اِس مہینے کی 6 تاریخ کو بلوچستان کے وزیراعلیٰ عبدالقدوس بزنجو کے آبائی علاقے جھاؤ میں سکولوں کے بچوں نے احتجاجی جلوس نکالا۔ ان بچوں نے پلے کارڈ اٹھا رکھے تھے جن پر کچھ ایسے نعرے درج تھے:

&quot;ہمیں کتابیں چاہئیں&#39;&#39;

&quot;سکولوں میں بچے ہیں مگر کتابیں نہیں&quot;

&quot;نیا تعلیمی سال آ گیا مگر کتابیں نہیں آئیں&quot;

جھاؤ ضلع آواران سے 54 کلومیٹر کے فاصلے پر واقع ہے جہاں اس احتجاج میں طلبہ و طالبات کی بڑی تعداد نے شرکت کی۔ ان بچوں کا ایک ہی مطالبہ تھا کہ انہیں کتابوں کی بروقت فراہمی یقینی بنائی جائے۔

بلوچستان بھر میں نئے تعلیمی سال کا آغاز یکم مارچ سے ہوتا ہے۔&nbsp; 10 فروری کو محکمہ ثانوی تعلیم نے ایک نوٹیفکیشن کے ذریعے تمام 35 اضلاع کے ایجوکیشن&nbsp; افسروں کو احکامات جاری کیے کہ وہ طے شدہ شیڈول کے مطابق اپنے اپنے علاقوں کے سکولوں کے لیے کتابیں وصول کر لیں۔

اس شیڈول کے مطابق آواران کے سکولوں کے لیے کتابوں کی وصولی 21 فروری کو ہونا تھی لیکن یکم مارچ کو بیشتر سکولوں میں بچوں نے نئی جماعتوں میں قدم رکھا تو پتا چلا کہ ان کے لیے کتابیں تاحال نہیں پہنچ سکیں۔

محکمے کے ڈائریکٹر واحد شاکر بلوچ کا کہنا ہے کہ سکولوں میں کتابیں فراہم کرنا آواران کے ضلعی ایجوکیشن آفیسر کی ذمہ داری ہے جنہیں ڈائریکٹوریٹ سے کتابیں وصول کرکے سکولوں کو پہنچانا تھیں لیکن وہ اس ذمہ داری کو پورا کرنے میں سستی کے مرتکب ہوئے ہیں۔

گورنمنٹ ہائی سکول لعل بازار جھاؤ کے ہیڈماسٹر محمد ظریف کا کہنا ہے کہ نئے تعلیمی سال کے آغاز پر سکولوں میں کتابیں نہ ہونے کا یہ پہلا واقعہ نہیں۔ پچھلے سال بھی ایسا ہی ہوا تھا اور بہت کم تعداد میں کتابیں دی گئی تھیں۔ تیسری اور پانچویں جماعت کے لیے کوئی کتاب نہ پہنچ سکی جبکہ دیگر جماعتوں کے متعدد مضامین کی کتابیں بھی دستیاب نہیں تھیں۔ ان کا کہنا ہے کہ اس صورتحال کی زبانی اطلاع آواران کے ضلعی ایجوکیشن آفیسر کو دے دی گئی تھی لیکن انہوں نے بھی کچھ نہیں کیا۔

ظریف بتاتے ہیں کہ رواں سال انہوں نے 28 فروری کو کتابوں کی ڈیمانڈ ڈسٹرکٹ ایجوکیشن آفیسر کو تحریری طور پر ارسال کر دی تھی جس کے بعد امید تھی کہ اس سال کتابیں بروقت ملیں گی اور نئے تعلیمی سال کا آغاز بہتر طریقے سے ہو گا مگر ایسا نہیں ہو سکا۔

&quot;ہم نے امتحانی نتیجے کا اعلان کرکے بچوں کو بتایا تھا کہ یکم مارچ کو کتابیں تقسیم کریں گے۔ اب بچوں کا ایک ہی مطالبہ ہے کہ انہیں کتابیں فراہم کی جائیں اور انہیں مطمئن کرنے کے لیے ہمارے پاس کوئی جواب نہیں۔&quot;

محمد ظریف بتاتے ہیں&nbsp; کہ کتابوں کی عدم دستیابی کے سبب تعلیم میں بچوں کی دلچسپی کم ہوتی جا رہی ہے جس کا اندازہ سکول میں آنے والے طلبہ کی تعداد میں مسلسل کمی سے لگایا جا سکتا ہے۔

