Uncover the pressing issue of coal mine accidents in Pakistan and the inadequate safety measures for workers. Explore the alarming statistics, risks, and consequences of these incidents, and

Coal Mine Accidents in Pakistan: Urgent Call for Enhanced Worker Safety Measures

انیس مارچ کی رات 11 بجے کے قریب ضلع ہرنائی میں کوئلہ کان میں میتھین گیس بھر جانے سے زوردار دھماکہ ہوا، جس کے نتیجے میں کان میں کام کرنے والے 10 مزدور پھنس گئے۔ کان میں کام کرنے والے آٹھ مزدوروں نے اپنی مدد آپ کے تحت ان مزدوروں کو نکالنے کے لیے ریسکیو آپریشن شروع کیا، مگر ریسکیو کے لیے ضروری سازو سامان اور تربیت نہ ہونے کے باعث بچانے والےمزدور بھی کان میں پھنس گئے۔

ڈپٹی کمشنر ہرنائی آفس کی جانب سے مائنز ڈیپارٹمنٹ اور پی ڈی ایم اے کو واقعہ کی اطلاع دی گئی جس کے بعد کوئٹہ سے ریسکیو ٹیمیں روانہ کر دی گئیں۔

کوئٹہ سے 120 کلومیٹر کی مسافت پر واقعہ ضلع ہرنائی 1 لاکھ 27 ہزار کی آبادی پر مشتمل ہے اور یہاں سیکڑوں کوئلہ کانیں موجود ہیں۔

جس کان میں دھماکہ ہو ا وہ زردالو نام کے گاؤں میں ہے اور اس کی ملکیت نجی ہے۔

ریسکیو آپریشن 12 گھنٹے تک جاری رہا۔

چیف انسپکٹر مائنز بلوچستان عبدالغنی بلوچ بتاتے ہیں کہ مشترکہ آپریشن کے دوران آٹھ افراد کو زندہ بچالیا گیا جبکہ 12 مزدوروں کی لاشیں نکالی گئیں۔

&quot;گیس بھر جانے کے بعد دھماکے سے کان کا ایک حصہ بیٹھ گیا جس سے 10 کان کن پھنس گئے۔ انہیں ریسکیو کرنے کے لیے 10 مزید کان کن اندر گئے تو وہ بھی گیس کی وجہ سے بے ہوش ہو گئے&quot;۔

عبدالغنی بلوچ نے بتایا کہ کان کا حصہ بیٹھ جانے کے بعد گیس بھی کافی مقدار میں جمع ہو گئی تھی۔

&quot;پہلے گیس خارج کرنے کے لیے ایگزاسٹ پنکھو ں کی مدد لی گئی جس کے بعد ریسکیو کے لیے ٹیمیں اندر گئیں۔ اس وقت صرف آٹھ مزدور ہی زندہ تھے&quot;۔&nbsp;

ڈپٹی کمشنر ہرنائی جاوید ڈومکی کے مطابق زندہ بچنے والے کان کنوں کی حالت خطرے سے باہر ہے۔ انہیں طبی امداد فراہم کر دی گئی ہے۔

&quot;مرنے والے زیادہ تر افراد کا تعلق ضلع پشین سے ہے۔ دو لاشیں ان افراد کی ہیں جو ریسکیو کے لیے کان کے اندر گئے تھے&quot;۔

رفیع اللہ کوئلے کی اسی کان میں کام کرتے ہیں۔ انہوں نے بتایا کہ حادثے کے بعد جب ریسکیو ٹیمیں وقت پر نہ پہنچیں تو ساتھی کان کنوں نے خود ہی اپنے ساتھیوں کو بچانے&nbsp; کا فیصلہ کیا۔

&quot;وہ بغیر سازو سامان کے کان میں اتر گئے۔ گیس ماسک تو میسر نہیں تھے، انہوں ںے منہ پر صرف کپڑے لپیٹ رکھے تھے۔ انہیں معلوم بھی نہیں ہوا کب گیس ان کے حواس پر حاوی ہو گئی&quot;۔

وہ کہتے ہیں یہ پہلا واقعہ نہیں، ماضی میں بھی ریسکیو ٹیموں کے وقت پر نہ پہنچنے کے باعث ساتھی کان کن اپنی مدد آپ کے تحت خطرناک ریسکیو آپریشن انجام دیتے رہے ہیں جس میں اکثر کچھ کی موت بھی ہوئی ہے۔

ایچ آر سی پی کے سابق وائس چیئرمین طاہر حبیب کے مطابق بلوچستان کی کوئلہ کانوں میں حادثات کی صورت میں مزدوروں کو بچانے کرنے کے لیے بنیادی سامان مسیر نہیں ہوتا ہے ان میں ابتدائی طبی امداد، گیس سے محفوظ رکھنے والے ماسک شامل ہیں جو وہاں موجود ہونے چاہیں، تاہم کان مالکان اخراجات کم کرنے کے لیے بنیادی آلات تک فراہم نہیں کرتے جو سنگین جرم ہے۔

&quot;مائنز ڈیپارٹمنٹ کے انسپکٹروں&nbsp; کی تعداد انتہائی کم ہونے اور غیر سنجیدگی کے باعث ان کان کے ٹھیکیداروں کے خلاف کوئی کاروائی عمل میں نہیں لائی جاتی۔ صرف حادثات کی صورت میں وقتی طور پر کان کو سیل کر دیا جاتا ہے اور کچھ عرصے بعد بغیر کسی کاروائی کے واپس کھولنے کی اجازت دے دی جاتی ہے&quot;۔

چیف انسپکٹر مائنز بلوچستان عبدالغنی نے بتایا کہ کان کو سیل کر دیا گیا ہے تاکہ حادثے کی وجوہات جاننے کے لیے تحققیات کی جا سکیں۔

انہوں نے بتایا کہ 2023ء میں بلوچستان میں کانوں میں پیش آنے والے حادثات میں 68 کان کنوں کی موت واقع ہوئی تھی۔

بلوچستان میں کوئلہ کان کنی کو سب سے بڑی صنعت تصور کیا جاتا ہے۔

پاکستان سینٹرل مائنز لیبر فیڈریشن کے جنرل سیکرٹری لالا سلطان کے مطابق بلوچستان بھر میں اس وقت تین ہزار 800 سے زائد کوئلہ کانیں ہیں جن میں ایک لاکھ سے زائد مزدور ہر سال ایک کروڑ ٹن سے زائد کوئلہ نکالتے ہیں۔ ان کے بقول یہ مقدار&nbsp; پاکستان بھر میں سالانہ بنیاد پر نکالے جانے والے کوئلے کا 50 فیصد ہے۔

محکمہ معدنیات بلوچستان کے ریکارڈ کے مطابق لورالائی، دکی، بولان اور زیارت سمیت بلوچستان کے سات اضلاع میں مجموعی طور پر 268 ملین ٹن سے زائد کوئلہ موجود ہے۔

عبدالغنی بتاتے ہیں کہ&nbsp; تقریباً تین ہزار کے قریب فعال کانوں میں 60 ہزار سے زائد کان کن کام کر رہے ہیں۔

لالا سلطان کے مطابق کوئلہ کانوں میں سب سے زیادہ حادثات بلوچستان میں ہوتے ہیں۔ &ldquo;ہمارے ڈیٹا کے مطابق 2022ء میں پاکستان بھر میں 152 کول مائنز مزدور کان کے اندر حادثات میں جان بحق ہوئے جس میں سب سے زیادہ تعداد یعنی 89 بلوچستان کے کان کنوں کی تھی۔ بتیس خیبرپختونخوا، 19پنجاب اور 12 کان کن صوبہ سندھ کے کانوں میں میں موت کے منہ میں چلے گئے۔

عبدالغنی بلوچ&nbsp; کہتے ہیں کہ مرنے والے مزدوروں کی تعداد ہمیشہ زیادہ بتائی جاتی ہے۔ تاہم وہ تصدیق کرتے ہیں کہ گزشتہ سال کے پانچ مہینوں میں بلوچستان کے کوئلہ کانوں میں 18 حادثات ہوئے جن میں 24 کان کنوں کی موت واقع ہوئی ہے۔

کان کنوں کی فلاح کے لیے بلوچستان میں اب بھی 1923ء کا مائن ایکٹ کام کر رہا ہے۔ اس ایکٹ کے تحت کام کے دوران کسی حادثے میں مرنے والے مزدور کے خاندان کو مالک اور ٹھیکدار پانچ سے آٹھ لاکھ اور حکومت تین سے پانچ لاکھ معاوضہ دینے کی پابند ہے۔ 
کئی واقعات میں یہ معاوضہ بھی ادا نہیں کیا جاتا۔

ہیومین رائٹس کمیشن نے 2022ء میں بلوچستان کے کول مائنز میں ہونے والے حادثات کے تناظر میں اپنی رپورٹ میں تشویش کا اظہار کرتے ہوئے لکھا تھا کہ کان کنی کے قدیم طریقے، پرانی ٹیکنالوجی اور ناکافی حفاظتی آلات کے استعمال سے کوئلے کے کان کنوں کے لیے خطرات بڑھ گئے ہیں۔

انسانی حقوق کے کمیشن نے حکومت سے مطالبہ کیا کہ وفاقی حکومت کان کنوں کی حفاظت کے لیے دنیا کی سطح پر مزدوروں انٹرنیشنل لیبر آرگنائزیشن اور خاص کر کان کنوں کے لیے بنائے گئے قوانین پر عمل درآمد یقینی بنائے۔

حکومت بلوچستان کی طرف سے کوئلہ کانوں میں کام کرنے والے مزدوروں کی فلاح و بہبود کے لیے کام کرنے والے کمشنر مائنز انور جان مندوخیل کا کہنا ہے کہ حکومت ہر سال 60 لاکھ روپے کا فنڈ مزدوروں کی صحت اور بنیادی طبی امداد کے لیے خرچ کرتی ہے۔

&ldquo;ہم نےمزدوروں کی حفاظت اور فلاح و بہبود کے&nbsp; لیے نرسز، ڈاکٹرز اور استادوں پر مشتمل ڈیڑھ سو افراد کا عملہ تعینات کیا ہے جو مختلف اضلاع میں پچیس ڈسپینسریز، مارواڑ میں 25 بیڈ کے ہسپتال میں اور مچھ میں ایک بی ایچ او&nbsp; میں کام کرتے ہیں&quot;۔

