Discover the factors contributing to the decline in migratory bird movement in Pakistan, from habitat loss to climate change. Explore the conservation challenges facing these birds and their

Exploring the Decline in Migratory Bird Movement in Pakistan: Environmental Factors and Conservation Challenges

مائی سرور چشمہ بیراج کی جھیل کنارے جال بُن رہی ہیں۔ ان کے شوہر اللہ دتہ یہاں سے مچھلیاں پکڑ کر بیچتے ہیں اور وہ مختلف کاموں میں ان کا ہاتھ بٹاتی ہیں۔ اس طرح دونوں مل جل کر&nbsp; اپنا گھر چلاتے ہیں۔

ستر سالہ مائی سرور اپنی عمر سے کہیں زیادہ بوڑھی دکھائی دیتی ہیں۔ ان کا گھر جھیل کے پاس گاؤں میں واقع ہے۔ وہ بتاتی ہیں کہ سردیوں میں یہاں نت نئے پرندوں کے غول کے غول اترتے ہیں جن کی بولیاں بہت بھلی لگتی ہیں۔

&quot;مگر اب اس جھیل پر پہلے جیسی رونق نہیں رہی۔ لگتا ہے بہت سے پرندوں نے یا تو آنا چھوڑ دیا ہے یا شاید ان کی نسل ہی ختم ہو گئی ہے۔&quot;

انہوں نے بتایا کہ ماگھ اور پھاگن (جنوری، فروری) میں انہوں نے با اثر لوگوں کو کئی بار یہاں مسافر پرندوں کا شکار کرتے دیکھا ہے۔

&quot;میں بینائی کم ہونے کی وجہ سے پرندوں کو دیکھ تو نہیں سکتی البتہ ان کی آوازوں سے ان کی تعداد کا اندازہ لگاتی ہوں۔ شاید شکاریوں کے خوف سے انہوں نے گانا چھوڑ دیا ہو۔ کاش!کوئی لوگوں کو پرندوں کا شکار کرنے سے باز رکھ سکتا۔&quot;

روس کے سرد علاقوں، وسطی ایشیا اور سائبیریا سے لاکھوں پرندے وہاں شدید سردیوں کی آمد سے قبل ستمبر اکتوبر میں دنیا کے گرم خطوں کی طرف نقل مکانی مکانی کرتے ہیں۔ جبکہ پاکستان بھی ان ممالک میں شامل ہے جو ان کی میزبانی کرتا ہے۔

مہمان پرندے (مائیگریٹری برڈز) سردیوں میں یہاں قیام اور افزائش کے بعد جنوری فروری میں واپس جاتے ہیں۔&nbsp; آنے اور یہاں سے واپسی کے لیے یہ کوہ قراقرم، ہندو کش کے راستے کوہ سلیمان کے ساتھ ساتھ دریائے سندھ کے اوپر سے سفر کرتے ہیں جسے ان پرندوں کا بین الاقوامی روٹ نمبر 4، گرین روٹ یا انڈس فلائی وے کہا جاتا ہے۔

یہ پرندے شمال سے جنوب تک تقریباً ساڑھے چار ہزار کلومیٹر کا سفر ایک ہی پرواز (گو) میں طے نہیں کرتے بلکہ راستے میں پانی، جھیلیں اور سرسبز مقامات دیکھ کر اترتے ہیں جہاں بھوک پیاس مٹانے اور آرام کرنے کے بعد آگے بڑھ جاتے ہیں۔

دنیا کے دیگر ممالک کی طرح پاکستان میں بھی ان مہمان پرندوں اور مقامی جنگلی حیات کے لیے علاقے مختص کیے گئے ہیں جو انہیں پناہ گاہیں اور خوراک فراہم کرتے ہیں۔ ان &#39;ریزرو ایریاز&#39; میں ویٹ لینڈز یعنی جھیلوں یا آبی ذخائر کی موجودگی ضروری قرار دی جاتی ہے۔

اس سلسلے میں اقوام متحدہ نے 1971ء میں ایرانی شہر رامسر میں ایک کنونشن منعقد کیا تھا جس میں ان ویٹ لینڈز یا جھیلوں کے حوالے سے اصول طے کیے گئے تھے۔ اب پاکستان سمیت دنیا کے لگ بھگ 90 فیصد ممالک اس کنونشن پر دستخط کر چکے ہیں۔

رامسر کنونشن کے معیار پر پوری اترنے والی جھیل یا ویٹ لینڈ کو &#39;رامسر سائٹ&#39; کہا جاتا ہے اور پاکستان میں چشمہ بیراج وائلڈ لائف سیکچری بھی انہیں میں سے ایک ہے۔

محکمہ وائلڈ لائف میانوالی بتاتا ہے کہ چشمہ کی جھیلوں میں ہنس گڈوال، یوریشن ویگن، لال سر، نیل سر،فرجینس، مختلف قسم کی مرغابیاں، مالارڈ، گریب، لٹل ایگریٹ، سارس کرین، لاریڈی،کارمورنٹ، سلٹ، مور مرغ، ناردرن سولر، کامن ٹیل، سرخاب اور کئی رنگوں کے بگلوں سمیت درجنوں اقسام کے مہمان پرندے قیام کرتے ہیں۔

پاکستان ٹورازم پورٹل&nbsp; اور اقوام متحدہ کی رامسر انفارمیشن سروس&nbsp; کے مطابق چشمہ بیراج وائلڈ لائف سینکچری 34 ہزار 99 ہیکٹر ( 84 ہزار 260 ایکڑ) رقبے پر مشتمل ہے جسے پہلی بار 1974ء میں وائلڈ لائف سینکچری قرار دیا گیا تھا تاہم عالمی ماہرین کی تجاویز پر اس کے رقبے میں توسیع کر کے 1989ء میں اسے تیسری بار حتمی شکل دی گئی۔

یہ سینکچری تین مارچ 1996ء کو رامسر سائٹ ڈیکلیئر کی گئی&nbsp; جس کو حیاتیاتی تنوع (بائیو ڈائیورسٹی) کے لحاظ سے چار حصوں میں تقسیم کیا جاتا ہے جس میں ویٹ لینڈ (آبی ذخیرہ/ جھیل )، دریا سندھ کے درمیانی جزائر (ڈیلٹا/ بیٹ یا بیلا)، ارد گرد کا صحرا اور پہاڑی علاقہ شامل ہیں۔

بیراج اور ارد گرد کے علاقے نہ صرف آبی حیات اور پرندوں کی پناہ گاہ ہیں بلکہ وسیع نباتات (پودوں، جھاڑیاں) کی موجودگی کے باعث جنگلی حیات کا بھی بڑا مسکن ہیں۔

ویٹ لینڈ کی زیادہ تر اراضی محکمہ آبپاشی پنجاب کی ملکیت ہے جبکہ اس سے ملحقہ ریزرو ایریا میں سرکاری کے ساتھ نجی رقبے بھی شامل ہیں۔

تاہم رامسر انفارمیشن سروس کے مطابق یہاں پانی کا ذخیرہ آبپاشی، بجلی کی پیداوار اور ماہی گیری کے لیے استعمال ہوتا ہے۔ اس علاقے سے سرکنڈوں کی صفائی کی بھی اجازت دی گئی ہے جو مقامی کاٹیج انڈسٹری کے کام آتا ہے۔

تاہم آبی ذخائر کے باہر کی زمینیں کھیتی باڑی، مویشی چرانے اور جنگلات کے لیے استعمال ہوتی ہیں۔

چشمہ کے آبی ذخائر پانچ حصوں میں تقسیم ہیں جس میں تین بڑی اور دو چھوٹی جھیلیں شامل ہیں تاہم ان میں سے کسی بھی جھیل کا رقبہ 618 ایکڑ سے زیادہ نہیں ہے۔

یہاں ستمبر، اکتوبر میں مہمان پرندوں کی آمد ہوتی ہے جبکہ دسمبر کے آخر تک یہ جنوب میں چلے جاتے ہیں لیکن فروری مارچ میں اپنے وطن واپسی کے دوران یہ یہاں&nbsp; پھر پڑاؤ کرتے ہیں اور جھیل کی رونق میں دوبارہ اضافہ ہو جاتا ہے۔

تاہم اب مقامی افراد شکوہ کرتے ہیں کہ چشمہ جھیل پر مہمان پرندوں کی تعداد ہر سال کم ہو رہی ہے۔

ساٹھ سالہ عمر حیات کندیاں کےرہائشی ہیں جنہوں نے چشمہ جھیل کے قریب اپنی زمین کاشت کر رکھی ہے۔

وہ گزرے وقت کو یاد کرتے ہوئے بتاتے ہیں کہ وہ لڑکپن میں اپنے مرحوم والد محمد نواز کے ساتھ جھیل پر شکار کا مقابلہ کیا کرتے تھے۔ تب چشمہ میں ہر طرف تا حد نگاہ پرندے اڑتے نظر آتے تھے مگر اب وہاں جاتے ہیں تو اکا دکا ہی کوئی مہمان پرندہ دکھائی دیتا ہے۔

<a href="https://rsis.ramsar.org/RISapp/files/RISrep/PK816RIS.pdf">رامسر انفارمیشن کی رپورٹ</a> بھی تصدیق کرتی ہے کہ جنوری 1975ء میں چشمہ جھیلوں میں ایک لاکھ 14 ہزار سے زیادہ پرندے موجود تھے جبکہ 1988ءسے 1991ء تک ہر سال جنوری میں یہاں دو لاکھ سے زائد پرندے پائے گئے تھے۔

محکمہ وائلڈ لائف آفس میانوالی سے حاصل کردہ معلومات کے مطابق 2018ء میں یہاں صرف چار ہزار پرندوں نے پڑاؤ کیا جو پچھلے 32 سال میں کم ترین تعداد تھی۔&nbsp;&nbsp; 2019-2020ء کے سیزن میں یہ تعداد سات ہزار 300 ہو گئی۔

2021ء کے سیزن میں 30 ہزار 400 جبکہ رواں سیزن میں تقریباً 16 ہزار 800 مہمان پرندے شمار کیے گئے ہیں۔

تاہم اسٹنٹ ڈائریکٹر وائلڈ لائف میانوالی ابرار احمد مطمئن پرندوں کی تعداد سے مطمئن ہیں۔ وہ دلیل دیتے ہیں کہ مائیگریٹری برڈز مختلف روٹس استعمال کرتے ہیں اور یہ ضروری نہیں کہ ہر سال وہ انڈس فلائی وے کا راستہ ہی اختیار کریں۔ اگر پانچ سال پہلے کو دیکھا جائے چشمہ جھیل پر مہمان پرندوں کی تعداد بڑھی ہے۔

وہ کہتے ہیں کہ پرندہ شماری بھی دوربینوں کی مدد سے کی جاتی ہے جو سائنسی طریقہ نہیں ہے اور یہ عالمی معیار کے مطابق بھی نہیں ہے۔

آبی حیات کے ماہرین بتاتے ہیں کہ چشمہ کی جھیلوں میں لگ بھگ 40 اقسام کی مچھلیاں پائی پائی جاتی ہیں۔ ایک زمانے تک یہاں ماہی گیری کا ٹھیکہ واپڈا دیا کرتا تھا تاہم بعد ازاں ماہی پروری اور ماہی گیری پر صوبے کا حق تسلیم کر لیا گیا۔

