گوجرانوالا میں شیرانوالا باغ کے قریب ایک سرکاری سکول میں صبح کے اوقات میں معمول کی کلاسیں لگتی ہیں اور سہ پہر کو ٹرانس جینڈر افراد پڑھنے آتے ہیں۔ یہ شہر میں ان لوگوں کے لئے حال ہی میں قائم کیا جانے والا مخصوص سکول ہے۔ یہاں ٹرانس جینڈر افراد کو ہفتے میں تین دن بنیادی تعلیم دی جاتی ہے۔

اس سکول میں پہلے روز پانچ ٹرانس جینڈر طالب علموں نے داخلہ لیا۔ اس سے پہلے لاہور اور ملتان میں بھی ایسے ہی سکول قائم کئے جا چکے ہیں۔ ان سکولوں میں پڑھنے کے لئے ٹرانس جینڈر افراد پر عمر کی کوئی حد مقرر نہیں کی گئی جبکہ یہاں انہیں پڑھانے کے لئے بھی ٹرانس جینڈر اساتذہ کو ہی بھرتی کیا گیا ہے۔

گوجرانوالا کے سکول میں پڑھانے والی ٹرانس جینڈر استاد نیہا چودھری کہتی ہی کہ الگ سکول کھولے جانے سے ٹرانس جینڈر ہراسانی سے بچ کر پرسکون ماحول میں تعلیم حاصل کر سکیں گے۔

&quot;ٹرانس جیںڈر افراد کے لئے یہ سکول کوئی معمولی بات نہیں۔ یہ اقدام انہیں معاشرے کا ذمہ دار شہری تسلیم کرنے کی جانب اہم قدم ثابت ہو گا&quot;۔

فی الوقت نیہا چودھری اس سکول کی واحد استاد ہیں تاہم جلد ہی یہاں ایک اور ٹرانس جینڈر استاد کو تعینات کیا جائے گا جس کے لئے تعلیمی قابلیت کم از کم گریجوایشن اور عمر کی حد 25 سے 45 سال رکھی گئی ہے۔ ٹرانس جینڈر سکولوں میں پڑھانے والے اساتذہ کو 30 ہزار روپے ماہانہ اعزازیہ دیا جاتا ہے۔

2017ء کی مردم شماری کے مطابق گوجرانوالہ ڈویژن میں ٹرانس جینڈر افراد کل تعداد 939 ہے لیکن غیرسرکاری اندازوں کے مطابق اصل تعداد اس سےکہیں زیادہ ہے جو شناختی کارڈ نہ ہونے، ناخواندگی، سماجی رکاوٹوں اور دیگر وجوہات کی بنا پر رجسٹر نہیں ہو سکی۔

گوجرانوالہ کے ڈپٹی کمشنر فیاض موہل بتاتے ہیں کہ حکومت نے ہر ڈویژنل ہیڈکوارٹر میں ٹرانس جینڈر افراد کے لئے مخصوص سکول کھولنےکی پالیسی بنائی ہے۔ ان سکولوں کے لئے خصوصی نصاب تیار کیا گیا ہے اور یہاں پڑھنے والوں کو مفت کتابیں اور یونیفارم اور 75 فیصد حاضری مکمل کرنے والے کو ماہانہ 5 ہزار روپے وظیفہ اور پک اینڈ ڈراپ کی سہولت دی جائے گی۔ ہر کلاس میں 15 طلبہ کو بٹھایا جائے گا۔

گوجرانوالا کے ٹرانس جینڈر سکول میں پہلے روز پڑھنے کے لئے آنے والے طلبہ کا جوش و خروش دیدنی تھا۔ شمع نامی طالب علم کا کہنا تھا کہ اب ٹرانس جینڈر بھیک کی بجائے تعلیم اور روزگار کے طلب گار ہیں۔ انہوں نے اس عزم کا اظہار کیا کہ وہ کسی سے پیچھے نہیں رہیں گے اور پڑھ لکھ کر ملک کا نام روشن کریں گے۔

ایک اور طالب علم بابل نے بتایا کہ ان کے گرو نے انہیں اس سکول میں داخلہ دلوایا ہے اور پڑھنے کے لئے کتابیں حکومت نے مفت فراہم کی ہیں۔ وہ حصول تعلیم کا اپنا خواب پورا ہونے پر حکومت اور انتظامیہ کے شکرگزار ہیں۔&nbsp;

پنجاب یونیورسٹی گوجرانوالا کیمپس کے ڈپٹی رجسٹرار اور سوشیالوجی کے استاد ڈاکٹر ساجد اختر کہتے ہی کہ ٹرانس جینڈر افراد کا سب سے بڑا مسئلہ یہ ہے کہ معاشرہ انہیں قبول نہیں کرتا۔

&quot;مجھے پڑھاتے ہوئے کئی سال ہو گئے ہیں لیکن تاحال کسی طالب علم نے مجھے اپنی زبانی یہ&nbsp; نہیں بتایا کہ وہ ٹرانس جینڈر ہے۔ اس کی وجہ یہ ہے کہ سماجی خوف کے باعث ایسے لوگ اپنی شناخت ظاہر نہیں کرنا چاہتے۔&quot;

ڈاکٹر ساجد کا کہنا ہے کہ عام لوگوں کو آگاہی دینی چاہیے کہ ٹرانسجینڈر افراد بھی انہی جیسے انسان ہیں اور ان کے ساتھ کوئی تفریق نہیں برتی جانی چاہئیے۔

وہ تجویز دیتے ہیں کہ ٹرانس جینڈر افراد کے لئے کالجوں اور یونیورسٹیوں میں سیٹیں مختص ہونی چاہئیں۔ انہیں باعزت روزگار شروع کرنے کے لئے قرضے ملنے چاہئیں اور&nbsp; ٹرانسجینڈر افراد سے نفرت کرنے کے بجائے انہیں معاشرے کا کارآمد فرد بنانے کے لئے کوششیں کی جائیں تو اس سے بہت اچھے نتائج نکلیں گے۔

گفٹ یونیورسٹی گوجرانوالہ میں ڈین آف آرٹس اینڈ سوشل سائنسز اور نفسیات کے استاد ڈاکٹر آسر اجمل سمجھتے ہیں کہ ٹرانسجینڈر افراد کو نوکریاں تلاش کرنے کے بجائے تجارت اور ہنر پر مبنی ذاتی کام کو ترجیح دینی چاہئیے۔مثال کے طور پر ایسے لوگ پلمبنگ یا الیکٹریشن کا ہنر سیکھ کر اپنا کام شروع کر سکتے ہیں۔

ڈاکٹر آسر کا یہ بھی کہنا ہے کہ صنفی تعصب کو ٹرانس جینڈر افراد کی تعلیم کی راہ میں حائل نہیں ہونا چاہئیے اور حکومت کے لئے ضروری ہے کہ وہ ایسے اقدامات کرے جن کی بدولت لوگوں کو ذات اور صنف کی تفریق کے بغیر یکساں مواقع حاصل ہو سکیں۔

خبردار! یہ مردہ ٹرانس جینڈر ہے، اسے اس قبرستان میں دفن نہیں کیا جا سکتا!

گوجرانوالہ کا ٹرانس جینڈر سکول: 'ہمارے لیے یہ کوئی معمولی بات نہیں'

text

گوجرانوالا کی نوشہرہ روڈ پر صغیر شہید پارک میں واٹر فلٹریشن پلانٹ سے پانی بھرنے والے لوگ یہ نہیں جانتے کہ اس پلانٹ کا فلٹر آخری مرتبہ ساڑھے تین سال پہلے تبدیل کیا گیا تھا۔

انتظامیہ نے اس پلانٹ کا فلٹر تبدیل کرنے کے بجائے فلٹر والا سسٹم ختم کر کے ٹونٹیوں میں بورنگ کا پانی براہِ راست جاری کر دیا ہے جسے لوگ فلٹر شدہ پانی سمجھ کر لے جاتے ہیں۔

شہر میں بیشتر فلٹریشن پلانٹ ایسے ہیں جن کے فلٹر آخری مرتبہ جنوری 2020ء میں تبدیل کئے گئے تھے اور اس کے بعد مالی وسائل کی کمی کو جواز بنا کر فلٹر کی تبدیلی کا کام بار بار ملتوی ہوتا رہا۔ اب ایسے تمام پلانٹ لوگوں کو بور کا پانی مہیا کر رہے ہیں۔

ڈسٹرکٹ ہیڈکوارٹر ہسپتال کے سابق میڈیکل سپرنٹنڈنٹ ڈاکٹر فضل الرحمان کہتے ہیں کہ کچھ عرصہ قبل شہر کے مختلف علاقوں میں زیرزمین پانی کا سروے کیا گیا تو اس میں آرسینک، فلورائیڈ اور دیگر دھاتوں اور نمکیات کی بھاری مقدار پائی گئی۔ اگر اس پانی کو فلٹر کئے بغیر پیا جائے تو اس میں شامل یہ اجزا جگر، معدے اور ہڈیوں کی سنگین بیماریوں کا سبب بنتے ہیں۔

عابد رضا گھروں میں استعمال ہونے والے واٹر فلٹر فروخت کرتے ہیں۔ ان کا کہنا ہے کہ شہر بھر کے سرکاری فلٹریشن پلانٹ خستہ حال ہیں اور ان سے بھرا جانے والا پانی بدبودار ہوتا ہے۔ اسی لئے جو لوگ استطاعت رکھتے ہیں وہ گھروں میں اپنے فلٹر لگوا رہے ہیں۔

انہوں نے بتایا: &quot;لیاقت پارک میں نصب پلانٹ میں چھ سو فٹ بور کا پانی مہیا کیا جا رہا ہے لیکن یہ پانی رنگ دار ہے۔ اسی طرح ماڈل ٹاؤں فلٹر کا پانی کثیف اور بدبودار ہے۔ فی الوقت شہر اور گردونواح میں کسی پلانٹ کا پانی صاف نہیں ہے جس کی وجہ یہ ہے کہ کسی بھی پلانٹ پر فلٹر بروقت تبدیل نہیں کئے جاتے۔&quot;

شہر کے مصروف علاقے زیرو پوائنٹ کے قریب رہنے والے دل نواز خان کا کہنا ہے کہ وہ کئی بار میونسپل کارپوریشن کو آگاہ کر چکے ہیں کہ ان کے علاقے کا پلانٹ کام نہیں کر رہا لیکن کارپوریشن کے افسر کہتے ہیں کہ &quot;پلانٹ ٹھیک کرانا ہمارا کام نہیں، آپ واسا سے رابطہ کریں۔&quot;

دل نواز کئی مرتبہ واسا کے دفتر بھی جا چکے ہیں جہاں افسر انہیں کہتے ہیں کہ &quot;فلٹریشن پلانٹ میونسپل کارپوریشن نے لگائے تھے اور ان کی مرمت کرنا بھی اسی کی ذمہ داری ہے۔&quot;

گوجرانوالہ کی ضلعی انتظامیہ کے ترجمان حافظ عبد الوحید کا موقف ہے کہ شہر کے تمام واٹر فلٹریشن پلانٹس کی مرمت اور فلٹرز کی تبدیلی کی ذمہ داری اس وقت واسا کے پاس ہے کیونکہ واسا حکام شہریوں سے فراہمی و نکاسی آب کے بل وصول کرتے ہیں۔

جن چھوٹے اضلاع میں واسا کا ادارہ موجود نہیں وہاں کی میونسپل کارپوریشن فلٹریشن پلانٹس کی مرمت کی ذمہ دار ہوتی ہے۔

انہوں نے بتایا کہ گوجرانوالہ میں واٹر فلٹریشن پلانٹس کے بجلی کے بلوں کی ادائیگی واسا کرتی ہے۔ اس کے علاوہ واسا کے اہلکاروں کی ہی یہ ذمہ داری ہوتی ہے کہ وہ پلانٹس کی صفائی کریں اور اس بات کو یقینی بنائیں کہ وہاں شہریوں کی آمدورفت اور صاف پینے کے پانی کی فراہمی میں کوئی رکاوٹ نہ ہو۔

شہر کے مختلف علاقوں میں نصب فلٹریشن پلانٹ نہ صرف صاف پانی مہیا نہیں کر رہے بلکہ ان میں بہت سے ایسے ہیں جو سرے سے ہی غیرفعال ہو چکے ہیں۔ جی ٹی روڈ پر گورنمنٹ ہائی سکول کے باہر فلٹریشن پلانٹ پر اب نشئیوں کا بسیرا ہے۔ اسی طرح سیٹلائٹ ٹاؤن میں گورنمنٹ گرلز ڈگری کالج کے باہر واقع پلانٹ کی کوئی ٹونٹی سلامت نہیں رہی اور اس کے تھڑے پر آوارہ کتے پائے جاتے ہیں۔

