑھی سے تعلق رکھنے والے 40 سالہ کاشت کار ظفر علی خان کا کہنا ہے کہ ہر سال زرعی زمینوں کو سیراب کرنے کے لئے نومبر اور دسمبر میں پانی کی ضرورت بڑھ جاتی ہے اور اگر ان مہینوں میں فصل کو پوری مقدار میں پانی نہ ملے تو پیدوار کافی حد تک متاثر ہو سکتی ہے۔

منڈہ ہیڈ ورکس کو نقصان پہنچنے سے نہ صرف آب پاشی کے نظام کو نقصان پہنچا ہے بلکہ شبقدر سے چارسدہ اور مہمند تک آمدورفت بھی متاثر ہوئی ہے۔ سیلاب میں پل تباہ ہو جانے کے باعث مقامی آبادی کو &nbsp;اب کشتی کے ذریعے دریا پار کرنا پڑتا ہے۔&nbsp;

حافظ یاسر کا کہنا ہے کہ منڈہ ہیڈ ورکس کو عارضی طور پر بحال کرنے کے لئے چار کروڑ روپے درکار ہیں جبکہ مستقل بحالی کے حوالے سے درکار فنڈز کا تخمینہ لگایا جا رہا ہے۔ ہیڈ ورکس کی عارضی بحالی کے بعد دونوں نہروں سے ضرورت کے مطابق زرعی مقاصد کے لئے پانی مہیا کیا جا سکے گا۔ تاہم انہوں نے واضح کیا ہے کہ پل پر لوگوں کی آمدورفت کا سلسلہ ہیڈ ورکس کی مستقل بحالی کے بغیر ممکن نہیں۔&nbsp;

حافظ یاسر کا دعویٰ ہے چارسدہ، نوشہرہ اور پشاور میں زرعی زمینوں اور آبادی کو سیلاب سے بچانے کے لئے 105 کلومیٹر طویل حفاظتی دیوار کی تعمیر جون 2024 تک مکمل ہو جائے گی جس کے بعد ان علاقوں کو دوبارہ کسی ایسی آفت کی صورت میں حالیہ شدت کی مشکلات کا سامنا نہیں ہو گا۔

سیلاب سے متاثرہ منڈہ ہیڈ ورکس بحال نہ ہو سکا: چارسدہ، نوشہرہ اور مردان میں زرعی زمینیں بنجر ہونے لگیں۔

عثمان علی کی کروڑوں روپے مالیت کی ٹراؤٹ مچھلی اِس سال 25 اگست کو آنے والے سیلاب میں بہہ گئی ہے۔

وہ پچھلے کئی سالوں سے اس کاروبار سے منسلک ہیں اور خیبرپختونخوا کے ضلع سوات کے صدر مقام مینگورہ سے 50 کلومیٹر شمال میں واقع تفریحی مقام مدین میں پانچ مچھلی فارم اور ٹراؤٹ کی نسل کَشی کا ایک پلانٹ (hatchery) چلاتے ہیں۔ ان کا کہنا ہے کہ وہ سیلاب میں تقریباً 60 ہزار کلو گرام بڑی مچھلیاں اور دو لاکھ 30 ہزار پُونگ مچھلیاں کھو بیٹھے ہیں۔

خیبرپختونخوا کے محکمہ ماہی پروری کے مینگورہ میں متعین اسسٹنٹ ڈائریکٹر ابرار احمد کہتے ہیں کہ چھ ہفتے پہلے&nbsp; آئے سیلاب نے 50 سالہ عثمان علی کی طرح کے ٹراؤٹ پالنے والے درجنوں کاروباری افراد کو شدید مالی نقصان پہنچایا ہے۔ ان کے محکمے کو ملنے والی اطلاعات سے ظاہر ہوتا ہے کہ سوات کی پانچوں تحصیلوں میں مجموعی طور پر ایک سو 51 نجی اور سرکاری ٹراؤٹ فارم مکمل طور پر تباہ ہو گئے ہیں جبکہ 71 مزید فارم جزوی طور پر سیلاب سے متاثر ہوئے ہیں۔ ان کے مطابق اس تباہی کے نتیجے میں لاکھوں کلوگرام &quot;ٹراؤٹ یا تو مر گئی ہے یا برساتی نالوں میں بہہ گئی ہے&quot;۔

تاہم ان کا کہنا ہے کہ ابھی اس نقصان کی مالیت کا حتمی اندازہ لگانا ممکن نہیں کیونکہ &quot;سیلاب کی وجہ سے درہم برہم ہو جانے والے مواصلاتی نظام کی بحالی کے بعد ہی صحیح طرح پتہ چل سکے گا&quot; کہ سوات میں کس جگہ ٹراؤٹ کے کتنے فارم سیلاب کا شکار ہوئے ہیں۔

بڑے پیمانے پر ٹراؤٹ کی تباہی سیاحت پر بھی منفی اثر ڈال سکتی ہے۔ سوات ہوٹل ایسوسی ایشن کے صدر حاجی زاہد خان اس حوالے سے شدید تشویش کا شکا رہیں اور&nbsp; کہتے ہیں کہ ان کے ضلعے میں سیاحت خاص طور پر ٹراؤٹ سے جڑی ہوئی ہے &quot;کیونکہ یہاں آنے والے تمام سیاح یہ مچھلی کھانے کا تجربہ کرنا چاہتے ہیں&quot;۔ لیکن چونکہ ایک ٹراؤٹ مچھلی کی افزائش دو سال میں مکمل ہوتی ہے اس لیے اگلے سال مارچ میں شروع ہونے والے سیاحت کے موسم میں اکثر سیاح یہ تجربہ نہیں کر پائیں گے &quot;جس سے ان کی سوات میں آمد میں کمی واقع ہو سکتی ہے&quot;۔&nbsp;&nbsp;

<h2>سیلابی تباہ کاریاں</h2>

ٹراؤٹ سرد پانیوں اور سرد ماحول میں پنپنے والی مچھلی ہے۔ سوات سمیت خیببر پختونخوا کے آٹھ شمالی اضلاع اس کی افزائش کے لیے انتہائی موزوں سمجھے جاتے ہیں کیونکہ وہاں کا درجہ حرارت پاکستان کے بیشتر علاقوں کی نسبت کافی کم ہوتا ہے۔ 
اسی لیے ان اضلاع میں ٹراؤٹ کے کئی سو فارم بنائے گئے ہیں اگرچہ خیبرپختونخوا کے محکمہ ماہی پروری کے پاس ان میں سے محض تین سو 74 کا ریکارڈ موجود ہے۔ اس محکمے کے پراجیکٹ ڈائریکٹرزبیر احمد کا کہنا ہے کہ ان میں سے ایک سو 81 فارم ایسے ہیں جو نجی اور سرکاری شعبے کی شراکت سے بنائے اور چلائے جا رہے ہیں۔ ان کے مطابق سیلاب کی وجہ سے &quot;ان میں سے 56 فارم پورے کے پورے تباہ ہو گئے ہیں جبکہ 23 کو جزوی نقصان پہنچا ہے&quot;۔&nbsp;

ٹراؤٹ کو معدوم ہونے سے بچانے کے لیے ان کے محکمے نے 10 سال پہلے مدین میں ایک برساتی نالے کے کنارے ایک تحقیقاتی مرکز، مچھلیوں کی نسل کَشی کا ایک پلانٹ اور ایک مچھلی فارم بھی قائم کیے تھے لیکن یہ سب کے سب اب سیلاب میں بہہ گئے ہیں۔ ضلع سوات ہی کی تحصیل مٹہ میں بنایا گیا ٹراؤٹ کی نسل کَشی کا ایک دوسرا سرکاری پلانٹ بھی ایک سیلابی ریلے نے تباہ کر دیا ہے۔

مینگورہ سے 40 کلومیٹر شمال میں واقع بحرین نامی قصبے کے رہنے والے 40 سالہ امین اللہ کا کہنا ہے کہ اس تباہی کے اثرات دور کرنے کے کے لیے لمبا عرصہ اور بھاری سرکاری سرمایہ کاری درکار ہوں گے۔ سیلاب سے پہلے وہ خود دو ٹراؤٹ فارم چلاتے تھے جن میں موجود 20 ہزار کلوگرام مچھلی سیلابی پانی کی نذر ہو گئی ہے۔

اپنے ذاتی تجربے کی بنیاد پر وہ کہتے ہیں کہ &quot; ٹراؤٹ کو پالنے اور بڑا کرنے میں بہت سا وقت، محنت اور پیسہ صرف ہوتا ہے&quot; جو سیلاب کے مارے مقامی کاروباری افراد خود سے دوبارہ باہم نہیں پہنچا سکتے۔ اس لیے، ان کے مطابق، تباہ شدہ سرکاری تحقیقاتی مراکز اور ٹراؤٹ کی افزائش کے لیے قائم کی گئی حکومتی سہولیات کی بحالی کے بغیر سوات اور اس کے نواحی اضلاع میں اس مچھلی کے کاروبار کا &quot;دوبارہ اپنے پاؤں پر کھڑا ہونا ممکن نہیں&quot;۔

بجلی ہے نہ پانی، مچھلی ہے نہ کاروبار : ہم نے یہ مانا گوادر میں رہیں کھائیں گے کیا؟

انہی کے محکمے کے ڈپٹی ڈائریکٹر فواد خلیل کہتے ہیں کہ صرف سوات میں ہی نہیں بلکہ شمالی خیبرپختونخوا کے متعدد اضلاع میں ٹراؤٹ مچھلی کی افزائش کے لیے بنائے گئے بیشتر فارم اس سال مون سون میں آنے والے مختلف سیلابی ریلوں میں بہہ گئے ہیں۔ ان کے خیال میں اس تباہی کے نتیجے میں اس کاروبار سے منسلک لوگوں کو ہونے والے نقصان کی مجموعی مالیت &quot;ڈھائی ارب روپے سے زیادہ&quot; ہے۔

تاہم ٹراؤٹ کو منڈیوں اور ریستورانوں تک پہنچانے&nbsp; والے ڈرائیوروں، تاجروں اور ریستورانوں کے مالکوں اور ملازموں کے روزگار کو اس کی عدم موجودگی کی وجہ سے پہنچنے والے نقصان کی لاگت اس تخمینے میں شامل نہیں۔ نہ ہی اس میں ان مزدوروں کی چلی جانے والی نوکریوں کو گنا گیا ہے جو ٹرا ؤٹ کی دیکھ بھال کا کام کرتے تھے۔

