Every year, dozens of people drown in the Indus River in Attock. What safety measures can the government implement to protect local residents and tourists?

What Safety Measures Should the Government Implement to Prevent Drownings in the Indus River in Attock?

اٹک کے رہائشی 50 سالہ محمد خرم عیدالاضحیٰ کے دوسرے روز تفریح کے لیے اپنے بچوں کے ہمراہ دریائے سندھ کے کنارے &#39;باغ نیلاب&#39; گئے تھے۔ ان کے 17 سالہ بیٹے محمد شہیر اور 13 سالہ بیٹی وردہ دریا کنارے کم گہرےپانی میں کھیل رہے تھے کہ وردا کا اچانک پاؤں پھسلا اور وہ گہرے پانی میں جا گریں۔

محمد شہیر نے بہن کو ڈوبتے دیکھا تو ان کے پیچھے چھلانگ لگا دی۔ اسی اثنا میں محمد خرم بھی اپنے بیٹے اور بیٹی کو بچانے کے لیے پانی میں کود گئے لیکن دریا کی بے رحم لہریں تینوں کو اپنے ساتھ بہا لےگئیں۔

دریا کنارے موجود ایک مقامی شخص نے بھرپور کوشش کے بعد باپ بیٹے کو نکال لیا لیکن طبی امداد کے بعد محمد خرم تو بچ گئے لیکن ان کے بیٹے شہیر ہسپتال میں دم توڑ گئے۔ وردا کی تلاش کےلیے ریسکیو 1122 کی غوطہ خور ٹیموں نے تین روز تک آپریشن جاری رکھا مگر بدقسمتی سے ان کی لاش بھی نہ مل سکی۔

شہیر اور وردا کے دادا بابا تاج محمد اپنی پوتی اور پوتے کی موت کا ذمہ دار حکومت کو قرار دیتے ہیں۔ کہتے ہیں کہ اگر لوگ تفریح کے لیے ایسی جگہوں پر نہ جائیں تو اور کہاں جائیں؟ حکومت تفریحی مقامات پر حفاظتی انتظامات کو یقینی بنائے۔

&quot;میرا بیٹا خرم اپنے جواں سال بیٹے کی میت کی تدفین کے بعد سے اپنی بچی کی تلاش میں دریائے سندھ کے کناروں پر بھٹک رہا ہے۔ وہ آج بھی میانوالی کے علاقے کندیاں میں چشمہ بیراج پر گیا ہوا ہے۔&quot;

صرف شہیر اور وردا ہی نہیں، عید الاضحیٰ کے تین دنوں کے دوران 10 افراد اٹک خورد کے مقام پر دریائے سندھ میں ڈوب کر جاں بحق ہوگئے تھے۔

نواحی علاقے کے رہائشی اعجاز احمد درزی کا کام کرتے ہیں جن کے بھائی اور دو جوان بھتیجے بھی یہیں دریا میں ڈوبنے سے جاں بحق ہوئے ہیں۔ وہ بتاتے ہیں کہ حفاظتی انتظامات کے بغیر دریائے سندھ میں نہانا اپنی موت کو دعوت دینے کے مترادف ہے کیونکہ یہاں کنارے کے قریب ہی بعض جگہ پانی بہت زیادہ گہرا ہے۔

<h2>اٹک خورد</h2>

راولپنڈی سے 96 کلومیٹر پشاور کی جانب جی ٹی روڈ پر دریائے سندھ کے کنارے واقع خوبصورت قصبہ &#39;اٹک خورد&#39; ایک تفریحی مقام ہے جس کو&#39;باغ نیلاب&#39;بھی کہا جاتا ہے۔ یہاں دریا کی سیر کے لیے کشتیاں، جھولے اور تازہ مچھلی کے متعدد ریستوران موجود ہیں۔

پنجاب اور خیبر پختونخوا کے درمیان سفر کرنے والےکچھ دیر کے لیے یہاں رکتے ہیں اور کئی لوگ یہاں پر سیر و تفریح کے لیے بھی آتے ہیں۔ چند سال قبل حکومت نے گولڑہ (راولپنڈی) سے اٹک خورد تک ایک ٹورسٹ ٹرین بھی چلائی تھی جو کچھ عرصہ بعد بند ہو گئی تھی۔

ڈسٹرکٹ ایمرجنسی افسر ریسکیو 1122 علی حسین نے لوک سُجاگ کو بتایا کہ یوم آزادی، عیدوں اور دیگر تہواروں پر خیبرپختونخوا اور پنجاب سے ہزاروں سیاح اٹک خورد آتے ہیں جن میں سے اکثر دریا میں اتر جاتے ہیں یا نہانا شروع کر دیتے ہیں۔

&quot;یہاں حادثات زیادہ ہوتے ہیں کیونکہ لوگ کم گہرا پانی سمجھ کر اترتے ہیں مگر کہیں کہیں کنارے کے ساتھ ہی زیرآب زیادہ گہرائی ہے جہاں بہاؤ تیز ہوتا ہے اور یہ افراد اس کی زد میں آ جاتے ہیں۔&quot;

اٹک میں ریسکیو 1122 کے ریکارڈ کے مطابق دفتر کو پچھلے پانچ سال کے دوران ڈوبنے کے واقعات کے حوالے سے 156 ایمرجنسی کالز موصول ہوئیں جن میں سو سے زائد افراد ڈوب کر جاں بحق ہوگئے۔

ضلعی انتظامیہ ہر سال گرمیوں یہاں دریا میں نہانے پر پابندی لگاتی ہے جس کے لیے دفعہ 144 کا نفاذ ہوتا ہے لیکن ڈوب کر ہلاک ہونے والوں کی شرح میں کوئی کمی نہیں آئی۔

ضلعی ایمرجنسی افسر بتاتے ہیں کہ اٹک میں ہر سال 30 سے 35 افراد ڈوبنے سے جاں بحق ہو جاتے ہیں۔ یہ وہ تعداد ہے جتنی لاشیں ریسکیو 1122کے غوطہ خور نکالتے ہیں جبکہ بعض کیسز میں مقامی افراد اپنی مدد آپ کے تحت بھی ڈوبنے والوں کی لاشیں نکال لیتے ہیں۔

وہ سمجھتے ہیں کہ دفعہ 144 کا نفاذ اس مسئلے کا عارضی حل ہوسکتا ہے تاہم مستقل حل کے لیے دریاؤں پر نہانے کے لیےمحفوظ مقامات بنانا پڑیں گے جہاں حفاظتی اقدامات یقینی بنائے جا سکیں ۔ اس اقدام سے حادثات میں کمی اور عوام کو بہتر تفریح میسر آ سکتی ہے۔

قریبی علاقے جہانگیرہ کے رہائشی ماما شعیب اٹک خورد میں ہوٹل چلاتے ہیں جنہوں نے 40 سال قبل دریا سے مچھلیاں پکڑنے کا کام شروع کیا تھا۔

وہ بتاتے ہیں کہ اس جگہ دریا کا بہاؤ بہت تیز اور نیچے نوکیلے پتھر ہیں۔ مقامی لوگ یہاں کبھی نہانے کا خطرے مول نہیں لیتے بلکہ حفاظتی سامان سے لیس ماہر غوطہ خور بھی اس تیز پانی میں خود کو بڑی مشکل سے سنبھالتے ہیں۔

ماما شعیب، ہوٹل چلانے کے ساتھ خدمت خلق کے طور پر یہاں ڈوبنے والے افراد کو نکالنے کا کام سرانجام دیتے ہیں۔ ان کا دعویٰ ہے کہ انھوں نے پچھلے 40 سال میں سینکڑوں افراد کو دریا سے زندہ نکالا ہے۔

&quot;اب تو ہم نے ایک باقاعدہ ٹیم بنالی ہے جس میں میرے تین بیٹوں سمیت 32 افراد شامل ہیں۔ رضا کاروں کا یہ نیٹ ورک اٹک خورد سے چشمہ بیراج تک پھیلا ہوا ہے جن کا ایک واٹس ایپ گروپ بنا ہوا ہے اوروہ دریائے کابل یا دریائے سندھ میں ڈوبنے والوں کی تلاش میں مدد کے لیے اطلاع ایک دوسرے کو دیتے ہیں۔&quot;

&quot; دریا سے کوئی لاش ملنے پر اس کی تصاویر اور ویڈیوز بھی واٹس ایپ گروپ میں شیئر کردی جاتی ہیں جس سے متوفی کے ورثاء کو تلاش کیا جاتا ہے یا لاش ان کے حوالے کی جاتی ہے۔ متعلقہ محکموں کو بروقت اطلاع دینے کے لیے گروپ میں ضلعی انتظامیہ، پولیس اور ریسکیو 1122 کے افسر اور اہلکار بھی شامل کیے گئے ہیں۔&quot;

ماما شعیب کے مطابق ضلعی انتظامیہ نے رضا کاروں کو لائف جیکٹس فراہم کی ہیں تاکہ وہ ڈوبنے والے افراد کو بچاتے ہوئے اپنی زندگیوں کو بھی محفوظ بنا سکیں۔

ان کا بھی یہی ماننا ہے کہ دریا کنارے جہاں زیادہ لوگ سیر و تفریح کے لیے آتے ہیں وہاں دریا کے کچھ حصوں کو لوہے کے جنگلے یا مضبوط رسے لگا کر لوگوں کے نہانے کے لیے مختص کر دیا جائے تو حادثات میں کمی لائی جاسکتی ہے ۔

ماما شعیب کے بیٹے سہیل احمد جو رضا کاروں کی ٹیم کے ساتھ کام کرنے کے علاوہ کشتی میں لوگوں کو دریا کی سیر کراتے ہیں۔ وہ کہتے ہیں کہ یہاں تفریح کے لیے زیادہ تر نوجوان ہی آتے ہیں۔

