افغانستان کی جگہ بلوچستان اب دنیا میں افیون کی پیداوار کا سب سے بڑا مرکز بنتا جا رہا ہے۔ یہ دعوی برطانوی اخبار دی ٹیلی گراف کی ایک حالیہ رپورٹ &nbsp;میں کیا گیا ہے۔

رپورٹ میں اس خدشے کا اظہار بھی کیا گیا ہے افیون سے حاصل ہونے والے لاکھوں ڈالر انتہا پسند گروپوں کے ہاتھ لگ کر خطے کو مزید خطرات سے دو چار کر سکتے ہیں۔

بلوچستان اسمبلی کے ممبر میر زابد علی ریکی نے لوک سجاگ سے بات کرتے ہوئے اس بات کی توثیق کی ان کی اطلاعات کے مطابق بھی اس برس بلوچستان میں افیون کی کاشت میں بہت زیادہ اضافہ ہوا ہے۔ بلوچستان میں حزب مخالف جمعیت علماء اسلام کی جانب سے واشک سے منتخب ہونے والے میر زابد نے یہ معاملہ صوبائی اسمبلی میں بھی اٹھایا تھا جس کے ردعمل میں میں حکومتی ارکان نے یقین دہانی کروائی تھی کہ وہ صوبے میں پوست کی کاشت کو برداشت نہیں کریں گے۔ ساتھ ہی انہوں نے اپوزیشن سے درخواست کی تھی کہ وہ پوست کے کھیتوں کی نشاندہی میں حکومت کی مدد کرے۔

<h3>سٹیلائٹ سے سب صاف نظر آ رہا ہے</h3>

دی ٹیلی گراف نے البتہ جغرافیائی ڈیٹا جمع کرنے والی کمپنی الکسس (Alcis) کی سیٹلائٹ ٹیکنالوجی کی مدد سے بلوچستان میں پوست کے بہت سے کھیتوں کی نشاندہی کر کے اپنی رپورٹ میں ان کی تصاویر شائع کر دی ہیں۔

ان کے مطابق بلوچستان کے صرف دو علاقوں میں کیے گئے ایک محدود سروے میں معلوم ہوا کہ وہاں 20 ہزار 15 ایکڑ رقبے پر پوست اُگائی جا رہی ہے جو افغانستان کے دو تہائی صوبوں میں پھیلی موجودہ 19 ہزار 763 ایکڑ کاشت سے بھی زیادہ ہے۔ اس سٹیلائٹ سروے کے مطابق بعض مقامات پر &nbsp;کئی کھیتوں کے 70 فیصد حصے پر صرف پوست نظر آ رہی ہے۔

رپورٹ نے افغانستان کی افیون تجارت کے ماہر ڈیوڈ مینسفیلڈ کے حوالے سے لکھا ہے کہ پاکستان رواں سال پوست کی کاشت میں افغانستان کو کہیں پیچھے چھوڑ دے گا۔ 
&quot;یہاں کئی کھیت 12 ایکڑ سے بھی بڑے ہیں اور کئی کھیت آبادی کے بالکل نزدیک ہیں جو یہ ظاہر کرتا ہے کہ اس کی کاشت کنٹرول سے باہر ہو رہی ہے۔ ایسی صورت حال تو افغانستان میں بھی کبھی نہیں دیکھی گئی۔&quot;

دی ٹیلی گراف کے مطابق کابل میں امریکی حمایت یافتہ حکومت کے زمانے میں یورپ میں 95 فیصد افیون افغانستان سے سمگل ہو کر جا رہی تھی تاہم طالبان نے اقتدار سنبھالتے ہی پوست کی کاشت پر پابندی لگادی تھی۔

مینسفیلڈ کے مطابق 2023ء میں افیون کی قیمت ایک ہزار 50 ڈالر فی کلو گرام تھی جو اب کم ہو کر 370 ڈالر تک آ گئی ہے اور اس کی ایک وجہ پاکستان میں اس کی پیداوار میں اضافہ ہے جس کے باعث اس کی رسد خاصی بڑھ گئی ہے اور قیمت نیچے آ گئی ہے۔

<h3>&#39;اب تو لوگوں نے پچھلے صحن میں بھی پوست کاشت کر رکھی ہے&#39;</h3>

دی ٹیلی گراف نے بلوچستان میں پوست کی کاشت میں اضافے کا الزام افغان کسانوں پر دھرا ہے۔ اس کے مطابق افغانستان میں پوست کی کاشت پر پابندی کے بعد افغان کسان سرحد پار بلوچستان آ گئے ہیں۔ یہ کسان بارڈر پر باڑ لگنے کے باوجود یہاں آتے جاتے ہیں اور یا تو مقامی زمینداروں سے زمین ٹھیکے پر لیتے ہیں یا بطور شراکت دار یہ فصل کاشت کرتے ہیں۔&nbsp;

بلوچستان کے ایک ریسرچ سکالر اس سے اتفاق نہیں کرتے۔ انہوں نے نام ظاہر نہ کرنے کی شرط پر لوک سجاگ کو بتایا کہ بلوچستان کے سرحدی علاقے میں پہلے بھی پوست کاشت ہوتی تھی لیکن پچھلے دو سال سے اس میں بہت زیادہ اضافہ ہوا ہے۔ اب گلستان کے علاوہ قلعہ سیف اللہ کے سرحدی ایریا، چمن، نوشکی اور لورالائی کے کچھ علاقوں میں بھی پوست کاشت ہو رہی ہے۔&nbsp;

