چالیس سالہ عالم خان میانوالی کے محلہ میانہ کے رہائشی ہیں۔ ان کے نو اور چھ سال کی عمر کے دو بچے سکول پڑھتے ہیں مگر مسلسل ایک ہفتے سے سکول نہیں جا رہے تھے کیونکہ دونوں کو پیٹ درد اور اسہال کی شکایت تھی۔

عالم خان&nbsp; کے علاقے&nbsp; میں سرکاری واٹر فلٹریشن پلانٹ دو ماہ سے بند پڑا ہے جس کی وجہ وہ گھر میں واٹر سپلائی&nbsp; سے آنے والا سرکاری پانی استعمال کر رہے تھے۔

وہ بتاتے ہیں کہ انہوں نے بچوں کو ہسپتال میں چیک کرایا، دوائی سے دونوں کو وقتی طور پر آرام آ&nbsp; گیا لیکن دوسرے دن پھر تکلیف شروع ہو گئی۔

&nbsp;&quot;اگلے دن میں ہسپتال پہنچا تو محلے کے دیگر لوگ بھی بچوں کو چیک کرانے آئے ہوئے تھے۔ جس پر ہم نے محلے کے پانی کو چیک کرانے کا فیصلہ کیا اور سیمپلز لیبارٹری بھیج دیے۔

وہاں سے آنے والے نتائج پریشان کن تھے۔&quot;

ڈسٹرکٹ ہیڈ کوارٹر میانوالی ڈیڑھ لاکھ نفوس پر مشتمل آبادی کا شہر ہے۔ محلہ میانہ، محلہ ہاشم شاہ، محلہ خنکی خیل، محلہ بلو خیل، محلہ زادے خیل، محلہ وتہ خیل، وانڈھی گھنڈ والی اور مجاہد ٹاؤن یہاں کی بڑی آبادیاں ہیں۔

عالم خان کا کہنا ہے کہ شہر کے مختلف محلوں میں 11 واٹر سپلائی سکیمیں کام کر رہی ہیں۔ سب کی پائپ لائنیں 30 سال پہلے بچھائی گئی تھیں جو اب بوسیدہ ہو چکی ہیں۔ اکثر محلوں میں پانی سے بد بو آتی ہے اور یہ استعمال کرنے کو دل نہیں کرتا۔

لیبارٹری رپورٹ کے مطابق شہر کے مختلف محلوں سے لیے گئے پانی کے نمونوں میں کئی نمکیات کی مقدار مطلوبہ حد سے کم پائی گئی ہے۔ پانی کا ٹی ڈی ایس لیول ایک ہزار 80 تک پہنچ چکا ہے جبکہ زیادہ سے زیادہ 900&nbsp; ملی گرام فی لیٹر قابل قبول ہوتا ہے۔

پانی کے نمونوں میں آرسینک کی مقدار 190 مائیکرو گرام فی لیٹر تک پائی گئی ہے۔ جبکہ ڈبلیو ایچ او کے مطابق سنکھیا کی زیادہ سے زیادہ مقدار 10 مائیکرو گرام فی لٹر ہونی چاہیے۔ تاہم پاکستان میں یہ مقدار 50 مائیکروگرام تک قابل قبول سمجھی جاتی ہے۔

ڈسٹرکٹ ہیڈ کوارٹر ہسپتال میانوالی کے سینئر ڈاکٹر امیر احمد خان&nbsp; بتاتے ہیں کہ پینے کے پانی میں نمکیات کی کمی یہاں بچوں کے بیمار ہونے کی شرح میں اضافے کا باعث ہے۔ رواں ماہ اب تک ہسپتال&nbsp; آنے والے مریضوں میں 50 فیصد بچے تھے۔ جن میں الٹی اور اسہال&nbsp; کی شکایت زیادی تھی جبکہ بڑوں میں ہیپاٹائٹس اے کے کیسز زیادہ آ رہے ہیں۔

سرکاری اعداد و شمار کے مطابق ڈسٹرکٹ ہیڈکوارٹر ہسپتال میانوالی میں رواں سال نومبر میں ٹائیفائڈ، ہیضہ، پیچش، ہیپاٹائٹس اے اور جگر کے کینسر کے تین ہزار مریض داخل ہوئے ہیں۔ جن میں سے ایک ہزار 900 میانوالی شہر کے رہائشی تھے۔ ڈاکٹرز کہتے ہیں کہ ان بیماریوں کی بڑی وجہ مضر صحت پانی کا استعمال ہوتا ہے۔

امریکی نیشنل انسٹی ٹیوٹ فار ہیلتھ(این آئی ایچ) نے 2017ء میں اپنی رپورٹ میں بتایا تھا کہ پاکستان میں صرف 20 فیصد آبادی کو پینے کا صاف پانی دستیاب ہے۔ جبکہ ملک کی 80 فیصد آبادی غیر محفوظ پانی پینے پر مجبور ہے۔

اقوام متحدہ کے ادارہ برائے اطفال (یونیسیف) کے اعدادوشمار بھی این آئی ایچ کی تصدیق کرتے ہیں۔ یونیسیف کے مطابق پانچ سال سے کم عمر&nbsp; تقریباً 53 ہزار پاکستانی بچے ہر سال&nbsp; مضر صحت پانی اور خراب سینیٹیشن کے باعث ڈائریا سے مر جاتے ہیں۔

پاکستان کی کنزرویشن سٹریٹجی رپورٹ میں اعتراف کیا گیا تھا کہ ملک میں مضرصحت پانی سے جنم لینے والی بیماریوں ٹائیفائیڈ، آنتوں کے کیڑے، اسہال اور گیسٹرو وغیرہ کی شرح 40 فیصد ہے۔

انٹر نیشنل یونین آف کنزرویشن فار نیچر(آئی یو سی این)&nbsp; کے مطابق پاکستان میں بچوں کی لگ بھگ 60 فیصد اموات کی وجہ غیر محفوظ پانی سے جنم لینے والی بیماریاں ہوتی ہیں۔ یہ شرح ایشیا میں سب سے زیادہ بتائی گئی تھی۔ &nbsp;

اسی صورت حال کے پیش نظر عالمی بینک کے ایگزیکٹو بورڈ نے پنجاب میں صاف پانی کی فراہمی اور سیوریج کے معاملات بہتر کرنے کےلیے 44 کروڑ 20 لاکھ ڈالر کی سرمایہ کاری کی منظوری بھی دی تھی۔ لیکن حالات میں کوئی بہتری دکھائی نہیں دیتی۔

محلہ وتہ خیل کی رہائشی چوبیس سالہ خدیجہ نجی سکول میں پڑھاتی ہیں۔ ان کے علاقے میں بھی فلٹریشن پلانٹ تین ماہ سے بند پڑا ہے۔ جس کی وجہ سے انہیں استعمال کا پانی ہمسایوں کے گھروں سے بھر کر لانا پڑتا تھا جنہوں نے پمپ (سبمرسیبل) لگائے ہوئے ہیں۔

وہ بتاتی ہیں کہ پچھلے ماہ انہیں جسم میں مسلسل درد رہنے لگا اور رنگت پیلی ہونا شروع ہو گئی۔ انہوں نے ڈسٹرکٹ ہیڈ کوارٹر ہسپتال میں چیک اپ کرایا تو ڈاکٹر نے &#39; یرقان&#39; تشخیص کیا اور اس کی وجہ پینے کا آلودہ پانی بتائی ہے۔

