حمیدہ جاوید لیاقت پور کے علاقے کچی منڈی میں عثمان کالونی کی رہائشی اور لیڈی ہیلتھ سپروائزر ہیں۔ ان کے علاقے میں ہر دو ماہ بعد کئی کئی روز پانی نہیں آتا۔ اس سے پورے علاقہ کے باسیوں کو اس قدر شدید مشکلات کا سامنا کرنا پڑتا ہے جن کا تصور ہی کیا جا سکتا ہے۔

حمیدہ بتاتی ہیں کہ زیر زمین پانی کھارا ہونے کی وجہ سے کپڑے اور برتن دھونے کے قابل بھی نہیں ہے۔ گھریلو ضروریات کے لیے انہیں 40 روپے فی گیلن کے حساب سے پانی خریدنا پڑتا ہے۔ اسی کے ساتھ وہ ہر ماہ میونسپل کمیٹی کو باقاعدگی سے پانی کا بل بھی ادا کرتی ہیں۔

&quot;جب میونسپل کمیٹی کے اہلکاروں سے پوچھا جاتا ہے کہ پانی کب آئے گا تو جواب ملتا ہے کہ الہ آباد سے آنے والی مین پائپ لائن پھٹ چکی ہے جس پر مرمت کا کام جاری ہے۔&quot;

لیاقت پوری میں زیرزمین پانی کھارا ہونے کے سبب 1980ء میں یہاں نہری پانی فراہم کرنے کا منصوبہ بنایا گیا۔ اس مقصد کے لیےتحصیل ہیڈکوارٹر ہسپتال لیاقت پور کے عقب میں پانی ذخیرہ کرنے کے لیے چار بڑے تالاب اور فلٹریشن سسٹم قائم کیے گئے۔ جب شہر کی آبادی 60 ہزار نفوس سے متجاوز ہوئی تو صاف پانی کی ضروریات بڑھ گئیں۔

چنانچہ 2007ء میں اس وقت کے تحصیل ناظم مخدوم سید مبین احمد نے پنجاب میونسپل ڈویلپمنٹ فنڈ کمپنی کی مالی معاونت اور 23 کروڑ روپے سے واٹر سپلائی کا نیا منصوبہ مکمل کروایا۔ اس کے لیے چھ کلومیٹر دور الہ آباد کے اطراف میں ٹیوب ویل نصب کر کے صاف پانی لیاقت پور شہر تک پہنچایا گیا۔

بعد ازاں محکمہ ہائی ویز اور پبلک ہیلتھ کے مابین رابطے کے فقدان کی وجہ سے 2016ء میں الہ آباد سے لیاقت پور آنے والی پائپ لائن کے اوپر ون وے سڑک کی تعمیر شروع کر دی گئی۔

2018ء میں حلقہ پی پی 257 سے منتخب ہونے والے ایم پی اے چوہدری مسعود احمد نےمزید 22 کروڑ روپے کے فنڈ منظور کرائے جس کے تحت سڑک کے نیچے آنے والی پرانی پائپ لائن کو بند کر کے نئی سڑک کے متوازی ایک اور پائپ لائن بچھائی جانا تھی جس کے بارے میں مبینہ طور پر گارنٹی دی گئی کہ یہ 100 سال تک قائم رہے گی۔

محکمہ پبلک ہیلتھ انجینئرنگ نے اس منصوبے پر کام مکمل کر کے اسے میونسپل کمیٹی لیاقت پور کے سپرد کرنا تھا مگر مذکورہ پائپ لائن بچھا کر اس میں پانی چھوڑا گیا تو یہ مختلف مقامات پر پھٹنے لگی۔ تب سے اب تک یہ پائپ لائن بے شمار مرتبہ پھٹ چکی ہے اور جب بھی ایسا ہوتا ہے تو شہر کو پانی کی سپلائی بند ہو جاتی ہے۔

ابوہریرہ علوی لیاقت پور کے صحافی ہیں۔ واٹر سپلائی سکیم کے بار بار پھٹنے پر انہوں نے رواں سال 27 جون کو وزیراعلیٰ پورٹل پر شکایت کی تو جولائی میں انہیں جواب ملا کہ محکمہ پبلک ہیلتھ کے ایس ڈی او اور ایکسیئن کی رپورٹ کے مطابق محکمہ پبلک ہیلتھ انجینئرنگ لیاقت پور نے مذکورہ سکیم مکمل کر کے ایک سال قبل میونسپل کمیٹی کے حوالے کر دی تھی۔ یہ کامیابی سے چل رہی ہے تاہم ایک دو بار کسی جوڑ سے پانی لیک ہوا ہے۔ اس کے علاوہ تمام معاملات ٹھیک چل رہے ہیں۔ یہ جواب حقیقت کے برعکس تھا۔

میونسپل کمیٹی لیاقت پور کے چیف سینیٹری انسپیکٹر خالد رفیق بتایا ہے کہ مذکورہ پائپ لائن فنی خرابی کے باعث پھٹتی ہے۔

&quot;الہ آباد سے دو متوازی پائپ لائنیں بچھائی گئی ہیں جن کا باہمی فاصلہ کم از کم چار فٹ ہونا چاہیے مگر محکمہ پبلک ہیلتھ نے دونوں لائنوں میں ایک انچ کا بھی وقفہ نہیں رکھا۔ بعض جگہوں پر دونوں لائنیں ایک دوسرے کے اوپر نیچے بھی ہیں۔&quot;

ان کا کہنا ہے کہ پائپ لائن بچھانے سے پہلےاور&nbsp; کھدائی کے بعد لائنوں کے نیچے ریت ڈالنا ضروری تھا جو نہیں ڈالی گئی۔

&quot;پائپ لائن کے راستے اینٹوں کے بھٹے ہیں۔ ان بھٹوں کی پرانی اینٹوں کے ٹکڑے، جنہیں مقامی زبان میں کھنگر کہا جاتا ہے، پائپ لائنوں کے نیچے پڑے ہیں۔ پانی چلنے سے پائپ لائن میں تھرتھراہٹ ہوتی ہے تو اس کے نیچے موجود نوکیلے کھنگر اس میں سوراخ کر دیتے ہیں۔ اسی وجہ سے اکثر یہ نیچے ہی سے پھٹتی رہتی ہے۔&quot;

انہوں نے بتایا کہ میونسپل کمیٹی کے پاس نہ تو اس کی مرمت کا مناسب انتظام ہے نہ اوزار۔ اس کے علاوہ محکمہ پبلک ہیلتھ انجینئرنگ نے ابھی تک سکیم میونسپل کمیٹی کے حوالے ہی نہیں کی۔

محکمہ پبلک ہیلتھ انجینئرنگ لیاقت پور کے سب انجینئر ملک یاسر نے بتایا کہ اس سکیم کے لیے 22 کروڑ روپے رکھے گئے تھے لیکن یہ 16 کروڑ روپے میں ہی مکمل کر لی گئی۔ ان کے محکمے نے یہ سکیم تاحال میونسپل کمیٹی لیاقت پور کے حوالے نہیں کی تاہم ڈیڑھ سال سے اس کے ذریعے لیاقت پور شہر کو پانی سپلائی ہو رہا ہے۔ انہوں نے بتایا کہ سکیم کی حوالگی کے لیے متعلقہ محکموں کو مراسلے لکھے جا چکے ہیں اور سیکرٹریوں کی منظوری کے بعد ہی یہ کام پایہ تکمیل کو پہنچے گا۔

ملک یاسر نے بھی تصدیق کی کہ پائپ لائنوں کے نیچے آنے والے اینٹوں کے نوکیلے ٹکڑوں سے پائپ لائن پھٹ رہی ہے۔

سابق رکن صوبائی اسمبلی چوہدری مسعود احمد نے بتاتے ہیں کہ یہ سکیم انہوں نے ہی منظور کروائی تھی۔ ان کے مطابق اس سے بچ جانے والے چھ کروڑ روپے سے لیاقت پور شہر میں واٹر سپلائی کے نظام کو بہتر بنایا جائے گا۔ اس مقصد کے لیے اوور ہیڈ واٹر ٹینک بھی تعمیر کیے جائیں گے۔

&nbsp;انہوں نے کہا کہ الزام عائد کیا جاتا ہے کہ اس پائپ لائن کا بار بار پھٹنا محکمہ پبلک ہیلتھ کے نگران افسروں اور ٹیکنیکل ٹیم کی صلاحیت اور اہلیت پر سوالیہ نشان ہے۔ اگر پائپ لائن کے روٹ میں اینٹوں کے کھنگر تھے تو ان سے بچاﺅ کا انتظام کیوں نہیں کیا گیا۔

میونسپل کمیٹی لیاقت پور کے چیف افسر پرویز اختر گجر نے دو ماہ قبل ہی عہدے کا چارج سنبھالا ہے۔ وہ کہتے ہیں کہ کسی بھی سکیم میں ناقص منصوبہ بندی اور غفلت کا تعین سکیم کے ہینڈ اوور کے عمل کے لیے بننے والی ٹیکنیکل کمیٹی یا محکمہ پبلک ہیلتھ ہی کریں گے۔

کروڑوں مالیت کی واٹر سپلائی ننکانہ صاحب کے باسیوں کو پینے کا صاف پانی نہ دے سکی

سو سالہ گارنٹی کس کام کی: پائپ لائن میں متواتر خرابی سے لیاقت پور میں پانی کا بحران

text

لیاقت پور شہر سے 17 کلومیٹر دور کے ایک گاؤں سے بشیر احمد اپنی ضعیف والدہ اور بیوی بچوں کے ہمراہ جنرل بس سٹینڈ پہنچے۔ انہیں بہاول نگر جانے والی بس کا شدید گرمی میں انتظار کرنا پڑا۔ سائے کے لیے بنائے گئے شیڈ کے نیچے حجام اور مرغی فروش براجمان تھے۔

بشیر احمد نے قریبی دکانوں کے سامنے بنے چھپروں کے نیچے سایہ تلاش کیا اور اپنے خاندان کو وہاں بٹھا کر بس کا انتظار کرنے لگے۔ اسی دوران ذیابیطس میں مبتلا ان کی ضعیف والدہ کو بیت الخلا جانے کی ضرورت ہوئی۔ پتا کرنے پر معلوم ہوا کہ اس جگہ کوئی بیت الخلا نہیں ہے۔ وہاں ایک ہاکر نے ان کی پریشانی کو بھانپتے ہوئے معمر خاتون کو بس سٹینڈ کے قریب اپنے گھر بھجوایا تاہم ان کی واپسی تک بشیر احمد کی بس چھوٹ چکی تھی۔

کچی منڈی میں برلب شاہی روڈ شہر کی قیمتی اراضی پر واقع اس بس سٹینڈ کے مسافر خانے کی کھڑکیاں اور دروازے غائب ہو چکے ہیں اور چھت کا بڑا حصہ گر گیا ہے۔ اب یہ بس سٹینڈ نہیں رہا بلکہ کچرا ڈالنے کا مقام بن چکا ہے۔

بسیں اور ویگنیں اب یہاں نہیں آتیں۔ تمام ٹرانسپورٹ لاری اڈے کے باہر سڑک پر کھڑی ہوتی ہے جبکہ صبح اور شام کے اوقات میں اس کا پڑاؤ اللہ والا چوک ہوتا ہے جس سے ٹریفک کی روانی متاثر رہتی ہے۔

لالا محمد اقبال بلوچ گزشتہ 20 سال سے لیاقت پور میں منی کوچز کی ایک کمپنی کے اڈا مینجر ہیں۔ انہوں نے بتایا کہ جنرل بس سٹینڈ 1980ء کی دہائی میں بنایا گیا تھا تاہم یہ گزشتہ کئی برس سے پوری طرح فعال نہیں ہے۔

میونسپل کمیٹی ہر سال بس سٹینڈ کا ٹھیکہ دیتی ہے۔ ٹھیکیدار باہر سڑک یا اللہ والا چوک پر آنے والی ہر بس اور اے سی کوچ سے 100 روپے جبکہ منی کوچ اور ویگنوں سے 50 روپے وصول کرتا ہے۔ رواں سال کے لیے ٹھیکہ 45 لاکھ روپے ہے۔

اقبال بلوچ کا کہنا تھا کہ اگر حکومت چاہے تو پبلک پرائیویٹ پارٹنر شپ کے تحت بھی جنرل بس سٹینڈ بنایا جا سکتا ہے جہاں ورکشاپس، سپیئر پارٹس کی دکانیں، ٹک شاپس اور دیگر مارکیٹیں تعمیر کی جا سکتی ہیں۔ ان کے مطابق سڑکوں پر بنے تمام اڈے ختم کر کے بس سٹینڈ میں منتقل ہونے چاہئیں۔

