چک امرو کی پینتیس سالہ شاہین 20 کلومیٹر فاصلہ طے کر کے زچگی کے لئے شکرگڑھ کے ایک نجی ہسپتال آئیں جہاں 20 ہزار روپے فیس کے عوض ان کی نارمل ڈلیوری کی گئی اور دو گھنٹے بعد گھر بھیج دیا گیا۔

شاہین بہت خوش تھیں کہ انہیں زچگی کے لئے آپریشن نہیں کروانا پڑا اور سارا عمل بخیروخوبی انجام پایا۔ تاہم ان کی خوشی زیادہ دیر برقرار نہ رہ سکی۔

جب وہ گھر پہنچیں تو ان کے نومولود بچے کو سانس لینے میں مشکل پیش آ رہی تھی۔ بچے کی جان بچانے کے لئے اہلخانہ اسے 40 کلومیٹر دور نارووال کے سہارا ہسپتال لے گئے جہاں اسے آکسیجن لگائی گئی لیکن بچے نے دم توڑ دیا۔

شاہین کہتی ہیں کہ &#39;&#39;میں زچگی کے لئے نجی ہسپتال اس لیے گئی تھی کہ مجھے وہاں اچھی سہولتیں ملنے کی امید تھی۔ مگر افسوس کہ بچے کا کسی ڈاکٹر نے معائنہ تک نہ کیا۔ بعد میں پتا چلا کہ وہاں نہ تو بچوں کا کوئی ڈاکٹر تھا اور نہ ہی آکسیجن دستیاب تھی۔ اسی لئے انہوں نے ہمیں فوراً ڈسچارج کر دیا۔&#39;&#39;

شکرگڑھ شہر کی اکتیس سالہ نازیہ یونس ایک بچے کی ماں ہیں۔ ان کی دوسری زچگی سرکاری ہسپتال میں ہوئی تھی۔ وہ بتاتی ہیں کہ ڈلیوری کے بعد جب وہ ہسپتال سے گھر پہنچیں تو ان کے بچے کی حالت بگڑنے لگی۔ اسے سانس لینے میں دشواری پیش آ رہی تھی۔ گھر والے اسے فوری طور پر لاہور لے گئے جہاں ڈاکٹروں نے بتایا کہ بچہ آکسیجن کی شدید کمی کا شکار ہے۔ تاہم کوشش کے باوجود اس کی جان بچائی نہ جا سکی۔

معروف کنسلٹنٹ ڈاکٹر فزا حیدر کہتی ہیں کہ ہسپتالوں میں نرسری وارڈ اور مناسب تعداد میں تربیت یافتہ عملے کا نہ ہونا نوزائیدہ بچوں کی اموات کا ایک بڑا سبب ہے۔

&#39;&#39;پیدائش کے فوری بعد بعض بچوں کو آکسیجن، انکیوبیٹر اور وارمر کی ضرورت ہوتی ہے۔ بہت سے بچوں کو پیدائش کے وقت یرقان ہوتا ہے۔ انہیں فوٹو تھراپی اور بلیو لائٹ تھراپی کی ضرورت ہوتی ہے۔ اس لئے ہسپتالوں میں نرسری وارڈ اور بچوں کے ڈاکٹر کی موجودگی بہت ضروری ہے۔&#39;&#39;

پنجاب ہیلتھ کیئر کمیشن ہسپتالوں میں نرسری وارڈ کو لازمی قرار دیتا ہے جہاں ایس او پیز کے مطابق آکسیجن، فوٹو تھراپی مشین، سکر مشین، نیبولائزر اور دیگر آلات کی دستیابی یقینی بنائی جانی چاہیئے۔ نرسری میں چائلڈ سپیشلسٹ اور تجربہ کار سٹاف کی موجودگی بھی لازم ہے۔ مگر ان شرائط پر عملدرآمد کم ہی دکھائی دیتا ہے۔

تحصیل شکرگڑھ کی آبادی سات لاکھ ہے جہاں ہر سرکاری و نجی ہسپتال میں لیبر روم تو موجود ہے لیکن ایک نجی ہسپتال کے علاوہ کہیں بھی نرسری کی سہولت نہیں ہے۔ یہ ہسپتال بھی اس قدر مہنگا ہے کہ عام آدمی اس کا رخ کرنے کا سوچ بھی نہیں سکتا۔

نارووال کی تحصیل ظفر وال کے ہسپتال بھی نرسریوں کے بغیر چل رہے ہیں۔

تحصیل ہیڈ کوارٹر ہسپتال شکر گڑھ کے ایم ایس ڈاکٹر ریاض کہتے ہیں کہ &#39;&#39;ہمارے ہسپتال میں زچگی کے اوسطاً ماہانہ 210 کیس آتے ہیں۔ ہسپتال میں نرسری کا سامان تو موجود ہے لیکن جگہ نہیں ہے اور سٹاف کی کمی ہے جس کی وجہ سے باقاعدہ وارڈ نہیں بن سکا۔&#39;&#39;

اس ہسپتال کی نرس شہزادی نےبتایا کہ نرسری وارڈ نہ ہونے کے باعث وہ زچہ بچہ کو 6 گھنٹے بعد ہی ڈسچارج کر دیتے ہیں۔ اگر کسی بچے کی طبعیت زیادہ خراب ہو تو اسے ڈسٹرکٹ ہسپتال ریفر کر دیا جاتا ہے۔

نارووال میں ڈسٹرکٹ ہیلتھ اتھارٹی کے چیف ایگزیکٹو ڈاکٹر نوید حیدر تحصیل ہیڈکوارٹر ہسپتال شکر گڑھ میں عملے کی کمی کے دعوے کو تسلیم نہیں کرتے۔ ان کا کہنا ہے کہ اب ہسپتال میں چائلڈ سپیشلسٹ کی تعیناتی عمل میں آ چکی ہے اور نرسری وارڈ بھی جلد کام شروع کر دے گا۔

لیاقت پور تحصیل ہسپتال: 'انتہائی نگہداشت کا یونٹ فعال ہوتا تو جان بچ سکتی تھی'

تحصیل شکر گڑھ کے سرکاری ہسپتال: 'نرسری وارڈ اور تربیت یافتہ عملے کا نہ ہونا نوزائیدہ بچوں کی اموات کا ایک بڑا سبب ہے'

text

پاک بھارت سرحد پر واقع ضلع نارووال میں دس ہزار ایکڑ رقبے پر پھیلے 73 جنگلوں میں درخت تیزی سے کم ہوتے جا رہے ہیں۔ اس علاقے میں مشہور بدوال مور والے جنگل کا سرسبز رقبہ 63 ایکڑ سے کم ہو کر تقریباً 40 ایکڑ تک رہ گیا ہے جبکہ چترانہ والا جنگل تقریباً ختم ہو چکا ہے جہاں اب کوئی درخت دکھائی نہیں دیتا۔

