ضلع راجن پور میں واقع رکھ ڈائمہ جنگل دو حصوں رکھ ڈائمہ شمالی اور رکھ ڈائمہ جنوبی پر مشتمل ہے۔ اس میں سفیدے، کیکر، شیشم اور دیگر اقسام کے درخت پائے جاتے ہیں۔ جنگل کی دیکھ بھال پر 10 ملازمین مامور ہیں۔ شمالی اور جنوبی رکھ ڈائمہ میں چار چار چوکیدار ہیں جبکہ ایک فاریسٹر اور ایک بیلدار&nbsp; شامل ہے۔

اس جنگل کا کل رقبہ 34 ہزار&nbsp; 701 ایکڑ ہے اور یہ دو حصوں پر مشتمل ہے۔&nbsp; رکھ ڈائمہ شمالی میں باغات لگے ہوئے ہیں جس کی وجہ سے اس حصے کی حالت بہتر ہے۔ اس میں دامن، کوٹلہ عیسن، رکھ عظمت والا، کوٹ مٹھن اور کوٹلہ حسین شامل ہیں۔

رکھ ڈائمہ جنوبی دریائی علاقوں پر مشتمل ہے جن میں راگستان شمالی کا دریائی جنگل، تھل مینگھراج کا دریائی اور کوٹلہ شیر محمد کا ریزرو جنگل شامل ہے۔

اس جنگل کا رقبہ دھیرے دھیرے کم ہو رہا ہے۔ بظاہر یہ تبدیلی کسی قدرتی عمل کے بجائے سالہا سال سے درختوں کی غیر قانونی کٹائی اور چوری کا نتیجہ ہے۔ محکمہ جنگلات کے ایک اہلکار کے مطابق چند برسوں میں جنگل کا رقبہ 42 مربع کلومیٹر سے سکڑ کر 32 مربع کلومیٹر رہ گیا ہے۔

سماجی کارکن واجد علی بخاری الزام لگاتے ہیں کہ جنگل سے مسلسل لکڑی چوری ہو رہی ہے اور چوروں کو محکمہ جنگلات کے ملازمین کی آشیر باد حاصل ہے۔ جنگل کے محافظ اپنا حصہ وصول کر کے چوری کی اجازت دے دیتے ہیں۔

جنگل میں صفائی کے لیے جن مزدوروں کی خدمات حاصل کی جاتی ہیں انہیں سرکاری ریکارڈ کے مطابق 18 ہزار روپے اجرت دی جاتی ہے۔ البتہ محمد عاصم کہتے ہیں کہ وہ پچھلے پانچ سال سے جنگل میں مزدوری کر رہے ہیں لیکن انہیں کبھی ان کے کام کا معاوضہ نہیں ملا۔

&quot;مجھ سے ہر ماہ واؤچر پر انگوٹھا لگوا لیا جاتا ہے اور اجرت یہ ہے کہ لکڑی کاٹنے کی اجازت مل جاتی ہے۔ میں اسے فروخت کرتا ہوں اور گھر کی گزر بسر اسی سے ہوتی ہے۔&quot;

انہوں نے بتایا کہ جنگل کی لکڑی لاکھوں میں فروخت ہوتی ہے۔ اس سے مختلف طرح کے فرنیچر تیار ہو کر مہنگے داموں فروخت ہوتے ہے۔ یہاں سے جمع ہونے والا کچرا 30 سے 40 ہزار روپے جبکہ پتے 25 ہزار روپے فی ٹرالی فروخت کیے جاتے ہیں۔ یہ کچرا اور پتے اینٹوں کے بھٹوں میں جلانے کے کام آتے ہیں۔ بقول ان کے حاصل ہونے والی رقم کا اندراج کہیں نہیں ہوتا۔

رکھ ڈائمہ کے فاریسٹ آفیسر محمد بلال لکڑی چوری کے الزامات کو بے بنیاد قرار&nbsp; دیتے ہیں۔

لوک سجاگ سے بات چیت کرتے ہوئے انہوں نے کہا کہ جنگل میں گرے ہوئے سوکھے پتے اور شاخیں قریب رہنے والے مزدور، کاشتکار اور محنت کش اپنا چولہا جلانے کے لیے لے جاتے ہیں جنہیں روکا نہیں جاتا۔ البتہ کوئی لکڑی چوری میں ملوث ہو تو اس کے خلاف قانونی کارروائی عمل میں لائی جاتی ہے۔

ان کے مطابق لکڑی چوروں کو سرکار کی طرف سے طے شدہ جرمانہ کر کے رقم سرکاری خزانے میں جمع کرا دی جاتی ہے۔ پھر بھی کوئی باز نہ آئے تو اس کے خلاف ایف آئی آر درج کرائی جاتی ہے اور قانون کے مطابق سزا ہوتی ہے۔

پولیس سے حاصل کیے گئے اعداد و شمار ان کارروائیوں کی تصدیق کرتے ہیں ان کے مطابق 2021ء میں لکڑی چوروں کے خلاف 53، 2022ء میں 46 اور رواں سال اب تک 34 مقدمات درج کیے گئے اور انہیں مختلف جرمانے بھی ہوئے۔ پولیس کے مطابق جرمانہ عدالت کی طرف سے ہوتا ہے اور اس کی رقم سرکاری خزانے میں جمع کرا دی جاتی ہے۔

تھانہ راجن پور کے اے ایس آئی محمد شریف نے لوک سجاگ کو بتایا کہ یہ جنگل خاص اہمیت کا حامل ہے اس لیے بھرپور کوشش ہوتی ہے کہ لکڑی چوری نہ ہو لیکن اہل علاقہ زیادہ تر غریب ہیں اور لکڑی اٹھانے سے باز نہیں آتے۔

ایک سوال کے جواب میں انہوں نے کہا کہ ماضی میں تمام مقدمات باہر کے لوگوں کے خلاف درج ہوئے، کسی سرکاری اہلکار پر گرفت نہیں ہوئی۔ دوسری جانب محکمہ جنگلات کے ایک اہلکار نے بتایا کہ لکڑی چوری پر معطل ہونے والے دو ملازموں کو کچھ عرصے بعد بحال کر دیا گیا تھا۔

فاریسٹ آفیسر راجن پور فراز احمد نے بتایا کہ&nbsp; انہوں نے محکمانہ کارروائی کرتے ہوئے ایک گارڈ کو ملازمت سے برطرف بھی کیا تھا، حکومتی قواعد کے مطابق جرمانے بھی کیے جاتے ہیں۔ البتہ انہوں نے جرمانے کی رقوم کی تفصیل بتانے سے انکار کر دیا۔

&quot;سکیورٹی کے نظام کو بہتر بنانے کے لیے نئی حکمت عملی تیار کی جا رہی ہے، جو نقصان ہو چکا اس کی تو تلافی نہیں ہو سکتی۔ ہماری کوشش ہے کہ مزید نقصان نہ ہو۔ اب لکڑی چوری کی صورت حال پر کافی حد تک قابو پا لیا گیا ہے&quot;۔

قانون دان عبدالمجید بزنجو کے مطابق لکڑی چوری کے بہت کم ملزمان گرفتار ہوتے ہیں اور ان کی ضمانت بھی ہوجاتی ہے۔

&quot;زیادہ تر مجرم چند ہزار روپے جرمانہ ادا کر کے رہا ہو جاتے ہیں اور دوبارہ سے لکڑی چوری شروع کر دیتے ہیں۔&quot;

'خاک اڑتی ہے چار سُو اے دوست'، ملتان میں شجرکاری مہم معطل، جنگلات کا رقبہ تیزی سے کم ہونے لگا