مدین میں ایک ٹراؤٹ فارم پر کام کرنے والے واجد علی کہتے ہیں کہ تباہ شدہ مچھلی فارم ان کی طرح کے ہزاروں مزدوروں کو ملازمت&nbsp; فراہم کرتے تھے۔ ان کے مطابق ان میں سے بیشتر کے پاس اب روزگار کا کوئی ذریعہ موجود نہیں۔ 
وہ خود ایک تباہ شدہ فارم کی مرمت اور صفائی کا کام کررہے ہیں اور کہتے ہیں کہ &quot;سیلاب نے بہت سے لوگوں کا معاش اس بری طرح متاثر کیا ہے کہ اس کی جلد بحالی کا کوئی امکان دکھائی نہیں دیتا&quot;۔

مچھلی ہانپ رہی ہے سانسیں لینے کو: سوات میں سیلاب سے تباہ شدہ ماہی پروری کے شعبے کی 'جلد بحالی کا کوئی امکان نہیں'۔

حسن ہر روز صبح سویرے جاگتے ہی اپنے موبائل فون پر روس اور یوکرین کی جنگ کے بارے میں خبریں ڈھونڈنے لگتے ہیں۔ وہ چاہتے ہیں کہ یہ تنازعہ جلد از جلد ختم ہو تاکہ وہ اپنی ادھوری تعلیم مکمل کر سکیں۔&nbsp;

ان کے والد، جو سعودی عرب میں ملازمت کرتے ہیں، ہمیشہ چاہتے تھے کہ ان کا بیٹا ڈاکٹر بنے۔ اس لیے خیبرپختونخوا کے ضلع مالاکنڈ کی تحصیل درگئی کے رہنے والے 22 سالہ حسن نے جیسے ہی انٹرمیڈیٹ کا امتحان پاس کیا تو انہیں طب کی تعلیم حاصل کرنے کے لیے یوکرائن بھیج دیا گیا۔ لیکن وہاں کے شہر خارکیف میں تعلیم حاصل کرتے ابھی انہیں تین ماہ اور بیس دن ہی گزرے تھے کہ 24 فروری 2022 کو روس نے یوکرائن پر حملہ کر دیا جس سے وہاں کے تعلیمی ادارے بند ہو گئے۔&nbsp;

ان کا کہنا ہے کہ جنگ کے آغاز سے چند روز پہلے ہی یوکرائن میں پاکستان کے سفارت خانے نے پاکستانی طلبا کو مشورہ دے دیا تھا کہ وہ جلد از جلد وہاں سے نکل جائیں۔ اس مشورے پر عمل درآمد کرتے ہوئے وہ خارکیف سے نکلے اور چار سو کلومیٹر کا فاصلہ طے کر کے ایک ایسی جگہ چلے گئے جو جنگ سے محفوظ تھی۔ ان کے مطابق وہاں دو سو اور پاکستانی بھی موجود تھے۔

اس جگہ سے یہ لوگ سفارت خانے کی فراہم کردہ بسوں میں بٹیھ کر قریبی ملک پولینڈ پہنچ گئے۔ وہ کہتے ہیں کہ پولینڈ میں تعینات پاکستانی سفارتی عملے نے انہیں ایک ایسے کیمپ میں ٹھہرایا جہاں چار سو طلبہ سمیت چھ سو دیگر پاکستانی پہلے ہی قیام پذیر تھے۔&nbsp;

اسلام آباد میں مقیم دفتر خارجہ کے ایک اہل کار اپنا نام ظاہر نہ کرنے کی شرط پر یوکرائن سے پاکستانیوں کے انخلا کی تفصیلات بیان کرتے ہوئے کہتے ہیں کہ جنگ شروع ہونے سے پہلے وہاں تین ہزار طلبا سمیت سات ہزار پاکستانی رہتے تھے جنہیں بحفاظت پولینڈ، رومانیہ اور ہنگری جیسے ملکوں میں پہنچا دیا گیا ہے۔ ان کے مطابق ان میں سے تقریباً دو ہزار افراد کو اب تک پاکستان بھی لایا جا چکا ہے.

حسن بھی کئی دوسرے لوگوں کے ہمراہ ہوائی جہاز کے ذریعے پاکستان واپس پہنچے ہیں۔ لیکن یہاں آ کر وہ مسلسل پریشان رہتے ہیں کہ وہ اپنی پڑھائی کا کیا کریں۔&nbsp;

اگرچہ یوکرائن میں ان کی یونیورسٹی نے گزشتہ دو ماہ سے آن لائن پڑھائی شروع کر دی ہے لیکن وہ سمجھتے ہیں کہ اس طریقے سے طب کی تعلیم حاصل کرنا ممکن نہیں ہے۔ وہ کہتے ہیں کہ &quot;محض آن لائن لیکچر سننے سے طبی مہارت حاصل نہیں کی جاسکتی بلکہ اس کے لیے استاد سے سوال کرنا اور عملی طبی تربیت حاصل کرنا بھی بہت ضروری ہے&quot;۔&nbsp;

تاہم اگر جنگ بند بھی ہو جائے تو ان کے پاس یوکرائن واپس جانے کے لیے مالی وسائل موجود نہیں۔ وہ کہتے ہیں کہ ان کے والد نے ان کی پڑھائی کے لیے درکار 35 لاکھ روپے اکٹھے کرنے کے لیے نہ صرف اپنی تمام جمع پونجی استعمال کر ڈالی تھی بلکہ کچھ رقم اپنے دوستوں سے ادھار بھی لی تھی۔ لیکن حسن نہ تو اب یونیورسٹی میں جمع شدہ فیس واپس لے سکتے ہیں اور نہ ہی انہیں یہ امید ہے کہ انہیں کبھی وہ رقم واپس مل سکے گی جو انہوں نے خار کیف میں رہائش کے لیے پیشگی ادا کر رکھی ہے۔&nbsp;

منصور احمد کو بھی اسی طرح کے مسائل درپیش ہیں۔ وہ خیبرپختونخوا کے ضلع سوات سے تعلق رکھتے ہیں اور جنگ کے باعث اپنی تعلیم ادھوری چھوڑ کر یوکرائن سے پاکستان واپس آ گئے ہیں۔ ان کا دعویٰ ہے کہ پولینڈ میں تعینات پاکستانی سفارتی عملے نے انہیں یقین دہانی کرائی تھی کہ جونہی جنگ ختم ہو گی تو حکومت پاکستان انہیں یوکرائن واپس جانے میں مدد دے گی۔ ان کے بقول انہیں یہ بھی کہا گیا کہ &quot;اگر جنگ نے طول پکڑا تو پاکستان میں ہی ان کی پڑھائی کا بندوبست کر دیا جائے گا&quot;۔

لیکن اب وہ &quot;اپنے مستقبل کے بارے میں &nbsp;شدید غیریقینی کا شکار ہیں&quot; کیونکہ، ان کے بقول، پاکستانی حکومت ان کے مسائل حل کرنے کے لیے کچھ بھی نہیں کر رہی۔ ان کا کہنا ہے کہ ان کے گھر والوں نے اپنی آبائی زمین بیچ کر ان کی تعلیم کے لیے 25 لاکھ روپے کا انتظام کیا تھا اس لیے اب ان کے پاس ایسے کوئی مالی وسائل موجود نہیں جنہیں استعمال کر کے وہ خود ہی مزید تعلیم حاصل کر سکیں۔ نتیجتاً وہ مطالبہ کرتے ہیں کہ حکومت ان جیسے طلبا کی مالی مشکلات کو پیشِ نظر رکھتے ہوئے انہیں پاکستانی تعلیمی اداروں میں داخلے دے اور ان کے تعلیمی اخراجات بھی خود برداشت کرے۔

تاہم جو پاکستانی طالب علم ابھی تک پولینڈ، ہنگری اور رومانیہ میں مقیم ہیں ان میں سے بیشتر کا مطالبہ ہے کہ حکومتِ پاکستان نہ صرف ان کی باقی تعلیم کا خرچ خود اٹھائے بلکہ انہیں انہی ملکوں کے تعلیمی اداروں میں داخلے بھی لے کر دے جہاں وہ ٹھہرے ہوئے ہیں۔&nbsp;

<h2>امتحان پر امتحان</h2>

طبی تعلیم کی نگرانی کرنے والا مرکزی سرکاری ادارہ پاکستان میڈیکل کمیشن بیرون ملک ڈاکٹر بننے والے پاکستانی طلبا کو اجازت دیتا ہے کہ مخصوص حالات میں وہ اپنی پڑھائی اپنے ہی ملک میں جاری رکھ سکیں۔ اس مقصد کے لیے کمیشن کے زیراہتمام ہر تین ماہ بعد نیشنل ایکوئی ویلنس بورڈ کا امتحان منعقد کیا جاتا ہے جسے پاس کرنے والے طلبا مقامی میڈیکل کالجوں میں داخلہ لے سکتے ہیں۔

لیکن بونیر سے تعلق رکھنے والے 25 سالہ امین رحمان کہتے ہیں کہ یوکرائن سے واپس آنے والے ان کی طرح کے طلبا کو یہ سہولت نہیں دی جا رہی۔ وہ پچھلے چار ماہ میں کئی مرتبہ پاکستان میڈیکل کمیشن سے رابطہ کر چکے ہیں لیکن، ان کے مطابق، ہر مرتبہ انہیں انتظار کرنے کا کہا جاتا ہے۔ ان کا یہ بھی دعویٰ ہے کہ انڈیا، بنگلہ دیش، متحدہ عرب امارات اور برِاعظم افریقہ کے متعدد ممالک میں اُن کے ہم جماعت طلبا کو مقامی اداروں میں ہی اپنی پڑھائی مکمل کرنے کی سہولت دی گئی ہے اور اس کے لیے ان سے کوئی اضافی فیس بھی نہیں لی جا رہی۔

حزب اختلاف سے تعلق رکھنے والی جماعت پاکستان تحریک انصاف کے سینیٹر محمد ہمایوں مہمند نے 5 جولائی 2022 کو یہ معاملہ سینیٹ کی قائمہ کمیٹی برائے نیشنل ہیلتھ سروسز، ریگولیشنز اینڈ کوآرڈینیشن کے اجلاس میں بھی اٹھایا۔ ان کا کہنا تھا کہ پاکستان میڈیکل کمیشن کے قواعدوضوابط کے مطابق بیرون ملک سے آئے ہوئے طالب علموں کو پاکستان میں پہنچنے کے دو سال بعد میڈیکل کالجوں کا داخلہ ٹیسٹ دینے کی اجازت ہوتی ہے۔ لیکن چونکہ یوکرائن سے آنے والے طلبا کا معاملہ خاص ہے اس لیے &quot;انہیں یا تو اس سال ستمبر میں ہی یہ داخلہ ٹیسٹ دینے کی اجازت دی جائے یا انہیں اسی سال دسمبر میں نیشنل ایکوئی ویلنس بورڈ کا امتحان دے کر مقامی میڈیکل کالجوں میں پڑھنے کا موقع دیا جائے&quot;۔