نارووال کی تحصیل شکر گڑھ سے پندرہ کلومیٹر دور چک بارایاں کے پرواز اختر اب شہر میں رہتے ہیں۔ ان کا بچپن اور لڑکپن گاؤں میں گزرا ہے جہاں وہ آم کے سرسبز پیڑوں میں گھرے مکان میں رہتے تھے۔ وہ بتاتے ہیں کہ ان کے علاقے میں دہائیوں سے کھڑے درخت تیزی سے کاٹے جا رہے ہیں۔

&#39;&#39;اپنے آبائی گھر کے قریب آم کے درخت کاٹے جانے کی اطلاع پر ہم نے گاؤں میں جا کر کٹائی کرنے والوں سے بازپرس کی تو انہوں نے بتایا کہ ان کے پاس درخت کاٹنے کا سرکاری اجازت نامہ ہے۔ جب ان سے اجازت نامہ دکھانے کو کہا گیا تو انہوں نے انکار کر دیا اور دو دن میں گیارہ درخت کاٹ کر بیچ دیے گئے۔&#39;&#39;

سرکاری ریکارڈ کے مطابق ضلع نارووال میں محکمہ جنگلات کے پاس 13 ہزار 712 ایکڑ اراضی ہے جس میں دس ہزار ایکڑ سے زیادہ رقبے پر جنگلات ہیں۔ ان میں ان میں آٹھ ہزار 440 ایکڑ رقبہ شکرگڑھ کی حدود میں آتا ہے۔

ان جنگلات میں کیکر، آم، شیشم اور سفیدے کے درخت لگے ہیں۔ ان جنگلوں میں خارپشت، سانبھر، ہاگ ہرن اور پاڑے سمیت متعدد جنگلی جانور پائے جاتے ہیں۔ اس کے علاوہ یہ جنگلات تیتر، بٹیر، طوطے، مور اور دیگر پرندوں کا مسکن بھی ہیں جہاں راوی کنارے مرغابیوں سمیت کئی ہجرتی پرندے بھی بسیرا کرتے ہیں۔

عباس راجپوت شکرگڑھ میں فارسٹ گارڈ کے طور پر تعینات ہیں۔ ان کا کہنا ہے کہ اگر کسی نے اپنی زمین پر بھی درخت کاٹنا ہوں تو اس کے لیے متعلقہ علاقے میں رینجرز سے اجازت نامہ لینا لازمی ہے۔

&quot;لیکن پچھلے دو ماہ سے محکمہ جنگلات نے ایک ٹرانزٹ پرمٹ (اجازت نامہ راہداری) لینے کا حکم جاری کیا ہے۔ کیونکہ لوگ دو سے تین درختوں کا پرمٹ لے کر زیادہ درخت کاٹ لیتے تھے۔ ٹرانزٹ پرمٹ جاری کرنے کا یہ اختیار محکمہ جنگلات کے پاس ہے۔ پرمٹ جاری ہونے سے پہلے مقامی نمبردار اس زمیندار کی تصدیق کرتا ہے۔ چونکہ شیشم کو تناور درخت بننے میں طویل مدت درکار ہوتی ہے اس لیے اسے کاٹنے کی اجازت نہیں ملتی۔ اس کے علاوہ اس پرمٹ کے ذریعے کوئی بھی درخت کاٹا جا سکتا ہے۔&#39;&#39;

اکتوبر 2022ء میں شکرگڑھ تھانے میں عبدالمنعم نامی فاریسٹ گارڈ نے ایف آئی آر درج کرائی جس کے مطابق کچھ لوگ محکمہ جنگلات کی دو لاکھ 50 ہزار روپے مالیت کی شیشم کی لکڑی چوری کر کے فرار ہو گئے۔ 
عبدالمنعم نے بتایا کہ &quot;اس کیس میں ملزموں کی ضمانتیں ہو چکی ہیں اور یہ اپنی نوعیت کا کوئی انوکھا واقعہ نہیں بلکہ ایسے واقعات عام ہیں۔&#39;&#39;

فاریسٹ رینج افسر غلام محی الدین کے مطابق شکرگڑھ کے جنگلات کا صرف 30 فیصد حصہ محکمہ جنگلات کے پاس ہے باقی سارے رقبے پر فوج کا کنٹرول ہے۔

&quot;سرحدی علاقے محکمہ وائلڈ لائف، جنگلات، فشریز، فوج اور رینجرز کے ماتحت ہیں جہاں ان کی مرضی کے بغیر کوئی درخت نہیں کاٹ سکتا۔ ہمارے پاس اہلکار کم ہیں رینج میں 32 ملازمین ہونے چاہیئں مگر ہمیں گیارہ ملازمین سے گزارا کرنا پڑ رہا ہے۔ لیکن اگر کہیں بھی درخت کاٹے جاتے ہیں یا لکڑی چوری ہوتی ہے تو ہم کارروائی کرتے ہیں اور ملزموں کو جرمانہ بھی کرتے ہیں&quot;

&nbsp;لیکن انہوں نے ان مقدموں کی تفصیل نہیں بتائیں۔

نارووال میں پاک بھارت سرحد پر پانچ میل کے علاقے کو 1995 میں پنجاب وائلڈ لائف ایکٹ کے تحت گیم ریزرو قرار دیا گیا تھا اور یہاں درخت کاٹنے یا غیرقانونی شکار کرنے والوں کے لیے ایک لاکھ سے دس لاکھ روپے تک جرمانے کی سزا مقرر کی گئی اور راوی کنارے جنگلی اور آبی حیات کے تحفظ کے لیے ایک کمپلیکس بھی بنایا گیا۔ تاہم باقی علاقوں میں قانون پر پوری طرح عملدرآمد نہ کرائے جانے کے باعث زمین درختوں سے خالی ہوتی جا رہی ہے۔

نارووال کے ڈسٹرکٹ وائلڈ لائف افسر ارشد ناز کا کہنا ہے کہ اب صرف بہنال، بڑا بھائی اور بیجا پور میں ہی جنگلی حیات کے لیے محفوظ علاقہ (پروٹیکٹڈ ایریا) باقی ہے۔ قانون پر عمل کرانے کے لیے پورے ضلعے میں محکہ وائلڈ لائف کے پاس صرف آٹھ لوگ ہیں جبکہ ہر تحصیل میں دس سے 15 اہلکاروں&nbsp; کی ضرورت ہے۔

&quot;اس علاقے میں زمینیں آباد ہو رہی ہیں، ماحول تبدیل ہو رہا ہے، جنگل میں تو پرانے درخت ہی ہوتے ہیں اور وہی کاٹے جا رہے ہیں۔ فاریسٹ ڈیپارٹمنٹ والے ان کی جگہ سفیدے کے درخت لگا رہے ہیں لیکن سفیدے میں وائلڈ لائف نہیں رہ سکتی۔&quot;

ماہر ماحولیات محمد رفیق بتاتے ہیں کہ درختوں کے پتے فضا کی دھول جمع کرتے ہیں اور انسانوں کو سانس کی بیماریوں سے بچاتے ہیں۔

