پینسٹھ سالہ محمد عارف گلگت شہر کے رہائشی ہیں جو یہاں مدینہ مارکیٹ کے سامنے کرائے کی دکان میں برسوں سے درزی کا کام کر رہے ہیں۔&nbsp;

وہ بتاتے ہیں کہ گرمیوں میں وہ دن میں تین جوڑے کپڑے سی لیتے ہیں جس سے دو ہزار روپے سلائی بن جاتی ہے۔ ان کے آٹھ افراد پر مشتمل خاندان کا گزر بسر اسی سے ہوتا ہے۔&nbsp;

&quot;لیکن سردیاں ہمارے لیے عذاب سے کم نہیں ہوتیں۔ دن بھر میں بجلی بمشکل ایک دو گھنٹے آتی ہے جس سے ایک جوڑا سینے میں بھی دو تین دن لگ جاتے ہیں۔&quot;&nbsp;

وہ کہتے ہیں کہ لوڈشیڈنگ کے دوران وہ ہاتھ سے رفوگری اور فٹنگ وغیرہ کا کام کرتے ہیں۔ اس کے لیے مہنگے کوئلے والی استری استعمال کرنا پڑتی ہے جو گرم ہونے میں ہی نصف گھنٹہ لیتی ہے۔&nbsp;

&quot;سردیوں میں پورا دن مشقت کے باوجود 500 سے ایک ہزار روپے کما پاتا ہوں جس سے گھر کے لیے چائے پتی اور چولہا جلانے کا تیل خریدنا بھی مشکل ہو جاتا ہے۔&quot;

محمد عارف کے پاس اس کے سوا کوئی چارہ نہیں لیکن محمد نعیم کا آبائی گاؤں راولپنڈی میں ہے۔ وہ یہاں پینا فیلکس کا کام کرتے ہیں اور سردیوں میں اپنا کاروبار لپیٹ کر گھر چلے جاتے ہیں۔ &rdquo;اس کڑاکے کی سردی میں بجلی کے بغیر کاروبار تو کیا یہاں رہنا بھی مشکل ہے۔&quot;&nbsp;

<a href="https://sdg3.nhsrc.pk/provincial_at_glance/6">گلگت بلتستان(جی بی) </a>کی آبادی لگ بھگ 18 لاکھ &nbsp;ہے۔ سردیوں میں محنت کش یہاں سے روزگار کے لیے راولپنڈی، کراچی جیسے بڑے شہروں کا رخ کرتے ہی ہیں، صاحب حیثیت لوگ بھی بجلی کی وجہ سے اسلام آباد چلے جاتے ہیں۔

<h3>یک نہ شد دو شد: سردیوں میں طلب زیادہ تو ہائیڈل کی پیداوار انتہائی کم&nbsp;</h3>

<a href="https://sdg3.nhsrc.pk/provincial_at_glance/6">آڈیٹر جنرل آف پاکستان</a>&nbsp;کی رپورٹ 23-2022ء کے مطابق جی بی میں بجلی کی مجموعی پیداواری صلاحیت (انسٹالڈ کپیسٹی) 215.9 میگا واٹ ہے جس میں 187.3 میگا واٹ ہائیڈل اور 28.65 میگا واٹ تھرمل بجلی شامل ہے۔ تاہم گرمیوں میں پیداوار 120.65 میگاواٹ اور سردیوں میں 90.43 میگا واٹ سے کبھی اوپر نہیں گئی۔

مئی 2023ء کے اعدادوشمار کے مطابق صوبے کو گرمیوں میں 254.82 اور سردیوں میں 452.19 میگاواٹ بجلی چاہیے تھی یعنی گرمیوں میں 134.17 اور سردیوں میں 361.76 میگاواٹ کا شارٹ فال پایا گیا۔&nbsp;

ایگزیکٹو انجینئر محکمہ برقیات شاکر علی اعتراف کرتے ہیں کہ طلب اور رسد میں اس نمایاں موسمی فرق کی وجہ سے گرمیوں میں 20 گھنٹے لوڈ شیڈنگ کرنا پڑتی ہے۔ بجلی سپلائی کے دورانیے میں بھی لوڈ اتنا زیادہ ہوتا ہے کہ مرحلہ وار بجلی بند کرنا پڑ جاتی ہے۔

جی بی میں بجلی کا دارومدار ہائیڈروپاور پر ہے جس کے لیے صوبے میں 75 <a href="https://agp.gov.pk/SiteImage/Policy/8.%20Spl.Study%20Water%20and%20Power.pdf">چھوٹے پلانٹس</a> (کل کپیسٹی تقریباً 187 میگاواٹ) موجود ہیں۔ یہ پلانٹ پہاڑی نالوں پر لگائے گئے ہیں جہاں سردیوں میں بہاؤ انتہائی کم ہو جاتا ہے اور ان کی پیداوار ایک تہائی رہ جاتی ہے۔

اس کی واضح مثال گلگت کے سیاحتی مقام نلتر کا 18 میگاواٹ کا پن بجلی گھر ہے جس کی پیداوار نومبر میں 9 میگاواٹ اور مارچ میں چھ میگاواٹ رہ جاتی ہے۔ یہیں قائم 14 میگاواٹ کے دوسرے پلانٹ سے بھی سپلائی سردیوں میں چھ میگاواٹ سے کم ہو جاتی ہے۔

چلاس، سکردو، ہنزہ سمیت سب علاقوں کے تمام ہائیڈرو پاور سٹیشنز کی پیداوار مارچ میں کم ترین سطح پر ہوتی ہےجو بجلی کا شارٹ فال بڑھنے کی سب سے بڑی وجہ ہے۔&nbsp;

<h3>ڈیزل جنریٹرز سے گلگت میں لوڈشیڈنگ کا دورانیہ صرف 25 منٹ کم ہو سکا</h3>

رواں سال کے آغاز میں وادی ہنزہ کے لوگوں نے بجلی کی قلت پر احتجاج شروع کر دیا جس میں عورتیں اور بچے بھی شریک تھے۔ مظاہرین نے دھرنا دے کر شاہراہ قراقرم کو چھ روز تک بلاک رکھا۔ 
جی بی میں ہنگامی ضرورت کے لیے مختلف شہروں اور قصبات میں ساڑھے 28 میگاواٹ کپیسٹی کے 24 تھرمل سٹیشن یا ڈیزل جنریٹرز نصب ہیں۔

احتجاج کے پیش نظر بجلی سپلائی کا دورانیہ پانچ گھنٹے تک لانے کے لیے ضلع ہنزہ، سکردو، گلگت اور چلاس کے شہری علاقوں میں ڈیزل جنریٹرز چلانے کا فیصلہ کیا گیا جن کے فیول کے لیے وفاقی حکومت نے 48 کروڑ روپے کی منظوری دی۔&nbsp;

سرکاری ریکارڈ کے مطابق سکردو میں 4 میگاواٹ کے چھ جنریٹر سیٹ ایک ماہ (جنوری) میں ایک کروڑ 74 لاکھ سے زائد کا ڈیزل پھونک گئے۔ یہی صورت حال چلاس کی ہے جہاں چار سے پانچ گھنٹے بجلی فراہم کی جاتی ہے۔&nbsp;

سپرنٹنڈنٹنگ انجینئر برقیات حامد حسین بتاتے ہیں کہ گلگت شہر کے سات میگاواٹ کے ڈیزل جنریٹر شام کے اوقات میں چلائے جاتے ہیں جن سے 20 گھنٹے دورانیے کی لوڈشیڈنگ میں صرف 25 منٹ کی کمی لائی جا سکی ہے۔

&quot;ہم نے حکومت کو سفارش بھیجی ہے کہ گلگت میں جنریٹر سے سپلائی منقطع کی جائے کیونکہ یہ 25 منٹ کی بجلی کے لیے یومیہ 26 لاکھ روپے کا ڈیزل کھا جاتے ہیں۔&quot;&nbsp;

تاہم ایکسیئن نگر عامر شہزاد کے مطابق صرف قصبہ ساس ویلی میں جنریٹر سے بجلی کی فراہمی کی جا رہی ہے جو ناگزیر ہے کیونکہ وہاں درجہ حرارت نقطہ انجماد سے کم رہتا ہے۔&nbsp;

<h3>ڈیزل جنریٹرز جی بی کے گلیشیئر اور قدرتی ماحول کو تباہ کر دیں گے&nbsp;</h3>

ماحولیاتی ماہرین جی بی میں ڈیزل جنریٹرز سے بجلی کی پیداوار کے حکومتی اقدام کو شدید تنقید کا نشانہ بنا رہے ہیں۔&nbsp;

ماہر ماحولیات اور انسٹیٹیوٹ آف اربن ازم کے سینئر ریسرچ فیلو ڈاکٹر اعجاز احمد بتاتے ہیں کہ جی بی میں 40 ہزار میگاواٹ سے زائد پن بجلی پیدا کرنے کی صلاحیت موجود ہے۔

&quot;اس کے باوجود ہم یہاں ڈیزل جنریٹرز کا استعمال کر رہے ہیں جو نا صرف مالی وسائل کی تباہی بلکہ ماحولیاتی اعتبار سے بھی انتہائی خطرناک ہیں۔&quot;

وہ کہتے ہیں گلگت بلتستان گلیشیئرز کا مرکز ہے اور دھواں ہمیشہ سرد جگہ کی طرف جاتا ہے۔ یعنی ڈیزل جنریٹرز سے نکلنے والا دھواں سیدھا جاکر گلیشیئرز پر ٹھہرتا ہے جو ان کے پگھلنے کا عمل تیز کر دیتا ہے۔

&quot;کون نہیں جانتا کہ یہاں گلیشیئرز پگھلنے سے جھیلیں بنی ہیں اور سیلابی ریلوں نے تباہی مچائی ہے۔&quot;

سیکریٹری برقیات گلگت ثناء اللہ مانتے ہیں کہ ڈیزل جنریٹرز ماحول دوست نہیں ہیں۔ مگر ان کا اصرار ہے کہ یہاں جعفر برادرز کے&#39; کینوپی ماؤنٹڈ جنریٹرز&#39; نصب کیے گئے ہیں جو زیادہ سے زیادہ کاربن جذب کر لیتے ہیں۔

&nbsp;لیکن ڈاکٹر اعجاز احمد، سیکریٹری برقیات کے اس موقف کو نہیں مانتے، وہ کہتے ہیں کہ جنریٹر چاہے جتنا اچھا ہو ماحول کے لیے زہر ہے۔ اس میں معمولی سی خرابی بھی پیدا ہو جائے تو دھوئیں کے بادل چھوڑنا شروع کر دیتا ہے۔&quot;پھر اس کے لیے ڈیزل کراچی سے آتا ہے اور اس کا ہزاروں کلومیٹر کا یہ سفر خود بھی آلودگی پیدا کرتا ہے۔&quot;

<h3>&nbsp;آخر جی بی سولر اور ونڈ جیسے ذرائع پر منتقل کیوں نہیں ہو جاتا؟</h3>

اس سوال کے جواب میں محمد عارف درزی کا کہنا تھا کہ ان کی اتنی بچت ہی نہیں ہوتی کہ سولر سسٹم وغیرہ کا انتظام کریں۔&nbsp;

لیکن سچ تو یہ ہے جب سرکاری بجلی تین روپے یونٹ ملے تو قابل تجدید ذرائع پر خرچہ کرنے کا کون سوچے گا؟

جی بی میں گھریلو صارفین سے 100 یونٹ تک یہی ریٹ وصول کیا جاتا ہے۔

آڈیٹر جنرل کی رپورٹ بتاتی ہے کہ 2015ء سے 2022ء کے درمیان حکومت نے جی بی میں ہائیڈرو پلانٹس سے کم پیداوار(under utilization)، بجلی چوری یا لائن لاسز، سبسڈی وغیرہ کی مد میں 29 ارب روپے سے زائد کا نقصان کیا ہے۔ بجلی کی پیداواری لاگت 17.86 روپے یونٹ کے مقابلے میں اس کی قیمت فروخت اوسطاً ساڑھے پانچ روپے یونٹ گھریلو اور ساڑھے سات روپے کمرشل ہے۔

ماہرین کی رائے ہے کہ حکومت نے یہی رقم اگر توانائی کے متبادل ذرائع پر خرچ کی ہوتی تو آج یہاں نہ لوڈشیڈنگ ہوتی اور نہ ماحول دشمن ڈیزل جنریٹرز استعمال کرنا پڑتے۔

تاہم سیکریٹری برقیات نے بتایا کہ مرکزی حکومت نے گلگت میں 100 میگاواٹ سولر بجلی کی منظوری دے دی ہے۔ یہ منصوبہ نومبر تک مکمل کیا جانا ہے جس کے تحت تمام سرکاری عمارتوں پر روف ٹاپ پینلز لگائے جائیں گے۔ ساتھ ہی ہائیڈروپاور کے کئی زیر التواء منصوبے بھی آئندہ سال سردیوں تک مکمل ہو جائیں گے۔

معاون خصوصی برائے اطلاعات ایمان شاہ بتاتے ہیں کہ یہاں بجلی کی قلت کا مسئلہ پرانا چلا آ رہا ہے کیونکہ جی بی حکومت کے پاس 2018ء تک توانائی سے متعلق قانون سازی کے اختیارات ہی نہیں تھے۔

نلتر میں 16 میگاواٹ کا منصوبہ اسی لیے 12 سال التواء کا شکار رہا جو اب جون تک مکمل ہو جائےگا۔ کچھ اور ہائیڈل منصوبے بھی زیر تکمیل ہیں۔&nbsp;

&quot;ہم نے لوگوں کے احتجاج پر مجبور ہو کر ڈیزل جنریٹرز چلائے ہیں ان کے علاوہ کوئی چارہ نہیں تھا۔&quot;

گناہ بے لذت: گلگت بلتستان میں لوڈشیڈنگ کم کر نے کے لیے ڈیزل جنریٹرز، بجلی تو پھر بھی نہ آئی اور آلودگی بڑھ گئی

text

Explore the objections raised by local communities and the forest department regarding the forest working plan in Gilgit-Baltistan, along with the obstacles hindering its implementation.

Objections and Challenges to the Forest Working Plan in Gilgit-Baltistan

سہیل احمد، گلگت بلتستان (جی بی) کے ضلع دیامر میں واقع گاؤں &#39;داریل کھنبری&#39; کے رہائشی&nbsp; اور ٹمبر کی خریدو فروخت کا کام کرتے ہیں۔ وہ یہاں مقامی کاشتکاروں و زمینداروں پر مشتمل کمیونٹیز سے درخت خریدتے ہیں اور لکڑی ملک کے مختلف شہروں میں بیچتے ہیں۔

وہ بتاتے ہیں کہ محکمہ جنگلات و جنگلی حیات جی بی نے دیامر کے لیے 2013ء میں ایک ورکنگ پلان دیا تھا جس کے تحت جنگل مالکان کو اپنے نجی جنگلات سے سرکاری قوانین و ضوابط کے اندر رہتے ہوئے لکڑی(ٹمبر) کاٹنے کی اجازت دی گئی تھی۔

&quot;ہم نے جنگل سے لکڑی کاٹنے کے لیے باضابطہ سرکاری فیس جمع کرائی اور محکمہ جنگلات سے 50 ہزار سی ایف ٹی(کیوبک فٹ) دیار کی کٹائی کا اجازت نامہ حاصل کیا۔درخت کاٹ لیے تو اس کی فروخت و ترسیل سے پہلے ہی حکومت نے مذکورہ ورکنگ پلان پر عملدرآمد روک دیا۔&quot;

اب ٹمبر کا کٹا ہوا سٹاک پڑا ہے اور سہیل احمد اسے بیچنے کے لیے 11 سال سے حکومتی منظوری کا انتظار کر رہے ہیں۔

&quot;یہی ہماری روزی روٹی ہے۔ ہم کئی بار حکومت اور محکمہ جنگلات کو درخواستیں دے چکے ہیں مگر کوئی ٹھوس نتیجہ نہیں نکلا۔ ضلعے سے باہر ٹمبر کی ترسیل کا معاملہ تعطل کا شکار ہے جس سے ہمارا مسلسل نقصان ہورہا ہے۔&quot;

صرف سہیل احمد ہی نہیں اس ضلعے کے درجنوں کاشت کار اور ٹمبر کے تاجر یہ شکوہ کرتے نظر آتے ہیں۔

دوسری طرف اگر ٹمبر کی کٹائی کا قانونی طریقہ کار طے نہ ہو یا ترسیل کی اجازت نہ ملے تو اصول و قواعد کے برعکس درختوں کی اندھا دھند کٹائی ہوتی ہے جس کی ترسیل کا محکمہ جنگلات کے پاس ریکارڈ بھی نہیں ہوتا۔

