ضلع ننکانہ صاحب میں امیدواروں نے انتخابی مہم شروع تو کر رکھی ہے لیکن ابھی تک عام انتخابات کے روایتی رنگ دکھائی نہیں دے رہے۔

2018ء کے انتخابات میں ضلع ننکانہ سے ن لیگ نے ایک قومی اور تین صوبائی نشستیں جیتی تھیں۔ تحریک انصاف ایک قومی اور ایک صوبائی نشست لینے میں کامیاب ہوئی تھی۔

اس ضلعے کی آبادی 16 لاکھ 34 ہزار 871 ہے۔ یہاں رجسٹرڈ ووٹرز کی تعداد نو لاکھ 46 ہزار 64 ہے جن میں سے پانچ لاکھ 14 ہزار 667 مرد اور چار لاکھ 31 ہزار 397 خواتین ووٹر ہیں۔

آئندہ الیکشن کے لیے یہاں دو قومی اور چار صوبائی نشستوں پر 171 امیدوار سامنے آئے ہیں۔ جن میں سے 16 کے کاغذات نامزدگی ابتدائی جانچ پڑتال میں مسترد ہو ئے ہیں۔

این اے 111 ننکانہ ون میں تحصیل شاہ کوٹ، سانگلہ ہل اور قصبہ وار برٹن شامل ہیں۔

پچھلے عام انتخابات میں اس قومی حلقے (سابقہ این اے 117) پر ن لیگ کے چوہدری برجیس طاہر کا سامنا پی ٹی آئی ٹکٹ ہولڈر چوہدری بلال احمد ورک اور سابق ایم پی اے آزاد امیدوار چوھدری طارق محمود باجوہ سے ہوا تھا۔

برجیس طاہر یہ مقابلہ طارق محمود سے صرف تین ہزار ووٹوں کی برتری سے جیتے تھے۔ پی ٹی آئی کے بلال ورک تیسرے نمبر پر رہے تھے۔

آئندہ الیکشن کے لیےاس نشست پر 26 امیدوار تھے جن میں سے بلال ورک اور پی ٹی آئی رہنما احسن رضا سمیت چار کے کاغذات نامزدگی مسترد کر دیے گئے ہیں۔

<hr />
<h2 style="text-align:center">ننکانہ صاحب نئی حلقہ بندیاں 2023</h2>

2018 کا قومی اسمبلی کا حلقہ این اے 117 ننکانہ صاحب 1 اب این اے 111 ننکانہ صاحب 1 ہے 
ننکانہ صاحب ضلع کا یہ حلقہ سانگلہ ہل اور شاہ کوٹ کی تحصیلوں پر مشتمل ہے۔ اس میں قصبہ واربرٹن کی میونسپل کمیٹی بھی شامل ہے۔ 2023 کی نئی حلقہ بندیوں کے تحت اس حلقے میں یہ تبدیلی کی گئی ہے کہ سوائے مصطفی آباد پٹوار سرکل کے پورے واربرٹن قانون گو حلقے کو نکال دیا گیا ہے۔ ننکانہ صاحب تحصیل کے ہی شیریں جھنگڑ،بال لیلا اور مال جی صاحب پٹوار سرکلز کو شامل کیا گیا ہے۔

2018 کا قومی اسمبلی کا حلقہ این اے 118 ننکانہ صاحب 2 اب این اے 112 ننکانہ صاحب 2 ہے 
یہ حلقہ ننکانہ صاحب کی شہری اور دیہی آبادی پر مشتمل ہے۔&nbsp; نئی حلقہ بندیوں کے تحت اس حلقے میں سوائے مصطفی آباد پٹوار سرکل کے پورے قصبہ واربرٹن قانون گوئی حلقے کو شامل کرلیا گیا ہے۔&nbsp; ننکانہ صاحب تحصیل کے ہی شیریں جھنگڑ،بال لیلا&nbsp; اور مال جی صاحب پٹوار سرکلز اس حلقے سے نکال دیے گئے ہیں۔

2018 کا صوبائی حلقہ پی پی 131 ننکانہ صاحب 1 اب پی پی 132 ننکانہ صاحب 1 ہے 
یہ سانگلہ ہل تحصیل کی مکمل آبادی پر مشتمل حلقہ ہے۔ جس میں شاہ کوٹ تحصیل کے پانچ پٹوار سرکل بھی شامل ہیں۔ نئی حلقہ بندیوں کے تحت اس حلقے میں تبدیلی یہ ہوئی ہے کہ سوائے پانچ پٹوار سرکل کے پورے شاہ کوٹ قانون گوئی حلقے کو نکال دیا گیا ہے۔

2018 کا صوبائی حلقہ پی پی 132 ننکانہ صاحب 2 اب پی پی 133 ننکانہ صاحب 2 ہے 
یہ حلقہ شاہ کوٹ تحصیل پر مشتمل ہے۔ جس میں ننکانہ صاحب تحصیل کے قصبے واربرٹن کی شہری آبادی بھی شامل ہے۔ پہلے اس حلقے میں واربرٹن قانون گوئی حلقہ بھی شامل تھا لیکن نئی حلقہ بندیوں میں سوائے ایک پٹوار سرکل کے باقی کو نکال دیا گیا ہے۔ شاہ کوٹ قانون گوئی کے پانچ پٹوار سرکل اب اس میں شامل ہیں اسی طرح ننکانہ صاحب قانون گوئی ون کے تین پٹوار سرکلز کو بھی شامل کیا گیا ہے۔

2018 کا صوبائی حلقہ پی پی 133 ننکانہ صاحب 3 اب پی پی 134 ننکانہ صاحب 3 ہے 
یہ ننکانہ صاحب کا شہری حلقہ ہے جس میں ریحان والا قصبے کے دیہات بھی شامل ہیں۔ نئی حلقہ بندیوں میں اس حلقے میں ایک پٹوار سرکل چھوڑ کر پورے واربرٹن قصبہ قانون گوئی حلقے کو شامل کرلیا گیا ہے۔ اسی طرح مانگٹانوالہ قصبے کا چاندپور پٹوار سرکل بھی اب اس حلقے کا حصہ ہے۔ ننکانہ صاحب ون اور ٹو قانون گوئی حلقوں کے پانچ پٹوار سرکلز کو اس حلقے سے نکال دیا گیا ہے۔

2018 کا صوبائی حلقہ پی پی 134 ننکانہ صاحب 4 اب پی پی 135 ننکانہ صاحب 4 ہے 
یہ ننکانہ صاحب تحصیل کا دیہی حلقہ ہے جس میں سید والا اور بڑا گھر قصبوں کی آبادیاں بھی شامل ہیں۔ نئی حلقہ بندیوں میں اس حلقے میں ننکانہ صاحب تحصیل کے پٹوار سرکل بدھے اور برخوردار کو شامل کیا گیا ہے جبکہ چاند پور پٹوار سرکل کو اس حلقے سے نکال دیا گیا ہے۔

<hr />

اب یہاں ن لیگ کے چوہدری برجیس طاہر اور طارق محمود باجوہ میں فائنل ریس نظر آ رہی۔ طارق باجوہ آزاد حثیت سے میدان میں اتریں گے حالانکہ وہ تحریک انصاف میں شامل ہو گئے تھے۔ لیکن اب ان کی انتخابی سرگرمیوں میں کہیں سیاسی وابستگی کا ذکر نہیں ہوتا۔

اس حلقے میں جٹ، رائے، ارائیں اور شیخ بڑی بڑی برادریاں ہیں مگر جٹ برادری کے ووٹ زیادہ ہیں۔ ماضی میں بلال ورک کی کامیابی میں بھی اسی برادری کا ہاتھ رہا ہے۔

طارق باجوہ کا اس حلقے میں اچھا خاصا ذاتی ووٹ بینک ہے تو برجیس طاہر یہاں اپنے ترقیاتی کاموں پر فخر کرتے ہیں۔ اب بھی ان دونوں میں کانٹے دار مقابلے کی توقع کی جا رہی ہے۔

&nbsp;بلال ورک ایک بار ق لیگ اور دو مرتبہ ن لیگ کے ٹکٹ پر یہاں سے رکن قومی اسمبلی منتخب ہو چکے ہیں۔ وہ کاغذات منظور ہونے اور پی ٹی آئی ٹکٹ ملنے کی صورت میں مقابلے کی پوزیشن میں واپس آ سکتے ہیں۔

این اے 112 ننکانہ ٹو ننکانہ صاحب شہر، بچیکی، سید والہ، منڈی فیض آباد اور مانگٹانوالہ وغیرہ پر مشتمل ہے۔

2013 ء میں اس حلقے (سابق این اے 118)میں ن لیگ کے رائے منصب علی نے تحریک انصاف کے برگیڈئیر ریٹائرڈ اعجاز احمد شاہ کو ہرا یا تھا۔

2015ء میں رائے منصب علی کے انتقال پر ڈاکٹر شذرہ منصب نے اعجاز شاہ کو شکست دی تھی۔ پچھلے عام انتخابات میں پی ٹی آئی کے اعجاز شاہ نے ڈاکٹر شذرہ مںصب سے یہ سیٹ چھین لی تھی۔

تحریک لبیک کے سید افضال حسین رضوی 49 ہزار ووٹوں کے ساتھ تیسرے اور پیپلز پارٹی کے شاہ جہان بھٹی چوتھے نمبر پر رہے تھے۔ 2023ء میں اعجاز کے استعفے پر یہاں ضمنی الیکشن ہوا تو اس حلقے سے عمران خان جیت گئے۔

آئندہ انتخابات کے لیے اس نشست پر 22 امیدواروں نے کاغذات نامزدگی جمع کرائے تھے۔ ان میں سے چار کے کاغذات نامزدگی مسترد کر دیے گئے ہیں جن میں پی ٹی آئی رہنما جمیل حسن، نواز چڈھر اور مرکزی مسلم لیگ کے غریب عالم شامل ہیں۔

&nbsp;اب سابقہ ایم این اے ڈاکٹر شذرہ منصب علی ن لیگ اور سابق وزیر داخلہ اعجاز شاہ پی ٹی آئی کے امیدوار ہیں۔ تحریک لبیک کے پیر افضال حسین شاہ، استحکام پاکستان پارٹی کے راٸے اسلم خاں، پیپلز پارٹی کے رائے شاہ جہاں بھٹی اور آزاد امیدوار رائے فیصل رشید بھٹی بھی میدان میں ہیں۔

تاہم اس حلقے میں ڈاکٹر شذرہ منصب اور اعجاز احمد شاہ کے درمیان سخت مقابلے کی توقع کی جا رہی ہے۔ پیر افضال حسین شاہ بھی مریدوں کی بڑی تعداد کے باعث مضبوط امیدوار ہیں۔

اس حلقے میں رائے اور ارائیں بڑی برادریاں ہیں ہیں جو امیدوار دونوں کی حمایت حاصل کر لیتا ہے وہی کامیاب ہوتا ہے۔رائے فیصل کے دستبردار نہ ہونے کی صورت میں اعجاز شاہ کو نقصان ہو سکتا ہے۔

ضلع ننکانہ صاحب کے چار صوبائی حلقوں میں 123 امیدواروں سامنے آئے تھے جن میں سے آٹھ امیدواروں کے کاغذات نامزدگی مسترد ہو گٸے ہیں۔

&nbsp;پی پی 132 میں تحصیل شاہ کوٹ کے چکوک اور تحصیل سانگلہ ہل کے علاقے شامل ہیں۔

پچھلے انتخابات میں یہاں (سابقہ پی پی 131) سے ن لیگ کے میاں اعجاز بھٹی معمولی برتری کے ساتھ آزاد امیدوار شازیہ چیمہ سے جیت گئے تھے۔ جبکہ پی ٹی آئی کے طارق سعید گھمن تیسرے نمبر پر آئے تھے۔

