میانوالی کے محمد رومان خان سول سیکرٹیریٹ لاہور میں ملازم ہیں۔ ہر جمعے کی شام وہ اپنے آبائی شہر جاتے ہیں اور اتوار کی شام لاہور کے لیے روانہ ہوتے ہیں۔ وہ کہتے ہیں کہ پچھلے دو سال سے انہیں میانوالی کے لاری اڈے پر شدید کوفت کا سامنا کرنا پڑ رہا ہے کیونکہ اس جگہ کوئی ویٹنگ روم (انتظارم گاہ) نہیں ہے اور شدید گرمی سردی میں انہیں سڑک پر کھڑے ہو کر بس کا انتظار کرنا پڑتا ہے۔

شفیق احمد کپڑے کے کاروبار سے وابستہ ہیں۔ ان کے سسرال کا تعلق سرگودھا سے ہے اور وہ اکثر اپنے بیوی بچوں کو سرگودھا لے جانے کے لیے اسی اڈے سے بس پکڑتے ہیں۔

ان کا کہنا ہے کہ اگر ساتھ بیوی بچے سفر کر رہے ہوں تو زیادہ پریشانی ہوتی ہے کیونکہ اس اڈے پر نہ تو بیٹھنے کے لیے کوئی جگہ ہے اور نہ ہی کہیں سایہ دکھائی دیتا ہے حتیٰ کہ بیت الخلا کی سہولت بھی نہیں ہے۔

تحریکِ انصاف کے دور حکومت میں میانوالی میں متعدد ترقیاتی منصوبے شروع کیے گئے تھے۔ لاری اڈے کی تعمیرنو کا منصوبہ انہی میں سے ایک ہے۔ 27 کروڑ 40 لاکھ روپے کی لاگت سے شروع ہونے والے اس منصوبے میں بسوں کے ٹرمینل، ٹوائلٹ بلاک اور مسافر خانہ تعمیر کیا جانا تھا۔

تعمیرنو کا یہ عمل مارچ 2023ء میں مکمل ہونا تھا مگر نگران حکومت آنے کے بعد اس کے لیے فنڈ جاری نہیں کیا گیا نتیجتاً ٹھیکیدار نے کام روک دیا۔

اب اڈے کی نئی عمارت کا ڈھانچہ تیار ہو چکا ہے۔ تعمیراتی کام شروع ہونے کے بعد تمام بس ٹرمینل سروس روڈ پر منتقل کر دیے گئے تھے جہاں بڑی تعداد میں مسافر بسوں پر سوار ہوتے اور اترتے ہیں۔

ٹرمینل کی سڑک پر منتقلی سے صفائی کا انتظام بھی خراب ہو گیا ہے۔ ملازمت کے لیے پچھلے 10 سال سے عیسیٰ خیل جانے آنے والے احمد جمال خان کہتے ہیں کہ سڑک پر بس سٹینڈ بنا دینے سے گندگی کے ڈھیر لگ گئے ہیں جس کی وجہ سے یہاں کچھ دیر کھڑا ہونا بھی محال ہے۔

میانوالی میں تعینات ایس ڈی او بلڈنگ ڈیپارٹمنٹ فیض شبیر کا کہنا ہے کہ اس جگہ سٹیٹ آ&#39;ف دی آرٹ&#39; لاری اڈا بنایا جا رہا ہے جس سے مسافروں کو سہولیات کی فراہمی کے علاوہ شہر کی خوبصورتی میں بھی اضافہ ہو گا۔

انہوں نے بتایا کہ اڈے کے لیے مختص کیے جانے والے 27 کروڑ 40 لاکھ روپے میں سے اب تک صرف 10 کروڑ روپے کے قریب ہی فنڈ جاری ہوئے ہیں۔

&quot;بدقسمتی سے حکومت کی تبدیلی کے بعد فنڈ روک دیے گئے تھے ورنہ مارچ 2023ء میں یہ منصوبہ تکمیل کو پہنچ جاتا۔ ہماری کوشش ہے کہ فنڈ میسر آنے پر جلد از جلد اسے مکمل کر لیا جائے کیونکہ روزانہ ہزاروں مسافروں کو تکلیف اٹھانا پڑ رہی ہے&quot;۔

نیازی ایکسپریس میانوالی کے منیجر فیصل خان نے لوک سجاگ کو بتایا کہ لاری اڈے کی تکمیل میں تاخیر سے ان کا کاروبار شدید متاثر ہوا ہے۔ بیٹھنے کی مناسب جگہ نہ ہونے سے دن کے وقت نکلنے والی بسوں میں مسافروں کی تعداد نصف سے بھی کم رہ گئی ہے۔

&quot;ہمیں مجبوراً&nbsp; کم بسیں چلانا پڑ رہی ہیں۔ سڑک پر منتقلی سے قبل ہر ایک گھنٹے بعد اڈے سے بس نکلتی تھی لیکن اب ہر تین گھنٹے بعد نکلتی ہے اور اس میں بھی سواریاں بمشکل پوری کی جاتی ہیں۔

ٹرانسپورٹروں کے علاوہ شہر کے سیکڑوں رہائشیوں کا روزگار بھی اسی لاری اڈے سے منسلک ہے۔ ان میں ایک مشہور چائے خانے کے مالک خدا بخش بھی ہیں۔ انہوں نے لوک سجاگ کو بتایا کہ وہ لاری اڈے میں گزشتہ 35 سال سے چائے خانہ چلا رہے ہیں۔

