بیالیس سالہ محمد ادریس ہفتے میں دو مرتبہ نارووال شہر نہ جائیں تو ان کی زندگی خطرے میں پڑ سکتی ہے۔

سیالکوٹ کی تحصیل ظفروال کے علاقے پرانا چونڈہ روڈ کے رہنے والے ادریس تین بچوں کے باپ اور پیشے کے اعتبار سے الیکٹریشن ہیں۔ 2010 میں ان کی صحت خراب رہنے لگی۔ ڈاکٹروں نے انہیں بتایا کہ ان کے دونوں گردے خراب ہو چکے ہیں جن کا ڈائلیسیز کروانا بہت ضروری ہے۔ چونکہ یہ سہولت انہیں اپنے علاقے میں دستیاب نہیں ہے اسی لیے وہ تیرہ سال سے ہر ہفتے دو مرتبہ پبلک ٹرانسپورٹ سے ڈسٹرکٹ ہیڈکوارٹر نارووال آتے جاتے ہیں۔

انہوں نے اپنے گردے تبدیل کروانے کی کوشش بھی کی تھی لیکن ان کا آپریشن کامیاب نہیں ہو سکا۔ اب ان کی صحت پہلے سے زیادہ خراب رہنے لگی ہے اسی لیے ڈاکٹروں نے انہیں ہفتے میں تین مرتبہ ڈائلیسیز کروانے کا کہہ دیا ہے۔

انہیں ڈائلیسیز کی سہولت اور ادویات حکومت کی طرف سے مفت ملتی ہیں لیکن ہفتے میں تین مرتبہ نارووال اپنے خرچے پر جانا ہوتا ہے جبکہ ان کے موجودہ مالی حالات میں اس کی گنجائش نہیں نکلتی۔

ادریس بتاتے ہیں کہ پہلے ان کی اہلیہ بھی ان کے ساتھ آیا کرتی تھیں مگر اب وہ محنت مزدوری کر کے گھر چلا رہی ہیں اس لیے وہ تنہا نارووال جاتے ہیں۔

شکر گڑھ کے گاؤں اخلاص پور کی پچیس سالہ طاہرہ ملک غیر شادی شدہ اور دو سال سے گردوں کے امراض میں مبتلا ہیں۔ وہ بتاتی ہیں کہ زندہ رہنے کے لیے انہیں ڈائلیسیز کروانا لازمی ہے جس کے لیے وہ ہفتے میں دو مرتبہ نارووال آتی ہیں۔

&quot;میرے والد محنت مزدوری کرتے ہیں جن کی آمدنی سے گھر کے اخراجات پورے نہیں ہوتے۔ اس لیے نارووال آنے جانے کا کرایہ میں خود مزدوری کرکے پورا کرتی ہوں۔ کرایہ جمع نہ ہو تو ڈائلیسسیز کروانے نہیں آتی۔ ایسے میں صحت تو خراب ہوتی ہے مگر میرے پاس کوئی چارہ نہیں ہوتا؟&#39;&#39;

2017ء کی مردم شماری کے مطابق ضلع نارووال کی تحصیل شکر گڑھ کی آبادی سات لاکھ کے قریب ہے۔ لیکن اتنی بڑی آبادی کے اس شہر میں صحت کی سہولتیں نہ ہونے کے برابر ہیں۔

ڈاکٹر محمد ریاض محمود تحصیل ہیڈ کوارٹرز ہسپتال (ٹی ایچ کیو) شکرگڑھ میں بطور میڈیکل سپرنٹنڈنٹ کام کرتے ہیں۔انہوں نے سجاگ کو بتایا کہ ٹی ایچ کیو میں نہ تو ڈائلیسیز یونٹ ہے اور نہ ہی یہاں کوئی نیفرالوجسٹ تعینات ہے۔

&quot;گردوں کے مریضوں کو علاج معالجے کے لیے لاہور جانا پڑتا ہے جبکہ ڈائلیسیز کروانے والے مریض ڈسٹرکٹ ہیڈ کوارٹرز ہسپتال نارووال کا رخ کرتے ہیں۔ شکرگڑھ کے پرائیویٹ ہسپتالوں میں بھی ڈائلیسیز کی سہولت نہیں ہے۔&#39;&#39;

ڈاکٹر طارق شاہین ڈسٹرکٹ ہیڈ کوارٹرز ہسپتال نارووال میں ڈائلیسیز وارڈ کے انچارج ہیں۔

انہوں نے سجاگ کو بتایا کہ ان کے پاس ڈائلیسیز کروانے والے مریضوں میں سے 65 فیصد کا تعلق شکرگڑھ سے ہے جبکہ 20 فیصد ظفروال اور صرف 15 فیصد مریض نارووال سے آتے ہیں۔

ڈاکٹر طارق کے مطابق یہ پنجاب کا واحد ڈائلیسیز وارڈ ہے جہاں 12 مشینیں دن رات کام کر رہی ہیں جبکہ دیگر اضلاع میں ڈائلیسیز کی سہولت صبح آٹھ بجے سے شام چار بجے تک ہی ہوتی ہے۔

