flood victims are migrating from kohistan

نگاہ گھر کی طرف ہے قدم سفر کی طرف: کوہستان کے سیلاب متاثرین نقل مکانی پر مجبور۔

video

گُل بَر کا 60 گھروں پر مشتمل پورا محلہ گزشتہ ماہ کے سیلاب میں مٹی کا ڈھیر بن گیا ہے۔

وہ کہتے ہیں کہ سیلابی پانی نے ان کے محلے کے 14 مکان تو مکمل طور پر ملیامیٹ کر دیے ہیں اور باقی سب کو بھی شدید نقصان پہنچایا ہے جبکہ زیادہ تر مکانوں میں موجود سامان بھی سیلاب میں بہہ گیا ہے۔ وہ اپنے بیوی بچوں کے ساتھ اب اپنے سسرال کے ہاں رہ رہے ہیں۔ انکے دیگر محلے دار بھی اپنے اپنے رشتہ داروں کے ہاں منتقل ہو گئے ہیں۔&nbsp;

سیلاب سے پہلے وہ خیبر پختونخوا کے شمالی ضلع سوات کے قصبے مدین کے اینگر آباد نامی محلے میں رہتے تھے جو بِشی گرام نامی نالے کے بلکل کنارے پر واقع ہے۔&nbsp;یہ نالہ ان کے محلے سے تھوڑے فاصلے پر دریائے سوات میں شامل ہو جاتا ہے۔&nbsp;

ان کا کہنا ہے کہ ان کی 44 سالہ زندگی میں انہیں دوسری بار اس نقصان کا سامنا کرنا پڑ رہا ہے کیونکہ 2010 میں آنے والا سیلاب بھی ان کے پورے محلے کو بہا لے گیا تھا۔ اس کے باوجود، ان کے مطابق، انہوں نے اور ان کے محلے میں رہنے والے دیگر لوگوں نے عین اسی جگہ دوبارہ اپنے مکان بنا لیے تھے جہاں وہ سیلاب کا شکار ہوئے تھے۔ چنانچہ 25 اگست 2022 کو بشی گرام نالے میں جیسے ہی سیلاب آیا تو یہ سب مکان پھر سے اس کی زد میں آ گئے۔&nbsp;

گُل بَر کا کہنا ہے کہ اینگر آباد کی زمین اس کے رہائشیوں کی ملکیت ہے اس لیے 2010 کے بعد ضلعی انتظامیہ نے انہیں یہاں مکان بنانے سے نہیں روکا تھا بلکہ، ان کے مطابق، ان کے گھروں کو نالے کے پانی سے محفوظ رکھنے کے لیے حکومت نے یہاں ایک حفاظتی پشتہ بھی تعمیر کر دیا تھا۔ لیکن وہ کہتے ہیں کہ اِس بار &quot;سیلاب کی شدت اتنی زیادہ تھی کہ یہ پشتہ بھی ٹوٹ گیا&quot;۔&nbsp;

مینگورہ کے رہنے والے 39 سالہ حیدر علی بھی کہتے ہیں کہ دریائے سوات میں آنے والا سیلابی ریلا اس قدر شدید تھا کہ اس کی وجہ سے 16 کنال اراضی پر پھیلی ان کی تفریح گاہ، سوات ونڈر پارک، کا ایک بڑا حصہ تہس نہس ہو گیا حالانکہ، ان کے مطابق، یہ جگہ دریا کے کنارے سے سات سو فٹ دور تھی۔ ان کا کہنا ہے کہ پانی کے ساتھ آنے والا کیچڑ اُن کے جھولوں اور دوسری مشینری میں پھنس گیا ہے اور کئی دیگر آلات اور تنصیبات ٹوٹ پھوٹ گئے ہیں جس سے انہیں &quot;مجموعی طور پر چار کروڑ روپے کا نقصان ہوا ہے&quot;۔&nbsp;

رواں ماہ کے شروع میں وہ اپنی تفریح گاہ کی بحالی میں مصروف ہیں اور کہتے ہیں کہ حالیہ سیلاب میں تباہ ہونے والے بہت سے ہوٹلوں اور تفریحی سہولیات کے مالکان کے برعکس انہوں نے کسی قانون کی خلاف ورزی نہیں کی۔ ان کا دعویٰ ہے کہ ان کے پاس تفریح گاہ کی تعمیر کے لیے درکار محکمہ آبپاشی، تحصیل میونسپل ایڈمنسٹریشن اور مقامی پولیس کے اجازت ناموں کے ساتھ ساتھ اس کی زمین کے کرائے کے معاہدے جیسی تمام ضروری دستاویزات موجود ہیں۔&nbsp;

مقامی تحصیل میونسپل ایڈمنسٹریشن کے سپرنٹنڈنٹ فضل محمد ان کی بات کی توثیق کرتے ہوئے کہتے ہیں کہ &quot;سوات ونڈر پارک ایک نجی زمین پر قائم کیا گیا ہے جس کی ملکیت کا ریکارڈ صوبائی محکمہ مال کے پاس موجود ہے&quot;۔ ان کا یہ بھی کہنا ہے کہ اس کی تعمیر کے لیے ضروری تمام حکومتی اجازت نامے بھی حاصل کیے گئے ہیں۔&nbsp;

اسی لیے حیدرعلی کا کہنا ہے کہ انہیں مقامی انتظامیہ کی طرف سے ایسا کوئی نوٹس نہیں ملا کہ وہ اپنی تفریح گاہ کو دوبارہ چالو نہیں کر سکتے۔ تاہم متعلقہ تحصیل میونسپل ایڈمنسٹریشن میں کام کرنے والے ایک اہل کار اپنا نام ظاہر نہ کرنے کی شرط پر کہتے ہیں کہ ان کے ادارے کی طرف سے پچھلے دو سالوں میں ایسے کئی درجن نوٹس جاری کیے گئے ہیں جن میں غیرقانونی عمارات اور تنصیبات کے مالکان کو خبردار کیا گیا ہے کہ ان کے خلاف قانونی اور انتظامی کارروائی کی جا سکتی ہے۔ ان کا کہنا ہے کہ &quot;ان میں سے اکثر عمارات نہ صرف حالیہ سیلاب میں تباہ ہوئی ہیں بلکہ 2010 کے سیلاب میں بھی ان کے ساتھ یہی ہوا تھا&quot;۔&nbsp;

<h2>غیر قانونی تعمیرات</h2>

خیبر پختونخوا میں 2014 میں دریاؤں کے تحفظ کے لیے بنائے گئے قانون کی رو سے کسی دریا کے کنارے کوئی بھی عمارت تعمیر کرنے کے لیے محکمہ آبپاشی سے اجازت لینا پڑتی ہے اور ایسی عمارت کا دریا کے کنارے سے کم از کم دو سو فٹ دور ہونا بھی ضروری ہے۔ اس قانون کی خلاف ورزی کرنے والوں کو چھ ماہ قید اور پانچ لاکھ روپے تک جرمانے کی سزا ہو سکتی ہے۔

لیکن ضلع سوات کے قصبے مدین کے سیون سٹار نامی ہوٹل کی مثال سے ظاہر ہوتا ہے کہ اس قانون پر کوئی عمل درآمد نہیں ہوتا۔ اس ہوٹل کو 2010 کے سیلاب میں شدید نقصان پہنچا تھا کیونکہ یہ تقریباً دریا کے اندر واقع تھا۔ اس کے باوجود حکومت نے اس کی تعمیرِنو کے دوران اس کا محلِ وقوع تبدیل کرانے کی کوئی کوشش نہ کی چنانچہ پچھلے ماہ یہ ایک بار پھر دریا برد ہو گیا۔ &nbsp;&nbsp;

ہوٹل کے مالک ساجد شاہ کا دعویٰ ہے کہ اِس کی عمارت دریا &nbsp;سے قانونی فاصلے پر بنائی گئی تھی لیکن یہ بات درست معلوم نہیں ہوتی کیونکہ اس کے تین ٹوٹے ہوئے ستون ابھی تک واضح طور پر دریا کے بیچ میں گڑے ہیں۔&nbsp;

مدین کی تحصیل میونسپل ایڈمنسٹریشن کے ایک افسر اپنا نام ظاہر نہ کرنے کی شرط پر کہتے ہیں کہ سیون سٹار ہوٹل کی طرح 2010 کے سیلاب میں تباہ ہونے والی کئی عمارتیں &quot;پچھلے 12 سال میں دوبارہ عین اسی جگہ تعمیر ہو گئی تھیں جہاں قانون کی رُو سے انہیں ہونا ہی نہیں چاہیے تھا&quot;۔&nbsp;