وہ کہتے ہیں کہ افغان کسان زمینیں ٹھیکے پر لے کر یا حصے پر پوست کاشت نہیں کر رہے ہیں۔ &quot;یہ درست ہے کہ افغانوں کو اس کی کاشت کا زیادہ تجربہ ہے مگر بیشتر افغان یہاں بطور کھیت مزدور ہی کام کرتے ہیں۔&quot;

ان کے بقول سولر ٹیوب ویل نے جہاں بلوچستان کے کئی علاقوں میں زراعت کو ممکن بنایا ہے وہیں اس سے پوست کی کاشت کو بھی بڑھاوا ملا ہے۔

&quot;اب تو جس کے پاس گھر کے پیچھے صحن (بیک یارڈ) میں تھوڑی سی زمین ہے اس نے بھی وہاں پوست کاشت کر رکھی ہے۔&quot;

<h3>لٹ رہا ہے کارواں، پاسباں کہاں گئے</h3>

ریسرچ سکالر نے اس بات پر تاسف کا اظہار کیا کہ یہ سب کچھ سکیورٹی ایجنسیز کی ناک کے نیچے ہو رہا ہے۔

&quot;کرپٹ اہلکار ان علاقوں سے بھتہ لیتے ہیں۔ اینٹی نارکوٹکس فورس والے سالانہ آپریشن کے نام پر کسی غریب کسان کی فصل تلف کر کے تصاویر بنوا کر چلے جاتے ہیں اور پھر سب ویسے ہی جاری رہتا ہے۔&quot;

دی ٹیلی گراف نے ایک افغان مہاجر کسان کے حوالے سے لکھا ہے کہ مقامی لوگوں کو حصہ دیے بغیر ان کے لیئے زمین حاصل کرنا اور پوست اگانا ممکن نہیں ہے کیونکہ وہ (مقامی لوگ) علاقے کی ملیشیا کو بھی جانتے ہیں۔

&quot;ہمیں اپنی پیداوار کھیتوں سے آگے بھیجنے کے لیے قانون نافذ کرنے والے اداروں کے اہلکاروں کو رقم دینی پڑتی ہے۔&quot;&nbsp;

ٹیلی گراف کو ایک افغان کسان نے بتایا کہ بلوچستان کے بیشتر کسان مویشی پال ہیں اور وہ زراعت اور پھر پوست کی کاشت کے طریقہ کار کے بارے میں بالکل نہیں جانتے۔ پوست کو کاشت کرنا اور اس کے ڈوڈوں پر کٹ لگا کر ان سے رسنے والا مواد اکٹھا کرنا خاصا پیچیدہ کام ہے جو اس کا علم اور تجربہ رکھنے والے افراد ہی کر سکتے ہیں۔ 
ایک اور مقامی کسان نے دی ٹیلی گراف کو بتایا کہ انہوں نے پہلی بار اس سال پوست کی کاشت کی ہے۔

&quot;کچھ افغان میرے واقف ہیں جو اس کی کاشت کا طریقہ جانتے ہیں لیکن مجھے اس کا کوئی علم و تجربہ نہیں، اس لیے میری پیداوار علاقے کے دیگر کسانوں سے کم ہے۔&quot;

<h3>بارود کے ڈھیر پر بیٹھا بلوچستان</h3>

ممبر بلوچستان اسمبلی میر زابد فکرمند ہیں کہ پوست کی کاشت میں اضافہ کے نتیجے میں مقامی سطح پر اس کی دستیابی ارزاں اور عام ہو جائے گی جو بلوچستان کے نوجوانوں میں نشے کی علت کو بڑھائے گی اور انہیں تباہی کی جانب لے جائے گی۔&nbsp;

ان کا مطالبہ ہے کہ حکومت اس کاروبار میں معاون سرکاری اہلکاروں کے خلاف کاروائی کرے اور &nbsp;پوست اگانے والوں بلکہ اس کی کاشت کے لیے اپنی زمین ٹھیکے پر دینے والوں کو بھی سخت سزا دے۔

عالمی ماہرین اس معاملے کو علاقائی کشیدگی سے بھی جوڑ رہے ہیں۔ &nbsp;&nbsp;

رپورٹ میں کینیڈا کے تھنک ٹینک ایشیا پیسیفک فاؤنڈیشن کے سینیئر فیلو مائیکل کوگل مین نے کہا ہے کہ بلوچستان تو عام حالات میں بھی بارود کے ڈھیر پر بیٹھا دکھائی دیتا ہے کیونکہ یہاں نسلی مزاحمت کار اور شدت پسند گروہ سرگرم رہتے ہیں۔ اب تو اس صوبے میں حساس تنصیبات اور بڑے پیمانے پر چینی سرمایہ کاری کے منصوبے بھی موجود ہیں۔&nbsp;

&quot;ایسے میں منشیات کا دھندہ سکیورٹی خطرات کو مزید بڑھا دیتا ہے۔&quot;

ڈیوڈ مینسفیلڈ کہتے ہیں &nbsp;کہ منشیات کے کاروبار سے حاصل ہونے والا منافع مسلح گروہوں کو جاتا ہے جو بلوچستان میں سمگلنگ اور تجارت کے بڑے راستوں پر قابض ہیں۔ 
&quot;لوگ بلوچستان کو نیا افغانستان قرار دیتے ہیں جو مسلح گروپوں کی موجودگی کے باعث واقعی بے قابو علاقہ ہے۔&quot;

