بی بی زرسانگہ ضلع قلعہ عبداللہ کے گاؤں سپینہ تیژہ کی رہائشی ہیں۔ ان کی عمر 30 سال ہو گئی ہے لیکن انہوں نے کبھی ووٹ کاسٹ نہیں کیا۔

وہ بتاتی ہیں کہ اب تک ان کا شناختی کارڈ نہیں بنا ہوا تھا اس لیے ووٹ نہیں ڈال سکیں۔ تاہم ان کے گھر کی دوسری خواتین نے بھی آج تک حق رائے دہی استعمال نہیں کیا کیونکہ یہاں صرف مرد ہی ووٹ ڈالنے جاتے ہیں۔

زرسانگہ نے پانچویں جماعت تک تعلیم حاصل کی ہے۔ وہ کہتی ہے کہ ان کے علاقے میں لڑکیوں کا مڈل سکول نہ ہونے کی وجہ سے وہ آگے نہیں پڑھ پائیں۔ یہاں آج بھی گرلز مڈل سکول نہیں ہے جب تعلیم نہ ہو تو شناختی کارڈ یا ووٹ کی اہمیت کا کوئی پتا نہیں ہوتا۔

&quot;میری شادی پانچ سال پہلے اپنے کزن سے ہوئی تھی۔ اب شوہر کے شناختی کارڈ کی میعاد ختم ہوئی تو ان کے ساتھ میں نے بھی اپنا کارڈ بنوا لیا ہے۔ اب میں الیکشن میں ووٹ ڈالنا چاہتی ہوں لیکن شاید شوہر اجازت نہ دیں۔ انہوں نے اجازت دے دی تو میں ووٹ ڈالنے والی اس خاندان کی پہلی عورت ہوں گی۔&quot;

الیکشن کمیشن کے مطابق 2018ء میں بلوچستان میں رجسٹرڈ خواتین ووٹرز کی تعداد 18 لاکھ 13ہزار 562 تھی۔ اس وقت ان میں سے صرف سات لاکھ 14ہزار 914 خواتین نے حق رائے دہی استعمال کیا تھا جو رجسٹرد خواتین ووٹرز کا 37.64 فیصد بنتا ہے۔

غیر سرکاری ادارے فری اینڈ فیئر الیکشن نیٹ ورک (فافن ) کے مطابق گزشتہ انتخابات میں اس صوبے میں خواتین کا سب سے کم ٹرن آؤٹ ضلع کوئٹہ کے حلقے این اے 266 میں نظر آیا جہاں یہ شرح تقریباً 25 فیصد تھی۔

صوبے کے دو قومی حلقوں میں خواتین کا ٹرن آؤٹ 30 فیصد سے کم رہا جبکہ سات میں یہ شرح 31 سے 40 فیصد کے درمیان رہی تھی۔ یہاں خواتین نے سب سے زیادہ ووٹ این اے 268 چاغی کم نوشکی کم خاران میں ڈالے تھے جہاں ان کا ٹرن آؤٹ لگ بھگ 57 فیصد تھا۔

ضلع قلعہ عبداللہ میں 2 لاکھ 32 ہزار 613 رجسٹرڈ ووٹرز میں 83 ہزار 891&nbsp; خواتین ووٹرز تھیں جن میں سے صرف 31 ہزار 474 خواتین نے ووٹ ڈالا تھا جو یہاں رجسٹرڈ خواتین ووٹرز کا 37 فیصد بنتا ہے۔

نگراں صوبائی مشیر برائے وومن ڈیویلپمنٹ شانیہ خان بتاتی ہیں کہ خواتین کی سیاسی عمل میں شرکت کے لیے مسلسل مہم کا مثبت ردعمل دیکھنے میں آیا ہے۔ اس حوالے سے بلوچستان میں خواتین تمام تر رکاوٹوں کے باوجود سیاسی میدان میں آگے بڑھ رہی ہیں۔

الیکشن کمیشن کے اعداد وشمار بتاتے ہیں کہ صوبے میں 2018ء میں رجسٹرڈ خواتین ووٹرز 18 لاکھ 13 ہزار 562 تھیں جن کی تعداد اب 23 لاکھ 55 ہزار 783 ہو چکی ہے۔ یوں پانچ سال کے دوران صوبے کی خواتین ووٹرز میں 5 لاکھ 42 ہزار 221 کا اضافہ ہوا ہے اور یہ کل ووٹرز کا 43 فیصد سے زیادہ ہے۔

نگراں صوبائی مشیر سمجھتی ہیں کہ دیگر صوبوں کے مقابلے میں بلوچستان کی خواتین نے امن و امان کی مخدوش صورتحال میں بہت جدوجہد کی ہے۔ یہ خواتین اب سیاسی عمل میں پیش پیش ہیں جن کی وجہ سے عورتوں کی بڑی تعداد اب ووٹ ڈالنے کے لیے نکلے گی۔

الیکشن کمیشن کے نئے اعداد وشمار کے مطابق ضلع قلعہ عبداللہ میں کل ایک لاکھ 63 ہزار 753 رجسٹرڈ ووٹر ہیں جن میں ایک لاکھ چار ہزار 161مرد اور 59 ہزار 592 خواتین ووٹر ہیں جو رجسٹرڈ ووٹرز کا صرف 36 فیصد بنتے ہیں۔

الیکشن کمیشن کے مطابق 2018ء میں قومی حلقہ 263 قلعہ عبداللہ/ چمن میں رجسٹرڈ ووٹرز دو لاکھ 32ہزار 613 تھے اور اب موجود حلقہ این اے 266 میں تین لاکھ 57 ہزار 834 ووٹر ہو چکے ہیں۔ جن میں سے زرسانگہ جیسی سیکڑوں خواتین آئندہ انتخابات میں حق رائے دہی استعمال کرنے کے لیے پر امید ہیں۔

پشتونخوا ملی عوامی پارٹی کے صوبائی سیکرٹری اطلاعات نصیر ننگیال بتاتے ہیں کہ ووٹ ڈالنا ہر مرد اور خاتون ووٹر کا قومی فریضہ ہے۔

&quot;اگرچہ اکثر مقامات پر خواتین کا پولنگ سٹیشن الگ ہوتا ہے تاہم کم آبادی والے علاقوں میں مشترکہ پولنگ سٹیشن قائم کیا جاتا ہے لیکن پردے کا انتظام بھی ہوتا ہے&quot;۔

وہ کہتے ہیں کہ پشتونخوا میپ اور جے یو آئی سمیت سیاسی جماعتوں نے اس عزم کا اظہار کیا ہے کہ مردوں کی طرح خواتین بھی ووٹ کاسٹ کرنے جائیں اور انہیں کوئی مسئلہ نہیں ہونا چاہیے۔

پاکستان میں ووٹر جینڈر گیپ پر ہیومن رائٹس واچ کی ایک رپورٹ میں خواتین ووٹرز کی کم رجسٹریشن کی بڑی وجہ ان کے کمپیوٹرائزد شناختی کارڈز نہ ہونا بتائی گئی ہے۔

رپورٹ کے مطابق شناختی کارڈز نہ بننے کی اہم وجوہات میں پسماندگی اور تعلیم کی کمی کا بڑا کردار ہے۔ جس کے باعث یہ خواتین نہ صرف ووٹ کے حق بلکہ بینظیر انکم سپورٹ سکیم جیسی سہولیات سے بھی فائدہ نہیں اٹھا پاتیں۔

کوئٹہ میں عورت فاؤنڈیشن کے ریجنل ڈائریکٹر علاؤ الدین خلجی بتاتے ہیں کی ان کی تنظیم نے &#39;جذبہ پروگرام&#39; کے تحت ملک کے 25 اضلاع میں کام کیا ہے۔ جس کے نتیجے میں ڈھائی لاکھ سے زائد خواتین کے شناختی کارڈ بنوا کر ان کے ووٹ کی رجسٹریشن کرائی گئی ہے۔

&nbsp;وہ کہتے ہیں کہ سیاسی عمل میں خواتین کی شمولیت کے لیے سب کو مل کر کام کرنے کی ضرورت ہے۔

انتخابی قوانین (الیکشن ایکٹ2017ء) الیکشن کمیشن کو اختیار دیتے ہیں کہ اگر کسی حلقے میں خواتین کے ووٹ دس فیصد سے کم کاسٹ ہوں تو وہ اس حلقے میں دوبارہ پولنگ کا حکم دے سکتا ہے۔

&nbsp;الیکشن ایکٹ میں کہا گیا ہے کہ اگر خواتین کو حق رائے دہی سے روکنے کے لیے کہیں کسی طرح کا معاہدہ ہوتا ہے یا ووٹ کے استعمال میں طاقت کے ذریعے خلل ڈالا جاتا ہے تو تب بھی کارروائی عمل میں لائی جا سکتی ہے۔

الیکشن کمیشن کے ایک افسر نے نام ظاہر نہ کرنے کی شرط پر بتایا کہ نادرا کے تعاون سے موبائل وینز کے ذریعے سیکڑوں خواتین کے شناختی کارڈز بنوائے گئے ہیں۔ اس کے علاوہ مختلف علاقوں بالخصوص تعلیمی اداروں میں آگاہی مہم بھی چلائی گئی لیکن خاطر خواہ نتائج نہیں ملے۔

وہ کہتے ہیں کہ جب آگاہی سیشن کے دوران تعلیم یافتہ جوان لڑکیوں سے شناختی کارڈ نہ ہونے کی وجہ پوچھی جاتی ہے تو جواب ملتا ہے &quot;گھر والے کہتے ہیں کہ آپ شادی کے بعد شوہر کے نام سے شناختی کارڈ بنوا لینا۔&quot;

ان کا کہنا تھا کہ کہ خواتین کے ٹرن آؤٹ میں بہتری کے لیے ایک تو والدین کو ووٹ کی اہمیت سے آگاہ کرنے کی ضرورت ہے۔ دوسرے، سیاسی جماعتیں خواتین کو پولنگ سٹیشن تک لانے کے لیے ٹرانسپورٹ فراہم کریں۔ البتہ پولنگ سٹیشنز اور خواتین عملے کی تعیناتی الیکشن کمیشن کی ذمہ داری ہے۔

بلوچستان نیشنل پارٹی کی شمائلہ اسماعیل کہتی ہےکہ ان کی سیاسی جماعت خواتین تک رسائی کی ہر ممکن کوشش کرتی ہے اور انہیں پولنگ سٹیشنز تک لانے کے لیے ٹرانسپورٹ کا انتطام بھی کرتی ہے۔ مگر جب تک خواتین انتخابی مہم کے لیے نہیں نکلیں گی تب تک کوئی تبدیلی نہیں آئے گی۔

شانگلہ: کیا آئندہ عام انتخابات میں خواتین کے ٹرن آؤٹ کا مسئلہ حل ہو پائے گا؟

قلعہ عبداللہ: "شناختی کارڈ بنوا لیا ہے شوہر نے اجازت دی تو ووٹ ڈالنے بھی جاؤں گی"

text

2018ء کے عام انتخابات میں بلوچستان کی قومی اور صوبائی اسمبلیوں سے 37 خواتین نے جنرل نشستوں پر الیکشن لڑا تھا جن میں سے 24 سیاسی جماعتوں کی نامزد اور دیگر آزاد امیدوار تھیں۔ اس الیکشن میں صرف ایک خاتون امیدوار کامیاب ہوئیں۔

