احتشام الحق دوستوں کے ساتھ چھٹیاں گزارنے کے لیے آذربائیجان جا رہے تھے لیکن اسلام آباد ائیرپورٹ پر ایف آئی اے کے حکام نے انہیں نہ صرف بیرون ملک جانے سے روک دیا بلکہ ان کے پاسپورٹ پر &#39;آف لوڈڈ&#39; کی مہر بھی لگا دی۔

وہ پیشے کے لحاظ سے سافٹ ویئر انجینئر ہیں اور انہوں نے اسلام آباد ہائی کورٹ میں ایک رٹ دائر کی ہے کہ ایف آئی نے ایسا کسی قانونی جواز کے بغیر کیا۔ 
درخواست میں انہوں نے یہ الزام بھی عائد کیا ہے کہ بعدازاں ایف آئی اے کے اہلکاروں نے درخواست گزار سے 80 ہزار روپے رشوت لے کر انہی دستاویزات کے ساتھ بیرون ملک سفر کی اجازت بھی دے دی۔

کچھ ایسا ہی پشاور کے محمد منیب (فرضی نام) کے ساتھ بھی ہوا۔ وہ دس سال سے اٹلی میں کام کر رہے ہیں۔ وہ بتاتے ہیں کہ گزشتہ ماہ پاکستان میں چھٹیاں گزارنے کے بعد وہ واپس اٹلی جا رہے تھے کہ انہیں اسلام آباد ایئرپورٹ پر روک لیا گیا جبکہ ان کے پاس کمپنی کا ورک پرمٹ اور تمام سفری و قانونی دستاویزات مکمل تھیں۔

&quot;ایئرپورٹ پر اچانک روکے جانے کے باعث میری فلائٹ مس ہو گئی۔ میں کچھ دوستوں کے ذریعے متعلقہ افراد سے بات کی اور دو لاکھ روپے دے کر خود کو کلیئر کرایا۔ یوں پانچ دن بعد میں اٹلی روانہ ہوا۔ یہ تجربہ میرے لیے نہایت تلخ اور اذیت ناک تھا۔&quot;

جب ان سے نام ظاہر نہ کرنے کی وجہ پوچھی گئی تو ان کا کہنا تھا کہ انہوں نے اپنے ملک واپس بھی آنا ہے تب تو یہ لوگ (ایف آئی اے والے) اس سے بھی برا سلوک کریں گے۔

<h2>کمبوڈیا، میانمار جانے والے ہزاروں پاکستانی کہاں غائب ہو گئے؟</h2>

وفاقی تحقیقاتی ایجنسی (ایف آئی اے) تصدیق کرتی ہے کہ سال بھر میں 66 ہزار سے زائد مسافروں کو ائیرپورٹس پر روکا گیا جبکہ 2024ء میں ایسےافراد کی تعداد لگ بھگ 35 ہزار تھی۔

پچھلے ماہ قومی اسمبلی کی قائمہ کمیٹی برائے اوورسیز پاکستانیز اینڈ ہیومن ریسورس ڈیویلپمنٹ کے اجلاس میں ایف آئی اے حکام نے بتایا کہ بھیک مانگنے کے الزام میں سعودی عرب سے 56 ہزار، متحدہ عرب امارات اور دیگر ریاستوں سے ہزاروں پاکستانی نکالے جانے سے ملک کا تشخص مجروح ہوا۔

ایف آئی اے حکام کہتے ہیں کہ پہلے غیر قانونی طور پر ہجرت کرنے والوں کا رخ یورپ کی جانب ہی ہوتا تھا، اب یہ رجحان مزید کئی ملکوں تک پھیل گیا ہے۔ مثال کے طور پر 24 ہزار سے زائد پاکستانی سیاحتی ویزے پر کمبوڈیا گئے جن میں سے صرف 12 ہزار ہی واپس آئے، باقیوں کا کچھ معلوم نہیں۔

اسی طرح ہزاروں پاکستانی شہری وزٹ ویزے پر میانمار اور دیگر ممالک گئے جن کی بڑی تعداد واپس نہیں لوٹی۔ قرین قیاس یہی ہے کہ یہ لوگ بھی مشرق بعید کے ملکوں یا کشتیوں کے ذریعے آسٹریلیا جانے کی کوشش میں ہوں گے۔

حکام کے بقول ائیرپورٹس پر روکے جانے والوں میں تقریباً 51 ہزار ورک ویزا، ٹورسٹ اور عمرہ ویزا والے افراد شامل تھے جنہیں مشکوک سفری دستاویزات کی بنیاد پر روکا گیا۔ 
ایف آئی اے حکام کا اصرار ہے کہ انسانی سمگلنگ اور غیرقانونی ہجرت روکنے کے لیے سخت اقدامات ضروری ہیں لیکن سوال یہ ہے کہ ائیرپورٹس پر ایسی کارروائیاں انسانی سمگلنگ روکنے میں کتنی مدد گار ثابت ہوں گی؟

ہینلے پاسپورٹ انڈکس ہر سال پوری دنیا کے مضبوط ترین اور کمزور ترین پاسپورٹوں کی ایک لسٹ جاری کرتا ہے۔ 2025ء میں اس نے سنگاپور کے پاسپورٹ کو سب سے مضبوط قرار دیا کیونکہ اس کے حامل دنیا کے 199 میں سے 193 ممالک میں بغیر ویزے کے جا سکتے ہیں۔ اس لسٹ کے مطابق پاکستانی پاسپورٹ کے حامل صرف 33 ممالک میں بغیر ویزے کے جا سکتے ہیں اور اس کا شمار کمزور ترین پاسپورٹوں میں کیا جاتا ہے۔

