راجو مل سکھر کی تحصیل صالح پٹ کے شہر سنگرار میں کریانے کی دکان چلاتے ہیں۔ ہر سال کی طرح 2021ء میں بھی دس محرم کو انہوں نے اپنے گھر کے باہر سبیل لگائی تھی۔ جب ان کی سات سالہ بیٹی پریا کماری سبیل پر عزاداروں کو پانی پلا رہی تھیں تو نامعلوم افراد نے انہیں اغوا کر لیا۔ دو سال بعد بھی ان کا کوئی سراغ نہیں مل سکا۔

پریا مقامی نجی سکول میں تیسری جماعت کی طالبہ تھیں۔ ان کی والدہ وینا کماری غم سے نڈھال ہیں اور ہر وقت بیٹی کے لیے روتی اور گھنٹوں دیواروں سے باتیں کرتی رہتی ہیں۔

پریا کے والد راجو مل بھی صدمے کی کیفیت سے نکل نہیں پائے۔ بیٹی کے ذکر پر ان کی حالت غیر ہو جاتی ہے۔ وہ بتاتے ہیں کہ 23 ماہ تک انہوں نے اپنی بیٹی کو گلی گلی، محلہ محلہ تلاش کیا مگر اس کا کہیں پتا نہیں چلا۔ اب گویا وہ جیتے جی مر چکے ہیں۔

راجو مل نے بتایا کہ اغوا کے فوری بعد ہندو پنچایت نے صوبائی وزیر ناصر حسین شاہ اور پولیس افسروں سے رابطہ کیا اور پریا کماری کی بازیابی کیلئے انکوائری ٹیم بھی بنی ۔اس میں ایس ایس پی رینک کے تین افسر شامل تھے۔سب نے تسلی دی مگر ان کی بیٹی نہیں ملی۔

&nbsp;

&quot;اُس وقت کے آئی جی مشتاق احمد دو مرتبہ سنگرار میں ہمارے گھر آئے۔ انہوں نے بچی کی بازیابی کی یقین دہانی کروائی مگر کچھ نہیں ہوا۔ پولیس نے شک کی بنیاد پر 300 سے زیادہ افراد کو حراست میں بھی لیا۔انکوائری ٹیم نے ان کے رشتہ داروں ،محلہ داروں اور آنے جانے والے بہت سے لوگوں سے تفتیش کی یہاں تک کہ گھر کے سامنے ٹیلے کی کھدائی بھی کرائی گئی مگر پریا کا کہیں کوئی سراغ نہیں ملا۔&quot;

اب پریا کماری کے والدین آبائی علاقہ چھوڑ کر سکھر شہر میں مقیم ہیں۔ یہ لوگ کسی سے نہیں ملتے اور بس اس آس پر دن کاٹ رہے ہیں کہ ایک دن ان کی بیٹی انہیں مل جائے گی۔

ایس ایس پی سکھر سنگھار ملک اعتراف کرتے ہیں کہ پریا کو بازیاب کرانے کی ان کی کوششیں کامیاب نہیں ہو سکیں۔وہ بتاتے ہیں کہ دوران تفتیش پریا کماری کے کپڑوں سے نمونے لیے گئے تھے۔ ڈی این اے ٹیسٹ میں سیمین سٹین کی نشاندہی ہوئی۔

ان کا کہنا ہے کہ وہ خاندان کے چند قریبی لوگوں سے تفتیش کرنا چاہتے تھے مگر پریا کے رشتہ دار تعاون نہیں کررہے۔ ایس ایس پی یہ بھی کہتے ہیں کہ ماہرین کی رائے میں &#39;اگر گھر والوں کے کپڑے ایک ساتھ دھوئے جائیں تو سیمین سٹین دیگر کپڑوں پر آسکتے ہیں&#39; اس لیے ابھی وہ کسی نتیجے پر نہیں پہنچ سکے۔

ایس ایس پی کا کہنا تھا کہ پریا کماری کے گھر والوں کے موبائل فون انہوں نے ایف آئی اےکو دیے ہیں۔

&quot;گھر والے کہتے ہیں کہ ہم پاس ورڈ بھول گئے ہیں۔ فون دس روز ایف آئی اے کے پاس رہے مگر وہ کہتے تھے کہ اگر پاس ورڈ کے بغیر فون کھولیں گے تو ڈیٹا ضائع ہو جائے گا۔&quot;

پریا کے والد راجو مل کہتے ہیں کہ بیٹی کے غم میں وہ خود کو سنبھال نہیں پا رہے تو موبائل فون کے پاس ورڈ کیسے یاد رکھتے۔

&nbsp;ایس ایس پی سنگھار ملک کا کہنا ہے کہ اب تک تین سو سے زیادہ مشکوک افراد سے تفتیش ہو چکی ہے جیل میں جرائم پیشہ افراد، مسافر خانوں اور قحبہ خانوں میں بھی تحقیقات کی گئی ہیں۔ پریا کو خانہ بدوش قبائل کےخیموں میں بھی تلاش کیا گیا ہے۔ تاہم تاحال ان کا کوئی پتا نہیں چل سکا۔

انہیں یقین ہے کہ پریاکماری زندہ ہے اور وہ ضرور ملے گی۔ بچی کوتاوان کے لیے اغوا نہیں کیا گیا بلکہ وہ لاپتہ ہے۔ سندھ حکومت نے پریا کے بارے میں معلومات حاصل کرنے اور اس کی تلاش میں مدد دینے پر 50 لاکھ روپے انعام کا اعلان کیا ہے۔

سکھر میں ہندو پنچایت کے صدر مکھی ایشور لعل ماکھیجا بتاتے ہیں کہ ایس ایس پی سکھر نے وعدہ کیا تھا کہ پریا کماری کو ہر حال میں بازیاب کرائیں گے۔انہیں امید ہے پریا جلد اپنے والدین سے ملے گی۔

سنگرار شہر کے مکھی وسومل کو خانہ بدوشوں پر بچی کے اغوا کا شبہ ہے۔ وہ کہتے ہیں کہ محرم کے دوران یہاں شہر میں خانہ بدوش آ کر خیمے لگاتے ہیں۔ جس روز پریاکماری اغوا ہوئی تھی اسی دن شام کو تمام خانہ بدوش خیمے اکھاڑ کر غائب ہوگئے تھے اور دوبارہ اس علاقے میں نظر نہیں آئے۔

مکھی راجیش کمار مینگھواڑ نے بتایا کہ پریا کے اغوا پر بار بار تفتیش سے اس کے رشتہ دار اس قدر پریشان ہوئے کہ وہ کیس سے ہاتھ اٹھانے پر مجبور ہو گئے تھے۔

پریا کماری کے چچا نانک رام بتاتے ہیں کہ ان کا آٹھ سالہ بیٹا دھنیش کہتا ہے کہ &quot;میری بہن پریابہت یاد آتی ہے۔ تیسرا محرم آگیا ہے مگر پریا واپس نہیں آئی ا ب تو مجھے بھی گھر کے باہر سبیل لگاتے بہت ڈر لگتا ہے۔&quot;

&nbsp;سندھ میں گذشتہ تین برسوں&nbsp; سے بچوں کے اغوا میں اضافہ دیکھا گیا ہے۔ یہ بات بھی قابل ذکر ہے کہ جو ڈاکو پہلے عورتوں اور بچوں پر ہاتھ نہ اٹھانے کی قسمیں کھاتے تھے اب وہ تاوان کے لیے بچے بھی اغوا کر رہے ہیں۔

بچوں کے لیے کام کرنے والی سماجی تنظیم ساحل کے ڈویزنل کوآرڈینیٹر برکت علی انصاری کہتے ہیں کہ گزشتہ سال چار ہزار 353 بچے جنسی تشدد ،گمشدگی اور کم عمری کی شادی سے شکار ہوئے۔

2022ء کی سالانہ رپورٹ کےمطابق جنسی زیادتی کا شکار ہونے والے زیادہ بچے پانچ سے چھ سال کی عمر کے ہیں۔ان میں دو ہزار 325 لڑکیاں اور ایک ہزار928 لڑکے شامل تھے۔

