ضلع بدین کی تحصیل ماتلی سے بتیس کلومیٹر دور گوٹھ گلاب لغاری واقع ہے۔ یہاں ہر طرف جھاڑ پھونس سے بنی جھونپڑیاں ہیں۔ پینتیس سالہ ریشم بجانو یہیں رہتی ہیں۔ ریشم کے شوہر، نانجی شراب پینے کے عادی تھے۔ اکتوبر کی ایک شام&nbsp; وہ اپنے ایک ساتھی مزدور، فقیر بجانو کو ساتھ گھر لے آئے تھے۔ دونوں نے حسب عادت شرا ب پی اور سو گئے، صبح اٹھے تو دونوں کی بینائی جا چکی تھی اور کچھ ہی دیر میں دونوں نے تڑپ تڑپ کر جان دے دی۔

ریشم بتاتی ہیں کہ ان کے پاس اتنے پیسے نہیں تھے کہ وہ اپنے شوہر اور ان کے دوست کو ہسپتال لے جاتیں۔ وہ نہیں جانتی کہ ان دونوں کی موت شراب پینے سے ہوئی یا سپرٹ پینے کی وجہ سے؟

&quot;جب نانجی اور فقیرو کی موت کی خبر پھیلی تو پولیس گھر سے نعشیں لے گئی اور ہمیں بتایا کہ دونوں نعشوں کا پوسٹ مارٹم ہو گا&quot;۔

ریشم کے دو بیٹے اور چار بیٹیاں ہیں۔ دسمبر میں ان کی سب سے بڑی بیٹی، جمنی کی شادی ہونا تھی جسے اب انہوں نے ملتوی کر دیا ہے۔

ان کے شوہر گاؤں سے کباڑ کا سامان لے کر شہر میں فروخت کرتے تھے۔ اب وہ جمنی کے ساتھ مل کر زمیندار کے کھیتوں میں کام کر کے بچوں کا پیٹ پال رہی ہیں۔

اس دن نانجی اور فقیرو بجانوکی ہی موت نہیں ہوئی تھی بلکہ گوٹھ گلاب لغاری سے دو کلومیٹر دور، آچار بھیل بھی اپنی آٹھ ماہ کی حاملہ بیوی کو چھوڑ کر چل بسے۔

آچار بھیل کی بیوی سنگھار بھیل بتاتی ہیں کہ ان کے شوہر نے شام چار بجے کے قریب کچھ پیا تھا، چند ہی گھنٹوں میں انہوں نے کچھ دکھائی نہ دینے کی شکایت کی اور پھر تڑپ تڑپ کر مر گئے۔

&quot;ہم گھر میں ایک اور فرد کا انتظار کر رہے تھے ، لیکن یہ نہیں جانتے تھے کہ اس سے پہلے ہی ایک فرد کم ہو جائے گا&quot;۔

سنگھار بھیل نے لوک سجاگ کو بتایا کہ ان کے شوہر کسان تھے۔ ان کے&nbsp; ساس، سسر بھی فوت ہو چکے ہیں۔ اب گھر میں ایک دیور رہتا ہے، اس کا بھی ذہنی توازن درست نہیں ہے۔

خانو کولھی، اپنےپانچ بیٹوں اور دو بیٹیوں کے ساتھ ننگرپارکر سے اس گاؤں میں کھیت مزدوری کرنے آئے تھے لیکن زہریلی شراب پی کر اپنی اولاد کو بے آسرا چھوڑ کر ہلاک ہو گئے۔

ان چاروں کے علاوہ گوٹھ گلاب لغاری میں 27 سالہ ہریش اور 40 سالہ کھیم چند میگھواڑ کی موت بھی اسی دن ہوئی تھی لیکن ان کے ورثا اس سانحے کے بارے بات کرنے کو تیار نہیں ہیں۔

گلاب لغاری پولیس سٹیشن پر چھ افراد کی اموات کا مقدمہ درج کر کے پولیس نے سپرٹ بیچنے کے الزام میں میڈیکل سٹور چلانے والے 40 سالا سنیل کمار کو گرفتار کر کے بدین جیل بھیج دیا۔

سنیل کمار کے والدین نے لوک سجاگ کو بتایا کہ ان کا بیٹا بے قصور ہے۔ پولیس نے اس پر جھوٹا مقدمہ چلایا ہے، اگر علاقے میں کوئی زہریلی شراب بیچ رہا ہے تو پولیس اس&nbsp; کے خلاف کارروائی کرے۔ لیکن وہ ایسے لوگوں سے پیسے لے لیتی ہے اور غریبوں کو تنگ کرتی ہے۔ پولیس&nbsp; نے سنیل کے خلاف 322 پی پی سی قتل خطا کی دفعات لگائی ہیں اور مقدمہ ابھی زیر سماعت ہے۔

چھ افراد کی موت کے بعد ڈی آئی جی حیدرآباد نے گلاب لغاری تھانے کے ایس ایچ او اصغر گوپانگ کو غفلت برتنے پر پولیس لائنز میں ٹرانسفر کر دیا۔ انکوائری کے لیے کمیٹی تشکیل دی اور مقدمہ بھی درج کیا۔ اصغر کے خلاف گلاب لغاری تھانے ہی میں ایف آئی آر درج کی گئی جس کے مدعی ایس پی ذوالفقار علی نظامانی ہیں۔

پاکستان میں کچی یا زہریلی شراب پینے کی وجہ سے ہلاکتیں عام ہیں اور اعداد و شمار کے مطابق صرف سندھ میں 1997 سے&nbsp; لے کر 2022 کے دوران قریب 250 افراد ہلاک ہو چکے ہیں۔&nbsp;

اس سے پہلے 1997 میں حیدآباد میں زہریلی شراب پینے سے سو سے زائد لوگ اپنی جان سے ہاتھ دھو بیٹھے تھے۔ ان میں سے 50 لوگوں کی موت کا ذمہ دارعلاقے بھر میں کچی شراب فروخت کرنے والے اسلم تیلی کو ٹھہرایا گیا تھا۔

اسی طرح 2016 میں حیدرآباد سے 35 کلومیٹر دور ٹنڈومحمد خان میں 100 لوگ شراب پینے سے مر گئے تھے۔ اس کیس کا مقدمہ پہلوان علی نواز پنہور کے خلاف چلایا گیا تھا لیکن ثبو ت ناکافی ہونے کی وجہ سے اسے بری کر دیا گیا تھا۔

حیدرآباد سے 15 کلومیٹر کے فاصلے پر ٹنڈوجام میں بھی 2021 میں 15 افراد ہلاک ہو گئے تھے۔ نومبر 2023 میں نواب شاہ میں دو بھائیوں سمیت تین افراد زہریلی شراب پینے سے مارے گئے تھے۔

جعلی شراب بنانے کے لیے اکثر میتھیلیٹڈ سپرٹ کا استعمال کیا جاتا ہے۔ اسے گنے کے رس میں ملایا جاتا ہے۔ عموماً اس سپرٹ کی مقدار زہر کی حد تک زیادہ ہوتی ہے۔ ایک تو ویسے بھی وہ (میتھیلیٹڈ سپرٹ) اوزار صاف کرنے یا جسم کے اوپر لگے زخم صاف کرنے کے لیے ہوتی ہے۔ کچھ لوگ اس محلول میں نیند آور گولیاں بھی ڈال دیتے ہیں۔

&nbsp;جو لوگ اسے شراب سمجھ کر پیتے ہیں وہ اپنی جان گنوا بیٹھتے ہیں۔ اصلی شراب مہنگی ہوتی ہے، دیہاتی اور غریب لوگ&nbsp; ایسی کچی اور غیر معیاری &quot;شراب&quot; کا استعمال کرتے ہیں کیونکہ یہ سستی ہوتی ہے۔

حیدرآباد سول ہسپتال کے میڈیکو لیگل آفیسر ڈاکٹر وسیم احمد نے لوک سجاگ کو بتایا کہ سپرٹ جسم میں جاتے ہی دماغ کے مختلف حصوں کو بند کر دیتی ہے۔ بیشتر افراد کو سب سے پہلے سانس لینے میں تکلیف ہوتی ہے، نظامِ تنفس کام کرنا چھوڑ دیتا ہے، آکسیجن ان کے تمام ٹشوز تک نہیں پہنچتی اور دماغ، دل، گردے اور جگر کام کرنا بند کر دیتے ہیں ۔ یہ سب نہ بھی ہو تو جگر کو&nbsp; بھاری نقصان پہنچتا ہے۔

وہ کہتے ہیں کہ زہریلی شراب پینے سے ہلاکتوں کے علاوہ متعدد افراد بینائی سے محرومی کے علاوہ مختلف قسم کی مہلک بیماریوں کا شکار ہو چکے ہیں۔

پاکستان میں شراب کے چھ&nbsp; کارخانے؛ مری بریوری، انڈس ڈسٹلری، مہران ڈسٹلری، کوئٹہ ڈسٹلری، بیچ بریوری اور کوسٹل بریوری موجود ہیں۔

سندھ ایکسائز اینڈ ٹیکسیشن کے ریکارڈ کے مطابق سندھ میں سرکاری لائسنس رکھنے والے 21 ہول سیلرز سمیت کُل 122 وائن شاپس موجود ہیں۔

&nbsp; حیدرآباد میں&nbsp; شراب کی نو دکانیں ہیں۔ دکانداروں کے ملازمین نام ظاہر نہ کرنے کی شرط پر بتایا کہ ہر دکان پر&nbsp; روزانہ&nbsp; سو&nbsp; لیٹر سے 300&nbsp; لیٹر&nbsp; تک شراب بکتی ہے۔&nbsp; یہ شراب 1200 روپے فی بوتل سے شروع ہوکر چار ہزار روپے فی بوتل بیچی جاتی ہے۔ غریب لوگ رقم نا ہونے کی وجہ سے سستے میں ملنے والی دیسی شراب اور سپرٹ پیتے ہیں۔

حیدرآباد کے ماہر نفسیات ڈاکٹر ایشور کمار نے لوک سجاگ کو بتایا کہ ڈپریشن میں مبتلا لوگ شراب کی طرف مائل ہوتے ہیں، چند لمحوں کے سکون سے وہ اس لت پر لگ جاتے ہیں۔

شراب بنانے والے&nbsp; 45 سالہ رانو ماچھی نے لوک سجاگ کو بتایا کہ وہ&nbsp; ببول کی چھال، سڑے ہوئے فروٹ، نشے کی گولیاں اور کالا گڑ ایک برتن میں ملا کر آگ پر رکھ&nbsp; دیتے ہیں۔ اس محلول کے بخارات کو ٹھنڈا کر کے جمع کیا جاتا ہے، یہ مشروب&nbsp; کچی شراب کہلاتا ہے۔

اس&nbsp; شراب کی ایک تھیلی کی قیمت 200 روپے ہوتی ہے۔ اس قسم کی شراب اکثر بدین، تھرپارکر، ٹنڈو محمد خان، ٹنڈو اللہ یار ، ٹھٹھہ اور نواب شاہ&nbsp; میں بنائی جاتی ہے۔

ڈی آئی جی پولیس حیدر آباد طارق&nbsp; رزاق دھاریجو نے لوک سجاگ کو&nbsp; بتایا، کچی شراب بنانا اور بیچنا جرم ہے۔ اس کے استعمال سے سندھ&nbsp; میں سیکڑوں لوگوں کی جانیں جا چکی ہیں۔ پولیس روزانہ کی بنیاد پر چھاپے مارتی ہے۔

حیدر آباد میں دیسی شراب بنانے کی بیشتر بھٹیاں ہٹڑی، ہوسڑی اور ٹنڈو جام میں ہیں۔ رواں سال حیدرآباد پولیس ان بھٹیوں سے پانچ ہزار لیٹر شراب برآمد کر چکی ہے۔

ٹنڈو الہ یار پولیس نے اس سال اپنی رپورٹ میں بتایا ہے کہ انہوں نے مختلف علاقوں سے 27 ہزار لٹر شراب پکڑی ہے۔

مقامی لوگوں کے مطابق&nbsp; غیر قانونی شراب بنانے کی زیادہ تر بھٹیاں پولیس کی سرپرستی میں چلتی ہیں جہاں سے پولیس کو بھتہ بھی ملتا ہے۔ اس لیے&nbsp; بھٹیاں ختم نہیں ہو سکی ہیں۔

علاج یا نشہ: کنٹرولڈ آئٹمز میں شامل کیٹامین دوا کی ضرورت سے زیادہ درآمد کے پیچھے کیا راز ہے؟

دوسو روپے کی شراب  چند گھنٹوں میں ہی جان لے لیتی ہے

text

حمیدہ بی بی ماں بننے والی تھیں۔ وہ 16 ستمبر کی صبح بڑے بیٹے سات سالہ اذان کو ساتھ لیے اپنا چیک اپ کرانے حیدر آباد سول ہسپتال گئی تھیں۔ لیکن روتی بلکتی اکیلی گھر لوٹیں کیونکہ انہوں نے گائنی وارڈ میں اذان کو کھو دیا تھا۔

اذان کے والد اکرام ایک سرکاری محکمے میں نوکری کرتے ہیں۔ وہ بتاتے ہیں کہ انہوں نے ٹاور مارکیٹ تھانے میں رپورٹ درج کرائی۔ ہسپتال کی سی سی ٹی وی فوٹیج سے معلوم ہوا کہ اُن کے بیٹے کو سول ہسپتال سے ایک مرد اور عورت نے اغوا کیا ہے۔