تاہم ان میں سے کئی عمارتوں کے مالکان دعویٰ کرتے ہیں کہ انہوں نے ان کی تعمیر کے لیے حکومت سے باقاعدہ اجازت لے رکھی تھی۔ ان میں تحصیل بحرین کے تفریحی مقام کالام میں بنا ہنی مون ہوٹل بھی شامل تھا جس کے دریا میں بہہ جانے کے مناظر سوشل میڈیا پر وائرل ہو چکے ہیں۔ اس کے مالک ہمایوں شنواری کے بیٹے زرمت اللہ شنواری کہتے ہیں کہ ان کے پاس اس کی تعمیر کے لیے حکومت کا جاری کردہ اجازت نامہ موجود تو تھا لیکن اب وہ &quot;اس کے ساتھ ہی سیلاب میں بہہ گیا ہے&quot;۔

بحرین کے تحصیل میونسپل افسر عرفان خان ان کے اس دعوے کو مسترد کرتے ہوئے کہتے ہیں کہ ہنی مون ہوٹل کی تعمیر کے لیے کبھی کوئی اجازت نامہ جاری نہیں کیا گیا۔ لیکن سوات ہوٹلز ایسوسی ایشن کے صدر حاجی زاہد خان کہتے ہیں کہ اس اجازت نامے کی موجودگی بعیدازقیاس نہیں کیونکہ، ان کے مطابق، &quot;سرکاری اداروں کے اہلکار اکثر رشوت لے کر غیرقانونی تعمیرات کی اجازت دے دیتے ہیں&quot;۔&nbsp;

اپنے اس دعوے کی دلیل کے طور پر ان کا کہنا ہے کہ &quot;اگر یہ اہل کار 2010 کے بعد دریائے سوات پر ناجائز تعمیرات نہ ہونے دیتے تو یہاں نہ تو کوئی ہوٹل، کیفے اور ریسٹورنٹ ہوتا اور نہ ہی حالیہ سیلاب سے بڑے پیمانے پر عمارتیں تباہ ہوتیں&quot;۔&nbsp;

<h2>تجاوزات کے خلاف کارروائیاں</h2>

عرفان خان کہتے ہیں کہ &quot;تحصیل میونسپل ایڈمنسٹریشن بحرین نے 2020 سے لے کر اب تک دریائے سوات پر قائم 86 غیرقانونی عمارتوں کو نوٹس جاری کیے ہیں۔ لیکن وہ کہتے ہیں کہ &quot;جب کبھی ان کے خلاف کوئی کارروائی کرنے کی کوشش کی جاتی ہے تو اعلیٰ حکام اسے روک دیتے ہیں&quot;۔&nbsp;

ان کے دفتر سے حاصل کی گئی ایک دستاویزات ان کے موقف کی تائید کرتی دکھائی دیتی ہیں۔ اس کے مطابق اپریل 2021 سے لے کر اب تک تحصیل میونسپل ایڈمنسٹریشن بحرین نے مقامی پولیس کو 27 ایسے افراد کے خلاف مقدمات درج کرنے کا کہا ہے جنہوں نے مبینہ طور پر دریائے سوات پر غیرقانونی تعمیرات کر رکھی ہیں۔ لیکن ابھی تک ان میں سے کسی ایک کے خلاف بھی کارروائی نہیں کی گئی۔

عرفان خان کا یہ بھی دعویٰ ہے کہ وہ دو سال سے زیادہ عرصے سے بحرین کے اسسٹنٹ کمشنر کو دریا پر موجود تجاوزات کے خلاف کارروائی کرنے کے لیے کہہ رہے ہیں۔ ان کے مطابق انہوں نے &quot;اس سلسلے میں آخری خط 7 جولائی 2020 کو لکھا تھا&quot;۔ لیکن وہ کہتے ہیں کہ &quot;ابھی تک اس ضمن میں کوئی عملی قدم نہیں اٹھایا گیا&quot;۔&nbsp;

دوسری طرف اسسٹنٹ کمشنر بحرین محمد اسحاق خان اس دعوے کو نہ تو تسلیم کرتے ہیں اور نہ ہی مسترد۔ اس کے بجائے وہ کہتے ہیں کہ اس بارے میں تمام سوالات کے جواب صرف مالاکنڈ ڈویژن کے کمشنر شوکت یوسفزئی دے سکتے ہیں کیونکہ وہ سوات اور اس سے ملحقہ اضلاع کی سول انتظامیہ کے سربراہ ہیں۔&nbsp;

تاہم شوکت یوسفزئی کہتے ہیں کہ ان کے ماتحت انتظامیہ وہ تمام اقدامات کر رہی ہے جو دریائے سوات کو تجاوزات سے پاک کرنے کے لیے ضروری ہیں۔ اِن کی مثال دیتے ہوئے ان کا کہنا ہے کہ حالیہ سیلاب کے فوراً بعد انہوں نے مالا کنڈ ڈویژن کے تمام ڈپٹی کمشنروں کو غیرقانونی عمارات کے مالکان کے خلاف قانونی کارروائی کرنے کے احکامات جاری کر دیے ہیں جن کے نتیجے میں &quot;31 افراد کے خلاف مقدمات درج کیے جا چکے ہیں&quot;۔&nbsp;

ان کے بقول انہیں معلوم نہیں کہ 2010 کے سیلاب کے بعد دریائے سوات پر غیر قانونی عمارتیں کیسے بن گئیں کیونکہ وہ اپنے موجودہ عہدے پر &quot;صرف تین ماہ پہلے&quot; تعینات ہوئے ہیں۔ لیکن ان کا کہنا ہے کہ انہوں نے &quot;22 جون 2022 کو بحرین کے اسسٹنٹ کمشنر کی سربراہی میں ایک کمیٹی قائم کر دی تھی جس نے سیلاب سے پہلے ہی غیرقانونی ہوٹلوں اور چائے خانوں کے 31 مالکان کو گرفتار کر لیا تھا اور 60 دیگر افراد کو نوٹس جاری کر دیے تھے کہ ان کے خلاف بھی کارروائی کی جا سکتی ہے&quot;۔ ان کے مطابق اس طرح کی سرکاری کارروائیوں کے نتیجے میں &quot;بحرین اور مدین کے درمیانی علاقے میں 21 غیرقانونی عمارتوں کو مسمار بھی کیا گیا ہے&quot;۔ &nbsp;

شوکت یوسفزئی اس عزم کا اظہار بھی کرتے ہیں کہ وہ باقی ماندہ تجاوزات کو اپنی نگرانی میں ختم کرائیں گے اور آئندہ &quot;کسی کو دریا کے کنارے غیرقانونی تعمیرات کی اجازت نہیں دیں گے&quot;۔

بہتے پانی پہ بنیادِ مکاں رکھ دی: 'سوات میں 2010 کے سیلاب میں تباہ ہونے والی عمارتیں دوبارہ اسی جگہ بن گئیں جہاں انہیں ہونا ہی نہیں چاہیے تھا'۔

text

شانگلہ میں لینڈ سلائیڈنگ کے متاثرین اس مسئلے کا مستقل حل چاہتے ہیں

نارنگ شاہ 24 جولائی 2022 کی رات کو اپنے گھر میں سو رہے تھے کہ انہیں فائرنگ کی آواز آئی۔ جب انہوں نے بالکونی سے جھانک کر یہ معلوم کرنے کی کوشش کی کہ یہ آواز کہاں سے آئی ہے تو انہیں پتہ چلا کہ ان کے محلے دار غلام نبی فائرنگ کر کے لوگوں کو خبردار کر رہے ہیں کہ ایک مقامی ندی میں طغیانی آنے والی ہے اس لیے وہ اپنے اہلِ خانہ کو لے کر کسی محفوظ جگہ پر چلے جائیں۔&nbsp;

ان کی ہدایت پر عمل درآمد کرتے ہوئے ان کے بیرتی نامی گاؤں کے سارے لوگ اپنے بیوی بچوں کو لے کر ایک قریبی پہاڑی پر چلے گئے جو خیبرپختونخوا کے شمالی ضلع اپر کوہستان کی تحصیل کندیا میں واقع ہے۔ نارنگ شاہ، جن کی عمر 47 سال ہے، کہتے ہیں کہ ان کے &quot;وہاں پہنچنے کے تھوڑی دیر بعد ندی میں بہنے والا پانی اس قدر بپھر گیا کی وہ ان کی آنکھوں کے سامنے ان کے گھر کو بہا لے گیا&quot;۔&nbsp;

وہ سامان ڈھونے والی ایک پک اپ وین کے ڈرائیور ہیں اور کہتے ہیں کہ انہوں نے &quot;سات سال کڑی محنت کر کے گھر بنانے کے لیے پیسے اکٹھے کیے تھے لیکن سیلاب نے لمحوں میں اسے ملیا میٹ کر دیا&quot;۔ ان کے مطابق اب ان کے &quot;خاندان کے پاس سر چھپانے کی جگہ بھی نہیں ہے&quot;۔&nbsp;

ان کے سات بھائیوں کے ساتھ بھی یہی ہوا ہے۔ ان کے گھر بہہ گئے ہیں اور وہ سینکڑوں دیگر متاثرینِ سیلاب کے ساتھ اپنے علاقے کی ایک مرکزی شاہراہ کے کنارے واقع بلند مقامات پر پناہ لیے ہوئے ہیں۔&nbsp;