<a href="https://fwf.punjab.gov.pk/fish_biodiversity">محکمہ فشریز پنجاب&nbsp;</a> کے مطابق چشمہ بیراج میں مچھلی کی موجودہ صلاحیت 12 سے 15 سو میٹرک ٹن ہے جبکہ ماہی گیری کے ٹھیکوں سے محکمہ تقریباً تین کروڑ 20 لاکھ روپے سالانہ کما رہا ہے۔ تاہم یہاں &#39;فشریز ہیچری منصوبے&#39; کی تکمیل کے بعد آمدنی میں کئی گنا اضافہ ہو جائے گا۔

اس وائڈ لائف سینکچری میں شامل پہاڑی علاقے میں بھیڑیا، گیدڑ، لومڑی، سرخ لومڑی، سیہہ، نیولا سمیت مختلف اقسام کے چوہوں جیسی جنگلی حیات کو پناہ گاہ فراہم کرتا ہے۔ یہاں کبھی کبھی اڑیال اور کامن لیوپارڈ بھی نظر آجاتا تھا مگر اب ایسے جانور کم ہی دکھا دیتے ہیں۔

یہاں بیلے یا دریائی جزیروں میں ہرن اور سؤر (کامن بور) بھی کبھی کبھی آ جاتے ہیں۔ سینکچری میں شامل ریتلے صحرا میں ریگ ماہی (سینڈ لزرڈ)، مختلف اقسام کی چھپکلیاں، سانپ اور رینگنے والے دیگر کیڑے مکوڑے پائے جاتے ہیں۔

چشمہ کی جھیلیں موسم سرما میں صرف مہمان پرندوں ہی کی میزبانی نہیں کرتیں بلکہ موسم گرما میں 50 سے زائد مقامی پرندوں کو افزائش کے لیے پناہ گاہ بھی فراہم کرتی ہیں جن میں عالمی سطح پر خطرے سے دوچار &#39;لمبی دم والی چڑیا ( واربلر پرنیا برنیسی) بھی شامل ہے۔

عمر حیات اور مائی سرور کے خیال میں یہاں سینکچری میں لوگوں کی زیادہ آمدورفت اور شکار کی وجہ سے جنگلی حیات اور مہمان پرندوں کی تعداد میں کمی آئی ہے جبکہ اڑیال اور ہرن تو بالکل ہی ختم ہو گئے ہیں۔

اسٹنٹ ڈائریکٹر وائلڈ لائف کا کہنا تھا کہ مہمان پرندوں کی آمد میں کمی کی کئی ممکنہ وجوہات ہو سکتی ہیں جن میں انسانی سرگرمیاں اور شکار بھی شامل ہیں۔

&quot;ہم غیر قانونی شکار پر جرمانہ کرتے ہیں لیکن جنگلی حیات اور پرندوں کی بقا و حفاظت محکمے کے ساتھ مقامی لوگوں کی بھی ذمہ داری ہے۔&quot;

محمکہ والڈ لائف کی پراگریس رپورٹ کے مطابق دسمبر 2021 ء سے نومبر 2022ء تک 110 شکاریوں کے چالان کر کے انہیں ایک لاکھ بارہ ہزار روپے جرمانہ کیا گیا جبکہ دسمبر 2022ء سے نومبر 2023 ء تک 201 افراد سے دو لاکھ 500 روپے جرمانہ وصول کیا گیا۔

ایک سوال پراسسٹنٹ ڈائریکٹر نے بتایا کہ ضلع میانوالی میں وائلڈ لائف کے عملے کی منظور شدہ اسامیوں کی تعداد 29 ہے جن میں سے دس خالی پڑی ہیں۔

درختوں پر طوطے، مینا، نیل کنٹھ اور فاختاؤں کی جگہ چیلوں اور کووں کا بسیرا، لاہور کے خوبصورت پرندے کہاں گئے؟

"لگتا ہے مسافر پرندوں نے شکاریوں کے خوف سے گانا چھوڑ دیا ہے"

text

ام عائشہ نے گزشتہ برس ایم اے اردو کی ڈگری مکمل کی تو انہیں گھر کے قریب ایک نجی سکول میں ملازمت مل گئی۔ سکول کی پرنسپل نے انہیں ناتجربہ کار ہونے کی وجہ سے پریپ کلاس کی ذمہ داری سونپ دی۔ عائشہ بتاتی ہیں کہ وہ ماہانہ ساڑھے چار ہزار روپے کے عوض سکول میں مسلسل آٹھ گھنٹے کام کرتی تھیں۔

کلاس پڑھانے کے علاوہ ان کی اضافی ذمہ داریوں میں بچوں کو لنچ کروانا اور واش روم لے جانا بھی شامل تھا۔ انہیں سو سے زائد بچوں کی کاپیاں روزانہ چیک کرنا پڑتیں جو وہ ساتھ گھر لے آتیں۔

&quot;پہلے مہینے کی تنخواہ انتظامیہ نے بطور سیکورٹی اپنے پاس رکھ لی تھی۔ میں دن بھر سکول میں بچے سنبھالتی اور گھر آ کر اگلے دن کے سبق بناتی، کاپیاں چیک کرتی، مجھے یوں لگنے لگا تھا کہ میں ایک ذہنی مریضہ بنتی جا رہی ہوں۔

اتنی جسمانی و ذہنی مشقت سے تنگ آ کر میں نے تین ماہ بعد نوکری چھوڑی اور جب سیکورٹی کی مد میں رکھی تنخواہ کا تقاضا کیا تو سکول والوں نے وہ بھی دینے سے انکار کر دیا&quot;۔

پچھلی تین دہائیوں کے دوران، نجی تعلیمی اداروں نے بتدریج پاکستان میں ایک اہم تعلیمی خدمات فراہم کرنے والے ادارے کے طور پر اپنا کردار ادا کیا ہے۔ نوے کی دہائی کے اوائل سے نجی تعلیمی اداروں کی تعداد میں اضافہ ہوا ہے۔ پاکستان ایجوکیشن سٹیٹسٹکس 2017-18ء کے مطابق پنجاب میں سکول جانے والے بچوں میں سے تقریباً نصف نجی سکولوں میں داخل ہیں۔

یونیسف کے مطابق پاکستان میں ایک اندازے کے مطابق 5 سے 16 سال کی عمر کے&nbsp; 2 کروڑ 28 لاکھ بچے سکول نہیں جاتے ۔جبکہ ایشین ڈیویلپمنٹ فنڈ کے اعداد و شمار کے مطابق ہر سال سکول جانے والے بچوں کی تعداد میں 20 لاکھ کا اضافہ ہوتا ہے ۔ایسی صورتحال میں تعلیم کی فراہمی کے لئے نجی شعبہ تعلیم اہم کردار ادا کرتا ہے۔

اگرچہ نجی تعلیمی اداروں نے شرح خواندگی کو کم اور پڑھے لکھے نوجوانوں کو روزگار فراہم کیا لیکن وقت کے ساتھ ساتھ گلی گلی کھلنے والےنجی فرینچائز سکول اساتذہ کا معاشی استحصال کر رہے ہیں۔

آسیہ بی بی پچھلے تین سال سے کندیاں کے ایک نجی سکول میں نرسری کلاس کو پڑھا رہی ہیں۔اٹھائیس سالہ آسیہ نے لوک سجاگ کو بتایا کہ انہیں مختلف سکولوں میں ملازمت کرتے ہوئے تقریبا آٹھ سال ہو چکے ہیں۔ پچھلے سکول میں انہوں نے پانچ سال تک کام کیا لیکن ان کے تجربے یا پرفارمنس کی بنیاد پر ان کی تنخواہ یا عہدے میں کوئی اضافہ نہیں ہوا۔ ماہانہ پانچ ہزار روپے کے عوض وہ سالہاسال کام کرتی رہیں لیکن وہ ہیڈ ٹیچر کے عہدے تک بھی نہیں پہنچ سکیں۔

&quot;سکول پرنسپل کی ذاتی پسند و ناپسند کی بنیاد پر ٹیچرز کی تنخواہوں میں اضافہ ہوتاہے، حتٰی کہ اتنے برس کام کرنے کے بعد بھی مجھے ہیڈ ٹیچر نہیں بننے دیا گیا&quot;۔

آسیہ مزید بتاتی ہیں، &quot;سکول کے ڈائریکٹر کے دوست کی اہلیہ تعلیم اور تجربے میں مجھ سے کہیں کم تھی، اسے ہیڈ ٹیچر بنا دیا گیا&quot;۔

اس ناانصافی پرانہوں نے دلبرداشتہ ہو کر سکول کی ملازمت چھوڑ دی۔ اس وقت وہ کندیاں کے ایک اور نجی سکول میں پڑھا رہی ہیں۔ اگرچہ حالات یہاں بھی مختلف نہیں ہیں لیکن ملازمت ان کی مجبوری ہے تو وہ کسی طرح گزارہ کر رہی ہیں۔

ضلع میانوالی کی آبادی 17 لاکھ 98 ہزار افراد پر مشتمل ہے۔ 2017ء کی مردم شماری کے مطابق یہاں شرح خواندگی 61.28 فیصد ہے، جس میں مردوں کی شرح خواندگی 78.54 فیصد جبکہ عورتوں کی 44.35 فیصد ہے ۔

پنجاب سکول ایجوکیشن ڈیپارٹمنٹ&nbsp; کے مطابق اس وقت ضلع بھر میں 352 رجسٹرڈ نجی سکول ہیں، 108 سکول عارضی طور پر رجسٹرڈ ہیں، 88 سکولوں نے رجسٹریشن کے لیے درخواست دی ہوئی ہے، 64 سکولوں کی رجسٹریشن منسوخ ہو چکی ہے جبکہ 48 سکول ایسے ہیں جنہوں نے رجسٹریشن کے لیے درخواست ہی نہیں دی ہے۔

ان نجی تعلیمی اداروں کی انتظامیہ میں اکثریت تاجر اور کاروباری حضرات کی ہے۔ جن کا تعلیمی شعبہ سے&nbsp; دور دور تک کوئی لینا دینا نہیں ہے، یہی وجہ ہے ان اداروں میں کام کرنے والے اساتذہ کے ساتھ ہر طرح کا ناجائز سلوک روا رکھے ہوئے ہیں، جہاں انہوں نے ان اداروں میں پڑھانے والے اساتذہ کو معاشی غلام بنا دیا ہے۔

پنجاب میں ایک مزدور کی کم از کم اجرت 32 ہزار روپے طے کی گئی ہے ،&nbsp; جبکہ میانوالی میں نجی تعلیمی اداروں میں اساتذہ ماہانہ پانچ سے سات ہزار روپے کے عوض نوکری کرنے پر مجبور ہیں۔

مسز کلثوم کی عمر بتیس سال ہے وہ عیسی خیل کے ایک نجی سکول میں کئی سال پڑھاتی رہی ہیں۔انہوں نے لوک سجاگ کو بتایا کہ نجی سکول کسی قسم کے اصول و ضوابط کے تحت نہیں چلتے۔ ان کے اپنے قاعدے ہوتے ہیں۔ موسم سرما اور موسم گرما کی چھٹیوں میں بلاجواز اساتذہ کو چھٹیاں نہیں دی جاتیں۔ معمولی تنخواہ کے بدلے خواتین اساتذہ کی مجبوریوں سے فائدہ اٹھایا جاتا ہے۔