کمیٹی نے ان کی تجاویز سے اتفاق کرتے ہوئے فیصلہ کیا کہ پاکستان میڈیکل کمیشن کو بھی ان سے آگاہ کیا جائے گا۔ (تاہم کمیشن کے ایک اعلی عہدیدار، جن کے کہنے پر ان کا نام ظاہر نہیں کیا جا رہا، کہتے ہیں کہ انہیں اس فیصلے کے حوالے سے کمیٹی کی طرف سے تا حال کوئی مراسلہ موصول نہیں ہوا۔)&nbsp;

دوسری طرف خیبر پختونخوا کے وسطی شہر مردان سے تعلق رکھنے والے طالب علم شعبان انجم سمجھتے ہیں کہ ان امتحانات کو پاس کرنے کی شرط کا بھی خاتمہ کیا جانا چاہیے۔ وہ یوکرائن کے دارالحکومت کیف میں میڈیکل کے دوسرے سال میں پڑھ رہے تھے جب جنگ شروع ہونے کی وجہ سے انہیں پولینڈ جانا پڑا۔ وہ تاحال وہیں مقیم ہیں اور کہتے ہیں کہ ان جیسے &quot;طلبا اتنے ذہنی تناؤ کا شکار ہیں کہ ان کے لیے پاکستان واپس آکر کسی قسم کا امتحان دینا ممکن ہی نہیں&quot;۔ اس لیے وہ مطالبہ کرتے ہیں کہ انہیں &quot;غیرمشروط طور پر پاکستانی میڈیکل کالجوں میں داخلہ دیا جائے&quot;۔

موسمیاتی تبدیلیوں کی شدت اور روس-یوکرین جنگ کی حدت: 'پاکستان کو گندم کی درآمد پر پہلے سے زیادہ خرچہ کرنا پڑے گا'۔

یوکرائن پر روسی حملے سے متاثر ہونے والے پاکستانی طلبا کا مطالبہ: 'ہمیں غیرمشروط طور پر پاکستانی میڈیکل کالجوں میں مفت تعلیم دی جائے'۔

محمد بلال نے پچھلے سال غیرقانونی طریقے سے یورپ جانے کی کوشش کی لیکن دو لاکھ روپے سے زیادہ رقم خرچ کرنے اور 50 روز ذلیل و خوار ہونے کے بعد وہ اس میں ناکام رہے اور اب تسلیم کرتے ہیں کہ ان کا یہ اقدام صحیح نہیں تھا کیونکہ اس میں ان کی جان بھی جا سکتی تھی۔&nbsp;

وہ اپنے دو بڑے بھائیوں اور والدہ کے ہمراہ پشاور کے علاقے سرکی میں دو مرلے کے مکان میں رہتے ہیں۔ جب 2013 میں انہوں نے آٹھویں جماعت پاس کی تو ان کے خاندان کے پاس اتنے پیسے نہیں تھے کہ وہ مزید تعلیم حاصل کر پاتے۔ چنانچہ پڑھائی چھوڑ کر وہ اپنی خاندانی دکان پر موٹرسائیکلوں کی تزئین و آرائش کے کام میں اپنے بڑے بھائیوں کا ہاتھ بٹانے لگے۔

چونکہ اس کاروبار میں آمدن بہت محدود ہے اس لیے پچھلے سال انہوں نے اپنے کچھ دوستوں سے مل کر چوری چھپے یورپ جانے کا منصوبہ بنایا۔ ان کا خیال تھا کہ وہاں جا کر انہیں اچھی نوکری مل جائے گی جس سے ان کے خاندان کے دن پھر جائیں گے۔ تاہم ان کی والدہ کہتی ہیں کہ &quot;میں نے اسے بارہا منع کیا کہ وہ اس طریقے سے بیرون ملک جانے کی کوشش نہ کرے لیکن اس نے میری بات نہ مانی&quot;۔&nbsp;

اس مخالفت کے باوجود محمد بلال نے اپنے بڑے بھائی کو آمادہ کر لیا کہ وہ اس مقصد کے لیے دو لاکھ روپے کا انتظام کریں کیونکہ ایک ایجنٹ یہ رقم لے کر انہیں ترکی پہنچانے پر تیار تھا۔ ان میں سے 50 ہزار روپے انہیں ایران پہنچنے پر دینا تھے جبکہ ڈیڑھ لاکھ روپے ترکی پہنچنے پر ادا کرنا تھے۔&nbsp;

یہ انتظامات مکمل کرنے کے بعد وہ 25 جولائی 2021 کو اپنے کچھ دوستوں کے ہمراہ پشاور سے روانہ ہوئے۔ ان کی پہلی منزل کوئٹہ تھی جہاں سے ایجنٹ کے مقامی نمائندے انہیں ایک بس میں بٹھا کر ایک صحرائی علاقے میں لے گئے۔ وہاں پاکستان کے مختلف علاقوں سے آئے ہوئے 40 افراد اور چند افغان شہری پہلے سے ہی موجود تھے۔ ایجنٹ کے نمائندوں نے انہیں تین گروہوں میں تقسیم کر کے بسوں اور ٹرکوں میں ڈالا اور بلوچستان کے مغربی قصبے تافتان کے پاس واقع پاک-ایران سرحد کی جانب روانہ کر دیا۔&nbsp;

انہیں وہاں پہنچنے میں کئی روز لگ گئے کیونکہ مختلف سکیورٹی ایجنسیوں کی حفاظتی چوکیوں سے بچنے کے لیے وہ کچے پکے صحرائی راستوں پر سفر کر رہے تھے۔ تافتان پہنچ کر انہوں نے ایک ویران علاقے میں واقع دشوار گزار پہاڑی راستے سے پیدل سرحد عبور کی اور ایران میں داخل ہو گئے۔

محمد بلال کہتے ہیں کہ ایران میں ان کے پہلے پڑاؤ پر عورتوں اور بچوں سمیت تقریباً دو ہزار افراد رکے ہوئے تھے کیونکہ دو روز پہلے سرحد پار کرنے والے ایک گروہ پر ایران کی بارڈر سکیورٹی فورس نے فائرنگ کر دی تھی جس سے آٹھ افراد ہلاک اور 20 سے زیادہ زخمی ہو گئے تھے۔&nbsp;

دو راتیں وہاں گزارنے کے بعد انہوں نے اپنا سفر دوبارہ شروع کیا اور ساڑھے تین گھنٹے کی مسافت پیدل طے کرنے کے بعد ایک صحرائی علاقے میں پہنچے جہاں انہیں ایجنٹ کے نئے نمائندوں کے سپرد کر دیا گیا۔ محمد بلال کہتے ہیں کہ وہ اور ان کے ساتھی اس جگہ سے ڈیڑھ ہزار روپے فی فرد کرایہ دے کر موٹرسائیکلوں کے ذریعے اگلی منزل پر پہنچے جہاں 70 افراد کو دو ٹرکوں میں بٹھا کر مزید آگے روانہ کر دیا گیا۔&nbsp;

ان کے مطابق اونچے نیچے راستوں پر کیا جانے والا یہ سفر اتنا تکلیف دہ تھا کہ اس کے دوران ہچکولے لگنے اور گر جانے سے ان کے ہاتھ کی انگلی شدید زخمی ہو گئی جبکہ ان کے ایک دوست کے پاؤں کی ہڈی ٹوٹ گئی۔ ان مشکل حالات میں سفر کرتے ہوئے وہ ایک قصبے میں پہنچے جہاں ان میں سے 16 افراد کو ایک ہی کار میں ٹھونس دیا گیا۔ چونکہ محمد بلال دبلے پتلے سے ہیں اس لیے انہیں دو دیگر افراد کے ساتھ ڈِکی میں لٹایا گیا جس میں ہوا کی آمدورفت کے لیے ایک چھوٹا سا سوراخ بنایا گیا تھا۔

وہ کہتے ہیں کہ تقریباً 20 گھنٹے اس طرح سفر کرنے کے بعد وہ ایران شار نامی جگہ پہنچے جہاں سے انہوں نے اپنے گھر والوں کو فون کر کے اپنی خیریت کی اطلاع دی۔ اس مقام سے آگے جانے کے لیے انہیں ایک بس کے خفیہ خانے میں بند کر دیا گیا جس میں تقریباً 20 گھنٹے سفر کرنے کے بعد وہ ایران کے شہر شیراز پہنچے۔ ان کے مطابق اس سفر کے دوران انہیں اور ان کے ساتھیوں کو سانس لینے میں مسلسل دشواری پیش آتی رہی جس کی وجہ سے ان کے ساتھ بند چھ افراد بے ہوش ہو گئے اور باقیوں کی حالت بھی بہت خراب ہوگئی۔

ان کی اگلی منزل تہران تھی جہاں انہیں ایک کار میں جانا تھا۔ محمد بلال کہتے ہیں کہ اس دفعہ ڈِکی میں سفر کرنے سے بچنے کے لیے انہوں نے کار کے ڈرائیور کو کچھ رقم دی اور اگلی سیٹ پر جگہ حاصل کر لی۔ تقریباً 10 گھنٹے بعد جب وہ تہران کے قریب پہنچے تو انہیں بتایا گیا کہ اس میں داخل ہونے کے لیے انہیں کچرا اٹھانے والے ٹرکوں میں سفر کرنا ہو گا۔ تاہم انہوں نے اپنے دوستوں کے ساتھ مل کر پانچ لاکھ ایرانی تومان (تقریباً 27 سو روپے) میں ایک اور گاڑی کا انتظام کیا اور تہران پہنچ گئے۔&nbsp;

وہ کہتے ہیں کہ تہران سے ترکی کی سرحد کا سفر انہوں نے دوبارہ ایک کار کی ڈکی میں کیا۔ لیکن جب 15 اگست 2021 کو وہ سرحد پر پہنچے تو انہیں پتہ چلا کہ طالبان کے کابل پر قبضے اور افغانستان سے بڑی تعداد میں لوگوں کی ممکنہ ہجرت کے خدشے کے پیش نظر ترکی نے اپنی سرحد مکمل طور پر بند کر رکھی ہے چنانچہ اسے عبور کرنا انتہائی خطرناک ہو سکتا ہے۔ یہ صورتِ حال دیکھ کر محمد بلال اور ان کے دوستوں کی ہمت جواب دے گئی۔ چنانچہ انہوں نے ترکی جانے کا ارادہ ترک کر دیا اور تہران واپس آ گئے۔ (اس کے باوجود پشاور میں ان کے بھائی کو ڈیڑھ لاکھ روپے ایجنٹ کو دینا پڑے کیونکہ، اس کے بقول، وہ ان کے ترکی جانے کے انتظامات کر چکا تھا۔)&nbsp;