&nbsp;&quot;پولیس نے بچے کو چار دن بعد سو کلومیٹر دور واقع شہر سانگھڑ سے بازیاب کرا لیا۔ ہم نے یہ دن کس تکلیف اور اذیت میں گزارے اسے الفاظ میں بیان نہیں کیا جا سکتا۔&quot;

ایس ایس پی تھانہ ٹاور مارکیٹ امجد احمد شیخ بتاتے ہیں کہ اذان کو سانگھڑ کے رہائشی اسلم اور ان کی بیوی فریدہ نے اغوا کیا تھا۔

&nbsp;&quot;اسلم بے روزگار تھا اور اس کی بیوی پانچویں بار کی حاملہ تھیں۔ اسلم نے 50 ہزار روپے کے عوض ایک بے اولاد جوڑے سے اپنے اس بچے کا سودا کر رکھا تھا جو ابھی دنیا میں آیا ہی نہیں تھا۔&quot;

اس نے پیشگی رقم بھی وصول کر لی تھی لیکن دوران زچگی ان کا بچہ مر گیا۔ جس کے بعد دونوں میاں بیوی نے مل کر کسی اور بچے کو اغوا کرنے کا منصوبہ بنایا۔

احمد شیخ نے بتایا کہ اب&nbsp; اسلم اور فریدہ جیل میں ہیں اور کیس کا چالان جمع ہو چکا ہے۔ تعزیرات پاکستان کی دفعہ 364- اے کے تحت 14 سال سے کم عمر بچے کو اغوا کرنے پر سات سال سے عمرقید یا موت تک کی سزا ہو سکتی ہے۔ 
&nbsp;&nbsp; &nbsp; 
سول ہسپتال حیدرآباد سے اذان کا اغوا اپنی نوعیت کا کوئی پہلا واقعہ نہیں تھا۔ چند سال قبل نواحی قصبہ &#39;سیری&#39;کا رہائشی جوڑا بھی یہاں اپنے دو دن کے بچے سے محروم ہو گیا تھا۔

تیس سالہ گلشن اور ان کے شوہر معشوق ملاح اپنے نومولود کے اغوا پر رو دھو کر خاموش ہو چکے ہیں۔اس واقعے کو پانچ سال ہو گئے مگر وہ نہیں جانتے کہ ان کا بچہ کہاں ہے؟ اُلٹا ہسپتال کی تحقیقاتی رپورٹ میں عملے کو &#39;بے قصور&#39; اور نومولود کے والدین کو &quot;غفلت کے مرتکب&quot; قرار دے دیا گیا تھا۔

لیاقت میڈیکل کالج حیدر آباد سے منسلک سول ہسپتال میں روزانہ درجنوں زچگیاں ہو تی ہیں۔ جس کے باعث زچہ بچہ وارڈز کھچا کھچ بھرے رہتے ہیں۔

سرکاری ریکارڈ کے مطابق گزشتہ سال یہاں شعبہ گائنی میں 17 ہزار ایک سو زچگیاں ہوئیں جن میں چھوٹے آپریشن (سیزیرین)بھی شامل ہیں۔ رواں سال اب تک 12 ہزار 301 سیزیرین ہو چکے ہیں جبکہ نارمل کیسز ان کے علاوہ ہیں۔

&nbsp;شعبہ گائنی میں خاتون ڈاکٹرز اور آپریشن تھیٹر ٹیکنیشنز کے ساتھ 40 سے زیادہ افراد پر مشتمل عملہ ڈیوٹی کرتا ہے۔

تھانہ ٹاور مارکیٹ کے اعداد و شمار بتاتے ہیں کہ سول ہسپتال سے پچھلے پانچ برسوں کے دوران چار بچے اغوا کیے گئے تھے جن سے متعلق اغوا کے تین مقدمات درج کرائے گئے تھے۔ تاہم ایک ہی بچے کو بازیاب کرایا جاسکا ہے۔

ڈاکٹر نجمہ سرھیو&nbsp; حیدر آباد میں راجپوتانہ ھسپتال کے گائنی وارڈ میں کام کرتی ہیں۔&nbsp; انہوں نے بتایا کے نومولود بچوں کے اغوا کے بیشتر معاملوں میں لڑکے اغوا کیے جاتے ہیں۔

&quot;بے اولاد یا وہ جوڑے جن کی صرف بچیاں ہوں، وہ بیٹے کے ہی خواہشمند ہوتے ہیں۔ تاہم لڑکیاں صرف بڑی عمر کی اغوا کی جاتی ہیں۔

چائلڈ پروٹیکشن انچارج حیدر آباد عنبریں بلوچ کا خیال ڈاکٹر نجمہ سے تھوڑا مختلف ہے۔ وہ بتاتی ہیں ہسپتالوں سے فقط نو مولود لڑکے ہی نہیں لڑکیاں بھی اغوا ہوتی ہیں۔

&quot;اغوا کاروں کے جو بچہ ہاتھوں لگ جائے اسے اٹھا لیتے ہیں&quot;۔

انہوں&nbsp; نے کہا کہ حالیہ دنوں میں حیدرآباد سول ہسپتال سے تین نومولود بچیاں لاوارث ملیں جن کو ایدھی کو حوالے کیا تھا۔ تیرہ دسمبر کی صبح کو حیدر آباد کے نسیم نگر تھانے کے حدود کے گاؤں بڈہو پالاری سے مزید چار بچے ٹیوشن سے واپس آتے ہوئے اغوا ہوئے۔ جن میں دو بہنیں، چار سالہ بشریٰ اور سات سالہ&nbsp; علیشبہ اور پانچ&nbsp; سالہ حسنین کو اغوا کیا گیا تھا۔

حیدر آباد پولیس کے اے ایس پی رانا دلاور بتاتے ہیں کہ اس واردات سمیت عنبرین بلوچ نے جو واقعات بتائے ان&nbsp; کا اغوا کی عام وارداتوں سے کوئی تعلق نہیں۔

بڈھو پالاری سے اغوا ہونے والے بچوں کو کراچی سے بازیاب کرا لیا گیا تھا۔ ملزم ظہیر نے بیوی سے علیحدگی کے بعد ایک عورت زارا چانڈیو کے مدد سے ان بچوں کو اغوا کرایا تھا۔

مٹیاری کے نواحی گاؤں سیکھاٹ کی رہائشی 30 سالہ سکینہ نے بھی سات سال قبل دس اکتوبر 2016ء کو یہیں سول ہسپتال کے گائنی وارڈ میں بیٹے کوجنم دیا تھا۔ پورا خاندان خوشی سے نہال تھا لیکن آٹھ گھنٹے بعد ہی نومولود کو وارڈ ہی سے اغوا کر لیا گیا تھا۔

سکینہ ایک کاشتکار کی بیوی ہیں۔مشکل حالات کے باوجود انہوں نے سندھ ہائی کورٹ میں پٹیشن دائر کر دی تھی۔ عدالتی حکم کے تحت تین بار جوائنٹ انویسٹی گیشن ٹیم تشکیل دی گئی لیکن ان کے بچے کو ڈھونڈا نہیں جا سکا۔

اس حوالے سے پولیس نے عدالت کو اپنی رپورٹ میں بتایا تھا کہ نومولود کے اغوا میں ہسپتال کا عملہ ملوث تھا۔ اس عرصے میں حیدرآباد کے پانچ ڈی آئی جی اور 11 ایس ایس پی تبدیل ہوئے۔ حتیٰ کہ موجودہ ایس ایس پی تیسری بار اسی علاقے میں تعینات ہوئے ہیں لیکن آج تک اس بچے کا سراغ نہیں مل سکا۔

سکینہ کے بھائی علی نواز نے 2018ء میں عدالت کو بتایا تھا کہ ان کی بہن اس واقعہ کے بعد اپنا ذہنی توازن کھو چکی ہیں۔ ان کے پاس وکیل کی فیس کے لیے بھی پیسے نہیں ہیں۔ اس لیے وہ کیس کی مزید پیروی نہیں کر سکتے۔ اب پولیس بھی اس مقدمے کو سی کلاس یعنی غیر فعال قرار دے چکی ہے۔

ایم ایس سول ہسپتال شاھد جونیجو عملے کے اغوا میں ملوث ہونے کی تردید کرتے ہیں۔ ان کا کہنا ہے کہ 2016ء میں نومولود کے اغوا میں بچے کے والدین کی غفلت ہو گی۔ پولیس نے&#39; اپنی جان چھڑانے کے لیے&#39;اغوا میں ہسپتال عملے کے ملوث ہونے کی رپورٹ دی تھی۔

&quot;تفتیش میں کسی اہلکار کا نام سامنے نہیں آیا اس لیے کسی کے خلاف کارروائی بھی نہیں ہوئی۔&quot;

ایس ایچ او تھانہ ٹاور مارکیٹ کہتے ہیں کہ بچے کے اغوا سے متعلق رپورٹ میں کسی کا نام نہیں دیا گیا تھا۔ تاہم تفتیشی افسر نے عملے کے ملوث ہونے کا خدشہ ضرور ظاہر کیا تھا۔

شاھد جونیجو بتاتے ہیں کہ گائنی وارڈ اور نرسری میں مریض کے ایک رشتہ دار کے علاوہ کسی کو آنے کی اجازت نہیں ہے اب تو وارڈز میں بھی گارڈ تعنیات ہیں۔ ہسپتال کے ایک ملازم نے نام ظاھر نہ کرنے کی شرط پر بتایا کہ سول ہسپتال میں سکیورٹی انتظامات عدالتی حکم پر کیے گئے ہیں۔

پاکستان میں انسانی سمگلنگ کی روک تھام کے لیے کام کرنے والی این جی او (ایس ایس ڈی او) کے ایگزیکٹو ڈائریکٹر کوثر عباس کا ماننا ہے کہ ہسپتالوں سے بچوں کے اغوا میں زیادہ تر انسانی سمگلروں اور جرائم پیشہ گروہوں کا ہاتھ ہوتا ہے۔

تاہم ایس ایس پی امجد احمد شیخ کسی گروہ کے ملوث ہونے سے اتفاق نہیں کرتے۔ وہ بتاتے ہیں کہ پہلے بالائی سندھ میں ڈاکوؤں کا سات رکنی ایک گینگ ہوتا تھا جو بچوں کے اغوا برائے تاوان میں ملوث تھا۔ لیکن وہ ڈاکو پولیس مقابلے میں ہلاک ہو چکے ہیں۔ اب ایسا کوئی گینگ موجود نہیں ہے۔

صوبائی حکومت نے بچوں کے تحفظ کے لیے ایک اور ادارہ &#39;سندھ چائلڈ پروٹیکشن اتھارٹی&#39; بھی بنا رکھا ہے۔ بچوں کے حقوق کے لیے سرگرم غیر سرکاری تنظیم &#39;سپارک&#39; کے کوآرڈینیٹر کاشف بجیر کہتے ہیں کہ سندھ چائلڈ پروٹیکشن اتھارٹی سالانہ 20کروڑ روپے بجٹ ہونے کے باوجود انتہائی غیر فعال ادارہ بن چکی ہے۔

عنبرین بلوچ بتاتی ہیں کہ اس ضلعے میں گزشتہ سال جنوری سے دسمبر تک 20 بچے لاپتہ ہوئے تھے۔ جن میں دو ایسے تھے جنہیں اغوا کیا گیا تھا۔

وہ کہتی ہیں کہ رواں سال سول ہسپتال سے ایک بچہ اغوا ہوا تھا جو مل گیا جبکہ شھر سے چار بچے لاپتہ ہوئے ہیں جس میں سے 17 سالہ محمد امان اور 15 سالہ عبدالصمد کا تاحال پتا نہیں چل سکا۔ یہ دونوں 9 ستمبر کو گم ہوئے تھے تاہم ان کے اغوا کا مقدمہ بھی درج کیا جا چکا ہے۔

فلاحی ادارے ایدھی فاؤنڈیشن حیدر آباد کے انچارج&nbsp; محمد معراج نے لوک سجاگ کو بتایا&nbsp; کہ سندھ میں بےاولاد یا بچوں کو گود لینے کی خواہشمند جوڑوں کو کراچی کے مرکزی دفتر میں بچے حوالے کیے جاتے ہیں۔ یہ وہ بچے ہوتے ہیں جن کا کوئی وارث نہیں ہوتا اور اس معاملے میں میں بہت سخت معیارات ہیں۔

'زمیں کھا گئی یا آسمان نگل گیا'، سکھر میں بچوں کے اغوا کی بڑھتی وارداتوں پر پولیس کی بے بسی

حیدرآباد سول ہسپتال سے بچوں کے  اغوا میں کون ملوث ہے؟

حیدرآباد کے علاقے لطیف آباد کے 35 سالہ جاوید رات کے وقت کتوں کو آٹوبھان روڈ پر کھانا کھلانے آتے ہیں۔ وہ کہتے ہیں کہ میں روزانہ 30 سے 40 کتوں کو 15 سو سے دو ہزار روپے تک کی سپیشل فیڈ اور گوشت کھلاتا ہوں اور یہ سلسلہ 10 سال سے چل رہا ہے۔

ان کا کہنا ہے کہ &quot;لوگ تو پالتو کتوں کو کھانا کھلاتے ہیں، میں گلیوں میں گھومنے والے بھوکے کتوں کو کھانا کھلانے گھر سے آتا ہوں۔ میں نے شوق سے اکیلے اس کام کو شروع کیا تھا لیکن اب لوگ اس مقصد کے لیے چندہ دینے لگے ہیں۔&quot;