<h2>کان کن خود قصور وار ہیں: مالکان</h2>

ہرنائی کی ایک نجی کان کے مالک سیف اللہ ترین کہتے ہیں &ldquo;زیادہ تر وقت کان کے اندر کام کرنے والے مزدور چونکہ گھنٹوں اندر رہتے ہیں تو چائے وغیرہ بنانے اور یا پھر سگریٹ پینے کے لیے لائٹر جلا لیتے ہیں جس کے باعث کان میں موجود گیس کا دھماکہ ہوجاتا ہے اور مالی اور جانی نقصان ہو جاتا ہے&quot;۔

سیف ترین کہتے ہیں اگر چہ وہ اپنے ہاں کام کرنے والے کان کنوں کو بنیادی حفاظتی سامان (ہیلمٹ، ماسک وغیرہ) فراہم کرتے ہیں مگر حکومت کو چاہیے کہ وہ مزدوروں کو تربیت دینے کا بندوبست کرے۔

&quot; کان کنوں میں یہ شعور آ جائے کہ&nbsp; کھدائی کے وقت حادثات سے بچاؤ کے لیے کون سے کاموں سے اجتناب کرنا ہے تو حادثوں کی تعداد میں بھی کمی آسکتی ہے&quot;۔

مگر ایچ آر سی پی بلوچستان کے سابق وائس چیئرمین طاہر حبیب، سیف ترین کی باتوں سے اتفاق نہیں کرتے۔

وہ کہتے ہیں کہ بیشتر حادثات گیسیں جمع ہونے کے بعد دم گھٹنے اور دھماکے سے ہوتے ہیں۔ کوئلہ باہر لانے کے لیے استعمال ہونے والی ٹرالی بھی حادثات کا باعث بنتی ہے۔ کمزور رسی ٹوٹنے سے&nbsp; ٹرالی تیزی سے نیچے کی طرف جاتی ہے اور کام کرنے والے کان کنوں کو کچلتی ہے اور یا پھر کسی چٹھان سے ٹکرا جاتی ہے۔ جس سے اس میں سوار مزدور حادثے کا شکار ہو جاتے ہیں۔

&quot;اس میں سارا قصور کان مالک اور ٹھیکیدار کا ہوتا ہے، کیونکہ وہ کھدائی کے لیے کرانے والے دھماکوں، ٹرالی کو کھینچنے والی رسیوں کی فراہمی اور دیگر حفاظتی انتظامات کے ذمہ دار ہوتے ہیں&quot;۔

وہ کہتے ہیں کہ انتظامیہ کی بھی ذمہ داری ہے کہ وہ وقتاً فوقتاً کانوں میں حادثات سے بچنے کے لیے ان کی جانچ پڑتال کرتے رہیں۔

'ہاتھ پاؤں سلامت ہیں تو کان کن قیمتی، معذور ہو جائے تو کوئی پوچھتا بھی نہیں'

"ماسک نہیں تھے، مزدوروں نے ساتھیوں کو بچانے کے لیے منہ پر کپڑے باندھے اور زہریلی کان میں اتر گئے"

text

بلوچستان کے ضلع جعفر آباد کی تحصیل اوستہ محمد گزشتہ سال سیلاب اور بارشوں کے باعث شدید متاثر ہوئی تھی۔ نو ماہ گزرنے کے بعد بھی یہاں زرعی رقبہ بارشوں اور سیلاب کے پانی میں ڈوبا ہوا ہے جس کے باعث بیشتر زمیندار اس سال گندم کی فصل کاشت نہیں کر سکے۔

یہاں قاضی عبدالصمد گاؤں کے شریف الدین ایسے ہی ایک کسان ہیں جو ہر سال نومبر کے آغاز پر گندم کی بوائی شروع کر دیتے تھے۔ جب فصل تیار ہوجاتی تو وہ اسے سرکاری خریداری مرکز پر فروخت کرکے اتنا معاوضہ حاصل کرلیتے تھے جس سے ان کے بیوی بچے آرام سے گزر بسر کر لیتے تھے۔

گزشتہ سال کی بارشوں اور سیلاب نے شریف الدین کو بے حد متاثر کیا اور وہ گندم کی بوائی کا سیزن شروع ہونے پر کھیتوں میں پانی کھڑا ہونے کی وجہ سے بیج نہ بو سکے۔ دو ماہ تک مزید انتظار کے بعد جب ان کے کھیتوں سے پانی خارج&nbsp; ہو گیا تو انہوں نے بوائی کا سلسلہ شروع کیا۔ مگر اس تاخیر سے ان کی گندم کی فصل بھی متاثر ہوئی ہے۔

&#39;ماضی کی نسبت اس سال گندم کی فصل بہت ہی کم ہوئی ہے۔ میں پریشان ہوں کہ اس بار اخراجات پورے کیسے ہوں گے اور بچوں کا پیٹ کیسے پالوں گا؟&#39;

&nbsp;ڈائریکٹر ایگریکلچر ریسرچ بلوچستان ڈاکٹر عصمت اللہ کے مطابق نصیر آباد ڈویژن کے علاقوں میں حالیہ بارشوں کے بعد کاشت کا عمل تاخیر سے شروع ہوا ہے جس کی وجہ سے فصل کی تیاری اور کٹائی میں بھی تاخیر ہو گی۔

&#39;&#39;بلوچستان میں بارشوں، سیلاب اور موسم کی تبدیلی میں تاخیر کے باعث فی ایکڑ گندم کی پیدوار 35 من سے کم ہوکر 25 رہ گئی ہے۔ اس کے مقابلے میں سندھ میں گندم کی پیداوار فی ایکٹر 40 من اور پنجاب میں 30 من ہے۔

انہوں نے بتایا کہ اس سال بلوچستان میں گندم کا زیرکاشت رقبہ معمول سے تین لاکھ ایکڑ کم رہا جس سے صوبے میں گندم کی ضرورت کو پورا کرنے میں مزید دشواری ہوسکتی ہے۔

&#39;موسم کی تاخیر سے تبدیلی ایک اور بڑا مسئلہ ہے۔ اس بار گندم کی بوائی کا سیزن دو ماہ کی تاخیر کے بعد دسمبر میں شروع ہوا&#39;۔

بلوچستان اپنی ضرورت کی 75 فیصد گندم خود پورا کرتا ہے جبکہ باقی 25 فیصد دوسرے صوبوں سے درآمد کرتا ہے۔ سرحد پار گندم کی سمگلنگ کے باعث بھی صوبے کی ضرورت پوری کرنا مشکل ہو جاتا ہے۔

حکومت نے بیج کی فراہمی پر سبسڈی دے کر اسے کسانوں کو مفت فراہم کرنے کا فیصلہ کیا مگر اس بیج کو کسانوں تک بروقت نہ پہنچایا جاسکا۔ نتیجتاً بوائی میں تاخیر ہوئی اور اس طرح پیداوار میں کمی آئی۔

ڈاکٹر عصمت نے مزید بتایا کہ بلوچستان میں کھاد بہت مہنگی ہو گئی ہے جس کی وجہ سے کسان اب اسے استعمال ہی نہیں کرتے۔ اس سے گندم کی پیداوار براہ راست متاثر ہو رہی ہے۔

&#39;&#39;صوبے میں گندم کی پیداوار کو بڑھانے کے لیے کھاد پر سبسڈی دینا اور پانی کی وافر فراہمی ناگزیر ہے۔ اگر یہ بنیادی سہولیات فراہم کردی جائیں تو بلوچستان میں گندم کی پیداوار فی ایکٹر 40 من تک بڑھائی جا سکتی ہے۔&#39;&#39;

ایک جانب گندم کی پیداوار میں کمی تو دوسری طرف صوبائی حکومت کی کسانوں سے سبسڈی پر گندم کی خریداری سے چھوٹے زمیندار بے حد پریشان ہیں۔

صحبت پور کے محمد اشرف چار ایکڑ پر گندم کاشت کرتے ہیں۔ پہلے تو وہ فصل میں 30 فیصد کمی سے پریشان تھے مگر اب کی سبسڈی پر خریداری کے فیصلے نے ان کی مشکلات مزید بڑھا دی ہیں۔

&#39;&#39;گزشتہ اور رواں سال کی بارشوں سے کسان پہلے ہی بہت نقصان اٹھا رہے ہیں اور اب حکومت چاہتی ہے کہ ہم گندم معمول سے کم ریٹ پر فراہم کریں۔ اس طرح ہمارے لیے فصل کی کاشت پر آئی لاگت پوری کرنا بھی مشکل ہو جائے گا۔ حکومت کسانوں کو سبسڈی دے اور ہمارے نقصان کا ازالہ کیا جائے تاکہ ہم اگلے سیزن کے لیے دوبارہ کاشت کے قابل ہو سکیں۔&#39;&#39;&nbsp;

وزیراعلی بلوچستان کے ترجمان بابر یوسفزئی نے لوک سجاگ کو بتایا کہ&nbsp; صوبائی حکومت نے گندم کی زخیرہ اندوزی اور منافع خوری کے خلاف سخت اقدامات کا فیصلہ کیا ہے اور محکمہ خوراک گندم کی خریداری مہم میں رکاؤٹ پیدا کرنے والے عناصر کے ساتھ سختی سے نمٹنے گا۔

ان کا کہنا تھا کہ چیف سیکرٹری کے زیر صدارت گندم کی خریداری کی پیش رفت کا جائزہ لینے کے لیے منعقدہ اجلاس میں گندم کے کاشتکاروں نے ذخیرہ اندوزی اور گندم مہنگے داموں بیچے جانے کے رجحان پر تشویش کا اظہار کیا ہے۔

اجلاس میں فیصلہ کیا گیا کہ حکومت گندم کی ذخیرہ اندوزی کرنے اور ناجائز منافع خوری میں ملوث عناصر کے خلاف کاروائی کے لئے قانون سازی کرے گی۔

بلوچستان کے سیکرٹری خوراک محمد ایاز مندوخیل نے بتایا کہ محکمہ خوراک نے رواں برس صوبے کے لیے دس لاکھ بوری گندم کی خریداری کا ہدف مقرر کیا ہے جو صوبے میں گندم کی پیداوار میں کمی کے تناظر میں کیا گیا ہے۔

گندم کی قلت کو دیکھتے ہوئے روس سے بھی گندم درآمد کرنے کا فیصلہ کیا گیا۔ اس معاہدے کے تحت گوادر بندرگاہ کے ذریعے ساڑھے چار لاکھ ٹن گندم درآمد کرنے کا سلسلہ شروع ہو چکا ہے۔

