تھل یونیورسٹی بھکر کو اپنے دوسرے تعلیمی سیشن کے آغاز میں سنگین مسائل نے گھیر لیا ہے۔ یونیورسٹی نے پچھلے سال 20 مضامین میں طلبہ کو داخلے دیے تھے جبکہ رواں سال ہائر ایجوکیشن کمیشن نے صرف دس مضامین میں داخلوں کی اجازت دی ہے۔ یہی نہیں بلکہ امسال یونیورسٹی میں کسی کو ماسٹر ڈگری کے لیے داخلہ نہیں ملے گا۔

بھکر میں اس یونیورسٹی کا آغاز 2012ء میں ہوا تھا جو وقت یونیورسٹی آف سرگودھا کا سب کیمپس تھی۔ ابتداً اس میں تقریباً 9 گریجوایٹ پروگرام شروع کیے گئے۔

2014ء میں یہ تعداد 40 تک پہنچ گئی۔ ان میں مختلف مضامین کے بی ایس پروگرام، ایم ایس سی اور ایم اے کے علاوہ کیمسٹری، باٹنی، ریاضی، معاشیات، زوآلوجی اور اردو کی ایم فل کلاسیں بھی شامل تھی۔

2019ء میں پنجاب حکومت نے بھکر میں تھل یونیورسٹی بنانے کا فیصلہ کیا۔ اس موقع پر یہ طے کیا گیا کہ یہاں 108 کنال رقبے پر محیط سرگودھا یونیورسٹی کے سب کیمپس کو ہی تھل یونیورسٹی کے سٹی کیمپس میں بدل دیا جائے گا اور مین کیمپس کے لیے مزید رقبہ بھی دیا جائے گا۔

چنانچہ بورڈ آف ریونیو نے نواحی علاقے سرائے مہاجر میں 261 ایکڑ زمین تھل یونیورسٹی کے لیے ہائیر ایجوکیشن ڈیپارٹمنٹ کو منتقل کر دی مگر وہاں تعمیراتی کام شروع نہیں ہوا۔

پنجاب اسمبلی کی منظوری کے بعد گزشتہ سال سال 9 فروری کو &#39;تھل یونیورسٹی بھکر&#39; کا قیام عمل میں آگیا۔ یہاں پہلے سیشن کا آغاز ہوا تو 16 مختلف ڈیپارٹمنٹس کے 20 بی ایس پروگراموں میں طلبہ کو داخلے دیے گئے۔

&nbsp;رواں سال ایچ ای سی کی ٹیم نے یونیورسٹی کا دورہ کیا جس کے بعد انہوں نے صرف دس تعلیمی شعبوں میں داخلوں کی اجازت دی کیونکہ باقی شعبہ جات ضروری شرائط پوری نہیں کر رہے تھے۔

تھل یونیورسٹی نے 2022ء میں کمپیوٹر سائنس، انفارمیشن ٹیکنالوجی، سافٹ ویئر انجینئرنگ، اکنامکس، فزکس، کیمسٹری، باٹنی، ریاضی، انگریزی، اسلامیات، اردو، فزیکل ایجوکیشن، کمیونیکیشن اینڈ میڈیا سٹڈیز ایجوکیشن، انٹرنیشنل ریلیشنز، نفسیات، سوشل ورک اور سوشیالوجی میں گریجوایٹ پروگرام کے علاوہ&nbsp; بی بی اے اور بی کام میں بھی داخلے دیے تھے۔

&nbsp;امسال یہاں اردو، انگریزی، سوشیالوجی، سوشل ورک، انٹرنیشنل ریلیشنز، میڈیا سٹڈیز، اکنامکس، اسلامیات اور ہیلتھ اینڈ فزیکل ایجوکیشن میں داخلوں کی اجازت نہیں مل سکی۔ تاہم پچھلے سال ان مضامین میں داخلہ لینے والے طالب علم اپنی ڈگری یہیں مکمل کریں گے۔

اگرچہ یونیورسٹی انتظامیہ اردو، ریاضی اور فزیکل ایجوکیشن میں داخلے شروع کرانے کی دوبارہ کوشش کر رہی ہے تاہم ابھی تک اس کا اعلان نہیں کیا جاسکا۔

تھل یونیورسٹی&nbsp; کی انتظامیہ نے اس صورتحال کا ذمہ دار متعلقہ بیوروکریسی اور صوبائی حکومت کو قرار دیا ہے۔

یونیورسٹی کے ایک اہم عہدیدار نے نام ظاہر نہ کرنے کی شرط پر لوک سجاگ کو بتایا کہ ابھی تک وہ قوانین ہی منظور نہیں ہو سکے جن کے تحت یونیورسٹی مستقل اساتذہ (پرماننٹ فیکلٹی ممبرز)کی تعیناتیاں اور دیگر معاملات&nbsp; طے کرتی ہے۔ ان قوانین اور ضوابط کی منظوری گورنر پنجاب دیتے ہیں۔

وہ بتاتے ہیں کہ ابھی تک تھل یونیورسٹی کا مستقل وائس چانسلر ہی تعینات نہیں ہو سکا۔ سرگودھا یونیورسٹی کے وی سی اپنے دفتر میں ہی بیٹھ کر معاملات کو دیکھ رہے ہیں جس کی وجہ سے وہ تھل یونیورسٹی کو توجہ نہیں دے پاتے۔

تھل یونیورسٹی کے ایک پروفیسر نے (جنہوں نے اپنا نام ظاہر نہ کرنے کی درخواست کی ہے) بتایا ہے کہ جب یہاں سرگودھا یونیورسٹی کا سب کیمپس قائم ہوا تو سرگودھا سے اساتذہ اور دیگر فیکلٹی ارکان کی ایک بڑی تعداد کو بھکر بھیجا گیا تھا۔ لیکن تھل یونیورسٹی کی منظوری کے بعد وہ واپس مین کیمپس چلے گئے۔

وہ بتاتے ہیں کہ صرف 30 فیکلٹی ارکان (اساتذہ) یہاں کام کرنے پر تیار ہوئے جنہیں ڈیپوٹیشن پر رکھ لیا گیا۔ تھل یونیورسٹی کا ایک بھی اپنا مستقل پروفیسر نہیں ہے اور نہ ہی یہاں تعیناتیوں کا عمل شروع ہو سکا ہے۔ چنانچہ تمام مضامین کے طلبہ کو وزیٹنگ پروفیسر پڑھا ہے ہیں۔

انہوں نے بتایا کہ دس مضامین کے داخلوں اجازت نہ ملنے کی بنیادی وجہ مستقل اساتذہ (فیکلٹی ممبر ان)کا نہ ہونا ہے۔ مستقل وی سی نہ ہونے سے یونیورسٹی کے معاملات زیادہ خراب ہیں۔