<h2>ائیرپورٹ پر کسے کیوں روکا جاتا ہے؟</h2>

اوورسیز ایمپلائمنٹ پروموٹرز الزام لگاتے ہیں کہ وزارتِ داخلہ اور ایف آئی اے بعض معاملات میں اپنی حدود سے تجاوز کرتے ہیں۔ بیرون ملک ملازمت کے امور میں ذمہ داریاں چار مختلف وزارتوں میں تقسیم ہیں لیکن ایک ادارے یعنی ایف آئی اے پر زیادہ بوجھ ڈال دیا گیا ہے جو غیر ضروری رکاوٹوں کا سبب بھی بن رہا ہے۔

امیگریشن امور کے ماہر غلام قاسم بھٹی ایڈووکیٹ بتاتے ہیں کہ شناختی کارڈ اور پاسپورٹ (نادرا، امیگریشن) کی تیاری وزارت داخلہ، مہارت اور پرٹیکٹر کی منظوری و دیگر کاغذی کاروائی وزارت اوورسیز کا اختیار ہے جبکہ ویزا وزارت خارجہ (ایمبیسیز) ، ٹکٹ و غیرہ وزارت کامرس اور ایئرپورٹ امیگریشن یا روانگی دوبارہ وزارت داخلہ (ایف آئی اے) کا دائرہ کار ہوتا ہے۔

پاکستان اوورسیز ایمپلائمنٹ پروموٹرز ایسوسی ایشن سے وابستہ سید اطہر شاہ کا ماننا ہے کہ بیرونِ ملک ملازمت کے لیے جب ایک مسافر کو وزارتِ اوورسیز سے پروٹیکٹر (ملازمت کا اجازت نامہ) جاری ہو جاتا ہے تو دیگر وزارتوں کا کردار صرف فالو اپ تک محدود ہونا چاہیے لیکن یہاں شبے اور مفروضوں کی بنا پر لوگوں کو روک لیا جاتا ہے۔

&quot;مثال کے طور پر بیشتر خلیجی ممالک میں پاکستانی ڈرائیونگ لائسنس کی کوئی قانونی حیثیت نہیں ہوتی، وہاں ٹیسٹ اور تربیت کے ذریعے نیا لائسنس حاصل کرنا پڑتا ہے۔ اس بنیاد پر کسی مسافر کو مشکوک سمجھنا غیر منطقی ہے&quot;۔

وہ کہتے ہیں کہ وزیرآباد گجرات اور منڈی بہاؤالدین سے روات تک کے مسافروں پر محض اس لیے سختی کی گئی کہ ان علاقوں کے زیادہ افراد ڈنکی لگانے (غیر قانونی طور پر یورپ جانے)کی کوشش کرتے ہیں۔

پنجاب کے کئی محنت کش کراچی سے سفر اس لیے کرتے ہیں کہ وہاں سے ٹکٹ پر نسبتاً کم رقم خرچ ہوتی ہے اور فلائٹس زیادہ ہوتی ہیں مگر انہیں بھی مشکوک قرار دے کر روکا گیا۔&nbsp;

&quot;مجھے نہیں معلوم کہ ان اقدامات سے ہیومن ٹریفکنگ رکے گی یا نہیں لیکن اوورسیز لیبر کو مشکلات ضرور پیش آ رہی ہیں۔ تاہم اب کچھ بہتری آئی ہے، زیادہ تر وزٹ ویزے یا نامکمل دستاویزات والوں ہی کو روکا جا رہا ہے۔&quot;

<h2>کیا روکے جانے والے افراد اگلی پروازوں سے بیرون ملک چلے گئے؟</h2>

اسلام آباد ہائی کورٹ میں زیر سماعت مقدمے کے ایک پٹیشنر اور قانون دان علی رضا کہتے ہیں کہ مسافروں کو غیر واضح وجوہ پر آف لوڈ کرنا غیر قانونی عمل ہے جو رشوت یا رقم کے لین دین کا راستہ کھول دیتا ہے اور ایسی کئی شکایات آ رہی ہیں۔

تاہم چیئرمین قائمہ کمیٹی برائے اوورسیز پاکستانیز سید رفیع اللہ نے لوک سجاگ کو بتایا کہ ابھی تک ان کے سامنے آف لوڈنگ کا ایسا ایک بھی کیس سامنے نہیں آیا جس میں اتنے شواہد ہوں کہ وہ کوئی تحقیقات کرائیں یا متعلقہ حکام سے بات کریں۔

&quot;پھر بھی متاثرہ افراد کمیٹی میں اپنی شکایت درج کرا سکتے ہیں۔&quot;

وہ کہتے ہیں کہ اگر کوئی شخص ملکی ساکھ کو نقصان پہنچائے گا تو اس کے خلاف کارروائی ایف آئی اے کی ذمہ داری ہے۔ ہر شخص کو قانونی جانچ پڑتال کے بغیر جانے دیا جائے تو نگرانی کا مقصد ہی ختم ہو جائے گا۔

اسلام آباد کے قانون دان علی رضا کا کہنا ہے کہ ایف آئی اے میں کچھ اہلکاروں کے تبادلوں اور بعض کے خلاف ہیومن ٹریفکنگ کے مقدمات درج ہونے کے بعد آف لوڈنگ کو بطور &#39;کارکردگی&#39; پیش کرنے کی کوشش کی جا رہی ہے۔

&nbsp;لیکن کیا آف لوڈ کیے گئے ہزاروں افراد سے متعلق کوئی انکوائری ہوئی یا وہ کسی ریکارڈ کے بغیر ہی اگلی فلائٹس پر روانہ ہو گئے؟ ایسا کچھ سامنے نہیں۔ 
آف لوڈ ہونے والے مسافر باہر جانے میں ناکام ہوئے ہوں یا بالاخر کامیاب ان کا نقصان لاکھوں میں ہوا ہے۔

