ایک 22 سالہ ڈرائیور کوڑے کرکٹ سے بھرا ٹرک لے کر لاہور کے شمال مشرقی نواح میں واقع گاؤں لکھوڈیر کو جا رہا ہے۔ وہ اپنا ٹرک وہاں کوڑا تلف کرنے کے لیے مخصوص کردہ ایک سرکاری جگہ پر خالی کرے گا جو 131 ایکڑ پر پھیلی ہوئی ہے۔

یہ اُس ڈرائیور کا روزانہ کا معمول ہے۔ وہ لاہور کے مختلف حصوں سے کوڑا اٹھاتا ہے اور اسے تلف کرنے کے لیے لکھوڈیر&nbsp; لے جاتا ہے۔ ہر روز وہ اپنے کام کے دوران اس جگہ کے کئی پھیرے لگاتا ہے جبکہ ہر پھیرے میں اسے 45 منٹ لگتے ہیں۔

26 اپریل 2022 کے دن اسے شدید تھکاوٹ محسوس ہو رہی ہے اور وہ ہر پھیرے کے دوران ایک دو وقفے لے رہا ہے۔ اس کی وجہ یہ ہے کہ اس دن درجہ حرارت 40 ڈگری سینٹی گریڈ تک جا پہنچا ہے کیونکہ لاہور دوماہ سے بھی کم عرصے میں گرمی کی دوسری شدید لہر کا سامنا کر رہا ہے۔

ٹرک خالی کرتے ہوئے ڈرائیور کو اپنے اردگرد پھیلے کوڑے کرکٹ کی سڑاند بالکل محسوس نہیں ہوتی۔ حقیقت یہ ہے کہ یہ بدبو تیز ہونے کے باوجود صحت کے لیے زیادہ خطرناک نہیں ہے۔

اس کے مقابلے میں یہاں سے نکلنے والی ایک بے بو گیس کہیں زیادہ خطرناک ہے۔ اس کا نام میتھین ہے اور اس کا شمار ان گیسوں میں ہوتا ہے جن کی ماحول میں موجودگی حرارت کو اسی طرح روک لیتی ہے جس طرح بے موسمی سبزیاں اور پودے اگانے کے لیے بنایا گیا گرین ہاؤس حرارت اور روشنی کو اپنے اندر روکے رکھتا ہے۔ فضا میں جمع ہو جانے والی یہ حرارت موسمیاتی تبدیلی پر منفی طور سے اثر انداز ہوتی ہے۔ ماہرین کا کہنا ہے کہ اسی کے اثرات کی وجہ سے اس سال لاہور میں بہار کے موسم میں بھی اتنی ہی حدت تھی جتنی عام طور پر شدید گرمی کے مہینوں میں ہوتی ہے۔&nbsp;

میتھین کھانا بنانے اور گھروں کو گرم رکھنے کے لیے استعمال ہونے والی قدرتی گیس کا بھی ایک بڑا جزو ہے اور لاہور یونیورسٹی آف مینجمنٹ سائنسز (لمز) میں ماحولیاتی معاشیات پڑھانے والے سانول نسیم کے مطابق، &#39;&#39;موسمیاتی تبدیلی پر گرین ہاؤس گیسوں کے 20 سالہ اثرات کے حوالے سے یہ کاربن ڈائی آکسائیڈ کی نسبت 80 فیصد زیادہ خطرناک ہے&#39;&#39;۔ ان کا کہنا ہے کہ کوڑا تلف کرنے کی جگہیں اور مال مویشی ماحول میں میتھین کے اخراج کے دو بڑے ذرائع ہیں۔ اپنی بات کی وضاحت کرتے ہوئے وہ کہتے ہیں کہ &#39;&#39;جب کوڑا تلف کرنے والی جگہوں پر نامیاتی مادہ آکسیجن کی غیر موجودگی میں گلتا سڑتا ہے تو اس سے خارج ہونے والی میتھین اسی مادے کی تہوں کے نیچے جمع ہوتی رہتی ہے اور بالآخر باہر نکل کر ماحول کا حصہ بن جاتی ہے۔&nbsp;

ماحول کے لیے نقصان دہ گیسوں سے متعلق معلومات جمع کرنے اور ان کا تجزیہ کرنے والی کینیڈا کی کمپنی جی ایچ جی سیٹ (GHGSat) کی جانب سے دنیا بھر میں میتھین کے اخراج سے متعلق جاری کردہ اعدادوشمار دیکھ کر اندازہ ہوتا ہے کہ تقریباً 20 فیصد میتھین کوڑا تلف کرنے کی جگہوں پر بنتی ہے۔

دوسری جانب اس مسئلے کے حوالے سے دنیا بھر کی حکومتوں، نجی شعبے کے اداروں، ترقیاتی بینکوں اور غیرسرکاری اداروں کی طرف سے بنایا گیا گلوبل میتھین انیشی ایٹو نامی اشتراک کہتا ہے کہ 2010 میں دنیا بھر سے ماحول کا حصہ بننے والی میتھین گیس کا صرف 11 فیصد کوڑا کرکٹ تلف کرنے کے مقامات سے خارج ہوا تھا۔ اس سے اندازہ ہوتا ہے کہ ماحول کو نقصان پہنچانے میں کوڑے کا کردار کس تیزی سے بڑھتا جا رہا ہے۔&nbsp;

<h2>مہلک کُوڑا</h2>

لکھوڈیر میں کوڑا کرکٹ تلف کرنے کے لیے مخصوص کی گئی جگہ سرکاری ادارے نیشنل انجینئرنگ سروسز پاکستان (نیسپاک) نے ترک کمپنی Cevka کے ماہرین کی مشاورت سے بنائی تھی۔ اس پر کام کا آغاز اپریل 2016 میں ہوا تھا اور اسے بنائے جانے کا مقصد یہ تھا کہ لاہور بھر سے جمع ہونے والے ایسے تمام کوڑے کو ایک جگہ جمع کیا جائے جسے نہ تو دوبارہ قابل استعمال بنایا جا سکتا ہو، نہ اسے کھاد کے طور پر استعمال کیا جا سکتا ہو اور نہ ہی کسی اور پائیدار انداز میں سنبھالا جا سکتا ہو۔

نیدرلینڈز انسٹیٹیوٹ فار سپیس ریسرچ کے محقق بریم ماساکرز جیسے ماہرین کو خدشہ ہے کہ اس جگہ اکٹھا کیا جانے والا کوڑا کرکٹ لاہور کی فضا میں بڑے پیمانے پر میتھین کے اخراج کا بڑا ذریعہ بن رہا ہے۔ ان کے مطابق اس گیس کے کئی بادل وقتاً فوقتاً شہر کی فضا پر چھائے ہوئے دیکھے گئے ہیں۔&nbsp;

بریم ماساکرز نے یہ انکشاف گزشتہ سال ستمبر میں بلومبرگ نیوز ایجنسی سے بات کرتے ہوئے کیا تھا۔ اس سے چند ہی روز پہلے یورپی خلائی ادارے کی جانب سے خلا میں بھیجے گئے سینٹینل 5پی نامی مصنوعی سیارے نے 6 اگست 2021 کو لاہور پر میتھین کا بادل دیکھا تھا۔&nbsp;

حکومتوں، کاروباری کمپنیوں اور سرمایہ کاری کی عالمی منڈیوں کو توانائی اور ماحولیات سے متعلق ارضی تجزیہ فراہم کرنے والی بین الاقوامی کمپنی کے روس ایس اے ایس (Kayrros SAS) کی ویب سائٹ کے مطابق اس بادل سے میتھین کے اخراج کی شرح اندازاً ایک سو 26 میٹرک ٹن فی گھنٹہ یا ایک لاکھ 26 ہزار کلوگرام فی گھنٹہ تھی۔&nbsp;

اس کمپنی کے جمع کردہ اعدادوشمار سے یہ بھی ظاہر ہوتا ہےکہ یہ اپنی نوعیت کا واحد واقعہ نہیں تھا بلکہ 2019 اور 2020 میں لاہور کی فضا میں کم از کم 15 مرتبہ میتھین کے بادل دیکھے گئے تھے۔ ٹروپومی (TROPOMI) نامی مصنوعی سیارے کے جمع کردہ اعداوشمار کی رو سے ایسے ایک بادل سے میتھین کے اخراج کی شرح دو سو پانچ میٹرک ٹن فی گھنٹہ تھی۔

تاہم کے روس ایس اے ایس کے لیے کام کرنے والے ماہر ماحولیات کلیمنٹ گیرون کہتے ہیں کہ یہ بات یقین سے نہیں کہی جا سکتی کہ لکھوڈیر میں واقع کوڑا تلف کرنے کی جگہ ہی میتھین کے ان بادلوں کے وجود میں آنے کا واحد سبب ہے۔ ان کا کہنا ہے کہ &#39;&#39;یہ بادل لاہور اور اس کے گردونواح میں کئی دیگر وجوہات کی بنا پر بھی بن سکتے ہیں جن میں کوڑا کرکٹ تلف کرنے والی جگہوں کے علاوہ پانی اور فضلے کو ٹھکانے لگانے کی جگہیں، کوئلے کے ڈھیر، گیس کی تقسیم کا نظام اور زرعی سرگرمیاں بھی شامل ہو سکتی ہیں۔ تاہم ان تمام ذرائع سے خارج ہونے والی میتھین بالآخر اکٹھی ہو کر ایک بادل کی صورت اختیار کر لیتی ہے۔&#39;&#39;

اس حوالے سے جی ایچ جی سیٹ کے زیرانتظام کام کرنے والے آئرس (IRIS) نامی مصنوعی سیارے کی جمع کردہ شہادتیں زیادہ واضح معلوم ہوتی ہیں۔ اس سیارے نے اکتوبر 2020 میں لکھوڈیر میں تلف شدہ کوڑے کے ڈھیر کے عین اوپر میتھین کے بادل منڈلاتے دیکھے تھے۔&nbsp;

کوڑے کی تلفی کے لیے مخصوص کی گئی اس جگہ کا انتظام لاہور ویسٹ مینجمنٹ کمپنی (ایل ڈبلیو ایم سی) کے پاس ہے جو یہ تسلیم کرتی ہے کہ اس مقام پر اکٹھی ہونے والی میتھین ہی ممکنہ طور پر فضا میں جا کر یہ بادل بنا رہی ہے۔ ایل ڈبلیو ایم سی کے پراجیکٹ مینیجر محمد سعد کہتے ہیں کہ اس کی دو ممکنہ وجوہات ہو سکتی ہیں۔ پہلی یہ کہ اس جگہ پہلے دس سال میں جتنا کوڑا پھینکا جانا تھا اس سے تین گنا زیادہ پھینکا جا رہا ہے۔ دوسری یہ کہ مون سون کی بارشوں میں اس کوڑے کی میتھین میں تبدیلی کے لیے ایک سازگار ماحول بن جاتا ہے۔

ان کے مطابق چونکہ یہاں گنجائش سے زیادہ کوڑا ڈالا جا رہا ہے اس لیے میتھین کو محدود مقدار میں خارج کرنے کے لیے بنائے گئے سوراخ بند ہو جاتے ہیں۔ یوں گیس کوڑے کی کئی تہوں کے نیچے جمع ہوتی رہتی ہے لیکن اسے باہر نکلنے کا راستہ نہیں ملتا۔ نتیجتاً وقتاً فوقتاً وہ تمام رکاوٹیں توڑ کر بڑے مرغولوں کی شکل میں فضا میں پھٹ پڑتی ہے۔

ان کا یہ بھی کہنا ہے کہ ایل ڈبلیو ایم سی اس مسئلے سے آگاہ ہے اور میتھین کو بادلوں کی شکل اختیار کرنے سے روکنے کے لیے ہر ممکن کوشش کر رہی ہے۔ اس سلسلے میں ستمبر 2021 میں ایک اہم قدم اٹھایا گیا اور لکھوڈیر میں کوڑا تلف کرنے کی جگہ پر میتھین کے اخراج کے لیے بنائے گئے سوراخوں کی صفائی کر کے انہیں کھول دیا گیا تھا۔&nbsp;

تاہم آئرس کے جمع کردہ اعدادوشمار سے ظاہر ہوتا ہے کہ شاید یہ سوراخ دوبارہ بند ہو گئے ہیں کیونکہ صرف اپریل 2022 میں ہی اس جگہ کے اوپر میتھین کے تین بادل دیکھے گئے تھے۔ ان میں سے 15 اپریل کو دکھائی دینے والا بادل ہر گھنٹے میں تقریباً 4.2 میٹرک ٹن (یا چار ہزار ایک سو 95 کلوگرام) میتھین خارج کر رہا تھا۔&nbsp;

ایل ڈبلیو ایم سی میں سینئر مینیجر کمیونیکیشن کے عہدے پر کام کرنے والے عمر چوہدری کہتے ہیں کہ ان کی کمپنی لکھو ڈیر میں پیدا ہونے والی میتھین کو جلا کر ختم کرنے کے منصوبے بنا رہی ہے۔ اس طرح یہ گیس &#39;&#39;کم خطرناک&#39;&#39; ہو جائے گی۔ سائنسی شواہد بتاتے ہیں کہ یہ ایک کارآمد طریقہ ہو سکتا ہے۔&nbsp;

تاہم جب تک کمپنی ایسے کسی منصوبے پر کام شروع کرے گی اس وقت تک لکھوڈیر میں میتھین کے اخراج کے لیے بنائے جانے والے سوراخ کھلے رہنے کی صورت میں بہت کم مقدار میں یہ گیس خارج ہوتی رہے گی اور اگر یہ سوراخ بند ہو گئے تو یہ بڑے بادلوں کی صورت میں باہر آ کر ماحول کو بڑے پیمانے پر آلودہ کرتی رہے گی۔ اس کا یہی اخراج ایک اہم وجہ ہے کہ جی ایچ جی سیٹ کی جانب سے 2021 میں جاری کردہ مختلف شہروں کی ایک فہرست کے مطابق لاہور سب سے زیادہ میتھین خارج کرنے والے پانچ بڑے شہری مقامات میں شامل ہو چکا ہے۔

لاہور پر زہریلے بادلوں کے سائے: 'لکھوڈیر میں کوڑے کی تلفی بڑے پیمانے پر میتھین کے اخراج کا باعث بن رہی ہے'۔

text

لاہور کے ایکسپو سنٹر کے اندر اور باہر 10 جولائی 2021 کو دوپہر کے وقت بڑی تعداد میں لوگ جمع ہیں۔ وہ کورونا وائرس سے تحفظ کے لئے ویکسین لگوانے کے لیے یہاں آئے ہیں۔&nbsp;

سنٹر کے وسیع و عریض ہالوں میں چینی، یورپی اور امریکی ساختہ ویکسین لگانے کے لیے الگ الگ جگہیں مخصوص ہیں۔ یورپی اور امریکی ویکسین لگوانے کے منتظر &nbsp;بیشتر لوگ نوجوان ہیں جبکہ جن جگہوں پر چینی ویکسین لگائی جا رہی ہیں وہاں دکھائی دینے والے لوگوں کی اکثریت درمیانی عمر والے اور معمر افراد پر مشتمل ہے۔ ان تمام لوگوں کے پاس ان کے کمپیوٹرائزڈ قومی شناختی کارڈ (سی این آئی سی) ہیں کیونکہ ویکسین لگوانے والے کے لئے ان کارڈوں کی موجودگی لازمی ہے۔&nbsp;

ایکسپو سنٹر میں ویکسین لگانے والے عملے کے بعض ارکان دعویٰ کرتے ہیں کہ انہوں نے ایسے لوگوں کی ایک چھوٹی -- مگر غیرمعینہ &ndash; تعداد کو بھی ویکسین لگائی ہے جن کے پاس شناختی کارڈ نہیں تھے۔ تاہم ان میں سے ایک اہل کار کا کہنا ہے کہ &quot;ہم نہ تو ان کے نام ویکسین لگوانے والوں کے ریکارڈ میں درج کر سکتے ہیں اور نہ ہی انہیں ویکسین لگوانے کا سرکاری سرٹیفکیٹ ملے گا&quot;۔&nbsp;

اگر بے ضابطہ طور پر ویکسین لگوانے والے ان لوگوں کو کبھی بیرون ملک جانے یا کوئی ایسا کام کرنے کی ضرورت پڑے جس کے لیے مذکورہ بالا سرٹیفکیٹ درکار ہوتا ہے تو ان کے ساتھ ویکسین نہ لگوانے والوں کی طرح کا ہی سلوک کیا جائے گا۔ چنانچہ ان کےپاس صرف یہی یقین دہانی بچتی ہے کہ انہیں کورونا وائرس کے خلاف تحفظ حاصل ہے۔

لوگوں کی اس چھوٹی سی تعداد کو چھوڑ کر ایسے تمام لوگ جن کے پاس قومی شناختی کارڈ نہیں ہیں انہیں کم از کم مستقبل قریب میں کورونا وائرس سے تحفظ کی یہ یقین دہانی بھی نہیں مل سکے گی۔&nbsp;

لاہور کے جوہر ٹاؤن میں شوالہ روڈ پر بنی ایک کچی بستی کے بیشتر رہائشیوں کا شمار بھی انہی لوگوں میں ہوتا ہے۔ اپنی جھونپڑیوں کے درمیان کھلی جگہ پر چارپائیوں پر بیٹھے اور گپ شپ لگاتے یہ لوگ ایکسپو سنٹر میں بڑے پیمانے پر جاری کورونا ویکسینیشن مہم کے بارے میں کچھ زیادہ نہیں جانتے حالانکہ یہ کام ان کے گھروں سے ایک کلومیٹر سے بھی کم فاصلے پر ہو رہا ہے۔

اس کچی بستی میں رہنے والی عورتوں کی بڑی تعداد قریبی گھروں میں گھریلو ملازموں کے طور پر کام کرتی ہے۔ ان میں سلمیٰ سعید بھی شامل ہیں جن کا تعلق لاہور سے 77 کلومیٹر جنوب مشرق میں واقع ضلع ننکانہ صاحب سے ہے۔ ان کی عمر 40 سال سے کچھ زیادہ ہے اور وہ چار بچوں کی ماں ہیں۔ چھ افراد پر مشتمل ان کے گھرانے میں صرف ان کے شوہر کے پاس قومی شناختی کارڈ ہے۔ سلمیٰ کو جب بھی کوئی سرکاری سہولت (جیسا کہ اپنے بچوں کو پولیو کے قطرے پلانا) حاصل کرنے کے لیے اپنی شہریت کا ثبوت دینا ہوتا ہے تو وہ اپنے شوہر کا شناختی کارڈ دکھا دیتی ہیں۔ ان کے مطابق &quot;بیشتر مواقع پر اسی سے کام چل جاتا ہے&quot;۔&nbsp;

اس بستی میں رہنے والی تقریباً تمام عورتیں ایسا ہی کرتی ہیں۔

درمیانی عمر کی کریمہ بی بی اگرچہ ان کے ساتھ نہیں رہتیں لیکن ان کی زندگی ان سے کچھ زیادہ مختلف نہیں ہے۔وہ بیس سال سے شادی شدہ ہیں اور دو بچوں کی ماں ہیں۔ زبان میں نقص ہونے کے باعث انہیں بولنے میں دشواری کا سامنا ہے۔ جب وہ پریشان ہوتی ہیں تو یہ دشواری اور بھی بڑھ جاتی ہے۔ 
وہ ہر صبح نو بجے جوہر ٹاؤن کے ایک گھر میں کام کرنے پہنچ جاتی ہیں۔ گھر کے مالکان کے لیے ناشتہ تیار کرتے ہوئے وہ کہتی ہیں کہ &quot;بہت عرصہ پہلے جب میرے والد زندہ تھے تو اس وقت میرے پاس شناختی کارڈ ہوا کرتا تھا&quot;۔ اب ان کے پاس اپنے پرانے شناختی کارڈ کی کوئی نقل بھی موجود نہیں کیونکہ، ان کے مطابق، &quot;ایک مرتبہ میرا بھائی میرا شناختی کارڈ لے گیا تھا لیکن اس نے پھر اسے کبھی واپس نہیں کیا&quot;۔

اب جبکہ حکومت لوگوں کو کورونا وائرس کی پانچویں لہر کے بارے میں خبردار کر رہی ہے تو کریمہ کے لیے خود کو اس سے محفوظ رکھنا ممکن نہیں۔ وہ جس گھر میں کام کرتی ہیں اس کے ایک فرد کا کہنا ہے کہ &quot;اگرچہ وہ ویکسین لگوانے سے خوفزدہ ہیں لیکن اس کے باوجود ہم نے انہیں ویکسین لگوانے کے لیے تیار کر لینا تھا کیونکہ وہ ہمارے گھر میں گزشتہ 10 سال سے کام کر رہی ہیں۔ مگر اب ہم ایسا نہیں کر سکتے کیونکہ ان کے پاس شناختی کارڈ ہی نہیں ہے&quot;۔

لاہور کی فیروزپور روڈ کے جنوبی سرے کے قریب بے ترتیبی سے پھیلی ایک بہت بڑی کچی بستی میں رہنے والی بہت سی عورتیں بھی ویکسین نہیں لگوا سکتیں کیونکہ ان کے پاس بھی شناختی کارڈ نہیں ہیں۔

یہ بستی شہر کی دیگر کچی بستیوں سے مختلف ہے کیونکہ یہ کسی امیر علاقے کے قرب و جوار میں نہیں بلکہ کاچھا نامی غریب گاؤں کے قریب واقع ہے۔ اس کی گنجان آباد گلیوں میں کوڑے کے ڈھیر اور گندے پانی کے جوہڑ جا بجا دکھائی دیتے ہیں۔ یہاں گھر چھوٹے چھوٹے ہیں مگر ان میں سے ہر ایک میں بہت سے لوگ رہتے ہیں۔ اسی لیے ان کے لیے ایک دوسرے سے جسمانی فاصلہ رکھنا ممکن نہیں ہے۔ یہاں کے بڑے، بوڑھے اور بچے سبھی ایسے کمروں میں رہتے ہیں جہاں ایک مشترکہ احاطہ تو ہوتا ہے لیکن کسی کے لیے الگ رہنے کی کوئی جگہ نہیں ہوتی۔&nbsp;

اس بستی کی رہائشی شمع بی بی اپنے دو چھوٹے بچوں کو نہلانے میں مصروف ہیں۔ ان کے شوہر کوڑا کرکٹ جمع کرنے کا کام کرتے ہیں۔ اگرچہ ان کی آمدنی بہت کم ہے تاہم، علاقے کی دیگر عورتوں کے برعکس، وہ اپنی بیوی کو کام پر نہیں بھیجتے۔

شمع کہتی ہیں کہ ایک مرتبہ انہوں نے شناختی کارڈ بنوانے کی کوشش کی لیکن وہ اس میں ناکام رہیں۔ ان کا کہنا ہے کہ 2018 کے انتخابات سے پہلے نیشنل ڈیٹا بیس اینڈ رجسٹریشن اتھارٹی (نادرا) کی جانب سے ان کی بستی میں لوگوں کے شناختی کارڈ بنانے کے لیے ایک موبائل وین بھیجی گئی۔ اس موقع پر انہوں نے بھی اس سہولت سے فائدہ اٹھانے کی کوشش کی تاہم وین میں موجود اہلکاروں نے انہیں بتایا کہ ان کا شناختی کارڈ لاہور میں نہیں بن سکتا۔ انہیں اس سلسلے میں اپنے آبائی ضلعے ننکانہ صاحب کے نادرا آفس سے رابطہ کرنے کو کہا گیا۔

لیکن ان کے لیے شناختی کارڈ بنوانے کے لیے ننکانہ صاحب جانا ممکن نہیں تھا کیونکہ، ان کے مطابق، اس کام پر نا صرف پیسے خرچ ہوتے بلکہ ان کے شوہر کے پاس انہیں وہاں لے جانے کا وقت بھی نہیں تھا کیونکہ انہیں قریباً روزانہ کام پر جانا پڑتا ہے۔

<h2>ویکسین سب کے لیے</h2>

الیکشن کمیشن آف پاکستان کے جمع کیے گئے اعداد و شمار &nbsp;کے مطابق، سلمیٰ، کریمہ اور شمع کی طرح پاکستان میں 18 سال سے زیادہ عمر کی ایک کروڑ 23 لاکھ سے زیادہ خواتین کے پاس قومی شناختی کارڈ نہیں ہے۔ یہ تمام خواتین اس وقت تک کورونا وائرس کی ویکسین لگوانے سے محروم رہیں گی جب تک حکومت اپنی پالیسی تبدیل نہیں کرتی اور ویکسین لگوانے کے لیے سرکاری طور پر تصدیق شدہ شناختی دستاویزات دکھانے کی شرط ختم نہیں کر دیتی۔

لاہور کی ایبٹ روڈ پرواقع نادرا کے دفتر میں کام کرنے والے حکام کا کہنا ہے کہ اس صورتحال کو تبدیل کرنا ان کے لیے بہت مشکل ہے حالانکہ ان کا یہ بھی دعویٰ ہے کہ ان کا محکمہ زیادہ سے زیادہ خواتین کے شناختی کارڈ بنانے کی متعدد کوششیں کر رہا ہے۔ان میں سے ایک اہل کار کے مطابق &quot;نادرا رجسٹریشن مراکز &nbsp;سے دور دراز &nbsp;واقع علاقوں اور کچی بستیوں میں موبائل وینیں بھیجی جا رہی ہیں تاکہ وہاں رہنے والے لوگ بالعموم اور خواتین بالخصوص اپنے گھر کی دہلیز پر اپنے شناختی کارڈ حاصل کر سکیں&quot;۔ تاہم ان کا کہنا ہے کہ جو خواتین شناختی کارڈ بنوانے کے لیے ان موبائل گاڑیوں سے رجوع کرتی ہیں ان کےپاس یا تو تمام ضروری دستاویزات نہیں ہوتیں یا ان کے شوہر انہیں شناختی کارڈ بنوانے میں مدد نہیں دیتے۔&nbsp;

