ضلع ٹانک کے گاؤں تتور میں رہنے والے زیر ولی کی بیٹی نثا بی بی گزشتہ برس اگست میں پانی میں ڈوب کر جاں بحق ہو گئیں۔ زیر ولی بتاتے ہیں کہ بیٹی کو&nbsp; زندہ حالت میں نکال لیا گیا تھا لیکن راستے میں سیلابی پانی کے باعث انہیں تتور پل کے مقام پر رکنا پڑا اور بروقت ہسپتال نہ پہنچنے کے سبب بیٹی نے&nbsp; وہیں دم توڑ دیا۔

ایک برس بعد اگست ہی کے مہینے میں تتور کے نصیب اللہ کو اپنی بیوی کی زچگی کے لیے شہر کے ہسپتال جانے کی ضرورت پیش آئی۔

وہ&nbsp; بتاتے ہیں کہ رات کے وقت جب وہ تتور پل پر پہنچے تو پانی کے تیز بہاؤ کی وجہ سے راستہ بند تھا۔ ہمیں طویل اور دشوار متبادل راستہ اختیار کرنا پڑا۔ ہسپتال پہنچنے پر ڈاکٹر نے بتایا کہ بچہ مر چکا ہے اور زچہ کی جان بچانے کے لیے فوری آپریشن کرنا ضروری ہے۔

&quot; اگر پل موجود ہوتا اور ہم بروقت ہسپتال پہنچ پاتے تو شاید بچہ صحیح سلامت ہوتا&quot;۔

نشیبی علاقوں پر مشتمل ضلع ٹانک مون سون کی بارشوں کے دوران کم و بیش ہر سال سیلابی صورت حال سے دوچار ہوتا ہے۔

ضلع جنوبی وزیرستان کے بارانی پانی کا نکاس ٹانک میں ہوتا ہے، یہ پانی زام کے مقام پر چھ بڑے نالوں پیر کچ، لواڑا، سیدگی، چھوا، ٹکواڑہ اور کریانی میں تقسیم ہوتا ہے۔ ان نالوں یا رود کوہیوں میں سیلاب اور طغیانی رہن سہن، زراعت اور نظام آمد و رفت سب کو متاثر کرتی ہے۔

2010ء میں آنے والے سیلاب نے جہاں ضلع بھر میں تباہی مچائی تھی وہاں تتور پل کو بھی بہت متاثرہ کیا جس کے بعد وہ کارآمد نہ رہا۔ یہ پل نیو تتور، تتور، کڑی لٹی، عمر خان، کوٹ گلان اور بزائے سمیت متعدد دیہات کو ٹانک شہر سے ملانے والا اکلوتا رابطہ پل تھا۔

پل کے بے کار&nbsp; ہونے سے زیادہ بارش ہوتے ہی ان دیہات کا شہر سے زمینی رابطہ منقطع ہو جاتا ہے۔

تتور سے تعلق رکھنے والے 35 سالہ ملک عباس علی تتور کا کہنا ہے کہ پل کا راستہ بند ہونے کے باعث شہر سے صرف آٹھ کلومیٹر کی دوری کے باوجود بھی علاقے کے لوگ سودا سلف لانے کے لیے 40 کلومیٹر طویل چیسن کچ کا راستہ اختیار کرنے پر مجبور ہیں۔

&quot;یوں اس مہنگائی میں اشیا خور و نوش دگنی قیمت میں پڑ جاتی ہیں&quot;۔

مون سون کے دوران سکول جانے اور آنےکے لیے بعض اوقات پل کے قریب بیٹھ کر طلبا و طالبات کو گھنٹوں انتظار کرنا پڑتا ہے۔

گاؤں کوٹ گلان سے تعلق رکھنے والے ملک حسین خان کہتے ہیں کہ ہر سال ان کی بیشتر زرعی زمین میں سیلابی پانی آ جاتا ہے جس سے وہ کچھ عرصہ قابل کاشت نہیں رہتیں۔

&nbsp;&ldquo;گزشتہ برس مجھ سمیت متعدد کسانوں کی گندم کی کھڑی فصل سیلابی پانی کی نذر ہو گئی۔&rdquo;

ویلج چیئرمین اور سماجی شخصیت فضل کریم تتور کا کہنا تھا کہ نکاسی کے نظام میں خرابی کے باعث بارش کا معمولی پانی بھی سیلاب کی صورت اختیار کر کے تباہی مچا دیتا ہے۔

&quot;جنوبی وزیرستان کا بیشتر بارانی پانی نالے پیر کچ میں آ جاتا ہے، جس سے اس نالے کے قریب نہ صرف آبادی متاثر ہوتی ہے بلکہ زرعی زمین بھی ناقابل کاشت ہو جاتی ہے۔ دیگر پانچ نالوں میں عموماً پانی نہ ہونے کے برابر ہوتا ہے۔ اکثر اوقات کریانی اور لواڑا رود کوہیوں کے کاشت کار پانی نہ ملنے سے زمین کاشت نہیں کر پاتے ہیں۔&quot;

ان کا کہنا تھا کہ زام کے مقام پر پانی کی تقسیم کو اگر ٹھیک کر دیا جائے اور تمام بڑے نالوں میں پانی برابر ہو تو تقریباً تمام آبادی کو سیلاب سے بچایا جا سکتا ہے۔ اس سے کاشتکاری سمیت دیگر فوائد بھی حاصل کیے جا سکتے ہیں۔

&quot;جس طرح گومل زام ڈیم کی تعمیر سے ٹانک کا مشرقی علاقہ سیلاب سے محفوظ ہو گیا، اس طرح ٹانک زام ڈیم کی تعمیر سے مغربی حصہ بھی محفوظ بنایا جا سکتا ہے، اس لیے ٹانک زام ڈیم کو بروقت تعمیر کیا جائے۔ اس سے بارش کا پانی علاقے میں کاشت کاری کے لیے استعمال ہو گا اور سیلاب سے تحفظ ملے گا۔&quot;

محکمہ آبپاشی کے حکام تسلیم کرتے ہیں کہ ڈیم کی تعمیر سے وزیرستان سے آنے والا بارانی پانی ذخیرہ اور منصوبہ بندی کے تحت زمین داروں کو فراہم کیا جا سکتا ہے۔ اس سے سیلابی صورت حال پیدا ہو گی اور نہ پانی ضائع ہو گا۔

محکمہ تعمیرات کے حکام کا کہنا ہے کہ تتور پل کی تعمیر رواں سال کے سالانہ ترقیاتی پروگرام میں شامل ہے اور اس کی پرپوزل شعبہ کنسلٹنٹ کے پاس موجود ہے جس کی منظوری کے بعد اخبارات میں ٹینڈر شائع کر دیا جائے گا۔ ان کے مطابق سیلاب بحالی سکیم میں بھی اس پل کی تعمیر کو شامل کیا گیا ہے۔ دونوں منصوبوں میں سے جس کی بھی منظوری ہوئی، تعمیراتی کام شروع کر دیا جائے گا۔

ڈپٹی کمشنر محمد شعیب کا کہنا تھا کہ سرکاری کام میں کچھ وقت لگتا ہے تاہم مراحل کی جلد تکمیل کے لیے وہ محکمہ تعمیرات سے رابطے میں ہیں۔

'حکومت سڑکیں اور پل بنا دے، ہم چیئر لفٹ پر سفر کرنا چھوڑ دیں گے'

سیلاب کی نذر ہونے والے تتور پل کی ازسرنو تعمیر سے انسانی جانیں بچائی جا سکتی ہیں

text

&nbsp;نئی مردم شماری کی بنیاد پر ہونے والی نئی حلقہ بندیوں میں ضلع ٹانک قومی اسمبلی کی اپنی علیحدہ نشست سے محروم ہو گیا ہے۔

