بلوچستان کے ضلع کوہلو کی شائستہ بی بی پڑھ لکھ کر ڈاکٹر بننا چاہتی تھیں۔ 2020 میں میٹرک کا امتحان اچھے نمبروں سے پاس کرنے کے بعد جب ایف ایس سی کرنے کا وقت آیا تو علاقے میں گرلز کالج نہ ہونے کے باعث ان کے خواب ٹوٹ گئے۔

شائستہ کہتی ہیں &#39;&#39;میری بچپن سے خواہش تھی کہ میڈیکل کی تعلیم حاصل کر کے ڈاکٹر بنوں اور اپنے علاقے کے لوگوں خصوصاً ان عورتوں کے کام آؤں جو&nbsp; گائناکالوجسٹ کے نہ ہونے کی وجہ سے زچگی کے دوران انتقال کر جاتی ہیں۔ تاہم کالج کی غیرموجودگی میں مجھے نہیں لگتا کہ کبھی ڈاکٹر بن پاؤں گی۔&#39;&#39;

کوہلو میں شائستہ جیسی سیکڑوں طالبات میٹرک کے بعد تعلیم چھوڑ چکی ہیں یا گھر پر ہی پڑھتی اور پھر پرائیویٹ داخلے بھجوا کر امتحان میں شریک ہوتی ہیں۔ تاہم گھر بیٹھے پڑھنے سے انہیں ویسے نتائج حاصل نہیں ہوتے جو وہ کالج میں پڑھ کر حاصل کر سکتی ہیں۔

2006&nbsp; میں اس وقت کے صدر جنرل پرویز مشرف نے کوہلو کے دورے میں بلوچستان کے لیے خصوصی صدارتی پیکیج کے تحت یہاں گرلز انٹر کالج کی تعمیر کا اعلان کیا تھا۔ اس اعلان کو 17 برس گزر چکے ہیں لیکن کالج کی تعمیر مکمل نہیں ہو سکی۔

کالج میں غیرتدریسی عملہ بہت پہلے بھرتی کر لیا گیا تھا جو ہر ماہ باقاعدگی سے تنخواہیں اور مراعات لے رہا ہے لیکن کالج کی عمارت نامکمل چھوڑ دی گئی ہے اور مستقبل قریب میں یہاں تدریسی عمل شروع ہونے کا دور کوئی امکان نظر نہیں آتا۔

ڈسٹرکٹ ایجوکیشن آفیسر حفیظ اللہ مری بتاتے ہیں کہ 2020 میں انتظامیہ نے لڑکیوں کی تعلیم کے بارے میں ایک سروے کیا تھا جس سے یہ سامنے آیا کہ ضلع بھر میں میٹرک کا امتحان پاس کرنے والی 300 میں سے آٹھ طالبات ہی اگلے درجے میں تعلیم جاری رکھ سکی تھیں۔

انہوں نے کہا کہ لڑکیوں کو ضلعے سے باہر کسی کالج یا ہاسٹل میں بھیجنا مقامی رسم و رواج کے بھی خلاف سمجھا جاتا ہے۔ کئی والدین ایسے ہیں جو مالی مشکلات کے باعث چاہتے ہوئے بھی اپنی بچیوں کو اعلیٰ تعلیم نہیں دلا سکتے۔ کوئٹہ یا ملک کے دیگر بڑے شہروں میں کم آمدنی والے لوگوں کے پاس بھی اپنے بچوں کو سرکاری اداروں میں اچھی تعلیم دلانے کے مواقع ہوتے ہیں لیکن کوہلو جیسے ضلع میں بیشتر لوگوں کے نہ تو مالی حالات اچھے ہیں اور نہ ہی انہیں سرکاری تعلیمی ادارے دستیاب ہیں۔

کوہلو میں لڑکیوں کے لیے اعلیٰ تعلیم کے ادارے نہ ہونے کے علاوہ لڑکے اور لڑکیوں کے لیے&nbsp; پرائمری اور سیکنڈری سکولوں کی بھی کمی ہے۔