محمد فہیم اقبال پبلک ہیلتھ انجینئرنگ ڈیپارٹمنٹ میانوالی میں ریسرچ آفیسر تعینات ہیں۔ وہ بتاتے ہیں کہ شہر میں واٹر سپلائی کا بور چھ سے سات سو فٹ گہرا ہوتا ہے۔ یہاں سے صاف پانی آتا ہے مگر بوسیدہ پائپ لائنوں اور لیکج کے باعث ان میں سیوریج کا پانی شامل ہو جاتا ہے جس کو پینے&nbsp; سے خرابی پیدا ہوتی ہے۔

وہ کہتے ہیں کہ شہر میں لوگ سو فٹ بور پر پمپ لگوا لیتے ہیں جس سے پانی صاف نہیں آتا۔ سمبرسیبل پمپ&nbsp; کی گہرائی کم از کم دو سو فٹ ہونی چاہیے۔

میونسپل آفیسر میانوالی (انفراسٹرکچر) وقار حیدر نے پانی میں آلودگی کی آمیزش سے انکار نہیں کیا۔ وہ بتاتے ہیں کہ شہر کے تمام محلوں کی بوسیدہ پائپ لائنوں کا سروےکرنے کے لیے ٹیم بنا دی گئی ہے۔ اس ٹیم کو کام فوری مکمل کرنے کی ہدایات جاری کی گئی ہیں۔ رپورٹ آتے ہی سپلائی لائنیں تبدیل کر دی جائیں گی۔

ڈپٹی کمشنر میانوالی سجاد احمد خان&nbsp; نے لوک سُجاگ سے گفتگو کے دوران تصدیق کی&nbsp; کہ شہر کے مختلف محلوں میں نصب تمام 22 فلٹریشن پلانٹ خراب ہو چکے تھے۔

وہ بتاتے ہیں کہ انہوں نے شہریوں&nbsp; کی شکایات پر ایکشن لیا جس پر اب 10 فلٹریشن پلانٹ ٹھیک کر دیئے گئے ہیں جبکہ 12 کی رپورٹ تیار کرکے متعلقہ محکمے کو بھیج دی گئی ہے۔ جیسے ہی فنڈ جاری ہوں گے تمام فلٹریشن پلانٹس کو چلا دیا&nbsp; جائے گا۔

&quot;تب تک شہری ڈاکٹروں کی ہدایات پر سختی سے عمل کریں تا کہ کوئی وبا پھیلنے کا خطرہ نہ ہو۔&quot;

آبی ماہر محمد علی کہتے ہیں کہ پانی میں آرسينک ليول کا اضافہ نہایت پریشان کن ہے۔ اس کی ایک وجہ&nbsp; انسانی اور صنعتی فضلےکا دریاوں اور نہروں میں ڈالا جانا ہے۔

&quot;پاکستان میں شمال سے جنوب کی طرف بہتا ہے اور ہمارے ملک میں تازہ پانی کو محفوظ کرنے کے موثر قوانین نہیں ہیں۔ دریاؤں میں آنے والی آلودگی پانی کے ساتھ زمین میں جذب ہوتی ہے اور پھر ہم یہی زیرِ زمین پانی استعمال کرتے ہیں&quot;۔

گھوٹکی میں کروڑوں کی لاگت سے لگائے گئے واٹر فلٹریشن پلانٹ 2 ماہ بھی نہ چل سکے

میانوالی: "فنڈز ملتے ہی تمام واٹر فلٹریشن پلانٹس کو چلا دیا جائے گا، تب تک ڈاکٹروں کی ہدایات پر عمل کریں"

text

پچیس سالہ سعدیہ حنیف میانوالی کے گاؤں علی خیلانوالہ میں بچیوں کے لیے امید کی کرن بن گئی ہیں۔وہ چھدرو کے اس گاؤں کی واحد تعلیم یافتہ لڑکی ہیں، جو پپلاں سے پچھلے سال ہی یہاں بیاہ کر آئی تھیں۔

سعدیہ حنیف پاک سٹڈیز میں ماسٹر ڈگری ہولڈر اور ان کے شوہر ایف اے پاس ہیں۔

وہ بتاتی ہیں کہ شادی کے ایک ماہ&nbsp; بعد ان پر انکشاف ہوا کہ اس گاؤں کی تمام عورتیں ناخواندہ ہیں۔ان کے لیے حیرت کی بات یہ تھی کہ یہاں اب بھی بچیوں کو سکول نہیں بھیجا جاتا بلکہ&nbsp; لڑکیاں اپنے گھر تھیں یا پھر کھیتوں میں کام کرتی ہیں۔

انہوں نے بتایا&nbsp; کہ والدین لڑکوں کو تو سکول بھیجتے تھے مگر لڑکیوں کی تعلیم کا رواج ہی نہیں تھا۔ صرف یہی نہیں، بچیوں کی تعلیم پر اخرجات کو بے فائدہ بھی سمجھا جاتا ہے۔ اس رویے نے انہیں سوچنے پر مجبور کر دیا۔

&quot;جب میں نے لڑکیوں کے والدین سے انہیں سکول بھیجنے کی بات کی تو پہلے بہت مشکل ہوئی کیونکہ وہاں ایسا کبھی کسی نے سوچا نہیں تھا۔لیکن اب گاؤں کی 25 بچیاں پرائمری سکول میں داخل ہو چکی ہیں۔&quot;

چھدرو یونین کونسل میانوالی شہر سے پچیس کلومیٹر دور پہاڑ کے دامن میں واقع ہے۔ یہاں&nbsp; لوگوں کا ذریعہ معاش کاشتکاری ہے اور زیادہ تر بچیاں بھی والدین کا ہاتھ بٹاتی ہیں۔ چھدرو کے گاؤں علی خیلانوالہ کی آبادی درجنوں گھرانوں پر مشتمل ہے۔لیکن یہاں سے قریب ترین گرلز پرائمری سکول بھی (داؤ خیلانوالہ) چار کلومیٹر دور ہے۔

سر کاری اعدادوشمار کے مطابق&nbsp; ضلع میانوالی میں شرح خواندگی 61.28 فیصد ہے۔یہاں&nbsp; مردوں میں خواندگی کی شرح 78.54 فیصد جبکہ عورتوں میں 44.35 فیصد ہے۔ میانوالی تین تحصیل پر مشتمل ضلع ہے۔

تحصیل میانوالی میں مجموعی شرح خواندگی تو 63.85 فیصد ہے مگر یہاں مردوں میں شرح خواندگی 81 فیصد جبکہ عورتوں میں 44.36 فیصد ہے۔یہاں کے دیہات میں شرح خواندگی مردوں میں 79.80 اور&nbsp; عورتوں میں 41.80 فیصد ہے۔

ڈسٹرکٹ ایجوکیشن آفس کے اعدادوشمار بتاتے ہیں کہ اس ضلعے میں ہر سال پرائمری سکولوں میں 24 سے&nbsp; 25 ہزار بچے جبکہ 12 سے 14 ہزار بچیاں داخل ہوتی ہیں۔یعنی داخلے میں بچیوں کی تعداد نصف ہے۔