گورنمنٹ ہائی سکول لعل بازار میں آٹھویں جماعت کے طالب علم نواز احمد کتابیں نہ ملنے پر سخت پریشان ہیں۔ انہوں نے سجاگ کو بتایا کہ پچھلے سال انہیں اردو اور سائنس کی کتابیں نہیں ملی تھیں۔ انتظار کے بعد انہوں نے سائنس کی کتاب تو دوسرے سکول سے منگوا لی مگر اردو کی کتاب دستیاب نہ ہو پانے کے باعث وہ اس کے امتحان کی اچھی تیاری بھی نہ کر سکے۔

تاہم آواران کے ڈسٹرکٹ ایجوکیشن آفیسر محمد ابراہیم مہر کتابوں کی عدم دستیابی کی ذمہ داری بلوچستان ٹیکسٹ بک بورڈ کے سر ڈالتے ہیں۔ ان کا کہنا ہے کہ پچھلے تین سال سے انہیں ٹیکسٹ بک بورڈ کی طرف سے بروقت کتابیں نہیں مل رہیں۔ کہیں ریاضی، کہیں اردو تو کہیں انگریزی کی کتاب میسر نہیں ہے جس سے بچوں کی تعلیم بری طرح متاثر ہو رہی ہے۔

حکومتِ بلوچستان کتابوں کی مد میں ہر سال ایک مقررہ گرانٹ کالجوں اور سکولوں کے ڈائریکٹوریٹ کو جاری کرتی ہے۔ یہ رقم کتابوں کے لیے کاغذ کی خریداری، ان کی اشاعت اور جلد بندی وغیرہ پر خرچ ہوتی ہے۔ اس سال محکمہ خزانہ کی جانب سے ڈائریکٹر سکولز بلوچستان کو اس مد میں ایک ارب چھ کروڑ روپے جاری کیے گئے ہیں۔

چیئرمین ٹیکسٹ بک بورڈ بلوچستان یحییٰ مینگل نے سجاگ سے بات کرتے ہوئے وضاحت کی کہ ادارے کو محکمہ خزانہ کی طرف سے سالانہ گرانٹ تاخیر سے ملتی ہے جس کی وجہ سے کتابوں کی چھپائی کا کام لیٹ ہو جاتا ہے۔

&quot;رواں مالی سال کے لیے کتابوں کی اشاعت کا کام اکتوبر 2022 میں شروع کیا گیا تھا مگر اس کے لیے مختص رقم فروری 2023 میں جاری کی گئی جس کا اثر کتابوں کی چھپائی پر اور فراہمی پر بھی پڑا&quot;۔

یحییٰ مینگل کے مطابق ادارے کی جانب سے ڈائریکٹر ثانوی تعلیم کو 65 فیصد کتابیں فراہم کی جا چکی ہیں اور باقی 35 فیصد کی چھپائی کا کام جاری ہے۔ وہ یہ بھی کہتے ہیں کہ آواران کے سکولوں میں کتابیں نہ پہنچنے کا معاملہ ان کی سمجھ سے بالاتر ہے۔

محکمہ خزانہ کے ایک افسر نے نام ظاہر نہ کرنے کی شرط پر بتایا کہ کتابوں کی فراہمی میں تاخیر کے ذمہ دار ناشر ہیں۔ ٹیکسٹ بک بورڈ بلوچستان نے جس ناشر کے ساتھ معاہدہ کیا ہو اس پر لازم ہوتا ہے کہ وہ کتابیں بروقت شائع کر کے پہنچائے گا۔ لیکن ناشر کبھی وقت پر کتابیں نہیں چھاپتے جبکہ محکمہ خزانہ نے ناشروں کو معاوضے کی ادائیگی میں کبھی تاخیر نہیں کی۔

کتابیں جمنیزیم میں ڈھیر اور عمارت پر تالا: کیا تربت پبلک لائبریری پر قبضہ ہو چکا ہے؟

''کتابیں دی جائیں ہمیں پڑھنا ہے''، آواران میں سکول کے بچوں کا احتجاج

text

شیر محمد پچھلے ڈیڑھ ماہ سے اپنے بیوی بچوں کے ہمراہ ایک خیمہ بستی میں رہ رہے ہیں جہاں ان کی گزربسر حکومت اور مخیر افراد کی جانب سے دی جانے والی امداد پر ہو رہی ہے۔ انہیں معلوم نہیں کہ وہ کب اپنے گھر واپس جا سکیں گے اور وہاں جا کر کیسے نئے سرے سے اپنی زندگی شروع کر سکیں گے۔

ان کی خیمہ بستی بلوچستان کے جنوب مشرقی ساحلی ضلع لسبیلہ کے صدرمقام بیلہ سے تقریباً 17 کلومیٹر جنوب میں ٹیارو نامی جگہ پر بنائی گئی ہے جہاں سے ان کا گاؤں، نصیبانی، 15 کلو میٹر مزید جنوب مغرب میں واقع ہے۔

