ضلع وہاری میں آئندہ ماہ قومی اسمبلی کی چار اور پنجاب اسمبلی کی آٹھ نشستوں پر انتخابات ہوں گے۔ امیدوار اگرچہ جوڑ توڑ میں مصروف ہیں تاہم ابھی تک انتخابی مہم کا روایتی رنگ نظر نہیں آ رہا۔

گزشتہ عام انتخابات میں اس ضلعے سے دو قومی حلقوں میں مسلم لیگ ن اور دو میں پاکستان تحریک انصاف کے امیدوار کامیاب ہوئے تھے۔

&nbsp;یہاں کی سیاست مدتوں سے روایتی زمیندار گھرانوں کے گرد گھوم رہی ہے جن میں دولتانہ، کھچی، منیس، بھابھہ، خاکوانی، جٹ، ارائیں، سید، چوہان، بھٹی اور ڈوگر خاندان نمایاں ہیں۔

الیکشن کمیشن کے مطابق ضلع وہاڑی کی کل آبادی 34 لاکھ 30 ہزار 421 ہے۔ جہاں رجسٹرڈ ووٹرز کی تعداد 19 لاکھ 29 ہزار 211 ہے جن میں آٹھ لاکھ 81 ہزار 137 خواتین اور 10 لاکھ 48 ہزار 74 مرد ووٹر ہیں۔

الیکشن کمیشن کی ترتیب سے وہاڑی کے پہلے قومی حلقے این اے 156 میں بورے والا شہر اور اس کی تحصیل کے دیہات شامل ہیں۔

&nbsp;یہاں سے ن لیگ کے چودھری نذیر ارائیں، پی ٹی آئی سے عائشہ نذیر جٹ اور پیپلز پارٹی کے کامران یوسف گھمن امیدوار ہیں۔ جمیعت علما اسلام کے قاری شاہین اور ٹی ایل پی کے ڈاکٹر محمد شہباز و دیگر بھی میدان میں موجود ہیں۔

پچھلے الیکشن میں اس علاقے سے ن لیگ کے چودھری فقیر حسین ارائیں منتخب ہوئے تھے اور عائشہ نذیر بطور آزار امیدوار دوسرے نمبر پر آئی تھیں۔

اس حلقے میں ارائیں سب سے بڑی برادری ہے جو چودھری نذیر ارائیں کی حامی ہے جبکہ جٹ اور لنگڑیال برادریاں عائشہ نذیر کو سپورٹ کر رہی ہیں۔

اب کی بار اس نشست پر چودھری نذیر اور عائشہ نذیر جٹ میں فائنل ریس ہو گی۔

<hr />
<h2 style="text-align:center">وہاڑی نئی حلقہ بندیاں 2023</h2>

2018 کا قومی اسمبلی کا حلقہ این اے 162 وہاڑی 1 اب این اے 156 وہاڑی 1 ہے 
یہ بورے والا تحصیل کا شہری اور دیہی حلقہ ہے اس میں قصبہ گگو منڈی اور شیخ فاضل بھی شامل ہے۔ نئی حلقہ بندیوں میں اس حلقے میں عمر پور قانون گو حلقے کے چک نمبر 267 ای بی، چک نمبر 283 ای بی، چک نمبر 285 ای بی اور چک نمبر 287 ای بی پٹوار سرکلز کو شامل کیا گیا ہے۔ جبکہ بورے والا قانون گو حلقہ ٹو کو اس حلقے سے نکال دیا گیا ہے۔

2018 کا قومی اسمبلی کا حلقہ این اے 163 وہاڑی 2 اب این اے 157 وہاڑی 2 ہے 
یہ بورے والا تحصیل کا دیہی حلقہ ہے اس میں وہاڑی تحصیل کے کچھ دیہات بھی شامل ہیں۔ 2024 کے انتخابات کے لیے اس حلقے میں معمولی تبدیلی کی گئی ہے۔ نئی حلقہ بندیوں میں اس حلقے میں بورے والا قانون گو حلقہ ٹو کو شامل کیا گیا ہے جبکہ عمر پور قانون گو حلقے کے چک نمبر 267 ای بی، چک نمبر 283 ای بی، چک نمبر 285 ای بی اور چک نمبر 287 ای بی پٹوار سرکلز اور ویاڑی تحصیل کے قصبہ کسمسر قانون گوئی کے 18 ڈبلیو بی پٹوار سرکل کو نکال دیا گیا ہے۔

2018 کا قومی اسمبلی کا حلقہ این اے 164 وہاڑی 3 اب این اے 158 وہاڑی 3 ہے 
یہ وہاڑی کا شہری اور دیہی حلقہ ہے۔ نئی حلقہ بندیوں میں اس حلقے میں میلسی تحصیل کے قصبے مترو قانون گو حلقے اور وہاڑی تحصیل کے قصبے کسمسر کے 18 ڈبلیو بی پٹوار سرکل کو شامل کیا گیا ہے جبکہ ملیسی تحصیل کے 7 آر (گڑھ موڑ) قانون گو حلقے کو نکال دیا گیا ہے۔

2018 کا قومی اسمبلی کا حلقہ این اے 165 وہاڑی 4 اب این اے 159 وہاڑی 4 ہے 
یہ مکمل طور پر میلسی تحصیل کا حلقہ ہے۔ اس حلقے میں میلسی شہر کے علاوہ جلہ جیم، سلطان پور، ٹبہ سلطان&nbsp; کے قصبات شامل ہیں۔ نئی حلقہ بندیوں میں اس حلقے میں میلسی تحصیل کے قصبے7 آر (گڑھ موڑ) قانون گو حلقے کو شامل کیا گیا ہے جبکہ اسی تحصیل کے قصبے مترو قانون گو حلقے کو نکال دیا گیا ہے۔

<hr />

&nbsp;این اے 157 بورے والا کے چکوک اور وہاڑی کے علاقوں لڈن، ماچھیوال وغیرہ پر مشتمل ہے۔ یہاں ن لیگ کے سابق ایم این اے ساجد مہدی سلیم، پی ٹی آئی سے سابق ایم پی اے اعجاز بندیشہ اور استحکام پاکستان پارٹی سے سابق وفاقی وزیر اسحاق خان خاکوانی امیدوار ہیں۔

اس قومی حلقے میں زیادہ دیہات شامل ہونے کی وجہ سے مقامی دھڑے بندیاں اہمیت کی حامل ہیں۔ چند روز قبل تک اس نشست پر ن لیگ اور آئی پی پی کے درمیان سیٹ ایڈجسٹمنٹ کی باتیں چل رہی تھیں مگر ن لیگ نے سید ساجد مہدی کا ٹکٹ کنفرم کر دیا ہے۔

&nbsp;ساجد مہدی اس حلقے میں مضبوط امیدوار ہیں تاہم اچھا مقابلہ دیکھنے کو ملے گا۔

این اے 158 میں وہاڑی شہر اور مضافات کے علاقے آتے ہیں۔ ن لیگ کی تہمینہ دولتانہ، ق لیگ کے رانا صغیر گڈو، پی ٹی آئی سے سابق رکن اسمبلی طاہر اقبال چودھری اور آفتاب خان کھچی امیدوار ہیں۔ جبکہ جماعت اسلامی نے جاوید حسین شاہ کو میدان میں اتارا ہے۔

ن لیگ کی مرکزی رہنما تہمینہ دولتانہ 2008ء میں ایم این اے بنی تھیں۔ مگر 2002ء کے انتخابات اور پچھلے دونوں چناؤ میں ہار چکی ہیں۔

تہمینہ دولتانہ کو یہاں بڑے ترقیاتی منصوبوں کا کریڈٹ جاتا ہے جبکہ طاہر اقبال زیادہ وقت حلقے میں گزارتے ہیں اور لوگوں کے دکھ سکھ میں شریک ہوتے ہیں۔ انہیں اگر پارٹی نشان مل جاتا ہے تو دونوں میں ٹکر کا مقابلہ ہو سکتا ہے۔

پی ٹی آئی کے دوسرے امیدوار آفتاب خان کھچی کے والد ممتاز خان کھچی چیئرمین ضلع کونسل منتخب ہوئے تھےجوچند روز قبل انتقال کر گئے۔ یہ یہاں کا پرانا سیاسی خاندان ہے۔

اس بار یہ حلقہ ن لیگ میں ٹکٹ پر اختلاف کا مرکز بنا رہا ہے۔ گزشتہ عام انتخابات میں یہاں سے ن لیگ کی تہمینہ دولتانہ ہار گئی تھیں لیکن اس قومی حلقے کے نیچے ایک صوبائی نشست پر ن لیگ کے میاں ثاقب خورشید جیت گئے تھے۔

جبکہ دوسری سیٹ پر نعیم بھابھہ نے آخری وقت میں ن لیگ کا ٹکٹ لینے سے انکار کر دیا تھا اور وہ سیٹ پی ٹی آئی کے رائے ظہور احمد کھرل جیت گئے تھے۔

&nbsp;اس بار تہمینہ دولتانہ اپنے صاحبزادے عمران دولتانہ کو اس قومی نشست پر الیکشن لڑانا چاہتی تھیں لیکن ثاقب خورشید بھی ن لیگ کے ٹکٹ کے لیے کوشاں تھے مگر تہمینہ دولتانہ یہ نہیں چاہتی تھیں اس لیے انہوں نے خود الیکشن لڑنے کا فیصلہ کیا ہے۔

مسلم لیگ ن کے سٹی صدر شیخ عبدالرحمان کا کہنا ہے کہ تہمینہ دولتانہ اچھے برے تمام حالات میں پارٹی کے ساتھ کھڑی رہیں۔ ان کا الیکشن لڑنے کا فیصلہ بالکل درست ہے اور ان کی جیت بھی یقینی ہے۔

تاہم ن لیگ حلقہ پی پی 233 کے صدر چودھری سعید اختر اپنے سٹی صدر سے اتفاق نہیں کرتے۔ وہ سمجھتے ہیں کہ میاں ثاقب سینئر سیاست دان ہیں اور ہمیشہ کامیاب ہوئے ہیں۔ یہاں قومی نشست پر پارٹی ٹکٹ ثاقب خورشید کو ملنا چاہیے تھا۔

این اے 159 میں میلسی شہر، جلہ جیم اور ٹبہ سلطان پور کے علاقے شامل ہیں۔ یہ ہائی وولٹیج حلقہ ہے جہاں پی ٹی آئی سے اورنگزیب کھچی، ن لیگ کے سعید احمد منیس اور پیپلز پارٹی کے محمود حیات خان ٹوچی امیدوار ہیں۔

سابق ایم این اے اورنگزیب کھچی، پانچ بار رکن اسمبلی منتخب ہونے والے دلاور خان کھچی کے صاحبزادے اور سابق ضلع ناظم ممتاز کھچی کے بھتیجے ہیں۔ ان کا اس حلقے میں خاصا بڑا ووٹ بینک ہے۔

سعید احمد منیس سابق سپیکر پنجاب اسمبلی ہیں جو کئی بار رکن صوبائی اسمبلی اور ایم این اے منتخب ہو چکے ہیں۔ جبکہ محمود حیات خان بھی سابق ایم این اے ہیں اور اس حلقے میں خاص اہمیت رکھتے ہیں۔ بلاشبہ اس نشست پر کانٹے دار مقابلہ ہو گا۔

ضلع وہاڑی کے آٹھ صوبائی حلقوں میں سے پچھلی بار چار مسلم لیگ ن اور چار ہی پی ٹی آئی نے جیتے تھے۔

پی پی 229 سے گزشتہ الیکشن میں یوسف کسیلیہ کامیاب ہوئے تھے اب بھی وہی ن لیگ کے امیدوار ہیں۔ پی ٹی آئی سے خالد محمود چوہان اور نذیر جٹ کے صاحبزادے عمر نذیر جٹ امیدوار ہیں۔ یہاں چودھری یوسف کسیلیہ ارائیں برادری کے علاوہ جٹ برادری سے بھی ووٹ لیتے ہیں۔ 
اس حلقے میں پی ٹی آئی سے خالد محمود چوہان امیدوار نامزد ہوں یا عمر نذیر دونوں صورتوں میں زبردست جوڑ پڑے گا۔

پی پی 231 بورے والا شہر میں سابق ایم پی اے خالد محمود ڈوگر ہی مسلم لیگ(ن) کے امیدوار ہیں۔ جبکہ پی ٹی آئی سے سردار خالد نثار ڈوگر، ارشاد احمد ارائیں اور اکبر علی بھٹی سامنے آئے ہیں جو کہ تینوں مضبوط امیدوار ہیں۔

یہاں ن لیگ ہی کے سابق چیئرمین بلدیہ چودھری عاشق ارائیں اور سردار خالد ڈوگر کے درمیان اختلافات ہیں۔ اگر چودھری عاشق آزاد امیدوار کے طور پر الیکشن لڑتے ہیں تو وہ ارائیں برادری کے ن لیگی ووٹ پر اثر انداز ہوں گے جس کا فائدہ پی ٹی آئی کو ہو گا۔

اسی حلقے میں ٹی ایل پی سے سردار ذوالفقار ڈوگر امیدوار ہیں جن کا نقصان ن لیگ کو ہو سکتا ہے۔ یہاں پیپلز پارٹی کے امیدوار سابق ایم پی اے حاجی عبدالحمید بھٹی ہیں جو کہ بھٹی برادری کا زیادہ ووٹ لینے میں کامیاب ہو سکتے ہیں۔

پی پی 232 میں ملک نوشیر لنگڑیال مسلم لیگ ن کے امیدوار ہیں جبکہ بلال اکبر بھٹی آزاد کھڑے ہو گئے ہیں جس سے ن لیگ کے امیدوار متاثر ہوں گے۔ جماعت اسلامی نے یہاں اپنے نوجوان رہنما علی وقاص ہنجرا کو میدان میں اتارا ہے۔

