مہاراج دیا رام میرپور خاص کے علاقے ستار نگر کے رہائشی ہیں۔ وہ ہندو پنڈت ہیں اور پچھلے&nbsp; 20 برس سے دیگر مذہبی رسومات کے ساتھ میگھواڑ کمیونٹی میں شادیاں کرواتے آ رہے ہیں۔ مگر کچھ عرصے سے انہیں مشکلات کا سامنا ہے۔

انہوں نے بتایا کہ شادی شدہ جوڑے ان سے میرج سرٹیفکیٹ مانگ رہے ہیں۔ مگر دیا رام کو سرٹیفکیٹ جاری کرنے کی تکنیکی معلومات کا علم نہیں۔

سندھ میں ہندوؤں کی شادیوں کا باضابطہ قانون بن چکا ہے جس کے تحت پنڈت بھی رجسٹرڈ ہوں گے اور رجسٹرڈ پنڈت ہی میرج سرٹیفکیٹ جاری کرنے کے مجاز ہوں گے، دیا رام کو کچھ عرصہ پہلے ہی اس قانون کا علم ہوا ہے۔

2023ء کی مردم شماری کے مطابق سندھ میں 41 لاکھ سے زائد ہندو آبادی ہے، تاہم پاکستان ہندو کونسل کا دعویٰ ہے کہ ہندو کمیونٹی 50 لاکھ سے زائد نفوس پر مشتمل ہے۔

صوبے میں ہندوؤں کی شادی پر سندھ ہندو میرج ایکٹ 2018ء منظور ہو چکا ہے مگر ہندو کمیونٹی کی اکثریت اور پنڈت سمیت دیگر سٹیک ہولڈرز اس امر سے لاعلم یا قانون کی جزیات سے ناواقف ہیں۔

یہ ایکٹ پاس کروانے کے لیے جدوجہد کرنے والے نیشنل لابنگ ڈیلیگیشن فار مینارٹی رائٹس کے ممبر ایم پرکاش پیشے کے لحاظ سے وکیل ہیں۔

ایم پرکاش حیدرآباد ڈسٹرکٹ ہندو پنچائت کے سرپرست بھی ہیں۔ وہ کہتے ہیں کہ سندھ میں 2016ء کے دوران سندھ اسمبلی نے ہندو میرج رجسٹریشن ایکٹ پاس کیا تھا۔ 
&nbsp; 
دو سال بعد اس قانون میں ترمیم کی گئی اورسندھ ہندو میرج ترمیمی ایکٹ 2018ء وجود میں آیا جو ایک مکمل عائلی قانون ہے جس کے رولز بھی بن گئے ہیں۔&nbsp; اس سے پہلے خاص طور پر سندھ میں آباد ہندو کمیونٹی کی نہ تو شادیاں رجسٹر ہوتی تھیں، نہ ہیں انہیں قانونی تحفظ حاصل تھا۔

&quot;اس قانون کے مطابق 45 روز میں ہندو جوڑے کی شادی رجسٹرڈ کروانا لازمی ہے۔ یہ قانون بننے سے قبل ہونے والی شادیاں بھی اسی قانون کے تحت رجسٹرڈ ہوں گی۔&quot;

انھوں نے بتایا کہ پنڈت کی رجسٹریشن یونین کونسل کی سطح پر ہو گی۔ سندھ لوکل گورنمنٹ ڈپارٹمنٹ کے افسران کو پنڈتوں کی رجسٹریشن کرنے کے اختیارات دیے گئے ہیں۔ ہر یونین کونسل میں ہندو آبادی کے حساب سے ایک یا زیادہ پنڈت رجسٹرڈ ہو سکتے ہیں جومیرج سرٹیفکیٹ جاری کرنے کے مجاز ہوں گے۔

وہ کہتے ہیں کہ سندھ ہندو میرج ایکٹ 2018ء سے ہندو عورتوں کو اور بھی کئی فائدے حاصل ہوئے ہیں۔

مثال کے طور پر اس قانون سے ہندو برادریوں میں کم عمری کی شادیوں کی روک تھام ممکن ہے کیوں کہ اس کے مطابق شادی کے لیے ہندو لڑکی کی کم ازم کم عمر 18برس ہونا لازمی قرار دیا گیا ہے۔

&quot;سندھ میں رہنے والی ہندو عورتوں کو پہلی بار دوسری شادی کا حق دیا گیا ہے۔ ہندو عورت کو اپنے شوہر سے خلع لینے کا حق بھی حاصل ہو گیا ہے۔&quot;

<h2>پنڈتوں کی رجسٹریشن کیوں نہیں ہو رہی؟</h2>

سندھ ہندو میرج ایکٹ کے تحت سندھ کی تمام ضلع کونسلز، تحصیل کونسلز، ٹاؤن کونسلز اور یونین کونسلز میں پنڈتوں کی رجسٹریشن کا باضابطہ نوٹیفکیشن جاری ہونے کے باوجود پنڈتوں کی رجسٹریشن کا عمل سست روی کا شکار ہے۔

اس سلسلے میں ڈائریکٹر لوکل گورنمنٹ حیدرآباد ڈویژن حبیب اللہ صدیقی کا کہنا ہے کہ سندھ ہندو میرج ایکٹ کے تحت محکمہ بلدیات کو پنڈتوں کی رجسٹریشن کی ذمہ داری سونپی گئی ہے اور ان کا محکمہ قواعد کے مطابق عمل درآمد کرنے کا پابند ہے، مگر کمیونٹی رجسٹریشن کی طرف مائل نہیں ہے۔

ان کے مطابق ہندو کمیونٹی کی اکثریت کو اس قانون کا علم نہیں ہے اس لیے پہلے انھیں آگاہی دینے کی ضرورت ہے۔ 
&nbsp; 
&quot;ہم تو رجسٹریشن کے لیے موجود ہیں مگر پنڈت بہت کم آ رہے ہیں۔&quot;