&quot;اڈے کی ازسر نو تعمیر کے لیے ہونے والی کھدائی سے ہر طرف مٹی کے ڈھیر لگ گئے ہیں جس کی وجہ سے اب ہماری دکان تک پیدل ہی پہنچا جا سکتا ہے۔ پہلے ہمارے پاس تل دھرنے کی جگہ نہیں ہوتی تھی لیکن اب اکا دکا لوگ ہی یہاں چائے پینے آتے ہیں۔&quot;

لاری اڈے پر کام کرنے والے سرکاری ٹھیکیدار عطا اللہ خان نے بتایا کہ اس منصوبہ کا تقریباً نصف کام مکمل ہو چکا ہے۔ اب حکومت کی طرف سے فنڈ روکے جانے کے سبب کام بند پڑا ہے۔ اڈے کا مرکزی ڈھانچہ اور سیوریج کا نظام مکمل تیار ہو گیا ہے جبکہ مسافر خانہ اور ٹوائلٹ بلاک زیرِ تعمیر ہیں۔

ان کا کہنا ہے کہ اگر فنڈ جاری کر دیے جائیں تو چھ ماہ میں یہ منصوبہ مکمل ہو جائے گا۔

پشاور میٹرو بس سروس: شہریوں کے لیے سہولت یا خزانے پر بوجھ؟

بیٹھنے کی جگہ ہے نہ بیت الخلا: میانوالی کا ادھورا بس اڈا مسافروں کے لیے زحمت بن گیا

text

میانوالی کی خٹک بیلٹ کے رہنے والے سیکڑوں لوگ ہر جمعے کے دن یونین کونسل چاپری کے ریڑھی چوک میں احتجاجی مظاہرہ کرتے ہیں۔ ان کا مطالبہ ہے کہ علاقے میں نامکمل واٹر سپلائی سکیم پر جلد دوبارہ کام شروع کیا جائے تاکہ انہیں صاف پانی میسر آ سکے۔

اس احتجاج کی قیادت کرنے والے مولانا محمد امین اللہ کہتے ہیں کہ یہ علاقے کے لئے &#39;زندگی اور موت کا مسئلہ&#39; ہے۔ انہوں نے اس سلسلے میں ڈپٹی کمشنر سے بھی ملاقات کی ہے جنہوں نے وعدہ کیا کہ فنڈ بحال ہوتے ہی ان کا مسئلہ حل کر دیا جائے گا لیکن علاقے کے لوگوں کو کئی خدشات لاحق ہیں چنانچہ اہل علاقہ نے دباؤ برقرار رکھنے کے لئے متواتر احتجاج کی حکمت عملی اپنا رکھی ہے۔

خٹک بیلٹ میانوالی سے 65 کلومیٹر دور شمال کی جانب تحصیل عیسیٰ خیل میں پہاڑ کے دامن میں واقع ہے۔ یہاں خٹک قوم آباد ہے، جن کی مادری زبان پشتو ہے، اس لیے اس علاقے کو خٹک بیلٹ کہا جاتا ہے۔

یہ علاقہ آٹھ یونین کونسلوں پر مشتمل ہے جن میں 87 دیہات آتے ہیں۔اس علاقے کی آبادی ڈیڑھ لاکھ سے زیادہ ہے۔ چونکہ یہاں زیرزمین پانی کھارا ہونے کے باعث قابل استعمال نہیں ہے اس لئے لوگ بارش کے پانی پر انحصار کرتے ہیں۔

چاپری کی پچپن سالہ عالم خاتون روزانہ خچر پر قریباً 10کلومیٹر دور ایک تالاب سے پانی بھر کر لاتی ہیں۔ گرمی ہو یا سردی ان کا یہی معمول ہے۔ اس تالاب میں برساتی نالوں کا مٹیالا پانی جمع رہتا ہے اور اسی سے وہ اپنے گھرانے کی تمام ضروریات پوری کرتی ہیں۔

یونین کونسل ونجاری سے تعلق رکھنے والے اڑتالیس سالہ شاہ فرمان بھی ایسے ہی ایک تالاب سے پانی بھرتے ہیں۔ ان کا کہنا ہے کہ وہ اپنے باپ دادا کو اسی طرح خچروں پر پانی بھر کر لاتا دیکھتے رہے ہیں۔

خٹک بیلٹ میں بیشتر دیہات کے قریب تالاب ضرور ہوتا ہے جہاں بارشوں کا پانی ذخیرہ ہوتا رہتا ہے۔ وہ کہتے ہیں کہ یہ پانی صاف نہیں ہوتا لیکن اس علاقے میں انسانوں اور حیوانوں کے لئے پانی کے حصول کا یہی واحد ذریعہ ہے۔

محکمہ پبلک ہیلتھ انجینئرنگ کے ریسرچ آفیسر محمد فہیم بتاتے ہیں کہ اس علاقے میں زیرزمین پانی 600 فٹ گہرائی پر ہے جو کڑوا ہے اور اسے پیا نہیں جا سکتا۔ علاقے میں لوگ بارش کا جو پانی استعمال کرتے ہیں وہ آلودہ ہوتا ہے جسے عالمی ادارہ صحت بھی ناقابل استعمال قرار دے چکا ہے۔

چاپری میں واقع بنیادی مرکز صحت کے حکام کا کہنا ہے کہ یہاں آنے والے زیادہ تر مریض ہیضے، ٹائیفائیڈ اور یرقان میں مبتلا ہوتے ہیں اور ان بیماریوں کا آلودہ پانی سے براہ راست تعلق ہے۔

2018ء میں حکومت نے چھ ارب روپے سے اس علاقے میں صاف پانی مہیا کرنے کا منصوبہ بنایا تھا۔ اس منصوبے کے پہلے مرحلے میں خٹک بیلٹ کی آٹھوں یونین کونسلوں میں پانی کے پائپ بچھائے گئے جن کا 90 فیصد کام بروقت مکمل کر لیا گیا۔