&quot;نجی سکولوں میں پیرنٹ ٹیچنگ میٹنگ کا نام پر اساتذہ کی عزت نفس کی دھجیاں اڑائی جاتی ہیں،ان میٹنگز میں آنے والے مرد حضرات خواتین اساتذہ کو ہراساں بھی کرتے ہیں ،لیکن ان کے خلاف شکایت کرنے پر بھی سکول انتظامیہ کبھی کارروائی نہیں کرتی کیونکہ انہیں خوف ہوتا ہے فیس کی مد میں آنے والی رقم بند ہو جائے گی&quot;۔

&nbsp;مسز کلثوم بتاتی ہیں کہ وہ اپنی شادی کے بعد بھی ایک سکول میں پڑھاتی رہیں لیکن کم تنخواہ اور کسی بھی قسم کی سیکورٹی نہ ہونے کی وجہ سے ان کے شوہر نے نوکری چھڑوا دی۔

ورلڈبنک کی ایک تحقیقاتی رپورٹ&nbsp; کے مطابق پاکستان میں خواتین سے توقع کی جاتی ہے کہ وہ اپنے گھروں کے قریب چند محدود پیشوں میں ہی کام کریں، جن میں تعلیم سرفہرست ہے۔ انہیں مردوں کی نسبت کم تنخواہ دی جاتی ہے۔ نجی سکولوں والے والے اس بات کا فائدہ اٹھاتے ہیں اور مقامی مارکیٹ سے غیر تربیت یافتہ خواتین کو کم تنخواہوں پر بھرتی کرتے ہیں۔

ہیومن رائٹس اوئیرنس کی 2022ء کی ایک رپورٹ کے مطابق چھوٹے شہروں اور قصبوں میں رہنے والی 70 فیصد سے زائد خواتین ماہانہ تین سے پانچ ہزار روپے کماتی ہیں اور انہیں کسی قسم کا الاؤنس بھی نہیں دیا جاتا۔ شہروں میں رہنے والی خواتین ان سے پانچ فیصد زیادہ کماتی ہیں یعنی ماہانہ 12 ہزار روپے سے یا اس سے کچھ زیادہ۔

مسز شازیہ جو کندیاں کے ایک نجی سکول کی پرنسپل ہیں، انہوں نے لوک سجاگ سے گفتگو کرتے ہوئے کہا کہ نجی سکولوں میں اساتذہ کو ان کے حقوق نہیں دئے جاتے۔ انہیں ملازمت کا کنٹریکٹ لیٹر جاری نہیں کیا جاتا، تنخواہوں سے سیکورٹی کے نام پر کٹوتی کر لی جاتی ہے، جاب ڈسکرپشن کے حوالے سے کوئی پالیسی ہی موجود نہیں ہے۔ان تمام مسائل کی بنیادی وجہ یہ ہے کہ سکول مالکان کی اکثریت میں کاروباری حضرات شامل ہیں جو پیسہ کمانے سے غرض رکھتے ہیں۔فرنچائز سسٹم نے ان کی یہ مشکل اور آسان کردی ہے۔

&quot;ایسے&nbsp; لوگ خود تعلیم یافتہ بھی نہیں ہوتے تو وہ سکول بھی اسی طرز پر چلاتے ہیں جیسے فیکڑیاں چلائی جاتی ہیں&quot;۔

پنجاب میں نجی تعلیمی اداروں کی رجسٹریشن کے لئے سکول ایجوکیشن ڈیپارٹمنٹ نے باقاعدہ ایک نظام مرتب کر رکھا ہے۔ نجی سکول مالکان، پرائیویٹ ایجوکیشن پرووائیڈر اینڈ انفارمیشن سسٹم کی ویب سائٹ&nbsp; پر نجی تعلیمی ادارے کے سربراہان اپنے سکول کو رجسٹر کرواتے ہیں۔ لیکن صوبے بھر میں نجی سکولوں میں اساتذہ کے حقوق یا مسائل کو حل کرنے کے لیےکسی قسم کی ریگولیٹری اتھارٹی موجود نہیں ہے۔

مسز شازیہ کہتی ہیں یہی بات مسائل کی جڑ ہے۔ وہ کہتی ہیں کہ پرائیویٹ سکولوں کے اساتذہ کے لیے کوئی ایسا پلیٹ فارم نہیں جہاں وہ اپنے حقوق کی بات کر سکیں۔ حکومت نے پرائیویٹ ٹیچرز&nbsp; کے حقوق کے لیے کوئی پالیسی مرتب کی نہ ہی ایسا ادارہ ہے جو&nbsp; سکول انتظامیہ کو بنیادی قوانین کا پابند بنائے&quot;۔

کندیاں کے پرائیویٹ سکول دی اسپرٹ سکول کے ڈائریکٹر محمد نذ رنے&nbsp; لوک سجاگ سے گفتگو کرتے ہوئے بتایا، ٹیچرز کو ان کے تجربے اور مہارت کی بنیاد پر تنخواہ دی جاتی ہے، وہ اپنی مرضی سے پیش کش قبول کرتی ہیں۔

&quot;علاقے کے دیگر سکولوں میں ایک ٹیچر کی جو تنخواہ مل رہی ہے ہم بھی وہی دے رہے ہیں&quot;۔

محمد نذر نے مزید بتایاکہ&nbsp; قصبوں اور دیہی علاقوں میں بچوں سے کم فیس لی جاتی ہے، یوں کاروبار میں رہنے کا واحد طریقہ یہ ہے کہ سکول اپنے اخراجات کو کم رکھے۔

&quot;اب چونکہ سکول کے بجٹ میں بڑا حصہ ٹیچرز کی تنخواہوں کا ہوتا ہے اس لئے مجموعی لاگت کو کم کرنے کے لئے لازمی طور پر ان کی تنخواہوں کو محدود رکھنا ان کی مجبوری بن جاتا ہے&quot;۔

تاہم، محمد نذر نے ٹیچرز کے زیادہ دیر کام کرنے اور لوڈ ہاورز&nbsp; کےبارے میں سوال کا جواب نہیں دیا۔

میانوالی کی ڈسٹرکٹ ایجوکیشن آفیسر، حمیرہ یاسمین نے لوک سجاگ سے گفتگو کرتے ہوئے بتایا، نجی سکولوں کی رجسٹریشن کے وقت جانچ پڑتال کی جاتی ہے کہ سکول کا انفراسٹرکچر کیسا ہوگا، طلبا کی تعداد کیا ہوگی، اساتذہ کی تنخواہوں کتنی دی جائیں گی۔لیکن بارہا وزٹ کے دوران پتہ چلتا ہے کہ بنیادی شرائط پوری نہیں کی گئیں پھر بھی سکول حکومت سے رجسٹرڈ شدہ ہے۔اس سلسلے میں ان تعلیمی اداروں میں کام کرنے والے اساتذہ کو اپنے حق کے لیے خود بھی آواز اٹھانی چاہئے۔

وہ کہتے ہیں کہ انہیں اساتذہ کی جانب سے کبھی شکایت موصول نہیں ہوئی، اس لیے ایسے اداروں کے خلاف ایکشن کس بنیاد پر لیا جاسکتا ہے؟

کندیاں کے پرائیویٹ سکول کے ٹیچر نے نام نہ ظاہر کرنے کی شرط پر بتایا کہ ستم ظریفی تو یہ ہے کہ پورے ملک میں پرائیویٹ سکولوں کے اساتذہ کی کوئی یونین نہیں البتہ سکول مالکان نے اپنی تنظیم بنا رکھی ہے جس کی آڑ لے کر وہ من مانے فیصلے کرتے ہیں۔

ملتان میں پنجاب ایجوکیشن فاؤنڈیشن کے تحت چلنے والے 389 سکولوں کے اساتذہ تین مہینوں سے تنخواہ کے منتظر

پنجاب کے پرائیویٹ سکولوں میں کیا ہو رہا ہے؟

استاد لطیف، پیشے کے لحاظ سے درزی ہیں اور پچھلے دس سال سے&nbsp; محلہ&nbsp; چاہ میر خان سنبلہ والا میں رہائش پذیر ہیں لیکن اب وہ اس آبادی سے تنگ آ چکے ہیں۔

چاہ میر خان سنبلہ والا محلہ کندیاں ٹاؤن کمیٹی کے عقب میں کندیاں موڑ سے تقریبا ڈیڑھ کلومیٹر&nbsp; دور واقع ہے۔ اس کی جس گلی میں داخل ہوں وہاں آپ سوچنے پر مجبور ہو جاتے ہیں کہ اندر کیسے جائیں؟

اس محلے میں&nbsp; پچھلے کافی عرصے سے&nbsp; گٹروں کا پانی کھڑا ہے۔ استاد لطیف نے لوک سجاگ کو بتایا کہ گھر سے باہر نکلتے ہی بدبو، مچھر اور مکھیوں کا سامنا تو کرنا پڑتا ہی ہے، کھڑے پانی کی چھینٹیں&nbsp; کپڑے خراب کر دیتی ہیں۔

&quot; قریب ہی سول ہسپتال ہے، مریضوں کو ہسپتال جانے کے لیے اس جوہڑ کو پار کرنا پڑتا ہے۔ علاقہ مکین ٹاؤن کمیٹی اور میونسپل کمیٹی کے سیکڑوں چکر لگا چکے ہیں لیکن ان کی وہاں کوئی سنوائی نہیں ہوتی&quot;۔

کندیاں، ضلع میانوالی، تحصیل پیپلاں کا گنجان آباد شہر ہے، اس کی آبادی&nbsp; 50 ہزار&nbsp; کے قریب&nbsp; ہے۔ تحصیل پپلاں کی چار لاکھ کے لگ بھگ آبادی میں سے صرف 96 ہزار&nbsp; شہری آبادی ہے۔

&nbsp;کندیاں شہر میں مونسپل کمیٹی بھی موجو د ہے، لیکن نکاسی آب کے ناقص نظام کی وجہ سے اس کی گلیاں اور بازار گندے پانی کے جوہڑ بن چکے ہیں۔

کندیاں میونسپل کمیٹی کے ایک انتظامی افسر نے اپنا نام ظاہر نہ کرتے ہوئے بتایا&nbsp; کہ چاہ میر سنبلہ والا محلہ سے کچھ عرصہ پہلے درخواست موصول ہوئی تو اس پر انتظامیہ نے از خود نوٹس لیا لیکن یہاں جو پانی کھڑا تھا اسے مشین سے نکالنا ممکن نہیں تھا، اس لئے ضلع کونسل میانوالی محتسب میں اس کا باقاعدہ کیس چلا اور یہ طے پایا کہ اس علاقے میں سیوریج لائن بچھا کر پانی نکالا جائے گا۔

&quot;سیوریج لائن کو بچھا نے پر تین لاکھ روپے کا تخمینہ بھی لگایا گیا، لیکن جب انجینئرز&nbsp; نے سائٹ کا دورہ کیا تو معلوم&nbsp; ہوا کہ علاقے کو&nbsp; صاف کرنے کے لیے سیوریج لائن کو چرچ سے گزارنا پڑے گا۔ ایسا ہو نہیں سکا تو یہ سکیم ادھوری رہ گئی&quot;۔