محکمہ خوراک ان دنوں 10 لاکھ بوری گندم کی خریداری میں مصروف ہے، اس مقصد کے لیے صوبائی حکومت نے نصیر آباد، کچھی، جھل مگسی سمیت کئی اضلاع سے گندم باہر لے جانے پر پابندی عائد کردی ہے۔

چیئرمین گوادر پورٹ اتھارٹی پسند خان بلیدی نے لوک سجاگ کو بتایا کہ گندم کی بوریاں لے کر چھ جہاز گوادر پورٹ پر لنگر انداز ہو چکے ہیں جن میں تین لاکھ بوریاں لائی گئی تھیں جبکہ مزید تین جہاز ڈیڑھ لاکھ بوریاں گوادر پہنچائیں گے۔

ماہر معاشیات ڈاکٹر سیف اللہ کھوسو کے مطابق بلوچستان حکومت کی جانب سے گندم کی ایک سے دوسرے ضلعے میں منتقلی پر پابندی کے باعث صوبے میں گندم کی قلت کا بحران مزید بڑھ سکتا ہے۔ خدشہ ہے کہ گندم کی کمی کے باعث فلور ملز بند ہونے سے عید اور اس کے بعد&nbsp; آٹے کی قیمتیں مزید بڑھ جائیں گی۔

پنجاب اور سندھ میں کھاد کی قلت: کیا ملک میں گندم کا نیا بحران آنے والا ہے؟

بلوچستان میں آٹے کا ایک اور بحران کیوں منڈلا رہا ہے؟

وزیراعظم شہباز شریف نے جون 2022ء میں اعلان کیا تھا کہ بلوچستان میں بینظیر انکم سپورٹ پروگرام کو توسیع دے کر اس سے مستفید ہونے والے افراد میں پانچ لاکھ کا اضافہ کیا جائے گا۔

ان کا یہ اعلان خوش آئند بھی تھا اور بلوچستان کا اہم اور دیرینہ مطالبہ بھی۔

<a href="https://ophi.org.uk/wp-content/uploads/MPDR_OPHI_UNDP_Multidimensional_poverty_Pakistan_2016.pdf">کثیر جہتی غربت پر 2016 کی رپورٹ</a> نے بلوچستان کے 71 فیصد افراد کو ان سہولیات سے محروم قرار دیا تھا جن کی بنیاد پر غربت کی سطح کا تعین کیا جاتا ہے جبکہ پنجاب، سندھ اور پختونخوا میں یہ شرح بالترتیب&nbsp; 31، 43 اور 49 فیصد تھی۔ اس شرح کو ماہرین Uncensored Headcount Ratio کہتے ہیں۔

تمام ماہرین میں اس بارے میں مکمل اتفاق ہے کہ بلوچستان میں غربت کی سطح ملک کے دیگر تمام علاقوں سے کہیں زیادہ ہے لیکن پھر بھی غربت کے خاتمے یا ازالے کے لیے جاری حکومتِ پاکستان کے سب سے بڑے اقدام - بینظیر انکم سپورٹ پروگرام - میں اس صوبے کا حصہ بہت کم ہے۔

ترجمان بلوچستان حکومت فرح عظیم شاہ کے مطابق بینظیر انکم سپورٹ پروگرام میں بلوچستان کا موجودہ حصہ چار فیصد سے بھی کم ہے۔

2017ء کی مردم شماری کے مطابق بلوچستان کی سوا کروڑ آبادی پاکستان کی کل آبادی کا چھ فیصد بنتی ہے اور اگر صوبے میں غربت کی اضافی شرح کو بھی شمار کر لیا جائے تو بلوچستان کا بینظیر انکم سپورٹ پروگرام میں حصہ 10 فیصد سے بھی زائد بنتا ہے۔

فرح عظیم شاہ نے لوک سجاگ کو بتایا کہ وزیرِ اعظم کے اعلان کے بعد بلوچستان حکومت وفاق کو صوبے کا حصہ بڑھانے کے لیے تین بار مراسلے ارسال کر چکی ہے۔

ترجمان کے مطابق 14 جون کو پہلی بار اور 28 جون 2022ء کو دوسری بار وزیراعلیٰ بلوچستان نے وزیراعظم کو خط لکھا اور ان پر زور دیا کہ وہ بلوچستان میں پروگرام سے مستفید ہونے والوں کی تعداد بڑھانے کے اپنے وعدے کو پورا کریں۔ ان کے مطابق اس سلسلے کا تیسرا خط 22 ستمبر کو بھیجا گیا تھا۔ تاہم اعلان کے دس ماہ بعد بھی اس سلسلے میں کچھ خاطرخواہ پیش رفت نہیں ہوئی۔

پاکستان میں اس وقت 80 لاکھ افراد کو بینظیر انکم سپورٹ پروگرام کے تحت مختلف ضمن میں مالی امداد دی جا رہی ہے جس میں بلوچستان کے 2 لاکھ 77 ہزار افراد بھی شامل ہیں۔

پروگرام کے اسلام آباد میں متعین ، ڈائریکٹر کمیونکیشن ثاقب ممتاز کے مطابق بلوچستان کے پانچ لاکھ افراد کو شامل کرنے کے لیے انہیں مزید 12 ارب روپے درکار ہوں گے۔

<h2>غربت کا پیمانہ: آمدن یا اثاثے</h2>

ڈاکٹر سعد سلیم جامعہ بلوچستان میں شعبہ سوشل سائنسز کے اسسٹنٹ پروفیسر ہیں۔ وہ سمجھتے ہیں کہ پروگرام میں مستحقین کی رجسٹریشن کا موجودہ پیچیدہ نظام بھی اس ضمن میں ایک رکاوٹ ہے۔

انہوں نے لوک سجاگ کو بتایا کہ پروگرام کی رجسٹریشن کے مرحلے میں زیادہ تر درخواستیں معمولی تکنیکی نقائص کی بنیاد پر مسترد کردی جاتی ہیں جو وسائل سے محروم مستحقین کے ساتھ ناانصافی ہے۔

انہوں نے رجسٹریشن کے طریقہ کار میں ایک بڑے نقص کی نشاندہی کرتے ہوئے بتایا کہ پروگرام مستحقین کی اہلیت کو ان کی آمدن کی بجائے ان کے اثاثوں کی قدر کی بنیاد پر جانچتا ہے۔ کسی کی ماہانہ آمدن 25 ہزار روپے سے کم ہے مگر اس کا ملکیتی گھر چند لاکھ روپے کا ہے تو اس اثاثے کی بنیاد پر اس کی اہلیت مسترد کر دی جاتی ہے۔ &quot;اس بنیاد پر انتہائی کم آمدن والے ہزاروں خاندان بھی بی آئی ایس پی کی رجسٹریشن کے مرحلے میں مسترد کر دیے جاتے ہیں&quot;۔

کوئٹہ کے نواحی علاقے ہزار گنجی کی رہائشی 36 سالہ ناہیدہ ایسی ہی ایک متاثرہ خاتون ہیں۔ وہ اکیلی ماں ہیں جو اپنے شوہر کی موت کے بعد تین چھوٹے بچوں کی پرورش کر رہی ہیں۔ مالی امداد کے حصول کے لیے انھوں نے کوئٹہ میں بینظیر انکم سپورٹ پروگرام کے ارباب کرم خان روڈ پر قائم دفتر میں درخواست جمع کروائی۔

چھ ماہ کے انتظار اور دفتر کے متعدد چکر لگانے کے بعد انھیں معلوم ہوا کہ ان کی درخواست مسترد کر دی گئی ہے کیونکہ ان کے پاس اپنی معاشی حیثیت کو ثابت کرنے کے لیے مناسب دستاویزات نہیں تھیں۔ ناہیدہ پچھلے سات سالوں سے اپنے بچوں کے ساتھ ایک چھوٹے سے گھر میں زندگی بسر کررہی ہیں اور بمشکل اپنے بچوں کی پرورش کر پا رہی ہیں۔

بینظیر انکم سپورٹ پروگرام بلوچستان کے ڈائریکٹر جنرل عبدالجبار نے لوک سجاگ سے بات کرتے ہوئے طریقہ کار کی اس خامی کو تسلیم کیا۔ وہ کہتے ہیں کہ کئی درخواست گزار ایسے آتے ہیں جو واقعی انتہائی مخدوش حالات کا شکار ہوتے ہیں مگر سسٹم اتنا پیچیدہ ہے کہ وہ کسی نہ کسی عذر کے باعث امداد کے لیے اہل نہیں ہو پاتے۔

&quot;بینظیر انکم سپورٹ پروگرام میں رجسٹرڈ ہونے کی شرائط سخت رکھی گئی ہیں۔ اسکین کا آپشن رکھنے والا شناختی کارڈ، پاسپورٹ، موٹرسائیکل رکھنے یا بجلی گیس کے زائد بل کی وجہ سے کئی افراد اس امداد کے لیے اہل قرار نہیں پاتے ہیں&quot;۔

وہ خود بتاتے ہیں کہ &quot;ایک خاتون میرے پاس درخواست لے کر آئیں کہ انکی درخواست ان کے اثاثے کی بنیاد پر مسترد کردی گئی تھی۔ انہوں نے بتایا کہ ان کا ایک گھر تو ان کے نام پر ہے مگر وہ سیلابی پانی میں ڈوب چکا ہے&quot;۔

<h2>بلوچستان میں رجسٹریشن کچھوے کی چال کیوں چلتی ہے؟</h2>

ڈائریکٹر جنرل عبدالجبار&nbsp; کہتے ہیں کہ پروگرام کے تحت بلوچستان میں رجسٹریشن کا عمل بنا رُکے سال بھر جاری رہتا ہے اور رجسٹرڈ بینفشریز کی تعداد میں مسلسل اضافہ ہو رہا ہے۔ وہ بتاتے ہیں کہ مستفید ہونے والوں کی تعداد حکومت کی جانب سے اس پروگرام کے لیے مختص کل رقم کی بنیاد پر طے کی جاتی ہے۔

ان کے مطابق وزیراعظم کے گوادر سے متعلق اعلان کے بعد ضلع میں مزید تین ہزار سے زائد خاندانوں کو بینظیر انکم سپورٹ پروگرام کا حصہ بنایا گیا ہے۔یوں گوادر میں مستفید ہونے والی خواتین کی تعداد 14 ہزار سے بڑھ کر 17 ہزار تک پہنچ چکی ہے۔

ادارے کے بلوچستان آفس کے مطابق وزیراعظم کے اعلان کے بعد سے صوبے بھر میں پروگرام سے مستفید ہونے والی خواتین کی تعداد میں 47 ہزار کا اضافہ ہوا ہے لیکن اس کے باوجود صوبے کے مستحقین کی کل تعداد صوبے کے جائز حصے سے بہت کم ہے۔