&quot;ہم دریا سے روزی کماتے ہیں۔ سردیوں میں لوگ یہاں کا رخ نہیں کرتے تاہم گرمیاں شروع ہوتے ہی ہمارا کاروبار چمک اٹھتا ہے۔ چھٹیوں اور عید کے ایام میں بڑی تعداد میں سیاح آتے ہیں۔ لیکن ضلعی انتظامیہ یہاں حفاظتی انتظامات کرنے کی بجائے دفعہ 144 لگا دیتی ہے جس سے کاروبار ختم ہو کر رہ جاتا ہے۔&quot;

وہ بہت افسردہ لہجے میں بولے &quot;اعلیٰ افسران کو ہمارے بارے میں بھی سوچنا چاہیے۔ ہمارے بھی بیوی بچے اور بوڑھے والدین ہیں ہم یہاں سے کمائیں گے نہیں تو گھر کا چولہا کیسے جلے گا۔&quot;

اس سلسلے میں ترجمان ڈی پی او آفس اٹک ملک نعیم کہتے ہیں کہ دفعہ 144 لوگوں کی زندگیوں کو محفوظ بنانے کے لیے لگائی جاتی ہے۔ اس کے علاوہ دریا میں غیر قانونی نقل و حمل کو روکنے کے لیے مختلف مقامات پر پولیس کی چوکیاں بھی موجود ہیں۔

&nbsp;&quot;جب ضلعی انتظامیہ کی جانب سے دریا میں نہانے پر پابندی لگائی جاتی ہے تو تمام چوکیوں پر تعینات ہمارا عملہ اپنی حدود میں کسی کو وہاں نہانے کی اجازت نہیں دیتا۔&quot;

تاہم ملاح سہیل احمد کا خیال ہے کہ حادثات سے بچنے کے لیے دریا میں لائف جیکٹس کے بغیر نہانے پر پابندی لگائی جا سکتی ہے۔اسی طرح تیراکی کے ماہر مقامی نوجوانوں کو یہاں بطور &#39;لائف گارڈز&#39; بھی تعینات کیا جاسکتا ہے۔

اٹک خورد میں اکثر سیاح شکوہ کرتے دیکھائی دیتے ہیں کہ حکومت یہاں مناسب انتظامات نہیں کر رہی۔ اگر یہاں نہانے کےلیے تالاب یا محفوظ علاقے بنا دیے جائیں تو سیاح کسی خطرے کے بغیر لطف اندوز ہو سکیں گے۔&quot;

اٹک خورد میں تفریح کے لیے اسلام آباد سے آئی رخسانہ بی بی (فرضی نام) بتاتی ہیں کہ وہ گرمیوں کی تعطیلات کے دوران اکثر ادھر کا رخ کرتے ہیں۔ یہ خوبصورت جگہ ہے جہاں دریا، انگریز دور کا ریلوے سٹیشن، سٹیل پل اور راستے میں مغلیہ دور کی تاریخی عمارتیں ہیں۔

&quot; لیکن یہاں دریا میں ڈوبنے کی خبریں سننے کو ملتی ہیں۔ یہاں آ کر بچے کشتی کی سیر کے لیے ضد کرتے ہیں لیکن ہم انہیں اجازت نہیں دیتے۔ہاں اگر بہتر حفاظتی انتظامات ہوں اور جان کو خطرہ نہ ہو تو ہم بھی بچوں کے ساتھ دریا کی سیر کو ترجیح دیں گے۔&quot;

وہ کہتی ہیں کہ دریا میں سیر کے لیے استعمال ہو نے والی کشتیاں غیر معیاری اور پرانی ہیں جو مچھلی کے شکار کےلیے بنائی گئی ہیں۔ مگر ملاح ان میں گنجائش سے زیادہ افراد کو بٹھا لیتے ہیں جن کی وجہ سے حادثات پیش آتے ہیں۔

&quot;ضلعی انتظامیہ کو چاہیے کہ ہر سال سیزن کے آغاز پر کشتیوں کا معائنہ کرائے اوران کے لیے فٹنس سرٹیفیکیٹ کا حصول لازم قرار دے۔ تاہم ہماری بدقسمتی یہ ہے کہ اس طرف کوئی توجہ نہیں دیتا۔&quot;

'فلٹر لگ گئے مگر چلائے گا کون؟' اٹک کے دیہات میں کروڑوں مالیتی واٹر فلٹریشن پلانٹ بے کار

اٹک خورد، دریائے سندھ ہر سال درجنوں افراد کو نگل جاتا ہے ذمہ دار کون؟

text

Discover the inspiring journey of Attock's first Christian woman lawyer, who defied societal norms to pursue her passion for justice and equality. Learn about her challenges, triumphs, and th

Breaking Barriers: Pioneering the Legal Path - The First Christian Woman Lawyer in Attock

اٹک: 120 سالہ تاریخ میں پہلی مسیحی وکیل خاتون

video

ضلع اٹک میں قومی اسمبلی کی دو اور صوبائی اسمبلی کی پانچ نشستوں پر انتخابات ہوں گے۔ 2018 کے عام انتخابات میں پی ٹی آئی نے یہاں سے دو قومی اور چار صوبائی نشستیں جیت لی تھیں مگر ضمنی الیکشن میں ایک قومی اور ایک صوبائی نشست کھو دی تھی۔

اس ضلعے میں رجسٹرڈ ووٹرز کی کل تعداد 13 لاکھ 49 ہزار 40 ہے جن میں چھ لاکھ 97 ہزار 362 مرد اور چھ لاکھ 51 ہزار 678 خواتین ووٹر ہیں۔

اٹک کی سیاست میں برادریوں اور دھڑے بندی کا کردار ہمیشہ سے اہم رہا ہے۔ یہاں شیخ، کھٹڑ، سید، بنگش، وردگ، ارائیں، مغل، قریشی، کشمیری، اعوان (ملک)، پٹھان اور بھٹی برادری با اثر شمار ہوتی ہیں۔ تاہم ایک ایک برادری سے کئی کئی امیدوار ہونے کے باعث ان کا ووٹ اکثر اوقات تقسیم رہتا ہے۔

این اے 49 میں تحصیل اٹک، حضرو اور حسن ابدال کے علاقوں پر مشتمل ہے۔ جہاں شیخ آفتاب احمد ن لیگ، خرم شہزاد پیپلز پارٹی، پی ٹی آئی کے میجر ریٹائرڈ طاہر صادق اور ملک امین اسلم آزاد امیدوار ہیں۔

&nbsp;مسلم لیگ ن کے شیخ آفتاب احمد یہاں سے پانچ بار رکن قومی اسمبلی اور ایک بار رکن صوبائی اسمبلی منتخب ہو چکے ہیں مگر پچھلا الیکشن طاہر صادق سے ہار گئے تھے۔ جبکہ ملک امین اسلم پی ٹی آئی کے وزیر مملکت رہ چکے ہیں۔

طاہر صادق سابق ضلع ناظم اٹک ہیں جنہوں نے پچھلی بار اٹک کے دو قومی اور ایک صوبائی حلقے سے بھاری اکثریت سے الیکشن جیتا تھا۔ ضلع بھر میں ان کی کھٹڑ برادری کے علاوہ میجر گروپ کے نام سے ایک مضبوط دھڑا اور ذاتی ووٹ بینک ہے۔

<hr />
<h2 style="text-align:center">اٹک نئی حلقہ بندیاں 2023</h2>

2018 کا قومی اسمبلی کا حلقہ این اے 55 اٹک 1 اب این اے 49 اٹک 1 ہے 
پنجاب میں قومی اسمبلی کا یہ پہلا حلقہ ہے جو&nbsp; ضلع اٹک کی تحصیلوں حضرو، اٹک اور حسن ابدال کے کچھ علاقوں پر مشتمل ہے۔ نئی حلقہ بندیوں کے تحت اس حلقے میں کوئی تبدیلی نہیں ہوئی ہے، یعنی 2018ء کے انتخابات کے وقت جو علاقے اس حلقے میں شامل تھے 2024ء کے انتخابات میں بھی وہی رہیں گے۔

2018 کا قومی اسمبلی کا حلقہ این اے 56 اٹک 2 اب این اے 50 اٹک 2 ہے 
یہ حلقہ جنڈ، فتح جھنگ اور پنڈی گھیپ کی آبادیوں پر مشتمل ہے۔ اس میں تحصیل حسن ابدال کے تین قانون گو حلقے قصبہ حصار، کوٹ پتھر گڑھ اور کوٹ سندکی بھی شامل ہے۔ نئی حلقہ بندیوں کے تحت اس حلقے میں کوئی تبدیلی نہیں ہوئی ہے، 2018ء کے انتخابات کے وقت جو علاقے اس حلقے میں شامل تھے 2024ء کے انتخابات میں بھی وہی رہیں گے۔

2018 کا صوبائی اسمبلی کا حلقہ پی پی 1 اٹک 1 اب پی پی 3 اٹک 3 ہے 
یہ حلقہ اٹک تحصیل پر مشتمل ہے۔ نئی حلقہ بندیوں کے تحت کامرہ کینٹ کا علاقہ جو پہلے اس حلقے میں شامل تھا اسے نکال دیا گیا ہے۔ اس کی جگہ اکھوری اور بوٹا پٹوار سرکلز کو اس حلقے میں شامل کیا گیا ہے۔

2018 کا صوبائی اسمبلی کا حلقہ پی پی 2 اٹک 2 اب پی پی 1 اٹک 1 ہے 
یہ حضرو تحصیل کا صوبائی حلقہ ہے۔&nbsp; اب اس میں کامرہ کینٹ کو بھی شامل کر دیا گیا ہے۔ نئی حلقہ بندیوں کے تحت اس حلقے سے تحصیل حسن ابدال کے پٹوار سرکلز خودا، اسلام گڑھ اور کوہیلہ کو نکال کر اس کی جگہ کامرہ کینٹ کو شامل کیا گیا ہے۔