تاہم کندیاں مسیحی کمیونٹی کے سربراہ اور چرچ کے ممبر حمید گل اس بات سے اتفاق نہیں کرتے۔ لوک سجاگ سے گفتگو کرتے ہوئے ان کا کہنا تھا کہا کہ میونسپل کمیٹی کے ملازمین اپنی نااہلی کی ذمہ داری دوسروں پر ڈال کر بری الذمہ ہونا چاہتے ہیں، اگر وہ&nbsp; روزانہ کی بنیادوں پر مشین کے ذریعے پانی نکالتے رہتے تو اتنا پانی جمع&nbsp; ہی نہیں ہوتا۔

&quot;شہر کے دیگر علاقے بھی اسی قسم کی صورتحال سے دوچار ہیں، کندیاں کا پرانا قبرستان جو میونسپل کمیٹی سے محض ایک کلو میٹر دور ہے، اس کے چاروں اطراف بھی کچرے کے ڈھیر لگے ہوئے ہیں۔ قریبی رہائشی علاقوں میں رہنے والے لوگ کچرے اور سیوریج کے پانی سے اٹھنے والے تعفن سے پریشان ہیں&quot;۔

تیس سالہ مسز فوزیہ اسی علاقے میں رہتی ہیں اور تعلیم و تدریس کے شعبے سے وابستہ ہیں، لوک سجاگ سے گفتگو کرتے ہوئے انہوں نے بتایا کہ انہیں جاب کے سلسلے میں روزانہ گھر سے باہر نکل کر اس گندے پانی سے گزرنا پڑتا ہے، یہی وجہ ہے کہ وہ آئے دن جلدی امراض کا شکار رہتی ہیں۔

ڈاکٹر کاشف حیات ایک نجی ہسپتال میں سکن سپیشلسٹ ہیں۔&nbsp; انہوں نے سجاگ کو بتایا کہ گندے پانی سے جلدی بیماریاں جیسے&nbsp; خارش، ایگزیما اور پھوڑے پھنسیاں وغیرہ یہاں عام ہیں۔

&quot;سول ہسپتال میں چونکہ ماہر امراض جلد موجود نہیں اس لیے جلدی امراض میں مبتلا مریضوں کی درست تعداد بتانا ممکن نہیں&quot;۔

کندیاں شہر، ضلع میانوالی کے وسط میں ہونے کے باوجود بنیادی سہولیات سے محروم ہے۔ چشمہ جھیل، سیاحوں کے لئے ایک پر کشش مقام ہے، یہ کندیاں شہر سے محض 20 کلومیٹر کے فاصلے پر ہے۔ اس شہر کی اہمیت اس لئے بھی بڑھ جاتی ہے کیونکہ یہ پنجاب کا آخری گاؤں ہے لیکن انتظامیہ کی عدم توجہی کے باعث اس شہر کی رونق مانند پڑ چکی ہے۔ جگہ جگہ پر گندگی کے ڈھیر، گندے پانی کے جوہڑ&nbsp; اور ان سے اٹھنے والےتعفن نے علاقے کی خوبصورتی کو تبا ہ کر دیا ہے۔

کندیاں میونسپل کمیٹی کے ایڈمنسڑیٹر اسسٹنٹ کمشنر اعجاز عبد الکریم ہیں جو تحصیل آفس میں بیٹھتے ہیں۔

کمیٹی کے روز مرہ کے امور یونین کونسل ہیڈ کلرک جاوید اقبال چلا رہے ہیں۔

جاوید اقبال نے لوک سجاگ کو بتایا کہ ان کے پاس اس وقت 24 ملازمین پر مشتمل عملہ موجود ہے جبکہ یہاں ضرورت 50 سے زائد ملازمین کی ہے۔ چوبیس میں سے 17 ملازم ڈیلی ویجز پر ہیں۔

&quot;ملازمین کو صفائی کے لئے بنیادی سامان ہی مہیا نہیں کیا جاتا تو وہ کیسے صفائی کریں گے؟&quot;

انہوں نے بتایا کہ کمیٹی کو ہر ماہ سرکار کی جانب سے 34 لاکھ روپے ملتے ہیں جن میں پینش، تنخواہ، ڈیلی ویجیز پر کام کرنے والا افراد&nbsp; کی ویجز شامل ہیں۔ بجلی کے بل، مشینری کی مرمت وغیرہ بھی اسی بجٹ میں کی جاتی ہے۔

ایک سوال کے جواب میں انہوں نے بتایا کہ ان کے پاس مشینری میں دو لوڈر، تین ٹریکٹر، دو ٹریکٹر ٹرالی اور تین پیٹر انجن موجود ہیں۔ ان مشینوں کو چلانے کے لئے چھ ڈرائیور بھرتی کئے گئے ہیں اور سیوریج کے لئے چار ملاز م ڈیوٹی پر موجود رہتے ہیں، لیکن اتنی بڑی آبادی والے شہر میں نکاسی آب کے مسائل چند لوگ حل نہیں کر سکتے۔&nbsp;

&quot;انتظامیہ کو ایک جانب عملے اور مشینری کی کمی کا سامنا ہے تو دوسری جانب مقامی افراد بھی مشکلات بڑھا دیتے ہیں۔ میونسپل کمیٹی کے خلاف ضلعی محتسب کے دفتر میں شکایات درج کروا دی جاتی ہیں جن کی بنا پر کمیٹی میں کوئی سی ای او آج تک ٹک کر کام ہی نہیں کر پا یا۔ ان کا تبادلہ کر دیا جاتا ہے یا پھر وہ خود ہی عاجز آکر مستعفی ہو جاتے ہیں۔ گزشتہ آٹھ ماہ سے سی ای او کی سیٹ خالی ہے اور اس حوالے سے مقامی حکومت&nbsp; کو درخواست بھی بھیجی جا چکی ہے لیکن فی الحال کوئی تعیناتی نہیں کی گئی&quot;۔

دفتر محتسب میانوالی کے ایک سینئر کلرک نے اپنی شناخت صیغہ راز میں رکھنے کی شرط پر&nbsp; لوک سجاگ&nbsp; کو بتایا کہ سی ای او کا تبادلہ انتظامی مسئلہ ہے۔ مقامی لوگوں نے اس حوالے سے کبھی شکایت درج نہیں کروائی، تاہم میونسپل کمیٹی کی کارکردگی کے حوالے سے جب بھی کوئی درخواست موصول ہوتی ہے تو فوراَ ایکشن لیا جاتا ہے۔

ایک ڈیلی ویجر نے بھی اپنا نام ظاہر نہ کرنے کی شرط پر بتایا کہ مقامی لوگ ذاتی رنجشوں کی بنا پر کھلے نالوں کو مٹی، پتھر یا رضائیاں ڈال کر بند کر دیتے ہیں۔ بعض اوقات ایسا بھی ہو تا ہے کہ سیوریج کا پانی نکالنےکے لیے&nbsp; ملازم جاتے ہیں تو انہیں با اثر افراد تنگ کرتے ہیں۔

سول ہسپتال کے اعدادو شمار کے مطابق پچھلے مہینے&nbsp; ایک ماہ&nbsp; سے لے 14 سال کے بچوں میں پیٹ کی بیماریوں سے متعلق&nbsp; 75 کیسسز رپورٹ ہوئے۔ ان میں پیٹ کے کیڑوں کو چار،&nbsp; ٹائیفائڈ&nbsp; چار،&nbsp; ہیپاٹئٹس کا ایک، پیچش کے پانچ ، پیٹ درد کے پانچ اور ملیریا کے پانچ کیسسز سمیت پیٹ کے دیگر امراض شامل ہیں۔

&nbsp;بچوں کی وارڈ کی ڈاکٹر ثمینہ نے بتایا کہ یہ اعداد و شمار گندے پانی سے پھیلنے والی بیماریوں کے درست عکاس نہیں کیونکہ&nbsp; بیشتر صورتوں میں لوگ پرائیویٹ ہسپتالوں کا رخ کرتے ہیں۔

پرائیویٹ ہسپتال میں تعینات&nbsp; ڈاکٹر آمنہ نے لوک سجاگ سے گفتگو کرتے ہوئے بتایا کہ شہر میں خاص طور پر خواتین میں صفائی کے حوالے سے آگاہی موجود نہیں ہوتی۔ وہ پیٹ کی بیماریوں کا دیسی ٹوٹکوں سے علاج کرتی ہیں۔ ہسپتال پہنچنے کی نوبت اس وقت آتی ہے جب پانی سر سے اوپر گذرنے لگے۔&nbsp;&nbsp;

کبیر والا میں 'گنگا الٹی بہنے لگی'، ڈیزائن کی خرابی سے کروڑوں مالیت کا سیوریج نظام ناکام

50 ہزار آبادی کا شہر ایک ہیڈ کلرک کے حوالے کیوں کر دیا گیا ہے؟

محمد اصغر میانوالی کے شہر کندیاں کے رہائشی ہیں۔ وہ پانچ ایکڑ زرعی زمین کے مالک ہیں اور زیادہ تر سبزی ہی کاشت کرتے ہیں۔رواں سال انہوں نے ایک ایکڑ پر پیاز اگایا تھا۔

وہ بتاتے ہیں کہ کھیت میں پینری لگانے اور جڑی بوٹی نکالنے کا کا م انہوں نے مزدوری پر کرایا اور سپرے خود کرتے رہے۔ فصل اکٹھی کرنے کے لیے دونوں میاں بیوی نے مل کر محنت کی۔ کھاد، سپرے، ڈیزل اورزمین کی تیاری پر کل دو لاکھ روپے خرچ&nbsp; آئے۔

وہ کہتے ہیں کہ عام طور پر اچھی زرخیز زمین پانچ سو من فی ایکڑ پیاز دیتی ہے لیکن اگست میں ژالہ باری نے ان کی فصل کو شدید متاثر کیا تھا ۔اس لیے پیداوار تین سو من سے زیادہ نہیں نکلی۔

محمد اصغر نے بتایا کہ اس بار منڈی میں&nbsp; پیاز کا ںرخ بھی تین سو روپے من سے اوپر نہیں گیا۔ وہ ایک ایکڑ&nbsp; سے منافع تو کیا ڈیزل اور کھاد کا خرچ بھی وصول&nbsp; نہیں کر پائے۔ &quot;مہنگائی نے چھوٹے کسان کو کاشت کاری چھوڑنے پر مجبور کر دیا ہے&quot;۔

عالمی ادارہ برائے خوراک اور ایف اے او (ورلڈ فود ایڈ اگریکلچر آرگنائزیشن ) روزانہ فی کس چار سو گرام سبزی اور فروٹ تجویز کرتے ہیں۔ جبکہ ایک تحقیق کے مطابق پاکستان میں یہ کھپت صرف سو گرام فی کس رہ گئی ہے۔

پاکستان میں مجموعی طور پر35 سے زیادہ اقسام کی سبزیاں اگائی جاتی ہیں۔ میانوالی میں گوبھی، گاجر، پالک، آلو، مولی، شلجم، بھنڈی، مرچ، مٹر اور پیاز زیادہ کاشت ہوتے ہیں۔

&nbsp;ضلع میانوالی پانچ ہزار 840 مربع کلو میڑ رقبے پر مشتمل ہے۔ ماحولیاتی تنوع کے اعتبار سے یہاں پانچ&nbsp; زون ہیں۔ لاکھوں ایکڑ صحرائے تھل، نہری علاقے، دریائے سندھ کے کچے (ڈیلٹا)، پہاڑی ڈھلوانوں اور پہاڑوں میں بھی فصلیں کاشت ہوتی ہیں۔