&nbsp;سابق ایم پی اے میاں اعجاز بھٹی اس حلقے سے ن لیگ کے دوبارہ متوقع امیدوار ہیں جنہیں برجیس طاہر کی مکمل حمایت حاصل ہے۔ دو پی ٹی آئی رہنماؤں طارق سعید گھمن اور چوہدری ارشد ساہی کے کاغذات مسترد ہو چکے ہیں۔

پی ٹی آئی اس نشست پر ابھی امیدوار کا فیصلہ نہیں کیا۔ اس حلقے میں تاحال مقابلہ میاں اعجاز اور آزاد امیدوار طارق باجوہ کے درمیان ہوتا نظر آ رہا ہے۔

پی پی 133 تحصیل شاہ کوٹ کے چکوک، وار برٹن اور تحصیل ننکانہ صاحب کے کچھ علاقوں پر مشتمل ہے۔

2018ء میں اس حلقے(سابقہ 132) سے پی ٹی آئی کے میاں عاطف نے ن لیگ کے امیدوار رانا ارشد کو شکست دی تھی۔

آئندہ انتخابات کے لیے سابق ایم پی اے میاں عاطف کےکاغذات نامزدگی ابتدائی جانچ پڑتال میں مسترد کر دیے گئے ہیں۔

&nbsp;یہاں رانا ارشد ن لیگ کے متوقع امیدوار ہیں۔ پی ٹی آئی کا ٹکٹ ملنے کی صورت میں سابق ایم پی اے کی اہلیہ فائزہ عاطف مضبوط امیدوار ہوں گی۔ استحکام پاکسان پارٹی کے چوہدری نوشیر مان بھی میدان میں ہیں۔

اگرچہ اس حلقے سے مزید کئی امیدواروں نے کاغذات نامزدگی جمع کر رکھے ہیں۔ تاہم فائنل راؤنڈ رانا ارشد، فاٸزہ عاطف اور نوشیر مان کے درمیان ہونے کی توقع ہے۔

&nbsp;پی پی 134 میں میونسپل کمیٹی ننکانہ، مانگٹانوالہ، میونسپل کمیٹی واربرٹن وغیرہ شامل ہیں۔ یہاں ن لیگ، پی ٹی آئی اور پیپلز پارٹی میں کانٹے کا مقابلہ ہوا تھا۔ جس میں ن لیگ کے محمد کاشف جیت گئے تھے۔ پی ٹی آئی کے شاہد منظور گل تھوڑے کم ووٹوں کے سات دوسرے اور پیپلز پارٹی کے سید ابرار تیسرے نمبر پر تھے۔

اب شاہد منظور گل، طاہر منظور گل اور راٸے رضوان طاہر کے کاغذات مسترد ہو چکے ہیں۔ اس نشست پر سابقہ حریف ن لیگ کے کاشف رنگ الٰہی پڈھیار اور پیپلز پارٹی کے سید ابرار میدان میں ہیں۔ شاہد منظور کی جگہ پی ٹی آئی کے سہیل منظور گل نے لے لی ہے۔

سیاسی مبصرین اس حلقے میں آئندہ ہونے الیکشن میں ان تینوں کے درمیان دلچسپ مقابلے کی توقع کر رہے ہیں تاہم جیت کس کا مقدر ٹھہرے گی یہ کہنا قبل از وقت ہو گا۔

پی پی 135 میں تحصیل ننکانہ کے علاقے ناتھا ،بڑا گھر، سید والہ وغیرہ آتے ہیں ۔اس حلقے میں زیادہ ترمقابلہ آغا، راجپوت اور رائے برادریوں میں ہوتا ہے۔ ایک بار آغا تو اگلے الیکشن میں راجپوت یا رائے برادری کی شخصیت جیت جاتی ہے۔

پچھلے چناؤ میں آغا علی حیدر نے ن لیگ کے ٹکٹ پر پی ٹی آ ئی کے رائے اسلم کھرل کو ہرایا تھا۔ آزاد امیدوار رانا جمیل تیسرے نمبر پر تھے۔

اب یہاں آغا علی حیدر ن لیگ اور رائے اسلم استحکام پاکستان پارٹی کے پلیٹ فارم سے انتخابی مہم شروع کر چکے ہیں۔ پی ٹی آئی رہنما و سابق ایم پی اے رانا جمیل حسن کے کاغذات نامزدگی مسترد ہو گئے ہیں۔

&nbsp;تاہم پی ٹی آئی کے ٹکٹ کے لیے رانا جمیل کے بھتیجے رانا شیرافضل خاں، سابق مشیر راٸے ملازم حسین کھرل اور نوجوان وکیل چوہدری اویس باور بھی امیدوار ہیں۔ یوں اس حلقے میں بھی تین امیدواروں کے درمیان مقابلہ متوقع ہیں۔

شیخو پورہ میں پارٹی ووٹ اہم، کس حلقے میں کن امیدواروں کے درمیان فائنل ریس متوقع ہے؟

ننکانہ صاحب میں روایتی حریفوں میں مقابلے، بڑی برادریاں کس امیدوار کے ساتھ کھڑی ہوں گی؟

text

سولہ سالہ عرفان علی فرسٹ ایئر کے طالب علم ہیں۔ وہ ضلع ننکانہ صاحب کے نواحی قصبے بچیکی کے رہائشی ہیں۔ انہیں جڑانوالہ میں اپنے کالج آنے جانے کے لیے روزانہ 40 کلو میٹر فاصلہ طے کرنا پڑتا ہے جو ان کے لیے بہت مشکل ہے۔

عرفان علی کا مسئلہ صرف طویل سفر نہیں ہے۔ وہ بتاتے ہیں کہ صبح بچیکی سے جڑانوالہ تک بہت کم بسیں جاتی ہیں اور بعض اوقات رش زیادہ ہو تو گاڑیوں میں جگہ ہی نہیں ملتی اوروہ کالج نہیں جا پاتے۔ اگر بس کے انتظارمیں تاخیر ہو جائے تو تب بھی انہیں گھر واپس آنا پڑتا ہے۔

عرفان علی کے والد سلیم علی سبزی بیچتے ہیں اور اس آمدنی میں چھ افراد پر مشتمل ان کے کنبے کی روزی روٹی مشکل سے ہی پوری ہوتی ہے۔ اس لیے وہ اپنے بیٹے کو کسی نجی کالج میں نہیں پڑھا سکتے اور نہ ہی عرفان کے لیے الگ سواری کا اضانی خرچ برداشت کر سکتے ہیں۔

عرفان علی کہتے ہیں کہ بچیکی میں کالج ہوتا تو ہمیں روزانہ مشکل نہ اٹھانا پڑتی۔ موٹر وے انٹرچینج پر جتنی رقم خرچ کی گئی ہے اس کا پانچواں حصہ بھی یہاں تعلیم پرلگایا جاتا تو دو کالج بن سکتے تھے۔

ننکانہ صاحب اور نواحی قصبات کو موٹروے سے جوڑنے کے لیے حکومت نے رواں سال تین مختلف مقامات پر انٹر چینج بنانے کی منظوری دی ہے۔ ان کے لیے چار ارب 26 کرورروپے کی خطیر رقم مختص کی گئی ہے۔ مگر اس پر یہاں کے لوگ منصوبہ سازوں اور مقامی سیاست دانوں سے خوش نہیں ہیں۔

موٹروے پر رائے منصب علی کھرل کے نام سے منسوب پہلا انٹر چینج بچیکی ننکانہ صاحب روڈ پر منظور ہوا۔ اس کے لیے ایک ارب 33 کروڑ 20 لاکھ روپے مختص کیے گئے ہیں۔

دوسرا انٹر چینج اڈا مانگٹانوالہ کے قریب تارے گڑھ کے مقام بن رہا ہے اس پر ایک ارب 59 کڑور 60 لاکھ روپے خرچ ہوں گے ۔تیسرا انٹرچینج شرقپور کے قریب ہے جس کی لاگت ایک ارب 33 کروڑ 20 لاکھ روپے بتائی گئی ہے۔

تینوں منصوبوں کی منظوری سے پہلے موٹروے سے ننکانہ صاحب، واربرٹن اور بچیکی جانے کے لیے لوگ کھیاڑے کلاں انٹرچینج استعمال کر رہے تھے ۔ننکانہ سے کھیاڑے کلاں انٹرچینج کا فاصلہ 10 کلومیٹر، بچیکی سے 12 کلومیٹر اور واربرٹن سے کھیاڑے کلاں تک 28 کلومیٹر بنتا ہے۔ 
بچیکی کے ساتھ نیا انٹرچینج سابق رکن قومی اسمبلی ڈاکٹر شذرہ منصب نے منظور کرایا ہے۔

سماجی کارکن فیصل اعجاز بتاتے ہیں کہ بچیکی سے نئے انٹر چینج کا فاصلہ آٹھ کلو میٹر اور پہلے سے موجود کھیاڑے کلاں انٹرچینج کا فاصلہ 14 کلو میٹر ہے۔ اس لیے یہ منصوبہ سیاست دانوں نے اپنے ووٹر بڑھانے کے لیے منظور کرایا اور ان قومی خزانے کے اربوں روپے ضائع کیے جا رہے ہیں۔

&nbsp;وہ کہتے ہیں کہ بچیکی کی کل آبادی دو لاکھ 76 ہزار 391 نفوس پر مشتمل ہے۔ اتنی بڑی آبادی بہت سی بنیادی سہولتوں سے محروم ہے۔ یہاں سے ہر سال تین سو سے زیادہ بچے میٹرک پاس کر رہے ہیں۔ مگر ان طلبہ کے لیے یہاں کوئی سرکاری کالج نہیں ہے۔

فیصل اعجاز کا کہنا ہے کہ ڈاکٹر شذرہ منصب نے الیکشن سے قبل بچیکی میں بوائز ڈگری کالج بنوانے کا وعدہ کیا تھا ۔ لیکن ان کی پارٹی کی حکومت آئی تو انہوں نےعوام سےاپنا وعدہ پورا نہیں کیا۔

انہوں کہا کہ بچیکی شہر کے اکثر علاقے گیس، پینے کے صاف پانی اور تفریحی پارکس سے محروم ہیں مگر یہاں انٹرچینج بنانے کو ترجیح دی گئی ہے۔

سابق رکن قومی اسمبلی ڈاکٹر شذرہ منصب بتاتی ہیں کہ انہوں نے بچیکی کے لیے بوائز ڈگری کالج سمیت بہت سے منصوبے منظور کرانے کی کوشش کی تھی لیکن انہیں انٹرچینج کے لیے ہی فنڈز ملے۔ انہیں کالج کی رقم منظور نہ ہونے کا افسوس ہے۔ اب کبھی موقع ملا تو وہ پہلے یہی وعدہ پورا کریں گی۔

ننکانہ کے قصبہ واربرٹن سے 14 کلومیٹر دور تارے گڑھ کے مقام پر نئے انٹرچینج کی کہانی بھی کچھ مختلف نہیں ہے۔ یہ منصوبہ سابق رکن قومی اسمبلی چوہدری برجیس طاہر نے واربرٹن کے لوگوں کے لیے منظور کرایا ہے۔

موٹروے انٹرچینج نقشے کے مطابق تارے گڑھ جانے کے لیے واربرٹن کے رہائشیوں کو جسلانی موڑ اور فتح دریا کا راستہ اختیار کرنا ہو گا۔ لیکن یہ رابطہ سڑکیں ٹوٹ پھوٹ کا شکار اوراتنی تنگ ہیں کہ مسافر گاڑیاں ادھر جانا بہت مشکل ہے۔