&nbsp;وہ کہتے ہیں کہ کتوں کو مارنا نہیں چاہیے، وہ انسانوں کے اچھے دوست بن سکتے ہیں۔

قاسم آباد میں رہائش پذیر سرکاری ملازم عبدالستار کہتے ہیں کہ ان کی 10 سالہ بیٹی نجمہ کو محلے میں آوارہ اور پاگل کتے نے ٹانگ پر کاٹا ہے۔

&quot;میں سول ہسپتال حیدر آباد گیا مگر وہاں پاگل کتے کے کاٹنے کی ویکسین موجود نہیں تھی اس لیے نجی میڈیکل سٹور سے 25 سو روپے میں خرید کر لگوائی ہے۔&rdquo;

ان کے مطابق ہسپتال میں کتوں کے کاٹنے کی عام ویکسین تو دستیاب تھی مگر آر آئی جی (ایکوریب ریگ) ویکسین دستیاب نہیں تھی جو ریبیز زدہ یا پاگل کتے کا شکار بننے والوں کو لگائی جاتی ہے۔

حیدر آباد سول ہسپتال میں کتوں کے کاٹنے کی ویکسین لگانے کے سنٹر میں بطور انچارج کام کرنے والے یاسر اور الطاف نے بتایا ہمارے پاس آر آئی جی ویکسین ختم ہو گئی تھی، اس لیے پاگل کتے کے کاٹے ہوئے لوگوں کو نہیں لگ رہی تھی مگر اب یہ ویکسین دستیاب ہے۔

عبدالستار کہتے ہیں حیدر آباد شہر میں سگ گزیدگی یا کتوں کے کاٹنے کے کیس بڑھ رہے ہیں۔ حیدر آباد کی لیاقت کالونی کے رہائشی 50 سالہ سکول ٹیچر اسلم کے خیال میں آوارہ کتوں کے خلاف جب سے مہم بند ہوئی ہے، ان کی تعداد بہت بڑھ گئی ہے۔

حیدر آباد سول ہسپتال کے ایمرجنسی سنٹر میں رواں سال جنوری سے ستمبر تک چار ہزار 573 کتے کے کاٹنے کے کیس رپورٹ ہوئے ہیں۔ جنوری 2023ء میں 569 افراد، فروری میں 481 ، مارچ میں 568، اپریل میں 504، مئی میں 500، جون میں 450، جولائی میں 437، اگست میں 476 اور ستمبر 2023ء میں 588 افراد کو کتوں نے کاٹا ہے۔

بلدیہ حکام کے مطابق ضلع حیدر آباد کی 160 یونین کونسلز میں پھیلے ہوئے آوارہ کتوں کی کل تعداد 70 ہزار کے قریب ہے۔

&nbsp;زیادہ کیس سامنے آنے کے بعد حیدر آباد میونسپل کارپوریشن یا بلدیہ اعلیٰ نے آوارہ کتوں کو اینٹی ریبیز ویکسین لگانے کا فیصلہ کیا ہے تاکہ وہ پاگل پن سے محفوظ رہ سکیں۔

آوارہ کتوں کو ویکسین لگانے اور محفوظ مقام پر منتقل کرنے کے لیے میئر حیدر آباد کاشف شورو کی سربراہی میں اکتوبر 2023ء میں ایک اجلاس منعقد کیا گیا۔ اس میں طے ہوا کہ محکمہ لائیو سٹاک کتوں کو ویکسین لگائے گا۔ پہلے مرحلے میں حیدر آباد شہر میں پانچ ہزار آوارہ کتوں کو ویکسین لگائی جائے گی جس کے اخراجات میونسپل کارپوریشن ادا کرے گی۔ البتہ اس کے لیے بجٹ کا تعین فی الحال نہیں ہوا۔

میونسپل وٹرنری آفیسر ڈاکٹر علی اختر شاہانی کے مطابق میونسپل کارپوریشن کے پاس کتوں کو پکڑنے کے لیے تربیت یافتہ سٹاف اور ضروری آلات موجود نہیں، کتے مار مہم کا سٹاف موجود ہے، لیکن یہ مہم شروع نہیں کی جا رہی۔

آوارہ کتوں کو ویکسین لگانے کے حوالے سے ہونے والے اجلاس میں بریفنگ کے دوران انہوں نے کہا کہ پوری دنیا میں کتا مار مہم پر پابندی ہے اور انہیں مارنے سے دنیا کو اچھا پیغام نہیں جائے گا۔ ان کے مطابق ویکسی نیشن کی اس مہم میں مقامی این جی اوز اور شیلٹر ہاؤسز سے بھی مدد لی جائے گی، نیز کتوں کی ویکسین جانوروں کے ہسپتالوں و سنٹرز پر تقریباً 350 روپے میں دستیاب ہو گی۔

محکمہ لائیو سٹاک حیدر آباد کے ڈپٹی ڈائریکٹر سید صابر علی شاہ نے لوک سجاگ کو بتایا کہ کتے ریبیز میں مبتلا ہو کر انسانوں کو کاٹتے ہیں اس لیے انہیں مارنے کا رواج چلا آ رہا تھا۔

ان کا کہنا تھا کتے عموماً سردیوں میں بریڈینگ شروع ہونے کے دنوں میں پاگل ہوتے ہیں۔ اس لیے بہتر ہے کہ اس سے پہلے ہم انہیں وٹرنری ہسپتال اور سنٹرز لا کر ضروری کارروائی کر لیں۔

انہوں نے بتایا جن کتیوں اور کتوں کی ویکسی نیشن ہو گی انہیں پہچان کے لیے بلیٹ پہنائی جائے گی۔

&quot;کتوں کو ٹنڈو محمد خان کیٹل کالونی میں منتقل کرنے لیے خصوصی گاڑی کا اہتمام کیا جائے گا۔ اس کے لیے جانوروں کے ڈاکٹر خدمات انجام دیں گے جبکہ کتوں کو پکڑنے کی ذمہ داری میونسپل کمیٹی کے عملے کی ہو گی۔&quot;

میئر کاشف علی شورو نے کہا کہ بلدیہ اعلیٰ حیدرآباد ویکسین منگوائے گی۔ اس کے سٹاف کو کتے پکڑنے کی تربیت دی جائے گی۔ سٹاف کو ویکسین لگائی جائے گی تاکہ وہ پاگل کتوں کے کاٹنے کی صورت میں محفوظ رہیں۔ مہم کا آغاز حسین آباد سے کیا جائے گا۔

غیر سرکاری تنظیم اینیمل پروٹیکشن کی سربراہ 40 سالہ حرا خان کو جانوروں سے لگاؤ ہے۔ انہوں نے لوک سجاگ کو بتایا کہ میں نے لطیف آباد میں جانوروں کے لیے ایک چھوٹا شلٹر ہاؤس بنا رکھا ہے جس میں اس وقت پانچ گدھے اور پانچ کتے موجود ہیں۔

&quot;ہم انہیں بیمار اور زخمی حالت میں مختلف علاقوں سے لائے تھے۔ یہاں ہم ایسے جانوروں کا علاج کرتے ہیں اور ان کی خوراک کا خیال رکھتے ہیں۔&rdquo;

ان کا کہنا ہے کہ آوارہ کتوں کو ویکسین لگانی چاہیے جس کے بعد نشان دہی کے لیے ویکسنیڈ کتے کو رنگ لگایا جا سکتا ہے۔

خیال رہے کہ بلدیہ اعلیٰ حیدر آباد کی جانب سے کتوں کو ویکسین لگانے کے فیصلے سے پہلے کتوں کو مارنے کا فیصلہ ہوا تھا۔ اس کے لیے ہری پور میں واقع ایک فیکٹری کو زہر بھیجنے کے لیے چھ لاکھ روپے دیے گئے تھے۔ تاحال فیکٹری نے کتا مار زہر فراہم نہیں کیا۔ بلدیہ حکام کے مطابق ملنے پر اسے سنبھال کر رکھا جائے گا تاکہ کسی اور کام آ سکے۔

&nbsp;

کراچی کے ساحلی جزیروں پر تعمیرات کا منصوبہ: ماہی گیروں اور قدرتی ماحول کے لیے سنگین خطرہ۔

کتے مار مہم نہیں چلے گی: حیدر آباد کے پانچ ہزار آوارہ کتوں کو ویکسین لگانے کی تیاریاں

حیدر آباد کے پچاس سالہ محمد فرید &#39;مرزا حیدر آبادی&#39; جوتا اور چپل بنانے کے ماہر ہیں۔ یہ ہنر انہیں ان کے اجداد سے ملا ہے۔انہوں نے حیدرآباد کے مرکزی علاقے سوچی پاڑہ میں اپنے گھر کے قریب&nbsp; جوتوں کی دکان اور چھوٹا سا کارخانہ بنا رکھا ہے۔

فرید بتاتے ہیں کہ 25 سال پہلے تک حیدرآباد جوتے اور چپل بنانے کی صعنت کا مرکز ہوا کرتا تھا۔ شاہی بازار کے قریب واقع گنجان آباد محلہ سوچی پاڑہ (سندھ میں جوتے مرمت کرنے والے کو &#39;موچی&#39; اور نئے جوتے بنانے والے کو &#39;سوچی&#39; کہا جاتا ہے) کی تنگ گلیوں میں واقع گھروں میں چپل اور جوتے بنائے جاتے تھے۔ یہ جوتے ناصرف پاکستان بلکہ بھارت میں بھی شوق سے خریدے جاتے تھے۔

وہ کہتے ہیں کہ حیدرآباد کی چوڑی کی طرح یہاں کے &#39;مرزا حیدرآبادی&#39; و دیگر چپل جوتے آج بھی بہت پسند کیے جاتے ہیں لیکن اب جوتا سازی کی صنعت اور منڈی لاہور منتقل ہو چکی ہے۔حیدر آباد میں جتنے بھی چھوٹے کارخانے ہیں ان سب میں ہاتھ سے کام کیا جاتا ہے۔جبکہ لاہور میں مشینوں پر جوتے بنتے ہیں۔

فرید نے بتایا کہ حیدرآباد میں جوتا سازی گھریلو صنعت ہے۔ دکانوں پر مرد اور گھر میں خواتین مل کر بھی روزانہ صرف دو سو جوتے بنا پاتے ہیں۔لیکن لاہور کا ایک کارخانہ روزانہ 10 ہزار سے زیادہ جوتے تیار کر لیتا ہے جو سستے بھی بنتے ہیں اس لیے اب بیشتر دکاندار لاہور ہی سے جوتے منگوا کر بیچتے ہیں۔

&nbsp;حیدرآباد میں اس وقت جوتوں کے تقریباً دو ہزار چھوٹےکارخانے کام کر رہے ہیں۔ ہاتھ سے بنائے جانے والے یہ جوتے مضبوط ہوتے ہیں اور اسی لیے مہنگے بھی بنتے ہیں۔ لاہور کے مصنوعی لیدر کی&nbsp; مشینی چپل ڈیڑھ سے دو سو روپے میں بنتی ہیں جبکہ ہاتھ سے بنی چپل ڈھائی سو سے کم میں نہیں بنائی جا سکتی۔

&nbsp;حیدرآباد میں خواتین کے فینسی چپل بھی بنائے جاتے ہیں مگر یہ آرڈر پر بنتے ہیں۔موچی بازار کے علاوہ سرفراز کالونی، لطیف آباد اور پکا قلعہ میں خواتین جوتے بناتی ہیں۔

پاکستان میں سالانہ چار کروڑ جوتوں کی مانگ ہے اور اس طلب کو ملکی پیداوار کے علاوہ چین سے درآمدات کے ذریعے پورا کیا جاتا ہے۔

سندھ حکو مت نے لگ بھگ 35 سال قبل مستقبل کی ضروریات کو پورا کرنے اور مقامی صنعت کے فروغ کے لیے حیدرآباد میں &#39;لیدر فٹ ویئر انسٹیٹیوٹ&#39; بنانے کا فیصلہ کیا تھا۔اس کے لیے یہاں رشی گھاٹ کے علاقے میں سندھ سمال انڈسٹریز کارپوریشن کے تحت ایک تین منزلہ فیکٹری نما عمارت بنائی گئی تھی۔

اس انسٹیٹیوٹ&#39; کے لیے عالمی ادارہ برائے اطفال (یونیسف)نے جدید مشینری عطیہ کی۔ 1990ء میں اس ادارے نے کام شروع کر دیاتھا۔ عملی طور پر یہ جوتے بنانے کا سرکاری کارخانہ تھا جس کا سب سے بڑا ہدف بیروزگار نوجوانوں کو جوتے تیار کرنے کی تربیت دینا تھا۔لیکن یہ ادارہ پچھلے 27 سال سے بند پڑا ہے۔&nbsp;

سمال انڈسٹرییز کارپوریشن ایمپلائز یونین کے رہنما جمن چنا اسی محکمے میں چار عشروں تک ملازمت کرنے کے بعد ریٹائر ہو چکے ہیں۔ وہ بتاتے ہیں کہ اس ادارے میں کام کا آغاز ہوا تو یہاں گریڈ 18 کے پراجیکٹ ڈائریکٹر،گریڈ 17 کے 10 انسٹرکٹر اور سٹور کیپر سمیت میں20 سے زیادہ افراد پر مشتمل عملہ تعینات تھا۔ ہر چھ ماہ بعد ڈیڑھ سو نوجوان یہاں تربیتی کورس مکمل کر کے ڈپلوما سرٹیفکیٹ حاصل کرتے تھے۔