اردو، معاشیات اور فزیکل ایجوکیشن میں ایک ایک مستقل پروفیسر موجود ہے لیکن ایچ ای سی نے ان مضامین میں داخلہ بھی روک دیا ہے۔ ان تین ڈیپارٹمنٹس کو دوبارہ شروع کرنےکی کوشش جاری ہے جبکہ ان شعبوں میں مستقل تقرریوں کی تیاریاں بھی ہو چکی ہیں۔

&nbsp;ان کا کہنا ہے کہ اس سلسلے میں رجسٹرار تھل یونیورسٹی ایچ ای سی سمیت متعلقہ اداروں سے رابطے میں ہیں۔

&nbsp;بی ایس اردو کے دوسرے سمیسٹر میں زیرتعلیم فیصل شہزاد کے والد پینشنر ہیں۔ وہ کہتے ہیں کہ ان جیسے طلبہ کے پاس اپنے علاقے سے قریب تھل یونیورسٹی کے سوا کہیں اور جا کر پڑھنے کے لیے وسائل نہیں ہیں۔ اکنامکس کے سوا بند ہونے والے تمام شعبے آرٹس اور سوشل سائٹسز کے ہیں اور دیہی علاقوں کے اکثر طلبہ انہی مضامین میں داخلہ لیتے ہیں۔

ان کا کہنا ہے کہ داخلے کی خواہش مند طالبات کے لیے یہ صورت حال زیادہ مایوس کن ہے کیونکہ طالبات کو دوسرے شہروں میں جا کر پڑھنے کی اجازت بہت کم ہی ملتی ہے۔

پچاس سالہ محمد خان بھکر کے محلہ عالم آباد میں کریانے کی دکان چلاتے ہیں۔ انہوں ںے&nbsp; اپنا پیٹ کاٹ کر بیٹے محمد اویس کو لاہور کی پنجاب یونیورسٹی سے سوشیالوجی میں ایم ایس سی تک تعلیم دلائی ہے۔

اب محمد خان کی بیٹی نے تھل یونیورسٹی سےایم ایس سی کر لی ہے۔ وہ بتاتے ہیں کہ بھکر میں یونیورسٹی کا سب کیمپس نہ ہوتا تو ان کے لیے بیٹی کو&nbsp; پڑھانا بہت مشکل تھا۔ محدود وسائل میں بچوں کو لاہور یااسلام آباد بھیج کر تعلیمی اخراجات برداشت کرنا آسان نہیں۔

یونیورسٹی کے عہدیدار صوبائی بیورو کریسی پر &#39;تعصب &#39;کا الزام عائد کرتے ہوئے کہتے ہیں کہ بڑے شہروں کی نئی یونیورسٹیوں کی گرانٹ 50 کروڑ روپے تک ہوتی ہے جبکہ تھل یونیورسٹی کو صرف 10 کروڑ روپے دیے گئے ہیں۔ اس کے علاوہ یہاں مستقل پروفیسروں کی عدم تعیناتی بھی ایک بڑا مسئلہ ہے۔

انہوں نے بتایا کہ یونیورسٹی کو مناسب فنڈز نہیں دیے جارہے۔ چونکہ یہ سرکاری ادارہ ہے اس لیے نہ تو یہاں طلبہ سے زیادہ فیس لی جا سکتی ہے اور نہ ہی کہیں اور سے مالی وسائل پیدا کرنے کا کوئی بندوبست ہے۔ اس پس ماندہ علاقے کے بچوں کا مستقبل ایسے ہی مقامی تعلیمی اداروں سے وابستہ ہے اس لیے حکومت ہنگامی بنیادوں پر یونیورسٹی کے مسائل پر توجہ دے۔

مولانا صفی اللہ تھل یونیورسٹی سنڈیکیٹ کے رکن ہیں۔ ان کا کہنا ہے کہ سنڈیکیٹ کے پہلے اجلاس کے بعد انہیں نہ تو کسی میٹنگ کے لیے بلایا گیا نہ ہی موجودہ معاملات سے آگاہ کیا گیا ہے۔

گورنمنٹ کالج یونیورسٹی لاہور کے سابق وائس چانسلر اور تھل یونیورسٹی بھکر کے سنڈیکیٹ ممبر ڈاکٹر حسن امیر کہتے ہیں کہ یونیورسٹی کو درپیش مسائل کے ذمہ دار وہ لوگ ہیں جو دھڑا دھڑ یونیورسٹیاں بنا رہے ہیں۔ ایچ ای سی کسی نئی یونیورسٹی کو پہلے تین سال کوئی فنڈنگ نہیں کرتا۔

وہ بتاتے ہیں کہ ابتدا میں یونیورسٹی کو فنڈنگ کی پوری ذمہ داری صوبائی حکومت پر ہوتی ہے۔ تھل یونیورسٹی سمیت متعدد نئی یونیورسٹیوں کے سروس قوانین کو گورنر سے منظوری ملنا باقی ہے۔ سنڈیکیٹ اجلاس کی صدارت ایک وزیر کرتے ہیں لیکن وزیروں کو یونیورسٹی کے معاملات کا کوئی اندازہ ہی نہیں ہوتا۔

&nbsp;پروفیسر حسن امیر نے بتایا کہ سنڈیکیٹ اجلاس میں جو بھی فیصلے ہوں وہ فائلوں کی نذر ہوجاتے ہیں۔ اکثر اوقات وزارت خزانہ، قانون اور ہائر ایجوکیشن کے سیکریٹریز یا نمائندے تمام امور کی منظوری میں شامل ہوتے ہیں لیکن بعد میں یہ لوگ سفارشات پرعمل ہی نہیں کراتے اور یہی سب سے بڑا مسئلہ ہے۔

&nbsp;

یونیورسٹی آف میانوالی: وزٹنگ فیکلٹی سے پڑھیں اور لیب کے بغیر مائیکرو بیالوجی کی ڈگری حاصل کریں

بھکر کی یونیورسٹی، جہاں کوئی طالب علم کسی مضمون میں ایم اے کے لیے داخلہ نہیں لے سکتا

text

پنجاب کے ضلع بھکر کی تحصیل کلور کوٹ سے تعلق رکھنے والے کسان محمد سمیر نے رواں سال دو ایکڑ رقبے پر نارک جی ون نامی لہسن کی فصل کاشت کی ہے۔ جس پر ان کے بقول صرف بیج کی مد میں 50 لاکھ روپے خرچہ آیا ہے۔

لیکن اب انہیں اپنے یہ پیسے ڈوبتے ہوئے نظر آرہے ہیں۔

وہ کہتے ہیں کہ مارکیٹ میں لہسن کی اس قسم کا کوئی خریدار ہے اور نہ ہی کسان اب اس کو بطور بیج خریدنے کے لیے تیار ہیں۔

&quot;نارک جی ون لہسن&quot; کے&nbsp; ایک ایکڑ کے لیے 20 من بیج درکار ہوتا ہے۔ محمد سمیر بتاتے ہیں کہ انہوں نے اپنے دو ایکڑ رقبے کے لیے پانچ ہزار سے12 ہزار روپے فی کلوگرام بیج مختلف اوقات میں خریدا تھا۔

