ضلع حیدرآباد سے 15 کلومیٹر دور، آزاد نگر 250 گھروں پر مشتمل ایک چھوٹی سی بستی ہے، جہاں کوہلی اور بھیل برادری کے لوگ آباد ہیں۔ نوے کی دہائی تک انہیں جبری مشقت کی غرض سے زمینداروں نے قیدی بنا کر رکھا ہوا تھا۔ ایک طویل جدوجہد کے بعد وہ ان زمینداروں سے آزاد تو ہو گئے لیکن ان کے پاس رہنے کے لئے کوئی جگہ نہیں تھی۔

گرین رُورل ڈیویلپمنٹ نامی ایک مقامی این جی او نے، سال2006ء میں ایکشن ایڈ کی مدد سے 11ایکڑ زمین خریدی تاکہ زمینداروں کی قید سے آزاد ہونے والے ہاری یہاں پر آباد ہو سکیں۔ اس بستی کو 2007ءمیں آزاد نگر کا نام دیا گیا۔

آزاد نگر کے رہنے والوں نے کچے پکے مکان تعمیر کئے اور یہاں رہنے لگے،&nbsp; مگر مسائل نے ان کا پیچھا نہیں چھوڑا۔

سومار بھیل&nbsp; بھی اُن کھیت مزدوروں میں سے ایک ہیں ، جو 1990ء میں ضلع سانگھڑ میں رئیس قادر بخش مری کے ہاں &quot;غلام&quot;&nbsp; تھے، اب وہ ایک سماجی رہنما ہیں۔ ان کی عمر 50 برس&nbsp; ہو چکی اور وہ آزاد نگر میں پرچون کی چھوٹی سی دکان بھی چلاتے ہیں۔ ان کے آٹھ بچے ہیں، چار بیٹے اور چار بیٹیاں، جو سات برس پہلے واحد مقامی سکول بند ہو جانے کے بعد کبھی سکول نہیں جا سکے۔

سومار بھیل کہتے ہیں کہ وہ چاہتے ہیں کہ ان کے بچے بھی تعلیم حاصل کریں لیکن ان کی بستی میں سوائے سکول کی عمارت کے اور کوئی سہولت دستیاب نہیں، کوئی استاد ہے نہ ہی کتابیں اور فرنیچر۔

رانومل بھی آزاد نگر کے رہائشی ہیں، وہ کھیتوں میں مزدوری کرتے ہیں۔ ان کے چار بچے بھی حصول تعلیم سے محروم ہیں۔ رانومل کہتے ہیں کہ ان کی خواہش تھی کہ ان کے بچے سکول جائیں لیکن یہاں دور دور تک کوئی سکول نہیں ہے۔

ان کی آمدنی&nbsp; اتنی قلیل ہے کہ وہ بچوں کو شہر کے سکول بھیجنے کی سکت نہیں رکھتے۔

اس بستی میں 2015ء میں ایک سکول قائم کیا گیا&nbsp; تھا لیکن سال بھر میں ہی بند ہو گیا۔ اساتذہ کو وقت پر تنخواہیں نہیں ملیں تو انہوں نے سکول آنا چھوڑ دیا۔ اب آٹھ کمروں کی وہ&nbsp; خستہ حال عمارت سنسان پڑی ہے۔

بستی میں ہر بچہ تعلیم حاصل کرنے کی بجائے، مزدوری کر نے پر مجبور ہے۔

آزاد نگر جیسے دیہی علاقوں میں تمام بچوں کو مساوی تعلیم کی سہولت فراہم کرنے اور تعلیمی معیار کو بہتر بنانے کے لئے سندھ ایجو کیشن فاؤنڈیشن (سیف ) نے 2015ء میں فاؤنڈیشن اسسٹڈسکولز ( ایف اے ایس ) سسٹم متعارف کروایا تھا۔

پروگرام کے مطابق فاؤنڈیشن دیہی سندھ کے نجی و سرکاری سکولوں کے ساتھ شراکت داری کرتی&nbsp; ہے اور ان کی مالی مدد کرتی ہے۔

فاؤنڈیشن کے تحت سکول قائم کرنے&nbsp; کے لیےکچھ شرائط ہیں جیسا کہ جس جگہ سکول قائم کرنا ہو&nbsp; وہ علاقہ غربت زدہ، کچی آبادی یا دیہی ہو۔ اس علاقے میں پہلے سے کوئی سکول موجود نہ ہو۔ بچوں کی تعداد کم سے کم 80 ہو، سکول کے منتظم کا کم از کم گریجویٹ ہونا ضروری ہے۔ اگر پہلے سے سکول موجو د ہو لیکن غیر فعال ہو تو فائونڈیشن اسے فنڈ جاری کر کے فعال بنا سکتی ہے۔

سندھ ایجو کیشن فاؤنڈیشن ایک نیم خود مختار ادارہ ہے، فاؤنڈیشن کے تحت چلنے والے سکولوں کو فی طالب علم امداد دی جاتی ہے، بچی کے لئے 1150 روپے ماہانہ اور بچے کے لئے&nbsp; 850 روپے ماہانہ۔

آزاد نگر میں سرکاری سکول موجود نہیں تھا تو سپارک نامی این جی او کے ایک ملازم کاشف بجیر نے ذاتی حیثیت سے آزاد نگر میں ایک سکول بنوایا۔

&nbsp;آزاد نگر سکول کو فنڈز کی مد میں سیف کی جانب سے 23 لاکھ روپے جا ری کئے گئے۔ کاشف بجیر کا کہنا ہے کہ ان پیسوں سے انہوں نے سکول کو فعال بنایا ا ور وہاں 280 کے قریب بچوں نے داخلہ بھی لیا۔ لیکن سندھ ایجوکشن فائونڈیشن&nbsp; ناہید شاہ درانی نے بطور ایم ڈی چارج سنبھالا تو انہوں نے فاؤنڈیشن کے تحت چلنے والے سکولوں کے بجٹ میں کٹوتی کر دی جس کی وجہ سے کئی سکولوں کا بجٹ سرے سے ختم ہی کر دیا گیا۔ آزاد نگر کا سکول بھی اسی کٹوتی کا شکار ہو گیا۔

