Explore the challenges and advancements in disability voting rights during elections in Pakistan. Learn about efforts to ensure accessibility and inclusion for disabled individuals in the ele

Overcoming Hurdles: Disability Voting Rights and Elections in Pakistan

بیالیس سالہ محمد جاوید&nbsp; ضلع حافظ آباد کے رہائشی ہیں جو بچپن میں پولیو کا شکار ہوئے تھے۔ اسی وجہ سے وہ گھر میں نقل و حرکت&nbsp; اور باہر&nbsp; آنے جانے کے لیے وہیل چیئر استعمال کرتے ہیں لیکن ہر الیکشن میں ووٹ ضرور کاسٹ کرتے ہیں۔

وہ بتاتے ہیں کہ وہ 2018ء کے انتخابات میں اپنا ووٹ ڈالنے کے لیے ایک دوست کی مدد سے ماڈل ہائی سکول پولنگ سٹیشن پہنچے تو وہاں لمبی لائن لگی ہوئی تھی۔ تقریباً ڈیڑھ گھنٹے بعد ان کی باری آئی تو برآمدے پر وہیل چیئر کو چڑھانے کے لیے کوئی ریمپ نہیں تھا۔

&quot;قطار میں موجود لوگوں نے وہیل چیئر اٹھا کر مجھے پولنگ عملے کے قریب پہنچایا لیکن بیلٹ پیپر لے کر جب میں پولنگ بوتھ میں داخل ہونے لگا تو سکیورٹی اہلکار نے میرے مددگار&nbsp; کو روک لیا اور کہا، غیر متعلقہ شخص کو آپ کے ساتھ جانے کی اجازت نہیں ہے&quot;۔

ان کا کہنا تھا کہ پریزیڈنگ افسر سے مددگار کو ساتھ بھیجنے کی گزارش کی جنہوں نے حکام سے فون پر بات کی لیکن صرف بوتھ تک چھوڑنے اجازت ملی جبکہ وہ سہارے کے بغیر وہیل چیئر سے نہیں اٹھ سکتے۔ بالآخر پریزیڈنگ افسر کو ان پر رحم آیا اور انہوں نے مددگار کے ذریعے پولنگ بوتھ جا کر ووٹ کاسٹ کرنے کی اجازت دے دی۔

محمد جاوید نے اپنی جسمانی کمزوری کو کبھی مجبوری نہیں بننے دیا۔ وہ مشکل حالات میں اعلیٰ تعلیم حاصل کر کے سکول ٹیچر بھرتی ہوئے اور 12 سال سے بچوں کو زیور تعلیم سے آراستہ کر رہے ہیں۔

وہ کہتے ہیں کہ الیکشن کمیشن معذور افراد کے لیے پولنگ سٹیشن پر خصوصی انتظامات کے دعوے تو کرتا ہے مگر عملی طور پر ایسا نہیں ہوتا اور ہر بار ووٹ ڈالنے کے لیے انہیں کڑے امتحان سے گزرنا پڑتا ہے۔

<h2>پاکستان میں معذور افراد کتنے ہیں؟</h2>

عالمی اداہ صحت (ڈبلیو ایچ او ) کے اندازوں کے مطابق دنیا بھر میں ایک ارب 30 کروڑ لوگ معذوری کے ساتھ زندگی بسر کر رہے ہیں جو کہ کل آبادی کا 16 فیصد بنتے ہیں۔

انسانی حقوق کی بین الاقومی تنظیم ہیومن رائٹس واچ کا تخمینہ ہے کہ پاکستان میں خصوصی افراد کی تعداد دو کروڑ 70 لاکھ کے قریب ہو سکتی ہے۔ پاکستانی وزارت انسانی حقوق ان اعداد و شمار کو تسلیم کرتی ہے۔

پشاور کے رہائشی اور پولیو سے متاثرہ مشتاق حسین پیرا پلیجک سینٹر (مرکز بحالی معذوراں) پشاور کے نگران ہونے کے علاوہ &#39;فرینڈز آف پیرا پلیجک&#39; نامی تنظیم کے سیکرٹری اطلاعات ہیں۔

وہ بتاتے ہیں کہ انہوں نے کئی الیکشن دیکھے ہیں لیکن آج تک خصوصی افراد کے لیے کبھی پولنگ بوتھ تک رسائی کا کوئی خاص انتظام نہیں کیا گیا جس سے انہیں اور ان جیسے لوگوں کو بہت تکلیف ہوتی ہے۔

&quot;ہم بھی اس ملک کے شہری ہیں اور ٹیکس دیتے ہیں۔ ہمارا بھی حق ہے کہ پولنگ سٹیشن جا کر اپنے پسندیدہ امیدوار کو ووٹ دیں لیکن پولنگ بوتھ تک ہماری رسائی کے لیے وہاں وہیل چیئرز ہوتی ہیں نہ ریمپ&nbsp; اور نہ ہی نابینا افراد کے لیے مدد گار کا انتظام ہوتا ہے۔ ایسے&nbsp; الیکشن ہوں یا نہ ہوں ہمارے لیے بے معنی ہیں&quot;۔

مشتاق حسین کا کہنا ہے کہ یہاں 75 برسوں سے ملک کی آدم شماری ہو رہی ہے مگر خصوصی آبادی&nbsp; کے درست اعداد و شمار بھی کسی ادارے کے پاس نہیں ہیں۔

خیبر پختونخوا میں معذور افرادکا ڈیٹا حاصل کرنے کے لیے محکمہ بہبود آبادی کو معلومات تک رسائی کے قانون کے تحت درخواست دی گئی جس کا اب تک جواب موصول نہیں ہوا ہے۔

ادارہ شماریات کی ویب سائٹ پر 2021ء تک کے نادرا سے موصول شدہ اعداد و شمار بتاتے ہیں کہ ملک میں خصوصی افراد کی تعداد تین لاکھ 71 ہزار 833 ہے۔

تاہم پاکستان میں سوشل پروٹیکشن سنٹر نامی تھنک ٹینک نادرا کے اعداد و شمار کو شک کی نظر سے دیکھتا ہے اور خصوصی افراد کا مکمل ڈیٹا جمع کرنے کی ضرورت پر زور دیتا ہے۔

نادرا کے مطابق پختونخوا میں خصوصی افراد کی تعداد ایک لاکھ 16 ہزار 491ہے جن میں ایک لاکھ ایک ہزار 625 شناختی کارڈ کے حامل ہیں۔ پنجاب میں خصوصی افراد کی تعداد ایک لاکھ 47 ہزار 539 ہے جن میں ایک لاکھ 27 ہزار 591&nbsp; شناختی کارڈ ہولڈرز ہیں۔

نادرا کے مطابق ملک میں بصارت کے محروم افراد کی تعداد 19 ہزار 643، قوت سماعت و گویائی&nbsp; سے محروم افرد (گونگے بہرے) کی تعداد 25 ہزار 183 اور جسمانی معذوری کا شکار&nbsp; خصوصی افراد دو لاکھ 95 ہزار 93 ہیں۔

شیخوپورہ کی شاہ کالونی کے رہائشی سید عطر عباس&nbsp; کی عمر&nbsp; 45 سال ہے۔ برسوں پہلے ایک حادثے میں ان کی ریڑھ کی ہڈی میں چوٹ آئی تھی تب سے وہ سیدھا کھڑے ہو سکتے ہیں نہ ہی گردن اٹھا کر سامنے دیکھ سکتے ہیں۔

وہ بتاتے کہ 2018ء میں وہ پولنگ سٹیشن پر پہنچے تھے تو قطار میں زمین پر بیٹھ کر اپنی باری کا انتظار کیا تھا اور رینگتے ہوئے سیڑھیاں چڑھ کر عملے تک پہنچے تھے۔ تب کہیں جا کر ووٹ کاسٹ کیا تھا۔

وہ کہتے ہیں کہ2021 ء کے ضمنی انتخاب میں پولنگ سٹیشن پر تعینات پولیس اہلکار نے&nbsp; انہیں زمین پر بیٹھے دیکھا تو لائن سے نکال کر نہ صرف انہیں سہارا دیا بلکہ ووٹ ڈالنے کے تمام مراحل میں بھی ان کی مدد کی تھی۔

&quot; اس وقت مجھے احساس ہوا کہ اگر الیکشن کمیشن ہر پولنگ سٹیشن پر خصوصی افراد کے لیے ایک مددگار تعینات کر دے تو ان کے لیے بہت سی آسانیاں میسر آ سکتی ہیں اور وہ&nbsp; کسی پریشانی کے بغیر اپنا ووٹ کاسٹ کر سکتے ہیں&quot;۔

مشتا ق حسین کہتے ہیں کہ خیبر پختونخوا کے خصوصی افرد میں سے 12ہزار افراد سپائنل کارڈ انجری ( ریڑھ کی ہڈی کی چوٹ)&nbsp; سے متاثر ہیں جن میں سے بیشتر بیساکھی یا وہیل چیئر استعمال کرتے ہیں۔ یہ&nbsp; صرف ریمپ کے ذریعے پولنگ بوتھ تک پہنچ سکتے ہیں لیکن پولنگ سٹیشنز سرکاری عمارتوں میں قائم کیے جاتے ہیں جہاں ریمپ ہوتے ہی نہیں۔