2017 کی مردم شماری میں لیے گئے ایک جائزے کے مطابق کوہلو بلوچستان کے 31 اضلاع میں تعلیمی اعتبار سے آخری درجے پر ہے۔ ضلع میں اس وقت لڑکیوں کے 71 پرائمری سکول، 21 مڈل سکول اور 11 ہائی سکول کام کر رہے ہیں۔ ان میں 12 ادارے ایسے ہیں جہاں لڑکے اور لڑکیوں کو اکٹھے تعلیم دی جاتی ہے۔

کوہلو میں تعلیم کے فروغ پر کام کرنے والے ادارے بلوچستان ایجوکیشن فانڈؤیشن کے فوکل پرسن یوسف مری کہتے ہیں کہ ان کا ادارہ پرائمری سطح تک بچوں کو مفت تعلیم فراہم کر رہا ہے۔ ضلع بھر کے دوردراز علاقوں میں بی ای ایف نے 20 سکول قائم کیے ہیں جن میں لڑکیوں کی تعلیم پر خصوصی توجہ دی جاتی ہے لیکن یہاں طلبہ صرف پرائمری کی سطح تک ہی پڑھ سکتے ہیں۔

بلوچستان ایجوکیشن فاؤنڈیشن کوہلو کی تحصیل کاہان میں پانچ سکول چلا رہی ہے۔ لیکن یہ سکول علاقے کی تمام آبادی کی تعلیمی ضروریات پوری کرنے کے لیے ناکافی ہیں۔ اس کی ایک بڑی وجہ یہ بھی ہے کہ کوہلو رقبے کے لحاظ سے بہت بڑا ضلع ہے اور یہاں چھوٹی چھوٹی آبادیوں کے درمیان بہت بڑا فاصلہ ہے۔ چنانچہ لوگوں کی بڑی تعداد کو ان کے گھروں کے قریب تعلیمی سہولت مہیا کرنا آسان نہیں ہے۔

گرلز ہائی سکول کوہلو کی پرنسپل رابعہ کلثوم نے لوک سجُاگ کو بتایا کہ ان کے سکول میں پہلی سے دسویں جماعت تک کم و بیش 800 طالبات زیرتعلیم ہیں۔ ان میں ہر سال تقریباً 80 طالبات میٹرک کا امتحان پاس کرتی ہیں۔ 2020 میں میٹرک کی تعلیم مکمل کرنے والی طالبات کی تعداد 73 تھی جبکہ 2021 میں یہ بڑھ کر 80 تک پہنچ گئی۔

ان کا کہنا ہے کہ تعلیم میں اچھی کارکردگی کے باوجود ان لڑکیوں کو مزید آگے بڑھنے کے مواقع دکھائی نہیں دیتے۔ پچھلے تین سال میں صرف 30 ایسی تھیں جو میٹرک کے بعد تعلیمی جاری رکھ سکیں۔ انہوں نے بتایا کہ اندازے کے مطابق ہر سال سکول سے فارغ التحصیل ہونے والی صرف پانچ طالبات ہی اعلیٰ ثانوی درجے کی تعلیم مکمل کرتی ہیں۔

بلوچ طلبا کا تعلیمی حقوق کے لیے ملتان سے لاہور تک پیدل مارچ: 'پاؤں زخمی سہی ڈگمگاتے چلو'۔

کوہلو گرلز کالج کا قیام: لڑکیوں کو تعلیم کے بہتر مواقعے کب میسر آئیں گے؟

text

21 فروری 2023 کی صبح بارکھان کے علاقے میں ایک کنویں سے تین لاشیں برآمد ہوئیں جن کے بارے میں کہا گیا کہ یہ ایک ماں اور دو بیٹوں کی لاشیں ہیں جو مبینہ طور پر صوبائی وزیر سردار عبدالرحمان کھیتران کی حراست میں تھے۔

