گردے کی تکلیف میں مبتلا 95 سالہ محمد عیسیٰ تربت ٹیچنگ ہسپتال میں ایک خستہ حال بستر پر زیر علاج ہیں۔ چار روز سے ان کی حالت بہت خراب ہے۔ ان ساتھ بیٹھے تیماردار ہسپتال انتظامیہ کے رویے سے نالاں دکھائی دیتے ہیں۔ ان کا کہنا ہے کہ یہاں مریضوں کی بہتر نگہداشت نہیں کی جاتی اور انجکشن لگانے کے لئے سرنج تک انہیں اپنے پیسوں سے خریدنا پڑتی ہے۔

وہ کہتے ہیں کہ اگر ان کے مالی وسائل اجازت دیتے تو وہ مزید &#39;عذاب سہنے&#39; کے بجائے اپنے مریض کو علاج کے لئے کراچی لے جاتے۔

چالیس سالہ سلمیٰ شوگر اور بلڈ پریشر کی مریضہ ہیں۔ انہیں سر درد اور بخار کے باعث ایک دن پہلے علاج کے لیے اس ہسپتال میں داخل کرایا گیا تھا۔ انہوں نے لوک سجاگ کو بتایا کہ ہسپتال میں ڈاکٹر تو ہیں لیکن مفت علاج اور ادویات میسر نہیں اور نہ ہی یہاں صفائی کا کوئی معقول انتظام ہے۔

سلمیٰ کے ساتھ بیٹھی ان کی چھوٹی بہن کا کہنا تھا کہ یہ &#39;برائے نام سرکاری ہسپتال&#39; ہے جب کسی مریض کو پیناڈول کی گولی تک مفت نہیں ملتی تو اس کے سرکاری ہونے کا کیا فائدہ؟

&nbsp;ساڑھے تین سو&nbsp; بستروں پر مشتمل اس ٹیچنگ ہسپتال کو تربت مکران میڈیکل کالج سے منسلک کئے جانے کے بعد اس میں نئی عمارتیں بن گئی ہیں اور نئے شعبوں کا اضافہ ہو گیا ہے لیکن یہاں آنے والے مریضوں کو بہت سی شکایات ہیں۔

مئی میں جب ضلع کیچ میں ڈینگی وائرس پھیلنے سے آبادی کا بڑا حصہ متاثر ہوا تو مقامی لوگوںے سرکاری ہسپتال میں سہولیات کی عدم فراہمی کا شکوہ کیا۔

ہسپتال کے ایم ایس ڈاکٹر خالد بلوچ کہتے ہیں کہ ڈینگی پھیلا تو ہسپتال میں اس کے مریضوں کے لئے ایک الگ یونٹ بنا کر اس میں تمام سہولیات فراہم کرنے کی کوشش کی گئی۔ لیکن اسی ہسپتال میں ایک شعبے کے انچارج (ان کا نام ظاہر نہیں کیا جا رہا) نے لوک سجاگ کو بتایا کہ جون میں ڈینگی وائرس کے درجنوں مریض ہسپتال آئے۔ اگرچہ ڈینگی کا علاج کرنے کے لئے الگ شعبہ بنایا گیا تھا لیکن 50 ڈگری تک پڑنے والی شدید گرمی میں ایئرکنڈیشنر کی سہولت نہیں تھی اس لیے وہاں کسی مریض کو داخل کرنا ممکن نہیں تھا۔ یہی وجہ ہے کہ بہت بڑی تعداد میں لوگوں نے علاج کے لئے نجی ہسپتالوں کا رخ کیا۔

&nbsp;تربت ٹیچنگ ہسپتال 16 مختلف شعبہ جات کے ساتھ مکران ڈویژن میں سب سے بڑا سرکاری ہسپتال ہے۔

ہسپتال سے ملنے معلومات کے مطابق یہاں او پی ڈی میں روزانہ ایک سے ڈیڑھ ہزار اور ماہانہ 28 سے 30 ہزار تک مریض آتے ہیں۔ روزانہ ایمرجنسی میں آنے والے مریضوں کی اوسط تعداد 150 اور گائنی وارڈ سے رجوع کرنے والوں کی تعداد 120 تک ہوتی ہے۔

&nbsp;ان میں ضلع کیچ کے ساتھ پنجگور اور گوادر سے مریض بھی آتے ہیں جبکہ ہسپتال انتظامیہ کے مطابق ایران کے سرحدی علاقوں میں رہنے والے مریضوں کی نمایاں تعداد بھی علاج کے لیے اسی ہسپتال کا رخ کرتی ہے۔

اس ہسپتال کے گائنی وارڈ میں گوادر سے تعلق رکھنے والی ایک مریضہ مریم نے بتایا کہ ان کے پیٹ میں بچہ انتقال کر گیا تھا اور چار گھنٹے سے جاری شدید درد کے باوجود ڈاکٹروں نے ان کا آپریشن نہیں کیا۔

وہ کہتی ہیں کہ اپنے علاقے میں علاج کی مناسب سہولیات نہ ہونے کے باعث وہ تربت ٹیچنگ ہسپتال میں آئی تھیں لیکن یہاں آ کر بھی انہیں مایوسی ہوئی ہے۔

تربت ٹیچنگ ہسپتال میں او پی ڈی اور ایمرجنسی کے ساتھ میڈیکل وارڈ، گائنی، آئی، ڈینٹل، سرجیکل وارڈ اور سات بستروں پر مشتمل ڈائلیسز وارڈ قائم ہیں۔ اس کے علاوہ یہاں آئی سی یو، ایم آر آئی، سرجری اور سٹی اسکین کی سہولت بھی میسر ہے۔

