جنوبی پنجاب کا پہلا ڈرائی پورٹ ٹرسٹ 28 سال قبل ملتان کے علاقے شیر شاہ میں قائم کیا گیا تھا۔ جس کا مقصد وسیب میں صنعتکاروں اور تاجروں کو سہولیات فراہم کرنا تھا۔

خیال تھا کہ ملتان، ڈیرہ غازیخان اور بہاول پور کی انڈسٹری اور امپورٹرز کو ملتان ہی میں کسٹم کلیئرنس کی سہولت ملے گی تو برآمدات و درآمدات بڑھیں گی اور لوگوں کے لیے روزگار کے نئے مواقع پیدا ہوں گے۔

&nbsp;بدقسمتی سے ایسا نہیں ہو سکا اور یہ ڈرائی پورٹ 1995ء سے آج تک &#39;نیم فعال&#39; چلا آ رہا ہے۔

ابتدا میں تو سٹیک ہولڈرز نےجوش و خروش سے کام کیا لیکن اب یہاں سے برآمدات و درآمدات روز بروز کم ہور ہی ہیں۔ یہاں تک کہ ڈرائی پورٹ انتؕظامیہ کے لیے اخراجات پورے کرنا بھی چیلنج بناہوا ہے۔

آل پاکستان بیڈشیٹ اینڈ اپ ہولسٹری مینوفیکچرنگ ایسوسی ایشن کے چیئرمین سید محمد عاصم بتاتے ہیں کہ ایک وقت تھا جب ملتان میں ہر ماہ برآمدی سامان کے 500 سے زائد کنٹینرز کلیئر ہوتے تھے مگر اب یہ تعداد ماہانہ 50 کنٹینر تک محدود ہو گئی ہے۔

پچھلے تین سال کا ڈیٹا تصیدیق کرتا ہے کہ یہاں سے درآمدات اور برآمدات میں روز بروز کمی آ رہی ہے۔

مالی سال 21- 2020ء میں ملتان ڈرائی پورٹ پر سامان کے 539 درآمدی کنٹینرز کلیئر کیے گئے جن کی مالیت 10 ارب 92 کروڑ 58 لاکھ روپے تھی۔ جبکہ یہاں سے ایک ہزار 584 کنٹینر مال برآمد کیا گیا تھا جس کی مالیت کا تخمینہ 59 کروڑ 57 لاکھ روپے لگایا گیا تھا۔

22-2021ء یہاں کل 261 کنٹینر بیرون ملک سے آئے جن کی مالیت چار ارب 21 کروڑ 12 لاکھ روپے تھی۔ جبکہ 887 کنٹینرز باہر بھیجے گئے تھے جن کی مالیت 75 کروڑ 90 لاکھ روپے بتائی گئی تھی۔

اسی طرح مالی سال 23- 2022ء کے دوران 139 درآمدی کنیٹنرز کلیئر ہوئے جن کی مالیت چار ارب 49کروڑ 34 لاکھ روپےتھی۔ اسی دوران یہاں سے 851 کنٹینر مال برآمد ہوا جس کی مالیت 52 کروڑ 98 لاکھ 51ہزار روپے تھی۔

رواں مالی سال کے پہلے پانچ ماہ میں دسمبر تک یہاں 91 کنٹینر درآمد کیے گئے اور 445 کنٹینر بیرون ملک روانہ کیے گئے ہیں۔

محمد عاصم نے لوک سجاگ کو بتایا کہ ملتان ڈرائی پورٹ حکومتی پالیسیوں کے باعث ویران ہے۔ چند سال قبل کسٹمز کلکٹوریٹ کو دو حصوں &#39;اپریز منٹ(مالیت کا تعین ) اور انفورسمنٹ &#39;میں تقسیم کر کے ڈرائی پورٹ کو کسٹم اپریزمنٹ کے تحت دے دیا گیا تھا۔

وہ کہتے ہیں کہ ملتان، کسٹمز کلکٹوریٹ فیصل آباد کا حصہ ہے اور کلکٹر کسٹمز اپریزمنٹ فیصل آباد آفس میں بیٹھتے ہیں۔ یہاں کوئی بھی مسئلہ ہو صنعتکاروں کو فیصل آباد جانا پڑتا ہے جس سے مسائل زیادہ بڑھ گئے ہیں۔

&quot;میں خود ملتان ڈرائی پورٹ کا ٹرسٹی ہوں لیکن اپنی درآمدات اور برآمدات کی کھیپ کراچی سے کلیئر کرانے کو ترجیح دیتا ہوں کیونکہ یہاں کسٹمز کا عملہ شپمنٹ کی کلیئرنس میں بہت وقت لیتا ہے۔&quot;

ملتان ڈرائی پورٹ سے زیادہ تر گرے فیبرک (خام کپڑا)، کاٹن یارن اور ہوم ٹیکسٹائل (چادریں، پردے وغیرہ)، جوتے، چمڑے کی جیکٹیں اور دیگر مصنوعات برآمد کی جاتی ہیں۔

اسی طرح درآمدات میں صنعتی مشینری، خام مال، کمپیوٹرز، آئی ٹی کا سامان، مشین آئل، میٹل سٹرپس، ہائیڈرو کاربن، زرعی ادویات و مشینری سمیت 20 مختلف اشیا شامل ہیں۔ تاہم یہاں فوڈ فیکٹریز اور ٹیکسٹائل کے خام مال کی امپورٹس پچھلے چھ ماہ سے ڈالر کی وجہ سے مسائل کا شکار ہیں۔

کسٹم اپریزمنٹ نے ملتان ڈرائی پورٹ پر کسٹمز کلیئرنس کے لیے اسسٹنٹ کلکٹر، پرنسپل اپریزر، تین اپریزرز، تین ایگزامینر، تین انسپکٹر اور دفتری امور کے لیے دیگر سٹاف تعینات کر رکھا ہے جبکہ پورٹ پر اے این ایف کا عملہ بھی موجود ہے جو کنسائمنٹس کی جانچ پڑتال کرتا ہے۔

محمد عاصم کا کہنا ہے کہ ملتان ڈرائی پورٹ پر کنٹینر کی چیکنگ کے لیے جدید سکینرز دستیاب نہیں ہیں جس کے باعث اینٹی نارکوٹکس فورس کو لوڈڈ اور تیار کنٹینر کھول کر چیک کرنا پڑتا ہے۔ اس عمل سے اشیا کی پیکنگ برباد ہو جاتی ہے اور بیرون ملک سے گاہکوں کی شکایات آتی ہیں۔

&quot;بعض اوقات شپمنٹ منسوخ ہونے پر ہمیں نقصان اٹھانا پڑتا ہے۔جدید سکینرز کی سہولت صرف کراچی اور لاہور کے ڈرائی پورٹس پر موجود ہے جہاں اضافی چارجز دینے پڑتے ہیں لیکن تاجر مینول ( انسانی ہاتھوں سے) تلاشی کے نقصان سے بچ جاتا ہے۔&quot;

ملتان ہی کے صنعتکار جو اپنا نام ظاہر نہیں کرنا چاہتے، یہاں کپڑا بنا کر بیرون ملک ایکسپورٹ کرتے ہیں۔

وہ نہ صرف کنٹینرز کی ہاتھوں سے تلاشی پر نالاں ہیں بلکہ انہیں یہ بھی شکایت ہے کہ ملتان ڈرائی پورٹ پر کلیئرنس کے دوران گڈز ڈیکلیئریشن (جی ڈی) پر بےجا اعتراضات لگائے جاتے ہیں۔

ایک اور معروف صنعتکار نے نام ظاہر نہ کرنے کی شرط پر بتایا کہ وہ کراچی پورٹ سے کنسائمنٹ کلیئر کراتے ہیں تو ڈیوٹی کے علاوہ صرف سندھ حکومت کو ٹیکس دینا پڑتا ہے۔ جبکہ ملتان سے کلیئرنس پر سندھ اور پنجاب حکومت دونوں کو ادائیگی کرنا پڑتی ہے، ان کے بقول یہ دہرا ٹیکس وارے نہیں کھاتا۔

صنعت کار محمد حسین کوشکوہ ہے کہ یہاں وقت بہت ضائع کیا جاتا ہے۔ کراچی پورٹ پر وی بوک سسٹم (WEBOC) کی وجہ سے جلد کلیئرنس ہو جاتی ہے جبکہ ملتان ڈرائی پورٹ کا آن لائن سسٹم کراچی کے ماتحت کام کرتا ہے۔ وہاں وہ مسائل نہیں ہوتے جو ملتان میں پیش آتے ہیں۔

کلیئرنگ ایجنٹ وقار شاہ بخاری بتاتے ہیں کہ ملتان میں وی بوک کلیئرنس سسٹم کا مین سرور ڈاؤن رہنے کے باعث گڈز ڈیکلیئرڈ (جی ڈی ) بھی رک جاتی ہیں جس سے امپورٹرز کو بعض اوقات ڈیمریج (کرائے کی مد میں اضافی چارجز ) کا بھی سامنا کرنا پڑتا ہے۔

ان کا کہنا تھا کہ چھوٹی پورٹ پر اگر کوئی انڈر انوائسنگ یا مس ڈیکلریشن کا واقعہ سامنے آ جائے تو مسائل بڑھ جاتے ہیں اس لیے لوگ یہاں کلیئرنس کرانے سے کتراتے ہیں۔

کلکٹر اپریزمنٹ فیصل آباد اسدق افضل تسلیم کرتے ہیں کہ ملتان ڈرائی پورٹ پر کلیئرنس سے متعلق صنعتکاروں کے تحفظات ان تک پہنچے ہیں۔ اب ان کی کوشش ہے کہ زوم میٹنگ کے ذریعے مسائل حل کیے جائیں اور ہفتے میں دو دن ملتان ڈرائی پورٹ پر اپنی موجودگی یقینی بنائی جائے۔