راجن پور کے رکھ ڈائمہ جنگل کا رقبہ کم کیوں ہو رہا ہے؟

text

گزشتہ برس سیلاب کے باعث ضلع راجن پور میں مویشیوں کی بڑی تعداد پانی میں بہہ گئی اور اس کے بعد انہیں بیماریوں نے گھیر لیا۔ اس سے مقامی آبادی کو بڑے پیمانے پر معاشی نقصان اٹھانا پڑا۔

اس ضلعے میں مویشیوں کی کثیر تعداد اور مقامی معیشت میں ان کی اہمیت کے باوجود صرف تین سرکاری ویٹرنری ہسپتال ہیں۔ ان میں علاج کے لیے مویشی لانے والوں کو ادویات کی قلت کے باعث اکثر مشکلات اور مایوسی کا سامنا کرنا پڑتا ہے۔

ضلع میں راجن پور، فاضل پور اور جام پور میں قائم سرکاری وٹرنری ہسپتالوں میں عملے کی تعداد بھی محدود ہے۔ علاقے میں ایک ویٹرنری آفیسر، چار ویٹرنری اسسٹنٹ، ایک ویٹرنری ٹیکنیشن اور ایک چوکیدار تعینات ہے۔ سول ویٹرنری ہسپتال جام پور اور فاضل پور میں ہر ایک میں عملے کی تعداد چھ ہے۔

محکمہ لائیو سٹاک کے مطابق ضلع راجن پور میں میں 66 ہزار سے کچھ زیادہ مویشی ہیں جن میں گائیں، بھینسیں، بھیڑیں اور بکریاں شامل ہیں۔ ان میں سے راجن پور اور ڈیرہ غازی خان میں پائی جانے والی نکری بکریاں اپنی الگ شناخت رکھتی ہیں۔ ان بکریوں کا رنگ سفید اور آنکھیں سرخی مائل ہوتی ہیں۔ جسم مضبوط گٹھا ہوا اور جلد چمک دار ہوتی ہے۔ اس نسل کی بکریوں کی قیمت لاکھوں روپے تک ہوتی ہے۔

فاضل پور کے دیہی علاقے سکھانی والا کے محمد شہباز نے مختلف نسل کی بکریاں پال رکھی ہیں اور ان کی خرید و فروخت کے لیے مختلف شہروں میں جاتے رہتے ہیں۔ نومبر 2022ء میں ان کا انتہائی مہنگا بکرا بیمار ہو کر مر گیا۔

ان کا کہنا ہے کہ بکرے کو گلہڑ کی بیماری اور بخار ہوا۔ وہ فاضل پور ہسپتال علاج کے لیے گئے مگر وہاں ادویات نہیں تھیں۔ ڈکٹروں کی جانب سے لکھ کر دی گئی دوائیں اتنی مہنگی تھیں کہ وہ انہیں خرید نہ سکے اورعلاج نہ ہونے سے ان کا قیمتی بکرا مر گیا۔

جام پور کے عبدالمالک کے پاس 10 بکریاں اور چار گائیں تھیں۔ اب ان کے پاس چھ بکریاں اور تین گائیں رہ گئی ہیں کیونکہ وہ بھی اپنے بیمار مویشیوں کا علاج نہ کرا سکے۔ ان کا کہنا ہے &quot;جام پور ہسپتال کے ڈاکٹر نجی میڈیکل سٹور سے خریداری کے لیے دوائیاں لکھ دیتے تھے جو بہت مہنگی ہوتیں اور ان کے لیے یہ دوائیں خریدنا ممکن نہیں تھا۔&quot;

جام پور میں تعینات ویٹرنری آفیسر ڈاکٹر شفیق نے بتایا کہ سول وٹرنری ہسپتال میں گزشتہ تین برسوں کے دوران علاج کے لیے 51 ہزار 246 جانور لائے گئے جن میں سے بیشتر صحت یاب ہوئے تاہم 11 ہزار 546 جانبر نہ ہو سکے۔

وٹرنری اسسٹنٹ ظہیر کے مطابق ہسپتال میں دوائیں کم ہیں اس لیے لوگوں کو نجی میڈیکل سٹور سے دوائیں لانے کو کہا جاتا ہے۔ انہوں نے بتایا کہ پہلے ہر ماہ ادویات کے 400 سے 500 کارٹن آتے تھے لیکن اب ان کی تعداد گھٹ کر 150سے 200 کے درمیان رہ گئی ہے جبکہ ضرورت کے مطابق ویکیسن، پینسلین اور دیگر ادویات کے 800 کارٹن درکار ہوتے ہیں۔

راجن پور وٹرنری ہسپتال کے ڈاکٹر فرحت کہتے ہیں کہ گل گھوٹو اور دیگر بیماریوں کے علاج کے لیے جو ویکسین اور پینسلین استعمال کی جاتی ہے اس کی قلت ہے۔

&quot;اب دوائیاں کم آتی ہیں۔ یہاں ادویات کے 400 کے بجائے صرف 150 کارٹن آ رہے ہیں۔&quot;

ایک سوال کے جواب میں انہوں نے بتایا کہ انہیں بجٹ فنڈ کی صورت میں نہیں ملتا بلکہ 150 کارٹن ادویات اور 300 لیٹر پیٹرول فراہم کیا جاتا ہے۔

ظہیر کے مطابق ان کے پاس صرف ایک موبائل گاڑی ہے جس کے ذریعے دور دراز علاقوں میں بھی علاج کی سہولت فراہم کی جاتی ہے۔

محکمے کے ایڈیشنل ڈائریکٹر ڈاکٹر حسن مجتبیٰ نے بتایا کہ ایک سال سے ادویات بہت کم آ رہی ہیں۔ اس بارے میں افسران بالا کو لکھ کر بھیجا گیا ہے لیکن تاحال صورتحال جوں کی توں ہے۔

انہوں نے کہا کہ وہ خود ہفتے میں دو مرتبہ ہسپتالوں کا دورہ کرتے ہیں۔ ان کی کوشش ہوتی ہے کہ مویشی پالنے والوں کو مشکلات نہ ہوں۔ جانوروں کا علاج کرنے کے لیے موبائل گاڑیوں کے ذریعے ہوم سروس بھی دی جاتی ہے لیکن محدود وسائل کے باعث لوگوں کی شکایات رہتی ہیں تاہم جلد ان پر قابو پا لیا جائے گا۔

کچھی بولان ، کیاسیلاب سے متاثرہ مویشی پالوں اور گلہ بانوں کے نقصان کا کبھی ازالہ ہو پائے گا؟

مویشیوں کے گڑھ راجن پور میں ویٹرنری ادویات کی قلت، پالتو جانور قابل علاج بیماریوں سے دم توڑنے لگے

بے نظیر انکم سپورٹ پروگرام کے تحت غریب، نادار اور بیوہ خواتین کو ہر تین ماہ بعد امدادی رقوم فراہم کی جاتی ہیں۔ یہ رقوم پہلے حبیب بینک کے ذریعے ادا کی جاتی تھیں اور خواتین انہیں وصول کرنے کی خاطر بینکوں کے باہر قطار میں کھڑی دکھائی بھی دیتی تھیں۔ اکتوبر 2020ء میں بینکوں کے بجائے رقم کی ادائیگی کا کام دکان داروں کے حوالے کر دیا گیا اور گلی محلوں میں ان کی موجودگی سے توقع کی گئی کہ لوگوں کو امداد زیادہ آسانی سے ملے گی۔

راجن پور میں خواتین کی جانب سے ان ریٹیلرز کی شکایات سامنے آ رہی ہیں۔ عورتوں کا کہنا ہے کہ بعض دکاندار رقوم کی ادائیگی کے وقت پانچ سو سے دو ہزار روپے تک کی رقم کمیشن کے نام پر کاٹ لیتے ہیں۔