پولیس نے تینوں افراد کی لاشیں مقامی ہسپتال منتقل کر دیں، جہاں محمد خان مری نے لاشوں کی شناخت، صوبائی وزیر سردار عبدالرحمان کھیتران کے نجی جیل میں قید ان کی اہلیہ اور دو بیٹوں کے طور پر کی۔

خان محمد مری کے مطابق لاشیں ان کی اہلیہ گراں ناز، بڑے بیٹے محمد نواز اور دوسرے بیٹے عبدالقادر کی ہیں جو 2019 سے صوبائی وزیر سردار عبدالرحمان کھیتران کی نجی جیل میں قید تھے۔ خان محمد مری کے مطابق ان کے گھر کے مزید پانچ افراد اب بھی سردار عبدالرحمان کھیتران کی جیل میں ہیں۔

واضح رہے کہ 9 فروری کو سماجی رابطے کی ویب سائٹ پر ایک وڈیو وائرل ہوئی جس میں ایک عورت کو قرآن شریف ہاتھ میں اٹھائے فریاد کرتے سنا گیا کہ وہ سردار عبدالرحمان کی نجی جیل میں بند ہیں اور مسلسل زیادتی کا نشانہ بنے ہوئے ہیں۔

خان محمد نے لوک سجاگ کو بتایا کہ 2019 میں سردار عبدالرحمان کھیتران کے آدمی ان کے گھر کے آٹھ افراد ان کی بیوی گراں ناز، بیٹی فرزانہ، بیٹے عبدالستار، عبدالغفار، محمد عمران، محمد نواز، عبدالمجید اور عبدالقادر کو اغوا کرکے لے گئے اور انہیں حاجی گوٹھ بارکھان میں اپنے نجی جیل میں قید کر دیا۔ سردار کے کارندے ان کے گھر کا سارا سامان بھی ساتھ لے گئے۔

خان محمد مری نے مزید انکشاف کرتے ہوئے بتایا کہ صوبائی وزیر اور اس کے اہلکار نجی جیل میں ان کے اہلِ خانہ سے نہ صرف جبری مشقت لیتے ہیں بلکہ ان پر جنسی و جسمانی تشدد بھی کیا جا رہا ہے۔

<h2>سردار بمقابلہ سردارزادہ</h2>

فروری میں گراں ناز کی جو وڈیو وائرل ہوئی تھی وہ سردار عبدالرحمان کھیتران کے صاحبزادے سردارزادہ انعام کھیتران کے سوشل میڈیا اکاؤنٹ پر پوسٹ کی گئی تھی۔

سردارزادہ کا الزام ہے کہ ان کے والد نے تین شادیاں کر رکھی ہیں اور وہ اپنی سیاست کے لیے اپنی اولاد کو باہم دست و گریبان رکھتے ہیں۔ انہوں نے بتایا کہ ان کا والد سے 2018 میں گاڑیوں کی ملکیت کی منتقلی پر اختلاف ہوا تھا جس کے بعد سے وہ ان کی جان کے درپے ہو گئے۔ &quot;انہوں نے مجھ پر اپنے ہی گھر میں چوری کرنے کا جھوٹا مقدمہ درج کروایا اور محمد خان مری پر جھوٹی گواہی کے لیے دباؤ ڈالا، اس نے انکار کر دیا اسی لیے میرے والد نے اس کے اہلِ خانہ کو اغوا کروایا۔&quot;

دوسری جانب سردار عبدالرحمان کھیتران ان الزامات کو رد کرتے ہوئے کہتے ہیں کہ انہوں نے اپنے بیٹے کو بلدیاتی انتخابات میں ضلعی چیئرمین بنانے سے انکار کیا اس لیے وہ اب ان کے خلاف ہو چکا ہے۔ ان کا یہ بھی کہنا تھا کہ ان کے خلاف یہ ساری مہم دراصل ان کے سیاسی مخالفین چلا رہے ہیں، جو بارکھان کو پرامن نہیں دیکھنا چاہتے۔