ان کے گاؤں کے رہنے والے 43 سالہ میور خان طغیانی کی وجہ بیان کرتے ہوئے کہتے ہیں کہ جولائی کے تیسرے ہفتے میں اپر کوہستان کے مختلف حصوں میں تیز بارشیں شروع ہوئیں جو اس مہینے کی 24 تاریخ تک جاری رہیں۔ ان کے مطابق &quot;ان بارشوں کا پانی ندی نالوں میں جمع ہو کر سیلاب کی شکل اختیار کر گیا&quot; جس سے بیرتی اور اس کے قریب واقع جشوئی نامی گاؤں میں مجموعی طور پر 83 مکان مکمل طور پر ڈوب گئے جبکہ 26 کو جزوی نقصان پہنچا۔

اس تباہی کا شکار ہونے والے لوگوں میں 23 سالہ جعفر شاہ بھی شامل ہیں۔ ان کا گھر پانی میں ڈوب چکا ہے اور اب 17 افراد پر مشتمل ان کا گھرانہ دوسرے متاثرینِ سیلاب کے ساتھ کھلے آسمان تلے پڑا ہے۔ ان لوگوں کی حالتِ زار بیان کرتے ہوئے وہ کہتے ہیں کہ &quot;جیسے ہی انہیں بادل آتے دکھائی دیتے ہیں وہ کسی ایسی جگہ کی تلاش میں بھاگ نکلتے ہیں جہاں وہ بارش سے محفوظ رہ سکیں&quot;۔

اگرچہ نارنگ شاہ کےخاندان سمیت کچھ متاثرین کو حکومت کی جانب سے خیمے فراہم کیے گئے ہیں لیکن انہیں شکایت ہے کہ یہ خیمے گرم موسم کے لیے موزوں نہیں۔ اس لیے وہ اور ان کے بچے &quot;سارا دن درختوں کے سائے میں گزارتے ہیں&quot;۔ ان کا یہ بھی کہنا ہے کہ حکومت نے انہیں کھانے پینے کا کوئی سامان فراہم نہیں کیا لہٰذا ان کی &quot;خوارک کا تمام تر بندوبست وہ مقامی لوگ کر رہے ہیں جن کے گھر اونچائی پر ہونے کی وجہ سے سیلاب سے محفوظ رہے ہیں&quot;۔

ایک مقامی غیرسرکاری تنظیم پاک مشن سوسائٹی کا کہنا ہے کہ سیلاب متاثرین کو ہیضے سمیت مختلف بیماریوں سے بچنے کے لیے دواؤں، پینے کے صاف پانی، مچھر دانیوں اور بیت الخلاؤں کی بھی شدید ضرورت ہے لیکن یہ سامان بھی ان تک نہیں پہنچ رہا۔ &nbsp;

کندیا تحصیل کونسل کے چیئرمین انور الحق اس بات کی تصدیق کرتے ہیں کہ سیلاب کے متاثرین کو چند خیموں اور محدود مقدار میں راشن کے علاوہ کچھ نہیں ملا۔ ان کا تو یہاں تک کہنا ہے کہ &quot;جب یہ لوگ ڈپٹی کمشنر کے دفتر میں جا کر وہاں متعین اہل کاروں کو اپنی ضروریات سے آگاہ کرتے ہیں تو انہیں جواب ملتا ہے کہ ہم آپ کی مزید مدد نہیں کر سکتے کیونکہ نہ تو ہمارے پاس کوئی اختیارات ہیں اور نہ ہی کوئی مالی وسائل&quot;۔&nbsp;

اپر کوہستان کے اسسٹنٹ کمشنر اور ضلعے میں قدرتی آفات سے نمٹنے کے لیے متعین کیے گئے آفسر حافظ وقار احمد بھی تسلیم کرتے ہیں کہ سیلاب کے متاثرین کو صرف ایک مرتبہ ہی راشن اور ادویات فراہم کی جا سکی ہیں۔ تاہم ان کا کہنا ہے کہ حکومت انہیں مالی امداد مہیا کرنے کے لیے ایک &quot;سروے کر رہی ہے جو تقریباً مکمل ہونے والا ہے&quot;۔ ان کے مطابق اس سروے کے بعد انہیں پیسے دے دیے جائیں گے تاکہ وہ اپنے مسائل خود حل کر سکیں۔

<h2>ملبے میں دب گئے، کبھی پانی میں بہہ گئے</h2>

اپر کوہستان کے علاوہ اس کے نواح میں واقع لوئر کوہستان، کولئی پلاس اور شانگلہ کے ضلعوں میں بھی درجنوں آبادیاں سیلاب کی تباہی کا شکار ہوئی ہیں۔ پاک مشن سوسائٹی نے اپنی رپورٹ میں ان نقصانات کی تفصیل فراہم کرتے ہوئے لکھا ہے کہ ان اضلاع میں دوہزار 40 کنال زرعی زمین، تین رابطہ پل، صاف پانی کی فراہمی کی چھ سکیمیں اور کئی نجی گاڑیاں شدید متاثر ہوئی ہیں جبکہ سیلابی پانی سو کے لگ بھگ مویشیوں کو بھی بہا لے گیا ہے۔ اسی طرح بہت سی رابطہ سڑکیں بھی ٹوٹ پھوٹ کر ناقابل استعمال ہو گئی ہیں۔

رپورٹ میں اس بات کی نشان دہی بھی کی گئی ہے کہ متاثرہ علاقوں میں صاف پانی اور بجلی دونوں میسر نہیں کیونکہ سیلاب نے پانی کی 24 گزرگاہوں، 11 پن چکیوں اور 21 چھوٹے پن بجلی گھروں کو بھی شدید نقصان پہنچایا ہے۔ ان میں سے ہر پن بجلی گھر کی تعمیر پر چار لاکھ سے پانچ لاکھ روپے خرچہ آیا تھا اور اس سے پیدا ہونے والی ایک سو 50 کلو واٹ بجلی 70 مقامی گھروں کو روشن رکھتی تھی۔ کندیا کے تحصیل دار نجیب اللہ قریشی کے مطابق بیرتی میں واقع لڑکوں کا سرکاری سکول بھی مکمل طور پر سیلاب کی نذر ہو گیا ہے۔

تاہم ان عمارتوں اور تنصیبات کی بحالی تو دور کی بات ہے حکومتی اہل کار ابھی تک کئی متاثرہ دیہات تک پہنچ بھی نہیں سکے۔ اس تاخیر کی وضاحت کرتے ہوئے حافظ وقار احمد کا کہنا ہے کہ اوچار نامی ایک مقامی نالے کا پل سیلاب میں بہہ جانے سے کندیا کا زمینی رابطہ اپر کوہستان کے دوسرے علاقوں سے منقطع ہو گیا تھا جس کی وجہ سے وہاں پھںسے ہوئے لوگوں کو فوری طور پر محفوظ مقامات پر پہنچانا ممکن نہ ہو سکا۔&nbsp;ان کے مطابق &quot;اگرچہ اس نالے پر ایک عارضی پل بنا دیا گیا تھا لیکن وہ بھی 11 اگست کی صبح آنے والے ایک سیلابی ریلے میں بہہ گیا جس کے باعث ابھی بھی امدادی مشینری کئی دیہات تک نہیں پہنچ سکی&quot;۔&nbsp;&nbsp;

<h2>قدرتی آفات کا قدرتی حل</h2>

متاثرین سیلاب کو شکوہ ہے کہ ایسا پہلی دفعہ نہیں ہو رہا بلکہ وہ کہتے ہیں کہ 2010، 2011، 2016 اور 2019 میں آنے والے سیلابوں کے نتیجے میں بھی وہ شدید انفرادی اور اجتماعی نقصانات اٹھا چکے ہیں۔&nbsp;

نجیب اللہ قریشی اس شکوے کو جائز سمجھتے ہیں اور کہتے ہیں کہ اگر اس علاقے میں سیلاب کی پیشگی اطلاع فراہم کرنے کا کوئی انتظام موجود ہوتا تو ان نقصانات سے بہت حد تک بچا جا سکتا تھا۔ ان کے مطابق &quot;اگرچہ صوبائی ڈزاسٹر مینجمنٹ اتھارٹی خطرناک موسمی حالات کے بارے میں وقتاً فوقتاً عمومی اطلاعات جاری کرتی رہتی ہے لیکن ان سے کسی مخصوص علاقے میں سیلاب کے امکانات کے بارے میں کوئی آگاہی نہیں ملتی&quot;۔

تاہم پاکستان ریڈ کریسنٹ سوسائٹی نامی فلاحی تنظیم کے ایک سابق اہل کار جمال فواد حسنین کہتے ہیں کہ ان علاقوں کو سیلاب سے بچانے کا ایک اور طریقہ یہ ہے کہ پہاڑوں سے بہہ کر ندی نالوں میں شامل ہونے والے بارشی پانی کے راستے میں ایسی رکاوٹیں، یا چیک ڈیم، کھڑی کی جائیں جو اس کی رفتار کم کر سکیں۔ وہ قدرتی آفات سے نمٹنے کا 15 سالہ تجربہ رکھتے ہیں اور کہتے ہیں کہ &quot;ایسی رکاوٹوں کے ارد گرد وسیع پیمانے پر درخت لگانے اور ندی نالوں کے ساتھ حفاظتی پشتے تعمیر کرنے سے بھی سیلاب سے ہونے والے نقصانات میں کمی آ سکتی ہے&quot; کیونکہ یہ تدابیر بھی سیلابی پانی کی رفتار کم کرنے میں مدد گار ثابت ہوتی ہیں۔

