&nbsp;ملتان کے مختلف تھانوں میں درج ہزاروں مقدمات گزشتہ چار برس سے عدالتوں کونہیں بھجوائے جاسکے۔ ان میں قتل، جنسی زیادتی ، منشیات، ڈکیتی، بوگس چیک، فراڈ ، امانت میں خیانت ،دھوکہ دہی ،اغوا، اقدام قتل، تشدد، چوری، غیر قانونی اسلحہ رکھنے اور دھمکیاں دینے سمیت کئی طرح کے مقدمے شامل ہیں۔

سابق چیف جسٹس آف افتخار چوہدری نے انصاف کی فوری فراہمی یقینی بنانے 2009ء میں جوڈیشل پالیسی نافذ کی تھی جس کے تحت مقدمات نمٹانے کے لیے ایک ٹائم فریم مقرر کرنے کے ساتھ ساتھ پولیس کو 14 روز میں مقدمات کا چالان عدالتوں میں پیش کرنے کا پابند کیا گیا تھا۔ مگر پولیس کی جانب سے ان احکامات پر عملدرآمد دیکھنے میں نہیں آیا۔

صوبے کے دیگر اضلاع کی طرح ملتان میں بھی مقدمات کی تعداد بڑھتی جارہی ہے جنہیں باقاعدہ سماعت کے لیے ٹرائل کورٹ میں فائل کی صورت میں بروقت نہیں بھیجا جا رہا۔

2019&nbsp; سے 2023ء تک ویمن کرائسز سنٹر سمیت ضلع ملتان کے 32تھانوں کے ساڑھے 33 ہزار سے زیادہ مقدموں کے چالان ملتان کی عدالتوں کو بھجوائے نہیں گئے۔

2019 کے 96 مقدمات کے چالان، 2020ءکے 337 ، 2021ءکے 2733 اور 2022ءکے 6370 چالان جمع نہیں ہوئے۔

رواں سال ساڑھے 35 ہزار ایف آئی آر درج کی گئیں۔ 10 ہزار 842 چالان عدالتوں کو بھجوائے گئے جبکہ 24 ہزار 323 چالان اب بھی سماعت شروع ہونے کے منتظر ہیں۔

&nbsp;ایسے مقدمات جن میں سات سال تک کی قید کی سزا ہوسکتی ہے ان کا عدالتوں نے چھ ماہ میں فیصلہ کرنا ہوتا ہے جبکہ سات سال سے زیادہ ، عمر قید یا موت کی سزا کے متوقع کیسز کا فیصلہ مختلف دائرہ کار کی عدالتوں نے ایک سال کے دوران لازمی کرنا ہوتا ہے۔

قانونی ماہرین پولیس کے فرسودہ طریقہ تفتیش، عدالتی احکامات پر عملدرآمد نہ کرنے کی روایت، فریقین کے غیر سنجیدہ طرزعمل اوربے جا مقدمہ بازی کے رحجان کو اس صورتحال کی بنیادی وجوہات شمار کرتے ہیں۔ علاوہ ازیں پراسیکیوشن، پولیس اور عدلیہ کے باہم کمزور ربط کو بھی اس کا نمایاں سبب بتایا جاتا ہے۔

ماہر قانون فرخ تیمور چانڈیو بلوچ کہتے ہیں کہ پولیس کی نفری میں اضافہ وقت کی اہم ضرورت ہے جس کے ساتھ اس کی استعداد کار بہتر بنانے کی بھی ضرورت ہے۔موجودہ نفری کے ساتھ نہ تو جرائم پر قابو پایا جا رہا ہے اور نہ ہی مقدمات نمٹائے جا رہے ہیں۔ نئے قوانین یا پرانے قوانین میں ترمیم کے لیے وکلا کو اعتماد میں لیا جانا چاہیے تاکہ ان کے تحفظات دور کیے جا سکیں۔

ڈسٹرکٹ بار ایسوسی ایشن ملتان کے سینئر قانون دان الطاف محمود قریشی کہتے ہیں کہ پولیس میرٹ پر تفتیش کرتے ہوئے زیر تفتیش مقدمات کے چالان بروقت مرتب کرے، سنگین نوعیت کے مقدمات کا جلد از جلدسراغ لگا کر ملزمان کو گرفتار کیا جائے اور ٹرائل کے لیے عدالت میں پیش کیا جائے تو اس صورتحال کا ازالہ ممکن ہے۔

ان کا کہنا ہے کہ پولیس افسر مقدمات کی تفتیش پر توجہ دیں اور میرٹ کو یقینی بنائیں اورتھانوں کے ریکارڈ کو مکمل کیا جائے تو مقدمات کے چالان بھیجنے میں تاخیر کی شکایت نہیں رہے گی۔

اس حوالے سے ملتان پولیس کے ترجمان وضاحت کرتے ہیں کہ محکمے کے اعلیٰ افسر اس مسئلے سے نمٹنے میں سنجیدہ ہیں۔سی پی او نے پولیس پراسیکیوشن کو بہتر بنانے، بروقت چالان عدالت میں جمع کرانے و دیگر قانونی امور کو احسن طریقے سے انجام دینے سے متعلق ہدایات جاری کر رکھی ہیں۔&nbsp;

اس کے علاوہ پولیس اور محکمہ پراسیکیوشن کے اجلاس میں بھی مقدمات کے اندراج اور تفتیش میں موجود کمزرویوں کو دور کر کے تفتیش کے معیار کو بہتر بنانے کی تجاویز دی گئی ہیں۔ سی پی او نے پولیس افسروں کو ہدایت کی ہے کہ پراسیکیوشن برانچ کے ساتھ بہتر ربط رکھیں اورزیرالتوا چالان بروقت عدالت میں جمع کرائیں۔

