سندھ میں میرپور خاص کے بعد ٹنڈو الہ یار کو آم کا دوسرا بڑا گڑھ کہا جاتا ہے۔ یہاں شہر کے گرد چار سُو آم کے باغات دکھائی دیتے ہیں جہاں سندھڑی، انور رٹول، لنگڑا، چونسا، اور دسہری سمیت کئی طرح کے آم اگائے جاتے ہیں جنہیں اندرون و بیرون ملک برآمد کیا جاتا ہے۔ لیکن اس سال یہاں آم کی پیداوار میں کم از کم 20 فیصد کمی کا اندیشہ ہے جس نے کسانوں، آم کے تاجروں اور اس پھل کی فصل اور صنعت سے وابستہ لاکھوں لوگوں کو پریشانی سے دوچار کر دیا ہے۔

ٹنڈو الہ یار کی تحصیل چمبڑ کے ہادی بخش لغاری 80 ایکڑ پر آم کے باغات کے مالک ہیں۔ ان کا کہنا ہے کہ پچھلے سال آنے والی شدید بارشوں اور سیلاب سے آموں کے باغت کو سخت نقصان پہنچا ہے۔

&#39;&#39;مجھے اپنے باغوں میں بیس فیصد درخت کاٹنا پڑے جو سیلابی پانی کے باعث ناکارہ ہو گئے تھے۔ اس سال بھی بارش اور ژالہ باری سے سے درختوں پر بور ختم ہو گیا۔ پہلے میں فی ایکڑ آم کا سودا تین لاکھ روپے میں کرتا تھا جبکہ امسال مجھے ڈھائی لاکھ سے زیادہ نہیں ملیں گے۔&#39;&#39;

محکمہ زراعت کے ڈائریکٹر علی نواز کے مطابق گزشتہ سال جب بارشیں شروع ہوئیں تو وہ آم کی برداشت کا موسم تھا۔ بارشوں میں تقریباً 15 فیصد پھل ضائع ہو گیا۔ ٹنڈو الہ یار کے علاوہ میرپور خاص، مٹیاری، سانگھڑ اور دیگر اضلاع میں بھی فصل کو شدید نقصان پہنچا ہے۔

کراچی میں آم کے کاروبار سے منسلک فدا حسین کا کہنا ہے کہ وہ ہر سال ٹنڈو الہ یار اور میرپور خاص میں آم کے باغات ٹھیکے پر لیتے ہیں اور فصل کو اندرون و بیرون ملک برآمد کرتے ہیں۔ گزشتہ سال ان کی فصل کو اس قدر نقصان پہنچا کہ وہ آم برآمد نہ کر سکے۔

&#39;&#39;پچھلےسال میں نے سو ایکڑ کا باغ تین لاکھ روپے فی ایکڑ کے حساب سے دو سال کے ٹھیکے پر لیا تھا۔ اس فصل سے مجھے آم کے صرف 40 ٹرک حاصل ہوئے۔ ایک ٹرک میں تقریباً ایک ہزار کلو آم آتا ہے۔ اس فصل کا ریٹ بھی اچھا نہ مل سکا اور مجموعی طور پر مجھے تین کروڑ کے ٹھیکے میں ایک کروڑ کا نقصان ہوا۔&#39;&#39;

فدا حسین کہتے ہیں کہ طوفانی بارشوں اور گرمی میں اضافے سے آم کی پیداوار بری طرح متاثر ہو رہی ہے۔ پیداوار کم ہونے سے اس مرتبہ پنجاب اور بلوچستان سے آموں کے بیوپاریوں کی آمد کے امکانات بھی کم ہیں۔

&#39;&#39;جس علاقے میں میرے باغات ہیں وہاں مارچ میں بارش بہت کم ہوئی ہے لیکن درجہ حرارت میں اچانک اور بار بار تبدیلی سے آم کے پھل کو &#39;محلو&#39; نامی بیماری نے آ لیا ہے جس سے پیداوار متاثر ہو رہی ہے۔

