مظفر آباد کے نجی ہسپتالوں میں ایک دوا کے استعمال سے مریضو ں کی طبیعت مسلسل بگڑنے لگی تو اس دوا کو ٹیسٹ کرانے کا فیصلہ کیا گیا۔ نتائج آئے تو سب میں تشویش کی لہر دوڑ گئی۔

شہر کے ایک نجی ہسپتال کے عملے کی جانب سے کچھ عرصے سے شکایت سامنے آ رہی تھی کہ مریضوں کو سرجری کے لیے بے ہوشی کی دوا دینے کے بعد ان کی طبیعت بگڑ جاتی ہے۔

عباس انسٹی ٹیوٹ آف میڈیکل سائنسز میں بھی کچھ ایسا ہوا۔ وہاں بطور فارماسسٹ وابستہ نورین اکبر نے بتایا کہ سرجری سے قبل مریضوں کو بے ہوش کرنے کی خاطر استعمال ہونے والی دوا آئسو فلورین امریکا میں تیار ہوتی ہے۔ پاکستان میں اس کے مختلف سپلائرز میں سے ایک، عباس انسٹی ٹیوٹ آف میڈیکل سائنسز کو یہ دوا فراہم کر رہا تھا۔

ڈاکٹرز&nbsp; نے توجہ دلائی کہ جن لوگوں کو آئسو فلورین دی جا رہی ہے ان میں دیگر مسائل کے علاوہ یرقان اور ہیپائٹس سی کی شکایات بھی پیدا ہو رہی ہیں۔ لیبارٹری میں ٹیسٹ کے نتیجے سے تصدیق ہوئی کہ مذکورہ دوا میں آئسو فلورین کی جگہ کلوروفام شامل تھا جو متروکہ دوا ہے۔

جعلی دوا کے معاملات ڈرگ انسپکٹر کے نوٹس میں آئے تو انہوں نے جعلی دوائیں بیچنے والوں کے خلاف کریک ڈاؤن شروع کر دیا۔

ڈرگ انسپکٹر فوزیہ اشرف بتاتی ہیں کہ اس دوران جعلی ڈپلوموں کی بنیاد پر مظفرآباد کی حدود میں کھلے 32 میڈیکل سٹورز سیل کر دیے گئے۔ ان کے خلاف ڈرگ ایکٹ 1976ء کی دفعہ 23 کے تحت مقدمات بھی درج کیے گئے۔ ان کے مطابق یہ میڈیکل سٹورز تاحال نہیں کھلے۔

آزاد کشمیر کے 10 اضلاع میں سے آٹھ میں ڈرگ انسپکٹر جبکہ دو میں ڈسٹرکٹ ہیلتھ آفیسر خود میڈیکل سٹورز کی چیکنگ کرتے ہیں۔ ڈائریکٹر جنرل صحت کے دفتر سے حاصل کیے گئے اعداد و شمار کے مطابق جون 2020ء سے جون 2023ء تک نو ہزار 56 میڈیکل سٹورز کی چیکنگ کی گئی۔ ان میں دو ہزار 947 رجسٹرڈ ہیں جبکہ باقی چھ ہزار 109 میڈیکل سٹورز تاحال رجسٹرڈ نہیں ہیں۔ صرف مظفر آباد میں میڈیکل سٹورز کی تعداد 15 سو&nbsp; سے زائد ہے۔ ان میں سے دو تہائی بنا رجسٹریشن کے کام کر رہے ہیں۔

محکمہ صحت کے ایک آفیسر نے شناخت ظاہر نہ کرنے کی شرط پر بتایا کہ چار سو ایسے سٹور تھے، جنھیں جعلی ڈپلومہ کی بنیاد پر محکمہ صحت کی جانب سے لائسنس جاری کیے گئے تھے۔ یہ بیس بیس سال سے چل رہے ہیں۔ ان میں سے بیشتر جعلی یا غیر معیاری ادویات فروخت کر رہے ہیں۔

ان سٹوروں میں جعلی، غیر معیاری، زائدالمیعاد اور غیر رجسٹرڈ ادویات فروخت کیے جانے کے ساتھ ساتھ ایسی ادویات بھی فروخت کی جا رہی تھیں جو بظاہر کچھ اور اندر سے کچھ تھیں۔ یہ زہریلی اور انسانوں کے لیے ناقابل استعمال تھیں۔ انہیں ایکسامول ایکسٹرا، انجکشن آر ایل 1000ایم ایل، کیلشیم کاربونیٹ 800 و دیگر کے نام پر فروخت کیا جا رہا تھا۔

محکمہ کی جانب سے ایک ہزار 970 ادویات کے نمونہ جات میرپور ڈی ٹی ایل (ڈرگ ٹیسٹنگ لیبارٹری) ارسال کیے گئے ہیں۔ ان میں سے 27 ادویات غیر معیاری، 45 زائدالمیعاد اور 56 غیر رجسٹرڈ پائی گئیں۔ کارروائی کے دوران&nbsp; ڈرگ سیل لائسنس اور کوالیفائیڈ سٹاف کے بغیر چلنے والے 70 میڈیکل سٹورز کو بند کیا گیا۔

اس کے علاوہ کوالٹی کنٹرول بورڈ، آزاد کشمیر کو 78 ایسے کیسسز موصول ہوئے جن میں میڈیکل سٹورز کی جانب سے ڈرگ سیل رولز کی مکمل خلاف ورزی کی گئی تھی۔ کوالٹی کنٹرول بورڈ نے ان کیسسز کے ٹرائل کے لیے اندراج کی منظوری دی ہے تاہم کارروائی اسی صورت ممکن ہے جب ڈرگ کورٹس موجود ہوں۔

چیف ڈرگ کنٹرولر سردار ریاض الحسن کا کہنا ہے کہ ریاست جعلی ادویات کے کاروبار کی اجازت نہیں دے سکتی۔ آزاد جموں و کشمیر میں نافذ ڈرگ ایکٹ 1976ء کے سیکشن اے ون کے تحت جعلی دوا بنانے اور فروخت کرنے والے کو کم از کم پانچ سال قید اور پانچ لاکھ روپے کا جرمانہ کیا جا سکتا ہے۔ تاہم ڈرگ کورٹ غیر فعال ہونے کے باعث موت کا کاروبار کرنے والوں کو کھلی چھوٹ ملی ہوئی ہے۔

&quot;2021ء سے ڈرگ کورٹس غیر فعال ہونے کے باعث 329 کیسسز کا اندراج ہی نہیں ہو سکا جبکہ متعدد انڈر ٹرائل کیسسز بھی التوا کا شکار ہو چکے ہیں۔ یہی سبب ہے کہ پچھلے تین سال کے دوران جعلی ادویات کا کاروبار کرنے والے صرف ایک شخص کے خلاف اسلام آباد ہائی کورٹ میں کیس چل رہا ہے&quot;۔

