تریسٹھ سالہ محمد رب نواز خان دل کے مریض ہیں جو کوٹ ادو سے ملتان کے چوہدری پرویز الہٰی انسٹیٹیوٹ آف کارڈیالوجی میں چیک اپ کرانے کے لیے آئے ہیں۔ 2009 میں انہیں پہلی مرتبہ دل کا دورہ پڑا تو ان کا اسی ہسپتال میں علاج کیا گیا تھا۔

&nbsp;2017 میں دوسرا دورہ پڑنے پر انہیں ہسپتال لایا گیا تو ڈاکٹروں نے ان کے دل کی نالیوں میں سٹنٹ ڈال دیے اور مستقل دوائیں تجویز کیں۔ چیک اپ کرانے اور مفت دوائیں لینے کے لیے انہیں ہر ماہ تقریباً ڈیڑھ گھنٹے سفر کر کے کوٹ ادو سے ملتان آنا پڑتا ہے۔ چونکہ ہسپتال میں روزانہ ہزاروں مریض آتے ہیں اس لیے رب نواز عموماً اپنی باری کے لیے گھنٹوں انتظار کرتے ہیں جو ان کے لیے آسان نہیں لیکن ان کے پاس کوئی اور چارہ نہیں ہوتا۔

ان کا کہنا ہے کہ اس ہسپتال بہت بڑی تعداد میں مریضوں کو سنبھالنے کی گنجائش نہیں ہے۔ اگر اس جیسا کوئی اور ہسپتال بنا دیا جائے یا اسی ہسپتال میں گنجائش بڑھا دی جائے تو انہیں اور ان جیسے دیگر مریضوں کو چیک اپ اور دوائیں لینے کے لیے طویل انتظار نہیں کرنا پڑے گا۔

ڈیرہ اسماعیل خان کے تینتالیس سالہ ملک داد بھی دل کے علاج کے لیے اسی ہسپتال میں آئے ہیں۔ ڈاکٹروں نے انہیں بھی دوائیں تجویز کرنے کے بعد ایک ماہ بعد دوبارہ چیک اپ کرانے کو کہا ہے۔ وہ بتاتے ہیں کہ جب انہیں دل کی تکلیف ہوئی تو پہلے انہوں نے ڈیرہ اسماعیل خان کے ڈسٹرکٹ ہسپتال میں معائنہ کروایا تھا جہاں ڈاکٹروں نے انہیں چوہدری پرویز الہٰی انسٹیٹیوٹ آف کارڈیالوجی میں جانے کو کہا۔

چونکہ ڈاکٹروں نے انہیں ہنگامی طور پر معائنہ کرانے کی ہدایت کی تھی اس لیے وہ ایمرجنسی وارڈ میں گئے جہاں مریضوں کا اس قدر رش تھا کہ انہیں باری کے لیے کئی گھنٹے انتظار کرنا پڑا۔ باری آنے پر ان کی دو مرتبہ ای سی جی کی گئی جس کے بعد ڈاکٹروں نے انہیں ادویات تجویز کر کے ایک ماہ بعد دوبارہ بلایا۔ مریضوں کا رش ہونے کے باعث انہیں ادویات لینے کے لیے بھی انہیں طویل انتظار کرنا پڑا۔

مہینہ پورا ہونے کے بعد وہ دوبارہ اس ہسپتال میں موجودہ ہیں اور چیک اپ کے لیے اپنی باری کا انتظار کر رہے ہیں۔ ان کا کہنا ہے کہ اگر حکومت ان کے اپنے شہر میں بھی ایسا ہی ہسپتال بنا دے تو وہ بیماری کی حالت میں طویل انتظار کی زحمت سے بچ سکتے ہیں۔

چوہدری پرویز الہٰی انسٹیٹیوٹ آف کارڈیالوجی اس وقت 279 بستروں کا ہسپتال ہے جس نے 2005 میں کام شروع کیا تھا جس میں پہلی اوپن ہارٹ سرجری 29 اکتوبر 2007 کو کی گئی تھی۔ ہسپتال کے میڈیکل سپرنٹنڈنٹ ڈاکٹر محمد اقبال کا کہنا ہے کہ اس ہسپتال تک آسان رسائی کی وجہ سے جنوبی پنجاب کے علاوہ بالائی سندھ، بلوچستان حتیٰ کہ خیبرپختونخوا سے بھی بہت سے مریض دل کی بیماریوں کے علاج کے لیے آتے ہیں۔

&#39;&#39;2022 میں پانچ لاکھ 17 ہزار 562 مریض اس ہسپتال کی ایمرجنسی اور آؤٹ ڈور میں علاج معالجے کے لیے آئے۔ روزانہ یہاں آنے والے مریضوں کی تعداد تقریباً 1800 ہے جنہیں مفت ادویات بھی فراہم کی جاتی ہیں۔&#39;&#39;

2014 میں مسلم لیگ (ن) کی صوبائی حکومت نے اس ہسپتال کو توسیع دینے کا فیصلہ کیا تھا۔ یکم جنوری 2015 کو اس وقت کے وزیر اعلیٰ پنجاب شہباز شریف نے منصوبے کا پی سی ون منظور کیا اور 23 جولائی 2015 کو اس پر کام کا باقاعدہ آغاز ہو گیا۔ ہسپتال کی توسیعی عمارت تعمیر کرنے پر ایک ارب 20 کروڑ روپے خرچ ہونا تھا جبکہ مشینری اور دیگر اخراجات کے لیے دو ارب 50 کروڑ رکھے گئے تھے۔ تاہم اس منصوبے کو بروقت مکمل نہیں کیا جا سکا۔

منصوبہ تاخیر کا شکار ہونے کے بعد اب اس کی عمارت کے اخراجات ایک ارب 80 کروڑ ہو گئے ہیں جبکہ دیگر اخراجات بھی بڑھ کر تین ارب 29 کروڑ تک جا پہنچے ہیں۔

منصوبے میں تاخیر کی بابت استفسار پر محکمہ صحت جنوبی پنجاب کے ترجمان اسد اللہ نے بتایا کہ اس منصوبے کا ٹھیکہ مسلم لیگ (ن) سے تعلق رکھنے والے سابق مئیر اسلام آباد شیخ انصر عزیز کی کمپنی انصر اینڈ برادرز کو دیا گیا تھا۔ اس کمپنی نے سست روی سے کام کیا اور لاگت بڑھنے پر حکومت سے مزید رقم کا مطالبہ کیا تاہم تحریک انصاف کی گزشتہ حکومت نے کمپنی کو بلیک لسٹ کر کے اس سے کام واپس لے لیا اور اب اس مںصوبے کے لیے نئے سرے سے ٹینڈر جاری کیے جائیں گے۔

ہسپتال کے توسیعی منصوبے میں تاخیر کے بارے میں جب کمشنر ملتان عامر خٹک سے پوچھا گیا تو ان کا کہنا تھا کہ ہسپتال کی عمارت کا تعمیری کام 30 جون 2023 تک مکمل ہو گا جس کے بعد اسے مریضوں کے لیے کھول دیا جائے گا۔ انہوں نے یہ بھی بتایا کہ صوبائی حکومت کے سالانہ ترقیاتی پروگرام کے تحت رواں مالی سال کے بجٹ میں اس کے لیے رقم بھی مختص کر دی گئی ہے۔