تہران میں انہوں نے خود کو افغان شہری ظاہر کرتے ہوئے ایرانی حکام کے حوالے کر دیا جنہوں نے انہیں غیرقانونی تارکین وطن کے لیے بنائے گئے ایک کیمپ میں بند کر دیا۔ کچھ روز بعد اس کیمپ سے تقریباً 12 سو لوگوں کو بسوں میں بٹھا کر افغانستان کے مغربی شہر ہرات کے قریب طالبان حکام کے حوالے کر دیا گیا۔ محمد بلال بھی ان میں شامل تھے۔&nbsp;

افغانستان پہنچ کر وہ ہرات سے اپنی مدد آپ کے تحت کابل روانہ ہوئے کیونکہ وہاں ان کی بہن بیاہی ہوئی ہیں۔ بہن کے گھر پہنچنے کے بعد انہوں نے پاکستانی سفارت خانے سے رابطہ کیا جہاں موجود اہل کاروں نے ان کا قومی شناختی کارڈ دیکھ کر انہیں پاکستان جانے کی اجازت دے دی۔&nbsp;

پشاور واپس آنے کے بعد وہ دوبارہ اپنے بھائیوں کے ساتھ مل کر اپنی دکان پر کام کرنے لگے ہیں اور کہتے ہیں کہ وہ آئندہ کبھی غیرقانونی طریقے سے پاکستان سے باہر جانے کا سوچیں گے بھی نہیں۔

<h2>اک آگ کا دریا ہے اور ڈوب کے جانا ہے</h2>

محمد بلال کی طرح ہر سال ہزاروں پاکستانی چھپ چھپا کر ایران کے راستے ترکی جانے کی کوشش کرتے ہیں تاکہ وہاں سے کسی نہ کسی طرح یورپ پہنچ سکیں۔ اس سفر کے دوران درجنوں افراد جغرافیائی رکاوٹوں اور موسم کی سختیوں کی تاب نہ لاتے ہوئے ہلاک ہو جاتے ہیں جبکہ بہت سے دیگر لوگ ایران اور ترکی کی سرحدوں پر وہاں کی سکیورٹی فورسز کی گولیوں کا نشانہ بن جاتے ہیں۔ جو لوگ کسی نہ کسی طرح یورپ میں داخل ہو جاتے ہیں انہیں وہاں قانونی قیام کی اجازت نہیں ملتی اور وہ ہزاروں کی تعداد میں یا تو یونان اور بلغاریہ جیسے ملکوں میں قائم کیے گئے حراستی کیمپوں میں زندگی گزارنے پر مجبور ہوتے ہیں یا غیرقانونی طور پر اپنے دوستوں، رشتہ داروں اور جاننے والوں کے ہاں ٹھہرے ہوتے ہیں۔

صرف یونان میں 60 ہزار سے زیادہ ایسے غیرقانونی پاکستانی تارکینِ وطن موجود ہیں۔ یہ انکشاف اِس سال سات فروری کو پاکستان کے دورے پر آئے ہوئے یونان کے ایک سرکاری وفد نے اُس وقت کے سمندر پار پاکستانیوں کے امور کے وزیر ایوب آفریدی کے ساتھ ایک ملاقات میں کیا تھا۔ اِس وفد کے ارکان کا کہنا تھا کہ ان پاکستانیوں کی اکثریت ایران اور ترکی کے راستے ان کے ملک میں پہنچی تھی۔&nbsp;

پشاور میں متعین وفاقی تحقیقاتی ادارے (ایف آئی اے) کے انسدادِ انسانی سمگلنگ سیل کے ڈپٹی ڈائریکٹر محمد آفتاب بٹ کا کہنا ہے کہ ایسے لوگوں کو بیرون ملک بھجوانے والے ایجنٹ انہیں راستے میں پیش آنے والی مشکلات کے بارے میں سچ نہیں بتاتے۔ اس لیے، ان کے مطابق، ان میں سے زیادہ تر کو علم ہی نہیں ہوتا کہ انہیں یورپ جانے کے لیے کس قسم کی دشواریوں کا سامنا کرنا پڑے گا۔&nbsp;

ان کا کہنا ہے کہ ایف آئی اے اس انسانی سمگلنگ کو دو طرح سے روکنے کی کوشش کرتی ہے۔ &quot;ایک تو ہم مختلف ذرائع سے ملنے والی شکایات پر کارروائی کرتے ہیں اور دوسرا یہ کہ ہم اپنے طور پر بھی ایسے لوگوں کو پکڑنے کی کوشش کرتے ہیں جو لوگوں سے پیسے لے کر انہیں غیرقانونی طریقے سے باہر بھجوانے میں ملوث ہوتے ہیں&quot;۔

ان کے مطابق 2021 میں ان کے ادارے کو اس حوالے سے مجموعی طور پر تین سو 78 شکایات موصول ہوئیں جن میں سے تین سو 28 پر تحقیقاتی کارروائی کی جا چکی ہے۔ ان کا یہ بھی کہنا ہے کہ 2021 میں خیبر پختونخوا میں انسانی سمگلنگ میں ملوث چار سو لوگوں کے خلاف مقدمات درج ہوئے جن کے نتیجے میں تین سو 69 افراد کو گرفتار کیا گیا اور تین سو 55 کو عدالتوں کی طرف سے سزائیں دی گئیں۔&nbsp;

لیکن یہ سرکاری اقدامات واضح طور پر انسانی سمگلنگ کی روک تھام میں ناکام ثابت ہو رہے ہیں۔ اس معاملے پر پاکستانی اور یورپی حکام کے ساتھ مل کر کام کرنے والے ایک غیرسرکاری ادارے سوسائٹی فار ہیومن رائٹس اینڈ پرزنرز ایڈ (شارپ) کے چیف ایگزیکٹو مدثر جاوید کے مطابق اس ناکامی کی وجہ انسانی سمگلروں کا باہمی ربط اور اثرورسوخ ہے۔ وہ کہتے ہیں کہ غیر قانونی طریقے سے پاکستانیوں کو دوسرے ملکوں میں پہنچانے والے ایجنٹ &quot;ایک مافیا کی شکل میں کام کرتے ہیں اس لیے پاکستان، ایران، ترکی، یونان اور دیگر ممالک میں ان کا ایک مربوط نیٹ ورک موجود ہوتا ہے&quot;۔ اس نیٹ ورک کے ذریعے ملنے والی اطلاعات کی وجہ سے &quot;اول تو یہ لوگ کبھی پکڑے ہی نہیں جاتے اور اگر کوئی سرکاری ادارہ ان پر ہاتھ ڈال ہی دے تو وہ اپنے تعلقات اور پیسے کے بل بوتے پر کڑی سزاؤں سے بچ نکلتے ہیں&quot;۔

جنہیں راستے میں خبر ہوئی کہ یہ راستہ کوئی اور ہے: انسانی سمگلر 'بیرون ملک جانے والے لوگوں کو راستے کی مشکلات کے بارے میں سچ نہیں بتاتے'۔

سیناب اللہ کو ڈاکٹروں نے مشورہ دیا ہے کہ وہ اپنا خراب گردہ جلد از جلد تبدیل کرائیں ورنہ ان کی زندگی کو خطرہ ہو سکتا ہے۔ لیکن وہ کہتے ہیں کہ کسی نجی ہسپتال سے یہ تبدیلی کرانے پر 18 لاکھ روپے خرچ آتا ہے جس کا انتظام کرنا ان کے لیے نا ممکن ہے جبکہ علاج معالجے کا سرکاری پروگرام انہیں یہ سہولت فراہم کرنے کو بالکل تیار نہیں۔

ان کی عمر محض 30 سال ہے اور وہ چار سال سے گردوں کے عارضے میں مبتلا ہیں۔ ان کے خاندان میں ان کی بیوی اور تین بچوں کے علاوہ ان کی 50 سالہ والدہ اور دو چھوٹے بھائی بھی شامل ہیں جن میں سے ایک فالج زدہ ہے۔ چونکہ ان کے والد پانچ سال پہلے فوت ہو چکے ہیں اس لیے اس تمام کنبے کی کفالت کی ذمہ داری ان کے بھائی حکمت اللہ کے سر&nbsp; ہے جو سوات کے علاقے میں محنت مزدوری کر کے 25 ہزار روپے ماہانہ کماتے ہیں۔ ان کے مطابق اس محدود آمدن سے گردے کی تبدیلی تو ایک طرف گھر کا خرچہ چلانا بھی مشکل ہے۔

سیناب اللہ کا تعلق خیبرپختونخوا کے قبائلی ضلع خیبر کی تحصیل برقمبر خیل سے ہے۔ لیکن اپنے گردوں کی صفائی (ڈائلیسس) کرانے کے لیے انہیں ہفتے میں دو مرتبہ&nbsp; پشاور کے ایک ہسپتال میں جانا پڑتا ہے۔ اس لیے آج کل وہ اسی شہر کے نواحی علاقے پشتَخرہ میں اپنے ماموں کے گھر میں مقیم ہیں۔

اگرچہ وہ خیبرپختونخوا میں جاری مفت علاج کے سرکاری منصوبے، صحت سہولت پروگرام، سے فائدہ اٹھانے کے اہل ہیں اور اسی کے تحت کوئی رقم ادا کیے بغیر اپنے گردوں کی صفائی کراتے ہیں لیکن اس کے ذریعے انہیں اپنا گردہ تبدیل کرانے کی اجازت نہیں۔ ان کے مطابق اس کی بنیادی وجہ یہ ہے کہ ان کے آبائی ضلعے سمیت پاک-افغان سرحد پر واقع سات قبائلی اضلاع کے لوگوں کو صحت سہولت پروگرام کے تحت متعدد ایسی سہولتیں دستیاب نہیں جو صوبے کے باقی ضلعوں کے لوگوں کو فراہم کی جا رہی ہیں۔

