اٹھائیس سالہ ہیڈ کانسٹیبل محمد ہارون خان میانوالی کے نواحی گاؤں بیرولی کے رہائشی اور چھ برس قبل پٹرولنگ پولیس میں بھرتی ہوئے تھے۔ دوران سروس انگریزی میں ماسٹر ڈگری کی تھی۔ وہ کافی عرصے سے تحصیل عیسیٰ خیل کی کنڈل پٹرولنگ پوسٹ پر تعینات تھے۔

رواں سال 30 ستمبر کی نصف شب درجن بھر دہشت گردوں نے ضلعی ہیڈکوارٹر سے 110 کلو میٹر دور واقع اس کنڈل پوسٹ پر بھاری ہتھیاروں سے حملہ کر دیا۔ اس وقت پوسٹ میں صرف چھ اہلکار تھے۔تاہم یہ مقابلہ صبح تک جاری رہا تھا۔

فائرنگ کے تبادلے میں محمد ہارون خان جاں بحق ہو گئے۔ دو حملہ آور بھی مارے گئے، دیگر حملہ آور فرار ہوگئے تھے۔

ہارون خان کے تین بچے ہیں۔ ان کی بڑی بیٹی پانچ سالہ فروا سکول جاتی ہے۔ بیٹا تین سال کا ہے اور دوسری بیٹی والد کی وفات کے 20 روز بعد پیدا ہوئی ہے۔ ہارون کی والدہ ابھی تک صدمے سے باہر نہیں نکل پائیں۔ وہ بتاتی ہیں کہ &quot;بچے سمجھتے ہیں ان کے بابا شہر گئے ہیں دو چار دن میں لوٹ آئیں گے۔&quot;

سی ٹی ڈی حکام کے مطابق دونوں ہلاک ہونے والے ملزموں زبیر نواز اور محمد خان کا تعلق کالعدم ٹی ٹی پی کے ٹیپو گروپ سے تھا۔ ان میں سے ایک ٹی ٹی پی لکی مروت کے امیر ارشد نواز کا بھائی تھا۔

میانوالی میں دہشت گردوں کا یہ پہلا حملہ نہیں تھا ۔ اس سے قبل رواں سال یکم فروری کو تھانہ مکڑوال پر دہشتگردوں نے حملہ کیا تھا تاہم کسی جانی نقصان کی اطلاع نہیں ملی تھی۔

&nbsp;اسی ماہ چار نومبر کو ایئر فورس کے ٹریننگ بیس میانوالی پر بھی دہشت گردوں نے حملہ کیا جسے ناکام بنا دیا گیا۔پاک فوج کے شعبہ تعلقاتِ عامہ کے مطابق جوابی کارروائی اور کلیئرنس آپریشن میں تمام نو دہشت گرد مارے گئے تھے۔ حملے کے دوران تین غیر آپریشنل طیاروں کو کچھ نقصان پہنچا تھا۔

سنٹر فار ریسرچ اینڈ سکیورٹی سٹڈیز (سی آر ایس ایس)کی سالانہ رپورٹ بتاتی ہے کہ 2022ء میں ملک بھر میں دہشت گردی سے جڑے تشدد کے واقعات میں 980 ہلاکتیں ہوئیں۔ دہشت گرد حملوں اور فورسز سے جھڑپوں کے کل 512 واقعات پیش آئے۔

&nbsp;گزشتہ سال زیادہ تر واقعات خیبر پختونخوا اور بلوچستان میں ہوئے۔ ان میں مارے جانے والوں میں 308 شہری، 295 سکیورٹی اہلکار اور 377 جنگجو شامل تھے۔ پچھلے سال پنجاب میں 25 واقعات پیش آئے تھے اور 28 ہلاکتیں ہوئی تھیں۔

سی آر ایس ایس کی آخری سہ ماہی رپورٹ کے مطابق رواں سال دہشت گردی سے ہلاکتوں کی آٹھ سال میں بلند ترین سطح دیکھی گئی ہے۔

اس رپورٹ میں کہا گیا ہے کہ 2023ء کے پہلے نو ماہ میں دہشت گردوں کی جانب سے 1087 حملے کیے گئے جن میں کل 345 سیکورٹی اہلکار مارے گئے۔ ان میں 2085 پولیس اہلکار اور 137 فوج کے جوان شامل ہیں۔

سکیورٹی صورتحال کے پیش نظر 20 برس قبل پنجاب میں ضلعی پولیس کی مدد کے لیے پٹرولنگ پولیس کا قیام عمل میں لایا گیا تھا۔ تمام بڑی شاہراہوں پر چیک پوسٹیں قائم کی گئیں اور ان کو پٹرولنگ پولیس کے حوالے کر دیا گیا تھا۔

پٹرولنگ پولیس کے بنیادی اہداف میں شاہراہوں پر غیر قانونی آمدرورفت روکنا، شہروں کو محفوظ بنانے میں اداروں کی معاونت اور ایمرجنسی میں عوام کی مدد کرنا شامل ہے۔