شہر کے مصروف علاقے زیرو پوائنٹ پر نصب فلٹریشن پلانٹ تین سال سے غیرفعال ہے۔ اس پلانٹ پر پانی کی آٹھ میں سے چھ ٹونٹیاں غائب ہیں، ساتویں خراب ہے اور آٹھویں پر فروٹ چاٹ بیچنے والے دکاندار کا قبضہ ہے جس نے اس ٹونٹی کے ساتھ مستقل پائپ لگا رکھا ہے جس کے ذریعے وہ اپنے برتن دھوتا ہے۔

دوسری جانب کنٹونمنٹ اور نجی ہاؤسنگ سوسائٹیوں میں تمام فلٹریشن پلانٹ درست کام کر رہے ہیں۔ کنٹونمنٹ بورڈ کی حدود میں آنے والے علاقے راہوالی میں رہنے والے ذیشان علی بتاتے ہیں کہ ان کے علاقے میں سرکاری عملہ ہر تین ماہ کے بعد فلٹر تبدیل کر دیتا ہے۔

یہی صورتحال گوجرانوالہ کی نجی ہاؤسنگ سوسائیٹیوں کی ہے جہاں رہنے والے لوگوں کو پینے کے پانی سے متعلق کسی پریشانی کا سامنا نہیں اور وہاں جو فلٹریشن پلانٹس لگائے گئے ہیں وہ اچھی حالت میں ہیں۔ 
محکمہ لوکل گورنمنٹ اینڈ کمیونٹی ڈویلپمنٹ نے 2005ء اور پھر 2014ء میں پنجاب کے مختلف اضلاع میں کروڑوں روپے کی لاگت سے فلٹریشن پلانٹ نصب کئے تھے۔ اس سلسلے میں گنجان آباد علاقوں کو ترجیح دی گئی کیونکہ وہاں پینے کے پانی کی ضرورت زیادہ تھی۔

2005ء میں ہر پلانٹ کی تنصیب پر اوسطاً گیارہ لاکھ اور 2014ء میں اوسطاً 23 لاکھ روپے خرچ ہوئے۔ منصوبے کے مطابق فلٹریشن پلانٹس کی مرمت اور فلٹر کی تبدیلی کا کام میونسپل کارپوریشن اور واسا کے ذمے لگایا گیا۔ جن شہروں میں واسا موجود نہیں ہے وہاں میونسپل کارپوریشن کو یہ دونوں ذمہ داریاں سونپی گئیں۔

منصوبے کے مطابق پلانٹ کو چلانے کے لئے تربیت یافتہ عملہ متعین کیا جانا تھا اور ایک فلٹر پلانٹ پر تین ملازم تعینات ہونے تھے لیکن تین پلانٹس پر ایک ملازم کی ڈیوٹی لگائی گئی جسے ضروری تربیت بھی فراہم نہ کی گئی۔

فلٹریشن پلانٹ خراب اور غیرفعال ہونے اور ان کے فلٹر بروقت تبدیل نہ کئے جانے کی بابت جب کمشنر کے دفتر سے پوچھا گیا تو جواب ملا کہ چند روز پہلے حکومت نے صوبے کے تمام اضلاع سے خراب فلٹریشن پلانٹس کے بارے میں رپورٹ مانگی گئی تھی۔

گوجرانوالا ڈویژن کی جانب سے بھیجی گئی رپورٹ کے مطابق ضلع گوجرانوالہ 43 میں سے 25 پلانٹ خراب ہیں اور 18 کام کرر ہے ہیں۔ حکام کا کہنا ہے کہ حکومت کی طرف سے فنڈ جاری ہوتے ہی خراب پلانٹس کی مرمت شروع کر دی جائے گی۔

ترجمان ضلعی انتظامیہ کے مطابق وزیر اعلی پنجاب کی جانب سے واٹر فلٹریشن پلانٹس کی مرمت اور بند پلانٹس کو چالو کرنے کے احکامات حال ہی میں موصول ہوئے ہیں جن پر عمل درآمد کے لیے ضروری کارروائی کی جارہی ہے۔

انہوں نے کہا کہ شہریوں کو بھی چاہیے کہ وہ اپنے اپنے علاقوں میں فلٹریشن پلانٹس کی حفاظت کو یقینی بنائیں اور جہاں کوئی مسئلہ ہو یا فلٹریشن پلانٹ خراب یا ناکارہ ہوچکا ہو اس بارے ڈپٹی کمشنر گوجرانوالہ کو مطلع کریں تاکہ مرمت و بحالی کے بارے میں فوری احکامات جاری کئے جاسکیں۔

پیاس جب بڑھتی ہے تو ڈر لگتا ہے پانی سے: حیدرآباد میں آلودہ پانی کے استعمال سے بیماریوں اور اموات میں اضافہ۔

واسا اور میونسپل کارپوریشن کی تُو تُو میں میں: گوجرانوالہ میں واٹر فلٹریشن پلانٹس کے فلٹر آخری بار کب تبدیل ہوئے تھے؟

گوجرانوالہ کے چاندنی چوک میں دودھ دہی بیچنے والے خالد گجر کو ان دنوں گاہکوں کی تند و تلخ باتیں سننا پڑ رہی ہیں کیونکہ انہوں نے دودھ کی قیمت ڈیڑھ سو روپے سے بڑھا کر دو سو کر دی ہے اور دھی کی دو سو 20۔

خالد کا کہنا ہے کہ پہلے انہیں دودھ 140 روپے فی لٹر ملتا تھا لیکن اب ان کی قیمت خرید ہی 190 روپے فی لٹر ہو گئی ہے۔ &quot;دودھ سپلائی کرنے والوں نے پہلے ہی خبردار کر دیا تھا کہ یکم مئی سے نئی قیمت پر دودھ ملے گا۔ جسے لینا ہے وہ لے اور جسے اعتراض ہے، وہ نہ لے&quot;۔

گوجرانوالہ کی ضلعی انتظامیہ کے ترجمان حافظ عبدالوحید کا کہنا ہے کہ کچھ عرصہ پہلے ڈیری فارم مالکان اور گوالوں کی تنظیم نے دودھ دہی کی قیمتیں بڑھانے کا فیصلہ کیا تھا جس پر انہیں پابند کیا گیا تھا کہ وہ رمضان میں ایسا نہیں کریں گے۔ &quot;اضافے کی بات چیت تو دو ماہ سے چل رہی تھی لیکن تاحال اس بارے کوئی سرکاری اعلامیہ جاری نہیں کیا گیا۔&quot;

دودھ فروخت کرنے والوں نے البتہ انتظامیہ کے حکم نامے کا انتظار نہیں کیا۔

محکمہ لائیو سٹاک کی ایڈیشنل ڈائریکٹر ڈاکٹر صائمہ ارم سید نے لوک سُجاگ کو بتایا کہ ضلع گوجرانوالہ میں گائے بھینسوں کی مجموعی تعداد آٹھ لاکھ کے قریب ہے جبکہ ضلعے میں دودھ کی روزانہ پیداوار ساڑھے&nbsp; 18 لاکھ لیٹر ہے۔ شہر کو کھلا دودھ مضافات میں قائم تقریباً دو ہزار باڑوں سے سپلائی کیا جاتا ہے۔

ثقلین شاہ گوجرانوالہ شہر سے تیس کلو میٹر دور قصبے کوٹ لدھا میں ایک باڑے کے مالک ہیں۔ یہ ان کا وراثتی پیشہ ہے۔ ان کا کہنا ہے کہ ایک سال پہلے جانوروں کی خوراک - ونڈہ - ڈھائی ہزار روپے من تھا جو اب چار ہزار روپے من تک پہنچ چکا ہے۔ بھوسہ پہلے ساڑھے تین ہزار روپے من تھا جو اب ساڑھے چھ ہزار روپے من سے کم پر فروخت نہیں ہو رہا۔ گھاس کی قیمت بھی چار سو روپے سے سات سو روپے من تک پہنچ گئی ہے۔

&quot;آپ خود ہی بتائیں کہ ہم پرانی قیمت پر آپ کو خالص دودھ کیسے دیں؟ اگر ہم قیمتیں نہ بڑھائیں تو گوالے دودھ میں پانی ملانے پر مجبور ہو جائیں گے۔&quot;

ان کے خیال میں ابھی بھی دودھ کی قیمتوں میں اضافہ جانوروں کی خوراک کی قیمتیوں میں اضافے کے تناسب سے نہیں ہوا۔&nbsp;

بلال ناصر چیمہ، ثقلین شاہ سے بالکل متفق ہیں۔ ان کا ڈیری فارم گوجرانوالہ سے 22 کلو میٹر دور قصبہ کلاسکے میں ہے جہاں انہوں نے ولایتی نسل کی پانچ سو گائیں رکھی ہوئی ہیں جو مقامی گایوں سے زیادہ دودھ دیتی ہیں۔

بلال کہتے ہیں کہ ڈیری فارم پر کئی طرح کی مشینیں چلانے کے لئے بجلی کی ضرورت ہوتی ہے جس کے لئے ہم کمرشل یونٹ کے حساب سے بل ادا کرتے ہیں۔ گزشتہ سال کے مقابلے میں اب بجلی کی قیمت دو گنا ہو گئی ہے۔ دودھ کو مارکیٹ تک پہنچانے کے لئے گاڑیاں استعمال ہوتی ہیں جنہیں اب پٹرول کی مد میں پہلے سے زیادہ ادائیگی کرنا پڑتی ہے۔ بیشتر ڈیری فارم ٹھیکے کی زمینوں پر قائم ہیں جن کا فی ایکڑ کرایہ ایک سال میں 50 ہزار روپے سے بڑھ کر ڈیڑھ لاکھ تک جا پہنچا ہے۔

قریبی قصبے راہوالی میں ایک باڑے کے مالک عامر گجر گائے بھینسوں کی خریدوفروخت کا کام بھی کرتے ہیں۔ ان کا کہنا ہے کہ ان دنوں ساہیوال نسل کی گائے کی خوراک کا روزانہ کا خرچہ ایک ہزار روپے جبکہ آسٹریلین اور دوغلی نسل کی گائے کی خوراک کا خرچہ ڈیڑھ روپے تک ہے۔ گائے کی دیکھ بھال اور ملازمین کی تنخواہ یا یومیہ اجرت الگ ہے۔ جب گائے بھینسیں حاملہ ہوتی ہیں تو دو ماہ تک دودھ نہیں دیتیں اور چند سال کے بعد ان کی قیمت بھی کم ہو جاتی ہے۔

انہوں نے لوک سجاگ کو بتایا کہ روزانہ تیس سے چالیس لیٹر دودھ دینے والی آسٹریلین نسل کی گائے کی قیمت ایک سال میں دو لاکھ روپے تک بڑھ چکی ہے۔ اب یہ لگ بھگ ساڑھے آٹھ لاکھ روپے میں مل رہی ہے۔

&quot;دوغلی نسل کی گائے ایک سال قبل ڈھائی سے تین لاکھ روپے میں مل جاتی تھی لیکن اب وہ بھی ساڑھے تین سے چار لاکھ روپے میں فروخت ہوتی ہے۔ یہ تقریباً پچیس کلو دودھ دیتی ہے۔ اسی طرح ساہیوال نسل کی گائے کی قیمت پچاس ہزار روپے اضافے کے بعد اب دو لاکھ ہے اور یہ روزانہ آٹھ لیٹر دودھ دیتی ہے۔ اس کا دودھ گاڑھا ہوتا ہے جس کی وجہ سے کچھ لوگ اسے زیادہ پسند کرتے ہیں&quot;۔

بلال چیمہ کے خیال میں مہنگائی ڈالر کی قیمت میں اضافے کے حساب سے بڑھتی ہے۔ جب ڈالر سو روپے کا تھا تو دودھ 80 روپے کلو تھا، اب ڈالر تین سو کے قریب ہے تو اس کی قیمت ڈھائی سو ہونی چاہئیے۔ &quot;یہ ہماری شرافت ہے کہ ہم اب بھی اسے دو سو پر بیچ رہے ہیں۔&quot;

خالد گجر اور ان جیسے دیگر دکانداروں کا کہنا ہے کہ قیمتیں بڑھنے میں ان کا کوئی ذاتی کردار یا مفاد نہیں ہے۔ اگر دودھ انہیں سستا ملے تو وہ سستا ہی بیچیں گے۔ تاہم شہری اس بات پر نالاں ہیں۔

نعمانیہ روڈ کے وقاص بھٹہ کہتے ہیں کہ اگر دودھ دہی کی قیمتوں میں دس بیس روپے اضافہ کیا جاتا تو بات سمجھ میں آتی۔ لیکن یکدم پچاس سے ساٹھ روپے اضافہ عام آدمی پر ظلم کے مترادف ہے۔