تین لاکھ 90 ہزار 626 آبادی پر مشتمل ضلع ٹانک کو 2018ءکے انتخابات میں قومی اور صوبائی اسمبلی کی اپنی ایک ایک نشست دی گئی تھی۔ ان میں این اے 37 پر مولانا فضل الرحمن کے صاحبزادے مولانا اسعد محمود اور پی کے 94 پر محمود احمد خان کامیاب ہوئے تھے۔

2023ء میں اس ضلعے کی آبادی چار لاکھ ستر ہزار بتائی گئی ہے۔ نئی حلقہ بندی میں یہاں کی صوبائی نشست برقرار تو رکھی گئی ہے لیکن پی کے 108(پرانا پی کے 94) میں تحصیل جنڈولہ کا علاقہ بھی شامل ہے۔

یہ علاقہ پچھلے الیکشن میں اس حلقے کا حصہ نہیں تھا۔ بلکہ انضمام کے بعد پہلے صوبائی اسمبلی کے انتخابات میں جنڈولہ سابقہ ایف آرز کو ملا کر تشکیل دیے گئے صوبائی حلقے (پی کے 115) میں شامل تھا۔

&nbsp;اسی طرح قومی اسمبلی کا حلقہ &#39;این اے 37 ٹانک&#39; سے اب &#39;این اے 43 ڈیرہ کم ٹانک&#39; ہو گیا ہے۔ اس حلقے میں ضلع ٹانک(بشمولجنڈولہ)کے ساتھ ضلع ڈیرہ اسماعیل خان کی دو تحصیلیں کلاچی اور پنیالہ کی پوری آبادیاں اور تحصیل ڈیرہ اسماعیل خان کی یارک قانونگوئی بھی شامل کی گئی ہے۔

یوں دونوں اضلاع کی یہ آبادیاں ملا کر این اے 43 اب سات لاکھ 64 ہزار 95 نفوس کی آبادیوں پر مشتمل ہو گا۔

الیکشن کمیشن نے اس حلقے میں تیدیلی کی وجوہات میں لکھا ہے کہ آبادی کے لحاظ سے ضلع ٹانک کی قومی نشست 52 فیصد یعنی نصف سے تھوڑی زیادہ بنتی تھی۔ اسی طرح ضلع ڈیرہ اسماعیل خان کی نشستیں 2.02 یعنی دو سے تھوڑی زیا دہ بنتی تھیں۔

کمیشن رپورٹ کی مطابق دونوں اضلاع ٹانک اور ڈیرہ اسماعیل خان کی آبادی کو ملا کر 54.2 نشستیں بنتی تھیں۔ لیکن ان دونوں اضلاع کو ملا کر تین قومی نشستیں دے دی گئی ہیں۔

اسی طرح آبادی کے لحاظ سے ضلع ٹانک کے حصے میں صوبائی اسمبلی کی 1.32 نشست آتی تھی۔ اگر آبادی کے فارمولے کے تحت&nbsp; ڈیڑھ سے زیادہ حصہ بنتا تو دو نشستیں دے دی جاتیں۔ کیونکہ یہ ڈیڑھ سے کم ہے اس لیے ایک نشست دی گئی ہے۔

مقامی سیاسی حلقوں کا اتفاق ہے کہ نئی حلقہ بندیوں سے بڑا نقصان تو ضلع ٹانک اور یہاں کے عوام کا ہوا ہے۔ جہاں تک سیاسی فریقوں کا تعلق ہے تو جماعت جمعیت علماء اسلام کو کوئی خاص فرق نہیں پڑے گا۔ کیونکہ ماضی میں بھی مولانا فضل الرحمان ڈیرہ ٹانک مشترکہ حلقے سے الیکشن جیت چکے ہیں۔

نئی حلقہ بندیوں سے ضلع ٹانک سے قومی اسمبلی کے لیے متوقع امیدواروں کو ضرور نقصان ہوا ہے جنہوں نے گزشتہ پانچ سال حلقوں میں بھاگ دوڑ کی تھی۔ اب حلقے میں اچانک تبدیلی پر نہ صرف پریشان بلکہ ناراض ہیں۔

سابق ممبر قومی اسمبلی داور خان کنڈی حلقہ ختم ہونے کی وجہ 2023ء کی مردم شماری کو سمجھتے ہیں۔ وہ بتاتے ہیں کہ ضلع ٹانک میں رہنے والے محسود اور برکی قبائل کا اندراج وزیرستان میں گیا کیا ہے، جو ٹانک کے ساتھ زیادتی ہے۔

وہ کہتے ہیں کہ پانچ لاکھ 15 ہزار کی آبادی پر چترال کو تو قومی اسمبلی کی نشست مل گئی، اگر ضلع ٹانک میں مردم شماری &quot;درست&quot; ہوتی تو یہاں بھی نشست مل سکتی تھی۔

&quot;یہ حلقہ انتخاب بہت ہی دور تک پھیل گیا ہے۔ جہاں امن و امان کی مخدوش صورت حال میں انتخابی مہم چلانا آسان نہیں ہے۔ ہم لوگوں کو اپنی زندگیاں خطرے میں ڈال کر انتخابی مہم چلانا پڑے گی۔&quot;

سیاسی رہنما عثمان خان بیٹنی بھی ناراض ہیں۔ وہ کہتے ہیں ٹانک کے ساتھ سوتیلی ماں جیسا سلوک کیا گیا۔ چار لاکھ ستر ہزار آبادی کو اپنا حلقہ کیوں نہیں دیا جا سکتا، سابقہ الیکشن کی طرح ضلع ڈیرہ اسماعیل خان کو قومی کی دو اور ٹانک کو اپنی الگ نشست دی جائے۔

&nbsp;پاکستان تحریک انصاف کے رہنما ملک رمضان شوری اس حلقے سے متوقع امیدوار ہیں۔ وہ بتاتے ہیں کہ مقامی سیاست میں لوگوں کے غم و خوشی میں شامل ہونا ضروری ہوتا ہے۔ لیکن موجودہ حلقے میں دور دراز علاقوں میں جانا ممکن نہیں ہو گا۔

&nbsp;&quot;نئی حلقہ بندی سے ٹانک کی تو شناخت ہی نہیں رہی۔ حلقے کا نام بھی &#39;ڈیرہ کم ٹانک&#39; ہو گیا ہے۔&quot;

صحافی شیخ رحمت اللہ بتاتے ہیں کہ موجودہ حلقہ جغرافیائی حدود کے لحاظ سے کافی وسیع ہے۔ یہاں کسی بھی امیدوار کو انتخابی مہم میں شدید مشکلات کا سامنا ہو گا۔

وہ کہتے ہیں کہ ٹانک پہلے سے ہی پسماندہ ضلع ہے اور یہاں ترقیاتی فنڈ ہمیشہ ناکافی ہوتا ہے۔ اب اس میں مزید پسماندہ علاقے شامل ہو گئے ہیں جس کا نتیجہ یہ ہو گا کہ منتخب نمائندے کا ترقیاتی فنڈ عوامی منصوبوں کی بجائے لوگوں کو خوش کرنے کے لیے بندر بانٹ کی نذر کر دیا جائے گا۔

شیخ رحمت اللہ کا خیال ہے کہ قومی حلقے میں شامل علاقوں کے انتظامی امور ضلع ڈیرہ اسماعیل خان کے پاس ہیں۔ اگر منتخب نمائندے ٹانک سے ہوں گے تو ان کو مسائل حل کرنے بھی شدید مشکلات ہوں گی۔ اس لیے الیکشن کمیشن ضلع ٹانک کی قومی نشست بحال کرے۔