2018 کا صوبائی اسمبلی کا حلقہ پی پی 3 اٹک 3 اب پی پی 2 اٹک 2 ہے 
یہ حسن ابدال تحصیل کا حلقہ ہے جس میں فتح جنگ میونسپل کمیٹی بھی شامل ہے۔ نئی حلقہ بندیوں میں اس حلقے میں حسن ابدال تحصیل کے پٹوار سرکلز خودا، اسلام گڑھ اور کوہیلہ کو شامل کرلیا گیا ہے۔ فتح جنگ تحصیل کے پٹوار سرکلز فتح جنگ، جعفر، گگن، بھال سیداں اور تاجا بارا کو نکال دیا گیا ہے۔

2018 کا صوبائی اسمبلی کا حلقہ پی پی 4 اٹک 4 اب پی پی 4 اٹک 4 ہے 
یہ حلقہ پنڈی گھیب اور فتح جھنگ تحصیلوں کی دیہی آبادی پر مشتمل حلقہ ہے۔ نئی حلقہ بندیوں میں اس حلقے میں سوائے میونسپل کمیٹی فتح جنگ اور باہتر قصبے کے قانون گو حلقے کے پوری فتح جنگ&nbsp; تحصیل کو شامل کیا گیا ہے۔&nbsp; جبکہ پنڈی گھیب تحصیل کے پٹوار سرکل سرکل ٹانویں اور کسراں کو نکال دیا گیا ہے۔

2018 کا صوبائی اسمبلی کا حلقہ پی پی 5 اٹک 5 اب پی پی 5 اٹک 54 ہے 
یہ حلقہ جنڈ تحصیل کی آبادی پر مشتمل ہے۔ نئی حلقہ بندیوں میں اس حلقے میں معمولی کی تبدیلی یہ آئی ہے کہ اب اس میں&nbsp; پنڈی گھیب تحصیل کے پٹوار سرکل ٹانویں اور کسراں کو شامل کر لیا گیا ہے جبکہ اٹک تحصیل کے اکھوری اور بوٹا پٹوار سرکل کو نکال دیا گیا ہے۔

<hr />

ملک امین اسلم پی ٹی آئی کے سابق وزیر مملکت ہیں جن کی برادری کا حلقے میں بہت سا ووٹ ہے اور ان کے والد ملک اسلم کا بھی علاقے میں اچھا اثر و رسوخ تھا۔

اس نشست پر پیپلز پارٹی کے امیدوار خرم شہزاد پہلی بار الیکش لڑ رہے ہیں جبکہ جماعت اسلامی، جے یو آئی اور تحریک لبیک کے امیدوار بھی میدان میں موجود ہیں۔

مقامی سیاست پر گہری نظر رکھنے والے میاں عاطف بتاتے ہیں کہ اس حلقے میں شیخ آفتاب اور طاہر صادق کے مابین کانٹے دار مقابلے کی توقع کی جا رہی ہے۔ تاہم پی ٹی آئی رہنما نو مئی کے بعد منظر عام سے غائب ہیں۔ اب دیکھنا یہ ہے کہ انتخابی مہم میں اس کا ن لیگ یا کوئی دوسرا امیدوار کتنا فائدہ اٹھا پاتا ہے۔

سابق ایم این اے طاہر صادق، ان کی صاحبزادی ایمان طاہر، اہلیہ ناز طاہر اور بیٹے زین الٰہی نے بھی مختلف حلقوں میں کاغذات نامزدگی جمع کرا رکھے ہیں۔ مگر مسز ناز طاہر کے سوا ابھی تک کوئی سامنے نہیں آیا۔

این اے 50 اٹک ٹو تحصیل پنڈی گھیب، جنڈ، فتح جنگ اور حسن ابدال کے کچھ علاقے آتے ہیں۔ یہ نشست بھی گزشتہ عام انتخابات میں طاہر صادق نے جیتی تھی لیکن ضمنی میں یہاں سے ن لیگ کے ملک سہیل کمڑیال جیت گئے تھے۔

اب اس حلقے میں 20 امیدوار دوڑ میں شامل ہیں تاہم ن لیگ کے ملک سہیل کمڑیال، پی ٹی آئی کی آزاد امیدوار ایمان طاہر، ٹی ایل پی کے صدر سعد رضوی اور پیپلز پارٹی کے سابق وفاقی وزیر سردار سلیم حیدر تگڑے امیدوار ہیں۔

2018ء میں اس انتخابی حلقے سے ٹی ایل پی نے 62 ہزار سے زائد ووٹ لیے تھے اور تیسرے نمبر پر آئی تھی جبکہ پیپلز پارٹی کی امیدوار سردار سلیم حیدر چوتھے نمبر پر تھے۔

پنڈی گھیب کےسماجی ورکر ریاض الدین اعوان بتاتے ہیں کہ نو مئی کے بعد ایمان طاہر اور ان کا خاندان منظر عام پر نہیں آیا۔ اگر 8 فروری تک یہی صورتحال رہی تو اس کا فائدہ ملک سہیل کمڑیال اور سردار سلیم حیدر خان کو ہوگا۔

&nbsp;وہ کہتے ہیں کہ ٹی ایل پی بھی اس علاقے میں اپنا حلقہ اثر بنا چکی ہے جس کے مرکزی صدر سعد رضوی یہاں خود الیکشن لڑ رہے ہیں۔ مجموعی صورت حال کو دیکھا جائے تو اس نشست پر زبردست معرکہ ہو گا اور کسی بھی امیدوار کی جیت کی پیش گوئی کرنا مشکل ہے۔

صوبائی حلقے پی پی 1، پی پی 2 اور پی پی 3 حلقہ این اے 49 جبکہ پی پی 4 اور پی پی 5 قومی حلقہ این اے 50 کے نیچے آتے ہیں۔

پنجاب کے پہلے صوبائی حلقے پی پی 1 میں تحصیل حضرو اور کامرہ کینٹ کاعلاقہ شامل ہے۔ جہاں 17 امیدوار انتخابی میدان میں اترے ہیں جن میں ن لیگ کے سابق ایم پی اے جہانگیر خانزادہ اور پی ٹی آئی کے سابق ٹکٹ ہولڈر قاضی احمد اکبر فرنٹ رنر ہیں۔

حضرو کے رہائشی نصیر خان بتاتے ہیں کہ دہشتگرد حملے میں سابق صوبائی وزیر داخلہ شجاع خانزادہ کی شہادت کے بعد اس نشست سے جہانگیر خانزادہ منتخب ہوئے اور پچھلی بار بھی وہی جیت گئے تھے۔ لیکن پی ٹی آئی کے قاضی احمد اکبر نے بھی خوب مقابلہ کیا تھا۔

وہ کہتے ہیں کہ اگرچہ احمد اکبر نو مئی کے بعد لوگوں میں دکھائی نہیں دیے تاہم اس بار بھی میدان جہانگیر خانزادہ اور قاضی احمد اکبر کے درمیان لگے گا۔ جماعت اسلامی، جمعیت علماءاسلام اور ایک آزاد امیدوار بھی اچھے ووٹ لے جائیں گے۔

پی پی 2 تحصیل حسن ابدال اور فتح جنگ کے علاقوں پر مشتمل ہے جہاں گزشتہ عام انتخابات میں میجر طاہر صادق نے ن لیگ کے آصف علی خان کو ہرایا تھا۔ مگر ضمنی میں ن لیگ کے سردار افتخار احمد خان جیت گئے تھے۔

اس بار اس حلقے میں پیپلز پارٹی کے سردار ذوالفقار حیات خان، ن لیگ کے سردار افتخار احمد خان اور پی ٹی آئی کے سابق ٹکٹ ہولڈر سردار محمد علی خان (آزاد) اور میجر طاہر صادق کی اہلیہ ناز طاہر نمایاں امیدوار ہیں۔

اس حلقے میں ملک، اعوان، خان، چوہدری، سردار، طاہر خیلی اور کھٹڑ اکثریتی برادریاں ہیں جبکہ چاروں امیدوار کھٹڑ برادری سے تعلق رکھتے ہیں۔ اس نشست پر زور دار مقابلے کی توقع ہے۔

پی پی امیدوار سردار ذوالفقار حیات اٹک کے پرانے سیاسی خاندان کے فرد اور نامور پاکستانی سیاستدان سردار شوکت حیات مرحوم کے پوتے ہیں۔ اس فیملی کا علاقے میں خاصا اثر ہے جبکہ میجر گروپ کا بڑا ووٹ بینک ہے۔ اسی طرح&nbsp; سردار افتخار&nbsp; اور سردار محمد علی کے ساتھ پارٹی سپورٹ موجود ہے۔

سماجی کارکن اور صحافی چوہدری وقار بتاتے ہیں کہ سردار محمد علی میجر گروپ اور طاہر خیلی گروپ کی مکمل حمایت سے ہی جیت سکتے ہیں۔ اگر طاہر صادق کی اہلیہ&nbsp; آخر تک الیکشن میں موجود رہیں تو اس کا فائدہ پی پی اور ن لیگ کو ہو گا۔

حسن ابدال کے رہائشی نعمان کہتے ہیں کہ سردار ذوالفقار حیات خان کی انتخابی مہم اور بے پناہ کام واضح نظر آ رہا ہے جبکہ سردار افتخار ضمنی انتخاب میں رکن صوبائی اسمبلی بننے کے بعد اب تک دوبارہ دکھائی نہیں دیے۔

پی پی 3 میں تحصیل اٹک کی آبادیاں اور کامرہ کینٹ کا علاقہ آتا ہے۔ 2018 ء کے عام انتخابات میں یہاں سے پی ٹی آئی کے سید یاور عباس بخاری منتخب ہوئے تھے جبکہ آزاد امیدوار ملک حمید اکبر دوسرے اور ن لیگ کے شیخ آفتاب کے بیٹے سلمان سرور تیسرے نمبر پر رہے تھے۔

&nbsp;اب کی بار اس نشست پر ملک حمید اکبر خان ن لیگ اور پی ٹی آئی کے حمایت یافتہ اعجاز حسین بخاری آزاد جبکہ طاہر صادق کے بیٹے زین الٰہی بھی امیدوار ہیں۔ ان کے علاوہ پیپلز پارٹی، ٹی ایل پی اور دیگر جماعتوں کے امیدوار بھی میدان میں موجود ہیں۔

