چالیس سالہ گوہر خان کا تعلق بلوچستان کے شمال مشرقی ضلع ژوب سے ہے۔ وہ ایک میڈیکل سٹور چلاتے ہیں۔ ان کی پینتیس سالہ اہلیہ اور پانچ بچوں کی ماں کو تین سال پہلے چھاتی کا سرطان لاحق ہو گیا تھا۔ گوہر خان نے کا کوئٹہ کے ایک پرائیویٹ ہسپتال سے ان کا علاج کرایا جس کے بعد وہ صحت مند زندگی گزار رہی ہیں۔

گوہر خان کہتے ہیں کہ پشتون اور بلوچ اقوام پر مشمتل بلوچستان کے قبائلی معاشرے میں چھاتی کے سرطان پر بات کرنا آج بھی معیوب سمجھا جاتا ہے۔ یہی وجہ ہے کہ اکثر مریض منفی معاشرتی رویوں، غفلت اور طبی سہولیات تک رسائی نہ ہونے کی وجہ سے اس بیماری کے چوتھے مرحلے میں پہنچ جاتے ہیں جہاں اس کا علاج نہ صرف مشکل بلکہ ناممکن ہو جاتا ہے۔

&quot;اس غریب صوبے میں طبی سہولیات کا فقدان اور غربت کی انتہا ہے جس کے باعث یہاں خواتین چھاتی میں درد اور تکلیف کو عام بیماری سمجھ لیتی ہیں۔ جب سرطان کی تشخیص ہوجاتی ہے تو ان میں سے بیشتر کے لیے ہسپتال تک رسائی بھی مشکل ہوتی ہے۔ اگر وہ کسی طرح ہسپتال پہنچ بھی جائیں تو مہنگا علاج ہر کسی کے بس میں نہیں ہوتا&quot;۔

کوئٹہ کے علاقے بروری میں قائم صوبے کے واحد کینسر ہسپتال &quot;سینار&quot; میں ناصرف بلوچستان بلکہ سرحد پارسے&nbsp; مریض بھی اپنا علاج کرانے آتے ہیں۔ بلوچستان کی سرحدیں ہمسایہ ممالک افغانستان اور ایران سے ملتی ہیں۔

سینار پرائیویٹ ہسپتال ہے جہاں تشخیص سے لے کر ٹیسٹ، علاج اور ادویات تک ہر چیز کی قیمت مریضوں سے وصول کی جاتی ہے۔ کینسر کے ایک مریض کے علاج پر 30 سے 70 لاکھ&nbsp; روپے تک خرچہ آتا ہے۔

جو مریض علاج کی سکت نہیں رکھتے انہیں مفت علاج کے لیے محکمہ سوشل ویلیفئر کو درخواست دینا پڑتی ہے&nbsp; مگر یہ اتنا طویل اور پیچیدہ عمل ہے کہ&nbsp; بیشتر صورتوں میں مریض مفت علاج کا ارادہ ترک کردیتے ہیں۔

چالیس سالہ بی بی زہرہ کا تعلق افغانستان کے علاقے نیمروز سے ہے۔ دو سال قبل وہ اپنے شوہر کے ہمراہ افغان صوبے قندھار اور پھر چمن اور کوئٹہ کے راستے 800 کلومیٹر سفر کرکے&nbsp; کراچی پہنچیں جہاں ایک نجی اسپتال میں ان کی دائیں چھاتی میں کینسر کی تشخیص ہوئی۔کراچی میں ابتدائی علاج سے ان کی تکیلیف کم نہیں ہوئی تو انھوں نے کوئٹہ کا رخ کیا۔ اب وہ گزشتہ 20 ماہ سے کوئٹہ کے سینار ہسپتال&nbsp; سے علاج کرا رہی ہیں اور سفری مشکلات کے باوجود ہر چھ ماہ بعد ڈاکٹر سے اپنا چیک اپ کرواتی ہیں۔

بی بی زہرہ کا شمار ان ہزاروں مریضوں میں ہوتا ہے، جو وقتاً فوقتاً اس ہسپتال میں آتے رہتے ہیں۔

بی بی زہرہ کو اپنے علاج سے زیادہ سرحد بند ہو جانے کی فکر رہتی ہے۔ پاک افغان سرحد بند ہو جانے کے باعث ان کا علاج کئی بار تعطل کا شکار رہا اور انھیں سرحد کھلنے کے انتظار میں کئی دن تک انتظار کرنا پڑا۔ اگرچہ وہ نیمروز سے 10 سے 12 گھنٹے دشوار گزار سفر کرکے کوئٹہ پہنچتی ہیں، تاہم انہیں یہاں ضروری سہولیات دستیاب ہوتی ہیں۔

سینار ہسپتال میں پاکستانی مریضوں کےٓ ساتھ افغان مریضوں کا علاج بھی &quot;انسانی ہمدردی&quot; کی بنیاد پر کیا جاتا ہے۔

اس ہسپتال میں گزشتہ چھ سال سے خدمات انجام دینے والے ڈاکٹر فیروزخان اچکزئی کا کہنا ہے کہ بلوچستان کے اس واحد سرطان ہسپتال میں سالانہ سات سے آٹھ ہزار نئے مریض آتے ہیں جبکہ بارہ ہزار زیر علاج مریضوں کا فالواپ یا روٹین کا چیک اپ ہوتا ہے۔

&quot;ہسپتال میں بلوچستان کے تمام اضلاع سمیت افغانستان، ایران اور سندھ سے تعلق رکھنے والے مریض علاج کرانے کے لیے اتا۔ مردوں میں خوراک کی نالی کا کینسر جبکہ خواتین میں چھاتی کے کینسر کی شرح زیادہ ہے۔افغان مریضوں میں معدے کے کینسر اور خون کے سرطان کے مریض زیادہ ہوتے ہیں&quot;۔

