پنجاب کو پاکستان میں بڑا بھائی کہا جاتا ہے کیونکہ اس کی آبادی دیگر تمام وفاقی اکائیوں کے مجموعے سے بھی زیادہ رہی ہے اور اسی وجہ سے قومی اسمبلی میں پنجاب کی سیٹوں کی تعداد پختونخوا، سندھ، بلوچستان اور اسلام آباد کی کل سیٹوں سے بھی زیادہ ہے۔

لیکن اب یہ بدلنے والا ہے۔

2023ء کی مردم شماری کے تازہ ترین غیر حتمی نتائج کے مطابق اب پنجاب کی آبادی پاکستان کی آبادی کے نصف سے زائد نہیں رہی بلکہ نصف کے برابر ہو گئی ہے۔

ادارہ شماریات پاکستان کے ایک حالیہ ٹویٹ کے مطابق 30 اپریل 2023ء تک چاروں صوبوں اور وفاقی دارالحکومت کی مجموعی آبادی 23 کروڑ 36 لاکھ&nbsp; شمار کی گئی ہے جبکہ پنجاب میں 11 کروڑ 68 لاکھ افراد کا شمار کیا گیا جو کل آبادی کا ٹھیک نصف یعنی 50 فیصد بنتا ہے۔

ادارے کے مطابق چند اضلاع میں مردم شماری کا سلسلہ 15 مئی تک جاری رہے گا تاکہ تمام افراد کی شماری کو یقینی بنایا جا سکے اور کسی بھی شکایت کا ازالہ کیا جا سکے۔ امکان یہی ہے کہ حتمی اعداد موجودہ اعداد سے کچھ ہی مختلف ہوں گے اور اس مضمون میں لگائے گئے حسابات میں فرق آنے کے امکانات کم ہی رہیں گے۔

پاکستان کے قیام کے بعد 1951ء میں ہونے والی پہلی مردم شماری کے مطابق پنجاب کی آبادی پاکستان ( اس وقت کا مغربی پاکستان) کی کل آبادی کا 61 فیصد تھی لیکن بعد میں ہونے والی تمام مردم شماریوں میں کل آبادی میں بڑے بھائی کا تناسب کم ہوتا رہا۔ گویا پنجاب میں آبادی میں اضافے کی شرح دوسرے تمام صوبوں سے کم رہی تھی۔ 1998ء سے 2017ء کے درمیان پنجاب کے کل آبادی میں حصے میں تین فیصد پوائینٹ سے کچھ کم کی کمی واقع ہوئی اور اب 2017ء اور 2023ء کی مردم شماریوں نے اس میں تین فیصد پوائینٹ کی کمی ظاہر کی ہے۔

اس کمی کا ایک فوری نتیجہ تو یہ نکلے گا کہ قومی اسمبلی میں پنجاب کی آٹھ سیٹیں کم ہو جائیں گی یعنی موجودہ 141 سیٹیں کم ہو کر 133 رہ جائیں گی جو کل 266 سیٹوں کا ٹھیک نصف بنتی ہیں۔

2017ء کی مردم شماری میں ظاہر ہونے والی کمی کا نتیجہ بھی یہی نکلا تھا جب 2018ء کے انتخابات کے لیے نئی حلقہ بندیاں کی گئی تھیں تو پنجاب کا حصہ 148 سے کم ہو کر 141 پر آ گیا تھا۔

2018ء میں قومی اسمبلی میں سیٹوں کی کل تعداد 272 تھی جن میں وفاق کے زیرِ انتظام قبائلی علاقوں کی سیٹیں 12 تھیں جو اس کے آبادی میں تناسب سے دوگنی تھیں۔ فاٹا کو یہ امتیازی حیثیت اس لیے دی گئی تھی کہ اس علاقے کو کسی صوبائی اسمبلی میں نمائندگی حاصل نہیں تھی۔ 2018ء میں فاٹا کے صوبہ پختونخوا میں ضم کر دیا گیا تو اس امتیازی حیثیت کا جواز ختم ہو گیا۔ اب سابقہ فاٹا کے علاقوں کی قومی اسمبلی میں چھ سیٹیں ہیں اور یوں کل سیٹوں کی تعداد 266 ہو گئی ہے۔

<h2>پنجاب کے حصے میں کمی کا فائدہ کس صوبے کو ہو گا؟</h2>

2017ء کی مردم شماری کے نتائج پر سب سے زیادہ اور سخت اعتراضات سندھ کو تھے۔ صوبے کے قائدین کے خیال میں مردم شماری کا طریقہ کار ناقص تھا جس کے نتیجے میں ان کی تمام آبادی کو نہیں گنا گیا تھا۔ سب سے زیادہ مخالفت کراچی کے قائدین نے کی تھی کیونکہ مردم شماری نے ملک کے اس سب سے بڑے شہر کی آبادی ایک کروڑ 60 لاکھ ظاہر کی تھی جبکہ ان کے اندازے میں یہ اس سے کہیں زیادہ تھی۔

حالیہ اعدادوشمار 2017ء سے 2023ء کے درمیان کراچی کی آبادی میں 18 لاکھ کا اضافہ ظاہر کر رہے ہیں جبکہ انہی چھ سالوں میں لاہور کی آبادی میں ساڑھے چھ لاکھ کا اضافہ ہوا ہے۔

یہ تو ابھی چند ہفتوں بعد ہی معلوم ہو گا کہ آیا 2023ء کی مردم شماری پر بھی سندھ کے قائدین معترض رہتے ہیں یا نہیں لیکن ایک بات بالکل واضح ہے کہ پنجاب کی سیٹوں میں کمی کا بڑا &#39;فائدہ&#39; سندھ کو نہیں ہو گا اور کراچی کو تو بالکل بھی نہیں!

نئے اعدادوشمار کے مطابق قومی اسمبلی میں سندھ کی سیٹوں کی تعداد میں محض ایک کا اضافہ ہو گا یعنی یہ موجودہ 61 سے بڑھ کر 62 ہو جائیں گی۔ 15 مئی تک جب مردم شماری حتمی طور پر مکمل ہو جائے گی تو اعدادوشمار میں ہونے والے ردوبدل کے نتیجے میں یہ ممکن ہے کہ سندھ کی سیٹوں میں ایک کی بجائے دو کا اضافہ ہو جائے لیکن تناسب کا حساب کچھ ایسا بن رہا ہے کہ ہر دو صورتوں میں کراچی کی سیٹیں پہلے کی طرح 20 ہی رہیں گی۔ گویا اضافی سیٹیں سندھ کے دوسرے اضلاع کو جائیں گی۔

ابھی یہ حساب لگانا ممکن نہیں کہ اضافی سیٹیں کس ضلع کو ملیں گی کیونکہ ادارہ شماریات نے اب تک ضلع وار آبادی ظاہر نہیں کی ہے۔

پنجاب کی سیٹوں میں کمی کا سب سے زیادہ &#39;فائدہ&#39; بلوچستان کو ہو گا کہ اس کی سیٹوں کی تعداد موجودہ 16 سے چھلانگ لگا کر 23 ہو جائے گی۔ یعنی سات سیٹوں کا اضافہ!

بلوچستان کی آبادی میں 2017ء اور 2023ء کے درمیان 63 فیصد کا اضافہ ریکارڈ کیا گیا ہے جو ملک میں ہونے والے مجموعی اضافے (15 فیصد) کا چار گنا ہے۔ یہ غیر معمولی ہے جس کی دو ہی بڑی وجوہات ہو سکتی ہیں۔ پہلی یہ کہ گذشتہ مردم شماری میں صوبے کی آبادی کو اصل سے کم گنا گیا تھا اور دوسری یہ کہ موجودہ میں اصل سے زیادہ گنا گیا ہے۔

ادارہ شماریات کی معلومات کی روشنی میں دوسری بات کے امکانات کم دکھائی دیتے ہیں کہ اس بار جدید ٹیکنالوجی کو بروئے کا لاتے ہوئے کاغذی فارموں کی بجائے ڈیٹا کا براہ راست اندراج کمپیوٹر ٹیبلٹ پر کیا گیا ہے، ہر گھر کی جیوٹیگنگ کی گئی ہے اور نادرہ کے شناختی کارڈ کے ڈیٹا بیس سے استفادہ کیا گیا ہے۔ان اقدامات نے اصل سے کم یا زیادہ گنتی کے امکانات کو بہت کم کر دیا ہے۔

موجودہ اور گذشتہ مردم شماروں کے دوران پنجاب کی آبادی میں چھ فیصد اضافہ نوٹ کیا گیا ہے اور پختونخوا میں 11 فیصد جس کے سبب اس صوبے کا قومی اسمبلی کی سیٹوں میں حصہ بنا ردوبدل 45 ہی رہے گا۔

ادارہ شماریات نے اپنے حالیہ ٹویٹ میں اسلام آباد کی آبادی نہیں بتائی جس کو چار صوبوں کے ساتھ قومی اسمبلی میں نمائندگی حاصل ہے۔ اپنے حساب&nbsp; کو مکمل کرنے کے لیے ہم نے وفاقی دارالحکومت کی حالیہ آبادی کا تخمینہ اس مفروضے کی بنیاد پر لگایا ہے کہ یہاں آبادی میں اضافے کی شرح وہی رہی ہو گی جو اس سے پہلے کی دو مردم شماریوں کے درمیان تھی۔ آبادی کے تناسب کے حساب سے اس بات کے امکانات نہ ہونے کے برابر ہیں کہ نئی حلقہ بندیوں میں اسلام آباد کی سیٹوں کی موجودہ تعداد &ndash; تین &ndash; میں کوئی تبدیلی ہو سکے۔