<h2>جی بی کے جنگلات اور ورکنگ پلان</h2>

محکمہ جنگلات، جنگلی حیات و ماحولیات کی سرکاری ویب سائٹ&nbsp; کے مطابق گلگت بلتستان کا کل رقبہ 69 ہزار 683 مربع کلو میٹر ہے جس میں سے دو ہزار 492 مربع کلو میٹر(3.58 فیصد) علاقے میں قدرتی جنگلات ہیں جبکہ لگ بھگ 427 مربع کلومیٹر اراضی پر باغات اور مصنوعی جنگل یا درخت لگائے گئے ہیں۔

یوں مجموعی طور پر جی بی کا 4.1 فیصد رقبہ جنگلات سے ڈھکا ہوا ہے۔

جی بی کے قدرتی جنگلات میں سے 71 فیصد نجی ملکیت ہیں مگر ان کا انتظام و نگرانی (مینیجمنٹ) بھی پہلے 1952ء کے معاہدے (الحاق پاکستان) اور اب جی بی فاریسٹ ایکٹ 2019 کے تحت محکمہ جنگلات کے سپرد کی گئی ہے۔

سرکار کی ملکیت جنگلات &#39;محفوظ علاقے&#39; قرار دیے گئے ہیں جہاں مالکانہ حقوق صرف حکومت کے پاس ہیں لیکن یہاں کے مقامی رہائشیوں کو قانون کے تحت کچھ حقوق اور رعایتیں (ایندھن کی لکڑی لینا، جانور چرانا وغیرہ ) دی گئی ہیں۔

جی بی کے نجی جنگلات کا انتظام بھی محکمہ جنگلات کے پاس ہے جو یہاں سے ٹمبر کی کٹائی یا درختوں کی کاٹ چھانٹ وغیرہ کے لیے مختلف اوقات میں قانونی طریقہ کار اور ضوابط تشکیل دیتا ہے جسے &#39;فاریسٹ ورکنگ پلان&#39; کہا جاتا ہے۔

فاریسٹ ڈیپارٹمنٹ جی بی کے مطابق جنگلات کے ضلع وار تناسب کو دیکھا جائے تو دیامر کے جنگلات صوبے کے مجموعی جنگلاتی وسائل کا 30 فیصد بنتے ہیں جو تمام کے تمام (100 فیصد) نجی ملکیت ہیں۔

&nbsp;دیامر، گلگت بلتستان کا بڑا ضلع ہے، یہ مشرق میں خیبرپختونخواہ کے ضلع اپر کوہستان جبکہ مغرب میں ضلع گلگت سے ملتا ہے۔ 1952ء میں اس ضلعے کے دو سب ڈویژنوں داریل اور تانگیر کے جنگلات کو عوامی قرار دے کر ان کا انتظام محکمہ جنگلات کے سپرد کیا گیا تھا۔

تاہم 1970ء میں پورے ضلع دیامر کو محکمہ جنگلات کے دائرہ اختیار میں دے دیا گیا اور 1993ء میں حکومت نے یہاں جنگلات کی کٹائی پر مکمل پابندی عائد کر دی تھی۔

<h2>بار بار نئے ورکنگ پلانز اور معطلی</h2>

وفاقی حکومت نے جی بی میں نجی جنگلات سے لکڑی کاٹنے کے لیے 2000ء میں پہلی بار فاریسٹ ورکنگ پلان متعارف کرایا جو 10 برس کے لیے تھا لیکن محض دو سال بعد ہی پلان پر کام روک دیا گیا۔ اس وقت جی بی میں محکمہ جنگلات براہ راست وفاقی وزارت امور کشمیر و گلگت بلتستان کی نگرانی میں کام کر رہا تھا۔

گلگت بلتستان کو جب صوبائی حیثیت (امپاورمنٹ اینڈ سیلف گورننس آرڈر جی بی 2009ء) دی گئی تو جنگلات کا شعبہ &#39;جی بی کونسل&#39; کے سپرد کر دیا گیا۔ جس میں چھ ارکان کی نامزدگی کا اختیار جی بی اسمبلی اور چھ کا انتخاب وزیراعظم پاکستان کی صوابدید پر چھوڑا گیا جو کونسل کے سربراہ اور چیئرمین بھی تھے۔

دیامر کے لیے 2013ء میں ایک نئے ورکنگ پلان کی منظوری دی گئی مگر اس پر بھی عمل نہ ہو سکا۔

لوک سجاگ کے پاس دستیاب سرکاری دستاویز(سیکرٹری جنگلات کی وزیراعلیٰ جی بی کو بھیجی گئی سمری) بتاتی ہیں کہ 19 مئی 2016 کو سابقہ ورکنگ پلان پر نظرثانی کر کے اس کی جی بی کونسل سے دوبارہ منظوری لی گئی جس میں پلان کی مدت دس سے بڑھا کر 30 سال کر دی گئی۔

اس ورکنگ پلان میں طے کیا گیا کہ جب تک پہلے سے کٹی ہوئی قانونی یا غیر قانونی لکڑی کو ٹھکانے نہ لگا لیا جائے تب تک نئے درخت نہیں کاٹے جائیں گے۔

ٹمبر (تعمیراتی لکڑی) سے مستفید ہونے والوں کو جنگل میں دوبارہ درخت لگانے کا بھی پابند بنا دیا گیا۔

اگرچہ دستاویز میں یہ دعویٰ کیا گیا ہے کہ 2017ء اور 2020ء کے درمیان بیشتر قانونی اور غیر قانونی ٹمبر ٹھکانے لگا دی گئی تھی تاہم سہیل احمد اس دعوے کی تردید کرتے ہوئے بتاتے ہیں کہ اس دوران ٹمبر کی نقل و حمل ہی نہیں ہوئی تھی۔

اسی اثنا میں وفاقی حکومت نے گلگت بلتستان گورنمنٹ آرڈر 2018ءکے نفاذ کا اعلان کردیا جس کے تحت فاریسٹ ڈیپارٹمنٹ کی ذمہ داری جی بی کونسل سے گلگت بلتستان اسمبلی کو منتقل ہو گئی۔

جی بی اسمبلی نے 2020ء میں جنگلات کی دیکھ بھال کے لیے فاریسٹ ایکٹ منظور کیا جس میں طے گیا گیا کہ حکومت کو سرکاری یا پرائیویٹ جنگلات سے غیرقانونی طور پر کاٹی گئی لکڑی پر معافی(کسی قسم کی ایمنسٹی سکیم) دینے کا کوئی اختیار نہیں ہو گا۔

اس قانون کے مطابق غیر قانونی طور کاٹی گئی لکڑی حکومت اپنے قبضے میں لےکر اسے تلف کرے گی یا آگ لگادے گی۔ اس موقع پر ڈویژنل فاریسٹ آفیسر یا کم از کم گریڈ 17 کا افسر لازمی موجود رہے گا۔

وزیراعلیٰ حافظ حفیظ الرحمن(20-2015ء) اور خالد خورشید (23-2020ء) کے ادوار حکومت میں بھی ورکنگ پلانز کی منظوری دیدی گئی مگر محکمہ جنگلات کے اعتراضات کے باعث ان پر عمل نہ ہوسکا۔

<h2>&nbsp;سنگین خامیوں سے بھرپور پلان، جنگل کٹائی کا منصوبہ</h2>

وزیراعلیٰ خالد خورشید کے دور میں جب ورکنگ پلان پر کام ہو رہا تھا تو اس وقت کے فاریسٹ سیکرٹری سمیر احمد سید نے وزیراعلیٰ کو سمری بھیجی تھی جس میں ورکنگ پلان کے لیے جنگلات کا 90ء کی دہائی کا ڈیٹا استعمال کرنے کی شدید مخالفت کی گئی تھی اور اس پلان میں لگ بھگ 18 سنگین خامیوں کی نشاندہی کی گئی تھی۔

انہوں نے وزیراعلیٰ کو لکھا تھا کہ دیامر کے جنگلات کے ایک تہائی صدی پرانے اعداد و شمار آج درست نہیں ہو سکتے ہیں لہٰذا جنگلات کی سائنسی بنیادوں پر دوبارہ اسیسمنٹ کی ضرورت ہے۔

&quot;پلان میں جنگلات کی بڑھوتری کی شرح 1.4 فیصد ظاہر کی گئی ہے جبکہ کٹائی کےلیے شرح 14 فیصد رکھی گئی ہے جو جنگلات کے تحفظ اور ماحولیاتی اصولوں کے خلاف ہے۔&quot;

انہوں نے واضح کیا تھا کہ مجوزہ پلان پر عملدرآمد سے تین لاکھ 25 ہزار بالغ درخت کاٹے جائیں گے جس سے نا صرف قومی اور عالمی میڈیا میں چیخ و پکار مچ جا ئے گی بلکہ یہ پلان پاکستان کے ماحولیاتی اہداف اور بین الاقوامی وعدوں کے بھی برعکس ہوگا۔

تاہم موجودہ وزیراعلیٰ حاجی گلبر خان جو خود دیامر کے رہائشی ہیں کی حکومت نے مقامی لوگوں کے اصرار پر تین نومبر 2024ء کو پھر ایک ایسے فاریسٹ ورکنگ پلان کی منظوری دے دی ہے جس پر سابق سیکرٹری جنگلات و جنگلی حیات کے تمام اعتراضات برقرار ہیں۔

وزیراعلیٰ کے ترجمان فیض اللہ فراق کا دعویٰ ہے کہ یہ(ورکنگ پلان) جنگلات کو بچانے کا پلان ہے۔ صرف وہی درخت کٹے گا جو فطری عمر پوری کر چکا ہے اور اس کٹائی کی اجازت بھی باقاعدہ سروے کے بعد دی جائے گی۔

انہوں نے جنگلات کے اعدادو شمار پر سوالات کا جواب دینے سے گریز کیا تاہم اس توقع کا اظہار کیا کہ دیامر کے لوگوں کی دیرینہ خواہش کے مطابق بہت جلد فاریسٹ ورکنگ پلان پر عملدرآمد اور ٹمبر کی ترسیل کا عمل شروع ہوگا۔

سید عبدالوحید، جی بی کے سیکریٹری جنگلات و جنگلی حیات ہیں۔ ان کا ماننا ہے کہ قدرتی آفات، غیر قانونی کٹائی، آگ لگنے کے واقعات اور خشک سالی کے باعث جنگلات میں جہاں کمی آئی ہے وہیں قدرتی عمل اور بڑے پیمانے پر شجرکاری کے نتیجے میں اضافہ بھی ہوا ہے۔

تاہم وہ اعتراف کرتے ہیں کہ جنگلات میں کمی اور اضافے کی شرح کو ماپنا یا دوبارہ اسیسمنٹ ناگزیر ہے۔

&nbsp;وہ بتاتے ہیں کہ دیامر میں لگ بھگ 345 کمپارٹمنٹس (وہ جنگل یا شجرکاری کا مسلسل علاقہ جس کے اطراف خالی رقبہ، ندی،سڑک یا پہاڑ حدود بناتے ہوں) کی نشاندہی ہوئی ہے جہاں درختوں کا معیار اور فی ایکڑ تعداد مقررہ اصولوں کے مطابق نہیں ہے۔ یہاں کٹائی کی اجازت نہیں ہو گی۔

&quot;ہم نے مرحلہ وار کمپارٹمنٹس میں درختوں کے پرانے اور نئے حجم کے اعدادوشمار تقابلی جائزے کے ساتھ پیش کردیے ہیں۔ کٹائی کی حتمی منظوری کابینہ دیتی ہے تاہم جہاں سابقہ اور نئے حجم میں 30 فیصد سے زیادہ فرق آئے گا اس جنگل کو پلان میں شامل نہیں کیا جائے گا۔&quot;

وہ کہتے ہیں کہ جس جنگل میں کٹائی کی اجازت ملے گی وہاں متعلقہ ڈسٹرکٹ فاریسٹ افسر موجود ہوں گے جو طے شدہ شرح کے مطابق ہی درخت کاٹنے کی اجازت دیں گے۔ کہیں ضرورت پڑی تو وہاں تصدیق کےلیے دوبارہ ٹیم بھیج دی جائے گی۔

آزاد کشمیر کے سرسبز جنگلات کا تیزی سے خاتمہ

ان کا کہنا تھا کہ دیامر میں پہلے سے کٹی ہوئی پانچ لاکھ کیوبک فٹ (سی ایف ٹی) ٹمبر موجود ہے جس میں سے ابھی تک قانونی یا غیر قانونی مقدار کا تخمینہ نہیں لگایا جا سکا۔ تاہم اندازہ یہی ہے کہ اس میں غیر قانونی لکڑی زیادہ ہوگی۔

&quot;ترسیل کی منظوری ملنے کی صورت میں سب سے پہلے ٹھیکیدار کو ٹمبر کا حصہ دیا جائے گا جو انہوں نے عوام سے خریدی ہے۔ اس ٹمبر کو بھی جنگل (متعلقہ کمپارٹمنٹ)کی شرح میں شمار کرلیا جائے گا۔&quot;

<h2>حکومت سے پہلے نجی جنگلات کے تحفظ کا نظام</h2>

ڈاکٹر عبدالسلام، دیامر کی وادی داریل کے علاقے منیکال کے رہائشی ہیں۔ وہ بتاتے ہیں کہ 1993ء سے پہلے ضلعے میں گاؤں کی سطح پر نوجوانوں کی کمیٹیاں بنی ہوئی تھیں جن کا کام جنگل کی دیکھ بھال کرنا ہوتا تھا۔

&nbsp;&quot;یہ نظام اتنا موثر تھا کہ اگر کوئی حقدار ( جنگل کا حصے دار) بھی بغیر اجازت درخت کاٹتا تھا تو اس پر جرمانہ کیا جاتا تھا جو اسے ہر حال میں ادا کرنا پڑتا تھا۔ یہ کمیٹیاں صرف جنگل کی کٹائی ہی نہیں بلکہ گھاس چرائی، شکار، مال مویشی اور ایندھن تک کے معاملات دیکھتی تھیں۔&quot;

&quot;کمیٹیوں کی زیرنگرانی درختوں کی کٹائی کا پورے گاؤں کو فائدہ ہوتا تھا اور سب کو آمدنی سے حصہ ملتا تھا۔ لیکن جنگل سے تعمیراتی لکڑی کاٹنے پر حکومتی پابندی کے بعد یہ کمیٹیاں غیر فعال ہو گئیں۔&quot;

ان کہ کہنا ہے کہ مقامی کمیٹیاں ختم ہونے کا فائدہ ٹمبر مافیا کو ہوا اور غیر قانونی کٹائی شروع ہوگئی۔ اب جو بھی صحتمند درخت نظر آتا ہے کاٹ لیا جاتا ہے جبکہ متعلقہ محکمہ کے پاس اتنی افرادی قوت ہی نہیں کہ جنگلات کی درست نگرانی کر سکے۔

تاہم قدیم روایات کے باعث آج بھی مقامی طور پر ایسی جگہ سے کٹائی پر مکمل پابندی ہے جہاں درخت سیلاب و قدرتی آفات کا روکنے میں مددگار ثابت ہوتے ہیں۔

دیامر میں درختوں کی کٹائی، جی بی حکومت کا نیا'فاریسٹ ورکنگ پلان' کیا رنگ دکھائے گا؟

Gilgit-Baltistan faces a dire situation as a shortage of rabies vaccines leads to the tragic loss of lives. Discover the challenges and the urgent need for government intervention to prevent

Rabies Crisis in Gilgit-Baltistan: Lack of Vaccines Leads to Tragic Deaths

بارہ سالہ یحییٰ عالم چھٹی کے طالب علم تھے اور ان&nbsp; کا گھر گلگت شہر کے مرکزی علاقے دیامر کالونی میں واقع ہے۔ اگست کے پہلے ہفتے وہ کچھ خریدنے کے لیے گھر سے نکلے تو صوبائی سیکرٹریٹ کے قریب انہیں کتے نے کاٹ لیا۔

یحییٰ عالم کے والد مشروف خان بتاتے ہیں کہ وہ فوری طور پر بیٹے کو ریجنل ہیڈ کوارٹر ہسپتال لے گئے جو قریب ہی چار کلومیٹر پر واقع ہے۔ وہاں ڈاکٹروں کو بتایا کہ بچے کو پاگل کتے نے کاٹ لیا ہے۔

&quot;میرے بیٹےکو کسی نے کتے کے کاٹے کی ویکسین ( انٹی ریبیز) نہیں لگائی جو شاید ہسپتال میں میسر ہی نہیں تھی۔ البتہ ڈاکٹروں نے کچھ ادویات وغیرہ لکھ دیں جو ہم نے بازار سے خریدیں اور یحییٰ کو گھر واپس لے آئے۔&quot;

ایک ماہ کچھ دن گزرے کہ یحییٰ کی طبیعت بگڑنا شروع ہو گئی۔

&quot;ہم اسے دوبارہ آر ایچ کیو ہسپتال لے گئے۔ ڈاکٹروں کو جب کتے کے کاٹے کا بتایا تو وہ گھبرا گئے اور کہا کہ اس پر رببیز کا حملہ ہو گیا ہے اسےفوری طور پر اسلام آباد لے جائیں۔&quot;