مقامی صنعت کار عمران میر کے مطابق اگرچہ اس بات میں وزن ہے کہ دودھ کی پیداواری لاگت بڑھ گئی ہے جس کی وجہ سے قیمتیں بڑھانا مجبوری تھی لیکن اچانک پچاس روپے کے اضافے میں دودھ فروشوں کی بدنیتی بھی شامل ہے۔

''دودھ فروشوں نے ملکی سیاسی صورتحال کا ناجائز فائدہ اٹھایا ہے۔ چونکہ حکمران سیاسی لڑائی میں مصروف ہیں اور ان کا انتظامی امور پر موثر کنٹرول نہیں ہے، اسی لئے انتظامیہ بھی چوکس نہیں رہی اور دودھ فروشوں نے من مرضی کی قیمتیں مقرر کر لی ہیں۔''

دودھ کی قیمتوں کے اضافے کے حق میں کسان اتحاد نے ایک احتجاجی ریلی نکالی جسے کے رہنماؤں کے ساتھ بات چیت کے بعد گوجرانوالا انتظامیہ نے دس روز میں دودھ کی نئی قیمتوں کے تعین کا وعدہ کیا ہے۔ ریلی کے شرکا نے قیمتوں میں اضافے کے علاوہ کیمیکل ملے دودھ پر پابندی لگانے اور کھاد کی بلیک میں فروخت کے خلاف اقدامات کرنے کے مطالبات بھی کئے تھے۔

کمشنر آفس کا کہنا ہے کہ نئی قیمتوں کے تعین سے قبل ملحقہ اضلاع اور ڈویژنل ہیڈ کوارٹرز میں موجودہ قیمتوں کا جائزہ لیا جائے گا۔

بلال کہتے ہیں کہ مہنگائی ڈالر کی قیمت میں اضافے کے حساب سے بڑھتی ہے۔ جب ڈالر 100 روپے کا تھا تو دودھ 80 روپے کلو تھا، جب ڈالر 150 کا ہوا تو دودھ 120 کا ہو گیا۔ ڈالر 200 کا ہوا تو دودھ 150 میں مل رہا تھا، اب ڈالر 300 کے قریب ہے تو اس کی قیمت 250 ہونی چاہئیے لیکن یہ ہماری شرافت ہے کہ ہم اب بھی اسے 200 پر ہی بیچ رہے ہیں۔

کیلے کی قیمتیں آسمان پر: سندھ میں کیلے کے باغوں پر کیا بیت رہی ہے؟

'اگر قیمت نہ بڑھائیں تو پانی ملانا ضروری ہو جائے گا': دودھ کی پیداواری لاگت میں کتنا اضافہ ہو گیا ہے؟

وسطی پنجاب کے اضلاع میں جہاں گندم کی کٹائی آخری مراحل میں ہے وہیں اسے ذخیرہ کرنے کا سلسلہ بھی جاری ہے۔ انتظامیہ نے حالیہ چند دنوں میں کئی کارروائیوں میں اربوں روپے مالیت کی ذخیرہ شدہ گندم کو ضبط کیا ہے۔

گوجرانوالا ڈویژن میں اب تک مجموعی طور پر 26 ہزار 273 میٹرک ٹن گندم قبضے میں لی جا چکی ہے جس کی قیمت دو ارب 57 کروڑ روپے بنتی ہے۔

گوجرانوالہ، سیالکوٹ، گجرات، منڈی بہاءالدین، حافظ آباد، نارووال اور وزیر آباد میں 280 کارروائیوں میں 461 گاڑیوں اور مختلف گوداموں میں چھپائی اور ذخیرہ کی گئی 25 ہزار 549 میٹرک ٹن گندم محکمہ خوراک جبکہ 724 میٹرک ٹن گندم ضلعی انتظامیہ نے اپنے قبضے میں لی ہے اور ذخیرہ اندوزوں کے خلاف 16 ایف آئی آر بھی درج کرائی گئی ہیں۔

گندم کی ذخیرہ اندوزی کی دو بڑی وجوہات ہیں۔

ذخیرہ اندوز گندم خرید کر اس کی قلت پیدا کرنے کے لئے اسے چھپا دیتے ہیں اور پھر قیمت بڑھنے کا انتظار کرتے رہتے ہیں تاکہ زیادہ سے زیادہ منافع کما سکیں۔

دوسری وجہ گندم کی افغانستان کو سمگلنگ ہے۔ چونکہ ملک سے باہر گندم بھیجنے پر بیوپاریوں کو مقامی مںڈی کے مقابلے میں زیادہ منافع ملتا ہے اس لئے وہ اسے خرید کر مخصوص عرصہ تک گوداموں میں رکھ لیتے ہیں۔

زرعی ماہر عبدالناصر بتاتے ہیں کہ وہ تین دہائیوں سے زرعی سرگرمیوں سے وابستہ ہیں اور انہوں نے کبھی گندم کی اتنی ذخیرہ اندوزی نہیں دیکھی جتنی وہ رواں سال دیکھ رہے ہیں۔ ان کی رائے میں بھی وزیراعظم کی طرف سے گندم کی حالیہ فصل کو &#39;بمپر کراپ&#39; قرار دینے کے دعویٰ کے باوجود بڑے پیمانے پر ذخیرہ اندوزی کی وجہ اس کی آنے والے دنوں میں متوقع سمگلنگ ہے۔

&#39;&#39;ذخیرہ اندوزوں&nbsp; کو یقین ہے کہ گزشتہ سال کی طرح اس برس بھی اوپن مارکیٹ میں گندم کی قیمت بڑھ جائے گی۔ اس وقت پنجاب میں محکمہ خوراک 3900 روپے فی من کے حساب سے گندم لے رہا ہے جبکہ وسطی پنجاب کی منڈیوں میں گندم کا ریٹ 4200 سے 4400 روپے من تک پہنچ گیا ہے اور آنے والے دو مہینوں میں گندم کی قیمت 5500 روپے من سے تجاوز کرنے کا امکان ہے۔&#39;&#39;

وفاقی حکومت کے مطابق رواں سال گندم کی پیداوار دو کروڑ 68 لاکھ ٹن رہے گی جوکہ گزشتہ سال سے چار لاکھ ٹن یعنی 1.6 فیصد زیادہ ہے۔ گزشتہ سال ملک میں گندم کی پیداوار دو کروڑ 64 لاکھ ٹن ہوئی تھی۔

محکمہ خوراک کے افسر سردار احمد علوی کا دعویٰ ہے کہ گندم کی ذخیرہ اندوزی کرنے والوں کے خلاف مربوط کارروائی کی جا رہی ہے جس میں مختلف شہروں کی ضلعی انتظامیہ اور محکمہ خوراک کو خفیہ ایجنسیوں کی معاونت بھی حاصل ہے۔

انہوں نے لوک سُجاگ کو بتایا کہ 16 روز میں سرکاری سطح پر گندم کی خریداری کا 58 فیصد ہدف حاصل کر لیا گیا ہے اور باقی بھی جلد حاصل ہو جائے گا۔

ان کا کہنا ہے کہ گندم کی فی ایکڑ پیداوار میں اضافہ ہوا ہے اور اس مرتبہ فصل بھی اچھی رہی ہے۔ اسی وجہ سے امسال گوجرانوالا ڈویژن کو پچھلے سال کے مقابلے میں تقریباً ڈھائی لاکھ زیادہ بوریاں اکٹھی کرنے کا ہدف دیا گیا ہے۔

وہ تسلیم کرتے ہیں کہ ذخیرہ اندوزی میں اضافہ ہوا ہے لیکن ان کا دعویٰ ہے کہ ذخیرہ اندوزوں کے خلاف موثر کارروائی ہو رہی ہے جس کی وجہ سے سرکاری ہدف پور اکرنے میں کوئی مشکل پیش نہیں آئے گی۔

کامونکی کے زمیندار رانا وقاص کہتے ہیں کہ گندم کی ذخیرہ اندوزی میں ملوث بااثر زمینداروں، سیاستدان اور سرکاری افسروں پر کوئی ہاتھ ڈالنے کی جرات نہیں کرتا۔

وہ الزام عائد کرتے ہیں کہ وسطی پنجاب کے اضلاع میں بااثر لوگوں نے بڑے گودام بنا رکھے ہیں جہاں بڑی مقدار میں گندم ذخیرہ کی جا رہی ہے۔ انتظامیہ کی تمام تر کوششوں اور دعووں کے باوجود ذخیرہ اندوزی زوروشور سے جاری ہے۔

وزیر آباد سے تعلق رکھنے والے زرعی ماہر اقبال چیمہ اس بات کی تصدیق کرتے ہوئے کہتے ہیں کہ ذخیرہ اندوزی محکمہ خوراک اور ضلعی انتظامیہ کے افسروں کی ملی بھگت کے بغیر نہیں ہوسکتی۔

&#39;&#39;جو گندم پکڑی جا رہی ہے اس میں لوگوں کی باہمی عداوتوں کا اہم کردار ہے۔ لوگ انتظامیہ کو اپنے مخالفین کے خلاف ذخیرہ اندوزی کی شکایت کرتے ہیں اور اگر ذخیرہ اندوز عام آدمی ہو تو وہ انتظامیہ کے شکنجے میں آ جاتا ہے۔تاہم اگر کوئی بااثر ہے تو اس کے گودام کی طرف کوئی نہیں آئے گا۔محکمہ خوراک کو صرف چھوٹا زمیندار ہی گندم بیچ رہا ہے۔ آڑھتیوں کی کوشش ہے کہ وہ کچھ مہینے انتظار کے بعد ہی گندم جاری کریں۔&#39;&#39;

عبدالناصر شیخ سمجھتے ہیں کہ پاکستان میں گندم کی قیمت نیچے لانے کا ایک ہی فارمولا ہے کہ اس کی افغانستان کو سمگلنگ روک دی جائے۔ جب ذخیرہ اندوزوں&nbsp; کو یقین ہو جائے گا کہ گندم سمگل نہیں ہوسکتی تو منڈیوں میں گندم کی قیمت سرکاری قیمت یعنی 3900 روپے من سے بھی کم ہو جائے گی۔

محنت کسان کی، ریٹ سرکار کا، منافع آڑھتی کا: 'ذخیرہ کی گئی گندم مارکیٹ میں لا کر اربوں روپے کا اضافی منافع کمایا جاتا ہے'

وسطی پنجاب: ' کبھی گندم کی اتنی ذخیرہ اندوزی نہیں دیکھی جتنی رواں سال دیکھ رہے ہیں'

وسطی پنجاب کے شہر وزیر آباد سے 15 کلو میٹر دور ورپال چٹھہ گاؤں کے سمیع اللہ کا 19 سالہ بیٹا اظہر محمود اپنے دوست غلام عباس کے ساتھ پاکستان سے یورپ جانے کے لیے روانہ ہوا لیکن دونوں دوست زندہ سلامت واپس نہ آ سکے۔ 
دونوں کی میتوں کو پچھلے دنوں ان کے آبائی قبرستانوں میں سپرد خاک کر دیا گیا۔

سمیع اللہ بتاتے ہیں کہ ان کے بیٹے کو عثمان علی نامی ایجنٹ نے کہا تھا کہ وہ اسے ایران کے رستے عراق لے جائے گا جہاں سے بہت سے نوجوان ان دنوں لیبیا جا رہے ہیں جو وہاں سے کشتی کے ذریعے اٹلی پہنچ جائیں گے۔

ایجنٹ نے انہیں عراق تک پہنچانے کے لئے ڈھائی لاکھ روپے مانگے اور کچھ رقم پیشگی وصول کی۔ اظہر کے دوست غلام عباس کو بھی اتنی ہی رقم میں باہر بھجوانے کا معاملہ طے پایا جو علی پور چٹھہ کا رہائشی تھا۔

سمیع اللہ کا کہنا ہے کہ عراق سے آگے لیبیا پہنچانے کا معاملہ اگلا ایجنٹ طے کرتا ہے اور لوگوں کو لیبیا سے کشتی کے ذریعے اٹلی لے جایا جاتا ہے۔ کشتی کا کرایہ کشتی والے ایجنٹ کو ادا کرنا ہوتا ہے۔ اس ایجنٹ نے بتایا تھا کہ ایک فرد کو اٹلی پہنچانے کا مجموعی خرچہ دس سے گیارہ لاکھ روپے تک ہوتا ہے۔