اس معاملے پر پنڈت حضرات کی رائے مختلف ہے۔

مہاراج دیا رام کہتے ہیں کہ انہوں نے میرپور خاص میونسپل کارپوریشن کے میونسپل کمشنر کو جون 2023ء میں درخواست دی تھی کہ انھیں پنڈت رجسٹر کیا جائے لیکن رجسٹرڈ کرنے کا نوٹیفکیشن اکتوبر2023ء میں جاری کیا گیا۔ ان کے خیال میں اس کا سبب یہ تھا کہ میونسپل افسر کو علم ہی نہیں تھا کہ یہ رجسٹریشن کیسے ہو گی اور نوٹیفکیشن میں کیا تحریر کیا جائے گا۔

&quot;میونسپل افسر نے بار بار دفتر کے چکر لگوانے کے چار ماہ بعد پنڈت اجازت نامہ جاری کیا۔&quot;

مہاراج دیا رام نے بتایا کہ ان کی رجسٹریشن تو ہو گئی ہے مگر ان کے جاری کردہ میرج سرٹیفکیٹ پر لگنے والی مہر پر کیا لکھوانا ہے، یہ کوئی نہیں بتا رہا۔

مہاراج کشور کمار سارسوت بھی ہندو پنڈت ہیں اور ان کا بنیادی تعلق تھرپارکر سے ہے، جب ان سے یہ سوال پوچھا گیا کہ سندھ ہندو میرج ایکٹ پرعمل درآمد کیوں نہیں ہو رہا ؟ تو انہوں نے بھی اس معاملے پر اپنے کچھ تحفظات کا اظہار کیا۔

مہاراج کشور کے مطابق اس قانون پر سو فی صد عمل کی راہ میں کچھ رکاوٹیں اور پیچیدگیاں ہیں ان کو حل کیا جائے، وہ کہتے ہیں کہ سب سے پہلے پنڈتوں کی رجسٹریشن کی فیس تمام&nbsp; اضلاع میں یکساں مقرر کی جائے، محکمہ بلدیات کا زیادہ تر عملہ ہندو میرج ایکٹ سے ناواقف ہے ان کو سینسٹائزڈ کیا جائے، پنڈتوں کی سروے کر کے ان کو میرج سرٹیفکیٹ کا فارمیٹ فراہم کیا جائے جو نادرا کیلئے قابل قبول ہو، ان اقدامات سے اس قانون کا استعمال تیز ہو گا۔ اس وقت محکمہ بلدیات کے ٹائون اور یوسیز کی سطح پر مقرر افسران اور پنڈتوں کے درمیان کمیونیکیشن گیپ ہے، اس لئے ہندو میرج ایکٹ پر عمل سست ہے۔&nbsp;&nbsp;

ایک سروے کے مطابق سندھ کے مختلف اضلاع میں پنڈتوں کی رجسٹریشن فیس بھی مختلف ہے، ضلع میرپورخاص میں یہ فیس پانچ ہزار روپے وصول کی جا رہی ہے جس کو بہت زیادہ قرار دیا جا رہا ہے۔ ضلع عمرکوٹ میں پنڈت کی رجسٹریشن فیس ایک ہزار روپے مختص ہے، ضلع سانگھڑ کی یوسیز اور ٹائون کمیٹیوں میں دو ہزار سے پانچ ہزار روپے فیس وصول کی جا رہی ہے، ضلع ٹنڈوالہیار میں سب سے کم فیس مقرر کی گئی ہے حال ہی میں ضلع ٹنڈوالہیار کی ٹائون کمیٹی سلطان آباد میں ایک پنڈت کو رجسٹرڈ کرنے کی فیس پانچ سو روپے وصول کی گئی جس کو مناسب قرار دیا گیا ہے۔ بعض پنڈتوں کا کہنا ہے کہ وہ بھاری فیس کے باعث بھی رجسٹرڈ نہیں ہو پا رہے۔

حبیب اللہ صدیقی کا کہنا ہے کہ لوکل گورنمنٹ ایکٹ کے تحت لوکل کونسلیں اپنے ٹیکس اور فیسیں مقرر کرنے میں آزاد ہیں، اسی لیے رجسٹریشن فیس الگ الگ مقرر ہے۔

پاکستان کی سطح پر اقلیتوں کے معاملات پر کام کرنے والے نیشنل لابنگ ڈیلیگیشن فار مینارٹیز کے رکن کرشن شرما کا کہنا ہے کہ سندھ ہندو میرج ایکٹ کے متعلق عوامی آگاہی پیدا کرنے کی ضرورت ہے۔

&quot;یہ وہ دستاویز ہے جس کے ذریعے جبری مذہب تبدیلی کے واقعات کی روک تھام ہو سکے گی، ہندو بچوں کی دیکھ بھال اور جائیداد میں حصہ دینے کے مسائل قانونی طریقے سے حل ہوں گے۔ اس کے تحت ریاست نے ہندو کمیونٹی کو تحفظ دیا ہے۔&quot; 
&nbsp; 
انہوں نے بتایا کہ قومی اسمبلی سے بھی ہندو میرج ایکٹ 2017ء پاس ہو چکا ہے مگر ابھی تک پنجاب اور خیبر پختونخواہ میں اس قانون کے رولز نہیں بن سکے۔ 
&nbsp; 
اس طرح سے یہ قانون پاس ہونے کے باوجود ان دو صوبوں میں لاگو نہیں ہو رہا۔

ان کا ماننا ہے کہ قانون پر عمل درآمد کے لیے پہلے مرحلے میں سندھ حکومت لوکل گورنمنٹ ڈپارٹمنٹ کے متعلقہ افسران کو تربیت فراہم کرے۔ اس کے بعد ہندو پنڈتوں کے ساتھ آگاہی نشستوں کا انعقاد کیا جائے اورانھیں رہنمائی فراہم کی جائے۔

سندھ ہندو میرج ایکٹ: 'شیڈولڈ کاسٹ ہندو عورتوں کو معلوم ہی نہیں کہ وہ قانونی طریقے سے طلاق لے سکتی ہیں'۔