ڈسٹرکٹ ایجوکیشن آفیسر سیکنڈری محمد خالد خان نے لوک سجاگ کو بتایا&nbsp; کہ ضلعے میں پرائمری تک لڑکوں کی تعداد 75 ہزار کے قریب ہوتی ہے جو انٹر میں ڈیڑھ ہزار تک رہ جاتی ہے۔ اس کے مقابلے میں&nbsp; پرائمری لیول پر بچیوں کی تعداد لگ بھگ 64 ہزار ہوتی ہے جو انٹر لیول تک بمشکل 600 رہ جاتی ہے۔

موضع شماری کے مطابق میانوالی کے 17 فیصد دیہات میں لڑکیوں کا&nbsp; ایک بھی پرائمری سکول، 64 فیصد دیہات میں مڈل سکول اور 83 فیصد دیہات میں ہائی یا ہائر سیکنڈری سکول موجود ہی نہیں۔

اس ضلعے میں گاؤں سے لڑکیوں کے پرائمری سکول کا اوسط فاصلہ چار کلومیٹر، مڈل سکول کا فاصلہ چھ کلومیٹر&nbsp; ہے، یہ پنجاب میں گھر سے سکول تک کے اوسط فاصلے سے کہیں زیادہ ہے۔

ڈسٹرکٹ ایجوکیشن آفیسر ایلیمنٹری (میل) محمد طارق عباس بتاتے ہیں کہ ضلع میانوالی کے شہری علاقوں میں ہر سو میں سے 84&nbsp; لڑکے سکول کی تعلیم مکمل کرتے جبکہ 100 میں سے 56 لڑکیاں تعلیم مکمل کرتی ہیں۔ دیہات میں یہ تناسب 75&nbsp; لڑکے اور 40 لڑکیوں کا ہے۔ اس لحاظ سے ضلع میانوالی میں جینڈر گیپ صوبہ پنجاب کے باقی اضلاع کی نسبت بہت زیادہ ہے۔

ڈسٹرکٹ ایجوکیشن آفیسر اس کی وجہ دیہات میں لوگوں کی پسماندہ سوچ اور بنیادی تعلیمی سہولیات کا فقدان بتاتے ہیں۔ وہ کہتے ہیں اکثر دیہات کا پرائمری سکول سے فاصلہ چار سے پانچ کلومیٹر تک کا ہوتا ہے اس وجہ سے وہ بچیوں کو نا اکیلے سکول بھیجتے ہیں اور نہ ہی ان کی تعلیم میں دلچسپی ظاہر کرتے ہیں۔

یونیسف کی رپورٹ کے مطابق پاکستان میں پانچ سے 16 سال کی عمر کے تقریباً دو کروڑ 28 لاکھ بچے سکول نہیں جاتے۔ یہ تعداد سکول کی عمر کے بچوں کی کل&nbsp; آبادی کا 44 فیصد&nbsp; ہے۔

ماہر تعلیم افضل خان کئی کالجز سے وابستہ رہے اور اب بھی ایک نجی کالج میں پڑھا رہے ہیں۔ وہ بتاتے ہیں کہ میانوالی کے&nbsp; دور دراز کے دیہات میں ایک خاص سوچ کے حامل لوگ&nbsp; بیٹیوں کو پرائی امانت سمجھتے ہیں۔ اس لیے ان پر تعلیمی اخرجات بھی نہیں کرنا چاہتے۔

&quot;دوسرے کمزور معاشی حالات ہیں۔ جن کی وجہ سے لوگ کھیتی باڑی میں بچیوں کو بھی اسی کام لگا لیتے ہیں اور یوں مفت کی افرادی قوت ہاتھ آ جاتی ہے۔&quot;

افضل خان کہتے ہیں کہ میانوالی کے دیہات میں تعلیمی اداروں کی کمی بھی یہاں لڑکیوں کی تعلیم بڑی رکاوٹ ہے۔ اگر سکول موجود ہوتا ہے تو وہاں خاتوں ٹیچر نہیں ہوتیں۔ میانوالی کے سکولوں میں خواتین اساتذہ کی تعداد&nbsp; مرد ٹیچرز سے 40 فیصد کم ہے۔ ان مسائل کو حل کرنا ہو گا۔ 
علی خیلانوالہ&nbsp; کی نذیراں بی بی کی دو بیٹیاں سکول اب&nbsp; پرائمری سکول جانے لگی ہیں۔

وہ بتاتی ہیں کہ وہ بالکل نا خواندہ ہیں مگر جب وہ سعدیہ کو&nbsp; دیکھتی تو سوچتی ہیں کہ کاش وہ بھی تعلیم یافتہ ہوتیں، کم از کم گھر کا سودا سلف اور حساب کتاب تو خود کر لیتیں۔

&nbsp;وہ کہتی ہیں کہ اب وہ اپنی بیٹیوں کی تعلیم میں کوئی کسر نہیں چھوڑیں گی، نا ہی ان کو اپنے ساتھ کھیتوں میں کام کرنے دیں گی تاکہ جیسی زندگی انہوں نے گزاری ہے ویسی ان کی بیٹیوں کا نہ گزارنی پڑے۔

میانوالی کے کالجوں میں اساتذہ کی راہ دیکھتے طلبہ اپنے مستقبل سے مایوس ہونے لگے

"سعدیہ کو دیکھ کر سوچتی ہوں کاش میں بھی تعلیم یافتہ ہوتی"

محمد طاہر خان میانوالی سے 25 کلومیٹر دور مشرق کی جانب ڈیرہ نورنگ خیلانوالہ میں رہتے ہیں۔ یہ گاؤں کوہستان نمک کے دامن میں چھدرو نامی علاقے میں واقع ہے۔ طاہر کا خاندان پانچ افراد پر مشتمل ہے اور وہ اپنی آبائی اراضی پر کاشت کاری کرتے ہیں۔ امسال انہوں ںے بارہ ایکڑ زمین پر کپاس کی فصل اگائی جو تیار ہو گئی تو 29 ستمبر کو ہونے والی چند منٹ کی ژالہ باری نے اسے اجاڑ کر رکھ دیا۔

طاہر نے بتایا کہ اس صبح آسمان پر بادل چھائے ہوئے تھے جنہیں دیکھ کر وہ خوش ہو گئے کہ اگر آج بارش ہو گئی تو ان کی فصل کو فائدہ ہو گا اور پانی کا خرچہ بھی بچ جائے گا۔ مگر بارش کے ساتھ غیرمعمولی ژالہ باری بھی شروع ہو گئی۔ کچھ ہی دیر کے بعد موسم صاف ہو گیا اور جب وہ اپنے کھیتوں میں پہنچے تو ان کی فصل پوری طرح تباہ ہو چکی تھی۔

اسی گاؤں کے رہائشی یوسف خان نے چھ ایکڑ پر کپاس کاشت کر رکھی تھی اور ان کی فصل بھی چنائی کے لیے تیار تھی جو ژالہ باری سے بری طرح متاثر ہوئی۔

ان کا کہنا ہے کہ وہ فی ایکڑ زمین پر ایک لاکھ چالیس ہزار روپے تک خرچ کر چکے تھے اور انہیں امید تھی کہ وہ 17 سے 20 من فی ایکڑ تک پیداوار حاصل کر لیں گے لیکن اب وہ بمشکل چار سے چھ من کپاس ہی اٹھا پائیں گے۔

