The government wants to build a dam to supply water to Rawalpindi, but locals have serious objections to the project.

Objections of locals over the construction of dodhocha dam.

غصے سے بھرے نوجوان اپنے دیہات کو جانے والے راستوں پر پھر رہے ہیں۔ ان کے ہاتھوں میں لاٹھیاں ہیں اور وہ ان راستوں سے گزرنے والے ہر اجنبی کو روک رہے ہیں۔ اگر ان مسافروں میں کوئی سرکاری افسر ہو جو ایک ڈیم کی تعمیر کے سلسلے میں ان کے علاقے میں سروے کے لیے آ رہا ہو تو یہ نوجوان اسے یہ کام کرنے کی اجازت نہیں دیتے۔&nbsp;

ان نوجوانوں کا تعلق لِنگ نالے کے ساتھ واقع سات دیہات سے ہے۔ یہ نالہ ضلع راولپنڈی کی جنوب مشرقی پہاڑی تحصیل کہوٹہ سے شروع ہو کر روات نامی قصبے کے قریب ایک وادی سے گزرتا ہے۔ یہ قصبہ راولپنڈی شہر کے مرکز سے جنوب مشرق میں قریباً 19 کلومیٹر فاصلے پر واقع ہے۔&nbsp;

پنجاب کی صوبائی حکومت نے حال ہی میں ان دیہاتوں کی زمینوں پر ایک ڈیم کی تعمیر کا ایسا منصوبہ شروع کیا ہے جو پچھلے پندرہ سال سے سرکاری دفتروں کی فائلوں میں پڑا تھا۔ حکومت ضلع راولپنڈی کی تین تحصیلوں میں زمین کے حصول سے متعلق قانون کی اس دفعہ کا بھی نفاذ کر چکی ہے جس کے نتیجے میں اسے ڈیم کی تعمیر کے لیے درکار 18,566 کنال زمین حاصل کرنے کا قانونی اختیار مل گیا ہے۔&nbsp;

لِنگ نالے کے کنارے ایک دلکش گاؤں بڑوالا کے رہائشی عمران کیانی کہتے ہیں: &#39;ڈیم سے قریباً ایک ہزار خاندان متاثر ہوں گے۔ جب وہ یہاں سے بے گھر ہو جائیں گے تو پھر انہیں کوئی دوسرا ٹھکانہ نہیں ملے گا&#39;۔ اگر ڈیم کی تعمیر کا عمل حکومتی منصوبے کے مطابق آگے بڑھتا ہے تو ان کے اپنے گاؤں میں 250 خاندان بے گھر ہو جائیں گے۔&nbsp; 
یہ ڈیم ددہوچھہ نامی گاؤں کے قریب بن رہا ہے اسی لیے اسے سرکاری طور پر ددہوچھہ ڈیم کا نام دیا گیا ہے۔

راولپنڈی میں ڈپٹی کمشنر کے دفتر میں کام کرنے والے ایک اہلکار نے سجاگ کو بتایا ہے کہ حکومت ضلع راولپنڈی کو پانی کی فراہمی کے لیے ددہوچھہ ڈیم کی تعمیر کو انتہائی اہم سمجھتی ہے کیونکہ اس ضلعے میں زیر زمین پانی کی سطح تیزی سے کم ہو رہی ہے۔ ان کا کہنا ہے کہ &#39;یہ ڈیم نا صرف گھریلو استعمال بلکہ زرعی مقاصد کے لیے بھی پانی فراہم کرے گا&#39;۔

ددہوچھہ ڈیم کی تعمیر کا معاملہ درحقیقت 2018 میں شروع ہوا جب سپریم کورٹ آف پاکستان نے راولپنڈی میں پانی کی کمیابی کا از خود نوٹس لیا۔ اس سلسلے میں ہونے والی عدالتی سماعتوں کے دوران ایک مرتبہ پاکستان کی سب سے بڑی رئیل اسٹیٹ کمپنی بحریہ ٹاؤن کے مالک ملک ریاض حسین نے کہا کہ وہ اپنے ذاتی سرمائے سے یہ ڈیم تعمیر کر سکتے ہیں۔ لیکن اس کے لیے انہوں نے شرط رکھی کہ افسرشاہی اس کی تعمیر کے عمل میں کسی قسم کی مداخلت نہیں کرے گی۔ تاہم بعد میں پنجاب حکومت نے عدالت کو یقین دہانی کرائی کہ وہ دو سال میں خود یہ ڈیم تعمیر کر سکتی ہے۔&nbsp;

اس یقین دہانی کو دو سال گزر چکے ہیں لیکن ڈیم کی تعمیر تا حال شروع نہیں ہوئی۔&nbsp;

اکتوبر 2020 میں صوبائی حکومت نے ڈیم کی تعمیر کا ٹھیکہ فرنٹیئر ورکس آرگنائزیشن (ایف ڈبلیو او) کو دیا جو پاکستان آرمی انجینئرنگ ونگ ہے۔ ایف ڈبلیو او سے توقع کی جا رہی ہے کہ وہ تین سال میں ڈیم کی تعمیر مکمل کر لے گی۔ اس کام پر اندازاً چھ ارب روپے لاگت آئے گی۔ (اس خرچے میں زمین کے حصول پر خرچ ہونے والے چھ ارب روپے شامل نہیں ہیں)۔

دوسری جانب دیہاتیوں کو اس بات کا ابھی تک صحیح طرح سے علم نہیں ہے کہ ڈیم کتنی جگہ گھیرے گا اور اسے دراصل کس جگہ تعمیر کیا جانا ہے۔ ان کا کہنا ہے کہ ضلعی انتظامیہ نے ان کے ساتھ کئی ملاقاتیں کی ہیں مگر ابھی تک انہیں اپنے ان سوالات کا جواب نہیں ملا۔ بڑوالا ہی کے ایک رہائشی اجمل کیانی &nbsp;کا کہنا ہے کہ &#39;ضلعی انتظامیہ کو خود بھی یہ اندازہ نہیں ہے کہ ڈیم کی جھیل کتنے رقبے پر محیط ہو گی&#39;۔ &nbsp;

نیوز میڈیا میں آنے والی اطلاعات کے مطابق ڈیم میں پانی ذخیرہ کرنے کی زیادہ سے زیادہ صلاحیت 60,000 ایکڑ فٹ ہو گی۔ اگر اس میں پانی &#39;ڈیڈ لیول&#39; (کم ترین سطح) تک پہنچ جائے تو اس صورت میں بھی اس میں 15,000 ایکڑ فٹ پانی موجود ہو گا۔

تاہم مقامی لوگوں نے ٹھان رکھی ہے کہ جب تک ان کے مطالبات نہیں سنے جاتے اس وقت تک وہ ڈیم کی تعمیر شروع ہونے نہیں دیں گے۔&nbsp;

عمران کیانی کا کہنا ہے کہ &#39;ڈیم سے متاثرہ دیہات کے سرکردہ لوگ گزشتہ ہفتے اکٹھے ہوئے۔ اس موقع پر تقریباً ایک ہزار لوگ موجود تھے جو سب کے سب بعد میں ایف ڈبلیو او کے سائٹ آفس میں گئے اور اسے کام روکنے پر مجبور کر دیا&#39;۔&nbsp;

دیہاتیوں کے اس اکٹھ کے بعد راولپنڈی کے اسسٹنٹ کمشنر نے بھی اس علاقے کا دورہ کیا۔ انہوں نے مقامی لوگوں کو ایف ڈبلیو او کے خدشے سے آگاہ کیا کہ اگر ڈیم کی تعمیر فوری شروع نہ ہوئی تو اس سے ٹھیکہ واپس لیا جا سکتا ہے۔ عمران کیانی کہتے ہیں &#39;انہوں نے ہم سے التجا کی کہ ہم ایف ڈبلیو او کے کام میں رکاوٹ نہ ڈالیں۔ اسسٹنٹ کمشنر نے ہمیں یہ یقین دہانی بھی کرائی کہ ہمارے مطالبات ایک ہفتے میں ہی پورے کر دیے جائیں گے&#39;۔

یہ ڈیڈ لائن ختم ہو چکی ہے لیکن صورت حال جوں کی توں ہے۔ عمران کیانی کا کہنا ہے کہ &#39;اگر ہمارے مطالبات نہ مانے گئے تو ہم دوبارہ ایف ڈبلیو او کے سائٹ آفس کی جانب مارچ کریں گے&#39;۔&nbsp;