&#39;&#39; توسیعی منصوبہ مکمل ہونے کے بعد ہسپتال میں بستروں کی تعداد 487 ہو جائے گی۔ یہاں تین سو سے زیادہ ڈاکٹر اور پیرا میڈیکل عملے کے پانچ سو سے زیادہ نئے اہلکار بھی بھرتی کیے جائیں جس کے بعد یہ ملتان میں دل کے مریضوں کا علاج کرنے والا سب سے بڑا ہسپتال بن جائے گا۔&#39;&#39;

پنجاب میں انسولین موجود ہونے کے باوجود ملتان کے سرکاری ہسپتالوں میں نایاب

سوال کرتی کئی آنکھیں منتظر ہیں یہاں: جنوبی پنجاب میں علاج کا انتظار کرتے دل کے مریض

text

نادیہ ملک کے ٹرانس جینڈر ہونے کی وجہ سے ان کے والدین کو شرمندگی محسوس ہوتی تھی اس لیے انہوں نے بیس سال کی عمر میں ماں باپ کا گھر چھوڑ کر اپنے جیسے لوگوں کے ساتھ رہنا شروع کر دیا تھا۔ اب وہ پڑھ لکھ رہی ہیں تو والدین نے ناصرف انہیں قبول کر لیا ہے بلکہ اس پر فخر بھی محسوس کرتے ہیں۔

ملتان سے تعلق رکھنے والی نادیہ کی عمر 32 سال ہے اور وہ اس شہر میں ٹرانس جینڈر افراد کے لیے مخصوص پاکستان کے پہلے سکول میں نوویں جماعت کی طالبہ ہیں۔ یہ مخصوص سکول گلگشت کے گورنمنٹ گرلز کمپری ہینسو ہائر سیکنڈری سکول میں دو سال پہلے قائم کیا گیا تھا۔ اب بہاولپور اور ڈیرہ غازی خان میں بھی ایسے سکول بن گئے ہیں۔

نادیہ ملتان کے علاقے طارق آباد میں ٹرانس جینڈر کمیونٹی کے ساتھ ہی رہتی ہیں لیکن ان کا اپنے والدین کے گھر بھی آنا جانا ہے۔ وہ سکول میں ڈیجیٹیل شعبے کی تعلیم میں مہارت حاصل کررہی ہیں۔ گزربسر کے لیے وہ دیگر ٹرانس جینڈر افراد کے ساتھ ڈانس پارٹیوں میں پرفارم کرتی ہیں لیکن اب ان کا اصل مقصد ٹیچر بننا اور اپنے جیسے لوگوں کو تعلیم سے آراستہ کرنا ہے۔

نادیہ ملک جس سکول میں پڑھتی ہیں اس کی پراجیکٹ مینیجر علیشہ شیرازی خود بھی ٹرانس جینڈر ہیں۔ وہ بہاءالدین زکریا یونیورسٹی ملتان کے شعبہ ایجوکیشن میں زیر تعلیم اور پاکستان میں تعیلم کے مضمون کی پہلی پی ایچ ڈی سکالر ہیں۔ انہیں پاکستان کے اس پہلے ٹرانس جینڈر سکول کی پہلی ٹیچر ہونے کا اعزاز بھی حاصل ہے۔

علیشہ شیرازی بتاتی ہیں کہ ابتدا میں ان کے سکول میں 18 ٹرانس جیںڈر زیرتعلیم تھے جن کی تعداد اب 36 ہو گئی ہے۔ ان کا یہ بھی کہنا ہے کہ اگر ٹرانس جینڈر کو انہی کی کمیونٹی کے اساتذہ پڑھائیں تو ان کے لیے تعلیم حاصل کرنا زیادہ آسان ہوتا ہے۔

اس سکول میں آٹھ اساتذہ تعینات ہیں جن میں چار ٹرانس جینڈر اور چار خواتین ہیں۔ بہاولپور میں قائم ایسے ہی سکول میں طلبہ کی تعداد 24ہے جہاں تین ٹرانس جینڈر اور تین خواتین اساتذہ پڑھاتی ہیں۔ ڈیرہ غازی خان کے ٹرانس جینڈر سکول میں 25 طلبہ پڑھتے ہیں جنہیں چار خواتین اساتذہ تعلیم دیتی ہیں۔

ان سکولوں کے اوقات تین سے پانچ بجے تک ہیں جہاں پرائمری ، مڈل، میٹرک اور ہائیر سیکنڈری کی کلاسیں ہوتی ہیں اور پنجاب ٹیکسٹ بک بورڈ کا نصاب پڑھایا جارہا ہے۔

جب کوئی ٹرانس جینڈر ان سکولوں میں داخلہ لینے آتا ہے تواس سے شناختی کارڈ یا ب فارم وصول کیا جاتا ہے۔ اس کے والدین کا نام اور پتہ درج کیا جاتا ہے۔ اگر اس نے پہلے کہیں تعلیم حاصل کی ہو تو وہاں کارزلٹ کارڈ مانگا جاتا ہے اور اس کے بعد ٹیسٹ لے کر داخلہ دے دیا جاتا ہے۔

بیس سالہ نشا خان ملتان کے ٹرانس جینڈر سکول میں زیر تعلیم ہیں۔ ان کے والدین کا گھر ملتان کے علاقے کینٹ ولاز میں ہے اور وہ پچھلے چار سال سے سبزہ زار ٹاﺅن اپنی کمیونٹی کے ساتھ رہتی ہیں۔

نشا خان اس سے پہلے کبھی سکول نہیں گئی تھیں۔ وہ بیوٹیشن کی تربیت بھی حاصل کر رہی ہیں اور مستقبل میں ڈاکٹر بننا چاہتی ہیں۔ ان کا کہنا ہے کہ ٹرانس جینڈر اساتذہ کی وجہ سے انہیں پڑھائی میں آسانی ہوتی ہے۔

جنوبی پنجاب کے سیکرٹری تعلیم قیصر سلیم نے سجاگ کوبتایا کہ ٹرانس جینڈرز کے مخصوص سکولوں میں اب تعلیم کے ساتھ فنی تربیت بھی دی جارہی ہے۔

&quot;اس مہینے ملتان کے ٹرانس جینڈر سکول میں اقوام متحدہ کے ذیلی ادارے یونیسکو کی معاونت سے ووکیشنل لیب کا افتتاح کردیاگیا ہے جہاں طلبہ کو ٹیلرنگ، انڈسٹریل ٹیلرنگ، بیوٹی پارلر چلانے، مارکیٹنگ اور دیگر ہنر سکھائے جائیں گے۔&#39;&#39;