<h2>کیا آئندہ انتخابات نئی حلقہ بندیوں کے مطابق ہو پائیں گے؟</h2>

مردم شماری کے حتمی نتائج مشترکہ مفادات کونسل میں پیش کیے جاتے ہیں، جہاں تمام صوبوں کی رضامندی حاصل کرنے کے بعد وفاقی حکومت انہیں سرکاری طور پر شائع کرتی ہے۔

مردم شماری کے نتائج کی سرکاری اشاعت کے بعد الیکشن کمیشن پر لازم ہو جاتا ہے کہ وہ قومی اور صوبائی اسمبلی کے انتخابی حلقوں کا از سر نو تعین کرے۔ اس مضمون میں قومی اسمبلی کی سیٹوں میں جس ردوبدل کی تفصیل بیان کی گئی ہے وہ نئی حلقہ بندیوں میں ہی کارفرما ہو گی۔ الیکشن ایکٹ 2017ء کے مطابق کمیشن کو دیگر انتظامات کے ساتھ حلقہ بندیوں کا کام انتخابات سے چار ماہ پہلے مکمل کرنا چاہیے۔

اگر موجودہ قومی اسمبلی اپنی آئینی مدت پوری کرتی ہے تو اگلے انتخابات اس سال وسط اکتوبر میں ہونے چاہیں گویا الیکشن کمیشن کو نئی حلقہ بندیاں وسط جون تک مکمل کرنی چاہیں جبکہ ادارہ شماریات مردم شماری 15 مئی تک مکمل کرے گا جس کے بعد اسے مشترکہ مفادات کونسل میں منظوری کے لیے پیش کیا جائے گا۔

آئندہ انتخابات کو نئی حلقہ بندیوں کے تحت منعقد کروانے کے لیے تمام متعلقہ اداروں کو دن رات ایک کرنا پڑے گا۔

One in every five Christians missing in census

نئی مردم شماری: قومی اسمبلی میں پنجاب کی مزید 8 سیٹیں کم، سندھ اور بلوچستان کے حصوں میں اضافہ

text

پنجاب میں پنجابی کو اپنی مادری زبان کہنے والوں کا تناسب پہلے سے کم ہو گیا ہے۔

حال ہی میں جاری کردہ 2017 کی مردم شماری کے نتائج کے مطابق پنجاب کی 70 فی صد آبادی نے پنجابی کو اپنی مادری زبان قرار دیا ہے جبکہ صوبے میں بسنے والے 21 فی صد لوگوں نے کہا ہے کہ ان کی مادری زبان سرائیکی ہے۔ یہ تناسب 1998 میں ہونے والی مردم شماری میں بالترتیب 75 فیصد اور 17 فی صد تھا۔ گویا بیس برس میں پنجاب میں پنجابی کو اپنی مادری زبان کہنے والوں میں پانچ فی صد کمی ہوئی ہے جبکہ سرائیکی کو مادری زبان کہنے والوں میں لگ بھگ اتنا ہی اضافہ ہوا ہے۔&nbsp;

کیا اس تبدیلی کی وجہ یہ ہے کہ سرائیکی خاندانوں کی آبادی میں اضافے کی شرح پنجابی خاندانوں کی آبادی میں اضافے کی شرح سے زادہ ہے؟

اس کا جواب ہاں بھی ہے اور نہیں بھی۔

مردم شماری 2017 کے اعداد و شمار کے مطابق پنجاب کے جن دس اضلاع کی آبادی میں 1998 کے بعد سب سے زیادہ تیزی سے اضافہ ہوا ہے ان میں سے آٹھ ایسے ہیں جہاں سرائیکی بولنے والوں کی بڑی تعداد بستی ہے۔ ڈیرہ غازی خان ڈویژن کے چار اضلاع یعنی ڈیرہ غازی خان، راجن پور، مظفر گڑھ اور لیہ اس فہرست میں بہت اوپر ہیں۔ ان اضلاع کی آبادی میں 1998 اور 2017 کے درمیان مجموعی طور پر 69 فیصد اضافہ ہوا ہے جبکہ اس دوران پورے صوبے کی آبادی میں 49 فی صد اضافہ ہوا۔

لیکن اسی عرصے میں ضلع لاہور کی آبادی میں مجموعی طور پر 76 فی صد اضافہ ہوا ہے جو ڈیرہ غازی خان ڈویژن کی آبادی میں اضافے سے زیادہ ہے۔ یہاں یہ امر قابلِ ذکر ہے کہ ڈیرہ غازی خان ڈویژن کے چاروں اضلاع کی کل آبادی ضلع لاہور کی کل آبادی (ایک کروڑ &nbsp;11 لاکھ) کے تقریباً برابر ہے۔ دوسرے لفظوں میں اگر جنوبی پنجاب کے ایک ایسے ڈویژن میں آبادی میں اضافہ صوبائی اوسط سے زیادہ رہا ہے جہاں زیادہ تر لوگ (80.3 فیصد) سرائیکی بولتے ہیں تو مرکزی پنجاب کے ایک ایسے ضلعے میں بھی آبادی میں اضافے کی شرح صوبائی اوسط سے بہت زیادہ رہی ہے جہاں غالب اکثریت (87 فی صد) پنجابی کو اپنی مادری زبان کہتی ہے اور جہاں سرائیکی بولنے والے بمشکل ایک فی صد ہیں۔ اس طرح سے یہ حساب برابر ہو جاتا ہے۔

پنجاب کے دو دیگر ڈویژنوں، بہاولپور اور ملتان، میں بھی بڑی تعداد میں سرائیکی بولنے والے رہتے ہیں۔ ان میں بہاولپور کے تین اضلاع کی آبادی میں مجموعی طور پر 50 فی صد اضافہ &nbsp;ہوا ہے (جو صوبائی اوسط سے معمولی سا زیادہ ہے) جبکہ ملتان کے چار اضلاع کی آبادی میں 45 فی صد اضافہ ریکارڈ کیا گیا ہے (جو صوبائی اوسط سے قدرے کم ہے)۔ لیکن دوسری طرف پنجابی بولنے والوں کی اکثریت پر مشتمل دو ڈویژنوں، گوجرانوالہ اور فیصل آباد، میں آبادی میں اضافے کی مجموعی شرح بالترتیب 41 فیصد اور 43 فی صد رہی ہے جو صوبائی اوسط سے کافی کم ہے۔&nbsp;

یہ اعداد و شمار یہ تو ظاہر کرتے ہیں کہ جنوبی اور مرکزی پنجاب میں آبادی میں اضافے کی شرح میں کچھ نہ کچھ فرق ضرور رہا ہے لیکن کیا صرف یہی فرق پنجاب کی لسانی شناخت میں ایک واضح تبدیلی لانے کی واحد وجہ ہے؟

کوئی نتیجہ اخذ کرنے سے پہلے ذرا ان اعداد و شمار پر بھی غور کریں۔

ضلع وہاڑی میں سرائیکی کو اپنی مادری زبان کہنے والوں کی آبادی میں 1998 اور 2017 کے درمیان 135 فیصد اضافہ ہوا ہے جس کا ذمہ دار کسی طور بھی شرحِ پیدائش میں اضافے کو نہیں ٹھہرایا جا سکتا۔ جو بات اس معاملے کو مزید پیچیدہ بناتی ہے وہ یہ ہے کہ ضلع وہاڑی میں اس عرصے میں پنجابی بولنے والے لوگوں کی آبادی میں اضافے کی شرح انتہائی کم یعنی 25 فی صد رہی ہے۔&nbsp;

ان دونوں شرحوں میں اتنے واضح اور وسیع فرق کی ایک توجیہہ ہجرت ہوسکتی ہے یعنی ہو سکتا ہے کہ اس عرصے میں سرائیکی بولنے والے لوگ بڑی تعداد میں کسی جگہ کو چھوڑ کر وہاڑی میں آباد ہو گئے ہوں اور مقامی پنجابی بڑی تعداد میں یہاں سے کوچ کر گئے ہوں۔ اس مفروضے کے حق میں ہمارے پاس کوئی شواہد نہیں لیکن حقیقت یہ ہے کہ لوگ بہتر معاش کی تلاش میں ہمیشہ بڑے شہروں کی جانب ہجرت کرتے ہیں لہٰذا جنوبی پنجاب کے اندر ہجرت کرنے والے لوگوں کو ملتان جانا چاہیے نہ کہ وہاڑی۔

چنانچہ اگر ہجرت کو خارج از امکان قرار دے دیا جائے تو دو مردم شماریوں کے درمیان وہاڑی کی سرائیکی اور پنجابی آبادیوں کی شرحِ اضافہ میں اتنے بڑے فرق کی ایک ہی توجیہہ ممکن ہے اور وہ یہ کہ لگ بھگ دو لاکھ مقامی افراد جو پہلے پنجابی کو اپنی مادری زبان کہتے تھے اب وہ سرائیکی کو اپنی مادری زبان قرار دے رہیں ہے۔