ملتان چیمبر آف کامرس اینڈ انڈسٹری (ایم سی سی آئی) کے صدر میاں راشد اقبال ڈرائی پورٹ کی بڑا کمزوری انفراسٹرکچر کو سمجھتے ہیں۔

وہ بتاتے ہیں کہ پورٹ کی کرین ایک عرصے سے خراب ہے مگر مرمت کرانے کے وسائل نہیں ہیں۔ کینٹنر کو سیدھا کرنے کے لیے کرین کرائے پر لانی پڑتی ہے جس پر دس سے بیس ہزار خرچ ہو جاتے ہیں۔

ملتان ڈرائی پورٹ سے درآمدات و برآمدات مسلسل کم ہو رہی ہیں جس کی وجہ سے اور انتظامیہ نصف کے قریب یعنی 20 سے زائد ملازمین کو فارغ کر چکی ہے۔ اب یہاں صرف 22 افراد کام کر رہے ہیں بوقت ضرورت دہاڑی دار مزدوروں سے کام لیا جاتا ہے۔

مقامی صنعت کار چودھری ذوالفقار انجم ملتان ڈرائی پورٹ کی &quot;ناکامی&quot; کا ذمہ دار ٹرسٹ کے عہدیداروں کو قرار دیتے ہیں جہاں بقول ان کے &quot;ایک ہی خاندان قابض ہے۔&quot;

تاہم جنرل منیجر ملتان ڈرائی پورٹ خواجہ حسن ودود اس &quot;الزام&quot; کی تردید کرتے ہیں۔ وہ کہتے ہیں کہ جب کوئی صنعتکار ملتان ڈرائی پورٹ ٹرسٹ میں دلچسپی ہی نہیں رکھتا تو اسے انہیں زبردستی تو ڈرائی پورٹ کا ٹرسٹی نہیں بنا سکتے۔

محموداحمد خان ملتان ڈرائی پورٹ پر سترہ سال تعینات رہے اور اب بطور پرنسپل اپریزر ریٹائر ہو چکے ہیں۔ وہ بتاتے ہیں کہ صنعتکار ملتان سے کلیئرنس کرانے کو اس لیے ترجیح نہیں دیتے ہیں کہ کراچی میں سامان کی زیادہ پوچھ گچھ اور چیکنگ کے دوران چیر پھاڑ نہیں ہوتی۔

&quot;کراچی میں رش کے باوجود کلیئرنس کی بہترین سہولیات ہیں جبکہ ملتان ڈرائی پورٹ پر جو کچھ ہوتا ہے اس سے کلیئرنس کرانے والوں کو امتیازی سلوک کا گمان ہوتا ہے۔&quot;

ایگزیکٹوممبر وفاقی ایوان صنعت وتجارت ملک سہیل طلعت کہتے ہیں کہ کراچی اور سینٹرل پنجاب صنعتی مراکز مانے جاتے ہیں صرف لاہور شہر میں تاجر اور صنعتکار چار ڈرائی پورٹس کامیابی سے چلا رہے ہیں۔ جنوبی پنجاب زرعی خطہ ہے جہاں صنعتیں نہ ہونے کے برابر ہیں۔ یہاں حکومت کو آسانیاں پیداکرنا ہوں گی۔

'آم ایران نہیں جائے گا'، برآمدی رکاوٹوں سے کاشت کار اور ایکسپورٹر کا نقصان، حکام پابندی پر مصر

ملتان ڈرائی پورٹ سے برآمدات و درآمدات میں روز بروز کمی کیوں آ رہی ہے؟

text

محمد اشرف ڈھڈی کا تعلق ضلع بہاولنگر کے قصبے ڈونگہ بونگہ سے ہے۔ وہ کپاس کے ایک بڑے کاشت کار ہیں۔ رواں سال بھی انھوں نے ایک سو ایکڑ رقبے پر یہ فصل کاشت کر رکھی&nbsp; ہے لیکن ان دنوں وہ اپنی جنس کو فروخت کرنے کے حوالے سے فکر مند ہیں کیوں کہ مارکیٹ میں اس کے نرخ بہت کم ہو گئے ہیں۔

اشرف کہتے ہیں کہ پچھلے کچھ ماہ سے کپاس کی فی من قیمت میں دوگنا تک کمی واقع ہوئی ہے۔ اب مارکیٹ میں کپاس کے نرخ 6800 روپے تک گر گئے ہیں۔ یہ حکومت کی طرف سے اعلان کردہ 8500 روپے کے مقابلے میں بھی 1700 روپے کم ہیں۔

ان کا کہنا ہے کہ اگر وہ موجودہ مارکیٹ ریٹ پر اپنی فصل فروخت کرتے ہیں تو ان کو نقصان اٹھانا پڑے گا کیوں کہ اس مرتبہ ڈیزل، کھاد، سپرے اور دوسرے زرعی مداخل کی قیمتیں بہت زیادہ بڑھی ہیں۔

اشرف کے پاس چونکہ وسائل ہیں تو انھوں نے آخری چنائی سے حاصل ہونے والی تقریباً ڈھائی سو من کپاس سٹاک کر لی ہے، اب وہ اسے اس وقت فروخت کرنا چاہتے ہیں جب اس کا فی من ریٹ کم از کم سرکاری قیمت 8500 روپے تک نہیں پہنچ جاتا ہے۔

وہ&nbsp; وقفے وقفے سے منڈی کا چکر بھی لگاتے رہتے ہیں تاکہ انہیں ریٹ کا پتا چل سکے اسی سلسلے میں وہ یکم نومبر کوبھی اپنے قصبے ڈونگہ بونگہ کی منڈی گئے تھے جہاں پر ان کے بقول آڑھتیوں نے بتایا کہ چونکہ ڈالر کی قیمت بہت کم ہو گئی ہے اس لیے کپاس کی مارکیٹ میں بھی مندہ چل رہا ہے۔

&quot; ڈالر کی قدر کم ہونے سے صرف کپاس کے نرخ ہی کیوں کم ہوئے ہیں، زرعی مداخل جیسا کہ کھاد، سپرے اور ڈیزل کی قیمتوں پر اس کا فرق کیوں نہیں پڑا؟&quot;

ان کا موقف ہے کہ یہ سب من گھڑت باتیں ہیں، اصل میں پچھلے کچھ سالوں سے ایک مافیا مارکیٹ میں داخل ہو گیا ہے جو کسانوں کو نقصان پہنچا کر خود سرمایہ بٹورنا چاہتا ہے۔

حکومتی دعوؤں کے مطابق رواں سال پاکستان میں 48 لاکھ ایکڑ رقبے سے زائدہ پر کپاس کاشت ہوئی ہے جو پچھلے پانچ سال کے مقابلے زیادہ ہے۔ حکومت نے تخمینہ لگایا ہے کہ رواں سال پاکستان اس زیر کاشت رقبے سے ایک کروڑ 20 لاکھ بیلز حاصل کر پائے گا۔

جنوبی پنجاب میں ملتان، بہاولپور اور ڈیرہ غازی خان ان تین ڈویژن میں پنجاب میں کاشت ہونے والے کل زیر کاشت رقبے کا لگ بھگ 85 فیصد حصہ ہے۔

یہاں پر اس وقت تقریباً کپاس کے تمام کاشت کار ہی محمد اشرف جیسی صورتحال سے دو چار ہیں۔

جن کاشت کاروں کے پاس وسائل ہیں، وہ تو اپنی جنس کو کچھ دیر تک روک رہے ہیں لیکن چھوٹے زمیندار جنہوں نے کپاس سے حاصل ہونے والے منافع سے گندم کی فصل کی کاشت پر اٹھنے والے اخراجات برداشت کرنا ہیں، وہ انتہائی مشکل میں ہیں اور اونے پونے اپنی جنس فروخت کرنے پر مجبور ہیں۔

پاکستان میں کپاس کی پیداوار کے حوالے سے کچھ روز پہلے نگران وفاقی وزیر صنعت و تجارت گوہر اعجاز نے میڈیا پر بتایا تھا کہ پاکستان گیارہ سال کے وقفے کے بعد اس فصل کی ریکارڈ پیداوار حاصل کرنے جا رہا ہے۔ ان کے بقول یکم اکتوبر 2023ء تک کپاس کی 50 لاکھ گانٹھیں جنرز فیکٹریوں میں پہنچ چکی ہیں جو کہ پچھلے سال پورے سال کے 49 لاکھ کاٹن بیلزکے اعداد وشمار سے بھی زیادہ ہے۔

پاکستان کاٹن جنرز ایسوسی ایشن کی ویب سائیٹ پر جاری ایک رپورٹ کے مطابق 16 اکتوبر تک فیکٹریوں کے پاس 60 لاکھ بیلز(گانٹھیں) آچکی ہیں۔ اسی طرح ایسوسی ایشن کی جانب سے 18 اکتوبر کو جاری کیے گئے اعداد و شمار کے مطابق اس وقت سات لاکھ 34 ہزار 737 گانٹھیں&nbsp; کاٹن جنرز کے گوداموں میں موجود ہیں جن کی مالیت تقریباً 75 ارب روپے بتائی جاتی ہے۔

اس کے باوجود ٹریڈنگ کارپوریشن پاکستان اس کی خریداری میں دلچسپی نہیں لے رہی۔ ایسوسی ایشن کے موقف کے مطابق اس کا نتیجہ یہ نکلا کہ آڑھتیوں نے بھی کاشتکاروں سے کپاس اونے پونے داموں خریدنا شروع کر دی۔

وسیم اکرم ملتان کے مضافاتی علاقے جلالپور میں کاٹن جننگ فیکٹری چلاتے ہیں۔ان کا کہنا ہے کہ کپاس کی سرکاری نرخ پر خریداری نہ ہونے کی وجہ اس کا کم معیار ہے۔