&nbsp;انہوں نے یہ بھی بتایا کہ ٹرانس جینڈر سکول سے تعلیم حاصل کرنے والی طالبات&nbsp; کی بڑی تعداد نے نویں، دسویں ،گیارہویں اور بارہویں کے بورڈ امتحانات میں شرکت کی اور نمایاں پوزیشنیں حاصل کی ہیں۔

جنوبی پنجاب کے ڈپٹی سیکرٹری تعلیم خواجہ مظہر الحق ٹرانس جینڈر سکول منصوبے کے نگران ہیں۔ انہوں نے بتایا کہ تینوں اضلاع میں ٹرانس جینڈر کے یہ سکول پائلٹ پراجیکٹ کے تحت کھولے گئے ہیں جہاں ناخواندہ طلبہ کو پرائمری میں داخلہ دیا جاتا ہے۔ابتدا میں انہیں لرننگ کلاسوں میں رکھا جاتا ہے اور دو تین ماہ بعد اگلی کلاس میں بھیج دیا جاتا ہے۔ اس طرح یہ طلبہ ایک سال میں پرائمری کی تعلیم مکمل کر لیتے ہیں۔

انہوں نے بتایا کہ جو طلبہ ان سکولوں میں آنے سے پہلے بھی کہیں زیرتعلیم رہے ہوں اور انہوں نے کسی وجہ سے تعلیم چھوڑ دی ہو انہیں مڈل کلاس میں داخلہ دیا جاتا ہے۔ اس کے بعد وہ نویں، دسویں، گیارہویں اور بارہویں جماعت کے بورڈ کے امتحان دیتے ہیں۔

مظہرالحق کا کہنا ہے کہ ٹرانس جینڈر سکولوں کا کوئی علیحدہ بجٹ نہیں ہوتا اور اس وقت چلائے جانے والے تینوں سکول سرکاری سکولوں کی عمارتوں میں ہی قائم ہیں اورانہیں پڑھانے والے اساتذہ بھی محکمہ تعلیم کے ملازم ہیں۔ تاہم آئندہ تعلیمی بجٹ میں اس منصوبے کے لیے باقاعدہ رقم مختص کی جائے گی۔

وفاقی ادارہ شماریات کے مطابق پنجاب میں ٹرانسجینڈر افراد کی تعداد 12 ہزار 435 ہے جبکہ ضلع ملتان میں یہ کمیونٹی 563 افراد پرمشتمل ہے۔ تاہم ان لوگوں کی اصل تعداد اس سے کہیں زیادہ ہو سکتی ہیں کیونکہ بہت سی وجوہات کی بنا پر مردم شماری میں ٹرانس جینڈر افراد کی درست تعداد ریکارڈ نہیں ہوتی۔

ٹرانس جینڈر پروٹیکشن ایکٹ  کے خلاف عدالتی درخواستیں: 'ناقدین اس قانون سے واقف ہی نہیں'۔

'ہم پر شرمندہ ہونے والے والدین اب ہمیں فخر سے قبول کرتے ہیں'

خانیوال کے محمد اظہر آج کل بہت پریشان ہیں۔ انہوں نے 12 ایکڑ پر گندم کاشت کر رکھی ہے اور انہیں کھاد نہیں مل رہی۔ ڈیلر ہڑتال پر چلے گئے ہیں جس کی وجہ سے بازار میں کھاد مہنگی ہو گئی ہے۔ یوریا کھاد کی 50 کلو کی بوری سرکاری نرخ پر&nbsp; 2,440روپے میں ملتی ہے لیکن ان دنوں مارکیٹ میں اس کی قیمت 3,700 تک جا پہنچی ہے۔

انہیں ایک ایکڑ زمین کے لیے یوریا کی دو اور ڈی اے پی کھاد کی ایک بوری چاہیے ہوتی ہے۔ وہ کہتے ہیں کہ مہنگے داموں ہی سہی، ڈی اے پی انہیں کہیں نہ کہیں سے مل جائے گی لیکن یوریا اس وقت تقریباً نایاب ہو چکی ہے۔

تحصیل جہانیاں کے چک 148 دس آر سے تعلق رکھنے والے محمد اظہر کے لیے یہ صورت حال نئی نہیں ہے۔ پچھلے دو برس سے وہ یہی دیکھتے آ رہے ہیں کہ جب گندم کی فصل کو کھاد کی ضرورت ہوتی ہے تو کھاد کسی نہ کسی وجہ سے مارکیٹ سے غائب ہو جاتی ہے۔

اظہر کی طرح لودھراں کے علاقے گیلے وال سے تعلق رکھنے والے محمد مصطفیٰ بھی کھاد کی تلاش میں مارے مارے پھر رہے ہیں۔ وہ دو ایکڑ زرعی زمین کے مالک ہیں اور انہوں نے مزید دو ایکڑ اراضی ایک سال کی مستاجری پر لے رکھی ہے۔

مستاجری زرعی رقبے کے ٹھیکے کو کہتے ہیں جس کے تحت زمین کا مالک خود کاشتکاری کرنے کے بجائے کسی اورشخص کو ٹھیکہ دے کر اس سے یکمشت رقم وصول کرلیتا ہے۔

یہ ٹھیکہ زیادہ تر دوفصلوں ربیع اورخریف کے لیے ہوتا ہے۔ مصطفی نے اپنی چار ایکڑ زمین پر گندم کاشت کر رکھی ہے۔ دو مرتبہ انہیں یوریا کھاد بلیک میں خریدنا پڑی تھی۔ اب انہیں ایک مرتبہ پھر اس کی ضرورت ہے تو کھاد کے ڈیلروں نے ہڑتال کر رکھی ہے۔ مصطفیٰ کہتے ہیں کہ اگر کھاد نہ ملی تو ان کی فصل کو ناقابل تلافی نقصان پہنچے گا۔

سرکاری اعداد و شمار کے مطابق ضلع خانیوال میں رواں سال چار لاکھ 80 ہزار ایکڑ رقبے پر گندم کاشت ہوئی ہے جو پچھلے سال کی نسبت 51 ہزار ایکڑ کم ہے۔ ضلع لودھراں میں بھی زیر کاشت رقبے میں کمی آئی ہے اور اس بار پچھلے سال کے مقابلے میں زیر کاشت رقبہ 23 ہزار ایکڑ کم ہوکر تین لاکھ 84 ہزار ایکڑ رہ گیا ہے۔

کسانوں کی رائے میں اس کمی میں پچھلے دو سال کے دوران کھاد کی مصنوعی قلت کا بھی کہیں نہ کہیں ہاتھ ضرور ہے۔

خانیوال میں کھاد ڈیلرز ایسوسی ایشن کے سینئر نائب صدر احمد رضا قادری سے جب ہڑتال اور اس کے نتیجے میں کھاد کی قلت کے بارے میں پوچھا گیا تو جواب میں انہوں نے اپنے چار مطالبات کا تذکرہ کیا۔

ان کا کہنا تھاکہ ہمارا پہلا مطالبہ یہ ہے کہ حکومت ہمیں کھاد کی فوری فراہمی یقینی بنائے۔