ماہر قانون میاں بلال ارشد کہتے ہیں کہ بعض کیسوں میں پولیس کی جانب سے نامکمل چالان جمع کرائے جاتے ہیں جو تاخیر کا سبب بنتے ہیں۔ اس ضمن میں پولیس اور محکمہ پراسیکیوشن کو ایک مشترکہ لائحہ عمل وضع کرنا چاہیے۔ پولیس کو بھی روایتی انداز ترک کر کے جدت اختیار کرنی چاہیے تاکہ ٹرائل کیس کی فائلیں جلد تیار ہوں اور تھانے کچہری کے دھکے کھانے والے سائلین کو بھی ریلیف ملے۔

اعلیٰ عدالتوں میں ججوں کی تقرریاں 'چیف جسٹس آف پاکستان کی ذاتی ترجیحات پر منحصر ہیں'۔

'انصاف میں تاخیر، انصاف سے انکار'، ملتان میں 33 ہزار مقدموں کے چالان 4 سال سے عدالتوں کے منتظر

text

ضلع ملتان میں خواتین اور بچوں کے ساتھ جنسی زیادتی کے مقدمات میں سزا کی شرح انتہائی کم ہے۔ رواں برس مئی، جون اور جولائی کے دوران شہر میں ریپ کے کسی ایک مقدمے میں بھی ملزموں کو سزا نہیں ہوئی۔

2022ء میں ریپ سے متعلق تعزیرات پاکستان کے سیکشن 376 کے تحت درج 353 مقدمات سماعت کے لیے ملتان کی مختلف عدالتوں میں پیش کیے گئے۔ ان میں سے 323 مقدموں میں 342 ملزم بری ہو گئے اور 30 مقدمات میں سزائیں سنائی گئیں۔ 14 افراد کو جرم ثابت ہونے پر عمر قید، 12 کو سات سال قید جبکہ چار کو تین تین سال کی قید کی سزا سنائی گئی۔

رواں برس جنوری میں سیکشن 376 کے تحت ریپ کے 30 مقدمات کا فیصلہ ملتان کی مقامی عدالتوں نے کیا۔ ان میں محض ایک ملزم کو عمر قید کی سزا سنائی گئی۔ دیگر 29 ملزم گواہوں کے منحرف ہونے اور/یا جرم ثابت نہ ہونے پر بری کر دیے گئے۔

فروری کے مہینے میں ایسے 29 مقدمات کا فیصلہ سنایا گیا جن میں دو ملزموں کو سزائے موت اور ایک لاکھ جرمانہ ہوا جبکہ ایک ملزم کو 14 سال قید اور 50 ہزار روپے جرمانے کی سزا سنائی گئی۔ دیگر 26 مقدموں میں ملزم بری ہو گئے۔

مارچ میں ایسے 20 مقدمات کا فیصلہ ہوا اور ایک مقدمے میں ایک ملزم کو عمر قید ہوئی۔ باقی 19 مقدمات میں 23 ملزموں کو رہائی مل گئی۔ اپریل میں 23 میں سے ایک مقدمے میں ایک ملزم کو عمر قید کی سزا ہوئی جبکہ 22 مقدمات میں ملزم بری ہو گئے۔ مئی میں تمام 24 مقدمات میں ملزم آزاد کر دیے گئے۔ جون میں کُل 28 مقدمات میں 29 ملزمان رہا ہوئے۔ اسی طرح جولائی میں بھی 13 مقدمات میں تمام ملزموں کو بری کر دیا گیا۔

ممبر پنجاب بار کونسل چوہدری داؤد احمد وینس بتایا کہ جنسی زیادتی کے مقدموں کے لیے خصوصی عدالتوں کا قیام عمل میں لایا گیا تھا البتہ کیس کی تفتیش کے لیے پولیس کا خصوصی سیل بھی قائم کیا جانا چاہیے۔

وہ کہتے ہیں کہ پراسیکیوشن کے نظام میں جدت لائی جائے اور ریپ کیسز کے ملزمان کو فوراً گرفتارکر کے اور ان کے فوری ٹرائل کرکے اینٹی ریپ ایکٹ پر عمل درآمد کرایا جائے تو ملزموں کو سزا دینا آسان ہو جائے گا۔

&quot;ریپ کیسز میں التوا سے ملزموں کو فائدہ پہنچ رہا ہے۔ طبی معائنے میں تاخیر سے بھی ملزموں کو ریلیف ملتا ہے۔&quot;

ڈپٹی ڈسٹرکٹ پبلک پراسیکیوٹر نذر حسین ٹانگرہ سمجھتے ہیں کہ کیس کی ابتدا میں شواہد اکھٹا کرنا انتہائی ضروری ہے۔

زیادتی کا شکار ہونے والا اگر کم عمر ہو تو بیان سے منحرف ہونا معنی نہیں رکھتا کیونکہ میڈیکل ایگزامینیشن اور ڈی این اے ٹیسٹ کی بنیاد پر ملزموں کو سزا ہو سکتی ہے۔ انہوں نے کہا کہ منحرف ہونے والے گواہوں کے خلاف ضابطہ فوجداری کے تحت کارروائی کی جا سکتی ہے۔ ان کے مطابق ملتان میں صنفی بنیاد پر تشدد کے مقدمات کو دیکھنے والی چار ماڈل عدالتیں بہترین نتائج دے رہی ہیں۔

ماہر قانون بلال شہباز خان بلوچ کہتے ہیں کہ ملزموں کے بری ہونے کی اہم وجوہات میں پولیس تفتیش میں نقائص ،گواہوں اور متاثرہ خواتین کا منحرف ہونا شامل ہیں۔ ملزموں کو سزا دلوانے کے لیے متاثرہ فریق کا اپنے بیان پر قائم رہنا ضروری ہے۔