&quot;ستمبر میں ہونے والی بارشوں اور حبس نے کپاس کی پیداوار بری طرح متاثر کی ہے۔ ٹیکسٹائل سیکٹر کے لیے بھی حکومت کے مقرر کردہ ریٹ آٹھ ہزار 500 روپے پر خریداری ممکن نہیں ہے۔ کیوں کہ اب بجلی اور مال برداری کے اخراجات کئی گنا بڑھ چکے ہیں۔

وہ کہتے ہیں کہ اس وقت بینکوں کا شرح سود انتہائی بلند سطح پر ہے جس کی وجہ سے فیکٹری مالکان بینک فنانسنگ کروانے سے محروم ہیں کیونکہ کوئی بچت نظر ہی نہیں آتی۔

پاکستان کاٹن جنرز ایسوسی ایشن کے چیئرمین چوہدری وحید بھی اس کی تصدیق کرتے ہوئے بتاتے ہیں کہ اس وقت جننگ فیکٹریوں میں تقریباً ساڑھے سات لاکھ گانٹھ کپاس موجود ہے &quot;اور ہم مزید خریداری کی سکت نہیں رکھتے&quot;۔

ان کے مطابق سیزن کے ابتدا میں روئی کی قیمت 20 ہزار روپے فی من تھی جو آج&nbsp; 14 سے 15 ہزار روپے فی من تک پہنچ چکی ہے اور اس قیمت پر جنرز فیکٹریوں کو بھی نقصان ہو رہا ہے اور کسانوں کو بھی۔

ملتان میں کسانون سے کپاس کی خریداری کرنے والے بڑے آڑھتی غلام عباس مغل کپاس کی مارکیٹ میں مندی کو ٹریڈنگ کارپوریشن آف پاکستان(ٹی سی پی) کی جانب سے خریداری شروع نہ کرنے سے بھی جوڑتے ہیں۔

وہ کہتے ہیں کہ حکومت نے وعدہ کیا تھا کہ جننگ فیکٹریوں اورآڑھتیوں سے 10 لاکھ کاٹن بیلز خریدے گی لیکن انھوں نے ابھی تک خریداری شروع ہی نہیں کی ہے، جس سے مارکیٹ میں عدم استحکام پیدا ہو گیا ہے۔

اس حوالے سے ڈپٹی ڈائریکٹر گوڈان ٹریڈنگ کارپوریشن آف پاکستان میاں اسد مقبول مڑل نے لوک سجاگ کو بتایا کہ ٹی سی پی نے کپاس کی (پروکیورمنٹ) خریداری کے لئے اپنی تمام تر تیاریاں مکمل کرلی ہیں جیسے ہی وزارت کی جانب سےضروری رسمی قانونی کارروائی مکمل ہونے کے احکامات ملیں گے تو کپاس کی خریداری کا عمل جلد شروع کر دیا جائےگا اور 10لاکھ کاٹن بیلز سرکاری نرخوں&nbsp; پر&nbsp; خریدی جائیں گی۔

واضح رہے کہ پچھلے سال اس حکومتی ادارے نے کپاس کی خریداری نہیں کی تھی جس کی تصدیق ڈپٹی ڈائریکٹر بھی کرتے ہیں۔

آڑھتیوں کے مطابق اس دفعہ اس ادارے کی خریداری کا مقصد ہی یہ تھا کہ مارکیٹ کو استحکام بخشا جائے اور حکومتی خریداری کی وجہ سے کسانوں کو اس کی کم از کم امدادی قیمت ضرور ملے۔

کسانوں کے مطابق رواں سال یکم نومبر تک لگ بھگ 80 فیصد چنائی کا عمل مکمل ہوچکا ہے اور ابھی تک 60 لاکھ بیلز جینرز فیکٹریوں میں پہنچی ہیں۔اس لیے خدشہ ہے کہ اس بار بھی 80 لاکھ بیلز تک ہی پیداوار ہو گی۔

کسان محمد اسماعیل اور محمد اشرف کہتے ہیں کہ رواں سال انھوں نے پہلے سے زیادہ رقبے پر کپاس کاشت کی ہے لیکن اگست اور ستمبر میں بارشوں کے بعد سفید مکھی کے حملوں نے اسے بہت زیادہ متاثر کیا ہے جس سے پیداوار میں بھی کمی آئی ہے۔

کوارڈینیٹر وفاق ایوان ہائے صنعت و تجارت پاکستان (ایف پی سی سی آئی) طلعت سہیل کہتے ہیں کہ جس طرح حکومت نے اس بار پھٹی کا ریٹ مقرر کیا ہے تو اسی طرح اسے روئی کا ریٹ بھی مقرر کرنا چاہیے۔ کیونکہ اس بار جو مسائل سامنے آ رہے ہیں وہ روئی کا ریٹ مقررنہ کرنے کی وجہ سے لگتے ہیں۔

وہ بتاتے ہیں کہ کپاس جب جنرز فیکٹریوں کے پاس پہنچتی ہے تو انہیں ریشوں سے بنولہ کو الگ کرنے کے لیے بجلی، مزدوری اور مال برداری کی مد میں اب بہت زیادہ اخراجات برداشت کرنا پڑ رہے ہیں۔ اس لیے وہ نقصان میں رہنے کے بجائے کم خریداری کو ترجیح دے رہے ہیں۔ &quot;حکومت جس طرح گندم اور پھر اس کی بائی پراڈکٹ آٹے کا ریٹ بھی مقرر کرتی ہے تو پھر کپاس اور روئی کے نرخ مقرر کرنے میں کیا مسئلہ ہے؟&quot;

وہ ٹریڈنگ کارپوریشن آف پاکستان کو ابھی تک خریداری شروع نہ کرنے پرتنقید کا نشانہ بناتے ہیں۔ وہ کہتے ہیں کہ حکومت کہتی ہے کہ رواں سال ملک میں ایک کروڑ 20 لاکھ گانٹھ پیداوار کا دعویٰ ہے۔ اس تخمینے کے مطابق ٹریڈنگ کارپوریشن آف پاکستان کو عملی طورپر دو ماہ قبل روئی کی خریداری شروع کرا دینی چاہیے تھی۔

طلعت سہیل کہتے ہیں کہ آئندہ کپاس کی کاشت موجودہ فصل کے معاوضے سے مشروط ہے۔ وہ ڈالر کے ریٹ میں کمی کو کپاس کی مارکیٹ پر اثر انداز ہونے کو بھی ایک من گھڑت پراپیگنڈہ قرار دیتے ہوئے کہتے ہیں کہ پچھلے برس ڈالر 280 روپے پر تھا اور کپاس 10ہزار روپے من خریدی جا رہی تھی۔ اب ڈالر 275 روپے پر ہے تو کپاس کی خریداری ساڑھے آٹھ ہزار روپے کیوں نہیں ہوسکتی؟

انہوں نے کہا کہ حکومت کو مارکیٹ میں فوری طور پر مداخلت کرنی چاہیے اور حکومت کے اعلان کردہ ریٹ کے حساب سے خریداری شروع کرنی چاہیے۔

جنرل سیکرٹری آل پاکستان ٹیکسٹائل ملز ایسوسی ایشن(اپٹما)آصف انعام نے لوک سجاگ کو بتایا کہ حکومتی نرخ پر خریداری کو یقینی بنانا انتظامیہ اور حکومت کی ذمہ داری ہے۔ ٹیکسٹائل اپنی ضرورت کے مطابق خریداری کر رہی ہے اور&nbsp; آنے والے دنوں میں مزید خریداری کی بھی خواہاں ہے۔ ملکی ٹیکسٹائل کی ضرورت ایک کروڑ 20&nbsp; لاکھ سے ایک کروڑ 40 لاکھ بیلز تک ہے اس لیے وہ زیادہ سے زیادہ خریداری کے خواہش مند ہیں۔

&quot;مارکیٹ میں کیا چل رہا ہے اور اس کو بہتر کرنا حکومت کی ذمہ داری ہے۔ اسے چاہیے کہ وہ کوئی بہتر طریقہ کار اپنائے تاکہ کسانوں کو تکلیف کا سامنا نہ کرنا پڑے&quot;۔

'حکومت کے کہنے میں آ کر کپاس اگائی اور اب فصل کے اخراجات پورے کرنا بھی مشکل ہو رہا ہے'

کپاس کی بمپر کراپ نے کاشت کار کومزید مسائل کاشکار کر دیا، ساڑھےسات لاکھ گانٹھ کپاس جننگ فیکٹریوں میں موجود، سرکاری خریداری نہیں ہو رہی

نگانہ چوک ملتان کے تاجر چوہدری حسن نے اچھے مستقبل کی خواہش میں واپڈا ٹاﺅن فیز تھری میں 10 مرلے کے دو پلاٹوں کی فائلیں خریدیں اور ان میں سے ایک پلاٹ کے لیے یکمشت ساڑھے 16 لاکھ روپے ادائیگی کی جبکہ دوسری فائل کی نصف سے زیادہ اقساط جمع کروا چکے ہیں۔ تاہم چار سال بعد بھی انہیں معلوم نہیں کہ وہ اپنے پلاٹوں کے مالک بن پائیں گے یا نہیں کیونکہ ابھی تک یہ پلاٹ فائلوں کی حد تک ہی وجود رکھتے ہیں۔

ملتان کے علاقے ناردرن بائی پاس روڈ پر بنائی جانے والی سوسائٹی گلبرگ ایگزیکٹو ہاﺅسنگ 2020ء میں کورونا وبا کے دوران لانچ ہوئی تھی۔ آغاز میں انتظامیہ نے بڑے پیمانے پر دھوم دھام سے کالونی میں پلاٹوں کی خریداری کے لئے سوشل میڈیا، پرنٹ، ریڈیو و دیگر ذرائع پر مارکیٹنگ مہم چلائی اورابتدائی مرحلے میں بہت سے لوگوں کو 5 مرلے سے لے کر ایک کنال تک کی فائلیں فروخت کر دیں۔

