&quot;ملتان میں عورتوں کے لیے پِنک بس سروس کے اعلان کی خوشی عارضی ثابت ہوئی۔ اس سروس کے نام پر ہمیں بیوقوف بنایا گیا۔&quot;

&nbsp;یہ ملتان کی رہائشی صدف بتول کے خیالات ہیں جنہیں اپنی ملازمت کے سلسلے میں روزانہ شہر میں سفر کرنا پڑتا ہے۔

&nbsp;18اگست 2023ء کو ڈپٹی کمشنر عمر جہانگیر نے پِنک بس سروس کا افتتاح کیا۔ فی الوقت یہ سروس شہر کے صرف ایک روٹ پر دستیاب ہے۔ یہ صبح آٹھ بجے چونگی نمبر نو سے نادر آباد پھاٹک سواریاں لے جاتی اور دوپہر ایک بجے لے آتی ہے۔ اس سروس کے لیے نئی کے بجائے سرخ رنگ کی زیراستعمال بسیں لائی گئی ہیں۔

صدف کا کہنا ہے کہ دن میں صرف دو گھنٹے کے لیے 15 کلومیٹر پر محیط محض ایک روٹ پر بس چلانے سے شہر کی عورتوں کو سفری سہولت نہیں ملتی۔ ملتان میں خصوصاً ملازمت پیشہ عورتوں اور طالبات کے لیے ٹرانسپورٹ مشکل تر ہوتی جا رہی ہے۔ رش کے اوقات میں سیٹ نہ ملنے پر انہیں بس سٹاپ پر طویل انتظار کرنا پڑتا ہے۔

25 سالہ تنزیلہ سلیم کا تعلق ملتان کے علاقے محمود کوٹ سے ہے۔ وہ گزشتہ چار سال سے نجی بینک میں ملازمت کر رہی ہیں۔ بینک جانے کے لیے انہیں روزانہ 18 کلومیٹر فاصلہ طے کرنا ہوتا ہے۔ کم کرایے کو پیش نظر رکھتے ہوئے وہ میٹرو اور سپیڈو بس سروس پر سفر کرتی ہیں مگر رش کے باعث ڈیڑھ گھنٹے کا سفر عموماً کھڑے ہو کر طے کرنا پڑتا ہے۔

میٹرو بس میں خواتین کے لیے مخصوص حصے میں بیٹھنے کے لیے صرف 12 نشستیں ہوتی ہیں لیکن رش کے اوقات میں 35 سے 40 عورتیں سفر کر رہی ہوتی ہیں۔ اس صورت حال میں تنزیلہ کو اپنی جگہ خود بنانا پڑتی ہے اور دوران سفر دھکے بھی کھانا پڑتے ہیں۔ مرد اور لڑکے عورتیں کے لیے مختص حصے میں بھی گھس آ تے ہیں۔ سوار ہوتے یا اترتے وقت خواتین کو جنسی ہراسانی کا سامنا بھی کرنا پڑتا ہے۔

تنزیلہ نے بتایا کہ جب وہ پسینے سے شرابور ہو کر اور مردوں کی بری نظروں کا سامنا کرنے بعد دفتر پہنچتی ہیں تو ان کی توانائی ختم ہو چکی ہوتی ہے۔

ملتان کے نجی ہسپتال میں ملازمت کرنے والی کائنات ملک کام پر جانے کے لیے رکشہ استعمال کرتی ہیں۔ان کے مطابق اکیلی عورت کے لیے رکشے میں سفر کرنا کسی اذیت سے کم نہیں۔

رکشہ ڈرائیور پیٹرول اور گیس کی قیمتوں کو جواز بنا کر عموماً زیادہ کرایہ وصول کرتے ہیں۔ بعض ڈرائیور گھورتے اور نازیبا اشارے کرتے یا فحش گانے چلاتے ہیں۔ سڑک سے گزرنے والے لوگ بھی رکشے میں بیٹھی خاتون کو گھورتے ہیں۔

کالج یا یونیورسٹی جانے کے لیے کئی لڑکیاں ان رکشوں سے سفر کرتی ہیں جن میں سواریاں مختلف مقامات پر اترتی اور چڑھتی ہیں۔

ان رکشوں پر روزانہ یونیورسٹی جانے والی طالبہ ماریا نے بتایا کہ ایک صبح وہ رکشے میں سوار تھیں کہ راستے میں دو مرد بھی ساتھ بیٹھ گئے۔ ان میں سے ایک نے انہیں بری طرح چھوا جس پر وہ غصے کے عالم میں فوراً رکشے سے اتر گئیں۔ رکشہ ڈرائیور نے سواری کم ہوتے دیکھی تو باجی باجی کہہ کر واپس بلانے لگا ۔ میں نے ان دونوں مردوں کو رکشے سے اتارنے کا مطالبہ کیا جس پر اس نے برے انداز میں جواب دیا کہ اتنا نخرہ ہے تو ہمارے رکشوں میں سفر ہی کیوں کرتی ہو۔

وہ کہتی ہیں کہ اس واقعے سے انہیں اتنی شرمندگی محسوس ہوئی کہ وہ تین دن تک نہ گھر سے باہر نکلیں اور نہ یونیورسٹی گئیں۔

2017ء میں حکومت نے 28 ارب روپے سے ملتان میٹرو بس سروس کا آغاز کیا تھا۔ اس کے ساڑھے 18 کلومیٹر طویل روٹ پر 21 سٹیشن ہیں جن کے آس پاس متعدد سرکاری و نجی سکول، کالج اور یونیورسٹیاں ہیں۔ ان تعلیمی اداروں کے طلبا و طالبات کی بڑی تعداد میٹرو بس پر سفر کرتی ہے۔