یہاں پہنچنے کی وجہ بیان کرتے ہوئے ان کا کہنا ہے کہ جولائی 2022 کے اواخر میں نصیبانی اور اس کے ارد گرد کئی روز بارش ہوتی رہی جس کے نتیجے میں اُس مہینے کی 25 تاریخ کو صبح سویرے ان کے گاؤں کے نواح میں بہنے والی پورالی ندی کے بہاؤ میں بہت اضافہ ہو گیا۔ تاہم مقامی لوگوں نے اسے معمول کی بات سمجھ کر نظرانداز کر دیا۔ ان کا خیال تھا کہ برسات کے موسم میں ایسا ہوتا ہی رہتا ہے۔ دراصل ان سب کو یقین تھا کہ جلد ہی ندی میں پانی کی سطح کم ہونے لگے گی۔&nbsp;

لیکن اس کے برعکس شام چھ بجے تک نصیبانی سے باہر جانے والے تمام راستے ندی سے نکلنے والے سیلابی پانی میں ڈوب چکے تھے۔ اس وقت تک گاؤں کے اندر بھی اتنا پانی گھس آیا تھا کہ اس کے ساڑھے تین سو کے قریب باشندوں کو اپنے گھربار چھوڑ کر ایک مقامی کمیونٹی ہال کی چھت پر پناہ لینا پڑ گئی تھی۔&nbsp; 
اگلے چار روز ان سب نے اسی چھت پر گزارے۔

سرکاری اعدادوشمار کے مطابق اس دوران پورالی ندی میں پانی کا بہاؤ دو لاکھ 18 ہزار مکعب میٹر فی سیکنڈ تھا جس کے باعث کسی امدادی ٹیم کا ان تک پہنچنا ناممکن تھا۔ اسی لیے، 45 سالہ شیر محمد کے مطابق، حکومتی اہل کار ان تک پانی کے بہاؤ میں کمی آنے کے بعد ہی پہنچ پائے۔&nbsp;

ان اہل کاروں نے بعدازاں انہیں ٹیارو کی خیمہ بستی میں منتقل کیا جہاں اپنے حالاتِ زندگی کے بارے میں ان کا کہنا ہے کہ &quot;سیلاب نے ہم سے سب کچھ چھین لیا اور بدلے میں ہمیں ہیضے کی وبا دے دی&quot;۔

نصیبانی کے جنوب مغرب میں واقع پٹوکی نامی گاؤں بھی پورالی ندی میں آنے والے سیلاب سے بری طرح متاثر ہوا۔ سیلابی پانی نے نہ صرف اس کے مکانات کو شدید نقصان پہنچایا بلکہ تین سو 65 ایکڑ پر کھڑی مقامی فصلیں بھی مکمل طور پر تباہ کر دیں۔

اس گاؤں سے تعلق رکھنے والے 34 سالہ کاشت کار محمد انور کہتے ہیں کہ سیلاب نے انہیں &quot;کوڑی کوڑی کا محتاج کر دیا ہے&quot;۔

وہ 18 افراد پر مشتمل ایک کنبے کے سربراہ ہیں اور اپنے علاقے کے بڑے زمینداروں میں شمار ہوتے ہیں۔ انہوں نے سوچ رکھا تھا کہ اس سال کپاس کی فصل بیچ کر وہ شمسی توانائی سے چلنے والے اپنے ٹیوب ویل کی قیمت ادا کریں گے جو انہوں نے پچھلے سال آٹھ لاکھ روپے ادھار لے کر لگایا تھا۔ ان کا یہ بھی خیال تھا قرض کی واپسی کے بعد بچ جانے والی رقم سے وہ ایک نیا گھر بنائیں گے۔

لیکن وہ کہتے ہیں سیلاب نے نہ صرف ان کی 45 ایکڑ رقبے پر کھڑی کپاس، گوارا اور جوار کی فصلیں تہس نہس کر دیں (جن کی مجموعی مالیت 38 لاکھ روپے تھی) بلکہ ان کا پرانا گھر بھی ملیا میٹ کر کے انہیں دربدر کر دیا۔&nbsp;

وہ کہتے ہیں کہ اگرچہ سیلابی پانی کے پٹوکی میں داخل ہونے سے پہلے ہی وہ اپنے اہل خانہ کو لے کر تحصیل بیلہ کے ایک محفوظ علاقے پیرانی گوٹھ میں اپنے بہنوئی کے ہاں منتقل ہو گئے تھے لیکن ان کے بڑے بھائی غلام حیدر اور ان کے ایک ماموں زاد اپنے گاؤں میں ہی رہ گئے تھے تاکہ وہ مویشیوں اور گھریلو سازوسامان کا خیال رکھ سکیں۔&nbsp;

