Discover the enduring plight of Sohbatpur, Balochistan, where residents have grappled with contaminated water for generations. Explore the ongoing failure of government projects aimed at reme

Decades of Contaminated Water: Unraveling Sohbatpur, Balochistan's Struggle and Government Project Failures

اٹھائیس سالہ احسان علی بگٹی موٹر سائیکل مکینک ہیں جنہوں نے اپنے گاؤں گلزار کاپاری سے چار کلومیٹر پر ڈسٹرکٹ ہیڈکوارٹر صحبت پور میں ورکشاپ بنا رکھی ہے۔ گرمی ہو یا سردی صبح سویرے ان کا پہلا کام شہر سے دو گیلن پانی خرید کر گھر لانا ہوتا ہے جبکہ وہ شام کو دکان سے واپسی پر بھی دو گیلن پانی ساتھ لاتے ہیں۔

وہ بتاتے ہیں کہ ان کے دیہات میں متمول لوگوں نے پختہ جبکہ غریب لوگوں نے کچے تالاب (جوہڑ) بنا رکھے ہیں جن میں پٹ فیڈر کینال کی نہروں (ڈسٹری بیوٹریز) یا کھالوں (واٹر کورسز) کا پانی سٹور کر لیا جاتا ہے جسے لوگ سارا سال خود بھی پیتے ہیں اور جانوروں کو بھی پلاتے ہیں۔

2023ء کی مردم شماری کے مطابق تقریباً دو لاکھ 40 ہزار&nbsp; نفوس کی آبادی کا ضلع صحبت پور پانچ تحصیلوں پر مشتمل ہے جن میں تحصیل صحبت پور، مانجھی پور، فرید آباد، حیرالدین اور سید محمد کنرانی شامل ہیں۔

احسان علی کے مطابق مانجھی پور شہر اور یونین کونسل گورا ناڑی کے سوا تقریباً پورے ضلعے کا زیر زمین پانی انتہائی کڑوا ہے جبکہ سرکاری واٹر سپلائی سکیموں کے ذریعے فراہم کیا جانے والا پانی بھی پینے کے قابل نہیں ہے۔ اس لیے لوگ دور دراز سے گدھا گاڑیوں، موٹرسائیکل یا پھر رکشے پر پینے کا پانی بھر لاتے ہیں۔

ان کا کہنا تھا کہ ضلعی صدر مقام صحبت پور میں بھی یہ حالت ہے کہ شہری 40 روپے گیلن پانی خریدتے ہیں جبکہ محکمہ پبلک ہیلتھ انجینئرنگ (پی ایچ ای) کی پائپ لائنیں چوک ہو چکی ہیں۔ واٹر سپلائی میں گٹروں کا پانی شامل ہونے سے سرکاری پانی میں بدبو آتی ہے جس کو پینا تو دور اس سے کپڑے دھونا بھی ممکن نہیں۔

&quot;مجھے پینے کے چار گیلن پانی پر روزانہ 160 روپے یعنی ماہانہ چار ہزار 800 روپے خرچ کرنا پڑتے ہیں جبکہ جو لوگ پانی خریدنے کی سکت نہیں رکھتے وہ یہی سرکاری یا تالابوں والا پانی پینے پر مجبور ہیں۔&quot;

اسی سالہ حاجی صحبت خان کھوسہ صحبت پور کی یوسی موذئی کے زمیندار ہیں۔ وہ بتاتے ہیں کہ 2004ء میں پٹ فیڈر کینال بننے سے پہلے ان علاقوں میں زیر زمین پانی میٹھا تھا جہاں 50 سے 100 فٹ کے درمیان گہرائی پر بور کے ذریعے ہینڈ پمپ سے لوگ صاف پانی لیتے تھے۔

&quot;تاہم پٹ فیڈر کینال آنے کے دس سال بعد ہمارے علاقے کو سیم و تھور نے گھیر لیا جس سے زمینیں خراب ہونا شروع ہو گئیں جبکہ زیر زمین پانی میں تو جیسے کسی نے نمک ملا دیا ہو۔ یوں پانی کڑوا ہونے کے بعد ہمیں مجبوراً گاؤں میں تالاب بنانے پڑے اور کھالوں کا پانی ہماری قسمت یا مجبوری بن گیا۔&quot;

<a href="https://www.who.int/news-room/fact-sheets/detail/drinking-water">عالمی ادارہ صحت&nbsp; (ڈبلیو ایچ او) کے مطابق دنیا میں دو ارب افراد پینے کے لیے غیر محفوظ پانی استعمال کر رہے ہیں</a> جو اسہال، ہیضہ، پیچش، ٹائیفائیڈ اور پولیو سمیت کئی بیماریوں کا باعث بنتا ہے جبکہ ہیضے سے سالانہ پانچ لاکھ پانچ ہزار اموات ہو جاتی ہیں۔

<a href="https://www.unicef.org/pakistan/media/3016/file/Clean%20Drinking%20Water%20For%20All%20(CDWA)%20Evaluation%20Report.pdf">اقوام متحدہ کا ادارہ ہنگامی امداد برائے اطفال&nbsp; (یونسیف) کی 2018ء کی ایک رپورٹ کے مطابق</a>&nbsp; پاکستان میں دو کروڑ 72 لاکھ سے زائد افراد کو پینے کے صاف پانی تک رسائی حاصل نہیں جبکہ ملک میں آلودہ پانی اور خراب ماحول کے باعث ڈائریا سے سالانہ پانچ سال سے کم عمر 39 ہزار بچے موت کے منہ میں چلے جاتے ہیں۔

صاف پانی کی اہمیت کے پیش نظر پاکستان میں پرویز مشرف دور میں بلوچستان سمیت ملک میں &#39;کلین واٹر فار آل&#39; منصوبے کا آغاز کیا گیا۔ تاہم بلوچستان میں اس کے مطلوبہ نتائج سامنے نہ آ سکے۔

جس پر اس صوبے میں مسائل کی تشخیص کے لیے (یونسیف) اور پلاننگ اینڈ ڈیویلپمنٹ ڈیپارٹمنٹ نے کلین وائر فار آل پراجیکٹ (بلوچستان)&nbsp; کی صورت حال سے متعلق ایک رپورٹ (اویلیویشن رپورٹ) تیار کرانے کا فیصلہ کیا جو ستمبر 2018ء میں جاری کی گئی تھی۔

یہ رپورٹ بتاتی ہے کہ 2007ء میں وفاقی حکومت نے بلوچستان میں پہلے مرحلے (فیز1) میں 567 فلٹر پلانٹس نصب کرنے کا منصوبہ بنایا جو 2008ء سے 2011ء کے درمیان یونین کونسل (20,000 افراد کے لیے ایک پلانٹ) کی سطح پر ٹھیکیداروں کے ذریعے لگائے گئے۔

پہلے اس منصوبے کی نگرانی ماحولیاتی تحفظ کی ایجنسی کو سونپی گئی مگر بعد ازاں یہ ذمہ داری پبلک ہیلتھ انجینئرنگ ڈیپارٹمنٹ (پی ایچ ای ڈی) کو منتقل کر دی گئی تھی۔ یہ منصوبہ شروع ہوا تو اس کا ہدف 575 (567+8 اضافی پلانٹس) واٹر فلٹریشن کی تنصیب مقرر کیا گیا جن میں واٹر فلٹریشن پلانٹس، الٹرا فلٹریشن (یو ایف) اور ریورس اوسموس (آر او) پلانٹس شامل تھے۔

تاہم 2011ء میں پہلا مرحلہ ختم ہوا تو صرف 409 الٹرا فلٹریشن پلانٹس اور 13 آر او پلانٹس لگائے گئے تھے جبکہ یو ایف پلانٹس میں سے 45 غیر فعال رہے۔

اس دوران 2010ء میں ڈیوولیوشن پلان کے تحت صاف پانی کا منصوبہ مرکز سے صوبائی حکومت کو منتقل ہو چکا تھا جبکہ پلانٹس کو بجلی کی قلت، مینٹیننس کے اخراجات، سیاسی مداخلت سمیت کئی مسائل کا سامنا تھا جس کے باعث صارفین کو یا تو غیر محفوظ پانی مل رہا تھا یا پھر پلانٹس بند پڑے تھے۔

یہ رپورٹ انکشاف کرتی ہے کہ فیز ون کے خاتمے پر جب ان پلانٹس کی بلوچستان انجینئرنگ سروسز سے تھرڈ پارٹی ویریفکیشن (تصدیق) کرائی گئی تو پتا چلا تھا کہ 41 فیصد پلانٹس غیر فعال ہیں۔

تاہم یونیسف نے پلاننگ اینڈ ڈیویلپمنٹ ڈیپارٹمنٹ کے ساتھ تعاون جاری رکھا اور 2015ء میں صاف پانی منصوبے کے فیز ٹو کی تیاری شروع کر دی گئی جس پر عمل درآمد کا آغاز دو سال بعد ہوا۔ دوسرے مرحلے میں 85 سولر پلانٹس لگائے جانے تھے جن میں 24 آر او اور 61 الٹرا فلٹریشن پلانٹس شامل تھے۔