اسی سلسلے میں ضلع میانوالی میں ابتدائی طور پر 12 چیک پوسٹیں بنائی گئی تھیں۔

تحصیل پپلاں میں تین مقامات کندیاں موڑ،حافظ والہ اور انور چوک پر پوسٹیں بنائی گئیں۔ تحصیل میانوالی میں پانچ نانگنی موڑ، یاروخیل، مسلاں والا، فخرآباد اور تری خیل جبکہ تحصیل عیسیٰ خیل میں چار پوسٹینں ںچغلاں، چچالی ،درہ تنگ اور کنڈل کے مقامات پر بنائی گئی ہیں۔

ایسں پی پٹرولنگ پولیس اختر حسین جوئیہ نے لوک سجاگ کو بتایا کہ ضلع میں پیٹرولنگ پولیس کی کل نفری ڈھائی سو کے قریب ہے اور چیک پوسٹوں کی تعداد 13 ہو چکی ہے۔ ہر پوسٹ پر ایک شفٹ میں آٹھ اہلکار ڈیوٹی دیتے ہیں اور ضرورت کے مطابق نفری کم زیادہ ہوتی رہتی ہے۔

&nbsp;&quot;ہر چیک پوسٹ کی حدود تقریباً 30کلو میٹر ہے۔ اور اس کے پاس 2004ء یا 2006ء ماڈل کی ایک ہائی لیکس گاڑی موجود ہے&quot;۔

آئی جی پنجاب پولیس ڈاکٹر عثمان انور نے یکم اکتوبر کو ہارون خاں کی نماز جنازہ کے موقعے پر بتایا تھا کہ کہ خیبر پختونخواہ کا بارڈر ایریا اور پہاڑی علاقہ ہونے کی وجہ سے میانوالی میں پولیس کو کچھ مشکلات کا سامنا ہے۔ لیکن پولیس کو سہولیات میں کوئی کوتاہی نہیں برتی جائے گی۔

تاہم ایک پٹرولنگ پوسٹ کے انچارج یہاں وسائل کی فراہمی کی مایوس کن تفصیل بتاتے ہیں۔ سب انسپکٹر محمد سمجھتے ہیں کہ موجودہ سہولیات میں موثر پٹرولنگ ممکن نہیں ہے۔

&quot;ہمیں 30 کلو میٹر ایریا میں پٹرولنگ کے لیے روزانہ صرف پانچ لٹر ڈیزل ملتا ہے جبکہ ایک چکر میں چھ لٹر فیول خرچ ہوتا ہے۔ ڈھائی سال پہلے 20 لٹر تیل روزانہ ملتا تھا تو ہر شفٹ میں علاقے کا ایک چکر لگا سکتے تھے لیکن اب دن میں ایک چکر بھی نہیں لگایا جا سکتا۔&quot;

علی اصغر 12سال سے پٹرولنگ پولیس میں بطور ڈرائیور ڈیوٹی دے رہے ہیں۔ وہ بتاتے ہیں کہ ڈیزل کی کمی کے ساتھ پٹرولنگ گاڑیوں کی مرمت ہوتی ہے نہ ہی بوقت موبل آئل تبدیل کیا جاتا ہے۔

&quot;جب گاڑی کھڑی ہوجاتی ہے تو چوکی کا عملہ اپنی جیب سے اس کی مرمت کراتا ہے&quot;۔

وہ کہتے ہیں کہ حکومت چونکہ مرمت کے لیے کچھ نہیں دیتی اس لیے گاڑی کی چھوٹی موٹی خرابی نظر انداز کر دی جاتی ہے۔ یوں گاڑیاں آہستہ آہستہ کٹھارا ہوتی جا رہی ہیں اور انہیں ایمرجنسی میں استعمال کیا ہی نہیں جا سکتا۔ آئل بروقت تبدیل نہ ہونے کی وجہ سے کئی گاڑیوں میں انجن کے مسائل ہیں۔

سب انسپکٹر ریٹائرڈ محمد اکرم، میانوالی کی تقریباً تمام چیک پوسٹوں پر بطور انچارج فرائض انجام دے چکے ہیں۔

وہ تصدیق کرتے ہیں کہ گاڑیوں کی مرمت اور چوکی کے دیگر اخراجات کا بل ضلعی ہیڈ کوارٹر کو بھیجا جاتا تھا لیکن وہاں سے انہیں کبھی ایک روپیہ بھی موصول نہیں ہوا۔

فیولنگ کا معاملہ نظر انداز کرتے ہوئے ایسں پی پٹرولنگ نے لوک سجاگ سے بات کرتے ہوئے دعویٰ کیا کہ 160 نئی گاڑیاں آچکی ہیں جو امید ہے جلد پٹرولنگ پولیس کو مل جائیں گی۔

