درشن لال گذشتہ 27 برس سے پوجا کے لئے ہر ہفتے اپنے شہر ایبٹ آباد سے 30 کلومیٹر کا فاصلہ طے کر کے مانسہرہ میں ہندوؤں کی تاریخی عبادت گاہ شِیو مندِر آتے ہیں۔&nbsp;

یہ مندِر اسلام آباد کے شمال میں 160 کلومیٹر کی مسافت پر واقع مانسہرہ سے 10 کلومیٹر شمال کی جانب قصبہ گاندھیاں میں چِٹی گَٹی نامی گاؤں میں واقع ہے۔ ہندو دھرم کے ماننے والوں کے نزدیک اس مندِر کے اہمیت کی بنیادی وجہ یہاں موجود &#39;شِیو لِنگا&#39; (سفید رنگ کا پتھر) ہے جسے وہ وسطی ایشیا کا قدیم ترین مقدس پتھر مانتے ہیں۔ 1947 میں ہندوستان کی تقسیم کے بعد بڑی تعداد میں ہندوؤں کی بھارت کوچ کر جانے کی وجہ سے کا یہ تاریخی مندِر غیر آباد ہو گیا تھا۔&nbsp;

ہزارہ یونیورسٹی مانسہرہ میں شعبہ آرکیالوجی کے سربراہ پروفیسر ڈاکٹر شاکر اللہ خان نے سُجاگ کو بتایا کہ گاندھیاں مندِر کا شِیو لِنگا پورے جنوب ایشیا میں سب بڑا اور قدیم لِنگا ہے۔ وہ کہتے ہیں کہ &quot;ایک اندازے کے مطابق یہ تقریباً ساتویں صدی سے یہاں پر نصب ہے۔&quot; ان کے مطابق گاندھیاں کے اطراف کے علاقہ میں آرکیالوجی ڈیپارٹمنٹ نے چوتھی اور پانچویں صدی کے بدھ مت کے شہروں کے آثار بھی دریافت کیے ہیں۔

انچاس سالہ درشن لال کے مطابق 1992 میں بھارت کے شہر ایودھیا میں بابری مسجد کے گرائے جانے کے ردِ عمل میں پاکستان میں مختلف مقامات پر ہندوؤں کی املاک اور مندِروں کو نقصان پہنچایا گیا تو کچھ لوگوں نے اس مندِر کو بھی توڑنے کی کوشش کی۔ مگر یہاں پر مندِر کے اطراف کی زمین کے مالک علی احمد خان نے مقامی افراد کو اس مندِر کو کوئی نقصان نہیں پہنچانے دیا اور خود اس کی حفاظت کی۔&nbsp;

اگلے سال ہندو برادری کے اُس وقت کے دو ارکانِ صوبائی اسمبلی سیٹھ بِہاری لال اور گیان سنگھ یہاں آئے اور مندِر کو دوبارہ آباد کرنے کے لئے کوششیں شروع کیں۔&nbsp; 
درشن لال کہتے ہیں کہ اس کے بعد صوبائی محکمہ اوقاف نے اس ویران مندِر کی دوبارہ تعمیر شروع کی اور ان والد شام لال کو اس معبد کا نگران مقرر کیا۔ رفتہ رفتہ پہلے پاکستان اور بعد میں بیرونِ ملک سے بھی ہندو یاتریوں نے تواتر سے اس مندِر میں پوجا کے لئے آنا شروع کر دیا۔ یہاں سالانہ دو تہوار &mdash; فروری کے دوسرے ہفتے میں مہا شیواتری اور ساون (جولائی اگست) کے مہینے میں ناگ پنچمی &mdash; کروائے جاتے ہیں۔

درشن لال کے بقول &quot;شروع شروع میں پوجا کے لئے بہت کم لوگ آتے تھے مگر آہستہ آہستہ یاتریوں کی تعداد بڑھنے لگی۔ فروری 2020 میں مہا شیواتری کے میلہ میں 900 سے زائد ملکی اور غیر ملکی ہندو یاتری شریک ہوئے۔&quot;

اگلے دو سالوں میں کورونہ وبا کی وجہ سے یاتریوں کی تعداد میں کافی کمی دیکھنے میں آئی۔&nbsp;

درشن لال کے مطابق مندِر میں یاتریوں کی تعداد تو دن بدن بڑھ رہی ہے مگر یہاں پر یاتریوں کے لئے سہولیات نہ ہونے کے برابر ہیں جس کی وجہ سے یاتریوں کو بہت سے مسائل کا سامنا ہے۔ ایک سال قبل تک تو یہاں پر صرف ایک بیت الخلا تھا۔&nbsp;

گذشتہ سال یہاں پر مندِر سے منسلک عمارت کے ساتھ ہی چار بیت الخلا بنائے گئے لیکن یہاں پر آنے والے یاتری اس سے خوش نہیں ہیں کیونکہ درشن لال کے مطابق &quot;ہم بیت الخلا اپنے مقدس مقامات سے دور تعمیر کرتے ہیں۔&quot; وہ کہتے ہیں کہ یہاں آنے والے یاتریوں کو کھانا کھلانے کے لئے لنگر خانہ اور تہواروں کی دیگر تقریبات کے لئے بھی ان کے پاس کوئی جگہ نہیں ہے۔&nbsp;

شِیو مندِر کے قریب ہی رہائش پذیر 57 سالہ محمد نواز خان کے مطابق 1972 میں ایک رات کچھ لوگوں نے رات کی تاریکی میں اس پتھر کو کاٹنے کی بھی کوشش کی تاہم ان کے چچا علی احمد خان نے انہیں یہاں سے بھگایا اور مندِر اور اس کے پتھر کوئی نقصان نہیں پہنچنے دیا۔

درشن لال کے مطابق علی احمد خان نے ہی 1993 میں مندِر کی چابیاں ہندو برادری کے سپرد کیں تاہم علی احمد خان اور ان کے خاندان کا یہ دعویٰ ہے کہ مندِر صرف 14 مرلہ زمین پر قائم تھا اس کے علاوہ باقی جگہ ان کی ذاتی ملکیت ہے اس لئے وہ یہاں انہیں دیگر تعیمرات کی اجازت نہیں دیتے۔

<h2>دعوے اور حقائق</h2>

محمد نواز خان کے مطابق پاکستان بننے کے بعد یہ جگہ متروکہ وقف املاک بورڈ نے مندِر سمیت بھارت کے زیرِ انتظام کشمیر سے آنے والے ایک مہاجر کو الاٹ کر دی تھی &quot;جو بعد میں ہمارے والد نے خرید کر اپنے نام کر الی۔&quot; وہ کہتے ہیں کہ 1993 میں جب بِہاری لال اور گیان سنگھ ایک وفد کے ہمراہ اس مندِر کو دیکھنے آئے تو &quot;ہم نے خریدی ہوئی زمین سے مندِر والی جگہ کی چابیاں ان کے حوالے کر دیں۔&quot;

لیکن دوسری طرف متروکہ وقف املاک بورڈ کے ایک اہلکار محمد اعجاز صوبائی محکمہ مال کے ریکارڈ کا حوالہ دیتے ہوئے کہتے ہیں کہ شِیو مندِر &mdash; جس کا قدیمی نام شِوالہ مندِ ہے &mdash; چار کنال 13 مرلہ پر محیط ہے جسے 54 برس قبل &quot;جعلی انتقال کے ذریعہ کچھ مقامی لوگوں نے اپنے نام منتقل کروا لیا تھا۔&quot;&nbsp;

اس کی تفصیل بتاتے ہوئے وہ کہتے ہیں کہ محکمہ مال کی 1940-41 کی جمع بندی کے مطابق خسرہ نمبر 64 کے تحت یہ رقبہ شوالہ مندِر کے نام ہے۔ اسی طرح 1946-47 میں سابق خسرہ نمبر 64 کو نیا خسرہ نمبر 86 جاری ہوا تو اس میں بھی یہ رقبہ شوالہ مندِر ہی کے نام رہا۔ چھ سال بعد 1953-54 کی جمع بندی میں بھی شوالہ مندِر کی ہی کا اندراج ہے۔