اس کے بعد اگلے دو سے ڈھائی سال کی تاخیر سے کالونی کے فیز&nbsp; اے، بی اور سی کی قرعہ اندازی ہوئی اور لوگوں کو پلاٹ نمبر دے دیے گئے تاہم قرعہ اندازی کے ایک سال بعد بھی لوگوں کو پلاٹوں کے قبضے نہیں مل سکے۔

گلبرگ ایگزیکٹو ہاﺅسنگ کے پاس صرف 600 کنال اراضی ایم ڈی اے سے منظور شدہ ہے تاہم اس نے اپنے ملکیتی رقبے سے تین گنا زیادہ تعداد میں فائلیں لوگوں کو فروخت کرکے اربوں روپے سرمایہ اکٹھا کر لیا ہے جبکہ تاحال اس ہاؤسنگ سوسائٹی میں ایک بھی گھر تعمیر نہیں ہوا۔

اب تک کالونی میں ترقیاتی کام کے نام پرصرف انٹری گیٹ بنایا گیا ہے۔ کالونی کے نقشے میں بار بار بار تبدیلی سے فائلیں خریدنے والے مایوس ہوگئے ہیں اوراپنی فائل کو آدھی قیمت میں فروخت کرکے نقصان اٹھانے کو بھی تیار ہیں۔

گلبرگ ایگزیکٹو کے ایک متاثرہ شخص اعجاز مدثر نے بتایا کہ جب وہ کالونی میں پلاٹ خریدنے کے لیے کسی جاننے والے کے تعلق سے آئے تو مینیجنگ ڈائریکٹر سید زین مرتضیٰ زیدی نے بتایا کہ کالونی کو جلد قابل رہائش بنانے کے لئے پہلے 50 گھر بنانے والوں کو گلبرگ انتظامیہ کی جانب سے&nbsp; 50 آلٹو کاریں بھی دی جائیں گی تاہم یہ وعدہ بھی صرف ایک سہانا خواب تھا۔

ملتان کے علاقے شاہ شمس روڈ باوا صفرا کے رہائشی محمد معراج متوسط گھرانے سے تعلق رکھتے ہیں اور خرادیے کا کام کرتے ہیں۔ انہوں نے اپنے ایک دوست کے مشورے سے گلبرگ ایگزیکٹو میں 5 مرلے کا پلاٹ نومبر 2021 میں 12لاکھ 50 ہزار روپے میں خریدا تھا تاہم طویل عرصے تک کالونی کی قرعہ اندازی میں تاخیر کی گئی جس پر انہیں اپنے پلاٹ کے متعلق تشویش لاحق ہوئی۔ انہوں نے بعدازاں دوستوں کی مشاورت سے پلاٹ بہت کم قیمت پر فروخت کر دیا۔

&nbsp;ایم ڈی اے کے ڈپٹی ڈائریکٹر اربن ٹاﺅن پلاننگ قسور محسن نے بتایا کہ گلبرگ ایگزیکٹو ملتان کی جانب سے اپنے خریداروں کو توسیعی منصوبے کے نام پر مزید پلاٹوں کی فروخت کا سلسلہ ابھی بھی جاری ہے تاہم ایم ڈی اے نے اسے غیر قانونی قرار دے دیا ہے اور تاحال منصوبے میں توسیع کے لیے کوئی درخواست بھی موصول نہیں ہوئی۔

انہوں نے بتایا کہ گلبرگ انتظامیہ کی جانب سے پیسے بٹورنے کی اطلاع پر سوشل میڈیا اور اخبارات کے ذریعے لوگوں کو سرمایہ کاری سے منع بھی کیا گیا تاہم لوگ اس پر توجہ نہیں دیتے اور جب کالونی کی غیرقانونی حیثیت معلوم ہوتی ہے تو پھر ایم ڈی اے کے پاس آ جاتے ہیں۔

&nbsp;ملتان کے علاقے لاڑ 5 فیض کے قریب موضع گوپال پور میں بنائی جانیوالی سیون ونڈرز ہاﺅسنگ سوسائٹی جی ایف ایس ڈویلپرز کا منصوبہ ہے۔ اس کے مالکان نے دعویٰ کیا تھا کہ وہ بہت بڑی کالونی لانچ کر رہے ہیں جو 40 مربع رقبے پر بنائی جا رہی ہے اور اس کی ابتدائی منظوری بھی لے لی گئی ہے تاہم چند روز قبل ایم ڈی اے انفورسمنٹ نے کالونی کی دیواروں کومنظور شدہ نہ ہونے پر مسمار کر دیا تھا اور ماڈل ٹاﺅن چوک پر واقع ان کے دفتر کو بھی غیرمعینہ مدت کے لئے سربمہر کر دیا گیا۔

کالونی انتظامیہ کا دعویٰ ہے کہ انہوں نے ایم ڈی اے کے بجائے ضلع کونسل ملتان سے کالونی کی منظوری لی ہے۔ تاہم ضلع کونسل کے مطابق انہوں نے سیون ونڈرز ہاﺅسنگ سوسائٹی کی ابتدائی منظوری دی ہے جو 40 مربع پر محیط ہے۔ ایم ڈی اے کا دعویٰ ہے کہ جی ایف ایس بلڈرز کے پاس 40 مربع کے بجائے صرف 4 مربع زمین موجود ہے تو وہ کیسے کالونی کی فائلوں کے نام پر لوگوں سے بڑے پیمانے پر سرمایہ جمع کر سکتے ہیں۔

تاہم جی ایف ایس کے سی ای او عرفان وحید میمن کا کہنا ہے کہ کالونی کے لئے زمین کی خریداری کا عمل جاری ہے&nbsp; اور مزید زمین جلد حاصل کر لی جائے گی۔

ملتان میں ایسی بہت سی غیرمنظور شدہ رہائشی سکیمیں ہیں جہاں سرمایہ کاری کرنے والے لوگوں کی بڑی تعداد جمع پونجی سے محروم ہو چکی ہے۔ ڈویلپر اور ڈیلر ان سکیموں کی فائلوں کی خرید و فروخت کے ذریعے بھاری منافع تو کما رہے ہیں لیکن جن پلاٹوں کی فائلیں بیچی جاتی ہیں ان کا کوئی وجود ہی نہیں ہوتا۔

حال ہی میں ملتان ڈیویلپمنٹ اتھارٹی (ایم ڈی اے) نے 169 غیر قانونی ہاﺅسنگ کالونیوں کی جانب سے ملیکت کے ٹرانسفر لیٹر جاری کرنے پر پابندی عائد کردی ہے اور ان کی کھیوٹ بھی بلاک کر دی گئی ہیں۔ایم ڈی اے کی جانب سے متعلقہ ہاﺅسنگ کالونیوں کے مالکان کو ان کالونیوں میں پانی، سیوریج،گیس اور پارکوں کی سہولتیں فراہم کرنے کی بھی ہدایت کی ہے۔

ایم ڈی اے سے حاصل کیے گئے اعداد و شمار کے مطابق ملتان سمیت گرد و نواح میں 200 سے زیادہ غیر قانونی ہاﺅسنگ سکیمیں موجود ہیں جن کے مالکان نے عوام سے اربوں روپے وصول کیے لیکن انہیں کوئی سہولت فراہم نہیں کی گئی۔

ترجمان ایم ڈی اے سید جاوید بخاری کہتے ہیں کہ ملتان ڈیویلپمنٹ اتھارٹی اخبارات، سوشل میڈیا اور الیکٹرانک میڈیا کے توسط سے نجی کالونیوں کے بارے میں عوام کو آگاہ کرتی رہتی ہے اور اپنی حدود میں بنائی جانیوالی نجی ہاﺅسنگ کالونیوں کی موثر مانیٹرنگ کرتی ہے۔ تاہم عوام کو بھی چاہئے کہ وہ خود پلاٹ خریدنے سے پہلے ایم ڈی اے کی ویب سائٹ اور دفاتر&nbsp; سے رابطہ کر کے معلومات حاصل کریں تاکہ وہ کسی دھوکے سے بچ سکیں۔

ماہر قانون سید اظہر بخاری الزام عائد کرتے ہیں کہ ایم ڈی اے کے اہلکاروں کی ملی بھگت کے بغیر ایسی ہاؤسنگ سکیموں کا کام نہیں چل سکتا۔ جب کسی کے پاس زمین ہی نہیں ہے تو وہ کیسے ایم ڈی اے کی ناک کے نیچے فائلیں بیچ سکتا ہے۔

ان کا مزید کہنا ہے کہ مبینہ طور پر ایم ڈی اے اس فراڈ&nbsp; سے چشم پوشی کرتی ہے۔اگر کسی غریب کی دکان تھوڑا سانقشے سے ہٹ کر ہو تو اس کے لوگ اسے گرانے پہنچ جاتے ہیں جبکہ غیرقانونی کالونیوں والے جب لوگوں کو لوٹتے ہیں تو ایم ڈی اے کی جانب سے دکھاوے کی کارروائیاں کی جاتی ہیں۔

حیدر آباد میں زرعی اراضی پر پھیلتی ہاوسنگ سکیمیں، بلڈرز نے کاشت کاروں کی زندگی اجیرن کر دی

4 مربعے پر 40 مربعے کی ہاؤسنگ سوسائٹی: ملتان کے لوگوں سے پلاٹ اور فائلوں کے نام دھوکے کا بازار گرم

جنوبی پنجاب میں طلبا کونسلوں کے انتخابات میں ساڑھے چار ہزار سے زیادہ مڈل اور ہائی سکولوں کے لگ بھگ 12 لاکھ طلبا و طالبات نے حق رائے دہی استعمال کرتے ہوئے اپنے نمائندے منتخب کیے ہیں۔ان انتخابات میں 14ہزار امیدوار صدر، نائب صدر اور جنرل سیکرٹری کی نشستوں پر کامیاب ہوئے۔