&nbsp;وہ بتاتے ہیں کہ مکڑوال حملے میں دہشت کردوں نے کلاشنکوف، سنائپر گن اور راکٹ لانچر استعمال کیے تھے۔ اس وقت پولیس کے پاس روایتی ہتھیار تھے۔ تاہم اب اہلکاروں کو جدید اسلحہ مہیا کیا گیا ہے۔ انٹیلی جنس رپورٹس کے باعث افسران اور جوان ہر لحاظ سے تیار تھے۔

&quot;ہم نے کنڈل پوسٹ پر نفری بڑھا دی ہے۔اور سنائپرز تعینات کئے ہیں۔ دور تک اندھیرے میں دیکھنے والے کیمرے (نائٹ گوگل) لگائے گئے ہیں۔ ابھی چیک پوسٹوں پر سینڈ بیگز(ریت) کے مورچے ہیں لیکن جلد میٹل کے مورچے نصب کیے جائیں گے۔&quot;

سابق چوکی انچارج محمد اکرم ان اقامات سے مطمئن نہیں ہیں۔ وہ کہتے ہیں کہ بڑے بڑے دعوے اپنی جگہ، جب تک ڈیزل سمیت پولیس کی دیگر بنیادی ضروریات پوری نہیں کی جاتیں تب تک صورتحال بہتر نہیں ہو گی۔

&quot;پٹرولنگ پولیس ایمرجنسی میں عوام کی مدد کو پہنچ ہی نہیں پاتی تو اس کی کار کردگی اور محکمے کی ساکھ کیسے بہتر ہو سکتی ہے&quot;۔

ڈی پی او میانوالی مطیع اللہ خان نوانی&nbsp; نے لوک سجاگ کو بتایا کہ کنڈل چیک پوسٹ پر حملے کے بعد عیسیٰ خیل سے پولیس اور ایلیٹ فورس آدھے گھنٹے میں کنڈل پہنچ گئی تھی۔ &quot;اب بھی تمام اداروں سے مسلسل رابطے میں ہیں&nbsp; اور ہر دشمن سے نمٹنے کے لیے ہر وقت تیار ہیں&quot;۔

ٹنڈو محمد خان پولیس کی خستہ حالی، 'مجرموں کا پیچھا کرنے جائیں تو ڈر رہتا ہےکہ گاڑی میں پٹرول ختم نہ ہو جائے'

"پٹرولنگ پولیس ایمرجنسی میں عوام کی مدد  کو پہنچ ہی نہیں پاتی تو کارکردگی کیا ہو گی؟"

text

محمد اقبال میانوالی کے گاؤں سمندی والا میں اپنی 10 ایکڑ بارانی زمین پر کاشت کاری کرتے ہیں۔ 30 سال پہلے جب ان کے گاؤں سمیت غنڈی، گلبازی والا ، مستی والا اور قریبی مواضعات کی زمینوں کو نہری پانی سے سیراب کرنے کا منصوبہ سامنے آیا تھا تو انہوں نے اس کی شدید مخالفت کی تھی کیونکہ ان کی زمین کا بڑا حصہ نئی کھودی جانے والی نہر کی نذر ہو رہا تھا۔

وہ کہتے ہیں کہ اہل علاقہ کے سمجھانے پر وہ اپنی زمین نہر کے لیے دینے کے لیے رضامند ہو گئے تھے اور باقی اراضی پر لہلہاتی فصلوں کا خواب آنکھوں میں سجا لیا۔لیکن 30 سال بعد بھی ان کا یہ خواب شرمندہ تعبیر نہ ہو سکا۔

&nbsp;محمد اقبال &#39;پائی خیل لفٹ اریگیشن سکیم&#39; کی بات کر رہے تھے۔ یہ منصوبہ نہ صرف ادھورا ہے بلکہ اب سرے سے ہی ختم ہونے کو ہے۔

ان کا کہنا ہے کہ عمران خان وزیراعظم بنے تو ان کے حلقے کا ووٹر ہونے کی وجہ سے انہیں بھی امید کی کرن نظر آئی تھی۔ ایم پی اے امین اللہ خان نے منصوبہ مکمل کرانے کی یقین دہانی بھی کرائی تھی لیکن کویٔی عملی اقدام نہیں ہوا۔

&quot;یوں لگتا ھے ہم اپنی زندگی میں اپنی لہلہاتی فصلیں نہیں دیکھ سکیں گے۔&quot;

دریا ئے سندھ پر جناح بیراج سے نکلنے والی تھل کینال میانوالی کےگاؤں &#39;پائی خیل&#39; سے بھی گزرتی ہے۔ محکم انہار نے1993ء میں اس علاقے کے لیے تھل کینال پرلفٹ اریگیشن سسٹم لگانے کا فیصلہ کیا۔

اس منصوبے کے تحت تھل نہر سے دو چھوٹی نہریں (ڈسٹری بیوٹریز) نکالی جانا تھیں۔ دائیں نہر کو ون آر اور بائیں جانب والی نہر کو ون ایل کا نام دیا گیا ۔200 کیوسک پانی 50 فٹ گہرائی سے اٹھا کر ان نہروں میں ڈالا جانا تھا۔