اجتماعی زیادتی کے مقدمات میں سزائیں تو کڑی ہیں لیکن ٹھوس شواہد نہ ہونے پر زیادتی اور بدفعلی کے مقدمات میں ملزم بری ہوجاتے ہیں۔ ایسے مقدمات کے بارے میں عام طور پر یہ سمجھا جاتا ہے کہ انصاف کے تقاضے پورے نہیں ہوئے ۔&quot;

وہ کہتے ہیں کہ ایسے مقدمات میں میڈیکل رپورٹ بھی بہت اہم ہوتی ہے جس میں تاخیر یا غلطیوں سے مجرم سزا سے بچ سکتے ہیں۔ ملزموں کی گرفتاری میں التوا کے بعد عدالتوں سے انہیں ریلیف ملنا بھی عام ہے۔

انہوں نے مزید کہا کہ اینٹی ریپ آرڈیننس 2020ء میں آیا جس کے بعد سخت اور فوری فیصلوں کو متعارف کرایا گیا اور صنفی بنیاد پر تشدد کے خلاف ماڈل عدالتیں قائم کی گئیں۔ اگر بروقت فرانزک اور ڈی این اے ٹیسٹ یقینی بنایا جائے تو متاثرین کو جلد انصاف فراہم کیا جا سکے گا۔ تاہم ایسے واقعات فوری رپورٹ ہونا اور ان پر پولیس کی غیرجانبدارانہ تفتیش بھی ضروری ہے۔

موقوف ہے کیوں حشر پہ انصاف ہمارا: جنسی زیادتی کے ملزمان سزا سے کیسے بچ جاتے ہیں؟

ملتان میں جنسی زیادتی کے مقدمات میں ملزموں کی اکثریت بری کیوں ہو جاتی ہے؟

ملتان کے علاقے باقر آباد میں ایک دو منزلہ عمارت پر کسی بھوت بنگلے کا گمان ہوتا ہے۔ اس کے دروازے اور کھڑکیاں ٹوٹی ہوئی ہیں، جگہ جگہ گندگی کے ڈھیر لگے ہیں، اندھیرے کمروں کی شکستہ دیواریں اور چھتیں مکڑی کے جالوں سے اٹی ہیں۔

آوارہ کتوں اور نشے کے عادی افراد کے علاوہ کوئی اس عمارت میں آتا جاتا دکھائی نہیں دیتا۔

پچھلے سولہ سال سے اسی حالت میں نظر آنے والی یہ عمارت دراصل ایک مدرسے کی ہے جہاں ایک ماڈل مدرسہ قائم کیا جانا تھا۔

یہ منصوبہ وفاقی حکومت نے 07-2006ء میں شروع کیا تھا جس کے تحت ملتان، بہاولپور، پاکپتن، لاہور اور گوجرانوالہ میں پانچ ماڈل مدرسوں کی تعمیر کے لیے آٹھ کروڑ 45 لاکھ روپے مختص کیے گئے۔ پرویز مشرف کے دور اقتدار میں تب پاکستان دہشت گردی کے خلاف جنگ میں شریک اور دہشت گردوں کے حملوں کا شکار تھا۔

اس منصوبے کا مقصد مدارس کے طلبہ کو دور حاضر کے تقاضوں سے ہم آہنگ سائنسی اور مذہبی تعلیم فراہم کرنا اور انہیں یونیورسٹیوں میں اعلیٰ تعلیم کے حصول کے قابل بنانا تھا۔

تین کنال 15 مرلے پر ماڈل مدرسے کی تعمیر کے لیے ایک کروڑ 66 لاکھ روپے مختص کیے گئے۔

عمارت تو وقت پر بن گئی مگر اسی دوران حکومت چلی گئی جس کے بعد منصوبے کے لیے مزید فنڈ جاری نہ ہو سکے۔

اس عمارت میں 22 کلاس روم، پرنسپل کا دفتر آفس اور اساتذہ کے لیے کمرے بنائے گئے تھے۔

مدرسے کے قریبی علاقے شاہ رکن عالم میں رہنے والے محمد زاہد خالد بتاتے ہیں کہ تعمیر کے تقریباً سات سال بعد 2014ء میں یہاں تدریسی سلسلہ شروع ہوا جو ایک تنازعے کے باعث چند روز بعد ہی ختم ہو گیا۔

یہ معاملہ کچھ یوں تھا کہ 2014ء میں ماڈل مدرسے کے قریب بچیوں کے ایک مدرسے کی انتظامیہ نے اس کے احاطے کو کچھ دن استعمال کے لیے حاصل کیا لیکن مقررہ وقت پر خالی نہ کیا۔

اس وقت عدالتوں میں محکمہ اوقاف کی نمائندگی کرنے والے وکیل محمد شہزاد حسین جعفری نے لوک سجاگ کو بتایا کہ ماڈل مدرسے&nbsp; کی عمارت پر قبضہ کر کے درس گاہ بنا لی گئی۔

&quot;جب محکمہ اوقاف نے اسے خالی کرانے کی کوشش کی تو بچیوں کے مدرسے کی انتظامیہ نے مبینہ طور پر بااثر لوگوں کی سرپرستی میں مزاحمت کی۔ لیکن بالاآخر محکمہ اسےخالی کرانے میں کامیاب ہو گیا&quot;۔

محکمہ اوقاف کے ریکارڈ کے مطابق 2014ء میں خالی عمارت کو طبی یا تعلیمی مقاصد کے لیے بذریعہ نیلامی لیز پر دینے کا فیصلہ ہوا۔ اس کے لیے محکمے نے 50 لاکھ روپے کی ناقابل واپسی گُڈ وِل رقم ادا کرنے اور ایک لاکھ روپے ماہانہ کرایہ دینے کی شرط رکھی۔ تاہم مقامی شہری اور علاقہ مکینوں کی تنظیم کے عہدیدار راؤ محمد عمر حیات نے نیلامی کے معاملے پر عدالت سےسٹے آرڈر لے لیا۔