ریاض الحسن کا کہنا ہے کہ&nbsp; آزاد کشمیر میں یہ کورٹ ڈرگ ایکٹ 1976ء کے سیکشن 31 کے تحت بنائی جانا تھی۔ اس ایکٹ کو 1986ء میں آزاد کشمیر میں اپنایا گیا تھا۔ ابتدا میں ڈرگ کورٹ کو&nbsp; ہائی کورٹ کے جج&nbsp; کو اضافی چارج&nbsp; دے کر چلایا جاتا رہا بعد میں چارج بینکنگ اور احتساب عدالت کے جج کو دیا گیا تھا۔

&quot;نومبر 2021ء میں احتساب عدالت کے جج ریٹائرڈ ہو چکے ہیں جس کے بعد سے یہ کورٹ غیر فعال ہے جبکہ الگ سے ڈرگ کورٹ آج تک تشکیل نہیں دی جا سکی جس کی بڑی وجہ وسائل کی کمی بتائی جا رہی ہے&quot;۔

ڈائریکٹر جنرل ہیلتھ سردار آفتاب نے لوک سجاگ کو بتایا کہ آزاد کشمیر میں ڈرگ کورٹ کے ذریعے ہی کارروائی آگے بڑھائی جا سکتی ہے اور سزائیں دی جا سکتی ہیں۔ کورٹ بنانا حکومت کا کام ہے۔

&quot;جعلی ڈپلومے بیس بیس سال پرانے ہیں، انہیں کس نے جاری کیا اور کون تجدید کرتا رہا اس پر میں کوئی رائے نہیں دینا چاہتا، البتہ جب سے میں نے چارج سنبھالا ہے ان کے خلاف مختلف اوقات میں کارروائی کی گئی ہے۔&quot;

سردار آفتاب نے کہا کہ انسانی زندگی کے ساتھ کھیلنے والا کوئی بھی شخص کسی بھی قسم کی معافی کا مستحق نہیں۔ اس معاملے کی تحقیقات کے لیے ایک کمیٹی بنائی گئی ہے جس کے ممبران کو ڈسکلوز نہیں کرنا چاہتا کیونکہ یہ لوگ مختلف ذریعے سے ان تک رسائی حاصل کرنے کی کوشش شروع کر دیتے ہیں۔ جب تک قانونی تقاضے پورے نہیں ہوتے کوئی بھی سٹور کھولنے کا سوال ہی پیدا نہیں ہوتا۔

دوسری جانب جب ڈرگ انسپیکٹر فوزیہ اشرف اور ڈی ایچ او عامر شہزاد نے جعلی ادویات کا کاروبار کرنے والوں کے خلاف کارروائی کی تو ان کو محکمے اور اعلیٰ حکومتی شخصیات کی جانب سے مزاحمت کا سامنا کرنا پڑا۔

ڈی ایچ او عامر شہزاد کہتے ہیں کہ جب انہوں نے یہاں ایک میڈیکل سٹور کو سیل کیا تو انہیں اور ماتحت عملے کو نوکری سے فارغ کروانے اور جان سے مارنے کی دھمکیاں دی گئیں جس کے خلاف انہوں نے تھانہ سٹی میں ایف آئی آر درج کروا دی ہے۔

&quot;پہلے سٹور دوبارہ کھلوانے کے لیے رشوت کے طور پر بھاری رقم دینے کی آفر کی گئی۔ انکار پر جان سے مارنے کی دھمکیاں دی گئیں۔ دیگر عملے کو بھی ہر روز ایسے ہی دھمکی آمیز پیغامات موصول ہوتے ہیں۔ جن کی اسکرین شاٹس بھی موجود ہیں۔&quot;

کئی میڈیکل سٹورز کو زیادہ عرصہ بند نہیں رکھا جا سکا۔ محکمہ صحت ہی کے ایک آفیسر نے شناخت ظاہر نہ کرنے کی شرط پر بتایا کہ جن میڈیکل سٹوروں کو سیاسی جماعتوں کی جانب سے پشت پناہی حاصل تھی، انھیں ستمبر کے آخر میں دوبارہ کھول دیا گیا۔

اس معاملے میں ادویات ساز کمپنی کے خلاف کارروائی کے سوال پر انہوں نے کہا کہ اگر کسی میڈیکل سٹور کے پاس بل وارنٹی ہوتی ہے تو ہم اس کمپنی کے خلاف بھی کارروائی کرتے ہیں، جس نے جعلی یا غیر معیاری ادویات دی ہوں۔

&quot;میں نے 2020ء میں اس وقت ڈپٹی کمشنر بدر منیر کو تحریر کیا تھا کہ ان کمپنیوں کو ایک دائرہ کار میں لانا چاہیے تاکہ یہ ٹیکس ادا کریں، لیکن ابھی تک کوئی عملی کارروائی نہیں ہوئی۔ بدقسمتی سے کوئی بھی فارما سیوٹیکل کمپنی آزاد کشمیر میں کسی قسم کا ٹیکس نہیں دے رہی حالانکہ یہ کمپنیاں ادویات کی مدد میں یہاں سے اربوں روپے کماتی ہیں۔&quot;

فارما ایسوسی ایشن کے نمائندے ساجد سلہریا محکمہ صحت کے اعداد و شمار کو درست نہیں مانتے اور کہتے ہیں کہ اگر ایسا ہوتا تو یہ اپنی رپورٹ پبلک کرتے۔ انہوں نے الزام عائد کیا کہ محکمہ صحت کے آفیسر ایسے معاملات کی تشہیر کر کے رشوت لینا چاہتے ہیں اور عوام کو گمراہ کر رہے ہیں۔

&quot;کوئی بھی دوا غیر معیاری نہیں۔ اگر کوئی دوا غیر معیاری ہے تو ڈسٹرکٹ ہیلتھ آفیسر اور محکمہ صحت کے ذمہ داران نے رپورٹ پبلک کیوں نہیں کی؟ یا ہمارے علم میں کیوں نہیں لایا گیا۔ یہ بات پراپیگنڈے کے سوا کچھ نہیں۔&quot;

وہ کہتے ہیں کہ آزاد کشمیر میں چار پانچ سو فارما سیوٹیکل کمپنیاں کام کر رہی ہیں جو سب کی سب پاکستان سے رجسٹرڈ ہیں۔ اگر کوئی دوا غیر معیاری نکلی ہے&nbsp; تو اس پر اور ملوث کمپنی پر پابندی عائد کی جائے۔