محکمہ انہار کے ریکارڈ کے مطابق نہر ون آر کی لمبائی 23.32کلومیٹر (پائی خیل سے چھدرو تک) اور ون ایل کی طوالت 13.41 کلو میٹر (پائی خیل سے سکندرآباد تک ) رکھی گئی۔ دونوں نہروں سے 12 مواضعات کا 78ہزار ایکڑ رقبہ سیراب کیا جانا تھا۔

سابق وزیراعلیٰ منظور وٹو کے دور میں اس منصوبے کاسنگ بنیاد رکھا گیا جس پر جون 1995 میں کام کا آغاز ہوا۔ یہ منصوبہ ایک سال بعد جون 1996ء کو مکمل ہونا تھا ۔لیکن اس پر کام پانچ سال جاری رہا اور پھر تکنیکی مسائل کے باعث روک دیا گیا۔

چند سال کے بعد منصوبے پر دوبارہ کام شروع کیا گیا ۔ اس کی تکمیل کی مدت جون 2011 رکھی گئی ۔1995ء میں اس منصوبے کی ابتدائی لاگت چار کرور 82 لاکھ تھی۔ 2011ء میں نظرثانی شدہ تخمینہ 63 کروڑ روپے ہو گیا تھا۔اب یہ پوری رقم خرچ ہو چکی ہے۔

اس منصوبے کا پی سی ون محکمہ آبپاشی نے بنایا تھا۔ یہی محکمہ سارے کام کی نگرانی کرتا رہا ہے۔ پلان کے مطابق کینال سے ڈسٹری بیوٹری نہروں میں پانی ڈالنے کے لیے دو پمپ ہاؤس بنائے گئے ہیں ۔ہر ایک میں بجلی کی تین تین موٹریں ہیں ۔ہر موٹر کی صلاحیت 50 کیوسک ہے۔

نہروں کی کھدائی برسوں پہلے تقریباًمکمل ہو چکی تھی۔مگر نہر ون آر صرف چار کلومیٹر اور ون ایل ڈھائی کلو میٹر تک ہی فعال ہو سکی ہے۔ ان کے غیر فعال حصے ویران پڑے ہیں۔&nbsp; بارشوں کا پانی پلوں کے نیچے سے مٹی نکال لے گیا ہے جو پل کسی بھی وقت سانحے کا سبب بن سکتے ہیں۔

دونوں نہروں کے فعال حصوں کی حالت بھی کچھ کم خراب نہیں ہے۔ ایکسیئن انہار میانوالی احمد رفیق الزام عائد کرتے ہیں ناقص منصوبہ بندی اور کرپشن نے اس منصوبے کو تباہ کر دیا ہے۔

وہ کہتے ہیں کہ اس منصوبے میں ناقص میٹیریل استعمال ہوا۔ اسی لیے نہروں کے فعال حصے کے پلوں سے آج بھی پانی رس رہا ہے۔نہروں کا ابتدائی حصہ سطح زمین سے 15 فٹ اونچا تھا۔ دوران تعمیر ٹیلوں پر سیمنٹ کی پلیٹوں کے نیچے بجری نہیں بچھائی گئی۔

&nbsp;ایکسین انہار نے بتایا کہ نہر کے بیڈ پر جب پانی کا دباؤ بڑھتا ہے تو پلیٹیں ایک دوسرے سے جدا ہو جاتی ہیں اور نہر ٹوٹ جاتی ہے۔اسی طرح پہاڑی علاقے میں برساتی پانی کے ممکنہ دباؤ کو بھی نظرانداز کر دیا گیا۔

&nbsp;احمد رفیق کا کہنا ہے کہ اس منصوبے میں ابتدء ہی سے سیاسی مداخلت کی گئی۔ دباؤ پر ڈیزائن کو بار بار تبدیل کیا گیا۔ ایک مرحوم رکن اسمبلی کی جلد بازی کے باعث مناسب فزیبلیٹی سٹڈی بھی نہیں کرائی گئی اور اب منصوبہ بند گلی میں جا کھڑا ہوا ہے۔

انہوں بتایا کہ اب بھی یہ منصوبہ &#39;مکمل طور پر مردہ&#39; نہیں ہوا۔ اس کی نئی فزیبلیٹی سٹڈی جاری ہے ڈیزائن کے نقائص اور ان کے ممکنہ حل کا نئے سرے سے تعین کیا جائے گا۔ پھر اس منصوبے کو مکمل فعال کرنے کی کوشش کی جائے گی۔

پینتیس سالہ محمد طفیل گلبازی والا میں پانچ ایکڑ رقبہ کاشت کرتے ہیں۔وہ بتاتے ہیں کہ انہیں کافی دور سے ٹیوب ویل کا مہنگا پانی لانا پڑتا ہے اور اس طرح فصل پر مشقت اور خرچہ دو گنا ہوگیا ہے۔ اگر نہری پانی مل جاتا تو یہاں کے کسان بہت سے مسائل سے بچ جاتے۔