سنہ 1966 میں جمّوں و کشمیر سے ہجرت کر کے آنے والے فتح محمد نامی شخص کو اراضی خسرہ نمبر 85 میں سات کنال چار مرلہ زمین کا انتقال جاری کیا گیا۔ اعجاز کہتے ہیں کہ &quot;فتح محمد نے 17 جنوری 1968 کو ایک جعلی اور فرضی انتقال نمبر 1164 کے تحت خسرہ نمبر 86 بھی ہتھیا لیا اور اسے علی احمد خان، عبدالواحد، محمد انور خان، صفدر خان وغیرہ پر فروخت بھی کر دیا۔&quot;

وہ کہتے ہیں کہ کچھ عرصہ بعد جب مندِر تعمیر و مرمت کا کام شروع کیا گیا تو ان نئے خریداروں نے اس میں رکاوٹیں ڈالنا شروع کر دیں۔ &quot;یہی وجہ ہے کہ انتقال نمبر 1164 کی منسوخی کے لئے متروکہ وقف املاک بورڈ نے اسی سال محکمہ مال کو مراسلہ تحریر کیا تو ان لوگوں نے سول کورٹ سے رجوع کر لیا۔ سول کورٹ نے ان کے خلاف فیصلہ دیا تو انہوں نے ڈسٹرکٹ کورٹ میں اپیل دائر کر دی۔&quot;

وہ کہتے ہیں کہ اسی دوران 2007 میں متروکہ وقف املاک بورڈ کے اس وقت کے چیئرمین نے ان انتقالات کی منسوخی کے خلاف پشاور ہائی کورٹ میں ریفرنس دائر کیا جس کا فیصلہ اِس سال 24 مارچ کو سنایا گیا جس کے تحت کیس کو حتمی فیصلہ کے لئے متروکہ وقف املاک بورڈ کے چیئرمین کے پاس بھیج دیا گیا۔

اعجاز کا کہنا ہے کہ جیسے ہی چیئرمین کی جانب سے فیصلہ آئے گا &quot;تو مندِر کی توسیع کے کام کا آغاز ہو جائے گا اور ہماری کوشش ہو گی کہ اس مندِر میں آنے والے یاتریوں کو ہر ممکن سہولیات فراہم کی جائیں۔&quot;

نصف صدی کا قصہ ہے: مانسہرہ کے شِیو مندِر کی ملکیت کا تنازع کب ختم ہو گا؟

text

جون 2022 کی ایک گرم دوپہر 65 سالہ محمد اجمل دریائے سِرن کے کنارے ایک درخت کی چھاؤں میں بیٹھے انتظار کر رہے ہیں کہ کب دھوپ کم ہو اور وہ مچھلیاں پکڑنے کے لیے جال پانی میں پھینکیں۔

لیکن انہیں خدشہ ہے کہیں انہیں خالی ہاتھ گھر نہ لوٹنا پڑے کیونکہ دریا میں مچھلیاں اس قدر کم رہ گئی ہیں کہ کئی گھنٹے کی جدوجہد کے بعد چند ایک ہی جال میں پھنستی ہیں۔ وہ 16 سال سے یہ کام کر رہے ہیں اور کہتے ہیں کہ &quot;شروع میں مجھے ایک گھنٹے میں چار سے پانچ&nbsp; کلو گرام مچھلیاں مل جاتی تھی لیکن اب پورے ہفتے میں بھی اتنی مقدار ہاتھ آجائے تو بڑی بات ہے&quot;۔

وہ خیبرپختونخوا کے شمال مشرقی ضلع مانسہرہ کے سرسبز علاقے بفہ کے رہنے والے ہیں جو مانسہرہ شہر سے 22 کلومیٹر شمال میں واقع ہے۔ اپنی پیشہ وارانہ زندگی کے شروع میں وہ بیشتر مقامی باسیوں کی طرح کھیتوں میں کام کر کے اپنی روزی کماتے تھے۔ مگر کبھی کبھار اپنی آمدن بڑھانے کے لیے وہ مچھلی پکڑ کر بھی فروخت کر لیا کرتے تھے۔ اس سے آہستہ آہستہ انہیں اتنی آمدن ہونے لگی کہ انہوں نے کھیتی باڑی چھوڑ کر اسے ہی اپنے روزگار کا واحد ذریعہ بنا لیا۔

تاہم پچھلے چند سالوں سے دریا میں مچھلیاں کم ہونے لگی ہیں اس لیے اب وہ دوبارہ کھیتوں میں کام کرنے لگے ہیں۔ البتہ اب بھی جس دن انہیں مزدوری نہ ملے اس دن وہ مچھلیاں پکڑنے دریا پر پہنچ جاتے ہیں۔

انہی کی طرح محمد خالد بھی شاکی ہیں کہ دریائے سِرن میں مچھلیاں کم ہو رہی ہیں۔ وہ پچھلے 15 سال سے شاہراہ ریشم اور ہزارہ ایکسپریس وے کے سنگم پر مچھلیاں فروخت کر رہے ہیں اور کہتے ہیں کہ ان کا کاروبار اچھا نہیں چل رہا۔ ان کے مطابق جب انہوں نے یہ کام شروع کیا تھا تو وہ گاہکوں کے سامنے دریا سے مچھلیاں پکڑ کر لے آتے تھے لیکن اب وہ ایسا کرنے کا تصور بھی نہیں کر سکتے کیونکہ انہیں ایک ایک مچھلی پکڑنے میں کئی کئی گھنٹے لگ جاتے ہیں۔

<h2>مچھلی پکڑنا یا مچھلی مارنا؟</h2>

دریائے سِرن مانسہرہ شہر کے شمال میں واقع ایک پہاڑی علاقے سے نکلتا ہے اور ضلع مانسہرہ کے مختلف علاقوں سے ہوتا ہوا دریائے سندھ میں جا گرتا ہے۔ یہ دریا سواتی مچھلی کے لیے مشہور ہے جسے مقامی لوگ ملھا بھی کہتے ہیں۔ دنیا بھر میں اس مچھلی کی تقریباً 64 اقسام موجود ہیں جن میں سے پانچ یہاں پائی جاتی ہیں۔

سواتی مچھلی کی مصنوعی افزائش نہیں کی جا سکتی اس لیے اسے بڑھوتری کے لیے مناسب قدرتی ماحول چاہیے۔ یہ موسمِ گرما میں دریا کے اُن علاقوں میں پائی جاتی ہے جو گلیشیئروں کے قریب واقع ہیں لیکن موسمِ سرما میں یہ بالائی علاقوں کی جانب منتقل ہو جاتی ہے۔

مقامی لوگوں کا کہنا ہے کہ پچھلے 10 سالوں میں دریائے سِرن میں سواتی مچھلی کی مقدار میں 90&nbsp; فیصد کمی آئی ہے۔ ان میں سے بعض لوگوں کا خیال ہے کہ اس کمی کا ایک اہم سبب حکومت کی طرف سے اسی دریا میں ٹراؤٹ مچھلی کی مقدار میں اضافہ کرنے کے لیے 2017 میں شروع کیے گئے مصنوعی طریقہ ہائے افزائش ہیں۔ ان کے مطابق ٹراؤٹ ایک گوشت خور مچھلی ہے جو دریا میں موجود چھوٹی مچھلیوں کو کھا جاتی ہے۔ چنانچہ ان مصنوعی طریقوں سے جیسے جیسے اس کی مقدار میں اضافہ ہوتا جا رہا ہے ویسے ویسے سواتی مچھلی کی مقدار میں کمی ہوتی جا رہی ہے کیوںکہ ٹراؤٹ اس کے بچے کھا جا تی ہے۔

لیکن مانسہرہ میں متعین صوبائی محکمہ ماہی گیری کے ڈپٹی ڈائریکٹر فہیم اختر اس نکتہ نظر سے متفق نہیں۔ ان کا کہنا ہے کہ سواتی مچھلی کی بقا کے لیے سب سے بڑا خطرہ اسے پکڑنے کے لیے اختیار کیے جانے والے غیر مناسب اور غیر قانونی طریقے ہیں جن میں سے خطرناک ترین بجلی کے کرنٹ کا استعمال ہے۔