ضلع گجرات کے انتخابی حلقوں میں توڑ پھوڑ تحریک انصاف کو اعتراضات، فائدہ کسے ہو گا؟

ضلع ٹانک کا قومی حلقہ پھر ڈیرہ اسماعیل خان سے جڑ گیا، نقصان کس کا ہوا؟

ٹانک کو ضلع بنے 30 سال ہو گئے ہیں لیکن اب بھی یہاں کے لوگ عام بیماریوں کا علاج کرانے کے لیے دوسرے شہروں میں جاتے ہیں۔

خیبرپختونخوا میں جنوبی وزیرستان، لکی مروت اور ڈیرہ اسماعیل خان کے درمیان واقع ٹانک کی آبادی تقریباً پانچ لاکھ ہے اور یہ صوبے کے پسماندہ اضلاع میں شمار ہوتا ہے۔ یہاں پانی، بجل، مواصلات اور خاص طور پر صحت کے شعبے میں اب تک کوئی ترقی نہیں ہوئی۔

ضلعے میں تحصیل سطح کا ایک واحد ہسپتال (ٹائپ سی) واقع ہے جس میں ناصرف ٹانک اور گردونواح بلکہ جنوبی وزیرستان کے لوگوں کا بھی رش رہتا ہے۔ لیکن اس ہسپتال میں علاج معالجے کی خاطرخواہ سہولیات موجود نہیں ہیں۔

ٹانک کے سیاسی رہنما اور ناظمین اتحاد کے صدر فضل کریم تتور بتاتے ہیں کہ ہسپتال کے شعبہ ایمرجنسی میں درد کے انجکشن کے علاوہ کوئی سہولت نہیں ہے۔

&quot;پہلے یہاں آنے والے مریضوں کو دوسرے ہسپتالوں میں بھیج دیا جاتا تھا لیکن اب مالی وسائل کی کمی کے باعث ریسکیو 1122نے بھی زخمیوں کے علاوہ دیگر مریضوں کو دوسرے شہروں کو منتقل کرنا بند کر دیا ہے اور لوگوں کو بھاری کرائے پر ایمبولینس حاصل کرنا پڑتی ہے&quot;۔

ان کا یہ بھی کہنا ہے کہ ضلع بننے کے بعد ہسپتال کو اپ گریڈ نہیں کیا گیا۔ اسی لیے موجودہ عمارت مستقبل میں ہسپتال کا درجہ بڑھنے کی صورت میں ناکافی ثابت ہو گی۔ اس طرح عملے اور ڈاکٹروں کی تعداد تو بڑھ جائے گی لیکن ان کی رہائش کا بندوبست نہیں ہوگا جس کی وجہ سے وہ اپنی کام اچھے طریقے سے نہیں کر پائیں گے۔

ہسپتال کی میڈیکل سپرنٹنڈنٹ غزالہ ہدایت کہتی ہیں کہ ہسپتال میں علاج معالجے کے معیار سے متعلق کیے جانے والے منفی دعوے حقائق پر مبنی نہیں ہیں۔ &quot;اگرچہ وسائل کی کممی ہے اور ہسپتال پر بوجھ بھی زیادہ ہے لیکن اس کے باوجود دستیاب وسائل میں اچھا علاج معالجہ فراہم کرنے کی بھرپور کوشش کی جا رہی ہے&quot;۔

&nbsp;انہوں نے ہسپتال کی کارکردگی سے متعلق گزشتہ مہینے کی رپورٹ دکھاتے ہوئے بتایا کہ جون میں یہاں 15 ہزار سے زیادہ مریضوں کا معائنہ کیا گیا جبکہ ایمرجنسی وارڈ میں پانچ ہزار سے زیادہ مریضوں کا علاج ہوا۔

&quot;گزشتہ مہینے ہسپتال میں 32 عام آپریشن ہوئے، ڈلیوری کے&nbsp; 200 سے زیادہ مریضوں کو نمٹایا گیا جن میں 31 آپریشن بھی شامل ہیں اور آنکھوں کے 16، آرتھوپیڈک کے سات اور یورالوجی کے دو آپریشن ہوئے&quot;۔

ٹانک کے سماجی رہنما اور سابق ڈسٹرکٹ ہیلتھ افسر ڈاکٹر طاہر جاوید آرائیں فضل کریم کی باتوں کی تصدیق کرتے ہوئے کہتے ہیں کہ موجود عمارت میں ہسپتال کی اپگریڈیشن ممکن نہیں ہے۔

وہ تجویز دیتے ہیں کہ ہسپتال کی موجودہ عمارت کو ویمن اینڈ چلڈرن ہسپتال میں تبدیل کر کے ڈیرہ اسماعیل خان روڈ پرڈسٹرکٹ ہیڈ کوارٹر ہسپتال کے لئے نئی عمارت بنائی جائے۔

ان کا یہ بھی کہنا ہے کہ خیبر پختوانخوا میں سرکاری و نجی شراکت سے چلنے والے ہسپتالوں کے بہتر نتائج آئے ہیں اس لئے ٹانک کے سرکاری ہسپتال کو بھی کسی غیر سرکاری تنظیم کے اشتراک سے چلایا جائے تاکہ اس کی کارکردگی بہتر بنائی جا سکے۔

&quot;چونکہ موجودہ فنڈ سے ٹانک اور جنوبی وزیرستان دونوں اضلاع کے مریضوں کو سہولیات دینا ممکن نہیں اس لیے صوبائی حکومت ہسپتال کے لیے سالانہ بنیادوں پرخصوصی گرانٹ دے جو ایک کمیٹی کے ذریعے استعمال کی جائے&quot;۔

تاہم فضل کریم سرکاری و نجی شعبے کی شراکت میں ہسپتال چلانے کی مخالفت کرتے ہوئے کہتے ہیں کہ ایک سال قبل ہسپتال کی سکیورٹی اور صفائی کے لئے ایک غیر سرکاری تنظیم نے چند ملازمین کو بھرتی کیا تھا جنہیں تاحال تنخواہیں ادا نہیں کی گئیں۔

&quot;اگر ہسپتال کا انتظام نجی شعبے یاغیر سرکاری اداروں کو دیا گیا تو مسائل میں مزید اضافہ ہو سکتا ہے&quot;۔

وہ ہسپتال کی اپ گریڈیشن کو ہی اس مسئلے کا واحد ممکن حل سمجھتے ہیں۔ انہیں یقین ہے کہ ہسپتال کا درجہ بلند ہو جانے سے اس میں مریضوں کے لیے گنجائش اور علاج معالجے کی سہولیات بڑھ جائیں گے اور نئے سپیشلسٹ ڈاکٹروں کی تعیناتی سے علاقے کے عوام کو فائدہ پہنچے گا۔

ڈاکٹر غزالہ ہدایت انکشاف کرتی ہیں کہ ہسپتال کی اپ گریڈیشن کے حوالے کاغذی کاروائی مکمل کر کے صوبائی ہیڈکوارٹر بھیج دی گئی ہے اور امید ہے کہ اس معاملے پر حکومت جلد کارروائی شروع کر دے گی۔

پورے ضلع صحبت پور میں ایک لیڈی ڈاکٹر: 'ایسا نہ ہوتا تو بیٹی کے سر پر ماں کا سایہ سلامت ہوتا'

"یہاں ایمرجنسی میں صرف درد کا انجکشن ملتا ہے"، ٹانک کے شہری واحد سرکاری ہسپتال میں سہولتوں کے فقدان پر نالاں