&quot;دس مشینیں جنرل ڈائلیسیز کے لیے، ایک مشین ہیپاٹائٹس بی اور ایک ہیپاٹائٹس سی کے مریضوں کے لیے مختص ہے&quot;۔

انہوں نے بتایا کہ ہر سال ہزاروں مریض ڈائلیسیز کروانے اس ہسپتال میں آتے ہیں۔

وہ کہتے ہیں کہ ٹی ایچ کیو ہسپتال شکرگڑھ اور ظفروال میں بھی ڈائلیسیز یونٹ بنا دئیے جائیں تو مریضوں کو درپیش بہت سی مشکلات کا خاتمہ ہو سکتا ہے۔ہفتے میں دو تین مرتبہ کا سفر نہ صرف مریضوں کی جیب پر بھاری پڑتا ہے بلکہ ان کی صحت پر برا اثر ہوتا ہے اور ہنگامی حالات میں مریضوں کی جان بھی جا سکتی ہے۔

ڈسٹرکٹ ہیلتھ آفیسر محمد طارق کہتے ہیں کہ ضلعے میں صنعتیں اور روزگار کے موقع نہ ہونے کی وجہ سے لوگوں کو محنت مزدوری کے لیے لاہور، سیالکوٹ، فیصل آباد، کراچی اور پشاور جیسے بڑے شہروں میں جانا پڑتا ہے۔

&quot;فیکٹریوں اور کارخانوں میں نامساعد حالات میں کام کرنے والے مزدور آلودہ پانی پینے پر مجبور ہوتے ہیں جس کی وجہ سے وہ گردوں کے امراض میں مبتلا ہو رہے ہیں۔&#39;&#39;

تاہم وہ آلودہ پانی کو گردوں کی خرابی کا سبب نہیں سمجھتے۔ ان کا کہنا ہے کہ شکرگڑھ کے سرکاری ہسپتالوں اور سکولوں میں پینے کے پانی کے متعدد ٹیسٹ کروائے گئے ہیں اور ان میں آرسینک کی مقدار اس حد تک موجود نہیں کہ وہ گردوں کو خراب کرے۔

شکرگڑھ کے رہائشی عبدالغفار ڈاکٹر طارق کی بات سے اتفاق نہیں کرتے۔ وہ کہتے ہیں کہ سکولوں اور ہسپتالوں میں پانی کا ٹیسٹ کروانا اچھی بات ہے لیکن محکمہ صحت رہائشی علاقوں میں فراہم کیے جانے والے پانی کے ٹیسٹ کیوں نہیں کرواتا؟

ان کا کہنا ہے کہ گردوں کے امراض میں مبتلا مریض عموماً معاشی طور پر بہت زیادہ کمزور ہو جاتے ہیں جس کی وجہ مہنگا ترین علاج معالجہ ہے اور ایک بار ڈائلیسیز کروانے پر چھ ہزار روپے خرچ ہوتے ہیں۔

&#39;&#39;پنجاب حکومت کو شکرگڑھ اور ظفروال میں ڈائلیسیز کی سہولت فراہم کرنی چاہیے&quot;۔

ایسوسی ایشن آف ہیومن رائٹس کے ضلعی نائب صدر میاں محمد رفیق بتاتے ہیں کہ &#39;&#39;ڈی ایچ کیو میں پچھلے 14 سال سے نیفرالوجسٹ کی اسامی خالی ہے جبکہ مریضوں کو درست تشخیص اور علاج کے لیے لاہور جانا پڑتا ہے&quot;۔

انہوں نے پنجاب حکومت سے مطالبہ کیا کہ وہ فوری طور پر ٹی ایچ کیو ہسپتال شکرگڑھ اور ظفروال میں ڈائلیسیز وارڈ&nbsp; بنائے اور ڈی ایچ کیو ہسپتال میں نیفرالوجسٹ کی خالی سیٹ پر تعیناتی کرے۔

ڈپٹی کمشنر اور چیئرمین ڈسٹرکٹ ہیلتھ اتھارٹی محمد اشرف نیفرالوجسٹ کی عدم موجودگی کا سبب یہ بتاتے ہیں کہ کوئی بھی نیفرالوجسٹ نارووال آنے کو تیار نہیں ہے۔

&quot;پورے پاکستان سے اگر کوئی نیفرالوجسٹ ڈسٹرکٹ ہیڈ کوارٹرز ہسپتال نارروال میں آنا چاہتا ہے تو ہمیں اطلاع دے، ہم اسے فوری طور پر جاب لیٹر دینے کے لیے تیار ہیں&quot;۔

اسی آلودہ پانی میں عمر بہتی جا رہی ہے: نارووال کے شہری آلودہ پانی کے استعمال سے ہسپتالوں کا رخ کرنے لگے

مرا علاج مرے چارہ گر کے پاس نہیں: شکرگڑھ اور ظفروال میں مقامی مریض ڈائلیسیز کی سہولت سے محروم

text

رائمہ بتول اپنی جماعت میں ہمیشہ پہلی پوزیشن لیتی تھیں۔جب انہیں پیٹ کی بیماریوں اور ہپاٹائٹس کی تشخیص ہوئی تو اس وقت ان کی عمر آٹھ سال تھی۔