انہوں نے اسی برس لاہور ہائیکورٹ ملتان بینچ میں درخواست دی کہ یہ جگہ باقر آباد عید گاہ کے نام ہے جسے محکمہ اوقاف نے ماڈل مدرسے کے لیے استعمال کیا ہے۔ اب اسے لیز کے لیے نیلام کیا جا رہا ہے جو غیر قانونی ہے۔

تاہم دو سال کی عدالتی لڑائی کے بعد 15 دسمبر 2016ء کو پیٹشنر نے یہ کیس واپس لے لیا۔

رواں برس محکمہ اوقاف ملتان نے ڈائریکٹر سٹیٹ اوقاف کو ایک سمری بھجوائی جس میں اس عمارت کی زبوں حالی پر تشویش کا اظہار کیا گیا ہے۔

اس میں تجویز دی گئی ہے کہ طبی اور تعلیمی سرگرمیوں کی اجازت دے کر اس عمارت کو فعال کیا جا سکتا جس کے لیے اسے لیز پر دے دیا جائے۔

لیز کی نیلامی کے لیے ناقابل واپسی رقم کو گھٹا کر 20 لاکھ روپے جبکہ کرایہ ایک لاکھ 20 ہزار روپے ماہانہ تجویز کیا گیا ہے۔

محکمہ تعلیم یا اساتذہ: چاغی میں بند پڑے سکولوں کا ذمہ دار کون ہے؟

سمری میں یہ بھی کہا گیا ہے کہ عمارت کو لیز پر لینے والا فریق اس کی مرمت بھی کروائے گا۔ اس میں اعتراف کیا گیا ہے مدرسہ چلانے کے لیے محکمے کے پاس مطلوبہ مالی وسائل موجود نہیں ہیں۔

محکمہ اوقاف کے ڈسٹرکٹ منیجر سید ایاز الحسن گیلانی نے لوک سجاگ کو بتایا کہ انہوں ںے اس عمارت کو ہسپتال یا تعلیمی سرگرمیوں کے لیےاستعمال کرنے کی درخواست اعلیٰ حکام کو دی گئی تھی لیکن جواب ملا کہ اسے بطور ماڈل مدرسہ ہی بحال کیا جائے گا۔

&quot;مسئلہ یہ ہے کہ اگر اسے کسی اور مقصد کے لیے استعمال کرنے کی کوشش کرتے ہیں تو بعض شہریوں کو اعتراض ہوتا ہے۔ پہلے بھی یہ کیس عدالت میں زیر سماعت رہا۔عمارت فعال نہ ہونے سے قومی خزانے کو نقصان پہنچ رہا ہے۔ ہم چاہتے ہیں کہ اسے بحال کر کے عوامی بھلائی کے لیے کام میں لایا جائے۔&quot;

راؤ محمد عمر حیات کے وکیل مہر محمد رمضان سیال کہتے ہیں کہ بھاری اخراجات سے تیار ہونے والی یہ عمارت محکمہ اوقاف کی جھولی میں ڈال دی گئی ہے جس کی نااہلی کے باعث عمارت کھنڈر بنتی جا رہی ہے۔ ان کا کہنا ہے کہ یہ عمارت جس مقصد کے لیے بنائی گئی تھی اسے اسی کے تحت فعال کرنا چاہیے۔

نیو ملتان کے محمد شیراز افضل اس صورتحال پر افسوس کا اظہار کرتے ہوئے کہتے ہیں کہ وہ اپنے دونوں بیٹوں کو جدید اور دینی تعلیم ایک ساتھ دینے کے لیے اس ماڈل مدرسے میں داخل کرانا چاہتے تھے مگر ان کی یہ خواہش پوری نہیں ہو سکی۔

ان کا کہنا ہے کہ اگر یہ مدرسہ بن جاتا تو اس سے دینی مدارس کو وقت کے تقاضوں کے مطابق جدید خطوط پر استوار کرنے کی راہ ہموار ہو سکتی تھی۔

ملتان میں ماڈل مدرسے کے قیام کی بیل منڈھے نہ چڑھ سکی، عمارت میں آوارہ کتوں اور نشیئوں کے ڈیرے

ملتان میں بلین ٹری سونامی منصوبے کے تحت شجرکاری کی مہم طویل عرصہ سے معطل ہے۔ لاکھوں پودے دیکھ بھال نہ ہونے کے باعث خراب ہو چکے ہیں اور درختوں کو غیرقانونی طور پر متواتر کاٹے جانے سے رہے سہے جنگلات کی بقا خطرے سے دوچار ہے۔

محکمہ جنگلات ملتان ڈویژن نے پچھلے پانچ سال میں آٹھ کروڑ 45 لاکھ سے زیادہ اور اس کے جنوبی زون نے دو کروڑ 42 لاکھ سے زیادہ پودے اگائے تھے۔ یہ پودے نہروں کے کناروں، عباسیہ، چیچہ وطنی، پیرووال اور ڈیرہ غازیخان کے جنگلات، ولہار صادق آباد اور لال سہانرہ پارک سمیت بہت سی جگہوں پر اگائے گئے جن میں سے بیشتر کو بڑھنے کا موقع نہیں مل سکا۔

ڈویژنل فاریسٹ آفیسر راشد محمود تصدیق کرتے ہیں کہ ملتان اور گردونواح میں درختوں کی تعداد تیزی سے کم ہو رہی ہے جس سے موسم اور ماحول براہ راست متاثر ہو رہے ہیں۔

جنگلات کے رقبے میں متواتر کمی کے باعث پچھلے چند سال سے ملتان اور گردونواح کا اوسط درجہ حرارت بڑھ رہا ہے۔

اِس سال یکم جولائی کو ملتان کا درجہ حرارت 45 ڈگری سینٹی گریڈ رہا۔ 2022ء میں اسی روز درجہ حرارت 43 ڈگری اور 2021ء میں 44 ڈگری ریکارڈ کیا گیا تھا۔