بارکھان، بلوچستان کی مشرقی سرحد پر واقع آخری ضلع ہے، جہاں سے جنوبی پنجاب کی حدود شروع ہو جاتی ہیں۔ دوسری جانب اس کی سرحد ضلع کوہلو سے ملتی ہے، جہاں مری قبائل کی اکثریت ہے۔ مری اور کھیتران قبائل میں بارہا سرحدی تنازعات اٹھتے رہے ہیں۔

کوہلو کا علاقہ حالیہ شورش میں بھی سرگرم رہا ہے۔ جب کہ اس کے برعکس سردار کھیتران مشرف دور سے لے کر ہر حکومت کا حصہ رہے ہیں اور ان کا علاقہ (بارکھان) ان کے بقول &#39;حب الوطن اور پُرامن&#39; رہا ہے۔ سردار کھیتران اس وقت بھی نہ صرف صوبائی وزیر مواصلات ہیں بلکہ حکمران جماعت بلوچستان عوامی پارٹی کے مرکزی ترجمان بھی ہیں۔

<h2>کیا ان آوازوں کو اب بھی دبا دیا جائے گا؟</h2>

مذکورہ معاملہ دو برس قبل بھی میڈیا میں ابھرا تھا۔ اس وقت مقامی رپورٹر محمد انور کھیتران نے اسے مسلسل رپورٹ کیا اور سوشل میڈیا پہ اس کی بازگشت سنی گئی۔ اس دوران انور کھیتران کو شہید کر دیا گیا۔ انور کھیتران کے ورثا نے ان کے قتل کا الزام سردار کھیتران پر ہی لگایا مگر ان کی کوئی شنوائی نہ ہو سکی۔

9 فروری کو سوشل میڈیا پہ وائرل ہونے والی خاتون کی وڈیو کے بعد یہ معاملہ بلوچستان کی سطح پر اٹھا مگر جلد ہی دبا دیا گیا پھر 21 فروری کو خاتون اور ان کے دو بیٹوں کی لاشیں برآمد ہو گئیں۔ جس کے بعد بلوچستان بھر میں غم و غصے کی لہر جنم لے چکی ہے۔

محمد خان مری نے لوک سجاگ کو بتایا کہ وہ بڑے عرصے تک سردار کھیتران کے ہاں بطور نجی گاڑد کام کرتے رہے ہیں۔ 2018 میں سردار عبدالرحمان قتل کے ایک مقدمے میں اسے اپنی جگہ گرفتاری دینے، اپنے خلاف گواہی سے مُکر جانے اور (سردار کے) بیٹے کے خلاف وعدہ معاف گواہ بن جانے کے لیے دباؤ ڈالتا رہا جس پر خان محمد وہاں سے بھاگ نکلے مگر ان کے اہلِ خانہ کو دُکی قصبہ سے اٹھا لیا گیا۔ جس کے بعد خان محمد مختلف پلیٹ فارم پر آواز اٹھاتے رہے۔

خان محمد نے اب بھی الزام عائد کیا ہے کہ پولیس نے ان کا مقدمہ درج کرنے سے انکار کر دیا ہے۔ جس کے بعد کوہلو کے قبائلی عمائدین اور عوام نے ان کے ساتھ اظہارِ یکجہتی کیا اور نمازِ جنازہ پڑھنے کے بعد لاشوں کو لے کر کوئٹہ روانہ ہو گئے۔ ان کا کہنا تھا کہ قاتلوں کی گرفتاری تک وزیراعلیٰ ہاؤس کے سامنے لاشوں کے ساتھ دھرنا دے کر بیٹھیں گے۔

شام گئے لواحقین کوئٹہ پہنچے تو پولیس نے انہیں شہر میں داخل ہونے سے روک دیا۔ بعدازاں احتجاج پر انہیں شہر میں داخلے کی اجازت دی گئی۔ کوئٹہ میں سول سوسائٹی کی مختلف تنظیموں اور افراد نے اس احتجاج کے ساتھ یکجہتی کا اعلان کیا اور لواحقین سے پہلے سینکڑوں کی تعداد میں ریڈ زون میں پہنچ گئے۔