&nbsp;ان کا کہنا ہے کہ اس ادارے میں آٹھ سال تک سندھ کے بیروزگار نوجوانوں کو تربیت دی جاتی رہی۔یہاں جوتوں کے کاریگر بھی بھرتی کیے گئے تھے اور یہاں سے تربیت یافتہ لوگ اپنے شہروں میں جا کر یہی کاروبار کرتے تھے۔

انہوں نے بتایا کہ 96-1995ء میں اس وقت ادارےکا بجٹ نو لاکھ روپے تھا۔اس میں سے چھ لاکھ ملازمین کی تنخواہوں اور تین لاکھ روپے چمڑے و دھاگے کی خریداری کے لیے دیے جاتے تھے۔&nbsp; 1997ء تک یہاں سندھ پولیس اور مختلف شوز کمپنیوں کے&nbsp; لیے جوتے بھی تیار ہوتے تھے۔

جمن چنا کے مطابق اس انسٹیٹیوٹ میں&nbsp; بننے والے جوتوں کو مارکیٹ میں متعارف نہیں کرایا گیا۔ اگر ایسا ہوتا یہ &#39;برانڈ&#39;بن جاتا۔ اس کے علاوہ مختلف شوز کمپنیوں کے جوتے بنانے&nbsp; کا کام بھی مبینہ کمیشن اور ٹھیکے کی لالچ میں ختم ہو گیا۔ اس کے بعد مالی بحران کو جواز بنا کر اس ادارے کو بند کر دیا گیا۔

جب یہ ادارہ بند ہوا تو اس کا پورا عملہ &#39;سروسز جنرل ایڈمنسٹریشن&#39; کراچی کے حوالے کر دیا گیا ۔اب عمارت کی دیکھ بھال کے لیے صرف دو چوکیدار رہ گئے ہیں اور جدید آٹومیٹک مشینیں کمروں میں بند پڑی زنگ آلود ہو چکی ہیں۔&nbsp;

سندھ سمال انڈسٹریز کارپوریشن کے ایک ملازم نے نام ظاہر نہ کرنے کی شرط پر بتایا کہ ادارے کے افسروں نے حکومت کو خط لکھا تھا کہ انسٹیٹیوٹ کو بحال کیا جائے مگر بجٹ جاری نہیں کیا گیاتھا۔ 2018ء میں انسٹیٹوٹ کی کروڑوں مالیت کی عمارت کو حکام نے دو لاکھ روپے کرائے پر دینے کا فیصلہ کیا تھا۔ اس کے لیے اسی عمارت کے باہر بینر آویزاں کیےگئے اور اخبارات میں اشتہارات&nbsp; دیے گئے تھے مگر تاحال کسی نے اسے کرایے پر نہیں لیا۔

سندھ سمال انڈسٹریز کارپویشن کے جوائنٹ ڈائریکٹر انجینئر علاؤالدین جونیجو نے اس بارے میں موقف دینے سے انکار کر دیا۔&nbsp; ان کے اسسٹنٹ کامران نے بتایا کہ انہیں اس انسٹیٹیوٹ کے بارے میں بات کرنے کی اجازت نہیں ہے۔

سابق صوبائی وزیر برائے سمال انڈسٹریز&nbsp; محمدعلی ملکانی بتاتے ہیں کہ انہوں نے اپنی وزارت کے دوران اس ادارے کو بحال کرنے کی کوشش کی تھی مگر کام ادھورا رہ گیا۔اب وہ اس پر مزید&nbsp; کچھ نہیں کہہ سکتے۔

جمن چنا&nbsp; کا ماننا ہے کہ اگر اس ادارے کو سندھ سمال انڈسٹریز کارپوریشن بحال کرے تو حیدرآباد میں جوتوں کے صنعت میں دوبارہ جان پڑسکتی ہے اور نوجوانوں کو&nbsp; روزگار بھی مل سکتا ہے۔

محمد فرید بھی جمن چنا سے اتفاق&nbsp; کرتے ہیں۔ وہ سمجھتے ہیں کہ اس وقت مصنوعی چمڑا بہت مہنگا ہے اس لیے فینسی جوتے بنانے والی خواتین کو اجرت بھی پوری نہیں ملتی۔اگر فٹ ویئر انسٹیٹوٹ کو فعال کر دیا جائے تو کاریگروں کی زندگی آسان ہو سکتی ہے۔

&nbsp;

حیدر آباد میں زرعی اراضی پر پھیلتی ہاوسنگ سکیمیں، بلڈرز نے کاشت کاروں کی زندگی اجیرن کر دی

حیدر آباد میں جوتا سازی کی تربیت دینے کے سرکاری ادارے پر 27 سال سے تالے، شہر میں جوتوں کی مشہور صنعت زوال پذیر

ٹنڈو الہ یار کے سولہ سالہ بشیر احمد میٹرک کے طالب علم تھے جو اپنے تعلیمی اخراجات پوری کرنے کے لیے ایک پولٹری فارم پر کام کیا کرتے تھے۔ ایک رات وہ فارم پر سو رہے تھے کہ انہیں زہریلے سانپ نے ڈس لیا۔ انہیں طبی امداد کے لیے ہسپتال پہنچایا گیا لیکن وہاں سانپ کے کاٹے کی ویکسین دستیاب نہیں تھی۔ اتنی دیر میں زہر ان کے پورے جسم میں پھیل چکا تھا جس کی تاب نہ لاتے ہوئے وہ ہسپتال میں ہی دم توڑ گئے۔

بشیر احمد کا تعلق ٹنڈو الہ یار کی تحصیل چمبڑ میں پیرکے نامی گاؤں سے تھا۔ ان کے افسردہ والدین کہتے ہیں کہ اگر ویکسین دستیاب ہوتی تو ان کے بیٹے کی زندگی بچ سکتی تھی۔

&nbsp;سندھ میں سانپ ڈسنے کے زیادہ واقعات ضلع تھرپارکر اور عمرکوٹ کے ریگستانی علاقے سے رپورٹ ہوتے ہیں۔ ہسپتالوں میں ایسے مریض کا خون ٹیسٹ لیا جاتا ہے اور دستیابی کی صورت میں ان کو اینٹی سنیک وینم ویکسین (عرف عام میں سانپ کے کاٹے کی ویکسین) لگائی جاتی ہے۔

محکمہ صحت کے مطابق ضلع تھرپارکر میں پچھلے نو ماہ (جنوری سے 31 اگست 2023ء) کے دوران ایک ہزار348 افراد کو زہریلے سانپوں نے کاٹا۔ان افراد کو ویکسین کے لیے سول سپتال مٹھی کے علاوہ ڈیپلو، کھیمے جو پار، چھاچھرو اور ننگرپارکر کے تحصیل ہسپتالوں میں لایا گیا تھا۔

کالے سانپ (بلیک کوبرا) کے علاوہ تھر میں اسی شکل کا ایک سانپ بنگارس کریت( Bungarus krait) بھی پایا جاتا ہے۔ مقامی لوگ ا سے &#39;پیئن بلا&#39; پکارتے ہیں۔یہ چارپائی پر بھی چڑھ جاتا ہے۔اور علاقے میں خوف و دہشت کی علامت ہے۔

بنگارس کاٹتا نہیں بلکہ سوئے ہوئے انسان کے منہ یا ناک میں زہر ڈال دیتا ہے۔اس سے انسان کے گلے میں اچانک پھوڑا نما رکاوٹ پیدا ہو جاتی ہے۔ سانسیں بند ہونے لگتی ہیں اور اگر اس کے سامنے تیز روشنی آ جائے تو بینائی بھی ضائع ہو سکتی ہے۔

&nbsp;سانپوں کا زہر عام طور پر انسان کے دماغ کو متاثر کرتا ہے۔ جس سے مریض کے موت ہوجاتی ہے۔ تھر میں محکمہ صحت کے حکام نے دعویٰ کیا ہے کہ یہاں سانپ سے اموات نہ ہونے کے برابر ہیں۔ مریض بروقت ہسپتال پہنچ جائے تو زندگی بچائی جا سکتی ہے۔

مٹھی سول ہسپتال کی رپورٹ کے مطابق رواں سال یہاں سانپ کے ڈسے 512 مریض لائے گئے۔ گرمیوں میں ایسے واقعات زیادہ تعداد میں رپورٹ ہوتے ہیں۔ جون میں 103، جولائی میں 139 اور اگست میں سانپ کے ڈسے 102 افراد ہسپتال لائے گئے۔

ان مریضوں کی تعداد کم و بیش ہر سال اتنی ہی ہوتی ہے۔ متاثرین کو سندھ کے سرکاری ہسپتالوں میں موجوداینٹی سنیک ویکسین کی چار سے 36 خوراکیں لگائی جاتی ہیں۔ ویکسین لگانے کا دورانیہ چار سے چھ گھنٹے ہوتا ہے۔یہ ویکسین انڈیا سے منگوائی جاتی ہے۔

2008ء میں پیپلز پارٹی کی حکومت نے سندھ میں سانپ کے کاٹے کا علاج کرنے کے لیے ویکسین بنانے کی غرض سے 30 کروڑ کی لاگت سے لیبارٹری قائم کرنے کا فیصلہ کیا۔

سابق صدر آصف زرداری نے پہلے سال ہی اپنے آبائی شہر نواب شاہ کے قریب سکرنڈ میں &#39;اینٹی سنیک وینم اینڈ ربیز سیرالاجی لیبارٹری&#39; کی بنیاد رکھی تھی۔ یہ لیبارٹری لائیو سٹاک ٹریننگ سکول کے ساتھ بنائی گئی اور اس کا انتظام محکمہ لائیو سٹاک کے سپرد کر دیا گیا۔

سکرنڈ لیبارٹری میں پہلی بار 2017ء میں ویکسین بنانے کا تجربہ کیا گیا۔2018ء میں لیبارٹری کا سالانہ بجٹ264 ملین روپے رکھا گیا تھا مگر پھر یہ سلسلہ برقرار نہ رہ سکا اور ویکسین بنانے کا کام ادھورارہ گیا۔

شروع میں لیبارٹری میں 28 افراد کام کرتے تھے۔ 24 افراد پر مشتمل سٹاف اور عمارت اب بھی موجود ہے مگر 15 سال بعد بھی یہاں ویکسین تیار نہیں ہو سکی۔

&nbsp;اینٹی سنیک ویکسین کی تیاری کا منصوبہ شروع کرنے کے لیے ڈاکٹر نعیم الحق قریشی کو پراجیکٹ ڈائریکٹر تعنیات کیا گیا تھا۔ 2019ء میں لیبارٹری کو فنڈ نہ ملنے پر انہوں نے سندھ ہائی کورٹ میں پٹیشن دائر کر دی تھی۔

ڈاکٹر نعیم الحق نے عدالت میں جمع کرائی گئی اپنی رپورٹ میں بتایا تھا تھا کہ دنیا میں صرف تین ملک کیپرالک ایسڈ سے اینٹی سنیک ویکسین تیار کرتے ہیں۔ چوتھا پاکستان ہے جو یہ ویکسین بنانے کی صلاحیت رکھتا ہے۔

رپورٹ کے مطابق انڈیا امونیم سلفیٹ سے ویکسین تیار کرتا ہے۔ پاکستان وہاں سے چار ہزار روپے فی خوراک کے حساب سے ویکسین منگوا رہا ہے اور مریض کو اس ویکسین کی 20 سے 30 خوراکیں لگائی جاتی ہیں۔

رپورٹ کہتی ہے کہ کیپرالک ایسڈ سے تیار کردہ ویکسین زیادہ مفید اور مؤثرہے۔ اس ویکسین کی ایک ہی خوراک سے لوگ صحت یاب ہوسکتے ہیں اور اس کی قیمت بھی پانچ سو روپے ہو گی۔

رپورٹ میں مزید بتایا گیا ہے کہ پاکستان میں ویکسین کی عدم دستیابی کے باعث سالانہ سانپ کے ڈسے تقریباً&nbsp; ڈیڑھ ہزار لوگ ہلاک ہو جاتے ہیں۔سکرنڈ لیبارٹری میں سالانہ چھ لاکھ لوگوں کے لیے ویکسین بنانے کی صلاحیت موجود ہے۔ اس سےپوری دنیا کی مانگ پوری ہو سکتی ہے۔

رپورٹ میں ڈاکٹر نعیم الحق نے دعویٰ کیا تھا کہ انہوں نے لیبارٹری میں دو اسسٹنٹ پروفیسروں اور 28 ملازمین کی مدد سے سانپ کی ویکسین کے 500 سیمپل تیار کر لیے ہیں۔ لیبارٹری میں کتوں کے کاٹے کی ویکسین بنانے کی سہولت بھی موجود ہے۔تاہم سکرنڈ میں تب سے سانپ کی ویکسین&nbsp; کی تیاری&nbsp; اور تجربات بند ہیں۔

عدالتی حکم پر سیکریڑی صحت نے اسی سال اینٹی سنیک وینم اینڈ ربیز سیرالاجی لیبارٹری کا دورہ کیا اور اپنی رپورٹ عدالت میں پیش کر دی تھی۔ اس رپورٹ میں بھی سکرنڈ لیبارٹری کو سانپ کی ویکسین بنانے کے لیے معیار کے مطابق قرار دیا گیا۔