<h2>ایک زمین دو قیمتیں</h2>

ڈیفنس ہاؤسنگ اتھارٹی (ڈی ایچ اے) فوج کا ادارہ ہے جو راولپنڈی سمیت پاکستان کے مختلف شہروں میں بڑے بڑے رہائشی منصوبے چلاتا ہے۔ اس نے 2000 کی دہائی میں راولپنڈی میں ڈی ایچ اے ویلی نامی اپنے رہائشی منصوبے کے لیے بڑوالا، ددہوچھہ اور ملحقہ دیہات میں 18,000 کنال زمین حاصل کی تھی۔ بعد ازاں لاہور ہائی کورٹ کے راولپنڈی بینچ نے زمین کے حصول کا عمل غیر قانونی قرار دیتے ہوئے اسے منسوخ کر دیا۔ تاہم بڑوالا کے رہائشی اجمل کیانی کے مطابق اس زمین پر ڈی ایچ اے کا قبضہ بدستور قائم ہے۔&nbsp;

ایک مقامی رہائشی کا یہ بھی دعویٰ ہے کہ ڈیم کی اصل جگہ میں وہ زمین بھی آتی ہے جو ڈی ایچ اے کے قبضے میں ہے لیکن ان کا الزام ہے کہ ڈی ایچ اے نے ڈیم کی جگہ تبدیل کرانے کے لیے پنجاب حکومت پر دباؤ ڈالا ہے۔&nbsp;

دوسری طرف ڈپٹی کمشنر کے دفتر میں کام کرنے والے ایک اہل کار کا کہنا ہے کہ حکومت نے اس سلسلے میں کسی قسم کا دباؤ قبول نہیں کیا بلکہ حکومت ددہوچھہ کے پاس اسی جگہ ڈیم بنانے جا رہی ہے جہاں وہ ہمیشہ سے اسے بنانا چاہتی تھی۔&nbsp;

اس کے باوجود بڑوالا کے رہائشی اور ایک سکول میں استاد کے طور پر کام کرنے والے حمید کیانی کی تشویش دور نہیں ہوئی۔ ان کا کہنا ہے: &#39;ہم قومی مفاد میں ڈیم کی تعمیر قبول کرنے کو تیار ہیں مگر ہمیں خدشہ ہے کہ اسے فوجی افسروں کے لیے پرتعیش رہائشی منصوبے بنانے کے لیے پہلے قدم کے طور پر استعمال کیا جائے گا۔

ان خدشات کو دور کرنے کے لیے وہ تجویز کرتے ہیں کہ حکومت ڈی ایچ اے ویلی کی زمین کو ڈیم کی تعمیر کے نتیجے میں بے گھر ہونے والے دیہاتیوں کی نو آباد کاری کے لیے استعمال کرے۔ ان کا کہنا ہے کہ &#39;آپ ڈیم کی تعمیر چاہتے ہیں؟ ٹھیک ہے، جائیں اور اس کی تعمیر کریں مگر ہمیں وہ زمین دے دیں جو ڈی ایچ اے ویلی نے ہم سے غیر قانونی طور پر حاصل کی تھی&#39;۔

دیہاتیوں کو ڈیم کے لیے لی جانے والی زمین کی قیمت کے متعلق بھی شکایت ہے۔ بڑوالا گاؤں کے ایک بزرگ جمشید کیانی کا کہنا ہے کہ &#39;فی کنال 90,000 روپے معاوضہ وصول کر کے ہم اس رقم سے &nbsp;راولپنڈی شہر میں پانچ مرلے کا گھر بھی نہیں خرید سکتے&#39;۔&nbsp;

انہی کے گاؤں کے رہائشی عمران کیانی نے آٹھ سال پہلے اپنے گھر کی تعمیر پر لاکھوں روپے خرچ کیے تھے۔ دراصل اس گاؤں میں رہنے والے بیشتر لوگوں نے اسی طرح حالیہ دہائیوں میں گھر بنانے پر بھاری رقم لگائی ہے مگر ان کا کہنا ہے کہ حکومت انہیں جو معاوضہ پیش کر رہی ہے وہ اس خرچ کے مقابلے میں بالکل معمولی ہے۔&nbsp;

بڑوالا میں قائم ڈسپنسری میں لیڈی ہیلتھ ورکر کی حیثیت سے کام کرنے والی ثمینہ کیانی کا یہی کہنا ہے کہ ان کی زمین کے عوض حکومت انہیں نہایت معمولی معاوضہ دے رہی ہے۔ وہ کہتی ہیں کہ &#39;90,000 روپے میں تو راولپنڈی میں چھ مہینے کے لیے ایک کمرے کا گھر بھی کرائے پر نہیں مل سکتا&#39;۔ &nbsp;

ثمینہ اور بڑوالا کے دوسرے رہائشیوں کا مطالبہ ہے کہ حکومت انہیں اس رقم کے مساوی زمین کی قیمت دے جو ایک دہائی پہلے ڈی ایچ اے کی جانب سے انہیں دی گئی تھی۔ اس وقت انہیں فی کنال 96,000 روپے ملے تھے ۔ اس تجویز کے متبادل کے طور پر ان کا کہنا ہے کہ حکومت کو چاہیے کہ وہ ان کی زمین کی وہی قیمت مقرر کرے جو ڈی ایچ اے ویلی میں اسی سائز کے پلاٹ کی ہے۔ کیونکہ، جمشید کیانی کہتے ہیں، &#39;ہمارے گاؤں میں وہ تمام سہولیات موجود ہیں جو ڈی ایچ اے ویلی میں میسر ہیں۔ یہاں پانی ہے، بجلی ہے اور گیس بھی موجود ہے۔ یہاں سکول بھی ہیں۔ اگر سب کچھ یہاں موجود ہے تو پھر ہمیں اپنی زمین کی وہی قیمت کیوں نہیں دی جا سکتی جو ڈی ایچ اے کو مل رہی ہے؟&#39;۔

بڑوالا اور اس کے نواحی دیہات میں چند خوشحال گھرانوں کے علاوہ بیشتر دیہاتیوں کی واحد ملکیت ان کے گھر ہیں۔ ان کا مسئلہ محض زمین کی قیمت سے متعلق نہیں۔ انہیں خدشہ ہے کہ ایک مرتبہ بے دخل ہونے کے بعد وہ عمر بھر گھر نہیں بنا سکیں گے۔ ان میں ایک بتول کیانی نامی بیوہ ہیں۔ ان کی چار بیٹیاں ہیں جن میں سے ایک معذور ہے۔ وہ کہتی ہیں کہ ان کا واحد اثاثہ ان کا گھر ہے۔ &#39;جب یہ گھر نہیں رہے گا تو مجھے معلوم نہیں میں اپنی بیٹیوں کو لے کر کہاں جاؤں گی&#39;۔

ان میں ایسے لوگ بھی ہیں جو اپنے مویشیوں کی چراگاہیں اور زرعی زمین کھونے کے خوف میں مبتلا ہیں جو کہ اس علاقے میں روزی کمانے کے دو بڑے ذرائع ہیں۔ ان ذرائع کے ختم ہو جانے کے بارے میں عمران کیانی کہتے ہیں کہ &#39;یہ منصوبہ معاشی طور پر ہمارا گلہ گھونٹے جانے کے مترادف ہے&#39;۔&nbsp;

ان دیہات کے بڑے بوڑھوں کو یہ پریشانی بھی ہے کہ اس منصوبے کے باعث انہیں اپنے اجداد کی قبریں پیچھے چھوڑنا پڑیں گی۔ خان پور گاؤں کے ایک بزرگ راجہ پرویز اپنا گاؤں چھوڑنے کا سوچ کر ہی پریشان ہیں۔ وہ کہتے ہیں کہ &#39;یہ جگہ چھوڑنے کا سوچ کر میں رات بھر روتا رہتا ہوں&#39;۔&nbsp;

اسی لیے مقامی لوگ اپنے مطالبات منوانے کے لیے ہر حد تک جانے کو تیار ہیں۔ راجہ پرویز خبردار کرتے ہیں کہ &#39;ہم یہ جگہ نہیں چھوڑیں گے بلکہ ہم اس کے لیے جان دینے کو بھی تیار ہیں&#39;۔&nbsp;