&#39;&#39;جنگلات کی کٹائی کے باعث درختوں پر انحصار کرنے والے جانوروں اور پرندوں سے ان کے ٹھکانے چھن جاتے ہیں۔ نارووال اور گردونواح کے جنگلاتی رقبے میں کمی آنے سے یہاں بسنے والے جانور اور پرندے بھی ختم ہو رہے ہیں یا ہجرت کر رہے ہیں۔&#39;&#39;

محمد رفیق کا کہنا ہے کہ موسمیاتی تبدیلیوں کے تناظر میں دیکھا جائے تو ہمیں مزید رقبے پر جنگلات درکار ہیں لیکن یہ المیہ ہے کہ ہم پہلے سے موجود اپنے جنگلوں کو بھی ختم کیے دیتے ہیں۔

لیہ میں جنگلات کی غیر قانونی کٹائی: 'جہاں کبھی گھنے درخت تھے وہاں اب دھول اُڑتی ہے'۔

شجر گرا تو پرندے تمام شب روئے:'نارووال اور گردونواح کے جنگلاتی رقبے میں کمی آنے سے جانور اور پرندے بھی ختم ہو رہے ہیں'

مسیحی برادری سے تعلق رکھنے والی اکیس سالہ انیتا جارج نارروال شہر میں اپنے والدین اور بہن بھائی کے ساتھ ایک کمرے کے مکان میں رہتی ہیں۔ ان کا اپنا گھر شہر سے 18 کلومیٹر دور تھرپال شریف نامی گاؤں میں ہے۔ ان کے تین بھائیوں پر ایک مسلمان نوجوان کے قتل کا الزام ہے جن میں سے دو جیل میں ہیں جبکہ تیسرے کو ضمانت پر رہائی مل چکی ہے۔ انیتا کا گھرانہ اپنے گاؤں میں نہیں جا سکتا کیونکہ انہیں خوف ہے کہ اگر وہ واپس گئے تو وہاں ان کی جان کو خطرہ ہو سکتا ہے۔&nbsp;

انیتا نارووال کے کالج میں سیکنڈ ایئر کی طالبہ ہیں۔ 22 جون 2022 کو ان کے سالانہ امتحان شروع ہو رہے تھے لیکن انہی دنوں انہیں گھربار چھوڑ کر شہر میں پناہ لینا پڑی۔ انیتا کی کتابیں اور رول نمبر سلپ گاؤں میں ہی رہ گئی ہیں جس کے باعث وہ امتحان میں شریک نہیں ہو سکیں۔ قتل کے اس واقعے کے بعد ان کے ساتھ گاؤں بدر ہونے والے مسیحی برادری کے 14 دیگر بچوں اور نوجوانوں کا تعلیمی سلسلہ بھی رک گیا ہے۔&nbsp;

انیتا کا خاندان ان دنوں نارووال کی مسیحی آبادی عیسیٰ نگری میں کسمپرسی کی زندگی گزار رہا ہے۔ گاؤں چھوڑتے وقت یہ لوگ کوئی سامان ساتھ نہیں لا سکے جس کے باعث انہیں روزمرہ زندگی میں بہت سے مشکلات کا سامنا ہے۔ انیتا کو پریشانی ہے کہ اب وہ اپنی تعلیم کیسے مکمل کر پائیں گی۔&nbsp;

نارروال کے تھانہ رایا میں 6 جون کو درج ہونے والے مقدمے کے مطابق تھرپال میں مسیحی برادری اور مسلمانوں کے درمیان مسلح تصادم ہوا جس میں دو نوجوان ہلاک ہو گئے۔ واقعے کے بعد مسیحی برادری سے تعلق رکھنے والے نو افراد پر قتل، اقدام قتل اور دیگر دفعات کے تحت مقدمات درج کیے گئے۔ ان میں انیتا کے دو بھائی بھی شامل ہیں جن پر مقتولین میں سے ایک کے قتل کا الزام ہے۔

انیتا اور اس کے اہلخانہ اپنی بے گناہی کا دعویٰ کرتے ہوئے بتاتے ہیں کہ گاؤں میں ان کے گھر کے سامنے ایک دکان تھی جہاں گاؤں کے لڑکے جمع رہتے تھے۔ دکاندار نے انہیں دکان پر کھڑے ہونے یا بیٹھنے سے بارہا منع کیا کیونکہ یہ لڑکے محلے میں آتی جاتی خواتین کو تنگ کرتے تھے۔ اس مسئلے پر مقامی رہائشیوں اور دکان کے قریب جمع ہونے والے نوجوانوں میں اکثر تکرار اور جھگڑا رہتا تھا جس نے بڑھ کر المناک صورت اختیار کر لی اور موقع پر موجود ان کے دونوں بھائیوں کو بھی قتل کے الزام میں دھر لیا گیا۔

جب یہ واقعہ پیش آیا تو تھرپال میں مسیحی برادری کے بارہ گھرانے آباد تھے جن میں سے سات خاندان اپنے گھر چھوڑنے پر مجبور ہو گئے ہیں۔ گاؤں کے اس چھوٹے سے محلے میں اب مسیحیوں کے کئی گھر ویران دکھائی دیتے ہیں۔ ان میں انیتا کا مکان بھی ہے جہاں اس واقعے سے پہلے ان کا بیس افراد پر مشتمل گھرانہ آباد تھا۔ اب گھر کے کمروں میں سامان بکھرا پڑا ہے اور پانی کی موٹریں اور بجلی کے میٹر چوری کر لیے گئے ہیں۔&nbsp;

ایسا ہی ایک گھر سلاس برکت کا ہے جس کا مرکزی گیٹ ٹوٹا ہوا ہے، بجلی کا میٹر غائب ہے۔ کمروں کے دروازے کھلے ہیں اور سامان جا بجا بکھرا دکھائی دیتا ہے۔ تین کمروں کے اس گھر میں کھلے صندوقوں سے باہر پڑے کپڑوں کو دیکھ کر اندازہ ہوتا ہے کہ یہاں کے مکینوں کو عجلت میں گھر چھوڑ کر جانا پڑا۔&nbsp;

پچاس سالہ سلاس پانچ بچوں کے باپ ہیں اور ایک ہزار روپے روزانہ اجرت پر نارووال کے ایک بھٹے پر اینٹیں بنانے کا کام کرتے ہیں۔ ان کی پیدائش تھرپال میں ہوئی تھی اور تب سے وہ اسی گاؤں میں رہ رہے تھے۔ حالیہ واقعے کے بعد پولیس انہیں بھی گرفتار کر کے لے گئی اور پانچ روز حوالات میں رکھا۔ کوئی الزام ثابت نہ ہونے پر انہیں رہا کر دیا گیا جس کے بعد وہ بیوی بچوں کے ساتھ دربدر ہیں کیونکہ گاؤں واپسی پر انہیں جان کا خطرہ ہے۔&nbsp;