سابق رکن صوبائی اسمبلی چوہدری محمود احمد نے بتایا کہ انہوں نے دو بار جنرل بس سٹینڈ کا تفصیلی دورہ کیا ہے۔ یہ جگہ بس سٹینڈ کی ضروریات پوری نہیں کرتی۔ ان کا کہنا تھا کہ انہوں نے 2019ء میں میونسپل کمیٹی لیاقت پور سے اس بس سٹینڈ کا مکمل ڈیٹا مانگا تھا جو ابھی تک فراہم نہیں کیا گیا تاہم یہاں میونسپل کمیٹی کے اہل کاروں کی آشیرباد سے قبضے ضرور ہو رہے ہیں۔

ان کا کہنا تھا کہ ان کی آئندہ ترجیحات میں جنرل بس اسٹینڈ کو چنی گوٹھ روڈ پر واقع زیر تکمیل سبزی منڈی کے ساتھ منتقل کرنا شامل ہے جس میں جدید تقاضوں کے ہم آہنگ تمام ضروری سہولیات موجود ہوں گی۔

چوہدری محمود احمدنے بتایاکہ موجودہ بس سٹینڈ کی جگہ پر کچی منڈی کے عوام کے لیے کمیونٹی ہال بنانے کی تجویز ہے۔ ان کا کہنا تھا کہ اگر نئے بس سٹینڈ کے لیے سرکاری جگہ کم پڑی تو نجی اراضی بھی خریدی جا سکتی ہے۔

میونسپل کمیٹی لیاقت پور کے سابق چیئرمین اور صدر مرکزی انجمن تاجران لیاقت پور راشد رفیق چوہدری نے بتایا کہ یہ جنرل بس سٹینڈ تقریباًچار عشرے قبل منظور ہوا تھا۔ اس کی اراضی پر سکول، عیدگاہ اور ریسکیو دفاتر بننے سے رقبہ کم ہو گیا جس کے بعد سے اس کی تجدید نہ ہو سکی۔ راشد رفیق کے مطابق انہوں نے بطور چیئرمین میونسپل کمیٹی لیاقت پور سیکرٹری ریجنل ٹرانسپورٹ اتھارٹی رحیم یار خان سے ملاقات کر کے بس سٹینڈ لائسنس کی تجدید کا کہا تھا مگر سیکریٹری نے واضح کیا تھا کہ حکومتی پالیسی ہے کہ سی کلاس بس سٹینڈ کے لیے کم از کم 28 کنال اراضی ہونا ضروری ہے۔ راشد رفیق نے بتایا کہ فی الوقت کہا جا سکتا ہے کہ جنرل بس سٹینڈ لیاقت پور منظور شدہ نہیں۔ یہی وجہ ہے کہ میونسپل کمیٹی &quot;بس سٹینڈ فیس&quot; کی بجائے &quot;پارکنگ فیس&quot; کے نام سے وصولی کرتی ہے۔

سیکرٹری ریجنل ٹرانسپورٹ اتھارٹی رحیم یار خان ریاست علی نے جنرل بس سٹینڈ کی حیثیت کے بارے میں بتایا کہ لیاقت پور میں سرکاری طور پر کوئی بس سٹینڈ وجود نہیں رکھتا۔

حاجی محمد اکرم وسیر یونین کونسل سٹی لیاقت پور کے نائب ناظم اور کچی منڈی سے کئی بار منتخب ہونے والے کونسلر ہیں۔ ان کا کہنا ہے کہ لاری اڈے کی جگہ پر ریاست بہاولپور کے عباسی نوابوں کا ریسٹ ہاؤس ہوا کرتا تھا۔ وقت گزرنے کے ساتھ وہ متروک ہوتا گیا۔ موضع چوہدری میں واقع مذکورہ اراضی 1980ء کی دہائی میں اس وقت کے کمشنر بہاولپور نے جنرل بس سٹینڈ کے لیے مختص کر دی۔ تب یہ رقبہ 15 ایکڑ سے زیادہ تھا مگر بعد میں اسی اراضی پر مسجد، عید گاہ، گرلز ایلیمنٹری سکول (اب سیکنڈری سکول)، بوائز پرائمری سکول، محکمہ پبلک ہیلتھ اور ریسکیو 1122 کے دفاتر قائم کر دیے گئے۔

&nbsp;&quot;بلدیہ لیاقت پور کے ایک سابق چیئرمین نے اپنے من پسند لوگوں کو بھی خاصی اراضی الاٹ کر دی قریبی رہائشوں نے بھی بس سٹینڈ کی کچھ اراضی پر قبضہ کر لیا۔ اب یہ جگہ 10 یا 12 کنال سے زیادہ نہیں رہی یہی وجہ ہے کہ یہ بس سٹینڈ محکمہ ٹرانسپورٹ کی سی کلاس درجہ بندی پر بھی پورا نہیں اترتا۔&quot;

انجمن تاجران کے جنرل سیکرٹری ممتاز حسین بلوچ اللہ والا چوک کی قریب ہی کاروبار کرتے ہیں۔ انہوں نے بتایا کہ چوک کے دکان دار بسوں اور ویگنوں کے یہاں رکنے کو اپنے کاروبار میں اضافہ کا باعث سمجھتے ہیں۔ تاہم چوک پر سواریوں کے لیے آنے والے رکشوں، موٹرسائیکلوں اور سامان کی نقل و حرکت کے لیے گدھا ریڑھیوں اور لوڈر رکشوں کے مسلسل کھڑا رہنے سے مسائل پیدا ہوتے ہیں۔

خالد محمود خان بلوچ اللہ والا چوک کے رہائشی اور میونسپل کمیٹی لیاقت پور کے سابق کونسلر ہیں۔ انہوں نے بتایا کہ اللہ والا چوک کے اطراف کے رہائشی غیر قانونی ٹرانسپورٹ اڈوں کی وجہ سے شدید اذیت میں مبتلا ہیں۔ یہاں کھڑی ہونے والی کوچز، بسوں اور ویگنوں کے ڈرائیور بلاجواز اور مسلسل پریشر ہارن بجاتے رہتے ہیں۔ اس سے بہرہ کر دینے والی شدید صوتی آلودگی پیدا ہوتی ہے۔

پارکنگ ٹھیکیدار شاہد اکبر چوہدری کا کہنا ہے کہ بھاری رقم کی ادائیگی کے باوجود بس سٹینڈ پر مسافروں، ٹرانسپورٹروں اور وصولی کرنے والے ٹھیکیدار کے ملازمین کے لیے سہولیات نہیں۔ بس سٹینڈ کا منظور شدہ نہ ہونا بھی مقامی اور ضلعی انتظامیہ کے سامنے ایک سوالیہ نشان ہے۔ بس سٹینڈ کی اراضی پر ناجائز قبضوں کے بارے میں تحقیقات ہونی چاہئیں۔

ٹریفک پولیس انچارج عبدالغفور کمبوہ کے مطابق &quot;پولیس کے عملے نے سابق اسسٹنٹ کمشنر صاحبان سے متعدد ملاقاتوں میں گزارش کی تھی کہ جنرل بس سٹینڈ میں تجاوزات ختم کر کے یہاں سہولتیں فراہم کی جائیں تاکہ شاہی روڈ اور اللہ والا چوک پر ٹریفک جام سے بچا جا سکے مگر کوئی پیش رفت نہیں ہوئی۔&quot;

محمد شکیب سرور حال ہی میں اسسٹنٹ کمشنر لیاقت پور تعینات ہوئے ہیں۔ ان کے پاس میونسپل کمیٹی لیاقت پور کے ایڈمنسٹریٹر کا چارج بھی ہے۔ انہوں نے بتایا کہ جنرل بس سٹینڈ لیاقت پور کی جگہ بہت کم ہے۔ میونسپل کمیٹی لیاقت پور کی آئندہ منصوبہ بندی بس سٹینڈ کو شہر سے باہر مناسب جگہ منتقل کرنا شامل ہے۔

بیٹھنے کی جگہ ہے نہ بیت الخلا: میانوالی کا ادھورا بس اڈا مسافروں کے لیے زحمت بن گیا

لیاقت پور کا جنرل بس سٹینڈ جہاں بسیں اور ویگنیں کھڑی نہیں ہوتیں

رحیم یار خان کی تحصیل لیاقت پور کی بستی ملھ میں آج کل ہر گھر میں خوف اور پریشانی کا راج ہے۔ اسّی گھروں پر مشتمل اس بستی میں ایک مہینے کے اندر نو بچوں کی موت واقع ہو چکی ہے۔

ان تمام بچوں کو پہلے نزلہ زکام اور چھینکوں کی شکایت ہوئی، اس کے بعد تیز بخار اور اسہال کی کیفیت رہی جس کے بعد انہوں نے کھانا پینا چھوڑ دیا اور ایک ہفتے کے اندر انتقال کر گئے۔ جاں بحق ہونے والے تمام بچوں میں بیماری کی یکساں علامات پائی گئیں۔

یونین کونسل الہ آباد کی یہ بستی الہ آباد خان بیلہ روڈ سے تین کلومیٹر دور موضع رئیس پٹھان کا حصہ ہے۔ یہاں تقریباً 1200 لوگ رہتے ہیں جن میں زیادہ تر چھوٹے کسان، دیہاڑی دار کھیت مزدور اور بعض سرکاری ملازم ہیں۔

بستی کے مکین بتاتے ہیں کہ اب تک ایک سے گیارہ سال تک عمر کے نو بچے جاں بحق ہو چکے ہیں اور 15 سے زیادہ بہاول پور اور رحیم یار خان کے ہسپتالوں میں زیر علاج ہیں۔ تاہم محکمہ صحت کا دعویٰ ہے کہ جاں بحق ہونے والے بچوں کی تعداد چھ ہے۔ انتقال کر جانے والوں میں دو گھرانوں کے دو دو بچے بھی شامل ہیں۔

محکمہ صحت نے بستی ملھ میں ایک طبی کیمپ لگایا ہے جہاں بچوں کے امراض کے ماہر ڈاکٹر قاضی میمد یوسف اور ڈاکٹر عبدالرحمان دو شفٹوں میں مریضوں کا معائنہ کر رہے ہیں۔ ڈاکٹر قاضی یوسف نے بتایا کہ 14 بچوں کے بلڈ سیمپل لئے گئے ہیں اور بستی و ملحقہ آبادیوں کے ایک ہزار سے زیادہ بچوں کو حفاظتی ٹیکے لگا دیے گئے ہیں اور یہ عمل جاری ہے۔

تحصیل ہیڈ کوارٹر ہسپتال لیاقت پور کے ڈپٹی میڈیکل سپرنٹنڈنٹ ڈاکٹر شاہد اقبال رانا کی رائے میں ممکنہ طور پر اس بستی کو خسرے کی وبا کا سامنا ہے۔ انہوں نے لوک سجاگ کو بتایا کہ بستی ملھ کی صورتحال کے پیش نظر ہسپتال میں ہائی الرٹ ہے جہاں بچوں کے لئے ایک وارڈ مختص کر کے وہاں ڈاکٹروں کی ڈیوٹی لگا دی گئی ہے تاہم ابھی تک ہسپتال میں اس بستی کا کوئی بچہ نہیں لایا گیا۔

بستی میں قائم کئے گئے میڈیکل کیمپ کے ڈاکٹر عبدالرحمٰن کی رائے میں بھی ان بچوں کی اموات خسرہ بگڑنے سے ہوئی ہیں۔ ان کا کہنا ہے کہ اب حالات کنٹرول میں ہیں اور مزید کسی بچے کی جان کو سنگین خطرہ نہیں ہے۔

بہاولپور کے ڈائریکٹر ہیلتھ اور عالمی ادارہ صحت (ڈبلیو ایچ او) کی ٹیم نے بھی بستی کا دورہ کر کے صورتحال کا جائزہ لیا ہے۔ اس کے علاوہ رحیم یار خان سے بھی سرویلیئنس افسر موقع پر پہنچے ہیں۔ محکمہ صحت نے بچوں کی اموات کے بعد ڈپٹی ڈسٹرکٹ ہیلتھ افسر ڈاکٹر غلام شبیر لاکھو کو تبدیل کر دیا ہے۔ ان کے پاس اس عہدے کا اضافی چارج تھا۔

بستی ملھ میں بیشتر بچے غذائی قلت کا شکار اور لاغر ہونے کی وجہ سے بیماریوں کا آسان ہدف ہیں۔غربت عام ہونے، تعلیم کی کمی اور خاندانی منصوبہ بندی کی عدم موجودگی کے باعث بچوں کی صحت کی طرف دھیان نہیں دیا جاتا۔ یہ حالات اس بستی سے ہی مخصوص نہیں بلکہ گردونواح کے دیگر علاقوں میں بھی یہی صورتحال ہے۔