وہ بتاتے ہیں کہ مہنگائی کی وجہ سے کھاد، سپرے، پانی اور ہل وغیرہ کے ریٹ میں بہت زیادہ اضافہ ہو گیا ہے۔ ان اخراجات کے لیے انہوں نے رقم ادھار لے رکھی تھی مگر اب اس تباہی کے بعد ان میں گندم کاشت کرنے کی ہمت نہیں کیونکہ اس سے ان کی خرچ کی ہوئی رقم بھی وصول نہیں ہو گی۔ یوسف خان پریشان ہیں کہ حکومت کا مقررہ ریٹ نہایت کم ہے اور اب آڑھتی اس سے بھی کم ریٹ دے رہے ہیں۔

ان کا اور ژالہ باری سے متاثرہ دیگر چھوٹے کسانوں نے حکومت سے مطالبہ کیا ہے کہ وہ ان کےنقصان کا ازالہ کرنے کے اقدامات کرے کیونکہ وہ اس فصل پر جو سرمایہ کاری کر چکے تھے اب اس کی واپسی کی امید نہیں رہی۔

چھدرو کے باسیوں کا ذریعہ روزگار زراعت کے ساتھ جڑا ہوا ہے۔ یہاں کے کاشتکار اپنی فصلوں کو ٹیوب ویل کے پانی سے سیراب کرتے ہیں۔ یہاں سال میں گندم اور کپاس کی صورت میں دو فصلیں اگائی جاتی ہیں۔ اس علاقے کے لوگ زیادہ تر کپاس کو پچھیتی کاشت کرتے ہیں جس کی وجہ سے ان کی چنائی اکتوبر کے پہلے ہفتے میں شروع ہو جاتی ہے مگر موسمیاتی تبدیلیاں اب ان کی کاشت کو بہت زیادہ متاثر کرنے لگی ہیں۔

کاشتکاروں کی تنظیم &#39;کسان اتحاد&#39; کے نائب صدر نواز خان کا کہنا ہے کہ ژالہ باری سے تین سے چار ہزار ایکڑ پر کپاس کی تیار فصل کو نقصان پہنچا ہے۔ کسان پہلے ہی ٹیوب ویل کے بل اور کپاس کے کم سرکاری ریٹ کی وجہ سے پریشان ہیں اور ژالہ باری نے ان کی پریشانی مزید بڑھا دی ہے۔ اس نقصان کے بعد متاثرہ کسانوں کا مطالبہ ہے کہ ان کے دو ماہ کے بجلی کے بل معاف کیے جائیں اور کپاس کے ریٹ کو بڑھایا جائے تاکہ وہ بچ جانے والی فصل فروخت کر کے گندم کی فصل کاشت کر سکیں۔

میانوالی کے اسسٹنٹ ڈائریکٹر زراعت محمد طارق خان بتاتے ہیں کہ انہوں نے ژالہ باری سے متاثرہ فصلوں کا دورہ کیا ہے اور نقصان کا تخمینہ لگانے کے لیے ایک ٹیم تشکیل دی ہے جو کہ متاثرہ کاشتکاروں کو معلومات کی فراہمی کے ساتھ ان کے نقصان کی تفصیلات بھی جمع کرے گی۔ یہ ٹیم اپنی رپورٹ حکومت کو دے گی جس کی روشنی میں کسانوں کو معاوضہ دینے کے معاملے پر فیصلہ کیا جائے گا۔

اسی گاؤں کی چالیس سالہ نذیراں بی بی چار بچوں کی ماں ہیں۔ کپاس کے&nbsp; موسم میں وہ اور ان کی بڑی بیٹی چنائی کا کام کرتی ہیں۔ ان کا کہنا ہے کہ وہ اپنے علاقے سے باہر کپاس چننے نہیں جاتیں بلکہ صرف نزدیکی علاقوں میں ہی کام کرتی ہیں۔ کپاس کا موسم ان کے لیے بہت فائدہ مند ثابت ہوتا ہے کیونکہ اس سے ان کو کچھ فاضل رقم کمانے کا موقع ملتا ہے۔ مگر حالیہ ژالہ باری نے ان کی یہ امید ختم کر دی ہے۔

وہ بتاتی ہیں کہ کپاس کے موسم میں عموماً ایک خاتون بیس سے پچیس ہزار روپے تک کپاس چن لیتی ہے جس سے زیادہ تر خواتین اپنی بیٹیوں کے جہیز کے لیے کچھ نا کچھ خرید لیتی ہیں۔ اس سال فی کلو کپاس چنائی کے ریٹ میں بھی اضافہ ہوا مگر اب چونکہ کاشتکاروں کا بہت نقصان ہو چکا ہے اس لیے ان کو کسی نے کپاس کی چنائی کے لیے بھی نہیں کہا اور کسانوں کے گھر والے خود ہی کپاس چن رہے ہیں۔

محکمہ زراعت کے مطابق میانوالی میں رواں سال ایک لاکھ 54 ہزار 490 ایکڑ رقبے پر کپاس کی فصل کاشت کی گئی ہے۔ پاکستان میں پچھلے سال جنوبی پنجاب اور سندھ میں سیلاب کی وجہ سے پیداوار 4.8 ملین بیلز رہیں تھیں جو تاریخ کی سب سے کم پیداوار تھی لیکن اس بار پاکستان میں 12 ملین&nbsp; بیلز ہونے کی امید ہے۔

راجن پور میں کپاس پر سفید مکھی کا حملہ: حکومتی اقدامات فصل کو بچانے میں کتنے کارگر ہوں گے؟

میانوالی میں چند منٹ کی ژالہ باری نے کپاس کی فصل تباہ کر دی، چھوٹے کسان حکومت سے مدد کےطلب گار

حافظ محمد نوید میانوالی سے 20 کلومیٹر دور تلہ گنگ روڈ پر واقع قصبے موسیٰ خیل کے رہائشی ہیں۔ انہوں نے سرگودھا بورڈ کے حالیہ امتحان میں 1100 میں سے 950 نمبر لے کر اپنی جماعت میں دوسری پوزیشن حاصل کی ہے۔ محمد نوید ایف ایس سی پری میڈیکل میں داخلے کے خواہش مند تھے۔ تاہم ان کے علاقے موسیٰ خیل کے گورنمنٹ ہائر سیکنڈری سکول میں ایف ایس سی اور آئی سی ایس کا داخلہ ٹیسٹ ہی نہیں ہوا کیونکہ وہاں سائنس کے مضامین کا کوئی استاد نہیں ہے۔

محمد نوید کے والد کا 2014ء میں انتقال ہو گیا تھا اور انہوں نے حافظ قرآن اور یتیم سٹوڈنٹ سکالر شپ پر میٹرک کی تعلیم حاصل کی ہے۔ ان کا کہنا ہے کہ والد کی وفات کے بعد ان کی والدہ لوگوں کے ہاں کام کاج کر کے بمشکل گھر چلاتی ہیں اس لیے علاقے سے باہر کسی کالج میں تعلیم حاصل کرنا ان کے لیے ممکن نہیں ہے۔ ان کی جماعت میں سے 30 طلبا نے میٹرک کا امتحان پاس کیا ہے اور اکثر اپنے علاقے کے ہائر سیکنڈری سکول میں داخلہ لینے کے خواہش مند ہیں مگر یہاں ایف ایس سی اور آئی سی ایس کی کلاسیں نہیں ہوتیں اور علاقے میں کوئی اور سرکاری یا نجی تعلیمی ادارہ نہیں ہے جہاں ان مضامین کی تعلیم دی جاتی ہو۔