اس نشست پر زین الٰہی کو میجر طاہر گروپ کی حمایت حاصل ہے۔ اگر زین الٰہی اور اعجاز بخاری دونوں آخر تک الیکشن میں موجود رہے تو اس کا فائدہ ن لیگ کے ملک حمید اکبر کو ہو گا۔

پی پی 4 میں تحصیل فتح جنگ اور پنڈی گھیب کےعلاقوں پر مشتمل ہے۔ یہاں بھی سماجی ڈھانچہ اور سیاسی دھڑے بندی اٹک کے دیگر حلقوں سے مختلف نہیں ہے۔

&nbsp;گزشتہ انتخابات میں اس نشست پر پی ٹی آئی کے کرنل محمد انور نے چوہدری شیر علی کو ہرایا تھا۔ جبکہ ٹی ایل پی کے ملک امانت راول تیسرے اور ملک ریا ست چوتھے نمبر پر تھے۔

اب اس حلقے میں ن کے چوہدری شیر علی، پیپلز پارٹی کے ملک ریاست سدریال، پی ٹی آئی سے سردار شاہ نواز آزاد اور ٹی ایل پی سے ملک امانت خان راول امیدوار ہیں۔ جبکہ کرنل انور الیکشن نہیں لڑ رہے۔ یہاں سخت مقابلہ دیکھنے کو ملے گا۔

پی پی 5 میں تحصیل جنڈ اور پنڈی گھیب کے کچھ علاقے آتے ہیں۔ یہ نشست پچھلے الیکشن میں پی ٹی آئی کے ملک جمشید الطاف نے جیتی تھی جبکہ ن لیگ کے ملک بہادر اور دوسری اور ٹی ایل پی کے احسن محمود گیلانی تیسری پوزیشن پر آئے تھے۔

&nbsp;اب سابق ایم پی اے کے ملک جمشید الطاف آزاد، ملک اعتبار خان ن لیگ، عاطف حسین گیلانی ٹی ایل پی اور شہیر حیدر ملک پاکستان نظریاتی پارٹی کے امیدوار ہیں۔

پنڈی گھیب کے رہائشی آصف بتاتے ہیں کہ چاروں امیدوار یہاں کی بااثر ملک، سید اور اعوان برادریوں سے تعلق رکھتے ہیں جنہیں پارٹیوں اور ذاتی ووٹر کی سپورٹ بھی حاصل ہے۔ لگتا یہی ہے اس حلقے میں ن لیگ، پی ٹی آئی کے آزاد اور ٹی ایل پی کے امیدواروں میں فائنل ریس ہو گی۔

میانوالی کے دو سابق ارکان قومی اسمبلی جیل میں ہیں، متبادل امیدواروں اور روایتی سیاسی خاندانوں میں مقابلے

ن لیگ، پیپلز پارٹی، 'آزاد' اور ٹی ایل پی ضلع اٹک میں کس کی کیا پوزیشن ہے؟

وفاقی دارالحکومت کے مغرب میں نصف گھنٹے کی مسافت پر ہی ضلع اٹک کا علاقہ شروع ہو جاتا ہے۔ پہلے اس ضلعے کی پانچ تحصیلیں ہوا کرتی تھیں لیکن 2005ء میں عوامی یا انتظامی ضروت کے تحت حضرو کو اٹک کی چھٹی تحصیل بنا دیا گیا تھا۔

حضرو کو تحصیل بنانے پر کسی کو کوئی پریشانی ہے نہ ہی ضلع اٹک کا حصہ ہونے سے کوئی مسئلہ ہے۔ یہاں لوگوں کو تکلیف یہ ہے کہ 18 سال بعد بھی اس تحصیل میں عدالتوں کا قیام عمل میں نہیں لایا جاسکا اور انہیں چھوٹے سے چھوٹے دیوانی یا فوج داری کیس کے لیے 45 کلومیٹر دور اٹک آنا پڑتا ہے۔

پچاس سالہ راشدہ بی بی (فرضی نام) حضرو کے نواح کی رہائشی ہیں۔ وہ بتاتی ہیں کہ برسوں پہلے خاوند سے ان کی علیحدگی ہوئی تھی۔ جس پر والد نے انہیں رہائش کے لیے ایک چھوٹا سا گھر دیا تھا لیکن یہ ان کے نام نہیں کرایا تھا۔ جبکہ ان کے بھائیوں نے والدین کی تمام جائیداد اپنے نام لکھوا لی تھی۔

وہ کہتی ہیں والدین کے انتقال کے بعد جو کچھ بچ گیا تھا وہ بھی بھائیوں نے دھوکے سے اپنے نام کرا لیا۔ اب جس گھر میں وہ رہ رہی ہیں اس میں بھی تمام بہن بھائیوں کا حصہ ہے۔

&quot;میرا ایک بیٹا ہے جو بیمار رہتا ہے روٹی مشکل سے پوری ہوتی ہے۔ اگر حضرو میں عدالت ہوتی تو میں انصاف مانگنے ضرور جاتی لیکن اٹک نہیں جا سکتی۔ کیونکہ سنا ہے عدالتوں میں کیس بیس بیس سال ختم نہیں ہوتے اور آنے جانے پر بہت پیسے لگتے ہیں۔ اس لیے میں نے اپنا معاملہ خدا پر چھوڑ دیا ہے۔&quot;

ضلعے کی چھ تحصیلوں کی کل آبادی 21 لاکھ 70 ہزار 423 ہے جن میں سے اٹک کے سوا چاروں تحصیلوں کی آبادی حضرو سے کم ہے۔ ڈھائی لاکھ سے کچھ زائد آبادی والی تحصیل حسن ابدال سمیت پانچ تحصیلوں میں عدالتیں موجود ہیں لیکن حضرو کے لگ بھگ چار لاکھ لوگ 18 سال سے اٹک کے چکر لگا رہے ہیں۔

ودرہ خان حضرو کے گاوں یاسین کی رہائشی ہیں۔ وہ بتاتی ہیں کہ تین سال قبل ان کے والد کا انتقال ہوا۔ ان کے چچا اور کزنز نے زمین ہتھیانے کے لیے انہیں اور ان کے بھائی ندیم خان کو والد کے قتل کے جھوٹے مقدمے میں پھنسا دیا جبکہ والد کی طبعی موت ہوئی تھی۔

&nbsp;&quot;مجھے عدالت نے باعزت بری کر دیا لیکن میرے بھائی کو 25 سال قید ہو گئی۔ اس کیس کی پیروی کے لیے مجھے اپنی معذور اور عمر رسیدہ ماں کے ساتھ عدالت آنا پڑتا ہے۔ ہم 35 کلو میٹر فاصلہ رکشہ میں طے کرکے اٹک آتی ہیں۔ ہر پیشی پر ہزاروں روپے خرچ ہو جاتے ہیں۔&quot;

وہ بتاتی ہیں کہ آنے اور واپس گھر پہنچنے میں شام ہو جاتی ہے۔ وکیل سے مشورے اور بھائی سے ملاقات کے لیے بھی اٹک ہی آنا پڑتا ہے۔ اگر حضرو میں عدالتیں ہوتیں تو انہیں بوڑھی ماں کے ساتھ اتنی مشکلات نہ اٹھانی پڑتیں۔

حضرو کے رہائشی مبارس خان 30 سال سے وکالت کر رہے ہیں۔ وہ روزانہ اٹک کچہری آتے ہیں اور شام کو واپس جا کر اپنے حضرو آفس میں بیٹھتے ہیں۔ وہ بتاتے ہیں کہ یہ پنجاب کی واحد تحصیل ہے جہاں عدالتیں نہیں ہیں اور کم و بیش ایک سو چار چھوٹے بڑے قصبات و دیہات کے چار لاکھ افراد اس سہولت سے محروم ہیں۔

وہ دعویٰ کرتے ہیں کہ اٹک کی عدالتوں میں دائر مجموعی مقدمات میں تحصیل اٹک سے زیادہ تحصیل حضرو کے ہیں۔ اسی طرح اس تحصیل سے سالانہ ریونیو بھی ضلع کی دیگر تحصیلوں سے زیادہ جمع ہوتا ہے مگر حضرو میں کورٹس نہیں بن پائیں۔

&quot;میں تحصیل کورٹس کے لیے 18 سال سے کوشش کر رہا ہوں۔ جس کے لیے تحصیل بھر میں وال چاکنگ کرائی، حضرو کے سینیئر وکلاء سے مدد بھی مانگی مگر افسوس کسی وکیل نے میرا ساتھ نہیں دیا بلکہ الٹا حوصلہ شکنی کرتے ہیں۔&quot;

وہ کہتے ہیں کہ ابتدا میں انہوں نے یہاں عدالتوں کے لیے چیف جسٹس لاہور ہائیکورٹ کو درخواست دی تو اس وقت کے چیف جسٹس خواجہ شریف نے انہیں بلوا لیا۔جس پر وہ کچھ ساتھیوں کے ہمراہ ملاقات کے لیے گئے تھے۔

&quot; چیف جسٹس نے مجھے مخاطب کرتے ہوئے کہا کہ اٹک بار سے چند وکلاء آئے تھے وہ تو کہتے ہیں اگر حضرو میں عدالتیں بن گئیں تو ہم بھوکے مر جائیں گے کیونکہ اٹک کی عدالتوں میں 60 فیصد سے زائد کیسز تحصیل حضرو کے ہیں۔ مجھے اس روز اندازہ ہوا کہ میرے سینیئر میرا ساتھ کیوں نہیں دے رہے۔&quot;

مبارس خاں کا ماننا ہے کہ سینیئر وکلاء سوچتے ہیں کہ یورپ اور امریکہ میں مقیم تحصیل حضرو کے بیشتر سائلین اچھی فیسیں دیتے ہیں اگر وہیں عدالتیں بن گئیں تو ان کی آمدنی کم ہو جائے گی۔

