پینتیس سالہ حمیرا خان میانوالی شہر کے ایک سرکاری سکول میں آٹھ سال سے بطور معلمہ تعینات ہیں۔ ان کے شوہر شاہ جہان خان ایک نجی بینک میں ملازمت کرتے ہیں۔

وہ بتاتی ہیں کہ شادی کے ایک سال بعد بھی جب ان کے ہاں اولاد نہ ہوئی تو میاں بیوی کے تعلقات خراب ہو گئے اور ان کے شوہر بات بے بات انہیں تشدد کا نشانہ بنانے لگے۔

&quot;ایک رات قریباً 12 بجے ہمارے درمیان جھگڑا ہوا۔ شوہر نے مجھے مارا پیٹا تو میں نے ون فائیو پر کال کر کے پولیس کو بلا لیا۔ پولیس آئی تو میرے شوہر نے دروازہ کھولا اور پولیس والوں سے کہا کہ یہ ہمارا نجی معاملہ ہے اور اگر وہ دوبارہ آئے تو اچھا نہیں ہو گا۔ یہ سن کر پولیس واپس چلی گئی اور شوہر شکایت کرنے پر مجھے دوبارہ مارنے پیٹنے لگے۔&quot;

یہ واقعہ اس حقیقت کے باوجود پیش آیا کہ پنجاب میں گھریلو تشدد کے خلاف ایک علیحدہ قانون موجود ہے۔

<h2>رکاوٹوں والی دوڑ میں جیت کس کی؟</h2>

خواتین پر تشدد کی روک تھام کا قانون پنجاب اسمبلی نے فروری 2016ء میں پاس کیا تھا۔ اس قانون میں شوہر یا گھر کے دیگر افراد کی جانب سے خواتین کو مارپیٹ کا نشانہ بنانے اور ان کے ساتھ پرتشدد اور دھمکی آمیز رویہ اختیار کرنے کو جرم قرار دیا گیا۔ اس کے علاوہ جذبات کو مجروح کرنے، زبانی کلامی و جنسی استحصال کرنے اور خواتین کو نفسیاتی طور پر ہراساں کرنے کو بھی پُرتشدد طرزعمل کی فہرست میں شامل کیا گیا۔ اور ان کیسز میں مجرموں کو قرار واقعی سزا دینے کے ساتھ ساتھ شکایت کرنے والی خواتین کی حفاظت کا خاطرخواہ بندوبست کرنے کا اہتمام بھی شامل کیا گیا۔

اس قانون پر عملدرآمد کے لیے ضلع کی سطح پر خواتین کے لئے پروٹیکشن سنٹر، شیلٹر ہوم اور پروٹیکشن کمیٹیوں کا قیام عمل آنا تھا اور وومن پروٹیکشن آفیسرز کی تعیناتی کی جانی تھی۔

قانون کی ایک شق کے مطابق اس کا اطلاق یکدم پورے صوبے میں نہیں ہونا تھا بلکہ طے یہ کیا گیا تھا کہ ہر ضلع میں ان ضروری لوزامات کی فراہمی کے بعد ایک نوٹیفیکیشن کے ذریعے اس قانون کا اطلاق کیا جائے گا۔

یہی شق اس قانون پر عملدرآمد کی راہ میں رکاوٹ بن گئی۔

دسمبر 2022ء تک اس قانون کا اطلاق صرف ملتان میں ہی ممکن ہو سکا کیونکہ وومن پروٹیکشن سنٹر اب تک وہیں بن پایا تھا۔

قانون کے پورے صوبے میں اطلاق کی راہ میں حائل رکاوٹیں دور کرنے کے لیے 2022ء میں پنجاب اسمبلی نے اس میں ترامیم منظور کیں۔

غیرسرکاری تنظیم شرکت گاہ کے مشیر سہیل وڑائچ کہتے ہیں کہ ترمیم میں خاص اہمیت اس شق کی ہے جس کے تحت سیکرٹری سوشل ویلفیئر و بیت المال کو یہ اختیار دے دیا گیا ہے کہ وہ کسی بھی عمارت کو پروٹیکشن سینٹر قرار دے سکتا ہے۔

میانوالی میں پہلے سے قائم وومین کرائسس سینٹر کو نئے قانون کے تحت 21 دسمبر 2022ء کو وومین پروٹیکشن سینٹر ڈیکلیئر کر دیا گیا۔ یہ وومن کرائسز سینٹر 2005ء میں وفاقی حکومت کے زیرانتظام قائم کیا گیا تھا لیکن اٹھارویں آئینی ترمیم کے بعد 2014ء میں اسے پنجاب سوشل ویلفیئر ڈیپارٹمنٹ کے ماتحت کر دیا گیا تھا۔

میانوالی کے علاوہ 11 دیگر اضلاع میں بھی کرائسس سینٹرز کو پروٹیکشن سینٹر ڈیکلیئر کر دیا گیا ہے جن میں بہاولپور، ڈیرہ غازی خان، فیصل آباد، مظفر گڑھ، خوشاب، لاہور، ملتان، راولپنڈی، ساہیوال، سیالکوٹ اور وہاڑی شامل ہیں اور ان کرائسس سینٹرز کی تمام مینیجرز کو ڈسٹرکٹ وومن پروٹیکشن آفیسر بھی نوٹیفائی کر دیا گیا ہے۔

<h2>کہ زخم ابھی بھرا نہیں</h2>

گویا اب گھریلو تشدد کے خلاف قانون پر عملدرآمد کی راہ میں کوئی تکنیکی رکاوٹ حائل نہیں ہے۔