&#39;&#39;پہلے ایجنٹ نے ہمیں کہا کہ وہ لڑکوں کو ایرانی زائرین کی حیثیت سے ویزے لگوا کر دے گا اور پھر ایران سے آگے عراق اور یورپ تک &#39;ڈنکی&#39; لگوائے گا۔ جب ڈھائی تین ماہ تک لڑکوں کی کوئی کال نہ آئی اور&nbsp; نہ ہی یہ پتہ چلا کہ وہ کہاں تک پہنچے ہیں تو اہل خانہ کو تشویش ہوئی اور انہوں نے بار بار ایجنٹ سے رابطے کیے۔ شروع میں تو ایجنٹ ٹال مٹول کرتا رہا تاہم مسلسل اصرار پر اس نے ہمیں بتا دیا کہ دونوں لڑکے اب اس دنیا میں نہیں رہے۔&#39;&#39;

سمیع اللہ نے بتایا کہ جب ایجنٹ سے میتیں واپس منگوانے کا مطالبہ کیا تو اس نے معذوری ظاہر کر دی اور کہا کہ یہ اس کے بس کی بات نہیں۔

&quot;راہوالی کے ایک شخص نے دونوں لڑکوں کی میتیں پاکستان واپس لانے کے لئے ہم سے ساڑھے تین لاکھ روپے لئے اور ایران جا کر میتیں واپس لایا۔&#39;&#39;

اس واقعے میں جاں بحق ہونے والے غلام عباس کے والد محمد اشفاق آٹے کی چکی چلاتے ہیں۔ ان کے تین بیٹے اور دو بیٹیاں ہیں جن میں غلام عباس سب سے بڑا تھا۔

محمد اشفاق نے بتایا کہ ایجنٹ انہی کے علاقے کا ہے جوکہ مبینہ طور پر لڑکوں کو بار بار یورپ کے سہانے خواب دکھاتا اور کہتا تھا کہ پاکستان میں تمہاری زندگی برباد ہو رہی ہے، اصل زندگی تو یورپ میں ہے۔

&quot;غلام عباس نے ایسی باتیں سن کر باہر جانے کی ضد شروع کر دی تھی۔ وہ ہمیں مجبور کرتا اور کہتا کہ میں باہر جاکر اپنے مالی حالات بہتر بنانے کے بعد چھوٹے بھائیوں کو بھی وہیں بلا لوں گا&quot;۔

اشفاق کہتے ہیں کہ وہ&nbsp; بیٹے کے غیر قانونی طور پر ملک سے باہر جانے کے حق میں نہیں تھے لیکن اس کی ضد کے سامنے ہار گئے۔

انہوں نے بتایا کہ جو شخص ایران سے لاشوں کو پاکستان لایا ہے اس کے مطابق عراق میں پہاڑی علاقے میں چڑھائی کے دوران ایک لڑکے کا پاؤں ٹوٹ گیا تھا۔ غلام عباس اور اظہر حسین اس کی مدد کرتے رہے اور اپنے قافلے سے کافی پیچھے رہ گئے۔ پہاڑوں پر آکسیجن کی کمی اور برف باری کے باعث دم گھٹنے سے ان کی موت واقع ہو گئی۔

انہوں نے بتایا کہ لڑکوں کے ڈیتھ سرٹیفکیٹس پر یہی لکھا ہے کہ عراق میں شدید سردی اور برف باری کے باعث ان کی موت واقع ہوئی۔ ان کے جسموں پر تشدد یا گولی کا کوئی نشان نہیں تھا۔

پاکستان میں روزگار کے لئے یورپ جانے کا سلسلہ 70ء کی دہائی میں اس وقت شروع ہوا جب حکومت نے شہریوں کے لیے پاسپورٹ کی سہولت عام کر دی تھی۔ 80 کی دہائی میں روزگار کے لئے بیرون ملک جانے کا رحجان عروج پر پہنچ گیا تھا۔ اس دوران گوجرانوالہ، گجرات ، منڈی بہاءالدین، سیالکوٹ، حافظ آباد اور نارووال سمیت وسطی پنجاب کے اضلاع سے بڑی تعداد میں لوگ قانونی اور غیر قانونی طریقوں سے یورپ پہنچے۔ ان لوگوں نے بیرون ملک کمائی کر کے اپنے آبائی علاقوں میں عالیشان مکان تعمیر کئے اور اپنی خوشحالی کا اظہار کیا۔

انسانی حقوق پر کام کرنے والی قانون دان شکیلہ سلیم رانا کہتی ہیں کہ ان لوگوں کی کامیاب زندگی کو دیکھ کر مقامی نوجوانوں میں بھی اپنی قسمت بدلنے کی خواہش نے جنم لیا جو اس مقصد کے لئے ہر خطرہ مول لینے کو تیار تھے۔ ان کے ساتھ بہت سے ایسے گروہ بھی منظم ہو گئے جو اُن لوگوں کو غیرقانونی طریقے سے باہر بھجوانے کا کام کرنے لگے جن کے لئے قانونی طریقے سے جانا ممکن نہیں تھا۔

&#39;&#39;گزشتہ تین عشروں میں سیکڑوں افراد کے لئے یورپ کا سفرِ معاش سفرِ آخرت ثابت ہوا&nbsp; لیکن بیرون ملک جانے کا جنون اس قدر زیادہ ہے کہ ایجنٹوں کے پاس مغربی ممالک میں جانے کے خواہش مند لوگوں کی کبھی کمی نہیں ہوئی۔&#39;&#39;

انسانی سمگلنگ کی روک تھام وفاقی تحقیقاتی ادارے (ایف آئی اے) کی ذمہ داری ہے جس کے گوجرانوالا اور گجرات میں قائم زونل دفاتر میں ہر ماہ سیکڑوں متاثرین کی درخواستیں آتی ہیں۔

ایف آئی اے قوانین کے ماہر شہروز شبیر چوہان ایڈووکیٹ نے لوک سجاگ کو بتایا کہ انسانی سمگلنگ کی زیادہ سے زیادہ سزا 14 سال قید ہے۔ ریکارڈ کے مطابق پچھلے ایک سال کے عرصے میں گوجرانوالہ اور گجرات کے زونل دفاتر نے انسانی سمگلنگ کے 300 سے زیادہ مقدمات درج کر کے 415 سمگلروں کو گرفتار کیا جن میں 45 مختلف مقدمات میں اشتہاری جبکہ چھ ریڈ بک کے ملزم شامل تھے۔

اس طرح کے کیسوں میں زیادہ تر راضی نامہ ہو جاتا ہے یا ملزم ٹھوس شواہد نہ ہونے یا استغاثہ کی کمزوری کے باعث بچ جاتے ہیں تاہم بعض مقدمات میں ملزموں کو سزائیں بھی ہوئی ہیں۔ پچھلے ایک سال کے دوران گوجرانوالہ اور گجرات کے زون کی عدالتوں میں 55 انسانی سمگلروں کو قید و جرمانے کی سزائیں سنائی گئیں جو ایک ریکارڈ ہے۔&#39;&#39;

ایف آئی اے ہر سال ایک ریڈ بک جاری کرتا ہے جس میں ان انسانی سمگلروں کا ریکارڈ شامل کیا جاتا ہے جن کے خلاف پاکستان سمیت دوسرے ممالک سے سنگین نوعیت کی شکایات موصول ہوئی ہوں۔

ریڈ بک میں اس وقت 115 انتہائی مطلوب انسانی سمگلروں کا ڈیٹا موجود ہے جن میں سے 57 کا تعلق وسطی پنجاب کے اضلاع سے ہے۔ گزشتہ سال ریڈ بک میں شامل صرف 11 انسانی سمگلروں کو ہی گرفتار کیا جا سکا جن میں سے سات کا تعلق پنجاب سے تھا اور چار اسلام آباد کے رہائشی تھے۔

سمیع اللہ کہتے ہیں کہ لڑکوں نے آخری مرتبہ ایران سے پاکستان میں اپنے گھر والوں کے ساتھ فون پر رابطہ کیا تھا۔ دونوں بہت خوش تھے اور بار بار یہ کہہ رہے تھے کہ دعا کریں کہ ہم جلد اپنی منزل پر پہنچ جائیں۔&#39;&#39; 
سمیع اللہ افسردہ لہجے میں کہتے ہیں &#39;&#39;کسے پتہ تھا کہ جسے وہ اپنی منزل کہہ رہے ہیں وہ یورپ نہیں بلکہ موت ہے۔&#39;&#39;

گوجرانوالہ میں ڈبل شاہ ایپ 'آئی ڈی اے' لوگوں کے کروڑوں روپے لوٹ کر غائب

'پہلے اپنے بیٹے کو ملک سے باہر بھجوانے کے لیے ڈھائی لاکھ روپے دئیے، اب اس کی میت وطن واپس منگوانے کے لیے ساڑھے تین لاکھ روپے'

فرخ اقبال دو ہفتے سے مرگی کی دوائی ڈھونڈھ رہے ہیں لیکن شہر کے کسی میڈیکل سٹور پر یہ دوا دستیاب نہیں ہے۔

ان کا تعلق گوجرانوالہ کے علاقے باغبان پورہ سے ہے اور وہ ایک فیکٹری میں کام کرتے ہیں۔ انہیں مرگی کی بیماری ہے اور وہ ایک نجی کلینک سے اپنا علاج کرا رہے ہیں جہاں آنے والے ان جیسے کئی اور مریض بھی پریشان ہیں کیونکہ ان میں کسی کو مرگی کی دوا نہیں مل رہی۔

فرح کا کہنا ہے کہ ڈاکٹروں نے انہیں بتایا ہے کہ کہ اگر بروقت دوا نہ ملی تو ان کی جان کو خطرہ ہو سکتا ہے۔

مرگی کے قومی مرکز&nbsp; کے مطابق ملک میں اس بیماری کے مریضوں کی تعداد 23 لاکھ کے لگ بھگ ہے۔ مرگی کا علاج عام طور پر دوائیوں سے کیا جاتا ہے اور بیشتر مریضوں کو دورے نہیں پڑتے تاہم اچانک ادویات کا استعمال چھوڑ دینا جان لیوا ہو سکتا ہے۔

اس وقت گوجرانوالہ سمیت وسطی پنجاب کے متعدد اضلاع میں مرگی کے علاج میں استعمال ہونے والی ادویات کی شدید قلت ہے۔

ان اضلاع میں شیخوپورہ، سیالکوٹ، نارووال، گجرات، منڈی بہاءالدین، حافظ آباد، وزیر آباد اور قصور شامل ہیں جہاں مرگی کے مریض دوا کے لئے مارے مارے پھر رہے ہیں۔

جن دکانوں پر یہ ادویات موجود ہیں ان کے مالکان لوگوں کی مجبوری سے فائدہ اٹھا کر گراں فروشی کر رہے ہیں۔

ذہنی امراض اور مرگی کے ڈاکٹر دانش ملک نے لوک سُجاگ کو بتایا کہ مرگی کے علاج میں استعمال ہونے والی ادویات (Valporic Acid) اور (Carbamazepine) مارکیٹ سے غائب ہیں۔

انہوں نے بتایا کہ مرگی ایسی بیماری ہے جس میں مریض کو کم از کم چار سال تک دوا کھانا پڑتی ہے۔یہ مدت اس سے بڑھ بھی سکتی ہے اور اگر مرض کی جلد تشخیص ہو جائے تو اس بیماری کا بڑی حد تک علاج ممکن ہوتا ہے۔

&quot;مرگی کی عام ادویات کی قلت پانچ چھ ماہ پہلے شروع ہوگئی تھی اور اب مارکیٹ میں آپ کو مرگی کی کوئی ریگولر دوا نہیں ملے گی۔ مسئلہ یہ کہ ہم اس دوا کا کوئی متبادل نہیں دے سکتے&quot;۔

ڈاکٹر دانش ملک نے بتایا کہ وہ تین ہفتوں سے لگ بھگ 30 ایسے مریضوں کا چیک اپ کر چکے ہیں جو کہ پانچ چھ سال سے مسلسل دوا استعمال کرنے کی وجہ سے صحت مند زندگی گزار رہے تھے اور اب دوا نہ ملنے کی وجہ سے انہیں دوباہ دورے پڑنا شروع ہوگئے ہیں۔

انہوں نے بتایا کہ طبی تحقیق کرنے والے اداروں کی رپورٹ کے مطابق پاکستان کی ایک فیصد آبادی اس بیماری میں مبتلا ہے۔

&#39;&#39;یعنی اگر کسی شہر کی آبادی 20 لاکھ ہے تو اس میں مرگی کے 20 ہزار مریض ہوسکتے ہیں اور یہ کوئی معمولی تعداد نہیں ہے۔ مر گی کی ریگولر ادویات دوسری دواؤں کی نسبت سستی اور باآسانی دستیاب رہی ہیں۔ لیکن اب ان کی قلت کے باعث جو ادویات ہمیں مجبوراً لکھنا پڑ رہی ہیں وہ کافی مہنگی ہیں اور ان کا اثر بھی ویسا نہیں ہوتا ہے۔ کئی مریض کچھ روز یہ متبادل ادویات استعمال کرکے چھوڑ دیتے ہیں اور اس کے فوری بعد ان کی حالت نازک ہو جاتی ہے&quot;۔