سیف کے ریسرچ آفیسر نور جونیجو&nbsp; نے لوک سجاگ کو بتایا کہ آزاد نگر کے اسکول کو بند کرنے کی کئی وجوہ تھیں۔

&quot;سکول کا&nbsp; منتظم سیف کے طے کردہ تعلیمی معیار پر پورا نہیں اترتا، وہاں کوالیفائیڈ اساتذہ نہیں رکھے گئے تھے، سکول میں بچوں کی تعداد کی نسبت اساتذہ کی تعداد بہت کم تھی&quot;۔

تاہم نور جونیجو کا کہنا ہے کہ&nbsp; اب بھی کوئی فرد یا ادارہ اس سکول کو فعال کرنا چاہے تو سیف اس کی مدد کرنے کو تیار ہے۔

کاشف بجیر&nbsp; کہتے ہیں کہ بستی میں ایک بھی سکول نہیں ہے، اگر کوئی اسی سکول کو فنکشنل کر دے تو انہیں اس کی ملکیت سے دستبردار ہونے میں بھی کوئی مسئلہ نہیں ہے کیونکہ وہ یہی چاہتے ہیں کہ یہاں کے بچے تعلیم حاصل کر سکیں۔

این اے 225 سے سید حسین طارق جاموٹ 2018ء میں پیپلز پارٹی کے ممبر منتخب ہوئے تھے، جنہوں نے اب تک سکول کی بحالی کے لیے کوئی خاطر خواہ کردار ادا نہیں کیا۔ جب ان سے سجاگ نےسوال کیا تو انہوں نے مقامی لوگوں کی جانب سے دی گئی درخواست اور مطالبے سے لاعملی کا اظہار کرتے ہوئے کہا کہ یہ ذمہ داری محکمہ تعلیم کی ہے۔

سومار بھیل حلقے کے ایم این اے، ایم پی اے اور صوبائی وزیر تعلیم کو سکول کی بحالی کے لیے&nbsp; تحریر ی درخواستیں بھیج چکے ہیں لیکن عملی طور پر اس حوالے سے کسی سطح پر بھی پیشرفت نہیں ہو سکی۔

میانوالی میں ہائر سیکنڈری سکول کے طلبہ سائنسی مضامین کی تعلیم سے محروم کر دیے گئے

آزاد نگر کے بچے سکول کیوں نہیں جاتے؟

text

حیدر آباد کے گیارہ سالہ راشد میمن گورنمنٹ ہائی سکول قاسم آباد میں ساتویں جماعت کے طالب علم ہیں لیکن ان کے پاس نصاب کی کتابیں نہیں ہیں۔ ان جیسے کئی طلبہ کتابوں کے بغیر سکول آتے ہیں جس کی وجہ سے ان کی پڑھائی کا حرج ہو رہا ہے۔ جب وہ اساتذہ سے کتابیں مانگتے ہیں تو انہیں جواب ملتا ہے کہ ابھی کتابیں نہیں آئیں جب آئیں گی تو سب کو مل جائیں گے۔

راشد کے والد رضوان میمن ایک ہوٹل پر کام کرتے ہیں جنہیں نو سو روپے دیہاڑی ملتی ہے۔ اس میں ان کے پانچ افراد پر مشتمل کنبے کی روٹی مشکل سے پوری ہو تی ہے۔ ساتویں جماعت کی کتابیں بازار سے اہک ہزار 784 روپے میں ملتی ہیں اور کاپیوں کے نو سو روپے الگ ہیں۔ اس لیے راشد کے والد بھی اس معاملے میں ان کی مدد نہیں کر سکتے۔

امینہ میربحر ٹنڈو جام کےگرلز ہائی سکول میں آٹھویں جماعت کی طالبہ ہیں۔ انہیں بھی سکول سے کتابیں نہ ملنے کی شکایت ہے۔

کتابیں نہ ہونے کی وجہ سے وہ سکول کا کام بھی پورا نہیں کر پاتیں ۔سکول انتظامیہ نے انہیں کچھ نہیں بتایا کہ کتابیں کب آئیں گے۔ اس لیے انہوں نے اپنے والد سےکتابیں بازار سے خرید کر لانے کو کہا ہے۔

موسم گرما کی چھٹیاں ختم ہوئے ایک ماہ سے زیادہ&nbsp; عرصہ ہو چکا ہے۔ بچے روزانہ صبح سکول بھی جاتے ہیں مگر سندھ میں سرکاری سکولوں کے اکثر بچوں کے بستے خالی ہوتے ہیں۔اس صورتحال سے صرف بچے ہی نہیں ان کے والدین اور اساتذہ&nbsp; بھی پریشان ہیں۔

کئی سال سے طے شدہ طریقہ کار کے مطابق سندھ ٹیکسٹ بک بورڈ ہر سال سرکاری سکولوں کے لیے کتابوں کی مطلوبہ تعداد فراہم کرتا آیا ہے۔مگر اس مرتبہ بچوں کی بڑی تعداد اب تک کتابوں سے محروم ہے۔

سندھ ٹیکسٹ بک بورڈ 1971ءسے جام شورو میں کام کر رہا ہے۔ اس کے پہلے چیئرمین ڈاکٹر نبی بخش قاضی تھے۔ اس ادارے کا بنیادی مقصد پہلی سے بارہویں جماعت تک کی نصابی کتب شائع کرنا ہے۔

