پریشان حال آصفہ علی مسلسل اپنے دوپٹے کے پلُو سے اپنے آنسو صاف کر رہی ہیں۔ انہیں یہ پریشانی کھائے جا رہی ہے کہ ہر ماہ دو بار ملنے والے 20 کلوگرام آٹے کے تھیلے سے وہ کیسے اپنے گھر کے 11 افراد کی ضروریات پورا کر پائیں گی؟

گیارہ سال قبل جب آصفہ کے شوہر کا انتقال ہوا تو اس وقت ان کی عمر 37 برس تھی۔ جب سے وہ اپنے آٹھ بچوں، ساس اور سسر کی کفالت کر رہی ہیں۔ وہ ایک مقامی نجی سکول میں &rsquo;خالہ&lsquo; کی پوسٹ پر کام کرتی ہیں جس سے ملنے والے قلیل تنخواہ پر اس کنبے کا انحصار ہے۔

گلگت شہر کے مجینی محلہ کی رہائشی آصفہ کو گذشتہ ایک سال سے گلگت بلتستان کے لیے مختص کوٹے کا آٹا بر وقت نہیں مل رہا۔ ان کے مطابق محکمہ خوراک کی جانب سے مقرر کردہ آٹا ڈیلر ہر پندھرواڑے 20 کلوگرام کا تھیلہ تھما دیتے ہیں &rsquo;&rsquo;وہ بھی بعض اوقات کڑی دھوپ اور بعض اوقات شدید سردی میں لمبی قطاروں میں کئی گھنٹے انتظار کے بعد۔&lsquo;&lsquo;

گلگت شہر کے علاقہ جوٹیال کے باسی شیر نبی کہتے ہیں کہ پہلے انہیں ہر ماہ 80 کلو سبسڈائزڈ آٹا ملتا تھا جسے گھٹا کر اب 40 کلو کر دیا گیا ہے جو ان کی گھریلو ضروریات کے لیے ناکافی ہے۔

<h2>&quot;فی خاندان آٹے کی فراہمی نصف کر دی گئی ہے&quot;</h2>

گلگت بلتستان میں گندم کی سبسڈی کا آغاز 1972ء میں ہوا جس کا اعلان اس وقت کے حکمران ذوالفقار علی بھٹو نے کیا تھا۔ لیکن پچھلی تقربیاً ایک دہائی سے اس نے تنازع کی سی صورت اختیار کر لی ہے جس میں آئے روز شدت آتی جا رہی ہے۔ 
وفاقی وزراتِ امورِ کشمیر اور گلگت بلتستان کے ایک اہلکار کے مطابق دور افتادہ علاقہ ہونے کی وجہ سے یہ سبسڈی دراصل ٹرانسپورٹ پر دی گئی تھی۔ &rsquo;&rsquo;اس طرح ڈیڑھ لاکھ ٹن سالانہ گندم کا کوٹہ گلگت بلتستان کے لیے مختص کر دیا گیا جو انہیں اُسی ریٹ پر دیا جاتا تھا جس ریٹ پر پنجاب کی آٹے کی مِلوں کو دیا جاتا تھا۔&lsquo;&lsquo;

سنہ 2000ء تک گللگت بلتستان کے باشندوں کو گندم آٹھ روپے فی کلو کے حساب سے دی جاتی رہی جبکہ پنجاب میں آٹے کی مِلوں کے لیے بھی یہی نرخ مقرر تھا۔ لیکن 2010ء-2011 ء تک گندم کا نرخ بڑھتے بڑھتے 24.37 روپے فی کلو تک جا پہنچا لیکن گلگت بلتستان میں اس کی فی کلو قیمت آٹھ روپے ہی رہی۔

یہی وجہ ہے کہ 2012ء میں وزارتِ امورِ کشمیر اور گلگت بلتستان نے فی کلو گندم کا ریٹ آٹھ روپے سے بڑھا کر 11 روپے کر دیا گیا اور دو سال بعد اسے 14 روپے فی کلو کر دیا۔

سال 2014ء میں ہی حکومت نے گندم کے نرخ میں مزید دو روپے فی کلو اضافہ کا اعلان کیا تو لوگ چُپ نہ رہے اور اسی سال اپریل کے مہینے میں گلگت بھر میں عوامی ایکشن کمیٹی کے تحت احتجاجوں کا ایک سلسلہ چل نکلا۔

عوامی ایکشن کمیٹی تحریک میں تمام مکاتب فکر، سیاسی جماعتوں اور حتیٰ کہ ماضی میں ایک دوسرے کے خون کی پیاسی فرقہ ورانہ تنظمیوں نے بھی ایک پلیٹ سے حصہ لیا۔

یہ احتحاج اتنے مؤثر تھے کہ وفاقی حکومت کو گندم کا ریٹ دوبارہ 11 روپے فی کلو پر لانا پڑ گیا۔ سنہ 2014ء میں وفاقی حکومت کو گندم کی سبسڈی کی مد میں پانچ ارب روپے سالانہ دینا پڑتے تھے۔

پاکستان تحریک انصاف کی حکومت نے اپنے دورِ حکومت میں گلگت بلتستان کے لیے گندم کی سبسڈی کے لیے آٹھ ارب روپے مختص کر رکھے تھے لیکن گذشتہ سال اپریل میں قومی اسمبلی میں عدمِ اعتماد کی تحریک کی کامیابی کی صورت میں بننے والے پاکستان ڈیموکریٹک موومنٹ کی مخلوط حکومت نے اپنی حکومت کے قیام کے ایک ماہ بعد ہی اس سبسڈی کو نصف کر دیا۔

اس کی وجہ سے ایک بار پھر گلگت بلتستان کے طول و عرض میں احتجاجی مظاہروں کا&nbsp; سلسلہ چل نکلا جس کی وجہ سے وفاقی حکومت کو سبسڈی کو چھ ارب روپے سالانہ کرنا پڑا۔

اس طرح گللگت بلتستان کو ہر ماہ آٹھ ہزار 582 بوری کم دی جانے لگی جس کی وجہ سے گلگت بلتستان میں مطلوبہ ضرورت سے 34 لاکھ 32 ہزار کلو آٹے کا ماہانہ کمی کا سامنا کرنا پڑا۔

اسی بات کی طرف اشارہ کرتے ہوئے شیر نبی کہتے ہیں کہ پہلے انہیں سبسڈائزڈ ریٹ پر ہر ماہ 80 کلو آٹا ملتا جو اب گھٹ کر 40 کلو پر آ گیا ہے۔

جوٹیال کے آٹا ڈیلر شبیر شاہ کہتے ہیں کہ حکومت کی جانب سے انہیں 200 افراد کی لسٹ دی گئی ہے جنہیں ہر ماہ رعایتی نرخ پر آٹا دیا جاتا ہے &rsquo;&rsquo;لیکن مجھے ہر ماہ حکومت کے سول سپلائی کے ادارے کی طرف سے 20 کلو کے صرف 180 تھیلے ملتے ہیں۔ میں باقی ماندہ 20 افراد کو رعایتی آٹا کہاں سے دوں؟&lsquo;&lsquo;

گلگت بلتستان کے محکمہ خوراک میں تعینات فوڈ ڈائریکٹر اکرام محمد کہتے ہیں کہ گلگت بلتستان کی آبادی میں تیزی کے ساتھ اضافہ ہو رہا ہے۔

ان کے مطابق 1972ء میں جب یہ سبسڈی شروع کی گئی تو گلگت بلتستان کی آبادی چھ لاکھ سے بھی کم تھی اور 2017ء کی مردم شماری کے مطابق اس کی آبادی تقریباً 15 لاکھ ہے۔