سہیل وڑائچ کا ماننا ہے کہ ان اقدامات کے ساتھ سطحی تبدیلیاں تو رونما ہونی شروع ہو گئی ہیں لیکن ابھی اس سلسلے میں بہت کچھ کیا جانا باقی ہے۔

&quot;خاطرخواہ تبدیلی تب آئے گی جب تشدد کی شکایت کرنے والی خواتین کو موثر طور سے تحفظ فراہم کیا جائے گا اور ان کے پروٹیکشن آرڈر اور ریذیڈنٹ آرڈر پر عمل درآمد شروع ہو گا۔ ابھی تو لوگوں کو اس قانون کے اطلاق کا علم ہی نہیں ہے۔&quot;

فوزیہ وقار خواتین کے حقوق کی جدوجہد کی ایک سرکردہ رہنما ہیں۔ وہ آج کل&nbsp; وفاقی محتسب برائے انسدادِ ہراسانی خواتین کے فرائض انجام دے رہی ہیں۔ ان کا ماننا ہے اس قانون میں گھریلو تشدد کے جرم کے تدارک کی بھرپور استطاعت ہے۔ انہوں نے لوک سجاگ کو بتایا کہ اس قانون کے تین پہلو اہم ہیں۔

&quot;پہلا یہ کہ یہ قانون عمومی اور خصوصی طور پر خواتین کے خلاف گھریلو تشدد کے خاتمے کے سلسلے میں ایک اہم قدم ہے۔ دوسرا یہ قانون حقیقی معنوں میں عورتوں کے خلاف تشدد کی روک تھام کرنے کی صلاحیت رکھتا ہے۔ اور تیسرا پہلو یہ ہے کہ اس قانون پر اس کی حقیقی روح کے ساتھ عمل درآمد کرنے کے لیے ہر ضلعے میں فعال قیادت کی ضرورت ہے۔&quot;

<h2>&#39;سنٹر میں خاتون پولیس آفیسر کو تعینات کیا جانا چاہئیے&#39;</h2>

میانوالی میں ڈسٹرکٹ وومن پروٹیکشن آفیسر کا چارج سنبھالنے والی زبیدہ شاہین کا کہنا ہے کہ عموماً خواتین گھریلو تشدد پر قانونی چارہ جوئی کرنے کی حامی نہیں ہوتیں۔ انہیں ڈر ہوتا ہے کہ یہ ان کی شادی شدہ زندگی کے خاتمے کا سبب بن سکتا ہے۔ ایسی صورت میں ہمارے پاس اگر کوئی خاتون گھریلو تشدد کا کیس لے کر آتی ہے تو ہم ان کی کونسلنگ کرتے ہیں اور اگر خواتین قانونی چارہ جوئی کرنا چاہیں تو ہم انہیں قانونی سہولت مہیا کرتے ہیں۔

&quot;ہمارے پاس علیحدہ سے کوئی فورس نہیں ہے۔ ہمیں اپنے اختیارات کے استعمال کے لئے پولیس اور انتظامیہ سے رجوع کرنا پڑتا ہے۔ پروٹیکشن سنٹر میں کم از کم سب انسپکٹر سطح کی خاتون پولیس آفیسر کو تعینات کیا جانا چاہئیے تاکہ ہمیں خواتین کو تحفظ دینے کی کارروائی میں اپنے تحفظ کی فکر نہ ہو۔&quot;

وومن پروٹیکشن آفیسر سمیرا صدیقی سمجھتی ہیں کہ ہمارے ہاں گھریلو تشدد کو معاشرتی سطح پر قبولیت حاصل ہے جس کی وجہ سے ایسے زیادہ تر واقعات تو رپورٹ ہی نہیں ہوتے۔ انہوں نے بتایا کہ میانوالی میں جنوری تا اپریل 2023ء خواتین کی طرف سے تشدد کی 31 شکایات درج کرائی گئیں جن میں سے ایک بھی گھریلو تشدد سے بچاؤ کے لئے نہیں تھی۔

<h2>&#39;مجھے مارپیٹ سے نجات چاہیے، طلاق نہیں&#39;</h2>

سمیرا کہتی ہیں کہ اگر کوئی خاتون گھریلو تشدد کی شکایت لے کر پولیس سے رجوع کرتی بھی ہے تو پولیس کا ردعمل حوصلہ افزا نہیں ہوتا۔&nbsp; گھریلو ناچاقی کے معاملات پر ایف آئی آر ہی درج نہیں کی جاتی اور برادری کی سطح پر صلح صفائی کے لئے زور دیا جاتا ہے۔

بیالیس سالہ سکینہ بی بی میانوالی شہر کے محلہ میانہ میں رہتی ہیں۔ 23 سال قبل ان کی شادی دیہاڑی دار مزدور محمد ساجد سے ہوئی جس سے ان کے تین بچے ہوئے۔ سکینہ بتاتی ہیں کہ ان کے شوہر بلڈپریشر کے مریض بھی ہیں اور وہ انہیں معمولی باتوں پر مارتے پیٹتے ہیں اور جب تھک جاتے ہیں تو انہی سے ٹانگیں دبواتے ہیں۔