عبدالجبار اپنے ادارے کی استعداد کے بارے میں بھی شاکی ہیں۔ انہوں نے بتایا کہ ان کا 60 فیصد عملہ ڈیپوٹیشن پر دوسرے محکموں سے یہاں تعینات ہے۔ &quot;30 فیصد ہیومن ریسورس کے ساتھ کام کر رہا ہوں جو مشکلات کا باعث بھی ہے اور بلوچستان کے دیگر صوبوں سے پیچھے رہنے کی ایک وجہ بھی&quot;۔

پروگرام کے دفاتر میں دوسرے محکموں سے ڈیپوٹیشن پر آئے اہلکار اور افسران گذشتہ سالوں میں ایک سے زائد بار مختلف نوعیت کی بد عنوانیوں اور مالی بے ضابطگیوں میں بھی ملوث پائے گئے اور انہیں جرم ثابت ہونے پر سزا بھی دی گئی۔ جس نے ادارے کے دفتری ماحول اور ساکھ کو نقصان پہنچایا۔

رجسٹریشن سسٹم کے بارے عبدالجبار مزید بتاتے ہیں: &quot;سسٹم آن لائن ہے اور بلوچستان میں بجلی اور انٹرنیٹ کی دستیابی کے مسائل بھی شدید ہیں۔ پھر رجسٹریشن سینٹرز انتہائی دور ہونے کی وجہ سے بھی لوگوں کو بے حد پریشانی کا سامنا کرنا پڑتا ہے&quot;۔

وفاقی وزیر اور بینظیر انکم سپورٹ پروگرام کی چیئرپرسن شازیہ مری نے لوک سجاگ کو بتایا کہ بلوچستان میں مستحقین کی رجسٹریشن کے لیے پروگرام کے تقریباً 25 موبائل یونٹ قائم کیے گئے ہیں۔

&quot;ہم اس بات کو یقینی بنارہے ہیں کہ بلوچستان کے لوگوں کو بی آئی ایس پی سے زیادہ سے زیادہ فائدہ حاصل ہو اور ایسے ٹارگٹڈ پروگرام متعارف کروائے جائیں جو آبادی کے سب سے زیادہ کمزور افراد کو امداد فراہم کرنے پر مرکوز ہوں۔ ان پروگراموں میں تعلیم، صحت اور دیگر ضروری خدمات کے لیے خصوصی گرانٹس شامل ہیں&quot;۔

'مہنگا علاج ہر کسی کے بس میں نہیں ہوتا': بلوچستان میں چھاتی کے کینسر میں مبتلا خواتین کی مسیحائی کون کرے گا؟

بلوچستان: غربت کی شرح باقی صوبوں سے دگنی، غربت کے خاتمے کے پروگرام میں حصہ آدھا

24 اکتوبر 2022 کی شام محمد مینگل بہت خوش تھے۔ اس روز ان کے سب سے بڑے بیٹے کا نکاح تھا۔ جب وہ لڑکی کے والد مہر علی کے گھر پہنچے تو ان کے سامنے یہ شرط رکھ دی گئی کہ طے شدہ نکاح کے ساتھ ہی لڑکی کے 13 سالہ بھائی کا نکاح بھی ان کی پانچ سالہ بیٹی ماہ بی بی کے ساتھ کر دیا جائے۔

دونوں خاندانوں میں یہ رشتہ بھی پہلے ہی سے طے تھا مگر محمد مینگل چاہتے تھے کہ نکاح دونوں بچوں کے بالغ ہونے پر کیا جائے۔ انہوں نے مہر علی کو منانے کی لاکھ کوشش کی کہ ان کی بیٹی بہت کم عمر ہے مگر وہ ان کے مسلسل دباؤ کے سامنے بے بس ہو گئے اور ان کی پانچ سالہ ماہ بی بی کا زبردستی نکاح کر دیا گیا۔ مہر علی نے اپنی بیٹی کو رخصت کر کے ماہ بی بی کو زبردستی روک بھی لیا۔

محمد مینگل جو ضلع خضدار کی تحصیل زہری کے رہائشی ہیں، اپنی کمسن بیٹی کو مجبوراً چھوڑ کر گھر تو لوٹ آئے لیکن چند روز بعد انہوں نے پولیس کو اس واقعے کی اطلاع دے دی۔

پولیس نے مقدمہ درج کرکے مہر علی سمیت شادی کے انتظامات کرنے والوں کو گرفتار کر لیا۔ اس واقعے کی ایف آئی آر خضدار صدر پولیس سٹیشن نے کم عمری کی شادی کی ممانعت کے قانون 1929ء کی شقوں کے علاوہ تعزیرات پاکستان کی دفعات 420، 342 اور 34 کے تحت درج کی۔

ایس ایچ او کے مطابق ملزموں کی گرفتاری کے بعد بچی کو بازیاب کروا کے اس کے والدین کے حوالے کر دیا گیا تھا۔

پانچ سالہ ماہ بی بی کی شادی کے چند روز بعد وفاقی شرعی عدالت نے اس کا ازخود نوٹس لیتے ہوئے صوبائی حکومت سے رپورٹ طلب کر لی۔

عدالت نے بلوچستان کے لا آفیسر سے پوچھا کہ صوبائی اسمبلی کی جانب سے کم عمری کی اور جبری شادیوں کی روک تھام کے لیے کیا اقدامات کیے جا رہے ہیں۔ لا افسر نے خضدار پولیس اور بلوچستان کے محکمہ سماجی بہبود کی جزوی رپورٹ پیش کرتے ہوئے بچوں کی شادیوں سے متعلق مسودہ قانون کی موجودہ صورتحال سے لاعلمی کا اظہار کیا۔ عدالت نے صوبائی حکومت کو 20 روز کے اندر کم عمری کی شادیوں سے متعلق قانون کا مسودہ عدالت میں پیش کرنے کا حکم دیا۔

یہ قانون بلوچستان کی صوبائی اسمبلی میں کئی بار پیش ہو چکا ہے۔

سابق رکن صوبائی اسمبلی یاسمین لہڑی نے بتایا کہ 2014 میں شادی کی عمر کی حد مقرر کرنے کا بل انہوں نے بلوچستان اسمبلی میں پیش کیا تو مذہبی جماعتوں کی جانب سے اس کی شدید مخالفت کی گئی۔&quot;خاص کر جمعیت علمائے اسلام کے ارکان اسمبلی اس پر کافی سرگرم تھے۔ انہوں حکومت کو کہا کہ قانون سازی شریعت کے مطابق کی جائے۔&quot;

2016 میں ایک بار پھر رکن اسمبلی ڈاکٹر شمع اسحاق نے اسمبلی میں اس بل کو پیش کیا لیکن ارکان اسمبلی نے اسے ایک بار پھر &#39;غیر اسلامی&lsquo; قرار دے کر رد کر دیا۔

میڈیا اور سول سوسائٹی نے شور تو خوب مچایا مگر یہ بل دوبارہ اسمبلی میں پیش نہ ہو سکا۔

سیکرٹری اطلاعات بلوچستان محمد حمزہ شفقات کے مطابق آخری مرتبہ جب بلوچستان کابینہ کے سامنے بل پیش ہوا تو اس پر عمر کی حد 18 برس مقرر کرنے اور شادی کے بعد بچہ ہونے کے باوجود اسے کالعدم قرار دینے سے متعلق اعتراضات اٹھائے گئے تھے۔ جس کے بعد یہ بل متعلقہ محکموں کو واپس بجھوا دیا گیا۔

وزیر اعلیٰ بلوچستان کی مشیر بشریٰ رند کہتی ہیں کہ ان کی حکومت اس بل کو منظور کرنا چاہتی ہے۔ انہوں نے بتایا کہ اس حوالے سے موجودہ صوبائی حکومت نے کئی اجلاس کیے ہیں اور متعلقہ اداروں کو تمام نقائص نکال کر اسے بہتر بنانے کی ہدایت کی گئی ہے۔

حمزہ شفقات نے بتایا کہ یہ بل اب سوشل ویلفئیر ڈیپارٹمنٹ کے پاس ہے۔ محکمے کی جانب سے بل پر 30 دسمبر کو مختلف سٹیک ہولڈرز کے ساتھ ایک مشاورتی سیشن کیا گیا ہے اور اسے جلد ہی دوبارہ صوبائی کابینہ کے سامنے پیش کر دیا جائے گا اور اس کا ڈرافٹ وفاقی شرعی عدالت کے سامنے بھی پیش کیا جائے گا۔

<hr />
<h5>قانون کی کہانی</h5>

کم عمری کی شادی کی ممانعت کے لیے پاکستان بھر میں 1929ء میں بنایا گیا قانون لاگو رہا ہے۔

اس قانون کے تحت:

&nbsp;&nbsp;&nbsp; &bull; شادی کے وقت لڑکی کی کم ازکم عمر 16 اور لڑکے کی 18 برس ہونی چاہیے۔

&nbsp;&nbsp;&nbsp; &bull; اگر کسی کی عمر کا تعین کرنے کے لیے مستند کاغذات موجود نہ ہوں تو عدالت فرد کے طبی معائنے کا حکم دیتی ہے۔

&nbsp;&nbsp;&nbsp; &bull; بچوں کی کم عمری میں شادی کرنے والے والدین یا سرپرست یا 18 سال سے زیادہ عمر کے دلہا کو ایک ماہ قید یا ایک ہزار روپے جرمانے کی سزا دی جا سکتی ہے۔

2010ء میں آئین میں اٹھارویں ترمیم کے بعد شادی اور خاندانی معاملات صوبائی سبجیکٹ بن گئے۔

سندھ نے 2014ء میں کم عمری کی شادی پر پابندی کا نیا صوبائی قانون منظور کیا جس کے تحت لڑکیوں اور لڑکوں دونوں کے لیے شادی کی کم از کم عمر 18 سال رکھی گئی ہے۔ نئے قانون کے تحت کمسنی کی شادی پر والدین، سرپرستوں اور ان کے معاونین کو تین سال تک قید اور جرمانے کی سزا دی جا سکتی ہے۔ اس قانون میں کمسنی کی شادی کو نہ صرف قابل دست اندازی پولیس جرم قرار دیا گیا ہے بلکہ یہ ناقابل ضمانت اور ناقابل راضی نامہ بھی ہے۔