ہپاٹائٹس جگر کی بیماری کو کہتے ہیں۔اس میں جگر سوج جاتا ہے اور خون صاف کرنے کا کام پوری طرح نہیں کر پاتا۔

رائمہ بتول کی والدہ آسیہ بتول نارووال پبلک سکول میں بطور آیا کام کرتی ہیں۔

انہوں نے سجاگ کو بتایا کہ پانچ سال پہلے رائمہ اکثر پیٹ درد، بھوک کی کمی اور قے کی شکایت کرتی تھیں۔ پہلے ان کا مختلف ڈاکٹروں سے علاج چلتا رہا پھر تکلیف میں شدت کی وجہ سے انہیں ڈسٹرکٹ ہیڈ کوارٹرز ہسپتال منتقل کردیا گیا۔

&quot;ڈاکٹروں نے رائمہ کو مختلف دوائیں دیں اور انجکشن لگائے مگر کوئی افاقہ نہ ہوا۔ وہ شدید&nbsp; تکلیف سے تڑپتی رہیں&quot;۔

چار دن بعد رائمہ کا انتقال ہو گیا۔

آسیہ&nbsp; بتاتی ہیں کہ ڈاکٹروں کے بقول انہیں یہ بیماری آلودہ پانی پینے سے لاحق ہوئی تھی۔

جیلانی کالونی کی 35 سالہ نرگس بھی کئی سال سے ہر روز کھانا کھانے کے بعد پیٹ میں درد اور قے کی شکایت کے ساتھ شہر بھر کے ڈاکٹروں اور حکیموں کے پاس علاج کرواتی رہی تھیں لیکن انہیں کوئی افاقہ نہیں ہو رہا تھا۔

ایک دن اپنی عزیزہ کے مشورے پر وہ میڈیکل سپیشلسٹ کے پاس چلی گئیں۔

ڈاکٹر نے نرگس کا تفصیلی چیک اپ کیا اور ٹیسٹ بھی کروائے جن کی رپورٹوں سے انکشاف ہوا کہ وہ معدے اور جگر کے امراض میں مبتلا ہیں۔

ڈاکٹر نے انہیں سرکاری نلکے کا پانی پینے سے روک دیا اور فلٹریشن پلانٹ سے پانی لا کر استعمال کرنے کا مشورہ دیا۔

ڈاکٹر نے بتایا کہ میونسپل کمیٹی نارووال کی طرف سے گھروں کو سپلائی کیا جانے والا پینے کا پانی آلودہ ہونے کی وجہ سے نرگس کی ایسی حالت ہوئی ہے۔

دو لاکھ آبادی پر مشتمل نارووال شہر پینے کے صاف پانی جیسی بنیادی سہولت سے محروم ہے۔

یہاں کے لوگوں کو پینے کا صاف پانی مہیا کرنے&nbsp; کے لیے 1972ء میں زیر زمین واٹر سپلائی پائپ لائن بچھائی گئی تھی۔ اکاون سال قبل بچھائی گئے یہ پائپ جگہ جگہ سے ٹوٹ چکے ہیں اور صاف پانی میں سیوریج کا پانی شامل ہو رہا ہے۔

وفاقی وزیر منصوبہ بندی و ترقی احسن اقبال کا حلقہ انتخاب بھی نارووال ہے۔ انہوں نے شہریوں کو پینے کا صاف پانی فراہم کرنے کے لیے 2014ء میں 18 کروڑ 50 لاکھ روپے کی لاگت سے واٹر سپلائی سکیم شروع کی تھی۔

اس مقصد کے لیے پبلک ہیلتھ انجینئرنگ ڈیپارٹمنٹ نے شہر کو آٹھ حصوں میں تقسیم کیا۔ ہر زون میں ایک واٹر پمپ ہاؤس بنایا جانا تھا جہاں سے گھروں تک پائپ لائن بچھائی جانا تھی۔ منصوبے کی تکمیل کے لیے دو سال کا وقت مقرر کیا گیا۔

نارووال چار یونین کونسلوں پر مشتمل ہے اور پبلک ہیلتھ انجینئرنگ ڈیپارٹمنٹ نے پہلے مرحلے میں یونین کونسل نمبر چار میں کام شروع کرتے ہوئے میونسپل کمیٹی آفس سے ملحقہ احاطے میں ڈیپ ویل لگایا اور شہر کے محلہ اسلام پورہ، محمد پورہ کھجور والی گلی سمیت دیگر علاقوں میں زیر زمین پائپ لائن بچھائی اور شہریوں کو کنکشن فراہم کردیے۔ یہ کام 2014ء میں شروع ہو کر 2015ء میں مکمل ہو گیا تھا۔

محکمے نے دیگر یونین کونسل میں بھی واٹر زون پر کام شروع کروایا مگر 2016ء میں مالی وسائل کی عدم دستیابی کی وجہ سے وہاں کام روک دیا گیا۔ اس طرح ان علاقوں کے لوگوں کو یہ سہولت میسر نہ آ سکی۔