پنجاب کے پسماندہ ترین اضلاع میں شمار ہونے والے راجن پور کی ہزاروں غریب خواتین کا انحصار بے نظیر انکم سپورٹ پروگرام پر ہے جس کے تحت انہیں ہر تین ماہ بعد 9 ہزار روپے ادا کیے جاتے ہیں۔

سوشل ویلفیئر آفس راجن پور کے زیر اہتمام اپریل 2023ء میں کیے جانے والے سروے کے مطابق ضلع میں 167 ریٹیلر رقوم فراہم کر رہے ہیں جبکہ کئی نوجوان جاز کیش یا ایزی پیسہ ڈیوائس کے ذریعے بھی چلتے پھرتے یا چوراہوں میں بیٹھ کر یہ کام کرتے ہیں۔ ریٹیلرز کے ہاں عموماً ایسی خواتین کا رش ہوتا ہے۔

نسرین بی بی راجن پور کے دیہی علاقے بستی اعوان کی رہائشی ہیں۔ ان کا کہنا ہے کہ پہلے وہ بینک سے امدادی رقم نکلوا لیتی تھیں مگر گزشتہ تین سال سے ادائیگی دکانداروں کے حوالے کر دی گئی ہے جس سے ان کو مشکلات کا سامنا ہے۔

&quot;پیسے لینے کے لیے طویل قطاروں میں کھڑا ہونا پڑتا ہے،دھکم پیل ہوتی ہے۔ گرمی اور دھوپ میں طویل انتظار کے بعد جب رقم ملتی ہے تو نو ہزار روپے میں سے آ ٹھ ہزارروپے اداکیے جاتے ہیں&quot;۔

ان کا کہنا ہے کہ وہ بہت غریب ہیں اور کپڑے سی کر اپنا گھر چلاتی ہیں، ان کے شوہر بیمار ہیں اور کام کاج نہیں کر سکتے۔ ان کے لیے یہ تھوڑی سی رقم بھی بہت اہم ہے۔

حاجی پور کی شرمیلا مائی بیوہ ہیں اور ان کے چھ بچے ہیں۔ انہوں نے بتایا کہ ان کی رقم کافی عرص سے موصول نہیں ہو رہی تھی ۔ جب انہوں نے پروگرام والوں سے معلوم کیا تو پتا چلا کہ دکاندار نے کچھ عورتوں سے ان کے ناموں پر انگوٹھے لگوا لیے اوران کی رقم خود نکال لی۔ جب وہ دکاندار سے پوچھنے گئیں تو اس نے کوئی جواب نہ دیا۔

انہوں نے بتایا کہ ہر مرتبہ ایک ہزار سے چار ہزار روپے تک رقم کاٹ کر انہیں باقی پیسے تھما دیے جاتے ہیں۔

بستی کشانی کی رابعہ بی بی کو امدادی رقم صرف ایک بار ملی۔ جب انہوں نے قریبی ریٹیلر سے معلوم کیا تو اس نے بتایا کہ ان کی رقم بند ہو گئی ہے اور اگر وہ دو ہزار روپے دیں تو وہ ان کی&nbsp; امداد بحال کروا دے گا۔

انہوں نے سلیمان نامی اس دکان دار کو دوہزار روپے دیے جس نے سروے کاجھانسہ دیا لیکن پیسے نہیں ملے۔ اسی طرح کی شکایات یہاں کی متعدد مستحق عورتوں کو ہیں۔

بے نظیر انکم سپورٹ پروگرام کے ڈپٹی ڈائریکٹر محمد کاشف نے بتایا کہ راجن پور میں 40 ہزار 788 مستحق عورتوں کو مالی امداد فراہم کی جاتی ہے لیکن کبھی کبھار ان کے ساتھ نوسربازی کے واقعات بھی سننے کو ملتے ہیں۔

جب ان سے پوچھا گیا کہ ایسے واقعات کی تعداد کتنی ہے تو ان کے پاس اس حوالے سے کوئی معلومات نہیں تھیں۔

ڈپٹی ڈائریکٹر کے مطابق لوگوں کی طرف سے اے ٹی ایم مشینوں کی خرابی کی بہت زیادہ شکایات موصول ہونے کی وجہ سے یہ سہولت دی گئی تھی تاکہ لوگ دکانداروں سے با آسانی رقوم حاصل کر سکیں۔

ڈپٹی کمشنر راجن پور منصور احمد خان بلوچ ہفتہ وار کھلی کچہری لگا کر عوام کے مسائل سنتے ہیں۔ اس میں بہت سی خواتین نے دکانداروں کی شکایت کی جس پر ڈپٹی کمشنر نے جانچ پڑتال اور ان کا سدباب کرنے کے لیے ٹیمیں تشکیل دیں ۔اس سلسلے میں چار دکانداروں کے خلاف قانونی کارروائی کی جا رہی ہے۔

&nbsp;منصور احمد بلوچ کہتے ہیں کہ کفالت پروگرام کے تحت رقوم کی تقسیم کے مراکز کی جانچ پڑتال اور سیکیورٹی کے لیے ٹیمیں تشکیل دے دی گئی ہیں۔ متاثرہ عورتوں کو ان کا حق بھی دلوایا گیا ہے اور متعلقہ تھانوں کو نوسربازوں کے خلاف سخت کارروائی کا حکم دیا گیا ہے۔

سماجی کارکن ڈاکٹر عرفان ایسی خواتین کو مشورہ دیتے ہیں کہ وہ کسی کے جھانسے میں آ کر سروے نہ کرائیں۔ یہ خواتین اپنے فون کے ذریعے خود بھی آن لائن رجسٹر ہو سکتی ہیں اور اس سلسلے میں کوئی مشکل پیش آئے تو کسی قابل اعتماد فرد کی مدد لی جا سکتی ہے۔

"پیسے دو گی تو پیسے ملیں گے"، ننکانہ صاحب میں بینظیر انکم سپورٹ پروگرام سے رقم کا حصول خواتین کے لیے درد سر بن گیا

راجن پور میں بے نظیر انکم سپورٹ پروگرام سے امداد لینے والی خواتین کو دکانداروں کے خلاف پیسے کاٹنے کی شکایات

راجن پور کی زراعت کا زیادہ تر انحصار نہری پانی پر ہے۔ ضلع کو دو نہریں داجل اور جام پور لنک 3 سیراب کرتی ہیں۔ یہ دونوں تونسہ بیراج سے نکلنے والی ڈیرہ غازی خان کینال کی شاخیں ہیں۔ راجن پور میں ان دو نہروں سے مزید 17 رابطہ نہریں نکلتی ہیں۔

رودکوہی سے آنے والے سیلاب راجن پور کی نہروں سے بھی ٹکراتے رہتے ہیں جس کے باعث انہیں مرمت کی ضرورت پڑتی ہے۔ علاقے کے کسانوں کو شکایت ہے کہ گزشتہ چند برس سے خستہ حال نہروں کی مرمت نہیں کی جا رہی اور پانی کم مقدار میں فراہم کیا جا رہا ہے۔ علاوہ ازیں نہری پانی بروقت نہیں ملتا۔

قطب کینال انہی میں سے ایک ہے جس کے قریب رہنے والے کسان عبدالغفار نے بتایا کہ وہ ہر سال چاول اور گندم اگاتے ہیں۔ وہ اسے نہری پانی سے سیراب کیا کرتے تھے لیکن اب نہری پانی نہ ہونے کے سبب انہیں ٹیوب ویل سے اپنی فصل کو پانی دینا پڑتا ہے۔