&quot;ہم جب بکنگ کراتے ہیں تو کھاد ہمیں ڈیڑھ سے دوماہ بعد وصول ہوتی ہے۔ نتیجتاً ہم مزید سرمایہ کاری نہیں کر سکتے۔ جو ڈیلر مہینے کے 15 ٹرک فروخت کرسکتا ہے وہ موجودہ صورت حال میں دو سے تین ٹرک ہی بیچ سکتا ہے&quot;۔

ان کا کہنا تھا کہ &#39;&#39;ہمارا دورسرا مطالبہ یہ ہے کہ کھاد بنانے والی کمپنیاں یوریا کھاد کی فراہمی کا ٹائی اپ کوٹہ ختم کریں۔ اس کی وضاحت کرتے ہوئے انہوں نے بتایا ٹائی اپ کوٹے کے تحت ایک ڈی اے پی بیگ کے ساتھ یوریا کا ایک بیگ بھی فروخت کرنا پڑتا ہے۔ اسی طرح ایک نائٹروفاس کے ساتھ بھی یوریا کی ایک بوری بیچنے کے لیے ملتی ہے۔

&quot;اس موسم میں نائٹروفاس اور ڈی اے پی کی تو ضرورت ہی نہیں اس لیے انہیں فروخت کرنا مشکل ہوجاتا ہے۔ ڈیلروں کو کھاد کی یہ بوریاں تین سے چارماہ یا اس سے بھی زیادہ عرصے کے لیے سٹاک کرنا پڑتی ہیں یا وہ انہیں ایک یا دو ہزار روپے کے نقصان میں بیچتے ہیں۔ ڈی اے پی کے ایک ٹرک کی قیمت تقریباً ایک کروڑ 25 لاکھ روپے ہے۔ اور ہر ڈیلر اس قابل نہیں ہوتا کہ وہ بڑی تعداد میں ڈی اے پی کی بوریاں ذخیرہ کر سکے۔&#39;&#39;

اپنا تیسرا مطالبہ بتاتے ہوئے انہوں نے کہا کہ انتظامیہ کھاد ڈیلروں کی دکانوں پر بلا وجہ چھاپے مارنے، ان کے گودام سیل کرنے اور ان کے خلاف مقدمے بنانا بند کرے۔

احمد رضا نے چوتھا مطالبہ یہ بتایا کہ ڈیلروں کو فوجی فرٹیلائزر کمپنی کی جانب سے دیے جانے والے کمیشن کو 3.85 فیصد سے بڑھا کر 10 فیصدکیا جائے یا بکنگ کروانے کے بعد تین سے چار روز میں کھاد فراہم کی جائے۔ موجودہ صورتحال بتاتے ہوئے ان کا کہنا تھا کہ اس وقت کھاد کو کمپنی سے ڈیلر تک پہنچنے میں ڈیڑھ سے دو ماہ لگ جاتے ہیں۔

لیکن ملتان کی بستی چدھڑ کے مہر غلام رسول سہو ڈیلروں کے مطالبات کو جائز نہیں سمجھتے۔ غلام رسول کو 2020ء میہں مثالی کاشتکار کا اعزاز حاصل ہوا تھا۔ انہوں ںے 100 ایکڑ رقبے پر گندم، چارا اور مکئی کاشت کر رکھی ہے۔ وہ الزام عائد کرتے ہیں کہ محکمہ زراعت کے اہلکار ڈیلروں کے ساتھ ملے ہوئے ہیں۔

&#39;&#39;حکومت کو چاہیے کہ کھاد ڈیلروں کو دینے کے بجائے کسانوں کو خود فروخت کرے۔&#39;&#39;

احمد رضا قادری اس الزام کو رد کرتے ہوئے کہتے ہیں کہ ڈیلروں اور محکمے کے اہلکاروں کی ملی بھگت کا تاثر درست نہیں کیونکہ وہ خود محکمہ زراعت کے آئے روز چھاپوں سے تنگ ہیں۔

کسان اتحاد کے مرکزی صدر چوہدری عمیر بھی کھاد ڈیلروں کو موجودہ صورتحال کا ذمہ دار قرار دیتے ہیں۔ ان کا کہنا ہے کہ کسانوں کو&nbsp; گزشتہ دو سال سے یوریا کھاد کی بلیک مارکیٹنگ کا سامنا ہے۔ ڈیلر ٹائی اپ کوٹے کے حوالے سے غلط بیانی کر رہے ہیں کیونکہ 80 فیصد ڈی اے پی امپورٹ ہوتی ہے جبکہ یوریا مقامی طور پر تیار کی جاتی ہے۔

انہوں نے مزید کہا کہ اس وقت چارے، گندم اور مکئی کی فصل کو صرف یوریا کھاد کی ضرورت ہے۔ ایسے میں کسان ڈی اے پی لے کر کیا کرے گا؟ ڈی اے پی کا استعمال کاشت کے وقت ہوتا ہے جبکہ یوریا فصل کی بڑھوتری کے وقت استعمال کی جاتی ہے۔ اگر محکمہ زراعت اور کھاد ڈیلر کسانوں کو بروقت یوریا کھاد کی فراہمی نہیں کرتے تو وزیراعلیٰ ہاؤس کے سامنے احتجاجی دھرنا دیا جائے گا۔

<h2>&quot;یوریا کی کوئی قلت نہیں&quot;</h2>

دوسری جانب جنوبی پنجاب کے سیکرٹری زراعت ثاقب علی عطیل کا دعویٰ ہے کہ ان کے ریجن میں مقامی سطح پر تیارکردہ یوریا کے تین لاکھ 18ہزار اور امپورٹڈ یوریا کے 72 ہزار سے زیادہ تھیلے مارکیٹ میں موجود ہیں۔

&quot; اس وقت طلب اور رسد کا بھی کوئی مسئلہ نہیں۔اوور چارجنگ اور ذخیرہ اندوزی کرنے والے ڈیلروں کے خلاف سخت کارروائیاں جاری ہیں&quot;۔

ڈپٹی ڈائریکٹر زرعی اطلاعات پنجاب نوید عصمت کاہلوں نے سجاگ کو بتایا کہ کھاد ڈیلروں کا احتجاج بلا جواز ہے۔ جہاں تک ان کی جانب سے چھاپوں کی شکایت کا تعلق ہے تو اس کی وجہ یہ ہےکہ ڈیلر کھاد بلیک میں فروخت کرتے ہیں جس کی روک تھام انتظامیہ کا فرض ہے۔

کھاد سے متعلق وفاقی ادارے نیشنل فرٹیلائزر ڈویلپمنٹ سینٹر کی ایک رپورٹ کے مطابق ملک میں ربیع سیزن کا آغاز 294 میٹرک ٹن یوریا کی موجودگی کے ساتھ ہوا ہے۔ اس دوران ملکی فیکٹریوں میں دو ہزار 971&nbsp; ہزار ٹن پیداوار متوقع ہے جبکہ 296 ہزار ٹن امپورٹڈ یوریا ملک میں موجود ہے۔