خیبر پختونخوا کے جنوبی اضلاع ڈیرہ اسماعیل خان اور ٹانک مون سون کی بارشوں میں اکثر سیلابی پانی کے رحم و کرم پر ہوتے ہیں، پہاڑوں سے آتے پانچ بڑے نالے یا چھوٹے دریا جنہیں مقامی زبان میں رود کوہی کہا جاتا ہے اور درجنوں چھوٹے نالے سال کا بیشتر حصہ یہاں بہتے ہیں۔ مون سون میں پانی کی بڑھتی سطح سیلاب اور طغیانی کا باعث بنتی ہے اور مقامی آبادی کو گھروں کے انہدام اور فصلوں کے نقصان کا سامنا کرنا پڑتا ہے اور عارضی طور پر لوگ بے گھر بھی ہو جاتے ہیں۔

2010 کے سیلاب سے ہونے والے نقصانات کی ابتدا خیبر پختونخوا کے ان جنوبی اضلاع میں ہی ہوئی تھی جب ٹانک کے نواحی علاقوں جیسے پائیں، نندور اور ڈیرہ اسماعیل خان کی تحصیل پُروا میں سیلابی ریلے دیہات میں داخل ہوئے۔ اس سے پائیں کے علاقے میں دو افراد جاں بحق ہوئے اور 370 مکانات منہدم ہوگئے تھے، زرعی زمینوں کو شدید نقصان پہنچا اور لوگوں کو نقل مکانی کرنی پڑی۔

ملک بھر کی طرح یہاں بھی سیلاب آتا ہے تو سیاسی نمائندوں کی جانب سے &quot;ڈیم بناؤ&quot; کی نعرے بازی شروع ہوجاتی ہے اور اس مرتبہ بھی یہی کچھ ہوا۔ صوبے میں 2013 سے حکمران جماعت پاکستان تحریک انصاف (پی ٹی آئی) کا نعرہ تھا کہ وہ سیکڑوں چھوٹے ڈیم بنائیں گے اور گزشتہ سیلاب میں بھی یہی نعرہ لگا۔

پچھلے سال دسمبر میں صوبائی حکومت کے حوالے سے خبر آئی کہ ڈیرہ اسماعیل خان اور ٹانک کے اضلاع میں بڑے نالوں (زام) ٹانک زام، درابن زام اور چودوان زام پر تین ڈیم بنائے جائیں گے، اس سے پہلے صوبائی وزیر بلدیات و دیہی ترقی فیصل امین گنڈاپور بھی ضلع ٹانک میں غوزئی ڈیم پر عملی کام کے آغاز کا مژدہ سنا چکے تھے۔

<h2>ٹانک زام ڈیم کا منصوبہ</h2>

ٹانک زام ڈیم جوکہ پہلے سے تعمیر شدہ گومل زام ڈیم سے کئی درجے بڑا اور مفید ڈیم ہے، اس کی پہلی فیزبیلٹی رپورٹ 1988میں بنائی گئی تھی۔ اُس وقت ڈیم کی لاگت کا تخمینہ پانچ ارب روپے بتایا گیا جبکہ&nbsp; 2007 میں یہ لاگت 10 ارب تک پہنچ گئی۔ ٹانک زام ڈیم کو شہر سے&nbsp; 50کلو میٹر دور ہنس تنگی کے مقام پر بنانےکی تجویز سامنے آئی۔

مارچ 2022 میں اس ڈیم کی انجینئرنگ کنسلٹنسی سروسز کیلئے خیبر پختونخوا کے ڈائریکٹوریٹ سمال ڈیمز ایریگیشن اور نیس پاک (NESPAK) کے درمیان معاہدہ ہوا جس کے تحت نیس پاک نے اس ڈیم کی فیزیبلٹی سٹڈی اپ ڈیٹ کرنے، انجینیئرنگ سروسز، تفصیلی ڈیزائن اور نئے پی سی ون کی تیاری سمیت دیگر امور انجام دینا تھے جبکہ ن اس پراجیکٹ کا تخمینہ 18 ارب روپے لگایا گیا۔

تکنیکی تفصیلات کے مطابق، ٹانک زام ڈیم میں 345000 ایریا فٹ پانی جمع کرنے کی گنجائش&nbsp; ہوگی، جس سے 70 ہزار ایکڑ زمین سیراب ہوگی اور25.5 میگا واٹ بجلی بھی پیدا کی جا سکے گی، ساتھ ہی اس سے زیرزمین پانی کی سطح بھی بلند ہوگی جو مجموعی طور پر اس علاقے میں پانی کی کمی کی صورتحال میں بہتری کا سبب بنے گی۔

<h2>ڈیم کی تعمیر پر تحفظات</h2>

ٹانک اتحاد کے صدر و سماجی شخصیت حاجی زمان بیٹنی ٹانک زام ڈیم کی تعمیر کو وقت کی اہم ضرورت قرار دیتے ہیں اور ان کا کہنا ہے کہ اس سے علاقے میں معاشی ترقی اور زراعت کو فروغ حاصل ہو گا۔

ان کا یہ بھی ہے کہ ہر سال سیلاب سے کروڑوں روپے کا مالی اور جانی نقصان ہوتا ہے۔ ٹانک زام ڈیم کی تعمیر سیلاب کی روک تھام میں مدد گار ثابت ہوگی جبکہ ڈیم کی تعمیر سے زیر زمین پانی کا لیول اونچا اور قابل استعمال ہو جائے گا اور اس سے آبنوشی کے مسئلے پر کافی حد تک قابو پا لیا جائے گا۔

ڈیم کیلئے جگہ کے انتخاب پر تحفظات بیان کرتے ہوئے جنڈولہ سب ڈویژن سے تعلق رکھنے والے سماجی رہنما رفعت اللہ المعروف پتو لالا بیٹنی کہتے ہیں کہ جنڈولہ کے عوام ڈیم کے تعمیر کے مخالف نہیں، لیکن اسے جس مقام پر تعمیر کیا جا رہا ہے اس پر انہیں اعتراضات ہیں کیونکہ مجوزہ مقام پر تعمیر سے جنڈولہ کی آبادی بری طرح متاثر ہوگی۔

&quot;ڈیم کی تعمیر سے جنڈولہ کے علاقے خرگی،کڑی وام اور گرنی سمیت مین وزیرستان شاہراہ متاثر ہوگی۔ اس کے علاوہ چار قدیمی قبرستان بھی اس کی زد میں آئیں گے۔&quot;

ان کا ہے کہ جنڈولہ کے لوگ اس ڈیم کو موجودہ مقام ہنس تنگی پر کسی صورت تعمیر نہیں ہونے دیں گے۔

ٹانک زام ڈیم کیلئےنیسپاک کے پراجیکٹ مینیجر حامد مسعود قریشی کہتے ہیں کہ مذکورہ جگہ متنازع&nbsp; ہونے کی وجہ سے ٹانک زام ڈیم کا کام فیزیبلٹی سٹڈی سے آگے نہیں بڑھ پایا۔ جب تک یہ تنازعہ ختم نہیں ہوگا، اس وقت تک دوبارہ پی سی ون نہیں بنایا جائے گا نہ ہی عملی کام کا آغاز ہوسکے گا۔

ٹانک کے ڈپٹی کمشنر محمد شعیب خان سے جب اس بارے میں بات کی گئی تو انہوں نے کہا کہ جنڈولہ کی آبادی ڈیم بنانے کی مخالف نہیں، بس ان کے تحفظات اور خدشات&nbsp; دور کرنے کی ضرورت ہے۔

مقامی آبادی کو خدشہ ہے کہ اس ڈیم کی مقررہ جگہ پر تعمیر سے ان کی زیادہ آبادی متاثر ہوگی، جبکہ ان کے قدیم قبرستان جس میں ان کے اباؤ اجداد دفن ہیں، وہ بھی ختم ہوجائیں گے۔ ساتھ ہی انہیں یہ بھی خدشہ ہے کہ اس ڈیم میں مقامی آبادی کے بجائے غیر مقامی افراد کو بھرتی کیا جائے گا۔ مقامی آبادی کا یہ بھی مطالبہ ہے کہ ٹانک زام ڈیم انہیں 24گھنٹے مفت بجلی فراہم کی جائے اور اس کا تحریری معاہدہ ہو۔