تحریک انصاف سے طاہر انور واہلہ اور سابق ایم پی اے اعجاز سلطان بندیشہ امیدوار ہیں۔ صائمہ نورین اور عبدالوحید گریوال نے بھی کاغذات جمع کر رکھے ہیں۔ بندیشہ کو ٹکٹ ملا تو زبردست مقابلہ ہو گا۔

پی پی 230 میں ساہوکا سے لڈن تک کا علاقہ آتا ہے۔ یہاں تہمینہ دولتانہ کے صاحبزادے اور سابق ایم پی اے عرفان عقیل دولتانہ ن لیگ کے امیدوار ہیں۔ ق لیگ سے عمران خان سلدیرا، پیپلز پارٹی سے اصغر علی جٹ اور سلمان یوسف گھمن، جماعت اسلامی کے عمران علی اور کسان اتحاد کے ملک ذوالفقار اعوان امیدوار ہیں۔

تحریک انصاف سے افضل کریم بیٹو، شاہد مہدی نسیم اور ان کے صاحبزادے سلمان مہدی، نذیر جٹ کے صاحبزادے عمر نذیر میں سے کوئی ایک لڑے گا۔ یہ عرفان دولتانہ کا آبائی علاقہ ہے اور انہیں تہمینہ دولتانہ کی وجہ سے اچھا ووٹ مل سکتا ہے۔

شاہد مہدی نسیم، عمران خان سلدیرا اور سلمان یوسف گھمن بھی اس حلقے میں اچھا ووٹ بنک رکھتے ہیں۔

پی پی 233 میں سابق ایم پی اے میاں ثاقب خورشید ن لیگ کے امیدوار ہیں۔ تحریک انصاف سے سابق ایم پی اے رائے ظہور کھرل میدان میں آئیں گے تاہم طاہر انور واہلہ بھی موجود ہیں۔

رائے ظہور احمد کھرل سابق ایم پی اے ہیں جبکہ میاں ثاقب خورشید چار بار ممبر صوبائی اسمبلی اور 2 بار تحصیل ناظم منتخب ہو چکے ہیں۔

یہاں جماعت اسلامی، پیپلز پارٹی، تحریک لبیک اور استحکام پاکستان پارٹی اور عوامی تحریک کے امیدوار بھی الیکشن لڑ رہے ہیں۔ تاہم خیال ہے کہ فائنل ریس ن لیگ اور پی ٹی آئی میں ہو گی۔

پی پی 234 پر مسلم لیگ ن کے نعیم اختر بھابھہ اور تحریک انصاف کے زاہد اقبال چودھری اور سلمان خان بھابھہ، پیپلز پارٹی کے راؤ ندیم اختر میدان میں ہیں۔ جبکہ محمد خاں کھچی بھی بطور آزاد امیدوار دوڑ میں شریک ہیں۔

&nbsp;اس حلقہ میں نعیم اختر بھابھہ، زاہد اقبال چودھری اور محمد خاں کھچی کے درمیان سخت مقابلے کی توقع ہے۔

پی پی 235 سے ن لیگ کے خالق نواز ارائیں، تحریک انصاف کے سابق صوبائی وزیر جہانزیب خان کھچی، پیپلز پارٹی کے کرنل نعیم خان نمایاں امیدوار ہیں۔ اس حلقے میں مسلم لیگ ن اور تحریک انصاف کے درمیان معرکہ آرائی کی توقع ہے۔

&nbsp;وہاڑی کے آخری صوبائی حلقہ پی پی 236 پر تحریک انصاف کے سابق ایم پی اے علی رضا خاکوانی، ن لیگ کے آصف سعید منیس اور پیپلز پارٹی کے نواب علی خان خاکوانی امیدوار ہیں۔

&nbsp;اس حلقہ میں تینوں امیدوار علاقے کے بڑے زمیندار، پڑھے لکھے اور نوجوان سیاست دان ہیں۔ یہاں ن لیگ اور پی ٹی آئی کے درمیان ٹکر کا مقابلہ ہونے کا امکان ہے۔

ضلع سرگودھا میں ہائی وولٹیج مقابلے مریم نواز کے مد مقابل کون الیکشن لڑے گا؟

وہاڑی کی سیاست مدتوں سے زمیندار خاندانوں کے گرد گھوم رہی ہے۔ اب کون کہاں کھڑا ہے؟

text

ماضی میں دہلی اور ملتان کے درمیان جس راستے پر تجارت ہوا کرتی تھی اس کا ایک حصہ اب ملتان وہاڑی روڈ کہلاتا ہے۔ اس پر وہاڑی کی جانب سفر کرتے ہوئے دہلی کا فاصلہ بتانے والے سنگ میل نظر آتے ہیں۔

&nbsp;ملتان وہاڑی روڈ صوبہ پنجاب میں قومی اسمبلی کے سات حلقوں سے گزرتی ہے۔ ان میں بوریوالا سے این اے 162، ماچھیوال سے این اے 163، وہاڑی سٹی سے این اے 164، ٹبہ سلطان پور سے این اے 165، جہانیاں سے این اے 153، ملتان سے این اے 156 اور این اے 157 شامل ہیں۔

اس اہم سڑک کی تعمیر نو آخری بار16&nbsp; سال قبل کی گئی تھی۔ وہاڑی میں نو کلومیٹر، گڑھا موڑ میں دو کلومیٹر اور ٹبہ سلطان پور میں ڈھائی کلومیٹر سڑک دو رویہ جبکہ باقی یک رویہ ہے۔

انجینئرز کا کہنا ہے کہ اس سڑک کی عمر 12 سال تھی۔ ان کے مطابق کارپٹ سڑک کو تقریباً ایک دہائی اور عام سڑک کو پانچ سال بعد مرمت یا تعمیرنو کی ضرورت ہوتی ہے۔

ٹرانسپورٹ ایسوسی ایشن وہاڑی کے صدر رانا اعجاز احمد کا کہنا ہے کہ یہ سڑک طویل عرصے سے خراب ہے جس سے گاڑیوں کی مرمت کا کام بڑھ گیا ہے۔ گڑھوں اور پتھروں کے باعث ٹائر جلدی خراب ہو جاتے ہیں۔

&quot;ہماری گاڑیوں کے ٹائر دیگر سڑکوں پر آٹھ سے نو ماہ چلتے ہیں لیکن اس پر دو ڈھائی ماہ ہی میں انہیں تبدیل کرنا پڑتا ہے۔ ایک کوسٹر کے چار ٹائروں کی قیمت ایک لاکھ روپے جبکہ بس کے ٹائروں کی قیمت تین لاکھ روپے ہے۔ اس پر مسافروں کو تاخیر کا شکوہ بھی رہتا ہے۔&quot;

ان کے مطابق جن دنوں سڑک کی حالت اچھی تھی، ڈیڑھ گھنٹے میں گاڑی وہاڑی سے ملتان پہنچ جایا کرتی تھی لیکن اب تقریباً سوا دو گھنٹے لگتے ہیں۔ کچھ گاڑیوں نے خانیوال روڈ کی طرف سے متبادل راستہ اپنا لیا ہے جس سے سفر 30 کلومیٹر بڑھ جاتا ہے۔

وہ کہتے ہیں &quot;سب سے زیادہ مشکل اڈا ٹھینگی پر ہوتی ہے جہاں سڑک پانچ فٹ تک نیچے دب چکی ہے اور وقفے وقفے سے وہاں کوئی ٹرک الٹ جاتا ہے۔&quot;

ڈسٹرکٹ ہسپتال وہاڑی کے میڈیکل آفیسر ڈاکٹر عرفان نیک کا کہنا ہے کہ ایسی خراب سڑک پر بالخصوص ریڑھ کی ہڈی، جسم کی دیگر ہڈیوں، سر، آرٹیریل انجری اور ویسکولر سرجری کے مریضوں کے لیے سفر انتہائی تکلیف دہ ہوتا ہے۔ جو مریض وینٹی لیٹر پر ہو اسے بھی خاصی مشکل کا سامنا کرنا پڑتا ہے۔

ریسکیو 1122 کے شفٹ انچارج محمد اعجاز خان نے بتایا کہ ملتان روڈ بہت زیادہ ٹوٹ پھوٹ کا شکار ہے اس لیے یہاں حادثات کی شرح روز بروز بڑھتی جا رہی ہے۔

ریسکیو 1122 کے ترجمان محمد عظیم جٹ کے مطابق یکم جنوری 2019ء سے 30 ستمبر 2023ء تک ملتان روڈ پر پانچ ہزار 208 حادثات پیش آئے جن میں سے 13 بڑے تھے۔ ان حادثات میں پانچ ہزار 796 افراد زخمی ہوئے اور 74 افراد جان کی بازی ہار گئے۔ ان میں تین ہزار 150 گاڑیوں اور سات ہزار 234 موٹر سائیکلوں کو نقصان پہنچا۔

2021ء میں پبلک پرائیویٹ پارٹنر شپ کے تحت سڑک کی تعمیرنو کا منصوبہ طے پایا لیکن چند ماہ کی تاخیر سے اخراجات کا تخمینہ بڑھ گیا اور منصوبہ ادھورا رہ گیا۔

پنجاب کے پراجیکٹ مینجمنٹ یونٹ نے اس مقصد کے لیے حال ہی میں ساڑھے چار ارب روپے کا تخمینہ لگایا ہے۔ اس کے مطابق ٹبہ سلطان پور تک ضلع وہاڑی کے حصے میں آنے والی 60 کلومیٹر سڑک پر ایک ارب 70 کروڑ روپے لاگت آئے گی جبکہ سلطان پور سے وہاڑی چوک تک ضلع ملتان کے حصے میں آنے والے 30 کلومیٹر کی تعمیرنو دو ارب 80 کروڑ روپے میں ہو گی۔ ضلع ملتان میں سڑک دو رویہ بنانے کے لیے اطراف کی اراضی خریدنے کی ضرورت نے لاگت کا تخمینہ بڑھا دیا ہے۔ تمام سڑک دو رویہ اور 120 فٹ چوڑی ہو گی۔

محکمہ ہائی وے وہاڑی کے مطابق اعلیٰ حکام کو سڑک کی جامع مرمت اور نئی تعمیر کے لیے بھیجا جانے والا ساڑھے چار ارب روپے کا تخمینہ ابھی منظور نہیں ہوا۔

سابق ممبر صوبائی اسمبلی میاں ثاقب خورشید کہتے ہیں کہ ماضی میں مقامی ممبر قومی اسمبلی طاہر اقبال چوہدری نے عوام کو بہلانے کے لیے سڑک کا تین مرتبہ افتتاح کرایا۔ پہلے عمران خان نے وزیراعظم ہاؤس سے اس کا افتتاح کیا۔ اس کے بعد سابق وزیراعلیٰ پنجاب سردار عثمان بزدار اور سابق وزیرخارجہ شاہ محمود قریشی نے بھی افتتاح کیا، لیکن سڑک نہ بن سکی۔

اس حلقے سے پاکستان تحریک انصاف کے طاہر اقبال چوہدری ممبر قومی اسمبلی منتخب ہوئے تھے لیکن نو مئی کے واقعات کے بعد وہ مسلسل روپوش ہیں لہٰذا ان کا مؤقف نہ لیا جا سکا۔

ڈپٹی کمشنر وہاڑی سید آصف حسین شاہ کا کہنا ہے کہ پنجاب حکومت سڑک جلد از جلد تعمیر کرنے کی کوشش کر رہی ہے۔ دو سال قبل پبلک پرائیویٹ پارٹنر شپ کے تحت ایک کمپنی کے ساتھ سڑک بنانے کا معاہدہ طے پا گیا تھا لیکن میٹریل کی قیمتیں بڑھنے سے معاملہ آگے نہ بڑھ سکا۔اب تخمینہ پنجاب حکومت کو بھیج دیا گیا ہے، جوں ہی احکامات جاری ہوں گے کام شروع کروا دیا جائے گا۔

6 ہزار حادثات، 680 ہلاکتیں، میانوالی تا مظفرگڑھ روڈ ڈیڑھ سال میں 'خونی سڑک' کیسے بنی؟

"عوام کو بہلانے کے لیے سڑک کا تین مرتبہ افتتاح": ملتان وہاڑی روڈ آج بھی تعمیر نو کی منتظر ہے

انچاس سالہ اللہ رکھی وہاڑی شہر سے 13 کلومیٹر دور گاؤں 65 ڈبلیو بی میں رہتی ہیں۔ نو برس قبل ان کا جوان سال بیٹا بس سے گر کر جاں بحق ہو گیا تھا جس کے تقریباً تین سال بعد خاندان کے واحد کفیل اور ان کے شوہر شدید بیمار پڑ گئے۔

شوہر&nbsp; کی بیماری کے بعد ان کے پاس مزدوری کرنے کے سوا کوئی چارہ نہیں تھا۔ ابتدا میں کام کے نتیجے میں ہونے والی تھکاوٹ کے باعث ان کے جسم میں اکثر درد رہتا اور بخار ہو جاتا تھا لیکن اب وہ اس کی عادی ہو گئی ہیں۔

وہ کھیتوں میں کپاس کی چنائی کرتی ہیں۔ ان کا کہنا ہے کہ پہلے چنائی اچھے موسم میں ہوا کرتی تھی لیکن گزشتہ چند برسوں سے اگیتی کپاس کی چنائی جولائی اگست میں ہو رہی ہے۔ اس دوران شدید حبس ہوتا ہے جس میں کام کرنا آسان نہیں۔