ان کا یہ بھی خیال ہے کہ شناختی کارڈ کا نہ ہونا خواتین کی طرف سے ویکسین نہ لگوانے کی واحد وجہ نہیں کیونکہ، ان کے بقول، &quot;بہت سے لوگ ویسے ہی ویکسین لگوانے سے ہچکچاتے ہیں۔ اگر ہم ان کے شناختی کارڈ فوری طور پر بنا دیں تو تب بھی وہ کسی نہ کسی وجہ کی بنا پر ویکسین لگوانے کے لیے تیار نہیں ہوں گے&quot;۔&nbsp;

تاہم ماہرینِ صحت کا حکومت سے اصرار ہے کہ حکومت جتنی جلد ممکن ہو سکے پاکستان کے تمام بالغ مردوں اور خواتین کی ویکسینیشن کو یقینی بنائی جائے خواہ ان کے پاس شناختی کارڈ ہوں یا نہ ہوں۔ پنجاب یونیورسٹی کے استاد اور صحتِ عامہ کے ماہر نعمان علی چوہدری اس بات سے اتفاق کرتے ہیں کہ حکومت کو ان تمام لوگوں کو &nbsp;وبا سے محفوظ کرنے کا کوئی منصوبہ بنانا چاہیے جن کے پاس شناختی کارڈ نہیں۔

اسی طرح لاہور میں ڈاکٹروں کی تنظیم پاکستان اکیڈمی آف فیملی فزیشنز کے سربراہ ڈاکٹر طارق میاں کا کہنا ہے کہ اگر حکومت پوری ملکی آبادی میں کورونا وائرس کے خلاف اجتماعی مدافعت پید اکرنا چاہتی ہے تو اسے یقینی بنانے کے لیے اسے کم ازکم 60 فیصد آبادی کو فوری طور پر ویکسین لگانا ہوگی لیکن اگر &quot;ایک کروڑ 23 لاکھ بالغ خواتین کو ویکسین نہ لگائی گئی تو اس سے یقینی طور پر بہت بڑا طبی خطرہ جنم لے سکتا ہے&quot;۔

سِول سوسائٹی کے کارکنوں کی نظر میں شناختی کارڈ سے محروم خواتین کو ویکسین لگانے میں ناکامی محض ایک طبی مسئلہ نہیں بلکہ صنفی انصاف کا معاملہ بھی ہے۔ لاہور میں خواتین کے حقوق کی تنظیم چلانے والی بشریٰ خالق کہتی ہیں کہ &quot;اگر حکومت ان خواتین کے لیے ویکسین کا اہتمام نہیں کرتی تو یہ ان سے صنفی بنیاد پر امتیازی سلوک ہو گا&quot;۔ ان کے مطابق &quot;ان خواتین کو کووڈ۔19 کے خلاف ویکسین لگوانے کے لیے مزید 10 سال تک انتظار نہیں کروایا جا سکتا لہٰذا حکومت کو چاہیے کہ انہیں کوئی عارضی شناخت فراہم کر کے انہیں ویکسین لگائے &quot;۔&nbsp;

لیکن یوں لگتا ہے کہ اس معاملے میں حکومت کی ترجیحات کچھ اور ہیں۔ صوبائی وزیرِ صحت ڈاکٹر یاسمین راشد کے سٹاف افسر ایم شاہد انور کے بقول &quot;جب شناختی کارڈ رکھنے والے سب لوگوں کو ویکسین لگا دی جائے گی تبھی ہم ان لوگوں کے بارے میں سوچیں گے جن کے پاس شناختی کارڈ نہیں ہیں&quot;۔

یہ رپورٹ لوک سجاگ نے پہلی دفعہ 23 جولائی 2021&nbsp;کو اپنی پرانی ویب سائٹ پر شائع کی تھی۔

پاکستان میں خواتین ووٹروں کی تعداد مردوں سے کم کیوں ہے؟

ایک کروڑ سے زیادہ عورتوں کو ویکسین نہیں لگے گی

Data collected by the World Bank shows that 9.1 out of every 100,000 Pakistanis committed suicide in 2017. A year later, this ratio was 8.9 for every 100,000 people. In fact, the same trend c

The life and times of a suicide survivor in Pakistan: How the failure to die makes living a hell

سنی سائمن 26 ستمبر 2019 کو لاہور میں داتا دربار کے قریبی علاقے ٹیکسالی چوک میں ایک ہوٹل کی دیوار سے خطرناک طریقے سے لٹکا ہوا تھا اور چیخ چیخ کر کہہ رہا تھا کہ وہ خود کو مار ڈالے گا۔ دیوار کے نیچے لوگوں کا مجمع لگا ہوا تھا جو اس سے التجا کر رہے تھے کہ وہ اس اقدام سے باز رہے۔ بالآخر منت سماجت کر کے انہوں نے اسے دیوار سے زندہ سلامت اتار ہی لیا۔&nbsp;

یہ تفصیلات اُس ابتدائی رپورٹ (ایف آئی آر) میں موجود ہیں جو داتا دربار تھانے نے تعزیراتِ پاکستان کی دفعہ 325 کے تحت سنی کے خلاف درج کی۔ اس دفعہ کے مطابق &quot;خودکشی کی کوشش کرنے یا اس جرم کا ارتکاب کرنے والا فرد ایک سال قید یا جرمانے یا بیک وقت دونوں سزاؤں کا مستوجب ہے&quot;۔&nbsp;

پولیس نے سنی کو اس ایف آئی آر کے تحت گرفتار کر کے اگلے دن لاہور کے ایک سینئر سول جج کی عدالت میں پیش کیا جس نے تیس ہزار روپے کے ضمانتی مچلکے جمع کرانے کی شرط پر اسے رہا کرنے کا حکم جاری کیا۔ لیکن ایسا لگتا ہے کہ وہ اپنی ضمانت کے لیے درکار رقم کا انتظام کرنے میں ناکام رہا کیونکہ، اسے جاننے والے لوگوں کے مطابق، وہ بیروزگار اور نشے کا عادی تھا اور اس کے لیے یہ رقم اکٹھا کرنا ممکن نہیں تھا۔ اس لیے اسے جیل بھیج دیا گیا۔

اسی دوران سرکاری وکیل ثمر عباس نے 27 دسمبر 2019 کو سنی کے مقدمے کا جائزہ لے کر ایک رپورٹ تیار کی جس میں انہوں نے لکھا کہ &quot;استغاثہ کے پاس چشم دید گواہوں کے بیانات موجود ہیں اور ملزم کا جرم ثابت کرنے کے لیے دیگر مواد بھی موجود ہے&quot;۔ اس بنا پر انہوں نے تجویز کیا کہ اس کے خلاف اقدام خودکشی کا مقدمہ چلایا جانا چاہیے۔&nbsp;

تاہم جنوری 2020 میں جب سنی پر فرد جرم عائد کی گئی تو اس نے اپنا جرم قبول کرنے سے انکار کرتے ہوئے اپنے اوپر لگے ہوئے الزامات کا دفاع کرنے کا فیصلہ کیا۔ اس کے خلاف مقدمہ فروری 2020 میں شروع ہوا اور اکتوبر 2020 تک جاری رہا جب عدالت نے کہا کہ &#39;&#39;ملزم کے اعترافی بیان کی روشنی میں اس کے خلاف تعزیراتِ پاکستان کی دفعہ 325 کے تحت جرم ثابت ہو گیا ہے&quot;۔&nbsp;

اس فیصلے کے تحت اس کو ایک سال قید اور 10 ہزار روپے جرمانے کی سزا سنائی گئی۔

اس کے بعد کوئی نہیں جانتا کہ سنی کے ساتھ کیا ہوا۔ داتا دربار تھانے کی پولیس کو بھی معلوم نہیں کہ اس نے کتنا وقت جیل کی سلاخوں کے پیچھے گزارا اور اسے کب رہا کیا گیا۔ اب وہ لاہور کے علاقے قلعہ گجر سنگھ کی بڈھن شاہ نامی آبادی میں بھی نہیں رہتا جہاں وہ اپنے مقدمے کی سماعت کے دوران مقیم تھا۔ اس کے رشتہ داروں اور ہمسایوں میں سے بھی کوئی نہیں جانتا کہ وہ کہاں چلا گیا ہے۔&nbsp;

محمد وسیم کے حالاتِ زندگی بھی سنی سے مختلف نہیں۔ خودکشی کی ناکام کوشش کے نتیجے میں اس کے مسائل بھی پہلے سے کہیں زیادہ بڑھ گئے ہیں۔

اس کی ابتلا کا آغاز دسمبر 2018 میں اس وقت ہوا جب اس نے 31 سال کی عمر میں شمالی لاہور میں واقع راوی روڈ کے علاقے میں اپنے گھر کے قریب بریانی کی دکان کھولی۔ دکان کرائے پر لینے اور اس کے لیے فرنیچر اور دیگر سامان خریدنے کے لیے اس نے اپنے رشتہ داروں اور دوستوں سے ڈھائی لاکھ روپے قرض لیا تھا۔ تاہم اس کا کاروبار چل نہ سکا جس کے بعد اسے کام جاری رکھنے اور گھر کا خرچ چلانے کے لیے مزید رقم ادھار لینا پڑی اور یوں اس کا قرض بڑھتے بڑھتے ساڑھے پانچ لاکھ روپے تک پہنچ گیا۔ &nbsp;

جلد ہی قرض خواہوں نے اس کے گھر کے چکر لگانا شروع کر دیے تاکہ اس سے اپنی رقم کی واپسی کا تقاضا کر سکیں۔ ان میں بعض لوگ اسے دھمکیاں بھی دیتے کہ اگر اس نے ان کی رقم جلد واپس نہ کی تو اچھا نہیں ہو گا۔ اس دوران جب وسیم کے لیے گھر چلانا اور اپنے دو نوعمر بیٹوں کی بنیادی ضروریات پوری کرنا مشکل ہو گیا تو اسے ذہنی دباؤ نے آ لیا۔&nbsp;

انہی حالات میں مارچ 2021 میں اس کا اپنی اہلیہ سے جھگڑا ہو گیا جس کے بعد وہ بچوں کو ساتھ لے کر میکے چلی گئی۔

اسی مہینے کی 19 تاریخ کو وسیم نے خودکشی کرنے کے لیے اپنے پیٹ میں پستول سے گولی مار لی جس کے بعد اسے فوری طور پر ہسپتال پہنچایا گیا۔ وہاں موجود ڈاکٹروں نے اس کا علاج کرنے کے ساتھ ساتھ اسے ایک سوال نامہ پُر کرنے کو کہا جس کا مقصد یہ اندازہ لگانا تھا کہ آیا وہ ذہنی طور پر صحت مند ہے یا نہیں۔&nbsp;

اس کے خلاف عدالتی کارروائی مئی 2021 میں شروع ہوئی اور وہ پانچ بار عدالت میں پیش بھی ہوا۔ ان میں سے ایک پیشی کے دوران اس کا بیان ریکارڈ کیا گیا جس میں اس نے اعتراف کیا کہ اس نے خودکشی کرنے کی کوشش کی تھی۔&nbsp;

اس کے خلاف مقدمے کی کارروائی تاحال جاری ہے تاہم اس کے بھائی ندیم بشیر کا کہنا ہے کہ انہوں نے مزید پیشیوں پر جانا چھوڑ دیا ہے کیونکہ اس کارروائی پر اٹھنے والی مالی اخراجات کے باعث ان کے خاندان پر قرض بڑھتا جا رہا ہے۔ وہ کہتے ہیں کہ &quot;وسیم کی ضمانت قبل از گرفتاری کے لیے جمع کرائے گئے پچاس ہزار روپے کے ضمانتی مچلکوں، مقدمے کے لیے وکیل کا انتظام کرنے اور ایک کے بعد دوسری پیشی پر عدالت جانے کے لیے درکار سفری اخراجات کی وجہ سے ان پر پہلے ہی برداشت سے زیادہ بوجھ پڑ گیا ہے&quot;۔&nbsp;

<h2>موت میں زندگی کا کھٹکا&nbsp;</h2>

عالمی بینک کے جمع کردہ اعدادوشمار کے مطابق 2017 میں پاکستان میں ہر ایک لاکھ لوگوں میں سے 9.1 نے خودکشی کی۔ اس سے اگلے سال یہ شرح 8.9 فیصد رہی۔ درحقیقت پچھلی دو دہائیاں سے کم و بیش یہی صورتحال چل رہی ہے۔ پاکستان جیسے کم اور متوسط آمدنی والے دیگر ممالک میں بھی تقریباً یہی رجحان دیکھنے کو ملتا ہے۔

تاہم کچھ عرصہ پہلے تک کراچی میں کام کرنے والی ماہر نفسیات عطیہ نقوی کا کہنا ہے کہ ملک میں خودکشی اور اس کی کوشش کرنے جیسے واقعات کی تعداد کہیں زیادہ ہو سکتی ہے۔ ان کے مطابق ان کی اصل تعداد اس لیے سامنے نہیں آتی کہ ان میں بیشتر کی پولیس یا دیگر سرکاری محکموں کو اطلاع ہی نہیں دی جاتی۔ وہ کہتی ہیں کہ &quot;جب کوئی فرد خودکشی کر لیتا ہے یا ایسی کوئی کوشش کرتا ہے تو اس سے جڑی بدنامی کے باعث اس کے اہلخانہ اس واقعے کو چھپانے کی کوشش کرتے ہیں&quot;۔&nbsp;

پاکستان میں خودکشی کا رجحان ہر علاقے میں ایک سا بھی نہیں ہے۔ سندھ کے جنوب مشرقی اضلاع عمر کوٹ اور تھرپارکر میں اس کی شرح ملک کے تمام دوسرے ضلعوں سے زیادہ ہے۔ بعض غیرسرکاری اداروں کے مطابق 2021 میں عمرکوٹ میں 98 افراد نے خودکشی کی جبکہ تھرپارکر میں 79 افراد نے اپنے ہاتھوں اپنی زندگی کا خاتمہ کیا۔&nbsp;

اگرچہ پنجاب کے 37 اضلاع میں خودکشی کے سالانہ واقعات کی تعداد اس سے کافی کم ہے لیکن ان کی مجموعی تعداد کو نظرانداز نہیں کیا جا سکتا۔ صوبائی پراسیکیوشن ڈیپارٹمنٹ کے مطابق 2021 میں پنجاب کے تمام اضلاع میں خودکشی کی ناکام کوشش کرنے والے چار سو 57 افراد کے خلاف مقدمات درج کیے گئے۔ ان میں سے 85 مقدمات میں لوگوں کو &#39;مجرم&#39; ٹھہرایا گیا اور انہیں سزائیں دی گئیں۔ 21 واقعات میں ملزموں کو بری کر دیا گیا جبکہ تین سو 51 مقدمات تاحال زیرسماعت ہیں۔&nbsp;

لاہور سے تعلق رکھنے والے وکیل اور انسانی حقوق کے فروغ کے لیے کام کرنے والے بین الاقوامی ادارے ہیومن رائٹس واچ کے پاکستان میں نمائندے سروپ اعجاز ان اعدادوشمار سے بہت ناخوش ہیں۔ ان کا کہنا ہے کہ جو لوگ خود اپنی جان لینے کے در پے ہوتے ہیں ان کے خلاف مقدمہ چلانا اور انہیں سزا دینا ایک مجہول سی بات ہے۔ انہیں &quot;یہ بات سمجھ میں نہیں آتی کہ سزا کے ذریعے ایسے افراد کی ذہنی حالت کو مزید خراب کر کے انہیں خودکشی سے باز کیسے رکھا جا سکتا ہے&quot;۔ وہ مزید سوال کرتے ہیں کہ &quot;اگر ایسے لوگوں کو جیل بھیجا جائے اور وہ وہاں دوبارہ خودکشی کی کوشش کریں تو پھر کیا ہو گا؟ اس کی ذمہ داری کس پر آئے گی؟&quot;&nbsp;

عطیہ نقوی بھی سمجھتی ہیں کہ خودکشی کی کوشش کرنے والوں کے خلاف قانونی کارروائی کرنے اور انہیں سزا دینے سے دوسرے لوگوں کو خودکشی کرنے سے نہیں روکا جا سکتا۔ ان کے بقول اگر ایسا ہو رہا ہوتا تو پاکستان میں ہر سال ایک لاکھ افراد میں سے نو کے لگ بھگ لوگ خودکشی نہ کر رہے ہوتے۔&nbsp;

<h2>مذہب اور موت</h2>

پاکستان پیپلزپارٹی سے تعلق رکھنے والے سینیٹ کے رکن کریم احمد خواجہ نے 2017 میں سینیٹ میں نجی حیثیت میں ایک بل پیش کیا۔ اس کے مقاصد بیان کرتے ہوئے انہوں نے لکھا کہ &#39;&#39;اپنی جان لینے کی کوشش کرنا فرد کی مایوسی کا آخری درجہ ہوتا ہے۔ فلاحی ریاست کی ذمہ داری ہے کہ وہ پہلے سے مشکلات میں مبتلا شہریوں کو مجرم قرار دینے کے بجائے ان کی مدد کرے&#39;&#39;۔ انہوں نے یہ بھی کہا کہ جو لوگ خودکشی کی کوشش کرتے ہیں ان کے لیے &quot;بحالی مراکز&quot; قائم کیے جانے چاہئیں۔

سینیٹ نے ستمبر 2017 میں ان کا پیش کردہ یہ بل منظور کر لیا لیکن قومی اسمبلی سے اس کی منظوری ہونے سے پہلے ہی 2018 کے وسط میں اس وقت کی قومی اسمبلی کی مدت پوری ہو گئی۔&nbsp;

پاکستان تحریک انصاف (پی ٹی آئی) سے وابستہ رکن قومی اسمبلی ریاض فتیانہ نے 2019 میں ایک نیا نجی بل پیش کیا جس کا مقصد بھی دفعہ 325 کی اصلاح کرنا تھا۔ تاہم اس پر نہ تو اب تک کوئی پارلیمانی بحث ہوئی ہے اور نہ ہی اس کی منظوری دی جا سکی ہے۔ &nbsp;

اس بل میں اس بات پر خاص طور پر زور دیا گیا ہے کہ یہ دفعہ ذہنی طور پر بیمار افراد کے لیے غیرمنصفانہ ہے۔

ریاض فتیانہ نے اس کے دیباچے میں لکھا ہے کہ &quot;نفسیاتی بیماریوں میں مبتلا افراد عموماً خود کو غیرمحفوظ سمجھتے ہیں اور انہیں محسوس ہوتا ہے کہ دنیا نے انہیں اکیلا چھوڑ دیا ہے اور نظرانداز کر دیا ہے۔ اس لیے ایسے افراد اپنے قریبی لوگوں سے مدد حاصل کرنے کے بجائے خودکشی میں اپنی نجات ڈھونڈنے کی کوشش کرتے ہیں&quot;۔&nbsp;

تاہم لاہور سے تعلق رکھنے والے انسانی حقوق کے وکیل اسد جمال کا کہنا ہے کہ ذہنی بیماریوں میں مبتلا افراد کے اقدامات کو مجرمانہ دائرے سے باہر رکھنے کے لیے کسی نئے قانونی اقدام کی ضرورت نہیں کیونکہ تعزیراتِ پاکستان کی دفعہ 84 کے تحت اقدام خودکشی تو ایک جانب ذہنی مسائل سے دوچار افراد کے خلاف کوئی بھی قانونی کارروائی نہیں ہو سکتی اور نہ ہی انہیں کوئی سزا دی جا سکتی ہے۔&nbsp;

جب پاکستان پیپلزپارٹی سے تعلق رکھنے والے سینیٹ کے ایک اور رکن شہادت اعوان نے 27 ستمبر 2021 کو اسی موضوع پر سینیٹ میں ایک بل پیش کیا تو بظاہر ان کے پیش نظر یہی بات تھی۔ اسی لیے انہوں نے براہِ راست دفعہ 325 کو مکمل طور پر ختم کرنے کا مطالبہ کیا۔&nbsp;

لیکن ان کے اسی مطالبے کی وجہ سے 27 دسمبر 2021 کو اس بل پر بحث کے دوران سینیٹ کے بعض ارکان نے ان پر زور دیا کہ وہ اسے واپس لے لیں۔ جمعیت علماء اسلام فضل الرحمان سے تعلق رکھنے والے سینیٹر کامران مرتضیٰ نے تو اسے &quot;نامناسب&quot; قرار دے دیا۔ ان کے مطابق، خودکشی کی کوشش کرنا قابل سزا جرم ہونا چاہیے کیونکہ اسلام میں اس کی ممانعت کی گئی ہے۔&nbsp;

اس عدم اتفاق کے نتیجے میں سینیٹ کے چیئرمین صادق سنجرانی نے اس ہدایت کے ساتھ یہ بل سینیٹ کی قائمہ کمیٹی برائے داخلہ کو بھیج دیا کہ اس معاملے میں اسلامی نظریاتی کونسل کی رائے بھی لی جائے۔ کمیٹی نے اس ہدایت کی تعمیل کی۔&nbsp;

6 جنوری 2022 کو اسلامی نظریاتی کونسل نے ایک خط کے ذریعے اپنی رائے دیتے ہوئے کہا کہ &#39;&#39;خودکشی کرنے کی کوشش قابل سزا ہی ہونی چاہیے کیونکہ اسلام کی رو سے یہ ایک بڑا گناہ ہے اور معاشرے میں اس کی حوصلہ شکنی ہونی چاہیے۔ جب یہ اقدام قابل سزا ہو گا تو اس سے خودکشی کے واقعات سے بچاؤ میں مدد ملے گی&#39;&#39;۔ تاہم کونسل نے یہ تجویز بھی دی کہ دفعہ 325 میں ایک شرط کا اضافہ کر کے صرف انہی افراد کے خلاف اقدام خودکشی کا مقدمہ درج کیا جائے جو ذہنی طور پر صحت مند ہوں۔&nbsp;

سینیٹ کمیٹی کے ارکان نے اس رائے سے اختلاف کرتے ہوئے کہا کہ ذہنی طور پر بیمار لوگوں کو پہلے ہی ہر طرح کی قانونی کارروائی اور سزا سے استثنیٰ حاصل ہے۔ اسی لیے انہوں نے تجویز دی کہ سینیٹ کو شہادت اعوان کا پیش کردہ بل اپنی اصل حالت میں ہی منظور کر لینا چاہیے۔&nbsp;

سروپ اعجاز بھی کہتے ہیں کہ خودکشی سے متعلق قوانین کو محض اسلامی نکتہ نظر سے دیکھنے سے غیرمسلم پاکستانی اس پر ہونے والے بحث مباحثے سے خارج ہو جاتے ہیں۔ ان کا کہنا ہے کہ &#39;&#39;خودکشی کے حوالے سے اسلامی احکامات کا اطلاق دوسرے مذاہب سے تعلق رکھنے والے لوگوں پر نہیں ہونا چاہیے کیونکہ وہ اس حوالے سے ایک الگ نکتہ نظر کے حامل ہیں&#39;&#39;۔&nbsp;

اگر پاکستان میں رہنے والے غیرمسلم افراد کو دفعہ 325 کے اطلاق سے یہ استثنا حاصل ہوتا تو یقیناً سنی کو ان مشکلات کا سامنا نہ کرنا پڑتا جو اسے اپنے خلاف ہونے والی قانونی اور عدالتی کارروائی کے نتیجے میں پیش آئیں۔

پنجاب میں غیر مسلم قیدیوں سے امتیازی سلوک: 'مذہبی تعلیم کے حصول پر ہمیں قید میں رعائت نہیں ملتی'۔

اب تو گھبرا کر یہ کہتے ہیں کہ مر جائیں گے: 'اپنی جان لینے کی کوشش کرنے والوں کو سزا دینے سے خودکشیاں نہیں رُکیں گی'۔

In November 2020, the provincial government launched the second phase of the Punjab Ujala program. Under this, solar energy will be provided to 4,200 schools located in 25 districts of North

Why is the supply of solar energy in Punjab schools delayed under  Punjab Ujala program?