اس رپورٹ کے مطابق ان میں سے 409 الٹرا فلٹریشن پلانٹس پر 812.187 ملین روپے جبکہ 33آر او پلانٹس پر246.236 روپے لاگت آئی تھی۔

کلین ڈرنکنگ واٹر فار آل فیز II کی انتظامیہ کا تخمینہ تھا کہ دوسرا مرحلہ مکمل ہونے کے بعد بلوچستان کی آبادی کو ڈھائی لٹر پانی فی کس روزانہ مہیا کیا جا سکے گا۔ تاہم ڈبلیو ایچ او کے مطابق یہ مقدار روزانہ کم از کم ساڑھے سات لٹر فی کس ہونی چاہیے۔

لیکن اس دوران بلوچستان حکومت نے جامع تشخیصی (ایویلیوایشن) پالیسی تیار کرنے کے لیے یونیسیف سے مدد مانگ لی۔

یونیسیف کی رپورٹ کے مطابق 8 مئی 2018 ء کو کل 409 فلٹریشن پلانٹس میں سے 60 فیصد خراب تھے یا غیر فعال پائے گئے تھے۔(صفحہ 53) تاہم ضلع صحبت پور میں جو 40 فلٹریشن پلانٹس لگائے گئے ان میں سے 19 فعال اور 21 غیر فعال تھے (صفحہ 31)جبکہ 15 اضلاع کے تشخیصی سروے میں 80 فیصد لوگوں نے پانی کی فراہمی پر عدم اطمینان کا اظہار کیا۔

یہ رپورٹ واضح کرتی ہے کہ فنڈز کی کمی، ضلعی سطح پر ہنر مند و تربیت یافتہ افراد کی عدم موجودگی، ناکافی بجلی، پلانٹس کے لیے واٹرسورس کا ناقص انفراسٹرکچر (یا جگہ کا غلط انتخاب) صاف پانی کی ناکافی فراہمی کی بڑی وجوہات ہیں۔

&quot;محکمہ پی ایچ ای کی طرف سے پلانٹس کے بنیادی ڈھانچے کی ناقص دیکھ بھال، خراب نگرانی، تخریب کاری، کرپشن اور سیاسی مسائل نے معاملات کو گھمبیر بنا رکھا ہے جبکہ اہم سٹیک ہولڈرز پبلک ہیلتھ انجینئرنگ، ڈسٹرکٹ ہیلتھ آفس اور مقامی حکومت کے درمیان ہم آہنگی (کوارڈی نیشن) کا فقدان تھا۔&quot;

&quot;پلانٹس کو چلانے کے لیے بجٹ اور مرمت کا ریکارڈ اور ڈیٹا نا کافی تھا جبکہ 2015ء کے بعد شاہد ہی کبھی فلٹریشن پلانٹس کا پانی ٹیسٹ کیا گیا ہو جبکہ میں زیادہ تر آپریٹرز یہاں تک کہ پی ایچ ای کا اپنا عملہ بھی فنڈز کی کمی کی شکایت کرتا رہا۔&quot;

تاہم پی ایس ایل ایم سروے&nbsp; کے مطابق 2020-2019ء میں مجموعی طور پر ضلع صحبت میں 56.1 فیصد لوگ پانی کے امپرووڈ یعنی بہتر ذرائع ( نل کا پانی، ہینڈ پمپ، موٹر پمپ، کھودا ہوا محفوظ کنواں، فلٹر پلانٹس، محفوظ چشمہ یا بوتل کا پانی) استعمال کرتے تھے۔

لیکن 2022ء کی طوفانی بارشیں اور سیلاب سب کچھ بہا لے گیا۔ سیلاب کے بعد جمع پانی کے نتیجے میں صحبت پور، جھل مگسی، نصیر آباد، جعفرآباد اور کچھی کے اضلاع میں ملیریا اور پانی سے پیدا ہونے والی بیماریاں بڑھ گئیں۔

سیلاب سے اس صوبے میں جہاں سیکڑوں واٹر سپلائی سکیمیں تباہ ہوئیں وہیں ضلع صحبت پور میں پہلے سے ناکافی واٹر سپلائی اور سینی ٹیشن کا نیٹ ورک بھی برباد ہو گیا۔

حاجی صحبت خان کھوسہ کا کہنا تھا کہ طویل عرصہ وہ بھی تالاب کا پانی پیتے رہے لیکن اب ان کے گاؤں سے سات کلو میٹر دور جروار پل پر او جی ڈی سی ایل نے میٹھے پانی کے بور لگائے ہیں جہاں سے موٹر سائیکل لوڈر والے پانی لاتے ہیں اور وہ 40 روپےگیلن خرید کر استعمال کرتے ہیں۔

&quot;اب ہم نہانے کے لیے بھی پانی خریدتے ہیں ورنہ تالاب کے پانی سے جسم پر سرخ دانے، خارش اور شدید جلن ہوتی ہے۔ سیلاب کے بعد یہاں صاف پانی میسر نہ ہونے کے باعث بیماریاں پھیل گئی تھیں لیکن پھر آرمی والوں نے یہاں ٹینکر کے ذریعے پانی پہنچانا شروع کیا لیکن بعد میں جروار پل پر بور لگے تو علاقے میں بیماریاں کچھ کم ہوئیں۔&quot;

میر محمد بگٹی عرف بابو مانجھی پور کے رہائشی ہیں جو ان دنوں سرگودھا یونیورسٹی میں پی ایچ ڈی کر رہے ہیں۔ وہ بتاتے ہیں کہ ان کے کم و بیش 30 رشتہ دار خاندان کئی دہائیوں سے شہر سے تین کلو میٹر دور گوٹھ محمد عالم بگٹی میں رہائش پذیر تھے۔

&quot;ہمارے سارے رشتہ داروں کو بیماریوں نے جکڑ رکھا تھا جن کی وجہ سے درجنوں افراد جوانی ہی میں انتقال کر گئے جبکہ بچوں میں دست، الٹی اور پیچش عام تھی۔ میں نے ڈاکٹروں سے مشورہ کیا تو معلوم ہوا کہ بیماریوں کی جڑ جوہڑ کامضر صحت پانی ہے۔&quot;

&quot;ہم نے صاف پانی کی فراہمی کے لیے ضلعی محکموں کو درخواستیں دیں مگر کسی نے بات نہیں سنی۔ بالآخر تنگ آ کر میں نے اپنے قبیلے کے بزرگوں کو مانجھی پور شہر منتقل ہونے کا مشورہ دیا جن میں سے ہمارے کچھ خاندان کافی پس و پیش کے بعد یہاں نقل مکانی پر راضی ہوئے جس کو دو سال بیت چکے ہیں۔ یقین مانیں! اب بچوں بڑوں سب کی حالت بہتر ہے۔&quot;

ڈاکٹر مشتاق احمد داجلی صحبت پور میں محکمہ ہیلتھ سے وابستہ ہیں۔ وہ تصدیق کرتے ہیں کہ ان علاقوں میں جوہڑوں یا تالاب کے پانی کے استعمال کی وجہ سے گردے اور پیٹ کی بیماریاں عام ہیں جبکہ سرکاری ہسپتالوں میں زیادہ تر بچے دست، الٹی اور کمزوری کی شکایات کے ساتھ آتے ہیں۔

اب صورت حال یہ ہے کہ محکمہ پی ایچ ای کی بیشتر واٹر سپلائی سکیمیں اور متعدد فلٹریشن پلانٹس عرصہ دراز سے بند پڑے ہیں۔

واٹر سپلائی کے معاملے پر سرکاری محکموں میں کوارڈی نیشن کا اب بھی یہ عالم ہے کہ چئیرمین ڈسٹرکٹ کونسل صحبت پور اور دیگر ارباب اختیار نے یہ کہہ کر جان چھڑا لی کہ ان معاملات پر محکمہ پی ایچ ای ہی بہتر جواب دے سکتا ہے۔ جبکہ ڈسٹرکٹ ہیلتھ افسر نے بار بار رابطہ کرنے پر بھی بات کرنے کو تیار نہیں ہوئے۔

اس سلسلے میں لوک سجاگ نے محکمہ پی ایچ ای کے ایکسیئن شکراللہ بلوچ سے رابطہ کیا تو انہوں نے پہلے تو بات کرنے سے انکار کر دیا تاہم بعد ازاں وہ واٹر سپلائی کی تفصیل بتانے پر رضامند ہو گئے۔

انہوں نے دعویٰ کیا کہ ضلع بھر میں اس وقت محکمہ پی ایچ ای کی 12 واٹر سپلائی سکیمیں ہیں جن میں سے تین سولر سسٹم اور نو بجلی پر چل رہی ہیں جبکہ کل 53 فلٹریشن پلانٹس ہیں جن میں 40 فعال اور 13 غیر فعال ہیں۔