برگزیدہ بٹ پبلک ہیلتھ انجینئرنگ ڈیپارٹمنٹ میں ایس ڈی او ہیں۔ وہ کہتی ہیں کہ اس منصوبے کے لیے 10 سال میں صرف 116 ملین روپے جاری کیے گئے جبکہ ایک دہائی پہلے اس پر اٹھنے والی لاگت کا تخمینہ 18 کروڑ 50 لاکھ روپے لگایا گیا تھا۔

&quot;اب اس منصوبہ کی تکمیل پر کل لاگت سے دو گنا زیادہ خرچ ہو گا&quot;۔

وہ یہ بھی کہتی ہیں کہ اس منصوبے کی تکمیل میں بدانتظامی کا بھی اہم کردار ہے۔

&quot;منصوبے کے تحت شہر کو آٹھ زون میں تقسیم کیا گیا تھا۔ایک زون کے علاوہ باقی میں واٹر پمپ لگانے اور پمپ ہاؤس تعمیر کرنے کے لیے نہ تو زمین مختص کی گئی اور نہ ہی خریدی گئی تھی&quot;۔

نارووال شہر کی 65 فیصد آبادی کو میونسپل کمیٹی کی طرف سے پانی فراہم کیا جاتا ہے۔ بعض لوگوں نے&nbsp; گھروں میں واٹر پمپ لگوا لیے ہیں جبکہ بہت بڑی تعداد فلٹریشن پلانٹ سے پانی حاصل کرتی ہے۔

جیلانی کالونی کے 45 سالہ امجد علی مزدور پیشہ ہیں۔ وہ روزانہ فلٹریشن پلانٹ سے پانی بھرتے ہیں۔

&quot;سارا دن سخت مزدوری کے بعد رات کو پانی بھرنے جب&nbsp; فلٹریشن پلانٹس جاتا ہوں تو وہاں لمبی قطاریں دیکھ کر ہمت جواب دے جاتی ہے&quot;۔

انہوں نے بتایا اس طرح پینے کا صاف پانی تو مل جاتا ہے لیکن کھانے اور نہانے کے لیے کمیٹی کے نل سے آنے والے گندے بدبودار پانی سے کام چلانا پڑتا ہے۔

&nbsp;ڈپٹی کمشنر محمد اشرف کہتے ہیں کہ حکومت کی تبدیلی اور فنڈز کی عدم دستیابی پر واٹر سپلائی کا منصوبہ تباہ و برباد ہو چکا ہے۔

&quot;سکیم&nbsp; کی دوبارہ منصوبہ بندی کرنے کی ضرورت ہے۔ البتہ جاری منصوبے پر انتظامیہ جو کچھ ہو سکا ضرور کرے گی۔&#39;&#39;

میونسپل کمیٹی کے چیف آفیسر ریحان سلیم کہتے ہیں کہ پرانی پائپ لائن کی مرمت کروانا ممکن نہیں ہے۔ انہوں نے بتایا کہ شہریوں کو پینے کا صاف پانی فراہم کرنے کے لیے میونسپل کمیٹی نے شہر میں 13 واٹر فلٹریشن پلانٹ لگا رکھے ہیں۔

آلودہ پانی پینے سے شہر میں جگر کے مریضوں کی تعداد بڑھتی جا رہی ہے۔ ڈسٹرکٹ ہیڈ کوارٹرز ہسپتال کے مطابق 22-2021 میں 26 ہزار 320 مریضوں کا معائنہ کیا گیا تھا جن میں سات ہزار 533 مریض جگر کی مختلف بیماریوں میں مبتلا پائے۔

نرگس کا علاج کرنے والے ڈاکٹر شیراز کا کہنا ہے کہ شہری فلٹریشن پلانٹ کا پانی استعمال کرکے ایسے امراض سے محفوظ رہ سکتے ہیں۔

ایسوسی ایشن آف ہیومن رائٹس نارووال کے نائب صدر میاں محمد رفیق کہتے ہیں کہ پینے کے صاف پانی کی فراہمی حکومت کی اولین ذمہ داری اور شہریوں کا بنیادی حق ہے۔ نارووال شہر کے لیے 13 فلٹریشن پلانٹ بہت کم ہیں۔ یا تو انتظامیہ صاف پانی کی سکیم مکمل کرے یا فلٹریشن پلانٹس کی تعداد بڑھائی جائے۔&nbsp;

پیاس جب بڑھتی ہے تو ڈر لگتا ہے پانی سے: حیدرآباد میں آلودہ پانی کے استعمال سے بیماریوں اور اموات میں اضافہ۔

نارووال کا سپورٹس سٹی کمپلیکس گھاس پھوس اور خودرو پودوں کی بہتات کی وجہ سے بھوت بنگلے کا منظر پیش کر رہا ہے۔

نارووال وفاقی وزیر پلاننگ اینڈ ڈویلپمنٹ احسن اقبال کا شہر ہے۔ انہوں نے 2009ء میں اس وقت کے وزیر اعظم یوسف رضا گیلانی سے سپورٹس سٹی نارووال کا میگا پروجیکٹ منظور کروایا تھا۔ اس میں کرکٹ، فٹ بال، ہاکی، بیڈ منٹن، لانگ ٹینس، بالی بال، باسکٹ بال، جمنیزیم اور سوئمنگ پول سمیت دیگر کھیلوں کے میدان تعمیر کیے جانا تھے۔