محمد سمیر کی طرح عمران علی جن&nbsp; کا تعلق ضلع بھکر کی ہی تحصیل دریا خان سے ہے۔

وہ بھی پہلی بار تجرباتی طور پر بیج پر 13 لاکھ روپے خرچ کرکے چار کنال یعنی آدھے ایکڑ رقبے پر اس فصل کو لگا کر پچھتا رہے ہیں۔

ان کا کہنا ہے کہ اب جب فصل تیار ہوگئی ہے تو انہیں پتہ چلا ہے کہ اس کا تو کوئی خریدار ہی نہیں ہے۔

&quot;اگر کوئی خریدار مل بھی جائے تو وہ بھی اتنے کم پیسے دے رہا ہے کہ اس کے بیج کا خرچ بھی پورا نہیں ہو پائے گا&quot;۔

عمران علی کہتے ہیں کہ اب وہی کسان بطور بیج اسے خریدنے کی طرف آئے گا جس نے پہلی مرتبہ یہ فصل کاشت کرنی ہے اور ایسے کسان بہت ہی کم ہیں۔

این اے آر سی جی ون نامی یہ بیج نیشنل ایگری کلچر ریسرچ کونسل (این اے آر سی) کے سائنس دانوں نے 2018ء میں تیار کیا تھا۔

دو سال اس کی آزمائشی کاشت ہوتی رہی جس کے بعد 2020ء میں حکومت نے اس کی فروخت کی اجازت دے دی۔

این اے آر سی نے اس کی ابتدائی قیمت 500 روپے فی کلو گرام رکھی اور اس کی ایک محدود مقدار تیار کر کے فروخت کے لئے پیش کر دی۔

پہلے سال تو اس کی قیمت میں کافی حد تک استحکام رہا لیکن پھر جب اس کی فصل پک کر تیار ہوئی اور اس نے بہت اچھی فی ایکڑ پیداوار دی تو اس کے نرخ تیزی کے ساتھ اوپر جانے لگے۔

پہلے سال یہ بیج تین ہزار روپے فی کلو گرام کے حساب سے فروخت ہوا تو پھر اگلے سالوں میں اس کی قیمت دس سے 12 ہزار روپے تک پہنچ گئی۔

کاشت کاروں کا کہنا ہے کہ جی ون لہسن کی پیداواری صلاحیت بہتر ہونے کی بنیادی وجہ اس کی پوتیوں کا حجم ہے جو روایتی لہسن کے مقابلے میں کہیں زیادہ ہے۔ پوتیوں کے اندر لہسن کے دانے بھی روایتی لہسن کی نسبت بہت بڑے ہوتے ہیں جن میں سے ہر ایک کا وزن سو گرام یا اس سے بھی زیادہ ہو سکتا ہے۔

عمران علی کہتے ہیں کہ پاکستان میں عام کاشت کئے جانے والے دیسی سفید لہسن کی پیداوار اچھی دیکھ بھال کے ساتھ 60 سے 70 من جبکہ گولڈن فارمی لہسن کی پیداوار 90 سے 100 من فی ایکڑ سے تک رہتی ہے جبکہ نارک جی.ون کی پیداوار ایک عام کاشتکار بھی 180 من سے 200 من فی ایکڑ تک حاصل کر لیتا ہے۔

اس&nbsp; تمام صورت حال سے متعلق این اے آر سی کے شعبہ سبزیات کے سائنٹیفک آفیسر سلطان محمود کے مطابق اس میں کوئی شک نہیں کہ جی ون&nbsp; گارلک اپنی پیداواری صلاحیت کی وجہ سے ایک شاندار قسم ہے، لیکن جب یہ مارکیٹ میں آیا تو اسے سوشل میڈیا اور دیگر ذرائع پر اس طرح دکھایا گیا کہ اس فصل کو کاشت کرنے والے دنوں میں امیر ہو جائیں گے۔

&quot; اسے ایسے لوگوں نے بھی کاشت کرنا شروع کر دیا جن کا کاشتکاری سے کوئی تعلق نہیں تھا۔ طلب کی وجہ سے اس بیج کے ریٹس جو این اے آر سی نے 500 روپے فی کلو مقرر کیے تھے وہ 16 ہزار روپے سے بھی تجاوز کر گئے۔ بیج بیچنے والوں نے خوب منافع کمایا۔&quot;

سوشل میڈیا پر جی ون گارلک کے نام سے بہت سارے ایسے پیج بنے ہوئے ہیں جہاں پر دن رات اس کی تشہیر ہورہی ہے۔

سلطان محمود کے مطابق اب صورت حال بدل رہی ہے۔ بیج میں ملاوٹ اور بیج کی مارکیٹ میں طلب کم ہونے کی وجہ سے لوگوں کو وہ قیمت نہیں مل رہی جو بہت اوپر چلی گئی تھی۔

ان کے خیال میں چند مفاد پرستوں نے کسانوں کو بہت سارے خواب دکھائے جس کی وجہ سے انھوں نے بڑھ چڑھ کر اسے کاشت کیا۔

سلطان محمود کے بقول یہ کہنا غلط ہوگا کہ اس فصل کا مستقبل ختم ہوچکا ہے۔ اب تک جی ون گارلک کی قیمت کو اوپر رکھا گیا تھا۔آئندہ سے یہ مارکیٹ میں دوسرے لہسن کی طرح اسی قیمت پر ہی بکے گا اور کسان کو اس کا بیج کم قیمت پر ملے گا۔

&quot; عام لہسن کے مقابلے میں دوگنا پیداوار ہونے کی وجہ سے کسان کو یہ 300 روپے کی قیمت پر بھی زیادہ منافع دے گا۔ جہاں تک ذائقے کا تعلق ہے تو بیشک اس کا ذائقہ مختلف ہے لیکن جس طرح لوگوں نے باقی سبزیاں اور پھلوں کی جدید قسموں کو قبول کر لیا تھا اسے بھی وقت کے ساتھ ساتھ لوگ قبول کر ہی لیں گے&quot;۔

این اے آر سی کے سائنسدانوں کے مطابق اس جدید لہسن کی ورائٹی کا مقصد پاکستان میں لہسن کی پیداوار میں اضافہ کرنا تھا کیونکہ اس سے پہلے مقامی طور پر کاشت ہونے والے لہسن کی پیداوار کم ہونے کی وجہ سے لہسن کی درآمد ملکی خزانے پر اضافی بوجھ کا سبب بن رہی تھی۔جی ون گالک ایک ایسی ورائٹی تھی جو جہاں جسامت میں عام لہسن سے بڑی تھی وہیں اس کی فی ایکڑ پیداوار بھی دیسی یا چائنہ لہسن سے تقریباً دو گنا تھی۔