روایتی طور پر کپاس کی کاشت مئی یا جون میں کی جاتی ہے اور اس کی چنائی اکتوبر میں شروع ہو کر دو تین ماہ جاری رہتی ہے۔ ان مہینوں میں موسم معتدل یا قدرے سرد ہوتا ہے اس لیے عورتیں سارا دن چنائی کرتی ہیں۔ موسمیاتی تبدیلی اور مون سون&nbsp; کی بے وقت بارشوں کے باعث بالخصوص 2014ء سے کپاس کی فصل خراب ہونا شروع ہوئی تو کاشت کار اسے فروری اور مارچ میں اگانے لگے ہیں۔

محکمہ زراعت وہاڑی کے مطابق کپاس کی اگیتی کاشت کا کوئی مخصوص ڈیٹا جمع نہیں کیا جاتا لیکن ایک اندازے کے مطابق 40 سے 45 ہزار ایکڑ پر کپاس کی اگیتی فصل کاشت کی گئی ہے جبکہ رواں سال وہاڑی میں کپاس کا&nbsp; کل زیر کاشت رقبہ دو لاکھ 20 ہزار ایکڑ ہے۔

اللہ رکھی بتاتی ہیں کہ &quot;ان دنوں میں کپاس کی چنائی صبح چھ بجے سے شام 10 بجے تک جاری رہتی ہے ۔اس دوران ایک عورت 30 سے 40 کلو تک چنائی کر لیتی ہے۔&quot;

اسی گاؤں کے کاشت کار میاں صابر کا کہنا ہے کہ کپاس کے لیے چونیاں (چننے والی) ملنا مشکل ہو گیا ہے۔ چند عورتیں ریٹ کا شکوہ کرتی ہیں تاہم زیادہ تر موسم کی شدت کے باعث کھیتوں کا رخ نہیں کرتیں حالانکہ چنائی کی اجرت بڑھا کر 12 سو روپے کر دی ہے۔ دیگر مداخل کے ساتھ کسان کا یہ خرچہ بھی بڑھ گیا ہے۔

وہ کہتے ہیں کہ جولائی اور اگست میں اگیتی کپاس سے چنائی کی جاتی ہے۔ عام طور پر 20 سے 25 عورتیں چنائی کے لیے بلائی جاتی ہیں۔ ان کے لیے ٹھنڈے پانی کا انتظام کیا جاتا ہے۔ دو افراد ہمہ وقت کھیت کے باہر رہتے ہیں تاکہ اگر کوئی عورت بے ہوش ہویا اسے چکر آئیں تو فوری ابتدائی طبی امداد دی جائے اور قریبی ہیلتھ سنٹر منتقل کیا جا سکے۔

کپاس کے کھیت میں چنائی کرنے والی 41 سالہ شمشاد بی بی کہتی ہیں کہ چند سال پہلے تک انہیں چنائی کے فوراً بعد معاوضے کی صورت میں کپاس یا موقع پر رقم دی جاتی تھی۔ اب شاید کسانوں کے اپنے حالات اتنے اچھے نہیں اس لیے بعض اوقات کئی مہینے انتظار کرنا پڑتا ہے۔

&quot;جب معاوضے میں کپاس دی جاتی تھی تب بیٹیوں کے جہیز کے لیے رضائیاں تلائیاں بنا لیتے تھے لیکن اب روئی کا ریٹ اس قدر بڑھ گیا ہے کہ اس کی خریداری ایک خواب لگتی ہے۔ ایک کلو سے چار سو گرام روئی نکل آتی ہے اور فی من چنائی کا 12 واں حصہ ملتا ہے۔&quot;

سیزن کے شروع میں مکئی کی تڑوائی اور چھلائی کی فی ایکڑ اجرت آٹھ ہزار روپے دی جاتی ہے۔ البتہ جیسے ہی دھان کی بجائی شروع ہوتی ہے عورتیں اسے چھوڑ کر دھان بیجنے لگتی ہیں جس کی فی ایکڑ اجرت 10 سے 11 ہزار روپے ہے۔ 10 عورتیں ایک دن میں ڈیڑھ ایکڑ تک بجائی کر لیتی ہیں۔

اس دوران مکئی کی تڑوائی اور چھلائی کا ریٹ بڑھ کر 13 ہزار روپے فی ایکڑ ہو جاتا ہے۔ 10 خواتین مل کر ڈیڑھ دن میں تقریباً ایک ایکڑ مکئی کی تڑوائی اور چھلائی کر لیتی ہیں۔

مکئی بیجنے کے فی ایکڑ 25 سو سے تین ہزار روپے ادا کیے جاتے ہیں۔ پانچ عورتیں صبح سات سے چار بجے تک ایک ایکڑ کی بجائی کر لیتی ہیں۔البتہ اس فصل کی بجائی کے لیے پلانٹر نامی مشین&nbsp; سے بیک وقت کھیلیاں بھی بن جاتی ہیں اور بیج بھی ڈال دیا جاتا ہے۔ اس سے بوئے گئے پودے مساوی فاصلے پر اگتے ہیں جس سے پیداوار بہتر ہوتی ہے۔ اس مشین سے مزدور عورتوں کی مانگ میں کمی آئی ہے۔

مکئی کے کھیت میں کیڑے مار ادویات چھڑکنے کی فی ایکڑ اجرت ایک ہزار سے 12 سو روپے تک ہے اور ایک فصل میں اوسطاً بجائی کے تین ہفتے بعد ہر تین ہفتے کے وقفے سے ادویات دی جاتی ہیں۔

اللہ رکھی بتاتی ہیں کہ چند روز قبل مکئی کی فصل کو ادویات دیتے ہوئے ان کی طبیعت بگڑ گئی تھی۔ ان کے پاس اتنے وسائل نہیں کہ مکمل احتیاطی تدابیر اختیار کر سکیں۔ زیادہ سے زیادہ وہ منہ پر کپڑا لپیٹ لیتی ہیں لیکن حبس کے دنوں میں یہ بھی ممکن نہیں ہوتا۔&quot;

خواتین گنا چھلائی کا فی من 15 ہزار روپے تک معاوضہ لیتی ہیں۔ گنا اور مکئی تڑوائی اور چھلائی کے لیے خواتین ٹولیوں کی صورت میں کام کرتی ہیں۔ 10 خواتین صبح سات سے شام چار بجے تک چار کنال گنا چھلائی کر لیتی ہیں۔ کچھ علاقوں میں گنا کٹائی، چھلائی اور لوڈنگ کا ریٹ 25 سے 30 روپے فی من ہے۔ اس میں خواتین کے ساتھ ساتھ مرد بھی کام کرتے ہیں۔

چک 59 ڈبلیو بی کے&nbsp; کاشت کار سجاد رفیق کا کہنا ہے کہ ان کی کل اراضی 30 ایکڑ ہے۔ وہ تین سال پہلے تک 14 ایکڑ پر کپاس کاشت کرتے تھے لیکن موسمیاتی تبدیلیوں نے کاشت کار کو بہت متاثر کیا ہے جس کی وجہ سے انہوں نے روایتی فصلوں خاص طور پر کپاس اور گندم کی کاشت بہت کم کر دی ہے۔ انہوں نے اس سیزن میں صرف چار ایکڑ پر کپاس کاشت کی ہے۔

سجاد رفیق بتاتے ہیں کہ پہلے کپاس کی چنائی جن مہینوں میں کی جاتی تھی ان میں مزدور عورتوں کی بڑی تعداد میں میسر ہوتی تھی لیکن موسمیاتی تبدیلیوں کی وجہ سے اب یہ جولائی میں شروع ہوتی ہے ۔

ان کا کہنا ہے کہ شدید موسم کی وجہ سے کھیتوں میں کام کرنے والی خواتین نے شہروں کا رخ کر لیا ہے جہاں وہ گھروں میں کام کرتی ہیں۔ تنخواہ کے ساتھ ساتھ انہیں پرانے کپڑے، جوتے اور دیگر سامان بھی مل جاتا ہے۔ اسی واسطے کپاس کے کاشت کار کو چنائی کے لیے مشکل سے ہی مزدور خواتین میسر آتی ہیں۔

ان کے مطابق&nbsp; کسان کی جانب سے ایک ہزار سے 12 سو روپے تک فی من چنائی دی جا رہی ہے۔ تاہم بڑھتی ہوئی مہنگائی سے موازنہ کیا جائے تو یہ معاوضہ بہت کم ہے۔ عورتوں کا زیادہ رجحان مکئی کی جانب ہے کیونکہ اس کی بجائی، زہر ڈالنا، صفائی، چھدرائی، کٹائی اور چھلائی سب وہی کرتی ہیں اور معاوضہ چنائی کی نسبت زیادہ ملتا ہے۔

لیبر سروے 21-2020ء کے مطابق ضلع وہاڑی میں مزدوروں کی مجموعی تعداد 11 لاکھ 60 ہزار ہے جن میں سے 51.2&nbsp; فیصد&nbsp; کا روزگار زراعت سے وابستہ ہے۔ وہاڑی میں&nbsp; مزدور عورتوں کی کل تعداد چار لاکھ نو&nbsp; ہزار ہے جن میں سے 79.2&nbsp; فیصد یعنی لگ بھگ تین لاکھ 30 ہزار اپنی روزی روٹی زراعت سے کماتی ہیں۔ یہ زیادہ تر وہی&nbsp; مزدور ہیں جو کپاس کی چنائی، مکئی کی بجائی اور چھلائی اور دھان کی بجائی کرتی ہیں۔

میری ذات ذرہِ بے نشان: 'زرعی مزدور خواتین کی مشقت کو کام تسلیم ہی نہیں کیا جاتا'۔

موسمیاتی تبدیلی نے کھیت مزدور خواتین کے لیے نئی جسمانی  اور معاشی مشکلات کھڑی کر دیں

ایک دور تھا جب وہاڑی کو سٹی آف کاٹن یعنی کپاس کا شہر کہا جاتا تھا لیکن اب صورت حال یہ کہ اس علاقے کے کسان کپاس کاشت کرنے سے قبل سو بار سوچتے ہیں۔ اب علاقے میں مکئی کی فصل تیزی سے کپاس کی جگہ لے رہی ہے۔ زیرنظر مضمون میں یہ جاننے کی کوشش کی گئی ہے کہ کسانوں نے کپاس کی کاشت سے منہ کیوں موڑا اور مکئی کی فصل نے انہیں کتنا فائدہ پہنچایا۔

وہاڑی سے شمال کی جانب حاصل پور روڈ پر چھ کلو میٹر آگے جائیں تو بھٹہ 27 سٹاپ آتا ہے۔ یہاں سے سات کلومیٹر مغرب کی جانب کرم پور روڈ پر ڈنگی پل نامی گاؤں کے 32 سالہ ملک عابد فرید نے چند سال قبل اپنے والد منظور احمد کی جگہ کاشتکاری سنبھالی ہے۔

پہلے وہ اپنی اراضی میں سے 14 ایکڑ پر ہر سال کپاس کاشت کرتے تھے۔ اس میں کبھی تو انہیں فائدہ ہوتا اور کبھی وہ گھاٹے میں رہتے۔ علاقے کے کسانوں نے گھاٹے سے بچنے اور بہتر منافعے کے حصول کے لیے دیگر فصلیں کاشت کرنا شروع کیں تو عابد فرید نے بھی اسی رحجان کی پیروی کی۔ اس حوالے سے مکئی کی فصل دیگر سے زیادہ بہتر ثابت ہوئی جس کی وجہ سے کسانوں نے کپاس کو چھوڑ کر دھڑا دھڑ مکئی اگانا شروع کر دی۔

محکمہ زراعت کے اعداد و شمار سے بھی اس بات کی تصدیق ہوتی ہے۔ 2001 سے 2022 تک وہاڑی میں کپاس کے زیر کاشت رقبے میں 81 فیصد تک کمی ہوئی جبکہ اسی دورانیے میں اس کی پیداوار 87 فیصد تک گر گئی۔

عابد فرید کہتے ہیں کہ ہر سال زرعی مداخل (کھاد، بیج، زرعی ادویات، ڈیزل) کی قیمتیں تو اوپر جاتی رہیں لیکن فصل کی پیداوار کم ہوتی گئی یوں کسان فائدے کے بجائے الٹا نقصان میں رہنے لگا۔ یہی وجہ تھی کہ کاشت کاروں نے کپاس کی کاشت سے منہ موڑنا شروع کر دیا۔

محکمہ زراعت کے ذیلی ادارے کراپ رپورٹنگ سروس کے مطابق 2001 میں ضلع وہاڑی میں چھ لاکھ چار ہزار ایکڑ رقبے پر کپاس اگائی گئی تھی جو پچھلے سال کم ہوکر صرف ایک لاکھ 15 ہزار ایکڑ تک رہ گئی تھی۔

دوسری جانب 2001 میں ضلع وہاڑی میں بہاریہ اور موسمی مکئی صرف 26 ہزار ایکڑ رقبے پر کاشت ہوتی تھی جبکہ 2022 میں اس کا زیرکاشت رقبہ بڑھ کر 6 لاکھ 57 ہزار ایکڑ تک پہنچ گیاتھا۔

عابد فرید کہتے ہیں کہ کسی زمانے میں کپاس کو کیش کراپ سمجھا جاتا تھا لیکن اب اس کی جگہ مکئی نے لے لی ہے۔ کسان کہتے ہیں کہ اگر کسی نے مکئی اگا لی تو گویا بہت بڑی رقم کا چیک اس کی جیب میں آ گیا۔ مکئی مختصر عرصہ یعنی 90 دن کی فصل ہے۔ اس لیے بھی کسان فائدے میں رہتا ہے کہ وہ اسے سال میں دو بار کاشت کرسکتا ہے۔