گذشتہ سال 428 بچوں کی گمشدگی کے واقعات رپورٹ ہوئے۔ان بچوں کا تعلق ضلع سکھر، خیرپور، کشمور، گھوٹکی، جیکب آباد ،لاڑکانہ، دادو، نوشہرو فیروز اور دیگر اضلاع سے تھا۔ اسی طرح 95 بچیوں کے اغوا کی وارداتیں رپورٹ ہوئیں۔

&nbsp;چند ماہ پہلے سکھر کے علاقے مائیکرو ٹاور کالونی سے پانچ سالہ آزاد علی ولد امتیاز علی میرانی کو گھر کے سامنے سے اغوا کر لیا گیا۔ دبر گوٹھ سے بارہ سالہ واجد ولد محمد رفیق کو بھی نامعلوم افراد محلے سے اغوا کر کے لے گئے۔

&nbsp;سکھر کے آباد محلے سے آٹھ سالہ صمد ولد حاجی شیخ کو اغوا کیا گیا اور اغوا کاروں نے 25 لاکھ تاوان کا مطالبہ کیا۔

ضلع کشمور میں کندھ کوٹ سے چھ سالہ فرحان سومرو کو اغوا کیا گیا۔ان کی رسیوں سے بندھے ہاتھوں سمیت تصاویر سوشل میڈیا پر وائرل ہوئی تھیں۔

رپورٹ کے مطابق دو سالہ مغوی کوثر کھوسو، آٹھ سالہ صداقت حاجانو، بارہ سالہ مقبول میرانی، چار سالہ صمد کمار اور پانچ سالہ جے دیپ ڈاکوں کے قبضے میں ہیں۔

دلچسپ بات یہ ہے کہ بازیاب ہونے والے بیشتر مغویوں کی رہائی پولیس مقابلوں کے ذریعے عمل میں آئی لیکن آج تک کوئی ملزم گرفتار نہیں ہو سکا۔

مسیحی لڑکیوں کا اغوا اور جبری شادی: 'کسی شہری کو دوسروں پر اپنا عقیدہ مسلط کرنے کا کوئی حق نہیں'۔ 

'زمیں کھا گئی یا آسمان نگل گیا'، سکھر میں بچوں کے اغوا کی بڑھتی وارداتوں پر پولیس کی بے بسی

text

سیما حیدر جکھرانی کے تبدیلیء مذہب اور انڈیا میں شادی کا معاملہ سوشل میڈیا پر عام ہونے کے بعد سندھ میں رہنے والے ہندو چند غیر معمولی اقدامات اٹھانے پر مجبور ہوئے ہیں۔ اس کا سبب ڈاکوؤں اور جکھرانی برادری کے بعض ہتھیار بند افراد کی جانب سے دی گئی دھمکیاں ہیں جن میں کہا گیا ہے کہ سیما کی واپسی نہ ہونے کی صورت میں ہندو کمیونٹی کے مندروں پر حملے کیے جائیں گے اور ان کی خواتین اور بچوں کو اغوا کیا جائے گا۔

سوشل میڈیا پر دی جانے والی ان دھمکیوں میں گھوٹکی، کندھ کوٹ، کشمور اور جیکب آباد کے کچے میں رہنے والے ڈاکو منیر مصرانی، فقیر ثنا اللہ شر، رانو شر اور عمر شر وغیرہ شامل ہیں۔

اس کے بعد سکھر، میرپور ماتھیلو، کندھ کوٹ، کشمور، غوث پور، گھوٹکی اور سنگرار کی ہندو پنچائتوں کے مکھی ایشور لعل، مکھی ڈاکٹر سریش کمار تلریجہ، مکھی نند لال، مکھی ککہ رام، مکھی وسو مل اور مکھی راجیش کمار کے درمیاں رابطوں کے بعد ایک ہنگامی اجلاس ہوا جس میں چند غیر معمولی فیصلے کیے گئے۔

ان فیصلوں کے مطابق خواتین کو مذہبی رسومات میں شرکت کرنے سے روکا گیا ہے۔ ہندو کمیونٹی کے لوگوں کو شہر سے باہر یا شہر کے اندر غیر ضروری تقریبات، سیر و تفریح اور ہوٹلوں میں قیام سے منع کیا گیا ہے۔ رات کو دیر تک دکانیں کھولے رکھنے پر روک لگائی گئی ہے اور بچوں پر خصوصی نظر رکھنے اور انہیں تنہا گھر سے باہر بھیجنے سے گریز کرنے کو کہا گیا ہے۔

بچوں اور بچیوں کے سکول، کالج اور اکیڈمی وغیرہ جانے آنے کو محدود کرنے، تعلیمی یا دیگر مقاصد کے لیے آمدورفت کے دوران خاندان کے کسی مرد کو ساتھ رکھنے پر بھی زور دیا گیا ہے۔ بچوں اور بچیوں کو اکیلے رکشہ میں بھیجنے سے اجتناب کا مشورہ دیا گیا ہے۔ مذہبی رسومات و دیگر تقریبات میں خواتین کےجانے اور رات گئے سفر سے پرہیز کرنے کی سفارش بھی کی گئی ہے۔

سیما کا معاملہ منظرعام پر آنے کے بعد غوث پور میں باگڑی کمیونٹی کے مرشد سانول شاہ کے آستانے پر فائرنگ کا واقعہ پیش آیا۔ اس کی رپورٹ غوث پور تھانے میں درج تو کی گئی مگر ابھی تک کوئی کارروائی عمل میں نہیں لائی گئی۔

مکھی ایشور لعل نے لوک سجاگ سے بات کرتے ہوئے کہا &quot;سندھ کی ہندو برادری میں شدید خوف و ہراس ہے۔ گھر سے نکلنے کے بعد ڈر ہوتا ہے کہ پتا نہیں واپس صحیح سلامت پہنچیں گے یا نہیں؟&quot;

انہوں نے مزید کہا کہ ماضی میں ہندو کمیونٹی کے افراد کو تاوان کے لیے اغوا کیا جاتا تھا مگر اب ان کے گھر، کاروبار، خواتین، بچے اور عبادت گاہیں بھی نشانے پر ہیں۔

ان کے بقول ضلع سکھر کی کجھور مارکیٹ میں 90 فیصد کاروبار ہندو کمیونٹی کا ہے جہاں سے بیرون ملک کجھور برآمد کی جاتی ہے۔ اس کے علاوہ اشیا خورونوش کے بڑے ڈیلر، ادویات کے سپلائر اور ڈاکٹروں کی بڑی تعداد بھی ہندو کمیونٹی سے ہے۔ انہیں غیرمحفوظ کرنا یا تحفظ فراہم نہ کرنا ملک سے دشمنی ہے۔

پوج ہندو پنچائت سکھر کے صدر مکھی ایشور لعل ماکھیجا کا کہنا تھا کہ 16 جولائی 2023ء کو کندھ کوٹ کشمور میں چند شر پسند عناصر کی جانب سے ہندوؤں کی عبادت گاہ کو جلایا گیا۔ اس کی ایف آئی آر درج ہوئی مگر کوئی کارروائی عمل میں نہیں لائی گئی ہے۔

چھوہارا مارکیٹ کے تاجر رجکمار وادھوانی نے بتایا کہ روہڑی میں آغا قادر داد زرعی مارکیٹ روہڑی کے تاجروں کو اب تک کوئی سکیورٹی نہیں دی گئی۔ خوف کے باعث مزدوری کرنے والے غریب لوگوں&nbsp; نے اپنا کام محدود کر دیا ہے۔ تاجر شام کے وقت ہی اپنے کاروبار بند کر دیتے ہیں۔ حالیہ مہینوں میں کجھور کا کاروبار عروج پر ہوتا ہے۔ مزدوروں کی کمی اور کاروبار جلدی بند کرنے سے تاجروں کے ساتھ ساتھ معیشت کو بھی نقصان ہو رہا ہے۔