اقوام متحدہ کے ادراہ برائے خوراک و زراعت کے مطابق 2019ء میں پاکستان نے&nbsp; 75 ہزار سے زائد ٹن لہسن خود پیدا کیا اور 58 ہزار 40 ٹن لہسن درآمد کیا جس پر نو ارب سات کروڑ روپے خرچ ہوئے۔

اسی ادارے کی رپورٹ کے مطابق 2014 ء کے بعد سے پاکستان میں لہسن کے استعمال اور درآمد دونوں میں مسلسل&nbsp; اضافہ ہو رہا ہے۔

پچھلے سات سالوں میں پاکستان کو اپنی سالانہ ضرورت پوری کرنے کے لیے لگ بھگ 40 فیصد تک لہسن باہر سے منگوانا پڑا ہے۔ پچھلے تین سال میں پاکستان نے لہسن کی خریداری پر اوسطاً سالانہ 12 ارب 81 کروڑ 37 لاکھ روپے خرچ کیے ہیں۔

ان اعدادو شمار میں قابل ذکر بات یہ ہے کہ جی ون بیج کی وجہ سے پچھلے تین سال میں پاکستان میں لہسن کی ریکارڈ پیداوار ضرور ہوئی ہے لیکن اس کے باوجود طلب پوری کرنے کے لیے پہلے جتنا یا اس سے زیادہ مقدار میں لہسن درآمد کرنا پڑا ہے۔

فرزند خان پچھلے 15 سال سے لاہور کی سبزی منڈی میں لہسن اور ادرک کی آڑھت چلا رہے ہیں ان کا خیال ہے کہ جی ون لہسن کھانے کے قابل ہے ہی نہیں کیوں کہ یہ پیاز کی ایک قسم ہے۔

&quot;اس کا ذائقہ بھی اچھا نہیں ہے اور یہ پکاتے وقت بہت زیادہ جھاگ بناتا ہے۔ اس لیے ابھی تک منڈی کی کسی آڑھت پر فروخت ہونے کے لیے نہیں آیا۔ نہ ہی کبھی کسی نے گھریلو استعمال کے لیے یا پھر مصالحہ جات بنانے والی فیکٹریوں نے ڈیمانڈ کی ہے&quot;۔

&nbsp;ان کا بھی یہی ماننا ہے کہ یہ بیج بیچنے والوں ڈیلروں نے کسانوں کو بہت بڑا دھوکہ دیا ہے۔

فرزند خان تو یہاں تک کہتے ہیں کہ جی ون لہسن کی وجہ سے ملک میں دوسرے روایتی لہسن کے بیجوں کو بھی نقصان پہنچا ہے۔

مظہر علی سرگودھا میں پھلوں اور سبزیوں کی جدید فارمنگ کے علاوہ کاشتکاروں کو کنسلٹنسی فراہم کرتے ہیں اور زرعی ادویات و آلات کا برینڈ بھی چلاتے ہیں۔

ان کے ماننا ہے کہ جی ون لہسن سراب کے علاوہ کچھ نہیں تھا اور ایک دن اس نے اپنی اصل قیمت کی طرف واپس جانا ہی تھا۔

&quot;عام مشاہدے کی بات ہے کہ ہمارے ہاں لوگ اوور سائز سبزیاں وغیرہ پسند نہیں کرتے۔ ہم پیاز اور دیگر سبزیوں کے متعلق دیکھ چکے ہیں۔ تاہم کوئی بعید نہیں کہ اسے اپنا لیا جائے؟ جہاں تک اسے ایکسپورٹ کرنے کا تعلق ہے تو یہ بھی محض اس کی قیمت کو اوپر لے جانے کے لیے کہانی گھڑی جارہی ہے۔ ہمارے پاس ایکسپورٹ کے لیے اس سے بہتر چیزیں موجود ہیں جب وہ صحیح طریقے سے ایکسپورٹ نہیں ہو پا رہیں تو جی ون لہسن کہاں سے ایکسپورٹ ہوگا؟&quot;

کیا لہسن کا نیا بیج کسانوں کی قسمت بدل دے گا؟

وہی ہوا جس کا ڈر تھا، جی ون لہسن کی مارکیٹ ٹھس ہوگئی

رانا محمد قاسم 41 برس کے ہیں۔ وہ بھکر کی تھل ٹیکسٹائل مل میں بطور کاریگر کام کرتے تھے۔ تھل ڈویلپمنٹ اتھارٹی کے تحت قائم ہونے والی یہ مل 2012ء میں مستقلاً بند کر دی گئی اور قاسم بے روزگار ہو گئے۔

ان کا کہنا ہے کہ اس کے بعد ان کے روزگار کا سلسلہ انتہائی غیر مستقل رہا ہے۔وہ بعض گھریلو مجبوریوں کے باعث بھکر شہر سے باہر نہ جا سکے اور اب انتہائی قلیل اجرت پر ایک نجی کالج میں بطور چوکیدار کام کر رہے ہیں۔

گھریلو مجبوریاں بھکر کے سبھی بے روزگاروں کے پیروں کی بیڑیاں نہیں بن پاتیں۔ 24 سالہ محمد کامران کا تعلق بھکر کے گاؤں کھِچی کلاں سے ہے۔ وہ 2016ء سے فیصل آباد کی مختلف ٹیکسٹائل ملوں میں مزدوری کر رہے ہیں۔

محمد کامران نے لوک سجاگ کو بتایا کہ ان جیسے کئی نوجوان روزگار کی تلاش میں بھکر سے فیصل آباد کا رخ کر چکے ہیں۔ ان کے مطابق اس وقت فیصل آباد کی ٹیکسٹائل انڈسٹری میں موجود مزدور طبقے کا ایک بہت بڑا حصہ ضلع بھکر، لیہ اور خوشاب سے ہے۔

ان کا کہنا تھا کہ محنت کشوں کے لیے بھکر میں مناسب اجرت پر روزگار کے مواقع نہ ہونے کے برابر ہیں۔ بس فصل کی کٹائی کے وقت ہی انہیں عارضی روزگار میسر آتا ہے۔وہ کچھ ایسے لوگوں کو بھی جانتے ہیں جو مزدوری کے لیے روزانہ بھکر سے 40 کلومیٹر دور ضلع ڈیرہ اسماعیل خان جاتے ہیں۔

لیبرفورس سروے 2020-21ء کے مطابق بھکر کے دیہی اور شہری علاقوں میں مجموعی طور پر بے روزگاری کی شرح 3.2 فیصد ہے جبکہ صوبہ پنجاب میں بے روزگاری کی مجموعی شرح 2.8 فیصد ہے۔ دوسری جانب ڈائریکٹر جنرل مانیٹرنگ اینڈ ایویلیوایشن پنجاب کی ایک رپورٹ کے مطابق ضلع بھکر میں بے روزگاری کی شرح چھ فیصد ہے۔

ضلع بھکر کی ویب آفیشل ویب سائٹ کے مطابق ضلع میں 46 صنعتی یونٹ بند پڑے ہیں جبکہ صرف چھ کام کر رہے ہیں جن میں سے چار فلور ملیں ہیں۔

