قیس محمد قاسم چوراسی سال کے ہیں۔ وہ لاہور جنرل ہسپتال کے عقب میں واقع محلہ میو میں رہتے ہیں۔ جیسا کے نام سے ظاہر ہے کہ یہاں رہنے والوں کی اکثریت کا تعلق میو برادری سے ہے جو 1947ء میں میوات سے ہجرت کر کے پاکستانی پنجاب میں آباد ہوئے تھے۔&nbsp;

ہجرت کے وقت قیس محمد چھ سال کے تھے۔ وہ اپنے والد سہراب خاں کو یاد کرتے ہوئے بتاتے ہیں کہ وہ میوات کے علاقے گڑ گاؤں میں سکول ٹیچر تھے۔

&quot;میرے والد اپنے وطن سے ہجرت کرنے پر بہت دلبرداشتہ رہتے تھے۔ وہ اکثر کہا کرتے تھے کہ بڑے آدمی ضرور بننا لیکن اپنی زبان اور ثقافت کبھی مت چھوڑنا۔&quot;

قیس محمد بتاتے ہیں کہ ان کے زمانہ طالب علمی میں &#39;انجمن اتحاد و ترقی میوات پاکستان&#39; کے نام سے ایک تنظیم قائم ہوئی تھی۔ انھوں نے ناصرف اس میں شمولیت اختیار کی بلکہ 70 کے عشرے میں ماہانہ رسالہ &#39;آفتاب میوات&#39; بھی نکالا جو اردو زبان میں میو برادری کی ترجمانی کرتا تھا۔

قیس محمد اب میواتی زبان کا ابتدائی قاعدہ اور گرائمر کے علاوہ متعدد کتابیں لکھ چکے ہیں جن میں سے کچھ ابھی شائع نہیں ہو پائیں۔ وہ لاہور سے شائع ہونے والے اردو ماہانہ &#39;صدائے میو&#39; کے ہر شمارے کے لیے میواتی زبان میں کالم بھی لکھتے ہیں۔

قیس محمد کے بھائی سکندر سہراب میو بھی کئی کتابوں کے مصنف ہیں جن میں نثر کے علاوہ اردو اور میواتی شاعری بھی شامل ہے۔ وہ دو ماہانہ رسالوں کے مدیر بھی ہیں۔

<h2>میواتیوں کو بھارت اور پاکستان دونوں میں ہی شناختی بحران کا سامنا ہے</h2>

تقسیم ہند میو برادری کے لیے ہجرت کے مصائب کے ساتھ ایک شناختی بحران بھی لے کر آئی۔ بھارت میں میواتی کو سرکاری سطح پر علیحدہ زبان کی بجائے ہندی کا ایک لہجہ مانا جاتا ہے۔

پروفیسر ڈاکٹر عطاالرحمان میو تین دہائیوں سے تعلیم و تدریس سے وابستہ ہیں اور ان دنوں لاہور گیریژن یونیورسٹی میں اردو پڑھا رہے ہیں۔ وہ بتاتے ہیں کہ میواتیوں کو صرف بھارت ہی نہیں پاکستان میں بھی شناخت کے مسائل کا سامنا کرنا پڑا۔&nbsp;

&quot;ہجرت کر کے آنے والے میو خاندانوں کی خواہش تھی کہ انہیں کسی ایک علاقے میں آباد کیا جائے جہاں وہ اپنی ثقافت و روایات کے ساتھ زندگی گزار سکیں مگر ایسا نہ ہو سکا۔ آبادی بکھرنے سے زبان کا تحفظ تو کجا آپسی میل جول بھی محدود ہو گیا۔&quot;

مغلوں کے زمانے سے میوات کا علاقہ کبھی بھی ایک انتظامی اکائی نہیں رہا تھا لیکن پھر بھی اس نے اپنی لسانی اور ثقافتی پہچان کو برقرار رکھا تھا۔

بھارت کی موجودہ انتظامی تقسیم کے مطابق میوات کا علاقہ تین ریاستوں &ndash; ہریانہ، راجستھان اور اترپردیش &ndash; کے آٹھ اضلاع میں بٹا ہوا ہے۔ ان میں سے ہریانہ کا گڑگاؤں دارالحکومت دہلی سے متصل ہے اور عملی طور پر اسی کا حصہ تصور کیا جاتا ہے۔

تقسیم کے وقت یہ علاقہ تین انتظامی اکائیوں میں تقسیم تھا جن میں سے دو شاہی ریاستیں الور اور بھرت پور تھیں اور ایک برطانوی ہند کے صوبے ہریانہ کا ضلع گڑگاؤں۔

<h2>&#39;ہماری اصل آبادی مردم شماری کے اعداد سے تین گنا زیادہ ہے&#39;</h2>

میو برادری کو راجپوت مانا جاتا ہے- موتی لال نہرو یونیورسٹی میں تاریخ کے سابق پروفیسر سورج بھان بھردواج &nbsp;کے ایک مقالے کے مطابق میواتی صوفیاء کی تبلیغ سے مسلمان ہونا شروع ہوئے تھے۔ ان کے بقول گو میواتیوں کی مذہبی شناخت 19 ویں صدی تک مبہم تھی لیکن اب پاکستان اور بھارت میں رہنے والے تمام میواتی مسلمان ہیں۔

برطانوی یونیورسٹی سے وابستہ محقق راکیش انکت کے مطابق 1947ء میں بھارت میں میواتی بولنے والوں کی کل تعداد چار لاکھ ایک ہزار 596 تھی جن میں سے ایک لاکھ 93 ہزار (یعنی نصف) پاکستان ہجرت کر گئے تھے۔&nbsp;

بھارت کی 2011ء کی مردم شماری نے میواتی بولنے والوں کی کل تعداد آٹھ لاکھ 56 ہزار 643 بتائی تھی جبکہ پاکستان کی تازہ مردم شماری (2023ء) کے مطابق یہاں ان کی تعداد 10 لاکھ 94 ہزار 219 ہے۔ گویا اس وقت بھی میو برادری دونوں ملکوں میں برابر تقسیم ہے۔

مردم شماری کے مطابق ضلع قصور میں چار لاکھ 70 ہزار سے زائد میواتی بولنے والے آباد ہیں جو پاکستان میں ان کی سب سے بڑی آبادی ہے اور یہ قصور کی کل آبادی کا 12 فیصد بنتے ہیں۔ لاہور میں ڈھائی لاکھ ہیں اور اس کے بعد ضلع سیالکوٹ، ملتان، نارووال اور لودھراں میں پچاس، پچاس ہزار کے قریب میواتی بولنے والے رہتے ہیں۔ پنجاب سے باہر کراچی میں 30 ہزار اور میر پور خاص میں دس ہزار کے قریب میو آباد ہیں۔&nbsp;

میو کمیونٹی کے رہنماؤں کا دعویٰ ہے کہ ان کی صحیح آبادی پاکستان میں مردم شماری کے اعداد سے تین گنا زائد ہے۔ پروفیسر ڈاکٹر عطاالرحمان میو بھی اسے درست مانتے ہوئے کہتے ہیں: &quot;بہت سے لوگ احساس کمتری کے باعث خود کو &#39;میو&#39; نہیں کہلواتے اور اپنے نام کے ساتھ راؤ، خان یا چوہدری لکھنے کو ترجیح دیتے رہے لیکن اب حالات کچھ بہتر ہو رہے ہیں۔&quot;

<h2>&#39;ہماری ثقافت دم توڑ رہی ہے بس میواتی زبان باقی رہ گئی ہے&#39;&nbsp;</h2>

عاصد خاں میو کو بھی دکھ ہے کہ ان کی ثقافت اور رسوم و رواج &nbsp;دم توڑ رہے ہیں۔ وہ ضلع قصور کے گاؤں حویلی رامیانہ کے رہائشی ہیں اور یہاں میو انٹرنیشنل کے نام سے سکول اور کالج چلاتے ہیں۔

&quot;بس صرف میواتی زبان باقی رہ گئی ہے۔ مجھے خدشہ ہے کہ اگر ہم نے اپنی مادری زبان کی حفاظت نہ کی تو اپنی شناخت بالکل ہی کھو دیں گے۔&quot;

وہ کہتے ہیں کہ میوات کے لوگ خود کو اردو کا وارث سمجھتے تھے اور اسے اپنی زبان مانتے رہے۔ تاہم 70ء کی دہائی کے آغاز میں (بنگلہ، سندھی اردو تنازعات کے بعد) میو برادری کو اپنی شناخت سے محرومی کا احساس ہونے لگا۔

جس کے بعد کئی تنظیمیں وجود میں آئیں جو میواتی کو علیحدہ زبان تسلیم کروانے کے لیے مختلف لائحہ عمل ترتیب دیتی رہیں لیکن کامیاب نہ ہو پائیں تاہم پچھلے پندرہ بیس سالوں میں ہونے والی کچھ کوششیں کامیاب ہوئیں۔

عابد حمید خان میو ضلع ناروال کے رہائشی اور سماجی و سیاسی کارکن ہیں۔ انہوں نے میواتی کو علیحدہ مادری زبان تسلیم کرانے میں اہم کردار ادا کیا۔ وہ بتاتے ہیں کہ انھوں نے 2010ء میں &#39;پاکستان میو اتحاد&#39; کے نام سے تنظیم بنائی۔&nbsp; 
&quot;اس تنظیم کے تحت ہم نے 2014ء میں نیشنل ڈیٹا بیس اینڈ ریگولیٹری اتھارٹی(نادرا) کو درخواست دی اور شناختی فارم میں دیگر زبانوں کے ساتھ میواتی کا بھی اندراج ہونے لگا۔&quot;

انہوں نے لوک سجاگ کو بتایا کہ پھر 2017ء میں انہوں نے قومی ادارہ شماریات سے رجوع کیا اور ساتھ ہی لاہور ہائی کورٹ میں بھی پٹیشن دائر کردی۔ عدالت عالیہ میں ادارہ شماریات نے یقین دہانی کرائی کہ آئندہ مردم شماری میں میواتی زبان کو شامل کر لیا جائے گا۔ جس کے نتیجے میں 2023ء کی مردم شماری میں میواتی کو شامل کر لیا گیا۔

&quot;فاضل جج نے دیگر اداروں کو بھی میواتی زبان کے اندراج کی ہدایات جاری کیں جس سے ہماری قوم کو شناخت مل گئی ہے۔&quot;&nbsp;

<h2>&#39;اب میواتی میں لکھنے والوں کی تعداد سیکڑوں میں ہے&#39;</h2>

عاصد خان نے میواتی کے فروغ کی پہلی کوشش 1995ء میں کی تھی۔ انھوں نے پنجاب یونیورسٹی کو درخواست دی تھی کہ جامعہ میں میواتی زبان کو پڑھایا جائے۔&nbsp;