انجمن تاجران موبائل مارکیٹ سکھر کے تاجر جئہ رام کا کہنا ہے کہ سکھر، گھوٹکی، کندھ کوٹ، کشمور اور شکارپور میں بہت سے ہندو ڈاکٹر، انجینئر اور کاروبار ی لوگ اپنے کاروبار بند کر کے نقل مکانی کی تیاریاں کر رہے ہیں۔ان کے مطابق ہندو کمیونٹی سے تعلق رکھنے والوں کے اغوا، قتل، جبری تبدیلی مذہب کا سلسلہ گزشتہ 40 برس سے جاری ہے جس کے باعث وہ ملک سے جانا چاہتے ہیں۔

پوج ہندو پنچائت سکھر کے ایڈوائز چندر بھان نے بتایا کہ سکھر سمیت مختلف اضلاع کی ہندو کمیونٹی کو شدید خدشات ہیں۔ ضلع شکارپور کے شہر چک میں رہنے والے ہندو تاجروں کو بھتے کے لیے چٹھیاں ملنا شروع ہوگئی ہیں۔حالات کو دیکھتے ہوئے اقلیتی برادری کے لوگ اپنی اولاد کو تعلیم اور کاروبار کے لیے دبئی، امریکا، کینیڈا اور آسٹریلیا بھیجنے کی تیاریاں کر رہے ہیں اور بہت سے تعلیم یافتہ لوگ ملک سے نقل مکانی کر چکے ہیں۔

کندھ کوٹ اور کشمور کے مکھی ڈاکٹر سریش کمار تلریجا نے بتایا کہ غوث پور کے مندروں پر فائرنگ برادری کے لیے نہایت پریشان کن ہے۔ اگرچہ اب سندھ حکومت نے مندروں پر سکیورٹی فراہم کی ہے تاہم شرپسند عناصر ابھی تک آزاد گھوم رہے ہیں۔

حالات کے پیش نظر آئی جی سندھ کے حکم پر گھوٹکی، کشمور، کندھ کوٹ، سکھر، جیکب آباد اور دیگر اضلاع میں ہندوؤں کی عبادت گاہوں پر 400 ہندو پولیس اہلکار تعینات کیے جا رہے ہیں۔ اس سلسلے سانگھڑ، میرپور خاص، کراچی اور تھرپارکر اضلاع کے چار سو ہندو پولیس اہلکاروں کا چناؤ کیا گیا ہے۔

میرپور ماتھیلو کے مکھی نند لال کا کہنا ہے کہ شہر کے مندروں میں ابھی تک سکیورٹی نہیں بھیجی گئی۔ تاہم گھوٹکی کے مکھی ککہ رام نے بتایا کہ شہر میں پولیس اہلکار پہنچ گئے ہیں۔ ایس ایس پی سکھر سنگھار ملک کا کہنا ہے کہ وہ مُکھیوں سے مسلسل رابطے میں ہیں اور انہیں ہر طرح کا تحفظ فراہم کیا جائے گا۔

ڈی آئی جی سکھر جاوید سونہارو جسکانی کا کہنا ہے کہ سیما کے انڈیا میں جا کر شادی کرنے کے واقعے کے بعد ڈاکوؤں نے سب سے پہلے رہڑکی دربار کو دھمکیاں دی تھیں۔ دربار کو پہلے ہی سیکورٹی فراہم کی جا رہی تھی لیکن دھمکیوں کے بعد سکیورٹی اہلکاروں کی نفری تین گنا بڑھا دی گئی۔ رہڑکی شہر اور اس کی طرف جانے والے راستوں پر بھی پولیس الرٹ ہے۔ سکھر، خیرپور، گھوٹکی اور دیگر اضلاع میں ہندو عبادت گاہوں پر بھی سکیورٹی موجود ہے۔ اس سلسلے میں رابطہ کمیٹیاں بھی بنائی گئی ہیں تاکہ کسی ناگہانی صورت حال میں کمیونٹی سے رابطہ رہے اور جلد سے جلد اقدامات کیے جا سکیں دیا جا سکے۔

ہم غم زدہ ہیں لائیں کہاں سے خوشی کے گیت: نظروں سے اوجھل پاکستانی ہندوؤں کے شب و روز

سیما حیدر کیس: سندھ بھر میں ہندو برادری نے سرگرمیاں محدود کر دیں، تحفظ کے لیے سکیورٹی دینے کا مطالبہ

پچاس سالہ غلام رسول شر سکھر میں گدھا گاڑی پر پانی بیچتے ہیں۔ وہ پچھلے بیس سال سے اسلام کالونی، گلشن اقبال، شر چوک اور آغا بدرالدین کالونی میں پانی سپلائی کر رہے ہیں۔ وہ روزانہ دور دراز جگہوں سے صاف پانی بھرتے ہیں اور پھر اسے ان علاقوں میں 30 تا 50 روپے فی گیلن میں فروخت کرتے ہیں۔

غلام رسول جن لوگوں کو پانی بیچتے ہیں انہیں اپنے گھروں میں پینے کا صاف پانی میسر نہیں ہوتا۔ تاہم یہ صورتحال صرف انہی جگہوں تک محدود نہیں بلکہ شہر کی بیشتر آبادیوں کے مکینوں کو اسی مسئلےکا سامنا ہے جنہیں روزانہ پینے کا پانی خریدنا پڑتا ہے۔

چونا بھٹہ کے پچپن سالہ محمد عمر بتاتے ہیں کہ وہ چالیس سال سے اس علاقے میں رہ رہے ہیں۔ اس تمام عرصہ میں وہ پینے کا پانی یا تو دور دراز جگہوں سے بھر کر لاتے رہے ہیں یا انہوں ںے اسے پانی سپلائی کرنے والوں سے خریدا ہے۔ ان کا کہنا ہے کہ پانی نہ ملنے کے باعث بہت سے لوگ اس جگہ سے نقل مکانی کر گئے ہیں۔

&quot;اہل علاقہ نے صاف پانی کی فراہمی کے لئے کئی مرتبہ انتظامیہ سے مطالبے کئے اور احتجاج کا راستہ بھی اپنایا لیکن ان کی شنوائی نہیں ہوئی&quot;۔

سکھر شہر کی آبادی ساڑھے پانچ لاکھ ہے جسے دریائے سندھ سے پانی فراہم کیا جاتا ہے۔ کئی دہائیاں پہلے شہر کو اس پانی کی فراہمی ٹینکیوں کے ذریعے ہوتی تھی۔ آبادی بڑھ گئی تو یہ ٹینکیاں ناکافی ثابت ہوئیں اس لیے 2020ء میں واٹر ورکس ٹیوب ویل سسٹم لگایا گیا۔

شہر کو سپلائی کیا جانے والا یہ پانی کھارا ہوتا ہے جس میں سنکھیا (آرسینک)کی حد سے زیادہ مقدار پائی جاتی ہے اس پانی کو صاف کرنے کے لئے میونسپل کارپوریشن اور پبلک ہیلتھ ڈیپارٹمنٹ نے 30 فلٹریشن پلانٹ لگا رکھے ہیں جن میں سے 20 غیرفعال ہیں۔

اس وجہ سے یہاں کے لوگ گردوں اور جلد کی بیماریوں، ہیپا ٹائٹس اور دیگر امراض میں مبتلا ہو رہے ہیں۔

2017ء میں سپریم کورٹ نے شہر میں پانی کی صورتحال پر جسٹس (ریٹائرڈ) امیر ہانی مسلم کی سربراہ میں ایک انکوائری کمیشن قائم کیا تھا۔ اس کمیشن نے 30 میں سے 25 مقامات پر پانی کو مضر صحت پایا۔ اسی طرح شہر کے مختلف ہسپتالوں میں استعمال ہونے والا پانی بھی آلودہ ہے جس کے چار میں سے تین سیمپل کمیشن نے مضر صحت قرار دیے۔