سینٹر فار پیس اینڈ ڈیویلپمنٹ انیشیوٹیو(سی پی ڈی آئی )کے زاہد عبداللہ خصوصی افراد کے لیے کام کرتے ہیں۔ وہ بتاتے ہیں کہ خصوصی افراد کی رسائی کے لیے سرکاری عمارتوں کا سروے شروع کیا گیا تھا جو تاحال مکمل نہیں ہو پایا ۔&nbsp;

وہ کہتے ہیں کہ پورے ملک میں سرکاری دفاتر یا نجی عمارتوں میں خصوصی افراد کے لیے کہیں ریمپس بنائے بھی گئے ہیں تو وہ بھی مقررہ معیار کے مطابق نہیں ہیں۔ سٹینڈرڈ کے مطابق اگر چڑھائی ایک فٹ ہو تو ریمپ کی لمبائی 12 فٹ ہونی چاہیے اور مقررہ معیار کے برعکس بنایا گیا ریمپ خصوصی افراد کے لیے خطرناک ثابت ہو سکتا ہے۔

ان کا کہنا تھا کہ ملک میں معذور افراد کے ووٹ ڈالنے میں بظاہر کوئی رکاوٹ نہیں ہے اور یہ لوگ&nbsp; اپنے ساتھ مدد گار کو بھی ساتھ لے جا سکتے ہیں۔ انہیں اکثر اوقات پولنگ افسر سہولت بھی دیتے ہیں لیکن مشکل تب زیادہ ہوتی ہے جب پولنگ بوتھ دوسری منزل پر ہو۔ 
شرقپور (شیخوپورہ) کے رہائشی فلک شیر گوگا اور ان کی 32 سالہ بہن دونوں کے ہاتھوں کی گرفت اتنا کمزور ہے کہ انتخابی نشان پر ٹھیک سے مہر نہیں لگا سکتے۔دونوں بہن بھائی صرف اسی وجہ سے ووٹ کاسٹ کرنے کا ارادہ نہیں رکھتے۔

گوگا کہتے ہیں کہ وہ ووٹ ڈالنا چاہتے ہیں لیکن اگر مدد گار میسر ہو تو انہیں ووٹ ڈالنے میں کوئی پریشانی نہیں ہو گی۔

حافظ آباد کے رہائشی خصوصی فرد محمد جاوید اعلیٰ تعلیم یافتہ ہیں اور ووٹ کے بغیر جمہوری عمل کو بے معنی سمجھتے ہیں۔ ان کا ماننا ہے کہ الیکشن کمیشن چند اقدامات کرے تو معذور افراد بھی پولنگ میں بھرپور حصہ لے سکتے ہیں۔

&nbsp;وہ کہتے ہیں کہ سماعت سے محروم افراد کے لیے اشاروں پر مبنی پوسٹر آویزاں کیے جانے چاہیئے۔

&quot;اگر یہ اقدا مات ممکن نہیں تو ہر شہر میں خصوصی افراد کے لیے ایک الگ پولنگ سٹیشن بنایا جا سکتا ہے یا انہیں ای ووٹنگ کی سہولت دے کر پولنگ سٹیشن پر&nbsp; آنے&nbsp; کی مشکلات سے بچایا جا سکتا ہے&quot;۔

پاکستان اقوام متحدہ کے کنونشن پر دستخط کر چکا ہے اور اس کنونشن کی آرٹیکل 29 اے&nbsp; کے تحت معذور افراد کو سیاست میں شامل کرنا ان کا اہم حق ہے لیکن ملک میں ایسا ہوتا نظر نہیں آ رہا۔

&nbsp;انتخابی قوانین (الیکشن ایکٹ 2017ء )کے مطابق بینائی سے محروم افراد اپنے ساتھ مددگار لا سکتے ہیں مگر یہاں زیادہ تر پولنگ عملہ قوانین سے لاعلم ہوتا ہے اور ایسے افراد کو&nbsp; امتحان میں ڈال دیتا ہے۔

خصوصی انتظامات سے متعلق الیکشن کمشنر خیبر پختونخوا شمشاد خان بتاتے ہیں کہ الیکشن کمیشن کی واضح ہدایات ہیں کہ تمام پولنگ سٹیشنز پر خصوصی افراد کے لیے پولنگ بوتھ گراونڈ فلور پر بنائے جائیں اور انہیں ریمپ کی سہولت مہیا کی جائے۔

ترجمان الیکشن کمشنر خیبر پختونخوا سہیل احمد کا کہنا تھا کہ&nbsp; انہیں نہیں معلوم کہ کتنے پولنگ سٹیشنز میں ریمپ نہیں اور معذور افراد کی رسائی کے لیے کتنے ریمپ بنائے گئے ہیں۔ تاہم عمومی ہدایات دی جاتی ہے کہ ان افراد کی پولنگ تک رسائی یقینی بنائی جائے۔

ان کا کہنا تھا کہ تمام ووٹروں کی آگاہی کے لیے الیکشن کمیشن کا ونگ کام کر رہا ہے جو مختلف جگہوں پر جا کر طلبا، شہریوں اور محروم طبقات کو ووٹ ڈالنے کے حوالے سے آگاہی دیتا ہے۔

&quot;معذور افراد کے لیے پوسٹل بیلٹ پیپر کی سہولت دسیتاب ہے۔ اگر وہ گھر بیٹھے ووٹ ڈالنا چاہیں تو یہ سہولت بروقت حاصل کر سکتے ہیں اس حوالے سے آگاہی دینا ہم سب کی ذمہ داری ہے اوریقیناً اس کی تشہیر بھی کی جانی چاہیے&quot;۔

<h2>معذور افراد اور سیاسی جماعتیں</h2>

تحریک انصاف کے مرکزی رہنما شوکت یوسفزئی کا کہنا تھا کہ معذور افراد&nbsp; کا&nbsp; گھر سے پولنگ سٹیشن اور پھر بوتھ تک پہنچنا بڑا مسئلہ ہوتا ہے۔ ایسے ووٹرز کو دنیا بھر میں مفت ٹرانسپورٹ فراہم&nbsp; کی جاتی ہے اور پاکستان میں بھی ایسا ہونا چاہیے۔

عوامی نیشنل پارٹی کی صوبائی ترجمان ثمر ہارون بلور بتاتی ہیں کہ ان کی پارٹی ہر کمزور کے ساتھ ہے اور پولنگ ڈے پر بھی ایسے ہر فرد تک پہنچنے کی کوشش کرے گی۔

مسلم لیگ (ن) خیبرپختونخوا خواتین ونگ کی صدر صوبیہ شاہد کہتی ہیں کہ ان کی کوشش ہوگی کہ ہر شہری&nbsp; کو ووٹ ڈالنے کی طرف راغب کریں اور پارٹی خصوصی افراد کے لیے ٹرانسپورٹ فراہم کرنے کے ساتھ بوتھ تک رسائی میں بھی مدد کرے گی۔

پنجاب امپاورمنٹ ڈس ایبل ایکٹ 2022ء کہتا ہے کہ معذور افراد کو سیاسی سرگرمی میں شامل ہونے اور&nbsp; پسند کے امیدوار کو ووٹ کرنے کا پورا حق&nbsp; ہے۔ اس ایکٹ میں پولنگ سٹیشنز پر معذور افراد کی آسانی کے لیے سہولیات فراہم کرنے کا ذکر بھی کیا گیا ہے &nbsp;

اس سلسلے میں ڈسٹرکٹ ریٹرننگ افسر شیخو پورہ ڈاکٹر وقار خان بتاتے ہیں کہ ضلع بھر کے تمام پولنگ سٹیشنوں پر معذور افراد کی آسانی کے لیے ریمپ موجود ہوں گے جس کے لیے متعلقہ حکام نے پولنگ سٹیشنوں کا دورہ کر کے جائزہ لیا ہے۔

&nbsp;ڈپٹی ڈائریکٹر سوشل ویلفیئر حافظ آباد کے اسسٹنٹ ثناء اللہ بتاتے ہیں کہ اس ضلعے میں رجسٹرڈ خصوصی افراد کی تعداد ساڑھے پانچ ہزار کے قریب ہے اور شیخوپورہ میں صرف چار ہزار رجسٹرڈ ہیں۔ تاہم بد قسمتی سے دیہی علاقوں میں مقیم خصوصی افراد رجسٹریشن کے عمل میں زیادہ دلچسپی رکھتے ہیں۔

عبدالصبور کاسی: پاکستان کے پہلے معذور شخص جو انتخابات میں حصہ لینے جا رہے ہیں

مجھے زمین پر رینگ کر پولنگ سٹیشن کے اندر جانا پڑا ، پولنگ سٹیشنوں پر خصوصی افراد کے ساتھ عمومی برتاؤ

text

نصرت حسین طوفان 48 سال سے چارسدہ میں صحافت کر رہے ہیں۔ وہ کئی بڑے قومی و علاقائی اخبارات سے منسلک رہ چکے ہیں اور تین نیوز چینلز کے ساتھ بھی کام کر چکے ہیں۔