<h2>خرچ زیادہ آمدن کم</h2>

عابد فرید بتاتے ہیں کہ وہاڑی کے کپاس کاشت کرنے والے کسان پہلے چھ ماہ میں اس فصل سے جتنی آمدنی حاصل کرتے تھے اس سے کہیں زیادہ رقم وہ تین ماہ میں حاصل ہونے والی مکئی سے کما لیتے ہیں۔ اس کی وجہ یہ ہے کہ مکئی کی فی ایکڑ اوسط پیداوار کپاس کے مقابلے میں کئی گنا تک زیادہ ہوتی ہے۔

ان کا کہنا ہے کہ مکئی کی فصل کے لیے زمین کی تیاری پر 15 ہزار روپے فی ایکڑ خرچ آتا ہے جبکہ تین بوری یوریا نو ہزار چھ سو، دو بوری ڈی اے پی 17 ہزارروپے ، دو سپرے تین ہزار، دو تھیلے دانے دار زنک دو ہزار چار سو روپے، بیج 18 ہزار ، ہر تیسرے یا چوتھے روز پانی لگانا ہوتا ہے جس کا فی ایکڑ خرچہ 30 ہزار روپے تک آتا ہے ۔اس طرح کل خرچ فی ایکڑ تقریبا ایک لاکھ روپے بنتا ہے۔

دوسری جانب کپاس کی کاشت کے لیے ایک بوری ڈی اے پی 8500 روپے، دو بوری یوریا 6400 روپے، دو بوری گوارا 5200 روپے، بیج نو ہزار روپے، ہر پانچویں دن سپرے کرنا ہوتا ہے جس کا فی ایکڑ خرچ 24 ہزارروپے اور پانی کا خرچ تقریبا 20 ہزارروپے آتا ہے اس طرح کپاس کی کاشت پر فی ایکڑ خرچہ تقریبا 70 ہزار روپے ہوتا ہے۔

عابد فرید بتاتے ہیں کہ کپاس کی کاشت میں ایک بڑا مسئلہ ناقص بیج اور زرعی ادویات کا ہے۔ مارکیٹ میں اس قدر جعلسازی ہے کہ ایک عام کاشتکار کو اچھا بیج اور خالص زرعی دوائی ملنا مشکل ہے جس کے نتیجے میں اس کی رقم بھی خرچ ہو جاتی ہے اور فصل بھی برباد ہوتی ہے۔

اسی علاقے سے ایک اور زمیندار نوید انجم گوہر کا کہنا ہے کہ کپاس کی جگہ مکئی کاشت کرنے والے کسان کافی حد تک فائدے میں رہے ہیں چاہے اس فصل کے نرخ بھی کتنے ہی کم نہ ہوجائیں۔

وہ رواں سال مارکیٹ میں مکئی کی بہت کم قیمت کا حوالہ دیتے ہوئے کہتے ہیں کہ حالیہ دنوں اس کے فی من نرخ دو ہزار روپے تک گر چکے ہیں لیکن اس فصل کی پیداوار اس بار پہلے سے بھی زیادہ اچھی ہے اس لیے کسان پھر بھی فائدے میں رہے ہیں۔

ان کے مطابق اس مرتبہ مکئی کی فی ایکڑ پیداوار 130 من فی ایکڑ تک آرہی ہے جبکہ پچھلے سالوں میں یہ 100 من فی ایکڑ تھی اور اس مرتبہ کسانوں نے یہ فصل پہلے سے زیادہ رقبے پر اگائی ہے۔

وہ بتاتے ہیں کہ گزشتہ سیزن میں مکئی کا فی من ریٹ 2700 روپے تھا اس لیے اس بار توقع کی جا رہی تھی کہ یہ ریٹ تین ہزار سے زیادہ ملے گا لیکن طلب و رسد کے فارمولے کے حساب سے جب کاشت زیادہ ہوئی تو ریٹ تین ہزار کے بجائے کم ہو کر دو ہزار تک آ گیا۔

ان کا کہنا ہے کہ تقریبا 70 فیصد کسانوں نے اپنی مکئی اسی ریٹ کے آس پاس فروخت کر دی ہے جبکہ باقی 30 فیصد ریٹ بڑھنے کا انتظار کر رہے ہیں۔

فصل کی پیداوار 130 من فی ایکڑ اور ایک من کی قیمت دو ہزار روپے کا مطلب یہ ہے کہ ایک ایکڑ کی پیداوار دو لاکھ 60 ہزار روپے میں تیار ہوئی۔ اگر ایک لاکھ روپے خرچ نکال دیا جائے تو کسان کو تین ماہ میں ایک لاکھ 60 ہزار کا فائدہ ہوا۔

نوید انجم گوہر کے بقول ان کے ضلع میں اب بھی کپاس کی جو فصل اگائی جارہی ہے وہ روایتی کاشت یعنی مئی کے بجائے جنوری فروری کی ہے۔

ان کے خیال میں کپاس کی فصل کو سب سے زیادہ نقصان موسمیاتی تغیرات نے پہنچایا ہے۔

یہ اچھے موسم میں پنپنے والی فصل ہے لیکن پری مون سون بارشوں کی کثرت نے اسے بہت زیادہ نقصان پہنچایا ہے اس لیے اب یہاں کے کاشت کار اگر کپاس اگائیں بھی تو ان کی ترجیح ہوتی ہے کہ وہ اسے جنوری فروری میں کاشت کرلیں اور بارشوں سے پہلے اس سے اچھی پیداوار حاصل کرلیں۔

وہ نشاندہی کرتے ہیں کہ جن کاشت کاروں نے کپاس کی اگیتی فصل کاشت کی تھی ان کی اس مرتبہ فصل بہت اچھی رہی اور انہوں اب تک 20 من فی ایکڑ تک چنائی کر لی ہے جب کہ ان کی اوسط پیداوار 50 من تک بھی جا سکتی ہے اور آٹھ ہزار پانچ سو روپے فی من ریٹ بھی اچھا ہے اس لیے وہ فائدے میں رہے۔

لیکن باقی 70 فیصد کاشتکار پچھیتی کاشت والے ہیں جنہوں نے گندم کی فصل اٹھا کر اپریل میں کپاس کی بجائی کی تھی۔ ان کی فصل زیادہ بہتر نہیں ہے اس لیے انہیں نقصان ہو سکتا ہے کیونکہ اس فصل کو سب سے زیادہ موسم نے متاثر کیا اور انہیں بیج بھی زیادہ مدافعت والا نہ مل سکا۔

اس کے علاوہ سفید مکھی اور سبز تیلے کے حملے سے بھی فصل متاثر ہوئی اور رہی سہی کسر زیادہ بارشوں نے پوری کر دی۔

پاکستان کسان اتحاد کے مرکزی جنرل سیکرٹری چوہدری افتخار احمد کا کہنا ہے کہ کپاس کی اگیتی کاشت کرنے والے کاشتکار کسی حد تک فائدے میں رہے ہیں لیکن گندم کی کٹائی کے بعد کپاس کاشت کرنے والوں کی فصل کی حالت بہت بری ہے اور وہ مکمل طور پر نقصان میں ہیں لیکن مکئی کاشت کرنے والوں کی صورت حال ان کے مقابلے میں بہتر ہے کیونکہ اس سیزن میں موسم اچھا رہا تو وہ کسان جس کی فی ایکڑ پیداوار 80 سے 90 من آتی تھی اس کی پیداوار 110 سے 130 من فی ایکڑ آئی ہے۔

افتخار چوہدری کے مطابق ریٹ کے کم ہونے میں طلب و رسد کے تکنیکی فارمولے کا عمل دخل نہیں ہے بلکہ اس کی دو وجوہات ہیں۔ پہلی وجہ سویابین کی امپورٹ پر پابندی ہے جس کی وجہ سے پولٹری فیڈ کی پیداوار بہت کم ہوئی۔

پاکستان میں مکئی کی پیداوار کا بڑا حصہ پولٹری فیڈ کی تیاری میں استعمال ہوتا ہے اس کے علاوہ چکن کے ریٹ میں بے تحاشہ اضافے سے بھی فروخت میں نمایاں کمی آئی جس کے پیش نظر پولٹری کی پیداوار بھی کم کر دی گئی۔

دوسری وجہ بین الاقوامی مارکیٹ میں مکئی کی مجموعی قیمت کا کم ہو جانا ہے۔ چونکہ اس سے قبل عالمی سطح پر مکئی کاریٹ زیادہ تھا اس لیے پاکستان سے بڑی مقدار میں مکئی برآمد کی جاتی تھی لیکن ریٹ میں کمی کی وجہ سے مکئی کی برآمد میں نمایاں کمی آئی ہے اور مقامی سطح پر اس کی قمیت فروخت میں ایک ہزار روپے تک کمی دیکھنے کو ملی۔

کسانوں کی ایک اور غیر سرکاری تنظیم کسان اتحاد پاکستان کے ضلعی صدر محمد اکرم کمبوہ کے خیال میں کپاس کی پیداوار میں کمی سے وہاڑی کو معاشی طور پر بہت زیادہ نقصان ہوا ہے۔

ان کا کہنا ہے کہ آج سے دس پندرہ سال پہلے جب یہاں پر کپاس کی اچھی پیداوار تھی تو ناصرف کسان خوشحال تھا بلکہ بے زمین خاندانوں کے حالات بھی کافی بہتر تھے۔ کیوں ان خاندانوں کی اکثر خواتین کپاس کی چنائی سے کنبے کے لیے سال بھر کی خوراک کا بندوبست کرلیتی تھیں۔ 
&quot;اس کے علاوہ شہر میں پانچ سو کے قریب جننگ فیکٹریاں، بنولہ کا تیل بنانے والے کئی کارخانے بند ہوگئے ہیں جن میں ہزاروں کی تعداد میں مزدور کام کرتے تھے۔&quot;

ان کا ماننا ہے کہ 90 کی دہائی میں وہاڑی وہ ضلع تھا جہاں دوسرے شہروں حتیٰ کے دوسرے صوبوں سے بھی مزدور آکر کام کرتے تھے لیکن اب یہاں کے مزدوروں کو گھر کی روزی روٹی کے لیے ملتان، فیصل آباد، لاہور اور کراچی جیسے شہروں کی طرف رخ کرنا پڑ رہا ہے۔

اکرم کمبوہ کے مطابق کپاس نہ ہونے کی وجہ سے اس شہر کی معیشت کو جتنا نقصان ہوا ہے مکئی کی کاشت شاید اس کو کبھی پورا نہیں کر سکتی۔

وہاڑی میں کپاس چھوڑ کر مکئی کاشت کرنے والوں کو کم قیمت کیوں مل رہی ہے؟

تین ماہ میں بھاری منافع: کاٹن سٹی وہاڑی میں کپاس کی جگہ مکئی 'کیش کراپ' بن گئی

2017ء میں وہاڑی کے ڈپٹی کمشنر علی اکبر بھٹی نے چند شعرا کو اپنے دفتر میں مدعو کیا اور اس دوران لاہور کے پاک ٹی ہاؤس کی طرز پر شہر میں ایک ادبی مرکز تعمیر کرنے کی خواہش کا اظہار کیا۔

انہوں نے تجویز دی کہ ادب کے فروغ اور شاعروں اور ادیبوں کے مل بیٹھنے کے لیے آفیسرز کلب میں ٹی ہاؤس بنایا جائے اور اس کی تعمیر کے لیے فنڈزسرکاری خزانے کے بجائے شہر کے صاحب حیثیت افراد سے لیے جائیں۔

اس موقع پر میونسپل پبلک لائبریری کے سابق لائبریرین سید وقاص سعید نے ٹی ہاؤس آفیسرز کلب کے بجائے لائبریری کے احاطے میں تعمیر کرنے کی تجویز دی۔

اپنی تجویز کے حق میں دلائل دیتے ہوئے ان کا کہنا تھا کہ پبلک لائبریری کے پاس وسیع جگہ موجود ہے اور یہ شہر کے وسط میں بھی ہے۔ دوسری بات یہ کہ کتاب اور ٹی ہاؤس کا آپس میں گہرا تعلق ہے۔ انہوں اس خدشے کا اظہار بھی کیا کہ بالائی طبقے کے لیے بنائے گئے آفیسرز کلب میں متوسط طبقے کے شاعروں اور ادیبوں کی موجودگی کو شاید پسند نہیں کیا جائے گا۔

ان کے بقول، اس موقع پر ساتھی شاعروں نے یہ کہہ کر انہیں خاموش کرا دیا کہ یہ بات ڈپٹی کمشنر کی طبع پر گراں گزرے گی اور ہو سکتا ہے وہ ٹی ہاؤس کا ارادہ ہی ترک کر دیں۔

مقامی کالج کے لیکچرار ڈاکٹر اکرم عتیق شاعری بھی کرتے ہیں۔ انہوں نے بتایا کہ ڈپٹی کمشنر سے ملاقات میں ٹی ہاؤس کا آئین مرتب کرنےکے لیے ایک کمیٹی مقرر کرنےاور درجہ چہارم کے دو سے تین سرکاری ملازمین کی خدمات لینے پر اتفاق ہوا۔

ٹی ہاؤس کی عمارت بنانے پر لگ بھگ 25 لاکھ روپے خرچ ہوئے جو چند ماہ میں مکمل ہو گئی اور اس کی رکنیت کے لیے شعر و ادب سے تعلق رکھنے 27 افراد نے فی کس 1500 روپے جمع کرائے۔