ڈاکٹر فیروز کے مطابق اس وقت ہسپتال میں صرف بلوچستان سے تعلق رکھنے والی چھاتی کے سرطان کی ڈھائی ہزار کے لگ بھگ مریض رجسٹرڈ ہیں۔ عمر رسیدہ خواتین ہی نہیں بلکہ نوجوان عورتیں اور اب غیر شدہ شدہ لڑکیاں بھی اس مرض میں مبتلا ہونے لگی ہیں۔

<h2>چھاتی کے سرطان کی علامات</h2>

چھاتی کا کینسر کسی بھی عمر میں ہوسکتا ہے لیکن 40 سال یا اس سے زیادہ عمر میں اس کے امکانات زیادہ ہوتے ہیں۔ماہرین صحت بتاتے ہیں کہ چھاتی میں درد، گلٹی محسوس ہونے، چھاتیوں کی جلد سرخ ہوجانے، یا نپل سے رطوبت بہنے کی صورت میں فوری طور پر ڈاکٹر سے رجوع کرنا چاہیے۔

ڈاکٹر فیروز اچکزئی نے بتایا کہ بلوچستان میں چھاتی کے سرطان کی اکثر مریض کینسر کے چوتھے مرحلے میں ہسپتال سے رجوع کرتی ہیں جن میں 80 فیصد جانبر نہیں ہو پاتیں۔ اکثر لوگ گھریلو ٹوٹکوں یا دم کے ذریعے علاج پر انحصار کرتے ہیں۔ بعض مریض اپنی بیماری کو پوشیدہ رکھتے ہیں، جس کی وجہ سے مرض لاعلاج شکل اختیار کر لیتا ہے۔

&nbsp;ڈاکٹر فیروز&nbsp; کے مطابق بلوچستان میں چھاتی کے سرطان کے سب سے زیادہ مریض کوئٹہ سے آتے ہیں۔ اس کے بعد ژوب، چمن، خضدار، تربت اور خاران کے مریضوں کی تعداد زیادہ ہے۔

سینار کے بالمقابل صوبے کے سب سے بڑے سرکاری ہسپتال بلوچستان میڈیکل کمپلیکس میں کینسر کے ہر طرح کے مریضوں کے لیے 40 بستروں کا صرف ایک وارڈ موجود ہے۔

بولان میڈیکل کمپلیکس کے کینسر وارڈ کے سربراہ ڈاکٹر زاہد محمود کا کہنا ہے کہ وہ گزشتہ دو دہائیوں سے کینسر کا علاج کر رہے ہیں۔ ان کے پاس ہر سال تین ہزار نئے مریض آتے ہیں۔وسائل نہ ہونے کی وجہ سےبہت سے&nbsp; مریضوں کو سینار ہسپتال ریفر کر دیا جاتا ہے۔

انہوں ںے بتایا کہ صحت یاب ہونے تک کینسر کے مریض پر 30 لاکھ روپے کے اخراجات آتے ہیں، بی ایم سی کے کینسر یونٹ کو سالانہ ایک کروڑ کا فنڈ فراہم کیا جاتا ہے جس سے صرف چار مریضوں کا بمشکل علاج ہو سکتا ہے۔ بیشتر مریض ادویات خریدنے کی استطاعت بھی تک نہیں رکھتے۔ یہی وجہ سے کہ چھاتی کےسرطان کی بیشتر مریض خواتین مہنگے علاج کی بجائے گھریلو ٹوٹکوں اور روایتی علاج کو ترجیح دیتی ہیں۔

<h2>ہر روز 109 اموات</h2>

پنک ربن ایک غیر سرکاری&nbsp; تنظیم ہے جو 2004 سے ملک بھر میں چھاتی کے کینسرکی روک تھام اور لوگوں میں اس بیماری کے حوالے سے شعور بیدار کرنے کے لیے سرگرم ہے۔

اس تنظیم کے جاری کردہ کے اعداد و شمار کے مطابق دنیا بھر میں ہر روز 1400 خواتین بریسٹ کینسر سے انتقال کر جاتی ہی۔ پاکستان میں یہ تعداد 109 ہے جو ان اموات کا آٹھ فیصد ہے۔

دنیا میں کینسر کے مریضوں کے اعدادو شمار پر نظر رکھنے والے ادارے <a href="https://gco.iarc.fr/today/data/factsheets/populations/586-pakistan-fact-sheets.pdf">گلوبل کینسر آبزرویٹری</a> کے مطابق پاکستان میں ہر سال کینسر کے ایک لاکھ 78 ہزار سے زیادہ نئے مریض سامنے آتے ہیں جن میں بریسٹ کینسر کی مریضوں کی تعداد 26 ہزار کے لگھ بھگ ہوتی ہے جو کینسر کے کُل مریضوں کا ساڑھے چودہ فیصد بنتا ہے۔

نومبر 2021ء میں سپریم کورٹ کے چیف جسٹس گلزار احمد کی سربراہی میں دو رکنی بینچ نے دل کے مریضوں کیلئے سٹنٹ سے متعلق ازخود نوٹس کی سماعت کے دوران ریمارکس دیتے ہوئے کہا تھا کہ چھاتی کا کینسر خواتین کو نہایت سرعت سے متاثر کر رہا ہے۔ ملک کے کسی سرکاری ہسپتال میں میمو گرافی (چھاتی میں گلٹی دیکھنے کا ٹیسٹ)&nbsp; اور بریسٹ کینسر کے علاج کی سہولت موجود نہیں۔

&nbsp;بیشتر خواتین مریض نجی ہسپتالوں سے&nbsp; چھاتی کے سرطان کا مہنگا علاج کرانے کی استطاعت نہیں رکھتیں۔ اس ضمن میں چیف جسٹس نے وفاقی اور صوبائی حکومتوں کو تمام ہسپتالوں میں بریسٹ کینسر کا علاج اور سرطان کے ٹیسٹ کا انتظام یقینی بنانے کی ہدایت کی تھی۔

تاہم ان ہدایات پر آج تک عمل نہیں ہوا۔

اپنا شریکِ درد بنائیں کسی کو کیا: چھاتی کے کینسر میں مبتلا خواتین کیسے گھٹ گھٹ کر مر رہی ہیں۔