<h2>&#39;لوگ ڈنکی لگانے کے راستے ڈھونڈتے ہی رہیں گے&#39;</h2>

ترجمان ایف آئی اے اس تاثر کو مسترد کرتے ہیں کہ کہ شہریوں کو بلاوجہ روکا جا رہا ہے۔ پاکستانی ایئرپورٹس سے روزانہ ہزاروں لوگ سفر کرتے ہیں جن میں سے صرف چند کو ہی سفر کی اجازت نہیں دی جاتی۔

ان کا کہنا ہے کہ مسافروں کی سکریننگ کسی ایک افسر کی صوابدید نہیں بلکہ باقاعدہ قانونی طریقہ کار کے تحت کی جاتی ہے جس میں ویزے کی نوعیت، ہوٹل بکنگ، مالی حیثیت اور سفری تاریخ سمیت مختلف عوامل کا جائزہ لیا جاتا ہے۔ نامکمل یا مشکوک دستایزات پر ہی کی مسافر آف لوڈ کیا جاتا ہے۔

ایف آئی اے حکام کہتے ہیں کہ انسانی سمگلنگ اور غیرقانونی ہجرت ملکی بدنامی کا باعث بن رہی ہے۔ بیرون ملک پاکستانیوں کے جانوں کے ضیاع، کشتیوں میں ہلاکتوں، گرفتاریوں اور ڈی پورٹیشنز کو روکنے کے لیے سخت جانچ پڑتال کے اقدامات ضروری ہیں۔

ریٹائرڈ میجر بیرسٹر محمد ساجد مجید امیگریشن، سروسز لاز اور وائٹ کالر کرائمز انویسٹی گیشن و لیٹیگیشن کے ایکسپرٹ ہیں۔

وہ اتفاق کرتے ہیں کہ انسانی سمگلنگ کے خلاف کارروائیاں ضروری ہیں مگر پاسپورٹ پر لگنے والی ریجیکشن سٹیمپ کسی بھی شہری کے لیے نہایت نقصان دہ ہوتی ہے۔ اس سے ناصرف ان کا بیرونِ ملک سفر کا حق متاثر ہوتا ہے بلکہ مستقبل میں بیرون ملک ملازمت کے دروازے بھی بند ہو سکتے ہیں۔

&quot;نوجوانوں میں مایوسی پھیلانے، قیمتی افرادی قوت کے ضیاع اور ملک کو زرِمبادلہ سے محروم کرنے والے اقدامات سے گریز کرنا ہو گا&quot;۔

سائبر سیکیورٹی ایکسپرٹ اور سابق ایڈیشنل ڈائریکٹر جنرل ایف آئی اے عمار جعفری کا ماننا ہے کہ ہیومن ٹریفکنگ کا مسئلہ آف لوڈنگ سے حل نہیں ہو گا بلکہ نوجوانوں کو روزگارکے متبادل مواقع فراہم کرنا ہوں گے۔

&quot;70ء کی دہائی میں مشرقِ وسطیٰ کو مستری مزدوروں جیسی غیرہنرمند افرادی قوت کی ضرورت تھی مگر نئی ٹیکنالوجی کے دور میں اب ایسی لیبر کی کہیں ضرورت نہیں رہی۔ جب روزگار اور ہنر نہیں ہو گا اور راستے بند کیے جائیں گے تو لوگ ڈنکی لگانے کے نئے راستے تلاش کر لیتے ہیں&quot;۔

وہ کہتے ہیں کہ پائیدار حل تو یہی ہے کہ ملک میں روزگار کا بندوبست کیا جائے۔ دوسرا آپشن یہ ہے کہ نوجوانوں کو اُن شعبوں میں تربیت دی جائے جن کی عالمی سطح پر مانگ بڑھ رہی ہے۔ قانونی ویزے کے حصول میں آسانیاں پیدا کی جائیں تاکہ وہ بیرونِ ملک قانونی اور باعزت روزگار حاصل کر سکیں۔

آپ ملک سے باہر نہیں جا سکتے: کیا 'ائیرپورٹ ناکے' پاکستانی پاسپورٹ کا وقار بلند کر پائیں گے؟

text

بیاسی سالہ بابا عظیم &nbsp;راولپنڈی کی ایک غیر سرکاری اولڈ ہوم میں دن گزار رہے ہیں۔ وہ کئی برس دیار غیر میں محنت مزدوری کرتے اور بیوی بچوں کی ضرورتیں پوری کرتے رہے مگر اب انہیں سہارے کی ضرورت پڑی تو اپنوں میں سے کوئی ان کے ساتھ نہیں۔

وہ تقریباً ایک سال قبل پناہ گاہ میں آئے تھے، ان کے بقول انہوں نے بیوی بچوں سے اس وقت ناطہ توڑا جب گھر کا ماحول ان کے لیے جہنم بن چکا تھا۔

&quot; کیا بتاؤں! میرے بچے تھے مگر اب نہیں ہیں۔ یہاں رشتوں کی کوئی قدر نہیں، چاہے بیوی بچے ہوں یا کوئی رشتہ دار سب پیسے کے غلام ہیں۔ اگر آپ کچھ دے سکتے ہیں تو عزت ملتی ہے ورنہ آپ صرف ایک بوجھ ہو۔&quot;

پناہ گاہ کی انتظامیہ کے رکن محمد شریف بتاتے ہیں کہ بابا عظیم نے یہاں آنے سے پہلے اپنا موبائل فون دریا میں پھینک دیا تاکہ وہ اپنے بچوں سے رابطہ کر یں نہ ہی بچے کر سکیں۔

اس اولڈ ہوم میں 20 افراد مقیم ہیں۔ منتظم شوکت حسین کہتے ہیں کہ یہاں کے ہر مکین کی الگ کہانی ہے، کسی کو ان کی اولاد نے چھوڑ دیا تو بعض نے خود ہی بچوں سے قطع تعلق کر لیا ہے۔

صرف بابا عظیم ہی نہیں ان جیسے سیکڑوں عمر رسیدہ مرد و خواتین اولڈ ہومز کا رخ کر رہے ہیں۔