&quot;گلگت بلتستان میں سالانہ تقریباً دو لاکھ 20 ہزار میٹرک ٹن گندم کی طلب ہے لیکن فی الوقت وفاقی حکومت ہمیں سالانہ ایک لاکھ 60 ہزار میٹرک ٹن گندم فراہم کی جارہی ہے۔اس طرح ہمیں تقربیاً سالانہ 70 ہزار میٹرک ٹن گندم (تقریباً 32 فی صد) کی کمی کا سامنا ہے۔&lsquo;&lsquo;

وہ کہتے ہیں کہ گلگت بلتستان میں گندم پر سبسڈی کو ختم نہیں کیا گیا بلکہ ٹرانسپورٹ کی مد میں اٹھنے والے اخراجات کو پورا کرنے کے لیے گندم کی قیمتوں میں اضافہ کیا جا رہا ہے &rsquo;&rsquo;جس کو کچھ لوگ غلط رنگ دے رہے ہیں۔&lsquo;&lsquo;

ان کے مطابق پٹرولیم مصنوعات میں اضافہ بھی گندم کے نرخ میں اضافہ کا ایک اہم محرک ہے۔

&rsquo;&rsquo;مثال کے طور پر کچھ ماہ قبل پنجاب سے گندم کے ٹرک کا کرایہ ایک لاکھ 20 ہزار روپے تھا جو اب ایک لاکھ 50 ہزار تک جا پہنچا ہے۔&lsquo;&lsquo;

انہوں نے کہا کہ گلگت بلتستان میں رعایتی نرخ پر آنے والی گندم کو مقامی آٹے کی مِلوں میں پیس کر ڈھائی ہزار آٹا ڈیلروں کے ذریعہ لوگوں تک پہنچایا جاتا ہے۔ &rsquo;&rsquo;اب حکومت نے فیصلہ کیا ہے ڈیلر شپ ختم کر کے پورے گلگت بلتستان میں 170 سیل پوائنٹ قائم کیے جائیں گے جس سے سبسڈائزڈ آٹے کی ترسیل میں شفافیت آئے گی اور ہر گھرانے کو آٹا وقت پر ملے گا۔&lsquo;&lsquo;

<h2>آٹا کہاں جا رہا ہے؟</h2>

گندم سبسڈی میں کٹوتی کے حوالے سے آزاد کشمیر اور گلگت بلتستان کے امور کے وفاقی وزیر قمر زمان کائرہ کا موقف ہے کہ وفاقی حکومت نے مشکل معاشی صورتِ حال کے باوجود گندم سبسڈی کی مد میں گلگت بلتستان کی گرانٹ میں دو ارب کا اضافہ کیا ہے۔

دلچسپی کی بات ہے کہ وفاقی وزیر دو ارب روپے اضافہ کا ذکر تو کرتے ہیں لیکن اسی گرانٹ میں چار ارب روپے کٹوتی کی بات کو گول کر جاتے ہیں۔

کائرہ کہتے ہیں کہ سبسڈی کا آٹا مافیا کے ہاتھوں لگ چکا ہے جس کے باعث نہ عوام کو بر وقت آٹا دستیاب ہو رہا ہے اور نہ اچھی کوالٹی کا آٹا مل رہا ہے۔

گلگت بلتستان کے محکمہ خوراک کے اعداد و شمار قمر زمان کائرہ کے اس الزام کو تقویت دیتے ہیں۔

ان اعداد و شمار کے مطابق گندم کی طلب اور رسد 32 فیصد کا فرق ہے لیکن آصفہ علی اور شیر نبی جیسے شہریوں کے کوٹے میں 50 فیصد کمی کر دی گئی ہے۔ کسی کو کچھ معلوم نہیں کہ باقی ماندہ 18 فیصد آٹا کہاں جاتا ہے؟

دوسری طرف گلگت بلتستان حکومت کے وزیر اطلاعات فتح اللہ خان کہتے ہیں کہ گلگت بلتستان میں پاکستان تحریک انصاف کی حکومت کو ناکام کرنے کے لیے گندم کی سبسڈی میں کٹوتی کی گئی ہے۔

انہوں نے متنبہ کیا کہ &rsquo;&rsquo;اگر ہماری حکومت کے ساتھ یہ رویہ جاری رہا تو رمضان المبارک کے مہینے میں یہاں مکمل قحط پیدا ہونے کا خدشہ ہے۔&lsquo;&lsquo;

شاید اسی خدشہ کے مدِ نظر رکھتے ہوئے اس سال ماہِ رمضان کے آغاز سے دو روز قبل وفاقی کابینہ کی اکنامک کوارڈینیشن کمیٹی نے گلگت بلتستان کو مارچ اور اپریل کے مہینے کے لیے 25 ہزار میٹرک ٹن گندم کی منظوری دی ہے۔

گندم کی خریداری میں سرگرم ذخیرہ اندوز: ملک کے اندر آٹے کی قیمتوں میں آضافے کا خدشہ۔

گلگت بلتستان میں آٹے کی راشن بندی میں کمی کیوں ہو رہی ہے؟

text

گلزار بی بی کے پاس رہنے کے لیے کوئی مستقل ٹھکانہ نہیں۔&nbsp;

پچھلے دو سال میں وہ تین جگہیں بدل چکی ہیں اور اب کئی ماہ سے اپنی ایک سہیلی کے ساتھ رہ رہی ہیں۔ تاہم انہیں معلوم نہیں کہ وہ مزید کتنا عرصہ اس جگہ ٹِک پائیں گی۔

ان کی ابتلا کی ابتدا 2014 میں ہوئی جب 19 برس کی عمر میں ان کی شادی ان کے والد کے دوست کے بیٹے سے ہوئی۔ وہ کہتی ہیں کہ ان کا شوہر انہیں &quot;مارتا پیٹتا تھا&quot; اور ان کے سسرالی رشتہ دار بھی ان کے ساتھ &quot;بدسلوکی سے پیش آتے تھے&quot;۔ دو سال بعد جب انہوں نے ایک بیٹی کو جنم دیا تو انہیں کچھ امید لگی کہ شاید اب ان کے حالاتِ زندگی بہتر ہو جائیں لیکن وہ کہتی ہیں کہ اس کے باوجود ان کی &quot;مشکلات میں کوئی کمی نہ آئی&quot;۔&nbsp;

بالاآخر 2020 میں ان کے شوہر نے انہں طلاق دے کر گھر سے نکال دیا اور ان کی بیٹی کو بھی اپنے پاس رکھ لیا۔&nbsp;

طلاق ملنے کے بعد گلزار بی بی اپنے میکے چلی گئیں لیکن ان کا وہاں رہنا ممکن نہ ہو سکا کیونکہ ان کے والدین وفات پا چکے تھے اور ان کے بھائی انہیں اپنے ساتھ رکھنے کو تیار نہیں تھے۔ نتیجتاً وہ اپنی ایک سہیلی کے ساتھ رہنے لگیں جس نےکچھ عرصہ بعد انہیں ایک ڈاکٹر کے ہاں ملازمت دلا دی۔ اس ڈاکٹر نے انہیں رہنے کے لیے بھی جگہ دے دی۔ &nbsp;

وہ خوش تھیں کہ ان کے روزگار اور رہائش کا مسئلہ اکٹھا ہی حل ہو گیا ہے لیکن، ان کے مطابق، انہیں &quot;ملازمت کرتے ابھی چند ماہ ہی ہوئے تھے کہ وہ ڈاکٹر اپنے خاندان کے ساتھ بیرون ملک منتقل ہو گیا&quot; اور وہ ایک مرتبہ پھر سڑک پر آ گئیں۔ تاہم ان کی ایک اور سہیلی انہیں اپنے گھر لے گئیں جہاں وہ اب تک رہ رہی ہیں۔&nbsp;

