پنجاب کے ناخواندہ ترین اضلاع میں سے ایک لودھراں میں قائم گورنمنٹ گرلز ووکیشنل انسٹی ٹیوٹ کی بوسیدہ عمارت عارضی طور پر خالی کیا ہوئی کہ وہاں جم خانہ بنانے کی تجویز پیش کر دی گئی جبکہ بہت سے لوگ وہاں انسٹی ٹیوٹ ہی کی نئی عمارت تعمیر ہوتے دیکھنا چاہتے ہیں۔

ڈپٹی کمشنر (ڈی سی) آفس لودھراں کے قریب اس مقام پر سات کنال سات مرلے کی ایک خالی عمارت ہوا کرتی تھی جسے 2010ء میں گورنمنٹ گرلز ووکیشنل انسٹی ٹیوٹ کو الاٹ کیا گیا۔ اس کے بعدطالبات کی فنی تربیت کے لیے مخصوص یہ انسٹی ٹیوٹ کرائے کی عمارت سے وہاں منتقل کر دیا گیا۔

وقت کے ساتھ عمارت کی حالت خستہ ہونے پرانسٹی ٹیوٹ کی انتظامیہ نے سیکرٹری ٹیوٹا کو اسی جگہ نئی عمارت کی تعمیر کے لیے فنڈز کے اجرا کا خط لکھا۔ حکومت پنجاب نے اس مقصد کے لیے 11 کروڑ روپے جاری کر دیے۔ اس دوران نئی عمارت بنانے کے لیے گورنمنٹ گرلز ووکیشنل ٹریننگ انسٹی ٹیوٹ کو دوبارہ کرائے کی عمارت میں منتقل کر دیا گیا۔

نئی تعمیر کی تیاریاں ہو رہی تھیں کہ ضلعی انتظامیہ نے اس رقبے پر جم خانہ بنانے کی تجویز پر غور شروع کر دیا۔ یہ خبر ملتے ہیں سول سوسائٹی، تاجر اور صحافی برادری اور سیاسی کارکنوں کی جانب سے صدائے احتجاج بلند ہوئی۔

ان لوگوں کہنا تھا کہ جم خانہ شہریوں کی ضرورت نہیں بلکہ یہاں مخصوص لوگوں نے محدود تعداد میں آنا ہو گا۔ دوسری جانب گورنمنٹ گرلز ووکیشنل ٹریننگ انسٹی ٹیوٹ کا شہر میں ہونا غریب اور متوسط طبقے&nbsp; سے تعلق رکھنے والی لڑکیوں کےلیے انتہائی اہم ہے۔

ڈسٹرکٹ مینیجر ٹیوٹا خورشید چوہان نے بتایا کہ ان کا ادارہ نجی عمارت کا 45 ہزار روپے ماہانہ کرایہ ادا کر رہا ہے جس میں 200 کے قریب طالبات تربیت پا رہی ہیں۔

ادارے کو الاٹ شدہ رقبے پر جم خانہ نہ بنانے کے لیے انہوں نے ڈپٹی کمشنر لودھراں کو قائل کرنے کی کوشش کی۔ ان کے نہ ماننے پر انہوں نے سیکرٹری ٹیوٹا پنجاب کو آگاہ کیا۔

اس کے بعد ڈپٹی کمشنر نے ٹریننگ انسٹی ٹیوٹ کی عمارت بنانے کے لیے تین مقامات پر متبادل رقبہ الاٹ کرنے کی تجویز دی۔&nbsp; ان میں شہر سے سات کلومیٹر دور چک نمبر 10، اسسٹنٹ کمشنر کے دفتر کے سامنے، جس کی انہیں کروڑوں روپے سرکاری قیمت ادا کرنا پڑے گی ہے اور محکمہی سپیشل ایجوکیشن کے دفتر کے سامنے آٹھ کنال رقبہ شامل ہے۔

معاملہ صرف گورنمنٹ گرلز ووکیشنل ٹریننگ انسٹی ٹیوٹ کے رقبے کا نہیں بلکہ لودھراں کی میونسپل لائبریری کو بھی جم خانہ میں شامل کرنے کی کوشش کی جا رہی ہے۔ لائبریری کے سینئر ممبر مبشر وسیم لودھی نے بتایا کہ 1990ء میں اے ڈی سی جی ڈاکٹر اعظم سلیم کی کاوشوں سے فروٹ مارکیٹ میں میونسپل لائبریری قائم ہوئی جس میں ہزاروں کتابیں ہیں۔ تقریباً 15 سال قبل اس کی عمارت بوسیدہ ہونے پر لائبریری کو ڈی سی آفس کے قریب نئی عمارت میں منتقل کر کے اس کا نام علامہ اقبال لائبریری رکھ دیا گیا۔ 2018ء میں ڈپٹی کمشنر لودھراں ثاقب علی عطیل نے یو ایس ایڈ کے تعاون سے اس کی تزئین و آرائش کی نیز لائبریری کے لیے نئے کمپیوٹر اور فرنیچر بھی خریدا گیا۔

انہوں نے&nbsp; بتایا &quot;اس لائبریری کے احاطے میں خوبصورت گراسی پلاٹ اور پھول دار پودے لگائے گئے ہیں اور اسے خواتین پارک کا نام دیا گیا ہے۔ صبح نو بجے سے پہلے خواتین آ کر واک کرتی ہیں۔ نو بجے لائبریری کھل جاتی ہے۔ شام چار بجے لائبریری بند ہو جانے کے بعد دوبارہ شام کو خواتین وہاں آ جاتی ہیں، اس طرح ایک احاطے اور عمارت سے دو کام لیے جا رہے ہیں۔&rdquo;

سابق ڈپٹی ڈائریکٹر تعلقات عامہ رحیم طلب نے بتایا کہ بیوروکریسی کا منصوبہ ہے کہ ووکیشنل ٹریننگ انسٹی ٹیوٹ کے رقبے پر جم خانہ بنا کر اور لائبریری کی دیوار توڑ کر اسے جم خانہ میں شامل کر لیا جائے۔ اسی وجہ سے لائبریری کی تختی اتار دی گئی ہے۔