رپورٹ کے مطابق پاکستانی حکومت نے اس معاملے پر کوئی ردعمل نہیں دیا۔

بلوچستان 'ایک نیا افغانستان': افیون کی کاشت میں اچانک بے تحاشا اضافہ کیا گل کھلائے گا؟

text

قابل تجدید توانائی کی طرف تیزی سے منتقل ہوتا پاکستان دنیا کی چھٹی سب سے بڑا سولر انرجی مارکیٹ بن چکا ہے جس نے بین الاقوامی توجہ حاصل کر لی ہے ۔ کوئی اسے انقلابی تبدیلی تو کوئی معجزہ کہہ رہا ہے، ورلڈ اکنامک فورم نے اس پیشرفت کو &#39;ترقی پذیر ممالک کے لیے اہم سبق&#39; قرار دیا۔

پاکستان نے گذشتہ چار سال کے دوران لگ بھگ چار ارب ڈالر کے سولر پینلز درآمد کیے ہیں۔ بلومبرگ کی پچھلے نومبر کی رپورٹ بتاتی ہے کہ صرف 2024ء میں چین سے مجموعی طور پر تقریباً دو ارب ڈالر کی سولر مصنوعات منگوائی گئیں۔

&quot;اس مالی سال کے پہلے نو ماہ میں چین سے 1.7 ارب ڈالر کے شمسی آلات کی حیران کن خریداری کی گئی جو 17 گیگا واٹ کی پیداوار کے مساوی اور مجموعی ملکی پیداواری صلاحیت کے ایک تہائی سے زیادہ بنتی ہے۔&quot;&nbsp;

بعض ماہرین اس بے مثال تبدیلی کا سبب چینی مصنوعات پر امریکی پابندیوں، کچھ ماحولیاتی تحفظ کے لیے عالمی کوششوں اور بعض حکومتی پالیسیوں میں ڈھونڈ دے رہے ہیں۔

تاہم حقیقت یہ ہے کہ پاکستان میں سولرائزیشن کو فروغ کسی ایک وجہ سے نہیں ملا بلکہ ملک میں مہنگی بجلی سمیت کئی عوامل نے مل کر نئے منظرنامے کی تشکیل میں کردار ادا کیا ہے۔

<h3>آسمان کو چھوتے بل: ہم کپیسٹی پیمنٹس کے گرداب میں کیسے پھنسے؟</h3>

پچھلے عشرے میں بجلی کے سنگین بحران کے باعث ملک اندھیروں میں ڈوبا ہوا تھا۔ اس مسئلے سے نمٹنے کے لیے عجلت میں درآمدی ایندھن (کوئلہ، ایل این جی، ڈیزل وغیرہ) پر چلنے والے تھرمل پلانٹس متعارف کرائے گئے جو بعد میں یہ خود مسئلہ بن گئے۔

نئے بجلی گھروں میں سے بیشتر غیر ملکی سرمایہ کاری سے لگائے گئے ان منصوبوں کو ریاست کی جانب سے مکمل تحفظ کی ضمانت (sovereign guarantees) دی گئی تھی۔ ان معاہدوں کی تمام ادائیگیاں ڈالر سے منسلک رکھی گئی تھیں اور ان میں &#39;ٹیک اور پے&#39; &nbsp;(take or pay)کی شرط بھی شامل تھی۔

جس کا مطلب یہ ہے کہ بجلی کی کھپت ہو یا نہ ہو، ان پلانٹس کو ہر حال میں ان کی پیداواری صلاحیت کے برابر ادائیگی (کیپیسٹی پیمنٹس) کی جاتی رہے گی اور کیونکہ ان معاہدوں کی ضامن ریاست پاکستان ہے اس لیے اگر یہ ادائیگیاں شرائط کے مطابق نہ کی گئیں تو دنیا میں پاکستان کو دیوالیہ تصور کیا جائے گا جس سے ملکی معیشت اور ساکھ کو ناقابل تلافی نقصان پہنچے گا۔

رینیوایبل فرسٹ اور ہیرالڈ اینالیٹکس کی رپورٹ &nbsp;&#39;دی گریٹ سولر رش&#39; کے مطابق کیپیسٹی پیمنٹس کا مسئلہ اس وقت مزید گھمبیر ہوا جب ملک میں بجلی کی پیداواری صلاحیت تقریباً 45 ہزار میگاواٹ تک جا پہنچی جبکہ طلب 30 ہزار میگاواٹ سے آگے نہیں بڑھی۔ گویا ہمیں 30 ہزار میگاواٹ بجلی خرچ کر کے 45 ہزار کی قیمت چکانی پڑی یہ اضافی بوجھ ظاہر ہے صارفین پر ہی پڑا۔

پھر 2021ء کے بعد ڈالر کے مقابلے میں روپیہ کی قدر بہت زیادہ گری اب کیپسٹی پیمنٹ کیونکہ ڈالروں میں کی جاتی ہے اس لیے روپے میں بجلی مزید مہنگی ہو گئی اور تین سال میں اس کے نرخ 155 فیصد سے زیادہ بڑھ گئے۔

<h3>نیٹ میٹرنگ پالیسی اور مراعاتی سکیموں نے ہی شمسی توانائی کو &#39;طلوع&#39; کیا</h3>