دوسرے مرحلے میں گھر گھر پانی کی ڈسٹری بیوٹری لائن بچھائی جانا تھی جس پر جاری کام 2022ء میں بند ہو گیا جو تاحال شروع نہیں ہو سکا۔

محکمہ پبلک ہیلتھ انجینئرنگ کے ایکسیئن شعیب ہاشمی کے مطابق پنجاب میں نگران حکومت آنے کے بعد اس منصوبے پر کام معطل کر دیا گیا اور اس کے لئے مختص باقی ماندہ فنڈ واپس لے لئے گئے۔ چونکہ محکمے کے پاس پیسے نہیں ہیں اس لئے کام آگے نہیں بڑھ سکا۔

احتجاج کی قیادت کرنے والے امین اللہ بتاتے ہیں کہ سکیم میں پہلے تو ایسے متعدد علاقوں کو شامل ہی نہیں کیا گیا تھا جو اس مسئلے سے بری طرح متاثر ہیں۔ جب لوگوں نے احتجاج کیا تو اس منصوبے کو تمام یونین کونسلوں تک پھیلا دیا گیا۔ پہلا مرحلہ مکمل ہونے کے بعد تجرباتی بنیادوں پر تین یونین کونسلوں میں پانی مہیا کیا جا رہا ہے۔ لیکن فنڈ واپس لئے جانے کے بعد خدشہ ہے کہ نئی حکومت کہیں یہ منصوبہ سرے سے ہی بند نہ کر دے۔ &nbsp;

اس منصوبے کے تحت چاپری کے قریب ایک بند بھی تعمیر کیا گیا ہے جہاں پانی ذخیرہ کر کے گھر گھر پہنچایا جانا تھا۔ لیکن ہر سال ہونے والی بارشوں کے باعث مٹی بھر جانے اور صفائی نہ ہونے سے اس کی گنجائش بھی کم رہ گئی ہے۔

حکومت نے یہ بھی طے نہیں کیا کہ اس منصوبے کو کیسے چلایا جائے گا۔ عیسیٰ خیل میں پبلک ہیلتھ ڈیپارٹمنٹ کے ایس ڈی او اشرف سہیل نے بتایا کہ ان کے محکمے نے منصوبے کی تکمیل کے بعد اسے چلانے کے لئے &#39;خٹک بیلٹ واٹر اتھارٹی&#39; قائم کرنے کی تجویز دی تھی لیکن اس سلسلے میں تاحال کوئی پیش رفت نہیں ہوئی۔

خٹک بیلٹ سے تعلق رکھنے والے پروفیسر عزیز اللہ خان بتاتے ہیں کہ اس علاقے میں کسی کو پینےکا پانی دینا بہت بڑا احسان سمجھا جاتا ہے کیونکہ یہاں پانی ایک نایاب چیز ہے۔ چاپری ڈیم کی تعمیر اور علاقے میں واٹر سپلائی سکیم شروع ہونے سے انہیں امید ہوئی تھی کہ اب علاقے کا یہ دہائیوں پرانا مسئلہ حل ہو جائے گا لیکن اس منصوبے پر کام معطل ہونے سے وہ ایک مرتبہ پھر مایوسی کا شکار ہیں۔

اسی آلودہ پانی میں عمر بہتی جا رہی ہے: نارووال کے شہری آلودہ پانی کے استعمال سے ہسپتالوں کا رخ کرنے لگے

خٹک بیلٹ میں ہفتہ وار احتجاج: نئی حکومت کہیں یہ منصوبہ سرے سے ہی بند نہ کر دے

موسیقی سے وابستہ تیس سالہ ریحان نیازی ان دنوں میانوالی کے فن کاروں کو پولیس کی جانب سے ہراساں کرنے کے خلاف احتجاج منظم کرنے میں مصروف ہیں۔

رواں برس اپریل کے اواخر میں میانوالی پولیس کی مدعیت میں دو مقامی گلوکاروں پر ان کے گانوں کو متنازع قرار دے کر یکے بعد دیگرے دو ایف آئی آرز درج کی گئی ہیں۔ پولیس کا مؤقف ہے چونکہ ان گانوں میں شراب اور دیگر منشیات کا ذکر ہے اس&nbsp; لیے یہ گانے اور ان کی شاعری معاشرے میں منشیات کو فروغ دے رہے ہیں۔

عیدالفطر کے دن ان میں سے ایک فوک گلوکار ریاض ماہی کو گرفتار کر لیا گیا تھا جن کی بعد ازاں ضمانت ہو گئی، جب کہ دوسری ایف آئی آر میں نامزد گلوکار نعمت نیازی کی گرفتاری تاحال عمل میں نہیں آئی۔

سماجی شخصیت رمضان خان کا کہنا ہے کہ جس طرح پچھلے چند مہینوں میں سوشل میڈیا ٹرولز نے غیرت کے تصور کو ڈھال بنا کر مقامی یونیورسٹی کے خلاف مہم چلائی، اسی طرح اب منشیات کلچر کی روک تھام کا نعرہ لگا کر شعرا اور گلوکاروں کے خلاف مہم چلائی جا رہی ہے۔

&quot;ایسا لگتا ہے کہ میانوالی میں طالبانی سوچ سرایت کرتی جا رہی ہے اور دکھ تو یہ ہے کہ ریاست بھی ایسی سوچ کی آلہ کار بن گئی ہے۔ بجائے اس کے کہ منشیات فروشوں کے خلاف کریک ڈاؤن کیا جاتا، الٹا فن کاروں کو دھر لیا گیا ہے۔&#39;&#39;