گلگت شہر کی باسی گلزار بی بی چاہتی ہیں کہ ان کا بھی اپنا گھر ہو جہاں وہ اپنی بیٹی کو بھی اپنے پاس رکھ سکیں لیکن نہ تو ان کے پاس اس کے لیے درکار مالی وسائل ہیں اور نہ ہی سرکاری سطح پر اُن جیسی بے سہارا عورتوں کے لیے کوئی ایسا ادارہ موجود ہے جو انہیں مستقل رہائش فراہم کر سکے۔

گلگت میں خواتین کے لیے مخصوص پولیس سٹیشن کی انچارج حُسن بانو کہتی ہیں کہ یہ مسئلہ صرف گلزار بی بی کو ہی درپیش نہیں بلکہ ایسی درجنوں بے گھر خواتین ان کے پاس آتی ہیں &quot;مگر وہ ان کے لیے کچھ بھی نہیں کر پاتیں&quot;۔ اپنی بات کی وضاحت کرتے ہوئے ان کا کہنا ہے کہ وہ خواتین جنہیں تشدد کے بعد گھر سے نکال دیا جاتا ہے یا وہ خواتین جو شوہروں اور سسرال والوں کے برے سلوک سے تنگ آ کر خود اپنا گھر چھوڑ دیتی ہیں انہیں &quot;زیادہ عرصے تک پولیس سٹیشن میں نہیں رکھا جا سکتا کیونکہ ایک تو پولیس سٹیشن میں زیادہ جگہ نہیں ہوتی اور دوسرا یہ کہ پولیس کے پاس ایسی خواتین کی دیکھ بھال اور نگہداشت کے لیے درکار مالی وسائل بھی نہیں ہوتے&quot;۔

اس لیے وہ کہتی ہیں کہ جب کوئی شادی شدہ خاتون ان کے پاس گھریلو تشدد کی شکایت لے کر آتی ہے تو ان کی &quot;یہی کوشش ہوتی ہے کہ وہ فریق مخالف سے صلح کر لے&quot;۔ گلگت اور غِذر میں قائم کیے گئے خواتین کے مخصوص پولیس سٹیشنوں کا ریکارڈ ظاہر کرتا ہے کہ تشدد کا شکار اکثر خواتین ایسا ہی کرتی ہیں کیونکہ، حُسن بانو کے بقول، &quot;انکے پاس سر چھپانے کا کوئی ٹھکانہ نہیں ہوتا&quot;۔ اس ریکارڈ کے مطابق ان دونوں پولیس سٹیشنوں میں 2012 اور 2022 کے درمیان گھریلو تشدد کی دو سو 50 شکایات آئیں لیکن ان میں سے تقریباً دو سو پر کوئی کارروائی نہیں کی گئی کیونکہ، پولیس کی مطابق، ان میں ملوث فریقین نے صلح کر لی تھی۔&nbsp;

نیک پروین نامی ایک مقامی سماجی کارکن خاتون اس صلح کے پیچھے کارفرما عوامل پر روشنی ڈالتے ہوئے کہتی ہیں کہ &quot;گھریلو ناچاقی، تشدد اور اس کے نتیجے میں طلاق پانے والی خواتین کا اپنے سسرال کے ساتھ رہنا تو ناممکن ہوتا ہی ہے ان کے میکے والے بھی انہیں مالی بوجھ سمجھتے ہیں&quot;۔ ان کا کہنا ہے کہ &quot;ایسی خواتین کو معاشرے میں بھی اچھی نگاہ سے نہیں دیکھا جاتا بلکہ انہیں ہر وقت طعن و تشنیع کا سامنا کرنا پڑتا ہے&quot;۔&nbsp;

نیک پروین کہتی ہیں کہ اس طرح کے حالات کا شکار خواتین کی مشکلات کا ایک ہی حل ہے کہ حکومت ان کے لیے سرکاری پناہ گاہیں بنائے &quot;جہاں وہ سکون سے زندگی گزار سکیں&quot;۔&nbsp;

<h2>ابھی کچھ اور دیر باقی ہے</h2>

گلگت-بلتستان میں 2009 سے لے کر 2014 تک پاکستان پیپلز پارٹی کی حکومت رہی۔ اپنے دورِ اقتدار میں اس جماعت نے پہلی بار اس خطے میں بے سہارا خواتین کے لیے ایک سرکاری دارالامان بنانے کا تصور پیش کیا۔ ابتدا میں حکومت کا خیال تھا کہ اس دارالامان کی اپنی عمارت کی تعمیر تک اسے کسی کرائے کی عمارت میں ہی قائم کر دینا چاہیے لیکن سرکاری قواعدوضوابط نے اسے اس امر کی اجازت نہیں دی۔

اسی دوران پاکستان پیپلز پارٹی کی حکومت کی آئینی مدت ختم ہو گئی اور 2015 میں گلگت بلتستان میں پاکستان مسلم لیگ نواز کی حکومت قائم ہوگئی۔ نئی حکومت کے دور میں کچھ عرصہ تو دارالامان کے قیام کا منصوبہ فائلوں میں ہی بند رہا مگر 2016 میں گلگت-بلتستان کے محکمہ برائے سماجی بہبود نے حکومت کو بتایا کہ اس نے دارالامان کی تعمیر کے لیے ضلع گلگت میں ایک مناسب جگہ منتخب کر لی ہے۔

تاہم اس انتخاب کے باوجود اس کی تعمیر شروع نہ ہو سکی۔&nbsp;

اس میں تاخیر کے پیشِ نظر ہنزہ کے سابق حکمران کی اہلیہ رانی عتیقہ غضنفر نے 2017 میں گلگت بلتستان قانون ساز اسمبلی میں ایک قرارداد پیش کی کہ بے سہارا خواتین کو تحفظ فراہم کرنے کے لیے خطے کے تینوں ڈویژنوں، گلگت، بلتستان اور دیامِر، میں ایک ایک سرکاری دارالامان قائم کیا جائے۔ وہ اس وقت حکمران جماعت پاکستان مسلم لیگ نواز کی طرف سے خود بھی اسمبلی کی رکن تھیں۔

اگرچہ ان کے ساتھی اراکینِ اسمبلی نے ان کی یہ قرارداد متفقہ طور پر منظور کر لی لیکن عملی طور پر اس معاملے میں ایک سال مزید کوئی پیش رفت نہ ہو سکی۔ یوں 19-2018 میں بالآخر ایک کروڑ چار لاکھ روپے کی لاگت سے گلگت شہر سے 13 کلومیٹر کے فاصلے پر واقع سکوار نامی جگہ پر دارالامان کی دومنزلہ عمارت کی تعمیر شروع ہوئی جو چار سال گزرنے کے باوجود ابھی تک مکمل نہیں ہو سکی۔&nbsp;

گلگت-بلتستان کے محکمہ برائے سماجی بہبود کے سیکرٹری نجیب عالم کا کہنا ہے کہ اس کی تکمیل میں ابھی دو ماہ مزید لگیں گے۔ اگرچہ وہ کہتے ہیں کہ اس کے بنتے ہی دارالامان کو فعال بنانے کے لیے اس کے عملے کی بھرتی کا عمل شروع کر دیا جائے گا لیکن کچھ سرکاری ذرائع کا کہنا ہے کہ مستقبل قریب میں ایسا ہوتا دکھائی نہیں دیتا۔