بلوچستان میں قومی اسمبلی کی 16 نشستوں پر چھ خواتین امیدوار سامنے آئیں جنہوں ںے کل 52 ہزار 666 ووٹ لیے۔ ان میں زبیدہ جلال کے 33ہزار 462 ووٹ تھے صرف یہی الیکشن جیت سکیں۔

خواتین امیدواروں کا ڈالے گئے ووٹوں (18 لاکھ 42 ہزار 844 ) میں سے حصہ 2.8 تھا۔

صوبائی اسمبلی میں جنرل نشستوں پر لڑنے والی خواتین کے نتائج اس سے بدتر تھے۔

بلوچستان اسمبلی کے لیے 31 خواتین میدان میں اتری تھیں جنہوں نے کل ملا کر 31 ہزار 439 ووٹ حاصل کیے جو ٹوٹل ڈالے گئے ووٹوں ( 17 لاکھ 90 ہزار 754) کا محض 1.76 فیصد بنتا ہے۔

پچھلے عام انتخابات میں قومی اسمبلی کی جنرل نشستوں پر چناؤ میں ملک بھر سے 183 خواتین امیدواروں نے حصہ لیا تھا مگر صرف آٹھ ہی پارلیمان تک پہنچ سکی تھیں۔

الیکشن کمیشن کا ریکارڈ بتاتا ہے کہ قومی اسمبلی کے لیے خواتین امیدواروں کی اتنی بڑی تعداد پہلی بار انتخابی میدان میں اتری تھی۔ مگر خواتین امیدواروں کے حوالے سے نتائج حوصلہ افزا نہیں تھے۔

عالمی رینکنگ میں پاکستان &#39;بدترین صنفی امتیاز&#39; والے ملکوں میں آتا ہے۔ تاہم پچھلے دس سال کے دوران اس فرق میں 5.1 فیصد کمی آئی ہے۔

ورلڈ اکنامک فورم کا جینڈر گیپ انڈکس 2023ء بتاتا ہے کہ پاکستان دنیا کے 146 ممالک کی فہرست میں سے 142ویں نمبر پر آتا ہے جہاں برابری کی شرح 57.5 فیصد ہے۔ جبکہ بنگلہ دیش 72.2 فیصد کے ساتھ اس فہرست میں 59ویں اور بھارت 64.3 فیصد کے ساتھ 127ویں نمبر پر آتا ہے۔

صنفی امتیاز کے خاتمے کےلیے تعلیم اور معاشی خود مختاری کے ساتھ خواتین کو سیاسی طور پر بااختیار بنانا سب سے زیادہ اہم مانا جاتا ہے جس کے لیے پاکستان میں بھی کچھ اقدامات کیے گئے۔ اسمبلیوں میں خواتین کی17 فیصد نامزدگی اور جنرل نشستوں پر پانچ فیٖصد کوٹا اسی سلسلے کی کڑی ہیں۔ مگر کوششوں کے باوجود پیشرفت کی رفتار بہت سست ہے۔

2018ء کے انتخابات میں قومی اسمبلی کی 272 اور چاروں صوبائی اسمبلیوں کی 577 سمیت مجموعی طور 849 جنرل نشستیں تھیں۔

الیکشن کمیشن ریکارڈ کے مطابق پیپلز پارٹی نے قومی اور صوبائی حلقوں کےلیے کل 642 پارٹی ٹکٹ جاری کیے تھے جس نے خواتین امیدواروں کو سب سے زیادہ یعنی 43 ٹکٹ جاری کیے تھے۔ 
اسی طرح دوسرے نمبر پر پی ٹی آئی تھی جس نے کل 769 میں سے 42 ٹکٹ خواتین&nbsp; امیدواروں کو دیئے تھے۔ ن لیگ نے 639 میں سے 37 اور متحدہ مجلس عمل نے 538 امیدواروں میں سے 33 خواتین کو امیدوار نامزد کیا تھا۔ 
بظاہر سیاسی پارٹیوں کے خواتین امیدواروں کو جاری کردہ ٹکٹس پانچ فیصد سے زیادہ تھے۔ تاہم اکتوبر 2018ء کے پہلے ہفتے میں الیکشن کمیشن نے پیپلز پارٹی، ن لیگ اور متحدہ مجلس عمل سمیت چھ پارٹیوں کو نوٹسز جاری کیے تھے&nbsp; جن میں خواتین کو کوٹے (پانچ فیصد) کے مطابق امیدوار نامزد نہ کرنے پر وضاحت مانگی گئی تھی۔ 
الیکشن ایکٹ 2017ء کہتا ہے کہ &quot;پارٹی اس بات کو یقینی بنائے گی کہ مجلس شوریٰ (پارلیمنٹ) بشمول صوبائی اسمبلیوں کی رکنیت کے لیےجنرل نشستوں پر کم از کم پانچ فیصد امیدوار خواتین میں سے منتخب کیے جائیں گے&quot; 
نوٹسز کے جواب میں سیاسی جماعتوں کا موقف تھا کہ انہوں نے کوٹے(5 فیصد) سے بھی زیادہ خاتون امیدواروں کو ٹکٹیں جاری کی ہیں۔

سیاسی ورکروں کا خیال ہے کہ الیکشن ایکٹ 2017ء میں ابہام ہے۔ قانون میں قومی اور صوبائی حلقوں کے لیے الگ الگ کوٹے کا تعین نہیں کیا گیا۔ اس ابہام کی وجہ سے الیکشن کمیشن کو&nbsp; سیاسی جماعتوں کی وضاحت قبول کرنا پڑی۔

رشید چودھری فئیر اینڈ فری الیکشن&nbsp; نیٹ ورک ( فافن) میں نیشنل کوارڈینیٹر ہیں۔ انہوں نے لوک سجاگ سے بات کرتے ہوئے کہا کہ قانون میں کوئی ابہام نہیں۔

&quot;قانون میں واضح طور پر قومی اسمبلی&#39; اور&#39; صوبائی اسمبلیوں&#39; کا ذکر کیا گیا ہے۔ یعنی پانچ فیصد خواتین امیدواروں کو قومی اور پانچ فیصد صوبائی اسمبلی کے انتخابات کے لیے ٹکٹوں کا اجرا۔ تمام سیاسی جماعتوں کو اپنے چاروں صوبوں میں اپنے ٹکٹ ہولڈروں کا پانچ فیصد شئیر خواتین کے لیے مخصوص کرنا ضروری ہے&quot;۔

تاہم، وہ کہتے ہیں کہ بلوچستان میں چونکہ قومی اسمبلی کی کل 16 نشستیں ہیں اس لیے ایسی جماعتیں جو صرف بلوچستان تک محدود ہیں ان کے لیے خواتین کی کم سے کم پانچ فیصد نمائندگی کی شرط پوری کرنا مشکل ہو جاتا ہے کیونکہ 16 فیصد کا پانچ فیصد اعشاریہ آٹھ بنتا ہے۔ قومی سطح کی دیگر جماعتوں کا یہ مسئلہ نہیں ہے&quot;۔

رشید چودھری نے کہا کہ مسئلہ یہ ہے کہ سیاسی جماعتیں قانون میں لکھی شرط &quot; کم سے کم&quot; پر اکتفا کرتی ہیں حالانکہ قانون تمام نشستوں پر خواتین امیدواروں کو کھڑا کرنے سے بھی نہیں روکتا۔

&quot;جنرل نشستوں پر کوٹہ بڑھانے سے خواتین کی بہتر نمائندگی کا مقصد پورا کیا جاسکتا ہے&quot;۔

وہ یہ بھی تجویز کرتے ہیں کہ شق نمبر 206 ترمیم کر کے پانچ فیصد کوٹے کے ساتھ ایک خاتون امیدوار کی شرط رکھی جائے۔

&quot;مثلاً کسی جماعت نے ملک بھر میں 10 امیدوار ہی کھڑے کیے ہیں تو انہیں بھی کم سے کم ایک خاتون امیدوار کو ٹکٹ دینے کا پابند بنایا جائے&quot;۔

عورت فاؤنڈیشن کی سابق ریذیڈنٹ ڈائریکٹر شبینہ ایاز کا کہنا ہے کہ سیاسی جماعتیں &quot;صرف خانہ پری&quot; کے لیے خواتین کو امیدوار نامزد کرتی ہیں۔

پاکستان میں سیاسی اعتبار سے صنفی تفریق میں صوبہ بلوچستان کو سرفہرست بتایا جاتا ہے۔ الیکشن 2018ء پر ووٹر لسٹوں سے لے کر امیدواروں کی نامزدگی اور نتائج تک کے اعداد و شمار اس دعوے کی تصدیق کرتے ہیں۔

عالمی ترقیاتی ادارے (یو این ڈی پی) کے مطابق گزشتہ عام انتخابات میں 60 فیصد سے زائد پاکستانی خواتین نے ووٹ ہی کاسٹ نہیں کیا تھا۔

&nbsp;جبکہ الیکشن کمشنر بلوچستان نے خود اعتراف کیا تھا کہ یہاں شناختی کارڈز نہ ہونے اور دیگر وجوہات کے باعث پانچ لاکھ سے زائد خواتین کے ووٹ درج ہی نہیں ہو پائے تھے اور خواتین کا ٹرن آؤٹ بھی انتہائی کم رہا۔

بلوچستان سے جیتنے والی واحد خاتون امیدوار زبیدہ جلال نے ماہر تعلیم وسماجی کارکن کے طور پر شہرت پائی، 1988ء سے سیاست میں ہیں اور کئی بار منتخب ہو چکی ہیں۔

راحیلہ حمید درانی پہلے وکالت اور صحافت سے وابستہ رہیں۔ لیکن 2008ء سے رکن اسمبلی چلی آ رہی ہیں۔ نیشنل پارٹی کی رہنما یاسمین لہڑی سماجی ورکر ہیں اور 2013ء سے 2018ء تک مخصوص کوٹے پر رکن اسمبلی رہ چکی ہیں۔

راحت جمالی کا تعلق ایک بڑے سیاسی گھرنے سے ہے۔ وہ 2013ء کے انتخابات میں مسلم لیگ(ن) کے پلیٹ فارم سے حلقہ پی بی 26 جعفرآباد سے کامیاب ہوئی تھیں۔ انہوں نے یہ انتخاب اپنے شوہر فائق جمالی کی نااہلی کے سبب لڑا تھا۔

اسی طرح بی این پی کی ڈاکٹر شہناز نصیر اور زینت شاہوانی جب الیکشن ہار گئیں تو پارٹی نے انہیں مخصوص نشستوں پر رکن اسمبلی بنا دیا تھا۔

شازیہ احمد لانگو نیشنل پارٹی سے تعلق رکھتی ہیں۔&nbsp; وہ بتاتی ہیں کہ نیشنل پارٹی کی قیادت گراس روٹ لیول سے ہے&nbsp; اور متوسط طبقے سے تعلق رکھتی ہے۔

&quot;ہماری جماعت خواتین کو بھرپور نمائندگی فراہم کرتی ہے۔ مجھے پچھلے الیکشن میں پارٹی کی بھرپور مدد حاصل تھی&quot;۔

تاہم راحیلہ حمید درانی کا تجربہ تھوڑا مختلف ہے۔

وہ 2018ء میں مسلم لیگ(ن) کی جانب سے کوئٹہ کی قومی اسمبلی کی نشست این اے 265 پر امیدوار تھیں۔ ان کے مقابلے میں پاکستان تحریک انصاف کے قاسم خان سوری کامیاب قرار پائے تھے۔