&quot;میں روز روز کی مار کٹائی سے تنگ آ کر ایک بار عورتوں کو تحفظ فراہم کرنے والے ادارے میں گئی اور انہیں ساری صورتحال بتائی۔ ادارے کے لوگوں ںے مجھے تسلی دی اور میری امداد کا بھی وعدہ کیا۔ جب میرے شوہر کو اس بات کا پتہ چلا تو اس نے مجھے اور مارا پیٹا اور خبردار کیا کہ اگر دوبارہ ادارے میں شکایت کی تو وہ انہیں طلاق دے دے گا۔ مجھے مارپیٹ سے نجات چاہیے، طلاق نہیں۔&quot;

&nbsp;

'تشدد جھیلتی رہی ہوں مگر طلاق نہیں لے سکتی'

اس نے کہا بیوی کو مارنا ہمارا خانگی معاملہ ہے اور پولیس واپس چلی گئی: گھریلو تشدد کے خلاف قانون کب لاگو ہو گا؟

text

میانوالی کی ریحانہ نے عابد کے ساتھ کورٹ میرج کی تھی۔ دونوں کی ذات میں فرق کے باعث ریحانہ کا خاندان اس شادی کا سخت مخالف تھا۔ اس لیے وہ تحفظ کے لیے شوہر کے ساتھ لاہور منتقل ہو گئیں۔

ایک سال بعد انہوں نے تعلقات بحال کرنے کے لیے اپنے گھر رابطہ کیا اور بتایا کہ وہ حاملہ ہیں۔ گھر والوں نے کہا کہ وہ انہیں &#39;معاف&#39; کر چکے ہیں اور وہ جب چاہیں واپس آ سکتی ہیں۔ جب ریحانہ گھر والوں سے ملنے گئیں تو ان کے بھائی نے انہیں غیرت کے نام پر قتل کر دیا۔

ملزم کو گرفتار کر کے جیل بھیج دیا گیا لیکن والد نے دیت کے قانون کے تحت اپنے بیٹے کو بہن کا قتل معاف کر دیا جس پر مقدمہ ختم ہو گیا۔

پاکستان میں غیرت کے نام پر قتل کے خلاف مخصوص قوانین کی موجودگی کے باوجود ایسے واقعات عام ہیں جنہیں پنجاب میں عام طور پر کالا کالی، سندھ میں کاروکاری، خیبرپختونخوا میں تور تورا اور بلوچستان میں سیاہ کاری کہا جاتا ہے۔

2004 میں حکومت نے پارلیمنٹ کے ایکٹ کے ذریعے غیرت کے نام پر قتل کو قتل عمد قرار دے کر اس کی سزا موت یا عمر قید مقرر کر دی تھی۔ اس سے پہلے ایسے واقعات کو عام قتل میں شمار کیا جاتا تھا۔ اس ایکٹ میں یہ بھی شامل ہے کہ قاتل ولی کا کردار ادا نہیں کر سکتا۔

تاہم یہ قانون عملی طور پر بے اثر رہا۔ چونکہ ایسے واقعات میں قاتل عموماً قریبی رشتہ دار ہی ہوتا تھا اس لیے مقتول کے ورثاء دیت کے قانون کے تحت اسے معاف کر دیتے تھے اور اس طرح قاتلوں کو گویا کھلی چھوٹ حاصل تھی۔

ڈسٹرکٹ کورٹ میانوالی میں وکالت کرنے والے عرفان الحسن کہتے ہیں کہ اس قانون سازی کے تحت غیرت کے نام پر قتل کو باقاعدہ جرم تو قرار دے دیا گیا لیکن اس قانون میں اس قدر سقم تھے کہ قاتل صاف بچ نکلتا تھا۔ دیت کے قانون کی موجودگی میں ورثاء قاتل کو معاف کر دیتے تھے اور وہ چند ہی ماہ میں رہا ہو جاتا تھا۔

چنانچہ غیرت کے نام پر قتل کے واقعات میں کوئی کمی نہ آئی۔

ہیومن رائٹس کمیشن آف پاکستان کے مطابق 2004 سے 2016 کے درمیان ایسے 15 ہزار 222 واقعات رپورٹ ہوئے۔ پنجاب پولیس کے مطابق صرف میانوالی میں&nbsp; ہی 2011 سے 2016 کے درمیان غیرت کے نام پر 73 افراد کی جان لے لی گئی۔

2016 میں قندیل بلوچ کے قتل کے بعد اس قانون میں مزید ترمیم کی گئی جس کے تحت غیرت کے نام پر قتل کو فساد فی الارض میں شمار کیا گیا اور اب ولی قاتل کو معاف نہیں کر سکتا۔ اس میں دوسری اہم بات یہ تھی کہ ولی قصاص کے تحت سزائے موت کو معاف کر سکتا ہے لیکن تعزیر کے تحت عمر قید کی سزا معاف نہیں کر سکتا۔ اس میں تیسرا اہم نکتہ یہ تھا کہ غیرت کے نام پر قتل کی صورت میں تعزیر کی سزا عمر قید ہو گی۔

اس ترمیم کے بعد اب پولیس نے ایسے مقدمات تعزیرات پاکستان کے سیکشن 302 اور 311 کے تحت درج کرنا شروع کر دیے۔

ڈسٹرکٹ بار ایسوسی ایشن میانوالی کے رکن شاہد خان کہتے ہیں کہ غیرت کے نام پر قتل کے خلاف قوانین کافی حد تک سخت کر دیے گئے ہیں۔ اب کوئی مجرم سزائے موت سے بچ بھی جائے تو اس کے لیے عمر قید کی سزا سے بچنا آسان نہیں ہوتا۔ 
لیکن ہیومن رائٹس کمیشن آف پاکستان کے اعداد وشمار اس بات کی تصدیق نہیں کرتے۔