انہی اعداد و شمار کو ایک دوسرے طریقے سے دیکھیں تو معلوم ہوتا ہے کہ 1998 اور 2017 کے درمیان ضلع وہاڑی کی آبادی میں پنجابی کو اپنی مادری زبان کہنے والے حصے میں آٹھ فی صد کمی ہوئی ہے جبکہ اسی عرصے میں سرائیکی کو اپنی مادری زبان کہنے والے حصے میں اتنا ہی اضافہ ہوا ہے۔ یہ محض ایک اتفاق نہیں ہو سکتا۔

<h2>لسانی شناخت میں نیا رحجان</h2>

بہت سے معاشروں میں اقلیتی برادریاں چند نسلوں میں اپنی مادری زبان کھو دیتی ہیں اور اکثریتی برادری کی زبان اختیار کر لیتی ہیں لیکن وہاڑی میں صورتِ حال اس کے برعکس معلوم ہوتی ہے۔ اس ضلعے کی کل آبادی (29 لاکھ) کا تین چوتھائی اب بھی پنجابی کو اپنی مادری زبان کہتا ہے اور صرف 19 فی صد مقامی آبادی سرائیکی کو اپنی مادری زبان قرار دیتی ہے۔ ایسے میں ایک اقلیتی لسانی شناخت کا تنزلی کے بجائے ترقی اور اضافے کی جانب سفر کسی سیاسی عمل کا نتیجہ ہی ہو سکتا ہے۔

یہ رجحان ضلع وہاڑی تک محدود نہیں ہے۔ ضلع خانیوال کی آبادی میں بھی پنجابی بولنے والوں کا حصہ 1998 کے مقابلے میں آٹھ فی صد کم ہو گیا ہے جبکہ اسی عرصے میں سرائیکی بولنے والوں کا حصہ 13 فیصد بڑھ گیا ہے۔ اسی طرح ضلع بھکر میں بھی سات فی صد آبادی نے اپنی لسانی شناخت پنجابی سے بدل کر سرائیکی کر لی ہے۔ ضلع ملتان اور ضلع لیہ میں بھی یہ تبدیلی دیکھنے میں آئی ہے اور اس کی شرح بالترتیب چار فیصد اور پانچ فی صد رہی ہے۔

لیکن اس ضمن میں سب سے نمایاں اور حیران کن تبدیلی ضلع میانوالی میں دیکھنے میں آئی ہے۔ 1998 میں اس ضلعے کی 74 فیصد آبادی نے اپنی مادری زبان پنجابی بتائی اور صرف 12 فی صد مقامی لوگوں نے کہا کہ ان کی مادری زبان سرائیکی ہے۔ لیکن 2017 میں گویا کایا کلپ ہو گئی اور میانوالی کی تقریباً 15 لاکھ آبادی کے 76 فی صد حصےنے سرائیکی کو اپنی مادری زبان قرار دیا جبکہ محض نو فی صد مقامی باشندوں نے اپنے آپ کو پنجابی کہا۔&nbsp;

یہ تجزیہ اس بات کو واضح کرتا ہے کہ گذشتہ بیس برسوں میں سرائیکی شناخت معاشرتی سطح پر گہری اور مضبوط ہوئی ہے۔ تاہم یہ ایک علیحدہ موضوع ہے کہ اس تبدیلی کا &nbsp;سیاست پر کیا اثر ہو گا اور آیا یہ ایک علیحدہ سرائیکی صوبے کی تخلیق پر منتج ہو پائے گی یا نہیں۔

یہ رپورٹ لوک سجاگ نے پہلی&nbsp;دفعہ&nbsp;12 اگست 2021 کو اپنی پرانی ویب سائٹ پر شائع کی تھی۔

2017 کی مردم شماری کے نتائج: پنجاب میں سرائیکی بولنے والوں کے تناسب میں اضافہ۔

یوں تو کسی ضمنی انتخاب سے کوئی بڑا سیاسی نتیجہ اخذ کرنا دُور کی کوڑی لانے کے مترادف ہے لیکن فی زمانہ سیاست میں&#39;بیانیے&#39; نے ٹھوس حقائق سے زیادہ اہمیت اختیار کر لی ہے اس لیے ہر انتخاب، ہر بیان اور ہر خبر میں پنہاں خفیف اشاروں میں مستقبل کی نوید ڈھونڈی جاتی ہے اور پھر اپنے اپنے میڈیا سیل کے ذریعے اس پر اپنی مرضی کی ایک تصوراتی عمارت تعمیر کی جاتی ہے۔ اسی کو اب سیاسی عمل کہا جاتا ہے۔

سیاسی میدان میں بیانیے کی اہمیت کی تازہ ترین مثال حال ہی میں لاہور کے قومی اسمبلی کے حلقے این اے-133 میں ہونے والا ضمنی انتخاب ہے۔

یہ حلقہ پاکستان مسلم لیگ نواز کے رکن قومی اسمبلی پرویز ملک کی وفات کی وجہ سے خالی ہوا تھا جس کے باعث یہاں 5 دسمبر 2021 کو انتخاب کا انعقاد ہوا۔ مبصرین اسے پاکستان مسلم لیگ نواز کی &quot;پکی&quot; نشست گردانتے ہیں لیکن موجودہ سیاسی صورتِ حال میں اس پارٹی کے لیے اسے دوبارہ جیتنا بہت اہم تھا تاکہ وہ اپنے اس بیانیے کو ثابت کر سکے کہ پنجاب بالعموم اور لاہور بالخصوص اب بھی اُس کا سیاسی گڑھ ہے اور یہ کہ ساڑھے تین سال حزبِ اختلاف میں رہنے کے باوجود ملک کے سب سے بڑے صوبے میں اس کی انتخابی حیثیت مسلمہ ہے۔&nbsp;

پاکستان مسلم لیگ نواز نے 2018 کے عام انتخابات میں اس حلقے میں 90 ہزار کے قریب ووٹ حاصل کیے تھے جبکہ گذشتہ اتوار کو ہونے والے ضمنی انتخاب میں اس کے حاصل کردہ ووٹوں کی تعداد لگ بھگ 47 ہزار رہی ہے۔ یوں بظاہر اسے عام انتخابات کے مقابلے میں 43 ہزار ووٹ کم ملے ہیں۔&nbsp;لیکن عام انتخابات میں اس حلقے کے کل رجسٹرڈ ووٹروں میں سے 52 فی صد نے ووٹ ڈالے تھے جبکہ ضمنی انتخاب میں یہاں کے محض ساڑھے 18 فی صد ووٹروں نے اپنا حقِ رائے دہی استعمال کیا ہے جس کا مطلب ہے کہ ان دو انتخابات کا براہِ راست&nbsp; موازنہ اتنا آسان نہیں۔&nbsp;

اگر ووٹر ٹرن آؤٹ میں اس واضح فرق کو نظر انداز بھی کر دیا جائے تو پاکستان مسلم لیگ نواز نے 2018 میں اس حلقے میں ڈالے گئے ہر ایک ہزار ووٹوں میں سے چار سو 65 ووٹ حاصل کیے تھے جبکہ ضمنی انتخاب میں اس کی امیدوار نے ڈالے جانے والے ہر ایک ہزار ووٹوں میں سے پانچ سو 72 ووٹ حاصل کیے ہیں۔ اس لحاظ سے اس پارٹی نے حلقے میں ڈالے گئے کل ووٹوں میں اپنا حصہ 10.7 فی صد بڑھایا ہے جو اس کے بیانیے کی نہ صرف تصدیق کرتا ہے بلکہ اسے تقویت بھی دیتا ہے۔

لیکن بیانیے کی یہ جنگ یہیں ختم نہیں ہوتی۔

<h2>سہہ جہتی لڑائی</h2>

اس ضمنی انتخاب کی ایک اہم بات یہ بھی تھی کہ گذشتہ دو انتخابات میں اپنے آپ کو پنجاب میں پاکستان مسلم لیگ نواز کی اصل حریف منوانے والی موجودہ حکمران جماعت پاکستان تحریک انصاف اس میں شامل ہی نہیں تھی کیونکہ الیکشن کمیشن آف پاکستان نے اس کے نامزد امیدوار اور اس کی متبادل امیدوار دونوں کے کاغذاتِ نامزدگی تکنیکی وجوہات کی بنا پر مسترد کر دیے تھے۔

اگر اس مسئلے سے صرفِ نظر بھی کر لیا جائے تو وفاق اور پنجاب میں پاکستان تحریک انصاف کی حکومتوں کی کارکردگی پر کئی سوالیہ نشان لگے ہوئے ہیں جن کی بنا پر یہ کہنا بے جا نہ ہوگا کہ اس کے مستقبل کے بارے میں ایک غیر یقینی کیفیت پائی جاتی ہے۔ حتیٰ کہ غیرجانب دار مبصرین میں بھی یہ تاثر عام ہے کہ یہ جماعت نہ صرف سیاسی شعور سے عاری ہے بلکہ حکومت چلانے کی اہلیت بھی نہیں رکھتی۔

اس کا ایک ثبوت تو یہی دیا جاتا ہے کہ این اے-133 کے ضمنی انتخاب میں اس کے امیدواروں کے کاغذاتِ نامزدگی ایک ایسی غلطی کے باعث نامنظور ہوئے جس کی توقع آپ کسی یونین کونسل کے امیدوار سے بھی نہیں رکھتے۔