لیکن پی ایچ ای حکام اور اہلکار اب بھی وہی فنڈز کی کمی کا شکوہ کرتے ہیں۔ ایکسیئن بتاتے ہیں کہ ضلع بھر میں واٹر سپلائی سکیمیں چلانے کے لیے پہلے ان کے محکمے کو ہر تین ماہ بعد چھ لاکھ روپے ملتے تھے لیکن سیلاب کے بعد یہ رقم نصف یعنی تین لاکھ روپے کر دی گئی جس سے مشکلات مزید بڑھ گئی ہیں۔

&quot;ہم جو سکیمیں چھ لاکھ میں فعال نہیں کر پا رہے تھے وہ محض تین لاکھ روپے میں کیسے چل رہی ہوں گی؟ اس کا اندازہ لگانا مشکل نہیں۔&quot;

ان کا کہنا تھا کہ صحبت پور سکیم کے تالاب میں پٹ فیڈر کینال سے بذریعہ اوچ کینال اور خیر واہ پانی آتا ہے جو تالابوں سے سیٹلنگ ٹینک اور پھر فلٹر ٹینک ہو کر شہر کو سپلائی کے لیے جاتا ہے۔ تاہم سیلاب کے بعد یونیسف نے آٹھ واٹر سپلائی سکیموں کو فعال کرکے دیا تھا۔

شکراللہ بلوچ نے بتایا کہ صحبت پور شہر کی تقریباً 47 ہزار آبادی کو روزانہ 6 لاکھ گیلن پانی مہیا کیا جاتا ہے جس کے لیے ملنے والے سہ ماہی فنڈز واٹر سپلائی سکیموں کی رپئیرنگ اور مینٹینس کے لیے ناکافی ہے۔

&quot;سیلاب کے بعد ہمیں واٹر فلٹریشن پلانٹس کے لیے کوئی رقم نہیں ملی جس کے باعث اکثر پلانٹس کی حالت خراب ہے تاہم یونیسیف نے مزید 10 فلٹریشن بحال کر کے دینے کا کہا ہے لیکن ان پر ابھی کام نہیں ہو سکا۔&quot;

شہریوں کو پانی کی فراہمی میں مشکلات کا اعٹراف کرتے ہوئے ان کا کہنا تھا کہ سیلاب کے بعد تحصیل فریدآباد میں ایک فلاحی تنظیم نے تین واٹر سکیمیں بحال کر کے دی تھیں لیکن یہاں بھی آپریٹرز کو کئی ماہ تک تنخواہیں نہیں مل پاتیں۔

&quot; اپریل سے مئی کے آخر تک کینالز بھل صفائی کے لیے بند ہو جاتی ہیں جبکہ گرمیوں میں پانی کا استعمال بڑھ جاتا ہے۔ ایک تو ہمارے پاس سٹوریج میں گنجائش کم ہے، اوپر سے بجلی اور وولٹیج کی کمی بھی پانی کی قلت کا باعث بن جاتی ہے جبکہ کوئی موٹر جل جائے تو مرمت کے الگ مسائل ہیں۔&quot;

ایکسیئن پی ایچ ای نے بتایا کہ صحبت پور کے لیے حال ہی میں ایشئین ڈیویلپمنٹ بینک کی طرف سے ایک پراجیکٹ دیا گیا ہے جس کی لاگت سات کروڑ کے لگ بھگ بتائی جا رہی ہے۔ اگر یہ بن گیا تو کافی مسائل حل ہوسکتے ہیں لیکن اس پر کام ہوگا یا نہیں یہ کہنا قبل از وقت ہو گا۔

&quot;ہمارے ضلع میں واٹر سپلائی اور فلٹریشن پلانٹس کے لیے بڑا پراجیکٹ درکار ہے۔&quot; تاہم انہوں نے ساتھ ہی یہ دعویٰ بھی کیا کہ صرف دو تین کے سوا تمام واٹر فلٹریشن پلانٹ فعال ہیں۔

ڈاکٹر مشتاق احمد داجلی کہتے ہیں کہ پی ایچ ای کی واٹر سپلائی کا پانی تو قطعی پینے کے قابل نہیں ہے جبکہ ٹینکرز والے جو پانی شہر لاتے ہیں وہ بھی اکثر خراب ہو چکا ہوتا ہے۔ یہ کئی کئی دن دھوپ میں کھڑے رہتے ہیں جن میں کائی جم چکی ہوتی ہے اور ان ٹینکرز کو کوئی صاف نہیں کرتا۔ محکمہ پی ایچ ای والوں کو اپنا پانی ٹیسٹ کرانے کے بعد سپلائی کرنا چاہیے۔

پی ایچ ای کی طرف سے مضر صحت پانی سپلائی ہونے کی شکایات پر ایکسیئن شکراللہ بلوچ کا کہنا تھا کہ محکمہ کی طرف اکثر اوقات پانی ٹیسٹ کیا جاتا ہے تاہم انہوں نے کوئی ایک واٹر ٹیسٹنگ رپورٹ بھی شئیر کرنے سے انکار کر دیا۔

پورے ضلع صحبت پور میں ایک لیڈی ڈاکٹر: 'ایسا نہ ہوتا تو بیٹی کے سر پر ماں کا سایہ سلامت ہوتا'

صحبت پور: لوگ دیہی علاقوں سے شہروں میں نقل مکانی پر کیوں مجبور ہیں؟

text

بلوچستان کے ضلع صحبت پور کے لوگ درختوں کو کاٹ کر جلائے جا رہے ہیں۔ اس لیے نہیں کہ ان کی درختوں سے کوئی دشمنی ہے اور نہ ہی انہیں لکڑیاں جلانا کا شوق ہے بلکہ مجبوری یہ ہے کہ پیٹ کی آگ بجھانے کے لیے انہیں کھانا بھی تو پکانا ہے۔

اس ضلعے کی 80 فیصد آبادی ویسے ہی گیس کی سہولت سے محروم ہے جو چولہا جلانے کے لیے لکڑی، ایل پی جی یا اوپلے (جانوروں کا خشک گوبر) بطور ایندھن استعمال کرتی ہے۔ تاہم اب یہ اشیاء جلانے والوں کی تعداد میں اضافہ ہو چکا ہے۔

صحبت پور اوچ گیس فیلڈ ایریا سے صرف 19 کلو میٹر دور ہے جبکہ سوئی 80 کلومیٹر کے فاصلے پر ہے جہاں قدرتی گیس کے بڑے ذخائر ہیں۔

سترام داس مانجھی پور شہر کے رہائشی اور ہندو پنچایت کے صدر ہیں۔ وہ بتاتے ہیں کہ شہر میں 2010ء کے سیلاب کے بعد گیس کا پریشر کم ہونا شروع ہوا۔ دوسال بعد دوبارہ سیلاب آیا تو گیس نہ ہونے کے برابر رہ گئی جس پر یہاں لوگوں نے کمپریسر لگا لیے تھے اور گزارہ چلتا رہا۔ لیکن اب چار سال سے گیس مکمل طور پر بند ہے۔

مانجھی پور میں ہندو برادری کے لگ بھگ 50 خاندان رہتے ہیں اور بیشتر تجارت پیشہ ہیں۔ سترام داس کہتے ہیں کہ ان کے ارد گرد تمام گھر لکڑی اوپلے اور ایل پی جی استعمال کر رہے ہیں۔ جس سے مالی نقصان کے ساتھ لوگوں کی صحت بھی تباہ ہو رہی ہے۔

&nbsp;انہوں نے بتایا کہ ان کے گھر میں ماہانہ چار ہزار روپے کی ایل پی جی، دو ہزار کی لکڑی اور ہزار روپے کے چار بوری اوپلے آتے ہیں۔ یعنی گیس نہ ملنے کے باعث سات ہزار روپے ماہانہ اضافی خرچ کرنا پڑ رہے ہیں جس سے اس مہنگائی میں مشکلات مزید بڑھ گئی ہیں۔

نصیرآباد ڈویژن سے تعلق رکھنے والے میر ظفر اللہ جمالی جب وزیر اعظم بنے تو اس وقت 2005ء میں ان علاقوں میں گیس مہیا کی گئی تھی۔ لیکن پانچ سال بعد ہی مانجھی پور کو سپلائی میں کمی آ&nbsp; گئی۔

&nbsp;تحصیل مانجھی پور کے مرکزی شہر کی آبادی لگ بھگ 18 ہزار ہے۔گیس کمپنی کے مطابق یہاں 300 کے قریب کنکشن تھے ان میں سے کچھ بند بھی ہو چکے ہیں۔

سترام داس کے مطابق گیس چار سال سے بند ہے لیکن بل ہر ماہ اپنے وقت پر آجاتے ہیں۔ پہلے جب گیس ملتی تھی تو ایک ہزار سے زیادہ بل نہیں آتا تھا مگر اب ڈیڑھ ہزار کے قریب آتا ہے۔ جو ادا نہیں کرتے ان کا اگلے ماہ جرمانے کے ساتھ نیا بل آجاتا ہے۔