بجلی بحران کے دوران 2015ء میں حکومت نے نیٹ میٹرنگ شروع کرنے کا فیصلہ کیا جس کا ہدف شہریوں کو شمسی توانائی میں سرمایہ کاری کی طرف راغب کرنا تھا۔ اس کے دو مقاصد تھے۔ ایک تو مہنگی تھرمل بجلی پر انحصار کم کرکے زرمبادلہ بچانا اور دوسرا بڑھتی ہوئی ماحولیاتی آلودگی پر قابو پانا۔

نیٹ میٹرنگ پالیسی پر 2017ء میں عمل شروع ہوا جس کے تحت صارفین کو چھوٹے پیمانے پر قابل تجدید توانائی کے سسٹمز لگانے کی اجازت دی گئی۔ بعدازاں25 کلو واٹ سے کم سسٹمز کو جنریشن لائسنس کی شرط سے مستثنیٰ قرار دے دیا گیا۔ اس کے نتیجے میں صارف خود پیدا کنندہ بھی بن گئے۔&nbsp;

توانائی اور ماحولیات پر کام کرنے والے ادارے رینیوایبل فرسٹ &nbsp;کے مطابق نیٹ میٹرنگ کے ضوابط کے تحت منظور شدہ لوڈ سے ڈیڑھ گنا تک کا سولر سسٹم لگانے کی اجازت نے مالی فوائد کو مزید بہتر کیا۔ اس کی بدولت صارف کی لاگت صرف دو سے چار سال میں واپس آ جاتی ہے۔

صرف نیٹ میٹرنگ پالیسی ہی نہیں سولر توانائی کے فروغ میں حکومتی مراعاتی سکیموں نے بھی اہم کردار ادا کیا۔&nbsp;

سٹیٹ بینک آف پاکستان نے 2016ء میں قابل تجدید توانائی کے لیے فنانسنگ سکیم شروع کی جس میں چھ ارب روپے تک کے منصوبوں کو چھ فیصد مارک اپ پر12 سال کے لیے قرضے دیے گئے۔ اس رقم سے دو ہزار600 سے زائد منصوبوں کے لیے سرمایہ فراہم کیا گیا۔

&quot;ستمبر 2024ء تک پاکستان کی آن گرڈ نیٹ میٹرنگ کے تحت شمسی توانائی کی مجموعی گنجائش تقریباً 3.2 گیگاواٹ تک پہنچ چکی تھی، یہ تخمینہ ہے اصل اس سے کہیں زیادہ ہو سکتا ہے۔&quot;&nbsp;

<h3>چین امریکہ کشمکش: دو ہاتھیوں کی لڑائی میں ہمارا بھلا کیسے ہوا؟</h3>

چین سولر سازی یا پولی سلیکون کی پیداوار کا سب سے بڑا مرکز ہے۔ دنیا کو 80 فیصد سے زائد پینلز یا ان کے پارٹس چین ہی سپلائی کرتا ہے۔امریکا اور یورپی ممالک کی سولر درآمدات کا انحصار چین پر رہا ہے۔

&nbsp;ساؤتھ ایشیا پیس ایکشن نیٹ ورک (ساپن نیوز) کی ایک رپورٹ کے مطابق چین کووڈ کے دوران امریکا میں سولر کی بڑھتی مانگ کو پورا کرنے میں ناکام رہا جبکہ دنیا میں اس وقت فوسل فیول(پٹرولیم، کوئلہ وغیرہ) کے استعمال میں کمی پر زور دیا جا رہا تھا۔

اس دوارن وہاں 2022ء اور 2024ءکے درمیان سولر ریٹ تین گنا بڑھ گئے۔ اس کی دو وجوہات تھیں، پہلی وجہ ایک بڑی چینی فیکٹری کی مرمت کے لیے بندش تھی اور دوسری سنکیانگ سے آنے والی مصنوعات پر امریکی پابندیاں تھیں۔

کچھ عرصہ بعد چین میں بند فیکٹری چل پڑی اور وہاں ایک نئی سولر فیکٹری نے بھی پیداوار شروع کر دی جبکہ امریکی پابندیاں برقرار رہیں۔ چین کی پیداوار اور ان پابندیوں کے باعث سولر ریٹ انتہائی کم سطح پر آ گئے جس کا فائدہ ایشیائی ممالک خاص طور پر بھارت اور پاکستان کو ہوا۔

&quot;پاکستان نے اس صورت حال کا سب سے زیادہ فائدہ اٹھایا۔ یہاں 2022ء تک سولر اپنانے کا رحجان باقی ممالک کے برابر تھا لیکن 2024ء میں یہ دنیا کی چھٹی بڑی سولر مارکیٹ بن گیا۔ اس کی بنیادی وجہ چینی پینلز کی غیرمتوقع اضافی سپلائی ہے۔&quot;&nbsp;

پاکستان میں نیٹ میٹرنگ صارفین کی تعداد اب دو لاکھ 83 ہزار سے بڑھ چکی ہے جن کی نصب شدہ سولر صلاحیت چار ہزار 124 میگاواٹ بتائی جا رہی ہے۔ لاکھوں آف گرڈ سولر صارفین ان کے علاوہ ہیں۔ یعنی وہ افراد جو نیٹ میٹرنگ کے بغیر سولر پینلز سے براہِ راست بجلی حاصل کر رہے ہیں جیسے زرعی صارفین سولر کے ذریعے ٹیوب ویل چلا رہے ہیں۔