ان کا کہنا ہے کہ وہ صرف سردیوں کی فصل یعنی گندم کاشت کرتے ہیں۔ گرمیوں میں زمین خالی چھوڑ دیتے ہیں کیونکہ اس وقت فصل کو پانی زیادہ درکار ہوتا ہے ۔حکومت پائی خیل آبپاشی سکیم فوری مکمل کر لے تو چھوٹے کسانوں کو بہت فائدہ ہو گا۔

سابق رکن اسمبلی امین اللہ خان کہتے ہیں کہ انہوں نے یہ منصوبہ ترجیحی بنیادوں پر بحال کرانے کی کوشش کی ۔محکمہ انہار نے دوبارہ فزیبلیٹی سٹڈی بھی شروع کر دی تھی لیکن بدقسمتی سے پنجاب حکومت ختم ہو گئی اور&nbsp; اس پر کام شروع نہ ہو سکا۔

'پٹ فیڈر کینال ہمارے لیے خونی نہر ثابت ہوئی ہے، ایک اور سیلاب کو برداشت کرنے کی سکت نہیں ہے'

ناقص منصوبہ بندی یا بدعنوانی: میانوالی میں پائی خیل لفٹ اریگیشن سکیم کیوں ناکام ہوئی

ضلع میانوالی کے گورنمنٹ ایسوسی ایٹ کالج کالاباغ&nbsp; میں پچھلے چند سال سے سائنس کے مضامین کا ایک بھی لیکچرار تعینات نہیں حالانکہ کالج میں طلبہ کی تقریباً 70 فیصد تعداد ایف ایس سی میں پڑھتی ہے اور آدھا سیشن گزر چکا ہے۔ اساتذہ کی عدم موجودگی کے کا یہ نتیجہ نکلا ہےکہ بہت سے طلبہ نے کالج آنا ہی چھوڑ دیا ہے۔

یہ کالج ضلعی صدر مقام میانوالی سے لگ بھگ 50 کلومیٹر دور تحصیل عیسیٰ خیل میں ایک پہاڑی کے دامن میں واقع ہے۔ فی الوقت کالج میں زیرِ تعلیم طلبا کی تعداد تقریباً 250 اور مستقل اساتذہ کی تعداد صرف آٹھ ہے۔ ان میں فزکس، کیمسٹری، بائیولوجی، ریاضی اور کمپیوٹر سائنس کا ایک بھی استاد شامل نہیں ہے۔ اس وقت کالج میں فرسٹ ایئر سے فورتھ ایئر تک کی کلاسز چل رہی ہیں۔

سیکنڈ ایئر کے طالب علم محمد جنید خان بتاتے ہیں کہ موجودہ حالات میں ان سمیت بہت سے طلبہ کا تعلیمی نقصان ہو رہا ہے۔

&quot;ہمارے پاس اتنے وسائل نہیں کہ شہر&nbsp; کے کالج میں داخلہ لیں اور ہاسٹل میں رہیں۔ نہ ہی حالات کسی پرائیویٹ کالج میں پڑھنے کی اجازت دیتے ہیں۔ ہمیں مجبوراً اپنے قریبی کالج میں داخلہ لینا پڑا۔ فرسٹ ایئر کے پہلے تین ماہ صرف آرٹس کے مضامین کی کلاسز ہوتی رہیں۔ چونکہ کالج میں سائنس کا کوئی ٹیچر موجود نہیں تھا، اس لیے انگریزی، اردو اور اسلامیات کے پیریڈز کے بعد ہماری چھٹی ہو جاتی تھی۔ تین ماہ بعد کالج میں عارضی ٹیچر بھرتی کیے گئے، جس کے بعد کلاسز شروع ہوئیں، لیکن اس سے ہمارا نقصان پورا نہیں ہو سکتا۔&quot;

&nbsp;کالج کے پرنسپل اور ایسوسی ایٹ پروفیسر ضیا اللہ خان نے بتایا کہ اساتذہ کی کمی کو عارضی طور پر پورا کرنے کے لیے ہائر ایجوکیشن ڈیپارٹمنٹ پنجاب کو ہر سال سی ٹی آئی (کالج ٹیچنگ انٹرن) تعینات کرنے کی درخواست دی جاتی ہے۔ البتہ ڈیپارٹمنٹ سیشن شروع ہونے کے کئی ماہ بعدٹیچر فراہم کرتا ہے جس سے طلبا کا کافی نقصان ہوتا ہے۔