ٹی ہاؤس کےافتتاح کی تاریخ طے کر دی گئی لیکن اس سے پہلے ہی ڈپٹی کمشنر کا تبادلہ ہو گیا۔ تاہم طے شدہ تاریخ سے دو دن قبل وہ جیسے تیسے ٹی ہاؤس کا افتتاح کر گئے۔

نئے آنے والے ڈپٹی کمشنر عرفان علی کاٹھیا نے ٹی ہاؤس کے معاملے میں دلچسپی لینے کے بجائے آفیسرز کلب کو جم خانہ بنانے پر توجہ مرکوز رکھی۔ انہوں نے وہاڑی جم خانہ کی عمارت تعمیر ہونے پر ٹی ہاؤس کو اس کا حصہ بنا کر کیفے سیفرون کا نام دے دیا۔

جم خانہ کی مرکزی عمارت میں سگریٹ نوشی کی اجازت نہیں ہے، لہٰذا جس نے سگریٹ پینا ہو وہ کیفے سیفرون کا رخ کرتا ہے۔ اب یہاں زیادہ تر لوگ کیفے میں چائے پیتے اور سگریٹ کے&nbsp; کش لگانے والے نظر آتے ہیں۔

وہاڑی جم خانہ کے سیکرٹری میاں محمد اقبال کے مطابق ٹی ہاؤس بننے کے بعد اس میں چند ہی ادبی تقریبات کا انعقاد عمل میں آ سکا۔ اس کے بعد یہ غیرفعال ہو گیا اور اس میں شہر کے ادباء و شعراء نے بھی کوئی دلچسپی نہ لی۔

وہاڑی کے موجودہ ڈپٹی کمشنر سید آصف حسین شاہ ٹی ہاؤس کے قیام کے دوران شہر میں بطور اسسٹنٹ کمشنر تعینات تھے۔ ان کا کہنا ہے کہ شعرا کی عدم دلچسپی کے باعث ٹی ہاؤس میں ادبی سرگرمیوں کا انعقاد نہ ہو سکا۔ چنانچہ جب آفیسرز کلب جم خانہ میں تبدیل ہوا تو&nbsp; ٹی ہاؤس نے اس اس کا حصہ بننا ہی تھا۔

ان کا یہ بھی کہنا ہے کہ اگر جم خانہ انتظامیہ ٹی ہاؤس کی عمارت کو اپ گریڈ نہ کرتی تو یہ اب تک کھنڈر بن جانا تھا۔

اس معاملے میں شعرا کا موقف یہ ہے کہ انتظامیہ نے ٹی ہاؤس کی کمیٹی بنانا تھی اور اس کے بعد اس نے اپنی سرگرمیوں کا آغاز کرنا تھا۔ لیکن ڈپٹی کمشنر کے تبادلے کے بعد کمیٹی نہ بن سکی اور نئے ڈپٹی کمشنر جم خانہ کے لیے سرگرم ہو گئے۔

بعض ادیبوں کو شکایت ہے کہ علی اکبر بھٹی نے ٹی ہاؤس کے قواعد و ضوابط بنانے اور انہی کے تحت اسے چلانے کی بات کی تھی لیکن نہ تو انہوں نے اس پر عمل کیا اور نہ ہی ٹی ہاؤس کی ذمہ داریاں کسی اور افسر کو منتقل کیں۔

مقامی شاعر سید جمیل حسین شاہ نے ٹی ہاؤس کی تعمیر کے لیے جمع ہونے والی رقم میں مبینہ بدعنوانی پر علی اکبر بھٹی کے خلاف ایک درخواست محکمہ اینٹی کرپشن لاہور کے نام ارسال کی تھی۔

اس درخواست میں یہ بھی کہا گیا تھا کہ یہ عمارت ادیبوں کے لیے بنائی گئی ہے، اسے جس جگہ پر تعمیر کیا گیا ہے وہ سرکاری ہے اور اس کی تعمیر میں عوام کا پیسہ استعمال ہوا ہے تو اس جگہ کو ادیبوں کے حوالے کیوں نہیں کیا جا رہا۔

جمیل حسین کے مطابق لاہور سے یہ درخواست وہاڑی میں اینٹی کرپشن کے دفتر ریفر کر دی گئی۔ وہاں سے اسے ڈپٹی کمشنر کے دفتر کو ریفر کر دیا گیا جبکہ شکایت بھی اسی دفتر میں سابق ڈپٹی کمشنر کے خلاف تھی۔

شعرا کی تنظیم ادب اجالا کے رہنما ڈاکٹر ندیم اکبر ندیم بتاتے ہیں کہ وہاڑی ٹی ہاؤس بننے کے بعد اس میں پانچ مشاعرے بھی ہوئے۔ ان میں سے دو سرکاری سطح پر منعقد کرائے گئے جس سے ثابت ہوتا ہے کہ ٹی ہاؤس میں ادبی سرگرمیوں کا آغاز ہو چکا تھا۔

ندیم اکبر دعویٰ کرتے ہیں کہ&nbsp; اندازے کے مطابق ٹی ہاؤس کے لیے تقریباً 70 لاکھ روپے جمع ہو گئے تھے جن میں سے اس کی عمارت بنانے پر بمشکل 20 لاکھ روپے ہی خرچ ہوئے۔

ایک تاجر رہنما کی طرف سے عمارت کے لئے مفت سیمنٹ دیاگیا اور بھٹہ خشت مالکان کی طرف سے اینٹیں بھی بلامعاوضہ فراہم کی گئیں۔ اس کے علاوہ سماجی تنظیم پلان پاکستان کی طرف سے بھی ٹی ہاؤس کے لئے سامان مہیا کیا گیا تھا۔ انہی حقائق کو مدنظر رکھتے ہوئے&nbsp; محکمہ اینٹی کرپشن کو درخواست دی گئی کہ باقی رقم کے بارے میں انکوائری کرائی جائے لیکن بات آگے نہیں بڑھ سکی۔

ان کا کہنا ہے کہ ضلعی انتظامیہ کو چاہئیے وہ سرکاری افسروں کی ایک کمیٹی بنا دے جو ٹی ہاؤس کے معاملات چلائے، اس میں دوبارہ رکنیت سازی اور تقریبات کا انتظام کرے اور کچھ عرصہ کے بعد یہ ذمہ داریاں شاعروں اور ادیبوں کے سپرد کر دی جائیں۔ اس طرح ادارے کو اب بھی فعال بنایا جا سکتا ہے۔

&nbsp;

آرٹ اور ادب کے راستے شناخت کا سفر

حسرت ان غنچوں پہ ہے ۔۔۔ وہاڑی میں ادیبوں کے لئے سرکاری سرپرستی میں بنایا جانے والا ٹی ہاؤس ناکام کیوں ہوا؟

وہاڑی سے 11 کلو میٹر کے فاصلے پر بوریوالا کے راستے میں چک 19 ڈبلیو بی آتا ہے۔ یہاں بڑی تعداد میں ڈھڈی جٹ برادری آباد ہے۔ یہاں کی خاص بات یہ ہے کہ پولیس اس گاؤں میں جانے سے کتراتی ہے اس لیے اسے وہاڑی کا نو گو ایریا بھی کہا جاتا ہے۔

اسی گاؤں کا رہائشی 16 سالہ علی شیر چند روز پہلے مبینہ پولیس مقابلے میں ہلاک ہو گیا۔

وہاڑی پولیس کے مطابق اتوار نو اپریل کو چک 557 ای بی کے قریب تین نامعلوم ملزم موٹر سائیکل چھین کر فرار ہوئے تھے۔ پولیس ہیلپ لائن 15 پر اس واقعے کی اطلاع موصول ہونے کے بعد اہم جگہوں پر ناکہ بندی کر دی گئی۔

چک 4 ڈبلیو بی کے قریب ناکہ بندی پوائنٹ پر ملزموں کا پولیس سے سامنا ہو گیا۔ پولیس نے انہیں رکنے کا اشارہ کیا تو ملزموں نے فائرنگ کر دی۔ اہلکاروں نے آڑ لے کر جوابی فائرنگ کی اور اس دوران ایک نامعلوم ڈاکو اپنے ہی ساتھیوں کی فائرنگ کی زد میں آکر ہلاک ہو گیا۔ اس کے دونوں ساتھی اندھیرے کا فائدہ اٹھاتے ہوئے فرار ہو گئے۔

&quot;ہلاک ہونے والا نوجوان علی شیر ولد شکیل احمد تھا۔&#39;&#39;

علی شیر کے دادا طالب حسین نے لوک سجاگ کو بتایا کہ ان کا پوتا دسویں جماعت میں پڑھتا&nbsp; تھا اور ان دنوں اس کے سالانہ امتحان تھے۔ وہ دو پیپر دے چکا تھا اور جس روز اس کی ہلاکت ہوئی اس دن وہ ماچھی وال کے ایک سکول میں بنائے گئے امتحانی مرکز میں فزکس کا پیپر دے رہا تھا۔

&quot;میں امتحانی مرکز کے باہر اس کا انتظار کر رہا تھا کہ اچانک پولیس کی گاڑی آئی اور اہلکار ڈیوٹی پر کھڑے گارڈ کو دھکا دے کر اندر داخل ہو گئے اور علی شیر کو باہر لے آئے۔ جب میں نے پولیس اہلکاروں سے پوچھا کہ اسے کہاں لے جا رہے ہیں تو انہوں نے مجھے دھکا دے کر پرے کیا اور اسے گاڑی میں ڈال کر چلے گئے۔&#39;&#39;

طالب حسین بتاتے ہیں کہ وہ فوری طور پر تھانہ ماچھی وال گئے۔ان کے ذہن میں یہی تھا کہ شاید یہ امتحان میں نقل کا کوئی معاملہ ہے۔ تھانے پہنچ کر انہیں پتا چلا کہ علی شیر کو سی آئی اے پولیس کے حوالے کر دیا گیا ہے۔

&quot;سی آئی اے سے بھی رابطہ کیا گیا لیکن کچھ پتہ نہیں چل رہا تھا اسی دوڑ بھاگ میں شام ہو گئی۔ گاؤں کے لوگوں نے مشورہ دیا کہ صبح ڈی پی او وہاڑی سے جا کر ملیں تو وہ داد رسی کریں گے اور آپ کے پوتے کی ضمانت ہو جائے گی۔ لیکن اگلے روز اس وقت ہم پر قیامت ٹوٹ پڑی جب علی الصبح سوشل میڈیا کے ذریعے معلوم ہوا کہ علی شیر کو پولیس مقابلے میں جان سے مار دیا گیا ہے&quot;۔

طالب حسین سوال کرتے ہیں کہ پولیس 16 سالہ طالب علم کو سکول سے اٹھا کر رات کے اندھیرے میں قتل کر دے تو اس سے بڑی لاقانونیت اور کیا ہو گی؟

علی شیر کے خاندان نے گاؤں کے سیکڑوں لوگوں سمیت احتجاج کرتے ہوئے وہاڑی کا مرکزی وی چوک بلاک کر دیا جس سے کئی گھنٹے ٹریفک بلاک رہی۔ علی شیر کے خاندان کے دو بڑے مطالبات تھے کہ قاتلوں کے خلاف کارروائی کی جائے اور اس کی میت ورثا کے حوالے کی جائے۔

علی شیر کے اہلخانہ کا کہنا ہے کہ پولیس میت دینے سے انکار کررہی تھی اور ان سے کہا جا رہا تھا کہ وہ خود اس کی تدفین کر دیں گے لیکن علی شیر کی والدہ اور بہنوں کو یہ بات کسی صورت قبول نہ تھی۔

سوشل میڈیا پر جب اس ہلاکت کو لے کر پولیس کو تنقید کا نشانہ بنایا جانے لگا تو پولیس کی جانب سے یہ معلومات جاری کی گئیں کہ علی شیر پانچ مقدمات میں ریکارڈ یافتہ تھا جبکہ اس کے بھائی ثاقب پر 12 مقدمات، دوسرے بھائی آصف پر تین، جبکہ والد شکیل احمد پر 45 مقدمات قائم ہیں۔

سینئر قانون دان عبدالوہاب بلوچ کہتے ہیں کہ ملزم اور مجرم میں فرق ہوتا ہے۔ قانون شکنی پر مقدمہ درج ہونے کے بعد جس پر الزام ہوتا ہے وہ شخص ملزم کہلاتا ہے۔ اس کے مجرم ہونے کا فیصلہ عدالت نے کرنا ہوتا ہے اس لیے پولیس کا ملزم کو ریکارڈ یافتہ ظاہر کرکے صفائی پیش کرنا مناسب نہیں ہے۔

علی شیر کی والدہ نے لوک سجاگ کو بتایا کہ ان کے معصوم بچے کو سکول سے اٹھا کر بے دردی سے قتل کیا گیا ہے۔

&quot;میرے بچے پر ظلم کے پہاڑ توڑے گئے تھے اس کے ہاتھوں کی انگلیاں توڑ دی گئی تھیں۔ پورے جسم پر تشدد کے نشان تھے۔ اس کے سر میں تیز دھار آلے سے ضرب لگا کر زخمی کیا گیا۔ آخر اس نے ایسا کون سا جرم کیا تھا کہ اس سفاکیت کے ساتھ اس کی جان لی گئی اور 40 گھنٹے&nbsp; تک ہمیں اس کا چہرہ تک دیکھنے نہیں دیا گیا۔ میں روتی رہی فریاد کرتی رہی لیکن ظالموں کو رحم نہ آیا میرے بیٹے کو جان سے مار کر سڑک پر پھینک دیا گیا اور سینے پر پستول رکھ کر پولیس مقابلہ ظاہر کیا گیا&quot;۔