&quot;جواب آیا کہ میواتی زبان کا کوئی لٹریچر ہی دستیاب نہیں ہے، اگر وہ مل جائے تو یہ سلسلہ شروع ہو سکتا ہے۔ اس واقعے کے بعد ہم نے لٹریچر پر کافی کام کیا ہے۔ &quot;

عاصد خان کہتے ہیں کہ اب میواتی زبان کی تعلیم و ترویج کے لیے پنجاب میں لگ بھگ ایک درجن تنظیمیں کام کررہی ہیں۔ میواتی زبان کی گرائمر، قاعدہ اور میواتی کہاوتوں پر مبنی کتب مفت دے رہی ہیں جبکہ 100 سے زائد کتابیں چھپ چکی ہیں۔

&quot;میں نے جب 2005ء میں ڈیٹا اکٹھا کیا تو اس وقت صرف 12 افراد میواتی لکھ رہے تھے مگر اب یہ تعداد سیکڑوں میں پہنچ چکی ہے۔ ریسرچ اور تھیسز لکھنےکا کام بھی ہو رہا ہے۔&quot;&nbsp;

ان کا کہنا تھا کہ میو برادری کی ترجمانی کے لیے &#39;صدائے میو&#39; اور &#39;میو ایکسپریس&#39; کے نام سے دو ماہنامے اور ایک سہ ماہی رسالہ &#39;اراولی&#39; اردو میں شائع ہوتے ہیں۔ تاہم ان میں میواتی تحریریں بھی باقاعدگی سے چھپتی ہیں۔

&#39;میواتی دنیا&#39; کے نام سے ایک ویب سائٹ بھی موجود ہے جس پر میواتی زبان و ثقافت سے متعلق مواد دستیاب ہے۔ کئی نوجوان میواتی یوٹیوب چینلز بھی چلا رہے ہیں۔

<h2>&#39;میں دس نوجوانوں کو جانتا ہوں ہیں جو میواتی زبان و کلچر پر مقالے لکھ رہے ہیں&#39;</h2>

عمران میو امپیریل یونیورسٹی لاہور میں پی ایچ ڈی سکالر ہیں۔ انہوں نے ایم فل میں &#39;میواتی ادب&#39; پر کام کیا ہے اور اب &nbsp;&#39;اردو کی لسانی تشکیل میں میواتی کا کردار&#39; کے عنوان سے تحقیقی مقالہ لکھ رہے ہیں۔

وہ بتاتے ہیں کہ میواتی زبان کا بڑا المیہ یہ ہے کہ اس کا اپنا کبھی کوئی رسم الخط نہیں رہا۔ جتنا بھی مواد دستیاب ہے وہ سنسکرت، اردو یا عربی میں ہے۔میواتی ادب و ثقافت تحریر کی بجائے ضرب الامثال اور کتھاؤں کی صورت میں سینہ بہ سینہ اگلی نسل کو منتقل ہوتی رہی۔&nbsp;

عمران میو، عاصد خان کے دعووں کی تصدیق کرتے ہوئے کہتے ہیں کہ جب 2018ء میں وہ ایم فل کے تھیسز پر کام کر رہے تھے تو انٹرنیٹ پر میواتی تاریخ و ادب وغیرہ دستیاب نہیں تھا لیکن اب جب وہ پی ایچ ڈی کررہے ہیں تو یہ معاملہ کچھ بہتر ہوا ہے۔&nbsp;

&quot;میں کم از کم 10 ایسے نوجوانوں کو جانتا ہوں ہیں جو اب میواتی زبان و کلچر پر ایم فل یا پی ایچ ڈی کے مقالے لکھ رہے ہیں۔&quot;

صدائے میو فورم کے جنرل سیکریٹری پروفیسر سرفراز احمد میو کہتے ہیں کہ میواتی زبان و ادب پر تیزی سے کام ہو رہا ہے لیکن اس قوم کی شناخت برقرار رکھنے کے لیے ضروری ہے کہ میواتی زبان کو پرائمری سکولوں میں بطور اختیاری مضمون شامل کیا جائے۔&nbsp;

نوٹ: یہ پورٹ لاہور سے آصف ریاض اور قصور سے افضل انصاری کی مشترکہ کاوش ہے

'میواتی خود کو اردو کا وارث سمجھتے تھے اور اسے اپنی زبان مانتے رہے': ہجرت کے 76 سال بعد میواتی کو زبان کا درجہ کیسے ملا؟

text

Discover the persistent challenge facing District Kasur after 75 years: the absence of effective solid waste management systems. Explore the ongoing efforts and the need for sustainable solut

75 Years On: District Kasur Still Lacks Adequate Solid Waste Management Systems

قصور شہر میں داخل ہوں تو آپ کو جگہ جگہ گندگی کے ڈھیر نظر آتے ہیں۔ یہ نہ تو بلھے شاہ اور نہ ہی نورجہاں کا &quot;قصور&quot; ہے۔ جن کا قصور ہے وہ آئیں بائیں شائیں کرتے نظر آتے ہیں۔

لاہور کے جنوب میں واقع پنجاب کا 16واں اور پاکستان کا 24 بڑا ضلع قصور روزانہ کی بنیاد پر تقریباً چار ہزار 200 ٹن سالڈ ویسٹ پیدا کرتا ہے جس میں ری سائیکل ایبل اور آرگینک کچرہ دونوں شامل ہے۔

ضلع کی آبادی 40 لاکھ&nbsp; سے زائد ہے یہاں سالڈ ویسٹ کو ٹھکانے لگانے کے لیے ایک بھی سرکاری ڈمپنگ سائٹ موجود نہیں ہے۔1947ء سے لے کر آج تک میونسپل کمیٹیاں سو سے زائد مقامات کو ڈمپنگ سائٹ کے طور پر استعمال کر چکی ہیں۔

جب ایک لینڈ فل اپنی گنجائش کو پہنچ جاتی ہے تو میونسپل کمیٹی کے اہلکار نئی جگہ کی تلاش کر لیتے ہیں۔ اس طرح منصوبہ بندی کے فقدان کی وجہ سے ضلع عنقریب کچرہ کنڈی میں تبدیل ہوتا دکھائی دے رہا ہے۔

شہری آبادیوں کے قریب کوڑے کرکٹ کے پہاڑ جیسے ڈھیر انسانی زندگی اور صحت کے ساتھ ساتھ حیوانی زندگیوں کو بری طرح متاثر کر رہے ہیں۔ سب سے بڑھ کر یہ کہ یہ زیر زمین پانی کو بھی آلودہ کر رہے ہیں۔

قصور کی چار تحصیلوں میں قصور، کوٹ رادھا کشن ، چونیاں اور پتوکی شامل ہیں۔ تحصیل قصور میں چار میونسپل کمیٹیاں ، کوٹ رادھا کشن میں ایک میونسپل کمیٹی، چونیاں میں چار جبکہ پتوکی میں دو میونسپل کمیٹیاں ہیں۔

انوائرمنٹ پروٹیکشن ڈیپارٹمنٹ (ای پی ڈی) کی رپورٹ کے مطابق پنجاب میں تقریباً پچاس ہزار ٹن سالڈ ویسٹ یومیہ پیدا ہوتا ہے جس کا نو فیصد قصور پیدا کر رہا ہے۔

ایک اور رپورٹ کے مطابق پنجاب میں صرف سات سالڈ ویسٹ مینجمنٹ کمپنیاں کام کر رہی ہیں اور ان میں قصور شامل نہیں ہے۔

سالڈ ویسٹ سے متعلقہ اس بگڑتی ہوئی صورتحال پر ضلعی انتظامیہ اور میونسپل کمیٹی کی بے حسی اور سیاسی شخصیات کی خاموشی ایک عام شہری کی پریشانی کا باعث ہے۔

حالیہ ہونے والے عام&nbsp; انتخابات میں کسی بھی پارٹی یا آزاد امیدوار کے سیاسی منشور، تقریر یا سوشل میڈیا کمپین میں سالڈ ویسٹ سائٹ بنانے، اسے شہری آبادی سے دور لے جانے یا سالڈ ویسٹ مینجمنٹ کا ذکر تک نہیں تھا۔

مقامی تاجر محمد شہباز کا کہنا ہے کہ آبادی میں تیز رفتاری سے اضافے سے جہاں سالڈ ویسٹ زیادہ مقدار میں پیدا ہو رہا ہے وہاں رہائشی آبادی کے پھیلاؤ کے سبب سکڑتی زمین ڈمپنگ سائیٹ کی فراہمی کو مزید مشکل میں ڈال رہی ہے۔

پنجاب حکومت نے یکم مارچ سے 31 مارچ 2024ء &quot;صاف ستھرا پنجاب&quot; کے نام سے ایک مہم چلائی ہے۔

محکمہ لوکل گورنمنٹ کی جانب سے تمام مقامی حکومتوں اور ویسٹ مینجمنٹ کمپنیوں کو مراسلے جاری کیے گئے۔ اس مہم کے فوکل پرسن ڈی جی لوکل گورنمنٹ تھے۔ انہوں نے دعویٰ کیا تھا کہ صاف ستھرا پنجاب مہم کے تحت کھلی جگہوں سے کوڑے کے ڈھیر مکمل طور پر ختم کر دیئے جائیں گے۔

&quot;سبزی منڈیوں، مارکیٹوں، بس ٹرمینلز اور قبرستانوں کو کوڑا کرکٹ سے پاک کیا جائے گا۔ یونین کونسل کی سطح پر آگاہی کیمپ لگائے جائیں گے۔گھر گھر جا کر لوگوں کو صفائی سے متعلق آگاہ کیا جائے گا۔ سکولوں اور کالجوں میں صفائی سے آگاہی کے لیے لیکچرز کا اہتمام کیا جائے گا۔&quot;

مگر قصور میں یہ مہم فوٹو سیشن اور ہینڈ آوٹ تک محدود رہی۔

ایڈیشنل ڈپٹی کمشنر موسیٰ طاہر مہم کی ناکامی کا اعتراف کرتے ہیں۔ وہ ضلع بھر کی تمام میونسپل کمیٹیوں کے ایڈمنسٹریٹر ہیں۔ انہوں نے لوک سجاگ کو بتایا کہ مہم کے بہتر نتائج کے لیے کافی وقت اور وسائل درکار ہیں۔

&quot;رمضان نگہبان پیکج صاف ستھرا پنجاب کی تکمیل کے راستے میں بڑی رکاوٹ تھا۔ سارے فنڈز وہاں خرچ ہو گئے۔ وسائل ہوں تو ایک ماہ میں پورا شہر صاف ہوسکتا ہے۔&quot;

میونسپل کمیٹی کے ایک اہلکار صابر علی کے مطابق شہر کی صفائی اور کچرہ اٹھانے کا کام روائیتی طور پر تین مراحل پر مشتمل ہوتا ہے۔ ابتدائی مرحلے میں جھاڑو کے ساتھ گلی محلہ کی صفائی کر کے کوڑا کرکٹ سڑک کے کنارے عارضی جگہ پر جمع کر دیا جاتا ہے۔

