بدین میں امیر شاہ سیم نالے کے کنارے قدیم گاؤں آسیلی پر آسیب زدہ جگہ کا گمان ہوتا ہے۔ چند سال پہلے تک بھرا پُرا یہ گاؤں اب مکینوں سے خالی ہو چکا ہے اور ٹوٹے پھوٹے مکانوں، سونی گلیوں اور اجاڑ راستوں پر اب ڈھونڈے سے بھی کوئی انسان دکھائی نہیں دیتا۔

بدین کی تحصیل گولاڑچی کی حدود میں یہ گاؤں تقریباً ایک صدی تک آباد رہا ہے۔ تاہم اب اس کے تمام باسی ہجرت کر کے بدین شہر اور گردونواح میں منتقل ہو گئے ہیں۔ انہی لوگوں میں شامل کاشف قادر میمن بتاتے ہیں کہ وہ آسیلی میں پیدا ہوئے تھے جہاں ان کا خاندان کئی نسلوں سے آباد تھا۔ ان کے اجداد کی قبریں بھی وہیں ہیں مگر اب چاہتے ہوئے بھی وہ اپنے گاؤں میں واپس نہیں جا سکتے۔

کاشف بدین کے گورنمنٹ ہائی سکول میں پڑھاتے ہیں۔ ان کا کہنا ہے کہ آسیلی کی ویرانی کا سبب امیر شاہ سیم نالہ (گونی پھلیلی آؤٹ فال ڈرین) ہے جسے ماتلی میں واقع انصاری شوگر مل میں الکوحل بنانے والے ڈسٹلری یونٹ سے خارج ہونے والے زہریلے مواد نے آلودہ کر دیا ہے۔

نالے سے نکلنے والی گیسوں سے گاؤں کے لوگ بیمار ہو کر مرنے لگے تو سبھی نے اپنی زمینیں اونے پونے داموں بیچ کر شہروں کو ہجرت کر لی۔

آسیلی کے قریب سیم نالے کی دوسری جانب ترائی نامی قصبہ ہے جس کی آبادی پانچ ہزار ہے۔ یہاں رہے والے اسلم آزاد سموں بتاتے ہیں کہ سیم نالے سے زہریلی گیسوں اور بدبو کے اخراج سے ناصرف ترائی بلکہ آس پاس کے دیہات میں رہنے والے تمام لوگوں کی صحت و زندگی بری طرح متاثر ہو رہی ہے اور لوگ تیزی سے نقل مکانی کرتے جا رہے ہیں۔

<h2>&#39;کبھی یہ علاقہ سُگداسی چاول کی خوشبو سے مہکتا تھا&#39;</h2>

گولاڑچی کے مشرق میں واقع قصبے کھور واہ کے لوگ بھی انہی حالات کا شکار ہیں۔ یہ قصبہ گونگڑو سیم نالے کے کنارے واقع ہے جو ٹںڈو محمد خان کی شاہ مراد شوگر مل اور سجاول کی دیوان شوگر مل کے ڈسٹلری یونٹ کی گندگی سے اٹ چکا ہے۔

کھور واہ کے سماجی کارکن عبدالغنی چنا بتاتے ہیں کہ کبھی یہ علاقہ سُگداسی چاول کے ذائقے اور خوشبو کے لئے مشہور تھا لیکن اب یہاں بدبو کے مستقل ڈیرے ہیں۔

امير شاہ اور گونگڑو بدین اور سجاول اضلاع سے گزرنے والے بڑے سیم نالے ہیں۔ انہیں بارشوں کے موسم میں بدین، سجاول اور ٹنڈو محمد خان کے سیلابی پانی کو سمندر تک پہنچانے کے مقصد کے تحت بنایا گیا تھا۔ لیکن پچھلے بیس سال سے یہ دونوں نالے ان اضلاع کی شوگر ملوں کی ملکیتی &#39;گٹر&#39; بن کر رہ گئے ہیں۔