سندھی پنڈت شادیوں کی رجسٹریشن کیوں نہیں کر رہے؟

text

نئی حلقہ بندیوں سے کہیں انتخابی حلقوں میں اضافہ ہوا ہے تو کہیں حلقے کم ہو گئے ہیں۔ نئی تجاویز کے تحت ضلع ٹھٹہ میں صوبائی اسمبلی کا ایک پورا حلقہ غائب ہو گیا ہے۔

الیکشن کمیشن آف پاکستان نےآئندہ عام انتخابات کے لیے حلقہ بندیوں کی ابتدائی فہرستیں 17 ستمبر کو جاری کی تھیں۔

نئی حلقہ بندیوں میں قومی اسمبلی کی مجموعی نشستوں کی تعداد 266 ہے، اس سے پہلے 2018 کے انتخابات میں یہ تعداد 272 تھی۔

نئی فہرست کے مطابق وفاقی دارالحکومت اسلام آباد سے قومی اسمبلی کی تین، پنجاب سے 141، سندھ سے 61، خیبرپختونخوا 45 اوربلوچستان میں 16 نشستیں ہیں۔

2018ءکے انتخابات کے وقت ضلع ٹھٹہ میں قومی اسمبلی کی ایک اور صوبائی اسمبلی کی تین نشستں تھیں۔ قومی اسمبلی کا حلقہ این اے 232 پور ے ضلع پر مشتمل تھا 2023ء کی حلقہ بندیوں کے بعد اس میں کوئی تبدیلی نہیں کی گئی۔ 
البتہ اس حلقے کو اب این اے&nbsp; 225 کا نام دیا گیا ہے۔

نئی حلقہ بندیوں میں تحصیل میرپور ساکرو کا صوبائی حلقہ (پی ایس 79 ) ختم کر دیا گیا ہے۔ اب اس ضلع سےآئندہ عام انتخابات میں قومی اسمبلی کے ایک اور صوبائی اسمبلی کے دو ارکان منتخب ہوں گے۔

مگر ان تبدیلیوں&nbsp; پر سیاسی جماعتوں کی مقامی قیادت کو اعتراض ہے۔

ختم یا ضم ہونے والے صوبائی حلقہ (پی ایس 79 ) کو پیپلز پارٹی کا گڑھ تصور کیا جاتا تھا۔ یہاں سےگزشتہ انتخابات میں پیپلز پارٹی کے جام اویس&nbsp; جوکھیو 43 ہزار 874 ووٹ لے کر رکن سندھ اسمبلی بنے تھے۔ 2013ء میں سید امیر حیدر شیرازی آزاد جیتے اور پی پی میں شامل ہو گئے تھے۔ ان سے پہلے سسی پلیجو بھی یہاں سے ایم پی اے رہ چکی ہیں۔

یہ صوبائی حلقہ (پی ایس 79) ٹھٹہ کی ساحلی پٹی پر واقع علاقوں میرپور ساکرو، دھابیجی، گھارو، گجو، بُہارا پر مشتمل تھا۔

ان علاقوں کی کل آبادی تین لاکھ41 ہزار 412 تھی۔ جبکہ اس حلقے میں رجسٹرڈ ووٹرز کی کل تعدا ایک لاکھ 46 ہزار 196 تھی۔

نئی مردم شماری کے بعد صوبائی حلقوں میں ووٹرز کے تعداد کو بڑھایا دیا گیا ہے۔ نئے فارمولے کے تحت سندھ میں ہر صوبائی حلقہ چار لاکھ 28 ہزار 432 کے قریب آبادی پر مشتمل ہو گا۔

اسی فارمولے کے پیش نظر اس حلقے (سابقہ پی ایس 79) کے علاقوں کو دوسری صوبائی نشستوں میں شامل کر دیا گیا ہے۔

یوں ٹھٹہ کے دونوں صوبائی حلقوں کی آبادی اب پانچ پانچ لاکھ سے زیادہ ہو گئی ہے۔

نئی حلقہ بندیوں کے مطابق پی ایس 75 (ٹھٹہ ون) اب پانچ لاکھ 56 ہزار 767 آبادی پر مشتمل ہو گا۔ جس میں ٹھٹہ تحصیل، میرپور ساکرو کے علاقے ٹاؤن کمیٹی گھارو، گھارو تپیدار سرکل آف میرپور ساکرو سپروائزری تپیدار سرکل شامل ہیں۔

اسی طرح پی ایس 76 (ٹھٹہ ٹو ) پانچ لاکھ 26 ہزار 424 نفوس کی آبادی پر مشتمل ہے۔ اس حلقے میں تحصیل گھوڑا باری، تحصیل کیٹی بندر اور میرپور ساکرو تعلقہ (گھارو ٹائون کمیٹی اور گھارو تپیدار سرکل آف میرپور ساکرو سپروائزری تپیدار سرکل کے سوا)&nbsp; باقی علاقے شامل کیے گئے ہیں۔

&nbsp;ضم ہونے والے صوبائی حلقے میں جوکھیو اور خاصخیلی برادریوں کی اکثریت رہتی ہے۔ جبکہ جام اویس بجار جوکھیو برادری کے سردار ہیں۔ جن کا نام ناظم جوکھیو قتل کیس میں بھی آیا تھا اور وہ کچھ عرصہ جیل میں بھی رہے۔

&nbsp;ٹھٹہ کے سینئر صحافی شبیر بھٹی کا خیال ہے کہ نئی حلقہ بندی سے سب سے زیادہ نقصان خاصخیلی برادری کے رہنما اقبال خاصخیلی کا ہو گا۔

اقبال خاصخیلی ہمیشہ پیپلز پارٹی کے مقابل مضبوط امیدوار ہوتے تھے اور اب حال ہی میں پیپلز پارٹی میں شامل ہوئے تھے۔