پاکستان ڈرگ اتھارٹی سے بھی اس لیبارٹری کا معائنہ کرایا گیا۔اسی رپورٹ کے بعد عدالتی حکم پر 2019ء میں لیبارٹری کو 264 ملین روپے کی قسط جاری کر دی گئی۔

ڈاکٹر نعیم کا کہنا تھا کہ 110 ملین روپے قرض ادا کر دیا گیا۔کیونکہ فنڈز نہ ملنے کی وجہ سے لیبارٹری نے قرضہ لے کر ویکسین کے تجربات جاری رکھے تھے۔ 10 ملین سےملازمین کی تنخواہیں ادا کی گئیں۔ باقی حکومت نے واپس لے لیے مگر لیبارٹری کے آلات نہ خریدے جا سکے۔

مارچ 2022ءمیں ڈاکٹر نعیم اپنی عہدے سے مستعفی ہو گئے۔انہوں نے الزام لگایا کہ ان پر لیباٹری میں ناتجربہ کار لوگ بھرتی کرنے کا سیاسی دباؤ تھا۔

لیبارٹری کے ملازمین کے مطابق سانپ کے ویکسین ٹیسٹ کرنے کے لیے چار گھوڑے اور تین اونٹ خریدے گئے تھے۔ان جانوروں کو چارہ نہیں دیا جا رہا ۔ایک گھوڑا ہلاک ہو چکا ہے۔باقی جانور بیمار پڑے ہیں۔تین سو سانپ بھی لیبارٹری میں موجود تھے، وہ ان کی دیکھ بھال پر مامور جوگی لےگئے ہیں۔

سکرنڈ لیبارٹری کے موجودہ انچارج اعجاز لغاری بتاتے ہیں کہ جدید ٹیکنالاجی والی اس لیبارٹری کا لوگوں کو کوئی فائدہ نہیں ہوا۔ سابق انچارج کی تعنیاتی کے دوران سانپ اور جانور گم ہو گئے۔ دفتر سے ایئر کنڈیشنر بھی غائب ہیں۔

وہ شکوہ کرتے ہیں کہ لیبارٹری کے فنڈ بند ہیں۔ ملازمین کو تنخواہیں نہیں مل رہیں اور جانور بھوکے مر رہے ہیں۔ ساتھ ہی انہوں نے یہ دعویٰ کیا کہ اب جلد ویکسین تیار کر کے محکمہ صحت کو دی جائے گی۔

ملتان پر سینڈ فلائی کا حملہ: زخمی چہرے لیے مریض علاج کی تلاش میں دربدر

سانپ جوگی لے گئے، اونٹ گھوڑے مر گئے: سکرنڈ لیبارٹری میں سانپ کے کاٹے کی ویکسین بنانے کا مشن 15 سال سے ادھورا

صوبہ سندھ میں ضلع بدین کا آخری شہر گلاب لغاری کبھی زرعی پیداوار کے لیے مشہور تھا جہاں چار سو لہلہاتے کھیت ہوا کرتے تھے لیکن اب وہاں زمینیں بنجر پڑی ہیں کیونکہ اس علاقے کی نہریں خشک ہو گئی ہیں۔

گلاب لغاری کے رہنے والے کاشت کار مولا بخش لغاری پانی کی قلت کے باعث نہر میراں خوری کی شاخ سے سیراب ہونے والی اپنی 40 ایکڑ زمین گزشتہ 10 برس سے اچھی طرح کاشت&nbsp; کرنے سے قاصر ہیں۔ پچھلے سال انہوں نے سیلاب کے پانی سے ٹماٹر اور سرسوں کاشت کیے لیکن ان سے ہونے والی آمدنی قرض چکانے میں صرف ہو گئی۔

انہوں نے بتایا کہ پانی کی عدم دستیابی پر دو ہفتے پہلے ایکسیئن روہڑی کنال حیدر آباد کے دفتر کے سامنے احتجاج کرنے پر انہیں کینٹ تھانے میں پانچ گھنٹے حبس بے جا میں رکھا گیا اور دیگر ساتھیوں کے احتجاج کے بعد رہائی ملی۔ ان کا کہنا ہے کہ وہ اس صورتحال پر جب بھی احتجاج کرنے آتے ہیں تو پولیس جھوٹے مقدمات درج کرنے کی دھمکی دیتی ہے۔

گلاب لغاری کے عبدالغفار لغاری روزنامہ عبرت کے رپورٹر ہیں۔ اپنے 25 سالہ کیریئر میں وہ باقاعدگی سے پانی کے مسائل پر رپورٹنگ کرتے چلے آئے ہیں۔ انہوں نے بتایا کہ گلاب لغاری کی یونین کونسل مانک لغاری، غلام شاہ اور حاجی الہ ڈنو سریوال کی آبادی 50 ہزار سے زیادہ ہے جہاں کسان نہری پانی کا کمی کا شکار ہیں۔

گلاب لغاری کے کاشت کار مقبول احمد پانی کے لیے ایک سال سے مسلسل احتجاج کررہے ہیں۔ انہوں نے لوک سجاگ کو بتایا کہ انہیں روہڑی کینال کے نصیر واہ اور سرفراز کینال سے پانی ملتا تھا اور وہ ان نہروں کے آخری سرے (ٹیل)کے کاشت کار ہیں۔ 
ان کا الزام ہے کہ ٹنڈو الہٰ یار اور دیگر شہروں کے طاقت ور زمین دار ان کے حصے کے پانی پر قابض ہو کر آخری سرے کے زمینوں کو بنجر بنا رہے ہیں۔

&quot;ہم نے اب گندم، کپاس، چاول اور گنے کی فصلیں کاشت کرنا بند کر دی ہیں۔ قبل ازیں پانی عموماً روانی سے آتا تھا۔ کبھی بند بھی کر دیا جاتا تھا مگر ہماری ضرورتوں کے لیے کافی ہوتا تھا۔&quot;

مقبول نے بتایا کہ گلاب لغاری کے قریب 100 سے زیادہ ایسے چھوٹے بڑے گاؤں ہیں جہاں زراعت تو دور کی بات پینے کا پانی بھی مشکل سے ملتا ہے۔ زیر زمین پانی کھارا ہو چکا ہے اور لوگوں کو کئی کلومیٹر سے بھر کر لانا پڑتا ہے۔ اس وقت نہر مراد واہ میں پانی نہیں ہے جس سے آخری سرے کی تقریباً 40 ہزار ایکڑ زمینیں بنجر پڑی ہیں۔

&quot;روہڑی کینال کی شاخ زئنور کا پانی چوری کر کے کیلاکاشت کیا جا رہا ہے اس سے پانچ دیہات کی پانچ ہزار ایکڑ زرعی زمین کاشت نہیں ہو رہی۔ سرفراز کینال سے بھی کیلے کی کاشت ہو رہی ہے۔ نہر میراں خوری سے چار ہزار ایکڑ اراضی پر کیلے کی فصل سیراب کرنے کے لیے 11 ہزار ایکڑ کا پانی بند کیا گیا ہے۔ نصیر واہ کی چاکر شاخ کا پانی بھی بند ہو چکا ہے۔&quot;

میں ہیں وہ ان کے حصے کا پانی چرا لیتے ہیں۔ ان کا کہنا ہے کہ خوراک کی ضرورت پوری کرنے کے لیے اب ان کے لیے گندم اگانا ممکن نہیں رہا۔

مقبول نے کہا&nbsp; کہ زیادہ پانی استعمال کرنے کی وجہ سے دھان پر پابندی لگائی گئی مگر اب کیلا کاشت کیا جا رہا ہے۔ اسے دھان سے بھی زیادہ پانی کی ضرورت ہوتی ہے۔ لوگ کیلے کے بغیر زندہ رہ سکتے ہیں مگر گندم کے بغیر نہیں رہ سکتے۔

&quot;ضلع بدین میں 80 فیصد اراضی پر گندم کی کاشت ہوتی تھی لیکن کم ہو کر 20 فیصد رہ گئی ہے۔ اس سے لوگ مہنگا آٹا خریدنے پر مجبور ہیں۔&quot;

صوبائی محکمہ زراعت کے مطابق 22-2021ء کے دوران سندھ میں 31 ہزار 963 ہیکٹرز پر کیلے کی کاشت ہوئی تھی۔ ضلع ٹھٹہ میں سب سے زیادہ آٹھ ہزار 271 ہیکٹرز پر کیلے کے باغات ہیں۔ خیرپور میں پانچ ہزار 550 ہیکٹر، نوشہرو فیروز میں چار ہزار 375 اور ضلع ٹنڈو الہٰ یار میں 1106 ہیکٹرز پر کیلا کاشت ہوتا ہے۔

مقبول کے مطابق ٹنڈو الہٰ یار میں محکمہ زراعت سندھ&nbsp; کے بتائے گئے ہیکٹرز سے زیادہ رقبے پر کیلا&nbsp; کاشت ہو رہا ہے۔

بدین میں روہڑی کینال کے آخری سرے پر واقع ملکانی شریف میں بھی طویل عرصہ سے پانی کی قلت ہے۔ یہاں کے کاشت کار طارق محمود نے بتایا کہ بااثر زمیندار پانی اپنے تصرف میں لے آتے ہیں جس سے بدین شہر کے قریبی علاقوں جرکسن اور سانگی فرہو میں پچھلے دس سال سے پورا پانی نہیں پہنچ رہا اور کاشت کاروں کے مسلسل احتجاج کے باوجود مسئلہ حل نہیں ہوا۔

گندم کی نئی فصل سندھ کو ایک نئے غذائی بحران کے دہانے پر لے آئی ہے؟ سات اہم باتیں

نہری پانی کی کمی اور کیلے کی کاشت: بدین میں گندم اور آٹے کا بحران سر اٹھانے لگا

چالیس سالہ شمع کولھی حیدرآباد کی نیوسبزی منڈی میں مزدوری کرتی ہیں۔ وہ چار بچوں کی ماں ہیں اور ان کے شوہر بھی تعمیراتی شعبے میں مزدوری کرتے ہیں۔

شمع کولھی شہر سے تین کلومیٹر دور محل نما گھروں کے درمیان گاؤں لکھمن کولھی کی رہائشی ہیں۔ 500 افراد پر مشتمل ان کا گاؤں ھالہ ناکہ روڈ پر نصف صدی سے آباد ہے۔ اس علاقے میں اب 300 ایکڑ اراضی پر ایک بڑی ہاؤسنگ سکیم بن چکی ہے۔

شمع کولھی بتاتی ہیں کہ یہاں ہر طرف آم، بیر اور لیموں کے باغات ہوتے تھے۔ پیاز، گنا، ٹماٹر اور گندم سمیت کئی فصلیں اگائی جاتی تھیں جن پر عورتیں اور مرد سب مل کر کام کرتے تھے۔ پھر یوں ہوا کہ زمینداروں نے یہ ساری زمین بلڈر کو بیچ دی۔

&quot;باغات کاٹ دیئے گئے۔ فصلیں ختم ہوئیں تو انہیں مویشی بھی بیچنا پڑے۔ زیر زمین پانی کڑوا ہو گیا۔ ایک تو روز گار گیا اور پھر سبزی، بچوں کا دودھ اور پانی بھی بازار سے خریدنا پڑتا ہے۔ بلڈر کے ملازمین روزانہ آ کر کہتے ہیں کہ گاؤں خالی کر دو۔ اب تمہارے گھر بھی گرا دیں گے۔ اگر ہمیں بیدخل کرنا ہی ہے تو کسی محفوظ جگہ منتقل کر دیں جہاں ہم بے خوف زندگی گزاریں اور کھیتی بھی کر سکیں۔

حیدرآباد شہر کی آبادی 20 لاکھ کے قریب پہنچ چکی ہے۔ یہاں 1980ء سے 2023ء تک حیدر آباد ڈیولپمنٹ اٹھارٹی کی منظوری سے پانچ سو سے زیادہ رہائشی سکیمیں بنائی گئی ہیں۔

شہرکے اطراف اب بھی تقریباً ایک ہزار ایکڑ رقبے پر درجنوں رہائشی کالونیاں بن رہی ہیں۔ ان میں ووھرا ٹاؤن، عباس ٹاؤن، بسم اللہ ٹاؤن، قادر ایونیو، جمیرا پام سٹی، حیدرآباد نیو سٹی، گولڈن ٹاؤن، اسرا ولیج و دیگر شامل ہیں۔

سالہا سال سے آباد 20 سے زیادہ چھوٹے بڑے گاؤں ان رہائشی سکیموں میں گھرے ہوئے ہیں جنہیں خالی کرایا جا رہا ہے۔

گاؤں امید علی لغاری، حاجی بھٹی، شیرمحمد گوپانگ، گاؤں عرس عالمانی و دیگر گوٹھوں کے تقریباً 19 ہزار کے قریب لوگ غیر یقینی صورت حال سے دوچار ہیں۔ کسان اب اپنے گھروں کو بچانے کی آخری لڑائی لڑ رہے ہیں۔

چار سو نفوس پر مشتمل گاؤں امید لغاری &#39;فضل سن سٹی&#39; نامی رہائشی سکیم کی زد میں آنے والی آبادیوں میں سے ایک ہے۔ اس گاؤں کے رہنے والے سماجی کارکن دوست علی بتاتے ہیں کہ ہاؤسنگ سکیم کی 300 ایکڑ اراضی محکمہ مال (ریونیو) اور محکمہ انہار کی ملکیت تھی۔یہ زمین ایک انہار انجنیئر عبدالعزیز شیخ نے زرعی استعمال کے لیے 99 سالہ لیز پر لی تھی۔ بعد میں اسے محکمہ ریونیو کی منظوری سے بیچ دیا گیا۔ یہاں ایک نہر بھی تھی جو اب ختم ہو گئی ہے اور وہاں پلاٹ بن رہے ہیں۔