سندھ میں 30 شگر ملیں چل رہی ہیں جن میں 13 انہی تینوں اضلاع میں واقع ہیں۔ ان میں بدین اور ٹنڈو محمد خان میں پانچ پانچ جبکہ سجاول میں تین ملیں قائم ہیں۔ نومبر سے جون تک یہ ملیں روزانہ ہزاروں ٹن زہریلا فضلہ ان سیم نالوں میں ڈالتی ہیں۔

انصاری شوگر مل کے ڈسٹلری یونٹ کا زہریلا مواد امیر شاہ سیم نالے میں ڈالا جاتا ہے جبکہ دیوان شوگر ملز اور شاہ مراد مل کا پانی گونگڑو نالے میں چھوڑا جاتا ہے۔ اس طرح بدین، گولاڑچی، میرپور بٹھورو اور جاتی تحصیلوں میں 800 سے زیادہ دیہات کی پانچ لاکھ آبادی ان نالوں سے براہ راست متاثر ہو رہی ہے۔

<h2>بھیڑ، بکری، انسان سب بیمار پڑے ہیں</h2>

تعلقہ ہسپتال گولاڑچی کے ڈاکٹر رمضان آرائیں نے لوک سجاگ کو بتایا کہ سیم نالوں کے زہریلے پانی کے باعث ان علاقوں میں ہیپاٹائٹس اور کینسر جیسے خطرناک امراض پھوٹ پڑے ہیں۔ نالوں کے آس پاس دیہات میں جلد کے امراض اور الرجی کے ساتھ سانس کی بیماریاں اور پھیپڑوں کا کینسر بھی عام ہو گیا ہے۔

گونگڑو نالے کے کنارے ایک سو گھروں پر مشتمل گوٹھ سومار لوٹھیو کے رہنے والے رشید لوٹھیو کہتے ہیں کہ نالے کا آلودہ پانی مویشیوں کی صحت کو بھی متاثر کر رہا ہے۔ اسی گاؤں کے غلام لوٹھیو کی پانچ بکریاں اور بچایو ملاح کی تین بھینسیں اس نالے کا پانی پی کر مر گئی ہیں۔

بدین، سجاول اور ٹنڈو محمد خان کے سیکڑوں دیہات میں پھیلے سیم نالوں کا آلودہ پانی پینے سے لاتعداد مویشی ہلاک ہو چکے ہیں۔

بدین میں محکمہ لائیو سٹاک کے ویٹرنری افسر ڈاکٹر عمران میمن بتاتے ہیں کہ امیر شاہ اور گونگڑو سیم نالوں کے آس پاس علاقوں میں 40 سے 50 فیصد بھیڑ بکریوں، گائے بھینسوں اور اونٹوں کی اموات انہی نالوں کے زہریلے پانی سے ہوتی ہیں۔

&quot;اس علاقے میں دسمبر سے جون تک چھ مہینے پینے کے پانی کا شدید بحران ہوتا ہے۔ جب جانوروں کے لئے صاف پانی میسر نہ ہو تو وہ سیم نالوں سے پانی پی لیتے ہیں اور پیٹ کی بیماریوں، کئی طرح کے ٹیومر اور کینسر کا شکار ہو کر مر جاتے ہیں۔ گرمی کے موسم میں مویشی ان نالوں کے پانی میں رہتے ہیں جس سے انہیں جلدی بیماریاں آ لیتی ہیں۔&quot;

<h2>نالوں کے بند کیوں ٹوٹ جاتے ہیں؟</h2>

امیر شاہ اور گونگڑو سیم نالوں کی تباہ کاری ان کے دو سو کلومیٹر تک پھیلے کمانڈ ایریا میں عام دکھائی دیتی ہے۔ ایک تو یہ نالے شوگر ملوں کے زہریلے مواد سے اٹے پڑے ہیں اور پھر ان کی صفائی کرنے یا ان کے کنارے مضبوط بنانے کا بھی کوئی انتظام نہیں ہے جس کی وجہ سے ہر سال بارشوں میں ان کے بند ٹوٹ جاتے ہیں اور زہریلا پانی کھیتوں میں داخل ہو کر انہیں بنجر کر دیتا ہے۔