ڈرگ مافیا یا حکومتی کوتاہی: وسطی پنجاب میں مرگی کے مریض دوا کے لیے خوار

"موت کا کاروبار کرنے والوں کو کھلی چھوٹ": آزاد کشمیر میں جعلی ادویات کی فروخت رک کیوں نہیں رہی

text

موسم کی تبدیلی کے ساتھ آزاد کشمیرکے بالائی علاقوں وادیٔ نیلم، وادیٔ لیپہ اور ضلع حویلی کے علاقے بھیڑی کے باسیوں نے موسم سرما کے دنوں کے لیے تیاریاں شروع کردی ہیں۔ یہ آزاد کشمیر کے وہ علاقے ہیں جہاں موسم سرما میں چھ ماہ تک شدید برفباری کے باعث ان کا دارالحکومت سے زمینی رابطہ منقطع ہوجاتا ہے۔ اسی لئے حکومت آزاد کشمیر انہیں بروقت آٹے کی فراہمی کی پابند ہوتی ہے، لیکن اس مرتبہ ان علاقوں میں راشن سٹاک کرنے کیلئے حکومت کے پاس سرکاری آٹا موجود نہیں ہے جس کے باعث لوگوں کو خدشہ ہے کہ وہ فاقہ کشی کا شکار ہوجائیں گے۔

گزشتہ دو سال سے آزاد کشمیر میں آٹے کے قلت کی وجہ سے بحرانی صورتحال پیدا ہو رہی ہے، جس پر ریاست کے مختلف حصوں میں اب بھی احتجاج جاری ہے۔ اسی دوران آزاد کشمیر حکومت کو پاکستان کی جانب سے آٹے پر دی جانے والی سبسڈی اور اس گندم کی فراہمی میں ہونے والی بدعنوانی کا تذکرہ بھی آنے لگا ہے۔

آزاد کشمیر میں گندم کی پیداوار کے بارے میں پلاننگ اینڈ ڈویلپمنٹ (پی اینڈ ڈی) ڈیپارٹمنٹ کی آفیشل ویب سائٹ سے حاصل کردہ معلومات کے مطابق محکمہ زراعت آزاد کشمیر 80,953 ہیکٹر رقبے پر سالانہ 154766میٹرک ٹن گندم کاشت کر رہا ہے، اس پیداوار سے متعلق دیگر تفصیلات کیلئے آر ٹی آئی کے ذریعے محکمۂ زراعت سے تفصیلات طلب کی گئیں، لیکن سیکرٹری زراعت جاوید ایوب نے متعدد بار رابطے کے باوجود کسی قسم کی معلومات فراہم نہیں کیں اور نہ ہی معلومات تک رسائی کی درخواست (آرٹی آئی) کا کوئی تحریری جواب دیا۔

اس وقت حکومت آزاد کشمیر پاکستان ایگریکلچر سٹوریج اینڈ سروسز کارپوریشن (پاسکو) سے ریاست کی آبادی کے 60 فیصد کو آٹے پر سبسڈی دینے کیلئے سالانہ تین لاکھ ٹن گندم خریدتی ہے۔ اس خریداری کے لیے حکومت آزاد کشمیر نے ساڑھے پانچ ارب روپے مختص کر رکھے ہیں تاہم 2021 کے بعد سے آزاد کشمیر میں آٹے کا شدید بحران ہے اور گندم کے آٹے پر حکومت پاکستان کی جانب دے دی جانے والی سبسڈی کے ثمرات عوام تک نہیں پہنچ رہے۔

سینئر صحافی عبدالحکیم کشمیری کہتے ہیں کہ &quot;مصنوعی بحران کچھ لوگوں کیلئے ایک کاروباری موقع ہے، آٹے کی فراہمی ایک منافع بخش سرگرمی بن چکی ہے جس کے باعث سالانہ بنیادوں پر سیکڑوں نئے لائسنس جاری کیے جارہے ہیں۔ 2023 کے پہلے چھ ماہ میں آٹے کے 941 نئے لائسنس دیے گئے تھے۔ 2021 میں آزاد کشمیر میں آٹا فراہمی کے لائسنس 5173 تھے اور 2023 میں یہ تعداد 6960 تک پہنچ چکی ہے ۔ویسے تو بتایا جاتا ہے کہ تین ہزار افراد کی آبادی پر ایک لائسنس جاری کیا جاتا ہے تاہم اگر لائسنس کی تعداد کے حساب سے دیکھا جائے تو ہماری آبادی دو کروڑ آٹھ لاکھ بنتی ہے۔&quot;

2017 کی مردم شماری کے مطابق آزاد کشمیر کی کل آبادی 40 لاکھ تھی، نئی مردم شماری کے تحت یہ آبادی کم ہو کر 27 لاکھ رہ گئی ہے کیونکہ اس مردم شماری کے دوران 15 لاکھ سے زیادہ کشمیری تارکین وطن یا پاکستان کے دیگر شہروں میں رہنے والے افراد کو شمار نہیں کیا گیا۔

سول سوسائٹی کے نمائندے فیصل جمیل کشمیری کے مطابق بینظیر انکم سپورٹ پروگرام (بی آئی ایس پی) اور محکمہ زکوٰة کے مطابق آزاد کشمیر میں ایک لاکھ پانچ ہزار خاندان مستحق ہیں جبکہ محکمۂ خوراک کئی گنا زیادہ گندم خرید رہا ہے جو&nbsp; مبینہ طور پر کرپشن کی نذر ہو رہی ہے۔

آبادی کے تناسب سے کئی گنا زیادہ مقدار میں گندم کی خریداری کے باعث حکومت آزاد کشمیر اب تک پاسکو کے گزشتہ سال کے واجبات ادا نہیں کر پائی۔ جنرل مینجر فیلڈ پاسکو مشتاق شاہد نے بتایا کہ حکومت آزاد کشمیر&nbsp; پاسکو کے 12 ارب دو کروڑ روپے کی ادائیگیوں کی نادہندہ ہے اور یہ رقم گزشتہ ایک سال کی ہے جبکہ 30 جون 2024 تک 11 ارب 72 کروڑ روپے کے مزید اخراجات متوقع ہیں۔

آزاد کشمیر اسمبلی کی خاتون ممبر نثارہ عباسی سے جب یہ سوال کیا گیا کہ حکو مت آزاد کشمیر تا حال پاسکو کا قرض ادا کیوں نہیں کرسکی تو انہوں نے بتایا کہ حکومت آزاد کشمیر کے اخراجات آمدن سے کہیں گنا زیادہ ہیں جس کے باعث وہ سنگین مالی بحران کا سامنا کر رہی ہے۔ اس لئے موجودہ صورتحال میں پاسکو کے 12 ارب روپے ادا کرنا ممکن نہیں۔