&ldquo;اگر لائبریری کو بھی جم خانہ میں شامل کر لیا گیا تو ایک طرف عام لوگوں کا داخلہ بند ہو جائے گا اور دوسری طرف خواتین بھی چہل قدمی کرنے سے محروم ہو جائیں گی۔&quot;

لودھراں کے آصف علی نے بتایا کہ تعلیمی پسماندگی اور بنیادی سہولیات سے محروم اضلاع میں لودھراں کا&nbsp; پنجاب میں 35 واں نمبر ہے، ایسے میں تعلیم کے بجائے بیوروکریسی کے لیے جم خانہ کو ترجیح دینا سمجھ سے بالاتر ہے۔

امیر جماعت اسلامی ضلع لودھراں ڈاکٹر طاہر احمد چوہدری کا کہنا ہے کہ جم خانہ امیروں کے لیے بنایا جا رہا ہے۔ اسے لودھراں سے باہر شفٹ کیا جائے کیونکہ وہ سفری اخراجات برداشت کر لیں گے ۔ووکیشنل انسٹی ٹیوٹ کی غریب طالبات کے شہر سے دور جانے سے نہ صرف ان کے سفری اخراجات ناقابل برداشت ہو جائیں گے بلکہ سفر میں وہ غیر محفوظ بھی ہوں گی۔

ایک رپورٹ کے مطابق ضلع لودھراں میں 15 سال سے زیادہ عمر کے تقریباً 46 فیصد افراد ناخواندہ ہیں۔ یہاں تعلیمی اداروں کا بھی فقدان ہے۔ ضلع لودھراں میں بہاؤالدین زکریا یونیورسٹی کا ایک ہی کیمپس ہے اس لیے حصول تعلیم کے لیے نوجوانوں کی بڑی تعداد کو بہاولپور یا ملتان جانا پڑتا ہے۔ ایسے میں روزگار کے حصول کے لیے ہنر سکھانے&nbsp; والے تعلیمی&nbsp; اداروں کی اہمیت دو چند ہو جاتی ہے۔

حسرت ان غنچوں پہ ہے ۔۔۔ وہاڑی میں ادیبوں کے لئے سرکاری سرپرستی میں بنایا جانے والا ٹی ہاؤس ناکام کیوں ہوا؟

کیا لودھراں کا جم خانہ گرلز ووکیشنل انسٹی ٹیوٹ اور لائبریری دونوں ہڑپ کر جائے گا؟

text

بہاولپور کے زمیندار محمد امین نے حکومت کی &quot;زیادہ کپاس اگاؤ&quot; مہم سے متاثر ہوکر 27 ایکڑ رقبے پر یہ فصل تو کاشت کر لی ہے لیکن نہری پانی میں کمی کی وجہ سے انہیں خدشہ ہے کہ ان کی پیداوار بھی کم رہے گی۔ اگرچہ ان کے کھیتوں میں ٹیوب ویل بھی لگا ہوا ہے لیکن ڈیزل مہنگا ہونے کی وجہ سے وہ اسے بار بار نہیں چلا سکتے۔ اب وہ پریشان ہیں کہ نجانے ان کی فصل کا کیا بنے گا۔

محمد امین کا تعلق ڈیرہ ورواہ سے ہے جہاں زرعی رقبہ تھری ایل بی سی نہر سے سیراب ہوتا ہے۔ ان کے بقول یہ سالانہ نہر(جس میں پانی سال بھر چلتا رہتا ہے) ہونے کے باوجود ایک ہفتہ چلنے کے بعد دو ہفتوں کے لیے بند رہتی ہے۔ اسی وجہ سے وہ اپنی فصل کو ضرورت کے مطابق اور وقت پر پانی نہیں دے پا رہے۔

وہ کہتے ہیں کہ حالیہ بارشوں کی وجہ سے پانی کی کمی کسی حد تک پوری ہو گئی ہے وگرنہ فصل خراب ہو چکی ہوتی۔ اب تک جتنی بارشیں ہوئی ہیں وہ فی الحال تو کپاس کے لیے مفید رہی ہیں لیکن مزید یا شدید بارشوں کی صورت میں فصل کو نقصان ہو گا کیونکہ کپاس اب اس مرحلے میں ہے جہاں اسے زیادہ دیر تک پانی میں کھڑا نہیں رکھا جا سکتا۔ ایسے میں نقصان دہ کیڑوں جیسا کہ سفید مکھی کا حملہ بھی خطرناک حد تک بڑھ سکتا ہے۔

اسی نہر سے فصل کو سیراب کرنے والے چک 33 بی سی اللہ دین والی کے چوہدری جاوید رسول کو بھی انہی حالات کا سامنا ہے۔ انہوں نے بھی سرکاری مہم کو دیکھ کر 35 ایکڑ رقبے پر کپاس کاشت کر لی ہے جو گزشتہ سال ان کے زیرکاشت رقبے سے 10 ایکڑ زیادہ ہے۔

ان کا کہنا ہے کہ کاشت سے پہلے محکمہ زراعت اور مقامی ضلعی انتظامیہ نے ان سے وعدے کیے تھے کہ فصل کو نہری پانی کی فراہمی ہر صورت ممکن بنائی جائے گی۔ اس کے علاوہ بیج، کھاد اور زرعی ادویات کے معیار اور ان کی دستیابی میں بھی کوئی کمی نہیں ہو گی۔ لیکن ایسا کچھ بھی نہیں ہوا۔ وہ بتاتے ہیں کہ نہری پانی کی کمی کے باعث کپاس کا پھل اور پتے گرنا شروع گئے ہیں۔

<h2>&quot;کپاس اگاؤ، معیشت بچاؤ&quot;</h2>

پنجاب حکومت نے کپاس کی کم از کم قیمت ساڑھے آٹھ ہزار روپے فی من مقرر کرتے ہوئے رواں سال اس کے زیر کاشت رقبے کو بڑھانے کی مہم شروع کی تھی۔ اس دوران کسانوں سے وعدے کیے گئے کہ انہیں معیاری بیج اور ادویات کی سرکاری نرخوں پر دستیابی کو یقینی بنایا جائے گا اور کپاس کی زیادہ پیداوار حاصل کرنے والے کاشتکاروں کو انعامات بھی دیے جائیں گے۔