&quot;لیکن انہیں اندازہ ہی نہیں کہ حضرو کے دور دراز دیہات سے بزرگ و خواتین سائل اپنے کیسز کی پیروی کے لیے کیسے اٹک پہنچتے ہیں۔ ہر پیشی پر اضافی اخراجات سے تنگ آ کر لوگ کیس کی پیروی ہی چھوڑ دیتے ہیں اور ریاست کو بھی سوچنا چاہیے۔&quot;

&nbsp;ان کا کہنا تھا کہ عدالتوں کے قیام کے لیے آواز اٹھانے پر ان کے خلاف ایف آئی آر تک درج کروائی گئی۔ لیکن وہ ثابت قدم ہیں اور اپنی تگ و دو جاری رکھیں گے۔

فراکت خان حضرو میں کاروبار کرتے ہیں۔ وہ بتاتے ہیں کہ ان کا لین دین کے معاملے پر کسی سے جھگڑا ہو گیا تھا۔ انہیں شدید چوٹیں آئیں اور بات تھانے کچہری تک جا پہنچی۔ اب دو سال ہوگئے کیس اٹک کی عدالت میں چل رہا ہے۔

&quot;ہر پیشی پر اٹک جانے سے ایک تو کاروبار متاثر ہوتا ہے دوسرا ہزاروں روپے اضافی خرچ ہوتے ہیں۔ مجھے کئی بار پولیس والوں کو عدالت لے جانا ہوتا تھا تو کرائے کی گاڑی لینا پڑتی تھی۔&quot;

حضرو میں مقامی سماجی تنظیمیں &#39;چھچھ محافظ کمیٹی&#39; اور &#39;اتحاد گروپ&#39; کے ممبران بھی اپنی سی کوشش کر رہے ہیں۔

اس سلسلے میں چھچھ محافظ کمیٹی کے چیئرمین نصیر خان جدون بتاتے ہیں کہ حضرو میں عدالتوں کے لیے لاہور ہائی کورٹ کی ہدایت پر 101 کنال پندرہ مرلے سرکاری اراضی منتخب کرلی گئی ہے لیکن مزید کوئی پیشرفت نہیں ہو رہی۔ تاہم ان کی کمیٹی لوگوں کے اس حق کے لیے کوشش جاری رکھے گے۔

یہاں کے سابق ایم پی&nbsp; اے جہانگیر خانزادہ سے تو رابطہ نہیں ہوسکا۔ البتہ ان کے قریبی ساتھی اور ن لیگ کے تحصیل صدر ملک انصار دعویٰ کرتے ہیں کہ اب کی بار حضرو میں عدالتوں کا قیام ان کی جماعت کی اولین ترجیحات میں شامل ہو گا۔

حضرو کی عدالتیں بننے میں سب سے بڑی رکاوٹ ڈسٹرکٹ بار یعنی اٹک اور حضرو کے وکلاء بتائے جاتے ہیں۔ جن کی وجہ سے اس تحصیل کے لوگ عدالتوں میں جانے کے لیے ویگنوں اور چنگ چی پر دھکے کھاتے پھر رہے ہیں۔

تاہم صدر اٹک ڈسٹرکٹ بار ملک فخر زاد کا کہنا ہے کہ وہ حضرو میں عدالتوں کے قیام کی مخالفت ہرگز نہیں کرتے مگر عدالتوں کا جو حسن ضلعی سطح پر ہوتا ہے وہ تحصیل کی سطح پر کسی صورت ممکن نہیں ہے۔

اسی بار کے سابق صدر اور ممبر پنجاب بار کونسل ملک اسرار تحصیل حضرو کے رہائشی ہیں۔ لیکن وہ &#39;حضرو میں عدالتوں کے قیام کے بالکل بھی حق میں نہیں ہیں۔&#39;

&nbsp;اس کی وجوہات بتاتے ہوئے وہ کہتے ہیں کہ زیادہ عدالتوں سے ججوں اور وکیلوں کی صلاحیتیں متاثر ہوتی ہے اور لوگوں کو معیاری انصاف نہیں مل پاتا۔

&quot;تحصیل میں عدالت ہو گی تو دیوانی اور فوجداری کے دو جج بیٹھیں گے۔ وکلاء ایک آدھ مہینے میں ان کے مائنڈ سیٹ سے واقف ہو جاتے ہیں اور یہ انصاف کے لیے ٹھیک نہیں ہے۔ جبکہ ڈسٹرکٹ میں ججوں اور وکلاء دونوں کی تعداد زیادہ ہوتی ہے اور اس کا فائدہ سائل کو ہوتا ہے۔&quot;

&nbsp;حضرو کے دور افتادہ گاؤں ڈھوک مونطہ کے رہائشی عبدالمالک 20 سال سے اپنے کیس کی پیروی کر رہے ہیں۔ وہ بتاتے ہیں کہ پیشی کے لیےگاؤں سے اٹک پہنچنا عذاب سے کم نہیں۔ سڑک ٹوٹ پھوٹ کا شکار ہے اور ٹرانسپورٹ نہ ہونے کے برابر ہے جس کی وجہ سے میلوں پیدل چلنے کے بعد کئی گاڑیاں بدل کر عدالت پہنچتے ہیں۔

&quot;ہم غریب لوگ ہیں اور دودھ بیچ کر گزارہ کرتے ہیں۔ وکیل کی فیس تو ایک ہی بار دینی تھی جس کے لیے دو بکریاں فروخت کیں اور فیس دے دی۔ مگر کیس کی پیروی کے لیے ہر تیسری پیشی پر بکری بیچنی پڑتی ہے۔ اتنے پیسوں کی تو زمین نہیں جتنے خرچ کر چکا ہوں۔ اگر عدالت حضرو میں ہوتی تو ہمارا اتنا پیسہ اور وقت برباد نہ ہوتا۔&quot;

حضرو میں پڑھو پنجاب، بڑھو پنجاب کا نعرہ بے اثر: کالجوں میں طلبہ کی تعداد میں غیرمعمولی کمی

اٹک کی تحصیل حضرو میں 18 سال بعد بھی عدالتیں کیوں قائم نہیں کی جا سکیں؟

آخر کب ہمیں پانی میسر آئے گا

ستائیس سالہ سیتا کماری(فرضی نام) ضلع اٹک کے علاقے صدر کی رہائشی ہیں۔ وہ اور جوزف ایک دوسرے کو پسند کرتے تھے اور آپس میں شادی کرنا چاہتے تھے، مگر گھر والے نہیں مان رہے تھے۔ 
وہ بتاتی ہیں کہ &quot;جوزف مسیحی ہیں اور صدر ہی میں رہتے ہیں۔ ہم دونوں کے مذاہب الگ تھے اس لیے گھر والوں نے ہر ممکن کوشش کی کہ یہ شادی نہ ہو۔ آخر دو سال بعد راضی ہو گئے۔ اب ہماری شادی کو پانچ سال ہو چکے ہیں۔&quot; 
ان کا کہنا ہے کہ شادی کے بعد ان پر شوہر یا سسرال نے کبھی کوئی دباؤ نہیں ڈالا۔ تاہم انھوں نے اپنی مرضی سے ہندو مت چھوڑ کر مسیحی مذہب اپنا لیا ہے۔ وہ اب باقاعدگی سے چرچ جاتی ہیں۔ وہ والدین، رشتے داروں کے گھر جاتی ہیں اور رشتے دار بھی ان کے ہاں آ جاتے ہیں کبھی کوئی مسئلہ نہیں ہوا۔ 
سیتا کماری کے بقول مسیحی لڑکے سے ان کی شادی کوئی نئی بات نہیں تھی۔ اس علاقے میں رہنے والے ہندو اور مسیحی کمیونٹی کے لڑکے لڑکیوں کی آپس میں پہلے بھی شادیاں ہوئی ہیں۔

راجیش لعل (فرضی نام) بھی اٹک کینٹ میں رہائش پذیر ہیں اور ہندو کمیونٹی سے تعلق رکھتے ہیں۔ ان کی بیٹی نے کچھ سال پہلے مسلمان لڑکے سے شادی کر لی تھی۔ وہ بتاتے ہیں کہ ان کی بیٹی کالج میں پڑھتی تھیں۔ وہاں ان کی ایک مسلمان لڑکے سے جان پہچان ہو گئی اور دونوں ایک دوسرے کو پسند کرنے لگے۔

انہوں نے بتایا کہ کچھ عرصے بعد لڑکا رشتہ لے کر میرےگھر آ گیا۔ مسیحی لڑکوں سے تو ہندو لڑکیوں کی شادیاں پہلے بھی ہوچکی ہیں لیکن مسلمان سے شادی کا سن کر حیرت ہوئی۔ مگر بچوں کی ضد تھی اس لیے نہ چاہتے ہوئے بھی ہم&nbsp; نے اپنی بیٹی مسلمان لڑکے سے بیاہ دی۔&quot;

راجیش کی بیٹی جس مسلمان لڑکے سے بیا ہی گئی تھیں ان کا سال بعد ہی انتقال ہو گیا تھا اور ان کی بیٹی ان کے گھر واپس آ گئی تھیں۔ اسی دوران بیٹی کے ہاں بچے کی پیدائش بھی ہوئی۔

وہ بتاتے ہیں کہ کچھ عرصے بعد انھوں نے اپنی بیٹی کی دوسری شادی کا فیصلہ کیا۔ تو بیٹی کیوں کہ مسلمان ہو چکی تھیں اس لیے وہ دوبارہ بھی مسلمان سے بیا ہ کرنا چاہتی تھیں۔

&quot;اس سلسلے میں کچھ جان پہچان والوں نے میری مدد کی اور ایک مسلم لڑکے نے میری بیٹی کو اولاد سمیت اپنا لیا۔&quot;