ان کا کہنا ہے کہ فاضل نہر، قادرا نہر، چھاچھڑ نہر، حضوری نہر، میراں پور نہر اور قطب کینال میں گزشتہ تین سال سے ضرورت کے عرصہ میں پانی نہ ہونے کے برابر ہوتا ہے۔

&quot;میں غریب کسان ہوں۔ ٹیوب ویل کے استعمال سے میرے اخراجات اور معاشی مسائل بڑھ گئے ہیں۔ جب فصل تیار ہو جاتی ہے اور پانی کی ضرورت نہیں رہتی تو نہر میں پانی آ جاتا ہے۔ نہر کے بند کمزور ہونے کی وجہ سے پانی فصلوں میں داخل ہو کر انہیں خراب کر دیتا ہے۔ نقصان سے بچنے کے لیے اس بار میں&nbsp; نے کوئی فصل کاشت نہیں کی۔&quot;

شعبہ زراعت پنجاب کی ایک رپورٹ کے مطابق 18 لاکھ 69 ہزار 337 ایکڑ رقبے پر مشتمل ضلع راجن پور میں نو لاکھ 53 ہزار 105 ایکڑ اراضی زیر کاشت ہے۔ بیشتر رقبے پر گندم، کپاس، گنا اور چاول کاشت ہوتے ہیں۔ ان فصلوں کو نہری پانی کی ضرورت پڑتی ہے۔

فاضل نہر کے قریب بستی بھٹہ کے عبد الرحمٰن کہتے ہیں کہ نومبر سے اپریل تک گندم کی فصل ہوتی ہے اور انہی مہینوں میں بعض علاقوں میں کینولا کاشت کیا جاتا ہے۔ اسی طرح مئی سے اکتوبر تک کپاس کی فصل کاشت کی جاتی ہے اور گنا، مکئی اور جوار بھی اگائے جاتے ہیں۔

وہ نہری پانی کی کم یابی اور فصلوں کے سیزن میں پانی نہ ملنے سے نالاں ہیں۔ ان کا کہنا ہے کہ نہر فاضل کی صورت حال بھی قطب کینال جیسی ہے ۔ &quot;جب کسان کو پانی کی ضرورت نہیں ہوتی تو پانی نہر میں چھوڑ دیا جاتا ہے۔ بروقت نہری پانی نہ ملنے سے علاقے میں فصلوں کی پیداوار بہت کم ہوئی ہے۔&quot;

نہری پانی کی کمی سے زیادہ تر فاضل پور، میراں پور، بمبلِی اور روجھان متاثر ہوئے ہیں۔ داجل، کوٹلہ مغلاں، کوٹلہ دیوان اور محمد پور میں بھی کسانوں کو مشکلات کا سامنا ہے۔

ڈپٹی کمشنر آفس راجن پور کے ایک متعلقہ افسر محمد عقیل نے بتایا کہ محکمہ انہار کو احکامات دیے گئے ہیں کہ ایسی نہریں جن کے پشتے کمزور ہیں ان کی مرمت کے لیے اقدامات کیے جائیں۔ اکثر نہریں جو سیلاب کے دوران ٹوٹ گئی تھیں ان کی مرمت کے منصوبے پر عمل درآمد کیا جا رہا ہے اور جلد ہی نہری نظام کو بہتر بنایا جائے گا۔

اس سلسلے میں محکمہ آب پاشی کے ایکسیئن عبدالرؤف نے کہا کہ محکمہ آبپاشی کو نہروں کی دیکھ بھال کے لیے 17 کروڑ روپے ملتے ہیں۔ البتہ سیاسی بے یقینی کے باعث اس مرتبہ فنڈ نہیں ملے جس سے نہروں کی مرمت کے کام میں مشکل پیش آئی۔ اب انہیں فنڈ مہیا کر دیے گئے ہیں اور وہ نہروں کی خستہ حالی کو دور کرنے کے لیے کام کر رہے ہیں۔

ماہر زراعت توقیر قادر کے مطابق اس عرصے میں نہری پانی میں 60 فیصد تک کمی ہوئی۔ نہروں کی ٹوٹ پھوٹ اور پانی کی کمی نے کسانوں کو مشکل میں ڈال دیا ہے جنہیں شکایت ہے کہ پانی گھٹ جانے کی وجہ سے کسان ٹیوب ویل سے اپنی زمینیں سیراب کرنے پر مجبور ہیں۔ اس طرح ان کی لاگت بڑھ گئی ہے اور منافع کم ہو گیا ہے۔

ملک کی طویل ترین نہر میں پانی کی قلت سے سندھ کی زراعت متاثر، کاشت کار زمینیں بیچنے لگے

'پانی تب آتا ہے جب ضرورت نہیں رہتی '، راجن پور کے کسان فصلیں بروقت کیسے سیراب کریں؟

ضلع راجن پور میں لال گڑھ کی نوشین کو پڑھنے لکھنے کا بہت شوق تھا۔ وہ ڈاکٹر بنناچاہتی تھیں اور انہوں نے ہر جماعت اچھے نمبر لے کر پاس کی تھی۔ جب وہ نویں جماعت میں پہنچیں تو والد نے انہیں سکول جانے سے روک کر ان کا رشتہ طے کر دیا۔ نوشین کی والدہ کے بقول ان کی بیٹی نے والد کو قائل کرنے کی بہتیری کوشش کی کہ اس کی جلد شادی نہ کی جائے اور تعلیم مکمل کرنے کا موقع دیا جائے۔ تاہم اپنی بات نہ سنے جانے پر دلبرداشتہ ہو کر 25 اکتوبر 2021 کو انہوں نے خودکشی کرلی۔

ایسی ہی ایک کہانی راجن پور کے علاقے میراں پور کی رہائشی فاطمہ کی بتائی جاتی ہے۔ ان کے گھر والوں کا کہنا ہے کہ فاطمہ ہونہار طالبہ تھیں۔ بھائیوں اور والد نے انہیں بمشکل دسویں جماعت تک پڑھنے دیا جس سے دل برداشتہ ہو کر 15 مئی 2022ء کو ا نہوں نے خودکشی کر لی۔

ضلع راجن پور کی لڑکیوں میں شرح تعلیم بہت کم ہے۔ بہت سی لڑکیوں کو ان کی خواہش کے برعکس تعلیم سے محروم رکھا جاتا ہے اور ایسی کئی لڑکیاں دلبرداشتہ ہو کر خودکشی کر لیتی ہیں۔

سماجی زندگی اور رہن سہن کے معیار سے متعلق 2022 کے قومی جائزے کے مطابق ضلع راجن پور میں شرح خواندگی 34 فیصد ہے جس میں مردانہ خواندگی کی شرح 43 فیصد اور زنانہ شرح 23 فیصد ہے۔ دیہات میں دیکھا جائے تو مردوں میں خواندگی کی شرح 37 فیصد اور خواتین میں 16 فیصد ہے۔

پورے پنجاب میں شرح تعلیم 67.32 فیصد ہے جن میں 74 فیصد مرد اور 61 فیصد خواتین خواندہ ہیں۔

تعلیمی میدان میں صنفی تفریق سے متعلق حکومت پنجاب کی جانب سے 2021 میں جاری کردہ رپورٹ کے مطابق راجن پور تعلیم سے محروم 5 سے 9 سال عمر کے بچوں کی تعداد کے اعتبار سے بھی صوبے میں سب سے پیچھے ہے۔ یہاں سکول جانے کی اس عمر کے 58 فیصد لڑکے اور 64 فیصد لڑکیاں تعلیم سے محروم ہیں جبکہ پورے صوبے میں یہ شرح 46 فیصد ہے۔