اس کی وجہ بیان کرتے ہوئے یہ ذرائع کہتے ہیں کہ حکومت نے ابھی تک اس بات کی منظوری نہیں دی کہ دارالامان کے لیے کتنا عملہ درکار ہوگا اور اس عملے میں سے کس کا گریڈ کیا ہو گا۔ اسی طرح اس عملے کی بھرتی اور تنخواہوں کے لیے درکار رقم بھی ابھی تک محکمہ برائے سماجی بہبود کو فراہم نہیں کی گئی۔

ہوئی تاخیر تو کچھ باعث تاخیر بھی تھا: بہاولنگر میں میڈیکل کالج کی تعمیر آٹھ سال سے کیوں التوا کا شکار ہے؟

گلشن میں کون بلبل نالاں کو دے پناہ: گلگت بلتستان میں بے سہارا خواتین کے لیے بنائی جانے والی پناہ گاہ کی تعمیر میں سالوں کی تاخیر۔

نیت زریں اپنے کمرے کے ایک کونے میں بیٹھ کر خودکلامی کرتی رہتی ہیں۔ اس دوران کبھی وہ اچانک ہنس دیتی ہیں اور کبھی ایک سرد آہ بھر کر کسی خیال میں یوں گم ہو جاتی ہیں کہ انہیں ارد گرد کا ہوش ہی نہیں رہتا۔&nbsp;

ان کا تعلق گلگت-بلتستان کے ضلع غِذر کی تحصیل اشکومن سے ہے جہاں وہ گوٹکوری نامی ایک سرسبز و شاداب گاؤں میں اپنے والدین اور بہن بھائیوں کے ساتھ رہتی ہیں۔ 12 سال پہلے وہ اپنے گاؤں کے قریب ہی گاہکوچ نامی جگہ پر واقع ویمن ڈگری کالج میں گیارہویں جماعت میں داخل ہوئیں۔ ان کی بڑی بہن آسیہ کے مطابق &quot;وہ کالج کی ذہین طالبات میں شمار ہوتی تھیں اسی لیے انہیں کالج کی ہیڈگرل بھی بنایا گیا&quot;۔&nbsp;

جب نیت زریں سیکنڈ ایئر میں پڑھ رہی تھیں تو ایک دن کالج سے واپس آ کر انہوں نے خود کو خلافِ معمول اپنے کمرے میں بند کر لیا۔ ان کی والدہ گلشن بی بی نے اس پر فکر مند ہو کر انہیں بار بار پکارا لیکن انہیں کوئی جواب نہ ملا لہٰذا انہوں نے گھر کے دیگر افراد کو کہا کہ وہ کسی نہ کسی طرح بند دروازہ کھولنے کی کوشش کریں۔ جب دروازے کی چٹخنی توڑ کر ان کے گھر کے کچھ لوگ کمرے میں داخل ہوئے تو انہوں نے دیکھا کہ نیت زریں گلے میں پھندا ڈال کر پنکھے سے جھول رہی ہیں۔&nbsp;

ان لوگوں نے انہیں نیچے اتار کر فوراً ہسپتال پہنچایا جہاں ان کی جان تو بچ گئی لیکن وہ اپنی یادداشت کھو بیٹھیں۔

ان کے اقدامِ خودکشی کی ممکنہ وجوہات بتاتے ہوئے آسیہ کہتی ہیں کہ 2011 میں نیت زریں کی منگنی شیرعالم نامی نوجوان سے ہوئی تھی جو فوج میں ملازم تھا لیکن وہ اسے پسند نہیں کرتی تھیں۔ وہ اپنی منگیتر سے روزانہ فون پر بات بھی کرنا چاہتا تھا جبکہ نیت زریں اس بات کو اچھا نہیں سمجھتی تھیں کیونکہ، آسیہ کے مطابق، &quot;وہ اپنی تعلیم پر توجہ دینا چاہتی تھیں&quot;۔&nbsp;

ان کے اقدامِ خودکشی کی دوسری ممکنہ وجہ یہ تھی کہ ان کے بڑے بھائی نے انہیں اپنی ہم جماعت طالبات کے ساتھ تفریحی دورے پر جانے کی اجازت نہیں دی تھی۔ آسیہ کہتی ہیں کہ ان کی بہن کی &quot;شدید خواہش تھی کہ وہ اپنی دوستوں کے ساتھ گھومنے پھرنے جائیں اور وہ کئی روز اس پر اصرار بھی کرتی رہیں لیکن جب انہیں اس کی اجازت نہ ملی تو وہ بہت دلبرداشتہ ہوئیں&quot;۔

تاہم غِذر میں رہنے والے لوگوں کا کہنا ہے کہ نیت زریں کا اقدامِ خودکشی کوئی اکلوتا واقعہ نہیں تھا بلکہ پچھلے چند سالوں میں درجنوں مقامی مردوں اور خواتین نے ایسی ہی کوششیں کی ہیں اور ان میں سے کئی ان میں کامیاب بھی ہو گئے ہیں۔&nbsp;

گلگت-بلتستان پولیس کے جمع کردہ اعداوشمار بھی یہی کہتے ہیں۔ ان &nbsp;سے ظاہر ہوتا ہے کہ پچھلے 44 سال میں پورے گلگت-بلتستان میں پیش آنے والے خودکشی کے تمام واقعات میں سے 75 فیصد صرف ضلع غِذر میں ہی پیش آئے ہیں حالانکہ اس کی آبادی اس خطے کی مجموعی آبادی کا 12 فیصد بھی نہیں بنتی۔&nbsp;

ان اعدادوشمار سے یہ بھی پتہ چلتا ہے کہ غِذر میں پچھلے 15 سالوں میں خودکشی کرنے والے لوگوں کی تعداد ماضی میں ایسا کرنے والوں کی تعداد سے پانچ گنا بڑھ گئی ہے۔ ان کے مطابق 1978 سے لے کر 2007 کے اختتام تک 30 سالوں میں اس ضلعے میں 50 افراد نے خودکشی کی جن میں 20 مرد اور 30 خواتین شامل تھیں جبکہ 2008 سے لے کر جون 2022 کے اختتام تک خودکشی کرنے والے مقامی لوگوں کی تعداد دو سو 62 ہو گئی۔ &nbsp;

گزشتہ 15 سالوں میں خودکشی کرنے والے افراد میں بچے بھی شامل ہیں اور 80 سال کے ضعیف العمر لوگ بھی اگرچہ ان میں سے 85 فیصد کی عمر 40 سال سے کم ہے۔ اسی طرح ان میں عورتوں کی تعداد (ایک سو 45) مردوں کی تعداد (ایک سو 17) سے کہیں زیادہ ہے۔&nbsp;

<h2>زندگی ہے اپنے قبضے میں نہ اپنے بس میں موت</h2>

گلگت شہر میں قائم کیے گئے دماغی اور نفسیاتی امراض کے ہسپتال میں ماہر نفسیات کے طور پر کام کرنے والی ایمن گل خواتین میں خودکشی کے بڑھتے ہوئے رجحان کو تشویش ناک قرار دیتے ہوئے کہتی ہیں کہ گلگت-بلتستان کے لوگ بالعموم اور مقامی خواتین کی ایک بڑی تعداد بالخصوص ذہنی اور نفسیاتی امراض میں مبتلا ہے۔ وہ کہتی ہیں کہ 2017 میں اِس ہسپتال کے قیام سے لے کر جون 2022 کے اختتام تک اس میں چار ہزار نو سو ایک مریضوں کا علاج ہو چکا ہے جن میں سے اکثر خواتین تھیں۔&nbsp;