اس مہم کے ذریعے صوبے میں 50 لاکھ ایکڑ رقبے پر کپاس اگانے کا ہدف مقرر کیا جس میں جنوبی پنجاب کا ہدف 45 لاکھ 54 ہزار ایکڑ تھا۔

محکمہ زراعت کی 21 جون 2023 کو جاری ہونے والی رپورٹ کے مطابق جنوبی پنجاب میں بہاولپور، ڈیرہ غازی خان اور ملتان ڈویژن میں 43 لاکھ 44 ہزار ایکڑ سے زیادہ رقبے پر کپاس اگائی گئی ہے اور اس طرح مقررہ ہدف کا 95 فیصد حاصل کر لیا گیا ہے۔

جنوبی پنجاب میں سب سے زیادہ کپاس بہاولپور ڈویژن میں اگائی جاتی ہے۔ رواں سال پنجاب میں کپاس کے کُل رقبے کا 44.5 فیصد بہاولپور میں ہے۔ اس ڈویژن میں بہاولپور سمیت بہاولنگر اور رحیم یار خان کے اضلاع شامل ہیں جہاں امسال&nbsp; 21 لاکھ 38 ہزار ایکڑ سے زیادہ رقبے پر کپاس کاشت کی گئی ہے جو پچھلے سال کے مقابلے میں 20 فیصد زیادہ ہے۔

تاہم کپاس کے بہت سے کاشت کاروں کو شکایت ہے کہ انہیں ملنے والا نہری پانی مقرر کردہ مقدار سے پچاس فیصد تک کم ہے جس کی تصدیق محکمہ انہار کی فراہم کردہ معلومات سے بھی ہوتی ہے۔

محکمے کے سب انجینئر اختر کاہلوں کے مطابق بہاولپور ڈویژن کی نہروں کے لیے محکمہ انہار کی طرف سے پانی کی مقررہ مقدار 6500 کیوسک ہے لیکن ہیڈ ریگولیٹر لال سوہانرا پر 2800 سے 3400 کیوسک تک پانی چھوڑا جا رہا ہے۔ یہ اعداد شمار گزشتہ مہینے کے ہیں جب کپاس میں پھل لگنے کا مرحلہ شروع ہوچکا تھا۔

اختر کاہلوں بتاتے ہیں کہ ہیڈ ریگولیٹر لال سوہانرا سے نکلنے والی نہر ڈیزرٹ برانچ میں 3000 کیوسک پانی کی منظوری دی گئی ہے لیکن اس میں 1300 کیوسک پانی چھوڑا جا رہا ہے۔ اسی طرح&nbsp; احمد پور برانچ میں 2200 کیوسک پانی کی ضرورت ہے جس میں 12 کیوسک پانی بھیجا جا رہا ہے۔ اس کے علاوہ 30 چھوٹی نہروں میں بھی پانی مقرر کردہ مقدار سے بہت کم ہے۔

کسان الزام عائد کرتے ہیں کہ ملتان میں محکمہ انہار کے چیف انجینئر اپنے زون کی نہروں کاپانی پورا کرنے کے بعد ہی دیگر ہیڈ میلسی سائفن سے دیگر علاقوں کے لیے پانی چھوڑتے ہیں۔ آج سے دو سال پہلے تک ہیڈمیلسی سائفن سے پانی کی تقسیم کا اختیار چیف انجینئر بہاولپورکے پاس تھا جو اس علاقے کی نہروں میں ضرورت کے مطابق پانی کی فراہمی کو یقینی بناتے تھے۔

جاوید رسول سمجھتے ہیں کہ کپاس کے زیرکاشت رقبے میں اضافے کے لیے سرکاری مہم ناصرف ملکی بلکہ دیہی معیشت کے لیے فائدہ مند ثابت ہو سکتی ہے کیونکہ یہ نقد آور فصل ہے جس سے کاشت کاروں سمیت دیہات کے بے زمین لوگوں خاص کر خواتین کو بھی بہتر روزگار مل جاتا ہے۔ اس کے علاوہ لاکھوں افراد کو روزگار دینے والی ملک کی ٹیکسٹائل انڈسٹری کے لیے بھی یہی بہتر ہے کہ پاکستان اپنی ضرورت کی کپاس کے حصول میں خودکفیل ہو۔

لیکن انہیں ایسا ہوتا دکھائی نہیں دیتا کیونکہ ان کے بقول نہری پانی میں کمی، زرعی مداخل کی قیمتوں میں اضافے اور زرعی ادویات کی عدم دستیابی کے باعث اس برس بھی پیداوار میں غیرمعمولی کمی آ سکتی ہے۔

سرکاری اعداد و شمار کے مطابق پنجاب میں پانچ سال بعد اتنے رقبے پر کپاس کاشت کی جا رہی ہے۔ اس سے پہلے 2018 میں 50 لاکھ 72 ہزار ایکڑ رقبے پر یہ فصل اگائی گئی تھی۔

پانی کی کمی، زرعی مداخل کی قیمتیں بڑھنے اور زرعی ادویات کی عدم دستیابی کے مسئلے پر بہاولپور کے ڈائریکٹر زراعت کا کہنا ہے کہ ان کا محکمہ کپاس کی فصل کو نقصان سے بچانے کے لیے کاشت کاروں کی ہرممکن مدد کر رہا ہے۔

بہاولپور ڈویژن میں محکمہ پیسٹ وارننگ کے ڈپٹی ڈائریکٹر محمد اقبال شاہد کہتے ہیں کہ زرعی ادویات کے معیار کو برقرار رکھنے کے لیے پیسٹی سائیڈز کمپنیوں کے گوداموں اورڈیلروں کی دکانوں پرچھاپے مارے جارہے ہیں۔ اس کے علاوہ کاشتکاروں کونقصان دہ کیڑوں کی شناخت، ان کا خاتمہ کرنے اور آئی پی ایم پروگرام کے بارے میں بھی مکمل آگہی فراہم کی جا رہی ہے۔