پاکستان تحریک انصاف کی اس کمزوری سے پاکستان پیپلز پارٹی نے فائدہ اٹھانے کی بھرپور کوشش کی ہے تاکہ وہ ضمنی انتخاب کو پنجاب میں اپنی سیاسی اور انتخابی واپسی کے لیے ایک روزن کے طور پر استعمال کر سکے۔

2018 میں اس کے امیدوار نے این اے-133 سے محض ساڑھے پانچ ہزار ووٹ حاصل کیے تھے جو تیسرے نمبر پر آنے والے تحریک لبیک پاکستان کے امیدوار کے ووٹوں کا نصف بھی نہیں تھے۔ پنجاب کے دیگر حلقوں میں بھی اس کی کارکردگی زیادہ مختلف نہیں تھی جس کے نتیجے میں اس صوبے کی قومی اسمبلی کے نشستوں کے لیے ڈالے گئے کل ووٹوں کا صرف چھ فی صد اس کے حصے میں آیا تھا۔&nbsp;

درحقیقت 2013 کے انتخاب میں ہی یہ بات واضح ہو گئی تھی کہ پنجاب میں اصل انتخابی مقابلہ اب پاکستان مسلم لیگ نواز اور پاکستان تحریکِ انصاف کے درمیان ہو گا اور پاکستان پیپلز پارٹی کی حیثیت پچھلی سیٹوں پر بیٹھے ایک تماشائی کی سی رہے گی۔

لیکن یہاں اس بات کا ذکر کرنا ضروری ہے کہ 1988 اور اس کے بعد ہونے والے دو انتخابات میں پاکستان پیپلز پارٹی پنجاب میں 39 فی صد کے قریب ووٹ حاصل کر چکی ہے۔ اس صوبے میں اس کی انتخابی سیاست کو پہلا بڑا دھچکا 1997 میں لگا جب یہاں اس کے حاصل کردہ ووٹوں کی شرح محض 22 فی صد رہ گئی۔ اگرچہ اس کے بعد ہونے والے دو انتخابات (2002 اور 2008) میں اس شرح میں خاطر خواہ اضافہ ہوا لیکن یہ کبھی بھی ماضی کی سطح تک نہیں پہنچ سکی۔

<h2>مستقبل کی جھلک</h2>

ان حالات میں پاکستان پیپلز پارٹی کو اس بات کا اچھی طرح احساس ہے کہ محض سندھ میں قومی اسمبلی کی اکثر سیٹوں پر کامیابی حاصل کر کے وہ مرکز میں کبھی بھی اپنی حکومت نہیں بنا سکتی کیونکہ قومی اسمبلی کی دو سو 72 عام نشستوں میں سے ایک سو 41 صوبہ پنجاب میں ہیں جبکہ صوبہ سندھ میں ان کی تعداد صرف 61 ہے۔ ان میں سے بھی 21 کراچی میں اور تین حیدرآباد میں ہیں جہاں پاکستان پیپلزپارٹی کی جیت کا امکان کم ہی رہتا ہے۔&nbsp;

اس لیے این اے-133 کے ضمنی انتخاب میں پاکستان پیپلز پارٹی کا مطمع نظر یہی تھا کہ اس میں اچھی کارکردگی دکھا کر کم از کم اس بیانیے کو رد کیا جائے کہ پنجاب میں اس کا کوئی سیاسی اور انتخابی مستقبل نہیں۔ اس کی کوشش تھی کہ وہ پنجاب میں موجود ووٹروں اور اپنے سیاسی حریفوں کو بتا سکے کہ اس کا صوبے میں زوال وقتی ہے۔&nbsp;

ضمنی انتخاب کے نتائج ظاہر کر تے ہیں کہ یہ پارٹی اس کوشش میں بڑی حد تک کامیاب ہوئی ہے کیونکہ 2018 کے عام انتخابات میں اس کے امیدوار نے این اے-133 میں ڈالے گئے ہر ایک ہزار ووٹوں میں سے صرف 29 ووٹ حاصل کیے تھے جبکہ 5 دسمبر 2021 کو ہونے والے ضمنی انتخاب میں اس کے اُسی امیدوار نے ڈالے گئے ہر ایک ہزار ووٹوں میں سے تین سو 95 ووٹ حاصل کیے ہیں۔ جس سے یہی ظاہر ہوتا ہے کہ اس نے پاکستان تحریک انصاف کی غیر موجودگی سے پیدا ہونے والے انتخابی خلا کو خوش اسلوبی سے پورا کیا ہے اگرچہ یہ کارکردگی اسے کامیابی دلانے کے لیے ناکافی رہی ہے۔&nbsp; 
کیا پاکستان پیپلز پارٹی اگلے عام انتخابات میں یہ کارکردگی دہرا پائے گی؟

ایک ضمنی انتخاب کے نتیجے کی بنیاد پر آنے والے پورے انتخابات کی پیش بینی کرنا قریب قریب ناممکن ہے کیونکہ ابھی تک یہی طے نہیں کہ اگلی انتخابی صف بندی کیا ہو گی اور کون سی پارٹی کس حلقے سے اور کس کے خلاف نبردآزما ہو گی؟ اس ضمن میں یہ سوال بھی اہم ہے کہ کیا پنجاب کے ہر حلقے میں پاکستان مسلم لیگ نواز کے مدِمقابل سب سے طاقت ور امیدوار صرف پاکستان پیپلز پارٹی کا ہی ہو گا اور کیا پنجاب کی انتخابی سیاست میں پاکستان تحریک انصاف بالکل غیر اہم ہو جائے گی؟&nbsp;

البتہ این اے-133 کی حد تک یہ بات کہی جاسکتی ہے کہ اس میں مسیحی ووٹروں کی بڑی تعداد میں موجودگی پاکستان پیپلز پارٹی کے لیے اگلے عام انتخابات میں ایک مثبت پہلو ثابت ہو سکتی ہے۔ ایک اندازے کے مطابق یہاں کا ہر دسواں ووٹر مسیحی ہے جن کے بارے میں عام تاثر یہی ہے کہ وہ تاریخی طور پر اس پارٹی سے وابستہ ہیں۔&nbsp;

اگرچہ گذشتہ دو انتخابات میں یہ ووٹر پاکستان تحریک انصاف کی جانب راغب ہو گئے تھے لیکن ضمنی انتخابات کی مہم میں پاکستان پیپلز پارٹی نے مسیحی آبادیوں پر خصوصی توجہ مرکوز کی اور بظاہر وہاں سے اچھے ووٹ لیے (تاہم اس بارے میں حتمی رائے پولنگ سٹیشن کی سطح کے نتائج کا مفصل تجزیہ کر کے ہی قائم کی جا سکتی ہے جو ابھی ممکن نہیں)۔

لہٰذا مختصراً یہ کہا جا سکتا ہے کہ ضمنی انتخاب نے فی الحال اس پارٹی کو اپنے اس بیانیے کو بڑھاوا دینے کا جواز فراہم کر دیا ہے کہ وہ پنجاب کے انتخابی میدان میں محض تماشائی کی حیثیت نہیں رکھتی۔

خواتین امیدواروں کی عام انتخابات میں کامیابی: بس کہ دشوار ہے ہر کام کا آساں ہونا۔

لاہور کا ضمنی انتخاب: کیا پاکستان پیپلز پارٹی پنجاب کی سیاست میں واپس آ گئی ہے؟

According to new figures, only the Christian population in Pakistan's minorities has declined. Read how did this happen?

minorities undercounted in pakistan census 2017

پاکستان میں رہنے والے مسیحیوں کا بھی ان لوگوں میں شامل ہونے کا امکان ہے جو 2017 میں ہونے والی مردم شماری کے صحیح ہونے پر سوال اٹھا رہے ہیں۔ مسیحیوں کو پہلے سے ہی یہ شکایت ہے کہ سرکاری اعداد و شمار میں ان کی آبادی کو اصل سے کم ظاہر کیا جاتا ہے۔ موجودہ مردم شماری کے نتائج کو دیکھا جائے تو ان کی یہ شکایت درست معلوم ہوتی ہے۔&nbsp;

چند روز پہلے حکومت کی جانب سے جاری کیے گئے اعداد و شمار کے مطابق پاکستان میں مسلمانوں کی آبادی 1998 میں 12 کروڑ 74 لاکھ تھی جو 2017 میں 20 کروڑ چار لاکھ ہو گئی۔ یعنی 19 سال میں پاکستان کی مسلم آبادی میں 57.2 فیصد اضافہ ہوا ۔ دوسری جانب اسی عرصہ میں غیر مسلم آبادی میں اضافے کی شرح 48.7 فیصد رہی۔&nbsp;

حیرانی کی بات یہ ہے کہ دونوں شرحوں کے درمیان اس آٹھ فیصد فرق سے صرف مسیحی آبادی ہی متاثر ہوئی ہے کیونکہ 1998 سے 2017 کے درمیان اس میں صرف 26.3 فیصد اضافہ ہوا ہے۔&nbsp;

پاکستان میں مسیحیوں کی سب سے بڑی تعداد پنجاب میں رہتی ہے جہاں مسلم اور مسیحی آبادیوں میں شرحِ اضافہ میں فرق اور بھی زیادہ ہے۔ مردم شماری کے نتائج بتاتے ہیں کہ 1998 اور 2017 کے درمیان اس صوبے میں مسلم آبادی 50.3 فیصد بڑھی جبکہ اسی عرصہ میں یہاں کی مسیحی آبادی میں صرف 21.6 فیصد اضافہ ہوا۔ &nbsp;