ریحان نیازی کا یہ مؤقف ہے کہ اس طرح کی شاعری عطا اللہ عیسیٰ خیلوی،&nbsp; شفا اللہ روکھڑی سمیت میانوالی کے نامور فوک گلوکاروں نے گائی ہے لیکن انہیں آج تک پولیس کی طرف سے اس نوعیت کی ہراسانی کا سامنا نہیں کرنا پڑا۔ 
ان کا کہنا ہے کہ اب تو سوشل میڈیا پر دس سال پرانے گانوں پر بھی کارروائی کا مطالبہ کیا جانے لگا ہے۔

&#39;&#39;یہ رحجان انتہائی خطرناک اور بنیاد پرستانہ سوچ کا عکاس ہے۔آج ان کی تو کل ہماری باری ہے اس لیے ہمیں اس کے خلاف آواز بلند کرنا ہو گی۔&#39;&#39;

ریاض ماہی اور نعمت نیازی پر تعزیراتِ پاکستان کی دفعہ 292&nbsp; اور&nbsp; 294 کے تحت ایف آئی آر درج کی گئی ہیں۔

ان گلوکاروں کے وکیل ملک سمیع اللہ کے مطابق &quot;سیکشن 292 اور 294 کی سزا زیادہ سے زیادہ تین مہینے قید یا جرمانہ ہے اور یہ دونوں قابل ضمانت جرم ہیں۔ سیکشن 292 فحش مواد کی تشہیر سے متعلق ہے جبکہ سیکشن 294 عوامی مقامات پر فحش موسیقی سے متعلق ہے۔&quot;

ان کا یہ بھی کہنا ہے کہ میانوالی کی پچھلے سو سال کی تاریخ میں اس طرح کی ایف آئی آر کی کوئی مثال نہیں ملتی۔

فوک گلوکار ریاض ماہی نے اپنے خلاف درج کی گئی ایف آئی آر سے متعلق لوک سجاگ کو بتایا کہ مقدمہ درج کر کے ان کے ساتھ ناانصافی کی گئی۔

&#39;&#39;جس گانے پر میرے خلاف مقدمہ قائم کیا گیا وہ عوامی مقام پر گایا ہی نہیں گیا اور نہ ہی اس کو باقاعدہ ریلیز&nbsp; کیا گیا۔ یہ&nbsp; ایک نجی محفل میں گایا گیا جہاں موجود ایک دوست نے موبائل کے ذریعے گانے کی ویڈیو بنائی اور سوشل میڈیا پر اپ لوڈ کی۔ اسی کی بنیاد پر میرے خلاف پولیس نے مقدمہ درج کر لیا۔&#39;&#39;

میانوالی کے نامور شاعر، کئی کتابوں کے مصنف اور معروف فوک گانوں کے خالق مظہر نیازی کا کہنا ہے کہ گلوکاروں کے بعد شعرا کو بدنام کرنے کی کوشش کی جا رہی ہے۔ ایک معمولی سی بات کو بڑھاوا دیا گیا اور بات کہاں سے کہاں پہنچ گئی۔ آج ایک غریب گلوکار کو دھر لیا گیا ہے تو کل شاعروں کی باری ہوگی۔&quot;

&nbsp;ان مقدمات پر سنجیدہ حلقوں میں تشویش پائی جاتی ہے۔ گورنمنٹ کالج میانوالی کے پروفیسر ملک حیات اللہ کہتے ہیں کہ اگر پولیس اس طرح سوشل میڈیا پوسٹوں پر مقدمات درج کرنا شروع کر دے گی تو یہ فنون ِ لطیفہ پر میانوالی میں زمین تنگ کر دینے کے مترادف ہو گا۔

&quot;اردو کے جتنے بھی معروف شعرا ہیں، ان سب کی شاعری جام و سبو، شراب و مے خانے کے استعاروں سے پُر ہے، تو کیا میر، غالب، داغ اور ذوق پر بھی بعد از مرگ مقدمے درجے کئے جائیں؟&quot;

ان کا کہنا ہے کہ اگر ایسے گانوں کو گانا جرم ہے جن میں شراب کا ذکر ہو تو نصرت فتح علی و عزیز میاں قوال پر بھی مقدمہ درج کیا جانا چاہیے۔

تاہم ڈسٹرکٹ پولیس آفیسر میانوالی مطیع اللہ خان پولیس کی اس کارروائی سے مکمل مطمئن ہیں۔

لوک سجاگ سے گفتگو کرتے ہوئے ڈی پی او نے بتایا کہ میانوالی پولیس کے اس اقدام کی پنجاب بھر میں تعریف کی گئی ہے۔

&#39;&#39;اگر ہم کارروائی نہ کرتے تو یہی لوگ کہتے کہ نشاندہی کے باوجود پولیس کارروائی نہیں کر رہی۔ ہم ہر ایسے گلوکار اور شاعر کے خلاف کارروائی کریں گے جو منشیات کی ترغیب دے گا کیونکہ ضلع کو تمام جرائم سے پاک کرنا ہمارا مشن ہے۔&quot;

یونیورسٹی آف میانوالی: "مجھے فکر ہے کہ کوئی میری بیٹی کی تصویر سوشل میڈیا پر لگا کر تماشا نہ بنا دے"

چلی ہے رسم کہ کوئی نہ گنگنا کے چلے: میانوالی میں دو مقامی گلوکاروں کے خلاف گانا گانے پر مقدمہ

یونیورسٹی آف میانوالی میں پانچویں سمیسٹر کے طالب علم محمد کامران ان دنوں طلبہ اور سول سوسائٹی کو منظم کرنے میں مصروف ہیں جس کا مقصد یونیورسٹی کو بدنام کرنے کی ایک مہم کا توڑ کرنا ہے۔