وہ بتاتے ہیں کہ صحافتی ادارے اضلاع کی سطح پر کام کرنے والے نمائندوں کو نہ صرف تنخواہیں نہیں دیتے۔ بلکہ ان سے سکیورٹی کے نام پر بھاری رقم (زر ضمانت) بھی وصول کی جاتی ہے جو ادارہ چھوڑنے پر اکثر اوقات واپس نہیں کی جاتی۔

&quot;تمام صحافتی ادارے چاہے اشاعتی ہوں یا نشریاتی، علاقائی رپورٹرز کو صرف اپنا کام چلانے کے لیے خبر کی حد تک نمائندہ تسلیم کرتے ہیں۔ باقی کسی چیز کا خیال نہیں رکھتے، میرا ان کے ساتھ کام کا تجربہ نہایت مایوس کن رہا ہے۔&quot;

وہ کہتے ہیں کہ انہوں نے صحافت اور عوام کی خدمت میں عمر گزار دی۔ اب یہ پیشہ چھوڑ کر دوسری جگہ طبع آزمائی کرنا ان کے بس کی بات نہیں رہی۔

ملک بھر کی طرح خیبر پختونخوا میں رپورٹر، سب ایڈیٹر، اسائنمنٹ ایڈیٹر، کیمرہ مین اور فوٹو گرافر سمیت سیکڑوں صحافی اخبارات و ٹی وی چینلز کے لیے کام کرتے ہیں۔ مگر ان کی اکثریت حکومت کی مقرر کردہ کم از کم اجرت بھی وصول نہیں کر پاتی۔

بیشتر صحافی ویج بورڈ ایوارڈ کے تحت اعلان کردہ تنخواہوں سے محروم ہیں اور کسمپرسی کی زندگی گزار رہے ہیں۔

وفاقی حکومت پچھلے 50 سال میں آٹھ بار صحافیوں کی تنخواہوں سے متعلق ویج ایوارڈ(اجرت کے تعین) کا اعلان کر چکی ہے۔ مگر آج تک کسی ایک پر بھی پوری طرح عمل نہیں کرا پائی۔

نیوز پیپرز ایمپلائی کنڈیشن آف سروس ایکٹ 1973ء کے تحت اخباری ملازمین کی تنخواہوں کا تعین کرنے والا ادارہ &#39;ویج بورڈ&#39; کے نام سے تشکیل دیا گیا تھا جس میں حکومت ہائی کورٹ کے ریٹائرڈ جج یا اس کے برابر عہدے کا فرد بطور چیئرمین تعینات کرتی ہے۔

اس بورڈ میں اخباری مالکان اور کارکن صحافیوں(یونین ) کے نمائندوں کی مساوی تعداد شامل کی جاتی ہے۔ یہی ادارہ مہنگائی کی شرح کے حساب سے اخباری ملازمین کی تنخواہوں اور دیگر مراعات کا تعین کرتا ہے اور میڈیا ملازمین کے گریڈز یا مراتب کے مطابق تنخواہوں کا فارمولہ طے جاتا ہے۔

عامل صحافیوں کے لیے پہلے ویج بورڈ &#39;شرائط خدمات آرڈیننس&#39; کے تحت 1960ء میں تشکیل دیا گیا تھا۔ جس نے 31 دسمبر 1960ء کو ویج ایوارڈ کا اعلان کیا تھا۔

لیکن اخبار مالکان کی ناراضی سے بچنے کے لیے اس پر 13 سال عمل درآمد نہیں ہو سکا۔ 1973ء میں &#39;شرائط خدمات&#39; کا نیا قانون منظور ہوا۔ اگرچہ اس قانون پر بھی پوری طرح عمل نہیں ہوا تاہم اس کے تحت 1994ء تک ہر پانچ سال بعد ویج ایوارڈ آنے کا سلسلہ جاری رہا۔

جولائی 2000ء سے ساتویں ویج بورڈ ایوارڈ کا اعلان ہوا تو میڈیا مالکان (تب نجی چینلز آ چکے تھے) نے اسے قبول کرنے سے انکار کر دیا۔

اس عرصے میں سرکاری اور نجی شعبے کی تنخواہوں میں 400 سے 500 فیصد تک اضافہ ہو چکا تھا۔ مگر صحافیوں کی چھ سال پہلے مقرر کی جانے والی اجرت پر نظرثانی نہیں کی گئی۔

&nbsp;اسی دوران میڈیا ہاؤسز میں کارکنوں کی چھانٹی شروع کر دی گئی جس پر ملازمین اور صحافیوں نے ویج ایوارڈ پر عمل درآمد کی تحریک کا آغاز کر دیا۔

پرویز مشرف کی فوجی حکومت نے ایوارڈ نافذ کرانے کی کوشش کی لیکن اسے بھی میڈیا مالکان کے سامنے جھکنا پڑا۔

اسی اثناء میں میڈیا مالکان کی تنظیم آل پاکستان نیوز پیپرز سوسائٹی (اے پی این ایس) نے ساتویں ویج ایوارڈ کو سپریم کورٹ میں چیلنج کر دیا اور دعویٰ کیا کہ اخباری ملازمین (خدمت کی شرائط) ایکٹ 1973ء امتیازی قانون ہے اور اس کا مقصد آزادی صحافت کو دبانا ہے۔

حالانکہ ویج بورڈ ایوارڈ جیسے قانون پر بنگلہ دیش اور بھارت میں برسوں سے عمل ہو رہا تھا۔ مگر پاکستان میں مقدمے بازی شروع ہو چکی تھی۔

سپریم کورٹ کو اے پی این ایس کی پٹیشن خارج کرنے میں چار سال لگ گئے لیکن ساتھ ہی درخواست دہندہ سے یہ بھی کہا گیا کہ وہ چاہے تو &#39;قابل دائرہ اختیار عدالت&#39; میں جا سکتا ہے۔

اس فیصلے سے صحافیوں کی مشکلات کم نہیں ہوئیں۔ میڈیا مالکان سندھ ہائی کورٹ پہنچ گئے۔ جہاں یکے بعد دیگرے بنچ تبدیل ہوتے رہے اور کیس کی سماعت میں مزید پانچ سال لگے مگر فیصلہ نہیں سنایا گیا جس پر صحافیوں کو سپریم کورٹ جانا پڑا۔

عدالت عظمیٰ نے اگست 2009ء میں 90 دن میں کیس کا فیصلہ کرنے کی ہدایت کی لیکن سندھ ہائی کورٹ نے اس ہدایت پر عمل نہیں کیا۔

ستمبر 2010ء کو ہائی کورٹ نے فیصلہ محفوظ کرلیا تھا لیکن یہ فیصلہ 2011ء میں سنایا گیا۔ جس کو اخباری مالکان نے پھر سپریم کورٹ میں چیلنج کر دیا۔

میڈیا مالکان کی اس درخواست بازی کے باعث صحافی مالکان کی مرضی کی تنخواہوں پر کام کرنے پر مجبور رہے۔ 2018ء میں آٹھویں ویج ایوارڈ کا اعلان ہوا تو پھر چیئرمین کی تقرری کا تنازع شروع ہو گیا۔

یوں 2000ءسے 2019ء تک سرکاری ملازمین کی تنخواہوں میں 511 فیصد اضافہ ہو چکا تھا جبکہ میڈیا ہاؤسز نے اس دوران ویج ایوارڈ تو درکنار، کم سے کم اجرت کے قانون پر بھی عمل نہیں کیا۔

اب تک یہی صورت حال برقرار ہے۔

چھتیس سالہ صحافی سفیر احمد چترال کے رہائشی ہیں۔ وہ پشاور میں ایک نجی ٹی وی چینل سے بطور کاپی ایڈیٹر منسلک ہیں۔ انہوں نے پشاور یونیورسٹی سے ابلاغ عامہ میں ماسٹر ڈگری کرنے کے بعد 2007ء میں ریڈیو پاکستان سے اپنے صحافتی کیرئیر کا آغاز کیا تھا۔

سفیر احمد اسلام آباد میں روزنامہ دوپہر اور پشاور میں روزنامہ مشرق میں آٹھ سال بطور سب ایڈیٹر کام کرتے رہے۔ وہ بتاتے ہیں کہ ان پر خاندان کے پانچ افراد کی ذمہ داری ہے لیکن انہیں ادارے سے اتنی تنخواہ مل رہی ہے جو مزدور کی مقررہ کردہ کم سے کم ماہانہ اجرت سے بھی کم ہے۔

وہ کہتے ہیں کہ ویج بورڈ ایوارڈ کے مطابق ادارے سے تنخواہ یا مراعات ملنا تو بہت دور کی بات ہے۔ انہیں آج تک یہ بھی معلوم نہیں کہ وہ کس گریڈ میں کام کر رہے ہیں۔

&quot;اگر کہیں اور بہتر نوکری ملے تو صحافت کو خیرباد کہنے میں ایک سیکنڈ بھی نہیں لگاؤں گا۔ جہاں ملازمت کا تحفظ ہو نہ بہتر تنخواہ، اور دوسروں کے لیے آواز اُٹھانے والا اپنا حق بھی نہ مانگ سکے تو ایسا پیشہ چھوڑ دینا ہی بہتر ہے۔&quot;