گورنمنٹ سیکنڈری ٹیچرز ایسوسی ایشن (گسٹا) حیدرآباد ڈویژن کے رہنما محمود چوہان بتاتے ہیں کہ ٹیکسٹ بورڈ کی ذمہ داری ہی سکولوں کو بروقت درسی کتابیں فراہم کرنا ہے۔لیکن اس مرتبہ سرکاری سکولوں کو صرف 25 فیصد کتابیں مہیا کی گئی ہیں۔

وہ کہتے ہیں کہ مارچ میں تعلیمی سیشن ختم ہوتا ہے۔ لیکن تاحال بچوں کی بڑی تعداد کو کتابیں فراہم نہیں کی جا سکیں۔ اگرچہ محکمہ تعلیم کی ویب سائٹ پر تمام کتابوں کی پی ڈی ایف موجود ہیں لیکن یہ مسئلے کا حل نہیں ہے۔

ان کا کہنا ہے کہ چند روز میں گسٹا کا اجلاس ہو رہا ہے۔اجلاس کے بعد بورڈ انتظامیہ سے بات کریں گے۔ اگر کتابوں کی فراہمی یقینی نہ بنائی گئی تو احتجاج کا لائحہ عمل تیار کیا جائے گا۔

&nbsp;سندھ میں بچوں کے مفت اور لازمی تعلیم کے حق سے متعلق قانون 2013 ءکے تحت پانچ&nbsp; سے 16 سال کی عمر کے بچوں کو مفت تعلیم دی جائے گی۔ کوئی بھی بچہ سکول میں کسی قسم کی فیس یا اخراجات ادا نہیں کرے گا۔

18ویں آئینی ترمیم کے بعد پہلی بار سندھ کےسکولوں میں مفت کتابیں دینے کا فیصلہ ہوا تھا، ابتدا میں طالبات کو پانچویں تک مفت کتابیں فراہم کی گئیں۔ بعدازاں تمام بچوں کو دسویں جماعت تک مفت فراہمی شروع کر دی گئی۔

2021ء کی &#39;پاک الائنس فار میتھس اینڈ سائنس &#39; کی رپورٹ کے مطابق سندھ میں پہلے ہی پانچ&nbsp; سے 16 سال تک کی عمر کے 44 فیصد بچے سکول سے باہر ہیں۔ لگ بھگ 65 لاکھ بچے&nbsp; تعلیم سے محروم ہیں۔ایسے میں کتابوں کا نہ ملنا مزید مسائل پیدا کر رہا ہے۔

صدام جروار ڈگھڑی ضلع میرپور خاص میں پرائمری سکول کے استاد ہیں۔وہ بتاتے ہیں کہ ان کے سکول میں چار سو بچے زیر تعلیم ہیں۔ ان میں سے صرف سو بچوں کو ہی کتابیں ملی ہیں باقی انتظار کر رہے ہیں۔

وہ بتاتے ہیں کہ اساتذہ نے بعض بچوں کو کتابیں مارکیٹ&nbsp; سے خرید کر دی ہیں۔ مگر سبھی کو اس طرح کتابوں کی فراہمی ممکن نہیں۔ سکول کے پاس تاحال سائنس اور جنرل نالج کی کتابیں نہیں ہیں۔

سندھ میں 36 ہزار سے زیادہ پرائمری اور چار ہزار پوسٹ پرائمری سکول قائم ہیں۔ان میں ہائر سیکنڈری سکول بھی شامل ہیں۔ محکمہ تعلیم سندھ کے ٹیکسٹ بک بورڈ ساڑھے 41 لاکھ سے زیادہ بچوں کے لیے کتابیں چھاپنے کا انتظام کرتا ہے۔ یہ کتب 40 ہزار 635 سکولوں میں تقسیم کی جاتی ہیں۔

ٹیکسٹ بک بورڈ کے پاس اتنی بڑی تعداد میں کتابیں چھاپنے کے لیے وسائل ہیں اور نہ ہی افرادی قوت۔ اسی لیےکتابوں کی چھپائی کے لیے بورڈ ٹینڈر دیتا ہے اور مارکیٹ سے یہ کام کرا لیا جاتا ہے۔ بورڈ&nbsp; کی اجازت سے نجی سکولوں کی ضرورت بھی پوری ہو جاتی ہے۔

سندھ ٹیکسٹ بک بورڈ&nbsp; کتابوں کی عدم فراہمی کا ذمہ دار محکمہ تعلیم کو سمجھتا ہے۔ بورڈ کے چیئرمین آغا سہیل بتاتے ہیں کہ ٹیکسٹ بک بورڈ کو41 لاکھ 60 ہزار بچوں کے لیے کتابیں چھاپنےکا ٹارگٹ ملا تھا جو پورا کر دیا گیا ہے۔

وہ کہتے ہیں کہ بورڈ نے جولائی کے آخر تک نصابی کتب ویئر ہاؤس پہنچا دی تھیں۔ ان کی تقسیم محکمہ تعلیم کی ذمہ داری ہوتی ہے۔کتابوں کی قلت نہیں ہے بلکہ ان کی تقسیم بہتر طریقے سے نہیں ہو پا رہی۔

محکمہ تعلیم کے حکام کتابوں کی تقسیم&nbsp; کے معاملے پر چیئرمین ٹیکسٹ بورڈ سے اتفاق نہیں کرتے۔ ان کا کہنا ہےکہ مطلوبہ تعداد سے کہیں کم کتابیں چھاپی گئی ہیں۔

سابق سیکرٹری تعلیم اکبر لغاری اور محکمہ تعلیم کے نصابی شعبے کی مشیر فوزیہ خان نے اس معاملے پر اپنا موقف دینے سے انکار کر دیا جبکہ&nbsp; صوبے کے نگران&nbsp; وزیر تعیلم نے بھی اس معاملے بات کرنے سے گریز کیا۔