<h3>نئی پالیسی: سولر نے بجلی سیکٹر کے انجرپنجر کو ہلا کر رکھ دیا ہے&nbsp;</h3>

توانائی کے سیکٹر کا سب سے بڑا مسئلہ بجلی کی پیداواری صلاحیت (انسٹالڈ کپیسٹی) کے مقابلے میں کھپت کا کم ہونا تھا۔ اب کیونکہ صارفین نے سولر کے ذریعے خود بے تحاشا بجلی پیدا کرنی شروع کردی ہے تو ایک طرف بجلی کی پیداوار بڑھ گئی ہے اور دوسری طرف بجلی کمپنیوں کی آمدن بھی کم ہو گئی ہے لیکن کیپسٹی پیمنٹس کا عفریت نہ صرف جوں کا توں موجود ہے بلکہ دن بدن زیادہ دہشتناک ہوتا جا رہا ہے۔ &nbsp;

اس صورت حال میں حکومت نے چند روز قبل نئی سولر پالیسی کا اعلان کیا ہے جس کے تحت اب نئے نیٹ میٹرنگ صارفین سے سولر بجلی 10 روپے یونٹ خریدی جائے گی۔اس سے قبل ڈسٹری بیوشن کمپنیاں نیٹ میٹرنگ صارفین سے 27 روپے یونٹ بجلی خرید رہی ہیں۔

وفاقی وزیر برائے توانائی اویس لغاری کہتے ہیں کہ حکومت شمسی توانائی کی حوصلہ شکنی نہیں کررہی بلکہ سولر سے ہر سال ایک ہزار 200 میگاواٹ بجلی کی توقع کر رہی ہے۔

وہ دعویٰ کرتے ہیں کہ نیٹ میٹرنگ کی نئی پالیسی کے باوجود سولر لگانے والے ساڑھے تین سے چار سال میں اپنا پیسہ وصول کرلیں گے۔

عارف حبیب لمیٹڈ کے ڈپٹی ریسرچ ہیڈ راؤ عامر علی &nbsp;سمجھتے ہیں کہ نئی پالیسی سے پیسہ وصولی کی مدت (پے بیک پیریڈ) دس سے پندرہ سال ہو جائے گی۔&nbsp;

تاہم رینیوایبل فرسٹ کے ماہرین کا ماننا ہے کہ سولر انرجی پر لاگت اور گرڈ بجلی کے ریٹ میں اتنا فرق ہے کہ نیٹ میٹرنگ سے نیٹ بلنگ کی پالیسی ہو یا خریداری (بائی بیک ریجیم) کا مکمل خاتمہ کر دیا جائے، تب بھی سولر کی اقتصادی کشش برقرار رہے گی اور سرمایہ واپسی کا عرصہ پانچ سال سے کم رہنے کا امکان ہے۔

وہ کہتے ہیں کہ ملک میں گرڈ بجلی کی طلب میں نمایاں کمی آئی ہے اس لیے طلب و رسد کے تخمینوں پر نظرثانی کرنا ہوگی۔ قابل تجدید توانائی کے ذرائع کو اپنانے اور گرڈ کی جدیدکاری کے لیے حکمت عملی میں تبدیلیاں ناگزیر ہو چکی ہیں۔

طویل لوڈ شیڈنگ سے دنیا کی چھٹی بڑی سولر مارکیٹ بننے کا سفر: کیا نئی پالیسی سے 'سولر سونامی' تھم جائے گا؟

Families in Khyber Pakhtunkhwa have tirelessly searched for missing loved ones, but even after years, they are left without answers. Explore the struggles and pleas for information from affec

Khyber Pakhtunkhwa's Missing Persons: Families Searching for Answers for Years

خیبر پختونخوا: لاپتہ پیاروں کے قصیدے اب نوحے بن گئے ہیں

video

The atmosphere in Narang Mandi has become tense due to rising communal tensions over the past few months. Local residents urge immediate government intervention to prevent further escalation

Tension Escalates in Narang Mandi: Urgent Government Action Needed to Address Communal Strife

15 فروری 2024ء کو ضلع شیخوپورہ کے محمد طیب مقصود نامی شہری نے تھانہ نارنگ منڈی میں توہین صحابہ کی ایک ایف آئی آر درج کرائی جس کے مطابق چھ افراد نے ایک نجی محفل میں بیٹھ کر صحابہ کرام کے خلاف نامناسب الفاظ استعمال کیے اور پھر ان میں سے ایک نے اس کی ویڈیو بنا کر وٹس ایپ سٹیٹس لگا دیا۔ یہ واقعہ 12 فروری کو ہوا اور وڈیو جلد ہی وائرل ہو گئی۔ مدعی مقدمہ نے موقف اختیار کیا اس سے مسلمانوں کی دل آزاری ہوئی اور وہ شدید غصے میں ہیں لہذا ملزمان کے خلاف سخت کارروائی کی جائے تاکہ علاقے کا امن و امان برقرار رکھا جا سکے۔

پولیس نے تعزیرات پاکستان کی دفعہ 298 اے کے تحت مقدمہ درج کرتے ہوئے چار ملزمان کو گرفتار کر لیا جبکہ دو ملزمان ابھی تک روپوش ہیں۔ گرفتار نہ ہوسکنے والوں میں سے ایک پر پہلے بھی اس طرح کے مقدمات درج ہو چکے ہیں۔