تاہم غلام حیدر کہتے ہیں کہ وہ ایسا کچھ نہ کر سکے کیونکہ 25 جولائی کی شام تک پٹوکی میں پانی کی سطح اتنی بلند ہو چکی تھی کہ ان کا پورا گھر اس میں ڈوب گیا تھا۔ چنانچہ ان کے گھر کے کمرے اُن کے سامنے گرتے رہے اور وہ کچھ نہ کر پائے۔ یہاں تک کہ ان کی تین گائیں بھی پانی میں بہہ گئیں اور وہ انہیں بچا نہ سکے۔

ان کا کہنا ہے کہ انہیں خود بھی &quot;چار راتیں ایک قریبی ٹیلے پر گزارنا پڑیں&quot; جہاں نہ کھانے پینے کا انتظام تھا نہ سونے کا بندوبست۔ 29 جولائی کو سرکاری اہل کاروں نے انہیں اسی ٹیلے سے اٹھا کر ایک محفوظ مقام پر پہنچایا۔&nbsp;

<h2>غم کی فصل</h2>

تحصیل بیلہ میں کپاس کی کاشت مئی کے مہینے میں کی جاتی ہے جبکہ اگست کے آغاز میں اس کی چنائی شروع ہو جاتی ہے جو اکتوبر تک جاری رہتی ہے۔ 
مقامی اسسٹنٹ کمشنر حمزہ انجم کہتے ہیں کہ ہر سال کپاس کی چنائی کے موسم میں تقریباً 20 ہزار کھیت مزدور سندھ بھر سے اس تحصیل میں کام کرنے کے لیے آتے ہیں۔ ان کے مطابق ان مزدوروں کی ایک بڑی تعداد حالیہ سیلاب سے شدید متاثر ہوئی ہے کیونکہ کپاس کی فصل کی تباہی کی وجہ سے انہیں نہ تو روزگار کے مواقع مل رہے ہیں اور نہ ہی ان کے پاس رہنے سہنے کا کوئی ٹھکانہ ہے۔

پہلے تو وہ انہی زمینداروں کی زمین پر عارضی گھر بنا لیتے تھے جن کی فصل کی وہ چنائی کرتے تھے لیکن حمزہ انجم کہتے ہیں کہ اس سال سیلاب کی وجہ سے انہیں یہ سہولت کہیں دستیاب نہیں۔ اس لیے ان کی ایک بڑی تعداد سیلاب متاثرین کے لیے قائم کی گئی خیمہ بستیوں میں رہ رہی ہے جو تحصیل بیلہ میں جگہ جگہ دکھائی دیتی ہیں۔&nbsp;

دوسری طرف بیلہ شہر میں قائم کپاس کی ایک جننگ فیکٹری کے مالک ونود کمار کہتے ہیں کہ سیلاب سے ہونے والے نقصانات کا منفی اثر صرف سندھی مزدوروں اور مقامی زمینداروں پر ہی نہیں پڑا بلکہ ان جیسے فیکٹری مالکان بھی اس سے شدید متاثر ہوئے ہیں۔ ان کا کہنا ہے کہ کپاس کی مقامی فصل کی موجودہ پیداوار معمول سے تین چوتھائی کم رہ گئی ہے جس کی وجہ سے جننگ فیکٹریوں میں پہلے کی نسبت کہیں کم کام ہو رہا ہے۔ &quot;اس کے نتیجے میں بیلہ سے روزانہ کراچی کپاس لے جانے والی گاڑیوں کی تعداد صرف نو رہ گئی ہے حالانکہ عام حالات میں ان کی تعداد 35 سے کم نہیں ہوتی تھی&quot;۔&nbsp;

بلوچستان کے محکمہ زراعت کی طرف سے بیلہ میں متعین کیے گئے ڈپٹی ڈائریکٹر محمد شفیع تباہی کے ان تخمینوں کی تصدیق کرتے ہوئے کہتے ہیں کہ کپاس کی مقامی فصل کو اس سال جتنا شدید نقصان پہنچا ہے اتنا انہوں نے پہلے کبھی نہیں دیکھا۔ اس کی شدت کی وضاحت کرتے ہوئے ان کا کہنا ہے کہ &quot; تحصیل بیلہ میں سیلاب سے تقریباً 60 ہزار ایکڑ زرعی اراضی متاثر ہوئی ہے جس میں سے 33 ہزار ایکڑ پر صرف کپاس کی فصل لگی ہوئی تھی&quot;۔ ان کے اندازے کے مطابق تباہ ہونے والی کپاس تحصیل بیلہ میں بوئی گئی تمام فصل کا 90 فیصد تھی۔ &nbsp;