'مہنگا علاج ہر کسی کے بس میں نہیں ہوتا': بلوچستان میں چھاتی کے کینسر میں مبتلا خواتین کی مسیحائی کون کرے گا؟

text

بلوچستان کے ضلع قلعہ سیف اللہ کی تحصیل کان مہترزئی میں رہنے والے چالیس سالہ نظام الدین کی زندگی جولائی میں آنے والے سیلاب سے بری طرح متاثر ہوئی ہے۔ اس آفت میں ان کے گھر اور دو ایکڑ پر سیب کے باغات کو شدید نقصان پہنچا ہے۔ یہ باغ ہی ان کا ذریعہ روزگار تھے جہاں 500 درخت جڑوں سے اکھڑ گئے ہیں یا سیلابی پانی نے انہیں بانجھ کر دیا ہے۔&nbsp;

کان مہترزئی کا شمار بلوچستان کے سرد ترین علاقوں میں ہوتا ہے جو اعلیٰ معیار کے سیب کی پیداوار کے لئے مشہور ہے۔ نظام الدین یہاں سوری مہترزئی نامی گاؤں کے رہائشی ہیں جو ایک برساتی ندی کے قریب واقع ہے۔ اس سال اگست میں شدید بارشوں کے بعد ایک اونچا سیلابی ریلا اس ندی سے گزرا جس نے بند توڑ کر انسانی آبادی اور زرعی اراضی کو لپیٹ میں لے لیا۔ سیلاب اس قدر زوردار تھا کہ کچے مکان، کھڑی فصلیں اور درخت تنکوں کی طرح پانی میں بہہ گئے۔&nbsp;

نظام الدین نے بتایا کہ اس علاقے میں بیشتر آبادی کے معاش کا دارومدار زراعت بالخصوص سیب کی فصل پر ہے۔ قریبی پہاڑوں سے آنے والا سیلابی پانی نمکین ہوتا ہے جو سیب کے درخت کی جڑوں میں پہنچ جائے یا سیلاب کے نتیجے میں درخت کے نچلے حصے کے اردگرد مٹی جمع ہو جائے تو درخت سوکھ جاتا ہے۔ اس طرح سوری مہترزئی اور گردونواح میں سیب کے تقریباً 25 ہزار درختوں کو ناقابل تلافی نقصان پہنچا ہے۔

گاؤں میں نظام الدین کا 14 کمروں پر مشتمل گھر بھی سیلاب میں بہہ گیا ہے۔ مٹی اور پتھروں سے بنے اس گھر کی تعمیر نو کے لیے انہیں جو رقم درکار ہے اس کا انتظام کرنا ان کے لیے فی الوقت ممکن نہیں کیونکہ اس مرتبہ ان کی سیب کی تیار فصل ضائع ہو چکی ہے جس سے وہ اپنے سال بھر کے اخراجات پورے کرتے تھے۔ ان دنوں وہ اس خیال سے پریشان ہیں کہ ان کے گھرانے کو شدید سردی کا موسم تباہ شدہ مکان کے کھنڈرات میں گزارنا پڑے گا۔

کان مہترزئی سے جنوب کی جانب دس کلومیٹر فاصلے پر واقع کلی زغلونہ گاؤں میں ساٹھ سالہ حکیم خان کے باغات بھی سیلاب کی نذر ہو چکے ہیں۔ ان کا کہنا ہے کہ وہ ہر سال سیب کے سیزن میں ہر درخت سے عموماً دس کریٹ فصل اٹھاتے اور پھل سے بھرے تین ٹرک کوئٹہ اور دیگر علاقوں کو بھیجتے تھے جس سے انہیں تقریباً چھ سے دس لاکھ روپے آمدنی ہوتی تھی۔ لیکن بارشوں اور سیلاب میں ناصرف ان کی تیار فصل تباہ ہو گئی بلکہ وہ آنے والے کئی سال کے لیے اپنے واحد ذریعہ روزگار سے بھی محروم ہو گئے ہیں۔&nbsp;

قدرتی آفات سے نمٹنے کے صوبائی ادارے پراونشل ڈیزاسٹر مینجمنٹ اتھارٹی (پی ڈی ایم اے) کی رپورٹ کے مطابق کئی ہفتے جاری رہنے والی بارشوں نے صوبے کے طول و عرض میں ایک لاکھ 98 ہزار ایکڑ پر کھڑی فصلوں اور باغات کو نقصان پہنچایا جبکہ سیلاب سے محفوظ رہنے والی فصل سڑکیں بند ہونے کی وجہ سے بروقت منڈیوں تک نہ پہنچ سکی۔

<h2>باغ کا باغ اُجڑ گیا</h2>

پاکستان میں پھلوں کی کاشت کے حساب سے سب سے زیادہ رقبہ بلوچستان میں ہے۔ آل پاکستان فروٹ اینڈ ویجیٹیبل ایکسپورٹرز امپورٹرز اینڈ مرچنٹ ایسوسی ایشن کے مطابق صوبے میں تقریباً دو لاکھ ہیکٹر اراضی سے پھلوں کی سالانہ دس لاکھ ٹن پیداوار حاصل ہوتی ہے۔ ضلع قلعہ سیف اللہ، لورالائی، مستونگ، پشین، کوئٹہ اور زیارت سیب کی پیداوار کے لیے مشہور ہیں جہاں پیدا ہونے والے تور کولو، شین کولو، گاجا، امری، گلاسی، بلیک ڈائمنڈ، رم زم، ٹاپ سپر اور مشہدی سیب اپنے ذائقے کی وجہ سے خاص شہرت رکھتے ہیں۔