&quot;گیس نہ ملنے سے خرچے تو بڑھ ہی گئے تھے لیکن اب لکڑیاں اور اوپلے جلا جلا کر دھوئیں سے میری بہو اور بیوی دونوں کی آنکھوں میں انفیکشن ہو گیا ہے۔ بچوں کو&nbsp; مستقل کھانسی کی شکایت ہے۔ ان کے علاج کے لیے ڈاکٹر کے پاس گئے تو وہ کہتے ہیں کہ ایل پی جی استعمال کریں۔&quot;

شہر کے بیشتر گھروں کی یہی صورتحال ہے خواتین گلے اور آنکھوں کے مسائل سے پریشان ہیں۔ کیوں کہ یہاں لوگوں کی اکثریت ایل پی جی گیس کے اخراجات برداشت نہیں کر سکتی اور اکثر اوقات سردیوں میں ایل پی جی کی قلت بھی ہو جاتی ہے۔

ستر سالہ مائی نصیباں (فرضی نام) گوٹھ شفقت خان کھوسہ میں اپنے بیٹے اور بہو کے ساتھ رہتی ہیں۔ وہ بتاتی ہیں کہ کئی سال پہلے جب گیس کا نام و نشان تک نہیں تھا تو وہ کھیت کی لکڑیوں اور بھینس کے سوکھے گوبر کو جلا کر کھانا بناتی تھیں۔ اب لگتا ہے وہی پرانا زمانہ واپس لوٹ آیا ہے۔

یہاں لکڑی پٹ فیڈر اور حیرالدین کے علاقوں سے درختوں کو کاٹ کر لائی جاتی ہے جو آٹھ سو روپے من فروخت ہوتی ہے۔ پانچ افراد پر مشتمل گھرانہ سردیوں میں اوسطاً ماہانہ چار من اور گرمیوں میں تقریبا ڈھائی من لکڑی استعمال کرتا ہے۔ ساتھ تین بوری اوپلے بھی لگتے ہیں جن کا ریٹ اب 250 روپے فی بوری ہے۔

مانجھی پور میں لوگوں کی شکایات پر دو مرتبہ سوئی سدرن کی ٹیمیں آئیں لیکن گیس بحال تو نہیں ہو سکی۔ شہری کئی بار احتجا ج ریکارڈ کرا چکے ہیں اور گیس حکام کے علاوہ ضلعی انتظامیہ کو بھی درخواستیں دی گئیں لیکن سوئی گیس ملنے کے کوئی آثار نظر نہیں آ رہے۔

یہاں آنے والی سوئی سدرن کی ٹیم نے بتایا تھا کہ صحبت پور سے براستہ مولوی قادر بخش مانجھی پور کی گیس پائپ لائن فش فارمز سے گزرتی ہے جو تالابوں میں دب چکی ہے۔

ڈیرہ اللہ یار زون کے منیجر اللہ بخش بتاتے ہیں کہ پریشر کے ذریعے پائپ لائن کو صاف کرنے کی کوشش کی گئی تھی مگر تالابوں میں دبی لائینیں کئی جگہوں سے لیک ہو رہی ہیں۔ جب تک نئی پائپ لائن نہیں آئے گی تب تک گیس بحال نہیں ہو سکتی۔

&nbsp;وہ کہتے ہیں کہ نئی پائپ لائن کے لیے متعلقہ حکام کو مراسلے لکھے جا چکے ہیں مگر ابھی تک فنڈز کی منظوری نہیں ہوسکی ہے۔

کراچی میں سوئی سدرن گیس کمپنی کے ترجمان سلمان احمد صدیقی نے لوک سجاگ کو بتایا کہ صحبت پور کی تین تحصیلوں میں گیس صارفین کی تعداد ایک ہزار 200 کے قریب ہے۔ تحصیل حیرالدین، پنہور سنہڑی اور سید محمد کنرانی میں ابھی گیس نہیں دی گئی۔

وہ کہتے ہیں کہ کمپنی نے ڈیرہ اللہ یار زون میں نیٹ ورک کی بحالی کا فیصلہ کیا ہے جس پر پہلے مرحلے میں 56کروڑ روپے خرچ کیے جائیں گے۔ صحبت پور سے مانجھی پور 20 کلومیٹر تین انچ قطر کی پائپ لائن کا ایک حصہ بحال کر دیا گیا ہے۔ تاہم تالابوں میں ڈوبا 80 فٹ ٹکڑا بوسیدہ ہوچکا ہے جس کو جلد ٹھیک کر دیا جائے گا۔

سرکاری افسروں کو یہ دلاسے دیتے ہوئے سالوں بیت چکے ہیں۔

مشتاق احمد بلیدی ضلع صحبت پور کی تحصیل سید والا کے رہاشی&nbsp; اور ریٹائرڈ ڈپٹی ڈسٹرکٹ افسر ایجوکیشن ہیں۔ وہ بتاتے ہیں کہ علاقے میں روزگار اور گیس نہ ہونے کی وجہ ماحول تبا ہ ہو رہا ہے۔

&quot;آج موسمیاتی تبدیلیوں کے مقابلے کے لیے ہمیں درختوں کی ضرورت ہے۔لیکن ہمارے لوگ روزی روٹی کے لیے درخت کاٹ کر جلا رہے ہیں یا لکڑیاں بیچ رہے ہیں۔&quot;

&nbsp;وہ کہتے ہیں کہ بلوچستان کی گیس ملک کے کئی شہروں میں جاتی ہے لیکن یہ گاؤں جہاں سے اوچ گیس فیلڈ کی جلتی چمنیاں کو دیکھا جاسکتا ہے، یہاں گیس میسر نہیں ہے۔

&quot; ہم یہ چمنیاں دیکھ کر ٹھنڈی آہیں بھرتے ہیں کہ کاش ہمیں بھی گیس مل جائے۔ یہاں سے 15 کلومیٹر پر مین پائپ لائن پڑی ہے مگر اس سے متصل دیہہ کنرانی اور دیہہ لاشار میں ہمارے لوگ اس سہولت سے محروم ہیں۔&quot;

تر جمان سوئی سدرن&nbsp; کہتے ہیں کہ وفاق نے نئے کنکشنز اور توسیع پر پابندی لگا رکھی ہے اس لیے کسی اور علاقے میں گیس نہیں دی جا سکتی تاہم انہوں نے یقین دلایا کہ صحبت پور میں گیس کمپنی کا سنٹر بنانے کے لیے انتظامیہ کے ساتھ معاملہ اٹھایا جائے گا۔

مانجھی پور شہر: چار سال سے بل باقاعدگی سے آ رہے ہیں، سوئی گیس کیوں نہیں آ رہی؟

سعید خان ضلع صحبت پور کے رہائشی اور ایف ایس سی کے طالب علم ہیں۔ وہ اپنے گوٹھ امین مرہٹہ سے تین کلو میٹر کے فاصلے پر واقع گورنمنٹ کالج مانجھی پور میں پڑھتے ہیں۔

سترہ سالہ سعید خان نے میٹرک بھی یہیں مانجھی پور سے کیا تھا۔ اس لیے انہیں کالج آنے جانے میں کوئی خاص تکلیف نہیں اور نہ ہی اساتذہ سے کوئی شکایت ہے۔ مگر مسئلہ یہ ہے کہ ان کا کالج صرف دو کمروں پر مشتمل ہے۔ فرسٹ ایئر اور سیکنڈ ایئر کے تمام مضامین کی کلاسز کے لیے یہی دو کمرے ہیں۔

وہ بتاتے ہیں کہ دونوں کلاس رومز کی حالت اتنی خراب ہے کہ دوران کلاس بھی چھت سے گارے اور سیمنٹ کے ٹکڑے گرتے رہتے ہیں اور ان کے ساتھی طالب علموں کی توجہ لیکچر سے زیادہ چھت پر رہتی ہے کہ کہیں اوپر ہی نہ آن گرے۔

سعید خان کے والد محمد امین کاشتکاری کرتے ہیں۔ ان کے پاس اپنی بارہ ایکڑ زمین ہے لیکن سیم زدہ ہےجس کی وجہ سے ان کی آمدنی بہت محدود ہے۔ سعید خان کہتے ہیں کہ اپنے شہر سے باہر جا کر تعلیم حاصل کرنا ان کے لیے ممکن نہیں ہے۔

&quot;اس لیے ہم سب اور اساتذہ انہیں کلاس رومز میں پڑھنے کے لیے بھی باری کا انتظار کرتے ہیں۔ جہاں ہر وقت جان کا خطرہ سر پر منڈلاتا رہتا ہے۔ ایک بار تو جشن آزادی کے دن چھت کا ایک بڑا ٹکڑا گر گیا تھا۔ شکر ہے لڑکے باہر تھے اس لیےکوئی جانی نقصان نہیں ہوا۔&quot;