ماضی میں عدم ادائیگی کے سوال پر انہوں نے کہا کہ گندم اور آٹے کی سمگلنگ اور پاسکو کو واجبات ادا نہ کرنے کی ذمہ دار آزاد کشمیر کی بیورو کریسی ہے، جس کی ملی بھگت سے آٹا اوپن مارکیٹ میں فروخت کیلئے سمگل کیا جاتا ہے

انہوں نے کہا کہ گندم کا&nbsp; کوٹہ آبادی کے تناسب کے مطابق ہونا چاہیے، مظفرآباد کی آبادی چھ لاکھ سے زیادہ ہے جبکہ یہاں ملنے والا کوٹہ نیلم اور حویلی سے بھی کم ہے، حالانکہ یہاں ضرورت دس ہزار ٹن کی ہے، جس میں سے صرف تین ہزار ٹن ملتا ہے۔

سول سوسائٹی کے نمائندے شاہد اعوان بھی حکومت کو دی جانے والی سبسڈی کے لوگوں کو منتقل نہ ہونے کی بڑی وجہ آٹے کی سمگلنگ کو قرار دیتے ہیں۔ انہوں نے اس کیلئے محکمہ خوراک کو ذمہ دار قرار دیتے ہوئے کہا کہ گندم&nbsp; کی خریداری&nbsp; سے لے کر پسوائی اور فروخت تک کرپشن کی جاتی ہے جس میں محکمہ خود بھی ملوث ہے۔

ڈائریکٹر محکمہ خوراک امان اللہ خان آٹے کی قلت اور حکومت کے پاس گندم کی عدم موجودگی کے بارے میں کہتے ہیں کہ پاسکو سے حاصل کی جانے والی گندم صرف ساٹھ فیصد آبادی کیلئے ہوتی ہے جبکہ اوپن مارکیٹ میں آٹا مہنگا ہونے کی وجہ سے عوام نے سرکاری آٹا خریدنا شروع کیا، جس کی وجہ سے حکومت پر بوجھ بڑھ گیا، یہی وجہ ہے کہ حکومت آزاد کشمیر پاسکو کے 12 ارب روپے کی مقروض ہوگئی ہے

امان اللہ خان سے جب آزاد کشمیر میں رجسٹرڈ ملوں کے ملکان کی تفصیلات اور انہیں حاصل ہونے والے گندم کے کوٹے کے متعلق تفصیلات مانگی گئیں، تو انہوں نے معذرت کی اور کہا کہ یہ تفصیلات فراہم کرنا ان کے لئے ممکن نہیں، تاہم وہ یہ بتا سکتے ہیں کہ آزاد کشمیر میں آٹے کی 13 ملیں رجسٹرڈ ہیں جبکہ 170 آٹا ڈپو اور 7500 لوکل ڈیلر ہیں جو عوام تک آٹا پہنچا رہے ہیں۔

ملز کی جانب سے سبسڈی پر خریدی گئی گندم کومبینہ طور پر آٹے کی مارکیٹ میں فروخت اور سمگلنگ کیلئے &#39;کیموفلاج&#39; کے طور پر استعمال کیا جا رہا ہے۔ ایڈیشنل ایس ایچ او تھانہ سوک سیکریٹریٹ چھتر قاضی خاقان نے ایک حالیہ کیس کا حوالہ دیتے ہوئے بتایا کہ ایک سرکاری ڈیلر کے خلاف شکایت تھی کہ وہ نیلم فلور مل سے آٹا خرید کر ڈپو پر اس کی پیکینگ تبدیل کرکے اسے اوپن مارکیٹ میں فروخت کرتا تھا۔ پولیس نے چھ مئی 2023 کو چھاپہ مار کر وہاں سے 847 پرائیویٹ بیگ برآمد کیے اور ملزم کے خلاف ایف آئی آر درج کرکے گرفتار کرلیا۔

محکمہ اینٹی کرپشن میں تعینات محسن ایوان نے بتایا کہ اگست 2023کو آٹے کی کرپشن میں ملوث فوڈ انسپیکٹر جاوید احمد کے خلاف بھی ایف آئی آر درج کی گئی تاہم ملزم فرار ہو چکا ہے۔

ملوں کی جانب سے آٹے کی سمگلنگ کے علاوہ بدعنوانی کا ایک ذریعہ گھوسٹ ملز رجسٹرڈ کروا کر گندم پر سبسڈی حاصل کرنا&nbsp; بھی ہے۔ اس طرح سستی گندم حاصل کرنے والوں میں اپوزیشن لیڈر اور ایک وزیر کے نام بھی شامل ہیں۔ سبسڈی پر حاصل کی گئی یہ گندم اسلام آباد اور پشاور کی ملوں کو اوپن مارکیٹ ریٹ پر فروخت کی جاتی ہے۔ مبینہ طور پر کئی حکومتی اور اپوزیشن ارکان نے ملیں رجسٹر کروا رکھی ہیں اور اس کی بنیاد پر گندم کا کوٹہ حاصل کرکے مارکیٹ میں فروخت کر رہے ہیں۔

&nbsp;اس حوالے سے جب محکمہ خوراک آزاد کشمیر کے سیکرٹری سے آر ٹی آئی قانون کے تحت تفصیلات مانگی گئیں تو انہوں نے نہ تو کوئی تحریری جواب دیا اور نہ ہی ٹیلفون پر بات کرنے کو آمادہ ہوئے۔

گندم کی سبسڈی&nbsp; اور آٹے میں کرپشن کے معاملات کو دیکھتے ہوئے وزیر اعظم آزاد کشمیر چوہدری انوار الحق نے سیکریٹری خوراک منصور قادر کو معطل اور چیئرمین سینٹرل بورڈ آف ریونیو امجد پرویز راجہ سے چارج لے کر سینئر وزیر کرنل ریٹائرڈ وقار نور کی سربراہی میں 11جولائی 2023کو تحقیقاتی کمیٹی تشکیل دی اور کمیٹی کو ہدایت کی گئی کہ تیس دن کے اندر تحقیقات مکمل کرکے رپورٹ پیش کرے، لیکن یہ رپورٹ تاحال مکمل نہیں ہوئی۔ اس حوالے سے کرنل ریٹائرڈ وقار نور نے بتایا کہ کمیٹی تاحال کسی حتمی نتیجے پر نہیں پہنچی، لیکن جلد ہی تحقیقات مکمل کر لی جائیں گی۔