اس طریقے سے مچھلیاں پکڑنے والے لوگ دریا کے کنارے جنریٹر چلا کر ننگی تاروں کے ذریعے پانی میں کرنٹ چھوڑ دیتے ہیں جس سے مچھلیاں تڑپ کر سطحِ آب پر آ جاتی ہیں جہاں سے انہیں پکڑ لیا جاتا ہے۔حالیہ سالوں میں کچھ ایسے واقعات بھی پیش آئے ہیں جن میں اس طریقے سے مچھلیاں پکڑنے والے لوگ جنریٹر بند کیے بغیر ہی پانی میں کود گئے اور نتیجتاً اپنی جان سے گئے۔

کچھ لوگ کم وقت میں زیادہ مچھلیاں پکڑنے کے لیے پانی میں بلیچنگ پاؤڈر بھی ڈالتے ہیں جس سے مچھلیاں ہلاک ہو کر سطحِ آب پر آ جاتی ہیں۔ محمد اجمل کا کہنا ہے کہ سو کلوگرام بلیچنگ پاؤڈر تقریباً ایک کلومیٹر علاقے میں پائی جانے والی تمام چھوٹی بڑی مچھلیوں کو مار دیتا ہے۔ لیکن چونکہ ان سب کو پکڑا نہیں جا سکتا اس لیے ان میں سے بہت سی گل سڑ کر پانی کی تہہ میں بیٹھ جاتی ہیں۔

ان سڑی ہوئی مچھلیوں کی وجہ سے دریائے سِرن کا پانی اتنا آلودہ ہو چکا ہے کہ اسے محض ہاتھ لگانے سے جلد کی خرابی کا خدشہ ہوتا ہے حالانکہ 25 سال پہلے یہی پانی پینے اور دیگر گھریلو ضروریات پوری کرنے کے لیے بھی استعمال ہوتا تھا۔

دریا کی آلودگی کا ایک اہم سبب یہ بھی ہے کہ اس کے کنارے واقع تمام آبادیوں سے نکلنے والا استعمال شدہ گندا پانی بھی اسی میں ڈالا جاتا ہے۔ فہیم اختر کے مطابق &quot;اس پانی میں کئی طرح کے کیمیائی مادے موجود ہوتے ہیں جو دریائی پانی کو زہریلا بنا رہے ہیں&quot;۔ اسی طرح وہ کہتے ہیں کہ &quot;فصلوں پر چھڑکی جانے والی کیڑے مار دواؤں میں شامل مضر مادے بھی بارش کے ساتھ بہہ کر دریا کا حصہ بن رہے ہیں&quot;۔

تاہم وہ تسلیم کرتے ہیں کہ حکومت کے پاس اس &quot;آلودہ پانی کو دریائی پانی میں شامل ہونے سے روکنے کا نہ تو کوئی انتظام موجود ہے اور نہ ہی یہ انتظام کرنے کے لیے مقامی محکموں کو کوئی مالی وسائل دستیاب ہیں&quot;۔

ان کے مطابق دریائے سِرن پر تعمیر کیے جانے والے 10.2 میگا واٹ کے جبوڑی نامی پن بجلی گھر کی تعمیر میں استعمال ہونے والا سیمںٹ، تارکول، پینٹ اور مختلف قسم کے تیل بھی اس کے پانی میں شامل ہوتے رہتے ہیں اور اس میں موجود آبی حیات کو نقصان پہنچاتے رہتے ہیں۔ اس منصوبے پر نومبر 2014 میں کام شروع ہوا تھا اور اسے 2021 میں مکمل ہونا تھا لیکن اس کی تعمیر ابھی بھی جاری ہے۔

<h2>ہار کر بیٹھ گئے جال بنانے والے</h2>

شاہراہِ ریشم کے راستے بفہ میں داخل ہوں تو مقامی جامع مسجد کے قریب سڑک کے دونوں اطراف بنی دکانوں کے سامنے مچھلی پکڑنے کے جال لٹکے دکھائی دیتے ہیں۔ ان میں سے ایک دکان میں 60 سالہ محمد پرویز بیٹھے جال بن رہے ہیں۔ وہ پچھلے 35 سال سے یہ کام کر رہے ہیں اور کہتے ہیں کہ ان کا کاروبار روز بروز ماند پڑتا جا رہا ہے۔

جب انہوں نے یہ کام شروع کیا تھا تو، ان کے مطابق، ان کے پاس اتنے گاہک آتے تھے کہ مہینے میں دو جال بُننے کے باوجود وہ ان کی مانگ پوری نہیں کر پاتے تھے۔ لیکن وہ کہتے ہیں کہ پچھلے تین سالوں سے یہ طلب اتنی کم ہو گئی ہے کہ اب وہ پورے سال میں زیادہ سے زیادہ 10 جال ہی فروخت کر پاتے ہیں۔

محمد اجمل کی نظر میں اس تبدیلی کی ایک اہم وجہ مچھلیاں پکڑنے کے لیے بجلی کے کرنٹ اور بلیچنگ پاؤڈر کا استعمال ہے۔ وہ کہتے ہیں کہ &quot;اگر تمام لوگ صرف جال کا ہی استعمال کریں تو دریا میں ابھی بھی سب کے لیے کافی مچھلی موجود ہے&quot;۔ اس لیے وہ مطالبہ کرتے ہیں کہ حکومت غیر مناسب اور غیر قانونی طریقوں سے مچھلیاں پکڑنے والے لوگوں کو کڑی سے کڑی سزائیں دے۔

تاہم فہیم اختر کا کہنا ہے کہ ان کے محکمے کے پاس ان طریقوں کے تدارک کے لیے وسائل اور عملے دونوں کی کمی ہے۔ ان کے مطابق پورے ضلع مانسہرہ میں دریا کی نگرانی کے لیے &quot;صرف 16 اہلکار ہیں جو بالکل کافی نہیں&quot;۔

اس کے باوجود ان کا کہنا ہے کہ ان کے محکمے نے کرنٹ اور بلیچنگ پاؤڈر کا استعمال کرنے والے متعدد افراد کو پکڑ کر جرمانہ بھی کیا ہے۔ لیکن یہ جرمانہ &quot;زیادہ سے زیادہ 25 ہزار روپے ہوتا ہے چنانچہ پکڑے جانے والے لوگ اس کی زیادہ پرواہ نہیں کرتے&quot;۔ اس لیے وہ سمجھتے ہیں کہ ایسے لوگوں کو موثر طور پر روکنے کے لیے &quot;انہیں قید کی سزا دینا ضروری ہے&quot;۔

تاہم وہ کہتے ہیں کہ اس کے لیے متعلقہ قوانین میں تبدیلی لانا پڑے گی جس کا اختیار ان کے پاس نہیں بلکہ صوبائی حکومت اور صوبائی اسمبلی کو حاصل ہے۔

ماحولیاتی تبدیلیوں کو روکنے کے لیے گلاسگو میں عالمی کانفرنس: 'ان مذاکرات سے کچھ حاصل نہیں ہوا'۔

ماہی گیری کے غیر قانونی طریقے:بجلی کے جھٹکوں اور بلیچنگ پاؤڈر کا دریائے سِرن میں سواتی مچھلی کی بقا سے کیا تعلق ہے؟

رواں برس وسطِ مارچ کی ایک رات 31 سالہ محسن اپنے چار ساتھیوں کے ساتھ اپنے گھر لوٹے تو وہاں سبطین نامی ان کا 28 سالہ دوست پستول لیے کھڑا تھا۔ اُس نے انہیں دیکھتے ہی ان پر گولیاں برسا دیں۔ تھوڑی دیر بعد جب مقامی پولیس موقعہِ واردات پر پہنچی تو وہ فرار ہو چکا تھا اور محسن اور اس کے ساتھی زخمی پڑے تھے۔&nbsp;

خیبرپختونخوا کے شمال مشرقی شہر مانسہرہ سے تعلق رکھنے والے یہ پانچوں افراد مقامی ٹرانس جینڈر برادری کے رکن تھے۔ ان میں سے 30 سالہ عظیم اور 31 سالہ نتاشا کو معمولی زخم آئے تھے اس لیے انہیں مانسہرہ کے کنگ عبداللہ ٹیچنگ ہسپتال میں ہی مرہم پٹی کر کے گھر بھیج دیا گیا۔ لیکن محسن کی ٹانگ میں لگنے والی گولی کی وجہ سے ان کی زندگی خطرے میں تھی اس لیے مقامی ڈاکٹروں نے انہیں ابتدائی طبی امداد دینے کے بعد مزید علاج کے لیے ایبٹ آباد میں واقع ایک بڑے سرکاری ہسپتال، ایوب میڈیکل کمپلیکس، میں بھیج دیا۔ ان کا کہنا ہے کہ وہاں بھی ان کا ٹھیک علاج نہ ہو سکا چنانچہ انہیں گولی نکلوانے کے لیے ایک نجی ہسپتال سے رجوع کرنا پڑا۔ &nbsp;