ہسپتال کو ادویات کی خریداری کے لئے سالانہ چھ کروڑ روپے کا فنڈ فراہم کیا جاتا ہے۔

ایم ایس ڈاکٹر خالد کے مطابق میڈیکل سٹور ڈیپارٹمنٹ کی طرف سے انہیں جن ادویات کی لسٹ دی جاتی ہے ان کی خریداری لازم ہے۔

&quot;اگرچہ ان میں سے بعض ادویات کی انہیں ضرورت نہیں ہوتی لیکن ٹیچنگ ہسپتال کو اپنے سالانہ فنڈز اپنی ضروریات کی ادویات پر خرچ کرنے کا اختیار نہیں&quot;۔

وہ تجویز دیتے ہیں کہ ہسپتال کو ادویات کی مد میں اپنا بجٹ خود استعمال کرنے کا اختیار دیا جائے یا کم از کم ان سے ضرورت کی ادویات معلوم کرکے فہرستیں بنائی جائیں تاکہ جو ادویات انہیں درکار ہیں وہ انہیں مل سکیں۔

ان کے مطابق چھ کروڑ روپے سالانہ ایک معمولی رقم ہے جس سے اتنے بڑے ہسپتال کو چلانا ممکن نہیں اگر حکومت ادویات کا سہ ماہی بجٹ چھ کروڑ روپے کردے تو اس سے بہتری آئے گی۔

انہوں نے یہ بھی بتایا کہ سال 23-2022ء کے بجٹ میں ادویات کی قیمتوں میں اضافے کے سبب کمپنی کی طرف سے مناسب ریٹ نہ ملنے کے باعث یہ بجٹ لیپس ہوگیا تھا۔

ہسپتال انتظامیہ کی جانب سے &#39;سب اچھا ہے&#39; کے دعووں کے باوجود یہاں آنے والے مریض انتظامیہ کے خلاف متواتر شکایات کرتے دکھائی دیتے ہیں۔

لوک سجاگ نے جن مریضوں سے بات کی انہوں نے دیگر مسائل کے علاوہ یہ بھی بتایا کہ او پی ڈی صبح 8 بجے کے بجائے 10 بجے کھلتی ہے جبکہ دوپہر ایک بجے سے پہلے بیشتر ڈاکٹرز اپنے پرائیوٹ کلینکس کو چلے جاتے ہیں۔

تاہم ڈاکٹر خالد اس شکایت کو مسترد کرتے ہوئے کہتے ہیں کہ تمام ڈاکٹر ہر وقت اپنی ڈیوٹی پر موجود رہتے ہیں۔ البتہ یہ ضروری نہیں کہ وہ وارڈ کا دورہ، ٹیچنگ اور دیگر سرگرمیوں کو چھوڑ کر صرف او پی ڈی کریں۔

تین سال پہلے کیچ کے اسسٹنٹ کمشنر نے ہر نجی کلینک پر دوپہر دو بجے سے پہلے ڈاکٹروں کی پریکٹس پر پابندی عائد کردی تھی مگر اب یہ پابندی برقرار نہیں رہی۔

کیچ کے قائم مقام ڈپٹی کمشنر عقیل کریم اس معاملے پر کسی مصلحت پسندی یا غفلت سے انکار کرتے ہوئے کہتے ہیں کہ ضلعی انتظامیہ ٹیچنگ ہسپتال کے معاملات پر گہری نظر رکھتی ہے اور جونہی کوئی شکایت ملے اس پہ ضروری کارروائی کی جاتی ہے۔

پورے ضلع صحبت پور میں ایک لیڈی ڈاکٹر: 'ایسا نہ ہوتا تو بیٹی کے سر پر ماں کا سایہ سلامت ہوتا'

کیچ کا 'برائے نام سرکاری ہسپتال': مریضوں کو سرنج اور پینا ڈول کی گولی بھی خریدنا پڑتی ہے

text

بلوچستان کے ضلع کیچ کی تحصیل تربت میں خواتین کا پولیس سٹیشن قائم کیا گیا ہے جس میں لیڈی ایس ایچ او کی قیادت میں 47 اہلکار، خواتین کی شکایات سن کر ان پر کارروائی کریں گی۔ یہ صوبے میں اس طرح کا دوسرا پولیس سٹیشن ہے۔ اس سے پہلے بلوچستان میں خواتین کو یہ سہولت صرف کوئٹہ میں میسر تھی۔

تربت کی آبادی 10 لاکھ ہے۔ مکران ڈویژن کا سیاسی طور پر متحرک علاقہ ہونے کی وجہ سے یہاں خواتین کو بلوچستان کے قبائلی علاقوں کی طرح کڑی سماجی پابندیوں کا سامنا نہیں کرنا پڑتا۔ لیکن کم عمری کی شادی، گھریلو تشدد اور طلاق جیسے مسائل یہاں بھی عام ہیں اور تھانوں میں خواتین کی جانب سے درج کرائے گئے مقدمات کی شرح ایسے مسائل کے مقابلے میں بہت کم ہوتی ہے۔ اس پولیس سٹیشن کے قیام سے یہ امید پیدا ہوئی ہے کہ اب کم از کم تربت اور گردونواح میں خواتین کے خلاف جرائم میں بڑی حد تک کمی آئے گی۔

