شیخ محمد سعید کے دن کا بیشتر حصہ پینے کے صاف پانی کو ڈھونڈنے میں گزر جاتا ہے کیوں کہ ان کے بقول حکومت نے سرکاری خرچے پر پانی صاف کرنے کا پلانٹ لگایا تھا وہ عرصہ دراز سے خراب پڑا ہے۔ اس لیے انہیں اپنے دن کے آغاز پر ہی ایسے گھر کی تلاش رہتی ہے جن کے نل سے صاف پانی آتا ہو اور وہ پانی دینے کے لیے راضی بھی ہوجائیں۔

محمد سعید کا تعلق پنجاب کے بالائی ضلع اٹک کے تاریخی قصبے فقیر آباد ہے جس کا پرانا نام لارنس پور تھا۔ اس قصبے کی آبادی لگ بھگ آٹھ ہزار کے قریب ہے اور اس میں اکثر مقامات پر زیر زمین پانی پینے کے قابل نہیں۔ چند ایک گھروں میں صاف پانی آتا ہے تو باقی گاؤں والے بھی انھی گھروں سے بھر کر لے کر جاتے ہیں۔

وہ بتاتے ہیں کہ تین سال پہلے یہاں حکومت نے ایک فلٹریشن پلانٹ لگایا تھا جو چند ہی دن چل پایا۔ اس کی وجہ ان کے بقول یہ ہے کہ گاوں میں جس آدمی کو یہ پلانٹ چلانے کی ذمہ داری سونپی گئی تھی وہ اخراجات اور دیگر مسائل کی وجہ سے اسے جاری نہ رکھ سکا۔

اسی ضلع کی تحصیل حضرو کے گاؤں غور غشی کی صورتحال بھی کچھ ایسی ہی ہے۔ یہاں بھی 2020 میں ایک سرکاری واٹر فلٹریشن پلانٹ لگایا گیا جو مقامی لوگوں کے مطابق بمشکل ایک مہینہ ہی چل سکا۔

گاؤں کے رہائشی محمد صفدر کے مطابق اس پلانٹ کے ساتھ بھی یہی مسئلہ ہوا کہ جس شخص کو اس کی ذمہ داری سونپی گئی تھی وہ اسے سنبھال نہیں سکا۔ اس کی بڑی&nbsp; وجہ یہ تھی کہ اسے اس پلانٹ کا بجلی کا بل جمع کرانے کے لیے گھر گھر سے پیسے اکٹھے کرنا پڑتے تھے جو مشکل کام تھا۔

ان کے مطابق اس پلانٹ کے بند ہونے کی ایک وجہ یہ بھی ہے کہ یہ آبادی سے دور تھا۔ لوگ یہاں سے کم ہی پانی لینے آتے تھے اسی لیے پھر وہ بجلی کے بل کی مد میں پیسے دینے کو بھی تیار نہیں تھے۔

تین سال قبل 2020 میں حکومت نے ضلع اٹک کی تین تحصیلوں اٹک، حضرو اور حسن ابدال میں عوام کو پینے کا صاف پانی فراہم کرنے کے لیے 60 ملین (چھ کروڑ) روپے کی لاگت سے 45 واٹر فلٹریشن پلانٹ لگائے تھے۔ان پلانٹس کی تنصیب کی ذمہ داری محکمہ پبلک ہیلتھ انجینئرنگ کو دی گئی تھی۔

ان میں سے پانچ پلانٹ اٹک شہر، چھ تحصیل اٹک کے گاؤں فقیر آباد، حاجی شاہ، گولڑہ، سروالہ، ڈھیر اور گوندل میں، حسن ابدال شہر میں چار جبکہ اس تحصیل کے گاؤں حصار اور شاہیہ میں ایک ایک پلانٹ لگایا گیا تھا۔ اسی طرح تحصیل میں شہری آبادی کے لیے تین جبکہ پیتھی، رحموں، مراڑیہ، ملاں منصور، فورملی، حیدرا، تاجک، ویسہ، کاملپور موسیٰ، ہارون، حمید، یاسین، ملہو، خگوانی، کالوکلاں، کالو خورد، بہبودی، غورغشتی، شینکہ، قطب بانڈی اور جلالیہ نامی گاؤں میں ایک ایک فلٹر یشن پلانٹ نصب کیا۔

جب یہ پلانٹ لگائے گئے تھے تو اس وقت کے مشیر برائے ماحولیاتی تبدیلی ملک امین اسلم نے، جن کا تعلق اٹک سے ہے، میڈیا کو بتایا تھا کہ یہ قدم خاص طور پر تحصیل حضرو اور اٹک کے کچھ علاقوں میں پیتھولوجیکل آلودگی میں اضافے کے باعث اٹھایا گیا ہے جس کے نتیجے میں ہیضہ، ہیپاٹائٹس، ٹائیفائیڈ اور بچوں کی بیماریاں پھیل رہی ہیں۔

یہ پلانٹ ایک معروف کمپنی سے خریدے گئے تھے اور پھر اسی کمپنی نے انہیں مقررہ مقامات پر نصب بھی کیا۔

اس نمائندے نے ان 45 پلانٹس میں سے 30 کا دورہ کیا تو یہ بات سامنے آئی کہ ان میں سے 8 مکمل طور پر بند پڑے ہیں جبکہ بیشتر پلانٹ کے فلٹر تبدیل نہیں کیے گئے۔

پلانٹس کی تنصیب کے بعد شہری علاقوں میں ان کی دیکھ بھال میونسپل کمیٹی کے سپرد تھی لیکن دیہات میں ان کی دیکھ بھال کے لیے کوئی بھی مناسب بندوبست نہیں کیا گیا اور اس کی ذمہ داری دیہات کے لوگوں پر چھوڑ دی گئی۔ مقامی لوگوں کے مطابق جب پلانٹ لگائے گئے تو دیہات کے لوگوں نے رضا کارانہ طور پر یوزر کمیٹیاں تشکیل دیں لیکن وہ زیادہ دیر تک نہیں چل سکیں۔ کیونکہ اس کے لیے بجلی کے بل اور مرمت کے لیے ایک تو کافی رقم درکار تھی دوسرا ان کو وقت پر چلانا اور پھر بند کرنا بھی ضروری تھا۔

محکمہ پبلک ہیلتھ انجینئرنگ کے سب ڈویژن آفیسر(ایس ڈی او) ارشاد ناز کے مطابق ان کے ادارے&nbsp; کا کام واٹر سپلائی سکیم یا واٹر فلٹر یشن پلانٹ کی تنصیب کرنا ہی ہوتا ہے۔ شہروں میں اس کو چالو رکھنے کی ذمہ دار میونسپل کمیٹی نبھاتی ہے لیکن دیہات میں ایسا کوئی نظام موجود نہیں ہے کہ ان کے لیے کسی سرکاری اہلکار کی ڈیوٹی لگائی جائے۔

وہ بتاتے ہیں کہ 1997 سے پہلے تک ایسا نظام نہیں تھا بلکہ دیہات اور شہروں میں ایسے منصوبوں کو چلانے کی ذمہ داری بھی انہیں محکمہ نبھاتا تھا جس کے لئے حکومت علیحدہ فنڈ مختص کرتی تھی اور تمام سکیمیں کامیابی سے چلا کرتی تھیں۔ لیکن پھر یہ پالیسی بدل دی گئی۔