اس وقت پروجیکٹ کی تعمیر پر ایک ارب 75 کروڑ روپے کے اخراجات کا تخمینہ لگایا گیا تھا۔ منصوبے کے لیے نارووال سے دو کلو میٹر دور مریدکے روڈ پر 46 ایکڑ اراضی خریدی گئی اور 2009ء میں ہی اس کی چار دیواری کی تعمیر کا کام شروع کر دیا گیا تھا۔

لیکن پھر فنڈز جاری نہ ہونے کی وجہ سے منصوبہ سست روی کا شکار ہو گیا۔

ضلع نارووال کی آبادی 17 لاکھ سے زائد ہے جس کا 85 فیصد دیہات میں رہتا ہے۔ ضلعے میں کھیلوں کی سہولیات نہ ہونے کے برابر ہیں۔

2013ء میں ن لیگ کی حکومت آئی تو احسن اقبال نے دوبارہ منصوبے&nbsp; پر کام شروع کروا دیا۔

پروجیکٹ کی تعمیر میں تاخیر اور مہنگائی کی وجہ سے لاگت کا تخمینہ بھی بڑھ گیا تھا۔ 2018ء تک منصوبے کی تعمیر پر تقریبا چار ارب روپے کی لاگت سے 85 فیصد سے زائد تعمیراتی کام مکمل ہو چکے تھے اور تکمیل کے لیے مزید 70 کروڑ روپے درکار تھے جس سے یہ پروجیکٹ 31 دسمبر 2018ء تک مکمل ہو جاتا۔

مگر 2018ء میں حکومت کی تبدیلی کے ساتھ ہی پروجیکٹ کے تعمیراتی فنڈز روک لیے گئے۔

پاکستان تحریک انصاف نے منصوبے میں مبینہ کرپشن کے الزامات پر تحقیقات شروع کروا دیں اور 2019ء میں احسن اقبال کو گرفتار کر لیا گیا۔کرپشن کیسیز کی تحقیقات میں تین سال گزر گئے۔

سپورٹس سٹی کا تعمیراتی کام رک جانے کی وجہ سے 50 کروڑ روپے کا آسٹروٹرف جو ہاکی اسٹیڈیم میں بچھایا جانا تھا، ڈبوں میں بند پڑے پڑے زائد المیعاد ہو گیا ہے۔

فٹ بال کے میدان کے اطراف میں کھلاڑیوں کے لیے جوگنگ ٹریک بنانے کے لیے مختلف تعمیراتی سامان اور کیمیکلز منگوائے گئے تھے۔ تعمیراتی سامان تو آہستہ آہستہ چوری ہو گیا اور کیمیکلز ڈرموں میں ہی خراب ہوگئے۔

اِن ڈور کھیلوں کے وہ کورٹس جن کی تعمیر مکمل ہو چکی تھی ان کی کھڑکیاں دروازے اور شیشے ٹوٹ پھوٹ چکے ہیں۔ جمنیزیم ہال میں امپورٹیڈ وڈ ورک بھی بارشوں اور عدم توجہ کی وجہ سے خراب ہو چکا ہے۔

کھیلوں کا ہر سٹیڈیم ایک مکمل پیکج کے ساتھ بنایا گیا ہے۔ سٹیڈیم کے ساتھ واش رومز اور بجلی کی فراہمی کے لیے معیاری انتظامات رکھے گئے ہے۔

سپورٹس سٹی میں ایک ہی وقت میں 14 مختلف کھیلوں کے میچز کروانے کے انتظامات موجود ہیں۔ کھلاڑیوں کے لیے کیفیٹیریا، مسجد اور رہائشی اپارٹمنٹ تعمیر کئے گئے ہیں لیکن ہر طرف اجاڑ نظر آتا ہے۔

شاہد حسین تجربہ کار سپورٹس مین اور ایک کرکٹ کلب کے صدر ہیں۔ وہ کہتے ہیں کہ سپورٹس سٹی میں 2018ء کے آغاز پر پاکستان کرکٹ ٹیم کے کھلاڑیوں نے ایک نمائشی میچ کھیلا تھا جس میں قومی ٹیم کے تین سابق کپتانوں نے بھی شرکت کی تھی۔ &quot;سابق صدر پاکستان ممنون حسین نمائشی کرکٹ میچ دیکھنے نارووال آئے تھے&quot;۔

شاہد حسین افسوس کا اظہار کرتے ہوئے کہتے ہیں کہ پاکستان میں کھیلوں کے میدانوں پر بھی سیاست کی جا رہی ہے۔&quot;منصوبہ وقت پر مکمل ہو جاتا تو پی ایس ایل کے تمام میچز عرب ممالک کی بجائے پاکستان میں نارووال کی سر زمین پر بین الاقوامی معیار کے مطابق ہو رہے ہوتے&quot;۔

محمد عابد کھیلوں کا سامان فرخت کرتے ہیں۔ وہ اس انتظار میں ہیں کہ کب سپورٹس سٹی کا منصوبہ مکمل ہو تاکہ وہ اپنا کاروبار پھیلا سکیں۔