وہ کہتے ہیں کہ انہوں نے کرائے پر گاڑی حاصل کی اور اسلام آباد روانہ ہو گئے۔ بچے کی حالت خراب ہوتی جارہی تھی اور وہ راستے میں گاڑی تیز چلانے یا شیشہ کھولنے کی اجازت نہیں دے رہا تھا۔

&quot;اسے(بچے کو) سپیڈ اور ہوا سے خوف آتا تھا وہ گاڑی کی معمولی سپیڈ بڑھنے پر بھی ڈرائیور پر حملہ آور ہو جاتا۔ آخر کار ہم گاڑی کے شیشے نیچے کیے بغیر 25 گھنٹوں بعد پمز ہسپتال پہنچے۔&quot;

پمز میں ڈاکٹروں نے معمولی چیک اپ کیا اور مریض کو پشاور بھیج دیا۔

یحییٰ عالم کو لیڈی ریڈنگ ہسپتال میں داخل کیے چند گھنٹے ہی ہوئے تھے کہ وہ دم توڑ گیا۔

تیرہ ستمبر کو یحییٰ عالم کی اندوہناک موت کے بعد گلگت بلتستان میں ریبیز سے ہلاکتوں کا نہ ختم ہونے والا سلسلہ شروع ہو گیا اور اگست سے اب تک یعنی تین ماہ میں گیارہ ہلاکتیں ہو چکی ہیں۔

<h2>ریبیز یا باؤلاپن کیا ہے؟</h2>

امریکی ادارہ سنٹرز فار ڈیزیز کنٹرول&nbsp; بتاتا ہے کہ <a href="https://www.cdc.gov/rabies/about/index.html">ریبیز یا باؤلا پن وائرل بیماری ہے جو انسانوں اور پالتو جانوروں میں کسی متاثرہ جانور (میمل) کے کاٹے یا خراشیں ڈالنے سے پھیلتی ہے۔ اگر متاثرہ شخص کو علامات شروع ہونے سے پہلے طبی امداد نہ ملے تو یہ جان لیوا ثابت ہوتی ہے۔</a>

عالمی ادارہ صحت&nbsp; کے مطابق ریبیز ایشیائی اور افریقی ممالک میں زیادہ سنگین مسئلہ ہے جس سے دنیا بھر میں سالانہ 59 ہزار اموات ہوتی ہیں۔تاہم کم رپورٹنگ کی وجہ سے اموات کا ڈیٹا اکثر اندازوں سے مختلف ہوتا ہے۔

اس وائرس سے عالمی نقصان کا تخمینہ تقریباً 8.6 ارب امریکی ڈالر سالانہ ہے۔

عالمی ادارہ کہتا ہے کہ یہ بیماری مرکزی اعصابی نظام پر حملہ کرتی ہے۔ انسانوں میں اس وائرس کی منتقلی کے 99 فیصد کیسز کتے سے متاثر ہوتے ہیں جن کے بیشتر شکار پانچ سے 14 سال کی عمر کے بچے بنتے ہیں۔

<a href="https://www.who.int/news-room/fact-sheets/detail/rabies">انسانوں اور جانوروں میں ریبیز انفیکشن کاٹے جانے، خراشوں اور رال کے ذریعے پھیلتا ہے۔ ایک بار اس بیماری کی طبی علامات ظاہر ہو جائیں تو یہ تقریباً 100 فیصد مہلک ہوتا ہے یعنی موت سے بچنا ناممکن کے برابر ہوتا ہے۔</a>

تاہم ریبیز کو بیماری کی علامات سامنے آنے سے پہلے صرف ویکسین سے روکا جاسکتا ہے۔

<h2>ریبیز یا باؤلے پن کی علامات</h2>

آر ایچ کیو ہسپتال کے ایم ایس ڈاکٹر اقبال عزیز بتاتے ہیں کہ باؤلے جانور کے کاٹے شخص پر کم از کم چھ روز بعد وائرس کے اثرات شروع ہوتے ہیں۔ پھر کسی بھی وقت ہنگامی صورت حال پیدا ہوسکتی ہے۔

&quot;مریض کو روشنی، پانی اور تیز رفتاری سے خوف آنا، جسمانی تھکاوٹ ہونا وغیرہ ریبیز کی اہم علامات ہیں۔ متاثرہ شخص کو تیز بخار، قے، سر درد کے ساتھ یاداشت کی خرابی و دیگر اعصابی مسائل کا سامنا بھی ہو سکتا ہے۔&quot;

گلگت شہر میں دو بڑے سرکاری ہسپتال ہیں جن میں ایک صوبائی ہیڈکوارٹرز (پی ایچ کیو) اور دوسرا ریجنل ہیڈ کوارٹرز(آر ایچ کیو) ہسپتال ہے جو شہید سیف الرحمن کے نام سے منسوب ہے۔

سرکاری ریکارڈ بتاتا ہے کہ پی ایچ کیو ہسپتال میں پچھلے تین ماہ کے دوران کتے کے کاٹے 166 افراد آئے جبکہ آر ایچ کیو ہسپتال میں71 افراد لائے گئے جن میں ایک بلی کا کاٹا بھی شامل تھا۔

ریکارڈ کے مطابق دونوں ہسپتالوں میں آنے والے تمام متاثرہ افراد کو ریبیز ویکسین لگائی گئی تاہم ان میں سے چار افراد پی ایچ کیو میں علاج کے دوران دم توڑ گئے جبکہ ایک آر ایچ کیو ہسپتال میں چل بسا۔

ان پانچ اموات میں ان افراد کے نام شامل نہیں جو ان دونوں ہسپتال سے ریفر کیے گئے یا گھروں میں دم توڑ گئے۔

ان ہسپتالوں کے علاوہ یہاں ہلاک ہونے والے مقامی افراد میں 12سالہ یحییٰ عالم، پانچ سالہ عائشہ ساکن اولڈ پولوگراؤنڈ، وقار عباس ولد زبیر عباس، افتخار حسین، شاد علی اور ریان عباس ساکنان دنیور شامل ہیں۔

جاں بحق افراد کے لواحقین الزام عائد کرتے ہیں کہ سرکاری ہسپتالوں کے ڈاکٹروں نے ان کے عزیزوں کا معمولی معائنہ کیا۔ انہیں ریبیز کے مریض کے طور پر نہیں دیکھا اور نہ ہی ان میں سے بیشتر کو ویکسین دی گئی۔

پی ایچ کیو کے میڈیکل سپرنٹنڈنٹ ڈاکٹر سرتاج عزیز کہتے ہیں کہ باؤلے کتے کے کاٹے مریض میں فوری آثار نمودار نہیں ہوتے اور اگر ہوتے بھی ہیں تو انہیں جانچنا مشکل ہوتا ہے۔ جب تک ڈاکٹر کو کتے کے کاٹے کا نہ بتایا جائے تب تک ویکسین نہیں دی جاتی۔

یحییٰ عالم سے قبل دو اگست کو محلہ امپھری گلگت کے مسعود الرحمن کو باؤلے کتے نے کاٹ لیا تھا۔ وہ ٹانگ سے بہتے خون کے ساتھ شہید سیف الرحمن(آر ایچ کیو) ہسپتال پہنچے جہاں میڈیکل سپرنٹنڈنٹ سے ان کی شناسائی تھی۔

خوش قسمتی سے انہیں نہ صرف ریبیز ویکسین میسر آ گئی بلکہ امیون گلوبلین بھی دی گئی جس کی وجہ سے وہ محفوظ رہے۔

ماہرین صحت&nbsp; کہتے ہیں کہ <a href="https://www.healthlinkbc.ca/healthlinkbc-files/rabies-immune-globulin-and-vaccine">اگر کسی کو کوئی جانور کاٹتا ہے جو ممکن ہے ریبیز وائرس(باؤلے پن) کا شکار ہو تو اسے فوراً ریبیز امیون گلوبلین اور ریبیز ویکسین لگوانی چاہیے۔</a>

<h2>ریبیز امیون گلوبلین اور ریبیز ویکسین کیا ہیں؟</h2>

ہیلتھ لنک برٹش کولمبیا&nbsp; کے مطابق باؤلے کتے یا <a href="https://www.healthlinkbc.ca/healthlinkbc-files/rabies-immune-globulin-and-vaccine">جانور کے کاٹے کسی بھی شخص کو عام طور پر دو قسم کے انجیکشن(ٹیکے) وقفوں وقفوں سے لگائے جاتے ہیں جن میں ریبیز امیون گلوبلین اور ریبیز ویکسین شامل ہیں۔</a>

ریبیز امیون گلوبلین، جسم میں ریبیز کا سبب بننے والے وائرس کے خلاف فوری اور قلیل مدتی تحفظ فراہم کرتا ہے۔ اس انجیکش میں انسانی خون سے لی گئی اینٹی باڈیز کی بڑی مقدار ہوتی ہے جو بیکٹیریا اور وائرس سے لڑنے میں مدافعتی نظام کی مدد کرتی ہے۔

ریبیز ویکسین، ریبیز وائرس سے ہونے والے انفیکشن کے خلاف دیرپا تحفظ فراہم کرتی ہے۔ یہ ویکسین مردہ ریبیز وائرس سے بنائی جاتی ہے اور یہ محفوظ ہوتی ہے۔

پاکستان میں بیشتر سرکاری ہسپتالوں کا المیہ یہ ہے یہاں اکثر اوقات ریبیز ویکسین ہی نہیں ہوتی اور اگر ہوتی ہے تو ریبیز امیون گلوبلین نہیں ہوتی۔

ڈاکٹر سرتاج بتاتے ہیں کہ دیامر کالونی کے یحییٰ عالم کو جب ہسپتال داخل کیا گیا تو یہ کیس ڈیڑھ ماہ پرانا ہو چکا تھا۔

&quot;تاہم جونہی اموات اور مریضوں کی تعداد بڑھی تو ہم نے فوراً ریبیز ویکسین کا بندوبست کیا اور امینوگلوبولین بھی منگوالی گئی۔&quot;

پانچ سالہ عائشہ کے والد تنویر احمد پی ایچ کیو میں تمام متاثرین کو ویکسین فراہم کرنے کے انتظامیہ کے دعوے کو مسترد کرتے ہیں۔

وہ کہتے ہیں کہ پی ایچ کیو میں نہ تو ویکسین تھی اور نہ ہی بچوں کےلیے وینٹی لیٹر تھا۔

&quot;کتے کے حملے کا بتانے کے باوجود میری بیٹی کو ہسپتال میں ویکسین مہیا نہیں کی گئی۔ ہمیں بتایا گیا کہ ریبیز ویکسین نہیں ہے جس پر میں بازار سے خرید لایا لیکن بدقسمتی سے وہ ناقص نکلی۔&quot;

تنویر نے بتایا کہ وہاں وینٹی لیٹر تک نہیں تھا جس کی وجہ سے انہیں بیٹی کو سی ایم ایچ لے جانا پڑا جہاں وہ نصف گھنٹے بعد انتقال کر گئیں۔

&quot;ستم ظریفی یہ ہے کہ کسی نے ناقص ویکسین کا نوٹس لیا نہ ہی وینٹی لیٹر کی عدم دستیابی کا۔&quot;

ایم ایس ڈاکٹر سرتاج ہسپتال میں بچوں کے وینٹی لیٹر نہ ہونے کا اعتراف کرتے ہیں۔ تاہم اصرار کرتے ہیں کہ عائشہ کو ویکسین باہر سے ملی لیکن بروقت دی گئی تھی۔

گلگت بلتستان کی مجموعی آبادی&nbsp; لگ بھگ 17 لاکھ ہے جہاں ریبیز سے تین ماہ میں 237 افراد متاثرہ ہوئے اور 11 اموات ہوئیں جو تشویشناک ہے۔

<a href="https://www.cdc.gov/rabies/php/protecting-public-health/index.html">امریکن سنٹرز فار ڈیزیز کنٹرول&nbsp; کے مطابق قریباً 34 کروڑ لوگوں کے ملک امریکا میں ریبیز سے پورے سال میں 10 سے بھی کم اموات ہوتی ہیں جس کی وجہ ماہرین صحت کے غیرمعمولی اقدامات ہیں۔</a>

امریکا میں سالانہ ریبیز کے تقریباً چار ہزار مشتبہ کیسز رپورٹ ہوتے ہیں جن میں سے 90 فیصد سے زیادہ لوگ خون آشام چمگادڑوں، ریکونز، سکنکس اور لومڑیوں کے متاثرہ ہوتے ہیں۔

2021ء کے دوران امریکا&nbsp; میں ریبیز سے صرف پانچ ہلاکتیں ہوئیں جس کی وجہ ماہرین کووڈ-19 کا لاک ڈاؤن بتاتے ہیں جب لوگ زیادہ تر گھروں میں رہے۔

اس حساب سے گلگت بلتستان میں ریبیز سے ہلاکتوں کی تعداد بہت ہی غیر معمولی ہے جہاں عام طور پر کتے کے کاٹے لوگ ہی ہسپتالوں کا رخ کرتے ہیں۔

&nbsp;اگرچہ آر ایچ کیو گلگت کے وارڈ ماسٹر کا کہنا تھا کہ اب یہاں ریبیز ویکسین اور ریبیز امیون گلوبلین وافر مقدار میں دستیاب ہے جس کی ایک خوراک (ڈوز) 35 ہزار روپے میں پڑتی ہے۔

تاہم سوال یہ ہے کیا یہ اقدام ریبیز سے اموات روکنے کے لیے کافی ہے؟

<h2>ریبیز کو روکنا کیسے ممکن ہے</h2>

تیسری دنیا کے ممالک میں کتوں کی آبادی کنٹرول کرنے کا روایتی طریقہ ان کو فائرنگ کر کے یا زہریلی گولیاں دے کر ہلاک کرنا ہے۔

گلگت بلتستان حکومت کی معاون خصوصی برائے اطلاعات ایمان شاہ بتاتے ہیں کہ گلگت شہر میں 15 ہزار کے قریب کتوں کی موجودگی بتائی جاتی ہے جن میں سے ڈیڑھ ہزار کو &#39;کتا مار مہم&#39; کے دوران ہلاک کر دیا گیا ہے۔ تاہم اس سے زیادہ فائدہ نہیں ہوا۔

&quot;ہم کتوں کی ویکسینیشن شروع کر رہے ہیں جس کے لیے مختلف غیرسرکاری تنظیموں سے رابطے کیے گئے ہیں۔ لوگوں کو بھی تنبیہ کی گئی ہے کہ وہ اپنے پالتو کتوں کو ویکسین کرائیں۔&quot;

جمشید احمد، غیر سرکاری تنظیم &#39;کمپری ہینسو ڈیزاسٹر ریسپانس سروس &#39;(سی ڈی آر ایس) کے ڈائریکٹر ہیں۔ وہ کہتے ہیں کہ ریبیز پر قابو پانے کا بہترین طریقہ ٹی این وی آر (ٹریپ، نیوٹر، ویکسینیٹ اینڈ ریٹرن)ہے۔ یعنی کتے یا بلی کو پکڑو، اس کی تولیدی صلاحیت ختم کرو اور اسے ویکسین کر کے چھوڑ دو۔

&quot;ہماری تنظیم نے پچھلے سال سکردو میں آوارہ کتوں کو ریبیز سے محفوظ کرنے کے لیے سرگرمیوں کا آغاز کیا تھا جس میں کم از کم 900 کتوں کو پکڑ کر ان کی تولیدی صلاحیت ختم کی گئی۔ دوسرا ان کتوں کو ویکسین دی گئی جس سے ان میں ریبیز پیدا نہیں ہوتا۔&quot;

وہ کہتے ہیں کہ کتوں کو گولی مارنے سے ریبیز(وائرس) یا باؤلے پن کا پھیلاؤ ہوتا ہے۔ گلگت بلتستان کی موجودہ صورتحال فوری توجہ کی متقاضی ہے اور سی ڈی آر ایس یہاں حکومت سے تعاون کے لیے تیار ہے۔

ان کا کہنا تھا کہ ٹی این وی آر کے ذریعے انسانوں اور جانوروں دونوں کی مشکلات میں کمی آئے گی۔&nbsp; گلگت بلتستان&nbsp; حکومت کو اس کے لیے فنڈنگ کرنی چاہیے تاکہ یہ خطہ کتوں کو مارنے کے ظالمانہ چکر سے نکلے اور ریبیز کی روک تھام بھی ممکن ہو سکے۔

قصور میں آوارہ کتوں کا خاتمہ آخر کس کی ذمہ داری ہے؟

گلگت بلتستان میں باؤلے کتوں کےکاٹے سے اموات کا سلسلہ آخر کیسے رکے گا؟

The economic lives of local farmers in Gilgit-Baltistan are being significantly affected by untimely rains and rising temperatures caused by climate change. Learn how these factors are impact