ادھر اسمبلی کا اجلاس اس دوران جاری رہا۔ جس میں اس واقعے پر ڈھکے چھپے الفاظ میں بات کی گئی، واقعے کی مذمت بھی کی گئی مگر کسی کا نام نہیں لیا گیا۔ وزیراعلیٰ نے واقعے کی تفتیش کے لیے جے آئی ٹی بنانے کا اعلان کیا اور مظاہرین سے بات چیت کے لیے مشاورتی اجلاس طلب کر لیا۔

بلوچستان میں جبری گمشدگیاں: 'اب ہمارے گھروں میں صرف عورتیں باقی رہ گئی ہیں'۔

صوبائی وزیر سردار عبدالرحمان کھیتران کی نجی جیل اور کنویں سے برآمد ہونے والی لاشیں: بارکھان میں کیا ہوا؟

گذشتہ برس کی موسمیاتی تباہی نے بلوچستان کے دورافتادہ ضلع کوہلو میں ایک نئے ذریعہ معاش کے پنپنے کے امکانات کو معدوم کر دیا ہے۔

ضلع کوہلو سنگلاخ پہاڑوں کا علاقہ ہے۔ اس کا رقبہ تو ساڑھے سات مربع کلومیٹر ہے لیکن آبادی کُل سوا دو لاکھ افراد ہے یعنی 28 افراد فی مربع کلومیٹر۔ یہاں ایک گھرانہ اوسطاً آٹھ افراد پر مشتمل ہے گویا ہر دو مربع کلومیٹر میں سات گھرانے آباد ہیں۔ (پورے صوبہ پنجاب میں ہر مربع کلومیٹر میں اوسط 535 افراد آباد ہیں۔)

ضلع کوہلو مری قبیلے کا گڑھ ہے۔ یہاں کی 97 فیصد آبادی کا تعلق اسی قبیلے سے ہے۔

قبیلے کا بنیادی ذریعہ معاش مال مویشی پالنا ہے جن میں زیادہ تر بھیڑ بکریاں ہوتی ہیں۔ یہ لوگ سال بھر ضلع کی قدرتی چراگاہوں میں گھوم پھر کر یہ مویشی پالتے ہیں۔

یہاں تعلیمی سہولیات ناپید ہیں۔ پاکستان ایجوکیشن ڈسٹرکٹ رینکنگ کے مطابق ملک کے 145 اضلاع میں کوہلو 116ویں نمبر ہے۔ 2007ء میں ایک تعلیمی اسیکم کے توسط سے کوہلو میں تعلیمی بہتری آئی ہے۔ اس کے سکیم کے تحت دو ہزار سے زیادہ بچے پاکستان بھر کے اچھے اداروں میں داخلہ لے کر اپنی تعلیم مکمل کر چکے ہیں جن میں سے کئی اب ملک کے اعلیٰ سرکاری عہدوں پر اپنی خدمات سرانجام دے رہے ہیں۔

ضلع کوہلو میں چھوٹے ندی نالے موجود ہیں جہاں ڈیم بنا کر پانی جمع کیا جا سکتا ہے جو نہ صرف زراعت کو ممکن بنا دیتا ہے &nbsp;بلکہ زیرزمین پانی کی سطح بھی بلند ہو جاتی ہے۔ اس کو مدنظر رکھتے ہوئے ضلع میں گزشتہ تین دہائیوں میں قدرتی ندی نالوں پر تین چھوٹے ڈیم تعمیر &nbsp;کئے گئے جس سے کچھ رقبہ قابل کاشت ہو گیا۔ ان کے نام نصیوبہ، ترخہ اور تنگہ ڈیم ہیں۔

اس کے بعد ضلع میں گندم، کپاس، ٹماٹر، مرچ، پیاز، کدو، توری و دیگر سبزیاں کاشت کی جانے لگیں۔ پھلوں کے کچھ باغات بھی لگائے گئے۔ یہاں کی آب و ہوا کو بادام، انار اور زردآلو کے باغات کے لیے سازگار مانا جاتا ہے۔