محکمے کے چند اہلکاروں نے نام ظاہر نہ کرنے کی درخواست کرتے ہوئے بتایا کہ پچھلے پانچ سال میں شجرکاری مہمات کے تحت لگائے گئے بہت سے پودے درخت بننے سے پہلے ہی ختم ہو گئے ہیں۔ اس کی ایک بڑی وجہ محکمے کے پاس فنڈ کی کمی ہے۔

پنجاب میں نگران حکومت قائم ہونے کے بعد ترقیاتی فنڈ کی فراہمی بند کر دی گئی تھی جس سے محکمہ جنگلات بھی متاثر ہوا ہے۔

دسمبر 2022ء سے محکمے کو بلین ٹری سونامی منصوبے کے تحت شجرکاری اور پودوں کی دیکھ بھال کے لیے مالی وسائل مہیا نہیں کیے گئے۔ جون 2023ء میں اس سلسلے میں 68 لاکھ روپے کی سپلیمنٹری گراںٹ جاری کی گئی تھی لیکن فنڈز استعمال نہیں کیے جا سکے۔

اس وقت محکمے میں پانچ ہزار کے قریب دیہاڑی دار ملازمین کو پچھلے ایک ماہ کی تنخواہ کی مد میں 12 لاکھ روپے ادا کیے جانا ہیں جس کے لیے وسائل نہیں ہیں۔

ان ملازمین میں محکمے کی نرسیوں میں پودوں کی دیکھ بھال کرنے والے مالی اور جنگلات کی حفاظت پر مامور عملہ شامل ہے۔

عملے کو تنخواہیں نہ ملنے سے پودوں اور جنگلات کی حفاظت کا کام متاثر ہوا ہے اور لکڑی چوری کے واقعات بڑھ گئے ہیں۔

پچھلے پانچ سال میں محکمے نے لکڑی چوروں کے خلاف 200 مقدمات درج کرائے اور ملزموں کو 21 لاکھ روپے سے زیادہ جرمانہ کیا گیا۔ ان مقدمات میں مجموعی طور پر ایک کروڑ 80 لاکھ روپے سے زیادہ مالیت کی لکڑی چوری ظاہر کی گئی تھی۔

محکمہ جنگلات کے رینج فاریسٹ آفیسر محمد رفیق ( فرضی نام) ںے اپنا نام ظاہر نہ کرنے کا کہتے ہوئے بتایا کہ پچھلے چند سال میں لگائے جانے والے نئے پودے نظر نہ آنے کی بڑی وجہ ان کی بڑھتی ہوئی چوری ہے۔ محکمہ جنگلات میں قانونی کارروائی کا نظام بہت ناقص ہے اور لکڑی چوروں کو قانونی شکنجے میں لانے کے لیے موثر اقدامات نہیں اٹھائے جاتے۔

انہوں نے بتایا کہ ایک فاریسٹ گارڈ کے پاس اوسطاً دو ہزار ایکڑ پر مشتمل جنگلات اور 150 سے 400 کلومیٹر لمبی نہروں اور سڑکوں کے کنارے درختوں کی حفاظت کی ذمہ داری ہے۔

&quot;ان ملازمین کے لیے اتنے بڑے رقبے کی حفاظت کرنا ممکن ہی نہیں اور دوسری بات یہ کہ جس ملازم کو تنخواہ نہیں ملے گی وہ اپنا کام دلچسپی اور دلجمعی سے کیسے کر سکتا ہے؟&quot;

محکمہ جنگلات ملتان ڈویژن کے پاس کُل 65 فاریسٹ گارڈ ہیں جو بغیر اسلحے کے ڈیوٹی دیتے ہیں جبکہ اس عہدے پر 25 اسامیاں خالی ہیں۔

ایک اہلکار نے بتایا کہ فاریسٹ گارڈ کے مقابلے میں لکڑی چوروں کے پاس جدید اسلحہ اور جدید طرز کی مشینری اور آرے ہوتے ہیں جن کی مدد سے ان کے لیے لکڑی چوری کرنا کوئی مشکل کام نہیں اور محکمے کے لیے ان پر ہاتھ ڈالنا بھی آسان نہیں ہوتا۔

دوسری جانب راشد محمود کا دعویٰ ہے کہ لکڑی چوری میں جو بھی ملوث ہو اس کے خلاف بلاامتیاز کارروائی کی جاتی ہے۔

تاہم محکمہ جنگلات کے ڈپٹی سیکرٹری ٹیکنیکل ڈاکٹر خرم اس بات کو تسلیم نہیں کرتے کہ گزشتہ شجرکاری مہمات میں لگائے جانے والے نئے پودے پروان نہیں چڑھ سکے۔

ان کا کہنا ہے کہ 95 فیصد نئے پودے پھل پھول رہے ہیں جس کی تصدیق انٹرنیشنل یونین فار کنزرویشن آف نیچر کی ٹیم نے دسمبر 2022ء میں ملتان کے دورے میں کی تھی۔

یہ دورہ ٹین بلین ٹری سونامی کے منصوبے کی شفافیت جانچنے کے عمل کا حصۃ تھا۔ ڈاکٹر خرم کے مطابق ٹیم نے جنگلات کی سیٹلائٹ کے ذریعے تصاویر لیں اور پھر مختلف جگہ کے دورے کرنے کے بعد بتایا تھا کہ شجرکاری مہم کامیاب رہی ہے۔

ماہر ماحولیات ڈاکٹر احسن خان ترین کا کہنا ہے کہ تیزی سے بڑھتی آبادی کے نتیجے میں لکڑی کی ضرورت بھی بڑھ رہی ہے جس کا لکڑی چوری کے رحجان سے گہرا تعلق ہے۔ اس کے علاوہ رہائشی منصوبوں کی تعمیر کے لیے بڑے پیمانے پر سبز رقبے کو ختم کیا جا رہا ہے لیکن اس کی جگہ نئے درخت نہیں اگائے جا رہے۔ ان حالات میں ماحولی نظام بری طرح متاثر ہوا ہے اور گرمی کی شدت بڑھتی جا رہی ہے۔