اسباب سارا لے گیا، آیا تھا اک سیلاب سا: اپر کوہستان میں متاثرینِ سیلاب کے پاس 'نہ تو خوراک اور خیمے ہیں اور نہ ہی ادویات اور علاج کی سہولتیں'۔

جمشید علی شاہ نے 13 اپریل 2018 کو خیبرپختونخوا کے شمالی ڈویژن مالاکنڈ کے کمشنر کی کھلی کچہری میں اپنے ضلعے شانگلہ کے ایگزیکٹو مجسٹریٹ کے خلاف شکایت کی۔ اگلے ہی دن وہ ایگزیکٹو مجسٹریٹ اپنے عملے کو لے کر صبح سویرے اُن کے گھر پہنچ گیا اور اس نے ان کے دروازے کے ساتھ بنی ہوئی سیڑھیوں کو تجاوزات قرار دے کر توڑنے کا حکم دے دیا۔ جب جمشید علی شاہ ںے اس پر احتجاج کیا تو انہیں گرفتار کر کے حوالات میں بند کر دیا گیا۔

یہ واحد واقعہ نہیں جس میں کسی ایگزیکٹو مجسٹریٹ نے اپنے عدالتی اختیارات استعمال کرتے ہوئے کسی شخص کو فی الفور سزا دی ہو۔ بونیر، شانگلہ، سوات، مالاکنڈ، چترال، اپر دِیر، لوئر دِیر اور باجوڑ کے اضلاع پر مشتمل مالاکنڈ ڈویژن میں شہریوں کو ایسی بے شمار شکایات ہیں۔ وہ کہتے ہیں کہ ضلعی انتظامیہ کے اہل کار اپنے عدالتی اختیارات کی بنیاد پر اکثر ان کے بنیادی حقوق پامال کرتے رہتے ہیں۔&nbsp;

یہ اختیارات تحصیل کی سطح پر متعین اسسٹنٹ کمشنروں کو حاصل ہیں تاکہ وہ 94 مختلف قسم کے جرائم میں ملوث لوگوں کو فوری طور پر سزائیں دے سکیں۔ ان جرائم میں امن و امان میں خلل پیدا کرنے، عوام میں اشتعال پھیلانے، جنگلات اور معدنی ذخائر کو نقصان پہنچانے، تجاوزات قائم کرنے، سرکاری عمارات اور تنصیبات کو توڑنے پھوڑنے اور سرکاری اور نجی املاک پر قبضہ کرنے جیسے اقدامات شامل ہیں۔ ان افسران کو حکومت کی طرف سے جاری کردہ لائسنس اور اجازت نامے طلب کرنے اور اشیائے ضرورت کے معیار اور قیمتوں کو قابو میں رکھنے کے لیے دکانوں اور گوداموں پر چھاپے مارنے کے اختیارات بھی حاصل ہوتے ہیں۔ وہ اپنے دائرہ اختیار میں شامل جرائم میں ملوث افراد کو موقع پر ہی تین سال تک قید اور جرمانے کی سزا دے سکتے ہیں۔

شانگلہ کی ضلعی انتظامیہ سے حاصل کردہ اعداد و شمار ظاہر کرتے ہیں کہ یہ افسران پورے مالاکنڈ ڈویژن میں ہر سال ہزاروں مقدمے سنتے ہیں۔ ان اعدادوشمار کے مطابق رواں سال کی پہلی سہ ماہی میں صرف شانگلہ کی پانچ میں سے چار تحصیلوں، الپوری، بشام، پورن اور چکیسر، میں ایگزیکٹو مجسٹریٹوں کے پاس مختلف اقسام کے 14 سو 67 مقدمات آئے جن میں سے ایک ہزار 86 نمٹا دیے گئے جبکہ تین سو 75 ابھی زیر سماعت ہیں۔

<h2>ایک ملک دو نظام</h2>

ایک مقامی مذہبی تنظیم، تحریکِ نفاذِ شریعتِ محمدی، نے 2009 کے شروع میں ضلع سوات کے علاقے مینگورہ میں کئی ہفتے دھرنا دے کر اسلامی نظامِ عدل کے نفاذ کا مطالبہ کیا۔ نتیجتاً حکومت نے پورے مالاکنڈ ڈویژن اور اس سے ملحقہ ضلع کوہستان میں شریعہ نظام عدل ریگولیشن نامی ایک قانون نافذ کر دیا تاکہ تحریکِ نفاذِ شریعتِ محمدی کے مطالبے کے مطابق مقامی آبادی کو فوری اور سستا انصاف مہیا کیا جا سکے۔

تاہم اس قانون پر عمل درآمد کے لیے ضلعی انتظامیہ کو بعض ایسے اختیارات کی ضرورت تھی جو 2001 میں جاری کیے گئے اس صدارتی آرڈی ننس کے ذریعے اس سے لے لیے گئے تھے جس کے تحت پاکستان بھر میں عدلیہ اور انتظامیہ کو ایک دوسرے سے علیحدہ کیا گیا تھا۔ اس لیے 2009 میں مالاکنڈ ڈویژن اور کوہستان کو اس آرڈی ننس کے دائرہ کار سے نکال دیا گیا اور یوں مقامی انتظامیہ کے اہل کاروں کو عدالتی اختیارات مل گئے۔ &nbsp;

لیکن ایگزیکٹو مجسٹریسی کا یہ نظام مقامی لوگوں کی توقعات پر پورا نہیں اترا۔ درحقیقت بیشتر لوگ اب اس سے نالاں دکھائی دیتے ہیں۔ ضلع شانگلہ کی تحصیل بشام میں مقامی مسائل کے حل کے لیے پیش پیش رہنے والے سید وصی شاہ عوامی جذبات کی عکاسی کرتے ہوئے کہتے ہیں کہ اس نظام کے تحت مقدمات کے فیصلے نہ تو اسلامی قانون کے مطابق ہوتے ہیں اور نہ ہی ان سے لوگوں کو انصاف ملتا ہے۔ ان کا کہنا ہے کہ دراصل مقامی لوگوں کے لیے &quot;انصاف کا حصول پہلے سے زیادہ مشکل ہو گیا ہے کیونکہ ایگزیکٹو مجسٹریسی میں مقدمات کے فیصلے کسی نظام کے تابع ہونے کے بجائے فرد واحد کی مرضی پر منحصر ہوتے ہیں&quot;۔&nbsp;

سوات سے تعلق رکھنے والے سینئر قانون دان اور انسانی حقوق کمیشن پاکستان (ایچ آر سی پی) کے کونسل ممبر شیر محمد خان کو بھی اس نظام سے یہی شکایت ہے۔ ان کا کہنا ہے کہ ایگزیکٹو مجسٹریٹ مقدمات کی سماعت کرتے ہوئے نہ تو گواہوں اور وکیلوں پر مبنی &quot;عدالتی طریقہ کار اختیار کرتے ہیں اور نہ ہی فریقین کے دلائل سنتے ہیں&quot;۔&nbsp;

شانگلہ کے علاقہ لیلونئی سے تعلق رکھنے والے 28 سالہ وکیل محمد سفیر خان بھی سمجھتے ہیں کہ &quot;ایگزیکٹو مجسٹریٹوں کے فیصلے عام طور پر یک طرفہ اور غیرمنصفانہ ہوتے ہیں&quot; کیونکہ وہ &quot;ملزموں کا موقف سنے بغیر ہی ان پر جرمانے عائد کر دیتے ہیں&quot;۔ اس رجحان کی مثال دیتے ہوئے وہ کہتے ہیں کہ &quot;جب جنگل سے غیر قانونی طور پر درخت کاٹنے کے الزام میں کسی شخص کو ایک ایگزیکٹو مجسٹریٹ کے سامنے پیش کیا جاتا ہے تو وہ اسے موقع پر ہی جرمانہ کر دیتا ہے اور یہ جاننے کی کوشش بھی نہیں کرتا کہ آیا وہ واقعی اس کام میں ملوث تھا یا نہیں&quot;۔

اس لیے وہ ایگزیکٹو مجسٹریسی کو آئینِ پاکستان میں دیے گئے ان بنیادی حقوق کے منافی قرار دیتے ہیں جو اس بات کی ضمانت دیتے ہیں کہ کسی بھی الزام کا سامنے کرنے والے شہری کا مقدمہ منصفانہ طریقے سے سنا جائے گا۔&nbsp;