&nbsp;

خیبر پختونخوا: 'مفت آٹے کی تلاش میں قطاروں میں کھڑے ہو کر گھنٹوں انتظار کرنا ہو گا'

گندم کی سمگلنگ اور گھوسٹ ملیں: آزاد کشمیر میں آٹے کی قلت، حکومت پاسکو کے 12 ارب کی مقروض

وادی نیلم کے علاقے کنڈل شاہی میں بولی جانے والی زبان 'کنڈل شاہی' مسلسل معدومی کا شکار ہو رہی ہے

video

جہاں دنیا بھر کو موسمیاتی تبدیلیوں نے اپنی لیپٹ میں لے رکھا ہے وہیں پاکستان کے زیر انتظام کشمیر میں بھی اس کے سنگین منفی اثرات مرتب ہوئے ہیں جن سے خاص طور پر مقامی کسانوں کی مشکلات بڑھتی جا رہی ہیں۔

اس علاقے کے صدر مقام مظفرآباد کے جنوب میں دو گھنٹے کی مسافت پر تقریباً دو ہزار آبادی کے گاؤں تھور میں رہنے والے محمد شکور کا واحد ذریعہ معاش کھیتی باڑی ہے، لیکن بدلتے موسمی حالات کے باعث پیداوار میں کمی کے باعث ان کے لیے اپنی زمین کی آمدنی سے گزر بسر کرنا مشکل ہوتا جارہا ہے۔

ان کا کہنا ہے کہ پچھلی بار جب انہوں ںے بوائی کی تو تین ماہ تک بارش ہی نہ ہوئی۔ اس کے بعد اس قدر شدید طوفانی بارشیں آئیں کہ زمین کا کٹاؤ شروع ہو گیا۔

&quot;زرعی زمین جو پہلے ہی کم تھی اس میں اب مزید کمی آ گئی ہے اور پیداوار پر بھی اثر پڑا ہے، ہمارا انحصار اسی زمین پر رہا ہے، چھ ماہ محنت کرکے فصل اگاتے تھے تو گھر کیلئے راشن بھی آجاتا تھا، فصل کا کچھ حصہ فروخت کرکے گھریلو ضروریات کیلئے کچھ نقد رقم بھی مل جاتی تھی، مگر اب یہ ممکن نہیں رہا۔&quot;

شازیہ کنول کا تعلق وادیٔ نیلم کے علاقے لیسوا سے ہے۔ ان کے شوہر کچھ عرصہ پہلے سیلاب میں جاں بحق ہو گئے تھے جبکہ ان کا گھر اور زرعی زمین بھی سیلاب کی نذر ہو گئی تھی۔ اس طرح ان کے خاندان کا واحد ذریعہ معاشی نہ رہا اور اب وہ اپنے پانچ بچوں کے ساتھ بمشکل گزربسر کر رہی ہیں۔

حکومت اور متعلقہ اداروں کی جانب سے متبادل زمین فراہم کرنے یا مالی معاونت کے حوالے سے سوال پر انہوں نے کہا کہ حکومت نے انہیں صرف ڈیڑھ لاکھ روپے معاوضہ دیا جس میں ان کے لیے زمین خریدنا اور گھر بنانا ممکن نہیں تھا۔

انہوں نے اپنے رشتہ داروں کی زمین پر ایک خیمہ لگایا ہے جہاں وہ اپنے بچوں کے ساتھ رہتی ہیں۔ چونکہ اس جگہ سے قریب ایک برساتی نالہ گزرتا ہے اسی لیے انہیں اپنے بچوں کے تحفظ کی بابت دھڑکا لگا رہتا ہے۔ کوئی متبادل جگہ میسر نہ ہونے کے باعث وہ وہیں رہنے پر مجبور ہیں۔ 
شازیہ نے بتایا کہ انہوں نے سنا تھا کہ سعودی حکومت کی جانب سے لیسوا متاثرین کو متبادل زمین فراہم کرنے اور رہائشی کالونی بنانے کیلئے حکومت آزاد کشمیر کو امدادی رقم دی گئی تھی، مگر انہیں کوئی خبر نہیں کہ اس کا کیا ہوا۔

ضلع نیلم کی انتظامیہ کے مطابق 2019 کے سیلاب میں صرف لیسوا میں چار سو بہتر کنال زرعی رقبہ متاثر ہوا تھا۔ ڈپٹی کمشنر آفس سے رائٹ ٹو انفارمیشن (آرٹی آئی) کے قانون کے تحت حاصل کردہ معلومات کے مطابق بے زمین متاثرین کو متبادل اراضی فراہم کرنے کا معاملہ تاحال التوا کا شکار ہے۔ جہاں تک معاوضوں کا تعلق ہے تو&nbsp; متعین شدہ حکومتی شرح کے مطابق نو افراد کے ورثاء کو امدادی رقوم، 76 مکانات، 42 دکانیں،&nbsp; مال مویشی کا نقصان برداشت کرنے والے 56 افراد ایک کروڑ اکیا سی لاکھ روپے ادا کیے جا چکے ہیں۔

سٹیٹ ڈیزاسٹر منیجمنٹ اتھارٹی( ایس ڈی ایم اے ) کے مطابق 2019 سے جون 2023 تک سیلاب آنے کے مختلف واقعات میں 254 افراد جاں بحق ہوچکے ہیں اور اربوں روپے کا نقصان ہوا ہے۔ تاہم نقصان کی کل کتنی مالیت کے بارے میں بورڈ آف ریونیو کے پاس کوئی اعداد وشمار نہیں ہیں۔ 
گزشتہ پانچ سال میں زرعی رقبہ کتنا کم ہوا حکومتی ادارے اس بارے میں بھی لاعلم ہیں۔ محکمہ زراعت&nbsp; کے پاس بھی اس حوالے سے کسی طرح کی کوئی تحقیق یا اعدادوشمار نہیں ہیں۔

محکمۂ زراعت کے سابق ریسرچ آفیسر شفیق الرحمان سے جب اس بارے میں معلومات لی گئیں تو انہوں نے بتایا کہ آزاد کشمیر میں بھی موسمیاتی تبدیلیوں کے باعث فصلوں، پھلوں اور سبزیوں کی پیداوار میں نمایاں کمی ہوئی ہے۔ فصلوں کی کاشت کا وقت تبدیل ہوا ہے جس سے فصلوں اور پھلوں کے معیار اور ذائقے میں بھی تبدیلی آئی ہے۔