Impact of Climate Change: Untimely Rains and Rising Temperatures on Farmers in Gilgit-Baltistan

اڑتالیس سالہ محمد ریاض ضلع غذر کی خوبصورت وادی پھندڑ کے رہائشی اور 70 کنال زرعی اراضی کے مالک ہیں۔ وہ 30 سال سے کھیتی باڑی کر رہے ہیں اور ہر سال آلو، گندم کاشت کرتے ہیں۔ یہی ان کی آمدنی کا واحد ذریعہ ہے جس پر ان کے گھر کا گزارا چلتا ہے لیکن اب کی بار وہ بےحد پریشان ہیں۔

وہ بتاتے ہیں کہ گلگت بلتستان (جی بی) میں دسمبر سے فروری کے دوران برفباری اور بارش ہوتی ہے۔ مارچ میں بہترین درجہ حرارت ہوتا ہے اور گلیشئر آہستہ آہستہ پگھلنا شروع ہوتے ہیں۔ اسی دوران جشن تخم ریزی منانے کے بعد کسان نئی فصل بونا شروع کر دیتے ہیں اور زمینوں کو آب پاشی کے لیے پانی ملتا ہے۔

&quot;اس سال وسط فروری تک برفباری نہیں ہوئی اور مارچ میں بارشیں ہو گئیں۔ مارچ کی بجائے مئی کے وسط میں نارمل درجہ حرارت اور پانی میسر آیا اس لیے بروقت بوائی نہیں ہو پائی اور فصلیں ایک ماہ سے زائد عرصہ تاخیر کا شکار ہو گئیں۔&quot;

گلگت بلتستان <a href="https://pmrugb.gov.pk/dipatch/Gilgit-Baltistan%20CC%20Strategy%202023.pdf">انوائرمینٹل پروٹیکشن ایجنسی</a> کے اعداد و شمار کے مطابق 1984ء سے 2013ء کے دوران 30 برسوں میں ہندوکش ہمالیہ پہاڑی رینج میں اوسطاً ہر دس سال بعد درجہ حرارت میں 0.18 ڈگری سینٹی گریڈ کا اضافہ ہوا ہے۔

اس عرصے کے دوران نہ صرف فی عشرہ 1.9 ملی میٹر بارش میں کمی ہوئی بلکہ ستمبر، اکتوبر، نومبر میں بارشیں کم ہوتی گئیں لیکن جنوری اور فروری میں بڑھتی گئیں۔

رپورٹ کے مطابق درجہ حرارت میں ایک درجہ سینٹی گریڈ کے اضافے سے پہاڑوں پر پڑی تقریباً 150 میٹر برف تک پگھل جاتی ہے۔

یہی وجہ ہے کہ محمد ریاض جیسے کاشتکاروں کو خوف نے گھیر رکھا ہے۔

محمد ریاض کہتے ہیں کہ سطح سمندر سے تقریباً 11 ہزار فٹ بلند ہونے کے باوجود گلگت بلتستان میں گرمی اور سردی دونوں میں شدت آتی جا رہی ہے جس سے فصلیں براہ راست متاثر ہوتی ہیں۔

رواں برس تاخیر سے برفباری ہوئی ہے اس لیے ڈر ہے کہ برف تیزی سے پگھلنی شروع ہو گی تو کہیں اچانک سیلاب فصلیں ہی نہ بہا لے جائے۔

قراقرم انٹرنیشنل یونیورسٹی میں شعبہ ماحولیاتی سائنس کی پروفیسر ارم بانو نے لوک سجاگ کو بتایاکہ درجہ حرارت میں اتار چڑھاؤ ماحولیاتی نظام میں تبدیلیوں کو ظاہر کرتا ہے۔

ان تبدیلیوں کے باعث نہ صرف مٹی کے غذائی اجزا بلکہ پودوں اور جانوروں میں بھی ساختیاتی تبدیلیاں رونما ہو سکتی ہیں۔

&quot;برفباری میں کمی اور بے وقت بارشوں سے فصلیں بروقت تیار نہیں ہو ں گی اس سے ان کی پیداوار اور معیار دونوں متاثر ہوں گے۔&quot;

غذر کے قریب ہی ایک اور وادی&#39; حراموش&#39; کے زمیندار ثمر بتاتے ہیں کہ بے وقت برفباری اور بارشوں کی وجہ سے فصل کے لیے زمین تیار کرنے کا موقع ہی نہیں ملا۔ چیری، توت اور دیگر پھلوں کے موسم میں تاخیر ہوئی تو پھلوں پر کیڑوں نے حملہ کر دیا۔

&quot;ہمارے ہاں پودوں پر پھول ہی بہار کی آمد کی نشانی ہوتے ہیں لیکن اس بار اس قدر بے یقینی رہی کہ مئی میں خوبانی پر پھل کی بجائے صرف پھول ہی لگے تھے حالانکہ پھول لگنے کا موسم مارچ اور اپریل میں ہوتا ہے۔&quot;

وہ کہتے ہیں کہ پہلے یہاں (گلگت بلتستان میں)&nbsp; بہت سا پھل ضائع ہو جاتا جاتا تھا یا سکھانا پڑتا تھا لیکن اب کچھ سالوں سے بیوپاری فصل کے تیار ہونے سے قبل ہی باغات کو خرید لیتے ہیں، وہ انہیں راولپنڈی، اسلام آباد اور پنجاب کے بڑے شہروں میں لے جا کر بیچتے ہیں۔

&quot;بڑی مارکیٹوں میں پھل پہنچانےکا سلسلہ کچھ برس پہلے ہی شروع ہوا ہے جس سے نہ صرف یہاں کے کاشت کاروں کو اچھی قیمت مل جاتی ہے بلکہ بیوپاری بھی خوب منافع کماتے ہیں۔&quot;

لیکن بقول ثمر کے&nbsp; اب موسمیاتی تبدیلیوں کی وجہ سے پھلوں کی پیداوار کو نقصان پہنچ رہا ہے۔

&quot;اگر یہ سلسلہ اسی طرح جاری رہا تو صرف ہمارے کاروبار ہی نہیں ڈوبیں گے بلکہ علاقے میں روزی روٹی کے بھی لالے پڑ جائیں گے۔&quot;

محکمہ زراعت گلگت بلتستان کے فراہم کردہ اعداد و شمار بتاتے ہیں کہ جی بی میں تقریباً 94 ہزار 394 ایکڑ رقبہ زیر کاشت ہے۔ یہ کل رقبے کی لگ بھگ 10 فیصد ہے۔

یہاں گزشتہ سال 43 ہزار 90 میٹرک ٹن گندم اور ایک لاکھ 28 ہزار 73 میٹرک ٹن آلو پیدا ہوا جبکہ مکئی اور جو کی بھی اچھی فصل ہوتی ہے۔

گلگت بلتستان پھلوں کی پیداوار میں اپنا کوئی ثانی نہیں رکھتا۔ محکمہ زراعت کہتا ہے کہ جی بی میں چیری کی پیداوار چار ہزار 85 میٹرک ٹن سالانہ ہوتی ہے جس میں سے تقریباً چھ فیصد یعنی 252&nbsp; میٹرک ٹن ضائع ہو جاتی ہے۔

&nbsp;جی بی کے ایگریکلچر افسر طارق انور بتاتے ہیں کہ یہاں خوبانی کی پیداوار ایک لاکھ 25 ہزار میٹرک ٹن سے زیادہ ہے جس میں تقریباً 35 فیصد یعنی 44 ہزار میٹرک ٹن کے قریب ضائع ہو جاتی ہے۔ سیب کی پیداوار 23 ہزار میڑک ٹن سے زیادہ ہے مگر صرف 16 ہزار میٹرک ٹن لگ بھگ ہی مارکیٹوں میں پہنچتا ہے۔

وہ کہتے ہیں کہ گلگت بلتستان میں ایک اندازے کے مطابق گزشتہ سال اخروٹ کی پیداوار چار ہزار 178 میٹرک ٹن اور چلغوزے کی پیداوار تین ہزار 375 میٹرک ٹن تھی۔ چلغوزہ اور اخروٹ زیادہ تر ملک کی بڑی منڈیوں میں ہی جاتا ہے۔

&quot;یہاں توت، ناشپاتی، انگور اور آڑو بھی بڑی مقدار میں اگائے جاتے ہیں جو بہت خوش ذائقہ ہوتے ہیں۔&quot;

طارق انور کا کہنا تھا کہ گلگت بلتستان میں سال کے دوران ایک ہی بار کاشت ہوتی ہے۔ موسمیاتی تبدیلی اگرچہ عالمی مسئلہ ہے لیکن جتنی تیزی سے جی بی میں اس کے اثرات نظر آ رہے ہیں اتنے شاید دنیا میں کہیں نہ ہوں۔

&quot;رواں برس باغات میں پودے پر پھل بظاہر پک چکے ہیں لیکن ان میں روایتی ذائقہ ہے اور نہ وہ شیرینی کیونکہ اس بار سردیاں معمول سے بہت زیادہ طویل رہیں۔&quot; جن دنوں فصل بوئی جا رہی تھی ان دنوں میں شدید سردی تھی اور پھر اچانک ہی گرمی شروع ہو گئی۔

&nbsp;&quot;پھل یا فصل پکنے کے دوران مخصوص درجہ حرارت درکار ہوتا ہے لیکن اس بار موسم اچانک رنگ بدلتا رہا۔ شام کو بارش ہوتی تھی تو دن کو تیز دھوپ نکلتی تھی جس کی وجہ سے بہت سارے علاقوں میں کیڑوں نے فصلوں پر حملہ کر دیا۔&quot;

انہوں نے بتایا کہ بارش کے بعد دھوپ اور درجہ حرارت میں اضافہ لاروے اور انڈوں، بچوں کی افزائش میں مدد فراہم کرتا ہے۔ لمبی سردیوں کے اثرات بالائی علاقوں میں ابھی تک موجود ہیں جہاں جون کے مہینے میں بھی فصلیں تیار نہیں ہوئی تھیں۔

خادم حسین، جی بی میں محکمہ تحفظ ماحولیات کے ڈپٹی ڈائریکٹر ہیں۔ وہ بتاتے ہیں کہ زراعت میں استعمال ہونے والی کھادیں، سپرے، ڈیزل اور ٹرانسپورٹ ان سرگرمیوں میں شامل ہے جو ماحولیاتی تبدیلیوں کا باعث بن رہی ہیں۔ تاہم یہاں موسمیاتی تبدیلی زرعی سرگرمیو ں کو شدید متاثر کر رہی ہے۔

&nbsp;وہ کہتے ہیں کہ گلگت بلتستان کا زیادہ تر رقبہ بنجر اور وسیع پہاڑی علاقوں پر مشتمل ہے اور مجموعی طور پر صرف دو فیصد رقبہ ہی کاشت ہو سکتا ہے۔ اگر موسمیاتی تبدیلیوں کے اثرات یونہی بڑھتے رہے تو علاقے میں غذائی بحران پیدا ہو سکتا ہے۔

گندم، کپاس اور دالوں کے لیے تنگ ہوتی زمین، موسمیاتی تغیر پاکستان کے زرعی منظر نامے کو کیسے بدل رہا ہے؟

موسمیاتی تبدلیاں: کیا گلگت بلتستان غذائی بحران کی جانب بڑھ رہا ہے؟

گلگت بلتستان کے محمد ذاکر پچھلے گیارہ سال سے صحافت کر رہے ہیں۔ اس عرصہ میں ان کے لیے خبروں کے پیچھے حقائق کی تلاش کا کام کبھی آسان نہیں رہا۔ اس کی وجہ یہ ہے کہ عوامی مسائل سے متعلق بہت سی خبروں کے لیے انہیں سرکاری محکموں سے رجوع کرنا پڑتا ہے جو عام طور پر معلومات دینے سے گریزاں ہوتے ہیں۔ ملک کے دیگر حصوں میں معلومات تک رسائی کے قانون اور اس حوالے سے محکموں کے قیام کے بعد صحافیوں کی یہ مشکل قدرے آسان ہو گئی ہے لیکن گلگت بلتستان میں ایسا کوئی قانون وجود نہیں رکھتا۔

ذاکر بتاتے ہیں کہ ان کے علاقے میں صحافیوں کو سرکاری محکموں سے معلومات لینے کے لیے عام طور پر ذاتی تعلقات پر انحصار کرنا پڑتا ہے۔ بعض اوقات یوں بھی ہوتا ہے کہ معلومات فراہم کرنے والا شخص اپنی بات سے مکر جاتا ہے جس سے ان کے لیے مسائل کھڑے ہو جاتے ہیں۔

گلگت بلتستان پاکستان کا واحد علاقہ ہے، جہاں پر معلومات تک رسائی کا کوئی قانون سرے سے موجود نہیں ہے۔ 2009 کو صدارتی حکم نامے &#39;گلگت بلتستان ایمپاورمنٹ اینڈ سیلف گورننس آرڈر&#39; کے تحت وجود میں آنے والی اسمبلی کو تقریباً 14 سال ہوچکے ہیں۔ اس قانون کے تحت ابتدائی طور پر گلگت بلتستان کی قانون ساز اسمبلی کو 63 امور پر قانون سازی کے اختیارات دیے گئے تھے۔

&nbsp;بعد ازاں 2018 میں دوبارہ جاری کردہ حکم نامے کے تحت اسمبلی کو بااختیار بناتے ہوئے اس کے قانون سازی سے متعلق اختیارات بھی بڑھادیے گئے۔ اسمبلی سے اب تک 79 قوانین منظور ہوچکے ہیں تاہم ان میں کوئی بھی ایسا قانون نہیں جس کے ذریعے معلومات تک آسان رسائی کا حق دیا گیا ہو۔

پاکستان کی قومی اسمبلی سمیت چاروں صوبوں کی اسمبلیوں میں معلومات تک رسائی کے حق کے متعلق قانون سازی کی جا چکی ہے۔ اس قانون کے تحت شہری اپنی درکار معلومات کے حصول کے لیے محکموں کو درخواست دے سکتے ہیں اور معلومات فراہم نہ کرنے والے حکام کے خلاف ایک مخصوص کمیشن میں ضابطے کی کارروائی کیلئے درخواست دی جاسکتی ہے۔

گلگت یونین آف جرنلسٹس کے صدر خالد حسین کہتے ہیں کہ صحافیوں کے امور سے متعلق مختلف معاملات پر قانون سازی کی جدوجہد انہی کی یونین نے شروع کی تھی لیکن اس معاملے میں سیاسی مداخلت کے باعث قانون سازی مکمل نہیں ہوسکی۔ وہ الزام عائد کرتے ہیں کہ سابق حکومت کے آخری اجلاس میں سپیکر نے اس قانون کی منظوری کی راہ میں رکاوٹ ڈالی۔

اس الزام پر جب سابق وزیراعلیٰ خالد خورشید سے بات کی گئی تو انہوں نے لاعلمی کا اظہار کرتے ہوئے بتایا کہ یہ شعبہ غالباً فیڈرل لیجسلیٹیو لسٹ کا ہے جبکہ سپیکر گلگت بلتستان اسمبلی نذیر احمد ایڈووکیٹ نے بتایا کہ اسمبلی اس حوالے سے مکمل بااختیار ہے اور دیگر صوبوں کی طرح یہاں بھی اس پر قانون سازی کی جاسکتی ہے۔

سابق حکومت میں بطور وزیر اطلاعات خدمات انجام دینے والے فتح اللہ خان سے بات کی گئی تو انہوں نے کہا کہ چند قوانین سلیکٹڈ کمیٹیوں کے سپرد کیے گئے ہیں جنہیں وہاں سے منظور کروا کے دوبارہ اسمبلی میں لایا جائے گا۔

بلدیاتی اداروں کے قانون کا ڈرافٹ بنانے میں معاونت کرنے والے گلگت بلتستان پالیسی انسٹیٹیوٹ کے کوآرڈینیٹر الطاف حسین کا کہنا ہے کہ آئین کے آرٹیکل 19 کے علاوہ جی بی گورنمنٹ آرڈر کے آرٹیکل 20 کے تحت بھی معلومات تک رسائی کا عوام کو حق دیا گیا ہے کہ وہ حکومت سے اپنی مطلوبہ معلومات لے سکتے ہیں۔ لیکن بدقسمتی سے اس بارے میں الگ قانون موجود نہیں، اسی لئے لوگ آئین پاکستان کے آرٹیکل 19 اور جی بی گورنمنٹ آرڈر 2018 کے تحت حاصل اس حق سے مستفید نہیں ہوپاتے۔

&quot;جب ہم دفتروں میں جاکر معلومات تک رسائی مانگتے ہیں تو ہمیں جواب دیا جاتا ہے کہ قانون اس کی اجازت نہیں دیتا۔ میں نے کئی بار یہ سوال اٹھایا کہ کوئی ایسا قانون ہے جو معلومات نہ دینے پر زور دیتا ہے۔ بنیادی طور پر قانون نہ ہونے کی دلیل میں وزن نہیں اور لوگوں کو اس حوالے سے علم بھی نہیں ہوتا کہ یہ قانون ہے کیا چیز، قانون بڑا مشکل سا سبجیکٹ ہے اور ہر شہری اس سے آگاہی نہیں رکھتا۔&quot;