محکمہ سوشل ویلفیئر کے مطابق راولپنڈی ڈویژن (آبادی 11,406,496) میں صرف ایک سرکاری اور پانچ غیر سرکاری ادارے موجود ہیں جو &quot;لاوارث&quot; معمر افراد کو رہائش فراہم کر رہے ہیں۔

<h3>معمر افراد کی شرح چھ فیصد</h3>

سرکاری اعداد و شمار کے مطابق اس وقت ملک میں 60 برس یا اس سے زائد عمر کے افراد کی تعداد تقریباً ایک کروڑ 35 لاکھ 16 ہزار 434 ہے جبکہ 75 برس اور اس سے زیادہ عمر کے افراد کی تعداد 24 لاکھ 96 ہزار 232 ہے۔

اس حساب سے پاکستان میں 60 سے زیادہ عمر کے افراد کی شرح کل آبادی (24 کروڑ 14 لاکھ سے زائد) کا لگ بھگ چھ فیصد بنتی ہے جو عالمی انداروں کے مطابق 2050ء تک دوگنا &nbsp;یعنی 12 فیصد ہو جائے گی۔

تحقیق بتاتی ہے کہ معمر افراد اکثر بلڈ پریشر، دل کی بیماریوں، بینائی و سماعت کی کمی، تمباکو نوشی، ڈپریشن، موٹاپے، دانتوں اور پیشاب کی تکالیف میں مبتلا ہو جاتے ہیں۔ نظر انداز کیا جانا یا بدسلوکی انہیں تنہائی، محرومی اور نفسیاتی کیفیت سے دوچار کر دیتی ہے۔

نجات کیئر ہوم کے بانی ملک اظہر تنویر بتاتے ہیں کہ کچھ برسوں سے پاکستان میں اولڈ ہومز کی طرف رحجان تیزی سے بڑھ رہا ہے جس کی بڑی وجہ بدلتی سماجی روایات اور جدید ٹیکنالوجی کا بڑھتا استعمال ہے۔

&quot; بچے اپنی سرگرمیوں میں اتنا مصروف ہیں کہ والدین سے ان کا تعلق کمزور پڑتا جا رہا ہے۔ وہ والدین کو اپنی ذمہ داری ہی نہیں سمجھتے جو معاشرتی بگاڑ کا اصل سبب ہے۔&quot;

انسانی حقوق کے سرگرم کارکن راشد چوہدری کہتے ہیں کہ ہر کوئی صاحب ثروت یا اپنی ضروریات پوری کرنے کے قابل نہیں ہوتا۔ جب کوئی شخص ریٹائر ہوتا ہے یا کام کرنے کے قابل نہیں رہتا تو وہ خاندان پر بوجھ بن جاتا ہے۔

اس مہنگائی میں معمر افراد کی خوراک، علاج معالجے اور دیکھ بھال کے اخراجات عام گھرانوں کے لیے ناقابلِ برداشت ہو جاتے ہیں۔

<h3>پاکستان میں 10 ہزار &nbsp;بزرگوں کو پناہ ملنا بھی مشکل</h3>

ماہرین کہتے ہیں کہ یہاں بیشتر افراد کے لیے بڑھاپا محض عمر رسیدگی کا معاملہ نہیں بلکہ ایسا خاموش بحران بن چکا ہے جو روز بروز سنگین شکل اختیار کر رہا ہے۔ دوسری طرف اس کے حل کے لیے کوئی مؤثر اقدامات نظر نہیں آ رہے۔

پاکستان بھر میں سرکاری سطح پر پاکستان بیت المال &nbsp;35 اولڈ ہومز چلا رہا ہے۔ پنجاب حکومت سات جبکہ سندھ، بلوچستان اور خیبرپختونخوا کی حکومتیں ایک ایک یا دو دو ادارے چلا رہی ہیں۔

یہاں بڑے غیر سرکاری اداروں میں سے ایدھی فاؤنڈیشن &nbsp;کے زیر انتظام 18، دارالسکون کراچی ایک، چھیپا ویلفیئر ایسوسی ایشن &nbsp;کا یک ویمن شیلٹر اور ایک اولڈ ہوم کام کر رہے ہیں۔ ان کے علاوہ کراچی سمیت بعض شہروں میں اکا دکا مزید غیر سرکاری اولڈ ہومز بھی موجود ہیں۔

یوں ملک کے تمام اولڈ ہومز ملا کر ان میں اتنی گنجائش بھی نہیں بنتی جہاں 10 ہزار عمر رسیدہ افراد بھی پناہ لے سکیں۔

اس کے برعکس ہمسایہ ملک بھارت میں صورت حال پاکستان سے نسبتاً بہتر نظر آتی ہے جہاں عمر رسیدہ (60 سال سے زائد عمر ) افراد کل آبادی کا8.6 فیصد ہیں۔

ٹاٹا ٹرسٹس، سمارتھ اور اقوامِ متحدہ پاپولیشن فنڈ کی کچھ سال پہلے کی مشترکہ سٹڈی &nbsp;کے مطابق وہاں معمر افراد کے لیے تقریباً ایک ہزار150 مراکز (اولڈ ہومز اور سینیئر لِونگ فسیلیٹیز) موجود ہیں جن میں لگ بھگ 97 ہزار لوگوں کے رہنے کی گنجائش ہے۔

اگرچہ سروے میں اولڈ ہومز میں سہولتوں کے معیار اور موزونیت پر کئی سوال اٹھائے گئے ہیں تاہم وہاں بھی اولڈ ایج ہومز آباد ہونے لگے ہیں۔ اندازہ لگایا گیا ہے کہ آئندہ دس برس میں آٹھ سے دس لاکھ افراد کی رہائش کا انتظام کرنا پڑے گا۔