ان کے پاس اپنے مسئلے کے حل کی دوسری امید عدالت ہے جس نے ماضی قریب میں ڈی ایچ اے ویلی کے لیے زمین کا حصول غیر قانونی قرار دے کر ان کی مدد کی تھی۔&nbsp;

اسی لیے ددہوچھہ اور بڑوالا کے رہائشی امید کر رہے ہیں کہ 26 جنوری 2021 کو جب ان کی درخواستوں اور 12 دیگر پٹیشنوں پر لاہور ہائی کورٹ کے راولپنڈی بینچ میں سماعت ہو گی تو فیصلہ ان کے حق میں آئے گا ۔

یہ رپورٹ لوک سجاگ نے پہلی&nbsp;دفعہ&nbsp;22 جنوری 2021&nbsp; کو اپنی پرانی ویب سائٹ پر شائع کی تھی۔

تھرپارکر میں کوئلے سے بجلی کی پیداوار: 'ہماری زمینیں زبردستی لی جا رہی ہیں اور ہمارا رہن سہن بدلا جا رہا ہے'۔

راولپنڈی کو پانی فراہم کرنے کے لیے ددہوچھہ ڈیم کی تعمیر: 'یہ منصوبہ ہمارا معاشی گلہ گھونٹنے کے مترادف ہے'۔

text

اسلام آباد میں کیپیٹل ڈویلپمنٹ اتھارٹی (سی ڈی اے) کے ایک دفتر میں روزانہ لوگوں کی بھیڑ لگی رہتی ہے۔ ان میں سے بیشتر لوگ شہر کے ان سیکٹروں سے آتے ہیں جہاں زیریں متوسط اور محنت کش طبقہ رہتا ہے۔ سی ڈی اے کا یہ دفتر شہر کو پانی کی فراہمی کا انتظام کرتا ہے اور یہاں آنے والے لوگوں کو سرکاری نلوں سے پانی کی فراہمی میں بے قاعدگی کی شکایات ہیں۔ چند روز پہلے سی ڈی اے کے پاس آنے والے مقامی رہائشیوں کے ایک وفد کے رہنما محمد کاشف کا کہنا ہے کہ &quot;ہمیں سمجھ نہیں آتی کہ کس سے بات کریں&quot;۔ یہ وفد سی ڈی اے کے حکام سے مل کر پانی کی کمی کا مسئلہ مستقل بنیادوں پر حل کرانا چاہتا ہے۔

اس مسئلے کی وجہ سے جی-9، جی-10، آئی-9 اور آئی-10 سیکٹروں کے رہائشی نل کے پانی کی عدم دستیابی کے حوالے سے روزانہ قریباً 200 شکایات درج کرا رہے ہیں۔ چونکہ آنے والے دنوں میں گرمی کی شدت بڑھ جائے گی اس لیے ان شکایات میں بھی کئی گنا اضافے کا امکان ہے کیونکہ، سی ڈی اے کے ایک عہدیدار کے مطابق، اگر کسی گھر میں سات لوگ رہتے ہیں تو وہاں موسم گرما میں پانی کی روزانہ اوسط طلب 50 گیلن تک پہنچ جائے گی جبکہ موسم سرما میں اسی گھرانے کو 30 گیلن پانی درکار ہوتا ہے۔&nbsp;

یہی وجہ ہے کہ جون اور جولائی کے مہینوں میں جب پانی کی طلب عروج پر ہوتی ہے تو اسلام آباد میں پانی کی قلت بھی اتنی ہی بڑھ جاتی ہے۔ نتیجتاً زیریں متوسط اور محنت کش طبقے کے علاقوں میں نل کے پانی کی سپلائی اکثر معطل ہو جاتی ہے۔

آئی-10 سیکٹر میں زیادہ تر چھوٹے تاجر اور ریٹائرڈ سرکاری ملازمین چھوٹے چھوٹے دو منزلہ گھروں میں رہتے ہیں۔ ان کی اپنی رہائش نچلی منزل پر ہوتی ہے لیکن بالائی منزل انہوں نے کرائے پر دے رکھی ہوتی ہے۔ یہاں کے رہائشی محمد طاہر بتاتے ہیں کہ گزشتہ گرمیوں میں اس سیکٹر میں کئی ہفتے تک نل کا پانی بند رہا۔ ان کا کہنا ہے کہ سردیوں کے موسم میں بھی پانی کی 20 منٹ روزانہ والی عمومی سپلائی ایک ہی گھر میں رہنے والے دونوں خاندانوں کے لئے نا کافی ہوتی ہے لیکن گرمیوں میں جب نل کا پانی کئی کئی دن تک نہیں آتا تو حالات بد ترین ہو جاتے ہیں۔&nbsp;

ان علاقوں کے رہنے والے لوگوں کے پاس پانی کے مسئلے کا واحد حل یہی ہے کہ وہ سی ڈی اے کے شکایات والے دفتر جا کر اپنی شکایت درج کرائیں اور عارضی طور پر ٹینکر کے ذریعے پانی کی فراہمی کی درخواست دیں۔ چونکہ ان علاقوں میں رہنے والے کئی ہزار گھرانوں میں سے ہر ایک کو یہی مسئلہ درپیش ہے اور ٹینکروں کے آنے میں خاصا وقت بھی لگ جاتا ہے اس لیے پانی سے متعلق شکایات کی تعداد روزانہ سینکڑوں تک پہنچ جاتی ہے۔ &nbsp;

شکایات لے کر آنے والے لوگ شنوائی کے انتظار میں گھنٹوں سی ڈی اے کے دفتروں کے باہر قطاروں میں کھڑے رہتے ہیں۔ چونکہ سی ڈی اے روزانہ 250 ٹینکر ہی مہیا کر سکتی ہے اس لیے ان میں بہت سے لوگوں کو کئی کئی دن انتظار کرنا پڑتا ہے۔

<h2>طلب و رسد کا معاملہ</h2>

اسلام آباد کو پانی کی فراہمی کا انحصار بڑی حد تک بارش پر ہے جسے دو ڈیموں میں ذخیرہ کر کے شہر کو فراہم کیا جاتا ہے۔ ان میں ایک خانپور ڈیم ہے جو شہر کے شمال میں ہے جبکہ دوسرا سملی ڈیم ہے جو شہر کے جنوب مشرق میں واقع ہے۔ یہ دونوں ڈیم پہاڑوں سے گزرنے والے موسمی ندی نالوں پر بنائے گئے ہیں اس لیے ان پہاڑوں پر جتنی زیادہ بارش ہوتی ہے اتنا ہی زیادہ پانی ان ڈیموں میں جمع ہوتا ہے۔ &nbsp;

چونکہ گزشتہ موسم سرما میں ان ڈیموں کے ارد گرد واقع پہاڑوں پر زیادہ بارشیں نہیں ہوئیں اس لیے اسلام آباد کے رہائشیوں کو خدشہ ہے کہ اس سال گرمیوں میں پانی کا بحران گزشتہ سال سے کہیں زیادہ شدید ہو سکتا ہے۔ تاہم سی ڈی اے کے حکام نے میڈیا کو جاری کیے جانے والے متعدد بیانات میں ان خدشات کو رفع کرنے کی کوشش کی ہے۔ سی ڈی اے میں واٹر سپلائی کے شعبے کے ڈائریکٹر سردار خان کہتے ہیں کہ شہر کے پانی کے ذخائر جولائی تک کی ضروریات پوری کرنے کے لیے کافی ہیں۔&nbsp;

ان کا یہ بھی کہنا ہے کہ اگر یکم جولائی 2021 سے پہلے مون سون کی بارشوں کا بھرپور انداز میں آغاز ہو گیا تو پانی کی فراہمی میں کوئی کمی نہیں ہو گی۔ تاہم اگر مون سون کا آغاز تاخیر سے ہوا تو پھر شہر کو پانی کے بحران کا سامنا ہو سکتا ہے۔&nbsp;

سی ڈی اے نے پانی کی سپلائی بڑھانے کے لیے شہر میں 175 ٹیوب ویل بھی نصب کر رکھے ہیں۔ سردار خان کے مطابق ان ٹیوب ویلوں اور ڈیموں سے ان کا محکمہ روزانہ اسلام آباد کو 60 ملین گیلن پانی مہیا کر رہا ہے تاہم وہ تسلیم کرتے ہیں کہ شہر میں پانی کی روزانہ طلب اس سے دگنی ( 120 ملین گیلن) ہے۔