ان کا کہنا ہے کہ انہوں نے چند مرتبہ حکام سے پوچھا کہ یہ کون سے قانون میں لکھا ہے کہ کوئی افسر لوگوں کو معلومات نہیں دے گا۔ سرکاری حکام بھی نہیں جانتے کہ وہ کسی بنیاد پر معلومات کی فراہمی سے انکار کرتے ہیں۔

الطاف حسین کا خیال ہے کہ قانون نہ ہونے سے بدعنوانی اور من مانی کا دروازہ کھل جاتا ہے اور اس معاملے میں درست راستہ یہی ہے کہ گلگت بلتستان میں معلومات تک رسائی کے حق سے متعلق جامع قانون بنایا جائے اور لوگوں میں اس حوالے سے شعور پیدا کیا جائے۔

خاتون صحافی شیرین کریم کہتی ہیں کہ معلومات تک رسائی کے قانون کا اطلاق گلگت بلتستان تک نہ ہونے کی وجہ سے صحافیوں کو سرکاری دفاتر جواب ہی نہیں ملتا۔ یہ ضروری ہے کہ گلگت بلتستان میں یا تو وفاقی قانون برائے حصول معلومات کو توسیع دی جائے یا پھر گلگت بلتستان اسمبلی اپنا قانون بنا کر گلگت بلتستان میں اس پر عملدرآمد&nbsp; یقینی بنائے۔

پاکستان پریس فاؤنڈیشن کی ایک رپورٹ کے مطابق، گلگت بلتستان حکومت نے اس ضمن میں قانون سازی کیلئے پنجاب حکومت سے تعاون مانگا تھا جس پر پنجاب کے چیف انفارمیشن کمشنر مقبول قادر شاہ نے 2021 میں گلگت بلتستان دورہ کیا جہاں متعلقہ حکام کو اس حوالے سے بریفنگ دی گئی تھی، تاہم دو سال سے زیادہ عرصہ گزرنے کے باوجود اس پر قابلِ ذکر کام نہیں ہو سکا۔

ڈپٹی ڈائریکٹر محکمہ اطلاعات شمس الرحمٰن نے بتایا کہ گلگت بلتستان میں سرکاری سطح پر صحافیوں کی فلاح و بہبود اور انہیں درپیش قانونی مسائل پر کام ہو رہا ہے۔ اس حوالے سے بہت جلد اسمبلی میں قوانین کی منظوری دی جائے گی جس کے بعد امید ہے کہ صحافیوں کے تحفظات رفع ہو جائیں گے۔

'چارہ گر کو چارہ گری سے گریز ہے'، خیبرپختونخوا میں معلومات کی فراہمی کا ذمہ دار محکمہ معلومات دینے سے گریزاں

گلگت بلتستان میں سرکاری محکموں کے افسر 'معلومات کے خزانے' پر نگران بن کر بیٹھ گئے

گلگت کے گنجان علاقے بسین کے لوگ آج کل ہر وقت سیلاب سے بچاؤ کی تیاری کئے رہتے ہیں۔ اس کی وجہ یہ نہیں کہ وہاں سیلاب آنے کی پیش گوئی ہے بلکہ علاقے میں بہنے والے ایک قدیم پہاڑی نالے کے کنارے جگہ جگہ سے کمزور ہو گئے ہیں۔ نالے کا پانی اکثر اپنے بند توڑ کر باہر نکل آتا ہے جس سے لوگوں کے گھروں اور کھیتوں کو متواتر نقصان ہو رہا ہے۔

اس نالے کو سردار کوہل واٹر چینل کہا جاتا ہے جس کی لمبائی تقریباً ساڑھے چودہ کلومیٹر ہے۔ یہ نالا سیاحتی مقام کارگاہ سے شروع ہو کر بسین، نپورہ، کھر اور نائیکوئی سے ہوتا ہوا آئی جی ہاؤس کے قریب ایسے ہی ایک اور نالے کوہل بالا میں شامل ہو جاتا ہے۔

گلگت میں زرعی مقاصد کے لئے پانی کی ضرورت پہاڑی نالوں کے ذریعے پوری کی جاتی ہے۔ اس علاقے میں سردار کوہل سمیت آٹھ بڑے نالے ہیں جنہیں قیام پاکستان سے پہلے ڈوگرہ راج کے دوران پہاڑوں کو کاٹ کر بنایا گیا تھا۔ پہاڑوں سے آنے والے پانی کو ان نالوں کے ذریعے مخصوص اطراف میں موڑا گیا اور اس طرح مختلف علاقوں میں پانی کی دستیابی ممکن بنائی گئی۔

بسین کے رہائشی عرفان صدیق کا گھر اسی علاقے میں ہے جہاں سے سردار کوہل واٹر چینل گزرتا ہے۔ وہ بتاتے ہیں کہ اس آبادی کی آبی ضرورت اسی نالے سے پوری ہوتی ہے لیکن گزشتہ چند سال سے زوردار بارشوں اور سیلاب نے اس کے کنارے توڑ دیے ہیں۔ چونکہ نالے کی سالانہ صفائی کا کوئی اہتمام نہیں اس لئے جب پانی کے راستے میں رکاوٹیں جمع ہو جاتی ہیں تو اس میں سیلابی کیفیت پیدا ہو جاتی ہے جسے نالے کے کمزور بند روک نہیں پاتے۔

بسین کے کشمیری محلہ میں رہنے والے حسین شاہ کا کہنا ہے کہ گزشتہ عیدالفطر سے دو روز پہلے نالے کا پانی آبادی میں داخل ہو گیا تھا۔ چونکہ اسے وہاں روکنے کا کوئی انتظام ممکن نہیں تھا اس لئے اہل نالے کارگاہ میں نالے کے منبع کی جانب دوڑے اور وہاں رکاوٹیں کھڑی کر کے پانی کے بہاؤ کو سست کرنے کی کوشش کی۔ جب یہ لوگ واپس آئے تو علاقے کی گلیاں پانی میں ڈوبی ہوئی تھیں اور سیلابی ریلا لوگوں کے گھروں اور کھیتوں میں داخل ہو چکا تھا۔&nbsp;

حسین شاہ کا کہنا ہے کہ یہ نالا بسین اور گردونواح کی آبادی کے لئے نعمت تھا جو اب زحمت بن چکا ہے۔ مقامی لوگوں نے بیسیوں مرتبہ سرکاری اداروں کو اس کے کناروں کی مرمت کرنے کے لئے درخواستیں دیں اور احتجاج کیا لیکن انتظامیہ نے کوئی کارروائی نہیں کی۔

گگلت میں ڈیزاسٹر مینجمنٹ اتھارٹی نالے کی ذمہ داری لینے سے انکاری ہے۔ اس ادارے کے اسسٹنٹ ڈائریکٹر شہزاد احمد کہتے ہیں کہ ان کی تعیناتی کے دوران پانی کے آبادی میں داخل ہونے کا واقعہ پہلی مرتبہ پیش آیا ہے جس کی رپورٹ اور متعلقہ سفارشات واٹر مینجمنٹ اتھارٹی کو جمع کرا دی ہیں۔ ان کا یہ بھی کہنا ہےکہ نالے کے کناروں کی تعمیرومرمت ان کے محکمے کام کام نہیں۔

گلگت میں واٹر مینجمنٹ ڈیپارٹمنٹ کے سیکرٹری برہان آفندی کا کہنا ہے کہ تکنیکی اعتبار سے یہ واٹر چینل ان کی حدود میں نہیں آتا کیونکہ یہ شہری علاقے میں ہے اور ان کا کام شہری علاقوں سے باہر ہوتا ہے۔

دوسری جانب میونسپل کارپوریشن گلگت کے چیف افسر عابد حسین بھی اپنے محکمے کو نالے کی مرمت اور دیکھ بھال سے بری الذمہ قرار دیتے ہیں۔ ان کا کہنا ہے کہ میونسپل کارپوریشن کا کام صرف پانی کی چوری کو روکنا ہے جس کے لئے انہوں نے نالے پر ایک چوکیدار بٹھا رکھا ہے۔

پچھلے سال جون میں وزیراعلیٰ گلگت بلتستان نے گلگت ڈویلپمنٹ اتھارٹی، میونسپل کارپوریشن اور ضلعی انتظامیہ کو تمام نالوں کی دیکھ بھال اور مرمت کیلئے جامع پالیسی ترتیب دینے اور اسے کابینہ اجلاس میں منظوری کیلئے پیش کرنے کو کہا تھا۔ ان احکامات کو ایک سال ہونے والا ہے لیکن حکومتی ترجمان علی تاج بتاتے ہیں کہ تاحال اس حوالے سے کابینہ میں کسی قسم کی تجاویز پیش نہیں کی گئیں۔

ان کا کہنا ہے کہ واٹر مینجمنٹ ڈیپارٹمنٹ نے نالوں کی صفائی و مرمت کے حوالے سے پی سی ون تیار کرکے متعلقہ فورم میں پیش کر دیا تھا تاہم اسے منظوری نہ مل سکی۔ اسی لئے جب تک سیوریج کا منصوبہ مکمل نہیں ہوتا ہے ہم اس پر کام نہیں کر سکتے۔

برہان آفندی کہتے ہیں کہ گلگت میں سیوریج کا باقاعدہ نظام موجود نہیں ہے۔ عام طور پر لوگ سیوریج کا پانی زمین میں گہرے گڑھے کھود کر تلف کرتے ہیں۔ اس پانی کی کچھ مقدار زمین میں جذب ہو جاتی ہے اور کچھ بہہ کر آبپاشی کے نالوں میں شامل ہو جاتی ہے۔ کئی آبادیوں میں سیوریج کا پانی براہ راست ان نالوں میں ڈالا جا رہا ہے۔ اس طرح نالوں کی تہہ میں گندگی جمع ہوتی رہتی ہے جو پانی کے بہاؤ کو متاثر کرتی ہے۔

ان کا کہنا ہے کہ جب تک گلگت میں سیوریج کا باقاعدہ نظام نہیں بن جاتا اس وقت تک نالوں میں سیلابی کیفیت پیدا ہونے اور ان کے بند ٹوٹنے کا خطرہ موجود رہے گا۔

گلگت میں سیوریج کا نظام بچھانے کے لئے وفاقی حکومت نے 2019ء میں ایک مںصوبہ تیار کیا تھا جس کی مالیت تین ارب 50 کروڑ تھی۔ تاہم خدشہ ہے کہ اب اس کی لاگت کئی گنا بڑھ چکی ہے۔ سرکاری ذرائع کا کہنا ہے کہ اس منصوبے کا ٹینڈر مکمل ہو چکا ہے اور متوقع طور پر جولائی سے اس پر کام شروع ہو جائے گا۔

ڈپٹی کمشنر گلگت اسامہ مجید چیمہ اس صورتحال کا حل یہ بتاتے ہیں کہ مقامی آبادیاں نالوں کی صفائی کے عمل میں انتظامیہ کی معاونت کریں۔ وہ کہتے ہیں کہ قدیم دور سے بھل صفائی کا کام مقامی لوگ ہی کرتے آئے ہیں جسے &#39;ہلہ شیری&#39; بھی کہا جاتا ہے لیکن گزشتہ چند سال سے یہ سرگرمی ختم ہوتی جا رہی ہے جس کی وجہ سے نالوں میں گنجائش کم ہو گئی ہے۔ ان کا کہنا ہے کہ جب عوام نالوں کی صفائی میں اپنا کردار ادا کریں گے تو تب ہی ایسے مسائل کے حل کی امید رکھی جا سکتی ہے۔

"آسمان پر بادل دیکھ کر فکر ہوتی ہے کہ کہیں اُچھار نالے میں سیلاب سے راستے بند نہ ہو گئے ہوں"

گلگت میں آبادی اور کھیتوں کو سیراب کرنے والا پہاڑی نالہ رحمت سے زحمت بن گیا

ادھیڑ عمر محمد ولی گلگت شہر میں لکڑی کے ایک کارخانے میں کاریگر ہیں۔ وہ گذشتہ 20 سال سے عمارتی لکڑی پر برقی مشینوں کے ذریعہ نقش و نگار بناتے ہیں جس سے ان کا اچھا گزر بسر ہو جاتا ہے۔

لیکن ہر سال کی طرح سے پچھلے سال نومبر میں سردیوں کے آغاز سے ہی ان کا کاروبار ٹھپ ہے جس کی بنیادی وجہ بجلی کی عدم فراہمی ہے۔

محمد ولی کا کہنا ہے کہ سردیوں میں 24 گھنٹے میں بمشکل تین گھنٹے تک بجلی دستیاب ہوتی ہے۔ ان کے مطابق گلگت بلتستان میں مارچ کے آخر میں جاڑے کی شدت میں کمی کے ساتھ لوڈ شیڈنگ کا دورانیہ بھی کم ہونا شروع ہو جاتا ہے۔

محمد ولی کہتے ہیں کہ گرمیوں میں جب بجلی کا مسئلہ نہیں ہوتا تو کارخانے دن رات چلتے ہیں اور وہ ڈبل شفٹ میں کام کر کے روزانہ آٹھ ہزار روپے تک کما لیتے ہیں۔

&quot;لیکن سردیوں میں پورے ہفتے میں بس تین ہزار روپے تک ہی بن پاتے ہیں&quot;۔

&nbsp;گلگت شہر میں ان کارخانوں کی تعداد 100&nbsp; سے زائد ہے اور ہر کارخانہ میں اوسطاً 10 افراد کام کرتے ہیں۔

محمد ولی بتاتے ہیں کہ سردیوں میں ان کے اخراجات بھی بڑھ جاتے ہیں کیونکہ کھانا پکانے، پانی گرم کرنے اور دیگر گھریلو ضروریات پوری کرنے کے لیے انہیں بازار سے جلانے کی لکڑی لانا پڑتی ہے۔

اس سال گلگت شہر میں جلانے کی لکڑی کی قیمت ایک ہزار روپے فی من رہی اور ایک محتاط اندازہ کے مطابق پانچ افراد پر مشتمل ایک گھرانے کو سردیوں کے موسم میں ہر ماہ 20 من لکڑی درکار ہوتی ہے۔یعنی ایک ماہ میں صرف ایندھن پر&nbsp; 20ہزار روپے کا خرچ۔

گلگت بلتستان میں سردیوں کے مہینوں میں بجلی سے متاثر ہونے والوں میں محمد ولی اکیلے نہیں بلکہ بجلی سے جڑے ہر کاروبار اور اس سے منسلک ہر شخص پر اس کے منفی اثرات ہوتے ہیں۔

سلمان احمد گلگت شہر میں ایک نجی کلینک میں بطور لیبارٹری اسسٹنٹ کام کرتے ہیں۔ وہ کہتے ہیں کہ جب سے سردیاں شروع ہوئی ہیں تو بجلی کی ترسیل کا دورانیہ بھی کم ہو گیا ہے جس کی وجہ سے ان کے کاروباری معمولات بھی بُری طرح متاثر ہوئے ہیں۔

&quot;بجلی صرف رات کو فراہم کی جاتی ہے اور اُس وقت تک تمام کلینک اور لیبارٹریاں بند ہو چکی ہوتی ہیں&quot;۔

بجلی کے متبادل کے طور پر وہ پیٹرول اور ڈیزل سے چلنے والے جنریٹر سے کام چلاتے ہیں لیکن سلمان کہتے ہیں کہ ایک طرف تو یہ بہت مہنگا پڑتا ہے جس کا بوجھ مریضوں پر ہی پڑتا ہے تو دوسری طرف یہ ماحولیاتی اور صوتی آلودگی کا باعث بھی بنتا ہے۔

&quot;لیکن اس کے سوا کوئی دوسرا چارا ہی نہیں کیونکہ سردی میں سینے اور وبائی امراض بڑھ جاتے ہیں اور ہمیں لیبارٹری چلانے کے لیے چار و نا چار جنریٹر پر ہی انحصار کرنا پڑتا ہے&quot;۔

شمسی توانائی اس کا ایک بہتر نعم البدل ہو سکتا ہے لیکن گلگت بلتستان میں فی الوقت لوگوں کا رجحان اس جانب نہیں ہے۔

گلگت بلتستان میں بجلی کی لوڈشیڈنگ کے خلاف احتجاجی مظاہرے بھی کئے گئے۔ عوامی ایکشن کمیٹی کی اپیل پر گلگت بلتستان کے ہر ضلع میں منعقد کئے جانے والے احتجاجی مظاہروں میں بڑی تعداد میں لوگوں نے شرکت کی۔ ان مظاہروں اور مطالبات پر عوامی ایکشن کمیٹی کے ترجمان آفاق احمد کا کہنا ہے کہ بجلی کی پیداواری صلاحیت میں اضافہ نہ کرنا حکمران طبقے کی عوامی مسائل سے عدم دلچسپی کا ایک ثبوت ہے۔