سینئر صحافی اور خیبر یونین آف جرنلسٹس کے سابق صدر سیف الاسلام سیفی بتاتے ہیں کہ آٹھویں ویج ایوارڈ میں میڈیا ورکرز کو تنخواہوں میں پانچ ہزار سے ساڑھے آٹھ ہزار روپے کا عارضی ریلیف دیا گیا ہے۔ تاہم ان سفارشات پر بھی دو تین قومی اخبارات نے چند کارکنوں کی حد تک عمل کیا ہے۔

&quot;یہ ویج بورڈ ایوارڈ بھی صرف پرنٹ میڈیا کے لیے ہے۔ اس میں الیکٹرانک میڈیا کے صحافی شامل نہیں ہیں۔&quot;

ویج ایوارڈ پر عمل درآمد کے لیے نیوز پیپرز ایمپلائی کنڈیشن آف سروس ایکٹ 1973ء کے تحت محکمہ اطلاعات و تعلقات عامہ میں امپلیمنٹیشن ٹریبونل آف نیوز پیپر ایمپلائیز (آئی ٹی این ای ) کے نام سے ٹربیونل قائم کیا گیا ہے جس کا صدر دفتر اسلام آباد میں ہے۔

اس ٹربیونل میں اخباری اداروں سے وابستہ افراد ویج ایوارڈ کے مطابق تنخواہیں نہ ملنے کی شکایت کر سکتے ہیں۔

درخواست کی سماعت چیئرمین آئی ٹی این ای کرتے ہیں۔ وہ فیصلے پر عمل کرانے کے لیے ریونیو ایکٹ کے استعمال کا اختیار بھی رکھتے ہیں۔

سیف الاسلام سیفی کہتے ہیں کہ عمل درآمد میں بھی شدید مسائل ہیں ۔ایک تو آئی ٹی این ای میں بھی درجنوں کیسز مدتوں سے زیر التوا ہیں۔ دوسرے اخباری کارکن اپنے تقرر نامہ (اپائنٹمنٹ لیٹر) کے بغیر کسی ادارے کے خلاف آئی ٹی این ای میں درخواست دائر نہیں کرسکتا۔

&quot;یعنی تقررنامے کے بغیر آپ ادارے کے ملازم نہیں ہیں۔ اس کے خلاف آپ کا دعویٰ ہی نہیں بنتا۔ اس لیے اکثر صحافتی ادارے اپنے دفاتر یا اضلاع میں کام کرنے والے نمائندوں کو تقرر نامے جاری نہیں کرتے۔ جو لیٹر ہمیں ملتے ہیں وہ ان کی جانب سے بنائی گئی متبادل کمپنیوں کے ہوتے ہیں یعنی ان میں ادارے کا نام نہیں ہوتا۔&quot;

خیبر پختونخوا میں صحافیوں کی نمائندہ تنظیم خیبر یونین آف جرنلسٹ کے صدر ناصر حسین بتاتے ہیں کہ اب تک بارہواں ایوارڈ آ جانا چاہیے تھا لیکن آخری ویج ایوارڈ کو چار سال ہو چکے ہیں۔ اس کے بعد خاموشی ہے۔

&quot;چار سال بعد مہنگائی کتنا بڑھ چکی ہے اس کی کسی کو پروا نہیں۔ ایوارڈ پر عمل درآمد کی حالت یہ ہے کہ خیبر یونین کے 600 ممبران میں سے تین اخبارات (روزنامہ جنگ، ڈیلی دی نیوز اور ڈیلی ڈان ) کے بمشکل پانچ یا چھ افراد کو ویج بورڈ کے مطابق تنخواہیں مل رہی ہیں۔&quot;

وہ کہتے ہیں کہ نئے پیمرا ترمیمی ایکٹ کے تحت اسلام آباد اور صوبائی دارالحکومتوں میں کونسل آف کمپلینٹ قائم کی جائے گی جہاں الیکٹرانک میڈیا کے کارکن تنخواہوں میں تاخیر یا نہ ملنے کی صورت میں شکایات کر سکیں گے۔

&quot; جب میڈیا کارکنوں کی آمدنی دہاڑی دار مزدور کے برابر بھی نہ ہو، تنخواہیں دینے میں لیت و لعل سے کام لیا جاتا ہو اور کئی کئی ماہ کے واجبات بقایا ہوں۔ ایسے میں ویج ایوارڈ کے برائے نام اعلان کا کوئی فائدہ نہیں، اس پر عمل کرانا ہو گا۔&quot;

ایسوسی ایٹڈ ممبر اے پی این ایس اور روزنامہ آئین پشاور کے چیف ایڈیٹر راحت اللہ خان بتاتے ہیں کہ اخبارات کی آمدنی کا انحصار اشتہارات اور بزنس پر ہوتا ہے۔ اس لیے بڑے ادارے تو ویج بورڈ کے مطابق تنخواہیں دے سکتے ہیں لیکن چھوٹے اخبارات کے لیے یہ مشکل ہے۔

وہ کہتے ہیں کہ کارکنوں کی تنخواہوں میں حکومت تعاون نہیں کر رہی۔ سرکاری اشتہارات کے چیک مہینوں بعد موصول ہوتے ہیں جو سابقہ اخراجات میں چلے جاتے ہیں۔ جس کی وجہ سے ورکروں کو تنخواہیں جیب سے دینا پڑتی ہیں۔

ڈیلی ٹائمز پشاور کے ایڈیٹر انچیف فضل الحق کا کہنا ہے کہ اس وقت حالات انتہائی خراب ہیں۔ اشتہارات بہت کم اور سرکولیشن نہ ہونے کے برابر ہے، اس لیے تنخواہیں میں ویج بورڈ کے سفارشات پر عملدرآمد مشکل ہے۔

&quot;علاقائی نمائندوں کو اشتہارات میں 50 فیصد کمیشن دیا جاتا ہے۔ جسے ہم ان کی تنخواہ میں شمار کر لیتے ہیں کیونکہ انہیں تنخواہیں دینا ہمارے بس کی بات نہیں ہے۔&quot;

لوک سجاگ نے ویج بورڈ ایوارڈ یا کم از کم اجرت کے حوالے سے آر ٹی آئی قانون کے تحت صوبائی محکمہ لیبر سے معلومات لینے کی کوشش کی۔ لیکن انہوں نے &quot;یہ وفاق کا معاملہ ہے&quot; کہہ کر جان چھڑالی&nbsp; جبکہ وفاقی سیکرٹری لیبر نے آر ٹی آئی کے تحت دی گئی درخواست کا تاحال جواب نہیں دیا ہے۔

خیبر پختونخوا کے محکمہ اطلاعات نے آر ٹی آئی کے تحت درخواست کے جواب میں خیبر یونین آف جرنلسٹس اور پشاور پریس کلب سے رجوع کرنے کا مشورہ دے کر خود کو بری الذمہ کر لیا&nbsp; جبکہ پریس انفارمیشن ڈیپارٹمنٹ ( پی آئی ڈی) نےایک ماہ گزرنے کے باوجود جواب دینے کی زحمت گوارا نہیں کی ہے۔

'ہم زندگی نہیں گزار رہے، زندگی ہمیں گزار رہی ہے'، بلوچستان میں سیکڑوں صحافی بغیر تنخواہ کام کرنے پر مجبور

"کہیں اور نوکری ملے تو صحافت کو چھوڑنے میں ایک سیکنڈ بھی نہ لگاؤں"

باجوڑ کے صحافی ابراہیم خان کو&nbsp; 15 برس قبل نامعلوم افراد نے قتل کر دیا تھا۔ اس وقت کو یاد کرتے ہوئے ان کے بیٹے عمران خان بتاتے ہیں کہ &quot;22 مئی 2008ء کو شام پانچ بجے ان کے چچا نے انہیں فون پر کہا کہ ان کا بیٹا یعنی میرا چچا زاد بھائی دھماکے میں شدید زخمی ہوا ہے اور میں فوراً گاؤں پہنچوں۔ گھر پہنچا تو معلوم ہوا کہ حادثہ میرے چچازاد کو پیش نہیں آیا تھا بلکہ میرے والد کو مجھ سے چھین لیا گیا تھا۔ انہیں کئی بار دھمکیاں دی جا چکی تھیں۔&quot;

انہوں نے بتایا کہ والد کے وفات کے بعد تمام بڑی سیاسی جماعتوں کے سربراہوں نے فون پر تعزیت کی اور تعاون کی یقین دہانیاں کرائیں۔ اس وقت یہ علاقہ وفاقی حکومت کے زیر انتظام تھا اس لیے اسلام آباد سے 15 لاکھ روپے کا چیک دیا گیا۔ پانچ لاکھ روپے وزیر اعلیٰ پنجاب شہباز شریف نے جبکہ 10 لاکھ روپے اس ادارے نے دیے جس میں والد ملازمت کرتے تھے۔ ان اقداامت سے وقتی ریلیف ضرور ملا لیکن والد کی شفقت سے محرومی کا مداوا تو نہیں ہو سکتا تھا۔

&quot;والد کی ناگہانی موت کے بعد میری بڑی بہن ذہنی مریضہ بن گئی۔ مجھے ایک بار اغوا کیا گیا۔ گھر پر ہینڈ گرنیڈ سے حملہ ہوا جس میں میری والدہ سمیت گھر کے آٹھ افراد زخمی ہوئے۔&quot;