ربیع سیزن میں ملک کو تین ہزار 265 ہزار ٹن یوریا کی ضرورت ہوگی جبکہ اس وقت تین ہزار 562 ہزار ٹن یوریا ذخیرہ ہو گا جو ضرورت سے 311 ہزار ٹن زیادہ ہے۔

یوریا کھاد کی قلت: 'نجانے بڑے پیٹ والے اسے ہڑپ کر گئے ہیں یا کوئی اور'۔

کھاد ڈیلر یا محکمہ زراعت: یوریا کھاد کی قلت کا ذمہ دار کون ہے؟

محمد ساجد کا رشتہ طے ہوا تو لڑکی والوں نے شادی سے پہلے ایک مکان لڑکی کے نام&nbsp; کرنے کی شرط رکھی۔

ساجد نے شرط پوری کرنے کے لیے نجی ہاؤسنگ سکیم میں قسطوں پر پانچ مرلے کا پلاٹ خرید کر اس پر گھر بنا دیا اور مزدوری کرنے دبئی چلے گئے اور وہاں سے قسطیں بھیجتے رہے۔

واپس آئے تو مکان پر کوئی اور قابض تھا۔

محمد ساجد 32 سال کے ہوچکے ہیں اور ان کی شادی رکی ہوئی ہے۔

ساجد ملتان کے علاقے سیتل ماڑی کے رہائشی اور پیشے کے لحاظ سے رنگساز ہیں۔

انہوں نے مارچ 2021ء میں ملتان کی نجی ہاؤسنگ سکیم ارحم ٹاؤن میں پانچ مرلے کا پلاٹ قسطوں پر خریدا تھا اس وقت پلاٹ کی قیمت ساڑے چار لاکھ روپے تھی۔انہوں نے 20 ہزار روپے بطور ایڈاونس ادا کیے تھے۔

&quot;میری کالونی کے مالک رانا مصطفی سے تین سال کی 36 قسطیں طے ہوئی تھیں۔ میں دو سال تک 11 ہزار 900 روپے ماہانہ قسط ادا کرتا رہا۔ دبئی سے واپسی معلوم ہوا کہ کالونی کے مالک نے مکان کے تالے توڑ کر پلاٹ کسی اور کو بیچ دیا ہے&quot;۔

ایک پلاٹ کئی کئی بار بیچنے کی وارداتیں صرف &quot;غیر حاضر&quot; خریداروں تک محدود نہیں۔

بابا منشا نے ساری زندگی کرائے کے مکان میں گزار دی آخر دو سال قبل انہیں اپنے مکان کو گھر میں بدلنے کا موقع دکھائی دیا تو انہوں نے اپنی جمع پونجی سے ارحم ٹاؤن میں قسطوں پر پلاٹ خرید لیا۔

بابا منشا اب 68 برس کے ہیں۔انہوں نے 90 ہزار روپے مرلہ کے حساب سے&nbsp; پانچ مرلے کا پلاٹ خریدا تھا جس کی رقم&nbsp; چار لاکھ 50 ہزار روپے بنتی ہے۔تین سال کی اقساط طے ہوئیں۔ بابا منشا باقائدگی سے 12 ہزار روپے ماہانہ اقساط ادا کرتے رہے۔ 
لیکن جب ان کی قسطیں مکمل ہوگئیں تو پلاٹ &quot;غائب&quot; ہو گیا۔

&quot;دو سال کالونی مالک قسطیں وصول کرتا رہا ہے لیکن جب رجسٹری&nbsp; کا موقع آیا تو وہ میرا پلاٹ کسی اور پارٹی کو بیچ کر فرار ہوگیا۔اب ہمارا فون تک نہیں اٹھاتا&quot;۔

مکان کو گھر سے بدلنے کا خواب دیھنے والے بابا منشا اکیلے نہیں۔

ملتان کی ایک اور نجی کالونی پی آئی اے ایمپلائز ہاؤسنگ سکیم میں مرزا ناصر بیگ نے 1996ء میں 12 ہزار روپے قسط کے حساب سے پانچ مرلے کا پلاٹ 60 ہزار روپے میں خریدا تھا۔

قسطیں مکمل ہونے کے بعد انہوں نے دیگر تمام واجبات ادا کر کے سوسائٹی کے صدر ابراہیم کھوسہ، جنرل سیکرٹری افتخار احمد سے الاٹمنٹ لیٹر اور قبضہ&nbsp; حاصل کرلیا۔ تاہم ہاؤسنگ سوسائٹی نے وہی پلاٹ دوسری پارٹی کو فروخت کردیا۔ 
&quot;پلاٹ کی ادائیگی میں نے کی لیکن اب وہاں تعمیرات کوئی اور کر رہا ہے&quot;۔

مرزا ناصر بیگ کے علاوہ احسن اسلم، سعید احمد، لئیق احمد اور سلطانہ جہانزیب کے ساتھ بھی اسی ہاؤسنگ سوسائٹی میں فراڈ ہوا ۔

متاثرین نے سوسائٹی کے خلاف&nbsp; کارروائی کے لیے&nbsp; تھانہ بہاء الدین زکریا میں درخواست دے&nbsp; رکھی ہے۔پولیس کہتی ہے کہ جلد کارروائی کی جائے گی۔

<h2>ملتان میں کتنی غیر قانونی ہاؤسنگ سکیمیں ہیں؟</h2>

ارحم ٹاؤن اور پی آئی اے ہاوسنگ سکیم غیر قانونی آبادیاں ہیں۔

ملتان ڈیویلپمنٹ اتھارٹی کی ڈائریکٹر اربن پلاننگ عنائزہ بتاتی ہیں کہ شہر میں قانونی اور باقاعدہ رجسٹرڈ ہاؤسنگ کالونیوں کی تعداد 57 ہے جبکہ غیر قانونی ہاؤسنگ کالونیوں کی تعداد 196 تک پہنچ گئی ہے۔

&quot;ایک سو اٹھارہ ہاؤسنگ کالونیوں کو عارضی طور پر، 16 ہاؤسنگ کالونیوں کو دوسرے مرحلے کے طور&nbsp; پر اور 29 کالونیوں کو تکنیکی طور اجازت دی گئی ہے&quot;۔

عارضی اجازت سے مراد یہ ہاؤسنگ سوسائٹیز غیر قانونی نہیں تاہم انہیں قواعد و ضوابط پوری کرنے کے لیے کالونی میں ترقیاتی کام کرانے کا وقت دیا گیا ہے۔ مگر یہاں پلاٹوں کی خریدو فروخت کی اجازت نہیں ہے۔

دوسرے مرحلے میں بھی پلاٹوں کی خریدو فروخت کی اجازت نہیں ہوتی۔تکنیکی طور پر اجازت کا مطلب یہ ہے کہ سوسائٹی این او سی کے لیے درخواست دے سکتی ہے۔ تاہم&nbsp; اس مرحلے پر بھی پلاٹوں کی خریدو فروخت نہیں کرسکتی۔