تاہم ڈائریکٹر ایجوکیشن حیدرآباد ریجن احمد دین میرانی دعویٰ کرتے ہیں کہ سکولوں میں بچوں کے تعداد بڑھ گئی ہے۔رواں سال بچوں کے داخلے میں گزشتہ سال کے مقابلے میں 15 فیصد اضافہ ہوا ہے۔اس لیےکتابوں کی کمی کا سامنا ہے۔

وہ بتاتے ہیں کہ ڈسٹرکٹ ایجوکیشن افسروں کی ایک کمیٹی نے تمام ویئر ہاؤسز کا جائزہ لیا ہے۔کسی ویئر ہاؤس میں کتابیں نہیں ہیں۔ ڈی ای اوز نے بورڈ کو مراسلہ لکھ دیا ہے۔ امید ہے کتابوں کی کمی جلد دور ہو جائے گی۔

حیدرآباد کے ایک پبلشر ساجد سندھی کا ماننا ہے کہ کاغذ کی بڑھتی قیمت کتابوں کی چھپائی پر اثرانداز ہوئی ہے۔ گزشتہ سال ایک ریم کاغذ 1300 روپے کا تھا۔ اب&nbsp; اس کی قیمت ساڑھے تین ہزار روپے ہوگئی ہے۔ زیادہ تعداد میں کتابیں چھاپنے کے لیے اداروں کو بجٹ بڑھانے کی ضرورت ہے۔

''کتابیں دی جائیں ہمیں پڑھنا ہے''، آواران میں سکول کے بچوں کا احتجاج

بدانتظامی یا کم چَھپائی: سندھ میں سکولوں کے لاکھوں بچوں کے بستے کتابوں سے خالی

رواں برس 20 جولائی کو ضلع دادو کے سیتا روڈ ریلوے سٹیشن پر جشن کا سماں تھا جہاں لوگ ڈھول اور شہنائی کی آواز پرجھوم رہے تھے۔ یہ لوگ سٹیشن پر کسی بارات یا کسی بڑی شخصیت کو وصول کرنے نہیں بلکہ موہن جو دڑو ایکسپریس کا استقبال کرنے کے لیے آئے تھے۔ ٹرین سٹیشن پہنچی تو لوگوں نے اس پر پھولوں کی پتیاں نچھاور کیں اور ڈرائیور اور گارڈ کو ہار پہنائے۔ یہ ٹرین مقامی لوگوں کے ایک برس کے انتظار اور جدوجہد کے بعد اس ریلوے سٹیشن پر آئی تھی۔

آٹھ بوگیوں پر مشتمل موہن جو دڑو ایکسپریس کوٹڑی سے چلتی ہے اور جامشورو، سیوہن، دادو، لاڑکانہ اور روہڑی تک جاتی ہے۔ کوٹڑی سے روہڑی کا فاصلہ 315 کلومیٹر ہے۔اس کی ہر بوگی میں 88 مسافروں کے بیٹھنے کی گنجائش ہے۔ یہ ٹرین گزشتہ سال بارشوں اور سیلاب کے باعث بند کر دی گئی تھی اور اس سہولت سے فائدہ اٹھانے والوں کا مطالبہ تھا کہ ٹرین کو دوبارہ کوٹڑی روہڑی ٹریک پر چلایا جائے۔

ٹرین کی بحالی کے لیے شہریوں نے کئی مرتبہ احتجاجی مظاہرے کیے اور سوشل میڈیا پر مہم بھی چلائی جو نتیجہ خیز ثابت ہوئی۔

قمبر علی خان شہر کے سیاسی و سماجی رہنما ایاز جمال چانڈیو کا اس جدوجہد میں اہم کردار ہے۔

&nbsp;ان کا کہنا ہے کہ 2022ء میں آنے والے سیلاب کے بعد دادو اور سیوہن سے سیلابی پانی کی نکاسی کے لیے ریل کی پٹڑی کو بااثر لوگوں کے کہنے پر غیر ضروری کٹ لگائے گئے جس سے نہ صرف خیرپور ناتھن ڈوبا بلکہ موہن جو دڑو ٹرین کی آمدورفت بھی بند&nbsp; ہو گئی۔ اس کی بحالی کے لیے لوگوں نے مل کر تحریک شروع کی جن کا تعلق ریلوے لائن پر واقع مختلف شہروں سے تھا۔

تحریک میں سرگرم سیتا روڈ کے مشہور میمن کہتے ہیں کہ انہوں نے دیگر لوگوں کے ساتھ قمبر، لاڑکانہ، سیتا روڈ، دادو اور دیگر شہروں میں احتجاج شروع کیے جو چھ ماہ تک باقاعدگی سے جاری رہے۔

وہ بتاتے ہیں کہ اگرچہ ان کے احتجاج میں کوئی رکاوٹ نہیں ڈالی گئی لیکن عام لوگوں کو قائل کرنے میں مشکل پیش آئی۔ جب ہم انہیں کہتے کہ ہمارے ساتھ باہر نکلو تو وہ مختلف عذر پیش کرتے جیسا کہ ٹرین وقت پر نہیں آتی، سفر میں بہت وقت لگ جاتا ہے، اس میں سہولیات نہیں ہیں۔ جواباً ہم انہیں بتاتے کہ بسوں اور کوچوں کی نسبت یہ سفر سستا ہے۔

&quot;میں سمجھتا ہوں کہ روڈ ٹرانسپورٹ مافیا کو مضبوط کرنے کے لیے ریلوے پر توجہ نہیں دی جاتی۔ عوام کو سستی اور معیاری سفری سہولیات کی فراہمی کے لیے ریلوے کا نظام جدید بنانے کی ضرورت ہے۔&quot;