&nbsp;امیر شاہ سیم نالے کے کنارے واقع بچل حجام گاؤں کے غفور حجام 16 ایکڑ زرعی زمین کے مالک ہیں جہاں کبھی وہ چاول، سورج مکھی، گندم اور سرسوں کاشت کیا کرتے تھے لیکن اب ان کی زمین ویران پڑی ہے۔ انہوں نے بتایا کہ ہر سال بارشوں کے موسم میں اس نالے میں شگاف پڑ جاتا ہے جس سے نالے کا زہریلا پانی زرعی زمینوں میں پھیل کر انہیں خراب کر دیتا ہے۔

بچل حجام کے قریب آسیلی جیسے ایک اجڑے گاؤں مٹھو میمن کے زمیندار رمضان میمن نے بتایا کہ اس گاؤں کے لوگوں کی ڈھائی ہزار ایکڑ زرعی زمین ہر سال آنے والے زہریلے پانی سے تباہ ہو گئی ہے جس کے بعد تمام لوگ شہر کو نقل مکانی کر گئے ہیں۔

<h2>&#39;ٹریٹمینٹ پلانٹ لگانے پر چھ کروڑ روپے خرچ آتا ہے&#39;</h2>

سندھ کے ساحلی علاقوں میں ماحولیات پر تحقیق کرنے والے ابوبکر شیخ نے لوک سجاگ کو بتایا کہ قانون کے مطابق ہر مل میں ایسا فلٹر اور ٹریٹمینٹ پلانٹ لگانا لازم ہے جس کے ذریعے فضلے کو صاف کر کے ماحول کو نقصان سے بچایا جا سکے۔ اگر اس قانون پر عمل کیا جائے تو ملوں سے خارج ہونے والے پانی کو 80 سے 90 فیصد تک صاف کیا جا سکتا ہے۔

انہوں نے کہا کہ شوگر ملوں کا ڈسٹلری یونٹ سارا سال چلتا رہتا ہے جس میں ایتھانول الکوحل کشید کیا جاتا ہے۔ انہوں نے بتایا کہ گنے کے رس سے ایک لیٹر الکوحل کشید کرنے کے لئے 15 لیٹر پانی استعمال کرنے کی اجازت ہوتی ہے۔ مگر یہ ملیں اس حد سے دس پندرہ گنا زیادہ پانی استعمال کرتی ہیں۔

جب یہ پانی کشید کے عمل سے گزر کر خارج ہوتا ہے تو اس میں کئی طرح کے کیمیائی مادے شامل ہو چکے ہوتے ہیں۔ ان میں سے جو پانی میں حل نہیں ہو سکتے وہ سطح آب پر تہہ بنا لیتے ہے جس کے باعث پانی میں آکسیجن کی مقدار کم ہو جاتی ہے اور آبی مخلوق ہلاک ہو جاتی ہے۔

ایک شوگر مل کے اہلکار نے لوک سجاگ کو بتایا کہ شوگر مل کے فضلے کو صاف کرنے کے پلانٹ کی تنصیب پر چھ کروڑ روپے سے زیادہ خرچہ آتا ہے اور اس کو چلانے کے اخراجات الگ ہیں اس لئے مل مالکان پلانٹ لگانے سے گریز کرتے ہیں۔