قلعہ سیف اللہ میں پھل اور سبزی منڈی کے تاجروں کی تنظیم کے صدر محمد صادق خان جوگیزئی کہتے ہیں کہ سیب کا سیزن جون سے اکتوبر تک ہوتا ہے۔ اس علاقے میں سیب کے باغات ژوب سے لے کر کان مہترزئی تک پھیلے ہوئے ہیں۔ فصل تیار ہونے کے بعد منڈی سے روزانہ سیب سے لدے تقریباً تین سو ٹرک ملک کے دیگر شہروں میں بھیجے جاتے ہیں۔ ایسے ایک ٹرک میں بیس سے تیس لاکھ مالیت کا تقریباً سولہ ٹن پھل ہوتا ہے۔&nbsp;

زمیندار ایکشن کمیٹی بلوچستان کے مطابق جون اور جولائی کی طوفانی بارشوں کے باعث صوبے میں دو لاکھ ایکڑ پر زرعی اراضی اور کھڑی فصلوں کو نقصان پہنچا ہے جس میں سیب کی فصل سب سے زیادہ متاثر ہوئی ہے۔ قلعہ سیف اللہ کی تحصیل مسلم باغ کے اسسٹنٹ کمشنر ذکا اللہ درانی کا کہنا ہے کہ سیلاب کے نتیجے میں سیب کے باغات کو سب سے زیادہ نقصان کان مہتر زئی اور گردونواح میں ہوا ہے۔

صادق کے مطابق &#39;&#39;سیب کی فصل مسلسل دو ماہ بارش کی زد میں رہی اور اس دوران بیشتر سیب درختوں پر ہی خراب ہو گئے۔ مجموعی طور پر نوے فیصد فصل ضائع ہوئی اور صرف دس فیصد ہی مارکیٹ میں پہنچ سکی۔ اس طرح زمینداروں کے علاوہ ٹرانسپورٹروں، مزدوروں اور سیب کو محفوظ کرنے کے لیے کریٹ، کیل اور اخبار جیسا سامان بیچنے والے چھوٹے دکانداروں کو بھی نقصان اٹھانا پڑا۔ اقوام متحدہ کے تعاون سے بلوچستان میں جاری زرعی خوراک و صنعت کی ترقی کے منصوبے کی رپورٹ میں بتایا گیا ہے کہ صوبے میں سیب کی کاشت اور فروخت سے قریباً 18 ہزار افراد کا روزگار جڑا ہوا ہے۔

وفاقی اور صوبائی حکومتوں کی جانب سے بارشوں میں جاں بحق ہونے والے افراد کے لواحقین کو فی کس بیس لاکھ روپے نقد امداد دی گئی ہے تاہم زمین داروں کی داد رسی کے لئے تا حال کوئی اقدامات نہیں اٹھائے گئے۔ حکیم خان کا کہنا ہے کہ &#39;&#39;اگرچہ ہمارے نقصانات کا ازالہ نہیں ہو سکتا تاہم حکومت کی تھوڑی سی توجہ اور امداد بھی اس مشکل گھڑی میں متاثرین کا احساس محرومی دور کر سکتی ہے&#39;&#39;۔&nbsp;

درانی کا کہنا ہے کہ پی ڈی ایم اے اور ضلعی انتظامیہ مشترکہ طور متاثرہ علاقوں کا سروے کر رہے ہیں جس کی تکمیل کے بعد زمینداروں کو ہر ممکن امداد مہیا کی جائے گی۔ تاہم صادق جوگیزئی اس دعوے پر تحفظات کا اظہار کرتے ہوئے کہتے ہیں کہ اب تک سیب کی فصل کو پہنچنے والے نقصان کو جانچنے اور درست تخمینے لگانے کے لیے بڑے پیمانے پر کوئی سروے ہی نہیں کیا گیا۔ ایسا سروے کرنے کے لیے معقول وقت اور افرادی قوت درکار ہوتی ہے جو شاید اس وقت حکومت کے پاس نہیں ہے۔

سیلاب نے کان مہترزئی میں سیب کے ہزاروں درخت بانجھ کر دیے: زمیندار زندگی دوبارہ شروع کرنے کے لیے حکومتی سہارے کے منتظر۔

مولوی میرا خان کی آلو کی فصل پانی کی کمی کے باعث خراب ہو گئی ہے جس کی وجہ سے انہیں بھاری مالی نقصان اٹھانا پڑا ہے۔&nbsp;

انہوں نے اِس سال مارچ میں لگ بھگ تین لاکھ روپے خرچ کر کے تین ایکڑ اراضی پر آلو کاشت کیے تھے جس سے انہیں تقریباً ایک سو 50 من (چھ ہزار کلو گرام) فی ایکڑ پیداوار کی توقع تھی۔ ان کا خیال تھا کہ اس فصل کو بیچ کر وہ تقریباً سات لاکھ روپے کما سکیں گے لیکن ان کی تمام توقعات دھری کی دھری رہ گئی ہیں کیونکہ ان کی فصل کو افزائش کے لیے درکار پانی ہی نہیں مل سکا۔ &nbsp; &nbsp;

بلوچستان کے شمال مغربی ضلع ژوب کے گاؤں کلی گردہ بابر میں رہنے والے 50 سالہ میرا خان کا خاندان کئی پشتوں سے کاشتکاری کرتا چلا آ رہا ہے جس کے لیے وہ کاریزوں کا پانی استعمال کرتے ہیں جو دراصل زمین دوز نالیاں ہیں جن کے ذریعے پہاڑوں کی چوٹیوں پر یا ان کے دامن میں واقع قدرتی چشموں کا پانی فصلوں تک پہنچایا جاتا ہے۔ یہ نالیاں سطحِ زمین پر بنے کنوؤں کے ذریعے ایک دوسرے سے جڑی ہوتی ہیں جو ان میں بہنے والے پانی کو ہوا اور روشنی فراہم کرنے کے ساتھ ساتھ انہیں صاف ستھرا رکھنے کے لیے بھی استعمال کیے جاتے ہیں۔ مقامی لوگوں کا کہنا ہے کہ آب پاشی کے اس طریقے سے نہ صرف پانی کو بخارات بن کر اڑنے سے بچایا جا سکتا ہے بلکہ اسے ٹھنڈا اور گردوغبار سے محفوظ بھی رکھا جا سکتا ہے۔&nbsp;