وہ کہتے ہیں کہ حلقے کی تبدیلی سے سسی پلیجو کے لیے بھی صورت حال آسان نہیں رہی۔ ان کے والد غلام قادر پلیجو&nbsp; نے بھی اسی حلقے سے الیکش جیتا تھا۔

&quot;سسی پلیجو نے ترقیاتی کام بھی اسی حلقے میں کرائے ہیں&quot;۔

وہ کہتے ہیں کہ شیرازی برادران بھی میر پور ساکرو میں اچھا اثر و رسوخ رکھتے ہیں۔ تاہم وہ دوسرے حلقے میں ایڈجسٹ ہو سکتے ہیں۔

اگر یہ لوگ آگے پیپلز پارٹی کے ساتھ رہے تو پارٹی کو اس کا فائدہ ہو گا۔

پی پی کی مقامی قیادت کو اپنے ضلع سے ایک نشست کم ہونے پر سخت اعتراض ہے۔

پیپلز پارٹی ضلع ٹھٹہ کے صدر صادق میمن سمجھتے ہیں کہ یہ نشست ختم ہونے سے میر پور ساکرو کے لوگوں کو نقصان ہو گا۔ یہاں کے لوگوں کی نمائندگی ختم ہو جائے گی۔ انہوں نے یہ اعتراض سیکرٹری الیکشن کمیشن کو بھیجا ہے۔

پیپلز پارٹی ہی سے وابستہ سابقہ ایم پی ایز سسی پلیجو اور علی حسن زرداری بھی نئی حلقہ بندی کی مخالفت کر رہے ہیں۔

دونوں رہنما ایک ہی بات کہہ رہے ہیں کہ متنازع حلقہ بندی سے الیکشن کمیشن کی غیرجانبداری سوالیہ نشان بن گئی ہے۔ اس اقدام کو واپس نہ لیا گیا تو اسے چیلینج کیا جائے گا۔

شبیر بھٹی پیپلز پارٹی کے&nbsp; اعتراض کی وضاحت کرتے ہوئے بتاتے ہیں کہ ٹھٹہ میں پانچ پانچ لاکھ سے زیادہ آبادی&nbsp; کا ایک ایک صوبائی حلقہ بنا دیا گیا۔ حالانکہ ختم ہونے والے حلقے کی آبادی تین لاکھ 41 ہزار سے زائد تھی۔ وہ کہتے ہیں کہ آبادی&nbsp; کو برابر کر کے تینوں حلقوں کو برقرار بھی رکھا جا سکتا تھا۔

اس حلقے کے خاتمے پر الیکشن کمیشن کو اعتراضات موصول ہو گئے ہیں۔ مختلف سیاسی جماعتوں نے الیکشن کمیشن کو تجاویز دی ہیں اور آبادی اور ووٹرز کے تناسب کے مطابق حلقے بنانے کا مطالبہ کیا ہے۔

نئی حلقہ بندیوں میں راجن پور کو اضافی صوبائی نشست مل گئی، حلقوں میں مواضعات کی تبدیلی سے انتخابی امیدواروں کو پریشانی

ضلع ٹھٹہ کی نئی حلقہ بندی: میر پور ساکرو کا صوبائی حلقہ ختم ہونے سے کس کو نقصان ہو گا ؟

حیدر آباد کے ہیرا لال باگڑی برسوں سے کیلے کی تجارت کر رہے ہیں۔ وہ مقامی باغات اور منڈیوں سے کیلا خریدتے اور اسے ملک بھر میں بیچتے ہیں۔ ایک سال پہلے انہوں نے ٹنڈوجام میں بیس ایکڑ پر کیلے کے باغ کا ٹھیکہ لیا تھا جس سے انہیں فی ایکڑ دو سے ڈھائی ٹرک تک پیداوار حاصل ہوئی تھی۔ لیکن اس سال انہیں ہر ایکڑ سے بمشکل ایک ٹرک کیلا ہی حاصل ہو پایا ہے۔

پیداوار میں بھاری کمی ہیرا لال کے لئے بہت پریشان کن ہے۔ ان کو خدشہ ہے کہ اگر پیداوار میں کمی کا سلسلہ برقرار رہا تو انہیں اس ٹھیکے میں بھاری نقصان اٹھانا پڑ سکتا ہے۔

ہیرا لال کی طرح سندھ کے بہت سے علاقوں میں کاشت کار کیلے کی پیداوار میں کمی کی شکایت کر رہے ہیں۔

حیدرآباد کی سبزی منڈی کے بیوپاری احمد موٹانی کا کہنا ہے کہ منڈی میں کیلے کی رسد کم ہو گئی ہے اور انہیں کیلا مہنگا مل رہا ہے جسے وہ مہنگا بیچنے پر مجبور ہیں۔

سندھ آباد کار بورڈ کے ترجمان اور کیلے کے کاشت کار اسلم مری اس کی تصدیق کرتے ہوئے کہتے ہیں کہ پیداوار میں کمی اور برآمد کی وجہ سے کیلا بہت مہنگا ہوگیا ہے۔ سندھ کی ہول سیل مارکیٹ میں فی من کیلے کی قیمت ساڑھے پانچ ہزار سے آٹھ ہزار روپے تک پہنچ چکی ہے جبکہ پرچون مارکیٹ میں کیلا 220&nbsp; سے 250 روپے فی درجن میں فروخت ہو رہا ہے۔

سندھ ایگریکلچر یونیورسٹی ٹنڈو جام کے پروفیسر اسماعیل کمبھر نے بتایا ہے کہ ان دنوں سندھ کے کیلے میں فزیورم نامی فنگس آ گیا ہے جسے &#39;پاناما ولٹ&#39; بھی کہا جاتا ہے اور مقامی لوگ اسے &#39;جلن والی بیماری&#39; کہتے ہیں۔ بیرون ملک سے آنے والی کیلے کی نئی اقسام یہ بیماری پھیلا رہی ہیں اور اسے کسی سپرے سے ختم نہیں کیا جاسکتا۔ باغ کو اس بیماری سے بچانے کے لئے ضروری ہے کہ متاثرہ پودےکو ہی تلف کردیا جائے۔