&quot;دوسرا بڑا مسئلہ یہ ہے کہ ہر خالی نشست کے مطابق سی ٹی آئی کے بجائے صرف چند مضامین کے عارضی ٹیچر فراہم کیے جاتے ہیں۔ اس سے کئی بار ایسا ہوتا ہے کہ کسی ایک مضمون&nbsp; کے استاد سے دوسرا مضمون پڑھانے کو کہا جاتا ہے۔ مثلاً کیمسٹری کے ٹیچر سے بائیولوجی یا کمپیوٹر سائنس&nbsp; پڑھانے کی درخواست کرنا۔ چند اساتذہ اسے قبول کر لیتے ہیں جبکہ بیشتر دوسرے مضامین پر گرفت نہ ہونے کے سبب معذرت کر لیتے ہیں کیونکہ ان کا کنٹریکٹ انہیں دوسرا مضمون پڑھانے کا پابند نہیں کرتا۔&quot;

انہوں نے مزید بتایا کہ اساتذہ کی عدم دستیابی پر مقامی آبادی میں سے کسی رضا کار کی خدمات بھی لی جاتی ہیں۔ البتہ کالج&nbsp; پسماندہ علاقے میں ہونے کے باعث&nbsp; تدریس کا تجربہ رکھنے والے رضا کار شاذو نادر ہی ملتے ہیں۔&quot;

تحصیل عیسیٰ خیل کے دیگر سرکاری کالجوں&nbsp; کی صورت حال بھی سی کالج جیسی ہے۔ چار لاکھ کے قریب نفوس پر مشتمل تحصیل میں تعلیمی سہولیات کی کمی بڑی تعداد میں لوگوں کو شہروں کا رخ کرنے پر مجبور کرتی ہے۔

گورنمنٹ ایسوسی ایٹ کالج فار ویمن کمر مشانی میں طالبات کی تعداد چھ سو ہے جہاں اساتذہ کی کل اسامیاں 22 ہیں۔ان میں سے صرف آٹھ پر مستقل اساتذہ تعینات ہیں۔ کالج میں فزکس، کیمسٹری، باٹنی اور سائیکالوجی کے مضامین کا کوئی استاد نہیں۔

گورنمنٹ ایسوسی ایٹ کالج فار ویمن عیسیٰ خیل میں کل 17 اسامیوں میں سے صرف آٹھ پر مستقل اساتذہ تعینات ہیں۔ اس کالج میں تقریباً آٹھ سو طالبات زیر تعلیم ہیں۔کالج میں کیمسٹری اور فزیکل ایجوکیشن کی اساتذہ نہیں ہیں۔

گورنمنٹ ایسوسی ایٹ کالج فار بوائز عیسیٰ خیل کی 23 اسامیوں میں سے 15 خالی ہیں جن میں کمپیوٹر سائنس اور کیمسٹری جیسے اہم مضامین بھی شامل ہیں۔

ڈپٹی ڈائریکٹر کالجز میانوالی عزیز اللہ خان نے بتایا کہ اس وقت ضلع میں سرکاری کالجوں کی تعداد 18 ہے جن میں سے پانچ طلبا اور 13 طالبات کے لیے ہیں۔ پسماندگی کے باعث ضلع کے نوجوان مقابلہ جاتی امتحانات میں باقی اضلاع کے طلبا کی نسبت کم تعداد میں منتخب ہوتے ہیں اس لیے کالجوں میں لیکچرار کی نشستیں سال ہا سال سے خالی ہیں۔

'ٹرانسفر ایپ' نے اٹک میں میٹرک پاس کرنے والے ہزاروں طلبہ کا تعلیمی مستقبل تاریک کر دیا

&quot;ہمارے دفتر کی طرف سے ہر سال باقاعدگی سے محکمہ ہائر ایجوکیشن پنجاب کے اعلیٰ حکام سے بروقت سی ٹی آئی بھرتی کرنے کی درخواست کی جاتی ہے لیکن اربابِ اختیار فیصلہ سازی کرتے کرتے آدھا سیشن گزار دیتے ہیں۔&quot;

گورنمنٹ گریجوایٹ کالج میانوالی کے شعبہ فزکس کے پروفیسر اور اساتذہ کی تنظیم پپلا (پنجاب پروفیسرز اینڈ لیکچررز ایسوسی ایشن) کے ضلعی صدر محمد حیات خان کا کہنا ہے کہ بلا شبہ اس مسئلہ کا مستقل حل خالی اسامیوں پر&nbsp; مستقل اساتذہ کی بھرتی ہے لیکن اس کے ساتھ ساتھ اس مسئلے سےعارضی طور پر بھی نمٹا جا سکتا ہے۔

&quot;حکام بالا کو تمام کالجز میں ہر مضمون کا کم از کم ایک لیکچرار تعینات کرنے کی پالیسی اپنانی چاہیے۔ شہر کے قریبی کالجز&nbsp; جہاں ضرورت سے زیادہ اساتذہ ہیں انہیں وہاں ٹرانسفر کرنا چاہیے جہاں اس مضمون کا کوئی استاد نہ ہو۔ علاوہ ازیں عارضی اساتذہ کی بروقت فراہمی سے بھی دور دراز&nbsp; اور پسماندہ علاقوں کے نوجوانوں کو بہتر تعلیم دی جا سکتی ہے۔&quot;