جنوبی پنجاب کے سب سے بڑے شہر ملتان میں طلبا و طالبات اپنے امیدواروں کو کامیاب کرانے کے لیے جوش و خروش کے ساتھ انتخابی مہم چلاتے رہے۔

ملتان شہر کے تعلیمی مرکز گلگشت کالونی میں واقع گورنمنٹ کمپری ہینسو بوائز ہائی سکینڈری سکول میں سٹوڈنٹ کونسل کے انتخابات میں محمد عبداللہ صدر، دلاور عباس نائب صدر اور محمد جنرل سیکرٹری منتخب ہوئے۔

محمد عبداللہ نے بتایا کہ طلبا اور سکول انتظامیہ کے درمیان رابطے کا فقدان رہا ہے۔ البتہ اب طالب علم انہیں اپنے مسائل بتاتے ہیں جنہیں وہ متعلقہ حکام تک پہنچا دیتے ہیں۔ مثلاً ان سکول کی پانی والی موٹر خراب تھی جس کے بارے میں سکول انتظامیہ کو نشاندہی کی ہے اور امید ہے کہ یہ جلد مرمت کروا دی جائے گی

&nbsp;دلاور عباس نے کہا کہ اگرطلبا کو نصاب پڑھنے میں دشواری ہوئی تو وہ ان کے لیے خصوصی کلاسوں کا انعقاد کرائیں گے۔ نیز سکول میں منعقد ہونے والی نصابی اور غیرنصابی سرگرمیوں کے انعقاد میں انتظامیہ سے تعاون کریں گے۔

جنرل سیکرٹری محمد نے بتایا کہ وہ ہفتے میں ایک بار مختلف کلاسوں میں جا کر طلبا کے مسائل معلوم کرتے ہیں اور انتظامیہ کے نوٹس میں لاتے ہیں۔

اس سکول کے پرنسپل روشن بادشاہ خان نے بتایا کہ سیکرٹری ایجوکیشن کے حکم پر ہونے والے انتخابات کا مقصد طلبا کو ذمہ دار شہری بنانا ہے۔ وہ نہیں چاہتے کہ کوئی انہیں اپنے سیاسی مقاصد کے لیے ہائی جیک کرے۔ ان انتخابات میں امتحانات میں پوزیشنیں لینے والے طلبا نے حصہ لیا اور جو پڑھائی میں قدرے کمزور تھے انہیں انتخاب میں حصہ لینے سے منع کیا گیا کیونکہ یہ ان کے لیے نقصان دہ ہو گا۔

ان کا خیال ہے کہ سٹوڈنٹ کونسلوں کو بااختیار بنانے سے پہلے سکولوں کے مسائل حل ہونے چاہئیں۔

&quot;ہمارے سکول کا نان سیلری بجٹ بہت کم ہے۔ 2012ء میں سکول کا نان سیلری بجٹ 20لاکھ روپے سہ ماہی تھا۔ اس وقت سکول کا بجلی کا بل 30 سے 35 ہزار روپے تھا۔ اب یہ بجٹ آٹھ لاکھ روپے ہے جبکہ بجلی کا بل ڈھائی سے تین لاکھ روپے ماہانہ ہے۔&quot;

ان کے مطابق حکومت کی جانب سے سکولوں کو سٹوڈنٹ کونسلز کے انتخابات کی مد میں کوئی اضافی بجٹ نہیں دیا جا رہا۔ انتخابات، تقریب حلف برادری اور اعلیٰ تعلیمی افسروں کے دورے بھی سکول کو اپنے نان سیلری بجٹ میں سے پورے کرنا ہوتے ہیں۔ سکول کونسلیں بننے کے بعد بچوں کی مشاورت سے ہی سکول کا فنڈخرچ کیا جائے گا۔

گورنمنٹ گرلز سکینڈری سکول شمس آباد کی پرنسپل رخسانہ پروین نے بتایا کہ سٹوڈنٹ کونسلوں کے انتخابات سے بچیوں میں قائدانہ صلاحیتیں جنم لیتی ہیں اور انہیں ووٹ کاسٹ کرنے کا طریقہ بھی سکھایا جا رہا ہے۔

&nbsp;ملتان کے گورنمنٹ کمپری ہینسو گرلز سکول کی پرنسپل زریں اختر کا کہنا ہے کہ کونسلوں کے انتخاب سے بچیوں کے تعلیمی نتائج پر منفی اثرات مرتب نہیں ہونے چاہیے۔انہیں خدشہ ہے کہ سکولوں میں یونین سے طالبات میں اتفاق کی بجائے نفاق پیدا ہوگا۔

ایک طالب علم کے والد ملک عبید نے کہا کہ طلبا کونسلوں کے الیکشن نہیں ہونے چاہئیں۔

&quot;کونسلوں کے الیکشن تعلیمی اداروں کا پُرامن ماحول خراب کر سکتے ہیں جیسے طلبا یونینوں نے کالجوں کا ماحول خراب کیا تھا۔ سکول میں سیاست نہیں ہونی چاہیے۔&quot;

&nbsp;حکام کے مطابق یہ انتخابات طلبا و طالبات کو بااختیار بنانے، فیصلہ سازی، مشاورت اور انتظامی امور تک رسائی دینے اور انہیں جمہوری عمل سے روشناس کرانے کے لیے تیسری مرتبہ کرائے گئے ہیں۔

پولیٹیکل سائنس کے اسسٹنٹ پروفیسر یاسر شریف کہتے ہیں کہ اگر سٹوڈنٹ کونسل انتخابات کا تسلسل جاری رہا تو آنے والے دنوں میں ان کے نقائص دور ہو جائیں گے اور بہتر نظام سامنے آئے گا۔ ان کے مطابق &quot;جب طلبا کو اپنے حقوق کے بارے میں شناسائی ہو جائے گی تو اس کا فائدہ ہوگا۔&quot;

ایڈیشنل سیکرٹری ایجوکیشن جنوبی پنجاب آغا ظہیر عباس شیرازی اس معاملے پر کہتے ہیں کہ اس نظام کے نقائص کا بھی جائزہ لیا جا رہا ہے۔ یہ دیکھنا ہے کہ اس سے طلبا کے مسائل حل ہو رہے ہیں یا ان میں اضافہ ہوا ہے۔ سٹوڈنٹ کونسل کے انتخابات میں امیدواروں کی نامزدگیوں، انتخابی مہم، الیکشن کمشنر کی تقرری، پولنگ کے عمل اور الیکشن ٹریبونل کی بھی مکمل جانچ پڑتال کی گئی ہے۔

گورنمنٹ سول لائنز گریجویٹ کالج ملتان کے ایسوسی ایٹ پروفیسر ڈاکٹر محمد جاوید احمد نے بتایا ہے کہ جب تک طلبا و طالبات کو خود مختار نہیں بنایا جائے گا اس وقت تک سٹوڈنٹ کونسلیں مثبت نتائج نہیں دے سکیں گی۔

&nbsp;انہوں نے کہا کہ 1980ء کی دہائی میں طلبا سیاست میں بیرونی عناصر کے آنے سے نوجوانوں کو منشیات مافیاز اور جرائم پیشہ افراد نے نقصان پہنچایا۔

جنوبی پنجاب کے سیکرٹری ہائیر ایجوکیشن کالجز میاں عطاالحق سے جب پوچھا گیا کہ کیا وہ سکول سٹوڈنٹ کونسل کے انتخابات کو کالج کی سطح پر رائج کریں گے تو انہوں نے کہا کہ یہ فیصلہ حکومت نے کرنا ہے اور ابھی ایسی کوئی بات زیرغور نہیں۔

میڈیکل کالجوں کے داخلہ ٹیسٹ میں بد انتظامی: 'پی ایم سی نے  ہزاروں طلبا کا مستقبل داؤ پر لگا دیا'۔

جنوبی پنجاب میں سکولوں کی طلبہ کونسلوں کا قیام فائدہ مند ہو گا یا نقصان دہ؟

حکومت پنجاب کی جانب سے گزشتہ ہفتے ملتان سمیت صوبہ بھر میں تھیٹروں کے تمام ڈراموں کے موجودہ سکرپٹس کو فحش قرار دیتے ہوئے منسوخ کر دیا گیا اور رقص پر بھی پابندی عائد کر دی گئی۔

صوبائی وزیراطلاعات و ثقافت عامر میر نے اس کی وجہ سٹیج پروڈکشن کے لیے ہوم ڈیپارٹمنٹ کی جانب سے جاری کردہ ایس او پیز پر عمل درآمد نہ کرنا بتائی۔ نگران صوبائی وزیر نے پنجاب آرٹس کونسل کو ہدایت کی ہے کہ وہ خصوصی طور پر بہترین اور اعلیٰ معیار کے ڈراموں کے سکرپٹ کی منظوری دیں۔

پنجاب حکومت اس سے قبل ضابطہ اخلاق کی خلاف ورزی کرنے پر متعدد اداکاروں اور ہدایت کاروں پر پابندی عائد کر چکی ہے۔

عامر میر نے واضح کیا کہ ترمیم شدہ&nbsp; ڈرامہ سکرپٹ ایکٹ&nbsp; کے تحت رقص کو سٹیج پرفارمنس سے خارج کر دیا گیا ہے۔ ان کے مطابق نئے ڈراموں کی رونمائی ترمیم شدہ ڈرامہ ایکٹ کے نفاذ پر منحصر ہو گی۔

اس پابندی سے جنوبی پنجاب کے سب سے بڑے شہر ملتان کے تمام فنکار، پروڈیوسر، ڈائریکٹر، تھیٹر مالکان، رقاصائیں، سپورٹنگ سٹاف اور دیہاڑی دار ملازم بری طرح متاثر ہو رہے ہیں۔