سالانہ حساب سے بھی دیکھا جائے تو پنجاب میں مسلم آبادی میں 2.2 فیصد کی شرح سے اضافہ ہوا ہے جبکہ مسیحی آبادی میں اضافے کی سالانہ شرح اس کے نصف سے بھی کم (1.0 فیصد) رہی ہے۔ اسی طرح پورے پاکستان میں مسلم اور مسیحی آبادی میں بالترتیب 2.4 اور 1.2 فیصد سالانہ شرح سے اضافہ ہوا۔&nbsp;

یہ فرق نا صرف حیران کن ہے بلکہ اس سے پہلے اس کی مثال بھی نہیں ملتی۔&nbsp;

گزشتہ مردم شماریوں میں در حقیقت مسیحیوں اور ہندوؤں کی آبادی میں اضافے کی شرح مسلمانوں کی آبادی میں شرحِ اضافہ سے زیادہ ریکارڈ کی جاتی رہی ہے۔ اس رجحان کو مدِ نظر رکھا جائے تو اس بار مسیحی آبادی میں اضافے کی شرح میں اچانک کمی کی کوئی معقول وجہ نظر نہیں آتی۔

ان اعدادوشمار میں یہ تاریک راز بھی چھپا ہوا ہے کہ اگر 20 سال میں مسیحیوں کی آبادی میں اسی شرح سے اضافہ ہوا ہوتا جس شرح سے مسلمانوں کی آبادی بڑھی ہے تو 2017 میں مسیحیوں کی آبادی مردم شماری میں دی گئی ان کی آبادی سے ساڑھے چھ لاکھ زیادہ ہوتی۔ گویا اس مردم شماری میں ہر پانچ میں سے ایک مسیحی یا تو غائب ہے یا اس کو گِنا نہیں گیا۔ اس بات سے شاید کسی کو حیرانی نہ ہو کہ اِن گم شدہ یا گنتی سے باہر مسیحیوں میں سے 486000 کا تعلق پنجاب سے ہے۔ &nbsp;

یہی وجہ ہے کہ پنجاب کی کل آبادی میں مسیحیوں کا حصہ جو 1998 میں 2.31 فیصد تھا 2017 میں کم ہو کر 1.88 فیصد رہ گیا ہے۔&nbsp;

مسیحیوں کی اتنی بڑی تعداد کو ملکی آبادی میں شمار نہ کیے جانے سے پاکستان میں ان کی پہلے سے ہی خراب سماجی اور معاشی حالت مزید بگڑ جائے گی۔ اور کچھ نہیں تو اس سے ریاستی وسائل سے استفادے کے لیے ان کے دعوے کمزور پڑ جائیں گے اور ان کی سیاسی اہمیت بھی کم ہو جائےگی۔&nbsp;

مسیحیوں کی آبادی کو صحیح طرح سے نہ گنے جانے سے غیر مسلم پاکستانیوں کے اندر بھی ان کا درجہ کمتر ہو جائے گا۔ ان کی آبادی میں دکھائے گئے اضافے کی انتہائی کم شرح کے باعث اعلیٰ ذات اور شیڈولڈ کاسٹ کے ہندوؤں کی انتخابی سیاسی اہمیت بڑھ جائے گی جن کی آبادی میں اضافے کی شرح مسیحیوں سے کہیں زیادہ بتائی گئی ہے۔&nbsp;

اعدادوشمار اس فرق کو کھول کر دکھاتے ہیں۔ مثال کے طور پر 2017 کی مردم شماری کے مطابق پاکستان کی مجموعی غیر مسلم آبادی میں مسیحیوں کی تعداد 36.1 فیصد ہے جبکہ ہندوؤں کی مجموعی تعداد 60.8 فیصد بنتی ہے۔ لیکن 1998 میں یہ صورتِ حال اس سے مختلف تھی۔ اس وقت پاکستان کی غیر مسلم آبادی میں مسیحیوں کا تناسب 42.5 فیصد تھا جبکہ اعلیٰ ذات اور شیڈولڈ کاسٹ ہندوؤں کا مجموعی تناسب 49.7 فیصد ریکارڈ کیا گیا تھا۔ اس میں اعلیٰ ذات کے ہندو ملک کی مجموعی غیر مسلم آبادی کا 42.9 فیصد تھے۔یعنی اس وقت ان کی تعداد لگ بھگ مسیحیوں کے برابر تھی۔&nbsp;

<h2>ذات بمقابلہ مذہب&nbsp;</h2>

اعلیٰ ذات اور شیڈولڈ کاسٹ ہندوؤں کو مجموعی طور پر دیکھا جائے تو ان کی آبادی میں اضافے کی شرح میں کوئی کمی نہیں آئی اور اس میں ماضی جیسی رفتار سے ہی اضافہ ہوا ہے چنانچہ 2017 کی مردم شماری میں بھی ان کی آبادی میں اضافے کی شرح مسلمانوں سے زیادہ رہی ہے۔&nbsp;

یہاں ایک بات کی وضاحت ضروری ہے۔ 1882 کے بعد برطانوی ہند میں کی گئی ہر مردم شماری میں اعلیٰ ذات اور شیڈولڈ کاسٹ کے ہندوؤں کو دو الگ گروہوں کے طور پر گنا جاتا رہا ہے۔ قیام پاکستان کے بعد کی گئی ابتدائی تین مردم شماریوں میں بھی ایسا ہی کیا گیا۔&nbsp;

تاہم جنرل ضیا الحق نے ایک نیا سیاسی نظام وضع کیا جس کے تحت کسی مذہب کے پیروکار صرف اپنے ہی مذہب سے تعلق رکھنے والے انتخابی امیدواروں کو ووٹ دے سکتے تھے۔ اس جداگانہ انتخابی نظام میں قومی اور صوبائی اسمبلیوں کی نشستیں مسلمانوں، مسیحیوں، ہندوؤں اور دوسرے مذاہب کے ماننے والوں کی آبادی کے تناسب کے مطابق ان میں تقسیم کی گئیں۔

اس نظام میں سب سے بڑا نقصان شیڈولڈ کاسٹ ہندوؤں کو ہوا کیونکہ اس میں انہیں اعلیٰ ذات کے ہندوؤں سے الگ شناخت نہیں دی گئی بلکہ انہیں &#39;بت پرستوں&#39; کے ایک ہی خانے میں ڈال دیا گیا۔ اس کا نتیجہ یہ نکلا کہ قومی اور صوبائی اسمبلیوں اور مقامی سطح پر منتخب اداروں میں ہندوؤں کی تمام مخصوص نشستیں اعلیٰ ذات کے ہندوؤں کے ہاتھ آ گئیں کیونکہ شیڈولڈ کاسٹ ہندوؤں کے مقابلے میں وہ نا صرف زیادہ وسائل کے مالک ہیں بلکہ سیاسی روابط کے اعتبار سے بھی ان سے آگے ہیں۔&nbsp;

اس کے بعد 1981 کی مردم شماری میں بھی دونوں ہندو برادریوں کو اکٹھا گنا گیا۔

1997 کے عام انتخابات تک اقلیتوں کے لیے جداگانہ انتخاب کا نظام ہی قائم رہا لیکن اس سے اگلے سال ہونے والی مردم شماری میں اعلیٰ ذات اور شیڈولڈ کاسٹ ہندوؤں کو ایک مرتبہ پھر الگ الگ گنا گیا۔ تاہم اس مردم شماری میں ہر 15 ہندوؤں میں سے صرف دو نے خود کو شیڈولڈ کاسٹ کے طور پر رجسٹرڈ کرایا۔بقیہ آبادی نے خود کو محض ہندو قرار دیا۔&nbsp;

1961 اور 1972 میں ہونے والی مردم شماری کے مقابلے میں یہ بہت بڑی تبدیلی تھی۔ ان دو مردم شماریوں میں ہر 15 میں سے 10 ہندوؤں نے خود کو شیڈولڈ کاسٹ بتایا تھا جبکہ صرف پانچ نے خود کو محض ہندوؤں کے طور پر رجسٹرڈ کرایا تھا۔&nbsp;

2017 کی مردم شماری کے نتائج میں شیڈولڈ کاسٹ یا دلت ہندوؤں کی آبادی میں ایک مرتبہ پھر کچھ اضافہ دیکھنے میں آیا ہے۔ ایسا لگتا ہے کہ ان کے اندر اپنی علیحدہ شناخت کا احساس دھیرے دھیرے واپس آ رہا ہے کیونکہ اس مردم شماری کے مطابق ہر 15 ہندوؤں میں سے تین نے خود کو شیڈولڈ کاسٹ کے طور پر رجسٹرڈ کرایا ہے۔&nbsp;

مردم شماری کے اعداد و شمار کی رو سے اعلیٰ ذات کے ہندوؤں کے مقابلے میں شیڈولڈ کاسٹ کی آبادی میں بھی بھاری شرح سے اضافہ ہوا۔ چنانچہ شیڈولڈ کاسٹ ہندو اب صوبہ سندھ کی مجموعی آبادی کا 1.7 فیصد ہو گئے ہیں جبکہ 1998 کی مردم شماری میں وہ صوبے کی آبادی کا 1.0 فیصد تھے۔