اس قانو ن کی منظوری کے بعد اکتوبر 2016 سے جون 2017 تک نو مہینوں میں غیرت کے نام پر قتل کے 280 واقعات رپورٹ ہوئے۔ عورت فاؤنڈیشن کی رپورٹ کے مطابق 2017 میں صرف 7 افراد کو سزا ہوئی۔

سوشل ویلفیئر ڈیپارٹمنٹ میانوالی کے اسسٹنٹ ڈائریکٹر رضوان احمد سمجھتے ہیں کہ صرف قوانین سخت کر دینے سے ایسے واقعات کی مکمل روک تھام ممکن نہیں ہے۔ جب تک معاشرے کا اجتماعی شعور ایسے جرائم کی حوصلہ شکنی نہیں کرے گا تب تک یہ واقعات ہوتے رہیں گے۔

ماہر قانون علینہ خان کہتی ہیں کہ ان قوانین میں اب بھی بہت سے سقم ہیں۔ اکثر ایسے قتل کو غیرت کے نام پر قتل ثابت ہی نہیں کیا جاتا جس سے ورثا کو معاف کرنے کا آپشن مل جاتا ہے۔

ایسا ایک واقعہ گزشتہ برس تحصیل عیسیٰ خیل میں پیش آیا جہاں صائمہ بی بی نامی خاتون کو اس کے خالہ زاد بھائی نے قتل کر دیا تھا۔ صائمہ کی شادی پانچ سال پہلے کامران سے ہوئی تھی۔ کچھ عرصہ پہلے صائمہ ایک اور شخص کے ساتھ چلی گئی اور پھر واپس آ گئی جبکہ کامران نے اسے دوبارہ قبول کر لیا تھا۔ تاہم صائمہ کے خالہ زاد بھائی قیصر کو اس کا رنج تھا جس نے فائرنگ کر کے صائمہ کو قتل کر دیا۔

جب اس واقعے کا مقدمہ چلا تو دونوں خاندانوں نے اسے قتل کا عام واقعہ قرار دیا۔ اس دوران صائمہ کے خاندان کی جانب سے ولی نے قاتل کو معاف کر دیا اور یوں ملزم کو رہائی مل گئی۔

علینہ خان کا یہ بھی کہنا ہے کہ اس قانون میں ایسے قتل کو ابھی تک ریاست کے خلاف جرم قرار نہیں دیا گیا۔ اس کے علاوہ یہ قانون صرف قتل کو زیرِ بحث لاتا ہے اور غیرت کے نام پر قتل کی کوشش میں بچ جانے والے افراد (جو عموماً خواتین ہوتی ہیں) کو کوئی تحفظ فراہم نہیں کرتا۔

&nbsp;

ناقص تفتیش اور کمزور عدالتی کارروائی: پنجاب میں ایک سال میں غیرت کے نام پر قتل 20 فیصد بڑھ گئے۔

غیرت کے نام پر قتل: 'جب تک معاشرہ ایسے جرائم کی حوصلہ شکنی نہیں کرے گا تب تک یہ واقعات ہوتے رہیں گے'

فروری 2022ء میں جب خالدہ کی شادی اپنی چچی کے بھائی سے ہوئی تو ان کی عمر 13 سال تھی اور وہ پانچویں جماعت میں پڑھتی تھیں۔ دولہا ظفر اللہ 35 سال کا تھا۔

خالدہ میانوالی کی تحصیل عیسیٰ خیل کے علاقہ کمر مشانی میں رہتی ہیں۔ ان کی شادی بدلے کی شادی تھی۔

وہ جس سکول میں پڑھتی تھیں اس کی ہیڈ مسٹرس نے لوک سجاگ کو بتایا:

&quot;شادی سے کچھ دن پہلے خالدہ کی ماں سکول آئیں اور منت سماجت کرنے لگیں کہ ہمیں بیٹی کا تاریخ پیدائش کا سرٹیفیکٹ بنا کر دیں جس میں اس کی عمر کم از کم 18 سال درج ہو&quot;۔

ہیڈمسٹرس نے انہیں سمجھایا کہ ایسا ممکن نہیں کیونکہ سکول کے طلباء و طالبات کا ڈیٹا سکول میں داخلے کے وقت سکول انفارمیشن سسٹم کی آن لائن ایپلیکیشن میں ب فارم کے مطابق درج ہوتا ہے اور اس میں تبدیلی ممکن نہیں ہوتی۔

&quot;اگلے دن اس کی ماں پھر سکول آئی اور مجھے پانچ ہزار روپے پیش کرنے کی کوشش کی اور کہا کہ ہمیں سرٹیفیکٹ دیں، ہم نے بچی کی شادی کرنی ہے۔

اس بات پر میں نے انہیں تنبیہہ کی اور واضح الفاظ میں کہا کہ اس سلسلے میں دوبارہ سکول مت آئیے گا&quot;۔

ایک ہفتہ بعد خالدہ کی شادی 35 سالہ ظفراللہ سے بذریعہ &#39;شرعی نکاح&#39; دھوم دھام سے ہوئی جسے کسی حکومتی ادارے نے نہ روکا۔