ملک بھر میں جاری ماں اور بچے کی صحت کے حوالے سے قومی پروگرام اس علاقے میں چھ سال سے بند پڑا ہے۔یہاں کوئی لیڈی ہیلتھ ورکر تعینات نہیں جو گھر گھر جا کر ماں اور بچے کی صحت بارے آگاہی دے سکے۔

ڈسٹرکٹ ہیڈکوارٹرز ہسپتال کے ڈاکٹروں کا کہنا ہے کہ اس علاقے کو فوری طور پر نیشنل ہیلتھ پروگرام میں شامل کیا جائے اور بستی و قرب و جوار کے نحیف و کمزور بچوں میں غذائیت کی کمی دور کرنے کی ہنگامی مہم شروع کی جائے۔

ڈاکٹر منیر اقبال بولان میڈیکل میں بطور سینئیر کنسلٹنٹ کام کرتے رہے ہیں۔

انہوں نے لوک سجاگ کو بتایا کہ کووڈ 19 کے دو تین سالوں میں بہت سے بچوں کی سالانہ ویکسین نہیں ہوسکی جس کی وجہ سے ان بچوں میں بیماریوں کے خلاف قوت مدافعت کم ہوگئی۔

&quot;خسرہ ایک متعدی مرض ہے اور اس&nbsp; کے دانے پانچ روز تک ظاہر نہیں ہوتے۔ والدین بچوں کو بخار، نزلہ اور چھینکوں کے علاج کے لیے عام ڈاکٹروں کو دکھاتے ہیں۔ ان میں سے کچھ عطائیوں کے پاس چلے جاتے ہیں جو ان کو اینٹی بائیوٹک اور دیگر دوائیں دے دیتے ہیں جس سے بچے کی حالت مزید بگڑ جاتی ہے۔

ڈاکٹر اقبال کہتے ہیں کہ اگر شروع میں درست تشخیص ہو تو بچے کی جان بچائی جاسکتی ہے۔

&quot;والدین کو چاہیے کہ وہ بچوں کو ہونے والے عام بخار کو بھی نظر انداز نہ کریں اور فوراً بچوں کے ڈاکٹر سے رجوع کریں۔

نیشنل پروگرام تحصیل لیاقت پور کی ایک لیڈی ہیلتھ سپروائزر نے نام ظاہر نہ کرنے کی شرط پر لوک سجاگ کو بتایا کہ &quot;پوری بستی ویکسینیشن کے حوالے سے بہت غیر محتاط اور لاپروا ہے یہاں کے بیشتر لوگ اپنے بچوں کی ویکسینیشن نہیں کرواتے&quot;۔

بستی میں تعینات رہنے والے محکمہ صحت کے ویکسینیٹر محمد ساجد کا کہنا ہے کہ مرنے والے بچوں میں سے صرف دو کی ویکسینیشن ہوئی تھی مگر وہ بھی باقاعدگی سے نہیں ہوئی تھی۔

&quot;اگر والدین کو سمجھانے اور ویکسین کی افادیت بتانے کی کوشش کی جائے تو وہ مرنے مارنے پر اتر آتے ہیں بستی کے لوگوں نے یہاں آنے والے صوبائی سطح کے ایک آفیسر سے بھی بدکلامی کی تھی&quot;۔

ڈپٹی ڈسٹرکٹ ہیلتھ آفس لیاقت پور میں تعینات اسسٹنٹ سپرنٹنڈنٹ (حفاظتی ٹیکہ جات) نذیر رحمانی&nbsp; بتاتے ہیں کہ دو سال قبل 9 ماہ سے 10 سال کے بچوں کو خسرہ سے بچاؤ کی ویکسین لگانے کی مہم چلائی گئی تھی اس دوران تحصیل بھر کی طرح اس بستی میں بھی ٹیمیں بھیجی گئیں۔ مگر بہت سے والدین نے اپنے بچوں کو ویکسین&nbsp; لگوانے سے انکار کر دیا تھا۔

مگر بستی ملھ اور گردونواح&nbsp; کے لوگ کچھ اور کہانی سناتے ہیں۔ ان کا کہنا ہے کہ علاقے میں بچوں کی ویکسینیشن کے لیے صرف ایک ویکسینیٹر تعینات ہے جو حفاظتی ٹیکے لگانے کے لیے مسجد میں اعلان کروا کر کسی جگہ بیٹھ جاتا ہے۔ اس لیے بیشتر لوگ اپنے بچوں کو ٹیکے لگوانے نہیں لاتے۔

نذیر رحمانی اس الزام کی تردید کرتے ہیں۔ وہ کہتے ہیں کہ ویکسین متعلقہ بیماری کے مقابلے میں قوت مدافعت بڑھاتی تو ہے تاہم یہ اس بیماری کے لاحق ہونے کے امکانات کو کم تو کر دیتی ہے لیکن مکمل طور پر ختم نہیں کر دیتی۔

سپائنا بائیفڈا: نوزائیدہ بچوں کی یہ جان لیوا بیماری رحیم یار خان کے دیہات میں کیوں بڑھ رہی ہے؟

لیاقت پور کی بستی میں بچوں کی لگاتار اموات: ویکسینیشن کے بندوبست کی کمیاں، کوتاہیاں دور کرنا کس کی ذمہ داری ہے؟

رحیم یار خان کی تحصیل لیاقت پور کے رہنے والے غلام قادر اپنی بکریوں کے لئے سبز پتے حاصل کرنے درخت پر چڑھے تو پاؤں پھسلنے کے باعث زمین پر آ گرے۔ اس حادثے میں ان کی ریڑھ کی ہڈی بری طرح متاثر ہوئی اور وہ گہری بیہوشی میں چلے گئے۔ اہلخانہ فوری طور پر انہیں تحصیل ہیڈکوارٹر ہسپتال لائے جہاں ڈاکٹروں نے انہیں بہاولپور منتقل کرنے کے لئے کہہ دیا۔

لیاقت پور سے دو گھنٹے کا فاصلہ طے کرنے کے بعد جب انہیں بہاولپور کے بہاول وکٹوریا ہسپتال لایا گیا تو سفر میں لگنے والے جھٹکوں سے ان کی ریڑھ کی ہڈی کا فریکچر مزید بگڑ چکا تھا۔ غلام قادر کو انتہائی نگہداشت کے وارڈ میں رکھا گیا جہاں وہ چند روز بعد انتقال کر گئے۔

غلام قادر کے ورثا کا کہنا ہے کہ اگر لیاقت پور کے ہسپتال میں انتہائی نگہداشت کا یونٹ (آئی سی یو) فعال ہوتا تو ان کی جان بچ سکتی تھی۔

لیاقت پور کی سویٹس اینڈ بیکرز ایسوسی ایشن کے صدر اصغر علی بیرا موٹرسائیکل کے حادثے میں شدید زخمی ہوئے تو انہیں تحصیل ہیڈکوارٹر ہسپتال میں لے جایا گیا لیکن وہاں ان کے فوری علاج کی سہولیات موجود نہیں تھیں۔ ڈاکٹروں نے انہیں رحیم یار خان کے شیخ زاید ہسپتال ریفر کیا لیکن وہ راستے میں ہی انتقال کر گئے۔

تحصیل ہسپتال میں آئی سی یو سمیت کئی شعبہ جات فعال نہ ہونے کے باعث بہت سے لوگ ایسی چوٹوں اور امراض کے سبب انتقال کر جاتے ہیں جن کا بروقت علاج ہونے کی صورت میں ان کی جان بچ سکتی ہے۔

2020 میں تحصیل ہیڈ کوارٹر ہسپتال میں 82 لاکھ روپے کی لاگت سے دس بستروں پر مشتمل آئی سی یو قائم کرنے پر کام شروع ہوا تھا جو اس سے اگلے سال مکمل ہو گیا اور محکمہ بلڈنگ نے اس کی عمارت ہسپتال انتظامیہ کے سپرد کر دی۔ لیکن تاحال اس یونٹ میں نہ تو کوئی مشینری نصب کی گئی ہے اور نہ ہی کوئی عملہ تعینات کیا گیا ہے۔ فی الوقت اس عمارت میں بچوں کا شعبہ کام کر رہا ہے اور انتہائی نگہداشت کے ضرورت مند مریضوں کو بہاولپور اور رحیم یار خان بھیج دیا جاتا ہے۔

اکتوبر 2019 میں لیاقت پور کی حدود میں چلتی ٹرین پر آگ لگنے سے 85 افراد زندہ جل گئے تھے۔ اس حادثے میں زخمی ہونے والے بہت سے مریضوں کو ابتداً تحصیل ہیڈ کوارٹر ہسپتال لیاقت پور منتقل کیا گیا مگر برن یونٹ کی سہولت نہ ہونے کے باعث انہیں بہاولپور اور رحیم یار خان بھیجنا پڑا اور زیادہ جھلسنے والے مسافروں کو پاک فوج کے ہیلی کاپٹروں کے ذریعے ملتان کے نشتر ہسپتال پہنچایا گیا۔

حادثے کے بعد اس وقت کے وزیراعلیٰ پنجاب عثمان بزدار نے تحصیل ہیڈکوارٹر ہسپتال میں برن یونٹ بنانے کا اعلان کیا لیکن بات اعلان سے آگے نہ بڑھ سکی۔

ایک ماہ قبل اس ہسپتال کے میڈیکل سپرنٹنڈنٹ کا عہدہ سنبھالنے والے ڈاکٹر بلال رحمانی نے لوک سجاگ کو بتایا کہ انہوں نے سب سے پہلے ہسپتال میں ڈائلیسس سنٹر فعال کرنے کی کوشش کی ہے جس پر کافی کام ہو چکا ہے۔ آئی سی یو کے حوالے سے ان کا کہنا تھا کہ سابق میڈیکل سپرنٹنڈنٹ نے ڈسٹرکٹ ہیلتھ اتھارٹی رحیم یار خان کے چیف ایگزیکٹو کو اس یونٹ میں عملہ اور مشینری فراہم کرنے کے لئے ڈیمانڈ لیٹر لکھے تھے لیکن تاحال ان کا جواب نہیں آیا۔

&#39;&#39;آئی سی یو میں عملے کی تعیناتی اور اس کی تعداد کا فیصلہ ڈسٹرکٹ ہیلتھ اتھارٹی نے کرنا ہے اور ضروری نہیں کہ وہ ہمیں اعتماد میں لے۔ مشینری کی فوری فراہمی اور عملے کی تعیناتی کے لئے ہم اتھارٹی کو دوبارہ لیٹر بھجوا رہے ہیں۔ آئی سی یو کی نئی عمارت کو بند رکھنے سے اس کے خراب ہونے کا اندیشہ تھا اس لئے یہاں عارضی طور پر شعبہ اطفال قائم کیا گیا ہے۔&#39;&#39;

تحصیل ہیڈکوارٹر ہسپتال کا علاقہ صوبائی اسمبلی کے حلقے 257 کی حدود میں آتا ہے جہاں سے منتخب رکن اسمبلی چوہدری مسعود احمد کا کہنا ہے کہ انہوں نے اپنے حلقے کے لئے ملنے والی گرانٹ سے ہسپتال میں سہولیات پوری کرنے کے لئے 20 کروڑ روپے فراہم کئے تھے جن سے آئی سی یو کی مشینری بھی خریدی جانا تھی لیکن تاحال اس کے لئے ٹینڈر بھی جاری نہیں ہو سکے۔

اس سلسلے میں جب ڈسٹرکٹ ہیلتھ اتھارٹی کے چیف ایگزیکٹو آفیسر ڈاکٹر خان وزیر سے بات کرنے کی کوشش کی گئی لیکن نہ تو انہوں نے ٹیلی فون اٹینڈ کیا اور نہ ہی واٹس ایپ پر بھیجے گئے پیغام کا کوئی جواب دیا۔ 
تحصیل ہیڈکوارٹر ہسپتال میں آئی سی یو فعال نہ ہونے کی وجہ سے ریسکیو 1122 پر مالی بوجھ میں بھی اضافہ ہو گیا ہے۔

لیاقت پور میں ادارے کے ریسکیو اینڈ سیفٹی آفیسر عمران ساجد کے مطابق جب ان کے اہلکار زخمیوں کو ہسپتال کے شعبہ حادثات میں لاتے ہیں تو انتہائی نگہداشت کے متقاضی مریضوں کو بہاولپور یا رحیم یار خان منتقل کرنے کے لئے کہہ دیا جاتا ہے جس سے ادارے پر مالی بوجھ بڑھ جاتا ہے اور عملے کی کمی کا مسئلہ بھی پیدا ہوتا ہے۔