دوسری طرف زرعی ادویات بنانے والی کمپنی کی نمائندہ تنظیم پاکستان کراپ پروٹیکشن ایسوسی ایشن (پی سی پی اے) کے ریجنل کوآرڈینیٹر ناصر شکیل کاہلوں نے ایک پریس کانفرنس میں کہا ہے کہ غیر معیاری زرعی ادویات کے حوالے کسانوں کے الزامات میں کوئی صداقت نہیں ہے۔

وہ بتاتے ہیں کہ پچھلے سال محکمہ پیسٹ وارننگ ڈیپارٹمنٹ نے 12 ہزار نمونے لیے تھے جن میں سے 97 فیصد معیاری پائے گئے، ڈھائی فیصد کم معیار کے حامل نکلے اور صرف 0.5 فیصد میں ملاوٹ ثابت ہوئی۔

وہ محکمہ زراعت پنجاب کے اس دعوے کو بھی غلط قرار دیتے ہیں کہ اس مرتبہ پنجاب میں 48 یا 50 لاکھ ایکڑ رقبے پر کپاس کی کاشت ہوئی ہے۔ ان کے مطابق رواں سال پنجاب بھر میں صرف 28 لاکھ ایکڑ رقبے پر کپاس اگائی گئی ہے۔

ان کے بقول جب زیادہ پیداوار نہیں ملے گی تو پھر سارا ملبہ پیسٹی سائیڈز کمپنیوں اور ڈیلروں پر ڈال دیا جائے گا۔

تاہم پاکستان جنرز ایسوسی ایشن کے چیئرمین چوہدری وحید ارشد اس سے اتفاق نہیں کرتے۔ ان کا کہنا ہے کہ رواں برس پنجاب میں تقریباً 48 لاکھ ایکڑ، سندھ میں 14 لاکھ، بلوچستان میں ڈھائی لاکھ اورخیبرپختونخوا میں 60 ہزار ایکڑ رقبے پر کپاس کاشت ہوئی ہے۔ان کے مطابق زیر کاشت رقبے میں اضافے کی وجہ سے ہی حکومت نے 82 لاکھ گانٹھوں کی پیداوار کا ہدف رکھا ہے۔

کپاس کی پیداوار کیوں گر رہی ہے؟

'کپاس اگاؤ معیشت بچاؤ'، بہاولپور ڈویژن کے کسان زیادہ کپاس اگا کر بھی پریشان

راولپنڈی کے ایک بینک پر لگے تشہیری بورڈ&nbsp; کا کرایہ پارکس اینڈ ہارٹیکلچر اتھارٹی (پی ایچ اے) راولپنڈی لیا کرتی تھی۔ 2019ء میں بینک انتظامیہ نے ہائیکورٹ میں رٹ دائر کی کہ تشہیری بورڈ بینک کی عمارت پر نصب ہے اس لیے پی ایچ اے کو کرایے کی وصولی سے روکا جائے۔عدالت نے فیصلہ بینک کے حق میں دے دیا۔

اس فیصلے سے پی ایچ اے بہاول پور کے دیوالیہ ہونے کی راہ ہموار ہو گئی۔

بہاول پور شہر کو سرسبز و شاداب بنانے والی پارکس اینڈ ہارٹیکلچر اتھارٹی کے قیام کی منظوری 2014ء میں ہوئی اور اس نے 2016ء میں کام شروع کیا۔

ابتدائی طور پر شہر میں گرین بیلٹس بنائی گئیں اور 20 پارک پی ایچ اے کی تحویل میں دیے گئے۔سات چوراہوں کو سبزے سے سنوارا گیا۔

پی ایچ اے کے اپنے ذرائع آمدن میں تشہیری بل بورڈ اور شہر بھر میں کھمبوں پر لگائے جانے والے سٹیمرز کا کرایہ شامل تھا۔

عدالتی فیصلے کو بنیاد بنا کر بہاول پور میں بعض کاروباری افراد نے تمام بل بورڈز کا ٹیکس روکنے کے لیے پی ایچ اے بہاول پور کے خلاف رٹ دائر کر دی اور حکم امتناعی حاصل کر لیا۔

اس روز سے پی ایچ اے کی سالانہ تقریباً ایک کروڑ روپے کی آمدن رک گئی۔

عدالتی فیصلے کے بعد گزشتہ چار برسوں میں بہاول پور شہر میں لگے ہوئے 51 بل بورڈ کے تقریباً چار کروڑ روپے ادا نہیں کیے گئے۔ جس کا براہ راست اثر ملازمین کی اجرتوں پر پڑا۔

پی ایچ اے بہاول پور میں اس وقت کام کرنے والے 81&nbsp; ڈیلی ویجرز اور تحصیل میونسپل کارپوریشن سے بھیجے گئے50 ملازمین، سبھی کو چھ ماہ سے تنخواہیں نہیں ملیں۔

یہاں تک کہ مستقل بنیادوں پر تعینات 76 افسران و دیگر کلیریکل سٹاف کی تنخواہیں بھی رکی ہوئی ہیں۔

پی ایچ اے میں ڈیلی ویجز پر کام کرنے والے حبیب اللہ نے لوک سجاگ کو بتایا کہ بے روزگاری کے عالم میں اس ادارے میں ملازمت کی تھی، روزگار مل گیا لیکن چھ ماہ سے تنخواہ نہیں ملی۔

&quot;دکان داروں نے ادھار پر سودا سلف دینا چھوڑ دیا ہے اور نوبت فاقوں تک آ گئی ہے۔ تعلیمی اخراجات نہ ہونے کے باعث بچے تعلیم ترک کرنے پر مجبور ہیں&quot;۔

انہوں نے کہا کہ پچھلی تنخواہیں ملنے کی امید پر وہ تھوڑی بہت ڈیوٹی جاری رکھے ہوئے ہیں۔ افسران مختلف اسلامی تہواروں پر مخیر حضرات سے راشن وغیرہ دلوا دیتے ہیں۔

محکمے کی جانب سے ہر بار بجٹ نہ ہونے کا کہہ کر اگلے ماہ تنخواہوں کی ادائیگی کا وعدہ کر لیا جاتا ہے۔