ان کے 32 سالہ ساتھی بلال کو پیٹ میں گولیاں لگی تھیں اس لیے انہیں بہتر علاج کی غرض سے لاہور منتقل کرنا پڑا۔ پانچویں زخمی عمیر بغیر علاج کرائے اپنے گھر منتقل ہو گئے تھے لیکن کچھ روز بعد ان کی حالت اس قدر بگڑ گئی کہ انہیں ہسپتال میں داخل ہونا ہی پڑا۔ تاہم ان کا علاج کامیاب نہ ہو سکا اور جلد ہی ان کا انتقال ہو گیا۔

اپنی موت سے پہلے عمیر کا کہنا تھا کہ وہ اور ان جیسے دیگر ٹرانس جینڈر افراد بھیک مانگ کر یا ناچ گا کر اپنے والدین اور بہن بھائیوں کا پیٹ پالتے ہیں لہٰذا انہیں یہ فکر کھائے جا رہی تھی کہ ان کی صحت ٹھیک نہ ہونے کی صورت میں ان کے گھر والوں کا کیا بنے گا۔ انہوں نے حکومت سے یہ مطالبہ بھی کیا کہ ان پر فائرنگ کرنے والے شخص کو قرار واقعی سزا دی جائے۔&nbsp;

محسن اس پورے واقعے کو یاد کرتے ہوئے کہتے ہیں کہ ان کی سبطین سےکوئی دشمنی نہیں تھی بلکہ وہ ان کا قریبی دوست تھا اور اکثر رات کو انہی کے گھر میں سو جاتا تھا۔ ان کا کہنا ہے کہ فائرنگ سے کچھ دیر پہلے ان کی اس سے فون پر مختصر بات بھی ہوئی تھی جس میں اس نے کسی قسم کی ناراضگی کا اظہار نہیں کیا تھا۔

سبطین نے بھی اپنی گرفتاری کے بعد پولیس کو بتایا کہ اس کی محسن کے ساتھ دوستی تھی لیکن اس کا یہ بھی کہنا تھا کہ ان دونوں کے درمیان کچھ اختلاف ہو گیا تھا جس کے باعث ان کی آپس میں تلخ کلامی بھی ہو چکی تھی۔ اس کے مطابق اسی تلخ کلامی کی وجہ سے اس نے ان پر قاتلانہ حملہ کیا تھا۔

اگرچہ پولیس نے سبطین پر اقدام قتل کا پرچہ درج کر کے اس کے خلاف مقدمہ عدالت کو بھیج دیا ہے لیکن محسن اسے سزا ملنے کے بارے میں زیادہ پرامید نہیں۔ ان کا کہنا ہے کہ مانسہرہ میں پہلے بھی ٹرانس جینڈر افراد پر تشدد کے متعدد ایسے واقعات ہو چکے ہیں جن میں ملوث لوگوں کو پولیس نے فوری طور پر حراست میں تو لے لیا لیکن موثر قانونی اور عدالتی کارروائی نہ ہونے کے باعث وہ سزا سے بچ نکلے۔&nbsp;

<h2>&#39;مرے قاتل، مرے دل دار&#39;</h2>

خیبرپختونخوا پولیس کی مرتب کردہ رپورٹوں کے مطابق صوبے کے مختلف حصوں میں 2015 سے اب تک 91 ٹرانس جینڈر افراد کو قتل کیا جا چکا ہے جبکہ اسی عرصہ میں انہیں تشدد کا نشانہ بنانے اور زخمی کرنے کے دو ہزار سے زیادہ واقعات پیش آ چکے ہیں۔ سب سے زیادہ ٹرانس جینڈر لوگ پشاور میں قتل ہوئے ہیں جبکہ اس ضمن میں دوسرا نمبر ضلع سوات کا ہے۔ &nbsp;ہزارہ ڈویژن کے دو اضلاع، مانسہرہ اور ایبٹ آباد، اس فہرست میں تیسرے اور چوتھے نمبر پر ہیں۔&nbsp;

اس ڈویژن میں کام کرنے والی ایک غیرسرکاری تنظیم، ہزارہ ٹرانس جینڈر ایسوسی ایشن، کی سربراہ نادرہ خان کا کہنا ہے کہ پولیس کی یہ رپورٹیں اس برادری کے افراد کو درپیش تشدد کی مکمل تصویر پیش نہیں کرتیں۔ ان کے مطابق &quot;درحقیقت مختلف سماجی وجوہات کی بنا پر اس طرح کے بہت سے واقعات کی نہ تو پولیس میں رپورٹ درج کرائی جاتی ہے اور نہ ہی نیوز میڈیا میں ان کی خبر لگائی جاتی ہے&quot;۔

مانسہرہ میں تعینات اسسٹنٹ سپرنٹنڈنٹ پولیس جمیل اختر ان واقعات کی ذمہ داری بڑی حد تک ٹرانس جینڈر لوگوں پر ہی ڈالتے ہیں۔ ان کا کہنا ہے کہ پولیس نے اس برادری کے ارکان کو متعدد بار ہدایت کی ہے کہ &quot;وہ اپنی رہائش گاہوں (جنہیں عموماً ڈیرہ کہا جاتا ہے) پر کلوزسرکٹ ٹی وی کیمرے نصب کرائیں، رات نو بجے کے بعد کسی اجنبی کو اپنے ڈیرے پر نہ آنے دیں، عوامی مقامات پر نامناسب لباس نہ پہنیں، کسی تقریب میں شرکت کی صورت میں میزبان کے شناختی کارڈ کی نقل اپنے پاس رکھیں اور سفر کرتے وقت غیرمتعلقہ افراد کو اپنے ساتھ گاڑی میں مت بٹھائیں&quot;۔ لیکن، ان کے مطابق، ٹرانس جینڈر افراد ان ہدایات پر کبھی عمل نہیں کرتے۔

ان افراد کے حقوق کے لیے کام کرنے والی ایک اور غیر سرکاری تنظیم، بلیو وینز، کے نیشنل کوآرڈینیٹر قمر نسیم ان سے متفق نہیں۔ ان کے مطابق یہ احتیاطی تدابیر صرف اجنبی حملہ آوروں کے خلاف موثر ہو سکتی ہیں جبکہ &quot;خیبرپختونخوا میں پچھلے سات سال میں قتل ہونے والے ٹرانس جینڈر افراد میں سے 72 کے قاتل ان کے دوست اور جاننے والے لوگ تھے&quot;۔

مثال کے طور پر 17 مارچ 2022 کو صوبے کے وسطی ضلع مردان میں چاند نامی ٹرانس جینڈر کو فائرنگ کر کے قتل کر دیا گیا۔ اس حملے میں ان کے ایک ٹرانس جینڈر ساتھی، ہنی، &nbsp;بھی زخمی ہو گئے۔ مقامی پولیس کا کہنا ہے کہ حملہ آور دراصل ہنی کا دوست تھا جس نے ان کی مبینہ بے وفائی پر مشتعل ہو کر ان پر فائرنگ کر دی تھی۔

اس واقعے کے صرف ایک روز بعد پشاور کے علاقے محلہ جنگی میں ثنااللہ نامی شخص نے مانو نامی ٹرانس جینڈر کو فائرنگ کر کے قتل کر دیا۔ خیبرپختونخوا ٹرانس جینڈر ایسوسی ایشن نامی تنظیم کی صدر آرزو خان کے مطابق مقتول نے قاتل کو کاروبار کے لیے آٹھ لاکھ روپے ادھار دے رکھے تھے جسے واپس مانگنے پر اس نے انہیں موت کے گھاٹ اتار دیا۔&nbsp;