<h2>کیا تھمے گا بہاؤ پانی کا؟</h2>

بیلہ سے چار کلومیٹر مشرق کی جانب واقع میارکہ گوٹھ میں حاجی محمد رحیم کی 26 ایکڑ زرعی زمین پر لگی کپاس اور بھنڈی کی فصل برباد ہو گئی ہے۔ لیکن ان کا کہنا ہے کہ اس بربادی کا سبب سیلاب یا اس کی شدت نہیں بلکہ پورالی ندی پر کچھ سال پہلے بنائی گئی تعمیرات اور تنصیبات ہیں۔&nbsp;

یہ ندی ضلع لسبیلہ میں دریائے ہنگول کے بعد پانی کی دوسری بڑی قدرتی گزرگاہ ہے جس میں بہت سے چھوٹے بڑے ندی نالوں کا پانی جمع ہوتا ہے۔ یہ بیلہ شہر کے شمال میں ضلع خضدار سے نکلتی ہے اور تحصیل بیلہ میں سے گزرتی ہوئی جنوب میں سمندر کی طرف چلی جاتی ہے۔ جس علاقے سے اس کا گزر ہوتا ہے اسے اس کی مناسبت سے پورالی بیسن کہا جاتا ہے۔&nbsp;

بلوچستان کی صوبائی حکومت نے 2017 میں عالمی بنک کے تعاون سے اس بیسن میں آب پاشی کا ایک نیا نظام متعارف کرایا جس پر 25 کروڑ 37 لاکھ 20 ہزار ڈالر لاگت آئی اور جس کا مقصد پورالی ندی اور اس کے قریب ہی بہنے والی ناڑی ندی کے آبی وسائل کو &quot;ایک مربوط طریقے سے منظم کرنا اور ترقی دینا&quot; تھا۔

اس نظام کے تحت پورالی ندی کے کنارے دو فٹ اونچے کر کے اس کا پانی دو چھوٹی ندیوں، نرگ اور ہنجری، میں منتقل کیا گیا۔ پانی کی اس منتقلی کو کنٹرول کرنے کے لیے تینوں ندیوں کے سنگم پر دو گیٹ بنائے گئے اور دونوں چھوٹی ندیوں کی چوڑائی کو کم کر کے انہیں گہرا کر دیا گیا۔ &nbsp;

ڈان اخبار میں نومبر 2016 میں چھپنے والے سکندر بروہی نامی تحقیق کار کے ایک مضمون کے مطابق اس نظام کا مقصد 35 ہزار پانچ سو 83 ایکڑ اراضی اور تین ہزار دو سو 20 مکانات کو ندی برد ہونے سے بچانا تھا۔ اس کا دوسرا مقصد چار ہزار پانچ سو کاشت کار خاندانوں کو آب پاشی کے لیے پانی فراہم کرنا اور 16 دیہات کو پینے کا پانی باہم پہنچانا تھا۔&nbsp;

لیکن مقامی لوگوں کو شکایت ہے کہ یہ نظام متعارف کرانے سے پہلے ان کی رائے سنی ہی نہیں گئی۔ حاجی محمد رحیم کا کہنا ہے کہ &#39;&#39;جب اس پر کام شروع ہوا تو ہم نے اس کا معائنہ کر کے کہہ دیا تھا کہ اس کی وجہ سے ہمارے علاقے میں سیلاب کا خطرہ بڑھ جائے گا&quot;۔ وہ کہتے ہیں کہ &quot;ہم نے ضلعی انتظامیہ کو بھی ان خدشات سے آگاہ کیا لیکن ہماری بات پر کسی نے توجہ ہی نہ دی&quot;۔

نرگ ندی کے علاقے میں رہنے والے کسانوں کی ایک تنظیم کے سربراہ عبدالجبار رونجھا بھی کہتے ہیں کہ &quot;جب یہ سرکاری منصوبہ منظرِعام پر آیا تو مقامی زمینداروں نے اس کے منصوبہ سازوں کو اس کے ممکنہ خطرات کے بارے میں خبردار &nbsp;کر دیا تھا&quot;۔ تاہم حکومت نے ان خطرات کو یہ کہہ کر مسترد کر دیا کہ اس کے انجینئر مقامی لوگوں سے بہتر علم رکھتے ہیں۔&nbsp;