سندھ میں کیلے کی فصل کو ہونے والا حالیہ نقصان 96-1995 میں &#39;بنانا بنچی ٹاپ وائرس&#39; سے ہونے والی تباہی سے مشابہ ہے۔ اُس سال بھی کیلے کی پیداوار اسی طرح کم ہو گئی تھی۔

اسلم مری کا کہنا ہے کہ سندھ کے کیلے میں &#39;ٹی آر فور&#39; بیماری بھی پائی گئی ہے جو ایک سال سے مختلف علاقوں میں ظاہر ہو رہی ہے۔ تاحال محکمہ زراعت نے اس بیماری کے خلاف کوئی ٹھوس اقدامات نہیں کئے۔

&quot;کیلے کی &#39;گرینڈ نائن&#39; نامی ورائٹی میں اس بیماری کا پھیلاؤ زیادہ ہے۔ ہم اس بیماری سے متاثرہ پودا جڑ سے نکال کر اس کے گڑھے میں آگ جلا دیتے ہیں تاکہ بیماری کے اثرات ختم ہو جائیں۔ اس کے علاوہ ہم کچھ نہیں کر سکتے۔&#39;&#39;

پروفیسر کمبھر موسمی اثرات کو بھی کیلے کی پیداوار میں کمی کا اہم سبب قرار دیتے ہیں۔ ان کا کہنا ہے کہ گزشتہ سال آنے والی بارشوں اور سیلاب سے ایک طرف تو باغات تباہ ہو گئے اور دوسری جانب سیلاب سے پھوٹنے والی نت نئی بیماریوں نے بھی کیلے کی فصل کو بری طرح متاثر کی جس سے پیداوار میں 40 فیصد تک کمی آئی ہے۔

حیدرآباد چیمبر آف کامرس کے سینئر نائب صدر نجم الدین کے مطابق برآمد میں اضافہ بھی مقامی مارکیٹ میں کیلے کی رسد میں کمی کا ایک نمایاں سبب ہے کیونکہ اس مرتبہ ایران کو بھی بڑی مقدار میں کیلا برآمد کیا جا رہا ہے۔

وزارت تحفظ خوراک اور پاکستان زرعی تحقیقاتی کونسل کے مطابق ملک بھر میں کیلے کی مجموعی پیداوار لگ بھگ ایک لاکھ 55 ہزار ٹن ہے جس میں سے 87 فیصد صرف سندھ پیدا کرتا ہے۔ 22-2021 کے سیزن میں 67 ہزار ٹن سے زیادہ کیلا برآمد کیا گیا۔ اس میں 30 ہزار ٹن قازقستان، 28 ہزار ٹن افغانستان اور باقی متحدہ عرب امارات، برطانیہ، تاجکستان، ازبکستان اور رومانیہ کو بھیجا گیا۔ کیلے کی برآمدات میں سندھ کا حصہ 90 فیصد ہے۔

پروفیسر کمبھر کے مطابق پانی کی قلت، درجہ حرارت میں اضافہ، باغات میں زیراستعمال زرعی آلات کا دوسری جگہوں پر استعمال جیسے عوامل اس بیماری کے پھیلاؤ کا باعث بنتے ہیں۔

&#39;&#39;ترقی یافتہ ممالک میں تو کاشت کار کسی شخص کو سکریننگ کے بغیر اپنے کھیت اور باغات میں داخل تک نہیں ہونے دیتے تاکہ ان کے ساتھ آنے والا کوئی کیڑا یا وائرس فصل کو نقصان نہ پہنچائے۔ لیکن ہمارے ہاں ایسا شعور نہیں پایا جاتا جس کی وجہ سے زرعی پیداوار کو بہت سا نقصان ہو رہا ہے۔&#39;&#39;

کیلے کی قیمتیں آسمان پر: سندھ میں کیلے کے باغوں پر کیا بیت رہی ہے؟

ولی محمد ٹنڈو اللہ یار کے چھوٹے کاشتکار ہیں، پچھلے چند سال سے ان کے حالات بدل گئے ہیں اور اب وہ نسبتاً خوشحال زندگی گذار رہے ہیں۔

ان کے پاس 25 ایکڑ زرعی زمین ہے جس میں سے کچھ حصے پر وہ گنا کاشت کرتے ہیں۔ ولی محمد کی خوشحالی کی وجہ گنے کی فصل تو ہے لیکن اصل &quot;کہانی&quot; اس کے بعد کی ہے۔

وہ چند سال سے گنے کو شوگر ملوں کو بیچنے کی بجائے اس سے گڑ تیار کرکے فروخت کر رہے ہیں۔ انہوں نے شہر کے بائی پاس پر بیلنا لگایا ہوا ہے جہاں دیسی طریقوں سے گنے سے گڑ بنایا جاتا ہے اور وہیں پر سٹال سجا کر گڑ فروخت کرتے ہیں۔

ولی محمد نے بتایا کہ انہوں نے بیلنے پر چار مزدور رکھے ہوئے ہیں، جو گنے کو مشین سے گذار کر رس نکالتے ہیں۔

&quot;ایک من گنے سے 16 کلو رس نکلتا ہے۔ جس سے ساڑھے تین سے چار کلو گڑ بن جاتا ہے۔ فی کلو گڑ کی اوسط قیمت 200 روپے ہے، اس طرح ایک من گنے سے سات سے آٹھ سو روپے آمدن ہو جاتی ہے۔&quot;

سندھ میں رواں کرشنگ سیزن کے لیے فی من گنے کی سرکاری یا امدادی قیمت 302 روپے مقرر کی گئی ہے لیکن سندھ کی ملیں کسانوں کو گنے کو ٹرکوں اور ٹریکٹر ٹرالیوں میں بھر کر مل تک پہنچانے کا خرچ نہیں دے رہیں وہ کسان خود برداشت کر رہے ہیں۔

ولی محمد کے بقول گڑ بنانے سے کسان کو سرکاری قیمت خرید سے پانچ سو روپے فی من اضافی آمدن ہوتی ہے۔