ضلع میانوالی کے سرکاری پروفائل کے مطابق ضلع بھر میں تین لاکھ 16 ہزار 815 ایکڑ رقبہ زیر کاشت ہے۔ جس میں سے 33ہزار 832 ایکڑ رقبہ نہر سے سیراب ہوتا ہے۔ جبکہ تقریباً دو لاکھ 83 ہزار ایکڑ پر بارانی کاشت ہوتی ہے۔

اس ضلعے کے لگ بھگ ایک لاکھ 60 ہزار ایکڑ رقبے پر سال میں ایک سے زیادہ بار کاشت ہوتی ہے۔ اس میں کچھ تو نہری علاقے اور باقی وہ بارانی زمینیں ہیں جہاں کاشت کاروں نے آبپاشی کے لیے ٹیوب ویل یا متبادل انتظامات کر رکھے ہیں۔

&nbsp;زراعت شماری 2010ء (ایگریکلچر سینسس) کے مطابق پنجاب میں 64 فیصد زمین مالکان پانچ ایکڑ یا اس سے کم رقبے کے مالک ہیں۔جبکہ میانوالی میں 66 فیصد کسانوں کے پاس پانچ ایکڑ یا اس سے کم رقبہ ہے۔

&nbsp;یہاں زیادہ تر روایتی فصلیں گنا،کپاس اور تمباکو ہی کاشت کی جا رہی ہیں ۔ جبکہ چھوٹے کاشت کار ان فصلوں کے اخراجات بھی پورے نہیں کر پاتے۔اس لیے وہ اپنی زمینیں کو ہاوسنگ سکیموں کو فروخت کر رہے ہیں۔

عمر حیات کندیاں شہر کے رہائشی ہیں۔ وہ اپنی پانچ ایکڑ اراضی پر پالک، پیاز اور گاجر کاشت کیا کرتے تھے اور اس آمدنی سے چھ افراد پر مشتمل خاندان کے اخراجات پورے کرتے تھے۔

وہ بتاتے ہیں کہ جوں جوں مہنگائی بڑھی اس کے ساتھ زمین کی تیاری، بیج، سپرے، کھاد اور پانی کے اخراجات برادشت کرنا بھی ناممکن ہو گیا تھا۔

&nbsp;انہوں نے اپنی زمین چار سال پہلے 40 ہزارروپے ایکڑ سالانہ ٹھیکے پر دے دی۔

وہ کہتے ہیں کہ ٹھیکے کی رقم سے گھر کا خرچ پورا نہیں ہوتا تھا۔اس لیے تنگ آکر حال ہی میں اپنی زمین ڈھائی لاکھ روپے فی کنال کے حساب سے فروخت کر دی ہے۔اس رقم سے وہ کوئی کاروبار کرنا چاہتے ہیں۔

میانوالی کے کچے میں سبزی کاشت کر نے والے کسانوں کی حالت بھی زیادہ اچھی نہیں ہے۔ ناصر خان میانوالی شہر سے چار کلو میڑ دور کچے کے رہائشی ہیں۔ وہ 15 ایکڑ زمین کے مالک ہیں اس بار انہوں نے دس ایکڑ پر گاجر اور تین ایکڑ پر پالک کاشت کی ہے۔

وہ بتاتے ہیں کہ انہیں سبزی لانچ کے ذریعے دریا کنارے پر لانی ہوتی ہے۔ وہ لانچ کو ڈیزل پر چلاتے ہیں اور اس پر روزانہ 900 روپے خرچ ہوتے ہیں، پھر سبزی کو میانوالی منڈی پہنچانے کے لیے لوڈر کا انتظام کرتے ہیں۔

وہ کہتے ہیں کہ کچے میں سبزی سٹور نہیں کی جا سکتی۔ اس لیے تازہ سبزی ہی منڈی میں لانا پڑتی ہےاور یہ روزانہ ڈھائی سے تین ہزار کی بکتی ہے۔

&quot;ڈیزل اور آنے جانے کا خرچ نکال کر دو ہزار بھی نہیں بچتے۔ یہ سودا بہت مہنگا ہے&quot;۔

&nbsp;تاہم کندیاں میں 20 ایکڑ کے زمیندار محمد امان اللّٰہ اپنے حالات سے مطمئن ہیں۔ انہوں نے پچھلے سیزن میں پانچ ایکڑ پر بھنڈی کاشت کی تھی اور خاطر خواہ منافع کمایا۔اب انہوں نے دس ایکڑ پر پالک کاشت کر رکھی ہے۔ تاہم کھادوں کی مارکیٹ میں قلت سے وہ خود بھی پریشان نظر&nbsp; آئے۔ 
وہ کہتے ہیں کہ چھوٹےکسان فصلوں پر آنے والی لاگت (ان پٹس)سے دلبرداشتہ ہو گئے ہیں۔

&nbsp;اسسٹنٹ ڈائریکٹر زراعت طارق خان نیازی نے لوک سجاگ کو بتایا&nbsp; کہ کسانوں کو کاشت کاری کے پرانے اور روایتی طریقے چھوڑنا ہوں گے۔

وہ کہتے ہیں کہ پنجاب میں تقریباً 36 لاکھ ایکڑ قابل کاشت رقبہ بنجر پڑا ہے۔ تاہم سالانہ 30 ہزار ایکڑ زمین زیر کاشت لائی جا رہی ہے۔کسانوں کو زرعی قرضوں کا فائدہ اٹھانا چاہیے۔ساتھ ماہرین سے بھی مدد لینی چاہیے اور محکمہ زراعت کے فری ہیلپ لائن نمبر پر بھی بات کر سکتے ہیں۔

انہوں نے بتایا کہ ہائبرڈ بیجوں کے استعمال سے پیداوار میں اضافہ ہو سکتا ہے۔چھوٹے کاشت کار موسمی سبزیاں اگائیں تو زیادہ منافع کما سکتے ہیں۔

&quot;کسان مہنگائی کی بجائے جدید کاشت کاری پر پر توجہ دیں&quot;۔

ماہر زراعت نذر اعوان زرعی افسر طارق نیازی کی بات سے اس حد تک تو اتفاق کرتے ہیں کہ کسانوں کو ڈیجٹیل اور سمارٹ فارمنگ کلچر کو اپنانا ہوگا تاہم ان کا کہنا ہے کہ کسانوں کو مہنگائی کے ساتھ موسمیاتی تبدیلیوں کا بھی سامنا ہے۔

&quot;سمارٹ طریقے اور خود کار ایری گیشن سسٹم پیداوار میں اضافے کا باعث تو بن سکتے ہیں لیکن بد قسمتی سے مہنگائی اور غربت کی وجہ سے چھوٹے کسان نہ صرف زراعت چھوڑ رہے ہیں بلکہ ملک میں سبزیوں کی فی کس روزانہ طلب بھی کم ہو رہی ہے&quot;۔

سبزی منڈی نہ کولڈ سٹوریج: تھر کی نامیاتی سبزیاں اونے پونے بکتی یا ضائع ہو جاتی ہیں

"جدید کاشتکاری اچھی بات ہے لیکن غریب کسان کیا کرے؟"

چار بچوں کی ماں سکینہ بی بی کندیاں ریلوے جنکشن کے قریب کچی آبادی میں گزشتہ 10 سال سے مقیم ہیں۔ ان کی عمر 30 سال ہے اور وہ دن بھر اپنے شوہر کے ساتھ کچرا اور کاٹھ کباڑ اکھٹا کرتی ہیں تاکہ اسے بیچ کر کچھ کما سکیں۔ مناسب خوراک نہ ملنے اور کام کی زیادتی سے ان کی صحت دن بدن گر رہی ہے۔

سکینہ کا کہنا ہے کہ چھ ماہ قبل اپنی بچی کی پیدائش سے پہلے ہی وہ خون کی کمی کا شکار تھیں۔ مناسب مقدار میں ماں کا دودھ نہ ملنے سے ان کی بیٹی لاغر ہوتی جا رہی ہے اور اس کا وزن بھی گر رہا ہے۔ سکینہ کے مطابق ان کے ہاں اتنا دودھ نہیں اترتا کہ بچی کا پیٹ بھر سکے۔

ماہرین صحت کے مطابق حاملہ ہونے سے لے کر بچے کی پیدائش اور دودھ پلانے تک عورت کو مناسب خوراک اور آرام کی ضرورت ہوتی ہے۔ اگر مائیں کمزور ہوں تو نحیف اور لاغر بچے پیدا ہونے کا امکان بہت زیادہ ہوتا ہے۔

قومی غذائی سروے 2018ء کے مطابق پاکستان میں ماں بننے کی عمر میں تقریباً ساڑھے 41 فیصد عورتیں انیمیا یا خون کی کمی کا شکار ہیں۔

عالمی ادارہ صحت کا کہنا ہے کہ ماں کا دودھ بچے کی صحت کے لیے بہت مفید ہوتا ہے۔ یہ بچے کو متعدی بیماریوں اور انفیکشن سے بچانے کے ساتھ نظام انہظام کو درست رکھتا ہے۔ اس سے دست اور قے سے بچاؤ میں بھی مدد ملتی ہے۔ ادارے کے مطابق چھ ماہ تک کے بچوں کو صرف ماں کا دودھ پلایا جائے۔

&nbsp;قومی غذائی سروے کے مطابق پاکستان میں 48 فیصد مائیں ہی بچوں کو اپنا دودھ پلاتی ہیں اور صوبہ پنجاب میں یہ شرح سب سے کم ہے۔

غیر سائنسی اور سنی سنائی باتوں کے باعث بھی بعض مائیں بچوں کو اپنا دودھ نہیں پلاتیں۔

25 سالہ نوراں بی بی اسی علاقے میں رہتی ہیں جہاں سکینہ کی رہائش ہے۔ پچھلے سال انہیں چھاتی کا سرطان ہوا جس کا انہوں نے آپریشن کروایا ہے۔

نوراں کا کہنا ہے کہ جنوری 2022ء میں ان کے ہاں بیٹا پیدا ہوا۔ ابتدا میں اسے دودھ پینے میں دقت ہوتی تھی لیکن بعدازاں اس نے ایک چھاتی سے دودھ پینا شروع کر دیا۔ انہیں کسی خاتون نے کہا کہ تمہارا دودھ کڑوا ہے اس لیے بچہ نہیں پیتا۔

نوراں نے بتایا کہ کے بیٹے کی عمر دو ماہ تھی جب انہوں نے خاتون کی بات مانتے ہوئے اسے بھینس کا دودھ دینا شروع کر دیا۔ کچھ عرصہ بعد انہیں محسوس ہوا کہ انہیں چھاتی میں سختی محسوس ہوئی اور پھر درد اور بخار رہنے لگا۔ ابتدا میں انہوں نے گھریلو ٹوٹکے استعمال کیے لیکن کوئی فرق نہ پڑا۔

ستمبر 2022 میں انہوں نے کندیاں کے گھنڈی ہسپتال میں چیک اپ کرایا جہاں سے انہیں میانوالی ڈسٹرکٹ ہیڈکوارٹر ہسپتال ریفر کیا گیا۔ وہاں گائناکالوجسٹ نے بتایا کہ انہیں چھاتی کا کینسر لاحق ہے جو پھیل رہا ہے اور آپریشن کر کے اسے ختم کرنا ہو گا۔

