دِیر شہر کے علاقہ بجلی گھر کے رہائشی گران محمد پچھلے 43 سال سے ڈرائیونگ کے روزگار سے منسلک ہیں۔ انہوں نے 25 سال کی عمر میں ڈرائیونگ سیکھی اور 38 سال تک مختلف لوگوں کے ساتھ ڈرائیور کی حیثیت سے گاڑی چلاتے رہے۔ پانچ سال قبل وہ اس قابل ہوئے کہ پس انداز کی ہوئی جمع پونجی سے وہ اپنی گاڑی خرید سکیں۔ ان کے مطابق &rsquo;&rsquo;میں اب بھی اپنی گاڑی کا مالک نہ بن سکتا اگر ہمارے ہاں نان کسٹم پیڈ گاڑیاں (وہ گاڑیاں جو ٹیکس وغیرہ سے مستثنیٰ ہیں) ہمارے ہاں دستیاب نہ ہوتیں۔&lsquo;&lsquo; 
سنہ 1997ء سے دِیر شہر میں گاڑیوں کے خرید و فروخت کا کاروبار کرنے والے میاں عبیدالرحمن کہتے ہیں کہ مالاکنڈ ڈویژن میں 2000ء میں افغانستان سے سمگل ہو کر آنے والے گاڑیوں کا سلسلہ شروع ہوا۔ ان کے مطابق اس سے قبل مالاکنڈ ڈویژن میں نان کسٹم پیڈ گاڑیاں نہیں تھیں یہی وجہ ہے کہ اُس وقت تک علاقے کے چند با اثر افراد کے علاوہ کسی میں گاڑی خریدنے کی سکت نہیں تھی۔ لیکن جب سے نان کسٹم پیڈ گاڑیوں کا کاروبار یہاں شروع ہوا تواس سے خاص متوسط طبقے کے لوگوں کی زندگیاں بدل گئیں۔ یہ گاڑیاں نہ صرف لوگوں کی ذاتی ضروریات کو پورا کرتی ہیں یہ روزگار کا اہم ذریعہ بھی بن گئی ہیں۔ 
سُجاگ کے ایک مختصر سروے کے مطابق 2008 سے 2010 ماڈل کی نان کسٹم پیڈ ٹویوٹا پریمیو گاڑی 12 لاکھ روپے تک مل جاتی ہے جبکہ باقاعدہ طور پر رجسٹرڈ گاڑی کی قیمت 30 لاکھ تک ہے۔ اسی طرح 2008-2009 ماڈل کی وِٹز گاڑی 10 لاکھ روپے تک مل جاتی ہے جبکہ اسی ماڈل کی کسٹم پیڈ گاڑی 20 لاکھ روپے تک ملتی ہے۔ 2008 اور 2009 کی ایگزئیو گاڑی 10 لاکھ روپے تک مل جاتی ہے ملک میں قانونی طور پر لائی گئی ایسی ہی گاڑی کی قیمت 25 سے 30 لاکھ روپے کے درمیان ہے۔

خیبر پختونخوا کا مالا کنڈ ڈویژن اُن تین آزاد ریاستوں &ndash; سوات، دیر اور چترال &ndash; پر مشتمل ہے جنہوں نے 1947ء کی تقسیم کے بعد پاکستان سے الحاق کر لیا تھا۔ 1954ء اور 55ء میں جب حکومت پاکستان نے ون یونٹ سکیم کے تحت چار صوبوں کو ضم کر کے مغربی پاکستان کو تشکیل دیا تو بہاولپور اور خیر پور کی ریاستوں کو تو نئے صوبے میں ضم کر دیا گیا لیکن پختونخوا کی ملحقہ ریاستوں کی حیثیت کو جوں کا توں رکھا گیا۔

ون یونٹ سیاسی طور پر ناکام رہا اور اسے بلا آخر 1969ء میں توڑ کر چار صوبوں کو بحال کر دیا گیا۔ اس موقعہ پر پختونخوا کی ریاستوں کی سابقہ آزاد حیثیت کو تبدیل کر کے انہیں خیبرپختونخوا کی حکومت کے زیر انتظام قبائلی علاقہ جات (پاٹا) قرار دے دیا گیا۔ اس مخصوص آئینی حیثیت کے باعث ان علاقوں میں کسی بھی صوبائی قانون کا اطلاق خودبخود نہیں ہو سکتا تھا بلکہ ان علاقوں کو کسی صوبائی قانون کی حدود میں لانے کے لیے گورنر کو خصوصی حکم جاری کرنا ہوتا تھا۔

مئی 2018ء میں پچیسویں آئینی ترمیم کے ذریعے ان علاقوں کی صوبے کے زیرانتظام قبائلی علاقہ جات کی حیثیت ختم کر کے انہیں انتظامی طور پر دیگر اضلاع کے مساوی کر دیا گیا۔ اسی ترمیم نے وفاق کے زیر انتظام قبائلی علاقہ جات (فاٹا) کو بھی صوبہ پختونخوا میں ضم کیا۔ دیر، سوات اور چترال کی سابقہ ریاستوں میں شامل علاقے اب پختونخوا کے ان نو اضلاع میں تقسیم ہیں: مالاکنڈ، بونیر، شانگلہ، سوات، اپر دیر، لوئر دیر، اپر چترال، لوئر چترال اور سنٹرل چترال۔

ان اضلاع میں ایک عام تاثر ہے کہ الحاق کے وقت حکومتِ پاکستان نے ان کے حکمرانوں کے ساتھ وعدہ کیا تھا کہ یہ علاقے ٹیکس سے مستثنیٰ ہوں گے۔ یہی وجہ ہے کہ نان کسٹم پیڈ گاڑیاں ان اضلاع میں بلا کسی روک ٹوک نقل و حرکت کر سکتی ہیں۔ لیکن دوسری طرف یہ بھی ایک حقیقت ہے کہ ان علاقوں میں کسٹمز ایکٹ کو 1975ء میں توسیع دے دی گئی تھی لیکن عملاً اس کا نفاذ تا حال نہیں ہو سکا۔

صوبے کے دیگر حصوں میں گاڑیوں کی رجسٹریشن محکمہ ایکسائز اینڈ ٹیکسیشن کرتا ہے جبکہ پراونشلی ایڈمنسٹرڈ ٹرائبل ایریا (پاٹا) میں پولیس سٹیشنوں میں گاڑیوں کا اندراج ہوتا ہے اور وہیں سے انہیں گاڑی کا نمبر دیا جاتا ہے جسے وہ نمبر پلیٹ کے طور پر استعمال کرتے ہیں۔

مارچ 2013ء میں وفاقی حکومت نے ملک میں نان کسٹم پیڈ گاڑیوں کے لئے ایمنسٹی سکیم کا اعلان کیا جس کے تحت مختلف ڈیوٹیز اور ٹیکسوں میں تقریباً ایک ماہ کے لئے خاطر خواہ چھوٹ دیتے ہوئے انہیں باقاعدہ طور پر رجسٹر کرنے کا عمل شروع کیا گیا۔ اس عرصہ کے دوران، فیڈرل بورڈ آف ریونیو کے اعداد و شمار کے مطابق، 34000 گاڑیاں رجسٹر کی گئیں جس سے قومی خزانہ کو 10 ارب روپے حاصل ہوئے۔

لیکن اس کے باوجود مالاکنڈ ڈویژن میں لاکھوں نان کسٹم پیڈ گاڑیاں موجود ہیں۔

<h2>مقامی &rsquo;رجسٹریشن&lsquo;</h2>

اکتوبر 2014ء میں خیبر پختونخوا میں اُس وقت کے انسپکٹر جنرل آف پولیس ناصر خان دُرانی نے وفاقی وزارتِ داخلہ، فیڈرل بورڈ آف ریونیو اور خیبر پختونخوا کے چیف سیکرٹری کو ایک سرکاری مراسلہ کے ذریعہ آگاہ کیا کہ مالاکنڈ ڈویژن اور وفاق کے زیر انتظام قبائلی علاقہ جات میں افغانستان سے سمگل ہو کر کر آنے والی نان کسٹم پیڈ گاڑیاں دہشت گردی کے واقعات میں استعمال ہو رہی ہیں۔

ان کا موقف تھا کہ &rsquo;&rsquo;پاکستان میں سمگل ہو کر آنے والی گاڑیوں کے حوالہ سے کسی بھی متعلقہ محکمہ کے پاس ایسا کوئی ریکارڈ موجود نہیں ہوتا جس سے اس کے مالک کا تعین کیا جا سکے۔&lsquo;&lsquo; اس کے تقریباً دو ماہ بعد دسمبر 2014ء میں پشاور میں آرمی پبلک سکول اینڈ کالج کے دل خراش واقعہ کے بعد بننے والی ایپکس کمیٹی نے اس مسئلہ کو قدرے سنجیدگی سے لیا اور ان گاڑیوں کے ریکارڈ کے حوالہ سے ایک باقاعدہ لائحہ عمل بنانے کا فیصلہ کیا۔

یوں مالاکنڈ ڈویژن کے چھ اضلاع سوات، بونیر، شانگلہ، اپر دِیر، لوئر دِیر اور چِترال کے پولیس سٹیشنوں میں جولائی 2015ء تک ایک لاکھ 20 ہزار نان کسٹم پیڈ گاڑیوں کا اندراج ہوا۔ اس کے لئے محکمہ ایکسائز اینڈ ٹیکسیشن، محکمہ پولیس اور فوجی اہلکاروں پر مشتمل ایک مشترکہ ڈیسک قائم کیا گیا جس کی منظوری کے بعد گاڑی کو پولیس سٹیشن میں رجسٹر کیا جاتا تھا۔

محکمہ ایکسائز اینڈ ٹیکسیشن کے ایک اہلکار نے سُجاگ کو بتایا کہ 2018ء میں ایک بار پھر نان کسٹم پیڈ گاڑیوں کا مقامی اندراج شروع کیا گیا اور جون 2018ء تک مالاکنڈ ڈویژن میں ایک لاکھ چھ ہزار گاڑیاں پولیس سٹیشنوں میں رجسٹر ہوئیں جس کے بعد مزید گاڑیوں کے اندراج کے عمل کو روک دیا گیا۔

لیکن یہاں یہ سوال اٹھتا ہے کہ یا تو تمام گاڑیوں کا پولیس سٹیشنوں میں اندراج نہیں ہو پاتا یا پھر مزید سمگل شدہ گاڑیاں مالاکنڈ ڈویژن میں آ جاتی ہیں جس کی وجہ سے دوبارہ اندراج کی ضرورت پیش آتی ہے۔

دوسری بات میں زیادہ وزن ہے کیونکہ افغانستان سے گاڑیوں کی سمگلنگ بلا تعطل جاری ہے۔ یہ گاڑیاں بلوچستان کے سرحدی شہروں کے راستے پاکستانی آتی ہیں جہاں سے کیرئیر (گاڑیوں کو ایک شہر سے دوسرے شہر پہنچانے والے لوگ) ان گاڑیوں کو ملک کے دیگر حصوں میں پہنچاتے ہیں۔ ایک کیرئیر، جو اپنا نام ظاہر نہیں کرنا چاہتے ہیں، نے سُجاگ کو بتایا کہ &rsquo;&rsquo;ہم ایک صوبہ سے دوسرے صوبہ تک گاڑی پہنچانے کے 30 سے 40 ہزار روپے لیتے ہیں جس میں سے حکومتی اہلکاروں کو بھی پیسے دینے پڑتے ہیں۔&lsquo;&lsquo;

کوئٹہ میں تعینات ایک حساس ادارے کے افسر نے سُجاگ کو بتایا کہ مختلف ماڈل کی گاڑیاں جاپان، سنگاپور اور آسٹریلیا سے دوبئی لائی جاتی ہیں۔ دوبئی سے ان گاڑیوں کو بحری بیڑوں کے ذریعہ ایران کی بندرگاہ بندر عباس پہنچایا جاتا ہے &rsquo;&rsquo;جس کے بعد یہ گاڑیاں نیمروز اور ہرات کے سرحدی شہروں کے راستے افغانستان آتی ہیں۔ پاکستان میں ان گاڑیوں کی سمگلنگ کے لئے نوشکی اور چمن بارڈر استعمال ہوتا رہا ہے لیکن موجودہ وقت میں ان گاڑیوں کا پاکستان کی سرحد میں داخل ہونے کا واحد راستہ نوکُنڈی راہداری ہے۔&lsquo;&lsquo;