راحیلہ درانی کہتی ہے کہ مردوں کی اجارہ داری والے معاشرے&nbsp; میں خواتین کا الیکشن مہم چلانا آسان کام نہیں۔ وہ بتاتی ہیں کہ انہیں کئی مواقعوں پر امتیازی سلوک کا سامنا رہا۔

&quot;میں نے اپنی الیکشن مہم میں درپیش مشکلات کا ذکر ہر فورم پر کیا۔ بالخصوص خواتین سے متعلق پروگرامز میں اور پھر کامیابی کے قصے بھی بیان کیے تاکہ خواتین کی حوصلہ افزائی ہو اور وہ آگے بڑھیں&quot;۔

وہ کہتی ہیں کہ&nbsp; ہار جیت کامعاملہ بعد کا ہے جس نے ہمت باندھی وہ جیت گئی۔

شکیلہ نوید دہوار کے شوہر بی این پی کے سرگرم پارٹی کارکن تھے جن کو ٹارگٹ کلنگ کا نشانہ بنایا گیا تھا۔ شکیلہ نوید کو الیکشن ہارنے پر پارٹی نے رکن صوبائی اسمبلی منتخب کرا لیا تھا۔ دیگر پارٹی امیدواروں میں شازیہ احمد لانگو بھی نیشنل پارٹی کی پرانی کارکن ہیں۔

کوئٹہ میں پیپلزپارٹی کی رہنما ثناء درانی بتاتی ہیں کہ ہونا تو یہ چاہیے کہ خواتین کو ان نشستوں پر امیدوار نامزد کیا جائے جہاں پارٹی مضبوط ہو مگر بدقسمتی سے بلوچستان میں گزشتہ انتخابات میں سیاسی جماعتوں نے خواتین کو وہاں ٹکٹس دیے جہاں پارٹی کمزور تھی۔

ثناء درانی ایک سال قبل پی اے پی سے پیپلز پارٹی میں شامل ہوئی تھیں۔ وہ سمجھتی ہیں کہ سیاسی جماعتیں خواتین پر اعتماد نہیں کرتیں اس لیے انہیں مخصوص نشستوں تک محدود رکھا جاتا ہے۔

&quot;ہمارے ہاں اس کی بڑی وجہ یہ ہے کہ خواتین کو مرضی سے ووٹ دینے کا اختیار نہیں۔ گھر کا مرد جس کو کہے گا اسی کو ووٹ ڈال دیں گی۔&quot;

وہ کہتی ہیں کہ انتخابی مہم میں پارٹی خاتون امیدواروں کو اتنی سپورٹ نہیں کرتی جتنی کرنی چاہیے۔ الیکشن اخراجات اور پارٹیوں میں آنے والی پیراشوٹرز بھی کارکن خواتین کے آگے بڑھنے میں بڑی رکاوٹ ہیں۔

عورت فاؤنڈیشن کے ریجنل ڈائریکٹر علاؤ الدین خلجی کا ماننا ہے کہ ویمن امپاورمنٹ کے لیے انتخابی قوانین کو مزید بہتر بنانا ہوگا۔ جنرل نشست پر خواتین کا کم از کم ٹرن آؤٹ 30 فیصد لازم قرار دیا جائے۔ اسی طرح تمام اسمبلیوں میں خواتین کی مخصوص نشستوں کا کوٹہ 17 سے بڑھا کر 33 فیصد کیا جانا چاہیے۔

&nbsp;وہ کہتے ہیں کہ الیکشن ایکٹ میں ترمیم کے ذریعے سیاسی جماعتوں کو پابند بنایا جائے کہ عام نشستوں پر کم از کم 15 فیصد ٹکٹس خاتون امیدواروں کو جاری کریں۔

&quot;خاتون امیدواروں کے نصف انتخابی اخراجات سیاسی جماعتیں برداشت کریں۔ انتخابی منصوبہ بندی، ووٹرز اور پولنگ کی تربیت کے لیے مقامی سطح پر مکمل حمایت کو یقینی بنائیں۔ اسی طرح خواتین امیدواروں کے لیے سکیورٹی ڈیپازٹ بھی کم کیا جائے۔&quot;

نگراں صوبائی وزیر اطلاعات جان اچکزئی پارلیمان میں خواتین کا کوٹا 33 فیصد کرنے سے مکمل اتفاق کرتے ہیں۔ ان کا کہنا تھا کہ سوسائٹی کے کمزور طبقات بالخصوص عورتوں کو سیاسی عمل میں شامل کرنا سب کی ذمہ داری ہے۔ فیصلہ سازی میں خواتین کی شرکت کے بغیر وومن امپاورمنٹ ممکن نہیں ہو گی۔

&nbsp;ثناء درانی کہتی ہے کہ سیاسی جماعتیں اگر خواتین امیدواروں کی مالی معاونت کریں اور بھر پور انتخابی مہم چلائیں تو کوئی وجہ نہیں کہ خواتین ووٹر پولنگ ڈے پر گھر سے نہ نکلیں۔

"سیاسی جماعتیں خواتین پر اعتماد نہیں کرتیں، انہیں مخصوص نشستوں تک محدود رکھا جاتا ہے"

نئی حلقہ بندیوں پر سیاسی حلقوں میں بحث تو الیکشن کے بعد بھی جاری رہے گی۔ تاہم ان تبدیلیوں سے بلوچستان میں زیارت، دکی، جھل مگسی جیسے اضلاع کو تو فائدہ ہوا ہے۔ لیکن یہاں جو علاقہ سب سے زیادہ گھاٹے میں رہا وہ نیا ضلع چمن ہے۔

پچھلی مردم شماری کے بعد چمن سمیت ضلع قلعہ عبداللہ کی آبادی سات لاکھ 58 ہزار 354 نفوش پر مشتمل تھی۔ 2018ء کے انتخابات کے لیے اس ضلعے میں قومی اسمبلی کا ایک حلقہ این اے 263 اور بلوچستان اسمبلی کے تین حلقے بنائے گئے تھے۔ جن میں پی بی 21، پی بی 22، اور پی بی 23 شامل تھے۔

ان صوبائی حلقوں میں سے دو پر پچھلے انتخابات میں عوامی نیشنل پارٹی کے انجینئر زمرک خان اچکزئی اور اصغر خان اچکزئی جیتے تھے۔ ایک نشست جمعیت علمائے اسلام کے حاجی نواز کاکڑ&nbsp; لے گئے تھے۔

2021 ء میں ضلع قلعہ عبداللہ کی تحصیل چمن کو الگ کر کے نیا ضلع بنا دیا گیا۔

حالیہ مردم شماری میں ضلع قلعہ عبداللہ کی آبادی تین لاکھ 61 ہزار 971 اور ضلع چمن کی آبادی چار لاکھ 66 ہزار 218 بتائی گئی ہے۔ یوں ان دونوں اضلاع کی آبادی آٹھ لاکھ 28 ہزار 189 بنتی ہے۔

نئی حلقہ بندی میں الیکشن کمیشن نے ضلع چمن اور قلعہ عبداللہ کی مشترکہ قومی نشست کے علاقوں میں کوئی تبدیلی نہیں کی۔ اس حلقے کا محض سیریل نمبر اب این اے 265 ہو گیا ہے۔ یہ حلقہ بدستور دونوں اضلاع چمن اور قلعہ عبداللہ پر مشتمل ہو گا۔

تاہم ان دونوں اضلاع کو بلوچستان اسمبلی کی ایک ایک نشست دے کر یہاں تیسرا حلقہ ختم کر دیا گیا ہے۔ یوں چمن کو چار لاکھ 66 ہزار 218 آبادی پر مشتمل بلوچستان کا سب سے بڑا صوبائی حلقہ بنا دیا گیا ہے۔

اب پی بی 50 ضلع قلعہ عبداللہ پر مشتمل ہے جس میں تحصیل قلعہ عبداللہ، تحصیل دوبندی اور تحصیل گلستان شامل ہیں۔

اسی طرح پی بی 51 اب ضلع چمن پر مشتمل ہے جس میں تحصیل صدر اور تحصیل سٹی چمن شامل ہیں۔

الیکشن کمیشن کی رپورٹ کے مطابق بلوچستان کا صوبائی حلقہ اوسطاً دو لاکھ 92 ہزار 47 کی آبادی پر بنتا ہے اور ضلع چمن میں 1.6 صوبائی نشستیں بنتی ہیں۔

اسی طرح قلع عبداللہ کی 1.24 نشستیں بنتی ہیں۔ دونوں اضلاع کی آبادی کو ملا کر 2.84&nbsp; نشستیں بنتی ہیں۔

الیکشن کمیشن کے اپنے فارمولے کے تحت چمن کو دو نشستیں ملنی چاہئیں تھیں لیکن ایک دی گئی ہے۔

سیاسی جماعتیں کہتی ہیں کہ دو اضلاع کا ایک قومی حلقہ بنایا جا سکتا ہے تو اس علاقے میں ایک مشترکہ صوبائی حلقہ بھی تشکیل دیا جا سکتا تھا۔

صحافی وحید اللہ سمجھتے ہیں کہ ایک نشست کی خاتمے سے یہاں کے لوگوں کی نمائندگی کم ہو گئی ہے، اس لیے بڑا نقصان تو عوام ہی کا ہوا ہے۔ جہاں تک امیدواروں یا سیاسی جماعتوں کا تعلق ہے پچھلی بار ضلع قلعہ عبداللہ&nbsp; سے دو سیٹیں&nbsp; اے این پی اور ایک جے یو آئی&nbsp; نے جیتی تھی اس لیے یہ جماعتیں بھی خوش نہیں ہیں۔

وہ کہتے ہیں کہ چمن کی نشست پر اے این پی کو کوئی نقصان نہیں ہوا۔ لیکن اب دونوں اضلاع میں پشتونخوا میپ،&nbsp; اے این پی اور جے یو آئی کے درمیان مقابلہ ہو گا۔ البتہ امیدواروں کی ہار جیت کا اندازہ سیاسی صف بندی سامنے آنے کے بعد ہو گا، کیونکہ کسی اتحاد کی صورت میں معاملات مختلف ہو جاتے ہیں۔

&nbsp;قلعہ اور چمن سے صوبائی حلقہ ختم ہونے پر متعدد اعتراضات سامنے آئے ہیں۔

الیکشن کمیشن کی پریس ریلیز کے مطابق بلوچستان سے خضدار، پشین، آواران، حب، لسبیلہ اور موسیٰ خیل کی حلقہ بندیوں پر اعتراضات جمع کرائے جا چکے ہیں۔

عوامی نیشنل پارٹی اور پشتونخوامیپ کو چمن، موسیٰ خیل اور ہرنائی کے حلقوں کی حد بندی پر اعتراضات ہیں۔ جبکہ بلوچستان نیشنل پارٹی ،نیشنل پارٹی کو کوئٹہ اور خضدار کی حلقہ بندیوں پر اعتراضات ہیں۔

اے این پی کے صوبائی جنرل سیکرٹری محبت کاکا کہتے ہیں کہ الیکشن کمیشن نے غیر منصفانہ حلقہ بندیاں تشکیل دی ہیں۔ چار لاکھ 66 ہزار سے زائد آبادی پر ایک نشست عوام کے ساتھ زیادتی ہے۔