ڈپٹی کمشنر شعیب خان نے مزید بتایا کہ جنڈولہ کے مشران سے دو مرتبہ اس حوالے سے مقامی روایات کے مطابق جرگہ بھی ہوا ہے اور انشاء اللہ جلد ان کے خدشات دور کر دیے جائیں گے۔ ان کا کہنا تھا کہ کڑی وام کے مقام پر ایک اور جگہ تجویز کی گئی ہے اور امید ہے اس حوالے سے نیسپاک کی ٹیم جلد ٹانک کا دورہ کرے گی۔

چھوٹے ڈیمز: کوہلو کی زرعی امیدوں پر موسمیاتی تباہی نے پانی پھیر دیا

خیبرپختونخوا کے جنوبی اضلاع کو سیلاب سے بچانے کے لیے ٹانک زام ڈیم کا منصوبہ متنازع کیوں ہوا؟

خیبرپختونخوا کے ضلع ٹانک کی چار لاکھ آبادی میں قریباً نصف لوگ پینے کے لئے کچے تالابوں میں جمع ہونے والے بارشوں کے پانی پر انحصار کرتے ہیں۔ ان میں مرکزی شہر ٹانک کی سوا لاکھ آبادی بھی شامل ہے جسے بنیادی ضرورت کا پانی ٹانک زام نامی علاقے میں واقع ایک تالاب سے پہنچایا جاتا ہے۔

اس تالاب کا پانی پہلے ایک نالے کے ذریعے شہر کے قریب چند چھوٹے تالابوں میں آتا ہے جہاں سے اسے پائپ لائنوں کے ذریعے لوگوں کے گھروں میں بھیجا جاتا ہے۔

شہر کو پانی مہیا کرنے والے یہ چھوٹے تالاب احمد شاہ نامی علاقے میں واقع ہیں، جنہیں سو سال پہلے بنایا گیا تھا۔

ٹانک زام کے بڑے تالاب سے یہ پانی جس نالے کے ذریعے ان کچے تالابوں میں لایا جاتا ہے وہ بھی کچا ہے جس کے کناروں پر نہ تو کوئی حفاظتی بندوبست ہے اور نہ ہی اس کی نگرانی کا کوئی انتظام ہے جس کی وجہ سے آئے روز جانور اس میں گر کر ہلاک ہوتے رہتے ہیں اور اس طرح یہ نالہ ہمیشہ آلودہ رہتا ہے۔

مقامی ڈاکٹر شیخ احسان اللہ کا کہنا ہے کہ یہ پانی پینے کے قابل نہیں ہے۔ نالے سے ملحقہ دیہات کے لوگ اسی میں نہاتے اور کپڑے دھوتے ہیں اور ان کے مویشی بھی اسی نالے میں پانی پیتے ہیں اور یہ آلودگی دن بدن بڑھتی جا رہی ہے۔

چونکہ اس پانی کو بڑے پیمانے پر صاف کرنے یا نتھارنے کا کوئی انتظام نہیں ہے اس لئے ٹانک میں لوگوں کی بڑی تعداد ایسی بیماریوں میں مبتلا رہتی ہے جو آلودہ پانی سے جنم لیتی ہیں۔

انٹرنیشنل جرنل فار انوائرنمنٹل سٹڈیز میں ضلع ٹانک کے حوالے سے چھپنے والی ایک رپورٹ کے مطابق یہاں ہسپتالوں میں آنے والے 78 فیصد مریض پیٹ اور آنتوں کی بیماریوں، 14 فیصد ٹائیفائیڈ اور آٹھ فیصد ہیپاٹائٹس میں مبتلا ہوتے ہیں۔

اگر ملحقہ ضلع جنوبی وزیرستان میں بارشیں زیادہ ہوں تو اس نالے میں سیلابی کیفیت پیدا ہو جاتی ہے اور پانی اس کے کنارے توڑ کر باہر نکل آتا ہے۔

ایسے واقعات کے بعد عام طور پر نالے کی مرمت میں کئی دن لگ جاتے ہیں۔اگر بارشیں کم ہوں تو ٹانک زام کے تالاب میں پانی کی مقدار بھی کم ہو جاتی ہے نتیجتاً شہر کو پانی کی قلت کا سامنا کرنا پڑتا ہے۔

ٹانک کے شہریوں کو شکایت ہے کہ کچے نالے کے قریبی دیہات کے کسان سرکاری اہلکاروں کی مبینہ ملی بھگت سے آبپاشی کے لئے اس نالے کا پانی چوری کرتے ہیں۔ اس کے علاوہ پانی فروخت کرنے والے لوگوں نے بھی نالے پر غیرقانونی کنکشن لگا رکھے ہیں۔ اس طرح شہر کو پانی کی سپلائی میں خلل آتا رہتا ہے۔ جب عوامی دباؤ بڑھتا ہے تو انتظامیہ پانی بحال کرا دیتی ہے لیکن کچھ عرصہ بعد یہ سلسلہ دوبارہ شروع ہو جاتا ہے۔

ٹانک اور گرد و نواح میں زیر زمین میٹھے پانی کے ذخائر موجود نہیں ہیں۔

مقامی ماہر ارضیات محمد ظاہر شاہ کے مطابق شہر میں زیر زمین پانی کڑوا ہونے کی وجہ نکاسی آب کے نظام کی خرابی ہے کیونکہ سیوریج کا پانی زیر زمین پانی میں مل کر اس میں تیزابیت کو بڑھا دیتا ہے اور اس طرح یہ پانی ناقابل استعمال ہو جاتا ہے۔

&quot;اگر نکاسی آب کا نظام ٹھیک کر دیا جائے تو کچھ عرصہ بعد زیر زمین پانی بھی قابل استعمال ہو سکتا ہے&quot;۔

محکمہ پبلک ہیلتھ کے ایکسیئن عبدالرحمٰن بتاتے ہیں کہ ضلع بھر میں جہاں میٹھا پانی دستیاب ہے وہاں مختلف ادوار میں 142 ٹیوب ویل لگائے گئے ہیں جن سے ڈبرہ، گومل، اتار، بیٹنی اور کنڈی کی لگ بھگ ڈیڑھ لاکھ آبادی کو پانی فراہم کیا جا رہا ہے۔

ان میں سے 20 ٹیوب ویل کچھ عرصہ پہلے خراب ہو گئے تھے جن میں سے 13 کی بحالی پر کام جاری ہے جبکہ سات ٹیوب ویل ایسے ہیں جنہیں سرے سے چالو ہی نہیں کیا گیا۔

&quot;جن علاقوں میں ٹیوب ویل کام کر رہے ہیں وہاں بھی پانی کا بحران ہےکیونکہ بجلی کی طویل لوڈ شیڈنگ کے باعث ٹیوب ویل بہت مختصر وقت کے لئے ہی چلائے جا سکتے ہیں جس کی وجہ سے لوگوں کو پانی کی قلت رہتی ہے&quot;۔

سالانہ ترقیاتی پروگرام 23-2022ء میں ٹانک میں پینے کے پانی کی نئی سکیموں اور ٹیوب ویلوں کو شمسی توانائی پر منتقل کرنے کے لئے 15 کروڑ روپے مختص کئے گئے تھے۔