راجیش لعل دعویٰ کرتے ہیں کہ اٹک صدر کے تمام مسیحی پہلے &#39; والمیکی ہندو&#39; تھے اور یہ کوئی بہت زیادہ پرانی بات نہیں ہے۔ اس لیے ان کی آپس میں رشتہ داریاں ہیں۔ ایک دوسرے کی غمی خوشی و تہواروں میں شرکت کرتے ہیں اور قبرستان بھی مشترکہ ہے۔

&#39;ہندو والمیکی&#39; برادری کی بنیاد مہارشی سوامی گرو والمیکی نے رکھی تھی جنہوں نے تیسری صدی قبل مسیح میں رامائن کی تالیف کی تھی۔ یہ لوگ وید پڑھتے اور رامائن کا پاٹھ کرتے ہیں۔ دوسرے ہندوؤں کے برعکس یہ لوگ اپنے مردے کو دفن کرتے ہیں۔

سماجی کارکن اشوک کمار کہتے ہیں کہ ہندو، مسیحی لڑکے لڑکیوں کی یہاں جتنی بھی شادیاں ہوئیں وہ سب پسند کی شادیاں تھیں۔ ان سب کے گھر والے نہ چاہتے ہوئے بھی رشتوں پر رضامند ہو گئے۔

لیکن بعض مقامی ہندؤوں کو یہ اعتراض ہے کہ ہندو لڑکی مسیحی نوجوان سے شادی کرے تو وہ مذہب تبدیل کر لیتی ہے۔ لیکن اگر کوئی مسیحی لڑکی ہندو نوجوان سے شادی کرتی ہے تو وہ اپنا مذہب نہیں چھوڑتی۔ پھر بھی بعض ہندو لڑکے بیوی کا مذہب اپنا لیتے ہیں۔

انسٹھ سالہ پرویز لعل کی بہو مسیحی ہیں۔ وہ بتاتے ہیں کہ &quot;چند سال قبل میرے بیٹے آصف نے مسیحی لڑ کی سے شادی کی تھی۔اب دونوں خوشی سے زندگی بسر کر رہے ہیں۔ ہم نے بہو کو کبھی چرچ جانے سے نہیں روکا اور نہ ہی انہیں مندر جانے کے لیے کہا ہے۔&quot;

برصغیر میں 1941ء کو ہونے والی مردم شماری کے وقت اٹک میں ہندوؤں کی تعداد ضلع کی کل آبادی کا 6.36 فیصد یعنی لگ بھگ 43 ہزار تھی۔ جبکہ اس زمانے میں اس شہر میں عیسائیت کو ماننے والے صرف 504 افراد تھے۔

&nbsp;یونائٹیڈ پرسبیٹیرین(یو پی) چرچ کے پادری جاوید جانسن پیٹر اتفاق کرتے ہیں کہ اٹک کے زیادہ تر کرسچن، ہندو مت سے مسیحی ہوئے ہیں اور اب بھی ہو رہے ہیں۔ تاہم غریب ہندووں کو راشن مراعات کے ساتھ انگریزوں کے اچھے اخلاق نے بھی متاثر کیا۔

عارف کھوکھر کا تعلق ہندو برادری سے ہے۔ وہ بتاتے ہیں کہ 1992ء میں سانحہ بابری مسجد کے بعد اٹک صدر میں شری بالمیک مندر کو ان کے سامنے گرا دیا گیا تھا۔ تب کچھ ہندو خوف کے باعث یہاں سے چلے گئے تھے یا پھر مذہب تبدیل کر لیا تھا۔ ان لوگوں کا خیال تھا کہ &quot;وہ اگر مسلمان یا مسیحی ہو جائیں گے تو ان کی جان بچ جائے گی۔&quot;

وہ سمجھتے ہیں کہ ہندو کمیونٹی کو دوسرے مذاہب کے مقابلے میں زیادہ امتیازی سلوک اور منفی رویوں کا سامنا ہے۔ سرکاری نوکریوں اور مراعات میں بھی نظر انداز کیا جاتا ہے۔ اس لیے انہیں خدشہ ہے کہ شاید مستقبل میں اٹک میں ایک بھی ہندو باقی نہ رہے۔

وجے کمار 11 سال سے محکمہ پولیس میں بطور سوئیپر کام کر رہے ہیں۔ وہ بتاتے ہیں کہ یہاں ہندوؤں کی اکثریت انتہائی غریب ہے۔ پڑھے لکھے افراد گنے چنے ہیں جن میں پنڈت سرون کمار فارماسوٹیکل کمپنی، راکیش کمار&nbsp; اے ایس ایف میں ملازمت کر رہے ہیں۔

وہ کہتے ہیں کہ چند لوگ سرکاری اداروں میں درجہ چہارم اور سوئیپر کی نوکری کرتے ہیں۔ کچھ ہنر مند ہندو فریج، اے سی مکینک، پینٹر اور درزی کا کام کرتے ہیں لیکن ان کا کاروبار بھی مندہ ہے۔ کیوں کہ یہاں پر بیشتر لوگ مذہب کے باعث ان سے لین دین نہیں کرتے۔

وہ ایک سرکار ی ملازم امر داس کے ساتھ پیش آنے والا ایک واقعہ سناتے ہیں۔ &quot; امر داس کی ڈیوٹی کچھ دن کے لیے لنگر تقسیم کرنے پر لگا دی گئی۔ جب محکمے کے لوگوں کو معلوم ہوا کہ وہ ہندو مذہب سے ہیں تو انہوں نے کھانے لینے سے انکار کر دیا۔&quot;

روپ لعل بھی ایک سرکاری ادارے میں 28 سال سے بطور سوئیپر کام کر رہے ہیں۔ وہ بتاتے ہیں کہ مسیحی تہواروں پر کرسچن عملے کو حکومت کی جانب سے راشن اور نقد رقم کے خصوصی پیکج دیے جاتے ہیں۔ لیکن انہیں محروم رہنا پڑتا ہے &quot;مسیحی ساتھی مجھے اکثر کہتے ہیں کہ آپ بھی مسیحی ہو جائیں۔ &quot;

وہ کہتے ہیں کہ ان کی بیٹی نے انٹر اچھے نمبروں سے پاس کر لیا ہے۔ لیکن بیٹی کو اچھے کالج یا یونیورسٹی میں داخل کر نے کی ان کی استطاعت نہیں ہے۔ حکومت کم از کم غریبوں کے بچوں کو پڑھانے کا انتظام ہی کر دے۔

دیکھ کبیرا رویا: سندھ میں شیڈولڈ ذاتوں کے ہندو کیوں مسیحی اور کبیر پنتھی ہو رہے ہیں؟

نقل مکانی یا تبدیلی مذہب: اٹک صدر کی ہندو آبادی میں متواتر کمی کیوں ہو رہی ہے؟

ناصر اعوان گزشتہ 30 سال سے اٹک شہر کے محلہ اعوان شریف میں مقیم ہیں۔ اِس سال جنوری میں ان کے علاقے کا واحد ٹیوب ویل زیر زمین پانی کی سطح کم ہو جانے کے سبب بند ہو گیا جس کے نتیجے میں 10 ہزار سے زیادہ آبادی پینے کے پانی سے محروم ہو گئی۔ اس ٹیوب ویل سے پانی کے ساتھ ریت اور بجری آنا شروع ہو گئی تھی جس سے سپلائی لائنیں بند ہونے کا خدشہ تھا لہٰذا بلدیہ حکام نے ٹیوب ویل بند کرنے میں ہی عافیت جانی۔

بعدازاں دوسرے ٹیوب ویلز کے مین پائپ اس علاقے کی سپلائی لائنوں کے ساتھ جوڑ دیے جس سے&nbsp; اعوان شریف کے لوگوں کو کم مقدار میں سہی مگر کئی ماہ بعد پانی میسر آنے لگا۔

وزیر خان پچھلے 13 سال سے اعوان شریف میں کے رہائشی ہیں۔ انہوں نے بتایا کہ چھ ماہ تک ان کا ٹیوب ویل بند رہا۔ بلدیہ اٹک کی جانب سے ہفتے میں دو دن پانی کا&nbsp; ٹینکر بھیجا جاتا تھا جو کسی گلی میں کھڑا کر دیا جاتا۔ لوگ وہاں سے پانی گھروں کو لے جاتے تھے۔ ٹینکر کا پانی آلودہ ہونے سے متعدد افراد پیٹ کے مختلف امراض کا شکار بھی ہوئے۔ اسی لیے اعوان شریف میں کرائے کے مکانوں میں رہنے والے سیکڑوں خاندان دوسروں علاقوں میں چلے گئے۔

انہوں نے بتایا کہ جب لوگوں نے اپنی مشکل دور کرنے کے لیے انتظامیہ سے درخواست کی تو ضلعی افسروں اور سیاسی عمائدین کی جانب سے علاقہ مکینوں کو یہی جواب موصول ہوا کہ نگراں حکومت میں کسی بھی قسم کا ترقیاتی کام نہیں کروایا جا سکتا۔

ضلع اٹک کی تحصیلوں میں میونسپل کمیٹیاں شہری آبادی کو پینے کا صاف پانی گھروں میں فراہم کرنے کا اہتمام کرتی ہیں۔ دیہات میں بیشتر آبادی ہاتھ اور بجلی سے چلنے والے پمپ اور کنوؤں کے ذریعے پانی حاصل کرتی ہے۔ اس کے علاوہ محکمہ پبلک ہیلتھ کی سکیموں کے تحت ٹیوب ویل بھی موجود ہیں۔ میونسپل کمیٹی تحصیل اٹک&nbsp; کی حدود میں مختلف مقامات پر نصب ٹیوب ویل پانی کی ضروریات پورا نہیں کر پاتے اور اگر ان میں سے&nbsp; کوئی ٹیوب ویل خراب ہو جائے تو شہریوں کی مشکلات بڑھ جاتی ہیں۔

پانچ ہزار آبادی پر مشتمل جسیاں گاؤں اٹک شہر سے پانچ کلومیٹر کی مسافت پر ہے۔ یہاں گزشتہ سال اکتوبر میں خراب ہونے والا ٹیوب ویل ابھی تک ٹھیک نہیں ہوا۔