یہ صرف ولی محمد کی کہانی نہیں بلکہ سندھ کے مختلف اضلاع میں ایسے کئی گنے کے کاشتکار ہیں جنہوں نے شوگرملوں کے رویے سے مایوس ہوکر گڑ بنانے کے بیلنے لگا لیے ہیں۔

حیدرآباد سے میرپور خاص یا ٹنڈو محمد خان روٹ پر سفر کرتے ہوئے مختلف دیہات میں سڑک کنارے ایسے بے شمار بیلنے نظر آتے ہیں جہاں کاشتکار گنے سے گڑ بناکر فروخت کر رہے ہیں۔

گنے سے گڑ بنانے والے ان بیلنوں پر قائم سٹالز پر عام طور پر تین اقسام کا گڑ دستیاب ہوتا ہے۔ خالص گڑ، کیمیکل والا گڑ اور سپیشل گڑ۔

سپیشل گڑ میں خشک میوہ جات یعنی بادام مونگ پھلی، تل، چنے، سونف، الائچی شامل کی جاتی ہے جس کی قیمت فی کلو 600 روپے وصول کی جاتی ہے جبکہ سادہ گڑ 200 روپے کلو فروخت کیا جاتا ہے۔

سفر کے دوران اکثر لوگ ان بیلنوں کو دیکھ کر گاڑیوں کو بریک لگاتے ہیں اورتازہ گڑ کی کشش ان کوخریداری پر مجبور کردیتی ہے۔

<h2>گنے کو ملز میں فروخت کرنے والے کاشتکار گھاٹے میں کیوں؟</h2>

&nbsp;نواب زبیر تالپور کاشتکاراور سندھ آبادگار اتحاد کے صدر ہیں۔ ان کا کہنا ہے کہ شوگر مل کو گنا دینے کے بعد رقم کی ادائیگی کے لیے انہیں بیسیوں چکر لگانا پڑتے ہیں۔ کوالٹی پریمیم بھی وعدے کے مطابق نہیں ملتا۔

شوگر فیکٹریز کنٹرول ایکٹ 1950ء کے تحت حکومت گنے میں طے شدہ پیمانے سے زیادہ مٹھاس ہونے پر ملز مالکان کو کسانوں کو کوالٹی پریمیم ادا کرنے کا حکم دے سکتی ہے۔

&nbsp;سپریم کورٹ آف پاکستان نے اپنے ایک فیصلے میں مِلوں کو حکم دے رکھا ہے کہ اگر شرحِ مٹھاس 8.5 فی صد سے زیادہ ہو تو وہ ہر اضافی مقدار پر گنے کی قیمتِ خرید میں پانچ روپے فی 40 کلو گرام کا اضافہ کرنے کے پابند ہیں۔

پاکستان خاص کر سندھ میں&nbsp; گنے کی بہت ساری اقسام میں مٹھاس کی شرح 14 فی صد تک بھی ہوتی ہے۔

نواب زبیر تالپور کہتے ہیں کہ گنے کے فی ایکڑ کاشت پر تقریباً پونے دو لاکھ روپے خرچہ آتا ہے۔ موجودہ ریٹ کے حساب سے گنا فروخت کرنے کے عوض فصل کا خرچہ مشکل سے نکلتا ہے۔

یہی وجہ ہے کہ اب گنے کے متبادل فصل پر توجہ دے رہے ہیں۔

نواب زبیر نے گذشتہ سیزن میں 100 ایکڑ رقبے پر گنے کی کاشت کی تھی مگر اس سال 40 ایکڑ پر گنا لگایا ہے۔

محمد ولی اگلے سال مزید رقبے پر گنا لگانے کا ارادہ رکھتے ہیں۔ وہ بتاتے ہیں کہ گڑ بنانے سے انہیں نقد اور فوری آمدن ہوتی ہے۔

&quot;سارا گڑ ہمارے سٹال پر فروخت نا بھی ہوسکے تو اس کو ہم ہول سیل مارکیٹ میں یا مقامی دوکانداروں کو بیچ دیتے ہیں&quot;۔

سندھ میں مجموعی طور 38 شوگر ملیں قائم ہیں۔ اس انڈسٹری میں انور مجید سے لے کر جہانگیر ترین جیسے کئی بزنس ٹائیکونز&nbsp; نے سرمایہ کاری کی ہوئی ہے۔

ان لوگوں کے سیاسی خیالات اور وابستگیاں بھلے مختلف ہوں لیکن کاشتکار سے &quot;سلوک&quot; کے معاملے میں یہ سب ایک پیج پر ہیں۔

<h2>کاشتکار شوگر ملوں سے کیوں ناراض ہیں؟</h2>

سندھ شوگرکین فیکٹریز کنٹرول ایکٹ کے مطابق سندھ میں ہر سال 15 اکتوبر سے اپریل تک گنے کا کرشنگ سیزن ہوتا ہے۔

اکتوبر تک گنے کی فصل تیار ہو جاتی ہے لیکن شوگرملز وقت پر کرشنگ نہیں کرتیں جبکہ کسان کے لیے مشکل یہ ہوتی ہے کہ وہ اپنی فصل کہاں لے کر جائے؟ گذشتہ چند برسوں سے سندھ میں ہر سال کاشتکاروں اور ملز مالکان کے درمیان گنے کے ریٹ اور شوگرملز چلانے کی تاریخ کے تعین کو لے تنازع کھڑا ہو جاتا ہے۔

کاشتکار ہر سال کی جھک جھک اور حکومت سندھ کے عدم تعاون کی وجہ سے بیزار ہوکر گنے کی بجائے دیگر فصل کاشت کرنے کو ترجیح دینے لگے ہیں۔

رواں کرشنگ سیزن کے لیے حکومت سندھ نے فی من گنے کے نرخ 302 روپے مقرر کیے ہیں لیکن اکثر شوگرملز کی جانب سے کاشتکاروں کو بروقت ادایئگی نہ ہونے کی شکایات سامنے آئی ہیں۔