وہ بھی دیہات کی سطح پر واٹر فلٹریشن پلانٹس جیسے منصوبوں کی ناکامی کو حکومتی سرپرستی نہ ہونے سے جوڑتے ہوئے کہتے ہیں کہ شروع شروع میں تو مقامی لوگ اس میں خاصی دلچسپی لیتے ہیں لیکن پھر یہ دلچسپی قائم نہیں رہ سکی اور دوسرا وہ لوگ چونکہ نان ٹیکنیکل ہوتے ہیں اس لیے ان پلانٹس کی صحیح دیکھ بھال کا علم نہیں ہوتا۔

ان کی بات کی تصدیق اس سے بھی ہوتی ہے کہ تحصیل حضرو میں لگے ہوئے بیشتر پلانٹس دیکھ بھال اور مرمت کے بغیر ہی چل رہے ہیں۔

گاؤں حمید میں بھی ایک ایسا ہی پلانٹ ہے جو کہنے کو تو چل رہا ہے لیکن مقامی لوگوں کے مطابق یہ جب سے نصب کیا گیا ہے اس کے فلٹر تبدیل نہیں ہوئے ہیں۔ اس گاؤں کے رہائشی مسلم خان کے مطابق جب اس کا فلٹر ہی تبدیل نہیں کیا گیا تو پھر یہ صاف پانی کیسے فراہم کرسکتا ہے۔ 
وہ کہتے ہیں کہ حکومت نے اس پر لاکھوں روپے ضائع کردیے ہیں۔

تحصیل حسن ابدال کے گاؤں حصار اور کامل پور موسی میں بھی فلٹریشن پلانٹ بظاہر چل رہا ہے لیکن مقامی لوگوں کے مطابق تین سال میں ایک بار بھی اس کی مرمت نہیں ہوئی اور نہ ہی فلٹر تبدیل کیا گیا ہے۔

اٹک شہر میں فلٹریشن پلانٹ فروخت کرنے والے ایک نجی کمپنی کے ملازم محمد صدیق ایسے پلانٹ نصب کرنے اور اس کی مرمت کا دس سال تجربہ رکھتے ہیں۔ ان کا کہنا ہے کہ ڈیڑھ دو سال بعد کسی بھی فلٹر یشن پلانٹ کی مرمت ضروری ہے اور اس پر نوے ہزار سے ڈیڑھ لاکھ تک خرچ آتا ہے۔ اگر ایسا نہ کیا جائے تو پھر زیر زمین پانی اور اس پلانٹ سے حاصل ہونے والے پانی میں کوئی فرق نہیں ہوتا۔

ان کے مطابق فلٹر کی بروقت تبدیلی سب سے ہم چیز ہے جو مختلف علاقوں کے زیر زمین پانی کے آلودگی کے حساب سے تبدیل کیا جاتا ہے۔ مثلا جس علاقے میں پانی زیادہ آلودہ ہے اور وہاں پر پلانٹ کا استعمال زیادہ ہے تو وہاں سال میں تین بار بھی فلٹر بدلنا پڑ سکتا ہے۔

لیکن ہر جگہ ایسا ہی نہیں ہے اس ضلع میں ویسہ، شینکہ اور جلالیہ ایسے دیہات جہاں پر مقامی لوگوں کی کاوش سے یہ پلانٹ کامیابی کے ساتھ چل رہے ہیں۔

ویسہ کے رہائشی اور مقامی سطح پر ایک فلاحی تنظیم چلانے والے شہزاد خان کے مطابق ان کے گاؤں کی آبادی 10 ہزار سے بھی زیادہ ہے اور جب یہ پلانٹ لگایا جا رہا تھا تو حکام کو آگاہ کیا تھا کہ یہ ضرورت پوری نہیں کرپائے گا لیکن وہ لگا کرچلے گئے۔

ان کے بقول بعد میں ان کی تنظیم نے لوگوں کی مدد کے لیے8 لاکھ روپے خرچ کرکے اس کی صلاحیت اور معیار بڑھا دیا ہے۔ اب مقامی لوگ خود اس کی دیکھ بھال کررہے ہیں اور ہر سال اس کی مرمت پر آنے والا کم از کم ایک لاکھ روپے کا خرچ بھی خود ہی دیکھتے ہیں۔ اس کے علاوہ بجلی کا بل جو 15 سے 20 ہزار تک آتا ہے وہ بھی ان کی تنظیم ہی ادا کرتی ہے۔

شینکہ اور جلالیہ میں لگے ان پلانٹس کی دیکھ بھال مقامی فلاحی تنظیمیں کررہی ہیں۔

اٹک سٹی کے سابق ناظم رانا شوکت کہتے ہیں کہ حکومت نے کروڑوں روپے خرچ کرکے عوام کی بہتری کے لیے فلٹریشن پلانٹ تو لگادیے لیکن اب ناقص پالیسیوں کی وجہ سے ان کی صحیح طرح سے دیکھ بھال نہیں ہو رہی جس کی وجہ سے ایک تو قومی خزانے پر بوجھ پڑ رہا ہے اور اس کا عوام کو فائدہ بھی نہیں ہوا۔

دیہی مسائل پر کام کرنے والے سماجی کارکن شہزاد خان کہتے ہیں دیہات میں چونکہ کوئی میونسپل نظام سرے سے موجود ہی نہیں ہے اور نہ ہی کوئی مستقل ادارے ہیں یعنی سڑک، سولنگ، نالی اور دیگر تعمیراتی کام جو دیہات میں لگائے جاتے ہیں۔

اس لیے حکومت ان کی دیکھ بحال اور مرمت سے بری الذمہ ہوجاتی ہے۔ اسی طرح کوئی واٹر فلٹریشن پلانٹ لگ جائے یا سیوریج کے پائپ دیہات میں پہنچ جائیں تو انہیں چلانا، ان کی دیکھ بھال، معمول کی مرمت اور ان پر ہونے والے دیگر تمام اخراجات اہل دیہہ کی ذمہ داری بن جاتے ہیں جبکہ شہروں اور قصبوں میں یہ ذمہ داری سرکار کے پاس رہتی ہے۔

ان کا کہنا ہے کہ دیہی علاقوں میں پانی کی فراہمی، نکاسی آب اور صاف صفائی کی ذمہ داریاں گورنمنٹ اٹھائے جس طرح قصبوں اور شہروں میں باقاعدہ قائم کیے گئے اداروں کے ذریعے اٹھائی جاتی ہیں تو ہی ایسے منصوبے کامیاب ہوسکتے ہیں۔

اٹک میں پانی کی جانچ کے لیے قائم ایک لیبارٹری میں کام کرنے والے فہد حسن خان بتاتے ہیں کہ اس لیبارٹری میں ضلع کے مختلف علاقوں سے پینے کے پانی کے روزانہ اوسطاً پانچ نمونے آتے ہیں جن میں سے تین نمونے پینے کے قابل نہیں ہوتے۔ فہد حسن خان نے کہا کہ لوگوں میں پینے کا پانی ٹیسٹ کروانے کی اہمیت کے بارے میں بالکل آگہی نہیں ہے۔ انہوں نے کہا کہ ماہرین کے مطابق پینے کے پانی کو ہر تین ماہ بعد ٹیسٹ کروانا ضروری ہے کیونکہ زیر زمین پانی کی کوالٹی میں بہت تیزی سے تبدیلیاں آرہی ہیں اور اس تبدیلی کو مدنظر رکھتے ہوے ہر گھر میں واٹر فلٹر لگوانا بہت ضروری ہے۔