یہاں رہنے والے عابد قریشی کا کہنا ہے کہ گاؤں میونسپل کمیٹی حدود سے باہر ہے۔ یہاں زیر زمین پانی چار سو سے پانچ سو فٹ گہرا ہے جو کھارا اور بدبودار ہونے کے باعث پینے کے قابل بھی نہیں۔ چند سال قبل سابق ایم این اے شیخ آفتاب احمد کے جاری کردہ فنڈ سے محکمہ پبلک ہیلتھ نے ایک ٹیوب ویل جناح پارک اٹک کے قریب لگوایا جس کا میٹھا پانی پائپ لائنوں کے ذریعے گاؤں میں لوگوں کے گھروں تک پہنچایا گیا۔

&quot;گاؤں میں ساڑھے پانچ سو سے زیادہ کنکشن دیے گئے۔ پانی کا ماہانہ بل شروع میں چار سو روپے فی گھر وصول کیا جاتا رہا جو بڑھ کر سات سو روپے تک پہنچ گیا۔ گزشتہ سال اس ٹیوب ویل کا بور ناکارہ ہونے کے بعد لوگوں کو پانی فراہم نہیں کیا جا رہا۔&quot;

عابد قریشی نے بتایا کہ جن گھروں میں بور اور موٹریں لگی ہیں۔ مخصوص اوقات میں لوگ ان سے ایک دو بالٹی پانی لے جاتے ہیں تاہم بیشتر کا پانی کھارا ہے۔

اسی گاؤں کے سجاد کا کہنا ہے کہ یہاں محکمہ پبلک ہیلتھ نے چند سال قبل مختلف مقامات پر دو ٹیوب ویل نصب کیے تھے۔ ان میں سے ایک دو ہفتوں بعد ہی بند ہو گیا جبکہ دوسرے ٹیوب ویل کا پانی بدبودار ہے۔

انہوں نے بتایا کہ چند سال قبل سابق ایم پی اے ملک شاہان حاکمین نے دریائے ہرو کے قریب قدرتی چشمے (جسے مقامی زبان میں چووا کہتے ہیں) کا پانی موٹروں سے گاؤں تک پہنچایا۔ یہ قابل استعمال تھا لیکن سیلاب آیا اور سب کچھ بہا کر لے گیا، یوں یہ قصہ بھی تمام ہوا۔

اس گاؤں میں رہنے والے الیکٹریشن امتیاز کا کہنا ہے کہ غریب لوگ پانی کی پرائیویٹ ٹینکی 22 سو روپے میں نہیں خرید سکتے۔ اگر کبھی مجبوراً ایسا کرنا پڑ جائے تو دو تین پڑوسی مل کر منگوا تو لیتے ہیں لیکن پورے مہینے کا بجٹ متاثر ہو جاتا ہے۔ گھر میں بورنگ کا خرچ چار لاکھ سے زیادہ ہے اور اس کی بھی کوئی گارنٹی نہیں کہ نکلنے والا پانی قابل استعمال ہو گا یا نہیں۔&quot;

ظفر اقبال بلدیہ اٹک میں 40 برس سے ملازم اور واٹر سپلائی کے انچارج ہیں۔ ان کا کہنا ہے کہ اٹک شہر میں شہریوں کو پانی کی فراہمی کے لیے مختلف مقامات پر 42 ٹیوب ویل نصب ہیں۔ زیر زمین پانی کی سطح نیچے ہو جانے سے 11 ٹیوب ویل بند کر دیے گئے ہیں جبکہ مزید 10 اپنی مقررہ معیاد پوری کر چکے اور کسی بھی وقت بند ہو سکتے ہیں۔

&quot;جب میں نے بلدیہ اٹک میں ملازمت اختیار کی تو اس وقت زیر زمین پانی کی سطح 45 سے 50 فٹ پر ہوا کرتی تھی۔ 1995ء میں غازی بروتھا نہر پروجیکٹ کا کام شروع ہوا۔ کنکریٹ سے بنی یہ نہر&nbsp; 2003ء میں مکمل ہوئی۔ اس کے بعد رفتہ رفتہ پانی کی سطح ڈیڑھ سو فٹ سے بھی زیادہ مزید نیچے چلی گئی۔&quot;

ان کے مطابق دریائے سندھ کے پانی کا زیر زمین رساؤ یا سیپج اٹک شہر تک نہیں پہنچ پاتا۔ اس سے زیر زمین پانی کی سطح خطرناک حد تک نیچے جا چکی ہے۔

غازی بروتھا نہر میں ہر دو سو فٹ کے فاصلے پر ہیوی موٹریں بھی لگائی گئی ہیں جو زیر زمین پانی نکال کر نہر میں پھینک رہی ہیں جس سے شہر اور گرد ونواح میں پانی کی سطح میں مزید گراوٹ ہو رہی ہے۔ زیرزمین پانی کم یاب ہونے سے ڈہوک فتح، محلہ سمندر آباد، محلہ آمین آباد، محلہ شاہ آباد، جی بلاک، اعوان شریف اور دیگر شہری آبادی کو پانی کی شدید قلت کا سامنا ہے۔ میونسپل کمیٹی انہیں دور دراز&nbsp; کے علاقوں میں لگے ٹیوب ویل کا پانی سپلائی کرتی ہے۔

ٹیوب ویل میں 30 ہارس پاور کی ہیوی موٹریں لگائی جاتی ہیں جس سے پانی کی ٹینکیوں کو بھرا جاتا ہے۔ یہ موٹریں گرمیوں میں پانی کی مانگ بڑھنے پر مسلسل چلتی ہیں۔ بجلی اس قدر مہنگی ہے کہ صرف ٹیوب ویلوں پر استعمال ہونے والی بجلی کا ماہانہ بل ڈیڑھ کروڑ روپے تک آجاتا ہے۔ شہر بھر میں صارفین کو پانی کے 14 ہزار کنکشن دیے گئے ہیں اور ان سے تین سو روپے فی گھر وصول کیے جاتے ہیں۔&nbsp; پانی کے بلوں کی مد میں بلدیہ اٹک کو 42 لاکھ روپے ماہانہ موصول ہوتا ہے۔

انہوں نے کہا کہ دریائے ہرو کے پانی کا سیپج جس علاقے میں زیادہ ہے وہاں زیر زمین پانی ستر سے 80 فٹ گہرا ہے۔ وہاں کم ٹیوب ویل لگا&nbsp; کرشہر میں پانی فراہم کیا جا سکتا ہے۔

چیف آفیسر بلدیہ اٹک مبارک علی نے بتایا کہ ضلع اٹک کی تحصیل حضرو ، جنڈ اور پنڈی گھیب میں ٹیوب ویل سے شہری آبادی کو پینے کا صاف پانی فراہم کرتے ہیں جبکہ تحصیل حسن ابدال میں قدرتی چشموں&nbsp; اور&nbsp; تحصیل فتح جنگ میں شاہ پور ڈیم کا پانی شہریوں کو ملتا ہے۔

ان کا کہنا ہے کہ بلدیہ اٹک کے اخراجات18 کروڑ روپے سالانہ ہیں۔ بجلی اور سوئی گیس کی طرح پانی کے بلوں میں فوراً اضافہ کیا جائے اور صارفین سے 15 سو روپے ماہانہ کے حساب سے وصولی کی جائے تو اس نظام کو کسی حد تک چلانا ممکن ہے۔

کوئٹہ میں موجود غیر قانونی ٹیوب ویل: عوام پینے کے پانی کے لیے ٹینکر مافیا کے رحم و کرم پر

اٹک میں زیرزمین آبی سطح خطرناک حد تک کم ہو گئی: شہر اور گردونواح میں پینے کے پانی کا بحران

شرجیل احمد پڑھ لکھ کر اچھی نوکری حاصل کرنا چاہتے تھے۔ اسی لیے انہوں نے اپنے والد کے ساتھ کھیتوں میں کام کرنے اور مویشیوں کی دیکھ بھال کے لیے وقت دینے کے ساتھ پڑھائی میں بھی محنت کی اور مقامی ہائر سیکنڈری سکول سے میٹرک کا امتحان پاس کر لیا۔

لیکن جب انہوں ںے گیارہویں جماعت میں داخلہ لینا چاہا تو انتظامیہ نے انہیں بتایا کہ سکول میں انٹرمیڈیٹ کے مضامین پڑھانے والا کوئی استاد نہیں ہے اسی لیے یہاں داخلے بند کر دیے گئے ہیں۔

چونکہ ان کے علاقے میں اعلیٰ تعلیم کا کوئی اور ادارہ موجودہ نہیں ہے اس لیے مجبوراً انہیں پڑھائی چھوڑنا پڑی اور اب وہ اپنے گاؤں میں زرعی ادویات کی دکان پر کام کرتے ہیں۔

شرجیل احمد ضلع اٹک کے گاؤں دورداد میں رہتے ہیں جو شہر سے 23 کلومیٹر دور ہے۔ اس علاقے میں ہائر سیکنڈری سکول 2005ء سے قائم ہے جہاں 16 سبجیکٹ سپیشلسٹ اساتذہ کی اسامیاں ہیں لیکن پچھلے 17 سال سے سکول میں کبھی اساتذہ کی تعداد پوری نہیں رہی۔

اس کے باوجود 2022ء تک یہاں گیارہویں اور بارہویں جماعت کی کلاسیں چلتی رہی تھیں۔

گزشتہ برس جب یہاں سے آخری سبجیکٹ سپیشلسٹ استاد اپنا تبادلہ کرا کے چلا گیا تو انٹرمیڈیٹ کے داخلے بند کر دیے گئے۔

شرجیل بتاتے ہیں کہ 2021ء میں ان سمیت گاؤں کے اس سکول میں پڑھنے والے تقریباً سو لڑکوں نے میٹرک کا امتحان دیا تھا جن میں سے قریباً 70 نے کامیابی حاصل کی لیکن اب ان کی اکثریت پڑھائی چھوڑ چکی ہے۔