پنجاب اجالا پروگرام کا پہلا مرحلہ نو ماہ میں مکمل ہونا تھا لیکن اس کے اہداف کی سو فیصد تکمیل چار سال چار ماہ میں بھی نہیں ہو سکی جبکہ اس کے دوسرے مرحلے پر عملی کام ابھی شروع بھی نہیں ہوا۔ &nbsp;

یہ پروگرام ایک ایسے منصوبے کا حصہ ہے جس کے تحت ایشیائی ترقیاتی بنک نے پاکستان کو 32 کروڑ 50 لاکھ ڈالر قرض دیا ہے تاکہ پسماندہ علاقوں اور معاشی طور پر کمزور طبقات کو غیرآلودہ اور پائیدار توانائی کے ذرائع تک رسائی دی جا سکے۔ اس رقم میں سے آٹھ کروڑ 70 لاکھ ڈالر پنجاب اجالا پروگرام کے ذریعے تعلیمی اداروں اور مراکزِ صحت میں شمسی توانائی کی فراہمی پر خرچ کیے جا رہے ہیں۔&nbsp;

شروع میں اس پروگرام کو سابق وزیرِ اعلیٰ پنجاب شہباز شریف کی مناسبت سے خادمِ اعلی اجالا پروگرام کا نام دیا گیا تھا (کیونکہ وہ خود کو وزیرِ اعلیٰ کے بجائے خادمِ اعلیٰ کہتے تھے)۔ اس پر عمل درآمد کے لیے ان کی صدارت میں چھ مارچ 2017 کو ہونے والے ایک ابتدائی اجلاس میں فیصلہ کیا گیا کہ اُسی سال کے خاتمے تک پنجاب بھر کے 20 ہزار سکولوں میں شمسی توانائی سے پیدا کی گئی بجلی فراہم کر دی جائے گی۔&nbsp;

جلد ہی یہ ہدف تبدیل ہو گیا۔&nbsp;

شہباز شریف ہی کی سربراہی میں 29 مارچ 2017 کو ہونے والے ایک اجلاس میں محکمہ سکول ایجوکیشن کے سیکرٹری شاہین جبار نے کہا کہ ان کے محکمے نے شمسی توانائی کی فراہمی کے لیے 22 ہزار 80 سکولوں کے اعدادوشمار توانائی سے متعلقہ اداروں کو فراہم کیے ہیں۔ ان کے مطابق ان میں سے لگ بھگ 15 ہزار سکول پنجاب کے جنوبی اضلاع میں واقع ہیں۔&nbsp;

لیکن تقریباً ڈھائی سال بعد، دسمبر 2020 میں، بجلی کی تقسیم کے ذمہ دار وفاقی ادارے، نیشنل ٹرانسمیشن اینڈ ڈسپیچ کمپنی، نے ایشیائی ترقیاتی بنک کو پنجاب اجالا پروگرام کی آڈٹ رپورٹ بھیجی جس کے مطابق اس کے تحت جنوبی پنجاب کے 10 ہزار 8 سو 61 سکولوں اور وسطی اور شمالی پنجاب کے چار ہزار دو سو سکولوں کو شمسی توانائی فراہم کی جانا تھی۔ یعنی اس سے مستفید ہونے والے سکولوں کی کل تعداد 15 ہزار 61 ہونی چاہیے تھی۔&nbsp;

اس ہدف میں دوسری بڑی تبدیلی اس وقت آئی جب اسے دو مرحلوں میں تقسیم کیا گیا اور ان میں سے پہلا مرحلہ جنوبی پنجاب کے لیے اور دوسرا مرحلہ وسطی اور شمالی پنجاب کے لیے مختص کیا گیا۔

حکومتی دستاویزات کے مطابق پہلے مرحلے کا کام دسمبر 2017 میں مکمل کیا جانا تھا۔ لیکن حقیقت میں پنجاب حکومت کے محکمہ توانائی کے پراجیکٹ مینجمنٹ یونٹ نے صوبے کے محکمہ سکول ایجوکیشن کو اس کے مکمل ہونے کی اطلاع 28 جولائی 2021 کو لکھے گئے ایک خط کے ذریعے دی جس میں کہا گیا تھا کہ اس وقت تک جنوبی پنجاب کے 10 ہزار سات سو 50 سکولوں میں شمسی توانائی کے آلات نصب ہو چکے تھے۔

گویا پہلے مرحلے کی تکمیل میں 52 مہینے لگ گئے جو کہ حکومت کے ابتدائی طور پر طے کردہ ہدف سے تقریباً چھ گنا زیادہ وقت ہے۔ تاہم اتنی تاخیر کے باوجود، نیشنل ٹرانسمیشن اینڈ ڈسپیچ کمپنی کی آڈٹ رپورٹ میں دیے گئے اعدادوشمار کی رُو سے، جنوبی پنجاب کے ایک سو 11 مزید سکولوں کو شمسی توانائی فراہم کرنے کا کام ابھی بھی باقی ہے۔

پنجاب کے محکمہ توانائی میں کام کرنے والے ایک سینئر اہلکار کا کہنا ہے کہ پہلے مرحلے کی تکمیل میں اس قدر تاخیر کی بنیادی وجہ یہ ہے کہ 11 ہزار کے قریب سکولوں میں صرف نو ماہ میں شمسی توانائی کے آلات نصب کرنا شروع سے ہی ایک غیرحقیقی ہدف تھا کیونکہ اس کی تکمیل میں ٹھیکیدار کمپنیوں کے انتخاب سے لے کر آلات کی تنصیب تک کئی ایسے مرحلے شامل ہیں جن میں سے ہر ایک کو قانونی طریقے سے مکمل کرنے کے لیے مہینوں درکار ہوتے ہیں۔ مثال کے طور پر وہ کہتے ہیں کہ حکومت کو &quot;ایسی ٹھیکیدار کمپنیوں کا انتخاب کرنے میں ہی نو ماہ لگ گئے جو اس کی مختص کردہ رقم کے اندر معیاری آلات فراہم اور نصب کر سکیں&quot;۔ اسی طرح، ان کے مطابق، &quot;شمسی توانائی کے تمام آلات دوسرے ملکوں سے درآمد کیے جاتے ہیں جنہیں ملک کے اندر لانے اور پھر دور دراز کے دیہاتی سکولوں تک پہنچانے کے لیے بھی کئی مہینے درکار ہوتے ہیں&quot;۔

<h2>بجٹ بمقابلہ بولی</h2>

نومبر 2020 میں صوبائی حکومت نے پنجاب اجالا پروگرام کے دوسرے مرحلے کا آغاز کیا۔ اس کے تحت شمالی اور وسطی پنجاب کے 25 اضلاع میں واقع چار ہزار دو سو سکولوں کو شمسی توانائی فراہم کی جائے گی۔ لیکن 16 ماہ گزرنے کے بعد ابھی تک اس کے لیے محض ٹھیکیدار کمپنیوں کے انتخاب کا عمل ہی مکمل کیا جا سکا ہے۔ &nbsp;

پروگرام کے پراجیکٹ ڈائریکٹر عارف منصور قیصرانی کہتے ہیں کہ اس عمل میں تاخیر کی وجہ یہ ہے کہ آلات کی فراہمی اور تنصیب کے لیے اپنی خدمات پیش کرنے والی ٹھیکیدار کمپنیاں متواتر ایسی بولیاں لگا رہی تھیں جو پروگرام پر آنے والی لاگت کے حکومتی تخمینے سے زیادہ تھیں۔ اس لیے، ان کے مطابق، حکومت کو &quot;بولی کا عمل بار بار دہرانا پڑا اور یوں دوسرے مرحلے کا کام شروع ہونے میں تاخیر ہوتی گئی&quot;۔&nbsp;

اگرچہ بولی کا عمل 23 نومبر 2020 کو شروع ہوا لیکن، پنجاب کے محکمہ توانائی کی فراہم کردہ دستاویزات کے مطابق، اس کے پہلے دور میں حصہ لینے والی ہر کمپنی نے جس رقم پر کام کرنے کی پیش کش کی وہ سرکاری طور پر مختص کردہ رقم سے زیادہ تھی۔ اس لیے 20 جنوری 2021 کو بولی کا دوسرا دور منعقد کیا گیا۔&nbsp;

اس دور میں پیکج 3 (جو ضلع چکوال کے تین سو 37 سکولوں پر مشتمل ہے)، پیکج 5 (جو ٹوبہ ٹیک سنگھ، ساہیوال، پاک پتن، اوکاڑہ، قصور اور لاہور کے اضلاع میں واقع چار سو 64 سکولوں پر مشتمل ہے)&nbsp;اور پیکج 7 (جس میں جہلم، گجرات، منڈی بہاؤالدین، حافظ آباد، چنیوٹ اور فیصل آباد کے اضلاع کے دو سو 88 سکول آتے ہیں) کے لیے دی جانے والی بولیاں منظور کر لی گئیں۔ جبکہ عارف منصور قیصرانی کی طرف سے 9 اپریل 2021 کو جاری کردہ ایک نوٹی فیکیشن کے ذریعے پیکج 1 (جو اٹک اور میانوالی کے اضلاع کے نو سو نو سکولوں پر مشتمل ہے)، پیکج 2 (جس میں ضلع راولپنڈی کے چھ سو 39 سکول شامل ہیں)، پیکج 4 (جس میں خوشاب، بھکر، سرگودھا اور جھنگ کے اضلاع میں واقع ایک ہزار 31 سکول شامل ہیں)&nbsp; اور پیکج 6 (جس میں شیخوپورہ، نارووال، سیالکوٹ،&nbsp;گوجرانوالہ اور ننکانہ صاحب کے اضلاع میں واقع پانچ سو 32 سکول آتے ہیں) کے لیے دی جانے والی تمام بولیاں رد کر دی گئیں۔&nbsp;

بعد ازاں عارف منصور قیصرانی نے 14 جون 2021 کو جاری کیے گئے ایک اور نوٹی فیکیشن کے ذریعے پیکج 7 کے لیے منظور شدہ بولیوں کو بھی مسترد کر دیا۔ یوں دو ادوار کے بعد صرف پیکج 3 اور پیکج 5 کے لیے دی گئی بولیاں ہی منظور کی جا سکیں۔&nbsp;

اپریل 2021 میں بولی کے تیسرے دور کا انعقاد ہوا جس میں ٹھیکیدار کمپنیوں کی طرف سے پیکج 2 اور پیکج 6 کے لیے کی جانے والی کم ترین پیش کشیں قبول کر لی گئیں جبکہ پیکج 1 اور پیکج 4&nbsp;کے لیے دی گئی بولی ایک بار پھر رد کر دی گئی۔&nbsp;

بولی کا چوتھا دور 27 جنوری 2022 کو منعقد ہوا جس میں بالآخر پیکج 1، پیکج 4 اور پیکج 7 کے لیے دی گئی بولیاں بھی منظور کر لی گئیں۔&nbsp;

عارف منصور قیصرانی کا کہنا ہے کہ یہ مراحل مکمل ہونے کے بعد حکومت نے پیکج 5 کی کم ترین بولی دینے والی کمپنی کے علاوہ باقی تمام کامیاب کمپنیوں سے معاہدے کر لیے ہیں &quot;جس سے سکولوں میں شمسی توانائی فراہم کرنے کا کام جلد ہی شروع ہو جائے گا اور اس سال کے آخر تک اسے مکمل بھی کر لیا جائے گا&quot;۔

<h2>اخراجات میں تضادات</h2>

دوسرے مرحلے کی کامیاب بولیوں میں کچھ حیران کن اعدادوشمار چھپے ہوئے ہیں۔&nbsp;

ان کے مطابق ایک سکول میں شمسی توانائی کے آلات کی فراہمی اور تنصیب کا زیادہ سے زیادہ خرچہ (چار لاکھ 16 ہزار آٹھ سو 45 روپے) پیکج 5 کے اضلاع (ٹوبہ ٹیک سنگھ، ساہیوال، پاک پتن، اوکاڑہ، قصور اور لاہور) میں آ رہا ہے جو نہ تو دور افتادہ ہیں کہ وہاں یہ آلات پہنچانے کے اخراجات باقی صوبے کی نسبت زیادہ ہوں اور نہ ہی وہ کسی پہاڑی یا صحرائی علاقے کا حصہ ہیں جہاں ان آلات کی ترسیل کے لیے خصوصی ذرائع کی ضرورت ہو۔

اس سے ملحقہ پیکج 6 کے اضلاع (شیخوپورہ، نارووال، سیالکوٹ،&nbsp;گوجرانوالہ اور ننکانہ صاحب) کے جغرافیائی خدوخال پیکج 5 کے اضلاع جیسے ہی ہیں لیکن وہاں فی سکول خرچہ تین لاکھ 39 ہزار چھ سو چار روپے آ رہا ہے جو پورے پنجاب میں دوسرے نمبر پر کم ترین رقم ہے۔ اسی طرح پیکج 7 کے اضلاع (جہلم، گجرات، منڈی بہاؤالدین، حافظ آباد، چنیوٹ اور فیصل آباد) میں آنے والا فی سکول خرچہ (تین لاکھ 50 ہزار 20 روپے) بھی پیکج 5 میں آنے والے فی سکول خرچے سے کہیں کم ہے۔

اس سے بھی زیادہ حیران کن امر یہ ہے کہ پیکج 5 کے اضلاع میں آنے والا خرچہ پیکج 4 میں شامل خوشاب، بھکر، سرگودھا اور جھنگ جیسے دوردراز صحرائی اور نیم صحرائی اضلاع کے فی سکول خرچے (تین لاکھ 29 ہزار نو سو 35 روپے) سے کہیں زیادہ ہے۔ درحقیقت پیکج 4 کا فی سکول خرچہ پنجاب بھر میں سب سے کم ہے۔&nbsp;

اسی طرح اٹک اور میانوالی جیسے پسماندہ اور پہاڑی اضلاع میں آنے والا فی سکول خرچہ (تین لاکھ 40 ہزار چار سو 63 روپے) اور جنوبی پنجاب کے 11 اضلاع میں آنے والا فی سکول خرچہ (تین لاکھ 76 ہزار چھ سو 35 روپے) بھی پیکج 5 کے اضلاع کی نسبت کم رہا ہے حالانکہ ان دونوں علاقوں میں شمسی توانائی کے آلات کی ترسیل اور تنصیب کے تکنیکی اور انسانی ذرائع لاہور اور ساہیوال کی نسبت بہت محدود ہیں۔&nbsp;

ان تضادات کے بارے میں حکومتی موقف یہ ہے کہ سرکاری اہلکاروں نے متعلقہ قوانین پر مکمل طور پر عمل درآمد کرتے ہوئے ہر پیکج کے لیے دی گئی کم ترین بولی کو ہی منظور کیا ہے۔ اس لیے، اس موقف کے مطابق، اگر کسی ایک جغرافیائی پیکج کے لیے دی گئی کم ترین بولی دوسرے علاقوں کے لیے دی جانے والی کم ترین بولی سے زیادہ رہی ہے تو یہ کسی اہلکار کی بد دیانتی یا بولی کے عمل میں کسی بے ضابطگی کا نتیجہ نہیں۔&nbsp;

دوسری طرف اس فرق کو دور کرنے کا واحد سرکاری حل یہ ہے کہ پیکج 5 کے لیے بولی دوبارہ کرا لی جائے۔ تاہم اس کا لازمی نتیجہ یہ نکلےگا کہ پروگرام کے دوسرے مرحلے کی تکمیل میں مزید تاخیر ہو جائے گی۔

اُجالا چوری: پنجاب کے دو سو سے زائد سرکاری سکولوں سے چور شمسی توانائی کا سامان لے اُڑے۔

پنجاب کے سکولوں میں شمسی توانائی کی فراہمی: ہوئی تاخیر تو کچھ باعثِ تاخیر بھی تھا۔

Imposing Sales Tax on Solar Panels will Hurt Clean Energy Production.

شمسی توانائی کے آلات پر سیلز ٹیکس کا نفاذ: 'ماحول دوست توانائی کا حصول بہت مہنگا ہو جائے گا'۔

video

ملتان شہر کے سلطان پور نامی علاقے میں واقع گورنمنٹ پرائمری سکول میں لگا شمسی توانائی سے بجلی پیدا کرنے والا نظام لگ بھگ ڈھائی سال سے بند پڑا ہے۔&nbsp;

سکول کے ہیڈماسٹر محمد اظہر کہتے ہیں کہ اسے اگست 2019 میں نصب کیا گیا لیکن اس میں شامل چھ پلیٹوں میں سے ایک تنصیب کے وقت ہی ٹوٹ گئی۔ ان کا کہنا ہے کہ بارہا شکایت کرنے کے باوجود اسے نصب کرنے والی کمپنی نے ٹوٹی ہوئی پلیٹ کو ابھی تک تبدیل نہیں کیا۔

تاہم اس نظام کے غیر فعال ہونے کہ وجہ پلیٹ کا ٹوٹنا نہیں بلکہ کچھ اور ہے۔&nbsp;

یہ وجہ بیان کرتے ہوئے وہ کہتے ہیں کہ 2 ستمبر 2019 کی شام کو انہیں اطلاع ملی کہ ایک چور سکول کے تالے توڑ کر شمسی توانائی کو بجلی میں تبدیل کرنے والا اِنورٹر اور بجلی کا ذخیرہ کرنے والی بیٹریاں لے اڑا ہے (جن کی مجموعی مالیت ڈھائی لاکھ روپے بنتی ہے)۔ انہوں نے فوری طور پر سکول پہنچ کر موقعِ واردات کا معائنہ کیا اور کوئی وقت ضائع کیے بغیر قریبی تھانے کو بھی مطلع کر دیا جس نے 6 ستمبر 2019 کو اس واردات کی ایک ابتدائی اطلاعاتی رپورٹ (ایف آئی آر) درج کر لی۔

وہ کہتے ہیں کہ انہوں نے سکول میں لگے کیمروں کی تیار کردہ تصاویر اور ویڈیوز بھی پولیس کو فراہم کر دیں جن میں ایک شخص کو چوری کرتے ہوئے واضح طور پر دیکھا جا سکتا ہے۔ لیکن، ان کے بقول، ان &quot;ٹھوس شواہد کی موجودگی کے باوجود پولیس نے ابھی تک کوئی کارروائی نہیں کی&quot;۔

اس صورتِ حال پر افسوس کا اظہار کرتے ہوئے وہ کہتے ہیں کہ اس واردات کہ بنیادی وجہ حکومت کی &quot;مجرمانہ غفلت&quot; ہے کیونکہ اس نے &quot;لاکھوں روپے مالیت کے شمسی توانائی کے سامان کی حفاظت کے لیے سکول میں کوئی چوکیدار تعینات نہیں کیا&quot;۔&nbsp;

ملتان شہر ہی کے ایک اور علاقے، بیری والا، کے گورنمنٹ گرلز پرائمری سکول میں نصب شمسی توانائی کے نظام کی بیٹریاں اور اِنورٹر بھی دو ستمبر 2019 سے غائب ہیں۔ اس سکول کی ہیڈمسٹرس شمائلہ حنیف کہتی ہیں کہ اُس روز جب وہ صبح کے وقت سکول پہنچیں تو انہیں معلوم ہوا کہ نامعلوم چور صرف دو ماہ پہلے لگائے گئے نظام کے اہم ترین حصے اٹھا کر لے گئے ہیں۔ ان کے مطابق چوری کیے گئے سامان کی مالیت ایک لاکھ پچاس ہزار روپے ہے۔

سرکاری سکولوں میں شمسی توانائی کی تنصیب کے پروگرام کے پراجیکٹ ڈائرکٹر اسد منصور قیصرانی اس صورتِ حال سے آگاہ ہیں۔ مئی 2020 میں انہوں نے ایک خط لکھ کر پنجاب کے محکمہِ توانائی کو بتایا کہ اُس وقت تک صوبے کے ایک سو پچاس سکولوں میں چوری کی ایسی وارداتیں ہو چکی تھیں جبکہ آئے روز ایسے واقعات کی تعداد میں اضافہ ہو رہا تھا۔ انہوں نے خط میں محکمے کے سیکرٹری سے یہ درخواست بھی کی کہ وہ پنجاب کی وزارتِ داخلہ کے ساتھ مل کر ان چوریوں کی مکمل تفتیش کرائیں اور چوری شدہ سامان کو جلد از جلد بازیاب کرائیں تاکہ شمسی توانائی کے نظام کو ہر سکول میں فعال کیا جا سکے۔&nbsp;

<h2>شمسی توانائی کے آلات کی حفاظت کس کی ذمہ داری؟</h2>

ہیڈمسٹریس &nbsp;شمائلہ حنیف کہتی ہیں کہ ان کے سکول میں چوری کی وارداتیں معمول کی بات ہے۔ ان کے بقول سکول کے مرکزی دروازے، کمروں اور الماریوں کے تالے اکثر ٹوٹے ہوئے ملتے ہیں اور اس کی پانی کی موٹر اور فرنیچر وغیرہ بھی کئی بار غائب ہو چکے ہیں۔&nbsp;

ضلع ملتان کی تحصیل شجاع آباد کے گاؤں سید والہ کے گورنمنٹ گرلز پرائمری سکول میں بھی چوری کے واقعات عام ہیں اس لیے اس کے عملے نے چھتوں میں لگے پنکھے اور ایسی تمام برقی اور دوسری تنصیبات کہیں سنبھال کر رکھی ہوئی ہیں جن کی سردیوں میں ضرورت نہیں پڑتی۔ اس سکول کی ہیڈمسٹریس ارم شاہد کہتی ہیں کہ ماضی میں ہونے والی چوریوں کی وجہ سے انہیں ہر وقت یہ خدشہ رہتا ہے کہ کہیں اس میں نصب شمسی توانائی سے بجلی بنانے کا نظام بھی چوروں کے ہاتھ نہ لگ جائے کیونکہ، ان کے مطابق، &quot;اس کی حفاظت کے لیے کوئی چوکیدار موجود نہیں&quot;۔

ان کا کہنا ہے کہ ان کے سکول کا &quot;سابقہ چوکیدار اس نظام کی تنصیب کے تقریبا چھ ماہ بعد ریٹائر ہو گیا تھا لیکن اس کے بعد نیا چوکیدار ابھی تک تعینات نہیں کیا گیا&quot;۔&nbsp;

ستم ظریفی یہ ہے کہ صوبائی حکومت خود اِن چوکیداروں کی ضرورت کا اقرار کر چکی ہے کیونکہ جب مارچ 2017 میں سرکاری پرائمری سکولوں میں شمسی توانائی کی تنصیب کا منصوبہ &nbsp;&#39;خادمِ اعلی پنجاب اجالا پروگرام&#39; کے نام سے شروع ہوا تو اس کے ابتدائی دنوں میں ہی یہ طے پایا تھا کہ ان تنصیبات کی حفاظت کے لیے چوکیدار تعینات کیے جائیں گے۔ اس سلسلے میں پنجاب کے سکول ایجوکیشن ڈیپارٹمنٹ کی طرف سے اپریل 2017 میں بھیجے گئے ایک خط کے جواب میں صوبائی محکمہ خزانہ نے چوکیداروں کی 17 ہزار چھ سو 69 اسامیوں کی منظوری بھی دے دی تھی۔

لیکن ان اسامیوں میں کسی ایک پر ابھی تک کوئی تقرری نہیں ہو سکی۔&nbsp;

سکول ایجوکیشن ڈیپارٹمنٹ کے ایڈیشنل سیکرٹری برائے بجٹ اینڈ پلاننگ، قیصر رشید، تسلیم کرتے ہیں کہ چوکیداروں کی تعیناتی میں تاخیر کی وجہ سے اب تک دو سو سے زائد سکولوں میں لگا شمسی توانائی کا سامان چوری ہو گیا ہے۔ لیکن ان کا یہ بھی کہنا ہے کہ سکولوں پر دیگر ضروری خرچے کرنے کے بعد ان کے محکمے کے پاس اتنے پیسے نہیں بچتے کہ وہ ہر سکول میں 20 ہزار روپے ماہانہ تنخواہ پر ایک چوکیدار بھی رکھ سکے۔&nbsp;

درحقیقت وہ شمسی توانائی کے مالی فوائد کے بارے میں ہی شکوک و شبہات کا شکار ہیں۔ ان کا کہنا ہے کہ پنجاب حکومت اسے نصب کرنے پر فی سکول سات لاکھ روپے خرچ کر رہی ہے جب کہ اس کو محفوظ اور چالو رکھنے پر آنے والے اخراجات اس کے علاوہ ہیں۔ یوں، ان کی نظر میں، شمسی توانائی کی فراہم کردہ بجلی دوسری بجلی سے کہیں زیادہ مہنگی پڑ رہی ہے کیونکہ عام طور پر ایک پرائمری سکول کا ماہانہ بِل بجلی دو چار ہزار روپے سے زیادہ نہیں ہوتا۔&nbsp;

لیکن اسد منصور قیصرانی کہتے ہیں کہ اب جبکہ ہزاروں سکولوں میں اس نظام کی تنصیب ہو چکی ہے تو صوبائی حکومت کو اس کی حفاظت کا انتظام کرنا ہی ہو گا۔ 
اپنی بات کی وضاحت کرتے ہو ئے وہ اس منصوبے کے مختلف پہلوؤں پر روشنی ڈالتے ہیں اور کہتے ہیں کہ &#39;خادمِ اعلی پنجاب اجالا پروگرام&#39; کے تحت صوبائی محکمہِ توانائی نے صوبے بھر کے 15 ہزار 61 پرائمری سکولوں، 24 سو بنیادی مراکزِ صحت اور اسلامیہ یونیورسٹی بہاولپور کو شسمی توانائی فراہم کرنا ہے۔ اس کے پہلے مرحلے میں جون 2021 تک جنوبی پنجاب کے 11 اضلاع میں 10 ہزار سات سو 50 پرائمری سکولوں میں شمسی توانائی کو بجلی میں تبدیل کرنے کے نظام نصب کر دیے گئے ہیں۔ ان کے مطابق ان میں سے تقریباً تین ہزار سکول ایسے ہیں جہاں پہلے بجلی موجود ہی نہیں تھی۔

ان کا کہنا ہے اس منصوبے کے لیے ایشیائی ترقیاتی بنک نے پاکستان کو قرضہ دے رکھا ہے جس میں سے پنجاب کے لیے آٹھ کروڑ 76 لاکھ ڈالر &nbsp;مختص کیے گئے ہیں۔ اس لیے محکمہ توانائی کے سیکرٹری کو 2020 میں لکھے گئے خط میں انہوں نے اس خدشے کا اظہار بھی کیا تھا کہ بنک کی طرف سے کرایا جانے والا منصوبے کا آزادانہ تجزیہ شمسی توانائی کی تنصیبات کی چوریوں کی وجہ سے کسی منفی نتیجے پر پہنچ سکتا ہے جو قرضے کی فراہمی میں تاخیر یا رکاوٹ کا سبب بن سکتا ہے۔&nbsp;

سلطان پور کے ہیڈماسٹر محمد اظہر کو یہ شکایت بھی ہے کہ ان کے سکول میں نصب شمسی توانائی کے نظام کے ساتھ منسلک اس کے محلِ وقوع &nbsp;کا تعین کرنے والی جی پی ایس مشین دو سال تک فعال ہی نہیں کی گئی۔ وہ سمجھتے ہیں کہ اگر یہ مشین فعال ہوتی تو اس کی مدد سے چوری شدہ سامان ڈھونڈا جا سکتا تھا۔&nbsp;