ڈاکٹر احسن کہتے ہیں کہ اگر منظم انداز میں بڑے پیمانے پر شجرکاری اور درختوں کی حفاظت کے انتظامات نہ کیے گئے تو چند ہی دہائیوں میں یہ علاقہ انسانی رہائش کے لیے موزوں نہیں رہے گا۔

*رازداری کے تحفظ کے لئے نام تبدیل کر دیئے گئے ہیں۔

شجر گرا تو پرندے تمام شب روئے:'نارووال اور گردونواح کے جنگلاتی رقبے میں کمی آنے سے جانور اور پرندے بھی ختم ہو رہے ہیں'

'خاک اڑتی ہے چار سُو اے دوست'، ملتان میں شجرکاری مہم معطل، جنگلات کا رقبہ تیزی سے کم ہونے لگا

سوشل میڈیا پر اپنی ویڈیوز سے شہرت حاصل کرنے والی ماڈل قندیل بلوچ کے قتل کو سات سال گزر گئے ہیں لیکن ان کا مقدمہ تاحال انجام کو نہیں پہنچ سکا۔

قندیل بلوچ کو 15 اور 16 جولائی 2016 کی درمیانی شب ملتان کے علاقے مظفرآباد میں ان کے گھر میں گلا گھونٹ کر قتل کر دیا تھا۔

اس قتل کا الزام قندیل کے بھائی وسیم اور پانچ دیگر ملزموں پر عائد کیا گیا۔ وسیم نے ناصرف اس قتل کا میڈیا کے سامنے اعتراف کیا بلکہ علاقہ مجسٹریٹ کے سامنے اپنا بیان بھی ریکارڈ کرایا تھا کہ اس نے غیرت کے نام پر اپنی بہن کو قتل کیا ہے۔

علاقہ مجسٹریٹ کی عدالت سے شروع ہونے والا یہ کیس سیشن کورٹ کے بعد ہائیکورٹ تک چلا اور اب اس کی اپیل سپریم کورٹ میں زیر سماعت ہے۔

قتل کے اس مقدمے کی پہلی سماعت 24 اکتوبر 2016ء کو ہوئی تھی اور 27 ستمبر 2019ء کو ملتان کی سیشن کورٹ نے محمد وسیم کو تمام گواہوں اور ثبوتوں کی روشنی میں جرم ثابت ہونے پر عمر قید کی سزا سنائی۔ وسیم نے اپنے والدین کی جانب سے راضی نامی بھی عدالت میں پیش کیا جسے عدالت نے مسترد کر دیا۔

عدالت نے ٹرائل کیس میں قندیل بلوچ کے بھائی اسلم شاہین، مفتی عبدالقوی، حق نواز، عبدالباسط اور محمد ظفر حسین کو عدم شواہد کی بنیاد پر بری کردیا تھا۔

سعودی عرب میں مقیم قندیل کے تیسرے بھائی محمد عارف کو عدالت پیش نہ ہونے پر اشتہاری قرار دیا گیا۔

ان کی گرفتاری انٹرپول کے ذریعے عمل میں آئی اور سیشن کورٹ میں ٹرائل کے بعد انہیں بھی بری کر دیا گیا۔

یہ مقدمہ دو سال 11 ماہ اور تین دن زیر سماعت رہا۔ اس دوران پانچ ججوں نے یہ کیس سنا اور 146ویں سماعت میں فیصلہ سنایا گیا۔ مقدمے کی سماعت تقریباً 30 مرتبہ وکلا اور گواہوں کی عدم موجودگی کے باعث ملتوی ہوئی۔

مرکزی ملزم وسیم نے اپنے والدین کے ساتھ راضی نامے کی بنیاد پر لاہور ہائی کورٹ کے ملتان بینچ میں میں سزا کے خلاف اپیل کی۔ چودہ فروری 2022ء کو ملتان بینچ نے اس راضی نامے اور ملزم کے اعتراف جرم پر مبنی بیان میں قانونی نقائص کو بنیاد بناتے ہوئے اسے بری کر دیا تھا۔

لاہور ہائیکورٹ ملتان بنچ میں تعینات ایڈیشنل پبلک پراسیکیوٹر محمد عبدالودود کہتے ہیں کہ ملزم وسیم کو جن وجوہات کی بناءپر ہائی کورٹ نے بری کیا وہ حیران کن ہیں۔

ہائی کورٹ نے والدین کی جانب سے وسیم کو معاف کرنے کی بنیاد پر انہیں بری کیا گیا تھا لیکن عدالت میں کوئی نیا راضی نامہ جمع نہیں کروایا گیا اور یہ وہی راضی نامہ تھا جسے سیشن کورٹ نےمسترد کر دیا تھا۔

قندیل بلوچ کے والد محمد عظیم ماہڑہ اس اپیل کے فیصلے سے قبل ہی وفات پا گئے تھے۔ اس طرح قندیل کے بری ہونے والے دوسرے بھائی حق نواز ان کے وارث ٹھہرے لیکن ان کی جانب سے بھی راضی نامے کا کوئی بیان عدالت میں جمع نہیں کرایا گیا۔

انہی باتوں کو مدنظر رکھتے ہوئے 19 فروری 2022 کو پراسیکیوٹر جنرل پنجاب کو رائے بھجوائی گئی جس کی بنیاد پر اس فیصلے کے خلاف سپریم کورٹ میں اپیل دائر کی گئی۔