خیبر کے باسیوں کا کہنا ہے کہ اس پروگرام کے تحت وہ گردے اور جگر کی پیوند کاری اور ہڈیوں کے گودے کی تبدیلی جیسے متعدد ضروری علاج نہیں کرا سکتے۔ اسی طرح ان سات ضلعوں سے تعلق رکھنے والے ہر خاندان کو ایک سال میں سات لاکھ 20 ہزار روپے مالیت کا مفت علاج کرانے کی اجازت ہے جبکہ دیگر اضلاع سے تعلق رکھنے والے خاندانوں کے لیے یہ سالانہ حد 10 لاکھ روپے ہے۔ دورانِ علاج یہ حد پار کرنے کی صورت میں وہ فوری طور پر حکومت سے اگلے سال کے لیے مختص کی گئی رقم میں سے چار لاکھ روپے بطور ایڈوانس بھی لے سکتے ہیں جبکہ یہ سہولت بھی خیبر اور دوسرے قبائلی اضلاع کے لوگوں کو دستیاب نہیں۔

مزید برآں ان ساتوں اضلاع کے رہنے والے لوگوں کو صحت انصاف پروگرام کے تحت مفت علاج کرانے کے لیے صوبائی محکمہ صحت سے ایک خاص کارڈ بنوانا پڑتا ہے جس کے لیے انہیں سرکاری دفتروں کے کئی چکر لگانا پڑتے ہیں۔ لیکن باقی اضلاع کے لوگ محض اپنا قومی شناختی کارڈ استعمال کر کے اس پروگرام سے فائدہ اٹھا سکتے ہیں۔

<h2>وفاق بمقابلہ صوبہ</h2>

جون 2018 سے پہلے قبائلی اضلاع میں رہنے والے لوگوں کو طبی سہولتیں فراہم کرنے کی ذمہ داری وفاقی حکومت کے پاس تھی کیونکہ اس وقت ان کے آئینی، سیاسی، قانونی اور انتظامی معاملات وفاق کے زیرِ انتظام قبائلی علاقوں کے طور پر چلائے جاتے تھے۔ جب اُس سال 31 مئی کو ایک آئینی ترمیم کے ذریعے انہیں خیبرپختونخوا کا حصہ بنایا گیا تو ان میں طبی سہولتوں کی فراہمی پھر بھی وفاقی حکومت کی ہی ذمہ داری رہی تاآنکہ 21 فروری 2022 کو اس وقت کے وزیر اعظم عمران خان نے ان میں جاری صحت کے وفاقی پروگرام کے عملے، اثاثوں اور واجبات کو خیبرپختونخوا کی حکومت کے حوالے کرنے کی منظوری دے دی۔

اس منظوری کے بعد اِس سال 30 مارچ کو خیبرپختونخوا کے وزیر صحت و خزانہ تیمور سلیم جھگڑا نے اعلان کیا کہ ان اضلاع کے لوگوں کو بھی وہ تمام طبی سہولتیں مہیا کی جائیں گی جو 2015 سے صوبے میں جاری صحت سہولت پروگرام کے تحت اس کے باقی اضلاع میں دی جا رہی ہیں۔ یہ اعلان سن کر سیناب اللہ اور ان کے اہلِ خانہ بہت خوش آئے کیونکہ انہیں لگا کہ اب جلد ہی ان کا گردہ مفت تبدیل ہو جائے گا۔ اسی توقع کی بنا پر انہوں نے اپنی سرجری کے لیے ضروری تمام طبی ٹیسٹ کرا لیے اور ان کی والدہ انہیں اپنا گردہ دینے کو بھی تیار ہو گئیں۔

اسی دوران ان کے بھائی تقریباً ہرروز پشاور میں واقع صحت سہولت پروگرام کے دفتر جا کر یہ معلوم کرنے کی کوشش کرنے لگے کہ قبائلی اضلاع کے لوگوں کو گردے کی مفت تبدیلی کی سہولت کب ملے گی۔ لیکن خیبرپختونخوا میں یہ سہولت فراہم کرنے والے واحد ہسپتال، رحمان میڈیکل انسٹی ٹیوٹ، کے عملے کا کہنا ہے کہ تیمور سلیم جھگڑا کے اعلان کے پانچ ماہ بعد بھی&nbsp; اسے صوبائی حکومت کی طرف سے قبائلی اضلاع کے رہنے والے مریضوں کے گردے مفت تبدیل کرنے کے بارے میں کوئی ہدایات موصول نہیں ہوئیں۔

ہر چارہ گر کو چارہ گری سے گریز تھا: خیبر پختونخوا میں صحت سہولت کارڈ مریضوں کے لیے کیسے تکلیف کا باعث بن گیا۔

خیبرپختونخوا کے محکمہ صحت کا کہنا ہے کہ اس معاملے میں تاخیر کی ذمہ دار وفاقی حکومت ہے۔ صوبائی حکام کے مطابق انہیں وفاقی حکومت کی طرف سے یقین دہانی کرائی گئی تھی کہ قبائلی اضلاع میں صحت سہولت پروگرام کی تمام سہولتوں کی فراہمی کے لیے درکار اضافی رقم وفاق کے مالی وسائل میں سے فراہم کی جائے گی۔ لیکن وہ کہتے ہیں کہ اِس سال 9 اپریل کو وفاق میں پاکستان تحریک انصاف کی جگہ پاکستان مسلم لیگ نواز کے برسرِاقتدار آنے کے بعد اِس رقم کی فراہمی روک دی گئی ہے۔

اس صورتِ حال کے بارے میں صحت انصاف پروگرام کے صوبائی انچارج ڈاکٹر ریاض تنولی کا کہنا ہے کہ وفاقی حکومت نے ان اضلاع میں لوگوں کے علاج معالجے کی تمام ذمہ داریاں تو صوبے کو منتقل کردی ہیں لیکن وہ اس مقصد کے لیے درکار رقم فراہم کرنے کو تیار نہیں۔ ان کے مطابق &quot;اس رقم کے بغیر صوبائی حکومت کے لیے ممکن نہیں کہ وہ قبائلی اضلاع میں بھی وہی طبی سہولتیں فراہم کرے جو صوبے کے دوسرے اضلاع میں دی جاتی ہیں&quot;۔

محمد حسین نامی 30 سالہ زمین دار کا ٹیوب ویل آٹھ ماہ پہلے اچانک خشک ہو گیا۔ انہوں نے 10 سال پہلے یہ ٹیوب ویل تین سو 20 فٹ گہرا بور کر کے لگایا تھا تاکہ اپنی زرعی زمین کو سیراب کر سکیں۔&nbsp;

حال ہی میں انہوں نے چھ لاکھ روپے خرچ کر کے چار سو 20 فٹ گہرائی سے پانی کھینچنے والا نیا ٹیوب ویل لگوایا ہے۔ اس کے باوجود ان کا کہنا ہے کہ انہیں مطلوبہ مقدار میں پانی نہیں مل رہا۔&nbsp;

وہ خیبرپختونخوا کے شمال مغربی ضلع خیبر کی تحصیل باڑہ میں رہتے ہیں۔ اسی تحصیل کے گاؤں اکاخیل میں رہنے والے 30 سالہ کاشت کار محمد یاسین کہتے ہیں کہ 10 سال پہلے مقامی لوگوں نے اپنی مدد آپ کے تحت لاکھوں روپے جمع کر کے ایک ٹیوب ویل لگایا تھا جس کے لیے زمین میں تین سو فٹ گہرا بور کیا گیا تھا لیکن جب اسے چالو کیا گیا تو اس میں سے صرف دس منٹ پانی نکلا۔ تب سے یہ ٹیوب ویل مسلسل خشک ہے۔ &nbsp;

اکا خیل پشاور سے 15 کلومیٹر مغرب میں واقع ہے۔ یہاں آفریدی قبیلے کی مختلف شاخوں سے تعلق رکھنے والے لوگ آباد ہیں۔ ان کا کہنا ہے کہ کچھ عرصے پہلے ان کا گاؤں اپنے اردگرد کے علاقوں کی نسبت کافی زرخیز تھا کیونکہ اس کا زیرِ زمین پانی بآسانی باہر نکالا جا سکتا تھا لیکن، محمد یاسین کے بقول، &quot;اب پانی کی کمی کے باعث اس کی زرخیزی بالکل ماند پڑ گئی ہے&quot;۔

نتیجتاً اکا خیل میں صرف بہار کے دنوں میں سبزہ دکھائی دیتا ہے۔ وہ بھی موسم میں حدت آتے ہی جھلس جاتا ہے۔ گاؤں میں کھیتی باڑی بھی نہ ہونے کے برابر رہ گئی ہے جبکہ، فضلِ ربی نامی مقامی کاشت کار کے مطابق، کچھ ہفتے پہلے یہاں پینے کا پانی بھی آسانی سے دستیاب نہیں تھا۔&nbsp;

اس مسئلے کو حل کرنے کے لیے مارچ 2022 میں حکومت نے یہاں اپنے خرچے پر ایک ٹیوب ویل لگایا ہے جس کے لیے چار سو 80 فٹ گہرا بور کیا گیا ہے۔ اس کی تنصیب سے مقامی لوگ خوش ہیں کیونکہ اب انہیں روزمرہ کی ضروریات کے لیے دور دراز علاقوں سے پانی بھر کر نہیں لانا پڑتا۔

<h2>خشک سالی کے خدشات</h2>

زیرِزمین پانی کی سطح میں کمی کی شکایات صرف باڑہ تک محدود نہیں بلکہ خیبرپختونخوا کے 35 میں سے 28 اضلاع اس مسئلے سے دوچار ہیں۔ 27 اگست 2021 کو وفاقی وزارتِ پانی و آبی ذخائر نے سینیٹ میں پیش کی جانے والی ایک رپورٹ میں اس امر کی تصدیق کرتے ہوئے کہا تھا &nbsp;کہ صوبے کے کچھ ضلعوں میں زیرِ زمین پانی کی سطح پچھلے 10 سال سے اتنی تیزی سے گر رہی ہے کہ آئندہ چند سالوں میں انہیں شدید خشک سالی کا سامنا کرنا پڑ سکتا ہے۔

اس رپورٹ کے مطابق گزشتہ ایک دہائی میں ضلع خیبر میں زیرِزمین پانی کی سطح 74 فٹ گِر گئی ہے جبکہ اسی عرصے میں ضلع ہری پور میں اس میں 61.50 فٹ کمی آئی ہے۔ اسی طرح مہمند، باجوڑ اور کرم کے اضلاع میں اس کی سطح میں 57.42 فٹ، 32.79 فٹ اور 25.75 فٹ تنزلی دیکھنے میں آئی ہے۔ صوبائی محکمہ پبلک ہیلتھ کا کہنا ہے کہ زیرِزمین پانی میں کمی کے نتیجے میں صوبے کے مختلف حصوں میں نصب تقریباً پانچ سو ٹیوب ویل خشک ہو چکے ہیں۔&nbsp;