علی شیر کی پھوپھی سکول ٹیچر ہیں۔ انہوں نے لوک سجاگ بتایا کہ جب طالب علم پیپر دینے جاتا ہے تو سب سے پہلے امتحانی مرکز کے دروازے پر گارڈ اور اس کے بعد امتحانی عملہ اس کی اچھی طرح تلاشی لیتا ہے۔ رول نمبر سلپ کی تصویر سے شناخت مکمل کرنے کے بعد اسے پیپر دینے کی اجازت ملتی ہے۔

&quot;ایسے میں اس کے پاس پستول کیسے ہو سکتا ہے جبکہ پولیس کا کہنا ہے کہ اس کے پاس پستول تھا۔ اس کے علاوہ پولیس نے سکول گارڈ کی اجازت، وارنٹ گرفتاری اور امتحانی مرکز کے سپرنٹنڈنٹ سے اجازت لیے بغیر علی شیر کو کمرہ امتحان سے پیپر دیتے ہوئے گرفتار کیا۔ اس سے واضح ہوتا ہے کہ پولیس مقابلہ ایک من گھڑت کہانی کے سوا کچھ نہیں&quot;۔

علی شیر کی بہن بی ایس انگریزی کی طالبہ ہیں۔ انہوں ںے لوک سجاگ کو بتایا کہ&nbsp; ان کے بے قصور بھائی کو قتل کر کے سوشل میڈیا پر وائرل کیا گیا۔

جس بھائی کو ہم نے کبھی تھپڑ تک نہیں مارا تھا اسے بدترین تشدد کا نشانہ بنایا گیا 40 گھنٹے تک مردہ خانے میں رکھا لیکن اس ایک جھلک تک نہ دیکھنے دی گئی&quot;۔

پچھلے تین سال کے دوران وہاڑی میں 21 مبینہ پولیس مقابلے ہو چکے ہیں جن میں 24 افراد ہلاک اور تین پولیس اہلکاروں سمیت 11 افراد زخمی ہوئے۔

رواں سال پولیس مقابلوں میں تیزی آئی ہے اور اب تک ایسے 12 مبینہ واقعات پیش آ چکے ہیں جن میں 12 افراد ہلاک اور ایک کانسٹیبل سمیت تین زخمی ہوئے۔

جب اس مبینہ پولیس مقابلے کے بارے میں ڈی ایس پی صدر سرکل وہاڑی رانا سلیم سے سوال کیا گیا تو ان کا کہنا تھا کہ علی شیر کا سارا خاندان جرائم پیشہ ہے۔

&quot;پولیس نے کسی سے زیادتی نہیں کی بلکہ میرٹ پر اپنی ڈیوٹی انجام دی ہے۔ پولیس مقابلہ ہوا جس میں علی شیر ہلاک ہوگیا۔اس کے بعد اس کے خاندان کی جانب سے احتجاج کے نام پر جو حالات پیدا کیے گئے وہ نہیں ہونے چاہیے تھے۔ انہوں نے پولیس کو بدنام کرنے کی پوری کوشش کی ہے لیکن ہم اپنی ڈیوتی کرتے رہیں گے۔ ہم نے آئی جی پنجاب کی ہدایات پر عمل کرتے ہوئے جرائم کی روک تھام کے لیے کوشش کرنی ہے&quot;۔

ایک سوال کے جواب میں رانا سلیم نے کہا کہ علی شیر کے خاندان کے مطالبے پر معاملے کی تفتیش کا آغاز کر دیا گیا ہے اگر اس میں پولیس اہلکار قصور وار ہوئے تو انہیں بھی سزا ملے گی۔

قانون دان عبدالوہاب بلوچ کا کہنا ہے کہ علی شیر کی عمر 16 سال تھی جو قانوناً کم عمری ہے اور اگر ایسا فرد کوئی سنگین جرم کر لے تو وہ بھی قابل ضمانت ہوتا ہے اور نوعمر افراد کے لیے جیل کے اندر بھی الگ سیل بنائے جاتے ہیں۔

&quot;کریمنل پروسیجر کوڈ کی شق 173 کے تحت پولیس اس بات کی پابند ہوتی ہے کہ شواہد اکٹھے کر کے ملزم کو عدالتی کارروائی کے لیے پیش کر دے۔ پولیس کے پاس سزا دینے کا کوئی آئینی اختیار نہیں ہے&quot;۔

انہوں نے کہا کہ علی شیر کو پولیس مقابلے میں قتل کر کے اس کا منصفانہ قانونی کارروائی کا بنیادی حق بھی غصب کیا گیا ہے۔

&nbsp;سینئر قانون دان میاں جعفر علی کا کہنا ہے کہ اس واقعے کے بعد پولیس کے خلاف صرف &quot;رپٹ ورشن&quot; درج ہوئی ہے۔جس کا مطلب &#39;&#39;تفتیش کا آغاز&#39;&#39;&nbsp; ہے۔

&quot;اگر ابتدائی تفتیش میں واضح ہو کہ پولیس اہلکار قصوروار ہیں تو تب ہی ان کے خلاف مقدمہ درج ہو سکے گا&quot;۔&nbsp;

باڑہ میں سکول ٹیچر کی پولیس کے ہاتھوں موت: 'وہ دہشت گرد نہیں، علم دوست انسان تھا'۔

وہاڑی 16 سالہ نوجوان کی مبینہ پولیس مقابلے میں ہلاکت: 'پولیس کے پاس سزا دینے کا کوئی آئینی اختیار نہیں ہے'

وہاڑی کے علاقے نو۔گیارہ ڈبلیو بی کی منظوراں بی بی کو عصر کی نماز پڑھتے ہوئے بائیں بازو میں درد محسوس ہوا جس نے کچھ ہی دیر میں شدت اختیار کر لی۔ جب درد ناقابل برداشت ہو گیا تو ان کے اہلخانہ نے 1122 پر ایمبولینس کے لیے کال کی جس نے انہیں ڈسٹرکٹ ہیڈکوارٹر ہسپتال پہنچا دیا۔

منظوراں بی بی کے شوہر ارشاد حسین بتاتے ہیں کہ ہسپتال کی ایمرجنسی میں ابتدائی چیک اپ اور ٹیسٹ کرنے کے بعد ڈاکٹروں نے بتایا کہ ان کی اہلیہ کو دل کا دورہ پڑا ہے۔ چونکہ منظوراں کی حالت تیزی سے بگڑ رہی تھی اس لیے انہوں ںے ہسپتال کے عملے سے درخواست کی کہ وہ امراض دل کے کسی ماہر ڈاکٹر کو بلوا لیں۔ لیکن انہیں بتایا گیا کہ اگر سپیشلسٹ ڈاکٹر سے علاج کرانا ہے تو ان کے نجی ہسپتال جانا پڑے گا کیونکہ سرکاری ہسپتال میں ان کی ڈیوٹی کا وقت ختم ہو گیا تھا۔

چاروناچار منظوراں کے اہلخانہ انہیں ڈاکٹر کے نجی کلینک میں لے گئے لیکن وہاں پہنچ کر پتا چلا کہ ڈاکٹر ایمرجنسی کے مریضوں کا نجی ہسپتال میں معائنہ نہیں کرتے۔ چنانچہ یہ لوگ دوبارہ ڈی ایچ کیو ہسپتال واپس آ گئے جہاں ڈاکٹروں نے انہیں بتایا کہ مریضہ کو ملتان کے نشتر ہسپتال میں ریفر کرنا ہو گا۔

چنانچہ جب انہوں نے ملتان جانے کے لیے ریسکیو 1122 پر ایمبولینس منگوانے کے لیے کال کی تو انہیں بتایا گیا کہ رات آٹھ بجے کے بعد مریضوں کو دوسرے شہروں میں منتقل کرنے کی سروس بند کر دی جاتی ہے اور اس وقت رات کے نو بج چکے تھے۔

ریسکیو 1122 کی ایمبولینس میں تربیت یافتہ عملے اور آکسیجن کی موجودگی کے باعث مریض کو دوران سفر سنبھالنا آسان ہوتا ہے۔ تاہم سہولت دستیاب نہ ہونے کے باعث انہوں نے نجی ایمبولینس تلاش کی جس کا ان سے 12 ہزار روپے کرایہ طلب کیا گیا جو معمول سے کہیں زیادہ تھا لیکن مریضہ کی نازک حالت کے باعث اہلخانہ نے یہ کرایہ دے کر انہیں نشتر ہسپتال پہنچایا جہاں مطلوبہ علاج میسر آنے کے باعث ان کی جان بچ گئی۔

ارشاد حسین شکوہ کرتے ہیں کہ ضلعی ہیڈ کوارٹر میں اتنی بھی سہولت نہیں ہے کہ رات کے وقت ایمرجنسی کے مریضوں کو بہتر انداز میں ڈیل کیا جا سکے اور ڈاکٹر اس قدر سنگ دل ہو چکے ہیں کہ ہنگامی صورتحال میں بھی مریضوں کو چیک نہیں کرتے۔

&#39;&#39;رات 8 بجے کے بعد 1122 ایمبولینس کی عدم دستیابی کا کوئی جواز نہیں بنتا کیونکہ محکمے کے پاس ہنگامی صورتحال سے نمٹنے کے لیے عملہ اور ضروری سازوسامان بھی موجود ہوتا ہے۔ ایسے میں مریضوں کو منتقل کرنے سے انکار کرنا ان کی جان کو خطرے میں ڈالنے کے مترادف ہے۔&#39;&#39;

ارشاد حسین مطالبہ کرتے ہیں کہ 1122 کی ایمرجنسی سروس 24 گھنٹے کے لیے چلائی جائے تاکہ جن مریضوں کا علاج ڈی ایچ کیو میں ممکن نہ ہو انہیں فوری طور پر بحفاظت ملتان یا بہاولپور شفٹ کیا جا سکے۔

دوسری جانب ریسکیو 1122 کے وہاڑی میں ضلعی ایمرجنسی افسر دانش خلیل کا کہنا ہے کہ رات 8 بجے کے بعد بھی مریضوں کو منتقل کرنے کی سروس چلتی ہے لیکن اس کے لیے ڈی ایچ کیو ہسپتال کے میڈیکل سپرنٹنڈنٹ کی جانب سے تحریری اطلاع دی جانا ضروری ہے۔

&#39;&#39;یہ اصول پورے پنجاب میں رائج ہے کیونکہ رات کے وقت اکثر ایسے مریض بھی دوسرے شہروں کو ریفر کر دیے جاتے ہیں جن کی حالت زیادہ خطرناک نہیں ہوتی اور جن کا ڈی ایچ کیو ہسپتال میں بھی علاج ہو سکتا ہے۔&#39;&#39;

جب ان سے پوچھا گیا کہ ریسکیو 1122 کا آپریٹر مریض کے لواحقین کو یکسر انکار کرنے کے بجائے انہیں ایمبولینس کے حصول کے لیے میڈیکل سپرنٹنڈنٹ سے اجازت نامہ لینے کے طریقہ کار کے بارے میں کیوں نہیں بتاتا تو ان کے پاس اس کا کوئی جواب نہیں تھا۔

جب ان سے گزشتہ چھ ماہ کے دوران رات 8 بجے کے بعد دوسرے شہروں میں شفٹ کیے گئے مریضوں کی تفصیل مانگی گئی تو وہ کوئی معلومات نہ دے سکے۔

ڈی ایچ کیو ہسپتال کے ایک ڈاکٹر نے تصدیق کی کہ ریسکیو 1122 کا عملہ رات 8 بجے کے بعد ریفر کیے جانے والے مریضوں کو دوسرے ہسپتالوں میں منتقل نہیں کرتا۔ ان کا کہنا تھا کہ ایمرجنسی وارڈ میں ڈاکٹر اسی مریض کو ہی دوسرے ہسپتال جانے کو کہتے ہیں جسے بہتر علاج کی ضرورت ہوتی ہے یا جس کی جان کو خطرہ ہوتا ہے۔ اگر ریسکیو 1122 کے عملے کو یہ محسوس ہوکہ کسی مریض کو بلاوجہ ریفر کیا گیا ہے تو انہیں ہمیں اس سے آگاہ کرنا چاہیے۔

ریسکیو 1122 کے میڈیا کوآرڈینیٹر کے مطابق ریفر کیے گئے مریضوں کو شفٹ کرنے کے لیے وہاڑی سٹیشن پر تین گاڑیاں ہیں جو لگاتار سروس فراہم کرتی ہیں اور روزانہ اوسطا 18 مریض شفٹ کیے جاتے ہیں۔

&#39;&#39;ہمارا عملہ اس قدر مصروف ہوتا ہے کہ اس کے پاس کھانا کھانے کا وقت بھی نہیں بچتا۔ ایمرجنسی کے ایک مریض کو منتقل کرنے میں چھ گھنٹے لگتے ہیں۔ بعض اوقات ملتان کے ڈاکٹر ہم پر برہم ہوتے ہیں کہ آپ ایسے مریضوں کو لے آتے ہیں جنہیں ہنگامی طبی امداد کی ضرورت نہیں ہوتی۔&#39;&#39;

جھنگ سے تعلق رکھنے والے مختار حسین راولپنڈی سے وہاڑی کے درمیان بس چلاتے ہیں۔ کچھ عرصہ پہلے وہاڑی کے بس اڈے پر انہیں دل کی تکلیف ہوئی تو ساتھیوں نے انہیں ڈسٹرکٹ ہیڈکوارٹر ہسپتال پہنچایا۔ طبعیت زیادہ خراب ہونے پر ڈاکٹروں نے ان کے اہلخانہ کو بلوایا اور انہیں ملتان کے پنجاب انسٹیٹیوٹ آف کارڈیالوجی میں لے جانے کو کہا کیونکہ ان کی حالت نازک تھی۔