موسیٰ خیل کے رہائشی فضل الرحٰمن الیکٹریشن ہیں اور ان کے بیٹے شمس الرحمٰن نے میٹرک کا امتحان 926 نمبر لے کر پاس کیا ہے۔ ان کی خواہش ہے کہ ان کا بیٹا ایف ایس سی میں داخلہ لے تاکہ وہ آئندہ آرمی کمیشن آفیسر کا امتحان دے سکے۔ جب انہوں نے میٹرک کے بعد ہائر سیکنڈری سکول موسیٰ خیل داخلے کے لیے رابطہ کیا تو انہیں معلوم ہوا کہ سکول میں صرف ایف اے کے داخلے ہوں گے۔

فضل الرحمٰن نے بتایا کہ موسیٰ خیل میں ہائر سیکنڈری سکول میں ایف ایس سی یا آئی سی ایس کے اساتذہ نہیں ہیں۔ میانوالی دور ہے جہاں اچھے کالج تو ہیں مگر ان کے اخراجات اٹھانا ان کے بس کی بات نہیں۔ وہ کہتے ہیں کہ فیس کے علاوہ میانوالی میں کرایے کی مد میں اخراجات بھی زیادہ ہوتے ہیں اس لیے اکثر والدین اپنے بچوں کو مزید تعلیم نہیں دلاتے۔

احمد بھی موسیٰ خیل کے رہائشی ہیں اور انہوں نے میٹرک کے بعد میانوالی کے ایک نجی کالج میں داخلہ لیا ہے۔ وہ کالج کے سفری اخراجات کو لے کر پریشان ہیں جو فیس سے تین گنا زیادہ ہیں۔ اس کے علاوہ میانوالی آنے جانے میں ان کا کافی وقت صرف ہوتا ہے۔ ان کے ساتھ میٹرک کا امتحان پاس کرنے والے بہت سے طلبا نے انہی مشکلات اور وسائل کی کمی کے باعث مزید پڑھنا چھوڑ دیا ہے۔

موسیٰ خیل کے واحد ہائی سکول کو جنوری 2004ء میں ہائر سکینڈری سکول کا درجہ دیا گیا تھا۔&nbsp; اس وقت سکول میں ایف اے اور ایف ایس سی کی کلاسز کا آغاز کیا گیا مگر 2014ء میں ہائر سکینڈری سیکشن کو موسیٰ خیل شہر کے اندر پرانی عمارت میں منتقل کر دیا گیا۔ اس وقت ہائر سیکنڈری سیکشن میں صرف ایک سبجیکٹ سپیشلسٹ استاد تعینات ہیں جبکہ باقی اساتذہ تبادلے کرا کے جا چکے ہیں۔

سکول کے پرنسپل محمد ساجد سعید نے بتایا کہ ایسے حالات میں ان کے پاس دو آپشن تھے کہ ہائر کلاسز بالکل ختم کر دی جائیں یا محدود وسائل کے ساتھ ایف اے کی کلاسیں جاری رکھی جائیں۔ ان کا کہنا ہے کہ اس وقت ہائی سیکشن کی عمارت میں 560 طلبا زیر تعلیم ہیں۔ اسی وجہ سے انہوں نے فرسٹ ائیر اور سیکنڈ ائیر کے لیے سٹاف روم اور سٹور روم میں کلاسز کا بندوست کیا ہے۔

ان کا کہنا ہے کہ ایف ایس سی اور آئی سی ایس کی کلاسز شروع کرنے کے لیے نہ ان کے پاس نہ تو کمرے ہیں اور نہ ہی عملہ۔

سبجیکٹ سپیشلسٹ محمد کلیم اللّٰہ کا کہنا ہے کہ 2019ء تک سکول میں ایف ایس سی اور ایف اے کی کلاسز ہوتی رہی ہیں مگر تحریک انصاف کی پنجاب میں حکومت بننے کے بعد علاقے میں چند نوجوانوں نے سکول کو کالج کا درجہ دلانے کے لیے تحریک کا آغاز کیا۔

&quot;اگرچہ یہ تحریک صرف سوشل میڈیا تک محدود رہی مگر اس کی وجہ سے سکول کے اساتذہ میں خدشہ پیدا ہوا کہ اگر اسے کالج کا درجہ دیا گیا تو ان کا تبادلہ دور دراز علاقوں میں کر دیا جائے گا۔ اس لیے یہاں سے تمام دیگر سبجیکٹ سپیشلسٹ اپنے نزدیکی سنٹر پر تبادلے کرا کے چلے گئے۔ یہی سبب ہے کہ 2020ء میں ایف ایس سی کے داخلے بند کرنا پڑے۔&quot;

پی 22-2021 کے تعلیمی سال میں سکولوں میں اساتذہ کی کمی کو پورا کرنے کے لیے اساتذہ بھرتی کیے گئے مگر ہائر سیکنڈری سکول موسیٰ خیل میں صرف فزکس کے ایک استاد کی تقرری عمل میں آئی جبکہ اب سکول میں 19 گریڈ کی ایک، 18 گریڈ کی دو اور 17 گریڈ کی 14 نشستیں خالی ہیں۔

محکمہ سکینڈری سکولز کے ڈسٹرکٹ ایجوکیشن آفیسر (ڈی ای او) محمد خالد خان کہتے ہیں کہ آن لائن تبادلوں کا سلسلہ شروع ہونے کے بعد ان کے اختیار میں نہیں کہ وہ کسی بھی ٹیچر کا وہاں ٹرانسفر کر سکیں۔ فی الحال تبادلوں کا سلسلہ بھی حکومت پنجاب کی جانب سے روک دیا گیا ہے۔ ان کا کہنا ہے کہ اساتذہ کی خالی نشستوں کا ریکارڈ حاصل کر کے انہوں نے محکمے کو بھیجا ہوا ہے۔ تاہم جب تک حکومت نئی بھرتیاں نہیں کرتی یا ایس ایس ٹی اساتذہ کو ترقی نہیں دی جاتی&nbsp; اس وقت تک سکولوں کو ایسی ہی مشکلات کا سامنا رہے گا۔

تھرپارکر کا گرلز کالج: یہاں صرف فزکس، زوآلوجی، انگریزی، ریاضی، اردو، اسلامیات، سندھی اور مطالعہ پاکستان کے استاد نہیں ہیں

میانوالی میں ہائر سیکنڈری سکول کے طلبہ سائنسی مضامین کی تعلیم سے محروم کر دیے گئے

محمد خلاص خان نے چار ایکڑ رقبے پر کپاس کی فصل کاشت کر رکھی ہے جس پر وہ اب تک ساڑھے چار لاکھ روپے خرچ کرچکے ہیں۔ چونکہ اب فصل چنائی کے مرحلے میں آگئی ہے تو انہیں یوں لگتا ہے کہ وہ اس فصل سے منافعے کے بجائے گھاٹا کھائیں گے اور اس کی ایک معقول وجہ ہے۔ 
خلاص کی عمر 35 سال ہے اور وہ میانوالی سے دس کلومیٹر مشرق میں واقع گاؤں مسلانوالہ میں رہتے ہیں۔

ان کا کہنا ہے کہ ان کے فی ایکڑ رقبے پر اب تک آںے والے اخراجات ایک لاکھ 12 ہزار روپے ہیں۔ فصل کی برداشت تک یہ بڑھ کر ایک لاکھ 40 ہزار یا اس سے بھی زیادہ ہوسکتے ہیں۔