گذشتہ برس اگست کے وسط میں یہاں مسلسل 50 گھنٹے تک ہونے والی موسلادھار بارش نے تباہی مچائی اور ان ڈیمز کو شدید نقصان پہنچایا جس سے ضلع میں زراعت کا سفر رک گیا ہے۔

ضلعی انتظامیہ کی ایک رپورٹ کے مطابق اس سیلاب نے 12 سو ایکڑ کپاس، ایک سو 12 ایکڑ مرچ اور 27 ایکڑ پر کھڑی ٹماٹر کی فصلوں کو تباہ کیا جبکہ 112 ایکڑ پر کھڑے میوہ جات کے باغات کو بھی نقصان پہنچایا۔ سیلابی ریلوں کی لپیٹ میں آ کر تین ہزار سات سو بھیڑیں، ڈیڑھ ہزار بکریاں اور &nbsp;70 گائیں بھی ہلاک ہو گئیں۔

تنگہ ڈیم میں پڑے ایک شگاف کی کئی سال سے مرمت نہیں ہو سکی تھی۔ سیلابی ریلوں نے اسے مزید نقصان پہنچایا اور کوہلو قصبہ کے نواحی علاقے کلی علن اوریانی کو مکمل طور پر ملیامیٹ کر دیا۔

2022ء کے سیلاب نے صوبہ بلوچستان کے پورے آبپاشی نظام کو بری طرح متاثر کیا ہے۔ 169 چھوٹے ڈیمز کو نقصان پہنچا جن میں سے 40 مکمل طور پر تباہ ہو گئے ہیں اور اب پانی کی سٹوریج کے کام نہیں آ سکتے۔

ڈیمز ٹوٹنے کے سب سے زیادہ واقعات قلعہ عبداللہ میں پیش آئے جہاں موسلادھار بارشوں اور سیلابی ریلوں سے 38 ڈیمز تباہ ہوئے۔ کوئٹہ میں 15، ضلع خضدار میں 11، ڈیرہ بگٹی میں نو، لسبیلہ میں بھی نو ،کچھی میں سات، چاغی، نوشکی، ہرنائی، ژوب، موسیٰ خیل میں پانچ پانچ ڈیمز ناکارہ ہوئے۔ ضلع خاران، واشک، مستونگ میں بھی چار چار، کیچ میں تین، قلات میں ایک، دُکی میں دو اور کوہلو میں بھی دو ڈیمز متاثر ہوئے۔

بلوچستان کے وزیر زراعت اسد بلوچ کے مطابق صوبے کے 34 میں سے 31 اضلاع میں سیلابی صورت حال کی وجہ سے زرعی زمینیں برباد ہو گئی ہیں اور ان علاقوں میں حکومت متاثرین اور خصوصاً زمینداروں کو کسی قسم کی مدد پہنچانے میں اب تک ناکام ہے۔&nbsp;

ان ڈیمز کی تباہی کی وجوہات کی تحقیقات کرنے کے بارے میں بھی سرکاری حلقوں میں اب تک کوئی تجویز زیر غور نہیں۔

ضلع کوہلو کو بلوچستان میں باغی سرگرمیوں کا مرکز مانا جاتا ہے۔ یہاں روزگار کے مواقع مفقود ہیں اور چھوٹے ڈیموں کی تعمیر نے زراعت کے پنپنے کی جو امید بیدار کی تھی اس پر گذشتہ برس کی موسمیاتی تباہی نے پانی پھیر دیا ہے۔

دوران بلوچ

کوہلو گرلز کالج کا قیام: لڑکیوں کو تعلیم کے بہتر مواقعے کب میسر آئیں گے؟

صوبائی وزیر سردار عبدالرحمان کھیتران کی نجی جیل اور کنویں سے برآمد ہونے والی لاشیں: بارکھان میں کیا ہوا؟

چھوٹے ڈیمز: کوہلو کی زرعی امیدوں پر موسمیاتی تباہی نے پانی پھیر دیا

Lok Sujag