<h2>ایم ڈی کا کام صرف نوٹس جاری کرنا</h2>

ملتان ڈویلپمنٹ اتھارٹی کے ڈائریکٹر جنرل قیصر سلیم&nbsp; کہتے ہیں کہ غیر قانونی ہاؤسنگ سکیموں کے خلاف سخت کارروائیاں عمل میں لائی جا رہی ہے۔

&quot; ایم ڈی اے نے وقتاً فوقتاً عوامی فلاحی پیغامات کے ذریعے لوگوں کو آگاہ کرتا رہتا ہے کہ کسی ہاؤسنگ سکیم میں پلاٹ لینے سے پہلے، ایم ڈی اے سے رابطہ کر کے ہاؤسنگ کالونی بارے معلومات حاصل کریں کہ آیا یہ کالونی رجسٹرڈ ہے یا نہیں؟&quot;

انہوں نے کہا شہریوں کو چاہیے کہ وہ ہاؤسنگ کالونی کا منظوری کا درجہ چیک کریں۔

&quot;کچھ تصدیق شدہ کالونیاں اپنے فیز ٹو یا توسیع کے نام پر پلاٹ سیل کرنا شروع کردیتی ہیں جو غیر قانونی ہے۔ حال ہی میں ہم نے ایڈمز ہاؤسنگ سکیم کے توسیعی حصے کو غیر قانونی قرار دیا ہے کیونکہ اس کی اجازت نہیں لی گئی&quot;۔

ایم ڈی اے کے ترجمان سید جاوید عباس بخاری کا کہنا ہے کہ سب سے پہلے ادارے کا فیلڈ سٹاف غیر قانونی کالونی کے بارے میں پہلے رپورٹ کرتا ہے ٓ جس کے بعد ایم ڈی اے انتظامیہ متعلقہ ہاؤسنگ کالونی کے مالکان کو نوٹس جاری کرتی ہے۔ مالکان پہلے نوٹس پر دستاویزات کے ساتھ پیش نہیں ہوتے تو پھر دوسرا نوٹس جاری کردیا جاتا ہے اگر اس پر بھی مالکان دستاویزات کے ساتھ پیش نہیں ہوتے تو پھر تین مختلف کار روائیاں عمل میں لائی جاتی ہیں۔

&quot;سب سے پہلے ایم ڈی اے کا انفورسمنٹ سیل جا کر اس ہاؤسنگ کالونی کا دفتر سیل کردیتا ہے۔ اگر وہ فائلیں فروخت کرنے کا&nbsp; کام جاری رکھتے ہیں تو دوسری کالونی کی سڑک اور سیوریج کا نظام توڑ دیا جاتا ہے۔ اس کے باوجود&nbsp; وہ ایم ڈی اے کے قواعد و ضوابط پر عمل نہ کریں تو ان&nbsp; کے خلاف مقدمہ درج کرکے قانونی کارر وائی عمل میں لائی جاتی ہے&quot;۔

ترجمان نے بتایا کہ ملتان میں 30کے قریب غیر قانونی اور غیر رجسٹرڈ نجی ہاؤسنگ سوسائٹیز کے خلاف مقدمات درج کیے جاچکے ہیں جن میں سفاری ٹاؤن&nbsp; بہادر پور بوسن روڈ ، پیراڈائز ہاؤسنگ کالونی بدھلہ روڈ ، القاسم ٹاؤن وہاڑی روڈ، پی آئی اے ہاؤسنگ سکیم پبلک سکول روڈ، آشیانہ ہاؤسنگ سکیم نواب پور روڈ&nbsp; شامل ہیں۔

<h2>متاثرین داد رسی کے لیے کہاں جائیں؟</h2>

ملک محمد آصف پیشے کے لحاظ سے وکیل ہیں اور دیوانی مقدمات کے ماہر ہیں۔

وہ کہتے ہیں کہ بدقسمتی سے متاثرین کی فوری داد رسی کا کوئی ادارہ موجود نہیں ہے۔

&quot;ماضی میں نیب کے پاس اختیار تھا کہ اگر کسی ہاؤسنگ کالونی کے 50 متاثرین انکے پاس شکایت لے کر پہنچ&nbsp; جاتے تھے تو وہ براہ راست مالکان کے خلاف کارروائی شروع کر دیتے تھے۔ لیکن اب نیب ترامیم میں یہ اختیار ختم ہو چکا ہے&quot;۔ 
انہوں نے بتایا کہ اب متاثرہ شخص عدالت میں صرف رقم کی ریکوری کا دعویٰ دائر کرتے ہیں۔

&quot;ایسے دیوانی مقدمے سالہا سال چلتے ہیں&quot;۔

&nbsp;ان کا کہنا ہے کہ ملتان ڈویلپمنٹ اتھارٹی صرف نوٹس جاری کرتی ہے یا مشتری ہوشیار باش کے نام سے اخبارات میں اشتہار دے دیتی ہے۔

ایم ڈی اے کے ترجمان یاور بخاری نے بتایا کہ متاثرین کی شنوائی کے لیے ایم ڈی اے میں علیحدہ سیل بنایا جارہا ہے جو ان نجی ہاؤسنگ کالونی مالکان کیخلاف تیز کارروائی عمل میں لائے گا۔

<h2>فراڈ کیسے ہوتا ہے؟</h2>

ملک آصف&nbsp; کا کہنا ہے کہ ہوتا یوں ہے کہ کالونی مالکان کے پاس اتنے پلاٹ ہوتے نہیں جتنے وہ فروخت کر دیتے ہیں۔

&quot;جو لوگ پلاٹوں کی باقائدگی سے دیکھ بھال نہیں کرتے یا کسی مجبوری کے باعث چکر نہیں لگا سکتے ایسے پلاٹوں کا قبضہ کسی اور کو دے دیا جاتا ہے&quot;۔

ملتان شہر میں پراپرٹی کے کام سے وابستہ ملک شعیب لابر ملک آصف کی بات کی تصدیق کرتے ہیں۔ ان کا کہنا ہے کہ بعض مرتبہ کالونی مالکان پلاٹوں سے زیادہ فائلیں بیچ دیتے ہیں۔

ملک شعیب کے مطابق جو لوگ قسطیں بروقت ادا نہیں کرتے مالک ان کو انتقال یا قبضہ نہیں دیتا اور پلاٹ کسی اور بیچ دیتا ہے۔ دوسرا یہ کہ ہاؤسنگ کالونی کے مالکان پلاٹ فروخت کرنے سے پہلے جن سہولیات کا وعدہ کرتے ہیں انہیں پورا نہیں کرتے جس کی وجہ سے&nbsp; فریقین کے درمیان تنازع کھڑا ہوجاتا ہے۔

&quot;تاہم سب سے بٖڑی وجہ زمینوں کے تیزی سے بڑھتے ہوئے ریٹ ہیں۔ وہ اس کی مثال دیتے ہوئے بتاتے ہیں کہ کسی نے ایک لاکھ روپے مرلہ کے حساب سے قسطوں پر پلاٹ خریدا لیکن جب قسطیں مکمل ہوئیں تو اس جگہ کی قیمت چار سے پانچ گنا بڑھ چکی ہے۔ اس صورتحال میں اکثر مالک بے ایمان ہو جاتے ہیں اور وہ مزید رقم کا تقاضہ کرتے ہیں اور انکار کی صورت میں اسے زیادہ قیمت پر کسی اور کو بیچ دیتے ہیں&quot;۔