<h2>&#39;صاحب چھٹی پر ہیں&#39;</h2>

قانون دان ڈاکٹر روشن علی کہتے ہیں کہ تحفظ ماحولیات ایکٹ 1997ء کے تحت کوئی بھی فرد یا کمپنی کوئی زہریلا کیمیائی مادہ یا فضلہ عام ماحول میں خارج نہیں کر سکتے۔ ایسا کرنے کی صورت میں کمپنی کو جرمانہ اور اس کے مالک کو دو سال قید کی سزا ہو گی اور کمپنی پر پابندی بھی عائد کی جا سکتی ہے۔

انہوں نے بتایا کہ اس قانون کے تحت سینئر سول جج ماحولیاتی میجسٹریٹ ہوتا ہے مگر سندھ میں کوئی بھی ایسی عدالت نہیں ہے جو ماحول کو تحفظ دے۔

سپریم کورٹ کے قائم کردہ سندھ واٹر کمیشن کے سربراہ ریٹائرڈ جسٹس امیر حانی مسلم نے جنوری 2019ء میں ایک فیصلے میں کہا تھا کہ تمام شوگر ملوں میں پانی صاف کرنے کے پلانٹ کی موجودگی ضروری ہے لیکن اس حکم پر عمل نہیں کیا گیا۔

اس معاملے میں گولاڑچی کے اسسٹنٹ کمشنر ہاشم مسعود نے ردعمل دیتے ہوئےکہا کہ انہیں عہدے سنبھالے زیادہ دن نہیں ہوئے اور وہ جلد ہی سیم نالوں میں زہریلا مواد پھینکنے والی شوگر ملوں کو نوٹس جاری کریں گے۔

تھرپارکر میں کوئلے سے بجلی کی پیداوار: 'ہماری زمینیں زبردستی لی جا رہی ہیں اور ہمارا رہن سہن بدلا جا رہا ہے'۔

شوگر ملوں سے بہتا زہریلا فضلہ جنوبی سندھ کو ویران کر دے گا

text

پینسٹھ سالہ آمی مہیری ضلع بدین کے ایک چھوٹے سے علاقے کڑیو گھنور کے گاؤں کھتھڑ میں رہتی ہیں۔ یہ گاؤں کبھی &#39;فراسی&#39; بنانے کا مرکز ہوا کرتا تھا لیکن اب آمی یہاں اس کام کی واحد ماہر ہیں جو پینتالیس سال سے اس صدیوں پرانے فنی ورثے کو بچانے کی کوشش کر رہی ہیں۔ اس کام میں ان کی بہو اور بیٹی بھی ان کا ساتھ دیتی ہیں۔

فراسی ایک نادر قسم کا &#39;بچھونا&#39; ہے جو عام طور پر مہمانوں کے لیے چارپائی پر بستر کے نیچے بچھایا جاتا ہے۔ لیکن اس کی آرائشی اہمیت بھی ہے اور لوگ اسے غالیچے یا قالین کی طرح اپنے کمروں میں سجاتے ہیں۔

سندھ کے قدیم فنون اور روایتی دستکاری کی ترقی کے ادارے (سٹکو) کے سیکرٹری عبدالحمید آخوند بتاتے ہیں کہ فراسی بنانے والے &#39;مہیری&#39; اور &#39;جت&#39; قبائل میں والدین یہ ثقافتی تحفہ بیٹیوں کو جہیز میں بھی دیتے ہیں۔

&#39;&#39;فراسی کا فن بہت مشکل اور مشقت طلب ہے۔ اس میں سب سے پہلے اونٹ کے بالوں (مرس) اور بھیڑ کی اون کو جمع کیا جاتا ہے اور انہیں صاف کر کے ان کی ڈھیریاں بنائی جاتی ہیں۔ گھر کے مرد ان ڈھیریوں دھاگہ بناتے ہیں جس میں کئی روز لگتے ہیں۔ پھر ان دھاگوں کو ببول اور بیر کے درخت کی گوند (لاکھ) سے رنگ دیا جاتا ہے اور ان سے فراسی بُنی جاتی ہے۔&#39;&#39;