مختار کے بھانجے تنویر احمد بتاتے ہیں کہ رات ساڑھے دس بجے جب انہوں نے ریسکیو 1122 کو کال کی تو انہیں جواب ملا کہ آٹھ بجے کے بعد سروس نہیں چلتی۔ جب انہیں بتایا گیا کہ مریض کی حالت انتہائی نازک ہے تو فون بند کر دیا گیا۔ 
ارشاد حسین کی طرح تنویر بھی نجی ایمبولینس کو 13 ہزار روپے دے کر مریض کو ملتان لے گئے جہاں بمشکل ان کی جان بچائی گئی۔

وہاڑی کے سماجی رہنما حافظ عبداللہ ملک کا کہنا ہے کہ رات کے وقت ایمرجنسی وارڈ میں عموماً وہی مریض لائے جاتے ہیں جن کی حالت زیادہ خراب ہوتی ہے۔ ایسے مریض کو دیکھ کر ڈیوٹی پر موجود کوئی کوئی بھی ڈاکٹر یہ اندازہ کر سکتا ہے کہ اسے بہتر علاج کے لیے کسی دوسرے ہسپتال ریفر کیا جانا چاہیے یا نہیں۔ ایسے میں ایمبولینس کے لیے صرف میڈیکل سپرنٹنڈنٹ سے اجازت لینے کی شرط مضحکہ خیز ہے۔

ڈسٹرکٹ ہیڈ کوارٹر ہسپتال وہاڑی کے میڈیکل سپرنٹنڈنٹ ڈاکٹر احمد فراز&nbsp; مریضوں کو 1122 کی ایمبولینس میں شفٹ کرنے کے لیے اپنے اجازت نامے کی شرط سے انکار کرتے ہیں۔

&#39;&#39;کئی مرتبہ مجھے خود بھی ریسکیو 1122 سروس سے مریضوں کو ہنگامی بنیادوں پر دوسرے ہسپتالوں میں منتقل کرنے کی درخواست کرنا پڑی لیکن جواب میں یہی بتایا گیا کہ پالیسی کے مطابق آٹھ بجے کے بعد ریفر ہونے والے مریض شفٹ نہیں کیا جا سکتا۔ اس سے واضح ہوتا ہے کہ مریضوں کو شفٹ کرنے میں میڈیکل سپرنٹنڈنٹ کاکوئی کردار نہیں ہے۔&#39;&#39;

ہسپتال کی ایمرجنسی میں کنسلٹنٹ کی ڈیوٹی کے حوالے سے ان کا کہنا تھا کہ ہر شعبے کے کنسلٹنٹ ڈاکٹر روسٹر کے مطابق اپنی ڈیوٹی انجام دیتے ہیں۔ عام طور پر دن کے وقت انہوں نے آوٹ ڈور مریضوں کو چیک کرنا ہوتا ہے اس لیے ان کی ڈیوٹی دن کے وقت ہوتی ہے لیکن ڈیوٹی روسٹر میں لکھا ہوتا ہے کہ جب ان کی ضرورت ہو گی تو بلانے پر انہیں آنا ہو گا۔

وہ دعویٰ کرتے ہیں کہ تمام ڈاکٹر رات کو ایمرجنسی مریضوں کا معائنہ کرنے آتے ہیں۔ تاہم اگر کوئی شہر میں موجود نہ ہو یا اس کی کوئی اور اہم مصروفیت ہو تو اسے حاضری سے استثنیٰ حاصل ہوتا ہے۔

'سیکورٹی خدشات کے وجہ سے رات کو سروس بند کر دی گئی ہے': ریسکیو 1122 ٹانک

رات 8 بجے کے بعد مریض کو دوسرے ہسپتال منتقل کرنے کی سہولت دستیاب نہیں ہے: ریسکیو 1122 وہاڑی

دسمبر 2012ء میں دہلی میں ایک طالبہ کے ساتھ چلتی بس میں ہونے والے ریپ کے واقعے نے پوری دنیا کو ہلا کر رکھ دیا تھا۔ ایسا ہی واقعہ تین فروری کو وہاڑی میں پیش آیا۔بس ہوسٹس کو چلتی بس میں زیادتی کا نشانہ بنایا گیا لیکن ان کا کیس دبانے کی کوششیں جاری ہیں۔

شاہدہ (فرضی نام) بتاتی ہیں کہ بس میں ساتھ سفر کرنے والا گارڈ شیراز انہیں شروع دن سے ہراساں کر رہا تھا۔ &nbsp;

&quot;مجھے غصہ بھی آتا لیکن اس لیے خاموش رہی کہ گھر بتاتی تو ابو ملازمت چھوڑنے کا کہتے، تو پھر گھر کے اخراجات کیسے پورے ہوتے؟&quot;

شاہدہ کو تین فروری 2023ء کو رحیم یارخان سے وہاڑی کی بس پر جانے کا کہا گیا۔ انہیں معلوم ہوا کہ شیراز کی ڈیوٹی بھی اس بس میں ہے تو انہوں نے ڈرائیور آصف سے کہا کہ وہ اس گارڈ کے ساتھ نہیں جانا چاہتیں۔

&quot;میرے خدشات کے باوجود ڈرائیور نے مجھے ڈیوٹی پر چلنے کے لیے اصرار کیا۔ بس ہوسٹس کی ڈیوٹی انچارج عالیہ سے بھی درخواست کی کہ مجھے اس بس پرنہ بھیجیں لیکن انہوں نے بھی میری ڈیوٹی تبدیل نہ کی&quot;۔

بس ساڑھے چھ بجے رحیم یار خان سے روانہ ہوئی اور صبح ساڑھے نو بجے میلسی میں تمام سواریاں اتر گئیں تو بس وہاڑی کی جانب روانہ ہوگئی۔ کچھ دیر بعد گیٹ لاک کردیا گیا اور گارڈ شاہدہ کا موبائل چھین کر پچھلی نشست پر چلاگیا۔

&quot;میں نے ڈرائیور کو شکایت کی تو اس نے کہا کہ جا کر خود موبائل لے لو۔ پھر وہ سب ہوا جس کا میں تصور بھی نہیں کرسکتی تھی&quot;۔

شاہدہ کے وکیل کا کہنا ہے کہ اس واقعے کے روز شاہدہ کی عمر 17 سال 11 ماہ اور 20 دن تھی۔

شاہدہ رحیم یارخان کے محنت کش گھرانے سے تعلق رکھتی ہیں۔وہ تین بہن بھائیوں میں سب سے بڑی ہیں۔ان کے والد رنگ ساز ہیں جنہیں کچھ برس قبل شدید کرنٹ لگا تو ان کا دایاں بازو اور انگلیاں بری طرح متاثر ہوئیں اور وہ کام کے قابل نہ رہے۔ یہ وہ وقت تھا جب ان کے گھر کے حالات بگڑنا شروع ہوئے۔

شاہدہ نے ٹیوشن پڑھا کر گھر کا کچن چلانے کی کوشش کی لیکن حالات بہتر نہ ہوئے۔ اس وقت وہ میٹرک کی طالبہ تھیں۔

شاہد ہ کے والد کے دوست نے بتایا کہ ایک ٹرانسپورٹ کمپنی کو بس ہوسٹس کی ضرورت ہے تو ان کے اہل خانہ آسانی سے مان گئے اور گزشتہ برس نومبر میں انہوں نے رحیم یار خان اور وہاڑی کے بیچ چلنے والی وڑائچ ٹرانسپورٹ بس سروس میں خاتون میزبان کے طور پر کام شروع کردیا۔ اس وقت ان کی عمر 18 سال سے کم تھی۔

<h2>جائے وقوعہ کے شواہد ختم کرنے کی کوشش؟</h2>

شاہدہ نے سجاگ کو بتایا کہ انہوں نے وہاڑی پہنچتے ہی ون فائیو پر کال کی جس کے بعد پولیس آ گئی۔

&quot;میرا میڈیکل کروایا گیا اور ملزمان شیراز اور آصف کو&nbsp; جنسی زیادتی کے مقدمے میں گرفتار کر لیا گیا۔ اگلے روز دونوں کا چار روزہ جسمانی ریمانڈ ہوگیا لیکن وقوعہ کے شواہد جمع کرنے کے لیے جب ملتان سے فرانزک ٹیم پہنچی تو اس سے پہلے بس عملے نے شواہد مٹانے کے لیے بس کو دھو دیا &quot;۔

تاہم ڈی پی او وہاڑی عیسٰی خان اس عمل کی توجیح پیش کرتے ہوئے کہتے ہیں کہ پی ایس ایل کی وجہ سے پولیس کی نفری اور افسروں کی ملتان میں ڈیوٹیاں لگی ہوئی تھیں، انہیں اسی بس کے ذریعے ملتان جانا تھا اس لیے بس کو دھلوایا گیا۔ تاہم ان کا کہنا ہے کہ &quot;لڑکی کا فوری میڈیکل اور ڈی این اے ہوگیا تھا اور ہم نے ملزموں کو گرفتار کر لیا تھا۔اس لیے ثبوت مٹانے کا سوال ہی پیدا نہیں ہوتا&quot;۔

وہاڑی پنجاب کا بڑا ضلع ہے جس کی سرحدیں بہاولنگر، بہاولپور، لودھراں، پاکپتن، خانیوال اور ساہیوال اضلاع سے لگتی ہیں۔ یہاں دور و نزدیک کے لیے روزانہ ہزاروں مسافر سفر کرتے ہیں جن کے لیے سیکڑوں بسیں اور کوچز موجود ہیں۔

وہاڑی ڈسٹرکٹ بار ایسوسی ایشن کے سابق جنرل سیکرٹری سردار مصور خان بلوچ&nbsp; کہتے ہیں کہ بس کو دھونے کی کوشش کا مقدمے پر&nbsp; زیادہ فرق نہیں پڑے گا کیونکہ&nbsp; متاثرہ لڑکی نے واقعہ کے فوری بعد میڈیکل کروا لیا تھا۔

<h2>کیا بس ہوسٹس انچارج ملزموں کے ساتھ ملی ہوئی تھی؟</h2>

&nbsp;&nbsp;&nbsp; شاہدہ کے وکیل عبدالوہاب بلوچ کے مطابق مقدمے میں تین ملزمان کو نامزد کیا گیا تھا جس میں سکیورٹی گارڈ شیراز، ڈرائیور آصف اور بس ہوسٹس انچارج عالیہ کا نام بھی شامل ہے جنہوں نے متاثرہ لڑکی کو مبینہ طور پر زبردستی ڈیوٹی پر بھیجا تھا۔&quot;عالیہ نے منع کرنے کے باوجود، جان بوجھ کر شاہدہ کی ڈیوٹی لگائی لیکن پولیس نے اس کو گرفتار نہیں کیا&quot;۔

&nbsp;ڈی پی او وہاڑی عیسی خان کہتے ہیں کہ پولیس تفتیش کرر ہی ہے۔

&quot;ہوسٹس انچارج کی ڈیوٹی تھی کہ وہ سٹاف کو مقررہ گاڑیوں میں بھجوائے اگر اس کی غلطی ہوئی تو اسے ضرور گرفتار کیا جائے گا دیگر ملزموں کے خلاف دفعہ 376-الف کے تحت مقدمہ درج کیا گیا ہے جس کی سزا موت ہے&quot;۔

بس ہوسٹس انچارج عالیہ عبوری ضمانت پر ہے۔

ڈی ایس پی لیگل روبینہ عباس کہتی ہیں کہ بچی کوتحفظ دیا گیا اور فوری طور پر میڈیکل کرایا گیا۔&quot;تمام کام تیزی کے ساتھ مکمل کیے کہ کہیں ملزمان تاخیر کافائدہ نہ اٹھالیں&quot;۔

روبینہ عباس کہتی ہیں انہوں نے اپنی نگرانی میں فرانزک کرایا اور ڈی این اے کے لیے نمونے بھی بروقت بھیج دیے۔

ورائچ بس سروس کا مالک محمد افضال رحیم یار خان کا رہائشی ہے۔

شاہدہ کے وکیل نے جب بس مالک سے بات کی تو مبینہ طور پر اس کا کہنا تھا&nbsp; کہتے ہیں کہ &quot;ہم سے کوئی رابطہ نہ کرے جس نے جواب طلبی کرنی ہے ہوسٹس انچارج کی کرے&quot;۔

<h2>&quot;آخری وقت تک لڑوں گی&quot;</h2>

وڑائچ بس سروس میں بیشتر بس ہوسٹس غریب گھرانوں سے تعلق رکھتی ہیں۔ ان کا کہنا ہے کہ&nbsp; جنسی طور پر ہراساں کرنے کے واقعات عام ہیں۔

&quot;نہ تو ہم ایسے واقعات بارے کسی کو بتانا چاہتے ہیں اور نہ ہی ہم اپنی زندگی میں کسی نئے دشمن کو افورڈ کر سکتے ہیں۔ ویسے بھی سب جانتے ہیں خواتین کو ہر کام کرنے کی جگہ پر ہراساں کیا جاتا ہے اور خاص طور پر ٹرانسپورٹ کی فیلڈ میں خواتین کو دیگر شعبہ جات سے زیادہ مشکلات پیش آتی ہیں&quot;۔

2018ء میں نجی کمپنی کی بس گارڈ عمر دراز نے بس ہوسٹس مہوش کو فیصل آباد میں بس ٹرمینل کی حدود میں گولی مار کر قتل کردیا تھا۔