میٹرو بس عملے کے مطابق اس پر روزانہ قریباً دو لاکھ افراد سفر کرتے ہیں جن میں نصف تعداد عورتوں کی ہے۔ اس روٹ پر 35 بسیں چلائی گئی تھیں تاہم افتتاح کے موقع پران کی تعداد بڑھانے کے اعلان پر چھ سال بعد بھی عمل درآمد نہیں ہوا۔ اس دوران سواریوں کی تعداد ایک لاکھ سے بڑھ کر دو لاکھ ہو گئی ہے۔ جن علاقوں میں میٹرو نہیں جاتی وہاں 100 فیڈر بسیں چلتی ہیں

ویمن یونیورسٹی ملتان کی طالبات کی بڑی تعداد میٹرو بس پر سفر کرتی ہیں۔ یونیورسٹی ترجمان کے مطابق ادارے میں اس وقت سات ہزار طالبات زیر تعلیم ہیں اور اس کے پاس صرف 12بسیں ہیں جن میں سے چار خراب ہیں۔

شیزا سلمان اس یونیورسٹی کے شعبہ انگریزی کی طالبہ ہیں۔ ان کا کہنا ہے کہ دیکھ بھال نہ ہونے سے کئی بار یہ پرانی بسیں راستے میں ہی بند ہو جاتی ہیں اور طالبات کو وہیں اتار دیا جاتا ہے۔

ڈسٹرکٹ ایجوکیشن آفیسر شیخ رفیق قریشی نے بتایا کہ ملتان شہر میں لڑکیوں کے نو سرکاری کالج ہیں جن میں مجموعی طور پر 10 ہزار سے زیادہ طالبات زیر تعلیم ہیں۔ ان کے لیے محض چھ بسیں فراہم کی گئی ہیں جن پر بمشکل دو سے تین سو طالبات سفر کر پاتی ہیں۔ باقی طالبات نجی بسوں پر آتی جاتی ہیں۔

ملتان کے ڈپٹی کمشنر عمر جہانگیر کا اس حوالے سے کہنا ہے کہ نئی بسوں کی فراہمی معاشی عدم استحکام کی وجہ سے ممکن نہیں۔ پرانی بسوں کی مرمت کے لیے بھی فنڈز کی کمی کا سامنا ہے۔ پِنک بس سروس کے لیے نئی بسیں نہیں آ سکیں۔ تاہم شہر میں اس سروس کے لیے بسوں کی تعداد جلد بڑھا دی جائے گی۔

ان حالات میں اپنی ٹرانسپورٹ استعمال کرنے والی عورتیں کی تعداد بڑھ رہی ہے۔ ٹریفک پولیس کی جانب سے عورتوں کے لیے ڈرائیونگ سکول قائم کیا گیا ہے جہاں ڈرائیونگ سیکھانے کے ساتھ ساتھ انہیں لائسنس بھی بنا کر دیاجارہا ہے۔

لائسنس برانچ کے انچارج راؤ امجد نے بتایا کہ رواں سال جنوری سے اگست کے دوران 312 خواتین نے ڈرائیونگ لائسنس بنوائے۔ ستمبر 2023ء تک لرنر لائسنس بنوانے والی 200 خواتین نے ڈرائیونگ لائسنس کے حصول کے لیے درخواستیں دیں۔ مجموعی طور پر ڈرائیونگ لائسنس رکھنے والی عورتیں کی تعداد دو ہزار ہو چکی ہے اوردوسال میں نوجوان لڑکیوں میں موٹر سائیکل چلانے کا رجحان بھی بڑھ گیا ہے۔

فیصل آباد: 37 لاکھ آبادی کے شہر میں چنگ چی رکشہ واحد 'پبلک ٹرانسپورٹ' رہ گئی

ملتان میں ملازمت پیشہ خواتین اور طالبات کے لیے پبلک ٹرانسپورٹ پر سفر دشوار، پِنک بس بھی کام نہ آئی

text

&quot;اگر سر پر باپ کا سایہ نہ بھی ہو تو اکیلی ماں 10 بچوں کو پال سکتی ہے لیکن بچوں کو ماں باپ پالنا پڑ جائیں تو وہ نہیں پال سکتے۔&quot;

یہ الفاظ ہیں ملتان کے اولڈ ایج ہوم کی رہائشی 70 سالہ ندا بی بی کے جو گزشتہ پانچ برس سے اولڈ ایج ہوم میں مقیم ہیں۔

وہ کہتی ہیں کہ بچے اپنے والدین کو اولڈ ایج ہوم اس لیے بھیج دیتے ہیں تاکہ ان کے آرام میں خلل نہ پڑے۔ وہ یہ نہیں سوچتے کہ ہماری ماں نے راتوں کو جاگ کر ہمیں پالا اور ہمارے مستقبل کے لیے قربانیاں دیں۔ ندا بی بی کے مطابق یہاں بہت سی سہولتیں ہیں لیکن ان سے انہیں سکون نہیں ملتا کیونکہ اولاد کا نعم البدل کوئی نہیں۔

وسائل کی کمی ایسے اداروں میں والدین کو چھوڑ آنے کی سب سے بڑی وجہ تصور کی جاتی ہے لیکن بابا فرید کچھ الگ ہی کہانی سناتے ہیں۔ بقول ان کے وہ میلسی کے نواحی علاقے کےخوش حال جاگیردار تھے۔ جوان ہونے پر عیش و عشرت میں پلے تین بیٹوں میں جائیداد پر جھگڑے شروع ہو گئے۔&nbsp; روز روز کے جھگڑوں سے تنگ آ کرانہوں نے&nbsp; زمین تینوں میں تقسیم کر دی۔

&quot;اس سے چھ ماہ بعد ہی اولاد مجھے بوجھ سمجھنے لگی۔ پیسے کی کمی، نہ ہی کوئی اور مشکل لیکن بیٹوں میں سے کوئی بھی اپنے والد کو ساتھ رکھنے کو تیار نہ تھا۔ انہوں نے مجھے اولڈ ایج ہوم داخل کروا دیا۔اب وہ میرے لیے ماہانہ دو ہزار روپے جمع کروا جاتے ہیں۔&quot;