<h3>بزرگ شہریوں کے لیے قوانین بہت، عمل ندارد</h3>

پبلک پالیسی ایکسپرٹ عامر جہانگیر کہتے ہیں کہ بڑھتی مہنگائی، کمزور سماجی تحفظ، محدود طبی سہولیات اور بدلتی سماجی اقدار مل کر بڑھاپے کو سماجی مسئلہ بنا رہی ہیں۔ ریاست نہ تو اس پر توجہ دے رہی ہے اور نہ ہی پالیسی سطح پر کوئی سنجیدگی نظر آتی ہے۔

بنگلہ دیش جیسے ملک میں بزرگ افراد کو ناصرف خوراک، رہائشی و طبی سہولیات فراہم کرنے کی کا آئینی ضمانت &nbsp;دی گئی ہے بلکہ 1998ء میں معمر افراد کو الاؤنس دینے کا پروگرام متعارف کرایا گیا تھا۔

تاہم پاکستان میں اقوامِ متحدہ کے میڈرڈ انٹرنیشنل پلان آف ایکشن آن ایجنگ 2002ء پر دستخط کے بعد سینیئر سیٹیزنز کے لیے اقدامات شروع کیے گئے۔ جہاں تک قانون سازی کا تعلق ہے تو پہلا سینیئر سیٹیزن ایکٹ 2007ء میں منظور ہوا تھا۔

اٹھارویں آئینی ترمیم کے چاروں صوبوں اور وفاقی دارالحکومت کے لیے الگ الگ قانون سازی کے علاوہ وفاقی حکومت نے پیرنٹل پروٹیکشن آرڈیننس (2021) بھی جاری کیا تھا۔ 
ان تمام ملتے جلتے قوانین کا مقصد معمر افراد کے حقوق کا تحفظ اور بچوں و اہل خانہ سے / والدین کی مالی معاونت کو یقینی بنانا تھا۔

تاہم مذکورہ قوانین معمر افراد کے بیشتر مسائل حل نہیں کر سکے۔ ان کی بے وقعتی کی تلخ مثال 55 سالہ نرگس &nbsp;کی کہانی ہے جو پانچ سال سے نجات کیئر ہوم راولپنڈی میں مقیم ہیں۔

وہ بتاتی ہیں کہ ان کے بچے انہیں ملنے آتے ہیں مگر اپنے ساتھ گھر لے جانے سے انکار کر دیتے ہیں۔ جب ان سے پوچھا گیا کہ وہ آپ سے ملنے کیوں آتے ہیں؟ تو انہوں نے بتایا &quot; اُنہیں ماں کی دعا چاہیے ہوتی ہے۔&quot;

اس کیئر ہوم سے وابستہ شبنم عزیز کہتی ہیں کہ ان کے ہاں 100کے قریب معمر خواتین رہائش پذیر ہیں جن میں سے بیشتر گھروں میں برے سلوک کی شکایت کرتی ہیں۔

<h3>کیا ای او بی آئی اور بی آئی ایس پی باوقار بڑھاپے کی ضمانت ہیں؟</h3>

پاکستان میں قانون سازی کے علاوہ بزرگ شہریوں کے لیے ویلفیئر کے متعدد اقدامات کیے گئے لیکن ان کا کوئی خاطر خواہ اثر دکھائی نہیں دیتا کیونکہ جاری مہنگائی کے سامنے ان کی حیثیت نہ ہونے کے برابر ہے۔

وفاقی حکومت نے پرائیویٹ اداروں کے ملازمین کی بڑھاپے میں مالی معاونت کے لیے ای او بی آئی (ایمپلائز اولڈ ایج بینیفٹ انسٹیٹیوشن) پنشن متعارف کرائی تھی۔ بعدازاں پاورٹی ریڈکشن منصوبے کے تحت غریب خاندان کی خواتین سربراہوں و بیواوں کے لیے بینظر انکم سپورٹ پروگرام بھی شروع کیا۔

چاروں صوبوں نے بھی اپنی اپنی سطح پر کچھ فلاحی اقدامات کیے جیسا کہ محکمہ سماجی بہبود سندھ نے حال ہی میں نادرا کے تعاون سے&#39;سینیئر سِٹیزن کارڈ&#39; کا آغاز کیا ہے جس کے تحت ان افراد کو صحت سمیت مختلف سہولتیں فراہم کی جائیں گی۔

تاہم راشد چوہدری بتاتے ہیں کہ ای او بی آئی پنشن صرف ان افراد (مرد یا عورت) کر ملتی ہے جو نجی ادارے کے ملازم رہے ہوں اور آجر نے ان کا کنٹریبیوشن (تنخواہ سے حصے کی رقم) جمع کرایا ہو۔ ملک میں رجسٹرڈ ورکرز (مرد و خواتین) کی تعداد 10 لاکھ سے بھی کم ہے یعنی 99 فیصد سے زیادہ افراد اس نظام سے باہر ہیں۔

یہ پنشن اتنی کم (تقریباً ساڑھے 11 ہزار ماہانہ) ہے کہ اس سے کوئی فرد کھانے پینے کی بنیادی اشیا کا انتظام بھی نہیں کر سکتا۔ اسی طرح بینظیر انکم سپورٹ جیسی سکیموں سے خواتین کی کچھ مدد ضرور ہو جاتی ہے مگر یہ بھی باوقار بڑھاپے کی ضمانت نہیں بن سکتیں۔

وہ کہتے ہیں کہ ترقی یافتہ ممالک کی حکومتیں شہریوں کو سوشل سکیورٹی، پنشن، ہیلتھ کیئر، اولڈ ایج ہومز جیسی سہولتیں دیتی ہیں لیکن پاکستان میں بڑھاپے کے لیے ایسا کوئی قابلِ عمل ماڈل موجود ہی نہیں۔