گھوٹکی میں کروڑوں کی لاگت سے لگائے گئے واٹر فلٹریشن پلانٹ 2 ماہ بھی نہ چل سکے

'فلٹر لگ گئے مگر چلائے گا کون؟' اٹک کے دیہات میں کروڑوں مالیتی واٹر فلٹریشن پلانٹ بے کار

text

اٹک کے نواحی گاؤں ڈھلیاں کے کاشت کار یار محمد کا ملکیتی زرعی رقبہ 50 ایکڑ ہے جس میں سے 18 ایکڑ رقبے پر انہوں نے مونگ پھلی کاشت کی ہے جبکہ باقی 32 ایکڑ رقبہ خالی پڑا ہے۔

یار محمد کے بقول ان کا علاقہ چونکہ بارانی ہے (وہ زرعی زمین جس کی کاشت بارش پر منحصر ہوتی ہے) اس لیے وہ اتنی ہی فصل کاشت کرتے ہیں جس سے انہیں غیر موافق موسم کی صورت میں بڑے نقصان کا خدشہ نہ ہو۔

انھوں نے پچھلے سال 25 ایکڑ رقبے پر مونگ پھلی اگائی تھی لیکن اس مرتبہ زیر کاشت رقبے میں کمی کردی ہے۔ اس کی وجہ وہ یہ بتاتے ہیں کہ پچھلے سیزن میں نہ تو وقت پر بارشیں ہوئیں اور جب ان کی فصل منڈی میں پہنچی تو مناسب نرخ بھی نہ ملے۔

یار محمد کہتے ہیں کہ موسم پر انسان کا زور نہیں لیکن انہیں یہ یقین ہو کہ فصل کے اچھے دام مل جائیں گے تو وہ 35 ایکڑ رقبے پر بھی مونگ پھلی کاشت کرسکتے ہیں۔

باقی 15 ایکڑ رقبے پر وہ مونگ پھلی کیوں نہیں لگائیں گے اس بارے میں ان کا کہنا ہے کہ یہ رقبہ سخت زمین والا ہے، جس میں بارش کا پانی کھڑا ہوجاتا ہے اس لیے یہاں مونگ پھلی کاشت نہیں ہوسکتی۔

صوبائی محکمہ زراعت کے مطابق مونگ پھلی کی کاشت کے لیے ریتلی، ریتلی میرا یا ہلکی میرا زمین موزوں ہے اور فصل کی بڑھوتری کے دوران اگر مناسب وقفوں سے بارش ہوتی رہے تو یہ بہتر پیداوار دیتی ہے۔ بارانی علاقوں کے موسم میں یہ دونوں خصوصیات موجود ہوتی ہیں اس لیے مونگ پھلی کا بیشتر ر قبہ بارانی علاقوں میں ہے۔

محکمہ زراعت کہتا ہے کہ گرم مرطوب آب و ہوا والا موسم اس فصل کے لیے انتہائی موزوں ہے۔ بیج کے اگاؤ کے وقت درجہ حرارت 20 تا 30 درجہ سینٹی گریڈ رہے تو بہتر ہوتا ہے کیوں کہ 33 ڈگری سینٹی گریڈ پر بیج کا اگاؤ کم ہوجاتا ہے۔

پاکستان میں 96 فیصد مونگ پھلی پنجاب میں کاشت ہوتی ہے اور صوبے میں اگنے والی فصل کا 80 فیصد حصہ پوٹھوہار کے علاقے راولپنڈی ڈویژن (اٹک، چکوال، جہلم اور راولپنڈی) میں ہوتا ہے۔

راولپنڈی ڈویژن میں بھی چکوال اور اٹک کے اضلاع میں مونگ پھلی سب سے زیادہ کاشت ہوتی ہے۔ 2021 میں چکوال میں ایک لاکھ 47 ہزار 997 ایکڑ اور&nbsp; اٹک میں ایک لاکھ دس ہزار 338 ایکڑ پر یہ فصل اگائی گئی۔ اس سے اگلے سال 2022 میں چکوال میں ایک لاکھ 61 ہزار 158 ایکڑ اور اٹک میں ایک لاکھ دس ہزار 121 ایکڑ رقبے پر یہ فصل ہوئی۔ رواں سیزن میں بھی اٹک میں ایک لاکھ دس ہزار ایکڑ رقبے پر یہ فصل لگی ہے۔

اگر پورے ملک کی بات کی جائے تو ہر سال لگ بھگ تین سے ساڑھے تین لاکھ ایکڑ رقبے پر مونگ پھلی کی فصل کاشت ہوتی ہے اور اس سے ایک لاکھ ٹن کے قریب پیداوار حاصل کی جاتی ہے۔

2021 میں پاکستان میں تین لاکھ 36 ہزار 767 ایکڑ رقبے پر مونگ پھلی کی فصل سے ایک لاکھ 21 ہزار 693 میٹرک ٹن پیداوار حاصل ہوئی۔ اس سال پاکستان میں فی ایکڑ اوسط پیداوار تقریبا نو من رہی۔

یار محمد کی عمر 55 سال ہوگئی ہے جب سے انھوں نے ہوش سنبھالا ہے وہ مونگ پھلی کاشت کرتے آرہے ہیں لیکن ان کا زیر کاشت رقبہ 18 ایکڑ سے 25 ایکڑ تک ہی رہا ہے۔

ضلع اٹک کی تحصیل پنڈی گھیپ کے گاؤں ڈومیال سے تعلق رکھنے والے مونگ پھلی کے کاشت کار ملک اظہر محمود بھی بڑے زمیندار ہیں ان کے خاندان کی ملکیتی زمین 875 ایکڑ (سات ہزار کنال) ہے جس میں سے اس مرتبہ انھوں ایک سو 25 ایکڑ رقبے پر مونگ پھلی کی فصل کاشت کی ہے۔

ملک اظہر کہتے ہیں پچھلے تین سال سے انھوں نے مونگ پھلی اگانا چھوڑ دی تھی اس کی وجہ ان کے بقول ایک تو بارشوں&nbsp; کے دورانیے میں تبدیلیاں ہیں تو دوسرا مونگ پھلی کی فصل کی کٹائی کے لیے مزدوری کے اخراجات اس قدر زیادہ ہوگئے تھے کہ ان کا منافع بہت ہی کم رہ گیا تھا۔

قومی ادارہ شماریات کے مطابق ضلع اٹک میں کل زیر کاشت رقبہ سات لاکھ 89 ہزار 307 ایکڑ ہے اور اس میں سے 60 ہزار ایکڑ کے علاوہ باقی سارا بارانی ہے۔ یہاں کے کاشت کار سال میں زیادہ تر دو ہی فصلیں اگاتے ہیں جن میں ایک گندم اور دوسری مونگ پھلی ہے۔

یار محمد اور ملک اظہر کا ماننا ہے کہ ضلع اٹک میں مزید 50 سے 60 فیصد رقبہ ایسا ہے جہاں پر مونگ پھلی کی فصل کاشت ہوسکتی ہے۔

<h2>مونگ پھلی سونے کی ڈلی</h2>

مونگ پھلی پاکستان کے بارانی علاقوں میں کاشت کی جانیوالی موسم خریف کی اہم ترین نقد آور فصل ہے اور خاص طور پر خطہ پوٹھوار میں موسم خریف کی کوئی بھی ایسی دوسری فصل نہیں جو مونگ پھلی کے مقابلے میں زیادہ آمدنی دیتی ہو۔