ضلع ملتان کے علاقے شجاع آباد میں واقع گاؤں ابراہیم والا کے پرائمری سکول کی ہیڈمسٹرس شمشاد بیگم بھی ان کی بات کی تائید کرتی ہیں۔ وہ کہتی ہیں کہ ان کے سکول میں شمسی توانائی کے نظام کی تنصیب کے لگ بھگ چھ ماہ بعد اس سے منسلک جی پی ایس مشین چالو کی گئی۔&nbsp;

اگرچہ اس مشین کا بنیادی مقصد &nbsp;شمسی توانائی جذب کرنے والی پلیٹوں کو ایک خود کار طریقے سے درست سمت میں رکھنا ہے تاکہ ان پر زیادہ سے زیادہ دھوپ پڑتی رہے لیکن اسد منصور قیصرانی کہتے ہیں کہ اس کے فعال ہونے کے بعد حکومتی اہل کار اپنے دفتروں میں بیٹھے شمسی توانائی کی تنصیبات کی کارکردگی اور محلِ وقوع پر بھی نظر رکھ سکتے ہیں۔

تاہم وہ اس بات کی تردید کرتے ہیں کہ کچھ سکولوں میں یہ مشین دیر سے فعال کی گئی ہے۔ اس کے برعکس ان کا دعویٰ ہے کہ شمسی توانائی کی تنصیب کے ساتھ ہی تمام سکولوں میں یہ مشینیں بھی فوری طور پر فعال کر دی گئی تھیں &quot;تاکہ تمام تنصیبات کی نگرانی کو یقینی بنایا جا سکے&quot;۔&nbsp;

سڑک بن رہی ہے: گوادر میں ایکسپریس وے کی تعمیر پرانے شہر کے باسیوں اور مچھیروں کے لیے وبالِ جان

Zhenfa Pakistan New Energy Company Limited is setting up a plant to generate electricity on forest land which will cause severe economic loss to the local people

Zhenfa Pakistan New Energy Company Limited's solar energy plant on forest land

رکھ چوبارہ کے ایک بڑے حصے پر شمسی توانائی سے بجلی پیدا کرنے والی پلیٹیں نصب ہو چکی ہیں جو جلد ہی فعال ہو جائیں گی۔ حکومتی اہل کاروں کے مطابق ان سے پیدا ہونے والی بجلی سے پاکستان بھر میں 70 ہزار گھرانے مستفید ہوں گے۔&nbsp;

رکھ چوبارہ 16 ہزار نو سو 26 ایکڑ اراضی پر مشتمل ہے اور اس کا زیادہ تر حصہ ایک ایسی سڑک کے شمال میں واقع ہے جو جنوب مغربی پنجاب کے ضلع لیہ کی تحصیل چوبارہ کے صدر مقام چوبارہ کو قریبی ضلعے جھنگ کے قصبے گڑھ مہاراجہ سے جوڑتی ہے۔ اس کے نام سے ظاہر ہوتا ہے کہ اسے کسی خاص مقصد کے لیے &#39;رکھا&#39; گیا ہے۔ سرکاری دستاویزات سے پتہ چلتا ہے کہ یہ مقصد اس پر جنگل اگانا ہے۔&nbsp;

لیکن جنوری 2021 میں رکھ کی زمین میں سے چھ سو 50 ایکڑ اراضی ایک چینی کمپنی، زینفا انرجی گروپ، کے ذیلی ادارے، زینفا پاکستان نیو انرجی کمپنی لمیٹڈ، کو 25 سالہ لیز پر دے دی گئی تاکہ وہ اس پر شمسی توانائی پیدا کرنے کا سازوسامان لگا کر ایک سو میگا واٹ بجلی پیدا کر سکے۔ یہ منصوبہ اب تکمیل کے آخری مراحل میں ہے۔&nbsp;

اس کی تنصیبات سے محض دو کلومیٹر کے فاصلے پر واقع ملانہ نامی بستی میں رہنے والے درجنوں گھرانے ابھی بھی بجلی سے محروم ہیں۔ ان میں سے چند ایک نے اپنی مدد آپ کے تحت شمسی توانائی سے بجلی بنانے والی پلیٹیں لگا رکھی ہیں لہٰذا انہیں چھوڑ کر باقی سارا گاؤں شام ہوتے ہی تاریکی میں ڈوب جاتا ہے۔&nbsp;

اس بستی کے ادھیڑ عمر رہائشی عاشق حسین کہتے ہیں کہ انہیں اس بات کی توقع نہیں کہ رکھ کی زمین سے پیدا ہونے والے بجلی کبھی ان تک بھی پہنچے گی لیکن وہ شکایت کرتے ہیں کہ اس کے لیے کی جانے والی تنصیبات کی وجہ سے ان کی پسماندگی میں مزید اضافہ ہو گیا ہے۔ اپنی بات کی وضاحت کرتے ہوئے وہ کہتے ہیں کہ یہ تنصیبات عین اس جگہ کی گئی ہیں جسے پچھلی چھ دہائیوں سے وہ اور سیکڑوں دوسرے مقامی باشندے اپنے مویشیوں کی چراہ گاہ کے طور پر استعمال کر رہے تھے۔

ان کے خیال میں اس زمین سے ان کے جانوروں کی بے دخلی کے شدید منفی معاشی اثرات مرتب ہوں گے کیونکہ اس علاقے کے زیادہ تر خاندانوں کے روزگار کا &quot;سب سے بڑا ذریعہ مویشی پالنا ہے جنہیں زیادہ تر رکھ چوبارہ میں ہی چرایا جاتا تھا&quot;۔ ان کا کہنا ہے کہ ملانہ اور اس کے آس پاس واقع متعدد دیہات میں زرعی آب پاشی کے لیے درکار پانی کی شدید کمی ہے جس کے باعث فصلوں کی فی ایکڑ پیداوار اچھی نہیں ہوتی۔ نتیجتاً &nbsp;مویشی مقامی معیشت کا سب سے اہم جزو ہیں۔&nbsp;

تاہم ان کا کہنا ہے کہ مقامی لوگ رکھ کی زمین مفت میں استعمال نہیں کرتے تھے بلکہ اس کے بدلے میں ہر سال پنجاب کے محکمہ جنگلا ت کو دس روپے فی جانور کے حساب سے فیس ادا کرتے تھے۔ ان کا یہ بھی کہنا ہے کہ اس محکمے نے انہیں مویشی چرانے کے باقاعدہ اجازت نامے دے رکھے تھے جو جُون 2021 تک قابلِ عمل تھے۔ لیکن وہ کہتے ہیں کہ &quot;اس مدت کے خاتمے سے پہلے ہی رکھ کی زمین چینی کمپنی کو دے دی گئی&quot;۔

اس ضمن میں اپنی شکایات حکومت تک پہنچانے کے لیے عاشق حسین سمیت کئی مقامی باشندوں نے جنوری 2021 میں ضلع لیہ کے ڈپٹی کلکٹر کو درخواستیں بھی دیں۔ ان میں انہوں نے موقف اختیار کیا کہ رکھ چوبارہ کے جنوب میں بہت سی زمین خالی پڑی ہوئی ہے جسے کمپنی کو دے کر مویشیوں کی بے دخلی کو روکا جا سکتا ہے۔ لیکن انہیں ان درخواستوں کا کوئی جواب موصول نہ ہوا۔

اسی ماہ انہوں نے ڈسٹر کٹ کورٹ لیہ میں ایک اور درخواست دائر کی جس میں انہوں نے کہا کہ حکومت دھونس دھاندلی کا استعمال کر کے انہیں رکھ کی زمین سے بے دخل کرنا چاہتی ہے۔ ان کے مطابق جب انہوں نے حکومتی اہل کاروں کو چراگاہ کے استعمال کے اجازت نامے دکھائے تو وہ طیش میں آگئے اور انہیں دھمکیاں دینے لگے۔ انہوں نے عدالت سے یہ استدعا بھی کی کہ بجلی کے منصوبے کی تعمیرو تنصیب کا کام اس وت تک روک دیا جب تک زمین کے استعمال سے متعلق تنازعہ حل نہیں ہو جاتا۔ &nbsp;

تاہم بعد میں مقامی باشندوں اور حکومتی اہل کاروں نے مل کر فیصلہ کیا کہ اس معاملے کو عدالت کے باہر ہی حل کیا جائے۔ چنانچہ، عاشق حسین کے مطابق، ان سے وعدہ کیا گیا کہ اگر وہ اپنی درخواست واپس لے لیں تو ان کی بستیوں میں علاج معالجے کی سہولتیں اور پینے کا صاف پانی فراہم کیا جائے گا اور کمپنی کی تنصیبات سے متاثرہ علاقے کے لوگوں کو کمپنی میں نوکریاں بھی دی جائیں گی۔&nbsp;

لیکن اس معاہدے کی سب سے بڑی خرابی یہ ہے کہ اس کا کوئی تحریری ریکارڈ موجود نہیں۔ عاشق حسین تسلیم کرتے ہیں کہ یہ وعدے درحقیقت &quot;زبانی کلامی&quot; کیے گئے تھے۔ تاہم ان کا یہ بھی کہنا ہے کہ &quot;ابھی تک ان میں سے کسی وعدے پر بھی عمل درآمد نہیں ہوا&quot;۔ حتیٰ کہ، ان کے بقول، پلانٹ میں نوکریاں بھی صوبہ سندھ کے لوگوں کو دے دی گئی ہیں۔

زینفا پاکستان نیو انرجی کمپنی لمیٹڈ کے چیف ایگزیکٹو آفیسر مقصود احمد بسرا اس اعتراض کا جواب دیتے ہوئے کہتے ہیں کہ جس علاقے میں ان کا ادارہ کام کر رہا ہے وہاں تکنیکی طور پر تربیت یافتہ لوگوں کی کمی ہے۔ اس لیے وہ تسلیم کرتے ہیں کہ ایسی اسامیوں پر غیرمقامی افراد کو ہی نوکریاں دی گئی ہیں جن کے لیے تکنیکی مہارت کی ضرورت ہے۔ لیکن ان کا دعویٰ ہے کہ &quot;اُن کاموں کے لیے 90 فیصد نوکریاں مقامی لوگوں کو دی گئی ہیں جن کے لیے کسی خاص مہارت کی ضرورت نہیں&quot;۔&nbsp;

<h2>جس کی لاٹھی اس کی بھینس</h2>

زینفا پاکستان نیو انرجی کمپنی لمیٹڈ ستمبر &nbsp;2014میں وجود میں آئی۔ لیکن ابھی اسے قائم ہوئے ایک سال بھی نہیں ہوا تھا کہ پنجاب پرائیویٹ پاور ڈویلپمنٹ بورڈ نے اسے ایک خط لکھ کر عندیہ دیا کہ وہ شمسی توانائی سے ایک سو میگا واٹ بجلی پیدا کرنے کا منصوبہ شروع کر سکتی ہے۔&nbsp;

جب کمپنی نے اس مقصد کے لیے رکھ چوبارہ کی زمین کا انتخاب کیا تو پنجاب کے بورڈ آف ریونیو نے 6 اگست 2015 کو لیہ کے ڈپٹی کمشنر کو ایک خط لکھ کر انہیں اس منصوبے کے بارے میں آگاہ کیا۔ اس خط کے جواب میں ستمبر 2015 میں اسسٹنٹ کمشنر چوبارہ نے رپورٹ دی کہ مجوزہ زمین محکمہ جنگلات کی ملکیت ہے جس سے اجازت لینے کے بعد ہی اسے شمسی توانائی پیدا کرنے کے لیے استعمال کیا جاسکتا ہے۔&nbsp;

تاہم ڈپٹی کمشنر لیہ نے ایک مختلف موقف اختیار کرتے ہوئے بورڈ آف ریونیو کو بھیجی گئی رپورٹ میں کہا کہ متعلقہ زمین 1940 سے 1995 تک صوبائی حکومت کی ملکیت تھی مگر اس کے بعد ریونیو ریکارڈ میں غلطی کی وجہ سے اسے محکمہ جنگلات کی ملکیت تصور کیا جانے لگا۔ ان کا کہنا تھا کہ اب اس غلطی کی تصیح کر دی گئی ہے۔

لہٰذا، اس بات کی نشان دہی کرتے ہوئے کہ صوبائی حکومت نے 1963 میں یہ زمین محکمہ جنگلات کو درخت لگانے کے لیے لیز پر دی تھی، ان کا کہنا تھا کہ اس کی اصلی مالک، یعنی پنجاب حکومت، کو مکمل طور پر یہ اختیار حاصل ہے کہ وہ محکمہ جنگلات سے پوچھے بغیر اسے کسی کو بھی دے دے ۔ اس رپورٹ کی روشنی میں بورڈ آف ریونیو نے زینفا پاکستان نیو انرجی کمپنی لمیٹڈ کو درکار زمین اس کے حوالے کر دی تاکہ وہ جائزہ لے سکے کہ آیا اس پر شمسی توانائی پیدا کرنے کے منصوبے کی تعمیر اور تنصیب قابلِ عمل ہے بھی یا نہیں۔

لیکن محکمہ جنگلات کے چوبارہ میں متعین اہل کار عمر فاروق کہتے ہیں کہ صوبائی حکومت نے ان کے محکمے کو زمین کی منتقلی کے عمل سے مکمل طور پر لاعلم رکھا حالانکہ، ان کے مطابق، اس عمل کے دوران ان کا محکمہ اس زمین پر درخت لگا رہا تھا۔ ان کا دعویٰ ہے کہ 2017 اور 2019 کے درمیان اس پر لگ بھگ 20 ہزار درخت لگائے گئے۔

محکمہ جنگلات کے ایک سیکشن آفیسر نے بھی 13 جنوری 2021 کو بورڈ آف ریونیو کو لکھے گئے ایک خط میں کہا کہ کمپنی کو یہ زمین دیتے وقت ان کے محکمے کو مطلع نہیں کیا گیا۔ ان کا کہنا تھا کہ اس عمل میں اس امر کو بھی نظرانداز کیا گیا کہ نہ صرف اس زمین کا انتظامی کنٹرول ان کے محکمے کے پاس تھا بلکہ فاریسٹ ایکٹ 1927 (ترمیم شدہ) کے تحت اسے جنگل لگانے کے لیے مختص کیا گیا تھا۔

ان کے دعوے کی تائید زمین کے سرکاری نقشے سے بھی ہوتی ہے جس میں دکھایا گیا ہے کہ اس میں سے گزرنے والی سڑک کے کنارے محکمہ جنگلات کے اہل کاروں کے سرکاری گھر موجود ہیں جبکہ ان کے عقب میں اس محکمے کی نرسری بھی واقع ہے۔&nbsp;

لیہ میں متعین ڈویژنل فاریسٹ آفیسر ندیم اشرف وڑائچ نے کنزرویٹر آف فاریسٹ رینج مینجمنٹ سرکل، لاہور، کو 13 جنوری 2021 کو لکھی گئی درخواست میں یہی موقف دہرایا۔ انہوں نے کہا کہ &quot;زینفا پاکستان نیو انرجی کمپنی لمیٹڈ نے لیہ کے ڈپٹی کمشنر کی معاونت سے محکمہ جنگلات کے زیرِ انتظام زمین پر بزورِ طاقت قبضہ کر لیا ہے&quot;۔ انہوں نے یہ بھی کہا کہ فاریسٹ ایکٹ 1927 (ترمیم شدہ) کے مطابق جنگل کے لیے مختص زمین کے استعمال میں تبدیلی کرنے کے لیے ضروری ہے کہ ان کا محکمہ اس کی باقاعدہ اجازت دے اور یہ کہ اس تبدیلی کے نتیجے میں جنگل کو پہنچنے والے نقصان کی تلافی کی جائے۔

دوسری طرف اگرچہ لیہ کے ڈپٹی کمشنر نے 25 جنوری 2021 کو وزیرِ اعلیٰ پنجاب کے سیکرٹیریٹ کو لکھے ہوئے ایک خط میں تسلیم کیا کہ اس اراضی کا انتظام پچھلے 59 سال سے محکمہ جنگلات کا پاس تھا لیکن ان کا یہ بھی کہنا تھا کہ &quot;اس سارے عرصے میں وہاں ایک درخت بھی نہیں لگایا گیا&quot;۔ لیکن، ان کے بقول، جیسے ہی کمپنی کو زمین دینے کا معاملہ سامنے آیا تو اچانک اس پر شجرکاری شروع ہو گئی۔ ان کی نظر میں یہ شجرکاری &quot;ان ناجائز قابضین کے مفاد کا تحفظ کرنے کے لیے کی جا رہی ہے جو اس زمین کو اپنے جانوروں کی چراگاہ کے طور پر استعمال کرتے ہیں&quot;۔

لیکن محکمہ جنگلات ابھی تک اپنے موقف پر ڈٹا ہوا ہے (حالانکہ عملی طور پر زمین اس کے کنٹرول سے نکل گئی ہے)۔ اسی لیے جب 18 اگست 2021 کو کمپنی نے پلیٹوں کی تنصیب کے لیے رکھ میں موجود درختوں کی کٹائی شروع کی تو جنگل کے گارڈ محمد اشفاق نے اس کے خلاف تھانہ چوبارہ میں رپورٹ درج کرا دی۔ ان کا کہنا تھا کہ ان کے منع کرنے کے باوجود کمپنی کے ملازمین نے 96 ہزار روپے مالیت کے درخت کاٹ دیے ہیں۔

ندیم اشرف وڑائچ نے بھی چوبارہ کے سول جج کو اکتوبر 2021 میں ایک ایسی ہی درخواست دی جس میں انہوں نے کہا کہ کمپنی کے دو ملازمین نے دو مختلف اوقات میں بالترتیب 96 ہزار روپے اور ایک لاکھ 80 ہزار روپے مالیت کے درخت کاٹے ہیں اس لیے ان کے خلاف کارروائی کی جائے۔ 
تاہم اس درخواست پر ابھی تک کوئی سماعت نہیں ہوئی۔

گوادر کو حق دو تحریک: 'ترقی کے نام پر ہم سے ہمارا سمندر اور پہاڑ چھین لیے گئے ہیں'۔

جنگل کی زمین پر بجلی کی پیداوار: رکھ چوبارہ کے باسی اور سرکاری محکمے آپس میں الجھ پڑے۔

Even in the presence of the Harassment Protection Act, bus hostess complain that they are harassed by both their co-workers and passengers.

harassment of bus hostess

سمرا عدیل اور بشیر احمد پہلی بار چار سال پہلے ایک بس کمپنی میں مِلے جہاں سمرا ایک سفری میزبان کے طور پر کام کرتی تھیں اور بشیر ایک سکیورٹی گارڈ تھا۔ آہستہ اہستہ انہیں ایک دوسرے سے محبت ہو گئی اور بشیر نے سمرا سے وعدہ کر لیا کہ وہ جلد ہی ان سے شادی کر لے گا۔&nbsp;

لیکن دو سال کا عرصہ گزر جانے کے باوجود جب اس نے اپنا وعدہ وفا نہ کیا تو سمرا نے اس کے ساتھ اپنا ناتا ختم کر لیا۔ دوسری طرف بشیر شادی کے بغیر ہی اس تعلق کو جاری رکھنے پر اصرار کر رہا تھا لہٰذا جب سمرا نے اس کی بات ماننے سے انکار کیا تو اس نے انہیں بلیک میل کرنا شروع کر دیا۔ وہ انہیں دھمکیاں دیتا تھا کہ وہ ان کی تصویریں اور پیغامات پوری دنیا کو دکھا دے گا۔&nbsp;

ایک دن جب سمرا لاہور کے نیازی بس اڈے میں اس بس سے اتریں جس میں انہوں نے سفری میزبان کے فرائض انجام دیے تھے تو بشیر ان کا پیچھا کرنے لگا۔ وہ کہتی ہیں کہ &quot;اس نے مجھے گالیاں دیں اور شدید نتائج کی دھمکیاں دیں۔ مجھے ڈر لگ رہا تھا کہ کہیں وہ مجھے جان سے ہی نہ مار دے&quot;۔&nbsp;

جب اس طرح کے واقعات مسلسل ہونے لگے تو سمرا نے کمپنی انتظامیہ کو ان کے بارے میں زبانی طور پر آگاہ کیا لیکن انہیں یہ جان کر بہت مایوسی ہوئی کہ ان کی شکایت پر کوئی کارروائی نہ کی گئی۔ ان کے مطابق بشیر کو صرف یہ کہا گیا کہ وہ انہیں تنگ نہ کیا کرے۔ وہ کہتی ہیں کہ &quot;کمپنی نے اس کے خلاف کوئی کارروائی نہ کرنے کا یہ جواز پیش کیا کہ وہ ایسی حرکتیں اس لیے کر رہا ہے کہ میرے اس سے تعلقات رہ چکے تھے&quot;۔

سمرا اب شادی شدہ ہیں اور ان کے دو بچے بھی ہیں لیکن دو سال پہلے اپنے ساتھ پیش آنے والے واقعات کی وجہ سے وہ ابھی بھی اس قدر خوف زدہ ہیں کہ ان کے بارے میں بات کرتے ہوئے انہوں نے اپنا اصلی نام پوشیدہ رکھا ہے۔ انہیں یہ بھی خدشہ ہے کہ اس موضوع کو خبروں میں لانے کی وجہ سے ان کی کمپنی کہیں انہیں نوکری سے ہی نہ نکال دے۔

طاہرہ خالد کو بھی اسی طرح ان کے ساتھ کام کرنے والے ایک مرد نے ہراساں کیا۔ ان کی عمر تیس پینتیس سال کے لگ بھگ ہے اور وہ ایک نِجی کمپنی کی بزنس کلاس بسوں میں میزبان کے طور پر کام کرتی ہیں۔ نوکری چلے جانے کے خوف سے وہ بھی اپنا اصلی نام نہیں بتانا چاہتیں۔&nbsp;

اس سال اپریل کے وسط میں جب تحریکِ لبیک پاکستان نامی مذہبی جماعت نے ایک ملک گیر احتجاج کے دوران جگہ جگہ ٹریفک میں رخنے ڈالے تو ان کی بس کو وسطی پنجاب میں ننکانہ صاحب نامی شہر کے پاس رکنا پڑا۔ وہاں کچھ دیر انتظار کے بعد سب مسافر تو ایک ایک کر کے بس سے اتر گئے لیکن طاہرہ، ڈرائیور اور عملے کا ایک اور رکن، علی، بس کے اندر ہی موجود رہے۔

اس دوران علی نے طاہرہ سے ان کا فون نمبر مانگنا شروع کیا اور ان کے بار بار انکار کے باوجود انہیں تنگ کرتا رہا۔ وہ کہتی ہیں کہ &quot;میں نے وہ تمام رات علی اور ڈرائیور کے ساتھ بس میں گزاری لیکن میں ایک لمحے کے لیے بھی سو نہیں سکی کیونکہ جب بھی میری آنکھیں بند ہونے لگتیں تو عدم تحفظ کا شدید احساس مجھے گھیر لیتا&quot;۔&nbsp;

یہ سب کچھ سہنے کے باوجود طاہرہ نے کمپنی انتظامیہ کو کوئی شکایت نہ کی کیونکہ ان کے بقول &quot;شکایت درج کرانے کے بجائے ہراساں کرنے والے شخص کو نظر انداز کرنا بہتر ہے&quot;۔

لیکن مہوش ارشد نامی سفری میزبان کو پیش آنے والے حالات سے ظاہر ہوتا ہے کہ شکایت نہ کرنا &nbsp;خطرناک بھی ہو سکتا ہے۔ سوشل میڈیا پر چلنے والی ایک وڈیو میں انہیں فیصل آباد کے ایک ویران بس اڈے میں بس کی سیڑھیاں چڑھتے ہوئے دیکھا جا سکتا ہے جبکہ ان کا ایک ساتھی ملازم، سکیورٹی گارڈ عمر دراز، انہیں زبردستی واپس کھینچ رہا ہے۔ اسے اونچی آواز میں دھمکیاں دیتے ہوئے بھی سنا جا سکتا ہے۔ چند لمحوں میں ہی وہ مہوش کو گولی مار کر خون آلود حالت میں بس کی سیڑھیوں پر ہی چھوڑ کر چلا جاتا ہے جہاں ان کی موت ہو جاتی ہے۔

اس ہولناک واقعے کی بنیادی وجہ یہ تھی کہ عمر دراز مہوش کو مجبور کر رہا تھا کہ وہ اس سے شادی کر لیں لیکن ان کی طرف سے مسلسل انکار پر وہ اس قدر غصے میں آ گیا کہ اس نے ان کا خون ہی کر دیا۔ تاہم مسلسل ہراساں ہونے کے باوجود مہوش نے کبھی کمپنی انتظامیہ کو آگاہ نہیں کیا کہ انہیں کس مصیبت کا سامنا ہے۔&nbsp;

ان واقعات سے ثابت ہوتا ہے کہ نِجی کمپنیوں کی بسوں میں میزبان کے طور پر کام کرنے والی خواتین کی ایک بڑی تعداد کو اپنے ساتھی ملازمین کی جانب سے جسمانی، جنسی اور ذہنی ہراس کا سامنا ہے۔ کئی میزبان خواتین کہتی ہیں کہ اکثر ڈرائیور انہیں خواہ مخواہ آنکھ مار دیتے ہیں یا جان بوجھ کر ایسے وقت میں بریک لگا دیتے ہیں جب وہ مسافروں کو کھانا یا مشروبات پیش کر رہی ہوتی ہیں۔ ان میں سے کچھ یہ الزام بھی لگاتی ہیں کہ ان کی کمپنیوں کی انتظامیہ انہیں اس طرح کے واقعات پر منہ بند رکھنے کا کہتی ہے جبکہ بیشتر کا کہنا ہے کہ وہ خود ہی ان حرکتوں کی شکایت نہیں کرتیں کیونکہ انہیں خدشہ ہوتا ہے کہ کہیں معاشرہ ان کے کردار پر انگلیاں اٹھانا شروع نہ کر دے۔&nbsp; 
ہوس ناک نظریں