گردوں کے امراض کے ماہر ڈاکٹر ادیب رضوی تصدیق کرتے ہیں کہ شہریوں کو آلودہ پانی کی وجہ سے گردوں کی بیماریوں میں تشویشناک حد تک اضافہ ہو رہا ہے اگر صاف پانی میسر آئے تو ان بیماریوں میں 70 فیصد تک کمی ہو سکتی ہے۔

سکھر میں امراض گردہ کے ہسپتال &#39;ایس آئی یو ٹی&#39; کے انچارج ڈاکٹر عبدالصبور سومرو نے لوک سجاگ کو بتایا ہے کہ 22-2021ء میں یہاں ایک لاکھ 31 ہزار سے زیادہ مریضوں کا علاج کیا گیا۔ ان کا کہنا ہے کہ شہر میں فراہم کیا جانے والا پانی پوری طرح صاف نہیں ہوتا اور اس میں گرد اور اضافی نمکیات پائے جاتے ہیں جس کی وجہ سے گردوں کی پتھری اور دیگر بیماریاں بڑے پیمانے پر پھیل رہی ہیں۔

میونسپل انتظامیہ سکھر میں واٹر سپلائی کے انچارچ آغا جاوید نے لوک سجاگ کو بتایا کہ دریائے سندھ کے پانی کو سپلائی کرنے سے پہلے تالابوں میں جمع کر کے مخصوص پلانٹ پر پھٹکڑی کے ذریعے صاف کیا جاتا ہے۔ شہر میں ایسے چار پلانٹ کام کر رہے ہیں جو مجموعی طور پر 17.5 ملین گیلن پانی فراہم کرتے ہیں جبکہ شہر کی موجودہ آبادی کے لحاظ سے پانی کی طلب 32 ملین گیلن ہے۔

شہر کو پانی کی فراہمی کے لئے بندر روڈ پر قائم واٹر پمپ سٹیشن کے آپریٹر غلام رسول اور سید سجاد شاہ کہتے ہیں کہ&nbsp; گرمی کے موسم میں پانی کی طلب میں اضافہ ہوجاتا ہے جس کے باعث تقریباً 25 من تک پھٹکری استعمال ہوجاتی ہے۔

&quot;اس مرتبہ ایک ماہ میں پھٹکڑی کی 400 بوریاں استعمال ہوئی ہیں اور اس کے باوجود پانی صحیح طریقے سے صاف نہیں ہوسکا کیونکہ اس کی طلب بڑھ گئی ہے&quot;۔

سماجی تنظیم الرٹ سٹیزن کے چیئرمین سردار الہٰی بخش کا کہنا ہے کہ شہر بھر سے اکٹھا ہونے والا سیوریج کا پانی پہلے دریا میں چھوڑا جاتا ہے پھر وہی پانی شہریوں کو پینے لئے سپلائی کیا جاتا ہے۔ شہر میں پانی فراہم کرنے والی سب سے بڑی ٹینکی 1941ء میں بنائی گئی تھی جسے اب 82 برس ہو چکے ہیں لیکن اس کی شاید ہی کبھی صفائی اور مرمت ہوئی ہو گی۔

سابق تعلقہ ناظم اور یونین کونسل چونا بھٹہ کے چیئرمین غلام مرتضیٰ گھانگھرو کہتے ہیں کہ سکھر میں بھینسوں کے بہت سے غیرقانونی باڑے ہیں۔ ان باڑوں کے مالکان واٹر سپلائی لائن میں جگہ جگہ غیرقانونی کنکشن لگا کر پانی لیتے ہیں جس سے مین لائن لیک ہو جاتی ہے اور پانی ضائع ہوتا رہتا ہے اور بہت سی جگہوں پر اس میں سیوریج کا پانی بھی مکس ہو جاتا ہے۔

انہوں نے بتایا کہ شہر کو پانی کی کمی کا مسئلہ بھی درپیش ہے۔ سکھر کی ارضی ساخت یہاں پانی کی کمی کا ایک اہم سبب ہے۔ یہاں چند علاقے اونچے اور بعض نیچے ہیں جس کی وجہ سے ہر جگہ پانی کی یکساں مقدار اور رفتار سے سپلائی میں مشکلات پیش آتی ہیں۔

آٹھ یونین کونسلوں مشتمل نیو پنڈ کی آبادی ڈھائی لاکھ ہے جو سال بھر پانی کی قلت سے پریشان رہتی ہے۔ یہاں پانی کی فراہمی کے لئے پائپ ساٹھ سال پہلے بچھائے گئے تھے جو اب جگہ جگہ سے پھٹ چکے ہیں۔

&nbsp;نیو پنڈ کے سماجی و سیاسی کارکن جمال نوناری بتاتے ہیں کہ ایم این اے نعمان اسلام شیخ، سابقہ ایم پی اے ڈاکٹر نصراللہ بلوچ اور سابقہ ایم پی اے انوار خان مہر نے نیوپنڈ گراؤنڈ کےقریب پانی سپلائی کرنے والی ایک بڑی ٹینکی کا افتتاح کیا تھا جو کہ 12 سال گزرنے کے باوجود غیرفعال ہے۔

پانی کی قلت اور آلودگی کے مسئلے پر سکھر شہر کے میر بیرسٹر ارسلان اسلام الدین شیخ کا کہنا ہے کہ فنڈز کی کمی کی وجہ سے مسائل درپیش ہیں۔ نیابلدیاتی سیٹ اپ بننے کے بعد پانی کے مسائل حل کرنے کے لئے فنڈجاری ہو جائیں گے۔ ان کا یہ بھی کہنا تھا کہ جلد تمام فلٹر پلانٹس کو مرمت کے بعد دوبارہ قابل استعمال بنا دیا جائے گا۔

سکھر بیراج پر کنٹرول روم انچارج عبدالعزیز سومرو کے مطابق ان دنوں پانی کی قلت بیراج اور اس سے نکلنے والی نہروں کی صفائی اور مرمت کی وجہ سے ہے۔ایسے موقع پر بیراج کے تمام دروازے کھول دیئے جاتے ہیں اور نہروں کے دروازے بند کر دیے جاتے ہیں جس کی وجہ سے پانی کی سپلائی معطل ہوجاتی ہے۔

واٹر سپلائی انچارج سید سجاد شاہ نے لوک سجاگ کو بتایا کہ شہر میں ہسپتالوں اور رہائشی فلیٹس کی تعداد بڑھ جانے کے باعث پانی کی طلب میں بھی اضافہ ہو گیا ہے۔ محکمہ واٹر سپلائی کے پاس دو گاڑیاں ہیں جو روزانہ کی بنیاد پر پانچ سے دس علاقوں میں پانی فراہم کرتی ہیں۔

آغاجاوید کا کہنا ہے کہ شہر میں پانی کی کمی کا مسئلہ بہت جلد حل ہو جائے گا کیونکہ پانی کی قلت دور کرنے کے لئے واٹر سپلائی فیز ون بند روڈ پر 25 ہارس پاور کے دو ہیوی ڈیوٹی موٹرپمپ نصب کئے جا رہے ہیں جو چوبیس گھنٹے چلیں گے اور ان سے شہر کو سپلائی ہونے والی پانی کی مقدار میں 10 ہزار 771 گیلن کا اضافہ ہو جائے گا۔

جعفر آباد: سیلاب کے بعد گنداخہ واٹر پلانٹ بحال نہ ہو سکا، لوگ آلودہ پانی پینے پر مجبور ہو گئے

دریا کے کنارے پیاسا شہر: اول تو پانی ملتا نہیں اور ملتا ہے تو گندا ہوتا ہے

لاڑکانہ کی تحصیل ڈوکری کے کاشتکار زیب علی ساریو اپنی چاول کی فصل کے لیے بہت پریشان ہیں۔ وہ 65 ایکڑ اراضی کے مالک ہیں جس میں سے 40 ایکڑ پر وہ عموماً چاول اگاتے ہیں۔ اس فصل کو بہت سا پانی چاہئیے ہوتا ہے مگر کئی سال سے انہیں مطلوبہ مقدار میں پانی نہیں مل رہا۔