ہسپتال کے ڈپٹی میڈیکل سپرنٹنڈنٹ ڈاکٹر شاہد اقبال رانا کہتے ہیں کہ حادثاتی ٹراما، فالج، ہارٹ اٹیک، برین ہیمرج اور آگ سے متاثرہ افراد سمیت ہر اس مریض کو فوری طور پر آئی سی یو میں داخل کرنا لازمی ہوتا ہے جس کی حالت تشویشناک ہو اور اسے مصنوعی تنفس کی ضرورت ہو۔ لیاقت پور اور گردونواح کی بہت بڑی آبادی کی زندگیوں کو تحفظ دینے کے لئے ہسپتال میں آئی سی یو کو جلد از جلد فعال کیا جانا ضروری ہے۔

لیاقت پور کا ڈائلیسز سنٹر: دس سال سے کھڑی خالی عمارت

لیاقت پور تحصیل ہسپتال: 'انتہائی نگہداشت کا یونٹ فعال ہوتا تو جان بچ سکتی تھی'

رحیم یار خان کی تحصیل لیاقت پور کے علاقے ٹھکو میں رہنے والے 90 سالہ میوہ کلر دل اور پھیپھڑوں کے عارضے میں مبتلا تھے۔ ایک دن طبعیت زیادہ بگڑنے پر اہلخانہ انہیں لیاقت پور کے تحصیل ہیڈکوارٹر ہسپتال لے گئے جو اس علاقے سے 55 کلومیٹر فاصلے پر واقع ہے۔ ڈاکٹروں نے معائنہ کرنےکے بعد انہیں 100 کلومیٹر دور رحیم یار خانے کے شیخ زاید ہسپتال کو ریفر کر دیا جہاں پہنچنے سے پہلے ہی ان کا انتقال ہو گیا۔

میوہ کے اہلخانہ کا کہنا ہے کہ اگر ان کے علاقے میں کوئی اچھا ہسپتال ہوتا یا لیاقت پور اور رحیم یار خان پہنچنے کے لیے بہتر سڑکیں موجود ہوتیں تو ان کی جان بچائی جا سکتی تھی۔

لیاقت پور کا شمار رقبے کے لحاظ سے جنوبی پنجاب کی بڑی تحصیلوں میں ہوتا ہے۔ لیکن یہاں سڑکوں اور ٹرانسپورٹ کی ناکافی سہولتوں کی وجہ سے لوگوں کے لیے کہیں آنا جانا جوکھم کا کام ہے اور ضلع مرکز سے دوری کی وجہ سے ہر طبقہ زندگی سے تعلق رکھنے والے لوگوں کو آئے روز سفری مشکلات اور مایوسی کا سامنا رہتا ہے۔

لیاقت پور کے مرکز سے 17 کلومیٹر دور چک 143 عباسیہ کے محمد خالد کو اپنی بیٹی کا ڈومیسائل بنوانے کے لیے کاغذات مکمل کرنے کی غرض سے لیاقت پور کے کئی چکر لگانا پڑے۔ اس کے بعد ڈپٹی کمشنر آفس رحیم یار خان میں دستاویزات جمع کرانے، ان پر اعتراضات دور کرنے اور پھر ڈومیسائل وصول کرنے کے لیے انہیں کئی مرتبہ رحیم یار خان جانا آنا پڑا جس پر ان کا بہت سا وقت اور پیسہ خرچ ہو گیا۔

&#39;&#39;ہمیں چھوٹی چھوٹی سہولیات حاصل کرنے کے لیے بھی رحیم یار خان جانا پڑتا ہے۔ اگر ہمارے یہ کام لیاقت پور میں ہی ہو جائیں تو یہاں کے لوگ بہت سے مسائل سے بچ سکتے ہیں۔&#39;&#39;

بار ایسوسی ایشن لیاقت پور کے صدر سردار اسد نواز خان کا کہنا ہے کہ لیاقت پور کے دور دراز دیہات سے ضلعی ہیڈکوارٹر تک پہنچنے میں طویل وقت صرف ہوتا ہے۔ اگر اس تحصیل کو ضلع کا درجہ دے دیا جائے تو یہاں کی تقریباً گیارہ لاکھ آبادی کی بہت سی مشکلات ختم ہو جائیں گی۔

لیاقت پور کا احاطہ کرنے والے صوبائی اسمبلی کے حلقے 255 کے سابق ایم پی اے رئیس محمد اقبال ایڈووکیٹ کا کہنا ہے کہ لیاقت پور شہر کا اپنے ضلعی ہیڈ کوارٹر رحیم یار خان سے فاصلہ 100 کلومیٹر ہے مگر جب کچے کے مواضع، عباسیہ کے چکوک اور چولستان کے ٹوبہ جات سے لوگ تکلیف دہ سفر کے بعد لیاقت پور پہنچتے اور یہاں سے ضلعی ہیڈکوارٹر جاتے ہیں تو یہ فاصلہ ڈیڑھ سے پونے دو سو کلومیٹر تک جا پہنچتا ہے۔

&nbsp;وہ کہتے ہیں کہ 2002ء سے 2007ء کے دوران بطور رکن صوبائی اسمبلی انہوں نے لیاقت پور کو ضلع کا درجہ دلانے کی کوشش کی تھی مگر انہیں کامیابی نہ مل سکی۔

لیاقت پور کو ضلع بنانے کا مطالبہ پچھلی چار دہائیوں سے جاری ہے۔ اس حوالے سے جدوجہد کرنے والی مقامی تنظیم &#39;&#39;ضلع بناؤ تحریک&#39;&#39; کے چیئرمین سید شجر حسین نقوی نے لوک سجاگ کو بتایا کہ شہر کے لوگ اس سلسلے میں موجودہ و سابق ارکان قومی و صوبائی اسمبلی سے ملاقاتیں کر چکے ہیں، بہت سے عوامی اجتماعات میں بھی لیاقت پور کو ضلع بنانے مطالبات کیے گئے ہیں اور بار ایسوسی ایشن و انجمن تاجران سمیت علاقے کی پیشہ وارانہ و سماجی تنظیموں کی طرف سے حکام کو قراردادیں اور خطوط بھی بھجوائے گئے مگر کسی نے اس مطالبے کو سنجیدگی سے نہیں لیا۔

شجر حسین نقوی اس مطالبے کے حق میں دلیل دیتے ہوئے کہتے ہیں کہ ننکانہ صاحب جیسی چھوٹی تحصیل کو بھی ضلعے کا درجہ دے دیا گیا ہے تو لیاقت پور کو ضلع بنانے میں کیا قباحت ہے۔

&#39;&#39;لودھراں کو اس وقت ضلع بنایا گیا جب اس کی آبادی بہت کم تھی اور اس کا اپنے ڈسٹرکٹ ہیڈ کوارٹر ملتان سے فاصلہ 70 کلومیٹر اور بہاولپور سے 15 کلومیٹر تھا۔ حافظ آباد جیسے چھوٹے شہر کو بھی اس لیے ضلعے کا درجہ مل گیا کہ وہاں کی سیاسی قوتیں زیادہ موثر تھیں۔&#39;&#39;

سابق وزیراعلیٰ پنجاب پرویز الہٰی کے سیاسی معاون اور پی پی 256 سے تحریک انصاف کے سابق ایم پی اے عامر نواز خان چانڈیہ نے 2018ء میں اسمبلی کا رکن منتخب ہونے کے بعد ایوان میں اپنی پہلی تقریر میں لیاقت پور کو ضلع کا درجہ دینے کی قرارداد پیش کی تھی۔

ان کا کہنا ہے کہ صوبائی حکومت نے پنجاب بورڈ آف ریونیو کے ذریعے کمشنر بہاولپور اور ڈپٹی کمشنر رحیم یار خان سے اس بارے میں رپورٹ بھی طلب کر لی تھی لیکن اس دوران حکومت ختم ہو گئی۔

اس رپورٹ میں لیاقت پور کو ضلع کا درجہ دینے کی صورت میں سب تحصیل خان بیلہ اور ضلع بہاولپور کے تاریخی قصبہ اوچ شریف کو اس کی تحصیلیں بنانے کی سفارش کی گئی تھی۔

سابق تحصیل ناظم لیاقت پور اور پی پی 255 سے سابق ایم پی مخدوم سید مسعود عالم شاہ کا کہنا ہے کہ پنجاب کی متعدد تحصیلوں کو ضلعے کا درجہ دیا جا چکا ہے مگر لیاقت پور کو اہلیت کے تقاضے پورے کرنے کے باوجود نجانے کیوں ضلع نہیں بنایا جا رہا۔

چار دہائیوں سے ضلع بنانے کا مطالبہ کرتے لیاقت پور کے شہری: 'ہمیں چھوٹی چھوٹی سہولیات کے لیے بھی رحیم یار خان جانا پڑتا ہے'

رحیم یار خان کی بستی نوناری سے تعلق رکھنے والی شمشاد بی بی نے دو سال پہلے بڑے آپریشن کے بعد بچی کو جنم دیا جو پیدائش سے کچھ ہی دیر کے بعد انتقال کر گئی۔ ہسپتال سے ڈسچارج ہونے کے بعد شمشاد اپنے گھر واپس آئیں تو ان کی طبعیت مسلسل خراب رہنے لگی۔ انہوں نے اپنا چیک اپ کرایا تو معلوم ہوا کہ انہیں ہیپا ٹائٹس سی لاحق ہے جبکہ آپریشن سے پہلے انہیں یہ بیماری نہیں تھی۔

بستی نوناری رحیم یار خان کی تحصیل لیاقت پور میں واقع ہے اور شمشاد بی بی کا آپریشن تحصیل ہیڈکوارٹر ہسپتال میں ہوا تھا۔ اسی ہسپتال نے ہیپاٹائٹس کے علاج کے لیے انہیں تین ماہ کی ادویات تجویز کی ہیں۔ شمشاد نے یہ کورس مکمل کر لیا ہے اور اب دوبارہ ٹیسٹ کرانے پر معلوم ہو گا کہ انہیں کس قدر افاقہ ہوا ہے۔

ڈھائی سو گھروں پر مشتمل بستی نوناری کی آبادی دو ہزار ہے۔ شہر سے قریب ہونے کے باوجود یہاں زندگی کی بنیادی سہولتیں میسر نہیں ہیں۔ بستی کے زیادہ تر لوگ کاشتکاری اور اینٹوں کے بھٹوں پر مزدوری کرتے ہیں جبکہ بعض کراچی، لاہور اور دیگر شہروں میں محنت مشقت کر کے اپنے خاندانوں کی کفالت کرتے ہیں۔

شمشاد کے شوہر عاصم خان کو خدشہ ہے کہ ان کی اہلیہ کو ہیپاٹائٹس کی بیماری تحصیل ہسپتال لیاقت پور میں بچے کی پیدائش کے دوران آلودہ آلات جراحی کے استعمال سے لاحق ہوئی تھی کیونکہ آپریشن سے پہلے کئے گئے ٹیسٹ میں انہیں ہیپا ٹائٹس نہیں تھا۔

بستی نوناری کے ملازم حسین، رب نواز، محمد رمضان اور ان کی اہلیہ صائمہ بی بی، بشیراں بی بی، خلیل احمد، شکیل، شہباز، شازیہ، شاد بی بی اور عارف سمیت بہت سے لوگوں کو ہیپا ٹائٹس سی لاحق ہے۔ پچھلے دو سال میں ریاض، حمیدہ بی بی، صغراں بی بی، فیض احمد، نزہت بی بی، عبدالعزیز اور چند دیگر لوگ اس مرض میں مبتلا رہنے کے بعد انتقال کر گئے ہیں۔

تحصیل ہیڈ کوارٹر ہسپتال لیاقت پور میں قائم ہیپاٹائیٹس کنٹرول پروگرام کے تحت چلائے جانے والے ہیپا ٹائٹس کلینک میں اس سال فروری میں 620 افراد کا معائندہ کیا گیا جن میں 49 افراد ہیپا ٹائٹس بی اور 120 ہیپاٹائٹس سی میں مبتلا پائے گئے۔

2022 میں یہاں مجموعی طور پر 6061 افراد نےاپنا معائنہ کراوایا جن میں 530 افراد میں ہیپاٹائیٹس بی اور 1440 افراد میں ہیپاٹائیٹس سی کی تشخیص ہوئی۔

ہسپتال میں اس شعبے کی سربراہ ڈاکٹر اقراء مدثر کہتی ہیں کہ یہ دونوں بیماریاں متاثرہ افراد کے زیراستعمال رہنے والی سرنجوں، بلیڈ، قینچی، نیل کٹر، ٹوتھ برش اور آلات جراحی سے پھیلتی ہیں۔ ان کا کہنا ہے کہ عام خیال کے برعکس ہیپاٹائٹس سی کا پینے کے پانی میں آرسینک یا مرکری کی آمیزش سے کوئی تعلق نہیں ہے۔