وہ بتاتے ہیں کہ &quot;مارچ کے آخری ہفتے یونیورسٹی میں سپورٹس گالا کا انعقاد کیا گیا جس کے اختتام پر&#39; کلچرڈے&#39; منایا گیا۔ اس موقع پرطلبہ نے ثقافتی رقص کیا جس کی ویڈیوز ساتھی طلبا و طالبات نے اپنے سوشل میڈیا اکاؤنٹس پر شیئر کر دیں۔ اس پر چند نام نہاد &#39;سوشل میڈیا ایکٹیوسٹس&#39; نے یونیورسٹی اور طلبہ و طالبات کو برا بھلا کہنا شروع کر دیا۔

یہ مہم شروع کرنے والے سوشل میڈیا ایکٹوسٹ کوئی اور نہیں، پاکستان انٹرنیشنل ہیومن رائٹس آرگنائزیشن (پی آئی ایچ آر او) نامی این جی او کے ضلعی آرگنائزر رب نواز خان ہاتھی خیل تھے۔ ان کے بعد خود کو صحافی کہلانے والے سوشل میڈیا ٹرولز اور &#39;مٹھی میانوالی&#39; اور&#39;نیازی ٹی وی&#39; جیسے&nbsp; گمنام سوشل میڈیا اکاؤنٹ بھی یونیورسٹی کے خلاف سرگرم ہو گئے۔

کامران بتاتے ہیں کہ اگلے ہی روز ایک ویڈیو سامنے آئی جس میں رب نواز نے یونیورسٹی کے سکیورٹی کے معاملات کو دیکھنے والے ایک پروفیسر کا ان کے دفتر میں انٹرویو کیا۔ اس میں رب نواز نے کلچرڈے کو ایشو بنا کر پروفیسر کی تذلیل کی اور ویڈیو شیئر کر دی جس پر سول سوسائٹی اور سیاسی وسماجی کارکنوں نےاحتجاج کیا۔

پروفیسر کی ہتک آمیز ویڈیو آنے بعد طلبہ نے یونیورسٹی میں مظاہرہ کیا۔ کلاسز کے بعد یونیورسٹی گراؤنڈ میں جلسہ کیا گیا اور وائس چانسلر آفس تک مارچ کیا گیا۔

احتجاج کے دوران طلبا نے خود کو منظم&nbsp; کرنے کا اعلان کرتے ہوئے کہا کہ وہ بیرونی عناصر کو یونیورسٹی کے معاملات دخل اندازی نہیں کرنے دیں گے ۔ اسی دوران فیس بک پر طلبہ نے یونین بنانے کی باتیں بھی شروع کر دیں۔

یونیورسٹی انتظامیہ نے طلبہ کے ساتھ مذاکرات کیے جن کا مطالبہ تھا کہ رب نواز کے خلاف قانونی کارروائی کی جائے اور اس پر ساتھیوں سمیت یونیورسٹی میں داخلے پر بھی پابندی لگائی جائے۔ یونیورسٹی انتظامیہ نے مطالبہ تسلیم کرنے کی زبانی یقین دہانی تو کرادی مگرکوئی عملی اقدام نہیں کیا۔

پچپن سالہ محمد حیات خان&nbsp; کپڑے کا کاروبار کرتے ہیں اور ان کی صاحبزادی یونیورسٹی کے شعبہ فزکس میں پڑھتی ہیں۔ حیات کہتے ہیں کہ انہیں فکر لاحق ہے کہ کوئی ان کی بیٹی کی تصویر بھی سوشل میڈیا پر لگا کر تماشا نہ بنا دے کیونکہ یونیورسٹی انتظامیہ ایسے عناصر کے خلاف&nbsp; کارروائی نہیں کر رہی۔

انگریزی ڈیپارٹمنٹ میں چھٹے سمیسٹر کی طالبہ عابدہ&nbsp; کہتی ہیں &quot;دکھ اس بات کا ہے کہ جو شخص غیرت کی آڑ لے کر یونیورسٹی کے خلاف مہم چلا رہا ہے اسے پاکستان انٹرنیشنل ہیومن رائٹس آرگنائزیشن نامی این جی او نے اپنا ضلعی عہدیدار بنا رکھا ہے۔&#39;&#39;

پاکستان انٹرنیشنل ہیومن رائٹس آرگنائزیشن (پی آئی ایچ آر او) انسانی حقوق کی علمبردار ہے۔ اس کی ویب سائٹ پر لکھے &quot;مشن&quot; کے مطابق یہ ایک آزاد، قومی تنظیم ہے جو انسانی وقار کو برقرار رکھنے اور سب کے لیے انسانی حقوق کے مقصد کو آگے بڑھانے کے لیے ایک متحرک تحریک کے حصے کے طور پر کام کرتی ہے۔مشن سٹیٹمنٹ کے بقول تنظیم کے قیام کا مقصد لوگوں کے حقوق کی حفاظت اور انہیں با اختیار بنانا اور امتیازی سلوک کا خاتمہ کرنا ہے۔

پی آئی ایچ آر او کے شکایات سیل کے انچارج شہزاد احمد نے اسلام آباد سے لوک سجاگ کو فون بتایا کہ رب نواز ہاتھی خیل کو &quot;متعدد شکایات&quot; سامنے آنے کے بعد ان کے عہدے سے ہٹایا جا چکا ہے اور ان&nbsp; کا تنظیم سے کوئی تعلق نہیں۔