<h2>تحفظ کا فقدان</h2>

مانسہرہ سے تعلق رکھنے والے وکیل تنویر احمد تشدد کے متاثرین کو مفت قانونی مدد فراہم کرتے ہیں۔ ان کا کہنا ہے کہ تقریباً ایک سال پہلے خیبرپختونخوا کے ہر ضلع میں ایک خصوصی عدالت قائم کی گئی تھی جس کا کام تشدد کا شکار ہونے والی خواتین، بچوں اور ٹرانس جینڈر افراد کے کیس سننا اور اس میں ملوث لوگوں کو سزا دینا تھا۔ ان کے مطابق ضلع مانسہرہ کی اِس عدالت میں دو سو مقدمات زیرسماعت ہیں لیکن ان میں سے کسی ایک میں بھی ملزموں کو سزا نہیں ملی۔&nbsp;

ٹرانس جینڈر افراد سے متعلق مقدمات میں ملزموں کو سزا نہ ملنے کے بارے میں ان کا کہنا ہے کہ ان میں متاثرہ فریق چند عدالتی پیشیوں کے بعد دوسرے فریق سے صلح کر لیتا ہے۔ ان کے مطابق اس کی وجہ یہ ہے کہ اِس برادری کے ارکان جگ ہنسائی کے خوف اور مالی مشکلات کی وجہ سے &quot;تھانوں اور عدالتوں کا رخ کرنے سے گریز کرتے ہیں&quot;۔&nbsp;

جمیل اختر اس مسئلے کو ایک مختلف زاویے سے دیکھتے ہیں۔ وہ کہتے ہیں کہ ٹرانس جینڈر افراد خود ہی اپنے اوپر ہونے والے تشدد کے مقدمات میں پولیس سے تعاون نہیں کرتے اور عدالت میں ان کی پیروی میں بھی دلچسپی نہیں لیتے جس کے باعث ان پر تشدد کرنے والے لوگوں کو سزا نہیں ملتی۔ &nbsp;

تاہم قمر نسیم کا کہنا ہے کہ اس صورتِ حال کی ایک اہم وجہ ٹرانس جینڈر برادری کے تحفظ کے لیے بنائی گئی صوبائی پالیسی کا غیرفعال ہونا ہے۔ ان کا کہنا ہے کہ اگرچہ صوبائی کابینہ نے اس برادری کے ارکان کو تحفظ دینے کے لیے ایک مسودہِ قانون کی منظوری دے رکھی ہے لیکن صوبائی اسمبلی نے اسے ابھی تک منظور نہیں کیا۔ ان کے مطابق &quot;اگر اس مسودے کو اسمبلی کی منظوری مل جاتی تو ایسے واقعات پر بڑی حد تک قابو پایا جا سکتا تھا&quot;۔

ٹرانس جینڈر پروٹیکشن ایکٹ  کے خلاف عدالتی درخواستیں: 'ناقدین اس قانون سے واقف ہی نہیں'۔

دوہری زنجیروں میں جکڑا ہے مقدر نے مجھے: 'تشدد کا شکار ٹرانس جینڈر افراد تھانوں اور عدالتوں کا رخ کرنے سے گریز کرتے ہیں'۔

Meezan Bank does not open a bank account for transgender person, declaring their earnings illegal. Does the bank have any legal authority to do so?

Meezan bank suspends bank account of transgender.

ہزارہ ٹرانس جینڈر ایسوسی ایشن کی جنرل سیکرٹری نادرا خان کا کہنا ہے کہ میزان بینک نے ان کی کمپنی کا بنک اکاؤنٹ اس لئے کھولنے سے انکار کر دیا ہے کہ ان کا تعلق تیسری صنف سے ہے۔&nbsp;

خیبر پختونخوا کے ضلع مانسہرہ سے تعلق رکھنے والی نادرا خان نے مذکورہ کمپنی 17 نومبر 2020 کو سکیورٹیز اینڈ ایکسچینج کمیشن آف پاکستان میں رجسٹرڈ کرائی۔ بعد ازاں انہوں نے اس کی رجسٹریشن ٹیکس وصول کرنے والے ادارے، فیڈرل بورڈ آف ریونیو، میں بھی کرا دی۔ لیکن اس کے باوجود میزان بینک کے مرکزی دفتر نے مانسہرہ میں اپنی مقامی برانچ کو اِس کمپنی کا اکاؤنٹ کھولنے سے روک دیا ہے۔&nbsp;

نادرا خان کے مطابق انہوں نے 31 دسمبر 2020 کو یہ اکاؤنٹ کھلوا نے کے لئے مانسہرہ کے لاری اڈہ میں شاہراہ ریشم پر واقع میزان بینک کی برانچ سے رجوع کیا۔ برانچ مینیجر نے ان کی انگلیوں کے نشانات کے ذریعے ان کی شناخت کی تصدیق کی اور ان سے کمپنی سے متعلقہ متعدد دستاویزات مانگیں جو انہوں نے سب کی سب فراہم کر دیں۔

ان دستاویزات کی چھان بین کے بعد برانچ مینیجر نے نادرا خان کو بتایا کی ان کا اکاؤنٹ کھل گیا ہے۔ اس کی تصدیق بینک کی طرف سے ان کے فون پر بھیجے گئے پیغامات میں بھی کی گئی۔ یہ اطلاعات ملنے کے بعد انہوں نے اس اکاؤنٹ میں دو ہزار روپے بھی جمع کرا دیے۔&nbsp;

لیکن چھ جنوری 2021 کو انہیں &nbsp;بینک کے فون نمبر سے کال کر کے بتایا گیا کہ ان کا اکاؤنٹ بند کیا جا رہا ہے کیوںکہ میزان بینک کی پالیسی کے مطابق تیسری صنف کے لوگوں کی کمائی غیر شرعی ہوتی ہے۔ یہ کارروائی بنک کے شریعہ بورڈ کے اس فیصلے کے تحت کی گئی جس کے ذریعے بورڈ نے تیسری صنف سے تعلق رکھنے والے افراد کے اکاؤنٹ کھولنے پر پابندی لگا رکھی ہے۔

سجاگ کے رابطہ کرنے پر میزان بنک کے مرکزی دفتر میں متعین کارپوریٹ کمیونیکیشن ڈیپارٹمنٹ کی اسسٹنٹ وائس پریزیڈینٹ طوبیٰ طارق نے کہا کہ ان کا ادارہ فی الحال اس معاملے کے بارے میں کوئی بیان نہیں دینا چاہتا۔

&nbsp;دوسری طرف نادرا خان کا کہنا ہے کہ یہ کمپنی انہوں نے اس لئے رجسٹرڈ کرائی تھی تاکہ تیسری صنف سے تعلق رکھنے والے لوگ ناچنے گانے کے علاوہ آمدنی کے دیگر ذرائع استعمال میں لا سکیں کیونکہ، ان کے بقول، کورونا وائرس کے دوران نہ تو حکومت نے اس صنف سے تعلق رکھنے والے لوگوں کی کوئی مدد کی ہے اور نہ ہی مخیر حضرات کو ان کا خیال آیا ہے۔ &nbsp;&#39;اس کمپنی کی ذریعے میں سکول، کالج اور دیگر فلاحی ادارے کھولنا چاہتی ہوں&#39;۔ &nbsp;

وہ بینک سے سوال کرتی ہیں کہ جب تیسری صنف کے افراد شناختی کارڈ بنوا سکتے ہیں تو پھر انہیں اکاؤنٹ کھولنے کی اجازت کیوں نہیں۔ ان کا حکومت سے پوچھنا ہے کہ ایسا کون سا قانون ہے جو میزان بینک کو یہ فیصلہ کرنے کی اجازت دیتا ہے کہ کس شخص کی کمائی شرعی ہے یا غیر شرعی۔&nbsp;

نادرا خان نے حکومت کے اعلیٰ عہدے داروں اور سٹیٹ بینک آف پاکستان سے یہ بھی اپیل کی ہے کہ وہ اس معاملے کا نوٹس لیں اور صنفی بنیادوں پر ان کے ساتھ امتیازی سلوک کرنے پر میزان بینک کے خلاف کارروائی کریں۔

یہ رپورٹ لوک سجاگ نے پہلی دفعہ&nbsp;19 جنوری 2021 کو اپنی پرانی ویب سائٹ پر شائع کی تھی۔