سلاس کہتے ہیں کہ &#39;&#39;میں نے چند مہینے پہلے اپنی زندگی بھر کی کمائی سے تھرپال میں ایک گھر خریدا تھا جس سے ہمیں بے دخل کر دیا گیا ہے۔ اب میں اپنے بچوں کو لے کر کہاں جاؤں گا۔&#39;&#39; وہ بتاتے ہیں کہ انہوں نے یہ گھر گاؤں کے ایک مسلمان رہائشی سے خریدا تھا اور اس کی پیشانی پر اب بھی ماشااللہ لکھا ہوا ہے۔&nbsp;

سلاس کی 70 سالہ والدہ مختار بی بی اس واقعے سے چند روز بعد انتقال کر گئیں جنہیں لواحقین نے تھرپال میں اپنے آبائی قبرستان کے بجائے نارووال شہر کے مسیحی قبرستان میں دفن کیا ہے۔ سلاس کا کہنا ہے کہ &#39;&#39;میری والدہ کی تمام زندگی تھرپال میں ہی گزری تھی۔ گھر سے بے دخلی کے بعد میری والدہ پریشان رہتی تھیں اور اسی پریشانی نے ان کی جان لے لی۔ ہمیں اپنی والدہ کو گاؤں کے مسیحی قبرستان میں دفنانے کے لیے کسی جانب سے کوئی مدد نہیں ملی۔ ہم نے اس خوف سے گاؤں کا رخ کرنے سے پرہیز کیا کہ وہاں ہم پر حملہ ہو سکتا ہے۔&#39;&#39;&nbsp;

پانچ بچوں کی ماں راحت بی بی کو بھی اس واقعے کے بعد گاؤں چھوڑنا پڑا۔ ان کا کہنا ہے کہ جب یہ واقعہ پیش آیا تو پولیس ان کے شوہر کو گرفتار کر کے لے گئی جو اب بھی جیل میں ہیں اور ان پر اس واقعے کے ثبوت مٹانے کا الزام ہے۔ راحت بی بی اگلی صبح جان کے خوف سے اپنے بچوں کو لے کر گاؤں سے نکل گئیں اور تاحال واپس نہیں گئیں۔ ان کا کہنا ہے کہ اس واقعے کے بعد ان کے بچوں کی تعلیم بھی متاثر ہوئی ہے۔

<h2>&#39;چاہیں بھی تو واپس نہیں جا سکتے&#39;</h2>

جھگڑے اور دہرے قتل کے اس واقعے کے بعد تھرپال چھوڑنے والے مسیحیوں کا کہنا ہے کہ ان کے لیے ایسے حالات پیدا کر دیے گئے ہیں جن میں وہ اپنے گھر واپس نہیں جا سکتے۔ ان کا کہنا ہے کہ انہوں نے گاؤں واپسی کے لیے تحریک انصاف کے ٹکٹ ہولڈر سجاد مہس سے مدد مانگی تھی لیکن ان کی کوشش بے سود رہی۔

پاکستان ہیومن لبریشن کمیشن کے بانی اسلم پرویز سہوترہ اس مقدمے میں تھرپال کی مسیحی برادری کی مدد کر رہے ہیں۔ ان کا کہنا ہے کہ &#39;&#39;مسیحی اُس وقت سے یہاں رہ رہے ہیں جب پاکستان وجود میں بھی نہیں آیا تھا۔ انہیں اپنے گاؤں سے بے دخل کرنا انسانی حقوق کی خلاف ورزی ہے۔&#39;&#39; وہ کہتے ہیں کہ بے دخلی کے عرصہ میں ان لوگوں کے گھروں سے بہت سا سامان چوری کیا جا چکا ہے جس کی ایف آئی آر بھی درج نہیں کی گئی۔ ان کا کہنا ہے کہ یہ پنجاب میں اپنی نوعیت کا پہلا واقعہ نہیں بلکہ وہ ایسے بہت سے مسیحیوں کو جانتے ہیں جنہیں اسی طرح اپنے علاقے سے بے دخل کیا جا چکا ہے۔&nbsp;

دوسری جانب تھانہ رایا کے سب انسپکٹر ارشد امین دعویٰ کرتے ہیں کہ کسی فرد کو گاؤں سے بے دخل نہیں کیا گیا۔ گاؤں چھوڑنے والے مسیحی خاندان اپنی مرضی سے شہر منتقل ہوئے ہیں اور ان پر کسی نے دباؤ نہیں ڈالا۔ اس دعوے کے حق میں وہ یہ ثبوت دیتے ہیں کہ مسیحیوں کے پانچ خاندان اب بھی گاؤں میں مقیم ہیں۔ مسیحی خاندانوں کو تحفظ کی فراہمی کے بارے میں ان کا کہنا ہے کہ &#39;&#39;کسی کے ساتھ چوبیس گھنٹے پولیس تعینات نہیں کی جا سکتی۔ جو لوگ گاؤں میں نہیں رہنا چاہتے وہ جب چاہیں آ کر اپنا سامان لے کر جا سکتے ہیں۔&#39;&#39;

جب اس مسئلے پر مسلم لیگ نواز سے تعلق رکھنے والے مقامی رکن صوبائی اسمبلی سے رابطہ کیا گیا تو انہوں نے اس پر تبصرے سے گریز کیا۔ اسی طرح تحریک انصاف کے ٹکٹ ہولڈر سجاد مہس سے جب اس بارے میں پوچھا گیا تو انہوں نے بھی کوئی بات نہیں کی۔ &nbsp;

دوسری جانب مقتول نوجوانوں کے بھائی رشید احمد کا کہنا ہے کہ &#39;&#39;ہماری کسی سے دشمنی نہیں تھی۔ جس رات گاؤں میں جھگڑا ہوا تو میرے بھائی صورتحال معلوم کرنے گئے تھے جنہیں وہاں قتل کر دیا گیا۔&#39;&#39; وہ بتاتے ہیں کہ مقتولین میں ایک بھائی لاہور میں ایک یونیورسٹی میں زیرتعلیم تھا اور چند روز پہلے ہی گاؤں واپس آیا تھا۔ وہ یہ دعویٰ بھی کرتے ہیں کہ انہوں نے کسی مسیحی کو علاقہ بدر نہیں کیا۔

'جس جگہ عمر گزار دی وہاں اب قدم بھی نہیں رکھ سکتے': قتل کے الزام میں نارووال کے گاؤں سے بے دخل ہونے والے مسیحی گھرانے دربدر۔

صابرہ بی بی نے دو کمروں پر مشتمل اپنے کچے گھر میں ایک چارپائی اس امید پر الگ سے بچھا کر رکھی ہوئی ہے کہ کسی دن ان کا 21 سالہ بیٹا یاسین گھر لوٹ کر آئے گا اور اس پر سوئے گا۔&nbsp;

یاسین 12 اکتوبر 2021 کو صوبہ پنجاب کے مشرقی ضلع نارووال کی تحصیل شکرگڑھ کے گاؤں جلالہ شریف میں واقع اپنے گھر سے نکل کر غائب ہو گیا تھا۔ تقریباً ایک ماہ بعد اس کی والدہ کو پتہ چلا کہ وہ انڈیا کے شہر امرتسر کی جیل میں قید ہے۔