جولائی 2021 میں ایک بس میں سفر کرنے والے چار مرد مسافروں نے ایک بیس سالہ سفری میزبان خاتون سے ان کا فون نمبر مانگا۔ وہ کہتی ہیں کہ ان کے انکار کے باوجود یہ مسافر اپنے ناجائز مطالبے پر مصر رہے اور اپنی بات منوانے کے لیے انہیں دھمکاتے بھی رہے۔ ان کے مطابق ان مردوں نے ان کی ٹک ٹاک ویڈیو بنانے کی کوشش بھی کی لیکن پیشتر اس کے کہ وہ ان کی تصویر اتارتے انہوں نے ڈانٹ ڈپٹ کر کے اپنی جان چھڑا لی۔&nbsp;

آزاد کشمیر کے ضلع باغ سے تعلق رکھنے والی یہ خاتون کہتی ہیں کہ انہیں یہ تو معلوم تھا کہ سفری میزبان کے طور پر ان کی نوکری بہت سخت ہوگی لیکن &quot;یہ اندازہ نہیں تھا کہ مجھے اس قدر ہراس کا سامنا بھی کرنا پڑ سکتا ہے&quot;۔

سیالکوٹ سے تعلق رکھنے والی ایک 21 سالہ سفری میزبان بھی اسی طرح کی آزمائش سے گزر چکی ہیں۔&nbsp;

ایک ماہ پہلے &nbsp;جب وہ لاہور سے ملتان جانے والی بس میں ڈیوٹی کر رہی تھیں تو ایک مسافر انہیں بار بار اپنے پاس بلا کر بے تکے سوالات کرتا رہا۔ جب بس ملتان پہنچنے والی تھی تو انہوں نے دیکھا کہ وہی مسافر ان کی تصاویر لے رہا ہے جس پر انہوں نے اسے ڈانٹا اور تصویریں مٹانے کو کہا۔ ان کی ڈانٹ سن کر پہلے تو اس مسافر نے یہ تسلیم کرنے سے انکار کر دیا کہ اس نے ان کی کوئی تصویر اتاری ہے لیکن بعد میں اس کا رویہ بگڑ گیا اور وہ کہنے لگا کہ وہ تصویریں مٹانے والا نہیں۔

انہوں نے اپنی کمپنی کے اعلیٰ حکام سے اس واقعے کے بارے میں شکایت بھی کی لیکن پھر بھی اس مسافر کے خلاف کوئی کارروائی نہ کی گئی۔

ایک اور خاتون کا کہنا ہے کہ بہت سے مرد مسافر سفری میزبانوں کی خفیہ طور پر لی گئی تصاویر استعمال کر کے ٹک ٹاک وڈیو بنا لیتے ہیں۔ ان کی ایک دوست کو اپنی اسی طرح بنائی گئی وڈیو کا اس وقت پتہ چلا جب وہ سوشل میڈیا پر عام ہو چکی تھی۔&nbsp;

<h2>قانونی تحفظ کا فقدان</h2>

پارلیمنٹ نے 2010 میں ایک ایسا قانون بنایا جس کے ذریعے ملازمت کرنے والی خواتین کو ان کی ملازمت کی جگہ پر ہراساں کیے جانے کے خلاف قانونی تحفظ فراہم کیا گیا تھا۔ اس قانون کے تحت بنائے گئے قواعد و ضوابط کے مطابق تمام نِجی اور سرکاری ادارے اس بات کے پابند ہیں کہ وہ اپنے ہاں ملازم خواتین کے لئے ایک محفوظ اور صحت مندانہ ماحول فراہم کریں۔ &nbsp; 
اگرچہ اس قانون کا دائرہِ کار پورے پاکستان پر پھیلا ہوا ہے لیکن حال ہی میں سپریم کورٹ آف پاکستان نے کہا ہے کہ اس میں کئی ایسے سقم ہیں جن کے باعث اس کے نفاذ میں کئی رکاوٹیں پیش آتی ہیں۔ &nbsp;

خواتین کے حقوق پر کام کرنے والی قانون دان شمائلہ خان ان رکاوٹوں کے بارے میں بات کرتے ہوئے کہتی ہیں کہ اس قانون میں دی گئی &#39;کام کی جگہ&#39; کی تعریف بہت محدود ہے کیونکہ اس کا اطلاق نہ تو غیر رسمی شعبے میں کام کرنے والی خواتین پر ہوتا ہے اور نہ ہی کسی ادارے یا کمپنی کے ساتھ کام کرنے والے ٹھیکے داروں یا اس سے غیر رسمی طور منسلک افراد پر ہوتا ہے۔ اس لیے ان کے خیال میں اس قانون میں &quot;فوری طور پر ترامیم کی ضرورت ہے&quot;۔

تاہم دوسرے ماہرین کا کہنا ہے کہ ان خامیوں کے باوجود یہ قانون ملازمت پیشہ خواتین کو ہراساں کیے جانے کے واقعات میں کمی لا سکتا ہے بشرطیکہ اس پر صحیح طریقے سے عمل کیا جائے۔ لاہور یونیورسٹی آف مینجمنٹ سائنسز میں قانون کے شعبے سے منسلک حِبا اکبر کا کہنا ہے کہ &quot;اس قانون کے تحت ہر سرکاری اور غیر سرکاری ادارے کے لیے ضروری ہے کہ وہ ایک ایسی کمیٹی بنائے جس کے پاس ہراس کا شکار ہونے والی خواتین اپنی شکایات درج کرا سکیں&quot;۔&nbsp;

ان کے خیال میں اگر یہ کمیٹی موجود ہو تو ایسی شکایات کو موثر طریقے سے حل کیا جا سکتا ہے لیکن وہ کہتی ہیں کہ اکثر سرکاری اور نِجی اداروں اور کمپنیوں میں یہ کمیٹی موجود ہی نہیں ہوتی۔

ٹرانسپورٹ کے شعبے میں بھی کچھ ایسی ہی صورتِ حال ہے۔ مثال کے طور پر فیصل موورز نامی نِجی بس کمپنی کے لاہور ٹرمینل کے مینیجر سہیل شہزاد تسلیم کرتے ہیں کہ ان کے ہاں ایسی کوئی کمیٹی موجود نہیں ہے۔ سکائی ویز نامی بس کمپنی نے بھی جنسی ہراس سے نمٹنے کے لیے کوئی کمیٹی نہیں بنائی۔ اس کے لاہور میں واقع دفتر میں سفری میزبانوں کی انچارج کے طور پر کام کرنے والی خاتون روبینہ اسلم کا کہنا ہے کہ وہ خود ہی اس طرح کے مسائل بخوبی نمٹا لیتی ہیں۔

ان دو کمپنیوں کے برعکس ڈیوو ایکسپریس کے لاہور میں واقع مرکزی دفتر میں کام کرنے والی سینئر اہل کار ثنا شہزادی کہتی ہیں کہ ان کی کمپنی نے اپنی ملازم خواتین کو کام کے دوران ہراس سے بچانے کے لیے باقاعدہ کمیٹی بنا رکھی ہے۔ (تاہم انہوں نے اپنی کمپنی کی سفری میزبانوں کو اس موضوع پر سجاگ سے بات کرنے کی اجازت نہیں دی۔)&nbsp;

دوسری طرف 2010 کے قانون میں کوئی ایسی دفعہ موجود نہیں جس کا اطلاق مسافروں کی طرف سے سفری میزبانوں کو ہراساں کرنے کے واقعات پر کیا جا سکے کیونکہ اس کا دائرہِ کار صرف ایک ہی کمپنی یا ادارے میں اکٹھے کام کرنے والے مردوں اور خواتین تک محدود ہے۔

لیکن اگر ملازم خواتین کو کام کے دوران کوئی ایسا شخص ہراساں کرے جوان کے ساتھ کام نہ کرتا ہو تو کیا ایسی صورت میں ان کے پاس کوئی قانونی راستہ موجود ہے؟&nbsp;

حبا اکبر کا کہنا ہے کہ ایسے واقعات کے بارے میں تعزیراتِ پاکستان کی دفعہ 509 کے تحت شکایت کی جا سکتی ہے کیونکہ اس دفعہ کے مطابق کسی خاتون کی عزت پر حملہ کرنا ایک جرم قرار دیا گیا ہے۔ ان کے مطابق کسی خاتون پر آوازے کسنا، اس سے نامناسب گفتگو کرنا، اسے گندے اشارے کرنا اور اسے جسمانی، ذہنی اور جنسی طور پر ہراساں کرنا سب اس دفعہ کے دائرہِ کار میں آتے ہیں۔ وہ کہتی ہیں کہ &quot;یہ دفعہ نہ صرف کام کی جگہ پر بلکہ نجی جگہوں جیسے گھروں اور عوامی مقامات جیسے گلیوں ، بسوں ، بازاروں اور پارکوں میں بھی لاگو ہوتی ہے اس لئے جو سفری میزبان خواتین بسوں کے مسافروں کے ہاتھوں ہراساں ہوتی ہیں وہ اس دفعہ کو استعمال کر کے پولیس کے پاس اپنی شکایت درج کرا سکتی ہیں&quot;۔&nbsp;

تاہم لاہور میں خواتین کے حقوق کے لیے کام کرنے والی ایک تنظیم کی سربراہ بشریٰ خالق کا کہنا ہے کہ دفعہ 509 کے تحت کرائی گئی شکایات پر عموماً کوئی عمل درآمد نہیں ہو پاتا کیونکہ پولیس خواتین کے ساتھ تعاون نہیں کرتی۔ ان کے مطابق اس دفعہ کے موثر استعمال کے لئے تھانوں کو ایسی جگہیں بنانا بہت ضروری ہے جہاں جاتے ہوئے خواتین کسی قسم کی ہچکچاہٹ اور خوف محسوس نہ کریں۔

یہ رپورٹ لوک سجاگ نے پہلی دفعہ&nbsp;10 اگست 2021&nbsp; کو اپنی پرانی ویب سائٹ پر شائع کی تھی۔

'اندازہ نہیں تھا کہ مجھے اس قدر ہراس کا سامنا کرنا پڑے گا'

The industrial waste treatment plant in Kasur is a major source of diseases like cancer and water pollution in the local inhabitant and soundings.

The industrial waste treatment plant in Kasur

محمد اشرف کی زرعی اراضی دو جگہ منقسم ہے۔ ایک جگہ 17 ایکڑ رقبہ ایک ایسے ٹیوب ویل سے سیراب ہوتا ہے جو پانچ سو فٹ کی گہرائی سے زیرِ زمین پانی نکالتا ہے جبکہ دوسری جگہ چھ ایکڑ زمین میں آبپاشی کے لیے لگایا گیا ٹیوب ویل محض ڈھائی سو فٹ گہرائی سے پانی نکالتا ہے۔ نتیجتاً زمین کے دونوں ٹکڑوں کی پیداواری صلاحیت مختلف ہے۔ جہاں پہلی اراضی پر بہت اچھی فصل اگتی ہے وہاں دوسری کی فی ایکڑ پیداوار بہت کم رہتی ہے۔

محمد اشرف فقیریا والا گاؤں کے رہنے والے ہیں جو لاہور سے 55 کلومیٹر جنوب مشرق میں قصور شہر سے دیپال پور جانے والی سڑک کے پاس اور ایک ایسے پلانٹ کے پڑوس میں واقع ہے جس میں قصور کی چمڑا بنانے اور رنگنے والی فیکٹریوں سے نکلنے والا مائع فضلہ صاف کیا جاتا ہے۔ بعد ازاں پلانٹ سے خارج ہونے والا پانی مقامی نالوں سے گزرتا ہوا دریائے ستلج میں جا گرتا ہے۔

ان کا کہنا ہے کہ پلانٹ سے نکلنے والا پانی پوری طرح صاف نہیں ہوتا جس کے باعث فقیریا والا اور اس کے کئی قریبی دیہات میں زیرِ زمین پانی آلودہ ہو چکا ہے۔ ان کے مطابق &quot;یہی وجہ ہے کہ کم گہرائی سے نکالا جانے والا پانی فصلوں کی پیداوار پر منفی اثر ڈال رہا ہے&quot;۔

اپنی ساری زمین کو پانچ سو فٹ کی گہرائی سے پانی نکال کر سیراب کرنے سے وہ اس مسئلے پر قابو پا سکتے ہیں لیکن اس کے لیے انہیں نہ صرف گہرا بور کرنے پر&nbsp; ایک لاکھ سے زیادہ روپے خرچ کرنا پڑیں گے بلکہ اتنی گہرائی سے پانی کھینچنے کے لیے انہیں بڑا انجن بھی لگانا پڑے گا جس میں زیادہ ڈیزل استعمال ہو گا اور یوں آب پاشی پر آنے والے ان کے مجموعی اخراجات بڑھ جائیں گے۔

فقیریا والا اور اس کے آس پاس کے دیہات کے بیشتر کاشت کاروں کو یہی مسئلہ درپیش ہے۔ وہ اپنی فصلوں کو آلودہ زیرِ زمین پانی سے سیراب کرنے مجبور ہیں کیونکہ ان کے پاس گہرائی سے نسبتاً صاف پانی نکالنے کے مالی وسائل نہیں ہیں۔

سپرنگر انٹرنیشنل پبلشنگ نامی ادارے کے شائع کردہ جریدے میں 2017 میں چھپنے والے ایک تحقیقی مضمون میں اس مسئلے کے ایک اور اہم پہلو کی نشان دہی کی گئی ہے۔ اس میں صنعتی فضلے کی صفائی کے لیے لگائے گئے پلانٹ کے قریب موجود تین دیہاتوں، فقیریا والا، دولے والا اور مان والا، میں زیرِ زمین پانی، مٹی اور سبزیوں میں کرومیم کی مقدار کا جائزہ لیا گیا اور نتیجہ نکالا گیا کہ ان تینوں اشیا میں انسانی صحت کے لیے مضر اس دھات کی ایک بڑی مقدار موجود ہے۔

&nbsp;یہ مضمون پنجاب یونیورسٹی کے دو شعبوں کے اساتذہ، محمد شفیق، طاہرہ شوکت، عائشہ نذیر اور فردوس بریں، نے مل کر لکھا۔ اس کے&nbsp; مطابق فقیریا والا کی مٹی اور سبزیوں اور دولے والا کے آبپاشی کے پانی میں کرومیم کی مقدار اس کی قابلِ قبول مانی گئی مقدار سے خطرناک حد تک زیادہ ہے۔ پہلے گاؤں کی سبزیوں میں اس کی مقدار دو سو ایک ملی گرام فی کلو گرام سے لے کر دو سو 88 ملی گرام فی کلو گرام ہے حالانکہ بین الاقوامی معیار کے مطابق یہ مقدار محض ایک ملی گرام فی کلوگرام ہونی چاہیے۔ اس گاؤں کی مٹی میں کرومیم کی زیادہ سے زیادہ مقدار 55 ملی گرام فی کلوگرام ہے حالانکہ امریکی معیار کے مطابق یہ 25 ملی گرام فی کلو گرام سے زیادہ نہیں ہونی چاہیے۔ اسی طرح دولے والا کے آبپاشی کے پانی میں اس کی مقدار 2.23 ملی گرام فی لٹر سے لے کر 6.32 ملی گرام فی لٹر کے درمیان ہے حالانکہ پنجاب کے تحفظِ ماحولیات کے سرکاری معیار کے مطابق یہ مقدار 0.01 ملی گرام فی لٹر ہونی چاہیے۔

تحفظِ ماحول پر کام کرنے والی ایک بین الاقوامی غیر سرکاری تنظیم، ورلڈ وائڈ فنڈ فار نیچر، کی طرف سے 2018 میں شائع کی گئی ایک رپورٹ مٹی اور پانی میں پائے جانے والے اس کرومیم کا تعلق براہِ راست چمڑے کے کارخانوں سے جوڑتی ہے۔ اس کا کہنا ہے کہ پاکستان بھر میں یہ کارخانے چمڑا رنگنے کے عمل میں اس دھات کا استعمال کرتے ہیں جو بعد میں ان سے نکلنے والے مائع فضلے میں شامل ہو جاتی ہے۔

اس رپورٹ کا یہ بھی کہنا ہے کہ اس فضلے میں کرومیم کے ساتھ ساتھ امونیم کے نمکیات، رنگ و روغن اور دوسرے معلق ٹھوس اجزا جیسے کئی دیگر زہریلے مواد بھی موجود ہوتے ہیں جو، طبی ماہرین کی نظر میں، سب کے سب انسانی صحت کے لیے مضر ہیں۔ تاہم ان میں سے کرومیم کے منفی طبی اثرات سب سے سنگین ہیں کیونکہ زرعی زمین اور آب پاشی کے لیے استعمال کیے جانے والے پانی میں اس کی ضرورت سے زیادہ مقدار انسانوں میں سرطان اور مستقل جینیاتی تبدیلیوں کو جنم دیتی ہے۔

پلانٹ کے قریب ترین واقع بستی، بنگلہ کمبوہاں کے لوگوں کو ان طبی خطرات سے بچانے کے لیے حکومت نے انہیں ہدایت کی ہے کہ وہ اپنے گاؤں کا زیرِ زمین پانی پینے کے لیے استعمال نہ کریں۔ اس کے بجائے انہیں سرکاری خرچے پر کہیں اور سے پینے کا پانی فراہم کیا جاتا ہے۔

لیکن مقامی لوگوں کا کہنا ہے کہ یہ پانی بھی نہ صرف آلودہ ہے بلکہ اس کی فراہمی بھی متواتر نہیں ہوتی۔ مثال کے طور پر دسمبر 2021 کے تیسرے ہفتے میں کئی روز اس کی فراہمی معطل رہی۔

سرکاری پانی کی عدم دستیابی کی دوران گاؤں کے لوگ کرومیم ملا مقامی پانی استعمال کرنے پر مجبور ہو جاتے ہیں کیونکہ ان کی اکثریت کے معاشی حالات ایسے نہیں کہ وہ بازار میں بکنے والا صاف پانی خرید سکیں۔ نتیجتاً بنگلہ کمبوہاں میں بیشتر لوگ کسی نہ کسی بیماری کا شکار ہیں۔ کسی کا یورک ایسڈ بڑھا ہوا ہے تو کسی کو ذیابیطس ہے، کسی کے خون کا دباؤ زیادہ ہے تو کسی کا جسم ہر وقت دکھتا رہتا ہے۔

&nbsp;ایک مقامی سبزی فروش کی بیوی آسیہ بی بی کہتی ہیں کہ وہ یورک ایسڈ کی زیادتی کا شکار ہیں جس کی وجہ سے ان کے جوڑوں میں شدید درد رہتا ہے جبکہ ان کی جوان بیٹی دمے کی مریضہ ہیں۔

<h2>نا اہلی اور کرپشن</h2>

پاکستان اور انڈیا کی سرحد کے قریب واقع قصور شہر میں چمڑے کے کارخانوں سے نکلنے والے گندے پانی کی نکاسی اور تلفی کا مسئلہ اس وقت سے موجود ہے جب سے یہ کارخانے وجود میں آئے ہیں۔ تاہم 1980 کی دہائی میں ان کی تعداد میں اتنا بڑا اضافہ دیکھنے میں آیا کہ ان سے نکلنے والے گندا پانی شہر کا سب سے بڑا مسئلہ بن گیا۔ جلد ہی اس پانی کی بدبو اور اس کے مضرِ صحت اثرات اس قدر شدید ہو گئے کہ حکومت کو ان کے حل کے بارے میں سنجیدگی سے سوچنا پڑا۔

چنانچہ 1990 کی دہائی کے شروع میں ایک ایسے پلانٹ کی تنصیب کا منصوبہ بنایا جانے لگا جو اس صنعتی فضلے کو صاف کر سکے۔ اس وقت قصور میں چمڑے کے ایک سو 60 کارخانے تھے جن سے روزانہ نو ہزار مکعب میٹر گندا پانی خارج ہوتا تھا۔ تاہم مستقبل میں کارخانوں کی تعداد میں اضافے کو پیشِ نظر رکھتے ہوئے 1993 میں ایک ایسا پلانٹ لگانے کا منصوبہ بنایا گیا جو روزانہ 13 ہزار مکعب میٹر صنعتی فضلہ صاف کر سکے۔

لیکن 1999 میں بالآخر حکومت نے جو پلانٹ لگایا اس سے فضلے کی صرف جزوی صفائی ہی ممکن ہو سکتی ہے کیونکہ یہ کارخانوں سے نکلنے والے پانی میں سے کرومیم، کیڈمیم اور زنک جیسی بھاری دھاتیں نکال ہی نہیں سکتا۔ اس لیے اس میں سے خارج ہونے والے نیم صاف پانی کے ذریعے ان دھاتوں کی ایک بڑی مقدار فقیریا والا اور اس کے نواحی دیہات کی مٹی اور پانی میں جذب ہوتی رہتی ہے۔

لیکن اس پلانٹ میں اس سے بھی بڑی خرابی یہ ہے کہ یہ&nbsp; مسلسل نہیں چلتا۔ آج کل بھی یہ بند پڑا ہے جس کے باعث اس میں آنے والا تمام کا تمام صنعتی فضلہ بغیر صاف ہوئے زرعی زمینوں میں سے گزرتا ہوا دریا میں گر رہا ہے۔

پلانٹ کو چالو رکھنے کے ذمہ دار سرکاری ادارے، قصور ٹینریز ویسٹ منیجمنٹ ایجنسی، کے ایک سابقہ ملازم دعویٰ کرتے ہیں کہ اب یہ پلانٹ اکثر بند رہتا ہے۔ وہ دعویٰ کرتے ہیں کہ ان کے تین سالہ دورِ ملازمت میں اسے صرف اس وقت چلایا جاتا تھا جب اعلیٰ حکومتی عہدیدار اس کی کارکردگی کا جائزہ لینے آتے تھے۔ ڈان اخبار کا بھی کہنا ہے کہ 2009 اور 2017 کے درمیان یہ پلانٹ آٹھ سال بند رہا۔

دوسری طرف ایجنسی کے پراجیکٹ منیجر شبیر حسین چیمہ کہتے ہیں کہ پلانٹ کو صرف اسی وقت بند کیا جاتا ہے جب اس میں کوئی تکنیکی خرابی پیدا ہو جائے۔ بصورتِ دیگر، ان کے مطابق، اسے ہر وقت چالو رکھا جاتا ہے۔

لیکن پچھلے 30 سال میں قصور میں کارخانوں کی تعداد میں اتنا اضافہ ہو گیا ہے کہ اگر یہ پلانٹ ہر وقت بھی چالو رہے تو اس میں ان سے پیدا ہونے والے تمام مائع فضلے کو صاف کرنے کی صلاحیت موجود نہیں۔ قصور ٹینریز ویسٹ منیجمنٹ ایجنسی کے مطابق شہر میں چمڑے کے کارخانوں کی مجموعی تعداد دو سو 82 ہو گئی ہے (جن میں سے دو سو 62 چالو حالت میں ہیں)۔ یہ کارخانے روزانہ 21 ہزار چار سو 25 مکعب میٹر گندا پانی خارج کرتے ہیں جو پلانٹ کی صلاحیت سے تقریباً آٹھ ہزار مکعب میٹر زیادہ ہے۔

شبیر حسین چیمہ کہتے ہیں کہ حکومت اس کی صلاحیت بڑھانے پر وقتاً فوقتاً غور کرتی رہتی ہے لیکن مالی وسائل کی عدم دستیابی کی وجہ سے اس پر ابھی تک کام نہیں ہو سکا۔

اسی دوران پلانٹ کے مالی معاملات میں بدعنوانی کی کچھ خبریں بھی سامنے آ ئی ہیں۔ ڈان اخبار میں 15 جولائی 2020 کو شائع شدہ ایک خبر کے مطابق قصور کی ضلعی انتظامیہ کو قصور ٹینریز ویسٹ منیجمنٹ ایجنسی کے مالی معاملات کے بارے میں دو تحقیقاتی رپورٹیں پیش کی گئی ہیں جن میں انکشاف کیا گیا ہے کہ 2018 اور 2020 کے درمیان اس کی انتظامیہ نے 20 لاکھ روپے خورد برد کیے جبکہ 2009 اور 2020 کے درمیان اس نے تین کروڑ روپے کی مالی بے ضابطگیاں کیں۔

ڈان کا کہنا ہے کہ ان رپورٹوں کی روشنی میں قصور کے ڈپٹی کمشنر نے ایجنسی کے آڈٹ آفیسر جہاں زیب ٹیپو اور اکاؤنٹس آفیسر فیصل علی کو معطل کر دیا ہے۔

<h2>بیماریاں پھیلاتا کوڑا کرکٹ</h2>

پلانٹ کے قریب ہی قصور ٹینریز ویسٹ منیجمنٹ ایجنسی نے چمڑے کے کارخانوں سے نکلنے والے کوڑے کرکٹ کی تلفی کے لیے ایک جگہ مختص کی ہوئی ہے۔ لیکن اس کی صحیح طربقے سے دیکھ بھال نہیں کی جا رہی چنانچہ اس میں ہر طرف رنگے ہوئے چمڑے کے ٹکڑوں، کاغذوں اور جانوروں کی کھال سے اتارے گئے بالوں سمیت ہر قسم کا کچرا بکھرا ہوا ہے۔

اس کے پاس واقع گاؤں بنگلہ کمبوہاں میں رہنے والے لوگوں کا کہنا ہے کہ اس کچرا گھر کے گرد چاردیواری نہ ہونے کی وجہ سے اس میں پڑا کوڑا اکثر ہوا کے زور پر اڑ کر ان کے گھروں میں پہنچ جاتا ہے جس سے، ان کے مطابق، کئی قسم کی بیماریاں جنم لے رہی ہیں۔

شبیر حسین چیمہ تسلیم ہیں کہ کارخانوں کی طرف سے اس جگہ پھینکا جانے والا کوڑا ماحول کو نقصان پہنچا رہا ہے- لیکن وہ اس عزم کا اظہار کرتے ہیں کہ وہ اس کی &quot;تلفی کے لیے بنائے گئے قواعد اور ضوابط پر عمل درآمد یقینی بنائیں گے تا کہ انسانی آبادی کو اس کے منفی ماحولیاتی اور طبی اثرات سے محفوظ رکھا جا سکے&quot;۔&nbsp;

تھرپارکر میں پانی کی قلت: 'ہم کئی نسلوں سے چیخ رہے ہیں کہ ہمیں پانی چاہیے لیکن حکومت نے کبھی ہماری بات نہیں سنی'۔

قصور میں صنعتی فضلہ صاف کرنے کا پلانٹ: سرطان جیسی بیماریوں اور آبی آلودگی کا بڑا ذریعہ۔

neelum jhelum hydropower project environmental impact on local peoples in Pakistan

How the Neelum River was destroyed due to poor planning and it is impacting environment of Muzaffarabad.