اس کے ساتھ ساتھ وہ بجلی کے بلوں میں نومبر اور دسمبر کے مہینے سے شامل کی گئی لائن رینٹ اور میٹر کی تنصیب کی چار ہزار روپے فِیس کو بھی &rsquo;&rsquo;مہنگائی میں پسے ہوئے&lsquo;&lsquo; صارفین پر ایک بوجھ سمجھتے ہیں۔

یہ مظاہرے کم از کم اس حد تک نتیجہ خیز ثابت ہوئے کہ حکومت نے 200 روپے ماہانہ لائن رینٹ معطل کر دیا۔

گلگت بلتستان میں پانی اور بجلی کے محکمہ (واٹر اینڈ پاور ڈیپارٹمنٹ گلگت بلتستان) کے مطابق گلگت بلتستان کے 10 اضلاع میں 202 میگاواٹ بجلی کی پیداواری صلاحیت ہے۔ لیکن اس وقت صرف 91 میگاواٹ بجلی پیدا ہو رہی ہے کیونکہ نالوں میں سردی کی وجہ سے پانی کا بہاؤ بہت کم ہو جاتا ہے جس کی وجہ سے سے بجلی کی پیداواری صلاحیت متاثر ہوتی ہے۔

اس 91 میگاواٹ میں سے 13.7 میگاواٹ سے زائد بجلی تھرمل جنریٹرز کی مدد سے جبکہ 77.3 میگاواٹ بجلی پانی کے ذریعہ پیدا کی جا رہی ہے۔

دوسری طرف اس خطے میں بجلی کی طلب 264 میگاواٹ ہے۔

اس طرح گلگت بلتستان کو 173&nbsp; میگاواٹ کمی کا سامنا ہے جس کی وجہ سے سردیوں میں 20 گھنٹے تک لوڈ شیڈنگ کی جاتی ہے۔

گلگت بلتستان کے محکمہ پانی اور بجلی کے اعداد و شمار کے مطابق ضلع گلگت میں بجلی کی طلب 90 میگاواٹ جبکہ پیداوار 32 میگاواٹ ہے۔

حال ہی میں گلگت بلتستان کے محکمہ واٹر اینڈ پاور کے ٹرانسفر ہونے والے سیکرٹری ظفر وقار تاج کہتے ہیں کہ بجلی کی پیداواری صلاحیت کو بہتر کرنے کے علاوہ طویل اور قلیل مدتی منصوبوں پر بھی غور و خوص کیا جا رہا ہے&rsquo;&rsquo;تاہم سردیوں میں بجلی کی قلت اور پیداواری صلاحیت کا متاثر ہونا قدرتی امر ہے۔&lsquo;&lsquo;

چھ سال قبل تک گلگت بلتستان حکومت کو صرف 25 کروڑ روپے تک کے منصوبوں کی منظوری کے اختیارات حاصل تھے جس کی وجہ سے دریا کے چلتے پانی پر بجلی گھر بنانا ممکن نہ تھا۔

ظفر تاج کے مطابق یہی وجہ ہے &rsquo;&rsquo;اب تک صرف قدرتی نالوں پر کم لاگت کے بجلی گھر بنائے گئے جہاں سردیوں میں پانی کم ترین سطح پر آ جاتا ہے جس کا اثر لامحالہ بجلی کی پیداوار پر ہوتا ہے۔&lsquo;&lsquo;

ظفر وقار کا کہنا ہے کہ 2016ء میں اس حد کو ایک ارب روپے کر دیا گیا&nbsp; جس کی وجہ سے موجودہ وقت میں بہتے پانی سے بجلی حاصل کرنے کے کچھ منصوبوں پر کام جاری ہے۔

اس کی تفصیل بتاتے ہوئے انہوں نے کہا کہ رواں سیزن کے دوران سرمیک سکردو اور شگر میں دو دو میگاواٹ کے منصوبوں کو منظوری کے لیے ایگزیکٹو کمیٹی آف دی اکنامک کونسل (ایکنک) میں پیش کر دیا گیا ہے۔

&quot;چپورسن ہنزہ میں ایک میگاواٹ کے علاوہ 20 منصوبوں پر کام تیزی سے جاری ہے جس سے سستی اور صاف بجلی عوام کو دستیاب ہو گی۔ گلگت میں ہینزل پاور پراجیکٹ پر بھی کام جاری ہے&quot;۔

ظفر وقار کا کہنا ہے کہ گلگت بلتستان میں بجلی کے بِلوں کی بر وقت ادائیگی ایک چیلنج ہے جس وجہ سے بجلی کی فراہمی کے مسائل بھی بڑھ جاتے ہیں۔

ان کے مطابق 2022ء کے آخر تک 34 کروڑ روپے نادہندگان پر واجب الادا ہیں۔ اب باقاعدہ طریقہ کار وضع ہو رہا ہے جس کے تحت نہ صرف بجلی کی چوری روکی جائے گی بلکہ بل ادا نہ کرنے والوں کے خلاف کارروائی بھی کی جائے گی جس میں بجلی کا کنکشن کاٹنا، جرمانہ لگانا اور جیل بھیجنا بھی شامل ہے۔

گلگت بلتستان میں بجلی گھروں کی تعمیر: اپنے حقوق تسلیم کرانے کے لیے دیہاتیوں کا کامیاب احتجاج۔

یہ اندھیرا جانے کتنوں کا اجالا کھا گیا: گلگت میں بجلی کی پیداوار میں کمی کیوں ہوتی جا رہی ہے؟

اس سال 26 اگست کو 15 سالہ قندیل سحر اپنے گھر میں قرآن کریم کی تلاوت کر رہی تھی کہ اچانک اُسے شور کی آواز سنائی دی۔

وہ جھٹ سے گھر کی چھت پہ چڑھی تو دیکھا کہ سیلاب کا ایک بڑا ریلا اس کے کچے گھر کے بالکل قریب آن پہنچا ہے۔ خطرے کو بھانپتے ہوئے وہ چھلانگ لگا کر اپنے ہمسایوں کے چھت پر چلی گئی جبکہ قندیل کا بھائی اُس کی جانب کودنے کی تیاری کر ہی رہا تھا کہ &rsquo;&rsquo;ہمارا مکان منہدم ہو گیا اور میری آنکھوں کے سامنے میرا بھائی اس میں دب گیا۔&lsquo;&lsquo; اس کے علاوہ گھر میں اس کی والدہ، دادی اور پانچ بہنیں بھی تھیں جو سب کی سب جاں بحق ہو گئیں۔

اب وہ اپنے گاؤں سے گزرتے دریا کے دوسرے کنارے واقع گلمتی گاؤں کے ایک مدرسے میں قائم عارضی کیمپ میں مقیم ہے۔

قندیل گلگت شہر سے70&nbsp; کلومیٹر مغرب کی جانب ضلع غِذر کے صدر مقام گاہکوچ سے 10 کلومیٹر مشرق میں بوبر نامی گاؤں میں رہائش پزیر تھی۔ ضلعی انتظامیہ کے اعداد و شمار کے مطابق قدرتی نالہ میں طغیانی کی وجہ سے اس گاؤں کے 10 افراد کی ہلاکت کے ساتھ ساتھ 80 گھر، ایک عبادت گاہ، ایک پُل اور آٹھ دکانیں بھی تباہ ہوئیں۔

اپنی مدد آپ کے جذبہ کے تحت گاؤں کی بحالی کے لئے بنائی گئی کمیٹی کے سربراہ یعقوب عالم طائی کہتے ہیں کہ انہوں نے زندگی میں اس شدّت کا سیلاب نہیں دیکھا۔ ان کے بقول &rsquo;&rsquo;ہم نے تو کبھی سوچا بھی نہیں تھا کہ اس نالے سے بھی سیلاب آ سکتا ہے۔&lsquo;&lsquo;

ان کا کہنا ہے کہ 60 فٹ چوڑی اس آبی گزرگاہ کی دونوں طرف غیر قانونی تعمیرات کی وجہ سے سیلابی راستہ گھٹ کر 10 فٹ تک محدود ہو کر رہ گیا &rsquo;&rsquo;جس کی وجہ سے سیلاب نے تباہی مچا دی اور گھروں کے گھر اجاڑ دئیے۔&lsquo;&lsquo;

حالیہ سیلاب کے اثرات سے گلگت بلتستان کے 10 اضلاع میں سے کوئی بھی محفوظ نہیں رہا۔ گلگت بلتستان کی ڈیزاسٹر منیجمنٹ اتھارٹی کے مطابق اس سیلاب میں مجموعی طور پر 17 افراد جاں بحق ہوئے جن میں سے 12 کا تعلق ضلع غِذر&nbsp; سے ہے۔ اسی طرح 100 سے زائد مقامات پہ آنے والے سیلاب نے 500 سے زائد گھروں کو تباہ کیا، جبکہ کئی سڑکیں اور رابطہ پُل بھی سیلاب میں بہہ گئے۔

گلگت بلتستان کے وزیرِاعلیٰ خالد خورشید کے مطابق اس سیلاب سے گلگت بلتستان کو 18 ارب روپے کا نقصان ہوا ہے۔

سیلابی صورتِ حال معمول پر آنے اور بحالی اقدامات کے ساتھ ہی گلگت بلتستان کے چیف سیکرٹری محی الدین وانی کی جانب سے 12 ستمبر کو جاری ہونے والے ایک حکم نامہ کے تحت دریا کنارے اور سیلابی راستوں پہ غیر قانونی تعمیرات کے خلاف ممکنہ قانونی اقدامات کے لئے گلگت بلتستان کے سیکرٹری داخلہ کی سربراہی میں کمیٹی قائم کر دی گئی ہے &rsquo;&rsquo;جو جی آئی ایس ]جیوگرافک انفارمیشن سسٹم[ ٹیکنالوجی کو بروئے کار لاتے ہوئے ایسے تمام مقامات اور تعمیرات کی نشان دہی کرے گی کی تاکہ انہیں گرا کر آبی گزرگاہوں کو واپس ان کی اصل حالت میں لایا جا سکے۔&lsquo;&lsquo;

گلگت بلتستان ڈیزاسٹر منیجمنٹ اتھارٹی نے سیلاب اور اس کی تباہیوں کے پیش نظر گذشتہ سال محکمہ خزانہ کو باقاعدہ خط لکھ کر 544 علاقوں کی نشان دہی کی تھی جہاں پر بند باندھنے اور دیگر حفاظتی اقدامات کی ضرورت تھی جس کے لئے مجموعی طور پر 36 کروڑ 82 لاکھ روپے کا تخمینہ لگایا گیا تھا۔

اسی طرح 18 جولائی 2019 میں نیشنل ڈیزاسٹر مینجمنٹ اتھارٹی (این ڈی ایم اے) نے چترال میں گلیشیئر پھٹنے اور سیلاب آنے کے بعد گلگت بلتستان اور خیبر پختونخوا کے تمام اضلاع کی انتظامیہ اور ڈسٹرکٹ ڈیزاسٹر منیجمنٹ اتھارٹیوں کو حکم دیا گیا کہ سیلابی راستوں اور دریا کے کناروں پر ہونے والی تمام تعمیرات کو منہدم کر دیا جائے۔ تاہم اس کے باوجود کوئی آپریشن عمل میں نہیں لایا جا سکا۔

لیکن دوسری طرف گلگت بلتستان میں ڈیزاسٹر مینجمنٹ اتھارٹی ہی کے ایک اسسٹنٹ ڈائریکٹر شہزاد بیگ کے نزدیک اس طرح کا آپریشن کوئی آسان کام نہیں ہے۔

گلگت بلتستان، ان کے بقول، گلیشیئرز اور جھیلوں سے بھرا پڑا ہے &rsquo;&rsquo;جن میں سے کوئی بھی جھیل یا گلیشیئرز کسی بھی وقت پھٹ سکتا ہے جس کی وجہ سے سیلابی صورتِ حال بن سکتی ہے۔&lsquo;&lsquo;

وہ مزید بتاتے ہیں کہ ایک سروے میں 36 گلیشیئرز کو خطرناک قرار دیا گیا ہے جن سے مختلف اضلاع کے مختلف مقامات کو خطرات در پیش ہیں۔ ان میں قراقرم، ہندوکش اور ہمالیہ رینج کے بالائی آبادیاں شامل ہیں لیکن چونکہ ان آبی گزرگاہوں سے لوگوں کا روزگار، رہائش اور دیگر معاشی سرگرمیاں وابستہ ہیں اس لئے، وہ سمجھتے ہیں، کہ فوری طور پر ایک نوٹیفکیشن کے ذریعے اس سب کو ختم نہیں کیا جا سکتا۔

وہ کہتے ہیں کہ &rsquo;&rsquo;البتہ سائنسی اصولوں کی بنیاد پر کئے گئے حفاظتی اقدامات &mdash; جیسا کہ سیلابی راستوں کو واگزار کرانا، کمیونٹی کو محفوظ کرنے کے لئے بند باندھنا اور قریبی علاقوں میں ماحول کو نقصان پہنچانے والے سرگرمیوں کو کم سے کم کرنا &mdash; سے ان کے اثرات کو کم کیا جا سکتا ہے۔&lsquo;&lsquo;

گلگت شہر سے 8 کلومیٹر مشرق کی جانب جوٹیال نالہ سمیت مختلف مقامات پر اسی بنیاد پر 2020-2021 میں چھوٹے بند باندھے گئے اور نالے کی صفائی کر کے پانی کے لئے جگہ چھوڑی گئی جس کی وجہ سے جوٹیال نالہ میں اس سال سیلاب تو آیا لیکن اس سے نقصان نہیں ہوا۔

ضلع غِذر میں ڈسٹرکٹ ڈیزاسٹر مینجمنٹ اتھارٹی کے اسسٹنٹ ڈائریکٹر محمد علی نے انکشاف کیا کہ نالوں کی چوڑائی کا کوئی واضح قانون نہیں ہے &rsquo;&rsquo;کیونکہ کہیں پر نالوں کی چوڑائی زیادہ تو کہیں پر کم۔ ان نالوں کے قریب تعمیرات اور سیلابی راستے کا واضح قانون موجود نہیں ہے جس کی وجہ سے بسا اوقات قانونی پیچیدگیوں کا سامنا کرنا پڑتا ہے۔&lsquo;&lsquo;

تونسہ کے دیہات کی سیلاب سے تباہی: 'بجری بنانے والے کارخانے ہمیں لے ڈوبے'

نہ رکتے ہیں آنسو نہ تھمتے ہیں نالے: آبی گزرگاہوں کے راستے میں تعمیرات نے سیلاب کی تباہ کاریوں کو دو چند کر دیا

گلگت کے علاقے جوٹیال میں ایک چراگاہ اور اس کے قریب واقع پانی کے نالے کی ملکیت پر دو گروہوں میں 14 مارچ 2022 کو جھگڑا ہوگیا جس میں ہونے والی فائرنگ سے دو افراد ہلاک اور چھ زخمی ہو گئے۔ اس کے چند روز بعد مقامی علاقے کنوداس کی نگر کالونی میں دو گروہوں کے درمیان زمین کے تنازعے نے پرتشدد صورت اختیار کر لی جس کے نتیجے میں ضلعی انتظامیہ نے متنازع زمین کو اپنی تحویل میں لے لیا۔&nbsp;

فروری 2022 میں بھی گلگت کے کئی علاقوں میں زمین کی ملکیت پر لڑائی جھگڑوں کے واقعات پیش آئے جن میں شامل کچھ لوگوں نے بعد ازاں متعدد احتجاجی مظاہرے بھی کیے۔ ان مظاہرین کا مطالبہ تھا کہ ضلعی انتظامیہ زرعی اراضی اور چراگاہوں کی حد بندی سے متعلق تنازعات کا فوری طور پر فیصلہ کرے اور رہائشی زمین کی ملکیت میں تبدیلی، اس کی الاٹمنٹ اور اس پر قبضے سے پیدا ہونے والے مسائل کا پائیدار حل نکالے کیونکہ ان کی وجہ سے پرتشدد واقعات اور جرائم جنم لے رہے ہیں۔&nbsp;

ایسا ہی ایک مظاہرہ 4 فروری کو گلگت شہر سے 20 کلومیٹر مغرب میں واقع بارگو پائین نامی علاقے کے لوگوں نے کیا۔ انہوں نے گلگت اور غذر کو جوڑنے والی سڑک پر دھرنا دیا اور اس پر چلنے والی ٹریفک کو کئی گھنٹوں تک معطل کیے رکھا۔ یہ مظاہرین اسسٹنٹ کمشنر سے مطالبہ کر رہے تھے کہ مقامی زرعی زمین اور پہاڑوں کی ازسرِنو حد بندی کی جائے۔ وہ خاص طور پر ہرالی نامی پہاڑ کی ملکیت کا دعویٰ کر رہے تھے جو، ان کے مطابق، طویل عرصہ ان کے مویشیوں کی چراگاہ رہا ہے۔ لیکن ان کا الزام تھا کہ 2001 میں ضلعی انتظامیہ نے اس پہاڑ کے نواح میں سکارکوئی کے نام سے ایک نیا موضع قائم کیا جس سے مقامی زمینوں کی حد بندی اس قدر متاثر ہوئی کہ کچھ دوسرے علاقوں کے لوگ بھی ہرالی کی ملکیت کا دعویٰ کرنے لگے۔&nbsp;