پائیدار سماجی ترقی کی تنظیم ( ایس ایس ڈی او) کی رپورٹ میں بتایا گیا ہے کہ 2022ء میں یکم جنوری سے لے کر 31 اکتوبر 2022ء تک پنجاب بھر میں ریپ اور گینگ ریپ کے تین ہزار 80 کیسز سامنے آئے۔ سب سے زیادہ 446 کیسز&nbsp; لاہور میں ہوئے۔ ضلع وہاڑی 74 کیسز کے ساتھ پنجاب میں 15 ویں نمبر پر ہے۔

ڈان نیوز کی 20 اکتوبر 2022ء کو شائع ہونے والی رپورٹ کے مطابق انسانی حقوق کی وزارت نے قومی اسمبلی کو بتایا کہ گزشتہ تین برسوں کے دوران خواتین پر تشدد کے 63 ہزار سے زائد مقدمات درج کیے گئے جن میں زیادتی اور اجتماعی زیادتی کے مقدمات کی تعداد 11 ہزار سے زائد ہے۔

ضلع وہاڑی کی سماجی تنظیم بیداری کی کوارڈینیٹر یاسمین فاطمہ کہتی ہیں کہ مختلف بس کمپنیوں میں ملازمت کرنے والی خواتین میزبانوں کے ساتھ جنسی ہراسانی کے واقعات عام ہیں۔ صرف عملے ہی نہیں انہیں مسافروں کی جانب سے بھی ہراسانی کاسامنا کرنا پڑتا ہے۔

شاہدہ کہتی ہیں کہ وہ&nbsp; خاموش رہ کر خود سے زیادتی کے واقعے کو پوشیدہ رکھ سکتی تھیں۔

&quot;لیکن میری خاموشی سے ایسے عناصرکی حوصلہ افزائی ہو تی۔ اس لیے میں نے فیصلہ کیا ہے کہ جو میرے ساتھ ہوا ہے میں اس کے خلاف آخری دم تک لڑوں گی تاکہ ملزمان کو سزا ہو اور دوبارہ ایسے واقعات نہ ہوں&quot;۔

'مشکلیں اتنی پڑیں': سکیورٹی گارڈ خواتین کو درپیش نامناسب حالاتِ کار کا حل کیسے ممکن ہے۔

وہاڑی میں بس ہوسٹس کے ساتھ زیادتی، شواہد ضائع کرنے کی کوشش

وہاڑی کے گاؤں بستی ڈھڈی والا کے ملک نذر بھارہ ٹھیکے (کرائے) کی زمین پر کاشت کاری کرتے ہیں۔انھوں نے 2021ء میں تل کاشت کیے تھے۔تل کی فصل چار ماہ میں تیار ہو جاتی ہے۔

کاشت کے وقت تل کا ریٹ ساڑھے پانچ سو روپے کلو تھا لیکن جب وہ اپنے تل بیچنے منڈی پہنچے تو ان کی 20 من پیداوار کا ریٹ تاجروں نے تین سو روپے فی کلو لگایا۔

نذر بتاتے ہیں کہ ڈیڑھ ماہ بعد جب وہ خود تل خریدنے منڈی&nbsp; گئے تو اس کا ریٹ 700 روپے کلو تھا۔

وہاڑی کے ہی ایک اور نوجوان کاشتکار اویس رحیم کی کہانی بھی کچھ ایسی ہی ہے۔ وہ اڈا چکڑالہ کے ایک قریبی گاؤں کے رہنے والے ہیں۔

2020ء میں انھوں نے مکئی کاشت کی تو مکئی کا ریٹ 12 سو روپے فی من تھا۔ جب فصل تیار ہوئی تو ریٹ گر کر ایک ہزار روپے ہو گیا لیکن جیسے ہی انھوں نے فصل فروخت کردی تو اس کی قیمت دوبارہ 12 سو روپے فی من پر آ گئی۔

اگلے سیزن میں انہوں نے کینولا کاشت کرنے کا فیصلہ کیا کہ اس کے نرخ چھ ہزار روپے من تک پہنچے ہوئے تھے۔

کینولا کی کاشت پر اخراجات دیگر فصلوں کے مقابلے میں کم ہوتے ہیں۔ اس لیے زیادہ منافع کے علاوہ اویس یہ بھی سوچ رہے تھے کہ اگلی فصل کی کاشت جلد شروع کر سکیں گے۔

لیکن جب کینولا کی فصل تیار ہوئی تو منڈی میں کوئی بھی انہیں چار ہزار 900 روپے سے زیادہ دینے کو تیار نہیں تھا۔

منڈی میں اجناس کی قیمت میں اتار چڑھاؤ کیونکر ہوتا ہے اور کمی کا بھگتان آخر کسان کو ہی کیوں بھتگنا پڑتا ہے؟

<h2>پلے نہیں دھیلا تے کردی میلہ میلہ</h2>

حافظ زبیر امجد ماہر نباتات ہیں اور وہاڑی کی ایک سیڈ کمپنی کے مالک ہیں۔ ان کے خیال میں طلب و رسد کے فارمولے کے تحت قیمت کا کم زیادہ ہونا کوئی انوکھی بات نہیں ہے۔

لیکن بہت سے ماہرین اتار چڑھاؤ کے اس کھیل کو سادہ نہیں مانتے اور اس &#39;فارمولے&#39; میں پنہاں کئی خفیہ اجزا کی نشاندہی کرتے ہیں۔ ان کا ماننا ہے کہ تاجر طلب کی نبض پہچانتے ہیں اور رسد کو کم زیادہ کر کے قیمتوں کو اپنی مرضی کی ڈگر پر چلاتے ہیں۔

وہاڑی کی غلہ منڈی کے آڑھتی محمد حسین تسلیم کرتے ہیں کہ سٹاکیے (ذخیرہ اندوز) کسان سے سستے داموں فصل خرید کر دو سے تین ماہ تک ذخیرہ کیے رکھتے ہیں۔ جس سے مصنوعی قلت پیدا ہو جاتی ہے اور جنس کے ریٹ بڑھ جاتے ہیں۔

حافظ زبیر کا خیال ہے کہ کسان بہتر منصوبہ بندی کرتے ہوئے چند دن یا ایک ڈیڑھ ماہ تک فصل اپنے پاس رکھ لے تو اسے بہتر ریٹ مل سکتا ہے۔

لیکن پاکستان کسان اتحاد کے رہنما چودھری افتخار احمد کے خیال میں ایسا ممکن نہیں۔ ان کا کہنا ہے کہ چھوٹے کاشتکار کے پاس اتنا سرمایہ نہیں ہوتا کہ وہ کاشت کے اخراجات بھی اٹھائے اور اچھا ریٹ ملنے تک اپنی پیداوار کو ذخیرہ بھی کیے رکھے۔

&quot;اگلی فصل کی بجائی کا انحصار پچھلی فصل کی فروخت پر ہوتا ہے۔ کاشتکار کو نہ صرف فوری طور پر کھاد، سپرے اور بیج کی مد میں لیا گیا قرض اتارنا ہوتا ہے بلکہ اگلی فصل کے لیے بیج اور ہل کا انتظام بھی کرنا ہوتا ہے&quot;۔

ان کے خیال میں اگر وہ اچھی قیمت کے لئے محض چند دن بھی انتظار کرے تو اگلی فصل کی کاشت میں دیر ہو سکتی ہے جس کا خمیازہ اسے کم پیداوار کی صورت میں اٹھانا پڑتا ہے۔

<h2>غضب کیا تیرے وعدے پہ اعتبار کیا</h2>

اویس رحیم اور نذر بھارہ دونوں نے نقصان اٹھانے کے بعد گندم کاشت کرنے کی ٹھانی کہ یہ واحد فصل ہے جس کی قیمت سرکار طے کرتی ہے اور اس قیمت پر خود گندم خریدتی بھی ہے۔

اویس کو امید تھی کہ (2021ء میں) حکومت گندم کی قیمت دو ہزار روپے من طے کرے گی لیکن حکومت نے یہ اس سے دو سو روپے کم رکھی۔

&quot;خریداری کے سرکاری مرکز میں گندم سے بھرے ٹرالر کئی دن سے کھڑے تھے لیکن محکمہ&nbsp; خریداری نہیں کر رہا تھا۔ باردانہ (بوریوں) کا بھی مسئلہ تھا، اس لیے میں ںے فیصلہ کیا کہ فصل آڑھتی کو ہی فروخت کر دی جائے جو&nbsp; اسےکھیت سے ہی اٹھا کر لے جاتا ہے۔ اس نے میری گندم 15 سو پچاس روپے فی من خریدی۔&quot;

اویس کو اپنی چار ایکڑ پر چھ ماہ میں پیدا ہونے والی گندم کی فصل پر نقد اخراجات کو منہا کر کے کل 12 ہزار روپے ماہانہ بچے۔ &nbsp;

&quot;ہم سرکاری نرخوں سے بھی کم پر فصل فروخت کرنے پر مجبور ہوجاتے ہیں کہ اپنے سر سے زرعی مداخل کی مد میں لیا قرض فوری چکا سکیں۔ یہی گندم تین ماہ کے بعد منڈی میں ڈھائی ہزار روپے فی من پر فروخت ہو رہی تھی&quot;۔&nbsp;

&nbsp;میاں عاصم ارائیں تحصیل میلسی میں ڈھائی سو ایکڑ کے مالک ہیں۔ ان کا کہنا ہے کہ چار سے چھ ماہ فصل پر دن رات ایک کرنے والے کسان کو پانچ سے سات سو روپے فی من بچتا ہے جبکہ ذخیرہ اندوز صرف دو ماہ میں ہی ڈھائی سے تین ہزار روپے فی من تک کما لیتا ہے۔

&quot;دو ماہ قبل، جب چاول کی فصل پک کر تیار ہوئی تو اس کی قیمت ساڑھے تین ہزار روپے فی من تھی لیکن اب یہ بڑھ کر چھ ہزار دو سو ہو چکی ہے اور اس میں ابھی مزید اضافے کا امکان ہے&quot;۔ 
2022ء میں جب نذر بھارہ نے گندم کاشت کی تو سرکاری ریٹ دو ہزار دو سو تھا لیکن انہیں آڑھتی نے دو ہزار ہی دیا۔ وہ اپنے اخراجات کا حساب لگا کر بتاتے ہیں کہ&nbsp; انہیں چھ ماہ بعد آٹھ ایکڑ کی گندم پر کل 48 ہزار روپے ہی بچے۔

<h2>کیا منڈی کی بھول بھلیوں سے باہر کوئی راستہ جاتا ہے؟</h2>

حافظ زبیر امدادی قیمت یا حکومت کے فصل کی قیمت طے کرنے کے حق میں نہیں۔ ان کا خیال ہے کہ امدادی قیمت کسان کے لیے فائدے کے بجائے نقصان کا باعث ہے۔ &quot;یہ قیمت کسان کی مرضی یا مفاد کے مطابق نہیں بلکہ حکومتی پالیسی کے حساب سے طے کی جاتی ہے&quot;۔

حافظ صاحب اس مسئلے کو لاینحل نہیں سمجھتے۔ وہ کہتے ہیں کہ حکومت اجناس ذخیرہ کرنے کے لیے نچلی سطح پر سٹور قائم کر سکتی ہے جس سے طلب و رسد میں توازن قائم کرنے میں مدد ملے گی اور پورا سال قیمتوں میں بھی تھوڑے بہت فرق کے ساتھ استحکام رہے گا۔

&quot;اس کا دوسرا حل یہ ہے کہ پاکستان میں بھی کراپ زوننگ کا نظام متعارف کرایا جائے جس کے تحت تحصیل کی سطح پر ڈیمانڈ اور سپلائی کے مطابق فصلیں کاشت کی جائیں&quot;۔

انہوں نے بتایا کہ چند سال قبل فیصل آباد کی زرعی یونیورسٹی کے طلبہ نے کراپ زوننگ بارے ایک مفصل رپورٹ مرتب کی تھی جسے متعلقہ محکموں&nbsp; کی جانب سے توجہ نہ ملی اور وہ فائلوں میں ہی دفن ہو گئی۔

وہ سمجھتے ہیں کہ اگر کراپ زوننگ کی جاتی تو دس سال میں کپاس کی پیداوار ڈیڑھ کروڑ گانٹھوں سے کم ہو کر 60 لاکھ تک نہ رہ جاتی۔

<h2>زمین زادوں کا مستقبل</h2>

نذر بھارہ بتاتے ہیں کہ چھوٹے زمیندار اپنا رقبہ فروخت کررہے ہیں یا کرایے پر دے رہے ہیں، جو باقی ہیں انھوں نے گزر اوقات کے لیے مال مویشیوں کا سہارا لیا ہوا ہے۔

اویس رحیم نے بھی اپنے مالی حالات کو بہتر کرنے کے لیے دیسی مرغیاں اور بکریاں پال لی ہیں۔ وہ کہتے ہیں: &quot;اب میں مجبوراً کاشتکاری کر رہا ہوں۔ کسی لینڈ ڈویلپر نے میری زمینوں کو کسی ہاؤسنگ سوسائٹی میں شامل کرنے کے لیے اچھے پیسوں کی آفر کی تو میں زمین کو بیچ کر کوئی کاروبار شروع کر لوں گا&#39;&#39;۔

نذر بھارہ نے کاشت کاری کے ساتھ رئیل اسٹیٹ کا کام بھی شروع کردیا ہے۔ ان کا کہنا ہے کہ &quot;اگر ہوائی کام ہی کرنا ہے تو پھر زیادہ منافع والا کام کیوں نہ کیا جائے؟&quot;

مبشر مجید

مبشر مجید وہاڑی کے رہائشی اور گذشتہ چھ سال سے تحقیقاتی صحافت کر رہے ہیں۔ زراعت، سماجی مسائل اور انسانی حقوق ان کے خاص موضوعات ہیں۔