اس حوالے سے سابق صوبائی وزیر بلدیات فیصل امین خان نے کہا تھا کہ ضلع ٹانک کے لیے شمسی توانائی سے چلنے والے 28 ٹیوب ویلوں کی منظوری دی جا چکی ہے لیکن اس سلسلے میں کوئی عملی پیشرفت تاحال نظر نہیں آئی۔

ٹانک کے شہریوں کو صاف پانی کی فراہمی کے لئے 1994ء میں جرمنی کے ترقیاتی بینک &quot;کے ایف ڈبلیو&quot; کی مالی اعانت سے اقوام متحدہ کے ذیلی ادارے &#39;یوناپ&#39;نے احمد شاہ میں چھ ٹیوب ویل اور ایک لاکھ گیلن گنجائش کے حامل تین بڑے ٹینک بنائے تھے اور ان سے شہر تک پانی لانے کیلئے 14 انچ قطر کی اٹھارہ ہزار رننگ فٹ پائپ لائن بچھائی تھی (جسے مقامی طور پر جرمن سکیم کہا جاتا ہے) لیکن انتظامیہ کی جانب سے مناسب دیکھ بھال نہ ہونےکے باعث رفتہ رفتہ تمام ٹیوب ویل خراب ہو گئے اور اس نظام نے کام کرنا چھوڑ دیا۔

تحصیل میونسپل ایڈمنسٹریٹر قدرت اللہ مروت بتاتے ہیں کہ جرمن سکیم کی بحالی کے لیے یوناپ&nbsp; کی مدد اور 18کروڑ 65 لاکھ روپے کی لاگت سے ٹیوب ویلوں کی مرمت کر کے انہیں شمسی توانائی پر منتقل کرنے کا منصوبہ تیار ہے۔اس منصوبے کے تحت 10کلومیٹر طویل پائپ لائن سمیت شہر کے مختلف علاقوں میں چھ پکے تالاب اور پانی کے چھ بڑے ٹینک بنائے جائیں گے۔

قدرت اللہ کا دعویٰ ہے کہ اس منصوبے کی تکمیل کے بعد مرکزی شہر کی حد تک پانی کا مسئلہ حل ہو جائے گا۔

مگر علاقے کے مکین نور عالم خان کو قدرت اللہ کے دعوے پر زیادہ بھروسہ نہیں۔ نورعالم سماجی شخصیت ہیں اور شہری سہولیات کے مسائل کے حل کے لیے سرگرم رہتے ہیں۔

وہ کہتے ہیں کہ منتخب نماٸندوں اور انتظامی افسران کی جانب سے پانی کے مساٸل کے حل کے لٸے اقدامات کے بلند دعوے ہوتے رہتے ہیں مگر ان پر عمل نہیں ہوتا۔&nbsp;&nbsp;

'نہ تو فلٹر پلانٹس کی مرمت ہوتی ہے اور نہ ہی ان کی صفائی ستھرائی کا کوئی انتظام ہے': گجرات میں شہری آلودہ پانی پینے پر مجبور

ٹانک میں "جرمن سکیم" کیوں ناکام ہوگئی؟

خیبر پختونخوا کے شہر ٹانک کی سلمیٰ بی بی کی بڑی بہن گذشتہ سال 24 دسمبر کو گردن توڑ بخار کی وجہ سے فوت ہوئیں تو سلمٰی شدید ذہنی تناؤ کا شکار ہوگئیں۔

اگلے روز اس کیفیت نے مزید شدت اختیار کی جس کے باعث 16 سالہ سلمیٰ رات سوا گیارہ بجے بے ہوش ہو گئی۔

اہل خانہ کے ہاتھ پاؤں پھول گئے کیونکہ ایک روز قبل ہی وہ سلمیٰ کی بڑی بہن کی اچانک موت کی وجہ سے نڈھال تھے اوپر سے اس کی طبیعت بھی بگڑ گئی۔

سلمیٰ کے ماموں زاد بھائی شاہد وینس کے مطابق انہوں نے سلمیٰ کو ہسپتال لے جانے کے لیے ریسیکو 1122 سے فون کے ذریعہ رابطہ کیا جہاں سے انہیں بتایا گیا کہ &quot;سیکورٹی خدشات کے وجہ سے رات کو سروس بند کردی گئی ہے&quot;۔

اس مختصر سے جواب کے بعد دوسری طرف سے فون کاٹ دیا گیا۔

یہ سُن کر سب پریشان ہو گئے کیونکہ کے ان کے علاقہ قاضیاںوالہ سے ڈسٹرکٹ ہیڈ کوارٹرز ہسپتال کا فاصلہ اگرچہ ایک کلومیٹر کے قریب ہے لیکن ان کے پاس کوئی ذاتی سواری تھی اور نہ ہی رات گئے کوئی ٹیکسی رکشتہ دستیاب تھا۔

&quot;شدید سردی میں بچی کو اٹھا کر پیدل ہسپتال لے جانا بھی ایک تکلیف دہ کام تھا۔ لیکن مرتے کیا نہ کرتے۔ بالآخر ہم نے سلمیٰ کو چارپائی پر ڈالا اور چار آدمی چارپائی کو کندھوں پر اٹھا کر اُسے ہسپتال لائے&quot;۔

شاہد بتاتے ہیں کہ ریسکیو سروس تو حالتِ جنگ میں بھی بند نہیں ہوتی، ٹانک شہر میں امن وامان کا کوئی سنگین مسئلہ بھی نہیں ہے۔

&nbsp;&quot;اس کے برعکس قریبی ضلع لکی مروت میں سیکورٹی صورتِ حال کافی خراب ہے لیکن وہاں سروس ہمہ وقت دستیاب ہے&quot;۔

وہ کہتے ہیں کہ ضلع ٹانک میں رات 11 بجے کے بعد ریسکیو 1122سیکورٹی خدشات کے باعث اپنی سروس بند کر دیتا ہے۔

&quot;حالانکہ اس قسم کی سروس کی اصل ضرورت تو رات کے وقت ہی ہوتی ہے جب مریضوں کو بر وقت ہپستال پہنچانے کے لیے پبلک ٹرانسپورٹ موجود نہیں ہوتی&quot;۔

خیبر پختونخوا کے صوبائی دارالخلافہ پشاور سے 280 کلومیٹر جنوب میں واقع ٹانک کی ضلعی حدود ڈیرہ اسماعیل خان، لکی مروت اور قبائلی ضلع جنوبی وزیرستان سے ملی ہوئی ہیں۔

2017ء کی مردم شماری کے مطابق ضلع ٹانک کی آبادی چار لاکھ کے قریب ہے۔ ساڑھے تین لاکھ افراد دیہات میں رہتے ہیں۔

ریسکیو 1122 کے ڈسٹرکٹ ایمر جنسی آفیسر وقاص عالم کا کہنا ہے کہ چند ماہ سے خیبر پختونخوا میں عمومی اور اس کے جنوبی اضلاع میں خصوصی طور پر پولیس اہلکاروں پر حملوں کی وجہ سے امن و امان کی صورتِ حال خراب ہوئی تو 20 دسمبر 2022ء کو اس سروس کو رات کے اوقات کے لیے بند کر دیا گیا۔

&quot;ہمارے اپنے دفتر میں بھی سیکورٹی کا کوئی خاص بندوبست نہیں ہے جس کی وجہ سے کسی بھی وقت ناخوشگوار واقعہ پیش آسکتا ہے&quot;۔

ان کا کہنا ہے کہ 28 دسمبر کو ڈسٹرکٹ پولیس آفیسر کو تحریری طور پر درخواست کی گئی کہ ان کے دفتر اور رات کے وقت ریسکیو 1122 کی گاڑیوں کی آمد و رفت کے لیے سیکورٹی فراہم کی جائے لیکن اس پر کوئی عمل درآمد نہیں ہوا۔ &quot;اس کے بعد ہمیں مجبوراً رات11 بجے کے بعد ریسکیو سروس بند کرنا پڑی&quot;۔