<h2>آئین بمقابلہ نظام</h2>

سات سال پہلے سوات سے تعلق رکھنے والے ایک وکیل عدنان خان کی درخواست کی سماعت کرنے کے&nbsp;بعد پشاور ہائی کورٹ کے دو رکنی بنچ نے 24 ستمبر 2015 کو شریعہ نظام عدل ریگولیشن کو آئین سے متصادم قرار دے کر اس کا نفاذ روک دیا تھا۔ اس فیصلے کے نتیجے میں اسسٹنٹ کمشنروں کے پاس زیرالتوا مقدمات بھی مقامی عدالتوں کو منتقل کر دیے گئے تھے۔

لیکن چھ ماہ کے بعد پشاور ہائی کورٹ نے ہی اس فیصلے کو معطل کرتے ہوئے ایگزیکٹو مجسٹریسی کا نظام دوبارہ بحال کر دیا (اگرچہ اس بحالی کے خلاف دی گئی درخواست ابھی بھی سپریم کورٹ میں زیرسماعت ہے)۔

عدنان خان اپنی درخواست میں اٹھائے گئے نکات کا حوالہ دیتے ہوئے کہتے ہیں کہ آئین کی شق نمبر 203 کے تحت ایک صوبے میں کام کرنے والی تمام عدالتیں انتظامی طور پر اس صوبے کی ہائی کورٹ کے ماتحت ہونی چاہئیں لیکن ایگزیکٹو مجسٹریٹ ہائی کورٹ کو جواب دہ ہونے کے بجائے صوبائی انتظامیہ کے تحت کام کرتے ہیں۔ اس لیے وہ سمجھتے ہیں کہ ایگزیکٹو مجسٹریسی آئین کے اس بنیادی تصور سے متصادم ہے جس کی رو سے عدلیہ اور انتظامیہ کو ایک دوسرے سے بالکل الگ ہونا چاہیے۔

ان کا یہ بھی کہنا ہے کہ &quot;ایگزیکٹو مجسٹریٹوں کی طرف سے کیے گئے عدالتی فیصلے انتظامی اور سیاسی اثرات سے مبرا نہیں ہو سکتے&quot; کیونکہ ان کے تقرر، تبادلے اور ترقی کا اختیار حکومت کو حاصل ہوتا ہے جو ان سے اپنی مرضی کے فیصلے لینے کے لیے اُن پر اپنے اختیار ات کا دباؤ ڈال سکتی ہے۔&nbsp;

انہی وجوہات کی بنا پر پشاور ہائی کورٹ مینگورہ بنچ بار ایسوسی ایشن نے جولائی 2022 کے شروع میں پشاور ہائی کورٹ میں ایک درخواست دائر کی جس میں ایگزیکٹو مجسٹریٹوں کو حاصل عدالتی اختیارات کے خاتمے کی استدعا کی گئی ہے۔ ہائی کورٹ نے اسے قبول کرتے ہوئے اس کی سماعت کی ذمہ داری اپنے مینگورہ بنچ کے ججوں جسٹس محمد نعیم انور اور جسٹس محمد اعجاز کو دی ہے جنہوں نے اس پر کارروائی شروع کرنے کے لیے صوبائی اور مرکزی حکومتوں کے متعلقہ حکام کو اپنی عدالت میں طلب کر لیا ہے۔

اعلیٰ عدالتوں میں ججوں کی تقرریاں 'چیف جسٹس آف پاکستان کی ذاتی ترجیحات پر منحصر ہیں'۔

مالاکنڈ ڈویژن کی انتظامیہ کے عدالتی اختیارات کے خلاف عوامی شکایات: 'ایگزیکٹو مجسٹریٹ عموماً یک طرفہ اور غیرمنصفانہ فیصلے کرتے ہیں'۔

water scarcity in gilgit baltistan

محمد ناہر کو اپنی گھریلو ضرورت کا پانی لوگوں سے مانگنا پڑتا ہے۔ ان کا 27 افراد پر مشتمل کنبہ اپنے گاؤں کے قریب واقع ایک قدرتی چشمے سے پانی بھرتا ہے جہاں اس کی باری ہر دو ہفتوں میں ایک بار آتی ہے لیکن اس کی ضروریات اتنی زیادہ ہیں کہ اس کا بھرا ہوا پانی اس کی باری آنے سے بہت پہلے ہی ختم ہو جاتا ہے۔ چنانچہ انہیں اپنے ہمسایوں اور محلے داروں کی منت سماجت کرنا پڑتی ہے کہ وہ انہیں باقی دنوں کے لیے پانی فراہم کریں۔&nbsp;

جواں سال محمد ناہر خیبرپختونخوا کے شمالی ضلع شانگلہ کی تحصیل بشام کے گاؤں لنڈئی جئی میں رہتے ہیں جس کے نواح میں واقع چشمہ روزبروز خشک ہوتا جا رہا ہے۔ اس میں پانی کی کم ہوتی ہوئی مقدار کے باعث گاؤں کا ہر خاندان ہر روز اس میں سے اپنی ضرورت کا پانی نہیں بھر سکتا اس لیے مقامی لوگوں کا کہنا ہے کہ انہوں نے پانی بھرنے کے لیے باریاں مقرر کر رکھی ہیں۔&nbsp;

لیکن پانی کی قلت کا مسئلہ صرف اسی گاؤں کو درپیش نہیں بلکہ شانگلہ کی سات لاکھ سے زیادہ آبادی کا ایک بڑا حصہ اس کا سامنا کر رہا ہے کیونکہ مقامی لوگ اپنی پانی کی ضروریات جن قدرتی ندی نالوں اور چشموں کے ذریعے پوری کرتے ہیں وہ تیزی سے سوکھ رہے ہیں۔ مثال کے طور پر ضلعی صدرمقام الپوری کے مشرق میں آٹھ کلومیٹر کے فاصلے پر واقع شلمانو میاں کلے نامی گاؤں میں 60 سال سے بہتا ہوا قدرتی چشمہ خشک ہو چکا ہے۔

اسی طرح الپوری سے تقریباً 20 کلومیٹر مشرق میں دونئی نامی گاؤں میں چھ سال پہلے ایک درجن سے زیادہ قدرتی چشمے ہوا کرتے تھے جو سارے کے سارے خشک ہو چکے ہیں۔ ساڑھے چار ہزار آبادی پر مشتمل اس گاؤں کے رہنے والے لوگ اب گاڑیوں کے ذریعے کئی کلومیٹر اترائی میں جاتے ہیں اور خان خوَڑ نامی ندی سے پانی بھر کر لاتے ہیں۔

دریائے سندھ کے مغربی کنارے پر واقع قصبے بشام کے قریبی گاؤں وَچ خوَڑ کے رہنے والے فضل معبود کو بھی اپنے علاقے میں پانی کی کمی کی شکایت ہے۔ وہ کہتے ہیں کہ کچھ عرصہ پہلے تک تین قدرتی چشمے پانی کی تمام مقامی ضرورتیں پوری کر رہے تھے لیکن 2015 اور 2021 کے درمیان وہ تینوں خشک ہو چکے ہیں جس سے، ان کے مطابق، ان کے &quot;گاؤں میں 50 کنال زرعی رقبہ بنجر ہو چکا ہے&quot;۔

گاؤں والے اس زمین پر گھریلو استعمال کے لیے سبزیاں کاشت کرتے تھے لیکن فضل معبود کہتے ہیں کہ &quot;اب انہیں یہ سبزیاں بازار سے خریدنا پڑتی ہیں&quot;۔&nbsp;

بشام ہی کے نواحی علاقوں باسی اور پندیاڑ میں بھی بیشتر قدرتی چشموں میں پانی کی مقدار بہت کم ہو گئی ہے جس کے نتیجے میں ان سے پانی بھرنے والے لوگوں کو اپنی باری کا انتظار کرنا پڑتا ہے۔ یہ انتظار کئی پرتشدد تنازعات کا سبب بھی بن چکا ہے۔ الپوری کے تھانیدار فضل الہٰی کے مطابق ان کے زیرِ نگرانی علاقے میں بھی ہر ماہ اس طرح کے کم از کم پانچ تنازعات سامنے آ رہے ہیں۔ &nbsp;

<h2>&#39;دریا سارے سوکھ گئے ہیں&#39;</h2>

شانگلہ کی ضلعی انتظامیہ اور سرکاری خدمات کی فراہمی میں بہتری لانے کے لیے بنائے گئے ادارے، کمیونٹی ڈریون لوکل ڈویلپمنٹ (community driven local development)، کے اہل کاروں کا کہنا ہے کہ اس ضلعے میں قدرتی چشموں کے سوکھنے کا ایک اہم سبب زیرزمین پانی کی سطح میں ہونے والی کمی ہے۔ ان کے مطابق تین سال پہلے بشام سے تقریباً 24 کلومیٹر جنوب مشرق کی جانب واقع کشمیر آباد مانڑئی میرا نامی جگہ پر حکومت نے مقامی آبادی کو پانی مہیا کرنے کے لیے ایک ٹیوب ویل لگایا تھا جس کے لیے ایک سو 85 فٹ گہرا بور کیا گیا تھا۔ لیکن وہ کہتے ہیں کہ یہ ٹیوب ویل اب بے کار ہو چکا ہے کیونکہ زیرِ زمین پانی کی سطح ایک سو 85 فٹ سے بھی نیچے جا چکی ہے۔ اسی طرح الپوری سے 12 کلومیٹر مشرق کی جانب بانڈہ میرا نامی جگہ پر بھی سرکار کی طرف سے تین سو 15 فٹ گہرا بور کر کے ایک ٹیوب ویل لگایا گیا تھا جو کچھ عرصے بعد ہی خشک ہو گیا تھا۔&nbsp;