ان دعوے داروں میں بگروٹ نامی بستی کے باشندے بھی شامل ہیں۔ انہوں نے 20 فروری 2022 کو گلگت کے مرکزی پریس کلب میں ایک پریس کانفرنس کرتے ہوئے کہا کہ یہ پہاڑ تقریباً چار سو سال پہلے گلگت کی حکمران دادی جواری خاتون نے ان کے اجداد کو بطور تحفہ دیا تھا تاکہ وہ اسے چراگاہ کے طور پر استعمال کر سکیں۔&nbsp;

<h2>زمینوں کی &#39;بندربانٹ&#39;</h2>

بہت سے مقامی لوگوں کے نزدیک گلگت میں زمینی تنازعات اور ان کے نتیجے میں جنم لینے والی بے چینی اور تشدد کی ایک بڑی وجہ &#39;سٹیٹ سبجیکٹ رول&#39; کا خاتمہ ہے۔ یہ قانون جموں و کشمیر کے آخری مہاراجہ ہری سنگھ نے 1927 میں لاگو کیا تھا۔ اس کے تحت ریاست جموں و کشمیر (جس میں اُس وقت گلگت بلتستان کے تمام علاقے بھی شامل تھے) میں غیر ریاستی باشندوں کو زمین خریدنے اور مستقل آباد ہونے کی اجازت نہیں تھی۔&nbsp;

یہ قانون پاکستان کے زیر انتظام آزاد جموں کشمیر میں ابھی بھی لاگو ہے لیکن &nbsp;گلگت بلتستان میں 1974 میں اسے معطل کر دیا گیا تھا جس کے بعد بڑی تعداد میں غیرمقامی لوگوں کو یہاں زمینیں خریدنے اور گھر بنانے کا موقع ملا۔ مقامی شیعہ آبادی کی ایک تنظیم انجمن حسینیہ نگر کے جنرل سیکرٹری سجاد شیر الیاٹ جیسے لوگوں کو شکایت ہے کہ ان غیرمقامی لوگوں کو زمین کی الاٹمنٹ کے دوران انصاف کے تقاضوں کو پیشِ نظر نہیں رکھا گیا۔ چنانچہ، ان کے بقول، اس سے &quot;گلگت بلتستان میں زمینوں کی وہ بندربانٹ شروع ہوئی جو ابھی تک جاری ہے&quot;۔&nbsp;

زمین سے متعلقہ تنازعات کی دوسری اہم وجہ 2001 میں پورے گلگت ریجن میں اراضی کے سرکاری ریکارڈ کا ازسرنِو ترتیب دیا جانا ہے۔ مقامی لوگوں کا کہنا ہے کہ اس عمل کے نتیجے میں ایک طرف تو بہت سی آبادیوں کی جغرافیائی اور انتظامی حدود تبدیل ہو گئیں اور دوسری طرف زمینوں، چراگاہوں اور پانی کی گزرگاہوں کی روایتی حد بندیاں بھی شدید متاثر ہوئیں۔

مقامی لوگوں کے زمین کی ملکیت اور استعمال سے منسلک حقوق کے تحفظ کے لیے کام کرنے والے ایک سماجی ادارے، تنظیم تحفظِ حقوق پشتینی باشندگان، &nbsp;کے صدر شمشاد حسین کہتے ہیں کہ اس ترتیبِ نو سے متعدد تنازعات نے جنم لیا جن میں ہرالی پہاڑ کی ملکیت پر ہونے والا جھگڑا بھی شامل ہے۔&nbsp;

اسی طرح مہاراجہ کے دور میں غیرآباد زمین کو آباد کرنے کے لیے بنائے گئے &#39;نوتوڑ رولز&#39; کا ذکر کرتے ہوئے وہ کہتے ہیں کہ ان کے تحت زمین تقسیم کرتے وقت کئی قانونی تقاضوں کا خیال نہیں رکھا گیا جس سے کئی تنازعات پیدا ہوئے ہیں۔ 1980 میں ان رولز میں کی جانے والی ترمیم کے تحت غیرآباد زمین صرف انہی لوگوں میں تقسیم کی جا سکتی ہے جو مقامی ہوں اور جو اسے ایک مقررہ مدت میں آباد کر سکیں۔ لیکن، شمشاد حسین کے بقول، مقامی انتظامیہ نے اس قانون کو اس طرح لاگو کیا ہے کہ زمین کی الاٹ منٹ میں کئی خرابیاں پیدا ہو گئی ہیں۔

ان کے خیال میں ان خرابیوں کی ابتدا قیامِ پاکستان کے بعد سرکاری اداروں کو دی جانے والی زمین سے ہوئی کیونکہ، ان کے بقول، &quot;جب بھی کسی سرکاری ادارے کو ضرورت پڑتی اسے کسی قاعدے قانون کے بغیر زمین الاٹ کر دی جاتی&quot;۔ جلد ہی یہ طریقہِ کار افراد تک بھی پھیل گیا اور &quot;فوجی افسروں، بااثر افراد اور حتیٰ کہ لینڈ مافیا کو بھی جائز اور ناجائز طریقے سے زمین الاٹ ہونے لگی&quot;۔

اس طرح کی متنازع الاٹمنٹ کی مثال پیش کرنے کے لیے وہ گلگت کے علاقے کنوداس کی نگر کالونی میں سنٹرل پولیس آفس کے سامنے واقع ایک قطعہِ زمین کا حوالہ دیتے ہیں۔ 12 ایکڑ سے زائد اراضی پر پھیلا ہوا یہ قطعہ مقامی شیعہ آبادی کی تنظیم انجمن حسینیہ نگر کے زیر قبضہ اور زیرِ استعمال ہے۔ اگرچہ اس تنظیم کے سربراہ سجاد شیر الیاٹ کا کہنا ہے کہ انہیں یہ زمین 1960 کی دہائی میں حکومتِ پاکستان کی طرف سے الاٹ کی گئی تھی لیکن شمشاد حسین اور ان کی تنظیم کا دعویٰ ہے کہ مہاراجہ کے دورِ حکومت میں یہ زمین دراصل موضع گلگت کی مشترکہ چراگاہ قرار دی گئی تھی اس لیے اسے مقامی لوگوں کو &nbsp;واپس کیا جانا چاہیے۔ &nbsp;

<h2>نیا قانون</h2>

سابق وزیر اعظم عمران خان نے 16 دسمبر 2021 کو سکردو میں ایک جلسے سے خطاب کرتے ہوئے مقامی لوگوں کو کہا تھا کہ وہ ایسے لوگوں کو اپنی زمینیں فروخت نہ کریں جن کا تعلق گلگت بلتستان سے نہ ہو۔ ان کی اس نصیحت کو عملی شکل دینے کے لیے گلگت بلتستان کی کابینہ نے فیصلہ کیا کہ جن لوگوں کے پاس مقامی رہائشی سرٹیفیکیٹ (ڈومیسائل) نہ ہو انہیں یہاں زمین خریدنے کا حق نہیں ہونا چاہیے۔ اس فیصلے کے نتیجے میں گلگت اور غذر کے ڈپٹی کمشنروں نے اپنے اپنے ضلعے میں دفعہ 144 نافذ کر کے تین ماہ کے لیے غیرمقامی افراد کو زمین کی فروخت پر پابندی لگا دی۔&nbsp;

تاہم گلگت بلتستان کے سابق اٹارنی جنرل اسد اللہ خان کہتے ہیں کہ اس پابندی کی کوئی قانونی حیثیت نہیں کیونکہ ایک تو دفعہ 144 کا اطلاق زمینوں کی خریدوفروخت پر ہو ہی نہیں سکتا (بلکہ اس کا مقصد صرف امن عامہ برقرار رکھنا ہوتا ہے) اور دوسرا یہ کہ اس کا اطلاق صرف 90 روز کے لیے کیا جا سکتا ہے چنانچہ اس کی مدد سے زمین کی فروخت پر مستقل پابندی نہیں لگائی جا سکتی۔&nbsp;

ان کا مزید کہنا ہے کہ گلگت میں رائج زمین سے متعلق تمام موجودہ قوانین بھی یا تو غلط استعمال کی وجہ سے اپنی افادیت کھو بیٹھے ہیں یا وہ معروضی حالات کے لیے مناسب نہیں۔ اس لیے وہ کہتے ہیں کہ زمین کی ملکیت، الاٹمنٹ اور خریدوفروخت کے بارے میں ایک نیا اور واضح قانون بنائے بغیر نہ تو سابق وزیرِ اعظم کی تاکید کی کوئی اہمیت ہے اور نہ ہی اس تاکید کے نتیجے میں لگائی گئی پابندیاں لڑائی جھگڑوں کو ختم کر سکتی ہیں۔ اس کے ساتھ ہی وہ حکومت کو خبردار کرتے ہیں کہ &quot;اگر جلد ہی ایسا قانون نہ بنایا گیا تو گلگت بھر میں زمین کے تنازعات پر ایسے فسادات پھوٹ سکتے ہیں جنہیں روکنا آسان نہیں ہو گا&quot;۔&nbsp;

گلگت کے ڈپٹی کمشنر اسامہ مجید چیمہ بھی تسلیم کرتے ہیں کہ یہ تنازعات حل کرنے کے لیے &quot;بڑے پیمانے پر قانونی کارروائی کرنے کی ضرورت ہے&quot;۔ تاہم وہ کہتے ہیں کہ اس کے لیے انہوں نے پہلے ہی &quot;حکومت کو سفارشات بھیج دی ہیں اور تمام متعلقہ حکام سے مشاورت بھی کر لی ہے&quot;۔

ان کا یہ بھی دعویٰ ہے کہ وہ الاٹمنٹ کے معاملے میں ہونے والی بے ضابطگیوں کی شکایات ملتے ہی فریقین کو طلب کر کے ان کا موقف سنتے ہیں اور فوری طور پر کسی فیصلے پر پہنچنے کی کوشش کرتے ہیں۔ تاہم ان فیصلوں میں تاخیر کی وضاحت کرتے ہوئے ان کا کہنا ہے کہ گلگت کی انتظامیہ میں عملے کی تعداد اس قدر کم ہے کہ نہ تو اراضی سے متعلق تنازعات کی بروقت تحقیق کی جا سکتی ہے اور نہ ہی قواعدوضوابط کی خلاف ورزی کر کے زمین الاٹ کرنے والے سرکاری حکام کے خلاف کوئی کارروائی کی جا سکتی ہے۔ ان کے بقول &quot;مقامی انتظامی افسران پر کام کا بوجھ اتنا زیادہ ہے کہ اگر ان میں سے کسی ایک کو معطل کر دیا جائے تو سارا نظام رک جاتا ہے&quot;۔&nbsp;

گلگت میں زمین کی ملکیت پر تشدد بھرے جھگڑوں میں اضافہ: 'ان تنازعات سے ایسے فسادات پھوٹ سکتے ہیں جنہیں روکنا آسان نہیں ہو گا'۔

Landslide in Hunza leaves people homeless

Landslide in Hunza

مجھے رہنے کو وہ ملا ہے گھر کہ جو آفتوں کی ہے رہ گزر: عطاآباد میں پہاڑی کٹاؤ کے متاثرین بنیادی سہولیات سے محروم

video

گلگت کے رہنے والے 70 سالہ بزرگ آصف خان کی تمام عمر حکومت سے اپنی زمین کا معاوضہ یا متبادل مانگتے گزر گئی ہے لیکن ابھی تک ان کی بات نہیں سنی گئی۔ اس کے باوجود وہ توقع لگائے بیٹھے ہیں کہ 15 مارچ 2022 کو وفاقی محتسب کی عدالت میں شروع ہونے والی ایک سماعت کے نتیجے میں بالآخر وہ اپنا مطالبہ منوانے میں کامیاب ہو جائیں گے۔ &nbsp;

اپنے بچپن میں انہوں نے سن رکھا تھا کہ کس طرح 49-1948 میں گلگت کی انتظامیہ نے ڈھول بجا کر مقامی لوگوں کو اکٹھا کیا اور انہیں بتایا کہ ان کے شہر میں ایئرپورٹ بنایا جا رہا ہے۔ ان کے مطابق یہ اعلان ان کے خاندان کے بزرگوں کے لیے بہت باعثِ تشویش تھا کیونکہ جس جگہ ایئرپورٹ کی تعمیر کی تجویز پیش کی جا رہی تھی اس میں ان کی رہائشی اور زرعی زمین بھی شامل تھی۔ انہیں خدشہ تھا کہ کہیں انہیں اپنے گھر اور کھیت کھلیان چھوڑنے ہی نہ پڑیں۔ &nbsp;

&nbsp;یہ خدشہ درست ثابت ہوا۔&nbsp;

ایئرپورٹ کی تعمیر شروع ہوتے ہی آصف خان کے خاندان سمیت 128 مقامی گھرانوں کو کہا گیا کہ وہ اپنی 470 کنال اراضی حکومت کے حوالے کر دیں۔ اس حکم کے نتیجے میں لوگوں نے اپنے بھرے پُرے گھر خالی کر دیے اور اپنی کھڑی فصلیں کھیتوں میں ہی چھوڑ دیں۔ ان میں سے اکثر اپنے رشتہ داروں کے گھروں میں منتقل ہو گئے جبکہ باقیوں کو عارضی طور پر ایک مقامی ہائی سکول اور گلگت کے سرکاری ریسٹ ہاؤس میں رہنا پڑا۔&nbsp;

اس ساری مصیبت کے بدلے میں حکومت نے انہیں 48 روپے فی کنال کے حساب سے صرف ان کی کھڑی فصلوں کا معاوضہ ادا کیا حالانکہ ان کا مطالبہ تھا کہ انہیں ان کے گھروں کے بدلے میں بنے بنائے گھر اور کھیتوں کے بدلے میں آباد زرعی زمین دی جائے۔ آصف خان کہتے ہیں کہ ایئرپورٹ کی تعمیر شروع ہونے سے لے کر اب تک اس کے متاثرین کی تین نسلیں یہ مطالبہ پیش کر چکی ہیں لیکن ابھی تک اس پر کوئی عمل درآمد نہیں ہوا۔

ایک روز بعد شروع ہونے والی سماعت کا ذکر کرتے ہوئے وہ کہتے ہیں کہ وفاقی محتسب اعجاز احمد قریشی نے گلگت بلتستان کی حکومت کو ہدایت کر رکھی ہے کہ وہ مقدمے کی پیروی کرنے کے لیے اپنا نمائندہ مقرر کرے جو تمام متعلقہ ریکارڈ کے ساتھ ان کے سامنے پیش ہو۔ اگرچہ انہیں امید ہے کہ اس بار اس مقدمے کا کوئی مثبت نتیجہ نکلے گا لیکن ساتھ ہی وہ حکومت کو خبردار بھی کرتے ہیں کہ اب بھی اگر اس معاملے کا کوئی حل نہ نکالا گیا تو اس کے نتائج اچھے نہیں ہوں گے۔ ان کے بقول &quot;ایئرپورٹ کے متاثرین کی موجودہ نسل کا احساس محرومی اس سطح پر پہنچ چکا ہے کہ اسے فوری طور پر ختم نہ کرنے کے نتیجے میں حکومت اور ریاست کو کسی ناخوشگوار صورتِ حال کا سامنا کرنا پڑ سکتا ہے&quot;۔&nbsp;

<h2>منتظرِ روزِ فردا&nbsp;</h2>

پاکستان اور انڈیا کے درمیان 1948 میں ہونے والی پہلی جنگ کے دوران انڈیا کے جنگی جہازوں کی بمباری سے گلگت اور اس کے گردونواح میں کئی افراد ہلاک ہو گئے اور اس علاقے کا باقی پاکستان کے ساتھ زمینی رابطہ بھی منقطع ہو گیا۔ چنانچہ مقامی آبادی کے تحفظ اور اس علاقے میں تعینات فوج کو رسد کی فراہمی یقینی بنانے کے لیے اس وقت کی حکومت نے گلگت میں ایئرپورٹ بنانے کا فیصلہ کیا۔&nbsp;

اس مقصد کے لیے شہر کے وسط میں ایک ہزار کنال سے زیادہ زمین منتخب کی گئی جس پر گھروں اور کھیتوں کے علاوہ ایک پولو گراؤنڈ اور چند دیگر عوامی سہولتیں بھی موجود تھیں۔ چونکہ دفاعی نکتہ نظر سے ایئرپورٹ کا فوری قیام بہت ضروری تھا اس لیے نومبر 1949 میں اس مقام پر ایک کچے رن وے پر ہی جنگی جہازوں کی آمدورفت شروع کر دی گئی۔