وقاص عالم پاکستان ٹیلی کمیونیکیشن لمیٹڈ کی کارگردگی سے بھی مطمئن نہیں ہیں۔

وہ کہتے ہیں کہ اب تک ریسکیو 1122 کا ٹال فری نمبر بھی مکمل طور پر فعال نہیں۔

&quot;ہم نے کئی مرتبہ شکایت درج کروائی لیکن کوئی شنوائی نہیں ہوئی جس کی وجہ سے ہم اپنی خدمات صحیح طرح سے سر انجام نہیں دے سکتے جس سے انسانی زندگی کو خطرات لاحق ہو سکتے ہیں&quot;۔

انہوں نے بتایا کہ گذشتہ ایک سال میں ریسکیو 1122 نے ایک ہزار 486 مریضوں کو ملک کے دیگر بڑے ہسپتالوں میں منتقل کیا۔

عملے کی کمی کے حوالے سے بات کرتے ہوئے انہوں نے بتایا کہ ضلع بھر کی چار لاکھ&nbsp; آبادی کے لیے ان کے پاس صرف 74 افراد پر مشتمل سٹاف ہے جس سے 24 گھنٹے سروس بحال رکھنا بہت مشکل ہے۔

ان کے خیال میں ایک ہزار679 مربع کلومیٹر پر پھیلی اتنی بڑی آبادی کے لیے کم از کم 150 اہلکاروں کا سٹاف ہونا ضروری ہے۔

فیک (جعلی) ٹیلی فون کالز بھی ان کے ادارے کے لیے ایک بڑا مسئلہ ہے۔

ان کا کہنا ہے گذشتہ سال ریسکیو 1122 کو مجموعی طور پر 31 ہزار 601 کالیں موصول ہوئیں جن میں 53 فیصد یعنی 17 ہزار 53 جعلی کالیں تھیں۔

وقاص عالم کہتے ہیں کہ بسا اوقات وہ فون کرنے والے کے بتائے ہوئے پتے پر پہنچتے ہیں لیکن وہاں کوئی بیمار موجود ہی نہیں ہوتا ہے جس سے نہ صرف ان کا وقت ضائع ہوتا ہے بلکہ بعض اوقات وہاں مصروف ہونے کی وجہ سے ٹیم اصل بیماروں تک بر وقت پہنچ نہیں پاتی&quot;۔

ڈسٹرکٹ پولیس آفیسر وقار احمد نے ریسکیو محکمے کی جانب سے تحریری درخواست موصول ہونے کی تصدیق کرتے ہوئے سُجاگ کو بتایا کہ قانون کے مطابق کسی بھی سرکاری ادارے کو سیکورٹی کی فراہمی انسپکٹر جنرل آف پولیس کی منظوری سے مشروط ہے۔

&quot;یہ ضلعی پولیس کے دائرہ اختیار میں نہیں ہے۔ ہمیں درخواست موصول ہو چکی ہے جسے طے شدہ طریقہ کار کے مطابق دیکھا جائے گا&quot;۔ &nbsp;

ڈی پی او رات کے اوقات میں ریسکیو سروس کی معطلی پر حیرت کا اظہار کرتے ہیں۔ ان کا کہنا ہے کہ &quot; ریسکیو ٹیموں کو دہشت گردوں نے بھی کبھی نشانہ نہیں بنایا۔ اس بنیاد پر سروس معطل کرنا سمجھ سے بالا تر ہے&quot;۔

مریضوں کو دیگر اضلاع منتقلی کے حوالے سے ڈسٹرکٹ ہیڈکوارٹرز ہسپتال ٹانک ڈاکٹر عباس شیرانی نے بتایا کہ ڈسٹرکٹ ہیڈکوارٹرز ہسپتال نہ صرف ٹانک بلکہ ٹانک کے جنوب میں واقع ضلع اپر وزیرستان کو بھی صحت سہولیات فراہم کرنے والا واحد ہسپتال ہے۔

ڈاکٹر شیرانی کے مطابق اس ہپستال میں ہر ماہ 20 ہزار سے زائد مریضوں کو صحت کی دستیاب سہولیات مہیا کی جاتی ہیں۔

ٹانک کا ڈسٹرکٹ ہیڈ کوارٹرز ہسپتال سی کیٹگری طبّی مرکز ہے جس میں امراضِ قلب، نفسیاتی مسائل، بچوں کے امراض، سینے اور تپِ دق، گُردوں کی صفائی (ڈائیلیسز)، جِلد، بچوں کی سرجری اور نیورو سرجری کے شعبہ جات سرے سے موجود ہی نہیں ہیں۔

ڈاکٹر شیرانی کہتے ہیں کہ اسی وجہ سے اس ہسپتال سے روزانہ کی بنیاد پر کافی تعداد میں مریضوں کو صوبہ کے دوسرے ہسپتالوں کو ریفر کیا جاتا ہے جس سے ثابت ہوتا ہے کہ ریسکیو 1122 کا یہ مطالبہ درست ہے کہ سٹاف کی تعداد کم سے کم دوگنا ہونی چاہیے۔

نشتر ہسپتال جانے والے مریضوں پر ٹریفک کی نشتر زنی اور ایمبولینس میں تڑپتے مریض

'سیکورٹی خدشات کے وجہ سے رات کو سروس بند کر دی گئی ہے': ریسکیو 1122 ٹانک

اس سال اگست میں وارن کینال میں پے در پے شگاف پڑنے سے سیلابی ریلا ایک طرف تو متوسط زمین دار حکیم سونا خان کا بھرا پُرا گھر بہا لے گیا تو دوسری طرف ان کی زرعی زمینوں کو بھی کاشت کے قابل نہیں چھوڑا۔ یہی کھیتی باڑی ان کی روزی روٹی کا واحد ذریعہ تھا۔

بیالیس سالہ سونا خان خیبر پختونخوا کے شمالی شہر ڈیرہ اسماعیل خان سے 70 کلومیٹر جنوب میں ضلع ٹانک کے صدر مقام سے چھ کلومیٹر کے فاصلہ پر واقع گاؤں رنوال میں رہتے ہیں۔ تقربیاً پانچ سو گھروں پر مشتمل اس گاؤں کے لگ بھگ ایک سو گھر اس سال اگست میں آنے والے سیلاب میں بہہ گئے تھے۔&nbsp;

انہیں امید تھی کہ وہ اپنی زمین پر فصلوں کی کاشت سے اگست میں شدید بارشوں کے باعث آنے والے سیلاب سے ہونے والے نقصانات کا کسی حد تک ازالہ کر لیں گے &quot;لیکن ناقص میٹریل کے استعمال کی وجہ سے وارن کینال بار بار ٹوٹ جاتی ہے اور ہماری زمینوں میں کئی فٹ پانی کھڑا ہو جاتا ہے۔&quot;&nbsp;

وہ کہتے ہیں کہ وارن کینال کی بحالی کے لئے صوبائی حکومت نے دو کروڑ 70 لاکھ روپے مختص کئے &quot;تاہم متعلقہ ٹھیکہ دار کی غفلت کے باعث کام التوا کا شکار ہے جس کی وجہ سے اس سال گندم اور چنے کی کاشت کا وقت گزر گیا۔&quot; ان کا دعویٰ ہے کہ وارن کینال سے سیراب ہونے والی 80 فی صد اراضی پر اس سال ربیع کی فصلیں کاشت نہ ہو سکیں۔