اس بات سے شمشاد بی بی کے شوہر عاصم کے خدشات کی تصدیق ہوتی ہے۔

ڈاکٹر اقراء بتاتی ہیں کہ لیاقت پور کے کچے کے علاقوں کے علاوہ چولستان میں بھی ہیپاٹائٹس کے مریضوں کی تعداد بہت زیادہ ہے۔ ہسپتال میں لوگوں کو اس وائرس کی سکریننگ اور علاج کی بلاتخصیص مفت سہولت فراہم کی جا رہی ہے تاہم لوگوں کو اس مرض اور اس کے علاج بارے میں مقامی سطح پر آگاہی دینے کی ضرورت ہے۔

تحصیل انجمن تاجران کے جنرل سیکرٹری اور بستی نوناری کے رہائشی ممتاز حسین بلوچ بتاتے ہیں کہ نوناری میں ہر سال پانچ سات افراد ہیپا ٹائٹس سی کا شکار ہو کر انتقال کر جاتے ہیں۔ بستی کے مکین نہیں جانتے کہ انہیں یہ بیماری کیوں لاحق ہوتی ہے اور محکمہ صحت نے بھی ابھی تک جانب کوئی توجہ نہیں دی۔ ان کا خیال ہے کہ بستی میں لوگوں کی ان اموات کے پیچھے کہیں نہ کہیں پینے کے آلودہ پانی کا بھی کردار ہے۔

نوجوان ڈاکٹروں کی مقامی تنظیم ینگ الائیڈ ہیلتھ پروفیشنلز ایسوسی ایشن کے چیئرمین قدیر احمد سے جب علاقے میں اس بیماری کے پھیلاؤ کی ممکنہ وجوہات کے بارے میں پوچھا گیا تو ان کا کہنا تھا کہ ہیپاٹائٹس بی اور سی عمومی طور پر وائرل انفیکشن کا نتیجہ ہوتا ہے تاہم زہریلے اور سیوریج ملے پانی میں شامل مادوں کے بعض اجزا بھی اس بیماری کا سبب بن سکتے ہیں۔

تحصیل ہیڈ کوارٹر ہسپتال لیاقت پور کے ڈپٹی میڈیکل سپرنٹنڈنٹ ڈاکٹر شاہد اقبال رانا کہتے ہیں اگر بستی نوناری میں ہیپاٹائٹس کی شکایات زیادہ ہیں تو وہاں کے لوگوں کے لیے ہسپتال میں علاج کا خصوصی انتظام کیا جا سکتا جہاں روزانہ پندرہ سے بیس افراد اپنا معائنہ کروا سکیں گے۔

ڈپٹی ہیلتھ آفس لیاقت پور کے دفتر میں حفاظتی ٹیکوں کے شعبے کے اسسٹنٹ سپرنٹنڈنٹ نذیر رحمانی کا کہنا ہے کہ انتظامیہ نے ہیپاٹائٹس کی روک تھام اور اس کے بروقت علاج کے لیے خاطرخواہ انتظامات کر رکھے ہیں۔ اس سلسلے میں تحصیل لیاقت پور کے پانچ دیہی مراکز صحت اور 28 بنیادی مراکز صحت میں میں بالغ افراد کے لیے ہیپاٹائٹس چیک اپ کی سٹرپس دستیاب ہیں۔

&#39;&#39;اگر کسی کا مثبت رزلٹ آ جائے تو اس کا مفت علاج کیا جاتا ہے جو تین ماہ میں مکمل ہو جاتا ہے۔ حفاظتی ٹیکوں کے توسیعی پروگرام (ای پی آئی) میں پیدائش سے لےکر 14 دن کے اندر ہیپاٹائٹس سے بچاو کی &quot;برتھ ڈوز&quot; دی جاتی ہے جبکہ اس پروگرام میں ہیپاٹائٹس کی ویکسین بھی شامل ہے جو پیدائش سے لے کر 18 ماہ کی عمر تک کے بچوں کو لگائی جاتی ہے۔

نذیر کا کہنا ہے کہ ڈپٹی ہیلتھ آفس میں بستی نوناری میں ہیپاٹائیٹس کے پھیلاؤ کے حوالے سے کوئی اطلاع نہیں ہے۔

مہنگا اور غیر معیاری علاج: ہیپاٹائٹس کے غریب مریض سرکاری ہسپتالوں میں خوار۔

متاثرہ افراد کے زیر استعمال اشیا یا ہسپتال انتظامیہ کی غفلت: لیاقت پور میں ہیپاٹائٹس کے مریضوں کی تعداد کیوں بڑھ رہی ہے؟

رحیم یار خان کے مشہور جنگل عباسیہ پلانٹیشن کی طرف جائیں تو راستے پر بہت سے لوگ ٹریکٹر ٹرالیوں، لوڈر رکشوں، موٹرسائیکلوں اور سائیکلوں پر لکڑی لاتے دکھائی دیتے ہیں۔ یہ وہ لکڑی ہے جو جنگل سے چوری کی جاتی ہے اور اسے جنگل کے قریب آرا مشینوں پر یا شہر میں فروخت کر دیا جاتا ہے۔ یہ سلسلہ کئی سال سے جاری ہے اور بہت سے لوگوں کا باقاعدہ کاروبار بن چکا ہے۔

عباسیہ پلانٹیشن رحیم یار خان میں منصوبہ بندی کے تحت اگائے گئے پاکستان کے سب سے بڑے جنگلات کا حصہ ہے جن کا مجموعی رقبہ 34 ہزار ایکڑ ہے۔

یہ رقبہ تین بڑے جنگلات پر مشتمل ہے جن میں عباسیہ پلانٹیشن اور قاسم والا جنگل تحصیل لیاقت پور میں واقع ہیں جبکہ ولہار کا جنگل تحصیل صادق آباد کی حدود میں آتا ہے۔

لیاقت پور میں عباسیہ پلانٹیشن کا مجموعی رقبہ چھ ہزار 749 ایکڑ پر مشتمل ہے جبکہ قاسم والا جنگل پانچ ہزار 150 ایکڑ&nbsp; پر پھیلا ہوا ہے۔ ان جنگلات میں 65 فیصد درخت سفیدے کے ہیں جبکہ 20 فیصد رقبے پر کیکر اور 15 فیصد پر شیشم اور دیگر درخت اگائے گئے ہیں۔

عباسیہ پلانٹیشن سے ملحقہ گاؤں کے رہنے والے سماجی کارکن مقبول احمد بتاتے ہیں کہ ان جنگلوں سے دن رات لکڑی چوری کی جا رہی ہے۔ وہ یہ الزام بھی عائد کرتے ہیں کہ لکڑی چوری کرنے والوں کو محکمہ جنگلات کے اہلکاروں کی پشت پناہی حاصل ہے۔

&#39;&#39;جنگلات کے محافظ اپنا حصہ وصول کر کے لکڑی چوری کرنے کی اجازت دے دیتے ہیں۔ جنگل میں صفائی کے لیے جن مزدوروں کی خدمات حاصل کی جاتی ہیں انہیں سرکاری ریکارڈ میں 18 ہزار روپے اجرت دی جاتی ہے لیکن عملی طور پر یہ ادائیگی نہیں ہوتی۔ اس کے بجائے محکمے کے اہلکار ان سے اجرت کے واؤچر پر دستخط کرا کے رقم خود رکھ لیتے ہیں اور مزدوروں سے کہا جاتا ہے کہ وہ اپنے معاوضے کے طور پر جنگل سے لکڑی کاٹ لیں۔&#39;&#39;

ایک بیلدار نے نام ظاہر نہ کرنے کی شرط پر بتایا کہ وہ پچھلے دس سال سے عباسیہ اور قاسم والا جنگل میں مزدوری کر رہے ہیں۔ انہیں اپنے کام کا معاوضہ کبھی نہیں ملا۔ اس کے بجائے محکمے کے اہلکار ان سے مسٹول (واؤچر) پر انگوٹھا لگوا کر محنتانے کے طور پر لکڑی کاٹنے کی اجازت&nbsp; دے دیتے ہیں۔ انہوں نے بتایا کہ ان کے خاندان کا گزر بسر اسی لکڑی کی فروخت پر ہے۔

مقبول احمد کا یہ بھی کہنا ہے کہ جب کبھی محکمے کے کسی اعلیٰ افسر نے جنگل کا دورہ کرنا ہو تو مبینہ طور پر اہلکار اپنی بدعنوانی کو چھپانے کے لیے نہر عباسیہ کے پشتے میں کٹ لگا کر جنگل میں پانی چھوڑ دیتے ہیں۔ اس طرح افسر کے لیے جنگل کا تفصیلی معائنہ کرنا مکن نہیں رہتا۔ ان جنگلوں میں آگ لگنے کے واقعات بھی عام ہیں اور عام طور پر یہ آگ لکڑی چوری کو چھپانے کے لیے لگائی جاتی ہے۔

عباسیہ پلانٹیشن کے بکھو والا بلاک سے ملحقہ گاؤں کے زمیندار سمیت خان نے سجاگ کو بتایا کہ لکڑی چوری کے باعث ان جنگلوں میں شیشم کے درخت نہ ہونے کے برابر رہ گئے ہیں جکہ کیکر اور سفیدے کے درخت بھی مسلسل کاٹے جارہے ہیں۔

&#39;&#39; شیشم کے درختوں کو جڑوں سے اکھاڑنے کے بعد نشان مٹانے کے لیے گڑھوں کو مٹی اور پتے بھر کر اس جگہ پانی چھوڑ دیا جاتا ہے۔ جنگل میں جمع ہونے والا&nbsp; کچرا 25 سے 30 ہزار روپے جبکہ پتے 20 ہزار روپے فی ٹرالی فروخت کیے جاتے ہیں۔ یہ کچرا اور پتے اینٹوں کے بھٹوں میں جلانے کے کام آتے ہیں جبکہ ان سے حاصل ہونے والی رقم سرکاری خزانے کے بجائے مبینہ طور پر محکمہ جنگلات کے افسروں اور اہلکاروں کی جیبوں میں جا رہی ہے۔ &#39;&#39;

عباسیہ پلانٹیشن کے بلاک آفیسر رانا محمد حفیظ اللہ بڑے پیمانے پر لکڑی چوری کو محض الزام قرار دیتے ہیں۔ انہوں نے سجاگ کو بتایا کہ جنگل کے اطراف میں رہنے والے غریب کاشتکار اور محنت کش اپنا چولہا جلانے کے لیے سوکھے پتے اور گری ہوئی شاخیں لے جاتے ہیں جنہیں روکا نہیں جاتا۔ البتہ کوئی لکڑی چوری میں ملوث پایا جائے تو اس کے خلاف ضرور کارروائی کی جاتی ہے۔

&quot;ہم چور کو جرمانہ کر کے لکڑی سرکاری خزانے میں جمع کروا دیتے ہیں۔ اگر کوئی عادی چور ہو اور باز نہ آئے تو اس کے خلاف مقدمہ درج کرایا جاتا ہے اور محکمہ اس کی پیروی کرتا ہے۔ پچھلے تین سال میں ایسے 15 مقدمات درج کیے گئے ہیں۔&#39;&#39;

&nbsp;رانا حفیظ کہتے ہیں کہ قانونی طور پر جنگلات کے اطراف آٹھ کلومیٹر کے دائرے میں کوئی آرا مشین نہیں لگ سکتی۔ ان کے محکمے نے ایسی کئی مشینیں ختم کروائی ہیں تاہم چک 11، 13 اور 50 عباسیہ میں طویل عرصہ سے لگی آرا مشینوں کو ختم کرانے میں بااثر لوگ رکاوٹ ہیں۔

مقبول کا کہنا ہے کہ ٹمبر مافیا اور کرپٹ اہلکاروں کا گٹھ جوڑ اس قدار طاقتور ہے کہ اگر کوئی فرض شناس آفیسر یا اہلکار لکڑی چوری روکنے کے لئے کارروائی کرنا چاہے تو اسے تشدد کا نشانہ بنایا ہے۔ گزشتہ سال فاریسٹ گارڈ اسلم نے لکڑی چوروں کو رنگے ہاتھوں پکڑا تو انہوں نے اس پر وحشیانہ تشدد کیا۔ اس واقعے کی ایف آئی آر تھانہ تبسم شہید میں درج ہوئی جس کے نامزد ملزم ضمانت پر ہیں۔