اس اختراع کے تحت خاندان کا کوئی بزرگ گواہان کی موجودگی میں ایجاب و قبول کے بعد لڑکے، لڑکی کو نکاح کے بندھن میں منسلک قرار دے دیتا ہے لیکن اس رشتے کا اندراج نکاح خواں کے رجسٹر یا یونین کونسل میں کروایا ہی نہیں جاتا تاکہ قانون کی گرفت سے بچا جا سکے۔

دس سال پہلے ظفر اللہ کی شادی خالدہ کی پھپھو سے طے پائی تھی لیکن ان کا انتقال ہو گیا جس کے بعد ظفراللہ کا خاندان، خالدہ کے خاندان پر مسلسل دباؤ ڈالتا رہا کہ ان کے &#39;نقصان&#39; کا ازالہ کرنے کے لیے انہیں اپنے خاندان کی کسی اور لڑکی کا رشتہ دیا جائے۔ اسی دباؤ میں خالدہ کے والد نے ظفراللہ کو اپنی کم عمر بیٹی ہی تھما دی۔

حال ہی میں اسی گاؤں سے کم عمری کی شادی کے تین مزید واقعات رپورٹ ہوئے۔ یہ تمام شادیاں بذریعہ &#39;شرعی نکاح&#39; سر انجام پائیں یعنی نکاح کی مذہبی رسم تو ادا کی گئی لیکن شادی کا سرکاری کھاتوں میں اندارج نہیں کروایا گیا۔

ثمینہ بی بی کی عمر تقریباً 15 سال ہے اور وہ تحصیل میانوالی کے گاؤں ٹبی داخلی کندیاں کی رہائشی ہے۔ان کی طلاق یافتہ والدہ اپنی بیٹی کے ہمراہ کرایہ کے مکان میں رہتی ہیں۔

مالک مکان باربار ثمینہ کی والدہ کو اپنے معذور بیٹے کے رشتے کے لیے پیغامات بھیج رہے تھے جس سے تنگ آکر انہوں نے ثمینہ کی شادی اپنے 28 سالہ ماموں زاد سے کر دی گئی جو پاکستان آرمی میں بطور کلرک ملازمت کرتا ہے۔

ثمینہ کی والدہ نے لوک سجاگ کو بتایا: &quot;ہم نے امام مسجد صاحب سے نکاح پڑھانے کے لیے رابطہ کیا تو اس نے بچی کا ب فارم دیکھ کر نکاح پڑھانے سے انکار کر دیا اور کہا کہ 16 سال سے کم عمر بچی کا نکاح رجسٹر میں درج نہیں ہو سکتا۔ پھر میرے بڑے بھائی نے ثمینہ کا شرعی نکاح گھر میں ہی پڑھا دیا&quot;۔

اقوامِ متحدہ کے کمیشن برائے بچوں کے حقوق کے مطابق شادی کی کم سے کم عمر 18 سال مقرر ہے۔ گو حکومت پاکستان اس عالمی اصول کو قبول کرتی ہے لیکن پاکستان کے قانون میں شادی کے لیے لڑکے کی کم سے کم عمر 18 سال اور لڑکی کی عمر 16 سال مقرر کی گئی ہے۔

مسلم فیملی لاز آرڈیننس مجریہ 1961 کے ذریعے کم عمری کی شادیاں روکنے کے لیے نکاح رجسٹرار کو پابند کیا گیا تھا کہ کم عمر بچوں اور بچیوں کی شادیوں کو رجسٹرنہ کیا جائے۔

اس کے علاوہ نکاح نامے کو بھی ازسر نو ترتیب دیا گیا تھا تاکہ دولہا اور دلہن کی باہمی رضا مندی کو یقینی بنایا جا سکے۔ نکاح نامے پر دلہن کے انگوٹھے کے نشان یا دستخط کو لازمی قرار دیا گیا اور نکاح خواں کو پابند کیا گیا کہ وہ تمام دستخط اپنی نگرانی میں مکمل کرائے۔

2005ء میں لوکل گورنمنٹ پنجاب اور محکمہ دیہی ترقی نے تمام ضلعی رابطہ آفیسرز کو ہدایا ت جاری کیں کہ مسلم فیملی لاز آرڈیننس پر عمل درآمد کو یقینی بنایا جائے اور ان نکاح خواہان کے لائسنس منسوخ کر دیئے جائیں جو ان قوانین پر عمل پیرا نہیں ہوتے۔

دو سال بعد حکومت نے شادی رجسڑیشن فارم کا اجراء کیا جس کے تحت نادرا کے ذریعے دولہا اور دلہن کے کوائف اکٹھے کئے گئے جس میں شناختی کارڈ یا فارم ب کے ساتھ ساتھ عمر کا اندراج بھی کیا جاتا ہے۔

2010ء میں منظور ہونے والی 18 ویں آئینی ترمیم کے بعد شادی بیاہ کے معاملات صوبائی حکومتوں کے زیرِاختیار آ گئے۔

صوبہ پنجاب نے شادی کے قانون میں ترمیم کا بل 2015ء منظور کیا جس کے تحت اگر کوئی 18 سال سے زائد عمر کا شخص کم عمر بچے (18 سال سے کم عمر لڑکے یا 16 سال سے کم عمر لڑکی) سے شادی کرے گا تو وہ چھ ماہ قید اور 50 ہزار روپے جرمانہ کا سزا وار ہو گا۔

اسی ترمیم کی شق نمبر 5 کم عمری کی شادی کرانے والے نکاح خواں کے لیے بھی یہی سزا متعین کی ہے جبکہ شق نمبر 6 والدین کو بھی اسی سزا کا مستحق قرار دیتی ہے۔