پنجاب نے 2015ء میں 1929ء کے قانون میں ترمیم کی جس کے تحت اگر کوئی فرد یہ سمجھے کہ کسی لڑکی یا لڑکے کی شادی کم عمری میں کی جا رہی ہے تو وہ متعلقہ یونین کونسل میں شکایت جمع کرائے گا جس کے بعد یونین کونسل کا چیئرمین اس حوالے سے فیملی کورٹ میں مقدمہ دائر کرے گا۔اس ترمیم نے خلاف ورزی کی سزا کو بڑھا کر ایک سے بڑھا کر چھ ماہ قید اور 50 ہزار روپیہ جرمانہ کر دیا۔

اسلام آباد، خیبر پختونخوا اور بلوچستان میں نئی قانون سازی کی کئی کوششیں کی گئیں جو تا حال کامیاب نہیں ہوئیں اس لئے ان علاقوں میں 1929ء کا قانون ہی نافذالعمل ہے۔

<hr />

کم عمری کی شادیوں کی ممانعت کے حوالے سے کوئٹہ میں کام کرنے والی سماجی کارکن ثمرین مینگل سمجھتی ہیں اس بارے قانون سازی ناگزیر ہے۔ ان کے خیال میں شادی کے لیے لڑکی کی عمر کی حد 18 سال ہی ہونی چاہیے۔

ضیا بلوچ کا تعلق ایک فلاحی تنظیم سے ہے۔ وہ اور دیگر تنظیمیں بروقت عمل کر کے ایسی کئی شادیاں رکوا چکے ہیں۔ ضیا نے بتایا کہ گذشتہ برس انہوں نے نہ صرف ایسی ایک شادی کو کروایا بلکہ مقدمہ بھی درج کروایا۔

کراچی سے تعلق رکھنے والی سارہ زمان فیمنسٹ ایکٹوسٹ اور محقق ہونے کے ساتھ ساتھ ایک نجی یونیورسٹی میں پڑھاتی بھی ہیں۔ خواتین کے مسائل کے حوالے سے وہ گزشتہ پندرہ برس سے مختلف ملکی و بین الاقوامی تنظیموں کے ساتھ کام کرتی رہی ہیں۔ ان کے مطابق کم عمری کی شادیوں کے پیچھے سماجی، مذہبی اور اقتصادی وجوہ کارفرما ہوتی ہیں۔ &quot;کم عمر بچیوں کی شادی کا والدین کو یہ بھی فائدہ پہنچتا ہے کہ انہیں نہ تو بیٹی کی شادی پر زیادہ اخراجات کرنا پڑتے ہیں اور نہ جہیز دینا پڑتا ہے&quot;۔

ان کی تحقیق سے سامنے آیا کہ ایسی شادیاں خاندانی قرض چکانے، خونی جھگڑے ختم کرنے یا محض گھریلو اخراجات پورے کرنے کے لیے بھی کر دی جاتی ہیں۔

بولان میڈیکل کالج کوئٹہ میں گائنی یونٹ کی سربراہ پروفیسر ڈاکٹر نجمہ غفار بتاتی ہیں کہ&nbsp; کم عمری کی شادیاں زچگی میں بہت سی پیچیدگیوں کا باعث بنتی ہیں۔ ان کے خیال میں بہتری کے لیے قانون نافذ کرنے والے اہلکاروں کی تربیت اور مقدمات کو ٹریک پر لانے کے لیے نظام بنانا ضروری ہے۔

سمیعہ راحیل قاضی قومی اسمبلی کی سابق رکن اور معروف مذہبی سکالر ہیں۔ انہوں نے یکم فروری 2019 کو سما ٹی وی کے ایک پروگرام میں گفتگو کرتے ہوئے اس بات پر اتفاق کا اظہار کیا کہ لڑکیوں کی شادی کی کم از کم عمر 18 سال ہونی چاہیے۔ ان کے خیال میں اس مسئلہ کو جڑ سے ختم کرنے کے لیے ایک وسیع اور مؤثر آگاہی مہم کی ضرورت ہے۔

شادی کے بوجھ تلے دبی بچیاں: شیڈولڈ کاسٹ ہندوؤں میں کم عمری کی شادیاں بچیوں کی صحت کے لیے مہلک رجحان۔

بلوچستان کی کم عمر دلہنیں: صوبائی اسمبلی عمر رسیدہ قانون بدلنے پر کیوں تیار نہیں؟

بارش کے نہ تھمنے والے سلسلے نے شفیع اللہ کو بے سکون کر رکھا تھا۔ وہ اندھیرے میں ڈوبے کمرے کے ایک کونے میں بیٹھے بار بار کھڑکی سے باہر کی صورتحال کا جائزہ لیتے اور پھر اپنے بچوں کی طرف فکر مندی سے دیکھتے تھے۔

دو کمروں کےاس گھر کی دیواریں اب مزید بوجھ اٹھانے کے قابل نہیں رہیں تھی اور چھت کسی بھی وقت زمیں بوس ہوسکتی تھی۔

یہ خستہ حال مکان اور ایک ایکڑ پر مشتمل سیب&nbsp; کا چھوٹا سا باغ ہی 52 سالہ شفیع اللہ کا کل سرمایہ ہے۔ شفیع گھر کے واحد کفیل ہیں اور اسی باغ کی آمدن سے اپنا، اپنی بیوی اور 7 بچوں کا پیٹ پالتے ہیں۔ کئی روز جاری رہنے والی بارشوں نے پہلے ہی کوئٹہ کے نواحی علاقے اوڑک میں سیلاب کی صورتحال پیدا کردی تھی اور پہاڑ سے آنے والا سیلابی پانی بھی اب آس پاس کے گھروں میں داخل ہونے لگا تھا۔

پھر وہی ہوا جس کا اندیشہ تھا اور پانی گھر میں داخل ہونے لگا۔ شفیع اللہ گھبرا کر اٹھے اور جلدی سے بیوی بچوں کو جگایا۔ وہ انہیں ساتھ لےکر قریبی پہاڑی کی جانب روانہ ہو گئے۔ اس راستے پر انہیں کئی دیگر لوگ بھی نظر آئے جو گھروں میں اچانک پانی داخل ہونے کے بعد پہاڑی پر پناہ لینے پر مجبور ہوگئے تھے۔

اگلی صبح پانی کے بہاؤ میں کچھ کمی آئی تو شفیع اللہ فوراً گھر کا جائزہ لینے پہنچ گئے لیکن ان کا گھر ملبے کا ڈھیر بن چکا تھا۔ سیلابی پانی نے پورے گاؤں کے مکانات کو زمین بوس کر دیا تھا۔

محکمہ موسمیات کوئٹہ کے مطابق صوبے میں 1961ء کے بعد سب سے زیادہ بارشیں 2022ء میں ریکارڈ کی گئیں۔ شدید گرمی کی لہر اور خشک سالی سے بلوچستان کو پہلے ہی سخت ترین حالات کا سامنا تھا اور اب موسمیاتی تبدیلی کے اثرات غیر معمولی بارشوں کی صورت میں سامنے آئے ہیں۔

اوڑک کوئٹہ کے وسط سے 20 کلومیٹر کے فیصلے پر شمال اور مشرقی کوہ زرغون اور چارشاخ کے پہاڑی سلسلے کے دامن میں واقع ہے۔ ہنہ اور اوڑک دراصل ضلع کوئٹہ کی دو یونین کونسلیں ہیں جو&nbsp; سیاحتی مقامات کے طور پر مقبول ہیں۔ 
اوڑک کی آبادی 10 ہزار سے زیادہ ہے اور یہاں کے 90 فیصد رہائشیوں کا روزگار سیب کے باغات سے وابستہ ہے۔

<h2>کہ طوفان ابھی تھما نہیں!</h2>

شفیع اللہ کا خاندان چار ماہ کے بعد بھی اپنے گھر کے قریب زمین کے نسبتاً خشک حصے پر خیمے میں رہائش پذیر ہے۔ موسم سرما اپنے جوبن پر ہے اور درجہ حرارت اب نقطہ انجماد سے مسلسل نیچے رہتا ہے، ان کا خیمہ سرد ہواؤں کو روک نہیں پاتا لہذٰا وہ زیادہ تر وقت اپنے بیوی بچوں کے ساتھ خیمے میں کمبل اوڑھے ہی گزارتے&nbsp; ہیں جو انہیں ایک غیر سرکاری تنظیم کی جانب سے ملے ہیں۔

شفیع اللہ کے مطابق سیلاب میں ان کے گھر کے علاوہ ان کا باغ بھی تباہ ہو گیا جو ان کی آمدنی کا واحد ذریعہ تھا۔

ان کا کہنا ہے کہ &quot;چار ماہ گزر چکے ہیں، یہاں سڑک نہیں بنائی گئی نہ ہی کسی نے امداد بھیجی ہے اور نہ ہی کسی نے گھر دوبارہ تعمیر کرنے میں کوئی مدد دی ہے، جو امداد اس علاقے میں آتی ہے وہ چند بااثر افراد لے جاتے ہیں۔ سمجھ نہیں آتی کس کے در پر جاکر مدد مانگیں&quot;۔

شفیع اللہ کی پریشانیاں وقت گزرنے کے ساتھ بڑھ رہی ہیں، وہ کہتے ہیں کہ بچوں کو کھلانے کیلئے کچھ نہیں۔ ان کا کہنا ہے کہ &quot;سیلاب نے باغ کو تباہ کردیا۔ سیب کے درجنوں درخت پانی میں بہہ گئے اور جو بچ گئے ان کا پھل ضائع ہو گیا&quot;۔

شفیع اللہ سیب کی فروخت سے سالانہ 10 سے 12 لاکھ روپے کماتے تھے جس سے ان کے بچوں کی ضروریات اور آئندہ فصل کے اخراجات پورے ہو رہے تھے مگر اس سال وہ صرف ایک لاکھ روپے ہی کما سکے ہیں۔

اوڑک کے گاؤں کلی مالک&nbsp; سے تین کلو میٹر دور سراغڑگئی میں بھی سیلاب نے ایسی ہی تباہی مچائی ہے۔ سراغڑگئی کوئٹہ شہر سے 17 کلومیٹر فاصلے پر واقع ہے جس کی آبادی مقامی افراد کے مطابق چھ ہزار سے زیادہ ہے۔