ڈاکٹر ہما رشید لاہور کی یونیورسٹی آف ویٹرنری اینڈ اینیمل سائنسز میں فارما سیوٹیکل ریسرچر کی حیثیت سے کام کرتی ہیں۔ انہوں نے بتایا کہ مرگی کی ادویات ہمیشہ سے عالمی ادارہ صحت کی ضروری ادویہ والی فہرست میں شامل رہی ہیں۔ دنیا بھر میں ان کی تیاری اور ترسیل کو ممکن بنایا جاتا ہے۔ ایسی ادویات کی قلت تمام متعلقہ اداروں کی کارکردگی پر سوال ہے۔

ڈاکٹر ہما نے بتایا کہ مرگی کے علاج میں سب سے بڑا مسئلہ تسلسل کا ہے یعنی مریض دوا کی ایک خوراک بھی چھوڑ نہیں سکتا۔ اگر دوا چھوڑ کر دوبارہ شروع کی جائے تو اکثر صورتوں میں اس کا اثر نہیں ہوتا۔ ایسی صورت میں دیگر دوائیں بھی ساتھ شامل کرنا پڑتی ہیں جو نہ صرف مہنگی ہو سکتی ہیں بلکہ ان کی اثر پذیری کے بارے میں یقین سے کچھ نہیں کہا جا سکتا۔

ڈاکٹر ہما کے مطابق اگر متبادل ادویات اثر نہ کریں تو مرگی کے مریض کو دیگر دماغی بیماریاں بھی گھیر لیتی ہیں اور اس کا مرض پیچیدہ ہو جاتا ہے۔

پاکستان میڈیکل ایسوسی ایشن گوجرانوالہ کے صدر ڈاکٹر سجاد مصطفیٰ مرگی کی دواؤں کی قلت کو &quot;ڈرگ مافیا&quot; کی کارروائی قرار دیتے ہوئے حکومت سے فوری کارروائی کا مطالبہ کرتے ہیں۔

&quot;مرگی کے 95 فیصد مریض غریب یا سفید پوش ہوتے ہیں۔ ادویات میسر نہ ہونے سے ہسپتالوں کی ایمرجنسی میں روزانہ اس بیماری کے کئی سیریس مریض رپورٹ ہو رہے ہیں۔&#39;&#39;

مرگی کی ادویات کی قلت کے حوالے سے لوک سُجاگ نے شہر کے مختلف میڈیکل سٹورز کا وزٹ کیا تو لگ بھگ تمام دکانداروں کا یہی کہنا تھا کہ &quot;مرگی کے علاج استعمال ہونے والی دو ادویات (Valporic Acid) اور (Carbamazepine)کمپنی کی طرف سے ہی نہیں آ رہیں۔&#39;&#39;

انہوں نے تسلیم کیا کہ ان دونوں ادویات کی مارکیٹ میں قلت ہو گئی ہے اور سٹورز پر جو ادویات پہلے سے موجود تھیں وہ اب ختم ہو چکی ہیں۔

منیر چوک میں فارمیسی چلانے والے اظہر حسین نے لوک سُجاگ کو بتایا کہ وہ کئی مرتبہ کمپنی کو ادویات کی ترسیل بارے میں کہہ چکے ہیں۔ اسی کمپنی کی تیار کردہ دوسری ادویات تو باقاعدگی سے آرہی ہیں لیکن مرگی کی دونوں ادویات کی سپلائی پہلے کم کر دی گئی تھی جو اب کچھ عرصہ سے مکمل طور پر بند ہے۔

محمد اقبال نامی مریض نے لوک سُجاگ کو بتایا کہ وہ پہلے جس دوا کا استعمال کرتے تھے وہ 15 سے 20 روپے روزانہ میں پڑتی تھی اور اب نئی دوا پر روزانہ 300 روپے خرچ ہوتے ہیں۔ وہ سوال کرتے ہیں کہ جن غریبوں کے گھروں میں کھانے کو آٹا نہ ہو وہ تین سو روپے کی دوا کہاں سے خریدیں گے؟

&quot;میں اپنے بیوی بچوں کو کہہ چکا ہوں کہ اگر مجھے مرگی کے باعث کچھ ہوگیا تو انہوں نے حکمرانوں کے خلاف مقدمہ درج کروانا ہے کیونکہ صحت کی سہولیات دینا حکومت کی ذمہ داری ہے اور اگر دوائی نہیں مل رہی تو یہ بھی حکومت کی نالائقی ہے۔ کیا حکمرانوں کو علم نہیں کہ ہر شہر میں ہزاروں مریض ادویات نہ ملنے کے باعث ذلیل و خوار ہورہے ہیں؟&quot;

شہر کے بیشتر سرکاری ہسپتالوں میں بھی مرگی کے مرض کی یہ دوائیں موجود نہیں ہیں۔

تحصیل ہیڈ کوارٹر ہسپتال کامونکی کے سٹور انچارج نے بتایا کہ سرکاری ہسپتال میں میڈیکل سپرنٹنڈنٹ کی طرف سے ڈسٹرکٹ ہیلتھ اتھارٹی کو ختم ہو جانے والی ادویات کی فہرست بھجوائی جاتی ہے۔ مرگی کی دواؤں کے بارے میں بھی انہیں آگاہ کیا جا چکا ہے کہ یہ دوائیں ختم ہو گئی ہیں لیکن دو تین مرتبہ یاد دہانی کے باوجود ادویات سپلائی نہیں کی گئیں۔

انہوں نے بتایا کہ فی الوقت صرف سول ہسپتال گوجرانوالہ اور پاک آرمی کے زیر انتظام چلنے والے سی ایم ایچ میں ہی مرگی کی دوائیں دستیاب ہیں۔

&nbsp;سول ہسپتال میں سال بھر کی ضرورت کی دوائیں اکٹھی خرید لی جاتی ہیں اور اب قلت ہو جانے پر صرف انہی مریضوں کو یہ ادویات مل رہی ہیں جو پہلے سے سول ہسپتال میں رجسٹرڈ ہیں اور ادویات لے رہے ہیں۔

جہاں تک سی ایم ایچ کا معاملہ ہے تو ہر مریض کی اس ہسپتال تک رسائی نہیں ہے اور وہاں رجسٹرڈ مریضوں کو بھی اب دس روز سے زیادہ عرصہ کی دوا نہیں مل رہی۔

ڈسٹرکٹ ہیلتھ افسر ڈاکٹر فریحہ اکرم نے لوک سُجاگ کو بتایا کہ مرگی کی ادویات پاکستان ہی کی دو کمپنیاں تیار کرتی ہیں جنہوں نے ایک غیر ملکی کمپنی سے ان ادویات کی تیاری کے حقوق حاصل کر رکھے ہیں۔ پاکستان سائیکاٹرسٹ سوسائٹی اور پی ایم اے کی طرف سے ڈرگ ریگولیٹری اتھارٹی آف پاکستان کو اس بارے میں تحریری اطلاع دے دی گئی ہے اور امید ہے کہ مرگی کی سستی ادویات کی قلت کا مسئلہ جلد حل ہو جائے گا۔

ڈرگ ریگولیٹری اتھارٹی (ڈریپ) میں ادویات کی قلت سے متعلق فوکل پرسن ایوب نوید تصدیق کرتے ہیں کہ مرگی کے علاج میں عام استعمال ہونے والی دوا Valporic Acid اور Carbamazpine مارکیٹ میں نایاب ہیں۔

وہ ان دواؤں کی قلت کا سب سے بڑا سبب ڈالر کی قیمت میں اضافے کو ٹھہراتے ہیں۔ ان کا کہنا ہے کہ روپے کی قیمت میں کمی کی وجہ سے خام مال کی قیمت بڑھ گئی ہے۔ انہوں نے بتایا کہ حکومت کو مذکورہ ادویات کی قیمتوں میں اضافے کی سمری بھیجی جا چکی ہے۔ تاہم وہ یقین سے کچھ نہیں کہہ سکتے کہ مرگی کی دوائیں کب دستیاب ہوں گی۔

''دوا نہ ملی تو ہمارے بچوں کے چہرے داغ دار ہو جائیں گے''

ڈرگ مافیا یا حکومتی کوتاہی: وسطی پنجاب میں مرگی کے مریض دوا کے لیے خوار

پنجاب میں گندم کی سرکاری قیمت ملکی تاریخ کی بلند ترین سطح پر پہنچنے کے باوجود بعض کسان اور آڑھتی سرکار کو گندم دینے کے بجائے اسے منڈیوں میں بیچنا چاہتے ہیں۔

رواں سال پنجاب میں گندم کی سرکاری قیمت 3900 روپے فی من مقرر کی گئی ہے جبکہ گزشتہ سال یہ قیمت 2300 روپے فی من تھی۔ یوں گندم کی قیمت میں 1600 روپے فی من کا ریکارڈ اضافہ ہوا ہے۔ ماضی میں کبھی یکمشت اتنا زیادہ اضافہ دیکھنے میں نہیں آیا۔

ایسے میں سوال یہ پیدا ہوتا ہے کہ آخر وہ کون سی وجوہات ہیں کہ سرکاری قیمت بڑھنے کے باوجود بھی سرکار کو گندم بیچنا کسانوں کی ترجیحات میں شامل نہیں؟

پنجاب کے سیکرٹری خوراک محمد زمان وٹو نے کہا ہے کہ اس سال گندم کی فی ایکڑ پیداوار خراب موسمی حالات کے باوجود بہت اچھی ہے اور پچھلے سال کی نسبت فی ایکڑ اوسطاً پانچ سے دس من تک زیادہ گندم حاصل ہو رہی ہے۔ حکومت نے امدادی قیمت میں اضافہ گندم پر کسانوں کی پیداواری لاگت بڑھنے کے پیش نظر کیا ہے۔

سرکاری قیمت کے برعکس وسطی پنجاب کے متعدد اضلاع کی منڈیوں میں گندم کی قیمت 4200 روپے فی من ہے اور 300 روپے کا یہ بڑا فرق کسانوں کو منڈیوں کی طرف لے جارہا ہے۔

دوسری طرف اگر مارکیٹ کا دورہ کریں تو اندازہ ہوگا کہ گندم اور اس سے بنی اشیا کی قیمتوں نے تمام سابقہ ریکارڈ توڑ دئیے ہیں۔

آج ایک کلو گندم کی قیمت 108 سے 110 روپے، آٹے کی فی کلو قیمت 135 سے 145 روپے، 15 کلو آٹے کے تھیلے کی قیمت دوہزار سے زیادہ اور&nbsp; منڈیوں میں گندم کی فی من قیمت 4200 روپے سے زیادہ ہوچکی ہے۔ روٹی 20 روپے اور نان 30 روپے میں فروخت ہو رہا ہے۔

گندم کی قیمت میں اتار چڑھاؤ پر نظر رکھنے والوں کا کہنا ہے کہ اس وقت اجناس کا کاروبار دوسرے کاموں کی نسبت زیادہ منافع بخش بن چکا ہے اور آنے والے مہینوں میں گندم کی قیمتوں میں مزید اضافہ ہو گا۔

فلور ملز ایسوسی ایشن کے صدر گوہر عباس کا کہنا ہے کہ&nbsp; گندم کی قیمتوں میں اضافے اور ذخیرہ اندوزی کا فلور ملوں سے کوئی لینا دینا نہیں ہے۔

انہوں نے کہا کہ گندم کی بڑی مقدار غیر قانونی طور پر بلوچستان، خیبرپختونخوا اور سندھ کے سرحدی علاقوں میں ذخیرہ کی جاتی ہے جو موقع پاکر وہیں سے افغانستان سمگل کردی جاتی ہے۔

&quot;جب مارکیٹ میں آٹے کی قلت ہو تو ذخیرہ کی گئی گندم مارکیٹ میں لاکر اربوں روپے کا اضافی منافع کمایا جاتا ہے&quot;۔

انہوں نے بتایا کہ رواں سال ملک کی 24 کروڑ سے زیادہ آبادی کے لیے ساڑھے تین کروڑ میٹرک ٹن سے زیادہ گندم درکار ہو گی جبکہ گندم کی پیداوار کا تخمینہ دو کروڑ 80 لاکھ میٹرک ٹن کے لگ بھگ ہے۔ اس طرح رواں سال بھی پاکستان کو&nbsp; 45 لاکھ میٹرک ٹن گندم کی کمی کا سامنا رہے گا۔