واربرٹن کے مکین بھی کئی بنیادی سہولیات سے محروم ہیں۔ اس لیے وہ اس انٹرچینج سے کچھ زیادہ خوش نظر نہیں آرہے۔

انجمن پٹرولیم ایسوسی ایشن کے صدرچوہدری لطیف دانش بتاتے ہیں کہ واربرٹن کی 50 ہزار سے زیادہ آبادی ہے۔لیکن یہاں بچوں کے لیے کوئی سرکاری کالج ہے اورنہ ہی کھیل کا میدان۔ سابق ایم این اے چوہدری برجیس طاہر یہاں کالج ،سپورٹس کمپلیکس اور ریسکیو 1122 سنٹر بنوانے کے اپنے وعدے ہی بھول گئے۔

وہ کہتے ہیں کہ تارے گڑھ انٹرچینج کا واربرٹن کے لوگوں کو کوئی فائدہ نہیں ہے۔ وہاں جانے والی رابطہ سڑکیں خراب ہیں۔اسی طرح جسلانی اور فتح دریا میں امن و امان کی صورتحال اچھی نہیں۔ رات کو وہاں سے کوئی موٹروے کی جانب نہیں جائے گا اور سب لوگ کھیاڑے کلاں انٹرچینج کو ترجیح دیں گے۔

تیسرا انٹر چینج شیخوپورہ کی تحصیل شرقپور کے گاؤں ایسن پر ننکانہ ہی کے علاقے منڈی فیض آباد اور شیخوپورہ جانے والی گاڑیوں کی سہولت کے لیے بنایا گیا ہے۔ یہ منصوبہ بھی باقی دو انٹر چینجز کی طرح تنقید کی زد میں ہے۔

منڈی فیض آباد کے رہائشی سہیل منظور گل بتاتے ہیں کہ شرقپور کے لیے پہلے سے موجود انٹر چینج گاؤں ایسن سے 11 کلو میٹر کے فاصلے پر ہے جبکہ منڈی فیض آباد سے شرقپور اور ایسن کا فاصلہ برابر ہی ہے۔ ایسن پر انٹرچینج بنانے کا مقصد محض سیاسی فائدہ حاصل کرنے کے سوا کچھ نہیں ہے۔

وہ کہتے ہیں کہ پچاس ہزار آبادی کا قصبہ منڈی فیض آباد چاول کی بہت بڑی مارکیٹ ہے۔یہاں چاول صاف کرنے کی ڈیڑھ سو سے زیادہ فیکٹریاں ہیں اور منڈی سے سیکڑوں مال بردار گاڑیاں روزانہ جی ٹی روڈ کے ذریعے شرقپور انٹرچینج جاتی ہیں۔ اس سڑک پر ٹریفک کا دباؤ بہت زیادہ ہے۔ 
سہیل منظور کا کہنا ہے کہ جی ٹی روڈ پر گاڑیاں گھنٹوں رش میں پھنسی رہتی ہیں۔ ایسن کے بجائے منڈی فیض آباد انٹر چینج بنا دیا جاتا تو ٹریفک جام کے مسائل حل ہو جاتے اور شرقپورانٹرچینج جانے کی تکالیف سے بھی جان چھوٹ جاتی۔

سابق رکن قومی اسمبلی و وفاقی وزیر چوہدری برجیس طاہر کہتے ہیں کہ واربرٹن میں سپورٹس کمپلیکس ،تفریحی پارک اور بوائز کالج کے لیے محکمہ ریلوے کا این او سی ضروری تھا۔ اس کی منظوری لینے میں دیر ہوگئی تو انہوں نے موٹر وے انٹر چینج کے لیے فنڈز منظور کرا لیے۔ 
انہوں نے بتایا کہ انٹر چینج کے بعد ان کا ٹارگٹ رابطہ سڑکوں کی منظوری تھا مگر انہیں وقت نہیں مل سکا ۔وہ پرامید ہیں کہ نئے الیکشن میں کامیاب ہو کروہ ادھورے منصوبے ترجیحی بنیادوں پر مکمل کریں گے۔

سُن بستیوں کا حال جو حد سے گزر گئیں: ننکانہ صاحب کی انوکھی ضلعی حدود کیسے اس کے باسیوں کے لیے وبالِ جان بنی ہوئی ہیں۔

ننکانہ صاحب میں رابطہ سڑکوں کے لیے ترستے شہری موٹروے پر انٹرچینج بننے سے نالاں کیوں؟

پینتالیس سالہ میاں عبدالغفار ڈسٹرکٹ ہیڈ کواٹر ہسپتال ننکانہ صاحب کے ڈائلیسز وارڈ میں شدید درد سے کراہ رہے ہیں۔ اس کی وجہ یہ ہے کہ ڈائلیسز کے دوران انہیں خون پتلا کرنے والا ضروری انجیکشن &#39;ہائپورین&#39; نہیں لگایا گیا۔

ڈائلیسز کے دوران ہائپورین انجیکشن نہ لگایا جائے تو ڈائلیسز مشین میں خون جمنے لگتا ہے اور مریض کو سخت تکلیف سے گزرنا پڑتا ہے۔ خون کے لوتھڑے جسم میں منتقل ہونے سے دماغ کی شریان پھٹنے کا اندیشہ بھی ہوتا ہے۔

عبدالغفار کہتے ہیں کہ ہسپتال میں کافی عرصہ سے ہائپورین دستیاب نہیں ہے ۔ وہ کسی نہ کسی طرح ادھار پکڑ کر ڈائلیسز میں یہ ٹیکہ لگوا لیتے تھے۔ اس مرتبہ ان کے پاس پیسے نہیں تھے تو تو مجبوراً ٹیکے کے بغیر ڈائلیسز کرایا۔ اس لیے ان کی حالت خراب ہے۔

میاں عبدالغفار&nbsp; ننکانہ صاحب کے نواحی علاقے واربرٹن کے رہائشی ہیں۔وہ گاڑیوں کے ٹائروں کو پنکچر لگا کر اپنے تین بچوں اور بیوی کے لیے روزی روٹی کما تے تھے۔ اس دوران انہیں گردوں کا مرض لاحق ہو گیا۔

عبدالغفار بتاتے ہیں کہ ہائپورین انجیکشن سرکاری ہسپتال میں مفت مل جاتا تھا۔ اب بازار سے بہت مہنگا ملتا ہے۔ جن کے پاس خریدنے کی استطاعت نہیں ہے انہیں ڈائیلسز کے دوران درد کے ساتھ ذہنی اذیت کا سامنا بھی کرنا پڑتا ہے۔

ہسپتال کے ریکارڈ کے مطابق ڈائلیسز وارڈ میں کل 28 مشینیں ہیں۔ یہاں روزانہ&nbsp; ایک سو مریضوں کے ڈائلیسز کئے جاتے ہیں۔ تاہم&nbsp; خون کو پتلا کرنے والا انجیکشن&nbsp; دستیاب نہ ہونے&nbsp; سے مریضوں کو شدید مشکلات کا سامنا ہے۔

ڈائلیسز وارڈ کے ٹیکنیشن محمد طیب کے مطابق کورونا وائرس کی وبا کے دوران &#39;ہائپورین&#39; کی قلت ہوئی تھی۔ انجیکشن ابھی تک نہیں مل رہا۔اس ٹیکے کی قیمت سات سو روپے ہے لیکن بلیک مارکیٹ میں یہ&nbsp; 1800 سے دو ہزار روپے کا بک رہا ہے۔

ڈاکٹر محمد افضال سندھیلہ ڈی ایچ کیو ہسپتال کے میڈیکل سپرنٹنڈنٹ ہیں۔ وہ بتاتے ہیں کہ ہائپورین انجیکشن کمپنی سے ہی نہیں مل رہا۔ انہوں نے مستحق مریضوں کو لوکل پرچیز سے ٹیکہ مہیا کرنے کے احکامات دیے ہیں۔

ڈی ایچ کیو ہسپتال ننکانہ میں مسئلہ صرف ہائپورین انجیکشن کا نہیں ہے۔ ذیابیطس کی انسولین سمیت بہت سی ادویات کی عدم دستیابی اور خراب مشینری کے باعث بھی مریضوں کو مشکلات درپیش ہیں۔ڈی ایچ کیو ہسپتال&nbsp; کا سالانہ بجٹ&nbsp; 8 کروڑ 16 لاکھ روپے ہے اوریہاں روزانہ آؤٹ ڈور میں ڈھائی سو کے قریب مریض آتے ہیں۔

پینسٹھ سالہ محمد بوٹا پرانا ننکانہ کے رہائشی ہیں۔ انہیں تین سال قبل ذیابیطس کا مرض&nbsp; تشخیص ہوا۔ وہ بتاتے ہیں کہ پہلے تو ڈاکٹروں نے دوائیں تجویز کیں جو وہ باقاعدگی سے استعمال کرتے رہے مگر ان کا شوگر لیول بڑھتا ہی چلا گیا۔

وہ کہتے ہیں کہ جب وہ اپنا چیک اپ کرانے کے لیے ڈی ایچ کیو ہسپتال&nbsp; گئے تو وہاں ڈاکٹر نے کہا کہ انہیں ادویات کے ساتھ انسولین بھی لگوانا پڑے گی اور ساتھ میں پرچی تھما دی۔ انہوں نے یہ تلقین بھی کی کہ بازار سے انسولین خرید کر فوری&nbsp; ڈوز لگوا لیں۔

&quot;میں نے ڈاکٹر سے کہا کہ انسولین خریدنے کی میری سکت نہیں ہے۔ مجھے ہسپتال سے ہی انسولین لے دیں تو ڈاکٹر نے بتایا کہ ہسپتال میں انسولین ختم ہو چکی ہے۔ وہ کچھ نہیں کر سکتے۔&quot;

ڈی ایچ کیومیں انسولین کی عدم دستیابی کے باعث یہاں ذیابیطس کے نئے مریضوں کی رجسٹریشن روک دی گئی ہے۔ پہلے سے رجسٹرڈ مریضوں کو بھی بازار سے انسولین خریدنے کی ہدایت دی جا رہی ہے۔

ریکارڈ کے مطابق ڈی ایچ کیو میں ذیابیطس کے 125 مریض رجسٹرڈ ہیں۔ انہیں ہر پندرہ روز بعد فی کس انسولین کا ایک وائل (بڑا ٹیکہ) فراہم کیا جاتا ہے۔مریض اب یہ ٹیکہ مارکیٹ سے 12 سے 15 سو روپے میں خریدنے پر مجبور ہیں۔

ہسپتال کے فارمیسی انچارج آصف علی بتاتے ہیں کہ گذشتہ سال&nbsp; ہر ماہ 200 انسولین کے حساب سے بجٹ رکھا گیا تھا۔ اس وقت ہسپتال میں ذیابیطس کے 70 مریض رجسٹرڈ تھے۔ تعداد میں اضافے سے انسولین&nbsp; دو ماہ قبل اپریل میں ہی ختم ہو گئی تھی۔

وہ کہتے ہیں کہ ہسپتال کو انسولین کی فراہمی&nbsp; پرائمری اینڈ سکینڈری ہیلتھ کیئر اتھارٹی کرتی ہے اور بجٹ ڈی ایچ کیو ہسپتال مہیا کرتا ہے۔ ہسپتال انتظامیہ کو مریضوں کی تعداد سے آگاہ کر دیا ہے۔