صوبے میں اعلیٰ ذات اور شیڈولڈ کاسٹ ہندوؤں کی مجموعی تعداد اس لئے بھی بڑھی ہے کہ ان کی آبادی میں شرحِ اضافہ بہت بلند رہی ہے (یا شاید انہیں بہتر طور سے گنا گیا ہے)۔ لہٰذا اب اعلیٰ ذات اور شیڈولڈ کاسٹ ہندو مجموعی طور پر سندھ کی آبادی کا 8.7 فیصد ہیں۔ 1998 میں وہ صوبے کی کل آبادی کا7.5 &nbsp;فیصد تھے۔&nbsp;

<h2>تنازعات کی بھرمار</h2>

2017 کی مردم شماری کے حال ہی میں جاری کردہ نتائج مختلف گروہوں کی پہلے سے موجود شکایات میں مزید اضافہ کریں گے۔ مثال کے طور پر اس بات کا قوی امکان ہے کہ پاکستان کی مسیحی آبادی ان اعداد و شمار کو چیلنج کرے گی۔ شیڈولڈ کاسٹ ہندوؤں کے حقوق کے لیے کام کرنے والے لوگ بھی یہ دعویٰ کر سکتے ہیں کہ ان کی آبادی کی درست گنتی نہیں ہوئی۔ خاص طور پر جب اس کا موازنہ 1961 اور 1972 کی مردم شماری کے نتائج سے کیا جائے تو یہ خدشہ اور بھی بڑھ جاتا ہے۔&nbsp;

بعض دیگر گروہ پہلے ہی مردم شماری کے نتائج پر اعتراضات کر چکے ہیں۔ سندھ کی صوبائی حکومت 2018 سے شکایت کر رہی ہے کہ اس مردم شماری میں صوبے کی آبادی دو کروڑ کم بتائی گئی ہے۔ اسی طرح کراچی سے تعلق رکھنے والی سیاسی جماعتیں، خصوصاً متحدہ قومی موومنٹ (ایم کیو ایم)، بھی یہ کہتی چلی آئیں ہیں کہ کراچی کی آبادی اس مردم شماری میں بتائی گئی تعداد (ایک کروڑ 60 لاکھ) سے کہیں زیادہ ہے۔&nbsp;

انہی شکایات کی بنا پر اس مردم شماری کی تکمیل کے تین سال بعد بھی اس کے نتائج کو سرکاری سطح پر جاری کرنے پر اتفاقِ رائے نہ ہو سکا۔ تاہم وفاقی اکائیوں کے درمیان اختلافات اور شکایات کے ازالے کے لیے بنائی گئی مشترکہ مفادات کونسل نے گزشتہ ہفتے بالآخر ان نتائج کی منطوری دے &nbsp;دی (حالانکہ سندھ کی شکایات بدستور برقرار ہیں)۔ چنانچہ وفاقی ادارہ شماریات نے آبادی سے متعلق مخصوص نتائج کو اپنی ویب سائٹ پر شائع کرنا شروع کر دیا ہے۔ &nbsp;

اس تنازعات کی بنیاد پر یہ کہا جا سکتا ہے کہ آنے والے ہفتوں اور مہینوں میں جوں جوں مردم شماری کے مزید نتائج سامنے آتے جائیں گے تو اس حوالے سے تحفظات اور شکایات میں بھی اضافہ ہوتا جائے گا۔

یہ رپورٹ لوک سجاگ نے پہلی دفعہ 31 مئی 2021 کو اپنی پرانی ویب سائٹ پر شائع کی تھی۔

پاکستان کے 'گم شدہ' مسیحی: 2017 کی مردم شماری  میں کس طرح مسیحیوں کی آبادی کو کم دکھایا گیا ہے۔

The recent by-elections to the National Assembly seat in Karachi have shown some trends which, if maintained, could radically change the electoral landscape of the city in the future.

A detailed analysis of results of NA-249 by elections karachi.

کراچی میں قومی اسمبلی کے حلقہ این اے 249 میں حالیہ ضمنی انتخاب میں ڈالے گئے ووٹوں کی شرح 2018 کے عام انتخابات کی نسبت قریباً نصف رہی مگر دونوں مواقع پر امیدواروں میں کانٹے کا مقابلہ دیکھنے کو ملا۔ 2018 میں پاکستان تحریک انصاف (پی ٹی آئی) کے امیدوار فیصل واوڈا نے پاکستان مسلم لیگ نواز (پی ایم ایل این) کے صدر شہباز شریف کو 723 ووٹوں سے ہرایا تھا جبکہ حالیہ انتخاب کے عبوری نتائج کی رو سے پاکستان پیپلز پارٹی (پی پی پی) کے امیدوار قادر خان مندوخیل نے پی ایم ایل این کے مفتاح اسماعیل کو 683 ووٹوں سے شکست دی۔&nbsp;

تاہم مفتاح اسماعیل نے اس عبوری نتیجے کو چیلنج کرتے ہوئے ووٹوں کی دوبارہ گنتی کا مطالبہ کیا ہے جسے الیکشن کمیشن آف پاکستان نے منظور کر لیا ہے۔&nbsp;

اگرچہ کسی ایک ضمنی الیکشن کی بنیاد پر وسیع سیاسی اور انتخابی نتائج اخذ نہیں کیے جا سکتے خواہ اس میں امیدواروں کے مابین کتنا ہی سخت مقابلہ کیوں نہ ہوا ہو لیکن کراچی میں ہونے والے اس ضمنی انتخاب کے نتائج کو یکسر نظر انداز بھی نہیں کیا جا سکتا کیونکہ ان سے پتا چلتا ہے کہ پاکستان کے سب سے بڑے شہر کی سیاست میں کیا ہو رہا ہے۔ اگر اس ضمنی انتخاب میں دکھائی دینے والے رجحانات زور پکڑتے ہیں تو یقینی طور پر آنے والے عام انتخابات میں شہر کا انتخابی منظر نامہ تبدیل ہو سکتا ہے۔&nbsp; 
ذیل میں ان چھ رجحانات کا جائزہ لیا گیا ہے جو ضمنی انتخاب کے نتیجے میں سامنے آئے ہیں:&nbsp;

<h2>1: ریت کا قلعہ</h2>

2018 کے انتخابات میں این اے 249 میں فیصل واوڈا نے 35,349 ووٹ (ڈالے گئے کل ووٹوں کا 26.9 فیصد) حاصل کیے اور ملک میں اس وقت کی سب سے بڑی سیاسی جماعت کے سربراہ کو شکست دی۔ لیکن ضمنی انتخاب میں واوڈا کی جماعت، پی ٹی آئی، نے عام انتخابات میں حاصل کردہ ہر 100 ووٹوں کے مقابلے میں صرف 25 ووٹ ہی حاصل کیے ہیں۔ نتیجتاً اس کے مجموعی ووٹ کم ہو کر 8,922 (یا ڈالے گئے کل ووٹوں کے 12.1 فیصد) پر آ گئے اور یوں اس انتخاب میں اس کی پوزیشن پانچویں رہی۔

اس حلقے میں بعض دوسری جماعتوں کے ووٹ بھی کم ہوئے ہیں مگر ان کی تعداد اتنی زیادہ نہیں جتنی کہ پی ٹی آئی کے کم ہونے والے ووٹوں کی ہے۔ کیا یہ کراچی میں اس جماعت کی انتخابی کامیابی کے خاتمے کا اشارہ ہے؟&nbsp;

2018 میں پی ٹی آئی نے اس شہر میں قومی اسمبلی کے 21 حلقوں میں سے 14 میں کامیابی حاصل کی تھی۔ پانچ دیگر حلقوں میں یہ دوسرے نمبر پر آئی اور بقیہ دو میں اس نے تیسری پوزیشن حاصل کی۔ اگر اور کچھ نہیں تو ضمنی انتخاب کا نتیجہ یہ ضرور ظاہر کرتا ہے کہ ڈھائی سال سے مرکز میں برسر اقتدار ہونے کے باوجود، یا پھر اسی وجہ سے، پی ٹی آئی کراچی کے ووٹروں میں اپنی مقبولیت کھو رہی ہے۔&nbsp;

<h2>2 : مقابلہ تو &#39;دلِ ناتواں&#39; نے خوب کیا</h2>

تحریکِ لبیک پاکستان (ٹی ایل پی) نے 2018 کے عام انتخابات میں این اے 249 میں ڈالے جانے والے کل ووٹوں کا 18.3 فیصد حاصل کیا حالانکہ یہ اس کا پہلا انتخابی معرکہ تھا۔&nbsp; 
ضمنی انتخاب میں اسے یہ مسئلہ بھی درپیش تھا کہ پولنگ والے دن سے دو ہی ہفتے پہلے وفاقی حکومت نے اسے ایک دہشت گرد تنظیم قرار دے کر اس کی سرگرمیوں پر پابندی لگا دی۔ فرانسیسی سفیر کی ملک بدری کے مطالبے پر گزشتہ دنوں اس نے جو احتجاج کیے اس کے بعد وزارت داخلہ نے 15 اپریل 2021 کو ایک نوٹیفکیشن جاری کیا جس میں کہا گیا کہ وفاقی حکومت کے پاس اس بات پر یقین کرنے کی معقول وجہ موجود ہے کہ ٹی ایل پی دہشت گردی میں ملوث ہے اور یہ کہ اس نے ملک کے امن اور سلامتی کو خطرے میں ڈالا ہے۔&nbsp;