مگر ان کا خواب جلد پورا ہوتا نظر نہیں آتا۔

احسن اقبال نے نومبر 2022ء میں متعلقہ حکام کے اعلیٰ سطحی اجلاس میں منصوبے کی تاخیر پر سخت برہمی کا اظہار کرتے ہوئے کہا تھا کہ سات ماہ گزر جانے کے باوجود منصوبے میں عدم پیشرفت وزارت بین الصوبائی رابطہ وزارت آئی پی سی کے غیر سنجیدہ رویے کو ظاہر کرتی ہے۔ انہوں نے متعلقہ حکام کو یہ منصوبہ 23 مارچ 2023ء کو فعال کرنے کی ہدایت کی تھی۔

لیکن ابھی دِلی بہت دور نظر آتی ہے۔

چلو چلو کوریا چلو: نارووال سے جنوبی کوریا، نان سٹاپ

خالد پرویز کی عمر 60 سال ہے اور وہ نوجوانوں کے ساتھ ہاکی کھیلتے ہیں۔ ان کا کہنا ہے کہ سیاسی کشمکش کی وجہ سے نہ صرف پیسے کا ضیاع ہوا بلکہ علاقہ صحت مند سرگرمیوں سے بھی محروم رہا ہے۔

سپورٹس سٹی نارووال منصوبے میں کرپشن کے کیسیز کے خاتمے پر احسن اقبال نے دوبارہ اس منصوبہ کی تکمیل کے لیے پاکستان سپورٹس بورڈ کی ٹیکنیکل ٹیم سے تخمینہ لگوایا ہے۔

احسن اقبال نے بتایا کہ 2018ء میں سپورٹس سٹی کے منصوبہ کی تکمیل کے لیے صرف 70 کروڑ روپے کی ضرورت تھی اور اب اس منصوبہ کی تکمیل کے لئے تین ارب 10 کروڑ روپے درکار ہیں۔

&quot;خود کو سپورٹس مین کہنے والے کپتان نے نوجوانوں سے کھیلوں کے میدان چھین لیے اور ملک کو اربوں روپے کا نقصان پہنچایا&quot;۔

انہوں نے کہا کہ سپورٹس سٹی کی تعمیر پر جلد کام شروع کر دیا جائے گا اور آئندہ چھ ماہ کے دوران منصوبے کو مکمل کر لیا جائے گا۔

ڈسٹرکٹ سپورٹس آفیسر رانا محمد اصغر کو احسن اقبال کی بات پر مکمل یقین ہے اور وہ&nbsp; پر امید ہیں کہ منصوبے پر جلد ہی کام کا آغاز ہو جائے گا۔ انہوں نے کہا کہ سپورٹس سٹی مکمل ہونے کے بعد باقاعدہ کوچ رکھے جائیں گے جو&nbsp; کھلاڑیوں کو بین الاقوامی معیار کی تربیت دیں گے۔

سیاسی کھیل میں فٹ بال بنا سپورٹس کمپلیکس: نارووال کے سپورٹس سٹی پر اور کتنے ارب روپے لگیں گے؟

نارووال میں روزانہ صبح سویرے سیکڑوں نوجوان پاسپورٹ دفتر کے باہر جمع ہو جاتے ہیں۔ ان کے ہاتھوں میں پاسپورٹ فیس کی رسیدیں ہوتی ہیں اور وہ دفتر میں داخلے کے لیے لمبی قطاروں میں کھڑے ہو کر اپنی باری کا انتظار کرتے رہتے ہیں۔

یہ تمام لوگ جنوبی کوریا جانے کے خواہش مند ہیں جنہیں پاسپورٹ بنوانے کے لیے دن بھر یا بعض اوقات کئی کئی روز انتظار کرنا پڑتا ہے۔

جنوبی کوریا نے غیرملکیوں کو لاٹری کے ذریعے ورک پرمٹ دینے کا ایک پروگرام شروع کر رکھا ہے جسے &#39;کورین ویزا لاٹری&#39; بھی کہتے ہیں۔

اس پروگرام کے تحت ویزا لینے کے لیے پہلے ایک آن لائن ویزا فارم بھرنا پڑتا ہے جس کے ساتھ پانچ سو روپے فیس جمع کرانا ہوتی ہے۔ درخواست دینے والوں کی اہلیت کی جانچ کے بعد لاٹری کے ذریعے لوگ منتخب کیے جاتے ہیں۔

لاٹری میں جب کسی فرد کا نام نکل آئے تو اسے ایک تحریری امتحان دینا ہوتا ہے جس میں شرکت کے لیے ایک مقررہ تاریخ تک کوریا کے سفارت خانے کو درکار دستاویزات، پاسپورٹ اور بینک ڈرافٹ کے ذریعے 28 ڈالر فیس جمع کروائی جاتی ہے۔ اس کے علاوہ کوریا جانے کے لیے روزمرہ بول چال کی حد تک کورین زبان سے واقفیت کا ہونا بھی لازمی ہے۔