زیب علی کی زمین جس علاقے میں واقع ہے وہ رائس بیلٹ کہلاتا ہے۔ اس علاقے میں چاول کی فصل کو سیراب کرنے کے لئے انگریزوں نے سکھر بیراج سے خاص طور پر&#39; رائس کینال&#39; نکالی تھی مگر اب اس نہر اور ایسے دیگر آبی ذرائع میں پہلے جتنی مقدار میں پانی نہیں آتا۔ زیب بتاتے ہیں کہ پہلے وہ 80 من فی ایکڑ تک پیداوار حاصل کرتے تھے جو اب 60 من سے زیادہ نہیں ہوتی۔

سندھ بلوچستان رائس ملز ایسوسی ایشن کے جنرل سیکریٹری اسد تونیو تصدیق کرتے ہیں کہ جیکب آباد، شکارپور، قمبر شھداد کوٹ، لاڑکانہ اور دادو میں چاول کی مجموعی پیداوار 40 فیصد کم ہو گئی ہے۔ دریائے سندھ کے دائیں اضلاع میں چند سال پہلے چاول کی سالانہ پیدوار ساڑھے پانچ سے چھ ملین ٹن ہوتی تھی جو اب بمشکل ساڑھے تین ملین ٹن تک پہنچتی ہے۔

سکھر بیراج سے سات نہریں نکلتی ہیں جو سندھ کا 80 لاکھ ایکڑ سے زیادہ رقبہ سیراب کرتی ہیں۔ سرکاری اعداد و شمار کے مطابق بیراج کے دائیں جانب تینوں نہروں میں پانی کا اخراج تقریباً 10 ہزار کیوسک تک کم ہو گیا ہے۔

سکھر بیراج پر کنٹرول روم کے انچارج بھی تسلیم کرتے ہیں کہ دادوکینال، کیرتھر اور رائس کینال میں اب پہلے جتنا پانی نہیں آتا۔

ان کا کہنا ہے کہ کیرتھر کینال میں پانی کی گنجائش نو ہزار 500 کیوسک سے کم ہو کر سات ہزار کیوسک رہ گئی ہے۔ رائس کینال میں پہلے 16ہزار 500 کیوسک پانی آتا تھا جو اب 10 ہزار کیوسک تک محدود ہو گیا ہے جبکہ دادو کینال میں پانی کی گنجائش چار ہزار 500 کیوسک سے کم ہو کر صرف تین ہزار کیوسک رہ گئی ہے۔

تاہم بیراج کے بائیں جانب چاروں نہروں میں پانی کی مقدار میں کوئی خاص کمی نہیں دیکھی گئی۔ اس طرف خیرپور فیڈر ایسٹ میں دو ہزار 315 کیوسک، خیرپور فیڈر ویسٹ کینال میں دو ہزار 700 کیوسک، نارا کینال میں 19 ہزار 600 کیوسک اور روہڑی کینال میں 18 ہزار 600 کیوسک پانی آ رہا ہے۔

سکھر بیراج کے چیف انجینئر اول الذکر تینوں نہروں میں پانی کی مقدار کم ہو جانے کی تصدیق کرتے ہیں۔ ان کا کہنا ہے کہ ان نہروں کی تہہ میں مٹی جمع ہو جانے کے باعث پانی کے بہاؤ کی گنجائش کم ہو گئی ہے تاہم اب ان نہروں کی بھل صفائی ہو گئی ہے اور امید ہے کہ آئندہ ان میں پورا پانی آئے گا۔

دوسری جانب ماہر آبپاشی اور انڈس ریور سسٹم اتھارٹی (ارسا) کے سابق چیئرمین نور محمد بلوچ کا کہنا ہے کہ نہروں کی بھل صفائی مسئلے کا حل نہیں۔ اصل مسئلہ یہ ہےکہ سکھر بیراج میں بھی مٹی کی کی بھاری مقدار جمع ہو چکی ہے جس میں ہر سال ایک سے دو فٹ تک اضافہ ہو رہا ہے۔

&quot;خریف کے سیزن میں بیراج کے دونوں اطراف زرعی علاقوں کی آبی ضرورت پوری نہیں ہوتیں۔ بیراج کے دروازوں کو لکڑی کے پھٹے لگا کر عارضی طور پر پانڈ لیول میں اضافہ کیا جاتا ہے مگر پھر بھی نہروں میں پورا پانی نہیں جاتا۔&quot;

انگریزوں کے بنائے سکھر بیراج کا پرانا نام لائیڈ بیراج تھا جس کی تعمیر 1932 میں مکمل ہوئی۔ اس بیراج میں پانی کے بہاؤ کی گنجائش 15 لاکھ کیوسک رکھی گئی لیکن کچھ ہی عرصہ کے بعد اس کے دائیں جانب مٹی جمع ہونا شروع ہو گئی تھی۔ اس مسئلے پر قابو پانے کے لئے بیراج کے گیٹ 6 سے 14 تک دس دروازے بند کر دیے گئے اور ان کے سامنے ایک ہزار فٹ لمبا اور دو ہزار فٹ چوڑا جزیرہ نما ٹیلا بنا دیا گیا۔

ڈاؤن سٹریم سے مٹی نکالنے کے لئے گیٹ 14 سے 23 تک ایک چینل بنایا گیا تاکہ نہروں کو گنجائش کے مطابق پانی مل سکے۔ لیکن پاکستان بننے کے بعد بیراج سے مٹی نکالنے اور پانی کا مطلوبہ مقدار میں بہاؤ برقرار رکھنے پر کوئی توجہ نہ دی گئی جس کے نتیجے میں اس کی حالت بگڑتی چلی گئی۔

نور محمد بلوچ کہتے ہیں کہ بیراج کی دونوں اطراف مٹی کے ٹیلے بن گئے ہیں جن کے باعث بیراج سے پانی کا بڑا ریلا نہیں گزر سکتا۔ صورتحال کی سنگینی کا اندازہ یوں لگایا جا سکتا ہے کہ گزشتہ سال آنے والے سیلاب میں یہاں سے صرف چھ لاکھ کیوسک پانی ہی گزر پایا تھا۔

&#39;&#39;سیلاب میں پانی کا دباؤ بیراج کی باؤنڈری وال پر پڑتا ہے اور اس دوران ہلکی سی لیکیج بھی کسی بڑے حادثے کا سبب بن سکتی ہے کیونکہ سکھر شہر اور روہڑی دریا کی سطح سے نیچے ہیں۔&#39;&#39;

سکھر بیراج کے کنٹرولر عبدلعزیز سومرو نے بتایا کہ سلِٹ سے بیراج میں پانی کی گنجائش پانچ سے چھ لاکھ کیوسک تک کم ہوگئی ہے۔ خدانخواستہ 2010 جیسا سیلابی ریلا دوبارہ آیا تو بڑے پیمانے پر نقصان کا خدشہ ہے۔

سندھ کے محکمہ آبپاشی نے سکھر بیراج کی بحالی کے لیے ورلڈ بینک کے تعاون سے اکتوبر 2022 میں 34 ارب روپے کی لاگت سے چار سالہ منصوبہ شروع کیا تھا۔

اس منصوبے کے تحت بیراج کے تمام گیٹ تبدیل کیے جائیں گے، دروازوں کو تقریباًدو فٹ اونچا کیا جائے گا، ستونوں سمیت بیراج کے پورے ڈھانچے کی مرمت ہو گی، دروازے کھولنے اور بند کرنے کے نظام کو جدید خطوط پر استوار کیا جائے گا، اپ سٹریم میں دائیں اور بائیں جانب جمع شدہ مٹی نکالی جائے گی اور اس طرح بیراج کی عمر مزید 50 سال بڑھ جائے گی۔

اس منصوبے میں بیراج کے دائیں جانب تینوں نہروں کی بھل صفائی (ڈی سلٹنگ) بھی شامل ہے۔بیراج کی بحالی کا ٹھیکہ چین کی کمپنی &#39;چائنہ روڈز اینڈ برجز کنسٹرکشن کارپوریشن&#39; کو دیا گیا ہے جبکہ کام کی نگرانی ورلڈ بینک کی کمپنی موٹ میکڈونلڈ، ایم ایم پاکستان اور سندھ حکومت کریں گے۔