گاؤں عرس عالمانی کے رہائشی علی نواز اب بھی کاشتکاری کرتے ہیں۔ وہ کہتے ہیں کہ سندھ قانونِ مزارعت کے تحت ہاری کو نوٹس دیئے بغیر زمین سے بیدخل نہیں کیا جا سکتا ۔مگر انہیں آج تک کوئی نوٹس نہیں دیا گیا۔

پچاس سالہ علی نواز دس افراد پر مشتمل خاندان کے اکیلے کفیل ہیں۔انہوں نے بتایا کہ گاؤں کے لڑکے مزدوری کرنے شہر جاتے ہیں تو بلڈرز کے ایما پر راہوکی اور ہٹڑی پولیس انہیں اٹھا لیتی ہے۔

&quot;اہلکار کہتے ہیں کہ گاؤں خالی کرو ورنہ تمہیں سکون سے رہنے نہیں دیں گے۔ہم رشوت دے کر لڑکوں کو چھڑا لاتے ہیں۔ دو مرتبہ ایسا ہو چکا ہے۔&quot;

اسی گاؤں کے پرائمری سکول ٹیچر میر اعجاز بتاتے ہیں کہ چار سال قبل گاؤں خالی نہ کرنے پر حیدرآباد نیو سٹی ہاؤسنگ سکیم کے مالکان عارف بلڈرز کی جانب سے مقامی لوگوں کے خلاف مقدمہ درج کرا دیا گیا تھا۔

&nbsp;وہ بتاتے ہیں کہ یہ مقدمہ ایک سابق فوجی افسر زاہد سومرو نے راہوکی تھانے میں انسداد دہشت گردی ایکٹ کی دفعات کے تحت درج کرایا جس میں محمد عرس عالمانی، خیر محمد، خدا بخش اور کوثر سمیت گاؤں کے 20 نوجوانوں اور کسانوں کو نامزد کیا گیا تھا۔

&quot;گرفتاریاں ہوئیں ہم نے سول کورٹ میں مقدمہ لڑا، گزشتہ سال مقدمہ جھوٹا ثابت ہوا۔ مگر اب گاؤں کا سیوریج بند کر دیا گیا ہے۔ لوگوں نے آواز اٹھائی تو دو جھوٹے مقدمات درج کرا دیئے گئے۔ پولیس گھر پہنچ گئی اور اب بھی دھمکیاں دی جا رہی ہیں۔&quot;

تھانہ راہوکی کے ایس ایچ او عطا محمد کاکا تسلیم کرتے ہیں کہ انہوں نے شکایت پر کارروائی کی تھی۔تاہم وہ کہتے ہیں کہ پولیس نے کسی کسان کو دھمکی نہیں دی۔

ایسوسی ایشن آف بلڈرز اینڈ ڈویلپرز (آباد) حیدرآباد ریجن کے وائس چیئرمین فراز میمن کا کہنا ہے کہ حیدرآباد میں جب آبادی بڑھنے لگی تو بلڈرز نے لوگوں کی سہولت کے لیے زرعی زمین پر رہائشی منصوبے بنائے۔ کسی نے کہیں پر غیر قانونی قبضہ نہیں کیا بلکہ زمینداروں سے زمینیں خریدی گئ ہیں۔

وہ کہتے ہیں کہ تمام متعلقہ اداروں بشمول سندھ بلڈنگ کنٹرول اتھارٹی، حیدرآباد ڈولپمینٹ اتھارٹی اور ٹاؤن پلاننگ سے این او سی لیے گئے ہیں۔ نقشے منظور کرانے کے بعد ہی ہاؤسنگ سکیمیں بنا رہے ہیں۔

ان کا کہنا تھا کہ بلڈرز پر کسانوں کی کوئی رقم واجب الادا نہیں ہے۔ اگر کوئی واجبات ہیں تو وہ زمینداروں پر ہوں گے۔

کمشنر آفس حیدرآباد میں ریونیو سب رجسٹرار بتاتے ہیں کہ کوئی بھی اراضی مالک زرعی زمین کو رہائشی میں بدلنے کے لیے حیدرآباد ڈیولپمنٹ اتھارٹی کو درخوست دے سکتا ہے۔ وہ درخواست ڈپٹی کمشنر کے پاس آتی ہے کیونکہ اس مقصد کے لیے ڈپٹی کمشنر کی منظوری ضروری ہے۔ حیدرآباد میں فی ایکڑ زمین کا نقشہ منظور کرانے کی فیس دو لاکھ روپیہ ہے۔

حکومت سندھ نے تین ماہ قبل صوبے میں 300 ہاؤسنگ سوسائٹیوں کو غیر قانونی قرار دیا ہے ان میں حیدرآباد ضلعے کی 20 سکیمیں بھی شامل ہیں مگر یہاں کام تاحال نہیں رکا۔ ان سکیموں میں المدینہ سٹی، الرحیم سٹی، کوہسار گرین سٹی، غوثیہ ٹاؤن، کوہسار ہیون، سائبان ہاؤسنگ سکیم اور دیگر شامل ہیں۔

صوبائی سیکرٹری زراعت اعجاز احمد مہیسر اتفاق کرتے ہیں کہ جس رفتار سے زرعی زمین پر ہاؤسنگ سکیمیں بن رہی ہیں اس سے فوڈ سیکورٹی کے مسائل درپیش ہو سکتے ہیں۔

انہوں نے لوک سجاگ کو بتایا کہ زرعی اراضی پر ہاؤسنگ کالونیاں ممنوع قرار دینے کی پالیسی بنانے کے لیے وزیر اعلیٰ سے بھی بات ہوئی ہے۔ اس وقت ایسا کوئی قانون نہیں ہے۔ مستقبل میں لینڈ پالیسی بنا کر ضروری قانون سازی کریں گے۔

گاؤں لکھمن کولھی کی پینتالیس سالہ لالی بھی شمع کولھی کے ساتھ سبزی منڈی میں کام کرتی ہیں۔ وہ اپنے پانچ بچوں کے ساتھ&nbsp; کچے گھر میں رہتی ہیں۔

وہ کہتی ہیں کہ ان کے باپ دادا دہائیوں سے یہاں آباد تھے۔ شناختی کارڈ بنوانے جاتے ہیں تو نادرا والے بجلی کا بل مانگتے ہیں۔ یہاں کبھی گیس اور بجلی تھی ہی نہیں تو بل کہاں سے لائیں۔

&quot;زمیندار تو ہمیشہ سے پردیس میں رہتے ہیں۔ یہاں سارا کام &#39;کمدار&#39; سنبھالتے تھے جن کو ووٹ دیئے تھے وہ بھی ان کا تحفظ نہیں کر رہے۔&quot;

سکول ٹیچر میر اعجاز بتاتے ہیں کہ حیدرآباد شہر سے دس کلومیٹر شمال مشرق میں &#39;دبی&#39; کا میدان ہے۔ سندھ پر قبضے کے لیے انگریز فوج نے حملہ کیا تو اس کا حکمران ٹالپور خاندان کے ساتھ 24 مارچ 1843 کو یہیں بڑا معرکہ ہوا۔

انگریز فوج جنرل چارلس نیپیئر اور سندھی فوج اپنے سپہ سالار ہوش محمد شیدی کی قیادت میں لڑی۔ ہوش محمد بہادری سے لڑے اور شہید ہو گئے۔ان کا نعرہ &#39;مرویسوں پر سندھ نہ ڈیسوں&#39; آج بھی لوگوں کی زبان پر ہے۔ انگریز جنرل نے وہاں یادگار بنوائی۔ شہید ہوش محمد کی یادگار بھی وہیں تعمیر کرائی گئی۔ قریب ہی&nbsp; شھید ہوش محمد کا مزار بھی ہے۔

میر اعجاز کہتے ہیں کہ یہ علاقہ بھی اب بلڈرز کی نظر میں ہے جہاں کل کوئی ہاؤسنگ سکیم بن رہی ہو گی۔

قیمتی جنگل ہاوسنگ سوسائٹی میں تبدیل ہو رہا ہے

ضلع دادو کی تحصیل خیرپور ناتھن شاہ کے ایک خیمہ سکول میں پرائمری سکول کے بچے مشکل حالات میں تعلیم حاصل کر رہے ہیں۔ گزشتہ برس آنے والے سیلاب کے اثرات نے تاحال اس علاقے کا پیچھا نہیں چھوڑا۔ یہاں نہ تو بجلی ہے اور نہ ہی پینے کا صاف پانی میسر ہے۔

عرضی نائچ نامی گاؤں میں واقع اس سکول میں پسینے میں شرابور تیسری اور پانچویں جماعت کے طالب علم فراز اور فیاض بتاتے ہیں کہ خیمے میں گرمی کی شدت اتنی ہے کہ پڑھنا لکھنا دشوار ہو جاتا ہے۔

گزشتہ برس ایم این وی ڈرین اور سپریو بند سے داخل ہونے والا سیلابی پانی عرضی نائچ کے بوائز پرائمری سکول کے علاوہ مڈل سکول اور گرلز پرائمری سکول میں جا پہنچا تھا۔

عرضی نائچ میں سو سے زیادہ بچوں کو تعلیم دینے والے بوائز سکول کی عمارت شکستہ ہو گئی ہے۔ اسی گاؤں میں واقع مڈل سکول کے استاد عبدالستار نائچ نے بتایا کہ سیلابی پانی سے سکول کی بیرونی دیوار منہدم ہو گئی اور کمرے اور واش روم بھی گر گئے تھے۔

&quot;پانی اترنے پر یونیسف اور سیو دی چلڈرن نامی غیر سرکاری تنظیم نے خیمے لگا کر عارضی سکول قائم کرنے میں مدد دی۔ البتہ گرمیوں میں خیمے کے اندر پڑھنا اور پڑھانا کسی عذاب سے کم نہیں ہے۔ 10 مہینوں سے بچے اسی خیمے میں زیرتعلیم ہیں۔ بارشوں کا موسم لوٹ آیا ہے لیکن سکول کا تعمیراتی کام شروع نہیں ہوا۔&quot;

انہوں نے بتایا کہ 2010ء میں آنے والے سیلاب کے دوران بھی سکول کی عمارت پانی میں گھس آیا تھا مگر یہ قائم رہی۔

یہاں سے چند کلومیٹر دور گرلز پرائمری سکول لدھاں کی طالبات خستہ حال کمرے کے فرش پر چٹایاں بچھائے بیٹھی ہیں۔

چوتھی جماعت کی طالبہ سلمیٰ کہتی ہیں کہ سیلاب کے بعدچند ماہ تک سکول بند رہا۔ پانی خشک ہونے کے بعد طالبات واپس آئیں تو کرسیاں اور ڈیسک کھڑے پانی میں خراب ہو چکے تھے۔ اب سکول کی ڈیڑھ سو طالبات تین کمروں میں فرش پر بیٹھ کر تعلیم حاصل کر رہی ہیں۔

گزشتہ برس آنے والے سیلاب نے خیرپور ناتھن میں بڑے پیمانے پر تباہی مچائی۔ چار لاکھ نفوس پر مشتمل اس تحصیل کے بیشتر علاقوں میں تین ماہ تک پانی کھڑا رہا۔ اس دوران مقامی سماجی کارکن عابد ببر اپنی کشتی میں لوگوں کو محفوظ مقامات پر پہنچاتے رہے۔

ان کا کہنا ہے کہ خیرپور ناتھن شاہ کی 18 میں سے 15 یونین کونسلوں میں پانی ہی پانی تھا۔ صرف سیتا، بورڑی اور ککڑ محفوظ رہیں۔ بیشتر سکولوں کی عمارتیں گر گئیں یا ان کی بنیادیں ہل گئیں۔

انہوں نے بتایا کہ عرضی نائچ اور لدھاں کے علاوہ کئی گاؤں جیسا کہ محمد بخش لغاری، لولجا، کاتڑی اور ستار ڈنو ڈیپر میں سکول خیموں میں منتقل ہو گئے ہیں۔ حکومت کی طرف سے سکولوں کی بحالی کا کام شروع نہیں ہوا۔ خیمے بھی تھر دیپ، سیو دی چلڈرن اور دیگر غیر سرکاری تنظیمیں دے رہی ہیں۔

خیرپور ناتھن شاہ میں تعلقہ ایجوکیشن آفیسر پرائمری لطف علی کھوسو نے لوک سجاگ کو بتایا کہ گزشتہ سیلاب میں اس تحصیل کی 15 یونین کونسلوں کے سارے پرائمری سکول پانی میں ڈوب گئے تھے۔ پٹڑائی بگھیو، ٹھارو آرائیں اور جبل ببر کے پرائمری سکولوں کی مثال دیتے ہوئے انہوں نے کہا کہ ان کی عمارتیں گر چکی ہیں۔

ان کے مطابق پٹڑائی بگھیو نامی گاؤں میں ایک گرلز پرائمری سکول کی طالبات اس گرمی میں درخت کے نیچے پڑھ رہی ہیں۔ واش روم گر چکے ہیں جن کی غیر موجودگی میں لڑکیوں کو بہت دشواری ہوتی ہے۔