بات یہیں ختم نہیں ہوتی۔ ڈی ایچ کیو کی ڈیجیٹل ایکسرے مشین بھی کئی ماہ سے خراب&nbsp; پڑی ہے اور مریض خوار ہو رہے ہیں۔

ایکسرے انچارج راؤ ظفر بتاتے ہیں کہ یہاں روزانہ لگ بھگ دو سو ایکسرے ہوتے تھے مجبوراً اب مریضوں کوباہر بھیجنا پڑ رہا ہے۔ ڈیجیٹل ایکسرے کی سرکاری فیس 150 روپے ہے۔ یہی ایکسرے مریضوں کو نجی لیبارٹری سے 1500 روپے میں پڑ رہا ہے۔

وہ کہتے ہیں کہ ایکسرے مشین کو متعدد بار ٹھیک کرایا جا چکا ہے لیکن یہ چند ماہ بعد ہی خراب ہو جاتی ہے۔

ایم ایس ڈاکٹر افضال کہتے ہیں کہ ڈیجیٹل ایکسرے مشین میں فنی خرابی تھی جس کے پارٹس&nbsp; لاہور بھجوا دیے ہیں اور امید ہے کہ یہ جلد ہی ٹھیک ہو جائے گی۔

ڈی ایچ کیو میں دل کے وارڈ کی صورت حال بھی کچھ مختلف نہیں ہے۔ ننکانہ صاحب کے محمد شعیب بتاتے ہیں کہ دل کے مرض میں مبتلا ان کی والدہ دو روز ہسپتال داخل رہیں لیکن انہیں ایک دن بھی ہسپتال کے سٹور سے دوا نہیں ملی۔

انہوں نے کہا کہ سرکاری ہسپتال غریبوں کا سہارا ہوتے ہیں مگر یہاں ضلعے کے سب سے بڑے ہسپتال میں دوا ہی نہیں ہے۔

چیف ایگزیکٹو آفیسر ہیلتھ ننکانہ ڈاکٹر اظہر امین بتاتے ہیں کہ ہسپتال میں ادویات اور مشینری کا مسئلہ رواں ماہ بجٹ ریلیز ہونے پرحل ہو جائے گا۔ ذیابیطس انسولین کی فراہمی بھی اگست ہی میں شروع کر دی جائے گی۔

ان کا کہنا ہے کہ صوبے بھر کے لیے رواں ہفتے 24 ہزار انسولین منگوا لی گئی ہیں۔ لیبارٹری ٹیسٹ رپورٹ ایک ہفتے میں آنی ہے۔اس کے بعد مریضوں کو انسولین مہیا کر دی جائے گی۔

'اسے لاہور لے جائیں': ننکانہ صاحب کا ضلعی ہسپتال ہر چوتھے مریض کو دوسرے شہروں کے ہسپتالوں میں کیوں ریفر کر دیتا ہے؟

'ڈائلیسز کا ٹیکہ نہیں، انسولین ختم ہے، ایکسرے باہر سے کرائیں'، ڈی ایچ کیو ننکانہ صاحب کی حالت ابتر

ننکانہ صاحب کی فرزانہ بی بی اپنے دو بچوں کے ساتھ صبح چھ بجے ہی بینظیر انکم سپورٹ پروگرام کےدفتر پہنچ گئی تھیں۔

وہ شہر سے 20 کلومیٹر دور خیر پور خونی گاؤں میں رہتی ہیں۔ ان کے خاوند بینائی سے محروم ہیں جن کا کوئی ذریعہ معاش نہیں۔ اسی لئے انہوں نے سرکاری امداد کے لیے بینظیر انکم سپورٹ (بی آئی ایس پی) کے دفتر سے رجوع کیا ہے۔

فرزانہ بی بی بتاتی ہیں کہ تین ماہ قبل پروگرام کی سروے ٹیم ان کے گھر آئی تھی جس نے ان کے گھرانے کے حالات دیکھ کر یقین دہانی کرائی تھی کہ انہیں ایک ماہ تک امداد ملنا شروع ہو جائے گی لیکن اب تک اس معاملے میں کوئی پیش رفت نہیں ہوئی۔

&quot;میں تین ماہ سے دفتر کے چکر لگا رہی ہوں۔ کئی مرتبہ رش کی وجہ سے اہلکاروں سے ملنے اور بات کرنے کی باری ہی نہیں آئی اور مجھے واپس جانا پڑا۔ ایک دو مرتبہ باری آئی توبتایا گیا کہ ابھی میری تصدیق کا عمل مکمل نہیں ہوا ۔&quot;

انہوں نے بتایا کہ وہ سلائی کڑھائی کر کے بمشکل گھر کی روٹی پوری کرتی ہیں۔ جب انہیں پروگرام کے دفتر آنا ہو تو سارا دن ضائع ہو جاتا ہے اور دیہاڑی توڑنے کے ساتھ کرایہ الگ بھرنا پڑتا ہے۔

2017ء کی مردم شماری کے مطابق ننکانہ صاحب کی کل آبادی 13 لاکھ 55 ہزار ہے اور سرکاری اعدادوشمار بتاتے ہیں کہ 2019 ء میں یہاں بینظیر انکم سپورٹ پروگرام سے امداد لینے والی خواتین کی تعداد تقریباً 20 ہزار تھی جو چار سال میں بڑھ کر 30 ہزار تک پہنچ چکی ہے۔

پروگرام میں رجسٹرڈ مستحق خواتین کو ہر تین ماہ بعد ساڑھے آٹھ ہزار روپے ملتے ہیں۔

اس پروگرام میں شامل ہونے کی درخواست پر ٹیم متعلقہ خاتون کے گھر کا سروے کرتی ہے۔ اس دوران عملہ خاندان کی مالی حالت کا جائزہ لیتا ہے اور اپنی تجویز پروگرام کے دفتر میں جمع کرا دیتا ہے۔ اہلیت کی تصدیق کے بعد درخواست گزار کو پروگرام میں رجسٹر کر لیا جاتا ہے۔

بی آئی ایس پی آفس ننکانہ کے مطابق اس کے پاس ہر ماہ ڈیڑھ ہزار سے 1800 تک نئی درخواستیں آرہی ہیں۔ ان کی جانچ پڑتال اور سروے پر دو سے تین مہینے لگ جاتے ہیں۔

دفتر کے مطابق اب مئی اور جون میں آنے والی تین ہزار 220 درخواستیں زیر التوا یعنی جانچ پڑتال کے عمل میں ہیں۔

تاہم درخواست گزاروں کی جانچ پڑتال اور انہیں رجسٹرڈ کرنے کا عمل کچھ اتنا آسان اور شفاف دکھائی نہیں دیتا۔

ننکانہ کے نواحی گاؤں واربرٹن کی رضیہ بی بی لوگوں کے گھروں میں کام کاج کر کے اپنے تین بچوں کا پیٹ پال رہی ہیں۔ ان کا کہنا ہے کہ وہ چھ ماہ سے اپنے گھر کا سروے کرانے کے لیے دفتر کے چکر لگا رہی ہیں لیکن ہر بار انہیں &#39;آئندہ ہفتے&#39; آنے کا کہہ کر ٹال دیا جاتا ہے۔

&quot;میں چند روز قبل دفتر پہنچی تو وہاں ایک شخص آ کر کہنے لگا بی بی چکر لگانے کا کوئی فائدہ نہیں۔ اگر سروے کرانا ہے تو دو ہزار روپے دو کل سروے ہو جائے گا۔اس شخص کو بتایا کہ میں بیوہ ہوں کمانے والا کوئی نہیں تو اتنے پیسے کہاں سے دوں۔ بحث و تکرار کے بعد وہ ایک ہزار پر مان گیا۔&quot;

رضیہ بی بی نے بتایا کہ اگلے ہی روز سروے ٹیم ان کے گھر پہنچ گئی۔ مگر امدادی رقم جاری کرانے کے لیے ایک مرتبہ پھر رشوت مانگی جا رہی ہے جبکہ ان کے پاس مزید پیسے نہیں ہیں۔

ننکانہ صاحب میں بینظیر انکم سپورٹ پروگرام کے لیے سروے کرنے والے عامر علی رشوت کے الزام کو نہیں مانتے۔ وہ کہتے ہیں کہ سروے کے لیے جس علاقے میں ڈیوٹی لگتی ہے وہاں سروے مکمل کر لیا جاتا ہے۔سروے ہو نے کے بعد بھی تصدیقی عمل ہوتا ہے۔

دفتر کے ریکارڈ کے مطابق ننکانہ صاحب میں 30 ہزار سے زیادہ رجسٹرڈ خواتین کو ہر تین ماہ بعد ساڑھےآٹھ ہزارروپے کی قسط رجسٹرڈ موبائل شاپ سے ملتی ہے۔

اس سے پہلے امداد لینے والی خواتین کو اے ٹی ایم کارڈ جاری کئے گئے تھے۔ لیکن پیسے نکلوانے میں فراڈ کے بڑھتے واقعات کے بعد ایک سال قبل کارڈ بند کر دیئے گئے۔ اب امدادی رقم شناختی کارڈ پر آتی ہے اور موبائل فون ڈیلر بائیو میٹرک مشین کے ذریعے تصدیق کر کے خواتین کو رقم دیتے ہیں۔

تاہم خواتین کو شکایت ہےکہ رقم دینے والے ڈیلر ادائیگی کے موقع پر ان سے کٹوتی کرتے ہیں۔

ننکانہ صاحب سے تقریباً 35 کلومیٹر دور سید والہ کی معراج بی بی تین سال سے اس پروگرام کے تحت ملنے والی امدادی رقم لے رہی ہیں۔ وہ بتاتی ہیں کہ جب رقم لینے وہ سید والہ میں موبائل شاپ پر جاتی ہیں تو ڈیلر ان کے پیسوں میں سے پانچ سو روپے کٹوتی کر لیتے ہیں۔

&quot;جب میں پوری رقم کا تقاضا کرتی ہوں تو جواب ملتا ہے &#39; ننکانہ صاحب کرایہ لگا کر چلی جاؤ وہاں پورے پیسے ملیں گے یہاں تو فیس لگے گی۔&#39; مجبوراً میرے پاس کٹوتی کرانے کے سوا چارہ نہیں ہوتا۔&quot;

بے جا کٹوتی اور خواتین کی مشکلات کی شکایات پر بی آئی ایس پی انتظامیہ نے رقم کی شفاف تقسیم کے لیے ضلع ننکانہ صاحب کے سات سکولوں میں سہولت مرکز قائم کیے ہیں۔

ان مراکز میں آنے والی خواتین کی سہولت کے لیے کیے جانے والے انتظامات ناکافی ہیں جنہیں تپتی دھوپ میں طویل قطاروں میں کھڑے ہو کر امداد لینا پڑتی ہے۔ گزشتہ دنوں ایسی ہی قطار میں کھڑی بشریٰ نامی خاتون گرمی سے بیہوش ہو گئی تھیں جنہیں ڈی ایچ کیو ہسپتال پہنچایا گیا۔

ریلوے روڈ پر پرائمری سکول نمبر 1 میں قائم سہولت سنٹر پر آنے والی نذیراں بی بی بتاتی ہیں کہ سہولت مرکز بننے پر وہ بہت خوش تھیں کہ اب انہیں موبائل شاپ پر اضافی رقم نہیں دینا پڑے گی۔ لیکن ان کی یہ خوشی عارضی ثابت ہوئی۔

&quot;جب میں جب سہولت سنٹر پہنچی تو وہاں سکیورٹی پر مامور پولیس اہلکار نے اندر جانے کی اجازت دینے کے لیے ایک ہزار روپے رشوت طلب کی اور انکار پر مجھے سکول کے باہر ہی کھڑا کر دیا۔ جو خواتین پیسے ادا کر رہی تھیں انہیں قطار اور انتظار کے بغیر پیسے مل رہے تھے۔