پشتونخوامیپ کے سیکرٹری برائے پارلیمانی امور حضرت عمر اچکزئی کہتے ہیں انہیں انصاف نہ ملا تو ہائی کورٹ سے رجوع کریں گے۔

جے یو آئی کے صوبائی امیر مولانا عبدالواسع کہتے ہیں کہ نئی حلقہ بندی قانونی تقاضا ہے۔ انہیں کی پارٹی کو موسیٰ خیل، بارکھان، زیارت، ہرنائی اور چمن کے حلقوں پر اعتراضات ہیں۔&nbsp;

بلوچستان نیشنل پارٹی ضلع کوئٹہ کے صدر غلام نبی مری، کوئٹہ اور خضدار کی حلقہ بندیوں سے ناخوش ہیں۔ انہوں نے الیکشن کمیشن میں اعتراضات جمع کرا ئے ہیں۔

نیشنل پارٹی کے صوبائی ترجمان علی احمد لانگو کہتے ہیں کہ کوئٹہ میں بلوچ حلقوں کو منصوبے کے تحت بگاڑا گیا ہے۔ لسبیلہ کی ایک صوبائی نشست&nbsp; بھی کم کر دی گئی ہے۔ ان چیزوں کو نظر انداز نہیں کیا جا سکتا۔

تحریک انصاف کو کسی حلقے پر کوئی اعتراض نہیں ہے۔ پارٹی کے صوبائی ایڈیشنل جنرل سیکرٹری عالم خان کاکڑ کہتے ہیں کہ &quot;ہمارا واحد مطالبہ ہے کہ جلد سے جلد انتخابات کرائے جائیں۔&quot;

پاکستان مسلم لیگ(ن) کے رہنما ہمایوں خان الکوزئی کہتے ہیں کہ ایسی حلقہ بندیوں کے انتہائی منفی اثرات مرتب ہوں گے بلکہ نفرت پھیلے گی۔

&quot; اقوام کو تقسیم کرنے کی بجائے ان کی آبادی کی بنیاد پر انہیں حلقے دیے جائیں۔&quot;

ادھر الیکشن کمیشن نے ایک پریس ریلیز میں کہا ہے کہ ابتدائی حلقہ بندیوں میں اگر ایسی غلطی پائی گئی ہیں جس کی قانون اجازت نہیں دیتا تو اعتراضات کی سماعت کے دوران ان غلطیوں کو درست کیا جائے گا۔

چمن میں کئی روز سے جاری دھرنے کے شرکا کون ہیں اور کیا چاہتے ہیں؟

نئی حلقہ بندیاں: بلوچستان کا ضلع چمن کیوں سب سے زیادہ گھاٹے میں رہا؟

آوران کے فضل محمد اسسٹنٹ ڈائریکٹر کراپ رپوٹنگ کے عہدے پر تعینات ہیں۔ وہ محکمہ زراعت کے شعبہ توسیع میں بھرتی ہوئے تھے۔ لیکن کچھ عرصہ بعد ہی ان کاتبادلہ شعبہ کراپ رپورٹنگ (ادارہ زرعی شماریات) میں کر دیا گیا تھا۔

&nbsp;فضل محمد 2007ء سے ضلع آواران، خضدار اور اب قلات میں فرائض انجام دے رہے ہیں۔ ان کا کہنا ہے کہ وہ تین اضلاع میں 15سال تک فصلوں کی رپورٹنگ کر چکے ہیں مگر کسی ضلع میں انہیں نہ تو کوئی دفتر ملا اور نہ ہی ٹرانسپورٹ۔

وہ کہتے ہیں کہ ان کے پاس 4 کراپ رپورٹر ہیں اور پورے ضلع کے لیے سال کا 25 سے 30 ہزار روپے کا فیول ہے یعنی سو لٹر پٹرول، جو ایک ہی ماہ میں ختم ہو جاتا ہے۔ضلع قلات سات ہزار 654 مربع کلومیٹر رقبےپر محیط ہے۔

&quot;میرا کنبہ دس افراد پر مشتمل ہے۔ اس مہنگائی میں 70 ہزار روپے تنخواہ میں گھر چلانا آسان نہیں۔ مجبوراَ اپنی تنخواہ سے ٹرانسپورٹ کا خرچ برداشت کررہے ہیں۔ موٹر سائیکل پر کراپ رپورٹنگ کریں تب بھی ایک فصل کے جائزے پر20 دن لگ جاتے ہیں۔&quot;

<h2>کراپ رپورٹنگ اہم کیوں ہے</h2>

ڈائریکٹر ایگریکلچر ریسرچ محمدقاسم خان کاکڑ بتاتے ہیں کہ کراپ رپورٹنگ کا شعبہ پالیسی سازی کے لیے ریڑھ کی ہڈی ہوتا ہے۔اسی سے اجناس کی ضرورت، اقسام اور پیداواری رحجانات کا پتا چلتا ہے اور ہر علاقے کی مخصوص زرعی ضروریات ، سبسڈی اور مراعات سب اسی سے طے ہوتی ہیں۔

وہ کہتے ہیں کہ فصل کا درست ڈیٹا ہی مارکیٹ کے انتظام کی بنیاد بنتا ہے۔ یہی اعدادو شمار زرعی سپلائی چین کے سٹیک ہولڈرز یعنی کاشت کاروں، پروسیسرز، تاجروں اور صارفین تک کو منصوبہ بندی میں مدد دیتے ہیں۔

محمد قاسم خان کے مطابق کراپ رپورٹنگ پالیسی سازی کے ساتھ زرعی وسائل کے تخمیے&nbsp; و تقسیم، غذائی تحفظ اور مارکیٹ کی منصوبہ بندی (طلب و رسد) کے لیے بہت اہم ہے۔

ڈیزاسٹر مینجمنٹ، زرعی تحقیق، بین الاقوامی تجارت، اقتصادی منصوبہ بندی اور ماحولیاتی تحفظ میں بھی کراپ ڈیٹا کا ناگزیر کردار ہوتا ہے۔

بلوچستان کے شعبہ کراپ رپورٹنگ کے مطابق اس وقت صوبے میں397کراپ رپورٹر اور36 سینئر کراپ رپورٹر کام کر رہے ہیں۔ تنخواہوں کی مد میں اس شعبے کا سالانہ بجٹ40 کروڑ اور آپریشنل بجٹ یعنی فیول کے لیے کل آٹھ لاکھ روپے مختص ہیں۔

محکمہ زراعت کےاعدادوشمار کے مطابق بلوچستان میں گزشتہ سال ربیع سیزن میں پھلوں کی پیداوار 78ہزار 247 ٹن رہی جبکہ خریف میں پیداوار 17لاکھ 12ہزار 576 ٹن تھی۔ پھلوں کے یہ باغات ایک لاکھ 85 ہزار928 ہیکٹر رقبے پر پھیلے ہوئے ہیں۔

قومی ادارہ شماریات کی زرعی شماریاتی رپورٹ 2010 کے مطابق صوبے کا کل رقبہ 8 کروڑ 58 لاکھ ایکڑ ہے جس میں سے سالانہ تقریباً 28 لاکھ ایکڑ رقبے پر مختلف فصلیں کاشت ہوتی ہیں جبکہ بلوچستان میں ساڑھے 33 لاکھ&nbsp; ایکڑ رقبے پر جنگلات ہیں۔

قلعہ عبداللہ کی تحصیل گلستان کے کاشتکار اور زمیندار ایکشن کمیٹی کے رہنما کاظم خان اچکزئی کہتے ہیں کہ اس علاقے میں کراپ رپورٹنگ کا شعبہ غیر موثر ہے۔زرعی ادارہ شماریات کے ڈیٹا اور فصلوں وباغات کے کاشتہ رقبے میں بہت فرق ہوتا ہے۔

وہ بتاتے ہیں کہ محکمہ زراعت کے مطابق قلعہ عبداللہ میں تین سو ایکڑ پر چیری کی کاشت ہے جبکہ اصل میں یہاں چیری بہت ہی کم ہے۔مگر سیکرٹری زراعت اس بات سے اتفاق نہیں کرتے۔ان کا موقف ہے کہ کراپ رپورٹنگ کے سوا زرعی ڈیٹا کہیں دستیاب نہیں جسے سامنے رکھ کر تقابلی جائزہ لیا جائے۔

فضل محمد کا کہنا ہے کہ کراپ رپورٹر کو کاشت کار ہی کے اعداد وشمار پر انحصار کرنا پڑتا ہے۔ لیکن بعض اوقات زمیندار یہ کہہ کر تفصیل بتانے سے ہی انکار کر دیتے ہیں کہ &quot;محکمہ زراعت نے ہمارے لئے کیا کیا ہے؟&quot;

ڈائریکٹر کراپ رپورٹنگ اختر بزدار بتاتے ہیں کہ کراپ رپورٹرز روایتی طریقے سے ڈیٹا جمع کرتے ہیں۔رقبے،کاشت اور پیداوار کی تفصیل زمیندار ہی بتاتے ہیں۔بعض کاشت کار تو رقبہ ہی ٹھیک سے نہیں بتا پاتے۔ بعض ڈرتے ہیں کہ کوئی نیا ٹیکس نہ لگ جائے اور اسی خدشے کے سبب رقبہ کم بتاتے ہیں۔

وہ کہتے ہیں کہ درست رپورٹنگ کے لیے وسائل بھی اہم ہوتے ہیں۔ بارہا حکام کو لکھا گیا ہے کہ کراپ رپورٹنگ کے لیے پٹرول کی رقم بہت کم ہے لیکن کوئی شنوائی نہیں ہو رہی۔ ہیڈکوارٹر کے پاس ایندھن کا سالانہ بجٹ 8 لاکھ روپے ہے ہے جبکہ فیلڈ میں جانے کے لیے پانچ پرانی گاڑیاں ہیں جو ایک کلو میٹر میں چار لٹر تک پٹرول استعمال کرتی ہیں۔

اختر بزدار کراپ رپورٹنگ کے لیے ریموٹ سینسنگ (سیٹیلائٹ کا استعمال) کو وقت کی ضرورت سمجھتے ہیں۔ ان کا کہنا ہے کہ اب تک انہیں کراپ رپورٹر کے فراہم کردہ اعداد وشمار پر اعتماد کرنا پڑتا ہے جبکہ ریموٹ سینسنگ میں لوکیشن چیک ہو جاتی ہے اور اس کا نتیجہ 95 فیصد تک صحیح ہوتا ہے۔

انہوں نے بتایا کہ ریموٹ سینسنگ میں سیٹلائٹ سے ہر ضلع کی تصویر لی جاتی ہے۔ اس تصویر کو پروسیس کر کے کراپ کو الگ الگ رنگ دیاجاتا ہے۔اس طرح رنگوں کے ذریعے گندم چاول وغیرہ کے رقبے کا تعین آسان اور درست ہوتا ہے ۔

ڈائریکٹر کراپ رپورٹنگ کا کہنا ہے کہ ریموٹ سینسنگ کے استعمال کے لیے انہوں نے 2020ء میں ایک تجویز دی تھی جس میں لاگت کا تخمینہ ایک ارب روپے تھا۔پلاننگ ڈیپارٹمنٹ نے اس کا پی سی ون بھی منظور کرلیاتھا۔ لیکن اسے کابینہ سے منظوری نہ مل سکی۔