اور تو اور کئی ایک لوگ فیس بُک کے ذریعہ بھی نان کسٹم پیڈ گاڑیوں کا کاروبار کر رہے ہیں اور گاڑی خریدنے کی صورت میں وہ ملک کے کسی بھی حصے میں گاڑی پہنچانے کی سہولت بھی مہیا کرتے ہیں۔

اپر دِیر میں تعینات سپرنٹنڈنٹ پولیس (انویسٹی گیشن) فرمان خان نے سُجاگ کو بتایا کہ پشاور ہائی کورٹ کے سوات بینج (جسے دارالقضاء بھی کہا جاتا ہے) کے ایک فیصلہ کی روشنی میں گذشتہ ماہ نان کسٹم پیڈ گاڑیوں کے اندراج کا سلسلہ ایک بار پھر شروع ہوا ہے۔ چند دنوں میں صرف اپر دِیر ضلع میں 1300 گاڑیوں کا اندراج کیا گیا ہے۔

انگریزی اخبار &rsquo;دی نیوز انٹرنیشنل&lsquo; میں شائع ہونے والی ایک رپورٹ کے مطابق فیڈرل بورڈ آف ریونیو کے ایک اہلکار کے حوالہ سے کہا گیا ہے کہ ملک میں مالاکنڈ ڈویژن میں ڈیڑھ سے اڑھائی لاکھ تک نان کسٹم پیڈ گاڑیاں ہیں جن کی رجسٹریشن سے ملکی خزانہ کو 30 ارب روپے تک حاصل ہو سکتے ہیں۔

دِیر سے سابقہ رکن صوبائی اسمبلی عنایت اللہ خان کا کہنا ہے کہ سوات، دِیر اور چترال کی آزاد ریاستوں نے پاکستان کے ساتھ الحاق کے وقت حکومت پاکستان نے وعدہ لیا تھا کہ اس علاقہ کی حیثیت ٹیکس فری زون کی ہو گی۔ لیکن دِیر سے ہی تعلق رکھنے والے فیڈرل بورڈ آف ریونیو کے ایک اعلیٰ عہدیدار نے اپنا نام صیغہ راز میں رکھنے کی شرط پر سُجاگ کو بتایا کہ ٹیکس سے استثنا کے حوالہ سے مقامی لوگوں، ان کے محکمہ یا دیگر کسی سرکاری ادارہ کے پاس کوئی تحریری ثبوت دستیاب نہیں ہے۔

اپر دِیر سے قومی اسمبلی کے سابقہ رکن صاحبزادہ طارق اللہ کا کہنا ہے کہ مالاکنڈ ڈویژن میں روزگار کے مواقع نہ ہونے کی وجہ مقامی لوگوں کی معاشی حالات بہت بُرے ہیں جس کی وجہ سے وہ ٹیکسز دینے کے قابل نہیں ہیں۔ &rsquo;&rsquo;یہی وجہ ہے کہ ضلع اپر دِیر سمیت مالاکنڈ ڈویژن کے لاکھوں لوگ روزگار کے تلاش میں بیرون ممالک میں مقیم ہیں۔&lsquo;&lsquo;

وہ کہتے ہیں کہ مالاکنڈ ڈویژن میں ٹیکسوں اور کسٹمز ڈیوٹیز کے اطلاق کے غیر مقبول فیصلہ کی سیاسی قیمت چُکانا پڑے گی جس کے لئے کوئی بھی سیاسی جماعت تیار نہیں کیونکہ ایسی صورت میں انتخابات میں انہیں یقینی طور پر عوامی غیض و غضب کا سامنا کرنا پڑے گا۔ یہی وجہ ہے کہ صاحبزادہ طارق ﷲ اور دیگر سیاسی جماعتوں کی مقامی قیادت نمائندہ وفد کی صورت میں وزیرِ اعظم کے ساتھ ملنے کا پروگرام بنا رہے ہیں &rsquo;&rsquo;تاکہ انہیں اگلے 30 سے 50 سال تک کے لئے مالاکنڈ ڈویژن میں کسٹمز ایکٹ کے نفاذ سے روکا جا سکے۔&lsquo;&lsquo;

اس سال جنوری میں پارلیمنٹ کے ایوانِ بالا میں جماعتِ اسلامی کے سینیٹر مشتاق احمد خان کی جانب سے پیش کردہ ایک قرارداد کو بھی متفقہ طور پر منظور کیا گیا جس میں خیبر پختونخوا کے ضم شدہ قبائلی اضلاع اور مالاکنڈ ڈویژن میں پچیسویں آئینی ترمیم کے تحت فراہم کردہ ٹیکس استثنیٰ میں مزید 10 سال تک کی توسیع کی سفارش کی گئی ہے۔

ایک مقامی ٹرانسپورٹر مشتاق احمد خان کہتے ہیں کہ حکومت ایمنسٹی سکیم کے تحت مالاکنڈ ڈویژن میں نان کسٹم پیڈ گاڑیوں پر مناسب ٹیکس لگا کر انہیں باقاعدہ طور پر رجسٹر کر دے &rsquo;&rsquo;جس سے ایک طرف تو غریب شہریوں کو فائدہ ہو گا تو دوسری طرف حکومت کواربوں روپے آمدن ہو گی جبکہ ان لاکھوں گاڑیوں کی رجسٹریشن سے سالانہ ٹوکن کی مد میں سرکاری خزانہ کو کروڑوں روپے کا فائدہ ہو گا۔&lsquo;&lsquo;

لیکن وہ یہ بھی کہتے ہیں کہ اس کے بعد سمگل شدہ گاڑیوں کی رجسٹریشن اور مقامی اندراج کا راستہ ہمیشہ کے لئے بند کر دیا جائے۔

موٹر سائیکلوں اور گاڑیوں کی رجسٹریشن: 'اگر جیب میں پیسے نہیں تو ایکسائز دفتر کا رخ نہ کریں'

مالاکنڈ ڈویژن میں رواں دواں سستی، نان کسٹم پیڈ گاڑیوں کا مستقبل کیا ہے؟

text

ملک کے شمال مغربی صوبے خیبر پختونخوا کے دارالخلافے پشاور سے تقریباً 300 کلومیٹر شمال مشرق کی جانب ضلع اَپر دِیر سے تعلق رکھنے والی مسکان بی بی کا تعلق ایک قدامت پسند مذہبی گھرانے سے ہے۔ لیکن اس کے باوجود انہوں نے 2015ء کے بلدیاتی انتخابات میں حصہ لیا تھا۔

چھتیس سالہ مُسکان اور انتخاب لڑنے کی خواہش مند دیگر خواتین کے لئے یہ ایک مشکل فیصلہ تھا۔ لیکن انہوں نے گھر والوں کی طرف سے حوصلہ افزائی اور تعاون سے یہ مشکل قدم اٹھا ہی لیا اور پہلی ہی بار وہ تحصیل کونسل کی رکن منتخب ہو گئیں۔

وہ سمجھتی تھیں کہ منتخب نمائندہ کے طور پر وہ خواتین کے مسائل کو بہتر طریقے سے اجاگر اور حل کر سکیں گی۔

لیکن منتخب ہونے کے بعد ان پر یہ راز کھلا کہ تحصیل کونسل میں فنڈز کی تقسیم کے حوالے سے مرد اور خواتین ارکان کے لئے مختلف لائحہ عمل وضع کیا گیا ہے۔ مسکان کہتی ہیں کہ &quot;ہونا تو یہ چاہیے تھا کہ خواتین کونسلروں کو ترقیاتی فنڈز میں اگر زیادہ نہیں تو کم از کم مرد ارکان کے مساوی فنڈ دیا جاتا۔ خواتین ارکان کے لئے کوئی ترقیاتی فنڈ مختص نہیں تھا۔&quot;

خیبر پختونخوا لوکل گورنمنٹ ایکٹ 2013 &mdash; جس کے تحت 30 مئی 2015ء کے بلدیاتی انتخابات ہوئے تھے &mdash; کے مطابق خواتین کے لئے مخصوص نشستیں رکھی گئی تھیں یعنی وہ رائے دہندگان کے براہ راست ووٹ کے ذریعے منتخب نہیں ہوتی تھیں۔ یہی وجہ ہے کہ فنڈز کی تقسیم میں ان کی حیثیت &#39;دوسرے درجےکے شہری&#39; کی سی تھی۔

اس غیر مساویانہ رویے کی وجہ سے وہ اس نتیجے پر پہنچیں کہ &quot;سیاسی جماعتوں نے محض قانونی شرط پوری کرنے کے لئے انہیں ضلعی اور تحصیل کونسلوں میں نمائندگی دی ہے جبکہ اس کا خواتین کو خود مختاری دینے کے نظریے سے کچھ لینا دینا نہیں ہے۔&quot;

یہی وجہ ہے کہ کچھ عرصہ بعد وہ اور ان جیسی دیگر خواتین نے مایوس ہو کر تحصیل کونسل کے اجلاسوں میں شریک ہونا چھوڑ دیا۔ ان کے مطابق &quot;اگر خواتین ارکان کو ترقیاتی فنڈ نہیں دیئے جائیں گے تو ہم کس طرح خواتین کے مسائل حل کر پائیں گی اور اگر ہم ان کے مسائل نہیں حل کر پائیں گی تو کل ان کا سامنا کس طرح سے کریں گی۔&quot;

لیکن مزے کی بات یہ ہے کہ کونسل کے سیشنز میں شرکت نہ کرنے کے باوجود وہ رجسٹر میں حاضر ہوتی تھیں۔ مسکان کہتی ہیں &quot;اس مایوس کُن صورتِ حال کے پیش نظر ہم اپنی جگہ اپنے قریبی رشتہ داروں کو کونسل اجلاس میں بھیج دیتی تھیں اور اپنی توجہ امورِ خانہ پر مرکوز رکھتیں۔ ہاں، بجٹ اجلاس میں ہم خود شریک ہوتی تھیں۔&quot;

مسکان ہی نہیں بلکہ اپر دِیر سے تعلق رکھنے والی دوسری خاتون اراکینِ تحصیل کونسل&nbsp; بھی کچھ ایسی ہی داستان سناتی ہیں۔

ایک اور سابق خاتون رکنِ تحصیل کونسل نے نام نہ بتانے کی شرط پر سُجاگ کو بتایا کہ وہ کونسل کے اجلاس میں شرکت کے لئے تقریباً 40 کلومیٹر دور سے آتی تھیں۔ انہیں اجلاس میں شرکت کے لئے ایک سے زیادہ گاڑیاں بدل کر آنا پڑتا تھا لیکن اس کے باوجود وہ تسلسل سے آتی تھیں۔

ان کا کہنا ہے کہ اجلاس کے دوران انہیں پانچ سو روپے یومیہ اعزازیہ ملتا تھا جو، ان کے مطابق، بہت کم تھا جس کی وجہ سے بہت سی خواتین ارکان نے کونسل کے اجلاسوں میں آنا ترک کر دیا۔ وہ کہتی ہیں کہ اگر انہیں بھی مساویانہ ترقیاتی فنڈ دیئے جاتے تو وہ ان مشکلات کے باوجود اپنی حاضری کو یقینی بناتیں۔

تحصیل کونسل دِیر کی ایک خاتون رکن کے شوہر سید خان کہتے ہیں کہ خواتین کو الیکشن میں حصہ لینے کے لئے راضی کرنا ایک مشکل کام تھا۔ &quot;میں نے اپنی بیوی کو جیسے تیسے انتخاب میں حصہ لینے کے لئے تو راضی کر لیا لیکن منتخب ہونے کے بعد انہیں اجلاس کے دوران ایک تماشائی کے طور پر ایک طرف بٹھا دیا جاتا تھا جس کی وجہ سے وہ کونسل اجلاس میں شرکت کرنے سے بد دل ہو گئیں۔&quot;

ایک اور خاتون رکن کے شوہر، جو اپنا نام ظاہر نہیں کرنا چاہتے،&nbsp; نے سُجاگ کو بتایا کہ وہ بھی اپنی بیوی کی جگہ کونسل کے اجلاسوں میں شرکت کرتے رہے ہیں۔ انہیں عام اجلاسوں میں تو کبھی کسی اعتراض کا سامنا نہیں کرنا پڑا لیکن &quot;بجٹ اجلاس میں خواتین ارکانِ کونسل کی حاضری ضروری ہوتی تھی۔&quot;