دوسرے مرحلہ میں کچرہ اس عارضی مقام سے ٹریکٹر ٹرالی کی مدد سے اٹھایا جاتا ہے۔

تیسرے اور آخری مرحلہ میں اس کچرے کو آبادی سے دور کسی کھلی جگہ پر پھنک دیا جاتا ہے تاکہ شہریوں کو صاف اور غیر آلودہ ماحول فراہم کیا جا سکے۔

ساجدہ بی بی، آسیہ بی بی اور طاہرہ پروین نے لوک سجاگ سے بات کرتے ہوئے&nbsp; کہا کہ&nbsp; کمیٹی کا عملہ تینوں مراحل میں ناکام ہے۔

&quot;نہ تو گلی محلوں کی صفائی کی جاتی ہے اور نہ ہی کوڑا کرکٹ وقت پر اٹھایا جاتا ہے۔ یہ کوڑا دوبارہ انہیں گلیوں بازاروں میں پھیل جاتا ہے۔ تمام سالڈ ویسٹ، شہری آبادی کے قریب ہی اکھٹا کیا جاتا۔&quot;

شہری علی رضا کا کہنا ہے کہ میونسپل کمیٹی کیپٹن نسیم حیات روڈ پر کئی سالوں تک شہر کا سالڈ ویسٹ جمح کرتی رہی آج اس کوڑے کے ڈھیر پر کئی گھر بن چکے ہیں۔ انہوں نے بتایا کہ ماضی کی مشہور کچرہ کنڈیوں میں بلدیہ چوک بلمقابل سٹی تھانہ، بنگلہ کمبوواں، فیروز پور روڈ پر بھلو سٹاپ، شیخ بھاگو اور دولے والا کے علاقے شامل ہیں۔

مقامی میونسپل کمیٹی کے چیف سینیٹری انسپکٹر فیصل جمیل نے سجاگ کو بتایا کہ شہر قصور کی میونسپل کمیٹی کی حدود میں 230 ٹن کچرہ پیدا ہوتا ہے جبکہ عملہ صرف 200 ٹن کچرہ اٹھا پاتا ہے اور باقی کا کچرہ شہری آبادی میں پڑا رہتا ہے۔ وہ ماضی اور انسانی وسائل کی کمی کو اس کی وجہ قرار دیتے ہیں۔

ان کے مطابق ضلع بھر کی کسی میونسپل کمیٹی کے پاس سالڈ ویسٹ کا گزشتہ سالوں کا ڈیٹا موجود نہیں ہے جس سے انسانی آبادی کی بڑھتی ہوئی شرح کے مطابق سالڈ ویسٹ مینجمنٹ کی مناسب حکمت عملی تیار کی جا سکے۔

&quot;اندھیرے میں تیر چلانے کا ایک نقصان یہ بھی ہے کہ آج تک کوئی میونسپل کمیٹی اس بات کا تعین نہیں کر سکی کہ سالڈ ویسٹ کی بڑھتی ہوئی مقدار کے مطابق ڈمپنگ سائیٹ کے لیے کتنی جگہ درکار ہے؟&quot;&nbsp;

میونسپل کمیٹی کے ایک اہلکار نے اپنا نام خفیہ رکھنے کی شرط پر لوک سجاگ کو بتایا کہ حال ہی میں بائی پاس پر ایک پرائیویٹ جگہ پر لینڈ فل کی گئی جو قریبی آبادی کے لیے وبال جان بن گئی۔ لوگوں نے&nbsp; احتجاج کیا تو ضلعی انتظامیہ نے ٹینری ویسٹ ڈمپنگ سائٹ کو ہی سالڈ ویسٹ سائٹ میں تبدیل کر دیا۔

ایک اور میونسپل کمیٹی کے اہلکار نے لوک سجاگ کو بتایا کہ کمیٹی کے عملے کو کبھی سالڈ ویسٹ مینجمنٹ کی تربیت نہیں دی گئی جس کا نتیجہ یہ ہے کہ&nbsp; مسئلہ حل ہونے کی بجائے بڑھ رہا ہے۔

&quot;تربیت نہ دینے کا ایک اور بڑا &#39;فائدہ&#39; یہ ہے کہ عملہ صفائی کو کبھی معلوم ہی نہیں ہوا کہ صفائی کے کام کے دوران ضروری حفاظتی آلات اور صحت سے متعلق چیک اپ وغیرہ کی سہولت ان کا بنیادی حق ہے۔&quot;

یونین کونسل کے ایک عوامی نمائندے محمد نعیم بھٹی کا کہنا ہے کہ میونسپل کمیٹی کے اخراجات اور مشینری کی حالت دیکھیں تو&nbsp; اس میں بدعنوانی نظر آتی ہے۔

وہ کہتے ہیں کہ ایک مؤثر اور فنکشنل شکایت سیل کا قیام، سالڈ ویسٹ مینجمنٹ کو بہتر بہتر بنانے میں اہم کردار ادا&nbsp; کرسکتا ہے۔

کچھ عرصہ قبل تحصیل کوٹ رادھا کشن میں میں ایک ڈمپنگ سائٹ&nbsp; منظور کی گئی تھی مگر اس کے ایک بڑا حصہ ریسکیو 1122 کو دے دیا گیا۔ اس کا نتیجہ یہ ہوا کہ اب ریسکیو عملہ کچرے کے ایک پہاڑ کے سائے میں کام کر رہا ہے۔

پتوکی کے علاقے بھائی پھیرو سے تعلق رکھنے والے حاجی محمد رمضان پاکستان کسان بورڈ کے انفارمیشن سیکرٹری اور سماجی شخصیت ہیں۔ انہوں نے لوک سجاگ سے خصوصی گفتگو کرتے ہوئے کہا کہ سالڈ ویسٹ سائیٹ کا نہ ہونا سیاسی شخصیات کی عدم دلچسپی کا نتیجہ ہے لیکن تمام ملبہ بیورو کریسی پر ڈال دیا جاتا ہے۔

انہوں نے بتایا کہ پتوکی میں 80ء کی دہائی میں سالڈ ویسٹ اکٹھا کرنے کے لیے شہری آبادی سے دور تقریباً 50 ایکڑ کے لگ بھگ جگہ مختص تھی جس پر آہستہ آہستہ سرکار نے عمارتیں بنا دیں اور کچھ زمین پر قبضہ ہو گیا۔

&quot;پتوکی میں اس وقت کئی جگہیں سالڈ ویسٹ کے طور پر استعمال ہو رہی ہیں۔ ایک سائٹ&nbsp; مقامی قبرستان کے عقب میں ہے۔&quot;

سابق تحصیل ناظم آغا نوید ہاشم رضوی نے لوک سجاگ کو بتایا کہ انہوں نے اپنے دور میں سالڈ ویسٹ سے کھاد بنانے کے پراجیکٹ پر کام کرنا چاہا مگر کامیاب نہ ہو سکے۔

اے ڈی سی آر امید ظاہر کرتے ہیں&nbsp; کہ مشینری کی مرمت کا کام اگلے چند روز میں مکمل ہو جائے گا۔ انہوں نے بتایا کہ لاہور سالڈ ویسٹ مینجمنٹ جلد قصور سے چھانٹی کیا ہوا سالڈ ویسٹ لے کر ری سائیکل کرے گی۔

چیف ایگزیکٹو آفیسر ہیلتھ ڈاکٹر محمد طلحہ کا کہنا ہے کہ سالڈ ویسٹ سائٹ کا شہری آبادیوں کے قریب ہونا متعدد صحت کے مسائل پیدا کرتا ہے۔ انہوں نے کہا کہ حال ہی میں پتوکی کے علاقہ پھولنگر میں تین بچوں کی موت واقع ہوئی اور چھ بچوں کو ہسپتال منتقل کر دیا گیا۔ ان بچوں کا تعلق خانہ بدوش خاندان سے تھا جو کوڑا کرکٹ اکٹھا کر تے تھے۔ انہوں نے کہا کہ جب سالڈ ویسٹ سائٹس آبادی کے قریب ہوں تو سانس اور جلد کی بیماریاں عام ہوجاتی ہیں جس کا شکار زیادہ تر بچے اور بوڑھے لوگ ہوتے ہیں۔

انہوں نے مزید بتایا کہ بے ترتیب کچرہ کنڈیاں آوارہ کتوں کی آماجگاہ ہوتی ہیں جو انفیکشن پھیلانے کا باعث بنتے ہیں۔

کیا قصور کے ٹینریز مالکان سے واٹر ٹریٹمنٹ پلانٹ چلانے کی توقع کی جا سکتی ہے؟

قصور کو کچرہ کنڈی بنانے میں کس کا قصور ہے؟

Join the movement to protect and ensure the welfare of stray dogs in Kasur. Explore initiatives, challenges, and community efforts aimed at creating a safer and more compassionate environment

Safeguarding Kasur: Advocating for Stray Dogs' Protection and Welfare

عابد قصور كے علاقے عثمان والا كے رہائشی ہیں۔ پیشے كے لحاظ سے درزی&nbsp; اور محلے میں ایک چھوٹی دكان چلاتے ہیں۔ رواں برس مئی كا مہینہ تھا، ان كی آٹھ سالہ بیٹی مہرین صبح صبح سكول جا رہی تھی كہ اس پر آوارہ كتوں كے جھنڈ نے حملہ كر کے کاٹ کھایا۔

عابداپنی زخمی بچی كو لے كر سركاری ہسپتالوں&nbsp; میں پھرتے رہے لیكن كسی نے بچی كو داخل نہیں كیا، البتہ ایک نجی ہسپتال والوں نے یہ كہہ كر بچی كے علاج سے انكار كر دیا كہ ہسپتال كا علاج عابد كی &quot;اوقات&quot; سے باہر ہے۔

&nbsp;جب تک مہرین كو لاہور كے سروسز ہسپتال میں لایا گیا تب تک وہ جاں بحق ہو چكی تھی۔ 
&nbsp; 
عابد كہتے ہیں كہ ان كی بچی كی موت كی خبر جب میڈیا پر آئی تو وزیر اعلی پنجاب نے نوٹس بھی لیا لیكن وہ نوٹس محض ایک جذباتی بیان تھا۔

&quot;اس پر كبھی ایكشن نہیں لیاگیا كیونكہ ذمہ داران كی نوكریاں میری بچی كی جان سے زیادہ قیمتی ہیں&quot;۔

قصور شہر کی سڑکوں اور گلیوں میں پھرنے والے آوارہ كتوں كی تعداد میں خطرناک حد تک اضافہ ہو چكا ہے۔ یہ آوارہ كتے نہ صرف شہریوں كے لیے مستقل خطرہ بن چكے ہیں بلكہ ضلعی انتظامیہ کا بھی منہ چڑا رہے ہیں۔