تھیٹر انڈسٹری میں کشش خان کے نام سے مشہور ضلع وہاڑی کی آرٹسٹ، پروڈیوسر اور رقاصہ نورالہٰی نے کہا کہ تھیٹروں میں رقص پر پابندی کا نقصان فنکاروں اور ان سے منسلک لوگوں کو ہو گا۔ ان کا کہنا ہے کہ 15 سالہ فنی کیریئر میں ان کی پرفارمنس پر کبھی فحاشی کی شکایت موصول نہیں ہوئی۔ گوجرانوالا، فیصل آباد یا لاہور کے کسی تھیٹر سے متعلق کوئی نازیبا ویڈیو وائرل ہونے کے بعد ہر جگہ رقص پر مکمل پابندی عائد کرنا غیرمناسب ہے۔

انہوں نے بتایا کہ وہ اپنے فن سے روزگار کمانے&nbsp; میں مصروف ایک دیہاڑی دار فنکارہ ہیں جو گھر کے 10 افراد کا بوجھ اٹھاتی ہیں۔ مہنگائی اور بجلی کی بھاری قیمت نے پہلے ہی لوگوں کو پریشان کر رکھا ہے اور اس پر یہ پابندی ان جیسے فنکاروں کے چولہے ٹھنڈے کر دے گی۔ 
ناز بھٹی کے نام سے معروف تھیٹر فنکارہ نجمہ بی چند برس سے اس انڈسٹری میں بطور رقاصہ کام کر رہی ہیں۔ انہوں نے بتایا کہ حکومتی پابندی سے فنکار بے روزگار ہونے لگے ہیں۔

&quot;میں گیتوں پر پرفارم کرتی ہوں اور ان کی ریہرسل سنسر بورڈ کی ہدایات کے مطابق ہوتی ہے جن میں نازیبا حرکت کرنے یا ناموزوں لباس پہننے کی ممانعت کی گئی ہے۔ سمجھ نہیں آتا کہ ان پر عمل درآمد کے باوجود&nbsp; پابندی کیوں لگائی گئی ہے۔ ایک پرفارمنس کا معاوضہ&nbsp; پندرہ سو سے دو ہزار روپے تک ملتا ہے جس سے میں اپنے یتیم بچوں کی کفالت کرتی ہوں۔ اس پابندی سے میرا روزگار ختم ہو جائے گا۔&quot;

آرٹسٹ ایسوسی ایشن پاکستان کے صدر و سنیئر فنکار رمضان شہزاد نے بتایا کہ ایسوسی ایشن میں 14 سے زیادہ فنکار رجسٹرڈ ہیں۔

وہ سمجھتے ہیں کہ رقص کے بغیر تھیٹر چلانا ممکن نہیں۔ پابندی کے نتیجے میں ملتان میں پہلے ہی 15 تھیٹر بند ہو چکے ہیں۔ کبھی ملتان میں نوشاب، معراج، سنگم، جہانزیب، گلستان، مقبول، خیام، تاج محل اور ریکس سمیت&nbsp; کل 18 تھیٹر ہوا کرتے تھے۔ اب ان کی تعداد صرف تین رہ گئی ہے۔&quot;

وہ کہتے ہیں کہ سرکاری افسروں کی موجودگی میں گھروں میں ہونے والی رقص کی محفلوں کو تو کوئی نہیں روکتا۔ تمام تر نزلہ فنکاروں ہی پر گرتا ہے۔

انہوں نے کہا کہ حکومت کی جانب سے فنکار ویلفیئر سپورٹ فنڈ قائم کیا گیا تھا جس کے ذریعے فنکروں کو صرف سات ہزار روپے سالانہ ملتے ہیں اور اس کے حصول بھی بہت مشکل ہے۔

تھیڑ اداکارہ سنبل خان کے مطابق پابندی لگانے کے بجائے قواعد وضوابط بنا کر ان پر عمل کیا جائے&nbsp; تو بہتر ہے ورنہ تھیٹر بالکل ختم ہو جائے گا۔

ڈرامہ پروڈیوسر اور ڈائریکٹر زوار بلوچ کا تھیٹر انڈسٹری کے ساتھ گزشتہ کئی عشروں سے تعلق ہے۔ انہوں نے بتایا کہ ان ڈرامہ ریکس تھیٹر ملتان میں پیش کیا جا رہا تھا جس کے لیے بیرون شہر سے بھی فنکار آئے تھے۔ آرٹس کونسل نے سکروٹنی کے بعد اس کی باقاعدہ منظوری دی اور اجازت نامے کا لیٹر بھی جاری کیا گیا لیکن نگران صوبائی وزیراطلاعات کے احکامات پر راتوں رات سب کچھ منسوخ کر دیا گیا۔ رات تین بجے چھاپہ مار کر ڈیرہ اڈا میں ریکس تھیٹر سیل کر دیا گیا۔ انہوں نے کہا کہ وہ اس کارروائی کے خلاف عدالت سے رجوع کریں گے۔

&quot;اس اقدام سے مجھے ایک ہفتے کے دوران 20 لاکھ روپے کا نقصان ہوا جبکہ تھیٹر سے وابستہ چھ سے سات سو افراد بے روزگار ہو گئے ہیں۔&quot;

یعقوب سید تھیٹر سے بطور ڈرامہ نگار وابستہ ہیں۔ ان کا کہنا ہے کہ تھیٹر نے کئی حوالوں سے سماج میں مثبت کردار ادا کیا ہے۔ مثال کے طور پر تھیٹروں میں دہشت گردی کے خلاف جنگ میں عوام کو بیدار کرنے والے ڈرامے بھی پیش کیے گئے۔ بدقسمتی سے چند لوگوں کے غیرمعیاری ڈراموں نے تھیٹر انڈسٹری کو یرغمال بنا لیا ہے۔

ان کا خیال ہے کہ جب تک فلم اور تھیٹر انڈسٹری کا گڑھ کراچی تھا یہ صنعت عروج پر تھی۔لاہور منتقلی کے بعد اس میں بدتہذیبی شامل ہوئی۔

انہوں نے کہا کہ&nbsp; آرٹس کونسل کو بے ہودہ اور ذومعنی گانوں پر پابندی لگانی چاہیے لیکن کسی ایک واقعے کی آڑ میں تمام تھیٹروں کے سکرپٹ منسوخ کرنا دانش مندی نہیں۔

ملتان آرٹس کونسل کے ریذیڈنٹ ڈائریکٹر سلیم قیصر کہتے ہیں کہ ڈرامہ سکرپٹ ایکٹ 1876 میں ترامیم کی گئی ہیں جن پر ابھی عمل درآمد ہونا ہے۔ اسی لیے تمام تھیٹروں کے ڈرامہ سکرپٹ فی الحال منسوخ کر دیے گئے ہیں۔ ضلعی انتظامیہ نے جن تھیٹروں کو سیل کیا ہے انہیں ازسرنو اپنے سکرپٹ آرٹس کونسل جمع کرانا ہوں گے۔ ان کی منظوری کے بعد فل سنسر ریہرسل کرائی جائے گی۔

تھیٹر انڈسٹری سے وابستہ فنکار بلال بپی نے بتایا کہ ملک میں ہونے والی نجی محفلوں میں ڈانس کے حوالے سے کوئی ضابطہ اخلاق موجود نہیں ہے۔ نجی محفلوں اور شادی بیاہ کی بعض تقریبات میں نیم برہنہ رقص بھی کروایا جاتا ہے جو قطعاً پنجاب کا کلچر اور تھیٹر کی روایت نہیں ہے۔ اب لوگ تھیٹروں میں بھی اسی طرح کے رقص کا مطالبہ کرتے ہیں۔ ہمیں امید ہے کہ اس پابندی کی بدولت آنے والے دنوں میں تھیٹر کے ڈراموں میں بہتری دیکھنے کو ملےگی۔

نہ والڈ سٹی اتھارٹی بنی، نہ فنڈ ملے: ملتان کے گھنٹہ گھر کا بُرا وقت بدلتے بدلتے پھر رک گیا؟

'فحاشی روکیں ناچ نہ روکیں'، نئے ڈرامہ سکرپٹر ایکٹ کے خلاف ملتان کے تھیٹر فنکاروں کا احتجاج

پاکستانی آم کی ایران کو برآمد پر دو ماہ سے پابندی عائد ہے جس کے باعث ملتان میں آم کے باغبان اور برآمد کنندگان پریشانی سے دوچار ہیں۔

میجر (ر) طارق خان آموں کی برآمد کے کاروبار سے وابستہ ہیں۔ وہ بتاتے ہیں کہ سرکاری محکمے ڈیپارٹمنٹ آف پلانٹ پروٹیکشن کی طرف سے عالمی قواعد وضوابط پر عمل درآمد کے نام پر پابندیاں عائد کی گئی ہیں جنہوں نے ایران جانے والے آموں کا راستہ روک دیا ہے۔

ایران کو ترسیل بند ہونے سے باغبانوں کو مقامی منڈی میں بھی مندی کا سامنا ہے۔ جو آم پہلے پانچ ہزار سے چھ ہزار روپے من فروخت ہو رہا تھا اب اس کی قیمت گر کر تین ہزار سے ساڑھے تین ہزار روپے فی من پر آ گئی ہے۔

ان کا کہنا ہے کہ حکومت اور سٹیٹ بینک آف پاکستان کی طرف سے ایف اے ٹی ایف کی شرائط کو پورا کرنے کے لیے پہلے ہی سخت ریگولیٹری فریم ورک لاگو ہو چکا ہے جس کے مطابق برآمد ہونے والے آم کی ادائیگی اگر ایک ہفتے میں نہ ہو تو برآمد کنندہ کا اکاﺅنٹ بلاک کر دیا جاتا ہے۔