انہوں نے کہا کہ اس وقت تھردیپ اور بعض دیگر غیر سرکاری تنظیمیں واش روم کی تعمیر کے لیے سروے کر رہی ہیں۔ تاہم سکول کی تعمیر کا کوئی شیڈول نہیں دیا گیا۔

لطف علی کھوسو نے بتایا کہ خیرپور ناتھن شاہ میں پرائمری سکولوں کی کل تعداد 335 ہے۔ ان میں 52 گرلز اور 283 بوائز سکول ہیں جن میں کل 32 ہزار طلبہ و طالبات زیر تعلیم ہیں۔ لڑکیوں کے آٹھ اور لڑکوں کے 30 پرائمری سکول مکمل طور پر خیموں میں منتقل ہو چکے ہیں۔

خیرپور ناتھن شاہ میں تعلقہ ایجوکیشں آفیسر سیکنڈری علی بخش چانڈیو نے بتایا کہ تحصیل میں 17 ہائی اور سیکنڈری سکول قائم ہیں جن کا انفراسٹرکچر جزوی یا کلی طور پر تباہ ہو چکا ہے۔

28 مئی کو محتسب اعلیٰ سندھ نے علاقے کا دورہ کیا اور ان سکولوں میں طلبا و طالبات کو درپیش مشکل حالات پر تشویش کا اظہار کیا۔ انھوں نے حکام کو سکولوں کی مرمت اور تعمیر کا کام مکمل کر کے رپورٹ دینے کی ہدایت کی۔

ضلع دادو میں محکمہ ایجوکیشن ورکس کے انجنیئر محمد جمن زرداری کا کہنا ہے کہ محکمے نے تحصیل کے تمام سکولوں کی مرمت کے ٹینڈر جاری کر دیے ہیں اور ان کی تعمیر بھی جلد شروع ہو جائے گی۔

بہا کر لے گیا سیلاب سب کچھ: خیرپور کی بستی مہیر ویسر کا سرکاری سکول تین ماہ سے زیر آب، بچوں کی تعلیم چھوٹ گئی

بجلی ہے نہ پانی نہ بیت الخلا: سیلاب سے برباد خیرپور ناتھن شاہ کے طلبہ کا امتحان ختم نہ ہو سکا

سندھ میں لاکھڑا کے مقام پر تقریباً 200 دیہات کی زرخیز زمین پچھلے 38 سال میں رفتہ رفتہ بنجر ہو چکی ہیں۔ کبھی یہاں ہری بھری چراگاہیں ہوا کرتی تھیں لیکن اب اس جگہ گھاس بھی نہیں اگتی اور میٹھے پانی کے کنویں کھاری ہو گئے ہیں۔

لاکھڑا میں وسیع رقبے پر کوئلے کی کان کنی ہوتی ہے اور یہاں پائے جانے والے کوئلے کے ذخائر ملک میں کسی بھی جگہ سے زیادہ ہیں۔ 1985 میں پہلی مرتبہ اس علاقے میں کوئلے کی کان کنی کا ٹھیکہ دیا گیا تھا جس کے بعد لاکھڑا کا قدرتی ماحول خراب ہوتا چلا گیا جو آج بدترین حالت کو پہنچ چکا ہے۔

مقامی گاؤں تاج محمدکھوسو کے رہائشی اکرم، ملوک اور یتیم کھوسو بتاتے ہیں کہ کوئلے کی کان کنی نے اس علاقے میں رہنے والوں کی صحت کو بری طرح متاثر کیا ہے۔

&quot;کان کنی شروع ہونے سے پہلے اور اس سے کچھ عرصہ بعد تک اس علاقے میں سرسبز کھیت لہلہاتے تھے۔&nbsp; برساتی نالے کے پانی سے کاشت کاری کی جاتی تھی۔ کنوؤں سے پینے کا صاف پانی ملتا تھا۔ لیکن کوئلے نے رفتہ رفتہ سب کچھ ختم کر دیا۔&quot;

ان کا کہنا ہے کہ کوئلے نکالنے والی کمپنیاں دریائے سندھ سے پانی کے ٹینکر بھر کر مقامی آبادی کو دے جاتی ہیں جو پینا تو درکنار نہانے دھونے کے قابل بھی نہیں ہوتا۔ آلودہ پانی سے دیہات کے لوگ بیمار ہو رہے ہیں۔ پیٹ کی بیماریاں اور الرجی عام ہے۔ کوئلے کی کانوں سے نکلنے والی زہریلی گیسوں کے باعث سانس کے مسائل پیدا ہو رہے ہیں جن سے انسانوں کے علاوہ مویشیوں کی صحت پر بھی برا اثر پڑ رہا ہے۔

انہوں نے بتایا کہ کمپنیاں کان کنی کے علاقے میں توسیع کر رہی ہیں جس کے باعث لوگوں سے ان کے گاؤں خالی کرائے جا رہے ہیں۔

&quot;زمین کا سروے ریکارڈ ہمارے نام پر ہے مگر کمپنیوں کے مالکان، مینجر اور ٹھیکیدار زمین حکومت سے لیز پر لینے کا دعویٰ کر کے قبضے کر رہے ہیں۔ اب کارو جبل، کیر تھر جبل اور تھانا بولا خان کے مقام تک کوئلہ نکالا جانے لگا ہے۔ اس سے مانجھند، کھانوٹ، دیہ لیلاں اور بھگڑا کے 100 سے زیادہ گاؤں متاثر ہو رہے ہیں۔&quot;

&nbsp;یہاں کام کرنے والی حاجی جمیل کول کمپنی کے مزدور رہنما نعیم خان کا کہنا ہے کہ کوئلے کی مانگ میں اضافہ ہو رہا ہے اور اسی وجہ سے کان کنی کے علاقوں میں بھی توسیع ہو رہی ہے۔ 
محکمہ توانائی کے ذیلی ادارے انسپیکٹوریٹ آف کول مائنز ڈویلپمنٹ کی جانب سے لاکھڑا کے لیے مقرر کردہ چیف انسپکٹر&nbsp; قمر الدین سومرو کے مطابق اس علاقے میں 50 ہزار سے زیادہ رقبے پر 60 سے زیادہ کمپنیاں کوئلہ نکالنے کا کام کر رہی ہیں۔

کان کنی کرنے والی کمپنیاں کہتی ہیں کہ وہ جس علاقے میں کام کرتی ہیں وہاں لوگوں کو بڑے پیمانے پر روزگار میسر آتا ہے۔

تاہم ملوک کے مطابق کان کنی کرنے والے بیشتر مزدور غیر مقامی ہیں اور مقامی لوگوں کو چھوٹا موٹا روزگار ہی دیا جاتا ہے۔

لاکھڑا کول مائنز لیبر یونین کے نائب صدر شرف الدین تصدیق کرتے ہیں کہ یہاں مزدوری کرنے والوں میں مقامی لوگوں کا تناسب بہت کم ہے۔ ان کا کہنا ہےکہ 80 فیصد مزدور خیبرپختونخوا سے آتے ہیں جبکہ مقامی لوگوں کو کانوں کی دیکھ بھال یا چوکیداری اور گاڑیوں میں کوئلہ لوڈ کرنے کا کام ہی ملتا ہے۔

&nbsp;کوئلے کی ان کانوں کے مزدوروں کو کام کے دوران ضروری تحفظ فراہم نہ کیے جانے کا مسئلہ بھی نمایاں ہے۔ مزدور شکایت کرتے ہیں کہ انہیں کام کے دوران حفاظتی کٹس نہیں دی جاتیں جس سے حادثات کی صورت میں جان جانے یا زخمی ہونے کا خطرہ بڑھ جاتا ہے۔

سندھ تحفظ ماحولیات ایجنسی حیدر آباد ریجن کے ڈائریکٹر عمران عباسی کہتے ہیں کہ کوئلے کی کمپنی کے لیے لازم ہے کہ وہ اپنے ورکرز کو مکمل سیفٹی کٹ، آکسیجن ماسک، ہیلمٹ، بوٹ اور دستانے فراہم کرے۔ ایسا نہ کرنے پر کارروائی عمل میں لائی جاتی ہے۔

ان کا کہنا ہے کہ گزشتہ ماہ حد سے زیادہ کھدائی کرنے اور مزدوروں کو سیفٹی کٹ نہیں دینے پر لاکھڑا کول مائنز میں کوئلے کی 13 کمپنیوں کو نوٹس دیے گئے۔

مقامی شہری گل شیر کھوسو کو شکایت ہے کہ جب کسی کان سے کوئلہ نکال لیا جاتا ہے تو اس کا منہ بند نہیں کیا جاتاجس کے نتیجے میں مال مویشی اس میں گر کر ہلاک ہو جاتے ہیں۔ انہوں نے بتایا کہ اگر کوئی مقامی فرد کان میں گر کر ہلاک ہو جائےتو اس پر کمپنی معاوضہ نہیں دیتی۔ 
&quot;ایسے مواقع پر مزدور یونین بھی ہماری مدد نہیں کرتی کیونکہ اس میں اکثر عہدیدار دوسرے علاقوں سے تعلق رکھتے ہیں۔ کانوں میں حادثے سے ہونے اولی موت پر سوات اور خیبر پختونخوا سے آنے والے مزدوروں کو 13 لاکھ روپے دیے جاتے ہیں مگر مقامی لوگوں کو کچھ نہیں ملتا۔&quot;

نعیم خان نے بتایا کہ ہر سال کانوں میں 40 سے زیادہ مزدور ہلاک ہو جاتے ہیں۔ ان کی میتیں ان کے آبائی گاؤں یا شہر بھیج دی جاتی ہیں۔ بعض مزدور حادثات میں معذور ہوتے ہیں جن کا علاج ہوتا ہے۔ ان کا کہنا تھا کہ&nbsp; یہاں محکمہ سوشل ویلفیئر کی جانب سے یہاں ہسپتال تعمیر کیا گیا ہے۔

تھرپارکر میں کوئلے سے بجلی کی پیداوار: 'ہماری زمینیں زبردستی لی جا رہی ہیں اور ہمارا رہن سہن بدلا جا رہا ہے'۔

اجڑے دیہات، بنجر زمینیں، کھاری پانی: لاکھڑا میں کوئلے کی کانوں نے ماحول اور زندگیاں برباد کر دیں

ٹنڈو محمد خان کی سول ہسپتال روڈ پر سائیکلوں کی مرمت اور پنکچر لگانے کی دکان ہے جہاں اکا دکا گاہک دکھائی دیتے ہیں۔ چھوٹی سی اس دکان میں خراب سائیکلوں اور ان کے پرزوں کا ڈھیر پڑا رہتا ہے جس کے بیچوں بیچ بمشکل چند لوگ بیٹھ سکتے ہیں۔

یہ دکان 58 سالہ تن ساز محمد فرید شیدی کی ہے جنہوں نے 1992ء میں بھارت کے شہر بنگلور میں ہونے والی انڈو پاک تن سازی (باڈی بلڈنگ) چیمپئن شپ میں سونے کا تمغہ جیتا تھا۔

تن سازی میں ان کی کامیابیوں کی لمبی فہرست کے ساتھ ان کی غربت کا دورانیہ بھی طویل ہے۔

وہ بنگلور میں ملنے والی کامیابی کے بعد عوامی پذیرائی کو سراہتے ہیں تاہم انہیں حکومت اور انتظامیہ سے گلہ ہے۔

&quot;جب میں بنگلور سے واپس ٹنڈو محمد خان پہنچا تو پورے شہر نے میرا زبردست استقبال کیا اور عوام نے بہت عزت افزائی کی۔ مگر حکومت یا ضلعی انتظامیہ کی جانب سے کوئی ہاتھ ملانے بھی نہ آیا۔&quot;

فرید کے مطابق 1991ء میں انہوں ںے کراچی ریلوے اسپورٹس ہال میں پاکستان ریلویز کے تعاون سے ہونے والے آل پاکستان مقابلے میں جونیئر مسٹر پاکستان کا ٹائٹل جیتا تھا۔ اس سے پہلے 1987ء میں وہ مسٹر ٹنڈو محمد خان بن چکے تھے۔ اس کے بعد انہوں ںے مسٹر حیدرآباد ڈویژن اور مسٹر سندھ کا اعزاز بھی حاصل کیا۔

کھیل کے میدان میں ملنے والی کامیابیوں کے باوجود انہیں متواتر معاشی مشکلات کا سامنا رہا۔

فرید نے بتایا کہ انہوں نے غربت اور بے روزگاری سے تنگ آ کر بنگلور میں ملنے والا سونے کا تمغہ 1997 میں 27 ہزار روپے میں بیچ دیا تھا۔ اس رقم سے انہوں نے سائیکل مرمت کرنے والے اوزار خریدے اور یہ دکان کھول لی۔ آج بھی یہی دکان ان کا واحد ذریعہ معاش ہے جس میں وہ اکیلے ہی سائیکل مرمت کرتے ہیں اور اس کام سے روزانہ پانچ سے سات سو روپے تک کما لیتے ہیں۔

فرید شیدی کہتے ہیں کہ اگر حکومت کرکٹ کی طرح تن سازی کے لیے فنڈ یا وظیفہ مقرر کرتی اور اس کھیل اور کھلاڑیوں کو اسپانسر ملتے تو انہیں اپنا میڈل بیچنا نہ پڑتا۔

وہ میڈل کے ساتھ ملنے والی اعزازی شیلڈ بھی بیچ چکے ہیں۔

ان کا کہنا ہے کہ مستقبل کے خدشات کی وجہ سے وہ اپنے بچوں کو باڈی بلڈنگ کی طرف نہیں لائے البتہ بہت سے لوگ ان کے شاگرد اور مداح ہیں۔