اٹک کے کسانوں کا کہنا ہے کہ مونگ پھلی سے حاصل ہونیوالی آمدنی ان کے ضلعے سمیت پوٹھوہار کے علاقوں کے کاشتکاروں کی معاشی حالت کو سنوارنے اور ان کا معیار زندگی بہتر بنانے میں اہم کردار ادا کرتی ہے اور یہی وجہ ہے کہ مونگ پھلی کو سونے کی ڈلی بھی کہا جاتا ہے۔

یار محمد پچھلے 22 سال سے مونگ پھلی کا کاروبار بھی کررہے ہیں۔ وہ بتاتے ہیں کہ اس وقت اٹک میں مونگ پھلی کی 58 آڑھتیں ہیں جہاں ہر آڑھت پر 15 سے 20 مزدور کام رہے ہیں۔ ان کا خیال ہے اٹک کی لگ بھگ 30 سے 40 فیصد آبادی کا روزگار کسی نہ کسی طرح مونگ پھلی کے ساتھ جڑا ہوا ہے۔ جب فصل کی برداشت ہوتی ہے تو سینکڑوں مزدور خاندان یہاں سے روزی کماتے ہیں اس کے علاوہ مونگ پھلی کو خشک کرنے کا کام کرنے والے اور ٹرانسپورٹر، جو جنس کو ملک کے دوسرے حصوں تک پہنچاتے ہیں، وہ بھی سیزن میں اچھی خاصی آمدنی حاصل کرلیتے ہیں۔

قومی لیبر فورس سروے 2020-21&nbsp; کے مطابق ضلع اٹک میں سات لاکھ 52 ہزار 200 مزدور ہیں جن میں سے 47.3 فیصد یعنی تین لاکھ 55 ہزار 795 افراد زرعی شعبے سے وابستہ ہیں۔ اٹک میں زرعی شعبے میں کام کرنے والے مزدوروں میں 78 فیصد خواتین ہیں۔

لیکن ملک اظہر اور یار محمد ان اعداد و شمار کو شک کی نظر سے دیکھتے ہیں۔ ان کا خیال ہے کہ یہ تعداد اس سے دوگنا سے بھی زیادہ ہے اور حکومتی عدم توجہی کی وجہ سے نہ صرف کسان بلکہ ان سب مزدورں کے معاشی حالات ابتر ہورہے ہیں۔

ملک اظہر کہتے ہیں کہ ضلع اٹک کے ساڑھے تین لاکھ ایکڑ رقبے پر مونگ پھلی کی کاشت ممکن ہے لیکن یہاں پر صرف ایک لاکھ ایکڑ پر یہ فصل اگائی جاتی ہے اس کی وجہ یہ ہے کہ وقت کے ساتھ مہنگائی کی شرح اور مزدوری کے اخراجات بہت زیادہ بڑھ گئے ہیں لیکن فصل کی قیمت اور پیداوار وہیں کی وہیں ہے۔

وہ بتاتے ہیں کہ ان کے علاقے میں بیشتر کاشت کار اب بھی روایتی طریقہ کاشت پر انحصار کیے ہوئے ہیں۔ وہ&nbsp; گھر کا بیج بناتے ہیں اور اسے سالوں تک استعمال کرتے ہیں جس سے ان کی پیداوار میں اضافے کے بجائے کمی آتی جارہی ہے۔ جبکہ محکمہ زراعت کی طرف سے ان کی کسی قسم کی کوئی بھی رہنمائی نہیں کی جاتی۔

یار محمد کہتے ہیں کہ ان کے علاقے میں مونگ پھلی کا ایک سرکاری ریسرچ سینٹر بھی قائم ہے جس کا انہیں چند ماہ پہلے ہی پتا چلا ہے لیکن انھوں نے کبھی نہیں سنا کہ اس ادارے نے کبھی کسی کسان کی رہنمائی کی ہو۔ اس لیے وہ سارے کام اندازے کے مطابق کرتے ہیں۔

تاہم اٹک کے ڈپٹی ڈائریکٹر زراعت ؎ شکیل احمد اس سے اتفاق نہیں کرتے۔ ان کا کہنا ہے کہ زرعی ماہرین باقاعدگی سے ضلع بھر میں ہر سال&nbsp; آگاہی کیمپ اور سیمینار منعقد کرتے ہیں۔ محکمہ زراعت ہر سال سو سے زیادہ تربیتی کیمپ لگاتا ھے اور رواں سال اب تک 142 تربیتی کیمپ لگائے جا چکے ہیں جہاں پر&nbsp; کسانوں کو مفید مشورے دیے گئے۔

اٹک میں ایوب ایگرکلچر ریسرچ انسٹیوٹ کے مونگ پھلی ریسرچ سنٹر کے سائنس دان منظور حسین بتاتے ہیں کہ یہ سنٹر 22 سال سے کام کرہا ہے جس میں پانچ ریسرچر اور سائنسدان فرائض انجام دے رہے ہیں جن کی محنت سے مونگ پھلی کے بیج اٹک 2019 اور فخر اٹک متعارف کرائے گئے ہیں۔ انھوں نے ان اقسام کی تیاری کو بڑی کامیابی قرار دیا کیونکہ ان کے بقول بیج کی نئی قسم تیار کرنے پر آٹھ سے دس سال لگ جاتے ہیں۔

&nbsp;انہوں نے کہا کہ دیسی اقسام کے بیج کی فی ایکڑ پیداوار 8 سے 12 من جبکہ سنٹر کی تیار کردہ اقسام کی پیداواری صلاحیت 30 سے 40 من فی ایکڑ ہے۔

تاہم حقائق ان کے دعوے سے برعکس ہیں۔ پچھلے پانچ سال میں پاکستان میں کبھی بھی مونگ پھلی کی فی ایکڑ اوسط پیداوار ساڑھے دس من سے زیادہ نہیں رہی اور اٹک میں بھی فی ایکڑ اوسط پیداوار زیادہ سے زیادہ 15 من رہی ہے۔

<h2>مونگ پھلی کی کاشت میں فائدہ ہی فائدہ</h2>

امریکہ محکمہ زراعت کی مونگ پھلی سے متعلق عالمی رپورٹ میں بتایا گیا ہے کہ بھارت میں 70&nbsp; فیصد کھانے کا تیل مونگ پھلی سے حاصل کیا جاتا ہے۔ جبکہ پاکستان میں کھانے کے تیل میں مونگ پھلی کا حصہ نہ ہونے کے برابر ہے۔ ہمارے ہاں یہ زیادہ تر بھون کر کھائی جاتی ہے اور بیکری کی اشیا بنانے میں استعمال ہوتی ہے۔

پاکستان میں مونگ پھلی کی فی ایکڑ اوسط پیداوار دس من ہے جو کہ بھارت سے آدھی ہے۔ بارانی زرعی تحقیقاتی ادارہ یہ تسلیم کرتا ہے کہ پاکستان میں پیداوار کم ہونے کی اہم وجہ زیادہ پیداواری صلاحیت رکھنے والی اقسام کی کمی، اچھا بیج نہ ہونا اور پیداوار بڑھانے کے عوامل پر عمل درآمد نہ ہونا ہے۔

ملک اظہر کہتے ہیں کہ مونگ پھلی برداشت کے لیے جو تھریشر ہے وہ بھی ایک مقامی کاری گر نے تیار کی ہے۔ اس کے علاوہ آج بھی بہت سارے کسان فصل کی پٹائی کَسّی سے کرتے ہیں کیوں کہ پٹائی کے لیے بھی کوئی مشین نہیں بنائی گئی۔ جو مشینیں کام کر رہی ہیں وہ بھی اسی طرح مقامی کاری گروں کی تیار کردہ ہیں۔