<h2>وہی ہے چال بے ڈھنگی</h2>

خیبر پختونخوا میں 31 مارچ 2022 کو ہونے والے بلدیاتی انتخابات کے دوسرے مرحلے میں ضلع اپر دِیر کی چھ تحصیلوں &mdash; ضلعی ہیڈ کوارٹرز کی تحصیل دِیر، تحصیل براول، تحصیل لرجم، تحصیل شرینگل، تحصیل کلکوٹ اور تحصیل واڑی &mdash; میں مردوں کے ساتھ ساتھ درجنوں خواتین امیدوار تحصیل اور ویلیج اور نیبرہُڈ کونسلوں کی ارکان منتخب ہوئیں۔ ان چھ تحصیل کونسلوں میں خواتین ووٹرز نے اپنے مسائل کے حل کے لئے 40 خواتین ممبران کو براہ راست منتخب کیا ہے۔

لیکن حسبِ روایت منتخب خواتین ارکان کی اپنی متعلقہ کونسل کے ماہانہ اجلاس میں شرکت سے گریزاں نظر آتی ہیں جس کی وجہ سے لاکھوں خواتین ووٹرز کے مسائل صحیح طریقے سے ان فورمز پر نہیں اٹھائے جا رہے۔

پچھلے سال 18 جولائی کو حلف برادری کے اجلاس میں تو تمام منتخب خواتین موجود تھیں لیکن اس کے بعد ہونے والے اجلاسوں میں ان کی شرکت نہ ہونے کے برابر رہی اور ان کے مرد رشتے دار ان کے جگہ ان کونسلوں میں شریک ہوئے۔ تحصیل کونسل دیر میں اب تک پانچ اجلاس منعقد ہوئے ہیں۔ اسی طرح شرینگل تحصیل کونسل کے تین اجلاس منعقد کئے گئے ہیں جبکہ تحصیل براول کے اب تک دو اجلاس منعقد ہوئے ہیں۔

<h2>قانونی گرفت</h2>

اس تمام صورتِ حال پر حکومت کے کردار پر اپر دِیر میں لوکل گورنمنٹ ڈیپارٹمنٹ کے ایک اسسٹنٹ ڈائریکٹر بادشاہ زادہ کہتے ہیں کہ ضلع اپر دِیر میں چھ تحصیلیں، ایک سو 17 ویلج اور پانچ نیبرہُڈ کونسلیں ہیں۔ ان کے مطابق مقامی حکومتوں میں تینوں سطحوں پر خواتین کو نمائندگی دی گئی ہے تاکہ وہ اپنے ضلع کی خواتین کی کماحقہ نمائندگی کر سکیں &quot;اسی لئے خواتین کی تحصیل، ویلج اور نیبرہُڈ کونسلوں میں شرکت ضروری ہے تاکہ وہ خواتین کے مسائل کو کونسل میں پیش کر کے انہیں حل کروائیں۔&quot;

انہوں نے کہا کہ خیبر پختونخوا کے 2013ء کے لوکل گورنمنٹ کے تحت بنائے گئے رولز آف بزنس &mdash; پروسیجر اینڈ کنڈکٹ آف بزنس اینڈ میٹنگ 2015 &mdash; کی شق نمبر 44 کی ذیلی شق 1 کے مطابق اگر کونسل کا کوئی رکن تحریری درخواست کے بغیر کسی اجلاس سے مسلسل پانچ دن غیر حاضر رہے تو اس کی نشست کو خالی قرار دیا جا سکتا ہے۔

بادشاہ زادہ کہتے ہیں خواتین ارکان کی جگہ ان کے رشتہ داروں کی کونسل اجلاس میں شرکت ایک غیر قانونی عمل ہے &quot;یہی وجہ ہے کہ لوکل گورنمنٹ ڈیپارٹمنٹ کونسل کے اجلاس سے غیر حاضر رہنے والی خواتین اور مرد ارکان سے جواب طلبی کے لئے جلد ہی شو کاز نوٹس جاری کرے گا اور تسلّی بخش جواب نہ ملنے کی صورت میں ان ارکان کو نا اہلی کا سامنا کرنا پر سکتا ہے۔&quot;

لیکن دوسری جانب خواتین کے حقوق پر کام کرنے والے تنظیم دِیر ڈیولپمنٹ آرگنائزیشن کے پروگرام منیجر ارشد ابدالی سمجھتے ہیں کہ کونسل کے اجلاسوں میں خواتین کی شرکت کو یقینی بنانے کے لئے ضروری ہے کہ انہیں تحصیل کی سطح پر ہونے والے ترقیاتی منصوبوں میں برابر کا حق دار تسلیم کیا جائے &quot;بصورتِ دیگر خانہ پُری کے لئے تو وہ منتخب ہوتی رہیں گی لیکن عورتوں کی خود مختاری کا خواب شرمندہ تعبیر نہ ہو سکے گا۔&quot;

قبائلی اضلاع میں مقامی حکومتوں کے انتخابات: 'بے اختیار نمائندے کونسلوں میں بیٹھ کر کیا کریں گے'۔

بلدیاتی حکومتیں: اپر دِیر کی خواتین ارکان کونسل کے اجلاسوں میں شرکت سے کیوں گریزاں ہیں؟

گُل افضل پچھلے پانچ سال سے کمر درد میں مبتلا ہیں۔ بیماری سے پہلے وہ تجارتی سامان کی باربرداری کیا کرتے تھے لیکن مسلسل بھاری بوجھ اٹھانے سے ان کی صحت متاثر ہونے لگی تو انہوں نے یہ کام چھوڑ دیا اور کوئی ایسا ذریعہ روزگار ڈھونڈنے لگے جس کی مدد سے وہ سات افراد پر مشتمل اپنے کنبے کی کفالت گھر بیٹھے کر سکیں۔

دو سال پہلے ایسا ہی ایک موقع اس وقت ان کے ہاتھ آیا جب ایک سرمایہ کار نے ان سے رابطہ کر کے کہا کہ وہ ان کے گھر کے ساتھ واقع ان کی ملکیتی پہاڑی ٹھیکے پر لے کر اس سے پتھر نکالنا چاہتا ہے۔ انہیں معلوم تھا کہ اس عمل کے نتیجے میں ان کے گھر کو بھی نقصان پہنچ سکتا ہے لیکن وہ کہتے ہیں کہ تنگدستی سے مجبور ہو کر انہوں نے ہاں کر دی۔&nbsp;

اب انہیں ہر وقت یہی خدشہ رہتا ہے کہ پتھر نکالنے کے دوران اپنی جگہ سے ہل جانے والے پہاڑی تودے کہیں ان کے گھر پر نہ آ گریں۔ مزیدبرآں پتھریلی چٹانوں کو کاٹنے کے لیے کیے جانے والے دھماکوں اور کھدائی کی وجہ سے ان کا گھر ہر وقت لرزتا رہتا ہے جبکہ اس دوران اڑنے والی دھول سے ان کے گھرانے کی صحت بھی متاثر ہو رہی ہے۔&nbsp;

خیبرپختونخوا کے شمالی ضلع اپردیر کے صدرمقام دیر سے چار کلومیٹر مشرق میں واقع ایک گاؤں میں رہنے والے 59 سالہ گل افضل اکیلے اس صورت حال کا سامنا نہیں کر رہے۔ ان کے پڑوس میں کئی اور زمین مالکان نے بھی انہی کی طرح اپنی ملکیتی پہاڑیاں پتھروں کی کان کنی کے لیے ٹھیکے پر دے رکھی ہیں۔

ایک مقامی سماجی کارکن ارشد خان کا کہنا ہے کہ اگرچہ اس علاقے میں کافی عرصے سے یہ کان کنی کی جا رہی ہے لیکن &quot;پچھلی ایک دہائی میں یہ کام پہلے سے کہیں بڑھ گیا ہے جس کی وجہ سے مقامی قدرتی حسن ختم ہو رہا ہے اور مقامی ماحول کو سخت نقصان پہنچ رہا ہے&quot;۔ اس نقصان کی تفصیل بیان کرتے ہوئے وہ کہتے ہیں کہ خوگو اوبہ چینہ، محبتئی چشمہ اور تھانہ چشمہ جیسے پانی کے قدیم مقامی چشمے خشک ہوتے جا رہے ہیں اور پہاڑوں میں بسنے والے جانوروں کی قدرتی چراگاہیں، پرندوں کے ٹھکانے اور جنگلی حیات کی خوراک ختم ہوتی جا رہی ہیں۔&nbsp;

اپر دِیر میں متعین خیبرپختونخوا کے محکمہ جنگلی حیات کے سب ڈویژنل آفیسر نور محمد ان سے متفق ہیں۔ وہ کہتے ہیں کہ پچھلے 25 سال میں جنگلوں اور پہاڑوں کو اندھا دھند کاٹا گیا ہے جس کے نتیجے میں اس ضلعے میں جنگلی حیات کی موجودگی پر شدید منفی اثرات مرتب ہوئے ہیں۔ ان کے مطابق ماضی میں اپردِیر کے بالائی علاقوں میں مارخور، چیتا، بھیڑیا، گیدڑ، بندر، ریچھ، لومڑی، خرگوش اور دیگر جانور عام ملتے تھے لیکن یہ سب &quot;اب ناپید ہوتے جا رہے ہیں&quot;۔ اسی طرح ان علاقوں میں &quot;مرغ زرین، چکور، رام چکور، مور، مونال اور مینا جیسے پرندے بھی پائے جاتے تھے جو اب کہیں دکھائی نہیں دیتے&quot;۔

پہاڑوں سے پتھر نکالنے کے عمل کے دوران پیدا ہونے والی دھول سے مقامی باسیوں کی صحت بھی بری طرح متاثر ہو رہی ہے اور ان میں سانس اور پھیپھڑے کی بیماریاں بڑھ رہی ہیں۔ اپردیر کے ڈسٹرکٹ ہیڈ کوارٹرز ہسپتال کے میڈیکل سپرنٹنڈنٹ ڈاکٹر امتیاز احمد ان بیماریوں میں اضافے کی تصدیق کرتے ہوئے کہتے ہیں کہ جنوری 2019 سے اگست 2022 تک ان کے ہسپتال میں سانس کی نالی سے متعلقہ بیماریوں میں مبتلا 57 ہزار پانچ سو نو مریض لائے گئے جبکہ اسی عرصے میں دمے کے تین ہزار دو سو 94 مریض اور پھیپھڑوں کی مختلف بیماریوں کا شکار پانچ سو 21 مریض بھی وہاں معائنے اور علاج کے لیے آئے۔

اگرچہ ان کے پاس ایسے اعدادوشمار موجود نہیں جن کی مدد سے اس صورت حال کا موازنہ ماضی سے کیا جا سکے تاہم وہ کہتے ہیں کہ &quot;یہ ایک غیرمعمولی تعداد ہے&quot;۔&nbsp;

اپردیر کے علاقے قولنڈی میں پتھروں کی کان کنی سے منسلک 34 سالہ نصیر اللہ خان بھی کہتے ہیں کہ ان کے کام کے نتیجے میں شدید ماحولیاتی آلودگی پیدا ہو رہی ہے۔ لیکن وہ کہتے ہیں کہ اس مسئلے پر قابو پانے کے لیے اس کاروبار پر پابندی نہیں لگائی جا سکتی کیونکہ، ان کے مطابق، &quot;درجنوں ٹھیکیداروں اور ہزاروں مزدوروں کی روزی روٹی اس سے جڑی ہوئی ہے&quot;۔&nbsp;

<h2>کاغذی قواعد، غیر موثر سزائیں</h2>

لوئردیر اور اپردِیر کے جڑواں اضلاع میں پتھروں کی کان کنی کے لیے جدید ٹیکنالوجی کے بجائے روایتی طریقے استعمال کیے جاتے ہیں جن میں پتھریلی چٹانوں کو بارودی دھماکوں کے ذریعے توڑا جاتا ہے اور پھر ٹوٹی ہوئی چٹانوں کو کھدائی کرنے والی مشینوں کے ذریعے اکٹھا کیا جاتا ہے۔ اس عمل میں بعض اوقات پورے پورے پہاڑ اپنی جگہ سے کھسک جاتے ہیں جس سے ان کے قریب واقع آبادیوں پر تودے گرنے کا خطرہ پیدا ہو جاتا ہے۔