اس پولیس سٹیشن کی ایس ایچ او میسرہ بلوچ بتاتی ہیں کہ علاقے میں خواتین کے لیے تھانے جانا اور خاص طور پر جنسی زیادتی یا ہراساں کیے جانے کی کھل کر شکایت درج کرانا معیوب سمجھا جاتا ہے۔ اسی لیے تاحال خواتین کے اپنے خلاف ظلم پر تھانے جا کر شکایت درج کرانے کی مضبوط رویت نہیں رہی۔ اسی طرح گھریلو تشدد کے بھی بہت کم واقعات رپورٹ ہوتے ہیں۔

انہوں ںے کہا کہ خواتین کے لیے مخصوص پولیس سٹیشن کے قیام سے اس صورتحال میں تبدیلی کی توقع ہے۔ ان کا یہ بھی کہنا ہے کہ وہ خواتین کے اس تھانے کو ایک تربیتی مرکز کے طور پر بھی چلائیں گی جہاں خواتین کو ان کے قانونی حقوق کے حوالے سے رہنمائی دی جائے گی۔

یہ پولیس سٹیشن عطا شاد ڈگری کالج روڈ پر چلڈرن پارک کے سامنے قائم ہے۔ اس کے مرکزی دروازے پر چار پولیس اہلکار ڈیوٹی دیتے ہیں جبکہ چار دیواری کے اندر تمام عملہ خواتین پر مشتمل ہے۔ پولیس سٹیشن میں اہلکاروں کے چھوٹے بچوں کی نگہداشت کے لیے بے بی کیئر روم اور فیڈنگ روم بھی بنائے گئے ہیں۔

مکران ہائی کورٹ بار ایسوسی ایشن کی رکن رضوانہ ایڈوکیٹ کا کہنا ہے کہ علاقے میں طلاق، گھریلو تشدد اور کم عمری میں شادی کے واقعات بڑھ رہے ہیں۔ ایسے واقعات کی روک تھام یا خواتین کو ان مسائل پر بہتر داد رسی کے لیے اس مخصوص تھانے سے بہت مدد ملے گی۔

انہوں ںے بتایا کہ تربت میں طلاق اور خواتین پر تشدد کے تقریباً سو سے زیادہ مقدمات مختلف عدالتوں میں زیر سماعت ہیں۔ اس کا مطلب یہ ہے کہ اب عورتوں میں اپنے مسائل کا مقابلہ&nbsp; کرنے کا شعور بیدار ہو رہا ہے۔ خواتین کے مخصوص پولیس سٹیشن کے قیام کے بعد عام خواتین خود پر تشدّد یا بچیوں کی کم عمری میں زبردستی شادی پر آسانی سے مقدمات درج کرا سکیں گی۔

اس پولیس سٹیشن کی جانب سے لڑکیوں کے مقامی سکولوں میں طالبات کو تشدد اور ہراسانی کے خلاف آگاہی دینے کی مہم چلانے کی منصوبہ بندی بھی کی گئی ہے۔ خواتین پولیس اہلکار طالبات کو بتائیں گی کہ انہیں جنسی یا جسمانی تشدد اور ہراساں کیے جانے کے واقعات سے بچنے اور ایسے واقعات پیش آنے کی صورت میں قانونی کارروائی کے لیے کیا کرنا چاہیے۔

تربت میں انسانی حقوق کمیشن کی کارکن شہناز شبیر کہتی ہیں کہ پولیس سٹیشن کے قیام سے ہو سکتا ہے کہ خواتین کے لیے اپنی شکایات درج کرانا قدرے آسان ہو جائے لیکن اب بھی بیشتر خواتین کے لیے خود تھانے جا کر دادرسی کے حصول پر آمادہ ہونے میں وقت لگے گا۔ جب تک خواتین معاشرے میں عدم تحفظ کے احساس کا شکار رہیں گی اس وقت تک ایسے اقدامات کے حقیقی مقاصد حاصل نہیں ہو سکتے۔

میسرہ بلوچ کہتی ہیں کہ جن خواتین کے لیے پولیس سٹیشن آ کر اپنی شکایت درج کرانا آسان نہیں ہے ان کے لیے ایک ٹول فری نمبر شروع کیا جائے گا اور خواتین گھر بیٹھے اس نمبر پر اپنا مسئلہ بیان کر سکتی ہیں جس پر ہر ممکن کارروائی کی جائے گی۔

ضلع کیچ کے ایس ای پی محمد بلوچ نے لوک سجاگ کو بتایا کہ خواتین پولیس سٹیشن کو ہرطرح سے بااختیار بنایا گیا ہے اور جہاں بھی اسے مزید پولیس فورس کی ضرورت ہو گی وہ مہیا کی جائے گی۔ وہ سمجھتے ہیں کہ وقت کے ساتھ خواتین کا اس پولیس سٹیشن پر بھروسہ بڑھ جائے گا اور اس سے مقامی سطح پر خواتین کے خلاف جرائم میں نمایاں کمی آئے گی۔

لب پہ رہ جاتی ہے آ آ کے شکایت میری: 'پولیس کے ڈر اور اس پر عدم اعتماد کے باعث خواتین خود پر ہونے والی تشدد کی رپورٹ درج نہیں کراتیں'۔

تربت میں خواتین کا پولیس سٹیشن: عورتوں کے خلاف جرائم کم کرنے میں کامیاب ہو پائے گا؟

بلوچستان کے ضلع کیچ میں واحد سرکاری لائبریری پچھلے تین سال سے بند پڑی ہے۔

یہ لائبریری شہر بھر کے طلبہ و طالبات کے لیے پڑھنے لکھنے سیکھنے اور امتحانات کی تیاری کے لیے علمی مواد کے حصول کا اہم ترین ذریعہ تھا جو ان سے چھن چکا ہے۔ لائبریری کھولنے کے لیے کالجوں اور یونیورسٹیوں میں پڑھنے والے نوجوانوں کا پُرزور مطالبہ اب احتجاج کی شکل اختیار کر گیا ہے لیکن انتظامیہ ٹس سے مس نہیں ہوئی۔