لیکن پچھلی ایک دہائی میں خشک سالی کے متعدد ادوار کے باعث بلوچستان کے شمال مغربی اضلاع میں واقع کاریزوں میں پانی کی مقدار بہت کم ہو گئی ہے۔ یہاں تک کہ ان میں سے کئی ایک خشک بھی ہو گئے ہیں۔ ان میں ژوب کے ضلعی صدر مقام سے 17 کلو میٹر شمال مشرق میں واقع کلی گردہ بابر میں موجود 10 کاریز بھی شامل ہیں۔&nbsp;

چونکہ تقریباً 10 ہزار آبادی پر مشتمل اس گاؤں کے بیشتر مکینوں کا ذریعہ معاش زراعت اور گلہ بانی ہے جن کے لیے ہی وہ انہی کاریزوں کے پانی پر انحصار کرتے ہیں اس لیے ان کے خشک ہو جانے سے مقامی لوگوں کا روزگار بری طرح متاثر ہو رہا ہے۔

یہاں رہنے والے 75 سالہ قطب خان اس مسئلے کی ایک اور وجہ کی نشان دہی کرتے ہوئے کہتے ہیں کہ &quot;کاریزوں کو خشک ہونے سے بچانے کے لیے ضروری ہوتا ہے کہ ان کی باقاعدگی سے صفائی کی جائے اور انہیں کشادہ رکھا جائے۔ &nbsp;یہی وجہ ہے کہ ہمارے آباؤاجداد راتوں کو لالٹین کی روشنی میں ہاتھوں اور کدالوں سے یہ کام کرتے تھے&quot;۔ لیکن، ان کے مطابق، &quot;اب جدید مشینری دستیاب ہونے کے باوجود مقامی کاشت کار اس جانب توجہ نہیں دیتے جس سے کاریزوں میں پانی کے بہاؤ کی گنجائش ماضی کی نسبت بہت کم ہو گئی ہے&quot;۔

اسی گاؤں کے رہنے والے 65 سالہ مولوی صالح کا بھی یہی کہنا ہے۔ وہ اپنی زمین پر گندم، جَو، پیاز، بھنڈی، کدو اور دیگر سبزیاں اگاتے ہیں اور کہتے ہیں کہ &quot;بہت سا پانی ٹوٹے پھوٹے اور خستہ حال کاریزوں کے اندر ہی ضائع ہو جاتا ہے&quot;۔ اس لیے وہ تجویز کرتے ہیں کہ ان کے اختتامی سروں پر پکے تالاب بنائے جائیں اور ان سے پکی نالیاں نکال کر زرعی زمینوں کو سیراب کرنے کا بندوبست کیا جائے تاکہ &quot;پانی کا ضیاع روکا جا سکے&quot;۔&nbsp;

تاہم کاریزوں کے بحالی کے اس جیسے واضح اور مربوط لائحہ عمل کی عدم موجودگی میں لوگ ایسے حل تلاش کر رہے ہیں جو مہنگے ہونے کے ساتھ ساتھ ناپائیدار بھی ہیں۔ ژوب کے رہنے والے ایک نوجوان نجیب اللہ کے مطابق حالیہ بارشوں سے پہلے کئی مقامی کاشت کاروں نے ایک برساتی ندی کے کنارے 20 سے 30 فٹ گہرے گڑھے کھودے تاکہ وہ ان میں جمع ہونے والے پانی کو ٹیوب ویلوں کی مدد سے اپنی زمینوں تک لے جا سکیں۔ ان کا کہنا ہے کہ &quot;اس طریقے سے فصلیں تو سیراب ہو گئیں لیکن اس میں بہت سا وقت، پیسہ اور محنت خرچ ہوئے&quot;۔

<h2>کاریز بنائیں، زراعت بچائیں</h2>

کاریز کا آغاز تقریباً تین ہزار سال پہلے ایران میں ہوا تھا۔ اس کی نادر انجینئرنگ کی وجہ سے اقوام متحدہ کے ادارہ برائے تعلیم، سائنس اور ثقافت (یونیسکو) نے 2016 میں اسے عالمی تعمیراتی ورثے کی فہرست میں بھی شامل کر لیا ہے۔ &nbsp;

کاریز کسی کی نجی ملکیت نہیں ہوتے بلکہ ان کی تعمیر اور استعمال دونوں اجتماعی سرگرمیاں ہوتی ہیں۔ ان میں بہنے والا پانی بھی ان سے سیراب ہونے والے علاقے کی مشترکہ ملکیت ہوتا ہے اس لیے ان کی مرمت اور صفائی ستھرائی بھی اس علاقے میں رہنے والے سبھی لوگوں کی مشترکہ ذمہ داری ہوتی ہے۔

بلوچستان کے محکمہ زراعت کے ڈائریکٹر محمد انور دوتانی کا کہنا ہے کہ ان کے محکمے کے ریکارڈ کے مطابق قیام پاکستان کے وقت بلوچستان میں چھ ہزار کاریز تھے۔ تاہم، ان کے مطابق، &quot;گزشتہ دو دہائیوں میں ان میں سے تقریباً نصف ختم ہو گئے ہیں&quot;۔

قطب خان سمجھتے ہیں کہ اس صورتِ حال کہ ذمہ داری محض خشک سالی پر نہیں ڈالی جا سکتی۔ ان کے خیال میں بارشوں میں کمی کے علاوہ کچھ دیگر عوامل نے بھی مقامی کاریزوں کو متاثر کیا ہے جن میں سب سے نمایاں آبادی میں اضافہ ہے۔ ان کے بقول &quot;مقامی آبادی کے بڑھنے سے زیرِکاشت رقبے میں اضافہ ہو گیا ہے جس سے پانی کی طلب اس کی رسد کے مقابلے میں بہت بڑھ گئی ہے&quot;۔