انہیں یہ خبر اس وقت ملی جب کسی نے انہیں بتایا کہ 11 نومبر 2021 کو ایک انڈین ٹیلی ویژن چینل نے جیل میں ان کے بیٹے کا انٹرویو کیا ہے جس میں اُس نے کہا ہے کہ اس نے &quot;غلطی سے سرحد پار کر لی تھی&quot;۔ لہٰذا انڈیا کی بارڈر سکیورٹی فورس نے اس &quot;جرم&quot;میں اسے گرفتار کر کے جیل بھیج دیا تھا۔&nbsp;

صابرہ بی بی اب ہر وقت رو رو کر اس کی واپسی کے لیے دعا کرتی رہتی ہیں۔ یہی نہیں بلکہ انہوں نے اپنے گھرانے کے دوسرے افراد کے ساتھ مل کر اسے واپس لانے کے لیے مقامی پولیس، رینجرز، وزارت خارجہ، انڈیا کے سفارت خانے اور انسانی حقوق کی تنظیموں سمیت ہر کسی سے رابطہ کیا ہے۔ لیکن وہ کہتی ہیں کہ انہیں اب تک یہ بھی معلوم نہیں ہو سکا کہ وہ انڈیا میں کس حال میں ہے۔&nbsp;

یاسین کے گھر والوں کا یہ بھی کہنا ہے کہ وہ کافی عرصے سے دماغی امراض میں مبتلا ہے اور 2020 میں علاج کے لیے لاہور کے دماغی امراض کے ہسپتال فاؤنٹین ہاؤس میں بھی جاتا رہا ہے۔ دراصل صابرہ بی بی اور ان کے شوہر اللہ دتہ بھی کافی عرصے سے ذہنی تناؤ کے مریض ہیں اور اب ان کی 28 سالہ بیٹی غلام فاطمہ بھی اپنے بھائی کی گمشدگی کی وجہ سے شدید ذہنی تناؤ کا شکار ہو گئی ہیں۔

وہ اپنے والدین کے روکنے کے باوجود اکثر یہ کہتے ہوئے سرحد کی جانب چلی جاتی ہیں کہ وہ یاسین کو واپس لے کر آئیں گی۔ اس لیے صابرہ بی بی کو ہر وقت یہ خدشہ رہتا ہے کہیں ان کی بیٹی بھی کسی دن سرحد پار نہ چلی جائے۔&nbsp;

<h2>مہلک غلطی</h2>

عمران نذیر 8 فروری 2021 کو اچانک لاپتہ ہو گئے۔&nbsp;

اس وقت ان کی عمر 26 سال تھی اور وہ اپنے گاؤں میں کھیتی باڑی کیا کرتے تھے کیونکہ انہوں نے آٹھویں جماعت کے بعد سکول چھوڑ دیا تھا۔ ان کے گھر والوں کا کہنا ہے کہ ان کی ذہنی حالت کافی عرصے سے مستحکم نہیں تھی یہاں تک کہ گم شدگی سے پانچ ماہ قبل انہیں ڈپریشن کے دورے بھی پڑنے لگے تھے۔

وہ ضلع نارووال کی تحصیل ظفر وال کے گاؤں فتح پور بڑری کے رہنے والے تھے جو پاکستان اور انڈیا کی سرحد کے پاس واقع ہے۔ ان کے بھائی شہباز نذیر کہتے ہیں کہ &quot;ہم نے اپنی مدد آپ کے تحت انہیں ڈھونڈنے کی بہت کوشش کی لیکن جب ہمیں ان کا کوئی سراغ نہ ملا تو ہم نے سرحد پر متعین رینجرز کے اہل کاروں سے رابطہ کیا&quot; تاکہ یہ پتہ چلایا جا سکے کہ عمران نذیر کہیں غلطی سے سرحد پار تو نہیں چلے گئے تھے۔&nbsp;

ان کے مطابق جب رینجرز نے اس معاملے کی تحقیق کی تو انہیں معلوم ہوا کہ ان کے بھائی نے ایسا ہی کیا تھا اس لیے انڈیا کی بارڈر سکیورٹی فورس کے اہل کاروں نے انہیں گولی مار کر ہلاک کر دیا تھا۔ پاکستانی حکام نے بعد ازاں انڈین حکام سے بات چیت کر کے ان کی لاش واپس حاصل کر لی اور اسے اُن کے اہل خانہ کے حوالے کر دیا۔

ضلع نارووال کے قصبے شکر گڑھ میں رہنے والے 58 سالہ نیاز احمد کے ساتھ بھی یہی کچھ ہوا۔&nbsp;

وہ 12 دسمبر 2019 کو صبح سویرے اپنے گھر سے چترانہ نامی گاؤں جانے کے لیے نکلے جو شکرگڑھ سے 15 کلومیٹر دور واقع ہے اور جہاں ان کی شادی شدہ بیٹی رہتی ہے۔ لیکن اس روز شدید دھند ہونے کی وجہ سے وہ راستہ بھٹک کر سرحد کے دوسری طرف چلے گئے جہاں انڈیا کی بارڈر سکیورٹی فورس نے ان پر گولیاں برسا دیں۔ ان کی بیٹی آنسہ کا کہنا ہے کہ &quot;میرے والد کی لاش ساری رات کھیتوں میں پڑی رہی&quot; جہاں بارش میں مسلسل بھیگنے کی وجہ سے اس کی حالت بہت خراب ہو گئی۔&nbsp;

ایک روز بعد کسی نے اس لاش کی تصویر سوشل میڈیا پر لگا دی لیکن، آنسہ کے مطابق، اس میں &quot;انہیں پہچاننا تقریباً نا ممکن تھا&quot;۔ وہ کہتی ہیں کہ بالآخر &quot;ہم نے انہیں ان کے ہاتھوں سے شناخت کیا&#39;&#39;۔

<h2>خونی لکیر</h2>

ضلع نارووال کی حدود شمال میں انڈیا کے زیرِانتظام کشمیر کے ضلع جمّوں اور مشرق میں انڈیا کی ریاست پنجاب کے ضلح گورداسپور سے ملتی ہیں۔ اس کی دو تحصیلوں، شکر گڑھ اور ظفروال، کے درجنوں گاؤں سرحد سے محض چند کلومیٹر کے فاصلے پر واقع ہیں جن سے تعلق رکھنے والے کئی لوگ پچھلے کچھ سالوں میں غلطی سے یا انجانے میں سرحد پار کر چکے ہیں۔ ان میں سے زیادہ تر کو انڈیا کی بارڈر فورس نے گرفتار کر کے جیلوں میں رکھا ہوا ہے لیکن بعض اس کی گولیوں کا نشانہ بھی بن چکے ہیں۔&nbsp;