گوجرانوالا کے زمیندار لطیف رندھاوا کہتے ہیں کہ اس صورتحال میں آڑھتی یا مڈل مین ہی اصل فائدہ اٹھا رہا ہے۔

انہوں نے بتایا کہ فصل کی تیاری کے مرحلے میں ہی آڑھتیوں نے بہت سے کسانوں سے ان کی فصل کا سودا کرلیا تھا اور انہیں بیج، کھاد، ڈیزل اور زرعی ادویات وغیرہ کی مد میں پیشگی بھاری رقوم تھما دی تھیں۔

&quot;ایسے میں کسان مجبور ہیں کہ اپنی فصل اسی آڑھتی کو دیں گے جس کے ساتھ انہوں نے فصل کا سودا کر رکھا ہے اور اس سے پیسے بھی وصول کر لئے ہیں&quot;۔

انہوں نے بتایا کہ آڑھتیوں کو اندازہ تھا کہ اس سال بھی گندم کے ریٹ بڑھیں گے کیونکہ گزشتہ دو تین سال سے اوپن مارکیٹ میں گندم کی قیمتیں تیز رہیں اور رواں سال منافعے کی شرح بھی گزشتہ سالوں سے زیادہ ہو گی۔

&quot;اب یہی آڑھتی گندم کو گوداموں میں ذخیرہ رہے ہیں۔ ان کا خیال ہے کہ اب گندم بیچی تو منافع سیکڑوں روپے میں ہو گا جبکہ چند ماہ روک کر سال کے آخری مہینوں میں بیچنے سے فی من ہزاروں روپے نفع ہو گا۔&#39;&#39;

لطیف کہتے ہیں کہ زیادہ منافعے کا لالچ ہی نجی گوداموں کو بھر رہا ہے اور سرکاری گوداموں میں گزشتہ سالوں جتنی گندم دیکھنے کو نہیں مل رہی۔

پنجاب حکومت نے اعلان کیا ہے کہ رواں سال گندم کی خریداری کے ہدف میں 15 لاکھ ٹن کا اضافہ کر دیا گیا ہے اور اب حکومت 50 کے بجائے 65 لاکھ ٹن گندم خریدے گی۔

نوشہرہ ورکاں کے کاشتکار محمد افضل گجر کو منڈیوں میں گندم کی قیمتیں کم یا زیادہ ہونے سے کوئی دلچسپی نہیں۔ وہ دس ایکڑ زرعی زمین کے مالک ہیں جو انہیں والد کی وراثت میں سے ملی تھی اور وہ خود کھیتی باڑی کرتے ہیں۔ 
افضل گجر اپنی فصل ایک آڑھتی کے ہاتھوں فروخت کر چکے ہیں۔ انہوں نے بتایا کہ آڑھتی ان کی مجبوری بن چکے ہیں۔

&quot;اگر آڑھتی نہ ہوں تو ہمارے لیے کھیتی باڑی کرنا مشکل ہو جائے۔ بیج،کھاد اور زرعی ادویات کی قیمتیں ایک سال میں 70 سے 100 فیصد تک بڑھ چکی ہیں۔ ڈیزل اور بجلی کے ریٹ بھی بڑھے&nbsp; ہیں۔ کھیتی باڑی اب سستی نہیں رہی۔ کسان کہاں سے نقد پیسے لائے؟&quot;

انہوں نے بتایا کہ وہ فصل کی نصف قیمت تین اقساط میں آڑھتی سے وصول کر کے فصل پر ہی خرچ کرچکے ہیں۔ باقی نصف قیمت کٹائی ہونے اور گندم کی سپلائی پر ادا کی جائے گی۔

&quot;آڑھتی چاہے تو سرکار کو 3900 روپے من کے ریٹ پر گندم بیچے اور چاہے تو منڈیوں میں 4200 روپے من پر فروخت کرے۔ اس نے بھی تو کچھ نہ کچھ منافع کمانا ہے ناں؟&quot;

شرافت علی گجر نوشہرہ ورکاں میں 22 ایکڑ زرعی زمین کے مالک ہیں۔ وہ محکمہ خوراک کو ہی گندم فروخت کر رہے ہیں۔ ان کے ساتھ بھی آڑھتیوں نے رابطہ کیا تھا لیکن انہوں نے سب کو ناں کردی ہے۔

&quot;سرکار اور آڑھتی کے درمیان فرق کچھ زیادہ فرق نہیں۔ صرف ایڈوانس کا چکر ہے جس میں ہمارے کسان بھائی پھنس جاتے ہیں اور اپنی حق حلال کی کمائی گندم کو کم قیمت پر آڑھتیوں کو بیچ دیتے ہیں&quot;۔

انہوں نے کہا کہ اس سال آڑھتیوں نے بہت سے کسانوں سے 3300 سے 3500 روپے فی من کے حساب سے گندم خریدی اور انہیں ایڈوانس رقم ادا کرکے سٹامپ پیپر لکھوا لیے۔ اب یہ کسان آڑھتیوں کو گندم دینے پر مجبور ہیں۔

کسان پیشگی رقم لے چکا ہے اور اگر آڑھتی اس گندم کو دو چار ماہ بعد بیچے گا تو ایک ہزار سے بارہ سو روپے فی من منافع کمائے گا۔ اتنا منافع گندم کو اگانے والا کسان نہیں کما رہا جتنا یہ مڈل مین اپنے گھر لے جائے گا&quot;۔

انہوں نے کہا کہ اس میں قصور صوبائی حکومت کا بھی ہے۔ اگر وہ دسمبر یا جنوری میں گندم کی امدادی قیمت کا اعلان کردے تو ہوسکتا ہے کہ کسان، آڑھتی کے جھانسے میں نہ آئے اور اپنی گندم کا کم قیمت پر سودا نہ کرے۔

شرافت بتاتے ہیں کہ حکومت نے گندم کی امدادی قیمت کا اعلان کچھ ہفتے پہلے کیا ہے جب گندم کی کٹائی شروع ہونے والی تھی۔

<h2>&#39;&#39;ہم منافع کیوں نہ کمائیں&#39;&#39;</h2>

قلعہ دیدار سنگھ کے آڑھتی رانا وہاب کا کہنا ہے کہ آڑھتی دراصل سرمایہ دار ہیں جو اجناس میں سرمایہ کاری کرتے ہیں۔ انہیں مڈل مین کہہ کر یوں پیش کیا جاتا ہے جیسے وہ مجرم ہوں۔

&quot;اگر ہم غریب کاشتکاروں کو ایڈوانس نہ دیں تو وہ فصلیں ہی کاشت نہ کر پائیں۔ پھر انہیں گندم اور مونجی کے بجائے عام سبزیاں اگانا پڑیں گی جس سے نہ تو ان کو آمدنی ہو گی اور نہ ہی حکومت کے اہداف پورے ہوں گے&quot;۔

وہ کہتے ہیں کہ آڑھت ایک ملک گیر نظام ہے۔ منافع حاصل کرنا ہر سرمایہ دار کا بنیادی حق ہوتا ہے۔ وہ سوال کرتے ہیں کہ صنعتکار اور تاجر کسی منافعے کے بغیر کاروبار نہیں کرتے تو ہم ایسا کیوں کریں؟

انہوں نے بتایا کہ گزشتہ دو تین سال میں نومبر سے مارچ تک گندم مہنگی قیمت پر فروخت ہوئی۔ اس لیے جو آڑھتی رقم کو چھ آٹھ ماہ تک روکے رکھنے کی مالی استطاعت رکھتا ہے وہ اس سال بھی زیادہ منافع کمائے گا۔

گندم کی نئی فصل سندھ کو ایک نئے غذائی بحران کے دہانے پر لے آئی ہے؟ سات اہم باتیں

'ان لائن ایپ' IDA: لوگوں کے کروڑوں روپے لوٹ کر غائب

video

وسطی پنجاب کے بیشتر کاشتکاروں کی طرح قمر الزماں بھی پریشان ہیں کہ اس سال وہ گندم کی کاشت پر اٹھنے والے اخراجات کس طرح پورے کر پائیں گے؟ &nbsp;

قمر الزماں وسطی پنجاب کے ضلع گوجرانوالہ کی تحصیل نوشہرہ ورکاں کے رہائشی ہیں جوکہ 22 ایکڑ زرعی زمین کے مالک ہیں ، یہ زمین انہیں اپنے والد کی وراثت میں سے ملی تھی۔

قمر الزماں کا کہنا ہے کہ حالیہ بارشوں سے ان کی 22 میں سے لگ بھگ 10 ایکڑ زمین پر کاشت گندم بری طرح متاثر ہوئی ہے اور اسی میں سے ان کا منافع تھا جوکہ شاید اب انہیں حاصل نہ ہوسکے گا۔

&quot;باقی بارہ ایکڑ رقبہ سے جو گندم حاصل ہوگی اس سے تو وہ لاگت بھی پوری نہ ہوسکے گی جوکہ گندم کی کاشت پر آئی تھی&quot;۔

اس سے ملتی جلتی داستان صہیب احمد کی بھی ہے جوکہ قصبہ کوٹ لدھا کے رہائشی ہیں اور ان کی خواہش تھی کہ گندم کی فصل سے جو آمدن ہوگی اس سے وہ اپنی بہن کے ہاتھ پیلے کریں گے لیکن قدرت کو شاید کچھ اور ہی منظور تھا۔

صہیب احمد 30 ایکڑ رقبہ کے مالک ہیں ، ان کا کہنا ہے کہ 20 مارچ سے پہلے موسم کی صورتحال کچھ اور تھی اور امید تھی کہ اس سال سِٹہ مضبوط ہوگا اور پیداوار بھی اچھی ہوگی۔

&quot;جب بارشیں شروع ہوئیں تو پھر ہر گھر سے دعائیں مانگی جانے لگیں کہ یا اللہ اس بارش کو روک دے ، تمام کسان ، ان کی بیوی بچے اور دیگر اہل خانہ دن رات دعائیں مانگتے نظر آئے لیکن شاید یہ ان کی دعاؤں کی قبولیت کا وقت نہیں تھا&quot;۔ 
صہیب کا کہنا ہے کہ مینہ برسا اور کھل کر بارشیں ہوئیں، یہ بارشیں کسانوں کی ساری جمع پونجی اور آس امیدیں بھی بہا کر لے گئیں۔

<h2>میلہ بیساکھی کی رونقیں پھیکی پڑ گئیں &nbsp;</h2>

&nbsp;وسطی پنجاب میں گندم کی کٹائی 14 اپریل کے بعد شروع کی جاتی ہے جب یکم بیساکھ ہوتی ہے اور&nbsp; یہاں مختلف دیہات میں بیساکھی کے میلے لگائے جاتے ہیں جس کے بعد کسان گندم کی کٹائی شروع کرتے ہیں۔

بیساکھی کے میلوں میں خواتین اور بچے بھی ذوق و شوق سے شریک ہوتے ہیں۔ پکوان پکائے جاتے ہیں، لڑکیاں چوڑیاں اور دیگر جیولری خریدتی ہیں،&nbsp; جانوروں کی خریداری ہوتی ہے، غرضیکہ دیہی زندگی کے تمام رنگ بیساکھی کے میلوں میں نظر آتے ہیں۔

اس سال 20 مارچ سے چھ اپریل تک ہونے والی بے موسمی بارشوں کے باعث جہاں کسانوں کی خوشیاں ماند پڑ چکی ہیں وہیں پنجاب کے روایتی بیساکھی کے میلے بھی اس جوش و خروش سے نہیں لگ رہے جوکہ یہاں کی دیہی ثقافت کا لازمی جزو سمجھا جاتا ہے۔

<h2>&quot;بے موسمی بارشوں سے 25 ارب کی گندم تباہ ہوچکی ہے&quot;</h2>

صوبہ پنجاب کے محکمہ زراعت کے حکام کا کہنا ہے کہ مارچ اور اپریل میں ہونے والی بے موسمی بارشوں سے گندم کی فصلوں کو شدید نقصان پہنچا اور صوبے کے مختلف اضلاع سے جو رپورٹس موصول ہوئی ہیں ان کے مطابق گندم کی لگ بھگ 25 ارب روپے مالیت کی فصل تباہ ہوچکی ہے۔

حالیہ شدید بارشوں اور ژالہ باری کے باعث ہونے والے نقصانات گندم کی مجموعی فصل کے چھ فیصد سے زیادہ ہیں۔

بارشوں اور آندھی نے پچھلے چار ہفتوں کے دوران وسطی پنجاب اور جنوبی پنجاب کے متعدد اضلاع کو متاثر کیا، جس کے نتیجے میں ان اضلاع میں کھڑی فصلوں کا تقریباً 50 فیصد حصہ فصلیں زمین پر گرنے کا باعث بنا ہے۔