مگر بار بار پوچھنے پر وہ یہ نہیں بتا سکے کہ رب نواز کو کب ان کے عہدے سے ہٹایا گیا۔ رب نواز&nbsp; کی تعیناتی کا نوٹیفکیشن 27 مارچ 2023ء کو جاری کیا گیا تھا مگر لوک سجاگ کی درخواست کے باوجود تادم تحریر ادارے نے ان سے لاتعلقی کا خط پیش نہیں کیا۔شہزاد احمد کا یہ بھی کہنا ہے کہ وہ اس معاملے کی تحقیقات کر رہے ہیں اور جلد اس معاملے پر کارروائی کریں گے۔

طلبہ اس معاملے میں یونیورسٹی انتظامیہ کے رویے سے سخت مایوس ہیں۔ بی ایڈ کے آخری سمیسٹر کے طالب علم عرفان اللہ خان کے مطابق تین سال یونیورسٹی کو بدنام کرنے کی مہم جاری ہے لیکن یونیورسٹی انتظامیہ ٹس سے مس نہیں ہوتی۔ اب کے پورا ضلع آواز بلند کر رہا ہے لیکن یونیورسٹی&nbsp; انتظامیہ حسبِ معمول خاموش ہے۔

تاہم طلبہ نے یونیورسٹی&nbsp; کے دفاع میں ایک دستخطی مہم شروع کر رکھی ہے۔ سول سوسائٹی، وکلاء، صحافیوں، تاجروں اور شعراء سمیت ہر طبقہ فکر سے تعلق رکھنے والی شخصیات، یونیورسٹی کے طلبا اور اساتذہ کے حق میں پیغامات جاری کر رہی ہیں۔

سماجی شخصیات اور ڈینٹل سرجن ڈاکٹر حنیف نیازی اور علی خان پائی خیل یونیورسٹی کی حمایت میں سرگرمِ عمل ہیں۔ حنیف نیازی کہتے ہیں کہ میانوالی میں یونیورسٹی کسی نعمت سے کم نہیں لیکن بدقسمتی سے سوشل میڈیا ایکٹیوسٹس کو اندازہ ہی نہیں کہ وہ ضلعے کی بیٹیوں پر اعلیٰ تعلیم کے دروازے بندکرنے کی سازش کر رہے ہیں۔

ادھر سوشل میڈیا ٹرولز کے خلاف کارروائی کی زبانی یقین دہانی کے اگلے ہی روز یونیورسٹی حکام نے احتجاج پر طلبا و طالبات کو یونین و انجمن سازی&nbsp; سے باز رہنے کے لیے ایک تنبیہی نوٹس بھی جاری کر دیا ہے۔

رجسٹرار آفس سے جاری کردہ اس نوٹس میں کہا گیا ہے کہ &quot;طلباء و طالبات کو سٹوڈنٹ یونین، فیڈریشن یا تنظیم بنانے کی اجازت نہیں ہے۔ انہیں ہدایت کی جاتی ہے کہ وہ ہم نصابی سرگرمیوں اور مثبت گفتگو کے لیے یونیورسٹی میں قائم سوسائٹیز میں ہی حصہ لیں۔ بصورتِ دیگر ان کے خلاف سخت تادیبی کاروائی کی جائے گی۔&quot;

یونیورسٹی رجسٹرار ڈاکٹر لیاقت اس نوٹس کا دفاع کرتے ہوئے کہتے ہیں کہ تمام سرکاری یونیورسٹیوں میں یونین بنانے پر پابندی ہے۔ یونیورسٹی آف میانوالی کے طلباء و طالبات کو بھی یونین بنانے سے روکنے کے لیے مذکورہ لیٹر جاری کیا گیا جو قواعد و ضوابط کے عین مطابق ہے۔

انگریزی ڈیپارٹمنٹ&nbsp; کی طالبہ نسرین کہتی ہیں کہ &quot;ہم نے اپنے اساتذہ اور ادارے کے تحفظ کے لیے آواز اٹھائی لیکن یونیورسٹی نے ہمارے خلاف ہی لیٹر جاری کر دیا جس سے طلباء و طالبات کا مورال متاثر ہوا۔ یہ لیٹر دینا ہی تھا تو کسی اور وقت کا انتظار کر لیتے۔&quot;

یونیورسٹی میں شعبہ سیاسیات کے وزیٹنگ فیکلٹی ممبر ساجد اللہ خان&nbsp; ضلع میانوالی ہی کے رہائشی ہیں۔ وہ کہتے ہیں &quot;میری خواہش تھی کہ اسی یونیورسٹی میں بطور مستقل استاد فرائض سر انجام دوں لیکن موجودہ حالات میں اگر مجھے مستقل تعیناتی کی آفر کی بھی جائے تو میں دس بار سوچوں گا۔&quot;

صنفی تفریق کا شکار یونیورسٹی آف نارووال کی طالبات: گرلز ہاسٹل کے قیام میں اور کتنا عرصہ لگے گا؟

گُل محمد چالیس سال سے میانوالی کی تحصیل عیسیٰ خیل کے کوٹ چاندنہ مہاجر کیمپ میں مقیم ہیں۔ یہ سارا عرصہ انہوں ںے اس خوف میں گزارا ہے کہ کہیں انہیں اس جگہ سے بے دخل نہ کر دیا جائے۔ ان کا تعلق افغانستان میں جلال آباد سے ہے۔ 1980ء کی دہائی میں جب افغان جنگ عروج پر تھی تو وہ ہجرت کر کے پاکستان آ گئے تھے۔