لاہور ہائیکورٹ نے آوارہ كتوں كو زہر دے كر یا گولی مار کر ہلاک کرنے پر مکمل پابندی لگا ركھی ہے۔

سال 2021ء میں پنجاب حکومت نے اینیمل برتھ کنٹرول پالیسی کا بھی انعقاد کیا، جس كے تحت كتوں كو مارنے كی بجائے انہیں پكڑ كر ان كی نس بندی كر دی جاتی ہے، یوں ان كی افزائش نسل نہیں ہو پاتی۔

فروری 2022ء میں پنجاب کے تمام ڈپٹی کمشنرز کو پی ڈی ایم کی طرف سے تحریری نوٹس بھیجا گیا تھا کہ آوارہ کتوں کو زہر دیکر تلف کرنے کی بجائے ٹی این وی آر کے طریقہ کار کو فوری طور پر اپنایا جائے ۔

ٹی سے مراد آوارہ کتوں کو ٹریپ کرنا، این سے مراد ان کو خصی کرنا یا ان کی نس بندی کرنا ہے، وی&nbsp; سے مراد ان کو ویکسین دینا اور آر کا مطلب ان کو ریلیز یعنی رہا کرنا ہے۔

اس پالیسی کے تحت کتوں کی افزائش نسل کو کنٹرول کرنے کی ذمہ داری میونسپل کمیٹی، محکمہ صحت&nbsp; اور لائیو سٹاک و ڈیری ڈیویلپمنٹ کی ہے جبکہ ضلعی انتظامیہ کا کام اس سارے عمل کی نگرانی اور عملدرآمد کو یقینی بنانا ہے ۔

&nbsp;لیكن ان محكموں کے درمیان عدم تعاون اور اور ذمہ داری کے واضع تعین نہ ہونے کی وجہ سے اس پالیسی پر نہ صرف عمل درآمد نہیں ہوسكا بلكہ آوارہ کتوں کی تعداد، کتے کاٹنے کے واقعات، باؤلے پن کے پازئیٹو کیسز کی تعداد اور&nbsp; ویکسین&nbsp; دی جآنے والے کتوں کی تعداد کا ریکارڈ کسی محکمے کے پاس موجود نہیں ہے۔

ڈسٹرکٹ ہیلتھ آفس سے لوک سجاگ ملنے والی رپورٹ كے مطابق جنوری 2022ء سے اكتوبر 2023ء تک ضلع بھر میں كتے كے كاٹنے كے كل1109 واقعات درج ہوئے۔

ایک شہری جاوید بھٹی کے مطابق جہاں آوارہ کتوں کی بڑھتی ہوئی تعداد شہریوں کے لیے وبال جان بنی ہوئی ہے وہاں ان کتوں کو بھی عوامی نفرت، جگہ اور خوراک کی قلت جیسے مسائل کا سامنا کرنا پڑتا ہے۔

چیف ایگزیکٹو آفیسر شیخ وقاص احمد نے لوک سجاگ کو بتایا کہ آوارہ کتوں کو پکڑنے کے لیے میونسپل کمیٹی کے پاس تربیت یافتہ عملہ اور جال وغیرہ تک دستیاب نہیں ہیں۔کمیٹی اپنے اہلکاروں کی جان خطرے میں نہیں ڈال سکتی، البتہ کتوں کو زہر دینے کام آسان اور قابلِ عمل تھا۔

میونسپل کمیٹی کے ایک اہلکار فیصل علی کے مطابق جب سے یہ نئی پالیسی بنی ہے انہوں نے کوئی آوارہ کتا نہیں پکڑا اور نہ ہی کسی کو زہر دیا ہے۔

چیف ایگزیکٹو آفیسر ہیلتھ ضلع قصور ڈاکٹر طلحہ نے لوک سجاگ كو بتایا كہ آوارہ كتوں كو پكڑنے كی زمہ داری میونسپل كمیٹی كی ہے، جس میں وہ مكمل طور پر ناكام ہو چكی ہے۔

&quot; كتوں كو ہلاک كرنا مسئلے كا حل نہیں ہے جبكہ&nbsp; ٹی این وی آر ہمارے سماجی، ثقافتی اور مذہبی پس منظر سے مطابقت رکھتی ہے اور زیادہ موضع طریقہ کار ہے&quot;۔

اینیمل برتھ کنٹرول پالیسی کا تیسرا اہم سٹیک ہولڈر لائیو سٹاک اینڈ ڈئیری ڈیویلپمنٹ اتھارٹی ہے۔

اتھارٹی کے ڈسٹرکٹ آفیسر ڈاکٹر محمد عباس نے لوک سجاگ کو بتایا كہ انہیں كسی بھی ادارے كی جانب سے یہ ذمہ داری نہیں سونپی گئی تھی پھر بھی اپنی مدد آپ کے تحت لائیو سٹاک قصور نے جولائی 2022ء سے جون 2023ء&nbsp; تک 482 آوارہ کتوں کی نس بندی کی ہے جبکہ 12 ہزار 779 آوارہ کتوں کو ویکسین دی ہے۔

ذمہ دار محکمہ جات کی عدم دلچسپی اور ذمہ داریوں کا درست تعین نہ ہونے کی وجہ سے ضلع بھر میں کتوں کی تعداد اور ان کے حملے خطرناک حد تک بڑھ چکے ہیں۔

اینیمل برتھ کنٹرول پالیسی كے مطابق صوبائی مانیٹرنگ کمیٹی کے بعد ضلعی مانیٹرنگ کمیٹی کا قیام عمل میں آتا ہے ۔ اس کمیٹی کا چیئرمین ڈپٹی کمشنر ہوتا ہے جبکہ باقی چھ اراکین میں ڈسٹرکٹ پولیس آفیسر، سی ای او ہیلتھ، ڈپٹی ڈائریکٹر لوکل گورنمنٹ، کسی این جی او کے دو نمائندے اور جانوروں پر تشدد سے بچاؤ کی تنظیم کا ایک نمائندہ شامل ہوتا ہے۔

ڈسٹرکٹ ہیلتھ آفس کے ایک اہلکار نے نام خفیہ رکھنے کی شرط پر بتایا کہ ایسی کمیٹی صرف فائلوں میں موجود ہے، حقیقت میں اس طرح کی کسی کمیٹی نے آج تک نہ تو کوئی میٹنگ کی ہے اور نہ ہی کوئی حکم صادر کیا ہے۔

ڈسٹرکٹ بار ایسوسی ایشن کے رکن اور سپریم کورٹ کے سینئر وکیل غلام احمد انصاری نے لوک سجاگ كو بتایا كہ قانوناً اس کمیٹی کی ماہانہ میٹنگ ہونا چاہیے اور اسے اپنی ذیلی کمیٹی تحصیل ایمپلی مینٹیشن کمیٹی( ٹی آئی سی) کی نگرانی کرنا چاہیے اور باقاعدگی کے ساتھ کارکردگی رپورٹ طلب کرنا چاہیے&nbsp; مگر اس طرح کی کوئی پریکٹس نظر نہیں آتی۔

ایک سوال کے جواب میں ان کا کہنا تھا کہ ٹی آئی سی اس بات کی قانوناً پابند ہے کہ وہ آوارہ کتوں کی تعداد کا تعین کرنے کے لیے باقاعدہ سروے کرے اور تمام اعداد و شمار اکٹھے کر کے روزانہ کی بنیاد پر صوبائی ڈیٹا میں شامل کرے مگر حقیقت میں ایسا کچھ نہیں ہوتا۔

مقامی تاجر برادری کے نمائندے افضال حسین، ملک عبدالعزیز اور علی رضا کے مطابق آوارہ کتوں کے حملوں اور ان کی غیر معمولی تعداد سے متعلق شکایت درج کرانے کے لیے ضلعی انتظامیہ کو ایک ہیلپ لائن متعارف کروانی چاہیے۔ انہوں نے مزید كہا كہ صوبائی حکومت اور ضلعی انتظامیہ اس معاملے پر غیر سنجیدہ ہیں ۔

وہ کہتے ہیں کہ ٹی این وی آر پالیسی قابلِ عمل ہے مگر مختلف محکمے اپنی ذمہ داری پوری کرنے کو تیار نہیں اور ان کو کوئی پوچھنے والا نہیں ہے یہی وجہ ہے کہ یہ مسئلہ سنگین سے سنگین تر ہوتا جا رہا ہے۔

محکمہ جنگلی حیات ناکام: تھرپارکر میں معدوم ہوتے جانوروں کے تحفظ کی ذمہ داری مقامی آبادی نے اٹھا لی

قصور میں آوارہ کتوں کا خاتمہ آخر کس کی ذمہ داری ہے؟

قصور کا نیا سیاسی منظر نامہ بھی روایتی خاندانوں اور پرانے چہروں کے ساتھ بن رہا ہے۔ یہاں ووٹر برادریوں کے چکر سے نکلتا دکھائی نہیں دے رہا تاہم&nbsp; حتمی فیصلہ پولنگ کے روز ہو گا۔

&nbsp;آئندہ عام انتخاب میں اس ضلعے کی چار قومی اور دس صوبائی نشستوں پر الیکشن ہو گا۔ گزشتہ الیکشن میں یہاں سے مسلم لیگ نون نے تین قومی اور چھ صوبائی نشستیں جیتی تھیں جبکہ پی ٹی آئی کے حصے میں ایک قومی اور تین صوبائی نشستیں آئی تھیں۔

ضلع قصور کے پہلے قومی حلقہ این اے 131 میں قصور شہر اور مصطفیٰ آباد کے علاقے آتے ہیں۔ اس نشست کے بڑے کھلاڑیوں میں ن لیگ کے سعد وسیم، پی ٹی آئی کے بختیار قصوری، مقصود صابر انصاری اور مہر محمد سلیم جبکہ پیپلز پارٹی کے چودھری منظور احمد شامل ہیں۔

&nbsp;سعد وسیم کے والد وسیم اختر ایک بار چودھری منظور سے ہارنے کے بعد مسلسل دو مرتبہ ممبر قومی اسمبلی بنے تھے۔ پچھلے عام انتخابات میں سعد وسیم نے سابق وزیر خارجہ اور پی ٹی آئی کے امیدوار سردار آصف احمد علی کو شکست دی تھی جبکہ پیپلز پارٹی کے چودھری منظور تیسرے نمبر پر آئے تھے۔

چودھری منظور پیپلز پارٹی کے مرکزی رہنما ہیں تاہم ایک بار ایم این اے منتخب ہوئے تھے اور تین بار ن لیگ سے ہار چکے ہیں۔

بختیار قصوری سابق وزیر خارجہ خورشید محمود قصوری کے بھائی ہیں جو خود بھی ایک سکول سسٹم چلاتے ہیں اور عملی سیاست میں پہلی بار آئے ہیں۔ مہر محمد سلیم سابق صدر ڈسٹرکٹ بار ہیں اور خورشید قصوری کے قریبی سمجھے جاتے ہیں۔