محکمہ زراعت کی سروے ٹیم میں شامل ایک آفیسر نے لوک سجاک کو بتایا کہ اعداد و شمار کے مطابق 16 لاکھ ایکڑ گندم کے رقبے میں سے 10 لاکھ ایکڑ رقبہ کو جزوی اور 35 ہزار ایکڑ&nbsp; رقبے کو خراب موسم کی وجہ سے مکمل نقصان پہنچا ہے۔ 
پنجاب میں سب سے زیادہ متاثرہ علاقے شیخوپورہ اور ننکانہ صاحب کے اضلاع ہیں جہاں فصلوں کے نقصانات کا تخمینہ لگ بھگ 45 فیصد لگایا گیا ہے۔

اس کے بعد منڈی بہاوالدین ، حافظ آباد ، مظفر گڑھ ،&nbsp; ساہیوال ، ٹوبہ ٹیک سنگھ ، اوکاڑہ ، بھکر ، پاکپتن اور گوجرانوالہ کے اضلاع میں دس فیصد سے زائد نقصانات رپورٹ ہوئے ہیں۔

محکمہ زراعت کو دستیاب اعداد و شمار کے مطابق مجموعی پیداوار کا نقصان دو لاکھ 50 ہزار ٹن کے لگ بھگ ہے جس کی مالیت 25 ارب روپے ہوگی یعنی تین ہرار 900 روپے فی 40 کلو گرام کی شرح سے۔

<h2>کسانوں کو زیادہ نقصان پہنچا، حکومت اعدادوشمار چھپا رہی ہے، ناصر چیمہ</h2>

ایوان زراعت پنجاب ، کسانوں کی بڑی تنظیم ہے جس کے ممبران کی بڑی تعداد کا تعلق وسطی پنجاب کے اضلاع سے ہے۔

ایوان زراعت پنجاب کے صدر اور سابق ایم پی اے چودھری ناصر چیمہ دعویٰ کرتے ہیں کہ بارشوں سے کسانوں کو زیادہ نقصان پہنچا ہے جبکہ حکومتی اعداد و شمار کم نقصانات ظاہر کررہے ہیں۔

انہوں نے کہا کہ بعض علاقوں میں ژالہ باری اور آندھی سے 70 فیصد فصل تباہ ہو گئی ہے اور فی ایکڑ پیداوار میں 15 من تک نقصان کا خدشہ ہے لیکن ان علاقوں میں صوبائی حکومت کا کوئی نمائندہ یا مجاز آفیسر ابھی تک نہیں پہنچا۔

&nbsp;ان کا کہنا ہے کہ پنجاب میں گندم کی فصل کافی اچھی جا رہی تھی اور گزشتہ سال کے برعکس موسم سازگار تھا، جس سے اناج کی نشوونما میں مدد ملی۔

&quot;مارچ کے اوائل میں ہلکی بارش نے ماحول سے پودوں کو نائٹروجن فراہم کرنے میں مدد دی، جس سے فاسفورس کھاد کم استعمال کرنا پڑی لیکن حالیہ بارشوں اور آندھیوں نے زمین کے وسیع حصے کو تباہ کر دیا ہے جس سے کاشتکار برادری کی اچھی فصل کاٹنے کی امیدوں پر پانی پھر گیا&quot;۔

ناصر چیمہ نے کہا کہ اگر پودے زمین سے 30 ڈگری کے زاویے پر بھی زندہ رہیں تو پریشان ہونے کی بات نہیں لیکن اگر پودے گیلی زمین پر لیٹ جائیں تو وہ گلنا شروع ہو جاتے ہیں۔

&nbsp;ان کا کہنا ہے کہ فصل کی کٹائی میں احتیاط نہ برتی گئی تو اس سے پیداوار میں مزید 10 فیصد نقصان ہوگا۔

<h2>ساڑھے سات لاکھ ایکڑ سے زائد رقبہ متاثر ہوا : ڈائریکٹر جنرل زراعت کی تصدیق</h2>

ڈائریکٹر جنرل زراعت پنجاب ڈاکٹر انجم علی نے تصدیق کی ہے کہ صوبے میں ساڑھے سات لاکھ ایکڑ سے زائد رقبہ حالیہ بارشوں سے متاثر ہوا ہے۔

انہوں نے سجاگ کو&nbsp; بتایا کہ صوبے میں پہلے ہی ہدف سے پانچ لاکھ ایکڑ کم رقبہ پر گندم کاشت ہوئی، یعنی پنجاب میں ایک کروڑ 60 لاکھ ایکڑ رقبہ پر گندم کاشت کی گئی جبکہ ٹارگٹ ایک کروڑ 65 لاکھ تھا۔

&quot;صوبائی محکمہ زراعت بے موسمی بارشوں کے باعث ہونے والے نقصانات پر نظر رکھے ہوئے ہے۔ اب تک موصولہ اطلاعات کے مطابق پنجاب میں 20 مارچ سے چھ اپریل تک ہونے والی بارشوں کے باعث ساڑھے سات لاکھ ایکڑ رقبہ متاثر ہوا ہے&nbsp; جس میں دو لاکھ ٹن سے زیادہ فصل تو تباہ ہوچکی ہے۔ باقی فصل متاثر ہوئی ہے&quot;۔

ڈائریکٹر جنرل زراعت نے کاشتکاروں کو ہدایت کی کہ وہ اپنی فصلوں میں پانی کھڑا نہ ہونے دیں اور جب کٹائی کا وقت آئے تو احتیاط سے کٹائی کریں اور متاثرہ فصل کی کٹائی کے لیے ہارویسٹر کی بجائے درانتی کا استعمال کریں، کیونکہ ہارویسٹر سے گیلی یا کمزور گندم&nbsp; کا بچنا مشکل ہوگا جبکہ درانتی سے نقصان کا خدشہ نہیں۔

<h2>پاکستان کی 18 فیصد آبادی غذائی قلت کا شکار ، نیشنل فوڈ سکیورٹی اینڈ ریسرچ کا اعتراف</h2>

وفاقی وزارت فوڈ سیکیورٹی اینڈ ریسرچ پاکستان میں خوراک کی ترسیل کے لیے اقدامات بروئے کار لاتا ہے۔

اس ادارے کی ویب سائٹ پر جاری ایک رپورٹ میں کہا گیا ہے کہ پاکستان نے گزشتہ کئی دہائیوں میں خوراک کی پیداوار میں نمایاں ترقی کی ہے۔ تاہم، آبادی میں اضافے، تیزی سے شہری کاری، کم قوت خرید، قیمتوں میں زیادہ اتار چڑھاؤ، خوراک کی بے ترتیب پیداوار، اور خوراک کی تقسیم کے غیر موثر نظام کی وجہ سے غذائی تحفظ اب بھی ایک اہم چیلنج ہے۔

&nbsp;فوڈ سیکیورٹی اسسمنٹ سروے (FSA) 2016 کے مطابق پاکستان کی 18 فیصد آبادی غذائی قلت کا شکار ہے۔

نیشنل انسٹی ٹیوٹ آف پاپولیشن اسٹڈیز (NIPS) کے مطابق غذائیت کے مسائل دیہی علاقوں 46 فیصد ہیں۔بعض علاقوں، جیسے سابق فاٹا میں&nbsp; 58 فیصد، گلگت بلتستان 51 فیصد اور بلوچستان میں52 فیصد افراد غذائی مسائل میں مبتلا ہیں۔ 
اسی طرح تقریباً نصف آبادی وٹامن اے اور آئرن کی غذائی ضرورت سے کم استعمال کر رہی ہے۔

پاکستان میں غذائی عدم تحفظ بنیادی طور پر غربت سے منسلک ہے۔ اس طبقے کے کمزور اقتصادی حالات انہیں دوسروں کی نسبت غیر محفوظ بناتے ہیں۔

"ہر کسان آسمان کی جانب ہاتھ اٹھائے ہوئے تھا لیکن شاید دعاؤں کی قبولیت کا وقت نہیں تھا"

گوجرانوالہ میں ڈیجیٹل ایپ کے ذریعے شہریوں سے ایک بڑے فراڈ کا کیس سامنے آیا ہے۔ یہ فراڈ دس بیس لوگوں کے ساتھ نہیں بلکہ ہزاروں لوگوں سے کیا گیا ہے اور اس کے متاثرین وسطی پنجاب میں ہر جگہ ملتے ہیں۔

ان متاثرین میں دکاندار بھی ہیں اور سرکاری ملازمین بھی حتیٰ کہ کئی پولیس اہلکاروں نے بھی اس فراڈ کا نشانہ بننے کا انکشاف کیا ہے تاہم سرکاری نوکری میں انکوائری کے ڈر سے وہ اپنی شناخت ظاہر نہیں کرتے۔

کسی سرکاری ادارے نے تاحال اس فراڈ کی باضابطہ تحقیقات تو شروع نہیں کیں تاہم اندازہ ہے کہ اس ایپ کے ذریعے کروڑوں روپے کی رقم لوگوں سے ہتھیا لی گئی ہے۔ سوشل میڈیا پر فراڈ کی مجموعی رقم کو اربوں روپے کہا جارہا ہے لیکن ابھی اس بارے کوئی بھی حتمی رائے قائم نہیں کی جا سکتی۔

&nbsp;اس فراڈ کا ذریعہ بننے والی آئی ڈی اے نامی ایپ ایک سال پہلے متعارف کروائی گئی تھی جس کے بارے میں یہ کہا گیا کہ یہ سرمایہ کاری کے لیے بنائی گئی ایپ ہے۔ اس ایپ پر سرمایہ کاری کی سات سکیمیں یا درجے متعارف کروائے گئے جن پر کم از کم 121 ڈالر سے لے کر ہزاروں ڈالر تک سرمایہ کاری کی جا سکتی تھی۔

ممبر یا انویسٹر کو ایپ اوپن کرکے ایک دن میں 30 کلک کرنا ہوتے تھے جس سے اس کے ایپ اکاؤنٹ میں ڈالر &quot;آتے&quot; تھے۔ ڈالر ملنے کی شرح سرمایہ کاری کے تناسب سے ہوتی تھی یعنی آپ نے جتنی زیادہ سرمایہ کاری کی ہوتی ہر کلک پر اتنے ہی زیادہ ڈالر ملتے تھے۔

یہی نہیں بلکہ ہر نئے ممبر کو تین تا پانچ نئے ممبرز یا انویسٹرز بھی بنوانا ہوتے تھے جن کو ناصرف اپنی سرمایہ کاری کا منافع ملتا تھا بلکہ نئے ممبر بنوانے کا منافع بھی حاصل ہوتا تھا۔

سردار کاشف نامی ایک ممبر کا کہنا ہے کہ جب وہ ایپ پر کام شروع کرتے تو ان پر ڈالروں کی برسات ہونے لگتی تھی۔

&quot;یوں لگتا کہ جیسے اب زندگی شان و شوکت سے گزرے گی اور کوئی مالی مسائل نہیں ہوں گے، لیکن کسے پتہ تھا کہ آگے کیا ہونے والا ہے؟&quot;

سردار کاشف نے بتایا کہ جب سے ایپ بند ہوئی ہے وہ ڈپریشن کا شکار ہو گئے ہیں۔

&quot; کچھ سمجھ نہیں آتا کہ کِسے پکڑیں کیونکہ سامنے کچھ نہیں، جن دوستوں نے مجھے ممبر بنایا تھا وہ خود رو رہے ہیں کیونکہ ان کے بھی ہزاروں ڈالر ڈوب گئے ہیں&quot;۔

اس ایپ میں سرمایہ کاری کرنے والے لوگ زیادہ سے زیادہ پیسے کمانے کے لالچ میں منافع کےطور پر حاصل شدہ رقم نکلوانے کی بجائے نئی سرمایہ کاری پر لگا دیتے تھے تاکہ منافعے کی شرح بڑھتی رہے۔

اندازاً ہر دس میں سے نو افراد ایسے تھے جن کے اکاؤنٹ میں ہزاروں ڈالر منتقل ہوئے لیکن انہوں نے رقم نکلوانے کے بجائے اسی سے مزید سرمایہ کاری کی اور اچانک ایپ بند ہو جانے سے ان سب کی رقم ڈوب گئی۔ بعض لوگوں نے دکانیں بیچ کر سرمایہ کاری کی، بعض نے بیویوں کے زیور بیچ ڈالے تھے۔

آئی ڈی اے کی ایپ نے صرف ایک سال کام کیا لیکن اس ایک سال میں کتنا سرمایہ ملک سے باہر گیا یہ کوئی نہیں جانتا۔