نوراں سمجھتی ہیں کہ اپنا دودھ نہ پلانے کے سبب نہ صرف ان کا بچہ بلکہ وہ خود بھی متاثر ہوئیں۔

اس ہسپتال کی ڈاکٹر آمنہ شفیق کہتی ہیں کہ ان کے پاس کچی آبادیوں سے آنے والی بیشتر خواتین انیمیا یا خون کی کمی کا شکار ہوتی ہیں۔ انہیں مناسب خوراک اور پینے کا صاف پانی میسر نہیں ہوتا۔ان پر کام کا بوجھ بھی عام عورتوں کی نسبت زیادہ ہوتا ہے۔ یہی وجہ ہے کہ ان میں اتنی طاقت نہیں ہوتی کہ بچے کو ٹھیک سے اپنا دودھ پلا سکیں جس کا اثر بچے کی صحت پر پڑتا ہے۔ غذائی قلت کی شکار ایسی بہت سی خواتین زچگی کے دوران انتقال کر جاتی ہیں۔

مسز طاہر کندیاں کے ایک نجی کالج میں پڑھاتی ہیں۔ وہ اپنے نومولود بچے کو اپنا دودھ پلاتی ہیں اور بعض اوقات نقاہت کے باوجود اس میں کوتاہی نہیں کرتیں۔ ان کا کہنا ہے کہ مناسب اور متوازن خوراک نہ ملنے سے ماں کا دودھ کم پیدا ہوتا ہے۔

ڈاکٹر آمنہ شفیق کا اس حوالے سے کہنا ہے کہ دودھ پلانے کے معاملے میں ماں پر مختلف عوامل اثرانداز ہوتے ہیں۔ اس عمل کے لیے خاندان کی طرف سے تعاون، ذاتی آرام اور مناسب خوراک کا ہونا لازمی ہے۔

ان کے مطابق مسلسل چھ ماہ تک دودھ پلانے سے رحم کے کینسر کا خطرہ 11 فیصد کم ہو جاتا۔ چھاتی کے سرطان کا امکان بھی کم ہوتا ہے۔ ماں کا دودھ انفیکشن سے بچانے والی ویکیسین اور دیگر پروٹین سے بھر پور ہوتا ہے۔ اس کے علاوہ دودھ میں موجود فیٹی ایسڈ بچے کے دماغ کی نشوونما میں بھی مدد دیتے ہیں۔

2 ستمبر کو ملک کے دیگر حصوں کی طرح کندیاں میں بھی &#39;گلوبل بریسٹ فیڈنگ ویک&#39; منایا گیا۔ اس موقع پر لیڈی ہیلتھ ورکر فرزانہ کوثر نے بتایا کہ بریسٹ فیڈنگ ویک میں عورتوں کو ماں کی صحت اور متوازن غذا کے استعمال اور بچے کو دودھ پلانے کے درست طریقوں سے متعلق آگاہی دی گئی۔ ان کا کہنا تھا پسماندہ علاقوں کی خواتین روایتی جھجھک کے باعث ایسے مسائل میں رہنمائی لینے سے کتراتی اور اپنا مرض چھپاتی ہیں جس سے ان کی زندگی خطرے میں پڑ جاتی ہے۔

'مہنگا علاج ہر کسی کے بس میں نہیں ہوتا': بلوچستان میں چھاتی کے کینسر میں مبتلا خواتین کی مسیحائی کون کرے گا؟

پسماندہ آبادیوں میں ماں کا دودھ میسر نہ آنے سے زچہ بچہ کی صحت اور زندگی کو خطرات

میانوالی کے علاقے کندیاں کی بیس سالہ سمرین٭ نے مقامی گرلز ڈگری کالج سے اپنی گریجوایشن مکمل کی ہے۔ رواں سال جنوری میں ایک روز وہ کالج سے چھٹی پر گھر جانے کے لیے سڑک پر اپنی دوستوں کا انتظار کر رہی تھیں تو انہیں محسوس ہوا عقب سے کوئی انہیں چھونے کی کوشش کر رہا ہے۔ جب انہوں نے مڑ کر دیکھا تو وہاں ایک اجنبی شخص موجود تھا۔ اسے دیکھ کر وہ خوف کی مارے ساکت ہو گئیں۔ اسی دوران ان کی دوست بھی وہاں پہنچ گئیں جنہیں دیکھ کر وہ شخص بھاگ گیا۔

سمرین کا کہنا ہے کہ جب کسی خاتون کے ساتھ اچانک ایسا واقعہ پیش آئے تو ابتدا میں یہ سمجھ ہی نہیں آتی کہ اس موقع پر کیا کرنا چاہیے۔ عام طور پر ایسے واقعات میں خواتین وقتی طور پر اعتماد کھو دیتی ہیں اور شور بھی نہیں کر پاتیں۔

سمرین نے بتایا کہ انہوں نے اس واقعےکا گھر میں کسی سے ذکر نہیں کیا کہ کہیں گھر والے انہیں کالج جانے سے ہی نہ روک دیں۔ تاہم انہوں نے کالج کی پرنسپل کو اس سے ضرور آگاہ کیا جس پر انتظامیہ نے کالج کے باہر چوکیدار کھڑا کر دیا گیا تاکہ طالبات کے ساتھ دوبارہ ایسا نہ ہو۔

یہ گورنمنٹ گرلز کالج کندیاں کی کسی طالبہ کے ساتھ پیش آنے والا کوئی واحد واقعہ نہیں ہے۔ چند ماہ قبل بھی ایف ایس سی کی طالبہ ثمینہ٭ کو بھی ایسی ہی صورت حال کا سامنا کرنا پڑا۔

اٹھارہ سالہ ثمینہ کے گھر اور گرلز کالج کے درمیان زیادہ فاصلہ نہیں ہے اس لیے زیادہ تر وہ پیدل ہی آتی جاتی ہیں۔

وہ بتاتی ہیں کہ ایک روز حسب معمول وہ چھٹی کے بعد گھر جا رہی تھیں۔ ابھی وہ کالج سے نکلی ہی تھیں کہ گلی میں چند لڑکوں نے ان پر آوازے کسنا شروع کردیئے۔اور کافی دور تک ان کا پیچھا کرتے رہے۔ وہ ہانپتے کانپتے گھر پہنچیں اور والدہ کو اس واقعے سے آگاہ کیا۔

وہ کہتی ہیں کہ اس کے بعد اگرچہ والدہ نے ان کے لیے رکشے کا انتظام کردیا ہے۔ تاہم یہ انہیں اچھا نہیں لگتا۔ ان کے والد دیہاڑی دار مزدور ہیں اور اضافی برداشت نہیں کر سکتے۔ لیکن اب وہ بھی پیدل کالج نہیں جا سکتیں کیونکہ اس واقعےکا خوف ان کے دل میں بیٹھ گیا ہے۔

ضلع میاںوالی پنجاب میں صنفی تعلیمی فرق کے لحاظ سے سرفہرست ہے۔یہاں مردوں میں شرح خواندگی 73 فیصد اور خواتین میں 41 فیصد ہے۔ہراسانی کے واقعات تعلیم حاصل کرنے کی خواہش مند طالبات کی حوصلہ شکنی کا باعث بنتے ہیں اور یہ اس علاقے میں سکولوں اور کالجوں کی طالبات کو درپیش اہم ترین مسئلہ ہے۔

کندیاں ڈیڑھ لاکھ آبادی کے ساتھ ضلعے کا دوسرا بڑا شہر ہے۔اور گورنمنٹ گرلز ڈگری کالج یہاں کا واحد سرکاری کالج ہے۔ یہاں اس وقت چار سو سے زیادہ طالبات زیر تعلیم ہیں۔

کندیاں میں گرلز کالج 2016 میں قائم کیا گیا تھا۔ اس کی عمارت شہر سے 9 کلو کے فاصلے پر کندیاں موڑ پر واقع تھی۔ تاہم یہاں کلاسز شروع ہو تے ہی شہریوں نے تنقید شروع کر دی اور کہا جانے لگا کہ ہمای بچیاں شہر سے اتنا دور تعلیم حاصل کرنے نہیں جا سکتیں۔

&nbsp;اس وقت یہاں سے رکن صوبائی اسمبلی اور سابق وزیر سبطین خان نے دسمبر 2018ء کو بوائز ڈگری کالج کو اس نئی عمارت میں شفٹ کرا دیا اور گرلز کالج کو شہر کے محلہ اسلام آباد میں بوائز کالج کی جگہ منتقل کر دیا گیا۔

گرلز کالج شہر میں تو آگیا مگر گنجان آباد علاقہ ہونے کی وجہ سے &#39;کالج والوں&#39; کی مشکلات میں کمی نہیں آئی۔یہاں کالج کا کل رقبہ آٹھ کنال ہے اور پارکنگ کے لیے جگہ نہیں ہے۔ تنگ گلیوں میں ایک گاڑی کھڑی ہو جائے تو پیدل گزرنے کی جگہ نہیں ہوتی۔اور محلے کے مکین کالج آتی جاتی بچیوں پر غصہ اتارتے ہیں۔

مسز طوبیٰ احمد یہاں لیکچرار تھیں۔اب وہ میانوالی ڈگری کالج میں تدریسی فرائضی انجام دے رہی ہیں ۔وہ بتاتی ہیں کہ گزشتہ سال کالج کے سامنے اسی محلے کے ایک رہائشی نے ان کی کھڑی گاڑی سے اپنی گاڑی ٹکرا دی اور الٹا انہیں دھمکیاں دیں۔

طوبیٰ احمد نے پرنسپل کو واقعے سے آگاہ کیا اور تھانے میں رپورٹ درج کرانے کا ارادہ ظاہر کیا۔مگر اہل خانہ نے انہیں مشورہ دیا کہ وہ میانوالی ٹرانسفر کرا لیں ورنہ خواہ مخواہ انہیں تھانے کچہری کے چکر لگانے پڑیں گے۔

&nbsp;ان کا کہنا تھا کہ وہ تو میانوالی شفٹ ہو گئی ہیں۔مگر بہت سے لوگ نہیں چاہتے کہ یہاں بچیاں پڑھیں ۔ وہ الزام عائد کرتی ہیں کہ لوگ اساتذہ کو تنگ اور طالبات کو ہراساں کرتے ہیں تاکہ کالج بند ہو جائے۔

اس کالج کی پرنسپل شازیہ نے طالبات کو ہراساں کیے جانے پر کبھی ضلعی انتظامیہ سے مدد نہیں مانگی۔وہ کہتی ہیں کہ جب تک والدین بچیوں کا ساتھ نہیں دیں گے وہ کچھ نہیں کر سکتیں۔اکثر بچیاں ڈر سے گھر میں ایسے کسی واقعے کا تذکرہ تک نہیں کرتیں۔

پرنسپل ایسے واقعات کا اعتراف کرتی اور کہتی ہیں کہ انہوں نے گلی میں چوکیدار کھڑا کیا ہےاور سی سی سی ٹی وی کیمرہ بھی لگوا دیا ہے۔وہ اس سے زیادہ اور کر کیا سکتی ہیں۔