ایمن گل سمجھتی ہیں کہ اِن خواتین کے نفسیاتی مسائل کی بنیادی وجہ ان پر ہونے والا ذہنی اور جسمانی تشدد ہے۔ وہ کہتی ہیں کہ &quot;خاندانی اور مالی مسائل کے سبب جنم لینے والی گھریلو تلخیوں کا نتیجہ عام طور پر خواتین پر تشدد کی صورت میں نکلتا ہے جس کی وجہ سے وہ شدید جذباتی اور نفسیاتی دباؤ کا شکار ہو جاتی ہیں&quot;۔ لیکن، ان کے مطابق، جب انہیں اس دباؤ سے نکلنے کا کوئی راستہ دکھائی نہیں دیتا تو وہ &quot;خودکشی جیسے انتہائی اقدام کی طرف مائل ہو جاتی ہیں&quot;۔

غِذر میں خواتین کے لئے مختص پولیس سٹیشن کی سربراہ عید نُما اس نکتہ نظر کی توثیق کرتے ہوئے کہتی ہیں کہ ان کے پاس ہر سال گھریلو تشدد کے کم از کم 25 مقدمات درج کرائے جاتے ہیں۔ تاہم وہ کہتی ہیں کہ اس تشدد کے علاوہ ذہنی تناؤ، ناپسندیدہ ازدواجی رشتوں اور محبت میں ناکامی کی وجہ سے بھی مقامی عورتیں اقدامِ خودکشی کر رہی ہیں۔&nbsp;

لیکن چونکہ اس طرف مائل ہونے والے زیادہ تر لوگ اپنی زندگی ختم کرنے کا کوئی ایسا طریقہ ڈھونڈتے ہیں جو نہ صرف کم سے کم تکلیف دہ ہو بلکہ اس میں ان کی ہلاکت بھی یقینی ہو اس لیے، غِذر کے ڈپٹی کمشنر طیّب سمیع کے مطابق، ان کی ایک بڑی تعداد دریا میں چھلانگ لگا کر اپنی زندگی کا خاتمہ کرتی ہے۔ ان کا کہنا ہے کہ اپریل اور جولائی کے درمیان مقامی دریا میں پانی کا بہاؤ اتنا تیز ہوتا ہے کہ اس میں کودنے والے شخص کو ایک معجزہ ہی بچا سکتا ہے۔

ضلعی انتظامیہ کا دعویٰ ہے کہ اسی وجہ سے وہ ایسے انتظامات کر رہی ہے جو خودکشی کے واقعات کو ہونے سے پہلے ہی روک سکیں۔ اس مقصد کے لیے پولیس نے غِذر میں ایک ایسا مرکز قائم کیا ہے جہاں لوگ اپنے علاقے میں ہونے والے گھریلو جھگڑوں یا خودکشی کے ممکنہ واقعات کے بارے میں فوری اطلاع دے سکتے ہیں۔ تاہم اس کی انتظامیہ کے پاس ایسے کوئی اعدادوشمار موجود نہیں جن سے پتہ چل سکے کہ اس میں موصول ہونے والی اطلاعات کی بنیاد پر کتنی جانیں بچائی گئی ہیں۔

غذر کے سپرنٹنڈنٹ پولیس شاہ میر کا یہ بھی کہنا ہے کہ جلد ہی مقامی لوگوں کو ایک ٹیلی فون ہیلپ لائن کا نمبر فراہم کیا جائے گا جسے استعمال کر کے وہ خودکشی کے واقعات میں پولیس کی بروقت مدد حاصل کر سکیں گے۔

ہم تو اس جینے کے ہاتھوں مر چلے: چترال میں معاشی اور معاشرتی دباؤ کا شکار لوگ 'خودکشی میں راہِ نجات ڈھونڈ رہے ہیں'۔

تنگ آ چکے ہیں کشمکش زندگی سے ہم: 'گلگت-بلتستان میں ہونے والے خودکشی کے تمام واقعات میں سے 75 فیصد صرف ضلع غِذر میں پیش آئے ہیں'۔

صابرہ بیگم کے مکان کی دیواروں میں دراڑیں پڑ گئی ہیں، اس کا فرش بیٹھنے لگا ہے اور اس میں ہر وقت ایک ناگوار بدبو پھیلی رہتی ہے۔

ان مسائل کی وجہ ان کے محلے کا استعمال شدہ گندا پانی ہے جو نکاسی کا کوئی مناسب انتظام نہ ہونے کے باعث زمین میں جذب ہو کر ان کے مکان کی بنیادیں کھوکھلی کر رہا ہے۔ وہ گلگت شہر کے یادگار محلہ میں رہتی ہیں اور کہتی ہیں کہ ان کے گھر میں کبھی کبھی زیرِ زمین پانی کی سطح اس قدر بلند ہوجاتی ہے کہ ان کے بیت الخلا کا گندا پانی اس کے اندر ہی پھیلنے لگتا ہے۔ ہر بار جب ایسا ہوتا ہے تو انہیں &quot;تقریباً سات ہزار روپے خرچ کر کے اس پانی کے اخراج کا انتظام کرنا پڑتا ہے&quot;۔

انہوں نے اپنی زندگی کے 25 سال اس مکان میں گزارے ہیں لیکن اب وہ کسی ایسی جگہ منتقل ہونا چاہتی ہیں جہاں انہیں گندے پانی کی نکاسی کا مسئلہ درپیش نہ ہو۔

ان کے محلے کے 12 سو کے قریب گھرانوں کے بیشتر افراد یہی چاہتے ہیں کہ وہ کہیں اور چلے جائیں کیونکہ وہ سب استعمال شدہ پانی کی نکاسی کے ہاتھوں سخت پریشان ہیں۔ وہ کہتے ہیں کہ یہ نکاسی ایک کھلے نالے کے ذریعے کی جاتی ہے جس میں بہنے والا فضلہ نہ صرف زمین میں جذب ہو رہا ہے بلکہ اکثر گلیوں اور گھروں میں بھی داخل ہو جاتا ہے۔ بعض نشیبی مقامات پر یہ پانی جوہڑوں کی صورت اختیار کر گیا ہے جو سردی کے موسم میں جم کر بدبودار برف بن جاتے ہیں۔

صابرہ بیگم کہتی ہیں کہ یہ جوہڑ ان کے خاندان کی ملکیتی اراضی سمیت قریبی زرعی زمینوں کو بھی متاثر کر رہے ہیں۔ نتیجتاً، ان کے مطابق، ان کی اراضی &quot;ایک بدبودار تالاب بن گئی ہے جس میں فصلیں اور سبزیاں کاشت کرنا تقریباً ناممکن ہو گیا ہے&quot;۔

تاہم یہ مسائل صرف یادگار محلے تک ہی محدود نہیں بلکہ کشروٹ، نگرل اور مجینی نامی محلوں سمیت گلگت کے کئی حصوں میں رہنے والے تقریباً پانچ ہزار گھرانے اسی طرح کی مشکلات کا سامنا کر رہے ہیں۔ ان سب کو شکایت ہے کہ ان کے علاقوں سے استعمال شدہ گندے پانی کی مناسب طریقے سے نکاسی نہیں کی جا رہی۔ گلگت سپورٹس ایسوسی ایشن کے 35 سالہ صدر محمد ذاکر کہتے ہیں کہ انہیں شہر کے مشرقی حصے میں واقع سات ہزار آبادی پر مشتمل کشروٹ محلے سے اسی لیے نقل مکانی کرنا پڑی کہ سالہا سال سے زمین میں جذب ہونے والے گندے پانی نے ان کے گھر کی بنیادیں خستہ کر دی تھیں۔ اب وہ دو کلومیٹر دور جوٹیال نامی محلے میں رہتے ہیں اگرچہ وہاں منتقل ہونے کے اخراجات نے ان کی مالی حالت بہت خراب کر دی ہے۔