تاہم یہ قانون بھی کم عمری کی شادی روکنے میں مکمل طور پر کامیاب نہیں ثابت ہوا۔ والدین نے قانون سے بچنے لے لیے &#39;شرعی نکاح&#39; کا راستہ نکال لیا ہے۔

سیکرٹری یونین کونسل کمر مشانی، تحصیل عیسیٰ خیل، شفاءاللہ خان کہتے ہیں کہ &quot;کم عمری کی شادیاں سر انجام ہی شرعی نکاح کے ذریعے پاتی ہیں جسے رجسٹر نہیں کروایا جاتا۔ تاہم جب ایسے جوڑے کی اولاد پیدا ہوتی ہے تو پیدائش سرٹیفکیٹ و دیگر کاغذات کے لیے نکاح نامہ کی ضرورت پڑتی ہے۔ تب نکاح خواں/رجسٹرار کو کچھ پیسے دے کر نئی تاریخوں میں نکاح نامہ بنوا لیا جاتاہے جس کے بعد یونین کونسل سے سرٹیفکیٹ بھی بن جاتا ہے&quot;۔ 
ایسے کیسز پولیس اسٹیشنز میں شاذ و نادر ہی درج کیے جاتے ہیں۔

ضلعی پولیس آفیسر میانوالی کے ڈیٹا سیل کے اہلکار زمان صاحب نے لوک سجاگ کو بتایا کہ ضلع بھر میں پچھلے تین سالوں میں کم عمری کی شادی کا ایک کیس بھی رپورٹ نہیں ہوا۔

اس سلسلے میں ڈسٹرکٹ سیشن کورٹ میانوالی کے انفارمیشن انچارج محمد عرفان نے بتایا کہ &quot;2015 میں ترمیمی بل کی منظوری کے بعد کم عمری کی شادی کی سزا میں اضافہ کیا گیا لیکن معاشرتی و مذہبی روایات کم عمری کی شادی کو سپورٹ کرتی ہیں جس کی وجہ سےڈسٹرکٹ کورٹ میانوالی میں ایک کیس بھی سامنے نہیں آیا جو کم عمری کی شادی سے متعلق ہو&quot;۔

اسماء مشتاق گزشتہ 10 سال سے ڈسٹرکٹ بار میانوالی میں وکالت کر رہی ہیں۔ ان کا کہنا ہے کہ &quot;قوانین سے لا علمی اور معاملے کی اہمیت کا ادراک نہ ہونے کے سبب ہمارے ہاں ایسے کیسز رپورٹ ہی نہیں ہوتے۔حال ہی میں منظر عام پر آنے والا دعا زہرا کیس لوگوں کے لیے کم عمری کی شادی سے زیادہ اغواء کی کہانی تھا&quot;۔ اسماء سمجھتی ہیں کہ اس حوالے سے علماء کا کردار بہت اہم ہے۔

نکاح خواں عموماً علماء ہی ہوتے ہیں، لیکن وہ اپنے خطبات میں اس موضوع پر کم ہی بات کرتے ہیں۔

&quot;شادی کی کم سے کم عمر کی حد کے حوالے سے علماء میں واضح اتفاقِ رائے نہ ہونے کے سبب عام لوگ اس کو جرم تصور ہی نہیں کرتے۔ وہ اسے معمولی سی بات سمجھتے ہیں&quot;۔

&nbsp;نوٹ: کم عمر دلہنوں کی پہچان چھپانے کے لیے ان کے اصل ناموں کو فرضی ناموں سے بدل دیا گیا ہے۔

شادی کے بوجھ تلے دبی بچیاں: شیڈولڈ کاسٹ ہندوؤں میں کم عمری کی شادیاں بچیوں کی صحت کے لیے مہلک رجحان۔

'شرعی نکاح' یا رجسٹر والا نکاح: کم عمری کی شادی کی روایت نے نیا راستہ ڈھونڈ لیا

محمد اسلم یونیورسٹی آف سرگودھا کے سب کیمپس میانوالی میں بی ایس انگلش کے طالبعلم تھے۔ وہ ابھی چھٹے سمسٹر میں تھے کہ یہ کیمپس یونیورسٹی آف میانوالی بن گیا۔

آٹھویں سمسٹر کی تکمیل کے ساتھ ہی انہیں ڈگری ملنی چاہیے تھی۔

وہ کہتے ہیں کہ &quot;لیکن ہم دو یونیورسٹیوں کے درمیان فٹ بال بن گئے۔یونیورسٹی آف میانوالی نے ہمیں ڈگری جاری نہ کی کیونکہ ہم یونیورسٹی آف سرگودھا کے سب کیمپس میانوالی میں داخل ہوئے تھے۔ وہاں جاتے تو کہا جاتا یونیورسٹی آف میانوالی ڈگری دے گی۔ خدا خدا کر کے ہمیں ڈگری تو مل گئی لیکن ہمارا ڈیڑھ سال ضائع ہو گیا&quot;۔

یونیورسٹی آف میانوالی کا قیام 13 دسمبر 2019ء کو پنجاب اسمبلی میں ایکٹ پاس ہونے کے ساتھ عمل میں آیا۔ اسی کنال پر محیط جس عمارت میں نئی یونیورسٹی قائم کی گئی وہ 2012ء سے یونیورسٹی آف سرگودھا کا میانوالی سب کیمپس تھا۔ یعنی اسی سب کیمپس کو نئی یونیورسٹی کا درجہ دے دیا گیا۔