اس حوالہ سے اس منصوبہ کے ٹھیکہ دار محمد جاوید نے سُجاگ کو بتایا کہ حکومت نے فنڈز کا اعلان تو کر دیا لیکن اس کی فراہمی میں تساہل کا شکار ہے جس کی وجہ سے سیلاب زدہ زرعی زمینوں کی بحالی کا کام التوا کا شکار ہے۔&nbsp;

خیبر پختونخوا کے قبائلی ضلع جنوبی وزیرستان، جو گذشتہ ڈیڑھ دھائی سے دہشت گردی کی لپیٹ میں ہے، سے جُڑا ضلع ٹانک دو ڈیموں &mdash; گومل زام ڈیم اور ٹانک زام &mdash; اور دو دریاؤں &mdash; دریائے کُرم اور دریائے سندھ &mdash;کے درمیان واقع ہے۔&nbsp;

محکمہ زراعت کے شعبہ شماریات کے مطابق ٹانک کی 49,742 ایکڑ زمین زیر کاشت ہے جس میں 30 فیصد نہری اور 70 فیصد بارانی ہے۔&nbsp;

<h2>ہمیشہ دیر کر دیتا ہوں میں!</h2>

ٹانک کی پس ماندگی کے خاتمے اور اس کی بنجر زمین کو سیراب کرنے کے لئے سابق وزیرِ اعظم ذوالفقار علی بھٹو نے 1971 میں آب پاشی و آب نوشی کے ساتھ ساتھ ملک کی توانائی ضروریات کو پورا کرنے کے لئے گومل زام ڈیم کی بنیاد رکھی۔ اس ڈیم کو 10 سال میں پایہ تکمیل کو پہنچنا تھا لیکن اسے مکمل ہونے میں 47 سال لگ گئے۔ سنہ 2011 میں اس ڈیم کی تکمیل کے مزید سات سال بعد یعنی 2018 میں اس کے نہری نظام سے مقامی زمینوں کی سیرابی کا عمل شروع ہوا۔&nbsp;

اس ڈیم سے آب پاشی اور آب نوشی کے لئے367 کلومیٹر پر محیط پانی کی تقسیم کا نظام بنایا گیا ہے جو ضلع ٹانک اور ڈیرہ اسماعیل خان کی کلاچی تحصیل کی ایک لاکھ 91 ہزار ایکڑ زمین کو سیراب کرتا ہے۔ ضلع ٹانک کے لئے 36 کلومیٹر پر محیط ایک نہر &#39;وارن کینال&#39; جو گومل کے علاقہ کوٹ اعظم سے شروع ہوتی ہے اور چھینہ نامی گاؤں تک جاتی ہے، بنائی گئی۔&nbsp;

یہ نہر آٹھ مائنر (چھوٹی نہروں) &mdash; شیخ سلطان، ڈبرہ، مانجھی، رنوال، گاؤں پتھر، فرید آباد، ڈیال اور اعظمی مائنر &mdash; پر مشتمل ہے۔ یہ آٹھ چھوٹی نہریں اس ضلع کی تقریباً 40 ہزار ایکڑ اراضی کو سیراب کرتی ہیں۔ ضلع ٹانک کے پاپولیشن آفیسر ڈاکٹر طارق ﷲ کے مطابق اس نہر کے اطراف میں آباد تقریباً ایک لاکھ 70 ہزار افراد وارن کینال کے پانی کو پینے کے لئے بھی استعمال کرتے ہیں۔&nbsp;

محکمہ زراعت کے شعبہ شماریات کے مطابق سال 2021-22 میں وارن کینال کے پانی سے 33 ہراز سات سو 37 ایکڑ پر تقریباً 30 ہزار پانچ سو 66 ٹن گندم کاشت کی گئی۔ اس کے علاوہ دو ہزار پانچ سو 22 ایکڑ پر چار سو 56 ٹن آئل سِیڈ، آٹھ سو 42 ایکڑ &nbsp;پر چھ سو 70 ٹن مسور کی دال اور ایک ہزار چار سو 47 ایکڑ پر 12 ہزار دو سو 48 ٹن گنّا کاشت کیا گیا تھا۔

اس سال کے سیلاب نے جہاں ضلع بھر میں تباہی مچائی اور درجنوں دیہاتوں کو صفحہ ہستی سے مٹا دیا تو وہیں وارن کینال میں بھی جگہ جگہ شگاف پڑ گئے۔ محکمہ زراعت کے شعبہ شماریات کے مطابق حالیہ سیلاب سے وارن کینال سے کاشت کی جانے والے دو ہزار 97 ایکڑ پر مکٸی، چاول، سورج مُکھی، گنّے اور سبزیوں کی کھڑی فصلیں تباہ ہوئیں۔&nbsp;

ٹانک شہر سے 15 کلومیٹر دور چھینہ گاؤں کے 35 سالہ زمین دار ملک عمران کہتے ہیں کہ تاحال حکومت کی جانب سے ان کو کوئی امداد نہیں دی گئی اور &quot;نہ ہی زمینوں کی بحالی کے لئے کوئی اقدامات کئے گئے ہیں۔&quot;&nbsp;

ٹانک شہر سے تین کلومیٹر جنوب میں گَرہ بلوچ نامی گاؤں کے ایک کسان عطا اللہ بلوچ کہتے ہیں کہ وارن کینال کو زمین سے 10 فٹ بلندی پر بنایا گیا ہے جس کے لئے کچی مٹّی کو مطلوبہ دباؤ دے کر بٹھایا نہیں گیا &quot;جس کی وجہ سے وقتاً فوقتاً مٹّی بیٹھ جاتی ہے اور نہر ٹوٹ جاتی ہے۔&quot;

وارن کینال کے حوالہ سے ٹانک میں ارِیگیشن ڈیپارٹمنٹ کے ایک ایگزیکٹو انجنیئر (ایکس سی این) غلام رسول برکی بھی اس نہر کی تعمیر میں پائے جانے والے سقم کے حوالہ سے عطا ﷲ کی بات کو آگے بڑھاتے ہیں۔ وہ کہتے ہیں کہ دنیا بھر میں زمین دوز نہری نظام محفوظ اور بہترین نظام تصور کیا جاتا ہے لیکن وارن کینال کی ڈیزائننگ کے وقت اس کو ملحوظِ خاطر نہیں رکھا گیا۔

ان کے مطابق &quot;وارن کینال ایک تو بہت لمبی ہے دوسرا یہ اونچائی پر واقع ہے جس کی وجہ سے نشیبی علاقوں میں اس کے پانی کا بہاؤ کافی تیز ہوتا ہے۔ نتیجتاً نہر کے نشیبی حصوں میں شگاف پڑ جاتے ہیں۔&quot; وہ ضلع ٹانک کی چِکنی مٹّی کو بھی نہر میں شگاف پڑ جانے کا باعث سمجھتے ہیں یہی وجہ ہے کہ &quot;کوشش کی جا رہی ہے کہ وارن کینال کے اطراف میں پتھروں کے حفاظتی بند باندھے جائیں جس سے نہر میں شگاف پڑنے کے مسئلہ پر کافی حد تک قابو پایا جا سکے گا۔&quot;&nbsp;

لیکن سرِ دست ٹانک کے اکثر زمین اپنے طور پر اپنی زمینوں کی بحالی کے کام میں مصروف ہیں جنہیں ہر وقت یہ خدشہ لاحق رہتا ہے کہ اگر دوبارہ نہر کا بند ٹوٹ گیا تو ان کی کئے کرائے پر ایک مرتبہ پھر پانی پھر جائے گا۔

محمد زعفران میانی

محمد زعفران میانی کا تعلق جنوبی ضلع ٹانک سے ہے۔ وہ حالات حاضرہ اور اپنے آبائی شہر کے مقامی مسائل پر رپورٹنگ کرتے ہیں۔