ماہر قانون ثنا اقرار کے مطابق ہائی کورٹ نے اس بات کو نظر انداز کیا کہ ٹرائل کورٹ نے راضی نامے کے بیان کو مسترد کرکے ملزم وسیم کو تعزیراتِ پاکستان کی دفعہ 311 (فساد فی الارض) کے تحت سزا سنائی تھی۔ ہائیکورٹ اس کیس کو 311 سے 302 یعنی (قتل عمد) میں بدل سکتی تھی۔

ابتدائی ایام میں اس مقدمے کی پیروی کرنے والی وکیل ثمرہ بلوچ کے مطابق کیس میں بیسیوں گواہوں کی شہادتیں قلمبند کی گئیں۔ حتٰی کے ملزم محمد وسیم کا اعتراف جرم کا بیان ریکارڈ کرنے والے جوڈیشل مجسٹریٹ محمد سرفراز انجم نے بھی حلفیہ بیان میں تمام پس منظر سیشن عدالت کے روبرو بطور گواہ پیش کیا۔

&quot;ہائی کورٹ نے اس نکتے پر اعتراض اٹھایا کہ ملزم کو اعتراف جرم کے بعد پولیس کی تحویل میں دینے کی بجائے جیل بھجوایا جانا چاہیے تھا جبکہ سپریم کورٹ کا ایک فیصلہ بھی ثابت کرتا ہے کہ اعتراف جرم کے بعد ملزم کو پولیس تحویل میں دینا اقبالی بیان کے رضاکارانہ ہونے کے خلاف ثبوت نہیں ہوسکتا&quot;۔

قندیل بلوچ کو پاکستان کی پہلی سوشل میڈیا سیلیبرٹی بھی کہا جاتا ہے۔ ان کا تعلق جنوبی پنجاب کے ضلع ملتان کے ایک غریب خاندان سے تھا۔ان کا اصل نام فوزیہ عظیم تھا۔ انہوں نے سوشل میڈیا پر اپنے بے باک انداز کی وجہ سے شہرت پائی اور یہی بعد میں ان کی قتل کا سبب بنی۔

قندیل بلوچ کے قتل کے بعد اکتوبر 2016 میں پارلیمنٹ نے غیرت کے نام پر قتل سے متعلق قانون میں ترمیم کی جس کے تحت مقتول کے لواحقین کی جانب سے معاف کیے جانے کے باوجود قاتل کو عمر قید کی سزا ہو گی۔

اس سے پہلے غیرت کے نام پر قتل کے زیادہ تر مقدمات میں مقتول کے ماں باپ یا بہن بھائی مقدمے کے مدعی بن کر قاتل کو معاف کر دیتے تھے اور اس طرح ملزم بری ہو جاتے تھے۔

ملزم وسیم کی بریت کے خلاف سپریم کورٹ میں دائر کی جانے والی اپیل میں یہ نکتہ اٹھایا گیا ہے کہ ہائی کورٹ نے اپنے فیصلے میں حقائق کا درست انداز میں جائزہ نہیں لیا اس لیے عدالت عمر قید کی سزا کو بحال کرے۔

غیرت کے نام پر قتل: 'جب تک معاشرہ ایسے جرائم کی حوصلہ شکنی نہیں کرے گا تب تک یہ واقعات ہوتے رہیں گے'

قندیل بلوچ کے قتل کے مقدمے کا عدالتی سفر سات سال میں بھی ختم نہ ہو سکا

ملتان میں شجاع آباد روڈ کے علاقے میں رہنے والے محمد آصف کو ایک فیملی کیس کے سلسلے میں اکثر ضلع کچہری آنا ہوتا ہے۔ یہاں انہیں اپنے مقدمے اور اس سے متعلقہ مسائل پر اتنی کوفت نہیں ہوتی جتنی پارکنگ کی جگہ نہ ہونے سے اٹھانا پڑتی ہے۔

کچہری کا پارکنگ سٹینڈ اس کے سامنے سے گزرتی دو رویہ سڑک پر ایک فلائی اوور کے نیچے قائم ہے۔ یہاں جگہ بہت کم ہے جس کی وجہ سے وکیل اور سائل اپنی گاڑیاں سڑک پر ہی کھڑی کر دیتے ہیں جس سے ٹریفک جام ہو جاتی ہے۔

ضلع کچہری میں سول و سیشن عدالتوں کے ساتھ بڑی تعداد میں وکلا کے چیمبر واقع ہیں۔ اس کے علاوہ ڈپٹی کمشنر، ایڈیشنل ڈپٹی کمشنر، اسسٹنٹ کمشنر، کالونی برانچ، جنرل برانچ ، بہبود فنڈ اور ڈسٹرکٹ اکاؤنٹس کے دفاتر بھی یہیں قائم ہیں۔

مقدمات کی سماعت اور محکمانہ امور نپٹانے کے لیے ہزاروں لوگ اس جگہ آتے ہیں۔ یہاں سے دو سڑکیں شہر کے گنجان مرکزی حصے کی جانب جاتی ہیں۔ کچہری کے مغرب میں خواتین یونیورسٹی اور جنوب میں گورنمٹ سول لائنز کالج واقع ہے جبکہ پولیس لائنز بھی یہاں سے قریب ہے۔ طلبہ اور عملے کے جانے آنے کے اوقات میں سڑک پر ٹریفک بہت زیادہ ہو جاتی ہے اور غلط پارکنگ کے باعث گزرنے کی جگہ نہیں رہتی۔

کچہری کے پارکنگ سٹینڈ میں تقریباً 95 گاڑیاں کھڑی کرنےکی گنجائش ہے۔ اسی طرح موٹر سائیکلوں کے لیے مخصوص جگہ پر بارہ سے تیرہ سو تک موٹر سائیکلیں کھڑی کی جا سکتی ہیں جبکہ یہاں آنے والی گاڑیوں اور موٹر سائیکلوں کی تعداد اس سے کہیں زیادہ ہے۔