ان کا کہنا تھا کہ سنا ہےکالج کی نئی عمارت کے لیے تین سال سے پیسے آئے ہوئے ہیں لیکن پتہ نہیں کس وجہ سے کام شروع نہیں ہو پا رہا؟

بلوچستان کے ضلع صحبت پور کی تحصیل مانجھی پور، سندھ کے ضلع جیکب آباد سے متصل ہے۔ مانجھی پور شہر اگرچہ 18 ہزار نفوس پر مشتمل ہے تاہم یہ قدیم آبادی ہے۔

مانجھی پور اس علاقے میں سبی کے بعد دوسرا شہر ہے جہاں برطانوی دور میں پرائمری سکول بنایا گیا تھا۔ 1946ء میں اسے مڈل کا درجہ دینے کے ساتھ یہاں ہاسٹل بھی تعمیر کیا گیا۔ یہاں نصیرآباد تک کے طلباء رہائش اختیار کرتے رہے اور انہیں مقامی زمیندار خان بہادر کی جانب سے کھانا فراہم کیا جاتا تھا۔

مانجھی پور مڈل سکول کو1952ء میں ہائی سکول کا درجہ ملا۔ کئی سال بعد&nbsp; یہاں دوسرا ہائی سکول بھی بن گیا مگر 2013ء تک ایف ایس سی کے لیے بچوں کو حیرالدین انٹر کالج جانا پڑتا تھا۔ تاہم 2015ء میں مانجھی پور انٹر کالج بنانے کی منظوری دی گئی۔

کالج کے لیکچرار اللہ داد پنھیار بتاتے ہیں کہ انٹر کالج میں کلاسز کا آغاز دو سال بعد 2017ء میں ہوا۔ پروفیسر جان محمد کھوسہ پہلے پرنسپل تعینات ہوئے۔ اس وقت بھی کالج کے لیے عمارت دستیاب نہیں تھی۔

وہ کہتے ہیں کہ پرنسپل نے مختلف شخصیات کی مدد سے مانجھی پور ہائی سکول میں ایک کمرہ حاصل کیا اور شام کو سکول میں انٹر کی کلاسز شروع کرا دیں۔ پانچ ماہ ایک کمرے میں کالج کا کام جاری رہا۔ پھر نئے پرنسپل محمد ایوب منگریو نے چارج سنبھالا تو طلباء کی تعداد میں اضافہ ہو چکا تھا۔

پرنسپل محمد ایوب منگریو بتاتے ہیں کہ سیاسی شخصیات کی دلچسپی اور ان کی کوششوں سے ہائی سکول کے ہاسٹل کی 1946ء والی پرانی عمارت کا انتخاب کیا گیا جو متروک ہو چکی تھی۔ اس بوسیدہ عمارت میں چار کمرے قابل استعمال بنائے گئے۔ جن میں سے ایک دفتر، ایک لیب اور دو کلاس رومز کے طور پر استعمال ہو رہے ہیں۔

مانجھی پور کالج کو 2019ء میں ڈگری کا درجہ دے دیا گیا لیکن بلڈنگ نہ ہونے کے باعث بی ایس کی کلاسز کا اجرا نہیں ہوسکا ہے۔

ابھی یہاں صرف ایف اے/ ایف ایس سی کی کلاسز لگتی ہیں۔ طلباء کی تعداد 250 اور طالبات کی تعداد 70 ہے۔ صبح کو کلاس رومز میسر نہ ہونے کی وجہ سے طالبات کی کلاسیں شام کو ہوتی ہیں۔

پرنسپل&nbsp; کہتے ہیں کہ موجودہ عمارت میں سٹاف سمیت طلباء کی زندگی کو&nbsp; شدید خطرات لاحق ہیں۔ بچے کالج آنے سے ڈرتے ہیں اب اس عمارت میں مزید تعلیم جاری رکھنا انتہائی مشکل ہو چکا ہے۔

انہوں نے شکوہ کیا کہ تین سال سے کالج کی عمارت کے لیے فنڈز آ چکے ہیں۔ زمین بھی الاٹ ہو چکی ہے مگر تعمیراتی کام کا آغاز نہیں ہو سکا۔

&nbsp;محکمہ مواصلات و تعمیرات کے ایکسیئن احمد نواز عمرانی بتاتے ہیں کہ 2020ء کے بجٹ میں ڈگری کالج کے لیے 15 کروڑ 52 لاکھ روپے منظور ہوئے۔ محکمے نے 17 نومبر 2021ء کو فیز ون کے ٹینڈرز جاری کیے۔

&quot;ضلعی انتظامیہ نے کالج کے لیے جون 2022 ء میں مانجھی پور سے ایک کلو میٹر مغرب میں&nbsp; دس ایکڑ زمین ہمارے حوالے کی تھی۔ جس کے بعد موبلائزیشن کی مد میں 10 فیصد رقم یعنی ڈیڑھ کروڑ ٹھیکیدار کو ریلیز کر دیے گئے تھے۔&quot;

وہ کہتے ہیں کہ زمین الاٹ ہوتے ہی کام شروع کرا دیا گیا تھا لیکن بارشوں کی وجہ سے کام روکنا پڑا۔اس کے بعد وہاں کام کرنا ناممکن تھا اب بھی اس زمین پر پانی کھڑا ہے۔

کالج کی عمارت کے ٹھیکیدار عبدالعزیز کھوسہ بتاتے ہیں کہ ٹینڈرز کے دو ماہ بعد محکمہ کا ورک آرڈر ملا تو زمین تک مٹیریل اور مشینری لے جانے کا راستہ نہیں تھا۔ ٹینڈر میں راستہ بنانے کے لیے پیسے نہیں رکھے گئے تھے۔ پچیس لاکھ روپے جیب سے خرچ کر کے راستہ بنایا۔

وہ کہتے ہیں کہ وہ کام شروع کرانے لگے تو زمین کالج کے نام نہیں تھی۔ ریونیو بورڈ کے ذریعے جون 2022ء میں مسئلہ حل ہوا لیکن جب دوبارہ کام کا آغاز کرنا چاہا تو شدید بارشیں شروع ہوگئیں اور سیلاب آگیا۔ آج تک یہ جگہ کام کے قابل نہیں ہے۔

&quot;کالج کی زمین چاروں طرف سے زرعی اراضی&nbsp; میں گھری ہے اور سڑک سے تقریباً چار فٹ نیچی ہے۔ اس لیے وہاں مجوزہ نقشے کے مطابق بلڈنگ بن ہی نہیں سکتی۔&quot;

عبدالعزیز کا کہنا ہے کہ جتنے پیسے انہیں ملے ہیں وہ اتنا کام کریں گے مزید کام نہیں کر سکتے۔ کیونکہ اب مٹیریل کے ریٹس بڑھ چکے ہیں۔

&quot;اگر محکمہ دوبارہ ٹینڈر کرے تو پھر ہی کام کرنا ممکن ہو سکتا ہے&quot;۔

تاہم ایکسیئن بلڈنگز سمجھتے ہیں کہ ٹھیکیدار کو ٹینڈرز کے مطابق کام مکمل کرنا ہو گا۔ اگر چاہے تو دوبارہ ٹینڈرز کے لیے درخواست بھی دے سکتا ہے۔ لیکن کام مکمل نہ کیا تو ٹھیکیدار&nbsp; بلیک لسٹ ہو جائے گا۔

محمد آصف کھوسہ یونین کونسل مانجھی پور کے چیئرمین ہیں۔ وہ بتاتے ہیں کہ اس کالج کے لیے ضلع کونسل سے یونین کونسل تک میں قرار دادیں پیش ہوئیں۔ کئی لوگوں کی کوششوں سے&nbsp; پہلے انٹر اور پھر ڈگری کالج منظور ہوا۔ اس کے بعد عمارت کے لیے ہر ادارے کو درخواستیں دی گئیں۔

&quot;تین سال سے رقم موجود ہے لیکن کام نہیں ہو رہا۔ اگر زمین کے حوالے سے کوئی ایشو ہے تو ڈپٹی کمشنر پرانے ہاسٹل والی جگہ کالج کے نام کرا دیں۔ ہمیں محکمے یا ٹھیکیدار کی کوتاہی سے کوئی سرو کار نہیں۔ کالج کی تعمیر شروع نہ ہوئی تو ہم عدالت سے رجوع کریں گے۔&quot;

ضلع واشک کا پہلا انٹرکالج: سات سال سے زیر تعمیر عمارت اور اس میں زیر تعلیم طلبا کی کہانی

تحصیل مانجھی پور کا واحد ڈگری کالج، صرف دو کلاس روم،'وہ بھی اب گرے کہ تب'

صحبت پور&nbsp; سے 13 کلو میٹر دور قصبہ حیرالدین کی طرف جائیں تو آبادی کے باہر ایک نامکمل سی ٹوٹی پھوٹی چار دیواری اور اندر کا چٹیل میدان حیرت زدہ کردیتا ہے۔