ژوب سے تعلق رکھنے والے زرعی امور کے ماہر ازمیر خان بھی ان سے متفق ہیں۔ ان کا کہنا ہے کہ &quot;خشک سالی، بڑھتی ہوئی آبادی اور دیہات سے شہروں کی طرف آبادی کی نقل مکانی کے باعث بلوچستان کے قدرتی ماحول اور آبی وسائل پر شدید منفی اثرات پڑ رہے ہیں&quot;۔ ان اثرات کا ایک اہم نتیجہ یہ نکلا ہے کہ &quot;بڑی تعداد میں کاریز خشک ہوگئے ہیں اور جو باقی بچے ہیں وہ بھی ختم ہونے کو ہیں&quot;۔&nbsp;

تاہم محمد انور دوتانی کی نظر میں ان کے خشک ہو جانے کی وجہ کچھ اور بھی ہے۔ ان کا کہنا ہے کہ &#39;&#39;قیام پاکستان سے پہلے کاریزوں کے قریب کنوؤں کی تعمیر ممنوع تھی تاکہ اُن کی وجہ سے زیرِزمین پانی کی سطح نیچے نہ جائے اور کاریزوں میں پانی کے بہاؤ پر کوئی منفی اثر نہ پڑے&quot;۔ لیکن، ان کے مطابق، &quot;اب کاشت کاروں نے آب پاشی کی ضروریات پوری کرنے کے لیے جا بجا ٹیوب ویل لگا لیے ہیں حالانکہ ان پر پابندی کا قانون اب بھی موجود ہے&quot;۔&nbsp;

ان کا کہنا ہے کہ ژوب کے نواحی ضلع &quot;قلعہ سیف اللہ میں ہی تین ہزار سے زیادہ ٹیوب ویل لگے ہوئے ہیں جن کی وجہ سے زیرِزمین پانی کی سطح بہت نیچے چلی گئی ہے اور نتیجتاً کاریزوں کے ماخذ کے طور پر کام کرنے والے قدرتی چشمے خشک ہو گئے ہیں&quot;۔

ان کے خیال میں اس مسئلے کا حل یہی ہے کہ مزید &quot;ٹیوب ویل لگانے کے بجائے کاریزوں کے نظام کو بحال کیا جائے&quot;۔ وہ سمجھتے ہیں کہ اس سے &quot;نہ صرف زراعت کے لیے درکار پانی کی کمی کا مسئلہ حل ہو جائے گا بلکہ زیرزمین پانی کی سطح کو بھی مزید نیچے جانے سے روکا جا سکے گا&quot;۔&nbsp;

ایک غیرسرکاری تنظیم، بلوچستان رورل سپورٹ پروگرام، نے یہی کیا ہے۔ 2014 میں اس نے نے ژوب کے ایک گاؤں کے لوگوں کو مالی اور تکنیکی امداد فراہم &nbsp;کی تاکہ وہ ایک مقامی کاریز کو پختہ کر سکیں۔ اس کے اہل کار نقیب اللہ کہتے ہیں کہ اس سے نہ صرف کاریز میں پانی کی مقدار میں اضافہ ہو گیا بلکہ یہ پانی دور دراز زمینوں تک بھی پہنچنے لگا۔ اسی تجربے کی بنا پر ان کا کہنا ہے کہ &quot;اگر ژوب میں موجود تمام کاریز فعال ہو جائیں تو اس ضلعے کی موجودہ زرعی اراضی کو سیراب کرنے کے ساتھ ساتھ اس کے تل نامی علاقے میں پڑی ایک لاکھ دس ہزار ایکڑ بنجر اراضی کو بھی قابل کاشت بنایا جا سکتا ہے&quot;۔

کوئی بھی رُت ہو ملی ہے دکھوں کی فصل ہمیں: 'گزشتہ دو دہائیوں میں بلوچستان میں آب پاشی کے لیے بنائے گئے آدھے کاریز خشک ہو گئے ہیں'۔

بسم اللہ خان کی نم آنکھوں میں بے بسی کا احساس واضح ہے۔ وہ کہتے ہیں کہ گزشتہ مہینے جنگل میں لگنے والی آگ ان کے چلغوزے کے سارے درخت راکھ کر گئی ہے جس سے ان کا واحد ذریعہِ معاش ختم ہو گیا ہے۔

وہ بلوچستان کے شمال مغربی ضلع شیرانی کے ایک پسماندہ علاقے شارغلی میں رہتے ہیں اور جون 2022 کی ابتدا میں کلی سورلکی نامی مقامی گاؤں میں ایک ایسے احتجاجی کیمپ میں بیٹھے ہیں جو جنگل میں لگنے والی آگ کے متاثرین نے قائم کیا ہے۔ ان متاثرین کا مطالبہ ہے کہ حکومت انہیں دوبارہ پاؤں پر کھڑا ہونے میں مدد دے اور ان کے لیے روزگار کے متبادل ذرائع کا بندوبست کرے۔&nbsp;

بسم اللہ خان کی عمر 50 سال ہے اور وہ دو بچوں کے باپ ہیں جن میں سے ایک جسمانی طور پر معذور ہے۔ وہ کہتے ہیں کہ وہ چلغوزے کی فصل سے تقریباً 10 لاکھ روپے سالانہ کما لیتے تھے۔ اس لیے ان کا پورا خاندان ہر سال اس کی چنائی اور فروخت کا شدید انتظار کرتا تھا۔

اِس سال جب چلغوزے کے درختوں پر کونپلیں پھوٹنا شروع ہوئیں تو انہیں امید لگ گئی کہ ان کی فصل اچھی ہو گی اور نتیجتاً انہیں گزشتہ سالوں کے مقابلے میں زیادہ آمدن ہو گی۔ لیکن وہ کہتے ہیں کہ &quot;آگ نے یہ تمام خواب چکنا چور کر دیے ہیں&quot;۔&nbsp;