ملزمان کا تعلق اہل تشیع مسلک سے ہے جبکہ مدعی دیوبند فرقے سے تعلق رکھتا ہے۔

اس واقعے کے دو ماہ بعد 12 اپریل کو اسی تھانے میں تحریک لبیک کے مقامی رہنما اویس مختار کی مدعیت میں اسی نوعیت کی ایک اور ایف آئی آر درج ہوئی ہے۔ اس میں بھی نامزد ملزم اہل تشیع مسلک سے ہے جبکہ گواہ مسلک دیوبند کے رہنما طیب مقصود ہیں جو 12 فروری والی ایف آئی آر کے مدعی تھے۔

اس کے تین دن بعد تحریک لبیک پاکستان کے رہنما سید قمر الدین شاہ کی مدعیت میں ایک اور مقدمہ درج ہوا جس کے متن کے مطابق ایک اور ملزم نے 12 اپریل کو سوشل میڈیا پر شیئر ہونے والے گستاخانہ مواد کی ناصرف تشہیر اور حمایت کی بلکہ اس قسم کے واقعات پر مقدمات درج کیے جانے پر بھی تنقید کی۔

بات یہیں پر نہیں تھمی بلکہ 20 اور 25 اپریل کو ایسے واقعات پر نارنگ منڈی تھانے میں مزید مقدمات درج ہوئے جن میں دیو بندی مسلک اور تحریک لبیک کے رہنما یا تو مدعی ہیں یا گواہ۔ ان واقعات نے تحریک لبیک کی قیادت اور مسلک دیوبند کے سرگرم افراد کو اکٹھا کر دیا ہے۔ مقامی ذرائع کے مطابق انھوں نے معاہدہ کیا ہے کہ ایسے واقعات کی روک تھام کے لیے وہ مل کر اقدامات اٹھائیں گے۔

پولیس ریکارڈ کے مطابق نارنگ منڈی میں دفعہ 298 اے کے تحت پہلا مقدمہ 2010ء میں اور پھر ایک اس سے اگلے سال درج ہوا تھا۔ ان دونوں مقدمات میں مدعی کا تعلق دیوبند مسلک سے تھا اور ان کے ملزمان گرفتاری کے بعد چند ماہ جیل رہے لیکن پھر دیوبند مسلک کی ضلعی قیادت نے فریقین کے درمیان صلح کرا دی اور معاملہ ختم ہو گیا۔

ناموس امہات المومین، اہل بیت، خلفائے راشدین اور صحابہ کرام سے متعلق دفعہ 298 اے کو تعزیراتِ پاکستان میں 1980ء میں جاری کیے گئے ایک ترمیمی آرڈینینس کے ذریعے شامل کیا گیا تھا جس میں مجرمان کے لیے تین سال قید، جرمانہ یا دونوں کی سزا رکھی گئی تھی۔ 2020ء میں قومی اسمبلی میں سزا کو عمر قید یا کم از کم دس سال تک بڑھانے کے لیے ایک ترمیمی بل پیش کیا گیا جو جنوری 2023ء میں منظور ہوا جس کے بعد اگست میں اسے سینیٹ نے بھی منظور کر لیا لیکن اسے صدر نے حتمی منظوری نہیں دی اور اس پر دوبارہ غور کرنے کے لیے اسے پارلیمنٹ کو واپس بھیج دیا۔

ابتدائی دو واقعات کے بعد نارنگ منڈی میں ان مقدمات کا سلسلہ 2020ء میں دوبارہ شروع ہوا، اس سال شہر میں اس نوعیت کے دو مقدمات درج ہوئے۔ پھر 2022ء میں دو اور 2023ء میں ایک اور مقدمہ درج ہوا۔ ان تمام کے ملزمان گرفتاری کے بعد ضمانت پر ہیں اور ان کے خلاف مقدمات زیرِ سماعت ہیں۔

2024ء میں ان واقعات میں اچانک تیزی آ&nbsp; گئی ہے اور صرف اپریل کے مہینے میں ہی پانچ مقدمات درج ہو چکے ہیں۔

<h2>امن کمیٹی اور تحریک لبیک کے متوازی اجلاس کیا رنگ لائیں گے؟</h2>

2010ء اور 2011ء کے ابتدائی واقعات کے بعد ان کی مستقل روک تھام اور بین المسالک ہم آہنگی قائم کرنے کے لیے نارنگ کے شہریوں نے ایک امن کمیٹی تشکیل دی تھی جس میں تمام مسالک، انجمن تاجران اور سول سوسائٹی کے نمائندوں کو شامل کیا گیا تھا۔ یہ کمیٹی دس سال ان واقعات کی روک تھام کرنے میں موثر رہی لیکن اب ایسا لگتا ہے کہ صورت حال اس کے بس سے باہر ہوتی جا رہی ہے۔

حالیہ واقعات کے تناظر میں امن کمیٹی کی مجلس عاملہ کا اجلاس 25 اپریل 2024ء کو منعقد ہوا جس میں تمام مسالک کے نمائندوں نے شرکت کی۔ اطلاعات کے مطابق اس اجلاس میں سوال اٹھایا گیا کہ توہین صحابہ کے حوالے سے واقعات میں زیادہ تر اہل تشیع مسلک سے تعلق رکھنے والے افراد ہی کیوں شامل ہوتے ہیں جس پر مسلک اہل تشیع کے اکابرین نے نہ صرف ایسے واقعات کی مذمت کی بلکہ ان کی روک تھام کے لیے دیگر تمام مسالک، پولیس، سکیورٹی اداروں اور انتظامیہ کے ساتھ مکمل تعاون کی یقین دہانی بھی کرائی۔