کوئٹہ کے بعد کیچ صوبہ بلوچستان میں آبادی کے لحاظ سے دوسرا بڑا ضلع ہے جہاں یہ لائبریری ضلع کے انتظامی مرکز تربت میں قائم ہے۔ بند ہونے سے پہلے روزانہ ڈیڑھ سے دو سو طلبہ اس لائبریری میں پڑھنے کے لیے آتے تھے۔

لائبریری کو پہلی مرتبہ فروری 2020 میں کووڈ وبا کے باعث بند کیا گیا تھا۔ طلبہ کے مطالبے پر ستمبر 2020 میں اسے کھولا گیا لیکن نومبر میں دوبارہ بند کر دیا گیا جس کی کوئی وجہ نہ بتائی گئی۔ ریکارڈ کے مطابق لائبریری بند ہونے سے ایک سال پہلے یہاں پبلک سروس کمیشن کے امتحان کی تیاری کرنے والے آٹھ نوجوانوں نے انگریزی کے لیکچرار کی نوکری کے لیے ہونے والے امتحان میں نمایاں کامیابی حاصل کی تھی۔

مقامی لوگ تربت یونیورسٹی میں توسیع کو اس لائبریری کے بند ہونے کی بنیادی وجہ سمجھتے ہیں۔ طالب علم اور سماجی کارکن عزیر حاصل بتاتے ہیں کہ 2017 میں جب تربت یونیورسٹی میں شعبہ قانون کا آغاز ہوا تو اس کا افتتاح پبلک لائبریری میں کیا گیا جس کے بعد اس شعبے کو یونیورسٹی کے بجائے لائبریری کی عمارت میں ہی قائم کرنے کا فیصلہ ہوا۔

عزیز کے مطابق اس کی وجہ یہ تھی کہ پبلک لائبریری جوڈیشل مجسٹریٹ کی عدالت، سیشن کورٹ اور ہائی کورٹ کی تربت برانچ کے قریب واقع ہے اس لیے لائبریری پر طلبہ اور اساتذہ کی سہولت کو ترجیح دی گئی تاہم اس کے باوجود یہاں 2020 کے آغاز تک لائبریری کا وجود قائم رہا۔

اس سے قبل 2017 میں اس لائبریری کے دفاتر کو کلاس روم بنا کر یہاں تربت یونیورسٹی کے شعبہ کیمسٹری کی کلاسیں شروع کی گئی تھیں۔ تاہم جب یونیورسٹی کی نئی عمارت کی تعمیر مکمل ہوئی تو شعبہ کیمسٹری کو واپس یونیورسٹی میں منتقل کر دیا گیا تھا۔

یکم جنوری 2021 کو تربت یونیورسٹی نے ایک نوٹیفکیشن کے ذریعے لائبریری کو بند کر کے اس کا فرنیچر باہر نکال کر کتابیں جمنیزیم&nbsp; میں رکھ دیں۔ یہ کتابیں ابھی تک وہیں پڑی ہیں جن میں بہت سی خراب بھی ہو گئی ہیں۔

لوک سجاگ نے لائبریری پر تربت یونیورسٹی کی ملکیت یا اس پر &#39;قبضے&#39; کی قانونی حیثیت جاننے کے لیے یونیورسٹی کے ڈائریکٹر انفارمیشن سے رابطہ کیا تو انہوں نے اس مسئلے پر رجسٹرار سے بات کرنے کو کہا۔ جب رجسٹرار سے رابطہ کرکے معلومات لینے کی کوشش کی گئی تو انہوں نے کہا کہ وہ وائس چانسلر کی رائے لینے کے بعد ہی اس پر بات کریں گے اور بتایا کہ وی سی اس وقت ملک سے باہر ہیں۔

ماہ گنج (فرضی نام) اس لائبریری میں مقابلے کے امتحان کی تیاری کرتی رہی ہیں۔ انہوں نے لوک سجاگ کو بتایا کہ لائبریری کی عمارت پر &#39;قبضے&#39; کی بنیاد اسی وقت ڈال دی گئی تھی جب بلوچستان ہائی کورٹ کے ایک جج نے لائبریری میں شعبہ قانون کا افتتاح کیا تھا اور اس وقت کے صوبائی وزیر خزانہ ظہور بلیدی بھی ان کےسا تھ تھے۔

ماہ گنج کہتی ہیں کہ جب لائبریری میں شعبہ قانون کا آغاز ہوا تو یہاں پڑھنے کے لیے آںے والے طلبہ پر سختیاں ہونے لگیں۔ لائبریری میں آنے والوں کو ایک شناختی کارڈ جاری کیا گیا جس کے بغیر کسی کو اندر داخل ہونے کی اجازت نہیں تھی۔ اگر کوئی طالب علم اپنے پاس کارڈ رکھنا بھول جاتا تو اسے لائبریری کی عمارت میں داخل ہونے نہیں دیا جاتا تھا خواہ وہ کتنی ہی دور سے کیوں نہ آیا ہو۔ اس کے بعد کئی اقدامات کے ذریعے لائبریری پر &#39;قبضہ&#39; مستحکم کرنے کے بعد اسے بند کر دیا گیا۔