پیر مہر علی شاہ بارانی زرعی یونیورسٹی راولپنڈی کے پلانٹ بریڈنگ ڈیپارٹمنٹ کے اسسٹنٹ پروفیسر محمود الحسن کے مطابق پاکستان خوردنی تیل کی اپنی ضرورت پوری کرنے کے لیے سالانہ اربوں روپے پام آئل اور سویابین کی درآمد پر خرچ کرتا ہے۔ اگر مونگ پھلی کی پیداوار بڑھا دی جائے اور اسے بطور خوردنی تیل بھی استعمال کرنا شروع کردیا جائے تو اس سے ملکی معیشت کو بہت زیادہ فائدہ ہوگا۔

محمود الحسن کہتے ہیں کہ کسان مونگ پھلی مقامی مارکیٹ میں اس لیے فروخت کرتے ہیں کیونکہ ان کے پاس وسائل اور آگہی کی بھی کمی ھے جس کی وجہ سے وہ اچھے معاوضے سے محروم رہ جاتے ہیں۔

انھوں نے کہا کہ بارانی یونیورسٹی نے مختلف علاقوں میں کسانوں کی معاونت کی ھے اور اب کسانوں کو تجارتی پیمانے پر مونگ پھلی کا تیل تیار کرنے کے قابل بنانے کے اقدامات کیے جا رہے ہیں۔ اس کے علاوہ مونگ پھلی کا مکھن بھی کسانوں کی آمدنی میں اضافہ کرسکتا ہے۔

یار محمد اور ملک اظہر جو دنوں مونگ پھلی کے کاروبار سے بھی منسلک ہیں ان کا بھی ماننا ہے کہ اگر حکومت آڑھتیوں کو سہولیات دے اور مونگ پھلی کو جدید طریقوں کے مطابق صاف کر کے پیک کرنے کے پلانٹ لگا کر دے تو اسے ایکسپورٹ بھی کیا جاسکتا ہے۔

سندھ میں حکومت اور شوگر ملز کے خلاف گنے کے کاشتکاروں کا انوکھا اقدام

مونگ پھلی سونے کی ڈلی نہ رہی: کسان خریف کی اہم ترین نقد آور فصل سے منہ کیوں موڑ رہے ہیں

&quot;راولپنڈی کی پیر مہر علی شاہ بارانی زرعی یونیورسٹی کا اٹک میں ذیلی کیمپس بند ہونے سے میری بیٹی کو اپنی تعلیم ادھوری چھوڑنا پڑی۔ مالی وسائل کم ہونے کے باعث میں اسے دوسرے شہر نہیں بھیج سکتا تھا۔&quot;

&nbsp;یہ کہنا ہے خان زمان کا جو اپنے گھر اور بیٹی کی تعلیم کے اخراجات بمشکل پورے کر رہے تھے۔ وہ بتاتے ہیں کہ ان کی بیٹی پڑھ لکھ کر شعبہ زراعت میں نوکری کرنا چاہتی تھی لیکن اب وہ گھر بیٹھی ہے۔

علی عمیر کے لیے&nbsp; بی ایس سی ایگریکلچر کی ڈگری کا حصول راولپنڈی منتقل ہونے ہی سے ممکن ہوا۔ ان کے مطابق اٹک کے ذیلی کیمپس میں کلاسز ختم ہونے کے بعد ان سمیت تمام طلبہ کو بتایا گیا کہ انھیں راولپنڈی میں یونیورسٹی کے مین کیمپس جانا ہوگا۔

&quot;میرے والد ایک ٹیلی فون کمپنی میں معمولی اجرت پر ملازمت کرتے تھے۔ میں نے انہیں بتایا کہ راولپنڈی کیمپس جانے سے میرے اخراجات بہت بڑھ جائیں گے۔ انھوں نے جیسے تیسے اخراجات دینے کی حامی بھر لی لیکن انھیں اس میں بہت سی مشکلات پیش آئیں۔&quot;

عمیر بتاتے ہیں کہ اٹک کیمپس میں ان کے ماہانہ چھ سے آٹھ ہزار روپے کے اخراجات راولپنڈی میں بڑھ کر 15 ہزار روپے ہو گئے۔

اسامہ ایوب تعلیم مکمل کرنے کے بعد اب ایک فوڈ فیکٹری میں بطور کوالٹی کنٹرولر کام کر رہے ہیں۔ وہ ان 150 طلبہ میں شامل تھے جنہیں اٹک کا ذیلی کیمپس بند ہونے کے بعد بارانی زرعی یونیورسٹی راولپنڈی منتقل ہونا پڑا۔

انہوں نے بتایا کہ انھیں مالی مشکلات نہیں تھیں البتہ راولپنڈی مہں دیگر مسائل پیش آئے۔

&quot;ہم چار کلاس فیلوز کو نجی ہاسٹل میں رہنا پڑا جہاں کھانے اور رہنے کا معیار اچھا نہیں تھا۔ ٹانگوں سے معذور میرے ایک کلاس فیلو کو کیمپس اور گھر آنے جانے میں دشواری کا سامنا رہا۔&quot;

اٹک میں یونیورسٹی کے ذیلی کیمپس کی منظوری 2014ء میں دی گئی تھی اور اس امید کے ساتھ سرکاری کالج سے مستعار لیے گئے چند کمروں میں کلاسوں کا آغاز کیا گیا کہ کیمپس تعمیر ہونے پر انہیں وہاں منتقل کر دیا جائے گا۔

ذیلی کیمپس کے پراجیکٹ ڈائریکٹر زوہیر حسنین کے مطابق کیمپس کی منظوری ملتے ہی انتظامیہ نے اس کے لیے ایک ہزار کنال اراضی کی خریداری کا عمل شروع کر دیا تھا جو 2016ء میں مکمل ہوا۔ اس پر 11 کروڑ 20 لاکھ روپے لاگت آئی۔ ان کے مطابق ابتدائی طور پر عمارت کی تعمیر کے لیے آٹھ کروڑ 80 لاکھ روپے کے فنڈزجاری کیے گئے تھے۔ ذیلی کیمپس میں ابتداً ایف سی پری ایگریکلچر اور بی ایس سی ایگریکلچر آنرز کی کلاسیں شروع کی گئیں۔

&nbsp;2015ء سے 2019ء تک اس کیمیپس میں بالترتیب 59، 88، 84، 36 اور 44 طلبہ کو داخلہ ملا۔ 2019ء میں یونیورسٹی کے پرو وائس چانسلر ندیم اختر عباس مرحوم نے اس عارضی کیمپس کو بند کرنے کے احکامات جاری کر دیے۔ انہوں نے اس کا سبب یہ بتایا کہ چند کمروں میں طلبہ کو معیاری تعلیم بھی نہیں دی جا سکتی اور یہ ڈیکورم کے خلاف ہے۔اس وقت تک کیمپس کی عمارت مکمل نہیں ہو پائی تھی۔

سابق وفاقی وزیر شیخ آفتاب احمد دعویٰ کرتے ہیں کہ اس وقت کے وزیراعلیٰ پنجاب شہباز شریف سے اس کیمپس کی منظوری ان کی کاوشوں کا ثمر ہے۔ اٹک کی ضلعی حکومت نے ہنگامی بنیادوں پر اس مقصد کے لیے مطلوبہ اراضی خریدی اور 2016ء میں اس کا سنگ رکھ کر عارضی طور پر سرکاری عمارت میں کلاسوں کا آغاز بھی کروا دیا۔