تاہم سنگ بنیاد رکھنے کے آٹھ ماہ بعد بھی اس منصوبے پر کوئی کام شروع نہیں ہوا۔

جب اس بارے میں سکھر بیراج کے چیف انجینئر سید سردار علی شاہ سے پوچھا گیا تو ان کا کہنا تھا کہ بیراج کی بحالی کاکام جلد شروع ہونے والا ہے۔ مگر بیراج پر تعینات ایکسیئن سید فیاض شاہ کہتے ہیں کہ بحالی کا کام شروع ہونے میں مزید پانچ سے چھ ماہ لگ جائیں گے۔

'پٹ فیڈر کینال ہمارے لیے خونی نہر ثابت ہوئی ہے، ایک اور سیلاب کو برداشت کرنے کی سکت نہیں ہے'

سکھر بیراج:  ' خدانخواستہ 2010 جیسا سیلابی ریلا دوبارہ آیا تو بڑے پیمانے پر نقصان کا خدشہ ہے'

روہڑی میں دریائے سندھ کے کنارے آغا قادر داد چھوہارا مارکیٹ پاکستان میں کھجور کی سب سے بڑی منڈی ہے۔ اس جگہ تین سو دکانیں اور گودام ہیں اور یہاں سے ہر سال بہت سی اقسام کی ہزاروں ٹن کھجور اندرون و بیرون ممالک بھیجی جاتی ہے۔ لیکن آج کل اس منڈی اور یہاں کے تاجروں اور مزدوروں کے حالات کچھ اچھے دکھائی نہیں دیتے۔

منڈی میں جا بجا گندے پانی کے جوہڑ اور غلاظت کے ڈھیر نظر آتے ہیں۔ ہر طرف پھیلے کیچڑ اور بدبو کے باعث اس جگہ سے گزرنا بھی محال ہے۔ یہاں کاروبار کرنے والے سنجے کمار کہتے ہیں کہ منڈی کی حالت پہلے بھی کچھ اتنی اچھی نہیں تھی لیکن پچھلے سال آنے والے سیلاب نے اس جگہ اور یہاں ہونے والے کاروبار کو بری طرح نقصان پہنچایا ہے۔ سیلاب کے بعد منڈی میں مہینوں پانی کھڑا رہا جس سے تاجروں کو کروڑوں روپے کا نقصان ہوا۔

آغا قادر داد مارکیٹ میں کاروبار اور مزدوری کرنے والے نجم علی، منیر جتوئی، حاجی مظہر الدین اور دیگر کا کہنا ہے کہ بارشوں کی وجہ سے کھجور کا دانہ تباہ ہو گیا اور درختوں میں کیڑا لگ گیا ہے جس کی وجہ سے پیداوار نصف سے بھی کم رہ گئی ہے۔ ان حالات میں کام ٹھپ ہو گیا ہے اور وہ روزانہ منڈی سے خالی ہاتھ واپس جاتے ہیں۔

جب کھجور کی فصل اتاری جاتی ہے تو ہزاروں مزدوروں کو روزگار ملتا ہے جو پیڑ سے کھجور کے خوشے اتارنے سے لے کر اس کو سُکھانے، اس سے چھوہارا بنانے اور پیکنگ تک بہت سے کام کرتے ہیں۔ یہ کھجور کو سُکھانے کی چٹائیاں بُننے والے سینکڑوں مزدوروں کے لیے بھی روزگار کے حصول کا موقع ہوتا ہے جن کے چولہے اس سال بجھے رہے ہیں۔

سنجے کمار کہتے ہیں کہ بارشوں اور سیلاب سے کھجور کی فصل کو تو نقصان پہنچا ہی تھا لیکن اس سے بھی بڑا نقصان واہگہ بارڈر کے راستے کھجور کی برآمد بند ہونے سے ہو رہا ہے۔ انہوں نے بتایا کہ پاکستان سے چھوہارا خریدنے والے بڑے ملکوں میں بھارت بھی شامل ہے لیکن 2019 میں واہگہ کے راستے کاروبار بند ہونے کی وجہ سے کھجور برآمد کرنے والے تاجر اور ان کے لیے کام کرنے والے ہزاروں مزدور سخت پریشانی سے دوچار ہیں۔

&#39;&#39;پہلے ہمارا 90 فیصد کاروبار واہگہ کے راستے ہوتا تھا۔ روہڑی کے ریلوے جنکشن ہونے کی وجہ سے کھجور باآسانی لاہور پہنچ جاتی تھی جہاں واہگہ بارڈر کے راستے اسے کم خرچ اور مختصر وقت میں سرحد پار پہنچایا جا سکتا تھا لیکن اب ہمیں دبئی کے راستے کاروبار کرنا پڑتا ہے جو ناصرف بہت مہنگا پڑتا ہے بلکہ واہگہ کے مقابلے میں اس راستے سے 35 تا 50 فیصد مال ہی پہنچایا جا سکتا ہے۔&#39;&#39;

کھجور کے برآمد کنندہ عبدالرشید میتلو کا کہنا ہے کہ دبئی کے راستے چھوہارے کی برآمد پر اخراجات بڑھ گئے ہیں۔ پہلے جو تاجر برآمد پر ایک لاکھ روپے خرچ کرتا تھا اب اسے دس لاکھ روپے تک خرچ کرنا پڑ رہے ہیں۔ ماضی میں واہگہ بارڈر سے روزانہ دو سے تین سو تک ٹرک پندرہ سے بیس ہزار بوری کھجور لے کر انڈیا جاتے تھے لیکن اس برس یہ برآمد 30 فیصد سے بھی کم رہی۔ ایک تو بارشوں کی وجہ سے فصل ویسے ہی کم ہوئی ہے اور اوپر سے برآمد محدود ہو جانے کی وجہ سے تاجروں کو بہت نقصان اٹھانا پڑ رہا ہے۔

اس منڈی سے کھجور برآمد کرنے والے کنور لال اور راج کمار وادھوانی نے بتایا کہ ایک طرف تو انہیں بارشوں اور سیلاب نے تباہ کیا اور گوداموں میں پڑی ہوئی کھجور خراب ہوئی&nbsp; دوسری جانب واہگہ بارڈر بند ہونے سے تاجروں کی حالت اور بھی پتلی ہو گئی ہے۔ پانچ لاکھ کی کھجور برآمد کرنے پر پانچ ہزار اور ایک کروڑ کی کھجور باہر بھیجنے پر 5 لاکھ ٹیکس دینا ہوتا ہے۔ اگر اس میں کمی کر دی جائے تو کھجور کی برآمد بڑھ جائے گی۔

سکھر چیمبر آف کامرس کے سینئر نائب صدر گرداس وادھوانی کہتے ہیں کہ 2020 میں برآمد پر ٹیکس کی شرح ایک فیصد سے بڑھا کر 10 فیصد کر دی گئی تھی۔ بعد میں ڈالر بھی 270 روپے تک پہنچ گیا اور واہگہ بارڈر بند ہونے سے کھجور کی سالانہ برآمد کم ہو کر 20 سے 30 فیصد تک ہی رہ گئی ہے۔

&#39;&#39;اس سال 5 لاکھ بوری کھجور ہی برآمد ہو سکی ہے جوکہ ماضی کے مقابلے میں ایک تہائی سے بھی کم مقدار ہے اور برآمد کنندگان بہت مشکل میں ہیں۔ اس سال کھجور کی برآمد سے کتنا زرمبادلہ حاصل ہوا اس کے بارے میں&nbsp; تو اسٹیٹ بینک ہی بتا سکتا ہے لیکن ہمارے اندازے مطابق ماضی میں کھجور کی برآمد سے ملک میں ہر سال 70 کروڑ ڈالر آتے رہے ہیں۔