دسمبر 2022 میں ضلع کیچ کے ڈپٹی کمشنر نے کہا تھا کہ لائبریری کی عمارت رنگ و روغن اور تعمیر و مرمت کے لیے بند کی گئی ہے جسے ایک ہفتے میں کھول دیا جائے گا۔ لیکن دس ہفتے سے زیادہ عرصہ گزرنے کے باوجود یہ وعدہ پورا نہیں ہوا اور انتظامیہ یہ بھی نہیں بتاتی کہ لائبریری کو کب کھولا جائے گا۔

کووڈ وبا کے بعد لائبریری کو بند کرنے کی وجہ اس کی چھت پر آنے والی دراڑ بتائی گئی۔ ضلع کیچ کے ایڈیشنل ڈپٹی کمشنر عقیل کریم کا کہنا ہے کہ ضلعی انتظامیہ نے لائبریری کی تزئین و آرائش مکمل کر لی ہے اور اب اس کے لیے فرنیچر خریدا جانا باقی ہے۔ وہ یہ بھی کہتے ہیں کہ لائبریری کو طلبہ کے تحفظ کے لیے بند کیا گیا تھا جسے خواہ مخواہ منفی رنگ دے دیا گیا ہے۔

طلبہ و طالبات لائبریری کھولنے کا متواتر مطالبہ کرتے چلے آ رہے ہیں جس میں اب شدت آ گئی ہے۔ طلبہ تنظیم بی ایس او پجار لائبریری بند کیے جانے کے خلاف کئی مرتبہ احتجاج بھی کر چکی ہے۔ ماہر تعلیم شاری بلوچ کا کہنا ہے کہ یونیورسٹی کے شعبہ قانون کو یونیورسٹی کی عمارت میں ہی ہونا چاہیے اور لائبریری میں طلبہ کو بلاروک و ٹوک رسائی ملنی چاہیے تاکہ وہ مقصد پورا ہو سکے جس کے لیے اسے قائم کیا گیا تھا۔

تربت میں عطا شاد لٹریری فیسٹیول عام ادبی میلوں سے کیسے مختلف تھا

کتابیں جمنیزیم میں ڈھیر اور عمارت پر تالا: کیا تربت پبلک لائبریری پر قبضہ ہو چکا ہے؟

عطا شاد بلوچی اور اُردو زبان کے نامور شاعر ہیں۔ بلوچی زبان میں انہیں وہی مقام حاصل ہے جو اردو میں فیض احمد فیض کا ہے۔ 13 فروری کو ان کے یوم وفات پر ایک ادبی میلے (لٹریری فیسٹیول) کا اہتمام کیا گیا جو کئی اعتبار سے بلوچستان میں اپنی نوعیت کا انوکھا پروگرام تھا جسے صوبہ بھر کے علمی و ادبی منظرنامے پر خاص توجہ حاصل رہی۔

ضلع کیچ میں عطا شاد کے آبائی علاقے تربت میں ہونے والے اس تین روزہ میلے کا اہتمام بلوچستان اکیڈمی آف ریسرچ اینڈ لٹریچر نے کیا تھا۔ یہ میلہ اس لیے بھی غیرمعمولی تھا کہ ضلع کیچ 2006 کے بعد سیاسی شورش کا ایک نمایاں مرکز رہا ہے۔ یہاں کتابوں کی دکانوں اور تعلیمی اداروں کے ہاسٹلوں پر چھاپے مارے گئے ہیں اور ترقی پسند ادب کی کتابیں ضبط کی جاتی رہی ہیں۔ ایسے واقعات میں طلبہ اور کتب فروشوں کی بڑی تعداد کو گرفتار بھی کیا گیا جس کے بعد تربت میں کتابوں کی دکانیں ختم ہو گئی تھیں۔

اس میلے میں بلوچ علم و ادب کی نمایاں شخصیات شریک ہوئیں۔ ڈاکٹر قیصر بنگالی کے علاہ تمام اہم مقررین کا تعلق بلوچی ادب اور بلوچ سیاست سے تھا جن میں معروف اشتراکی دانش ور ڈاکٹر شاہ محمد مری، چاچا اللہ بشک بزادر، ڈاکٹر واحد بخش بزدار، سعید تبسم مزاری اور اردو زبان کے شاعر وحید نور اور سانی سید نمایاں تھے۔ 
&nbsp;

اس موقع پر عطا شاد کی شخصیت اور ان کی شاعری کے مختلف پہلوؤں پر کئی سیشن رکھے گئے تھے جن میں معروف ادیبوں نے خیال آرائی کی۔ اس کے ساتھ بلوچی زبان و سیاست، بلوچستان کی سماجی و معاشی اہمیت، سماجی ترقی میں عورت کا کردار، بلوچی ادب میں ترجمے کی اہمیت اور بلوچ ماخذ جیسے موضوعات پر گروہی مباحث (پینل ڈسکشنز) ہوئے۔

ایک اور خاص بات یہ بھی تھی کہ اس میلے کے اختتام پر ایک درجن کے قریب قراردادیں پیش کی گئیں جو موقع پر موجود بلوچ ادبا اور دانشوروں نے مشترکہ طور پر تیار کی تھیں۔ یہ ادبی میلوں میں ایک نئی روایت ہے۔ تین روز تک ہر سیشن میں ایک ہزار سے زیادہ لوگ شریک ہوئے، جن میں نوجوان خواتین کی شرکت متاثر کن تھی۔