وہ کہتی ہیں کہ جب مرکز کے باہر خواتین کا رش ہو گیا تو سب نے مچایا، احتجاج کیا اور تب کہیں جا کر پیسے ملے۔ اگر علم ہوتا کہ پیسے لینے کے لیے اس قدر مشکل جھیلنا پڑے گی تو وہ کبھی یہاں نہ آتیں۔

بی آئی ایس پی ننکانہ صاحب کی ڈپٹی ڈائریکٹر طیبہ یاسمین کہتی ہیں کہ سروے سے لے کر امدادی رقم کی وصولی تک ادارے کی جانب سے ہر خدمت مفت فراہم کی جاتی ہے اور اگر کسی دفتر یا رجسٹر موبائل شاپ کے خلاف خواتین سے رشوت لینے یا کٹوتی کرنے کی اطلاع ملی تو اس کے خلاف کارروائی ہو گی۔

وہ بتاتی ہیں کہ پچھلے تین مہینے میں 25 موبائل شاپس کے خلاف ایسی شکایات آئی ہیں جن پر کارروائی کرتے ہوئے انہوں نے تمام کی آئی ڈی بلاک کرا دیں اور اضافی رقم بھی خواتین کو واپس کی ہے۔

انہوں نے بتایا کہ ڈی پی او نے سہولت مراکز پر رشوت لینے کی شکایات پر پولیس اہلکاروں کےخلاف انکوائری اور محکمانہ کارروائی کی ہدایت کردی ہے۔

متروکہ املاک کا ضلع: ننکانہ صاحب کی میونسپل کمیٹی کنگال کیوں ہوئی؟

"پیسے دو گی تو پیسے ملیں گے"، ننکانہ صاحب میں بینظیر انکم سپورٹ پروگرام سے رقم کا حصول خواتین کے لیے درد سر بن گیا

ننکانہ صاحب کو ضلعے کا درجہ ملے اٹھارہ سال گزر گئے ہیں لیکن اب تک یہاں کے لوگوں کو پینے کا صاف پانی بھی مہیا نہیں کیا جا سکا۔ 14 سال پہلے شہر میں صاف پانی پہنچانے کے لیے واٹر سپلائی بچھائی گئی تھی لیکن اس سے آلودہ پانی آتا ہے۔ شہریوں کے پاس نہ تو صاف پانی کے حصول کا کوئی دوسرا ذریعہ ہے اور نہ ہی کوئی ان کا یہ مسئلہ حل کرانے میں دلچسپی لے رہا ہے۔

شہر میں واٹر سپلائی بچھانے کا منصوبہ 2010 میں شروع ہوا تھا جس پر 23 کروڑ روپے لاگت آئی۔ اس منصوبے کے تحت اپر گوگیرہ نہر سے ننکانہ صاحب تک واٹر سپلائی پائپ لائن بچھائی گئی اور یہ کام 2012 میں مکمل ہوا۔

اس کے بعد محکمہ پبلک ہیلتھ کی جانب سے واٹر سپلائی کے امور میونسپل کمیٹی ننکانہ صاحب کے حوالے کرنے کے لیے لیٹر لکھا گیا تاہم کمیٹی نے یہ کہہ کر ذمہ داری لینے سے انکار کر دیا کہ اس کے پاس مالی وسائل نہیں ہیں۔

دونوں محکموں کے اس تنازعے میں آٹھ سال گزر گئے اور بالآخر 2020 میں میونسپل کمیٹی نے واٹر سپلائی کا چارج لے لیا۔

ذمہ داریاں ملنے کے بعد جب کمیٹی نے صاف پانی کے معیار کو چیک کرنے کے لیے نظام کو چالو کیا تو لائنوں سے سیوریج ملا آلودہ پانی آیا جس کے بعد اسے بند کر دیا گیا اور ابھی تک دوبارہ چالو نہیں کیا گیا۔

کینیڈا کالونی کے جعفر حسین اس منصوبے کی ناکامی کا ذمہ دار ٹھیکے دار کی مبینہ غفلت اور محکمہ پبلک ہیلتھ کے اہلکاروں کی نااہلی یا لاپروائی کو ٹھہراتے ہیں۔ وہ بتاتے ہیں کہ آبادی کا بڑا حصہ پمپ اور نلکوں کے ذریعے زیرزمین پانی استعمال کرتا ہے لیکن یہ پانی بھی اب صاف نہیں رہا جس کی وجہ سے بیماریاں پھیل رہی ہیں۔ پانی کے مسئلے کا نہ تو ضلعی انتظامیہ نے نوٹس لیا ہے اور نہ ہی عوامی نمائندوں نے اس مسئلے کو حل کروانے میں دلچسپی دکھائی ہے۔

ڈسٹرکٹ ہیڈ کواٹر ہسپتال کے ایم ایس محمد افضال سندھیلہ تصدیق کرتے ہیں کہ ننکانہ صاحب میں فیکٹریوں کے زہریلے پانی نے زیرآب پانی کو بھی آلودہ کر دیا ہے جس کی وجہ سے شہر اور گردونواح میں معدے کے مسائل، یرقان، اسہال، ہیضہ اور انتڑیوں کی بیماریاں عام ہو گئی ہیں۔

وہ شہریوں کو ہدایت کرتے ہیں ان بیماریوں سے بچنے کے لیے یا تو پانی کو ابال کر پئیں یا پھر فلٹر شدہ پانی استعمال کریں۔ ان کا کہنا ہے کہ ایسے طریقوں پر عمل کرنے سے ہسپتال میں ان بیماریوں کے مریضوں کی تعداد میں کم از کم 15 فیصد تک کمی ضرور لائی جا سکتی ہے۔

ڈسٹرکٹ ہیڈکواٹر ہسپتال سے لیے گئے اعدادو شمار کے مطابق رواں ماہ ننکانہ صاحب شہر سے پیٹ کی مختلف بیماریوں میں مبتلا 110 مریض علاج کے لیے آئے۔ شہر میں یرقان کے مریضوں کی تعداد بھی بڑھ رہی ہے۔ ریکارڈ کے مطابق اپریل میں یرقان کے 60، مئی میں 112، جون میں 133 اور رواں ماہ 46 مریض اس ہسپتال میں آئے۔

میونسپل کمیٹی ننکانہ صاحب میں کام کرنے والے ایک افسر نے اپنا نام ظاہر نہ کرنے کی شرط پر بتایا کہ محکمہ پبلک ہیلتھ کی جانب سے واٹر سپلائی کے جو بھی منصوبے شروع کئے جاتے ہیں ان کی لاگت کروڑوں روپے ہوتی ہے لیکن یہ منصوبے یا تو چند ماہ ہی چل پاتے ہیں یا پھر ننکانہ واٹر سپلائی کی طرح شروع ہونے سے پہلے ہی بند ہو جاتے ہیں۔

&quot;ننکانہ صاحب میں محکمہ پبلک ہیلتھ کی جانب سے واٹر سپلائی کے لیے مکمل نئی پائپ لائن بچھانے کی بجائے پائپوں کو 1980 میں ڈالی گئی بوسیدہ پائپ لائن سے جوڑ کر کام چلانے کی کوشش کی گئی ہے۔ اس کا نتیجہ یہ ہےکہ نہر پر نصب کیے گئے ٹیوب ویلوں کا صاف پانی جب پرانی پائپ سے گزرتا ہے تو صارف تک پہنچنے کے بعد پینے کے قابل نہیں رہتا۔&quot;

وہ انکشاف کرتے ہیں کہ انہی وجوہات کی بنا پر میونسپل کمیٹی واٹر سپلائی کی ذمہ داری لینے سے کترا رہی تھی مگر اس وقت کے ڈپٹی کمشنر راجہ منصور احمد نے کمیٹی پر دباؤ ڈال کر یہ منصوبے اسے ہینڈ اوور کروا دیا جس کے نتائج سب کے سامنے ہیں۔

وہ یہ بھی کہتے ہیں کہ جتنے پیسے اس منصوبے پر ضائع کئے گئے ہیں ان میں سے اگر 15 فیصد بھ فلٹریشن پلانٹ لگانے کے لیے مہیا کر دیے جاتے تو نا صرف شہر کے ہر محلے میں پینے کا صاف پانی میسر ہوتا بلکہ باقی بچ جانے والی رقم کسی دوسرے ترقیاتی منصوبے کے لیے کام آ سکتی تھی۔

&quot;ہم نے مخیر افراد کے تعاون سے رائے بلار پارک میں 15 لاکھ میں ایک آر او فلٹر پلانٹ لگایا ہے جو پرانا ننکانہ صاحب کے رہائشیوں کو صاف پانی مہیا کر رہا ہے&quot;۔

کچھ عرصہ پہلے تک ننکانہ صاحب کے بہت سے شہری پینے کے صاف پانی کی ضرورت رکشوں پر نہری پانی بیچنے والوں سے پوری کررہے تھے لیکن اپر گوگیر کے قریب ایک بااثر گروہ نے بھتہ نہ دینے پر رکشوں کو پانی کی فراہمی روک دی ہے جس کے باعث شہریوں کے لیے صاف پانی کا یہ ذریعہ بند ہو گیا ہے۔

سماجی کارکن عابد حمید کہتے ہیں کہ واٹر سپلائی منصوبے کی ناکامی کے بعد ان کا گھرانہ پینے کے لیے اسی نہری پانی پر انحصار کر رہا تھا لیکن مافیا نے ان سے یہ حق بھی چھین لیا۔

&quot;صاف پانی نہ ہونے کے باعث میرا معدہ خراب ہو گیا اس لیے اب مجھے دکانوں سے مہنگے داموں پانی خرید کر پینا پڑتا ہے۔ کروڑوں روپے لگانے کے باوجود واٹر سپلائی منصوبہ بند پڑا ہے جس پر نہ تو آج تک کوئی انکوائری ہوئی اور نہ ہی کسی نے اس عوامی مسئلے کو حل کروانے کی کوشش کی ہے۔&quot;

تاہم محکمہ پبلک ہیلتھ کے سب انجینئر جنید احمد اس دعوے کو مسترد کرتے ہیں کہ واٹر سپلائی سکیم میں پرانی پائپ لائن استعمال کی گئی ہے۔ اس کے بجائے ان کا کہنا ہے کہ میونسپل کمیٹی نے واٹر سپلائی کی ذمہ داری قبول کرنے میں وقت ضائع کیا جس کے باعث پائپ لائنوں میں مٹی جم جانے سے گدلا پانی آنے لگا۔ وہ یہ دعویٰ بھی کرتے ہیں کہ ایک مرتبہ پوری پائپ لائن کی صفائی کروا دی جائے تو یہ مسئلہ حل ہو جائے گا۔

اس معاملے کی انکوائری سے متعلق ننکانہ صاحب کے ڈپٹی کمشنر میاں رفیق احسن سے پوچھا گیا تو انہوں نے جواب دیا کہ واٹر سپلائی کا منصوبہ ان کی تعیناتی سے پہلے کا ہے اس لیے پہلے وہ خو د تمام تر تفصیلات جمع کریں گے اور تبھی انکوائری ہوگی۔

وہ تصدیق کرتے ہیں کہ محکمہ پبلک ہیلتھ کی جانب سے کام میں غفلت اور بدعنوانی کی شکایات موصول ہوئی ہیں اور جو بھی قصور وار پایا گیا اس کے خلاف سخت قانونی کارروائی عمل میں لائی جائے گی۔ اس کے علاوہ جہاں کہیں اس منصوبے میں کوئی خرابی ہے اسے ٹھیک کروا کر لوگوں کو جلد از جلد صاف پانی کی فراہمی یقینی بنائی جائے گی۔