سراغڑگئی کے رہائشی 36 سالہ باچا خان اپنی مدد آپ کے تحت گھر کو دوبارہ تعمیر کررہے ہیں۔ کئی دنوں کی مشقت کے بعد وہ چار دیواری ہی مکمل&nbsp; کرپائے ہیں کیونکہ وہ مزدوروں کو معاوضہ ادا نہیں کرسکتے۔ یہی وجہ ہے کہ وہ اور ان کے اہل خانہ خود ہی&nbsp; گھر کی تعمیر میں مصروف ہیں۔

باچا کہتے ہیں کہ &quot;میں نے بہت انتظار کیا کہ انتظامیہ کی جانب سے گھر کو دوبارہ تعمیر کرنے میں مدد ملے گی مگر جب مسلسل انتظار کے بعد بھی مدد کے کوئی آثار نظر نہ آئے تو میں نے خود ہی ہمت کی اور کچھ رشتہ داروں اور علاقے کے مخیر حضرات سے قرض لے کر اپنے گھر کی دوبارہ تعمیر شروع کردی۔ مگر میرے پاس اب بھی اتنے پیسے نہیں کہ گھر کی چھت تعمیر کرسکوں&quot;۔

باچا کا کہنا ہے کہ اس سخت سردی میں خیمے میں بچوں اور عورتوں&nbsp; کا گزارا ممکن نہیں۔ بچے سردی کی شدت برداشت نہیں کر پا رہے اور بیمار رہتے ہیں۔ &quot;میں چاہتا ہوں کہ ایک کمرہ ہی تعمیر ہوجائے تاکہ یہ سردی ہم چھت تلے گزار سکیں&quot;۔

سیلاب نے باچا خان کے سیب کے باغ کو بھی بری طرح تباہ کردیا۔ انہیں اس باغ سے سالانہ پانچ سے چھ لاکھ روپے تک منافع ہوتا تھا مگر اس سال انہیں ایک روپے کی کمائی بھی نہیں ہوئی۔باچا خان کہتے ہیں &quot;میرا کوئی معاشی مستقبل نہیں اور میں نہیں جانتا کہ دوبارہ کیسے اپنے پاؤں پر کھڑا ہو سکوں گا؟&quot;

<h2>سیلاب بلوچستان کا کیا کچھ بہا لے گیا</h2>

وفاقی وزارت منصوبہ بندی و ترقی کی پوسٹ ڈیزاسٹر نیڈ اسسمنٹ رپورٹ کے مطابق بلوچستان میں سیلاب سے 890 ارب روپے کا نقصان ہوا جبکہ بحالی کے لیے کم از کم 490 ارب روپے درکار ہیں۔

رپورٹ کے مطابق بلوچستان میں سیلاب کی تباہ کاریوں کے باعث غربت کی شرح میں تقریباً آٹھ فیصد مزید اضافے کا امکان ہے۔

سیلاب کے باعث صوبے کے 24 لاکھ افراد خوراک کی قلت کا بھی شکار ہوگئے ہیں۔

رپورٹ کے مطابق بلوچستان میں سیلاب سے متاثرہ ڈھائی لاکھ مکانات کی تعمیر نو پر 31 ارب روپے جبکہ مرمت پر 21 ارب روپے لاگت کا تخمینہ لگایا گیا ہے۔

بلوچستان میں زرعی شعبہ بھی سیلاب سے بری طرح متاثر ہوا ہے۔ رپورٹ میں بتایا گیا ہے کہ صوبے کو زراعت کے شعبے میں 57 ارب روپے کا نقصان پہنچا ہے جس کی بحالی کیلئے 30 ارب روپے سے زیادہ رقم درکار ہے۔

بلوچستان میں سیلاب سے لائیو سٹاک کے شعبے کو بھی بری طرح نقصان پہنچا ہے۔

رپورٹ کے مطابق صوبے میں تین لاکھ 95 ہزار مویشی سیلاب کی نذر ہوئے۔

بلوچستان کی صورت حال ملک کے باقی حصوں کی نسبت زیادہ خراب ہے کیونکہ یہاں آبادی کم ہے جس کی بڑی اکثریت غریب ہونے کے علاوہ وسیع و عریض علاقوں میں پھیلی ہوئی ہے۔

بلوچستان کی صوبائی کابینہ نے صوبے میں فلڈ ایمرجنسی اسسٹنس پروگرام کی منظوری دی ہے۔ وزیر اعلیٰ بلوچستان میر عبدالقدوس بزنجو نے کہا ہے&nbsp; کہ صوبائی حکومت نے متاثرہ علاقوں کے کاشتکاروں کی بحالی کے لیے 16 ارب روپے کی لاگت کا پروگرام شروع کیا ہے جس کے تحت انہیں شمسی توانائی، بیج اور کھاد پر سبسڈی دی جائے گی تاکہ وہ دوبارہ اپنے پاؤں پر کھڑا ہو سکیں۔

<h2>عجب کیا تیرے وعدے پہ اعتبار کیا</h2>

سیلاب سے نقصانات اور بحالی کیلئے صوبائی حکومت کا سروے مکمل ہوچکا ہے تاہم متاثرین کو فی الحال کوئی اقدامات ہوتے نظر نہیں آرہے۔

کوئٹہ کے علاقے نواں کلی سے تعلق رکھنے والے صابر احمد کے مطابق حکومتی ٹیم دو ماہ قبل سروے کرنے آئی لیکن تاحال&nbsp; امداد کیلئے کوئی نہیں آیا۔

انہوں نے بتایا کہ حکومتی ٹیم نے دوبارہ آبادکاری کے لیے کوئی ٹائم فریم نہیں دیا، لہذٰا وہ نہیں جانتے کہ کب تک اس سخت سردی میں وہ خیموں میں رہیں گے؟

کوئٹہ کے علاقے چشمہ اچوزئی کو بھی بارشوں اور سیلاب کے باعث بے حد نقصان پہنچا ہے اور اب سخت سردی یہاں متاثرین کے لئے بڑا امتحان ہے۔

چشمہ اچوزئی کوئٹہ ایئرپورٹ سے پانچ کلومیٹر فاصلے پر واقع ہے، ماضی میں اس علاقے میں بڑی تعداد میں باغات ہوا کرتے تھے جو پچھلے دس سال میں نہ ہونے کے برابر رہ گئے ہیں اور ان کی جگہ درجنوں ہاؤسنگ سکیموں نے لے لی ہے۔

39&nbsp; سالہ شہاب الدین اس علاقے کے ان مکینوں میں سے ایک ہیں جن کے گھر بارش کے باعث زمین بوس ہوگئے اور آج وہ خون جما دینے والی سردی میں اپنے خاندان سمیت ایک خیمے میں محصور ہیں۔

شہاب الدین کے چار بچے ہیں اور وہ پرچون کی دکان چلا کر گزر بسر کرتے ہیں۔ ان کا کہنا ہے کہ میں ںے &quot;بیس سال کی محنت سے یہ گھر تعمیر کیا تھا جو پل بھر میں مٹی کا ڈھیر بن گیا، اب میں اسے دوبارہ کیسے تعمیر کروں گا؟&quot;

شہاب کے مطابق حکومت کی جانب سے تاحال انہیں کسی قسم کی امداد نہیں دی گئی تاہم ایک غیرسرکاری تنظیم کی جانب سے انہیں دو گارڈر اور آٹھ بانس ملے ہیں جوگھر تعمیر کرنے کیلئے ناکافی ہیں۔

کوئٹہ کی انتظامیہ کے پاس اتنے وسائل نہیں ہیں کہ وہ خود ہی متاثرینِ کی مدد کرسکے۔ کوئٹہ کے اسسٹنٹ کمشنر نثار احمد لانگو نے&nbsp; بتایا کہ سیلاب سے ہونے والے نقصانات سے متعلق سروے رپورٹ وفاقی حکومت کو ارسال کی گئی ہے تاہم ابھی تک انہیں کوئی جواب موصول نہیں ہوا۔

انہوں نے مزید کہا کہ وہ پی ڈی ایم اے کے ساتھ رابطے میں ہیں تاکہ متاثرہ خاندانوں کے لئے گرم کپڑوں اور کمبلوں کا بندوبست کیا جا سکے۔

کئی طوفان آئیں گے اب اس سیلاب سے آگے: 'مسلسل سیلابی پانی کی زد میں رہنے سے جیکب آباد کی زرعی زمین ناقابل کاشت ہو گئی ہے'۔

خاک ہو جائیں گے ہم تم کو خبر ہونے تک: کوئٹہ میں سیلاب متاثرین کی بحالی کا کام کب شروع ہو گا؟

سہ پہر کا وقت تھا مچھ کی ایک کوئلہ کان میں کئی مزدور کام کررہے تھے، 34 سالہ امان اللہ روزانہ کی طرح کان کے باہر ایک ڈھیر سے کوئلہ بوری میں بھرنے میں مصروف تھا۔دبلی جسامت، مگر سخت جان امان دن بھر کوئلے کی بوریاں بھرتا اور پھر انہیں اپنے کندھے پر اٹھا کر اس مقام تک پہنچاتا جہاں سے انہیں ٹرک میں لوڈ کیا جاتا ہے۔دن بھر کوئلے کے ڈھیر میں گزارنے کے باعث اس کا چہرہ اور کپڑے سیاہ گرد میں اٹے ہوئے تھے۔

بلوچستان کے ضلع بولان کی تحصیل مچھ صوبائی دارالحکومت کوئٹہ سے 70 کلومیٹر دور ہے 50 ہزار کی آبادی پر مشتمل اس علاقے میں 50 سے زائد رجسٹرڈ کوئلہ کانیں ہیں اور یہاں کی 70 فیصد آبادی کان کنی کے شعبے سے ہی وابستہ ہے۔

امان دن بھر کی مشقت کے بعد اپنا کام ختم کرنے ہی والا تھا&nbsp; کہ اچانک سات سے آٹھ نقاب پوش مسلح افراد نے دھاوا بول دیا۔

یہ سب اتنا اچانک ہوا کہ وہاں موجود کان کن حرکت بھی نہ کرسکے۔ مسلح افراد کی جانب سے چھ کان کنوں کو ایک راستے پر چلنے کا اشارہ کیا گیا، ان میں سے ایک امان بھی تھا، ڈگمگاتے قدموں کے ساتھ امان اور دیگر کان کن بنا توقف کئے ان کے حکم پر عمل کرنے لگے۔

وہ مسلسل انتہائی دشوار گزار پہاڑی راستے پر چلتے گئے اور جب بے حال ہو گئے تو اغواء کاروں نے کھلے آسمان تلے ہی ایک مقام پر پڑاؤ ڈال لیا۔