ٹرانس جینڈر افراد کے مالی حقوق کی پامالی: 'بینک نے کہا تیسری صنف کا اکاؤنٹ نہیں کُھل سکتا'۔

شمال مشرقی خیبرپختونخوا کے تین اضلاع، اپرکوہستان، لوئرکوہستان اور کولئی پالس، میں 31 مارچ 2022 کو ہونے والے مقامی حکومتوں کے انتخابات میں صرف پانچ خواتین نے حصہ لیا اور وہ سب بلامقابلہ کامیاب ہو گئیں۔ ان میں سے دو خواتین اپرکوہستان، دو کولئی پالس اور ایک لوئرکوہستان سے کونسلر منتخب ہوئیں۔&nbsp;

تاہم ان تینوں اضلاع کی مقامی حکومتوں میں خواتین کے لیے مخصوص کی گئی نشستوں کی کل تعداد ایک سو 62 ہے جن میں سے ایک سو 57 ابھی تک خالی ہیں۔ اگرچہ الیکشن کمیشن آف پاکستان نے اعلان کیا ہے کہ ان نشستوں پر عیدالفطر کے بعد ضمنی انتخاب ہوں گے لیکن مقامی لوگوں کا کہنا ہے کہ ان کے لیے درکار خواتین امیدوار شاید ہی سامنے آئیں۔

ضلع اپرکوہستان سے تعلق رکھنے والے ایک شخص کا اپنا نام ظاہر نہ کرنے کی درخواست کرتے ہوئے کہنا ہے کہ &quot;اس علاقے میں اگر کوئی خاتون اپنے خاندان سے باہر کسی مرد سے بات بھی کر لے تو اسے سنگین نتائج بھگتنا پڑتے ہیں&quot;۔ اس تناظر میں درجنوں خواتین کا ایسے منتخب اداروں کا رکن بننا بہت مشکل نظر آتا ہے جہاں انہیں اجنبی مردوں کے ساتھ مل کر کام کرنا ہو گا۔

ان اضلاع کی انتخابی تاریخ بھی یہی ظاہر کرتی ہے۔ 2001 اور 05-2004 میں ہونے والے مقامی حکومتوں کے انتخابات میں یہاں خواتین کے لیے مخصوص کی گئی نشستوں پر کسی ایک امیدوار نے بھی کاغذات نامزدگی جمع نہیں کرائے تھے۔ (2015 میں کوہستان میں مقامی حکومتوں کے انتخابات ہو ہی نہیں سکے تھے کیونکہ اُس وقت پشاور ہائی کورٹ میں اسے تین ضلعوں میں تقسیم کرنے کا تنازعہ چل رہا تھا۔)&nbsp;

تاہم کچھ مقامی لوگوں کا کہنا ہے کہ اس بار پانچ خواتین کا کونسلر منتخب ہو جانا اس بات کی علامت ہے کہ کوہستان کے لوگوں کی سوچ بالآخر تبدیل ہو رہی ہے۔ اپرکوہستان کی ولیج کونسل جیجال سے منتخب&nbsp;ہونے والی ایک خاتون کونسلر کے خاندان سے تعلق رکھنے والے شاہ نذر نامی شخص کا کہنا ہے کہ &quot;کوہستان اب بدل رہا ہے&quot;۔ ان کے مطابق اس کا ایک ثبوت یہ بھی ہے کہ ان کے گاؤں سے ان کی رشتہ دار خاتون کے علاوہ دو اور خواتین بھی انتخابات میں حصہ لینا چاہتی تھیں۔ تاہم وہ کہتے ہیں کہ مقامی لوگوں نے باہمی مشاورت سے صرف ایک امیدوار کو ہی انتخاب لڑنے کے لیے نامزد کیا۔ &nbsp;

<h2>تمہارا ووٹ میری مرضی</h2>

اپرکوہستان، لوئرکوہستان اور کولئی پالس کے اضلاع ہزارہ ڈویژن کا حصہ ہیں۔ اس ڈویژن میں ایبٹ آباد، مانسہرہ، بٹا گرام اور تورغر کے اضلاع بھی شامل ہیں جن کی مقامی حکومتوں میں خواتین کے لیے مخصوص کی گئی کل پانچ سو 33 نشستوں پر 31 مارچ 2022 کو مجموعی طور پر نو سو 86 امیدواروں نے انتخاب لڑا۔

ان اضلاع میں سے ایبٹ آباد میں خواتین امیدواروں کی تعداد سب سے زیادہ تھی۔ وہاں دو سو نو نشستوں پر چار سو 87 خواتین نے انتخاب میں حصہ لیا۔ دوسرے نمبر پر مانسہرہ تھا جہاں ایک سو 94 نشستوں کے لیے تین سو 91 خواتین امیدوار تھیں جبکہ تورغر میں 40 نشستوں پر صرف 25 خواتین نے انتخاب میں حصہ لیا جس کے نتیجے میں وہاں متعدد نشستیں خالی رہ گئی ہیں۔&nbsp;

تاہم پورے ہزارہ ڈویژن میں تحصیل چیئرمین اور میئر کی 22 نشستوں پر انتخاب لڑنے والے دو سو12 امیدواروں میں ایک خاتون بھی شامل نہیں تھی۔ سیاسی اور انتخابی عمل میں مقامی خواتین کی عدم شمولیت کا ایک ثبوت یہ بھی ہے کہ اپرکوہستان، لوئرکوہستان اور کولئی پالس کے اضلاع میں رجسٹرڈ ووٹروں کی مجموعی تعداد ایک لاکھ 76 ہزار آٹھ سو 92 ہے لیکن ان میں سے صرف 78 ہزار چھ سو 15 خواتین ہیں۔ یعنی ہر سو مقامی ووٹروں میں سے 56 مرد اور محض 44 عورتیں ہیں۔&nbsp;

مانسہرہ سے تعلق رکھنے والی پاکستان تحریک انصاف کی رکن شکیلہ ربانی مقامی مردوں کو اس صورتِ حال کا ذمہ دار قرار دیتی ہیں کیونکہ &quot;وہ سیاسی سرگرمیوں میں خواتین کی شمولیت کی حمایت نہیں کر تے&quot;۔ &nbsp;ان کا کہنا ہے کہ اس &quot;حمایت کی عدم موجودگی میں خواتین کے لیے انتخاب لڑنا تو کجا ووٹ ڈالنا بھی مشکل ہے&quot;۔&nbsp;

ان کا یہ بھی کہنا ہے کہ جو عورتیں ہمت کر کے کسی نہ کسی طرح سیاست میں آ جاتی ہیں انہیں ترقی کرنے کے لیے حوصلہ افزا ماحول نہیں ملتا۔ اپنی مثال دیتے ہوئے وہ کہتی ہیں کہ حالیہ انتخابات میں انہوں نے اپنی جماعت کو درخواست دی تھی کہ انہیں تحصیل چیئرمین کی نشست کے لیے امیدوار نامزد کیا جائےکیونکہ وہ 2015 کے بلدیاتی انتخابات میں ضلع کونسل کی رکن منتخب ہو چکی ہیں۔ لیکن، ان کے مطابق، ان کے انتخابی تجربے کے باوجود انہیں نامزد نہیں کیا گیا۔

مانسہرہ سے ہی تعلق رکھنے والی ایک اور سیاسی کارکن عنبرین سواتی بھی کہتی ہیں کہ ہزارہ ڈویژن میں بالعموم اور کوہستان میں بالخصوص خواتین کے انتخابات میں حصہ نہ لینے کی بنیادی وجہ یہ ہے کہ ان کے خاندان کے مرد سیاسی عمل میں ان کی شمولیت کو پسند نہیں کرتے۔ تاہم وہ سیاسی جماعتوں کی قائدین کو بھی اس صورتِ حال کا ذمہ دار سمجھتی ہیں۔ &nbsp;