میانوالی کے کالجوں میں اساتذہ کی راہ دیکھتے طلبہ اپنے مستقبل سے مایوس ہونے لگے

سرگودھا کے راحیل جوزف بی ایس فزکس کے طالب علم ہیں۔ وہ پرائمری سکول سےلے کر یونیورسٹی تک اپنے مسلمان کلاس فیلوز کی طرح اسلامیات کا مضمون بھی پڑھتے رہے ہیں جبکہ محکمہ تعلیم نے اس دوران مسیحیوں اور دیگر غیرمسلم طلبہ کے لئے اسلامیات کی جگہ اخلاقیات کا مضمون متعارف کروا دیا تھا۔

راحیل بتاتے ہیں کہ جب وہ پانچویں جماعت میں پڑھتے تھے تو اسلامیات کے استاد نے انہیں اسلام قبول کرنے کے دعوت دی تھی جس پر وہ خاموش رہے۔

ان کا کہنا ہے کہ سکول میں مسیحی برادری سے تعلق رکھنے والے ان جیسے دیگر طلبہ کو بھی اساتذہ کی جانب سے اسلام قبول کرنے کے لئے کہا جاتا تھا۔

پچیس سالہ راحیل انسانی حقوق کے کئی قومی و بین الاقوامی اداروں کے لئے کام کر چکے ہیں اور اس وقت بھی ایک حکومتی پروگرام کے برانڈ ایمبیسڈر ہیں۔

وہ اسلامیات کا مضمون پڑھنے کی وجہ یہ بتاتے ہیں کہ انہیں کسی ادارے میں اس کا متبادل مضمون اخلاقیات پڑھانے والا استاد ہی نہیں ملا اور وہ خائف تھے کہ اسلامیات نہ پڑھنے پر اصرار کر کے وہ سب کی نظروں میں آ کر کسی امتیازی سلوک کا ہدف بن سکتے تھے۔

تعلیمی نصاب میں اخلاقیات کا مضمون 2007ء میں شامل کیا گیا۔ اس سے پہلے جنرل ضیاالحق کی حکومت نے 1979ء میں متعارف کرائی جانے والی تعلیمی پالیسی میں اسلامیات کے مضمون کو گریجوایشن تک لازمی قرار دے دیا تھا۔ جس کے بعد مذہبی اقلیتوں کے طلبہ کو یہ مضمون باامر مجبوری پڑھنا پڑھتا تھا۔

ان طلبہ کی مشکل میں مزید اضافہ 2022ء میں اس وقت ہوا جب واحد قومی نصاب کی پالیسی کے دوسرے مرحلے میں انٹرمیڈیٹ کے طلبہ کے لئے ترجمہ قرآن کا مضمون بھی شامل کر لیا گیا جبکہ غیرمسلم طلبہ کو اخلاقیات کا مضمون پڑھانے کے لئے کئے جانے والے عملی اقدامات نہ ہونے کے برابر تھے۔

پالیسی میں اخلاقیات پڑھنے والے طلبہ کو ترجمہ قرآن کا امتحان چھوڑنے کا آپشن دیا گیا اور نمبروں کے فرق کو پورا کرنے کے لئے اخلاقیات کے مضمون میں حاصل کردہ نمبروں کی نسبت سے انہیں اضافی نمبر دینے کی پالیسی بنائی گئی۔

تاہم تعلیمی اداروں میں اخلاقیات پڑھانے کا انتظام نہ ہونے کے سبب اس مضمون میں اقلیتی طلبہ کے نمبر بہت کم آتے ہیں، نتیجتاً انہیں ترجمہ قرآن کے متبادل ملنے والے اضافی نمبر بھی اتنے ہی کم ہوتے ہیں۔

سرگودھا کی 20 سالہ جمیلہ شہر کی ایک نجی یونیورسٹی میں بی ایس کیمسٹری کی طالبہ ہیں۔ انہوں نے ابتدائی تعلیم مسیحیوں کے ایک نجی سکول میں حاصل کی تھی جہاں انہیں اسلامیات کے بجائے مسیحی مذہبی عقائد (Catechism) پڑھنے کا موقع ملا۔

ان کا کہنا ہے کہ سبھی مسیحی طلبہ کو ایسے سکولوں میں پڑھنے کا موقع نہیں ملتا اس لئے وہ سرکاری اداروں میں اسلامیات کا مضمون اختیار کرنے پر مجبور ہوتے ہیں کیونکہ وہاں اخلاقیات کو کوئی استاد ہی نہیں ہوتا۔