&quot;سب سے زیادہ تشویشناک بات یہ ہے کہ موسمیاتی تبدیلی سے بارشوں کا نظام بری طرح متاثر ہوا ہے۔ کہیں پر بارش زیادہ ہوتی ہے اور کہیں کم۔ وادی نیلم، وادی لیپہ ،باغ ،حویلی ،کوٹلی اور بھمبر میں بارشوں کا اپنا نظام تھا، کھیتی باڑی ایک مخصوص وقت پر ہوا کرتی تھی، مگر اب بارشوں کے اوقات کار میں تبدیلی کے باعث زرعی سرگرمیاں تعطل کا شکار ہیں۔&quot;

وہ کہتے ہیں کہ ان تبدیلیوں سے نہ صرف پھلوں اور فصلوں کی بیماریوں میں اضافہ ہوا، بلکہ نت نئے حشرات کی تعداد بھی بڑھ گئی ہے جن میں ٹڈیوں، فروٹ فلائی اور کیڑوں کی مختلف اقسام شامل ہیں۔

شفیق الرحمان نے مزید بتایا کہ موسمی تغیر کی وجہ سے زمین بنجر اور کٹاؤ کا شکار ہو رہی ہے جبکہ اس کی زرخیزی بھی بری طرح متاثر ہوئی ہے۔ وہ کہتے ہیں کہ قدرتی طور پر پہاڑوں کے اوپر پائے جانے والے پودے کم درجہ حرارت پر موجود زرخیزی کو استعمال کرتے ہیں تاہم درجہ حرارت بڑھ جانے سے یہ زرخیزی بھی ختم ہو رہی ہے۔

ظفر جہانگیر محکمۂ زراعت میں بطور ریسرچ آفیسر کام کرتے ہیں۔ جب ان سے فصلوں کو موسمیاتی تبدیلیوں کے اثرات سے تحفظ دینے کے بارے میں پوچھا گیا تو انہوں نے بتایا کہ مکئی اور گندم کی فصل، سبزیوں اور پھلوں پر اس حوالے سے تحقیق جاری ہے اور&nbsp; نئے بیج متعارف کرانے کی کوششیں ہورہی ہیں تاکہ پیداوار بڑھائی جاسکے اور فصلوں کے انتخاب میں بھی کسانوں کی رہنمائی کی جارہی ہے۔

&quot;ہمارے ہاں فروٹ فلائی کے حملوں میں بہت زیادہ اضافہ ہوا ہے، پہلے کم درجۂ حرارت کے باعث سے یہ مرجاتی تھیں، مگر اب ایسا نہیں ہو رہا، اسی طرح پہلے اس خطے میں جنگلی سؤروں کے موجودگی کے کوئی آثار نہیں ملتے مگر موسمیاتی تبدیلی سے اس خطے میں ان کی افزائش بڑھی ہے اور جو تھوڑی بہت فصل ہوتی ہے، وہ اسے بھی تباہ کر دیتے ہیں۔&quot;

ان سے جب پوچھا گیا کہ گزشتہ پانچ سال کے دوران کتنی فیصد زرعی زمین کو نقصان پہنچا ہے اور پیداوار پر کیا اثر پڑا ہے تو انہوں نے بتایا کہ اس حوالے سے ان کے پاس کوئی اعداد و شمار موجود نہیں ہیں۔

ان معلومات کے حصول کے لیے جب سیکرٹری زراعت سردار جاوید ایوب سے رابطہ کیا گیا تو انہوں نے کوئی جواب نہیں دیا جبکہ ڈائریکٹر محکمۂ زراعت اعظیم خان نے بتایا کہ ڈیٹا محکمے زراعت کے پاس سرے سے موجود ہی نہیں ہے۔

ادارۂ تحفظ ماحولیات کی جانب سے 2018 میں ماحولیاتی صورت حال سے متعلق رپورٹ کے مطابق آزاد کشمیر میں نئے گھروں کی تعمیرات اور بڑھتی ہوئی آبادی کے باعث پہلے ہی زرعی زمین کم ہوتی جارہی ہے۔ یہی وجہ ہے، کہ آزاد کشمیر میں زرعی رقبہ صرف 24.5 فیصد ہے اور&nbsp; 2018 کے بعد اس بارے میں کسی بھی حکومتی ادارے نے مزید کوئی تحقیق نہیں کی۔

کلائمیٹ چینج سیل کے ڈائریکٹر ڈاکٹر سردار رفیق کہتے ہیں کہ موسمیاتی تبدیلی پاکستان کے زیر انتظام کشمیر کی زراعت کیلئے ایک بڑا چیلنج ہے۔

&quot;آزاد کشمیر کا زرعی رقبہ نہ صرف سکڑا ہے بلکہ مختلف فصلیں بھی ناپید ہوگئی ہیں۔ وادیٔ نیلم میں شونٹر اور گریس ویلی میں شہریوں کی زندگی کا انحصار جن فصلوں پر تھا اب ان کے صرف تذکرے ہی سننے کو ملتے ہیں۔&quot;

&quot;پانچ سال قبل وادی نیلم میں دو کلو تک وزن کا ایک خاص آلو پیدا ہوتا تھا مگر اب وہ ختم ہو گیا ہے، اسی طرح سردیوں میں جب بارش اور برف باری کے باعث راستے بند ہو جاتے تھے تو لوگ تونبہ کی روٹی استعمال کرتے تھے مگر اب یہ ناپید ہوتا دکھائی دے رہا ہے، جس کی بنیادی وجہ درجہ حرارت میں اضافہ ہے۔

سردار رفیق نے بتایا کہ موسمیاتی تبدیلی کے باعث موسم بہار ختم ہو چکا ہے، سردی سے فوراً بعد گرمی شروع ہوجاتی ہے۔گزشتہ پچاس سال میں اوسطاً درجہ حرارت میں 2 سینٹی ڈگری اضافہ ہوا ہے جبکہ اگلے پچاس سال میں مزید تین ڈگری اضافے کا خدشہ ہے۔ انہوں نے کہا کہ اگر بدلتے موسمی حالات کو مدنظر رکھ کر اگر کاشت کاری کی جائے تو مستقبل میں غذائی قلت کے خطرے سے بچاؤ ممکن ہے۔

ہواؤں کے بدلتے رخ سے انجان رہے ہم: پاکستان کا زرعی شعبہ موسمیاتی تبدیلی سے کن تبدیلیوں کی زد میں ہے؟

بہار کا موسم ختم، بارشوں کا انداز بدل گیا: آزاد کشمیر میں زراعت موسمیاتی تبدیلی کی لپیٹ میں