پی ٹی آئی کے تیسرے امیدوار مقصود صابر انصاری وائس چیئرمین ضلع کونسل رہ چکے ہیں اور ان کے والد غلام صابر انصاری پانچ بار ایم پی اے منتخب ہوئے تھے۔ ان تینوں میں سے جس کو بھی ٹکٹ ملا آسان امیدوار نہیں ہو گا۔

اس نشست پر برادری ووٹ کے علاوہ پارٹی اور امیدوار کا عمومی رویہ اہمیت رکھتا ہے۔ یہاں تھانے کچہری میں لوگوں کی مدد اور ضلعی انتظامیہ کا جھکاؤ بھی انتخابی عمل پر اثر انداز ہوتا ہے۔

قصور میں گزشتہ دنوں پیپلز پارٹی اور پی ٹی آئی کے کارکن دو مرتبہ احتجاج کر چکے ہیں جس میں دونوں نے ضلعی انتظامیہ پر ن لیگ کی حمایت کا الزام عائد کیا تھا۔

این اے 132 میں تحصیل کوٹ رادھا کشن اور تحصیل قصور کے دیہات اور قصبات شامل ہیں جہاں 15 سال سے ن لیگ حکمرانی کر رہی ہے۔ دیہی اور نیم شہری حلقہ ہونے کی وجہ سے یہاں ووٹر اور امیدوار کی ترجیحات مختلف ہیں۔

اس نشست پر صدر ن لیگ سابق وزیر اعظم شہباز شریف اور پی ٹی آئی کے راشد طفیل مدِمقابل ہیں۔ ن لیگ کے سابق ایم این اے ملک رشید احمد اور ان کا بیٹا مظہر رشید اس حلقے کے نیچے صوبائی نشستوں پر امیدوار ہیں۔

یہاں سے پی ٹی آئی امیدوار راشد طفیل کے والد سردار طفیل کئی بار رکن قومی اور صوبائی اسمبلی منتخب ہوئے تھے۔ ان کے انتقال کے بعد پچھلی بار راشد طفیل نے پی ٹی آئی کے ٹکٹ پر الیکشن لڑا مگر ن لیگ کے ملک رشید سے ہار گئے تھے۔

اس حلقے میں میئو، ارائیں اور انصاری بڑی برادریاں ہیں جبکہ بریلوی اور اہلحدیث مکاتب فکر سے تعلق رکھنے والا ووٹ بھی اہم کردار ادا کرتا ہے۔

شہباز شریف کو جہاں ن لیگ اور ملک رشید گروپ کی حمایت حاصل ہے۔ وہیں کوٹ رادھا کشن قصور روڈ، اوور ہیڈ برجِ و دیگر ترقیاتی منصوبے بھی ان کے کریڈٹ پر ہیں جو ووٹر پر اثرانداز ہو سکتے ہیں۔ اس کے علاوہ قدآور شخصیت اور رائیونڈ کے قریب ہونا شہباز شریف کے حق میں جائے گا۔

دوسری طرف راشد طفیل کا اصل ووٹ بنک میئو برادری ہے۔ مگر اس بار انہیں پی ٹی آئی سے ہمدردی کا ووٹ مل سکتا ہے کیونکہ شہر کے ساتھ دیہات میں بھی پی ٹی آئی کی پاپولر سپورٹ موجود ہے۔

تاہم راشد طفیل اپنی بیوی اور بیٹی پر نو مئی کے واقعات میں ملوث ہونے کے الزامات کی وجہ سے شدید دباؤ میں ہیں۔ ان کے کورنگ امیدوار سابق بیوروکریٹ حاجی محمد ڈوگر ہیں۔

تحریک لبیک کے امیدوار منیر ساقی کے مطابق این اے 132 میں مذہبی ووٹ اہلحدیث کے احتشام الہی ظہیر، جماعت اسلامی کے راؤ اختر علی اور ٹی ایل پی میں تقسیم ہو گا۔

&quot;اگر ٹی ایل پی، میواتی برادری کا امیدوار لے آتی ہے تو وہ مذہبی ووٹ کا زیادہ بڑا حصہ لے جائے گی، جس کا فائدہ ن لیگ کو ہو گا&quot;۔

این اے 133 تحصیل چونیاں اور تحصیل پتوکی پر مشتمل ہے۔ یہاں بڑے کھلاڑیوں میں ن لیگ کے رانا اسحاق، آئی پی پی کے آصف نکئی اور پی ٹی آئی کے عظیم الدین لکھوی شامل ہیں اور ان میں کانٹے دار مقابلہ متوقع ہے۔

رانا اور نکئی گروپ روایتی حریف ہیں۔ اگر ن لیگ اور آئی پی پی میں کوئی سیٹ ایڈجسٹمنٹ ہوئی بھی تو امکان یہی ہے کہ دونوں حریف گروپ ایک دوسرے کے لیے سیاسی میدان خالی نہیں چھوڑیں گے۔ جس کا پہلی بار پی ٹی آئی فائدہ اٹھا سکتی ہے۔

رانا محمد اسحاق تین بار ایم این اے منتخب ہو چکے ہیں۔ وہ سابق سپیکر رانا محمد اقبال کے کزن اور پتوکی سے سابق ایم این اے رانا محمد حیات کے بھائی ہیں۔

&nbsp;سردار آصف نکئی سابق وزیر اعلیٰ سردار عارف نکئی کے صاحبزادے ہیں۔ 2002 کے عام انتخابات میں این اے 140 اور141 سے بیک وقت ق لیگ کے پلیٹ فارم سے منتخب ہوئے۔ حتمی طور پر این اے 141 سے قومی اسمبلی میں پہنچے اور 2004 میں انہیں وفاقی کابینہ میں شامل کیا گیا۔

انہیں ہاؤسنگ اینڈ ورکس کی وزارت بھی دی گئی۔ 2008 اور 2013 کے انتخابات میں آپ پی پی 183 سے ق لیگ کے ٹکٹ پر ایم پی اے منتخب ہوئے۔ 2018 میں پی ٹی آئی کے ٹکٹ پر الیکشن لڑا اور پی پی180 سے ایم پی اے منتخب ہوئے ۔ انہیں وزیر اعلیٰ پنجاب عثمان بزدار کی کابینہ میں شامل کر کے کمیونیکشن اینڈ ورکس کی وزارت دی گئی تھی۔

اس حلقہ میں رانا خاندان کو ن لیگ کے علاوہ میو اور راجپوت برادری کی حمایت حاصل ہے۔ جبکہ نکئی کو جٹ اور ڈوگر برادری کا ووٹ ملتا ہے۔دیہی حلقہ ہونے کے باعث یہاں پارٹی ووٹ کافی کم رہتا ہے۔

این اے 134 میں تحصیل پتوکی کا علاقہ آتا ہے۔ اس حلقہ کا سیاسی و سماجی ڈھانچہ این اے 133 سے مختلف نہیں۔ یہاں بھی رانا اور نکئی خاندانوں کے درمیان مقابلہ ہوتا ہے۔ اس بار بھی ن لیگ کے رانا محمد حیات اور آئی پی پی کے سردار طالب نکئی میں جوڑ پڑے گا۔

اس حلقے میں پی ٹی آئی سے کوئی بڑا نام سامنے نہیں آیا تاہم کارکنوں نے کاغذات نامزدگی جمع کرا رکھے ہیں۔

یہاں جماعت اسلامی کے امیدوار حاجی محمد رمضان کہتے ہیں کہ پی ٹی آئی کا ووٹ انہیں پڑے گا کیونکہ یہاں پارٹی کی کوئی لیڈر شپ نہیں ہے۔ ان کا خیال ہے کہ ارائیں برادری اور مذہبی ووٹ کی حمایت سے وہ سبقت لے جائیں گے۔

صوبائی حلقوں میں سے تین، پی پی 175، 178 اور پی پی 179 پر ن لیگ کے امیدوار دو دہائیوں سے براجمان ہیں۔ ان کے پاس دھڑے اور برادری کا مضبوط ووٹ بنک ہے۔ ان میں ملک رشید احمد، ملک احمد سعید اور ملک احمد خان شامل ہیں۔

پی پی 175 سے ن لیگ کے امیدوار سابق ایم این اے ملک رشید ہیں جو پچھلے دونوں الیکشن یہاں سے جیت چکے ہیں اور اس بار انہوں نے اپنا قومی حلقہ شہباز شریف کے لیے چھوڑ دیا ہے۔

اس نشست پر پی ٹی آئی کے امیدوار سابق ٹکٹ ہولڈر تنویر حیات جوئیہ ہیں۔ جبکہ آئی پی پی کے امیدوار داؤد قریشی ہیں جو سابق ایم پی اے اور ریٹائرڈ بیوروکریٹ انیس قریشی کے صاحبزادے ہیں۔

پی پی 176 میں مسلم لیگ ن کے امیدوار چودھری الیاس گجر دو مرتبہ ممبر صوبائی اسمبلی رہ چکے ہیں۔ ان کے مدمقابل پی ٹی آئی سے مسز مزمل مسعود بھٹی اور ناصرہ میو ہیں۔

مسز مسعود اپنے شوہر مسعود بھٹی کے قتل کے بعد سیاست میں آئی تھیں جبکہ ناصرہ میو پی ٹی آئی کے ٹکٹ پر پتوکی کی قومی نشست پر پچھلا الیکشن لڑ چکی ہیں۔ یہاں سے سابق ایم پی اے ندیم یعقوب سیٹھی بھی آزاد امیدوار کے طور پر لڑ رہے ہیں۔

پی پی 177 سے ن لیگ کے امیدوار نعیم صفدر انصاری 2008 سے مسلسل ن لیگ کے ایم پی اے چلے آ رہے ہیں۔ یہاں انصاری برادری کی اکثریت اور ن لیگ کا مضبوط ووٹ بینک ہے۔

&nbsp;ان کے مد مقابل پی ٹی آئی کے امیدوار قیصر ایوب شیخ آ سکتے ہیں جو پارٹی کے پرانے کارکن ہیں۔ اس حلقے سے پیپلز پارٹی کے امیدوار آصف علی کھوکھر تاجر یونین کے صدر اور پارٹی کے پرانے ورکر ہیں۔

پی پی 178 پر ن لیگ کے امیدوار ملک احمد سعید ہیں جو دو دہائیوں میں صرف ایک الیکشن ہارے ہیں۔ ان کے مد مقابل پی ٹی آئی کے امیدوار بیرسٹر شاہد مسعود ہیں جو پچھلے تین انتخابات بطور آزاد امیدوار ہار چکے ہیں۔ جبکہ پیپلز پارٹی کے امیدوار شاہین صفدر پہلی بار الیکشن لڑ رہے ہیں۔