وہ کہتے ہیں کہ اتنے سال گزرنے کے باوجود انہیں اپنے والد کے قاتلوں کا پتہ نہیں چلا۔ والد کے ادارے کا انہیں ضلع باجوڑ سے نمائندگی دینے کا وعدہ بھی ایفا کا منتظر ہے۔

عمران خان نے اس خواہش کا اظہار کیا کہ ان کے والد سمیت جتنے بھی صحافی دہشت گردی کا نشانہ بنے، انہیں سول یا عسکری اداروں کے شہدا کی طرح شہدا پیکج دیا جائے۔

ابراہیم خان کی طرح خیبر پختونخوا، بالخصوص ضم شدہ قبائلی علاقوں میں دہشت گردی کی جنگ میں کئی صحافی فرائض کی انجام دہی کے دوران قتل کیے گئے۔ ایسے واقعات میں اپنے کئی دوست کھونے والے سینئر صحافی شمیم شاہد کہتے ہیں کہ خیبر پختونخوا اور قبائلی علاقوں کے صحافیوں کے قتل کا موجودہ سلسلہ سوات منگلور کے استاد اور صحافی فضل وہاب کو 2003ء میں قتل کرنے سے شروع ہوا۔ اس کے بعد وزیرستان کے اللہ نور وزیر کو جرگہ سے واپسی پر نشانہ بنایا گیا۔

پانچ ستمبر 2005ء کو وزیرستان کے ایک اور صحافی حیات اللہ خان کو نامعلوم افراد نے اغوا کیا جو چھ ماہ تک لاپتہ رہے۔ اہل خانہ کو نہ حکومت اور نہ ہی شدت پسند تنظیموں کی جانب سے ان کے بارے میں کوئی معلومات فراہم کی گئیں۔ 16جون 2006ء کو ٹیلی فون کال پر ان کے گھر والوں کو بتایا گیا کہ حیات اللہ کی لاش میر علی بازار میں پڑی ہوئی ہے۔

انہوں نے بتایا &quot;ستمبر 2001ء سے 2023ء تک خیبر پختونخوا اور سابقہ قبائلی علاقوں کے 54 صحافی جان کی بازی ہار چکے ہیں۔ ان میں بیشتر کے خاندانوں کو اگر کوئی ریلیف ملا ہے تو صحافیوں کی کوششوں سے۔&quot;

وہ کہتے ہیں کہ حیات اللہ خان کی شہادت کے بعد پشاور ہائی کورٹ سے جوڈیشل انکوائری بھی کرائی گئی لیکن اس کی رپورٹ ابھی تک سربمہر ہے۔

&nbsp;حیات اللہ خان کے بھائی احسان اللہ خان کہتے ہیں کہ ان کی شہادت کے بعد تین انکوائری کمیشن بنے لیکن ایک کی بھی رپورٹ جاری نہیں کی گئی۔

&quot;سپریم کورٹ کی سربراہی میں پشاور ہائی کورٹ میں کمیشن بنایا گیا جس میں ہمارے خاندان کے افراد کے انٹرویو بھی کیے گئے۔ حیات اللہ خان کی بیوہ نے تفصیل انکوائری کمیشن کے گوش گزار کی جس کے بعد انہیں بھی دھمکیاں ملنا شروع ہو گئیں۔

برطانوی نشریاتی ادارے بی بی سی کو انٹرویو میں بھی انہوں نے کھل کر حیات اللہ خان کے اغوا اور شہادت کے حوالے سے بات کی جس کے بعد ہمارے گھر میں 17 نومبر 2007ء کو بم دھماکہ کیا گیا اس کے نتیجے میں حیات اللہ خان کی بیوہ بھی شہید ہو گئیں اور ان کے بچے باپ کے بعد ماں کے سائے سے بھی محروم ہو گئے۔&quot;

سینئر صحافی عارف یوسف زئی کہتے ہیں کہ فرائض کی انجام دہی کے دوران شہید ہونے پر سول اور فوجی ادارے تمغوں اور اعزازات سے نوازتے اور ان کے اہل خانہ کو نقد امداد دیتے ہیں۔ صحافی اگر کام کے دوران شہید ہو جائے تو کوئی پوچھنے والا نہیں ہوتا۔حکومت کے ساتھ صحافی تنظیموں کا فرض ہے کہ شہید صحافیوں کے خاندان کی معاونت کریں۔

خیبر پختونخوا میں صحافیوں کی بڑی تنظیم خیبر یونین آف جرنلسٹ کے صدر ناصر حسین کہتے ہیں کہ یونین کی کوششوں سے صوبائی حکومت نے 2015/16ء میں صحافیوں کے لیے 10 لاکھ روپے شہید پیکج کا اعلان&nbsp; کیا تھا لیکن آج تک کسی بھی صحافی کے خاندان کو اس کی رقم نہیں ملی۔ &quot;پاکستان فیڈرل یونین آف جرنلسٹس ہو یا خیبر یونین آف جرنلسٹس، ہم نے ہر دور میں صحافیوں پر ہونے والے مظالم کے خلاف آواز بلند کی ہے۔&quot;

انہوں نے کہا کہ دہشت گردی کے خلاف جنگ کے دوران بم دھماکوں میں صحافیوں کو ہدف بنایا گیا اور وہ شہید ہوئے۔ یونین کی کوششوں سے قومی اسمبلی سے پروٹیکشن آف جرنلسٹس اینڈ میڈیا پروفیشنلز بل پاس کرایا گیا ہے جس کے تحت کمیشن فار دی پروٹیکشن آف جرنلسٹس اینڈ میڈیا پروفیشنلز وجود میں آنا ہے لیکن تاحال اس پر عمل درآمد نہیں ہو سکا جس کے لیے یونین کی تگ و دو جاری ہے۔

&quot;خیبر پختونخوا خوا پروٹیکشن آف جرنلسٹس اینڈ میڈیا پریکٹیشنرز بل 2021ء پیپلز پارٹی کی خاتون رکن اسمبلی کی جانب سے صوبائی اسمبلی کے سیکرٹریٹ میں جمع کیا گیا ہے، لیکن یہ تاحال اسمبلی سے پاس نہیں ہوا۔&quot;

اس بل میں کے پی کے حکومت کو آئین کے آرٹیکل 19 کے تحت صحافی اور میڈیا پریکٹیشنر کی جان اور مال کے تحفظ کے حق کو یقینی بنانے کے لیے عملی اقدامات اٹھانے کا کہا گیا ہے تاکہ ان کی غیر جانبداری، تحفظ اور اظہار رائے کی آزادی کا فروغ ممکن بنایا جا سکے۔

ناصر حسین کے مطابق صحافیوں کے خاندانوں کی خبر گیری اور کفالت کے لیے صحافتی تنظیموں کی جانب سے کوئی فنڈ قائم نہیں کیا گیا۔

صحافیوں کی بین الاقوامی تنظیم رپورٹر ود آؤٹ بارڈرز کے مطابق پاکستان صحافیوں کے لیے خطرناک ترین ممالک میں پانچویں نمبر پر ہے۔ رپورٹ کے مطابق 2003ء سے اب تک پاکستان میں 93 صحافیوں کو قتل کیا جا چکا ہے۔

'میں کس کے ہاتھ پہ اپنا لہو تلاش کروں'، بلوچستان میں 16 سال میں 41 صحافی نامعلوم ہاتھوں کی گولیوں کا نشانہ بن گئے

خیبرپختونخوا میں فرائض کی انجام دہی کے دوران قتل کیے جانے والے صحافیوں کے اہلخانہ انصاف اور مدد کے منتظر

خیبر پختونخوا کا معلومات تک رسائی کا قانون ہر گزرتے دن کے ساتھ بے اثر ہوتا جا رہا ہے۔ 2013 میں آئین کے آرٹیکل 19 اے کے تحت صوبے کے تمام سرکاری اداروں کو عوام کے سامنے جوابدہ بنانے اور معلومات کے حصول کیلئے خیبر پختونخوا رائیٹ ٹو انفارمیشن ایکٹ 2013 کے نام سے قانون تو اسمبلی سے پاس کرالیا گیا تھا لیکن اس پر مؤثر عمل درآمد تاحال یقینی نہیں بنایا جا سکا۔

سال 2013 میں قانون بنایا گیا اور ایکٹ کے سیکشن 24 کے تحت 120 دنوں میں انفارمیشن کمیشن کا قیام عمل میں لایا گیا ۔تاہم دس سال کا عرصہ گزرنے کے باوجود بھی عوام اس کے ثمرات سے مستفید نہیں ہو سکے۔

عام شہری تو درکنار صحافیوں کیلئے بھی اس قانون کے تحت معلومات کا حصول انتہائی مشکل بنایا گیا ہے۔

پشاور سے تعلق رکھنے والے سینئر صحافی عزیز بونیری کہتے ہیں کہ آر ٹی آئی کے تحت حاصل معلومات اور اپنے ذرائع سے حاصل کردہ معلومات میں زمین و آسمان کا فرق ہوتا ہے۔ آر ٹی آئی درخواست کے جواب میں بیشتر سرکاری ادارے غلط بیانی سے کام لیتے ہیں۔