ان کا کہنا ہے کہ مقامی لوگ طالبات کے لیے مشکلات پیدا کر رہے ہیں۔کالج کے راستے کا مسئلہ حل کرنے کے لیے انہوں نے کئی بار ڈپٹی کمشنر کو مراسلہ لکھا ہے لیکن کارروائی نہیں ہوئی۔ ہائر سیکنڈری گرلز سکول جرنیلی روڈ پر ہے اور گرلز کالج سے متصل ہے۔سکول کا رقبہ بھی 52 کنال ہے۔اگر وہاں سے سڑک بن جائے تو مسائل کم ہو جائیں گے۔

چالیس سالہ محمد منیر زرگر کالج کی پچھلی گلی میں رہتے ہیں&nbsp; اور یہیں دس سال سے جیولری&nbsp; کا کاروبار کرتے ہیں۔وہ بتاتے ہیں کہ کالج کی گاڑیوں نے اس علاقے میں مقامی لوگوں کا راستہ روک رکھا ہے۔ خریداری کے لیے آنے والوں کو رکشے سے اتر کر پیدل بازار تک آنا پڑتا ہے۔&nbsp;

وہ کہتے ہیں کہ ان کی دکان پر گاہک کم ہورہے ہیں۔ اگر متبادل راستہ فراہم کیا جائے تو اہل محلہ اور&nbsp; کالج دونوں کا مسئلہ حل ہو جائے گا۔&nbsp;کندیاں کے سابق ناظم ملک حبیب نے بتایا کہ پہلے ان کی بچیوں کو پڑھنے کے لیےمیانوالی جانا پڑتا تھا۔ اب شہر میں سہولت ملی ہے تو کچھ لوگ شر پسندی کر رہے ہیں۔بچیوں کے والدین کو آگے آنا ہوگا۔

ماہر نفسیات نازیہ ناہید کہتی ہیں کہ ہراسانی منفی سماجی رویہ ہے۔ مرد جہاں کہیں بھی عورت کو نہتا اور بے بس دیکھتے ہیں انہیں ہراساں کرنا شروع کر دیتے ہیں ۔کم عمر طالبات اکثر ری ایکٹ نہیں پاتیں۔والدین کو لڑکیوں میں اعتماد پیدا کرنا چاہیے۔

ایڈوکیٹ مسزز نائلہ مشتاق دھون اس حوالے سے کہتی ہیں کہ عوامی مقامات،گلی کوچوں یا کہیں بھی خواتین کو ہراساں کرنے کے خلاف سزا کا قانون موجود ہے۔ لیکن اس حوالے سے شعور اور ارادے کی کمی ہے۔

&nbsp;وہ کہتی ہیں کہ تعزیرات پاکستان کی دفعہ509 کے تحت اگر کوئی شخص کسی خاتون کی اپنے الفاظ یا رویے سے بے تو قیری کرتا ہے تو اسے تین سال قید اور جرمانہ ہو سکتا ہے۔ 394 اے کے تحت نا مناسب گانا گانے والے کو بھی تین ماہ کی سزا ہو سکتی ہے۔

٭ فرضی نام استعمال کیے گئے ہیں

'والدین "بدنامی" کے خوف سے نکل آئیں تو خواتین کو ہراساں کرنے کے واقعات کا موثر تدارک ممکن ہے'

ہراسانی کے بڑھتے واقعات، کندیاں میں گرلز ڈگری کالج کی طالبات عدم تحفظ اور خوف کا شکار

پینتالیس سالہ عیسیٰ خان کندیاں شہر کے رہائشی ہیں۔ وہ گزشتہ&nbsp; 20 سال سے شہر سے چار کلومیٹر دور دور کندیاں موڑ پر گنے کے جوس اور چنے&nbsp; کی ریڑھی لگاتے ہیں اور روزانہ اوسطاً سات سو روپے کماتے ہیں۔ اسی سے ان کے گھر کی روزی روٹی چلتی ہے۔ ان کا گھرانہ چار بچوں سمیت چھ افراد پر مشتمل ہے۔

جس جگہ وہ ریڑھی لگاتے ہیں اس سے قریب ایک پارک کی تعمیر کا منصوبہ بنایا گیا ہے۔ سابق وزیراعظم نے 2021 میں جب اس پارک کا سنگ بنیاد رکھا تو عیسیٰ خان بہت خوش ہوئے۔ ان کی خوشی کا سبب یہ تھا کہ اس پارک سے انہیں اپنے کاروبار میں ترقی کی امید تھی کیونکہ پارک میں لوگ آتے تو لامحالہ اس کے قریب ان کی ریڑھی پر فروخت بھی بڑھ جاتی۔

تاہم اس پارک کی تعمیر تاحال مکمل نہیں ہو سکی اور کاروبار میں ترقی کے حوالےسے عیسیٰ خان کی امیدیں بھی دم توڑنے لگی ہیں۔

ڈیڑھ لاکھ آبادی پر مشمل کندیاں، میانوالی سٹی کے بعد اس ضلعے کا سب سےبڑا شہری علاقہ ہے لیکن یہاں تفریح کی کوئی سہولت موجود نہیں۔

ایم ایم روڈ پر میانوالی سے مظفرگڑھ کی طرف دس کلومیٹر کے فاٖصلے پر ایک رابطہ سڑک مغرب میں کندیاں کو نکلتی ہے۔ یہاں سے شہر چار کلو میٹر فاصلے پر ہے اور مشرق میں پرانے جنگل &#39;کندیاں پلانٹیشن&#39; کارقبہ شروع ہوتا ہے۔ سڑک پر یہ سٹاپ &#39;کندیاں موڑ&#39; کہلاتا ہے۔

یہاں محکمہ جنگلات کی 20 ہزار ایکڑ زمین میں سے 50 ایکڑ پر پنجاب حکومت نے پارک بنانے کا فیصلہ کیا تھا۔ پی سی ون کے مطابق پارک کی تعمیر پر لاگت کا تخمینہ تقریباً 23 کروڑ 50 لاکھ روپے لگایا گیا۔ تاہم عملاً اس کے لیے 17 کروڑ 64 لاکھ روپے مختص کیے گئے۔

پارک میں دس ایکڑ زمین پر گھاس کے قطعات بنائے جانا ہیں۔ 20 ایکڑ پر درخت اور پودے جبکہ ایک ایکڑ گلاب اور چمبیلی کے پھولوں اگانے کا منصوبہ ہے۔ اس کے علاوہ دس ایکڑ پر نباتاتی&nbsp; گارڈن کا قیام بھی اس منصوبے کا حصہ ہے جس سے عام لوگوں کے علاوہ نباتیات (باٹنی) کے طلبہ بھی استفادہ کر سکتیں گے۔

منصوبے کے مطابق پارک میں 40 اقسام کے پھول اور پودے ہوں گے۔ بچوں کے لیے پلے ایریا، پبلک ٹوائلٹس، لوگوں کے بیٹھنے کے لیے مناسب جگہ، پینے کے پانی کی فراہمی کے علاوہ دیگر ضروری سہولیات بھی مہیا کی جانا ہیں۔

سیاحوں کے لیے انفارمیشن سنٹر، ایک فوڈ کورٹ ،چار ہٹ، چار ٹک شاپس اور پانچ پکنک شیڈز بھی اس منصوبے کا حصہ ہیں۔پارکنگ ایریا، واک ویز، باؤنڈری وال اور چھ ہزار رننگ فٹ جاگنگ ٹریک کے ساتھ اس میں عملے کے کوارٹر اور دیگر تعمیرات بھی اس میں شامل ہے۔

&nbsp;پنجاب فاریسٹ ڈیپارٹمنٹ&nbsp; نے خوش خبری دی تھی کہ یہ پارک جہاں کندیاں کی خوبصورتی میں اضافہ کرے گا وہیں دس ہزار 848 مقامی لوگوں کے روزگار کا ذریعہ بھی بنے گا۔

پارک کی تعمیر اور نگرانی کے دونوں کام محکمہ جنگلات&nbsp; کو سونپے گئے، سب ڈویژنل فاریسٹ افسر کندیاں کو منصوبے کا فوکل پرسن مقرر کیا گیا اور پارک کی تکمیل کے لیے 30 جون 2023 کی تاریخ مقرر کی گئی تھی۔

منصوبے کے مطابق پارک کو دو ماہ قبل عوام کے لیے کھول دیا جانا چاہئے تھا۔لیکن ایسا نہیں ہو سکا۔ اگرچہ اس کی چار دیواری اور مرکزی گیٹ مکمل ہوچکا ہے مگر احاطے کے اندر پارک نام کی کوئی چیز نہیں ہے اور ہر طرف ٹف ٹائلز ، سریہ اور تار پڑے ہیں۔

پینتیس سالہ سالہ محمد دین بھی کندیاں میں رہتے ہیں۔ انہوں نے اڑھائی سال قبل یہیں کندیاں موڑ پر کھانے پینے کی اشیاء کی دکان بنائی تھی مگر چلی نہیں اور اب وہ مزدوری کرتے ہیں۔

محمد دین بتاتے ہیں کہ دن کے وقت تو کندیاں موڑ پر مسافروں کی تھوڑی بہت آمدورفت رہتی ہے۔مگر شام ہوتے ہی ویرانی چھا جاتی ہے کوئی مسافر یہاں نہیں اترتا۔تمام بسیں ویگنیں ایک کلومیٹر دور کندیاں ریلوے سٹیشن کے سامنے المعصو م اڈے پر جا کر سواریاں اتارتی ہیں۔

وہ کہتے ہیں کہ ان کاروبار روز بروز گر رہا تھا تو انہیں دکان ختم کرنا پڑی۔اب پارک بنے گا تو یہاں رونق بڑھے گی۔ سیاحوں کی آمد سے ریڑھی ٹھیلے والوں کا فائدہ ہو گا اور وہ بھی دوبارہ&nbsp; دکانیں کھول لیں گے۔

ڈائریکٹوریٹ جنرل مانیٹرنگ اینڈ ایویلیوایشن پلانگ اینڈ ڈیویلپمنٹ بورڈ کی ٹیم نے پارک کا تعمیر کا معائنہ کر کے 15 مئی 2023ء کو اپنی رپورٹ حکام کو پیش کر دی تھی۔

سیکرٹری فنانس اورسیکرٹری فاریسٹ وائلڈ لائف اور فشریز&nbsp; کو ارسال کی گئی اس رپورٹ میں بتایا گیا&nbsp; کہ پارک کا 80 فیصد کام اپریل میں مکمل ہونا چاہیئے تھا مگر ایسا نہیں ہو سکا اور گزشتہ مالی سال کے دوران&nbsp; منصوبے کے لیے جاری کی گئی رقم کا 42.23 فیصد ہی استعمال ہو پایا ہے۔

رپورٹ کے مطابق منصوبے پر کام کی رفتار بہت سست ہے۔ زمین پر بکھرےبجلی کے تار&nbsp; مزدوروں کے لیے خطرہ بن سکتے ہیں۔

فیصل خان سرگودھا یونیورسٹی میں باٹنی کے طالب علم ہیں۔ ان کا کہنا ہے کہ یہ پارک&nbsp; تعلیمی لحاظ سے بہت اہم ہے کیونکہ منصوبے کے مطابق یہاں بوٹینکل گارڈن میں نا صرف پھول دار بلکہ مقامی پودے&nbsp; بھی بہ کثرت ہوں گے اور یہ باٹنی کے طلبہ کے لیے بڑا تحقیقی مرکز بن سکتا ہے۔