کوئٹہ میں موجود غیر قانونی ٹیوب ویل: عوام پینے کے پانی کے لیے ٹینکر مافیا کے رحم و کرم پر

کروڑوں مالیت کی واٹر سپلائی ننکانہ صاحب کے باسیوں کو پینے کا صاف پانی نہ دے سکی

پچھلے دو ماہ سے میونسپل کمیٹی ننکانہ صاحب کے 236 ملازمین تنخواہوں سے محروم ہیں۔ ان میں کمپیوٹر آپریٹر، کلرک، اسسٹنٹ، نائب قاصد، سینٹری ورکر، بیل دار، پلمبر اور واٹر سپلائی لائن مین شامل ہیں۔

میونسپل کمیٹی سے ریٹائر ہونے والے 60 ملازمین کو گزشتہ تین ماہ سے پنشن نہیں دی گئی۔ دو ملازمین کو ریٹائرمنٹ کے بعد گریجویٹی کی رقم نہیں ملی جن میں سے ایک چھ ماہ قبل بطور نائب قاصد ریٹائر ہونے والے محمد شریف ہیں۔

وہ کہتے ہیں &rdquo;سوچا تھا کہ ریٹائر ہونے کے بعد ملنے والی رقم سے اپنا گھر خرید کر کرائے کے مکان جیسے بوجھ سے بچ جاؤں گا مگر پچھلے چھ مہینے سے بجٹ نہ ہونے کا رونا رو کر مجھے ذاتی گھر کے خواب سے دور کر دیا گیا ہے&ldquo;۔

انہوں نے کہا کہ وہ قرض لے کر گھر کا کرایہ دے رہے ہیں۔

محکمہ لوکل گورنمنٹ میونسپل کمیٹی کو ماہانہ 72 لاکھ روپے کے قریب فنڈ فراہم کر رہا ہے۔

کمیٹی اپنے ذرائع سے تقریباً 35 لاکھ روپے ماہانہ حاصل کر پاتی ہے۔ یہ آمدن لاری اڈا، رکشہ سٹینڈ، برتھ سرٹیفکیٹ، نکاح نامہ کی فیس اور چند دیگر ذرائع سے ہوتی ہے۔

تاہم میونسپل کمیٹی کے اخراجات مجموعی آمدن سے کہیں زیادہ ہیں۔

مثلاً رواں سال اپریل کی تنخواہیں ایک کروڑ روپے بنتی ہیں جنہیں ادا کرنا باقی ہے۔

لاکھوں روپے کے ماہانہ خسارے نے اس کی کمر توڑ دی ہے۔

اس کا اندازہ میونسپل کمیٹی ننکانہ صاحب کی تیار کردہ ایک حالیہ لائبلٹی رپورٹ سے ہوتا ہے جس کے مطابق اس نے19 کروڑ 95 لاکھ روپے سے زائد رقم ادا کرنی ہے۔

رپورٹ میں بتایا گیا ہے کہ ماہانہ تنخواہ، تنخواہوں کے بقایا جات، ماہانہ پنشن، ریٹائرڈ ملازمین کی گریجویٹی، چھٹی کے دن کام کرنے کی اجرت اور فوت ہونے والوں کی مالی امداد کی مد میں اسے کل دو کروڑ 68 لاکھ 19 ہزار 167 روپے درکار ہیں۔

&nbsp;متفرق اخراجات کی مد میں کمیٹی نے تین کروڑ 67 لاکھ سے زائد کی رقم ادا کرنی ہے۔

پچیس لاکھ روپے کے بجلی کے بل دینے ہیں۔

ننکانہ صاحب کی میونسپل کمیٹی کو آمدن کے وہ ذرائع میسر نہیں جو عموماً دیگر کو ہوتے ہیں۔

شہر کی 90 فیصد پراپرٹی متروکہ وقف املاک بورڈ کے پاس ہے جسے قیام پاکستان کے وقت غیرمسلم چھوڑ گئے تھے۔

میونسپل کمیٹی اپنی آمدن کے لیے اسے استعمال میں لانے سے قاصر ہے۔

دیگر اضلاع کے بلدیاتی ادارے اپنے علاقے میں پراپرٹی سے متعلق مختلف ٹیکسوں کی مدد سے اپنے وسائل بڑھا لیتی ہیں جیسے گھریلو نقشوں کو پاس کرنے کی فیس اور پراپرٹی ٹیکس۔ لیکن ننکانہ صاحب میں کیونکہ متروکہ املاک، ذاتی پراپرٹی سے کہیں زیادہ ہیں اس لیے یہاں کی بلدیہ کا یہ ذریعہ آمدن تقریباً نہ ہونے کے برابر ہے۔

خسارے کے باوجود لوکل گورنمنٹ نے کمیٹی کو دیے جانے والے ماہانہ فنڈ میں اضافہ نہیں کیا۔

میونسپل کمیٹی ننکانہ صاحب میں بطور ہیڈ کلرک کام کرنے والے اکرم گجر آل پاکستان کلرک ایسوسی ایشن ننکانہ کے صدر بھی ہیں۔

وہ کہتے ہیں کہ پچھلے چند ماہ سے کمیٹی کے مالی حالات جتنے برے ہیں، اس سے پہلے کبھی نہیں دیکھے۔

ان کے مطابق ابتر حالات کی بڑی وجہ متروکہ وقف املاک بورڈ ہے جو کمیٹی کو موصول ہونے والی آمدن کے ذرائع پر زبردستی قبضہ کر رہا ہے۔

وہ بتاتے ہیں کہ کمیٹی کے بڑھتے ہوئے اخراجات اور خسارے کو کم کرنے کے لیے انہوں نے پانچ ماہ قبل ننکانہ صاحب مانگٹانوالہ روڈ پر جنرل بس سٹینڈ کے چاروں اطراف 65 دکانیں تعمیر کروائیں۔ ان کے کرایے سے کمیٹی کو ماہانہ ساڑھے تین سے چار لاکھ روپے آمدن ہو رہی تھی۔

تاہم متروکہ وقف املاک بورڈ نے اپنا ملکیتی رقبہ ہونے کے دعوے پر ان دکانوں سے کرایہ وصول کرنا شروع کر دیا۔

چیف آفیسر (سی او) میونسپل کمیٹی ننکانہ صاحب راؤ نواز کا مؤقف ہے کہ تنخواہوں کی بندش کی بنیادی وجہ لوکل گورنمنٹ کی جانب سے ملنے والے ماہانہ فنڈ کا اخراجات کی نسبت کم ہونا ہے۔ 
&quot;اس لیے تنخواہوں، پنشن اور دیگر اخراجات کو مدنظر رکھتے ہوئے سیکرٹری لوکل گورنمنٹ کو ماہانہ ملنے والی 72 لاکھ روپے کی گرانٹ بڑھا کر ڈھائی کروڑ کرنے کے لیے لیٹر ارسال کر دیا ہے۔ تاہم ابھی گرانٹ بڑھانے کے حوالے سے احکامات جاری نہیں کیے گئے&quot;۔

انہوں نے کہا کہ بورڈ نے کمیٹی کی دکانوں پر قبضہ کر کے مالی نقصان پہنچایا ہے جس پر قانونی چارہ جوئی کے لیے سیکرٹری بورڈ کو اپیل کی ہے۔

اس کی سماعت مقرر ہونے پر دکانیں واپس لینے کی بھرپور کوشش کی جائے گی۔

ایڈمنسٹریٹر متروکہ وقف املاک بورڈ ننکانہ صاحب ملک محمد عمر کہتے ہیں بورڈ کے ملکیتی رقبے پر کسی کو بھی قبضہ کرنے کی اجازت نہیں ہے۔

&quot;یہی وجہ ہے کمیٹی کی جانب سے غیر قانونی طور پر دکانوں کے کرایوں کی وصولی روک کر حاصل ہونے والی آمدن کو بورڈ کے کھاتے میں جمع کروایا جا رہا ہے&quot;۔

دکانوں کے حصول کے لیے میونسپل کمیٹی کی جانب سے کی گئی اپیل پر ان کا کہنا تھا کہ وہ اس کیس کی پیروی کرتے ہوئے اسے خارج کروانے کے لیے ہر ممکن کوشش کریں گے۔

ڈپٹی سیکرٹری لوکل گورنمنٹ فنڈ لاہور امجد علی کہتے ہیں کہ بجٹ میں اضافے کے لیے میونسپل کمیٹی ننکانہ صاحب کی درخواست موصول ہوئی ہے، البتہ ماہانہ مختص فنڈز کے علاوہ کمیٹی کو دینے کے لیے بجٹ نہیں ہے۔

ان کے مطابق فراہم کردہ بجٹ کمیٹی کی ضروریات کے لیے کافی تھا تاہم جولائی 2022ء میں اس کے ملازمین کے سکیل ریوائز ہونے سے فنڈز کم پڑ گئے۔

انہوں نے مؤقف اختیار کیا کہ نئے تخمینے کے مطابق بجٹ وزارت خزانہ کو ارسال کر دیا گیا ہے۔ اس کی منظوری جون میں ہو گی جس کے بعد مسئلہ حل ہو جائے گا۔

لیکن سیور مین تنویر علی اتنا انتظار نہیں کر سکتے۔

انہوں نے لوک سجاگ کو بتایا کہ وہ بیوی بچوں سمیت چھ افراد کی کفالت کر رہے ہیں۔ تنخواہوں کی بندش سے مالی حالات اس قدر خراب ہو گئے ہیں کہ نوبت فاقوں تک پہنچ گئی ہے۔

&quot;میں نے اپنی بیوی کو شادی پر تحفے میں دیا گیا ایک تولہ سونے کا سیٹ سنار کے پاس دو ماہ کے لیے گروی رکھوا کر 50 ہزار روپے ادھار لیے ہیں تاکہ گھر کا نظام چلتا رہے۔ ان کی واپسی جون کے آغاز پر نہ کی تو وہ سیٹ کو من مانی قیمت پر نیلام کر دے گا&quot;۔

وہ کہتے ہیں کہ سونے کے اس سیٹ سے ہاتھ دھونا ان کے لیے بہت تکلیف دہ ہو گا۔

انہوں نے سی او میونسپل کمیٹی، سیکرٹری فنڈز اور نگران وزیراعلیٰ سے اپیل کی ہے کہ جلد از جلد تنخواہیں جاری کر دی جائیں۔

2019ء میں حکومت پنجاب کی جانب سے انصاف آفٹر نون سکولز کے نام سے ایک تعلیمی پروگرام کا آغاز کیا گیا تھا جس کا مقصد سکول کی عمارتوں اور سہولیات کو صبح کی کلاسوں کے اوقات کے بعد استعمال میں لاتے ہوئے مزید طلبہ کو تعلیم فراہم کرنا تھا۔

محکمہ تعلیم کے مطابق اس وقت صوبہ پنجاب میں آ فٹر نون سکولز کی تعداد چھ ہزار 700 ہے جس میں 30 ہزار 258 اساتذہ فرائض سر انجام دے رہے ہیں۔

سی ای او&nbsp; ایجوکیشن احسن فرید کے مطابق ننکانہ صاحب میں سرکاری سکولز کی کل تعداد 784 ہے جن میں اب تک 160 پرائمری سکولز کو آفٹر نون سکولز کا درجہ دیا گیا ان میں 63 بوائز جبکہ 97 گرلز سکولز شامل ہیں۔ بوائز سکولز میں اب تک نو ہزار 544 طلبا جبکہ گرلز سکولز میں چودہ ہزار 210&nbsp; طالبہ داخل ہیں۔