بھکر شہر کے 38 سالہ اطہر نے اپنی عملی زندگی کا آغاز 2010ء میں تھل ٹیکسٹائل مل بھکر میں بطور الیکٹریشن کیا۔ مل بند ہو جانے کے بعد روزگار کے لیے انہیں بھی اپنا ضلع چھوڑنا پڑا۔ پہلے وہ ڈیرہ اسماعیل خان میں کام کرتے رہے اور اب رحیم یار خان میں قائم ایک شوگر مل میں کام کرتے ہیں۔

ان کا کہنا ہے کہ ابھی تک ان کے ضلع میں لوگوں کو باعزت روزگار دینے کے لیے کوئی قابل ذکر بڑی صنعت موجود نہیں۔ تحصیل دریا خان میں ایک شوگر مل ہے لیکن اس سے بہت کم لوگوں کو روزگار میسر آتا ہے۔

بھکر کے دوسرے شہروں کی صنعتوں میں کام کرنے والے افراد ایسی بہت سی سہولتوں سے محروم ہیں جو انہیں تھل ٹیکسٹائل جیسی بڑی مل میں گھر کے قریب حاصل تھیں۔ نیز یہ مل عورتوں کے لیے بھی مناسب روزگار کا ذریعہ تھی۔

محمد قاسم بتاتے ہیں کہ اس ٹیکسٹائل مل کے توسط سے ملازمین کو میسر سہولتوں میں سے ایک ڈسپنسری بھی تھی جس سے مل ملازمین کے علاوہ اہل علاقہ مفت علاج اور ادویات&nbsp; سے مستفید ہوتے تھے۔ علاوہ ازیں بچوں کے لیے سکول اور رعایتی نرخوں پر سودا سلف خریدارنے کے لیے&nbsp; سٹور بھی موجود تھا۔

ان کے مطابق شاید یہ بھکر کی واحد صنعت تھی جس میں خواتین مزدوروں کی معقول تعداد کام کرتی تھی۔&quot;اس مل کے بند ہو جانے کے بعد بھکر میں خواتین کے لیے بڑے پیمانے پر روزگار کا کوئی ذریعہ نہیں رہا۔&quot; اب ایسی خواتین یا تو لوگوں کے گھروں میں معمولی سی تنخواہ پر کام کرتی ہیں یا کھیتوں میں کٹائی کے دوران&nbsp; محنت مزدوری کرتی ہیں۔

لیبرفورس سروے 2020-21ء کے مطابق بھکر کی شہری خواتین میں بے روزگاری کی شرح 20 فیصد ہے۔

صحافی اور سماجی شخصیت لقمان اسد بتاتے ہیں کہ&nbsp; 1949ء میں تھل ڈیویلپمنٹ اتھارٹی&nbsp; (ٹی ڈی اے) ایکٹ منظور کیا گیا تھا جس کا بنیادی مقصد گنجان آباد علاقوں سے مہاجرین کی تھل کے علاقوں میں آبادکاری کرنا تھا۔

اس دوران حکومت نے تھل کے لوگوں کی بہت سی زمینیں تھل ڈیویلپمنٹ اتھارٹی کے نام ضبط کر لیں جس کے عوض مقامی لوگوں سے کئی وعدے کیے گئے جن میں ان علاقوں کو تھل کینال سے سیراب کرنا اور روزگار کے لیے مختلف صنعتیں لگانا شامل تھا۔

انہوں نےدعویٰ&nbsp; کیا&nbsp; کہ تھل کینال&nbsp; کے ذریعے وعدہ کے مطابق فائدہ نہیں پہنچایا گیا۔ دوسری طرف پورے ضلع میں صرف ایک ٹیکسٹائل مل لگائی گئی جو تقریباً دو سے اڑھائی ہزار افراد کو روزگار فراہم کرتی تھی اور بعد ازاں اسے بھی بند کر دیا گیا۔

ضلع بھکر کے علاقے جنڈانوالہ کی سماجی شخصیت مفتی عامر شفیق کے مطابق دوسرے شہروں کا رخ نہ کرنے والے غریب محنت کشوں کی ایک قابل ذکر تعداد بڑے کاشتکاروں اور وڈیروں سے قرض لینے پر مجبور ہو جاتی ہے جسے اتارنے کے لیے انہیں طویل عرصہ ان کے ہاں کام کرنا پڑتا ہے۔

فیصل آباد میں 50 فیصد ٹیکسٹائل یونٹ بند ہو گئے، ملک کی سب سے بڑی صنعت میں لاکھوں لوگوں کے روزگار کو خطرہ

بھکر کے محنت کش روزگار کے لیے دوسرے اضلاع کا رخ کیوں کر رہے ہیں؟

05-2004ء میں پاکستان میں کپاس کی پیداوار ایک کروڑ 42 لاکھ گانٹھوں سے کچھ زائد تھی۔ پاکستان سینٹرل کاٹن کمیٹی (پی سی سی سی) کے مطابق یہ کم ہوتے ہوتے گذشتہ سال 37 لاکھ گانٹھیں پر آ&nbsp; گئی تھی۔

یہ پاکستان میں کپاس کی پچھلے 40 سالوں کی سب سے کم پیداوار تھی۔

ہم یہاں کیسے پہنچے؟

چودھری سدی محمدنے 10 سال پہلے کپاس کاشت کرنا ترک کر دیا تھا۔ وہ ضلع بھکر کے چک 19 کے رہنے والے ہیں۔ وہ ہر سال 15 ایکڑ پر کپاس کاشت کرتے تھے اور اچھے دنوں میں انہوں نے 35 من فی ایکڑ&nbsp; تک کی پیداوار حاصل کی تھی۔

دس سال پہلے جب انہوں نے آخری دفعہ کپاس کاشت کی تو حالات یہاں تک پہنچ گئے تھے کہ فصل پر پہلے سے کہیں زیادہ خرچ کرنے کے باوجود وہ بمشکل پانچ من فی ایکڑ ہی حاصل کر سکے تھے۔

وہ اس کا ذمہ دار محکمہ زراعت اور پیسٹی سائیڈ کمپنیوں کو ٹھہراتے ہیں۔

&quot;انہوں نے ایسے بیج مارکیٹ میں عام کر دیے ہیں جن میں بیماریوں اور حشرات کے خلاف قوت مدافعت نہ ہونے کے برابر ہے۔ پہلے تین، چار سپرے کرنے پڑتے تھے لیکن پھر 10 سے 12 سپرے کرنے پر بھی کیڑوں کو کچھ فرق نہیں پڑتا تھا&quot;۔ 
انہوں ںے بتایا کہ کپاس کی زیادہ تر فصل پھول اور ٹینڈے بننے سے پہلے ہی ختم ہونا شروع ہو جاتی تھی۔