&quot;اس قانون کے نفاذ کے بعد میں اب تک مختلف سرکاری اداروں میں سیکڑوں درخواستیں جمع کرا چکا ہوں تاہم وہاں سے ملنے والے جوابات کا تناسب بہت کم ہے۔ زیادہ تر سرکاری محکمے دس دن کے اندر جواب نہیں دیتے جن کے خلاف مجبوراً انفارمیشن کمیشن میں شکایت درج کرائی جاتی ہے لیکن انفارمیشن کمیشن شکایت پر سماعت کی بجائے صرف نوٹس لیتا ہے۔ ایسے کیسز بھی ہیں جن میں محکموں سے معلومات لے کر درخواست گزار کو فراہم کرنے کے بجائے ان پر &#39;مفاہمت&#39; کے لیے دباؤ ڈالا جاتا ہے۔&quot;

عزیز بونیری نے بتایا کہ انہوں نے بینک آف خیبر کے بارے میں کچھ معلومات لینے کے لیے چھ ماہ پہلے درخواست دی تھی جس کا جواب تاحال نہیں آیا۔ ان کے بقول انفارمیشن کمیشن کی جانب سے ان پر دباؤ ڈالا جا رہا ہے کہ وہ اپنے درخواست سے دست بردار ہو جائیں۔

&quot;اگر چھ ماہ میں ایک صحافی بھی معلومات حاصل نہیں کر سکتا تو عام شہریوں کا کیا حال ہو گا ۔انفارمیشن کمیشن اس وقت صوبائی خزانے پر اضافی بوجھ کے علاوہ کچھ نہیں۔&quot;

معلومات تک رسائی قانون کے صوبائی قانون کے مطابق اگر کوئی ادارہ کسی شہری کے درخواست پر دس دنوں میں معلومات فراہم نہیں کرتا تو اس محکمے کے خلاف انفارمیشن کمیشن میں شکایت درج کی جاتی ہے۔ انفارمیشن کمیشن کا کام 60 دنوں میں شکایت پر فیصلہ کرنا ہوتا ہے جس میں متعلقہ ادارے سے معلومات لے کر شہری کو فراہم کرنا اور محکمے پر قانون کی مطابق جرمانہ عائد کرنا ہے۔

لیکن صوبے میں یہ شکایت عام ہے کہ بعض محکمے مسلسل معلومات چھپانے کے مرتکب ہو رہے ہیں لیکن ان کے خلاف کوئی کارروائی نہیں کی جا رہی۔

انفارمیشن کمیشن سے آر ٹی آئی درخواست کے ذریعے حاصل کردہ معلومات کے مطابق 2013 سے اب تک 24548 شہریوں نے معلومات کے حصول کے لیے درخواستیں دی ہیں جن میں 13398 درخواست گزاروں کو معلومات فراہم کر دی گئیں۔ انفارمیشن کمیشن کو 10427 شکایات موصول ہوئیں جن میں 8813کو حل کر لیا&nbsp; گیا جبکہ 1568شکایات حل طلب ہیں۔

موصولہ دس ہزار سے زیادہ شکایات میں سے صرف 20 پر ہی محکموں کے سربراہان یا پی آئی اوز کو جرمانہ کیا گیا ہے ۔شکایات پر زیادہ تر سماعتیں 2015 میں ہوئیں جن میں سے چھ پر جرمانے عائد ہوئے جبکہ&nbsp; 2018 میں سات محکموں پر جرمانے عائد کیے گئے ۔2016 میں چار، 2017 میں دو اور 2020 میں ایک محکمے کو معلومات نہ دینے پر جرمانہ کیا گیا۔

اس حوالے سے ماہر قانون شبیر حسین گگیانی کہتے ہیں کہ آر ٹی آئی کا قانون بہت اچھا ہے لیکن اس کو استعمال کیسے کیا جائے عوام کو یہ آگاہی دینا حکومت اور انفارمیشن کمیشن کا کام ہے تاہم اس حوالے سے دس سالوں میں کوئی خاطر خواہ اقدام&nbsp; نہیں اُٹھایا گیا۔

انہوں نے اس ایکٹ میں کئی خامیوں کی طرف بھی اشارہ کیا جیسا کہ اگر کسی سائل کی درخواست پر متعلقہ محکمے کے خلاف کاروائی نہیں کی جاتی یا کارروائی سے درخواست گزار کی شکایت دور نہیں ہوتی تو ایسا کوئی فورم نہیں ہے جہاں اس کے خلاف اپیل کی جاسکے۔ شکایات کی سماعت کے حوالے سے وہی تاریخ پر تاریخ کا پرانا طریقہ کار رائج ہے۔

&quot;اس قانون کے تحت معلومات کے حصول کا طریقہ کار انتہائی پیچیدہ ہے۔ اس نوعیت کے قوانین کے لیے ضلع کی سطح پر تمام اداروں میں ون ونڈو آپریشن کی سہولت ہونی چاہئے تھی۔پیچیدہ طریقہ کار اور تاریخوں میں الجھنے کی وجہ سے تو عام لوگ عدالتوں تک کا رخ نہیں کرتے، معلومات تک رسائی کیلئے آر ٹی آئی درخواست کیسے فائل کریں گے۔&quot;

یہی نہیں بلکہ اس قانون پر عملدرآمد بھی نہ ہونے کے برابر ہے۔ اگر مختلف محکموں سے معلومات مانگنے والے ہزاروں درخواست گزار جواب کے منتظر ہیں، تو دوسری طرف انفارمیشن کمیشن کے کمشنروں کا کورم پورا نہ ہونے کی وجہ سے بھی سینکڑوں شہریوں کی شکایات زیر التوا ہیں۔

اس حوالے سے انفارمیشن کمیشن کے ڈپٹی ڈائریکٹر کمیونیکیشن سید سعادت جہاں سے بات کی گئی تو انہوں نے بتایا کہ کورم پورا نہ ہونے کی وجہ سے اس وقت محکمے کے پاس 1500 سے زیادہ درخواستیں زیر التواءہیں جن پر فیصلہ ہونا باقی ہے۔

کمشنر کی تعیناتی محکمہ اطلاعات کے ذریعے وزیراعلیٰ کی اجازت سے کی جاتی ہے جس کیلئے کئی خط اور یاد دہانیاں محکمہ اطلاعات کو بھجوائی جا چکی ہیں، تاہم ابھی تک کمشنروں کی تعیناتی عمل میں نہیں لائی گئی جس کی وجہ سے مسائل کا سامنا ہے۔

جب نگران وزیر اطلاعات بیرسٹر فیروز جمال شاہ کی توجہ اس طرف مبذول کرائی گئی تو انہوں نے بتایا کہ کمشنر کی تعیناتی کے لیے ان کی سربراہی میں کمیٹی کی بیٹھک ہوچکی ہے۔ نام فائنل کرکے الیکشن کمیشن کو بھی بھجوائے جاچکے ہیں جن کی اجازت کے بعد وزیر اعلیٰ کمشنر کی تعیناتی کا اعلامیہ جاری کریں گے۔

بیرسٹر فیروز جمال کا کہنا تھا کہ نگراں حکومت شفافیت یقینی بنانا چاہتی ہے اور آر ٹی آئی کے ذریعے عوام براہ راست مختلف محکموں سے جواب طلبی اور معلومات حاصل کرسکتے ہیں۔ کسی محکمے کو جواب دہ بنانے کےلئے انفارمیشن کمیشن کی کمشنر کی تعیناتی بہت اہم تھی، جس پر کام ہوچکا ہے۔

الیکشن کمیشن کی اجازت اور نگران وزیر اعلیٰ کی جانب سے نام کی منظوری میں کتنا وقت لگے گا اس حوالے سے کچھ کہنا قبل از وقت ہے تاہم صرف کمشنرز کی تعیناتی سے مسئلہ حل ہونا ممکن نہیں۔ اس کیلئے تمام اداروں کو جوابدہ کرنے کے ساتھ طریقہ کار کو آسان بنانا اور عوام میں بھر پور آگاہی کیلئے کام کرنا ہوگا تاکہ اس قانون کے ثمرات سے عوام پوری طرح مستفید ہوسکیں۔

خیبر پختونخوا کا بلدیاتی نظام کیوں مفلوج ہو کر رہ گیا ہے؟

'چارہ گر کو چارہ گری سے گریز ہے'، خیبرپختونخوا میں معلومات کی فراہمی کا ذمہ دار محکمہ معلومات دینے سے گریزاں

پشاور میں جی ٹی روڈ پر ترناب کا علاقہ صوبے میں شہد کی سب سے بڑی منڈی سمجھا جاتا ہے۔ یہاں سے ناصرف خیبرپختونخوا بلکہ ملک کے دوسرے حصوں کو اور بیرون ملک بھی شہد سپلائی ہوتا ہے اور ملک بھر سے لوگ شہد خریدنے یہاں آتے ہیں۔