وہ کہتے ہیں کہ حالیہ سیلاب نے بالآخر ان انجینئروں کو غلط ثابت کر دیا ہے کیونکہ، ان کے بقول، &quot;بیلہ کے جنوب میں واقع درجنوں دیہات شدید بارشوں کی وجہ سے نہیں بلکہ پورالی ندی کا حفاظتی بند ٹوٹنے کی وجہ سے زیرِ آب آئے&quot;۔ ان کے مطابق اس بند کے ٹوٹنے کی بنیادی وجہ بھی یہ تھی کہ اس ندی کے پانی کو چھوٹی ندیوں میں منتقل کرنے کے لیے بنائی گئی تعمیرات اور تنصیبات نے سیلابی پانی کا رخ موڑ دیا تھا۔&nbsp;

مقامی وکیل اور سماجی کارکن محمد عاصم لاسی نے اسی مسئلے کو بنیاد بناتے ہوئے بلوچستان ہائی کورٹ میں ایک درخواست دی ہے جس میں انہوں نے کہا ہے کہ پورالی ندی پر بنائے گئے نئے آبی نظام کے ناقص ڈیزائن کی وجہ سے ہی اس کے سیلابی پانی کا رخ انسانی آبادی کی جانب مڑا۔ انہوں نے عدالت سے یہ استدعا بھی کی ہے کہ اس نظام کے تحت کی گئی تعمیرات کو گرا کر ندی کے بہاؤ کا پرانا قدرتی طریقہ بحال کیا جائے اور اسے تبدیل کرنے کے ذمہ دار سرکاری حکام اور انجینئروں کے خلاف قانونی کارروائی کی جائے۔

بیلہ میں متعین صوبائی محکمہ آبپاشی کے سب ڈویژنل آفیسر عاشق علی جاموٹ بھی ان عوامی شکایات سے متفق ہیں۔ وہ کہتے ہیں کہ 2017 میں بنائے گئے آبی نظام پر کام کرنے والے انجینئر &quot;پورالی ندی کا مزاج ہی نہیں سمجھ پائے&quot; کیونکہ، ان کے بقول، &quot;اگر ندی کے راستے میں گیٹ نہ لگے ہوتے تو اس کا پانی اپنے قدرتی راستے پر ہی آگے بڑھتا رہتا اور ارگرد کے دیہات کا رخ نہ کرتا&quot;۔&nbsp;

ان کا یہ بھی کہنا ہے کہ &quot;مستقبل میں مقامی دیہات کو سیلاب سے بچانے کے لیے اس ندی کے &quot;قدرتی بہاؤ کی راہ میں حائل رکاوٹیں ختم کر کے اسے اس کی پرانی حالت میں لے جانا بہت ضروری ہے&quot;۔

اس قدر کثرت آفات کہاں تھی پہلے:  'تونسہ کے نہری نظام نے رودکوہی نالوں کا بہاؤ تبدیل کر کے انہیں رحمت سے زحمت بنا دیا ہے'۔

پاتے نہیں جب راہ تو چڑھ جاتے ہیں نالے: لسبیلہ میں آب پاشی کا سرکاری منصوبہ کیسے تباہ کن سیلاب کا سبب بنا۔

نو عمر راشد حسین پڑھ لکھ کر ڈاکٹر بننا چاہتے ہیں لیکن وہ کھیتی باڑی میں اپنے والد کا ہاتھ بٹانے پر مجبور ہیں اور یہ سوچ کر ذہنی تناؤ کا شکار رہتے ہیں کہ کیا وہ کبھی اعلیٰ تعلیم حاصل کر پائیں گے۔&nbsp;

وہ بلوچستان کے جنوبی ضلع آواران کے قصبے جھل جھاؤ میں رہتے ہیں جو ضلعی صدر مقام آواران سے 63 کلومیٹر جنوب مشرق میں واقع ہے۔ جب 2020 میں انہوں نے میٹرک کا امتحان پاس کیا تو صوبائی حکومت نے اعلان کیا کہ وہ اور ان کے ساتھ میٹرک کرنے والے دوسرے مقامی لڑکے اس وقت تک جھل جھاؤ کے گورنمنٹ گرلز ہائر سیکنڈری سکول میں انٹرمیڈیٹ کی تعلیم حاصل کر سکتے ہیں جب تک ان کے علاقے میں تعمیر کیا گیا بوائز انٹر کالج فعال نہیں ہو جاتا۔&nbsp;