وہ کہتے ہیں کہ ریموٹ سینسنگ منصوبے کے تحت کوئٹہ میں نیوکلیس لیب تعمیر کی جائے گی۔اس میں جدید سافٹ ویئر اور ایپلی کیشنز وغیرہ استعمال ہوں گے۔ ممکن ہے اس کے لیے ورلڈ بینک سے فنڈ بھی مل جائیں۔

&nbsp;بلوچستان میں ریموٹ سینسنگ کے حوالے سے عالمی ادارہ برائے خوراک و زراعت (ایف اے او) اور سپارکو کے درمیان تعاون پر بات چیت ہوتی رہی ہے۔ جبکہ ڈائریکٹر جنرل پنجاب کراپ رپورٹنگ بتاتے ہیں کہ صوبے میں دو سال سے آن گراؤنڈ کراپ رپورٹنگ کے ساتھ ریموٹ سینسنگ کو بھی استعمال کیا جا رہا ہے۔

بلوچستان کے سیکرٹری زراعت محمد طیب لہڑی کا ماننا ہےکہ کراپ رپورٹنگ ڈیٹا کے بغیر کوئی زرعی پالیسی اور زرعی ترقیاتی سکیم بنانا ممکن نہیں ہے۔ مگر صوبائی زرعی پالیسی 30-2020ء کی تیاری میں کراپ رپورٹنگ کو شامل نہ کرنا اچھا فیصلہ نہیں تھا جس کی وجہ سے&nbsp; زرعی اہداف کا حصول بھی مشکل ہو گا۔

بلوچستان کی آخری زرعی پالیسی اس وقت کے سیکرٹری زراعت قمبر دشتی کی سربراہی میں تشکیل دی گئی تھی۔اس کے بنیادی مقاصد میں پانی کے کم سے کم استعمال اورزرعی پیداواری صلاحیت میں اضافے کو یقینی بنانا تھا۔

اس پالیسی میں مصنوعات کا معیار اور مارکیٹ میں سپلائی بہتر بنانا، مارکیٹگ کے لیے جدید اور پائیدار مواقع (ہینڈلنگ، سٹوریج، ٹرانسپورٹ اور پروسیسنگ) کی فراہمی کے علاوہ محکمے کی کارکر دگی بڑھانا بھی شامل تھا۔

ماحولیات اور آب و ہوا کے خطرات کاجائزہ لےکر گورننس اور سروسز کی بہتری ، کسانوں کی مارکیٹ تک رسائی ،ان کی کپیسٹی بلڈنگ اور پرائیویٹ سیکٹر کی سرمایہ کاری اس پالیسی کے خاص عناصر تھے۔

سیکرٹری زراعت سمجھتے ہیں کہ ماضی میں کراپ رپورٹنگ سروسز کو نظرانداز کیا جاتا رہا ہے۔ لیکن تین سال میں اس کی استعداد کار میں اضافہ ہوا ہے۔گزشتہ ربیع میں کراپ رپوٹنگ نے 10اضلاع کے اعداد وشمار جدید طریقے (جی آئی ایس)سے حاصل کیے ہیں۔

&nbsp;وہ کہتے ہیں کہ موجودہ خریف میں مزید 10اضلاع کا ڈیٹا جدید طریقے سے حاصل کیاجائے گا۔ پانچ برسوں سے کراپ رپورٹنگ سروسز کا کوئی منصوبہ منظور نہیں کیا گیا ۔اس لیے اب ریموٹ سینسنگ منصوبے کی منظوری ضروری ہے۔

اچھی پیداوار کے لئے اچھی سڑک چاہئیے: آواران کے کسان سبزیاں خریدتے ہیں، اگاتے نہیں!

بلوچستان میں زیرکاشت رقبے اور فصلوں کی معلومات دینے کا نظام غیرفعال ہو جانے کا خدشہ

بلوچستان میں ضلع قلعہ سیف اللہ کے حاجی فضل محمد کا چار ایکڑ پر انار اور سیب کا باغ گزشتہ سال آنے والی بارشوں اور سیلاب میں اجڑ گیا تھا۔ اس باغ میں پھلوں سے لدے سینکڑوں درخت تھے جو اب چٹیل میدان کا منظر پیش کرتا ہے۔

جب سیلاب آیا تو پانی اس علاقے میں کئی ماہ کھڑا رہا کیونکہ اسے اخراج کا راستہ نہیں مل سکا تھا۔ چنانچہ جو درخت سیلاب میں گرنے سے بچ گئے تھے وہ کھڑے پانی کے باعث خراب ہو گئے۔ فضل محمد نے اپنے باغ کو تیار کرنے پر سخت محنت کی تھی۔ چونکہ اس علاقے میں بجلی کی لوڈشیڈنگ زیادہ ہوتی ہے اس لیے وہ ٹیوب ویل کو چلانے کے لیے شمسی توانائی کے 177 پینل بھی لائے تھے۔ تاہم سیلاب نے سب کچھ برباد کر دیا۔

فضل محمد کا مطالبہ ہے کہ اس علاقے میں آبی گزرگاہوں پر تجاوزات ختم کی جائیں تاکہ آئندہ انہیں ایسی صورتحال کا سامنا نہ کرنا پڑے۔

محکمہ زراعت کے ریسرچ آفیسر سراج الدین خان ںے بتایا کہ سیب اور انگور سرد علاقوں کے پھل ہیں۔ روایتی طریقے کے مطابق انہیں تقریباً 15 دنوں کے بعد پانی دیا جاتا ہے اور پانی کا زیادہ دیر ٹھہرے رہنا ان درختوں کے لیے نقصان دہ ہوتا ہے۔ یہی وجہ ہے کہ سیلابی پانی کھڑا ہونے سے اس علاقے میں تمام باغات تباہ ہو گئے ہیں۔

حاجی فضل محمد اب سرکاری امداد کے منتظر ہیں تاہم اب تک انہیں گندم کے ایک بوری بیج کے علاوہ کچھ نہیں ملا۔

کاشت کاروں کی تنظیم زمیندار ایکشن کمیٹی کے چیئرمین ملک نصیر احمد شاہوانی کہتے ہیں کہ صوبے کی آبادی کے بڑے حصے کا روزگار زراعت سے وابستہ ہے اور موسمیاتی تبدیلی نے سب سے زیادہ نقصان زمینداروں کو ہی پہنچایا ہے۔

موسمیاتی تبدیلی کے اثرات بلوچستان پر طویل عرصے سے ظاہر ہو رہے ہیں۔ پروونشل ڈیزاسٹر مینجمنٹ اتھارٹی (پی ڈی ایم اے) نے رواں سال بھی یہاں مون سون بارشوں سے ممکنہ خطرات کے بارے میں آگاہ کیا ہے جس سے پہاڑی سیلاب، لینڈ سلائیڈنگ، دریائی سیلاب اور آندھی کے نتیجے میں انفراسٹرکچر کی تباہی اور فصلوں اور مویشیوں کو نقصان پہنچنے کا اندیشہ ہے۔

پی ڈی ایم اے نے کوئٹہ، جعفرآباد، جھل مگسی، صحبت پور، اوستہ محمد، نصیرآباد، بارکھان، ڈیرہ بگٹی، قلعہ سیف اللہ، ہرنائی، کچھی، خضدار، کوہلو، لسبیلہ، لورالائی، موسیٰ خیل اور سبی کو ہائی رسک اضلاع قرار دیا ہے۔ 2023ء کی مون سون بارشوں میں اب تک 21 افراد کی ہلاکت ہوئی ہے جبکہ چار ہزار سے زیادہ گھروں کو نقصان پہنچا ہے۔

پی ڈی ایم اے کے مطابق 2022ء میں مون سون کی غیر معمولی بارشوں اور سیلاب سے بلوچستان کے 32 اضلاع کے 91 لاکھ 82 ہزار 616 افراد متاثر ہوئے تھے۔

انوائرمنٹل پروٹیکشن ایجنسی (ای پی اے) کے ڈائریکٹر کلائمیٹ غلام مرتضیٰ کلوار نے بتایا کہ 18 ویں ترمیم کے بعد ماحولیات صوبائی معاملہ بن گیا ہے۔ خیبر پختونخوا اور سندھ کے بعد بلوچستان نے بھی موسمیاتی تبدیلی سے نمٹنے کے بارے میں اپنی پالیسی بنانے کا فیصلہ کیا ہے۔ اس سلسلے میں سابق سیکرٹری اسفند یار خان کاکڑ کے دور میں یو این ڈی پی کے ذریعے پالیسی پر کام کا آغاز کیا گیا ہے۔ پالیسی ڈرافٹ کے بعد تمام اسٹیک ہولڈرز کے ساتھ مل کر ایکشن پلان تشکیل دیا جائے گا جس کو صوبائی کابینہ سے منظور کرایا جائے گا۔

وہ کہتے ہیں کہ کوشش ہے تمام سٹیک ہولڈرز کے ساتھ مل کر بہترین پالیسی تشکیل دی جائے جس کی بدولت کسی بھی بڑے نقصان کو کم سے کم رکھنا ممکن ہو۔ اس حوالے سے موسمیاتی تبدیلی کے اثرات کو محدود رکھنے اور ان سے مطابقت پیدا کرنے پر خاص توجہ دی جا رہی ہے۔

نصیراحمد شاہوانی سمجھتے ہیں کہ موسمیاتی تبدیلی سے متعلق بلوچستان کی پالیسی ایک مثبت پیش رفت ہو گی لیکن ضروری ہے کہ اس معاملے میں سب سے بڑے سٹیک ہولڈر یعنی زمیندار کو بھی اعتماد میں لیا جائے۔

صوبائی سیکرٹری ماحولیات و موسمیاتی تبدیلی نیاز احمد نیچاری کہتے ہیں کہ گلوبل وارمنگ سے پیدا ہونے والی موسمیاتی تبدیلی صرف پاکستان کا نہیں پوری دنیا کا مسئلہ ہے۔ موسم بدلنے سے کوئٹہ کا درجہ حرارت بڑھ گیا ہے جو اب 41 ڈگری سینٹی گریڈ تک پہنچ جاتا ہے۔ انہوں نے بتایا کہ ان کا محکمہ فی الوقت وفاقی حکومت کی بنائی گئی قومی موسمیاتی تبدیلی پر ہی عمل پیرا ہے۔

ماہر ماحولیات و صحافی عافیہ سلام سمجھتی ہیں کہ موسمیاتی تبدیلی کے بجائے ماحولیاتی تغیر بہتر اصطلاح ہے کیونکہ موسم کے ساتھ پورا ماحول بدل رہا ہے۔ ان کے مطابق ماحولیاتی تغیر میں پاکستان کا حصہ یا کردار ایک فیصد سے بھی کم ہے تاہم جرمن واچ انڈیکس کے مطابق یہ اس مسئلے سے بری طرح متاثر ہونے والے ملکوں میں سے ایک ہے۔

عافیہ سلام کہتی ہیں کہ زیادہ رقبے کی وجہ سے ماحولیاتی تغیر کے حوالے سے بلوچستان کے مختلف علاقوں کی مشکلات بھی الگ الگ ہیں۔ صوبے کو جن بڑے خطرات کا سامنا ہے ان میں سیکڑوں کلومیٹر طویل ساحلی پٹی پر سمندر کی سطح میں اضافہ، جنگلات کی کٹائی اور پانی کی کمی یا خشک سالی شامل ہیں۔