مقامی لوگوں کا کہنا ہے انڈیا کی طرف سے سرحد پر لگائی گئی خاردار تاروں کی باڑ عین سرحدی لکیر کے اوپر نہیں بلکہ اس سے کئی سو میٹر پیچھے انڈین حدود میں واقع ہے جس کے باعث لوگوں کو پتہ ہی نہیں چلتا کہ وہ کب سرحد پار کر چکے ہیں۔ بعض جگہوں پر اس باڑ میں بڑے بڑے شگاف ہو گئے ہیں جن کی وجہ سے سرحد کا تعین مزید مشکل ہو جاتا ہے۔ اسی طرح سرحدی لکیر بعض اوقات کھیتوں، ندی، نالوں اور دریاؤں میں سے بھی گزرتی ہے جہاں اس کا تعین کرنا آسان نہیں ہوتا۔&nbsp;

جب عمران نذیر، نیاز احمد اور یاسین کی طرح کوئی پاکستانی شہری اس لکیر کو عبور کر کے دوسری جانب جا نکلتا ہے تو پاکستان رینجرز اور انڈیا کی بارڈر سکیورٹی فورس کے حکام کے درمیان ملاقات ہوتی ہے جس میں طے کیا جاتا ہے کہ آیا یہ کوئی مجرمانہ فعل تھا یا کوئی نادانستہ غلطی۔ تاہم اس ضمن میں مقامی پولیس کو شاذ ہی اطلاع دی جاتی ہے۔&nbsp;

اس لیے شکر گڑھ میں متعین ڈپٹی سپرنٹنڈنٹ پولیس ملک محمد خلیل کہتے ہیں &quot;اگر کوئی شخص سرحد پار چلا جائے تو اس کے بارے میں تمام تر معلومات رینجرز کے پاس ہی ہوتی ہیں&quot;۔ &nbsp;تاہم رینجرز حکام یہ معلومات شہریوں اور صحافیوں سے مکمل طور پر پوشیدہ رکھتے ہیں۔&nbsp;

اسی طرح اسلام آباد میں دفترِخارجہ کے اہل کار بھی صحافیوں کو یہ نہیں بتانا چاہتے کہ ہر سال کتنے پاکستانی غلطی سے سرحد پار کر کے انڈیا چلے جاتے ہیں، ان میں سے کتنے قید کیے جاتے ہیں اور کتنے مار دیے جاتے ہیں۔ تاہم وہ دعویٰ کرتے ہیں کہ حکومت پاکستان ایسے لوگوں کے خاندانوں کے ساتھ رابطے میں رہتی ہے اور انہیں ہر نئی پیش رفت سے آگاہ کرتی رہتی ہے۔ (یاسین کے اہلِ خانہ اس دعوے کو رد کرتے ہوئے دفتر خارجہ کے ساتھ اپنے ایسے رابطوں کی تردید کرتے ہیں۔)&nbsp;

انڈین بارڈر فورس کے ہاتھوں گرفتار ہونے والے لوگوں کی پاکستان واپسی کے حوالے سے وزارتِ خارجہ کا کہنا ہے کہ اس میں لگنے والے وقت کا دارومدار اس بات پر ہوتا ہے کہ آیا وہ مجرمانہ طریقے سے سرحد کے دوسری طرف گئے یا ایسا غلطی سے ہو گیا۔ تاہم، وزارت کے حکام کے مطابق، دونوں صورتوں میں انہیں سرحد پار کرنے کے جرم کی سزا بھگتنا پڑتی ہے اور اگر پاکستان اور انڈیا کے تعلقات خراب ہوں تو کئی دفعہ انہیں سزا پوری کرنے کے باوجود بھی فوری طور پر رہائی نہیں ملتی۔&nbsp;

انڈین سکیورٹی فورس کے ہاتھوں پاکستانی شہریوں کی ہلاکت کے بارے میں وزارتِ خارجہ کا کہنا ہے کہ پاکستان اس پر باقاعدہ سرکاری احتجاج کرتا ہے۔ یہ احتجاج اسلام آباد میں انڈین ہائی کمیشن اور نئی دہلی میں پاکستانی ہائی کمیشن کے ذریعے انڈیا کی وزارت خارجہ کو ریکارڈ کرایا جاتا ہے۔

تاہم عمران نذیر اور نیاز احمد کے لواحقین کہتے ہیں کہ وہ ان کی ہلاکت پر کیے گئے ایسے کسی بھی حکومتی احتجاج سے بے خبر ہیں۔

پاکستان اور ایران میں منقسم بلوچ خاندان: خصوصی سفری اجازت ناموں کے خاتمے کے بعد چاغی کے لوگ 'اپنی جان پر کھیل کر سرحد پار کر رہے ہیں'۔

کس کا ہے جرم کس کی خطا سوچنا پڑا: انجانے میں یا غلطی سے پاک-انڈیا سرحد پار کرنے والے نارووال کے باسیوں کی درد بھری داستاں۔

گرمی ہو سردی ہو یا بارش، امرت شہزادی انصاف کی توقع لیے اپنے مقدمے کی پیشی پر ہمیشہ عدالت میں موجود ہوتی ہیں۔ تاہم ہر بار انہیں محض اگلی پیشی کی تاریخ دے دی جاتی ہے۔&nbsp;

وہ وسطی پنجاب کے ضلع نارووال کی تحصیل شکرگڑھ کے گاؤں شاہ پور میں رہتی ہیں اور عدالت میں پیش ہونے کے لیے ہر بار 50 کلومیٹر کا فاصلہ طے کر کے نارووال شہر پہنچتی ہیں۔ ان کو درپیش مشکلات کو دیکھتے ہوئے ان کے قریبی لوگ کچھ عرصے سے انہیں مشورہ دے رہے ہیں کہ وہ اپنا مقدمہ واپس لے لیں۔ دوسری طرف، ان کے مطابق، فریق مخالف بھی انہیں اس کی پیروی سے روکنے کے لیے دھمکیاں دے رہا ہے۔&nbsp;

لیکن 30 سالہ امرت شہزادی کہتی ہیں کہ انہوں نے نہ تو ابھی تک ہمت ہاری ہے اور نہ ہی وہ خوفزدہ ہوئی ہیں۔&nbsp;

ان کے مقدمے کی بنیاد ان کا اپنے ہمسایوں کے ساتھ ہونے والا ایک جھگڑا ہے۔ اس کی وجہ بیان کرتے ہوئے وہ کہتی ہیں کہ ان کے گھر کی بیٹھک میں ان کی ایک دوست نے بیوٹی پارلر کھول رکھا ہے جہاں وہ خود بھی عورتوں کا بناؤسنگھار کرنے کی تربیت لے رہی ہیں۔ اکتوبر 2019 میں جب انہوں نے اس بیوٹی پارلر کا ایک ایسا دروازہ بنانا چاہا جو براہِ راست گلی میں کھل سکے تو، ان کے مطابق، ان کے ہمسایوں نے دروازے کی مجوزہ جگہ پر اپنی ملکیت کا دعویٰ کرتے ہوئے ان سے لڑنا جھگڑنا شروع کر دیا۔ وہ کہتی ہیں کہ انہیں نہ صرف دھمکیاں دی گئیں بلکہ کئی اور طریقوں سے ہراساں بھی کیا گیا۔&nbsp;