ملتان میں محکمہ سوشل ویلفیئر کے تحت اولڈ ایج ہوم یا عافیت سنٹر 1995ء میں تعمیر کیا گیا۔ عید گاہ کے قریب شمس آباد کے علاقے میں&nbsp; واقع اس ہوم میں بزرگ مرد و خواتین کے رہنے کے لیے الگ الگ انتظامات کیے گئے ہیں۔ ادارے میں داخلے کے لیے عمر کا 60 سال سے زیادہ ہونا ضروری ہے۔بے گھر یا اولاد کی سختیوں سے تنگ معمر افراد یہاں باقی کی زندگی گزار سکتے ہیں۔ یہاں رہائش، بجلی، کھانا اور ادویات جیسی سہولیات مفت دستیاب ہیں۔ اس وقت ملتان کے اولڈ ہوم میں 50 سے زیادہ بزرگ مقیم ہیں۔

تاہم گزشتہ کچھ عرصہ سے ان کی تعداد میں اضافہ ہونے لگا ہے۔ پہلے یہاں صرف 30 بزرگوں کے رہنے کی گنجائش ہونے کے باعث داخلے کی درخواستیں لمبا عرصہ زیر التوا رہتی تھیں۔ اس مسئلے کا حل نکالتے ہوئے مئی 2022ء میں ادارے سے ملحقہ جگہ پر ایک نئی عمارت تعمیر کر کے اسے اولڈ ایج ہوم میں شامل کیا گیا۔ اب ادارے میں بیک وقت 70 سے زیادہ بزرگ رہ سکتے ہیں۔

اولڈ ایج ہوم انتظامیہ کے مطابق سرکاری بجٹ سیلری اور نان سیلری کے زمروں میں تقسیم ہوتا ہے اور یہ چار اقساط میں جاری ہوتا ہے۔&nbsp; نان سیلری بجٹ کی مد میں ادارے کے اخراجات، بجلی و گیس کے بل، کھانے پینے کا سامان، بلڈنگ کی دیکھ بھال، اور سیلری بجٹ میں سٹاف کی تنخواہیں شامل ہیں۔

ادارے کے انچارج کے مطابق نان سیلری بجٹ کا تخمینہ ہر سال بزرگ افراد کی ضروریات کو دیکھتے ہوئے آٹھ سے 10 لاکھ روپے لگایا جاتا ہے مگر سالانہ اقساط میں جاری ہونے والا بجٹ ادارے اور بزرگ رہائشیوں کی ضروریات پوری کرنے کے لیے ناکافی ہوتا ہے۔

انہوں نے بتایا کہ فنڈز کے اجرا میں تاخیر کی صورت میں انہیں بہترین کھانا، ادویات، فرنیچر اور آسائشیں دینامشکل ہو جاتا ہے لہٰذا مختلف عطیہ دہندگان کے تعاون سے بزرگ افراد کے لیے ادارے میں کنٹریکٹ بنیادوں پر باورچی اور اٹینڈنٹ کو بھرتی کیا گیا ہے۔ انہیں تنخواہ حکومت کے بجائے عطیہ دہندگان فراہم کرتے ہیں

یہاں رہنے والوں کی صحت کی دیکھ بھال کے لیے سرکاری سطح پر کوئی خاص فنڈ نہیں دیے جاتے۔ ادارے کی پالیسی کے مطابق مہینے میں ایک بار ڈاکٹر چیک اپ کرنے کے لیے&nbsp; آتے ہیں یا ایمرجنسی کی صورت میں کسی کو ہسپتال منتقل کیا جا سکتا ہے۔

یہاں قیام کرنے والوں کا کہنا ہے کہ عمر کے اس حصے میں بیشتر بزرگوں کی صحت خراب رہتی ہے اس لیے مہینے میں ایک بار معائنہ نا کافی ہے۔

اس میں قدرے بہتری اس وقت آئی جب نگران وزیراعلیٰ پنجاب محسن نقوی نے اپریل 2023 میں اچانک اولڈ ایج ہوم کا دورہ کیا۔بزرگ رہائشیوں کی صحت کے مسائل کو دیکھتے ہوئے وزیراعلیٰ نے نشتر ہسپتال سے ڈاکٹروں کی ایک ٹیم اولڈ ایج ہوم کے لیے تشکیل دینے کی ہدایات جاری کیں جو ہر ہفتے ادارے میں جا کر بزرگوں کو صحت کی سہولیات فراہم کریں۔

ملتان سے تعلق رکھنے والے ڈاکٹر مبشراحمد انسٹیٹیوٹ آف کارڈیالوجی میں شعبہ نفسیات کے انچارج ہیں۔ ان کا کہنا ہے کہ جب انہوں ںے اپنے طور پر یہاں آ کر مختلف بزرگ رہائشیوں سے بات کی تو ان میں سے بہت سوں کو ڈپریشن سمیت دیگر&nbsp; ذہنی مسائل کا شکار پایا۔

&quot;ان افراد کے دماغی و ذہنی امراض میں مبتلا ہونے کا زیادہ امکان ہوتا ہے لیکن حکومت کی جانب سے کوئی بھی ماہر نفسیات ادارے میں کبھی تعینات نہیں کیا گیا۔&quot;

ان کے مطابق اپنے خاندان سے دور ہونے کے سبب بیشتر بزرگ تنہائی محسوس کرتے ہیں لہٰذا ان میں خود کشی سمیت دیگر منفی خیالات زیادہ&nbsp; شدت سے آ سکتے ہیں۔انہیں سماجی سپورٹ کی بہت ضرورت ہوتی ہے۔ رشتہ دار اگر ان سے ملنے آئیں تو ان کی تنہائی کو دور کیا جا سکتا ہے۔

'کھانا اکثر پڑوسیوں سے مانگ کر کھاتی ہوں': ڈیرہ اسماعیل خاں ڈویژن میں بے وسیلہ خواتین کے لیے کوئی دارالامان نہیں