ضلع نارووال سے لوگوں کی بڑی تعداد ویزا لاٹری کے لیے درخواستیں دیتی ہے اور ان میں بہت سےلوگ اس لاٹری کے لیے منتخب بھی ہو چکے ہیں۔

ویزا لاٹری سکیم سے کسی کو بیرون ملک روزگار ملے نہ ملے اس کی بدولت نارووال میں بہت سے لوگوں کے روزگار اور کاروبار ضرور پھل پھول رہے ہیں۔

ان میں کمپیوٹر کی دکانیں اور کوریا کی زبان سکھانے والی اکیڈمیاں خاص طور پر قابل ذکر ہیں۔ اس کے علاوہ پاسپورٹ اور شناختی کارڈ بنوانے والے ایجنٹوں اور فارم بھرنے میں مدد دینے والوں کی بھی چاندی ہو گئی ہے۔

<h2>ملک سے بھاگ نکلنے کی معیشت</h2>

نارووال شہر کے علاوہ ضلعے کے 1400 سے زیادہ دیہات کے لوگ بھی پاسپورٹ کے دفتر آتے ہیں۔ بہت بڑی تعداد میں یہ لوگ اکثر کئی روز اپنی باری کے انتظار میں دفتر کے باہر ڈیرے ڈالے رہتے ہیں۔

پاسپورٹ کے حصول کے لیے قطار میں کھڑے 32 سالہ کلیم اللہ نے بتایا کہ وہ تحصیل شکرگڑھ کے گاؤں سکروڑ سے آئے ہیں اور دو روز سے یہیں موجود ہیں۔ انہوں نے الزام عائد کیا کہ جو لوگ ایجنٹوں سے مک مکا کر لیتے ہیں وہی دفتر کے اندر جا پاتے ہیں جبکہ باقی لوگوں کو طویل انتظار کرنا پڑتا ہے۔

پاسپورٹ دفتر میں داخلے کا انتظار کرنے والے متعدد دیگر لوگوں نے بھی سجاگ کو بتایا کہ دفتر کے عملے کی ملی بھگت سے کام کرنے والے ایجنٹ لوگوں کا کام کروانے کے عوض پانچ سے دس ہزار روپے رشوت وصول کرتے ہیں۔

پاسپورٹ آفس کے باہر دھکم پیل اور لڑائی جھگڑا بھی دیکھنے کو ملتا ہے۔ ایسے بہت سے واقعات میں لوگ زخمی بھی ہوئے ہیں جبکہ دفتر کے دروازوں کھڑکیوں کو بھی نقصان پہنچا ہے۔

لوگ یہ الزام بھی عائد کرتے ہیں کہ پاسپورٹ بنوانے کے علاوہ وصول کرنے کے لیے بھی ایجنٹوں اور عملے کو پانچ سو سے ہزار روپے تک رشوت دینا پڑتی ہے۔

جب ان شکایات کے حوالے سے نارووال میں ریجنل پاسپورٹ آفس کے اسسٹنٹ ڈائریکٹر غلام رسول پاشا سے بات کی گئی تو ان کا کہنا تھا کہ ویزا لاٹری سکیم کی وجہ سے روزانہ سیکڑوں لوگ پاسپورٹ بنوانے کے لیے آتے ہیں۔ چونکہ ہمارے دفتر میں اس مقصد کے لیے صرف ایک پراسیس سسٹم ہے اس لیے کم وقت میں لوگوں کی بڑی تعداد کو بھگتانا مشکل ہوتا ہے۔ اس کے باوجود زیادہ سے زیادہ لوگوں کے پاسپورٹ بنانے کے لیے دفتر کا عملہ اپنی ڈیوٹی ختم ہونے کے بعد بھی رات بارہ بجے تک کام کرتا رہتا ہے۔

انہوں نے اس الزام کی تردید کی کہ پاسپورٹ دفتر کا عملہ ایجنٹوں کی ملی بھگت سے رشوت لے کر لوگوں کے کام کرتا ہے۔

ویزا لاٹری کے لیے سب سے پہلے آن لائن درخواست دینا پڑتی ہے۔ چونکہ بیشتر لوگوں کے پاس کمپیوٹر نہیں ہوتا یا وہ آن لائن درخواست دینے کے طریقے سے واقف نہیں ہوتے اس لیے وہ مارکیٹ کا رخ کرتے ہیں جہاں اس کام میں مدد دینے کے لیے بہت سے دکانیں کھل گئی ہیں۔ ان دکانوں پر دو سو سے پانچ سو روپے لے کر لوگوں کے درخواست فارم بھرے جاتے ہیں۔ کوریا کا ویزا حاصل کرنے کے خواہش مند لوگ دیگر متعلقہ کاموں میں مدد اور رہنمائی کے لیے بھی ادائیگی کرتے ہیں۔

<h2>آئیے کورین سیکھیئے!</h2>

چونکہ کوریا کا ویزا لینے کے لیے کورین زبان سے واقفیت شرط ہے اس لیے شہر میں جا بجا ایسی اکیڈمیاں کھل گئی ہیں جو لوگوں کو یہ زبان سکھاتی ہیں اور اس کے عوض پانچ سے 30 ہزار روپے ماہانہ فیس وصول کرتی ہیں۔ تاہم ایسی بیشتر اکیڈمیوں میں پڑھنے کا ماحول اور تدریسی معیار انتہائی ناقص ہے جہاں لوگوں کو زمین پر بیٹھ کر سبق لینا پڑتا ہے جبکہ انہیں پڑھانے والے اساتذہ بھی زبان کے ماہر نہیں ہوتے۔