اس پارکنگ سٹینڈ کا انتظام ڈسٹرکٹ بار ایسوسی ایشن کے ہاتھ میں ہے۔ گزشتہ سال اس سٹینڈ کا ٹھیکہ دو کروڑ تین لاکھ روپے میں جبکہ 2021ء میں دو کروڑ 10 ہزار روپے میں نیلام ہوا تھا۔

یہاں کار پارک کرنے کے لیے 50 روپے کا ٹوکن لینا پڑتا ہے اور موٹر سائیکل کھڑی کرنے کی فیس 30 روپے ہے۔ سرکاری نرخ نامے کے مطابق یہ فیس بالترتیب 30 اور 20 روپے ہونی چاہیے۔

سرکاری نرخ سے زیادہ فیس وصول کئے جانے اور کروڑوں روپے آمدنی کے باوجود اس پارکنگ سٹینڈ میں گاڑیوں کی حفاظت کا مناسب بندوبست نہیں ہے جس کی وجہ سے چوری کے واقعات تواتر سے پیش آتے رہتے ہیں۔ پچھلے ایک سال کے دوران کاروں اور موٹرسائیکلوں کی چوری کی آٹھ ایف آئی آر درج کرائی گئی ہیں۔

سائیکل سٹینڈ کی آمدنی کے بارے میں میونسپل کارپوریشن کے ایک افسر نے اپنا نام مخفی رکھنے کی شرط پر بتایا کہ کنٹونمنٹ اور ضلع کچہری سمیت ملتان کے تمام پارکنگ سٹینڈ میونسپل کارپوریشن کے پاس ہیں اور ان کے ٹھیکوں سے موصول ہونے والی رقم بھی قومی خزانے میں جاتی ہے۔ لیکن کچہری کے فلائی اوور کے نیچے والا پارکنگ سٹینڈ کارپوریشن کے بجائے بار ایسوسی ایشن کے زیرانتظام چل رہا ہے جس کی رقم بھی سرکار کو نہیں دی جاتی۔

&quot;محکمے کے اعلیٰ افسروں نے ضلعی انتظامیہ کو متعدد بار ضلع کچہری کا پارکنگ سٹینڈ واگزار کرانے اور اس سے حاصل ہونے والی رقم قومی خزانے میں جمع کرانے کے لیے کہا لیکن جواب میں ہمیشہ یہی بتایا گیا کہ یہ وکلا کا معاملہ ہے اس لیے دور رہنا ہی بہتر ہے۔&quot;

ڈسٹرکٹ بار ایسوسی ایشن ملتان کے سیکرٹری سید علی الطاف گیلانی کہتے ہیں کہ بار کو یہ پارکنگ سٹینڈ 2008 میں اس وقت کی حکومت نے دیا تھا اور اس سے حاصل ہونے والی رقم وکلا کی بہبود پر خرچ ہوتی ہے۔

ٹریفک کے مسئلے کی بابت ان کا کہنا تھا کہ پہلے وکلا کی گاڑیاں تعداد میں کم ہونے کی وجہ سے کچہری کے اندر ہی پارک ہو جاتی تھیں۔ گاڑیوں کی تعداد میں اضافہ ہونے اور وکیلوں کے چیمبر کی تعمیر کے بعد یہاں جگہ کم پڑ گئی ہے۔

پارکنگ سٹینڈ کے مسئلے پر ضلعی انتظامیہ کے ترجمان وسیم یوسف سے بات کی گئی تو انہوں نے بتایا کہ وکلا کو پارکنگ کی متبادل جگہ فراہم کرنے کے لئے بار کے عہدیداروں اور انتظامی افسروں سے مشاورت جاری ہے اور اس سلسلے میں کچہری کے اندر ایک عارضی پارکنگ سٹینڈ بھی بنا دیا گیا ہے۔

ٹریفک کے مسئلے پر قابو پانے کے لئے حکومت پنجاب اور لاہور ہائی کورٹ کے چیف جسٹس کے احکامات پر کچہری کی عمارت کے اندر چار منزلہ پارکنگ سٹینڈ بھی تعمیر کیا جا رہا ہے جو تین سال میں دستیاب ہو گا۔

فلائی اوور کے نیچے پارکنگ سٹینڈ کے باعث پیدا ہونے والے ٹریفک مسائل کے بارے میں ٹریفک پولیس آفس کا موقف لینے کے لئے اس کے ترجمان محمد عدنان سے رابطہ کیا گیا تو ان کا بھی یہی کہنا تھا کہ &quot;یہ وکیلوں کا معاملہ ہے اور ہم اس معاملے میں نہیں پڑنا چاہتے۔&quot;

حسیب اعوان

حسیب اعوان ملتان کے نوجوان صحافی ہیں۔ گزشتہ چھ برسوں سے الیکٹرانک اور پرنٹ میڈیا میں کام کر رہے ہیں۔ مختلف قومی اخبارات اور چینلوں سے منسلک رہے ہیں۔

'انصاف میں تاخیر، انصاف سے انکار'، ملتان میں 33 ہزار مقدموں کے چالان 4 سال سے عدالتوں کے منتظر

ملتان میں جنسی زیادتی کے مقدمات میں ملزموں کی اکثریت بری کیوں ہو جاتی ہے؟

ملتان میں ماڈل مدرسے کے قیام کی بیل منڈھے نہ چڑھ سکی، عمارت میں آوارہ کتوں اور نشیئوں کے ڈیرے

'خاک اڑتی ہے چار سُو اے دوست'، ملتان میں شجرکاری مہم معطل، جنگلات کا رقبہ تیزی سے کم ہونے لگا

قندیل بلوچ کے قتل کے مقدمے کا عدالتی سفر سات سال میں بھی ختم نہ ہو سکا

ملتان کچہری پارکنگ سٹینڈ کا تنازعہ: ' یہ وکیلوں کا معاملہ ہے اور ہم اس میں نہیں پڑنا چاہتے’

Lok Sujag