یہ دونوں باتیں الیکشن ایکٹ 2017 کے تحت کسی بھی سیاسی جماعت کو تحلیل کرنے کی معقول بنیاد بن سکتی ہیں۔ تاہم ایک سیاسی جماعت کو انتخاب کے لیے نا اہل قرار دینے کے لیے وفاقی حکومت کو ایک طویل طریقہ کار اختیار کرنا ہوتا ہے جس میں سپریم کورٹ سے بھی رجوع کرنا پڑتا ہے جبکہ یہ عمل شروع ہونے سے بہت پہلے الیکشن کمیشن نے این اے 249 میں ضمنی انتخاب کے لیے دوسرے امیدواروں کے ساتھ ساتھ ٹی ایل پی کے امیدوار کے کاغذات نامزدگی بھی منظور کر لیے تھے۔ الیکشن کمیشن کے پاس خود سے اس منظوری کو واپس لینے اور ٹی ایل پی کو انتخابات میں شرکت سے روکنے کا کوئی اختیار نہیں تھا۔

تاہم این اے 249 سے ملنے والی اطلاعات سے ظاہر ہوتا ہے کہ مقامی انتظامیہ نے وفاقی حکومت کی جانب سے اس جماعت پر لگائی گئی پابندی کے حکم کو مدِ نظر رکھتے ہوئے اسے جلسے جلوس نکالنے کی اجازت نہیں دی۔ اس کے باوجود اس نے 11,125 ووٹ حاصل کیے ہیں۔ یقیناً یہ 2018 میں اسے حاصل ہونے والے 23,981 ووٹوں کے مقابلے میں بہت کم ہیں تاہم حلقے میں ڈالے جانے والے مجموعی ووٹوں میں سے اسے ملنے والے ووٹوں کی شرح میں صرف تین فیصد ہی کمی آئی ہے اور یہ شرح 18.3 فیصد سے گر کر 15.1 فیصد پر آ گئی ہے۔&nbsp; 
اس لیے کہا جا سکتا ہے کہ انتخابی میدان میں ٹی ایل پی نے بھلے ہی پہلے سے بہتر کارکردگی نہ دکھائی ہو مگر اس کا ووٹ بینک ابھی بھی برقرار ہے۔&nbsp;

<h2>3: فرقہ وارانہ تقسیم</h2>

2018 کے عام انتخابات میں متحدہ مجلسِ عمل (ایم ایم اے) کے امیدوار نے این اے 249 میں 10,307 ووٹ حاصل کیے جن میں سے بیشتر ووٹ جمیعت علمائے اسلام (فضل الرحمان) کے تھے۔ ضمنی انتخاب میں ایم ایم اے نے اپنا امیدوار کھڑا نہ کرنے اور پاکستان مسلم لیگ نواز کی حمایت کرنے کا فیصلہ کیا جو اپوزیشن کے اتحاد پاکستان ڈیمو کریٹک موومنٹ میں جمیعت علمائے اسلام (فضل الرحمان) کی سب سے بڑی اتحادی جماعت ہے۔&nbsp;

ایم ایم اے کا یہ ووٹ کہاں گیا؟

یقیناً اس کے تمام ووٹ پاکستان مسلم لیگ نواز کو نہیں ملے اور ان سے ٹی ایل پی کو بھی فائدہ نہیں ہوا جو اس ضمنی انتخاب میں حصہ لینے والی واحد مذہبی جماعت تھی حالانکہ جمیعت علمائے اسلام (فضل الرحمان) گزشتہ دنوں میں اس کے موقف اور اقدمات کی حمایت بھی کر چکی ہے۔&nbsp;

اس سے ثابت ہوتا ہے کہ مذہبی ووٹر کسی بڑی سیاسی یا مذہبی وجہ کے بغیر فرقہ وارانہ حدود پار نہیں کرتا۔ مثال کے طور پر 2002 میں ایم ایم اے کو تمام فرقوں سے تعلق رکھنے والے لوگوں کے ووٹ ملے تھے کیونکہ اس میں ان تمام فرقوں کی جماعتیں شامل تھیں۔ لیکن عام حالات میں چونکہ ٹی ایل پی بریلوی مسلک سے تعلق رکھنے والوں کی جماعت ہے اس لیے اسے جمعیت علمائے اسلام کے ووٹر کی حمایت نہیں مل سکتی کیونکہ اس ووٹر کا تعلق دیوبندی فرقے سے ہے۔ &nbsp;&nbsp;

<h2>4: مستحکم ووٹ بینک&nbsp;</h2>

متحدہ قومی موومنٹ (ایم کیو ایم) پاکستان نے جولائی 2018 میں ہونے والے عام انتخابات میں اس حلقے سے 13,534 ووٹ (یا ڈالے گئے کل ووٹوں کا 10.3 فیصد) حاصل کیے تھے۔ ضمنی انتخاب میں اسے 7,511 ووٹ (یا ڈالے گئے کل ووٹوں کا 10.2 فیصد) ملے۔

اگر حاصل کردہ ووٹوں کی شرح کو دیکھا جائے تو ایم کیو ایم کو اتنی ہی حمایت ملی جتنی اسے 2018 میں ملی تھی۔ چونکہ ضمنی الیکشن میں ووٹر ٹرن آؤٹ عام انتخابات کے مقابلے میں کم رہا اس لیے ایم کیو ایم کے ووٹوں میں کمی کو بھی اسی تناظر میں دیکھا جا سکتا ہے۔ مستقبل قریب میں کراچی بھر میں یہی رجحان برقرار رہتا دکھائی دیتا ہے۔

<h2>5: سہانے خواب</h2>

پاک سر زمین پارٹی 2016 میں ایک نئی سیاسی جماعت کے طور پر سامنے آئی۔ اس کے سربراہ مصطفیٰ کمال ہیں جو 2005 سے 2010 تک کراچی کے میئر رہ چکے ہیں۔ اس کے بعد 2013 میں وہ ایم کیو ایم کے ٹکٹ پر سینیٹ کے رکن بھی منتخب ہوئے تھے۔

لیکن 2018 کے عام انتخابات میں پاک سر زمین پارٹی کی کارکردگی خاصی خراب رہی۔ کراچی میں قومی اسمبلی کی 21 نشستوں پر الیکشن لڑنے والے اس کے امیدواروں میں صرف مصطفیٰ کمال ہی 10 ہزار سے زیادہ ووٹ لے پائے تھے۔ انہوں نے کراچی وسطی کے حلقے این اے 253 سے الیکشن لڑا اور چوتھی پوزیشن پر آئے۔ دیگر حلقوں میں پاک سرزمین پارٹی کے 16 امیدوار ساتویں یا اس سے بھی نچلے نمبر پر رہے۔

عام انتخابات میں این اے 249 میں پاک سر زمین پارٹی کی امیدوار فوزیہ حمید نے بھی ساتویں پوزیشن حاصل کی تھی۔ انہوں نے 1,617 ووٹ (یا ڈالے گئے کل ووٹوں کا 1.2 فیصد) حاصل کیے۔ تاہم ضمنی الیکشن میں اس پارٹی کے امیدوار نے 9,227 ووٹ (یا ڈالے گئے کل ووٹوں کا 12.6 فیصد) حاصل کیے۔ درحقیقت پاک سر زمین پارٹی ان دو جماعتوں میں سے ایک ہے جن کے ووٹوں میں اس ضمنی انتخاب میں عام انتخابات کے مقابلے میں اچھا خاصا اضافہ ہوا ہے۔&nbsp;

اس کی ایک بڑی وجہ یہ ہو سکتی ہے کہ اس مرتبہ خود مصطفیٰ کمال اس حلقے سے امیدوار تھے۔ پھر بھی یہ سوال برقرار &nbsp;رہتا ہے کہ انہوں نے کس جماعت کا ووٹ توڑا؟

اس کا ایک جواب یہ ہو سکتا ہے کہ اس حلقے میں اردو بولنے والے ان لوگوں نے ضمنی انتخاب میں پاک سر زمین پارٹی کو ووٹ دیا جنہوں نے 2018 میں پی ٹی آئی کو ووٹ دیا تھا مگر اب وہ اس سے مایوس ہو چکے ہیں۔&nbsp;

پی ٹی آئی نے اس ضمنی انتخاب میں 2018 کے عام انتخابات کی نسبت 14.8 فیصد کم ووٹ لیے ہیں۔ غالب امکان ہے کہ ان ووٹوں کا بڑا حصہ پاک سر زمین پارٹی کی جانب منتقل ہوا جس نے اس ضمنی انتخابات میں عام انتخابات کے مقابلے میں 11.1 فیصد زیادہ ووٹ حاصل کیے۔&nbsp;

اگر ہم اس عام مفروضے پر یقین کریں کہ 2018 میں پی ٹی آئی اردو بولنے والوں کی سیاسی ہمدردیاں حاصل کرنے میں کامیاب رہی تھی تو یہ بھی کہا جا سکتا ہے کہ یہی ووٹر اب پاک سر زمین پارٹی کا رخ کر رہا ہے۔ تاہم صرف ایک ضمنی الیکشن کے نتائج کی بنیاد پر یہ نتیجہ اخذ نہیں کیا جا سکتا کہ پی ٹی آئی سے نکلنے والا ووٹ ہمیشہ پاک سر زمین پارٹی کو ہی فائدہ پہنچائے گا۔