اس صورت حال سے نمٹنے کے لیے انہوں نے عدالتی کارروائی کرنے کا فیصلہ کیا اور شکرگڑھ کی ایک عدالت میں اپنے ہمسایوں کے خلاف مقدمہ دائر کر دیا۔ اس مقدمے کے اندراج کے چند روز بعد جب وہ پیشی کے لیے عدالت میں پہنچیں تو ان کے مخالف فریق نے ان پر اسے واپس لینے کے لیے دباؤ ڈالنا شروع کر دیا۔ لیکن جب انہوں نے ایسا کرنے سے انکار کیا تو، ان کے بقول، ان کے ہمسائے پولیس کی موجودگی میں ہی انہیں مارنے پیٹنے لگے۔ وہ کہتی ہیں کہ اس تشدد میں ان کے ہمسایوں کے وکلا بھی شامل تھے۔

اس تمام وقوعے کے دوران عدالت میں موجود کسی شخص نے اس کی ویڈیو بنا کر سوشل میڈیا پر ڈال دی جو وائرل ہو گئی۔ اس پر پنجاب کے وزیراعلیٰ عثمان بزدار نے امرت شہزادی پر ہونے والے تشدد کا نوٹس لیتے ہوئے اس میں ملوث ملزموں کی فوری گرفتاری کا حکم دیا۔ ان کی ہدایت پر عمل کرتے ہوئے شکرگڑھ پولیس نے ایک ملزم کو حراست میں لینے کا دعویٰ بھی کیا اور اس کی ہتھکڑیاں لگی تصویر بھی نیوز میڈیا کو جاری کر دی۔&nbsp;

تاہم امرت شہزادی کا گرفتار شدہ شخص کے بارے میں کہنا ہے کہ وہ اسے جانتی ہیں نہیں۔ وہ کہتی ہیں کہ انہیں مارنے پیٹنے والوں کے چہرے ویڈیو میں واضح دکھائی دے رہے تھے لیکن پولیس نے انہیں گرفتار کرنے کے بجائے خانہ پری کے لیے کسی غیرمتعلقہ شخص کو پکڑ لیا۔

چنانچہ انہوں نے اس تشدد میں ملوث لوگوں کو سزا دلانے کے لیے نارووال کی عدالت میں مقدمہ دائر کر دیا جو ڈھائی سال سے زیرسماعت ہے۔ &nbsp;

<h2>بنے ہیں اہل ہوس مدعی بھی&hellip;&nbsp;</h2>

شکرگڑھ سے تعلق رکھنے والی 60 سالہ شہناز کوثر نے جنوری 2022 میں تعزیراتِ پاکستان کی دفعہ 354 کے تحت مقامی پولیس کو ایک رپورٹ درج کرائی۔ (یہ دفعہ کسی عورت کی عزت مجروح کرنے کے لیے اس پر کیے گئے کسی بھی طرح کے جسمانی یا زبانی حملے کا احاطہ کرتی ہے-) اس میں انہوں نے کہا کہ جب وہ اپنا مکان بیچنے کی غرض سے ایک گاہک کو وہاں لے گئیں تو اس پر ناجائز طور پر قابض شعیب نامی شخص نے نہ صرف انہیں تشدد کا نشانہ بنایا بلکہ ایک تیز دھار آلے سے ان پر قاتلانہ حملہ بھی کیا۔

صرف یہی نہیں بلکہ، شہناز کوثر کے بقول، اُس نے ان کے اہل خانہ پر اتنا دباؤ ڈالا کہ مجبوراً انہوں نے پولیس کو درج کرائی گئی رپورٹ واپس لے لی۔ وہ کہتی ہیں کہ &quot;اب میں دوبارہ کبھی تھانے نہیں جاؤ گی کیونکہ وہاں عورتوں کی کوئی شنوائی نہیں ہوتی&quot;۔&nbsp;

تحصیل شکرگڑھ کے گاؤں دیلاپور میں دو کمروں کے مکان میں رہنے والی 32 سالہ راحت بی بی اور ان کی 70 سالہ والدہ نذیراں بی بی کو بھی اسی طرح کا مسئلہ درپیش رہا ہے۔ دونوں ماں بیٹی بیوائیں ہیں اور لوگوں کے گھروں میں کام کر کے اپنی روزی روٹی کماتی ہیں۔&nbsp;

نذیراں بی بی کہتی ہیں کہ ان کا مرحوم شوہر انہیں اور ان کی بیٹی کو نہ صرف روزانہ تشدد کا نشانہ بناتا تھا بلکہ کئی سال پہلے دوسری شادی کرنے کے لیے اس نے ان دونوں کو اپنے گھر سے نکال بھی دیا تھا۔ وہ کہتی ہیں کہ انہوں نے ان اقدامات کے خلاف ایک قریبی قصبے نورکوٹ میں واقع تھانے میں ایک رپورٹ بھی درج کرائی تھی لیکن چند روز بعد ہی انہیں یہ رپورٹ واپس لینا پڑ گئی تھی کیونکہ انہیں خوف تھا کہ ان کا شوہر اور اس کا خاندان انہیں اور ان کی بیٹی کو کہیں مار ہی نہ دیں۔

تھانہ نورکوٹ (جس کے دائرہ کار میں لگ بھگ ایک لاکھ مجوعی آبادی والے 70 دیہات آتے ہیں) کے اہل کار تسلیم کرتے ہیں کہ وہ عورتوں پر ہونے والے تشدد کے واقعات پر خال خال ہی کارروائی کرتے ہیں۔ ان میں سے ایک اہل کار اپنی شناخت ظاہر نہ کرنے کی شرط پر کہتا ہے کہ &quot;یہ تشدد عموماً ایک گھریلو معاملہ ہوتا ہے اس لیے تھانے میں بیٹھے ہوئے ہمیں پتہ ہی نہیں چل سکتا کہ آیا کسی گھر کے اندر کسی عورت پر واقعی تشدد کیا گیا ہے یا نہیں&quot;۔&nbsp;

پنجاب پولیس کی طرف سے جاری کردہ اعدادوشمار بھی یہی دکھاتے ہیں کہ اس طرح کے واقعات کی اطلاع تھانوں تک پہنچتی ہی نہیں۔ ان کے مطابق یکم جنوری 2021 سے لے کر 31 دسمبر 2021 تک نارووال ضلع میں عورتوں پر ہونے والے گھریلو تشدد کے کسی ایک واقعے کی رپورٹ بھی پولیس کو درج نہیں کرائی گئی۔&nbsp;

اسی طرح خواتین کے مرتبے کے تحفظ کے لیے حکومت پنجاب کے قائم کردہ صوبائی کمیشن ((Punjab Commissiono on the Status of Women کی صوبے میں صنفی برابری کے بارے میں تیار کی گئی ایک رپورٹ کے مطابق ضلع نارووال میں 2020 میں عورتوں پر ہونے والے گھریلو تشدد کے صرف 25 کے قریب واقعات حکومتی اداروں کے سامنے آئے۔ باقی تمام گھروں کے اندر ہی دبا دیے گئے۔&nbsp;