فراسی پر مختلف طرح کے رنگین پھول اور ڈیزائن بنائے جاتے ہیں۔ ہر رنگ اور ڈیزائن کے لیے الگ ریشمی دھاگے اور پشم استعمال کی جاتی ہے۔ فراسی بنانے کے لیے استعمال ہونے والے فریم اور دیگر سامان بھی کاریگر خود لکڑیوں اور رسیوں سے تیار کرتے ہیں جنہیں مقامی زبان میں ارٹ، گڑت، مکڑی، گھوڑی، پیزگ، ایس، جھل وغیرہ کہا جاتا ہے۔

&nbsp;فراسی کی تین اقسام ہوتی ہیں جنہیں فراسی، آدھی فراسی اور کھرڑی کہا جاتا ہے۔ کھرڑی صرف اونٹ اور بھیڑ کے بالوں سے بنائی جاتی ہے جبکہ فراسی اور آدھی فراسی میں اونٹ یا بھیڑ کے بالوں کے ساتھ رنگین ریشمی دھاگے بھی شامل ہوتے ہیں۔

&nbsp;ایک فراسی بنانے میں دو ماہر خواتین کو تین سے چھ ماه لگ جاتے ہیں۔ فراسی اپنی بناوٹ کے لحاظ سے بہت مضبوط ہوتی ہے اور سو سال تک نہ تو پھٹتی ہے اور نہ ہی کے رنگ یا ڈیزائن میں کوئی فرق آتا ہے۔

کھتھڑ گاؤں کے حسن مہیری بتاتے ہیں کہ ان کی اہلیہ فراسی بنانے کی ماہر تھیں۔ بےنظیر بھٹو شہید کے دور حکومت میں انہوں نے لندن&nbsp; کی ایک عالمی ثقافتی نمائش میں سندھی ثفاقتی ورثے کی نمائندگی کرتے ہوئے فراسی کا سٹال لگایا تھا۔ اس نمائش میں فراسیوں اور اس فن کو بیحد سراہا گیا مگر حکومت نے ان کی کوئی مدد نہیں کی اس لیے مایوس ہو کر ان کی اہلیہ نے یہ کام چھوڑ دیا۔

&#39;&#39;پہلے کھتھڑ، بجاری شریف، خانانی جت، باگھلی، سنھڑو مہیری، بھائی خان مہیری، سکھیو مہیری اور خیرو نوندانی سمیت علاقے کی بیس بستیوں میں چھ سو سے زیاده خواتین فراسی بنانے کا کام کرتی تھیں۔ مگر بہتر اجرت نہ ملنے کے باعث اکثر نے یہ کام چھوڑ دیا ہے اور اب اس علاقے کے دو دیہات میں مجموعی طور پر صرف چھ خواتین ہی&nbsp; فراسی بنانے کا ہنر جانتی ہیں۔&#39;&#39;

عبدالحمید آخوند کا کہنا ہے کہ چند سال پہلے ایک فراسی کی قیمت 10 سے 30 ہزار روپے تک ہوتی تھی، مگر مہنگائی کے باعث اس کی لاگت میں بہت اضافہ ہو گیا ہے۔ اب کاریگر فراسی کی قیمت ڈیڑھ لاکھ روپے تک طلب کرتے ہیں جس سے اس کی فروخت میں کمی آئی ہے۔

آمی مہیری اس فن کے زوال کا سبب یہ بتاتی ہیں کہ فراسی بنانے والی خواتین مسلسل بیٹھ کر کام کرنے سے گھٹنوں اور کمر کے درد میں مبتلا ہو جاتی ہیں۔ دھول اور آنکھوں پر دباؤ پڑنے سے نظر کمزور ہو جاتی ہے۔ یہی وجہ ہے کہ نوجوان لڑکیاں اس کام سے دور بھاگتی ہیں اور اسے سیکھنا نہیں چاہتیں۔