رواں سال کے آغاز سے پانی کی قلت کا مسئلہ اور بھی شدت اختیار کر گیا ہے کیونکہ موسم سرما میں بارشوں اور برف باری میں تاخیر اور کمی کے باعث پانی کے زیرِ زمین ذخیرے پوری طرح بھر نہیں پائے۔ محکمہ موسمیات کے اعدادوشمار بھی اس بات کی تصدیق کرتے ہیں۔ ان سے ظاہر ہوتا ہے کہ نومبر 2021 &nbsp;میں شانگلہ سمیت خیبرپختونخوا میں صرف 1.6 ملی میٹر بارش ہوئی جو اس مہینے میں ہونے والی اوسط بارش سے 90.8 فیصد کم تھی۔ اسی طرح اپریل 2022 میں اس صوبے میں 15.9 ملی میٹر بارش ہوئی جو اس مہینے میں ہونے والی اوسط بارش سے 78.6 فیصد کم تھی۔&nbsp;

ان منفی موسمی اثرات کے ساتھ ساتھ کچھ علاقوں میں حکومتی ترقیاتی منصوبے بھی پانی کی قلت کا سبب بن رہے ہیں۔ دونئی کی ویلج کونسل کے نومنتخب ناظم نثار احمد اس طرح کے ایک منصوبے کی نشان دہی کرتے ہوئے کہتے ہیں کہ ان کے علاقے میں گیارہ عشاریہ آٹھ میگاواٹ پن بجلی پیدا کرنے کے لیے تعمیر کیا جانے والا کروڑہ ہائیڈروپاور پراجیکٹ مقامی چشموں کے خشک ہونے اور مقامی ندی نالوں میں پانی کی سطح کے گرنے کی ایک اہم وجہ ہے۔

ان کے مطابق مقامی لوگوں نے اس مسئلے کی طرف حکومتی توجہ مبذول کرانے کے لیے کئی مرتبہ احتجاج بھی کیا ہے لیکن سرکاری حکام نے اس پر کوئی توجہ نہیں دی۔&nbsp;

ڈان اخبار میں 25 فروری 2022 کو شائع شدہ ایک خبر ظاہر کرتی ہے کہ صوبائی حکومت کو اس مسئلے کے بارے میں معلوم ہے کیونکہ، اس کے مطابق، وزیرِاعلیٰ خیبرپختونخوا محمود خان نے ایک ایسے منصوبے کے لیے 32 کروڑ روپے کی منظوری دی ہے جس کا جزوی مقصد کروڑہ ہائیڈروپاور پراجیکٹ کی وجہ سے پانی کی کمی کا شکار ہونے والے علاقوں کو ان کی ضرورت کا پانی فراہم کرنا ہے۔ (تاہم نثار احمد اس طرح کے کسی بھی منصوبے کے بارے میں لا علم ہیں اور کہتے ہیں کہ حکومت اس سلسلے میں کچھ بھی نہیں کر رہی۔)&nbsp;

کمیونٹی ڈریون لوکل ڈویلپمنٹ میں کام کرنے والے انجینئر عدنان منیر بھی دعویٰ کرتے ہیں کہ حکومت شانگلہ میں پانی کی قلت سے نہ صرف آگاہ ہے بلکہ اس کے حل کے لیے عملی اقدام بھی اٹھا رہی ہے۔ اس لیے، ان کے مطابق، ان کے ادارے نےحالیہ سالوں میں کئی ایسے منصوبے پایہ تکمیل کو پہنچائے ہیں جن کا مقصد پانی کی کمی کا سامنا کرنے والی آبادیوں کو پائپ لائنوں کے ذریعے قدرتی چشموں کا پانی مہیا کرنا ہے۔ لیکن ساتھ ہی وہ اس بات کو بھی تسلیم کرتے ہیں کہ &quot;بہت سے علاقوں میں چشمے اور ندی نالے خشک ہونے سے یہ منصوبے بے کار ہو چکے ہیں حالانکہ ان میں سے ہر ایک پر پندرہ لاکھ سے پچیس لاکھ روپے خرچ آیا تھا&quot;۔&nbsp;

خیبرپختونخوا کے وزیر محنت و انسانی حقوق شوکت یوسفزئی (جن کا تعلق شانگلہ ہی سے ہے) بھی اسی طرح کا دعویٰ کرتے ہوئے کہتے ہیں کہ اس ضلعے کے جن علاقوں میں قدرتی چشمے خشک ہو چکے ہیں وہاں ٹیوب ویل نصب کیے جا رہے ہیں۔ تاہم جن علاقوں میں یہ ٹیوب ویل لگائے جا رہے ہیں وہاں کی آبادی کو شکایت ہےکہ ابھی تک ان میں سے چند ایک ہی فعال ہوئے ہیں جبکہ باقیوں کی تنصیب بھی ابھی تک مکمل نہیں ہو سکی۔

تھرپارکر میں پانی کی قلت: 'ہم کئی نسلوں سے چیخ رہے ہیں کہ ہمیں پانی چاہیے لیکن حکومت نے کبھی ہماری بات نہیں سنی'۔

پیاسی دھرتی، جلتے سائے: موسمیاتی تبدیلیوں کے باعث کس طرح شانگلہ کے قدرتی ندی نالے اور چشمے تیزی سے سوکھ رہے ہیں۔

آبپاشی کے نظام کی ٹوٹ پھوٹ: شانگلہ میں زرعی زمینیں بنجر ہو رہی ہیں

دشوار راستے، دشوار تر زندگی: شانگلہ کی ندی پر بنے نامکمل پل سے مقامی لوگوں کی نقل و حرکت محدود

Hundreds of farmers in different parts of Swat have been protesting for a month and demanding the government not to use their agricultural land for the construction of Swat Expressway Phase 2

The construction of Swat Expressway Phase 2.

رحمان علی کو خدشہ ہے کہ جلد ہی وہ اپنے روزگار کا واحد ذریعہ کھو بیٹھیں گے۔&nbsp;

وہ ضلع سوات کے صدر مقام مینگورہ کے نواحی قصبے کانجو میں 27 کنال اراضی کاشت کرتے ہیں جس پر گندم اور سبزیاں اگانے کے علاوہ انہوں نے آڑو کے سات سو درخت بھی لگا رکھے ہیں۔ لیکن چند روز پہلے سرکاری اہل کاروں نے ان کی اراضی کے بیچوں بیچ نشانات لگا دیے ہیں کیونکہ یہ ایک مجوزہ منصوبے، سوات ایکسپریس وے فیز ٹو، کے راستے میں آ رہی ہے۔ انہیں ڈر ہے کہ اس سڑک کی تعمیر سے وہ اپنی اراضی سے ہمیشہ کے لیے محروم ہو جائیں گے۔&nbsp;

سوات کے مختلف علاقوں میں سینکڑوں کاشت کاروں کو یہی پریشانی لاحق ہے۔ اس لیے وہ ایک مہینے سے احتجاجی مظاہرے کر رہے ہیں اور حکومت سے مطالبہ کر رہے ہیں کہ وہ سڑک کی تعمیر کے لیے ان کی زرعی زمینیں استعمال نہ کرے۔ ان مظاہروں کی قیادت کرنے والے ایک مقامی سماجی رہنما محمد وکیل کا کہنا ہے کہ &quot;حکومت نے ہمیں بتائے بغیر ہماری ہزاروں کنال اراضی پر نشانات لگا دیے ہیں&quot;۔&nbsp;

وہ 2006 اور 2009 کے درمیان سوات پر ہونے والے مقامی طالبان کے قبضے کا ذکر کرتے ہوئے کہتے ہیں کہ &quot;پہلے ان کی دہشت گردی نے ہمارا روزگار تباہ کیا پھر 2010 میں آنے والے سیلاب نے ہمیں کہیں کا نہ چھوڑا اور اب ایکسپریس وے ہمارے باغات اور زمینیں ہم سے چھیننے والی ہے&quot;۔

اس سڑک کے متوقع متاثرین میں کانجو ہی سے تعلق رکھنے والے محمد الیاس بھی شامل ہیں کیونکہ ان کی 25 کنال تجارتی اور زرعی زمین بھی اس کے مجوزہ راستے میں واقع ہے۔ وہ اپنی طرح کے 67 دیگر زمین مالکان سے مل کر عدالت سے رجوع کرنے کی تیاری کر رہے ہیں تاکہ وہ اپنی فصلوں اور باغات کو سڑک کی زد میں آنے سے بچا سکیں۔