اس امکان کی روک تھام کے لیے خیبرپختونخوا کے صوبائی قانون میں واضح طور پر کہا گیا ہے کہ پہاڑوں کے صرف انہی حصوں کو توڑا جا سکتا ہے جو سڑکوں اور انسانی آبادیوں سے دور ہوں۔ اس قانون میں پتھر توڑنے والے کارخانوں پر یہ بھی لازم قرار دیا گیا ہے کہ وہ اس عمل کے دوران خارج ہونے والی دھول کو فضا میں شامل ہونے سے روکنے کے لیے اپنی تمام سرگرمیاں سبز رنگ کے پردے کے پیچھے انجام دیں گے۔ لیکن اپردِیر کے علاقے کوٹکے سے تعلق رکھنے والے 37 سالہ سماجی کارکن اسرار یوسفزئی کہتے ہیں کہ &quot;ان قواعدوضوابط پر شاذ ہی کوئی عمل کرتا ہے&quot;۔

اگرچہ اپردِیر میں متعین اسسٹنٹ کمشنر سکندر خان ان کی بات کی تردید کرتے ہوئے کہتے ہیں کہ ضلعی انتظامیہ اور خیبرپختونخوا کا محکمہ معدنیات ایسے لوگوں کے خلاف وقتاً فوقتاً کارروائی کرتے رہتے ہیں جو ان قواعدوضوابط کی خلاف ورزی میں ملوث پائے جاتے ہیں لیکن وہ تسلیم کرتے ہیں کہ یہ کارروائی زیادہ موثر نہیں ہوتی۔ ان کے نزدیک اس کی وجہ یہ ہے کہ اس جرم کا ارتکاب کرنے والوں کو &quot;زیادہ سے زیادہ تین ماہ قید اور دس ہزار روپے جرمانے کی سزا دی جا سکتی ہے جو انہیں اس کام سے باز رکھنے کے لیے بہت ناکافی ہے&quot;۔

پتھرو آج مرے سر پہ برستے کیوں ہو: اپر دیر میں پہاڑ کاٹنے کا کاروبار 'قدرتی ماحول اور انسانی صحت کو سخت نقصان پہنچ رہا ہے'۔

جب صہیب علی نے 22 فروری 2022 کو گلے میں پھندا ڈال کر خودکشی کی تو اس کی عمر محض 14 سال تھی اور وہ نویں جماعت میں پڑھتا تھا۔&nbsp;

اس کے گھر والوں کے بقول اس کا مزاج دوستانہ تھا اور وہ کھیل کود کا شوقین تھا لیکن اس کی موت کے بعد جاری ہونے والی ایک طبی رپورٹ میں اس کی خودکشی کا سبب ذہنی دباؤ بتایا گیا۔ اس کے والد کرم علی کا کہنا ہے کہ بظاہر ان کے بیٹے کو کسی طرح کی کوئی ذہنی بیماری یا نفسیاتی پریشانی لاحق نہیں تھی البتہ وہ تسلیم کرتے ہیں کہ وہ حساس طبیعت کا مالک تھا اور عین ممکن ہے کہ اسے کسی ایسے مسئلے کا سامنا ہو جس کے بارے میں اس نے کسی کو نہ بتایا ہو۔&nbsp;

صہیب علی کا گھر پرواک پائین نامی پہاڑی گاؤں میں ہے جو خیبر پختونخوا کے شہر چترال سے تقریباً ایک سو کلومیٹر شمال مشرق میں واقع ہے۔ اس کی موت اس دور افتادہ علاقے میں پچھلے چند سالوں میں ہونے والا خودکشی کا چھٹا واقعہ ہے۔ کرم علی کا کہنا ہے کہ ان کے خاندان کے کچھ دیگر لوگ بھی خودکشی کی کوشش کر چکے ہیں جن میں صہیب کے ایک ماموں بھی شامل ہیں۔ &nbsp;

گورنمنٹ پوسٹ گریجوایٹ جہانزیب کالج سوات میں سماجیات کے استاد ظفر احمد کہتے ہیں کہ پرواک پائین میں ہی نہیں بلکہ پورے ضلع چترال میں پچھلی دو دہائیوں کے دوران خودکشی کے درجنوں واقعات پیش آئے ہیں۔ انہوں نے اس رجحان پر تفصیلی تحقیق کی ہے جس سے ظاہر ہوتا ہے کہ 2013 سے لے کر 2019 تک سات سالوں میں 74 چترالی مردوں اور ایک سو دو چترالی خواتین نے خودکشی کی۔ ان کے مطابق ان میں سے 36 فی صد لوگوں نے دریائے چترال میں چھلانگ لگا کر اپنی زندگی کا خاتمہ کیا، 28 فیصد افراد نے خود کو گولی ماری جبکہ 36 فی صد نے گلے میں پھندا ڈال کر یا زہریلی اشیا کھا کر خود کو ہلاک کیا۔

اس سے پہلے 2007 اور 2012 کے درمیان بھی اس ضلعے سے خودکشی کے تین سو 12 واقعات مقامی اخبارات میں رپورٹ ہوئے تھے۔ اسی طرح پچھلے تین سال کے دوران بھی یہاں خودکشی کے کم از کم 27 واقعات سامنے آئے ہیں۔&nbsp;

ان کی تفصیل بیان کرتے ہوئے ہیومن رائٹس کمیشن چترال نامی غیرسرکاری تنظیم کے سربراہ نیاز احمد نیازی کہتے ہیں کہ 2020 میں پانچ خواتین اور پانچ مردوں اور 2021 میں تین خواتین اور نو مردوں نے خودکشی کی۔ ان کے مطابق اِس سال بھی چترال میں &quot;اگست کے اختتام تک ایک خاتون اور چار مرد خودکشی کر چکے ہیں&quot;۔

<h2>مرتے ہیں آرزو میں جینے کی</h2>

ایک لمبا عرصہ یہ خودکشیاں چترال سے باہر کے لوگوں کی نظروں سے پوشیدہ رہیں۔ یہاں تک کہ خیبر پختونخوا کے محکمہ صحت نے بھی محض پانچ سال پہلے اس رجحان کا نوٹس لیا اور وہ بھی اس وجہ سے کہ چترال کے صحافی اس کے بارے میں صوبائی اور قومی سطح کے صحافتی اداروں میں لکھنے لگے تھے۔&nbsp;

تاہم ان کی دی ہوئی خبروں کی جانچ پڑتال کرنے کے لیے محکمے نے سینئر سرکاری اہل کاروں پر مشتمل ایک چار رکنی کمیٹی بنائی اور اسے یہ ذمہ داری بھی دی کہ وہ خودکشی کے واقعات کے محرکات کی نشاندہی کرے۔ یہ کمیٹی تفصیلی تحقیقات کے بعد اس نتیجے پر پہنچی کہ بیشتر خودکشیوں کے بنیادی اسباب غربت، بے روزگاری اور نفسیاتی امراض تھے۔&nbsp;

آغا خان ہیلتھ سروسز پاکستان نامی غیرسرکاری تنظیم کے خیبر پختونخوا کے سربراہ معراج الدین ان میں سے غربت کو خودکشی کی سب سے اہم وجہ سمجھتے ہیں۔ ان کا کہنا ہے کہ چترال میں تقریباً 70 فیصد لوگ ایک دن میں 500 روپیہ بھی نہیں کما پاتے اس لیے ان میں سے اکثر مسلسل مالی مسائل کا سامنا کرنے کی وجہ سے ذہنی دباؤ کا شکار ہو جاتے ہیں۔ &quot;ان میں سے جو لوگ یہ دباؤ زیادہ دیر تک نہیں جھیل پاتے وہ خودکشی کے ذریعے اس سے نجات کی راہ ڈھونڈتے ہیں&quot;۔

ان کا یہ بھی خیال ہے کہ صہیب علی کی عمر کے بچوں میں خودکشی کے رحجان کی بنیادی وجہ اُن کے والدین کا یہ دباؤ ہوتا ہے کہ وہ امتحان میں اچھے نمبر لیں۔ وہ کہتے ہیں کہ &quot;جب یہ بچے اپنی یا اپنے خاندان کی توقعات کے مطابق نمبر حاصل نہیں کر پاتے تو انہیں لگتا ہے کہ وہ کبھی کامیاب نہیں ہو پائیں گے لہٰذا وہ مایوس ہو کر اپنی زندگی ختم کر لیتے ہیں&quot;۔&nbsp;

چترال پولیس نے اسی لیے مقامی سکولوں، کالجوں اور یونیورسٹی میں &#39;زندگی ایک نعمت ہے&#39; کے عنوان سے ایک مہم چلا رکھی ہے۔ ضلعی پولیس کی سربراہ سونیا شمروز خان کہتی ہیں کہ &quot;اس مہم کے تحت طلبا و طالبات کو خوش باش زندگی گزارنا اور مشکل حالات کا صبر و تحمل سے مقابلہ کرنا سکھایا جاتا ہے&quot;۔&nbsp;

آغا خان ہیلتھ سروسز پاکستان نے بھی 2017 سے چترال کے تین مقامی مراکزِ صحت، ایک تحصیل ہیڈکوارٹر ہسپتال اور ایک طبی مرکز میں مقامی نفسیاتی مریضوں کو یہ سہولت فراہم کر رکھی ہے کہ وہ انٹرنیٹ کے ذریعے گلگت میڈیکل سنٹر اور آغاز خان یونیورسٹی کراچی کے ڈاکٹروں سے طبی مشورے کر سکیں۔ معراج الدین کہتے ہیں کہ اس طریقے سے اب تک &quot;ذہنی امراض میں مبتلا چار سو 50 سے زیادہ افراد کا علاج کیا جا چکا ہے&quot; جو، ان کے مطابق، &quot;اب صحت مند زندگی گزار رہے ہیں&quot;۔&nbsp;

<h2>عورت کا مقدر: قیدِ حیات یا بندِ غم</h2>

ظفر احمد کی تحقیق کے مطابق پچھلے چند سالوں میں چترال میں ہر 10 خودکشی کرنے والے لوگوں میں سے لگ بھگ چھ خواتین تھیں۔ ان میں سے آدھی شادی شدہ اور 20 سال سے 40 سال کی عمر کی تھیں۔ مقامی سماجی کارکنوں کا کہنا ہے کہ اِن خواتین کی خودکشی کی وجوہات میں ازدواجی مسائل، طلاقیں اور غربت سب سے نمایاں ہیں۔

چترال شہر میں سماجی بہبود کے کاموں میں سرگرم شاہدہ پروین کا کہنا ہے کہ مقامی لڑکیوں کی چترال سے باہر شادیاں بھی ان کی خودکشی کا سبب بن رہی ہیں۔ اپنی بات کی وضاحت کرتے ہوئے وہ کہتی ہیں کہ بعض غریب چترالی باشندے پیسوں کے عوض اپنی کم سِن بیٹیوں کی شادیاں پنجاب اور خیبر پختونخوا کے ادھیڑ عمر مردوں سے کر دیتے ہیں جن میں بیشتر پہلے سے شادی شدہ ہوتے ہیں۔ لیکن، ان کے مطابق، &quot;ایسی لڑکیوں کو سسرال میں دوسری بیوی بن کر رہنا پڑتا ہے لہٰذا عموماً ان کی شادیاں کا انجام طلاق پر ہوتا ہے جو چترالی معاشرے میں اچھی نہیں سمجھی جاتی&quot;۔ &nbsp;

شاہدہ پروین خود بھی انہی حالات سے گزر چکی ہیں۔ 1983 میں جب وہ چھٹی جماعت میں زیرتعلیم تھیں تو ان کے والدین نے انہیں ادھیڑ عمر کے ایک غیرمقامی شخص سے بیاہ دیا تھا جس نے پہلے بھی تین شادیاں کر رکھی تھیں۔ ان کا کہنا ہے کہ سسرال میں انہیں مسلسل ظلم و زیادتی کا سامنا کرنا پڑا جس کے نتیجے میں بالآخر 1989 میں ان کی شادی ختم ہو گئی۔&nbsp;