ڈسٹرکٹ فاریسٹ آفیسر راجہ جاوید اقبال لکڑی چوری ہونے کا اعتراف کرتے ہوئے کہتے ہیں کہ چوری مکمل طور پر نہیں رک سکی لیکن ان کا یہ دعویٰ بھی ہے کہ محکمے نے اس پر بڑی حد تک قابو پا لیا ہے۔

لیاقت پور سرکل کے سب ڈویژنل پولیس آفیسر اللہ یار سیفی لکڑی چوری عام ہونے کی ایک وجہ یہ بتاتے ہیں کہ موجودہ قوانین کے تحت اس جرم کی سزا اتنی سخت نہیں ہے کہ لوگ اس سے باز آ جائیں۔ وہ تجویز کرتے ہیں کہ جنگل سے غیرقانونی طور پر لکڑی چوری کرنے کے خلاف سخت قوانین متعارف کرائے جانے چاہئیں۔

لیاقت پور بار ایسوسی ایشن لیاقت پور کے سابق جنرل سیکرٹری صلاح الدین موہل بتاتے ہیں کہ لکڑی چوری کے بیشتر ملزم گرفتار ہی نہیں ہوتے اور عدالت سے ضمانت قبل از گرفتاری حاصل کر کے اس کی کنفرمیشن کروا لیتے ہیں۔ اس جرم کی سزا تین سال قید یا ایک لاکھ روپے تک جرمانہ ہے۔ لیکن عام طور پر عدالتیں قید کے بجائے ملزموں کو جرمانے کی سزا سناتی ہیں جو چند ہزار روپے ہی ہوتا ہے جسے ادا کرکے ملزم دوبارہ لکڑی چوری کرنے لگ جاتے ہیں۔&nbsp;

لیہ میں جنگلات کی غیر قانونی کٹائی: 'جہاں کبھی گھنے درخت تھے وہاں اب دھول اُڑتی ہے'۔

رحیم یار خان کے جنگلات میں درختوں کی غیر قانونی کٹائی:  محافظ ہی جاں کے دشمن بن گئے

خالد بدر تین دہائیوں سے رحیم یار خان کی تحصیل لیاقت پور کی فوجی کالونی میں مقیم ہیں اور اخبار بیچ کر گزر بسر کرتے ہیں۔

آج کل وہ اپنا گھر بیچ کر شہر کے کسی اور علاقے میں منتقل ہونا چاہتے ہیں مگر کوئی ان کا گھر خریدنے کو تیار نہیں ہے۔

&nbsp;معاملہ یہ ہے کہ خالد کی گلی کئی ماہ سے سیوریج کے پانی میں ڈوبی ہوئی ہے۔ گندے پانی میں اترے بغیر مکینوں کا کہیں آنا جانا ممکن نہیں۔

&quot;میونسپل کمیٹی کا عملہ کبھی کبھار عملہ سکر مشین سے پانی نکال کر لے جاتا ہے مگر گٹر چند منٹوں بعد دوبارہ ابلنے لگتے ہیں&quot;۔

خالد بتاتے ہیں کہ گندے پانی کی وجہ سے محلے میں جھگڑے بڑھ رہے ہیں لوگ گندا پانی اپنے گھروں میں داخل ہونے سے روکنے کے لیے گلی میں مٹی ڈال کر اس کا راستہ بدلنے کی کوشش کرتے ہیں تو یہ پانی ارد گرد کے گھروں کا رخ کر لیتا ہے اور گلی کے مکین لڑنے مرنے پر اتر آتے ہیں۔

جوہڑ نما گلی کے تعفن اور آلودگی نے یہاں کے مکینوں کا ناک میں دم کر رکھا اور مچھر اور مکھیاں وبائی بیماریاں پھیلا رہے ہیں۔ یہی وجہ ہے کہ باہر سے کوئی شخص یہاں آ کر رہنا پسند نہیں کرتا۔

یہ مسئلہ صرف خالد بدر یا فوجی کالونی کے باسیوں تک محدود نہیں۔شہر کے کئی علاقوں میں یہی صورتحال ہے۔ فوجی کالونی سے ملحق محلہ اسلام نگر شرقی و جنوبی کی کئی گلیاں گندے پانی کے نالوں کا منظر پیش کر رہی ہیں۔

مسلسل پانی کھڑا رہنے کی وجہ سے ان آبادیوں میں گھروں کی بنیادیں بھی کمزور ہو رہی ہیں۔علاقے کی پوش اور جدید سمجھی جانے والی ہاؤسنگ سکیم غربی کا چلڈرن پارک بھی پوری طرح گندے پانی میں ڈوبا ہوا ہے۔

2017ء کے آغاز میں اس وقت کے ایم پی اے میاں اسلام اسلم کی درخواست پر وزیراعلیٰ شہباز شریف نے لیاقت پور کو میگا سیوریج پراجیکٹ دینے کا اعلان کیا تھا جس پر 51 کروڑ 80 لاکھ روپے خرچ ہونا تھے۔

لاہور کی کمپنی پروگریسو انٹرنیشنل انجینئرز اینڈ کنٹریکٹرز نے یہ ٹھیکہ حاصل کر کے 24 جولائی 2017ء کو کام کا آغاز کیا۔ اس منصوبے کو 18 ماہ میں مکمل ہونا تھا اور ابتدائی طور پر اس کے لیے چھ کروڑ روپے جاری کیے گئے۔

اس منصوبے میں پرانے ڈسپوزل کی جگہ نئے کنووں اور تالابوں کی تعمیر کے علاوہ چک نمبر 20 عباسیہ کی حدود میں ایسوسی ایٹ کالج سے ملحقہ اراضی اور کچی منڈی میں نئے کنویں تعمیر کیے جانا تھے۔تاہم منصوبے میں اس بات کا کوئی ذکر نہیں ملتا کہ کنوؤں میں جمع ہونے والا پانی کہاں اور کیسے ڈسپوز آف کیا جائے گا۔

فنڈز کی فراہمی میں تعطل کے باعث اس منصوبے کی تکمیل کی مدت میں بار بار توسیع ہوتی رہی۔

محکمہ پبلک ہیلتھ کی طرف سے جنوری 2022ء میں جاری کردہ نوٹ کے مطابق پچھلے سالانہ ترقیاتی پروگرام میں اس منصوبے کی&nbsp; تکمیل کی حتمی تاریخ 30 جون 2022ء مقرر کی گئی تھی مگر اس تاریخ کو گزرے بھی آٹھ ماہ ہونے کو ہیں۔

پبلک ہیلتھ کے اپنے ریکارڈ کے مطابق عملی طور پر یہ سکیم 40 فیصد بھی مکمل نہیں ہو سکی۔ محکمے کے افسروں کی کارکردگی کا اندازہ اس طرح بھی لگایا جا سکتا ہے کہ حکومت اب تک اس منصوبے کے لیے 24 کروڑ روپے جاری کر چکی ہے مگر اس میں سے 19 کروڑ 80 لاکھ روپے پہ خرچ کیے گئے ہیں۔

&nbsp;لیاقت پور شہر میں سیوریج سسٹم کی لائنیں 40 سے 60 سال پرانی ہیں جن میں بعض ریت مٹی سے بھر چکی ہین تو کچھ گَل کر ناکارہ ہو گئی ہیں۔

میونسپل کمیٹی لیاقت پور کے چیف سینیٹری انسپکٹر ملک عبداللطیف نے سجاگ کو بتایا کہ پرانا ڈسپوزل ورکس ناکارہ ہو چکا ہے اور شہر بھر کے سیوریج کے اخراج کے لیے کوئی جگہ باقی نہیں بچی۔

&quot;پہلے ڈسپوزل ورکس کے ارد گرد کی زرعی زمینوں کو سیراب کرنے کے لیے سیوریج کا پانی فروخت کیا جاتا تھا مگر اب وہاں رہائشی منصوبوں پر کام ہو رہا ہے اور جو زمینیں باقی ہیں وہاں سبزیاں کاشت کی جاتی ہیں ہے جن کو سیوریج کا پانی لگانے پر پنجاب فوڈ اتھارٹی نے پابندی عائد کر رکھی ہے&quot;۔

ملک لطیف بتاتے ہیں کہ بارشوں کے موسم میں صورت حال زیادہ گھمبیر ہو جاتی ہے۔ پرانے ڈسپوزل ورکس پر پانی ذخیرہ کرنے کی گنجائش ختم ہونے کی وجہ سے سارا گندا پانی ملحقہ غوثیہ کالونی، ملک ٹاون، اقلیتی آبادیوں، حکیم آباد کے بوائز پرائمری سکول، اقلیتی قبرستان اور مندر میں داخل ہو جاتا ہے۔

&nbsp;ان کا کہنا ہے کہ نئی سکیم میں 75 ہارس پاور کی دو موٹریں لگائی گئی ہیں۔ ان میں سے ایک گزشتہ چھ ماہ سے خراب ہے جس کی وجہ سے پورے شہر کا لوڈ ایک موٹر پر آ چکا ہے۔ نئے منصوبے میں ایک جنریٹر خریدا گیا تھا مگر وہ بھی ناکارہ پڑا ہے۔

میونسپل کمیٹی لیاقت پور کے سب انجینئر وقاص سلیم کا کہنا ہے کہ میگا سیوریج منصوبے سے فی الحال ان کے ادارے کا کوئی تعلق نہیں۔ &quot;جب یہ سکیم مکمل ہو گی تو تبھی اسے میونسپل کمیٹی کے حوالے کیا جائے گا&quot;۔ وہ یہ بھی کہتے ہیں کہ اگر اس منصوبے کے لیے فنڈ بروقت جاری کر دیے جاتے تو یہ کب کا مکمل ہو چکا ہوتا۔

&nbsp;ویسے تو پینسٹھ ہزار نفوس پر مشتمل اس شہر کے تمام بازاروں، مارکیٹوں اور گلی محلوں میں یہی صورتحال دیکھنے کو ملتی ہے۔ لیکن رشید آباد، غوثیہ کالونی، اسلام نگر، مہاجر و فوجی کالونی، محلہ شیخ مظہر حسین، ریسٹ ہاوس روڈ،&nbsp; واپڈا روڈ، قصاب مارکیٹ، کرسچن کالونی،چک 87 بینک روڈ، کچی منڈی شمالی و جنوبی پھاٹک روڈ، غلہ منڈی اور عقب تھانہ سٹی میں یہ خرابی زیادہ نمایاں ہے۔

&nbsp;گزشتہ چار سال تک صوبائی اسمبلی کے رکن رہنے والے چوہدری مسعود احمد محکمہ پبلک ہیلتھ کو اس منصوبے کی سست روی کا ذمہ دار ٹھہراتے ہیں۔

&quot;منصوبہ مکمل نہ ہونے کی وجہ سے شہر میں کروڑوں کی لاگت سے نئی تعمیر ہونے والی سڑکیں برباد ہو رہی ہیں۔بیشتر تعلیمی اداروں کے اردگرد سیوریج کا پانی جمع ہے جو طلبہ و طالبات کی جسمانی و ذہنی صحت پر منفی اثرات مرتب کر رہا ہے&quot;۔

&nbsp;ان کا کہنا ہے کہ میونسپل کمیٹی میں حال ہی میں بھرتی ہونے والے سینیٹری ورکرز گھر بیٹھے تنخواہیں لے رہے ہیں۔ بلدیہ کے پاس وینچ مشینیں موجود ہیں لیکن چلانے کے لیے عملہ نہیں۔

انہوں ںے الزام لگایا کہ پانی کھینچنے والی سکر، جیٹنگ ( پانی کے بہاؤ میں رکاوٹ بننے والی اشیا کو پریشر سے صاف کرنے والی مشین) اور دیگر مشینری میں استعمال ہونے والا ڈیزل خوردبرد کیا جا رہا ہے۔

مقامی سماجی کارکن سجاد حسین فرید نے سجاگ کو بتایا کہ لیاقت پور میں پبلک ہیلتھ ڈیپارٹمنٹ کا کوئی مستقل ایس ڈی او تعینات نہیں ہے۔ جیسے ہی سیوریج پراجیکٹ کے لیے فنڈ ریلیز ہوتے ہیں یہاں کسی ایس ڈی او کو بھیج دیا جاتا ہے جو فنڈ ختم ہونے کے بعد اپنا تبادلہ کروا لیتا ہے۔

ان کا کہنا ہے کہ محکمے کے افسروں نے اس میگا سکیم کی غلط منصوبہ بندی کی اور &quot;زون بی&quot; کی سیوریج لائن کی نکاسی کے&nbsp; لیے جو ڈیزائن بنایا وہ پانی کے قدرتی بہاؤ سے الٹ ہے۔