سب کیمپس میں 20 سے زائد شعبہ جات میں بی ایس اور ایم ایس کی کلاسز پڑھائی جارہی تھیں اور اساتذہ یونیورسٹی آف سرگودھا کے تعینات کردہ تھے۔

سب کیمپس کو علیحدہ یونیورسٹی کا درجہ دینے کا عمل عجلت میں بنا کسی مربوط منصوبے کے کیا گیا جس سے نئی یونیورسٹی مسائل کی آماجگاہ بن گئی ہے اور ان کا خمیازہ طلبہ کو بھگتنا پڑ رہا ہے۔

وائس چانسلر کی تقرری میں ہی ایک سال سے زائد عرصہ لگ گیا۔

طلبہ و سول سوسائٹی کے مقامی سیاسی قیادت پر مسلسل دباؤ ڈالنے کے بعد فروری 2021ء میں یہ تقرری عمل میں آئی۔ لیکن اس کے بعد بھی ایک سے ایک مسئلہ سر اٹھاتا رہا۔

یونیورسٹی آف سرگودھا کے تعینات کردہ مستقل اساتذہ واپس سرگودھا چلے گئے جس کے سبب کئی شعبہ جات میں جاری ایم ایس اور ایم فل کی کلاسز ختم کر دی گئیں اور نئی یونیورسٹی کی فیکلٹی وزٹنگ اساتذہ پر مشتمل رہ گئی۔

اس وقت یونیورسٹی آف میانوالی میں کل تین ہزار 315 طلباء و طالبات زیرِ تعلیم ہیں جن میں ایک 359 طلباء اور ایک ہزار 956 طالبات ہیں۔

یونیورسٹی کی ویب سائٹ کے مطابق فیکلٹی آف سائینسز اس وقت 11 شعبوں میں گریجوایشن اور پانچ میں ماسٹرز کروا رہی ہے جبکہ فیکلٹی آف سوشل سائینسز اینڈ ہیومینٹیز نو شعبوں میں بی ایس اور پانچ میں ایم ایس آفر کرتی ہے۔

ان سب کے لیے یونیورسٹی میں صرف 14 مستقل اساتذہ موجود ہیں، اور ان کی تقرری بھی چند ہفتے قبل ہی عمل میں آئی ہے۔ باقی تمام اساتذہ وزٹنگ فیکلٹی کا درجہ رکھتے ہیں۔

اکیس سالہ ثریا یونیورسٹی آف میانوالی میں بی ایس میتھ کی طالبہ ہیں اور اس وقت ساتویں سمسٹر میں پڑھ رہی ہیں۔

وہ کہتی ہیں کہ &quot;میرا دل چاہتا ہے کہ اس یونیورسٹی کو چھوڑ کر کہیں اور داخلہ لے لوں، لیکن گھر کے حالات اور ماحول اجازت نہیں دیتے کہ کسی دوسرے شہر جا کر تعلیم جاری رکھ سکوں&quot;۔

ان کا کہنا ہے کہ &quot;یہاں کوالٹی ایجوکیشن ہے ہی نہیں۔ ہمیں یہاں چار سال گزرنے والے ہیں، ابھی تک ہمیں مستقل اساتذہ نہیں ملے۔ ہر سمسٹر کے شروع میں ہم سے وعدہ کیا جاتا ہے کہ نئے سمسٹر تک مستقل اساتذہ کی بھرتی کا عمل مکمل ہو جائے گا لیکن ابھی تک ایسا نہیں ہو سکا۔ مجبوراً ہمیں وزٹنگ فیکلٹی سے پڑھنا پڑھ رہا ہے، جس میں زیادہ تر تو ہمارے وہ سینئرز ہی ہیں جنہوں نے اسی یونیورسٹی سے پڑھا۔ وہ کلاس تو پڑھا دیتے ہیں مگر ہمارے کانسپٹس کلیئر نہیں ہو پاتے&quot;۔

بی ایس باٹنی کی طالبہ اقراء کے مطابق یونیورسٹی میں پریکٹیکل کرایا ہی نہیں جاتا۔سائنس لیب یا تو فنکشنل نہیں، یا پھر سامان ادھورا ہے۔

&quot;سائنس کے طلبہ پریکٹیکل کیے بغیر ہی یہاں سے تعلیم مکمل کر جاتے ہیں۔ مائیکرو بائیولوجی اور بائیو ٹیکنالوجی کی لیبارٹریاں تو سرے سے موجود ہی نہیں ہیں۔ صرف تھیوری پڑھا کر ڈگری دی جا رہی ہے&quot;۔

محمد اکرم شعبہ ایجوکیشن میں بی ایڈ کے طالب علم ہیں۔ وہ کہتے ہیں کہ یونیورسٹی میں سوائے ایک ایڈمشن دفتر کے کوئی بھی دفتر فعال نہیں ہے جس کی وجہ سے چھوٹے چھوٹے کاموں کے لیے بھی کئی چکر کاٹنے پڑتے ہیں۔

ان کے مطابق: &quot;طلبہ کے سکالر شپ کے چیک مہینوں سے پڑے ہیں لیکن دستخط نہیں ہو پارہے۔ درجنوں چکر کاٹنے کے بعد مجھے پتہ چلا کہ یونیورسٹی میں خزانچی (ٹریئرر) کی سیٹ ہی خالی پڑی ہوئی ہے۔عارضی طور پر بھی کسی کو چارج نہیں دیا گیا جس کی وجہ سے کوئی چیک سائن نہیں ہو رہا&quot;۔