پروگرام کے تحت ان سکولوں میں ہیڈ ماسٹر کے لیے ماہانہ 18 ہزار روپے، استاد کے لیے 15 ہزار روپے جبکہ نائب قاصد کے لیے سات ہزار روپے معاوضہ مقرر کیا گیا تھا جسے سرکاری اصطلاح میں تنخواہ کی بجائے &#39;اعزازیہ&#39; کا نام دیا گیا۔ یہ پنجاب میں حکومت کی طے کردہ کم از کم اجرت 32 ہزار روپے ماہانہ سے بھی کم ہیں۔

پنجاب میں آفٹر نون سکول کے عملے کو 11 ماہ سے &#39;اعزازیہ&#39; نہیں ملا۔

اساتذہ کے حقوق کے لیے سرگرم تنظیم ایجوکیٹرز ایسوسی ایشن نے یکم مئی کو ننکانہ صاحب کے تمام آفٹر نون سکول بند کرکے ڈپٹی کمشنر آفس کے سامنے احتجاج کیا۔ ایسوسی ایشن کے سر پرست اعلی محمد اختر سیال نے بتایا کہ احتجاج کے بعد محکمہ تعلیم کے نمائندگان نے مذاکرات کے ذریعے دس دن میں تنخواہیں فراہم کرنے کی یقین دہانی کروائی تھی مگر یہ مسئلہ حل نہیں ہوا۔

&quot;مقررہ وقت گزرنے کے بعد سی ای او ایجوکیشن سے رابطہ کیا تو انہوں نے مزید یقینی دہانی کروائی ہے کہ تنخواہیں آئندہ چار سے پانچ روز تک منتقل کر دی جائیں گی&quot;۔ اختر سیال کہتے ہیں کہ اب بھی تنخواہیں جاری نہ کی گئیں تو وہ دوبارہ احتجاج کریں گے۔ &quot;اس کے سوا ہمارے پاس راستہ کونسا ہے؟&quot;

اساتذہ کو تنخواہیں ملنے کی امید کم ہے۔ جیسل سکول میں بطور ہیڈ تعینات محمد شفیع رندھاوا ایجو کیٹرز ایسوسی ایشن کے ضلعی صدر بھی ہیں۔ وہ بتاتے ہیں کہ جھوٹے وعدے ان کے لیے نئے نہیں۔انہیں ہر مہینے نیا دلاسا دے کر کہا جاتا ہے کہ اس بار تنخواہیں دے دی جائیں گی۔

<h2>ادائیگیاں کیوں بند ہیں؟ جتنے منہ، ۔ ۔ ۔</h2>

ننکانہ صاحب کے صوبائی حلقہ پی پی 133 سے پاکستان تحریک انصاف کے ٹکٹ ہولڈر سہیل منظور گل کہتے ہیں کہ چونکہ یہ ان کی پارٹی کا پروجیکٹ ہے اس لیے نئی حکومت نے اسے ذاتی انا کی بھینٹ چڑھانے کے لیے اساتذہ کو ادائیگیاں روک لی ہیں۔انہوں نے کہا کہ ان کی حکومت نے پنجاب میں جو بھی پروجیکٹ شروع کیے انہیں یا تو بند کر دیا گیا ہے یا فنڈ نہ ہونے کا بہانہ بنا کر روک رکھا ہے۔

ان کا کہنا ہے کہ موجودہ حکومت کو اختلافات سے ہٹ کر اساتذہ کو ادائیگی کرنی چاہیے ورنہ دیہاتی بچوں کی فلاح و بہبود کے لیے شروع کیا گیا آفٹر نون پروگرام سیاست کی نظر ہو جائے گا۔

ہمارے سیاسی کلچر کو مدِنظر رکتھے ہوئے سہیل منظور کا دعویٰ بعید از قیاس نہیں لگتا۔

رانا محمد ارشد ننکانہ صاحب سے نون لیگ کے امیدوار کے طور پر دو بار ممبر صوبائی اسمبلی منتخب ہو چکے ہیں، وہ سہیل منظور کے مؤقف کی تردید کرتے ہیں ان کے مطابق پنجاب میں تحریک انصاف کی حکومت کے دوران ہی اس پروگرام کے فنڈز جاری نہیں ہوئے تھے جس کی وجہ سے ادائیگیوں میں تعطل آیا۔انہوں نے کہا کہ وہ پہلے معاملے کی تہہ تک پہنچ کر وجوہات معلوم کریں گے اس کےبعد جہاں بھی نقص ہوا اسے حل کروانے کی پوری کوشش کریں گے۔

چیف ایگزیکٹو آفیسر محکمہ تعلیم احسن فرید کہتے ہیں کہ انہیں ایڈمن فنانس کی جانب سے فنڈز موصول نہیں ہوئے۔ وہ اس پروگرام میں تنخواہوں کی فراہمی کے لیے بنائے گئے نظام سے مطمئن نہیں ہیں جس کے تحت بجٹ کی فراہمی سیکرٹری سکول ایجوکیشن اور وزیر اعلیٰ کی منظوری کی مرہون منت ہے۔ وہ تجویز کرتے ہیں کہ تنخواہوں کی ادائیگی کا اختیار ضلعی اکاؤنٹ آفس کے ماتحت کر دیا جائے تو تنخواہوں کی تاخیر کا معاملہ حل ہو جائے گا۔

ننکانہ صاحب سے رکن قومی اسمبلی و وفاقی وزیر چوہدری برجیس طاہر آفٹر نون سکول کے اساتذہ کو تنخواہیں نہ ملنے کے معاملے سے لاعلم تھے۔ تاہم انہوں نے یقین دہانی کروائی کہ وہ جلد وزیر اعلیٰ سے مل کر تنخواہوں کی سمری پر دستخط کروا کر اساتذہ کا مسئلہ حل کروائیں گے۔

ایڈمن فنانس ننکانہ صاحب نعیم احمد سلہریا کے مطابق تنخواہوں سے محروم اساتذہ کی تعداد پانچ ہزار 437 ہے جن میں 784 ہیڈز، چار ہزار 653 دیگر اساتذہ ہیں۔ وہ کہتے ہیں کہ فنڈز ملتے ہی بنا کسی تا خیر کے تنخواہیں جاری کر دی جائیں گی۔ 
&quot;تنخواہوں کی ادائیگی کے لئے فنڈز جاری کروانے کے حوالے سے سیکرٹری سکول ایجوکیشن کو متعدد بار درخواست کی مگر ہر بار نئے وعدے کے سوا کچھ نہیں ملا&quot;۔

فیاض احمد ساجد سیکرٹری سکول ایجوکیشن آفس میں پروگرام آفیسر آفٹر نون سکول ہیں۔ وہ کہتے ہیں کہ پنجاب حکومت نے گذشتہ چھ ماہ کی تنخواہوں کا بجٹ پاس کیا ہے جس کی سمری نگران وزیر اعلیٰ کو بھیج دی گئی ہے جس کی منظوری کے بعد تمام اضلاع کو تنخواہوں کے پیسے جاری کر دیے جائیں گے۔

<h2>آفٹرنون سکولز کی کیا افادیت ہے؟</h2>

سابق سینئر ہیڈ ماسٹر و ماہر تعلیم جاوید اقبال شوکا کے بقول آفٹر نون سکول ایک احسن اقدام ہے جس کی بدولت ننکانہ سمیت پنجاب کے تمام سکولوں میں داخلے کا تناسب بڑھ گیا ہے۔ 
انہوں نے بتایا کہ ضلع ننکانہ صاحب میں ان سکولوں میں 2019ء سے 2023ء کے دوران ایک لاکھ 77 ہزار نئے داخلے ہوئے۔&quot;دیہی علاقوں میں آفٹر نون سکولز کھلنے سے صبح کے اوقات میں جو بچے محنت مزدوری کرتے ہیں ان کو بھی تعلیم حاصل کرنے کا موقع مل گیا&quot;۔

ان کا کہنا ہے کہ عام سکولوں میں سٹاف کی کمی ہے جس کی وجہ سے 50 طلبا کی کلاس میں بچوں کی تعداد 100 تک جا پہنچتی ہے جن پر مناسب توجہ دینا ایک استاد کے بس میں نہیں ہوتا۔ آفٹرنون سکولز اس دباؤ میں کمی کر رہے تھے۔

ننکانہ صاحب سے 18 کلومیٹر دور انصاف آفٹر نون سکول ولگن سہیل میں ایک سال قبل تعینات ہونے والی استانی 40 سالہ شمشا شمیم نے اسلامیات میں ماسٹرز کر رکھا ہے۔ ان کا کہنا ہے کہ 20 سال پہلے شوہر کے انتقال کے بعد سے وہ دو بھائیوں کے زیر کفالت ہیں جو مقامی زمیندار کے ہاں دیہاڑی دار مزدور ہیں۔

&quot;میری نوکری لگی تو مجھے خوشی تھی کہ میں بھائیوں پر بوجھ بننے کی بجائے ان کا سہارا بنوں گی&quot;۔ وہ مایوسی کے عالم میں کہتی ہیں کہ کئی ماہ سے روزانہ سکول آنے جانے کے لیے بھائیوں سے کرائے اور کھانے پینے کے مد میں پیسے مانگ مانگ کر وہ تھک گئیں ہیں۔

انہوں نے بتایا کہ گذشتہ سال سکول کا سیشن اپریل میں ختم ہو کر چھٹیوں کے بعد اگست میں شروع ہونا تھا لیکن انہیں مئی کے مہینے بھی سکول جانے کی ہدایت کی گئی جس کا معاوضہ بھی ابھی تک نہیں دیا گیا ۔

&quot;بھائی سکول سے استعفیٰ دینے پر دباؤ ڈال رہے ہیں، میں شاید ہی نوکری جاری رکھ سکوں&quot;۔

سندھ میں تدریسی عملے کی غیرحاضری کا مسئلہ: اساتذہ سکولوں میں نہیں آتے لیکن سرکاری ریکارڈ میں حاضر رہتے ہیں

11 ماہ سے تنخواہ کے منتظر اساتذہ: کیا پنجاب کے انصاف آفٹرنون سکولز کی شام ڈھل چکی ہے؟

ننکانہ صاحب کے قصبے واربرٹن سے تعلق رکھنے والے رفیق علی کیٹرنگ کا کام کرتے ہیں۔ کچھ عرصہ پہلے وہ ٹریفک حادثے میں شدید زخمی ہو گئے تھے۔ جب انہیں ہسپتال لایا گیا تو وہ بے ہوش تھے۔ ڈاکٹروں نے بتایا کہ ان کے دماغ میں خون جم گیا ہے اس لئے جتنا جلد ہو سکے انہیں لاہور لے جایا جائے۔

لاہور کے جنرل ہسپتال میں ڈاکٹروں نے بتایا کہ انہیں یہاں بھیجنے کی ضرورت نہیں تھی کیونکہ سی ٹی سکین میں ان کے دماغ میں خون جما دکھائی نہیں دیا۔

اس طرح رفیق اور ان کے اہلخانہ نے نہ صرف شدید ذہنی کوفت برداشت کی بلکہ انہیں لاہور لانے اور واپس لے جانے پر ان کے بہت سے پیسے بھی خرچ ہو گئے۔

ننکانہ صاحب کی بشریٰ بی بی کا دو سالہ بیٹا محمد وسیم پیٹ میں درد کی وجہ سے دو روز تک ڈسٹرکٹ ہیڈ کوارٹرز ہسپتال میں زیر علاج رہا۔ تیسرے دن ڈاکٹروں نے انہیں فیصل آباد کے الائیڈ ہسپتال لے جانے کا مشورہ دے دیا۔