&quot;جن شہری آبادیوں میں پہلے سے سیوریج لائن موجود نہیں، انہیں نئے پراجیکٹ میں بھی نظرانداز کر دیا گیا سکیم کے تینوں مجوزہ حصوں پر بیک وقت کام شروع کیا گیا جس کی وجہ سے کوئی ایک زون بھی مکمل نہیں ہو سکا&quot;۔

وہ کہتے ہیں کہ ٹھیکیداروں کو قواعد کے برعکس ایڈوانس ادائیگیاں کر دی جاتی ہیں۔ اس منصوبے کے ٹھیکیدار کے پاس ٹیکنیکل ٹیم ہی نہیں تھی جس کا نتیجہ یہ نکلا کہ چھ کروڑ روپے کی لاگت سے پانچ ہزار 600 فٹ طویل پائپ لائن بغیر کسی منصوبہ بندی کے ڈسپوزل ورکس سے نہر ٹو آر عباسیہ مالی والے پل کی طرف بچھا دی گئی۔ اس لائن کے راستے میں آنے والی زرعی زمینوں کے مالکان نے منصوبے کے خلاف حکم امتناعی لے کر رکھا ہے۔ جب تک اس کا فیصلہ نہیں ہوتا یہ لائن چالو&nbsp; نہیں ہو سکے گی۔

محکمہ پبلک ہیلتھ لیاقت پور کے سب انجینئر ملک یاسر میگا سیوریج پراجیکٹ کے نگران ہیں۔ انہوں نے منصوبے کی تکمیل میں تاخیر کی وجہ فنڈز کی عدم فراہمی کو قرار دیا۔ وہ کہتے ہیں کہ نگران حکومت نے بھی آتے ہی ترقیاتی منصوبوں کے فنڈز مکمل طور پر روک دیے ہیں۔&quot;تاہم ٹھیکیدار محکمہ پبلک ہیلتھ سے تعاون کر رہا ہے&quot;۔

سب انجینئر کا کہنا تھا کہ اس منصوبہ کی مد میں رکھی گئی مکمل رقم ریلیز ہو جاتی تو منصوبہ بروقت مکمل ہو جاتا اور لوگوں کو مشکلات کا سامنا نہ کرنا پڑتا۔

ساہیوال کے کسان سیوریج کو نہری پانی میں ملانے پر راضی نہیں، دیہات میں سیوریج نظام کا منصوبہ کیسے ناکام ہوا؟

لیاقت پور کی فوجی کالونی میں ہمسائے کیوں لڑ رہے ہیں؟

سعید الرحمٰن کو جب ٹرین کا انتطار کرتے ہوئے تین گھنٹے گذر گئے تو ان کے صبر کا پیمانہ لبریز ہوگیا۔ وہ اپنے 25 سالہ بھائی بلال کے گردوں کا ڈائلیسز کروا کر خان پور سے واپس اپنے گھر لیاقت پور آرہے تھے۔

خان پور سے لیاقت پور کا فاصلہ 50 کلو میٹر ہے۔سردی بڑھتی جارہی تھی اور سعید کی فکر بھی۔ انہوں نے لیاقت پور میں اپنے دوست کو فون کرکے مدد مانگی۔

ان کے بھائی کو گردوں کے مرض کی تشخیص 2021ء کے اوائل میں ہوئی اور مرض اتنا بڑھ گیا کہ اسی سال مارچ میں ان کا ہفتے میں ایک اور پھر دو مرتبہ ڈائلیسسز ہونے لگا۔

ان کے اپنے شہر کے سرکاری ہسپتال میں ڈائلیسز سنٹر کی بلڈنگ کی تعمیر لگ بھگ دس سال پہلے مکمل ہو گئی تھی لیکن اس وقت سے یہ صرف دھول اکٹھی کر رہی ہے۔

سعید الرحمٰن لوکل گورنمنٹ اینڈ کمیونٹی ڈویلپمنٹ میں گریڈ 14 کے اہلکار اور یونین کونسل نمبر 125 کچی محمد خان میں بطور سیکرٹری فرائض انجام دے رہے ہیں۔

سعید الرحمن بتاتے ہیں کہ مریض کے ساتھ ایک آدمی کا ہونا لازم ہوتا ہے اور کرائے بھاڑے پر بھی خاصے اخراجات ہوتے ہیں۔ ابتدا میں تو وہ کرائے کی گاڑی کا انتظام کرتے رہے مگر پانچ ماہ بعد ہی یہ ان کے لیے ممکن نہ رہا تو انہوں نے ٹرین کا سفر اختیار کیا۔

&quot;بھائی کے ڈائلاسیز پر ایک سال کے دوران پانچ لاکھ سے زائد اخراجات ہوئے۔ میں ایسے خاندانوں کو بھی جانتا ہوں جو اپنے مریضوں کو سفر کی اذیت سے بچانے کے لیے عارضی طور پر بڑے شہروں میں منتقل ہو چکے ہیں&quot;۔

ہفتے میں دو بار ڈائلاسیز کے تکلیف دہ عمل سے گزرنے والا سعیدالرحمن کا بھائی محمد بلال زیادہ دیر زندگی کی جنگ نہ لڑ سکا اور اپریل 2022ء میں اپنے خالق حقیقی سے جا ملا۔

<h2>عمارت تیار، عملہ ندارد</h2>

2017ء کی مردم شماری کے مطابق جنوبی پنجاب کے ضلع رحیم یار خان کی تحصیل لیاقت پور کی آبادی 12 لاکھ نفوس پر مشتمل ہے جن کی اکثریت زراعت پیشہ ہے۔ یہاں صنعتیں ہیں نہ بڑے کاروباری مراکز۔

دس سال پہلے تحصیل ہیڈکوارٹر ہسپتال میں دو کروڑ روپے کی لاگت سے ڈائلیسز سنٹر کی عمارت تو کھڑی کر دی گئی مگر آج تک اسے فعال نہیں کیا گیا۔

ڈائلیسز جیسے اذیت ناک عمل سے گزرنے کے لیے مریضوں کو لیاقت پور سے سو کلومیٹر دور بہاولپور کے وکٹوریہ ہسپتال یا پھر اتنے ہی فاصلے پر واقع رحیم یار خان کے شیخ زید ہسپتال جانا پڑتا ہے۔ کچھ مریضوں کو&nbsp; کبھی کبھار خان پور تحصیل ہیڈ کوارٹر ہسپتال میں بنے خیراتی ڈائلاسز سنٹر میں بھی وقت مل جاتا ہے۔

تحصیل ہیڈ کوارٹر ہسپتال لیاقت پور میں ڈائلاسیز سنٹر&nbsp; کا منصوبہ 11-2010ء میں چیف منسٹر ساؤدرن پنجاب ڈویلپمنٹ پروگرام کے تحت شامل کیا گیا تھا۔

بیس بیڈ پر مشتمل اس ڈبل سٹوری عمارت کو ڈائلاسز بلاک کا نام دیا گیا۔ ساڑھے پانچ ہزار مربع فٹ سے بڑے اس بلاک میں مجموعی طور پر 16 کمرے ہیں۔منصوبے پر 2011ء میں کام کا آغاز ہوا اور دسمبر 2014ء میں محکمہ بلڈنگز نے عمارت مکمل کرکے محکمہ ہیلتھ کے حوالے کردی۔

میڈیکل سپرنٹنڈنٹ تحصیل ہیڈ کوارٹر ہسپتال نے 27 فروری 2015ء کو اس بلاک کے لیے 35 افراد کی بھرتی کا ڈیمانڈ لیٹر بھجوایا تھا مگر محکمہ نے اس خط کا جواب چھ سال بعد دیا اور&nbsp; اپریل 2021ء میں صرف پانچ اسامیاں منظور کیں جس میں نفرالوجسٹ، میڈیکل آفیسر اور ٹیکنیشن کی ایک ایک جبکہ چارج نرس کی دو اسامیاں رکھی گئی ہیں۔

دو سال سے سٹاف کی منظوری کے باوجود بھی تاحال نہ تو عملہ تعینات کیا گیا نہ ہی مشینری پہنچی ہے۔

<h2>سپیشلسٹ سٹاف یہاں آنے پر کیوں تیار نہیں؟</h2>

مقامی شہری محمد ابوہریرہ نے جنوری 2021ء کو وزیراعظم پورٹل اور وزیر اعلی پنجاب شکایات سیل میں عرضیاں ڈالیں تو سیکریٹری پرائمری اینڈ سیکنڈری ہیلتھ لاہور نے وزیر اعظم پورٹل پر دیئے گئے جواب میں لیاقت پور کے ڈائلاسیز بلاک میں سہولتیں فراہم نہ کرنے پر معذرت بھی کی۔ یہ بھی کہا گیا&nbsp; کہ آئندہ سالانہ ترقیاتی پروگرام میں مشینری اور عملہ فراہم کر کے اس منصوبے کو فعال کر دیا جائے گا مگر اس وعدے کو بھی دو سال گذر گئے ہیں۔

حال ہی میں صوبائی اسمبلی سے سبکدوش ہونے والے ایم پی اے چودھری مسعود احمد ڈائلاسیز بلاک فعال نہ ہونے کی ذمہ داری بیوروکریسی پر ڈالتے ہیں۔&quot;میں نے بار بار متعلقہ حکام سے درخواست کی مگر وزیر اعلیٰ کی سفارش بھی کام نہ آئی&quot;۔ 
انہوں نے بتایا کہ تحصیل ہسپتال میں ڈاکٹروں اور معاون عملہ کے لیے قائم پرانی رہائشی عمارتیں ناقابل استعمال قرار دی جا چکی ہیں اور نئی رہائش گاہیں موجود نہیں ہیں۔ &quot;سپیشلسٹ سٹاف یہاں تعینات ہونے پر تیار نہیں ہوتا، بلاک کے فعال نہ ہونے کی ایک وجہ یہ بھی ہے&quot;۔ &nbsp;

تاہم چودھری مسعود نے بتایا کہ انہوں نے 20 کروڑ روپے کی لاگت سے رہائشی بلاک کا منصوبہ منظور کروایا تھا جس پر تعمیرات جاری ہیں۔&quot;شاید اس منصوبے کی تکمیل سے عملہ یہاں آنے پر مائل ہوجائے&quot;۔

<h2>کیا مسئلے کا کوئی حل ہے؟</h2>

محلہ شیخ مظہر حسین کے محمد عامر علوی کپڑے کے تاجر ہیں۔ ان کی 23 سالہ بیٹی عائشہ عامر گزشتہ پانچ سال سے ڈائیلائسز کے مراحل سے گزر رہی ہیں۔ عائشہ بارہویں جماعت کی طالبہ تھیں جب انہیں گردوں کا مرض لاحق ہوا۔ پھر وہ ڈائلاسیز کروانے پر مجبور ہو گئیں۔انہیں بھی ہفتے میں دو دن رحیم یار خان جانا پڑتا ہے۔

عائشہ تعلیم ادھوری چھوڑ کر بیماری کے ساتھ ساتھ ہفتے میں دو مرتبہ سفر کی اذیت سے گذرتی ہیں۔

محمد عامر بتاتے ہیں کہ گزشتہ پانچ سال سے بیٹی کو لانے لے جانے اور دوائیوں پر ان کا ماہانہ خرچ پچاس سے ساٹھ ہزار روپے ہے جو گزشتہ چھ ماہ کے دوران مزید بڑھ چکا ہے۔

عامر علوی نے تو اپنی حیثیت کے مطابق اپنی بیٹی کو رحیم یار خان لے جانے کے لیئے گاڑی اور ڈرائیور کا انتظام کر رکھا ہے لیکن بیشتر لوگ اتنے خوش قسمت نہیں۔

عامر ہی کے محلے کے دکاندار شیخ شوکت علی کا 27 سالہ شادی شدہ بیٹا خرم بھی ملتان سے محض دو بار ڈائلاسز کروانے کے بعد چند روز قبل چھ فروری کو زندگی کی بازی ہار چکا ہے۔

&nbsp;تحصیل ہیڈ کوارٹر ہسپتال لیاقت پور کے ایم ایس&nbsp; ڈاکٹر ارشاد ندیم نے بتایا کہ&nbsp; صوبائی حکومت نے رحیم یار خان کے چیف ایگزیکٹو آفیسر ہیلتھ کو دو کروڑ روپے کے فنڈز منتقل کر دیئے ہیں۔

&quot;مشینری کی خریداری کے بعد ہسپتال ہی کے موجودہ عملہ کی ٹریننگ کروا کے ڈائلاسیز کا باقاعدہ کام شروع کر دیا جائے گا&quot;۔ &nbsp;