ٹیوب ویلوں اور کنوؤں کی تعمیر کے لیے زیرِزمین پانی کی جانچ کا کام کرنے والے سلیم خان ان اعددوشمار کی توثیق کرتے ہیں۔ وہ کہتے ہیں کہ کئی سال پہلے انہوں نے جن لوگوں کو ٹیوب ویل لگانے میں مدد دی تھی ان میں سے بیشتر شکایت کرنے لگے ہیں کہ ان کے ٹیوب ویل اب زمین سے پانی کھینچ نہیں پاتے۔

پانی کے معیار اور مقدار کے حوالے سے تحقیق اور منصوبہ بندی کرنے والے قومی ادارے پاکستان کونسل برائے تحقیقِ آبی وسائل کے سربراہ ڈاکٹر منیب خٹک بھی سلیم خان سے متفق ہیں۔ ان کا کہنا ہے کہ 2010 کے بعد خیبرپختونخوا کے کچھ علاقوں میں زیرزمین پانی کی سطح ہر سال 13 فٹ سے 16 فٹ نیچے جا رہی ہے۔ ان کے مطابق اس کی ایک وجہ یہ ہے کہ ٹیوب ویلوں اور کنوؤں کے ذریعے زمین سے بڑی مقدار میں پانی نکالا جا رہا ہے اور دوسری وجہ یہ ہے کہ موسمیاتی تبدیلیوں کے باعث حالیہ سالوں میں بارشیں کم ہو گئی ہیں جس کے باعث زیرِزمین پانی کے ذخائر دوبارہ نہیں بھر رہے۔&nbsp;

ان کا یہ بھی کہنا ہے کہ زرعی زمینوں کو روایتی طریقے سے سیراب کرنے سے پانی کی بڑی مقدار ضائع ہو جاتی ہے لیکن اس کے باوجود حکومت مزید ٹیوب ویلوں کی تنصیب اور کنوؤں کی کھدائی کو روکنے کے لیے کوئی قانون نہیں بنا رہی۔ اس طرح، ان کے مطابق، کارخانوں، رہائشی علاقوں، تجارتی سرگرمیوں اور گاڑیاں دھونے والے سروس سٹیشنوں میں بے شمار پانی ضائع ہو رہا ہے جسے دوبارہ استعمال میں لانے کے لیے کوئی منصوبہ بندی نہیں کی جا رہی۔&nbsp;

اگرچہ خیبرپختونخوا اسمبلی نے انہی مسائل کے حل کے لیے جولائی 2020 میں واٹر ریسورس ریگولیٹری اتھارٹی قائم کرنے کا قانون بنایا تھا لیکن اس کے نتیجے میں قائم ہونے والی اتھارٹی کا ابھی تک صرف ایک اجلاس ہی ہو سکا ہے۔&nbsp;

<h2>سیاسی وعدے، کاغذی منصوبے</h2>

پاکستان کونسل برائے تحقیقِ آبی وسائل نے 21-2020 میں اسلام آباد کے چند علاقوں میں بارشوں کے پانی کو ضائع ہونے سے بچانے کے لیے کچھ چھوٹے ڈیم تعمیر کیے جن کی وجہ سے وہاں زیرِزمین پانی کی سطح تقریباً ساڑھے چھ فٹ بلند ہو گئی۔ اب یہ کونسل خیبر پختونخوا کے دو جنوبی اضلاع کوہاٹ اور ہنگو میں بھی اقوام متحدہ کے ادارے یونیسکو کی مدد سے ایسے ہی ڈیموں کی تعمیر کر رہی ہے۔ اسی طرح باڑہ میں مستورہ کے مقام پر اور ضلع خیبر کی دوسری تحصیل جمرود میں جبہ کے مقام پر بھی بارشی پانی کو ذخیرہ کرنے کے لیے دو ڈیم بنانے کا منصوبہ بنایا جا رہا ہے۔

ڈاکٹر منیب خٹک کا کہنا ہے کہ خیبر میں بہت سے برساتی نالے بہتے ہیں اس لیے یہ ضلع چھوٹے ڈیموں کی تعمیر کے لیے بہت موزوں ہے۔ ان کے مطابق ان ڈیموں کی تعمیر سے نہ صرف اس علاقے میں آنے والے سالانہ سیلاب پر قابو پایا جا سکتا ہے بلکہ مقامی لوگوں کی پانی کی ضروریات پوری کرنے کے لیے آبی ذخائر بھی بنائے جا سکتے ہیں۔&nbsp;

لیکن سرکاری دستاویزات سے پتہ چلتا ہے کہ ان دونوں ڈیموں کی تعمیر کا منصوبہ دراصل 10 سال سے بھی زیادہ پرانا ہے۔ ان دستاویزات کے مطابق مستورہ ڈیم کے قابلِ عمل ہونے کے بارے میں سرکاری رپورٹ 2007 میں مکمل کر لی گئی تھی جبکہ جبہ ڈیم کے متعلق ایسی ہی رپورٹ 2008 میں بنائی گئی تھی۔&nbsp;

سابق وزیر اعظم عمران خان نے بھی 5 اپریل 2019کو جمرود کے دورے میں ان دونوں ڈیموں کی تعمیر کا اعلان کیا تھا جبکہ جنوری 2020 میں صوبائی حکومت نے جبہ ڈیم کے لیے نو ارب 90 کروڑ 65 لاکھ روپے مختص کرنے کی منظوری بھی دی تھی۔ لیکن اس تمام پیش رفت کے باوجود ان دونوں ڈیموں کی تعمیر کا منصوبہ ابھی تک صرف سرکاری کاغذوں پر موجود ہے اور اس پر عملی کام شروع بھی نہیں ہو سکا۔

ہمیں جینے دو، ہمیں پانی دو: خیبرپختونخوا کے شمال مغربی علاقے باڑہ میں بنجر ہوتی زمینوں کے کاشت کاروں کی پکار

In Khyber Pakhtunkhwa, extrajudicial killing have increased in recent months, leading to daily protests in the province.

Extrajudicial killing in Khyber Pakhtunkhwa

چھ سال قبل جب پلوشہ* کی شادی ہوئی تو اس وقت ان کے شوہر محمد عرفان ایک نِجی سکول میں پڑھاتے تھے جہاں تنخواہ کم تھی اور نوکری عارضی۔ اس لیے وہ ہمیشہ دعا کرتیں کہ عرفان کو کسی سرکاری سکول میں مستقل ملازمت مل جائے۔ &nbsp; &nbsp;

ان کی دعا قبول ضرور ہوئی لیکن عرفان کبھی سرکاری سکول میں پڑھا نہیں پائے۔

یکم جون 2020 کی گرم صبح کو وہ ضلع خیبر کی تحصیل باڑہ کے علاقے ذوالفقار گڑھی میں واقع اپنے گھر سے سرکاری نوکری پر تعیناتی کا حکم نامہ وصول کرنے کے لیے نکلے لیکن کبھی واپس نہیں لوٹے۔ ان کے گھر والوں کے مطابق عرفان نے انہیں آخری بار اس دِن سہ پہر ڈھائی بجے فون کیا۔ اس کے بعد اُن کا موبائل فون ہمیشہ کے لیے خاموش ہوگیا۔

پلوشہ کہتی ہیں کہ عرفان کا فون مسلسل بند پا کر &#39;ہم بہت پریشان ہوگئے۔ ہم نے ان کے دوستوں اور رشتے داروں سے ان کے بارے میں دریافت کیا مگر ان کا کچھ پتا نہ چلا۔ میرے بھائیوں نے جمرود اور تحصیل باڑہ کے تھانوں میں ان کی گمشدگی کی رپورٹیں درج کروائیں اور علاقے کی بااثر شخصیات سے بھی رابطہ کیا لیکن ہمیں کوئی معلومات نہ مل سکیں&#39;۔

22 جون کو خیبر پختونوا کے مقامی اخبارات میں ایک خبر چھپی جس میں بتایا گیا کہ پشاور کے جنوب میں واقع متنی کے علاقے میں انسدادِ دہشت گردی کے محکمے (سی ٹی ڈی) کے ساتھ ایک مبینہ مقابلے میں چار افراد مارے گئے ہیں۔ پلوشہ اور ان کے گھر والوں پر اس وقت قیامت ٹوٹ پڑی جب انہیں معلوم ہوا کہ ان &#39;مارے جانے والے افراد میں عرفان کا نام بھی ہے&#39;۔

پلوشہ کا دعویٰ ہے کہ ان کے شوہر کو مارنے سے پہلے ان پر شدید تشدد کیا گیا۔ وہ کہتی ہیں: عرفان پر دہشت گردی کا الزام لگا کر میرے اور بچوں کے سامنے ایک ایسا سوال رکھ دیا گیا جس کا جواب ملنا ممکن نہیں&#39;۔

ابھی بھی عرفان کی موت کو یاد کرتے ہوئے ان کی آنکھوں میں آنسو آجاتے ہیں۔ &#39;وہ میری زندگی کا مشکل ترین وقت تھا۔ شوہر کے مرنے کی خبر کی تصدیق ہونے کے باوجود بھی یقین نہیں آ رہا تھا کہ ایسا کیسے ہو سکتا ہے&#39;۔

22 جون کی سہ پہر کو جب عرفان کی لاش ان کے آبائی علاقے میں پہنچی تو ان کے رشتے داروں اور مقامی لوگوں نے اسے دفنانے کے بجائے تحصیل باڑہ کے تجارتی مرکز خیبر چوک میں رکھ کر تمام ٹریفک روک دی جس میں افغانستان جانے والی مال بردار گاڑیاں بھی شامل تھیں۔ مظاہرین نے خود کو سیاسی اتحاد کا نام دیا اور صوبائی حکومت سے عرفان کے قتل کی تحقیقات کا مطالبہ کیا۔ ان کا یہ بھی مطالبہ تھا کہ عرفان کے خاندان کو ان کی موت کا ہرجانہ دیا جائے اور اُن کی جگہ ان کی بیوہ کو سرکاری نوکری دی جائے۔