کراپ رپورٹنگ سروس پنجاب کے اعداد و شمار سدی محمد کی باتوں کی تصدیق کرتے ہیں۔ سروس کے مطابق ضلع بھکر میں 2011-12ء میں 61 ہزار ایکڑ پر کپاس بوئی گئی تھی لیکن پچھلے سال ضلع میں کپاس کا رقبہ محض آٹھ ہزار ایکڑ رہ گیا تھا۔ ان دس سالوں میں پیداوار بھی ساڑھے 83 ہزار گانٹھوں سے کم ہو کر ساڑھے 11 ہزار گانٹھوں پر آ گئی۔

اسی عرصے کے دوران پنجاب میں مجموعی طور پر بھی کپاس کی صورت حال بری ہی رہی۔ زیرِ کاشت رقبہ اور کل پیداوار دونوں نصف پر آ&nbsp; گئے لیکن ضلع بھکر میں یہ کمی اس سے بہت زیادہ یعنی آٹھ گنا کے قریب رہی۔

<h2>سخت موسم اور ہارے ہوئے بیج</h2>

احمد نواز صاحب کافی عرصہ سے محکمہ زراعت بھکر میں بطور فیلڈ اسسٹنٹ کام کر رہے ہیں۔ ان کا کہنا ہے کہ کپاس کی فصل کی موجودہ صورت حال کے پیچھے کئی وجوہات ہیں جن میں سب سے بڑی وجہ کسان کو اچھی کوالٹی کے بیج کی عدم دستیابی ہے۔

&quot;جو بیج مہیا کیا جا رہا ہے اس میں قوت مدافعت بالکل نہیں ہے۔ کیڑا فصل کی جان ہی نہیں چھوڑتا۔ ہمارے ہاں کچے کے علاقے میں ویسے بھی نمی کی وجہ سے حشرات بہت زیادہ ہو جاتے ہیں&quot;۔ 
وہ کہتے ہیں کہ سرمائے کی کمی دوسری بڑی وجہ ہے۔

&quot;بیشتر کسانوں کو بیج، کھاد وغیرہ آڑھتی اور ڈیلروں سے ادھار لینا پڑتا ہے۔ اس میں ان کی اپنی چوائس نہیں ہوتی۔ انہیں غیر معیاری مداخل بھی قبول کرنا پڑتے ہیں جس کا براہ راست اثر پیداوار پر پڑتا ہے۔ بیج مافیا بہت مضبوط ہے۔&quot; 
احمد نواز کسانوں کو بھی ذمہ دار ٹھہراتے ہیں۔

&quot;کسان اگر وقت پر کپاس کی فصل میں گوڈی کرے گا تو&nbsp; زمین میں نمی کا تناسب برقرار رہے گا اور پانی دیر سے لگانے سے فصل اثرانداز نہیں ہو گی لیکن وہ گوڈی کرنے کی بجائے پانی لگا دیتا ہے جس کی وجہ سے جڑی بوٹیوں میں اضافہ ہوتا ہے جو حشرات کے لیے میزبان پودوں کا کردار ادا کرتی ہیں&quot;۔

انہوں نے بتا یا کہ کپاس ترک کرنے والے کسان مونگ اور مکئی وغیرہ کاشت کر رہے ہیں۔

<h2>کیا کپاس کی واپسی ممکن ہے؟</h2>

احمد نواز کہتے ہیں کہ اس سال حالات قدرے بہتر نظر آ رہے ہیں۔ &quot;کچھ کسان کپاس کی طرف دوبارہ مائل ہوئے ہیں۔ حکومت پنجاب نے بھی بیج پر ایک ہزار&nbsp; روپے فی ایکڑ سبسڈی دے رکھی ہے۔ اچھی فصل پر انعام کی رقم بھی بڑھائی گئی ہے۔&quot;

محمد عاقب ایسے ہی کسانوں میں سے ایک ہیں۔ وہ چار سال بعد تین ایکڑ پر اچھی امید کے ساتھ دوبارہ کپاس لگا رہے ہیں۔ انہیں اب تک موسم بھی بہتر لگ رہا ہے۔

عاقب ضلع بھکر کے چک 40 ٹی ڈی اے کے رہائشی ہیں اور اپنے والد کے ساتھ کاشتکاری میں ہاتھ بٹاتے ہیں۔

انہوں نے لوک سجاگ کو بتایا کہ حشرات کا مسئلہ تو تھا ہی لیکن موسم کی شدت بھی اتنی بڑھ گئی تھی کہ&nbsp; فصل اس سے جل جاتی تھی۔

&quot;سپرے کا خرچ حد سے زیادہ ہو گیا تھا اور آمدن کم سے کم ہوتی جا رہی تھی۔ 2015ء تک ان کی پیداوار 35، 36 من فی ایکڑ تک تھی لیکن پھر کم ہوتے ہوتے 2018ء تک تین سے پانچ من فی ایکڑ تک آگئی تھی&quot;۔

عاقب نے بتایا ہے کہ دوبارہ کپاس لگانے کی تین وجوہات ہیں، پہلی تو یہ کہ کاٹن کا ریٹ آج کل بہت اچھا ہے۔ انہیں امید ہے کہ خرثہ زیادہ ہونے کے باوجود یہ فصل انہیں کچھ منافع دے جائے گی۔ دوسری وجہ یہ ہے کہ اس سال بوائی کے وقت انہیں موسم سازگار لگ رہا ہے جس سے جرمینیشن اچھی ہونے کی امید ہے اور تیسرا یہ کہ پہلے انہیں سفید مکھی کو کنٹرول کرنے کا کوئی آئیڈیا نہیں تھا لیکن اب انہیں کچھ پیسٹی سائیڈز کا پتہ چلا ہے جس سے ان کے خیال میں یہ کچھ حد تک کنٹرول ہو جائے گی۔

وہ کہتے ہیں کہ اگر اس بار کپاس کی پیداوار اچھی رہی تو مستقبل میں بھی اسے جاری رکھیں گے ورنہ وہ پھر سے مونگ کاشت کرنے لگیں گے۔ 
پاکستان کی اپنی کاٹن انڈسٹری کو سالانہ سوا سے ڈیڑھ کروڑ گانٹھوں کی ضرورت ہوتی ہے۔ گذشتہ برس کپاس کی مقامی پیداوار اس کے ایک تہائی کے برابر تھی گویا انڈسٹری کو اپنی ضرورت کا دو تہائی باہر سے منگوانا پڑی تھی۔

پاکستان میں کاٹن کی قیمت 2021-22ء تک ساڑھے چار ہزار روپے فی من تھی امسال اس سے دو گنی سے بھی زائد ہو چکی ہے۔

<h2>اچھا بیج کہاں سے آئے گا؟</h2>

ڈاکٹر محمد سعید&nbsp; سینٹرل کاٹن ریسرچ انسٹی ٹیوٹ ملتان (سی سی آر آئی) کے چیف سائینٹسٹ ہیں۔