چند دن پہلے انھوں نے پہلی چنائی کرائی ہے جو فی ایکڑ چار من رہی اور یہ ان کی توقعات سے تین من کم ہے۔

اب اگلی دو چنائیوں میں وہ زیادہ سے زیادہ 15 من کپاس حاصل کرلیں گے جو مجموعی طور پر 19 من ہو جائے گی۔ سرکاری اداروں کی اطلاعات کے مطابق میانوالی میں پچھلے تین سالوں کی اوسط فی ایکڑ پیداوار بھی 19 من ہی ہے۔

خلاص کا کہنا ہے کہ اگر حکومت کی طرف سے مقرر کردہ 8500 روپے کے حساب سے 19 من پیداوار کی قیمت نکالی جائے تو یہ ایک لاکھ 61 ہزار 500 روپے کی بنتی ہے۔

اس قیمت میں سے فصل کی چنائی کے لیے دی جانے والی مزدوری فی کلو 20 روپے کے حساب سے 15 ہزار 200 روپے بنے گی۔

اگر موسمی حالات ٹھیک رہے اور فصل بیماری سے بچی رہی وہ فی ایکڑ سے 5800 روپے آمدن حاصل کرلیں گے جو ان کے بقول چھ ماہ کی محنت کے مقابلے میں بہت کم ہے۔

خلاص بتاتے ہیں کہ&nbsp; گزشتہ سال بھی انہوں نے کپاس کی فصل کاشت کی تھی جو چھ ہزار روپے فی من تک فروخت ہوئی تھی۔ اس مرتبہ حکومت نے فصل کی کم از کم قیمت 8500 روپے مقرر کی تو یوں لگا کہ کسان کو کچھ نہ کچھ فائدہ ہوجائے گا اسی لیے انہوں ںے ایک بار پھر یہ فصل کاشت کرلی لیکن بدقسمتی سے پچھلے پانچ چھ ماہ کے دوران زرعی مداخل کی قیمتوں میں اتنا زیادہ اضافہ ہو چکا ہے کہ اب اخراجات واپس مل جائیں تو بھی غنیمت ہے۔

خلاص خان کا تعلق ضلع میاںوالی کے ایسے علاقے سے ہے جہاں کسانوں کو نہری پانی کی سہولت میسر نہیں ہے بلکہ انہیں بجلی یا ڈیزل سے چلنے والے ٹیوب ویل کی مدد سے فصلوں کو سیراب کرنا پڑتا ہے۔

صوبائی محکمہ زراعت کے اعداد وشمار بتاتے ہیں کہ ضلع میاںوالی میں کل زیر کاشت رقبہ 9 لاکھ 52 ہزار 202 ایکڑ ہے لیکن اس میں سے صرف دو لاکھ تین ہزار 691 ایکڑ رقبے کو ہی نہری پانی دستیاب ہے۔

خلاص بتاتے ہیں کہ پچھلے سال ٹیوب ویل کے پانی کے ایک گھنٹے کی قیمت 2200 روپے تھی جو اب 3600 تک پہنچ گئی ہے جبکہ کچھ علاقے میں تو یہ ریٹ 4200 روپے بھی ہے۔

محکمہ زراعت کے مطابق کپاس کی فصل کو آٹھ پانی لگانا پڑتے ہیں لیکن خلاص کے بقول بارشیں ہوتی رہیں تو یہ تعداد کم ہوجاتی ہے۔ عمومی طور پر اس علاقے میں فصل کو چھ بار پانی دینا پڑتا ہے۔

&nbsp;وہ بتاتے ہیں کہ ان کے اور آس پاس کے گاؤں میں زیر زمین پانی پانچ سو فٹ سے بھی نیچے چلا گیا ہے جسے نکالنے کے لے بجلی کی بڑی موٹریں لگانا پڑتی ہیں جو زیادہ یونٹ استعمال کرتی ہیں جس سے بل بھی زیادہ آتا ہے۔

اس کے علاوہ بعض زرعی ٹیوب ویل ٹریکٹر کی مدد سے چلائے جاتے ہیں جن میں ڈیزل استعمال ہوتا ہے۔ پچھلے سال کی نسبت ڈیزل کی قمیتوں میں بھی دوگنا اضافہ ہوگیا ہے۔

اس طرح یہاں کا کسان ایک گھنٹہ ٹیوب ویل چلانے کے لیے 3600 روپے معاوضہ دے رہا ہے اور ایک ایکڑ رقبے کو ایک بار پانی دینے میں تین گھنٹے صرف ہوتے ہیں۔ یعنی ایک پانی کی لاگت 10 ہزار 800 روپے اور چھ بار پانی دینے کی لاگت 64 ہزار 800 روپے بنتی ہے۔

&quot;اسی طرح ڈی اے پی کھاد 8000 سے 12000، یوریا کھاد 2000سے 3800 روپے بوری تک چلی گئی ہے۔ ڈیزل کی قیمتوں میں اضافے سے زمین کی تیاری کے لیے ٹریکٹر سے ایک بار ہل چلانے کا ریٹ 2100 سے بڑھ کر اب 3000&nbsp; تک پہنچ چکا ہے۔ زرعی ادویات بھی لگ بھگ دوگنا قیمت پر مل رہیں ہیں۔&quot;

خلاص کو اب افسوس ہورہا ہے کہ انھوں نے سرکاری اداروں کی بات مان کر کپاس کاشت کرلی ہے۔

حکومت پنجاب نے اس مرتبہ زیر کاشت رقبہ بڑھانے کے لیے&quot; کپاس اگاؤ معیشت بچاؤ مہم&quot; چلائی۔ جس میں ایک تو فصل کی کم از کم امدادی قیمت 8500 روپے مقرر کی گئی، دوسرا انہیں نہری پانی کی فراہمی اور کنٹرول ریٹ پر کھادیں اور معیاری زرعی ادویات کی فراہمی کو یقینی بنانے کا وعدہ کیا گیا جس سے متاثر ہو کر خلاص خان جیسے میاںوالی اور پنجاب کے کئی کاشت کاروں نے زیر کاشت رقبے میں پچھلے سال کی نسبت اضافہ کردیا۔

میانوالی میں کپاس کے زیر کاشت رقبے کی بات کی جائے تو وہ پچھلے سال 2022 میں ایک لاکھ 43 ہزار تھا جبکہ رواں سال یہ ایک لاکھ 54 ہزار 490 ایکڑ پر چلا گیا ہے۔

اس طرح پنجاب اور پورے پاکستان میں بھی کپاس کے زیر کاشت رقبے میں اضافہ ہوا ہے۔

امریکی محکمہ زراعت میں بیرون ملک زرعی خدمات کے شعبے نے 28 اگست 2023 کو پاکستان میں کپاس کی صورتحال کے حوالے سے ایک رپورٹ جاری کی ہے جس کے مطابق رواں سال ملک میں کپاس کے زیر کاشت رقبے کا اندازہ 2.5 ملین ہیکٹر (61 لاکھ 75 ہزار ایکڑ) ہے جو پچھلے سال کی نسبت 28 فیصد اور سال 18-2017 کے بعد سب سے زیادہ ہے۔ پیداوار کا تخمینہ 6.5 ملین بیلز لگایا گیا ہے جو پچھلے سال سے 67 فیصد زیادہ ہے۔ زیر کاشت رقبے اور پیداوار میں اضافہ پاکستان میں کپاس کی قیمت میں اضافے کے امکانات کو بھی ظاہر کرتا ہے۔