عافیہ سلام نے بتایا کہ ملک میں کلائمیٹ چینج جینڈر ایکشن پلان بھی بن گیا ہے کیونکہ صنفی مسائل بھی موسمیاتی مسئلے کا حصہ ہیں اور آدھی آبادی کونظر انداز کر کے موسمیاتی تبدیلی کی کسی پالیسی پر عمل ممکن نہیں ہو گا۔

موسمیاتی تبدیلی سے متاثر ہوتی گندم کی پیداوار: کیا ہمیں غذائی بحران کا سامنا کرنا پڑ سکتا ہے؟

بلوچستان میں موسمیاتی تبدیلی سے نمٹنے کی پالیسی بنانے کا فیصلہ: کیا 'سب سے بڑے سٹیک ہولڈر' کی آواز بھی سنی جائے گی؟

کوئٹہ کے محمد ایاز چار سال تک گھر کا کوڑا گلی کی نکڑ میں رکھے کچرا دان میں پھینکتے رہے ہیں۔ تاہم اب انہیں یہ کچرا معاوضہ دے کر اٹھوانا پڑتا ہے کیونکہ دو سال پہلے یہ کچرا دان اٹھا لیا گیا تھا اور لوگوں کو اس کا کوئی متبادل بھی مہیا نہیں کیا گیا۔

ایاز کہتے ہیں کہ یہ کچرا تعفن اور بیماریاں پھیلا رہا ہے۔ جب ہوا چلتی ہے پلاسٹک کے بیگ اور دیگر کوڑا کرکٹ ان کے گھر کے سامنے جمع ہو جاتا ہے جس پر مکھیاں بھنبھاتی رہتی ہیں اور خاص طور پر گرمیوں کے موسم میں ان لوگوں کو بہت مشکل پیش آتی ہے۔

میونسپل کارپوریشن نے شہر کے گلی کوچوں میں بڑے کچرا دان رکھنے کا سلسلہ دو برس قبل ختم کر دیا تھا۔ اب لوگ عموماً گلی کے کسی ایک مقام پر کچرا پھینک جاتے ہیں جسے کارپوریشن کی چھوٹی گاڑیاں اٹھا لے جاتی ہیں۔

میٹرو پولیٹن کارپوریشن کوئٹہ کے ایڈمنسٹریٹر عبدالجبار بلوچ کا کہنا ہے کہ کارپوریشن کے پاس کچرا اٹھانے کے لیے 95 ڈمپر اور 78 چھوٹی گاڑیاں ہیں۔ اس کے علاوہ صفائی کرنے اور نکاسی آب کے لیے تقریباً 400 مستقل اور اتنے ہی دیہاڑی دار ملازم بھی تعینات ہیں جن کی مدد سے روزانہ سات سو ٹن کچرا ٹھکانے لگایا جاتا ہے جبکہ باقی اسی ماحول میں رہ جاتا ہے۔ اس کے لیے کارپوریشن چھ ماہ یا ایک سال بعد خصوصی صفائی مہم شروع کرتی ہے تاہم مالی بحران کی وجہ سے گزشتہ ڈیڑھ سال سے یہ مہم نہیں چلائی جا سکی۔

عبدالجبار کہتے ہیں کہ 1994ء میں اس وقت کی آبادی کے مطابق کچرا پھینکنے کی جگہ یا ڈمپ سائٹ کا تعین کیا گیا تھا۔ تاہم اس کے بعد آبادی تو بڑھتی رہی لیکن اس سائٹ کے رقبے میں اضافہ نہ ہو سکا۔

میٹرو پولٹین کارپوریشن کے سابق ایڈمنسٹریٹر طارق جاوید مینگل کے مطابق شہر میں روزانہ 16 سے 17سو ٹن کچرا پیدا ہوتا ہے۔ مشرقی بائی پاس کے قریب پہاڑی کے دامن میں 60 ایکڑ پر مشتمل ڈمپ یارڈ کچرے سے تقریباً بھر چکا ہے۔

عبدالجبار کے مطابق 2008ء میں کچرے کی ری سائیکلنگ کا پلانٹ لگایا گیا تھا۔ یہ پلانٹ نامیاتی جیسا کہ کچن کے کچرے کی ری سائیکلنگ کرتا ہے۔ تاہم مطلوبہ کچرا نہ ملنے کے باعث پلانٹ بند ہو گیا کیونکہ اس کوڑے کا بڑا حصہ کچرا چننے والے لے جاتے ہیں۔ میٹرو پولیٹن کارپوریشن کے پاس کچرا چننے والوں کو روکنے کی کوئی پالیسی نہیں ہے۔

طارق جاوید مینگل کہتے ہیں کہ 2017ء کی مردم شماری کے مطابق کوئٹہ کی آبادی 22 لاکھ ہے لیکن حقیقی آبادی تقریباً 40 لاکھ ہے۔ اتنی بڑی آبادی کے لیے کارپوریشن کو عملے اور مشینری کی کمی کا سامنا ہے۔ کارپوریشن کے پاس جو وسائل ہیں وہ 22 لاکھ آبادی کی ضروریات سے نمٹنے کے لیے بھی کافی نہیں۔

موسمیاتی تبدیلی و ماحولیات کے صوبائی سیکرٹری اسفندیار خان کاکڑ بتاتے ہیں کہ محکمہ ماحولیات نے لوکل گورنمنٹ کے ساتھ مل کر ایک ورکنگ گروپ بنایا تھا۔ اس نے صوبائی حکومت کو مختلف سفارشات بھیجی ہیں جن میں شہر اور اس کے آس پاس تین سے چار انجینئرڈ لینڈ فِل سائٹس کی نشاندہی کرنا اور جائزہ لینا بھی شامل ہیں۔ اس مقصدکے لیے ڈھائی کروڑ روپے کا تخمینہ لگایا گیا ہے۔

اس کے علاوہ ان سفارشات میں کچرے سے پانچ سے 10 میگاواٹ بجلی بنانے اور موجودہ ڈمپ سائٹ کو بائیو ڈائی ورسٹی پارک میں بدلنے کی فیزیبلٹی سٹڈی بھی دی گئی ہے۔

32 سالہ مرجان گل بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز میں پڑھاتے ہیں۔ وہ پچھلے پانچ سال سے کوئٹہ میں کچرے تحقیق کر رہے ہیں اور شہر کے لیے انجینئرڈ لینڈ فِل سائٹ بنانے کی وکالت کرتے ہیں۔ ان کا کہنا ہے کہ لینڈ فِل سائٹ زیر زمین پانی کے معیار اور ماحولیاتی آلودگی سے بچاؤ کے لیے اہم ہے۔

وہ تجویز دیتے ہیں کہ اس سائٹ کے لیے ایسی زمین کا انتخاب کیا جائے جو آبادی اور ائیرپورٹ سے دور ہو، چرند پرند متاثر نہ ہوں اور جہاں سے پانی زیرزمین ذخائر میں نہ جاتا ہو۔

مرجان گل کے مطابق ایک لینڈ فِل سائٹ پر کھلے میدان کے مقابلے میں 10 گنا زیادہ کچرا ڈالا جا سکتا ہے۔ یہ سائٹ روزگار کے مواقع بھی پیدا کر سکتی ہے اور کچرے سے پیدا ہونے والی میتھین سے توانائی بجھی حاصل کی جا سکتی ہے۔

ماہرین کے مطابق لینڈ فِل سائٹ انجینئرنگ کے قواعد اور معیارات کے مطابق بنائی جاتی ہے۔ اس کا مقصد زمین پر ایسی جگہ تیار کرنا ہوتی ہے جس میں پڑا کچرا ماحولیاتی آلودگی اور صحت عامہ کے لیے خطرہ نہ بنے۔ اس میں بجری، مٹی اور دیگر مواد سے بنی تہیں کچرے سے نکلنے یا گزرنے والے پانی کو زیرزمین جانے سے روکتی ہیں۔ کچرے میں بننے والی میتھین گیس کے اخراج کا بندوبست بھی کیا جاتا ہے۔

جامعہ بلوچستان کے شعبہ انوائرمنٹل سائنسز سے وابستہ چنگیز خان سمجھتے ہیں کہ شہر کے لیے تین سے چار لینڈ فِل سائٹس کی تعمیر ضروری ہے۔

بارش میں ڈمپ سائٹ کے کھلے کچرے سے کیمیکل پانی کے ساتھ بہہ جاتے ہیں اور یہ پانی کسی دریا یا جھیل کا حصہ بن کر آبی حیات کے لیے خطرہ بن جاتا ہے۔

&quot;ڈمپ سائٹ پر نامیاتی اور غیرنامیاتی دونوں اقسام کا کچرا پھینکا جاتا ہے۔ ان کے گلنے سڑنے یا جلنے سے خارج ہونے والی گیسیں فضائی آلودگی پپدا کرتی ہیں جبکہ لینڈ فِل سائٹس کے ذریعے ان تمام خطرات سے بچاؤ ممکن ہے۔&quot;

لاہور میں پیدا ہونے والا ہزاروں ٹن کچرا: 'اس کوڑے کو سنبھالنے کے لئے مؤثر قانون اور مناسب پالیسی موجود نہیں'۔

کوئٹہ کی گلیوں سڑکوں پر کچرے کے ڈھیر: باغوں کے شہر کا تعفن کیسے ختم ہو گا؟

1988 میں کوئٹہ کی ترقی کے لئے ایک ماسٹر پلان بنایا گیا تھا جس کے تحت شہر کے نواحی علاقے ہزار گنجی میں ایک کمرشل زون کی تعمیر بھی عمل میں آنا تھی۔ یہ ایک لمبا چوڑا منصوبہ تھا جس کا مقصد شہر میں ٹریفک کے دباؤ اور ماحولیاتی آلودگی کو کم کرنا تھا۔ تاہم آج 35 سال گزرنے کے باوجود یہ منصوبہ مکمل نہیں ہو سکا۔

اس منصوبے کے لئے بلوچستان حکومت نے 1988 میں ہی 604 ایکڑ اراضی مختص کر دی تھی جس میں سے 463 ایکڑ پر جون 1991 میں کام کا آغاز ہو گیا۔ اُس وقت کوئٹہ کی آبادی چار لاکھ 30 ہزار تھی جو اب 26 لاکھ سے بڑھ چکی ہے۔ یہ منصوبہ مستقبل میں بڑی آبادی کی ضروریات کو مدنظر رکھ کر بنایا گیا تھا۔ اس کے کئی حصے تھے جنہیں بتدریج 20 سال میں مکمل ہونا تھا مگر اب جبکہ اس کی اشد ضرورت محسوس کی جا رہی ہے تو اس کی تکمیل کا دور دور تک کوئی امکان دکھائی نہیں دیتا۔

کیو ڈی اے کے چیف انجینئر سلیمان طاہر خان کے مطابق ہزار گنجی کمرشل زون کی تعمیر پر 29 کروڑ 8 لاکھ روپے لاگت آنا تھی۔ زون میں 36 ایکڑ رقبہ پھل وسبزی منڈی، 68 ایکڑ بس سٹینڈز، 47 ایکڑ ٹرک اڈے، 81 ایکڑ آٹو مارکیٹ اور ورک شاپس اور17 ایکڑ رقبہ باردانہ وغلہ منڈی کے لیے دیا گیا۔

27 ایکڑ اراضی پر ڈرائی فروٹ مارکیٹ، 46 ایکڑ پر بزنس سنٹر، چار ایکڑ پر منی ٹرک سٹینڈ اور 141 ایکڑ پرایک ہاؤسنگ سکیم (شالکوٹ ہاوسنگ) کی تعمیر ہونا تھی۔