<h2>6: غیر متوقع نتیجہ</h2>

سوشل میڈیا پر این اے 249 میں پی پی پی کی انتخابی کارکردگی کے حوالے سے کچھ ایسی تنقید دیکھنے کو مل رہی ہے کہ اس نے اپوزیشن اتحاد کو کمزور اور حکومت کو مضبوط کرنے کا صلہ پایا ہے۔ اس مضمون میں اس تنقید کو صحیح یا غلط ثابت کرنے کی گنجائش نہیں لیکن اگر انتخابی اعداد و شمار کو دیکھا جائے تو یہ کہا جا سکتا ہے کہ کسی بھی انتخاب میں کسی بھی جماعت کی فتح کا حقیقی دارو مدار مقامی عوامل پر ہوتا ہے۔&nbsp;

ان عوامل میں سب سے پہلا یہ ہے کہ عام اور ضمنی انتخابات دونوں میں اس حلقے سے پی پی پی کے امیدوار قادر خان مندو خیل تھے جو پختون ہیں۔ چونکہ اس حلقے میں پختونوں کی بڑی آبادی ہے اس وجہ سے انہیں اپنے حریفوں پر برتری حاصل تھی۔

ڈان اخبار کی ایک رپورٹ کے مطابق قادر خان مندو خیل 2018 میں عام انتخابات سے چند ہی ہفتے پہلے اس حلقے میں منتقل ہوئے تھے۔ بعدازاں انہوں نے یہاں خاصا کام کیا اور کوویڈ وبا کے دوران لوگوں کی مدد کر کے مقامی سطح پر اپنی حمایت بڑھائی۔ انہوں نے ڈان سے گفتگو کرتے ہوئے کہا کہ &quot;عام انتخابات کے بعد میں لوگوں کے درمیان رہا اور انہیں مدد دی جبکہ الیکشن جیتنے اور ہارنے والے دوسرے امیدوار کہیں نظر نہ آئے&quot;۔

2018 سے پہلے قادر خان مندو خیل نے 2002 میں کراچی ہی سے پی ٹی آئی کے ٹکٹ پر سندھ اسمبلی کے لئے انتخاب لڑا تھا مگر وہ کوئی خاص کارکردگی دکھانے میں ناکام رہے۔&nbsp; 
اسی طرح کے چند دیگر عوامل نے بھی ان کی اچھی کارکردگی میں کردار ادا کیا ہے۔ ان میں ایم ایم اے کا اس مقابلے سے واضح طور پر باہر ہونا خاص طور پر اہم ہے۔ اگرچہ ایم ایم اے اپنے حامیوں کو مذہبی نعروں پر اکٹھا کرتی ہے تاہم اس کی بڑی انتخابی طاقت پختون ووٹر ہیں۔ چونکہ اس نے ضمنی انتخاب میں اپنا امیدوار کھڑا نہ کرنے کا فیصلہ کیا تھا اس لیے دوسرے امیدواروں کو پختون ووٹ اپنے حق میں متحرک کرنے کا موقع مل گیا۔ ایسا لگتا ہے کہ قادر خان مندوخیل نے یہ کام دوسروں کی نسبت زیادہ کامیابی سے کیا اور بڑی تعداد میں پختون ووٹ اپنی جانب راغب کرنے میں کامیاب رہے۔

شاید اسی وجہ سے پی ٹی آئی نے بھی اردو بولنے والے امیدوار کے بجائے ایک پختون امجد اقبال آفریدی کو میدان میں اتار ا تھا۔ لیکن اس کی یہ حکمت عملی ناکام رہی کیونکہ اس طرح حلقے میں اردو بولنے والے اس کے حامیوں میں ضمنی انتخاب کے لئے خاطر خواہ گرم جوشی پیدا نہ ہو سکی۔&nbsp;

پی ٹی آئی کا حکومت میں ہونا بھی امجد آفریدی کے خلاف گیا اور یہ پی پی پی کی 2018 کے انتخابات کے مقابلے میں زیادہ ووٹ حاصل کرنے کی دوسری بڑی وجہ ہو سکتی ہے۔&nbsp; 
این اے 249 میں بہت سی آبادیاں پانی اور نکاسی آب جیسی بنیادی شہری سہولیات سے محروم ہیں۔ ہر انتخاب کے موقع پر امیدوار یہ مسائل حل کرنے کا وعدہ کرتے ہیں۔ آخری مرتبہ یہ وعدہ کرنے اور اسے پورا نہ کرنے والی شخصیت پی ٹی آئی کے امیدوار فیصل واوڈا تھے۔ ان علاقوں کے لوگوں نے ضمنی انتخاب میں ان کی جماعت کو ووٹ دینے سے پہلے یقیناً دو مرتبہ سوچا ہو گا۔ &nbsp;

اسی طرح این اے 249 کے باسیوں کی بڑی تعداد محنت کش اور نچلے متوسط طبقے سے تعلق رکھتی ہے جو پی ٹی آئی کی ڈھائی سالہ حکومت میں بڑھتی ہوئی مہنگائی اور معاشی سرگرمیاں ماند پڑنے سے بری طرح متاثر ہوا ہے۔ اس لیے اس طبقے کے ووٹروں کا پی ٹی آئی کے امیدوار کو مسترد کرنا سمجھ میں آتا ہے۔&nbsp;

ضمنی انتخاب کے دوران پی ٹی آئی &nbsp;کے اندرونی اختلافات نے بھی اس کی مشکلات میں اضافہ کیا۔ امجد آفریدی کی امیدوار کی حیثیت سے نامزدگی کو سندھ اسمبلی میں پارٹی کے رکن اور ضمنی الیکشن میں ٹکٹ کے ایک دوسرے امیدوار ملک شہزاد اعوان نے کھلے عام مسترد کیا تھا۔ انہوں نے بطور احتجاج صوبائی اسمبلی کی نشست سے مستعفی ہونے کی دھمکی بھی دی تھی۔ تاہم سندھ کے گورنر عمران اسماعیل سے ملاقات کے بعد وہ اپنے مطالبے سے دستبردار ہو گئے لیکن اس وقت تک ضمنی انتخاب میں صرف ایک مہینہ رہ گیا تھا۔&nbsp;

شہزاد اعوان کا امجد آفریدی سے بہتر امیدوار ہونے کا دعویٰ اس حقیقت پر مبنی تھا کہ این اے 249 میں ہندکو بولنے والی ہزارہ وال برادری کی اتنی بڑی تعداد بستی ہے جو شہزاد اعوان کو 2018 میں صوبائی اسمبلی کی نشست پر کامیاب کرانے کے لیے کافی تھی۔ اگرچہ پی ٹی آئی نے آفریدی۔اعوان تنازعے کو حل کر لیا مگر اس کا امکان کم ہی ہے کہ ہندکو بولنے والے ووٹر مکمل طور پر امجد آفریدی کی حمایت کرنے پر راضی ہو گئے ہوں۔&nbsp;

دوسری جانب پی پی پی کو ایسے کسی اندرونی اختلاف کے نتیجے میں اپنے ووٹ ٹوٹنے کا ڈر نہیں تھا۔ لہٰذا ایک ایسے حلقے میں جہاں مجموعی رجسٹرڈ ووٹروں کی تعداد 339,591 ہے اس کا اپنے ووٹوں میں &nbsp;عام انتخابات میں حاصل کردہ ووٹوں کے مقابلے میں 8,920 ووٹوں کا اضافہ کر لینا کوئی ایسے اچنبھے کی بات نہیں خاص طور پر ایک ایسی جماعت کے لیے جو 2008 سے صوبہ سندھ پر مسلسل حکمرانی کر رہی ہے۔

تاہم آئندہ کسی انتخاب میں پڑنے والے ووٹوں کی شرح زیادہ ہونے اور دوسری سیاسی جماعتوں اور امیدواروں کے درمیان نئی صف بندیوں کی موجودگی میں پی پی پی شاید دوبارہ ایسی &nbsp;کارکردگی نہ دکھا پائے۔

یہ رپورٹ لوک سجاگ نے پہلی دفعہ 7 مئی 2021 کو اپنی پرانی ویب سائٹ پر شائع کی تھی۔

طاہر مہدی

طاہر مہدی ایک انتخابی تجزیہ نگار ہیں انہیں صحافت کا وسیع تجربہ ہے اور وہ سیاسی اور سماجی امور پر گہری نظر رکھتے ہیں۔

نئی مردم شماری: قومی اسمبلی میں پنجاب کی مزید 8 سیٹیں کم، سندھ اور بلوچستان کے حصوں میں اضافہ

2017 کی مردم شماری کے نتائج: پنجاب میں سرائیکی بولنے والوں کے تناسب میں اضافہ۔

لاہور کا ضمنی انتخاب: کیا پاکستان پیپلز پارٹی پنجاب کی سیاست میں واپس آ گئی ہے؟

پاکستان کے 'گم شدہ' مسیحی: 2017 کی مردم شماری میں کس طرح مسیحیوں کی آبادی کو کم دکھایا گیا ہے۔

کراچی میں ضمنی انتخابات: این اے 249 میں پاکستان تحریکِ انصاف کی شکست کا سبب بننے والی سیاست۔

Lok Sujag