اس کے علاوہ رپورٹ میں یہ تنبیہ بھی کی گئی ہے کہ ستمبر عام طور پر کپاس کی فصل کے لیے انتہائی اہم مہینہ ہوتا ہے اور حالیہ چند برس کے دوران اس مہینے اوسط سے کم درجہ حرارت اور ہوا میں زیادہ نمی کے اثرات ظاہر ہوئے ہیں جو فصل کے نقصان دہ کیڑوں کے لیے سازگار ہیں۔ اس لیے اس مہینے میں کسانوں کو چوکنا رہنے کی ضرورت ہے۔

خلاص کے گاؤں سے تعلق رکھنے والے کاشت کار محمد ایوب خان تین ایکڑ رقبے کے مالک ہیں اور انہوں نے بھی اس پر کپاس کاشت کر رکھی ہے۔

ان کا کہنا ہے کہ موسمی تبدیلیوں کی وجہ سے کپاس کی کاشت کے وقت بارشوں اور آندھیوں نے کاشتکاروں کا نقصان کیا۔ اب جب فصل تیار ہوگئی ہے تو ملی بگ اور تھرپس بیماری نے حملہ کر دیا ہے جس سے اوسط پیداوار پہ فرق پڑے گا۔

ان کے بقول سوائے امدادی قیمت بڑھانے کے &quot;کپاس اگاؤ، معیشت بچاؤ&quot; مہم کے لیے حکومت کی طرف سے کسانوں کے ساتھ کیا گیا کوئی بھی وعدہ پورا نہیں ہوا۔

امدادی قیمت کیوں بڑھائی گئی تھی اس بارے میں ان کا خیال ہے کہ یہ ملک میں ڈالر اور عالمی منڈی میں کپاس کی بڑھتی ہوئی قیمتوں کی وجہ سے ہوا ہے جس کا پاکستان کے کسانوں کو بھی کچھ فائدہ پہنچا ہے کیوں کہ اس مرتبہ کپاس ساڑھے آٹھ ہزار سے ساڑھے نو ہزار روپے میں فروخت ہورہی ہے۔

انٹرنیشنل مارکیٹ میں 21 ستمبر 2022 کو کپاس کی فی من قیمت ساڑھے 22 ہزار روپے رہی ہے۔

کسان اتحاد نامی غیر سرکاری تنظیم کے میانوالی میں ضلعی صدر عبدالقادر خان کہتے ہیں کہ رواں سال مہاڑ ایریا (جہاں خلاص خان اور ایوب کا گاؤں ہے) میں ٹیوب ویل کا اوسطاً&nbsp; بجلی بل جو پچھلے سال 8 لاکھ سے 10 لاکھ تک تھا وہ اب 14 لاکھ سے 18 لاکھ تک پہنچ چکا ہے۔ اس کے خلاف ان کی تنظیم نے 13 ستمبر کو ڈی سی آفس میانوالی کے باہر احتجاج بھی کیا تھا۔

ان کے کہنا ہے کہ بجلی کے بل جمع کرانے کے لیے کسان اپنے مویشی بیچنے پر مجبور ہوگئے ہیں۔ حکومت پنجاب کو چاہیے کہ کپاس کے مقررہ ریٹ پر نظر ثانی کرے اور کم سے کم ریٹ 13 سے 14 ہزار فی من مقرر کرے تاکہ کسان کو بھی منافع مل سکے۔

جب میانوالی کے ڈپٹی ڈائریکٹر زراعت (توسیع ) ملک محمد نواز سے کسانوں کی شکایات کے حوالے سے پوچھا گیا تو ان کا جواب تھا کہ سرکاری قیمت کے علاوہ حکومت پنجاب نے کپاس کے کاشتکاروں کی حوصلہ افزائی کے لیے نقد انعامات بھی رکھے ہیں۔ صوبائی سطح پر جو کاشت کار سب سے زیادہ پیداوار لے گا اسے 15 لاکھ روپے انعام ملے گا۔ اسی طرح دوسرا انعام 12 لاکھ اور تیسرا انعام 10 لاکھ روپے ہے۔ ضلعی سطح پر بھی کسانوں کی حوصلہ افزائی کے لیے ایسے انعامات رکھے گئے ہیں جن میں پہلا انعام 8 لاکھ، دوسرا انعام&nbsp; 6 لاکھ جبکہ تیسرا انعام 5 لاکھ مقرر کیا گیا ہے۔

'کپاس اگاؤ معیشت بچاؤ'، بہاولپور ڈویژن کے کسان زیادہ کپاس اگا کر بھی پریشان

'حکومت کے کہنے میں آ کر کپاس اگائی اور اب فصل کے اخراجات پورے کرنا بھی مشکل ہو رہا ہے'

ساٹھ سالہ کاشتکار حبیب اللہ خان میانوالی کے گاؤں موسیٰ خیل کے رہائشی ہیں۔ وہ 20 کینال زرعی زمین کے مالک ہیں اور آٹھ افراد پر مشتمل ان کے خاندان کا ذریعہ آمدنی یہی زمین ہے جس پر وہ مختلف فصلیں اگاتے ہیں۔ ان کی زمین نمل کینال کے پانی سے سیراب ہوتی ہے لیکن اب انہیں یوں لگتا ہے کہ جیسے آںے والے برسوں میں انہیں یہ پانی نہیں ملے گا۔

&nbsp;حبیب اللہ کا کہنا ہے کہ ربیع سیزن میں وہ گندم اور چنا جبکہ خریف میں کپاس کے علاوہ جوار، باجرہ اور گوار کاشت کرتے ہیں۔ پہلے انہیں دونوں سیزن میں فصل کے لیے پانی مل جاتا تھا لیکن اب ڈیم میں پانی بہت کم رہ گیا ہے۔

ان کا گاؤں میانوالی کےمشرق میں22 کلومیٹر اور نمل ڈیم سے12 کلومیٹر دور واقع ہے۔ وہ کہتے ہیں کہ دس سال پہلے تک نمل نہر میں دو دو ماہ مسلسل پانی ملتا تھا ۔اب یہ دورانیہ کم ہوکر10 سے 12 دن رہ گیا ہے۔ اس بار تو گندم کوبھی مشکل سے پانی ملا۔

انہوں نے بتایا کہ ڈیم کی صفائی نہ ہونے سے اس میں پانی کی گنجائش بہت کم رہ گئی ہے۔ اگر صورتحال یہی رہی تو چند سال میں ان کی زمین بنجر ہو جائے گی۔

&nbsp;محمد غازی بھی اسی گاؤں میں چار ایکڑ رقبے کے مالک ہیں۔وہ کہتے ہیں کہ نمل ڈیم کا پانی ان کی فصل تک پہنچ ہی نہیں پاتا۔اس لیے انہوں نے گندم اور کپاس کے بجائے صرف چنا اور باجرہ&nbsp; کاشت کرنا شروع کر دیا ہے۔

نمل ڈیم کوہ نمک (سالٹ رینج) کے مغربی کنارے سے 35 کلومیٹر مشرق میں واقع ہے ۔یہ ڈیم برطانوی دور حکومت میں تعمیر ہوا۔ اس کی بنیاد اس وقت پنجاب کے لیفٹیننٹ گورنر مائیکل او ڈائر نے 1913 میں رکھی تھی۔