یہ احتجاج آٹھ روز تک جاری رہا جس کے بعد صوبائی حکومت نے بالآخر ان کے مطالبات مان لیے۔ سیاسی اتحاد کے صدر کہتے ہیں:&rsquo;18 جولائی کو عرفان کی بیوہ کو باڑہ میں واقع صاحبزاہ عبدالقیوم خان نامی نیم سرکاری سکول نوکری دے دی گئی جہاں انہیں ماہانہ پندرہ ہزار روپے تنخواہ ملے گی۔انتظامیہ نے عرفان کے لواحقین کی مالی معاونت کرنے اور ان کے دیگر مطالبات بھی جلد پورا کرنے کی یقین دہانی کرائی ہے&lsquo;۔

تاہم پولیس حکام کا اصرار ہے کہ ان مطالبات کو ماننے کا یہ مطلب نہیں کی حکومت نے یہ بھی تسلیم کر لیا ہے کہ عرفان بے قصور مارے گئے۔ ضلع خیبر کے ضلعی پولیس آفیسر ڈاکٹر محمد اقبال کے بقول سکیورٹی اداروں کے پاس ایسے شواہد موجود ہیں جن سے ثابت ہوتا ہے کہ عرفان دہشت گردانہ سرگرمیوں میں شامل تھے تاہم &nbsp;وہ کہتے ہیں کہ &rsquo;ہم نے سیاسی اتحاد کے مطالبات تسلیم کرنے اور تعزیت کے لیے اُن کے گھر جانے کو اس لیے مناسب سمجھا تاکہ علاقے میں انتشار پیدا نہ ہو اور امن و امان برقرار رہے&lsquo;۔

دوسری طرف پلوشہ کا دعویٰ ہے کہ عرفان کا دہشت گردی سے کوئی تعلق نہیں تھا بلکہ وہ ایک علم دوست انسان تھے جنہیں فارغ وقت میں کتابیں پڑھنے کا شوق تھا ۔&rsquo;میں نے ان کے ساتھ چھ سال گزارے۔ اگر وہ دہشت گردانہ سرگرمیوں میں ملوث ہوتے تو ان کے قتل پر مجھے اتنا دکھ نہ ہوتا&lsquo;۔

ایک ایسا ہی واقعہ اسی سال 22 فروری کو پیش آیا۔ اس کی ابتدا اس وقت ہوئی جب پشاور کے پولیس حکام نے مقامی میڈیا کو اطلاع دی کہ انہوں نے شہر کے قریب ریگی کے علاقے میں ایک مقابلے میں چار دہشت گردوں کو مار دیا ہے۔ مارے جانے والے افراد میں لنڈی کوتل سے تعلق رکھنے والے اٹھائیس سالہ عدنان شنواری بھی شامل تھے۔ وہ ایک قبائلی سرحدی پولیس، لیویز فورس، کے اہل کار تھے اور دو بچوں کے باپ تھے۔&nbsp;

جب عدنان کی گولیوں سے چھلنی لاش لنڈی کوتل پہنچی تو مقامی لوگوں نے اسے ماورائے عدالت قتل قرار دے کر حمزہ بابا چوک پر احتجاجی دھرنا شروع کر دیا جو اگلے دس دن تک جاری رہا۔ اس مظاہرے میں بھی مطالبات کیے گئے کہ عدنان کی موت کی عدالتی تحقیقات کروائی جائیں، ان کے بھائی کو سرکاری نوکری دی جائے اور ان کے ورثا کو عوضانہ دیادیا جائے۔

عدنان کے والد اسماعیل شنواری خود بھی خیبر پختونخوا کی قبائلی پولیس، خاصہ دار فورس، سے ریٹائر ہوئے ہیں۔ ان کا کہنا ہے کہ 10 نومبر 2019 کو ان کے علاقے کی پولیس اور انسدادِ دہشت گردی کے محکمے کے اہلکاروں نے اُن کے بیٹے کو ان کے گھر سے گرفتار کیا اور چند گھنٹوں کی پوچھ گچھ کے بعد رہا کر دیا۔&rsquo; چند روز بعد عدنان کو دوبارہ گھر سے گرفتار کیا گیا مگر اس بار زندہ لوٹنے کے بجائے اس کی لاش گھر پہنچی&#39;۔

اسماعیل کہتے ہیں کہ ان کا بیٹا کسی غیر قانونی سرگرمی میں ملوث نہیں تھا لیکن &#39;اگر وہ ایسی سرگرمیوں میں ملوث تھا بھی تو اسے عدالت میں کیوں پیش نہیں کیا گیا&lsquo;۔

عدنان کی ہلاکت سے کچھ عرصہ قبل ان کے آبائی علاقے لنڈی کوتل میں ایک اور مقامی نوجوان خاطر شنواری اسی قسم کے حالات میں ہلاک ہو چکے تھے۔

خاطر دو بچوں کے باپ تھے اور کراچی میں ٹرک ڈرائیور کے طور پر کام کرتے تھے لیکن چھٹیاں گزارنے کے لیے پاکستان اور افغانستان کی سرحد پر واقع اپنے گاؤں پسد خیل آئے ہوئے تھے۔ 17 دسمبر 2019 کو سکیورٹی اداروں نے ایک سرچ آپریشن کے دوران ان کے بیس ہمسایوں سمیت انہیں اس وقت گرفتار کیا جب ان کے گاؤں میں سرحد پر باڑ کی تنصیب کے دوران فرنٹیئر کانسٹیبلری (ایف سی) کے تین اہلکار ایک بارودی سرنگ کے دھماکے میں ہلاک ہو گئے اور تین زخمی ہوگئے۔

پانچ روز بعد جب خاطر کی لاش ان کے گھر پہنچی تو ان کے گھر والوں کے مطابق اس پر جگہ جگہ شدید تشدد کے نشانات تھے۔ لیکن سرکاری مؤقف کے مطابق خاطر سرکاری حراست سے بھاگنے کی کوشش میں ایف سی کے قلعے کی دیوار سے گر کر ہلاک ہو گئے تھے۔

لیکن ان کے رشتے داروں اور مقامی لوگوں نے اس سرکاری مؤقف کو ماننے سے انکار کر دیا اور خاطر کی ہلاکت کو ایک ماورائے عدالت قتل قرار دیے دیا جس پر احتجاج کرتے ہوئے انہوں سات روز تک پاک افغان شاہراہ کو ہر قسم کی آمدورفت کے لیے بند کر دیا۔

ایسے کئی اور واقعات بھی خیبر پختونخوا میں گذشتہ چند مہینوں میں پیش آ چکے ہیں۔ اگرچہ &nbsp;صوبائی سطح پر کسی سرکاری یا غیر سرکاری ادارے کے پاس ان کے بارے میں کوئی اعداد و شمار &nbsp;نہیں لیکن ہیومن رائٹس کمیشن آف پاکستان (ایچ آر سی پی) کے مطابق اس طرح کے ماورائے عدالت قتل پچھلے کئی سالوں سے پاکستان بھر میں ہوتے چلے آ رہے ہیں۔

اس کمیشن کی ایک رپورٹ میں بتایا گیا ہے کہ اکتوبر 2013 سے لے کر مئی 2018 کے درمیان 1704 دنوں میں ملک کے مختلف حصوں میں ماورائے عدالت قتل کے کل 2127 واقعات ہوئے ہیں۔ دوسرے لفظوں میں اس عرصے میں ہر چار دنوں میں پانچ لوگ اس قسم کے واقعات میں مارے گئے۔

نقیب اللہ کی ہلاکت کے بعد ماورائے عدالت قتل کی روک تھام کے مطالبے نے زور پکڑا تھا اور اُمید کی جا رہی تھی کہ اس قسم کے مزید واقعات رونما نہیں ہوں گے لیکن یہ سلسلہ آج بھی ماضی کی طرح جاری ہے: ماہر قانون اسد علی

&nbsp;ان میں سب سے نمایاں واقعہ جنوری 2018 میں کراچی میں پیش آیا جب وہاں کی پولیس نے ایک ستائیس سالہ پشتون نوجوان نقیب اللہ محسود کو دہشت گرد قرار دے کر انہیں ایک مبینہ طور پر جعلی پولیس مقابلے میں قتل کر دیا۔ ان کی ہلاکت پر &nbsp;ملک کے مختلف حصوں میں شدید مظاہرے ہوئے جن میں ان کے ورثا کے لیے انصاف کا مطالبہ کیا گیا مگر ابھی تک ان کی ہلاکت کے ذمہ دار پولیس اہلکاروں کو کوئی سزا نہیں ملی۔ &nbsp;

خیبر پختونخوا کے معروف ماہرِ قانون اسد علی کہتے ہیں کہ نقیب اللہ کی ہلاکت کے بعد ماورائے عدالت قتل کی روک تھام کے مطالبے نے زور پکڑا تھا اور اُمید کی جا رہی تھی کہ اس قسم کے مزید واقعات رونما نہیں ہوں گے &#39;لیکن یہ سلسلہ آج بھی ماضی کی طرح جاری ہے&#39;۔ وہ کہتے ہیں کہ فوج اور خفیہ ایجنسیاں &#39;دہشت گردی میں ملوث افراد کے خلاف موجود شواہد کی کمی اور عدالتوں سے ان کی رہائی کے امکان کو بنیاد بنا کر ایسے ماورائے عدالت اقدامات کرتے ہیں تاہم ان کی جتنی حوصلہ شکنی کی جائے اتنی ہی کم ہے&#39;۔

پشاور ہائی کورٹ کے ایک بنچ نے 18 اکتوبر 2019 کو اس حوصلہ شکنی کے لئے کچھ اہم اقدامات اٹھائے جن کے تحت فوج اور خفیہ ایجنسیوں کو کہا گیا کہ وہ اپنی نگرانی میں چلنے والے تمام حراستی مراکز میں قید افراد کا ریکارڈ صوبائی پولیس کے حوالے کریں۔ عدالت نے صوبائی انسپکٹر جنرل (آئی جی) پولیس کو بھی حکم دیا کہ وہ تین روز کے اندر اِن حراستی مراکز کا کنٹرول سنبھال لیں۔

لیکن ایک ہفتے کے اندر ہی سپریم کورٹ آف پاکستان نے اِن احکامات پر عمل درآمد روک دیا۔

*فرضی نام

یہ رپورٹ لوک سجاگ نے پہلی دفعہ&nbsp;17 ستمبر 2020 کو اپنی پرانی ویب سائٹ پر شائع کی تھی۔

باڑہ میں سکول ٹیچر کی پولیس کے ہاتھوں موت: 'وہ دہشت گرد نہیں، علم دوست انسان تھا'۔