کشروٹ میں ہی فرنیچر سازی کے ایک کارخانے کے جواں سال مالک وقاص احمد خان کہتے ہیں کہ نالوں میں بہنے والا گندا پانی اکثر ان کے کارخانے میں داخل ہو جاتا ہے جس سے وہاں پڑی لکڑی خراب ہو جاتی ہے اور انہیں لاکھوں روپے کا نقصان برداشت کرنا پڑتا ہے۔ انہوں نے دوسرے مقامی لوگوں کے ساتھ مل کر کئی مرتبہ اس صورت حال پر احتجاج بھی کیا ہے تاکہ وہ شہری انتظامیہ تک اپنا یہ مطالبہ پہنچا سکیں کہ ان کے محلے میں نکاسی آب کے زیرِ زمین نظام کی فوری ضرورت ہے۔ لیکن وہ کہتے ہیں کہ یہ سب کوششیں ابھی تک بے سود ثابت ہوئی ہیں۔

کشروٹ میں دکان داری کرنے والے 40 سالہ عالم نور کا پتھروں سے بنا چار مرلے کا پورا مکان بھی زمین میں جذب ہونے والے پانی کی وجہ سے 2018 میں زمیں بوس ہو چکا ہے۔ ان کا کہنا ہے کہ وہ تین دہائیوں سے اس محلے میں رہ رہے ہیں لیکن پچھلے کچھ سالوں سے یہاں رہنا مشکل سے مشکل تر ہوتا جا رہا ہے۔ اس کی وجہ بیان کرتے ہوئے وہ کہتے ہیں کہ &quot;مقامی آبادی میں اضافے کے ساتھ ساتھ محلے کی زمین میں جذب ہونے والے گندے پانی کی مقدار میں بھی اضافہ ہوتا جا رہا ہے&quot;۔

<h2>مر کے بھی نہ چین پایا</h2>

گلگت شہر کا استعمال شدہ پانی متعدد چھوٹے بڑے کھلے نالوں کے ذریعے قریبی دریا میں ڈالا جاتا ہے۔ 2017 میں نیشنل انجینئرنگ سروس آف پاکستان (NESPAK) نے اس کے حوالے سے ایک رپورٹ تیار کی جس میں کہا گیا کہ اس کی نکاسی کے موجودہ نظام کی وجہ سے شہر کے مرکزی علاقوں میں زیرِ زمین پانی کی سطح تیزی سے بلند ہو رہی ہے۔ نتیجتاً مجینی، کھر، کشروٹ، نگرل، جوٹیال اور کنوداس نامی محلوں میں تعمیر شدہ بہت سی عمارتیں 2030 تک زمین بوس ہو جائیں گی کیونکہ وہاں زیرِ زمین پانی دو فٹ کی گہرائی پر آ گیا ہے حالانکہ کچھ سال پہلے یہ 18 فٹ کی گہرائی پر پایا جاتا تھا۔

یہ رپورٹ تیار کرنے والے ماہرین کا کہنا ہے کہ اس مسئلے کا واحد حل نکاسی آب کے ایک ایسے نظام کی تعمیر ہے جو استعمال شدہ پانی کو شہر کی زمین میں جذب نہ ہونے دے۔

اس نظام کی عدم موجودگی میں فی الحال گلگت اور اس کے گردونواح میں جابجا گندے پانی کے جوہڑ دکھائی دیتے ہیں۔ ایسا ہی ایک جوہڑ&nbsp; کئی سال سے کشروٹ کے مرکزی قبرستان میں بھی موجود ہے۔

عباس نبی نامی مقامی شہری کہتے ہیں کہ سردی کے موسم میں یہ جوہڑ اس قدر پھیل جاتا ہے کہ قبرستان میں مردوں کو دفن کرنا بھی ممکن نہیں رہتا۔ وہ اِس سال مارچ میں ہوئی اپنے چچا کی تدفین کا ذکر کرتے ہوئے کہتے ہیں کہ اس کے چند روز بعد ہی ان کی قبر میں گندا پانی داخل ہو گیا جس کے نتیجے میں ان کی نعش سطحِ زمین پر آ گئی۔

ان کا کہنا ہے کہ جب انہوں نے اس واقعے کی اطلاع مقامی انتظامیہ کو دی تو گلگت کے ڈپٹی کمشنر نے خود قبرستان کا دورہ کر کے صورتِ حال کا معائنہ کیا اور مقامی لوگوں کو اس میں بہتری کی یقین دہانی کرائی۔ لیکن عباس نبی کہتے ہیں کہ تاحال اس حوالے سے کوئی عملی قدم نہیں اٹھایا گیا۔

ان کا یہ بھی کہنا ہے کہ انہوں گلگت بلتستان کے سابق وزیراعلیٰ حافظ حفیظ الرحمان کو بھی ان کے دورِ حکومت کے دوران قبرستان میں گندے پانی کی موجودگی سے آگاہ کیا تھا۔ &quot;لیکن اس کے باوجود یہ مسئلہ حل نہیں ہوا حالانکہ حافظ حفیظ الرحمان کے اپنے بھائی اسی جگہ مدفون ہیں&quot;۔

<h2>تین جماعتیں ایک منصوبہ</h2>

گلگت بلتستان میں پاکستان پیپلزپارٹی کے نائب صدر اور علاقائی قانون ساز اسمبلی کے سابقہ ڈپٹی سپیکر جمیل احمد کہتے ہیں کہ 2010 میں جب اس علاقے میں ان کی جماعت کی حکومت بنی تو اس نے گلگت شہر میں نکاسی آب کا زیرِ زمین نظام تعمیر کرنے اور مقامی آبادی کو پینے کا صاف پانی فراہم کرنے کے لیے ایک فلٹریشن پلانٹ لگانے کا منصوبہ بنایا۔ ان کے مطابق اس منصوبے پر تین ارب روپے لاگت آنا تھی اور اسے تین سال میں مکمل ہونا تھا۔

لیکن وہ کہتے ہیں کہ 2015 میں اس پر کام کا آغاز ہوتے ہی پاکستان پیپلزپارٹی کی حکومت ختم ہو گئی جبکہ اس کے بعد آنے والی پاکستان مسلم لیگ نواز کی حکومت نے، ان کے بقول، بعض سیاسی وجوہات کی بنا پر یہ منصوبہ معطل کر دیا۔

تاہم پاکستان مسلم لیگ نواز سے تعلق رکھںے والے سابق وزیرِاعلیٰ حافظ حفیظ الرحمٰن کہتے ہیں کہ اسے معطل کرنے کے بجائے انہوں نے اپنے دور اقتدار میں وفاق حکومت سے اس کی باقاعدہ منظوری لے لی تھی اور اس کے لیے درکار رقم بجٹ میں مختص کرنے کے بعد جوٹیال کے مقام پر پانی صاف کرنے والے پلانٹ کی تعمیر بھی شروع کر دی تھی۔ لیکن وہ کہتے ہیں کہ 2020 میں ان کی حکومت کا دورانیہ ختم ہو گیا تو یہ سب کام ٹھپ ہو گیا۔

پاکستان تحریک انصاف نے 2020 میں گلگت بلتستان میں اقتدار میں آنے کے بعد یہ کام دوبارہ شروع کا فیصلہ کیا ہے اگرچہ اس دوران اس کی لاگت تین ارب روپے&nbsp; سے بڑھ کر سات ارب روپے ہو چکی ہے۔ تاہم گلگت بلتستان کے وزیر اطلاعات و منصوبہ بندی فتح اللہ خان کہتے ہیں کہ ان کی حکومت نے اس کے لیے درکار تمام رقم کا انتظام کر لیا ہے لہٰذا، ان کے مطابق، &quot;اس پر عملی کام بھی جلد ہی شروع ہو جائے گا&quot;۔