لیکن ان دنوں اس منڈی میں شہد زیادہ اور اس کے خریدار کم ہو گئے ہیں۔

شہد کی مکھیاں پالنے اور شہد کا کاروبار کرنے والے تاجروں کی تنظیم ہنی بی کیپرز اینڈ ٹریڈرز ایسوسی ایشن کے نائب صدر شیخ گل باچا بتاتے ہیں کہ ہر دکان دار کے پاس کئی من شہد پڑا ہے جس کے خریدار نہیں ہیں۔ ایک وقت تھا کہ اس مارکیٹ سے شہد کے سات سو کنٹینر خلیجی ممالک کو برآمد کئے جاتے تھے جن کی تعداد اب کم ہو کر 150 رہ گئی ہے۔

شیخ گل باچا کہتے ہیں کہ اس کاروبار سے وابستہ لوگوں کو کئی طرح کی مشکلات درپیش ہیں۔

شہد کی مکھیوں کی فارمنگ (مگس بانی) لاگت میں اضافے، غیر سازگار ماحول، موسمیاتی تبدیلی اور جدید طریقوں کے عدم استعمال کے باعث اس قدر متاثر ہو چکی ہے کہ تاجر اس کاروبار سے سرمایہ نکالنے لگے ہیں۔

ان کا کہنا ہے کہ اب مکھیوں کے فارم کو ایک سے دوسری جگہ منتقل کرتے ہوئے گاڑیوں کے کرایوں کی مد میں ہی بہت بڑی رقم خرچ ہو جاتی ہے۔ راستوں میں پولیس بھی مگس بانوں کو حیلے بہانوں سے تنگ کرتی ہے۔

&quot;ماضی میں موسم گرما میں اکثر مگس بان، جن کا تعلق افغانستان سے ہے، مکھیوں کو خیبرپختونخوا سے ملحقہ افغان علاقوں میں منتقل کر دیتے تھے۔ اب سرحد پر سختی بڑھ گئی ہے اور مگس بانوں کو ویزے کے حصول میں بھی دشواری ہوتی ہے۔&quot;

<h2>پاکستان میں شہد کے کاروبار کا حجم</h2>

پاکستان بالخصوص خیبرپختونخوا میں مگس بانی کو افغان مہاجرین کی آمد کے بعد فروغ ملا۔ اقوام متحدہ کے ادارہ برائے مہاجرین (یو این ایچ سی آر) کے توسط سے ان مہاجرین کو شہد کی مکھیاں اور انہیں پالنے کے ڈبے دیے گئے اور اس سلسلے میں تربیت بھی فراہم کی گئی۔ جب ان مہاجرین نے شہد کا کاروبار شروع کیا تو ان کی دیکھا دیکھی مقامی لوگوں نے بھی اسے اپنا لیا۔

اس طرح پاکستان جو 1990ء تک شہد درآمد کرتا تھا چند ہی برس میں شہد برآمد کرنے والا ملک بن گیا۔اندازے کے مطابق ملک میں شہد کے کاروبار سے 16 لاکھ افراد وابستہ ہیں۔ ان میں 55 فیصد افغان مہاجرین ہیں۔ پاکستان میں بنائے جانے والے شہد کی بہت سی اقسام ہیں جن میں بعض اپنے اعلیٰ معیار کی بنا پر دنیا بھر میں مشہور ہیں۔

125 من شہد کی فروخت کے لیے ترناب مارکیٹ میں بیٹھے رحمت اللہ کا کہنا ہے کہ بہت سی کوششوں کے باوجود کوئی بیوپاری ان سے شہد لینے کو تیار نہیں۔

وہ کہتے ہیں کہ ان کا فارم لاہور میں واہگہ بارڈرکے قریب ہے جسے وہ ناران کاغان منتقل کرنا چاہتے ہیں لیکن وہ اس مقصد کے لئے درکار اخراجات کرنے کی سکت نہیں رکھتے۔ اگر فارم کو بروقت منتقل نہ کیا گیا تو موسم کی شدت سے مکھیاں مر جائیں گی اور ان کا سارا کاروبار ختم ہوجائے گا۔

رحمت اللہ خان کا کہنا ہے کہ ان کے کاروبار کو زوال کا سامنا ہے اور اس کی ایک بڑی وجہ جعلی شہد ہے جو اب مارکیٹ میں عام ملتا ہے۔ رہی سہی کسر متواتر موسمی تبدیلی پورا کر رہی ہے جس سے کاروبار ٹھپ ہو کر رہ گیا ہے۔

ترناب میہں ایگریکلچر ریسرچ انسٹی ٹیوٹ کے ذیلی ادارے اینٹامالوجی ڈیپارٹمنٹ کے پرنسپل ریسرچ آفیسر محمد یونس نے بتایا کہ پھلوں اور سبزیوں کی بار آوری کے لیے بھی شہد کی مکھیوں کی موجودگی لازمی ہوتی ہے۔ خیبر پختون خوا میں ان مکھیوں کی تین اقسام میں ایف ایس سیرانا، ایف ایس ڈائرک سیٹا، فلوریا اور آسٹریلیا سے منگوائی گئی ایف ایس ملپرا شامل ہیں۔ لیکن اب اس میں دو اقسام ناپید ہو رہی ہیں۔ اس سے شہد کے پیداوار متاثر ہوئی ہے۔

اس کا سبب وہ موسمیاتی تبدیلی اور فصلوں پر کیڑے مار زہر کے بے تحاشا کو استعمال قرار دیتے ہیں۔ اس کے علاوہ ان کا کہنا ہے کہ شور کی آلودگی بھی شہد کی مکھیوں کے&nbsp; لیے خطرہ ہوتی ہے اور انہی وجوہات کی بنا پر ملک میں پیدا ہونے والا 20 اقسام کا شہد اب 10 تک اقسام تک محدود ہو گیا ہے۔

ترناب کے رہائشی حاجی طاہر شاہ بھی کئی دہائیوں سے مگس بانی سے وابستہ ہیں۔ اب وہ کوئی دوسرا کاروبار شروع کرنے کا سوچ رہے ہیں کیونکہ پیداوار میں کمی اور اخراجات میں اضافے کے باعث ان کے لیے شہد کا کاروبار منافع بخش نہیں رہا۔

ان کا کہنا ہے کہ پہلے مکھیوں کے جن ڈبوں سے 25 کلو تک شہد حاصل ہوتا تھا اب ان سے 15 کلو تک بمشکل مل رہا ہے۔

&quot;ہمارے شہد کے لیے خلیجی ممالک کی منڈی بہت وسیع اور منافع بخش تھی لیکن اب وہاں چین اور انڈیا نے قبضہ کر لیا ہے۔ یہ ممالک شہد کے علاوہ ان منڈیوں میں مکھیوں کا زہر، رائل جیلی، ویکس، پولن اور نقلی سریش فراہم کر کے بھی کثیر زرمبادلہ کماتے ہیں جبکہ ہمارے ہاں مکھیوں سے یہ پانچ چیزیں حاصل کرنے کے لئے درکار ٹیکنالوجی نہیں ہے۔ علاوہ ازیں بڑی منڈی ہونے کے باوجود انٹرنیشنل سٹینڈرڈز سرٹیفکیشن نہ ہونے کی وجہ سے پاکستان کا شہد یورپ کی منڈی میں برآمد نہیں ہو سکتا۔

ہنی بی کپیر اینڈ ٹریڈرز ایسوسی ایشن کے جنرل سیکریٹری شیر زمان مومند کہتے ہیں کہ ایک ایسی لیبارٹری کی ضرورت ہے جو شہد جانچنے کا عمل ایک چھت کی نیچے مکمل کر کے بین الاقوامی معیار سے متعلق سرٹیفکیٹ مہیا کرے۔ یوں اس شہد کو دنیا کے کونے کونے تک پہنچایا جا سکتا ہے۔&quot;

وہ حکومت سے یہ مطالبہ بھی کرتے ہیں کہ شہد کے مکھیوں کے عالمی دن پر شہد کی نمائش کا انعقاد کیا جائے۔ اس طرح ملکی و غیر ملکی تاجروں میں منفرد خصوصیات کے حامل مقامی شہد کو متعارف کرایا جا سکتا ہے۔

اس حوالے سے محمد یونس سے بات کی گئی تو ان کا کہنا تھا کہ صوبائی حکومت کے تعاون سے آئی ایس او سرٹیفکیشن کی لیبارٹری کی تیاری کا 40 فیصد کام باقی ہے۔ اس کے مکمل ہونے کے بعد مقامی تاجروں کو شہد کی برآمد کے لئے بین الاقوامی معیار کی پابندی کا سرٹیفکیٹ جاری کیا جا سکے گا جس سے شہد کی برآمدات کو بیرونی ملک منڈیوں تک رسائی میں مدد ملی گی۔

افغانستان پاکستان کو انگور اور انار کیوں نہیں بھیج رہا؟

خلیجی ممالک میں منافع بخش پاکستانی شہد کےکاروبار کو زوال کا سامنا کیوں کرنا پڑ رہا ہے؟

پشاور اور نوشہرہ کے سنگم پر واقع اکبر پورہ کے طارق خان کو توقع تھی کہ اس سال وہ فی ایکڑ 24 من گندم حاصل کرنے میں کامیاب رہیں گے۔ لیکن ان کی امیدیں بر نہ آئیں کیونکہ بے وقت بارشوں اور ژالہ باری نے ان کی فصل کو شدید نقصان پہنچا ہے۔