انہیں یہ بھی معلوم ہے کہ مستقبل قریب میں ان کے نقصان کا ازالہ ممکن نہیں کیونکہ، ان کے مطابق، &quot;چلغوزے کے درخت کودوبارہ اُگنے اور پہلا پھل دینے میں عام طور پر 20 سے 25 سال لگ جاتے ہیں&quot;۔ اس لیے وہ پریشان ہیں کہ اتنا عرصہ وہ اپنا گھر بار کیسے چلائیں گے۔ ان کے علاقے میں نہ تو کھیتی باڑی ممکن ہے اور نہ ہی سڑکوں، بجلی، پینے کے صاف پانی، طبی مراکز اور سکولوں جیسی سہولتیں موجود ہیں جن کی مدد سے ان جیسے مقامی لوگ اپنی زندگیاں بہتر بنا سکیں۔

یہی وجہ ہے کہ چلغوزے کے کاروبار سے وابستہ شیرانی کے سبھی لوگ اپنے معاشی مستقبل کے بارے میں شدید غیریقینی کیفیت کا شکار ہیں۔ ان میں شامل عبدالودود نامی تاجر کہتے ہیں کہ وہ پچھلے 20 سال سے مقامی لوگوں سے چلغوزے خرید کر ملک کے دیگر علاقوں میں فروخت کر رہے ہیں۔ اس مقصد کے لیے انہوں نے اس سال بھی بڑی بڑی رقمیں درختوں کے مالکان کو پیشگی دی ہیں جن کی واپسی کی انہیں اب کوئی امید نہیں۔ وہ کہتے ہیں کہ &quot;اس آگ نے مجھے بھاری مالی نقصان پہنچایا ہے جس کے صدمے سے نکلنا میرے لیے آسان نہیں ہو گا&quot;۔

اقوام متحدہ کے عالمی ادارہِ خوراک و زراعت (ایف اے او) کے شعبہ نیچرل ریسورس مینیجمنٹ میں کنسلٹنٹ کے طور پر کام کرنے والے ڈاکٹر فیض الباری بھی ان مقامی معاشی نقصانات کی توثیق کرتے ہیں۔ ان کا کہنا ہے کہ درخت سے صارف تک پہنچنے کے عمل میں چلغوزہ ہزاروں مقامی لوگوں کو روزگار مہیا کرتا ہے &quot;جو سب شیرانی کے جنگل میں لگنے والی آگ کی وجہ سے اس روزگار سے محروم ہو گئے ہیں&quot;۔

ان کے مطابق ان لوگوں کو آنے والے مہینوں اور سالوں میں &quot;خوراک کے حصول میں بہت سی مشکلات کا سامنا کرنا پڑے گا کیونکہ ان کے علاقے میں متبادل معاشی ذرائع نہ ہونے کے برابر ہیں&quot;۔&nbsp;

جنگل کی آگ کے متاثرین کہتے ہیں کہ وہ چلغوزے کے درختوں کی ہر ممکن حفاظت اسی لیے کر رہے تھے کہ ان کے بغیر ان کے علاقے میں معاشی سرگرمیوں کا تصور بھی نہیں کیا جا سکتا۔ کلی سورلکی کے احتجاجی کیمپ میں موجود ایک 60 سالہ بزرگ، حاجی مسعود، ان حفاظتی انتظامات کی تفصیل بیان کرتے ہوئے کہتے ہیں کہ &quot;مقامی قبائل نے قرآن پر حلف لے کر معاہدہ کر رکھا تھا کہ وہ چلغوزے کے درخت نہیں کٹنے دیں گے&quot;۔

ان کے مطابق اس معاہدے کی وجہ سے کلی سورلکی اور اس کے نواحی علاقے کے باشندوں نے ان لوگوں کی دشمنی بھی مول لے رکھی ہے جو لکڑی کی کٹائی اور فروخت کے کام سے منسلک ہیں۔ لیکن ان اقدامات کے باوجود وہ کہتے ہیں کہ &quot;نجانے اس جنگل کو کس کی نظر لگ گئی&quot;۔&nbsp;

<h2>خوابوں کی راکھ</h2>

عالمی ادارہِ خوراک و زراعت اور ورلڈ وائلڈلائف فنڈ نامی ماحول کے تحفظ پر کام کرنے والی بین الاقوامی غیرسرکاری تنظیم کے ایک مشترکہ سروے کے مطابق خیبرپختونخوا اور بلوچستان کے سنگم پر واقع کوہِ سلیمان میں چلغوزے کا جنگل 64 ہزار ایکڑ پر پھیلا ہوا ہے۔ اس سے ہر سال ساڑھے چھ لاکھ کلوگرام چلغوزہ پیدا ہوتا ہے جس کی مالیت تقریباً تین ارب روپے بنتی ہے اور جو پاکستان میں اس فصل کی مجموعی پیداوار کا 74 فیصد ہے۔&nbsp;

اس سروے کا کہنا ہے کہ اگرچہ گلگت بلتستان کے بعض علاقوں اور خیبر پختونخوا کے تین اضلاع، جنوبی وزیرستان، دیامیر اور چترال، میں بھی چلغوزہ پیدا ہوتا ہے لیکن کوہِ سلیمان کے جنگل سے حاصل ہونے والے چلغوزے کا معیار سب سے اچھا سمجھا جاتا ہے۔ خیبرپختونخوا کے ضلع ڈیرہ اسماعیل خان اور بلوچستان کے اضلاع شیرانی اور موسیٰ خیل میں بیسیوں دیہات کے ہزاروں لوگ کئی دہائیوں سے اسی جنگل کی پیداوار سے روزی روٹی کما رہے ہیں۔&nbsp;

ان ضلعوں کے دوردراز دیہات میں رہنے والے چلغوزے کے کاشت کار ہر سال ستمبر میں اپنی فصل چنتے ہیں، اسے بوریوں میں بھرتے ہیں اور اپنے کندھوں یا اونٹوں پر لاد کر پہاڑوں سے نیچے اتارتے ہیں۔ یوں یہ چلغوزہ بلوچستان کے قصبے ژوب میں پہنچتا ہے ہیں جہاں سے اسے ملک بھر کی بڑی بڑی منڈیوں میں بھیجا جاتا ہے۔