'نہ بچوں نے پروا کی نہ حکومت کو فکر ہے'، ملتان میں اولڈ ایج ہوم کے مکینوں کی مشکلات

گھنٹہ گھر ملتان شہر کی اہم پہچان ہے اور اس میں لگے گھڑیال کی سوئیاں برسوں سے رُکی ہوئی ہیں اور ان کو دوبارہ حرکت میں لانے کا حالیہ منصوبہ بھی اب ٹھپ ہوتا دکھائی دے رہا ہے۔

گھنٹہ گھر کی 138 سالہ قدیم عمارت کو اصل حالت میں بحال کرنا ملتان والڈ سٹی پراجیکٹ نامی منصوبے کا حصہ تھا۔ یہ مںصوبہ پنجاب حکومت نے اٹلی کی حکومت کے تعاون سے شروع کیا تھا۔

اس کے تحت شہر کی کئی تاریخی عمارتوں کی بحالی عمل میں آئی لیکن بہت سا کام اب بھی ادھورا ہے جبکہ اٹلی کی حکومت نے رواں سال کے آغاز پر اس میں اپنی شراکت ختم کر دی ہے۔

گھنٹہ گھر کی بحالی کے لئے اٹلی کی حکومت نے دو کروڑ روپے فراہم کرنے کی حامی بھری تھی۔

پہلے مرحلے میں 80 لاکھ روپے جاری ہونے کے بعد مرمتی کاموں کا آغاز ہوا جو 30 فیصد ہی مکمل ہو پایا ہے۔

فنڈ کی فراہمی معطل ہو جانے کے باعث عمارت کے نئے فرش اور چھت کی تعمیر، رنگ و روغن اور گھڑیال کی بحالی سمیت کئی کام ادھورے رہ گئے ہیں۔

ملتان کی تاریخی عمارتوں کو محفوظ بنانے کا یہ جامع منصوبہ پایہ تکمیل کو پہنچے بغیر بند ہونے کا خدشہ ہے جس سے شہر کے ثقافتی ورثے کو لاحق خطرات پہلے سے بھی بڑھ گئے ہیں۔

2012ء میں شروع ہونے والے اس منصوبے کے تحت ملتان کے تاریخی دروازوں اور عمارتوں کو صدیوں پرانے انداز کے مطابق اپ گریڈ کیا جانا تھا۔

اس منصوبے کی کل لاگت کا تخمینہ 85 کروڑ روپے لگایا گیا جسے &#39;جائزے اور عملدرآمد&#39; کے دو مراحل میں مکمل ہونا تھا۔

پراجیکٹ کے مینیجر محمد عمیر بتاتے ہیں کہ عملدرآمد کے مرحلے میں حرم گیٹ کی بحالی، چوک حرم گیٹ پر لوگوں کے بیٹھنے کے لئے پویلین اور عوامی بیت الخلا کی تعمیر، دربار موسیٰ پاک کے مسافر خانے اور اندرون شہر صرافہ بازار کی سو میٹر پر محیط 80 دکانوں کی حالت بہتر بنانے، وہاں بجلی کی تاروں کو زیر زمین بچھانے اور سولر سسٹم نصب کرنے کے علاوہ چند دیگر مقامات کو بحال کیا جانا تھا۔

عمیر کے مطابق منصوبے کے دوسرے مرحلے کے کچھ اہداف حاصل کر لئے گئے تاہم بہت سی جگہیں یا تو جزوی طور پر ہی بحال ہو پائیں یا ان پر سرے سے کام ہی شروع نہیں ہو سکا۔

ان میں پاک گیٹ سے دہلی گیٹ تک 1.9 مربع کلومیٹر پر محیط شہر کی قدیم فصیل بھی شامل ہے جس کی تزئین و آرائش کے لئے 20 لاکھ روپے کے فنڈ درکار تھے جن کی عدم دستیابی کے باعث اس پر کام معطل ہو گیا۔

ضلعی انتظامیہ نے 2021ء میں یہ کام پارکس اینڈ ہارٹیکلچر اتھارٹی کے حوالے کر دیا جس پر کوئی پیش رفت نہ ہوئی۔ چنانچہ اس دیوار کے نصف سے زیادہ حصے کی بحالی کا کام ادھورا پڑا ہے۔

محکمہ آثار قدیمہ ملتان کے سابق سربراہ محمد غلام کا کہنا ہے کہ 2002ء میں لاہور والڈ سٹی اتھارٹی قائم ہونے کے بعد اسے ملتان میں بھی شروع کیا گیا اور ابتداً یہاں اتھارٹی بنانے کے بجائے ثقافتی ورثے کی بحالی کا عمل ایک منصوبے کے طور پر شروع کیا گیا۔

منصوبے پر ہونے والی پیش رفت کا جائزہ لینے کےبعد اسے اتھارٹی میں تبدیل کیا جانا تھا لیکن ایسا نہ ہو سکا۔

چار سال تک انتظار کرنے کے باوجود والڈ سٹی اتھارٹی کا قیام ممکن نظر نہ آیا تو اٹلی کی حکومت نے اس منصوبے کو آگے بڑھانے سے معذوری ظاہر کی اور مزید فنڈ کی فراہمی روک کر پنجاب حکومت کے ساتھ اپنا معاہدہ ختم کر دیا۔

اب یہ منصوبہ معطل ہے اور کسی بھی وقت بند ہو سکتا ہے۔

اکتوبر 2020ء میں وزیراعلیٰ کو پنجاب والڈ سٹی اتھارٹی کے بل کی سمری پیش کی گئی تھی۔ 2021ء میں اس بل کی قانونی حیثیت میں تبدیلیوں کے بعد اسے دوبارہ اسمبلی میں لایا گیا لیکن بل کو حتمی منظوری نہ مل سکی۔