کاشف عباسی اسلام آباد سے تعلق رکھنےو الے صحافی ہیں۔ وہ شہر میں پانی کی کمی سے متعلق مسائل پر رپورٹنگ کا وسیع تجربہ رکھتے ہیں۔ ان کا کہنا ہے کہ پانی کی کمی کی سب سے بڑی وجہ یہ ہے کہ اس شہر کی آبادی میں تیزی سے اضافہ ہو رہا ہے۔ ان کے مطابق 20 سال پہلے یہاں پانچ لاکھ لوگ رہتے تھے جبکہ 2017 کی مردم شماری کے نتائج بتاتے ہیں کہ اسلام آباد کی آبادی 20 لاکھ سے زیادہ ہو گئی ہے۔&nbsp;

کاشف عباسی کا کہنا ہے کہ شہر کی آبادی میں تیزی سے اضافے کے باوجود انتظامیہ نے پچھلے 20 سالوں میں پانی کی فراہمی بڑھانے کے لیے کچھ نہیں کیا۔ اسی طرح شہر کو پانی فراہم کرنے کے لئے بنائے گئے نظام میں بھی کئی خرابیاں پیدا ہو گئی ہیں۔ مثال کے طور پر پانی کی سپلائی لائنیں جگہ جگہ ٹوٹ پھوٹ گئی ہیں لہٰذا انہیں بڑے پیمانے پر مرمت کی ضرورت ہے۔&nbsp;

محمد طاہر اس بات کی تصدیق کرتے ہوئے کہتے ہیں کہ شہر کے بہت سے علاقوں میں لوگ سی ڈی اے کی پائپ لائنیں توڑ کر پانی چوری کر رہے ہیں۔ ان کے مطابق &quot;ہم نے کئی مرتبہ سی ڈی اے کو اس چوری کی شکایت درج کرائی ہے مگر ہماری بات پر کسی نے کان نہیں دھرے&quot;۔

سی ڈی اے کے ایک اعلیٰ عہدیدار نے اپنا نام خفیہ رکھنے کی شرط پر بتایا کہ سی ڈی اے کے پاس ان تمام مسائل کو حل کرنے کے لیے مالی وسائل نہیں ہیں تاہم ان کا کہنا ہے کہ وفاقی حکومت اسلام آباد کو تربیلا ڈیم سے پینے کے صاف پانی کی فراہمی کے ایک منصوبے پر کام کر رہی ہے جس پر اندازاً 1.2 ارب امریکی ڈالر خرچ ہوں گے۔ وہ کہتے ہیں کہ حکومت اس منصوبے کے لیے چین کے ایک بینک سے قرض لینے کے بارے میں سوچ رہی ہے۔

لندن میں مقیم ماہرِ ماحولیات دانش مصطفیٰ کچھ عرصہ پہلے تک اسلام آباد میں کام کرتے رہے ہیں۔ ان کا کہنا ہے کہ شہر میں پانی کے مسائل زیادہ تر ناقص انتظام اور پانی کی تقسیم کے نظام کی مناسب دیکھ بھال نہ ہونے کا نتیجہ ہیں۔ وہ کہتے ہیں: &quot;سب سے پہلی خرابی تو یہ ہے کہ سی ڈی اے نے عام لوگوں کو گھروں میں ٹیوب ویل لگانے کی اجازت دے رکھی ہے جس کا مطلب یہ ہے کہ شہر میں زمین سے بغیر کسی قاعدے قانون کے پانی نکالے جانے کے نتیجے میں زیرِ زمین پانی کی سطح تیزی سے کم ہو رہی ہے۔ دوسرا مسئلہ یہ ہے کہ ڈیموں میں مٹی جمع ہو رہی ہے جس سے ان میں پانی اکٹھا کرنے کی صلاحیت کم ہوتی جا رہی ہے جبکہ تیسرا مسئلہ یہ ہے کہ پانی کی تقسیم کے نظام کا ناقص انتظام اور اس کی مناسب دیکھ بھال نہ ہونے سے بڑے پیمانے پر پانی ضائع اور چوری ہو رہا ہے&quot;۔ ان کا کہنا ہے کہ اگر یہ مسائل حل ہو جائیں تو پھر اسلام آباد میں پانی کی کوئی کمی نہیں ہو گی۔

ان مسائل کو حل کرنے کے لیے وہ تجویز کرتے ہیں کہ سی ڈی اے غیر قانونی ٹیوب ویل بند کرائے اور زیر زمین پانی کو ٹیوب ویلوں کے ذریعے نکالنے کو کسی قاعدے قانون کے تحت لے کر آئے، پانی کے مناسب نرخ مقرر کیے جائیں اور اس کے بلوں کی وصولی باقاعدہ بنائی جائے۔ اسی طرح ان کا کہنا ہے کہ خاص طور پر سیلاب کے موسم میں ڈیموں سے مٹی نکالی جائے اور نگرانی اور دیکھ بھال کا نظام بہتر بنا کر پانی کے ضیاع اور چوری کا روکا جائے۔&nbsp;

دانش مصطفیٰ یہ بھی کہتے ہیں کہ جب کبھی پانی کی ترسیل میں کمی واقع ہو تو باغات اور لانوں کو پانی دینے اور پانی کو گھروں کے بیرونی حصوں میں استعمال کرنے پر پابندی عائد کی جائے۔ لیکن ساتھ ہی وہ خبردار بھی کرتے ہیں کہ اگر سی ڈی اے نے پانی کی تقسیم کے بوسیدہ نظام کو فوری طور پر درست نہ کیا تو &nbsp;مستقبل میں موجودہ صورتِ حال بدتر ہو جائے گی۔

یہ رپورٹ لوک سجاگ نے پہلی دفعہ&nbsp;31 مئی 2021 کو اپنی پرانی ویب سائٹ پر شائع کی تھی۔

اسلام آباد میں پانی کی قلت: 'اگر موجودہ بوسیدہ نظام کو جلد درست نہ کیا گیا تو صورتِ حال بدتر ہو جائے گی'۔

وفاقی حکومت ایک ایسے قانون کی منظوری دینے میں ہچکچاہٹ کا مظاہرہ کر رہی ہے جس کے باعث مسیحی طلاق ایکٹ میں ترامیم ہو جائیں گی اور پاکستانی مسیحیوں کے لیے طلاق کا حصول آسان ہو جائے گا۔&nbsp;

اس قانون کا مسودہ اگست 2019 میں وفاقی وزارتِ انسانی حقوق نے تیار کیا تھا۔ جب یہ مسودہ تیار ہو گیا تو وفاقی وزیر برائے انسانی حقوق شیریں مزاری نے بیان دیا کہ اسے جلد ہی منظوری کے لیے پارلیمنٹ میں پیش کر دیا جائے گا۔ مگر لگ بھگ دو سال گزر جانے کے باوجود ایسا کچھ نہیں ہوا اور یہ مسودہ ابھی تک وفاقی سیکرٹریٹ کی کسی الماری میں پڑا ہوا ہے۔&nbsp;

حکومت اور مسیحی برادری میں موجود ذرائع کا کہنا ہے کہ چرچ کے رہنما اس قانون کی سختی سے مخلف کر رہے ہیں کیونکہ وہ اسے مذہبی احکامات کی خلاف ورزی سمجھتے ہیں۔&nbsp;

چرچ کے ایک نمائندے نے اپنا نام ظاہر نہ کرنے کی شرط پر بتایا کہ مسیحی مذہبی رہنما شادی شدہ جوڑوں کو طلاق کا حق دینے کے حامی نہیں ہیں کیونکہ وہ شادی کو ایک مذہبی رسم کے طور پر دیکھتے ہیں۔ان کے مطابق شادی خدا کی جانب سے بنایا گیا ایک بندھن ہے جسے انسان خود ختم نہیں کر سکتے۔ ان کے خیال میں اس کا خاتمہ اسی صورت میں ممکن ہے کہ میاں بیوی میں سے کوئی ایک یا دونوں اُن مذہبی شرائط کی خلاف ورزی کے مرتکب ہوئے ہوں جن کے تحت انہیں یکجا کیا گیا تھا۔&nbsp;