سلیمان طاہر بتاتے ہیں کہ آٹو مارکیٹ اور ورکشاپس کے سوا متذکرہ بالا تمام کاروباری سرگرمیاں ہزار گنجی منتقل ہو چکی ہیں۔البتہ وہ تسلیم کرتے ہیں کہ حکومتی وانتظامی عدم توجہی کے باعث منصوبے کے بعض حصوں پر کام مکمل نہیں ہوسکا۔&nbsp;

تاہم تین دہائیوں سے یہاں کاروبار کرنے والے ہزار گنجی کی مرکزی انجمن تاجران کے صدر سید عبدالخالق آغا چیف انجینئر کے دعوے کو تسلیم نہیں کرتے۔ ان کا کہنا ہے کہ کمرشل زون بنانے کے مقاصد پورے نہیں ہو سکے۔ بسوں اور منی ویگن کے اڈے آج بھی شہر کے وسط میں ہیں۔کراچی بس ٹرمینل، بزنس سنٹر اور شالکوٹ ہاؤسنگ سکیم پر کام ہونا باقی ہے۔ ٹرک اڈہ، سبزی وفروٹ منڈی جون 1998ء میں ہی یہاں منتقل کر دیے گئے تھے لیکن وہاں مسائل ناصرف برقرار ہیں بلکہ بڑھتے جا رہے ہیں۔

شیر علی یہاں پھل اورسبزی منڈی میں کاروبار کرتے ہیں۔ انہوں نے بتایا کہ ہزار گنجی میں افغانستان اور ایران سے بھی مال آتا ہے اور ملک بھر میں سپلائی ہوتا ہے۔&nbsp; منڈی میں روازنہ دو ہزار سے زیادہ گاڑیاں آتی جاتی ہیں۔ تاہم یہاں نیلامی کی جگہ پر مناسب شیڈ نہ ہونے سے پھل اور سبزیاں خراب ہوجاتی ہیں۔

&quot;سات سو فٹ کے نیلامی پلیٹ فارم پر ماشہ خوروں (پرچون فروشوں) کا قبضہ ہے۔نتیجتاً پھل وسبزیاں کھلی جگہوں اتارنا پڑتی ہیں۔ ماشہ خوروں کو فیز ٹو میں 23 ایکڑ رقبے پر 866 پلاٹ الاٹ کئے جا چکے ہیں لیکن اس کے باوجود پلیٹ فارم پر ان کا قبضہ برقرار ہے۔

تاجر رہنما سید عبدالخالق آغا کہتے ہیں کہ ہزار گنجی سے کیو ڈی اے کو صرف پلاٹ ٹرانسفر&nbsp; فیس کی مد میں ہی سالانہ 31کروڑ 68 لاکھ روپے سے زیادہ آمدنی ہوتی ہے۔ بزنس سنٹر، گیراجوں اور شالکوٹ ہاوسنگ سکیم کے پلاٹوں پر غیرفعال فنڈ کے نام پر بھی کم از کم تین لاکھ ملتے ہیں۔ محکمہ زراعت کو سبزی منڈی سے سالانہ ساڑھے پانچ کروڑ کے علاوہ نیلامی سے 20لاکھ روپے وصول ہوتے ہیں۔ مگر کوئی محکمہ مسائل کو حل کرنے پر توجہ نہیں دیتا۔

کیو ڈی اے کے ڈائریکٹر اسٹیٹ سید انور شاہ اس منصوبے کی تکمیل میں تاخیر کا ذمہ دار الاٹیوں کو سمجھتے ہیں۔

ان کا دعویٰ ہے کہ جن لوگوں کو اس منصوبے میں زمین الاٹ کی گئی تھی انہوں نے 1990ءکے بعد کوئی قسط جمع نہیں کرائی۔ ایسے میں ترقیاتی کام کیسے ہو گا؟ کیو ڈی&nbsp; اے کی گورننگ باڈی نے فیصلہ کیا ہےکہ جن الاٹیوں کی آدھی قسطیں جمع نہیں ہوئیں ان کے پلاٹ منسوخ کئے جائیں گے۔ تاجر اقساط ادا کریں تو شالکوٹ ہاؤسنگ سکیم میں کام کرنے کے لیے انہیں این او سی جاری کر دیے جائیں گے۔ کراچی کوئٹہ بس ٹرمینل کے ٹرانسپورٹروں کو پلاٹوں کے لیے دوبارہ آفر لیٹر جاری کیاگیا ہے مگر اس کا کوئی جواب نہیں ملا۔

تاہم عبدالخالق آغا ڈائریکٹر اسٹیٹ کی بات سے اتفاق نہیں کرتے۔ ان کا کہنا ہے کہ ہزار گنجی زون میں کُل آٹھ ہزار 21 پلاٹ تھے جبکہ تاجر حضرات کراچی بس ٹرمینل کے سوا تمام قسطیں ادا کر چکے ہیں۔

کوئٹہ کراچی کوچز یونین کے صدر میر حکمت علی لہڑی کے بقول بس کمپنیاں اڈے کی زمین کی قسطوں کی ادائیگی کے لیے تیار ہیں۔ لیکن کیو ڈی اے انہیں ویرانے میں پھینکنے کے لیے تمام رقم نقد مانگ رہی ہے۔

ان کا کہنا ہے کہ ہزارگنجی ٹرمینل پر پانی ہے نہ بجلی۔ اگر بنیادی سہولتیں میسر ہوں تو ایک ہی دن میں بسیں اس ٹرمینل پر منتقل کی جا سکتی ہیں لیکن خالی میدان میں مسافروں کو مشکلات میں ڈالنے کا کوئی فائدہ نہیں۔&quot;

ڈرائی فروٹ ایسوسی ایشن کے صدر حمد اللہ خان ترین کہتے ہیں کہ کمرشل زون میں خشک میوہ جات کے کاروبارکے لیے بزنس سنٹر بھی بنایا جانا تھا۔ اس جگہ کے لئے رقم کی ادائیگی کے بعد انہیں ورک آرڈر جاری کر دیا گیا۔ ابھی کام شروع نہیں ہوا تھا کہ چند پلاٹوں پر بعض لوگوں نے قبضہ کر لیا جو تاحال برقرار ہے۔

ڈائریکٹر اسٹیٹ انور شاہ سمجھتے ہیں کہ کمرشل زون&nbsp; کی تکمیل سے شہر کے بہت سے مسائل حل ہو سکتے تھے مگر ضلعی انتظامیہ نے اس سلسلے میں کوئی کردار ادا نہیں کیا۔ ان کی اس شکایت پر ڈپٹی کمشنر آفس سے بات کی گئی تو وہاں ایک افسر نے نام ظاہر نہ کرنے کی شرط پر بتایا کہ یہ الزام بے بنیاد ہے اور اس حوالے سے کیو ڈی اے نے خود کوئی عملی قدم نہیں اٹھایا۔

وزیراعلی میرعبدالقدوس بزنجو خود کیو ڈی اے کے چیئرمین ہیں۔ ان کے ترجمان بابر یوسف زئی نے لوک سجاگ سے بات کرتے ہوئے یقین دہانی کرائی کہ اس منصوبے کو رواں سال کے آخر تک مکمل کر لیا جائے گا اور وزیراعلیٰ خود اس منصوبے کو سنجیدگی سے لے رہے ہیں۔

انہوں نے بتایا کہ منی بس اڈوں کی منتقلی کے خلاف بس مالکان نے عدالت سے رجوع کیا تھا۔ ٹریفک کے مسائل پر بھی ایک درخواست عدالت میں زیرسماعت ہے۔ حکومت کی کوشش ہے کہ شہر کے تمام مسائل جلد حل ہوں جس کے لئے کوششیں جاری ہیں۔

نارووال کا ویمن اینڈ چلڈرن پارک: 'اپنی نوعیت کا ایک  منفرد منصوبہ جو سیاست کی نذر ہو گیا'

کوئٹہ میں ٹریفک کا دباؤ اور آلودگی کم کرنے کا منصوبہ 35 سال میں مکمل نہ ہو سکا

قلعہ عبداللہ کے عبدالمالک کی اہلیہ اپنے 10ویں بچے کی پیدائش کے دوران زندگی کی بازی ہار گئیں۔

جب ان کے ہاں بچے کی پیدائش کا وقت آیا تو عبدالمالک انہیں عبداللہ خان بازار میں واقع دیہی مرکز صحت لے آئے مگر وہاں کوئی ڈاکٹر نہیں تھا۔ چنانچہ انہیں ایک نجی کلینک سے رجوع کرنا پڑا۔

عبدالمالک کا کہنا ہے کہ بچے کی پیدائش نارمل ہوئی اور وہ گھر واپس آ گئیں لیکن انہیں ہائی بلڈ پریشر کی شکایت تھی اور اسی رات ان کی حالت بگڑ گئی۔ عبدالمالک بھاگم بھاگ ڈاکٹر کو لینے کلینک پر گئے مگر کچھ ہی دیر میں ان کی اہلیہ انتقال کر گئیں۔

&quot;میری اہلیہ کو بنیادی مرکز صحت میں لیڈی ڈاکٹر میسر آتی تو اس کی جان بچ سکتی تھی۔ میرے چھوٹے چھوٹے بچے جب پوچھتے ہیں کہ ماں کدھر گئی تو میرے پاس کوئی جواب نہیں ہوتا۔&#39;&#39;

لوگوں کی بنیادی صحت سے متعلق اقدام (پی پی ایچ آئی) کے مطابق پاکستان میں دوران زچگی ہر ایک لاکھ میں سے 186 خواتین کی موت ہو جاتی ہے لیکن بلوچستان میں یہ شرح 298 ہے۔

بلوچستان کے صوبائی صدر مقام کوئٹہ سے 80 کلومیٹر دور ضلع قلعہ عبداللہ کی آبادی سات لاکھ 58 ہزار ہے جس میں 98 فیصد لوگ پشتون ہیں۔2017 ء کی مردم شماری کے مطابق اس ضلعے کی آبادی میں چار فیصد کی شرح سے سالانہ اضافہ ہو رہا ہے۔

محکمہ خزانہ کے اعداد و شمار سے اندازہ ہوتا ہے کہ قلعہ عبداللہ میں چیف لیڈی میڈیکل افسر اور خواتین گائنا کالوجسٹ کی 28 اسامیاں ہیں جبکہ یہاں کی آبادی میں 18سال سے زیادہ&nbsp; عمر کی خواتین کی تعداد تقریباً 95 ہزار ہے۔

ڈسٹرکٹ ہیلتھ افسر سید عبدالحنان آغا کے مطابق ضلعے میں اس وقت صرف پانچ مستقل گائناکالوجسٹ تعینات ہیں جبکہ غیرسرکاری تنظیموں (این جی اوز) کے زیراہتمام طبی سہولیات کی فراہمی کے تحت آٹھ لیڈی ڈاکٹر کام کر رہی ہیں۔

پی پی ایچ آئی کے مطابق قلعہ عبداللہ میں پانچوں گائناکالوجسٹ اگر کوئی ناغہ کئے بغیر کام کریں تو ایک ڈاکٹر کو روزانہ کم از کم آٹھ کیس دیکھنا پڑیں گے۔