سابق وزیر جنگلات سبطین خان نے بتایا کہ فاریسٹ پارک کندیاں کے حسن میں اضافہ کرے گا۔ لیکن بد قسمتی سے حکومتوں کو اپنی مدت پوری کرنے کا موقع نہیں ملتا جس سے ترقیاتی منصوبے التوا کا شکار ہوجاتے ہیں۔

ایس ڈی ایف او کندیاں آصف ندیم بتاتے ہیں کہ صوبائی اسمبلی تحلیل ہونے سے کام کی رفتار کم ہوئی۔ لیبر پارک میں 14 ملازمین کی ضرورت ہے جن میں مالی اور دیگر عملہ شامل ہے۔ تاہم جنوری میں جب پنجاب اسمبلی تحلیل ہوئی تو الیکشن کمیشن نے&nbsp; بھرتیوں پر پابندی لگا دی تھی۔ اس لیے کام مقررہ مدت میں مکمل نہیں ہو سکا۔

انہوں نے دعویٰ کیا کہ پارک کا 60 فیصد کام ہوچکا ہے۔ تاہم انہوں نے تسلیم کیا کہ پارک کا انفارمیشن سنٹر، ٹف ٹائل کا کام، بوٹینکل گارڈن ، پلے ایریا اور لان نامکمل ہیں۔

تعمیراتی کام کے انچارج انجینئر بشیر احمد بھی ان کی تائید کرتے ہیں۔ان کا کہنا ہے کہ بروقت افرادی قوت میسر آ جاتی تو پارک کا کام جلد مکمل ہوسکتا تھا۔

کندیاں میں کھیلوں کا واحد میدان جہاں گائے بکریاں اور کتے بھی کھیلتے ہیں

بھرتیوں پر پابندی یا محکمہ جنگلات کی سُستی: کندیاں فاریسٹ پارک کی تعمیر تاخیر کا شکار

پندرہ سالہ نجیب اقبال کندیاں کے نواحی گاؤں کیتانوالہ میں رہتے ہیں۔ وہ چار سال سے کرکٹ کھیل رہے ہیں۔ ان کا حال ہی میں ڈویژنل انڈر16 ٹیم میں چناؤ ہوا ہے۔ تاہم اس کامیابی پر وہ خوش ہونے کے ساتھ پریشان بھی ہیں۔

نجیب کی پریشانی یہ ہے کہ ان کے شہر میں&nbsp; کوئی اچھا گراؤنڈ نہیں ہے۔ ان کے بقول بظاہر تو یہاں &#39;کندیاں سٹیڈیم&#39; کے نام سے کرکٹ گراؤںڈ موجود ہے مگر اس کی حالت کھیلنے کے قابل نہیں ہے۔ چونکہ شہر میں کھیلنے کی کوئی اور جگہ نہیں ہے اس لیے نجیب اور ان کے ساتھی اسی گراؤںڈ میں پریکٹس کرتے ہیں۔

وہ بتاتے ہیں کہ چار سال پہلے یہاں گراؤنڈ کے بجائے کچرا کنڈی کا گمان ہوتا تھا کیونکہ لوگ یہاں کوڑا کرکٹ پھینکتے تھے۔ نجیب اور ان کے ساتھی کھلاڑیوں نے اس میدان کو صاف کیا لیکن چار دیواری نہ ہونے کی وجہ سے اسے بہتر حالت میں رکھنا ممکن نہیں کیونکہ آئے روز مویشی یہاں داخل ہو کر پچ کو خراب کر جاتے ہیں جس کی وجہ سے یہاں کھیلنے والوں کو مشکلات کا سامنا رہتا ہے۔

نجیب کا کہنا ہے کہ کندیاں میں کھیلوں کا بھرپور ٹیلنٹ پایا جاتا ہے۔ اگر شہر میں سپورٹس کمپلیکس بن جائے تو سیکڑوں نوجوانوں کی تقدیر بدل سکتی ہے۔

اڑتیس سالہ محمد عامر گیارہ سال سے کرکٹ کھیل رہے ہیں۔ وہ بتاتے ہیں کہ ان کا کمسن بیٹا شاہ میر اپنے دوستوں کے ساتھ اس گراؤنڈ میں کرکٹ کھیل رہا تھا کہ اسے آوارہ کتے نے کاٹ لیا۔ اس واقعے کے بعد شاہ میر نے گراؤںڈ میں کھیلنا بند کر دیا۔ عامر بتاتے ہیں کہ ان کے بیٹے کے علاوہ بھی کئی بچوں کے ساتھ ایسے ہی واقعات پیش آ چکے ہیں۔

کندیاں میانوالی کی تحصیل پپلاں کا علاقہ ہے۔ 17 لاکھ آبادی کے اس ضلعے میں کندیاں شہر (کچا اور پکا کندیاں) کی آبادی لگ بھگ ڈیڑھ لاکھ ہے۔

2001ء میں ضلعی حکومت نے کندیاں میں کھیلوں کا سٹیڈیم بنانے کا اعلان کیا تھا۔ اس کے&nbsp; لیے جی ٹی روڈ (اسے شیر شاہ سوری روڈ بھی کہتے ہیں) کے مغرب میں واقع 87 کنال سرکاری اراضی کا انتخاب کیا گیا۔ صوبائی حکومت نے یہ رقبہ ضلعی سپورٹس ڈیپارٹمنٹ کے حوالے کر دیا۔

حمیرحیات خان روکھڑی نے 2002ء میں بطور ضلع ناظم یہاں سٹیڈیم کا سنگ بنیاد رکھا۔ ضلعی حکومت نے 50 لاکھ روپے سے سٹیڈیم کی چار دیواری تعمیر کرائی، کرکٹ کے لیے تین پچیں بنوائیں اور اسے ضلعی محکمہ کھیل کے کنٹرول میں دے دیا۔

چار دیواری مکمل ہوتے ہی گراؤنڈ میں کھیل شروع ہو گئے جن میں کرکٹ، فٹ بال اور والی بال خاص طور پر نمایاں تھے۔

رضا کرکٹ کلب کے شریک انچارج محمد عزیز لوگی کہتے ہیں کہ جب گراؤنڈ بنا تو علاقے میں نوجوانوں نے تیتر بٹیر پالنا چھوڑ کر جسمانی کھیل کھیلنا شروع کر دیے۔ اس طرح یہ سٹیڈیم علاقے میں نوجوانوں کے لیے صحت مند تفریح کی جگہ بن گیا۔

عزیز بتاتے ہیں کہ 2008 میں ایک کرکٹ ٹورنامنٹ کے دوران مسلح افراد گراؤنڈ میں گھس آئے جنہوں نے وکٹیں توڑ دیں اور کھلاڑیوں سے سامان چھین لیا۔

گراؤنڈ کے قریب رہنے والے محمد بلال اور محمد وارث کے مطابق اس واقعے کا نہ تو مقدمہ درج ہوا اور نہ ہی پولیس نے مداخلت کی۔ اس کے بعد پپلاں، چشمہ اور قریبی دیہات کے کھلاڑیوں نے اس گراؤنڈ میں آنا چھوڑ دیا۔

خوف کی فضا کے باعث جب کھیلوں کی سرگرمیوں میں کمی آئی تو لوگ دیوار کی اینٹیں اور گیٹ اکھاڑ لے گئے۔ 2011ء تک یہ میدان مویشیوں اور آوارہ کتوں کی آماجگاہ بن چکا تھا جس کے بعد اس زمین پر چنے کی کاشت شروع ہو گئی۔

2018ء میں مقامی کھلاڑیوں ثناءاللہ، امان اللہ اور محمد عامر نے ڈسٹرکٹ سپورٹس آفس کو سٹیڈیم کی جگہ خالی کرانے کے لیے درخواست دی۔ اس وقت گراؤنڈ پر ارشد نامی کاشت کار نے فصل کاشت کرر کھی تھی۔

اس درخواست پر ضلعی محکمہ کھیل نے فوری کارروائی کی۔ مقامی وڈیروں نے بھی کاشت کار ارشد سے رابطہ کیا جس کے بعد انہوں نے گراؤنڈ کا قبضہ چھوڑ دیا اور یہاں کھیل دوبارہ شروع ہو گئے۔

کندیاں کی سماجی و کاروباری شخصیت محمد اکبر ساجھرہ کرکٹ سے خاص لگاؤ رکھتے ہیں اور سعودی عرب میں اپنے طویل قیام کے دوران ریاض کرکٹ ایسوسی ایشن سے بھی منسلک رہے ہیں۔ ان کا کہنا ہے کہ 2019 میں وطن واپسی پر وہ گراؤنڈ میں گئے تو وہاں کے حالات بہت خراب تھے۔ انہوں نے اپنی جیب سے دولاکھ روپے خرچ کیے اور کھلاڑیوں کی مدد سے میدان کو کوڑے کرکٹ سے صاف کرایا اور ایک نئی پچ بھی بنوا کر دی۔

2021 ء میں انہوں نے اسی گراؤنڈ میں ضلعی سطح کا ٹورنامنٹ منعقد کرایا جس میں ضلعے کی 26 ٹیموں نے شرکت کی۔

محمد اکبر کہتے ہیں کہ کندیاں میں سپورٹس کمپلیکس مقامی آبادی کی ایک اہم ضرورت ہے۔ انہوں نے اس مقصد کے لیے ضلعی محکمہ سپورٹس سے کئی مرتبہ بات کی ہے لیکن ہر مرتبہ انہیں ٹال دیا گیا۔

2019 ء میں پنجاب حکومت نے 14 تحصیلوں میں سپورٹس کمپلیکس بنانے کی منظوری دی تھی۔ اس سلسلے میں ضلع میانوالی کی تحصیل عیسیٰ خیل میں ایک سپورٹس کمپلیکس بنایا گیا، پپلاں میں کرکٹ گراؤںڈ کی سہولت دی گئی، میانوالی شہر میں کرکٹ سٹیڈیم اور تحصیل سپورٹس کمپلیکس تعمیر ہوئے مگر کندیاں کو نظرانداز کر دیا گیا۔

ضلعی محکمہ کھیل کے حکام نے کندیاں سپورٹس کمپلیکس کی تعمیر کے لیے پچھلے سال سٹیڈیم کی جگہ کا جائزہ لیا تھا تاہم اس کی تعمیر کا تخمینہ لگائے جانے کے بعد کوئی پیش رفت نہیں ہو سکی۔

ضلعی افسرِ کھیل امتیاز احمد کہتے ہیں کہ کندیاں میں سپورٹس کمپلیکس کی تعمیر کا کام جلد شروع ہو جائے گا۔ فی الوقت اس سلسلے میں مالی وسائل کی کمی درپیش ہے۔ وہ منتخب عوامی نمائندوں پر زور دیتے ہیں کہ وہ بھی اس معاملے میں اپنا کردار ادا کریں۔

عریج فاطمہ

عریج فاطمہ کا تعلق کندیاں، ضلع میانوالی سے ہے۔ عریج نے پولیٹیکل سائنس میں ماسٹرز کر رکھا ہے۔ تعلیم، خواتین اور دیہی ترقی ان کے دلچسپی کے شعبے ہیں۔