&quot;بدقسمتی سے 2018ء میں ہماری حکومت نہ بن سکی اور نئی حکومت نے منصوبے پر تاخیر حربے اختیار کرنا شروع کر دیے۔ یہاں تک کہ&nbsp; 2019ء میں کلاسز ختم کروا دی گئیں اور زیر تعلیم طلبہ کو کہا گیا کہ باقی ماندہ تعلیم کے لیے وہ بارانی زرعی یونیورسٹی راولپنڈی چلے جائیں۔ اس سے کئی طلبہ کو مالی اور دیگر مسائل پیش آئے۔&quot;

انھوں نے الزام عائد کیا کہ پاکستان تحریک انصاف کی پچھلی حکومت نے اس منصوبے کو رکوانے کی کوشش کی۔ منصوبے کا آڈٹ بھی کروایا گیا لیکن کچھ نہیں ملا۔ ان کے مطابق اس کیمپس کے باقی ماندہ کام کی تکمیل کے لیے فنڈز منظور کروا لیے گئے ہیں۔

دوسری جانب سابق حکومت میں وزیر اعظم کے معاون خصوصی برائے موسمیاتی تبدیلی ملک امین اسلم کہتے ہیں کہ بارانی زرعی یونیورسٹی کے اٹک میں ذیلی کیمپس کے پی سی ون میں مختص کی گئی زیادہ تر رقم صرف مہنگے نرخ پر زمین خریدنے کے لیے خرچ کر دی گئی۔ اس سے کیمپس کے تعمیراتی کام کے لیے کچھ نہیں بچا تھا۔

ان کے مطابق داخلہ لیتے وقت طلبہ کو اصل صورت حال سے آگاہ نہیں کیا گیا۔ گورنمنٹ کالج اٹک کے چند کلاس رومز میں کلاسوں کا آغاز کر دیا گیا اور ہائر ایجوکیشن کمیشن سے زراعت کی ڈگری کی منظوری بھی نہیں لی گئی تھی۔ پی ٹی آئی حکومت نے طلبہ کو ڈگری دلوانے کے لیے ہی راولپنڈی منتقل کیا۔

زہیر حسنین کے مطابق اب تک اس کیمپس کی تعمیر پر 78 کروڑ 60 لاکھ روپے خرچ کیے جا چکے ہیں۔ انھوں نے بتایا کہ ایڈمن بلاک، اکیڈمک بلاک، گرلز ہاسٹل، بوائز ہاسٹل، لائبریری، مسجد، ہیلتھ سنٹر، ورکس آفس، ریسرچ سنٹر، منی مارکیٹ اور فیکلٹی ہاسٹل کی تعمیر&nbsp; مکمل ہو چکی ہے۔ تاہم فنڈز کی کمی کی وجہ سے ابھی تک بجلی کی فراہمی، کیمپس کے اندر سڑکوں کی تعمیر، ٹیوب ویل کی تنصیب، نکاسی آب اور سیوریج کے کام کا آغاز نہیں ہو سکا۔ ان مقاصد کے لیے 33 کروڑ روپے کے فنڈز درکار ہیں۔

انہوں نے بتایا کہ تعمیراتی کام میں رکاوٹ کا ایک سبب پنجاب اسمبلی کی تحلیل بھی ہے کیونکہ نگران حکومت فنڈز جاری نہیں کر سکتی۔ انھوں نے کہا کہ جونہی مذکورہ بالا کام مکمل ہو گئے تو کلاسوں کا آغاز کر دیا جائے گا۔

ان کا کہنا ہے کہ کہ ذیلی کیمپس کی تعمیر مکمل ہونے کے بعد ابتدائی طور پر بی ایس زراعت، بی ایس معاشیات، بی ایس ریاضی اور بی ایس بیالوجی میں طلبہ کو داخلہ دیا جائے گا۔ یہاں کم فیس میں معیاری تعلیم کی سہولت میسر ہو گی جس سے کم آمدن والے گھرانوں کے بچے اعلیٰ تعلیم حاصل کر سکیں گے۔

یونیورسٹی آف میانوالی: وزٹنگ فیکلٹی سے پڑھیں اور لیب کے بغیر مائیکرو بیالوجی کی ڈگری حاصل کریں

اٹک میں بارانی یونیورسٹی کا ذیلی کیمپس بند ہونے سے سیکڑوں طلبہ کا تعلیمی نقصان

اٹک کی 32 سالہ عارف بی بی دو ماہ قبل جب قریبی بنیادی مرکز صحت گئیں تو ڈاکٹروں نے ان کی حالت دیکھ کر فوری طور پر بلغم کا ٹیسٹ کیا۔ رپورٹ آئی تو بتایا کہ انہیں ٹی بی کا مرض لاحق ہو گیا ہے اس لیے وہ علاج کے لیے فوری طور پر دیہی مرکز صحت مگیاں یا تحصیل ہیڈ کوارٹر ہسپتال پنڈی گھیب چلی جائیں۔

عارف بی بی&nbsp; کو کچھ عرصہ سے کھانسی کے شدید دورے پڑ رہے تھے۔ان کا رنگ پیلا اور وزن&nbsp; کم ہو رہا تھا۔ وہ اگلے ہی دن گھر سے پانچ کلومیٹر دور مگیاں کے سرکاری ہسپتال پہنچ گئیں۔

وہ بتاتی ہیں کہ وہاں ان کے چند مزید ٹیسٹ ہوئے اور ڈاکٹر نے علاج شروع کردیا۔ساتھ ہی تنبیہہ کی کہ وہ کسی صورت دوائی کا ناغہ نہیں کریں گی۔ ڈاکٹر نے انہیں یہ ہدایت بھی کی کہ انڈا، دودھ، گوشت اور پھل روزانہ اپنی خوراک کا حصہ بنالیں تو جلد ٹھیک ہوجائیں گی۔

عارف بی بی کی شادی کو دو سال ہوئے ہیں اور فی الحال ان کی اولاد نہیں ہے۔وہ اپنے شوہر جو دیہاڑی دار مزدور ہیں، ان کی والدہ اور چھوٹے بھائی کے ساتھ رہتی ہیں۔

ان کا کہنا ہے کہ ان کے پاس اتنے وسائل نہیں کہ روزانہ گوشت اور پھل خرید سکیں۔

&nbsp;ٹی بی ایک متعدی بیماری ہے جو جسم کے کسی بھی حصے پر اثر انداز ہوسکتی ہے لیکن عام طور پر پھیپھڑوں میں نمودار ہوتی ہے۔درست علاج نہ کیا جائے تو یہ جان لیوا بھی ثابت ہو سکتی ہے۔

عالمی ادارہ صحت کے مطابق 2021 ء میں &nbsp;ٹی بی سے دنیا بھر میں 16 لاکھ اموات ہوئیں جبکہ ایک کروڑ چھ لاکھ نئے افراد میں یہ بیماری پائی گئی۔ پاکستان بھی اس بیماری سے متاثرہ پانچ بڑے ممالک میں شامل ہے۔

2021 ءمیں پاکستان میں ٹی بی کے تین لاکھ 39 ہزار 256 مریض رپورٹ ہوئے جن میں سے 50 ہزار کے قریب لوگوں کی اموات ہوئیں جو کورونا، ایڈز، خسرہ، ملیریا، یرقان اور السر جیسے امراض سے زیادہ ہیں۔