پاکستان تحریکِ انصاف (پی ٹی آئی) سے تعلق رکھنے والی مسیحی رکن قومی اسمبلی شنیلا روتھ اس بات کا اعتراف کرتی ہیں کہ اس مجوزہ قانون کی مخالفت ہو رہی ہے۔ وہ کہتی ہیں کہ ان کی جماعت اس وقت تک اس کا مسودہ پارلیمنٹ میں پیش نہیں کر سکتی جب تک اسے مسیحی مذہبی قیادت کی متفقہ منظوری نہ مل جائے۔ وہ کہتی ہیں کہ &quot;ہم مسیحی برادری کے اندرونی خاندانی معاملات میں مداخلت کا الزام اپنے سر نہیں لے سکتے یہی وجہ ہے کہ اس قانون کی منظوری تاخیر کا شکار ہے&quot;۔

تاہم وفاقی وزارتِ انسانی حقوق کے حکام کے مطابق اس مسودہِ قانون کی مخالفت کی کوئی ٹھوس وجہ نہیں۔ ان کا دعویٰ ہے کہ حکومت نے چرچ کے رہنماؤں اور مسیحیوں کی غیر سرکاری سماجی تنظیموں کے ساتھ نو عدد مشاورتی اجلاس کیے جن کا مقصد اس مسودے کی تیاری ہی تھا۔ وزارتِ قانون کے ایک اعلیٰ سطحی افسر کا کہنا ہے کہ ان اجلاسوں میں اس پر سنگین اعتراضات کیے گئے لیکن شیریں مزاری نے اسے پارلیمنٹ میں لے جانے کا اعلان تب ہی کیا جب یہ اعتراضات دور ہو گئے تھے۔

<h2>مسیحی طلاق کے قانون میں ضیا کا کردار</h2>

موجودہ مسیحی طلاق ایکٹ کی دفعہ 7 کا نفاذ 1869 میں برطانوی دور میں عمل میں آیا تھا۔ اس کی رو سے ہندوستان میں عدالتوں کو مسیحی جوڑوں کے درمیان طلاق کے معاملات میں انگلینڈ کے سِول قانون کے مطابق فیصلہ دینے کا اختیار دیا گیا تھا۔ قیام پاکستان کے 34 سال بعد بھی یہ دفعہ اس قانون کا حصہ رہی تاہم اس کے بعد وزارتِ قانون کے افسروں نے نشاندہی کی کہ اس دفعہ کی وجہ سے یہ قانونی پیچیدگی پیدا ہوتی ہے کہ ایک خود مختار ملک کی عدالتیں کسی اور ملک کے قانون کی پیروی کر رہی ہوتی ہیں۔ اسی لیے 1981 میں جنرل ضیاالحق کی فوجی حکومت نے ایک صدارتی حکم نامے کے تحت دفعہ 7 کو ختم کر دیا۔

کراچی سے تعلق رکھنے والے استاد اور انسانی حقوق کے کارکن صابر مائیکل کہتے ہیں کہ اس دفعہ کو ختم کرنے کی وجہ قانونی نہیں بلکہ سیاسی تھی۔ ان کے مطابق &quot;جس طرح ضیا الحق پاکستانی معاشرے میں مسلمانوں پر مذہبی رنگ چڑھا رہے تھے اسی طرح وہ چاہتے تھے کہ پاکستان کے مسیحی بھی کٹر مذہبی راہ اختیار کریں۔ اسی لیے انہوں نے یہ دفعہ ختم کر کے مذہبی رہنماؤں کو مسیحی خاندانی معاملات میں ایک اہم کردار دلا دیا&quot;۔ صابر مائیکل یہ بھی کہتے ہیں کہ ریاست کے حمایت یافتہ پادریوں نے اس کام میں حکومت کو اعانت مہیا کی۔&nbsp;

حقیقت یہ ہے کہ دفعہ 7 کو ختم کرتے وقت مسیحی برادری سے کوئی وسیع تر مشاورت نہیں کی گئی۔ یہ بھی حقیقت ہے کہ اس وقت کسی مسیحی رہنما نے اس دفعہ کو ختم کرنےکی مخالفت نہ کی۔ مسیحیوں کے حقوق کے لیے کام کرنے والے کاشف اسلم اس معاملے میں مسیحیوں کی خاموشی کی وجہ بیان کرتے ہوئے کہتے ہیں کہ &quot;پاکستان میں رہنے والے مسیحیوں کی بڑی اکثریت کو یہ بھی علم نہیں تھا کہ ان سے کون سی چیز واپس لی جا رہی ہے&quot;۔&nbsp;

اس دفعہ کا خاتمہ پہلی مرتبہ 1988 میں اس وقت ایک عوامی مسئلے کے طور پر سامنے آیا جب بے نظیر بھٹو وزیراعظم بنیں۔ کاشف اسلم کے مطابق &quot;ان کے دور میں پاکستان میں خواتین کے حقوق پر گفتگو کا آغاز ہوا کیونکہ ان کی حکومت نے خواتین کے خلاف امتیازی سلوک کے خاتمے کے عالمی کنونشن پر دستخط کیے تھے۔

اقوام متحدہ کے زیرِ اہتمام بننے والے اس کنونشن کی دنیا کے بہت سے دیگر ممالک نے بھی تائید کی تھی اور اس کے تحت پاکستان اپنے ہاں خواتین کے حالات زندگی میں بہتری لانے کا پابند تھا۔ کاشف اسلم کا کہنا ہے کہ &quot;ان دنوں مسیحی برادری کے بعض سیاسی اور سماجی رہنماؤں نے ضیا حکومت کی جانب سے اپنی برادری کے خلاف ہونے والی نا انصافی پر آواز اٹھانا شروع کی&quot;۔ &nbsp;

نتیجتاً بے نظیر بھٹو کی وزارتِ قانون نے ایک ایسا قانونی مسودہ تیار کرنے کی کوشش کی جس کے ذریعے مسیحی خواتین کو کڑی مذہبی شرائط پوری کیے بغیر طلاق کے حصول میں مدد مل سکے۔ تاہم مسیحی مذہبی رہنماؤں کی مخالفت کے باعث یہ کوشش ناکام رہی۔&nbsp;

تقریباً تین دہائیوں کے بعد دفعہ 7 ایک مرتبہ پھر موضوعِ بحث بنی جب 2017 میں لاہور ہائی کورٹ کے جج جسٹس منصور علی شاہ نے قرار دیا کہ اس کا خاتمہ غیر آئینی ہے۔ انہوں نے یہ فیصلہ امین مسیح نامی شخص کی درخواست پر دیا جس نےعدالت سے استدعا کی تھی کہ وہ اور اس کی اہلیہ ایک دوسرے سے علیحدگی چاہتے ہیں مگر اس کے لیے وہ ایک دوسرے پر بدچلنی کا الزام عائد کرنا نہیں چاہتے جو کہ مذہبی احکامات کی رو سے مسیحی جوڑوں میں علیحدگی کی ایک بنیادی وجہ ہونی چاہیے۔

جسٹس منصور علی شاہ کے فیصلے کو بعض مسیحی مذہبی رہنماؤں نے لاہور ہائی کورٹ کے بڑے بینچ میں چیلنج کیا ہوا ہے جس پر حتمی فیصلہ آنا ابھی باقی ہے۔ کاشف اسلم کے مطابق &quot;اس فیصلے کی کڑی مخالفت کی گئی۔ اس کے مخالفین کا استدلال ہے کہ سیکشن 7 کی بحالی سے مسیحی برادری میں طلاقیں عام ہو جائیں گی&quot;۔&nbsp;

اس تنازعے کو ختم کرنے کا ایک طریقہ یہ ہے کہ پارلیمنٹ ضیا الحق کے صدارتی حکم نامے کو منسوخ کر دے کیونکہ بہرحال یہ ایک آمر حکومت کی جانب سے جاری کیا گیا تھا۔ تاہم پاکستان تحریکِ انصاف کی حکومت یہ راستہ اختیار کرنے سے گریزاں ہے۔&nbsp;

اس کے لیے وہ اسی وجہ کا سہارا لے رہی ہے جسے بنیاد بناتے ہوئے ضیاالحق نے دفعہ 7 کو ختم کیا تھا۔ پاکستان تحریکِ انصاف کے ایک رکن اسمبلی نے نام ظاہر نہ کرنے کی شرط پر بتایا کہ اس دفعہ کی بحالی کا مطلب یہ ہے کہ پاکستان کے مسیحی خاندانوں پر انگلینڈ کے شہری قوانین کا اطلاق ہو گا۔ان کے بقول &quot;پاکستانی ریاست اپنے ہاں کوئی غیر ملکی قانون کیسے رائج کر سکتی ہے؟&quot;