<h3>بحران کا قابل عمل حل کیا ہے؟</h3>

پنجاب میں سات سرکاری اولڈ ایج ہومز ہیں جو لاہور، ملتان، راولپنڈی، فیصل آباد، نارووال، ساہیوال اور ٹوبہ ٹیک سنگھ میں قائم کیے گئے ہیں۔

راولپنڈی کے سرکاری اولڈ ایج ہوم میں تقریباً 20 افراد مقیم ہیں جن کی کفالت صوبائی حکومت کی ذمہ داری ہے لیکن انتظامیہ کو ان کے کپڑوں اور دیگر ضروریات کے لیے بھی این جی اوز یا مخیر حضرات پر انحصار کرتا پڑتا ہے۔

بتایا گیا ہے کہ اس ادارے میں صرف ان معمر افراد کو جگہ دی جاتی ہے جو کسی ذہنی یا جسمانی معذروی کا شکار نہ ہوں۔ کوئی ایسا سینئر سیٹیزن وہاں پہنچے تو انہیں ایدھی ہوم بھیج دیا جاتا ہے۔

اس سلسلے میں ڈائریکٹر سوشل ویلفیئر راولپنڈی محمد شاہد رانا نے یہ کہہ کر موقف دینے سے انکار کر دیا کہ انہیں اس پر بات کرنے کا اختیار نہیں ہے۔ 
ملک اظہر تنویر سمجھتے ہیں کہ کچھ مثبت اقدامات ہوئے ہیں مگر کیئر ہومز پر توجہ نہ ہونے کے برابر ہے۔&nbsp;

&quot;اکثر ہسپتالوں میں لاوارث مریض لائے جاتے ہیں ان کا ایمرجنسی میں علاج تو ہو جاتا ہے لیکن ڈسچارج کرتے وقت مسئلہ ہوتا ہے کہ انہیں کہاں بھیجا جائے؟ یہ خلا کیئر ہومز سے ہی پُر ہو سکتا ہے۔&quot;

راشد چوہدری کے برعکس ان کا ماننا ہے کہ پاکستان میں بیت المال کا مؤثر ماڈل موجود ہے۔ اگر کوئی بیمار کسی ہسپتال سے علاج کرانے کے لیے بیت المال میں درخواست دے تو یہ ادارہ متعلقہ ہسپتال کو ادائیگی کر کے علاج کی سہولت فراہم کر دیتا ہے۔

وہ کہتے ہیں کہ بیت المال کے قانون میں ضروری ترامیم کر کے اس ماڈل کو اپنایا جا سکتا ہے۔ نجی اداروں کے ساتھ مل کر اولڈ ہومز بڑھائے جائیں جہاں حکومت اسی طرح فنڈنگ کرے جیسے ہسپتالوں کو بیت المال کرتا ہے۔ یوں ناصرف ہزاروں معمر شہریوں کو رہائش و کفالت میسر ہوگی بلکہ غیر سرکاری و سرکاری اداروں کے درمیان اشتراک عمل بھی پیدا ہوگا۔

اولڈ ہوم میں رہنے والوں کے نام ان کی درخواست پر فرضی استعمال کیے گئے ہیں.

پاکستان میں بڑھاپا خاموش بحران کی صورت کیوں اختیار کر رہا ہے؟

پاکستان کے بلند پہاڑی علاقوں میں 167 &nbsp;برفانی چیتے پائے جاتے ہیں۔ یہ نتیجہ ہے ایک طویل اور پیچیدہ سائنسی تحقیق کا جو حال ہی میں مکمل ہوئی ہے۔

برفانی چیتا ایک نایاب جانور ہے جسے معدوم ہو جانے کا شدید خطرہ لا حق ہے۔ نایاب ہونے کے ساتھ برفانی چیتوں کو پراسرار بھی مانا جاتا ہے کیونکہ ان کی زندگی کا قریبی مشاہدہ کرنا تقریباً ناممکن ہوتا ہے۔ ان کا بسیرا انتہائی بلند برف پوش پہاڑی علاقوں میں ہوتا ہے جہاں جنگل، چٹانیں اور کھائیاں انسان کی رسائی کو بہت مشکل بنا دیتی ہیں اور سال کے زیادہ تر حصے میں موسم بھی سخت سرد رہتا ہے۔

سنو لیپرڈ کے محقق اور سنو لیپرڈ فاؤنڈیشن کے بانی ڈاکٹر علی نواز نے لوک سجاگ کو بتایا کہ اس تحقیقی کام میں پندرہ سال سے زائد کا کٹھن فیلڈ ورک شامل ہے جس سے فاؤنڈیشن نے ایسے نتائج حاصل کیے ہیں جو برفانی چیتوں کی بقا کی حکمت عملی تیار کرنے کے عمل کو ضروری سائنسی بنیاد فراہم کریں گے۔

<h2>بڑھتی حدت اور برفانی چیتے کے پگھلتے مسکن</h2>

موسمیاتی تبدیلیاں برفانی چیتوں کے قدرتی مسکن کو تیزی سے متاثر کر رہی ہیں۔ سنو لیپرڈ فاؤنڈیشن کے محقق ڈاکٹر حسین علی نے &nbsp;لوک سجاگ کو بتایا کہ درجہ حرارت میں اضافے سے برف پوش علاقے سکڑ رہے ہیں جس سے برفانی چیتے کی ہوم رینج محدود ہوتی جا رہی ہے اور اس کی بقا مشکل سے مشکل تر۔&nbsp;

جنگلی حیات کے ماہر وقار زکریا کہتے ہیں کہ ماحولیاتی دباؤ صرف درجہ حرارت کی تبدیلی تک محدود نہیں۔ سڑکوں کی تعمیر، انفراسٹرکچر کی توسیع اور شہری آبادی کے پھیلاؤ نے جنگلی ہیبٹیٹس کو تیزی سے سکڑنے پر مجبور کر دیا ہے۔ &quot;جو علاقے کبھی چند درجن افراد تک محدود تھے، وہاں اب ہزاروں سیاح پہنچنے لگے ہیں اور اس بڑھتی ہوئی آمدورفت نے ماحول پر پہلے ہی بہت بوجھ ڈالا ہوا ہے۔&quot;