شبنم بشیر کو چند ماہ پہلے بخار ہوا تو ان کے جسم کی رنگت زرد پڑنے لگی اور انہیں ہر وقت نقاہت رہنے لگی۔ کچھ روز بعد جب انہوں نے ایک ہسپتال سے معائنہ اور ٹیسٹ کرائے تو انہیں پتہ چلا کہ انہیں یرقان ہو چکا ہے۔&nbsp;

وہ کہتی ہیں کہ &quot;جب ڈاکٹروں نے بتایا کہ مجھے یرقان ہوا ہے تو میرے سر پر قیامت ٹوٹ پڑی&quot;۔ ان کے اس شدید ردِعمل کا سبب یہ پریشانی تھی کہ ان کے &quot;علاج کے اخراجات کیسے پورے ہوں گے&quot; کیونکہ، ان کے مطابق، ان کے شوہر ایک تندور پر روٹیاں لگاتے ہیں جس سے انہیں اتنی کم آمدنی ہوتی ہے کہ اس میں مشکل سے ان کی گزر بسر ہوتی ہے۔&nbsp;

دو بچیوں کی ماں شبنم بشیر کی عمر 31 سال ہے اور وہ آزاد کشمیر کے دارالحکومت مظفر آباد کے وسط میں ٹانگہ سٹینڈ نامی ایک پرانی اور گنجان بستی میں دو کمروں کے کرائے کے مکان میں رہتی ہیں۔ ان کے معالجوں کے خیال ہے کہ انہیں یرقان ہونے کی وجہ آلودہ پانی کا استعمال ہے۔&nbsp;

یہ تشخیص صحیح معلوم ہوتی ہے کیونکہ ان کے گھر میں پانی فراہم کرنے والی سرکاری پائپ لائن ان کے محلے کے سامنے سے گزرنے والے ایک گندے نالے کے ساتھ ساتھ چلتی ہے۔ یہ لائن اس قدر خستہ حال ہے کہ اس میں نالے کے گندے پانی کا شامل ہو جانا کوئی حیرت کی بات نہیں۔

لیکن شبنم بشیر یہ نہیں جانتیں کہ ان کے گھر میں استعمال ہونے والا پانی انسانی صحت کے لیے کتنا نقصان دہ ہے۔ درحقیقت مظفر آباد میں رہنے والے لوگوں کی ایک بڑی تعداد انہی کی طرح لاعلم ہے کہ ان کے گھروں میں فراہم کیا جانے والا پانی کس قدر آلودہ ہے اور اسے پینے کی وجہ سے انہیں کس قسم کے طبی مسائل کا سامنا کرنا پڑ رہا ہے۔&nbsp;

تاہم سرکاری اعدادوشمار نشان دہی کرتے ہیں کہ اس پانی کے استعمال کی وجہ سے مظفر آباد میں یرقان اور اسہال جیسے متعدد امراض بڑے پیمانے پر پھیل چکے ہیں۔ شہر کے سب سے بڑے سرکاری ہسپتال، عباس انسٹیٹوٹ آف میڈیکل سائنسز، کے شعبہ شماریات کے مطابق 2017 میں وہاں یرقان کے 16 ہزار نو سو 82 مریض لائے گئے جبکہ 2018 میں ان کی تعداد بڑھ کر 19 ہزار سات سو 97 تک پہنچ گئی۔ اگرچہ پچھلے چار سالوں میں یہ تعداد کچھ کم ہوئی ہے لیکن پھر بھی 2022 کے پہلے پانچ ماہ میں اس مرض میں مبتلا ایک ہزار آٹھ سو دو لوگوں کو اس ہسپتال میں لایا گیا ہے۔

اسی طرح 2017 میں اسہال کے دو لاکھ 82 ہزار دو سو 56 مریض عباس انسٹیٹوٹ آف میڈیکل سائنسز میں علاج کے لیے آئے جبکہ 2018 میں ان کی تعداد تین لاکھ 14 ہزار ایک سو 84 اور 2019 میں تین لاکھ 32 ہزار تین سو 18 ریکارڈ کی گئی۔ اِس سال 30 مئی تک بھی اسہال کا شکار 44 ہزار 56 مریضوں کا یہاں علاج کیا گیا ہے۔ &nbsp;

اس ہسپتال کے میڈیکل سپیشلسٹ ڈاکٹر عادل چودھری کا کہنا ہے کہ اتنی بڑی تعداد میں لوگوں کا ان امراض میں مبتلا ہونا اس بات کی نشاندہی کرتا ہے کہ &quot;مظفرآباد اور اس کے &nbsp;گردونواح میں آبی آلودگی کی شرح خطرناک حد تک بڑھ چکی ہے&quot;۔ وہ خبردار کرتے ہیں کہ &quot;اگر اس آلودگی کا تدارک نہ کیا گیا تو اگلے 20 سالوں میں یہاں صحت کا بہت بڑا بحران جنم لے سکتا ہے&quot;۔&nbsp;

<h2>سرکاری جائزے، عوامی ضروریات</h2>

اسد غلام دین 28 سال کے پڑھے لکھے انسان ہیں۔ لیکن حال ہی میں وہ مظفرآباد شہر سے دو میل مغرب میں دریائے نیلم اور دریائے جہلم کے اتصال پر واقع ایک تاریخی بارہ دری کے سامنے ایک ایسے چشمے سے پانی بھرنے والے لوگوں میں شامل ہیں جس کے پاس لگے بورڈ پر واضح طور پر لکھا ہے کہ اس کا پانی پینے کے قابل نہیں۔ وہ اس اِنتباہ کی موجودگی سے آگاہ ہیں لیکن ان کا کہنا ہے کہ &quot;ہم یہی پانی استعمال کرنے پر مجبور ہیں کیونکہ سرکاری سپلائی کے ذریعے ہمارے گھروں میں آنے والا پانی نہ صرف ہماری ضروریات سے بہت کم ہے بلکہ اس میں پائی جانے والی آلودگی اِس چشمے کی آلودگی سے کہیں زیادہ خطرناک ہے&quot;۔&nbsp;

یہ بورڈ آزاد کشمیر کے ادارہ تحفظ ماحولیات ( ای پی اے ) نے لگایا ہے جس کے ڈائریکٹر شفیق عباسی کا کہنا ہے کہ انہوں نے مظفرآباد اور اس کے گردونواح میں عوام کی آگاہی کے لئے ایسے کئی بورڈ نصب کیے ہیں۔ ان کی تنصیب کی وجہ بیان کرتے ہوئے وہ کہتے ہیں کہ ان کے ادارے نے &quot;2013 اور 2019 میں دو سروے کیے جن سے پتہ چلا کہ اس علاقے میں واقع متعدد چشموں اور ندی نالوں کا پانی انتہائی آلودہ ہو چکا ہے&quot;۔