ستر سے زیادہ کتابوں کے مصںف ڈاکٹر شاہ محمد مری کا کہنا تھا کہ &#39;&#39;انسانی اجتماع، یکجائی اور آپس میں مختلف موضوعات پر بات چیت چند لمحوں کے لیے بھی بہت اہم ہوتی ہے اور یہاں تین روز تک یہ سب کچھ ہوا۔ یہ میلہ بلوچی ادب کے حوالے سے انتہائی اہمیت رکھتا ہے۔ اس دوران ہزاروں کی تعداد میں لوگ یہاں آئے، مقررین کو سنا، سوال کیے، آپس میں خیالات، فکر اور لہجوں کا تبادلہ ہوا جس سے بلوچی ادب کو ترقی ملے گی۔&#39;&#39;

اس میلے میں 35 لاکھ روپے مالیت کی کتابیں فروخت ہوئیں۔ لیکن اس سے بھی اہم بات یہ ہے کہ ان کتابوں کے موضوعات دیگر شہروں میں ہونے والے ادبی میلوں میں بڑی تعداد میں فروخت ہونے والی کتابوں کے عام موضوعات سے یکسر مختلف تھے۔

کراچی سے آئے ناشر جاوید حسن نے لوک سجاگ کو بتایا کہ ملک بھر میں عام قاری اسٹال یا دکان پر آکر اپنی پسند کی کتابیں ٹٹول کر لیتا ہے مگر تربت کے قاری کو پہلے سے معلوم ہے کہ اسے کیا اور کسے پڑھنا ہے، وہ کتابیں ٹٹول کر وقت نہیں ضائع کرتا بلکہ اپنا انتخاب بتا کر کتاب مانگتا ہے اور یہ ایک گہرا فرق ہے۔ انہوں نے اپنا مشاہدہ بیان کرتے ہوئے کہا کہ تین روز میں کسی قاری نے رجعتی موضوع پر کسی کتاب کے بارے میں نہیں پوچھا بلکہ ادب، سماج، تاریخ یا مذاہب کے درمیان تقابلی جائزے جیسے موضوعات پر کتابیں خریدی گئیں۔&#39;&#39;

عطاشاد ادبی میلے میں بائیس ناشروں نے کتابوں کے سٹال لگائے تھے جن کا تعلق لاہور، کراچی، لاہور اورکوئٹہ جیسے بڑے شہروں کے علاوہ گوادر، پشکان اور کیچ سمیت بلوچستان کی بہت سی جگہوں سے بھی تھا۔

میلے کی میزبان بلوچستان اکیڈمی کے چیئرمین پروفیسر ڈاکٹر غفور شاد نے بتایا کہ اس پروگرام کے لیے مالی مدد کا حصول ایک مشکل کام تھا لیکن جب انہوں نے اس کے انعقاد کی تیاریاں شروع کیں تو بہت سے ہم خیال لوگ ان کے ساتھ شامل ہوتے گئے اور مالی مدد سمیت ہر طرح کا تعاون بھی میسر آنے لگا اور وہ ناقابل یقین طور پر ایک کامیاب ادبی میلے کے انعقاد میں کامیاب رہے جس کی بلوچستان میں پہلے کوئی مثال نہیں ملتی۔

میلے کا اختتام 15 فروری کی رات محفل مشاعرہ پر ہوا۔ اس سے قبل دو راتوں کو بلوچی کلاسیکل اور عام موسیقی کی نشستیں ہوئیں جن میں لوگوں کی بڑی تعداد نے شرکت کی۔ آخری شب مشاعرے میں کم و بیش دو ہزار افراد موجود تھے۔ 
تربت یونیورسٹی کی طالبہ شاری بلوچ اس میلے میں خواتین کی بڑی تعداد کے آنے کو سماج میں انقلابی تبدیلی کا مظہر سمجھتی ہیں۔ کوہِ سلیمان کے علاقے سے آئے بلوچی زبان کے شاعر سعید تبسم مزاری کا کہنا ہے کہ عطا شاد ادبی میلے جیسی سرگرمیاں بلوچستان میں سماجی، سیاسی اور لسانی فاصلوں کو مٹائیں گی۔

آرٹ اور ادب کے راستے شناخت کا سفر

کوہِ مراد بلوچستان کے جنوب مغربی ضلع کیچ کی تحصیل تربت میں واقع سیاہ رنگ کے ایک خشک پہاڑ کا نام ہے۔ ذِکری فرقے سے وابستہ لوگوں کا ماننا ہے کہ ان کے مذہبی پیشوا نے اپنی زندگی کے آخری ایام اسی جگہ عبادت اور تبلیغ کرتے ہوئے گزارے تھے اس لیے وہ اسے مقدس سمجھتے ہیں اور ہر سال رمضان کے مہینے کے آخری دنوں میں اس کی زیارت کرتے ہیں۔ اس سالانہ زیارت کے علاوہ عام دنوں میں بھی وہ پیدل قافلوں کی صورت میں کوہِ مراد پہنچ کر وہاں اپنے عقائد کے مطابق عبادت کرتے ہیں۔&nbsp;

تاہم ذِکری فرقے سے تعلق رکھنے والے حاجی خان کہتے ہیں کہ آج کل ان زائرین کو اپنی عبادات اور مذہبی رسومات کی آزادانہ ادائیگی میں بہت سی مشکلات کا سامنا ہے۔ وہ کیچ میں ایک نیم سرکاری ادارے، پبلک ہیلتھ سپورٹ انیشی ایٹو، میں ڈسٹرکٹ سپورٹ منیجر کے طور پر کام کرتے ہیں اور کہتے ہیں کہ ان زائرین کو جگہ جگہ پوچھ گچھ اور تلاشی کے نام پر تنگ کیا جاتا ہے۔&nbsp;