یہاں پر یہ تجویز بھی سامنے آئی کہ تمام مسالک کے تین تین افراد اور امن کمیٹی کی مجلس عاملہ پر مشتمل ایک کمیٹی تشکیل دی جائے جو ایک ہفتہ میں فرقہ واریت کی روک تھام،گزشتہ واقعات پر لائحہ عمل اور آئندہ ایسے واقعات کے سدباب پر تجاویز تیار کرکے لائے۔

امن کمیٹی کے اجلاس کے دس روز بعد 5 مئی کو شہر میں ایک اور اجلاس تحریک لبیک پاکستان کے مرکزی دفتر میں کیا گیا جس میں اہل تشیع کے علاوہ باقی تمام مسالک، تحریک لبیک لاہور ڈویژن اور تحریک لبیک ضلع شیخوپورہ کے نمائندوں نے شرکت کی۔

اطلاعات کے مطابق اس روز شہر میں حالات کی کشیدگی کو دیکھتے ہوئے حساس اداروں کے افسران بھی اس اجلاس میں شریک ہوئے جبکہ سب ڈویژنل پولیس آفیسر (ایس ڈی پی او) مرید کے سرکل ڈی ایس پی طاہر صدیق خصوصی طور پر یہاں آئے اور تھانہ نارنگ منڈی میں موجود رہے۔

اس اجلاس میں تحریک لبیک پاکستان کے ضلعی امیر چوہدری شاہد گجر نے زور دیا کہ ملزمان کو لگام ڈالی جائے اور اگر پولیس اور سکیورٹی ادارے اس حوالے سے تعاون نہیں کریں گے تو سب کچھ جام کرکے شدید احتجاجی مظاہرہ کیا جائے گا۔

اجلاس میں مسلک اہلسنت، دیوبند اور اہلحدیث کے علماء پر مشتمل کمیٹی بنانے کا کہا گیا جو آئندہ ہونے والے ایسے واقعات پر تصدیق اور تحقیق کرکے فیصلہ کریں گے کہ کیا لائحہ عمل اختیار کیا جائے۔

ابھی یہ اجلاس جاری تھا کہ شہر میں صحابہ اکرام کی شان میں گستاخی کا ایک اور واقعہ رپورٹ ہوا جس پر پولیس نے فوری ایکشن لیتے ہوئے ملزم کو گرفتار کرلیا اور ڈی پی او شیخوپورہ بلال ظفر شیخ نے 13 ایم پی او کے تحت ملزم کو جیل بھیج دیا۔

تحریک لبیک کے اجلاس کے کچھ دیر بعد اسی روز نارنگ امن کمیٹی کا بھی اجلاس منعقدہ ہوا جس میں اہل تشیع مسلک کے نمائندوں نے تحریک لبیک کے دفتر میں ہونے والے اجلاس کے لیے انہیں نظر انداز کرنے پر شدید احتجاج کیا۔

ان مسلک کے اکابرین کا کہنا تھا کہ بہتر ہوتا ہے کہ شہر میں جاری مذہبی فرقہ واریت کے خاتمے کیلئے اہل تشیع مسلک کو بھی شامل کیا جاتا۔

اب اگر تحریک لبیک کے اجلاس کے فیصلے کے مطابق دیگر مسالک کے علماء پر مشتمل کمیٹی بنائی جاتی ہے تو وہ متنازع ہوگی کیوں کہ اگر خدانخواستہ شہر میں دوبارہ فرقہ واریت کے حوالے سے کوئی سرگرمی ہوئی یا اہل تشیع کے مقدسات کی توہین کی گئی تو اس حوالے سے کیا اقدامات کیے جائیں گے کیونکہ کمیٹی میں اہل تشیع کے نمائندوں کو شامل نہیں کیا گیا ہے مذہبی فرقہ واریت کی روک تھام کیلئے اہل تشیع سمیت تمام مسالک کا کمیٹی کاحصہ بننا ضروری ہے۔

تحریک لبیک ضلع شیخوپورہ کے معاون نشر و اشاعت یاسر رضوی نے لوک سجاگ کے سوال پر کہا کہ &quot;چونکہ صحابہ کرام کی شان میں گستاخی کے واقعات مسلسل مسلک اہل تشیع کی جانب سے رونما ہو رہے ہیں اس لیے اس کمیٹی میں ان کو شامل نہیں کیا گیا ہے۔&quot;

وہ کہتے ہیں کہ ہماری طرف سے تجویز کردہ مشترکہ کمیٹی میں تین مسالک سے تین تین افراد شامل کیے جائیں گے جس کا مقصد یہ ہوگا کہ جو کوئی بھی مقدس ہستیوں کی شان میں گستاخی کرے گا، کمیٹی اس پر تحقیق اور تصدیق کرے گی کہ گستاخی کس نوعیت کی ہے اس میں کون کون شامل ہے، اس پر کیا سزا تجویز کی جائے، مقدمہ درج کروایا جائے یا کوئی اور ردعمل دیا جائے تاکہ کسی بھی بےگناہ کو سزا نہ مل سکے جو ملوث پایا جائے صرف اسی کے خلاف کارروائی عمل میں لائی جا سکے۔

<h2>پولیس: ہم معاملے کی حساسیت کو دیکھتے ہوئے چل رہے ہیں</h2>

اس دوران شہر میں امن و امان کی صورتحال کو برقرار رکھنے کے لیے قانون نافذ کرنے والے اداروں کے افسران نے دیگر مذہبی جماعتوں سمیت اہل تشیع کے اکابرین سے ملاقاتیں بھی کیں جس پر جن افراد پر توہین کا الزام ہے انھوں نے شہریوں کے مذہبی جذبات مجروح کرنے پر معافی بھی مانگی۔