خیال رہے کہ مختلف اسباب بتا کر محکمہ ریلوے نے اباسین ایکسپریس، چلتن ایکسپریس، خوشحال خان خٹک ایکسپریس، بولان میل، بدین ایکسپریس اور چند دیگر ٹرینیں بند کر دی ہیں۔ نیز بہت سے ریلوے سٹیشنوں کو خسارے میں قرار دے کر مسافر ٹرینوں کے سٹاپ بھی ختم کر دیے ہیں۔

لاڑکانہ کے محمد حسین ڈیرو ٹرین کے سفرکو ترجیح دیتے ہیں۔ ان کا کہنا ہے کہ موہن جو دوڑ ایکسپریس بند ہونے سے ٹرین میں سفر کرنے والوں کی مشکلات بڑھ گئی تھیں۔ یہ سفر روڈ ٹرانسپورٹ کے مقابلے میں آرام دہ اور سستا ہوتا ہے۔

&nbsp;&quot;اگر مجھے حیدرآباد سے لاڑکانہ بس کے ذریعے جانا ہو تو یکطرفہ کرایہ 1300 روپے ادا کرتا ہوں جبکہ ٹرین کا ٹکٹ نو سو روپے میں پڑتا ہے۔&quot;

ان کے مطابق لاڑکانہ تا حیدرآباد مزید ٹرینیں چلانے کی ضرورت ہے۔

موہن جو دڑو ایکسپریس کے علاوہ سندھ میں اس وقت دو ٹرینیں چل رہی ہیں جن میں جیکب آباد سے کراچی جانے والی سکھر ایکسپریس اور کراچی سے میرپورخاص تک سفر کرنے والی مہران ایکسپریس شامل ہیں۔

سندھ میں کل 215 ریلوے سٹیشنوں میں سے 100 پر مسافر ٹرینیں رکتی ہیں۔ دیگر سٹیشنوں پر لوگ ریل گاڑیاں گزرتے دیکھتے ہیں مگر ان پر سفر نہیں کر سکتے۔

روہڑی ہیڈکوارٹر کے ٹرین انچارج حبیب ساجد کا کہنا ہے کہ ماضی میں کوٹڑی اور حیدرآباد اہم ترین سٹیشن ہوا کرتے تھے اور تقریباً تمام ٹرینیں کوٹڑی اور حیدرآباد میں ٹھہرتی تھیں۔

تاہم آمرانہ حکومتوں میں ریلوے کو عوامی سہولت کے بجائے کمائی کرنے والا ادارہ بنانے کی کوشش کی گئی جس سے صورت حال بدل گئی۔ کوٹڑی جنکشن سٹیشن ہے اور وہاں ریلوے ورکشاپ بھی ہے۔ اس لیے پہلے اس کی اہمیت حیدرآباد سے زیادہ تھی۔ لیکن کمائی کو ترجیح دیتے ہوئے اس کی ڈاؤن گریڈنگ کر دی گئی۔

ان کے مطابق ریل کے حادثات ناقص میٹیریل اور بہتر چیکنگ نہ ہونے کے باعث ہوتے ہیں۔ ریلوے کا تمام تر ڈھانچہ اپنی معیاد پوری کر چکا ہے۔ جب ان پٹڑیوں پر 110 کی رفتار سے ٹرین چلتی ہے تو حادثہ ہونے کا بہت امکان ہوتا ہے۔

&quot;حال ہی میں دوبارہ شروع کی گئی موہن جو دڑو ایکسپریس نے عوام کے لیے ایک بار پھر سفری سہولت فراہم کی ہے۔ اسی طرح ملک میں بند کی گئی دیگر ٹرینوں کو دوبارہ شروع کیا جائے۔ ٹرینوں کے بند کیے گئے اسٹاپ بحال کیے جائیں اور ریلوے کے محکمے پہ توجہ دی جائے تو سفر کو سستا، آسان اور محفوظ بنایا جا سکتا ہے۔&quot;

راجن پور کا ریلوے سٹیشن جہاں تین سال سے سیٹی نہیں بجی

عوامی احتجاج رنگ لے آیا: دادو میں موہن جو دڑو ایکسپریس کا  ڈھول اور شہنائیوں سے استقبال

چالیس سالہ سیتا حیدرآباد کے علاقے ہوسڑی میں رہتی ہیں اور وہ پچھلے پانچ سال سے مقامی سبزی منڈی میں مزدوری کرنے آ رہی ہیں۔

سیتا بتاتی ہیں کہ اگر سیزن اچھا ہو تو انہیں سبزی یا پھل کی چھانٹی کا کام مل جاتا ہے۔ کبھی ایسا بھی ہوتا ہے کہ وہ سارا دن منڈی میں کام کا انتظار کر کے خالی ہاتھ واپس آتی ہیں۔

سیتا کے شوہر اشوک ٹھیلے پر کاٹھ کباڑ خریدنے اور بیچنے کا کام کرتے ہیں۔ ان کے کنبے میں سات افراد ہیں۔ سیتا کے شوہر کی آمدنی سے خرچہ پورا نہیں ہوتا۔گھر کا راشن خریدنا بھی مشکل ہو جاتا ہے۔ اسی لیے انہیں ہر حال میں کام کرنا پڑتا ہے۔

ہالا ناکہ روڈ پر واقع حیدرآباد کی مرکزی سبزی منڈی میں صبح سویرے ہی مزدور خواتین کی آمد شروع ہوجاتی ہے۔ چند ایک خواتین نواحی دیہات سے یہاں سبزیاں بیچنے بھی آتی ہیں۔ بعض خواتین منڈی میں اپنا چھابہ بھی لگاتی ہیں تاہم یہ صبح آٹھ بجے تک گھروں کو چلی جاتی ہیں۔

اس منڈی میں زیادہ تر عورتیں قاسم آباد، ہوسڑی، ہٹڑی بائی پاس، اسلام آباد محلہ اور ریلوے کالونی سے مزدوری کی تلاش میں آتی ہیں جنہیں عموماً پیاز، آلو، ٹماٹر اور پھلوں کی چھانٹی (صفائی) کا کام ملتا ہے۔