ستمبر 2018 کے پہلے ہفتے میں آزاد جموں و کشمیر کے صدر مقام مظفر آباد کے باسیوں کو پانی کی شدید قلت کا سامنا کرنا پڑا حالانکہ دریائے نیلم اس شہر کے بیچوں بیچ گزرتا ہے۔

مقامی لوگوں کا کہنا ہے کہ پانی کی کمی نیلم جہلم ہائیڈرو پاور پراجیکٹ نامی منصوبے کی وجہ سے پیدا ہوئی تھی جس کے تحت مظفر آباد سے 41 کلومیٹر مشرق میں نوسیری کے مقام پر دریائے نیلم کا رخ موڑ کو اسے چھتر کلاس کے علاقے میں دریائے جہلم میں ڈالا گیا ہے جہاں اس سے نو سو 69 میگاواٹ بجلی پیدا کی جاتی ہے۔

اس منصوبے کے ماحولیاتی اثرات کا جائزہ لینے کے لیے 1997 میں تیار کی گئی ایک رپورٹ کے مطابق اس کی تعمیر سے پہلے مظفر آباد میں دریا کا کم سے کم بہاؤ جنوری 1982 میں ریکارڈ کیا گیا جب اس کی مقدار 33 مکعب میٹر فی سیکنڈ تھی جبکہ زیادہ سے زیادہ بہاؤ 1992 کے سیلاب کے دوران دیکھنے میں آیا جب اس کی مقدار چار ہزار مکعب میٹر فی سیکنڈ تک پہنچ گئی تھی۔

لیکن سوا تین سال پہلے نیلم جہلم ہائیڈرو پاور پراجیکٹ سے بجلی کی پیداوار کا آغاز ہوا تو مظفر آباد سے گزرنے والے دریائی پانی کی مقدار کم ہو کر صرف نو مکعب میٹر فی سیکنڈ رہ گئی جس کے&nbsp; نتیجے میں ماکڑی کے مقام پر بنایا گیا شہر کو پانی فراہم کرنے والا نظام براہ راست متاثر ہوا اور شہریوں کو ان کی ضرورت سے کہیں کم پانی ملنے لگا۔

اس صورتِ حال سے پریشان مظفر آباد کے باسیوں نے فوراً ایک پرزور احتجاجی مہم شروع کی جس کے نتیجے میں شہر کی انتظامیہ نے انہیں یقین دہانی کرائی کہ وہ نیلم جہلم ہائیڈرو پاور پراجیکٹ کی تعمیر کے ذمہ دار وفاقی ادارے واٹر اینڈ پاور ڈویلپمنٹ اتھارٹی (واپڈا) سے بات چیت کر کے دریا کے بہاؤ کی بحالی کے لیے ضروری اقدامات کرے گی۔

تاہم پانی کی قلت کا مسئلہ مظفر آباد تک محدود نہیں بلکہ اس منصوبے کے آس پاس واقع متعدد دیہات کو اسی طرح پینے کے پانی کی کمی کا سامنا ہے۔ ان میں کیالہ نامی گاؤں بھی شامل ہے جہاں کی رہنے والی 26 سالہ نورین بی بی کا کہنا ہے کہ 16-2015 کے بعد ان کے گاؤں کے قریب پائے جانے والے چشمے سوکھ گئے ہیں جس کی وجہ سے انہیں ہر روز تقریباً تین کلومیٹر کا سفر کر کے پانی لانا پڑتا ہے۔

اگرچہ ان کے گاؤں میں ہر خاندان نے بارش کا پانی جمع کرنے کے لیے ٹنکیاں نصب کر رکھی ہے تا کہ وہ اسے پینے کے علاوہ دوسری گھریلو ضروریات کے لیے استعمال کر سکیں لیکن وہ کہتی ہیں کہ کیالہ میں پانی کی کمی اس قدر شدید ہے کہ یہاں کے مقامی لوگ &quot;پہلے کی طرح نہ تو سبزیاں اگا سکتے ہیں اور نہ ہی مال مویشی پال سکتے ہیں۔ اس لیے ان میں سے کئی ایک گاؤں چھوڑ کر چلے گئے ہیں&quot;۔

پرتھامہ نامی ایک قریبی گاؤں میں بھی یہی صورتِ حال ہے۔

یہاں کے 45 سالہ رہائشی نور حسین کریانے کی دکان چلاتے ہیں اور کہتے ہیں کہ قریباً پانچ سال سے ان کے علاقے میں پانی کی اس قدر کمی ہو گئی ہے کہ انہیں روزانہ موٹر سائیکل پر جا کر کئی کلومیٹر دور واقع قدرتی چشموں سے پینے کا پانی لانا پڑتا ہے۔ ان کا کہنا ہے کہ جب کبھی کسی مقامی خاندان کو شادی یا مرگ کے موقع پر معمول سے زیادہ پانی درکار ہوتا ہے تو اس کا انتظام مظفر آباد سے ٹینکر منگوا کر کرنا پڑتا ہے۔ لیکن ایک ٹینکر پانی کی قیمت ساڑھے تین ہزار سے چار ہزار روپے ہوتی ہے اس لیے، ان کے مطابق، &quot;بہت سے لوگ اسے خریدنے کی استطاعت نہیں رکھتے&quot;۔

مقامی لوگوں کا خیال ہے کہ قدرتی چشموں کے سوکھنے کی وجہ نیلم جہلم ہائیڈرو پاور پراجیکٹ میں شامل سرنگوں کی تعمیر ہے۔ ان کے اس خیال کی تائید 2018 میں آزاد جموں و کشمیر کے تحفظِ ماحولیات کے ادارے کی طرف سے اس منصوبے کی انتظامیہ کو لکھے گئے ایک خط سے ہوتی ہے جس میں کہا گیا ہے کہ سرنگوں کی تعمیر سے ہونے والی لرزش کے باعث پانی کے زیر زمین راستے بدل گئے ہیں جس کے نتیجے میں ان کے آس پاس واقع دیہات میں پائے جانے والے قدرتی چشمے سوکھ گئے ہیں۔

<h2>ترے وعدے پہ اعتبار کیا</h2>

ناروے کی کمپنی، نارپلان کنسلٹنگ انجینئرز اینڈ پلانرز، نے 1997 میں نیلم جہلم ہائیڈرو پاور پراجیکٹ سے متعلقہ معاملات کا تفصیلی جائزہ لینے کے بعد کہا تھا کہ نوسیری اور مظفرآباد میں ماحولیاتی توازن برقرار رکھنے اور اس علاقے میں رہنے والے لوگوں کی پانی کی ضروریات پوری کرنے کے لیے دریائے نیلم میں کم از کم 20 مکعب میٹر فی سیکنڈ کا بہاؤ برقرار رکھنا بہت ضروری ہے۔

لیکن واپڈا نے یہ رپورٹ یہ کہہ کر مسترد کر دی تھی کہ دریا میں اتنا پانی چھوڑنے سے حکومتِ پاکستان کو چھ کروڑ 50 لاکھ ڈالر کا نقصان ہو گا جس کے نتیجے میں اس منصوبے سے پیدا ہونے والی بجلی مالی طور پر منفعت بخش نہیں رہے گی۔ 
چنانچہ وپڈا نے 2010 میں نارپلان کو اس مسئلے کا دوبارہ جائزہ لینے کو کہا جس کے بعد نارپلان نے مظفر آباد کی آبادی میں اضافے کے بارے میں اپنے تخمینے میں کمی کر لی۔ اپنی ابتدائی رپورٹ میں اس نے کہا تھا کہ 2050 میں شہر کی آبادی تقریباً پانچ لاکھ 92 ہزار 92 افراد پر مشتمل ہو گی لیکن اس کی نظرِثانی شدہ رپورٹ کے مطابق 2050 میں یہ آبادی محض تین لاکھ 37 ہزار سات سو 96 افراد ہوگی جن کی ضروریات پوری کرنے کے لیے دریائے نیلم میں 20 مکعب میٹر فی سیکنڈ کا بہاؤ برقرار رکھنا ضروری نہیں ہو گا۔

لیکن کچھ دوسرے اعداد و شمار ظاہر&nbsp; کرتے ہیں کہ نارپلان کا نظر ثانی شدہ تخمینہ ٹھیک نہیں۔ مثال کے طور پر جاپان کے بین الاقوامی امداد فراہم کرنے والے ادارے جائیکا کا 2007 میں کیے گئے ایک تجزیے میں کہنا تھا کہ 2050 تک مظفر آباد کی آبادی پانچ لاکھ 92 ہزار نفوس پر مشتمل ہو گی۔

مقامی لوگوں کا بھی کہنا ہے کہ 2005 میں آنے والے زلزلے کے بعد مظفر آباد کی آبادی تیزی سے بڑھ رہی ہے کیونکہ آزاد جموں و کشمیر کے دور دراز علاقوں سے لوگ اپنے گھر بار چھوڑ کر یہاں منتقل ہو رہے ہیں تا کہ مستقبل میں کسی قدرتی آفت کا شکار ہونے کی صورت میں صحت اور نقل و حمل کی سہولیات ان کی پہنچ میں رہیں۔

اسی طرح وفاقی وزارتِ آبی وسائل نے بھی 2019 میں تیار کی گئی اپنی ایک رپورٹ میں لکھا ہے کہ واپڈا کی طرف سے 11-2010 میں نیلم جہلم ہائیڈرو پاور پراجیکٹ کے ماحولیاتی اثرات کا کرایا گیا تجزیہ درست نہیں لگتا۔ اس رپورٹ میں کہا گیا ہے کہ اس غلط تجزیے کی بنیاد پر دریائے نیلم کا ماحولیاتی بہاؤ (یعنی پانی کی وہ کم سے کم مقدار جو دریا کے قدرتی ماحول کے تحفظ کے لیے ضروری ہے) نو مکعب میٹر فی سیکنڈ رکھا گیا ہے &quot;جو ناکافی معلوم ہوتا ہے&quot;۔

آزاد جموں و کشمیر کے تحفظِ ماحولیات کے ادارے نے اسی طرح کے خدشات کے پیشِ نظر 2011 میں واپڈا کو نیلم جہلم ہائیڈرو پاور پراجیکٹ کی تعمیر کا اجازت نامہ جاری کرتے ہوئے کئی شرائط عائد کی تھیں جن میں سے ایک یہ تھی کہ واپڈا ایسی سکیمیں شروع کرے گا جو مظفر آباد اور اس منصوبے سے متاثرہ دوسرے عللاقوں کی پانی کی ضرورت پوری کر سکیں۔

اس ادارے کے ڈائرکٹر جنرل عدنان خورشید کا کہنا ہے کہ اجازت نامہ دیتے وقت منصوبے کی انتظامیہ کو واضح طور پر کہا گیا تھا کہ وہ مظفر آباد اور اس کے گرد و نواح میں پانی کی فراہمی کے لیے سکیمیں شروع کرے گی، شہر کے استعمال شدہ گندے پانی کو صاف کرنے کے پلانٹ لگائے گی اور منصوبے سے متاثرہ علاقے میں زیرِ زمیں پانی کی سطح کو برقرار رکھنے کیے پانی کے ذخیرے تعمیر کرے گی۔

2014 میں ان کے ادارے نے اپنی شرائط کو دہراتے ہوئے اسے خبردار کیا تھا کہ اگر مظفر آباد شہر اور نوسیری اور مجہوہی نامی دیہات کی مقامی آبادی کی پانی کی ضروریات پورا کرنے کے لیے سکیمیں شروع نہ کی گئیں تو نیلم جہلم ہائیڈرو پاور پراجیکٹ کی تعمیر کے لیے دی گئی اجازت منسوخ کر دی جائے گی۔

<h2>دریا یا گندا نالہ</h2>

ادھیڑ عمر کے راجہ عمر احسن مظفر آباد کے سکریٹریٹ روڈ پر دریائے نیلم کے کنارے رہتے ہیں۔ ماضی میں جب ان کے رشتے دار دوسرے شہروں سے انہیں ملنے آتے تھے تو وہ ان کے ساتھ گرمیوں کی شاموں میں اپنے گھر کے باہر چارپائی پر بیٹھ کر دریا کی ٹھنڈی فضا کا مزا لیتے تھے لیکن وہ کہتے ہیں کہ اب بدبو کی وجہ سے اس کے پاس کھڑا ہونا بھی مشکل ہو گیا ہے۔

اس کی وجہ یہ ہے کہ شہر کا سارا&nbsp; استعمال شدہ گندا پانی براہِ راست دریائے نیلم میں شامل ہو رہا ہے جبکہ اس کے کناروں پر بھاری مقدار میں پھینکا گیا گھریلو اور صنعتی و تجارتی کچرا بھی اس کے بہاؤ کا حصہ بنتا رہتا ہے۔

مظفر آباد کے ایک ہسپتال میں کام کرنے والے معالج ڈاکٹر اعجاز احمد کہتے ہیں کہ پہلے بھی شہر کا کوڑا کرکٹ اور استعمال شدہ پانی دریائے نیلم میں ہی ڈالا جاتا تھا لیکن اس میں پانی کی مقدار زیادہ ہونے کی وجہ سے اس ماحول دشمن عمل کے اثرات واضح نہیں ہوتے تھے۔ لیکن، ان کے مطابق، &quot;اب ایک طرف دریا میں پانی کی مقدار کم ہو رہی ہے جبکہ دوسری طرف بڑھتی ہوئی آبادی کی وجہ سے اس میں پھینکے جانے والے فضلے اور کچرے کی مقدار میں اضافہ ہو رہا ہے&quot;۔

ان کا یہ بھی کہنا ہے کہ دریائی آلودگی میں اضافے کی وجہ سے مظفر آباد میں پچھلے چند سالوں میں ٹائیفائیڈ، ڈائیریا اور ڈینگی جیسے وبائی امراض بڑھ گئے ہیں کیونکہ دریا میں پانی کی مقدار کم ہونے سے شہر کا اوسط درجہِ حرارت چار سے پانچ ڈگری سینٹی گریڈ&nbsp; بڑھ گیا ہے (جس کی تصدیق وفاقی وزارتِ آبی وسائل نے بھی اپنی 2019 کی رپورٹ میں کی ہے) اور بارش اور گندے ندی نالوں سے دریا میں شامل ہونے والا پانی اس کے خشک پاٹ میں چھوٹے چھوٹے جوہڑوں کی صورت میں جمع ہو رہا ہے جہاں مچھروں کی خوب افزائش ہوتی ہے۔

عالمی ادارہِ صحت کی طرف سے جاری کیے گئے اعداد و شمار ڈاکٹر اعجاز احمد کے تجزیے کی توثیق کرتے ہیں۔ ان کے مطابق 2019 میں آزاد جموں و کشمیر میں ڈینگی کے ایک ہزار چھ سو 89 مریض سامنے آئے جن میں سے زیادہ تر کا تعلق مظفر آباد سے تھا جبکہ نومبر 2021 میں ایسے مریضوں کی تعداد مزید بڑھ کر دو ہزار پانچ سو 80 ہو گئی۔

انہی مسائل کے حل کے لیے آزاد جموں و کشمیر کے تحفظِ ماحولیات کے ادارے نے نیلم جہلم ہائیڈرو پاور پراجیکٹ کی منظوری کے لیے یہ شرط رکھی تھی کہ واپڈا مظفر آباد میونسپل کارپوریشن کے ساتھ مل کر 16 ایسے پلانٹ لگائے گا جن سے گندا پانی صاف کر کے دریا میں ڈالا جائے گا۔ لیکن مقامی لوگ اور آزاد جموں و کشمیر کی حکومت کے اہل کار کہتے ہیں کہ ابھی تک اس شرط پر کوئی عمل درآمد نہیں ہوا۔

نیلم جہلم ہائیڈروپاور پراجیکٹ: مالی بےضابطگیوں اور بدعنوانی کی 21 سالہ طویل داستان۔

دریا کنارے پیاسے لوگ: ناقص منصوبہ بندی کے ہاتھوں دریائے نیلم کی تباہی کیسے ہوئی۔

لاہور کو دنیا کا آلودہ ترین شہر بنانے میں دھواں چھوڑتے کارخانوں اور گاڑیوں کا کردار۔

ضلع شیخوپورہ کے دیہات ایاں نگر کلاں کے رہنے والے 62 سالہ سلمان سجاد وڑائچ اپنی 50 ایکڑ اراضی شمسی توانائی پر چلنے والے ان ٹیوب ویلوں سے سیراب کرتے ہیں جو انہوں نے 2018 میں لگائے تھے کیونکہ اس وقت انہیں نصب کرنے پر حکومت کسانوں کو ان کی کل مالیت کا 80 فیصد امداد کے طور پر دے رہی تھی۔&nbsp;

لیکن وہ کہتے ہیں کہ یہ امداد صرف انہی کسانوں کو دی جا رہی تھی جو پانی کو ضائع ہونے سے بچانے کے لیے آب پاشی کا ایک ایسا نظام (ڈرِپ ایریگیشن) بھی نصب کر رہے تھے جس کے ذریعے کھاد ملا پانی سیدھا فصلوں کی جڑوں تک پہنچایا جاتا ہے۔ اگرچہ اس نظام کی لاگت پر بھی حکومت نے انہیں 60 فیصد مالی امداد فراہم کی لیکن ان کا کہنا ہے کہ اس کے باوجود ٹیوب ویلوں اور ڈرِپ ایریگیشن کی تنصیب پر ان کا پچاس لاکھ روپیه خرچ ہوا۔&nbsp;

پنجاب کے زیادہ تر کسانوں کے پاس اس قدر نقد رقم ہوتی ہی نہیں۔&nbsp;

پنجاب کی تحصیل پاکپتن کے 40 سالہ کاشت کار نصیرالدین چشتی ان کسانوں میں شامل ہیں جو صرف جزوی طور پر اتنی بڑی رقم کا بندوبست کر سکتے ہیں۔ کچھ عرصہ پہلے اپنی ساٹھ ایکڑ اراضی سیراب کرنے کے لیے انہوں نے 35 لاکھ روپے کی لاگت سے شمسی توانائی سے چلنے والے ٹیوب ویل لگائے جس کے بعد ان کے پاس اتنے پیسے نہیں بچے کہ وہ اپنی بقیہ اراضی پر بھی اسی طرح کے ٹیوب ویل لگا لیں۔

اس لیے انہوں نے سوچا کہ کیوں نہ مزید ٹیوب ویل لگانے کے لیے وہ کسی بینک سے قرض لے لیں لیکن جب انہوں نے اپنے دوستوں اور اپنے علاقے کے دوسرے کسانوں سے اس بارے میں معلومات حاصل کیں تو انہیں پتہ چلا کہ بینک نہ صرف قرض کی منظوری میں بہت وقت لگا دیتے ہیں بلکہ بہت سی غیر ضروری دستاویزات بھی طلب کرتے ہیں جنہیں جمع کرنے کے لیے بہت خوار ہونا پڑتا ہے۔ اس لیے انہوں نے مزید ٹیوب ویل لگانے کا ارادہ ہی ترک کر دیا۔&nbsp;

ملتان میں رہنے والے 50 سالہ زمیندار عامر گل کو بھی اسی طرح کے مسائل کا سامنا ہے۔&nbsp;

وہ جنوبی پنجاب کے ضلع بہاولپور کی تحصیل یزمان منڈی میں بارہ ایکڑ پر پھیلے ہوئے اپنے لیموں، کینو اور مالٹے کے باغات کو زیرزمین پانی سے سیراب نہیں کر سکتے کیونکہ اس علاقے میں یہ پانی کڑوا ہے۔ اس لیے وہ آب پاشی کے لیے نہری پانی استعمال کرتے ہیں۔ لیکن جہاں ایک طرف بہاولپور میں نہری پانی کی طلب ہر سال بڑھ رہی ہے (کیونکہ یہاں زیرِ کاشت رقبے میں مسلسل اضافہ ہو رہا ہے) وہاں دوسری طرف مقامی نہروں میں دستیاب پانی مختلف انتظامی اور موسمیاتی وجوہات کی بنا پر کم ہو رہا ہے۔

چنانچہ وہ زیرزمین کڑوے پانی کو کشید کر کے اسے ریورس آسموسس (آر او) ٹیکنالوجی کے ذریعے صاف کرنا چاہتے ہیں تاکہ وہ اسے ایک بڑے حوض میں جمع کر کے بوقت ضرورت کام &nbsp;میں لا سکیں۔ اس مقصد کے لیے انہیں نہ صرف بجلی سے چلنے والا ٹیوب ویل لگانا پڑے گا بلکہ آر او پلانٹ چلانے کے لیے بھی بجلی درکار ہو گی &nbsp;لیکن حکومتی گرِڈ سے ملنے والی بجلی کی قیمت اتنی زیادہ ہے کہ اسے استعمال کرنے سے ان کی پیداواری لاگت ان کی استطاعت سے بہت بڑھ جائے گی۔ اس لیے وہ زمین سے پانی نکالنے اور اسے صاف کرنے کے لیے شمسی توانائی کا استعمال کرنا چاہتے ہیں۔&nbsp;

لیکن ان دونوں مقاصد کے لیے درکار مشینری کو شمسی توانائی پر چلانے کا ابتدائی خرچہ اس قدر زیادہ ہے کہ وہ اس کے لیے ضروری مالی وسائل اکٹھے نہیں کر پا رہے۔ انہوں نے2019 &nbsp;میں مختلف بینکوں سے بھی رابطے کیے لیکن جن شرائط اور ضوابط پر یہ بینک انہیں شمسی توانائی سے بجلی پیدا کرنے والی پلیٹوں (فوٹو والٹئیک سولر پینل) کے لیے قرضہ فراہم کرنے پر آمادہ تھے وہ ان جیسے درمیانے درجےکے زمیندار کے لیے بہت سخت ہیں۔

عامر گل کہتے ہیں کہ ایک ٹیوب ویل چلانے کے لیے درکار پلیٹوں کی تنصیب کی خاطر دیا جانے والا قرض اور اس پر لگنے والا سود مجموعی طور پر قریباً نو لاکھ روپے بنتے ہیں جو ان کی مروجہ قیمت سے دوگنا زیادہ ہے جبکہ اس کے لیے انہیں بینک کے پاس اپنی زمین بھی گروی رکھنا پڑتی۔ ان کا یہ بھی کہنا ہے کہ بینک والے قرض کی رقم زمیندار کو دینے کے بجائے اپنے منظور شدہ کمپنیوں کو دیتے ہیں جو اپنی مرضی کی پلیٹیں لگا کر چلی جاتی ہیں۔ ان کے بقول &quot;اگر یہ پلیٹیں بعد میں غیر معیاری نکلیں تو آپ کچھ نہیں کر سکتے&quot;۔

اسلام آباد میں کام کرنے والی ایک سماجی تنظیم، رورل ڈیولپمنٹ پالیسی انسٹیٹوٹ (آر ڈی پی آئی)، کی ایک حالیہ رپورٹ میں بھی کہا گیا ہے کہ پاکستانی بینک شمسی توانائی سے بجلی پیدا کرنے والی پلیٹوں کے لیے قرض دینے میں بہت تامل کا مظاہرہ کرتے ہیں کیونکہ وہ اس کے واپس نہ ملنے کی صورت میں گروی رکھی جانے والی زمین کو اپنے قبضے میں لینے اور اسے فروخت کرنے کے اخراجات برداشت نہیں کرنا چاہتے۔ اس رپورٹ کی مصنفہ یہ بھی کہتی ہیں کہ ابھی تک پاکستان میں استعمال شدہ پلیٹوں کی خرید و فروخت کا کوئی طریقہِ کار وجود میں نہیں آیا جس کے باعث بینک قرضہ واپس نہ کرنے والے کسانوں سے یہ پلیٹیں واپس لے کر انہیں کسی اور شخص یا ادارے کو بیچ بھی نہیں سکتے۔&nbsp;