سماجی تنظیم &#39;زندگی ویلفیئر سوسائٹی&#39; سے منسلک روح اللہ کمیونٹی ڈویلپمنٹ پروجیکٹ نامی منصوبے کے تحت درامندی والا میں سکول کے بچوں کی تعلیم پر کام کر چکی ہیں۔ انہوں نے بتایا کہ راجن پور کے متعدد علاقوں میں لڑکیوں کے حصول تعلیم کو غلط خیال کرتے ہوئے انہیں اس سے روکا جاتا ہے۔ لڑکیوں کو صرف گھریلو کام کاج تک محدود رکھا جاتا ہے اور ان کی کم عمری میں شادی کر دی جاتی ہے۔

&nbsp;رہبر ویلفیئر فاﺅنڈیشن نامی سماجی تنظیم وابستہ محمد اسلم راجن پور کے علاقوں بنگلہ دھینگن اور کوٹلہ نصیر میں بچوں کے تعلیمی منصوبے پر کام کا تجربہ رکھتے ہیں۔ ان کے مطابق فرسودہ رسم و رواج لڑکیوں کی تعلیم میں بڑی رکاوٹ ہیں۔

&quot;لڑکیوں کو کہا جاتا ہے کہ ان کے خاندان میں تعلیم حاصل کرنے کا رواج نہیں ہے اس لیے وہ بھی تعلیم حاصل نہ کریں۔&quot;

راجن پور میں لڑکیوں کے سکول چھوڑنے کی&nbsp; شرح بہت زیادہ ہے۔ مثال کے طور پر بستی اعوان اور کوٹلہ اندرون کے گرلز ایلیمنٹری سکولوں کے اساتذہ کے مطابق پہلی سے تیسری جماعت تک تقریباً 60 فیصد لڑکیاں تعلیم چھوڑ دیتی ہیں جبکہ تیسری سے پانچویں جماعت تک90 فیصد لڑکیاں تعلیم کو خیرباد کہہ دیتی ہیں۔

سرسید سکول فاضل پور اور خواجہ فرید گرلز سکول راجن پور کی انتظامیہ نے بتایا کہ ان سکولوں میں بچیوں کا داخلہ تو کرایا جاتا ہے لیکن بیشتر کو دو تین جماعتیں پڑھانے کے بعد گھر بٹھا لیا جاتا ہے۔

اس حوالے سے ڈپٹی ڈسٹرکٹ ایجوکیشن آفیسر راجن جگہوں پر بہت کم تعداد میں لڑکیوں کو سکول بھیجا جاتا ہے۔

&quot;ہم&nbsp; نے ایک ٹیم تشکیل دی جو گھر گھر جا کر لوگوں کو بچیوں کی تعلیم کے بارے میں آگاہی دیتی ہے۔ اس مہم سے بعض علاقوں میں صورت حال بہتر ہو رہی ہے۔&quot;

راجن پور کے علاقے حاجی پور میں گورنمنٹ ڈگری کالج کے پروفیسر شاہ نواز نے کہا کہ بہت سی بچیاں محنتی اور ہونہار ہوتی ہیں لیکن انہیں تعلیم مکمل نہیں کرنے دی جاتی۔ کم عمری میں شادی ہونے سے بھی سلسلہ تعلیم رک جاتا ہے۔ انہوں نے کہا کہ اساتذہ نے خود گھروں میں جا کر والدین کو قائل کرنے کی کوشش بھی کی ہے لیکن اس میں ٹرانسپورٹ جیسے مسائل بھی آڑے آجاتے ہیں۔

محمد اسلم ٹرانسپورٹ کی ناکافی سہولیات اور سکولوں کے دور واقع ہونے کو بھی لڑکیوں کی تعلیم میں بڑی رکاوٹ سمجھتے ہیں۔

راجن پور کی بستی اعوان کے گرلز ایلیمنٹری سکول میں صرف 184 طالبات زیر تعلیم ہیں۔ اسی طرح کوٹلہ اندرون کے ایلیمنٹری سکول میں 204اور میراپور کے گرلز ایلیمنٹری سکول میں 170طالبات زیرتعلیم ہیں۔ بستی اعوان کی آبادی تقریباً 17ہزار ہے۔کوٹلہ اندرون کی 26 ہزار اور میرا پور کی آبادی 11ہزار کے قریب ہے۔ آ بادی کے لحاظ سے دیکھا جائے تو طالبات کی یہ تعداد بہت کم ہے۔ اسی تناسب سے ہائرسیکنڈری سکولوں میں بھی طالبات کی تعداد بہت کم ہے۔

گاؤں سکھانی والا کی رہائشی حنا نے بتایا کہ انہوں نے اپنے ہی گاؤں کے سکول سے میٹرک کیا لیکن انٹرمیڈیٹ کے لیے انہیں شہر کے کالج جانا پڑتا۔ ان کے مطابق سکھانی والا میں ٹرانسپورٹ کا بہت مسئلہ ہے جس کی وجہ سے انہوں نے پڑھائی چھوڑ دی اور اب گھر کے کام کاج کرتی ہیں۔

بستی سراں کے اقبال نے بتایا کہ اس علاقے میں بس، ویگن وغیرہ کی صورت میں ٹرانسپورٹ کی کوئی سہولت نہیں ہے۔ وہ اپنے کام کاج میں مصروف ہوتے ہیں اس لیے اپنی بیٹی کو پڑھنے کے لیے دور نہیں بھیج سکتے اس لیے انہوں نے پانچویں جماع کے بعد اس کی تعلیم چھڑوا دی۔

&nbsp;پاکستان مسلم لیگ (ن) سے تعلق رکھنے والے سابق رکن قومی اسمبلی سردار حفیظ الرحمٰن دریشک سے جب پوچھا گیا کہ انہوں نے اپنے دورحکومت میں لڑکیوں کی تعلیم کے لیے کیا اقدامات کیے تو انہوں نے کہا کہ ان کی کوششوں سے تین گرلز سکول قائم کیے گئے۔

اس کے علاوہ بعض سکولوں کو اپ گریڈ کرنے کے لیے سروے بھی کروایا گیا لیکن ان حکومت کا آخری سال ؛پانامہ کیس&#39; جیسے مسائل کی نذر ہو گیا۔ انہوں نے دعویٰ کیا کہ اگر وہ آئندہ انتخابات میں برسراقتدار&nbsp; آئے تو ان تمام منصوبوں کو پایہ تکمیل تک پہنچایا جائے گا۔

سرکاری اعداد وشمار کے مطابق ضلع راجن پور میں لڑکوں اور لڑکیوں کے سکولوں کی مجموعی تعداد 389 ہے جن میں سے 336 پرائمری، 25 ایلیمنٹری اور 28 گرلز ہائر سیکنڈری ہیں۔ ان میں پرائمری سکولوں میں پڑھنے والوں کی تعداد 35200 ہے، ایلیمنٹری سکولوں میں 3612 زیر تعلیم ہیں جبکہ ہائر سکینڈری سکولوں میں 1736 طلبہ و طالبات پڑھ رہے ہیں۔ نجی شعبے میں بچیوں کے 112 سکول کام کر رہے ہیں جن میں 62320 طالبات زیر تعلیم ہیں۔

کوہلو گرلز کالج کا قیام: لڑکیوں کو تعلیم کے بہتر مواقعے کب میسر آئیں گے؟

فرسودہ رسوم، سکولوں کے طویل فاصلے: راجن پور میں طالبات کے سکول چھوڑنے کی بلند شرح برقرار

راجن پور کے علاقے بیٹ بوسن کی 22 سالہ اقصیٰ اور علی ایک دوسرے کو پسند کرتے تھے۔ دونوں کا تعلق مختلف برادریوں سے تھا اور ان کے خاندانوں میں دیرینہ مخاصمت بھی چلی آ رہی تھی۔ تاہم اس کی پروا نہ کرتے ہوئے پانچ دسمبر 2021ء کو دونوں نے ملتان جا کر نے کورٹ میرج کر لی۔

