نجیب اللہ اپنی اہلیہ اور تین بیٹوں کے ساتھ راجن پور کی سادات کالونی میں رہتے ہیں۔ چند ماہ قبل ان کے خاندان کے تمام افراد کا وزن کم ہونے لگا اور بچے سست رہنے لگے جس سے انہیں پریشانی لاحق ہوئی۔ انہوں نے شہر کے فزیشن ڈاکٹر ایوب ملک سے رابطہ کیا جنہوں نے چند لیبارٹری ٹیسٹ لکھ کر دیے جن کی رپورٹ ملنے پر ڈاکٹر نے انہیں بتایا کہ گھر کے تمام افراد کا ایچ پائیلوری ٹیسٹ مثبت آیا ہے۔ یہ جسم میں پایا جانے والا ایک بیکٹیریا ہے جو ان کے نظام انہضام کو متاثر کر رہا ہے۔

 ادویات تجویز کرنے کے ساتھ ڈاکٹر نے انہیں پینے کے پانی کا لیبارٹری ٹیسٹ کرانے کی بھی ہدایت کی۔ اگلے روز وہ گھر میں لگے نلکے کا تازہ پانی لے کر شہر میں موجود سرکاری واٹر ٹیسٹنگ لیبارٹری گئے۔ دوسرے روز انہیں پانی کی ٹیسٹ رپورٹ مل گئی جس میں لکھا تھا کہ پانی میں ٹی ڈی ایس (مجموعی حل شدہ مواد) کی سطح 1640 پی پی ایم اور کثافت (حل شدہ کیلشیم اور میگنیشیم) کی سطح 850 پی پی ایم ہے۔ اس کےعلاوہ پانی میں کلورائیڈ لیول 260 بتایا گیا۔

ڈاکٹر نے اس رپورٹ کو دیکھ کر بتایا کہ ان کے گھر کا زیر زمین پانی مضر صحت ہو چکا ہے جس کا استعمال مزید بیماریوں کا سبب بن سکتا ہے۔

قاسم علی راجن پور کے علاقے مچھی درہ میں رہتے ہیں۔ اگست کے اوائل میں انہیں پیٹ کے ایک جانب شدید درد ہوا۔ اہلخانہ انہیں ہسپتال لے گئے جہاں ان کے ایکسرے اور خون کے مختلف ٹیسٹ کیے گئے۔ رپورٹ ملنے پر معلوم ہوا کہ ان کے گردے میں پتھری ہے۔ ادویات کے ساتھ انہیں بھی زیر زمین پانی ٹیسٹ کرانے کا مشورہ دیا گیا۔

پانی کی رپورٹ کے مطابق اس میں ٹی ڈی ایس 1130 پی پی ایم، کثافت 600 پی پی ایم اور آرسینک پانچ پی پی ایم تھا۔ ڈاکٹر نے انہیں بتایا کہ مضر صحت پانی پینے کی وجہ سے ان کے گردے خراب ہو رہے ہیں۔

ماہر امراض گردہ و مثانہ ڈاکٹر شاہد حسین کا کہنا ہے کہ ٹی ڈی ایس اور ہارڈنس کی زیادہ مقدار والا پانی پینے سے گردوں اور مثانے پر برے اثرات مرتب ہوتے ہیں۔ زیادہ عرصہ ایسا پانی پینے سے مثانے کا انفیکشن اور گردوں میں پتھریاں بننے لگتی ہیں۔ بروقت علاج نہ کیا جائے تو گردے فیل بھی ہو سکتے ہیں جس کے بعد مریض کو زندگی بھر کے لیے ڈائیلیسز کے عمل سے گزرنا پڑتا ہے۔

راجن پور کے سینئر فزیشن ڈاکٹر محمد ایوب ملک کہتے ہیں کہ پانی میں موجود غیر حل پذیر دھاتوں اور نمکیات کی زیادتی سے دل، گردے، جگر، معدے اور انتڑیوں کی بیماریوں اور ذیابیطس میں اضافہ ہو رہا ہے۔

ان نمکیات اور دھاتوں کی ایک خاص مقدار جیسا کہ ٹی ڈی ایس 300 سے 500 پی پی ایم صحت کے لیے ضروری ہے۔ اس سے کم مقدار سے بھی انسانی جسم بیماری کا شکار ہو جاتا ہے۔

ان کا کہنا ہے کہ راجن پور شہر کا زیر زمین پانی تیزی سے خراب ہو رہا ہے۔ 2010ء تک زیر زمین پانی کا ٹی ڈی ایس 400 پی پی ایم تک تھا جو اب بڑھ کر 1200 اور چند علاقوں میں 1600 پی پی ایم سے بھی تجاوز کر گیا ہے۔

عالمی ادارہ صحت کے معیار کے مطابق پانی میں ٹی ڈی ایس 300 سے 500 پی پی ایم تک ہونا چاہیے جبکہ 1000 پی پی ایم تک قابل برداشت ہے۔ اسی طرح پانی کی کثافت زیادہ سے زیادہ 500 پی پی ایم تک ہونی چاہیے۔

اگر ٹی ڈی ایس 1000 پی پی ایم اور کثافت 500 پی پی ایم سے بڑھ جائے تو ایسا پانی انسانی صحت کے لیے مضر شمار ہو گا جسے پینے سے دل کی بیماری، ذیابیطس، معدے کے مسائل جیسے پیٹ میں درد اور اسہال وغیرہ ہو سکتے ہیں۔ زیادہ عرصہ تک ایسا پانی پینے سے گردوں کی بیماریاں اور جگر کی خرابی جنم لے سکتی ہے۔

سماجی کارکن تنزیل الرحمٰن علوی نے محمد حسین کالونی میں 24 ہزار لیٹر روزانہ کی صلاحیت کا آر او (ریورس اوسموسس) پلانٹ نصب کر رکھا ہے جہاں سے شہری بلا معاوضہ پینے کا صاف پانی حاصل کر رہے ہیں۔

ان کا کہنا ہے کہ سوا لاکھ سے زیادہ آبادی کے شہر میں روزانہ چند ہزار لیٹر صاف پانی کی فراہمی اونٹ کے منہ میں زیرے کے برابر ہے۔ اس کے لیے سرکاری سطح پر لائحہ عمل بنانے کی ضرورت ہے۔ اگر ہر محلے میں آر او پلانٹ لگ جائیں تو تمام شہریوں کو پینے کا صاف پانی دستیاب ہو گا جس سے ہسپتالوں میں مریضوں کی شرح میں غیرمعمولی کمی آ سکتی ہے۔