2016ء سےسال رواں تک پنجاب حکومت نے ادارے کے بجٹ کو کم و بیش مستقل رکھا ہوا ہے۔

ان سات برس میں دوسرے سرکاری اداروں کے ملازمین کی تنخواہوں اور الاؤنسز میں خاصا اضافہ ہوا۔تاہم پی ایچ اے بہاول پور کے ملازمین&nbsp; کی اجرت میں کوئی قابل ذکر بڑھوتری نہ ہوئی۔ نیز وہ میڈیکل الاؤنس، میرج گرانٹ، ڈیتھ گرانٹ، پنشن اور دیگر سہولتوں سے بھی محروم چلے آ رہے ہیں۔

2016ء سے اب تک کسی ایک ملازم کو بھی پنشن نہیں ملی۔

&nbsp;ورک چارج ملازمین نے تنخواہیں نہ ملنے پر ہڑتالیں کیں اور احتجاج کیا۔ اب وہ کبھی ڈپٹی کمشنر کا دروازہ کھٹکھٹاتے ہیں تو کبھی گورنر پنجاب بلیغ الرحمن کی رہائش گاہ پر احتجاجی دھرنا دیتے ہیں۔

متعدد ملازمین صوبائی محتسب کی عدالت جا چکے ہیں۔

پی ایچ اے کے ڈیلی ویجر ملازم محمد ارشد نے لوک سجاگ کو بتایا &quot;اگر نوکری چھوڑ دی تو شاید گزشتہ چھ ماہ کی تنخواہ بھی نہ ملے۔ اب ہم ہڑتال پر ہیں۔ صرف نظام کو چلانے کے ایک گھنٹہ کام کرتے ہیں اور باقی وقت تنخواہوں کے اجرا کے لیے ہڑتال کرتے ہیں۔&quot;

ہڑتال کے باعث پارکوں اور گرین بیلٹ کی حالت خراب ہے۔ گھاس سوکھ چکا ہے اور جگہ جگہ گندگی کے ڈھیر لگے ہیں۔

پی ایچ اے شعبہ اکاؤنٹس کے حکام نے بتایا کہ ادارہ مالیاتی اداروں سے بطور سیلری لون تقریباً چھ کروڑ روپے لے چکا ہے۔ مختلف ٹھیکیداروں سے پارکس اینڈ گرین بیلٹس پر کام کرائے گئے لیکن ان کے بل دینے کی رقم موجود نہیں۔

پارکس اینڈ گرین بیلٹس کو پانی دینے کے لیے ٹریکٹروں کا ڈیزل تک دستیاب نہیں کیونکہ پٹرول پمپ مالکان کے بھی چار ماہ سے لاکھوں روپے بقایا ہیں۔

ڈی جی پی ایچ اے روبینہ اقبال عباسی نے لوک سجاگ کو بتایا کہ پی ایچ اے کے پاس 23 پارکس اور 53 کلومیٹر گرین بیلٹ ہے۔ ورک چارج ملازمین کی ہڑتال کی وجہ سے پارکس اور گرین بیلٹس دونوں تباہ ہو رہے ہیں۔

انہوں نے کہا کہ فی الوقت پی ایچ اے بہاول پور کے ذرائع آمدن نہ ہونے کے برابر ہیں۔ روہی پارک اور کشمیر پارک کی کینٹین ٹھیکے پر دے کر وہاں سے 82 ہزار روپے فی کینٹین کرایہ وصول کیا جاتا ہے۔

&quot;بجلی کے کھمبوں پر سٹیمر اور پارکوں کے اندر فیسٹیول کرانے والوں سے کرایہ وصول کر کے کام چلانے کی کوشش کر رہے ہیں&quot;۔

انہوں نے بتایا کہ حکومت پنجاب کو بقایاجات کی ادائیگی اور بجٹ میں اضافہ کے علاوہ گاڑیوں کی رجسٹریشن، کمرشل بلڈنگز، پلازوں کی تعمیر اور ہاؤسنگ سوسائٹیوں کی منظوری کے وقت پی ایچ اے کا حصہ شامل کرنے کی تجویز دی ہے۔

&quot;نجی ہاؤسنگ سکیموں کے پارکس کی دیکھ بھال ہمارے ادارے کی ذمہ داری ہے، اس لیے ان سے ہمیں کرایہ لینا چاہیے۔ عدالت عالیہ میں بل بورڈز کے کرایے کے حوالے سے حکم امتناعی ختم کرانے کے لیے پیروی کر رہے ہیں۔ عدالت سے فیصلہ آنے پر وصولی کریں گے&quot;۔

&nbsp;پی ایچ اے نے 2016ء میں کام شروع کیا تو گرین بیلٹس کا رقبہ 18.5 ایکڑ تھا۔

اس کے لیے دو ملازم فی ایکڑ کے حساب سے 36 ملازمین کی ضرورت تھی۔ اسی طرح 20 پارکس کا رقبہ 30.8 ایکڑ تھا جس کے لیے چار ملازم فی ایکڑ کے حساب سے 123 ملازمین کی ضرورت تھی۔ سات مختلف چوراہوں کا رقبہ 10 ایکڑ تھا جس کے لیے چار ملازم فی ایکڑ کے حساب سے 40 ملازمین کی ضرورت تھی۔

اس طرح مجموعی طور پر 209 ملازمین کی ضرورت تھی مگر ڈیلی ویجز پر 90 ملازم اور ٹی ایم اے سے 69 ملازمین تعینات کیے گئے جو 159 بنتے ہیں۔

دوسری جانب 2016ء سے 2022ء سے گرین بیلٹس کا رقبہ بڑھ کر 22.5 ایکڑ ہو گیا۔ 23 پارکس کا رقبہ بڑھ کر 55.4 ایکڑ ہوا اور چوک سات سے&nbsp; بڑھ کر نو ہو گئے ہیں۔

<h2>بجٹ بڑھے تو بات بنے</h2>

پی ایچ اے بہاول پور میں 2014-15ء کے لیے 164 ریگولر سٹیوں کی منظوری ہوئی تھی جس کے لیے فنانس ڈیپارٹمنٹ نے چار کروڑ 79 لاکھ 94 ہزار روپے بجٹ جاری کیا حالانکہ پی ایچ اے نے 10 کروڑ 80 لاکھ کا مطالبہ کیا تھا۔