اس مسئلے کی روک تھام کے لیے چترال کی ضلعی انتظامیہ نے 2005 میں ایک طریقہ کار بھی وضع کیا جس کے تحت ہر یونین کونسل میں ایسی کمیٹیاں بنائی گئیں جو مقامی لڑکیوں سے شادی کے خواہش مند غیرچترالی لوگوں کی جانچ پڑتال کی ذمہ دار تھیں۔ تاہم ان کمیٹیوں کے کام کے بارے میں ایسے کوئی اعددوشمار موجود نہیں جن سے اس طریقہ کار کی افادیت کے بارے میں کچھ کہا جا سکے۔&nbsp;

معراج الدین خواتین میں خودکشی کے رحجان کی ایک اور وجہ کی نشان دہی کرتے ہوئے کہتے ہیں کہ چترال میں روزگار کے زیادہ مواقع نہ ہونے کی وجہ سے بیشتر مقامی مرد محنت مزدوری کے لئے ملک کے دوسرے حصوں یا دوسرے ملکوں میں چلے جاتے ہیں جہاں سے وہ مہینوں بلکہ سالوں تک واپس نہیں آ پاتے۔ &quot;ایسے میں ان کی بیویوں کو گھریلو پریشانیوں اور معاشرتی بندشوں سے اکیلے ہی لڑنا پڑتا ہے جس سے وہ ذہنی کِھچاؤ کا شکار ہو جاتی ہیں&quot;۔ ان کے مطابق یہی &quot;کِھچاؤ انہیں خودکشی جیسے انتہائی اقدام کی طرف لے جاتا ہے&quot;۔

ہم تو اس جینے کے ہاتھوں مر چلے: چترال میں معاشی اور معاشرتی دباؤ کا شکار لوگ 'خودکشی میں راہِ نجات ڈھونڈ رہے ہیں'۔

امان اللہ خان کو خیبرپختونخوا کی صوبائی حکومت سے سخت شکوہ ہے۔ وہ صوبے کے شمال مغربی ضلع چترال کے کڑوپ رشت بازار میں قیمتی پتھروں کی تجارت کرتے ہیں اور کہتے ہیں کہ حکومتی پالیسیوں کی وجہ سے ان جیسے &quot;ہزاروں مقامی لوگوں کی روزی روٹی بند ہونے والی ہے&quot;۔&nbsp;

انہیں شکایت ہے کہ یہ پالیسیاں مقامی وسائل پر مقامی آبادی کے حق کو نظرانداز کر کے بنائی جا رہی ہیں۔ اس لیے، ان کے مطابق، ان کے نتیجے میں چترال میں معدنیات کی کھدائی، نقل و حمل اور خریدوفروخت سے منسلک ٹھیکیداروں، مزدوروں، ڈرائیوروں اور تاجروں سبھی کا روزگار خطرے میں پڑ جائے گا۔&nbsp;

معدنیات کی کان کنی کرنے والے مقامی ٹھیکے داروں کی تنظیم، مائنز اینڈ منرلز ایسوسی ایشن چترال، کو بھی یہی شکوہ ہے۔ اس کے سربراہ شہزادہ مدثر کہتے ہیں کہ مقامی سرمایہ کار ذاتی وسائل خرچ کر کے مقامی پہاڑوں میں چھپی معدنیات کا کھوج لگاتے ہیں لیکن کان کنی کے ٹھیکے دیتے وقت انہیں نظرانداز کر دیا جاتا ہے اور &quot;معدنیات سے بھرپور جگہیں غیرمقامی لوگوں اور بڑی کمپنیوں کو دے دی جاتی ہیں&quot;۔&nbsp;

اسی تنظیم کے ایک رکن رضاالملک کہتے ہیں کہ وہ غیرمقامی سرمایہ کاروں کی مخالفت نہیں کرتے لیکن یہ مطالبہ ضرور کرتے ہیں کہ ٹھیکے دیتے وقت &quot;تمام لوگوں کے لیے ایک ہی پیمانہ&quot; رکھا جائے۔ ان کا کہنا ہے کہ پچھلے سال کان کنی کے ٹھیکے لینے کے لیے دو سو مقامی لوگوں نے بھی درخواستیں دیں لیکن صوبائی &quot;محکمہ معدنیات نے غیرمقامی درخواست دہندگان میں سے کچھ کو تو 50 ہزار ایکڑ اراضی پر کان کنی کرنے کی اجازت دے دی لیکن کسی مقامی ٹھیکے دار کو اس مقصد کے لیے پانچ سو ایکڑ سے زیادہ جگہ بھی نہیں دی&quot;۔&nbsp;

<h2>چترال کے معدنی وسائل پر کس کا حق ہے؟</h2>

پشاور سے تین سو 57 کلومیٹر شمال مغرب میں واقع ضلع چترال کے پہاڑوں میں قیمتی پتھر، تانبہ، سیسہ، آرسینک، مائیکا، سُرمہ اور کئی دیگر معدنیات پائی جاتی ہیں۔ان کی کان کنی کا آغاز 1913 میں ہوا تھا لیکن اُس دور میں یہاں پکی سڑکیں نہیں تھیں اس لیے یہ معدنیات بہت محدود پیمانے پر نکال کر دوسرے علاقوں میں پہنچائی جا سکتی تھیں۔ نتیجتاً کان کنی مقامی آبادی کے محض ایک محدود حصے کے روزگار کا وسیلہ ہی بن سکی اور زیادہ تر چترالی باشندے زراعت، مویشی بانی، شکار اور لکڑی کی خریدوفروخت سے وابستہ رہے۔

لیکن آج سے تقریباً 15 سال پہلے صوبائی حکومت نے مقامی لوگوں کی ذاتی اراضی اور رہائشی مکانوں کو چھوڑ کر چترال کی باقی تمام زمین کو سرکاری ملکیت میں لے لیا تو روزگار کے یہ روایتی ذرائع کم ہونے لگے۔ رضاالملک کہتے ہیں کہ اِس وقت ان کے ضلعے کی 95 فیصد اراضی صوبائی حکومت کے پاس ہے۔

ان کا یہ بھی کہنا ہے کہ صوبائی محکمہ جنگلی حیات نے اس سرکاری زمین میں واقع جنگلات میں شکار کھیلنے اور ان سے لکڑی کاٹنے پر پابندی لگا دی ہے۔ اسی طرح مقامی دریاؤں کے کناروں سے ریت اور بجری اٹھانا اور وہاں پتھر توڑنے کے کارخانے لگانا بھی ممنوع قرار دے دیا گیا ہے۔ ان کے مطابق &quot;ان حالات میں کان کنی ہی مقامی لوگوں کا واحد ذریعہِ روزگار رہ گیا ہے لیکن حکومت اب اسے بھی بند کرنے پر تُلی ہوئی ہے&quot;۔

اس شکایت کا بنیادی سبب خیبر پختونخوا حکومت کا وہ فیصلہ ہے جس کے تحت 2008 اور 2021 کے درمیان چترال کے 80 فیصد معدنیاتی علاقے میں مقامی لوگوں کے کان کنی کے حقوق ختم کر دیے گئے تھے۔ اس اقدام کا مقصد اس علاقے کو 15 حصوں میں تقسیم کر کے ایسی غیر مقامی کمپنیوں کو دینا تھا جو یہاں کان کنی کرنے کے لیے بڑی سرمایہ کاری کر سکیں۔ تاہم حکومت ان 13 سالوں میں کسی بڑی کمپنی کو اس کام پر آمادہ نہیں کر سکی۔ &nbsp;

دوسری طرف مقامی لوگ مسلسل مطالبہ کر رہے تھے کہ یہ پابندی ختم کی جائے۔ جولائی 2021 میں اس مطالبے نے اتنا زور پکڑا کہ حکومت نے بالآخر اسے مان لیا اور بڑے سرمایہ کاروں کے لیے مختص علاقوں میں بھی مقامی ٹھیکیداروں کو کام کرنے کی اجازت دے دی۔&nbsp;

اس حکومتی فیصلے کے بعد تقریباً پانچ سو مقامی اور غیرمقامی سرمایہ کاروں نے معدنیات کی نشاندہی کرنے کے اجازت نامے اور کان کنی کے ٹھیکے حاصل کرنے کے لیے ایک آن لائن سسٹم کے ذریعے درخواستیں جمع کرائیں۔ تاہم مقامی لوگ الزام عائد کرتے ہیں کہ محکمہ معدنیات نے یہ ٹھیکے منصفانہ انداز میں دینے کے بجائے اُن کے ساتھ &quot;سخت ناانصافی کی ہے&quot;۔&nbsp;

شہزادہ مدثر محکمے کے اہل کاروں پر الزام لگاتے ہیں کہ ٹھیکوں کے اشتہار شائع کرنے سے پہلے ہی انہوں نے اپنے من پسند افراد کو ان کی تمام تفصیلات سے آگاہ کر دیا تھا تاکہ وہ متعلقہ کاغذات اور فیسیں مقررہ وقت سے پہلے جمع کرا دیں۔ دوسری طرف، ان کے بقول، اشتہار میں آن لائن فیس جمع کرانے کی تاریخ یکم مئی 2022 رکھی گئی حالانکہ &quot;اس دن چترال کے دور دراز علاقوں میں آن لائن ادائیگی کی سہولت ہی دستیاب نہیں تھی&quot;۔ وہ دعویٰ کرتے ہیں کہ &quot;اس طرح صرف انہی لوگوں کو ٹھیکے مل سکے جنہوں نے یکم مئی سے پہلے فیس جمع کرا دی تھی جبکہ باقی لوگوں کی درخواستوں پر غور ہی نہیں کیا گیا&quot;۔

صوبائی محکمہ کان کنی و معدنیات میں تکنیکی شعبے کے اسسٹنٹ ڈائریکٹر محمد شہیر اجمل ان سے متفق نہیں۔ ان کا اصرار ہے کہ &quot;ٹھیکے دیتے وقت کسی سے غیرمنصفانہ سلوک نہیں کیا گیا&quot;۔&nbsp;

<h2>حکومت، عدالت، عوام</h2>

حال ہی میں خیبرپختونخوا کے وزیراعلیٰ محمود خان کے مشیر برائے معدنیات محمد عارف نے ایک منصوبے کا خلاصہ (summary) تیار کیا ہے جسے ابھی تک وزیراعلیٰ کی منظوری درکار ہے۔ اس کے تحت چترال میں ان 15 جگہوں کو بحال کیا جا رہا ہے جہاں صرف بڑی غیرمقامی کمپنیوں کو کان کنی کی اجازت ہو گی۔&nbsp;

محمد شہیر اجمل اس اقدام کی وجہ بیان کرتے ہوئے کہتے ہیں کہ بیشتر مقامی ٹھیکے داروں کے پاس دشوارگزار پہاڑی علاقوں میں وسیع پیمانے پر کان کنی کرنے کے لیے درکار مالی،تکنیکی اور انسانی وسائل موجود نہیں۔ اس کے برعکس، ان کے بقول، &quot;بڑی کمپنیوں کے پاس ایسا سرمایہ، افرادی قوت، مشینری اور دیگر وسائل موجود ہوتے ہیں جن کی مدد سے وہ بڑے بڑے قطعات اراضی پر ایک پائیدار طریقے سے کان کنی کر سکتی ہیں&quot;۔&nbsp;

تاہم شہزادہ مدثر ان کے موقف کو رد کرتے ہوئے کہتے ہیں کہ مقامی ٹھیکیدار وسائل کی کمی پر قابو پانے کے لیے بڑے سرمایہ داروں کے ساتھ شراکت کر سکتے ہیں۔ اس کے علاوہ، ان کے مطابق، حکومت کو ٹھیکے کی منظوری کے بعد بھی یہ اختیار ہوتا ہے کہ وہ چھ ماہ میں اس پر کام شروع نہ کر سکنے والی کمپنی کا ٹھیکہ منسوخ کر کے کسی اور کو دے دے۔ ان کے خیال میں اس اختیار کی موجودگی میں مقامی ٹھیکے داروں کو بعض مخصوص جگہوں پر کان کنی سے دور رکھنے کی کوئی منطق نہیں۔&nbsp;