طارق کے پاس تین ایکڑ زمین ہے۔ وہ صرف اپنی گھریلو ضروریات پوری کرنے کے لئے گندم کاشت کرتے ہیں۔ ان کا کہنا ہے کہ جب گندم نے قد نکالا اور دانہ پک گیا تو بارشوں، تیز آندھی اور ژالہ باری کا سلسلہ شروع ہو گیا جس سے نہ صرف فصل گر گئی بلکہ خوشوں سے دانہ بھی جھڑ گیا۔ ان کا اندازہ ہے کہ امسال وہ پندرہ سولہ من فی ایکڑ سے زیادہ پیداوار حاصل نہیں کرپائیں گے۔

فصل خراب ہونے کے نتیجے میں میں اس سال انہیں آٹے کی قلت رہے گی۔ وہ یہ سوچ کر پریشان ہیں کہ انہیں سستے یا مفت آٹے کی تلاش میں قطاروں میں کھڑے ہو کر گھنٹوں انتظار کرنا ہو گا یا آٹے کے ٹرکوں کے پیچھے بھاگنا پڑے گا۔ 
چارسدہ کے کاشتکار محمد کریم بھی ایسی ہی کہانی سناتے ہیں۔

بارشوں اور ژالہ باری کے نتیجے میں ان کی چار ایکڑ زمین پر اگی گندم میں سے ڈیڑھ ایکڑ گر گئی ہے۔گزشتہ سال انہیں 35 من فی ایکڑ پیداوار حاصل ہوئی تھی لیکن اس سال 20 من سے زیادہ فصل حاصل ہونے کی امید نہیں ہے۔ طارق کی طرح کریم بھی سال بھر کے آٹے کے لئے اسی گندم پر انحصار کرتے ہیں اور اب مستقبل کے خدشات سے پریشان ہیں۔

صوبائی محکمہ زراعت کے ذیلی ادارے کراپس رپورٹنگ سروسز کے ڈائریکٹر جنرل محمد کلیم نے لوک سجاگ کو بتایا کہ خیبر پختونخوا میں اس سال سات لاکھ 82 ہزار ہیکٹر رقبے پر گندم کاشت کی گئی جس سے 14 لاکھ 50 ہزار میٹرک ٹن گندم حاصل ہونے کا امکان تھا جو پچھلے سال کے مقابے میں تقریباً ایک لاکھ ٹن زیادہ ہے۔ لیکن طوفانی بارشوں اور ژالہ باری سے ہونے والے نقصان کے بعد یہ ہدف پورا ہوتا دکھائی نہیں دیتا۔

خیبر پختونخوا کے وسطی اضلاع پشاور، چارسدہ، مردان، صوابی، نوشہرہ اور جنوبی اضلاع ڈی آئی خان، کرک، لکی مروت اور ٹانک گندم پیدا کرنے والے نمایاں علاقے ہیں۔

تنظیم اتحاد زمینداران کے چیئرمین ارباب محمد جمیل کہتے ہیں کہ بے وقت بارشوں کے باعث ان علاقوں میں فصل کی کٹائی میں تاخیر ہوئی اور گندم کا دانہ زمین پر گر گیا۔ خدشہ ہے کہ اس مرتبہ پہلے جتنی پیداوار حاصل نہیں ہو سکے گی۔

موسمی کیفیت میں آنے والی اس بے وقت تبدیلی سے بنوں، لکی مروت، کرک، ٹانک، ڈی آئی خان، ہنگو، شمالی و جنوبی وزیرستان، پشاور، چارسدہ، مردان، صوابی، نوشہرہ اور ملاکنڈ کے کچھ حصے خاص طور پر&nbsp; متاثر ہوئے ہیں۔

محکمہ زراعت کے ڈائریکٹر سیڈ ڈاکٹر مراد علی خان نے نے بتایا کہ گزشتہ سال سیلاب سے متاثرہ علاقوں میں یوایس ایڈ اور اقوام متحدہ کے امدادی اداروں کی جانب سے کسانوں کو معیاری تخم ،کھاد اور زرعی ادویات فراہم کی گئی تھیں جس سے ان علاقوں میں گندم کی بروقت کاشت ممکن بنائی گئی۔ یہ ریلیف متاثرہ علاقوں کے علاوہ ان اضلاع میں بھی دیا گیا جہاں دیگر فصلیں اگائی جاتی ہیں۔ تاہم بارشوں اور ژالہ باری کے باعث یہ کاوشیں اکارت گئیں۔

محکمہ زراعت کے مطابق صوبہ اپنے ضرورت کا صرف 24 فیصد گندم خود پیدا کرتا ہے جبکہ بقیہ گندم کیلئے سرکاری سطح پر پنجاب سے اور پاسکو کے ذریعے بیرونی ممالک سے گندم خریدی جاتی ہے۔ خیبر پختونخوا کو اپنی سالانہ ضرورت پوری کرنے کے لیے لگ بھگ پچاس لاکھ میٹرک ٹن گندم درکار ہوتی ہے جبکہ پچھلے تین سال میں صوبے میں اوسط 12 لاکھ 90 ہزار 9 سو 70 میٹرک ٹن گندم پیدا ہوئی ہے۔

صوبے کے زیادہ تر کاشتکار اپنی سالانہ ضروریات کو مدنظر رکھتے ہوئے گندم کاشت کرتے اور اسے ذخیرہ کر لیتے ہیں۔ اسی لئے حکومت بھی زمینداروں سے خریداری نہیں کرتی۔ اس سال حکومت پاسکو کے توسط سے 14 لاکھ میٹرک ٹن گندم خریدنے کا ارادہ رکھتی ہے جبکہ باقی کمی کو پورا کرنے کیلئے پنجاب سے آزاد تجارت کے ذریعے گندم لائی جائے گی۔

گندم کی پیداوار میں کمی بیشی سے قطع نظر خیبرپختوانخوا میں سال بھر آٹے کی قلت رہتی ہے۔ موسمیاتی عوامل کے باعث گندم کی پیداوار میں آنے والی حالیہ کمی کے بعد صوبے میں آٹے کے بحران میں شدت آنے کا خدشہ ہے۔ چند ماہ سے صوبے کے بڑے شہروں میں بیس کلو سپیشل آٹے کا تھیلا 3,600 روپے میں فروخت ہوتا رہا ہے جبکہ شہری مراکز سے دور علاقوں میں آٹے کی قیمت اس سے بھی زیادہ ہے۔

آٹا ڈیلرز خیبر پختونخواکے صدر حاجی رامبل نے بتایا ہے کہ اس وقت صوبے میں آٹے کی قیمت افغانستان سے بھی زیادہ ہے۔ یہی وجہ ہے طورخم بارڈر پر ہوٹل مالکان افغانستان سے آٹا منگوا رہے ہیں۔ اس کی وجہ بیان کرتے ہوئے انہوں نے بتایا کہ پاکستان کی جانب سے پابندیوں اور سرحد کو بند کئے جانے کے بعد افغانستان نے تاجکستان سے گندم درآمد کرنا شروع کر دی ہے۔

محکمہ خوراک کے کنٹرولر فوڈ کمال احمد کہتے ہیں کہ صوبے میں آٹے کے بحران کی شدت کو کم رکھنے کے لئے سمگلنگ کی روک تھام پر خاص توجہ دی جا رہی ہے۔ اس سلسلے میں صوبے کے تمام اضلاع کے داخلی و خارجی راستوں پر محکمہ خوراک کی چیک پوسٹیں قائم کی گئی ہیں۔ علاوہ ازیں ضلع خیبر میں کسٹم حکام کے ساتھ ایک مشترکہ چیک پوسٹ بھی بنائی گئی ہے جہاں افغانستان جانے والی گاڑیوں کی سخت نگرانی کی جا رہی ہے۔

کامران علی شاہ

کامران علی شاہ کا تعلق چارسدہ سے ہے۔ وہ گزشتہ 14 سال سے صحافت سے وابستہ ہیں۔ مختلف اخبارات، ریڈیو اور نیوز چینلز میں خدمات سر انجام دے چکے ہیں۔

مجھے زمین پر رینگ کر پولنگ سٹیشن کے اندر جانا پڑا ، پولنگ سٹیشنوں پر خصوصی افراد کے ساتھ عمومی برتاؤ

"کہیں اور نوکری ملے تو صحافت کو چھوڑنے میں ایک سیکنڈ بھی نہ لگاؤں"

خیبرپختونخوا میں فرائض کی انجام دہی کے دوران قتل کیے جانے والے صحافیوں کے اہلخانہ انصاف اور مدد کے منتظر

'چارہ گر کو چارہ گری سے گریز ہے'، خیبرپختونخوا میں معلومات کی فراہمی کا ذمہ دار محکمہ معلومات دینے سے گریزاں

خلیجی ممالک میں منافع بخش پاکستانی شہد کےکاروبار کو زوال کا سامنا کیوں کرنا پڑ رہا ہے؟

خیبر پختونخوا: 'مفت آٹے کی تلاش میں قطاروں میں کھڑے ہو کر گھنٹوں انتظار کرنا ہو گا'