وقار زکریا کہتے ہیں کہ جب کسی ایک دباؤ پر دوسرا دباؤ بھی شامل ہو جائے تو اس کا اثر محض جمع نہیں ہوتا بلکہ کئی گنا بڑھ جاتا ہے۔&nbsp;

وقار زکریا نے حکومتی پالیسیوں پر تنقید کرتے ہوئے کہا کہ پاکستان کی جنگلی حیات کئی دباؤ کا شکار ہے اور اگر صورت حال کو عالمی معیار پر پرکھا جائے تو یہ موسمیاتی تبدیلی کے اثرات کا دس سے پندرہ فیصد بھی برداشت کرنے کی صلاحیت نہیں رکھتی۔

وہ اس بات پر اظہار افسوس کرتے ہیں ہمارے معاشرے میں عمومی سوچ یہی ہے کہ سب سے پہلے انسانوں کی ضروریات پوری کی جائیں۔ &quot;جب ہم انسانوں کی بنیادی ضروریات بھی مناسب طور پر پوری نہیں کر پا رہے تو جنگلی جانوروں کا تحفظ ہماری ترجیحات میں کہاں جگہ پا سکتا ہے؟&quot;

اس صورت حال نے معدومی کے خطرے سے دوچار برفانی چیتے کے تحفظ اور بقا کی کوششوں کو مزید اہم بنا دیا ہے۔&nbsp;

<h2>برفانی چیتا: آدھا پاکستانی اور آدھا افغان</h2>

ڈاکٹر علی نواز نے فخر سے لوک سجاگ کو بتایا کہ یہ پاکستان میں اپنی نوعیت کی پہلی تحقیق ہے جس میں جینیٹکس اور کیمرہ ٹریپنگ دونوں طریقے بیک وقت استعمال کیے گئے ہیں۔ اس میں ایسے بہترین شماریاتی طریقے اور ماڈلز استعمال کیے گئے ہیں جو ماضی کی تحقیقات میں استعمال نہیں کیے جا سکے تھے۔

ڈاکٹر علی کے مطابق اسمال پر ٹرسٹ اور نارویجن ریسرچ کونسل نے اس تحقیق میں نمایاں تعاون فراہم کیا۔ اگرچہ حکومت نے براہِ راست مالی معاونت نہیں کی تاہم فیلڈ ٹیموں کے ذریعے لاجسٹک سہولیات اور رہنمائی فراہم کی۔

برفانی چیتے پر تحقیقات کا پس منظر بیان کرتے ہوئے ڈاکٹر علی نواز نے بتایا کہ پاکستان میں برفانی چیتے پر پہلی تحقیق &nbsp;2007-08میں چترال میں کی گئی تھی جو ایک برفانی چیتے پر مرکوز تھی۔ اس میں یہ بات سامنے آئی کہ یہ جانور تقریباً 1600 مربع کلومیٹر کے علاقے میں گھومتا ہے اور اپنا آدھا وقت افغانستان جبکہ آدھا پاکستان میں گزارتا ہے۔

اس تحقیق میں ایک برفانی چیتے پر جی پی ایس کالر لگایا گیا تھا تاکہ یہ معلوم کیا جا سکے کہ وہ کہاں کہاں جاتا ہے اور کتنے بڑے علاقے کو اپنا مسکن بناتا ہے۔ اس جانور کو ایک سال تک مانیٹر کیا گیا۔

جنگلی حیات کے ماہر وقار زکریا نے لوک سجاگ کو بتایا کہ ہندو کش، قراقرم اور ہمالیہ کے مختلف حصوں میں موسمی حالات یکساں نہیں ہیں۔ ہمالیہ کے کچھ علاقے مثلاً مری، ایبٹ آباد، سوات اور کشمیر میں نسبتاً زیادہ بارشیں ہوتی ہیں تاہم درجہ حرارت میں مسلسل اضافہ اور بارش کے غیر یقینی پیٹرن سے پودوں کی افزائش، خوراک کی دستیابی اور ہیبٹیٹ براہ راست متاثر ہوتے ہیں جس کے نتیجے میں جنگلی جانور خوراک کی تلاش میں انسانی آبادیوں کے قریب آنے لگتے ہیں۔کم درجہ حرارت کی عادی انواع بلندی کی طرف ہجرت کرتی ہیں لیکن موزوں ہیبٹیٹ کی کمی ان کے لیے مشکلات پیدا کرتی ہے۔

<h2>کیمرہ ٹریپنگ اور ڈی این اے سے آبادی کا تخمینہ کیسے لگایا جاتا ہے؟</h2>

حالیہ تحقیق کی تفصیلات بتاتے ہوئے ڈاکٹر حسین علی نے بتایا کہ اس میں دو بنیادی ٹیکنالوجیز استعمال کی گئیں جن میں جینیٹکس اور کیمرا ٹریپنگ شامل ہے۔

جینیٹکس کے طریقہ کار کے تحت برفانی چیتے کی ممکنہ رہائش گاہوں کا تفصیلی سروے کیا گیا اور وہاں سے اس کے فضلے کے نمونے جمع کر کے ان کے لیبارٹری میں ڈی این اے ٹیسٹ کیے گئے۔ &quot;انسانوں کی طرح ہر جانور کا جینیاتی کوڈ بھی منفرد ہوتا ہے اسی لیے ڈی این اے سیکوینسنگ کے ذریعے ہم ہر فرد کو الگ شناخت کر سکتے ہیں۔ اور اس طرح کے بہت سے ٹیسٹوں سے جو ڈیٹا تیار ہوتا ہے اس کے تجزیے سے ان کی آبادی کا تخمینہ لگایا گیا۔&quot;