کھجور برآمد کرنے والے تاجر عبدالرشید میتلو نے بتایا کہ خیرپور میں کرم آباد اور ٹھیڑھی کے علاقے میں کھجور کی پیکنگ اور دیگر کاموں کی تقریباً 60 فیکٹریاں چل رہی ہیں مگر حکومت کی جانب سے انہیں کوئی سہولت نہیں ملتی۔ انہوں نے بتایا کہ کھجور کے بیج بھی کارآمد ہوتے ہیں اور اس کی ویلیو ایڈیشن کرکے بھاری زرمبادلہ کمایا جا سکتا ہے لیکن ہمارے ہاں کھجور کے علاوہ صرف چھوہارا ہی برآمد کیا جاتا ہے۔

آغا قادر داد مارکیٹ میں کاربار کرنے والے نزاکت جتوئی کا کہنا ہے کہ کھجور کی برآمد سے ملک کی معیشت میں بھی بہتری آ سکتی ہے۔ حکومت کو چاہیے کہ برآمد کنندگان کو زیادہ سہولیات دے کر انہیں زیادہ سے زیادہ مقدار میں کھجور بیرون ملک فروخت کرنے کی ترغیب دے۔ اس طرح ملک میں زرمبادلہ آئے گا جو ہماری سب سے بڑی ضرورت ہے۔

&#39;&#39; کھجور کی برآمد تقریباً 23 ارب روپے کا کاروبار ہے مگر ٹیکس کی شرح زیادہ ہونے کی وجہ سے بیشتر برآمدکنندگان &#39;&#39;ہنڈی&#39;&#39; پر کاروبار کرتے ہیں۔ انڈیا کھجور درآمد کرنے والا بڑا ملک ہے تاہم واہگہ بارڈر بند ہونے کی وجہ سے آڑھتی ہم سے سستے داموں کھجور خرید کر کہ دبئی کے راستے اسے مہنگے داموں بیچتے ہیں۔ جب ہم واہگہ سے انڈیا میں کھجور برآمد کرتے تھے تو تاجروں اور ملک دونوں کو فائدہ ہوتا تھا۔&#39;&#39;

بڑا ہی زور ہے اس بار مینہ کے قطروں میں: 'اس سال خیرپور میں کھجور کے کاشت کار قرض کیسے اتاریں گے، مزدور گھر کیسے چلائیں گے؟'

آسمان سے گرا کھجور میں اٹکا: واہگہ بارڈر بند ہونے سے کھجور برآمد کرنے والے تاجر پریشان

نزاکت جتوئی ضلع خیرپور میں کھجور کے بڑے کاشت کار ہیں۔ وہ علاقے بھر میں بہتر پیداوار حاصل کرنے کے حوالے سے پہچانے جاتے ہیں۔ ان کا کجھور کا باغ 120 ایکڑ پر پھیلا ہوا ہے۔ پچھلے کچھ سالوں سے وہ اپنی فصل کی پیداوار سے کافی پریشان ہیں۔

&quot;ہم پوری کوشش کرتے ہیں لیکن پتا نہیں زمین کو کیا ہوگیا ہے کہ فصل کی پیداوار کم سے کم ہوتی چلی جارہی ہے۔ زرعی ادویات بھی استعمال کرچکے ہیں لیکن اس سے بھی کوئی فائدہ نہیں ہوا۔ اب تو صورتحال یہ ہے کہ پیداوار آدھی سے بھی کم رہ گئی ہے۔&quot;

مالٹے (سٹرس) اور آم کے بعد کجھور پاکستان کا تیسرا سب سے اہم پھل ہے۔ پاکستان کا شمار دنیا میں کھجور پیدا کرنے والے چھ بڑے ملکوں میں ہوتا ہے۔

پاکستان میں کھجور کے باغات بلوچستان اور سندھ میں ہیں۔ کجھور کے زیرکاشت کل رقبے کا 56 فیصد بلوچستان میں ہے اور 43 فیصد سندھ میں۔ سندھ کی تقریباً 85 فیصد کھجور صرف ضلع خیرپور میں پیدا ہوتی ہے۔ اگر اس کے پڑوسی ضلع سکھر کو بھی شامل کرلیا جائے تو یہ دنوں اضلاع ملک کر صوبائی پیداوار کا 98 فیصد پیدا کرتے ہیں۔گویا سندھ کی تمام پیداوار انہی دو اضلاع میں مرکوز ہے۔&nbsp;

انہی اعدادوشمار کو دوسری جانب سے دیکھیں تو پاکستان کی کجھور کی کل پیداوار کا ایک تہائی صرف ضلع خیرپور سے آتا ہے۔

پچھلے سال نزاکت کی فصل کی پیداوار اس سال سے بھی کہیں بُری رہی تھی۔ &quot;میری 70 ایکڑ زمین میں ابھی بھی پانی کھڑا ہے۔ چھوٹے پودے سوکھ رہے ہیں۔ پتا نہیں اس زمین سے کب پانی نکلے گا اور ہم کچھ اور کھیتی کرنے کا سوچیں گے&quot;۔

محکمہ زراعت سندھ کے ایڈیشنل ڈائریکٹر عبدالقادر دایو کے مطابق سندھ میں 2010 کے سیلاب کے بعد صورتحال خراب ہونا شروع ہوئی تھی جب زمین میں پانی زیادہ عرصے تک کھڑا رہا اور زیر زمین پانی کی سطح اوپر آگئی جس سے سیم و تھور جیسے مسائل پیدا ہو گئے ۔

ان کے مطابق خیر پور اور سکھر میں پچھلے تین سال کے دوران مختلف بیماریوں سے کھجور کے 11 ہزار درخت سوکھ چکے ہیں۔

محکمہ زراعت کے مقامی اہلکاروں کے اندازے کے مطابق خیرپور اور سکھر میں 11 لاکھ سے زائد کھجور کے درخت ہیں۔ضلع خیر پور کی آٹھ میں سے پانچ تحصیلوں (کنگری، خیرپور، کوٹ ڈیجی، گمبٹ اور سوبھودیرو) کی تقریباً 80 فیصد زرعی اراضی کھجور کے باغات سے ڈھکی ہوئی ہی اور پڑوسی ضلع سکھر کی 20 فیصد۔

کاشت کاروں کے مطابق ان کے پودے فنگس (الُی) اور سڈن ڈکلائن (اچانک گراوٹ) نامی بیماری کی وجہ سے سوکھ رہے ہیں۔ وہ بتاتے ہیں کہ یہ بیماری خیرپور میں تیزی سے پھیل رہی ہے جس سے نہ صرف پودے سوکھ رہے ہیں بلکہ بچ جانے والے پودوں کی پیداوار بھی کم ہوتی چلی جا رہی ہے۔

شاہ عبدالطیف یونیورسٹی خیرپور کے شعبہ ڈیٹ پام ریسرچ انسٹیٹیوٹ کے ڈائریکٹر ڈاکٹر امیر احمد نے سجاگ کو بتایا کہ سڈن ڈکلائن افریقی ملکوں مراکش اور الجیریا سے شروع ہوئی اور پچھلے کچھ عرصے میں پاکستان خاص کر خیرپور میں بھی اس کے اثرات نظر آ رہے ہیں۔

ان کے مطابق یہ فنگس کی ہی ایک شکل ہے جو زمین سے جڑوں کے ذریعے پودے میں داخل ہوتی ہے اور پھر اس کے اندر اپنا جال پھیلا کر اس میں پانی کی ترسیل کے نظام کو بلاک کر دیتی ہے۔ اس طرح پودوں کے اوپر والے حصے خشک ہوجاتے ہیں۔

ڈاکٹر امیر کے خیال میں ابتدائی مراحل میں اس مرض کی تشخیص ہوجائے تو اس پر کنٹرول پانا ممکن ہے لیکن تاخیر کی صورت میں پودے کو بچانا ناممکن ہو جاتا ہے۔