اس بجٹ سے ملازمین کو تنخواہیں تو ملیں لیکن وہ الاؤنسز سے محروم رہے۔

2020-21ء میں آٹھ کروڑ 44 لاکھ 16 ہزار روپے بجٹ کا مطالبہ کیا گیا تھا جس کے مقابلے میں تین کروڑ 30 لاکھ روپے حکومت اور ایک کروڑ 20 لاکھ روپے مقامی آمدن سے حاصل ہوئے۔

اس دوران صرف تنخواہوں کی مد میں تقریباً پانچ کروڑ 70 لاکھ&nbsp; روپے کی ضرورت تھی۔

2021-22ء میں 16 کروڑ 19 لاکھ روپے کا مطالبہ کیا گیا لیکن حکومت کی طرف سے تین کروڑ 36 لاکھ روپے جاری ہوئے۔

پی ایچ اے کی اپنی آمدن ایک کروڑ 20 لاکھ روپے تھی جبکہ تنخواہوں کے سالانہ اخراجات چھ کروڑ 95 لاکھ روپے&nbsp; کے قریب تھے۔

&nbsp;2022-23ء میں 10 کروڑ 80 لاکھ روپے کا مطالبہ کیا گیا لیکن حکومت کی طرف سے وہی تین کروڑ 36 لاکھ روپے جاری ہوئے۔

ایک کروڑ 40 لاکھ روپے پی ایچ اے بہاول پور کی ذاتی آمدن سے شامل ہوئے۔تاہم اس دوران تنخواہوں کے اخراجات سات کروڑ 55 لاکھ روپے سے تجاوز کرگئے۔

گورنر پنجاب بلیغ الرحمٰن کے ترجمان راؤ رضوان نے لوک سجاگ کو بتایا کہ گورنر پی ایچ اے کے مسائل کے بارے میں پوری طرح آگاہ ہیں۔ وہ فنڈز کے اجرا کے لیے کاوشیں کر رہے ہیں۔ جلد پی ایچ اے ملازمین کے مسائل حل کرائے جائیں گے۔

نہ والڈ سٹی اتھارٹی بنی، نہ فنڈ ملے: ملتان کے گھنٹہ گھر کا بُرا وقت بدلتے بدلتے پھر رک گیا؟

ہائی کورٹ راولپنڈی بنچ کے فیصلے نے کس طرح پی ایچ اے بہاول پور کو مقروض کر دیا؟

بہاولپور کے ایک نجی گرلز ہاسٹل کی چھت گرنے کے واقعہ نے ایک بار تو پوری ضلعی انتظامیہ کو متحرک کر دیا تھا لیکن اب ایک ماہ بعد حالات واپس &#39;پرانی ڈگر&#39; پر آتے دکھائی دے رہے ہیں۔ عوام کا غصہ ختم، معاملہ ختم۔

انتیس اپریل کو ریاض کالونی میں ہونے والے اس حادثے میں صادق ویمن یونیورسٹی کی دو طالبات جاں بحق ہو گئی تھیں۔

صالحہ منور بی ایس باٹنی اور مائدہ اقبال بی ایس نفسیات کے چوتھے سمسٹر میں تھیں۔ وہ دونوں کزن تھیں اور اپنی یونیورسٹی سے ڈیڑھ سو کلومیٹر دور واقع گاؤں چک 172 مراد چشتیاں کی رہنے والی تھیں۔

صالحہ کے والد نے لوک سجاگ کو بتایا کہ وہ دونوں حادثے سے پانچ روز قبل ہی گھر سے دوبارہ اپنے ہاسٹل گئی تھیں۔

مائدہ کا اکلوتا بھائی فوج میں ہے اور حادثے والے دن اس کی پاسنگ آؤٹ پریڈ تھی جس میں مرحومہ بہن سمیت ان کا خاندان مدعو تھا لیکن بوجوہ جا نہیں پایا۔

صالحہ اور مائدہ جس نجی ہاسٹل میں رہائش پذیر تھیں وہ گاڈر اور ٹی آئرن سے بنی ایک دو منزلہ عمارت میں تھا۔ یہ عمارت عبدالستار نامی شخص کا گھر تھا جس میں انہوں نے یونیورسٹی کی 50 طالبات کو رہائش مہیا کی ہوئی تھی۔

چھت پر رکھی پانی کی ٹینکی مسلسل ٹپکتی رہتی تھی جسے متعدد شکایتوں کے باوجود مرمت نہیں کروایا گیا اور جس سے چھت کمزور ہو کر بالاآخر گر گئی۔

اس حادثے نے بہاولپور کے اعلیٰ تعلیمی اداروں میں پڑھنے والے ہزار ہا طلبا و طالبات اور ان کے والدین کو افسردہ اور مضطرب کر دیا ہے۔

سب کا ایک ہی سوال ہے: نجی ہاسٹلز قانوناً کس ادارے کی ذمہ داری ہیں؟ اس بے تحاشہ بڑھتے ہوئے کاروبار کے اصول و ضوابط کون طے کرے گا اور کون ان پر عمل کروائے گا؟

<h2>طلبہ کہاں سر چھپائیں؟</h2>

صادق ویمن یونیورسٹی کی افسر تعلقات عامہ میڈم نعیمہ نے لوک سجاگ کو بتایا کہ یونیورسٹی میں چھ ہزار کے قریب طالبات زیرتعلیم ہیں جبکہ یونیورسٹی کا رقبہ کم ہے اور ہاسٹل صرف دو ہیں جن میں 600 کے قریب طالبات رہائش پذیر ہیں۔ مریم ہاسٹل میں 200 اور فاطمہ ہاسٹل جو ایک سال قبل ہی تعمیر ہوا اس میں 400 طالبات کی گنجائش ہے۔