ملک شعیب لابر کہتے ہیں کہ ایم ڈی اے سمیت تمام ادارے&nbsp; متاثرین کو ریلیف فراہم کرنے میں ناکام ہیں۔ &nbsp;

سیکرٹری ہاؤسنگ جنوبی پنجاب، محمد آصف چودھری&nbsp; کہتے ہیں کہ غیر قانونی اور غیر رجسٹرڈ ہاؤسنگ کالونیوں کی تشہیر اہم مسئلہ ہے۔

انہوں نے بتایا کہ غیر قانونی ہاؤسنگ سکیموں کی تشہیر پر مکمل پابندی عائد کرنے کے لیے پیمرا اور میڈیا ہاؤسز&nbsp; سے بات چیت جاری ہے۔

گوجرانوالہ میں جعلی پیرس

ملتان میں غیر قانونی ہاؤسنگ سکیموں نے کتنے ہی گھر اجاڑ دیے

مہر اللہ بخش کی عمر 75 سال ہے جس میں 56 سال انہوں نے عدالتوں میں پیشیاں بھگتتے گزارے ہیں۔ وہ 1967 سے ملتان کے علاقے خان پور مڑل میں 81 کنال زمین کی ملکیت کا مقدمہ لڑ رہے تھے۔

اللہ بخش کے والد نے 1958 میں خان پور مڑل میں 81 کنال اور 16 مرلے زرعی زمین خریدی تو زمین بیچنے والے کی برادری کے کچھ لوگوں نے اس پر حق شفع دائر کردیا یعنی یہ قانونی دعویٰ کر دیا کہ یہ زمین خریدنے کے لیے پہلا حق ان کا ہے۔ اللہ بخش کا تعلق آرائیں برادی سے ہیں اور زمین بیچنے والوں کا شیخ برادری سے۔

1963 میں زمین بیچنے والے نے اس مسئلے کو حل کرنے کے لیے اپنی اہلیہ کی جانب سے بھی حق شفع کا مقدمہ دائر کر دیا۔ اس طرح عدالت نے یہ زمین فروخت کنندہ کی اہلیہ کے نام کر دی اور یوں دیگر افراد کا حق شفع کا دعویٰ خارج ہو گیا۔

لیکن بیچنے والے نے زمین محکمہ مال میں اپنی اہلیہ کے نام منتقل نہیں کروائی۔ یوں سرکاری ریکارڈ میں زمین کی ملکیت پہلے مالک کے نام ہی رہی جبکہ عملی طور پر اسے اللہ بخش کا خاندان استعمال کرتا رہا۔ 
1967 میں اللہ بخش نے یہ زمین قانونی طور پر شیخ برادری سے خرید لی۔

پھر اسی سال فروخت کنندہ کی اہلیہ نے دوبارہ عدالت میں دعویٰ دائر کر دیا کہ زمین کی اصل مالک وہ خود ہیں اور ان کے شوہر کو اسے فروخت کرنے کا کوئی اختیار نہیں تھا۔

یہ مقدمہ چار دہائیوں سے زیادہ عرصہ تک مختلف عدالتوں میں سے ہوتا ہوا سپریم کورٹ میں پہنچا جس نے 2011 میں خاتون کے حق میں فیصلہ دے دیا۔

لیکن جب یہ فیصلہ آیا تو دعویٰ کرنے والی خاتون کا انتقال ہو چکا تھا۔ چنانچہ یہ زمین ان کے بچوں کے حصے میں آئی۔

اللہ بخش کے مطابق خاتون کی اولاد نے زمین واگزار کراتے وقت ان کی اس اراضی پر بھی قبضہ کر لیا جس پر ان کا کوئی حق نہیں تھا۔

چنانچہ وہ دوبارہ سپریم کورٹ چلے گئے جس نے 2012 میں زمین کے درست انتقال کا حکم دیا لیکن اسی سال مخالف فریق نے لاہور ہائی کورٹ کے ملتان بینچ سے حکم امتناع (سٹے آرڈر) لے لیا۔

اس طرح یہ مقدمہ تاحال زیرسماعت ہے۔ اللہ بخش کو یقین نہیں کہ اس مقدمے کا فیصلہ ان کی زندگی میں ہو جائے گا۔

اللہ بخش کا طویل مقدمہ کوئی انوکھی مثال نہیں ہے۔ 
ملتان کی عدالتوں میں تقریباً 1,700 مقدمے ایسے ہیں جن پر پچھلے پچاس سال میں فیصلہ نہیں ہو سکا۔

ملتان کی سول و سیشن عدالتوں اور لاہور ہائیکورٹ اور سپریم کورٹ کے ملتان بینچ میں زیر سماعت مجموعی مقدمات کی تعداد 60 ہزار کے قریب ہے۔ ان میں 43 ہزار 849 مقدمات دیوانی ہیں جو کل زیر سماعت مقدمات کا 72 فیصد ہیں جبکہ باقی 28 فیصد فوجداری مقدمات ہیں۔

دیوانی مقدمات کا تعلق لین دین اور جائیداد کے معاملات سے ہوتا ہے جبکہ چوری، ڈکیتی، قتل اور جنسی زیادتی جیسے جرائم سے متعلق مقدمات فوجداری کہلاتے ہیں۔

<h2>تاخیر کیوں ہوتی ہے؟</h2>

سابق ڈسٹرکٹ اینڈ سیشن جج محمد حفیظ اللہ خان دیوانی مقدمات کے فیصلوں میں طویل تاخیر کی تین بڑی وجوہات بتاتے ہیں۔

سٹے آرڈر اور سمن: وہ بتاتے ہیں کہ ایسے مقدموں میں عدالتیں دو طرح کے حکم جاری کرتی ہیں جن میں ایک عبوری اور دوسرا حتمی حکم کہلاتا ہے۔ حکم امتناع یا سٹے آرڈر بھی عبوری حکم ہوتا ہے جس میں عدالت حتمی فیصلے سے قبل متنازع معاملے کو جوں کا توں رکھنے کا حکم دیتی ہے۔

بعض اوقات کوئی فریق عدالت میں دائر کردہ اپنے دعوے میں ترمیم چاہتا ہے جس پر عدالت عبوری حکم جاری کر دیتی ہے۔ اس کے علاوہ مقدمے میں اضافی شہادت جمع کرانے کی درخواست پر بھی عبوری حکم جاری کیا جاتا ہے۔ عدالت کے عبوری احکامات کے خلاف اپیل بھی کی جا سکتی ہے اور حفیظ اللہ کے بقول یہی اپیلیں مقدموں کو طویل عرصہ لٹکائے رکھتی ہیں۔