ان کا یہ دعوی بھی ہے کہ معدنیات کے مشیر کے تیار کردہ خلاصے کی منظوری سے پہلے ہی &quot;مقامی سرمایہ کاروں کی ایسی درخواستوں کو مسترد کیا جا رہا ہے جو ان 15 جگہوں پر کان کنی کے لیے دی گئی ہیں&quot;۔&nbsp;

ان حکومتی اقدامات کو روکنے کے لیے مائنز اینڈ منرلز ایسوسی ایشن چترال نے پشاور ہائی کورٹ میں ایک درخواست بھی دائر کی ہے جسے سماعت کے لیے منظور کر لیا گیا ہے۔ 6 جولائی 2022 کو اس پر کارروائی کرتے ہوئے عدالت نے نہ صرف متعلقہ صوبائی حکام کو کہا کہ وہ 28 جولائی کو سرکاری ریکارڈ کے ساتھ پیش ہو کر اپنا موقف پیش کریں بلکہ یہ فیصلہ بھی دیا کہ اس درخواست کا فیصلہ ہونے تک نہ تو درخواست گزاروں کو کان کنی کے لیے جاری کیا گیا اجازت نامہ منسوخ کیا جائے اور نہ ہی انہیں نظرانداز کر کے دوسروں کو ایسے اجازت نامے جاری کیے جائیں۔

حکومتی حلقوں میں بھی کسی حد تک یہ آگاہی موجود ہے کہ کان کنی کے لیے جن مقامی ٹھیکے داروں کی درخواستیں موصول ہو چکی ہیں انہیں چترال میں کسی بھی جگہ پر کان کنی کرنے &nbsp;سے منع نہیں کیا جا سکتا۔ معدنیات کے شعبہ کی ترویج و ترقی کے لئے وزیر اعلیٰ کی سربراہی میں کام کرنے والے ادارے منرل انویسٹمنٹ فیسیلیٹیشن ایجنسی میں چترال کی نمائندگی کرنے والے مقصود عالم سمجھتے ہیں کہ ایسا کرنا قانونی طور پر ٹھیک نہیں ہو گا۔

وہ صوبائی حکومت کو خبردار کرتے ہوئے یہ بھی کہتے ہیں کہ اگر چترال کے مقامی لوگوں کے مطالبات کو نظرانداز کرتے ہوئے اور عدالتی فیصلے کی خلاف ورزی کرتے ہوئے اس ضلعے کے کچھ حصوں کو غیرمقامی کان کن کمپنیوں کے لیے مختص کر دیا گیا تو اس سے یہاں &quot;احساسِ محرومی پیدا ہو سکتا ہے اور ایک احتجاجی تحریک بھی جنم لے سکتی ہے&quot;۔

ہمارے حصے میں عذر آئے، جواز آئے، اصول آئے: 'صوبائی حکومت چترال میں کان کنی سے منسلک لوگوں کا روزگار بند کرنے پر تُلی ہوئی ہے'۔

گلگت بلتستان اور خیبرپختونخوا میں تقریباً 71 لاکھ افراد ہر سال کسی نہ کسی طرح ایسی قدرتی آفات سے متاثر ہوتے ہیں جو کسی گلیشیئر کے پگھلنے یا پھٹنے کے نتیجے میں شروع ہوتی ہیں۔

یہ انکشاف فہد بشیر بنگش نے کیا ہے جو ان آفات کے نقصانات کو محدود رکھنے کی غرض سے شروع کیے گئے گلاف-دو (GLOF-II) نامی منصوبے کے صوبائی کوارڈینیٹر ہیں۔ ان کا یہ بھی کہنا ہے کہ گلگت بلتستان اور خیبرپختونخوا میں مجموعی طور پر تقریباً تین ہزار گلیشیئر جھیلیں ہیں۔ ان میں سے 33 ایسی ہیں جن میں پائی جانے والی برف مقامی درجہ حرارت میں اضافے کے باعث تیزی سے پگھل رہی ہے جس کے نتیجے میں وہ کسی وقت بھی پھٹ کر بڑے پیمانے پر تباہی کا سبب بن سکتی ہیں۔

ان کے مطابق خیبرپختونخوا کے ضلع چترال کے تین علاقوں، مڈک لشٹ، ریشون اور آرکاری، ضلع اپردیر کے دو علاقوں، کمراٹ اور بیاڑ، ضلع سوات کے تین علاقوں، مٹلتان، مانکیال اور اتروڑ، ضلع اپر کوہستان کے ایک علاقے کندیاں اور گلگت بلتستان کے سات علاقوں میں گلیشیئر سے بننے والی جھیلیں موجود ہیں۔ ان جھیلوں کے اردگرد رہنے والے لوگوں کو موسمیاتی تبدیلی کے اثرات اور اس کے خطرات سے نمٹنے کے طریقوں کے بارے میں آگاہی دینے کے لیے حکومت نے اقوام متحدہ کے ترقیاتی پروگرام (UNDP) کی مدد سے 2011 میں گلاف-ایک نامی پروگرام شروع کیا۔ 2017 میں اس پروگرام کے دوسرے مرحلے، گلاف-دو، کا آغاز ہوا جس کے تحت نہ صرف قدرتی آفات کے بارے میں وقت سے پہلے آگاہی دینے کا نظام (early warning system) بنایا گیا ہے بلکہ مختلف جھیلوں اور دریاؤں پر موسم کا اندازہ لگانے، بارش کی مقدار ماپنے اور پانی کی گہرائی کا اندازہ لگانے والے آلات بھی نصب کیے جا رہے ہیں۔

اس نظام کی مدد سے خیبرپختونخوا کی پراونشل ڈیزاسٹر مینجمنٹ اتھارٹی (پی ڈی ایم اے) نے 19 جون 2022 کو انتباہ جاری کیا کہ رواں موسمِ گرما میں صوبے کے کئی علاقوں میں شدید بارشیں پڑنے، ندی نالوں میں سیلاب آنے اور پہاڑوں سے تودے گرنے کا خطرہ ہے۔ اس انتباہ کے پیشِ نظر متعلقہ محکموں کو ہدایات جاری کی گئی ہیں کہ وہ مقامی آبادیوں کو ان موسمی آفات سے لاحق خطروں سے بچانے کے اقدامات کریں اور سیاحوں کو بھی تاکید کی گئی ہے کہ وہ ایسے علاقوں میں جانے سے اجتناب کریں جہاں پہاڑی تودے گرنے یا سیلاب آنے کا خطرہ ہو۔

<h2>شجر گرا تو پرندے تمام شب روئے</h2>

ضلع اپردیر کے علاقے بیاڑ سے تعلق رکھنے والے 36 سالہ اکرام اللہ ایک مقامی سرکاری کالج میں پڑھاتے ہیں۔ ان کا کہنا ہے کہ ان کے علاقے میں 2015 سے اب تک کئی مرتبہ سیلاب آ چکا ہے جس میں بڑے پیمانے پر مکانوں، زرعی زمینوں، پلوں، سڑکوں اور سکولوں کو نقصان پہنچا ہے اور پانچ لوگ ہلاک بھی ہوئے ہیں۔ ان کے مطابق چند سال پہلے اسی ضلعے میں واقع شندور جھیل کا گلیشیئر پھٹنے سے بھی مقامی آبادی بری طرح متاثر ہوئی تھی۔

تاہم وہ کہتے ہیں کہ اعلیٰ تعلیم کے حصول کے دوران انہیں احساس ہوا کہ ان قدرتی آفات کی دو اہم وجوہات مقامی جنگلات کی کٹائی اور ان کے علاقے میں رہائشی اور تجارتی مقاصد کے لیے بنائی گئی عمارات کی تعداد میں اضافہ ہے۔ اپر دیر کے علاقے شرینگل میں قائم شہید بینظیر بھٹو یونیورسٹی کے شعبہ ماحولیاتی سائنس کے چیئرمین پروفیسر جمعہ محمد بھی ان سے اتفاق کرتے ہیں۔

ان کا کہنا ہے کہ آبادی میں اضافے کے باعث تعمیرات اور ایندھن کے لیے درکار لکڑی کی مانگ میں اضافہ ہو رہا ہے جسے جنگلات سے درخت کاٹ کر پورا کیا جا رہا ہے۔ لیکن، ان کے مطابق، &quot;جب جنگلات سے درخت کاٹے جاتے ہیں تو ان میں جمع شدہ کاربن فضا میں خارج ہو کر فضائی حدت میں اضافہ کر دیتی ہے جس سے درجہ حرارت بڑھ جاتا ہے اور گلیشیئر پگھلنے لگتے ہیں&quot;۔ یہی نہیں بلکہ &quot;جب گلیشیئروں کی برف پگھل کر سیلاب بنتی ہے تو وہ اپنے ساتھ پہاڑی تودوں کو بھی بہا لے جاتی ہے جو انسانی آبادی پر گر کر جانی و مالی نقصان کا باعث بنتے ہیں&quot;۔ تاہم وہ کہتے ہیں کہ آہستہ آہستہ پگھلنے والے گلیشیئر سے ہونے والے نقصان کی نسبت اچانک پھٹ پڑنے والے گلیشیئر سے ہونے والی تباہی کا حجم کہیں زیادہ ہوتا ہے کیونکہ اس کے نتیجے میں پہاڑی تودے غیر متوقع طور پر اور شدید طریقے سے حرکت میں آتے ہیں۔

ان کے مطابق اپردیر میں ایسے واقعات ابھی کم ہو رہے ہیں کیونکہ یہاں &quot;جنگلات ابھی بھی ایک وسیع علاقے پر موجود ہیں جن کے درخت نہ صرف سیلابی پانی کی رفتار میں رکاوٹ بنتے ہیں بلکہ اس پانی کے ساتھ بہنے والے پہاڑی تودوں کو بھی بڑی حد تک روک لیتے ہیں&quot;۔ لیکن وہ خبردار کرتے ہیں کہ &quot;اگر جنگلوں سے درختوں کی کٹائی پر قابو نہ پایا گیا تو اس علاقے میں بھی گلیشیئروں کا پھٹنا عام ہو جائے گا جس سے بڑے پیمانے پر جانی اور مالی نقصان ہو سکتا ہے&quot;۔

زمینی حقائق سے ظاہر ہوتا ہے کہ یہ خدشات بہت جلد عملی شکل اختیار کر سکتے ہیں۔

اگرچہ صوبائی محکمہ جنگلات کے اہل کاروں کے پاس ایسے کوئی اعدادوشمار موجود نہیں جن سے پتہ چل سکے کہ اپر دیر میں جنگلات کا کل رقبہ کتنا ہے اور حالیہ سالوں میں اس میں کتنی کمی آئی ہے لیکن مقامی لوگ اس بات پر متفق ہیں کہ مقامی جنگل چھدرے ہوتے جا رہے ہیں جس کے نتیجے میں مقامی موسم بھی تبدیل ہو رہے ہیں۔

دیر شہر سے جنوب کی جانب واقع کوچکل نامی گاؤں سے تعلق رکھنے والے 62 سالہ مظفر خان کہتے ہیں کہ تین دہائیاں پہلے جب وہ جوان تھے تو سردیوں میں ان کے علاقے میں کم از کم تین سے چار فٹ برف پڑتی تھی۔ ان کے مطابق اُس زمانے میں &quot;سال کے چھ مہینے اس قدر سرد ہوتے تھے کہ یہاں نظام زندگی مفلوج ہو جاتا تھا&quot;۔ لیکن اب صورتِ حال یہ ہے کہ &quot;فروری اور مارچ میں ہی یہاں میدانی علاقوں جیسی گرمی پڑنے لگتی ہے&quot;۔

محکمہ موسمیات کا حالیہ ریکارڈ ان کی بات کی تصدیق کرتا ہے۔ اس کے مطابق اِس سال 18 مارچ کو اپردیر اور لوئر دیر کے دونوں اضلاع کا اوسط درجہ حرارت 32 ڈگری سینٹی گریڈ تھا جو اس علاقے میں اس مہینے کے دوران پہلے کبھی نہیں دیکھا گیا۔ اگرچہ 31 مارچ 2018 کو بھی یہاں کا زیادہ سے زیادہ درجہ حرارت 31 ڈگری سینٹی گریڈ ہو گیا تھا لیکن اس سے پہلے 1967 سے لے کر 2010 تک اس مہینے میں زیادہ سے زیادہ مقامی درجہ حرارت کبھی بھی 23.9 ڈگری سینٹی گریڈ سے نہیں بڑھا۔