پی پی 179 میں ن لیگ کے امیدوار سابق ایم پی اے ملک احمد خان ہیں جو سابق وزیر اعظم میاں شہباز شریف کے معاون خصوصی رہے اور قومی سیاست میں نمایاں مقام رکھتے ہیں۔ ان کے مد مقابل پی ٹی آئی کے محمد حسین ڈوگر پہلے پیپلز پارٹی کے ایم پی اے رہ چکے ہیں۔

پی پی 180 سے ن لیگ کے احسن رضا اور آئی پی پی کے ریٹائرڈ کرنل ہاشم ڈوگر سیاسی دنگل سجائیں گے۔ یہ حلقہ قصور میں سب سے زیادہ موضوع بحث ہے کیونکہ یہاں ن لیگ اور آئی پی پی کی سیٹ ایڈجسٹمنٹ کے باوجود ن لیگ کے امیدواران مظہر رشید اور احسن رضا آئی پی پی کے ہاشم ڈوگر کے خلاف کمر بستہ ہیں۔

اگر صورت حال برقرار رہی تو پارٹی یہ نشست اوپن رکھ سکتی ہے۔ ق لیگ اور پی ٹی آئی کے مشترکہ امیدوار وقاص موکل بھی اسی حلقے سے مضبوط امیدوار ہیں جو سابق ایم پی اے حسن اختر موکل کے صاحبزادے ہیں۔

سابق وزیر ریٹائرڈ کرنل ہاشم ڈوگر نے نو مئی کے واقعہ پر پی ٹی آئی کو خیر باد کہہ دیا تھا اور آئی پی پی میں شمولیت اختیار کرلی تھی۔

ن لیگ کے ملک مظہر رشید ایم این اے ملک رشید احمد خان کے صاحبزادے ہیں جبکہ احسن رضا بھی ن لیگ کے سابق ایم پی اے ہیں۔

اسی طرح پی پی 181 میں ن لیگ کے شیخ علاؤالدین اور آئی پی پی کے راؤ شاہد قیوم میں کانٹے دار مقابلہ متوقع ہے۔ شیخ علاؤالدین سابق رکن صوبائی اسمبلی اور بزنس مین ہیں۔

یہاں پی ٹی آئی کے امیدوار حنبل ثنا کریمی ہیں جن کے والد میاں عبد الخالق ثانی چونیاں کے تحصیل ناظم رہے۔ جبکہ آئی پی پی کے راؤ زاہد قیوم کے والد راؤ قیوم پیپلز پارٹی کے سرگرم کارکن اور ممبر صوبائی اسمبلی رہے ہیں۔

پی پی 182 پر ن لیگ کے امیدوار محمود انور چودھری، پی ٹی آئی کے عقیل اسلم اور آئی پی پی کے امیدوار پیر مختار احمد ہیں۔ محمود انور کاروباری شخصیت ہیں تاہم پہلے بھی ن لیگ کے پلیٹ فارم سے الیکشن جیت چکے ہیں۔ مد مقابل رانا عقیل پی ٹی آئی کے پرانے ورکر ہیں۔

جبکہ آئی پی پی کے امیدوار پیر مختار احمد پرانے سیاستدان اور سابق تحصیل ناظم چونیاں ہیں۔ وہ پانچ بار ایم پی اے رہ چکے ہیں اور پچھلی بار پی ٹی آئی کے ٹکٹ پر منتخب ہوئے تھے۔

پی پی 183 اور 184 میں برادری اور دھڑے کا عنصر زیادہ ہے۔

پی پی 182 شہری آبادی پر مشتمل ہے اس لیے اس پر قومی سیاست اور امیدوار کی شخصیت اثر انداز ہوتے ہیں۔ مقامی لوگوں کی رائے کے مطابق اس حلقہ میں جیتنے والا امیدوار اکثر بدلتا رہتا ہے۔

پی پی 183 میں سابق چیئرمین ضلع کونسل سکندر حیات ن لیگ کے امیدوار ہیں جو صوبائی اسمبلی کا الیکشن پہلی بار لڑ رہے ہیں۔ وہ سابق ایم این اے رانا محمد حیات کے بیٹے اور رانا اقبال کے بھتیجے ہیں۔

ان کا مقابلہ روایتی حریف نکئی خاندان کے آصف نکئی سے ہے۔ جو آئی پی پی کے امیدوار ہیں اور کئی بار ممبر صوبائی اسمبلی متخب ہو چکے ہیں۔ اس حلقے میں پی ٹی آئی کے متوقع امیدوار رانا الماس لیاقت ہیں جو پرانے پارٹی کارکن ہیں۔

قصور کے آخری صوبائی حلقے پی پی 184 میں ن لیگ کے امیدوار سابق سپیکر پنجاب اسمبلی رانا محمد اقبال ہیں۔ ان کا مقابلہ سابق ڈی آئی جی اور آئی پی پی کے امیدوار رانا محمد اسلم سے ہو گا جو رانا اقبال کے قریبی رشتے دار ہیں اور ان کے خلاف دو الیکشن پی ٹی آئی کے پلیٹ فارم سے لڑ چکے ہیں۔

&nbsp;اس نشست پر پی ٹی آئی کے امیدوار ذکاوت لیاقت پارٹی کے دو دہائی پرانے کارکن ہیں۔

ضلع سرگودھا میں ہائی وولٹیج مقابلے مریم نواز کے مد مقابل کون الیکشن لڑے گا؟

قصور کا نیا سیاسی منظر نامہ اور پرانے سیاست دان، شہباز شریف کس نشست پر کھڑے ہیں؟

&nbsp;بلھے شاہ اور نورجہاں کا شہر قصور نصف صدی سے ماحولیاتی آلودگی کے خوفناک اثرات سے لڑ رہا ہے۔ یہاں زیرزمین پانی کے استعمال سے شہر اور نواحی علاقوں میں لوگوں کی بڑی تعداد کینسر، معدے کی بیماریوں اور ہڈیوں یا دانتوں کے ٹیڑھے پن کا شکار ہے۔

سرکاری محکمے اور غیر کاری ادارے اس صورت حال کا ذمہ دار یہاں چمڑے کی صنعت (ٹینریز) سے خارج ہونے والے آلودہ پانی کو سمجھتے ہیں اور اس کا برملا اعتراف کرتے ہیں لیکن آج تک اس کا خاطر خواہ حل نکانے میں کامیاب نہیں ہو سکے۔

قصور میں ٹینریز قیام پاکستان سے کام کر رہی ہیں۔ منافع بخش کاروبار ہونے کے باعث یہ صنعت فروغ پاتی رہی۔ اب شہر کے علاقوں دین گڑھ، نیاز نگر اور اقبال نگر میں ان کی تعداد 230 ہو چکی ہے۔

چمڑے کی صفائی میں استعمال ہونے والے کیمیکلز، ٹینری مالکان کی اجارہ داری اور انتظامیہ کا غیر سنجیدگی کے باعث سے شہر آلودہ ہوتا چلا گیا۔ تعفن اور بد بو سے لوگوں کی زند گی اجیرن ہو گئی۔ جب زیرزمین پانی بھی پینے کے قابل نہ رہا تو شہریوں نے احتجاج شروع کر دیا تھا۔

&nbsp;عالمی ادارے آگے بڑھے، 1996ء میں وفاقی و صوبائی حکومتوں اور اقوام متحدہ کے ادارے یو این ڈی پی نے مشترکہ طور پر &#39;قصور ٹینریز پلوشن کنٹرول پراجیکٹ &#39;شروع کیا۔ اس منصوبے کے لیے اقوام متحدہ کے ادارے یو این ڈی&nbsp; پی نے 25 لاکھ ڈالر دیئے اور 19 کروڑ 90 لاکھ روپے کی مقامی سرمایہ کاری شامل تھی۔

منصوبے کے تحت دیپالپور روڈ پر ایک بڑا واٹر ٹریٹمنٹ پلانٹ لگایا گیا جس کا مقصد ٹینریز سے نکلنے والے آلودہ پانی کو صاف کرنا تھا۔ اس میں سے چمڑے کی باقیات، چربی اور بالوں کے علاوہ کرومیم اور کچھ دیگر زیریلے مادے بھی نکالے جاتے تھے۔

اس پراجیکٹ (بشمول ٹریٹمنٹ پلانٹ) کو چلانے کے لیے ایک خود مختار ادارہ قصور ٹینریز ویسٹ مینجمینٹ اتھارٹی (کے ٹی ڈبلیو ایم اے ) تشکیل دیا گیا تھا&nbsp; جس کا سربراہ (منیجنگ ڈائریکٹر) ڈپٹی کمشنر کو بنایا گیا۔ اس کے ارکان میں کچھ سرکاری افسران اور ٹینریز کا ایک نمائندہ شامل تھے۔

ابتدائی چند برسوں میں تو اس ادارے نے خوب کام کیا لیکن پھر منصوبہ عدم توجہ کا شکار ہوتا چلا گیا۔ اس دوران ٹینریز کی تعداد بھی بڑھتی گئی۔ ایک بار پھر آلودہ پانی صاف کیے بغیر دریائے ستلج میں پھینکا جانے لگا۔

قصور ٹینریز ویسٹ منیجمنٹ اتھارٹی (کے ٹی ڈبلیو ایم اے)کےجنرل منیجر غادف متین بتاتے ہیں کہ ٹینریز سے ٹریٹمنٹ پلانٹ تک آلودہ پانی 3.8 کلومیٹر طویل پختہ نالے کے ذریعے آتا ہے۔

&quot;پلانٹ سے پانی آٹھ کلومیٹر طویل گرین چینل سے ہوتا ہوا کچے نالے(روہی نالہ) میں گرتا ہے۔ جہاں سے اسے پانچ کلو میٹر دور دریائےستلج میں پھینک دیا جاتا ہے۔&quot;

وہ کہتے ہیں کی ٹینریز سے پانی کا اوسط ڈسچارج آٹھ ہزار کیوبک میٹر یومیہ ہے۔ بقر عید کے بعد یہاں سرگرمی عروج پر ہوتی ہے تو ڈسچارج 19ہزار کیوبک میٹر تک پہنچ جاتا ہے۔

&quot;اس کا اندازہ ہم ٹینریز میں نصب واٹر میٹرز کی ریڈنگ سے لگاتے ہیں۔ شہر کے سوریج کا پانی بھی اسی میں شامل ہوجاتا ہے۔ جس سے تمام تخمینے غلط ہو جاتے ہیں۔ پلانٹ میں &#39;ان فلو&#39; کی پیمائش کا انتظام تکنیکی طور پر ممکن نہیں ہے۔&quot;

قصور ٹینری پالیوشن کنٹرول پراجیکٹ کے مطابق ٹریٹمننٹ پلانٹ کی صلاحیت 13 ہزار کیوبک میٹر روزانہ (24 گھنٹے چلنے کی صورت میں) ہے۔