جب کوئی مقدمہ دائر کیا جاتا ہے تو پہلے عدالت یہ دیکھتی ہے کہ اس پر کارروائی ہو سکتی ہے یا نہیں اور پھر پیشی دے کر دوسرے فریق کو طلبی کا سمن جاری کرتی ہے۔ اکثر ایسا ہوتا ہے کہ عدالت کی جانب سے سمن جاری ہوتے رہتے ہیں اور دوسرا فریق پیش نہیں ہوتا اور یوں تاریخ پر تاریخ پڑتی رہتی ہے۔ اگر کسی فریق کے حق میں یکطرفہ طور پر فیصلہ ہو جائے تو دوسرا فریق اس کے خلاف اپیل کر دیتا ہے۔ اس طرح مقدمہ طوالت اختیار کر جاتا ہے۔

ملکیت اور قبضہ: حفیظ اللہ کے مطابق مقدمے کے فریقین کا طرزعمل دیوانی مقدموں کے فیصلوں میں تاخیر کی دوسری بڑی وجہ ہے۔ جائیداد سے متعلق مقدمات میں عموماً جس فریق کے پاس زمین کا قبضہ ہوتا ہے مقدمے کو طوالت دینے کے لیے ہر حربہ استعمال کرنے کی کوشش کرتا ہے اور ہر پیشی پر کوئی نہ کوئی نئی درخواست دے دیتا ہے جس پر عدالت عبوری فیصلہ دیتی ہے اور دوسرا فریق اس کے خلاف اپیل کر دیتا ہے۔ گواہوں کے حاضر نہ ہونے پر بھی عدالتیں اگلی تاریخ دے دیتی ہیں۔ اس طرح اصل مقدمہ بیچ میں ہی رہ جاتا ہے اور سالہا سال تک عدالتی کارروائی ضمنی معاملات کے گرد ہی گھومتی رہتی ہے۔

وکیل اور ہڑتالیں: حفیظ اللہ وکلا کے طرزعمل کو دیوانی مقدموں کے فیصلوں میں طویل تاخیر کی تیسری بڑی وجہ قرار دیتے ہیں۔ ان کا کہنا ہے کہ جائیداد سے متعلق مقدمات میں زمین پر قابض فریق کے وکلا مقدمے کو طویل دینے کے لیے ہر حربہ آزماتے ہیں۔ اس کے علاوہ وکلا کی آئے روز ہڑتالیں بھی اس تاخیر کا اہم سبب ہے۔ جس دن وکلا کی ہڑتال ہو اس دن زیرسماعت کسی مقدمے پر کارروائی تقریباً چھ مہینے آگے چلی جاتی ہے۔

سائل عام طور پر مشہور وکلا کے پاس جاتے ہیں جن کے پاس پہلے ہی بہت سے مقدمات ہوتے ہیں۔ انہیں روزانہ درجنوں پیشیاں بھگتانا ہوتی ہیں اس لیے وہ ہر مقدمے کو خاطرخواہ وقت نہیں دے پاتے اور تاریخیں لیتے رہتے ہیں۔

<h2>ایک جج کتنے مقدموں کی سماعت کر سکتا ہے؟</h2>

ججوں کی کمی بھی مقدمات کے فیصلوں میں تاخیر کا ایک نمایاں سبب ہے۔ حفیظ اللہ کہتے ہیں کہ مقدموں کی تعداد ہزاروں میں ہوتی ہے جبکہ ان کی سماعت کرنے والے ججوں کی تعداد انگلیوں پر گنی جا سکتی ہے۔

اس کے علاوہ ججوں کا ماتحت عملہ اچھی طرح تربیت یافتہ نہیں ہوتا جس کے باعث مقدمات کو سنبھالنے اور نمٹانے میں تاخیر رہتی ہے۔

ضلع کچہری ملتان میں ججوں کی کل تعداد 69 ہے جس میں 19 جج ایسے ہیں جو خاص طور پر دیوانی مقدمات سنتے ہیں جبکہ 22 جج دیوانی اور فوجداری دونوں طرح کے مقدمات کی سماعت کرتے ہیں۔ اس وقت ان میں سے ہر جج کے پاس سات سو سے پندرہ سو تک مقدمات ہیں۔

گویا اگر یہ جج صاحبان اتوار کے علاوہ کوئی چھٹی نہ کریں یعنی ایک سال میں تین سو دن کام کریں اور روزانہ دو سے پانچ مقدمات کی سماعت کریں تب بھی ہر مقدمے کی باری ایک سال بعد ہی آ سکتی ہے۔

ڈسٹرکٹ بار ملتان کے جنرل سیکرٹری سید علی الطاف گیلانی بھی ججوں کی کمی کو دیوانی مقدمات کے فیصلوں میں تاخیر کا اہم سبب گردانتے ہیں۔

ان کا کہنا ہے کہ عدالتوں میں دیوانی مقدمات کی بھرمار ہے جنہیں سننے کے لیے ججوں کی تعداد بہت کم ہے۔

ایسے مقدمات میں ایک فریق کو تاخیر سے فائدہ ہوتا ہے اس لیے وہ تواتر سے درخواستیں دائر کرتا رہتا ہے اور مقدمہ نمٹنے کی نوبت ہی نہیں آتی۔ تاخیر کے ساتھ مقدمات کی فائل بھی بھاری ہو جاتی ہے جسے ہاتھ لگانے سے جج بھی گریز کرتے ہیں۔

ملتان کے سینئر وکیل شاہ زیب ہاشمی کہتے ہیں کہ پاکستان میں رائج دیوانی قانون انگریزوں نے بنایا تھا جس میں دور حاضر کے تقاضوں کے مطابق تبدیلیاں نہیں کی گئیں۔ بہت سے دیوانی مقدمات کوئی ٹھوس بنیاد نہ ہونے کے باوجود سالہا سال تک چلتے رہتے ہیں۔

اگر ایسے مقدمے ہارنے والوں کے لیے جرمانے اور ہرجانے کی سزائیں رکھی جائیں تو عدالتوں کا وقت بچ سکتا ہے اور انصاف کی فراہمی میں تاخیر کی شکایت بڑی حد تک دور ہو سکتی ہے۔

صہیب اقبال

صہیب اقبال عرصہ دس سال سے شعبہ صحافت سے منسلک ہیں مختلف اخبارات میں کالم اور فیچر لکھتے ہیں اور چینلز کے لیے رپورٹنگ کرتے ہیں۔

سوال کرتی کئی آنکھیں منتظر ہیں یہاں: جنوبی پنجاب میں علاج کا انتظار کرتے دل کے مریض

'ہم پر شرمندہ ہونے والے والدین اب ہمیں فخر سے قبول کرتے ہیں'

کھاد ڈیلر یا محکمہ زراعت: یوریا کھاد کی قلت کا ذمہ دار کون ہے؟

ملتان میں غیر قانونی ہاؤسنگ سکیموں نے کتنے ہی گھر اجاڑ دیے

تاریخ پہ تاریخ: ملتان میں 50 سال سے زیرِ سماعت مقدمات کا مقدمہ

Lok Sujag