وفاقی حکومت کے تحقیقی ادارے، پاکستان کونسل فار ریسرچ اِن واٹر ریسورسز، نے بھی 2015 اور 2020 میں دوبار مظفرآباد کے پانی کا جائزہ لیا جن کے نتیجے میں اس نے انکشاف کیا کہ یہاں استعمال ہونے والا 70 فیصد پانی غیر محفوظ ہو چکا ہے۔ ان میں یہ بات بھی سامنے آئی ہے کہ نہ صرف شہر کے آس پاس پائے جانے والے زیادہ تر ندی نالوں اور چشموں کا پانی زہریلا ہو چکا ہے بلکہ اس میں سے گزرنے والے دریائے نیلم اور اس کے نواح میں بہنے والے دریائے جہلم کا پانی بھی انسانی استعمال کے قابل نہیں رہا۔&nbsp;

<h2>ناکام منصوبے، خاموش ادارے</h2>

1998 کی مردم شماری کے مطابق مظفر آباد کی آبادی چار لاکھ 54 ہزار تھی جو 2017 میں بڑھ کر چھ لاکھ 50 ہزار ہو گئی ہے۔ اکتوبر 2005 میں آنے والے زلزلے کے بعد آزاد کشمیر کے دیہی علاقوں سے یہاں منتقل ہونے والے لوگ اس کے علاوہ ہیں جن کی اصل تعداد کے بارے میں کوئی سرکاری اعدادوشمار موجود نہیں۔&nbsp;

مظفر آباد ڈویلپمنٹ اتھارٹی کے چیئرمین اظہر گیلانی کہتے ہیں کہ یہ نقل مکانی شہر کے پانی کی آلودگی کی ایک اہم وجہ ہے۔ اپنی بات کی وضاحت کرتے ہوئے ان کا کہنا ہے کہ &quot;زلزلے کے بعد شہر میں آنے والے لوگوں کو مکانوں کی تعمیر کے لئے اجازت نامے جاری کرتے ہوئے تعمیراتی قواعدوضوابط کو بالکل نظرانداز کیا گیا جس کے نتیجے میں قدرتی ندی نالوں اور چشموں کے ارد گرد بڑی تعداد میں انسانی بستیاں بن گئی ہیں&quot; جن کا کچرا انہی ندی نالوں اور چشموں کے اردگرد پھینکا جا رہا ہے۔ اسی طرح، ان کے مطابق، &quot;ان آبادیوں سے گندے پانی کی نکاسی کے لیے زیرزمین پائپ لائنیں بھی نہیں بچھائی گئیں چنانچہ یہ پانی کھلے نالوں سے گزرتا ہوا آبی گزر گاہوں میں شامل ہو رہا ہے&quot;۔&nbsp;

شفیق عباسی ان کے موقف کی تائید کرتے ہیں۔ ان کا کہنا ہے کہ &quot;شہر کی آبادی میں بے ہنگم اضافے کی وجہ سے&quot; اس کے مضافات میں ایسی دشوار گزار جگہوں پر بھی بستیاں بنا دی گئی ہیں&quot; جہاں گندے پانی کی نکاسی جیسی شہری سہولتیں فراہم کرنے کے لیے &quot;سرکاری ادارے کبھی پہنچ ہی نہیں پاتے&quot;۔&nbsp;

مظفرآباد میونسپل کارپوریشن کے سٹیٹ آفیسر انجم بلال پانی کی آلودگی کی ایک اور وجہ کی نشان دہی کرتے ہوئے کہتے ہیں کہ شہر میں &quot;روزانہ تقریباً 50 ٹن سے 55 ٹن کوڑا کرکٹ پیدا ہوتا ہے جسے تلف کرنے کا کوئی انتظام موجود نہیں۔ اس لیے اسے مقامی دریاؤں اور ندی نالوں میں پھینک دیا جاتا ہے&quot;۔

مظفر آباد کے ایک سماجی کارکن فیصل جمیل کشمیری بھی اسی مسئلے کو پانی کی آلودگی کا ذمہ دار سمجھتے ہیں۔ وہ کہتے ہیں کہ اسے حل کرنے کے لیے &quot;2019 میں شہر کی انتظامیہ نے دفعہ 144 نافذ کر کے دریائے نیلم میں کوڑا پھینکنے پر پابندی بھی لگائی لیکن اس پر عمل درآمد کرانے کے لیے کوئی عملی اقدامات نہ کیے گئے اور یوں شہر کا کچرا آبی گزرگاہوں کا حصہ ہی بنتا رہا&quot;۔

اُسی سال وفاقی حکومت کے ادارے، واٹر اینڈ پاور ڈویلپمنٹ اتھارٹی (واپڈا)، کی جانب سے آزاد کشمیر کی حکومت کو تقریباً 30 کروڑ روپے بھی فراہم کیے گئے تاکہ مقامی دریاؤں اور ندی نالوں کو کوڑے کرکٹ سے پاک کیا جا سکے۔ لیکن فیصل جمیل کشمیری کہتے ہیں کہ &quot;اس کے باوجود ان آبی وسائل کی آلودگی میں کوئی کمی نہیں آئی&quot;۔

مقامی سرکاری اہل کار تسلیم کرتے ہیں کہ یہ مسئلہ اتنا شدید ہے کہ انہیں اس کا کوئی فوری حل نظر ہی نہیں آ رہا۔ ان میں سے ایک کا کہنا ہے کہ دراصل &quot;حکومت کے پاس اتنے مالی وسائل ہی نہیں کہ وہ آبی آلودگی پر قابو پانے کا کوئی مستقل بندوبست کر سکے&quot;۔

فائزہ گیلانی

"موت کا کاروبار کرنے والوں کو کھلی چھوٹ": آزاد کشمیر میں جعلی ادویات کی فروخت رک کیوں نہیں رہی

گندم کی سمگلنگ اور گھوسٹ ملیں: آزاد کشمیر میں آٹے کی قلت، حکومت پاسکو کے 12 ارب کی مقروض

وادی نیلم کے علاقے کنڈل شاہی میں بولی جانے والی زبان 'کنڈل شاہی' مسلسل معدومی کا شکار ہو رہی ہے

بہار کا موسم ختم، بارشوں کا انداز بدل گیا: آزاد کشمیر میں زراعت موسمیاتی تبدیلی کی لپیٹ میں

چاہ میں پاؤں کہاں آس کا میٹھا پانی: 'مظفرآباد میں دستیاب 70 فیصد آبی وسائل انسانی استعمال کے قابل نہیں رہے'۔

Lok Sujag