اس سال 13 جنوری کو چیف سیکرٹری پنجاب کے زیر صدارت والڈ سٹی پراجیکٹ کی مینجمنٹ کمیٹی کے اجلاس میں منصوبے پر عملدرآمد کی حتمی رپورٹ پیش نہ کئے جانے، اثاثوں کی منتقلی اور ٹھیکیداروں کے واجبات کی ادائیگی کے معاملات زیربحث آئے اور شرکا نے والڈ سٹی اتھارٹی کے عدم وجود کو مسائل کا بنیادی سبب قرار دیا۔

اسی اجلاس میں اٹلی کے نمائندوں نے منصوبے پر کام جاری رکھنے سے معذوری کا اظہار کیا تھا۔

اس منصوبے میں کام کرنے والے انجینئر کاشف عمران بتاتے ہیں کہ شہر کے تاریخی ورثے کی بحالی کے لئے بہت بڑی رقم خرچ کی گئی اور غیر ملکی ماہرین کی خدمات بھی حاصل کی گئیں۔ اگر اب یہ پراجیکٹ بند ہو گیا تو ناصرف بحال کیے گئے مقامات کو اس حالت میں برقرار رکھنا مشکل ہو گا بلکہ ادھورے چھوڑے گئے آثار قدیمہ بہت جلد ملیامیٹ ہو جائیں گے۔

کاشف کے مطابق اس منصوبے کو بند کئے جانے کی صورت میں مکمل اور نامکمل تمام مقامات کو متعلقہ محکموں کے حوالے کرنا ضروری ہے۔

بحال کئے گئے مقامات کی دیکھ بھال کے لئے نہ تو کوئی فنڈ ہیں اور نہ ہی فنڈ ملنے کی کوئی امید ہے۔ ان حالات میں یہ منصوبہ ناکام ہو جانے کا خدشہ ہے۔

ملتان کے کئی تعلیمی اداروں میں شعبہ تاریخ کے سربراہ رہنے والے پروفیسر عبدالسلام نے شہر کی تاریخ و ثقافت سے متعلق کتابوں پر مشتمل لائبریری قائم کر رکھی ہے۔

ان کا کہنا کہ ملتان کے بہت سے تاریخی مقامات اب معدوم ہو چکے ہیں اور جو باقی ہیں وہ معدومیت کے قریب ہیں۔ نئی نسل کو اس کے ثقافتی ورثے کے بارے میں آگاہ رکھنے کے لئے باقی ماندہ آثار کی بحالی ضروری ہے وگرنہ شہر میں صرف پلازے ہی دکھائی دیں گے۔

ملتان کا بہاءالدین زکریا کمپلیکس: زائرین کے لیے تعمیر عمارت 32 برس سے کون استعمال کررہا ہے؟

نہ والڈ سٹی اتھارٹی بنی، نہ فنڈ ملے: ملتان کے گھنٹہ گھر کا بُرا وقت بدلتے بدلتے پھر رک گیا؟

&nbsp;پینتیس سالہ ظفر (فرضی نام) دس سال قبل منشیات کی لت میں مبتلا ہوئے اور&nbsp; آج تک اس سے چھٹکارا نہیں پا سکے۔ ان کی اہلیہ دو مرتبہ انہیں شہر کے منشیات بحالی مرکز میں چھوڑ کر آئیں مگر دونوں مرتبہ ظفر گھر لوٹ آئے۔

منشیات کی عادت میں مبتلا ہونے کے بعد ان کے معاشی حالات دن بدن خراب ہوتے گئے۔ اہل خانہ کے مطابق ان کا اچھا خاصا سپیئر پارٹس کا کاروبار نشے کی نذر ہو گیا۔ کچھ دکانیں کرائے پر دے رکھی تھیں، وہ بھی بیچ دیں۔

ظفر ملتان میں اپنی بیوی، 15 سالہ بیٹی اور 13 سالہ بیٹے کے ساتھ رہتے ہیں۔ایک نجی سکول میں پڑھانے والی ان کی بیوی بتاتی ہیں کہ ان کی قلیل تنخواہ کا زیادہ تر حصہ ظفر نشے میں اڑا دیتے تھے۔

ان کا یہ بھی کہنا ہے کہ منشیات سے بحالی کے مراکز میں دیگر مریض بھی موجود ہوتے ہیں اور کسی نہ کسی طرح وہاں بھی منشیات کا استعمال جاری رہتا ہے۔

32 سالہ ناصر (فرضی نام) کا تعلق ملتان کے علاقے وہاڑی چوک سے ہے۔ انہیں منشیات کی لت سے چھٹکارا دلانے کے لئے منشیات بحالی مرکز میں علاج کی غرض سے داخل کرایا گیا تھا لیکن انہیں کوئی افاقہ نہیں ہوا۔

ان کے والد کہتے ہیں کہ ناصر نے 25 سال کی عمر میں نشہ کرنا شروع کیا۔ بی کام کی تعلیم حاصل کی لیکن اس کے بعد منشیات کے استعمال نے انہیں مزید تعلیم یا ملازمت کے قابل نہ چھوڑا۔

بحالی مرکز کے انچارج محمد میثم نے بتایا کہ اس مرکز میں چار ماہ علاج کروانے کے بعد ناصر نے گھر جانے سے پہلے آئندہ نشے کو ہاتھ نہ لگانے کے وعدے کیے اور قسمیں بھی کھائیں۔ 
مگر ان کے والد کا کہنا ہے کہ &quot;دوبارہ گلی محلے کے انہی دوستوں سے ملاقاتوں کے باعث وہ منشیات کو چھوڑ نہ سکا۔

منشیات کے عادی افراد کے لیے قائم کردہ بحالی مرکز سرکاری سطح پر ملتان کی سطح پر اپنی نوعیت کا واحد ادارہ ہے۔