شادی کی خبر ملنے پر دونوں خاندانوں کے درمیان کشیدگی بڑھ گئی۔ بالخصوص اقصیٰ کے خاندان والے اس شادی کو تسلیم کرنے کے لیے تیار نہیں تھے۔ حالات کے پیش نظر علی اپنی اہلیہ کو لے کر راجن پور شہر سے دور منتقل ہو گئے۔

چند ماہ بعد اقصیٰ کے گھر والوں نے اسے یہ کہہ کر بلایا کہ وہ ان کی شادی کو قبول کرتے ہیں۔ تین ماہ کی حاملہ اقصیٰ یہ سن کر بہت خوش ہوئیں اور اپنے گھر والوں سے ملنے چلی گئیں جہاں 17 جون 2022ء کو مبینہ طور پر ان کے بھائی محسن نے&nbsp; فائرنگ کر کے انہیں قتل کر دیا۔

اس واقعے سے اگلے روز پولیس نے ملزم کو گرفتار کر لیا۔ تاہم 15 ستمبر 2022ء کو اس کے گھر والوں نے اسے رہا کرا لیا۔

راجن پور میں ایسے واقعات تواتر سے پیش آتے ہیں اور ملزموں کو سزا نہ ملنے یا رہا ہو جانے کا یقین ان واقعات کے تسلسل کا بڑا سبب ہے۔

اقصیٰ کیس کے وکیل ظہور احمد کھوسہ کا کہنا ہے کہ مقتولہ کے والد اس کیس کے مدعی تھے جنہوں نے اپنے قاتل بیٹے کو معاف کر دیا۔ معافی نامہ کے تحت اسے رہا کر دیا گیا اور کیس بھی ختم ہو گیا۔

ان کا کہنا ہے کہ ایسے واقعات بڑھ رہے ہیں اور خواتین کو جھوٹی انا اور غیرت کی بھینٹ چڑھایا جا رہا ہے۔

ایسا ہی ایک واقعہ راجن پور کے قصبہ فاضل پور میں پیش آیا جہاں 27 سالہ رقیہ بی بی کو مبینہ طور پر ان کے ماموں عبدالرحمٰن نے شک کی بنا پر آٹھ اکتوبر 2021ء کو قتل کر دیا۔ ملزم کو قتل کے تیسرے روز گرفتار کر لیا گیا۔ سات ماہ جیل میں رہنے کے بعد رشتہ داروں نے دیت دے کر ملزم کو رہا کرا لیا۔

پاکستان میں غیرت کے نام پر قتل کے خلاف قوانین ہونے کے باوجود ایسے واقعات عام ہیں۔ ایسے قتل کو پنجاب میں کالا کالی، سندھ میں کاروکاری، خیبر پختون خوا میں تور تورا اور بلوچستان میں سیاہ کاری کہا جاتا ہے۔ ہیومن رائٹس کمیشن آف پاکستان کے مطابق 2004ءسے 2016ء کے درمیان ملک میں غیرت کے نام پر قتل کے 15ہزار 222 واقعات رپورٹ ہوئے۔

ڈسٹرکٹ کورٹ راجن پور سے حاصل کیے گئے اعدادوشمار کے مطابق ضلع میں پچھلے تین برس میں غیرت کے نام پرتقریباً 50 افراد قتل ہوئے مگر اس سلسلے میں درج ہونے والے مقدمات میں صرف چھ افراد کو ہی سزا ہوئی۔

اس حوالے راجن پور تھانہ سٹی کے ایس ایچ او شبیر مستوئی سے بات کی گئی تو انہوں نے کہا کہ ایسے مقدمات میں مجرم کے ورثا ہی عموماً مدعی ہوتے ہیں۔ اس لیے وہ مجرم کو معاف کر کے صلح کے ذریعے کیس ختم کر دیتے ہیں۔

&quot;جس کیس میں ورثا کے بجائے پولیس مدعی بنتی ہے، اس میں مجرم کو معافی نہیں بلکہ سزا ملتی ہے۔&quot;

ڈسٹرکٹ کورٹ راجن پور کے سینئر وکیل انتظار احمد نے بتایا کہ 2016ء میں قانون میں ہونےو الی ایک ترمیم کے تحت غیرت کے نام پر قتل کو فساد فی الارض میں شمار کیا گیا۔

اس کے مطابق ولی قصاص کے تحت سزائے موت کو معاف کر سکتا ہے لیکن تعزیر کے تحت عمر قید کو معاف نہیں کر سکتا۔ اس ترمیم کے بعد اب پولیس نے ایسے مقدمات تعزیرات پاکستان کے سیکشن 302 اور 311 کے تحت درج کرنا شروع کر دیے ہیں۔

ان کا کہنا ہے کہ قبل ازیں قانون سازی کے تحت غیرت کے نام پر قتل کو باقاعدہ جرم تو قرار دیا گیا تھا لیکن قاتل سزا سے بچ نکلتا تھا۔

دیت کے قانون کے تحت ورثا قاتل کو معاف کر دیتے تھے اور وہ چند ہی ماہ میں رہا ہو جاتا تھا۔ اسی لیے غیرت کے نام پر قتل کے واقعات میں کوئی کمی نہ آئی۔

سوشل ویلفیئر ڈیپارٹمنٹ راجن پور کی ڈپٹی ڈائریکٹر شازیہ نواز کا کہنا ہے کہ صرف قوانین سخت کر دینے سے ایسے واقعات کی مکمل روک تھام ممکن نہیں۔ جب تک معاشرے کا اجتماعی شعور ایسے جرائم کی حوصلہ شکنی نہیں کرے گا اور نئی نسل میں شعور پیدا نہیں کیا جائے گا، ایسے واقعات ہوتے رہے گے۔

انہوں نے بتایا&nbsp; کہ پنجاب پولیس کے مطابق صرف راجن پور میں 2011ء سے 2016ء کے درمیاں 85 افراد کی غیرت کے نام پر جان لے لی گئی۔

ماہر قانون اور سپریم کورٹ کے وکیل فرح کھوسہ نے بتایا کہ غیرت کے نام پر قتل کے قانون میں جو ترامیم 2016ء میں کی گئیں وہ بنیادی طور پر دفعہ 302، دفعہ 310 اور دفعہ 345 کے آخر میں کیے گئے اضافے ہیں۔ اس سے پہلے یہ ہوتا تھا کہ ورثا قاتل کو معاف کر سکتے تھے۔

اس قانون سے پہلے اس جرم کی زیادہ سے زیادہ سزا دو سے پانچ سال قید تھی۔ متعلقہ قانون میں کہا گیا ہے کہ غیرت کے نام پر قتل کرنے والے کی سزا 25 سال سے کم نہیں ہو گی۔ اسی طرح انسانی جان کی دیت بھی 43 لاکھ روپے مقرر کی گئی ہے، لیکن دیت اس صورت میں ادا کی جا سکتی ہے اگر جج حالات و واقعات کا جائزہ لینے کے بعد یہ محسوس کرے کہ اس کیس میں راضی نامہ ہو سکتا ہے۔ گویا غیرت کے نام پر قتل کی دیت اور معافی نامہ جج کی مرضی سے مشروط کر دیا گیا ہے۔ جج کی رضامندی کے بغیر اگر کوئی اپنے طور پر دیت ادا کرتا ہے اور قاتل کو معافی مل جاتی ہے تو یہ درست نہیں ہو گا۔ اس کی قانون اجازت نہیں دیتا۔