<h2>ایک سڑک، دو نقشے</h2>

سوات ایکسپریس وے (جس کا سرکاری نام ایم-16 موٹروے ہے) اسلام آباد-پشاور موٹروے (ایم-1) سے نوشہرہ کے مقام سے شروع ہوتی ہے۔ اس کے پہلے مرحلے کی تعمیر کا آغاز 2016 میں ہوا اور یہ جون 2019 میں مکمل ہوا- اس میں نوشہرہ کو ایک چار رویہ سڑک کے ذریعے ایک سو 16 کلومیٹر شمال میں واقع لوئر دیر کے قصبے چک درہ سے ملایا گیا۔&nbsp;

دوسرے مرحلے میں اس سڑک کو چک درہ سے 80 کلومیٹر مزید شمال میں واقع ضلع سوات کے قصبے فتح پور تک پہنچایا جائے گا۔ دو سال میں مکمل ہونے والے اس مرحلے کی لاگت کا تخمینہ 58 ارب روپے لگایا گیا ہے جس میں سے 21.6 ارب روپے صرف زمین کی خریداری کے لیے مختص کیے گئے ہیں۔&nbsp;

ایکسپریس وے کی تعمیر کے لیے خیبر پختونخوا ہائی ویز اتھارٹی کی جانب سے تعینات کیے گئے پراجیکٹ ڈائریکٹر برکت اللہ خان کا کہنا ہے کہ دوسرے مرحلے کے لیے مجموعی طور پر سات ہزار سات سو کنال زمین درکار ہے جسے حاصل کرنے کے لیے سڑک کے مجوزہ راستے پر حصول اراضی کے قانون کے سیکشن چار کا اطلاق کر دیا گیا ہے۔ نتیجتاً سوات کی ضلعی انتظامیہ نے ایک طرف تو ان قطعاتِ اراضی کی نشان دہی شروع کر دی ہے جنہیں اس منصوبے کے لیے حاصل کیا جانا ہے اور دوسری طرف انہیں بیچنے پر پابندی لگا دی گئی ہے۔

مقامی انتظامی اہل کاروں کا کہنا ہے کہ اب تک سوات کی چار تحصیلوں، بریکوٹ، کانجو، بابوزے اور کبل، میں ایسی زمینوں کی نشاندہی کا عمل مکمل ہو چکا ہے جبکہ تحصیل مٹہ اور خوازہ خیلہ میں یہ کام ابھی جاری ہے۔ تاہم مقامی کاشت کار کہتے ہیں کہ حکومت آڑو، سیب، سٹرابری اور دیگر پھلوں کی پیداوار کے لیے انتہائی موزوں اس اراضی کو ایکسپریس وے کی زد میں آنے سے بچا سکتی تھی اگر اس کی تعمیر اس کے موجودہ نقشے کے بجائے خیبر پختونخوا کے محکمہ آب پاشی کی طرف سے تین سال پہلے بنائے گئے نقشے کے مطابق کی جاتی۔

محمد وکیل کہتے ہیں کہ اس پرانے نقشے کے مطابق سڑک کا زیادہ تر حصہ دریائے سوات کے ساتھ ساتھ تعمیر کیا جانا تھا۔ اس طرح &quot;زراعت کی اتنی تباہی نہ ہوتی جتنی اب ہونے کا خطرہ ہے&quot; کیونکہ نئے نقشے کے مطابق تو &quot;چک درہ سے لے کر فتح پور تک تمام سڑک ہی زرعی زمینوں کے درمیان سے گزر رہی ہے&quot;۔&nbsp;

ناصر الملک نامی ایک مقامی انجینئر بھی پرانے نقشے کی موجودگی کی توثیق کرتے ہیں۔ان کا کہنا ہے کہ وہ اس سرکاری ٹیم میں شامل تھے جس نے یہ نقشہ مرتب کیا تھا۔ ان کے مطابق اس کے لیے &quot;سروے 2016 میں شروع ہوا تھا لیکن اس کی رپورٹ 2018 میں بنائی گئی تھی&quot;۔&nbsp;

وہ کہتے ہیں یہ نقشہ بنانے والے لوگوں کے لیے سب سے اہم مسئلہ ایکسپریس وے کو دریا میں آنے والی سالانہ طغیانی سے محفوظ رکھنا تھا۔ ان کے بقول اس مسئلے کے حل کے لیے دریا اور سڑک کے درمیان ایسے پشتوں کی تعمیر تجویز کی گئی تھی جن کی موجودگی میں &quot;اگر 2010 جیسا شدید سیلاب بھی آ جاتا تو سڑک کو کوئی نقصان نہ پہنچتا&quot;۔&nbsp;

لیکن ناصر الملک کا یہ بھی کہنا ہے کہ ان پشتوں کی تعمیر سے نہ صرف سڑک کی لاگت میں اضافہ ہو جاتا بلکہ اس کی تعمیر میں دقت بھی پیش آتی۔

برکت اللہ خان کہتے ہیں کہ انہی وجوہات کی بنا پر اب ایکسپریس وے کو دریا سے تقریباً ڈیڑھ کلومیٹر مغرب میں تعمیر کیا جائے گا۔ لیکن وہ کہتے ہیں کہ اس کا نیا نقشہ ابھی حتمی نہیں بلکہ، ان کے بقول، &quot;اگر منصوبے کے لیے حاصل کی جانے والی زمینوں کی نشان دہی مکمل ہونے کے بعد یہ بات سامنے آتی ہے کہ اس سے مقامی زراعت کو بہت زیادہ نقصان پہنچ رہا ہے تو میرے محکمے کو یہ اختیار ہے کہ وہ اِس نقشے میں حسبِ ضرورت تبدیلی کر سکے&quot;۔&nbsp;

وہ زمینوں کے مالکان کو یہ یقین دہانی بھی کراتے ہیں کہ سڑک کے نقشے کو حتمی شکل دینے سے پہلے &quot;ان کی بات پوری طرح سنی جائے گی&quot;۔&nbsp;

سوات کے ڈپٹی کمشنر جنید خان بھی کہتے ہیں کہ انہوں نے خود زمینوں کے مالکان سے ملاقاتیں کی ہیں اور انہیں بتایا ہے کہ سڑک کی تعمیر شروع ہونے سے پہلے ان کی تمام شکایات کو بغور سنا جائے گا۔ ان کا مزید کہنا ہے کہ جلد وہ ایک اجلاس بلائیں گے &quot;جس میں خیبر پختونخوا ہائی ویز اتھارٹی کے حکام، دوسرے متعلقہ محکموں کے افسروں اور زمینوں کے مالکان کو بلایا جائے گا اور ان کے تحفظات دور کرنے کی پوری کوشش کی جائے گی&quot;۔

<h2>زمین کی ملکیت پر تنازعات</h2>

ساحل خان سوات کے مقامی زعما پر مشتمل ایک عوامی جرگے کے ترجمان ہیں۔ ایکسپریس وے کے لیے حصولِ اراضی سے جڑے ایک اور خدشے کی نشان دہی کرتے ہوئے وہ کہتے ہیں کہ جب حکومت لوگوں کو ان سے حاصل کردہ زمینوں کی قیمت ادا کرے گی تو ان کی ملکیت سے متعلق کئی مسائل اٹھ کھڑے ہوں گے۔ اپنی بات کی وضاحت کرتے ہوئے ان کا کہنا ہے کہ &quot;بیشتر مقامی لوگوں نے وراثت میں ملنے والی زمینیں تقسیم تو کر لی ہیں لیکن ان ملکیت ابھی بھی خاندان کے کسی ایک شخص کے پاس ہے&quot;۔ وہ خود ایکسپریس وے کے راستے میں آنے والی ایسی زمین کے مالک ہیں جو خاندانی تقسیم کے نتیجے میں ان کے رشتہ داروں کو مل چکی ہے۔

ماضی قریب میں سوات میں فوجی چھاؤنی کی تعمیر کے لیے مقامی لوگوں سے لی گئی زمین کا ذکر کرتے ہوئے ساحل خان کہتے ہیں کہ اس میں سے بہت سی زمین فوج کو محض اس لیے مفت مل گئی کیونکہ اس کے مالکان اس کی ملکیت اپنے نام منتقل نہیں کرا سکے تھے۔ لہٰذا وہ حکومت سے مطالبہ کرتے ہیں کہ ایکسپریس وے کی زد میں آنے والی تمام زمینوں کا جائزہ لے کر ان کی ملکیت کے انتقال کو یقینی بنایا جائے تاکہ خاندانوں کے اندر اور حکومت اور مقامی لوگوں کے مابین دشمنیوں اور مقدمے بازیوں سے بچا جا سکے۔