اس مرکز میں 50 مریضوں کی گنجائش ہے لیکن اس وقت وہاں صرف 24 مریض ہی زیر علاج ہیں۔

زہرہ سجاد زیدی اس مرکز کے مشاورتی بورڈ کی رکن ہیں اور ایسے مختلف مراکز میں نشے کے عادی افراد کے کونسلنگ سیشن لیتی ہیں۔ ان کے مطابق منشیات کے عادی افراد کے لیے اس کا استعمال ترک کرنا مشکل ہوتا ہے۔ 
انہوں نے لوک سجاگ کو علاج کے دوران پیش آنے والی چند اہم دشواریوں کے بارے میں بتایا۔

&#39;&#39;سنٹر میں شروع کے ہفتے یا 15 دن تک کم مقدار میں ادویات فراہم کی جاتی ہیں۔ اس کے بعد اگر دوائی نہ دینے پر مریض چیخے چلائے، شور مچائے اور توڑ پھوڑ بھی کرے تو ایسی صورت حال اس سمیت دیگر مریضوں کے علاج پر منفی اثر ڈالتی ہے۔

چونکہ سینٹر میں مریضوں کو زبردستی باندھ کر نہیں رکھا جا سکتا اس لیے ایسے مریضوں کے مزید علاج کی ذمہ داری نہ لیتے ہوئے انہیں واپس لواحقین کے حوالے کر دیا جاتا ہے۔&quot;

ان کا کہنا ہے کہ دوران علاج اور منشیات استعمال نہ کرنے کی وجہ سے مریضوں کی بھوک بڑھ جاتی ہے اور بحالی مراکز میں کھانے پینے کا مناسب انتظام نہ ہونے یا خوراک میں کمی کے باعث مریضوں میں غم و غصّے کی کیفیت پیدا ہوتی ہے۔ اس رویے کے باعث وہ وقتی طور پر تو نشہ چھوڑنے کا ارادہ ظاہر کرتے ہیں مگر باہر جاتے ہی دوبارہ منشیات کے عادی بن جاتے ہیں۔

میثم کا کہنا ہے کہ جنوری 2021ءسے مارچ 2023ء تک ادارے میں 1150 مریض علاج کی غرض سے آئے جن میں سے پانچ سو مریضوں نے مکمل علاج کروایا اور صحت یاب ہو کر واپس گئے۔

ان میں سے 200 کے قریب مریض ایسے تھے جو نشے کی عادت کو چھوڑنے کا ارادہ نہیں رکھتے تھے۔ لواحقین کی جانب سے داخل کروائے گئے وہ مریض چند روز کے اندر ہی ادارے سے بنا علاج کروائے واپس چلے گئے۔ دوبارہ نشہ شروع کرنے والوں کو ادارے کی جانب سے ایک بار پھر علاج کی پیشکش کی گئی لیکن اس کا خاطر خواہ فائدہ نہ ہوا۔

نبیل خان منشیات بحالی مرکز میں گزشتہ آٹھ برسو سے بطور مینیجر منسلک ہیں۔ ان کے مطابق نشے کے عادی افراد کو ادویات کے بجائے کونسلنگ کی زیادہ ضرورت ہوتی ہے۔ یہ کام ماہر نفسیات انجام دیتے ہیں۔ ادارے میں ایک ہی ماہر نفسیات تعینات ہیں جو ہفتے میں دو بار تمام مریضوں کے ساتھ کونسلنگ سیشن کے دوران انہیں منشیات کے نقصانات اور خطرات سے آگاہ کرتی ہیں۔

ایسی مثالیں بھی موجود ہیں کہ لوگ اس مرکز سے مکمل صحت یاب ہو کر گئے اور اب بہت اچھی زندگی گزار رہے ہیں۔ تیس سالہ محمد احسن نے بری صحبت اور بے روزگاری کے باعث ہیروئن، افیم، چرس سمیت دیگر اقسام کا نشہ کرنا شروع کر دیا تھا۔ وہ دو سال تک منشیات کا استعمال کرتے رہے۔

احسن کے بڑے بھائی کو جب سرکاری مرکز کا پتا چلا تو انہوں نے انہیں وہاں داخل کرا دیا جہاں کونسلنگ کی بدولت احسن کو نشے سے نجات مل گئی۔ اب وہ موبائل فون کی دکان چلا رہے ہیں اور نشے سے پاک زندگی گزار رہے ہیں۔

ملتان میں منشیات بحالی کے نجی مراکز بھی موجود ہیں مگر ان کی فیسیں بہت زیادہ ہوتی ہیں جنہیں&nbsp; غریب طبقہ عموماً ادا نہیں کر سکتا۔

ان نجی علاج گاہوں میں منشیات کے عادی افراد&nbsp; کو الگ الگ کمرے فراہم کرنے سمیت دیگر کئی سہولیات&nbsp; میسر ہیں۔

ڈاکٹر نثار چوہدری ایسی ہی ایک علاج گاہ نجات سنٹر میں ماہر نفسیات کی حیثیت سے تعینات ہیں اور گزشتہ 15 برس سے منشیات کا استعمال کرنے والوں کا علاج کر رہے ہیں۔

ان کا کہنا ہے کہ منشیات کی عادت جسمانی بیماری نہیں بلکہ اس کا تعلق دماغ سے ہے۔ منشیات میں دوبارہ مبتلا ہونے کی مختلف وجوہات ہیں۔ مریض کے دوبارہ نشہ کرنے کی ایک وجہ یہ بھی ہو سکتی ہے کہ اس کا مکمل علاج نہ ہوا ہو اور وہ علاج ادھورا چھوڑ کر ادارے سے چلا گیا ہو۔ اس کے علاوہ علاج گاہ کی جانب سے اگر مریض کا فالو اپ نہ ہو تو تب بھی وہ دوبارہ نشے کا شکار ہو سکتا ہے۔

علاج یا نشہ: کنٹرولڈ آئٹمز میں شامل کیٹامین دوا کی ضرورت سے زیادہ درآمد کے پیچھے کیا راز ہے؟