وہ 12 سال سے پاکستان تحریک انصاف سے وابستہ ہیں اور اس کے خواتین ونگ سمیت مختلف شعبوں کی عہدیدار رہ چکی ہیں۔ اپنے ذاتی تجربات کی بنیاد پر ان کا کہنا ہے کہ سیاسی جماعتوں کے مرد قائدین خواتین کو انتخابی امور میں محض ایک علامتی کردار کی ادائیگی تک محدود رکھنا چاہتے ہیں۔ مثال کے طور پر 2018 کے انتخابات میں جب انہیں پاکستان تحریک انصاف نے قومی اسمبلی کے حلقہ این اے 13 سے اپنا امیدوار نامزد کیا تو اس کی وجہ یہ نہیں تھی کہ ان کی جماعت کو ان کی سیاسی اہلیت پر پورا بھروسہ تھا بلکہ، ان کے مطابق، ایسا صرف اس انتخابی شرط کو پورا کرنے کے لیے کیا گیا تھا جس کے تحت ہر جماعت کے امیدواروں میں کم از کم پانچ فیصد خواتین کی موجودگی ضروری ہے۔&nbsp;

تاہم وہ کہتی ہیں کہ ان کی اپنی جماعت کے سینئر رہنما اعظم خان سواتی کی مبینہ مداخلت پر ان کی یہ نامزدگی بھی منسوخ کر دی گئی حالانکہ اس کی منظوری پاکستان تحریک انصاف کے سربراہ عمران خان اور ان کی جماعت کے پارلیمانی بورڈ نے دی تھی۔&nbsp;

خواتین امیدواروں کی عام انتخابات میں کامیابی: بس کہ دشوار ہے ہر کام کا آساں ہونا۔

کوہستانی خواتین کی مقامی انتخابات میں عدم دلچسپی: 'مردوں کی حمایت کے بغیر ان کا سیاست میں آنا ممکن نہیں'۔

اختر نعیم کی عمر 70 سال ہے۔ انہوں نے اپنی جوانی اور ادھیڑ عمری کے کئی سال اس خواہش میں گزارے ہیں کہ کاش وہ بھی اپنے علاقے کے ایک کامیاب کاشت کار رستم خان کی طرح چائے کاشت کر کے بہت سا منافع کما سکیں۔&nbsp;

لیکن رستم خان کے برعکس نہ تو ان کے پاس مالی وسائل تھے کہ وہ ایک ایسی فصل اگانے کا تجربہ کر سکیں جس کی پہلی پیداوار چار سال کا وقت لیتی ہے اور نہ ہی انہیں چائے کا معیاری بیج دستیاب تھا۔ لہذا انہوں نے وفاقی حکومت کے ادارے، نیشنل ٹی اینڈ ہائی ویلیو کراپس ریسرچ انسٹیٹیوٹ، سے رجوع کیا جس نے انہیں یقینی دہانی کرائی کہ انہیں چائے کی کاشت سے لے کر اس کی فروخت تک ہر مرحلے میں ہرممکن تکنیکی امداد فراہم کی جائے گی۔ &nbsp;

اختر نعیم کا کہنا ہے کہ انسٹیٹیوٹ نے اپنا وعدہ پورا کرتے ہوئے نہ صرف ان کی زمین کا تجزیہ کیا اور اسے چائے کی کاشت کے لیے موزوں بنانے کی غرض سے اس میں کئی کیمیائی مادے ڈالے بلکہ انہیں بیج اور ایک ایسی کھاد بھی فراہم کی جو مارکیٹ میں کہیں دستیاب نہیں تھی۔ نتیجتاً 2001 میں انہوں نے اپنی ایک ایکڑ نہری زمین پر چائے کاشت کر دی۔

یوں وہ خیبرپختونخوا کے شمال مشرقی ضلعے مانسہرہ سے تعلق رکھنے والے ان پانچ سو کاشت کاروں میں شامل ہو گئے جو سات سو ایکڑ رقبے پر چائے کاشت کر رہے تھے۔

تاہم یہ تجربہ اس قدر ناکام ثابت ہوا کہ ان میں سے اکثر کاشت کاروں نے پچھلے 17 سال میں اسے دہرانے کے بارے میں سوچا بھی نہیں۔ نتیجتاً حالیہ سالوں میں اس علاقے میں چائے کے زیرِ کاشت رقبہ کم ہو کر صرف 46 ایکڑ کے قریب رہ گیا ہے۔

اختر نعیم کا کہنا ہے کہ اس کمی کی سب سے بڑی وجہ 8 اکتوبر 2005 کو آنے والے زلزلے کی وجہ سے اس نہر کا ٹوٹنا تھا جس سے چائے کے مقامی کھیت سیراب ہوتے تھے۔ ان کے مطابق &quot;نہر کی مرمت میں کئی سال لگ گئے اور اس دوران پانی دستیاب نہ ہونے کے باعث یہ کھیت خشک ہو گئے&quot;۔&nbsp;

ان کا یہ بھی کہنا ہے کہ جن زمینوں کو چائے کی کاشت کے لیے منتخب کیا گیا وہ اتنی زرخیز ہیں کہ وہاں ایک سال میں دو سے تین فصلیں پیدا کی جا سکتی ہیں۔ اس کے برعکس چائے کی پہلی پیداوار کے لیے سالوں انتظار کرنا پڑتا ہے۔ اس لیے، ان کی نظر میں، چائے کی کاشت مقامی &quot;کاشت کاروں کے لیے مالی اعتبار سے فائدہ مند ثابت نہیں ہوئی&quot;۔&nbsp;

<h2>خود کفالت کا خواب</h2>

سرکاری اعدادوشمار ظاہر کرتے ہیں کہ یکم جولائی 2020 سے لے کر 30 جون 2021 تک پاکستانیوں نے مجموعی طور پر لگ بھگ تین لاکھ ٹن چائے کی پتی استعمال کی۔ اس میں سے صرف 15 ٹن چائے مقامی طور پر اگائی گئی تھی۔ نتیجتاً، وفاقی اداہ شماریات کے مطابق، پاکستان نے صرف جولائی 2020 اور اپریل 2021 کے دوران 53 کروڑ 30 لاکھ ڈالر خرچ کر کے دو لاکھ 21 ہزار تین سو 19 ٹن چائے درآمد کی۔&nbsp;

آنے والے سالوں میں ان اخراجات میں اور بھی اضافہ ہونے کی توقع ہے کیونکہ ملک میں چائے کی طلب میں مسلسل اضافہ دیکھنے میں آ رہا ہے۔ اقوام متحدہ کا ادارہ برائے خوراک و زراعت (ایف اے او) اپنی ایک رپورٹ میں اس رجحان کی تصدیق کرتے ہوئے کہتا ہے کہ پاکستان میں 2007 اور 2016 کے درمیان چائے کے استعمال میں 35.8 فیصد اضافہ ہوا۔&nbsp;

اس صورتِ حال کے پیشِ نظر کئی زرعی اور معاشی ماہرین عرصہ دراز سے کہتے چلے آئے ہیں کہ پاکستان کو چائے خود اگانی چاہیے تاکہ اس کی درآمد پر آنے والے بھاری اخراجات سے بچا جا سکے۔ اس مقصد کے لیے موزوں زمین کی تلاش قیامِ پاکستان کے کچھ عرصہ بعد ہی شروع ہو گئی تھی جس کے نتیجے میں 1958 میں مانسہرہ کو چائے کی کاشت کے لیے موزوں پایا گیا۔&nbsp;

تاہم سرکاری سرپرستی نہ ہونے کے باعث آئندہ تین دہائیوں میں یہاں چائے کی کاشت شروع نہ ہو سکی۔ بالآخر 1987 میں وفاقی حکومت نے مانسہرہ شہر کے شمال میں واقع علاقے شنکیاری میں 50 ایکڑ اراضی پر ایک تحقیقاتی مرکز قائم کیا جس میں تحقیق کے لیے چین کے ماہرین کی خدمات حاصل کی گئیں اور چائے کا بیج بھی وہیں سے منگوایا گیا۔ ابتدائی طور پر اس مرکز میں کام کرنے والے مقامی سائنس دانوں کی تعداد 28 تھی (جو رفتہ رفتہ کم ہو کر صرف آٹھ رہ گئی ہے)۔ &nbsp;

تقریباً چار سال کی تحقیق کے بعد اس مرکز میں کام کرنے والے ماہرین نے طے کیا کہ شنکیاری اور اس کے نواحی علاقوں، اچھڑیاں اور بفہ، کی زمین چائے کی کاشت کے لیے موزوں ترین ہے۔&nbsp;