<h2>مسیحی برادری میں اتفاقِ رائے کیوں ممکن نہیں؟</h2>

موجودہ شکل میں طلاق کا مسیحی قانون کسی جوڑے کو صرف اسی صورت میں علیحدگی کی اجازت دیتا ہے جب ان میں سے کوئی ایک ثابت کر دے کہ دوسرا بد چلنی (یعنی ناجائز جنسی تعلقات) کا مرتکب ہوا ہے۔&nbsp;

لیکن پاکستان میں بیشتر مسیحی خواتین ان پڑھ اور غریب ہیں۔ ان کے لیے عدالت میں یہ ثابت کرنا تقریباً نا ممکن ہوتا ہے کہ ان کے مرد بد چلنی کا ارتکاب کر رہے ہیں۔ وہ اپنے اوپر بد چلنی کا الزام بھی نہیں لینا چاہتیں کیونکہ اس طرح ان کی سماجی اور خاندانی زندگی تباہ ہو سکتی ہے۔

لہٰذا کوئی متبادل طریقہ دستیاب نہ ہونے کی وجہ سے بہت سی مسیحی خواتین اپنا مذہب تبدیل کرنے پر مجبور ہوتی ہیں کیونکہ اگر مسیحی میاں بیوی میں سے کوئی ایک اپنا مذہب چھوڑ کر دوسرا مذہب اختیار کر لے تو اس کی شادی خود بخود ختم ہو جاتی ہے۔&nbsp;

شنیلا روتھ کا کہنا ہے کہ مسیحی برادری میں طلاق کے لیے بد چلنی کی شرط سبھی کو ناپسند ہے کیونکہ &quot;اس سے مسیحی عورت کو سنگین مشکلات جھیلنا پڑتی ہیں&quot;۔ ان کے مطابق پاکستانی مسیحیوں میں یہ آگاہی بھی پھیل رہی ہے کہ اس شرط کو تبدیل ہونا چاہیے اور نا موزوں شادیوں کو ختم کرنے کے لیے کسی اور بنیاد پر کوئی اور طریقہ وضع کیا جانا چاہیے۔

تاہم مسئلہ یہ ہے کہ ایسا کیسے ہو کیونکہ اس سلسلے میں کی جانے والی بہت سے کوششیں پہلے ہی ناکام ہو چکی ہیں۔

ان میں سے ایک کوشش خود شنیلا روتھ نے کی تھی۔ وہ بتاتی ہیں کہ 2013 اور 2018 کے درمیان پنجاب اسمبلی کی رکن کے طور پر انہو ں نے اس معاملے پر ایک قانون کا مسودہ تیار کیا تھا مگر اس وقت کی حکومت نے اسے مسترد کر دیا۔&nbsp;

کاشف اسلم کے مطابق اسی دوران کیتھولک چرچ آف پاکستان نے بھی مسیحی طلاق ایکٹ میں ترامیم متعارف کروانے کی کوشش کی۔ چونکہ پاکستان میں مسیحیوں کی اکثریت کیتھولک چرچ سے وابستہ ہے اس لئے اس نے 2016 میں اس حوالے سے ایک بہت بڑے اجتماع کا انعقاد کیا۔

چرچ سے وابستہ انسانی حقوق کی تنظیم نیشنل کمیشن فار جسٹس اینڈ پیس کے زیرِ اہتمام منعقد کئے گئے اس اجتماع میں 12 مسیحی فرقوں کے سربراہوں نے شرکت کی۔ لاہور میں ہونے والا یہ اجتماع دو ماہ تک جاری رہا جس کے دوران تفصیلی بات چیت کے بعد اس کے شرکا بالآخر طلاق کے لیے کوئی راستہ نکالنے پر متفق ہو گئے۔&nbsp;

بعد ازاں اس اجتماع کے شرکا نے انسانی حقوق کو مدنظر رکھتے ہوئے ایک مسودہ قانون تیار کیا جس کا مقصد مسیحی عائلی قوانین میں متعدد ترامیم کرنا تھا جن میں ایک یہ بھی تھی کہ مسیحی جوڑوں کے لیے طلاق کا عمل آسان بنایا جائے۔ یہ مسودہ قانون سینیٹر کامران مائیکل کو بھیجا گیا جو اس وقت پاکستان مسلم لیگ نواز (پی ایم ایل این) کی حکومت میں وفاقی وزیر تھے۔ تاہم مسیحی برادری کے اندرونی اختلافات کے باعث وہ اسے پارلیمنٹ میں پیش نہ کر سکے۔ &nbsp;

رجعت پسند مسیحی مذہبی رہنما اس قانون کی اس لیے مخالفت کر رہے تھے کہ اس سے طلاق کا اختیار انسان کے ہاتھ میں آ جاتا اور یوں مسیحی شادی ایک مقدس بندھن کے بجائے دو افراد کے درمیان شراکت بن جاتی۔ لیکن سول سوسائٹی کی تنظیمیں بھی اس سے خوش نہیں تھیں کیونکہ اس میں مسیحی عورت کو طلاق لینے کا حق اس طرح نہیں دیا گیا تھا جس طرح یورپ اور شمالی امریکہ کی مسیحی عورتوں کو حاصل ہے۔

کاشف اسلم بتاتے ہیں کہ طلاق کی مخالفت صرف کیتھولک چرچ تک ہی محدود نہیں بلکہ پاکستان میں ہر مسیحی فرقے میں یہی صورتحال ہے۔ ان کا کہنا ہے کہ &#39;&#39;درحقیقت یہ فرقے ہی طلاق کے حوالے سے نئے قانون کی منظوری کی راہ میں سب سے بڑی رکاوٹ ہیں۔ چونکہ ان کی تعداد 238 کے قریب ہے اس لئے طلاق کے قانون میں ترامیم کے حوالے سے ان کے لئے اتفاق رائے پر پہنچنا بہت مشکل ہو جاتا ہے&quot;۔ وہ تو یہاں تک کہتے ہیں کہ &quot;پاکستانی مسیحیوں میں کبھی کسی بات پر اتفاق ہوا ہی نہیں&quot;۔&nbsp;

یہ عدم اتفاق ہی اگست 2019 میں پاکستان تحریکِ انصاف کی حکومت اور مسیحی برادری کے رہنماؤں کے مابین بات چیت ناکام ہونے کی ایک بڑی وجہ بنا۔ اس بات چیت میں حکومت کی جانب سے شیریں مزاری اور پارلیمانی سیکرٹری برائے قانون ملیکہ بخاری نے حصہ لیا تھا جبکہ مسیحی برادری کے نمائندوں میں تمام بڑے فرقوں کے نمائندوں کے علاوہ سول سوسائٹی کی متعدد تنظیموں کے ارکان بھی شامل تھے۔&nbsp;

وفاقی وزارت انسانی حقوق کے ایک عہدیدار کا کہنا ہے کہ اس بات چیت کے مثبت نتائج کو صرف ایک مذہبی گروہ کے محض ایک نمائندے نے سبوتاژ کر دیا۔ نتیجتاً مسیحی طلاق ایکٹ میں اصلاحات کا عمل غیرِ معینہ مدت کے لیے تاخیر کا شکار ہو گیا۔

یہ رپورٹ لوک سجاگ نے پہلی&nbsp;دفعہ 6 جولائی 2021&nbsp;کو اپنی پرانی ویب سائٹ پر شائع کی تھی۔

طلاق ایکٹ: مسیحی عورتوں کے لیے موت کا پھندا

حکمران جماعت پاکستان تحریک انصاف (پی ٹی آئی) نے جبری گمشدگیوں کے خلاف 26 جنوری 2021 کو قومی اسمبلی میں پیش کیے جانے والے ایک قانون کا مسودہ مسترد کر دیا۔ دو سال سے کم عرصہ میں یہ دوسرا موقع ہے جب پی ٹی آئی نے اسی موضوع پر کسی قانون کی منظوری کی مخالفت کی ہے۔ دونوں مواقع پر قانون کا مسودہ قبائلی ضلعے شمالی وزیرستان سے تعلق رکھنے والے قومی اسمبلی کے رکن محسن داوڑ نے پیش کیا تھا۔&nbsp;