منشیات بحالی مرکز ملتان: ' نشے کے عادی افراد کو ادویات کے بجائے کونسلنگ کی زیادہ ضرورت ہوتی ہے'

کوثر بی بی ملتان شہر میں 25 برس سے کشیدہ کاری کا کام کر رہی ہیں۔ وہ چھ بچوں کی ماں ہیں اور انہوں نے یہ کام انہوں نے شوہر کی بیماری کے بعد گھر کے اخراجات پورے کرنے کے لیے شروع کیا تھا۔ دکاندار انہیں آرڈر دیتے تھے اور وہ گھر پر رہ کر ہی سارا کام کرتی تھیں۔

چند سال قبل تک ان کے کام کی خوب مانگ تھی لیکن گزشتہ آٹھ دس برسوں میں دکانداروں نے گھروں میں کام کرنے والی خواتین کو آہستہ آہستہ آرڈر دینا بند کر دیئے ہیں۔

ملتان کا حسین آگاہی بازار (کشیدہ کاری کے) کام والے ملبوسات کے حوالے سے بڑی مارکیٹ ہے۔ فیصل صمد کی دکان اسی بازار میں ہے۔ان کے پاس ہاتھ اور مشین دونوں کی کڑھائی والے ملبوسات ہیں۔ وہ بتاتے ہیں کہ ہاتھ کے کام والے کپڑوں کی قیمت سنتے ہی گاہک اپنا ہاتھ کھینچ لیتے ہیں۔

&quot;ہمارے ہاں اب زیادہ تر مشین کی کڑھائی والے ملبوسات فروخت ہوتے ہیں۔بیس میں سے ایک گاہک ہی ہاتھ کا کام مانگتا ہے&quot;۔

چوک بازار کے ذیشان احمد کی دکان 50 برس پرانی ہے۔ وہ بھی فیصل کی بات کی تائید کرتے ہوئے کہتے ہیں کہ اب اڈے کے کام اور ہاتھ سے کشیدہ کاری کیے گئے ملبوسات کی جگہ مشینی کام نے لے لی ہے۔

&quot; کپڑے کی قیمت اور میٹیریل کے ریٹ آسمان سے باتیں کرنے لگے ہیں۔ ہاتھ سے تیار کردہ ملبوسات کی قیمت عام لوگوں کے بس کی بات نہیں رہی۔ ہاتھ کے کام والے اور مشین سے کشیدہ کاری والے سوٹ کی مانگ میں ایک اور دس کا فرق ہے&quot;۔

کوثر بی بی اس کی وجہ یہ بتاتی ہیں کہ &quot;کپڑوں پر ہاتھ سے کشیدہ کاری، دپکے اور ستارہ موتی کے کام پر کافی وقت لگتا ہے لیکن مشینیں دنوں کا کام منٹوں میں کر دیتی ہیں اس لیے وہ سستا بھی ہوتا ہے&quot;۔

&quot;مہنگائی کی وجہ سے اڈے کا سامان مہنگا ہو گیا ہے۔تین سو روپے گز والا کپڑا مہنگا ہو کر 11 سو روپے گز ہو چکا ہے جبکہ ستارے موتی اور دیگر سامان 50 روپے تولہ سے بڑھ کر 400 روپے تولہ ہو چکا ہے&quot;۔

وہ بتاتی ہیں کہ پہلے متوسط طبقے کے لوگ بھی دستکاری والے ملبوسات خرید لیتے تھے لیکن اب یہ ان کے بس میں نہیں رہے۔

کوثر اب صاحبِ حیثیت خواتین سے ملبوسات کے آرڈر لیتی ہیں۔

جلالپور پیروالا کی 50 سالہ فاطمہ بی بی تو اب کشیدہ کاری سے تائب ہوچکی ہیں۔ وہ چند سال پہلے تک اون، دھاگے اور موتیوں سے کروشیہ کی اشیا بناتی تھیں۔ &quot;پہلے کام کی طلب بہت زیادہ تھی اس لیے آمدن بھی خوب ہوتی تھی۔لیکن اب مشینیں خواتین دست کاروں کے مقابل آ گئی ہیں۔ مشینی کام تیز اور سستا ہوتا ہے&quot;۔

تاہم فاطمہ کا خیال ہے کہ ہاتھ کا کام ابھی بالکل ختم نہیں ہوا البتہ بے تحاشا مہنگا ہو گیا ہے اور اب صرف پیسے والوں کی دسترس میں ہی ہے۔

<h2>ڈوبتے کو تنکے کا سہارا: مارکیٹنگ کے نئے محاذ</h2>

ہاتھ کا کام بہت سے علاقوں میں گھریلو خواتین کے لیے روزگار کا واحد ذریعہ تھا جبکہ اس کی جگہ لینے والی مشینی کڑھائی کا کام مرد مزدوروں سے لیا جاتا ہے یوں اس پوری صنعت کا صنفی کردار یکسر تبدیل ہو گیا ہے۔

&nbsp;مشینوں پر کام کرنے والے مرد مزدور کڑھائی کے فن سے نابلد ہوتے ہیں۔ ان کی مہارت بس مشین چلانے میں ہوتی ہے۔ حسین آگاہی بازار کی گلی کمنگراں والی میں مشینی کام کے کارخانے ہیں جہاں مرد کاریگر ریٹے اور دپکے موتی کے مشینی ملبوسات تیار کرتے ہیں۔ یہاں کام کرنے والے محمد سلطان نے بتایا کہ انہیں روزانہ کی بنیاد پر ایک ہزار سے 12 سو روپے مزدوری ملتی ہے (جو خواتین دستکاروں کو ملنے والی روازنہ اجرت کے دو گنا سے بھی زیادہ ہے) اور وہ ایک دن میں پانچ سے چھ سوٹ تیار کر دیتے ہیں۔

&nbsp;سلطان کہتے ہیں کہ انہیں چونکہ کوئی ہنر نہیں آتا اس لیے یہاں کام کرنا ان کی مجبوری ہے۔