ممبر ایگزیکٹو کمیٹی ملتان چیمبر آف کامرس کی ایگزیکٹو کمیٹی کے ممبر، انجمن آڑھتیاں کے صدر اور آم کے برآمد کنندہ اعظم صابری نے بتایا کہ ملتان سمیت ملک بھر میں آم دھونے کے لیے تقریباً بیس ہاٹ واٹر ٹریٹمنٹ پلانٹ ہیں۔ اس سے پہلے آم دھوئے بغیر بھی بیرون ملک بھیجا جاتا تھا اور دھو کر بھی۔ آٹھ برس سے بڑی مقدار میں آم اسی طرح ایران جا رہے تھے۔

تاہم ڈیپارٹمنٹ آف پلانٹ پروٹیکشن نے اچانک مقامی طور پر تیار کردہ ہاٹ واٹر ٹریٹمنٹ پلانٹس کو ناقص قرار دے دیا۔ان کا الزام ہے کہ محکمے نے ایران کے پروٹوکولز کو جواز بنا کر پلانٹس پر غیر ضروری اعتراضات لگائے اور آم باہر بھیجنے سے روک کر ملک کو غیرملکی زرمبادلہ سے محروم کر دیا۔

اعظم صابری کہتے ہیں کہ برآمدی پالیسی میں خامیوں سے آم کے برآمدکنندگان کو شدید مالی نقصان اٹھانا پڑ رہا ہے کیونکہ مقامی مارکیٹ بہت کمزور ہے اور برآمد سے ہی آم کے کاشتکاروں کو مالی سہارا ملتا ہے۔

تاہم ملتان میں ڈیپارٹمنٹ آف پلانٹ پروٹیکشن کی انچارج پریانکا اوڈ اس بات سے اتفاق نہیں کرتیں۔ انہوں نے بتایا کہ ایران کو آموں کی برآمد بند ہونے کا سبب ایرانی حکومت کے نافذ کردہ سخت قواعد ہیں۔

&quot;ملتان سمیت جنوبی پنجاب کے کئی شہروں میں 10 مختلف باغات کو معائنے کے بعد ہی برآمد کی اجازت دی گئی ہے۔ اس کا مقصد ایران سمیت دنیا کے دیگر ممالک میں پاکستان کے اعلیٰ معیار کے آم کی برآمد کو یقینی بنانا ہے۔ چونکہ آم جلد خراب ہونے والا پھل ہے اس لیے تمام پہلوﺅں کا جائزہ لے کر ہی اس کی برآمد کی اجازت دی جاتی ہے۔&quot;

انہوں نے کہا کہ ایران کو آموں کی ترسیل بند ہونے کے ذمہ دار خود برآمد کنندگان ہیں جو گاہک کی شرائط پوری نہیں کر رہے۔

ملتان میں واقع نوازشریف زرعی یونیورسٹی کے ایسوسی ایٹ پروفیسر ڈاکٹر کاشف رضا کے مطابق آم کی برآمد کے لیے عالمی قواعد و ضوابط پر عمل کرنا ضروری ہے۔ ان قواعد کے تحت بیرون ملک جانے&nbsp; والے آم کو کیلیشیم کاربائیڈ نامی کیمیکل کی پڑیاں ڈال کر پکانے پر بھی پابندی عائد ہے نیز آم کو لکڑی کی پیٹی کی بجائے کارڈ بورڈ باکس میں پیک کیا جانا ضروری ہے۔

ٹریڈ ڈویلپمنٹ اتھارٹی آف پاکستان کے ایریا منیجر سید راشد گیلانی نے اس مسئلے پر بات کرتے ہوئے بتایا کہ برآمد کی جو شرائط امریکا کی ہیں وہ خلیجی ممالک کی نہیں ہیں۔ ہمیں مختلف ممالک کی شرائط کو مدنظر رکھنا ہوتا ہے۔

کاشف رضا کہتے ہیں کہ ملکی پیداوار کا صرف 20 سے 25 فیصد آم برآمدی معیار کا ہوتا ہے۔ اس کی برآمد کو موسمیاتی تبدیلیوں نے بھی نقصان پہنچایا ہے۔ گزشتہ سیزن میں ہیٹ ویو اور اس مرتبہ ژالہ باری سے آم کی پیداوار متاثر ہوئی۔&quot;

آم کے کاشتکاروں کی تنظیم &#39;مینگو گرؤرز کوآپریٹو سوسائٹی&#39; کے صدر سید زاہد حسین گردیزی کے مطابق موسمیاتی تبدیلی سے پہلے چونسہ آم کی پیداوار 200 من فی ایکڑ تھی جو اب 50 من فی ایکڑ رہ گئی ہے۔

&quot;پاکستان میں اس وقت آم کے دو لاکھ 98 ہزار باغات ہیں۔ منافع کم ہو جانے کے باعث یہ باغات ہاﺅسنگ سوسائٹیوں کو فروخت کیے جا رہے ہیں۔ برآمد بڑھانے کے لیے سب سے پہلے آم کو ہائی ویلیو کراپ کا درجہ دینا ہو گا۔ ہمیں زیادہ پیداوار کے لیے بھرپور تحقیق اور سرمایہ کاری کی بھی ضرورت ہے۔&quot;

پاکستان ایگری کلچر ریسرچ کونسل کے پروفیسر ڈاکٹر راﺅ محمد ولی نے بتایا کہ آم کی چند اقسام پر زیادہ کام کرنے کی ضرورت ہے۔

&quot;ہمیں موسمی چونسا، وائٹ چونسا اور عظیم چونسا پر توجہ دینی چاہیے کیونکہ انہیں پوری دنیا میں پسند کیا جاتا ہے۔ اس کے ساتھ مینگو پلپ، فروزن، خشک، مینگو آئل، مکھن سمیت مختلف اشیا بنانے کی جانب بڑھنا چاہیے۔ آم کی برآمد بڑھانے کے لیے جدید ڈیجیٹل مارکیٹنگ کی بھی ضرورت ہے۔ &quot;

کلیئرنگ ایجنٹ شالیمار انٹرپرائز کمپنی کے مالک غلام حسن کا کہنا ہے کہ آم کی برآمد کے لیے ملتان انٹرنیشنل ایئرپورٹ پر سہولیات دستیاب نہیں ہیں۔ آم کی شیلف لائف کم ہوتی ہے اور اس کے باوجود یہ ایئرپورٹ پر شیڈز سے باہر رکھا جاتا ہے۔ ملتان سے صرف خلیجی ملکوں کی پروازیں دستیاب ہیں۔ دیگر ممالک کے لیے آم ملتان کی بجائے لاہور، فیصل آباد اور دیگر شہروں سے بھیجنا پڑتا ہے۔

انہوں نے بتایا کہ پورے ملک میں برآمد ہونے والے آم کا صرف ایک فیصد کارگو فلائٹس سے بھجوایا جاتا ہے۔ ایئرلائن کے فریٹ چارجز بہت زیادہ ہیں اور کم از کم 260 روپے فی کلو وصول کیے جاتے ہیں۔ ایسی برآمدی پالیسی کے ہوتے ہوئے آم کی پیداوار میں کمی آئی ہے جسے بڑھانے کے لیے سب سے پہلے ان مسائل کو ختم کرنا ہو گا۔

موسمیاتی تبدیلی اور سیلاب کی تباہ کاریاں: ٹنڈو الہ یار میں آم کی پیداوار کم ہونے سے کاشتکار اور تاجر پریشانی سے دوچار

ملتان کی رہائشی سکیم واپڈا ایمپلائز کوآپریٹو ہاؤسنگ سوسائٹی میں انتظامی امور نپٹانے کے لیے عہدیداروں کا چناؤ کرنا ہو تو ووٹ حاصل کرنے کی مہم میں رئیل اسٹیٹ اور سیاست دونوں سے وابستہ لوگ متحرک ہوتے ہیں۔

یہ سوسائٹی ناردرن بائی پاس یا سیداں والا بائی پاس سے نیو جوڈیشل کمپلیکس کی طرف جانے والی سڑک پر واقع ہے۔ اس کے دو فیز مکمل ہو چکے ہیں۔ 2015ء میں شروع ہونے والے تیسرے فیز میں ترقیاتی کام رک جانے کے باوجود پلاٹوں کی فائلوں کی خرید و فروخت نہیں رکی۔

واپڈا ٹاؤن کے امور کوآپریٹو سوسائٹی ایکٹ کے تحت چلائے جاتے ہیں۔ چند برس قبل انتخابی قواعد و ضوابط میں ہونے والی ترمیم سے سرکاری عہدیداروں اور ملازموں کو سوسائٹی انتخابات میں حصہ لینے سے روک دیا گیا تھا۔ اسی بنیاد پر گزشتہ برس منتخب ہونے والے صدر چوہدری خالد محمود، جنرل سیکرٹری امجد نواز بھٹی اور ایک ایگزیکٹو ممبر کو مخالف گروپ واپڈا ٹاؤن بچاؤ تحریک (والنٹیئر گروپ) نے بذریعہ عدالت نااہل کروا دیا۔ اس کے بعد سوسائٹی رجسٹرار کے احکامات پر خالی عہدوں پر چار جون 2023ء کو ضمنی انتخابات کروائے گئے۔ ان میں واپڈا ٹاؤن بچاؤ تحریک (والنٹیئر گروپ) کا مقابلہ واپڈا اینڈ ریذیڈنٹس سے ہوا۔

قواعد کے مطابق ہر گھر کا ایک ووٹ ہے۔ کمیونٹی چارجز ادا کرنے والا فرد ہی ووٹ ڈال سکتا ہے۔ کرایہ دار ووٹ کاسٹ نہیں کر سکتا۔ حالیہ ضمنی انتخابات میں اہل ووٹروں کی تعداد چار ہزار 239 تھی۔ ان میں واپڈا ٹاؤن بچاؤ تحریک (والینٹیئر گروپ) نے بڑے مارجن سے میدان مار لیا۔