باقی طالبات نجی ہاسٹلوں میں رہائش رکھنے پر مجبور ہیں۔

میڈم نعیمہ نے مزید بتایا کہ یونیورسٹی کیلئے ائیرپورٹ کے قریب نہر اے بی برانچ پر سوا سو ایکڑ رقبہ مختص کیا گیا ہے جہاں تدریسی شعبہ جات کے علاوہ سات ہاسٹلوں کی تعمیر کا بھی منصوبہ ہے جن ڈھائی سے تین ہزار طالبات کی رہائش کی گنجائش ہوگی۔

لیکن اس زمیں پر قبضہ ہو چکا ہے اور معاملہ عدالت میں ہے جس کی وجہ سے تعمیر ممکن نہیں ہو رہی۔

یونیورسٹی کے لیگل ونگ کے حکام کہتے ہیں کہ یونیورسٹی کی زمین پر سابق صوبائی وزیر ملک اقبال چنڑ کے لوگوں نے قبضہ کر رکھا ہے۔معاملہ عدالت میں ہے جہاں انہوں نے موقف اختیار کیا ہے کہ رقبہ پر ان کی بلڈنگز اور شیڈز تعمیر ہیں اگر ان کو گرا دیا گیا تو ناقابل تلافی نقصان ہوگا جس پر سول عدالت نے عارضی حکم امتناعی جاری کر دیا۔

اقبال چنڑ 2013ء میں بہاولپور سے نون لیگ کی جانب سے ممبر صوبائی اسمبلی منتخب ہو کر صوبائی وزیر اور چولستان ڈیویلپمنٹ اتھارٹی کے سربراہ رہ چکے ہیں۔

لوک سجاگ نے ان کے بھائی ملک اعجاز چنڑ سے استفسار کیا تو جواب ملا کہ یہ معاملہ عدالت میں ہے اور وہ جو بھی فیصلہ کرے گی اس پر عمل کیا جائے گا۔

<h2>ڈھائی ارب روپے سالانہ کا کاروبار</h2>

بہاولپور شہر سوا کروڑ آبادی والے بہاولپور ڈویژن میں اعلیٰ تعلیم کے اداروں کا واحد مرکز ہے۔ یہاں اسلامیہ یونیورسٹی، صادق ویمن یونیورسٹی، گورنمنٹ صادق ایجرٹن کالج، گورنمنٹ پوسٹ گریجوایٹ کالج اور قائد اعظم میڈیکل کالج میں گردونواح اور پنجاب بھر سے آنے والے ہزاروں طلبہ و طالبات زیرتعلیم ہیں۔

اسلامیہ یونیوسٹی بہاولپور میں طلبا کی کل تعداد 70 ہزار بتائی جاتی ہے۔ دیگر اداروں کی طرح یونیورسٹی کے ہاسٹلز میں بھی گنجائش ناکافی ہے یہاں سات ہاسٹلز میں چھ ہزار 300 طالبات رہتی ہیں اور تین ہزار طلبا پانچ ہاسٹلز میں رہائش رکھتے ہیں جبکہ اندازاً 15 ہزار طلبا و طالبات نجی ہاسٹلز میں رہنے پر مجبور ہیں۔

طلبہ کو لا محالہ نجی ہاسٹلز میں قیام کرنا پڑتا ہے۔ رہائش کی طلب کو دیکھتے ہوئے لوگوں نے شہر میں چھوٹے بڑے گھروں میں پارٹیشن کر کے انہیں ہاسٹلز میں تبدیل کر دیا ہے جہاں ایک بستر جتنی جگہ کا کم از کم ماہانہ کرایہ پانچ ہزار روپے ہے۔ 
ایک محتاط اندازے کے مطابق بہاولپور شہر میں نجی ہاسٹلز کے کاروبار کا حجم تقریباً ڈھائی ارب روپے سالانہ ہے۔

نجی ہاسٹل اپنے آپ کو کسی قاعدے قانون کو ماتحت تصور نہیں کرتے۔ متعلقہ اداروں کو بھی ان پر کوئی قانون لاگو کرنے کی پروا نہیں۔بس دہشت گردی کی روک تھام کے لیے جب سے پولیس کو اپنے علاقے میں کرایہ داروں کا ریکارڈ رکھنے کا پابند کیا گیا ہے تب سے وہ ان ہاسٹلز کی ایک سرسری سی فہرست تیار کر کے اپنے پاس رکھنے لگے ہیں۔

قانوناً ان ہاسٹلز پر پاکستان ہوٹلز اینڈ ریسٹورنٹس ایکٹ 1976ء کا اطلاق ہونا چاہیے جس کے تحت ان کے لیے لازم ہوتا ہے کہ ہاسٹل کے قیام کی پیشگی اجازت طلب کریں اور صحت، صفائی، محفوظ بلڈنگ اور دیگر خدمات کی فراہمی کو یقینی بنائیں جس کا متعلقہ حکام کو ہر سال معائنہ کرنا ہوتا ہے۔

قانون پر عمل درآمد کی صورت میں میونسپل کارپوریشن کو ان ہاسٹلز کی عمارات کو معائنہ کے بعد قابل رہائش یا خطرناک قرار دینا ہو گا اور لینڈ ریکارڈ میں ان کی حیثیت رہائشی سے تبدیل کر کے کمرشل کرنا ہو گی۔

اس عمل سے گزرنے سے ان پر ٹیکسوں کی شرح بڑھ جائے گی اور سیلز ٹیکس اور انکم ٹیکس کا اطلاق بھی ہو جائے گا اور یہ ظاہر ہے مالکان کے لیے قابلِ قبول نہیں۔

<h2>آئی بلا کو ٹال تُو: حادثے کا ذمہ دار کون؟</h2>

ریاض کالونی کے سانحے کے بعد پولیس نے کمال مستعدی کا مظاہرہ کرتے ہوئے ہوسٹل کے مالک عبدالستار کے خلاف تھانہ سول لائنز میں دفعہ 302 کے تحت یعنی قتلِ عمد کا مقدمہ درج کر لیا۔ ساتھ ہی ایک وضاحتی بیان میں کہا کہ پولیس نے ڈیڑھ ماہ قبل تمام نجی ہاسٹلوں کا سروے کروا کے ڈپٹی کمشنر کو خط لکھ دیا تھا کہ اس حوالے سے کارروائی کی جائے۔