جب عورتوں پر ہونے والا تشدد محض ایک گھر کا اندرونی معاملہ نہیں ہوتا تو بھی، نورکوٹ کے پولیس اہل کار کے مطابق، &quot;پولیس اس وقت تک کچھ نہیں کر سکتی جب تک اس کا شکار عورت اس کے بارے میں رپورٹ درج نہ کرائے&quot;۔

خواتین کے مرتبے کے بارے میں بنائے گئے کمیشن کی رپورٹ ظاہر کرتی ہے کہ 2020 میں نارووال میں عورتوں پر ہونے والے مختلف اقسام کے تشدد کے ایسے واقعات کی تعداد ایک سو 23 تھی جن کی رپورٹ حکومتی اداروں کو دی گئی (جبکہ بہت سے دیگر واقعات کبھی ان اداروں کے سامنے ہی نہیں آئے)۔ یہ تعداد اُس سال پنجاب کے تمام دوسرے اضلاع کے مقابلے میں کم تھی۔&nbsp;

پنجاب پولیس کی طرف سے جاری کردہ اعدادوشمار بھی اسی طرح کا نقشہ پیش کرتے ہیں۔ ان کے مطابق یکم جنوری 2021 سے لے کر 31 دسمبر 2021 تک نارووال ضلع میں عورتوں پر ہونے والے تمام قسم کے تشدد کے تین سو 69 واقعات کے بارے میں پولیس کو بتایا گیا۔ ان میں سے صرف 20 اُس سال کے پہلے چھ ماہ میں پیش آئے جس سے صاف ظاہر ہوتا ہے کہ اُن مہینوں کے دوران ہونے والے واقعات کی ایک بڑی تعداد کی اطلاع کبھی پولیس تک پہنچی ہی نہیں۔ اگر ایسا نہیں تھا تو سال کے باقی مہینوں میں بھی ایسے واقعات کی تعداد 20 کے لگ بھگ ہی رہنی چاہیے تھی۔&nbsp;

صنفی برابری کے بارے میں جاری کی گئی رپورٹ کے مصنفین سمجھتے ہیں کہ تشدد سے متاثرہ عورتیں ایسے واقعات کی اطلاع حکومتی اداروں کو اس لیے نہیں دے پاتیں کہ انہیں خوف ہوتا ہے کہ ایسا کرنے سے خود ان کے &quot;نام پر آنچ&quot; آئے گی۔ مزیدبرآں &quot;پولیس کا ڈر، پولیس اہل کاروں کی کارکردگی پر عدم اعتماد اور مجرموں کو سزا نہ ملنے&quot; کے خدشات بھی انہیں ایسا کرنے سے روکتے ہیں۔&nbsp;

<h2>خواتین بمقابلہ پولیس</h2>

انسانی حقوق کے لیے کام کرنے والی غیرسرکاری تنظیم ڈیجیٹل رائٹس فاؤنڈیشن کی ڈائریکٹر ریسرچ اینڈ پالیسی شمائلہ خان کہتی ہیں کہ مردوں کی بالادستی والے معاشرے میں خواتین کے لیے خود پر ہونے والے تشدد کے خلاف آواز اٹھانا آسان نہیں۔ ان کا کہنا ہے کہ &quot;بہت سی خواتین اس لیے بھی اس تشدد کی شکایت نہیں کرتیں کہ انہیں فوری اور باآسانی انصاف ملنے کی امید نہیں ہوتی&quot;۔

تاہم ان کی نظر میں اس صورتِ حال کی سب سے بڑی وجہ پولیس کا غیرذمہ دارانہ رویہ ہے۔ اپنی بات کی وضاحت کرتے ہوئے وہ کہتی ہیں کہ &quot;خواتین پر تشدد کے مقدمات میں پولیس نہ تو صحیح طریقے سے شواہد اکٹھے کرتی ہے اور نہ ہی بروقت تفتیش مکمل کرتی ہے&quot;۔ ان کا یہ بھی کہنا ہے کہ بعض اوقات ان معاملات میں تاخیر کی وجہ ملزموں کی طرف سے پولیس پر ڈالا جانے والا سیاسی اور سماجی دباؤ بھی ہوتا ہے۔&nbsp;

شکرگڑھ میں واقع صدر تھانے میں نائب محرر کے عہدے پر کام کرنے والے جعفر حسین اپنے محکمے کے اس مبینہ رویے کا عملی مظاہرہ کرتے ہوئے دعویٰ کرتے ہیں کہ تعزیرات پاکستان کی دفعہ 354 کے تحت درج ہونے والے عورتوں پر تشدد کے اکثر مقدمات جعلی ہوتے ہیں۔ ان کے مطابق اس کی وجہ یہ ہے کہ بہت سے لوگ باہمی تنازعات میں انتقامی کارروائی کے طور پر اپنے مخالف فریق پر الزام لگا دیتے ہیں کہ اس نے ان کی عورتوں کی عزت مجروح کی ہے۔

ان کا یہ بھی کہنا ہے کہ &quot;اگر پولیس کے پاس کسی خاتون پر تشدد کی کوئی حقیقی رپورٹ آ بھی جائے تو عموماً چند ہی روز میں فریقین کے درمیان صلح ہو جاتی ہے اور یہ رپورٹ واپس لے لی جاتی ہے&quot;۔ ان کے بقول اسی لیے دفعہ 354 کے تحت دائر کیے گئے مقدموں میں سے بمشکل ایک فیصد میں ہی مجرموں کو سزا ہو پاتی ہے۔

صبا چوہدری

صبا چوہدری نے پولیٹیکل سائنس میں ماسٹرز کیا ہے۔ وہ قومی اور بین الاقوامی اشاعتی اداروں کے لیے صنفی موضوعات، انسانی حقوق اور سیاست پر رپورٹ کرتی ہیں۔

تحصیل شکر گڑھ کے سرکاری ہسپتال: 'نرسری وارڈ اور تربیت یافتہ عملے کا نہ ہونا نوزائیدہ بچوں کی اموات کا ایک بڑا سبب ہے'

شجر گرا تو پرندے تمام شب روئے:'نارووال اور گردونواح کے جنگلاتی رقبے میں کمی آنے سے جانور اور پرندے بھی ختم ہو رہے ہیں'

'جس جگہ عمر گزار دی وہاں اب قدم بھی نہیں رکھ سکتے': قتل کے الزام میں نارووال کے گاؤں سے بے دخل ہونے والے مسیحی گھرانے دربدر۔

کس کا ہے جرم کس کی خطا سوچنا پڑا: انجانے میں یا غلطی سے پاک-انڈیا سرحد پار کرنے والے نارووال کے باسیوں کی درد بھری داستاں۔

لب پہ رہ جاتی ہے آ آ کے شکایت میری: 'پولیس کے ڈر اور اس پر عدم اعتماد کے باعث خواتین خود پر ہونے والی تشدد کی رپورٹ درج نہیں کراتیں'۔

Lok Sujag