میدان میں ایک کمرہ ہے اور کچھ زنگ آلود مشینری پڑی ہے۔ دراصل یہ صحبت پور کا &quot;سپورٹس کمپلیکس&quot; ہے جو &quot;سیاسی کھیلوں&quot; کی منہ بولتی تصویر بنا ہوا ہے۔

سابق وزیراعلی بلوچستان جام کمال خان&nbsp; کے دور میں نصیر آباد ڈویژن میں تین سپورٹس کمپلیکس بنانے کا اعلان کیا گیا تھا یہ منصوبے نصیرآباد کے علاوہ سبی اور صحبت پور میں شروع کیے گئے۔

صحبت پور کا سپورٹس کمپلیکس شروع ہوا مگر جام کمال کے جاتے ہی منصوبہ بھی جام ہوگیا۔

ضلع صحبت پور کی آبادی دو لاکھ سے زائد ہے۔ یہ پہلے ضلع جعفرآباد کی تحصیل تھا۔ 2013ء میں اسے ضلعے کا درجہ دیا گیا۔

&nbsp;فیاض احمد کھوسہ ہارڈ بال کرکٹ کے آل راؤنڈر کھلاڑی اور ضلعی سپورٹس ایسوسی ایشن کے صدر&nbsp; ہیں۔ وہ شہر کے&nbsp; نواحی گاؤں سخی در محمد کھوسہ کے میں رہتے ہیں۔مگر وہ کھیلوں اور کھلاڑیوں کے بارے میں مایوس ہیں۔

&quot; ہمارے ہاں ٹیلنٹ کی کوئی کمی نہیں، سرکاری اور غیر سرکاری سطح پر ٹورنامنٹ بھی ہوتے ہیں لیکن یہاں ایک بھی ڈھنگ کا سپورٹس گراؤنڈ نہیں ہے۔ سپورٹس کمپلیکس کی منظوری پر کھلاڑیوں کو بہت خوشی ہوئی تھی مگر افسوس&nbsp; تین سال میں صرف چاردیواری ہی بن سکی ہے۔ صحبت پور میں نوجوان کھلاڑیوں کا کیریئر شروع ہوتے ہی ختم ہو گیا ہے۔ &quot;

محکمہ مواصلات و تعمیرات (بی اینڈ آر )کے ایکسئین بشیر احمد نے بتایا کہ ضلع صحبت پور میں اس منصوبے کی لاگت کا کل تخمینہ 26 کروڑ 60 لاکھ روپے تھا۔

&quot; پہلے تو صحبت پور شہر میں سپورٹس کمپلیکس کے لیے جگہ تلاش کی گئی مگر کامیابی نہیں ہوئی۔آخر شہر سے ساڑھے 13کلو میٹر&nbsp; کے فاصلے پر تحصیل حیرالدین میں تقریبا 40 ایکڑ اراضی کا انتخاب کیا گیا۔یہ زمین مقامی سیاسی شخصیت میر نبی بخش خان کھوسہ&nbsp; مرحوم نے گورنمنٹ ڈگری کالج کے لیے وقف کی تھی&quot;۔

انہوں نے بتایا کہ شہر سے&nbsp; دور سپورٹس کمپلیکس&nbsp; بنانے پر سیاسی پارٹیوں، کھلاڑیوں اور شہریوں نےبہت&nbsp; تنقید کی مگر قریب&nbsp; کوئی سرکاری اراضی دستیاب نہیں تھی ۔ اگر نجی زمین خریدتے تو رقم اسی پر لگ جاتی اور&nbsp; کمپلیکس کی تعمیر ہی شروع نہ ہو پاتی۔

انہوں نے بتایا کہ سپورٹس کمپلیکس منصوبے میں فٹ بال اور کرکٹ کے&nbsp; الگ الگ گراؤنڈ، ٹیبل ٹینس اور والی بال کے کورٹس کے علاوہ&nbsp; جمنیزیم کی تعمیر بھی شامل ہے۔

&quot;ٹینڈرز کے بعد کام کا ٹھیکہ ایک نجی کمپنی کو ملا جس کے بعد حکومت نے ابتدائی موبلیٹی اور باؤنڈری وال کے لیے کل رقم کا تقریبا 18 فیصد یعنی پانچ کروڑ روپے جاری کر دیئے&quot;۔

وہ کہتے ہیں کہ کمشنر نصیر آباد ڈویژن نے 19 مارچ 2021 ء کو منصوبے کا سنگ بنیاد رکھ کر کام کا باقاعدہ آغاز کردیا۔ مزید رقم ریلیز نہ ہونے کے باعث اب تک کام بند پڑا ہے۔

سپورٹس کمپلیکس کے ٹھیکیدار پرویز احمد خان کا کہنا ہے کہ انہوں نے 2020ء میں ٹھیکہ 2018 ءکے شیـڈول کے مطابق لیا تھا مگر اب لاگت بہت بڑھ گئی ہے۔ شیڈول عمارتی سامان کی قیمتوں کی تفصیل ہوتی ہے جن کا تعین پاکستان انجئینرگ کونسل کرتی ہے۔

&nbsp;پرویز احمد نے بتایا کہ اس وقت سٹیل(سریا) کی قیمت&nbsp; ایک لاکھ 30 ہزار روپے ٹن تھی جو 2023 ءکے شیڈول میں&nbsp; تین گنا بڑھ کر تین لاکھ 50 ہزار روپے ٹن تک&nbsp; پہنچ چکی ہے۔ سمینٹ اس وقت 540 روپےبوری تھا اب&nbsp; قیمت 1100 روپے بوری ہوچکی ہے۔

ڈیزل تب&nbsp; 80 روپے لٹر تھا ،کام شروع کیا تو 120 روپے ہوگیا اور اب 280 روپے لٹر تک پہنچ چکا ہے۔

وہ کہتے ہیں کہ ترقیاتی پالیسی کے تحت حکومت بلڈنگ کے ٹھیکے میں صرف&nbsp; کنکریٹ اور لوہے پر اضافی رقم دیتی ہے باقی&nbsp; سامان کے&nbsp; اضافی پیسے نہیں ملتے۔

&#39;&#39; جب تک 2023 ء کے شیڈول کے مطابق مزید رقم نہیں ملتی تب تک یہاں کام بند رہے گا ۔ حکام سے بات چیت جاری ہے&nbsp; امید ہے اس پرو جیکٹ کے لیے مزید فنڈز کی منظوری ہوجائے گی۔&#39;&#39;

مقامی زمیندار اور سماجی کارکن&nbsp; جہانگیر خان سپورٹس کمپلیکس&nbsp; سےصرف سات کلو میٹر دور گاؤں عبدالرحیم کنرانی&nbsp; میں رہتے ہیں،ان کا کہنا ہے کہ&nbsp; ہر نئی حکومت کروڑوں روپے کے میگا منصوبے شروع کرتی ہے لیکن اکثر&nbsp; ادھورے&nbsp; پڑے رہتے ہیں۔

&quot;سپورٹس کمپلیکس کے ساتھ بھی یہی ہوا۔ ہر حکومت کی پہلی ترجیح جاری منصوبوں کی تکمیل ہونی چاہئے ورنہ عوام کے ٹیکسوں کا سرمایہ ضائع ہوجاتا ہے&quot;۔

پرویز خان بھی جہانگیر خان&nbsp; کی تائید کرتے ہیں۔

ان کا کہنا تھا کہ پچھلے دو سال کی ساڑھے تین ہزار صوبائی سکیمیں فنڈز نہ ہونے&nbsp; کی وجہ سے ادھوری پڑی ہیں کیونکہ کوئی حکومت پرانی حکومتوں کے کام کے لیے پیسے نہیں دیتی۔

بلوچستان نیشنل پارٹی کے رہنما میر دوران خان کھوسہ شروع سے اس منصوبے کے بارے میں شکوک وشبہات کا شکار رہے ہیں۔

وہ کہتے ہیں کہ انہوں نے&nbsp; سپورٹس کمپلیکس&nbsp; صحبت پور&nbsp; سے10 کلو میٹر&nbsp; دور بھنڈ شریف میں بنانے کی تجویز دی&nbsp; تھی مگر کسی نے توجہ نہیں دی۔

ان کے خیال میں اس منصوبے کو ویرانے میں لے جانے کا پلان مخصوص افراد کو فائدہ پہنچانے کے لیے بنایا&nbsp; گیا تھا۔

&quot;وہاں پانی کڑوا اور زمین سیم زدہ ہے، اس لیے کوئی بلــڈنگ سات یا آٹھ سال سے زیادہ نہیں ٹک پائے گی&quot;۔

سیاسی کھیل میں فٹ بال بنا سپورٹس کمپلیکس: نارووال کے سپورٹس سٹی پر اور کتنے ارب روپے لگیں گے؟

" صحبت پور میں نوجوان کھلاڑیوں کا کیریئر شروع ہوتے ہی ختم ہو گیا ہے "