پاکستان میں رپورٹ ہونے والے کل مریضوں میں 63 فیصد یعنی دو لاکھ آٹھ ہزار 573 پنجاب میں تھے۔ گنجان آباد اضلاع لاہور، فیصل آباد، راولپنڈی فیصل آباد اور گوجرانوالہ میں یہ بیماری زیادہ ہے۔ اس کے بعد اٹک، ننکانہ صاحب، حافظ آباد، گجرات، ناروال اور میانوالی آتے ہیں جہاں سالانہ دو سے چار ہزار تک ٹی بی کیسز رپورٹ ہوتے ہیں۔

اٹک کے سینیئر ڈاکٹر طفیل خٹک کا ماننا ہے کہ ٹی بی پھیلنے کی بڑی وجہ متوازن خوراک کی کمی ہے۔ پسماندہ دیہات میں اس بیماری کی شرح زیادہ ہے۔

ضلع اٹک کی آبادی 22 لاکھ سے زیادہ ہے۔یہاں 20 لاکھ کے قریب لوگ دیہی علاقوں میں رہتے ہیں۔ نیشنل ٹی بی کنٹرول پروگرام کی ویب سائٹ کے مطابق اس ضلع میں صرف 13 مقامات یا ہسپتالوں میں ٹی بی کے ٹیسٹ کی سہولت موجود ہے۔

ان میں ڈسٹرکٹ ہیڈ کوارٹر ہسپتال اور پانچ تحصیل ہیڈ کوارٹر ہسپتالوں کے علاوہ پانچ دیہی مراکز صحت، ایک ڈسٹرکٹ جیل اور ایک فلاحی ادارے کے پاس لیبارٹری کی سہولت ہے۔

ڈاکٹر داؤد ملک ضلع اٹک میں ٹی بی پروگرام کے کوآرڈینیٹر ہیں۔ ان کا کہنا ہے کہ ضلعے میں ایک ہزار 400 مریضوں کا علاج جاری ہے۔ پچھلے سالوں میں بھی یہ تعداد ڈیڑھ ہزار تک رہی ہے۔

&quot;ضلع بھر میں 800 کے لگ بھگ لیڈی ہیلتھ ورکر گھر گھر جاکر سکریننگ کر رہی ہیں۔ ٹی بی کا مشتبہ مریض نظر آ جائے تو اسے قریبی مرکز صحت جانے کی ہدایت کی جاتی ہے&quot;۔

ڈاکٹر داؤد کہتے ہیں کہ مریض کو چھ ماہ ادویات مفت دی جاتی ہیں۔ فالو اپ سسٹم کے ذریعے یہ یقینی بنایا جاتا ہے کہ مریض باقاعدگی سے دوا کھا رہا ہے۔

وہ بتاتے ہیں کہ ضلع اٹک میں چھ ماہ کے دوران اس مرض کی تشخیص کے لیے 12 ہزار سے زیادہ افراد کی سکریننگ کی گئی جن میں بلغم ٹیسٹ، ایکسرے، ایچ آئی وی اور جینز ٹیسٹ شامل ہیں۔ ڈسٹرکٹ جیل میں بھی 700 قیدیوں کی سکریننگ کی گئی ہے۔

لیکن ڈاکٹر طفیل خٹک کے خیال&nbsp; میں یہ اقدامات 22 لاکھ کی آبادی کے لیے ناکافی ہیں۔ وہ یہ بھی کہتے ہیں کہ ٹی بی کیسز بہت کم تعداد میں رپورٹ ہوتے ہیں۔

&quot;اس کی بڑی وجہ یہ ہے کہ دیہات میں لوگوں کو طبی مراکز تک پہنچنے کے لیے بہت زیادہ فاصلہ طے کرنا پڑتا ہے&quot;۔

موضع سینسز 2020 ءکے مطابق اٹک میں زیادہ آبادی والے 405 دیہات میں سے صرف 80 میں بنیادی مراکز صحت اور 55 میں دیہی مراکز صحت کی سہولت ہے۔ ضلعے کی 862 چھوٹی آبادیوں کو اس معاملے میں ہمیشہ نظرانداز کیا گیا ہے۔

<h2>ٹی بی کیس رپورٹ کیوں نہیں ہوتے؟</h2>

عالمی ادارہ صحت (ڈبلیو ایچ او) کے مطابق پاکستان میں 2020ء میں ٹی بی کے&nbsp; ممکنہ طور پر&nbsp; پانچ لاکھ 73 ہزار نئے کیسز سامنے آئے تھے لیکن ان میں صرف دو لاکھ 77 ہزار یعنی 48 فیصد ہی رپورٹ ہوئے۔

اسی طرح 2021 ء میں بھی مریضوں کی کل تعداد چھ لاکھ 11 ہزار تھی لیکن صرف 56 فیصد یعنی تین لاکھ 39 ہزار 256 کیس رپورٹ ہوئے۔

نیشنل ٹی بی کنٹرول پروگرام میں صوبائی سطح کے ایک سینیئر عہدے دار نے نام ظاہر نہ کرنے کی شرط پر بتایا کہ تمام مریضوں تک رسائی میں سب سے بڑا مسئلہ فنڈز کی کمی ہے۔

پنجاب کو ٹی بی کے لیے سالانہ دو سے ڈھائی ارب روپے ملتے ہیں جو مریضوں کی تعداد کے لحاظ سے مونگ پھلی کے دانے کے برابر ہیں جبکہ ایک عام مریض پر پانچ ہزار روپے خرچ ہوتے ہیں۔

لورالائی کے طبی ماہر اور سماجی کارکن ڈاکٹر منیر اقبال کے خیال میں مریضوں تک رسائی میں بڑی رکاوٹ فنڈز کی کمی نہیں بلکہ صحت کا نظام ہے۔

&quot;ہمارے ہسپتال، ڈاکٹر اور طبی عملہ اس بات پر انحصار کرتا ہے کہ مریض ان کے پاس آئیں تو تب وہ علاج کریں گے یہ سراسر غلط ہے۔&quot;

ان کے ماننا ہے کہ ٹی بی کو ختم کرنے کے لیے چین یا انگلینڈ جیسے &#39;ایکٹو ڈیٹیکٹو سسٹم&#39; کو اپنانا ہوگا جس میں ڈاکٹر گلی محلوں اور دیہات میں جاکر خود مریضوں کو تلاش کرتے ہیں۔

ان کے کہنا ہے کہ &nbsp;ٹی بی کا ایک متاثر شخص سال میں آٹھ سے 15 نئے لوگوں کو مریض بناتا ہے۔اس لیے اگر کوئی مریض سامنے آئے تو&nbsp; فوراً اس کے تمام قریبی لوگوں کے ٹیسٹ کرنے چاہئیں۔تب ہی بیماری پر قابو پانا ممکن ہو گا۔

<h2>عام بیماری &#39;خطرناک &#39;کیوں بن رہی ہے</h2>

ڈاکٹر منیر اقبال کا کہنا کہ صحت کے&nbsp; کمزور نظام اور حکومتی عدم توجہی نے &nbsp;ٹی بی کے معاملے میں پاکستان کو بڑی مصیبت سے دو چار کردیا ہے۔

وہ بتاتے ہیں کہ پاکستان تیزی سے ادویات کے خلاف مزاحمت رکھنے والی &nbsp;ٹی بی (طبی زبان میں ایم ڈی آر ٹی بی اور ایکس ڈی آر ٹی بی جبکہ دیسی زبان میں بگڑی ہوئی ٹی بی ) کی طرف بڑھ رہا ہے۔