بعض لوگوں کی طرف سے ان کیسوں میں پولیس کی طرف سے جانبداری برتے جانے کے الزامات بھی عائد کیے جا رہے ہیں لیکن پولیس کا موقف ہے کہ وہ معاملے کی حساسیت کو دیکھتے ہوئے چل رہے ہیں اور تمام کیسوں میں قانون کے مطابق کارروائیاں کی جارہی ہیں۔

ایس ایچ او تھانہ نارنگ انسپکٹر رانا اعظم علی خاں کہتے ہیں کہ فرقہ واریت کے واقعات میں اضافے پر کافی تشویش ہے لیکن پولیس قانون کے مطابق تمام وہ اقدامات اٹھا رہی ہے جو شہر کے امن و امان کے لیے ضروری ہیں۔ ان کا کہنا ہے کہ ہر واقعے پر قانون کے مطابق مقدمات درج کیے ہیں کچھ ملزمان منظر عام سے غائب ہوگئے تھے جس کی وجہ سے ان کی گرفتاری عمل میں نہیں آسکی جن واقعات کا فوری علم ہوا ان پر فوری گرفتاری بھی عمل میں لائی گئی ہے۔ پولیس چاہتی ہے کہ عوام قانون ہاتھ میں نہ لے۔ ایسے واقعات کی روک تھام کے لیے پولیس کے ساتھ مذہبی جماعتوں اور تمام مسالک کا کردار بھی اہم ہے۔

سب ڈویژنل پولیس آفیسر (ایس ڈی پی او) مرید کے سرکل ڈی ایس پی طاہر صدیق کا بھی یہی کہنا ہے کہ پولیس اپنی ذمہ داری ایمانداری اور فرض شناسی کے تحت پوری کرنے کی کوشش کر رہی ہے اس کے لیے تمام مسالک کے ساتھ عوام کے تعاون کی بھی بہت ضرورت ہے۔

<h2>شیعہ گروپوں کا نیا اتحاد: ہم بھی امن چاہتے ہیں</h2>

اس صورت حال میں نارنگ منڈی میں اہل تشیع مسلک کے تمام گروپوں کا ایک اتحاد القائم متحدہ شیعہ کونسل کے نام سے سامنے آیا ہے اور بااثر سماجی، سیاسی اور مذہبی شخصیات پر مشتمل ایک 9 رکنی کمیٹی بھی بنائی گئی ہے۔

اس کمیٹی کی سربراہی چوہدری سخاوت علی ڈگرا&nbsp; کو سونپی گئی ہے جن پر تمام گروپوں نے مکمل اعتماد کا اظہار کرتے ہوئے شہر کے امن و امان کو برقرار رکھنے کے لیے اٹھائے جانے والے ہر فیصلے کو قبول کرنے کی حامی بھری ہے۔

چوہدری سخاوت علی ڈگرا نے لوک سجاگ سے گفتگو کرتے ہوئے تحریک لبیک کی مقامی قیادت کی جانب سے منعقدہ اجلاس میں ان کے مسلک کو شریک نہ کرنے پر افسوس کا اظہار کیا ہے۔ ان کے مطابق اس فیصلے سے ان کے مسلک کے لوگوں میں یہ تاثر ابھرا ہے کہ انہیں شاید الگ تھلگ کردیا گیا ہے۔

&quot;ہمارا مؤقف تو سنتے ہم بھی یہی کہہ رہے ہیں کہ جس کسی نے بھی خلاف ورزی کی ہے اس کو قانون کے مطابق سزا ملنی چاہیے لیکن اگر کوئی شرمندگی کااظہار کرتے ہوئے معافی مانگتا ہے تو اسے موقع ملنا چاہیے دوسری صورت میں اس سے کوئی رعایت نہیں برتنی چاہیے۔&quot;

وہ کہتے ہیں کہ ہم بھی شہر میں امن چاہتے ہیں اور اس کے لیے ماضی میں عملی کردار بھی ادا کیا ہے۔ گزشتہ کچھ دنوں سے سوشل میڈیا پر جو توہین آمیز مواد گردش کر رہا ہے ہم اس کی اور اس کو شیئر کرنے والے افراد کی شدید الفاظ میں مذمت کرتے ہیں۔

بطور سرپرست شیعہ کمیونٹی کو پیغام دیتا ہوں کہ دوسرے مسالک اور ان کے مقدسات کا احترام کریں۔

&quot;ہم ایسے تمام عناصر کا ہر لحاظ سے بائیکاٹ کریں گے جو شہر کا امن خراب کرنے کی کوشش کرے گا، اس کے لیے ہم قانون نافذ کرنے والے اداروں کے ساتھ کھڑے تھے، ہیں اور رہیں گے۔&quot;

سجاگ رپورٹ

بلوچستان 'ایک نیا افغانستان': افیون کی کاشت میں اچانک بے تحاشا اضافہ کیا گل کھلائے گا؟

طویل لوڈ شیڈنگ سے دنیا کی چھٹی بڑی سولر مارکیٹ بننے کا سفر: کیا نئی پالیسی سے 'سولر سونامی' تھم جائے گا؟

خیبر پختونخوا: لاپتہ پیاروں کے قصیدے اب نوحے بن گئے ہیں

نارنگ منڈی میں فرقہ واریت کی آگ کون بھڑکا رہا ہے؟