جی ایم اعتراف کرتے ہیں کہ محدود بجٹ کے باعث پلانٹ کو صرف آٹھ گھنٹے چلایا جاتا ہے&nbsp; اور پانی کا بڑا حصہ صاف کیے بغیر ستلج میں پھینکنا پڑتا ہے۔ اگر سیوریج کی ڈرین الگ ہو تو صورت حال کچھ بہتر ہو سکتی ہے۔

ڈسٹرکٹ افسر فشریز معیز احمد تصدیق کرتے ہیں کہ ٹینریز کا آلودہ پانی ضلع اوکاڑہ تک آبی حیات کو بُری طرح متاثر کر رہے ہیں۔ دریا میں پانی کا بہاؤ کم ہوتے ہی آلودگی سے جانور، پرندے، درخت اور آبی حیات تیزی سے ہلاک ہونا شروع ہوجاتی ہے۔

&nbsp;2010ء میں ضلعی انتظامیہ نے اقبال نگر کے نام سے ٹینریز کا نیا کلسٹر بنایا۔ مالکان کو پابند کیا کہ وہ اپنی ہر ٹینری میں کروم ریکوری پلانٹ لگائیں گے۔ دین گڑھ اور نیاز نگر کی طرح یہاں بھی کسی نے کوئی پلانٹ نہیں لگایا۔

غیر سرکاری تنظیم &#39;گڈ تھنکر&#39; کے چیف محمد اویس بتاتے ہیں کہ ٹینریز میں پلانٹس نہ ہونے سے آلودہ پانی کچے نالے میں پھینک دیا جاتا ہے یا پھر بور کرکے زیر زمین پانی میں ملا دیا جاتا ہے۔

وہ کہتے ہیں کہ اقبال نگر کے اردگرد دیہات میں لوگ ہڈیوں اور دانتوں کے ٹیڑھے پن کی شکایت کرتے ہیں مگر اس طرف کوئی توجہ نہیں دے رہا۔ بیماریاں بڑھ رہی ہیں اور غربت کے باوجود لوگ پینے کا پانی خریدنے پر مجبور ہیں۔

کے ٹی ڈبلیو ایم اے&nbsp; کے جنرل منیجر نے صوبائی سیکرٹری انڈسٹریز کو چھ اکتوبر 2022ء کو مراسلے میں آگاہ کیا کہ محکمہ صحت کے سروے کے مطابق صرف دو دیہات بنگلہ کمبواں اور دولے والا میں کینسر کے دو ، معدے کے 99، جلد کی بیماری کے 116 جبکہ ہیپاٹائٹس کے 50 مریض پائے گئے ہیں۔

جی ایم تسلیم کرتے ہیں کہ ٹینریز کی وجہ سے درجنوں دیہات خاص طور پر بنگلہ کمبواں، حسین خان والہ، بہادرپورہ، شیخ عماد، دولےوالا، ٹولووالا، فقیریےوالا، کوٹلہ شیخ نتھا، چوڑ پورا، شمس پورہ، منگل منڈی، نوری والا اور بھیڈیاں عثمانوالہ کی حالت زیادہ خراب ہے۔

چیف ایگزیکٹو ہیلتھ اتھارٹی قصور ڈاکٹر محمد طلحہٰ بتاتے ہیں کہ بھاری دھاتوں (ٹی ڈی ایس کی زیادہ مقدار ) والا پانی پینا جان لیوا ثابت ہوتا ہے۔اس سے کینسر، جگر اور گردے کی دائمی بیماریاں لاحق ہو جاتی ہیں۔ خاص طور پر کرومیم معدے کی نالی کے علاوہ چھوٹی آنت کو زیادہ متاثر کرتی ہے جو کینسر تصور کیا ہے۔

&nbsp;پاکستان ٹینریز ایسوسی ایشن نے 2022ء کے ایکسپورٹ سٹریٹجی پیپر میں دعویٰ کیا تھا کہ لیدر انڈسٹری نے جولائی 2021ء سے جون 2022ء تک کے مالی سال میں 95کروڑ 37 لاکھ ڈالر کی مصنوعات ایکسپورٹ کی ہیں جس میں قصور کی ٹینریز کا بھی بڑا حصہ ہے۔

2013ء میں پنجاب حکومت اور کے ٹی ڈبلیو ایم اے نے یو این ڈی پی سے مل کر پلوشن کنٹرول پراجیکٹ کا فیز ٹو شروع کرنے کا منصوبہ بنایا تھا۔ جس کے تحت موجودہ پلانٹ سے صاف ہونے والے پانی کا بائیولوجیکل ٹریٹمنٹ کیا جانا تھا مگر اس میں کوئی پیشرفت نہ ہو سکی۔

محکمہ ماحولیات نے دسمبر 2022ء میں زیر زمین پانی کا تجزیہ کرایا تھا۔ جس میں کرومیم، نائٹریٹس اور میٹلز (ٹی ڈی ایس)کی مقدار خطرناک حد تک زیادہ پائی گئی تھی۔

اس رپورٹ کی بنیاد پر لاہور ہائیکورٹ نے قصور کے ٹینری مالکان کو تمام یونٹس میں ایفولینٹ ٹریٹمنٹ /کروم ریکوری پلانٹس لگوانے کی ہدایت کی تھی مگر صرف دو کارخانوں نے ہی یہ پلانٹ لگائے۔

&nbsp;جوڈیشل واٹر اینڈ انوائرمنٹ کمیشن نے ٹینریز میں کروم ریکوری پلانٹ لگوانے کے لیے دباؤ بڑھانا شروع کیا تو ضلعی انتظامیہ اور ٹینری مالکان کے درمیان پانچ ستمبر کو ہونے والی میٹنگ میں&nbsp; کروم ریکوری پلانٹس لگانے پر اتفاق ہوا جبکہ پنجاب سمال انڈسٹریز کارپوریشن نے پلانٹس کے لیے ٹینریز کو آسان قرضے دینے پر رضا مندی ظاہر کی۔

آلودگی کیس کی اگلی سماعت کے دوران کمشنر لاہور ڈویژن نے لاہور ہائیکورٹ میں پیشکش کی کہ کے ٹی ایم ڈبلیو اے کے تمام امور ٹینری مالکان کے سپرد کرنے کو تیار ہیں۔ جس پر عدالت نے تین ماہ (قابل توسیع) کے لیے احکامات جاری کر دیے۔

&nbsp;اب کے ٹی ڈبلیو ایم اے کو بہتری کی امید پر ٹینری مالکان کے حوالے کیا جا چکا ہے۔ کے ٹی ڈبلیو ایم اے، ٹینری مالکان اور ضلعی انتظامیہ نے ڈیڑھ ماہ قبل دس نومبر کو ایک سمجھوتے پر دستخط کیے۔ جس کے مطابق:

آلودہ پانی دریا میں پھینکنے سے قبل اسے پنجاب انوائرمنٹ کوالٹی سٹینڈرڈ کے مطابق صاف کیا جائے گا۔ تین ماہ کے اندر ہر ٹینری میں کروم ریکوری پلانٹ لگائے جائیں گے ۔

ٹریٹمنٹ پلانٹ 24 گھنٹے چلایا جائے گا۔ ضلعی انتظامیہ تمام معاملات کی مکمل نگرانی کرے گی اور رپورٹ ہر ہفتے ہائیکورٹ ، کمشنر لاہور، ماحولیاتی ادارے اور جوڈیشل کمیشن کو ارسال کی جائے گی۔

اب صدر ٹینریز ایسوسی ایشن دین گڑھ ( ٹی اےڈی ) کے ٹی ڈبلیو ایم اے کے نئے سربراہ (منیجنگ ڈائریکٹر) ہیں۔

جنرل منیجر کے ٹی ڈبلیو ایم اے، ٹی اےڈی کے دو ارکان ، سمال ٹینریز ایسوسی ایشن کا نمائندہ، ڈائریکٹر ماحولیات اور ڈسٹرکٹ اکاؤنٹس افسر(بطور ڈائریکٹر فنانس) اتھارٹی کے رکن ہیں۔

&nbsp;ٹی اے ڈی کے صدر میاں شان الہٰی دعویٰ کرتے ہیں کہ ضلعی انتظامیہ ٹریٹمنٹ پلانٹ کو چلانے میں مکمل ناکام رہی ہے۔ وہ تقریباً 10 سال سے بند پلانٹ کو بحال کر کے جلد چلانے جا رہے ہیں۔

&nbsp;ٹینریز مالکان، کے ٹی ڈبلیو ایم اے کے لگ بھگ دو کروڑ روپے کے ڈیفالٹر ہیں۔ اس سلسلے میں شان الہٰی کہتے ہیں کہ پہلے کے ٹی ڈبلیو ایم اے کا انتظامیہ سے چارج لینا ضروری تھا۔ اب نادہندہ ٹینری مالکان سے بھی واجبات اقساط میں وصول کر لیے جائیں گے۔

لیکن یہاں کی سول سوسائٹی، وکلاء اور تاجر اس معاہدے سے پر امید نہیں ہیں۔

ملک شاہنواز ایڈووکیٹ کہتے ہیں کہ ٹینری مالکان کو کے ٹی ڈبلیو ایم اے کا مختار کل بنانا ایسے ہی ہے &#39;جیسے قاتل کو اپنے مقدمے کا منصب بنا دیا جائے۔&#39;

این جی او گڈتھنکر کے سی ای او وقاص کے خیال میں یہ ممکن نہیں کہ ٹینری مالکان واٹر ٹریٹمنٹ پلانٹ کے اخراجات برداشت کریں اور اسے مؤثر انداز میں چلائیں۔

&nbsp;&quot;یہ توقع کرنا احمقوں کی جنت میں رہنے کے مترادف ہوگا۔&quot;

تاہم ڈپٹی کمشنر محمد ارشد بھٹی کہتے ہیں کہ انتظامیہ اپنی ذمہ داری پوری کرے گی۔ ٹینری مالکان کے واجبات کو بعد میں دیکھ لیں گے &quot; فی الحال ہمیں اچھے کی امید رکھنی چاہیے۔&quot;

&nbsp;ٹینری مالک محمد یوسف ثقلین کہتے ہیں کہ آلودہ پانی کے مسائل کی سنگینی سے واقف ہیں۔

&quot;ہم ایفولینٹ ٹریٹمنٹ پلانٹس لگانے کی حمایت کرتے ہیں اور پہلے ہی کے ٹی ڈبلیو ایم اے کے تمام اخراجات (تقریباً 50 لاکھ روپے ماہانہ )برداشت کر رہے ہیں۔&quot;

قصور میں صنعتی فضلہ صاف کرنے کا پلانٹ: سرطان جیسی بیماریوں اور آبی آلودگی کا بڑا ذریعہ۔

نئی حلقہ بندیوں کے ساتھ ہی ضلع قصور کو جہاں دس سال قبل ختم ہونے والی ایک صوبائی نشست واپس مل گئی ہے۔ وہیں سیاسی حلقوں میں نئی حد بندی پر بحث اور تنقید جاری ہے۔