ڈاکٹر منیر&nbsp; کہتے ہیں کہ غریب لوگ پہلے قریب ہی حکیم یا عطائی کے پاس جاتے ہیں۔حالت خراب ہونے پر سرکاری یا نجی ہسپتالوں میں&nbsp; آتے ہیں۔کچھ ڈاکٹر بھی ایسے ہیں جنہیں ٹی بی کے علاج کا درست طریقہ کار معلوم نہیں۔

اٹک کی تحصیل حسن ابدال کے نواحی گاؤں ملی پنڈ کی 30 سالہ شکیلہ بی بی، ایم ڈی آر ٹی بی کی مریضہ ہیں وہ بھی پہلے عطائی کے پاس گئی تھیں جو انہیں 16 روز تک ٹائیفائیڈ کی دوا دیتا رہا۔

شکیلہ بی بی کے بھائی کے بقول جب بہن کی حالت زیادہ خراب ہوگئی تو وہ انہیں واہ کینٹ لے گئے جہاں ٹی بی تشخیص ہوئی۔وہاں بھی دوا سے بہتری نہ آئی تو ڈاکٹروں نے راولپنڈی جانے کا مشورہ دیا۔

&quot;سول ہسپتال راولپنڈی کے ڈاکٹروں نے بتایا کہ انہیں تو ایم ڈی آر ٹی بی ہے۔&quot;

اب شکیلہ بی بی دس ماہ سے ہر مہینے دوائی لینے راولپنڈی جاتی ہیں اور قدرے بہتر محسوس کرتی ہیں۔

تحصیل فتح جھنگ کے کمبڑیال گاؤں کے 40 سالہ محمد شکیل پانچ بچوں کے باپ ہیں اور سبزی بیچ کر گھر چلا رہے ہیں۔ان کی بھی کچھ ایسی ہی کہانی ہے۔

وہ کئی روز سے&nbsp; بیمار تھے اس لیے اٹک سول ہسپتال جا کر معائنہ کرایا۔وہاں ڈاکٹروں نے انہیں شوگر (ذیابیطس) کی دوا دے دی جسے وہ دس ماہ کھاتے رہے۔ پھر راولپنڈی&nbsp; گئے تو وہاں انہیں بتایا گیا کہ وہ ٹی بی میں مبتلا&nbsp; ہیں۔

صوبائی ٹی بی کنٹرول پروگرام کے عہدے دار ایم ڈی آر ٹی بی کے بڑھتے کیسز پر نظام صحت&nbsp; کی خامیوں کا اعتراف کرتے ہیں تاہم ان کا کہنا ہے کہ ٹی بی کا علاج اتنا طویل اور تکلیف دہ ہے کہ لوگ اکتا کر چھوڑ دیتے ہیں۔

&quot;اگر کسی کو صبح نہار منہ بڑی بڑی چھ گولیاں کھانی پڑیں تو اندازہ لگائیں اس کی حالت کیا ہوگی؟ &quot;

ان کے مطابق دوا ادھوری چھوڑنے پر عام ٹی بی ہی &#39;ملٹی ڈرگ رزسٹنٹ ٹی بی&#39; میں بدل جاتی ہے۔ پھر حکومت کو ایسے مریض کی دوا پر 12 لاکھ سے 18 لاکھ روپے خرچ کرنا پڑتے ہیں۔

عالمی ادارہ صحت بھی اس کی تصدیق کرتا ہے کہ پاکستان عام ٹی بی کے مریضوں کی تعداد کے لحاظ سے 5.8 فیصد کے ساتھ دنیا میں پانچویں نمبر پر ہے۔ جبکہ ایم ڈی آر ٹی بی (ملٹی ڈرگ رزسٹنٹ ٹی بی) کے 7.9 فیصد کیسوں کے ساتھ تیسرا خطرناک ترین ملک ہے۔

ڈاؤ یونیورسٹی آف ہیلتھ سائنسز کراچی کے&nbsp; پروفیسروں نے 2022 ء میں ایم ڈی آر ٹی بی پر ایک ریسرچ کی جس میں بتایا گیا ہے پچھلے کچھ عرصے سے ایم ڈی آر ٹی بی کے کیسز میں ڈرامائی طور پر اضافہ ہوا ہے۔

پاکستان میں 2015 ءسے 2021 ءتک ایم ڈی آر ٹی بی کے رجسٹرڈ مریضوں کی تعداد 33 فیصد تک بڑھ گئی ہے۔ 2015 ءمیں ملک بھر میں ایسے 27 ہزار مریض تھے 2021 ءتک یہ تعداد&nbsp; 36 ہزار تک پہنچ گئی۔ جن میں سے 51 فیصد مریضوں کا تعلق پنجاب سے ہے۔

اس ریسرچ کے مطابق یہ بیماری سنگین اس وقت ہوتی ہے جب ٹی بی کے جرثومے پر ابتدائی چار اینٹی ٹی بی ادویات بے اثر ہو جاتی ہیں۔

ڈاکٹر منیر اقبال کے مطابق پاکستان اب ایم ڈی آر ٹی بی سے بھی آگے ایکس ڈی آر ٹی بی (ایکسٹینسولی ڈرگ رزسٹنٹ ٹی بی) پر چلا گیا ہے جس کا علاج مزید مشکل اور مہنگا ہے۔

عالمی ادارہ صحت نے پاکستان میں 2021 میں ایکس ڈی آر ٹی بی کے 838 مریضوں کی نشاندہی کی ہے۔

ڈاؤ یونیورسٹی کے چند پروفیسروں نے ایکس ڈی آر ٹی بی پر ریسرچ میں 2012 ءسے 2018ء تک کے رجسٹرڈ 184 مریضوں کا مشاہدہ کیا۔

اس ٹیم نے&nbsp; یہ نتیجہ اخذ کیا کہ 184 مریضوں میں سے 83 (یعنی 45 فیصد) انتقال کرگئے جبکہ 24 (یعنی 13 فیصد) پر علاج کے مثبت نتائج برآمد نہیں ہوئے۔&nbsp; 11(چھ فیصد) مریضوں نے اپنا علاج ادھورا چھوڑ دیا جبکہ 59 (یعنی 32 فیصد) ہی اپنا علاج کامیابی کے ساتھ مکمل کر پائے۔باقی چار فیصد کی تفصیل میسر نہیں آ سکی۔

اس سٹوری میں لاہور سے آصف ریاض نے بھی مدد فراہم کی ہے۔

محمد صابرین

محمد صابرین کا تعلق ضلع اٹک کے گاؤں دکھنیر سے ہے ۔ گزشتہ تین دھائیوں سے انگریزی، اردو اخبارات اور نشریاتی اداروں کیلیے بطور فری لانس جرنلسٹ کام کر رھے ہیں۔

'فلٹر لگ گئے مگر چلائے گا کون؟' اٹک کے دیہات میں کروڑوں مالیتی واٹر فلٹریشن پلانٹ بے کار

مونگ پھلی سونے کی ڈلی نہ رہی: کسان خریف کی اہم ترین نقد آور فصل سے منہ کیوں موڑ رہے ہیں

اٹک میں بارانی یونیورسٹی کا ذیلی کیمپس بند ہونے سے سیکڑوں طلبہ کا تعلیمی نقصان

مرض بڑھتا گیا جوں جوں دوا 'چھوڑی': ملک میں 'ٹی بی' کی بگڑتی صورتحال، نظام صحت میں آخر مسئلہ کیا ہے؟