پہلے قلعہ عبداللہ کا ڈسٹرکٹ ہیڈکوارٹر ہسپتال چمن میں تھا۔ جب چمن کو علیحدہ ضلع بنایا گیا تو قلعہ عبداللہ میں نئے ہسپتال کی ضرورت تھی۔ چنانچہ تحصیل گلستان کے انتظامی مرکز عبدالرحمٰن زئی میں ڈسٹرکٹ ہیڈ کوارٹر ہسپتال (ڈی ایچ کیو) قائم کرنے کا فیصلہ ہوا جس کی عمارت تاحال زیرتعمیر ہے۔ اسی لیے ڈی ایچ کیو کو عارضی طور پر تحصیل ہسپتال میں ہی چلایا جا رہا ہے۔

ڈی ایچ کیو کے ایک ڈاکٹر نے اپنا نام ظاہر نہ کرنے کی شرط پر بتایا کہ ضلعے میں ورلڈ بینک کے تعاون سے 23 لیڈی میڈیکل افسر اور آٹھ ڈاکٹر تعینات&nbsp; کی گئی ہیں لیکن عموماً یہ ڈاکٹر اپنی ڈیوٹی پر حاضر نہیں ہوتیں۔

&quot;ڈی ایچ کیو میں نارمل ڈلیوری کے لیے بھی ڈاکٹر نہیں ہوتیں۔ اگر ہوں بھی تو مناسب سہولتیں موجود نہیں ہیں حتیٰ کہ ضرورت کے وقت اہم دوائیں بھی دستیاب نہیں ہوتیں۔ مشینری اور ماہر عملے کا فقدان ہے۔ اسی لئے بہت سے لوگوں کو نجی ہسپتالوں میں لے جانا پڑتا ہے اور اگر کوئی بہت پیچیدہ کیس آ جائے تو اسے کوئٹہ ریفر کر دیا جاتا ہے۔&#39;&#39;

&nbsp;ان کا کہنا ہے کہ سہولیات کی کمی کے باعث بہت سے ڈاکٹر یہاں سے اپنا تبادلہ کرا لیتے ہیں۔

دوسری جانب محکمہ صحت کے پبلک ہیلتھ ڈائریکٹر ڈاکٹرخالد قمبرانی بتاتے ہیں کہ حال ہی میں 800 سے زیادہ ڈاکٹروں کو ان کے متعلقہ اضلاع میں ایڈہاک بنیادوں پر تعینات کیا گیا ہے۔ قلعہ عبداللہ میں بھی ایسی 17 لیڈی ڈاکٹروں کی چھ ماہ کے لئے تعیناتی عمل میں آئی ہے اور اس مدت میں ان کا کہیں تبادلہ نہیں ہو سکتا۔

ڈی ایچ کیو کی لیڈی ڈاکٹر گل پری (فرضی نام) کہتی ہیں کہ کیس نارمل ہو تو اکثر لوگ اپنے گھر پر ڈلیوری کرا لیتے ہیں لیکن پیچیدگی یا زیادہ درد کی صورت میں ڈاکٹروں کے پاس آتے ہیں۔

&#39;&#39;ڈی ایچ کیو میں ہر ہفتے تین سے چار خواتین کی ڈلیوری ہوتی ہے۔ ضروری دوائیں لوگوں کو خود لانا پڑتی ہیں۔ اگر ادویات اور مشینری کا انتظام ہو جائے تو ہسپتال میں روزانہ بہت لوگوں کو ڈلیوری کی سہولت دی جا سکتی ہے۔&#39;&#39;

خالد قمبرانی کا دعویٰ ہے کہ محکمہ صحت زچگی کے دوران شرح اموات&nbsp; کنٹرول کرنے کے لئے بھرپور کوششیں کر رہا ہے۔ اسی سلسلے میں 35 گائنا کالوجسٹ ڈاکٹروں کی تعیناتی کے لئے سمری حکومت کو بھیج دی گئی ہے۔

پورے ضلع صحبت پور میں ایک لیڈی ڈاکٹر: 'ایسا نہ ہوتا تو بیٹی کے سر پر ماں کا سایہ سلامت ہوتا'

ضلع قلعہ عبداللہ: 'میری اہلیہ کو لیڈی ڈاکٹر میسر آتی تو اس کی جان بچ سکتی تھی'

دس سالہ بی بی فاطمہ اپنے والدین کی واحد اولاد ہیں۔ ان کے والد ظفر اللہ انہیں پڑھا لکھا کر ڈاکٹر بنانا چاہتے ہیں لیکن انہیں خدشہ ہے کہ شاید ان کا یہ خواب پورا نہیں ہو سکے گا۔

بی بی فاطمہ کے خاندان کا تعلق ضلع قلعہ عبداللہ سے ہے جو صوبائی دارالحکومت کوئٹہ سے تقریباً 100 کلومیٹر کی مسافت پر واقع ہے۔ بی بی فاطمہ یہاں کلی سپینہ تیژہ کے گرلز پرائمری سکول میں پڑھتی ہیں۔ گزشتہ سال اگست میں آنے والی بارشوں اور سیلاب کے بعد اس سکول کی عمارت کو شدید نقصان پہنچا ہے اور یہاں پڑھنے والی بچیاں پچھلے سات ماہ سے گھر بیٹھی ہیں یا لڑکوں کے پرائمری سکول میں پڑھنے پر مجبور ہیں جسے قبائلی معاشرے میں اچھا نہیں سمجھا جاتا۔

فاطمہ کو اپنا سکول بہت یاد آتا ہے اور وہ جلد از جلد دوبارہ اپنے کلاس روم میں جانا اور ہم جماعت طالبات سے ملنا چاہتی ہیں۔

&#39;&#39;بارشوں کے بعد میں سکول نہیں جا سکی۔ سکول میں ہم پڑھتے، کھیلتے اور دوستوں سے باتیں کیا کرتے تھے۔ اب میں کئی ماہ سے گھر میں اکیلی ہوں اور مجھے اپنی دوست یاد آ رہی ہیں۔&#39;&#39;

سپینہ تیژہ کی آبادی چار ہزار سے زیادہ لوگوں پر مشتمل ہے جہاں اس وقت تین پرائمری سکول ہیں جن میں دو لڑکوں کے لیے مخصوص ہیں۔ بارشوں میں لڑکیوں کے سکول کو زیادہ نقصان پہنچا ہے جس کی وجہ سے وہاں کلاسیں معطل ہیں۔

ظفر اللہ کو خدشہ ہے کہ اگر ایک اور تیز بارش ہو گئی تو ان کی بیٹی کے سکول کی عمارت منہدم ہو جائے گی۔ ایسے حالات میں سکول کی تعمیرنو کے لیے طویل انتظار کرنا پڑے گا اور اس طرح ان کی بیٹی کی پڑھائی کا وقت نکل جائے گا۔

گورنمنٹ ٹیچرز ایسوسی ایشن بلوچستان کے مرکزی چیف آرگنائزر محمد یونس کاکڑ کہتے ہیں کہ سیلاب میں بڑے پیمانے پر سکولوں کی عمارتیں متاثر ہوئی ہیں جس کی وجہ سے وہاں بچوں کو پڑھانا اساتذہ کیلئے محفوظ نہیں ہے۔ یونیسف کے تعاون سے جتنے سکولوں کو بحال کیا جا رہا ہے وہ متاثرہ سکولوں کی مجموعی تعداد کا بہت چھوٹا سا حصہ ہیں۔ کوئٹہ سمیت بڑے شہروں میں بھی بہت سے سکول ایسے ہیں جن کی عمارت کو استعمال کرنا خطرے سے خالی نہیں۔

شماریاتی بیورو کے مطابق ضلع قلعہ عبداللہ میں شرح خواندگی 51فیصد ہے جس میں مردوں کی تعداد 67 فیصد اور خواتین کی تعداد 33 فیصد ہے۔ گزشتہ سال آنے والے سیلاب میں اس ضلعے کے 66 سکولوں کو نقصان پہنچا جن میں مجموعی طور پر 146 کلاس روم، 30 بیت الخلا اور 21 سکولوں کی چار دیواری متاثر ہوئی۔ پچھلے سات آٹھ ماہ کے دوران اس ضلعے میں صرف چھ سکولوں کو ہی بحال کیا جا سکا ہے۔

محکمہ ثانوی تعلیم کے ڈویژنل ڈائریکٹر کلیم اللہ شاہ نے بتایا کہ سیلاب سے متاثرہ سکولوں کی تعمیر ومرمت یونیسف کے تعاون سے ہو رہی ہے اور اس حوالے سے حکومت کی جانب سے کوئی فنڈ نہیں دیے گئے۔ محکمہ تعلیم متاثرہ سکولوں کی نشاندہی کرتا ہے جس کے بعد اس کی بحالی کے لیے موصول ہونے والے فنڈ محکمہ مواصلات اور تعمیرات کے ذریعے استعمال میں لائے جاتے ہیں۔

صوبائی محکمہ تعلیم کے مطابق گزشتہ سال مون سون کی غیرمعمولی بارشوں سے بلوچستان بھر میں دو ہزار 859 سکول متاثر ہوئے تھے جہاں تین لاکھ 86 ہزار 708 طلبہ و طالبات زیرتعلیم ہیں۔

یونیسف کے جاری کردہ بحالی منصوبے کے تحت 12 اضلاع کے 194 سکولوں میں سے 67 کی بحالی عمل میں آ چکی ہے جبکہ باقی 127 سکولوں کی تعمیرومرمت کا کام جاری ہے۔ آئی آر سی بھی اس کام میں یونیسف کی معاون ہے۔

سیکرٹری ثانوی تعلیم عبدالرئوف بلوچ کا کہنا ہے کہ سکولوں کی بحالی کے علاوہ نئے سکولوں کا قیام بھی عمل میں لایا جا رہا ہے۔ اس کے علاوہ سکولوں کو گرانٹس بھی دی جا رہی ہیں تاکہ ضروری سہولتوں کے فقدان پر قابو پایا جا سکے۔ اس کے علاوہ محکمہ تعلیم نے یونیسیف کے تعاون سے بالغوں کے لیے تعلیمی مراکز بھی قائم کیے ہیں۔

محکمہ تعلیم یا اساتذہ: چاغی میں بند پڑے سکولوں کا ذمہ دار کون ہے؟

غیر سرکاری تنظیم انٹرنیشنل ریسکیو کمیٹی (آئی آر سی) اس وقت بلوچستان کے مختلف اضلاع میں سکول نہ جانے والی بچیوں کو تعلیم دینے اور ہنر سکھانے کے لیے کام کر رہی ہے۔ اس تنظیم کے سینئر مینیجر سید افتخار شاہ کے مطابق مون سون کی بارشوں سے ان کی تنظیم کے سکول بھی متاثر ہوئے ہیں۔ آئی آر سی نے اپنے سکول بحال کرنے کے علاوہ کئی سرکاری سکولوں کی تعمیر ومرمت میں مدد دینے کے علاوہ اساتذہ کو نفسیاتی مدد بھی فراہم کی ہے۔

حال ہی میں اس تنظیم نے قلعہ عبداللہ کے چند سکولوں سمیت صوبے کے پانچ دیگر اضلاع میں 89 سکولوں کو بحال کرایا ہے۔

مطیع اللہ مطیع

مطیع اللہ مطیع کوئٹہ سے تعلق رکھتے ہیں۔ وہ ماحولیات، موسمیاتی تبدیلی، خواتین اور بچوں کی حقوق سے متعلق مسائل پر رپورٹنگ کرتے ہیں۔