<h2>سڈن ڈکلائن (اچانک گراوٹ) کیا ہے؟</h2>

وزیر علی میتلو نے شاہ عبدالطیف یونیورسٹی خیرپور سے سڈن ڈکلائن اور کھجور کی دوسری بیماریوں میں ڈاکٹریٹ کی ہے اور اب بے نظیر بھٹو شہید یونیورسٹی بے نظیر آباد میں اسسٹنٹ پروفیسر ہیں۔

وہ کہتے ہیں کہ یہ خطرناک بیماری دو سال کے عرصے میں پودے کو مار دیتی ہے۔ اس کا سب سے مہلک پہلو یہ ہے کہ اگر باغ میں ایک پودا بھی اس بیماری سے متاثر ہے تو پھر پورا باغ ہی اس کی لپیٹ میں آجاتا ہے۔اس سے بچنے کا حل یہ ہے کہ جو پودہ متاثر نظر آئے اسے فوری طور پر تلف کردینا چاہیے۔

مصر دنیا میں سب سے زیادہ کھجور پیدا کرنے والا ملک ہے۔ وزیر علی میتلو نے مصر کے سرکاری تحقیقاتی ادارے کے ایک سائنسدان عادل عبدالسعود کے ساتھ مل کر تین سال تک خیرپور میں اس بیماری پر تحقیق کی اور 17 مقامات سے اس بیماری کے نمونے اکٹھے کیے۔

ان کے مطابق نور پور نامی قصبہ جو خیرپور کے مشرقی جانب واقع ہے وہاں پر 50.17 فیصد پودوں میں اس بیماری کے اثرات پائے گئے۔ بیبرلوئی میں 36 فیصد، احمد پور میں 32 فیصد، کوٹ میر محمد میں 20 فیصد پودے سڈن ڈکلائن کے مرض میں مبتلا تھے۔

وزیر علی بتاتے ہیں کہ اس بیماری کا جنم زمین یا پودوں میں نمی کی مقدار زیادہ ہونے کی وجہ سے ہوتا ہے اسی لیے خیرپور کے مشرقی اطراف یہ بیماری بہت زیادہ ہے کیوں کہ ان علاقوں میں سیلاب کا پانی کھڑا ہونے کے علاوہ کھجور کے باغات میں درختوں کے درمیان چاول اور پانی زیادہ استعمال کرنے والے فصلیں بھی لگائی جارہی ہیں۔

وہ کہتے ہیں کہ خیرپور کی مغربی اطراف جو علاقہ ضلع سکھر سے ملتا ہے وہاں باغات میں فصلیں لگانے کا رجحان کم ہے اس لیے یہاں پر اس بیماری کے اثرات بھی کم پائے گئے ہیں۔

عبدالرشید میتلو کا تعلق اسی علاقے سے ہے جہاں پر یہ بیماری زیادہ پھیلی ہوئی ہے وہ تصدیق کرتے ہیں کہ ببرلوء، پریالو، پیر جو گوٹھ، گاڑھی موری، نور پور اوراس کے اطراف کے علاقوں میں ہر سال درجنوں کی تعداد میں پودے سوکھ رہے ہیں اور جو باقی بچے ہیں ان کی پیداوار بہت کم رہ گئی ہے۔

سرکاری اعداد و شمار کے مطابق2010 &nbsp;کے سیلاب کے بعد سندھ میں کجھور کی فی ایکڑ پیداوار 85 من سے کم ہو کر 55 من پر آ گئی تھی۔

<h2>ایک درخت کی معیشت اور ثقافت</h2>

خیرپور کی معیشت کجھور کے اردگرد گھومتی ہے۔ وزیر علی میتلو کا ماننا ہے کہ اگر اس فصل کو نقصان پہنچا تو خیرپور کے ناصرف لاکھوں خاندانوں کا ذریعہ معاش ختم ہوجائے گا بلکہ یہ علاقہ اپنی ایک اہم ثقافتی شناخت بھی کھو دے گا۔&nbsp;

لیکن وزیر علی کو خدشہ ہے کہ سڈن ڈکلائن خیرپور کی طرف بڑھ رہی ہے، اگر اس پر بروقت قابو نہ پایا گیا تو یہ لاکھوں خاندانوں کا روز گار اور اس سے پوری ثقافت کو بھی برباد کردے گی۔

ان کی پریشانی بے جا نہیں وہ بتاتے ہیں کہ مراکش میں بھی اس بیماری نے اتنی تباہی مچائی تھی کہ جو ملک دنیا کو کھجوریں بیچتا تھا وہ اپنی ضرورت پوری کرنے کے لیے خود خریدنے پر مجبور ہوگیا۔&nbsp;

پاکستان میں بھی آثار کچھ مختلف نہیں دکھائی دے رہے۔

مالی سال 2020-21 میں پاکستان نے 20 ہزار میٹرک ٹن کھجور باہر بھیجی تو اسے اپنی ضرورت پوری کرنے کے لیے 57 ہزار میٹرک ٹن باہر سے منگوانا پڑی۔ اس سے اگلے سال حالات اور بھی زیادہ برے ہوگئے کیوں کہ اس سال پاکستان نے صرف 18 ہزار آٹھ سو میٹرک ٹن کھجور برآمد کی جبکہ اسے 72 ہزار میٹرک ٹن درآمد کرنا پڑی۔

خیرپور میں کھجور کی کٹائی کے موسم یعنی جولائی اور اگست کے دو ماہ کے دوران نئی بستیاں آباد ہو جاتی ہیں اور کجھور سے متعلق بہت سی سرگرمیاں ایک بڑے تہوار کی شکل اختیار کر لیتی ہیں۔ مزدور پھل کی چنائی کرتے ہیں۔ انہیں سکھا کر چھوہارے بنائے جاتے ہیں۔ جنہیں کھجور کے پتوں سے بنی چٹائیوں پر پھیلا کر خشک کیا جاتا ہے۔ مختلف طرح کے ٹرک علاقے میں فصل کو ایک سے دوسری جگہ منتقل کرتے ہوئے دکھائی دیتے ہیں۔

ان مہینوں میں یہاں ہر طرف چھوہارے کی خوشبو پھیلی ہوئی ہوتی ہے۔

وزیر علی کہتے ہیں کہ یہاں کا مزدور اس فصل کی بوائی، چھدرائی اور کٹائی کا اس قدر ماہر ہے کہ انہیں دبئی، قطر اور سعودی عرب کی کمپنیاں اسی کام کے لیے اچھی تنخواہ پر ملازمت دیتی ہیں۔ یہاں کے بہت سارے غریب خاندانوں کا روزگار کھجور کے پتوں کی چٹائیاں اور دوسری چیزیں بنانے سے وابستہ ہے۔ بیشتر غریبوں کے گھر ہی کھجور کی ٹہنیوں اور پتوں کے بنے ہوئے ہوتے ہیں۔

خالد بانبھن

خالد بھانبھن، سکھر سندھ سے تعلق رکھتے ہیں۔ بطور رپورٹر صحافی ،انسانی حقوق ،ماحولیات، جیوپولیٹیکل موضوعات پر رپوٹنگ کرتے ہیں۔

'زمیں کھا گئی یا آسمان نگل گیا'، سکھر میں بچوں کے اغوا کی بڑھتی وارداتوں پر پولیس کی بے بسی

سیما حیدر کیس: سندھ بھر میں ہندو برادری نے سرگرمیاں محدود کر دیں، تحفظ کے لیے سکیورٹی دینے کا مطالبہ

دریا کے کنارے پیاسا شہر: اول تو پانی ملتا نہیں اور ملتا ہے تو گندا ہوتا ہے

سکھر بیراج: ' خدانخواستہ 2010 جیسا سیلابی ریلا دوبارہ آیا تو بڑے پیمانے پر نقصان کا خدشہ ہے'

آسمان سے گرا کھجور میں اٹکا: واہگہ بارڈر بند ہونے سے کھجور برآمد کرنے والے تاجر پریشان

سڈن ڈِکلائن کا عفریت اور خیرپور کی کھجور کی معیشت: وقت کم ہے اور مقابلہ سخت

Lok Sujag