صحبت پور کے شوکت علی اپنے خاندان کے ساتھ ہنسی خوشی زندگی گزار رہے تھے کہ ان کی اہلیہ بچی کو جنم دینے کے بعد طبی پیچیدگیوں کے باعث دم توڑ گئیں اور ان کی دنیا اندھیر ہو گئی۔

شوکت موٹر سائیکل مکینک ہیں۔ ان کا گھر بلوچستان کے ضلع صحبت پور کی تحصیل مانجھی پور میں ہے لیکن وہ کوئٹہ میں کام کرتے ہیں۔ تقریباً پانچ سال پہلے ان کی اہلیہ پہلی مرتبہ امید سے ہوئیں تو وہ انہیں معمول کے معائنے کے لیے مانجھی پور کے بنیادی مرکز صحت میں لے جاتے تھے۔ تاہم وہاں سہولتوں کے فقدان کے باعث ان کی اہلیہ نے 45 کلومیٹر دور جیکب آباد کے ہسپتال میں چیک اپ کرانا شروع کر دیا۔

15 مارچ 2020ء کی صبح جب بچے کی پیدائش کا وقت آیا تو شوکت کوئٹہ میں تھے۔ شوکت کے والدین ان کی اہلیہ کو فوری طور پر ایک پرائیویٹ گائنی کلینک میں لے گئے جہاں ایمرجنسی میں ان کی ڈلیوری ہوئی۔

شوکت بتاتے ہیں کہ رات گئے انہیں&nbsp; گھر سے فون پر اطلاع دی گئی کہ ان کی اہلیہ کی طبعیت اچانک خراب ہوگئی ہے۔

&quot;ڈلیوری کے دوران زیادہ خون بہہ جانے کی وجہ سے اہلیہ کی طبعیت بگڑتی چلی گئی۔ میرے والدین انہیں لے کر جیکب آباد روانہ ہوئے لیکن اس نے راستے میں ہی دم توڑ دیا۔&#39;&#39;

مانجھی پور کے سرکاری مراکز صحت میں ایمرجنسی، لیبر روم اور بنیادی نوعیت کے لیبارٹری ٹیسٹوں کی سہولت کا فقدان ہے۔ سب سے اہم بات تو یہ ہے کہ وہاں کوئی لیڈی ڈاکٹر ہی نہیں ہے۔ مانجھی پور تو ایک طرف، پورے ضلع صحبت پور میں ڈھنگ کا کوئی ذچہ بچہ مرکز نہیں ہے جس کی وجہ سے خواتین کو حمل اور بیماری میں کڑی مشکلات کا سامنا رہتا ہے۔ ان حالات میں بیشتر خواتین جیکب آباد کے ہسپتالوں کا رخ کرتی ہیں۔

بچے کی پیدائش کے لیے زیادہ تر خواتین گھریلو دائیوں پر انحصار کرتی ہیں جبکہ کسی پیچیدگی یا ایمرجنسی کی صورت میں وہ بھی مریضہ کی مدد نہیں کر سکتیں۔

امیر بخش بروہی چھوٹے پیمانے پر کاشتکاری کرتے ہیں۔ وہ مانجھی پور سے تقریبا تین کلومیٹر کے فاصلے پر گوٹھ ملیر میں اپنی اہلیہ پیروزاں اور 26 سالہ بیٹے علی گل کے ساتھ رہتے ہیں۔

چند سال پہلے ان کی اہلیہ کی طبعیت بہت زیادہ خراب ہو گئی۔ وہ دو برس تک مقامی ڈاکٹروں سے علاج کراتے رہے لیکن افاقہ نہ ہوا۔ بالاآخر انہوں ںے جیکب آباد کے ایک نجی ہسپتال میں چیک اپ کروایا تو ڈاکٹروں نے بتایا کہ ان کی اہلیہ کی بیضہ دانی میں گلٹیاں بن گئی ہیں۔

ڈاکٹروں کے مشورے پر انہوں نے اپنی اہلیہ کا آپریشن کروا لیا لیکن اب ان کے پیٹ میں دوبارہ گلٹیاں بننے لگی ہیں۔

&quot;میری بیوی دن رات درد سے تڑپتی رہتی ہے۔ جب درد ناقابل برداشت ہوتا ہے تو ہم قصبے کے بنیادی مرکز صحت پر جاتے ہیں جہاں ہمیں درد کش دوا دے کر رخصت کر دیا جاتا ہے۔&#39;&#39;

&nbsp;امیر بخش کہتے ہیں کہ مانجھی پور میں کوئی اچھا ہسپتال نہیں ہے اور وہ اپنی بیوی کو کسی بڑے شہر کے ہسپتال میں لے جا کر اس کا علاج کرانے کی سکت نہیں رکھتے۔

گزشتہ سال اگست میں آنے والے سیلاب میں صحبت پور بری طرح متاثر ہوا جہاں ہزاروں ایکڑ زری اراضی برباد ہو گئی۔ امیر بخش بھی سیلاب سے متاثرہ کاشتکاروں میں شامل ہیں جو چھ ماہ تک سیلابی پانی جمع رہنے کے باعث اپنی زمین کو بحال نہیں کر سکے اور مالی مشکلات کا شکار ہیں۔ ان حالات میں وہ اپنی بیوی کی حالت دیکھ کر کڑھنے کے علاوہ کچھ نہیں کر سکتے۔

صحبت پور کو 2013 میں ضلع کا درجہ دیا گیا تھا اور اس وقت شہر کی آبادی تقریباً دو لاکھ ہے۔ ضلع میں 26 بنیادی مراکز صحت، سات سول ڈسپنسریاں اور ایک ڈسٹرکٹ ہیڈکوارٹر ہسپتال ہے جس کی عمارت تک نہیں بن سکی اور اسے ایک پرانے مرکز صحت کی عمارت میں چلایا جا رہا ہے۔

&nbsp;محکمہ صحت کے مطابق 26 بنیادی مراکز صحت میں صرف جھنڈا تالاب کے مرکز پر ایک لیڈی ڈاکٹر تعینات ہے اور باقی جگہوں پر کوئی خاتون ڈاکٹر یا گائناکالوجسٹ نہیں ہوتی۔

شہر کے دور دراز علاقوں میں اگر کسی مریض کی حالت خراب ہو تو اسے سندھ کے شہروں میں ریفر کرنا پڑتا ہے جبکہ صحبت پور سٹی کے علاوہ کسی بنیادی مرکز صحت میں ایمرجنسی کی سہولت نہیں ہے۔ ایسے میں بہت سے مریض دوسرے ہسپتالوں کو جاتے ہوئے راستے میں دم توڑ جاتے ہیں جن میں بڑی تعداد حاملہ خواتین کی ہوتی ہے۔

غلام محمد مہر میڈیکل کالج سکھر کے ڈاکٹر محمد عمران سومرو کا کہنا ہے کہ بچے کی پیدائش کے دوران زیادہ خون بہہ جانا اور پیدائش میں تاخیر کے نتیجے میں جسم میں زہر کا پھیلنا زچہ کی زندگی کے لیے شدید خطرات کا باعث ہوتا ہے۔

زچگی میں خواتین کے علاج&nbsp; کے لیے کوالیفائیڈ لیڈی ڈاکٹر اور ایسے میٹرنٹی ہوم کا ہونا ضروری ہے جہاں چوبیس گھنٹے آپریشن کی سہولت، نومولود بچوں کے لیے آکسیجن، انکیوبیٹر اور پیڈیاٹریشن کی سہولت موجود ہو۔

شوکت علی کی بیٹی کی عمر اب چار سال ہو گئی ہے۔ وہ حسرت بھرے لہجے میں کہتے ہیں کہ اگر مانجھی پور کے سرکاری ہسپتال میں بنیادی سہولیات میسر ہوتیں تو ان کی بیٹی کے سر پر ماں کا سایہ بھی سلامت ہوتا۔

اپنا شریکِ درد بنائیں کسی کو کیا: چھاتی کے کینسر میں مبتلا خواتین کیسے گھٹ گھٹ کر مر رہی ہیں۔

گزشتہ برس اگست میں آنے والے سیلاب نے بلوچستان کے ضلع صحبت پور کو برباد کر کے رکھ دیا جہاں دیگر نقصانات کے علاوہ 90 ہزار ایکڑ پر چاول کی فصل کا بھی خاتمہ ہو گیا۔ اس علاقے میں سیلاب سے ہونے والی شدید تباہی کا سبب پٹ فیڈر کینال کو قرار دیا گیا ہے جس کے کنارے ٹوٹنے سے صحبت پور اور نواحی علاقے پانی میں ڈوب گئے تھے۔