کوٹ چاندنہ کا یہ مہاجر کیمپ پاکستان میں افغان مہاجرین کی پہلی بستی تھی جو آج بھی قائم ہے۔ گل محمد 1982 میں مہاجر کی حیثیت سے اپنی رجسٹریشن ہونے اور شناختی کارڈ بننے کے بعد یہاں منتقل ہوئے تھے اور پھر اس جگہ کے مستقل رہائشی بن گئے۔

گل محمد تین بیٹوں اور ایک بیٹی کے باپ ہیں اور اب ان کی عمر 66 سال ہے۔ ان کا بڑا بیٹا قریبی علاقے کالا باغ میں قالین بیچتا ہے، دوسرا ٹریکٹر ٹرالی پر مزدوری کرتا ہے اور تیسرا کیمپ میں کپڑوں کی دکان چلاتا ہے جس میں گل محمد بھی اس کے ساتھ بیٹھتے ہیں۔

ان کا کہنا ہے کہ وہ 25 سال کی عمر میں اس کیمپ میں آئے تھے۔ اس وقت اکثر لوگ کھلے آسمان تلے رہتے تھے لیکن انہیں یہ سہولت تھی کہ یہاں راشن باقاعدگی سے ملتا تھا۔

&quot;میری آنکھوں کے سامنے یہ کیمپ پہلے ایک بستی اور پھر خیموں کا شہر بن گیا جو کئی کلومیٹر تک پھیلا ہوا تھا جس میں ہزاروں مہاجرین رہتے تھے۔ کیمپ میں سرکاری ٹرک گھی، چینی، دالیں اور چاول لے کر آتے تھے یہاں تک کہ آگ جلانے کے لیےلکڑیاں بھی حکومت فراہم کرتی تھی&quot;۔

گل محمد کہتے ہیں کہ وہ بہت پہلے اپنا سب کچھ افغانستان میں چھوڑ کر پاکستان آ گئے تھے۔ ماضی میں بھی اور اب بھی افغان مہاجرین کو واپس بھیجنے کی باتیں انہیں پریشان کر دیتی ہیں کیونکہ وہ اپنی زندگی کا بڑا حصہ یہیں گزار چکے ہیں اور ان کے بچے بھی یہیں پلے بڑھے ہیں جن کے لیے افغانستان واپس جا کر نئی زندگی شروع کرنا ممکن نہیں ہو گا۔

گل محمد کے مطابق جنگ کے مصائب سے جان بچا کر آنے کے بعد انہوں نے کڑی محنت کر کے پاکستان میں اپنی زندگی دوبارہ شروع کی۔ اب اگر حکومت پاکستان نے انہیں افغانستان واپس بھیجنے کا فیصلہ کیا تو وہ دوسری مرتبہ مہاجر ہو جائیں گے۔

<h2>کوٹ چاندنہ مہاجر کیمپ</h2>

1979 میں افغانستان پر سوویت یونین (روس) کے حملے سے تین سال بعد افغان مہاجرین کی پاکستان آمد کا سلسلہ شروع ہوا تو میانوالی کے علاقوں کوٹ چاندنہ، ٹولہ منگلی اور موضع کچ تندرخیل میں دو ہزار ایکڑ رقبے پر ایک مہاجر کیمپ بنایا گیا جسے کوٹ چاندنہ کیمپ کا نام دیا گیا۔ کیمپ کے لیے یہ زمین مقامی لوگوں سے کرایے پر لی گئی تھی۔

مہاجر کیمپ کے ڈسٹرکٹ ایڈمنسٹریٹر اشفاق حسین نے بتایا کہ یہاں 1982 میں 50 ہزار افغان مہاجرین کو خیمہ بستیوں میں بسایا گیا جس کے بعد حکومت نے کچے گھر بنانے کے لیے ضروری سامان بھی فراہم کیا۔ ہر گزرتے سال کے بعد کیمپ کی آبادی بڑھتی رہی۔ 1988 میں اس کیمپ کی آبادی ایک لاکھ 80 ہزار تک پہنچ چکی تھی۔ اقوام متحدہ کے ہائی کمیشن برائے مہاجرین کے تعاون سے کیمپ میں واٹر سپلائی کا انتظام کیا گیا اور تعلیمی و طبی مراکز قائم کیے گئے۔

کمشنوریٹ برائے افغان مہاجرین پنجاب کے مطابق 1995 تک راشن سکیم کے تحت ہر گھرانے کو ماہانہ 15 کلو گرام گندم، 900 گرام کوکنگ آئل، 600 گرام چینی، 45 گرام چائے اور 900 گرام خشک دودھ مہیا کیا جاتا رہا۔ اس کے علاوہ سعودی عرب کے تعاون سے لالٹینیں روشن کرنے اور دیگر استعمال کے لیے کیروسین آئل بھی تقسیم کیا جاتا تھا۔

راشن سکیم بند ہوئی تو مہاجرین کی بڑی تعداد افغانستان واپس لوٹ گئی۔ باقی بچ جانے والے مہاجرین نے پنجاب کے دوسرے شہروں کا رخ کیا جہاں روزگار کے زیادہ مواقع میسر تھے۔ یوں اس کیمپ کی آبادی کم ہو گئی جس کے بعد کمشنوریٹ نے کیمپ کا تین چوتھائی سے زیادہ حصہ ڈی نوٹیفائی کر دیا۔

کیمپ کی آبادی گھٹنے کے ساتھ اس کا رقبہ بھی 2071 ایکڑ سے کم کر کے 390 ایکڑ&nbsp; کردیا گیا۔ خالی ہونے والی زمین مالکان کو واپس کر دی گئی جبکہ کیمپ کی موجودہ زمین کے مالکان کو پہلے کی طرح کرایہ دیا جاتا ہے۔