لیکن وہ کہتے ہیں کہ چار کمروں پر مشتمل اس سکول میں داخلہ لینے کے بعد انہیں پتہ چلا کہ اس میں نہ تو انٹرمیڈیٹ کی تعلیم دینے کے لیے اساتذہ موجود تھے اور نہ ہی اس میں سائنس کی پڑھائی کے لیے درکار لیبارٹری وغیرہ کا انتظام کیا گیا تھا۔ چنانچہ انہوں نے اسے چھوڑ دیا اور کچھ دوستوں کے مشورے پر چھ سو کلومیٹر شمال میں واقع صوبائی صدرمقام کوئٹہ کے ایک کالج میں داخل ہو گئے۔&nbsp;

لیکن، ان کے مطابق، اس دوران ان کے والد کو پیاز کی فصل میں نقصان اٹھانا پڑا جس کی وجہ سے ان کے خاندان کے مالی حالات اتنے خراب ہو گئے کہ ان کے لیے کالج کے اخراجات اٹھانا ممکن نہ رہا۔ چنانچہ وہ تعلیم ترک کرکے گھر لوٹ آئے اور اپنے والد کے ساتھ کھیتوں میں کام کرنے لگے۔&nbsp;

تاہم انہوں نے اپنا ڈاکٹر بننے کا خواب ترک نہیں کیا اس لیے وہ ابھی بھی فارغ وقت میں اپنی کتابیں پڑھتے رہتے ہیں۔ اس دوران انہیں کوئی مشکل پیش آئے تو وہ فون پر اپنے اُن دوستوں سے رہنمائی لے لیتے ہیں جو ابھی تک کوئٹہ میں پڑھ رہے ہیں۔ انہیں یہ بھی امید ہے کہ اس سال ان کی کپاس کی فصل اچھی ہو گی اور ان کے والد انہیں پڑھائی کے لیے دوبارہ کوئٹہ بھیجنے کے قابل ہو جائیں گے۔

تاہم ان کے سابقہ ہم جماعت عبدالخالق کو یہ امید نہیں کہ وہ کبھی اپنی تعلیم دوبارہ شروع کر پائیں گے۔ راشد حسین کی طرح انہوں نے بھی 2020 میں میٹرک کا امتحان پاس کرنے کے بعد گورنمنٹ گرلز ہائر سیکنڈری سکول میں داخلہ لیا تھا لیکن اس میں اساتذہ کے نہ ہونے کی وجہ سے وہ پڑھائی چھوڑ کر مستری کا کام کرنے لگے۔ ان کے والد پیر جان کہتے ہیں کہ &#39;&#39;میرے بیٹے کی عمر محنت مزدوری کرنے کی نہیں ہے۔ میں نے سوچا بھی تھا کہ اسے اعلیٰ تعلیم دلواؤں گا لیکن میرے پاس اس مقصد کے لیے اسے کسی دوسرے شہر بھیجنے کے وسائل نہیں ہیں&quot;۔&nbsp;

<h2>تعمیر میں مضمر خرابی</h2>

پانچ سال پہلے کی جانے والی سرکاری مردم شماری کے مطابق جھل جھاؤ کی آبادی تقریباً 40 ہزار ہے جس کی تعلیمی ضروریات کے پیش نظر صوبائی حکومت نے 2014 میں یہاں لڑکوں کے لیے ایک انٹر کالج بنانے کا فیصلہ کیا۔&nbsp;

اگلے دو سال میں اس کالج کی عمارت تو کھڑی ہو گئی لیکن اساتذہ کی تقرری نہ ہونے کی وجہ سے اس میں تدریسی عمل شروع نہ ہو سکا۔ اس حوالے سے کیے جانے والے پرزور عوامی مطالبات کے نتیجے میں پچھلے سال بالآخر حکومت نے آواران کے نواحی ضلع لسبیلہ کے علاقے وندر میں قائم ایک ڈگری کالج کے لیکچرار سراج احمد کو بوائز انٹر کالج جھل جھاؤ کے پرنسپل کا اضافی عہدہ دے کر انہیں کہا کہ وہ اسے فعال بنائیں۔&nbsp;

جب وہ کالج پہنچے تو انہوں نے اس کی عمارت کو کافی خستہ حالت میں پایا۔ ان کا کہنا ہے کہ &quot;اس کی چاردیواری موجود ہی نہیں تھی، مرکزی ہال کا فرش بیٹھ چکا تھا، کمروں کے داخلی دروازے غائب تھے اور بیت الخلا پوری طرح بنائے ہی نہیں گئے تھے۔ اسی طرح اس میں بجلی کی وائرنگ بھی نہیں کی گئی تھی&quot;۔ لیکن وہ کہتے ہیں کہ &quot;جنوری 2022 میں جب میں نے باقی ماندہ تعمیراتی کام، فرنیچر اور وائرنگ کے لئے پیسے مانگے تو صوبائی ڈائریکٹوریٹ آف ایجوکیشن سے جواب آیا کہ کالج میں ابھی تدریسی عمل شروع نہیں ہوا اس لیے یہ پیسے فراہم نہیں کیے جا سکتے&quot;۔