ذِکری فرقے سے ہی تعلق رکھنے والے سماجی کارکن گلزار دوست اس صورتِ حال کی وضاحت کرتے ہوئے کہتے ہیں کہ اس کی ابتدا 2010 میں ہوئی۔ ان کے مطابق اُس سال &quot;سکیورٹی اہلکاروں نے کوہِ مراد پر موجود مذہبی مقامات کے داخلی راستوں پر چوکیاں بنا لیں اور جوتوں سمیت ان جگہوں پر آنا جانا شروع کر دیا جہاں ذِکری لوگ ہمیشہ ننگے پاؤں جاتے ہیں&quot;۔&nbsp;

ان کا یہ بھی کہنا ہے حالیہ سالوں میں کوہِ مراد جانے والے قافلوں میں شامل لوگوں کو کسی معقول وجہ کے بغیر گرفتار کر لیا جاتا ہے جبکہ اس پہاڑ سے کچھ لوگ لاپتہ بھی ہو چکے ہیں۔ وہ بتاتے ہیں کہ کس طرح چند ماہ پہلے مرکزی بلوچستان کے علاقے آواران سے کوہِ مراد جانے والے زائرین کے ایک قافلے کو روک کر اس میں موجود ایک 80 سالہ شخص کو گرفتار کر لیا گیا &quot;جس کی تاحال کوئی خبر نہیں آئی کہ اسے کہاں قید رکھا گیا ہے&quot;۔ اسی طرح وہ کہتے ہیں کہ ضلع آواران ہی کی تحصیل مشکے سے تعلق رکھنے والے چار نوجوان زائرین بھی اپریل 2022 کے آخر میں کوہِ مراد سے لاپتہ ہو گئے۔ ان کے بارے میں &quot;کوئی نہیں جانتا کہ وہ کہاں ہیں&quot;۔

تاہم ان نوجوانوں کے لواحقین نے ان کی گمشدگی کے بارے میں نہ تو حکومتی اداروں کو آگاہ کیا ہے اور نہ ہی وہ صحافیوں سے اس سلسلے میں بات کرنے پر تیار ہیں۔ گلزار دوست کے مطابق &quot;اس خاموشی کا سبب خوف ہے&quot;۔ ان کا کہنا ہے کہ یہ لوگ ان گرفتاریوں یا گمشدگیوں کا تذکرہ اس لیے نہیں کرتے کہ اس ذکر کے نتیجے میں انہیں اپنی گرفتاری یا گمشدگی کا خدشہ ہوتا ہے کیونکہ &quot;ماضی میں کئی بار ایسا ہو چکا ہے کہ گرفتار یا لاپتہ ہونے والوں کی رہائی یا بازیابی کے لیے آواز اٹھانے والے لوگ خود بھی لاپتہ ہو گئے&quot;۔&nbsp;

لیکن اپنا نام پتہ ظاہر کیے بغیر ذِکری برادری سے تعلق رکھنے والے بہت سے لوگوں سوال اٹھاتے ہیں کہ پچھلے کچھ سالوں میں کوہِ مراد پر ایسا کیا ہوا ہے جس کے باعث وہاں بڑی تعداد میں پولیس، لیویز اور فرنٹیئر کانسٹیبلری کے اہلکاروں کو متعین کرنے کی ضرورت پڑ گئی ہے۔ چونکہ ان کی نظر میں اس پہاڑ پر مذہبی رسومات کے علاوہ کبھی کوئی غیرمعمولی سرگرمی وقوع پذیر نہیں ہوتی اس لیے ان کا کہنا ہے کہ اس تعیناتی کا مقصد صرف &quot;زائرین کے اندر خوف پیدا کرنا ہے&quot;۔&nbsp;

گلزار دوست، جو تربت سِول سوسائٹی نامی فلاحی تنظیم کے کنوینر بھی ہیں، کہتے ہیں کہ اس اقدام نے بظاہر اپنا مقصد حاصل کر لیا ہے کیونکہ، ان کے مطابق، اس کے نتیجے میں ان کی برادری کے لوگ &quot;جو پہلے صرف دیگر فرقوں سے تعلق رکھنے والے متشدد عناصر سے خوف زدہ تھے اب کوہِ مراد کی زیارت کرتے ہوئے بھی ڈرے رہتے ہیں&quot;۔ &nbsp;

دوسری طرف ضلع کیچ کے ڈپٹی کمشنر حسین جان بلوچ سکیورٹی اہل کاروں کی تعیناتی کو ایک ضروری حفاظتی قدم قرار دیتے ہیں۔ ان کے مطابق اس کی وجہ کوہِ مراد پر زائرین کی بڑھتی ہوئی تعداد ہے جنہیں محفوظ رکھنے کے لیے پہلے سے زیادہ افرادی قوت چاہیے۔ وہ کہتے ہیں کہ &quot;اگر یہ اہل کار کوہِ مراد اور اس کے اندر موجود مذہبی مقامات پر زائرین کی تحفظ کے لیے گشت کرتے ہیں تو اس میں برائی کیا ہے؟&quot;

لیکن وہ اِس &nbsp;پہاڑ سے چار نوجوانوں کی گمشدگی کو ایک افسانہ قرار دیتے ہیں اور کہتے ہیں کہ یہ افواہ پاکستان دشمن پراپیگنڈے کے طور پر پھیلائی جا رہی ہے۔ کچھ ہفتے پہلے فرنٹیئر کانسٹیبلری کے اہل کاروں کے ہاتھوں ذِکری زائرین کی گرفتاری کے معاملے پر بھی ان کا موقف ہے کہ اس میں کوئی حقیقت نہیں ہے۔ اگرچہ وہ تسلیم کرتے ہیں کہ حال ہی میں زائرین کے ایک پیدل قافلے کو روک کر اس میں شامل کچھ افراد کو گرفتار کیا گیا تھا لیکن ان کا دعویٰ ہے کہ &quot;ایسا غلط فہمی کی بنا پر ہوا تھا اور ضلعی انتظامیہ کی مداخلت پر تمام گرفتار افراد کو رہا کر دیا گیا تھا&quot;۔&nbsp;