ابتداء میں مقامی سیاسی رہنماؤں کے تیور دیکھ کر لگ رہا تھا کہ حلقوں میں معمولی ردوبدل پر بھی الیکشن کمیشن میں اعتراضات کی بھر مار ہو جائے گی۔ تاہم ابھی تک ضلع میں کسی پارٹی کا کوئی اعتراض ریکارڈ پر نہیں آیا ہے۔

&nbsp;2013ء کے عام انتخابات میں ضلع قصور سے قومی اسمبلی کے چار اور صوبائی اسمبلی کی دس ارکان منتخب ہوئے تھی۔ لیکن پچھلے انتخابات میں ایک نشست کم کر دی گئی تھی۔ اب نئی حلقہ بندی میں یہاں صوبائی اسمبلی کی نشستیں دوبارہ 10 ہو گئی ہیں جبکہ قومی اسمبلی کی چار نشستیں برقرار ہیں۔

2018ء میں قومی اسمبلی کے حلقے یہاں این اے137 سے این اے 140 تک تھے۔ اب یہ نمبر این اے 131 سے شروع ہو کر این اے 134 پر ختم ہوتے ہیں۔ ان قومی حلقوں میں کوئی بڑی تبدیلی نہیں آئی ہے۔

پچھلے الیکشن میں قصور کے صوبائی حلقے پی پی 174 سے پی پی 182 تک تھے۔ اب یہاں حلقوں کے نمبر پی پی 175 سے پی پی 184 تک ہو گئے ہیں۔

دلچسپ بات یہ ہے کہ تھوڑی بہت تبدیلی کے ساتھ یہ تمام حلقے 2013ء والے ہی ہیں۔

حالیہ حلقہ بندیوں میں دسویں صوبائی حلقے کی تشکیل کے لیے ضلع کے کسی ایک حلقے کو نہیں توڑا گیا۔ بلکہ متعدد حلقوں میں معمولی ردوبدل کی گئی ہے۔

نئے حلقے میں زیادہ تر آبادیاں پی پی 180، پی پی 177 اور پی پی 178 سے نکال کر شامل کی گئی ہیں۔

عام خیال یہی ہے کہ قصور کی نئی حلقہ بندی کا مجموعی فائدہ ن لیگ کو ہوا ہے۔ تاہم سب سے زیادہ فائدہ ن لیگ کے سابق ایم پی اے ندیم یعقوب سیھٹی کو ہوا ہے۔

ندیم یعقوب کا حلقہ پی پی 175 گزشتہ عام انتخابات میں تحصیل کوٹ رادھا کشن کے ساتھ منسلک کر دیا گیا اور ان کا آبائی علاقہ مصطفیٰ آباد قصور شہر کے ساتھ شامل کر دیا گیا۔ یوں ان کا ووٹ بینک تقسیم ہو گیا تھا۔

تاہم وہ ن لیگ کا ٹکٹ نہ ملنے پر آزاد کھڑے ہو گئے تھے اور پھر منظر سے غائب رہے۔ اب وہ دوبار اپنی جگہ بناتے نظر آ رہے ہیں۔

حلقہ پی پی 178 میں کوئی بڑی تبدیلی نہیں کی گئی اور یہاں روایتی سیاست دانوں کے اپنے اپنے دھڑے دھڑے موجود ہیں۔

سابق وزیراعظم شہباز شریف کے مشیر خاص ملک محمد احمد خان اپنے حلقوں کی حد بندی سے اب بھی مطمئن نہیں ہیں۔ وہ پی پی 179 سے متوقع امیدوار ہیں اور اس حلقے سے بھیلہ ہتھاڑ، گاڑھے والا اور پکھوکی یونین کونسل کو نکلوا کر اس میں عثمان والا کو شامل کرانا چاہتے تھے۔ لیکن ایسا نہیں ہو سکا۔

پی پی 180 نسبتاً بڑا حلقہ تھا۔ نئی حلقہ بندی میں اس حلقے کی آبادی کم کرنا پڑی۔

اس لئے تین یونین کونسل بشمول پیال کلاں، تلونڈی اور عثمان والا کی پڑی آبادیوں کو یہاں سے نکال دیا گیا ہے۔ جبکہ الٰہ آباد اور گیلن ہتھار کی آبادی اس حلقے میں شامل کی گئی ہیں۔

پی پی 180 کے کچھ علاقے ادھر ادھر ہونے کا فائدہ ن لیگ کے ملک خاندان کو ہوا ہے۔ اسی خاندان کے ایک نوجوان ملک مظہر رشید اب حلقے میں متحرک نظر آتے ہیں۔ پارٹی ٹکٹ کا حتمی فیصلہ ہونے تک وہ ن لیگ کے امیدوار سابقہ ایم پی اے احسن رضا کے مقابلے میں اپنی انتخابی مہم چلائیں گے۔

حسن اختر موکل کے بیٹے وقاص حسن موکل بھی پی پی 180 سے ق لیگ کے متوقع امیدوار ہیں۔ وہ کہتے ہیں کہ آبادی کے تناسب سے حلقہ بندیوں میں تبدیلیاں ہوتی رہتی ہیں۔ یونین کونسلوں یا ایک دو گاؤں کے ردوبدل سے کسی سیاسی کارکن کو کوئی فرق نہیں پڑنا چاہیے۔

پاکستان پیپلز پارٹی کے مرکزی رہنما چوہدری منظور نئی حلقہ بندی سے نالاں ہیں۔

وہ بتاتے ہیں کہ حلقہ بندی میں کوئی اصول مد نظر نہیں رکھا گیا اور نہ ہی کوئی کوئی منصوبہ بندی کی گئی تھی۔ اگر کوئی منصوبہ بندی تھی تو وہ صرف ن لیگ کو فائدہ پہنچانے کے لیے تھی۔

وہ کہتے ہیں کہ نئی حد بندی نے انتخابی نظام کو تباہ کر کے رکھ دیا ہے۔ ان کے حلقہ این اے 132 میں صوبائی اسمبلی کے چار حلقے( پی پی 176 تا179) پڑتے ہیں۔ یہ سراسر زیادتی ہےاور انتخابی مہم چلانا نا ممکن ہے۔

جماعت اسلامی کے متوقع امیدوار حاجی محمد رمضان بھی چوہدری منظور سے اتفاق کرتے ہیں۔ وہ بتاتے ہیں کہ حالیہ حلقہ بندیاں کسی قواعد و ضوابط کے بغیر کی گئیں ہیں اور اس کا مقصد صرف اور صرف ن لیگ کو فائدہ دینا ہے۔

وہ کہتے ہیں کہ پی پی 180 اور 183 میں رانا اور راجپوت برادری کے علاقے ڈھونڈ ڈھونڈ کر شامل کیے گئے تاکہ ایک سیاسی خاندان کو فائدہ ہو۔ یہ خاندان ضلع کی دو قومی اور تین صوبائی نشستوں پر انتخابات لڑ رہا ہے۔

پی ٹی آئی قصور کے رہنما قیصر ایوب کا خیال ہے کہ حلقہ بندیاں کوئی معنی نہیں رکھتیں کیونکہ ووٹ شخصیت کی بجائے پارٹی کو ملے گا۔ البتہ ضلعے میں صوبائی حلقے کے اضافے سے ان کی پارٹی کے دو متوقع امیدوارں کا تنازع ختم ہو گیا ہے۔ بیرسٹر شاہد محمود اور محمد حسین ڈوگر میں سے اب کوئی بھی آزاد لیکشن نہیں لڑے گا۔

نئے حلقے کے لیے صوبائی حلقوں میں توڑ پھوڑ سے صوبائی امیدواواروں کو تو شاہد کم فرق پڑے۔ تاہم قومی اسمبلی کے ایک حلقے میں بعض جگہ تین اور چار صوبائی حلقے بھی آ گئے ہیں۔ یوں امیدواروں کے لیے مشترکہ انتخابی مہم خاصی مشکل ہو جائے گی۔

قصور میں الیکشن کمیشن کی طرف سے کی گئی نئی حلقہ بندیاں پر کئی اعتراضات بھی اٹھائے گئے ہیں ۔ یہ اعتراضات الیکشن ایکٹ 2017ء کے سیکشن 20&nbsp; رول 10 میں وضع کیے گئے اصولوں اور قواعد و ضوابط کے تحت ہیں۔ اگرچہ اپیل کنندگان کوئی نمایاں سیاسی شخصیات نہیں اور نہ ہی یہ اعتراضات کسی سیاسی پارٹی کے پلیٹ فارم سے اٹھائے گئے ہیں&nbsp; تاہم بیشتر اپیلیں ان حلقوں سے آئی ہیں جہاں ن لیگ کے بڑے برج براجمان ہیں۔

جیسا کہ پی پی 183, 184 میں سابق سپیکر صوبائی اسمبلی رانا محمد اقبال اور پی پی 178, 179 اور 176، جہاں ن لیگ سے تعلق رکھنے والے ملک احمد خان کا اثر رسوخ ہے۔ یہ قصور کا بڑا سیاسی خاندان ہے۔ اسی طرح قومی اسمبلی کے وہ حلقے زیادہ اعتراضات کی زد&nbsp; میں ہیں جہاں ن لیگ کے بڑے نام اپنا قبضہ جمانے ہوئے ہیں۔ ان میں این اے 132 اور این اے 134 قابلِ ذکر ہیں۔

درخواست گزاروں کی طرف سے سب سے زیادہ اعتراض نئے حلقوں میں ووٹروں کی تعداد سے متعلق ہے جو الیکشن کمیشن کے اپنے طے کردہ فارمولا کے مطابق نہیں ہے۔ دوسرا بڑا اعتراض قانون گو حلقہ اور پٹواری سرکل کی ہیر پھیر ہے جسے الیکشن کمیشن نے یا تو درست کرنا ہے یا اس کا قانونی جواز پیش کرنا ہے۔

&nbsp;

افضل انصاری

'میواتی خود کو اردو کا وارث سمجھتے تھے اور اسے اپنی زبان مانتے رہے': ہجرت کے 76 سال بعد میواتی کو زبان کا درجہ کیسے ملا؟

قصور کو کچرہ کنڈی بنانے میں کس کا قصور ہے؟

قصور میں آوارہ کتوں کا خاتمہ آخر کس کی ذمہ داری ہے؟

قصور کا نیا سیاسی منظر نامہ اور پرانے سیاست دان، شہباز شریف کس نشست پر کھڑے ہیں؟

کیا قصور کے ٹینریز مالکان سے واٹر ٹریٹمنٹ پلانٹ چلانے کی توقع کی جا سکتی ہے؟

ضلع قصور:صوبائی نشست کا اضافہ،کیا ن لیگ کو واقعی حلقوں میں ردوبدل کا فائدہ ہو گا ؟