کین کمشنر ضمیر احمد جاگیرانی سندھ میں شوگرملوں کی کنٹرولنگ اتھارٹی ہیں۔ وہ کہتے ہیں کہ کئی شوگرملز ایسی ہیں جن کی طرف کاشتکاروں کے عرصہ دراز سے 40 کروڑ روپوں سے زائد واجبات ہیں جن کی ادائیگی نہیں کی جارہی۔

کین کمشنر سندھ کے مطابق انصاری شوگر ملز کی جانب کاشتکاروں کے سات کروڑ روپے بقایا ہیں، سیری شوگرملز پر آٹھ کروڑ روپے واجبات ہیں۔ چمبڑ شوگرملز پر دو کروڑ روپے، گھوٹکی شوگرملز پر آٹھ کروڑ، لاڑ شوگرملز ایک کروڑ ، نودیرو&nbsp; شوگرملز&nbsp; 18 لاکھ ، نیو دادو شوگرملز پر 19 کروڑ اور باوانی شوگرملز کے پاس کاشتکاروں کے دو کروڑ روپے کے واجبات ہیں۔

<h2>گنے کی کاشت میں عدم دلچسپی کے نتائج</h2>

کاشتکاروں کی جانب سے گنے کی کاشت میں عدم دلچسپی کے باعث سندھ میں حکومت کی جانب سے گنے کی کاشت کا مقرر کردہ ٹارگٹ حاصل نہیں ہو رہا۔

محکمہ زراعت سندھ کے ڈائریکٹر جنرل ہدایت اللہ چھجڑو&nbsp; نے بتایا کہ گذشتہ برس22ء-2021ء میں ان کے محکمے کی جانب سے سندھ میں تین لاکھ 10 ہزار ہیکٹرز پر گنے کی کاشت کا ٹارگٹ مقرر کیا گیا تھا لیکن صوبے میں دو لاکھ 89 ہزار ہیکٹرز پر گنے کی کاشت ہوئی۔ یعنی 21 ہزار ہیکٹرز کم کاشت ہوئی۔

&quot;رواں برس گنے کی کاشت کا ہدف پچھلے سال سے 10 ہزار ہیکٹرز کم کرکے تین لاکھ ہیکٹرز کا ٹارگٹ مقرر کیا گیا ہے لیکن سندھ میں حالیہ بارشوں اور سیلاب کے باعث زراعت کو بڑے پیمانے پر ہونے والے نقصان کو مدنظر رکھتے ہوئے اس سال بھی گنے کی کاشت اور پیداواری ہدف حاصل نہ ہونے کا خدشہ ہے&quot;۔

حکومتی اعداد و شمار اس بات کی تصدیق کرتے ہیں کہ سندھ میں کسانوں کی طرف سے گنا کاشت کرنے کے رجحان میں کمی واقعے ہو رہی ہے۔

2017ء اور 2018ء کے سیزن میں سندھ میں تقریباً تین لاکھ 33 ہزار چار سو 50 ہیکٹر(8 لاکھ 24 ہزار ایکڑ) رقبے پر گنا کاشت ہوا تھا جو 2021ء اور 22ء کے سیزن میں 38 ہزار 72 ہیکٹر(94 ہزارایکڑ)&nbsp; کم ہوکر دو لاکھ 95 ہزار تین سو 76 ہیکٹر (سات لاکھ 29 ہزار ایکڑ) رہ گیا ہے۔

کین کمشنر ضمیر احمد کے مطابق گذشتہ سیزن 22-2021 کے دوران سندھ کی شگرملز نے مجموعی طور پر ایک کروڑ 55 لاکھ 24 ہزار 728 میٹرک ٹن گنا خرید کیا تھا اور شوگرملز&nbsp; نے اس سے 15 لاکھ 56 ہزار 265 میٹرک ٹن چینی بنائی تھی۔ وہ کہتے ہیں کہ اس مرتبہ چینی کی پیداوار میں کمی کا اندیشہ ہے۔

میٹھا میٹھا ہپ ہپ: شوگر ملیں گنے کی مٹھاس میں کمی بیشی کر کے کس طرح کاشت کاروں کو لوٹ رہی ہیں۔

سندھ میں حکومت اور شوگر ملز کے خلاف گنے کے کاشتکاروں کا انوکھا اقدام

راجیش کمار سوچی کے بھائی دلیپ کمار کا انتقال ہوا تو وہ ان کی استھی (راکھ) کو کوٹری کے مقام پر دریائے سندھ میں بہانے لے آئے۔ لیکن دریا پر پہنچ کر ان کا دل ٹوٹ گیا کیونکہ اس میں پانی نہ ہونے کے برابر تھا۔ وہ کچھ دیر دریا کے پیٹ میں جوہڑ کی شکل میں کھڑے پانی کو تکتے رہے اور پھر پیتل کے لوٹے میں جمع راکھ کو اسی پانی میں ڈال کر بوجھل قدموں سے واپس لوٹ گئے۔

راجیش سندھ کے دوسرے بڑے شہر حیدرآباد کے علاقے سرے گھاٹ کے رہائشی ہیں۔ اگر ان کے بس میں ہوتا تو وہ اپنے بھائی کی استھی کو دریائے گنگا میں بہانے کے لیے بھارت لے جاتے۔ لیکن استطاعت نہ ہونے کے باعث سندھ کے بہت سے ہندوؤں کی طرح دریائے سندھ ہی ان کے لیے گنگا کی حیثیت رکھتا ہے۔ جب دریا میں پانی نہیں ہوتا تو ہندو برادری کے بہت سے لوگوں کو راجیش ہی کی طرح مایوسی ہوتی ہے۔