وہ مسلسل سفر کرتے رہے اس دوران اغواء کار پہاڑوں پر ویرانے میں کبھی دو دن تو کبھی تین دن کھلے آسمان تلے پڑاو کرتے۔

پہاڑی راستوں پر بنارکے 12، 12 گھنٹے سفر کرنے سے مغویوں کے پاؤں پر چھالے پڑ چکے تھے، اکثر انہیں کھانے کو بھی کچھ نہ دیا جاتا جس سے ان کی حالت مزید بگڑ رہی تھی۔

اغواء کاروں کی ہر وقت ان پر نظر ہوتی، وہ انہیں اپنی مرضی کے بنا حرکت بھی نہیں کرنے دیتے تھے۔

بلوچی، براہوی اور پشتو بلوچستان کی تین ذیادہ بولی جانے والی زبانیں ہیں امان بھی پشتو بولنے کے علاوہ بلوچی اور براہوی زبان کچھ حد تک سمجھتے تھے مگر اغوا کار آپس میں ایسی زبان میں گفتگو کر رہے تھے جو امان اور دیگر مغویوں کے لیے انتہائی اجنبی تھی۔

امان اللہ کا تعلق خیبر پختونخواء کے علاقے شانگلہ سے ہے جسے 11 نومبر کو نامعلوم مسلح افراد دیگر پانچ مزدوروں کے ہمراہ اغواء کرکے اپنے ساتھ لے گئے تھے

تین بیٹیوں اور دو بیٹوں کا باپ امان اپنے گھر کا واحد کفیل ہے گھر سے سیکڑوں میل دور سخت مشقت کرکے معمولی اجرت کی خاطر وہ سال بھر اپنے بیوی بچوں سے دوری برداشت کرتا تاکہ اس کے بچے بھوکے پیٹ نہ سوئیں۔

طویل عرصے کی اس قید کے دوران اغواء کاروں کا رویہ پرتشدد یا غیر انسانی تو تھا مگر امان اللہ کو بس اسی بات کا خوف رہتا کہ کہیں اسے اور اس کے ساتھیوں کو قتل ہی نہ کردیا جائے۔

امان اور اس کے دیگر چار ساتھیوں کو 17 روز کی قید کے بعد رہائی ملی تو اس نے خدا کا شکرادا کیا۔

بازیاب ہونے والوں میں روزی خان، سرتاج، امان اللہ اور فرمو الدین کا تعلق خیبر پختونخوا کے علاقے شانگلہ سے جبکہ جمال کا تعلق کوئٹہ سے ہے۔

تاہم سوات کے رہائشی برکت علی کو تب رہا نہیں کیا گیا اور وہ مزید دو ہفتے قید رہے۔

اس واقعے سے چند روز پہلے کالعدم تنظیم کی جانب سے مچھ کی &#39;مائینز ایریا نمبر 66&#39; سے پہچانے جانے والی اس کان کے مالک کو&nbsp; بھتہ نہ دینے پر کان کنی بند کرنے سے متعلق دھمکی آمیر پمفلٹ پھینکا گیا تھا۔

خیبرپختونخوا سے تعلق رکھنے والے رکن قومی اسمبلی ڈاکٹر عباداللہ مزدوروں کی بازیابی کیلئے سرگرم رہے۔

انہوں نے بتایا کہ جرگے اور قبائلی عمائدین کی کوششوں سے ان مزدوروں کی رہائی ممکن ہوئی جبکہ اہل خانہ نے بھی اغواء کاروں سے انسانی ہمدردی کی بنیاد پر انہیں رہا کرنے کی اپیل کی تھی۔

ڈاکٹر عباد کے مطابق اغواء کار ان مزدوروں کو رات گئے کوئٹہ سے 60 کلو میٹر دور مچھ کے ہی پہاڑی علاقے میں چھوڑ گئے تھے جہاں سے وہ انہیں اپنے ساتھ لے آئے۔

مچھ سے اغواء ہونے والے چھٹے کان کن برکت کیلئے پریشانی تب بڑھی جب دیگر پانچ ساتھیوں کو تو رہا کردیا گیا مگر انہیں آزاد نہ کیا گیا۔

برکت نے اغواء کاروں سے منت سماجت کی کہ خدارا اسے بھی ان کے ساتھیوں کے ہمراہ آزاد کردیا جائے مگر اغوا کاروں نے کہا کہ جب وہ چلنے کے قابل ہوجائیں گے توانہیں بھی رہا کیا جائے گا۔

تاہم برکت کے چچازاد بھائی اقبال یوسفزئی کے مطابق جس تنظیم نے انہیں اغواء کیا انہوں نے اسے مشکوک قرار دے کر اپنے پاس مزید وقت کیلئے قید رکھا۔

&quot;بتیس سالہ برکت بطور منشی (اکاونٹنٹ) مچھ کی اسی کوئلہ کان میں چار سال سے کام کررہے تھے، وہ عام کان کنوں کی نسبت پڑھے لکھے تھے جس کی وجہ سے انہیں مزدوری کی بجائے انتظامی نوکری مل گئی تھی۔ بہتر روزگار ملنے کے بعد وہ اپنے خاندان کے ہمراہ مچھ میں ہی مستقل طور پر رہائش پزیر ہوگئے تھے۔&quot;

اقبال نے مزید بتایا کہ برکت کے پاس اکثر راشن کی پرچیاں ہوتی تھیں یہ پرچیاں کان میں آنے والے راشن کی رسیدیں ہیں جو وہ حساب کتاب کے لیے اپنے پاس سنبھال کررکھتے تھے۔

&quot;جب اغوا کار انہیں اپنےساتھ لے گئے تو اس وقت بھی ان کے پاس راشن کی ایک ایسی پرچی تھی جس کا سامان ایف سی کی چیک پوسٹوں پر پہنچایا گیا تھا&quot;۔

مچھ میں فرنٹیئر کانسٹیبلری (ایف سی) بلوچستان کی مختلف چیک پوسٹیں قائم ہیں، جن پر نجی کنٹریکٹرز کے زریعے راشن پہنچایا جاتا ہے۔

مسلسل پہاڑی راستوں پر پیدل چلنے سے برکت علی کی حالت دیگر مغوی کان کنوں کی نسبت کہیں ذیادہ بگڑ چکی تھی۔

انہیں 31 روز کی قید کے بعد بالاآخر رہائی مل گئی اور وہ اپنے گھر لوٹ آئے۔تاہم اس واقعے کے بعد سے وہ شدید ذہنی دباؤ اور صدمے کا شکار ہیں۔

ان کے کزن اقبال کے مطابق برکت کی بازیابی&nbsp; کے لیے حکومت کی جانب سے کوئی اقدام نہیں کیا گیا باوجود اس کے کہ وہ انتہائی غریب گھرانے سے تعلق رکھتے ہیں اور اپنے خاندان کےواحد کفیل ہیں۔

<h2>ہر وقت حملے کا خوف</h2>

بلوچستان میں کوئلہ کان کنی کو سب سے بڑی صنعت تصور کیا جاتا ہے، چیف انسپکٹر مائینز بلوچستان عبدالغنی کہتے ہیں کہ&nbsp; تقریباً تین ہزار کے قریب کوئلہ کانوں میں 42 ہزار سے زائد کان کن کام کرتے ہیں۔

جامعہ بلوچستان کے ایک تحقیقاتی مکالے کے مطابق صوبے کی کوئلہ کانوں میں 60 ہزار سے زائد کان کن کام کررہے ہیں، تاہم ان کانوں میں کام کرنے والے اکثر مزدوروں کا تعلق صوبہ خیبر پختونخوا سے ہے۔

بلوچستان میں حادثات اور حملوں میں شانگلہ سے تعلق رکھنے والے کئی مزدور جان سے ہاتھ دھو چکے ہیں۔

کان کنوں کے حقوق کے لیے کام کرنے والے ادارے کول مائینز ویلفیئر ایسوسی ایشن کے بانی علی بش خان کے مطابق ضلع شانگلہ کے تقریباً 75 فیصد مزدور کان کنی سے وابستہ ہیں اور ان کی ایک بڑی تعداد بلوچستان کی کوئلہ کانوں میں کام کرتی ہے۔

شانگلہ سے ہی تعلق رکھنے والے 32 سالہ فرید الدین ہرنائی&nbsp; کی ایک کوئلہ کان میں دو سال سے کام کررہے ہیں۔

کوئٹہ سے 170 کلومیٹر دور ضلع ہرنائی کے علاقوں شاہرگ اور خوست میں ساڑھے چھ ہزار ایکٹر سے زائد رقبے پر کوئلہ کانیں (کول فیلڈز) قائم ہیں۔2017 کی مردم شماری کے مطابق یہاں 97 ہزار سے زائد لوگ آباد ہیں۔

پاکستان منرل ڈویلپمنٹ ڈیپارٹمنٹ کے اعداد و شمار کے مطابق ان علاقوں میں 29 ملین ٹن کے قریب کوئلے کے زخائر ہیں جبکہ 2013ء کے بعد سے یہاں اوسط دو ملین ٹن سالانہ کوئلہ نکالا جارہا ہے۔

فرید کہتے ہیں عدم تحفظ کے ماحول کے باوجود وہ یہاں خوشی خوشی کام کررہے ہیں۔ &quot;روزگار نہ ہو، گھر میں بچوں کیلئے کھانے کو کچھ نہ ہو تو کہیں کام مل جائے غنیمت ہے&quot;۔

فرید الدین کے چار بچے ہیں جن کی عمریں دو سے سات سال کے درمیان ہیں۔ وہ پہلے شانگلہ میں ہی ایک کان میں کام کرتے تھے مگر بے روزگار ہوئے تو ہرنائی آگئے جہاں ان کے چچا زاد حمید احمد اسی کان میں مزدوری کرتے ہیں۔ 
حمید بتاتے ہیں کہ کان کن اغواء کے مسلسل واقعات سے بے حد پریشان ہیں۔

&quot;گھر سے دور روزگار کی تلاش میں آنے کے بعد اب ہر وقت یہی ڈر لگا رہتا ہے کہ کہیں ان کی کان پر بھی مسلح افراد دھاوا نہ بول دیں&quot;۔

حمید مسلسل اسی کشمکش میں ہیں کہ کیا وہ ان حالات میں مزید یہاں کام کریں یا پھر گھر واپس لوٹ جائیں؟

<h2>اغوا کار کون ہیں؟</h2>

بلوچستان میں کان کنوں کے اغوا اور قتل کے واقعات کا تسلسل طویل عرصے سے جاری ہے۔

مسلح تنظیموں کی جانب سے زیادہ تر واقعات کی زمہ داری قبول کی جاتی ہے جبکہ کئی کان کنوں کو ریاستی جاسوس قرار دے کر بھی قتل کیا گیا ہے۔