اس ڈیم کی اونچائی91&nbsp; فٹ ہے۔ اس میں630 ملین کیوبک فٹ پانی جمع کرنے کی صلاحیت تھی۔ اس سے 12کلو میٹر طویل ایک نہر بھی نکالی گئی جسے &#39;نمل کینال&#39;&nbsp; کہا جاتا ہے۔

نمل کینال کا کمانڈ ایریا آٹھ ہزار753 ایکڑ تھا۔ اس میں سے پانچ ہزار897 ایکڑ زیر کاشت ہے۔آج 110 سال بعد نہر کی لمبائی سکڑ کرآٹھ کلو میٹر رہ گئی ہے۔

ڈسٹرکٹ آفیسر زراعت محمد فاروق اعظم بتاتے ہیں کہ15 برس پہلے یونین کونسل موسیٰ خیل کا ساڑھے چار ہزار ایکڑ رقبہ اسی نہر سے سیراب ہوتا تھا مگر اب تین ہزار ایکڑ زمین مشکل سے سیراب ہوتی ہے۔ اس عرصے میں یہاں کاشت30&nbsp; فیصد متاثر ہوئی ہے۔

اربن سیکٹر پلاننگ اینڈ منیجمنٹ سروسز یونٹ کی 2022ء کی رپورٹ کے مطابق نمل ڈیم&nbsp; کی جھیل کا رقبہ ساڑھے پانچ مربع کلومیٹر تھا جو کم ہو کر 1986ء میں 4.6 کلومیٹر رہ گیا اور پانی کی گنجائش 16 فیصد کم ہو گئی۔ 2018ء میں سٹوریج لیول 27 فیصد کم ہو گیا۔

2022ء میں جھیل کا رقبہ 2.2 مربع کلومیٹر رہ گیا اور ڈیم کی تہہ میں مٹی بھر جانے سے پانی کی گنجائش 57 فیصد کم ہو گئی۔

اب صورت حال یہ ہے کہ جھیل میں پانی کی سطح کم ہونے کے ساتھ علاقے میں واٹر ٹیبل بھی روز بروز گرتا جا رہا ہے۔

کاشت کارمحمد غفور یونین کونسل موسیٰ خیل میں اپنا آبائی رقبہ کاشت کرتے ہیں۔انہوں نےاپنی 25 ایکڑ زمین میں سے بارہ ایکڑ پر کپاس کاشت کر رکھی ہے اور باقی رقبہ پانی دستیاب نہ ہونے کی وجہ سے بنجر چھوڑ دیا ہے ۔

وہ بتاتے ہیں کہ انہوں نے ایک سال پہلے آبپاشی کےلئے ٹیوب ویل لگوایا تھا۔690&nbsp; فٹ گہرا بور ہوا۔60 لاکھ روپے خرچ ہوئےآئے مگر دو ماہ کے اندر ہی زیر زمین پانی کی سطح مزید کم ہو گئی اور ان کو ٹیوب ویل بند کرنا پڑا۔

سر کاری اعدادوشمار کے مطابق ضلع میانوالی کا کل قابل کاشت رقبہ 7لاکھ 55ہزار ایکڑ ہے۔ اس میں سے تین لاکھ 16ہزار 815 ایکڑ رقبہ زیر کاشت ہے ۔ صرف 33 ہزار آٹھ سو ایکڑ نہری پانی سے کاشت ہوتا ہے۔

سماجی کارکن امیر اللہ خان نے بتاتے ہیں کہ وہ ڈیم کی بحالی کے لیے پانچ بار&nbsp; محکمہ انہار کو درخواستیں دے چکے ہیں۔2022 ء میں موسیٰ خیل اڈا پر کسانوں نے سڑک بلاک کر کے اس مسئلے پر احتجاج بھی کیا لیکن ان کی شنوائی نہیں ہوئی۔

وہ کہتے ہیں کہ جو تھوڑا بہت پانی آ رہا ہے وہ نہر میں بند باندھ کر بااثر افراد اپنی طرف موڑ لیتے ہیں۔ آگے پانی پہنچ ہی نہیں پاتا۔ اس لیے بہت سے کاشتکار کپاس کی فصل بوتے ہی نہیں۔

محمکہ انہار نمل کے ایس ڈی او محمد نوید کا کہنا ہے کہ نہر کی صفائی تو ہوتی ہے مگر ڈیم کی بحالی بہت بڑا منصوبہ ہے۔ پچھلی حکومت میں ڈیم کی صفائی کا منصوبہ زیر غور آیا تھا مگر کوئی پیشرفت نہیں ہو سکی۔

اربن پلاننگ سروسز یونٹ نے نمل جھیل اور ڈیم کی بحالی&nbsp; کے لیے 317.72 ملین روپے کا خام تخمینہ لگایا تھا۔ مگر اس معاملے پر کوئی پیش رفت نہیں ہو سکی۔

جھیل&nbsp; کی تباہی سے نہ صرف زراعت بلکہ پوری وادی کا ماحول بدل رہا ہے اور چرند پرند اور نباتات بھی اس سے متاثر ہو رہے ہیں۔

&nbsp;اسسٹنٹ ڈائریکٹر وائلڈ لائف محمد ابرار بتاتے ہیں کہ بھی یہاں پر غیرملکی مہمان پرندے بڑی تعداد میں آیا کرتے تھے۔ شکار پر پابندی&nbsp; کے باوجود اب یہاں ان پرندوں کی تعداد بہت کم رہ گئی ہے۔اس کے علاوہ نباتات میں سونف، باتھو، کوڑتماں یہاں اب ناپید ہو چکے ہیں۔

&nbsp;کوہ نمک کے مغربی جانب موسیٰ خیل سے یونین کونسل چھدرو تک پھیلی 12کلومیٹر لمبی اور کئی کلو میٹر چوڑی یہ پٹی کپاس کی پیداوار اورکوالٹی کے لیے مشہور رہی ہے ۔حافظ والا کاٹن فیکٹری کے سلیکٹر محمد قدیر خان بتاتے ہیں کہ یہاں کی کاٹن کا ریشہ اعلیٰ کوالٹی کا شمار ہوتا ہے لیکن نہر سکڑنے سے اب یوں لگتا ہے کہ اس علاقے سے کپاس کی فصل کا خاتمہ ہو جائے گا اور&nbsp; زراعت سے وابستہ تقریباً چھ سو خاندان اپنا روزگار کھو بیٹھیں گے۔

عاصم سعید خان

میانوالی: "فنڈز ملتے ہی تمام واٹر فلٹریشن پلانٹس کو چلا دیا جائے گا، تب تک ڈاکٹروں کی ہدایات پر عمل کریں"

"سعدیہ کو دیکھ کر سوچتی ہوں کاش میں بھی تعلیم یافتہ ہوتی"

میانوالی میں چند منٹ کی ژالہ باری نے کپاس کی فصل تباہ کر دی، چھوٹے کسان حکومت سے مدد کےطلب گار

میانوالی میں ہائر سیکنڈری سکول کے طلبہ سائنسی مضامین کی تعلیم سے محروم کر دیے گئے

'حکومت کے کہنے میں آ کر کپاس اگائی اور اب فصل کے اخراجات پورے کرنا بھی مشکل ہو رہا ہے'

میانوالی میں نمل ڈیم کی جھیل سوکھنے لگی، زرخیز زمینیں بنجر ہونے کا خدشہ