جب ان کا پہلا مسودہ 30 اپریل 2019 کو مسترد ہوا تو اپنی ایک ٹویٹ میں ان کا کہنا تھا کہ پی ٹی آئی نے اس مسودہ قانون کی مخالفت کر کے &#39;اپنا اصل چہرہ دکھا دیا ہے&#39;۔ اس مرتبہ بھی ان کا یہی کچھ کہنا تھا۔ وفاقی وزیر برائے انسانی حقوق شیریں مزاری سے اپنے مسودے کی حمایت کی منظوری کے لیے مدد مانگتے ہوئے انہوں نے پی ٹی آئی کے ارکان پارلیمان کو یاد دلایا کہ ان میں سے بہت سے لوگ کبھی جبری گمشدگیوں کے خلاف شدومد سے بولا کرتے تھے۔ یہ الگ بات ہے کہ محسن داوڑ کی احتجاجی آواز صدا بالصحرا ثابت ہوئی۔&nbsp;

اس صورتحال سے یہ تاثر ابھرتا ہے جیسے پی ٹی آئی کی حکومت نے اس موضوع پر کبھی کوئی عملی قدم نہیں اٹھایا۔ تاہم اس سے برعکس دو سال پہلے اس کی وفاقی وزارت برائے انسانی حقوق نے جبری گمشدگیوں کو جرم قرار دینے کے لیے ایک مسودہ قانون تیار کیا تھا۔ تاہم یہ مسودہ وفاقی سیکرٹریٹ کی فائلوں میں گم ہو چکا ہے۔&nbsp;

ایسا قانون منظور کرنے کا خیال سب سے پہلے سینیٹ میں انسانی حقوق کی فنکشنل کمیٹی میں پیش کیا گیا تھا۔ 2018 کے آخر میں اس کمیٹی نے تجویز کیا کہ جبری گمشدگیوں کو دیگر طرح کے اغوا سے الگ جرم سمجھا جانا چاہیے۔ اس تجویز کے پیچھے کچھ بیرونی عوامل بھی کارفرما تھے۔&nbsp;

مثال کے طور پر اقوام متحدہ کے دفتر برائے انسانی حقوق کے ساتھ کام کرنے والے ماہرین کے ایک گروہ نے ستمبر 2012 میں کہا تھا کہ: &#39;ہم پاکستان کو درپیش سلامتی کے مسائل سے آگاہ ہیں ۔۔۔ تاہم جبری گمشدگیوں کے خلاف تمام افراد کے تحفظ سے متعلق 1992 کے اعلامیے کی رو سے &#39;خواہ جنگ کا خطرہ ہو یا حالت جنگ، اندرونی سیاسی عدم استحکام ہو یا کوئی اور ہنگامی حالت، کسی بھی طرح کے حالات کسی کو جبری طور پر لاپتہ کرنے کی اجازت نہیں دیتے&#39;۔&nbsp;

یہ اعلامیہ اقوام متحدہ کی جنرل اسمبلی نے 1992 میں منظور کیا تھا اور اس پر دستخط کرنے والے ملکوں میں پاکستان بھی شامل ہے۔ اس اعلامیے میں بہت سی دوسری باتوں کے علاوہ یہ بھی کہا گیا ہے کہ &#39;کسی فرد کو کسی بھی طرح لاپتہ کیا جانا انسانی وقار پر حملہ ہے&#39;۔ اس اعلامیے میں ایسے اقدامات کو &#39;انسانی حقوق کے عالمگیر اعلامیہ میں بیان کردہ انسانی حقوق اور بنیادی آزادیوں کی سنگین اور کھلی خلاف ورزی&#39; قرار دیتے ہوئے ان کی مذمت کی گئی ہے۔&nbsp;

اس کے بعد سے اقوام متحدہ مسلسل اسی موقف کا اظہار کرتی چلی آئی ہے۔ ستمبر 2020 میں اس سے وابستہ انسانی حقوق کے ماہرین نے ادریس خٹک کے جبری لاپتہ کیے جانے کی کڑے الفاظ میں مذمت کی۔ ان کا کہنا تھا کہ &#39;پاکستانی حکام انہیں قانون کی عدالت میں پیش کریں اور ان پر ایک منصفانہ مقدمہ چلانے کی ضمانت دیں&#39;۔&nbsp;

2012 &nbsp;اور 2020 کے درمیان انسانی حقوق کی تنظیموں اور غیر ملکی حکومتوں نے متعدد مواقع پر پاکستان پر زور دیا کہ وہ جبری گمشدگیوں کا سلسلہ ختم کرنے کے لیے ٹھوس اقدامات کرے۔ یہ بین الاقوامی دباؤ حکومت کی جانب سے مذکورہ بالا قانون کا مسودہ تیار کرنے کے پیچھے کارفرما عوامل میں سے ایک تھا۔&nbsp;

انسانی حقوق کی وزارت کی جانب سے تیار کیا جانے والا یہ مسودہ قانون پاکستان پینل کوڈ (پی پی سی) اور کریمنل پروسیجر کوڈ (سی آر پی سی) میں ترمیم کے ذریعے جبری گمشدگیوں کو جرم قرار دینے کی تجویز پیش کرتا ہے۔ اس میں کہا گیا ہے کہ جبری گمشدگیوں کو اغوا سے ہٹ کر ایک جرم سمجھا جانا چاہیے کیونکہ عام طور پر جبری گمشدگیوں کے پیچھے ریاستی اداروں کے حکام کا ہاتھ ہوتا ہے۔ یہ قانون جبری گمشدگی کے کسی واقعے میں ملوث قانون نافذ کرنے و الے اداروں اور انٹیلی جنس حکام کے خلاف مقدمہ درج کرنے کی بھی اجازت دیتا ہے۔&nbsp;

جب یہ مسودہ تیار ہو گیا تو جنوری 2019 میں اسے جائزے کے لیے وفاقی وزارت قانون اور وزارت داخلہ کو بھیج دیا گیا۔ دونوں وزارتوں نے اس پر سنگین تحفظات کا اظہار کیا۔ وزارت داخلہ میں کام کرنے والے ایک سرکاری افسر کا اس حوالے سے کہنا ہے کہ &#39;وزارت داخلہ سمجھتی ہے کہ یہ قانون اپنی موجودہ شکل میں انٹیلی جنس سروس کی ساکھ خراب کرنے کے لیے استعمال ہو سکتا ہے۔&nbsp;

اصولی طور پر دیکھا جائے تو وزارت داخلہ کو اس خدشے سے کوئی سروکار نہیں ہونا چاہیے کیونکہ اس کا بنیادی کام پاکستان بھر میں قانون کا نفاذ یقینی بنانا ہے۔ یہاں یہ بات بھی اہم ہے کہ وزارت داخلہ کا انٹیلی جنس اداروں پر اختیار بہت ہی محدود ہے کیونکہ عملی طور پر صرف ایک انٹیلی جنس ایجنسی یعنی انٹیلی جنس بیورو اس کے ماتحت ہے۔ دوسرے اداروں کا فوج سے تعلق ہے اور وہ فوج کی اعلیٰ قیادت کو ہی براہ راست جوابدہ ہیں۔&nbsp;

تاہم فوج کا یہ موقف ہے کہ اس کا زیادہ تر جبری گشمدگیوں سے کوئی لینا دینا نہیں۔ گزشتہ برس اس نے جبری گمشدگیوں کے واقعات کا جائزہ لینے کے لیے ایک خصوصی سیل قائم کیا جو اس نتیجے پر پہنچا کہ انٹیلی جنس ایجنسیاں جبری گمشدگیوں کے بہت سے واقعات کی ذمے دار نہیں۔ اس جائزے سے واقف ایک افسر کا کہنا ہے کہ &#39;لاپتہ کیے جانے کے 2000 سے زیادہ واقعات مجرمانہ اغوا سے متعلق تھے جبکہ لاپتہ ہونے والے سیاسی طور پر سرگرم لوگوں میں بیشتر نوجوان ہیں جو شدت پسندوں گروہوں کا حصہ بن کر اپنی مرضی سے زیرِ زمین جا چکے ہیں&#39;۔&nbsp;