ملتان چیمبر آف کامرس اینڈ انڈسٹری میں ایک ویمن ونگ موجود ہے جس کے قیام کا مقصد ہنر مند خواتین کو کاروبار کے فروغ میں مدد اور انہیں خود مختار بنانے کے لیے مواقع فراہم کرنا ہے۔

ضلع ملتان کی 250 خواتین دستکار ویمن ونگ میں رجسٹرڈ ہیں۔

ویمن ونگ کی کنوینر صالحہ حسن کہتی ہیں کہ بہترین کام کرنے والی خواتین کو مصنوعات کی مارکیٹنگ اور فروخت کے لیے مفت تربیت فراہم کی جاتی ہیں۔مگر عام خواتین کے لیے چیمبر تک رسائی بہت مشکل ہے۔جن خواتین نے ملتان چیمبر کے ویمن ونگ سے فائدہ اٹھایا بھی ہے وہ بھی اب صرف خواص کے لیے کام کرتی ہیں۔

رخسانہ نے آج سے چند سال قبل انگلینڈ میں ہونے والی دستکاری نمائش میں شرکت کی تھی۔ ان کے ٹکٹ، رہائش اور نمائش میں لگائے گئے سٹالز کے اخراجات چیمبر اور دیگر اداروں نے اٹھائے۔ رخسانہ وہاں زری، دپکے سے بنے فینسی ملبوسات اور ہاتھ سے تیار کردہ جیولری لے کر گئی تھیں۔ انہیں وہاں نہ صرف اپنے ملبوسات کی اچھی قیمت ملی بلکہ بیش قیمت رابطے قائم کرنے کا موقع بھی ملا۔

&nbsp;لندن سے واپسی پر رخسانہ نے دکانداروں سے آرڈر لینا بند کر دیے۔ &quot;دکاندار کپڑا ، موتی، نگ، گوٹے اور میٹیریل فراہم کرنے کے بعد تین سے چار سو روپے روزانہ معاوضے پر کام کرواتے تھے۔اب میں اپنی جان پہچان کی خواتین کے لیے کام کرتی ہوں&quot;۔

<h2>آن لائن کا آسرا کتنوں کی مدد کر پائے گا؟</h2>

صالحہ حسن کہتی ہیں کہ دستکار خواتین کو کام جاری رکھنے کے لیے روایتی طریقوں کی بجائے مارکیٹنگ کے نئے طریقے اپنانا ہوں گے۔

پاک گیٹ کی عاصمہ نے اپنے ہنر کی اچھی قیمت کے لیے نیا طریقہ آزمایا اور آن لائن فروخت کا سلسلہ شروع کیا۔

عاصمہ تبسم نے 20 سال پہلے فیبرک پرنٹنگ کا کام اپنے شوق کی وجہ سے کیا تھا لیکن شوہر کی وفات کے بعد شوق ان کے روز گار کا ذریعہ بن گیا۔ عاصمہ شوہر کی وفات کے بعد سے بھائی کے گھر رہتی ہیں۔

ان کے دو بچے ہیں بیٹا سیکنڈ ایئر اور بیٹی فرسٹ ایئر کی طالبہ ہے۔

عاصمہ سلک اور کاٹن کے کپڑوں پر مختلف رنگوں سے خوبصورت ڈیزائن بناتی ہیں۔ &quot;فیبرک پرنٹنگ کے کام میں محنت کے ساتھ کپڑے پر ڈیزائن بنانے اور رنگوں کے انتخاب کے لیے تخلیقی صلاحیتوں کی ضرورت ہوتی ہے۔ ایک سوٹ تیار کرنے میں چار سے پانچ روز درکار ہوتے ہیں&quot;۔

عاصمہ نے بتایاکہ ان کے تیار کردہ سوٹ کی قیمت آٹھ سے 15 ہزار روپے تک ہے۔ دکانداروں کی طرف سے آرڈر ملنا بند ہوئے تو عاصمہ نے ملبوسات کو آن لائن فروخت کرنا شروع کردیا۔

انہوں نے سوشل میڈیا سائیٹس فیس بک اور انسٹاگرام پر اپنے پیج بنا رکھے ہیں اور وہ ان پر اپنے ملبوسات کی تصاویر وغیرہ باقاعدگی سے اپ لوڈ کرتی ہیں۔

مگر ان کا کہنا ہے کہ آن لائن پراڈکٹس متعارف کروانے اور ان کی تشہیر کرنے میں خاصی محنت اور سرمایہ درکار ہوتا ہے۔ اس لیے عاصمہ کے ملبوسات کم کم ہی فروخت ہوتے ہیں۔

صالحہ حسن بتاتی ہیں کہ چیمبر آف کامرس کی جانب سے خواتین دستکاروں کے لیے ای کامرس پروگرام کا آغاز کیا جا رہا ہے جس کے ذریعے خواتین گھر بیٹھے آن لائن اپنی مصنوعات فروخت کرنے کے قابل ہوں گی۔

&nbsp;

سہیرہ طارق

ملتان میں ملازمت پیشہ خواتین اور طالبات کے لیے پبلک ٹرانسپورٹ پر سفر دشوار، پِنک بس بھی کام نہ آئی

'نہ بچوں نے پروا کی نہ حکومت کو فکر ہے'، ملتان میں اولڈ ایج ہوم کے مکینوں کی مشکلات

نہ والڈ سٹی اتھارٹی بنی، نہ فنڈ ملے: ملتان کے گھنٹہ گھر کا بُرا وقت بدلتے بدلتے پھر رک گیا؟

منشیات بحالی مرکز ملتان: ' نشے کے عادی افراد کو ادویات کے بجائے کونسلنگ کی زیادہ ضرورت ہوتی ہے'

کشیدہ کاری: خواتین دستکاروں اور کڑھائی کی 'مرد مشینوں' میں چھڑی جنگ

Lok Sujag