پیاس کے شہر میں دریا کا سراب: حکومتی نا اہلی کے باعث گلگت کے شہری آلودہ پانی استعمال کرنے پر مجبور۔

گلگت میں گندے پانی کی نکاسی کا ناقص انتظام: 'زیر زمین پانی کی سطح بلند ہونے سے بہت سی مقامی عمارتیں 2030 تک زمین بوس ہو جائیں گی'۔

گلگت شہر کے علاقے کنوداس کی رہائشی 14 سالہ ندا روزانہ تقریباً آٹھ سو میٹر پیدل چل کر اپنے گھر کے لیے درکار پانی دریائے گلگت سے بھر کر لاتی ہیں۔ سردی ہو یا گرمی، ان کا یہی معمول ہے کیونکہ، ان کے مطابق، ان کے گھر میں لگا ہوا سرکاری نل بہت کم وقت کے لیے اور بہت محدود مقدار میں پانی فراہم کرتا ہے۔&nbsp;

پچھلے سال ان کی ایک ہم عمر سہیلی اور دو خواتین مختلف مواقع پر دریا کے کنارے کپڑے دھوتے ہوئے پاؤں پھسل جانے سے ڈوب کر ہلاک ہو گئی تھیں۔ اس کے باوجود ندا کا کہنا ہے کہ وہ روزانہ اس خطرے کا سامنا کرنے پر مجبور ہیں۔&nbsp;

گلگت شہر ہی کی مجاہد کالونی میں رہنے والی 55 سالہ زینب بی بی بھی پچھلے 35 سال سے پینے کا پانی بھرنے اور کپڑے دھونے کے لیے دریائے گلگت پر جا رہی ہیں۔ ان کا گھر دریا سے تقریباً تین سو میٹر کے فاصلے پر واقع ہے اور وہ کہتی ہیں کہ چاہے سخت گرمی ہو یا برف پڑ رہی ہو انہیں ہر طرح کے موسم میں تقریباً روزانہ دریا پر جانا پڑتا ہے کیونکہ سرکاری نل سے انہیں اپنی گھریلو ضرورریات کے لیے درکار پانی نہیں ملتا۔&nbsp;

کنوداس کی مسلم کالونی کے رہنے والے نذر شاہ کو بھی یہی شکایت ہے۔ ان کا کہنا ہے کہ وہ 22 برس سے اس محلے میں مقیم ہیں لیکن اس تمام عرصے میں انہیں کبھی بھی سرکاری ذرائع سے ضروری مقدار میں پانی نہیں ملا۔&nbsp;

وہ اس سلسلے میں حکومت سے اس قدر مایوس ہو چکے ہیں کہ انہوں نے باقی اہلِ محلہ سے مل کر اپنی مدد آپ کے تحت دریا میں بجلی کی ایک موٹر لگا لی ہے جو دریائی پانی کھینچ کر گھر گھر پہنچاتی ہے۔ اسے چالو رکھنے کے لیے ہر مقامی گھرانے سے ہر ہفتے ایک ہزار روپے وصول کیے جاتے ہیں۔

گلگت میں پانی کی فراہمی کے ذمہ دار ادارے واٹر اینڈ سینی ٹیشن ایجنسی (واسا) کے ایگزیکٹو انجینئر سہیل کاشف بھی تسلیم کرتے ہیں کہ شہر کے اکثر علاقوں میں گھریلو ضروریات کے لیے درکار پانی مناسب مقدار میں دستیاب نہیں۔ اس کے ایک اہم سبب کی نشاندہی کرتے ہوئے وہ کہتے ہیں کہ بہت سے بااثر مقامی لوگوں نے پانی کی سرکاری پائپ لائنوں میں غیرقانونی نل نصب کر رکھے ہیں جن کے ذریعے وہ بڑی مقدار میں پانی چوری کر رہے ہیں۔ ان کے مطابق کچھ لوگ تو چوری کے اس پانی سے اپنی فصلیں بھی سیراب کر رہے ہیں۔ تاہم وہ شکوہ کرتے ہیں کہ شہری انتظامیہ نے ان پانی چوروں کے خلاف کبھی کوئی موثر کارروائی نہیں کی اور نہ ہی کبھی ان کے غیرقانونی نلوں کو بند کیا ہے۔ &nbsp;

ان کا یہ بھی کہنا ہے کہ پچھلی تین دہائیوں میں گلگت شہر کی آبادی میں تیزی سے اضافہ ہوا ہے لیکن واسا کو فراہم کیے جانے والے مالی وسائل کو اسی تناسب سے بہتر نہیں بنایا گیا۔ وہ کہتے ہیں کہ اس محکمے کا &quot;سالانہ بجٹ چھ کروڑ روپے ہے اور یہ رقم بھی ہمیں بروقت دستیاب نہیں ہوتی&quot;۔

ان کے مطابق یہ رقم اس قدر قلیل ہے کہ اس سے پانی کی فراہمی کے موجود نظام کو بھی ٹھیک طرح سے نہیں چلایا جا سکتا۔ نتیجتاً &quot;صاف پانی کی طلب اور اس کی فراہمی کے درمیان فرق بہت بڑھ گیا ہے&quot;۔

<h2>کروڑوں روپے کے ہوائی وعدے</h2>

گلگت کو برمس نامی مقام پر بنائی گئی چھوٹی بڑی نو ٹینکیوں سے پانی فراہم کیا جاتا ہے۔ یہ پانی کارگاہ نالے سے لیا جاتا ہے جو شہر سے پانچ کلومیٹر دور بہتا ہے۔ اس نالے کے پانی کو لفٹ پمپوں کے ذریعے کھینچ کر بلندی پر واقع ٹینکیوں میں پہنچایا جاتا ہے جہاں سے اسے پائپ لائنوں کے ذریعے گھروں تک لے جایا جاتا ہے۔&nbsp;

یہ ٹینکیاں 1988 میں بنائی گئی تھیں جب گلگت کی آبادی تقریباً 55 ہزار تھی۔ اگرچہ 2017 کی مردم شماری کے مطابق گلگت کی آبادی چار لاکھ سے تجاوز کر گئی ہے اس کے باوجود اسے پانی فراہم کرنے والے سرکاری نظام میں کوئی اضافہ نہیں کیا گیا۔ یہی وجہ ہے کہ مقامی آبادی کا ایک بڑا حصہ دریا کا پانی استعمال کرنے پر مجبور ہے۔&nbsp;

مقامی لوگوں کو یہ شکایت بھی ہے کہ ٹینکیوں سے آنے والا پانی انسانی استعمال کے قابل ہی نہیں رہا۔ کشروٹ نامی علاقے کے رہائشی محمد زبیر بتاتے ہیں کہ ایک دن انہوں نے نل کھولا تو اس میں سے پانی کے ساتھ ایک مردہ مینڈک بھی برآمد ہوا۔&nbsp;

کنو داس کے رہائشی ناصر خان کے مطابق اس آلودگی کی سب سے بڑی وجہ یہ ہے کہ بالائے زمین بچھائی گئی پانی کی پائپ لائنیں کئی جگہ بالکل بوسیدہ ہو چکی ہیں جبکہ بہت سے مقامات پر یہ بوسیدہ پائپ لائنیں سیوریج کے پائپوں کے بیچوں بیچ گزرتی ہیں جہاں ان میں گندا پانی بھی شامل ہو جاتا ہے۔&nbsp;