صوبائی محکمہ تعلیم کے جوائنٹ ڈائریکٹر کالجز باھو خان کھوسہ اس صورتِ حال کی ذمہ داری کالج میں اساتذہ کی عدم موجودگی پر ڈالتے ہیں۔ ان کا کہنا ہے کہ اس میں تدریسی عمل کے آغاز کا سرکاری اعلامیہ جاری ہونے تک حکومت اس کی مرمت اور تزئین کے لیے درکار پیسے نہیں دے سکتی لیکن، ان کے مطابق، یہ اعلامیہ اس وقت تک جاری نہیں ہو گا جب تک اساتذہ کی تعیناتی نہیں ہو جاتی۔

<h2>اسامیاں، بھرتیاں، منظوریاں</h2>

اس سال 65 طلبہ نے بوائز انٹر کالج جھل جھاؤ میں داخلہ تو لے لیا ہے لیکن انہیں تعلیم دینے کے لیے صرف اس کے پرنسپل اور انگریزی کے ایک لیکچرار ہی موجود ہیں۔ سراج احمد کہتے ہیں کہ دسمبر 2021 میں جب صوبائی سیکرٹری کالجز نے صرف ایک لیکچرار کی تعیناتی کی منظوری دی تو &quot;میں نے ٹیلی فون پر ڈائریکٹر کالجز اور جوائنٹ ڈائریکٹر کالجز دونوں کو بتایا تھا کہ کالج چلانے کے لیے کم از کم پانچ لیکچرار چاہئیں&quot;۔

تاہم ڈائریکٹر کالجز سراج کاکڑ سمجھتے ہیں کہ یہ مسئلہ جلد ہی حل ہو جائے گا کیونکہ، ان کے بقول، &quot;جب طلبا کے داخلے مکمل ہو جائیں گے تو متعلقہ محکموں پر تدریسی عملے کی تعیناتی کے لیے عوامی دباؤ بڑھے گا جس کے نتیجے میں کالج میں اساتذہ کی خالی اسامیاں بھی پُر ہو جائیں گی&quot;۔&nbsp;

آواران کے ڈسٹرکٹ ایجوکیشن آفیسر ریاض احمد رند ان سے متفق نہیں۔ وہ کہتے ہیں کالج میں تقرریوں کے لیے اساتذہ کا انتخاب بلوچستان پبلک سروس کمیشن کا کام ہے لیکن اس نے ابھی تک ان پر &quot;بھرتی کا اشتہار بھی جاری نہیں کیا&quot;۔ &nbsp;

صوبائی محکمہ ہائر ایجوکیشن کے سیکرٹری حافظ عبدالماجد بھی اساتذہ کی تعیناتی نہ ہونے کی یہی&nbsp;توجیہہ پیش کرتے ہیں۔ ان کا کہنا ہے کہ اس وقت صرف جھل جھاؤ میں ہی نہیں بلکہ بلوچستان بھر میں مجموعی طور پر کالج لیکچرار کی تین سو 80 اسامیاں خالی پڑی ہیں لیکن بلوچستان پبلک سروس کمیشن ان کے لیے موزوں امیدواروں کا انتخاب نہیں کر پا رہا۔&nbsp;

ان کا مزید کہنا ہے کہ ان کے محکمے نے یہ معاملہ صوبائی کابینہ کے سامنے بھی رکھا ہے تاکہ وہ یا تو ان اسامیوں پر عارضی تقرریاں کرنے کی اجازت دے یا صوبائی پبلک سروس کمیشن کے علاقائی دفاتر قائم کرنے کی منظوری دے تاکہ ان تعیناتیوں کے عمل میں تیزی لائی جا سکے۔ لیکن، ان کے مطابق، &quot;تاحال اس معاملے میں کوئی پیش رفت نہیں ہو سکی&quot;۔

شبیر رخشانی

''کتابیں دی جائیں ہمیں پڑھنا ہے''، آواران میں سکول کے بچوں کا احتجاج

پاتے نہیں جب راہ تو چڑھ جاتے ہیں نالے: لسبیلہ میں آب پاشی کا سرکاری منصوبہ کیسے تباہ کن سیلاب کا سبب بنا۔

خواب ہی خواب کب تلک دیکھوں: اعلیٰ تعلیم سے محروم آواران کے نوجوان کسانوں اور مزدوروں کے طور پر کام کرنے پر مجبور۔

Lok Sujag