ہندو مذہب کے ماننے والوں کی آخری رسومات چار طریقوں سے ادا کی جاتی ہیں جن میں لاش کو آگ میں جلانا، زمین میں دفن کرنا، پانی میں بہانا یا جنگل میں چھوڑ دینا شامل ہیں۔ برصغیر میں تاریخ کے مختلف ادوار میں ہندو آخری رسومات کے لیے انہی میں سے مختلف طریقے اختیار کرتے چلے آئے ہیں۔ پاکستان میں رہنے والے ہندو اپنے عزیزوں کے انتقال کے بعد عموماً ان کی لاش کو جلاتے ہیں یا زمین میں دفن کر دیتے ہیں۔

پاکستان میں ہندو برادری کی اکثریت سندھ میں آباد ہے۔ جب ان میں کوئی فرد انتقال کر جاتا ہے تو اس کی میت کو جلانے کے بعد حاصل ہونے والی کچھ راکھ پیتل کے لوٹے میں ڈال کر اس پر سفید یا سرخ کپڑا باندھ کر محفوظ کر لی جاتی ہے۔ یہ لوگ اس لوٹے کو کسی مندر یا کسی مقدس مقام پر رکھ دیتے ہیں جسے مناسب دن اور وقت پر دریائے سندھ میں بہا دیا جاتا ہے۔

ہندو برادری میں جن لوگوں کے پاس ذرائع اور وسائل ہیں وہ اپنے عزیزوں کی راکھ بھارت لے جاتے یا بھجوا دیتے ہیں جسے وہاں اتراکھںڈ ریاست کے شہر ہریدوار میں دریائے گنگا میں بہا دیا جاتا ہے۔ ہریدوار ہندوؤں کے مقدس ترین مقامات میں سے ایک ہے۔

جو لوگ ایسا کرنے کی استطاعت نہیں رکھتے وہ سندھ میں ہی تین مقامات میں سے کسی ایک پر اپنے عزیزوں کی استھیاں بہاتے ہیں۔ ان میں کوٹری کا شو مندر، سکھر کے قریب دریائے سندھ کے جزیرے سادھ بیلو کا مندر اور تھرپارکر کے علاقے ننگرپارکر کےقریب پہاڑوں میں واقع ساردھرو دھام مندر شامل ہیں۔ موخرالذکر جگہ دریائے سندھ کے کنارے نہیں ہے۔ یہاں ہندو برادری مندر کے قریب سے گزرنے والی پہاڑی ندی کے پانی میں استھیاں بہاتی ہے۔

سندھ میں رہنے والے ہندوؤں کا کوٹری کے شو مندر کے ساتھ پرانا تعلق ہے۔

جب یہ لوگ اپنے عزیزوں کی استھیاں لے کر یہاں آتے ہیں تو مندر کے شیوا دھاری یعنی بڑے پجاری انتقال کر جانے والے کا کریا کرم (مخصوص مذہبی رسم) کرتے ہیں۔ اس کے بعد متوفی کے لواحقین ایک خاص پوجا/عبادت کے بعد استھیوں کو دریا کی لہروں کے حوالے کر دیتے ہیں۔

2006 میں جب کھوکھرا پار بارڈر کھول کر تھر ایکسپریس ٹرین چلائی گئی تو سندھ کے ہندووں کے لیے بھارت آنا جانا آسان ہو گیا۔

اس دوران ہندو برادری کی بڑی تعداد بھارت میں اپنے مقدس مذہبی مقام ہریدوار گئی اور وہاں اپنی مذہبی رسومات کی ادائیگی کے ساتھ اپنے عزیزوں کی استھیاں بھی دریائے گنگا میں بہائیں جو وہ پاکستان سے اپنے ساتھ لے گئے تھے۔

تاہم اب بہت سے ہندو وسائل ہونے کے باوجود اپنے عزیزوں کی استھیاں بھارت نہیں لے جا سکتے کیونکہ یہ ٹرین بند ہو چکی ہے اور سیاسی مسائل کی وجہ سے اب بھارت کا ویزا ملنا آسان نہیں رہا۔ اگر ہندوؤں کو بھارت کا ویزا مل بھی جائے تو پہلے انہیں طویل سفر کر کے لاہور کے واہگہ بارڈر پر آنا پڑتا ہے جہاں سے وہ بس کے ذریعے بھارت جاتے ہیں۔ اس سفر پر بہت زیادہ اخراجات آتے ہیں اس لیے بیشتر لوگ استھیاں بہانے کے لیے دریائے سندھ کا انتخاب کرتے ہیں۔

کوٹری میں واقع تاریخی شو مہادیو مندر کے پجاری مہاراج ہیرا لال بتاتے ہیں کہ اس جگہ بہت سے زائرین آتے ہیں جن میں اکثریت ان لوگوں کی ہوتی ہے جو اپنے عزیزوں کی استھی کو پانی میں بہانا چاہتے ہیں۔ جب پانی کی مقدار زیادہ ہوتی ہے تو وہ کشتی میں بیٹھ کر دریا کے بیچ میں جاتے ہیں اور یہ راکھ پانی میں ڈال دیتے ہیں۔

آج کل دریائے سندھ میں کوٹری بیراج سے نیچے پانی کی مقدار بہت کم ہے اور جو پانی ہے وہ دریا کے بیچوں بیچ چھوٹے تالابوں کی صورت میں نظر آتا ہے۔

اشوک شرما

اشوک شرما کا تعلق حیدر آباد، سندھ سے ہے۔ مختلف مین اسٹریم میڈیا چینلز سے وابستہ رہے ہیں۔

سندھی پنڈت شادیوں کی رجسٹریشن کیوں نہیں کر رہے؟

ضلع ٹھٹہ کی نئی حلقہ بندی: میر پور ساکرو کا صوبائی حلقہ ختم ہونے سے کس کو نقصان ہو گا ؟

کیلے کی قیمتیں آسمان پر: سندھ میں کیلے کے باغوں پر کیا بیت رہی ہے؟

سندھ میں حکومت اور شوگر ملز کے خلاف گنے کے کاشتکاروں کا انوکھا اقدام

گنگا دور اور سندھ سُوکھا: استھیاں بہانے والے ہندوؤں کی مایوسی