ان علاقوں میں چائے کی کاشت کو فروغ دینے کے لیے وفاقی حکومت نے 1996 میں تحقیقاتی مرکز کو ترقی دے کر نیشنل ٹی اینڈ ہائی ویلیو کراپس ریسرچ انسٹیٹیوٹ میں تبدیل کر دیا تاکہ اس کے سائنس دانوں اس کے 33 ایکڑ پر پھیلے ہوئے چائے کے باغات میں تجربات اور تحقیق کا کام کر سکیں۔ اس کے ذمے مقامی کاشت کاروں کو چائے کی کاشت پر راغب کرنے، انہیں اس کے لیے تکنیکی سہولتیں فراہم کرنے اور فصل کی فروخت میں ان کی مدد کرنے جیسے کام بھی لگائے گئے۔

اِس وقت سائنس دانوں سمیت انسٹی ٹیوٹ میں کام کرنے والے عملے کی کل تعداد 40 ہے جس میں انتظامی افسران اور کھیتوں میں کام کرنے والے مزدور بھی شامل ہیں۔ ان کی کوششوں سے پیدا کردہ چائے کا کچھ حصہ بیج کے طور پر کسانوں کو دے دیا جاتا ہے اور کچھ تحقیقی مقاصد کے لیے استعمال کیا جاتا ہے۔ لیکن اس کا بڑا حصہ پتی بنانے والی فیکٹریوں کو فروخت کیا جاتا ہے جس سے حاصل ہونے والی زیادہ تر رقم کسانوں سے خریدےگئے چائے کے سبز پتوں کی قیمت کے طور پر انہیں ادا کر دی جاتی ہے۔

&nbsp;بقایا رقم انسٹی ٹیوٹ میں ہونے والے مختلف تحقیقی اور انتظامی اخراجات کے لیے استعمال کی جاتی ہے۔ اس کے اہلکاروں کے مطابق اس کے سالانہ اخراجات ڈھائی کروڑ روپے کے لگ بھگ ہیں جن میں سے تقریباً آدھے چائے کی فروخت سے پورے کیے جاتے ہیں (جبکہ باقی رقم وفاقی حکومت سرکاری خزانے سے فراہم کرتی ہے)۔

<h2>&nbsp;چائے برباد کرے گی ہمیں معلوم نہ تھا</h2>

انسٹی ٹیوٹ کے اہلکاروں کا کہنا ہے کہ 2001 میں کئی مقامی کاشت کار چائے کی کاشت پر تیار ہو گئے تھے۔ انہیں زرعی ترقیاتی بنک نے ایک لاکھ روپے فی ایکڑ کے حساب سے بلاسود قرضہ بھی دیا تاکہ انہیں فصل پر آنے والے اخراجات برداشت کرنے میں مشکل نہ ہو۔&nbsp;

تاہم ان میں شامل بفہ میرا نامی جگہ کے رہنے والے 74 سالہ حق نواز خان کا کہنا ہے کہ قرض کی رقم کافی نہیں تھی کیونکہ چائے کی کاشت پر آنے والا ان کا خرچہ اس سے کہیں زیادہ تھا۔&nbsp;

چار سال بعد انہیں ایک اور مسئلہ درپیش تھا۔ ان کی فصل تیار ہو چکی تھی لیکن اس کی چنائی کے لیے ماہر مزدور انہیں کہیں نہیں مل رہے تھے۔ انسٹی ٹیوٹ بھی اس ضمن میں ان کی کوئی مدد نہ کر سکا۔ چنانچہ، ان کے مطابق، اگلے دو سال وہ اپنے طور پر چنائی کراتے رہے جس کے باعث وہ اچھی پیداوار نہ لے سکے۔

اگلا مرحلہ چائے فروخت کرنے کا تھا۔ وہ کہتے ہیں کہ ان کی فصل کا واحد گاہک انسٹی ٹیوٹ خود ہی تھا لیکن &quot;اس کا ادائیگی کرنے کا نظام بہت ہی سست ہے کیونکہ اس کے لیے کاشت کاروں کو اس وقت تک انتظار کرنا پڑتا ہے جب تک پتی تیار کرنے والی فیکٹریاں مقامی طور پر پیدا کردہ چائے مارکیٹ میں فروخت نہ کر لیں&quot;۔

چنانچہ 2007 میں حق نواز خان نے چائے کاشت بند کر دی اور اپنی زمین پر دوسری فصلیں اگا لیں۔

اختر نعیم کو بھی اسی طرح کی شکایات رہی ہیں۔ ان کا یہ بھی کہنا ہے کہ ان کی کاشت کردہ چائے کی قیمتِ خرید اتنی کم تھی کہ تمام تر حکومتی امداد کے باوجود ان کے پیداواری اخراجات پورے نہیں ہو پاتے تھے۔&nbsp;

وفاقی حکومت کے محکمہ زراعت کے سابق ایڈیشنل سیکرٹری اور چائے کی مختلف اقسام اور ان کی کاشت سے متعلقہ امور کے ماہر ڈاکٹر خورشید خان چائے کی کاشت میں کاشت کاروں کی عدم دل چسپی کی ایک اور وجہ کی نشان دہی کرتے ہیں۔ ان کے مطابق اس کے راستے کی سب سے بڑی رکاوٹ اس کی کاشت کا موجودہ طریقہ کار ہے جس کے تحت اسے زمین کے چھوٹے چھوٹے اور الگ الگ ٹکڑوں پر اگایا جاتا ہے۔ ان کا کہنا ہے کہ &quot;اس طریقے سے نہ تو کاشت کاروں کو فائدہ ہو رہا ہے اور نہ ہی چائے کی پیداوار بڑھانے میں کوئی کامیابی ہو رہی ہے&quot;۔&nbsp;

ان کی نظر میں اس مسئلے کا واحد حل سینکڑوں ایکڑ اراضی پر ایک مربوط ٹی اسٹیٹ کا قیام ہے جہاں زمین کاشت کاروں کو ٹھیکے پر دے کر انہیں پابند کیا جائے کہ وہ چائے کے علاوہ کچھ اور کاشت نہیں کریں گے۔&nbsp;

لیکن نیشنل ٹی اینڈ ہائی ویلیو کراپس ریسرچ انسٹی ٹیوٹ کے ڈائریکٹر ڈاکٹر عبدالوحید کے خیال میں سال ہا سال کی کوششوں کے باوجود چائے کی کاشت میں بہتری نہ آنے کی وجہ کچھ اور ہے۔ ان کے مطابق اس کا بنیادی سبب چائے کے سبز پتوں کو پتی میں تبدیل کرنے کے لیے درکار صنعتی سہولتوں کی مقامی سطح پر عدم موجودگی ہے۔ ان کا کہنا ہے کہ چائے کی کاشت کے فروغ کے لیے یہ سہولتیں ناگزیر ہیں کیونکہ ایک طرف تو یہ مقامی چائے کی خریداری میں اضافے کا باعث بنیں گی اور دوسری طرف ان کے قیام سے &quot;کسانوں کو ان کی فصل کا معاوضہ بھی بروقت ملنے لگے گا&quot;۔

سید نعمان شاہ

نصف صدی کا قصہ ہے: مانسہرہ کے شِیو مندِر کی ملکیت کا تنازع کب ختم ہو گا؟

ماہی گیری کے غیر قانونی طریقے:بجلی کے جھٹکوں اور بلیچنگ پاؤڈر کا دریائے سِرن میں سواتی مچھلی کی بقا سے کیا تعلق ہے؟

دوہری زنجیروں میں جکڑا ہے مقدر نے مجھے: 'تشدد کا شکار ٹرانس جینڈر افراد تھانوں اور عدالتوں کا رخ کرنے سے گریز کرتے ہیں'۔

ٹرانس جینڈر افراد کے مالی حقوق کی پامالی: 'بینک نے کہا تیسری صنف کا اکاؤنٹ نہیں کُھل سکتا'۔

کوہستانی خواتین کی مقامی انتخابات میں عدم دلچسپی: 'مردوں کی حمایت کے بغیر ان کا سیاست میں آنا ممکن نہیں'۔

مانسہرہ میں چائے کی کاشت کا ناکام حکومتی منصوبہ: نصف صدی کا قصہ ہے دو چار برس کی بات نہیں۔