سوسائٹی کے حالیہ ضمنی انتخابات ہارنے والوں کی نمائندگی کرنے والے وکیل و صدر ہائی کورٹ بار ایسوسی ایشن رانا آصف سعید نے بتایا کہ &quot;واپڈا سوسائٹی کے ضمنی الیکشن غیر قانونی تھے۔ جب سوسائٹی ایکٹ میں ضمنی انتخابات کی کوئی گنجائش ہی نہیں تھی تو الیکشن کیسے کروائے جا سکتے تھے۔ ضمنی الیکشن کی بجائے سوسائٹی انتظامات چلانے لیے کوئی اور آپشن استعمال کیا جا سکتا تھا اور متفقہ رائے سے عارضی باڈی بنائی جا سکتی تھی۔&quot;

سوسائٹی کے ایک رہائشی اور ووٹر نواب احمد خان خاکوانی بتاتے ہیں کہ اب عام رہائشی ان انتخابات میں حصہ نہیں لے سکتے کیونکہ انتخاب لڑنے کے لیے کروڑوں روپے خرچ کرنا پڑتے ہیں۔

ضمنی انتخابات میں سوسائٹی کے داخلی و خارجی راستوں، چوراہوں، گلیوں، پارکوں، فلٹر پلانٹس، دکانوں اور گھروں کے سامنے دونوں انتخابی گروپوں کے پینا فلیکس کثیر تعداد میں آویزاں رہے، گھر گھر مہم چلائی گئی اور یوں کثیر سرمایہ خرچ کیا گیا۔ انتخاب کی نگرانی کے لیے محکمہ کوآپریٹو کی 65 افراد پر مشتمل ٹیم لاہور سے ملتان آئی۔ مبینہ طور پر ان کی رہائش، سفر اور کھانے پینے کے اخراجات امیدواروں نے برداشت کیے۔

موجودہ ممبر ایگزیکٹو باڈی ارشد لوتھڑ نے انتخابات میں زیادہ اخراجات کا سبب بتاتے ہوئے کہا کہ یہ ملتان کی ایک بڑی، آباد اور سہولیات سے مزین امیر ترین سوسائٹی ہے۔ یہاں زمیندار، ڈاکٹر، وکلا، تاجر، اشرافیہ اور امیر رہائش پذیر ہیں۔ بہت سے لوگ مقام اور ناک اونچا رکھنے کے لیے بے دریغ پیسہ استعمال کرتے ہیں البتہ ہائی کورٹ اور سپریم کورٹ بار ایسوسی ایشنوں کے انتخابات کے مقابلے میں یہ اخراجات بہت کم ہیں۔

البراق رئیل سٹیٹ کے چیف ایگزیکٹو اس سے اختلاف کرتے ہوئے کہتے ہیں کہ انتخابات میں کروڑوں روپے خرچ کرنے کی بات میں صداقت نہیں ہے اور ان کے حمایتی گروپ کے پینافلیکس اور پوسٹر پانچ سے چھ لاکھ روپے میں بنوائے گئے تھے۔

واپڈا ٹاؤن میں رئیل اسٹیٹ کا کاروبار کرنے والے ایک شخص نے اپنا نام شائع نہ کرنے کی شرط پر بتایا کہ اس سوسائٹی کے پاس بینک میں سات ارب روپے موجود ہیں اور منتخب باڈی نہ ہونے سے عدالتی احکامات پر یہ رقم منجمند کر دی گئی ہے۔ نومنتخب عہدیدار ہی اس رقم کے ذریعے ترقیاتی کام کروانے کے قابل ہوں گے۔

مختلف پراپرٹی ڈیلرز نے بتایا کہ اس وقت سوسائٹی میں پلاٹوں اور گھروں کی ٹرانسفر پر پابندی ہے کیونکہ ٹاؤن کی مینیجنگ باڈی کی تشکیل کا عمل ابھی مکمل نہیں ہوا۔

واپڈا ٹاؤن میں رئیل اسٹیٹ کا کاروبار کرنے والے ایک شخص کے مطابق خرید و فروخت، فائل ٹرانسفر اور قبضے سمیت سب کے لیے انتظامی امور چلانے والے منتخب عہدیداروں کا اہم کردار ہوتا ہے لہٰذا ان کے تعاون کی ضرورت پڑتی ہے۔ وہ کہتے ہیں &quot;اگر ہماری حمایت نہیں کریں گے تو فائلیں ٹرانسفر کیسے کروائیں گے۔&quot;

انہوں نے بتایا کہ جن افراد نے واپڈا ٹاﺅن میں پلاٹ خریدے ہیں انھیں قبضہ حاصل کرنے میں بھی مشکلات ہوتی ہیں کیونکہ بعض اوقات سوسائٹی کے عہدیدارمختلف اعتراضات لگا کر کام میں رخنہ ڈالتے ہیں۔ اس سے پراپرٹی ڈیلروں پر لوگوں کا اعتماد اٹھ جاتا ہے جس سے کاروبار متاثر ہوتا ہے۔

رئیل اسٹیٹ کا کاروبار کرنے والوں کی جانب سے سوسائٹی کے انتخابات میں خاص دلچسپی پر بات کرتے ہوئے پراپرٹی ڈیلرمنصور قریشی نے بتایا کہ واپڈا ریذیڈنٹس گروپ نے اقتدار سنبھال کر جائیداد کی خریدوفروخت کے کاروبار سے وابستہ ہر مجاز پراپرٹی ڈیلر پر 50 ہزار روپے سالانہ تجدید لائسنس فیس عائد کردی تھی جو تمام پراپرٹی ڈیلرز کے لیے پریشانی کا سبب تھی۔ سوسائٹی کی اس سیاست سے پراپرٹی ڈیلروں کوشدید تشویش لاحق ہوئی کہ اگر وہ لوگ دوبارہ اقتدار میں آگئے تو ان پر بھاری ٹیکس عائد کردیں گے۔ واپڈا ٹاﺅن فیز3 میں پراپرٹی ڈیلروں نے بڑے پیمانے پر سرمایہ کاری کی ہوئی ہے۔ اس صورت حال نے سوسائٹی کے انتخابات میں ان کی دلچسپی بڑھا دی۔

رہائشی جگہ کمرشل کرنے کے حوالے سے ایک رہائشی سلمان نے بتایا کہ سوسائٹی عہدیدار نقشے بنا کر ایم ڈی اے کو جمع کرواتے ہیں اور اس کے بعد وہ ان نقشوں کا جائزہ لینے کے بعد قواعد وضوابط کے مطابق انہیں منظور کرتی ہے۔ بعض اوقات اس میں تھوڑی بہت ترمیم بھی ہوجاتی ہے۔

تاہم دیکھا گیا ہے کہ جو نقشہ بھی سوسائٹی بھیجتی ہے اسے ایم ڈی اے منظور ضرور کرتی ہے۔ واپڈا ٹاﺅن ملتان کی کالونی کے فیز ای کا توسیعی منصوبہ ابھی ایم ڈی اے کے پاس زیر التوا ہے۔ اسے کچھ عرصہ قبل ایم ڈی اے نے غیر قانونی قرار دیا تھا لیکن معاملات طے ہونے کے بعد پھر خریدوفروخت کی اجازت دے دی گئی اور اب پلاٹ بیچنے اور خریدنے کا عمل جاری ہے۔

رئیل سٹیٹ سے وابستہ واپڈا ٹاؤن کے رہائشی سہیل سلیم بہت سی زمینیں خرید کر سوسائٹی کو فروخت کر چکے ہیں۔ وہ کہتے ہیں &quot; بہت سے سیاسی رہنما بھی اپنے فرنٹ مینوں کے ذریعے یہاں پراپرٹی کی خرید و فروخت کے کام سے منسلک ہیں۔&quot;

البراق رئیل سٹیٹ کے چیف ایگزیکٹو واپڈا اینڈ ریذیڈنٹس گروپ کے حامی ہیں۔ البراق اور اس گروپ کا مرکزی انتخابی دفتر ایک ہی تھا۔ دوسری جانب والنٹیئر گروپ کا انتخابی دفتر بھی چوہدری عزیر جٹ نامی پراپرٹی ڈیلر کے دفتر میں قائم ہوا۔

ارشد لوتھڑ کہتے ہیں کہ انتخابات میں سیاسی جماعتوں کی جانب سے بھی امیدواروں کی حمایت کی گئی۔ مسلم لیگ (ن) کے ضلعی نائب صدر عبدالرحمان واپڈا اینڈ ریذیڈنٹس گروپ کی حمایت کرتے رہے۔ سوسائٹی کے باہر پاکستان پیپلزپارٹی کے ممبر قومی اسمبلی سید موسیٰ گیلانی کے بینر اور پینافلیکس آویزاں رہے جنہوں نے حالیہ ضمنی انتخاب جیتنے والے والنٹیئر گروپ کی حمایت کی۔

مسلم لیگ (ن) کے سابق ممبر قومی اسمبلی ملک عبدالغفار ڈوگر الیکشن کے روز واپڈا اینڈ ریذیڈنٹس گروپ کے کیمپ میں حوصلہ افزائی کے لیے موجود رہے۔ اسی جماعت کے ملک انور علی خود بھی پراپرٹی ڈیلر ہیں اور انہوں نے بھی اسی گروپ کو سپورٹ کیا۔

والینٹئر گروپ کے نومنتخب صدر چوہدری محمد ناصر نے بتایا کہ واپڈا ایمپلائز کوآپریٹو ہاﺅسنگ سوسائٹی گزشتہ چند برسوں میں مالی بے ضابطگیوں کے باعث توجہ کا مرکز رہی ہے۔ 2016ء میں سوسائٹی کے سیکرٹری جنرل سعید خان پر نیب نے پلاٹوں کی غیر قانونی خرید و فروخت اوراربوں روپے مالیت کی بے ضابطگیوں کا الزام عائد کرتے ہوئے انکوائری کی تھی۔ سعید خان کی دوران حراست وفات ہو گئی اور ان کے خلاف اس کیس میں کچھ ثابت نہ ہو سکا مگر اس سے سوسائٹی کی بدنامی ضرور ہوئی۔