پاکستان آم پیدا کرنے والا چوتھا بڑا ملک ہے اور یہاں اوسطاً سالانہ 1.7 سے 1.8 ملین ٹن آم اگایا جاتا ہے۔ دو سال پہلے پاکستان نے ایک لاکھ 25 ہزار ٹن آم برآمد کیا تھا جبکہ گزشتہ سال برآمدی ہدف میں 25 ہزار ٹن کمی کر دی گئی تھی۔ پاکستانی آم 37ممالک کو برآمد کیے جاتے ہیں۔ ملک میں آم کی مجموعی پیداوار میں سندھ کا حصہ 20 فیصد اور برآمد میں اس کا حصہ 50 فیصد ہے۔

سرکاری اعداد شمار مطابق 2021 میں سندھ میں&nbsp; ایک لاکھ 62 ہزار 232 ایکڑ رقبے پر آم کے باغات تھے۔ ٹنڈوالہ یار میں آم کا زیرکاشت رقبہ ساڑھے 21 ہزار ایکڑ تھا جہاں 54 ہزار 715 میٹرک ٹن پیداوار ہوئی جبکہ پچھلے سال آنے والی بارشوں کے بعد نئے درختوں کی کاشت نہ ہونے کے برابر ہوئی ہے۔

آبادکار رہنما علی پلھ ایڈووکیٹ کا کہنا ہے کہ آم کی پیداوار کم ہونے کی سب سے بڑی وجہ موسمیاتی تبدیلی ہے۔ آم کو بڑھنے کے لیے 34 ڈگری درجہ حرارت درکار ہوتا ہے جبکہ گزشتہ&nbsp; سال ٹنڈو الہ یار میں 50 ڈگری تک گرمی پڑی جس میں آم کا پھل نشوونما نہیں پاتا اور نہ ہی اس میں مٹھاس آتی ہے۔ گزشتہ سال بارشوں کی وجہ سے باغات میں پانی کھڑا ہو گیا تھا جس سے آم کی فصل کو بہت نقصان ہوا ہے۔

سندھ چیمبر آف ایگریکلچر کے سینئر نائب صدر نبی بخش سٹھیو اور ڈگھڑی کے احسان جروار آم کے کاشت کار ہیں۔ ان کا کہنا ہے کہ مارچ میں ہونے والی بارشوں اور ژالہ باری نے آم کے بور کو ختم کر دیا ہے۔ اس مرتبہ کیریاں بھی کم اُگی ہیں اور امسال درجہ حرارت زیادہ رہا تو آم کا نقصان بھی بڑھ جائے گا۔

پاکستان فروٹ اینڈ ویجیٹیبل ایکسپورٹر ایسوسی ایشن کے ترجمان نے بتایا ہے کہ گزشتہ سال آم کی برآمد 25 ہزار ٹن تک کم رہی تھی جس میں اس سال مزید کمی آنے کا خدشہ ہے۔

سندھ زرعی یونیورسٹی کے پروفیسر اور زرعی ماہرڈاکٹر اسماعیل کنبہر کہتے ہیں کہ پاکستان میں 300 اقسام&nbsp; کا آم پیدا ہوتا ہے جس میں سے 200 اقسام سندھ میں اگائی جاتی ہیں۔ میرپورخاص، ٹنڈو الہ یار، ٹنڈو جان محمد، سانگھڑ، ٹنڈو آدم اور دیگر علاقوں&nbsp; کے باغات میں&nbsp; گزشتہ سال بارش کا پانی کئی ماہ تک کھڑا رہا جس سے آم کے پودوں کو سخت نقصان پہنچا۔ اندیشہ ہے کہ اس سال پیداوار بہت کم رہے گی۔

&#39;&#39;حکومت نے تمام پھلوں کی پیداوار کو محفوظ رکھنے کے لیے اقدامات اٹھائے ہیں مگر آم کے باغات کے لیے کوئی بندوبست نہیں کیا۔ ہر سال لاکھوں ٹن آم خراب ہو جاتا ہے جس کی حفاظت کے لیے کولڈ چین قائم کرنے اور کاشتکار کو تربیت&nbsp; دینے کی ضرورت ہے۔ &quot;