یونیورسٹی کے قیام کو تین سال سے زائد عرصہ گزر چکا ہے مگر انتظامی پوسٹوں پر ابھی تک وائس چانسلر اور کنٹرولر امتحانات کے علاوہ کوئی بھی سیٹ ایسی نہیں جس پر تقرری ہوئی ہو۔

رجسٹرار کی اہم پوسٹ سمیت درجنوں سیٹیں خالی پڑی ہیں۔ڈیڑھ سال قبل ٹیچنگ و نان ٹیچنگ سٹاف کی تقرری کے لیے درخواستیں طلب کی گئی تھیں مگر تاحال ان پر بھی بھرتی کا عمل مکمل نہیں ہوا۔

اسسٹنٹ پروفیسر ڈاکٹر عبدالمجید خان نیازی نے لوک سجاگ کو بتایا کہ &quot;رجسٹرار سمیت کچھ اہم نشستیں خالی ہونے کی وجہ سے بھرتی کا عمل نہایت سست روی کا شکار ہے۔ تاہم یونیورسٹی نے درخواستیں طلب کر رکھی ہیں، جن پر جلد ہی عمل شروع ہو گا اور انشاءاللہ جلد تمام نشستوں پر بھرتی مکمل کر لی جائے گی&quot;۔

وائس چانسلر یونیورسٹی آف میانوالی ڈاکٹر اسلام اللہ خان لوک سجاگ کو بتایا کہ &quot;یونیورسٹی چند برسوں کی بجائے دہائیوں میں بنتی ہے۔

ہم نے نئے ڈیپارٹمنٹس کا اجراء کیا اور وزٹنگ فیکلٹی کے لیے ایم فل کوالیفیکیشن لازم کی۔ مستقل اساتذہ کی بھرتی کا عمل بھی شروع کیا۔ نیا اکیڈمک بلاک تعمیر کرایا۔

&quot;عہدہ سنبھالنے کے فورا بعد میں نے کوششیں کیں کی کسی طرح یونیورسٹی کے رقبے میں اضافہ کیا جائے کیونکہ کوئی یونیورسٹی بھی 80 کنال پر مشتمل نہیں ہوتی۔یونیورسٹی کو بڑھانے کے لیے ہزاروں کنال زمین کی ضرورت ہوتی ہے۔ اس سلسلے میں ہم نے عارضی اور مستقل بندوبست کے لیے حکومت سے مسلسل رابطہ کیا ہے۔ عارضی بنیادوں پر ہم نے محمکہ ہائر ایجوکیشن ڈیپارٹمنٹ پنجاب سے یونیورسٹی سے ملحقہ گورنمنٹ گریجوایٹ کالج میانوالی کی خالی زمین الاٹ کرنے کے لیے خط لکھا ہے جس پر پیش رفت ہورہی ہے۔

مستقل بنیادوں پر ضلعی انتظامیہ سے 1500 سے دوہزار کنال اراضی کا تقاضا کیا ہوا ہے۔ اس سلسلے میں شہر سے 20 کلومیٹر دور موسیٰ خیل کے مقام پر سرکاری زمین کا تعین بھی کر لیا گیا ہے، جو انشاءاللہ جلد یونیورسٹی کو الاٹ کر دی جائے گی&quot;۔

تاہم طلبہ کو دور دور تک ایسی کوئی امید نظر نہیں آتی۔

محمد سلیم بی ایس انگلش کے طالب علم ہیں اور یونیورسٹی کے حالات سے انتہائی نالاں ہیں۔ وہ کہتے ہیں کہ &quot;باقی مسائل تو اپنی جگہ ، یہاں ڈیپارٹمنٹس کے پاس کلاس رومز بھی نہیں ہیں۔

اکثر ایسا ہوتا ہے کہ ایک کلاس ختم ہونے کے بعد ہمیں کمرہ خالی نہ ہونے کے سبب اگلی کلاس کا دو دو گھنٹے انتظار کرنا پڑتا ہے۔ جو نئی بلڈنگ بنی ہے ، ابھی تک اس کے واش روم بھی فنکشنل نہیں۔

ہزاروں طلباء و طالبات کے لئے صرف ایک ایک ہی واش روم بلاک موجود ہے۔اور پھر پوری یونیورسٹی میں طالبات کے لیے کوئی کامن روم بھی نہیں ہے&quot;۔

(طلبا اور طالبات کی پہچان چھپانے کے لیے ان کے اصل ناموں کو فرضی ناموں سے بدل دیا گیا ہے۔)

ماہ پارہ ذوالقدر

اس نے کہا بیوی کو مارنا ہمارا خانگی معاملہ ہے اور پولیس واپس چلی گئی: گھریلو تشدد کے خلاف قانون کب لاگو ہو گا؟

غیرت کے نام پر قتل: 'جب تک معاشرہ ایسے جرائم کی حوصلہ شکنی نہیں کرے گا تب تک یہ واقعات ہوتے رہیں گے'

'شرعی نکاح' یا رجسٹر والا نکاح: کم عمری کی شادی کی روایت نے نیا راستہ ڈھونڈ لیا

یونیورسٹی آف میانوالی: وزٹنگ فیکلٹی سے پڑھیں اور لیب کے بغیر مائیکرو بیالوجی کی ڈگری حاصل کریں

Lok Sujag