آمی بھی اب مایوسی کا شکار ہیں اور اس کام کو جاری رکھنا نہیں چاہتیں۔

&#39;&#39;میری والدہ، نانی، دادی اور ان کی پشتیں اسی ہنر سے وابستہ تھیں۔ اب لوگ ہمارا کام دیکھتے، اس کی تصویریں بناتے اور بڑی بڑی باتیں کرتے ہیں لیکن فراسی کوئی نہیں خریدتا جبکہ باتوں سے پیٹ کی آگ نہیں بجھتی۔&#39;&#39;

عبدالحمید اخوند نے بتایا کہ ان کے ادارے کا کام قدیم اور زوال پذیر دستکاری کو بچانا ہے جس کے لیے انہوں نے مختلف اضلاع میں ڈسپلے سنٹر بنائے ہیں اور ہنرمندوں کو دستکاری کا سامان بھی فراہم کیا جاتا ہے۔

ان کا کہنا ہے کہ سٹکو نے نمائشوں میں فراسی کی ہنرمندوں کو ہمیشہ مدعو کیا ہے اور ان کے کام کی نمائش بھی کی ہے۔ تاہم دستکاری کی مارکیٹنگ سٹکو کا نہیں بلکہ سندھ سمال انڈسٹریز ڈیپارٹمنٹ کا کام ہے۔ اگر حکومت اس قدیم ہنر کو بچانے اور فراسی کی عالمی مارکیٹ میں فروخت کے لیے اقدامات کرے تو فراسی کی کاریگروں کو تنگ دستی اور مایوسی کا سامنا نہیں کرنا پڑے گا۔

گوادر کی دوچ گر خواتین: 'کبھی کبھی نیند میں خیال آتا ہے کہ انگلی میں سوئی چبھ گئی ہے اور اس میں سے خون نکل رہا ہے'۔

لوگ 'فراسی'کی تصویریں تو بناتے ہیں مگر خریدتا کوئی نہیں: سندھ کا دم توڑتا قدیم ثقافتی ہنر

عمر ملاح بدین کی تحصیل گولاڑچی کے ایک اجڑے گاؤں امن ملاح میں رہتے ہیں۔ آج سے تیس سال پہلے یہ ایک بھرا پُرا علاقہ تھا جہاں مچھیروں کے تین سو سے زیادہ خاندان آباد تھے۔ یہ لوگ اپنی کشتیوں میں قریبی نریڑی جھیل میں ماہی گیری کرتے اور خوشحال زندگی گزارتے تھے لیکن اب اس گاؤں میں ویرانی کا راج ہے۔ بیشتر لوگ یہ جگہ چھوڑ کر جا چکے ہیں اور جو باقی ہیں وہ بقا کی جدوجہد میں لگے ہیں۔

اس گاؤں کی آبادی اور خوشحالی نریڑی جھیل سے وابستہ تھی جو اب پہلی حالت میں باقی نہیں رہی۔ یہ جھیل تازہ پانی سے محروم ہو گئی ہے، فیکٹریوں کے آلودہ پانی نے اس میں آبی حیات کا خاتمہ کر دیا ہے اور رہی سہی کسر سمندر نے پوری کر دی ہے جو تیزی سے اسے نگلتا جا رہا ہے۔

اب امن ملاح میں چند ہی گھرانے مقیم ہیں جن میں عمر ملاح کا خاندان بھی شامل ہے۔ چونکہ اب انہیں مچھلی نہیں ملتی اس لیے وہ جھیل کے آس پاس دیوی (ببول) کے جنگلات کی لکڑی اور اس سے کوئلہ بنا کر بیچتے ہیں۔

سندھ کی ساحلی پٹی پر معدوم ہوتی 80 سے زیادہ جھیلوں کے کنارے رہنے والے سینکڑوں ملاح خاندانوں کی یہی کہانی ہے جن کے خواب ان جھیلوں کے ساتھ مرتے جا رہے ہیں۔