یہ خواتین منڈی میں دیہاڑی پر کام کرتی ہیں۔ ان کے لیے یہاں کوئی خاص اوقات کار مقرر نہیں ہیں۔ صبح آتے ہی کام مل جائے تو کام میں لگ جاتی ہیں ورنہ بیشتر شام تک کام کا انتظار کرتی&nbsp; ہیں۔ ان تمام کا تعلق ہندو برادری سے ہے۔

سیتا کہتی ہیں کہ یہاں آنے کے لیے ان کا 50 روپے کرایہ لگتا ہے۔ جب مزدوری نہیں ملتی تو انہیں بھوکے رہنا پڑتا ہے۔ ایک دن بھی کام نہ ملے تو مشکل ہو جاتی ہے۔

پچاس سالہ روپا اس سبزی منڈی میں برسوں سے کام کر رہی ہیں۔ ان کا کنبہ آٹھ افراد پر مشتمل ہے اور شوہر محنت مزدوی کرتے ہیں۔

روپا بتاتی ہیں کہ وہ عام طور پریہاں سے تین سو روپے روزانہ کماتی ہیں۔ لیکن &#39;سیزن&#39; کے دنوں میں انہیں سات سے آٹھ سو روپے دیہاڑی مل جاتی ہے۔

سیزن سے مراد مقامی فصلوں کے مڈی میں آنے کا موسم ہے۔ سردیوں کے آغاز پر ٹماٹر اور گرمیوں میں پیاز وافر مقدار میں یہاں آتا ہے۔ تب عورتوں کا کام زیادہ ہوتا ہے تو ان کی مزدوری بھی بڑھ جاتی ہے۔

محکمہ شماریات کے مطابق حیدر آباد کی آبادی 23 لاکھ 86 ہزار ہے جس میں خواتین کا تناسب 48 فیصد سے کچھ کم ہے۔ ضلع میں ہر خاندان اوسطاً چھ سے سات افراد پر مشتمل ہے۔ ایک اندازے کے مطابق ضلع میں 25 فیصد خاندان غربت کی لکیر سے نیچے زندگی گزار رہے ہیں۔ سرکاری ریکارڈ کی رو سے یہاں 46 ہزار 214 خاندان بے نظیر انکم سپورٹ پروگرام میں رجسٹرڈ ہیں۔

سبزی منڈی میں مزدورخواتین کی تعداد تین سو کے قریب ہے۔ ان خواتین کو یہ بھی شکایت ہے کہ ان کا نام بینظیر انکم سپورٹ پروگرام میں شامل نہیں کیا گیا اسی لیے وہ مستحق ہونے کے باوجود حکومتی امداد سے محروم ہیں۔

سماجی کارکن شمیم مری کا کہنا ہے کہ ایسی اکثر خواتین کی بی آئی ایس پی میں رجسٹریشن نہ ہونے کی بڑی وجہ شناختی کارڈ نہ ہونا ہے۔ دوسری وجہ آگاہی کی کمی ہے۔

وہ بتاتی ہیں کہ منڈی میں مردوں کو روزانہ اجرت 800 سے 1000 روپے تک ملتی ہے جبکہ خواتین کو تین سو روپے دیے جاتے ہیں۔ ان میں 100 روپے کرائے اور کھانے پر خرچ ہو جاتے ہیں۔ باقی دوسو روپے ہی بچتے ہیں جس سے اخراجات پورے نہیں ہوتے۔

تاہم سبزی منڈی میں آڑھتیوں کی تنظیم فروٹ اینڈ ویجیٹیبل ایسوسی ایشن کے صدر الطاف میمن وضاحت کرتے ہیں کہ منڈی میں 234 تاجرسبزی اور 270 پھلوں کا کام کرتے ہیں۔ منڈی میں دو ہزار سے زیادہ مزدور ٹرکوں سے سامان اتارتے اور لادتے ہیں جبکہ انہیں ان سب لوگوں کے مسائل&nbsp; کا حل نکالنا ہوتا ہے۔

وہ کہتے ہیں کہ منڈی میں کام کرنے والی خواتین کو کوئی آڑھتی نہیں بلاتا۔ وہ اپنی مرضی سے آتی ہیں۔ کام مل جائے تو کرکے چلی جاتی ہیں۔

&quot;ان کا کام مردوں کی نسبت آسان ہوتا ہے۔ عورتیں ایک جگہ بیٹھ کر چھانٹی کرتی ہیں جبکہ مرد بوریاں اٹھا کر ٹرکوں میں لوڈ کرتے ہیں۔ اسی لیے انہیں عورتوں سے زیادہ مزدوری ملتی ہے۔&quot;

نیشنل ٹریڈ یونین کے جنرل سیکریٹری ناصر منصور بتاتے ہیں&nbsp; کہ دیہاڑی دار مرد و خواتین کے لیے لیبر ڈپارٹمنٹ ہی کچھ کرسکتا ہے۔ بدقسمتی سے ادارے اپنا کام ہی نہیں کرتے اور مزدوروں کے لیے بنائے گئے قوانین پر عمل نہیں ہوتا۔ وہ کہتے ہیں کہ جب قانون پر عمل ہی نہیں ہو گا تو مالکان کی مرضی ہے وہ آدھی اجرت دیں یا پوری۔

تیس سالہ شانتا بھی منڈی میں کام کرنے والی دیہاڑی دارخواتین میں سے ایک ہیں۔ انہیں شکوہ ہے کہ انہیں دن بھر مردوں کے درمیان رہ کر کام کرنا پڑتا ہے۔ عورتوں کے لیے منڈی میں کوئی سایہ دار جگہ ہے اور نہ پینے کے پانی کا کوئی انتظام۔ مجبوری میں انہیں مردانہ واش رومز استعمال کرنا پڑتے ہیں اور ہر وقت جنسی ہراسانی کا خوف رہتا ہے۔