ڈاکٹر شاہد اقبال رانا تحصیل ہیڈ کوارٹر ہسپتال میں ڈپٹی میڈیکل سپریٹنڈنٹ کے فرائض سرانجام دے رہے ہیں۔ انہوں نے سجاگ کو بتایا کہ تحصیل لیاقت پور کے بیشتر علاقوں میں زیر زمین پانی میں آرسینک اور مرکری کی مقدار بہت زیادہ ہے لمبا عرصہ تک ڈاکٹر کے مشورہ کے بغیر مسلسل ادویات لینا اور کھانے پینے میں بد پرہیزی گردے فیل ہونے کا عام سبب ہیں۔

مناسب دیکھ بھال نہ ہونے کی وجہ سے ڈائلاسز بلاک کی عمارت شکستگی کی طرف گامزن ہے۔ اگر اس کو جلد کام میں نہ لایا گیا تو شائد کچھ ہی عرصہ میں اسے متروک قرار دے دیا جائے۔

آج - 3 فروری 2023 - سپیشل جج اینٹی کرپشن بہاولپور کی عدالت میں عباسیہ سیم نالے کے حوالے سے ایک مقدمے کی سماعت ہو گی۔

رحیم یار خان کی تحصیل لیاقت پور کا یہ سیم نالہ گذشتہ 14 برس سے مختلف محکموں اور عدالتوں میں پیشیاں بھگت رہا ہے۔ آج جس مقدمے کی سماعت ہے وہ بہاولپور کے شہری غلام رسول نے دائر کیا ہے۔ وہ اس بات سے نالاں ہیں کہ اس سیم نالہ کی تعمیر کی راہ میں رکاوٹ بننے والے ذمہ دار افراد کے خلاف نہ صرف کارروائی نہیں کی گئی بلکہ الٹا انہیں ترقی دے دی گئی ہے۔

تھری آر ڈرین نامی اس نالہ کا مقصد لیاقت پور کے ایک سو دیہات کو سیم سے پہنچنے والے نقصان سے بچانا تھا۔ ان دیہات پر مشتمل علاقے کو عباسیہ کہا جاتا ہے اور یہاں سیم کا مسئلہ ضیاالحق کی حکومت میں بنائی گئی عباسیہ لنک کینال کی تعمیر کے بعد پیدا ہوا۔ یہ بڑی لنک کینال، پرانی عباسیہ کینال کے بائیں کنارے کے متوازی بنائی گئی تا کہ چولستان میں &#39;خاص لوگوں&#39; کو الاٹ کی گئی ہزاروں ایکڑ زمینوں کو سیراب کیا جاسکے۔ اس نئی نہر میں جب پانی چھوڑا گیا تو ان لوگوں کی زمینیں تو سیراب ہو گئیں لیکن عباسیہ میں زیر زمین پانی کی سطح بلند ہو گئی اور مناسب نکاس نہ ہونے کے باعث یہ سیم اور تھور کی نذر ہو گئیں۔

شاہ محمد بھٹہ ان دیہات میں سے ایک &ndash; چک 148 &ndash; کے چھوٹے زمیندار تھے۔ سیم نے نہ صرف ان کی تین ایکڑ زمین کو ناقابل کاشت بنا دیا بلکہ ان کے مکان کو بھی نقصان پہنچایا۔ اب وہ بے زمین افراد کی مانند شہر جا کر مزدوری کرتے ہیں۔ 
ان سو چکوک پر مشتمل علاقے کی لگ بھگ ڈھائی لاکھ آبادی کا روزگار کاشتکاری سے ہی منسلک ہے۔

2007 میں اس علاقے سے رکن صوبائی اسمبلی چوہدری محمود احمد نے سیم نالے کی تعمیر کا منصوبہ منظور کروایا تاکہ عباسیہ کی زمینوں سے سیم کے اثرات کا خاتمہ ہو سکے۔ صوبائی حکومت نے اس نالے کے لیے محکمہ انہار کو 35 کروڑ روپے کے فنڈ دیے۔

اس نالہ نے چنی گوٹھ سے شروع ہو کر موضع دین محمد جیٹھہ بھٹہ کے مقام پر شاہی روڈ کے متوازی بہنے والے سکارپ 6 سیم نالے میں شامل ہو جانا ہے۔ 40 کلومیٹر طویل یہ نالہ 46 دیہات سے گزر کر عباسیہ کے 100 دیہات کی زمینیں کو دوبارہ قابل کاشت بنا سکتا تھا۔

<h2>سوکھا نالہ اور کرپشن کی بہتی گنگا</h2>

اس منصوبے پر کام کا آغاز ستمبر 2008 میں ہوا اور اسے ڈیڑھ سال میں مکمل ہونا تھا لیکن محکمہ انہار کے بابو شاید کسی اور ہی مار پہ تھے۔

نالے کا مجوزہ راستہ بار بار تبدیل کیا جاتا رہا اور اس کا بجٹ بھی بڑھتے بڑھتے ایک ارب روپے تک جا پہنچا لیکن نالہ کی تعمیر مکمل نہ ہوئی۔

جاوید مشتاق غلہ منڈی لیاقت پور کے آڑھتی ہیں اور انہی چکوک میں سے ایک - چک نمبر 149 ڈی این بی - میں 50 ایکڑ کے زمیندار بھی ہیں۔ ان کا تحصیل بھر کے کسانوں سے ہمہ وقت رابطہ رہتا ہے۔ علاقہ عباسیہ کے کسانوں کی بربادی کا ان کے کاروبار پر بھی منفی اثر پڑا۔ انہوں نے&nbsp; 2011 کے اواخر میں اس وقت کے وزیراعلیٰ شہباز شریف کو ایک درخواست دی جس میں سیم نالے کی عدم تکمیل سے ہونے والے نقصان اور اس منصوبے میں خامیوں اور مبینہ بدعنوانی کی نشاندہی کی گئی تھی۔

ان کی درخواست پر کارروائی کرتے ہوئے اس وقت کے سیکرٹری انہار نے انجینئرنگ اکیڈمی لاہور کے پرنسپل احمد شیر ڈوگر کو تحقیقات پر مامور کیا جنہوں نے منصوبے میں کئی نقائص کی نشاندہی کرتے ہوئے ان کی درستی اور ذمہ دار افسروں کے خلاف کارروائی کے لیے اپنی سفارشات دیں۔

ان سفارشات کی روشنی میں محکمہ انہار نے چیف انجینئر بہاولپور کو لاپروائی اور بدعنوانی کے ذمہ دار ایکسیئن، ایس ڈی او اور سب انجینئروں کے خلاف پیڈا ایکٹ کے تحت کارروائی کے لیے کہا لیکن اس پر عمل نہیں ہو سکا۔

جولائی 2013 میں وزیراعلیٰ شہباز شریف نے منصوبے کا جائزہ لینے کے لیے معائنہ ٹیم بھجوائی جس نے بڑے پیمانے پر بدعنوانی اور پیشہ ورانہ نااہلیوں کی نشاندہی کی۔ تاہم اس ٹیم کی رپورٹ پر بھی کوئی کارروائی نہ ہوئی۔

غلام رسول خان بہاولپور کے سماجی کارکن ہیں اور گزشتہ کئی سال سے پاکستان عوامی احتساب پارٹی کے چیئرمین کی حیثیت سے بہاولپور ڈویژن کے سرکاری اداروں کی کرپشن کے خلاف آواز اٹھا رہے ہیں۔ ان کی درخواستوں پر کئی سرکاری افسران کے خلاف تادیبی کارروائیاں ہو چکی ہیں۔

&nbsp;غلام رسول نے اس سیم نالہ منصوبے میں مبینہ بدعنوانی کے ذمہ داروں کا تعین کرنے کے لیے محکمہ اینٹی کرپشن کو درخواست دی جس نے 24 جون 2021ء کو سابق ایکسیئن عبدالستار نیازی، محمد نعیم، عبدالرشید، میاں مسعود احمد اور موجودہ ایس ای تونسہ شریف ساجد محمود، سب انجینئر رانا عبدالرزاق، رانا سعید عامر، سرکاری ٹھیکیدار ملک اطہر اور دیگر کے خلاف ایف آئی آر درج کر لی۔

تاہم یہ مقدمہ چند روز بعد ہی خارج ہو گیا۔

اس مقدمے مں نامزد بعض ملزم ریٹائر ہو چکے ہیں جبکہ ایک کا انتقال ہو چکا ہے۔

<h2>&#39;فائل صاحب کی ٹیبل پر پڑی ہے&#39;</h2>

غلام رسول الزام عائد کرتے ہیں کہ سابق وزیراعلی عثمان بزدار نے اپنے دور حکومت میں اس مقدمے کے اہم ملزم رانا ساجد محمود کو ایگزیکٹیو انجینئر کے عہدے سے ترقی دے کر اپنے آبائی حلقے تونسہ شریف میں سپرنٹنڈنٹ انجینئر تعینات کر دیا تھا۔ 
ان کا یہ بھی کہنا ہے کہ تاخیر کا شکار اس منصوبے میں ٹھیکیدار کو سازوسامان کی قیمتوں میں اضافے کی مد میں کروڑوں روپے ادا کیے جا چکے ہیں لیکن منصوبہ وہیں کا وہیں ہے۔

گذشتہ سال ڈائریکٹر جنرل اینٹی کرپشن نے اس منصوبے کی دوبارہ انکوائری کروائی اور لاپروائی و بدعنوانی کے ذمہ داروں کے خلاف کارروائی کا حکم دیا لیکن بہاولپور کے سابق ڈائریکٹر اینٹی کرپشن نے انکوائری چیف انجینئر انہار بہاولپور کو محکمانہ کاروائی کے لیے بھجوادی جنہوں ںے تمام ملزموں کو &quot;بری&quot; کردیا۔

غلام رسول بتاتے ہیں کہ ٹھیکیدار نے معاہدے کی خلاف ورزی کرتے ہوئے ناقص میٹریل استعمال کیا اور کام نامکمل چھوڑ دیا۔ بہت سی جگہوں پر پلیوں کے جائنٹ نامکمل ہیں اور ان کی شٹرنگ بھی نہیں کی گئی۔ کئی جگہ کھدائی نہ ہونے کی وجہ سے سیم کے پانی کا بہاؤ بھی نہیں ہو پا رہا۔بارش ہو جائے تو نالے کا پانی اوور فلو ہو کر لوگوں کی فصلوں اور گھروں میں داخل ہو جاتا ہے۔

اور تو اور سیم نالے کی زد میں آنے والی زمینوں کے تمام مالکان کو تاحال ادائیگی بھی نہیں کی گئی۔ 2008 میں صوبائی حکومت نے اس کے لیے اسسٹنٹ کمشنر لیاقت پور کے اکاؤنٹ میں 13 کروڑ روپے ٹرانسفر کیے تھے تاہم اس منصوبے کی منظوری لینے والے سابق ایم پی اے چوہدری محمود احمد کے بھائی اور موجودہ ایم پی اے چوہدری مسعود احمد کا کہنا ہے کہ متاثرین میں اب تک 40 لاکھ روپے ہی تقسیم کیے گئے ہیں۔

محکمہ زراعت کے اسسٹنٹ ڈائریکٹر اصغر شہباز بتاتے ہیں کہ علاقے میں سیم و تھور کی وجہ سے فصلوں کی پیداوار میں مجموعی طور پر 15 سے 20 فیصد تک کمی ہوئی ہے جبکہ آم اور&nbsp; کینو کے باغات کو بھی نقصان پہنچا ہے۔ سیم کی وجہ کپاس کی کاشت میں 50 فیصد کمی آچکی ہے اور اس کی اوسط پیداوار بھی بری طرح متاثر ہوئی ہے۔ سیم نالہ جن 46 دیہات کی حدود سے گزر رہا ہے ان میں زرعی نقصان بہت زیادہ ہے۔

منصوبے پر کام کی تازہ ترین صورتحال جاننے کے لیے محکمہ انہار سب ڈویژن لیاقت پور کے ایس ڈی او سے رابطہ کیا گیا تو ان کا کہنا تھا کہ انہوں نے چند ماہ قبل ہی چارج لیا ہے اور وہ اس بارے کوئی معلومات نہیں رکھتے۔ تاہم ان کا یہ ضرور کہنا تھا کہ &quot;منصوبے کو چالو کرنے کے لیے مزید رقم درکار ہے۔ اس کے نئے تخمینے میں 50 ٹیوب ویل نصب کیے جانا ہیں اور تبدیل شدہ بجٹ کی فائل چیف انجینئر محکمہ انہار بہاول پور کی ٹیبل پر پڑی ہے&quot;۔

وحید رُشدی

وحید رُشدی, لیاقت پور، ضلع رحیم یار خان سے تعلق رکھنے والے صحافی اور سماجی کارکن ہیں۔ علاقائی اور سیاسی و سماجی مسائل پر لکھتے ہیں۔