انہوں نے کہا کہ خطرناک عمارتوں کو سربمہر کرنا ڈپٹی کمشنر کی ذمہ داری ہے۔ ڈی پی او بہاولپور کی جانب سے ڈپٹی کمشنر کو جو خط 30 مارچ کو ارسال کیا گیا تھا اس میں ایسے 34 ہاسٹلز کی فہرست شامل تھی جو پولیس کے مطابق کسی بھی ادارے کی اجازت یا علم کے بغیر کام کر رہے تھے۔

اس لسٹ میں ریاض کالونی کا وہ گرلز ہاسٹل شامل نہیں تھا جس میں حادثہ ہوا۔

تاہم تھانہ سول لائنز کے ایس ایچ او عامر لعل دعویٰ کرتے ہیں کہ اس ہاسٹل کے کرایہ داری معاہدے اور وہاں رہنے والی طالبات کا ریکارڈ تھانے میں موجود ہے۔ جہاں تک عمارت کمزور اور خطرناک ہونے کا تعلق ہے تو یہ دیکھنا تحصیل میونسپل کارپوریشن کا کام تھا۔

انہوں نے انکشاف کیا کہ اس حادثے کے دوسرے روز میونسپل کارپوریشن کے افسروں نے تھانے میں آکر اس ہوسٹل کے نام پرانی تاریخوں میں لکھا ایک نوٹس جمع کرانے کی کوشش کی لیکن انہوں نے ایسا کرنے سے انکار کر دیا تھا۔

انہوں نے کہا کہ کارپوریشن کے حکام حادثے کی ذمہ داری اور کسی تادیبی کاروائی سے بچنے کے لیے اب نجی ہاسٹلز کو گزری ہوئی تاریخوں میں نوٹس جاری کر رہے ہیں۔

کارپوریشن کے چیف آفیسر نے اس سلسلے میں لوک سجاگ کو کوئی معلومات دینے سے انکار کیا۔ انہوں نے ریکارڈ کے حوالے سے بھی کہا کہ ڈپٹی کمشنر بہاولپور نے انہیں ہاسٹلز کے ریکارڈ اور معلومات دینے سے روک دیا ہے۔

<h2>اچانک نمودار ہونے والی نجی ہاسٹل مالکان ایسوسی ایشن</h2>

متعلقہ اداروں پر ہاسٹلز کو قانون کے دائرے میں لانے کا دباؤ جونہی بڑھا، اچانک ایک نجی ہاسٹل ایسوسی ایشن نمودار ہو گئی۔

اس کے صدر حافظ شعبان ایک نجی ہاسٹل کے مالک ہیں اور سرپرستِ اعلیٰ بلال بلوچ ہیں جو مسلم لیگ نون کے رہنما اور ایم پی اے کے امیدوار ہیں۔

حافظ شعبان نے دعویٰ کیا کہ بہاولپور میں لگ بھگ ایک ہزار نجی ہاسٹل ہیں جو 35، 40 ہزار طلبا و طالبات کو رہائش کی سہولت مہیا کر رہے ہیں۔ تاہم انہوں نے اپنے دعویٰ کے ثبوت کے طور پر &#39;بہاولپور کے ایک ہزار نجی ہاسٹلوں&#39; کی فہرست دینے سے انکار کیا۔

ایک پریس کانفرنس میں جب ان سے پوچھا گیا کہ ایسوسی ایشن کب سے کام کر رہی ہے تو ان کا جواب تھا کہ &quot;یہ تنظیم دوچار روز پہلے ہی قائم ہوئی ہے&quot;۔

حافظ صاحب نے کہا کہ چھت گرنے کا واقع ایک اتفاقی حادثہ تھا لیکن اس میں ہاسٹل مالک عبدالستار کی غفلت کو نظرانداز نہیں کیا جا سکتا۔

انہوں نے کہا کہ ڈپٹی کمشنر کی سربراہی میں ایک کمیٹی بنائی جا رہی ہے جو تمام ہاسٹلوں کی عمارتوں کا محکمہ بلڈنگ کے ساتھ معائنہ کرے گی اور خطرناک عمارتوں کو بند کر کے طلبہ کو معیاری عمارتوں میں منتقل کیا جائے گا۔

حافظ صاحب نے بلڈنگ رولز کے مطابق ان ہاسٹلز کو کمرشل قرار دینے کی مخالفت کی اور اس سلسلے میں ضلعی انتظامیہ کی جانب سے جاری کیے گئے نوٹسز کے مذمت کرتے ہوئے کہا: &quot;اگر عمارتوں کو کمرشل قرار دے دیں گے تو فیسوں اور ماہانہ ٹیکسوں کی ادائیگی کے باعث مالکان کے اخراجات بڑھ جائیں گے اور انہیں کرائے بڑھانے پڑیں گے جس سے طالب علموں کے رہائشی اخراجات دو گنا ہو جائیں گے&quot;۔

معروف قانون دان محمد صادق کہتے ہیں کہ جب بھی کوئی ناخوشگوار واقعہ پیش آتا ہے تو انتظامیہ خوب حرکت میں آتی ہے لیکن &quot;زیادہ زور معاملے کو دبانے پر ہوتا ہے اور مسائل کے مستقل سدباب کا کبھی نے نہیں سوچا جاتا&quot;۔

محمد یاسین انصاری

محمدیاسین انصاری بہاول پور کے نوجوانوں صحافی ہیں۔ عرصہ 23 سال سے پرنٹ و الیکٹرانک میڈیا کے ساتھ منسلک ہیں۔

کیا لودھراں کا جم خانہ گرلز ووکیشنل انسٹی ٹیوٹ اور لائبریری دونوں ہڑپ کر جائے گا؟

'کپاس اگاؤ معیشت بچاؤ'، بہاولپور ڈویژن کے کسان زیادہ کپاس اگا کر بھی پریشان

ہائی کورٹ راولپنڈی بنچ کے فیصلے نے کس طرح پی ایچ اے بہاول پور کو مقروض کر دیا؟

میٹھا میٹھا ہپ: کیا دو طالبات کی ہلاکت بہاولپور کے نجی ہاسٹلز کو قانون کے دائرے میں لا پائے گی؟

Lok Sujag