<h2>مذہبی آزادی کا فقدان</h2>

ذِکری فرقہ صرف بلوچستان میں پایا جاتا ہے۔ اگرچہ اس کے پیروکاروں کی صحیح تعداد کا تعین ناممکن ہے کیونکہ مردم شماری میں اس کا کوئی طریقہ کار موجود نہیں تاہم ان کی اکثریت کا تعلق بلوچ قوم سے ہے اور وہ بلوچستان کے مرکزی، جنوبی اور مغربی حصوں میں پھیلے ہوئے ہیں۔

1990 کی دہائی میں بلوچستان سے تعلق رکھنے والے بعض سُنی علما نے ذِکریوں کو دائرہ اسلام سے خارج قرار دے دیا تھا جس کے بعد ان پر حملے شروع ہو گئے تھے۔ اس دوران ضلع کیچ کے صدر مقام تربت میں رہنے والے ذِکری رہنما مومن علی کے گھر پر بم بھی پھینکے گئے۔ تاہم عام لوگ اس فرقہ وارانہ تشدد سے لاتعلق رہے اور سیاسی کارکنوں اور سیاسی جماعتوں کے رہنماؤں نے بھی اس کی شدید مذمت اور مخالفت کی جس کے باعث ایسے واقعات آہستہ آہستہ ختم ہو گئے۔ &nbsp;

لیکن 2006 میں جب بلوچستان میں ایک بلوچ قوم پرست مسلح تحریک شروع ہوئی تو اس کی پرتشدد کارروائیوں کے ساتھ ساتھ ذِکری فرقے سے تعلق رکھنے والے لوگوں پر دوبارہ حملے ہونے لگے اور ان میں سے کچھ کو اغوا بھی کر لیا گیا۔ 2010 کے بعد ایسے واقعات میں اور بھی شدت آ گئی۔ اُس سال تربت شہر میں دو ذِکری علما، ملا حفیظ اور ملا جوگی، کو قتل کر دیا گیا جبکہ 2012 میں ضلع گوادر کے قصبے کلانچ میں ایک اور ذِکری عالم ملا باران کو ہلاک کر دیا گیا۔ اسی طرح 2014 میں تربت میں واقع ایک ذِکری عبادت گاہ پر حملے میں آٹھ افراد ہلاک ہو گئے اور 2016 میں کیچ میں ذِکری برادری کے روحانی پیشوا سید ملا اختر مولائی کو فائرنگ کر کے مار دیا گیا۔

اب اگرچہ ایسے مہلک واقعات نہیں ہوتے لیکن کیچ اور تربت میں ذِکریوں کے خلاف فرقہ وارانہ منافرت ابھی بھی موجود ہے۔ اس کی ایک حالیہ مثال اس وقت منظر عام پر آئی جب 2020 میں تربت سے تعلق رکھنے والے ایک شاعر اور گلوکار نے کوہِ مراد کے بارے میں ایک مذہبی گیت لکھا اور گایا۔ مقامی سُنی علما نے نہ صرف اس گیت پر شدید اعتراض کیا بلکہ اس کے خالق کو مجبور کیا کہ وہ سوشل میڈیا پر اسے ایک غلط عمل قرار دے کر اپنے &#39;ایمان کی تجدید&#39; کرے۔&nbsp;

بلوچستان کے صوبائی محکمہ سماجی بہبود میں ڈپٹی ڈائریکٹر کے طور پر کام کرنے والے ذِکری قدیر لقمان ایسے واقعات پر تبصرہ کرتے ہوئے کہتے ہیں کہ &quot;ہمیں ہر وقت امتیازی سلوک کا سامنا رہتا ہے اس لیے خوف کے مارے ہم آزادی سے اور کھلے عام اپنی مذہبی رسومات بھی ادا نہیں کر سکتے&quot;۔

اس کے ساتھ ہی ان کا یہ بھی کہنا ہے کہ یہ حالات &quot;کسی سوچی سمجھی سازش کا حصہ ہیں جس کے ذریعے صدیوں سے اکٹھے رہنے والے ذِکریوں اور غیرذکریوں کو لڑانے کی کوشش کی جا رہی ہے&quot;۔ تاہم ان کے مطابق یہ سازش ابھی تک مکمل طور پر کامیاب نہیں ہو سکی کیونکہ &quot;ذِکری اس کا فعال حصہ نہیں بنے&quot;۔

اسد بلوچ

کیچ کا 'برائے نام سرکاری ہسپتال': مریضوں کو سرنج اور پینا ڈول کی گولی بھی خریدنا پڑتی ہے

تربت میں خواتین کا پولیس سٹیشن: عورتوں کے خلاف جرائم کم کرنے میں کامیاب ہو پائے گا؟

کتابیں جمنیزیم میں ڈھیر اور عمارت پر تالا: کیا تربت پبلک لائبریری پر قبضہ ہو چکا ہے؟

تربت میں عطا شاد لٹریری فیسٹیول عام ادبی میلوں سے کیسے مختلف تھا

بڑا کٹھن ہے راستہ جو آ سکو تو ساتھ دو: 'ذکری زائرین اب کوہِ مراد کی زیارت کرتے ہوئے بھی ڈرے رہتے ہیں'۔

Lok Sujag