&quot;جن طلبہ کے والدین کے معاشی حالات اچھے تھے صرف وہی اٹک جا کر انٹرمیڈیٹ میں داخلہ لے سکے ہیں&quot;۔

شرجیل کے بڑے بھائی عقیل احمد نے اسی ہائر سیکنڈری سکول سے ایف ایس سی پاس کی تھی لیکن گھر کے معاشی حالات اچھے نہ ہونے کی وجہ سے وہ مزید نہ پڑھ سکے۔ شرجیل کا چھوٹا بھائی جلیل احمد اسی سکول میں میٹرک کا طالب علم ہے لیکن انہیں اس کا تعلیمی مستقبل بھی کچھ روشن دکھائی نہیں دیتا۔

شرجیل احمد کے والد خلیل احمد کے بقول اس سکول میں ہائر سکینڈری کا شعبہ بند ہونے سے دورداد اور اس کے قریب ایک درجنوں دیہات کا تعلیمی نقصان ہوا ہے جن کی آبادی ایک لاکھ کے قریب ہے۔

دورداد ہائر سیکنڈری سکول اس لیے بھی اہمیت کا حامل ہے کہ اٹک سمیت تحصیل حسن ابدال اور فتح جنگ کے کئی دیہات سے اس کا فاصلہ ان کے تحصیل ہیڈ کوارٹر سے کم ہے۔

محکمہ تعلیم کے ضلعی دفتر کے مطابق ضلع اٹک میں کُل 22 ہائر سیکنڈری سکول ہیں جن میں سے 10 لڑکیوں اور 12 لڑکوں کے ہیں۔

لڑکوں کے سکولوں میں انٹرمیڈیٹ کے 184 سبجیکٹ سپیشلسٹ اساتذہ کی اسامیوں میں سے 135 اسامیاں خالی پڑی ہیں جبکہ لڑکیوں کے سکولوں میں 160 میں سے 120 اسامیوں پر تقرری نہیں ہوئی۔

تقریباً 22 لاکھ آبادی کے ضلع اٹک میں چار ہائر سیکنڈری سکول ایسے ہیں جہاں انٹرمیڈیٹ جماعتوں کو پڑھانے والا کوئی بھی استاد نہیں ہے۔ان میں دورداد کے علاوہ کوٹ فتح خان کا بوائز سکول اور چھب اور شادی خان قصبوں میں خواتین کے سکول شامل ہیں۔

قصبہ ملال میں قائم بوائز ہائر سکینڈری میں ایک سبجیکٹ سپیشلسٹ استاد رہ گیا ہے جہاں صرف دو طلبہ انٹرمیڈیٹ کی تعلیم حاصل کر رہے ہیں۔

اس سکول میں نویں اور دسویں جماعت کو پڑھانے والے استاد محمد زبیر کہتے ہیں کہ سبجیکٹ سپیشلسٹ اساتذہ کی کمی کی وجہ سے سکول انتظامیہ رواں سیشن میں گیارہویں جماعت کے داخلے بند کرنے پر غور کر رہی ہے۔

اسی طرح کُھنڈا قصبے کے بوائز ہائر سیکنڈری سکول میں بھی انٹرمیڈیٹ کی جماعتوں کے لیے صرف ایک ہی استاد تعینات ہے۔

اٹک میں لڑکیوں کے بیشتر ہائر سیکنڈری سکولوں کی حالت بھی کچھ ایسی ہی ہے۔ اٹک، کامرہ کینٹ اور حسن ابدال شہر کے علاوہ تمام علاقوں کے سکولوں میں انٹرمیڈیٹ کے اساتذہ مطلوبہ تعداد کے نصف سے بھی کم ہیں۔

ملہو اور بسال نامی قصبوں کے گرلز ہائر سیکنڈری سکول میں ایک ایک سبجیکٹ سپیشلسٹ تعینات ہے۔اسی طرح ملہووالی اور کوٹ فتح خان کے گرلز ہائر سکینڈری سکولوں میں تین تین اساتذہ ہیں جبکہ ان چاروں سکولوں میں انٹرمیڈیٹ کے سبجیکٹ سپیشلسٹ کی سولہ سولہ اسامیاں رکھی گئی ہیں۔

ضلعی محکمہ تعلیم کے ایک سینئر عہدیدار (جو اپنا نام ظاہر نہیں کرنا چاہتے)کے مطابق ضلعے کے تمام ہائی اور ہائر سیکنڈری سکولوں کی تعداد 262 ہے جن میں سے 197 میں مستقبل بنیادوں پر پرنسپل ہی تعینات نہیں کیے جا سکے۔

وہ بتاتے ہیں کہ تین سال پہلے یہاں کے 39 مڈل سکولوں کو اپ گریڈ کرکے ہائی کا درجہ تو دے دیا گیا ہے لیکن اب تک یہاں کوالیفائیڈ اساتذہ تعینات نہیں کیے گئے اور مڈل کے اساتذہ ہی نویں اور دسویں جماعتوں کو پڑھا رہے ہیں۔

<h2>استاد کہاں گئے؟</h2>

گورنمنٹ ہائر سیکنڈری سکول دورداد کے پرنسپل ممتاز حسین کا کہنا ہے کہ محکمہ تعلیم نے نہ تو گزشتہ سال سے نئی بھرتیاں کی ہیں اور نہ ہی موجودہ اساتذہ کو ترقی ملی ہے جبکہ اس عرصہ میں بہت سے اساتذہ ریٹائر بھی ہو گئے ہیں۔

لیکن ان کے خیال میں محکمہ تعلیم کی طرف سے اساتذہ کو آن لائن ٹرانسفر کی سہولت فراہم کرنا اس مسئلے کی سب سے بڑی وجہ ہے۔ اس سہولت کے ذریعے بہت سے اساتذہ نے دور دراز دیہات سے شہروں کے سکولوں میں تبادلہ کروا لیا ہے۔ یہ ایک خودکار نظام ہے جو اساتذہ کا تبادلہ ان کے من پسند سکول میں سیٹ خالی ہونے کی بنیاد پر کر دیتا ہے۔

&quot;اگر کسی سکول میں صرف ایک ہی سیکنڈری سکول ٹیچر ہو تو اس کو تبادلے کے لیے اسی سکول میں کسی دوسرے ٹیچر کی ضرورت ہوگی جو اس کی جگہ تعینات ہو سکے جبکہ سبجیکٹ سپیشلسٹ کسی سکول میں اکلوتا ہونے کے باوجود بھی اپنا تبادلہ باآسانی کرا سکتا ہے&quot;۔

اس سے پہلے اساتذہ کے تبادلوں میں محکمے کے افسروں کا اہم کردار ہوتا تھا۔ چونکہ ضلع بھر کے سکول انہی کے زیر کنٹرول ہوتے ہیں اس لیے انہیں تمام سکولوں میں اساتذہ کی تعداد پر نظر رکھنا پڑتی تھی۔ اس لیے وہ ضرورت کو مدنظر رکھ کر ہی تبادلوں کی منظوری دیتے تھے۔

ممتاز حسین اٹک شہر میں رہتے ہیں اور روزانہ 23 کلومیٹر سفر طے کرکے دورداد آتے جاتے ہیں۔

ان کا کہنا ہے کہ علاقے میں نہ تو سڑکیں ٹھیک ہیں اور نہ ہی کوئی مناسب پبلک ٹرانسپورٹ میسر آتی ہے۔ اسی لیے انہیں روزانہ سکول کھلنے سے ڈھائی گھنٹے پہلے گھر سے روانہ ہونا پڑتا ہے اور واپسی پر شام ڈھل جاتی ہے۔

ممتاز حسین کے مطابق اسی وجہ سے اساتذہ ایسے علاقوں میں پڑھانے سے گریز کرتے ہیں اور انہی مسائل کی وجہ سے یہاں کے طلبہ کے لیے روزانہ شہر جا کر پڑھنا مشکل ہوتا ہے۔

ان کا ماننا ہے کہ اگر اساتذہ کی مزید بھرتیاں نہ ہوئیں، پرانے اساتذہ کو ترقیاں نہ دیں گئیں تو حالات بہت ہی زیاہ بدتر ہوجائیں گے کیونکہ اگلے تین سے چار سال میں پچاس فیصد اساتذہ نے ریٹائر ہو جانا ہے۔

صوبائی محکمہ تعلیم کی ویب سائٹ &#39;سکول انفارمیشن سسٹم&#39; کے مطابق 2020ء میں اٹک میں نویں اور دسویں جماعتوں میں کُل 35 ہزار 951 طلبہ زیر تعلیم تھے جبکہ اس سال ہائر سیکنڈری سکولوں میں انٹرمیڈیٹ کے طلبہ کی تعداد تین ہزار 280 تھی۔

اس طرح یہاں میٹرک میں داخلہ لینے والے صرف نو فیصد طلباء ہی انٹرمیڈیٹ درجے میں تعلیم جاری رکھ پائے، 64.1&nbsp; فیصد شرح تعلیم کے ساتھ خواندگی کے اعتبار سے پنجاب کے نمایاں اضلاع میں شمار ہونے والے ضلع اٹک میں میٹرک کے بعد تعلیم ادھوری چھوڑ دینے والے طلبہ کی شرح راجن پور، بہاولنگر، ڈیرہ غازی خان اور مظفر گڑھ جیسے نسبتاً پسماندہ سمجھے جانے والے اضلاع سے بھی زیادہ ہے۔

اس سٹوری میں لاہور سے ہمارے رپورٹر آصف ریاض نے بھی مدد فراہم کی

ندیم حیدر

ندیم حیدر کا تعلق اٹک شہر سے ہے۔ گزشتہ آٹھ سال سے ملکی سطح کے مختلف نیوز چینلز کے ساتھ بطورڈسٹرکٹ رپورٹر کام کر رہے ہیں۔