ڈومالہ گاؤں کے 35 سالہ محمد سلیم کا گھرانہ مناسب روزگار نہ ہونے کی وجہ سے شدید مشکلات کا شکار ہے۔ وہ بتاتے ہیں کہ ان کے پاس نہ تو بچوں کو پہنانے کے لیے اچھے کپڑے ہیں نہ ہی وہ ان کے لیے مناسب خوراک کا انتظام کر سکتے ہیں۔ کسی کے مشورے پر انہوں نے ایک ہزار روپے قرض لے کر کوریا ویزا لاٹری کے لیے آن لائن درخواست دی تھی۔ خوش قسمتی سے لاٹری میں ان کا نام نکل آیا جس کے بعد انہوں نے اپنی بھینس فروخت کرکے پاسپورٹ بنوایا،&nbsp; کوریا کے ویزے کا ٹیسٹ دینے کے لیے 10 ہزار روپے فیس جمع کروائی اور اب ایک اکیڈمی کو 30 ہزار روپے دے کر کورین زبان سیکھنے کی کوشش کر رہے ہیں۔

قصبہ نورکوٹ کے رہائشی 25 سالہ محمد ابراہیم اور 30 سالہ ناصر محمود بیروزگار ہیں۔ ان کی خواہش ہے کہ کوریا جا کر اچھا روزگار پائیں اس مقصد کے لیے انہوں نے کوریا کی ویزا لاٹری سکیم میں حصہ لیا ہے۔ ان کہنا ہے کہ پاسپورٹ بنوانے اور کوریا کی زبان سکھانے والی اکیڈمیوں میں داخلے پر بھاری رقم خرچ کرنے کے باوجود وہ نہیں جانتے کہ آیا ان کے لیے کوریا جانا ممکن ہو گا یا نہیں۔

چندرکے راجپوتاں نامی گاؤں کے محمد عبداللہ کہتے ہیں کہ شہر میں کورین زبان سکھانے والی جو اکیڈمیاں کام کر رہی ہیں وہ نہ تو حکومت سے مںظور شدہ ہیں، نہ ان میں اچھے اساتذہ ملتے ہیں اور نہ ہی ان کے جاری کردہ سرٹیفکیٹ کی کوئی اہمیت ہے۔ عبداللہ کا کہنا ہے کہ حکومت کو چاہیے کہ وہ روزگار کے لیے بیرون ملک جانے کے خواہش مند لوگوں کو ہنر سکھانے کے ساتھ متعلقہ غیرملکی زبانوں کی تعلیم بھی دے۔

غیررجسٹرڈ اور غیرمعیاری اکیڈمیوں کے مسئلے کے بارے میں نارووال میں محکمہ تعلیم کے چیف ایگزیکٹو آفیسر محمد اقبال چودھری سے پوچھا گیا تو ان کا کہنا تھا کہ وہ غیرملکی زبانوں کا کورس کروانے والی اکیڈمیوں کو چیک کرنے کا اختیار نہیں رکھتے۔ &quot;کوریا کی زبان سکھانے والی اکیڈمیوں کی کارکردگی اور معیار کا جائزہ لینا ہائر ایجوکیشن ڈیپارٹمنٹ کی ذمہ داری ہے&quot;۔

دوسری جانب نارووال کے ڈپٹی کمشنر اور ڈسٹرکٹ ایجوکیشن اتھارٹی کے چیئرمین محمد اشرف یقین دہانی کراتے ہیں کہ کورین زبان سکھانے والی غیرقانونی اکیڈمیوں کے خلاف سخت کارروائی کی جائے گی۔ ان اکیڈمیوں کو اپنی رجسٹریشن کروانے کو کہا جائے گا اور فیڈرل بورڈ آف ریونیو ان سے ٹیکس بھی وصول کرے گا۔

عابد محمود بیگ

عابد محمود بیگ 30 سالوں سے صحافت سے وابستہ ہیں اردو انگلش الیکٹرانک میڈیا کی صحافت اور انویسٹیگیش نیوز سٹوری پر کام کرنے کا وسیع تجربہ رکھتے ہیں۔

مرا علاج مرے چارہ گر کے پاس نہیں: شکرگڑھ اور ظفروال میں مقامی مریض ڈائلیسیز کی سہولت سے محروم

اسی آلودہ پانی میں عمر بہتی جا رہی ہے: نارووال کے شہری آلودہ پانی کے استعمال سے ہسپتالوں کا رخ کرنے لگے

سیاسی کھیل میں فٹ بال بنا سپورٹس کمپلیکس: نارووال کے سپورٹس سٹی پر اور کتنے ارب روپے لگیں گے؟

چلو چلو کوریا چلو: نارووال سے جنوبی کوریا، نان سٹاپ

Lok Sujag