سبزی منڈی میں آڑھتیوں کی یونین تو موجود ہے مگر اس میں کسی خاتون کی کوئی نمائندگی نہیں ہے۔ دلچسپ بات یہ ہے کہ منڈی محکمہ محنت و افرادی قوت میں بھی رجسٹر نہیں اسی لیے یہاں لیبر قوانین کا اطلاق بھی نہیں ہوتا۔ یہاں مزدور عورتوں تو کیا مرد مزدوروں کی بھی کوئی یونین یا انجمن نہیں ہے اس لیے وہ اجتماعی طور پر اپنے حقوق کے لیے آواز بھی نہیں اٹھا سکتے۔

انسانی حقوق کمیشن حیدرآباد کی ریجنل کوآرڈینیٹر غفرانہ آرائیں کہتی ہیں کہ مزدور یونین کی بدولت ہی ایسے مسائل حل ہو سکتے ہیں۔ خواتین کو متحد ہونے کی زیادہ ضرورت ہے۔ کمیشن اسی حوالے سے مزدور خواتین کی معاونت کر سکتا ہے۔

لیبر پالیسی 2010ء کے مطابق مزدوروں کو یہ حق ہے کہ وہ یونین بنا سکتے ہیں۔ یونین اس بات کی ضامن ہو گی کہ کسی جگہ کام کرنے کا ماحول تمام مزدوروں کے لیے سازگار ہو۔

'لاپتہ' محنت کش: پشاور کے مشہور تارو کباب کا خفیہ جزو خواتین کی محنت ہے!

مرد کی دیہاڑی 1000 اور عورت کی 300 روپے: حیدرآباد کی سبزی منڈی میں مزدور خواتین صنفی تفریق پر شکوہ کناں

حالیہ دنوں سندھ کے ضلع تھرپارکر سے تعلق رکھنے والی نوعمر لڑکی گڈی کولہی کی ویڈیو سوشل میڈیا پر وائرل ہوئی ہے۔ اس ویڈیو میں وہ بتا رہی ہیں کہ انہیں اغوا کر کے زبردستی ان کا مذہب تبدیل کرایا گیا، جنسی زیادتی کا نشانہ بنایا گیا اور سال بھر زنجیروں میں جکڑ کر قید رکھا گیا۔

گڈی کا تعلق تھرپارکر کے علاقے چیلہار سے ہے جو مٹھی سے 30 کلومیٹر واقع ہے۔ وہ ماں باپ اور بڑی بہن کے ساتھ ایک جھونپڑی نما گھر میں رہتی ہیں۔ ان کے دونوں والدین کھیت مزدوری کر کے روٹی کماتے ہیں۔

گڈی کی والدہ سیتا کے بقول ایک سال پہلے وہ دونوں ماں بیٹی لکڑیاں چننے کے لئے گئیں تو گھر سے چار کلومیٹر کے فاصلے پر بکھو گاؤں میں رستم جونیجو نامی شخص اور اس کے دو ساتھیوں نے گڈی کو اسلحے کے زور پر اغوا کر لیا۔ اس وقت گڈی کی عمر 14 برس تھی۔

&quot; جب گڈی کو رستم نے اغوا کیا تو مجھے اور میرے شوہر کو جان سے مارنے کی دھمکیاں دی گئیں جس کی وجہ سے ہم مقدمہ درج نہیں کرواسکے تاہم میں نے بکھو گاؤں کے زمیندار سجن جونیجو اور میر جونیجو کے سامنے فریاد کی مگر وہ ٹالتے رہے &quot;۔

بیس اپریل 2023ء کو پولیس نے سیتا کو اطلاع دی کہ گڈی اغوا کاروں کے چنگل سے بھاگ کر تھانے پہنچ گئی ہیں۔ گڈی کو رستم نے اپنے گاؤں ہرپار میں قید رکھا جو کہ گڈی کے گاؤں سے پانچ کلومیٹر کی دوری پر ہے۔

گڈی کی وڈیو کے بعد واقعے کی تفصیلات میڈیا پر آئیں تو سماجی تنظیموں نے ان کے حق میں آواز اٹھائی جس کے نتیجے میں گڈی اپنے اغوا کاروں کے خلاف ایف آئی آر درج کرانے میں کامیاب ہوگئیں۔ 
اب تک اس مقدمے میں کوئی گرفتاری عمل میں نہیں آئی ہے۔

ایف آئی آر میں نامزد ملزم رستم جونیجو، ان کے چچازاد بھائی کامران جونیجو اور شمعون جونیجو ضمانت پر ہیں۔عدالت نے فریقین کو 16 مئی کو عدالت میں پیش ہونے کا حکم دیا ہے۔

گڈی کا کہنا ہے: &quot;رستم جونیجو اور ان کے ساتھی انہیں دھمکیاں دے رہے ہیں۔ انہوں نے میری ماں سے کہا ہے کہ گڈی کو ہمارے حوالے کرو اور اس کے عوض 20 ہزار روپے اور آدھا من آٹا لے لو وگرنہ اچھا نہیں ہو گا۔&quot;

اس کیس کے مرکزی ملزم رستم جونیجو ان الزامات کو رد کرتے ہوئے کہتے ہیں کہ انہوں نے گڈی کولہی کو اغوا نہیں کیا بلکہ اس نے اپنے مرضی سے ان کے ساتھ نکاح کیا ہے۔

&quot;میرا ان کے گھر آنا جانا تھا۔ اس دوران اسے مجھ سے محبت ہو گئی اور ہم دونوں نے ضلع عمرکوٹ کی تحصیل سامارو میں پیر سرہندی کے ہاں نکاح کیا۔ گڈی نے وہیں اسلام قبول کیا تھا اور اس کا اسلامی نام امامت رکھا گیا۔ میرے پاس گڈی کے مذہب تبدیل کرنے کی سند ہے۔&quot;