غیرت کے نام پر قتل: 'جب تک معاشرہ ایسے جرائم کی حوصلہ شکنی نہیں کرے گا تب تک یہ واقعات ہوتے رہیں گے'

راجن پور: تین سال میں غیرت کے نام پر 50 افراد قتل، 44 واقعات میں ملزم سزا سے بچ نکلے

&quot;راجن پور میں ریل گاڑی کیا بند ہوئی میرا تو کاروبار ہی ختم ہو گیا&quot;۔ یہ کہنا تھا شہر کے نواحی علاقے شکار پور کے رہائشی پیریں ڈتہ کا۔ وہ کراچی کے علاقے گلشن اقبال میں عمارتیں رنگ و روغن کرنے کا کام کرتے تھے۔

کورونا کی وبا کے دوران ہونے والے لاک ڈاؤن سے وہ اور ان کے ہمراہ کام کرنے والے سات مزدور بے روزگار ہو گئے۔

یہ سب خوشحال خان خٹک ایکسپریس کے ذریعے کراچی جایا اور آیا کرتے تھے۔ راجن پور سے صرف یہی ریل گاڑی کراچی جاتی تھی۔

لاک ڈاؤن کے خاتمے پر کراچی جانے کے لیے وہ ان مزدوروں کو ساتھ لے کر ریلوے سٹیشن پہنچے۔وہاں انہیں بتایا گیا کہ یہ ٹرین بند کر دی گئی ہے۔

پیریں ڈتہ کا کہنا ہے کہ بس والے ٹرین کی نسبت بہت زیادہ کرایہ لے رہے تھے جو ان کے پاس نہیں تھا۔ اس لیے وہ کراچی نہ جا سکے۔

2021ء سے راجن پور ریلوے سٹیشن بالکل بند پڑا ہے۔

پیریں ڈتہ نے لوک سجاگ کو بتایا کہ جن دنوں وہ ریل گاڑی سے سفر کیا کرتے تھے راجن پور سے کراچی کا کرایہ 950 روپے تھا جو ان کے لیے قابل برداشت تھا۔تاہم وہ بتاتے ہیں کہ ان دنوں بس کا کرایہ زیادہ تھا۔

&quot;آج راجن پور سے کراچی جانے والی بس کا کرایہ تین ہزار روپے ہے&quot;۔

پاکستان ریلوے کے کرایوں کو مدنظر رکھتے ہوئے کہا جا سکتا ہے کہ اگر آج راجن پور سے کراچی ٹرین چل رہی ہوتی تو اس کی اکانومی کلاس کا کرایہ بس کی نسبت تقریباً نصف ہوتا۔

ضلع راجن پور کی آبادی 20 لاکھ کے قریب نفوس پر مشتمل ہے۔ زرعی علاقہ ہونے کے باوجود یہاں کے بیشتر لوگ دیگر شہروں میں جاکر روز گار کمانے کو ترجیح دیتے ہیں۔

<h2>1997ء سے اب تک چار ٹرینیں بند ہوئیں</h2>

راجن پور ریلوے سٹیشن 1973ء میں قائم ہوا۔ 1997ء تک اس سٹیشن سے چار ریل گاڑیاں چلتن ایکسپریس (فیصل آباد تا کوئٹہ)، اباسین ایکسپریس (پشاور تا کوئٹہ)، خوشحال خان خٹک ایکسپریس (پشاور تا کراچی) اور پسنجر ایکسپریس (ملتان تا جیکب آباد) گزرتی تھیں۔

1997ء میں اباسین اور پسنجر بند کر دی گئیں۔ انتہائی کامیاب سروس ہونے کے باوجود 20 جولائی 2010ء کو چلتن ایکسپریس بھی نامعلوم وجوہات کی بنا پر بند ہو گئی۔ اس طرح راجن پور ریلوے سٹیشن ویرانی کی طرف بڑھنے لگا۔

سٹیشن ماسٹر مہتاب شاہین کا کہنا ہے کہ کورونا کی وبا روکنے کے لیے اٹھائے گئے اقدامات کے تحت 22 مارچ 2020ء کو خوشحال خان خٹک ٹرین بند کر دی گئی تھی۔

اس سٹیشن سے ہر ماہ کم و بیش 15 سو مسافر اس ٹرین میں سفر کرتے تھے۔ انہوں نے بتایا کہ ان کے علاوہ راجن پور سٹیشن پر پانچ افراد پر مشتمل عملہ تعینات ہے۔ جب ٹرینیں زیادہ گزرتی تھیں تو عملہ بھی زیادہ تھا۔

انتیس سالہ عبدالجبار راجن پور ریلوے سٹیشن پر خوانچہ لگاتے تھے۔اس سے وہ ہزار سے 15 سو روپے تک روزانہ کما لیتے تھے۔ ان کا کہنا ہے کہ یہ روزگار چھن جانے کے بعد بچوں کا پیٹ پالنا مشکل ہو گیا ہے۔

ریلوے سٹیشن پر قلی کا کام کرنے والے محمد کاشف کے مطابق ان کی ایک ہزار روپے دیہاڑی لگ جاتی تھی مگر اب وہ بے روزگار ہیں۔

مہتاب شاہین کے مطابق 25 اگست 2022ء&nbsp; میں سیلاب سے راجن پور کے قصبے فاضل پور میں دھندی سٹیشن کی 2.7 کلومیٹر پٹڑی ٹوٹ گئی تھی۔ اس کی مرمت تین ماہ قبل مکمل ہوئی ہے۔

ڈی ایس ریلوے ملتان حماد حسن نے لوک سجاگ کو بتایا کہ خوشحال خان خٹک کوویڈ 19 کی وجہ سے بند ہوئی تھی۔ بعدازاں کوچز کی کمی ہو گئی جس کی وجہ سے ٹرین بحال نہ ہوسکی۔

&quot;ٹوٹے ہوئے ٹریک کی مرمت میں بھی تاخیر ہوئی۔ چونکہ ٹریک مکمل ہو چکا ہے اس لیے امید ہے کہ خوشحال خان خٹک ٹرین جلد بحال کر دی جائے گی&quot;۔

راجن پور کے گاؤں سکھانی والا کے فرید بخش خان لاشاری زمیندار ہیں۔ انہوں نے بتایا کہ انہیں چار سال پہلے تک اپنی فصل کی بوائی اور کٹائی کے لیے مزدور ملنا مشکل ہوتے تھے۔ ٹرین بند ہونے سے بہت سے مزدور کراچی نہیں جا سکتے۔ یہی سبب ہے کہ اب وہ زیادہ تعداد میں دستیاب ہیں۔

ٹرکوں کی نسبت کم کرایہ ہونے کے باعث بہت سے لوگ ٹرینوں کے ذریعے سامان بھجواتے تھے۔ ٹرین کی بندش نے افرادی قوت کے ساتھ سامان کی نقل و حمل کو بھی متاثر کیا ہے۔

راجن پور کی بستی کوٹلہ عیسن کے رہائشی 65 سالہ بزرگ اللہ ڈتہ ذیابیطس کے مریض&nbsp; ہیں۔ ان کا کہنا ہے کہ گزشتہ دو برس سے وہ کراچی اپنی بیٹی سے ملنے نہیں جا سکے۔

&quot;میں کراچی کا سفر بس میں نہیں کر سکتا۔ بس کا کرایہ زیادہ اور سفر دشوار ہے۔ بیماری کے باعث مجھے بار بار واش روم جانے کی ضرورت ہوتی ہے&quot;۔

پیریں ڈتہ اب راجن پور میں تندور لگا کر روزی کماتے اور مشکل سے اپنے پانچ بچوں کا پیٹ پالتے ہیں۔ ان کا کہنا ہے راجن پور میں تعمیراتی کام بہت کم ہے لہٰذا رنگ و روغن کا کام نہیں ملتا۔