دور تک چھائے تھے بادل اور کہیں سایہ نہ تھا: 'سندھ میں ہونے والے موسمیاتی تغیرات کا اثر فصلوں کی پیداوار اور کسانوں کی آمدن دونوں پر پڑے گا'۔

موسمیاتی تبدیلی اور سیلاب کی تباہ کاریاں: ٹنڈو الہ یار میں آم کی پیداوار کم ہونے سے کاشتکار اور تاجر پریشانی سے دوچار

text

عمرکوٹ کی تحصیل سامارو سے تعلق رکھنے والی سنیتا تقریباً 137 کلومیٹر فاصلہ طے کر کے حیدرآباد کے ریشم بازار میں خریداری کے لیے آئی ہیں۔ انہوں نے اپنی بہن اور ایک بھائی کی شادیوں کے لیے کپڑے اور جوتے خریدنا ہیں جس کے لیے یہ بازار بہترین جگہ سمجھی جاتی ہے۔ لیکن یہاں آ کر وہ مشکل میں پڑ گئی ہیں کیونکہ اس جگہ خواتین کے لیے نہ تو کوئی بیت الخلا ہے اور نہ ہی پینے کا پانی دستیاب ہے۔

سنیتا اپنی والدہ اور بہنوں کے ساتھ صبح سات بجے گھر سے نکلی تھیں اور خریداری کرتے ہوئے انہیں رات کے آٹھ بج گئے ہیں۔ بازار میں طویل وقت صرف کرنے کے بعد سستانے اور بیت الخلا استعمال کرنے کے لیے انہیں رکشہ لے کر حیدرآباد میں اپنے رشتہ داروں کے ہاں جانا پڑا۔

اس طرح آنے جانے میں ان کے دو گھنٹے ضائع ہو گئے اور وہ خریداری مکمل نہیں کر سکیں۔ اب انہیں مزید ایک دن حیدرآباد میں رہنا پڑے گا کیونکہ عمرکوٹ آنے جانے پر بہت سا وقت اور پیسہ خرچ ہو گا جس کے وہ متحمل نہیں ہو سکتے۔

حیدرآباد کا ریشم بازار ایک پہاڑی پر قائم ہے جہاں کبھی جنگل ہوا کرتا تھا لیکن اب یہ جگہ کنکریٹ کا جنگل بن چکی ہے۔ یہ بازار خواتین کے ملبوسات، جوتے، میک اپ کے سامان اور چوڑیوں کے حوالے سے خاص شہرت رکھتا ہے۔

اس بازار کی دکاندار ایسوسی ایشن کے صدر محمد طارق کا کہنا ہے &#39;&#39;کہ یہ بازار حیدرآباد میں خریدوفروخت کا سب سے بڑا مرکز ہے جہاں سندھ بھر سے روزانہ تقریباً دس ہزار خواتین آتی ہیں۔ اکثر خواتین یہ شکایت کرتی ہیں کہ بازار میں بیت الخلا، پینے کے صاف پانی اور آرام کرنے کی سہولیات نہیں ہیں۔ لیکن ہمارے پاس اتنے وسائل نہیں کہ ہم اپنی مدد آپ کے تحت گاہکوں کو یہ سہولتیں دے سکیں۔&#39;&#39;

ریشم بازار کے علاوہ حیدرآباد کی کلاتھ مارکیٹ، لطیف آباد نمبر سات، پریٹ آباد، لیاقت کالونی ، قاسم آباد اور چاندنی مارکیٹ سمیت دیگر بازاروں میں بھی خواتین خریداروں کے لیے بیت الخلا کی علیحدہ سہولت میسر نہیں ہے۔ ان حالات میں شہر اور سندھ کے دیگر علاقوں سے خریداری کے لیے آنے والی خواتین کو سخت پریشانی کا سامنا رہتا ہے۔