بدین سجاول اور ٹھٹہ کی ساحلی پٹی میں تازہ پانی کی 80 سے زیادہ جھیلیں ہوا کرتی تھیں جن میں نریڑی، جھبو، شکور، سائینری، اچھ، کنڈڑی، چورھڈی، کھنبھرو، وایارو، ھڈا ، داسڑا، بہن، سانڈو، بکرانڈی، شیخانی، لوہن، کڈھ، دان، پٹیجی اور میانو جھیل اپنی خوبصورتی اور معاشی افادیت کے باعث بہت مشہور رہی ہیں۔

1999 میں آنے والے سمندری طوفان کے نتیجے میں سمندر کو خشکی کی طرف بڑھنے کا راستہ مل گیا اور دیکھتے ہی دیکھتے اس نے ذرخیز زمین کے ساتھ ساحلی پٹی کی متعدد قدیم جھیلوں کو بھی نگل لیا۔ تباہی کا یہ سلسلہ آج بھی جاری ہے اور اب یہ جھیلیں کھارے پانی کے سمندری ڈھورے بن کے رہ گئیں ہیں۔

تیزی سے معدوم ہوتی ان جھیلوں میں نریڑی اور جھبو بھی شامل ہیں اور یہ دونوں رامسر سائٹس (عالمی اہمیت کے حامل آبی مقامات) میں شمار ہوتی تھیں۔ نریڑی جھیل بدین کی تحصیل گولاڑچی اور ساحلی پٹی میں 12 ہزار ایکڑ پر پھیلی ہوتی تھی۔ لیکن کئی سال سے میٹھا پانی میسر نہ ہونے، چینی بنانے کی فیکٹریوں سے نکلنے والے کیمیائی مادوں اور بحیرہ عرب کے کھارے پانی نے اسے ایک سمندری کھاڑی میں تبدیل کر دیا ہے۔

اس سے کچھ دور گولاڑچی اور ضلع سجاول کے تحصیل جاتی کی ساحلی حدود میں ایک ہزار 745 ایکڑ پر پھیلی جھبو جھیل بھی میٹھے پانی کی کمی اور سمندری چڑھاؤ کی لپیٹ میں آ کر تباہ ہو گئی ہے۔ ماضی کی اس حسین کے آثار چند ہی ایکڑ پر باقی ہیں اور یہ بھی سمندر کی نذر ہونے والے ہیں۔

چند دہائیاں پہلے ان جھیلوں کے دامن ڈیڑھ سو سے زیادہ اقسام کے جانوروں اور پودوں کا مسکن تھے جن آبی پرندے، مچھلیاں، آبی پھل اور گھاس خاص طور پر قابل ذکر ہیں۔ ان جھیلوں میں ڈنبھرو، تھیرو، پوپری، کرڑو، رڑو، فوجی رڑو، منڈھو، کھگھو، تھیری، گراس، دیو، لوہڑ، بوہن، جرکو، موراکھی، گندن، وکھر، ڈاہی، گانیر اور دیگر اقسام کی مچھلیاں ملتی تھیں۔

ان جھیلوں سے نڑ، ٹوپ، کل، ڈیر، پن، سینر، ناڑو، کنول، لوڑھ، قم اور پابوڑو جیسے آبی پھل اور گھاس حاصل کی جاتی تھی۔

سرد موسم میں کونج، چیکھلو، ہنجھ، لاکھے جاجی، تور، نیرگی، تھورانڈو، ڈگوش، بوھاڑ، گہنو، رتونبو، بڈنو، چیہ، آڑی، پین، گوریو، سان، جاہو، چٹوڑو، کہنگ، کیناٹھی، گوھایو، گایو، کانیرو ، ڈیڈوڑو، اور دیگر اقسام کے لاکھوں پرندے وسط ایشیا سے ہجرت کر کے ان جھیلوں پر آتے تھے۔