گڈی کولہی کے ماموں رام چند کہتے ہیں کہ ان کی بھتیجی نابالغ ہے اور اس کے مذہب کی تبدیلی کی بات سراسر جھوٹ ہے۔

سماجی کارکن پشپا کماری اس معاملے پر رائے دیتے ہوئے کہتی ہیں کہ ہندو کمیونٹی کی لڑکیاں ناجائز مقاصد کے لئے بااثر افراد کا آسان ہدف ہوتی ہیں کیونکہ ان کی کہیں داد رسی نہیں ہوتی۔

&quot;اگر کوئی بالغ فرد مذہب تبدیل کرنا چاہتا ہے تو اسے یہ حق حاصل ہے مگر پہلے اس کی عمر کا تعین ہونا ضروری ہے۔ ہندو برادری کی نابالغ لڑکیوں کو ورغلا کر صرف شادی کے لیے ایک تبدیلی مذہب کی سند بنوائی جاتی ہے جس کے ردعمل میں ریاست کچھ بھی نہیں کرتی۔ ان حالات میں خاص طور اوڈ، بھیل اور کولہی کمیونٹی ملک چھوڑنے پر مجبور ہے۔&quot;

صوبہ سندھ میں قانونی طور پر شادی کے وقت لڑکی کی عمر کم از کم 18 برس ہونا لازمی ہے۔ مگر اس کے باوجود کم عمری کی شادی کے واقعات تسلسل سے سامنے آتے ہیں۔

قانونی ماہر منور پلی کا کہنا ہے کہ ملک میں جب اس نوعیت کے کیس سامنے آتے ہیں تو زیادہ تر یہ کہا جاتا کہ لڑکی یا عورت کو اغوا کیا گیا ہے۔ لیکن پاکستان پینل کوڈ میں کوئی ایسا سیکشن نہیں جس میں جبراً کسی کا مذہب تبدیل کرانے کی کوئی سزا مقرر کی گئی ہو۔ جبری تبدیلی مذہب کے خلاف بل قومی اسمبلی میں پیش کیا گیا تھا لیکن اسے منظوری نہیں مل سکی۔

سنٹر فار سوشل جسٹس کے مطابق 2021ء میں سندھ میں جبری تبدیلی مذہب کے 78 کیس رپورٹ ہوئے تھے جبکہ 2022ء میں یہ تعداد بڑھ کر 124 ہو گئی جن میں 81 ہندو، 42 مسیحی اور ایک سکھ خاتون کا مذہب زبردستی تبدیل کرائے جانے کی رپورٹیں درج کرائی گئیں۔

گڈی کولہی کہتی ہیں &quot;مجھے عدالتوں سے تو انصاف کی امید ہے البتہ بااثر لوگوں نے ہمارا&nbsp; جینا دوبھر کر دیا ہے اور ہمیں مقدمے سے دستبردار ہونے کے لئے کہا جا رہا ہے لیکن جو کچھ بھی ہو جائے میں انصاف کے حصول تک پیچھے نہیں ہٹوں گی&quot;۔

مسیحی لڑکیوں کا اغوا اور جبری شادی: 'کسی شہری کو دوسروں پر اپنا عقیدہ مسلط کرنے کا کوئی حق نہیں'۔ 

وزیراعلیٰ سندھ کے معاون خصوصی ویرجی کولہی کہتے ہیں کہ &quot;یہ معاملہ جبری مذہبی تبدیلی کا نہیں بلکہ یہ ایک مجرمانہ سوچ کا تسلسل ہے جو کسی ذات پات یا مذہب کو نہیں دیکھتی۔ سندھ میں لڑکیوں کا اغوا یا ان کی زبردستی شادی محض ہندو برادری تک محدود نہیں ہے۔ مسلم لڑکیاں بھی اس ظلم کا شکار ہوتی ہیں۔ چونکہ غیر مسلم تعداد میں کم ہیں اس لیے ان کے ساتھ ہونے والے واقعات جلدی منظر عام پر آجاتے ہیں۔&quot;

ویرجی کولہی کے مطابق خاص بات یہ ہے کہ ایسے واقعات میں غیر مسلموں کی جانب سے پُرزور ردعمل نہیں آتا کیوں کہ ان سے زیادتی کرنے والے لوگ طاقت ور اور بااثر ہوتے ہیں۔

&quot;عام طور پر جن لڑکیوں کے مذہب کی تبدیلی کا معاملہ سامنے آتا ہے ان کی عمر کا ریکارڈ تحریری طور پر کہیں موجود نہیں ہوتا۔ اسی وجہ سے شک کا فائدہ ان عناصر کو مل جاتا ہے جو لڑکیوں کو اپنے قبضے میں رکھنا چاہتے ہیں۔&quot;

اختر حفیظ

اختر حفیظ سندھی زبان کے افسانہ نگار اور صحافی ہیں۔ وہ ایک سندھی روزنامہ سے وابستہ ہیں۔

آزاد نگر کے بچے سکول کیوں نہیں جاتے؟

بدانتظامی یا کم چَھپائی: سندھ میں سکولوں کے لاکھوں بچوں کے بستے کتابوں سے خالی

عوامی احتجاج رنگ لے آیا: دادو میں موہن جو دڑو ایکسپریس کا ڈھول اور شہنائیوں سے استقبال

مرد کی دیہاڑی 1000 اور عورت کی 300 روپے: حیدرآباد کی سبزی منڈی میں مزدور خواتین صنفی تفریق پر شکوہ کناں

20 ہزار روپے اور آدھا من آٹا لو اور گڈی کوہلی ہمارے حوالے کرو: تھرپارکر میں جبری تبدیلی مذہب