گیارہ سال بعد 60-1959 میں حکومت نے ایئرپورٹ کو جدید شکل دی اور اس کا پکا رن وے تعمیر کیا۔ اس کے متاثرین نے اُس وقت بھی حکومت کو اس کا وعدہ یاد دلاتے ہوئے مطالبہ کیا کہ انہیں ان کے گھروں اور کھیتوں کا متبادل فراہم کیا جائے۔ گلگت کا علاقہ اُن دنوں ایک ریذیڈنٹ کے ماتحت تھا۔ گورنر کے مساوی اس عہدے پر اُس زمانے میں بریگیڈئر حبیب الرحمان نامی ایک فوجی افسر تعینات تھے جنہوں نے فوری طور پر یہ مطالبہ مرکزی حکومت تک پہنچایا۔

اس کے &nbsp;باوجود اگلے 14 برس اس پر کوئی پیش رفت نہ ہوئی۔

بالآخر 1974 میں حکومت نے فیصلہ کیا کہ متاثرین کو گلگت سے تقریباً 20 کلومیٹر مشرق میں واقع پڑی بنگلہ کے مقام پر ایک ہزار ایک سو 44 کنال زمین الاٹ کی جائے گی۔ تاہم یہ زمین دو انتظامی یونٹوں کے درمیان متنازع تھی اس لیے اس کی ملکیت متاثرین کے نام منتقل نہ ہو سکی۔ بعد میں انہیں چھلمش داس نامی جگہ پر متبادل زمین الاٹ کی گئی لیکن اس کی ملکیت پر بھی تنازعہ موجود تھا جس کے باعث اس کا انتقال بھی ان کے نام نہ ہو سکا۔&nbsp;

ایئرپورٹ متاثرین کو درپیش ایک اہم مسئلہ یہ بھی تھا کہ آخر وہ اپنا مطالبہ کن اداروں کے سامنے اٹھائیں۔ 2009 میں گلگت بلتستان میں ایک منتخب مقامی حکومت کے قیام سے پہلے اس علاقے کا انتظام براہِ راست مرکزی حکومت کے باتھ میں تھا لیکن مرکزی پارلیمنٹ میں اس کی ابھی تک کوئی نمائندگی نہیں ہے۔ دوسرے لفظوں میں یہاں کے لوگوں کے پاس منتخب نمائندوں کے ذریعے اپنا مطالبہ پارلیمنٹ کے سامنے رکھنے کی سہولت موجود نہیں۔ اسی طرح ان کا علاقہ پاکستان کی اعلیٰ عدالتوں کے دائرہِ اختیار سے بھی باہر ہے۔ 
اب اگرچہ گلگت بلتستان کی اپنی علاقائی حکومت وجود میں آچکی ہے لیکن اس کے وزیر قانون سید سہیل عباس ابھی بھی کہتے ہیں کہ اس کے پاس متاثرین کے &quot;مسئلے کا کوئی حل موجود نہیں ہے کیونکہ ایئرپورٹ بنانے اور چلانے والا ادارہ، سول ایوی ایشن اتھارٹی، اس کے دائرہ اختیار میں نہیں آتا بلکہ وفاقی حکومت کے ماتحت ہے&quot;۔&nbsp;

اس ضمن میں ایئرپورٹ متاثرین کو امید کی پہلی کرن اس وقت نظر آئی جب 1980 کی دہائی کے نصف آخر میں گلگت بلتستان کو وفاقی محتسب کے دائرہ کار میں شامل کیا گیا۔ اس تبدیلی سے فائدہ اٹھاتے ہوئے انہوں نے 1987 میں اس ادارے کو درخواست دی کہ ان کا مطالبہ پورا کیا جائے۔ اس درخواست کی سماعت کرنے کے بعد وفاقی محتسب نے اُسی سال 22 ستمبر کو حکم جاری کیا کہ 90 روز میں انہیں متبادل زمین الاٹ کی جائے۔

لیکن اگلے دو سال اس حکم پر کوئی عمل درآمد نہ ہوا لہٰذا متاثرین نے دوبارہ وفاقی محتسب سے رجوع کیا۔ اس بار ان کی درخواست کی سماعت کے دوران وفاقی وزارتِ امور کشمیر و گلگت بلتستان نے موقف اختیار کیا کہ گلگت بلتستان میں کوئی ایسی سرکاری اراضی موجود نہیں ہے جو انہیں الاٹ کی جا سکے۔

حکومت کا یہ موقف بھی رہا ہے کہ وفاقی محتسب کو گلگت بلتستان میں ہونے والے ترقیاتی کاموں کے بارے میں سماعت کرنے کا کوئی اختیار نہیں۔ تاہم متاثرین میں شامل مقامی صحافی خالد حسین کہتے ہیں کہ یہ موقف ٹھیک نہیں کیونکہ اس سے پہلے اسی نوعیت کے ایک مقدمے میں پاکستان اور چین کو ملانے والی سڑک، شاہراہ قراقرم، کے متاثرین نے وفاقی محتسب کے ذریعے ہی زرِتلافی وصول کی ہے۔

اسی قسم کے دلائل کو مدِنظر رکھتے ہوئے وفاقی محتسب نے 1989 میں نہ صرف اپنا پہلا فیصلہ برقرار رکھا بلکہ ان سرکاری اہل کاروں کے خلاف کارروائی کرنے کا حکم بھی جاری کیا جو اس کے احکامات پر عمل درآمد &nbsp;کی راہ میں رکاوٹ بنے ہوئے تھے۔&nbsp;

اس فیصلے پر بھی اگلے 20 سال کوئی پیش رفت نہ ہوئی۔

2009 میں مرکزی حکومت نے وفاقی محتسب &nbsp;سے اپیل کی کہ وہ اپنے فیصلوں پر نظر ثانی کریں۔ لیکن انہوں نے یہ اپیل مسترد کرتے ہوئے کہا اسے دائر کرنے کی قانونی مدت بہت پہلے گزر چکی ہے۔&nbsp;

اس سلسلے میں آخری بڑی ہلچل ستمبر 2019 میں دیکھنے میں آئی جب متاثرین نے اپنے مطالبات کے حق میں ایک لانگ مارچ کیا۔ لیکن ماضی کی تمام کوششوں کی طرح یہ مارچ بھی بے نتیجہ ہی رہا۔

لوئر دیر میں مکئی کی کاشت پر پابندی: 'فصل نہ لگا سکنے کے باعث لوگ روٹی کو بھی ترس جائیں گے'۔

'تیسری نسل بوڑھی ہو گئی، حق نہیں ملا': گلگت ایئرپورٹ کے لیے جگہ دینے والے خاندان 74 سال سے متبادل زمینوں کے منتظر۔

Gillgit-Baltistan protest over shortage of water and electricity.

سینگل میں بجلی کی سہولت صرف برائے نام موجود ہے حالانکہ اس کے آس پاس ایک نہیں بلکہ تین بجلی گھر موجود ہیں۔ اس گاؤں میں چوبیس گھنٹوں میں سے تقریباً چار گھنٹے بجلی آتی ہے اور اس کی وولٹیج اتنی کم ہوتی ہے کہ اس سے کپڑے دھونے کی مشینیں اور دوسرے برقی آلات نہیں چلائے جا سکتے۔&nbsp;

سینگل گلگت بلتستان کے ضلع غذر میں گلگت-چترال شاہراہ پر واقع ہے۔ حال ہی میں اس کے پہلو سے گزرنے والے قدرتی نالے پر ڈیڑھ میگا واٹ کا ایک نیا بجلی گھر بنایا گیا ہے لیکن اس کے فعال ہونے کے باوجود یہاں بجلی کی فراہمی کی صورتحال بہتر نہیں ہوئی۔ اس نالے پر پہلے بھی دو بجلی گھر قائم ہیں (جن میں سے ایک کسی فنی خرابی کی وجہ سے غیر فعال ہے) لیکن جب نئے بجلی گھر کی تعمیر شروع ہوئی تو مقامی لوگوں میں امید پیدا ہوئی کہ اب انہیں چوبیس گھنٹے بجلی ملا کرے گی۔ تاہم ان کی توقع کے برعکس یہ منصوبہ ان کے لیے فائدے کا باعث بننے کے بجائے ان کے لیے مشکلات پیدا کر رہا ہے&nbsp;کیونکہ اس کے ذریعے نالے کا رخ موڑ کر ان کی زرعی زمینوں کو پانی سے محروم کر دیا گیا ہے۔

اس صورت حال سے پریشان&nbsp; مقامی لوگوں نے بجلی گھر کے فعال ہونے کے فوراً بعد ہی احتجاج کرنے کا فیصلہ کیا۔ چنانچہ 8 جنوری 2022 کو وہ بڑی تعداد میں اس کے سامنے جمع ہوئے اور اپنے مطالبات کے حق میں مظاہرہ کرنے لگے۔ ان کے احتجاج کے دوران سرکاری انتظامیہ نے ان کے نمائندوں سے مذاکرات بھی کیے لیکن ان کے بے نتیجہ رہنے کے بعد مظاہرین نے خود کارروائی کرتے ہوئے پانی کا رخ بجلی گھر سے واپس اپنی زمینوں کی جانب موڑ دیا جس سے بجلی کی پیداوار رک گئی۔

اس احتجاج کے تیسرے دن گلگت ڈویژن کے کمشنر وقار احمد کی سربراہی میں انتظامیہ نے مظاہرین کے ساتھ دوبارہ مذاکرات کیے جن کے بعد انہیں ان کے تمام مطالبات تسلیم کرنے کی تحریری یقین دہانی کرائی گئی۔ لیکن ابھی مظاہرین نے اپنا احتجاجی کیمپ پوری طرح سمیٹا بھی نہیں تھا کہ مقامی پولیس نے اس میں موجود سات افراد کے خلاف توڑ پھوڑ، کار سرکار میں مداخلت اور دہشت گردی کی دفعات کے تحت مقدمہ درج کر لیا۔&nbsp;

نتیجتاً مظاہرین نے احتجاج ختم کرنے کا فیصلہ موخر کرتے ہوئے ایک قریبی پولو گراؤنڈ میں دھرنا دے دیا۔ اس دھرنے میں ہر طبقے اور ہر عمر سے تعلق رکھنے والے مقامی لوگوں نے شرکت کی۔ اس میں طلبہ کی ایک بڑی تعداد بھی شامل تھی جن کی پڑھائی میں متوقع حرج کے پیش نظر منتظمین نے انہیں مفت ٹیوشن اور انٹرنیٹ جیسی تدریسی سہولیات بھی مہیا کیں اور اپنے احتجاج کو بھی &#39;فکری نشست&#39; کا نام دے دیا۔ اس دھرنے میں موجود لوگوں کا کہنا تھا کہ مقدمے کا اندراج سراسر ناانصافی ہے۔

مقدمے کا سامنا کرنے والوں میں شامل 75 سالہ نظرب خان بھی یہی کہتے ہیں۔ وہ سینگل میں مڈل تک تعلیم حاصل کرنے والے پہلے فرد ہیں لیکن کوئی نوکری کرنے کے بجائے وہ مال مویشی پال کر روزی کماتے ہیں۔ ان کا کہنا ہے کہ &quot;مظاہرین نے نہ تو کوئی سڑک بند کی اور نہ ہی کسی طرح کی توڑپھوڑ میں ملوث ہوئے&#39;&#39; بلکہ انہوں نے انتہائی پرامن طریقے سے اپنے مطالبے حکومت کے سامنے رکھے۔&nbsp;

سینگل اور اس کے نواحی علاقے سے منتخب ہونے والے گلگت بلتستان اسمبلی کے ڈپٹی سپیکر نذیر احمد ایڈوکیٹ بھی نظرب خان کی بات کی توثیق کرتے ہوئے کہتے ہیں کہ مقامی لوگوں نے اپنے اظہار رائے کے حق کو استعمال کرتے ہوئے پرامن طریقے سے اپنے مطالبات پیش کیے۔ اس لیے، ان کے مطابق، &#39;&#39;ان مظاہرین کے خلاف انسداد دہشت گردی کے قانون کا استعمال ان کی آواز چھیننے کے مترادف ہے&#39;&#39;۔

تاہم پولو گراؤنڈ میں دیے گئے دھرنے کے تیسرے روز انتظامیہ نے مظاہرین کے نمائندوں سے دوبارہ مذاکرات کیے اور مقدمہ واپس لے لیا۔ جواب میں مظاہرین نے احتجاج ختم کرتے ہوئے بجلی گھر کا پانی بحال کر دیا۔

<h2>رواج بمقابلہ قانون</h2>

گلگت بلتستان میں بہت سے معاشی اور معاشرتی امور پرانے وقتوں سے رائج مقامی قوانین کے تحت چلائے جاتے ہیں۔ ان میں پانی کی تقسیم اور مشترکہ زمینوں کا چراگاہوں کے طور پر استعمال بھی شامل ہیں۔ ان قوانین کے تحت بجلی گھروں کی تعمیر کے لیے استعمال کیے گئے نالے کا پانی گلگت بلتستان میں راجاؤں کے دور حکومت سے ہی مقامی لوگوں کی ملکیت سمجھا جاتا ہے۔ سینگل کے رہنے والوں کا یہ بھی کہنا ہے کہ ان کے آبا و اجداد نے وادی پونیال کے راجہ کو مالیہ ادا کر کے اس پانی کی ملکیت حاصل کی تھی لہٰذا اس پر ان کا حق فائق ہے۔&nbsp;

اسی گاؤں کے رہنے والے عنایت بیگ مقامی لوگوں کے قانونی حقوق کے لیے سوشل میڈیا پر آواز بلند کرتے رہتے ہیں۔ ان کا کہنا ہے کہ &#39;&#39;اس علاقے میں رواجی قوانین کی حیثیت مسلم ہے جس سے کوئی انکار نہیں کر سکتا۔ انہی قوانین کے تحت مقامی لوگوں نے نالے کا پانی خریدا تھا جسے ان سے چھینا نہیں جا سکتا&#39;&#39;۔&nbsp;

لیکن ان حقوق کو نظر انداز کر کے 17-2016 میں پاکستان مسلم لیگ (نواز) کے دور حکومت میں گلگت بلتستان کی آٹھ لاکھ کنال بنجر زمین کو قابل کاشت بنانے کے لیے اقوام متحدہ سے منسلک ادارے انٹرنیشنل فنڈ فار ایگریکلچر ڈویلپمنٹ کے تعاون سے ایک منصوبہ شروع کیا گیا۔ اس منصوبے کے تحت سینگل کے پاس بہنے والے نالے کا رخ تبدیل کر کے اسے بنجر زمینوں کی طرف موڑا گیا اور اس پر بجلی گھر بھی بنائے گئے۔

مقامی لوگوں کا مطالبہ ہے کہ نالے کے پانی پر ان کی ملکیت تسلیم کی جائے اور بجلی کی تقسیم کا فارمولا بناتے وقت سینگل اور اس کے قریبی دیہات کی ضروریات کو بھی مدنظر رکھا جائے۔ ان کے احتجاج کے نتیجے میں ان کے یہ مطالبات تسلیم کر لیے گئے ہیں اور سرکاری انتظامیہ کے ساتھ طے پانے والے ان کے معاہدے کی رو سے انہیں یقین دہانی بھی کرائی گئی ہے کہ مقامی بجلی گھروں میں گریڈ ایک سے پانچ تک کی تمام اسامیوں پر مقامی لوگ ہی بھرتی کیے جائیں گے۔&nbsp;

اگرچہ سینگل کے باسی اس معاہدے سے مطمئن ہیں لیکن وہ کہتے ہیں کہ اس کی خلاف ورزی کی صورت میں وہ دوبارہ احتجاج شروع کر دیں گے۔ ان خیالات کا اظہار کرتے ہوئے 30 سالہ ٹیکسی ڈرائیور محمد نعیم، جو اپنا کام کاج چھوڑ کر مظاہروں میں شریک رہے ہیں، کہتے ہیں کہ انہیں توقع ہے کہ معاہدے پر عملدرآمد سے ان کی بجلی اور پانی کی ضروریات پوری ہو جائیں گی لیکن ساتھ ہی وہ خبردار کرتے ہیں کہ &quot;اگر حکومت اس معاہدے سے منحرف ہوئی تو ہم دھرنا دے کر گلگت چترال روڑ کو اس وقت تک بند کر دیں گے جب تک ہمیں ہمارا حق نہیں مل جاتا&#39;&#39;۔

فہیم اختر

فہیم اختر گلگت بلتستان کے مقامی مسائل پر رپورٹنگ کرتے ہیں۔ انہوں نے قراقرم انٹرنیشنل یونیورسٹی سے میڈیا اور کمیونیکیشن میں ماسٹرز کیا ہے۔