بدین، ٹھٹہ اور سجاول کی ساحلی پٹی کے 4 ہزار دیہات کی تقریباً آٹھ لاکھ آبادی کی معاشی و سماجی زندگی کسی نہ کسی طرح ان جھیلوں سے منسلک تھی۔ یہاں رہنے والے مچھیرے انہی جھیلوں سے مچھلیاں پکڑ کر گزر بسر کرتے تھے۔ یہی نہیں بلکہ جھیلوں پر آنے والے غیر ملکی پرندے بھی ان کی روزی روٹی کا ذریعہ تھے جنہیں بیچ کر انہیں اس قدر رقم مل جاتی تھی کہ اس سے وہ اپنے بچوں کی شادیاں بھی کیا کرتے تھے۔

زیرو پوائنٹ کے خمیسو ملاح کا کہنا ہے کہ میٹھے پانی کی کمی سے جھیلیں برباد ہو گئی ہیں۔ یہاں کے لوگ اور باہر سے آنے والے سیاح پرندوں کا گوشت بہت پسند کرتے ہیں، خصوصاً بڑی دعوتوں میں&nbsp; پرندوں کا گوشت پکایا جاتا تھا جو ہم انہیں انہی جھیلوں سے پکڑ کر مہیا کرتے تھے۔ اب ہماری روزی کا یہ ذریعہ بند ہو گیا ہے کیونکہ جھیلیں ختم ہونے کے باعث سرد ممالک سے آنے والے لاکھوں مسافر پرندوں کی پناہ گاہیں بھی ختم ہو گئی ہیں۔

جھیلوں کے کنارے وسیع رقبے پر پھیلی گھاس ساحلی پٹی پر رہنے والے لوگوں کے مویشیوں کی خوراک تھی۔ دیہات اور ماہی گیروں کی بستیوں میں رہنے والی خواتین ان جھیلوں کے کنارے مخصوص جھاڑیوں سے عام استعمال کی مختلف چیزیں بنا کر فروخت کیا کرتی تھیں جبکہ مقامی بچے جھیلوں کے اندر اگنے والے آبی پھل بور، پونی، لوڑھ، قم اور پابوڑو کو بازاروں میں بیچ کر جیب خرچ حاصل کرتے تھے۔

سيرانی کے قریبی بھگڑا میمن گاؤں کی فاطمہ ملاح نے بتایا کہ برسوں پہلے ہم جھیل کی پن (آبی جھاڑی جس کے پتوں اور ٹہنیوں سے مختلف چیزیں بنائی جاتی ہیں) سے تڈے اور تئوریاں (چٹائیاں) بناکر بیچتے تھے&nbsp; اور اس کی آمدنی سے ہمارا اچھا گزارا ہو جاتا تھا۔ لیکن جب سے&nbsp; جھیلیں خشک ہونا شروع ہوئی ہیں تو پن بھی اگنا بند ہو گئے ہیں۔

&#39;&#39;اب ہمارے مرد شہروں میں جاکر مزدوری کرتے ہیں جو کبھی مل جاتی ہے اور کبھی وہ خالی ہاتھ واپس آتے ہیں۔ پہلے بھی ہم زیادہ خوشحال نہیں تھے لیکن جھیلیں ہماری بنیادی ضرورتیں پورا کر دیتی تھیں۔ اب ایسا بھی ہوتا ہے کہ ہمیں خالی پیٹ سونا پڑتا ہے۔&#39;&#39;

رضا آکاش

شوگر ملوں سے بہتا زہریلا فضلہ جنوبی سندھ کو ویران کر دے گا

لوگ 'فراسی'کی تصویریں تو بناتے ہیں مگر خریدتا کوئی نہیں: سندھ کا دم توڑتا قدیم ثقافتی ہنر

سندھ کی معدوم ہوتی جھیلیں:'اب ایسا بھی ہوتا ہے کہ ہمیں خالی پیٹ سونا پڑتا ہے'

Lok Sujag