پٹ فیڈر کینال سندھ کی سرحد کے ساتھ بلوچستان کے اضلاع میں زراعت کو فروغ دینے کے لیے 1965 میں بنائی گئی تھی۔ یہ نہر گڈو بیراج میں زیرو پوائنٹ سے شروع ہو کر ضلع صحبت پور، جعفرآباد اور نصیرآباد سے گزرتی ہوئی جھل مگسی کی سرحد پہ ختم ہوتی ہے۔ صحبت پور کے ایک لاکھ 96 ہزار ایکڑ زرعی رقبے میں سے ایک لاکھ 28 ہزار ایکڑ اسی نہر سے سیراب ہوتا ہے۔

پورے نصیرآباد ڈویژن میں زراعت کا انحصار اسی نہر پر ہے۔ جب یہ نہر بنائی گئی تو اس میں 2900 کیوسک پانی آتا تھا&nbsp; جسے 1998 میں بڑھا کر 6700 کیوسک کر دیا گیا۔ اس طرح صحبت پور سمیت نصیرآباد ڈویژن میں زرعی سرگرمیوں کو فروغ ملا، علاقے میں معاشی استحکام آیا اور غربت کم ہو گئی۔

19 اگست 2022 کی رات صحبت پور سےگزرنے والے سیلابی ریلے نے خدابخش موری کے قریب آر ڈی 267 گوٹھ جمل خان بگٹی اور آر ڈی 280 گوٹھ سردار خان گاجانی کے مقام پر اس نہر میں دو بڑے شگاف ڈال دیے۔ اس طرح کچھ ہی دیر میں سیلاب نے وسیع علاقے کو لپیٹ میں لے لیا۔

پٹ فیڈر کے شگافوں سے نکلنے والے سیلابی پانی کے باعث اوچ کینال سمیت حیر دین ڈرینج کی مختلف شاخوں پر شدید دباؤ آ گیا۔ اس طرح ان نہروں سے بھی پانی بہہ نکلا جس نے صحبت پور میں تباہی مچا دی۔ سیلاب میں لوگوں کے گھر، مال مویشی اور فصلیں تباہ ہو گئیں۔ اس سے پہلے 2010 اور 2012 میں آنے والے سیلاب میں بھی اس نہری نظام کو نقصان پہنچا تھا لیکن اب کے تباہی کا حجم ماضی کے مقابلے میں کہیں زیادہ رہا۔

پی ڈی ایم اے کی رپورٹ کے مطابق سیلاب سے ضلع بھر میں 21 ہزار 703 مکان اور 476 میں سے 98 سکول مکمل طور پر تباہ ہو گئے جبکہ 304 کو جزوی نقصان ہوا۔ اسی طرح ضلع بھر میں 41 بنیادی مراکز صحت میں سے 7 پانی میں بہہ گئے اور 32 جزوی طور پر متاثر ہوئے۔ سیلاب میں سینکڑوں دیہات صحفہ ہستی سے مٹ گئے، کم از کم ساڑھے چھ ہزار مویشی ہلاک ہوئے اور خریف کی فصل برباد ہو گئی۔

صحبت پور کی یونین کونسل گوراناڑی کے علاقے گوٹھ ارباب خان پندرانی کے علی گل پندرانی سیلاب سے پہلے 17 ایکڑ زمین پر کاشت کاری کرتے تھے۔ سیلاب میں ان کی فصل بہہ گئی اور گھر زمین بوس ہو گیا۔ پناہ لینے کے لیے وہ مرکزی شاہراہ پر نکل آئے جہاں امدادی اداروں نے انہیں ایک خیمہ دیا جس میں وہ اب تک مقیم ہیں۔

علی گل کہتے ہیں کہ گزشتہ برس آنے والے سیلاب کے بعد چاول اور سرسوں کی کاشت ختم ہو گئی ہے۔ انہوں نے خیمے میں سردیوں کا موسم تو جیسے تیسے گزار لیا ہے لیکن گرمیاں گزارنا بہت مشکل ہو گا۔

&#39;&#39;پٹ فیڈر کینال ہمارے لیے خونی نہر ثابت ہوئی ہے۔ پچھلے سال کی طرح اس سال بھی بارشیں ہوئیں تو نہر میں دوبارہ شگاف پڑ سکتا ہے۔ اب ہم میں ایک اور سیلاب کو برداشت کرنے کی سکت نہیں ہے۔&#39;&#39;

پٹ فیڈر اور کچھی کینال کا درمیانی علاقہ ریتلا اور ڈھلانی ہونے کے باعث پہاڑیوں سے آنے والا بارشوں کا پانی اپنے ساتھ ٹنوں کے حساب سے مٹی اور پتھر بھی ساتھ لاتا ہے۔ چونکہ پٹ فیڈر ڈھلانی علاقے میں واقع ہے اس لیے یہ سارا پانی ملبے سمیت نہر میں جا گرتا ہے۔

محکمہ آبپاشی میں حیرالدین ڈرینج کے سابق ایس ڈی او الہٰی بخش گاجانی کہتے ہیں کہ پہاڑی ملبے سے پٹ فیڈر میں پانی کے بہاؤ میں رکاوٹ پیدا ہو جاتی ہے۔ اس طرح ناصرف پانی کی قلت ہو جاتی ہے بلکہ نہر کے کنارے بھی کمزور پڑ جاتے ہیں اور اس میں شگاف کا خطرہ بڑھ جاتا ہے۔

ڈپٹی ڈائریکٹر محکمہ زراعت خالد حسین چنا بھی تصدیق کرتے ہیں کہ پٹ فیڈر میں شگاف پڑنے کی بڑی وجہ اس میں جمع ہونے والی مٹی اور پتھر ہیں جبکہ نہر کے کنارے اور پشتے بھی کمزور ہیں جو سیلابی پانی کا بہاؤ برداشت نہیں کر سکتے۔

صحبت پور سے تعلق رکھنے والے انجینئر عرض محمد بتاتے ہیں کہ سیلابی پانی جب کسی نہر میں داخل ہوتا ہے تو اس راستے کو ہمیشہ کے لیے اپنا لیتا ہے۔ اس مسئلے کا واحد حل اِن لیٹ گیٹ ہیں جو گاد اور سیلابی ملبے کو نہر میں داخل ہونے سے روکتے ہیں۔ پانی کی ایسی گزرگاہوں کا انتخاب کر کے وہاں 20 فٹ کا مضبوط اور اعلیٰ معیار کا ان لیٹ گیٹ لگانا چاہیے۔ان لیٹ گیٹ کے سامنے نہر کے دوسرے کنارے پر پتھروں کی پچنگ کرنا بھی ضروری ہے تاکہ سامنے سے آنے والے تیزرفتار پانی کا بہاؤ پتھروں سے ٹکرا&nbsp; کر کمزور ہو جائے اور کناروں یا پشتوں کو کوئی نقصان نہ پہنچے۔

یوں تو پٹ فیڈر کینال میں اِن لیٹس گیٹ لگے ہوئے ہیں اور ان جگہوں پر نہر کے پشتے بھی مضبوط ہیں لیکن آر ڈی 280 کے مقام پر کچھی کینال اور پہاڑی علاقوں کے پانی کا راستہ بن گیا ہے جہاں اِن لیٹ گیٹ بنانے کی اشد ضرورت ہے۔

عرض محمد کہتے ہیں کہ پٹ فیڈر کینال کے زیرو پوائنٹ آر ڈی 298 سے لے کر میرحسن ڈِپ تک قائم پُشتے انتہائی کمزور ہو چکے ہیں۔ محکمہ آبپاشی اور حکومت کو چاہیے کہ پُشتوں کو مضبوط بنائے اور جن مقامات سے اوچ کینال کے اطراف کا پانی آ کر گرتا ہے، وہاں ان لیٹ گیٹ یا ڈسٹریز قائم کی جائیں اور پانی و گاد کا رخ کسی اور جانب موڑا جائے تاکہ ہر سال بارشوں اور سیلاب سے نہر کو نقصان نہ ہو۔

رضوان الزمان منگی

رضوان الزمان منگی کا تعلق بلوچستان کے ضلع صحبت پور سے وہ 10 سالوں سے صحافت سے وابستہ ہیں اور مختلف اداروں کیلئے کام کرتے رہے ہیں۔

صحبت پور: لوگ دیہی علاقوں سے شہروں میں نقل مکانی پر کیوں مجبور ہیں؟

مانجھی پور شہر: چار سال سے بل باقاعدگی سے آ رہے ہیں، سوئی گیس کیوں نہیں آ رہی؟

تحصیل مانجھی پور کا واحد ڈگری کالج، صرف دو کلاس روم،'وہ بھی اب گرے کہ تب'

" صحبت پور میں نوجوان کھلاڑیوں کا کیریئر شروع ہوتے ہی ختم ہو گیا ہے "

پورے ضلع صحبت پور میں ایک لیڈی ڈاکٹر: 'ایسا نہ ہوتا تو بیٹی کے سر پر ماں کا سایہ سلامت ہوتا'

'پٹ فیڈر کینال ہمارے لیے خونی نہر ثابت ہوئی ہے، ایک اور سیلاب کو برداشت کرنے کی سکت نہیں ہے'