گلگت میں زمین کی ملکیت پر تشدد بھرے جھگڑوں میں اضافہ: 'ان تنازعات سے ایسے فسادات پھوٹ سکتے ہیں جنہیں روکنا آسان نہیں ہو گا'۔

آیا جو سیلِ 'سنگ' سب اسباب لے گیا: اپر دیر کے باسیوں کو درپیش قدرتی آفات میں غیر متوقع اور شدید اضافہ۔

کرامت شاہ 27 فروری 2022 کی رات خیبر پختونخوا کے ضلع اپر دیر میں اخگرام نامی چیک پوسٹ پر متعین تھے تاکہ وہ جنگلات سے لکڑی کی چوری اور نقل و حرکت پر نظر رکھ سکیں۔ اس دوران انہوں نے ایک ٹرک کو روکا تو اس میں بڑی مقدار میں لکڑی موجود تھی جسے غیرقانونی طور پر کاٹ کر اپردیر سے باہر&nbsp; لے جایا جا رہا تھا۔

لیکن جب انہوں نے ٹرک میں موجود لکڑی کا معائنہ کرنے اور اس کے بارے میں اپنے اعلیٰ افسروں کو اطلاع دینے کی کوشش کی تو ٹرک کے عملے&nbsp; نے نہ صرف انہیں اغوا کر کے شدید تشدد کا نشانہ بنایا بلکہ بعد ازاں انہیں ٹرک کے نیچے کچل کر ہلاک بھی کر دیا۔

اپردیر کے جنگلوں سے درختوں کی غیرقانونی کٹائی اور ان کی لکڑی کی چوری چھپے ملک کے دوسرے حصوں کو منتقلی کا یہ واحد واقعہ نہیں۔ درحقیقت ایسے واقعات عام ہیں اور انہیں روکنے کی کوشش کرنے والے صوبائی محکمہ جنگلات کے اہل کاروں کو کرامت شاہ کی طرح اکثر جان لیوا خطرات کا سامنا کرنا پڑتا ہے۔

اگرچہ اِن اہل کاروں کو ضلعی انتظامیہ، پولیس اور دیر لیویز کا تعاون بھی حاصل ہوتا ہے لیکن ان کی اپنی محدود تعداد، ان کے محکمےمیں پائی جانے والی بدعنوانی اور لکڑی چوری میں ملوث لوگوں کو قرار واقعی سزا نہ ملنے کے باعث ان کی کوششیں کامیاب نہیں ہو پاتیں۔

<h2>محافظ سست اور چور چُست</h2>

سرکاری دستاویزات کے مطابق اپردیر میں دو لاکھ 89 ہزار آٹھ سو 65 ایکڑ اراضی پر جنگلات موجود ہیں۔ اس اراضی کی دیکھ بھال کے لیے اسے اپردیر اور شرینگل نامی دو ڈویژنوں میں تقسیم کیا گیا ہے۔ ان دونوں ڈویژنوں میں درختوں کی غیرقانونی کٹائی اور لکڑی کی چوری اور اس کی نقل و حرکت کو روکنے پر متعین محافظوں کی کل تعداد 80 ہے۔ دوسرے لفظوں میں ان میں سے ہر ایک کو اوسطاً تین ہزار چھ سو 23 ایکڑ پر محیط جنگل کی نگرانی کرنا ہوتی ہے۔ نتیجتاً اُس کے لیے اپنی زیرِنگرانی اراضی کے ہر حصے پر نظر رکھنا ممکن نہیں ہوتا۔

اس مسئلے کو حل کرنے کے لیے گزشتہ سال محکمہ جنگلات نے اپنی چیک پوسٹوں پر کلوز سرکٹ ٹی وی کیمرے بھی نصب کیے تھے لیکن اس کے باوجود لکڑی چوری کے واقعات میں کوئی کمی نہیں آئی۔

اپر دیر کے دو باسی مظفر سید اور اختر محمد سمجھتے ہیں کہ مقامی جنگلات سے درختوں کی کٹائی اور لکڑی کی چوری کا یہ عمل دراصل 1969 سے جاری ہے۔ اُس سال مرکزی حکومت نے نواب کا اقتدار ختم کر کے دیر کی ریاست کو شمال مغربی سرحدی صوبے (جسے اب خیبر پختونخوا کہا جاتا ہے) کا حصہ بنا دیا تھا۔ وہ کہتے ہیں کہ اِس انضمام سے پہلے نواب کا رعب و دبدبہ اتنا شدید تھا اور اس کا قائم کردہ سزا اور جزا کا نظام اتنا سخت تھا کہ کسی کو جنگل سے درخت کاٹنے کی جرات نہیں ہوتی تھی۔ تاہم ان کا کہنا ہے کہ صوبے کی عملداری میں آنے کے بعد صوبائی انتظامیہ کی تمام تر کوششوں کے باوجود مقامی جنگلات سکڑتے ہی چلے جا رہے ہیں۔&nbsp;

اس صورتِ حال میں کچھ بہتری 1993 کے بعد دیکھنے میں آئی کیونکہ اس سال نگران وزیر اعظم معین قریشی کی حکومت نے اپر دیر سمیت پورے مالاکنڈ ڈویژن کے جنگلات سے درختوں کی کٹائی پر مکمل پابندی لگا دی تھی۔ مقامی باشندے کہتے ہیں کہ یہ پابندی اتنی شدید تھی کہ وہ گِرے ہوئے اور خشک ہو جانے والے درختوں کو بھی نہ تو کاٹ سکتے تھے اور نہ ہی ان کی لکڑی استعمال کر سکتے تھے۔

اگرچہ 2015 میں نافذ کی گئی ایک نئی پالیسی کے تحت یہ پابندی نرم کر دی گئی ہے اور مخصوص حالات میں مخصوص شرائط کے تحت جنگل سے خشک اور کمزور درخت کاٹنے کی اجازت دے دی گئی ہے لیکن اس کے نتیجے میں جنگلات کو لاحق خطرات میں پھر سے اضافہ ہو گیا ہے۔ مقامی لوگ کہتے ہیں کہ جن کمپنیوں اور ٹھیکے داروں کو ایسے درخت کاٹنے کی اجازت دی جاتی ہے وہ محکمہ جنگلات کے اہل کاروں کے ساتھ ملی بھگت کر کے صحت مند درختوں کو بھی کاٹ لیتے ہیں۔

اپر دیر کے وسطی علاقے ڈوگ درہ کے رہنے والے رضوان اللہ اور دیر شہر کے مضافات کے باسی اسرار خان بھی جنگلات کے سکڑنے کا سب سے بڑا سبب محکمہ جنگلات کے اہل کاروں میں پائی جانے والی بدعنوانی کو ہی قرار دیتے ہیں۔ ان کا تو یہاں تک کہنا ہے کہ ان اہل کاروں کی مدد کے بغیر جنگلات سے لکڑی کی چوری ممکن ہی نہیں۔

ان کے مطابق اس چوری میں ملوث لوگ محکمے کے اندر اس قدر اثر و رسوخ رکھتے ہیں کہ &quot;دیانت دار اہل کاروں کے لیے ان کا مقابلہ کرنا ممکن ہی نہیں&quot;۔ اس اثر و رسوخ کی وجہ سے یہ لوگ نہ صرف لکڑی کی کٹائی اور چوری روکنے کی کوشش کرنے والے سرکاری عملے کو تشدد کا نشانہ بناتے ہیں بلکہ قانون کی گرفت سے بھی بچ نکلتے ہیں۔&nbsp;

سرکاری اعدادوشمار اُن کے موقف کی تائید کرتے دکھائی دیتے ہیں۔ ان کے مطابق اپر دیر ڈویژن میں گزشتہ 14 مہینوں میں غیرقانونی طور پر درخت کاٹنے اور ان کی لکڑی دوسرے علاقوں میں&nbsp; لے جانے کے الزام میں مختلف افراد کے خلاف ایک سو پانچ مقدمے درج کیے گئے۔ لیکن ان میں سے صرف 25 لکڑی چور عدالتوں سےسزا پانے کے بعد جیل گئے۔ اسی طرح کروڑوں روپے کی لکڑی کو اِدھر اُدھر کرنے میں ملوث لوگوں سے صرف 28 لاکھ 92 ہزار روپے جرمانہ وصول کیا گیا اور ان کے قبضے سے محض ایک ہزار دو سو 91 مکسر فٹ لکڑی ہی برآمد کی جا سکی۔

اسی بنا پر اپر دیر کی تحصیل کل کوٹ کے علاقے کوہستان کے رہائشی 55 سالہ شمس الرحمان کہتے ہیں کہ ان مقدمات کا اندراج محض دکھاوا ہوتا ہے کیونکہ، ان کے مطابق، ان میں سے زیادہ تر بے گناہ افراد کے خلاف درج کیے جاتے ہیں۔ اپنی بات کی وضاحت کرتے ہوئے وہ کہتے ہیں کہ&quot;محکمہ جنگلات کے اہل کار یا تو اصل مجرموں کے خلاف کارروائی کی ہمت نہیں رکھتے یا وہ انہیں رشوت لے کر چھوڑ دیتے ہیں جبکہ اپنی کارکردگی کو اچھا دکھانے کے لیے وہ بے گناہ لوگوں کو پکڑ لیتے ہیں&quot;۔

دوسری طرف اپر دیر کے ڈپٹی کمشنر اکمل خان خٹک کا دعویٰ ہے کہ ضلعی انتظامیہ جنگلات کی چوری میں ملوث ٹمبر مافیا کے خلاف سخت کارروائیاں کر رہی ہے۔ ان کا یہ بھی کہنا ہے کہ جنگلات کی کٹائی روکنے کے ساتھ ساتھ خالی زمینوں اور پہاڑوں پر نئے درخت بھی لگائے جا رہے ہیں۔ ان کے مطابق اس سال شجرکاری کی سرکاری مہم کے دوران 42 لاکھ نئے درخت لگائے جا رہے ہیں۔ محکمہ جنگلات کے ضلعی اہل کاروں کا بھی کہنا ہے کہ اِس سال اپردیر فاریسٹ ڈویژن میں 15 سو ایکڑ رقبے پر نئے درخت لگائے گئے ہیں۔

تاہم اس علاقے میں درختوں کی کٹائی میں صرف مجرمانہ عناصر ہی ملوث نہیں بلکہ عام لوگ بھی اپنی گھریلو ضروریات پوری کرنے کے لیے یہی کچھ کر رہے ہیں۔ قدرتی گیس دستیاب نہ ہونے کی وجہ سے یہاں رہنے والے لوگوں کو موسم سرما اور برفباری کے دوران اپنے گھروں کو گرم رکھنے کے لیے ایندھن کی شدید ضرورت ہوتی ہے جسے پورا کرنے کے لیے وہ جنگل سے لکڑی کاٹ لاتے ہیں۔

دیر شہر سے تقریباً 70 کلومیٹر شمال میں واقع گاؤں تھل سے تعلق رکھنے والے لاجبر خان کا کہنا ہے کہ مقامی لوگوں&nbsp; نے متعدد مرتبہ حکومت سے مطالبہ کیا ہے کہ انہیں قدرتی گیس فراہم کی جائے یا ان کے علاقے میں پن بجلی پیدا کرنے والے چھوٹے چھوٹے ہائیڈل پاور لگائے جائیں تاکہ انہیں &quot;توانائی کے متبادل ذرائع مل سکیں&quot;۔ لیکن ابھی تک حکومت نے ان کی بات نہیں سنی۔

وہ خبردار کرتے ہیں کہ اگر اس مطالبے کو اسی طرح نظر انداز کیا جاتا رہا تو مقامی لوگ کبھی جنگلوں سے درخت کاٹنا نہیں چھوڑیں گے۔&nbsp;

<h2>ماحولیاتی تباہ کاری</h2>

محکمہ موسمیات کے اعدادوشمار ظاہر کرتے ہیں کہ 1967 سے 2009 تک دیر میں ہر سال 14 سو ملی میٹر سے&nbsp; لے کر 19 سو ملی میٹر تک بارش ہوتی رہی۔ اس عرصے کے دوران دسمبر اور جنوری کے مہینوں میں کم از کم درجہ حرارت منفی سات ڈگری سینٹی گریڈ تک چلا جاتا تھا جبکہ جون اور جولائی کے مہینوں میں زیادہ سے زیادہ درجہ حرارت 38 ڈگری سینٹی گریڈ سے نہیں بڑھتا تھا۔&nbsp;