ٹنڈو محمد خان کے مصطفیٰ نے بھی فرید شیدی سے باڈی بلڈنگ کا فن سیکھا ہے۔ وہ بتاتے ہیں کہ فرید شیدی کئی کلبوں کے کوچ بھی رہے ہیں۔ مگر افسوس کی بات ہے کہ کئی بڑے اعزازات ملنے کے باوجود وہ سائیکلیں مرمت کر کے روزی کمانے پر مجبور ہیں۔

حیدر آباد میں کام کرنے والے سینئر صحافی نیاز بالم بتاتے ہیں کہ اب باڈی بلڈنگ کے لیے مہنگی مشینیں آ گئی ہیں اور جِم کی فیس بھی بہت بڑھ گئی ہے۔ حیدر آباد میں کم فیس لینے والے دو ہی کلب ہیں۔ اب لوگ اپنا جسم بہتر بنانے کے لیے تو تن سازی کرتے ہیں مگر اسے بطور کھیل اپنانے کا رحجان کم ہو گیا ہے۔ تاہم کسی طرح کی سرکاری سرپرستی کے بغیر اب بھی شہر میں تن سازی کی سرگرمیاں ہوتی رہتی ہیں۔

اسی سلسلے میں رواں برس 20 مارچ کو حیدر آباد کے ہیلتھ اینڈ ویلتھ باڈی بلڈنگ کلب نے تن ساز نوجوانوں کی حوصلہ افزائی کے لیے مہران آرٹ کونسل میں ایک مقابلہ منعقد کیا تھا جس میں حیدر آباد، میرپور خاص، کراچی اور دیگر شہروں سے نوجوان تن سازوں نے حصہ لیا۔

اس کلب کے سی ای او مدثر عیسانی نے بتایا کہ بہت سے لوگ تن سازی کا شوق رکھتے ہیں مگر محکمہ کھیل کی طرف سے انہیں کوئی مدد نہیں دی جاتی۔ اگر حکومت کرکٹ کے طرح باڈی بلڈنگ کا کوئی بورڈ بنائے یا وظیفہ مقرر کرے تو پاکستان کے نوجوان اس میدان میں پوری دنیا میں اپنا لوہا منوا سکتے ہیں۔

حیدر آباد کی ڈسٹرکٹ اسپورٹس آفیسر مریم کیریو کے مطابق کچھ عرصہ پہلے سندھ میں باڈی بلڈنگ کی ترویج کے لیے فنڈ مختص کیے جاتے تھے۔ اب باڈی بلڈنگ کی بہت سی تنظیمیں اور فیڈریشنیں بن گئی ہیں جن کےآپس میں جھگڑے بھی رہتے ہیں۔ اپنی تنظیم یا فیڈریشن کو اصلی اور دوسری کو جعلی بتانا عام ہے۔ اسی چپقلش کی وجہ سے کسی کو بھی فنڈ نہیں دیے جاتے۔

سندھ اولمپک ایسوسی ایشن کے جنرل سیکریٹری احمد علی راجپوت کا کہنا ہے کہ ایسوسی ایشن کے پاس باڈی بلڈنگ سمیت 36 کھیل رجسٹرڈ ہیں۔ ان میں کسی بھی کھیل کو حکومت فنڈز نہیں دیتی۔ لوگ اپنی مدد آپ کے تحت تن سازی اور دیگر کھیلوں کو جاری رکھے ہوئے ہیں۔ تاہم زیادہ تر نوجوانوں کے لیے اس کھیل کو جاری رکھنا ممکن نہیں ہوتا کیونکہ اس کے لیے انہیں تن سازی کی جدید سہولیات اور مالی وسائل درکار ہوتے ہیں جنہیں پورا کرنا ہر کسی کے بس کی بات نہیں۔

اولمپکس مقابلے: جذبہ جواں، صلاحیت بھرپور لیکن پھر بھی جیت ابھی تک ایک خواب۔

چار دن کی چاندنی اور پھر: 'میں نے سونے کا تمغہ بیچ کر سائیکل مرمت کرنے کا سامان خرید لیا'

سانگھڑ کی تحصیل سنجھورو کے غلام علی لغاری چالیس سال تک ایک زمیندار گھرانے کے کھیتوں میں مزدوری کرتے رہے۔ تقریباً دس سال پہلے زمین مالکان نے انہیں بے دخل کیا تو انہوں نے اپنا حق مانگا جس پر ان کے گھر کو آگ لگا دی گئی جس میں ان کے مویشی، آٹے کی چکی، موٹرسائیکل اور جمع پونجی سمیت سب کچھ جل کر راکھ ہو گیا۔

غلام علی کے بیٹے منظوری لغاری بتاتے ہیں کہ زمینداروں نے ان کے والد کے 26 لاکھ روپے دینا تھے۔ انہوں نے اپنا حق اور گھر کے نقصان کا معاوضہ لینے کے لیے سندھ ٹیننسی ایکٹ کے تحت اس وقت سانگھڑ کے اسسٹنٹ کمشنر کو درخواست دی جو اس طرح کے تنازعات پر فیصلہ دینے کے مجاز تھے۔ اسسٹنٹ کمشنر نے کیس سننے کے بعد ان کے حق میں فیصلہ دے دیا۔ تاہم زمینداروں سے اس فیصلے پر عمل نہ کرایا جا سکا۔ چنانچہ غلام علی نے سندھ ہائی کورٹ میں رٹ کر دی۔

ہائی کورٹ کے حیدرآباد بینچ نے 30 جولائی 2019 کو غلام علی کے حق میں فیصلہ دیا لیکن اس وقت تک ان کی وفات ہو چکی تھی۔ عدالت نے سیشن جج سانگھڑ اور جوڈیشل مجسٹریٹ کو حکم دیا کہ تین ماہ میں اس فیصلے پر عملدرآمد کرایا جائے۔ اپنے فیصلے میں عدالت کا کہنا تھا کہ سندھ ٹیننسی ایکٹ کے تحت زمیندار نہ تو ہاری/کھیت مزدور سے بیگار لے سکتا ہے اور نہ ہی اسے زمین سے بے دخل کر سکتا ہے۔

سندھ حکومت نے اس فیصلے کو سپریم کورٹ میں چیلنج کر رکھا ہے۔ سیشن جج سانگھڑ کا کہنا ہے کہ جب سپریم کورٹ فیصلہ دے گی تو تب ہی غلام علی کے لواحقین کو ان کا حق ملے گا۔

سندھ ٹیننسی ایکٹ 1952 میں بنایا گیا تھا۔ اس قانون کے تحت زمین مالکان کے خلاف کسانوں کی شکایات بیوروکریسی سنتی ہے۔ تاہم اکثر مواقع پر کسان یہ شکوہ کرتے دکھائی دیتے ہیں کہ سرکاری افسروں پر بڑے زمینداروں کے اثرورسوخ کے باعث کسانوں/ہاریوں کو انصاف نہیں ملتا۔

غلام علی کے کیس میں عدالت نے اسسٹنٹ کمشنروں سے کسانوں اور مزدوروں کے کیس سننے کا اختیار بھی واپس لے لیا ہے اور قرار دیا ہے کہ اب ایسے مقدمات ہائی کورٹ دیکھے گی۔

سندھ کے انڈسٹریل ریلیشنز ایکٹ 2013 کو اس مسئلے کے حل کی جانب ایک دور رس اقدام کے طور پر دیکھا جاتا ہے۔ اس قانون سازی کی بدولت غلام علی جیسے کسان صنعتی مزدوروں کی طرح یونین بنا کر اپنے آجروں سے لین دین کر سکتے ہیں۔ علاوہ ازیں، اس ایکٹ کے تحت حکومت نے ان کسانوں کے لیے 50 کروڑ روپے بھی مختص کیے ہیں جو ان کی بہبود پر خرچ کیے جائیں گے۔

پاکستان نیشنل ٹریڈ یونین کے رہنما ناصر منصور کا کہنا ہے کہ اس ایکٹ میں انہیں قانونی طور پر مزدور تسلیم کیا جا چکا ہے اور اصولی طور پر وہ ان تمام رائج قوانین سے فائدہ اٹھا سکتے ہیں جو مزدوروں کے حقوق کے تحفظ کے لیے بنائے گئے ہیں۔ ان میں کسانوں/کھیت مزدوروں کی سوشل سکیورٹی کے اداروں میں رجسٹریشن اور ان کے خاندان کی ہیلتھ انشورنس بھی شامل ہیں۔ اگر کام کے دوران کسی کسان کو چوٹ لگ جائے یا اس کی موت ہو جائے تو قانون کے تحت متاثرہ فرد یا اس کے اہلخانہ معاوضے کے بھی حقدار ہیں۔

تاہم صوبائی محکمہ محنت کے لا افسر ریجھو مل کا کہنا ہے کہ کسانوں کے لیے سوشل سکیورٹی، ھیلتھ انشورنس، ای او بی آئی اور پینشن کے لیے زمینداروں سے پیسے اور مراعات لینا آسان کام نہیں ہے۔ اس کی وجہ یہ ہے کہ سندھ میں کسانوں اور ماہی گیروں کو یونین سازی کے حقوق تو مل گئے ہیں مگر اس قانون کے تحت قواعد و ضوابط ابھی ترتیب نہیں دیے جا سکے جن میں کافی وقت لگ سکتا ہے۔

قواعد و ضوابط نہ ہونے کی وجہ سے کسانوں کو ایمپلائیز اولڈ ایج بینیفٹ انسٹیٹیوشن کے ادارے اور سوشل سکیورٹی کے محکمے میں رجسٹرڈ نہیں کیا جا سکا۔ ریجھو مل کے مطابق اس مقصد کے لیے ان کا محکمہ کسانوں کی تنظیموں اور زمینداروں سے مشاورت کر رہا ہے۔ ان کا کہنا ہے کہ کپڑے کی فیکٹریوں، کارخانوں یا ملوں میں خام مال زرعی زمینوں سے ہی لایا جاتا ہے۔ اس قانون کے بعد ہوسکتا ہے کہ مستقبل میں فیکٹری مالکان کسانوں کو بھی سوشل سکیورٹی اور صحت کی انشورنس کے لیے مدد دیں۔

محکمہ محنت حیدرآباد ریجن کے ریجنل ڈائریکٹر غلام سرور نے بتایا کہ کسانوں اور ماہی گیروں کو انڈسٹریل ریلیشنز ایکٹ 2013 کے تحت یونین سازی کا حق ملنے کے بعد ان کے ادارے نے کسانوں کی 10 تنظیموں اور ایک فیڈریشن کو رجسٹرڈ کر لیا ہے۔ انہوں نے بتایا کہ سوشل سکیورٹی، ای او بی آئی اور پینشن دینا ان کے ادارے کی ذمہ داری نہیں ہے۔ اس مقصد کے لیے کسانوں اور ماہی گیروں کے آجر انہیں اجرت کا پانچ فیصد ادا کریں گے تو تبھی انہیں یہ سہولتیں مل سکیں گی۔

دوسری جانب زمینداروں اور آبادکاروں کی تنظیم ایوان زراعت سندھ کے مرکزی جنرل سیکرٹری زاہد بھرگڑی کا کہنا ہے کہ &#39;&#39;ہم زمیندار اپنے کسانوں کو زرعی پیداوار میں حصے دار سمجھتے ہیں۔ چونکہ ہم کسان کو پہلے ہی پیداوار میں حصہ دے رہے ہوتے ہیں اس لیے انہیں دوسری مراعات دینے کے پابند نہیں ہیں۔&#39;&#39;

سانگھڑ، بدین، ٹنڈو اللہ یار، دادو، نواب شاہ اور ٹھٹہ اضلاع سے تعلق رکھنے والے کسانوں رزاق، منظور، مختیار اور دیگر نے بتایا کہ اب تو کسانوں کو آدھا حصہ بھی نہیں ملتا اور اکثر زمیندار انہیں دیہاڑی دار مزدور کی حیثیت سے ہی ملازمت دیتے ہیں۔ ان کا کہنا ہے کہ زمینداروں کے ہاں کھیت مزدوری کرنے والے بہت سے کسان نہ صرف اپنے پیشہ وارانہ حقوق بلکہ بنیادی انسانی حقوق سے بھی محروم رہتے ہیں۔

ہاری ویلفیئر ایسوسی ایشن کی رپورٹ کے مطابق سندھ میں کھیت مزدوروں کی بڑی تعداد زمینداروں کی نجی جیلوں میں قید ہے۔ 2021 میں عدالتی احکامات پر ایسے 1465کسانوں کو ان جیلوں سے رہائی دلائی گئی جن میں 445 بچے اور521 خواتین بھی شامل تھیں۔ اس سے پہلے 2013 سے 2021 تک دس ہزار 190 افراد کو ان جیلوں سے بازیاب کرایا گیا تھا۔

راشد لغاری

راشد لغاری حيدرآباد سنده سے تعلق رکھتے ہیں. بطور رپورٹر صحافی. ماحولیات, انسانی حقوق اور سماج کے پسے طبقے کے مسائل کے لیے رپورٹنگ کرتے رہیں ہیں۔

دوسو روپے کی شراب چند گھنٹوں میں ہی جان لے لیتی ہے

حیدرآباد سول ہسپتال سے بچوں کے اغوا میں کون ملوث ہے؟