&quot;اس لیے کراچی ہی اچھی آپشن ہے&quot;۔

ریلوے بد انتظامی اور خسارے کا شکار کیوں ہے؟

راجن پور کا ریلوے سٹیشن جہاں تین سال سے سیٹی نہیں بجی

میرے خدا مجھے اتنا تو معتبر کر دے 
میں جس مکان میں رہتا ہوں اس کو گھر کردے

فاضل پور میں رہنے والی 47 سالہ بلو رانی خواجہ سرا ہیں۔ بیس برس قبل انہوں نے اپنا آبائی علاقہ شکار پور چھوڑا اور راجن پور سے 15 کلومیٹر دور اس چھوٹے سے شہر میں آ بسیں۔

بلو رانی کے مطابق انہوں نے اپنی برسوں کی کمائی ذاتی مکان حاصل کرنے پر خرچ کر دی لیکن وہ مکان ان کے نام نہ ہو سکا۔

&quot;تب میرے پاس قومی شناختی کارڈ نہیں تھا کیونکہ خواجہ سراﺅں کے شناختی کارڈ بنتے نہیں تھے۔ حل یہ نکالا کہ مکان کی رجسٹری اپنے ڈھولچی اللہ وسایا کے نام کر دی۔&quot;

ڈھولچی کا بلورانی سے دیرینہ تعلق تھا اور دونوں تقریبات میں اکٹھے جاتے تھے۔

ڈھولچی اپنی زندگی ہی میں بیوی بچوں سمیت اسی مکان میں رہنے لگا۔ اللہ وسایا کی وفات کے بعد ان کی بیوہ اللہ بچائی نے مکان کی ملکیت کا دعویٰ کر دیا۔

اللہ بچائی بتاتی ہیں کہ وہ بلو رانی کا ڈھولچی تھا اور ویل کی صورت میں ہونے والی آمدنی سے اسے حصہ ملتا تھا۔

&quot;یہ مکان میرے مرحوم شوہر نے اپنی کمائی سے خریدا تھا۔&quot;

بلورانی کے مطابق رواں برس سات اپریل کی شام تھانے دار، چند کانسٹیبل اور بیوہ کا ایک رشتہ دار اس کے گھر گھس آئے اور انہیں تشدد کا نشانہ بنایا جس سے ان کے بائیں ہاتھ کی ہڈی ٹوٹ گئی۔

انہوں نے الزام لگایا کہ اس کارروائی کے پیچھے وہ بیوہ ہے جو مکان پر قبضہ کرنا چاہتی ہے۔

تشدد کے بعد وہ ڈی ایس پی صدر کے سامنے پیش ہوئی تو انہوں نے ایس ایچ او تھانہ فاضل پور کو قانون کے مطابق کارروائی کی ہدایت کی لیکن ابھی تک انصاف نہیں مل رہا۔

راجن پور کے قانون دان خلیل احمد دریشک کہتے ہیں کہ مذکورہ صورت حال میں جائیداد کے فروخت کنندہ و گواہان اور ہمسائیوں کی گواہی پر جائیداد اصل مالک کو مل سکتی ہے۔

بلو رانی کا بھی کہنا ہے کہ مکان کی خریداری کے گواہان موجود ہیں جن کی بنیاد پر اس نے مکان کی ملکیت کا دعویٰ کر رکھا ہے۔

عبدالواحد افتخار عرف نیناں سات سال سے راجن پور میں خواجہ سراﺅں کی تنظیم ٹرانس جینڈر ویلفیئر سوسائٹی کی صدر ہیں۔

وہ رواں سال مارچ سے پولیس خدمت مرکز میں وکٹم سپورٹ آفیسر کے طور پر ذمہ داریاں نبھا رہی ہیں۔

انہوں نے بتایا کہ خواجہ سراؤں کو شناختی بنوانے میں مدد دینے کے ساتھ وہ بے نظیر انکم سپورٹ پروگرام سے انہیں امداد دلوانے میں معاونت کرتی ہیں۔

وہ کہتی ہیں &quot;بے نظیر انکم سپورٹ آفس میں 14 خواجہ سراﺅں کے نام لکھوا چکے ہیں لیکن پانچ ماہ بیت جانے کے باوجود بھی انہیں امداد نہیں ملی۔&quot;

بے نظیر انکم سپورٹ آفیسر محمد کاشف کہتے ہیں کہ ان کا کام ڈیٹا اپنے ہیڈ آفس بھیجنا ہوتا ہے جہاں سے امداد کی حتمی منظوری ہوتی ہے۔ انہوں نے بتایا کہ سروے کرنے کے بعد رپورٹ اسلام آباد ہیڈ آفس بھیج دی ہے۔

&quot;ٹرانس جینڈرز کے معاملے میں ہمیں مشکل یہ پیش آتی ہے کہ زیادہ تر غیر مقامی اور باہر سے آئے ہوتے ہیں۔ اکثر کے پاس شناختی کارڈ نہیں ہوتا جس کی وجہ سے ہمارے سسٹم میں ان کا اندراج ممکن نہیں ہو پاتا&quot;۔

ان کا کہنا ہے کہ نادرا کی ٹیمیں سروے کے لیے گھر گھر گئی تھیں۔خواجہ سرا فیملی کے ساتھ نہیں بلکہ اکیلے رہتے ہیں۔ روزی روٹی کمانے کے لیے وہ صبح سویرے گھر سے نکل جاتے ہیں اور شام یا رات تک واپس آتے ہیں۔ اس لیے کام کے اوقات میں وہ اکثر سروے ٹیموں کو دستیاب نہیں ہو پاتے۔

&quot;قومی شناختی کارڈ کے حامل جتنے خواجہ سرا ہمارے پاس آ رہے ہیں ہم ان کا ڈیٹا اپنے ہیڈ آفس بھیج رہے ہیں۔اب دوبارہ سروے کیا جا رہا ہے جس میں خواجہ سرا بھی شامل ہوں گے۔ اس عمل میں چھ سے آٹھ ماہ لگ جائیں گے&quot;۔

عبد الواحد افتخار کہتی ہیں &quot;دوسرے شہروں میں نادرا والے بالعموم اور فاضل پور والے بالخصوص شناختی کارڈ نہیں بنا کر دیتے۔&quot;

فاضل پور میں نادرا آفس کے انچارج بلال احمد کا کہنا ہے کہ اس سال دو خواجہ سراﺅں کے شناختی کارڈ بنائے ہیں۔

&quot;شناختی کارڈ کے لیے فیملی ممبر کی تصدیق کی ضرورت ہوتی ہے۔ اکثر خواجہ سراؤں سے ان کے خاندان والوں نے قطع تعلق کیا ہوتا ہے جس کی وجہ سے یہ خود ہی شناختی کارڈ بنوانے نہیں آتے&quot;۔

محکمہ سوشل ویلفیئر کی ڈپٹی ڈائریکٹر شازیہ نواز نے لوک سجاگ کو بتایا کہ اب تک شناختی کارڈ کے لیے 65 خواجہ سراﺅں کی نادرا میں رجسٹریشن ہو چکی ہے اور 55 کے ووٹ کا اندراج ہوا ہے۔

نیناں کے مطابق ضلع راجن پور میں اس وقت 300 کے قریب خواجہ سرا رہتے ہیں۔

&nbsp;

ونیزہ خان

ونیزہ خان کا تعلق راجن پور سے ہے۔ ونیزہ ایم ایس سی کی طالبہ ہیں اور اپنے علاقے کے مسائل کے حل کے لیے آواز بلند کرتی ہیں۔