ایم فل سوشل ورک کی طالبہ اور ایک نجی سکول کی ٹیچر کرمل سلیم اس بات کی تصدیق کرتے ہوئے کہتی ہیں کہ انہیں گیارہویں جماعت میں اخلاقیات کا مضمون اختیار کرنے کا آپشن دیا گیا تھا لیکن انہوں نے اسلامیات ہی پڑھی کیونکہ سکول میں انہیں اخلاقیات پڑھانے والے اساتذہ میسر نہیں تھے اس لئے وہ اسلامیات پڑھتی آئی تھیں اور اسی لئے کالج میں بھی یہی مضمون اختیار کیا۔

کرمل بتاتی ہیں کہ جن سکولوں اور کالجوں میں اخلاقیات کا مضمون آفر کیا جاتا ہے وہاں اس کی کلاسیں برائے نام ہی ہوتی ہیں۔

&quot;عام طور پر اخلاقیات کا کوئی علیحدہ شعبہ یا استاد نہیں ہوتے اس لئے طلبہ کو اپنی مدد آپ کے تحت پڑھنا پڑتا ہے جس کی وجہ سے ان کے نمبر بہت کم آتے ہیں&quot;۔

2017ء کی مردم شماری کے مطابق سرگودھا میں مسیحی برادری کے لوگوں کی آبادی 66,000 ہے۔ 2018ء میں سرگودھا بورڈ میں 1837 غیرمسلم طلبہ نے امتحان دیا جن میں صرف 429 یعنی 23 فیصد نے اخلاقیات کا مضمون چنا جبکہ باقی 77 فیصد نے اسلامیات کا امتحان دیا۔

پنجاب کے سماجی معلومات نظام &#39;ایس آئی ایس پنجاب&#39; سے حاصل ہونے والی معلومات سے پتا چلتا ہے کہ سرگودھا کے تعلیمی اداروں میں اخلاقیات کا مضمون پڑھانے کے لئے استاد کی اسامی وجود ہی نہیں رکھتی۔

ڈسٹرکٹ ایجوکیشن آفس کے حکام کا کہنا ہے کہ حکومت نے اخلاقیات کے اساتذہ کو بھرتی کرنے کی کوئی پالیسی نہیں بنائی۔

اس خلا کو پُر کرنے کے لئے اسلامیات یا آرٹس کے کسی استاد کو یہ مضمون پڑھانے کی عارضی ذمہ داری سونپ دی جاتی ہے۔

اگر گزشتہ دس سال کے عرصہ میں کالجوں کے لیکچرار کی اسامیوں کے لئے شائع کئے گئے اشتہاروں کا جائزہ لیا جائے تو وہاں بھی اخلاقیات کے اساتذہ کا کوئی تذکرہ نہیں ملتا۔

سرگودھا میں ایک چرچ اور سکول چلانے والے مسیحی مذہبی رہنما فادر تھامس سمجھتے ہیں کہ مذہبی اقلیتوں سے تعلق رکھنے والے طلبہ کو نوعمری میں اسلامیات پڑھنے پر مجبور کرنا ان کی مذہبی شناخت و آزادی کو سلب کرنے کے مترادف ہے۔

&quot;ایسے طلبہ مذہبی کتب کے مواد کی حساسیت سے واقف نہیں ہوتے اس لئے کسی نادانستہ غلطی پر ان کےخلاف توہین مذہب کا الزام عائد ہونے کا خدشہ رہتا ہے&quot;۔

فادر تھامس اخلاقیات کے نصاب پر بھی عدم اطمینان کا اظہار کرتے ہیں۔ ان کا کہنا ہے کہ اس مضمون میں عالمی اخلاقی اصولوں کی ترویج کے بجائے زیادہ تر اسلامی اخلاقی تصورات کا پرچار کیا گیا ہے اور دوسرے مذاہب کی اخلاقیات و اقدار کو مناسب نمائندگی نہیں دی گئی۔

وہ تجویز دیتے ہیں کہ اخلاقیات کے نصاب کو مزید بہتر بنا کر اسے بین المذاہب ہم آہنگی پیدا کرنے کے لئے استعمال کیا جائے اور اسے مسلم طلبہ کے لئے بھی لازمی قرار دیا جائے جس سے معاشرے مں عدم برداشت کی فضا کو ختم کرنے میں مدد ملے گی۔

محمد نعیم خان

محمد نعیم خان کا تعلق ضلع میانوالی سے ہے۔ سرگودھا یونیورسٹی میں ایم فل انگریزی کے طالب علم ہیں۔

"پٹرولنگ پولیس ایمرجنسی میں عوام کی مدد کو پہنچ ہی نہیں پاتی تو کارکردگی کیا ہو گی؟"

ناقص منصوبہ بندی یا بدعنوانی: میانوالی میں پائی خیل لفٹ اریگیشن سکیم کیوں ناکام ہوئی

میانوالی کے کالجوں میں اساتذہ کی راہ دیکھتے طلبہ اپنے مستقبل سے مایوس ہونے لگے

غیرمسلم طلبہ کو اسلامیات کی بجائے اخلاقیات کا مضمون پڑھانے والے اساتذہ کہاں ہیں؟