بشریٰ کے لیے یہ صورتحال کافی پریشان کن تھی۔ کیونکہ اس روز ان کے بیٹے کی طبعیت دوبارہ بگڑ گئی تھی اور ان کے پاس اتنے پیسے بھی نہیں تھے کہ وہ فوری طور پر کرایے کی گاڑی کا بندوبست کر سکتیں۔

وہ بتاتی ہیں کہ ان کے شوہر نے کسی سے کچھ پیسے ادھار لیے اور اس طرح انہوں نے بچے کو 80 کلومیٹر دور فیصل آباد پہنچایا۔

الائیڈ ہسپتال میں ڈاکٹروں نے مختلف معائنوں کے بعد انہیں بتایا کہ بچے کے پیٹ میں ہونے والا درد دراصل مثانے کی کسی خرابی کی وجہ سے ہے۔

بشریٰ بی بی اور ان کے شوہر بیٹے کے ساتھ دو روز تک ہسپتال میں فرش یا گھاس پر سوتے رہے۔ کیونکہ فیصل آباد میں نہ تو ان کا کوئی رشتہ دار تھا جس کے پاس وہ ٹھہر سکتے اور نہ ہی ان کے پاس کرایے پر کمرہ لینےکے پیسے تھے۔

بشریٰ کہتی ہیں کہ ان کا بچہ تو صحت یاب ہو گیا لیکن&nbsp; آنے جانے اور کھانے پینے پر 15 ہزار روپے خرچ ہو گئے۔

&#39;&#39;اگر میرے بچے کا علاج ننکانہ صاحب کے ہسپتال میں ہو جاتا تو ہمیں اس قدر بڑی رقم خرچ نہ کرنا پڑتی۔&#39;&#39;

وہ الزام عائد کرتی ہیں کہ ننکانہ صاحب کے ہسپتال میں ڈاکٹروں نے ان کے بچے کی زندگی کو اس لیے خطرے میں ڈالا کیوں کہ وہاں کسی بڑی سفارش پر آنے والے مریض کو بستر مہیا کرنا تھا۔

رفیق علی کا خیال ہے کہ اس ہسپتال کے ڈاکٹر شعبہ حادثات یا آؤٹ ڈور میں جانے والے بیشتر مریضوں کو فیصل آباد یا لاہور کے کسی ہسپتال میں بھجوا دیتے ہیں۔

ہسپتال کے ریکارڈ سے بھی اس بات کی تصدیق ہوتی ہے کہ یہاں آنے والے ہر چوتھے مریض کو دوسرے شہروں کے ہسپتالوں میں ریفر کیا جارہا ہے۔

رواں برس جنوری سے اب تک یہاں پانچ ہزار 625 مریضوں کا علاج کیا گیا جبکہ اس دوران لاہور یا فیصل آباد کے ہسپتالوں میں ریفر کیے جانے والے مریضوں کی تعداد ایک ہزار 955 ہے۔

اس ہسپتال میں بطور فزیشن کام کرنے والے ڈاکٹر محمد حمزہ کے مطابق ایمرجنسی میں جو بھی مریض آتا ہے اس کا مکمل معائنہ کرنے کے بعد ہی یہ فیصلہ کیا جاتا ہے کہ اسے یہیں پر داخل کرنا ہے یا کسی دوسرے ہسپتال میں بھجوانا ہے۔

ان کے بقول ہسپتال میں سی ٹی سکین اور ایم آر آئی کی سہولت نہ ہونے کے باعث بھی زیادہ تر مریضوں کو فیصل آباد یا لاہور کے بڑے ہسپتالوں میں بھجوانا پڑتا ہے۔

رفیق علی کو لاہور بھجوانے کے بارے میں بھی ان کا موقف ہے کہ وہ بے ہوشی کی حالت میں یہاں آئے تھے پھر جب انہیں ہوش آیا تو ان کا مکمل معائنہ کیا گیا جس میں ڈاکٹر اس نتیجے پر پہنچے تھے کہ شاید ان کے دماغ میں خون جم گیا ہے اور اسی بنا پر انہیں لاہور لے جانے کا مشورہ دیا گیا تھا۔

ننکانہ صاحب کا یہ سرکاری مرکز صحت 1985ء میں قائم کیا گیا تھا اور جب اس شہر کو ضلعے کا درجہ ملا تو 2007ء میں اسے ڈسٹرکٹ ہیڈ کوارٹرز ہسپتال میں تبدیل کر دیا گیا۔

ہسپتال کی ویب سائٹ کے مطابق 2018ء میں اس ہسپتال کی مزید توسیع اور تزئین و آرائش ہوئی ہے اور اس میں سہولیات کو مزید بہتر بنایا گیا ہے۔

ہسپتال میں گائناکالوجی، آرتھوپیڈک، ریڈیالوجی، ڈینٹل اینڈ چیسٹ اور ایکسیڈنٹل و میڈیکل ایمرجنسی سمیت سات شعبے ہیں۔ یہاں آپریشن اور آؤٹ ڈور کی سہولت بھی میسر ہے۔

اس ہسپتال میں کام کرنے والے ڈاکٹروں کی تعداد بھی 160 ہے جو کسی بھی لحاظ سے کم نہیں ہے۔ ان ڈاکٹروں میں 70 کنسلٹنٹ، 25 فزیشن، 20 آرتھوپیڈکس، 20 گائناکالوجسٹ، 15 سرجن، 5 کارڈیالوجسٹ اور 5 پیڈیٹریشن ہیں۔

ہسپتال کی ویب سائٹ پر کہا گیا ہے کہ &quot;کوئی بھی مریض معمول کے مطابق آئے یا ایمرجنسی میں، ہسپتال اسے بہترین طبی خدمات فراہم کرے گا&quot;۔

لیکن شہر سے 12 کلومیٹر دور قصبہ مانگٹانوالہ کے مزدور کرامت علی ہسپتال کی طرف سے بہترین طبی خدمات فراہم کرنے کے ان دعووں کو درست تسلیم نہیں کرتے۔

چند ماہ پہلے ان کے بیٹے کو شہد کی مکھیوں نے کاٹ لیا تو وہ انہیں فوری طور پر ڈی ایچ کیو ننکانہ صاحب لے گئے لیکن وہاں کے ڈاکٹروں نے انہیں داخل کرنے کے بجائے فیصل آباد ریفر کر دیا۔

وہ بتاتے ہیں کہ ان کے پاس علاج تو دور کی بات، فیصل آباد جانے کے لئے کرائے کے پیسے بھی نہیں تھے۔ انہوں نے ڈاکٹروں کی منت سماجت کی کہ بچے کو ایک آدھ دن کے لیے ہسپتال میں داخل کر لیں لیکن انھوں نےانکار کردیا۔

ہسپتال کے انتظامی معاملات کی نگرانی کے حوالے سے ہسپتال انتظامیہ، ضلعی انتظامیہ اور عوامی نمائندوں پر مشتمل &#39;&#39;ہیلتھ کونسل&#39;&#39; کے رکن شاہین غیور کا کہنا ہے کہ کرامت علی چونکہ مالی طور پر کمزور ہیں اس لیے وہ بیٹے کو کسی دوسرے شہر لے جانے کی سکت نہیں رکھتے تھے اس لیے وہ ان کے پاس آئے۔

&quot;میں نے میڈیکل سپرنٹنڈنٹ سے رابطہ کر کے انہیں ساری صورت حال سے آگاہ کیا تو انہوں نے مریض بچے کا ہسپتال میں علاج شروع کرا دیا&quot;۔

میڈیکل سپرنٹنڈنٹ ڈاکٹر افضال سندھیلہ کے مطابق شہد کی مکھی کے کاٹنے سے متاثرہ مریض کو دوسرے شہر ریفر کرنے پر انہوں نے متعلقہ ڈاکٹر کی سرزنش کی ہے اور انہیں تنبیہ کردی گئی ہے کہ اگر ان کے خلاف دوبارہ کوئی شکایت آئی تو انہیں محکمانہ کاروائی کا سامنا کرنا پڑے گا۔

ان کا کہنا ہے کہ ہسپتال میں شکایات کے حوالے سے مانیٹرنگ سیل نہیں ہے لیکن پھر بھی آئندہ ایسے واقعات کو روکنے کے لیے یہ فیصلہ کیا گیا ہے کہ اب جو بھی مریض کہیں اور ریفر کیا جائے گا اس کے لیے سی ای او اور ایم ایس کا اجازت نامہ ضروری ہو گا۔

انہوں نے یہ یقین دہانی بھی کرائی کہ آنے والے دنوں میں صرف وینٹی لیٹر پر موجود مریضوں کے علاوہ تمام افراد کا علاج ہسپتال میں ہی ممکن بنایا جائے گا جس کی روزانہ کی بنیاد پر نگرانی ہوگی۔

ڈاکٹر راحیل اس ہسپتال میں بطور کارڈیالوجسٹ کام کرتے ہیں۔ان کے مطابق ہسپتال میں مثانے، گردوں، ناک کان، جلد اور گلے کی بیماریوں کے ڈاکٹر دستیاب نہیں ہیں۔ اس کے علاوہ اس ضلعے کی آبادی کے لحاظ سے ہسپتال میں بستروں کی کمی بھی مریضوں کو دوسرے شہر بھیجے جانے کی ایک وجہ ہے۔

2017ء کی مردم شماری کے مطابق ننکانہ صاحب کی کل آبادی 13 لاکھ 54 ہزار کے لگ بھگ ہے جبکہ ڈی ایچ کیو اس ضلع کا واحد بڑا سرکاری ہسپتال ہے جہاں 125 بستروں کی سہولت موجود ہے۔ گویا&nbsp; ضلع کے ہر گیارہ ہزار افراد کے لئے ضلع ہیڈ کواٹر ہسپتال میں ایک بستر میسر ہے۔

عالمی ادارہ صحت کے ڈیٹا کے مطابق پاکستان کا شمار دنیا کے ان ممالک میں ہوتا ہے جہاں آبادی اور ہسپتال کے بستروں میں تناسب انتہائی کم ہے۔ ادارہ کی ویب سائٹ کے مطابق پاکستان میں ہر دس ہزار افراد کے لیے اوسطاً&nbsp; چھ بستر دستیاب ہیں۔ یہ شرح چین میں 43، سری لنکا میں 41، ایران میں 16 اور بنگلہ دیش میں آٹھ ہے جبکہ بھارت اور افغانستان میں پاکستان سے بھی کم یعنی بالترتیب پانچ اور چار ہے۔ ترقی یافتہ ممالک میں جاپان اور کوریا پہلے نمبر پر ہیں جہاں یہ شرح بالترتیب 130 اور 124 ہے۔

&nbsp;ضلعے میں شاہ کوٹ اور سانگلہ ہل میں تحصیل ہیڈ کوارٹر ہسپتالوں کے علاوہ پورے ضلعے میں صرف سات دیہی مراکز صحت اور 47 بنیادی مراکز صحت ہیں۔

شاہین غیور اپنے شہر میں صحت کی سہولیات کے فقدان سے تو انکار نہیں کرتے ہیں لیکن ان کا خیال ہے کہ اس ہسپتال میں کام کرنے والے ڈاکٹر اگر اپنے رویوں میں بہتری لے آئیں تو بھی بہت سے مسائل حل ہوسکتے ہیں۔

صداقت علی

ضلع ننکانہ صاحب سے تعلق تکھنے والےصداقت علی عوامی، سماجی، سیاسی اور دیگر مسائل پر لکھنے کا شوق رکھتے ہیں۔