تاہم مقامی باشندوں کا کہنا ہے گزشتہ دس سال میں اپر دیر میں بارشیں کم سے کم تر ہوتی گئی ہیں۔ اسی طرح، ان کے مطابق، موسم سرما میں ہونے والی برفباری بھی دو سے تین فٹ سالانہ سے کم ہو کر برائے نام رہ گئی ہے۔&nbsp;

ان موسمی تبدیلیوں کے ساتھ ساتھ جنگلات کےخاتمے سے جنم لینے والے زمینی کٹاؤ اور سیلاب نے گزشتہ دو دہائیوں میں اپر دیر میں بہنے والے دریاؤں کے کنارے موجود متعدد آبادیوں اور بہت سی زرعی زمین کو تہ تیغ کر دیا ہے۔ صرف پچھلے سالوں کے دوران کئی مقامی آبی گزرگاہوں پر بنے پُل، ایک پرائمری سکول، متعدد علاقوں کے بازار، دو بڑے ہوٹل اور بہت سے مکان سیلاب میں بہہ گئے اور ایک درجن سے زائد لوگ بھی اپنی جان سے ہاتھ دھو بیٹھے۔

لیہ میں جنگلات کی غیر قانونی کٹائی: 'جہاں کبھی گھنے درخت تھے وہاں اب دھول اُڑتی ہے'۔

کل رات جو بوڑھا شجر کٹ کے گرا ہے: جنگلات سے لکڑی چوری کے باعث اپر دیر میں برف باری کم ہوگئی ہے اور گرمی زیادہ۔

اپر دیر میں پاک افغان سرحد پر واقع دیہات: انہیں پتھروں پہ چل کر اگر آ سکو تو آؤ۔

video

Local farmers in Lower dir demanded of the authorities concerned to lift ban on cultivating maize crop in Maidan area.

Ban on Maize crop cultivation in Lower dir KPK

خیبرپختونخوا کے شمالی ضلع لوئر دیر کی تحصیل میدان کے کاشت کار اور زمین دار شدید الجھن کا شکار ہیں کہ آیا انہیں اس بار مکئی کاشت کرنی چاہیے یا نہیں۔

اس علاقے سے تعلق رکھنے والے 60 سالہ کاشت کار فضل الحلیم خان کہتے ہیں کہ پچھلے سال گندم کی کٹائی کے بعد جب اپریل میں مکئی کی بوائی شروع کی گئی تو ضلعی انتظامیہ نے مقامی لوگوں کو پیشگی اطلاع دیے بغیر اس کی کاشت پر پابندی عائد کر دی۔ ان کے مطابق اس وقت تک ان جیسے کئی کاشت کار اور زمین دار یہ فصل لگا چکے تھے لیکن سرکاری پابندی پر عمل درآمد کے لیے انہیں اس پر ہل چلانا پڑا۔&nbsp;

ان کا کہنا ہے کہ فصل کی اس طرح تلفی کے نتیجے میں مقامی کاشت کاروں کو &quot;کروڑوں روپے کا نقصان اٹھانا پڑا&quot; کیونکہ اس سے ان کے وہ تمام پیسے ضائع ہو گئے جو انہوں نے زمین کی تیاری اور فصل کی بوائی پر خرچ کیے تھے۔ یہی نہیں بلکہ &quot;وہ مکئی کی فصل &nbsp;سے ہونے والی متوقع آمدن سے بھی محروم ہو گئے جبکہ ان کے پاس کسی دوسری فصل کی بوائی کا وقت بھی باقی نہ رہا&quot;۔&nbsp;

حکومت کے فیصلے سے نالاں کاشت کاروں اور زمین داروں نے پچھلے سال متعدد مظاہرے بھی کیے جن کا انتظام میدان ایکشن کمیٹی نامی مقامی تنظیم نے کیا تھا۔ ان مظاہروں کی روک تھام کے لیے ضلعی انتظامیہ نے اس تنظیم سے مذاکرات کیے جن کے نتیجے میں پچھلے سال ہی فریقین کے درمیان ایک زبانی معاہدہ طے پا گیا۔&nbsp;

اس معاہدے کے تحت کاشت کاروں اور زمین داروں کو یقین دہانی کرائی گئی کہ انہیں نہ صرف ان کی تلف کی گئی فصل کا معاوضہ ادا کیا جائے گا بلکہ انہیں روزمرہ استعمال کے لیے مکئی کا آٹا اور جانوروں کے لیے چارہ بھی مہیا کیا جائے گا۔ تاہم ایک بڑے مقامی زمیندار جوہر خان کا کہنا ہے کہ اس معاہدے پر تاحال کوئی عمل درآمد نہیں ہوا۔&nbsp;

وحید گل نامی 51 سالہ کاشت کار ان کی بات کی تصدیق کرتے ہوئے کہتے ہیں کہ ایک ماہ بعد مکئی کی نئی فصل کی کاشت کا وقت آ چکا ہو گا لیکن &quot;ابھی تک ہمیں نہ تو یہ معلوم ہے کہ اس پر پابندی برقرار ہے یا نہیں اور نہ ہی گزشتہ فصل کے ضیاع سے ہونے والے ہمارے نقصان کا کوئی ازالہ کیا گیا ہے&quot;۔

دوسری طرف لوئر دیر کے ایڈیشنل ڈپٹی کمشنر عبدالولی خان کا کہنا ہے کہ ضلعی انتظامیہ نے ایک 29 روزہ جائزے کے ذریعے کسانوں کے نقصانات کا اندازہ لگا کر ایک مفصل رپورٹ تیار کی ہے جو صوبائی چیف سیکرٹری کو بھیج دی گئی ہے۔ لیکن وہ کہتے ہیں کاشت کاروں اور زمین داروں کو زرِتلافی کی ادائیگی کرنے یا نہ کرنے کا فیصلہ وہ نہیں کر سکتے بلکہ اس کا اختیار صرف صوبائی حکومت کو ہے۔ ان کے مطابق &quot;حکومت اس سلسلے میں جو بھی فیصلہ کرے گی اس سے کسانوں کو آگاہ کر دیا جائے گا&quot;۔&nbsp;

<h2>&nbsp;امن یا روزگار</h2>

پانچ یونین کونسلوں پر مشتمل تحصیل میدان کی دو لاکھ 19 ہزار سے زیادہ آبادی کے بیشتر حصے کا روزگار زراعت سے وابستہ ہے۔ ان میں سے اکثر فضل الحلیم خان اور وحید گل کی طرح بے زمین کاشت کار ہیں جو دوسرے لوگوں کی ملکیتی تقریباً آٹھ ہزار ایکڑ اراضی پر مکئی، گندم اور چاول کی فصلیں کاشت کرتے ہیں۔

سرکاری اعدادوشمار کے مطابق میدان میں مکئی کی فی ایکڑ پیداوار تقریباً چار سو 40 کلو گرام ہے جس کی بنیاد پر مقامی کاشت کار تخمینہ لگاتے ہیں کہ یہاں اگنے والی مکئی کی اوسط سالانہ مالیت تقریباً 18 کروڑ روپے ہے۔ مقامی لوگ اسے نہ صرف اپنی روزمرہ خوراک میں استعمال کرتے ہیں بلکہ وہ اسے فروخت کر کے نقدی بھی کماتے ہیں۔ اس کے ڈنٹھل خشک کر کے سردی اور برف باری کے موسم میں جانوروں کے چارے کے طور پر بھی استعمال کیے جاتے ہیں۔

حکومت نے پہلی مرتبہ 2008 میں میدان میں مکئی کاشت پر پابندی لگائی۔ اُس سال اِس علاقے میں سرگرم دہشت گردوں کے خلاف ایک فوجی آپریشن شروع کیا گیا جس کی قیادت کرنے والے فوجی حکام کا خیال تھا کہ دہشت گرد سکیورٹی اہل کاروں اور مقامی آبادی پر حملہ کرنے کے لیے مکئی کی فصل کو آڑ کے طور پر استعمال کر رہے تھے۔ یہ پابندی 2012 تک برقرار رہی۔&nbsp;

کئی سال بعد 2021 میں اسے دوبارہ عائد کر دیا گیا کیونکہ، ایک مقامی قبائلی رہنما کے مطابق، اُس سے پچھلے سال میدان کے علاقے میں دہشت گردی کے متعدد واقعے دیکھنے میں آئے تھے۔ مثال کے طور پر 24 ستمبر 2020 کو ایک مقامی امن کمیٹی کے سربراہ خان بادشاہ کی گاڑی پر ریموٹ کنڑول بم سے حملہ کیا گیا جس میں دو افراد زخمی ہوٸے۔ اسی طرح یکم اکتوبر 2020 کو دہشت گردوں نے ایک مقامی سکول ٹیچر کو فائرنگ کر کے مار دیا جبکہ 18دسمبر کو دہشت گردوں کی فاٸرنگ کے نتیجے میں دو پولیس اہل کار ہلاک ہو گئے۔

تاہم میدان میں رہنے والے اور جماعت اسلامی سے تعلق رکھنے والے خیبرپختونخوا اسمبلی کے سابق رکن سعید گل مکئی کی کاشت پر پابندی کے احیا کو حکومت کی ناکامی قرار دیتے ہیں اور کہتے ہیں کہ ضلعی انتظامیہ نے یہ قدم اٹھاتے وقت لوگوں کو اعتماد میں نہیں لیا۔ ان کے مطابق &quot;اگر دہشت گردی کی روک تھام کے لیے قبائلی عمائدین سے مشورہ کیا جاتا تو وہ اکٹھے ہو کر اس مسئلے کا کوئی بہتر حل تلاش کر سکتے تھے&quot;۔&nbsp;

عامر خان نامی 37 سالہ زمین دار بھی ان سے اتفاق کرتے ہوئے سوال کرتے ہیں کہ آخر یہ پابندی صرف تحصیل میدان پر ہی کیوں لاگو کی گئی ہے حالانکہ، ان کے مطابق، لوئر دیر کے دیگر علاقوں میں بھی حالیہ سالوں میں دہشت گردی کے واقعات دیکھنے میں آئے ہیں۔

مقامی لوگوں کا یہ بھی کہنا ہے کہ اگر یہ پابندی اس سال برقرار رہی تو ہزاروں بے زمین کاشت کار اپنے روزگار کے واحد ذریعے سے محروم ہو جائیں گے۔ فضل الحلیم خان تو یہاں تک کہتے ہیں کہ یہ فصل کاشت نہ کر سکنے کے نتیجے میں کئی مقامی گھرانے &quot;روٹی کو بھی ترس جائیں گے&quot;۔

اس لیے ان کے ساتھی کاشت کار وحید گُل مطالبہ کرتے ہیں کہ حکومت دہشت گردی سے نمٹنے کے لیے مکئی کی کاشت پر پابندی لگانے کے بجائے کوئی ایسا طریقہ اختیار کرے جس سے کاشت کاروں کے روزگار پر زد نہ پڑے۔&nbsp;

خیبرپختونخوا میں انسانی حقوق کمیشن پاکستان (ایچ آر سی پی) کے وائس چئیرپرسن اکبر خان بھی حکومت کو خبردار کرتے ہیں کہ امن و سلامتی برقرار رکھنے کے لیے لوگوں کے روزگار پر پابندیاں لگانا &quot;کوئی اچھی حکمت عملی نہیں&quot;۔ ان کے خیال میں ایسا کرنا نہ صرف آئین کی ان شقوں کی خلاف ورزی ہے جن کے تحت ریاست اور حکومت ایسا ماحول فراہم کرنے کے پابند ہیں جس میں لوگ اپنی معاشی سرگرمیاں بلاخوف و خطر انجام دے سکیں بلکہ اس سے میدان کی مقامی آبادی میں &quot;پہلے سے موجود احساس محرومی مزید بڑھ جائے گا&quot;۔

سید زاہد جان

سید زاہد جان کا تعلق خیبر پختونخوا کے ضلع دیر سے ہے اور وہ گزشتہ باٸیس سال سے صحافت کے شعبے سے وابستہ ہیں۔