یکم نومبر 2013 کو کوئٹہ سے 150 کلومیٹر دور ضلع بولان میں کوئلہ کان کنوں کی گاڑی پر فائرنگ سے چھ مزدور مارے گئے تھے۔ مارے جانے والے مزدور کوئٹہ کی ہزارہ برادری سے تعلق رکھتے تھے تاہم ان مزدوروں کے قتل کی ذمہ داری کسی تنظیم نے قبول نہیں کی اور نہ ہی تحقیقات میں کسی تنظیم کا نام سامنے آیا۔

پچیس دسمبر 2013 کو ہرنائی سے 35 کلومیٹر دور شاہرگ کے علاقے سے آٹھ کان کن کو اغوا کرلیا گیا تھا جن کا تعلق شانگلہ سے تھا۔ ان کان کنوں کو 10 جنوری 2014 کو تاوان کی ادائیگی کے بعد رہا کردیا گیا تھا۔

جولائی 2014ء میں کوئٹہ کے شمال مشرق میں 35 کلو میٹر دور ڈیگاری میں کوئلہ کان میں سات کان کنوں کو فائرنگ کرکے ہلاک کردیا گیا اس واقعے کی ذمہ داری ایک کالعدم تنظیم نے لی تھی۔ چند روز بعد مچھ سے آٹھ کان کنوں کو اغواء کر لیا تھا۔

جنوری 2015 میں کوئٹہ سے 28 کومیٹر دور سورینج کی کوئلہ کان سے عملے اور کان کنوں سمیت سات افراد کو اغواء کرلیا گیا جن میں سے دو کو ابتدا ہی میں جب کہ دیگر پانچ کو بعد ازاں رہا کردیا گیا تھا۔تاہم یہ واضح نہیں ہوسکا کہ آیا ان مغویوں کو تاوان کی ادائیگی کے بعد رہائی ملی یا پھر ویسے ہی چھوڑ دیا گیا؟

اکیس نومبر 2021 کو ضلع ہرنائی سے 35 کلومیٹر دور شاہرگ میں مسلح افراد نے کوئلہ کان میں کام کرنے والے تین کان کنوں کو گولی مار کر قتل کردیا۔دیگر واقعات کی طرح اس واقعہ کا مقدمہ تو درج کرلیا گیا مگر آج تک اس میں کوئی پیش رفت نہ ہوسکی۔

گزشتہ ایک برس کے دوران بلوچستان کی کوئلہ کانوں سے مزدوروں کو عملے کے اغواء کے واقعات میں اچانک اضافہ دیکھنے میں آیا ہے۔

بلوچستان کے علاقے مچھ میں اس سال تین جنوری 2022ء کو رات گئے کوئلہ کان میں 11 کان کنوں کو قتل کردیا گیا تھا، واقعہ کی زمہ داری کالعدم تنظیم داعش نے قبول کی۔

بارہ جون 2022ء کو کوئٹہ کے نواحی علاقے سپین کاریز میں کوئلے کی کان میں کام کرنے والے ایک انجینئر اور تین کان کنوں کو اغوا کرکے مسلح افراد اپنے ساتھ لے گئے۔ اغواء ہونے والے افراد میں سے دو کا تعلق چکوال، دوسرے کا صوابی اور تیسرا مظفر آباد کا رہائشی تھا۔

بعد ازاں کوئلہ کان کے انجینئر شیر بہادر&nbsp; کی لاش ہرنائی کے قریبی علاقے سے ملی تھی جبکہ دیگر کان کنوں کو تاوان کی ادائیگی کے بعد رہائی مل گئی۔

<h2>سرکار کے وعدے اور دعوے</h2>

انسپکٹر جنرل بلوچستان پولیس عبد الخالق شیخ کہتے ہیں کہ کوئٹہ میں کوئلہ نکالنے کے 40 مقامات پر پولیس کو تعینات کیا گیا ہے اور دیگر علاقوں میں سیکورٹی اہلکاروں کی تعداد میں اضافہ کیا جائے گا۔

بلوچستان میں کان کنوں کی حادثات میں اموات اور اغواء برائے تاوان جیسے واقعات کوئی نئی بات نہیں مگر سالہا سال سے ان مسائل کی نشاندہی کے باوجود صوبائی حکومت کی جانب سے حل کے لیے کوئی سنجیدہ کوشش نہیں کی گئی۔ 
ایک سرکاری اعلامیہ کے مطابق وزیراعلی بلوچستان میر عبدالقدوس بزنجو کی جانب سے مائینز ڈیپارٹمنٹ اور ضلعی انتظامیہ کو کوئلہ کانوں میں سیکورٹی انتظامات کو بہتر بنانے کی ہدایت کی گئی ہے مگر اب تک زمینی حقائق ویسے کے ویسے ہیں۔

پاکستان کمیشن برائے انسانی حقوق کے ممبر حبیب طاہر ایڈوکیٹ بتاتے ہیں کہ بلوچستان میں کوئلہ مالکان اور ٹھیکیداروں سے بھتہ وصول کیا جاتا ہے اس کے ساتھ مزدوروں کو اغواء کیا جاتا ہے۔&quot;حال ہی میں مچھ کی کوئلہ سے چھ مزدوروں کو اغواء کیا گیا جن کو بعد میں تاوان کی ادائیگی کے بعد رہا کردیا گیا تاہم یہ معلوم نہ ہوسکا کہ ادا کی گئی تاوان کی رقم کتنی تھی&quot;۔

انہوں نے کہا کہ &#39;افسوس کی بات ہے کہ حکومت کی جانب سے سیکورٹی کے موثر اقدامات نہیں کئے جارہے اور کئی سالوں سے حکومت مزدوروں کو تحفظ فراہم کرنے میں ناکام رہی ہے&#39;۔

پاکستان مائینز فیڈریشن کے چیئرمین لالہ سلطان کہتے ہیں کہ انہوں نے بارہا اپنی تنظیم کے پلیٹ فارم سے اغوا کاروں سے اور تنظیموں سے درخواست کی ہے کہ وہ غریب مزدوروں کو اغوا نہ کریں جو اپنے پیاروں سے سیکٹروں میل دور روزی روٹی کے لیے یہاں آتے ہیں۔یہ مزدور آپ کا مسئلہ نہیں ہیں۔

&quot;ایک ریلیف ملا ہے کہ پہلے کان کنوں کو اغوا کرکے قتل کردیا جاتا تھا مگر اب یہ سلسلہ ختم ہوگیا ہے۔تاہم کوئلہ کانوں میں بھتے کے پیچھے کون ہیں اور یہ کیوں کیا جارہا ہے، ہمیں اس کا علم نہیں۔&quot; لالہ سلطان اس بات پر زور دیتے ہیں کہ مسئلے کا حل نکلنا چاہیے۔

کوئہ سے 230 کلو میٹر دور ضلع دکی سے تعلق رکھنے والے ظریف خان ںاصر نے تین سال قبل کوئلہ کان پانچ سالکے لیے ٹھیکے پر حاصل کی تھی۔

ان کے مطابق انہیں دو ماہ سے بھتے&nbsp; کے لیے دھمکیاں موصول ہو رہی ہیں جس کی وجہ سے انہوں نے کان میں کام بند کردیا ہے۔

&quot;مجھے اب تک 15 بار دھمکی مل چکی ہے کبھی مجھ سے ایک کروڑ تو کبھی 50 لاکھ روپے بھتہ دینے کا کہا جاتا ہے&quot;۔

ظریف نے بھتے کی دھمکی ملنے کے خلاف دکی پولیس اسٹیشن میں ایف آئی آر درج کروائی مگر آج تک کوئی شنوائی نہیں ہوئی۔

&quot;کام بند رہنے کی وجہ سے سات سے آٹھ کروڑ روپے مالیت کا کوئلہ نکالا نہیں جاسکا جس سے&nbsp; کروڑوں کا نقصان ہو رہا ہے&quot;۔

&quot;میری طرح دکی کے کئی دیگر ٹھیکداروں کو بھی بھتے کے لیے دھمکیاں موصول ہوئیں۔ہم نے بھتے کی دھمکیوں کے خلاف دکی میں قومی شاہراہ پر دھرنا بھی دیا مگر ہم اب بھی بھتہ مافیا کے رحم و کرم پر ہیں&quot;۔ 
دھرنے میں شریک نوراللہ نامی ٹھیکیدار نے کہا کہ &#39;ہم نے مجبوراً کوئلے سے بھرے ٹرک شاہراہ پر کھڑے کر کے احتجاج شروع کیا تاکہ انتظامیہ ہمارے مسلے کو سنجیدہ لے۔مسلسل درخواستیں دینے کے باوجود بھی دھمکیاں ملنے کا سلسلہ نہیں رکا، کیا ہم اپنی کوئلہ کانیں بند کردیں؟&#39;

ڈائریکٹر جنرل مائنز بلوچستان بشیر مستوئی کہتے ہیں کہ کانوں کی حفاظت کے لیے اقدامات اٹھائے جارہے ہیں۔

تاہم ان کے مطابق کوئلے کی کمپنیوں کی انتظامیہ کو خود سیکورٹی کا خیال رکھنا چاہیے۔

عاصم احمد خان

عاصم احمد کوئٹہ سے تعلق رکھتے ہیں اور 2015 سے صحافت کے شعبے سے وابستہ ہیں۔وہ ہیومن رائیٹس، ماحولیات، اکانومی اور انتہاپسندی پر رپورٹ کرتے ہیں۔

"ماسک نہیں تھے، مزدوروں نے ساتھیوں کو بچانے کے لیے منہ پر کپڑے باندھے اور زہریلی کان میں اتر گئے"

بلوچستان میں آٹے کا ایک اور بحران کیوں منڈلا رہا ہے؟

بلوچستان: غربت کی شرح باقی صوبوں سے دگنی، غربت کے خاتمے کے پروگرام میں حصہ آدھا

بلوچستان کی کم عمر دلہنیں: صوبائی اسمبلی عمر رسیدہ قانون بدلنے پر کیوں تیار نہیں؟

خاک ہو جائیں گے ہم تم کو خبر ہونے تک: کوئٹہ میں سیلاب متاثرین کی بحالی کا کام کب شروع ہو گا؟

بلوچستان کے کان کن زندگی یا روز گار میں سے ایک کا انتخاب کرنے پر کیوں مجبور ہیں؟