ان شکایات کی توثیق پاکستان کونسل آف ریسرچ ان واٹر ریسورسز نامی وفاقی ادارہ بھی کر چکا ہے۔ اس کے اہل کاروں نے گزشتہ سال اکتوبر میں گلگت کے مختلف مقامات سے لیے گئے پانی کے نمونوں کا تجزیہ کرنے کے بعد تیار کردہ اپنی رپورٹ میں لکھا کہ اس شہر میں پینے کا تمام پانی آلودہ ہو چکا ہے۔&nbsp;

گلگت بلتستان کے محکمہ تحفظِ ماحولیات کی ایک رپورٹ بھی پینے کے مقامی پانی میں ٹائیفائیڈ پھیلانے والے جراثیم کی موجودگی کی تصدیق کر چکی ہے۔ اس محکمے کے ڈائریکٹر شہزاد شگری کا کہنا ہے کہ مقامی لوگوں کو فراہم کیا جانے والا نالوں، گلیشیئروں اور چشموں کا پانی صحت کے لیے اچھا نہیں ہے۔ ان کے مطابق &nbsp;گرمیوں میں اس کی آلودگی خاص طور پر بڑھ جاتی ہے کیونکہ اس موسم میں مال مویشی بھی مقامی ندی نالوں میں نہاتے ہیں اور یوں ان کا فضلہ بھی ان کے پانی میں شامل ہو جاتا ہے۔

دریائے گلگت بھی اسی طرح مسلسل آلودہ ہوتا جا رہا ہے۔

ایک طرف تو شہر کے مختلف محلوں جیسا کہ کوٹ، ڈاک پورہ، تھوپ اور محلہ بازار کا استعمال شدہ گندا پانی چار نالوں کے ذریعے اس میں گر رہا ہے اور دوسری جانب کھاری بسین نامی علاقے میں قائم ایک مذبح خانہ سے نکلنے والی غلاظت بھی اس میں ڈالی جا رہی ہے۔ اسی طرح مقامی لوگوں کی ایک بڑی تعداد دریا میں ہی اپنے کپڑے دھوتی ہے اور گرمیوں میں نہاتی بھی وہیں ہے۔&nbsp;

پاکستان کونسل آف ریسرچ ان واٹر ریسورسز کی طرف سے کیے گئے تجزیے کے مطابق، ان تمام سرگرمیوں کے نتیجے میں دریا کے پانی میں ٹائیفائیڈ سمیت متعدد بیماریوں کے جراثیم پیدا ہو گئے ہیں۔ گلگت ڈسٹرکٹ ہیڈکوارٹر ہسپتال کے میڈیکل سپیشلسٹ ڈاکٹر رازق حسین بھی اس مسئلے کی نشان دہی کرتے ہوئے کہتے ہیں کہ گندے دریائی پانی کے استعمال سے مقامی لوگوں میں ہیضہ، ہیپا ٹائٹس اور ٹائیفائیڈ جیسی بیماریاں عام ہو رہی ہیں۔ ان کے مطابق &quot;گزشتہ سال ڈسٹرکٹ ہیڈکوارٹر ہسپتال میں ہیضے کے تقریباً پانچ سو مریضوں کا علاج کیا گیا جبکہ اس میں علاج کے لیے آنے والے ہیپاٹائٹس اور ٹائیفائیڈ کے مریضوں کی تعداد اس قدر زیادہ ہوتی ہے کہ ان کا ریکارڈ رکھنا بھی ایک مشکل کام ہے&quot;۔

ان مسائل کے حل کے لیے گلگت بلتستان کی علاقائی حکومت نے حال ہی میں اعلان کیا ہے کہ 50 کروڑ روپے کی لاگت سے شہر کو پانی فراہم کرنے کے لیے ایک نیا اور مربوط نظام قائم کیا جائے گا۔ اس میں پانی کی موجودہ ٹینکیوں کی دیکھ بھال اور صفائی کے ساتھ ساتھ نئی ٹینکیوں کی تعمیر بھی شامل ہو گی۔ لیکن واسا کے ایگزیکٹو انجینئر سہیل کاشف کہتے ہیں کہ اس منصوبے کو ابھی تک باقاعدہ منظوری نہیں مل سکی۔&nbsp;

تاہم گلگت بلتستان کے وزیر اطلاعات فتح اللہ خان دعویٰ کرتے ہیں کہ یہ منصوبہ جلد ہی مکمل ہو جائے گا۔ ان کے مطابق کنو داس کی پہاڑی پر بنائی جانے والی نئی ٹینکیوں میں 28 لاکھ گیلن پانی ذخیرہ کرنے کی گنجائش ہو گی جو دریائے گلگت سے لفٹ پمپوں کے ذریعے ان میں ڈالا جائےگا۔ ان کا یہ بھی کہنا ہے کہ اس منصوبے کے تحت ہر ہفتے ٹینکیوں کی صفائی کی جائے گی، ان میں جراثیم کش ادویات ڈالی جائیں گی اور ان کے پانی کا باقاعدگی سے تجزیہ کیا جائے گا۔&nbsp;

گلگت ڈویلپمنٹ اتھارٹی کے ڈائریکٹر عارف حسین بھی اسی طرح کا دعویٰ کرتے ہوئے کہتے ہیں کہ اس منصوبے پر کافی کام پہلے ہی کیا جا چکا ہے جبکہ اس کا بقایا کام بھی حکومت سے مطلوبہ رقم بروقت دستیاب ہونے کی صورت میں اگلے دو مہینے میں مکمل کر لیا جائے گا۔&nbsp;

تاہم مقامی لوگوں کو ان وعدوں پر اعتبار نہیں۔&nbsp;

2015 کے گلگت کے سالانہ ترقیاتی پروگرام میں شامل ایک منصوبے کا حوالہ دیتے ہوئے ان کا کہنا ہے کہ اس کے تحت دریائے گلگت کا پانی لفٹ پمپوں کے ذریعے مجاہد کالونی اور مرکز کالونی نامی محلوں کو فراہم کیا جانا تھا۔ لیکن، ان کے مطابق، اسے اب تک مکمل نہیں کیا جا سکا کیونکہ اسے تعمیر کرنے والا ٹھیکیدار محض ٹینکیاں بنانے کے بعد پائپ بچھائے بغیر ہی غائب ہو گیا ہے۔ &nbsp; &nbsp;

ان لوگوں کا خیال ہے کہ کوئی نیا منصوبہ شروع کرنے کے بجائے اگر یہی نامکمل منصوبہ کسی طرح تکمیل تک پہنچا دیا جائے تو گلگت شہر میں پانی کی کمی کا مسئلہ بڑی حد تک حل ہو سکتا ہے۔&nbsp;

کرن قاسم

کرن قاسم کا تعلق گلگت بلتستان سے ہے اور وہ گزشتہ 11 سال سے صحافت سے وابستہ ہیں۔

گلگت بلتستان میں آٹے کی راشن بندی میں کمی کیوں ہو رہی ہے؟

گلشن میں کون بلبل نالاں کو دے پناہ: گلگت بلتستان میں بے سہارا خواتین کے لیے بنائی جانے والی پناہ گاہ کی تعمیر میں سالوں کی تاخیر۔

تنگ آ چکے ہیں کشمکش زندگی سے ہم: 'گلگت-بلتستان میں ہونے والے خودکشی کے تمام واقعات میں سے 75 فیصد صرف ضلع غِذر میں پیش آئے ہیں'۔

گلگت میں گندے پانی کی نکاسی کا ناقص انتظام: 'زیر زمین پانی کی سطح بلند ہونے سے بہت سی مقامی عمارتیں 2030 تک زمین بوس ہو جائیں گی'۔

پیاس کے شہر میں دریا کا سراب: حکومتی نا اہلی کے باعث گلگت کے شہری آلودہ پانی استعمال کرنے پر مجبور۔