تاہم ٹولہ منگلی کے مقامی رہائشی موسیٰ خان افغان بستی کو دی جانے والی زمین کے معاوضے سے مطمئن نہیں ہیں اور اسے نہایت معمولی قرار دیتے ہیں۔

کچ تندرخیل میں پہاڑوں کے دامن میں رہنے والے ساٹھ سالہ غلام مصطفیٰ خان کی زمین بھی کیمپ کے علاقے میں آتی ہے۔ ان کا کہنا ہے کہ &quot;اب ہماری اپنی آبادی بھی خاصی بڑھ گئی ہے۔ ہم نے تو پہاڑ کے دامن میں کسی نہ کسی طرح گزارا کر لیا مگر اب&nbsp; ہمیں اپنی زمینوں پر بچوں کے لیے مکان بنانا ہیں۔ ہمارا خیال تھا کہ چند سال کے بعد افغان باشندے یہاں سے چلے جائیں گے لیکن اب ایسا نہیں لگتا کیونکہ انہوں نے مقامی غریب لوگوں کے نام پر مزید زمینیں بھی خریدنا شروع کر دی ہیں۔&#39;&#39;

غازی خان کا شمار اس کیمپ میں رہنے والے نسبتاً خوشحال مہاجرین میں ہوتا ہے۔ وہ افغان صوبہ پکتیکا سے ہجرت کر کے آئے تھے اور اب ان کا گوجرانوالا میں ایکسکویٹر مشینوں کاروبار ہے۔ ان کا کہنا ہے کہ وہ اب افغانستان واپس جانے کی خواہش نہیں رکھتے۔

&#39;&#39;1982ء میں جب میں اس کیمپ میں آیا تو میری عمر 13 سال تھی۔ میں یہیں پلا بڑھا اور میرے بچے بھی یہیں پیدا ہوئے۔ اب یہی ہمارا ملک ہے۔ مجھ سمیت یہاں کے تمام رہائشی انہی کچے گھروں میں خوش ہیں جہاں کم سے کم ہمیں تحفظ تو حاصل ہے۔ افغانستان میں ہماری زمینوں پر قبضے ہو چکے ہیں اور وہاں جائیں تو صرف بھوک ہی ہماری منتظر ہو گی&quot;۔

لاہور میں مقیم افغان:' ہم ہر وقت غیر یقینی کیفیت میں رہتے ہیں کہ کہیں ہمیں واپس نہ بھیج دیا جائے'۔

&quot;جب یہ کیمپ بنا تو اس کے لیے مقامی لوگوں کی رضا مندی سے زمین کرائے پر پر لی گئی تھی جس کا کرایہ ہر تین سال کے بعد زمین مالکان کو فصل کی پیداوار کے مقابل ادا کیا جاتا ہے&quot;۔

موسیٰ خان کا کہنا ہے کہ پہلے تو یہ صرف کچی بستی تھی، مگر اب آہستہ آہستہ پکے مکان بھی بننا شروع ہو گئے ہیں جسے دیکھ کر یوں لگتا ہے کہ مہاجرین یہاں مستقل رہنے کی تیاریوں میں ہیں۔ علاقے میں پہلے ہی روزگار کے مواقع بہت محدود ہیں اور اب انہوں نے یہاں کاروبار بھی جما لیے ہیں۔

اڑتیس سالہ احمد خان کوٹ چاندنہ کے رہائشی ہیں اور ان کی دو ایکڑ زمین کیمپ کے علاقے کا حصہ ہے۔

&quot;ہماری زمین پر جب مہاجر کیمپ بنایا گیا تو اس وقت میں پیدا نہیں ہوا تھا۔ ہم یہی سنتے چلے آئے ہیں کہ بس چند سال کے بعد یہ کیمپ ختم ہو جائے گا اور زمین ہمیں واپس مل جائے گی۔ مگر اب بھی زمین مہاجرین کے زیراستعمال ہے جو دن بدن بنجر ہوتی جا رہی ہے&#39;&#39;

مقامی افراد افغان مہاجرین کی کاروباری سرگرمیوں سے بھی خوش نہیں ہیں۔

کالا باغ بازار میں الیکٹرانکس کا سامان بیچنے والے 54 سالہ قاسم خان افغانیوں کے مزید قیام کے حامی نہیں۔ وہ کہتے ہیں کہ &quot;ان لوگوں نے ہمارے کاروبار تباہ کیے ہیں۔ ابتدا میں تو یہ لوگ کیمپوں تک ہی محدود تھے لیکن دو تین دہائیاں پہلے انہوں نے کیمپوں سے باہر کاروبار شروع کر دیے۔ یہ لوگ سمگل شدہ سستا سامان بیچتے ہیں جس سے مقامی لوگوں کا کاروبار ٹھپ ہو کر رہ گیا ہے۔&#39;&#39;

فیصل شہزاد

بیٹھنے کی جگہ ہے نہ بیت الخلا: میانوالی کا ادھورا بس اڈا مسافروں کے لیے زحمت بن گیا

خٹک بیلٹ میں ہفتہ وار احتجاج: نئی حکومت کہیں یہ منصوبہ سرے سے ہی بند نہ کر دے

چلی ہے رسم کہ کوئی نہ گنگنا کے چلے: میانوالی میں دو مقامی گلوکاروں کے خلاف گانا گانے پر مقدمہ

یونیورسٹی آف میانوالی: "مجھے فکر ہے کہ کوئی میری بیٹی کی تصویر سوشل میڈیا پر لگا کر تماشا نہ بنا دے"

کوٹ چاندنہ کیمپ: افغان مہاجروں کی جائے پناہ اور مقامی لوگوں کی پریشانی

Lok Sujag