انہوں نے لوک سجاگ کو بتایا&nbsp; کہ ناقص بیجوں کے پھیلاؤ کی سب سے بڑی وجہ سیڈ ترمیم ایکٹ 2015ء پر عملدرآمد نہ ہونا ہے۔

&quot;سیڈ ترمیم ایکٹ 2015ء کے مطابق سیڈ ڈیلر یا سیڈ کمپنیاں کسی ایسے بیج کو فروخت نہیں کر سکتیں جو فیڈرل سیڈ سرٹیفیکیشن اینڈ رجسٹریشن ڈیپارٹمنٹ (ایف ایس آر ڈی) سے رجسٹرڈ نہ ہو۔

مگر اس پر عمل درآمد نہیں ہوتا۔ مختلف سیڈ ڈیلر اور کمپنیاں ناقص بیج کو رجسٹرڈ ورائیٹی کا نام اور پیکنگ دے کر فروخت کر رہی ہیں۔&quot;

&quot;ہمارا ادارہ براہ راست کسانوں کو بیج نہیں دے سکتا، ہمیں اس کی اجازت نہیں، کسان نے ڈیلر سے ہی بیج خریدنا ہے&quot;۔

ڈاکٹر محمد سعید بتاتے ہیں کہ کپاس کی پیداوار میں کمی کے دیگر عوامل بھی ہیں ہیں۔&quot;پچھلے سال بے وقت بارشوں نے فصل کو بہت نقصان پہنچایا۔موسمیاتی تبدیلیوں سے کپاس کی فصل بھی متاثر ہوئی ہے۔&quot;

&quot;ہمارے پاس جدید لیب اور سسٹم نہیں ہے جس کی مدد سے ہم جنیٹکلی نیا بیج تیار کر سکیں جو موسم اور بیماریوں کے لحاظ سے قوت مدافعت رکھتا ہو۔ ہم صرف کراس بریڈنگ کی سہولت رکھتے ہیں&quot;۔

انہوں نے کہا کہ دنیا کا کوئی بھی ملک سفید مکھی کے مسئلے سے دوچار نہیں ہے اس کے تدارک کے لیے ہمیں بہتر دوا تیار کرنا ہو گی۔

&quot;ہمارا ادارہ اس وقت کپاس کے بیج کی ایسی ورائیٹیاں بنا چکا ہے جس سے چتکبری، امیریکن، گلابی اور لشکری سنڈی کا حملہ کم ہو گیا ہے۔ہم جنگلی کپاس کے ساتھ کراسنگ سے نئی ورائیٹی پر کام کر رہے ہیں جس سے امید ہے سفید مکھی کا حملہ بھی 50 فیصد تک کم ہو جائے گا بشرطیکہ یہ بیج ہر کسان تک پہنچ سکے&quot;۔

کپاس کی پیداوار کیوں گر رہی ہے؟

کپاس کے کیڑوں کے خلاف جاری کیمیائی جنگ: کیا سیڈ کمپنیاں 'میر جعفر' کا کردار ادا کر رہی ہیں؟

بھکر کے شوکت حیات اور ان کے پانچ بھائیوں کے پاس تحصیل منکیرہ میں 21 ایکڑ زرعی زمین ہے اور یہ سب چنے کے کاشتکار ہیں۔ ان کی زندگی اچھی گزر رہی تھی لیکن پچھلے آٹھ سال سے پانچوں بھائی مزدوری کرنے پر مجبور ہیں۔ زمین اب بھی ان کے پاس ہے لیکن آسمان نامہربان ہے۔

ان لوگوں کا 21 میں سے 18 ایکڑ رقبہ بارانی ہے۔ شوکت حیات بتاتے ہیں کہ سات آٹھ سال پہلے وہ بارانی رقبے سے تقریباً دو تا ڈھائی سو من تک چنا اٹھاتے تھے یعنی ایک ایکڑ سے انہیں تقریباً آٹھ تا دس من پیداوار ہوتی تھی۔ لیکن کئی سال سے بارشیں نہ ہونے کی وجہ سے اب وہ بمشکل پچاس سے ساٹھ من تک ہی حاصل کر پاتے ہیں۔

شوکت کا کہنا ہے کہ اخراجات اور آمدن کے فرق کو دیکھیں تو اس عرصہ میں انہوں نے نقصان ہی اٹھایا ہے۔

&quot;آمدن ختم ہوئی تو مجبوراً ہمیں مزدوری کرنا پڑی۔اب ہم بڑے زمینداروں کی فصلوں کی کٹائی کر کے گزارہ کرتے ہیں۔ ہر سال ہم بارش کی امید پر چنا کاشت کرتے ہیں لیکن جب مارچ میں فصل اٹھانے کا وقت آتا ہے تو 90 فیصد پودے سوکھ چکے ہوتے ہیں۔&#39;&#39;

ان کا کہنا ہے کہ اس سال بھی انہیں کوئی اچھی امید نہیں ہے کیونکہ اب تک اتنی بارش نہیں ہوئی جتنی اس فصل کو درکار ہوتی ہے۔

بھکر رقبے کے لحاظ سے صحرائے تھل کا سب سے بڑا ضلع ہے جہاں 18 لاکھ 32 ہزار ایکڑ سے زیادہ زمین زیرکاشت ہے۔ اس میں تقریباً ساڑھے دس لاکھ ایکڑ رقبہ بارانی ہے اور باقی آبپاشی کے مختلف ذرائع سے سیراب ہوتا ہے۔ یہاں شوکت حیات جیسے چھوٹے کسانوں کا دارومدار بارش پر ہے۔ تاہم بڑے زمینداروں نے اپنے رقبے پر ٹیوب ویل لگا رکھے ہیں۔

چنا اس علاقے میں کاشت ہونے والی سب سے بڑی فصل ہے۔

رواں سال پنجاب میں 18 لاکھ 41 ہزار ایکڑ رقبے پر چنا کاشت کیا گیا جس کا 97 فیصد تھل کے پانچ اضلاع میں اگایا گیا جن میں بھکر، خوشاب، لیہ، جھنگ اور میانوالی شامل ہیں۔ ان اضلاع میں چنے کے زیرکاشت رقبے کا 52 فیصد بھکر میں ہے۔

اسد شاہ منکیرہ میں 13 ایکڑ رقبے کے مالک ہیں۔ ان کا کہنا ہے کہ ایک ایکڑ پر 30 کلو چنے کے بیج لگا کر چھ ماہ بعد 60 کلو پیداوار ملے تو یہ سراسر گھاٹے کا سودا ہے۔ تین سال پہلے پیداوار کچھ بہتر ہوئی تھی لیکن اس کے بعد پچھلے دو سال سے اخراجات نکالنا بھی مشکل ہو رہا ہے۔