ایپ پر سرمایہ کاروں کی فوج چند مہینوں میں تیار ہوگئی اور لوگوں نے دھڑا دھڑ انویسٹمنٹ کرنا شروع کردی۔ ایک ممبر پانچ نئے لوگوں کو ممبر بناتا اور نئے ممبر مزید پانچ ممبر بناتے اور اس طرح مختصر وقت میں یہ تعداد ہزاروں لاکھوں تک پہنچ گئی۔

ممبر شپ کی بنیادی شرط کم از کم 121 ڈالر سے سرمایہ کاری کا اکاؤنٹ کھلوانا تھا جو کہ پاکستانی روپوں میں تقریبا 35 سے 37 ہزار روپے کے درمیان بنتے ہیں۔

شیخ ابراہیم نامی ایک ممبر نے لوک سجاگ کو بتایا کہ انہوں ںے شروع میں 121 ڈالر سے سرمایہ کاری کی تھی لیکن انہوں نے دیکھا کہ وہ روزانہ تیس کلک کرکے چھ ڈالرز کماتے ہیں جبکہ ان کے بعض دوست روزانہ تیس کلک کر کے ڈیڑھ سے دو سو ڈالر کما لیتے ہیں تو انہوں ںے اپنی دکان بیچ کر سرمایہ کاری بڑھانے کا فیصلہ کیا۔

ابراہیم کہتے ہیں کہ لکڑ والا پُل بازار میں ان کی کپڑے کی دکان اچھی خاصی چل رہی تھی جسے انہوں نے ساٹھ لاکھ روپے میں فروخت کیا اور ساری رقم کی سرمایہ کاری کردی جو اس وقت 20 ہزار ڈالر بنتے تھے۔

اب ان کے اکاؤنٹ میں بھی روزانہ دو سو ڈالر گرنے لگے۔ انہیں یقین ہوگیا کہ پانچ چھ ماہ میں وہ اتنا منافع کما لیں گے&nbsp; کہ اپنی بیچی ہوئی دکان دوبارہ خرید سکیں گے اور ان کی&nbsp; بیس ہزار ڈالر کی سرمایہ کاری بھی روزانہ کی بنیاد پر ڈالرز پیدا کرتی رہے گی۔

جب سے ایپ بند ہوئی ہے شیخ ابراہیم کے گھر میں سوگ کی سی کیفیت ہے وہ اس امید پر بار بار موبائل فون چیک کرتے ہیں شاید ایپ کھل جائے اور وہ اپنی تمام رقم یکمشت واپس نکلوا لیں گے۔

<h2>فراڈ ایپ کا آخری وار ، رقم فوری ڈبل کروائیں &nbsp;</h2>

آئی ڈی اے نے جو آخری داؤ کھیلا وہ رقم فوری ڈبل کرنے سے متعلق تھا جس میں دراصل لوگوں کی نفسیات سے کھیلا گیا۔

چھ&nbsp; اپریل جمعرات کے روز کیش ڈبل سکیم متعارف کروائی گئی جس کے مطابق &quot;آپ سات اپریل سے جتنے ڈالرز بھجواؤ گے وہ فوری ڈبل ہو جائیں گے اور پانچ روز بعد آپ ڈالرز ودڈرا کروا سکیں گے۔&quot;

اس سکیم کا آنا تھا کہ لوگوں نے دھڑا دھڑ ڈالر&nbsp; بھجوانے شروع کردئیے۔ ہر طرف شور مچ گیا ، جس کے پاس جو رقم تھی وہ آن لائن جمع کرادی گئی۔ &nbsp;

اس سکیم کے شروع ہونے کے کچھ ہی گھنٹوں بعد یعنی سات اپریل کی شام کو کیش ودڈرا کی آپشن بند کردی گئی۔ کچھ لوگوں کو اس پر کھٹکا ہوا&nbsp; تاہم بیشتر&nbsp; لوگ انجام سے بے پروا ہوئے بغیر مسلسل کیش بھجواتے رہے۔ 
بالآخر وہی ہوا جس کا ڈر تھا۔

نو اپریل اتوار کی صبح چار بجے یعنی سحری کے وقت جن لوگوں نے بھی وہ ایپ کھولنے کی کوشش کی انہیں ناکامی کا سامنا کرنا پڑا ، کیونکہ ایپ ہی بند کردی گئی تھی۔

تادم تحریر ایپ بند ہوئے دو روز ہوچکے ہیں اور ایپ نہ تو دوبارہ آن ہوئی ہے اور نہ ہی اس کے اب آن ہونے کا کوئی امکان باقی بچا ہے۔

خیال ہے کہ سکیم کے آغاز میں ہی اتنا مال اکٹھا ہوگیا ہوگا کہ ایپ چلانے والوں نے بارہ تاریخ کا بھی انتظار نہیں کیا اور کیش ودڈرا کی آپشن بند ہو جانے کے بعد شور مچنے پر ایپ بند کرکے غائب ہو گئے۔

سیٹلائیٹ ٹاؤن مارکیٹ گوجرانوالہ کا سب سے بڑا بازار ہے جہاں دو ہزار سے زیادہ دکانیں ہیں۔ لوک سُجاگ نے متاثرین کی موجودگی کی اطلاع پر اس جگہ کا دورہ کیا تو انکشاف ہوا کہ یہاں تقریباً ہر دوسرا دکاندار اس ایپ کا متاثرہ ہے۔

یہاں ڈالر شاپ نامی دکان کے مینیجر طلحہ نے بتایا کہ آئی ڈی اے آٹو ٹرینڈنگ ایپلیکیشن تھی اور آٹو ٹرینڈنگ کے ذریعے ہی ان کے اکاؤنٹ میں ڈالر بھیجے جاتے تھے۔ سرمایہ کاری کرنے کے لیے کرپٹو کرنسی کی ایپ بائے نانس کے ذریعے رقم بھجوائی جاتی تھی۔ بائے نانس ایک ایسی ایپلیکیشن ہے جو کئی سال سے چل رہی ہے اور اس کے ذریعے ڈالر خرید کر مطلوبہ ایڈریس پر رقم بھجوائی جاتی ہے۔

&quot;جب ہماری رقم پوری ہو جاتی تھی یا جب ہمیں منافع واپس لینا ہوتا تھا تو وہاں سے بائے نانس پر منافع منتقل کیا جاتا جہاں ڈالر کا جو ریٹ چل رہا ہوتا تھا اس ریٹ کے مطابق ڈالر فروخت کرکے اپنی رقم ایزی پیسہ ، جیز کیش یا کسی بھی بینک اکائونٹ میں منتقل کروائی جاتی تھی۔&quot;

طلحہ نے بتایا کہ سات اپریل 2023 کو ایپ پر رقم ڈبل کرنے کی آفر کی گئی جس میں صارفین کو بتایا گیا کہ سات اپریل سے بارہ اپریل تک یعنی پانچ روز میں ان کی سرمایہ کاری پر سو فیصد منافع ملے گا۔ اس آفر کا آنا تھا کہ ہر فرد نے اپنا تمام تر سرمایہ ایپ پر منتقل کرنا شروع کر دیا۔ رقم ڈبل تو نہ ہو سکی لیکن اچانک ایپ ہی بند ہوگئی۔

محمد ایان اسی مارکیٹ میں کپڑا رنگائی کا کام کر کے روزانہ پانچ چھ ہزار روپے کماتے ہیں۔

ایک دکاندار نے انہیں ممبر بنانے کی آفر کی اور کہا کہ اگر آپ کو روزانہ پچاس ساٹھ ڈالر مل جائیں اور ساتھ میں کپڑا رنگائی کا کام بھی چلتا رہے تو کیا برا ہے؟ انہوں نے آفر قبول کر کے پانچ لاکھ روپے کی سرمایہ کاری کر دی۔

اس سرمایہ کاری سے جو منافع آتا اسے وہ نکلوانے کے بجائے اس میں مزید سرمایہ کاری کر دیتے تاکہ منافعے کی شرح بڑھتی رہے۔ یوں تین ماہ میں منافعے سمیت ان کی رقم دو گنا سے بھی زیادہ ہوچکی تھی۔ وہ اس امید پر سرمایہ کاری کیے جا رہے تھے کہ ایک سے ڈیڑھ سال میں اتنا منافع کما لیں گے کہ اپنی دکان شروع کرسکیں گے لیکن اچانک سب کچھ ختم ہوگیا۔

ایپ کے ایک اور ممبر محمد عامر پونڈانوالہ چوک میں موٹر سائیکلیں کرائے پر دینے کا کام کرتے تھے۔وہ کہتے ہیں کہ جب ایپ شروع ہوئی اور ان کے کچھ دوستوں نے سرمایہ کاری کی تو وہ سبھی کو منع کرتے رہے کہ ممکنہ طور پر یہ فراڈ ہو گا اور سبھی کی رقم ڈوب جائے گی۔

تاہم دو تین ماہ تک انہوں ںے ان لوگوں کو روزانہ ہزاروں روپے کماتے دیکھا تو خود بھی لالچ میں آ گئے۔

&quot;میں ںے ابتدا میں جب 121 ڈالر کی سرمایہ کاری کی تو زیادہ منافع نہ ملا۔ پھر میں نے موٹر سائیکلیں فروخت کرکے ساری رقم کی سرمایہ کاری کرڈالی اور روزانہ سو تا سوا سو ڈالر اپنے اکاؤنٹ میں منتقل ہوتے دیکھتا رہا&quot;۔

یہ سلسلہ تین ماہ سے زیادہ دیر جاری نہ رہ سکا اور ایک دن ایپ پر &#39;کیش ودڈرا&#39; کی آپشن اچانک بند ہوگئی۔ اس وقت ان کے اکاؤنٹ میں ساڑھے چار ہزار ڈالر موجود تھے جن میں سے پندرہ سو ڈالر ان کی ذاتی انویسٹمنٹ اور تین ہزار ڈالر منافع تھا۔

&quot;اب میں یہ انتظار کر رہا ہوں کہ میری ذاتی انویسٹمنٹ ہی مجھے واپس مل جائے تاکہ میں موٹر سائیکلیں دوبارہ سے کرائے پر دینے کا کام شروع کرسکوں&quot;۔ &nbsp;

گوجرانوالہ سمیت سیالکوٹ ، گجرات ، منڈی بہاوالدین ، حافظ آباد ، نارووال ، شیخوپورہ اور گردونواح کے اضلاع میں بھی اس ایپ کے متاثرین سامنے آ رہے ہیں۔

سید سبط الحسن المعروف ڈبل شاہ سے کون واقف نہیں جنہوں نے کئی سال پہلے وسطی پنجاب کے شہر وزیرآباد میں لوگوں کو رقم ڈبل کرنے کا لالچ دے کر لوٹاتھا۔

ڈبل شاہ کو بعد ازاں نیب نے گرفتار کرلیا ، ان کی املاک ضبط کر لی گئیں اور ہزاروں متاثرین کو اربوں روپے واپس لوٹائے گئے۔ ڈبل شاہ کچھ سال پہلے وفات پاگئے تھے۔

خیال کیا جاتا ہے کہ ڈبل شاہ کے بعد یہ رقم ڈبل کرنے کا دوسرا بڑا فراڈ ہے۔

دونوں کے درمیان فرق صرف یہ ہے ڈبل شاہ ملک میں موجود رہ کر فراڈ کرتا تھا جبکہ اس ایپ کا تاحال کچھ پتہ نہیں کہ یہ کہاں سے چلائی جارہی ہے اور پاکستانیوں کی بھاری رقم کون لوٹ کر لے گیا ہے؟

لوک سُجاگ نے جب اس سلسلے میں ایک وفاقی تحقیقاتی ادارے کے افسر سے بات کی تو انہوں نے بتایا کہ مصدقہ طور پر اس ایپ کو بیرون ملک سے چلایا جارہا تھا اور یہ بات بھی سامنے آئی ہے کہ آئی ڈی اے جیسی مزید چار ایپس چل رہی ہیں۔

ان کا کہنا تھا کہ آئی ڈی اے بند ہونے کے بعد وہ ایپس بھی اب بند ہو جائیں گی کیونکہ وہاں سے لوگوں نے دھڑا دھڑ کیش ودڈرا کی آپشن استعمال کرنا شروع کر دی ہے۔

جب ان سے ایسی ایپس کی انکوائری کے بارے میں پوچھا گیا تو انہوں ںے بتایا کہ تاحال اس پر کوئی کارروائی نہیں ہوئی البتہ ایف آئی اے، سکیورٹیز ایکسچینج کمیشن آف پاکستان اور ایف بی آر اس سلسلے میں کارروائی کے مجاز ہیں اور یہی ادارے اس بارے میں کوئی قدم اٹھانے کا فیصلہ کریں گے۔

احتشام احمد شامی