تین سال پہلے عالمی ادارہِ خوراک و زراعت نے ایک عالمی مالیاتی سہولت، گلوبل انوائرنمنٹ فیسیلٹی (جی ای ایف)، کو استعمال کرتے ہوئے کوہِ سلیمان میں ایک ایسے منصوبے کا آغاز کیا جس کا مقصد چلغوزے کے کاروبار سے وابستہ مقامی لوگوں کو عالمی منڈی سے منسلک کرنا تھا۔ اس کے تحت نہ صرف چلغوزے کے پودوں کی نرسریاں بنائی گئیں بلکہ مقامی لوگوں کو تکنیکی مشورے بھی دیے گئے تاکہ وہ جنگل کی بہتر حفاظت کرنے کے ساتھ ساتھ اپنی فصل کی چنائی بھی بین الاقوامی طور پر تسلیم شدہ اصولوں کے مطابق کر سکیں۔

آگ کی وجہ سے یہ سارا منصوبہ چوپٹ ہو گیا ہے۔&nbsp;

<h2>آگ جنگل میں لگی ہے دور دریاؤں کے پار</h2>

مقامی لوگوں کا کہنا ہے کہ آگ کی ابتدا مئی کے وسط میں ڈیرہ اسماعیل خان کے علاقے درازندہ سے ہوئی لیکن تیز ہوا کے باعث یہ جلد ہی لگ بھگ 50 کلومیڑ مغرب میں واقع کوہ سلیمان کے بلند ترین مقام تورغر تک پھیل گئی جو ضلع شیرانی کا حصہ ہے۔ شروع میں کلی سورلکی اور اس کے اردگرد کے دیہات سے تعلق رکھنے والے لوگوں نے اپنی مدد آپ کے تحت اس پر قابو پانے کی کوشش کی لیکن بسم اللہ خان کہتے ہیں کہ اس کی شدت اس قدر زیادہ تھی کہ تین افراد اس سے جھلس کر ہلاک ہو گئے۔

ان کے مطابق اس کوشش کے دوران آگ کے شعلے ان کے گھروں تک بھی آ گئے &quot;چنانچہ ہمیں ضلعی انتظامیہ اور فلاحی تنظیموں کی مدد سے محفوظ مقامات پر منتقل ہونا پڑا&quot;۔ بعدازاں فرنٹیئر کور اور صوبائِی لیویز فورس کے اہلکاروں اور سینکڑوں مقامی رضاکاروں نے آگ بجھانے کے لیے سرتوڑ اقدات کیے۔ انہیں صوبائی فائربریگیڈ، ریسکیو سروس کے عملے اور فوجی ہیلی کاپٹروں کی مدد حاصل تھی۔ لیکن ان سب ذرائع کے استعمال کے باوجود اس پر قابو نہ پایا جا سکا۔

آگ کے شروع ہونے کے 15روز بعد بالآخر ایران سے آگ بجھانے والا طیارہ منگوایا گیا جس نے اسے بجھا تو دیا لیکن اس وقت تک ہزاروں درخت جل کر راکھ ہو چکے تھے۔

اگرچہ ابھی تک اس آگ کے لگنے کی حتمی وجہ کا تعین نہیں کیا جا سکا لیکن بلوچستان کے صوبائی سیکرٹری جنگلات و جنگلی حیات دوستین خان جمالدینی کا کہنا ہے کہ یہ آسمانی بجلی گرنے سے شروع ہوئی۔ دوسری طرف شیرانی کے ڈسرکٹ فارسٹ آفیسر اسے مقامی قبائل کے درمیان تنازعے کا شاخسانہ سمجھتے ہیں۔ ان کا خیال ہے کہ &quot;کسی شخص نے اپنے مخالفین سے انتقام لینے کے لیے اُن کے درختوں کو آگ لگائی جس نے بعد میں پورے جنگل کو لپیٹ میں لے لیا&quot;۔&nbsp;

تاہم ژوب سے تعلق رکھنے والے سماجی کارکن اور ماہرِ ماحولیات باز میر خان کہتے ہیں کہ اس اقدام سے نہ صرف ہزاروں ایکڑ پر لگے ہوئے درخت جل گئے ہیں بلکہ آگ نے جنگلی جانوروں اور پرندوں کی کئی انواع کو بھی متاثر کیا ہے۔ ژوب میں متعین محکمہ ماحولیات کے اسسٹنٹ ڈائریکٹر خالق داد مندوخیل بھی ان سے اتفاق کرتے ہوئے کہتے ہیں کہ آگ نے مقامی جنگلی حیات سمیت پورے علاقے کے ماحول کو بری طرح متاثر کیا ہے۔ ان کے بقول یہ نقصان اتنا شدید ہے کہ &quot;اس کا ازالہ آئندہ کئی دہائیوں میں نہیں ہو پائے گا&quot;۔

رفیع اللہ مندوخیل

'مہنگا علاج ہر کسی کے بس میں نہیں ہوتا': بلوچستان میں چھاتی کے کینسر میں مبتلا خواتین کی مسیحائی کون کرے گا؟

سیلاب نے کان مہترزئی میں سیب کے ہزاروں درخت بانجھ کر دیے: زمیندار زندگی دوبارہ شروع کرنے کے لیے حکومتی سہارے کے منتظر۔

کوئی بھی رُت ہو ملی ہے دکھوں کی فصل ہمیں: 'گزشتہ دو دہائیوں میں بلوچستان میں آب پاشی کے لیے بنائے گئے آدھے کاریز خشک ہو گئے ہیں'۔

جنگل جنگل آگ لگی ہے بستی بستی ویراں ہے: بلوچستان کے ضلع شیرانی میں چلغوزے پر مبنی مقامی معیشت کو 'نجانے کس کی نظر لگ گئی'۔

Lok Sujag