یہ نتیجہ اس مسودہ قانون کو پارلیمان کے سامنے پیش کیے جانے کی راہ میں ایک بڑی رکاوٹ ہے۔ وزارت داخلہ کے ذرائع نے اس کی منظوری میں تاخیر کی وضاحت کرتے ہوئے کہا ہے کہ &#39;وزارت داخلہ فوج کی اس رائے سے اتفاق کرتی ہے کہ اس قانون کی وجہ سے انٹیلی جنس اداروں کے نام پر حرف آئے گا&#39;۔

دریں اثنا انسانی حقوق کی وزارت نے ایک اور تجویز پیش کی ہے کہ حکومت تمام افراد کو جبری گمشدگی سے تحفظ دینے کے عالمی کنونشن پر دستخط کر دے۔ وزارت کا خیال ہے کہ اس سے پاکستان پر اس مسئلے کی وجہ سے اقوام متحدہ اور دوسرے ممالک کی جانب سے پڑنے والے دباؤ کو کم کرنے میں مدد ملے گی۔&nbsp;

2001 &nbsp;سے اب تک پاکستان کے مختلف حصوں سے ہزاروں لوگ لاپتہ ہو چکے ہیں۔ حالیہ برسوں میں ایسی بیشتر گمشدگیاں سندھ اور بلوچستان سے ہوئیں۔&nbsp;

بلوچستان سے لاپتہ ہونے والے افراد کے اہلخانہ کی جانب سے قائم کردہ تنظیم &#39;دی وائس فار بلوچ مسنگ پرسنز&#39; کے مطابق اس صوبے سے اب تک مجموعی طور پر 6000 افراد غائب ہو چکے ہیں۔ تنظیم کا یہ بھی کہنا ہے کہ 2009 سے اب تک بلوچستان کے غیرآباد علاقوں سے 1400 لاپتہ بلوچوں کی مسخ لاشیں ملی ہیں۔

سندھ میں حکومت نے حال ہی میں متعدد سندھی قوم پرست تنظیموں پر پابندی عائد کی ہے یہاں گزشتہ چند برس میں 152 افراد لاپتہ ہو چکے ہیں۔ سندھ میں وائس فار مسنگ پرسنز کی شاخ کے مطابق ایسے بیشتر لوگ سیاسی کارکن تھے۔&nbsp;

تاہم حکومت کی جانب سے جبری گمشدگیوں کے معاملے پر قائم کردہ کمیشن کے چیئرمین جسٹس (ریٹائرڈ) جاوید اقبال ان دعووں سے اتفاق نہیں کرتے۔ انہوں نے حال ہی میں کہا ہے کہ ملک بھر میں لاپتہ افراد کی تعداد اس وقت 2141 ہے۔ انہوں نے سکیورٹی اداروں کے موقف کی تائید کرتے ہوئے یہ بھی کہا ہے &#39;ایسے بہت سے لوگ یا تو متشدد نظریات کے حامل مذہبی و فرقہ وارانہ اور سیاسی شدت پسند گروہوں کا حصہ بن چکے ہیں یا بیرون ملک منتقل ہو گئے ہیں۔&nbsp;

دوسری جانب انسانی حقوق کے کارکن سر عام سکیورٹی اور انٹیلی جنس اداروں کو جبری گمشدگیوں کا ذمہ دار قرار دیتے ہیں۔ ان کا کہنا ہے کہ اس دعوے کے حق میں کسی ثبوت کی ضرورت نہیں کیونکہ صرف وہی لوگ لاپتہ ہوتے ہیں جو یا تو ریاستی پالیسیوں سے اختلاف کرتے ہیں یا انہیں ایسی پالیسیوں کا مخالف تصور کیا جاتا ہے۔ ان کے مطابق تمام لاپتہ افراد کو چار درجوں میں تقسیم کیا جا سکتا ہے۔ ان میں سے ایک وہ ہیں جو براہ راست یا بالواسطہ طور پر بلوچستان میں علیحدگی کی تحریک سے وابستہ ہیں۔ دوسرے وہ ہیں جو کالعدم مذہبی و فرقہ وارانہ تنظیموں کا حصہ ہیں۔

تیسرے درجے میں ایسے لوگ آتے ہیں جو سندھی قوم پرست جماعتوں کے حامی یا کارکن ہیں اور چوتھے درجے میں آنے والے لوگ لبرل اور بائیں بازو کے نظریات کے حامی ہیں۔&nbsp;

جبری گمشدگیوں کے واقعات میں انٹیلی جنس ایجنسیوں کے مبینہ کردار کو مدنظر رکھتے ہوئے قانون دان اور انسانی حقوق کے کارکن پی ٹی آئی کی حکومت سے یہ توقع نہیں رکھتے کہ وہ لاپتہ افراد یا ان کے اہلخانہ کی کوئی مدد کرے گی۔ سپریم کورٹ کے وکیل سلمان اکرم راجہ سمجھتے ہیں کہ اگر حکمران جماعت جبری گمشدگیوں کے مسئلے پر سنجیدگی سے کچھ کرنا چاہتی ہے تو پھر اسے کوئی نیا قانون لانے کی بھی ضرورت نہیں ہے۔ اس معاملے پر سجاگ سے بات کرتے ہوئے ان کا کہنا ہے کہ &#39;پاکستان پینل کوڈ کے تحت یہ گمشدگیاں پہلے ہی ایک جرم ہیں۔ ایسے تمام واقعات اغوا سے متعلق قوانین کی ذیل میں آتے ہیں&#39;۔&nbsp;

اپنا ہی تیار کردہ مسودہ قانون پارلیمان سے منظور کرانے میں حکومت کی ہچکچاہٹ کے حوالے سے ان کا کہنا ہے کہ &#39; اتنی تاخیر کا مطلب یہ ہے کہ حکومت اس معاملے میں سنجیدہ نہیں ہے۔ بصورت دیگر یہ قانون دو سال سے اس طرح نہ پڑا ہوتا&#39;۔&nbsp;

سپریم کورٹ کی وکیل اور انسانی حقوق کمیشن آف پاکستان (ایچ آر سی پی) کی چیئرپرسن حنا جیلانی لگی لپٹی رکھے بغیر کہتی ہیں کہ پی ٹی آئی کی حکومت جبری گمشدگیوں کے معاملے میں بے بس ہے۔ ان کا کہنا ہے کہ &#39;حکومت کے پاس کبھی اس مسئلے سے نمٹنے کا اختیار تھا ہی نہیں کیونکہ۔ اس معاملے کو فوج اور اس کے انٹیلی جنس ادارے ہی دیکھتے ہیں&#39;۔&nbsp;

سجاگ کے ساتھ فون پر بات چیت کرتے ہوئے حنا جیلانی کہتی ہیں مسئلہ یہ نہیں کہ آیا ہمیں جبری گمشدگیوں کے معاملے پر کوئی مخصوص قانون درکار ہے یا نہیں بلکہ اصل مسئلہ یہ ہے کہ آیا انٹیلی جنس ادارے ہمارے قانونی اور عدالتی نظام کے دائرے میں آتے بھی ہیں یا نہیں۔ وہ کہتی ہیں کہ &#39;ہمیں ایسا نظام بنانے کی ضرورت ہے جہاں فوج اور اس کے انٹیلی جنس اداروں کو ہر کام کی کھلی چھوٹ نہ ہو بلکہ وہ منتخب حکام کے سامنے جواب دہ ہوں&#39;۔&nbsp;

یہ رپورٹ لوک سجاگ نے پہلی دفعہ&nbsp;1 فروری 2021&nbsp;&nbsp;کو اپنی پرانی ویب سائٹ پر شائع کی تھی۔

عمر فاروق

راولپنڈی کو پانی فراہم کرنے کے لیے ددہوچھہ ڈیم کی تعمیر: 'یہ منصوبہ ہمارا معاشی گلہ گھونٹنے کے مترادف ہے'۔

اسلام آباد میں پانی کی قلت: 'اگر موجودہ بوسیدہ نظام کو جلد درست نہ کیا گیا تو صورتِ حال بدتر ہو جائے گی'۔

طلاق ایکٹ: مسیحی عورتوں کے لیے موت کا پھندا

کوئی امید بر نہیں آتی: جبری گمشدگیوں کے خاتمے کے لیے درکار قانون سرکاری راہداریوں میں کیسے کھو گیا۔