ان خدشات پر تبصرہ کرتے ہوئے انسانی حقوق کمیشن آف پاکستان (ایچ آر سی پی) کے کونسل ممبر اور سوات میں کام کرنے والے وکیل شیر محمد خان کہتے ہیں کہ اگر حکومت ایکسپریس وے کے متعلق پائے جانے والے تمام عوامی شکوک و شبہات اور شکایات دور نہیں کرتی تو یہ ایک متنازعہ منصوبہ رہے گا۔ ان کے مطابق &quot;حکومت کی ذمہ داری صرف یہ نہیں کہ وہ منصوبے کے لیے حاصل کردہ زمین کے مالکان کو اس کی قیمت ادا کرے&quot; بلکہ حصولِ اراضی کے قانون کے تحت وہ اس بات کی بھی پابند ہے کہ وہ ان زمینوں سے بے دخل ہونے والے لوگوں کی از سرِ نو بحالی کا بھی انتظام کرے۔ ان کے مطابق قانوناً &quot;یہ بحالی ایسی زمین پر ہونی چاہیے جہاں وہ تمام سہولتیں موجود ہوں جو لوگوں سے لی گئی زمین پر انہیں دستیاب تھیں&quot;۔

گلگت بلتستان میں بجلی گھروں کی تعمیر: اپنے حقوق تسلیم کرانے کے لیے دیہاتیوں کا کامیاب احتجاج۔

سوات ایکسپریس وے کے دوسرے مرحلے کی تعمیر: 'ہم سے ہمارے باغات اور زمینیں چھینی جا رہی ہیں'۔

Three people, including a woman, were killed in Jijal in the Lower Kohistan district of Khyber Pakhtunkhwa. Police and locals say all three were killed in the name of honour.

Three killed on the name of honour in lower Kohistan.

گزشتہ ماہ کی 14 تاریخ کو خیبر پختونخوا کے ضلع لوئر کوہستان کے ایک ہی علاقے جیجال میں ایک عورت سمیت تین افراد کو قتل کر دیا گیا۔ پولیس اور مقامی لوگوں کا کہنا ہے کہ تینوں قتل غیرت کے نام پر کیے گئے۔

مقتولین میں شامل 19 سالہ صفیہ 11 جنوری 2022 کو اپنے گھر سے بھاگ کر قریبی ضلع شانگلہ میں مقیم اپنے جاننے والے لوگوں کے ہاں چلی گئیں۔ اگلے دن یہ لوگ انہیں تحصیل بِشام کے ایک تھانے میں لے گئے جہاں پولیس کو اپنا بیان ریکارڈ کراتے ہوئے انہوں نے کہا کہ انہوں نے اپنا گھر اس لیے چھوڑا ہے کہ ان کی ساس اور شوہر ان پر تشدد کرتے تھے۔&nbsp;

ایک دن بعد پولیس نے صفیہ کو ایک مقامی سیشن جج کے سامنے پیش کیا جس نے پہلے تو حکم دیا کہ انہیں دارالامان بھیجا جائے لیکن جب عدالت میں موجود ان کے والد عمر دراز نے درخواست کی کہ ان کی بیٹی کو ان کے ساتھ جانے کی اجازت دی جائے تو جج نے یہ درخواست قبول کر لی۔

لیکن صفیہ کبھی اپنے والدین کے گھر نہ پہنچ سکیں۔&nbsp;

پولیس کا کہنا ہے کہ جب وہ اپنے والد کے ساتھ جیجال واپس جا رہی تھیں تو راستے میں گھات لگا کر بیٹھے ہوئے ان کے سسرالی رشتہ داروں نے انہیں اغوا کر لیا۔ پولیس کی درج کردہ ایک ابتدائی اطلاعاتی رپورٹ کے مطابق ایک دن بعد ان کے خاوند تاج محمد نے انہیں قتل کر دیا۔&nbsp;

اسی روز جیجال بازار میں 13 سالہ صلاح الدین کو بھی قتل کر دیا گیا۔ اس کے والد شیر محمد کہتے ہیں کہ ان کا آٹھویں جماعت کا طالب علم بیٹا صبح کے وقت سکول جا رہا تھا جب اسے فائرنگ کر کے ہلاک کیا گیا۔ مقامی پولیس کا کہنا ہے کہ یہ قتل بھی تاج محمد نے کیا تھا کیونکہ اسے شک تھا کہ اس کی بیوی صفیہ اور صلاح الدین کے درمیان ناجائز تعلقات تھے۔&nbsp;

اس دن تیسرا قتل ایک مقامی پولیس اہلکار فضل الرحیم کا ہوا۔ وہ صلاح الدین کی جائے قتل سے شواہد اکٹھے کرنے کے بعد واپس تھانے جا رہے تھے کہ محمد حق نامی ایک شخص نے اپنے دیگر ساتھیوں کی مدد سے انہیں قتل کر دیا۔

مقتول اہلکار کے چچا فضل الرحمٰن کا کہنا ہے کہ کچھ عرصہ پہلے ان کے خاندان کا محمد حق کے خاندان کے ساتھ پانی کی ایک سرکاری سکیم کی تنصیب پر جھگڑا ہوا تھا جو کہ اس قتل کی وجہ ہو سکتا ہے۔ تاہم کچھ مقامی لوگوں کا کہنا ہے کہ اس کی حقیقی وجہ فضل الرحیم پر کچھ برس پہلے لگا یہ الزام تھا کہ ان کے محمد حق کی ایک قریبی رشتہ دار خاتون کے ساتھ ناجائز تعلقات تھے۔

لوئر کوہستان کے ڈسٹرکٹ پولیس آفیسر ذوالفقار جدون ان تینوں واقعات کے بارے میں بات کرتے ہوئے کہتے ہیں کہ ان میں مجموعی طور پر چھ افراد کو ملزم نامزد کیا گیا ہے۔ ان کے مطابق &quot;پولیس ان میں سے چار کو گرفتار کر چکی ہے جبکہ محمد حق اور اس کا بیٹا ابھی تک مفرور ہیں&quot;۔&nbsp;

<h2>روایات کے قیدی</h2>

خیبر پختونخوا کے شمال مشرقی پہاڑی علاقے کوہستان کے اضلاع لوئر کوہستان، اپر کوہستان اور کولئی پالس (وسطی کوہستان) میں اُن مردوں اور عورتوں کے قتل کے مقدمات شاذ ہی عدالت تک پہنچتے ہیں جن پر ایک دوسرے سے ناجائز تعلقات کا الزام ہوتا ہے۔ ایسے لوگوں کو مقامی طور پر &#39;چور&#39; کہا جاتا ہے اور مقامی روایات کے مطابق ایک &#39;چور&#39; عورت کے خاندان کو اجازت ہے کہ وہ اُسے قتل کرنے کے بعد اس سے مبینہ طور پر وابستہ &#39;چور&#39; مرد کو بھی مار دے۔&nbsp;

صفیہ اور صلاح الدین کے والدین بھی ان روایات کی پاس داری کر رہے ہیں۔ اس لیے، ذوالفقار جدون کے مطابق، &quot;وہ نہ تو پولیس کو کوئی بیان دینے پر تیار ہیں اور نہ ہی انہوں نے مقتولین کی لاشوں کا پوسٹ مارٹم کرایا ہے&quot;۔&nbsp;

اپر کوہستان سے تعلق رکھنے والے ایک سماجی کارکن، حفیظ الرحمان، کا کہنا ہے کہ &#39;چور&#39; مردوں اور عورتوں سے نمٹنے کا یہ روایتی طریقہ کوہستان کے تمام حصوں میں رائج ہے۔ وہ وسطی کوہستان کی پالس وادی میں 2012 میں پیش آنے والے ایک واقعے کا ذکر کرتے ہوئے کہتے ہیں کہ اس میں اب تک دس افراد قتل کیے جا چکے ہیں جن میں پانچ عورتیں بھی شامل ہیں۔ اس خون ریزی کی ابتدا ایک وڈیو کے منظرِ عام پر آنے سے ہوئی تھی جس میں چند خواتین کو ایک نوجوان کے رقص پر تالیاں بجاتے ہوئے دیکھا جا سکتا ہے۔&nbsp;

مقامی پولیس کی جانب سے اکٹھے کیے گئے اعدادوشمار بھی ظاہر کرتے ہیں کہ پچھلے چند سال میں کوہستان میں اس طرح کے کئی واقعات ہو چکے ہیں۔ ان کے مطابق 2018 سے اب تک صرف لوئر کوہستان ضلع میں 14 مختلف واقعات میں 10 خواتین اور نو مردوں کو &#39;چور&#39; قرار دے کر قتل کیا جا چکا ہے۔ &nbsp;

تاہم حفیظ الرحمان کہتے ہیں کہ حقیقت میں ایسے واقعات کی تعداد اس سے کہیں زیادہ ہو سکتی ہے کیونکہ اس طرح مارے جانے والے اکثر لوگوں کے اہلِ خانہ پولیس یا میڈیا کو کچھ بتاتے ہی نہیں۔

عمر باچا

عمر باچا خیبر پختونخوا کے ضلع شانگلہ سے تعلق رکھنے والے ایک تحقیقاتی صحافی ہیں۔ انسانی حقوق، سماجی مسائل، سیاحت اور معیشیت کے حوالے سے رپورٹنگ میں دلچسپی رکھتے ہیں۔