ان کا کہنا ہے کہ سٹیٹ بینک آف پاکستان نے 2016 میں ایک ایسی سکیم جاری تو کر دی جس کے تحت بینکوں کو کہا گیا کہ وہ شمسی توانائی کے فروغ کے لیے قرضے فراہم کریں لیکن اس سکیم کے نتیجے میں پیدا ہونے والے مسائل کا کوئی حل پیش نہ کیا گیا۔ مثال کے طور پر اس کے تحت بینک شمسی توانائی سے پیدا ہونے والی بجلی کو محفوظ کرنے کے لیے درکار بیٹریوں کے لئے قرضہ نہیں دیتے حالانکہ ان بیٹریوں کی لاگت پلیٹوں پر آنے والی لاگت کے برابر ہی ہوتی ہے۔ اسی طرح حکومت نے بینکوں کو ایسی کوئی یقین دہانی نہیں کرائی کہ قرضے واپس نہ ہونے کی صورت میں انہیں ہونے والا خسارہ برداشت کرنے میں وہ ان کی مالی مدد کرے گی حالانکہ کچھ دوسری قرضہ سکیموں کے بارے میں حکومت یہ یقین دہانی فراہم کر چکی ہے۔

اس کی سب سے نمایاں مثال نیا پاکستان ہاوسنگ سکیم کے تحت دیے جانے والے قرضے ہیں جن کے واپس نہ ہونے کی صورت میں بینکوں کو ہونے والے خسارے کا 40 فیصد حصہ حکومتِ پاکستان برداشت کرتی ہے۔ اس مقصد کے لیے حکومت نے ورلڈ بینک کے تعاون سے 15 ارب روپے کا فنڈ بھی قائم کیا ہوا ہے۔

سٹیٹ بینک آف پاکستان کے اسسٹنٹ ڈائریکٹر زرک خان بھی آر ڈی پی آئی کی رپورٹ کی مصنفہ کے تجزیے سے متفق ہیں۔ اس رپورٹ کی اکتوبر 2021 میں ہونے والی رونمائی کے موقع پر ان کا کہنا تھا کہ بینکوں نے قرضہ دینے کی شرائط اس لیے سخت رکھی ہیں کہ اس کے واپس نہ ہونے کی صورت میں ہونے والا نقصان صرف انہی کو برداشت کرنا ہوتا ہے۔ تاہم انہوں نے یہ امید بھی ظاہر کی کہ جیسے جیسے شمسی توانائی سے بجلی بنانے والے استعمال شدہ سامان کی خرید و فروخت کی مارکیٹ وجود میں آ جائے گی ویسے ویسے نجی بینک اپنی شرائط آسان کرتے جائیں گے۔

<h2>لائسنس راج&nbsp;</h2>

لاہور کی کینال ویو ہاؤسنگ سو سائٹی میں رہنے والے 35 سالہ عثمان بھٹی نے دسمبر 2020 میں اپنے گھر کی چھت پر شمسی توانائی سے دس کلو واٹ بجلی پیدا کرنے والا سسٹم لگوایا۔ اس پر 11 لاکھ روپے خرچ آئے جو انہوں نے اپنی جیب سے ادا کیے۔

ان کے بھائی بھی اب اسی طرح کا سسٹم لگوانا چاہتے ہیں لیکن عثمان بھٹی کہتے ہیں کہ پچھلے 10 ماہ میں اس کی تنصیب کا خرچہ تقریباً پندرہ لاکھ روپے تک جا پہنچا ہے۔ ان کے مطابق اس کی وجہ یہ ہے کہ ڈالر کے مقابلے میں روپے کی مسلسل گرتی ہوئی قدر کے باعث اس میں استعمال ہونے والی غیر ملکی بیٹریوں اور پلیٹوں کی قیمت بہت بڑھ گئی ہے۔

اسی طرح وہ ایک اور مسئلے کی نشان دہی بھی کرتے ہیں۔

چونکہ ان کے شمسی توانائی سے چلنے والے سسٹم کی پیدا کردہ بجلی ان کی گھریلو ضروریات سے زیادہ ہے اس لیے وہ اضافی بجلی لاہور الیکٹرک سپلائی کمپنی (لیسکو) کے ہاتھ فروخت کرنا چاہتے ہیں۔ ان کا کہنا ہے کہ انہوں نے پچھلے سال کے اختتام پر لیسکو کو ایک درخواست دی کہ انہیں بجلی کی فروخت کا لائسنس جاری کیا جائے۔ لیسکو اس طرح کی درخواستیں نیشنل الیکٹرک پاور ریگولیٹری اتھارٹی (نیپرا) کو بھیج دیتا ہے جس کی طرف سے منظوری ملتے ہی لائسنس جاری ہو جاتا ہے اور لیسکو کے اہل کار شمسی توانائی سے بجلی پیدا کرنے والے گھر پر ایک مخصوص میٹر نصب کر دیتے ہیں جس سے پتہ چلتا رہتا ہے کہ وہاں سے کتنی بجلی لیسکو کے گرِڈ میں شامل ہو رہی ہے۔&nbsp;

آلٹرنیٹو انرجی ڈیولپمنٹ بورڈ نامی حکومتی ادارے کی جاری کردہ گائیڈ لائن کے مطابق اس سارے عمل میں تقریباً ایک سے ڈیڑھ ماہ کا وقت لگنا چاہیے لیکن عثمان بھٹی کہتے ہیں کہ انہیں درخواست دیے ہوئے تقریباً دس ماہ ہو گئے ہیں مگر ابھی تک انہیں نیپرا کی منظوری کا انتظار ہے۔ وہ دعویٰ کرتے ہیں کہ انہوں نے اپنی درخواست کو ایک سرکاری افسر سے دوسرے سرکاری افسر تک پہنچانے کے لیے لیسکو کے اہل کاروں سے کئی ملاقاتیں بھی کی ہیں اور کچھ سرکاری حکام کو رشوت بھی دی ہے لیکن اس کے باوجود انہیں ابھی تک لائسنس نہیں ملا۔ جس کا نتیجہ یہ ہے کہ اپنے گھر میں لگے شمسی توانائی کے سسٹم سے وہ کوئی مالی فائدہ نہیں اٹھا سکتے۔&nbsp;

نیپرا کے ڈائریکٹر جنرل (لائسنسگ) امتیاز حسین بلوچ تسلیم کرتے ہیں کہ اگرچہ اس سلسلے میں دی گئی زیادہ تر درخواستوں کی منظوری مقررہ مدت کے اندر ہی ہو جاتی ہے لیکن ان میں سے کچھ پر توقع سے زیادہ وقت لگ جاتا ہے کیونکہ، ان کے مطابق، بعض اوقات درخواست دہندہ کی طرف سے تمام ضروری کاغذات یا تو دیر سے جمع کرائے جاتے ہیں یا ان میں سے کچھ کاغذات جمع ہی نہیں کرائے جاتے۔ وہ اس بات کا بھی اقرار کرتے ہیں کہ چند درخواستیں ایسی بھی ہوتی ہیں جنہیں نمٹانے میں سرکاری اہل کار ضرورت سے زیادہ وقت لگا دیتے ہیں۔ تاہم وہ نیپرا کی 2020-21 کی سالانہ رپورٹ کا حوالہ دیتے ہوئے کہتے ہیں کہ اب تک پورے پاکستان میں آٹھ ہزار چار سو 17 ایسی درخواستوں کی منظوری دے کر نئے میٹر نصب کیے گئے ہیں جبکہ ان میں سے دو ہزار ایک سو 70 میٹر صرف لاہور میں لگائے گئے ہیں۔

لیکن ان تمام میٹروں سے منسلک شمسی توانائی کا نظام محض 142 میگاواٹ کے قریب بجلی پیدا کرنے کی صلاحیت رکھتا ہے جو ملک میں پیدا ہونے والی کل بجلی کا ایک فیصد بھی نہیں حالانکہ آر ڈی پی آئی کی رپورٹ کی مصنفہ کہتی ہیں کہ پاکستان شمسی توانائی کا استعمال کر کے کئی گنا زیادہ بجلی پیدا کر سکتا ہے۔ ورلڈ بینک کی طرف سے2020 &nbsp;میں شائع کی جانے والی ایک رپورٹ بھی یہی کہتی ہے۔ اس کے مطابق اگر پاکستان کے صرف 0.071 فیصد رقبے پر شمسی توانائی سے بجلی پیدا کرنے کا سامان نصب کر دیا جائے تو اس سے پورے ملک کی بجلی کی موجودہ طلب پوری ہو سکتی ہے۔

لیکن وہ کہتی ہیں کہ اس بات کو ممکن بنانے کے لیے حکومت کو شمسی توانائی کی ترویج میں حائل انتظامی اور مالی رکاوٹیں دور کرنے کے لیے ایک جامع پالیسی بنانی ہو گی۔&nbsp;

ٹیوب ویلوں کے بجلی کے بلوں میں ڈالے گئے اضافی یونٹ: پنجاب بھر کے کسان شدید نالاں۔

بینکوں کے مہنگے قرضے اور افسر شاہی کے تاخیری حربے کس طرح شمسی توانائی کے فروغ کو روک رہے ہیں۔

Ahmadi women face social discrimination and religious bigotry.

نجمہ بی بی کے ساتھ کام کرنے والی خواتین اساتذہ ان کے سلام کا جواب تک نہیں دیتیں۔&nbsp;

ان کا تعلق احمدی مذہب سے ہے اور وہ 1989 سے ضلع فیصل آباد کی تحصیل جڑانوالہ کے مختلف سرکاری سکولوں میں پڑھا رہی ہیں۔ ان کے مطابق 2013 میں ان کے خاوند کی وفات کے کچھ عرصہ بعد ان کا تبادلہ ایک ایسے سکول میں ہو گیا جہاں پہلے دن ہی ان کا استقبال انتہائی سردمہری سے کیا گیا۔ شروع میں انہیں توقع تھی کہ وقت گزرنے کے ساتھ ساتھ سکول کا عملہ ان سے بہتر سلوک کرنے لگے گا لیکن اس کے برعکس ان کا رویہ مزید خراب ہوتا چلا گیا۔ وہ کہتی ہیں کہ &quot;عملے میں شامل افراد میرے ساتھ بیٹھ کر کھانا تک کھانا گوارا نہیں کرتے اور نہ ہی مجھے سٹاف روم میں داخل ہونے دیا جاتا ہے&quot;۔&nbsp;

اس سے پہلے وہ جس سکول میں تعینات تھیں وہاں انہیں کبھی کسی امتیازی سلوک کا سامنا نہیں کرنا پڑا تھا کیونکہ ایک تو ان کی اپنی رشتہ دار خاتون اس سکول کی ہیڈ مسٹریس تھیں (جو خود بھی احمدی تھیں) اور دوسرا یہ کہ باقی عملہ بھی ان سے مذہبی اختلاف رکھنے کے باوجود ان کا احترام کرتا تھا۔&nbsp;

لیکن نجمہ بی بی کے مطابق ان کے موجودہ سکول میں &quot;چار پانچ استانیوں کا ایک گروہ&quot; ان سے نفرت کرتا ہے اور &quot;انہوں نے آہستہ آہستہ باقی عملے کو بھی اپنے ساتھ ملا لیا ہے&quot;۔ لہٰذا 2015 میں جب ان کے بیٹے کی شادی ہوئی تو ان کے رفقائے کار میں سے کسی نے بھی اس میں شرکت نہ کی اور نہ ہی وہ نجمہ بی بی کو اپنی خوشیوں اور غموں میں شریک کرتے ہیں۔

زینب کو بھی اسی طرح کے سماجی رویوں کا سامنا ہے۔&nbsp;

وہ وسطی پنجاب کے شہر چنیوٹ میں رہتی ہیں اور احمدی مذہب کو ماننے والی ہیں۔ وہ چار سال سے شادی شدہ ہیں اور ایک سالہ بیٹی کی ماں بھی ہیں جس کی دیکھ بھال پر توجہ دینے کے لیے وہ گھر سے باہر نہیں نکل سکتیں اس لیے انہوں نے سِلے سلائے کپڑے بیچنے کا آئن لائن کاروبار شروع کر رکھا ہے۔

زینب نے شادی سے پہلے اپنی زندگی کے 26 سال چنیوٹ کے پاس واقع ربوہ نامی قصبے میں گزارے ہیں جو پاکستان میں احمدی جماعت کا مذہبی اور انتظامی صدر مقام ہے۔ ان کا کہنا ہے کہ ربوہ میں رہتے ہوئے انہیں کسی قسم کے مذہبی امتیاز کا سامنا نہیں کرنا پڑا (کیونکہ وہاں کی 55 ہزار کے لگ بھگ مجموعی آبادی میں سے 90 فیصد لوگ احمدی ہیں) لیکن ان کی مختصر سی کاروباری زندگی میں انہیں متعدد بار ایسے لوگوں سے واسطہ پڑا ہے جو ان کے مذہب سے شدید دشمنی رکھتے ہیں۔&nbsp;

ان کے مطابق کپڑے سپلائی کرنے والے کئی ڈیلروں نے ان کے مذہب کا پتہ چلنے پر ان سے کاروباری تعلقات توڑ لیے ہیں کیونکہ وہ کسی احمدی کے ساتھ لین دین کرنے کو جائز نہیں سمجھتے۔ (اسی طرح کئی دکان دار اپنی دکان کے باہر لکھ کر لگا دیتے ہیں کہ اس میں احمدیوں کا داخلہ ممنوع ہے)۔

لاہور کی ایک نجی یونیورسٹی میں پڑھنے والی اکیس سالہ احمدی طالبہ نمرہ بھی کہتی ہیں کہ انہیں درپیش عمومی سماجی نفرت کی وجہ سے ان کا میل جول ان کے قریبی عزیزوں تک محدود ہے۔ انہیں تفریحی سرگرمیاں بہت اچھی لگتی ہیں لیکن انہیں ہر وقت یہ احساس رہتا ہے کہ پاکستان میں ان کے مذہب کو پسند نہیں کیا جاتا اس لیے انہوں نے غیر احمدی لوگوں کے ساتھ گھومنے پھرنے اور کھانے پینے کی خواہش کا ہی گلا گھونٹ دیا ہے۔&nbsp;

نمرہ کی زندگی کے پہلے 10 سال ربوہ میں گزرے لیکن بعد میں ان کا خا ندان چنیوٹ میں منتقل ہو گیا جہاں سکول میں گزارے ہوئے وقت کے بارے میں ان کا کہنا ہے کہ شروع شروع میں انہیں احساس نہیں ہوتا تھا کہ وہ دوسرے بچوں سے مختلف ہیں لیکن جلد ہی ان کے ساتھ پڑھنے والی لڑکیوں نے انہیں ان کے عقیدے کی وجہ سے تنگ کرنا شروع کر دیا۔ ان میں سے کچھ تو انہیں برملا ناپسند کرنے لگیں اور کچھ ان سے ہمدردی کا اظہار کرتے ہوئے کہتیں &quot;تم اتنی اچھی انسان ہو لیکن ہمیں افسوس ہے کہ تم مسلمان نہیں ہو&quot;۔

نمرہ کہتی ہیں کہ لاہور آکر بھی وہ اس قسم کے رویوں سے بچ نہیں پائیں حالانکہ اپنی طرف سے انہوں نے یہاں ایک ایسی یونیورسٹی میں داخلہ لیا ہے جسے روشن خیال اور متنوع سمجھا جاتا ہے۔ ان کے مطابق ان کے ساتھ پڑھنے والے لڑکے اور لڑکیاں نہ صرف احمدیوں کے بارے میں اشتعال انگیز خیالات کا کھلم کھلا اظہار کرتے ہیں بلکہ انہیں واجب القتل بھی قرار دیتے ہیں۔&nbsp;

ان کے کچھ ساتھی طلبا نمرہ پر اپنا عقیدہ مخفی رکھنے کا الزام بھی لگاتے ہیں لیکن وہ کہتی ہیں وہ اپنی مذہبی شناخت کبھی نہیں چھپاتیں بلکہ &quot;جب کوئی مجھ سے میرے مذہب کے بارے میں پوچھتا ہے تو میں کہہ دیتی ہوں کہ میں احمدی ہوں&quot;۔ درحقیقت یونیورسٹی اور دوسرے عوامی مقامات پر وہ ایک ایسا برقعہ پہنتی ہیں جو اپنے منفرد ڈیزائن کی وجہ سے احمدی خواتین کی خاص نشانی سمجھا جاتا ہے۔

ان کے برعکس ان کی بہن احمدی برقعہ نہیں پہنتیں۔ وہ لاہور ہی کی ایک ایسی یونیورسٹی میں زیر تعلیم ہیں جہاں طلبا میں مذہبی شدت پسندی کا رجحان عام ہے اس لیے وہ اپنی حفاظت کے لیے اپنی مذہبی شناخت چھپانے کو ترجیح دیتی ہے۔&nbsp;

لاہور یونیورسٹی آف مینجمنٹ سائنسز میں سوشیالوجی کی استاد ڈاکٹر نِدا یاسمین کرمانی احمدی خواتین کو درپیش اس مذہبی اور سماجی امتیاز کے بارے میں بات کرتے ہوئے کہتی ہیں کہ گزشتہ تین دہائیوں میں پاکستان میں احمدیوں کے خلاف تعصب میں تیزی سے اضافہ ہوا ہے۔ ان کے مطابق اس کا ایک بڑا سبب &quot;ملک میں سنّی گروہوں کی بڑھتی ہوئی سیاسی طاقت اور اسلامی تنظیموں کی جانب سے احمدیوں کے خلاف پھیلائی جانے والی نفرت ہے جسے اکثر اوقات ریاستی سرپرستی بھی حاصل ہوتی ہے&quot;۔

حقیقت یہ ہے کہ احمدیوں کے ساتھ روا رکھے جانے والے شدت پسندانہ مذہبی اور سماجی رویوں کے فروغ میں ریاست براہِ راست حصہ دار ہے کیونکہ 1974 میں مرکزی پارلیمنٹ نے انہیں غیر مسلم قرار دے دیا اور 1984 میں اس وقت کی فوجی حکومت نے ایک ایسا قانون جاری کیا جس کے تحت کسی احمدی کا اپنے آپ کو مسلمان کہنا یا ظاہر کرنا بھی قابلِ سزا جرم بن چکا ہے۔

<h2>آگے کھائی اور پیچھے پہاڑ</h2>

بہت سی نوجوان احمدی خواتین کی طرح علینہ تقریباً بارہ سال قبل ربوہ سے لاہور تعلیم حاصل کرنے آئیں لیکن ان کے بی ایس کرنے سے پہلے ہی ان کے گھر والوں نے ان کی شادی کر دی لہٰذا انہیں اپنی تعلیم شادی کے بعد مکمل کرنا پڑی۔ اب وہ 28 سال کی ہیں اور ایک بچے کی ماں بھی ہیں۔

ان کا کہنا ہے احمدی خواتین کو دوہرے امتیازی سلوک کا سامنا کرنا پڑتا ہے کیونکہ ایک طرف تو بہت ہی چھوٹی مذہبی اقلیت (جس کی کل آبادی تقریباً چار لاکھ 85 ہزار لوگوں پر مشتمل ہے) سے تعلق رکھنے کی وجہ سے وہ ہر وقت مسلمان اکثریت کے تعصب کا نشانہ بنتی ہیں اور دوسری طرف خود ان کے اپنے خاندان اور جماعت والے انہیں ایک خود مختار زندگی نہیں گزارنے دیتے۔

علینہ کا کہنا ہے کہ احمدی خواتین کو لباس کے انتخاب جیسے روزمرہ کے معاملے سے لے کر اپنی تعلیم اور شادی جیسے اہم فیصلوں تک کوئی اختیار حاصل نہیں بلکہ یہ تمام معاملات ان کے خاندان کے مرد احمدی جماعت کی ہدایات کے مطابق طے کرتے ہیں۔ وہ کہتی ہیں کہ وہ اپنی پسند کا برقعہ بھی نہیں پہن سکتیں کیونکہ، ان کے مطابق، ان کی جماعت نے طے کر دیا ہے کہ احمدی خواتین کو کس طرح کا برقعہ استعمال کرنا چاہیے لہٰذا ربوہ میں کام کرنے والے تمام درزی صرف اسی وضع کے برقعے ہی تیار کرتے ہیں۔

جماعتِ احمدیہ پاکستان کے اہل کار کہتے ہیں کہ اگرچہ وہ چاہتے ہیں کہ ان کی جماعت سے تعلق رکھنے والی تمام خواتین مذہبی احکامات کے تحت اپنی زندگی گزاریں لیکن ان کا کہنا ہے کہ اس میں کبھی جبر سے کام نہیں لیا جاتا۔ لیکن علینہ کہتی ہیں کہ انہیں برقعہ ترک کرنے پر اپنے رشتے داروں کی طرف سے شدید تنقید کا نشانہ بنایا گیا حتیٰ کہ ان کے اپنے گھر والوں نے انہیں کہا کہ وہ جماعت کے احکامات کی خلاف ورزی کر کے اچھا نہیں کر رہیں۔&nbsp;

تاہم ان کا یہ بھی کہنا ہے کہ ایسے احکامات کا اطلاق عموماً متوسط اور غریب گھرانوں سے تعلق رکھنے والی خواتین پر زیادہ سختی سے کیا جاتا ہے۔ ان کے بقول &quot;اگر آپ کا تعلق ایک معاشی طور پر &nbsp;مضبوط گھرانے سے ہے تو ان احکامات کو نظر انداز کرنا آپ کے لیے کوئی بڑی بات نہیں&quot;۔

اپنی بات کے ثبوت میں وہ بیرونِ ملک مقیم ایک احمدی خاتون کی مثال دیتی ہیں جو اکثر ربوہ میں دیگر خواتین کو تعلیم کی افادیت اور دیگر سماجی موضوعات پر لیکچر دینے آتی ہیں۔ علینہ کے مطابق وہ خاتون &quot;نہ تو برقعہ پہنتی ہیں اور نہ ہی سر ڈھانپتی ہیں&quot;۔

ربوہ سے تعلق رکھنے والی عینی کو بھی اپنے خاندان اور جماعت سے اسی طرح کی شکایات ہیں۔

کچھ سال پہلے جب انہوں نے اپنے والدین سے لاہور جا کر اور ہاسٹل میں رہ کر پڑھنے کی اجازت مانگی تو انہیں کہا گیا کہ اس کے لیے پہلے انہیں اپنے مذہب سے تعلق رکھنے والے ایک ایسے لڑکے سے منگنی کرنا ہو گی جسے وہ اچھی طرح جانتی بھی نہیں تھیں۔ ان کی عمر اس وقت 20 سال سے بھی کم تھی لیکن پڑھائی کی خاطر انہوں نے ہاں کر دی۔

تاہم لاہور میں رہتے ہوئے عینی کو احساس ہوا کہ ان کے خیالات اور اندازِ فکر ان کے منگیتر سے بہت مختلف ہیں۔ چنانچہ انہوں نے اپنے والدین پر اپنی منگنی ختم کرنے کے لیے زور ڈالنا شروع کر دیا (جس کے نتیجے میں انہوں نے منگنی کی انگوٹھی بھی واپس کر 
&nbsp;دی ہے)۔

اگر وہ اس رشتے کو تڑوانے میں کامیاب ہو بھی جاتی ہیں تو ان کے مطابق انہیں شادی بالآخر کسی احمدی لڑکے سے ہی کرنا پڑے گی خواہ وہ اسے پسند کرتی ہوں یا نہیں۔ وہ کہتی ہیں کہ کسی احمدی خاتون کو یہ اختیار حاصل نہیں کہ وہ اپنی مرضی سے کسی غیر احمدی مرد سے شادی کر لے۔ ان کے بقول اس صورت میں اسے اپنے خاندان اور جماعت دونوں کی طرف سے بائیکاٹ کا سامنا کرنا ہو گا۔&nbsp;

لیکن ڈاکٹر ندا یاسمین کرمانی کہتی ہیں کہ یہ معاملہ احمدیوں تک محدود نہیں بلکہ ہر مذہب، ہر فرقے اور ہر گروہ میں اجتماعی عزت اور گروہی شناخت کا تصور خواتین کے جسم اور ان کی خودمختاری &nbsp;کے ساتھ نتھی کر دیا گیا ہے۔ ان کے بقول جیسے ہی اس گروہ سے تعلق رکھنے والی خواتین اپنی خود مختاری کا مطالبہ کرتی ہیں یہ تصور خطرے میں پڑ &nbsp;جاتا ہے۔

ان کا یہ بھی کہنا ہے کہ کوئی بھی اقلیتی مذہبی گروہ جب یہ محسوس کرتا ہے کہ اس کی شناخت اور بقا خطرے میں ہے تو اس سے تعلق رکھنے والے مرد اپنی خواتین &nbsp;کو قابو میں رکھنے کی کوششیں تیز تر کر دیتے ہیں تا کہ انہیں دوسرے مذاہب سے تعلق رکھنے والے مردوں سے &#39;محفوظ&#39; رکھ کر وہ اپنے مذہب کے حیاتیاتی تسلسل کو یقینی بنا سکیں۔ اسی وجہ سے پاکستان میں &quot;احمدیوں سمیت تمام اقلیتی گروہوں سے تعلق رکھنے والی خواتین کو دوہرے ظلم کا سامنا کرنا پڑتا ہے&quot;۔

نوٹ: اس رپورٹ میں شامل احمدی خواتین کے نام تبدیل کر دئیے گئے ہیں تاکہ ان کی نِجی اور اجتماعی زندگی پر کوئی منفی اثر نہ پڑے۔

گھر میں امتیازی سلوک اور باہر مذہبی تعصب کا سامنا: احمدی خواتین 'دوہرے ظلم' کا شکار۔

How girls' education has affected by the Corona pandemic compared to boys

How many girls in Pakistan has stopped going to school during Covid-19?