اسد کے حالات خراب ہوئے تو انہوں ںے تین سال قبل نجی بینک سے زرعی قرضہ حاصل کیا لیکن وہ اب تک اسے واپس نہیں کر سکے اور اس پر سود بڑھتا جا رہا ہے۔ وہ کہتے ہیں کہ قرض تب ہی اترے گا جب فصل اچھی ہو گی۔

منکیرہ میں محکمہ مال کے گرداور مرید عباس بتاتے ہیں کہ بھکر میں چنے کے صرف چھوٹے کاشتکار ہی مشکل میں نہیں بلکہ بڑے زمیندار بھی پریشان ہیں۔ ان کے خیال میں خراب موسمی حالات پیداوار میں کمی کی واحد وجہ نہیں ہیں۔

&quot;بڑے زمینداروں نے اپنی اراضی کو ہموار کر کے ٹیوب ویل لگا لیے ہیں۔ لیکن وہ فصل کو محفوظ رکھنے کے لیے کسی قسم کا سپرے نہیں کرتے۔ نتیجتاً پودوں کو فنگس لگ جاتی ہے اور پھلی کے اندر بنتا بیج سکڑ جاتا ہے یا بالکل ختم ہو جاتا ہے&quot;۔

انہوں ںے بتایا کہ چنے کے کاشتکار فصل کی قیمت سے بھی مطمئن نہیں ہیں۔

&quot;جب چنا کھیت سے اٹھایا جاتا ہے تو اس کا ریٹ کم ہوتا ہے۔ پچھلے دو سال سے یہ ریٹ 10 ہزار روپے فی بوری کے آس پاس رہا۔ چونکہ چھوٹے کسان فصل کاشت کرنے کے لیے ادھار لیتے ہیں اس لیے وہ اپنی فصل فوری طور پر آڑھتی کو بیچنے پر مجبور ہوتے ہیں تاکہ ادھار اتار سکیں۔ بڑے زمین دار عموماً چنے کو سٹاک کر لیتے ہیں اور جب اچھی قیمت ملتی ہے تو اسے بیچ دیتے ہیں&quot;۔

&quot;گزشتہ سال چنے کا فی بوری ریٹ 18 سے 20 ہزار تک گیا تھا لیکن اس قیمت کا فائدہ بڑے زمینداروں نے ہی اٹھایا&quot;۔

بھکر میں قائم ایرڈ زون ریسرچ سنٹر موسمیاتی تبدیلیوں کو مدنظر رکھتے ہوئے تھل کے علاقوں میں کسانوں کو کاشت کے جدید ذرائع سے متعلق رہنمائی دیتا اور بہترین بیجوں کی تیاری اور کسانوں کو ان کی فراہمی یقینی بناتا ہے۔ اس ادارے کے ڈائریکٹر ڈاکٹر خالد حسین نے سجاگ کو بتایا کہ موسمیاتی تبدیلیوں کے ہوتے ہوئے روایتی طریقہ کاشت میں تبدیلی کی ضرورت ہے لیکن زیادہ تر کاشت کار پرانے طور طریقوں پر قائم ہیں۔

&quot;محکمہ زراعت نے چند سال پہلے خاص طور پر بارانی علاقوں میں ڈرپ اور سپرنکلر نظامِ آبپاشی پر کسانوں کو 60 فیصد سبسڈی کی سہولت کا اعلان کیا تھا لیکن پورے علاقے میں شاید ہی کچھ لوگ ہوں جو اس نظام کی طرف گئے ہوں۔

ڈاکٹر خالد حسین کا مزید کہنا تھا کہ انہوں نے ادارے کے تحقیقی فارم پر دیسی چنے کے بیجوں کو موسمیاتی تبدیلیوں کے مطابق بہتر بنا کر کاشت کیا ہے۔ ہموار زمین پر ٹیوب ویل جبکہ غیر ہموار زمین کو سپرنکلر نظام آبپاشی کے ذریعے سیراب کیا جاتا ہے نتیجتاً صرف ایک سے دو پانی دینے پر ہی یہاں بھرپور پیداوار ہوتی ہے۔

&nbsp;&quot;ہم وقتاً فوقتاً یہ آگاہی کسانوں تک پہنچا رہے ہیں لیکن نتائج انتہائی مایوس کن ہیں&quot;۔

انہوں نے بتایا کہ ایک تو دور دراز کے کسان ان پروگراموں میں شرکت نہیں کر پاتے اور دوسرا&nbsp; یہاں کا کسان بارانی فصل پر اس طرح محنت نہیں&nbsp; کرتا جس طرح وہ ٹیوب ویل کے پانی سے سیراب کی جانے والی فصلوں پر کرتا ہے۔

&quot;سپرنکلر نظام آبپاشی نہ اپنانے کی ایک وجہ آگاہی کی کمی اور دوسری وجہ سہل پسندی ہے۔ اس طریقے میں پانی کے نظام کی کڑی دیکھ بھال کرنا پڑتی ہے جبکہ چنے کے کاشتکاروں کو اکتوبر میں چنا بونے کے بعد مارچ اپریل تک بے فکر ہو کر رہنے کی عادت ہے&quot;۔

انہوں نے کہا کہ کسان فصل کو کھاد دینے اور سپرے کرنے سے بھی لاپروائی برتتے ہیں حالانکہ فصل کو ایک مرتبہ ڈی اے پی کھاد ضرور دینی چاہیے۔ اسی طرح فنگس کو بھی سپرے کرکے آسانی سے ختم کیا جاسکتا ہے۔ اگر کسان ان اقدامات پر عمل کریں تو بہتر پیداوار حاصل کر سکتے ہیں۔

پچھلے دس سال کے دوران پاکستان میں چنے کے زیر کاشت رقبے میں تقریباً 14فیصد تک کمی آئی ہے۔ چنانچہ ملک میں چنے کی درآمد بڑھتی جا رہی ہے اور ملک کو ہر سال اس کی طلب پوری کرنے کے لیے پانچ ارب روپے خرچ کرنا پڑ رہے ہیں۔

وقاص احمد خان

وقاص احمد خان کا تعلق بھکر سے ہے. پچھلے سات برس سے درس و تدریس سے وابستہ ہیں۔ علاقائی، سماجی اور سیاسی مسائل سے دلچسپی رکھتے ہیں۔

بھکر کی یونیورسٹی، جہاں کوئی طالب علم کسی مضمون میں ایم اے کے لیے داخلہ نہیں لے سکتا

وہی ہوا جس کا ڈر تھا، جی ون لہسن کی مارکیٹ ٹھس ہوگئی

بھکر کے محنت کش روزگار کے لیے دوسرے اضلاع کا رخ کیوں کر رہے ہیں؟

کپاس کے کیڑوں کے خلاف جاری کیمیائی جنگ: کیا سیڈ کمپنیاں 'میر جعفر' کا کردار ادا کر رہی ہیں؟

ضد ہماری ہستیوں کی ابر ہے برسات ہے: چنے کی بہتر پیداوار کے لیے روایتی طریقہ کاشت میں تبدیلی کی ضرورت ہے

Lok Sujag