کیمرا ٹریپنگ کی تکنیک میں وائلڈ لائف اسٹڈیز کے لئے خاص طور پر تیار کردہ کیمرے استعمال کیے جاتے ہیں جن میں موشن سینسر اور انفرا ریڈ ٹیکنالوجی ہوتی ہے جیسے ہی کوئی جانور کیمرے کے سامنے سے گزرتا ہے یہ خود بخود اس کی تصویر کھینچ لیتے ہیں۔اس تحقیق میں یہ کیمرے سنو لیپرڈ کے ممکنہ راستوں میں نصب کیے گئے۔

ہر برفانی چیتے کی کھال پر موجود دھبے &nbsp;منفرد ہوتے ہیں۔ ڈاکٹر حسین علی کے مطابق شمالی پاکستان میں نصب کیے گئے ان کیمروں سے حاصل ہزاروں تصاویر کا آپسی موازنہ کر کے یہ معلوم کیا گیا کہ کونسی تصاویر ایک ہی چیتے کی ہیں اور کون سی مختلف چیتوں کی۔ اس موازنے نے ہر انفرادی جانور کی علیحدہ شناخت کو ممکن بنا دیا اور اسی مکمل ڈیٹا سے یہ اخذ کیا گیا کہ ان کی کل تعداد کتنی ہے۔&nbsp;

تحقیق کے سربراہ ڈاکٹر علی نواز کے مطابق کیمرا ٹریپنگ اسٹڈی مکمل کرنے میں عموماً دو سے تین ماہ لگ جاتے ہیں۔ &quot;درست تخمینہ لگانے کے لیے جانوروں کی تصاویر بار بار کیپچر کرنا ضروری ہے بصورت دیگر نتائج محدود رہتے ہیں۔ اسی لیے 20 سے 25 مقامات پر بتدریج اسٹڈیز کی گئیں اور ڈیٹا کو یکجا کر کے ایک بڑے علاقے کو کور کیا گیا۔&quot;

ڈاکٹر علی نواز کا کہنا تھا کہ ایک سال میں دو سے زیادہ مطالعات ممکن نہیں ہوتے کیونکہ موسم ایک بڑی رکاوٹ ہے۔ زیادہ تر مطالعات صرف بہار یا خزاں میں ہی کیے جا سکتے ہیں۔ یہی وجہ ہے کہ یہ سلسلہ کئی برسوں پر محیط رہا۔

ان کا کہنا ہے کہ حالیہ کام ایک نہیں بلکہ دو الگ اور آزاد تحقیقات تھیں جنہوں نے ایک دوسرے کے نتائج کی تصدیق کی۔ انہوں نے بتایا کہ کیمرا ٹریپنگ 2010ء تا 2019ء تک کی گئی جس میں برفانی چیتوں کی آبادی کا تخمینہ 155 نکلا جبکہ جینیٹکس اسٹڈی 2017ء تا 2023ء کی گئی جس میں ان کی آبادی کا تخمینہ 167 سامنے آیا۔

&quot;یہ دونوں نتائج (155 اور 167) ایک دوسرے سے قریب ہیں جس سے یہ یقین مزید مضبوط ہوا کہ یہ تخمینے حقیقت کے قریب ہیں چونکہ جینیٹکس اسٹڈی نسبتاً نئی اور تازہ ترین ڈیٹا پر مبنی ہے اس لیے اسے زیادہ معتبر مانا گیا اور موجودہ رپورٹنگ میں 167 کو حوالہ بنایا گیا۔&quot;

ان تحقیقات کے لئے کئی عالمی اداروں نے مالی تعاون کیا جن میں برطانوی حکومت کا ڈارون انیشیٹوو، وائٹلے فنڈ فار نیچر، سنو لیپرڈ ٹرسٹ، ریسرچ کاونسل آف ناروے اور پینتھرا شامل تھے۔

<h2>برفانی چیتا کہاں کہاں رہتا ہے؟</h2>

برفانی چیتا فطری طور پر ایشیا کے بارہ ممالک میں پایا جاتا ہے جن میں افغانستان، بھوٹان، چین، بھارت، قازقستان، کرغیزستان، منگولیا، نیپال، پاکستان، روس، تاجکستان اور ازبکستان شامل ہیں۔

برفانی چیتے ہمالیہ، قراقرم، ہندوکش، پامیر، تیان شان اور التائی جیسے بلند و دشوار گزار پہاڑی سلسلوں میں آباد ہیں۔

برفانی چیتوں کی عالمی آبادی کا تخمینہ 3,500 سے 7,000 کے درمیان ہے۔

ان کی سب سے بڑی آبادی چین میں ہے جس کا تخمینہ دو ہزار سے ڈھائی ہزار کے درمیان لگایا گیا ہے۔ منگولیا میں ان کی تعداد تقریباً ایک ہزار ہے جبکہ بھارت میں یہ پانچ سو سے سات سو کے درمیان بتائی جاتی ہے۔

افغانستان کا علاقہ واخان بھی برفانی چیتے کا ایک اہم مسکن ہے جہاں ان کی آبادی کا اندازہ 110 سے 136 کے درمیان لگایا گیا ہے۔&nbsp;

شازیہ محبوب

شازیہ محبوب اسلام آباد میں مقیم ایک تحقیقی صحافی ہیں۔

آپ ملک سے باہر نہیں جا سکتے: کیا 'ائیرپورٹ ناکے' پاکستانی پاسپورٹ کا وقار بلند کر پائیں گے؟

پاکستان میں بڑھاپا خاموش بحران کی صورت کیوں اختیار کر رہا ہے؟

بپھرتے موسموں میں پگھلتے مسکن: کیا برفانی چیتوں کی نئی گنتی ان کی بقا کی کوششوں کو سہارا دے پائے گی؟