پشاور کے بورڈ بازار میں کھانے پینے کے سامان سے لے کر ملبوسات اور روزمرہ استعمال کی چیزوں تک ایسی بہت سی اشیا مل جاتی ہیں جو کبھی صرف افغان دارالحکومت کابل میں دستیاب تھیں۔ اسی لیے اسے &#39;چھوٹا کابل&#39; بھی کہا جاتا ہے۔ اس میں کام کرنے والے بیشتر دکان دار بھی افغان مہاجرین ہیں جو اپنے ملک میں گزشتہ چار دہائیوں سے جاری جنگ کی وجہ سے اپنا گھر بار چھوڑ کر پاکستان آئے اور پھر یہیں بس گئے۔

سات سالہ افغان مہاجر سبحان اللہ اس بازار میں درسی کتابوں کی ایک دکان پر کام کرتا ہے۔ کچھ عرصہ پہلے وہ قریب ہی واقع ایک سکول میں پڑھتا تھا اور اپنی نصابی کتابیں اسی دکان سے خریدتا تھا۔ لیکن اب اپنے گھر کے نامساعد مالی حالات کے باعث وہ اپنی تعلیم چھوڑ کر کام کرنے پر مجبور ہے جس کا روزانہ معاوضہ محض 50 روپے سے لے کر 100 روپے تک بنتا ہے۔&nbsp;

اس کے والد حبیب اللہ پشاور کے شمالی مغربی کونے میں واقع اور ضلع خیبر کی تحصیل جمرود سے متصل کارخانو بازار میں ریڑھی پر موبائل فون سے متعلقہ پرزہ جات فروخت کرتے ہیں۔ پچھلے دو سال میں کورونا وبا کی وجہ سے ان کا کاروبار بہت متاثر ہوا ہے جس کے باعث انہوں نے سبحان اللہ سمیت اپنے تین بچوں کو سکول سے اٹھا لیا ہے۔

آمنہ نامی افغان بچی کے والدین نے بھی کورونا کی پیدا کردہ مالی مشکلات کی وجہ سے اس کی تعلیم منقطع کر دی ہے۔ سکول چھوڑنے سے پہلے وہ بورڈ بازار کے علاقے میں ساتویں جماعت میں پڑھ رہی تھی۔ تاہم اس کے بڑے بھائی سید آغا کی تعلیم ابھی جاری ہے۔ وہ نویں جماعت میں پڑھتا ہے اور کہتا ہے کہ کورونا کے پھیلنے سے پہلے اس کے 25 ہم جماعت تھے &quot;لیکن اب ان کی تعداد صرف پانچ رہ گئی ہے&quot;۔

بورڈ بازار ہی کے علاقے میں پڑھنے والے دسویں جماعت کے طالب علم سدیس کا بھی کہنا ہے کہ کورونا کی وجہ سے اس کے بہت سے ساتھی تعلیم چھوڑ گئے ہیں۔ اس کا خاندان افغان صوبے ننگرہار سے ہجرت کر کے پاکستان آیا تھا اور اس کے والد بھی ریڑھی پر خشک میوہ جات فروخت کرتے ہیں۔ لیکن حبیب اللہ کے برعکس وہ جیسے تیسے ابھی بھی اپنے بیٹے کے تعلیمی اخراجات پورے کر رہے ہیں۔ &nbsp;&nbsp;

<h2>&nbsp;افغان سکولوں پر بڑھتا ہوا مالی دباؤ</h2>

اقوام متحدہ کے ادارہ برائے مہاجرین کے مطابق پاکستان میں مقیم رجسٹرڈ افغان مہاجرین کی تعداد 14 لاکھ ہے جبکہ ایک اندازے کے مطابق تقریباً 10 لاکھ غیر رجسٹرڈ افغان بھی یہاں قیام پذیر ہیں۔ گزشتہ برس 15 اگست کو افغانستان میں طالبان کی حکومت قائم ہونے کے بعد مزید تین لاکھ افغان شہریوں کو پاکستان کے ویزے جاری کیے جا چکے ہیں جن میں کئی پناہ گزین بھی شامل ہیں۔

ان افغانوں کی بڑی تعداد خیبرپختونخوا میں مقیم ہے جہاں ان کی اکثریت خطِ غربت سے نیچے زندگی بسر کرتی ہے۔ وہ ایسے چھوٹے موٹے کاروبار اور محنت مزدوری کرتے ہیں جن سے وہ بمشکل اپنی روزی روٹی کا بندوبست کر سکتے ہیں۔ اگر کبھی کسی وجہ سے ان کا روزگار محض چند روز کے لیے ہی متاثر ہو جائے تو ان کے لیے اپنے بچوں کو تعلیم دلانا ممکن نہیں رہتا۔

ان بچوں کو تعلیم دینے کے لیے پاکستانی حکومت نے اقوام متحدہ کے ادارہ برائے مہاجرین کے تعاون سے ملک بھر کی افغان بستیوں میں ایک سو 53 سکول قائم کر رکھے ہیں۔ان میں سے ایک سو پانچ سکول خیبرپختونخوا میں واقع ہیں جن میں مجموعی طور پر تقریباً 53 ہزار طلبہ پرائمری سطح کی تعلیم حاصل کر رہے ہیں جبکہ ان میں سیکنڈری سطح کی تعلیم حاصل کرنے والے بچوں کی تعداد تین ہزار ہے۔ یہ سکول پرائمری شعبے کے ہر طالب علم سے ہر ماہ کم از کم 50 روپے فیس لیتے ہیں۔

دو سال پہلے جب پاکستان میں کورونا وائرس کی وبا پھیلی تو ابتدائی طور پر یہ سکول چھ ماہ کے لیے بند کر دیے گئے تھے۔ جب انہیں دوبارہ کھولا گیا تو ان کی انتظامیہ نے طالب علموں سے بندش میں گزرے مہینوں کی فیسوں کا تقاضا شروع کر دیا۔ لیکن وبا کی وجہ سے ان میں سے بہت سے طلبا کے والدین کے کام کاج یا تو ٹھپ ہو گئے تھے اور یا پھر ان کی آمدن پہلے کی نسبت بہت کم رہ گئی تھی۔ اس لیے ان کے لیے غیر ادا شدہ فیسیں بھرنا ممکن نہیں تھا۔ نتیجتاً انہوں نے اپنے بچوں کو سکول بھیجنا ہی بند کر دیا۔&nbsp;

سبحان اللہ کے سکول کے پرنسپل سفیر اللہ رحمتی اس تبدیلی کی توثیق کرتے ہوئے کہتے ہیں کہ &quot;وبا سے پہلے ہمارے سکول میں چھ سو بچے زیر تعلیم تھے لیکن اب اس کے طلبا کی تعداد صرف ایک سو 40 رہ گئی ہے&quot;۔

فیسوں کی عدام ادائیگی کے علاوہ افغان سکولوں کے نصاب میں کی گئی ایک حالیہ تبدیلی بھی مہاجر بچوں کی تعلیم پر منفی اثر ڈال رہی ہے۔ یہ تبدیلی 2019 میں آئی جب اقوام متحدہ کے ادارہ برائے مہاجرین نے افغان پناہ گزینوں کے پاکستان میں طویل قیام کے امکان کو مدنظر رکھتے ہوئے فیصلہ کیا کہ ان کے سکولوں میں اب افغان نصاب کے بجائے پاکستانی نصاب پڑھایا جائے۔ چنانچہ جو طلبا پہلے پشتو، دری یا فارسی جیسی افغان زبانوں میں تعلیم حاصل کر رہے تھے انہیں اب سارا نصاب اردو زبان میں پرھنا پڑ رہا ہے جس کے نتیجے میں ان میں سے بہت سے بچوں نے اپنی تعلیم ادھوری چھوڑ دی ہے۔&nbsp;

ان دونوں وجوہات کی بنا پر طالب علموں کی تعداد میں ہونے والی کمی کے باعث افغان سکولوں کے مالی وسائل پر دباؤ بہت بڑھ گیا ہے۔ سفیر اللہ رحمتی کہتے ہیں کہ ان کے سکول کی عمارت کا کرایہ 50 ہزار روپے ماہانہ ہے اور اس میں 12 اساتذہ تعینات ہیں۔ لیکن طلبا کی کم ہوتی ہوئی تعداد کے پیش نظر ان کا کہنا ہے کہ &quot;کرایہ اور بجلی اور گیس کے بل ادا کرنے کے بعد ہمارے لیے اساتذہ کو تنخواہ دینا بھی مشکل ہو جاتا ہے&quot;۔&nbsp;

پشاور میں واقع افغان سکولوں کے پرنسپلوں کی ایسوسی ایشن کے صدر امن اللہ نصرت بھی ان عوامل کی نشان دہی کرتے ہوئے کہتے ہیں کہ ایسی مالی مشکلات کی وجہ سے بہت سے افغان سکول بند ہو رہے ہیں۔ پشاور ہی کے علاقے کبابیان کے ایک سکول کے پرنسپل محمد ضمیر خان خیبر پختونخوا میں رہنے والے افغان بچوں کی تعلیمی صورت حال پر تبصرہ کرتے ہوئے کہتے ہیں کہ اب اس کا ایک ہی حل باقی رہ گیا ہے جو، ان کے مطابق، یہ ہے کہ &quot;اقوامِ متحدہ کا ادارہ برائے مہاجرین افغان بچوں کے تعلیمی اخراجات خود برداشت کرے&quot;۔ ان کے خیال میں اس سے ایک طرف کورونا کی وجہ سے پریشان حال والدین کا معاشی بوجھ ہلکا ہو گا اور دوسری طرف سکولوں کی مالی مشکلات کا بھی ازالہ ہو سکے گا۔

ان کا کہنا ہے کہ کئی افغان سکولوں نے مل کر اقوام متحدہ کے ادارے کو اس حوالے سے ایک درخواست بھی بھیجی ہے مگر &quot;تاحال اس پر کوئی پیش رفت نہیں ہوئی&quot;۔ تاہم اقوام متحدہ کے ادارہ برائے مہاجرین کے ترجمان قیصر آفریدی اس درخواست سے لا علم ہیں۔

درحقیقت انہیں اس بات کی خبر بھی نہیں کہ خیبر پختونخوا میں مقیم افغان مہاجر بچے بڑی تعداد میں سکول چھوڑ رہے ہیں۔ ان کا کہنا ہے کہ ان کے &quot;ادارے کے پاس ان بچوں کے سکول چھوڑنے کی کوئی اطلاع نہیں ہے&quot;۔

اسلام گل آفریدی

اسلام گل آفریدی پچھلے سولہ سال سے خیبر پختونخوا اور ضم شدہ قبائلی اضلاع میں قومی اور بیں الاقوامی نشریاتی اداروں کے لئے تحقیقاتی صحافت کر رہے ہیں۔