دو بیٹیوں کے ساتھ ٹنڈو محمد خان سے ریشم بازار آنے والی آمنت نے بتایا کہ انہیں گھر سے یہاں تک پہنچنے میں ایک گھنٹے سے زیادہ وقت لگتا ہے۔ بسوں کا تھکا دینے والا سفر کرنے کے بعد بازار میں دوران خریداری آرام کی ضرورت پڑتی ہے تو بیٹھنے کے لیے کوئی جگہ نہیں ہوتی۔ نہ تو دکانداروں نے گاہکوں کی سہولت کے لیے کوئی انتظام کیا ہے اور نہ ہی انتظامیہ نے اس جانب توجہ دی ہے۔

ریشم بازار اور خریداری کے ایسے دیگر مقامات پر خواتین کے لیے بیت الخلا کی سہولت نہ ہونے کے بارے میں جب حیدرآباد کے ایڈیشنل ڈپٹی کمشنر ٹو قائم نمائی سے بات کی گئی تو ان کا کہنا تھا کہ &#39;&#39;بازاروں اور شاپنگ مال میں بیت الخلا بنوانا ضلعی انتظامیہ کا کام نہیں بلکہ یہ میونسپل کارپوریشن اور مارکیٹ کمیٹی کی ذمہ داری ہے۔ تاہم اس کے باوجود ہم ایسے معاملات میں لوگوں کو سہولت دینے کی کوشش کرتے ہیں۔&#39;&#39;

سیہون شہر سے آنے والی ایک عمررسیدہ خاتون کلثوم نے بتایا کہ شوگر کے مرض میں مبتلا ہونے کے باعث انہیں دن میں کئی مرتبہ بیت الخلا میں جانا پڑتا ہے۔ چونکہ اس بازار میں خواتین کے لیے صرف ایک بیت الخلا ہے اس لیے یہاں آ کر انہیں اور ان جیسی بہت سی خواتین کو بہت مشکل پیش آتی ہے۔

حیدرآباد میونسپل کارپوریشن کے ایڈمنسٹریٹر فاروق خان سے جب اس بارے میں پوچھا گیا تو ان کا کہنا تھا کہ وہ چند ہی روز پہلے اس عہدے پر آئے ہیں اس لیے صورتحال سے پوری طرح آگاہ نہیں ہیں۔ تاہم انہوں ںے یقین دلایا کہ وہ دکانداروں کی تنظیم کے ساتھ مل کر اس مسئلے کا حل نکالنے کی کوشش کریں گے۔

اس مسئلے کے بارے میں میونسپل کارپوریشن کے کمشنر فاخر شاکر کا کہنا ہے &#39;&#39;چند جگہوں پر بیت الخلا ضرور موجود ہیں لیکن سماجی روایات خواتین کو وہاں جانے سے روکتی ہیں۔ بازاروں میں بیت الخلا بنوانا بلدیہ کا ہی کام ہے لیکن ہمارے پاس اس مقصد کے لیے بجٹ نہیں ہوتا البتہ جہاں ضرورت اور گنجائش ہو وہاں ہم لوگوں کو سہولیات فراہم کرتے رہتے ہیں۔&#39;&#39;

انہوں ںے یہ بھی بتایا کہ جن بازاروں میں خواتین کے لیے بیت الخلا کی سہولت موجود نہیں ہے وہاں اس کا اہتمام کرنے کے لیے متعلقہ حکام کو لکھ دیا گیا ہے۔

پون کمار

پون کمار کا بنیادی طور پر تعلق ضلع عمرکوٹ، سندھ سے ہے، گذشتہ 9 برس سے حیدرآباد میں صحافت کر رہے ہیں۔

موسمیاتی تبدیلی اور سیلاب کی تباہ کاریاں: ٹنڈو الہ یار میں آم کی پیداوار کم ہونے سے کاشتکار اور تاجر پریشانی سے دوچار

کاروبار رواں، سماجی ذمہ داریاں مفقود: حیدر آباد کے بازاروں میں خواتین خریداروں کے لیے سہولیات کا فقدان

سندھ صوفی میلہ: لوگ محبت اور امن چاہتے ہیں

Lok Sujag