راولپنڈی کے علاقے مسلم ٹاون کی رہنے والی شازیہ بی بی کے تینوں بچے مارچ 2020 کے بعد سکول نہیں جا سکے۔

ڈیڑھ سال پہلے ان کے شوہر جوتوں کی دکان پر سیلز مین تھے اور 18 ہزار سے 20 ہزار روپے ماہانہ کماتے تھے۔ اس قلیل آمدن کو بہتر بنانے کے لیے 45 سالہ شازیہ بی بی فارغ وقت میں محلے والوں کے کپڑے سی لیا کرتی تھیں۔ لیکن جب کورونا وبا کی روک تھام کے لیے حکومت نے صنعتی اور تجارتی سرگرمیوں پر پابندی لگائی تو ان کے شوہر کی نوکری چلی گئی۔ یوں گھر چلانے کی ساری ذمے داری ان کے کندھوں پر آ پڑی اور ان کا کپڑے سینے کا مشغلہ ان کی آمدنی کا واحد ذریعہ بن گیا۔ &nbsp;

ان کا کہنا ہے کہ اس کام کے عوض ملنے والا معاوضہ اس قدر قلیل ہے کہ انہیں گزر بسر کرنے کے لیے کئی گھریلو خرچے بہت کم کرنا پڑے ہیں جن میں بچوں کی تعلیم پر ہونے والے اخراجات بھی شامل ہیں۔&nbsp;

ان کے مطابق پچھلے سال ستمبر میں چھ ماہ کی بندش کے بعد جب سکول دوبارہ کھلے تو ان کے پاس بچوں کی فیس دینے کے لیے پیسے نہیں تھے لہٰذا انہوں نے اپنے دونوں بیٹوں کو سکول سے نکال کر اپنے گھر کے قریب ایک سستے ٹیوشن سنٹر میں بھیجنا شروع کر دیا۔ وہ اس وقت نویں اور دسویں جماعت میں پڑھ رہے تھے اس لیے شازیہ بی بی کو فکر تھی کہ ان کی تعلیم کو بالکل منقطع کر دینا کہیں ان کے مستقبل پر بہت منفی اثر نہ ڈالے۔&nbsp;

لیکن اپنی 10 سالہ بیٹی کی پڑھائی انہوں نے بالکل ختم کرا دی۔

راولپنڈی ہی کے نورانی محلہ کی شاہ خالد کالونی میں رہنے والی شازیہ طاہر نے بھی ایسا ہی کیا۔ ان کے شوہر &nbsp;2018 کے آخر میں دِل کا دورہ پڑنے کی وجہ سے وفات پا گئے تھے۔ تب سے وہ اپنے گھریلو اخراجات پورے کرنے کے لیے دوسرے لوگوں کے گھروں میں صفائی ستھرائی کا کام کرتی ہیں۔

پچھلے سال جب کورونا وبا کی وجہ سے ان کی آمدن میں کمی آ گئی تو انہیں انتخاب کرنا پڑا کہ وہ اپنے چھ سالہ بیٹے اور 13 سالہ بیٹی میں سے کس کی تعلیم کا خرچہ برداشت کریں۔ انہوں نے فیصلہ بیٹے کے حق میں دیا اور بیٹی کا سکول چھڑا دیا۔

وہ کہتی ہیں کہ اپنی آٹھویں پاس بیٹی کو مزید پڑھانے کے بجائے اب وہ اس کی شادی کی تیاری کریں گی۔&nbsp;

لاہور کے جوہر ٹاؤن میں شوالہ روڈ پر واقع ایک کچی بستی میں رہنے والی جمیلہ بی بی اور ان کے رکشا ڈرائیور شوہر طالب حسین کی کہانی کچھ زیادہ مختلف نہیں۔ محدود ذرائع آمدن کے باوجود انہوں نے اپنی تین بیٹیوں اور ایک بیٹے کو نجی تعلیمی اداروں میں داخل کرایا ہوا تھا لیکن کورونا کی وجہ سے ان کی آمدن میں کمی ہو گئی تو انہیں اپنی بیٹیوں کو سکول سے نکالنا پڑ گیا۔&nbsp;

طالب حسین کا کہنا ہے کہ وبا کے ابتدائی مہینوں میں لگنے والے لاک ڈاؤن میں نہ صرف وہ کافی عرصہ بے روزگار رہے بلکہ ان کی جمع پونجی بھی روز مرہ کے اخراجات کی نذر ہو گئی۔ اس دوران جب ستمبر 2020 میں بند شدہ تعلیمی ادارے کھلے تو ان کے پاس چاروں بچوں کی فیس دینے کے پیسے نہیں تھے چنانچہ انہوں نے صرف اپنے بیٹے کی تعلیم جاری رکھنے کا فیصلہ کیا حالانکہ اس کی ماہانہ فیس ان کی تینوں بیٹیوں کی مجموعی ماہانہ فیس سے ڈھائی گنا زیادہ ہے۔&nbsp;

اسی بستی سے کچھ دور ایک جھونپڑی میں نادر علی کا خاندان آباد ہے۔ وہ دس سال قبل فیصل آباد سے روزگار کی تلاش میں لاہور آئے تھے اور 2020 کے وسط تک ایک نِجی کاروباری ادارے میں بطور سکیورٹی گارڈ ملازم &nbsp;تھے۔ کورونا وبا کی وجہ سے وہ نوکری سے ہاتھ دھو بیٹھے جس کے نتیجے میں ان کے خاندان &nbsp;کی گزر بسر اب اُن کی بیوی مصباح کی کمائی پر ہے جو کپڑے سینے کا کام کرتی ہیں۔ &nbsp;

ان کے دونوں بیٹے نِجی تعلیمی اداروں میں پڑھتے ہیں جبکہ بیٹی ایک دینی مدرسے میں زیرِ تعلیم ہے۔ نادر علی کہتے ہیں کورونا وبا سے قبل ان کی پانچ سالہ بیٹی بھی سکول میں داخل تھی لیکن پھر انہوں نے فیصلہ کیا کہ وہ اسے دینی تعلیم دلوائیں گے کیونکہ، ان کے بقول، &quot;لڑکیوں کو گھرداری چلانے کے لئےجو ہنر درکار ہوتے ہیں انہیں سیکھنے کے لیے گھر اور مدرسہ ہی کافی ہیں&quot;۔

<h2>لڑکیوں کی تعلیم: اعداد و شمار کیا کہتے ہیں؟</h2>

انسانی حقوق کے لیے کام کرنے والی بین الاقوامی تنظیم ہیومن رائٹس واچ کی ایک حالیہ رپورٹ میں کہا گیا ہے کہ کورونا وبا سے پہلے پاکستان میں دو کروڑ 20 لاکھ کے لگ بھگ بچے سکول نہیں جا رہے تھے جن میں لڑکیوں کی تعداد لڑکوں کی نسبت زیادہ تھی۔ اس رپورٹ کے مطابق 50 لاکھ پاکستانی بچے پرائمری سکول جانے کی عمر میں تھے لیکن وہ کسی تعلیمی ادارے میں داخل نہیں تھے۔ ایسے ہر دس بچوں میں سے چھ لڑکیاں تھیں۔ اسی طرح ایسے بچے جو مڈل سکول جانے والی عمر میں تھے مگر پڑھتے لکھتے نہیں تھے ان میں سے 59 فیصد لڑکیاں تھیں۔ رپورٹ کا یہ بھی کہنا تھا کہ ہائی سکول پہنچنے والے ہر 100 بچوں میں لڑکیوں کی تعداد صرف 13 تھی۔

لیکن جیسا کہ اوپر بیان کیے گئے واقعات سے ظاہر ہوتا ہے کورونا کے پھیلنے کے بعد سکول نہ جانے والے بچوں کی مجموعی تعداد میں اضافہ تو ہوا ہی ہے اس میں سے لڑکیوں کی تعداد اور بھی تیزی سے بڑھی ہے۔&nbsp;

وفاقی محکمہِ تعلیم کے ایڈیشنل سیکرٹری محی الدین احمد وانی تسلیم کرتے ہیں کہ وبا کی وجہ سے لڑکوں کی نسبت لڑکیوں کی تعلیم زیادہ متاثر ہوئی ہے لیکن ان کا کہنا ہے کہ &quot;یہ طے کرنا ابھی مشکل ہے کہ ان میں سے کتنی طالبات مستقل طور پر تعلیم چھوڑ چکی ہیں اور کتنی کچھ عرصے بعد دوبارہ اپنی تعلیم کا سلسلہ شروع کر دیں گی&quot;۔

ان کے مطابق اس مسئلے کی نوعیت اور گہرائی کو سمجھنے کے لیے وسیع پیمانے پر تحقیق کی ضرورت ہے &quot;تا کہ معلوم ہو سکے کہ کن طبقات اور کن علاقوں میں لڑکیوں کی تعلیم کورونا کی وجہ سے زیادہ متاثر ہوئی ہے&quot;۔&nbsp;

تاہم ان عوامل کا جائزہ لینے کے لیے کچھ ادارے پہلے ہی کچھ نہ کچھ تحقیق کر چکے ہیں۔ ان میں نوبل انعام یافتہ پاکستانی طالبہ ملالہ یوسف زئی کی طرف سے لڑکیوں کی تعلیم کے لیے قائم کیا گیا ملالہ فنڈ بھی شامل ہے جس نے نومبر 2020 میں اس موضوع پر ایک تفصیلی رپورٹ شائع کی ہے۔&nbsp;&nbsp;

اس رپورٹ کی بنیاد پاکستان کے چاروں صوبوں میں جولائی-اگست 2020 میں کئے جانے والے ایک سروے پر رکھی گئی ہے جس میں 16 سو بالغ افراد اور 15 سو 92 بچوں نے حصہ لیا تھا۔ ان بچوں میں سے 65 فیصد لڑکے اور 35 فیصد لڑکیاں تھیں۔&nbsp;

سروے میں حصہ لینے والے 57 فیصد بالغ افراد کا کہنا تھا کہ انہیں کورونا کے دوران مالی مشکلات کا سامنا رہا (جس کے باعث ان میں سے کئی ایک کو اپنے بچوں کی تعلیم چھڑانا پڑی)۔ اس سروے سے یہ بھی پتہ چلتا ہے کہ پنجاب، سندھ اور خیبر پختونخوا کے دیہی اضلاع میں رہنے والے ایسے بچے جو کورونا کے دوران سکولوں سے نکال لیے گئے وہ اپنی تعلیم کے دوبارہ شروع ہونے کے بارے میں زیادہ پر امید نہیں۔ لیکن حیرت انگیز طور پر بلوچستان کے دیہی علاقوں کی طالبات شہری علاقوں کی طالبات کی نسبت زیادہ پر امید ہیں کہ ان کا منقطع تعلیمی سلسلہ جلد ہی پھر سے چل پڑے گا۔&nbsp;

اس سروے میں حصہ لینے والی بہت سی طالبات کا کہنا تھا کہ والدین کی طرف سے سکول جانے کی اجازت کا نہ ملنا، تعلیمی اخراجات ادا کرنے میں مشکلات اور سکولوں میں اساتذہ اور دیگر سہولیات کی عدم دستیابی ان کی تعلیم کے تسلسل میں پیش آنے والی بڑی رکاوٹیں ہیں۔

نِجی سکولوں کی تنظیم آل پاکستان پرائیویٹ سکولز فیڈریشن نے بھی حال ہی میں اس حوالے سے کچھ اعداد و شمار جاری کیے ہیں جن کے مطابق ایک کروڑ 30 لاکھ ایسے بچے نومبر 2020 کے بعد سکول نہیں جا رہے جو کورونا وبا سے پہلے تعلیم حاصل کر رہے تھے۔ فیڈریشن کا کہنا ہے کہ ان میں سے 60 فیصد لڑکیاں ہیں۔&nbsp;

لیکن سجاگ کے بار بار استفسار کے باوجود فیڈریشن نے یہ وضاحت نہیں کی یہ اعداد و شمار کس طرح، کب اور کس نے اکٹھے کیے ہیں۔ اسی لیے لاہور میں مقیم تعلیمی اور سماجی کارکن بیلا رضا جمیل انہیں درست نہیں مانتیں۔ ان کا کہنا ہے کہ ان اعدا و شمار سے یہ بھی واضح نہیں ہوتا کہ آیا لڑکیوں کی تعلیم عارضی طور پر منقطع ہوئی ہے یا وہ مستقلاً سکول چھوڑ چکی ہیں۔&nbsp;

وہ بہرحال مانتی ہیں کہ کورونا کی وجہ سے معاشی سرگرمیوں پر لگائی جانے والی پابندیوں نے بہت سے لوگوں کو مالی طور پر شدید متاثر کیا ہے جس کی وجہ سے &quot;کم آمدنی والے گھروں میں بہت سے ماں باپ کو بیٹوں اور بیٹیوں میں سے کسی ایک کو تعلیم دلانے کا انتخاب کرنا پڑا ہے&quot;۔ ان کے بقول، اس انتخاب کا سامنا کرنے والے والدین نے عموماً بیٹوں کی تعلیم کو ترجیح دی ہو گی کیونکہ &quot;بیٹیوں کی تعلیم پر پیسہ لگانا غیر اہم سمجھا جاتا ہے&quot;۔ &nbsp;

بیلا رضا جمیل کے بقول حکومت اس تعلیمی امتیاز کو ختم کرنے کے لیے کئی اقدامات کر رہی ہے جن میں سب سے اہم احساس ایجوکیشن پروگرام ہے جس کے تحت لڑکیوں کو ترجیحی بنیادوں پر تعلیمی وظائف دیے جا رہے ہیں۔ لیکن ان کا کہنا ہے کہ زیادہ تر والدین کو ایسے وظائف کے بارے میں معلوم ہی نہیں ہوتا۔ چنانچہ وہ کہتی ہیں کہ &quot;ان کی زیادہ سے زیادہ تشہیر کرنا بہت ضروری ہے تا کہ زیادہ سے زیادہ لڑکیاں ان سے مستفید ہو سکیں&quot;۔

کورونا وبا کے دوران سکول چھوڑنے والے بچوں میں لڑکیوں کی تعداد زیادہ کیوں ہے؟

How Kashmiri citizens, trade workers, and small business owners are suffering from the ban of Cross-LoC-Trade

Suspended Cross-LoC-Trade  is destroying business in both Kashmir

مہندی سے رنگے سرخ بالوں والی ایک ادھیڑ عمر خاتون ایک چھوٹی سی دکان میں کشمیری شالیں دیکھ رہی ہیں۔ جیسے جیسے دکان دار انہیں قیمتیں بتا رہا ہے ان کے چہرے پر فکر کی لکیریں گہری ھوتی جا رہی ہیں۔&nbsp;

وہ اپنی بیٹی کی شادی کے لیے پاکستان کے زیر انتظام کشمیر کے دارالحکومت مظفرآباد کی مدینہ مارکیٹ میں خریداری کر رہی ہیں جہاں ایک شال 10 ہزار روپے میں فروخت کی جا رہی ہے۔ ڈھائی سال پہلے یہی شال اس سے آدھی قیمت پر دستیاب تھی۔&nbsp;

اُس وقت اِس طرح کی شالیں ایک خصوصی تجارتی انتظام کے تحت انڈیا کے زیر انتظام کشمیر سے براہِ راست منگوائی جا رہی تھیں۔ اس تجارتی انتظام کے قواعد کے مطابق دونوں کشمیروں کے درمیان کھینچی گئی عارضی سرحد، جسے لائن آف کنٹرول کہا جاتا ہے، کے دو مقامات، تیتری نوٹ اور چکوٹھی، کے ذریعے کشمیری باشندے آپس میں تجارت کر سکتے تھے۔&nbsp;

لیکن اب یہ خصوصی تجارت بند ہو چکی ہے۔

دکان دار کا کہنا ہے کہ اب انڈیا کے زیر انتظام کشمیر میں تیار کیے جانے والے ملبوسات انہیں دبئی کے راستے منگوانا پڑتے ہیں جس سے ان کی درآمد پر خرچہ بہت بڑھ گیا ہے۔ کشمیری ملبوسات بیچنے والے ایک اور دکان دار کا کہنا ہے کہ حال ہی میں انہوں نے سات لاکھ مالیت کا سامان انڈیا کے زیر انتظام کشمیر سے دبئی &nbsp;کے راستے منگوایا ہے جس کے لیے انہیں کسٹم اور کراچی سے کشمیر تک نقل و حمل کے &nbsp;واجبات کی مد میں چار لاکھ روپے دینا پڑے ہیں۔&nbsp;

ان دونوں دکان داروں کو شکایت ہے کہ ان اضافی اخراجات کے باعث ان کے برآمدی سامان کی لاگت بڑھ گئی ہے جس سے اس کی فروخت میں نمایاں کمی آئی ہے اور نتیجتاً ان کی آمدن بھی کم ہو گئی ہے۔

دونوں کشمیروں کے درمیان تجارت کے خاتمے نے 53 سالہ گوہر کشمیری کی مالی امیدوں پر بھی پانی پھیر دیا ہے۔ ان کا تعلق انڈیا کے زیر انتظام کشمیر کے ضلع اننت ناگ کی تحصیل بیج بہارہ سے ہے لیکن 1990 میں وہ پاکستان کے زیرانتظام کشمیر میں منتقل ہو گئے اور پھر کبھی واپس نہیں جا سکے۔ اپنا اصلی نام پوشیدہ رکھنے کی شرط پر وہ کہتے ہیں کہ یہ تجارت ان کے لیے لائن آف کنٹرول کے دوسری طرف موجود اپنے رشتہ داروں سے جڑے رہنے کا ذریعہ بھی تھی۔

وہ پھل، سبزیاں اور مصالحہ جات وغیرہ درآمد کرتے تھے۔ آخری بار انہوں نے 2016 میں دس ٹن پیاز منگوائے تھے۔ اس کے بعد وہ بیمار پڑ گئے لیکن مکمل صحت یاب ہونے کے بعد جب انہوں نے اپنا کاروبار دوبارہ &nbsp;شروع کرنے کا فیصلہ کیا تو لائن آف کنٹرول کے راستے سامان منگوانے اور بھیجنے پر پابندی لگ چکی تھی۔

پینتالیس سالہ سعید احمد کو بھی اس بندش کی بھاری قیمت ادا کرنا پڑی ہے۔ وہ پاکستان کے زیر انتظام کشمیر میں چکوٹھی کے مقام پر رہتے ہیں اور دوسری طرف سے زیادہ تر پھل، سبزیاں اور دواؤں میں استعمال ہونے والی جڑی بوٹیاں درآمد کرتے تھے جبکہ اِس طرف سے وہ خشک میوے اور دالیں وغیرہ بھیجتے تھے۔ آخری بار انہوں نے 40 ٹن چھوہارے انڈیا کے زیر انتظام کشمیر کو برآمد کیے اور بدلے میں کیلے منگوائے۔ لیکن یہ کیلے ان تک پہنچنے سے پہلے ہی دونوں کشمیروں کے درمیان تجارت بند کر دی گئی اور ان کا سامان ہمیشہ کے لیے دوسری طرف پھنس گیا۔ اسی طرح 25 ٹن چھوہارے جو انہیں اگلے ہفتے دوسری طرف بھیجنا تھے وہ بھی گودام میں پڑے پڑے خراب ہو گئے۔&nbsp;

تجارت پر پابندی نے سینکڑوں ٹرک ڈرائیوروں اور مزدوروں کو بھی براہ راست متاثر کیا ہے۔

چکوٹھی سے تعلق رکھنے والے محمد منظور عباسی بھی ان میں شامل ہیں۔وہ پانچ افراد پر مشتمل اپنے خاندان کے واحد کفیل ہیں اور آج کل مشکل سے 300 روپے روزانہ کما پاتے ہیں۔ ان کے مطابق تجارتی سرگرمیوں کے بند ہونے سے پہلے وہ لائن آف کنٹرول پر دوسری طرف سے آنے والے ٹرکوں سے سامان اتار کر پاکستانی ٹرکوں میں لادتے تھے جس کے نتیجے میں وہ ہر روز 15 سو سے دو ہزار روپے کما لیتے تھے۔&nbsp;

تجارت کے خاتمے سے نیر احمد کا روزگار بھی مشکل میں پڑ گیا ہے۔&nbsp;

وہ چکوٹھی میں لائن آف کنٹرول کے قریب ایک ہوٹل میں کام کرتے تھے لیکن اب یہ ہوٹل بند ہو گیا ہے لہٰذا وہ ہٹیاں بالا نامی قصبے میں کریانے کی دکان پر کام کرنے پر مجبور ہیں۔ وہ کہتے ہیں کہ آمدن میں کمی کہ وجہ سے انہیں اپنے بچوں کو سکول سے اٹھانا پڑا ہے کیونکہ ان میں سرکاری سکول کی معمولی سی فیس دینے کی سکت بھی نہیں رہی۔

<h2>دونوں کشمیروں میں تجارت سے کس کو فائدہ ہو رہا تھا</h2>

دونوں کشمیروں کے درمیان تجارت اکتوبر 2008 میں شروع ہوئی۔ انڈیا کے ایک تحقیقی ادارے اندرا گاندھی انسٹی ٹیوٹ آف ڈویلپمنٹ ریسرچ کی ایک رپورٹ کا کہنا ہے کہ اس کی داغ بیل اپریل 2005 اس وقت ڈالی گئی جب اس وقت کے پاکستانی صدر پرویز مشرف اور انڈین وزیر اعظم من موہن سنگھ نئی دہلی میں ملے۔&nbsp;

اس تجارت کے قواعد کے مطابق دونوں اطراف کے تاجر ایک دوسرے سے چیزیں خریدنے کے بجائے صرف ان کا تبادلہ کر سکتے تھے۔ ان قواعد کے تحت 21 اشیاء قانونی طور پر اور بغیر کسی ٹیکس کے لائن آف کنٹرول کے آر پار جا سکتی تھیں اگرچہ ایک امریکی تحقیقی ادارے، یونائیٹیڈ سٹیٹس انسٹی ٹیوٹ آف پیس (یو ایس آئی پی)، کی ایک رپورٹ کے مطابق حقیقت میں ان میں سے صرف پانچ یا چھ چیزوں ہی کی تجارت ہوتی تھی۔

سری نگر سے تعلق رکھنے والے تاجر سمیع اللہ خان نے اس رپورٹ کے مصنفین کو بتایا کہ اس کم تعداد کی ایک اہم وجہ قابلِ تبادلہ اشیاء کی فہرست میں ایسی چیزوں کی موجودگی تھی جن کی مارکیٹ میں کوئی مانگ نہیں تھی۔&nbsp;

شروع میں یہ تجارت ہفتے میں دو دن ہوتی تھی لیکن بعد میں اسے ہفتے میں چار دن تک بڑھا دیا گیا جن کے دوران ہر روز دونوں اطراف سے مختلف اشیا سے لدے پچیس پچیس ٹرک لائن آف ٹرک تک پہنچتے تھے جہاں ان سے سامان اتار کر دوسری طرف کے ٹرکوں پر رکھا جاتا تھا۔ چکوٹھی کے تاجروں کی ایک تنظیم کے ایک عہدیدار اعجاز احمد میر کا کہنا ہے کہ لائن آف کنٹرول کے دونوں طرف سینکڑوں مزدور تجارتی سامان کی منتقلی کے کام میں لگے ہوئے تھے۔

اسی طرح یو ایس آئی پی کی رپورٹ کا کہنا ہے کہ پاکستانی زیرِ انتظام کشمیر سے تعلق رکھنے والے 585 تاجر اور انڈیا کے زیرِ انتظام کشمیر سے تعلق رکھنے والے 630 تاجر دونوں کشمیروں کے درمیان تجارت سے منسلک تھے۔ اس رپورٹ کی ایک مصنفہ کے مطابق اس تجارت نے ایک ایسا نظام پیدا کر دیا تھا جس سے نہ صرف تاجروں، ڈرائیوروں اور مزدوروں کو روزگار ملتا تھا بلکہ ہوٹل، ڈھابے اور گیس سٹیشن چلانے والے افراد کے لیے بھی آمدن کے اچھے مواقع پیدا ہو گئے تھے۔&nbsp;

انڈیا کے دارالحکومت دہلی میں قائم ایک نِجی تحقیقی ادارے، بیورو آف ریسرچ آن انڈسٹری اینڈ اکنامک فنڈا مینٹلز، کی ایک رپورٹ میں بھی اس بات کی تائید کی گئی ہے کہ بین الکشمیر تجارت سے براہِ راست فائدہ اٹھانے والے لوگوں کی تعداد ہزاروں میں تھی۔ اس رپورٹ کے مطابق صرف انڈیا کے زیرِ انتظام &nbsp;کشمیر میں 22 ہزار کے قریب افراد اس تجارت کے مختلف شعبوں میں سرگرم تھے۔

لیکن یہ تجارت اپریل 2019 میں اس وقت بند کر دی گئی جب انڈیا کی وزارتِ داخلہ نے الزام لگایا کہ پاکستان میں موجود کچھ عناصر لائن آف کنٹرول کے آر پار بنائے گئے تجارتی راستوں کو انڈیا کے زیرِ انتظام کشمیر میں دہشت گردانہ دراندازی کے لیے استعمال کر رہے ہیں۔

اس بندش کی وجہ سے اس تجارت سے منسلک اکثر لوگ اب مختلف قسم کی مالی پریشانیوں کا شکار ہیں۔ ان کی معاشی صورتِ حال پر تبصرہ کرتے ہوئے انڈیا کے زیر انتظام کشمیر سے تعلق رکھنے والے تجارتی برادری کے نمائندے ہلال ترک کہتے ہیں کہ &quot;نہ صرف سینکڑوں تاجر غیر معینہ مدت کے لیے متاثر ہوئے ہیں بلکہ اڑی اور پونچھ کے دور دراز علاقوں کے رہنے والے مزدوروں کا واحد ذریعہ معاش بھی ان سے چھن گیا ہے&quot;۔&nbsp;

فضا اشرف

فضا اشرف نے اقراء یونیورسٹی اسلام آباد سے عالمی تعلقات میں ایم ایس سی کیا ہے۔ وہ ماحولیات، موسمیاتی تبدیلی اور متعلقہ موضوعات پر رپورٹنگ کرتی ہیں۔